\id 2TI 562TIDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 2 Tımothy 
\mt1 2 Tımothy ts'ǫ̀ aatł'è 
\c 1  
\p  
\v 1 Sı̨ Paul, Nǫ̀htsı̨ wedahxà Zezì-Krı wecheekeèdeè aht'e. Zezì-Krı gogha ehkw'ı-ahodı nı̨dè welǫ whìle ts'ǫ̀ ts'eeda ha, Nǫ̀htsı̨ eyı ghǫ edeyatıì goghàı̨ɂǫ ı̨lè. Eyı godı nezı̨ı̨ t'à dǫ ts'ǫ̀ gohde ha sekayaetı. 
\p  
\v 2 Tımothy seza lanìı sìı dıı enı̨htł'è wets'ǫ̀ eehtł'è. Nǫ̀htsı̨-Gotà eyıts'ǫ Zezì-Krı nets'ǫ̀ sǫgı̨ı̨wǫ welè, etenegeèɂı̨ welè, eyıts'ǫ nexè sìghà welè. 
\s1 Ayìı neghǫ̀t'ǫǫ sìı hotıì wek'ènedì 
\p  
\v 3 Nǫ̀htsı̨ masì weehwhǫ. Secho gıxèht'eè, sınì ehkw'ı xè Nǫ̀htsı̨ wegha eghàlaehda, eyıts'ǫ dzęę̀, toò ehk'ę̀ę̀ t'aats'ǫǫ̀ negha wets'ǫ̀ yahtı.  
\v 4 Įdì nenatì wenahdì t'à, neehɂį̀ ha dehwhǫ. Neehɂį̀ nı̨dè sıì sınà ha ne.  
\v 5 Dànì nınì ehkw'ıı t'à negha ehkw'ı-ahodıı sìı wenahdì. Netsı̨ Loıs eyıts'ǫ nemǫ Eunıce dànì Nǫ̀htsı̨ gha gınì nàtso ı̨lè lanì, nı̨ sı hanì nınì nàtso hǫt'e wek'èehsǫ.  
\v 6 Eyı ts'ıhɂǫ̀ Nǫ̀htsı̨ edets'ǫ t'asìı nezı̨ı̨ neghàı̨ɂǫǫ sìı deɂǫ̀ǫ̀ wet'à nezı̨į̀ eghàlaı̨da. Sılà nek'e ahłà xè nek'eèyahtı t'à Nǫ̀htsı̨ wets'ǫ t'asìı nezı̨ı̨ nedzeè yìı ajàa sìı wenaądì.  
\v 7 Nǫ̀htsı̨ edets'ǫ Įnì Degaı goghàyı̨ı̨ɂǫǫ sìı wet'à goınì nàtso-le ade ha ayį̀į̀là nıìle, hanìkò wets'ǫ Įnì Degaı wet'à goınì nàtso ha, ełeghǫnets'eètǫ eyıts'ǫ nezı̨į̀ edek'èts'edì ha goghàyı̨ı̨ɂǫ hǫt'e. 
\p  
\v 8 Eyıt'à gots'ǫ̀ K'àowo weghǫ dǫ ts'ǫ̀ goı̨de ha į̀į̀zhanelı̨-le, eyıts'ǫ sı̨ wegha dǫ-danìı̨laa-kǫ̀ whıhda t'à seghǫ į̀į̀zhanelı̨-le. Hanìkò godı nezı̨ı̨ gha sexè daneeɂa ha welì. Nǫ̀htsı̨ sìı eyı gha nàts'etsoò agohɂı̨ hǫt'e.  
\v 9 Nǫ̀htsı̨ ededı̨ edaxàgoı̨la hǫt'e, wets'ǫ dǫ degaı ts'ı̨ı̨lı̨ ha gokayaı̨htı hǫt'e. T'asìı wı̨ı̨zìı hots'èhtsı̨ t'à agǫ̀ǫ̀là nıìle, hanìkò hanıwǫ t'à eyıts'ǫ wesǫnıwǫ ts'ıhɂǫ̀ agǫ̀ǫ̀là hǫt'e. Dıı nèè hòɂǫ kwe Zezì-Krı wet'ǫ̀ǫ̀ Nǫ̀htsı̨ hòt'a edesǫnıwǫǫ̀ goghàyı̨ı̨ɂǫ ı̨lè.  
