\id EPH 50EPHDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h Ephesus 
\mt1 Ephesus got'ı̨į̀ gıts'ǫ̀ aatł'è 
\c 1  
\p  
\v 1 Sı̨ Paul, Nǫ̀htsı̨ wedahxà Zezì-Krı wecheekeèdeè aht'e. Dıı enı̨htł'è kǫ̀ta Ephesus Nǫ̀htsı̨ wets'ǫ dǫ nàgedèe eyıts'ǫ Zezì-Krı ghǫ t'aats'ǫǫ̀ gınì nàtsoo sìı gıts'ǫ̀ eehtł'è hǫt'e. 
\p  
\v 2 Nǫ̀htsı̨-Gotà eyıts'ǫ gots'ǫ̀ K'àowo Zezì-Krı naxıts'ǫ̀ sǫnıwǫ welè eyıts'ǫ naxıxè sìghà agııle. 
\s1 Dıı dèè hòèlı̨ kwe Nǫ̀htsı̨ gòį̀hchì hǫt'e 
\p  
\v 3 Nǫ̀htsı̨, gots'ǫ̀ K'àowo Zezì-Krı Wetà, weghàsǫts'eedı welè, ededı̨ sìı goxè sìghà hòɂǫǫ̀ ayį̀į̀là hǫt'e. Įdòo yak'e gots'ǫ Zezì-Krı wedahxà t'asìı hazǫǫ̀ wet'à goxè sìghà hòɂǫ ha sìı hòt'a goghàyı̨ı̨la hǫt'e.  
\v 4 Dıı dèè hòèlı̨ kwe Zezì-Krı wets'ıhɂǫ̀ gòį̀hchì hǫt'e. Wegha degaı ts'ı̨ı̨lı̨ gha, eyıts'ǫ wenadąą̀ hołı̨ı̨ dę ts'eeda ha goı̨hwhǫ hǫt'e. Goghǫneètǫ t'à,  
\v 5 ı̨nę̀ę whaà gots'ǫ Zezì-Krı wedahxà weza ts'ı̨ı̨lı̨ gha gòį̀hchì hǫt'e. Hanì ha nıwǫ xè wegha nezı̨.  
\v 6 Edeza ghǫneètǫǫ sìı wets'ıhɂǫ̀ t'asìı k'èxa-le wesǫnıwǫ enıìyah goghàı̨ɂǫ t'à, hazǫǫ̀ weghàsǫts'eedı welì.  
\v 7 Nǫ̀htsı̨ enıìyah t'à wesǫnıwǫ dahxà Zezì wedoò t'à gohołı̨į̀ hazǫǫ̀ goghǫ nahoazha eyıts'ǫ edaxàgoı̨la hǫt'e.  
\v 8 Nǫ̀htsı̨ sıì gǫı̨zǫ xè t'asìı hazǫǫ̀ k'èezǫ hǫt'e, eyıt'à wet'à gots'ı̨ı̨zǫǫ eyıts'ǫ wet'à t'asìı nıts'eedìı hazǫǫ̀ deɂǫ̀ǫ̀ goghàyı̨ı̨la hǫt'e.  
\v 9 Nǫ̀htsı̨ dànıwǫǫ sìı dǫ gha deɂı̨į̀ wheɂǫ ı̨lèe sìı wek'èts'eezǫǫ̀ agǫ̀ǫ̀là. Nǫ̀htsı̨ hanì yeghàlaeda wegha nezı̨ eyıts'ǫ Zezì-Krı wedahxà hanì yeghàlaeda hǫt'e.  
\v 10 Ehkw'ı nèhòkw'o nı̨dè Nǫ̀htsı̨ eyı hazǫǫ̀ yeghàlaeda ha hǫt'e. Ekìıyeè k'e nı̨dè t'asìı hazǫǫ̀ yak'e whelaa eyıts'ǫ t'asìı hazǫǫ̀ dıı nèk'e whelaa sìı k'àowo ı̨łè wetł'aà whelaà ayele ha, eyı k'àowo sìı Zezì-Krı hǫt'e. 
\p  
\v 11 Ededı̨ wets'ıhɂǫ̀ whaà gots'ǫ Nǫ̀htsı̨ dànì sınìhòɂǫǫ sìı k'ę̀ę̀ gòį̀hchì hǫt'e. Ededı̨ sìı edınì k'ę̀ę̀ t'asìı hazǫǫ̀ ghàlaı̨da hǫt'e.  
\v 12 Hanì-ı̨dè goxı̨ t'akwełǫ̀ǫ̀ Zezì-Krı gogha ehkw'ı-ahodıı sìı enıìyah wexè hòɂǫ t'à weghàsǫts'eedı welì.  
\v 13 Naxı̨ sı yatı ehkw'ıı ghǫ aàhkw'ǫ eyıts'ǫ godı nezı̨ı̨ wet'à dànì edaxàahdè ha weghǫ aàhkw'ǫ t'à Zezì-Krı wexè ı̨łè laahjà. Naxıgha ehkw'ı-ahodıì aahjà ekò, Nǫ̀htsı̨ Yedàyeh Nezı̨ı̨ goghàyeɂà ha dı ı̨lèe sìı wet'à naxık'e nàekwı̨ lanì hǫt'e, eyı weghàà Zezì-Krı wets'ǫ aaht'e naxık'èhoedzǫ.  
\v 14 Nǫ̀htsı̨, edets'ǫ dǫ hazǫǫ̀ deghàà edaxàgole gots'ǫ̀ Yedàyeh Nezı̨ı̨ godzeè yìı nàdè ayį̀į̀là. Yedàyeh Nezı̨ı̨ godzeè yìı nàdè t'à t'asìı hazǫǫ̀ Nǫ̀htsı̨ goghàyele ha dıı sìı goghàhòt'à ha wek'èts'eezǫ. Eyı ts'ıhɂǫ̀ Nǫ̀htsı̨ enıìyah wexè hòɂǫǫ sìı weghàsǫts'eedı hǫt'e. 
\s1 Paul Ephesus got'ı̨į̀ gha yahtı 
\p  
\v 15 Eyıt'à gots'ǫ̀ K'àowo Zezì naxıgha ehkw'ı-ahodıı eyıts'ǫ wets'ǫ dǫ hazǫǫ̀ gıghǫnıahtǫ weghǫ eèhkw'ǫ gots'ǫ,  
\v 16 naxıgha yahtı xè t'aats'ǫǫ̀ naxıgha Nǫ̀htsı̨ masì weehwhǫ.  
\v 17 Nǫ̀htsı̨, gots'ǫ̀ K'àowo Zezì-Krı Wetà wexè enıìyah hòɂǫǫ sìı t'aats'ǫǫ̀ naxıgha wets'ǫ̀ yahtı hǫt'e. Yedàyeh Nezı̨ı̨ wet'à goahsǫǫ̀ aahde ha, eyıts'ǫ Nǫ̀htsı̨ denahk'e wek'èahsǫ anaxele ha naxıgha weehkè hǫt'e.  
\v 18 Naxıda enıìyah hòɂǫ ts'ǫ̀ naxıkayaetıı sìı naxıdzeè t'à hotıì nezı̨į̀ wek'èahsǫ ha, eyı sı gha yahtı hǫt'e. T'asìı enıìyah deè Nǫ̀htsı̨ edets'ǫ dǫ gha ts'atà whehłaa sìı goghàyele ha hǫt'e.  
