\id REV 67REVDOG.sfm post-publishing to usfm 20050621 bp 
\rem converted to Unicode Oct 2007 via DOG3.c2u 
\h John Wenazhıı 
\mt1 John wenazhıı xègoèht'į̀ 
\c 1  
\s1 Yatı t'akwełǫ̀ǫ̀ xàyaetı 
\p  
\v 1 Zezì-Krı edecheekeè ayìı ghàgı̨ı̨dà agǫ̀ǫ̀làa sìı dıı enı̨htł'è k'e dek'eèhtł'è hǫt'e. Nǫ̀htsı̨-Gotà ı̨daà dàgode ha sìı wegodıì Zezì ghàı̨ɂǫ hǫt'e. Zezì wecheekeè dıı godıì gık'èezǫ ha t'à, edeyak'eet'ı̨į̀ John ts'ǫ̀ ayį̀į̀là.  
\v 2 John t'asìı hazǫǫ̀ yaɂı̨ı̨ sìı yeghǫ goı̨de. Nǫ̀htsı̨ weyatıì eyıts'ǫ Zezì wegodıì ghǫ goı̨de.  
\v 3 Dıı godı ı̨daà dàgode ha sìı weghǫ hǫt'e. Amìı dıı godıì k'eyahtıı sìı wexè sìghà hǫt'e. Eyıts'ǫ amìı yıìkw'o xè wegha ehkw'ı-ahodıı sìı wexè sìghà hǫt'e. Įdaà dàgode ha sìı hòt'a wets'ǫ̀ hawe hǫt'e. 
\s1 Weghàsǫts'eedı 
\p  
\v 4 John, Asıa nèk'e kǫ̀ta łǫ̀hdı̨ yàgòlaa Nǫ̀htsı̨ wecheekeè nàgedèe sìı dıı godı gots'ǫ̀ ı̨ı̨tł'è: 
\p Nǫ̀htsı̨ whaà gots'ǫ wehòhɂǫ, dıì wehòhɂǫ, eyıts'ǫ welǫ whìle ts'ǫ̀ wehòhɂǫ ha sìı, eyıts'ǫ ı̨nì degaı łǫ̀hdı̨ Nǫ̀htsı̨ wenadąą̀ nàgeèhza sìı naxıxè sǫgı̨ı̨wǫ welè eyıts'ǫ naxıxè sìghà hòɂǫǫ̀ agııle.  
\v 5 Eyıts'ǫ Zezì-Krı naxıxè sǫnıwǫ welè eyıts'ǫ naxıxè sìghà hòɂǫ welè. Ededı̨ sìı t'aats'ǫǫ̀ ehkw'ı gode hǫt'e. Ededı̨ t'akwełǫ̀ǫ̀ naìdàa elı̨ eyıts'ǫ dıı nèk'e k'àowocho hazǫǫ̀ gogha k'àowodeè elı̨ hǫt'e. 
\p Goghǫneètǫ ts'ıhɂǫ̀ wedoò xàı̨tł'ı t'à gohołı̨į̀ goghǫ nahoazhaà ayį̀į̀là hǫt'e.  
\v 6 Wetà Nǫ̀htsı̨ gha eghàlats'eeda ha t'à, dǫ ı̨łè lats'ı̨ı̨t'e xè yahtıı ts'ı̨ı̨lı̨į̀ agǫ̀ǫ̀là. Zezì-Krı weghàsǫts'eedı eyıts'ǫ welǫ whìle ts'ǫ̀ k'àowocho nàtso welè! Amen.  
\v 7 Įdòo k'eaht'į̀, k'oh k'e gots'ǫ̀ nììtła ha. Dǫ hazǫǫ̀ geɂį̀ ha. Dǫ behkà t'à gıghaı̨hkoo sìı ededı̨ kò geɂį̀ ha. Eyıts'ǫ dıı nèk'e dǫ hazǫǫ̀ wets'ıhɂǫ̀ geejı̨ xè getse ha. Hanì hòɂǫ welè! Amen. 
\p  
\v 8 Gots'ǫ̀ K'àowo Nǫ̀htsı̨ dıı hadı hǫt'e: “Yatı t'akwełǫ̀ǫ̀ wheɂǫǫ aht'e eyıts'ǫ yatı nǫǫde wheɂǫǫ aht'e. Whaà gots'ǫ sehòhɂǫ, dıì sehòhɂǫ, eyıts'ǫ welǫ whìle ts'ǫ̀ sehòhɂǫ ha. T'asìı wı̨ı̨zìı segha dìì gǫ̀hłı̨ nıìle,” gots'ǫ̀ hadı. 
\s1 Dǫ wet'àaɂàa deè 
\p  
\v 9 Sı̨ sìı nèot'ı̨ John aht'e. Naxıxèht'eè Zezì wedahxà ts'èwhı̨į̀ daehɂa, eyıts'ǫ naxıxèht'eè Nǫ̀htsı̨ wenàowoò k'ę̀ę̀ ehda. Nǫ̀htsı̨ weyatıì eyıts'ǫ Zezì wegodıì t'à gohde ts'ıhɂǫ̀ dıı dzęę̀ k'e dı Patmos gòyeh k'e whıhda hǫt'e.  
\v 10 Nǫ̀htsı̨ Dzęę̀ k'e Yedàyeh Nezı̨ı̨ sets'ǫ̀ ajà. Įdè sechį̀ht'a dechı̨shì t'à hòtł'ò gots'edeè lagodı,  
\v 11 dıı hats'edıì hǫt'e: “Nenazhıı dàgot'ı̨ı̨ sìı enı̨htł'è k'e dek'enìı̨tł'è gà kǫ̀ta łǫ̀hdı̨ Nǫ̀htsı̨ wecheekeè nàgedèe sìı gıts'ǫ̀ anele. Dıı kǫ̀ta łǫ̀hdı̨ hǫt'e: Ephesus, Smyrna, Pergamum, Thıyatıra, Sardıs, Phıladelphıa eyıts'ǫ Laodısıya,” hats'edıì hǫt'e. 
\p  
\v 12 Amìı sets'ǫ̀ godee sìı wets'ǫ̀ ets'aèhtła ekò ek'aèk'ǫchı̨į̀ łǫ̀hdı̨ sǫǫ̀mba-dekwo t'à hòèlı̨ı̨ weyìı tłeh dèk'ǫ̀ǫ nàwheɂa nǫǫ̀.\fig Ek'aèk'ǫchı̨į̀ łǫ̀hdı̨ sǫǫ̀mba-dekwo t'à hòèlı̨ı̨|src="HK018E.tif" size="span" ref="1.12" \fig* 
\v 13 Ek'aèk'ǫchı̨į̀ wenı dǫ nàwo, “dǫ wet'àaɂàa deè” lanì wègaat'ı̨. ʔeh nedèe wekè ts'ǫ̀ haı̨hdo yìı wheda, eyıts'ǫ ɂehtł'ı̨ sǫǫ̀mbaekwo lanıı wedzıìwı te nawhet'ı.  
\v 14 Wekwì eyıts'ǫ wekwìghà nahzha degoo lanì, hotıì zhah lanì, eyıts'ǫ wedaà kǫ̀ dèk'ǫ̀ǫ lanì wègaat'ı̨.  
\v 15 Kǫ̀ dèk'ǫ̀ǫ nı wekè satsǫ̀ dekwoo wek'e saı̨dı̨ lanì wègaat'ı̨. Gode nı̨dè tı nàı̨lı̨ı̨ lagodı.  
\v 16 Nàgòts'ehnèe ts'ǫ edılà t'à whǫ̀ łǫ̀hdı̨ dayele, eyıts'ǫ wewà gots'ǫ behcho wek'à į̀ła-ts'ǫ̀ dènıı xàı̨ɂa. Wınì sadeè nàtsoo lanì wègaat'ı̨. 
\p  
\v 17 Weehɂı̨ ekò wekè gà nàehkw'o, dǫ ełaı̨wo lahjà. Nàgòts'ehnèe ts'ǫ edılà sek'e ayı̨į̀là, hadı, “Dı̨ı̨jı̨-le. Sı̨ sìı yatı t'akwełǫ̀ǫ̀ wheɂǫǫ eyıts'ǫ yatı nǫǫde wheɂǫǫ aht'e.  
\v 18 Sı̨ sìı ehda hǫt'e. Ełaıhwho ı̨lè hanìkò dıì welǫ whìle ts'ǫ̀ ehda hǫt'e. Dǫ ełaı̨dèe nèk'e gha ladlì k'èhdì. 
\p  
\v 19 “Eyıt'à ayìı ghàı̨daa sìı dek'enìı̨tł'è. Dıì dàgode ha eyıts'ǫ ı̨daà dàgode ha sìı dek'enìı̨tł'è.  
\v 20 Whǫ̀ łǫ̀hdı̨ nàgòts'ehnèe selatł'aà whelaa eyıts'ǫ ek'aèk'ǫchı̨į̀ łǫ̀hdı̨ sǫǫ̀mbaekwo t'à hòèlı̨ı̨ sìı dıı awèts'edı hǫt'e: Whǫ̀ łǫ̀hdı̨ sìı kǫ̀ta łǫ̀hdı̨ Nǫ̀htsı̨ wecheekeè nàgedèe sìı gıyak'eet'ı̨į̀ gha hǫt'e, eyıts'ǫ ek'aèk'ǫchı̨į̀ łǫ̀hdı̨ sìı kǫ̀ta łǫ̀hdı̨ Nǫ̀htsı̨ wecheekeè nàgedèe sìı gha hǫt'e. 
\c 2  
\s1 Kǫ̀ta Ephesus Nǫ̀htsı̨ wecheekeè gıts'ǫ̀ aatł'è 
\p  
\v 1 “Kǫ̀ta Ephesus Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Ededı̨ nàgòts'ehnèe whǫ̀ łǫ̀hdı̨ welatł'aà whela xè ek'aèk'ǫchı̨į̀ łǫ̀hdı̨ ta k'etłoo sìı dıı weyatıì hǫt'e: 
\pi1  
\v 2 “Dànì aahdaa sìı naxık'èehsǫ hǫt'e. Segha hòtł'ò eghàlaahda eyıts'ǫ hoìla kò seghǫ naxınì nàtso wek'èehsǫ hǫt'e. Dǫ hołı̨ı̨ k'ę̀ę̀ geedaa sìı gıxè aaht'ı̨-le naxık'èehsǫ. Eyıts'ǫ dǫ hogets'ì t'à Nǫ̀htsı̨ wecheekeèdeè ats'ı̨ı̨t'e gedıı sìı gıahdzà t'à ehkw'ı agedı-le gıgòahɂǫ hǫt'e.  
\v 3 Sıızì ts'ıhɂǫ̀ sıì naxıgha hoìla, hanìkò ı̨łaà segha naxınì nàtsoo xè seghǫ nìahtsǫǫ̀ aahjà-le. 
\pi1  
\v 4 “Hanìkò t'asìı ı̨łè naxık'e nìdahoehɂà: T'akwełǫ̀ǫ̀ dànì seghǫnıahtǫ k'ę̀ę̀ seghǫnıahtǫ-le aahjà.  
\v 5 Dagǫǫwà dahkw'e ı̨lè wenaahdì, hanìkò eyı gots'ǫ hodàahde hǫt'e. Edek'eahłı̨ xè t'akwełǫ̀ǫ̀ dànì eghàlaahda ı̨lèe sìı ts'ǫ̀ anaahde. Edek'eahłı̨-le nı̨dè naxıts'ǫ̀ ehtła gà naxıts'ǫ k'aàk'ǫchı̨į̀ naxıghǫ neèhchı ha.  
\v 6 Hanìkò t'asìı ı̨łè segha nezı̨į̀ aaht'ı̨: Nıcolaıtan gı̨ı̨lı̨ı̨ dàget'ı̨ı̨ sìı wedzaahwhǫ hǫt'e, sı̨ sı eyı wedzaehwhǫ hǫt'e. 
\pi1  
\v 7 “Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. T'aa hołı̨ı̨ ghǫ hoehnèe sìı ts'ı wet'à ts'eedaa gots'ǫ shètı̨į̀ awehłe ha. Eyı ts'ı sìı Nǫ̀htsı̨ wets'ǫ hoı̨zı̨-nèk'e nàı̨ɂa hǫt'e. 
\s1 Kǫ̀ta Smyrna Nǫ̀htsı̨ wecheekeè gıts'ǫ̀ aatł'è 
\p  
\v 8 “Kǫ̀ta Smyrna Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Dıı yatı sìı amìı t'akwełǫ̀ǫ̀ elı̨ı̨ eyıts'ǫ nǫǫde elı̨ı̨ sìı weyatıì hǫt'e. Ełaı̨wo ı̨lè eyıts'ǫ k'achı̨ naìdà hǫt'e.  
\v 9 Dànì naxıxè hoìla xè eteaht'ı̨ı̨ sìı naxık'èehsǫ, hanìkò dǫ ahxee aahłı̨ hǫt'e! Dǫ xàè Israel got'ı̨į̀ ats'ı̨ı̨t'e gedıı sìı naxıızì jıı gehtsı̨ wek'èehsǫ. Hanìkò xàè Israel got'ı̨į̀ agı̨ı̨t'e nıìle, wehłı̨ı̨ wecheekeè agı̨ı̨t'e.  
\v 10 Whaà-le-t'ıì ayìı t'à daahɂa ha sìı weghǫ dahjı̨-le. Ehkw'ı anaxèehsı̨, wehłı̨ı̨ naxeèhdzà ha nıwǫ t'à dǫ-danìı̨laa-kǫ̀ ts'ǫ̀ anaxele ha hǫt'e. Hoònǫ dzęę̀ ts'ǫ̀ danaxegį̀ı̨hɂa ha. Naxıweè hogehtsı̨ kò naxınì nàtsoò aahłe. Wek'èxa welǫ whìle ts'ǫ̀ ts'eedaa naxıghàehɂà ha. 
\pi1  
\v 11 “Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welì. T'aa hołı̨ı̨ ghǫehnèe sìı nàekeè t'à ełaàts'ewıı sìı t'à daı̨ɂa ha-le. 
\s1 Kǫ̀ta Pergamum Nǫ̀htsı̨ wecheekeè gıts'ǫ̀ aatł'è 
\p  
\v 12 “Kǫ̀ta Pergamum Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Ededı̨ behcho wek'à į̀ła-ts'ǫ̀ dènıı wets'ǫ sìı eyı weyatıì hǫt'e.  
\v 13 Edı̨į̀ nàahdèe sìı wek'èehsǫ; edı̨į̀ wehłı̨ı̨ wedaèhchı̨cho whetǫǫ eyıts'ǫ edı̨į̀ nàdèe sìı ekǫ nàahdè hǫt'e. Hanìkò ı̨łaà naxıgha ehkw'ı-ahodı. Sek'èahsǫ-le dahdı nıìle. Secheekeè Antıpas t'aats'ǫǫ̀ segha gode elı̨ı̨ ı̨lèe sìı wenaahdì. Naxıkǫ̀ta ełaàwìgwo kò ı̨łaà seghǫ naxınì nàtso ı̨lè. 
\pi1  
\v 14 “Hanìkò t'asìı mǫ̀hdaa naxık'e nìdahoehɂà ha: Naxını dǫ mǫ̀hdaa Balaam wenàowoò k'ę̀ę̀ dǫ hoghàgogeehtǫ. Eyı dǫ sìı Israel got'ı̨į̀ hołı̨ı̨ hogehtsı̨ gha k'àowo Balak hoghàehtǫ ı̨lè. T'asìı nǫ̀htsı̨ą hòèlı̨ı̨ ghàgeedıı sìı gedè agohɂı̨, eyıts'ǫ edezhį̀į̀ t'à hołı̨ı̨ k'alagedè agohɂı̨.  
\v 15 Eyıts'ǫ naxını dǫ mǫ̀hdaa Nıcolaıtan gı̨ı̨lı̨ı̨ gınàowoò gıgha ehkw'ı-ahodı.  
\v 16 Eyıt'à edek'eahłı̨! Edek'eahłı̨-le nı̨dè whaà-le-t'ıì naxıts'ǫ̀ ehtła gà behcho sewà xàı̨ɂa t'à nàgeehtł'ì ha. 
\pi1  
\v 17 “Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welì. T'aa hołı̨ı̨ ghǫehnèe sìı ‘Manna’ deɂı̨į̀ wheɂǫǫ sìı weghàehdı ha. Eyıts'ǫ kwe degoo k'e wıızì gòò dek'eèhtł'èe sìı weghàehɂà ha. Amìı eyı weghǫ̀t'ǫǫ sìı ededı̨ zǫ yek'èezǫ ha. 
\s1 Kǫ̀ta Thıyatıra Nǫ̀htsı̨ wecheekeè gıts'ǫ̀ aatł'è 
\p  
\v 18 “Kǫ̀ta Thıyatıra Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Dıı yatı sìı Nǫ̀htsı̨ Weza weyatıì hǫt'e. Ededı̨ sìı wedaà kǫ̀ dèk'ǫ̀ǫ lanì eyıts'ǫ wekè satsǫ̀ dekwoo wek'e saı̨dı̨ lanì hǫt'e.  
\v 19 Dànì aahdaa sìı naxık'èehsǫ. Ełeghǫnıahtǫ xè naxıgha ehkw'ı-ahodı hǫt'e. Ełets'àdaahdı eyıts'ǫ hoìla kò naxınì nàtso hǫt'e. Eyıts'ǫ t'akwełǫ̀ǫ̀ secheekeè whahłı̨ nahk'e hanì eghàlaahda hǫt'e. 
\pi1  
\v 20 “Hanìkò t'asìı ı̨łè naxık'e nìdahoehɂà: Eyı ts'èko Jezebel nakwenàoɂǫǫ edèedıı sìı nàweahɂǫ nıìle. Secheekeè hoghàgoehtǫ t'à ts'ıɂǫ̀ geède, edezhį̀į̀ t'à hołı̨ı̨ k'alagedè eyıts'ǫ t'asìı nǫ̀htsı̨ą hòèlı̨ı̨ ghàgeedıı sìı gedè agohɂı̨.  
\v 21 Eyı ts'èko hołı̨ı̨ nàowoò k'ę̀ę̀ eghàlaedaa sìı edek'eelı̨ ha weghàhòehɂǫ ı̨lè, hanìkò hanıwǫ-le.  
\v 22 Eyıt'à tàda t'à eyaelı̨į̀ awehłe ha, eyıts'ǫ amìı yexè hołı̨ı̨ hogehtsı̨ı̨ sìı eyı ts'èko wenàowoò ghǫ edek'egı̨ı̨lı̨ lenǫsıı hòtł'ò dagı̨ı̨ɂaà agehłe ha.  
\v 23 Ts'èko wecheekeè hazǫǫ̀ ełaàgehde ha. Hanì-ı̨dè Nǫ̀htsı̨ wecheekeè hazǫǫ̀ dǫdzeè yìı eyıts'ǫ dǫnì yìı k'eeht'į̀ aht'e sek'ègeezǫ ha. Eyıts'ǫ naxıhołı̨į̀ k'èxa naxık'eehkwa hǫt'e sek'ègeezǫ ha.  
\v 24 Nǫ̀htsı̨ wecheekeè eyıì-le kǫ̀ta Thıyatıra nàgedèe sìı gıts'ǫ̀ yatı nèehɂà ha. Eyı ts'èko wek'ę̀ę̀ eghàlaahda-le eyıts'ǫ wehłı̨ı̨ wenàowoò weghàdeahtǫ-le. Dǫ mǫ̀hdaa eyı nàowo gıgha wet'àaɂà t'à dǫ gıghàdeetǫ ha gı̨ı̨wǫ. Naxı̨ eyı nàowo dahwhǫ-le sìı dıı yatı naxıghàehɂǫ, (weɂǫ̀ǫ̀ t'asìı naxıgha dezhìı sìı ts'ǫ̀ naxeehɂa ha-le):  
\v 25 Naxıts'ǫ̀ nèehtła gots'ǫ̀ seghǫ naxınì nàtsoo sìı hotıì wek'èahdì. 
\pi1  
\v 26 “T'aa hołı̨ı̨ ghǫehnèe eyıts'ǫ nǫǫde ts'ǫ̀ sek'ę̀ę̀ edaa sìı dǫ hazǫǫ̀ xàɂaa ts'ǫ̀ k'àowoò awehłe ha.  
\v 27 ‘Ededı̨ sìı satsǫ̀-geh t'à gıgha k'àowocho nàtsoo elı̨ ha, nàgoèhtł'ı xè kwetǫ yetaezhì lagole ha.’ Setà ededahxà k'àowo ehłı̨į̀ asį̀į̀là lanì, ededı̨ sı sedahxà k'àowo elı̨į̀ awehłe ha. 
\pi1  
\v 28 “Eyıts'ǫ whǫ̀-k'eàhkaa weghàehɂà ha.  
\v 29 Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. 
\c 3  
\s1 Kǫ̀ta Sardıs Nǫ̀htsı̨ wecheekeè gıts'ǫ̀ aatł'è 
\p  
\v 1 “Kǫ̀ta Sardıs Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Ededı̨ Nǫ̀htsı̨ wets'ǫ ı̨nì degaı łǫ̀hdı̨ eyıts'ǫ whǫ̀ łǫ̀hdı̨ welatł'aà whelaa sìı dıı weyatıì hǫt'e: Dànì aahdaa sìı wek'èehsǫ, dǫ nezı̨į̀ aahda naxegı̨ı̨hwhǫ hanìkò dǫ ełaı̨dèe laaht'e.  
\v 2 Ts'ıahdè! Ayìı naxıghǫ ełaàwı ha nìkw'oo sìı nàtsoò aahłe. Nǫ̀htsı̨ wek'ę̀ę̀ deghàà eghàlaahda nıìle wek'èehsǫ.  
\v 3 Eyıt'à ayìı naxıghǫ̀t'ǫǫ eyıts'ǫ ayìı aàhkw'oo sìı wenaahdì. Eyı yatı wek'èaht'e xè edek'eahłı̨. Ts'ıahdè-le nı̨dè eeɂį̀ı̨-dǫǫ̀ lanì naxınaàhtǫ naxıts'àhtła ha. Ayìı sadzeè k'e naxıts'àhtła ha sìı wek'èahsǫ ha nıìle. 
\pi1  
\v 4 “Hanìkò dǫ łǫ-lea kǫ̀ta Sardıs nàgedèe sìı hołı̨ı̨ t'à edegoht'ǫǫ̀ tsį̀gı̨ı̨hwho-le. Edegha hogeèhnǫ ne t'à goht'ǫ degoo t'à-aget'ı̨ xè sexè k'egedè ha.  