\v 10 Hanìkò dıì sìı wesǫnıwǫ k'èhots'eezǫǫ̀ agǫ̀ǫ̀là, Zezì-Krı Edaxàgolee sìı gots'ǫ̀ nììtła t'à. Nàowo wet'à ełaàts'ewıı sìı yedıhòèhtsı̨ eyıts'ǫ godı nezı̨ı̨ t'à welǫ whìle ts'ǫ̀ ts'eedaa sìı wek'èts'eezǫǫ̀ agǫ̀ǫ̀là.  
\v 11 Godı nezı̨ı̨ dǫ ts'ǫ̀ haehsı̨ ha, eyıts'ǫ wet'à dǫ hoghàehtǫ ha, eyı gha wecheekeèdeè ehłı̨ ha sį̀į̀hchì hǫt'e.  
\v 12 Eyı ts'ıhɂǫ̀ hanì daıhɂa hǫt'e. Hanìkò amìı segha ehkw'ı adıı sìı wek'èehsǫ t'à, weghǫ į̀į̀zhaehłı̨ nıìle. Nǫǫde dzęę̀ gha ayìı wetł'aà wheɂǫ ahłàa sìı yek'èdì ha hotıì wek'èehsǫ hǫt'e. 
\p  
\v 13 Nàowo ehkw'ıı hoghàneehtǫǫ sìı nezı̨į̀ wek'ę̀ę̀ ı̨da. T'aats'ǫǫ̀ Zezì-Krı gha nınì nàtso anehwhǫ xè Zezì wets'ıhɂǫ̀ dǫ ghǫneę̀tǫ.  
\v 14 Nàowo ehkw'ıı netł'aà wheɂǫǫ̀ adlàa sìı hotıì wek'ènedì. Yedàyeh Nezı̨ı̨ godzeè yìı nàdèe sìı wexè wek'ènedì. 
\p  
\v 15 Asıa nèk'e dǫ wı̨ı̨zìı sexè aget'ı̨-le agejà wek'èı̨zǫ hǫt'e. Phygelus eyıts'ǫ Hermogenas ededı̨ kò sexè aget'ı̨-le agejà. 
\p  
\v 16 Onesıphorus eyıts'ǫ wekǫ̀ dǫ nàdèe sìı gots'ǫ̀ K'àowo gots'ǫ̀ wedzeè eteèɂı̨ welè, t'aats'ǫǫ̀ sınà asį̀į̀hwhǫ ı̨lè t'à, eyıts'ǫ sedaàtǫ kò seghǫ į̀į̀zhaelı̨-le ı̨lè.  
\v 17 Į̀le, hanì k'ehoɂa-le ı̨lè. Kǫ̀godeè Rome nììtła ekò segòhɂǫ gots'ǫ̀ hazǫǫ̀ ts'ǫ̀ sekak'eet'į̀ ı̨lè.  
\v 18 Nǫǫde dzęę̀ k'e nı̨dè Nǫ̀htsı̨ eteyeèɂı̨ welè. Kǫ̀ta Ephesus nàhdè ekò t'asìı nezı̨ı̨ łǫ t'à sets'àı̨dì ı̨lèe sìı hazǫǫ̀ wek'èı̨zǫ hǫt'e. 
\c 2  
\p  
\v 1 Eyıt'à nı̨ seza lanet'ee sìı, Zezì-Krı wesǫnıwǫ t'à nànetsoò adı̨ı̨le.  
