\id JAS 60JASDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h James 
\mt1 James wenı̨htł'è 
\c 1  
\p  
\v 1 Sı̨ James, Zezì-Krı eyıts'ǫ Nǫ̀htsı̨ gıcheekeè aht'e. Israel got'ı̨į̀ hoònǫ-daats'ǫ̀-nàke xàɂaa gı̨ı̨lı̨ı̨ sìı dıı nèk'e dǫ nàgedèe gota-ts'ǫ̀ agejàa sìı gıts'ǫ̀ eehtł'è. Naxıxè sìghà welè. 
\s1 Hoìla eyıts'ǫ hołı̨ı̨ t'à goèdzà 
\p  
\v 2 Sèot'ı̨ı̨, hoìla łǫ xàɂaa t'à naxeèdzà nı̨dè sıì naxınà welè.  
\v 3 Naxıgha ehkw'ı-ahodı ts'ıhɂǫ̀ naxeèdzà nı̨dè denahk'e naxınì nàtsoò ade ha, eyıts'ǫ enats'ıt'è dahwhǫ ha-le. Eyı wek'èahsǫ hǫt'e.  
\v 4 Įłaà naxınì nàtsoò aahwhǫ nı̨dè deghàà naxıgha ehkw'ı-ahodı ha, eyıts'ǫ nezı̨į̀ eghàlaahda gha t'asìı wı̨ı̨zìı naxıgha dek'aɂį̀ ha-le.  
\v 5 Naxıta dǫ ı̨łè wınì gǫǫzǫ ha nıwǫ nı̨dè Nǫ̀htsı̨ ts'ǫ̀ yawehtı. Hanì-ı̨dè Nǫ̀htsı̨ yınì gǫı̨zǫǫ̀ ayele ha. Ayìı wets'eekèe sìı weɂǫ̀ǫ̀ goghàyele ha hǫt'e, eyıts'ǫ “Ayìıha sı̨ı̨kè?” gòhdı nàgoehɂǫ ha nıìle.  
\v 6 Hanìkò t'asìı weahkè nı̨dè naxınì nàtso xè naxıgha ehkw'ı-ahodı ha hǫt'e, eyıts'ǫ ekìı ahodı dahwhǫ ha nıìle. Dǫ wınì nàtso-le sìı nı̨hts'ı t'à k'etaetı̨ lanì, nàke ts'ǫ̀ nànıwo lanì.  
\v 7 Dǫ hanıı sìı gots'ǫ̀ K'àowo t'asìı t'à yets'àdı ha nıwǫ-le kò.  
\v 8 Wınì nàke dǫǫ̀ elı̨ hǫt'e, eyıt'à t'asìı hazǫǫ̀ ghàlaeda gha wınì nàtso-le hǫt'e. 
\p  
\v 9 Gòet'ı̨ eteèt'ı̨ı̨ sìı Nǫ̀htsı̨ gha dǫ wet'àaɂàa elı̨ t'à sıì wınà ha hǫt'e.  
\v 10 Hanìkò gòet'ı̨ ahxee sìı wesǫǫ̀mbaà t'à dǫ wet'àaɂàa elı̨ nıìle t'à sıì wınà ha hǫt'e. Dǫ ahxee sìı ı̨t'ǫ̀chàa lanì whaà-lea ts'ǫ̀ zǫ nezı̨į̀ wègaat'ı̨, eyı tł'axǫǫ̀-ı̨dè egǫ.  
\v 11 Sadeè nàtsoo wexèıdı nı̨dè eyı ı̨t'ǫ̀chàa sìı egǫ xè weɂı̨t'ǫ̀ą nàtł'ì, eyıts'ǫ wèdaat'ı̨-le at'į̀. Dǫ ahxee eyı lanì hǫt'e, ı̨łaà edılaà ghàlaeda et'ıì wewhìle ade ha. 
\p  
\v 12 Dǫ weèdzà t'à wexè hoìla kò wınì nàtso-le ade-le sìı wexè sìghà hǫt'e. Ayìı t'à weèdzàa sìı yeghǫèhnǫ nı̨dè wek'èxa welǫ whìle ts'ǫ̀ edaà awedle ha. Amìı Nǫ̀htsı̨ ghǫnegeètǫǫ sìı hanì edeyatıì goghàı̨ɂǫ hǫt'e. 
\p  
\v 13 Dǫ hołı̨ı̨ t'à weèdzà nı̨dè, “Nǫ̀htsı̨ asehɂı̨,” hadı ha-le. Nǫ̀htsı̨ ededı̨ sìı hołı̨ı̨ t'à weèdzà ha hòɂǫ nıìle, eyıts'ǫ ededı̨ hołı̨ı̨ t'à dǫ èhdzà nıìle.  
\v 14 Hanìkò dǫ edınì t'à hołı̨ı̨ nıwǫ ts'ıhɂǫ̀ weèdzà hǫt'e. Hołı̨ı̨ nàowoò ts'ıɂǫ̀ yeehtè lanì.  
\v 15 Dǫ hołı̨ı̨ ghaewıı sìı yek'ę̀ę̀ eghàlaeda, eyıts'ǫ k'èdaà hołı̨ı̨ nàowoò wegha nàtso at'į̀ t'à, eyı dǫ yet'à ełaàwı hǫt'e. 
