\id 1JN - Ndendeule Bible Version
\ide UTF-8
\h 1 Yohane
\toc1 Baluwa jhukutumbula jha Yohane
\toc2 1 Yohane
\toc3 1 Yoh
\mt2 Baluwa jhukutumbula jha
\mt1 Yohane
\imt Ulongolelo
\ip Baluwa jha kutumbula jha Yohane ikajhandikwe na ntenga Yohane pange muchaka cha makome nhwano ade makome ticha pabhelwika Yecho Kilichitu. Yohane akilongolelajhe jwenio kubhehe ndi jwajhandike, nambo mu chula jha kutumbula innangiha kubhehe jwenio ndi jwalongela alolite kwa miho ghake pannema pano na tukamwene bada payokita Yecho, mu chula jha 1:1-3. Yene majhandikilo ghajhandike uhwanana hake na ngita hela chijhandikwe mu Lilobhe lya Mbone lya Yohane. Inhobheleka kubhehe Yohane akajhandike chimo cha itabo ncheche ya Lilobhe lya Mbone jha Yecho Kilichitu, pamonga na baluwa itato, yane baluwa jha kutumbula na jha ubhele na jha utato jha Yohane pakibha atamita ku muche gwa ku Epecho.
\ip Yohane akajhandike baluwa jhenje kwa lilongo lya bhando bhubhanyeketii Kilichitu bhoha kipinde chenie bhando bhubhanyeketii Kilichitu bhakibha mukulagha hake na lilongo lya bhando lilikemitwa, “Akaginochitiki”. Bhamba bhakajheketii kubhehe Yecho akibha Chapanga kamile, nambo akibha jhe mundo jwa uchakaka jhuna hyegha na myae ngita chabhii mundo jwa pannema. Nhwalo gwenio Yohane akajhandike kubhehe jwalongila panane jha Yecho kutama kwake pannema na mabhoko ghake ghakampapihe Yecho, mu chula jha 1:1-3. Chikinkangita Yohane kujhandika baluwa jhenje ndi kulangiha luhangano lwake jwenio, mu chula jha 1:4, kwakanikiya bhubhanyeketii Kilichitu bhakoto kuhenga malemo, mu chula jha 2:1 na kwalonda na mabholo ghuwange, mu chula jha 2:26 na kwalobholela uchakaka bhando bhibhannyeketi Kilichitu kubhehe bhaghombolilwe, mu chula jha 5:13.
\iot Ghughabhii mukitabo
\io Yohane achimulila nhwalo gwa kujhandika baluwa jhake na nhwalo gwa kujhandika baluwa jhenje, mu chula jha 1:1-4.
\io Na jwenio ilonge kubhehe Chapanga ndi lumule na tipalwa kutama ngita Yecho chatamita, mu chula jha 1:5-3:10.
\io Kabhele atukombocha twenga unhwilo gwa kupalana, mu chula jha 3:11-5:12.
\io Peniya ijhomolela baluwa jhake, mu chula jha 5:13-21.
\c 1
\s Lilobhe lyapela bhando ughome
\p
\v 1 Tunyandikii mangota Lilobhe lende lya ughome lilikibha kuhumii pukutumbuu. Tukalijhohine na kummona kwa miho ghito tabhete, tukalilolokiye na kulikamuu kwa mabhoko ghito tabhete. 
\v 2 Ughome gwenio piupitila twenga tukauhwene na ngohe tutangacha malobhe ghake gha ughome gwa machiko ghoha ghangapeta ghuukibha kwa Tate na kulangiwa kwito. 
\v 3 Chitukiwene na kujhoha ndi chitutangachi na mangota hele, kupala na mangota mme pamonga na twenga mu kulombana na Tate na Mwana gwake Yecho Kilichitu. 
\v 4 Tunnyandikila mangota malobhe ghanga luhangano lwito lutimile.