\v 2 Eyıts'ǫ dǫ łǫ gıdaà ayìı dàehsı̨ı̨ sı̨į̀kw'oo sìı dǫ gıgha dìì-le laneewǫǫ sìı, eyıts'ǫ dǫ hoghàgeetǫ ha dìì-le sìı seyatıì gıtł'aà wheɂǫǫ̀ anele.  
\v 3 Zezì-Krı wets'ǫ eghǫǫ-dǫǫ̀ nezı̨ı̨ nelı̨, nexè hoìla nı̨dè goxèht'eè nınì nàtso anehwhǫ.  
\v 4 Dǫ eghǫǫ-dǫǫ̀ elı̨ı̨ sìı edets'ǫ k'àowo wınì k'ę̀ę̀ eghàlaeda ha nıwǫ hǫt'e, eyıt'à la eyıì-le k'alawo ha nıwǫ-le.  
\v 5 Eyı xèht'eè dǫ ehdaàtı̨mǫedaa sìı sǫnàts'edèe nàowoò k'ę̀ę̀ at'į̀ lenǫsıı t'asìı sǫǫ̀mbaekwo t'à hòèlı̨ı̨ dehnè ha nıìle.  
\v 6 Dǫ t'asìı dehshee k'è hòtł'ò eghàlaedaa sìı t'asìı dıìdì ajà nı̨dè ededı̨ t'akwełǫ̀ǫ̀ yeghǫ shètı̨ ha hǫt'e.  
\v 7 Jǫ ayìı dànèehsı̨ı̨ sìı hotıì wedaànınewo, gots'ǫ̀ K'àowo eyı nezı̨į̀ wenıı̨dì anııle. 
\p  
\v 8 Zezì-Krı wenaądì: k'àowocho Davıd wets'ıhɂǫ̀ǫ-dǫǫ̀ elı̨ eyıts'ǫ ełaı̨wo gots'ǫ naìdà. Eyı godı nezı̨ı̨ sìı wet'à dǫ hoghàehtǫ,  
\v 9 eyı gha daıhɂa hǫt'e eyıts'ǫ dǫjıı lanì satsǫ̀tł'ıì t'à daseetł'ı̨. Hanìkò Nǫ̀htsı̨ weyatıì sìı dǫ wı̨ı̨zìı dayeezà ha nıìle.  
\v 10 Eyıt'à Nǫ̀htsı̨ dǫ gòį̀hchìı sìı gıgha daıhɂa kò dehwhǫ. Hanì-ı̨dè ededı̨ sı Zezì-Krı edaxàgole welì, eyıts'ǫ welǫ whìle ts'ǫ̀ enıìyah k'ę̀ę̀ geeda welì. 
\p  
\v 11 Dıı yatı sìı hotıì ehkw'ı hǫt'e: 
\q1 Wexè ełaàts'ı̨ı̨dè nı̨dè 
\q2 wexè ts'eeda ha hǫt'e. 
\q1  
\v 12 Dats'ı̨ı̨ɂa kò weghǫ goınì nàtso ats'ı̨ı̨hwhǫ nı̨dè, 
\q2 wexè k'ahots'edè ha hǫt'e. 
\q1 Wek'èts'eezǫ-le ts'edı nı̨dè 
\q2 ededı̨ sı gok'èezǫ-le hadı ha. 
\q1  
\v 13 Wets'ǫ̀ goyatıì nàts'eezhì sǫnı kò 
\q2 ededı̨ edeyatıì nàezhì ha nıìle, 
\q2 edınì k'èch'a ade ha hòɂǫ nıìle t'à. 
\s1 Nǫ̀htsı̨ wınì k'ę̀ę̀ hòtł'ò eghàlaı̨da 
\p  
\v 14 Eyı yatı hazǫǫ̀ t'aats'ǫǫ̀ gınadì agı̨ı̨le. Nǫ̀htsı̨ nadąą̀ gıghǫnatı̨ı̨ɂà, yatı wet'àaɂà-le ghǫ ełek'èch'a agııdì-le. Eyı nezı̨ nıìle, dǫ gogeèhkw'ǫǫ sìı wet'à gınì nàtso-le at'į̀ zǫ hǫt'e.  