\p  
\v 16 Sèot'ı̨ı̨, edeghǫyaahɂà sǫ̀ǫ̀.  
\v 17 T'asìı hazǫǫ̀ nezı̨ı̨ xè wedeèdlı̨ı̨ gots'ǫ̀ at'ı̨ı̨ sìı ı̨dòo yak'e gots'ǫ hǫt'e. Nǫ̀htsı̨-Gotà, sa eyıts'ǫ whǫ̀ whehtsı̨ı̨ sìı gots'ǫ̀ ayehɂı̨ hǫt'e. Nǫ̀htsı̨ sìı, wınì nàke nıìle, edınì eładı̨į̀ ayehɂı̨ nıìle.  
\v 18 Weyatıì ehkw'ıı t'à k'achı̨ gogǫ̀hłı̨ gha gòį̀hchì hǫt'e. Hanì-ı̨dè dıı nèk'e t'asìı hazǫǫ̀ whehtsı̨ı̨ gots'ǫ sìı goxı̨ xàè wets'ǫ ts'ı̨ı̨lı̨ ha agǫ̀ǫ̀là. 
\s1 Ets'eèhkw'ǫ xè wek'ę̀ę̀ k'ehots'eɂa 
\p  
\v 19 Sèot'ı̨ı̨, dıı yatı wedaànıahdè: Dǫ hazǫǫ̀ ekòet'ıì egeèhkw'ǫ welì, hanìkò ekòet'ıì xàyagııhtı-le, eyıts'ǫ ı̨whąą̀ gìch'e welè-le.  
\v 20 Dǫ ìch'e nı̨dè Nǫ̀htsı̨ wınì k'ę̀ę̀ ehkw'ı eda ha nıìle.  
\v 21 Eyıt'à hołı̨ı̨ nàowoò hazǫǫ̀ wet'à hołı̨ı̨ k'ę̀ę̀ k'ehoahɂaa sìı wedę aahłe. Nǫ̀htsı̨ yatıì naxıdzeè yìı adlàa sìı k'èeweèt'ı̨ lanì wek'ę̀ę̀ aahda, eyı wet'à edaxànaxeetè ha dìì-le. 
\p  
\v 22 Ekìı yatı zǫ aàhkw'ǫ-le, hanìkò wek'ę̀ę̀ aahda, hanì-ı̨dè edeghǫyaahɂà ha-le.  
\v 23 Amìı Nǫ̀htsı̨ weyatıì yeèhkw'ǫ, hanìkò yek'ę̀ę̀ eda-le sìı edeghǫyaahɂà hǫt'e. Eyı dǫ sìı wet'à edeghàts'eeda t'à edeghàeda lanì.  
\v 24 Edeghàı̨dà tł'axǫǫ̀ dànì wègaat'ı̨ı̨ sìı ekòet'ıì yenadì-le.  
\v 25 Nàowo wedeèdlı̨ı̨ sìı hołı̨ı̨ gots'ǫ̀ k'àowo-le ayehɂı̨ hǫt'e. Ayìı nezı̨į̀ ts'ıìkw'oo sìı t'aats'ǫǫ̀ wenats'edì xè wek'ę̀ę̀ eghàlats'eeda nı̨dè goxè sìghà hǫt'e. 
\p  
\v 26 Dǫ Nǫ̀htsı̨ ghǫ wınì nàtsoò edeewǫ, hanìkò edeyatıì xoehdı-le nı̨dè edeghǫyaeɂà hǫt'e eyıts'ǫ ayìı wegha ehkw'ı-ahodıı sìı wet'àaɂà-le hǫt'e.  
\v 27 Nǫ̀htsı̨ gogha ehkw'ı-ahodı nı̨dè Nǫ̀htsı̨-Gotà dıı hanì wegha eghàlats'eedaa sìı wınì k'ę̀ę̀ degaı xè hołı̨ı̨ dę hǫt'e: eyı sìı ts'ınake eyıts'ǫ ts'èko gıdǫǫ̀ ełaı̨dèe gıgha hoìla sìı gıts'àts'edı, eyıts'ǫ dıı nèk'e nàowołı̨ı̨ ch'à edek'èts'edì. 
\c 2  
\s1 Dǫ mǫ̀hdaa zǫ nezı̨į̀ gıts'ǫ̀ naahɂa-le 
\p  
\v 1 Sèot'ı̨ı̨, gots'ǫ̀ K'àowo Zezì-Krı wexè enıìyah hòɂǫǫ sìı naxıgha ehkw'ı-ahodı t'à, dǫ mǫ̀hdaa zǫ nezı̨į̀ gıts'ǫ̀ naahɂa-le, dǫ hazǫǫ̀ naxıgha ełègı̨ı̨ht'e ha hǫt'e.  
\v 2 Edahxǫ dǫ goht'ǫ dètìı t'à-at'ı̨ xè welakw'ǫǫ̀ k'e sǫǫ̀mbaekwo lamǫ̀ǫ wheɂǫǫ sìı ełeahdìı-kǫ̀ goyaèhtła, eyıts'ǫ edahxǫ dǫ-teèt'ı̨ı̨ goht'ǫts'ıa t'à-at'ı̨ ededı̨ sı ełeahdìı-kǫ̀ goyaèhtła nı̨dè  
\v 3 dǫ ahxee wègaat'ı̨ı̨ sìı nezı̨į̀ wets'ǫ̀ naahɂa xè wets'ǫ̀ dıı haahdı, “Jǫ daèhchı̨ nezı̨ı̨ negha whetǫ,” wèahdı, hanìkò dǫ-teèt'ı̨ı̨ ts'ǫ̀ dıı haahdı, “Nı̨ ekǫ nàąwo,” hanì-le-ı̨dè “Sekè gà dechı̨tè k'e wheęda,” wèahdı.  