\v 5 T'aa hołı̨ı̨ ghǫehnèe sìı eyı lanì goht'ǫ degoo yìı geèhkw'e ha. Nı̨htł'è k'e dǫ welǫ whìle ts'ǫ̀ geeda gha gıızì dek'eèhtł'èe sìı gots'ǫ gıızì ejınahwha ha-le, hanìkò Setà wenadąą̀ eyıts'ǫ yak'eet'ı̨į̀ gınadąą̀ eyı dǫ wek'èehsǫ dehsı̨ ha.  
\v 6 Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. 
\s1 Kǫ̀ta Phıladelphıa Nǫ̀htsı̨ wecheekeè gıts'ǫ̀ aatł'è 
\p  
\v 7 “Kǫ̀ta Phıladelphıa Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Ededı̨ degaı xè ehkw'ı elı̨ı̨ sìı dıı weyatıì hǫt'e. Ededı̨ sìı k'àowocho Davıd weladlì k'èdìı elı̨ hǫt'e. Ayìı ts'ǫdaà xàedee sìı dǫ wı̨ı̨zìı yedaede ha dìì hǫt'e, eyıts'ǫ ayìı yedaedee sìı dǫ wı̨ı̨zìı yets'ǫdaà xàede ha dìì hǫt'e.  
\v 8 Dànì eghàlaahdaa sìı wek'èehsǫ. Aàhkw'ǫ, naxınadąą̀ enìxàı̨tǫ ahłà eyıts'ǫ dǫ wı̨ı̨zìı enìyeechı ha dìì. Nàahtso-le naxık'èehsǫ, hanìkò seyatıì k'èahdì hǫt'e eyıts'ǫ sek'èahsǫ-le dahdı nıìle.  
\v 9 Eyı dǫ wehłı̨ı̨ wecheekeè agı̨ı̨t'ee sìı naxınadąą̀ nàgògehgè agehłe ha. Naxıghǫneehtǫ hǫt'e gık'èezǫǫ̀ agehłe ha. Israel got'ı̨į̀ agı̨ı̨t'e-le kò xàè ‘Israel got'ı̨į̀ ats'ı̨ı̨t'e’ gedı t'à hogets'ìı-dǫǫ̀ agı̨ı̨t'e.  
\v 10 Senàowoò k'èahdì eyıts'ǫ ts'èwhı̨į̀ daahɂa t'à hazǫǫ̀ dıı nèk'e dǫ xè hoìla agode ha sìı ch'à naxık'èhdì ha. Dıı nèk'e dǫ hazǫǫ̀ nàdèe sìı hoìla t'à geèdzà ha. 
\pi1  
\v 11 “Whaà-le-t'ıì naxıts'ǫ̀ ehtła ha. Seghǫ naxınì nàtsoo sìı hotıì wek'èahdì, hanì-ı̨dè edegha t'asìı deahnǫǫ sìı dǫ wı̨ı̨zìı naxıghǫ neyıìwa ha-le.  
\v 12 T'aa hołı̨ı̨ ghǫehnèe sìı Nǫ̀htsı̨kǫ̀-gocho goyìı kwe nàtsoo nàı̨ɂa elı̨į̀ awehłe xè t'aats'ǫǫ̀ ekǫ wehòhɂǫ ha. Nǫ̀htsı̨ wıızì eyıts'ǫ Nǫ̀htsı̨ wekǫ̀godeè wıızì wek'e dek'eèhtł'è ha. Eyı kǫ̀godeè wegòò sìı Jerusalem wìyeh; Nǫ̀htsı̨ yak'e gots'ǫ ı̨zhıì adeè ayele ha. T'aa wınì nàtsoo sìı sıızì wegòò wek'e dek'enèehtł'è ha.  
\v 13 Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. 
\s1 Kǫ̀ta Laodısıya Nǫ̀htsı̨ wecheekeè gıts'ǫ̀ aatł'è 
\p  
\v 14 “Kǫ̀ta Laodısıya Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: 
\pi1 “Ededı̨ ‘Amen’ wìyeh, t'aats'ǫǫ̀ ehkw'ı gode eyıts'ǫ Nǫ̀htsı̨ t'asìı hazǫǫ̀ whehtsı̨ ts'ǫ̀ K'àowo elı̨ı̨ sìı dıı weyatıì hǫt'e.  
\v 15 Dànì eghàlaahdaa sìı wek'èehsǫ, segha whek'òo eyıts'ǫ whekǫ̀ǫ laaht'e-le. Eyı nàke sìı ı̨łè ààhchı nı̨dè dehwhǫ.  
\v 16 Eyıt'à segha tı whekǫ̀ǫ eyıts'ǫ tı whek'òo laaht'e-le. Ekìı tı yaazea whekǫ̀ǫ laaht'e t'à sewà gots'ǫ xànaxeehsè ha.  
\v 17 ‘Ahxee ats'ı̨ı̨t'e,’ edèahdı, ‘T'asìı łǫ gots'ǫ t'à t'asìı wets'ı̨ı̨wǫ gǫ̀hłı̨-le,’ dahdı, hanìkò naxıxè gots'eèdı, eteaht'ı̨, naxıdaà goìle xè goht'ǫ dę dahkw'e hǫt'e, wek'èahsǫ-le nì?  
\v 18 Sǫǫ̀mbaekwo kǫ̀-dèk'ǫ̀ǫ t'à wedeèdlı̨į̀ adlàa sìı seghǫ nàahdì nı̨dè ahxee aahłı̨ ha. Goht'ǫ degoo seghǫ nàahdì, hanì-ı̨dè goht'ǫ dę edeghǫ į̀į̀zhaahłı̨ ha-le, eyıts'ǫ godaàtłeè seghǫ nàahdì, hanì-ı̨dè k'eaht'į̀ ha. 
\pi1  
\v 19 “T'aa gıghǫneehtǫǫ sìı hołı̨ı̨ hogehtsı̨ nı̨dè nàgeehɂǫ xè nezı̨į̀ geeda gha hoghàgeehtǫ hǫt'e. Eyıt'à ehkw'ı nànıahdè xè edek'eahłı̨.  
\v 20 Jǫ tı̨ı̨dà nàhwho xè enìı̨tǫ ts'aht'ı; amìı sıìkw'o t'à sets'ǫ̀ enìxàechì nı̨dè wegà goyaehtła gà wexè shèhtı̨ ha, eyıts'ǫ ededı̨ sı sexè shètı̨ ha. 
\pi1  
\v 21 “T'aa hołı̨ı̨ ghǫehnèe sìı sedaèhchı̨cho k'e segà whedaà awehłe ha. Sı̨ hołı̨ı̨ ghǫèhnǫ t'à Setà wedaèhchı̨cho k'e wegà whıhdaà asììdlà hǫt'e.  
\v 22 Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè.” 
\c 4  
\s1 Yak'e daèhchı̨cho whetǫ 
\p  
\v 1 Eyı tł'axǫǫ̀ ı̨dòo k'eeht'į̀ là senadąą̀ yak'e enìı̨tǫ enìxàı̨ke. Amìı t'akwełǫ̀ǫ̀ sets'ǫ̀ gode ı̨lèe sìı dechı̨shì dedı lanì k'achı̨ sets'ǫ̀ gode, hadı, “Įdaà dàgode ha sìı weghàı̨daà anehłe ha t'à, jǫ ts'ǫ̀ dekı̨į̀tła,” sèhdı. \fig Dechı̨shì dedı|src="HK062E.tif" size="span" ref="4.1" \fig* 
\v 2 Ekòet'ıì Nǫ̀htsı̨ wets'ǫ Įnì Degaı sexèhdı t'à senadąą̀ yak'e daèhchı̨cho whetǫǫ eyıts'ǫ wek'e ts'edaa segha wègoèht'į̀.  
\v 3 Eyı daèhchı̨cho k'e whedaa sìı sǫǫ̀mbakweè lanì wek'e saı̨dı̨. Daèhchı̨cho wemǫǫ̀ k'àlemį̀į̀ nawhet'ı. Eyı k'àlemį̀į̀ sìı kwe ı̨t'ǫ̀ wèdaat'ı̨ı̨ lanì wek'e saı̨dı̨.  
\v 4 Eyı daèhchı̨cho wemǫǫ̀ daèhchı̨cho naènǫ-daats'ǫ̀-dı̨ whela. Ǫhdah naènǫ-daats'ǫ̀-dı̨ gık'e dèhkw'e. Goht'ǫ degoo yìı geèhkw'e eyıts'ǫ sǫǫ̀mbaekwo kwìt'ıì gık'e whela.  
\v 5 Daèhchı̨cho whetǫǫ gots'ǫ kǫ̀ naìtł'ı̨, eezhıı dèekw'ǫ xè hǫtsaa eezhıı xèeta lagodı. Daèhchı̨cho wenadąą̀ tłeèk'ǫ̀ǫ łǫ̀hdı̨ wekǫ̀ nàtsoo wègaat'ı̨; eyı sìı Nǫ̀htsı̨ wets'ǫ ı̨nì łǫ̀hdı̨ agı̨ı̨t'e.  
\v 6 Eyıts'ǫ daèhchı̨cho wenadąą̀ tı nechàa lanıı whehtǫǫ wègaat'ı̨, eja lanì wenı̨ı̨dàà xègaat'ı̨. 
\p Eyı tanı daèhchı̨cho whehtǫ wemǫǫ̀ t'asìı dı̨ godìı dèhkw'e, gıdaà łǫ gık'e whela; gıwèdzǫ gıdaà whela eyıts'ǫ gıchį̀ht'a sı gıdaà whela.  
\v 7 Eyı t'asìı godìı t'akwełǫ̀ǫ̀ sìı goìjìıcho lanì wègaat'ı̨, yek'èè whedaa sìı ejıe lanì wègaat'ı̨, taı t'à whedaa sìı dǫ wınì lanì wègaat'ı̨, eyıts'ǫ dı̨ t'à whedaa sìı det'ǫcho naat'aa lanì wègaat'ı̨.  
\v 8 Eyı t'asìı dı̨ godìı sìı gı̨ı̨ts'ǫǫ̀ ek'ètaı gǫ̀hłı̨ eyıts'ǫ hazǫǫ̀ ts'ǫ̀ gıdaà gık'e whela, gı̨ı̨ts'ǫǫ̀ wetł'a kò gıdaà whela. Dzęę̀, toò ehk'ę̀ę̀ dıı hagedı: 
\q1 “Gots'ǫ̀ K'àowo t'asìı wegha dìì-le sìı degaı, degaı, degaı zǫ hǫt'e. 
\q1 Nǫ̀htsı̨ hǫt'e; whaà gots'ǫ wehòhɂǫ, dıì wehòhɂǫ, 
\q2 eyıts'ǫ welǫ whìle ts'ǫ̀ wehòhɂǫ ha hǫt'e,” t'aats'ǫǫ̀ hagedı. 
\m  
\v 9 Eyıt'à eyı t'asìı dı̨ godìı sìı amìı daèhchı̨cho k'e whedaa, welǫ whìle ts'ǫ̀ wehòhɂǫǫ sìı gıghàsǫedı xè masì gıìhdı. Haget'ı̨ taàt'eè,  
\v 10 ǫhdah naènǫ-daats'ǫ̀-dı̨ sìı eyı daèhchı̨cho k'e whedaa ts'ǫ̀ nàgògehge eyıts'ǫ welǫ whìle ts'ǫ̀ wehòhɂǫǫ sìı ghàsǫgeedı. Edets'ǫ sǫǫ̀mbaekwo kwìt'ıì eyı daèhchı̨cho nadąą̀ nègewa xè hagedı, 
\q1  
\v 11 “Gots'ǫ̀ K'àowo Gonǫ̀htsı̨, 
\q1 t'asìı hazǫǫ̀ wheęhtsı̨ ne t'à enıìyah xè neghàsǫts'eedıı sìı nı̨ zǫ nets'ǫ̀ hats'edı ha hǫt'e eyıts'ǫ t'asìı hazǫǫ̀ ts'ǫ̀ k'àı̨wo welè. 
\q1 Hanì welè neewǫ t'à t'asìı hazǫǫ̀ hòèlı̨ı̨ xè geeda hǫt'e,” gedı. 
\c 5  
\s1 Enı̨htł'èyeè eyıts'ǫ sahzǫ̀ą 
\p  
\v 1 Eyı daèhchı̨cho k'e whedaa sìı nàgòts'ehnèe ts'ǫ enı̨htł'èyeè dayeɂa. Eyı enı̨htł'è į̀ła-ts'ǫ̀ wek'e aatł'èe eyıts'ǫ łǫ̀hdı̨ ts'ǫ̀ wedaàdzeh.  
\v 2 Yak'eet'ı̨į̀ nàtsoo ı̨łè hòtł'ò dıı hadı, “Amìı eyı enı̨htł'èyeè łǫ̀hdı̨ ts'ǫ̀ wedaàdzeh sìı yets'ǫdaà xàehdlà ha edegha hoèhnǫ?” hadı.  
\v 3 Hanìkò yak'e, dıı nèk'e eyıts'ǫ dèè gotł'a ts'ǫ t'asìı godìı wı̨ı̨zìı eyı enı̨htł'èyeè yets'ǫdaà xàehdlà gà yek'eyahtı ha gǫ̀hłı̨-le.  
\v 4 T'asìı godìı degaı elı̨ı̨ sìı eyı enı̨htł'èyeè ts'ǫdaà xàehdlà gà yek'eyahtı ha sìı gogìhɂà ha dìì t'à, sıì ııtsè.  
\v 5 Eyıt'à ǫhdah naènǫ-daats'ǫ̀-dı̨ gots'ǫ ı̨łè sets'ǫ̀ hadı, “Netse-le. ‘Judah got'ı̨į̀ ts'ǫ goìjìıcho’ wìyeh sìı eyıts'ǫ ‘Davıd wets'ǫ ts'ıghòochı̨į̀’ wìyeh sìı hoèhnǫ hǫt'e. Ededı̨ sìı eyı enı̨htł'èyeè łǫ̀hdı̨ ts'ǫ̀ wedaàdzeh sìı yets'ǫdaà xàehdlà ha weghàhòt'ǫ hǫt'e,” sèhdı. 
\p  
\v 6 Eyı tł'axǫǫ̀ Sahzǫ̀ą ełaàwìgwo lanì wègaat'ı̨, eyı daèhchı̨cho gà tanı nàwo. Wemǫǫ̀ t'asìı dı̨ godìı eyıts'ǫ ǫhdah naènǫ-daats'ǫ̀-dı̨ nàgeèhza. Eyı sahzǫ̀ą wek'e edè łǫ̀hdı̨ gǫ̀hłı̨ eyıts'ǫ wedaà łǫ̀hdı̨ gǫ̀hłı̨. Eyı sìı Nǫ̀htsı̨ wets'ǫ ınì degaı łǫ̀hdı̨ dıı nèk'e hazǫǫ̀ ts'ǫ̀ adlàa sìı agı̨ı̨t'e.  
\v 7 Eyı sahzǫ̀ą amìı daèhchı̨cho k'e whedaa sìı ts'ǫ̀ ehtła gà eyı enı̨htł'èyeè nàgòts'ehnèe ts'ǫ dayeɂaa sìı neyıìchì.  
\v 8 Sahzǫ̀ą eyı enı̨htł'èyeè neyıìchı tł'axǫǫ̀ t'asìı dı̨ godìı eyıts'ǫ ǫhdah naènǫ-daats'ǫ̀-dı̨ sìı gıts'ǫ̀ nàgògı̨ı̨hgè. Hazǫǫ̀ tł'ık'eetı̨ı̨ lanıı k'egele eyıts'ǫ sǫǫ̀mbaekwo kw'àyį̀ą weyìı dzèh-łekǫǫ dèk'ǫ̀ǫ dagıale. Eyı dzèh-łekǫǫ dèk'ǫ̀ǫ sìı Nǫ̀htsı̨ wets'ǫ dǫ degaı xàyageetı lanì hǫt'e.  
\v 9 Shı̨ wegòò t'à dıı hagedıì gejı̨, 
\q1 “Eyı enı̨htł'èyeè nı̨į̀chı gà wets'ǫdaà xàı̨hdlà ha neghàhòt'ǫ. 
\q2 Ełaànìgwo ı̨lè eyıts'ǫ nedoò t'à Nǫ̀htsı̨ gha dǫ nàgıneèhdì. 
\q1 Dǫ hazǫǫ̀ xàɂaa, yatı hazǫǫ̀ xàɂaa eyıts'ǫ dıı nèè hazǫǫ̀ gots'ǫ agı̨ı̨t'e. 
\q1  
\v 10 Dǫ ı̨łè zǫ lagı̨ı̨t'e agìnelà, Gonǫ̀htsı̨ gha eghàlageeda gha yahtıı gı̨ı̨lı̨į̀ agìnelà, 
\q2 eyıts'ǫ dıı nèk'e k'àowocho gı̨ı̨lı̨ ha,” hagedıì gejı̨. 
\p  
\v 11 Eyı tł'axǫǫ̀ ı̨dòo k'eeht'į̀ ekò yak'eet'ı̨į̀ łǫ gejį̀ hǫt'e. Yak'eet'ı̨į̀ lemìıyǫǫ̀ łǫ t'à gıts'ıhtà ha dìì. Daèhchı̨cho, t'asìı dı̨ godìı eyıts'ǫ ǫhdah naènǫ-daats'ǫ̀-dı̨ gımǫǫ̀ yak'eet'ı̨į̀ łǫ ełèwhede.  
\v 12 Hòtł'ò gejı̨, hagedı, 
\q1 “Sahzǫ̀ą ełaı̨wo ı̨lèe sìı nezı̨į̀ weghàhòt'ǫ hǫt'e! 
\q1 Ededı̨ sìı t'asìı hazǫǫ̀ gha K'àowocho welè, t'asìı hazǫǫ̀ weghǫ̀zhe welè, 
\q2 gǫǫzǫǫ̀ weghàhòt'à welè, nàtsoò awedle, eyıts'ǫ enıìyah xè weghàsǫts'eedı welè!” hagedıì gejı̨. 
\p  
\v 13 Eyı tł'axǫǫ̀ yak'e gots'ǫ, dıı nèk'e gots'ǫ, dèè wetł'a gots'ǫ eyıts'ǫ tı yìı gots'ǫ, t'asìı hazǫǫ̀ dıı hagedıì gejı̨, 
\q1 “Amìı daèhchı̨cho k'e whedaa eyıts'ǫ eyı sahzǫ̀ą sı enıìyah xè gıghàsǫhoedı welè. 
\q1 Welǫ whìle ts'ǫ̀ t'asìı hazǫǫ̀ ts'ǫ̀ k'agewo welè!” hagedıì gejı̨. 
\m  
\v 14 T'asìı dı̨ godìı sìı “Amen,” gedı, eyıts'ǫ ǫhdah naènǫ-daats'ǫ̀-dı̨ nàgògı̨ı̨hgè gà eyı daèhchı̨cho k'e whedaa eyıts'ǫ eyı sahzǫ̀ą sı ghàsǫgeedı. 
\c 6  
\s1 Enı̨htł'èyeè łǫ̀hdı̨ ts'ǫ̀ wedaàdzeh 
\p  
\v 1 Sahzǫ̀ą weghàehda ekò eyı enı̨htł'èyeè łǫ̀hdı̨ ts'ǫ̀ wedaàdzeh t'akwełǫ̀ǫ̀ wheɂǫǫ sìı nàyı̨ı̨zhì. Eyı tł'axǫǫ̀ t'asìı dı̨ godìı sìı ı̨łè eezhıı ladıì xàyaı̨htı, “Jǫ-ı̨tłe,” sèhdı.  
\v 2 Hǫtsaa senadąą̀ tłı̨cho degoo wègoèht'į̀! Eyı tłı̨cho t'à-at'ı̨ı̨ sìı ı̨htį̀ daetı̨. Ededı̨ sìı sǫǫ̀mbaekwo kwìt'ıì weghǫ̀t'ǫ eyıts'ǫ eghǫǫ-dǫǫ̀ hoehnè ha nàhǫhoehwho lanì natłı̨yeèhchì. 
\p  
\v 3 Eyı tł'axǫǫ̀ sahzǫ̀ą eyı enı̨htł'èyeè wedaàdzeh nàke t'à wheɂǫǫ sìı nàyı̨ı̨zhì. K'achı̨ t'asìı dı̨ godìı sìı wets'ǫ ı̨łè hadı, “Jǫ-ı̨tłe,” sèhdı.  
\v 4 K'achı̨ tłı̨cho ı̨łè dek'o lanıı wègoèht'į̀. Eyı tłı̨cho t'à-at'ı̨ı̨ sìı dıı nèk'e ts'èwhı̨į̀ hòɂǫ-le ayele ha eyıts'ǫ dǫ ełaàłìdeè ayele ha weghàhòt'ǫ. Eyı gha behcho nechàa weghǫ̀t'ǫ. 
\p  
\v 5 Eyı tł'axǫǫ̀ sahzǫ̀ą enı̨htł'èyeè wedaàdzeh taı t'à wheɂǫǫ sìı nàyı̨ı̨zhì. K'achı̨ t'asìı dı̨ godìı sìı wets'ǫ ı̨łè hadı, “Jǫ-ı̨tłe,” sèhdı. Hǫtsaa senadąą̀ tłı̨cho dezǫǫ wègoèht'į̀! Eyı tłı̨cho t'à-at'ı̨ı̨ sìı wet'à t'asìı wedaeda yàıtǫ̀.  
\v 6 Eyı t'asìı dı̨ godìı sìı gıta ts'ǫ dıı hats'edıì hǫt'e, “Łè denahk'e dètì ha; łè nàke aı̨hda elı̨ı̨ sìı ı̨łè dzęę̀ gots'àɂeedì xètłǫ elı̨ ha, eyıts'ǫ łè eładı̨ı̨ xàɂaa ek'èta aı̨hdaa elı̨ı̨ sìı ı̨łè dzęę̀ gots'àɂeedì xètłǫ elı̨ ha. Hanìkò tłeh eyıts'ǫ jìetì sı wedıhoı̨htsı̨-le!” hats'edıì hǫt'e. 
\p  
\v 7 Eyı tł'axǫǫ̀ sahzǫ̀ą eyı enı̨htł'èyeè wedaàdzeh dı̨ t'à wheɂǫǫ sìı nàyı̨ı̨zhì. K'achı̨ t'asìı dı̨ godìı sìı wets'ǫ ı̨łè hadı, “Jǫ-ı̨tłe,” sèhdı.  
\v 8 Hǫtsaa senadąą̀ tłı̨cho dıìgà lanıı wègoèht'į̀! Eyı tłı̨cho t'à-at'ı̨ı̨ sìı “ełaàgòhde” wìyeh eyıts'ǫ yek'èè etłee sìı “dǫ ełaı̨dèe nèk'e” wìyeh. Dıı nèk'e tanı eyıts'ǫ k'achı̨ tanı ts'ǫ̀ dǫ nàdèe sìı ełaàgogìhde ha gıghàhòt'ǫ. Mǫ̀hdaa behcho t'à ełaàgogìhde ha, mǫ̀hdaa bò whìle t'à, mǫ̀hdaa tàda nàtsoo t'à eyıts'ǫ mǫ̀hdaa tıts'aàdìı wets'àhoejı̨ı̨ t'à ełaàgogìhde ha. 
