\id 2CO 482CODOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 2 Corınth 
\mt1 2 Corınth got'ı̨į̀ gıts'ǫ̀ aatł'è 
\c 1  
\p  
\v 1 Sı̨ Paul, Nǫ̀htsı̨ wedahxà Zezì-Krı wecheekeèdeè aht'e. Gòet'ı̨ Tımothy wexè kǫ̀ta Corınth Nǫ̀htsı̨ wecheekeè nàgedèe sìı gıts'ǫ̀ eehtł'è, eyıts'ǫ Achaıa nèk'e Nǫ̀htsı̨ wets'ǫ dǫ hazǫǫ̀ nàgedèe sìı gıts'ǫ̀ ts'eetł'è. 
\p  
\v 2 Nǫ̀htsı̨-Gotà eyıts'ǫ Zezì-Krı gısǫnıwǫ naxıxè welè eyıts'ǫ naxıxè sìghà hòɂǫǫ̀ agııle. 
\s1 Nǫ̀htsı̨ ededzeè t'à etegoèhɂı̨ 
\p  
\v 3 Nǫ̀htsı̨ weghàsǫts'eedı welè. Ededı̨ sìı Zezì-Krı Wetà hǫt'e, eyıts'ǫ ededı̨ ededzeè t'à etegoèhɂı̨ elı̨. T'asìı hazǫǫ̀ t'à goxè sìghà hòɂǫ gha Nǫ̀htsı̨ elı̨ hǫt'e.  
\v 4 Goxè hoìla łǫ sǫnı kò goxè sìghà hòɂǫǫ̀ agohɂı̨. Gots'ǫ̀ hanì eda hǫt'e t'à dǫ gıgha hoìla sìı gıxè sìghà hòɂǫǫ̀ agets'ehɂı̨.  
\v 5 Zezì-Krı gogha daı̨ɂà t'à goxı̨ wexè dats'ı̨ı̨ɂa, eyı lanì Zezì-Krı wets'ıhɂǫ̀ deɂǫ̀ǫ̀ goxè sìghà hòɂǫ hǫt'e.  
\v 6 Goxè hoìla nı̨dè naxıxè sìghà hòɂǫ gha eyıts'ǫ edaxàahdè gha ats'et'ı̨. Goxè sìghà hòɂǫ nı̨dè naxı̨ sı naxıgha hǫt'e, eyı t'à goxèht'eè ts'èwhı̨į̀ daahɂa nı̨dè, wet'à naxınì nàtso ha.  
\v 7 Naxıxè sìghà hòɂǫ agode ha sìı hotıì gogha ehkw'ı-ahodı hǫt'e. Goxè daahɂa wek'èts'eezǫ, eyıt'à goxè naxıgha sìghà hòɂǫ ha hotıì wek'èts'eezǫ hǫt'e. 
\p  
\v 8 Sèot'ı̨ı̨, Asıa nèk'e dànì dats'ı̨ı̨ɂaa sìı wek'èahsǫ ha naxıts'ı̨ı̨hwhǫ. Goınì nàtso nahk'e sıì goxè hoìla ı̨lè, eyıt'à edaxàts'eedè gha ahxe whìle ts'ı̨ı̨wǫ ı̨lè.  
\v 9 Hòt'a ełaàts'ede ha hotıì hats'ı̨ı̨wǫ ı̨lè. Goxı̨ edets'àts'edı ts'ı̨ı̨wo ha-le t'à goxè hagòjà, hanìkò Nǫ̀htsı̨ dǫ naìdà ayehɂı̨ı̨ sìı ededı̨ wets'ǫ̀ hoèlı̨ ts'ı̨ı̨wǫ ha t'à goxè hagòjà hǫt'e.  
\v 10 Hoìla t'à ełaàts'ede ch'à edaxàgoı̨la hǫt'e, eyıts'ǫ ełaàts'ede ch'à gok'èdì ha. Ededı̨ gots'àdı ha wets'ǫ̀ hoèlı̨ı̨ ts'ı̨ı̨wǫ, eyıts'ǫ t'aats'ǫǫ̀ edaxàgohtè ha gogha ehkw'ı-ahodı hǫt'e.  
\v 11 Naxı̨ xàyaahtı t'à gots'àahdı ha hǫt'e. Hanì-ı̨dè dǫ łǫ goghǫ Nǫ̀htsı̨ ts'ǫ̀ masì gı̨ı̨wǫ ha, gots'ǫ̀ wedzeè sǫnıwǫ t'à. 
\s1 Paul dàde ha ı̨lèe sìı ładı̨į̀ ayį̀į̀là 
\p  
\v 12 Godzeè t'à nàowo degaı k'ę̀ę̀ eyıts'ǫ ehkw'ı k'ę̀ę̀ eghàlats'ı̨ı̨dà wek'èts'eezǫ hǫt'e. Nǫ̀htsı̨ wek'ę̀ę̀ dıı nèk'e dǫ gıta eyıts'ǫ naxıta hanì denahk'e eghàlats'ı̨ı̨dà hǫt'e. Dıı nèk'e gots'ǫ wet'à gots'ı̨ı̨zǫǫ nàowoò k'ę̀ę̀ ats'ı̨ı̨t'į̀ nıìle, Nǫ̀htsı̨ wesǫnıwǫ k'ę̀ę̀ ats'ı̨ı̨t'į̀ hǫt'e. Eyı weghǫ xàdahots'edì ha dìì-le.  
\v 13-14 Eyıt'à t'asìı wek'eyaahtıı xè wenıahdì ha dìì sìı ghǫ naxıts'ǫ̀ ts'eetł'è nıìle. Hanìkò t'asìı hazǫǫ̀ wenıahdì-le nı̨dè nǫǫde-ı̨dè deghàà wenıahdì aahde ha dehwhǫ, hanì-ı̨dè goghǫ xàdahoahdì ha, eyıts'ǫ gots'ǫ̀ K'àowo Zezì nììtłaa dzęę̀ k'e nı̨dè goxı̨ naxıghǫ xàdahots'edì ha. 
