\id 2PE 622PEDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 2 Peter 
\mt1 2 Peter wenı̨htł'è 
\c 1  
\p  
\v 1 Sı̨ Sımon-Peter, Zezì-Krı wegha eghàlaehda eyıts'ǫ wecheekeèdeè aht'e. Dǫ Nǫ̀htsı̨ gıgha ehkw'ı-ahodıì agììdlàa sìı gıts'ǫ̀ aatł'è hǫt'e. Nǫ̀htsı̨ eyıts'ǫ Zezì-Krı Edaxàgolee gıts'ıhɂǫ̀ ehkw'ı aahdaa k'ę̀ę̀ naxııtà hǫt'e. Goxı̨ gogha ehkw'ı-ahodıì agòìdlàa sìı gogha t'asìı wet'àaɂàa deè hǫt'e, eyı xèht'eè naxı̨ sı naxıgha t'asìı wet'àaɂàa deè hǫt'e. 
\p  
\v 2 Nǫ̀htsı̨-Gotà eyıts'ǫ gots'ǫ̀ K'àowo Zezì gık'èahsǫ t'à Nǫ̀htsı̨ t'aats'ǫǫ̀ naxıxè sǫnıwǫ welè, eyıts'ǫ naxıxè sìghà hòɂǫ ayııle. 
\s1 Nǫ̀htsı̨ gokayaetıı sìı eyı denahk'e hòtł'ò yàahtǫ̀ 
\p  
\v 3 Nǫ̀htsı̨ nàtso wehòhɂǫ t'à, wet'à ts'eeda gha eyıts'ǫ wınì k'ę̀ę̀ ts'eeda gha t'asìı hazǫǫ̀ goghàı̨la hǫt'e. Nǫ̀htsı̨ gots'ǫ̀ wedzeè nezı̨ı̨ xè enıìyah wehòhɂǫ t'à gokayaı̨htıı sìı wek'èts'eezǫǫ̀ ats'ejà.  
\v 4 Gots'ǫ̀ hanì naɂa ts'ıhɂǫ̀ t'asìı deè godawhelaà ayį̀į̀làa sìı ghǫ edeyatıì goghàı̨ɂǫ hǫt'e. Eyı ts'ıhɂǫ̀ Nǫ̀htsı̨ xè aaht'ı̨į̀ aahjà eyıts'ǫ dıı nèk'e dǫ gınàowołı̨ı̨ k'ę̀ę̀ aahda ch'à edaxàwhahde hǫt'e. 
\p  
\v 5 Nǫ̀htsı̨ hanì goxè hòɂǫ ha nıwǫ t'à naxıgha ehkw'ı-ahodıı sìı wexè nezı̨į̀ k'ehoahɂa, eyıts'ǫ nezı̨į̀ k'ehoahɂa wexè Nǫ̀htsı̨ k'èahsǫ ha hoghàdeahtǫ,  
\v 6 eyıts'ǫ Nǫ̀htsı̨ k'èahsǫǫ sìı wexè hołı̨ı̨ ch'à edek'èahdì, eyı wexè naxınì nàtsoò aahłe, eyıts'ǫ naxınì nàtsoo sìı wexè Nǫ̀htsı̨ wınì k'ę̀ę̀ aahda,  
\v 7 Nǫ̀htsı̨ wınì k'ę̀ę̀ aahdaa sìı wexè naxèot'ı̨ gıts'ǫ̀ naxıdzeè nezı̨ aaht'ı̨, eyıts'ǫ naxèot'ı̨ gıts'ǫ̀ naxıdzeè nezı̨ wexè ełeghǫnıahtǫ.  
\v 8 Hanì aahda gha nàahtso nı̨dè Zezì-Krı wek'èahsǫǫ sìı naxık'e wègaat'ı̨ ha, eyıts'ǫ k'ètł'ǫ̀ hanì aahda ha nıìle.  
\v 9 Ekò dǫ hanì eda-le sìı wedaà goìle lanì hǫt'e, eyıts'ǫ dànì ı̨nę̀ę gots'ǫ wehołı̨į̀ weghǫ whìle adlàa sìı yenadì-le hǫt'e. 
\p  
\v 10 Eyıt'à sèot'ı̨ı̨, naxıkayaetı xè naxììchì k'ę̀ę̀ aahda, eyı ghǫ naxınì nàtsoò aahłe hanì-ı̨dè naxıxè hagode ha. Hanì edeghàlaahda nı̨dè hołı̨ı̨ naxıdaèht'è hǫı̨lı̨ ha nıìle.  