\v 15 Nǫ̀htsı̨ wınì k'ę̀ę̀ eghàlaı̨da gha hòtł'ò edı̨į̀hdzà. Dǫ yegha nezı̨į̀ eghàlaı̨dàa sìı edeghǫ į̀į̀zhaelı̨ nıìle, eyıts'ǫ yatı ehkw'ıı sìı nezı̨į̀ dǫ hoghàehtǫ hǫt'e.  
\v 16 Nǫ̀htsı̨ k'èch'a t'asìı ghǫ-le gots'edee sìı wedę anele. Dǫ hagedıı sìı Nǫ̀htsı̨ ts'ǫ̀ nezı̨į̀ nageɂa nıìle eyıts'ǫ denahk'e Nǫ̀htsı̨ gı̨ı̨wǫ-le aget'į̀.  
\v 17 Ayìı dǫ hoghàgogeehtǫǫ sìı tàda lanì dǫ ta ts'ǫ̀ ade ha. Hymenaeus eyıts'ǫ Phıletus eyı nàke sìı hanì dǫ hoghàgogeehtǫ.  
\v 18 Nàowo ehkw'ıı k'ę̀ę̀ dǫ hoghàgogeehtǫ-le agejà. Dǫ ełaı̨dèe hòt'a nagìdà ı̨lè gedıì hoghàgogeehtǫ t'à dǫ mǫ̀hdaa gıgha ehkw'ı-ahodı-le agogehɂı̨.  
\v 19 Hanìkò Nǫ̀htsı̨ wenàowoò sìı yìetł'aà nàtsoo whetǫ lanì hǫt'e. Wek'e dıı hanì dek'eèhtł'è: “Gots'ǫ̀ K'àowo amìı wets'ǫ agı̨ı̨t'ee sìı gok'èezǫ hǫt'e,” dek'eèhtł'è. Eyıts'ǫ dıı hanì dek'eèhtł'è: “Amìı gots'ǫ̀ K'àowo wegha ehkw'ı-ahodıı sìı hołı̨ı̨ nàowoò wedę ayele ha hǫt'e,” dek'eèhtł'è. 
\p  
\v 20 Dǫ ahxee wekǫ̀ goyìı sìı kw'à mǫ̀hdaa sǫǫ̀mbaekwo eyıts'ǫ sǫǫ̀mba degoo t'à hòèlı̨ı̨ whela hǫt'e. Eyıts'ǫ mǫ̀hdaa dechı̨ eyıts'ǫ kwe t'à hòèlı̨. Kw'à dètìı sìı t'asìı wet'àaɂà gha gıt'à-at'ı̨, ekò kw'à dètì-le sìı t'asìı-ts'ıì gha gıt'à-at'ı̨.  
\v 21 Dǫ hołı̨ı̨ wedę ayį̀į̀là nı̨dè kw'à wet'àaɂàa lanì hǫt'e. Wets'ǫ̀ K'àowo gha degaı xè wet'àhoòɂà at'į̀, eyıts'ǫ la nezı̨ı̨ ghàlaeda gha sınìwheda ha. 
\p  
\v 22 Cheko gınàowołı̨ı̨ ch'à edek'ènedì. Ehkw'ı zǫ k'ę̀ę̀ k'ehoı̨ɂa, t'aats'ǫǫ̀ Nǫ̀htsı̨ gha nınì nàtso anehwhǫ, dǫ ghǫneètǫ eyıts'ǫ ts'èwhı̨į̀ k'ehoı̨ɂa. Dǫ hazǫǫ̀ gıdzeè degaı xè Nǫ̀htsı̨ ghǫ gınì nàtsoo agı̨ı̨t'ee sìı hanì geeda hǫt'e.  
\v 23 Dǫ ezhı̨ne k'ę̀ę̀ ełets'ǫ̀ nàyagehtıı sìı gıxè anet'ı̨-le. Eyı hagedı t'à dǫ ełets'ǫ̀ gìch'e wek'èı̨zǫ hǫt'e.  