\s Chapanga ndi Lumule
\p
\v 5 Lilobhe lende tulijhohine kubhoke kwa Yecho na ngohe tuntangacha kwino mangota kubhehe Chapanga ndi lumule na lubhii jhe lubhendo loloha nkate jhake. 
\v 6 Anda tulongii kubhehe tubhii pamonga na jwenie, na papa peniya tutama mulubhendo, tulongele uwange na itendwa na malobhe ghito gha chakaka jhe. 
\v 7 Nambo anda tutamite mulumule, ngita jweno chabhii mulumule, peniya tubhii maghumba nde twe kwa twenga na miyahe jha Yecho Kilichitu, Mwana gwa Chapanga itujhelebhuya uhakaho gwito ghoha.
\p
\v 8 Anda tulongii tukwetijhe uhakaho, tukikoloya tabhete, uchakaka ubhiijhe nkate jhito. 
\v 9 Nambo anda tulongile kwa Chapanga tutei uhakaho, peniya Chapanga jwenio ndi jwahobholeka na jwaumbone, natulekekeya uhakaho gwito na kutujhelebhuha kubhoka mu gwanganandela gwoha ghututeile. 
\v 10 Anda tulongii tutehijhe uhakaho, natuntenda Chapanga nhwange na lilobhe lyake libhijhe nkate jhito.
\c 2
\s Kilichitu ndi utangatilo gwito
\p
\v 1 Yana yango iniipala, ninyandikila ilebhe henge, nkoto kuhenga uhakaho. Nambo anda apiti mundo jwatehi uhakaho, tukwete jhumo jwatutangati kutujhope kwa Tate, ndi Yecho Kilichitu jwangalilemwa. 
\v 2 Kilichitu ndi litambiko lilitubhokeya uhakaho gwito, hilu chi uhakaho gwito tugha, nambo uhakaho gwa nnema gwoha.
\p
\v 3 Anda kuijhokanikiya mihilo jha Chapanga, peniya chakaka kubhehe tummanya. 
\v 4 Mundo akoto kulonge anda ammanya Chapanga, nambo ajhokanikii jhe mihilo jhake, bhahe, umanya mundo jwenio alonge uwange na uchakaka ubhii jhe nkate jhake. 
\v 5 Nhwalo mundo jhojhoha jwakamuu Lilobhe lya Chapanga, jwenio ndi jwakwete upalo ghutimile gwa Chapanga nkate jhake. Kilebhe chenie ndi tuhoto kumanya kubhehe tulombine na Chapanga. 
\v 6 Mundo jhojhoha jwailongela alombine na Chapanga, ipalwa kutama ngita Yecho Kilichitu chatamita.
\s Lilaghilo liyono
\p
\v 7 Akakoche bhunimpahile, lilaghilo lende lininyandikila leno chi lilaghilo liyono, nambo lende lilaghilo ndi limikibhanalo kubhoke pukutumbula. Lilaghilo lyenio ndi makacho ndi lela lilobhe linyohine. 
\v 8 Nambo kipinde chenje, lilaghilo lende lininnyandikila leno ndi lilaghilo liyono, uchakaka gwake ubhonekine nkate jha Kilichitu na nkate jhino hele. Nhwalo lubhendo lubhoka na lumule lutumbwii kumulikila.
\p
\v 9 Mundo jhojhoha jwalonge atama mulumule, nambo inchimwa unung'una mundo, mundo jwenio amela mulubhendo. 
\v 10 Mundo jhojhoha jwampala unung'una mundo abhii mulumule lwenio, kibhii jhe kilebhe chochoha chela nkate jhake chikihoto kuntenda mundo jhonge ahenge uhakaho. 
\v 11 Nambo mundo jwanchimwa unung'una mundo abhii mulubhendo, ityanga mulubhendo na amanyii jhe kwaijhenda, nhwalo lubhendo luntehi abhehe jwangalola.
\p
\v 12 Ninyandikila mangota akayana nhwalo uhakaho gwino ulekekiwe kupete liina lya Kilichitu. 