\v 11 Hanìkò gots'ǫ̀ K'àowo Zezì-Krı, Edaxàgolee elı̨ı̨ sìı, wenàowoò k'ę̀ę̀ welǫ whìle ts'ǫ̀ hòɂǫǫ sìı goyaahdè t'à Nǫ̀htsı̨ naxıghǫ wınà ha hǫt'e. 
\s1 Nakwenàoɂǫǫ Nǫ̀htsı̨ yatıì t'à gogı̨ı̨de 
\p  
\v 12 Eyı hazǫǫ̀ hòt'a wek'èahsǫ xè nàowo ehkw'ıı ghǫ naxınì nàtso kò t'aats'ǫǫ̀ wenaahdì anaxehłe ha hǫt'e.  
\v 13 Įłaà sezhį̀į̀ eda ts'ǫ̀ eyı wenaahdì anaxehłe ha sìı segha ehkw'ı hǫt'e.  
\v 14 Whaà-le-t'ıì sezhį̀į̀ ełaàwı ha, Zezì-Krı hotıì wek'èehsǫǫ̀ asį̀į̀là hǫt'e.  
\v 15 Sewhìle tł'axǫǫ̀ kò eyı hazǫǫ̀ wenaahdì gha t'aats'ǫǫ̀ naxıts'ǫ̀ gohde ha. 
\p  
\v 16 Gots'ǫ̀ K'àowo Zezì-Krı dıı nèk'e ts'ǫ̀ ajà eyıts'ǫ dànì nàtso wehòhɂǫ ghǫ naxıxè gots'adoo sìı ekìı godı dǫ yèhtsı̨ t'à ats'edı nıìle, hanìkò dànì enıìyah deè elı̨ı̨ sìı goxı̨ godaà t'à wets'aɂı̨ hǫt'e.  
\v 17 Yak'e gots'ǫ Nǫ̀htsı̨-Gotà ededı̨ Zezì xè enıìyah hòɂǫ xè weghàsǫedıì ayį̀į̀là hǫt'e, yets'ǫ̀ dıı hadı t'à, “Dıı Seza hǫt'e, weghǫneehtǫ, eyıts'ǫ weghǫ sǫdehwhǫ hǫt'e,” yeghǫ hadı ı̨lè.  
\v 18 Zezì wexè shìh degaı ka ts'eèhkw'e ekò yak'e gots'ǫ hats'edı ı̨lèe sìı goxı̨ wets'ıìkw'o ı̨lè. 
\p  
\v 19 Goxè hanàhòwo ts'ıhɂǫ̀ nakwenàoɂǫǫ gıyatıì ehkw'ı hǫt'e denahk'e wek'èts'eezǫǫ̀ ats'ejà. Eyı yatı sìı togoòtł'òo nı ek'aèk'ǫ nı̨ı̨dı̨ lanì hǫt'e. Dzę wegòò èhkǫ gots'ǫ̀, eyıts'ǫ naxıdzeè yìı whǫ̀-k'eàhkaa daaɂaà ade gots'ǫ̀ hotıì wenaahdì welì.  
\v 20 Nǫ̀htsı̨ Nı̨htł'è sìı nakwenàoɂǫǫ edınì k'ę̀ę̀ dek'enègı̨ı̨tł'è nıìle, eyı wenıahdì ha naxıgha sıì wet'àaɂà hǫt'e.  
\v 21 Nǫ̀htsı̨ yatıì sìı dǫ gınì k'ę̀ę̀ aatł'è nıìle, hanìkò Yedàyeh Nezı̨ı̨ gıdzeè yìı nàèhdǫ t'à nakwenàoɂǫǫ Nǫ̀htsı̨ yatıì t'à gogı̨ı̨de hǫt'e. 
\c 2  
\s1 Naxıta dǫ mǫ̀hdaa hogets'ì t'à hoghànaxegeehtǫ ha 
\p  
\v 1 Hanìkò ı̨nę̀ę sìı dǫ gıta nakwenàoɂǫǫ hogets'ì gogede gòı̨lè, eyı xèht'eè naxıta dǫ mǫ̀hdaa hogets'ì t'à hoghànaxegeehtǫ ha. Dǫ naàhtǫ Nǫ̀htsı̨ ghǫ ekǫ-le hoghànaxegeehtǫ ha, gots'ǫ̀ K'àowo t'asìı wegha dìì-le ededı̨ nàgoèhdìı sìı k'ahowo nıìle gedı ha. Haget'ı̨ t'à ı̨whąą̀ edegha hoìla hogehtsı̨ hǫt'e.  