\v 4 Hanì k'ehoahɂa nı̨dè ekǫ-le eghàlaahda hǫt'e. Naxèot'ı̨ ı̨łè wet'àhoòɂà eyıts'ǫ ı̨łè wet'àhoòɂà-le k'ę̀ę̀ gıts'ǫ̀ k'ehoahɂa. Haaht'ı̨ nı̨dè hołı̨ı̨ nàowoò k'ę̀ę̀ ełesınìyaahtı hǫt'e. 
\p  
\v 5 Sèot'ı̨ı̨, seàhkw'ǫ: dǫ-teèt'ı̨ı̨ gı̨ı̨lı̨ı̨ sìı gıgha ehkw'ı-ahodı ha Nǫ̀htsı̨ gòį̀hchì hǫt'e, eyıt'à gıxè sìghà hòɂǫ hǫt'e. Dıı nèk'e gogha dǫ-teèt'ı̨ı̨ gı̨ı̨lı̨ı̨ kò, Nǫ̀htsı̨ goghǫ dıı hadı, “Gıgha ehkw'ı aehsı̨ xè seghǫnegeètǫ t'à dǫ ahxee gı̨ı̨lı̨ ha eyıts'ǫ senàowoò k'ę̀ę̀ hòɂǫǫ gıghǫ̀t'à ha,” hadı.  
\v 6 Naxı̨ sìı dǫ-teèt'ı̨ı̨ į̀į̀zhagı̨ı̨lı̨į̀ agıahɂı̨. Dǫ ahxee gı̨ı̨lı̨ı̨ sìı naxıt'ǫ̀ǫ̀ ahxe gìhłè hǫt'e. Ededı̨ sìı nàyaetıı-kǫ̀ ts'ǫ̀ anaxegehɂı̨ hǫt'e.  
\v 7 Eyı hanıı dǫ sìı naxıts'ǫ̀ K'àowo elı̨ı̨ sìı wıızì jıı gehtsı̨. 
\p  
\v 8 Nǫ̀htsı̨ Nı̨htł'è k'e dıı hanì dek'eèhtł'èe, “Edeghǫnıahtǫ k'ę̀ę̀ naxèot'ı̨ ghǫnıahtǫ.” Eyı nàowo nezı̨ı̨ wek'èahdì nı̨dè ehkw'ı eghàlaahda hǫt'e.  
\v 9 Hanìkò dǫ mǫ̀hdaa zǫ gıts'ǫ̀ nezı̨į̀ naahɂa nı̨dè hołı̨ı̨ hoahtsı̨ hǫt'e, eyıts'ǫ gonàowoò k'ę̀ę̀ nàowo-k'eezhìı-dǫǫ̀ lanì naxısınìyaetı hǫt'e.  
\v 10 Nàowo hazǫǫ̀ k'èahdì hanìkò nàowo ı̨łè zǫ nàahzhì nı̨dè nàowo hazǫǫ̀ k'eahzhì gha naxısınìyaetı ha hǫt'e.  
\v 11 Nǫ̀htsı̨ dıı hadı ı̨lè, “Ełexè hołı̨ı̨ hoahtsı̨-le,” eyıts'ǫ, “Dǫ ełaahwhı-le,” hadı ı̨lè. Ełexè hołı̨ı̨ hoahtsı̨-le, hanìkò dǫ ełaahwhı nı̨dè Nǫ̀htsı̨ wenàowoò nàezhìı dǫǫ̀ k'ę̀ę̀ naxııtà hǫt'e. 
\p  
\v 12 Nàowo wet'à hołı̨ı̨ gots'ǫ̀ k'àowo-le sìı wek'ę̀ę̀ aahda. Eyı nàowo weghàà naxısınìyaetı ha ts'ıhɂǫ̀, eyı nàowo k'ę̀ę̀ nezı̨į̀ goahde eyıts'ǫ wek'ę̀ę̀ k'ehoahɂa.  
\v 13 Dǫ wedzeè eteèɂı̨-le sìı wesınìyaetıı dzęę̀ k'e nı̨dè eteweèɂı̨ ha nıìle. Ełets'ǫ̀ godzeè eteèɂı̨ı̨ sìı ełesınìyats'ehtı nahk'e elı̨ hǫt'e! 
\s1 Gogha ehkw'ı-ahodı eyıts'ǫ wek'ę̀ę̀ k'ehots'eɂa 
\p  
\v 14 Sèot'ı̨ı̨, dǫ, “segha ehkw'ı-ahodı,” hadı hanìkò yek'ę̀ę̀ eghàlaeda-le nı̨dè wegha wet'àaɂà-le hǫt'e. “Segha ehkw'ı-ahodı,” hadı zǫ t'à edaxàweetè ha nıìle.  