\v 19 Eyıts'ǫ goxı̨ gogha ehkw'ı-ahodıı sìı t'asìı enıìyah t'à nàtsoò godzeè yìı ayį̀į̀làa sìı eyı wek'èahsǫ gha yahtı hǫt'e. Eyı t'asìı nàtsoo t'à Nǫ̀htsı̨ godzeè yìı nàtsoò eghàlaeda hǫt'e.  
\v 20 Eyı wet'à Zezì-Krı naìdà ayį̀į̀là hǫt'e, eyıts'ǫ ı̨dòo yak'e edegà nàgòts'ehnèe whedaà ayį̀į̀là.  
\v 21 Įdòo yat'a k'aodèe hazǫǫ̀ xàɂaa eyıts'ǫ k'aodèe gıızì gǫ̀hłı̨ı̨ sìı hazǫǫ̀ gınahk'e Zezì k'àowodeè elı̨į̀ ayį̀į̀là. Dıì gogha zǫ k'àowodeè yèhtsı̨ nıìle hanìkò ı̨daà hòɂǫ gha sı ayį̀į̀là hǫt'e.  
\v 22-23 Nǫ̀htsı̨ sìı t'asìı hazǫǫ̀ Zezì-Krı wetł'aà whelaà ayį̀į̀là, eyıts'ǫ Nǫ̀htsı̨ wecheekeè hazǫǫ̀ gha t'akwełǫ̀ǫ̀ wheda ayı̨į̀là. Eyıt'à Nǫ̀htsı̨ wets'ǫ dǫ agı̨ı̨t'ee sìı wezhį̀į̀ lagı̨ı̨t'e, wet'ǫ̀ǫ̀ deghàà agììdlà eyıts'ǫ wet'ǫ̀ǫ̀ t'asìı hazǫǫ̀ hòèlı̨ı̨ sìı deghàà ajà. 
\c 2  
\s1 Zezì-Krı wexè ts'eedaà ats'ejà 
\p  
\v 1 Naxı̨ sìı naxıhołı̨į̀ ts'ıhɂǫ̀ dǫ ełaı̨dèe laaht'e ı̨lè.  
\v 2 Hołı̨ı̨ nàowoò k'ę̀ę̀ aahda ı̨lè, eyıts'ǫ dıı nèk'e hołı̨ı̨-hogehtsı̨ı̨-dǫǫ̀ gık'ę̀ę̀ aahda ı̨lè, eyıts'ǫ ı̨nìłı̨ı̨ yat'a ts'ǫ̀ k'àowo elı̨ı̨ sìı wek'èaht'e ı̨lè. Eyı ı̨nìłı̨ı̨ sìı dǫ Nǫ̀htsı̨ k'èagı̨ı̨t'e-le sìı dıì gıgha k'àowo elı̨ hǫt'e.  
\v 3 Goxı̨ sı hołı̨ı̨ k'ę̀ę̀ ts'eedaà ekò gıxèts'ı̨ht'e ı̨lè. Hołı̨ı̨ ghats'eewı eyıts'ǫ gonìłı̨ı̨ t'à dàts'ı̨ı̨wǫǫ sìı k'èats'ı̨ı̨t'e ı̨lè. Dǫ hazǫǫ̀ gıxèht'eè gonìłı̨ı̨ k'èxa nàgoehkwa ha gogha hòɂǫ ı̨lè.  
\v 4 Hanìkò Nǫ̀htsı̨ sıì goghǫneètǫ t'à, eyıts'ǫ sıì etegoèhɂı̨ t'à,  
\v 5 Zezì-Krı wexè nats'ìdà agǫ̀ǫ̀là. Hołı̨ı̨ hots'èhtsı̨ t'à dǫ ełaı̨dèe lats'ı̨ı̨t'e ı̨lè kò ts'eedaà agǫ̀ǫ̀là. Eyıt'à Nǫ̀htsı̨ gots'ǫ̀ sǫnıwǫ ts'ıhɂǫ̀ edaxàts'ı̨ı̨de hǫt'e.  
\v 6 Nǫ̀htsı̨ sìı Zezì-Krı wexè nats'ìdà agǫ̀ǫ̀là hǫt'e. Zezì-Krı wexè ts'eeda t'à, goxı̨ sı ı̨dòo yak'e wexè ts'eèhkw'eè lagǫ̀ǫ̀là hǫt'e.  
\v 7 Hanì-ı̨dè ı̨daà hòɂǫ nı̨dè, Nǫ̀htsı̨ enıìyah t'à wesǫnıwǫǫ sìı gots'ǫ̀ wègaat'ı̨į̀ ayele ha. Zezì-Krı xè dànì eghàlaı̨dà, eyı weghàà gots'ǫ̀ wedzeè nezı̨ı̨ wek'èts'eezǫǫ̀ agǫ̀ǫ̀là.  
\v 8 Nǫ̀htsı̨ wesǫnıwǫ t'à edaxàwhahde hǫt'e, eyıts'ǫ naxıgha ehkw'ı-ahodı t'à Nǫ̀htsı̨ wesǫnıwǫ ààhchı hǫt'e. T'asìı haahłà t'à naxıghǫ̀t'ǫ nıìle, hanìkò Nǫ̀htsı̨ naxıghàyı̨ı̨ɂǫ hǫt'e.  
\v 9 Hòtł'ò eghàlats'ı̨ı̨dà t'à gǫǫ̀t'ǫ nıìle, eyıt'à dǫ wı̨ı̨zìı yeghǫ xàdahodì ha nıìle.  
\v 10 Nǫ̀htsı̨ ededı̨ gok'e eghàlaı̨dà hǫt'e, t'asìı nezı̨ı̨ weghàlats'eeda gha Zezì-Krı dahxà gòèhtsı̨ hǫt'e. Nǫ̀htsı̨ hanì wegha nezı̨į̀ eghàlats'eeda ha nadąą̀ gogha sınìhòı̨ɂǫ hǫt'e. 
\s1 Zezì-Krı wexè dǫ ı̨łè lats'ı̨ı̨t'e 
\p  
\v 11 Naxı̨ Israel got'ı̨į̀ k'ę̀ę̀ naxıgǫ̀hłı̨-le aaht'e, eyıt'à dǫ gıkwǫ̀ nàt'àa gı̨ı̨lı̨ı̨ sìı “dǫ gıkwǫ̀ nàt'à-le aaht'e,” naxègedı eyı wenaahdì. (Eyı dǫ sìı beh zǫ t'à gıkwǫ̀ nàt'àa agı̨ı̨t'e hǫt'e.)  
\v 12 Ekìıyeè k'e Zezì-Krı wets'ǫ̀ nıwà aaht'e ı̨lè, eyıts'ǫ Israel got'ı̨į̀ gha naxıtà-le ı̨lè, eyı wenaahdì. Eyıt'à ekìıyeè k'e Nǫ̀htsı̨ edets'ǫ dǫ xè nakenawhehtsı̨ı̨ sìı naxıgha ayį̀į̀là-le ı̨lè. Naxıgha ahxe whìle ı̨lè, eyıts'ǫ dıı nèk'e Nǫ̀htsı̨ wedę aahda ı̨lè.  