\v 13 Ninyandikila mangota akatate nhwalo mummanye jwenio jwakibha kubhoke pakutumbuu. Ninyandikii mangota achikangombo nhwalo munhotwi Jwanganandela.
\p
\v 14 Ninyandikile mangota akayana nhwalo mu mmanye Tate. Ninyandikile mangota akatate nhwalo mu mmanye jwenio jwakibha kuhumii pakutumbula. Ninyandikile mangota achikangombo nhwalo nkwete makakala, na lilobhe lya Chapanga libhii nkate jhino na munhotwi Jwanganandela.
\p
\v 15 Mangaupala jhe nnema, hilu mambu ghighabhii mu nnema. Mundo jhojhoha jwaupala nnema, upalo gwa Tate ubhiijhe nkate jhake. 
\v 16 Nhwalo kila kilebhe chikibhii pannema, ngita tama mbajha ya yegha na ilebhe ibhaibhona bhando na kunoghelwa na kuloka kwa nhwalo jha ulohe, yenie yoha ibhokajhe kwa Tate, nambo ibhoke pannema. 
\v 17 Nnema pamonga na ilebhe yake yoha inoghela itenda kupeta, nambo mundo jwahenga ghapala Chapanga, atama machiko ghoha ghangapeta.
\s Likoko lya Kilichitu
\p
\v 18 Makayana, kupehekela kubhandikile! Mukajhohine kubhehe jwankana Kilichitu ahika, nambo ngohe akamakoko twe bha Kilichitu bhapitile, kwa gheniya tumanye kubhehe kipinde cha kupekehekeya kubhandikile. 
\v 19 Bhando bheniya bhahumii pakate jhito, nambo bhakibha bhito jhe ndi mana bhakatulekite, anda ngabhabhe bhito, ngabhatamite na twenga. Nambo ngabhatulekita, ngabhajhenda kupala kulangii bhakibha bhito jhe.
\p
\v 20 Nambo mangota mpakitwe mahuta na Uhuke gwa Chapanga kubhoka kwa Jhola Jwanyahinyahi, yenio umanye uchakaka. 
\v 21 Ninyandikila mangota, chi nhwalo ummanye jhe uchakaka, nambo umanye, kabhele ubhii ng'o uwange ghoghoha ghupatikana uchakaka.
\p
\v 22 Bho, ghane ndi nhwange? Ndi jhola jwakana kubhehe Yecho chi Kilichitu Nkomboche jwahaghulilwe na Chapanga. Mundo ngita jwenio ndi Likoko nkolongwa jwa Kilichitu, jwenio ndi jwankana Tate na Mwana. 
\v 23 Nhwalo mundo jhojhoha jwankana Mwana, helahela ankana Tate, na mundo jhojhoha jwaumanya Mwana imanya na Tate hele.
\p
\v 24 Yene, lilobhe lyango limilijhohohine kuhumii makacho litame kumwojho gwino, anda lilobhe lyenio litamite nkate jhino, na mangota natama nkate jha Mwana na Tate. 
\v 25 Na lilaghano lela lyatulaghila Kilichitu jwenio ndi lende: Kutupe ghome machiko ghoha ghangapeta.
\p
\v 26 Ninnyandikila ilebhe henge kwa nhwalo gwa bhando bhala bhibhapata kunhobhecha mangota. 
\v 27 Na mangota mpakwite mahuta na Uhuke jwa Chapanga kubhoke kwa Kilichitu. Na anda Uhuke atamite nkate jhino, mipalwa jhe kubholwa kabhele na mundo jhojhoha jhola. Nhwalo Uhuke jwenio amolangana kila kilebhe, na mabholo ghake ndi gha uchakaka na chi ghauwange. Bhahe, mughakamulile mabholo gha Uhuke na kujhendele kutama mu kulombana na Kilichitu.
\p
\v 28 Chakaka, na ngohe akayana ntamengane nkate jhake, kupala kipinde papakuyekulilwa mma nganganga na nkoto kubhehe na hone palonge jhake pala pahika. 