\v 15 Edahxǫ naxıta gots'ǫ dǫzhìı hanì-le-ı̨dè ts'èko goht'ǫ wets'ǫ-le xè yeghǫ shètı̨ı̨ whìle nı̨dè,  
\v 16 naxı̨ ı̨łè yets'ǫ̀ dıı hadı, “Nexè sìghà welè; negha gòkǫ̀ xè weghǫ shèı̨tı̨ı̨ negha deghàà welè,” yèhdı, hanìkò goht'ǫ eyıts'ǫ yeghǫ shètı̨ı̨ t'à yets'àı̨dı-le nı̨dè eyı t'asìı nıìle.  
\v 17 Eyı lanì, “gogha ehkw'ı-ahodı,” ts'edı, hanìkò wek'ę̀ę̀ eghàlats'eeda-le nı̨dè, k'ètł'ǫ̀ gogha ehkw'ı-ahodı hǫt'e. 
\p  
\v 18 Hanìkò dǫ sets'ǫ̀ dıı hadı nı̨dè, “Nı̨ negha ehkw'ı-ahodı, hanìkò sı̨ nezı̨į̀ eghàlaehda,” sèhdı nı̨dè, wets'ǫ̀ dıı haehsı̨ ha. “Negha ehkw'ı kò wek'ę̀ę̀ eghàlaı̨da-le sìı weghàıhdà, ekò sı̨ ayìı dàhɂı̨ weghàà segha ehkw'ı-ahodıı sìı weghàı̨daà anehłe ha,” haehsı̨ ha.  
\v 19 Nǫ̀htsı̨ ı̨łè zǫ gǫ̀hłı̨ı̨ sìı negha ehkw'ı-ahodı. Ehkw'ı aneewǫ hǫt'e! Įnìłı̨ı̨ kò ededı̨ sı eyı gıgha ehkw'ı hǫt'e, eyıt'à geejı̨ xè gıts'ehłı̨ laget'į̀. 
\p  
\v 20 Gonezǫ-le dìì! Gogha ehkw'ı-ahodı hanìkò wek'ę̀ę̀ ts'eeda-le nı̨dè wet'àhoòɂà nıìle. Dıı weghàà wek'èı̨zǫ anııhłe:  
\v 21 Gocho Abraham wedaànıahdè. Tso ełeka nèyı̨ı̨la k'e Nǫ̀htsı̨ ts'ǫ̀ edeza Isaac ełaehwhı xè yek'eehk'ǫ̀ ha sınìhòı̨ɂǫ, hajà t'à dǫ ehkw'ı eda gha wııtà hǫt'e.  
\v 22 Wegha ehkw'ı-ahodı xè yek'ę̀ę̀ eghàlaı̨dàa sìı ełexè at'ı̨ hǫt'e. Yek'ę̀ę̀ eghàlaı̨dà t'à wegha ehkw'ı-ahodıı sìı deghàà ajà hǫt'e.  
\v 23 Nǫ̀htsı̨ Nı̨htł'è k'e dànì dek'eèhtł'èe sìı wek'ę̀ę̀ agòjà hǫt'e. Dıı hanì dek'eèhtł'è: “Abraham Nǫ̀htsı̨ yegha ehkw'ı adı ts'ıhɂǫ̀, ehkw'ı eda gha wııtà ayį̀į̀là,” eyıts'ǫ Nǫ̀htsı̨ weàgı̨ą wìyeh.  
\v 24 Eyı ts'ıhɂǫ̀ dǫ dànì eghàlaeda weghàà dǫ ehkw'ı eda k'ę̀ę̀ wııtà hǫt'e, wegha ehkw'ı-ahodı zǫ t'à nıìle. 
\p  
\v 25 Eyı xèht'eè ts'èkojıı Rahab wìyeh ededı̨ kò wexè hagòjà. Israel gots'ǫ nàeɂį̀ı̨-dǫǫ̀ nàke edekǫ̀ goyagǫ̀ǫwa gà edèot'ı̨ naàhtǫ et'ıì t'asį̀ı̨ nagoèhɂà ı̨lè. Hanì eghàlaı̨da t'à ehkw'ı eda k'ę̀ę̀ wııtà hǫt'e.  
\v 26 Gozhį̀į̀ wets'ǫ ı̨nì wedę nı̨dè ełaı̨wo hǫt'e, eyı lanì gogha ehkw'ı-ahodı wek'ę̀ę̀ ts'eeda-le nı̨dè gogha wet'àaɂà-le hǫt'e. 
\c 3  
\s1 Gowalıì t'à dàts'edıı sìı wehots'ııhdı ha hǫt'e 
\p  
\v 1 Sèot'ı̨ı̨, dǫ-hoghàehtǫǫ-dǫǫ̀ aahłı̨ ha k'ehoahɂa-le. Dǫ-hoghàehtǫǫ ts'ı̨ı̨lı̨ nı̨dè dǫ eyıì-le gınahk'e hòtł'ò gosınìyaetı ha, wek'èahsǫ hǫt'e.  
\v 2 Goxı̨ dǫ ts'ı̨ı̨lı̨ı̨ sìı ekǫ-le eghàlats'eeda hǫt'e. Dǫ edewà t'à ekǫ-le xàyahtı-le sìı deghàà dǫ nezı̨ı̨ elı̨ hǫt'e, eyıts'ǫ ekǫ-le eghàlaeda ch'à edezhį̀į̀ hazǫǫ̀ k'èdì ha dìì-le. 