\v 24 Gots'ǫ̀ K'àowo wecheekeè sìı dǫ xè nàyaehtı ha nıìle. Dǫ hazǫǫ̀ ts'ǫ̀ wedzeè eteèɂı̨ ha hǫt'e, dǫ hoghàgoehtǫ ha dìì-le, eyıts'ǫ dǫ dzaı̨hwhǫ ha-le.  
\v 25 Dǫ gık'èch'a agedıı sìı edek'egı̨ı̨lı̨ gha Nǫ̀htsı̨ goghàhòɂà ha t'à ts'èwhı̨į̀ hoghàgoehtǫ ha hǫt'e. Hanì-ı̨dè nàowo ehkw'ıı sìı gık'èezǫǫ̀ agede ha,  
\v 26 ehkw'ı nànıgedè agede ha, wehłı̨ı̨ gok'èchıìtła ch'à eyıts'ǫ wenàowoò k'ę̀ę̀ geeda ch'à kwı̨geehdè ha. 
\c 3  
\s1 Nǫǫde dzęę̀ ts'ǫ̀ nı̨dè dàgode ha 
\p  
\v 1 Hanìkò dıı wedaànıahdè: Nǫǫde dzęę̀ ts'ǫ̀ hawe nı̨dè dıı nèk'e hoejı̨ı̨ łǫ k'ehokw'o ha.  
\v 2 Dǫ ededı̨ zǫ edeghǫnegeètǫ ha, sǫǫ̀mba ghageewı ha, xàhogedì agede xè xàdahogedì ha, nàdahogeeɂà ha, edèot'ı̨ k'èagı̨ı̨t'e ha-le, masì gı̨ı̨wǫ ha-le, degaı nàowoò dę geeda ha,  
\v 3 ełeghǫnegeètǫ ha-le, ełeghǫ nahogeele ha-le, ełıızì jıı gehtsı̨ ha, nàowołı̨ı̨ ch'à edek'ègedì ha dìì, ełets'ǫ̀ yıdagı̨ı̨t'e ha, t'asìı nezı̨ı̨ sìı dzagı̨ı̨hwhǫ ha,  
\v 4 ełeghǫyageeɂà ha, gınì nàìtło ha, t'asìı deè edegeetsı̨ ha, Nǫ̀htsı̨ nahk'e sìgoèt'ı̨ı̨ ghageewı ha,  
\v 5 Nǫ̀htsı̨ k'ègeezǫ lanì k'ehogeɂa kò, Nǫ̀htsı̨ t'asìı wegha dìì-le sìı k'ę̀ę̀ geeda nıìle. Dǫ hanıı sìı gıxè aaht'ı̨-le. 
\p  
\v 6 Dǫ hanıı sìı dǫ kǫ̀ goyageedè gà ts'èko gınì nàtso-le sìı ghǫyageeɂà. Edeyatıì t'à goghǫdageehnè t'à goxè nàgedè xè gots'ǫ̀ k'ahogedè. Dǫ hanıı sìı hołı̨ı̨ zǫ k'ę̀ę̀ geedaa eyıts'ǫ hołı̨ı̨ hazǫǫ̀ xàɂaa sìı gıdaèht'è.  
\v 7 T'aats'ǫǫ̀ hołı̨ı̨ nàowoò hoghàdegeetǫ, hanìkò Nǫ̀htsı̨ wenàowoò ehkw'ıı sìı gıgha ehkw'ı-ahodı hǫı̨lı̨-le.  
\v 8 Jannes eyıts'ǫ Jamber lagı̨ı̨t'e. Įnę̀ę whaà eyı dǫ nàke Moses k'èch'a gogı̨ı̨de ı̨lè, eyıts'ǫ nàowo ehkw'ıı k'èch'a eghàlagı̨ı̨dà ı̨lè. Hanıı dǫ edınìłı̨ı̨ k'ę̀ę̀ nànıgedèe sìı Zezì-Krı gıgha ehkw'ı-ahodı-le t'à Nǫ̀htsı̨ sìı gıdę agǫ̀ǫ̀là.  