\v 29 Anda umanye kubhehe Kilichitu ihenga ghapala Chapanga, na kwa gheniya mipalwa kumanya kubhehe kila mundo jwahenga ghapala Chapanga ndi mwana jwa Chapanga.
\c 3
\s Yana ya Chapanga
\p
\v 1 Nwachilangane ubhii bhole upalo ghongo gwa Tate chatupaii hake ade tukemwe yana ya Chapanga! Na chakaka ndi chitubhile. Yene bhando bha pannema bhatumanyajhe, nhwalo bhaumanyajhe Chapanga. 
\v 2 Akakoche bhango bhinimpahile, twenga ngohe ndi yana ya Chapanga, nambo ibhonikinejhe hotu chitupala kubhehe. Nambo tumanya kubhehe papakupitii Kilichitu, natuwanana na jwenio nhwalo natupabhona pabhile. 
\v 3 Yene, kila mundo jwabhii na lihobholelo lende mu Kilichitu, akijhelebhula jwenio ngita Kilichitu chajhelehwike.
\p
\v 4 Kila mundo jwahenga uhakaho ikana kutenda ngita lilaghalikilo lya Chapanga chilipala, nhwalo kuhenga uhakaho ndi kulikana lilaghalikilo lyenio. 
\v 5 Nhwalo umanye ngita Yecho Kilichitu akahikite kubhoha uhakaho gwito, na nkate jwa jwenio ubhiijhe uhakaho gwogwoha. 
\v 6 Yene, kila mundo jwatama kwa kulombana na Kilichitu ihenga ndeka uhakaho, nambo kila mundo jwahenga uhakaho amwejhe Kilichitu hilu kuumanya.
\p
\v 7 Akayanango mangalogwa mundo jhojhoha ankolohe. Mundo jwahenga itendwa yaipala Chapanga jwenio ndi ijheketelwa na Chapanga ngita Kilichitu chainhalalicha Chapanga. 
\v 8 Nambo mundo jwahenga uhakaho jwenio ndi jwa Limbembela, nhwalo Limbembela atehi uhakaho kuhumii pukutumbula. Nambo Mwana gwa Chapanga ajhakuhika pannema kuhangabhana lihengo lya Limbembela.
\p
\v 9 Kila mundo jwabhelwikwe na Chapanga ihengajhe uhakaho, nhwalo ughome uhyono gwapatite na Chapanga ubhii nkate jhake. Na kabhele ihotojhe kuhenga uhakaho nhwalo jwenio ndi mwana jwa Chapanga. 
\v 10 Pamba ndi pupalangiya yana ya Chapanga na yana ya Limbembela. Nhwalo mundo jhojhoha jwangahenga ilebhe yukunhalalii Chapanga amu yangaipala unung'una mundo jwenio chi mwana jwa Chapanga.
\s Tupalane
\p
\v 11 Nhwalo lende ndi lilobhe linyohina kuhumii makacho ndi lende, kubhehe tupalane twabhete kwa twabhete! 
\v 12 Tukoto kubhehe ngita Kaine, jwalongwichwa na Limbembela, ngankomita unung'una mundo. Na akankomite kwa nhwalo ghane? Akankomite kwa nhwalo itendwa yakwe yakabhii nayo yanganandela, nhwalo itendwa ya unung'una mundo ikajheketilwe palonge jha Chapanga!
\p
\v 13 Yene, akalongo bhango, nkoto kukangacha ngita bhando bha pannema bhanchimwe mangota. 
\v 14 Twenga tumanye kubhehe tupokonywike kuhumii mukuwegha na kujhingii mughome nhwalo jwapala akalongo bhito bhibhanyeketi Kilichitu. Mundo jwangabhehe na upalo ijhendelela kutama mukuwe. 