\p  
\v 3 Tłı̨cho wewà yìı satsǫ̀ whetǫǫ̀ ats'ehɂı̨ nı̨dè, wet'à tłı̨cho gok'èı̨t'eè ats'ehɂı̨. Eyı satsǫ̀ t'à tłı̨cho edı̨į̀ ts'ǫ̀ ade ha wets'ı̨ı̨hwhǫǫ sìı ts'ǫ̀ at'ı̨ hǫt'e. \fig Tłı̨cho wewà yìı satsǫ̀ wheɂǫǫ|src="HK004D.tif" size="span" ref="3.3" \fig* 
\v 4 Eyıts'ǫ elàcho sı wedaànıahdè. Sıì nechà eyıts'ǫ nı̨hts'ı nàtsoo t'à nàeda, hanìkò amìı elà k'èdìı sìı elàht'oò nechà-lea t'à elà k'èdì hǫt'e.  
\v 5 Eyı lanì gowalıì t'asìı nechà-lea gok'e wheɂǫ hǫt'e, hanìkò wet'à t'asìı deè ghǫ xàdahots'edì. Kǫ̀kwıì nechà-lea kò wet'à dèè gok'eek'ǫ̀ ha dìì-le.  
\v 6 Gozhį̀į̀ k'e t'asìı whelaa gots'ǫ sìı gowalıì denahk'e hołı̨ı̨-deè hǫt'e. Wet'à edegha hoìla hots'ehtsı̨ eyıts'ǫ wet'à godıhołè. Gowalıì sìı kǫ̀ dèk'ǫ̀ǫ lanì wet'à t'asìı hazǫǫ̀ k'eek'ǫ̀, eyıts'ǫ wehłı̨kǫ̀ gots'ǫ kǫ̀ t'à gowalıì dìtła lanì. 
\p  
\v 7 Tıts'aàdìı hazǫǫ̀ xàɂaa, t'asìı yat'a k'edèe, gòo eyıts'ǫ tı yìı t'asìı nàdèe, eyı hazǫǫ̀ dǫ hoghàgogeèhtǫ t'à gok'èagı̨ı̨t'e.  
\v 8 Hanìkò dǫ wı̨ı̨zìı gowalıì gok'èı̨t'eè ayele ha dìì. T'aats'ǫǫ̀ wet'à hołı̨ı̨ hots'ehtsı̨, nàèdıłı̨ı̨ weyìı dagoòɂǫ lanì hǫt'e. 
\p  
\v 9 Gowalıì t'à Nǫ̀htsı̨-Gotà weghàsǫts'eedı, hanìkò eyı gowalıì et'ıì t'à dǫ Nǫ̀htsı̨ k'ę̀ę̀ gıhòèlı̨ı̨ sìı gıts'ǫ̀ nàdahots'eeɂà.  
\v 10 Gowà et'ıì t'à Nǫ̀htsı̨ weghàsǫts'eedı eyıts'ǫ wet'à dǫ ts'ǫ̀ nàdahots'eeɂà. Sèot'ı̨ı̨, hanì ha dìì.  
\v 11 Tık'è ı̨łè zǫ gots'ǫ sìı tı nezı̨ı̨ eyıts'ǫ dewatì xàetł'ì nıìle.  
\v 12 Sèot'ı̨ı̨, jìek'oò ı̨chį̀ghoò ta dehshe nıìle, eyıts'ǫ edaghoò jìek'ots'ıì k'e dehshe nıìle. Eyı xèht'eè, tı nezı̨ı̨ eyıts'ǫ dewatì sı tık'è ı̨łè gots'ǫ xàetł'ò nıìle. 
\s1 Gots'ı̨ı̨zǫ eyıts'ǫ wek'ę̀ę̀ k'ehots'eɂa 
\p  
\v 13 Naxıta dǫ gǫǫzǫ xè t'asìı nıedì edeewǫ nı̨dè ehkw'ı eda t'à wègaat'ı̨į̀ ayııle, eyıts'ǫ gǫǫzǫ t'à k'èeweèt'ı̨ k'ę̀ę̀ dǫ ts'ǫ̀ nezı̨į̀ eghàlaıdà.  
\v 14 Hanìkò ełeghǫ ts'oxoahdı xè dǫ wet'àaɂàa edaahtsı̨ nı̨dè goahsǫ nıìle. Edeghǫ xàdahoahdì-le, eyıts'ǫ nàowo ehkw'ıı sìı wedę aahłe-le.  
\v 15 Hanì gots'ı̨ı̨zǫǫ̀ k'ehots'eɂaa sìı yak'e gots'ǫ nıìle, dıı nèk'e gots'ǫ hǫt'e. Nǫ̀htsı̨ wets'ǫ nıìle, wehłı̨ı̨ wets'ǫ hǫt'e.  
\v 16 Dǫ ełeghǫ sıì ts'ohogeedı xè gıt'àhoòɂà edegeetsı̨ nı̨dè dǫ xè nàdahoowo hǫt'e, eyıts'ǫ hołı̨ı̨ hazǫǫ̀ xàɂaa hogehtsı̨ hǫt'e. 