\v 9 Jannes eyıts'ǫ Jamber lanì, hanıı dǫ sìı whaà ts'ǫ̀ haget'ı̨ ha nıìle, ezhı̨ne agı̨ı̨t'ee sìı dǫ hazǫǫ̀ nezı̨į̀ gınıedì ha. 
\s1 Ayìı hoghàneètǫǫ sìı wek'ę̀ę̀ ı̨da 
\p  
\v 10 Hanìkò nı̨ sìı ayìı hoghàehtǫǫ, dànì ehdaa, ayìı gha eghàlaehdaa, dànì segha ehkw'ı-ahodıı, dànì ts'èwhı̨į̀ dehwhǫǫ, dànì dǫ gıghǫneehtǫǫ, daıhɂà sǫnı kò sınì nàtso xè ehdaa, hazǫǫ̀ wek'èı̨zǫ hǫt'e.  
\v 11 Dànì sexè hoìla xè dasegį̀ı̨hɂa, eyıts'ǫ kǫ̀ta Antıoch, kǫ̀ta Iconıum eyıts'ǫ kǫ̀ta Lystra eyı hazǫǫ̀ sexè hagòjàa sìı hazǫǫ̀ wek'èı̨zǫ hǫt'e. Hanìkò gots'ǫ̀ K'àowo sìı eyı hazǫǫ̀ ch'à edaxàseèhtı̨.  
\v 12 Amìı Zezì-Krı wedahxà Nǫ̀htsı̨ wınì k'ę̀ę̀ ehda ha nıwǫǫ sìı dagı̨ı̨ɂaà agedle ha wek'èts'eezǫ hǫt'e.  
\v 13 Ekò dǫ wejıı eyıts'ǫ dǫ ghǫyageeɂàa gı̨ı̨lı̨ı̨ sìı denahk'e sıì negezı̨-le agede ha. K'èdaà dǫ ghǫyageeɂà xè ededı̨ sı gıghǫyahoeɂà ha.  
\v 14 Hanìkò nı̨ sìı ayìı hoghàneètǫ eyıts'ǫ ayìı negha ehkw'ı-ahodıı sìı wek'ę̀ę̀ ı̨da, dǫ eyı hazǫǫ̀ hoghànegeèhtǫǫ sìı gık'èı̨zǫ t'à.  
\v 15 Chekoa nechà-lea nelı̨ gots'ǫ Nǫ̀htsı̨ Nı̨htł'è k'èı̨zǫ hǫt'e. Eyı yatı t'à gonezǫǫ̀ anejà, eyıts'ǫ Zezì-Krı negha ehkw'ı-ahodıı sìı wet'à edaxàneetè ha hǫt'e.  
\v 16 Nǫ̀htsı̨ Nı̨htł'è k'e yatı dek'eèhtł'èe sìı Nǫ̀htsı̨ wets'ǫ hǫt'e. Wet'à dǫ hoghàts'eehtǫ gha nezı̨, wet'à dǫ nàts'eɂǫ ha dìì-le, dǫ ekǫ-le geeda nı̨dè wet'à ehkw'ı anagets'ehɂį̀, eyıts'ǫ weghàà dǫ ehkw'ı geeda gha hoghàgets'eehtǫ ha hǫt'e.  
\v 17 Hanì-ı̨dè Nǫ̀htsı̨ wets'ǫ dǫ t'aats'ǫǫ̀ nezı̨į̀ eghàlageeda gha t'asìı hazǫǫ̀ deghàà gıts'ǫ ha. 