\p  
\v 9 Sahzǫ̀ą enı̨htł'èyeè wedaàdzeh sı̨làı t'à wheɂǫǫ sìı nàyı̨ı̨zhì. Kwe-ladà wek'e Nǫ̀htsı̨ ts'ǫ̀ t'asìı k'eek'ǫ̀ǫ sìı wetł'a dǫ gıdą̀ązhį̀ı̨ wègoèht'į̀. Nǫ̀htsı̨ weyatıì k'ę̀ę̀ geeda ts'ıhɂǫ̀ ełaàgogį̀ı̨hdèe agı̨ı̨t'e.  
\v 10 Hòtł'ò gezeh xè hagedı, “Gots'ǫ̀ K'àowo, t'asìı negha dìì-le, nı̨ sìı degaı xè ehkw'ı anet'e. Dàı̨waà-ı̨dè dıı nèk'e gots'ǫ dǫ gısınìyanehtı ha? Ełaàgogį̀ı̨hdè k'èxa dàht'e nı̨dè nàgı̨ı̨hkwa ha?” gedıì yagìzeh.  
\v 11 Eyı tł'axǫǫ̀ hazǫǫ̀ ɂeh degoo nedèe gıghǫ̀zha eyıts'ǫ dıı hagèts'edı, “Įłaà whaà hoògǫ gots'ǫ̀ naahɂı̨ ha. Dànì ełaànaxegį̀ı̨hdèe sìı eyı lanì, naxıxèht'eè Nǫ̀htsı̨ wecheekeè gı̨ı̨lı̨ı̨ sìı mǫ̀hdaa ełaàgede ha. Hazǫǫ̀ ełaàgogį̀ı̨hdè tł'axǫǫ̀ nı̨dè ayìı k'enaahɂı̨ ı̨lèe sìı wek'ę̀ę̀ agode ha,” gìts'edıì hǫt'e. 
\p  
\v 12 Eyı tł'axǫǫ̀ sahzǫ̀ą weghàehda kò enı̨htł'èyeè wets'ǫdaàdzeh ek'ètaı t'à wheɂǫǫ sìı nàyı̨ı̨zhì. Hǫtsaa dèè hòtł'ò nàgoèhdǫ. Sa dezǫǫ̀ ajà, eyıts'ǫ adzęzah edoò lajà,  
\v 13 eyıts'ǫ nı̨hts'ı nàtsoo t'à ts'ı hòtł'ò nàada nı̨dè jìecho dıìdìı sìı hodàetł'ì lanì whǫ̀ dèè k'e ts'ǫ̀ hodàètł'ı.  
\v 14 Enı̨htł'èyeè deyìınats'eèwa lanì yat'a whìle ajà, shìh hazǫǫ̀ eyıts'ǫ dı whelaa sı hazǫǫ̀ wedıhòłı̨. 
\p  
\v 15 Dıı nèk'e k'aodèe, gıza hazǫǫ̀, eghǫǫ-dǫǫ̀-gha-k'aodèe hazǫǫ̀, dǫ ahxee, dǫ wet'àaɂàa gı̨ı̨lı̨ı̨, dǫ edets'ǫ̀ k'agedè-le eyıts'ǫ dǫ edets'ǫ̀ k'agedèe hazǫǫ̀ kwe yìı eyıts'ǫ shìh ta kwe whelaa ta nàdegeeɂį̀.  
\v 16 Shìh eyıts'ǫ kwe ts'ǫ̀ nagıìdzeh hagedı, “Gok'e hodàahtł'ì, eyı daèhchı̨cho k'e whedaa eyıts'ǫ Sahzǫ̀ą nàgoehkwa ch'à gok'èahdì.  
\v 17 Hòt'a hoìla agogelee dzęę̀ weghǫnìhoı̨wo hǫt'e. Dànì edaxàts'ı̨ı̨de welì?” gedıì gezeh. 
\c 7  
\s1 Dǫ dıı haàtłǫ nàgıakwı̨ hǫt'e 
\p  
\v 1 Eyı tł'axǫǫ̀ yak'eet'ı̨į̀ dı̨ dıı nèk'e wedzıì dı̨ gòlaa gà nàgeèhza gìgoèht'į̀. Dèè gok'e, tı k'e eyıts'ǫ ts'ı ta nı̨hts'ı ade ha-le t'à nı̨hts'ı ı̨dè ts'ǫ̀ gıtǫ̀.  
\v 2 Eyı tł'axǫǫ̀ sa kàɂàa gots'ǫ yak'eet'ı̨į̀ eyıì-le naetłe wègoèht'į̀. Eyı yak'eet'ı̨į̀ sìı Nǫ̀htsı̨ Edaa wets'ǫ enı̨htł'è k'e nàts'eekwį̀ı̨ k'eɂa. Yak'eet'ı̨į̀ dı̨ tı eyıts'ǫ dèè tsį̀gehwhı ha gıghàhòt'ǫǫ sìı gots'ǫ̀ hòtł'ò naìdzeh hadı,  
\v 3 “Nǫ̀htsı̨ wecheekeè gıts'abeè k'e nàts'eekwį̀ gots'ǫ̀, dèè, tıcho eyıts'ǫ ts'ı tsį̀ahwhı-le,” gòhdı.  
\v 4 Eyı tł'axǫǫ̀ dıı hats'edıì hǫt'e, “Dǫ dıı haàtłǫǫ sìı nàgıakwı̨ hǫt'e: Israel got'ı̨į̀ ts'ǫ ı̨łèakw'eènǫ-daats'ǫ̀-dı̨ènǫ-daats'ǫ̀-dı̨-lemì (144,000). 
\q1  
\v 5 Judah got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Ruben got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Gad got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1  
\v 6 Aser got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Naphtalı got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Manaseh got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1  
\v 7 Sımeyon got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Levı got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Isakar got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1  
\v 8 Zebulun got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 Joseph got'ı̨į̀ ts'ǫ hoònǫ-daats'ǫ̀-nàke-lemì (12,000), 
\q1 eyıts'ǫ Benjamın got'ı̨į̀ ts'ǫ hoònǫ-daats'ǫ̀-nàke-lemì (12,000). 
\m Hazǫǫ̀ t'à dǫ haàtłǫǫ nàgıakwı̨ hǫt'e,” hats'edıì. 
\s1 Dǫdeè ɂeh degoo nedèe yìı geèhkw'e 
\p  
\v 9 Eyı tł'axǫǫ̀ senadąą̀ dǫ łǫ t'à łǫ gìgoèht'į̀. Dǫ sıì łǫ t'à dǫ wı̨ı̨zìı goıhtà ha dìì. Dǫ hazǫǫ̀ xàɂaa, yatı hazǫǫ̀ xàɂaa eyıts'ǫ dıı nèk'e hazǫǫ̀ gots'ǫ dǫ agı̨ı̨t'e. Daèhchı̨cho eyıts'ǫ eyı Sahzǫ̀ą nadąą̀ nàgeèhza. ʔeh degoo nedèe yìı geèhkw'e eyıts'ǫ ɂorı dagıale.  
\v 10 Hòtł'ò hagedı: 
\q1 “Gonǫ̀htsı̨ eyı daèhchı̨cho k'e whedaa eyıts'ǫ eyı sahzǫ̀ą edaxàgogı̨ı̨la hǫt'e,” gedıì gezeh. 
\m  
\v 11 Yak'eet'ı̨į̀ hazǫǫ̀ eyı daèhchı̨cho, ǫhdah naènǫ-daats'ǫ̀-dı̨ eyıts'ǫ t'asìı dı̨ godìı sìı gomǫǫ̀ nàgeèhza. Daèhchı̨cho wenadąą̀ nàgògı̨ı̨hgè, gınì dèè xèedìı xè Nǫ̀htsı̨ ghàsǫgeedı,  
\v 12 hagedı, 
\q1 “Amen! Nǫ̀htsı̨ weghàsǫts'eedı xè welǫ whìle ts'ǫ̀ masì wets'ı̨ı̨hwhǫ. 
\q2 Nǫ̀htsı̨ t'aats'ǫǫ̀ enıìyah t'à gǫǫzǫ xè nàtso wehòhɂǫ welè. Amen!” hagedı. 
\p  
\v 13 Eyı tł'axǫǫ̀ ǫhdah ı̨łè daseehke, “Eyı dǫ ɂeh degoo nedèe yìı geèhkw'ee sìı amìı agı̨ı̨t'e? Eyıts'ǫ edı̨į̀ gots'ǫ aget'ı̨?” sèhdı. 
\p  
\v 14 Eyıt'à wets'ǫ̀ haehsı̨, “K'àowo, nı̨ wek'èı̨zǫ hǫt'e.” 
\p Sets'ǫ̀ hadı, “Eyı agı̨ı̨t'ee sìı hòtł'ò dagı̨ı̨ɂà hǫt'e. Sahzǫ̀ą wedoò t'à edeɂeè k'enagı̨ı̨htso t'à gıɂeè degoò agį̀į̀là hǫt'e.  
\v 15 Eyıt'à, 
\q1 Nǫ̀htsı̨ wedaèhchı̨cho nadąą̀ nàgeèhza hǫt'e. 
\q1 Dzęę̀, toò, Nǫ̀htsı̨kǫ̀-gocho goyìı gıgha eghàlaeda. 
\q1 Eyı daèhchı̨cho k'e whedaa sìı edets'ǫ nı̨hbàa gok'e ayele ha. 
\q1  
\v 16 Welǫ whìle ts'ǫ̀ degeèhdì ha-le eyıts'ǫ tı sı ghageewı ha-le. 
\q1 Sadeè nàtsoo gık'e ade ha-le, eyıts'ǫ sıì edı t'à dagı̨ı̨ɂa ha-le. 
\q1  
\v 17 Eyı sahzǫ̀ą daèhchı̨cho gà tanı nàwoo sìı sahzǫ̀ą-k'èdìı-dǫǫ̀ lanì gok'èdì ha. 
\q1 Tı nı̨ı̨lı̨ı̨ wet'à ts'eedaa sìı ts'ǫ̀ agole ha. 
\q1 Eyıts'ǫ Nǫ̀htsı̨ gonatì hazǫǫ̀ yedeedı ha,” ǫhdah hasèhdı. 
\c 8  
\s1 Sǫǫ̀mbaekwo kw'àyį̀ą 
\p  
\v 1 Sahzǫ̀ą eyı enı̨htł'èyeè wedaàdzeh łǫ̀hdı̨ t'à wheɂǫǫ sìı nàyı̨ı̨zhì ekò hazǫǫ̀ yak'e geèhkw'ee sìı tanı sadzeè ts'ǫ̀ gıxè t'asagodı-le agòjà. 
\p  
\v 2 Eyı tł'axǫǫ̀ yak'eet'ı̨į̀ łǫ̀hdı̨ Nǫ̀htsı̨ nadąą̀ nàgeèhza gìgaat'ı̨. Dechı̨shì łǫ̀hdı̨ gıghǫ̀zha. 
\p  
\v 3 Yak'eet'ı̨į̀ eyıì-le ı̨łè sǫǫ̀mbaekwo kw'àyį̀ą k'ehtı̨ xè sǫǫ̀mbaekwo ladà ts'ǫ̀ èhtła. Dzèh-łekǫǫ dèk'ǫ̀ǫ łǫ kw'àyį̀ą yìı adlà. Eyı sìı Nǫ̀htsı̨ wets'ǫ dǫ degaı ayìı gha yagehtıı sìı wexè sǫǫ̀mbaekwo ladà k'e Nǫ̀htsı̨ ts'ǫ̀ yek'eehk'ǫ̀. Eyı ladà daèhchı̨cho wenadąą̀ wheɂǫ hǫt'e.  
\v 4 Yak'eet'ı̨į̀ wılà gots'ǫ dzèh weloò, Nǫ̀htsı̨ wets'ǫ dǫ yagehtıı xè ı̨dòo Nǫ̀htsı̨ wenadąą̀ ts'ǫ̀ ajà.  
\v 5 Eyı tł'axǫǫ̀ yak'eet'ı̨į̀ eyı sǫǫ̀mbaekwo kw'à neyıìchı gà sǫǫ̀mbaekwo ladà k'e gots'ǫ kǫ̀ dèk'ǫ̀ǫ yeyìı ayı̨į̀là, eyıts'ǫ dıı nèk'e ts'ǫ̀ xàyeèhtł'ı. Eyı hayı̨į̀là ts'ıhɂǫ̀ eèzhıı, hòtł'ò agodı, kǫ̀ naìtł'ı̨ eyıts'ǫ dèè hòtł'ò nàèhdǫ. 
\s1 Dechı̨shì łǫ̀hdı̨ 
\p  
\v 6 Eyı tł'axǫǫ̀ yak'eet'ı̨į̀ łǫ̀hdı̨ dechı̨shì łǫ̀hdı̨ geehdı ha sınìgı̨ı̨de. 
\p  
\v 7 Yak'eet'ı̨į̀ t'akwełǫ̀ǫ̀ whedaa sìı edets'ǫ dechı̨shì yeèhdı ekò, kǫ̀, ı̨lı eyıts'ǫ edoò ełeta dèè k'e ts'ǫ̀ hodàètł'ı. Dèè tanı k'aɂį̀ı̨ ts'ǫ̀ wek'enık'ǫ, wexètłǫ ts'ı k'enık'ǫ eyıts'ǫ tł'oh hazǫǫ̀ wek'enık'ǫ. 
\p  
\v 8 Yak'eet'ı̨į̀ nàke t'à whedaa sìı edets'ǫ dechı̨shì yeèhdı ekò shìh nechàa dèk'ǫ̀ǫ xè tį̀ts'eèhk'a wègoèht'į̀. Tıcho tanı k'aɂį̀ı̨ ts'ǫ̀ edoò whelı̨.  
\v 9 Tı yìı t'asìı nàdèe sìı hazǫǫ̀ tanı k'aɂį̀ı̨ ts'ǫ̀ ełaàgı̨ı̨dè eyıts'ǫ wexètłǫ elàcho wedıhòłı̨. 
\p  
\v 10 Yak'eet'ı̨į̀ taı t'à whedaa sìı edets'ǫ dechı̨shì yeèhdı. Yat'a ts'ǫ whǫ̀ nechàa dechı̨-dèk'ǫ̀ǫ lanıı hodàdeèwò. Deh nechàa hazǫǫ̀ eyıts'ǫ dehtsoa hazǫǫ̀ tanı k'aɂį̀ı̨ ts'ǫ̀ k'e nàekw'o.  
\v 11 Eyı whǫ̀ “Nàèdıłı̨ı̨” wìyeh hǫt'e. Tı hazǫǫ̀ gǫ̀hłı̨ı̨ sìı tanı k'aɂį̀ı̨ ts'ǫ̀ tı nàèdıłı̨ı̨ whelı̨ t'à dǫ łǫ ełaı̨dè. 
\p  
\v 12 Yak'eet'ı̨į̀ dı̨ t'à whedaa sìı edets'ǫ dechı̨shì yeèhdı. Sadeè, adzęzah, eyıts'ǫ whǫ̀ hazǫǫ̀ tanı k'aɂį̀ı̨ ts'ǫ̀ gıxèɂeèhdı t'à tanı k'aɂį̀ı̨ ts'ǫ̀ gıxè togoòtł'ò agòjà. Dzę eyıts'ǫ to dı̨ sadzeè haı̨wa ts'ǫ̀ togoòtł'ò agòjà. 
\p  
\v 13 Eyı tł'axǫǫ̀ det'ǫcho yat'a k'et'a wègaat'ı̨. Hòtł'ò ezeh xè hadı, “Hoìla ha, hoìla ha, hoìla nechàa agode ha. Įłaà yak'eet'ı̨į̀ taı dechı̨shì geehdı ha t'à dıı nèk'e dǫ hazǫǫ̀ sıì gıxè hoìla agode ha!” hadıì ezeh. 
\c 9  
\p  
\v 1 Yak'eet'ı̨į̀ sı̨làı t'à whedaa sìı wets'ǫ dechı̨shì yeèhdı ekò yat'a ts'ǫ dıı nèk'e ts'ǫ̀ whǫ̀ hodàdeèwò wègaat'ı̨. Eyı whǫ̀ sìı ı̨zhıì dèè goyìı gǫǫ̀ɂàa yets'ǫdaà xàede ha ladlì weghǫ̀t'ǫ.  
\v 2 Eyı dèè goyìı gǫǫ̀ɂàa sìı yets'ǫdaà xàechì ekò weyìı gots'ǫ ło łǫ xàı̨t'ı lanì, kǫ̀ nàtsoo dèk'ǫ̀ǫ gots'ǫ lanì. Ło łǫ xàekw'e t'à sadeè eyıts'ǫ yat'a goèhzǫǫ̀ agòjà.  
\v 3 Ło yìı gots'ǫ ts'aelǫ̀ą łǫ xàı̨de, dıı nèk'e ts'ǫ̀ agejà. Eyı ts'aelǫ̀ą sìı nàèdıłı̨ı̨-k'àle lagı̨ı̨t'e ha gıghàhòt'ǫ. \fig Nàèdıłı̨ı̨-k'àle|src="HK002D.tif" size="span" ref="9.3" \fig* 
\v 4 Yatı gıghǫ̀t'ǫǫ hagìts'edı, “Dıı nèk'e tł'oh, ı̨t'ǫ̀ą xàɂaa eyıts'ǫ ts'ı wı̨ı̨zìı wedıhoahtsı̨ ha-le. Hanìkò amìı Nǫ̀htsı̨ nı̨htł'è gıts'abeè k'e nàekwı̨-le sìı eyı zǫ dagı̨ı̨ɂaà agıahłe ha,” gìts'edı.  
\v 5 Dǫ ełaàgehde ha gıghàhòt'ǫ-le, hanìkò sı̨làı sa ts'ǫ̀ dǫ dagı̨ı̨ɂaà agogele ha hǫt'e. Nàèdıłı̨ı̨-k'àle dǫkwǫ̀ xàhde nı̨dè sıì wek'è eya nàtso, eyı lanì ts'aelǫ̀ą hòtł'ò dǫ dagogį̀ı̨hɂa ha.  
\v 6 Ekìıyeè k'e dǫ ełaàts'ıde gı̨ı̨wǫ kò ełaàgede ha-le. 
\p  
\v 7 Eyı ts'aelǫ̀ą sìı tłı̨cho ełegegǫ gha nàgehtł'ı̨ lanì gìgaat'ı̨. Sǫǫ̀mbaekwo kwìt'ıì gıkwì k'e whela, eyıts'ǫ gınì dǫnì lanì gìgoèht'į̀.  
\v 8 Gıkwìghà, ts'èko kwìghà lanì eyıts'ǫ gıghòò goòjìı weghòò lanì.  
\v 9 Eyıts'ǫ satsǫ̀ gıdzǫ k'e whela. Gı̨ı̨ts'ǫǫ̀ nàeda nı̨dè tłı̨cho behchı̨į̀ xè tłı̨cho łǫ ełegegǫ ts'ǫ̀ geède lagodı.  
\v 10 Nàèdıłı̨ı̨-k'àle wetsè lanì gıtsè k'oòts'oo sìı t'à sı̨làı sa ts'ǫ̀ dǫ dagı̨ı̨hɂa ha.  
\v 11 Gıts'ǫ k'àowo sìı dèè yìı gǫǫ̀ɂàa gots'ǫ yak'eet'ı̨łı̨ı̨ hǫt'e. Eyı yak'eet'ı̨łı̨ı̨ sìı Israel got'ı̨į̀ gıyatıì k'ę̀ę̀ “Abadon” wìyeh eyıts'ǫ Greece got'ı̨į̀ gıyatıì k'ę̀ę̀ “Apollyon” wìyeh (eyı sìı “t'asìı yedıhohtsı̨” gedıì-agedı). 
\p  
\v 12 T'akwełǫ̀ǫ̀ hoìla wetehoòwo, hanìkò ı̨łaà hoìla nàke xèhoìwı ha. 
\p  
\v 13 Yak'eet'ı̨į̀ ek'ètaı t'à whedaa sìı edets'ǫ dechı̨shì yeèhdı ekò Nǫ̀htsı̨ wenadąą̀ sǫǫ̀mbaekwo ladà wheɂǫǫ sìı wedzıì dı̨ gots'ǫ gots'edeè hǫt'e.  
\v 14 Eyı yak'eet'ı̨į̀ ek'ètaı t'à whedaa wets'ǫ̀ dıı hats'edıì hǫt'e, “Yak'eet'ı̨į̀ dı̨ dehcho Euphrates gà dageetł'ı̨ı̨ sìı dagı̨ı̨ge,” wèts'edıì hǫt'e.  
\v 15 Eyı yak'eet'ı̨į̀ dı̨ sìı dıı sadzeè gha, dıı dzęę̀ gha, dıı sa gha eyıts'ǫ dıı xo gha, gık'èhodì hǫt'e. Dıı nèk'e dǫ hazǫǫ̀ tanı k'aɂį̀ı̨ ts'ǫ̀ ełaàgogìhde ha xàgeèdeè agǫ̀ǫ̀là.  
\v 16 Dıı hats'edıı eèhkw'o, “Hazǫǫ̀ t'à eghǫǫ-dǫǫ̀ tłı̨cho k'e dageèhkw'ee sìı nàke-lakw'eènǫ-lemìıyǫǫ̀ hageètłǫ,” hats'edıì hǫt'e. 
\p  
\v 17 Tłı̨cho eyıts'ǫ dǫ gık'e dageèhkw'ee sìı dıı hanì senazhıı gìgoèht'į̀: Satsǫ̀ gıdzǫ whelaa sìı kǫ̀ lanì dek'o, dèhtł'è-dezǫǫ xè dekwo-degoo lanì wègaat'ı̨. Tłı̨cho gıkwì sìı goòjìıkwì lanì eyıts'ǫ gıwà gots'ǫ kǫ̀ xè ło, eyıts'ǫ kwe dèk'ǫ̀ǫ xàewì.  
\v 18 Eyı kǫ̀, ło, eyıts'ǫ kwe dèk'ǫ̀ǫ tłı̨cho gıwà gots'ǫ xàewìı sìı t'à dıı nèk'e dǫ hazǫǫ̀ tanı k'aɂį̀ ełaàgı̨ı̨dè.  
\v 19 Tłı̨cho sìı edewà eyıts'ǫ edetsè t'à dǫ ełaàgehde; gıtsè gòocho lanì eyıts'ǫ edekwì t'à dǫ tsį̀gehde. 