\p  
\v 15 Eyı hotıì wek'èehsǫ t'à naxı̨ t'akwełǫ̀ǫ̀ naxıts'àhtła ha dehwhǫ, hanì-ı̨dè nàekeè-eht'aà naxıxè sìghà agode ha.  
\v 16 Macedonıa nèk'e ts'ǫ̀ dehtła nı̨dè naxıts'àhtła ha dehwhǫ ı̨lè eyıts'ǫ Macedonıa nèk'e gots'ǫ ek'èt'à naehtła nı̨dè k'achı̨ naxıts'àhtła ha dehwhǫ ı̨lè. Hanì-ı̨dè naxı̨ Judea nèk'e ts'ǫ̀ aseahłe ha ı̨lè.  
\v 17 Hotıì nànıwhıwo-le et'ıì hanì edexè sıìgòhłà dahwhǫ nì? Dǫ nànıgedè-le k'ę̀ę̀ edexè sıìgòhłà t'à ehghàà “Hęɂę” eyıts'ǫ “Į̀le” dehsı̨ seahwhǫ nì? 
\p  
\v 18 Hanìkò Nǫ̀htsı̨ edeyatıì k'èdì k'ę̀ę̀ godı nezı̨ı̨ naxıghàts'ı̨ı̨ɂǫǫ sìı ehkw'ı hǫt'e, eyı ghǫ ı̨hk'è “Hęɂę” eyıts'ǫ ı̨hk'è “Į̀le” ts'edı nıìle.  
\v 19 Sılas, Tımothy eyıts'ǫ sı̨ Nǫ̀htsı̨ Weza Zezì-Krı weghǫ naxıts'ǫ̀ gots'ı̨ı̨dee sìı weghǫ “Hęɂę” ts'edı, eyıts'ǫ k'achı̨ “Į̀le” ts'edı nıìle, hanìkò Zezì wexè t'aats'ǫǫ̀ “Hęɂę” hǫt'e.  
\v 20 Nǫ̀htsı̨ edeyatıì hazǫǫ̀ gogha whehtsı̨ı̨ sìı Zezì-Krı wets'ıhɂǫ̀ hazǫǫ̀ “Hęɂę” zǫ hǫt'e. Wets'ıhɂǫ̀ “Amen” ts'edı hǫt'e, wet'à Nǫ̀htsı̨ weghàsǫts'eedı hǫt'e.  
\v 21 Nǫ̀htsı̨ sìı Zezì-Krı wet'à goınì eyıts'ǫ naxınì nàtsoò ayehɂı̨ hǫt'e. Edegha gòį̀hchì hǫt'e,  
\v 22 eyıts'ǫ wets'ǫ ats'ı̨ı̨t'e wek'èhoedzǫǫ̀ ayį̀į̀là. Eyıt'à edets'ǫ Įnì Degaı godzeè yìı nàdè ayį̀į̀là, wet'à gogha sǫǫ̀mba nìı̨ɂǫ lanì, eyı weghàà ı̨daà ayìı godawhelaa sìı hotıì goghǫ̀t'à ha wek'èhoedzǫǫ̀ ayį̀į̀là. 
\p  
\v 23 Naxıgha hoìla ahłe ha-le t'à ek'èt'à kǫ̀ta Corınth ts'ǫ̀ anahjà nıìle Nǫ̀htsı̨ hotıì yek'èezǫ hǫt'e.  
\v 24 Dànì naxıgha ehkw'ı-ahodıı sìı weghǫ naxıts'ǫ̀ k'ahots'edè dehsı̨į̀-aehsı̨-le, hanìkò naxınà gha naxıxè eghàlats'eeda hǫt'e, naxıgha ehkw'ı-ahodıı sìı wet'à naxınì nàtso hǫt'e. 
\c 2  
\p  
\v 1 Naxıgha hoezhì ahłe ha dehwhǫ-le t'à dıì k'achı̨ naxıts'àhtła ha-le.  
\v 2 Naxıdzeè nànııtì anaxèhłà nı̨dè amìı sınà asele ha? Naxı̨ zǫ sınà aseahɂı̨ ha ı̨lè, hanìkò naxıdzeè nànııtì anaxèhłà.  
\v 3 Eyıt'à hanì naxıts'ǫ̀ ııtł'è ı̨lè. Hanì-ı̨dè naxıts'àwhıhtła nı̨dè naxı̨ sınà aseahłe ha ı̨lèe sìı ts'ǫǫ̀dehwhǫǫ̀ aseahłe ha-le ı̨lè. Hazǫǫ̀ sexè naxınà ha dahwhǫ ne hotıì wek'èehsǫ.  
\v 4 Sıì ts'ǫǫ̀dehwhǫ xè sedzeè etse eyıts'ǫ senatì łǫ xàı̨tł'ı t'à hanì naxıts'ǫ̀ ııtł'è hǫt'e. Naxıdzeè nànııtì anaxehłe ha dehwhǫ-le, hanìkò sıì naxıghǫneehtǫ hǫt'e wek'èahsǫ ha dehwhǫ. 
\s1 Hołı̨ı̨-hohtsı̨ı̨-dǫǫ̀ weghǫ nahoezhe 
\p  
\v 5 Amìı wets'ıhɂǫ̀ godzeè nànııtìı sìı sı̨ zǫ asį̀į̀là nıìle, naxı̨ denahk'e naxıdzeè nànııtì anaxį̀į̀là hǫt'e. Hanìkò weghǫ deɂǫ̀ǫ̀ aehsı̨ ha dehwhǫ-le.  
\v 6 Naxıta dǫ deɂǫ̀atłǫ gısınìyaı̨htı t'à hòt'a yek'èxa daı̨ɂà hǫt'e.  
\v 7 Dıì hòt'a weghǫ nahoahłe, eyıts'ǫ wets'ǫ̀ nezı̨į̀ aahdı, hanì-ı̨dè sıì edek'eelı̨ t'à wegha dìì agode ha-le.  
\v 8 Eyıt'à dànì weghǫnıahtǫǫ sìı hotıì yek'èezǫǫ̀ aweahłe ha dehwhǫ.  