\v 13 Hanìkò dıì sìı Zezì-Krı wet'à naxıxè hagǫ̀ht'e-le agòjà. Nǫ̀htsı̨ ts'ǫ̀ nıwà aaht'e ı̨lè hanìkò dıì sìı Zezì-Krı naxıgha wedoò xàı̨tł'ı t'à Nǫ̀htsı̨ ts'ǫ̀ nıwà-le anaxììdlà hǫt'e. 
\p  
\v 14 Ededı̨ sìı goxè ts'èwhı̨į̀ hòɂǫǫ̀ ayį̀į̀là hǫt'e. Israel got'ı̨į̀ eyıts'ǫ dǫ eyıì-le xàɂaa sìı dǫ ı̨łè zǫ lagǫ̀ǫ̀là. Dǫ nàke xàɂaa gıge kwı̨į̀ nechàa nàı̨ɂaa sìı yedıhòèhtsı̨. Eyıt'à dıì ełek'èch'a ts'eeda-le ats'ejà.  
\v 15 Edezhį̀į̀ t'à Moses wenàowoò wedę ayį̀į̀là, wet'à naxısınìyaetı-le ayį̀į̀là. Ededı̨ edet'à dǫ nàke xàɂaa gı̨ı̨lı̨ı̨ sìı dǫ ı̨łè wegòò gı̨ı̨lı̨ ha nıwǫ t'à, hanì eghàlaı̨dà hǫt'e. Hanì t'aa ełexè goxè ts'èwhı̨į̀ hòɂǫǫ̀ ayį̀į̀là.  
\v 16 Wezhį̀į̀ dechı̨et'aa k'e wedıìtsò t'à eyı dǫ nàke xàɂaa sìı Nǫ̀htsı̨ xè ts'èwhı̨į̀ hogèhɂǫǫ̀ agǫ̀ǫ̀là. Hanì t'aa ełek'èch'a geeda-le agǫ̀ǫ̀là.  
\v 17 Naxı̨ Nǫ̀htsı̨ ts'ǫ̀ nıwà aaht'e ı̨lèe sìı Zezì naxıts'ǫ̀ nììtła t'à dànì ts'èwhı̨į̀ goxè hòɂǫ ghǫ naxıts'ǫ̀ goı̨de ı̨lè, eyıts'ǫ dǫ Nǫ̀htsı̨ ts'ǫ̀ nıwà-lea agı̨ı̨t'ee sìı ededı̨ sı hanì gots'ǫ̀ goı̨de ı̨lè.  
\v 18 Goxı̨ dǫ nàke xàɂaa ts'ı̨ı̨lı̨ı̨ sìı ededı̨ wet'à Yedàyeh Nezı̨ı̨ goghàı̨ɂǫ t'à, Nǫ̀htsı̨-Gotà ts'ǫ̀ ats'ede ha gogha dìì-le ayį̀į̀là hǫt'e. 
\p  
\v 19 Eyıt'à naxı̨ sìı Nǫ̀htsı̨ ts'ǫ̀ nıwà aaht'e-le aahjà, hanìkò Nǫ̀htsı̨ wets'ǫ dǫ gıxè aaht'e, eyıts'ǫ Nǫ̀htsı̨ weza aaht'e.  
\v 20 Goxı̨ hazǫǫ̀ yìetł'aà whetǫǫ k'e kǫ̀ hòèlı̨ı̨ lanì Nǫ̀htsı̨ wecheekeèdeè eyıts'ǫ nakwenàoɂǫǫ gıyatıì k'e nàts'eèhza lats'ı̨ı̨t'e, eyıts'ǫ Zezì-Krı ededı̨ sìı kwe denahk'e wet'àaɂàa elı̨, wet'à yìetł'aà whetǫǫ k'e kǫ̀ hòèlı̨ı̨ sìı nàtsoò yııtǫ̀.  
\v 21 Ededı̨ wet'à goxı̨ hazǫǫ̀ ełexè gok'èhodì lanì, eyıts'ǫ gots'ǫ̀ K'àowo wedahxà Nǫ̀htsı̨ wekǫ̀ degaı lats'ı̨ı̨t'eè agǫ̀ǫ̀là.  
\v 22 Naxı̨ sı Zezì-Krı wet'à kǫ̀ ełexè naxıhòèlı̨ı̨ laaht'e, eyıts'ǫ wets'ǫ Įnì Degaı t'à Nǫ̀htsı̨ eyı kǫ̀ yìı nàdè hǫt'e. 
\c 3  
\s1 Paul, Israel got'ı̨į̀ agı̨ı̨t'e-le sìı gots'ǫ̀ godı nezı̨ı̨ nìı̨ɂǫ 
\p  
\v 1 Eyı ts'ıhɂǫ̀ sı̨ Paul, Zezì-Krı wegha eghàlaehda k'èxa sedaàtǫ hǫt'e, naxı̨ Israel got'ı̨į̀ aaht'e-le sìı naxıgha sìghà agode ha t'à. 
\p  
\v 2 Nǫ̀htsı̨ edesǫnıwǫǫ̀ seghàı̨ɂǫǫ sìı wek'ę̀ę̀ naxıgha eghàlaehda ha weghǫ aàhkw'o sǫnı.  
\v 3 Eyı t'asìı deɂı̨į̀ wheɂǫ t'à wenıts'eedì-le sìı Nǫ̀htsı̨ wek'èehsǫǫ̀ asį̀į̀là. Eyı weghǫ hòt'a yatı łǫ-lea t'à naxıts'ǫ̀ ııhtł'è ı̨lè.  
\v 4 Wek'eyaahtı nı̨dè Zezì weghǫ t'asìı wenıts'eedì-le sìı dànì sı̨ wek'èehsǫǫ̀ ahjàa sìı wenıahdì aahde ha. Eyı gogha deɂı̨į̀ wheɂǫ t'à wenıts'eedì-le ı̨lè.  
\v 5 Eyı sìı dǫ gokwe gı̨ı̨dàa sìı gık'èezǫǫ̀ agììdlà-le ı̨lè, hanìkò dıì Nǫ̀htsı̨ wecheekeèdeè degaı eyıts'ǫ nakwenàoɂǫǫ degaı gı̨ı̨lı̨ı̨ sìı Yedàyeh Nezı̨ı̨ t'à gık'èezǫǫ̀ agejà.  
\v 6 Eyı t'asìı enıìyah gots'ǫ̀ deɂı̨į̀ wheɂǫ ı̨lèe sìı dıı hǫt'e: dǫ Israel got'ı̨į̀ agı̨ı̨t'e-le sìı godı nezı̨ı̨ egıìkw'o ts'ıhɂǫ̀ Nǫ̀htsı̨ t'asìı hazǫǫ̀ edeza gogha ts'atà yèhłaa sìı Israel got'ı̨į̀ gıxè goghàyele ha hǫt'e. Eyıt'à hazǫǫ̀ ełexè dǫ ı̨łè zǫ lats'ı̨ı̨t'e, eyıts'ǫ Zezì-Krı wedahxà Nǫ̀htsı̨ t'asìı nezı̨ı̨ goghàɂà ha dıı sìı hazǫǫ̀ ełexè goį̀zhe ha hǫt'e. 
\p  
\v 7 Nǫ̀htsı̨ wesǫnıwǫ seghǫ̀t'ǫ t'à eyı godı nezı̨ı̨ gha eghàlaehdaà asį̀į̀là, hanì seghàhòı̨ɂǫ t'à sedzeè yìı nàtsoò eghàlaeda hǫt'e.  