\p  
\v 20 Dıı nèk'e dǫ ełaàgı̨ı̨dè-le sìı edılà t'à ayìı gèhtsı̨ı̨ sìı ghǫ edek'egı̨ı̨lı̨-le. Įnìłı̨ı̨ ts'ǫ̀ yagehtı ghǫ naget'è-le. Sǫǫ̀mbaekwo t'à t'asìı hòèlı̨ı̨, sǫǫ̀mba degoo, satsǫ̀ dekwoo, kwe, eyıts'ǫ dechı̨ t'à nǫ̀htsı̨ą hòèlı̨ı̨ sìı ts'ǫ̀ yagehtı. Edegha nǫ̀htsı̨ą gehtsı̨ı̨ sìı k'egeet'į̀-le, egeèhkw'ǫ-le xè k'egedè-le kò ı̨łaà gots'ǫ̀ yagehtı.  
\v 21 Ełaàłegìhde, ı̨k'ǫǫ̀ t'à ałegehɂı̨, edezhį̀į̀ t'à hołı̨ı̨ k'alagedè eyıts'ǫ egeeɂį̀, hanìkò edek'egı̨ı̨lı̨-le. 
\c 10  
\s1 Yak'eet'ı̨į̀ enı̨htł'èyeè nechà-lea dayeɂa 
\p  
\v 1 Eyı tł'axǫǫ̀ k'achı̨ yak'e gots'ǫ yak'eet'ı̨į̀ nàtsoo hodàèhtła weehɂı̨. K'oh wemoèhdo eyıts'ǫ k'àlemį̀į̀ wekwì godo nawhet'ıì wègaat'ı̨. Wınì sa lanì wek'e saı̨dı̨ eyıts'ǫ wedzaà kǫ̀ dèk'ǫ̀ǫ nàı̨ɂa lanì.  
\v 2 Eyı yak'eet'ı̨į̀ enı̨htł'èyeè nechà-lea dayeɂa; eyı enı̨htł'èyeè wek'eyats'ehtı ha welatł'aà wheɂǫ. Nàgots'ehnèe ts'ǫ edekè t'à tıcho k'e nàèht'è eyıts'ǫ gots'ı̨hts'ǫ ts'ǫ edekè t'à dèè k'e nàèht'è.  
\v 3 Goìjìıcho lanì hòtł'ò whezeh. Hòtł'ò whezeh ekò eezhıı łǫ̀hdı̨ ek'èt'à xàyagı̨ı̨htı.  
\v 4 Eezhıı łǫ̀hdı̨ goı̨de kò ayìı dàgedıı sìı dek'enèehtł'è ha dehwhǫ ı̨lè, hanìkò yak'e gots'ǫ sets'ǫ̀ hats'edıì hǫt'e, “Eyı eezhıı łǫ̀hdı̨ dàgedıı sìı dǫ wı̨ı̨zìı ts'ǫ̀ haı̨dı-le eyıts'ǫ dek'enìı̨tł'è-le,” hasèts'edıì hǫt'e. 
\p  
\v 5 Eyı tł'axǫǫ̀ yak'eet'ı̨į̀ tıcho eyıts'ǫ dèè k'e nàwo weehɂı̨ ı̨lèe sìı nàgòts'ehnèe ts'ǫ edılà ı̨dòo yak'e ts'ǫ̀ ayį̀į̀là.  
\v 6 Nǫ̀htsı̨ welǫ whìle ts'ǫ̀ edaa sìı yak'e eyıts'ǫ t'asìı hazǫǫ̀ yeyìı nàdèe whehtsı̨. Eyıts'ǫ dıı dèè eyıts'ǫ t'asìı hazǫǫ̀ yek'e nàdèe whehtsı̨. Eyıts'ǫ tıcho eyıts'ǫ t'asìı hazǫǫ̀ yeyìı nàdèe whehtsı̨ı̨ sìı ededı̨ yıızì dahxà dıı hadıì yatı nàtsoo whıhtsı̨: “Hòt'a Nǫ̀htsı̨ naèhɂı̨ ha nıìle!  
\v 7 Yak'eet'ı̨į̀ łǫ̀hdı̨ t'à whedaa sìı edets'ǫ dechı̨shì yeèhdı ha nıìkw'o nı̨dè Nǫ̀htsı̨ nàowoò dǫ gha deɂı̨į̀ wheɂǫǫ sìı hòt'a deghàà wek'ę̀ę̀ agode ha. Nakwenàoɂǫǫ Nǫ̀htsı̨ gha eghàlagı̨ı̨dà ı̨lèe sìı dànì dǫ ts'ǫ̀ gogı̨ı̨dee sìı wek'ę̀ę̀ agode ha,” yak'eet'ı̨į̀ hadı. 
\p  
\v 8 Yak'e gots'ǫ amìı sets'ǫ̀ gode ı̨lèe sìı k'achı̨ sets'ǫ̀ gode, hadı, “Eyı yak'eet'ı̨į̀ tıcho eyıts'ǫ dèè k'e nàwoo sìı wets'ǫ̀ ı̨ı̨tła gà eyı enı̨htł'èyeè dayeɂaa sìı nıį̀chı,” sets'ǫ̀ hats'edıì hǫt'e. 
\p  
\v 9 Eyıt'à yak'eet'ı̨į̀ wets'ǫ̀ èhtła gà, “Enı̨htł'èyeè nechà-lea seghàı̨chı,” wets'ǫ̀ haehsı̨. Sets'ǫ̀ hadı, “Nıį̀chı gà neɂà. Nebò yìı dı̨ı̨ts'aà ade ha, hanìkò newà yìı kw'ıahnǫ-dıì lanì negha łekǫǫ̀ ade ha,” sèhdı.  
\v 10 Eyıt'à yak'eet'ı̨į̀ wılà gots'ǫ enı̨htł'è neehchì gà ıɂà. Kw'ıahnǫ-dıì lanì łekǫ, hanìkò ıɂà tł'axǫǫ̀ sebò yìı dı̨ı̨ts'aà ajà.  
\v 11 Eyı tł'axǫǫ̀ sets'ǫ̀ hats'edıì, “Sedahxà, dàgode ha sìı weghǫ dǫ gıts'ǫ̀ goı̨de. Dǫ łǫ xàɂaa, yatı łǫ xàɂaa eyıts'ǫ dıı nèk'e hazǫǫ̀ eyıts'ǫ k'àowocho łǫ gıts'ǫ̀ goı̨de,” sèts'edıì hǫt'e. 
\c 11  
\s1 Nakwenàoɂǫǫ nàke 
\p  
\v 1 Dechı̨ wet'à ìdzàa seghǫ̀t'ǫ xè sets'ǫ̀ hats'edı, “Nǫ̀htsı̨kǫ̀-gocho ts'ǫ̀ ı̨ı̨tła gà dàı̨hcho ne sìı wexèɂį̀hdzà eyıts'ǫ eyı ladà wheɂǫǫ sı wexèɂį̀hdzà. Eyıts'ǫ ekǫ dǫ dàtłǫ yagehtıı sìı gı̨ı̨htà.  
\v 2 Hanìkò Nǫ̀htsı̨kǫ̀-gocho gomǫ̀ht'a kwekwı̨į̀ nechàa weyìı kwekwı̨į̀ nechà-lea nawheɂaa wege gòɂǫǫ sìı wexèɂį̀hdzà-le, eyı sìı dǫ eładı̨ı̨ gıgha ne t'à. Dı̨ènǫ-daats'ǫ̀-nàke sa gots'ǫ̀ kǫ̀godeè degaı sìı wedıhogehtsı̨ ha.  
\v 3 Sets'ǫ nakwenàoɂǫǫ nàke sìı t'asìı t'à nàgetsoò agehłe ha. Įłè-lemì-daats'ǫ̀-nàkeakw'eènǫ-daats'ǫ̀-ek'ètaènǫ (1,260) dzęę̀ gots'ǫ̀ dǫhshǫ̀ǫ goht'ǫǫ̀ yìı geèhkw'e xè nadąą̀ gogede ha,” sèts'edıì hǫt'e.  
\v 4 Eyı nakwenàoɂǫǫ nàke sìı ts'ı nàke jìecho “olıve” wek'e dehshee eyıts'ǫ ek'aèk'ǫchı̨į̀ nàke dıı nèk'e ts'ǫ̀ K'àowo nadąą̀ nawheɂa lanì nàgeèhza.  
\v 5 Dǫ gots'ǫ̀ hoìla eghàlageeda nı̨dè gıwà ts'ǫ kǫ̀woò xàewìı t'à gok'egeehk'ǫ̀. Amìı eyı nakwenàoɂǫǫ nàke ts'ǫ̀ hoìla eghàlaedaa sìı hanì ełaàwı ha hǫt'e.  
\v 6 Eyı nakwenàoɂǫǫ nàke sìı yat'a ts'ǫ̀ k'àhogewo ha gıghàhòt'ǫ hǫt'e. Nǫ̀htsı̨ yatıì t'à dǫ ts'ǫ̀ gogede gots'ǫ̀ chǫh agot'ı̨-le agehɂį̀, tı edoò ìhłè agehɂı̨ eyıts'ǫ dıı nèk'e hoìla hazǫǫ̀ xàɂaa agele ha gıghàhòt'ǫ. T'aàtłǫ ts'ǫ̀ hanì eghàlageeda ha gı̨ı̨wǫǫ sìı hagehɂı̨. 
\p  
\v 7 Hòt'a dǫ ts'ǫ̀ gogede ghǫnagı̨ı̨t'e nı̨dè tıts'aàdìı nechàa dèè goyìı gots'ǫ xàetła ha eyıts'ǫ gok'aàwo xè goghǫehnè ha, eyıts'ǫ ełaàgòhde ha.  
\v 8 Kǫ̀godeè wenı tı̨lı k'e gıweè whela ha. Eyı kǫ̀godeè wıızì sìı Sodom-lanì eyıts'ǫ Egypt-lanì wìyeh hǫt'e, ekǫ gıts'ǫ̀ K'àowo dechı̨et'aa k'e wedıìtsò ı̨lè.  
\v 9 Taı dzęę̀ daats'ǫ̀ tanı haı̨wa gots'ǫ̀ dıı nèk'e ts'ǫ dǫ hazǫǫ̀ xàɂaa eyıts'ǫ yatı hazǫǫ̀ xàɂaa gots'ǫ dǫ eyı nakwenàoɂǫǫ nàke gıweè whelaa ghàgeeda ha, hanìkò gokw'ǫǫ̀ nègııle ha gı̨ı̨wǫ-le.  
\v 10 Eyı dǫ nàke ełaàgı̨ı̨dèe t'à dıı nèk'e dǫ hazǫǫ̀ gınà ha. Eyı gha dzędeè hogehtsı̨ xè t'asìı ełeghàgele ha, eyı nakwenàoɂǫǫ nàke sìı dıı nèk'e dǫ dagogį̀ı̨hɂa ı̨lèe t'à. 
\p  
\v 11 Hanìkò taı dzęę̀ daats'ǫ̀ tanı tł'axǫǫ̀ Nǫ̀htsı̨ gok'e ehsò t'à nagìdà agǫ̀ǫ̀là. Nàgeèhzaà agejà t'à amìı gogıaɂı̨ı̨ sìı sıì geèhyeh.  
\v 12 Eyı tł'axǫǫ̀ eyı nakwenàoɂǫǫ nàke yak'e gots'ǫ gıts'ǫ̀ hòtł'ò dıı hats'edıı gıìkw'o, “Jǫ ı̨dòo ts'ǫ̀ aahde,” gıts'ǫ̀ hats'edıì hǫt'e. Eyıt'à k'oh yìı ı̨dòo yak'e ts'ǫ̀ agejà; dǫ gots'ǫ̀ xànegı̨ı̨ɂaa sìı goghàgeeda. 
\p  
\v 13 Eyı sadzeè et'ıì dèè hòtł'ò nàèhdǫ t'à kǫ̀godeè gots'ǫ kǫ̀ łǫ hodàètł'ı; kǫ̀ gòlaa hoònǫ ts'ǫ ı̨łè hodàètł'ı. Dèè hòtł'ò nàèhdǫ t'à dǫ łǫ̀hdı̨-lemì ełaı̨dè. Dǫ ełaı̨dè-le sìı sıì geèhyeh t'à Nǫ̀htsı̨ yak'e whedaa ghàsǫgeedı. 
\p  
\v 14 Hoìla nàke wetehoòwo, wek'è hoìla taı agode ha sìı wets'ǫ̀ hawe. 
\s1 Yak'eet'ı̨į̀ łǫ̀hdı̨ t'à wheda 
\p  
\v 15 Yak'eet'ı̨į̀ łǫ̀hdı̨ t'à whedaa sìı edets'ǫ dechı̨shì yeèhdı ekò yak'e gots'ǫ hòtł'ò dıı hats'edıì hǫt'e, 
\mi “Gots'ǫ̀ K'àowo eyıts'ǫ wets'ǫ Chrıst xè dıı nèk'e gogha k'àowo gı̨ı̨lı̨į̀ agejà eyıts'ǫ ededı̨ sìı welǫ whìle ts'ǫ̀ K'àowo elı̨ ha,” hats'edıì hǫt'e. 
\m  
\v 16 Eyı tł'axǫǫ̀ ǫhdah naènǫ-daats'ǫ̀-dı̨ Nǫ̀htsı̨ nadąą̀ daèhchı̨cho k'e geèhkw'ee sìı Nǫ̀htsı̨ nadąą̀ nàgògı̨ı̨hgè gà gıghàsǫedı,  
\v 17 hagedı, 
\mi “Gots'ǫ̀ K'àowo eyıts'ǫ Gonǫ̀htsı̨, nı̨ sìı t'asìı negha dìì-le. Nı̨ sìı nexè hòɂǫ ı̨lè eyıts'ǫ dıì nexè hòɂǫ hǫt'e. T'asìı negha dìì-le t'à dıı nèk'e k'àhoı̨wo ha xèhoneehwho, eyıt'à masì nets'ı̨ı̨hwhǫ.  
\v 18 Dǫ hazǫǫ̀ xàɂaa gìch'è, eyıt'à dıì nàgı̨ı̨hkwa ha. Dǫ ełaı̨dèe sìı dıì gısınìyaetı ha nèhòı̨wo. Nakwenàoɂǫǫ negha eghàlagı̨ı̨dàa, nets'ǫ dǫ gı̨ı̨lı̨ı̨, eyıts'ǫ nets'ǫ̀ nezı̨į̀ kànegı̨ı̨ɂaa sìı nezı̨į̀ gıts'ǫ̀ eghàlaı̨da ha. Eyıts'ǫ dǫ wet'àaɂàa, dǫ wet'àaɂà-le, nek'èagı̨ı̨t'ee sìı nezı̨į̀ gıts'ǫ̀ eghàlaı̨da ha. Hanìkò amìı dıı dèè yedıhohtsı̨ı̨ sìı godıhohtsı̨ ha hǫt'e,” hagedı. 
\p  
\v 19 Eyı tł'axǫǫ̀ yak'e ts'ǫ Nǫ̀htsı̨kǫ̀-gocho enìxàetǫ. Nǫ̀htsı̨kǫ̀-gocho goyìı nakenahòdlı̨ı̨ gha sǫǫ̀mbaekwo-ladzè wègoèht'į̀. Hǫtsaa eezhı xè kǫ̀ naìtł'ı̨, dèè hòtł'ò nàèhdǫ xè ı̨hlı łǫ hodàètł'ı. 
\c 12  
\s1 Ts'èko eyıts'ǫ tıts'aàdìıcho dek'oo 
\p  
\v 1 T'asìı enıìyah yak'e wègoèht'į̀: ts'èko ɂeh yìı wheda lanì sadeè t'à nàhtł'ı̨. Adzęzah weketł'a wheɂǫ eyıts'ǫ sǫǫ̀mbaekwo kwìt'ıì whǫ̀ hoònǫ-daats'ǫ̀-nàke wek'e whela wekwì k'e wheɂǫ.  
\v 2 Hotıì eda-le; webebìa gòhłè ha nìkw'o t'à wegha eya nàtso t'à yaèzeh.  
\v 3 Eyı tł'axǫǫ̀ k'achı̨ t'asìı enıìyah yak'e wègoèht'į̀: tıts'aàdìıcho dek'oo wekwì łǫ̀hdı̨ wek'e whela eyıts'ǫ sǫǫ̀mbaekwo kwìt'ıì łǫ̀hdı̨ wekwì k'e whela wègoèht'į̀.  
\v 4 Edetsè t'à whǫ̀ tanı k'aɂį̀ yat'a whelaa sìı dıı nèk'e ts'ǫ̀ hodàyeèhde. Eyı tıts'aàdìıcho dek'oo sìı ts'èko webebìa gòhłè ha nıìkw'oo yenadąą̀ nàwo, eyı bebìa wegǫ̀hłı̨ ts'ǫ̀et'ıì yeɂà ha nıwǫ t'à.  
\v 5 Eyı ts'èko dǫzhìa nìı̨htı̨. Eyı dǫzhìa sìı satsǫ̀-geh t'à dǫ hazǫǫ̀ xàɂaa ts'ǫ̀ k'ahowo ha. Ekòet'ıì eyı dǫzhìa sìı ı̨dòo Nǫ̀htsı̨ ts'ǫ̀ eyıts'ǫ wedaèhchı̨cho ts'ǫ̀ nıwıìtı̨.  
\v 6 Eyı ts'èko ekìı-ka nèk'e ts'ǫ̀ kwı̨èhsa. Edı̨į̀ Nǫ̀htsı̨ yedasınìhòı̨ɂǫǫ sìı ekǫ ts'ǫ̀ ajà, ekǫ ı̨łè-lemì-daats'ǫ̀-nàkeakw'eènǫ-daats'ǫ̀-ek'ètaènǫ (1,260) dzęę̀ gots'ǫ̀ wek'èhodì ha. 
\p  
\v 7 Yak'e ełegegǫ xèhǫǫ̀wo. Mıchael edets'ǫ yak'eet'ı̨į̀ xè eyı tıts'aàdìıcho dek'oo ts'ǫ̀ ełegegǫ eyıts'ǫ eyı tıts'aàdìıcho dek'oo wets'ǫ yak'eet'ı̨łı̨ı̨ xè gots'ǫ̀ ek'èt'à ełegegǫ.  
\v 8 Hanìkò eyı tıts'aàdìıcho dek'oo sìı hoehnè ha nàtso-le t'à yak'e gots'ǫ xàgogeèhde.  
\v 9 Eyı tıts'aàdìıcho dek'oo sìı ı̨nę̀ę whaà gots'ǫ gòocho hǫt'e. Eyı sìı wehłı̨ı̨ hanì-le-ı̨dè “Satan” wìyeh hǫt'e. Ededı̨ sìı dıı nèk'e dǫ hazǫǫ̀ ekǫ-le ts'ǫ̀ goèhɂa. Wets'ǫ yak'eet'ı̨łı̨ı̨ xè dıı nèk'e ts'ǫ̀ gogeèhde. 
\p  
\v 10 Eyı tł'axǫǫ̀ yak'e gots'ǫ hòtł'ò dıı hats'edıì hǫt'e: 
\mi “Hòt'a Nǫ̀htsı̨ edaxàgoı̨la. Ededı̨ sìı K'àowocho elı̨ eyıts'ǫ edets'ǫ Chrıst xè K'àowo nàtsoo elı̨ ha. Amìı Nǫ̀htsı̨ wenadąą̀ t'aats'ǫǫ̀ gòet'ı̨ k'e nìdahoeɂà elı̨ı̨ sìı hòt'a hodàweèdo hǫt'e.  
\v 11 Gòet'ı̨ Sahzǫ̀ą wedoò t'à eyıts'ǫ edeyatıì sı t'à gıghǫèhnǫ hǫt'e. Eyı gha ełaàgııde kò gıgha t'asanìle hǫt'e.  
\v 12 Eyıt'à naxı̨ hazǫǫ̀ yak'e nàahdèe sìı sıì naxınà welè! Hanìkò wehłı̨ı̨ dıı nèk'e ts'ǫ̀ ajà ne t'à, dèè eyıts'ǫ tıcho xè hoìla hòɂǫ ha! Whaà-lea gots'ǫ̀ zǫ wegha hòɂǫ t'à sıì ìch'è hǫt'e,” ts'edıì hǫt'e. 
\p  
\v 13 Eyı tıts'aàdìıcho dek'oo dıı nèk'e ts'ǫ̀ hodàweèhdo yek'èhoèhzà t'à ts'èko dǫzhìa nìı̨htı̨ı̨ sìı yedeèzhì.  
\v 14 Eyı ts'èko sìı det'ǫcho nechàa wı̨ts'ǫǫ̀ nàke weghǫ̀zha, yet'à ekìı-ka nèk'e wedasıìgòdlàa sìı ts'ǫ̀ naat'a ha. Ekǫ taı xo daats'ǫ̀ tanı haı̨wa ts'ǫ̀ wek'èhodì ha eyıts'ǫ ekǫ gòocho dayeechı ha-le.  
\v 15 Eyı tł'axǫǫ̀ gòocho edewà gots'ǫ tı xàehse. Eyı tı sìı deh whelı̨. Gòocho eyı ts'èko deh nàtsoo t'à weehłı̨į̀ ayele ha nıwǫ ı̨lè.  
\v 16 Hanìkò dèè whàgoets'è gà eyı tıts'aàdìıcho dek'oo wewà gots'ǫ tı xàetł'ıı sìı nałayeèhdò t'à ts'èko ts'àı̨dì.  
\v 17 Tıts'aàdìıcho dek'oo eyı ts'èko ghǫ sıì ìch'è t'à weza hazǫǫ̀ ts'ǫ̀ ajà; weza hazǫǫ̀ Nǫ̀htsı̨ nàowoò k'èagı̨ı̨t'e eyıts'ǫ Zezì wegodıì k'ègedì. Eyı tıts'aàdìıcho dek'oo eyıts'ǫ ts'èko weza ełexè ełegıagǫ. 
\c 13  
\p  
\v 1 Tıts'aàdìıcho dek'oo tabàa nàwo wègaat'ı̨. 
\s1 Tıts'aàdìı nechàa tıcho yìı gots'ǫ xàèhtła 
\p Eyıts'ǫ tıts'aàdìı nechàa eyıì-le tıcho yìı gots'ǫ xàèhtła wègaat'ı̨. Wekwì łǫ̀hdı̨ eyıts'ǫ wedè hoònǫ gǫ̀hłı̨. Sǫǫ̀mbaekwo kwìt'ıì hoònǫ wedè k'e whela eyıts'ǫ wekwì łǫ̀hdı̨ k'e gıızì dek'eèhtł'è. Eyı gıızì łǫ̀hdı̨ sìı Nǫ̀htsı̨ k'èch'a yatı dek'eèhtł'è hǫt'e.  