\v 9 Naxeehdzà ha dehwhǫ t'à hanì naxıts'ǫ̀ ııhtł'è. Dànì t'asìı hazǫǫ̀ weghàlaahda ha naxèehsı̨ı̨ sìı asį̀į̀ hazǫǫ̀ wek'èaht'e lì dehwhǫ t'à ahłà.  
\v 10 Dǫ ghǫ nahoahłe nı̨dè sı̨ sı weghǫ nahoehłe ha hǫt'e. Ayìı weghǫ nahoehłaa sìı (t'asìı weghǫ nahoehzhe ha gǫ̀hłı̨ nı̨dè) Zezì-Krı wenadąą̀ weghǫ nahoehła hǫt'e, naxıgha nezı̨ ha t'à.  
\v 11 Hanì-ı̨dè wehłı̨ı̨ goghǫehnè ha-le. T'aats'ǫǫ̀ goghǫyaeɂà k'ehoɂa wek'èts'eezǫ hǫt'e. 
\s1 Nakenahòdlı̨ı̨ wegòò k'ę̀ę̀ eghàlats'eeda 
\p  
\v 12 Įdì whaà-le Zezì-Krı wegodıì nezı̨ı̨ t'à dǫ ts'ǫ̀ gohde ha kǫ̀ta Troas nàwhıhtła ı̨lè. Gots'ǫ̀ K'àowo ekǫ dǫ ts'ǫ̀ gohde ha segha hòɂǫǫ̀ ayį̀į̀là.  
\v 13 Hanìkò sèot'ı̨ Tıtus ekǫ wegòhɂǫ-le t'à sıì weghǫ nanıhwhǫ ı̨lè, eyıt'à ekǫ dǫ masì gèehsı̨ tł'axǫǫ̀ Macedonıa nèk'e ts'ǫ̀et'ıì ahjà. 
\p  
\v 14 Hanìkò Nǫ̀htsı̨ sìı masì wets'ı̨ı̨hwhǫ hǫt'e, ededı̨ t'aats'ǫǫ̀ Zezì-Krı wexè k'egohɂı̨. Zezì-Krı edegha dǫ dèhnǫǫ ats'ı̨ı̨t'e t'à, dǫ hazǫǫ̀ gınadąą̀ enıìyah xè wek'èts'adè hǫt'e. Hazǫǫ̀ nèk'e k'ets'edèe sìı goxı̨ got'à dǫ Zezì-Krı k'ègeezǫǫ̀ agohɂı̨, t'asìı łekǫǫ łedìı lats'ı̨ı̨t'eè agǫ̀ǫ̀là hǫt'e.  
\v 15 Nǫ̀htsı̨ sìı dǫ edaxàgeedèe eyıts'ǫ dǫ gıdıhołèe sìı gıgha Zezì-Krı wets'ǫ t'asìı łekǫǫ łedìı lats'ı̨ı̨t'eè agǫ̀ǫ̀là.  
\v 16 Dǫ edaxàgeedèe sìı gıt'à eda gha t'asìı łekǫǫ łedìı lats'ı̨ı̨t'e, hanìkò dǫ gıdıhołèe sìı gıt'à ełaàde gha t'asìı wejıı łedìı lats'ı̨ı̨t'e. Amìı la hadeèzhì yeghàlaeda ha yexèht'eè?  
\v 17 Dǫ łǫ gıxèht'eè eghàlats'eeda nıìle, Nǫ̀htsı̨ yatıì t'à dǫ ts'ǫ̀ gots'ede k'èxa gots'àɂeedì t'à sǫǫ̀mba ts'ehtsı̨ nıìle. Hanì nıìle, Nǫ̀htsı̨ dǫ ts'ǫ̀ goı̨hɂà ats'ı̨ı̨t'e t'à, Zezì-Krı wedahxà Nǫ̀htsı̨ wenadąą̀ ehkw'ı dǫ gıts'ǫ̀ gots'ede hǫt'e. 
\c 3  
\p  
\v 1 Eyıt'à edeghǫ xàdahots'edì ats'edı dahwhǫ nì? Dǫ mǫ̀hdaa hoghànaxegeehtǫ ha gı̨ı̨wǫ nı̨dè, dǫ dàhòt'ı̨ı̨ agı̨ı̨t'e ghǫ enı̨htł'è edexè k'egehchı ha dahwhǫ. Goxı̨ sı hanıı nı̨htł'è naxıts'ǫ̀ k'ets'ehchı ha dahwhǫ nì? Hanì-le-ı̨dè hanıı enı̨htł'è goghàahɂà ha dahwhǫ nì?  
\v 2 Naxı̨ gonı̨htł'è laaht'e, godzeè k'e dek'enaxèehtł'è, dǫ hazǫǫ̀ gık'èezǫ xè gık'eyahtı hǫt'e.  
\v 3 Naxı̨ sìı Zezì-Krı wets'ǫ enı̨htł'è nezı̨ı̨ laaht'e, naxıta eghàlats'eeda t'à. Edotì t'à naxık'e aatł'è nıìle, Nǫ̀htsı̨ edaa sìı wets'ǫ Įnì Degaı t'à naxık'e aatł'è hǫt'e. Eyıts'ǫ kwe k'e weyatıì dek'eèhtł'è nıìle, naxıdzeè yìı dek'eèhtł'è hǫt'e. 
\p  
\v 4 Eyı weghǫ sìı Zezì-Krı wets'ıhɂǫ̀ Nǫ̀htsı̨ wenadąą̀ hotıì ehkw'ı-ahodı ts'ı̨ı̨wǫ hǫt'e.  
\v 5 Goxı̨ godahxà hats'edı nıìle. Goxı̨ whatsǫǫ̀ t'asìı ts'ı̨ı̨lı̨ nıìle, hanìkò Nǫ̀htsı̨ hanì eghàlats'eeda ha goghàhòı̨ɂǫ hǫt'e.  
\v 6 Nakenahòdlı̨ı̨ wegòò k'ę̀ę̀ nezı̨į̀ eghàlats'eeda gha wecheekeè ts'ı̨ı̨lı̨į̀ agǫ̀ǫ̀là. Eyı nàowo gòò sìı nàowo zǫą xèht'eè nıìle, hanìkò Yedàyeh Nezı̨ı̨ wenàowoò hǫt'e. Nàowo zǫą dek'eèhtł'èe sìı ełaàts'edeè agohɂı̨, hanìkò Yedàyeh Nezı̨ı̨ wet'à ts'eeda hǫt'e. 