\v 2 Dǫ łǫ edenàowołı̨ı̨ k'ę̀ę̀ eghàlageedaà agede ha, eyıt'à dǫ eyıì-le nàowo ehkw'ıı ghǫ nezı̨į̀ xàyagehtı ha-le.  
\v 3 Eyı dǫ hoghàgogeehtǫǫ sìı t'asìı gha egedì-le t'à ededı̨ godı gèhtsı̨ı̨ sìı t'à naxıxè gogedo. Whaà gots'ǫ nàgeekwa ha gıgha hòɂǫ hǫt'e, hanìkò amìı godıhohtsı̨ ha sìı whetı̨ nıìle. 
\p  
\v 4 Nǫ̀htsı̨ wets'ǫ yak'eet'ı̨į̀ hołı̨ı̨ hogèhtsı̨ ekò etegoèhɂı̨-le ı̨lè, hanìkò wehłı̨kǫ̀ ts'ǫ̀ agǫ̀ǫ̀là. Gısınìyaetıı dzęę̀ gots'ǫ̀ togoòtł'òo gòɂǫǫ k'è gıdanìı̨la hǫt'e.  
\v 5 Eyıts'ǫ ı̨nę̀ę whaà hołı̨ı̨-hogehtsı̨ı̨-dǫǫ̀ dıı nèk'e nàgı̨ı̨dèe sìı Nǫ̀htsı̨ etegoòɂı̨-le t'à, dèè te teètł'ıı t'à ełaàgı̨ı̨dè agǫ̀ǫ̀là ı̨lè. Noah nàowo ehkw'ıı ghǫ goı̨dee sìı ededı̨ zǫ edaxàyèhtı̨ eyıts'ǫ wexè dǫ łǫ̀hdı̨ edaxàgoı̨la.  
\v 6 Eyıts'ǫ Sodom got'ı̨į̀ eyıts'ǫ Gomorah got'ı̨į̀ gots'ǫ̀ hoìla eghàlaı̨dà; łèbè gı̨ı̨lı̨ ts'ǫ̀ gok'enı̨hk'ǫ. Eyı hanì gots'ǫ̀ eghàlaı̨dàa sìı weghàà dǫ Nǫ̀htsı̨ k'èch'a hogehtsı̨ı̨ sìı dànì ı̨daà Nǫ̀htsı̨ gots'ǫ̀ eghàlaeda ha wek'èhoedzǫǫ̀ ayį̀į̀là hǫt'e.  
\v 7 Hanìkò Lot ehkw'ı edaa sìı Nǫ̀htsı̨ edaxàyį̀ı̨htı̨, dǫ wemǫǫ̀ hołı̨ı̨ nàowoò k'ę̀ę̀ geeda ts'ıhɂǫ̀ sıì wegha dìì ı̨lè.  
\v 8 (Eyı dǫ ehkw'ı edaa sìı dzę taàt'eè dǫ wejıı gota nàdè, eyı xè dànì hołı̨ı̨ nàowoò k'ę̀ę̀ eghàlageeda goghàeda xè goìkw'o t'à sıì wegha dìì ı̨lè.)  
\v 9 Hanì hòɂǫ nı̨dè gots'ǫ̀ K'àowo dǫ Nǫ̀htsı̨ wınì k'ę̀ę̀ geedaa sìı dànì hoìla ch'à edaxàgohtè ha sìı yek'èezǫ hǫt'e, hanìkò amìı ehkw'ı geeda-le sìı nàgoehkwa hǫt'e eyıts'ǫ gısınìyaetıı dzęę̀ gha gok'èdì.  
\v 10 Dǫ edınìłı̨ı̨ k'ę̀ę̀ geeda xè gıts'ǫ̀ k'aodèe nègelı̨-le sìı hotıì gıxè hagode ha. 
\p Hanıı dǫ sìı gıkwì nàtso xè xàhogedì t'à, yat'a ı̨nì nàtsoo k'adageedè gha edègeejı̨-le.  
\v 11 Yak'eet'ı̨į̀ denahk'e nàgetso xè t'asìı gıgha dìì-le kò, gots'ǫ̀ K'àowo wenadąą̀ yatıjıı t'à yat'a ı̨nì nàgetso gok'e nìdahogeeɂà nıìle.  