\v 2 Eyı tıts'aàdìı nechàa tıcho yìı ts'ǫ xàèhtłaa sìı nǫ̀da “leopard” lanì wègaat'ı̨, eyıts'ǫ wekè sahkè lanì eyıts'ǫ wewà goìjìıcho wewà lanì wègaat'ı̨. Eyı tıts'aàdìıcho dek'oo sìı tıts'aàdìı nechàa nàtsoò ayį̀į̀là xè edetł'axǫǫ̀ k'àowocho elı̨į̀ ayį̀į̀là.  
\v 3 Tıts'aàdìı nechàa wekwì łǫ̀hdı̨ ts'ǫ ı̨łè k'e wekaà nechàa wheɂǫ. Eyı wekaà yet'à ełaàwı ha ı̨lè, hanìkò k'aàt'ıì anajà. Dıı nèk'e ts'ǫ dǫ hazǫǫ̀ eyı tıts'aàdìı nechàa weghǫ sıì gıgha enıìyah t'à gık'èède.  
\v 4 Tıts'aàdìı nechàa edetł'axǫǫ̀ eghàlaedaà ayį̀į̀là t'à dǫ hazǫǫ̀ tıts'aàdìıcho dek'oo ts'ǫ̀ yagehtı. Eyıts'ǫ dǫ hazǫǫ̀ tıts'aàdìı nechàa sı ts'ǫ̀ yagehtı, hagedı, “Amìı dıı tıts'aàdìı nechàa xèht'e? Dǫ wı̨ı̨zìı yedaèt'è gǫ̀hłı̨-le!” gedı. 
\p  
\v 5 Eyı tıts'aàdìı nechàa sìı xàdahodì xè Nǫ̀htsı̨ k'èch'a gode ha weghàhòt'ǫ. Eyıts'ǫ dı̨ènǫ-daats'ǫ̀-nàke sa gots'ǫ̀ k'àowo elı̨ ha weghàhòt'ǫ.  
\v 6 Nǫ̀htsı̨ ededı̨, Nǫ̀htsı̨ nàdèe k'è, eyıts'ǫ hazǫǫ̀ yak'e nàgedèe sìı k'èch'a xàyaı̨htı.  
\v 7 Tıts'aàdìı nechàa sìı Nǫ̀htsı̨ wets'ǫ dǫ ts'ǫ̀ eghǫ xè goghǫehnè ha weghàhòt'ǫ hǫt'e. Dǫ hazǫǫ̀ xàɂaa, yatı hazǫǫ̀ xàɂaa eyıts'ǫ hazǫǫ̀ nèk'e ts'ǫ̀ k'àowo elı̨ ha weghàhòt'ǫ hǫt'e.  
\v 8 Dıı nèk'e dǫ hazǫǫ̀ tıts'aàdìı nechàa ts'ǫ̀ yagehtı ha. Sahzǫ̀ą ełaàwìgwo wenı̨htł'è k'e gıızì dek'eèhtł'è-le agı̨ı̨t'e. Dıı dèè hòèlı̨ gots'ǫ amìı welǫ whìle ts'ǫ̀ geeda ha sìı eyı enı̨htł'è yìı gıızì dek'eèhtł'è. 
\p  
\v 9 Amìı wedzıì gǫ̀hłı̨ı̨ sìı eèhkw'ǫ welì.  
\v 10 Amìı wedaànìı̨tǫ wegha hòɂǫǫ sìı wedaànìı̨tǫ ha hǫt'e. Amìı behcho t'à ełaàwı wegha hòɂǫǫ sìı behcho t'à ełaàwı ha hǫt'e. Eyıt'à Nǫ̀htsı̨ wets'ǫ dǫ ts'èwhı̨į̀ dagı̨ı̨ɂa xè edınì nàtsoò agı̨ı̨hwhǫ ha hǫt'e. 
\s1 Tıts'aàdìı nechàa dèè goyìı gots'ǫ xàèhtła 
\p  
\v 11 Eyı tł'axǫǫ̀ k'achı̨ tıts'aàdìı nechàa eyıì-le dèè goyìı gots'ǫ xàèhtła wègaat'ı̨. Wedè nàke sìı sahzǫ̀ą-edè lanıı wek'e whela, hanìkò tıts'aàdìıcho dek'oo lanì gode.  
\v 12 Tıts'aàdìı nechàa wekwì łǫ̀hdı̨ sìı wedahxà k'àowo elı̨. Dıı nèk'e dǫ hazǫǫ̀ tıts'aàdìı wekwì łǫ̀hdı̨, ı̨łè wekaà nechàa naıjìı sìı ts'ǫ̀ yagehtıì agǫ̀ǫ̀là.  
\v 13 Eyı tıts'aàdìı k'àowo whelı̨ı̨ sìı enıìyah deè hòèhtsı̨. Dǫ hazǫǫ̀ godaà yat'a gots'ǫ kǫ̀ dèk'ǫ̀ǫ dıı nèk'e ts'ǫ̀ ayį̀į̀là.  
\v 14 Tıts'aàdìı wekwì łǫ̀hdı̨ wedahxà hanì enıìyah deè hòèhtsı̨ t'à dıı nèk'e dǫ goghǫyaàɂǫ. Weyatıì k'e tıts'aàdìı nechàa behcho t'à gego hanìkò xàı̨dàa sìı kwe t'à wek'ę̀ę̀ wègaat'ı̨ı̨ nàı̨hɂaà agı̨į̀là. Eyıt'à tıts'aàdìı wekwì łǫ̀hdı̨ ghàsǫgeedıì agǫ̀ǫ̀là.  
\v 15 Eyı tıts'aàdìı nechàa dıı nèk'e gots'ǫ xàèhtłaa sìı eyı kwe t'à wek'ę̀ę̀ wègaat'ı̨ hòèlı̨ı̨ sìı yek'e ehsò t'à godeè ayele ha weghàhòt'ǫ. Eyıts'ǫ amìı yets'ǫ̀ yahtı-le sìı hazǫǫ̀ ełaàgòhde ha weghàhòt'ǫ.  
\v 16 Dǫ hazǫǫ̀ nàgòts'ehnèe gılà k'e hanì-le-ı̨dè gıts'abeè k'e t'asìı dek'eèhtł'è ha agǫ̀ǫ̀là. Dǫ wet'àaɂàa, dǫ wet'àaɂà-le, dǫ ahxee, dǫ-teèt'ı̨ı̨, dǫ edets'ǫ̀ k'agedèe eyıts'ǫ dǫ edets'ǫ̀ k'agedè-le, hazǫǫ̀ t'asìı gık'e dek'eèhtł'è ha agǫ̀ǫ̀là.  
\v 17 Eyı tıcho yìı gots'ǫ tıts'aàdìı nechàa wekwì łǫ̀hdı̨ wıızì hanì-le-ı̨dè wets'ǫ ıtàa gık'e dek'eèhtł'è lenǫsıı dǫ wı̨ı̨zìı t'asìı nàehdì ha dìì, eyıts'ǫ t'asìı gıghǫ nàedì ha dìì. 
\p  
\v 18 Dıı yatı dàdıì-adıı sìı dǫ gǫǫzǫǫ sìı yenıedì welì. Dǫ gǫǫzǫ nı̨dè eyı tıts'aàdìı nechàa wets'ǫ ıtàa sìı yııhtà ha welì, dǫ wets'ǫ ıtàa ne t'à. Eyı dǫ wets'ǫ wet'à ıtàa sìı ek'ètaekw'eènǫ-daats'ǫ̀-ek'ètaènǫ-daats'ǫ̀-ek'ètaı (666) hǫt'e. 
\c 14  
\s1 Sahzǫ̀ą eyıts'ǫ dǫdeè gìgaat'ı̨ 
\p  
\v 1 K'eeht'į̀ ekò senadąą̀ shìh nechàa Zıon wìyeh k'e sahzǫ̀ą nàwo wègaat'ı̨. Wexè dǫ ı̨łèakw'eènǫ-daats'ǫ̀-dı̨ènǫ-daats'ǫ̀-dı̨-lemì (144,000) nàgeèhza, gıts'abeè k'e sahzǫ̀ą wıızì eyıts'ǫ Wetà wıızì dek'eèhtł'è.  
\v 2 Eyı tł'axǫǫ̀ yak'e gots'ǫ tı nàı̨lı̨ı̨ lagodı, eyıts'ǫ eezhıı lagodı. Dǫ tł'ık'eetı̨ı̨ t'à sǫnàgedè lagodı eèhkw'o.  
\v 3 Daèhchı̨cho wenadąą̀, eyıts'ǫ t'asìı godìı dı̨, ǫhdah naènǫ-daats'ǫ̀-dı̨ gınadąą̀ dǫ łǫ shı̨ wegòò t'à gejı̨. Dǫ wı̨ı̨zìı eyı shı̨ ghàdegeetǫ ha dìì, dǫ ı̨łèakw'eènǫ-daats'ǫ̀-dı̨ènǫ-daats'ǫ̀-dı̨-lemì (144,000) dıı nèè gots'ǫ edaxàgeèlaa sìı ededı̨ zǫ eyı shı̨ k'ègeezǫ.  
\v 4 Eyı dǫ haàtłǫǫ sìı ts'èko xè hołı̨ı̨ k'ę̀ę̀ eghàlagı̨ı̨dà whìle, degaı k'ę̀ę̀ edek'ègıadì t'à. Sahzǫ̀ą edı̨į̀ k'etłoo sìı gık'èè k'edè. Dǫ gıta gots'ǫ nàgeèdìı agı̨ı̨t'e, eyıts'ǫ jìecho t'akwełǫ̀ǫ̀ dıìdìı Nǫ̀htsı̨ eyıts'ǫ Sahzǫ̀ą ghàgogį̀ı̨laa lagı̨ı̨t'e.  
\v 5 Hogets'ì gogı̨ı̨dee whìle eyıts'ǫ hołı̨ı̨ wı̨ı̨zìı gıts'ǫ̀-èlı̨-le. 
\s1 Yak'eet'ı̨į̀ taı gìgoèht'į̀ 
\p  
\v 6 Eyı tł'axǫǫ̀ yak'eet'ı̨į̀ k'achı̨ ı̨łè ı̨dòo k'et'a weehɂı̨. Godı nezı̨ı̨ welǫ whìle ts'ǫ̀ wheɂǫǫ dıı nèk'e dǫ hazǫǫ̀ gık'èezǫ ha k'eyeɂa; dǫ hazǫǫ̀ xàɂaa, yatı hazǫǫ̀ xàɂaa eyıts'ǫ dıı nèk'e hazǫǫ̀ gha adlà hǫt'e.  
\v 7 Yak'eet'ı̨į̀ hòtł'ò hadı, “Hòt'a dǫ sınìyaetıı dzęę̀ ts'ǫ̀ whaà-le t'à Nǫ̀htsı̨ wek'èaht'e eyıts'ǫ weghàsǫahdı. Ededı̨ sìı yak'e, dıı dèe, tıcho eyıts'ǫ tı xàı̨lı̨ı̨ hazǫǫ̀ yèhtsı̨ hǫt'e, eyıt'à wegha zǫ aahda,” hadı. 
\p  
\v 8 Eyı tł'axǫǫ̀ k'achı̨ yak'eet'ı̨į̀ ı̨łè wègoèht'į̀, hadı, “Kǫ̀godeè nàgoı̨tł'ı! Kǫ̀godeè Babylon hazǫǫ̀ nàgoı̨tł'ı, eyı kǫ̀godeè sìı dıı nèk'e dǫ hazǫǫ̀ edehołı̨į̀ k'ę̀ę̀ eghàlagı̨ı̨dà agǫ̀ǫ̀là,” hadı. 
\p  
\v 9 Eyı tł'axǫǫ̀ k'achı̨ yak'eet'ı̨į̀ ı̨łè wègoèht'į̀, hòtł'ò dıı hadı: “Amìı eyı tıts'aàdìı nechàa eyıts'ǫ kwe t'à wek'ę̀ę̀ wègaat'ı̨ı̨ ts'ǫ̀ yahtı eyıts'ǫ amìı wets'abeè k'e hanì-le-ı̨dè wılà k'e wıızì aatł'èe sìı  
\v 10 Nǫ̀htsı̨ hòtł'ò nàyeehkwa ha. Nǫ̀htsı̨ sıì wets'ǫ̀ wek'èch'a t'à hòtł'ò daı̨ɂa yeghàhòɂà ha. Sahzǫ̀ą eyıts'ǫ yak'eet'ı̨į̀ gınadąą̀ kwe dèk'ǫ̀ǫ t'à daı̨ɂaà awedle ha hǫt'e.  
\v 11 Hanıı dǫ gık'eek'ǫ̀ gots'ǫ ło welǫ whìle ts'ǫ̀ ı̨dòo deekw'e ha. Amìı eyı tıts'aàdìı nechàa ts'ǫ̀ eyıts'ǫ kwe wek'ę̀ę̀ wègaat'ı̨ı̨ ts'ǫ̀ yagehtıı eyıts'ǫ wıızì gık'e aatł'èe sìı ts'èwhı̨į̀ hòɂǫ hǫı̨lı̨ ha-le.”  
\v 12 Hanì hòɂǫ ha t'à Nǫ̀htsı̨ wets'ǫ dǫ degaı sìı ts'èwhı̨į̀ nageèhɂı̨ ha hǫt'e. Nǫ̀htsı̨ wenàowoò k'èagııt'è eyıts'ǫ Zezì ts'ǫ̀ edınì nàtsoò agııle. 
\p  
\v 13 Eyı tł'axǫǫ̀ yak'e gots'ǫ dıı hats'edıì hǫt'e: “Dıı dek'enìı̨tł'è: Jǫ gots'ǫ ı̨daà amìı gots'ǫ̀ K'àowo gıgha ehkw'ı adıı xè ełaàgedee sìı gıxè sìghà hǫt'e,” hats'edıì hǫt'e. 
\p Yedàyeh Nezı̨ı̨ hadı, “Hęɂę, hòtł'ò eghàlagı̨ı̨dà k'èxa k'èhogeèɂa ha eyıts'ǫ ayìı dàgı̨ı̨laa sìı t'aats'ǫǫ̀ gıxè whela ha,” hadı. 
\s1 Dèè k'e t'asìı dıìdìı nàgehtsį̀ 
\p  
\v 14 Eyı tł'axǫǫ̀ senadąą̀ k'oh degoo wègoèht'į̀, “dǫ wet'àaɂàa deè” lanıı k'oh k'e wheda. Sǫǫ̀mbaekwo kwìt'ıì wekwì k'e wheɂǫ, eyıts'ǫ behcho whezòo dènıı k'eɂa.  
\v 15 Ekòet'ıì Nǫ̀htsı̨kǫ̀-gocho ts'ǫ yak'eet'ı̨į̀ eyıì-le xàèhtła. Yak'eet'ı̨į̀ eyı k'oh k'e whedaa sìı ts'ǫ̀ hòtł'ò hadı, “T'asìı dıìdìı hazǫǫ̀ nàgehtsį̀ ha nèhòı̨wo t'à, nebehchoò t'à xàneht'à,” yèhdı.  
\v 16 Eyıt'à eyı k'oh k'e whedaa sìı edebehchoò dèè gote ayį̀į̀là t'à dèè k'e t'asìı dıìdìı hazǫǫ̀ nàgèhtsı̨. 
\p  
\v 17 Eyı tł'axǫǫ̀ k'achı̨ yak'eet'ı̨į̀ eyıì-le yak'e Nǫ̀htsı̨kǫ̀-gocho gots'ǫ xàèhtła. Ededı̨ sı behcho whezòo dènıı k'eɂa.  
\v 18 Sǫǫ̀mbaekwo ladà wek'e Nǫ̀htsı̨ ts'ǫ̀ t'asìı k'eek'ǫ̀ǫ sìı gots'ǫ yak'eet'ı̨į̀ eyıì-le xàèhtła. Eyı yak'eet'ı̨į̀ ladà k'e kǫ̀ dèk'ǫ̀ǫ ts'ǫ̀ k'àowo hǫt'e. Yak'eet'ı̨į̀ behcho dènıı k'eɂaa sìı ts'ǫ̀ hòtł'ò dıı hadı, “Nets'ǫ behcho dènıı t'à, dıı nèk'e ts'ı wek'e jìecho dawhelaa sìı xàąht'à gà nàąhtsį̀, hòt'a dıìdì ne t'à,” yèhdı.  
\v 19 Eyı yak'eet'ı̨į̀ sìı edebehchoò dèè gote ayį̀į̀là gà jìecho dıìdìı hazǫǫ̀ nàwhehtsı̨. Tàtsǫgeèhɂe ha tǫhcho yìı yìı̨hde, Nǫ̀htsı̨ sìı jìecho gots'ǫ̀ wınì-le t'à.  
\v 20 Kǫ̀godeè gomǫ̀ht'a tǫhcho yìı jìecho tàtsǫgeèhɂe. Eyı tǫhcho yìı gots'ǫ jìechotì edoò lanì xàı̨lı̨. Sı̨làı gokè haàtagǫǫhwha ts'ǫ̀ ajà eyıts'ǫ, nàkeakw'eènǫ-chı̨ haı̨wa ts'ǫ̀ edoò nı̨ı̨lı̨. 
\c 15  
\s1 Hoìla łǫ̀hdı̨ agode ha 
\p  
\v 1 K'achı̨ yak'e enıìyah deè nàhòwo wègoèht'į̀: yak'eet'ı̨į̀ łǫ̀hdı̨ hoìla łǫ̀hdı̨ wet'à nǫǫde dǫ dagı̨ı̨ɂaà agedle ha sìı dagıale. Eyı wet'à Nǫ̀htsı̨ dǫ nàgoehkwa ghǫ nǫǫt'e ha t'à nǫǫde hǫt'e.  
\v 2 Tıdeè lanıı, eja wek'e saı̨de xè weta kǫ̀ dèk'ǫ̀ǫ lanıı wègoèht'į̀. Amìı eyı tıts'aàdìı nechàa “ek'ètaekw'eènǫ-daats'ǫ̀-ek'ètaènǫ-daats'ǫ̀-ek'ètaı” (666) wìyeh eyıts'ǫ kwe wek'ę̀ę̀ wègaat'ı̨ı̨ ghǫgeèhnǫǫ sìı eyı tıdeè lanıı gà nàgeèhza, Nǫ̀htsı̨ tł'ık'eetı̨ı̨ goghàyı̨ı̨laa sìı dagıale.  
\v 3 Nǫ̀htsı̨ wecheekeè Moses eyıts'ǫ Sahzǫ̀ą gıts'ǫ shı̨ t'à gejı̨, hagedı, 
\q1 “Gots'ǫ̀ K'àowo t'asìı negha dìì-le anet'e, 
\q2 t'asìı hazǫǫ̀ ghàlaneedàa sìı gogha enıìyah nechàa hǫt'e. 
\q1 Kèhǫǫ̀wo gots'ǫ, welǫ whìle ts'ǫ̀ t'aats'ǫǫ̀ K'àowocho anet'e, 
\q2 eyıts'ǫ nenàowoò sìı ehkw'ı zǫ hǫt'e. 
\q1  
\v 4 Gots'ǫ̀ K'àowo, dǫ hazǫǫ̀ nek'èagı̨ı̨t'e ha hǫt'e eyıts'ǫ neghàsǫgeedı ha. 
\q2 Nı̨ zǫ degaı anet'e. 
\q1 Ehkw'ı eghàlaı̨dàa sìı wek'èhoedzǫǫ̀ adlà ne t'à, 
\q2 dǫ hazǫǫ̀ xàɂaa nets'ǫ̀ aget'ı̨ xè neghàsǫgeedı ha hǫt'e,” hagedıì gejı̨. 
\p  
\v 5 K'achı̨ yak'e ts'ǫ̀ k'eeht'į̀ ekò Nǫ̀htsı̨kǫ̀-gocho enìxànı̨ı̨tǫ wègoèht'į̀. Eyı kǫ̀-gocho sìı “Nǫ̀htsı̨ nàowoò gha nı̨hbàa nàı̨ɂa” hǫt'e.  
\v 6 Yak'eet'ı̨į̀ łǫ̀hdı̨ hoìla łǫ̀hdı̨ wet'à dǫ dagı̨ı̨ɂa ha dagıalee sìı Nǫ̀htsı̨kǫ̀-gocho gots'ǫ xàgeède. ʔeh nedèe degoo wek'e saı̨dee yìı geèhkw'e eyıts'ǫ ɂehtł'ı̨ sǫǫ̀mbaekwo lanıı gıdzıìwı te nawhet'ı.  
\v 7 T'asìı dı̨ godìı gots'ǫ ı̨łè sǫǫ̀mbaekwo kw'àyį̀ą łǫ̀hdı̨ yak'eet'ı̨į̀ łǫ̀hdı̨ goghàyı̨ı̨wa. Nǫ̀htsı̨ welǫ whìle ts'ǫ̀ edaa sìı eyı kw'àyį̀ą łǫ̀hdı̨ weyìı dǫ ts'ǫ̀ wek'èch'a dagoòɂǫ whetł'ı.  
\v 8 Nǫ̀htsı̨ enıìyah t'à nàtsoo wehòhɂǫ gots'ǫ wekǫ̀ gocho ło dagoòɂǫ ajà. Hoìla łǫ̀hdı̨ dıı nèk'e dǫ hazǫǫ̀ k'e ajà gots'ǫ̀, dǫ wı̨ı̨zìı Nǫ̀htsı̨kǫ̀-gocho goyaetła ha dìì. 
\c 16  
\s1 Sǫǫ̀mbaekwo kw'àyį̀ą łǫ̀hdı̨ 
\p  
\v 1 Eyı tł'axǫǫ̀ Nǫ̀htsı̨kǫ̀-gocho gots'ǫ yak'eet'ı̨į̀ łǫ̀hdı̨ ts'ǫ̀ hòtł'ò dıı hats'edıì hǫt'e, “Sǫǫ̀mbaekwo kw'àyį̀ą łǫ̀hdı̨ dıı nèk'e nałaahtł'ì. Ayìı weyìı whetł'ıı sìı eyı t'à Nǫ̀htsı̨ dǫ nàehkwa ha,” hats'edıì hǫt'e. \fig Sǫǫ̀mbaekwo kw'àyį̀ą dıı nèk'e nałaahtł'ì|src="HK035A.tif" size="span" ref="16.1" \fig* 
\p  
\v 2 Yak'eet'ı̨į̀ t'akwełǫ̀ǫ̀ elı̨ı̨ sìı edets'ǫ kw'àyį̀ą dıı nèk'e ts'ǫ̀ nałayeèhtł'ı. Dǫ hazǫǫ̀ tıts'aàdìı nechàa wıızì gık'e aatł'èe sìı eyıts'ǫ kwe wek'ę̀ę̀ wègaat'ı̨ı̨ ts'ǫ̀ nàgògı̨ı̨hgèe sìı gıkaà łǫ ajà t'à sıì dagı̨ı̨ɂa. 