\s1 Nakenahòdlı̨ı̨ wegòò sıì enıìyah hǫt'e 
\p  
\v 7-8 Nàowo kwe k'e dek'eèhtł'èe sìı wet'à ełaàts'ede kò, enıìyah nechàa k'ę̀ę̀ gots'ǫ̀ nììt'ǫ hǫt'e. Moses wınì k'e saı̨dı̨ı̨ sìı whìle adaade kò Israel got'ı̨į̀ whaà ts'ǫ̀ gıghàeda ha dìì ı̨lè. Nàowo kwe k'e dek'eèhtł'èe sìı weghǫ enıìyah ı̨lè, hanìkò Yedàyeh Nezı̨ı̨ t'à ayìı goghǫ̀t'ǫǫ sìı eyı denahk'e weghǫ enıìyah nechàa hǫt'e.  
\v 9 Nàowo wet'à dǫ ełaàgede gha gısınìyaetıı sìı enıìyah hǫt'e nı̨dè, nàowo nezı̨ı̨ wet'à ehkw'ı agòìdlàa sìı dàı̨hcho ts'ǫ̀ wenahk'e enıìyah dèè elı̨!  
\v 10 Ayìı enıìyah elı̨ ı̨lèe sìı dıì gogha enıìyah-le ajà, dıì hòt'a ayìı denahk'e enıìyah sìı wek'èts'eezǫǫ̀ ats'ejà t'à.  
\v 11 Ayìı whìle adaadee sìı enıìyah t'à nàhòwo nı̨dè, ayìı welǫ whìle ts'ǫ̀ wheɂǫ ha sìı wenahk'e enıìyah deè elı̨ hǫt'e! 
\p  
\v 12 Hanì gogha ehkw'ı-ahodı t'à sıì weghǫ goınì nàtso hǫt'e.  
\v 13 Moses xèts'ı̨ı̨ht'e nıìle. Wınì k'e saı̨dı̨ı̨ sìı whìle adaade kò, edınì k'e ɂehtł'ı̨ whehchì ayį̀į̀là, Israel got'ı̨į̀ wınì k'esaı̨dı̨ ghàgeeda ha-le t'à.  
\v 14 Hanìkò gınıedì ha gıkwì dezhì adlà. Dıı dzęę̀ ts'ǫ̀ nakenahòdlı̨ı̨ wezǫǫ gık'eyahtı nı̨dè gınıedì ha dìì, eyı ɂehtł'ı̨ ı̨łaà gıgha enı̨htł'è k'e whehchì lanì. Eyı ɂehtł'ı̨ sìı gıgha ı̨ɂǫ̀ǫ̀ adlà nıìle, Zezì-Krı wedahxà nı̨dè zǫ eyı ɂehtł'ı̨ gıgha ı̨ɂǫ̀ǫ̀ adle ha hǫt'e.  
\v 15 Dıı dzęę̀ ts'ǫ̀ Moses wenı̨htł'è k'eyagehtı nı̨dè gınıedì-le, ı̨łaà gıdzeè k'e ɂehtł'ı̨ whehchì lanì hǫt'e.  
\v 16 Hanìkò dǫ gots'ǫ̀ K'àowo gıgha ehkw'ı-ahodıì agejà nı̨dè, eyı ɂehtł'ı̨ sìı gıgha ı̨ɂǫ̀ǫ̀ adle ha hǫt'e.  
\v 17 Gots'ǫ̀ K'àowo Įnì Degaı hǫt'e, eyıts'ǫ edı̨į̀ gots'ǫ̀ K'àowo wets'ǫ Įnì Degaı wehòhɂǫǫ sìı dǫ k'ahogedè agììdlà hǫt'e.  
\v 18 Goxı̨ sìı goınì k'e ɂehtł'ı̨ whehchìı nıìle, gots'ǫ̀ K'àowo dànì enıìyah elı̨ı̨ sìı gok'e saı̨dı̨ hǫt'e. Gots'ǫ̀ K'àowo, Įnì Degaı elı̨ı̨ sìı godzeè yìı eładı̨į̀ agohɂį̀, eyıt'à denahk'e wexèht'eè ats'et'į̀ agohɂı̨. 
\c 4  
\s1 Godzeè yìı t'asìı enıìyah k'èts'edì 
\p  
\v 1 Nǫ̀htsı̨ wesǫnıwǫ dahxà dıı la goghǫ̀t'ǫ hǫt'e, eyıt'à gogha gots'eèdı ha nıìle.  
\v 2 Hanìkò deɂı̨į̀ k'ehots'eɂa eyıts'ǫ t'asìı weghǫ į̀į̀zhats'ı̨ı̨lı̨ı̨ sìı wedę ha ts'ı̨ı̨wǫ. Dǫ ghǫyats'eeɂà t'à eghàlats'eeda nıìle, eyıts'ǫ Nǫ̀htsı̨ weyatıì ładı̨į̀ ats'ehɂı̨ nıìle. Hanìkò dǫ ededzeè t'à gogeèhkw'ǫ ha ts'ı̨ı̨wǫ t'à Nǫ̀htsı̨ wenadąą̀ nàowo ehkw'ıı ghǫ hotıì ehkw'ı gots'ede hǫt'e.  
\v 3 Gots'ǫ godı nezı̨ı̨ sìı dǫ mǫ̀hdaa deghàà gınıedì-le t'à gıgha ɂehtł'ı̨ ɂı̨į̀ wheɂǫ lanì, dǫ gıdıhołè ha ts'ǫ̀ gıadèe sìı gıgha hanì hǫt'e.  