\v 12 Hanìkò eyı dǫ t'asìı nıgeedì-le ghǫ ekǫ-le gogede t'à Nǫ̀htsı̨ k'èch'a agedı. Tıts'aàdìı wets'àhoejı̨ı̨ lagı̨ı̨t'e eyıts'ǫ tıts'aàdìı k'ę̀ę̀ k'ehogeɂa. Gık'èchıìtła xè ełaàgede zǫ gha gıgǫ̀hłı̨ lagı̨ı̨t'e, eyıts'ǫ tıts'aàdìı lanì gıdıhołè ha. 
\p  
\v 13 Dànì dǫ ts'ǫ̀ hoìla ghàlagı̨ı̨dà k'ę̀ę̀ gıts'ǫ̀ hoìla adle ha. Dzę kò hołı̨ı̨ k'ę̀ę̀ sìgoèt'ı̨ hogehtsı̨ı̨ gıgha nezı̨. Eyı hanıı dǫ naxıta aget'ı̨ t'à į̀į̀zhaahłı̨ ha naxıghàlageeda. Naxıxè nàsı̨ ghǫ shègezhe kò edehołı̨į̀ k'ę̀ę̀ k'ehogeɂa gıgha nezı̨.  
\v 14 T'aats'ǫǫ̀ gınìłı̨ı̨ t'à ts'èko ghàgeeda, hołı̨ı̨ hogehtsı̨ı̨ gıgha hòt'a-le, dǫ gınì nàtso-le sìı ts'ıɂǫ̀ geele, egedì-le gha nàgeghò. Dǫ hanıı sìı Nǫ̀htsı̨ hòtł'ò nàgoehkwa ha hǫt'e.  
\v 15 Nàowo ehkw'ıı ts'ǫǫ̀ nıwà agejà, Beyor weza Balaam wenàowoò k'ę̀ę̀ geedaà agejà. Eyı dǫ sìı hołı̨ı̨ ghàlaeda k'èxa sǫǫ̀mba ehtsı̨ı̨ wegha nezı̨.  
\v 16 Hanìkò tłı̨tsoa ekǫ-le hòèhtsı̨ yèhdı. Tıts'aàdìı sìı gogede ha dìì kò eyı tłı̨tsoa dǫ lanì yets'ǫ̀ xàyaı̨htı t'à eyı nakwenàoɂǫǫ-jıı sìı ezhı̨ne k'ę̀ę̀ k'ehoɂa-le ayį̀į̀là. 
\p  
\v 17 Dǫ hanıı sìı tık'è tı whìle lagı̨ı̨t'e, eyıts'ǫ nı̨hts'ı nàtsoo t'à k'oh k'eweehts'ı lagı̨ı̨t'e. Sıì togoòtł'òo gòɂǫǫ sìı gıdawheɂǫ hǫt'e.  
\v 18 Yatı wet'àaɂà-le t'à xàdahogedì, dǫ gınìłı̨ı̨ t'à hołı̨ı̨ hogehtsı̨ ha gok'alagedè, eyıts'ǫ hołı̨ı̨ k'ę̀ę̀ geedaa gıta gots'ǫ dǫ edaxàwhedee sìı k'achı̨ hołı̨ı̨ hogehtsı̨ ha gok'alagedè.  
\v 19 “T'asìı naxıts'ǫ̀ k'ahowo ha nıìle,” gògedı kò ededı̨ hołı̨ı̨ nàowoò gıts'ǫ̀ k'ahowo. T'asìı dǫ daèt'èe sìı yegha k'àowo elı̨ hǫt'e.  
\v 20 Gots'ǫ̀ K'àowo Zezì-Krı Edaxàgolee sìı gık'èezǫǫ̀ agejà t'à dıı nèk'e hołı̨ı̨ nàowoò ch'à edaxàgı̨ı̨de tł'axǫǫ̀, k'achı̨ hołı̨ı̨ nàowoò k'alagedè agejà nı̨dè, nǫǫde ts'ǫ̀ t'akwełǫ̀ǫ̀ nahk'e gıxè deɂǫ̀ǫ̀ hoìla agode ha hǫt'e.  
\v 21 Ehkw'ı ts'eedaa nàowoò k'èhogeezǫ-le nı̨dè denahk'e gıgha nezı̨ ha ı̨lè. Hanìkò gık'èezǫ kò Nǫ̀htsı̨ nàowoò gıts'ǫ̀ adlàa sìı wedę agį̀į̀là t'à denahk'e gıxè hoìla agode ha.  