\p  
\v 17 Hanìkò wet'à gots'ı̨ı̨zǫǫ sìı yak'e gots'ǫ hǫt'e nı̨dè, wet'à degaı ats'et'į̀, wet'à ts'èwhı̨ welè hats'ı̨ı̨wǫ, ełets'ǫ̀ godzeè nezı̨ı̨ ha ts'ı̨ı̨wǫ, ełek'èats'ı̨ı̨t'e ha ts'ı̨ı̨wǫ, ełets'ǫ̀ godzeè eteèɂı̨, ełets'ǫ̀ nezı̨į̀ eghàlats'eeda, dǫ wet'àaɂàa zǫ ts'ǫ̀ nezı̨į̀ nats'eɂa-le, eyıts'ǫ ehkw'ı ełets'ǫ̀ nats'eɂa.  
\v 18 Dǫ ełexè ts'èwhı̨į̀ hogehtsı̨ı̨ sìı dǫ ehkw'ı geedaà agogele hǫt'e. 
\c 4  
\s1 Nǫ̀htsı̨ ghàdeahtè xè wek'èaht'e 
\p  
\v 1 Ayìı ts'ıhɂǫ̀ ełets'ǫ̀ ààhch'e xè ełek'èch'a aahdı? Naxıdzeè yìı hołı̨ı̨ nàowoò naxık'alawo t'à ełets'ǫ̀ ààhch'e hǫt'e.  
\v 2 T'asìı łǫ dahwhǫ hanìkò naxıghǫ̀t'à hǫı̨lı̨-le. Dǫ eyıì-le t'asìı gıts'ǫ sìı naxıdzeè t'à weahwhǫ hanìkò naxıghaelı̨ ha dìì, eyıt'à dǫ ełaahwhı xèht'e lanì. Ełets'ǫ̀ naxınì-le xè ełetawhıahdè. Nǫ̀htsı̨ weahkè-le ts'ıhɂǫ̀ t'asìı naxıghǫ̀t'à nıìle.  
\v 3 Weahkè sǫnı kò t'asìı naxıghǫ̀t'à-le nı̨dè naxınì ekǫ-le t'à weahkè ts'ıhɂǫ̀ hǫt'e. T'asìı naxıghǫ̀t'ǫ nı̨dè sìgoèt'ı̨ı̨ zǫ ts'ǫ̀ wek'ehoahwhı ha dahwhǫ. 
\p  
\v 4 Naxı̨ sìı Nǫ̀htsı̨ k'èch'a aaht'ı̨ hǫt'e. Dıı nèk'e gots'ǫ dǫ gıàgı̨ą ts'ı̨ı̨lı̨ nı̨dè Nǫ̀htsı̨ wedzats'ı̨ı̨hwhǫ hǫt'e, wek'èahsǫ-le nì? Amìı dıı nèk'e ts'ǫ nàowołı̨ı̨ k'ę̀ę̀ at'ı̨ı̨ sìı Nǫ̀htsı̨ ts'ǫ̀ xànıɂaà ade ha hǫt'e.  
\v 5 Dıı hanì Nǫ̀htsı̨ Nı̨htł'è k'e dek'eèhtł'è, “Wets'ǫ Įnì Degaı godzeè yìı nàdè ayį̀į̀là, wets'ǫ Įnì Degaı deghàà wets'ǫ ts'ı̨ı̨lı̨ ha goı̨hwhǫ hǫt'e.” Dıı hanì dek'eèhtł'èe sìı ekìı ahodı dahwhǫ nì?  
\v 6 Hanìkò edesǫnıwǫǫ̀ denahk'e gots'ǫ̀ ayehɂı̨ hǫt'e. Hanì ts'ıhɂǫ̀ Nǫ̀htsı̨ Nı̨htł'è dıı hadı: 
\mi \qt “Nǫ̀htsı̨ sìı dǫ xàhodì k'èch'a at'ı̨, hanìkò dǫ k'èeweèt'ı̨ı̨ elı̨ı̨ sìı ts'ǫ̀ wedzeè sǫnıwǫ hǫt'e,” dek'eèhtł'è.\qt* 
\p  
\v 7 Eyıt'à Nǫ̀htsı̨ ghàdeahtè xè wek'èaht'e. Wehłı̨ı̨ ch'à edek'èahdì, hanì-ı̨dè naxıts'ǫǫ̀ naetła ha.  
\v 8 Nǫ̀htsı̨ ts'ǫ̀ nıwà-le aahde, hanì-ı̨dè ededı̨ sı naxıts'ǫ̀ nıwà-le ade ha. Naxı̨ hołı̨ı̨-hoahtsı̨ı̨-dǫǫ̀ aaht'ee sìı naxıhołı̨į̀ wedę aahłe, eyıts'ǫ naxınì nàke laaht'ee sìı naxıdzeè degaı aahłe.  
\v 9 Edek'eahłı̨ t'à naxıdzeè nànııtì xè hòtł'ò aahtse. Nàɂaahdlò nı̨dè dıì aahtse, naxınà nı̨dè dıì ts'ǫǫ̀dahwhǫ.  
\v 10 Nǫ̀htsı̨ wenadąą̀ edek'eahłı̨ nı̨dè naxıts'àdı xè naxıxè sìghà hòɂǫ ayele ha hǫt'e. 