\v 4 Wehłı̨ı̨ dıı nèè gha k'àowo elı̨ı̨ sìı dǫ gıgha ehkw'ı-ahodı-le sìı gınì t'à gıgha xègaat'ı̨-le agǫ̀ǫ̀là. Eyıt'à Zezì-Krı wegodıì nezı̨ı̨ ts'ıhɂǫ̀ dǫ xè dzęh hòɂǫǫ sìı gıgha wègaat'ı̨ ha dìì, eyıts'ǫ Zezì-Krı enıìyah wehòhɂǫ xè hotıì Nǫ̀htsı̨ xèht'eè wègaat'ı̨ı̨ sìı, gınıedì ha dìì hǫt'e.  
\v 5 Goxı̨ edeghǫ gots'edeè-ats'edı-le, Zezì-Krı, t'asìı hazǫǫ̀ ts'ǫ̀ k'àowo elı̨ı̨ sìı weghǫ gots'edeè-ats'edı. Zezì wets'ıhɂǫ̀ naxıgha eghàlats'eeda hǫt'e.  
\v 6 Nǫ̀htsı̨ hadı, “Togoòtł'òo yìı gots'ǫ dzęh xàı̨dı̨į̀ awede,” hadıı sìı godzeè yìı dzęh nı̨ı̨dı̨į̀ ayį̀į̀là, eyı ts'ıhɂǫ̀ Zezì-Krı weghàts'eeda nı̨dè Nǫ̀htsı̨ dànì enıìyah elı̨ı̨ sìı wek'èts'eezǫ ats'et'į̀. 
\p  
\v 7 Gozhį̀į̀ kwetǫ lanìı sìı weyìı t'asìı enıìyah k'èts'edì hǫt'e. Eyı t'asìı enıìyah xè nàtsoo sìı Nǫ̀htsı̨ wets'ǫ hǫt'e wek'èhoedzǫ, goxı̨ gots'ǫ nıìle.  
\v 8 Goxı̨ sìı hazǫǫ̀ gomǫǫ̀ goòɂàa ts'ǫ̀ dǫ gogha hoìla hogehtsı̨, hanìkò anats'et'è nıìle; gogha hoezhì agot'ı̨ kò gogha ahxe whìle ts'ı̨ı̨wǫ-le,  
\v 9 dǫ dagogį̀ı̨hɂa hanìkò Nǫ̀htsı̨ ɂǫ̀goehdè whìle, dèè k'e ts'ǫ̀ gogeèhde hanìkò godıhogèhtsı̨ whìle.  
\v 10 Zezì dànì gogha dàı̨ɂàa xè ełaı̨woo sìı t'aats'ǫǫ̀ gozhį̀į̀ yìı edexè k'ets'eɂa hǫt'e, eyı ts'ıhɂǫ̀ Zezì gozhį̀į̀ yìı edaa sìı wek'èedzǫǫ̀ ade ha.  
\v 11 Goxı̨ ı̨łaà ts'eeda et'ıì t'aats'ǫǫ̀ Zezì wets'ıhɂǫ̀ ełaàts'ede ha gogha hòɂǫ hǫt'e, hanì-ı̨dè gozhį̀į̀ ełaàwı ha sìı weyìı Zezì edaa sìı wek'èedzǫǫ̀ ade ha hǫt'e.  
\v 12 Eyıt'à goxı̨ t'aats'ǫǫ̀ ełaàts'ede lanì, hanìkò eyı ts'ıhɂǫ̀ naxı̨ sìı aahda gha adlà hǫt'e. 
\p  
\v 13 Dıı hanì dek'eèhtł'è, “Segha ehkw'ı-ahodı t'à weghǫ gohde hǫt'e,” dek'eèhtł'è. Goxı̨ sı eyı xèht'eè gogha ehkw'ı-ahodı t'à weghǫ gots'ede hǫt'e.  
\v 14 Nǫ̀htsı̨ sìı Zezì-Krı naìdà ayį̀į̀là hǫt'e, goxı̨ sı Zezì xè nats'ìdà agole ha hǫt'e, eyıts'ǫ naxıxè wenadąą̀ nàts'eèhzaà agole ha wek'èts'eezǫ.  
\v 15 Eyı hazǫǫ̀ sìı wet'àhoahwhı gha agòjà hǫt'e. Hanì-ı̨dè Nǫ̀htsı̨ wesǫnıwǫǫ sìı deɂǫ̀ǫ̀ dǫ łǫ ts'ǫ̀ ade ha, deɂǫ̀ǫ̀ dǫ łǫ Nǫ̀htsı̨ masì gı̨ı̨wǫ ha, eyıts'ǫ enıìyah xè deɂǫ̀ǫ̀ dǫ łǫ Nǫ̀htsı̨ ghàsǫgeedıì agede ha. 
\p  
\v 16 Eyıt'à gogha gots'eèdı nıìle. Gozhį̀į̀ nàtso-le adaade kò dzę taàt'eè goınì t'à denahk'e nàts'etsoò agodaade hǫt'e.  
\v 17 Whaà-lea gots'ǫ̀ yaazea goxè hoìla hǫt'e, hanìkò wet'à welǫ whìle ts'ǫ̀ goxè sıì enıìyah hòɂǫ gha agot'ı̨ hǫt'e, eyı sìı hazǫǫ̀ t'à denahk'e wet'àaɂà hǫt'e.  
\v 18 Eyıt'à ayìı wègaat'ı̨ı̨ sìı gha goınì nàtso ats'ı̨ı̨hwhǫ-le, hanìkò ayìı wègaat'ı̨-le sìı gha goınì nàtso ats'ı̨ı̨hwhǫ hǫt'e. T'asìı wègaat'ı̨ı̨ sìı whaà-le gots'ǫ̀ zǫ gha hǫt'e, ekò t'asìı wègaat'ı̨-le sìı welǫ whìle ts'ǫ̀ gha hǫt'e. 
\c 5  
\s1 Yak'e gokǫ̀ gòɂǫ hǫt'e 
\p  
\v 1 Dıı nèk'e ts'eedaa sìı whaà-lea gots'ǫ̀ nı̨hbàa yìı nàts'edè lanì hǫt'e. Eyı nı̨hbàa wedıhołè nı̨dè yak'e welǫ whìle ts'ǫ̀ gogha kǫ̀ gòɂǫ hǫt'e. Eyı sìı dǫlà t'à hòèlı̨ nıìle, Nǫ̀htsı̨ godawheɂǫǫ̀ ayį̀į̀là wek'èts'eezǫ hǫt'e.  