\v 15 Kila mundo jwanchimwa unung'una mundo jwenio ndi nkomi, mangota umanye kubhehe mundo jhojhoha nkomi akwetijhe ughome gwa machiko ghoha gwangapeta ghutama nkate jhake. 
\v 16 Twenga tumanye kupalana ndi kilebhe ghane, nhwalo Kilichitu akabhohite ughome gwake kwa nhwalo gwito. Na twenga helahela tupalwa kubhoha ughome gwito kwa nhwalo gwa akalongo bhito bhibhanyeketii Kilichitu. 
\v 17 Yene, mundo anda akwete ilebhe ya pamba pannema, peniya amwene nnongo mundo alolite, nambo apahijhe kunkole kiya, nahotola bho, kulonge ampala Chapanga? 
\v 18 Yana yango bhunimpahile, upalo gwino ukoto kubhehe malobhe ndo, nambo kupalana kwino kubhonekane kwa itendwa na uchakaka.
\s Lihobholelo kwa Chapanga
\p
\v 19 Yene, ndi tuhoto kumanye kubhehe twe ndi bhando bha uchakaka, na miojho jhito naibhejhe na kiholo palonge jha Chapanga: 
\v 20 Ata ipitile kubhehe uhotolo gwito gwa kumanya tutei ghambone amu kulemwa ituhadabuu kubhehe tutei uhakaho, tumanye kubhehe Chapanga ndi nkolongwa kuliku uhotolo gwenio na jwenio amanye kila kilebhe. 
\v 21 Akakoche bhango, anda uhotolo gwito gwa kumanya ghamaha na ghanganandela anda utuhadabwilejhe natubhehejhe na kiholo palonge jha Chapanga, 
\v 22 na twenga tupoke kila kilebhe chitujhopa kubhoke kwa jwenio, nhwalo tujheketela lilaghilo lyake na kuhenga ghala ghaghapala. 
\v 23 Na lilaghilo lyake ndi lende: Kunnyekete Mwana gwake Yecho Kilichitu, na kupalana ngita twe Kilichitu chatupahile. 
\v 24 Jwajhekete lilaghilo lya Chapanga atama nkate jha Chapanga na Chapanga atama nkate jha jweno. Kwa ndela ya Uhuke gwa Chapanga jwatupeile Chapanga, twenga tumanye kubhehe Chapanga atama mu kulombana na twenga.
\c 4
\s Kuimanya ihuke ya uchakaka na jhuwange
\p
\v 1 Akakoche bhango bhunimpahile, nkoto kunyekete kila mundo akwete kihuke cha Chapanga, nambo munyighe mundo jwenio pange abhii na Kihuke jwa Chapanga, nhwalo bhalondole bhamahele bha uwange bhapiti pamba pannema. 
\v 2 Jenje ndi naumanya anda mundo alongochwa na Uhuke gwa Chapanga. Kila mundo jwajheketela kubhehe Yecho Kilichitu akahikite, akibha mundo, mundo jwenio akwete Uhuke gwa Chapanga. 
\v 3 Nambo mundo jhojhoha jwangannyekete Yecho Kilichitu, akwetejhe Uhuke jwahuma kwa Chapanga. Mundo jwenio akwete Uhuke jwankana Kilichitu, na mangota nnyohine atenda kuhika, na ngohe ahikite pannema!
\p
\v 4 Nambo mangota yana ya Chapanga manhotwile milondole bha uwange bheniya, nhwalo Uhuke gwa Chapanga jwabhii nkate jhino jhuna makakala hake kupeta uhuke jwabhii nkate jha bhando bhubhabhii pannema. 
\v 5 Milondole bha uwange bhoha bhilonge ilebhe ya pannema na nnema gwajhokanikiya nhwalo bheniya ndi bha pannema. 
\v 6 Nambo twenga ndi bhando bha Chapanga. Mundo jwaumanye Chapanga atujhokonikiya, mundo jwangaumanya Chapanga atujhokonikijhe. Yene, tuhoto kumanya Uhuke ghane gwa chakaka gwa Chapanga na uhuke ghane gwa uwange.