\v 8 Nǫ̀htsı̨ wets'ǫ dǫ hazǫǫ̀ gıgha sı̨ denahk'e dek'aɂį̀ ehłı̨ kò eyı wesǫnıwǫ seghǫ̀t'ǫ dahxà dıı la seghàı̨ɂǫ hǫt'e: Dǫ Israel got'ı̨į̀ agı̨ı̨t'e-le sìı Zezì-Krı dànì sıì enıìyah t'à dǫ xè sìghà agole ha sìı t'à gıts'ǫ̀ gohde ha.  
\v 9 Eyı t'asìı enıìyah deɂı̨į̀ wheɂǫǫ sìı dànì agode ha sìı dǫ hazǫǫ̀ nezı̨į̀ gınıedì agehłe ha hǫt'e. Nǫ̀htsı̨ t'asìı hazǫǫ̀ whehtsı̨ı̨ sìı ı̨nę̀ę whaà gots'ǫ deɂı̨į̀ yèhɂǫ ı̨lè.  
\v 10 Nǫ̀htsı̨ hanì eghàlaı̨dà hǫt'e. Dànì deɂǫ̀ǫ̀ gǫǫzǫǫ sìı yat'a ı̨nì k'aodèe hazǫǫ̀ gık'èezǫ ha nıwǫ t'à, edecheekeè got'à hanì eghàlaı̨dà hǫt'e.  
\v 11 Welǫ whìle gots'ǫ̀ dànì hòɂǫ ha nıwǫ k'ę̀ę̀ eghàlaı̨dà, gots'ǫ̀ K'àowo Zezì-Krı wexè deghàà ayį̀į̀là hǫt'e.  
\v 12 Zezì-Krı wet'ǫ̀ǫ̀ eyıts'ǫ gogha ehkw'ı-ahodı t'à edèdats'eedı-le Nǫ̀htsı̨ ts'ǫ̀ ats'ede ha dìì-le agòjà.  
\v 13 Eyıt'à naxıgha daıhɂa kò sets'ıhɂǫ̀ naxıgha gots'eèdı awede-le, eyı wet'à sıì naxıgha enıìyah ha hǫt'e. 
\s1 Paul k'achı̨ Ephesus got'ı̨į̀ gha yahtı 
\p  
\v 14 Eyı hanì naxıxè sìghà hòɂǫ ha t'à Nǫ̀htsı̨-Gotà wets'ǫ̀ nàgòhge xè yahtı.  
\v 15 Ededı̨ wet'à yak'e wèot'ı̨ hazǫǫ̀ eyıts'ǫ dıı nèk'e wèot'ı̨ hazǫǫ̀ weza k'ę̀ę̀ goızì hòèlı̨ hǫt'e.  
\v 16 Ededı̨ sìı enıìyah nàtsoo wets'ǫ̀-èlı̨ t'à edets'ǫ Įnì Degaı t'à naxıdzeè yìı nàahtsoò anaxele ha, eyı gha yahtı.  
\v 17 Hanì-ı̨dè naxıgha ehkw'ı-ahodı t'à Zezì-Krı naxıdzeè yìı nàdè welè. Eyıts'ǫ dıı sı gha yahtı: denahk'e ts'ǫ̀ ełeghǫnıahtǫ xè  
\v 18 Nǫ̀htsı̨ wets'ǫ dǫ hazǫǫ̀ gıxè Zezì-Krı deɂǫ̀ǫ̀ enıìyah t'à goghǫneètǫǫ sìı deghàà wenıahdì anaxedle ha welì,  
\v 19 eyıts'ǫ dàı̨hcho ts'ǫ̀ goghǫneètǫǫ sìı dǫ wı̨ı̨zìı yek'èezǫ nıìle, eyı wenıahdì welì. Dànì Nǫ̀htsı̨ wexè hòɂǫǫ sìı deghàà naxıdzeè yìı wehòhɂǫ welè. 
\p  
\v 20-21 Nǫ̀htsı̨ godzeè yìı nàtsoò eghàlaeda k'ę̀ę̀, t'asìı wets'eekèe, hanì-le-ı̨dè gogha dànì eghàlaeda ghǫ nànıts'edè nahk'e nezı̨į̀ goghàlaeda ha wegha dìì nıìle. Wets'ǫ dǫ gıt'ǫ̀ǫ̀ eyıts'ǫ Zezì-Krı wets'ıhɂǫ̀, dǫ hazǫǫ̀ ełetł'axǫǫ̀-geedèe sìı welǫ whìle ts'ǫ̀ Nǫ̀htsı̨ ghàsǫgeedı welè! Amen. 
\c 4  
\s1 Zezì-Krı wezhį̀į̀ lats'ı̨ı̨t'e 
\p  
\v 1 Gots'ǫ̀ K'àowo wegha sedaàtǫ hǫt'e, gots'ǫ̀ K'àowo naxıkayaı̨htıı sìı hotıì nezı̨į̀ wek'ę̀ę̀ aahda ha naxeehwhǫ hǫt'e.  
\v 2 Hotıì k'èeweèt'ı̨ k'ę̀ę̀ aahda, dǫ ts'ǫ̀ naxıdzeè nezı̨ welè, eyıts'ǫ ełeghǫnıahtǫ xè ełexè ts'èwhı̨į̀ aahda.  
\v 3 Yedàyeh Nezı̨ı̨ wedahxà dǫ ı̨łè laaht'e gha hòtł'ò eghàlaahda, eyıts'ǫ t'aats'ǫǫ̀ ełexè ts'èwhı̨į̀ aahda.  
\v 4 Goxı̨ gogha ehkw'ı-ahodıı sìı gots'ǫ̀ K'àowo wezhį̀į̀ ı̨łè zǫ lats'ı̨ı̨t'e, eyıts'ǫ Yedàyeh Nezı̨ı̨ ı̨łè zǫ gǫ̀hłı̨. Naxıkayaetı ekò edaxàahdèe ı̨łè zǫ gha naxıkayaetı ı̨lè.  
\v 5 Eyıts'ǫ gots'ǫ̀ K'àowo ı̨łè zǫ gǫ̀hłı̨, gogha ehkw'ı-ahodı ı̨łè zǫ gǫ̀hłı̨, eyıts'ǫ t'asìı ı̨łè zǫ gha gok'ètaìdzı̨ hǫt'e.  
\v 6 Nǫ̀htsı̨ ı̨łè zǫ gǫ̀hłı̨, ededı̨ dǫ hazǫǫ̀ gha Gotà elı̨. Ededı̨ sìı dǫ hazǫǫ̀ gha K'àowo elı̨, eyıts'ǫ t'asìı hazǫǫ̀ t'à godzeè yìı eghàlaeda hǫt'e. 
\p  
\v 7 Hanìkò goxı̨ hazǫǫ̀ gotaàt'eè Zezì dàı̨hcho ts'ǫ̀ goghàyeɂà ha nıwǫ k'ę̀ę̀ wesǫnıwǫ goghǫ̀t'ǫ hǫt'e.  