\p  
\v 11 Sèot'ı̨ı̨, ełıızì jıı aahtsı̨-le. Amìı edèot'ı̨ ghǫ gode, hanì-le-ı̨dè yesınìyaehtıı sìı, Nǫ̀htsı̨ nàowoò k'èch'a gode xè yesınìyaehtı hǫt'e. Nǫ̀htsı̨ nàowoò wesınìyaahtı nı̨dè wenàowoò k'ę̀ę̀ aahda nıìle, wek'èch'a goahde hǫt'e.  
\v 12 Nǫ̀htsı̨ zǫ gogha nàowo whehtsı̨ xè gosınìyaehtıı elı̨ hǫt'e, ededı̨ zǫ edaxàgole ha, hanì-le-ı̨dè godıhohtsı̨ ha. Hanìkò naxı̨ sìı naxèot'ı̨ gısınìyaahtı ha naxıghàhòt'ǫ nıìle. 
\s1 Ayìı dàahłe ha sìı ghǫ xàdahoahdì-le 
\p  
\v 13 Seàhkw'ǫ; naxı̨ mǫ̀hdaa dıı haahdı, “Dıı dzęę̀ hanì-le-ı̨dè satsǫ eyıì-le kǫ̀ta gòlaa ts'ǫ̀ ats'ede ha. Įłè xo ekǫ nàts'edè gà ekǫ eghàlats'eeda ha, eyıts'ǫ sǫǫ̀mba łǫ ts'ehtsı̨ ha,” dahdı.  
\v 14 Ayìıha hanì goahde? Satsǫ dàgode ha sìı wek'èahsǫ nıìle. Whaà-lea gots'ǫ̀ ɂàh gòhłè eyı tł'axǫǫ̀-ı̨dè dàwhìdì at'į̀, eyı laaht'e.  
\v 15 Ehkw'ı goahde xè dıı haahdı welì, “Gots'ǫ̀ K'àowo hanıwǫ nı̨dè, ts'eedaa xè dıı hats'ele ha, hanì-le-ı̨dè eyı hats'ele ha,” haahdı welì.  
\v 16 Hanìkò naxı̨ sìı xàdahoahdì lanì goahde. Hanì xàdahots'edìı sìı hołı̨ı̨ hots'ehtsı̨ hǫt'e.  
\v 17 Amìı ehkw'ı eghàlaeda ha yek'èezǫ kò yek'ę̀ę̀ eghàlaeda-le nı̨dè hołı̨ı̨ hoehtsı̨ hǫt'e. 
\c 5  
\s1 Dǫ ahxee gı̨ı̨lı̨ı̨ sìı edexogııhdı welì 
\p  
\v 1 Naxı̨ dǫ ahxee aahłı̨ı̨ sìı seàhkw'ǫ. Naxıxè hoìla agode ha t'à hòtł'ò aahtse.  
\v 2 T'asìı hazǫǫ̀ wèdaat'ı̨ı̨ naxıts'ǫ sìı ı̨hjıì ajà, eyıts'ǫ yììda naxıgoht'ǫǫ̀ gı̨ı̨ɂà.  
\v 3 Naxıts'ǫ sǫǫ̀mbaekwo eyıts'ǫ sǫǫ̀mba degoo hazǫǫ̀ ek'eèhtsǫ̀ ajà. T'asìı hazǫǫ̀ ek'eèhtsǫ̀ǫ sìı weghàà t'asìı ghǫ aahdı-le ı̨lèe naxık'èhoedzǫ ha. Kǫ̀ t'à naxıkwǫ̀ k'eek'ǫ̀ lanì ha. Nǫǫde dzęę̀ gha t'asìı hazǫǫ̀ xàɂaa nàwhahtsı̨ hǫt'e.  
\v 4 Seàhkw'ǫ! Dǫ naxıdèè k'e t'asìı dehshee nàgı̨ı̨htsı̨ı̨ sìı gıts'àɂaahdì-le t'à naxısınìyaetı hǫt'e. Dǫ t'asìı dehshee naxıgha nàgehtsı̨ı̨ sìı yagìtse t'à, gots'ǫ̀ K'àowo t'asìı wegha dìì-le sìı goèhkw'ǫ hǫt'e.  
\v 5 Dıı nèk'e dǫ ahxee k'ę̀ę̀ aahda, eyıts'ǫ t'asìı hazǫǫ̀ edegha zǫ wet'à-aaht'ı̨. Tıts'aàdìı ełaàgıìhwhıı gha łek'à agehɂı̨ lanì gosınìyaetıı dzęę̀ gha dǫ ahxee edèwhahtsı̨.  
\v 6 Dǫ ekǫ-le hogèhtsı̨-le xè naxık'èch'a aget'ı̨-le kò gısınìyaahtı xè ełaàgìahde hǫt'e. 
\s1 Naxıgha hoìla nı̨dè wexè ts'èwhı̨į̀ daahɂa 
\p  
\v 7 Sèot'ı̨ı̨, gots'ǫ̀ K'àowo jǫ anade ts'ǫ̀ ts'èwhı̨į̀ naahɂı̨. Dèè-goehshee-dǫǫ̀ sìı wedèè k'e t'asìı dehshee gha naèhɂı̨ı̨ sìı wedaànıahdè. Łık'è eyıts'ǫ xat'ǫ̀ chǫh agode gha ts'èwhı̨į̀ naèhɂı̨ hǫt'e.  