\c 4  
\p  
\v 1 Nǫ̀htsı̨ wenadąą̀ eyıts'ǫ Zezì-Krı wenadąą̀ nets'ǫ̀ eehtł'è. Zezì ededı̨ sìı dǫ geedaa eyıts'ǫ dǫ ełaı̨dèe gosınìyaehtı ha. Gots'ǫ̀ wègoèht'į̀ ha eyıts'ǫ wenàowoò k'ę̀ę̀ hòɂǫǫ̀ ayele ha. Wedahxà dıı yatı neghàıhɂǫ hǫt'e:  
\v 2 Nǫ̀htsı̨ yatıì t'à dǫ ts'ǫ̀ goı̨de ha t'aats'ǫǫ̀ sınìwheęda. Nàowo ehkw'ıı k'ę̀ę̀ aahda, hołı̨ı̨ hòahtsı̨-le, eyıts'ǫ eyı gha naxınì nàtsoò aahłe, gìı̨dı. T'aats'ǫǫ̀ dǫ xè ts'èwhı̨į̀ neewǫ eyıts'ǫ hotıì nezı̨į̀ hoghàgı̨ı̨htǫ.  
\v 3 Įdaà nı̨dè dǫ sìı nàowo ehkw'ıı ka-egeèhkw'ǫ ha-le agode ha. Dàgı̨ı̨wǫǫ sìı zǫ k'ę̀ę̀ hoghàgoetǫ gı̨ı̨wǫ ha. Ayìı geèhkw'ǫ hagı̨ı̨wǫǫ sìı t'à hoghàgeetǫ gha hoghàehtǫǫ-dǫǫ̀ łǫ edegha nègele ha.  
\v 4 Nàowo ehkw'ıı ka-egeèhkw'ǫ-le agede ha, ekìı godı dǫ yèhtsı̨ zǫ ka-egeèhkw'ǫ ha.  
\v 5 Hanìkò nı̨ sìı t'asìı hazǫǫ̀ gha nınì ehkw'ı anehwhǫ, negha hoìla kò wexè ts'èwhı̨į̀ ı̨da. Godı nezı̨ı̨ k'eneɂa gha nekayaetı ne t'à, la neghǫ̀t'ǫǫ sìı t'aats'ǫǫ̀ wek'ę̀ę̀ hòtł'ò eghàlaı̨da. 
\p  
\v 6 Sı̨ hòt'a selǫ nèhòkw'ı ha nìhǫǫwo, Nǫ̀htsı̨ gha sezhį̀į̀ k'ehǫǫwo lanì. Dıı nèk'e gots'ǫǫ̀ asedle ha nìhǫǫwo.  
\v 7 Ehdageedè t'à dǫ nàtła k'etı̨mǫehdaa laht'e. Nezı̨į̀ k'etı̨mǫehda t'à nǫǫde ts'ǫ̀ gıghǫèhnǫ, eyıt'à nǫǫde ts'ǫ̀ Nǫ̀htsı̨ gha ı̨łaà sınì nàtso hǫt'e.  
\v 8 Ehkw'ı gha sııtà xè hoehnǫ ts'ıhɂǫ̀ t'asìı sǫǫ̀mbaekwo t'à hòèlı̨ı̨ nǫǫde dzęę̀ k'e seghǫ̀t'à ha. Gots'ǫ̀ K'àowo ededı̨ zǫ ehkw'ı dǫ sınìyaehtı hǫt'e eyıts'ǫ ayìı dehnǫǫ sìı seghàyııɂà ha. Sı̨ zǫ hasele ha nıìle, hanìkò dǫ hazǫǫ̀ wègoèht'į̀ gha kànegı̨ı̨ɂaa sìı ededı̨ sı hagole ha hǫt'e. 
\s1 Paul wexè hoìla hoòwo 
\p  
\v 9 Įwhąą̀ sets'ǫ̀ anede gha hòtł'ò edı̨į̀hdzà.  
\v 10 Demas dıı nèk'e t'asìı whelaa ghǫneètǫ t'à sets'ǫǫ̀ ajà xè kǫ̀ta Thessalonıca ts'ǫ̀ ajà. Crescens Galatıa nèk'e ts'ǫ̀ ajà, eyıts'ǫ Tıtus Dalmatıa nèk'e ts'ǫ̀ ajà.  