\v 8 Eyı ts'ıhɂǫ̀ dıı hanì dek'eèhtł'è, 
\mi \qt “Įdòo dagǫǫwà ajà ekò dǫ gıdanìı̨laa sìı edexè agǫ̀ǫ̀là, eyıts'ǫ t'asìı nezı̨ı̨ dǫ ghàı̨la,” dek'eèhtł'è.\qt* 
\m  
\v 9 (“Įdòo ajà,” dek'eèhtł'èe sìı t'akwełǫ̀ǫ̀ ı̨zhıì dèè goyìı togoòtł'òo sìı ts'ǫ̀ ajà t'à ahodı hǫt'e.  
\v 10 Ededı̨ ı̨zhıì dèè goyìı ajàa sìı ededı̨ et'ıì ı̨dòo yat'a hazǫǫ̀ weɂǫ̀ǫ̀ dagǫǫwà ts'ǫ̀ ajà hǫt'e, dèè eyıts'ǫ yat'a hazǫǫ̀ hòèlı̨ı̨ sìı yìı wehòhɂǫ gha ajà.)  
\v 11 Ededı̨ sìı dǫ mǫ̀hdaa wecheekeèdeè gı̨ı̨lı̨ ha goghàhòı̨ɂǫ hǫt'e, mǫ̀hdaa nakwenàoɂǫǫ gı̨ı̨lı̨ ha, mǫ̀hdaa godı nezı̨ı̨ k'egeɂaa gı̨ı̨lı̨ ha, mǫ̀hdaa Nǫ̀htsı̨ wets'ǫ dǫ k'ègedìı gı̨ı̨lı̨ ha, eyıts'ǫ mǫ̀hdaa dǫ hoghàgogeehtǫǫ gı̨ı̨lı̨ ha agǫ̀ǫ̀là.  
\v 12-13 Hanì-ı̨dè Nǫ̀htsı̨ wets'ǫ dǫ dànì Nǫ̀htsı̨ gha eghàlageeda ha sìı gık'èezǫǫ̀ agede ha, eyıts'ǫ hazǫǫ̀ ełexè Nǫ̀htsı̨ gha goınì ı̨łè zǫ lats'ede gots'ǫ̀, eyıts'ǫ Nǫ̀htsı̨ weza deghàà wek'èts'eezǫ ats'ede gots'ǫ̀, Nǫ̀htsı̨ wets'ǫ dǫ hazǫǫ̀ ełexè nàgetsoò agede ha. Hanì-ı̨dè dànì Zezì-Krı wexè hòɂǫǫ sìı wexèht'eè goxè hòɂǫ ats'ede ha. 
\p  
\v 14 Hanì-ı̨dè k'achı̨ bebìa lats'ı̨ı̨t'e ha-le, taatı̨į̀ t'à goxè k'etaetı̨ lanì ha-le. Dǫ goghǫyageeɂà t'à gogı̨ı̨zǫǫ sìı ładı̨į̀ hoghàgogeehtǫ nı̨dè goxè ts'ıɂǫ̀-hogeeɂà ha-le.  
\v 15 Hanìkò ełeghǫnets'eètǫ t'à ehkw'ı ełets'ǫ̀ gots'ede ha. Goxı̨ Nǫ̀htsı̨ wets'ǫ dǫ ats'ı̨ı̨t'ee sìı Zezì wezhį̀į̀ lats'ı̨ı̨t'e, eyıts'ǫ Zezì ededı̨ gokwì elı̨ lanì hǫt'e. T'asìı hazǫǫ̀ t'à Zezì-Krı wexè nàts'etsoò ats'ede ha hǫt'e.  
\v 16 Ededı̨ wet'à wezhį̀į̀ hǫt'ıì eyıts'ǫ t'asìı hazǫǫ̀ wek'e whelaa sìı yàłııtǫ̀, eyıts'ǫ wet'à goxı̨ wezhį̀į̀ ats'ı̨ı̨t'ee sìı wegha goılaà ghàlats'eeda t'à eyıts'ǫ ełeghǫnets'eètǫ t'à wezhį̀į̀ nàtsoò ats'ehɂı̨ hǫt'e. 
\s1 Dǫ gıxè dzęh agǫ̀ht'e lanì aahda 
\p  
\v 17 Eyıt'à gots'ǫ̀ K'àowo wedahxà yatı nàtsoo t'à dıı hanaxèehsı̨: Dǫ Nǫ̀htsı̨ k'ègeezǫ-le sìı k'achı̨ gık'ę̀ę̀ aahda-le, gınìłı̨ı̨ k'ę̀ę̀ geeda ne t'à.  
\v 18 Gınì t'à gıxè togoòtł'ò lanì t'à Nǫ̀htsı̨ ts'ǫǫ̀hk'e t'asìı nıgeedì-le xè gık'ę̀ę̀ eda-le. Ededzeè t'à egeèhkw'ǫ ha gı̨ı̨wǫ-le xè gıkwì nàtsoo t'à Nǫ̀htsı̨ nàowoò k'ègeezǫ-le hǫt'e.  
\v 19 T'asìı wı̨ı̨zìı ghǫ į̀į̀zhagı̨ı̨lı̨-le agejà, t'aa gı̨ı̨wǫ ts'ǫ̀ hołı̨ı̨ k'ę̀ę̀ k'ehogeɂa, eyıts'ǫ t'asìı wejıı hazǫǫ̀ k'alagedè xè ı̨łaà denahk'e hołı̨ı̨ hogehtsı̨ ha gı̨ı̨wǫ. 
\p  
\v 20 Hanìkò naxı̨ sìı Zezì-Krı weghǫ hanì hoghànaxeètǫ nıìle.  
\v 21 Hotıì weghǫ aàhkw'ǫ xè weghǫ hoghànaxeètǫ ı̨lè, eyıts'ǫ Zezì-Krı wet'à nàowo ehkw'ıı k'èhoahsǫ aahjà hǫt'e.  
\v 22 Įnę̀ę dànì naxınìłı̨ı̨ k'ę̀ę̀ aahda ı̨lèe sìı wek'ę̀ę̀ aahda-le gha hoghànaxeètǫ ı̨lè. Hołı̨ı̨ gha hòtł'ò kànıahɂaa sìı wet'à naxınì wedıhołè hǫt'e.  
\v 23 Hanìkò naxınì ładı̨į̀ ajàa k'ę̀ę̀ aahda ha hoghànaxeètǫ ı̨lè,  
\v 24 eyıts'ǫ dǫgòò lanì aahda ha hoghànaxeètǫ ı̨lè. Nǫ̀htsı̨ k'ę̀ę̀ hotıì ehkw'ı aahda xè degaı aaht'e ha naxıhòèlı̨ hǫt'e. 
\p  
\v 25 Eyıt'à naxı̨ hazǫǫ̀ hots'ets'ìı k'ę̀ę̀ goahde-le eyıts'ǫ naxèot'ı̨ ts'ǫ̀ ehkw'ı goahde, Zezì-Krı wezhį̀į̀ ı̨łè zǫ gots'ǫ ats'ı̨ı̨t'e t'à.  
\v 26 “Ààhch'e nı̨dè hołı̨ı̨ hoahtsı̨-le,” dek'eèhtł'è. Sa nàɂàa ts'ǫ̀ ààhch'e-le,  
\v 27 hanì-ı̨dè wehłı̨ı̨ naxıdaèht'è ha nıìle.  