\p  
\v 3 Yak'eet'ı̨į̀ nàke t'à whedaa sìı edets'ǫ kw'àyį̀ą yìı ayìı whetł'ıı sìı tıcho k'e nałayeèhtł'ı t'à tıcho edoò whelı̨, dǫ ełaı̨wo wedoò lanì. Eyı hagòjà ts'ıhɂǫ̀ tı yìı t'asìı nàdèe sìı hazǫǫ̀ ełaı̨dè. 
\p  
\v 4 Eyı tł'axǫǫ̀ yak'eet'ı̨į̀ taı t'à whedaa sìı edets'ǫ kw'àyį̀ą deh nechàa eyıts'ǫ dehtsoa ta nałayeèhtł'ı t'à tı edoò whelı̨.  
\v 5 Eyı tł'axǫǫ̀ yak'eet'ı̨į̀ tı ts'ǫ̀ k'àowo elı̨ı̨ sìı dıı hadı weèhkw'o: 
\q1 “Whaà gots'ǫ nehòhɂǫǫ eyıts'ǫ dıì nehòhɂǫǫ sìı Nǫ̀htsı̨ degaı anet'e. 
\q2 Dıı hanì t'asìı wesınìyanehtı t'à ehkw'ı anet'e. 
\q1  
\v 6 Nets'ǫ dǫ eyıts'ǫ nakwenàoɂǫǫ gıdoò nałageèhtł'ı ts'ıhɂǫ̀ dıı hanì dǫ gısınìyanehtı. 
\q2 Ayìı dàgı̨ı̨la k'èxa edoò gedǫ agı̨į̀là,” yak'eet'ı̨į̀ hadı. 
\m  
\v 7 Sǫǫ̀mbaekwo ladà gots'ǫ dıı hats'edıì hǫt'e: 
\q1 “Hęɂę, Gonǫ̀htsı̨, t'asìı hazǫǫ̀ negha dìì-le anet'e. 
\q2 Dànì dǫ gısınìyanehtıı sìı ehkw'ı hǫt'e,” ts'edıì hǫt'e. 
\p  
\v 8 Yak'eet'ı̨į̀ dı̨ t'à whedaa sìı edets'ǫ kw'àyį̀ą sa k'e nałayeèhtł'ı. Sa wekǫ̀ nàtsoo t'à dǫ k'eek'ǫ̀ ha, hanì weghàhòt'ǫ hǫt'e.  
\v 9 Sa sıì whekǫ̀ t'à dǫ gıkwǫ̀ k'eek'ǫ̀ ts'ıhɂǫ̀ Nǫ̀htsı̨ ts'ǫ̀ nàdahogeeɂà. Ayìı t'à dǫ dagı̨ı̨ɂaa sìı Nǫ̀htsı̨ yets'ǫ̀ K'àowo hǫt'e, hanìkò ı̨łaà edek'egı̨ı̨lı̨ ha gı̨ı̨wǫ-le eyıts'ǫ Nǫ̀htsı̨ ghàsǫgeedı ha gı̨ı̨wǫ-le. 
\p  
\v 10 Yak'eet'ı̨į̀ sı̨làı t'à whedaa sìı edets'ǫ kw'àyį̀ą tıts'aàdìı nechàa wedaèhchı̨cho k'e nałayeèhtł'ı. Tıts'aàdìı nechàa wenèk'e hǫtsaa gıxè togoòtł'ò agòjà. Dǫ sıì dagı̨ı̨ɂà t'à edewalıì k'ètsǫgìɂà  
\v 11 eyıts'ǫ gıkaà łǫ xè gıgha eya nàtso t'à Nǫ̀htsı̨ yak'e whedaa sìı ts'ǫ̀ nàdahogeeɂà, hanìkò dànì eghàlagı̨ı̨dàa sìı weghǫ edek'egı̨ı̨lı̨ ha gı̨ı̨wǫ-le. 
\p  
\v 12 Eyı tł'axǫǫ̀ yak'eet'ı̨į̀ ek'ètaı t'à whedaa sìı edets'ǫ kw'àyį̀ą dehcho Euphrates gòyeh k'e nałayeèhtł'ı. Hǫtsaa tı hazǫǫ̀ whìle ajà xè dèè whegǫ. Dıı hagòjàa sìı sa kàɂàa nèk'e gots'ǫ k'àowocho nìgıdè ha gıdasınìhòt'ǫ hǫt'e.  
\v 13 Eyı tł'axǫǫ̀ ı̨nìłı̨ı̨ taı ts'alı lanì gìgoèht'į̀. Tıts'aàdìıcho dek'oo wewà yìı gots'ǫ ı̨łè xàèhtła eyıts'ǫ ı̨łè tıts'aàdìı nechàa wewà yìı gots'ǫ xàèhtła eyıts'ǫ ı̨łè nakwenàoɂǫǫ ehkw'ı gode-le wewà yìı gots'ǫ xàèhtła.  
\v 14 Eyı ı̨nìłı̨ı̨ sìı enıìyah hogehtsı̨, eyıts'ǫ dıı nèk'e k'àowocho hazǫǫ̀ ts'ǫ̀ agejà. Nǫ̀htsı̨ t'asìı wegha dìì-le sìı wets'ǫ dzędeè k'e ełegegǫ ha k'àowocho hazǫǫ̀ łą̀ą ełègehdè agogį̀į̀là. 
\p  
\v 15 Gots'ǫ̀ K'àowo dıı hadı, “Kexoahdı! Eeɂį̀ı̨-dǫǫ̀ lanì hǫtsaa naxıts'ǫ̀ nèehtła ha. Amìı ts'ıgoedìı xè edegoht'ǫǫ̀ edegà whehłaa sìı wexè sìghà ha hǫt'e. Hanì-ı̨dè goht'ǫ dę edeghǫ į̀į̀zhaelı̨ ha-le,” hadı. 
\p  
\v 16 Eyı tł'axǫǫ̀ eyı ı̨nìłı̨ı̨ taı Hebrew yatıì k'ę̀ę̀ Armagedon gòyeh ekǫ k'àowocho hazǫǫ̀ ełègogį̀ı̨la. 
\p  
\v 17 Eyı tł'axǫǫ̀ yak'eet'ı̨į̀ łǫ̀hdı̨ t'à elı̨ı̨ sìı edets'ǫ kw'àyį̀ą yat'a nałayeèhtł'ı ekò Nǫ̀htsı̨kǫ̀-gocho goyìı daèhchı̨cho gots'ǫ hòtł'ò dıı hats'edıì hǫt'e, “Hòt'a enahǫ̀t'e!” hats'edıì hǫt'e.  
\v 18 Ekòet'ıì kǫ̀ naìtł'ı̨, hòtł'ò eezhıı eyıts'ǫ dèè hòtł'ò nàèhdǫ. Dıı nèk'e dǫ ajà gots'ǫ haį̀tł'ò dèè nagoèhdǫ whìle.  
\v 19 Kǫ̀godeè Babylon taı ts'ǫ̀ łats'ıgoı̨dla eyıts'ǫ dıı nèk'e kǫ̀godeè hazǫǫ̀ nàgoı̨tł'ı. Nǫ̀htsı̨ sìı Babylon got'ı̨į̀ gıhołı̨į̀ yenadì t'à eyı k'èxa nàgoı̨hkwa. Nǫ̀htsı̨ gots'ǫ̀ wek'èch'a t'à hòtł'ò dagı̨ı̨ɂa ha goghàhòı̨ɂǫ.  
\v 20 Dıa hazǫǫ̀ whelaa sìı whìle ajà eyıts'ǫ shìh hazǫǫ̀ wègoèht'į̀-le ajà.  
\v 21 Yat'a gots'ǫ ı̨hlı nechàa dǫ k'e hodàetł'ò. Eyı ı̨hlı sìı ı̨łèakw'eènǫ haàtłǫǫ aı̨hdaa dǫ k'e nàı̨tł'ı t'à sıì dagı̨ı̨ɂa, eyıt'à Nǫ̀htsı̨ ts'ǫ̀ gìch'è xè nàdahogeeɂà. 
\c 17  
\s1 Ts'èko eyıts'ǫ tıts'aàdìı nechàa 
\p  
\v 1 Yak'eet'ı̨į̀ łǫ̀hdı̨ kw'àyį̀ą łǫ̀hdı̨ k'egelee sìı ı̨łè segà nììtła, hadı, “Sek'èè ı̨ı̨tła. Ts'èkojıı tı łǫ k'e whedaa sìı dànì daı̨ɂaà awedle ha sìı weghàı̨daà anehłe ha.  
\v 2 Dıı nèk'e k'àowocho hazǫǫ̀ eyı ts'èkojıı xè hołı̨ı̨ hogehtsı̨, eyıts'ǫ dıı nèk'e dǫ hazǫǫ̀ yenàowoò k'ę̀ę̀ eghàlageeda gıgha nezı̨. Wets'ǫ jìetìłı̨ı̨ t'à geèhde lagı̨ı̨t'e,” hadı. 
\p  
\v 3 Eyı tł'axǫǫ̀ Yedàyeh Nezı̨ı̨ wedahxà yak'eet'ı̨į̀ ekìı-ka nèk'e ts'ǫ̀ naseèhtı̨. Ekǫ ts'èko tıts'aàdìı nechàa k'e wheda wègaat'ı̨. Eyı tıts'aàdìı nechàa sìı wek'aàtsı̨į̀ dek'o-dezǫ hǫt'e, Nǫ̀htsı̨ k'èch'a wıızìłı̨ı̨ łǫ gǫ̀hłı̨ı̨ sìı hazǫǫ̀ wedzıìwı k'e aatł'è, eyıts'ǫ wekwì łǫ̀hdı̨ gǫ̀hłı̨ xè edè hoònǫ wek'e whela.  
\v 4 Eyı ts'èko goht'ǫ dek'o-dezǫǫ yìı wheda. Sǫǫ̀mbaekwo eyıts'ǫ sǫǫ̀mbakweè wek'e whela xè wek'e saı̨de. Eyı ts'èko sǫǫ̀mbaekwo lıbò dayaka. Eyı lıbò sìı t'asìıłı̨ı̨ eyıts'ǫ wenàowołı̨ı̨ weyìı dagoòɂǫ hǫt'e.  
\v 5 Wets'abeè k'e wıızì dek'eèhtł'è, eyı wıızì sìı wenıts'eedì ha gogha dezhì. Wek'e dıı hanì dek'eèhtł'è: 
\q1 “Babylon kǫ̀godeè hǫt'e, 
\q1 ts'èkojıı hazǫǫ̀ gha gomǫ elı̨ hǫt'e 
\q1 eyıts'ǫ dıı nèk'e dǫ hazǫǫ̀ yenàowojıı k'ę̀ę̀ geeda,” hanì dek'eèhtł'è. 
\m  
\v 6 Eyı ts'èko sìı Nǫ̀htsı̨ wets'ǫ dǫ godoò edǫ t'à yeèhde wègaat'ı̨. Nǫ̀htsı̨ wets'ǫ dǫ Zezì gıgha ehkw'ı adı t'à dagı̨ı̨ɂa hǫt'e. 
\p Eyı ts'èko weehɂı̨ ekò sıì segha enıìyah dìì.  
\v 7 Eyıt'à yak'eet'ı̨į̀ sets'ǫ̀ hadı, “Dànìghǫ sıì negha enıìyah dìì? Eyı ts'èko eyıts'ǫ eyı tıts'aàdìı nechàa k'e whedaa sìı ayìı gha agı̨ı̨t'ee sìı nedaehsı̨ ha. Eyıts'ǫ wekwì łǫ̀hdı̨ eyıts'ǫ wedè hoònǫ wek'e whelaa sìı eyı ghǫ nedaehsı̨ ha.  
\v 8 Eyı tıts'aàdìı nechàa weneeɂı̨ı̨ sìı eda ı̨lè, hanìkò dıì ełaı̨wo hǫt'e. Nǫǫde-ı̨dè dǫ ełaı̨dèe k'è gòɂǫǫ gots'ǫ xàetła ha, eyı tł'axǫǫ̀ dèè wedıhołè ha. Dıı nèk'e dǫ łǫ eyı tıts'aàdìı nechàa ghàgeeda nı̨dè gıgha enıìyah dìì ha ne, eyı tıts'aàdìı nechàa sìı eda ı̨lè, dıì ełaı̨wo hǫt'e, hanìkò k'achı̨ naìdà ha hǫt'e. Welǫ whìle ts'ǫ̀ ts'eedaa enı̨htł'è k'e gıızì dek'eèhtł'è-le sìı agı̨ı̨t'e. Eyı enı̨htł'è sìı dèè hòèlı̨ gots'ǫ hǫt'e. 
\p  
\v 9 “Eyı hazǫǫ̀ dàhodıì-ahodıı sìı dǫ gǫǫzǫǫ gınıedì welì. Tıts'aàdìı nechàa wekwì łǫ̀hdı̨ sìı shìh łǫ̀hdı̨ gha hǫt'e, eyı sìı ts'èko yek'e wheda.  
\v 10 Eyıts'ǫ eyı wekwì łǫ̀hdı̨ sìı k'àowocho łǫ̀hdı̨ gha hǫt'e. Sı̨làı sìı ełaı̨dè, ı̨łè eda eyıts'ǫ ı̨łè ı̨łaà k'àowocho ìhłè-le. K'àowocho whelı̨ nı̨dè whaà-lea gots'ǫ̀ zǫ k'àowo elı̨ ha hǫt'e.  
\v 11 Eyı tıts'aàdìı nechàa eda ı̨lè hanìkò dıì ełaı̨woo sìı eyı k'àowocho ek'èdı̨ t'à whedaa elı̨ hǫt'e. K'àowocho łǫ̀hdı̨ gota gots'ǫ hǫt'e, hanìkò wedıhołè ha hǫt'e. 
\p  
\v 12 “Eyı tıts'aàdìı nechàa wedè hoònǫ weneeɂı̨ı̨ sìı k'àowocho hoònǫ gha hǫt'e. Įłaà dèè ts'ǫ̀ k'àowo gı̨ı̨lı̨-le. Hanìkò ı̨łè sadzeè gots'ǫ̀ tıts'aàdìı nechàa xè k'àowo gı̨ı̨lı̨ ha gıghàhòt'à ha hǫt'e.  
\v 13 Hazǫǫ̀ gınì ı̨łè zǫ lagı̨ı̨t'e ha, gıdahxà tıts'aàdìı nechàa k'àowo elı̨į̀ agele ha.  
\v 14 Sahzǫ̀ą ts'ǫ̀ ełegegǫ ha, hanìkò Sahzǫ̀ą goghǫehnè ha. Ededı̨ sìı k'àowo hazǫǫ̀ gha K'àowo elı̨ eyıts'ǫ k'àowocho hazǫǫ̀ gha K'àowocho elı̨. Eyı Sahzǫ̀ą wecheekeè gìhchìı xè weyatıì k'ègedìı sìı wexè agı̨ı̨t'e,” yak'eet'ı̨į̀ hasèhdı. 
\p  
\v 15 Eyı tł'axǫǫ̀ yak'eet'ı̨į̀ sets'ǫ̀ hadı, “Eyı tı łǫ ts'èkojıı yek'e whedaa sìı dıı nèk'e dǫ łǫ lanì hǫt'e, dǫ łǫ xàɂaa eyıts'ǫ yatı hazǫǫ̀ xàɂaa gots'ǫ agı̨ı̨t'e.  
\v 16 Eyı tıts'aàdìı nechàa eyıts'ǫ edè hoònǫ weneeɂı̨ı̨ sìı eyı ts'èkojıı dzagı̨ı̨hwhǫ ha. Wekwǫ̀ǫyaà-geleè xè goht'ǫ dę whedaà agele ha. Wekwǫ̀ geɂà xè kǫ̀ t'à gık'eehk'ǫ̀ ha.  
\v 17 K'àowocho haget'ı̨ı̨ sìı Nǫ̀htsı̨ hanì goınì whehtsı̨ t'à gık'ę̀ę̀ eghàlageedaà aget'ı̨. Eyı tıts'aàdìı nechàa sìı edetł'axǫǫ̀ k'àowo elı̨į̀ agele ha. Nǫ̀htsı̨ weyatıì k'ę̀ę̀ agode gots'ǫ̀ haget'ı̨ ha hǫt'e.  
\v 18 Ts'èkojıı weneeɂı̨ı̨ sìı kǫ̀godeè Babylon hǫt'e, eyı kǫ̀godeè sìı dıı nèk'e k'àowocho hazǫǫ̀ ts'ǫ̀ k'àowo hǫt'e,” yak'eet'ı̨į̀ sets'ǫ̀ hadı. 
\c 18  
\s1 Kǫ̀godeè Babylon hodàètł'ı 
\p  
\v 1 Hagòjà tł'axǫǫ̀ yak'e gots'ǫ yak'eet'ı̨į̀ eyıì-le hodàèhtła wègaat'ı̨. K'àowocho nàtsoo elı̨ k'ę̀ę̀ weghàhòt'ǫ. Sıì weghǫ enıìyah xè wek'e saı̨dı̨ t'à dıı nèk'e hazǫǫ̀ dzęh agòjà.  
\v 2 Hòtł'ò ezeh xè hadı: 
\mi “Kǫ̀godeè nàı̨tł'ı! Kǫ̀godeè Babylon hodàètł'ı. Eyı kǫ̀godeè gòlaa sìı ı̨nìłı̨ı̨ nàdè ajà. Įnìłı̨ı̨ łǫ ekǫ aget'ı̨, t'asìı wejıı k'edèe sìı hazǫǫ̀ ekǫ aget'ı̨.  
\v 3 Dǫ hazǫǫ̀ xàɂaa eyı ts'èkojıı wets'ǫ jìetì gıadǫ xè wenàowojıı k'ę̀ę̀ eghàlagı̨ı̨dà. Dıı nèk'e ts'ǫ k'àowocho gıxè hołı̨ı̨ hogèhtsı̨ eyıts'ǫ dıı nèk'e ts'ǫ k'aàwı yets'ǫ t'asìı wèdaat'ı̨ı̨ t'à ahxe gehłè,” yak'eet'ı̨į̀ hadıì ezeh. 
\m  
\v 4 Eyı tł'axǫǫ̀ yak'e gots'ǫ k'achı̨ dıı hats'edıı eèhkw'o: 
\mi “Sèot'ı̨ı̨, Babylon gots'ǫǫ̀ xàehdè. Hanì-ı̨dè eyı ts'èko wenàowojıı k'ę̀ę̀ aahda ha nıìle eyıts'ǫ wexèht'eè daahɂa ha nıìle.  
\v 5 Shìh nechàa lanì wenàowojıı hazǫǫ̀ yak'e ts'ǫ̀ ełeka dawhela. Eyı ts'èko hoìla hòèhtsı̨ı̨ sìı Nǫ̀htsı̨ yenadì hǫt'e.  
\v 6 Dànì dǫ ts'ǫ̀ eghàlaı̨dàa sìı hanì wets'ǫ̀ eghàlaahda. Dànì eghàlaı̨dà k'èxa nàke laàtłǫǫ wets'ǫ̀ eghǫlaahda. Welıbò gots'ǫ nàekeè wegha deyaahtł'ì.  
\v 7 T'asìı wèdaat'ı̨ı̨ łǫ xàɂaa wets'ǫ t'à ahxe k'ę̀ę̀ nàdè adììdlà. Eyı t'aànì enıìyah xè ahxe k'ę̀ę̀ ı̨ı̨dà xèht'eè daı̨ɂa xè wedzeè nànııtì aweahłe. Edeghǫ xàhodì gode, edets'ǫ̀ hadı, ‘Ts'èko-k'àowo aht'e t'à daèhchı̨cho k'e whıhda. Ts'èko wedǫǫ̀ wegà ełaı̨wo aht'e nıìle eyıts'ǫ sedzeè nànııtì hǫı̨lı̨ ha nıìle,’ edets'ǫ̀ hadı.  
\v 8 Eyı k'èxa ı̨łè dzęę̀ k'e hǫtsaa daı̨ɂaà awedle ha. Wets'ǫ dǫ ełaàde ha, wedzeè nànııtì ha eyıts'ǫ wegha bò whìle agode ha. Kǫ̀ t'à wek'eek'ǫ̀ ha, Gonǫ̀htsı̨ t'asìı wegha dìì-le sìı yesınìyaehtı ha hǫt'e. 
\p  
\v 9 “Dıı nèk'e k'àowocho yexè hołı̨ı̨ hogèhtsı̨ xè wets'ǫ t'asìı wèdaat'ı̨ı̨ łǫ t'à ahxe gehłèe sìı gıghàeda ha hǫt'e. Wek'eek'ǫ̀ ts'ǫ ło gıghàeda t'à gıdzeè nànııtìı xè weghǫ getse ha hǫt'e.  
\v 10 Eyı ts'èkojıı sıì hòtł'ò daı̨ɂa t'à k'àowocho sıì geejı̨į̀ agede ha. Nıwà gots'ǫ gıghàeda ha, getse xè dıı hagedı ha: 
\mi ‘Hoìla hodeè! Heè, kǫ̀godeè Babylon weghǫ enıhoòyah ne là! Kǫ̀godeè nàtsoo elı̨ ı̨lè, hanìkò ı̨łè sadzeè zǫ t'à wexè hoìla agòjà!’ gedıì getse ha. 
\p  
\v 11 “Dıı nèk'e ts'ǫ k'aàwı gı̨ı̨lı̨ı̨ sìı t'asìı gıghǫ nàedì-le agòjà t'à kǫ̀godeè ghǫ hòtł'ò getse ha.  
\v 12 T'asìı dıı hanıı gıghǫ nàedì ı̨lè: sǫǫ̀mbaekwo, sǫǫ̀mba degoo, sǫǫ̀mbakweè; ehtł'ı̨ dètìı; jìechochı̨į̀ gots'ǫ dechı̨kàà nezı̨ı̨, tıts'aàdìıcho weghòò t'à t'asìı hòèlı̨ı̨, dechı̨kàà dètìı t'à t'asìı hòèlı̨ı̨, satsǫ̀ dekwoo t'à t'asìı hòèlı̨ı̨, satsǫ̀ nedàa t'à t'asìı hòèlı̨ı̨ eyıts'ǫ kwe wèdaat'ı̨ı̨ t'à t'asìı hòèlı̨ı̨.  
\v 13 Eyıts'ǫ dı̨ı̨ts'ıa łǫ xàɂaa, wet'à ło łekǫǫ dèk'ǫ̀ǫ xàɂaa, yìk'eetł'òo, jìetì, tłeh wet'à bò xàet'èe, łè nezı̨ı̨, ejıe eyıts'ǫ sahzǫ̀ą, tłı̨cho webehchı̨į̀ xè, eyıts'ǫ dǫ sı gıghǫ nàedì ı̨lè. 