\v 11 Luke ededı̨ zǫ segà wheda. Mark wekàątła gà edexè awı̨ı̨le, Nǫ̀htsı̨ wılaà ghàlaehda ekò nezı̨į̀ sets'àı̨dì ı̨lè t'à.  
\v 12 Tychıcus kǫ̀ta Ephesus ts'ǫ̀ awèhłà.  
\v 13 Jǫ ts'ǫ̀ nìı̨tła nı̨dè, kǫ̀ta Troas ekǫ Carpus wegà seɂeè aèhchì ahłàa sìı edexè anele nǫǫ̀. Senı̨htł'è eyıts'ǫ enı̨htł'è ewò t'à hòèlı̨ı̨ eyı t'aa wedę awı̨ı̨de sǫ̀ǫ̀. \fig Enı̨htł'è ewò t'à hòèlı̨ı̨|src="HK072A.tif" size="span" ref="4.13" \fig* 
\p  
\v 14 Alexander satsǫ̀-eghàlaedaa-dǫǫ̀ sets'ǫ̀ hoìla deè hòèhtsı̨. Gots'ǫ̀ K'àowo eyı k'èxa hoìla yeghàhòɂà ha.  
\v 15 Nı̨ sı wech'à edexonehdı, godı nezı̨ı̨ t'à dǫ hoghàts'eehtǫǫ sìı sıì wek'èch'a hǫt'e t'à. 
\p  
\v 16 T'akwełǫ̀ǫ̀ seghǫ nàyaetı ekò dǫ wı̨ı̨zìı sek'edaedı-le ı̨lè, hazǫǫ̀ sets'ǫǫ̀ nageèhde ı̨lè. Eyı k'èxa Nǫ̀htsı̨ t'asagǫ̀ǫ̀là-le nı̨dè dehwhǫ.  
\v 17 Hanìkò gots'ǫ̀ K'àowo sexè at'ı̨ t'à, sınì nàtsoò asį̀į̀là. Hanì ts'ıhɂǫ̀ godı nezı̨ı̨ deghàà dǫ ts'ǫ̀ gohde ha, eyıts'ǫ dǫ hazǫǫ̀ Israel got'ı̨į̀ agı̨ı̨t'e-le sìı geèhkw'ǫ ha welì. Ekìıyeè k'e goìjìıcho wewà ch'à Nǫ̀htsı̨ edaxàsį̀ı̨htı̨ ı̨lè.  
\v 18 Nàowołı̨ı̨ hazǫǫ̀ sek'alawo ch'à gots'ǫ̀ K'àowo edaxàsehtè ha, eyıts'ǫ yak'e wenàowoò k'ę̀ę̀ hòɂǫǫ sìı ts'ǫ̀ asele ha. Welǫ whìle ts'ǫ̀ weghàsǫhoedı welè. Amen. 
\s1 Naxıxè sìghà welè 
\p  
\v 19 Prıscılla eyıts'ǫ Aquıla, eyıts'ǫ Onesıphorus wekǫ̀ dǫ hazǫǫ̀ nàdèe sìı segha “Naxıxè sìghà welè” gìı̨dı.  
\v 20 Erastus kǫ̀ta Corınth aìda, eyıts'ǫ kǫ̀ta Mıletus ekǫ Trophımus eyaelı̨ t'à sexè ajà-le.  
\v 21 Xok'e agode kwe jǫ sets'ǫ̀ anede ha wı̨ı̨hdzà. Eubulus yatı nezı̨ı̨ nedanìı̨ɂǫ, eyıts'ǫ Pudens, Lınus, Claudıa, eyıts'ǫ gòet'ı̨ hazǫǫ̀, “Nexè sìghà welè,” nègedı. 
\p  
\v 22 Gots'ǫ̀ K'àowo nets'ǫ ı̨nì xè at'ı̨ welè. Nǫ̀htsı̨ nets'ǫ̀ sǫnıwǫ welè.