\v 28 Dǫ eeɂį̀ ı̨lèe sìı k'achı̨ eeɂį̀ welè-le, hanìkò eghàlaeda ha hǫt'e. Edılà t'à t'asìı wet'àaɂàa hohtsı̨ ha hǫt'e, hanì-ı̨dè dǫ t'asìı gıgha whìle sìı yet'à gots'àdı ha. 
\p  
\v 29 Yatıjıı t'à goahde-le, hanìkò yatı wet'à dǫ gınì nàtsoò ade ha sìı t'à goahde, hanì-ı̨dè dǫ egeèhkw'ǫǫ sìı wet'à nezı̨į̀ edexègeedì xè gıt'àhoehwhı ha.  
\v 30 Eyıts'ǫ Nǫ̀htsı̨ wets'ǫ Įnì Degaı sìı wedzeè nànııtì aweahłe-le. Ededı̨ sìı weghàà Nǫ̀htsı̨ wets'ǫ dǫ aaht'e eyıts'ǫ nǫǫde dzęę̀ k'e edaxànaxeetè gha naxık'èhoedzǫ hǫt'e.  
\v 31 T'asìı hazǫǫ̀ t'à ełek'èch'a aaht'ee sìı wedę aahłe. Ełets'ǫ̀ naxınì nàìtłoo, ełets'ǫ̀ ààhch'ee, ełetawhıahdèe, ełek'adaahdèe, eyıts'ǫ hołı̨ı̨ hazǫǫ̀ k'ę̀ę̀ k'ehoahɂaa sìı wedę aahłe.  
\v 32 Ełets'ǫ̀ naxıdzeè eteèɂı̨ welè, Zezì-Krı wet'ǫ̀ǫ̀ Nǫ̀htsı̨ naxıghǫ nahoı̨la k'ę̀ę̀ ełeghǫ nahoahłe. 
\c 5  
\p  
\v 1 Nǫ̀htsı̨ weza aaht'e xè naxıghǫneètǫ t'à dànì eghàlaedaa sìı wexèahɂı̨.  
\v 2 Zezì dànì goghǫneètǫ xè gogha ełaı̨wo k'ę̀ę̀, t'aats'ǫǫ̀ ełeghǫnıahtǫ k'ę̀ę̀ aahda. Zezì gogha ełaàwı gha Nǫ̀htsı̨ ghàdìtı̨ t'à yınì k'ę̀ę̀ eghàlaı̨dà. 
\p  
\v 3 Naxı̨ sìı hołı̨ı̨ k'ę̀ę̀ ełek'alaahdè ha honàedı nıìle, hołı̨ı̨ nàowoò k'ę̀ę̀ k'ehoahɂa ha-le, eyıts'ǫ dǫ t'asìı wets'ǫ sìı gha aahdì ha-le. Nǫ̀htsı̨ wets'ǫ dǫ degaı hanì geeda ha sìı ehkw'ı nıìle.  
\v 4 Naxıta dǫ wı̨ı̨zìı whàdagoetsǫ̀ǫ gode ha-le, ezhı̨ne yatıì hanì-le-ı̨dè yatı nezı̨-le t'à dlòahtsı ha-le, eyı hazǫǫ̀ sìı Nǫ̀htsı̨ wets'ǫ dǫ gıgha ehkw'ı nıìle. Hanìkò gowà t'à Nǫ̀htsı̨ ts'ǫ̀ masì ts'edı welì.  
\v 5 Dıı sìı hotıì wek'èahsǫ welì: Dǫ hołı̨ı̨ nàowoò k'ę̀ę̀ edaa, hołı̨ı̨ k'ehoɂaa, hanì-le-ı̨dè t'asìı gha edì-le sìı Zezì-Krı eyıts'ǫ Nǫ̀htsı̨ gınàowoò k'ę̀ę̀ hòɂǫǫ sìı weghǫ̀t'à ha nıìle. (Dǫ dıı nèk'e ts'ǫ t'asìı gha edì-le sìı wegha nǫ̀htsı̨ lanì at'į̀ hǫt'e.)  
\v 6 Hots'ets'ìı yatıì t'à dǫ naxıghǫyagııɂà sǫ̀ǫ̀. Dǫ hanì eghàlageeda t'à Nǫ̀htsı̨ k'èagı̨ı̨t'e-le sìı Nǫ̀htsı̨ nàgoehkwa ha hǫt'e.  
\v 7 Eyıt'à hanıı dǫ xè aaht'ı̨-le. 
\p  
\v 8 Įnę̀ę sìı naxı̨ sı naxıxè togoòtł'ò ı̨lè, hanìkò dıì sìı gots'ǫ̀ K'àowo wets'ıhɂǫ̀ naxıxè dzęh agòjà. Eyıt'à dǫ gıxè dzęh agǫ̀ht'e lanì aahda.  
\v 9 (Dzęh ts'eeda nı̨dè t'asìı nezı̨ı̨ zǫ eghàlats'eeda, ehkw'ı k'ehots'eɂa eyıts'ǫ nàowo ehkw'ıı xè ts'eeda.)  
\v 10 Eyıt'à gots'ǫ̀ K'àowo ayìı wegha sìghà sìı wegòahɂà.  
\v 11 Togoòtł'òo k'ę̀ę̀ k'ehots'eɂaa sìı wedę aahłe, eyıts'ǫ eyı k'èch'a xàyaahtı.  
\v 12 Dǫ Nǫ̀htsı̨ k'èagı̨ı̨t'e-le sìı deɂı̨į̀ dànì k'ehogeɂaa sìı weghǫ gots'edee sìı weghǫ į̀į̀zhats'ı̨ı̨lı̨ ha hǫt'e.  
\v 13 Hanìkò t'asìı hazǫǫ̀ dzęh wek'e nı̨ı̨dı̨ı̨ sìı dǫ ts'ǫ̀ nezı̨į̀ wègaat'ı̨ hǫt'e.  
\v 14 Eyı dzęę̀ sìı wet'à t'asìı hazǫǫ̀ wègaat'ı̨ at'į̀ hǫt'e. Eyıt'à dıı hanì dek'eèhtł'è, 
\mi \qt “Nı̨ wheętı̨ı̨ sìı ts'enewı, naìdà anede, hanì-ı̨dè Zezì-Krı dzęh nek'e nı̨ı̨dı̨į̀ ayele ha,” dek'eèhtł'è.\qt* 
\p  
\v 15 Eyıt'à dànì aahdaa sìı ghǫ hotıì edexoahdı. Dǫ gogı̨ı̨zǫ-le lanì aahda-le, hanìkò dǫ gogı̨ı̨zǫ k'ę̀ę̀ aahda.  
\v 16 Dıı dzęę̀ k'e nàowołı̨ı̨ łǫ t'à, t'asìı nezı̨ı̨ ghàlaahda ha naxıgha hòɂǫ taàt'eè weghàlaahda.  
\v 17 Eyıt'à goahsǫ-le k'ę̀ę̀ aahda-le, hanìkò Nǫ̀htsı̨ ayìı dàahłe ha naxı̨ı̨hwhǫǫ sìı wenıahdì.  
\v 18 Jìetì t'à deàhde-le, eyı sìı wet'à tsį̀daahwhı hǫt'e. Hanìkò Yedàyeh Nezı̨ı̨ hotıì naxıdzeè yìı nàdèe aweahłe.  