\v 2 Hanìkò ı̨łaà dıı nèk'e ts'eeda et'ıì godzeè etse, yak'e gokǫ̀ yìı nàts'edè ha ts'ı̨ı̨wǫ t'à.  
\v 3 Gokǫ̀ yìı nàts'edè nı̨dè goht'ǫ yìı ts'eèhkw'e lanì ha, hanì-ı̨dè ı̨ht'edę gògaat'ı̨ ha-le.  
\v 4 Įłaà dıı nèk'e nı̨hbàa yìı ts'eeda et'ıì godzeè etse xè dats'ı̨ı̨ɂa hǫt'e. Etets'eèt'ı̨ ha ts'ı̨ı̨wǫ-le, hanìkò yak'e gokǫ̀ yìı nàts'edè ha ts'ı̨ı̨wǫ. Gozhį̀į̀ ełaàwıı sìı gozhį̀į̀ welǫ whìle ts'ǫ̀ eda ts'ǫ̀ łatats'eedè ha ts'ı̨ı̨wǫ.  
\v 5 Nǫ̀htsı̨ sìı goxè hanì hòɂǫ gha gòhtsı̨ ı̨lè, eyıt'à Yedàyeh Nezı̨ı̨ gots'ǫ̀ ayį̀į̀là, eyı wet'à gogha nadąą̀ sǫǫ̀mba nìı̨ɂǫ lanì, eyı weghàà ı̨daà ayìı gogha whelaa sìı hotıì goghǫ̀t'à gha ayį̀į̀là. 
\p  
\v 6 Eyıt'à gozhį̀į̀ t'à ı̨łaà ts'eeda et'ıì gots'ǫ̀ K'àowo wets'ǫ̀ nıwà ts'eèhkw'e hotıì godzeè t'à wek'èts'eezǫ hǫt'e.  
\v 7 Ayìı gogha ehkw'ı-ahodıı sìı k'ę̀ę̀ ts'eeda hǫt'e, ayìı gogha wègaat'ı̨ı̨ sìı k'ę̀ę̀ ts'eeda nıìle.  
\v 8 Eyı sìı hotıì godzeè t'à gogha ehkw'ı-ahodı hǫt'e. Gozhį̀į̀ wets'ǫǫ̀ nàts'edèe gà gots'ǫ̀ K'àowo wexè ats'ı̨ı̨t'ee sìı, eyı denahk'e gogha nezı̨ hǫt'e.  
\v 9 Eyıt'à gozhį̀į̀ yìı ts'eedaa, gozhį̀į̀ yìı ts'eeda-le, ehk'ę̀ę̀ gots'ǫ̀ K'àowo wınà hots'ehtsı̨ ha ts'ı̨ı̨wǫ hǫt'e.  
\v 10 Ehkw'ı anaxèehsı̨, goxı̨ hazǫǫ̀ Zezì-Krı wenadąą̀ nìts'edè gà gosınìyaehtı ha hǫt'e. Dǫ hazǫǫ̀ ı̨łaà edezhį̀į̀ yìı geeda et'ıì ayìı hogehtsı̨ k'èxa gıghàhòt'à ha. Ehkw'ı gı̨ı̨dà, hanì-le-ı̨dè ehkw'ı gı̨ı̨dà-le k'èxa goghàhòɂà ha. 
\s1 Nǫ̀htsı̨ wexè ts'èwhı̨į̀ ts'eeda 
\p  
\v 11 Eyıt'à dànì gots'ǫ̀ K'àowo wek'èats'ı̨ı̨t'e ha wek'èts'eezǫ t'à, dǫ ładı̨į̀ agede ha gıghǫdats'eehnè ha hots'eèhdzà. Dànì ts'eedaa sìı Nǫ̀htsı̨ wegha hotıì nezı̨į̀ wègaat'ı̨ hǫt'e, eyıts'ǫ naxı̨ sı naxınì gha hotıì nezı̨į̀ wègaat'ı̨ nı̨dè dehwhǫ.  
\v 12 Haehsı̨ t'à naxıts'ǫ̀ edeghǫ xàdahots'edì ats'edı nıìle, hanìkò naxı̨ goghǫ xàhoahdì gha gots'ede. Hanì-ı̨dè, dǫ dànì gìgaat'ı̨ ghǫ xàhogedì hanìkò gıdzeè yìı dàgǫ̀ht'e ts'ǫnegı̨ı̨ɂà-le sìı gıts'ǫ̀ goahde ha dìì-le agode ha.  
\v 13 Ezhı̨ne k'ę̀ę̀ k'ehots'eɂa nı̨dè Nǫ̀htsı̨ wegha hadets'į̀į̀là hǫt'e; gots'ı̨ı̨zǫ k'ę̀ę̀ k'ehots'eɂa nı̨dè naxıgha ats'et'ı̨ hǫt'e.  
\v 14 Zezì-Krı goghǫneètǫ t'à hanì wegha eghàlats'eeda ha ts'ı̨ı̨wǫ. Dǫ ı̨łè dǫ hazǫǫ̀ gha ełaı̨wo, eyıt'à dǫ hazǫǫ̀ ełaı̨dè hǫt'e, eyı gogha ehkw'ı-ahodı t'à ats'et'ı̨.  
\v 15 Ededı̨ sìı dǫ hazǫǫ̀ gha ełaı̨wo t'à, dǫ geedaa sìı edegha geeda ha nıìle hanìkò amìı gogha ełaı̨woo eyıts'ǫ gogha naìdàa sìı wegha geeda ha hǫt'e. 
\p  
\v 16 Eyıt'à jǫ gots'ǫ ı̨daà dıı nèè gots'ǫ dǫ gınàowoò k'ę̀ę̀ dǫ wı̨ı̨zìı gısınìyats'ehtı ha nıìle. Įnę̀ę sìı Zezì-Krı hanì wesınìyats'ı̨ı̨htı ı̨lè, hanìkò dıì sìı hats'et'ı̨-le ats'ejà.  