\p  
\v 14 “Eyı k'aàwı gı̨ı̨lı̨ı̨ sìı ts'èkojıı ts'ǫ̀ dıı hagedı ha, ‘Jìecho neɂà ghaı̨wı̨ ı̨lèe sìı neghǫ whìle ajà. Eyıts'ǫ t'asìı dètìı hazǫǫ̀ nets'ǫ ı̨lèe sìı neghǫ whìle ajà, eyı hazǫǫ̀ naneet'į̀ ha nıìle,’ hagedı ha.  
\v 15 Eyı ts'èkojıı wets'ıhɂǫ̀ k'aàwı gı̨ı̨lı̨ı̨ sìı t'asìı łǫ gıghǫ nàèdì t'à ahxe gehłè ı̨lè. Hanìkò ts'èkojıı sıì hòtł'ò daı̨ɂa t'à k'aàwı gı̨ı̨lı̨ı̨ sìı hòtł'ò geejı̨ ha. Nıwà gots'ǫ gıghàeda ha eyıts'ǫ gıdzeè t'à gıgha dìì xè gıghǫ etse ha.  
\v 16 Gezeh xè hagedı ha: 
\mi ‘Hoìla hodeè! Heè, kǫ̀godeè Babylon weghǫ enıhoòyah! Eyı ts'èko goht'ǫ dek'oo dètìı xè wèdaat'ı̨ı̨ yìı wheda ı̨lè eyıts'ǫ sǫǫ̀mbakweè xè sǫǫ̀mbaekwo t'à t'asìı hòèlı̨ı̨ t'à-at'ı̨ ts'ıhɂǫ̀ wek'e saı̨de ı̨lè!  
\v 17 Hanìkò ı̨łè sadzeè zǫ t'à t'asìı dètìı hazǫǫ̀ wedıhòłı̨,’ k'aàwı hagedıì gezeh ha. 
\p “Elàcho ts'ǫ̀ k'àowo hazǫǫ̀ tı k'e ts'ǫ̀ geèlı̨ı̨ sìı, eyıts'ǫ dǫ hazǫǫ̀ elàcho yìı geèhkw'ee sìı, eyıts'ǫ elàcho k'ègedìı gı̨ı̨lı̨ı̨ sìı nıwà gots'ǫ Babylon ghàgeeda ha.  
\v 18 Eyı ts'èko wek'eek'ǫ̀ gıghàeda nı̨dè dıı hagedı ha, ‘Eyı kǫ̀godeè wexèht'eè gòı̨lè whìle,’ hagedı ha.  
\v 19 Ehtł'è edekwì k'e ts'ǫ̀ geehdè xè getse ha, weghǫ gıdzeè nànııtìı xè hagedı ha: 
\mi ‘Hoìla hodeè! Heè, kǫ̀godeè Babylon weghǫ enıhoòyah ne là! Dǫ hazǫǫ̀ tıdeè k'e elàcho t'à į̀hnǫǫ̀ t'asìı eghǫgeelee sìı eyı ts'èko wets'ǫ t'asìı t'à ahxe gehłè ı̨lè. Hanìkò ı̨łè sadzeè zǫ t'à eyı ts'èko t'asìı wı̨ı̨zìı wets'ǫ-le awììdlà!’ gedıì gezeh ha.  
\v 20 ‘Naxı̨ yak'e dahkw'ee sìı eyı ts'èko wets'ǫ̀ dànàhòwo ts'ıhɂǫ̀ naxınà welè. Naxı̨ hazǫǫ̀ Nǫ̀htsı̨ wets'ǫ dǫ aahłı̨, wecheekeèdeè eyıts'ǫ nakwenàoɂǫǫ aahłı̨ı̨ sìı naxınà welè! Eyı ts'èkojıı dànì naxıts'ǫ̀ eghàlaı̨dà k'èxa Nǫ̀htsı̨ yesınìyaehtı hǫt'e,’ ” hats'edıì hǫt'e. 
\p  
\v 21 Eyı tł'axǫǫ̀ yak'eet'ı̨į̀ nàtsoo kwe nechàa behchı̨kè laı̨hcho neyıìchı gà teyį̀ı̨hk'ah, hadı, 
\mi “Kǫ̀godeè Babylon weghǫ enıìyah sìı dànì hodàètł'ı eyı lanì hodàgoetł'ì ha. K'achı̨ wenagot'a ha nıìle.  
\v 22 Kǫ̀godeè ekǫ enı̨htł'èjı̨ı̨ dedı ets'ıìkw'o ha-le. Ekǫ dǫ wı̨ı̨zìı tł'ık'eetı̨ı̨ eyıts'ǫ dechı̨shì t'à sǫnàwo ha-le. Dechı̨-eghàlaedaa-dǫǫ̀, satsǫ̀-eghàlaedaa-dǫǫ̀ eyıts'ǫ ehtł'ı̨-gehtsı̨ı̨-dǫǫ̀ hanıı gıts'eɂį̀ ha-le. Kwe wet'à łè nàts'eèdee sìı wenats'ıìkw'o ha-le.  
\v 23 Ekǫ ek'aèk'ǫ wı̨ı̨zìı k'achı̨ dèk'ǫ̀ǫ ha-le. Ekǫ dǫzhìı eyıts'ǫ ts'èko honìgedè ha-le. Kǫ̀godeè Babylon gots'ǫ k'aàwı sìı dıı nèk'e gogha dǫ wet'àaɂàa deè gı̨ı̨lı̨ ı̨lè. Eyı ts'èkojıı wet'à dǫ hazǫǫ̀ xàɂaa gıghǫyahoòt'ǫ t'à ts'ıɂǫ̀ geède.  
\v 24 Eyı kǫ̀godeè sìı nakwenàoɂǫǫ, Nǫ̀htsı̨ wets'ǫ dǫ eyıts'ǫ dǫ hazǫǫ̀ ełaàgı̨ı̨dèe sìı gıdoò goyìı wègaat'ı̨ hǫt'e,” yak'eet'ı̨į̀ hadı. 
\c 19  
\s1 Aleluya! 
\p  
\v 1 Eyı tł'axǫǫ̀ yak'e gots'ǫ dǫ łǫ ełexè gezeh lagodı, dıı hagedı, 
\mi “Aleluya! Nǫ̀htsı̨ ededı̨ zǫ dǫ edaxàgole hǫt'e, t'asìı wegha dìì-le, eyıts'ǫ weghàsǫts'eedı ha hǫt'e.  
\v 2 Dànì dǫ sınìyaehtıı sìı ehkw'ı hǫt'e. Eyı ts'èkojıı dıı nèk'e dǫ xè hołı̨ı̨ k'ę̀ę̀ eghàlaı̨dàa sìı yesınìyaı̨htı hǫt'e. Nǫ̀htsı̨ wecheekeè ełaàgòı̨hdè k'èxa Nǫ̀htsı̨ nàyı̨ı̨hkwa hǫt'e,” hagedı. 
\m  
\v 3 K'achı̨ gezeh xè dıı hagedı, 
\mi “Aleluya! Eyı ts'èkojıı wek'eek'ǫ̀ gots'ǫ ło welǫ whìle ts'ǫ̀ ı̨dòo deekw'e ha,” gedı. 
\p  
\v 4 Ǫhdah naènǫ-daats'ǫ̀-dı̨ eyıts'ǫ t'asìı dı̨ godìı sìı Nǫ̀htsı̨ daèhchı̨cho k'e whedaa sìı gà nàgògı̨ı̨hgè eyıts'ǫ gıghàsǫedı, hagedı, “Amen, Aleluya!” gedı. 
\p  
\v 5 Eyı daèhchı̨cho gots'ǫ dıı hats'edıì hǫt'e: 
\mi “Naxı̨ hazǫǫ̀ wecheekeè yàahłı̨ı̨ sìı, naxı̨ hazǫǫ̀ wek'èaht'ee sìı, eyıts'ǫ dǫ wet'àaɂàa, wet'àaɂà-le yàahłı̨ı̨ sìı Gonǫ̀htsı̨ weghàsǫahdı,” hats'edıì hǫt'e. 
\p  
\v 6 Eyı tł'axǫǫ̀ k'achı̨ yak'e gots'ǫ dǫ łǫ ełexè gezeh lagodı, deh nàtsoo sı lagodı eyıts'ǫ hòtł'ò eezhıı sı lagodı. Gezeh xè dıı hagedı, 
\mi “Aleluya! Gonǫ̀htsı̨ t'asìı wegha dìì-le sìı ededı̨ zǫ t'asìı hazǫǫ̀ ts'ǫ̀ K'àowo hǫt'e!  
\v 7 Goınà xè weghàsǫts'eedı welè! Hòt'a Sahzǫ̀ą honìda ha nìhǫǫwo; ts'èko ìhchı ha sìı hòt'a sedììdlà hǫt'e.  
\v 8 Ehtł'ı̨ degoo wèdaat'ı̨ı̨ yeyìı wheda ha weghǫ̀chì hǫt'e,” hagedıì gezeh. 
\m (Ehtł'ı̨ degoo wèdaat'ı̨ı̨ sìı Nǫ̀htsı̨ wets'ǫ dǫ ehkw'ı eghàlagı̨ı̨dà gha hǫt'e.) 
\p  
\v 9 Eyı tł'axǫǫ̀ yak'eet'ı̨į̀ sets'ǫ̀ hadı, “Dıı dek'enìı̨tł'è: ‘Amìı eyı sahzǫ̀ą honìdza wets'ǫ nàsı̨ nàgedè ha gıxayaetıı sìı gıxè sìghà hǫt'e,’ ” sets'ǫ̀ hadı. K'achı̨ sets'ǫ̀ hadı, “Dıı sìı xàè Nǫ̀htsı̨ weyatıì hǫt'e,” hadı. 
\p  
\v 10 Yak'eet'ı̨į̀ hadı t'à wekè gà nàgòhge xè weghàsǫehdı ha là, yak'eet'ı̨į̀ sets'ǫ̀ hadı, “Hawı̨ı̨de-le! Nı̨ eyıts'ǫ nèot'ı̨ Zezì wegodıì ehkw'ı adı gı̨ı̨wǫǫ sìı naxıxèht'eè Nǫ̀htsı̨ wecheekeè aht'e. Nǫ̀htsı̨ weghàsǫedı! Nǫ̀htsı̨ wets'ǫ nakwenàoɂǫǫ hazǫǫ̀ sìı Zezì wegodıì zǫ t'à gogede hǫt'e,” sets'ǫ̀ hadı. 
\s1 Amìı tłı̨cho degoo t'à-at'ı̨ı̨ sìı 
\p  
\v 11 Yak'e enìxànı̨ı̨tǫ wègoèht'į̀ ekò senadąą̀ tłı̨cho degoo nàwo. Eyı tłı̨cho t'à-at'ı̨ı̨ sìı dıı hawìyeh: “edeyatıì k'èdìı” eyıts'ǫ “ehkw'ı hǫt'e” wìyeh. Ededı̨ sìı ehkw'ı dǫ sınìyaehtı eyıts'ǫ nàowo ehkw'ıı k'ę̀ę̀ eghǫ.  
\v 12 Wedaà kǫ̀ dèk'ǫ̀ǫ lanì wègaat'ı̨ eyıts'ǫ wekwì k'e sǫǫ̀mbaekwo kwìt'ıì łǫ whela. Wıızì wek'eèhtł'è, hanìkò dǫ wı̨ı̨zìı yek'èezǫ-le; ededı̨ zǫ yek'èezǫ hǫt'e.  
\v 13 ʔeh nedèe edoò ta adlàa yìı wheda eyıts'ǫ wıızì “Nǫ̀htsı̨ weyatıì” wìyeh.  
\v 14 Yak'e gots'ǫ eghǫǫ-dǫǫ̀ gık'èè k'edè. Tłı̨cho degoo t'à-aget'ı̨ eyıts'ǫ ɂeh degoo wèdaat'ı̨ı̨ yìı geèhkw'e.  
\v 15 Eyı dǫ gık'èè gıadèe sìı behcho dènıı wewà gots'ǫ xàı̨ɂa. Yet'à dıı nèk'e dǫ hazǫǫ̀ ghǫehnè ha. “Eyıts'ǫ satsǫ̀-geh t'à dǫ hazǫǫ̀ ts'ǫ̀ K'àowo elı̨ ha.” Nǫ̀htsı̨ t'asìı wegha dìì-le sìı wek'èch'a t'à, tǫhcho yìı t'asìı whelaa sìı tàtsǫyeèhɂe ha.  
\v 16 Weɂeè nedèe k'e eyıts'ǫ wedzaà k'e wıızì dek'eèhtł'è: 
\pc “K'àodèe ts'ǫ̀ K'àowo, k'àowocho hazǫǫ̀ gha K'àowocho,” dek'eèhtł'è. 
\p  
\v 17 Eyı tł'axǫǫ̀ sa k'e yak'eet'ı̨į̀ nàwo weehɂı̨. Yat'a t'asìı hazǫǫ̀ k'edèe sìı ts'ǫ̀ hòtł'ò dıı hadı, “Nǫ̀htsı̨ wenàsı̨deè gha ełèwhahde.  
\v 18 K'àowocho gıkwǫ̀, eghǫǫ-dǫǫ̀ gha k'aodèe gıkwǫ̀, dǫ wet'àaɂàa gıkwǫ̀, tłı̨cho eyıts'ǫ dǫ gık'eèhkw'ee sìı gıkwǫ̀ ghǫ shèahzhe ha. Dǫ edets'ǫ̀ k'agedèe eyıts'ǫ dǫ edets'ǫ̀ k'agedè-le gıkwǫ̀ eyıts'ǫ dǫ wet'àaɂàa eyıts'ǫ dǫ wet'àaɂà-le gıkwǫ̀, dǫkwǫ̀ hazǫǫ̀ ghǫ shèahzhe ha,” yak'eet'ı̨į̀ gòhdı. 
\p  
\v 19 Eyı tł'axǫǫ̀ tıts'aàdìı nechàa eyıts'ǫ dıı nèk'e gots'ǫ k'àowocho hazǫǫ̀ gıts'ǫ eghǫǫ-dǫǫ̀ xè łą̀ą nègı̨ı̨de gìgoèht'į̀. Amìı eyı tłı̨cho degoo k'e whedaa sìı wets'ǫ eghǫǫ-dǫǫ̀ xè gots'ǫ̀ ełegegǫ.  
\v 20 Hanìkò tıts'aàdìı nechàa dagıachì eyıts'ǫ wets'ǫ nakwenàoɂǫǫ ehkw'ı gode-le sìı eyı sı dagıachì. Eyı nakwenàoɂǫǫ sìı tıts'aàdìı nechàa dahxà enıìyah hòèhtsı̨ t'à dǫ łǫ tıts'aàdìı nechàa wıızì gık'e wheɂǫǫ eyıts'ǫ kwe wek'ę̀ę̀ hòèlı̨ ts'ǫ̀ nàgògı̨ı̨hgèe sìı ts'ıɂǫ̀ geèdeè agǫ̀ǫ̀là. Eyı tıts'aàdìı nechàa eyıts'ǫ wets'ǫ nakwenàoɂǫǫ-łı̨ı̨ ı̨łaà geeda et'ıì, kwe dèk'ǫ̀ǫ ta ts'ǫ̀ gogeèhde.  
\v 21 Eyı tłı̨cho degoo k'e whedaa sìı wewà gots'ǫ behcho xàı̨ɂaa t'à k'àowocho eyıts'ǫ gıts'ǫ eghǫǫ-dǫǫ̀ hazǫǫ̀ ełaàgòı̨hdè. Yat'a k'edèe sìı dǫweè k'enį̀ı̨laa ts'ǫ̀ hodàgı̨ı̨de gà gıbò dagoòɂǫ ts'ǫ̀ dǫkwǫ̀ ghǫ shègıazhe. 
\c 20  
\s1 Įłè-lemì xo 
\p  
\v 1 Eyı tł'axǫǫ̀ yak'e gots'ǫ yak'eet'ı̨į̀ hodàetłe wègoèht'į̀. Įzhıì dèè goyìı gǫǫ̀ɂàa gha ladlì k'eɂa, eyıts'ǫ satsǫ̀tł'ıì nechàa k'ele.  
\v 2 Eyı yak'eet'ı̨į̀ tıts'aàdìıcho dek'oo daachì. Eyı tıts'aàdìıcho sìı ı̨nę̀ę whaà gots'ǫ gòocho hǫt'e eyıts'ǫ wehłı̨ı̨ hǫt'e. Įłè-lemì xo gots'ǫ̀ wek'èhodì ha t'à yak'eet'ı̨į̀ dayeèzà.  
\v 3 Įzhıì dèè goyìı gǫǫ̀ɂàa ekǫ goyìı yı̨ı̨hxà gà wets'ǫdaàdoò ayį̀į̀là. Dǫ wı̨ı̨zìı yets'ǫ̀ enìxàechı ha-le ayį̀į̀là. Eyıt'à ı̨łè-lemì xo gots'ǫ̀ eyı tıts'aàdìıcho dek'oo sìı dǫ hazǫǫ̀ xàɂaa ts'ıɂǫ̀ geedè agole ha-le. Eyı tł'axǫǫ̀ nı̨dè whaà-lea ts'ǫ̀ xàetłaà agele ha. 
\p  
\v 4 Eyı tł'axǫǫ̀ daèhchı̨cho łǫ wègoèht'į̀, dǫ sınìyagehtı ha gıghàhòt'ǫǫ sìı gık'e dèhkw'e. Eyıts'ǫ dǫ łǫ gıdą̀ązhį̀ı̨ senadąą̀ wègoèht'į̀. Zezì wegodıì eyıts'ǫ Nǫ̀htsı̨ weyatıì t'à gogede k'èxa gıkwì k'egı̨ı̨hkàa sìı agı̨ı̨t'e. Tıts'aàdìı nechàa eyıts'ǫ kwe wek'ę̀ę̀ hòèlı̨ ts'ǫ̀ nàgògı̨ı̨hgè-le eyıts'ǫ gıts'abeè eyıts'ǫ gılà k'e tıts'aàdìı nechàa wıızì dek'eèhtł'è-le agı̨ı̨t'e. Eyı dǫ hazǫǫ̀ nagìdà, eyıts'ǫ ı̨łè-lemì xo gots'ǫ̀ Chrıst wexè k'aodèe gı̨ı̨lı̨.  
\v 5 (Dǫ eyıì-le ełaı̨dèe sìı ı̨łè-lemì xo wek'ehowı gots'ǫ̀ nagìdà-le.) Eyı sìı t'akwełǫ̀ǫ̀ dǫ nagìdà agı̨ı̨t'e.  
\v 6 Eyı t'akwełǫ̀ǫ̀ dǫ nagìdàa sìı degaı agı̨ı̨t'e eyıts'ǫ gıxè sìghà agǫ̀ht'e. K'achı̨ ełaàgııde ha nıìle, hanìkò Nǫ̀htsı̨ wets'ǫ yahtıı gı̨ı̨lı̨ ha eyıts'ǫ ı̨łè-lemì xo gots'ǫ̀ wexè k'àowo gı̨ı̨lı̨ ha. 
\s1 Wehłı̨ı̨ wegha hoìla nechà ha 
\p  
\v 7 Įłè-lemì xo k'ehǫǫwo nı̨dè wehłı̨ı̨ sìı wedaànìı̨tǫ ts'ǫ xàetłaà agele ha.  
\v 8 Dıı nèk'e hazǫǫ̀ ts'ǫ̀ wek'eèhoowo ha, dǫ hazǫǫ̀ xàɂaa goghǫyaeɂà t'à ełegegǫ gha ełègoowa ha. Eyı dǫ xàɂaa agole ha sìı Gog eyıts'ǫ Magog gìyeh. Tabàa ewaà dàtłǫǫ sìı dǫ wexètłǫ hǫt'e.  
\v 9 Dǫ ełèwhedee sìı dıı nèk'e hazǫǫ̀ ts'ǫ̀ geède. Kǫ̀godeè Nǫ̀htsı̨ wets'ǫ dǫ nàgedèe sìı, eyı kǫ̀godeè Nǫ̀htsı̨ yeghǫneètǫǫ sìı, wemǫǫ̀ nègı̨ı̨de, hanìkò yak'e gots'ǫ kǫ̀ hodàetł'ì t'à eyı dǫ xàɂaa hazǫǫ̀ gık'enı̨ı̨k'ǫ.  
\v 10 Eyıts'ǫ wehłı̨ı̨ goghǫyaàɂǫǫ sìı kwe dèk'ǫ̀ǫ ta ts'ǫ̀ geèhxà. Ekǫ tıts'aàdìı nechàa eyıts'ǫ wets'ǫ nakwenàoɂǫǫ ehkw'ı gode-le sìı ekǫ gogeèhde ı̨lè. Welǫ whìle ts'ǫ̀ dzę eyıts'ǫ to hòtł'ò dagı̨ı̨ɂa ha. 
\s1 Dǫ ełaı̨dèe sìı gısınìyaetı ha 
\p  
\v 11 Eyı tł'axǫǫ̀ daèhchı̨cho degoo eyıts'ǫ amìı yek'e whedaa sìı wègoèht'į̀. Dèè eyıts'ǫ yat'a wech'à kwı̨geèhdeè lagejà, gıgha gòɂǫ-le t'à.  
\v 12 Eyıts'ǫ dǫ ełaı̨dèe sìı gìgoèht'į̀. Dǫ wet'àaɂàa eyıts'ǫ dǫ wet'àaɂà-le hazǫǫ̀ eyı daèhchı̨cho degoo gà nàgeèhza. Enı̨htł'ècho mǫ̀hdaa ts'ǫdaà xàaza wègaat'ı̨, eyıts'ǫ k'achı̨ enı̨htł'è ı̨łè wets'ǫdaà xàatǫ. Eyı enı̨htł'è wek'e dǫ welǫ whìle ts'ǫ̀ geeda gha gıızì dek'eèhtł'è. T'akwełǫ̀ǫ̀ enı̨htł'è whelaa wek'e ayìı dek'eèhtł'èe sìı eyı weghàà dǫ ełaı̨dèe sìı gısınìyaetı hǫt'e.  
\v 13 Tıcho yìı ts'ǫ eyıts'ǫ dǫ ełaı̨dèe k'èhodìı gots'ǫ dǫ hazǫǫ̀ ełaı̨dèe sìı xàgı̨ı̨de. Dǫ hazǫǫ̀ ayìı hogèhtsı̨ı̨ sìı weghàà gısınìyaetı hǫt'e.  
\v 14 Eyı tł'axǫǫ̀ ełaàts'edee eyıts'ǫ dǫ ełaı̨dèe k'èhodìı k'è gòɂǫǫ sìı kwe dèk'ǫ̀ǫ ta ts'ǫ̀ gogeèhde. Eyı kwe dèk'ǫ̀ǫ whehtǫǫ sìı nàekeè t'à ełaàts'ewı gha hǫt'e.  