\s Upalo gwa Chapanga
\p
\v 7 Akakoche bhango bhinimpala, tupalane, nhwalo upalo uhuma kwa Chapanga. Kila mundo jwabhii na upalo ndi mwana gwa Chapanga na aumanye Chapanga. 
\v 8 Mundo jwangabhehe na upalo, aumanyejhe Chapanga, nhwalo Chapanga ndi upalo. 
\v 9 Na Chapanga akalangihe upalo gwake kwito, kwa kuntuma Mwana mundo jwakanjika pannema, kupala tubhehe na ughome kwa ndela jhake. 
\v 10 Upalo gwa uchakaka ndi ghongo: Chi twenga tukatumbwi kumpala Chapanga, nambo jwenio Chapanga akatupahi twenga na ata kuntuma Mwana gwake abhehe ndela jha kutujhelanicha kwa nhwalo gwa uhakaho gwito.
\p
\v 11 Akakoche bhango bhunimpahile, anda Chapanga akatupahi naha, na twenga tupalwa kupalana. 
\v 12 Abhii jhe mundo jwakawaite kummona Chapanga kipinde chochoha, nambo anda tupaline, Chapanga natama nkate jhito na upalo gwake ukamilika hake nkate jhito.
\p
\v 13 Kwa lilobhe lyenio tumanye kubhehe tutama nkate jhake na jwenio abhii nkate jhito, nhwalo jwenio atupekihe Uhuke gwake. 
\v 14 Na twenga tulolite na kwatangachii bhange kubhehe Tate antumite Mwana mundo abhehe Nkomboche jwa pannema. 
\v 15 Kila mundo jwatangacha kubhehe Yecho ndi Mwana gwa Chapanga, Chapanga itama nkate jhake na jwenio utama nkate jha Chapanga. 
\v 16 Bhahe, twenga tumanye na tujheketela upalo gwabhii nako Chapanga kwito twenga.
\p Chapanga ndi upalo na jhojhoha jwatama muupalo na alombine na Chapanga na Chapanga alombine na jwenio. 
\v 17 Mu lende upalo gwa Chapanga ukamilichwe kwito tukoto kubhehe na kiholo mu lichiko lya luhadabulo: Ughome gwito pamba pannema ngita ghala gha Kilichitu. 
\v 18 Paubhii upalo ubhiijhe bhoghohe, hena upalo ghukamilike ubhenga bhoghohe ghoha, bhahe, mundo jwabhii na bhoghohe akamilikejhe muupalo, nhwalo kujhoghopa kulangii palonge pabhii luhadabulo.
\p
\v 19 Twenga tubhii na upalo, nhwalo Chapanga ndi jwakatumbwii kutupala. 
\v 20 Mundo anda alongii ampala Chapanga na kongo anchimwa nnongo mundo, jwenio ndi nhwange. Nhwalo mundo anda ampahijhe nnongo mundo jwammona, ihotojhe kumpala Chapanga jwangammona. 
\v 21 Yene, Kilichitu atupekihe unhwilo ghongo: Jwampala Chapanga ipalwa ampala jwanyeketii Kilichitu nnyake hele.
\c 5
\s Tuuhotwii nnema kwa kihobholelo
\p
\v 1 Kila mundo jwajhekete kubhehe Yecho ndi Kilichitu akatumitwe na Chapanga kung'ombola, jwenio ndi mwana gwa Chapanga. Na kila mundo jwampala tate ampala na mwana hele. 
\v 2 Yene ndi chitumanye kubhehe tuipala yana ya Chapanga, kwa kumpala Chapanga na kuikamu mihilo jhake. 
\v 3 Nhwalo kumpala Chapanga ndi kujhokanikiya mihilo jhake. Na nhwilo gwake unonopa jhe kuikengama, 
\v 4 nhwalo kila jwabhelwikwe na Chapanga auhotwi nnema. Kwa ndela jhene tuhotwile nnema, kwa kihobholelo chito. 