\v 17 Eyıt'à dǫ Zezì-Krı xè edaa sìı dǫgòò ìhłè hǫt'e. Wenàowoò zǫą sìı wedę adlà, wenàowogòò wetł'axǫǫ̀ ajà.  
\v 18 Eyı hazǫǫ̀ sìı Nǫ̀htsı̨ ayehɂı̨ hǫt'e. Ededı̨ sìı Zezì-Krı wet'ǫ̀ǫ̀ wexè ts'èwhı̨į̀ ts'eedaà agǫ̀ǫ̀là, eyıts'ǫ godı nezı̨ı̨ dǫ ts'ǫ̀ hats'edı gha, la goghàı̨ɂǫ hǫt'e.  
\v 19 Nǫ̀htsı̨ sìı Zezì-Krı wet'ǫ̀ǫ̀ dıı nèk'e dǫ edexè ts'èwhı̨į̀ geedaà agǫ̀ǫ̀là, eyıt'à gıhołı̨į̀ k'èxa gosınìyaehtı nıìle. Nǫ̀htsı̨ dànì dǫ edexè ts'èwhı̨į̀ geedaà agohɂı̨ı̨ sìı weghǫ dǫ ts'ǫ̀ hats'edı ha goghàhòı̨ɂǫ hǫt'e.  
\v 20 Eyıt'à goxı̨ sìı Zezì-Krı wegha dǫ ts'ǫ̀ gots'edee ats'ı̨ı̨t'e. Goxı̨ got'à Nǫ̀htsı̨ naxıts'ǫ̀ gode lanì hǫt'e. Zezì-Krı wedahxà naxıghǫnàdats'eetì: Nǫ̀htsı̨ wexè ts'èwhı̨į̀ aahda, naxèts'edı.  
\v 21 Zezì wehołı̨į̀ whìle sìı Nǫ̀htsı̨ gogha hołı̨ı̨ wek'e whelaà ayį̀į̀là, hanì-ı̨dè Zezì wet'ǫ̀ǫ̀ Nǫ̀htsı̨ ehkw'ı ts'eedaà agole ha. 
\c 6  
\p  
\v 1 Goxı̨ Nǫ̀htsı̨ gha ełexè eghàlats'eedaa ts'ı̨ı̨lı̨ı̨ sìı Nǫ̀htsı̨ wesǫnıwǫ k'ètł'ǫ̀ naxıts'ǫ̀ awede-le, naxèts'edıì naxıghǫnàdats'eetì.  
\v 2 Nǫ̀htsı̨ ededı̨ dıı hadı, 
\mi \qt “Naxıts'ǫ̀ sınì nezı̨ı̨ ekò k'e naxeèhkw'ǫ ı̨lè, eyıts'ǫ dǫ edaxàgehłee dzęę̀ k'e naxıts'àehdì ı̨lè,” hadı.\qt* 
\m Ehkw'ı anaxèehsı̨, dıì sìı Nǫ̀htsı̨ naxıts'ǫ̀ wınì nezı̨ hǫt'e, dıì edaxàgolee dzęę̀ hǫt'e. 
\s1 Paul wexè hoìla k'ehokw'o 
\p  
\v 3 T'asìı wı̨ı̨zìı t'à dǫnì tsį̀ts'ehwhı ha ts'ı̨ı̨wǫ-le, hanì-ı̨dè godı nezı̨ı̨ gha eghàlats'eedaa sìı wets'ıhɂǫ̀ t'asìı nezı̨-le t'à dǫ gok'e nìdahogeeɂà ha-le.  
\v 4 Hanìkò t'asìı hazǫǫ̀ ghàlats'eeda weghàà Nǫ̀htsı̨ xàè wecheekeè ats'ı̨ı̨t'ee sìı dǫ gık'èezǫ ha: dànì ts'èwhı̨į̀ dats'ı̨ı̨ɂa t'à, dànì goxè hoìla łǫ t'à, dànì gogha dìì agot'į̀ t'à, dànì goxè hoejı̨ k'ehokw'o t'à;  
\v 5 gokwǫ̀ǫyaà-gogehɂı̨ t'à, dǫ-danìı̨laa-kǫ̀ nègogı̨ı̨le t'à, gots'ıhɂǫ̀ dǫ xè nàdahoowo hogehtsı̨ t'à; la nàtso ghàlats'eeda t'à, łǫ-eht'aà to ts'ete-le eyıts'ǫ dets'eèhdì t'à;  
\v 6 dànì degaı k'ę̀ę̀ ts'eedaa, Nǫ̀htsı̨ yatıì nıts'eedìı, dǫ xè ts'èwhı̨į̀ hots'èhɂǫǫ xè etegets'eèɂı̨ı̨; dànì Yedàyeh Nezı̨ı̨ k'ę̀ę̀ ts'eedaa eyıts'ǫ dànì hotıì dǫ ghǫnets'eètǫǫ;  
\v 7 dǫ ts'ǫ̀ ehkw'ı gots'edee t'à, eyıts'ǫ dànì Nǫ̀htsı̨ wedahxà eghàlats'ı̨ı̨dàa t'à; nàowo ehkw'ıı wet'à ełets'egǫ lanì nàgòts'ehnèe eyıts'ǫ gots'ı̨hts'ǫ wet'à-ats'et'ı̨ı̨;  
\v 8 dǫ goghǫ nezı̨į̀ agedıı hanì-le-ı̨dè gok'adageedèe, goghǫ nezı̨į̀ agedıı hanì-le-ı̨dè goghǫ nezı̨į̀ agedı-le; godzeè t'à ehkw'ı gots'ede hanìkò dǫ mǫ̀hdaa eghǫyaeɂàa-dǫǫ̀ ats'ı̨ı̨t'e gògedı;  
\v 9 dǫ gok'ègeezǫ kò gok'ègeezǫ-le lanì gots'ǫ̀ nageɂa; ełaàts'ede ha welì lanì hanìkò ı̨łaà ts'eeda hǫt'e; nàgoakwa hanìkò ełaàts'ı̨ı̨dè-le,  
\v 10 dats'ı̨ı̨ɂà hanìkò t'aats'ǫǫ̀ sìts'eèt'ı̨; etets'eèt'ı̨ hanìkò dǫ łǫ ahxeè lagets'į̀į̀là; t'asìı wı̨ı̨zìı gots'ǫ-le hanìkò t'asìı hazǫǫ̀ gots'ǫ hǫt'e. Eyı hazǫǫ̀ weghàà xàè Nǫ̀htsı̨ wecheekeè ats'ı̨ı̨t'ee sìı dǫ gık'èezǫ ha. 