\v 22 Dıı hats'edıı sìı gıghǫ ehkw'ı xàyaı̨tı hǫt'e: “Tłı̨ ayìı naxaèhkoo sìı k'achı̨ yets'ǫ̀ anajà,” dek'eèhtł'è, eyıts'ǫ “Gogòò wek'enaatsoò adlàa sìı k'achı̨ ehtł'èk'ò ta k'edeɂà anajà,” dek'eèhtł'è. 
\c 3  
\s1 Gots'ǫ̀ K'àowo nǫ̀ǫtłaa dzęę̀ k'e 
\p  
\v 1 Seàgı̨ą, dıì xè nàakeè naxıts'ǫ̀ eehtł'è hǫt'e. Ayìı dàehsı̨ı̨ sìı t'aats'ǫǫ̀ wenaahdì ha dehwhǫ. Eyı nı̨htł'è nàke naxıts'ǫ̀ ahłàa sìı wet'à ehkw'ı nànıahdè aahde ha naxeehwhǫ.  
\v 2 Įnę̀ę sìı nakwenàoɂǫǫ degaı yatı goghàgı̨ı̨ɂǫǫ sìı wenaahdì ha naxeehwhǫ, eyıts'ǫ gots'ǫ̀ K'àowo Edaxàgolee elı̨ı̨ sìı wecheekeèdeè gıt'ǫ̀ǫ̀ nàowo nezı̨ı̨ naxıghàı̨ɂǫ hǫt'e, eyı sìı wenaahdì ha naxeehwhǫ. 
\p  
\v 3 Nǫǫde dzęę̀ ts'ǫ̀ whaà-le nı̨dè, eghageedlòo-dǫǫ̀ edınìłı̨ı̨ k'ę̀ę̀ geedaa sìı naxıta agede ha, eyı sìı hotıì wenıahdì ha hǫt'e.  
\v 4 Dıı hagedı ha, “Zezì jǫ ts'ǫ̀ anade ha hadı nı̨dè, welaedì? Gocho ełaàgı̨ı̨dè gots'ǫ eładı̨į̀ agòjà whìle. Dıı dèè hòèlı̨ gots'ǫ dàgǫ̀ht'ee sìı agǫ̀hłı̨,” hagedı ha.  
\v 5 Hanìkò Nǫ̀htsı̨ edeyatıì t'à yak'e whehtsı̨ eyıts'ǫ tı yìı gots'ǫ dèè ı̨dòo ayį̀į̀là eyıts'ǫ tı t'à dèè xè hòɂǫǫ̀ ayį̀į̀là, eyı sìı gınadì ha gı̨ı̨wǫ-le.  
\v 6 Whaà hoògǫ tł'axǫǫ̀ eyı tı dèè goteètł'ı ı̨lèe t'à t'asìı hazǫǫ̀ wedıhòłı̨.  
\v 7 Nǫ̀htsı̨ weyatıì et'ıì t'à yak'e eyıts'ǫ dıı nèk'e gok'eek'ǫ̀ gha wek'èhodì hǫt'e. T'asìı hazǫǫ̀ wesınìyaetıı dzęę̀ k'e ts'ǫ̀ wek'èhodì, eyıts'ǫ ekìıyeè k'e nı̨dè dǫ hazǫǫ̀ Nǫ̀htsı̨ k'èch'a geedaa sìı gıdıhołè ha. 
\p  
\v 8 Seàgı̨ą, dıı t'asìı ı̨łè wenaahdì-le sǫ̀ǫ̀: Nǫ̀htsı̨ wegha ı̨łè dzęę̀ sìı ı̨łè-lemì xo lanì hǫt'e, eyıts'ǫ ı̨łè-lemì xo sìı wegha dzę ı̨łè lanì hǫt'e.  
\v 9 Gots'ǫ̀ K'àowo edeyatıì goghàı̨ɂǫǫ sìı yek'ę̀ę̀ eghàlaeda ha whį̀at'ı̨ nıìle, hanìkò dǫ mǫ̀hdaa whį̀at'ı̨ gı̨ı̨wǫ. Nǫ̀htsı̨ sìı ts'èwhı̨į̀ naxıdanaèhɂı̨ hǫt'e, dǫ wı̨ı̨zìı wedıhołè ha nıwǫ-le, dǫ hazǫǫ̀ edek'egı̨ı̨lı̨ ha goı̨hwhǫ hǫt'e. 