\v 8 Eyı lanì ts'èwhı̨į̀ naahɂı̨ xè naxınì nàtsoò aahwhǫ, gots'ǫ̀ K'àowo whaà-le-t'ıì jǫ ts'ǫ̀ anade ha ne t'à.  
\v 9 Sèot'ı̨ı̨, ełek'èch'a goahde-le. Haaht'ı̨ nı̨dè naxısınìyaetı ha. Dǫ-sınìyaehtıı-dǫǫ̀ hòt'a naxısınìyahtı ha nìkw'o! 
\p  
\v 10 Sèot'ı̨ı̨, ı̨nę̀ę gots'ǫ nakwenàoɂǫǫ sìı gots'ǫ̀ K'àowo wedahxà gogı̨ı̨de k'èxa ts'èwhı̨į̀ dagı̨ı̨ɂà ı̨lè. Eyı lanì ts'èwhı̨į̀ daahɂa ha hǫt'e.  
\v 11 Amìı edınì nàtsoò ayį̀į̀hwhǫ xè yeghǫ nat'è-le sìı wexè sìghà hòɂǫ, wek'èahsǫ hǫt'e. Job wegodıì k'èahsǫ sǫnaà; Nǫ̀htsı̨ ts'ǫ̀ edınì nàtsoò ayį̀į̀hwhǫ, eyıt'à nǫǫde ts'ǫ̀ gots'ǫ̀ K'àowo yexè eładı̨į̀ hòɂǫǫ̀ ayį̀į̀là hǫt'e. Gots'ǫ̀ K'àowo sìı gots'ǫ̀ wedzeè sıì eteèɂı̨ hǫt'e. 
\p  
\v 12 Sèot'ı̨ı̨, dıı wedaànıahdè: Yak'e wedahxà, dıı nèk'e wedahxà, hanì-le-ı̨dè t'asìı wı̨ı̨zìı dahxà yatı nàtsoo aahtsı̨ ha nıìle. “Hęɂę,” dahdı nı̨dè wek'ę̀ę̀ eghàlaahda, eyıts'ǫ “Į̀le,” dahdı nı̨dè wek'ę̀ę̀ eghàlaahda. Haaht'ı̨-le nı̨dè wek'èxa naxısınìyaetı ha hǫt'e. 
\s1 Naxıgha ehkw'ı-ahodı k'ę̀ę̀ yaahtı 
\p  
\v 13 Dǫ wegha hoìla nı̨dè yeghǫ yawehtı. Naxıta dǫ wınà nı̨dè shı̨ t'à Nǫ̀htsı̨ ghàsǫedı welè.  
\v 14 Dǫ eyaelı̨ nı̨dè Nǫ̀htsı̨ wecheekeè gha k'aodèe gı̨ı̨lı̨ı̨ sìı gokayawehtı. Gots'ǫ̀ K'àowo wedahxà degaı-tłeè wek'e agele xè gık'eèyahtı ha hǫt'e.  
\v 15 Gınì nàtsoo t'à yagehtı nı̨dè eyı dǫ eyaelı̨ı̨ sìı Nǫ̀htsı̨ k'aàt'ıì ayele ha, eyıts'ǫ gots'ǫ̀ K'àowo k'achı̨ nenaìtłaà ayele ha. Eyıts'ǫ eyı dǫ hołı̨ı̨ hòèhtsı̨ nı̨dè wehołı̨į̀ weghǫ nahoezhe ha.  
\v 16 Eyıt'à naxıhołı̨į̀ ghǫ ełets'ǫ̀ hǫdeahdè, eyıts'ǫ ełegha yaahtı, hanì-ı̨dè k'aàt'ıì aahde ha. Dǫ ehkw'ı edaa sìı yahtı nı̨dè weyatıì nàtso hǫt'e, eyıts'ǫ t'asìı gha yahtıı sìı wek'ę̀ę̀ hòɂǫ at'į̀. 
\p  
\v 17 Nakwenàoɂǫǫ Elıjah goxèht'eè dǫ ı̨lè. Chǫh agode ha-le gha hòtł'ò yaı̨htı t'à taı xo daà-tanı ts'ǫ̀ dèè k'e chǫh wı̨ı̨zìı ajà-le ı̨lè.  
\v 18 Eyı tł'axǫǫ̀ k'achı̨ yaı̨htı t'à chǫh ajà, eyıts'ǫ dèè k'e t'asìı naèhshǫ. 
\p  
\v 19 Sèot'ı̨ı̨, naxıta gots'ǫ dǫ ı̨łè ekǫ-le ajà nı̨dè, eyıts'ǫ dǫ eyıì-le yets'ǫ̀ gode t'à ehkw'ı goòɂà ts'ǫ̀ anayį̀į̀là nı̨dè,  
\v 20 dıı yatı wedaànıahdè: Amìı hołı̨ı̨-hohtsı̨ı̨-dǫǫ̀ ehkw'ı edaà anayehɂį̀ı̨ sìı ełaàwı ch'à edaxàyehtè hǫt'e, eyıts'ǫ wehołı̨į̀ łǫ sìı weghǫ nahoezheè ayehɂı̨ hǫt'e.