\v 19 Nǫ̀htsı̨ Nı̨htł'è gots'ǫ shı̨ eyıts'ǫ Nǫ̀htsı̨ ts'ǫ̀ ts'ejı̨ı̨ xàɂaa t'à ełets'ǫ̀ goahde. Naxıdzeè t'à gots'ǫ̀ K'àowo wets'ǫ̀ aahjı̨.  
\v 20 T'aats'ǫǫ̀ Zezì-Krı wıızì t'à Nǫ̀htsı̨-Gotà t'asìı hazǫǫ̀ gha masì weahwhǫ. 
\p  
\v 21 Ełek'èaht'e, hanì-ı̨dè Zezì-Krı wets'ǫ̀ nezı̨į̀ naahɂa hǫt'e. 
\s1 Dǫzhìı eyıts'ǫ gıts'èkeè dànì ełexè geeda ha 
\p  
\v 22 Dǫ ts'èkeè yàahłı̨ı̨ sìı gots'ǫ̀ K'àowo k'èaht'e lanì naxıdǫǫ̀ k'èaht'e.  
\v 23 Zezì-Krı edets'ǫ dǫ gha nakweè wheda lanì dǫzhìı hoet'ı̨ı̨ sìı edets'èkeè gha nakweè whedaa elı̨ hǫt'e. Zezì wecheekeè sìı wezhį̀į̀ agı̨ı̨t'e, eyıts'ǫ ededı̨ Edaxàgolee elı̨ hǫt'e.  
\v 24 Wecheekeè sìı Zezì-Krı k'èagı̨ı̨t'e lanì ts'èko sı t'asìı hazǫǫ̀ t'à ededǫǫ̀ k'èagı̨ı̨t'e ha hǫt'e. 
\p  
\v 25 Dǫzhìı yàahłı̨ı̨ sìı naxıts'èkeè ghǫnıahtǫ, Zezì-Krı edecheekeè goghǫneètǫ lanì eyıts'ǫ gogha ełaı̨wo lanì.  
\v 26 Hanì-ı̨dè edecheekeè degaı lanì Nǫ̀htsı̨ ghàgole ha nıwǫ. Wegodıì nezı̨ı̨ t'à degaı agole ha eyıts'ǫ tı t'à gok'enaehtse ha.  
\v 27 Gìdaat'ı̨ xè edets'ǫ̀ agole ha nıwǫ. Tsǫ̀ wı̨ı̨zìı gık'e wheɂǫ-le xè t'asìı wı̨ı̨zìı t'à gıxoeɂa ha-le. Degaı gı̨ı̨lı̨ı̨ xè t'asìı wı̨ı̨zìı t'à dǫ gok'e nìdahoeɂà ha-le.  
\v 28 Zezì edets'ǫ dǫǫ̀ ghǫneètǫ xèht'eè dǫzhìı hoet'ı̨ı̨ sìı edezhį̀į̀ ghǫneètǫ lanì edets'èkeè ghǫneètǫ ha hǫt'e. Dǫ edets'èkeè ghǫneètǫ sìı edeghǫneètǫ hǫt'e.  
\v 29 Dǫ wı̨ı̨zìı edezhį̀į̀ ghǫneètǫ-le gǫ̀hłı̨ nıìle, hanìkò edezhį̀į̀ wàɂeedı xè nezı̨į̀ yek'èdì hǫt'e, Zezì-Krı edets'ǫ dǫ nezı̨į̀ gok'èdì lanì.  
\v 30 Goxı̨ wets'ǫ dǫ ats'ı̨ı̨t'ee sìı wezhį̀į̀ ts'ǫ ats'ı̨ı̨t'e hǫt'e.  
\v 31 “Hanì ts'ıhɂǫ̀ dǫzhìı sìı edetà eyıts'ǫ edemǫ gots'ǫǫ̀ xàetła ha, eyıts'ǫ edets'èkeè xè dǫ ı̨łè lade ha, eyı dǫ nàke sìı dǫ ı̨łè zǫ lagede ha,” dek'eèhtł'è.  
\v 32 Dıı sìı gogha enıìyah dìì eyıts'ǫ wenıts'eedì ha dìì. Eyı sìı Zezì-Krı eyıts'ǫ wets'ǫ dǫ ghǫ gohde aehsı̨.  
\v 33 Eyıt'à naxı̨ dǫzhìı yàahłı̨ı̨ sìı edeghǫnıahtǫ lanı naxıts'èkeè gıghǫnıahtǫ ha hǫt'e, eyıts'ǫ ts'èko hazǫǫ̀ nezı̨į̀ ededǫǫ̀ ts'ǫ̀ nageɂa ha hǫt'e. 
\c 6  
\s1 Naxıtà eyıts'ǫ naxımǫ gıts'ǫ̀ nezı̨į̀ aahda 
\p  
\v 1 Chekoa yàahłı̨ı̨ sìı gots'ǫ̀ K'àowo wets'ǫ aaht'e t'à xàè naxèot'ı̨ k'èaht'e, eyı sìı ehkw'ı ne t'à.  
\v 2-3 Nǫ̀htsı̨ Nı̨htł'è k'e dıı hanì dek'eèhtł'è: “Naxıtà eyıts'ǫ naxımǫ gıts'ǫ̀ nezı̨į̀ aahda, hanì-ı̨dè t'asìı hazǫǫ̀ t'à naxıxè sìghà agode ha, eyıts'ǫ dıı nèk'e whaà nàahdè ha,” dek'eèhtł'è. Nàowodeè hazǫǫ̀ gha sìı eyı nàowo t'akwełǫ̀ǫ̀ wexè yatı nezı̨ı̨ wheɂǫ hǫt'e. 
\p  
\v 4 Gotà yàahłı̨ı̨ sìı naxıza tsį̀gıahɂa t'à gìch'eè agıahłe-le, hanìkò nezı̨į̀ gıaseh, gots'ǫ̀ K'àowo wenàowoò k'ę̀ę̀ hoghàgıahtǫ. 
\s1 K'aodèe gı̨ı̨lı̨ı̨ eyıts'ǫ gıcheekeè 
\p  
\v 5 Dǫ gıcheekeè yàahłı̨ı̨ sìı dıı nèk'e naxıgha k'àowo gǫ̀hłı̨ı̨ sìı gık'èaht'e, dahjı̨ xè gıts'ǫ̀ hotıì nezı̨į̀ naahɂa. Zezì-Krı wek'èaht'e lanì, naxıdzeè nezı̨ı̨ xè gıts'ǫ̀ ehkw'ı eghàlaahda.  
\v 6 Gınadąą̀ zǫ gık'èaht'e-le, ekìı naxıghǫ nezı̨į̀ agı̨ı̨wǫ zǫ gha aaht'ı̨-le, hanìkò Zezì-Krı wecheekeè lanì gıgha nezı̨į̀ eghàlaahda, hanì-ı̨dè naxıdzeè t'à Nǫ̀htsı̨ wınì k'ę̀ę̀ eghàlaahda hǫt'e.  
\v 7 Dǫ zǫ gha eghàlaahda dahwhǫ-le. Gots'ǫ̀ K'àowo wegha eghàlaahda lanì naxıdzeè t'à naxıts'ǫ̀ k'àowo gıgha eghàlaahda.  