\v 5 Bho, ghane auhotola nnema? Ndi jhola jwajheketii kubhehe Yecho ndi Mwana gwa Chapanga.
\s Yecho Kilichitu ndi ghane
\p
\v 6 Yecho Kilichitu ndi jwakahikite kwa mache na miyahe jha kuwe kwake. Akahikitijhe kwa mache tugha, nambo kwa mache na kwa miyahe jhake. Na Uhuke ndi jwatangacha malobhe ghanga kubhehe Uhuke ndi chakaka. 
\v 7 Bhahe, bhabhii bhatato bhubhitangacha: 
\v 8 Ndi Uhuke gwa Chapanga, mache na miyahe; kwa bhoha bhatato bhajheketelana. 
\v 9 Anda tujheketela chikilongelwa na bhando, bhahe chikilongelwa na Chapanga ndi kitopi hake nhwalo ghanga ndi malobhe ghalongila Chapanga kwa Mwana Mundo. 
\v 10 Jwannyekete Mwana gwa Chapanga abhii uwachakaka kumwojho gwake, nambo jwangannyekete Chapanga, intenda Chapanga kubhehe nhwange, nhwalo akajheketijhe malobhe ghapiita Chapanga kwa Mwana mundo. 
\v 11 Na malobhe gheniya ndi ghanga, Chapanga atupii ughome gwa machiko ghoha ghangapeta, na ghome gwenio ubhii nkate jha Mwana. 
\v 12 Mundo jhojhoha jwabhinako Mwana gwa Chapanga abhii na ghome gweno, jwangabhehe na Mwana gwa Chapanga akwetijhe ghome.
\s Ghome gwa machiko ghoha
\p
\v 13 Ninnyandikila mangota ilebhe henge bhumunnyeketile liina lya Mwana gwa Chapanga, umanye kubhehe mmi na ughome gwa machiko ghoha ghangapeta. 
\v 14 Na twenga tubhii nganganga palonge jha Chapanga nhwalo tumanye uchakaka kubhehe pitunnyopa kilebhe chochoha ngita chaipala jwenio atujhokanikiya. 
\v 15 Jwenio atujhokonikiya kila pitunnyopa na nhwalo tumanye kubhehe jweno atujhokonikiya kila pitunnyopa, tumanye hele kubhehe atupe ghoha ghitunnyopa.
\p
\v 16 Mundo anda amwehi nnongo mundo atenda uhakaho lyangannete kuwegha, ipalwa kunyopee kwa Chapanga na Chapanga nampela ughome. Nilonge yenio kwa bhala bhubhatehi uhakaho gwangapaleke kuwe. Nambo ubhii uhakaho ghumpelekela mundo mu kuwegha, nanenga nilonge jhe kubhehe mipalwa kunnyopa Chapanga nhwalo gwa gheniya. 
\v 17 Kila kitendwa changanandela palonge jha Chapanga ndi uhakaho, nambo ubhii uhakaho gwangampeleke mundo mu kuwegha.
\p
\v 18 Tumanye kubhehe kila jwabhelwikwe na Chapanga ahenga jhe uhakaho, nhwalo jwenio ulondwa na Mwana jwa Chapanga, yenio Limbembela intendajhe kilebhe.
\p
\v 19 Tumanye twenga ndi yana ya Chapanga pamo nakubhehe nnema ghoha ulongochwa na Limbembela jwenio.
\p
\v 20 Chakaka tumanye kubhehe Mwana gwa Chapanga ahikite, atupehile malango tumanye Chapanga jwa uchakaka, tutama kwa kulombana na Chapanga jwa uchakaka na kulombana na Mwana mundo, Yecho Kilichitu. Na jhonjo ndi Chapanga jwa uchakaka na ghongo ndi ghome gwa machiko ghoha ghangapeta.
\p
\v 21 Yana yango mwibhambale kuijhinamii ichapanga yawange!