\v 15 Amìı eyı enı̨htł'è wek'e dǫ welǫ whìle ts'ǫ̀ geeda gha gıızì dek'eèhtł'è-le sìı kwe dèk'ǫ̀ǫ ta ts'ǫ̀ gogeèhde hǫt'e. 
\c 21  
\s1 Kǫ̀godeè Jerusalem wegòò 
\p  
\v 1 Eyı tł'axǫǫ̀ yak'e wegòò eyıts'ǫ dèè wegòò wègoèht'į̀. T'akwełǫ̀ǫ̀ gots'ǫ yak'e eyıts'ǫ dèè sı whìle ajà, eyıts'ǫ tıcho sı whìle ajà.  
\v 2 Yak'e gots'ǫ Kǫ̀godeè Degaı ı̨zhıì ajà wègaat'ı̨. Kǫ̀godeè wegòò Jerusalem, Nǫ̀htsı̨ gots'ǫ ı̨zhıì ajà. Ts'èko dǫzhìı xè honìda ha goht'ǫ wèdaat'ı̨ı̨ yìı wheda lanì eyı kǫ̀godeè wèdaat'ı̨.  
\v 3 Daèhchı̨cho gots'ǫ hòtł'ò dıı hats'edıì hǫt'e, “Jǫ gots'ǫ ı̨daà Nǫ̀htsı̨ dǫ ta nàdè ha t'à wekǫ̀ dǫ nı wheɂǫ ha. Wets'ǫ dǫ gı̨ı̨lı̨ ha, Nǫ̀htsı̨ ededı̨ goxè nàdè ha, eyıts'ǫ Gonǫ̀htsı̨ elı̨ ha hǫt'e.  
\v 4 Gonatì hazǫǫ̀ deedı ha. K'achı̨ dǫ ełaàde ha-le, gıdzeè nànııtì ha-le, getse ha-le eyıts'ǫ gıkwǫ̀ eya ha-le, ı̨nę̀ę dànì hòı̨ɂàa sìı hagǫ̀ht'e-le agòjà ne t'à,” hats'edıì hǫt'e. 
\p  
\v 5 Eyı daèhchı̨cho k'e whedaa sìı hadı, “T'asìı hazǫǫ̀ wegòò ahłe ha!” eyıts'ǫ sets'ǫ̀ hadı, “Eyı hazǫǫ̀ dek'enìı̨tł'è, dıı yatı sìı hotıì ehkw'ı hǫt'e eyıts'ǫ weghàà aahda ha hǫt'e.” 
\p  
\v 6 Eyıts'ǫ sets'ǫ̀ hadı, “Hòt'a enahǫ̀t'e. Yatı t'akwełǫ̀ǫ̀ aht'e eyıts'ǫ yatı nǫǫde aht'e; kèhǫǫ̀wo ts'ǫ sehòhɂǫ eyıts'ǫ nǫǫde ts'ǫ̀ sehòhɂǫ. Amìı tı ghaewıı sìı t'asìı k'èxa-le tı wet'à ts'eedaa weghàehdı ha.  
\v 7 T'aa hołı̨ı̨ ghǫ hoehnèe sìı eyı hazǫǫ̀ weghǫ̀zhe ha hǫt'e. Wenǫ̀htsı̨ ehłı̨ ha eyıts'ǫ ededı̨ seza elı̨ ha.  
\v 8 Hanìkò dǫ gınì nàtso-le sìı, dǫ ehkw'ı-ahodı gı̨ı̨wǫ-le sìı, dǫjıı, dǫ ełaàgehdee dǫǫ̀, hołı̨ı̨ k'alagedèe dǫǫ̀, ı̨k'ǫǫ̀ gı̨ı̨lı̨ı̨, kwe t'à nǫ̀htsı̨ą hòèlı̨ı̨ ts'ǫ̀ yagehtıı, eyıts'ǫ hots'ìı-dǫǫ̀, hazǫǫ̀ kwe dèk'ǫ̀ǫ whehtǫǫ weta ts'ǫ̀ agedle ha. Nàekeè t'à ełaàgede ha,” sets'ǫ̀ hadı. 
\p  
\v 9 Yak'eet'ı̨į̀ łǫ̀hdı̨ kw'àyį̀ą yìı wet'à hoìla dagoòɂǫ dagıale ı̨lèe sìı k'achı̨ geehɂı̨. Yak'eet'ı̨į̀ ı̨łè sets'ǫ̀ ajà, hasèhdı, “Sek'èı̨tła. Eyı ts'èko sahzǫ̀ą xè honìda ha sìı weghàı̨daà anehłe ha,” sèhdı.  
\v 10 Yedàyeh Nezı̨ı̨ wedahxà yak'eet'ı̨į̀ shìh danı̨ı̨chàa ts'ǫ̀ naseèhtı̨. Yak'e gots'ǫ Kǫ̀godeè Degaı ı̨zhıì ts'ǫ̀ ajà weehɂı̨į̀ asį̀į̀là. Kǫ̀godeè Jerusalem hǫt'e, Nǫ̀htsı̨ gots'ǫ ı̨zhıì ajà.  
\v 11 Nǫ̀htsı̨ wets'ǫ enıìyah deè eyı kǫ̀godeè k'e saı̨dı̨. Sǫǫ̀mbakweè dètìı lanì wèdaat'ı̨, eyıts'ǫ eja sı lanì wenı̨ı̨dàà xègaat'ı̨.  
\v 12 Eyı kǫ̀godeè wemǫǫ̀ kwı̨į̀ danı̨ı̨chàa nawheɂa. Eyı kwı̨į̀ sìı dekòo xè dagǫǫwà hǫt'e. Eyı kwı̨į̀ wek'e enìı̨tǫ hoònǫ-daats'ǫ̀-nàke whela eyıts'ǫ yak'eet'ı̨į̀ hoònǫ-daats'ǫ̀-nàke enìı̨tǫ k'ègedì. Eyı enìı̨tǫ k'e Israel got'ı̨į̀ gots'ǫ dǫ hoònǫ-daats'ǫ̀-nàke xàɂaa gı̨ı̨lı̨ı̨ sìı gıızì dek'eèhtł'è.  
\v 13 K'àbatsǫ̀ǫ̀ ts'ǫnèe enìı̨tǫ taı whela, chı̨k'è ts'ǫnèe enìı̨tǫ taı whela, sazı̨ ts'ǫnèe enìı̨tǫ taı whela eyıts'ǫ dą̀ą ts'ǫnèe enìı̨tǫ taı whela.  
\v 14 Eyı kǫ̀godeè wemǫǫ̀ kwı̨į̀ danı̨ı̨chàa nıɂàa sìı wets'ǫ yìetł'aà hoònǫ-daats'ǫ̀-nàke hǫt'e. Eyı yìetł'aà whelaa wek'e sahzǫ̀ą wecheekeèdeè hoònǫ-daats'ǫ̀-nàke gıızì dek'eèhtł'è. 
\p  
\v 15 Eyı yak'eet'ı̨į̀ sets'ǫ̀ godee sìı wet'à ìdzàa sǫǫ̀mbaekwo t'à hòèlı̨ı̨ k'eɂa. Eyı wet'à kǫ̀godeè wemǫǫ̀ kwı̨į̀ danı̨ı̨chàa nawheɂa, enìı̨tǫ eyıts'ǫ kǫ̀godeè dàı̨hchoo sìı yexèɂìhdzà ha k'eyeɂa.  
\v 16 Kǫ̀godeè wedzıì dı̨ gǫ̀hłı̨; dàı̨hdoo sìı wexènìı̨hkò. Yak'eet'ı̨į̀ eyı sǫǫ̀mbaekwo dechı̨ t'à kǫ̀godeè xèɂìhdzà ekò ı̨łè-lemì-daats'ǫ̀-sı̨làekw'eènǫ echı̨ haı̨hdo hǫt'e nǫǫ̀, eyıts'ǫ hanìı̨hkò xè hadagǫǫwà hǫt'e.  
\v 17 Kwı̨į̀ danı̨ı̨chàa yexèɂį̀hdzà ekò nàkeakw'eènǫ-daats'ǫ̀-hoònǫ-daats'ǫ̀-ek'ètaı gokè hanìı̨htǫ hǫt'e. Dànì dǫ t'asìı xègìhdzà k'ę̀ę̀ yak'eet'ı̨į̀ yexèɂį̀hdzà.  
\v 18 Eyı kwı̨į̀ danı̨ı̨chàa sìı sǫǫ̀mbakweè wèdaat'ı̨ı̨ t'à hòèlı̨ eyıts'ǫ eyı kǫ̀godeè sǫǫ̀mbaekwo wedeèdlı̨ı̨ wek'e saı̨de t'à hòèlı̨.  
\v 19 Eyı kǫ̀godeè wemǫǫ̀ kwı̨į̀ danı̨ı̨chàa nıɂàa sìı wets'ǫ yìetł'aà sǫǫ̀mbakweè wèdaat'ı̨ı̨ hazǫǫ̀ xàɂaa t'à hòèlı̨. T'akwełǫ̀ǫ̀ yìetł'aà whetǫǫ sìı sǫǫ̀mbakweè wek'e saı̨dı̨ı̨ t'à hòèlı̨, wek'èè yìetł'aà whetǫǫ sìı kwe dèhtł'èe t'à hòèlı̨, taı t'à yìetł'aà whetǫǫ sìı sǫǫ̀mbakweè ı̨t'ǫ̀ t'à hòèlı̨, dı̨ t'à yìetł'aà whetǫǫ sìı sǫǫ̀mbakweè ı̨t'ǫ̀-degoo t'à hòèlı̨,  
\v 20 sı̨làı t'à yìetł'aà whetǫǫ sìı sǫǫ̀mbakweè dek'o-dezǫǫ t'à hòèlı̨, ek'ètaı t'à yìetł'aà whetǫǫ sìı sǫǫ̀mbakweè ejıedoò t'à hòèlı̨, łǫ̀hdı̨ t'à yìetł'aà whetǫǫ sìı sǫǫ̀mbaekwokweè lanıı t'à hòèlı̨, ek'èdı̨ t'à yìetł'aà whetǫǫ sìı sǫǫ̀mbakweè ı̨t'ǫ̀-dèhtł'èe t'à hòèlı̨, łǫǫ̀tǫ t'à yìetł'aà whetǫǫ sìı sǫǫ̀mbakweè dekwoo t'à hòèlı̨, hoònǫ t'à yìetł'aà whetǫǫ sìı sǫǫ̀mbakweè ı̨t'ǫ̀-dezǫǫ t'à hòèlı̨, hoònǫ-daats'ǫ̀-ı̨łè t'à yìetł'aà whetǫǫ sìı sǫǫ̀mbakweè jìek'oò lanıı t'à hòèlı̨, eyıts'ǫ hoònǫ-daats'ǫ̀-nàke t'à yìetł'aà whetǫǫ sìı sǫǫ̀mbakweè dèhtł'è-dezǫǫ t'à hòèlı̨.  
\v 21 Enìı̨tǫ hoònǫ-daats'ǫ̀-nàke sìı sǫǫ̀mbakweè degoo wèdaat'ı̨ı̨ t'à hòèlı̨, enìı̨tǫ ı̨łè zǫ kò sǫǫ̀mbakweè degoo ı̨łè zǫ t'à hòèlı̨. Kǫ̀godeè gonı tı̨lı nıɂàa sìı sǫǫ̀mbaekwo deèdlı̨ı̨ t'à hòèlı̨ eyıts'ǫ eja lanì wenı̨ı̨dàà xègaat'ı̨. 
\p  
\v 22 Eyı kǫ̀godeè gonı Nǫ̀htsı̨kǫ̀-gocho wègaat'ı̨-le, Gonǫ̀htsı̨ t'asìı wegha dìì-le sìı eyıts'ǫ Sahzǫ̀ą gogha Nǫ̀htsı̨kǫ̀-gocho lagı̨ı̨t'e t'à.  
\v 23 Eyı kǫ̀godeè sìı Nǫ̀htsı̨ wets'ǫ enıìyah deè wek'e saı̨dı̨ t'à sa eyıts'ǫ adzęzah wek'e daaɂa-le kò t'asanìle. Hazǫǫ̀ ts'ǫ̀ wek'e dzęh agǫ̀ht'e eyıts'ǫ Sahzǫ̀ą sìı gogha ek'aèk'ǫ dèk'ǫ̀ǫ elı̨ lanì.  
\v 24 Dǫ hazǫǫ̀ xàɂaa wets'ǫ dzęh nı̨ı̨dı̨ı̨ weghàà k'egedè ha, eyıts'ǫ dıı nèk'e k'àowocho t'asìı wèdaat'ı̨ı̨ gıts'ǫ xè eyı nègedè ha.  
\v 25 To agode ha nıìle t'à, eyı kǫ̀godeè wets'ǫ enìı̨tǫ sìı eneèdo hǫı̨lı̨ ha nıìle.  
\v 26 Dǫ hazǫǫ̀ xàɂaa deɂǫ̀ǫ̀ t'asìı gıgha wet'àaɂàa sìı eyı kǫ̀godeè ts'ǫ̀ agele ha.  
\v 27 T'asìı wejıı sìı eyı kǫ̀godeè ts'ǫ̀ adle ha-le, eyıts'ǫ dǫ wı̨ı̨zìı hołı̨ı̨ hohtsı̨ı̨ xè hots'ì godee sìı eyı kǫ̀godeè goyaetła ha-le. Dǫ welǫ whìle ts'ǫ̀ geeda xè Sahzǫ̀ą wenı̨htł'è k'e gıızì dek'eèhtł'èe sìı eyı kǫ̀godeè goyageedè ha. 
\c 22  
\s1 Deh nıɂàa ts'ǫ tı wet'à ts'eeda 
\p  
\v 1 Eyı tł'axǫǫ̀ yak'eet'ı̨į̀ deh nıɂàa ts'ǫ tı wet'à ts'eedaa sìı weghàehdaà asį̀į̀là. Eyı tı sìı eja lanì wenı̨ı̨dàà xègaat'ı̨ eyıts'ǫ Nǫ̀htsı̨ wedaèhchı̨cho gots'ǫ eyıts'ǫ Sahzǫ̀ą sı gots'ǫ tı nı̨ı̨lı̨ hǫt'e.  
\v 2 Eyı kǫ̀godeè tı̨lı-deè nıɂàa tanı deh nı̨ı̨lı̨. Eyı deh nıɂàa sìı webàa į̀ła-ts'ǫ̀ ts'ı wet'à ts'eedaa nàwheɂa. Eyı ts'ı wek'e xo taàt'eè hoònǫ-daats'ǫ̀-nàkeè wek'e jìecho dehshe, sa taàt'eè wek'e jìecho dehshe. Eyıts'ǫ ts'ı wets'ǫ ı̨t'ǫ̀ą t'à dǫ hazǫǫ̀ xàɂaa k'aàt'ıì agede gha hǫt'e.  
\v 3 Ekǫ dǫ wı̨ı̨zìı daı̨ɂa gha wesınìyaetı ha nıìle. Nǫ̀htsı̨ eyıts'ǫ Sahzǫ̀ą gıdaèhchı̨cho eyı kǫ̀godeè wheɂǫ ha eyıts'ǫ wecheekeè gıgha eghàlaeda ha.  
\v 4 Nǫ̀htsı̨ wınì geɂį̀ ha eyıts'ǫ gıts'abeè k'e wıızì dek'eèhtł'è ha.  
\v 5 To agode ha nıìle. Nǫ̀htsı̨ ededı̨ sìı gok'e daaɂa ha ne t'à, dǫ wı̨ı̨zìı ek'aèk'ǫ nıwǫ ha nıìle eyıts'ǫ dǫ wı̨ı̨zìı sadeè nıwǫ ha nıìle. Eyıts'ǫ welǫ whìle ts'ǫ̀ k'àowo gı̨ı̨lı̨ ha. 
\p  
\v 6 Yak'eet'ı̨į̀ sets'ǫ̀ hadı, “Dıı yatı sìı hotıì ehkw'ı hǫt'e, eyıts'ǫ weghàà aahda ha hǫt'e. Nǫ̀htsı̨ sìı gots'ǫ̀ K'àowo hǫt'e, ededı̨ zǫ wedahxà nakwenàoɂǫǫ gogede hǫt'e. Whaà-le-t'ıì dàgode ha sìı wecheekeè gık'èezǫ ha nıwǫ t'à edeyak'eet'ı̨į̀ nets'ǫ̀ yı̨ı̨hɂà hǫt'e,” sèhdı. 
\s1 Whaà-le-t'ıì Zezì jǫ ts'ǫ̀ ade ha 
\p  
\v 7 “Kexoahdı, hòt'a whaà-le-t'ıì jǫ ts'ǫ̀ ahde ha! Dıı enı̨htł'è k'e godı dek'eèhtł'èe sìı hòt'a wek'ę̀ę̀ agode ha. Amìı dıı godı wegha ehkw'ı-ahodıı sìı wexè sìghà hǫt'e.” 
\p  
\v 8 Sı̨ sìı John aht'e; eyı weehɂı̨ xè weèhkw'ǫ hǫt'e. T'asìı hazǫǫ̀ weehɂı̨ xè weèhkw'ǫ tł'axǫǫ̀ yak'eet'ı̨į̀ eyı hazǫǫ̀ weghàehdaà asį̀į̀làa sìı weghàsǫehdı ha wekè gà nàgòıhgè.  
\v 9 Hanìkò sets'ǫ̀ hadı, “Hawı̨ı̨de-le! Nı̨ eyıts'ǫ nèot'ı̨ nakwenàoɂǫǫ gı̨ı̨lı̨ı̨ eyıts'ǫ dǫ hazǫǫ̀ dıı enı̨htł'è weyatıì gıgha ehkw'ı-ahodıı sìı naxıxèht'eè Nǫ̀htsı̨ gha eghàlaehda aht'e. Eyıt'à Nǫ̀htsı̨ zǫ weghàsǫı̨dı!” hasèhdı. 
\p  
\v 10 Eyıts'ǫ hasèhdı, “Eyı enı̨htł'è k'e ayìı dek'eèhtł'èe sìı hòt'a whaà-le-t'ıì wek'ę̀ę̀ agode ha ne t'à dǫ ch'à wek'èı̨dì-le.  
\v 11 Amìı ekǫ-le eghàlaedaa sìı k'èdaà hawet'į̀; amìı hołı̨ı̨ hohtsı̨ı̨ sìı k'èdaà hawet'į̀. Amìı ehkw'ı eghàlaedaa sìı k'èdaà hawet'į̀, eyıts'ǫ amìı degaı k'ę̀ę̀ edaa sìı k'èdaà hawet'è,” hadı. 
\p  
\v 12 “Kexoahdı, hòt'a whaà-le-t'ıì jǫ ts'ǫ̀ ahde ha! Ayìı dǫ ghàehłe ha sìı edexè k'ehłe. Dǫ dànì eghàlagı̨ı̨dà k'èxa t'asìı gıghàehłe ha.  
\v 13 Yatı t'akwełǫ̀ǫ̀ aht'e eyıts'ǫ yatı nǫǫde aht'e; kèhǫǫ̀wo gots'ǫ sehòhɂǫǫ eyıts'ǫ welǫ ts'ǫ̀ sehòhɂǫǫ aht'e. 
\p  
\v 14 “Amìı edeɂeè nedèe k'enagı̨ı̨htsoo sìı gıxè sìghà hǫt'e. Hanì-ı̨dè eyı ts'ı wet'à ts'eedaa wejìecho ghǫ shègezhee gıghàhòt'à ha eyıts'ǫ kǫ̀godeè wèdaat'ı̨ı̨ sìı goyageedèe gıghàhòt'à ha.  
\v 15 Hanìkò hołı̨ı̨-dǫǫ̀ mǫ̀ht'a geèhkw'e ha, ı̨k'ǫǫ̀-gı̨ı̨lı̨ı̨-dǫǫ̀, hołı̨ı̨ k'ę̀ę̀ dǫ k'alagedèe dǫǫ̀, dǫ ełaàgehdee dǫǫ̀, nǫ̀htsı̨ą hòèlı̨ı̨ ts'ǫ̀ yagehtıı dǫǫ̀, eyıts'ǫ hogets'ìı ghageewıı dǫǫ̀, hazǫǫ̀ mǫ̀ht'a geèhkw'e ha. 
\p  
\v 16 “Sı̨ sìı Zezì aht'e. Nǫ̀htsı̨ wecheekeè dıı godı gıts'ǫ̀ anele gha sets'ǫ yak'eet'ı̨į̀ nets'ǫ̀ wııhɂà hǫt'e. K'àowocho Davıd wets'ıhɂǫ̀ǫ-dǫǫ̀ aht'e eyıts'ǫ Dzę Wegòò sìyeh,” Zezì hadı. 
\p  
\v 17 Yedàyeh Nezı̨ı̨ eyıts'ǫ ts'èko honìda ha sìı dıı hagedı, “Hęɂę, gots'ǫ̀ anede!” gedı. Amìı gogeèhkw'ǫǫ sìı, “Hęɂę, gots'ǫ̀ anede!” gedıì welì. Eyıts'ǫ amìı tı ghageewıı sìı tı wet'à ts'eedaa ts'ǫ̀ agııde gà t'asìı k'èxa-le gıìhchı. 
\p  
\v 18 Kexoahdı! Dǫ hazǫǫ̀ dıı enı̨htł'è k'e nadąą̀ xàyaetı gıìkw'oo sìı gıts'ǫ̀ dıı haehsı̨ ha: Amìı dıı enı̨htł'è k'e yatı dek'eèhtł'èe sìı weɂǫ̀ǫ̀ yatı yeta ayį̀į̀là nı̨dè dıı enı̨htł'è k'e hoìla dek'eèhtł'èe sìı t'à Nǫ̀htsı̨ nàyeehkwa ha.  
\v 19 Eyıts'ǫ amìı dıı enı̨htł'è k'e yatı mǫ̀hdaa wedę ayį̀į̀là nı̨dè ts'ı wet'à ts'eedaa eyıts'ǫ kǫ̀godeè degaı gots'ǫ t'asìı wets'ǫ ha ı̨lèe sìı Nǫ̀htsı̨ yeghǫ naìchı ha. Ts'ı wet'à ts'eedaa eyıts'ǫ kǫ̀godeè sìı dıı enı̨htł'è k'e wegodıì dek'eèhtł'è hǫt'e. 
\p  
\v 20 Ededı̨ dıı godı t'à godee sìı dıı hadı, “Hęɂę, whaà-le-t'ıì jǫ nèehtła ha,” hadı. Hęɂę, gots'ǫ̀ K'àowo Zezì, gots'ǫ̀ anede! 
\p  
\v 21 Zezì, gots'ǫ̀ K'àowo, wesǫnıwǫǫ sìı Nǫ̀htsı̨ wets'ǫ dǫ hazǫǫ̀ gıxè welè. Amen.