\v 8 Dǫ edets'ǫ̀ k'agedè-le, edets'ǫ̀ k'agedèe, ehk'ę̀ę̀ gots'ǫ̀ K'àowo sìı dǫ hazǫǫ̀ ełèht'eè dànì eghàlagı̨ı̨dà k'èxa goghàhòɂà ha wek'èahsǫ hǫt'e. 
\p  
\v 9 Naxı̨ dǫ ts'ǫ̀ k'àowo yàahłı̨ı̨ sìı eyı xèht'eè dǫ naxıtł'a geèhkw'ee sìı gıts'ǫ̀ nezı̨į̀ k'ehoahɂa. Gıts'ǫ̀ yıdaaht'e-le, yak'e gıts'ǫ̀ k'àowo gǫ̀hłı̨ı̨ sìı naxı̨ sı naxıts'ǫ̀ k'àowo elı̨ wek'èahsǫ t'à, eyıts'ǫ Nǫ̀htsı̨ sìı dǫ ı̨łè xàɂaa zǫ gòį̀hchì nıìle. 
\s1 Gots'ǫ̀ K'àowo t'asìı nàtsoo wets'ǫ̀-èlı̨ı̨ sìı t'à wexè nàahtsoò aahde 
\p  
\v 10 Nǫǫde t'à dıı hanaxèehsı̨: Gots'ǫ̀ K'àowo t'asìı nàtsoo wets'ǫ̀-èlı̨ı̨ sìı t'à nàahtsoò aahde.  
\v 11 Nǫ̀htsı̨ wets'ǫ eghǫǫ-dǫǫ̀ lanì, Nǫ̀htsı̨ wets'ǫ ełets'egǫǫ-goht'ǫǫ̀ hazǫǫ̀ edek'e nìahwha, hanì-ı̨dè wehłı̨ı̨ naxık'alawo ha nıwǫ kò weghǫahnè ha dìì-le.  
\v 12 Dǫ xè ełets'egǫ ats'et'ı̨ nıìle, hanìkò yat'a k'aodèe gı̨ı̨lı̨ı̨ eyıts'ǫ dıı nèk'e togoòtł'òo gha k'aodèe gı̨ı̨lı̨ı̨ sìı gıxè ełets'egǫ hǫt'e, eyıts'ǫ yat'a ı̨nìłı̨ı̨ nàgetsoo sìı gıxè ełets'egǫǫ̀ ats'et'ı̨ hǫt'e.  
\v 13 Eyıt'à Nǫ̀htsı̨ wets'ǫ eghǫǫ-dǫǫ̀ yàahłı̨ k'ę̀ę̀ ełets'egǫǫ-goht'ǫǫ̀ hazǫǫ̀ yìahdè xè sı̨į̀daahkw'e, hanì-ı̨dè t'asìıłı̨ı̨ naxık'alagedè nı̨dè, nàahtso xè gıts'ǫǫ̀hk'e naahzha ha dìì-le. Eyı hazǫǫ̀ haahłà tł'axǫǫ̀ nı̨dè, gıghǫahnè ha hǫt'e. \fig Eghǫǫ-dǫǫ̀|src="HK075E.tif" size="span" ref="6.11-13" \fig* 
\v 14 Eyıt'à nàahtso gıts'ǫ̀ naahɂa, nàowo ehkw'ıı t'à wheahtł'ı̨, eyıts'ǫ satsǫ̀ naxıdzıìwı k'e whetǫ lanì wet'à ehkw'ı ts'eedaa t'à aaht'ı̨.  
\v 15 Ke yìı wheahɂè xè ts'atà sı̨į̀daahkw'e, hanì-ı̨dè wegodıì nezı̨ı̨ wet'à ts'èwhı̨į̀ ts'eedaa sìı t'à dǫ ts'ǫ̀ goahde ha dìì-le.  
\v 16 Eyı hazǫǫ̀ wexè Nǫ̀htsı̨ ghǫ naxınì nàtso welè, eyı sìı eghǫǫ-dǫǫ̀ t'asade ch'à edenadąą̀ satsǫ̀ k'etı̨ lanì hǫt'e. Naxıgha ehkw'ı-ahodı t'à k'į̀ dèk'ǫ̀ǫ hazǫǫ̀ wehłı̨ı̨ naxıts'ǫ̀ ayehɂı̨ı̨ sìı naekwıì aahłe ha.  
\v 17 Eghǫǫ-dǫǫ̀ wets'ǫ satsǫ̀-ts'ah wheahɂǫ lanì, Nǫ̀htsı̨ edaxànaxeehtèe sìı naxıgha ehkw'ı-ahodı welì, eyıts'ǫ Yedàyeh Nezı̨ı̨ wets'ǫ behcho, Nǫ̀htsı̨ weyatıì hǫt'e sìı, wet'à aaht'ı̨.  
\v 18 Eyıts'ǫ Yedàyeh Nezı̨ı̨ naxıts'àdı t'à t'asìı hazǫǫ̀ xàɂaa gha yaahtı eyıts'ǫ naxıts'àdı ha weahkè. Eyıt'à hotıì kexoahdı eyıts'ǫ t'aats'ǫǫ̀ Nǫ̀htsı̨ wets'ǫ dǫ hazǫǫ̀ gha yaahtı. 
\p  
\v 19 Sı̨ sı segha yaahtı, dǫ ts'ǫ̀ gohde nı̨dè dàehsı̨ ha sìı gha yatı seghǫ̀t'à ha t'à. Hanì-ı̨dè sınì dehjı̨-le xè godı nezı̨ı̨ weghǫ t'asìı deɂı̨į̀ whelaa sìı dǫ ts'ǫ̀ haehsı̨ ha.  
\v 20 Eyı godı nezı̨ı̨ k'èxa sedaàtǫ xè satsǫ̀tł'ıì sek'e whela. Dejı̨-le xè dànì gots'ǫ̀ K'àowo godı nezı̨ı̨ weghǫ gohde ha sı̨ı̨hwhǫ k'ę̀ę̀ gohde ha segha yaahtı. 
\s1 Paul nǫǫde gots'ǫ̀ xàyaı̨htı 
\p  
\v 21 Tychıcus, sèot'ı̨ weghǫneehtǫǫ sìı t'aats'ǫǫ̀ gots'ǫ̀ K'àowo gha eghàlaeda hǫt'e. Sexè dàgǫ̀ht'ee sìı hazǫǫ̀ yeghǫ naxıxè godo ha, hanì-ı̨dè dànì sexè hòɂǫǫ eyıts'ǫ ayìı ghàlaehdaa sìı wek'èahsǫ ha.  
\v 22 Eyıt'à goxè dànì hòɂǫǫ sìı wek'èahsǫ ha, eyıts'ǫ naxıdzeè nàtsoò ayele ha naxıts'ǫ̀ wııhɂà hǫt'e. 
\p  
\v 23 Gòet'ı̨ gı̨ı̨lı̨ı̨ sìı Nǫ̀htsı̨ goxè sìghà hòɂǫǫ̀ ayııle, Nǫ̀htsı̨-Gotà eyıts'ǫ Zezì-Krı naxıghǫnegeètǫ xè naxıgha ehkw'ı-ahodıì agııle welè.  
\v 24 Dǫ hazǫǫ̀ t'aats'ǫǫ̀ gots'ǫ̀ K'àowo Zezì-Krı ghǫnegeètǫǫ sìı Nǫ̀htsı̨ gots'ǫ̀ sǫnıwǫ welè.