\p  
\v 10 Hanìkò gots'ǫ̀ K'àowo nǫ̀ǫtłaa dzęę̀ k'e nı̨dè dǫ gıxaelı ha-le, eeɂį̀ı̨-dǫǫ̀ enìxàezhì lagode ha. Ekìıyeè k'e nı̨dè hòtł'ò nàgoekw'ǫ xè yat'a hazǫǫ̀ whìle agode ha, whǫ̀ dawhelaa hazǫǫ̀, dıı nèè eyıts'ǫ t'asìı hazǫǫ̀ wek'e whelaa sìı kǫ̀ t'à wedıhołè ha. 
\p  
\v 11 T'asìı hazǫǫ̀ hanì wedıhołè ha t'à dànì aahda ha sìı edeghǫ nànıahdè welì. Nǫ̀htsı̨ wınì k'ę̀ę̀ degaı k'ę̀ę̀ aahda.  
\v 12 Nǫ̀htsı̨ nììtłaa dzęę̀ k'e whaà-le-t'ıì weghǫ nèhòkw'ı ha wek'èahsǫ xè wek'enaahɂı̨ hǫt'e. Eyı dzęę̀ k'e nı̨dè yat'a hazǫǫ̀ gok'eek'ǫ̀ ha, eyıts'ǫ t'asìı hazǫǫ̀ kǫ̀ nàtsoo t'à wedıhołè ha.  
\v 13 Hanìkò Nǫ̀htsı̨ weyatıì k'ę̀ę̀ agode ha sìı gogha ehkw'ı-ahodı, yak'e wegòò eyıts'ǫ dèè wegòò gǫ̀hłı̨ ha t'à goınà xè wexats'eelı hǫt'e. Ekǫ nı̨dè nàowo ehkw'ıı zǫ k'ę̀ę̀ ts'eeda ha. 
\p  
\v 14 Eyıt'à seàgı̨ą, naxınà xè wexaahłı t'à t'asìı wejıı wı̨ı̨zìı naxık'e wheɂǫ-le gha hòtł'ò eghàlaahda, naxık'e nìdahoet'à ha-le, eyıts'ǫ Nǫ̀htsı̨ xè ts'èwhı̨į̀ naxıxè hòɂǫǫ gha hotıì edeahdzà.  
\v 15 Gots'ǫ̀ K'àowo ts'èwhı̨į̀ godanaèhɂı̨ t'à ı̨łaà dǫ łǫ edaxàgole ha nıwǫ, eyı wedaànıahdè. Gòet'ı̨ Paul weghǫnets'eètǫǫ sìı ededı̨ sı Nǫ̀htsı̨ dahxà hanì naxıts'ǫ̀ gǫǫzǫǫ̀ ı̨ı̨tł'è ı̨lè.  
\v 16 Paul, wenı̨htł'è k'e eyı hazǫǫ̀ ełèht'eè enı̨ı̨tł'è ı̨lè. T'asìı mǫ̀hdaa ghǫ ı̨ı̨tł'èe sìı dǫ gınıedì ha gıgha dezhì. Dǫ mǫ̀hdaa t'asìı nıgeedì-le xè hòtł'ò gıgha ehkw'ı-ahodı-le t'à weyatıì ekǫ-le agehɂı̨, Nǫ̀htsı̨ Nı̨htł'è eyıì-le sı hagehɂı̨ lanì. Haget'ı̨ t'à gıdıhołè ha hǫt'e. 
\p  
\v 17 Eyıt'à seàgı̨ą, eyı hòt'a wek'èahsǫ t'à, hotıì edexoahdı. Hanì-ı̨dè dǫ Nǫ̀htsı̨ k'èagı̨ı̨t'e-le sìı gıxè naxıdıhołè ha-le, eyıts'ǫ Nǫ̀htsı̨ edaxànaxı̨ı̨la gots'ǫ ek'èt'à anaahde ha-le.  
\v 18 Gots'ǫ̀ K'àowo Zezì-Krı Edaxàgolee elı̨ı̨ sìı denahk'e nezı̨į̀ wek'èahsǫ xè denahk'e wesǫnıwǫ xè aahda. Dıì gots'ǫ welǫ whìle ts'ǫ̀ ededı̨ weghàsǫts'eedı ha hǫt'e! Amen.