\p  
\v 11 Naxı̨ Corınth got'ı̨į̀ yàahłı̨ı̨ sìı edèdats'eedı-le xè naxıts'ǫ̀ gots'ı̨ı̨de hǫt'e, eyıts'ǫ godzeè t'à naxıts'ǫ̀ nezı̨į̀ ats'ı̨ı̨wǫ hǫt'e.  
\v 12 Godzeè t'à t'aats'ǫǫ̀ naxıghǫnets'eètǫ hǫt'e, hanìkò naxı̨ sìı goghǫnıahtǫ gha edèdaahdı.  
\v 13 Seza laaht'e lanì dıı hanaxèehsı̨ ha: Goxı̨ naxıghǫnets'eètǫ xèht'eè goghǫnıahtǫ ha dehwhǫ, gots'ǫ̀ naxıdzeè nechà aahłe. 
\s1 Dǫ gıgha ehkw'ı-ahodı-le sìı gıxè ı̨łè laaht'e-le 
\p  
\v 14 Dǫ gıgha ehkw'ı-ahodı-le sìı gıxè ı̨łè laaht'e-le. Dǫ ehkw'ı geedaa eyıts'ǫ dǫ nàowołı̨ı̨ k'ę̀ę̀ geedaa sìı ełexègı̨ı̨ht'e nıìle. Dzęh eyıts'ǫ togoòtł'òo sìı ełèht'eè nıìle.  
\v 15 Zezì-Krı eyıts'ǫ wehłı̨ı̨ sìı ełek'ę̀ę̀ agı̨ı̨wǫ nıìle. Dǫ wegha ehkw'ı-ahodıı eyıts'ǫ dǫ wegha ehkw'ı-ahodı-le sìı ełègı̨ı̨ht'e hǫı̨lı̨ nıìle.  
\v 16 Nǫ̀htsı̨kǫ̀-gocho eyıts'ǫ nǫ̀htsı̨ hòèlı̨ı̨ wets'ǫ yahtıı-kǫ̀ sìı ełek'ę̀ę̀ agı̨ı̨wǫ nıìle. Goxı̨ sìı Nǫ̀htsı̨ edaa wekǫ̀ lats'ı̨ı̨t'e hǫt'e. Nǫ̀htsı̨ dıı hadı ı̨lè, 
\mi \qt “Gıdzeè yìı nàhdè ha eyıts'ǫ gıta aht'e ha, Gınǫ̀htsı̨ ehłı̨ ha, eyıts'ǫ sets'ǫ dǫ gı̨ı̨lı̨ ha.”\qt* 
\mi  
\v 17 \qt “Eyıt'à gıgha ehkw'ı-ahodı-le sìı gıta gots'ǫ xàahdè, gıxè aaht'ı̨-le. T'asìı hołı̨ı̨ ne sìı daahchì-le, hanì-ı̨dè sets'ǫ dǫ aahłı̨į̀ anaxehłe ha.”\qt* 
\mi  
\v 18 \qt “Naxıtà ehłı̨ ha, eyıts'ǫ naxı̨ seza eyıts'ǫ setì aahłı̨ ha, Nǫ̀htsı̨ t'asìı wegha dìì-le sìı hadı,”\qt* hǫt'e. 
\c 7  
\p  
\v 1 Seàgı̨ą, Nǫ̀htsı̨ hanì goxè yatı whehtsı̨ t'à, t'asìı hazǫǫ̀ hołı̨ı̨ ne sìı wedę ats'ııle. Gozhį̀į̀ eyıts'ǫ goınì t'à hołı̨ı̨ hots'ehtsı̨ı̨ sìı k'alats'ııdè-le. Nǫ̀htsı̨ gots'ǫ̀ wek'èch'a sǫ̀ǫ̀ ts'ı̨ı̨wǫ t'à hotıì degaı k'ę̀ę̀ ts'ııdà. 
\s1 Paul sıì wınà agòjà 
\p  
\v 2 Naxıdzeè yìı gogha gòɂǫǫ̀ aahłe. Dǫ wı̨ı̨zìı k'èch'a hots'èhtsı̨ whìle, dǫ wı̨ı̨zìı ekǫ-le eghàlaı̨dà ats'ı̨ı̨là whìle, eyıts'ǫ dǫ t'à edegha sìghà k'ehots'ı̨ı̨ɂa whìle.  
\v 3 Eyı hanì naxıts'ǫ̀ gohdee sìı naxısınìyaehtıì aehsı̨-le. Godzeè t'à naxıghǫnets'eètǫǫ sìı naxıts'ǫ̀ haehsı̨ ı̨lè, eyıt'à naxıxè ts'eeda eyıts'ǫ naxıxè ełaàts'ede gha ts'eèhkw'e hǫt'e.  
\v 4 Sıì naxıghǫ ehkw'ı aahwhǫ hǫt'e eyıts'ǫ naxıghǫ xàhohdì. Naxıts'ıhɂǫ̀ sınì nàtsoò ajà. Gogha hoìla łǫ kò sıì sınà hǫt'e. 
\p  
\v 5 Macedonıa nèk'e nèts'ı̨ı̨de ekò, goxè ts'èwhı̨į̀ gòı̨ɂà-le. T'aats'ǫǫ̀ goxè hoìla k'ehokw'o t'à godzeè dejı̨ ı̨lè.  
\v 6 Hanìkò dǫ gıxè hoìlaa sìı Nǫ̀htsı̨ gıdzeè t'à nàtsoò agohɂį̀ hǫt'e. Tıtus gots'ǫ̀ nììtła t'à Nǫ̀htsı̨ godzeè nàtsoò ayį̀į̀là hǫt'e.  
\v 7 Ededı̨ gots'àèhtła zǫ t'à godzeè nàtsoò ajà nıìle, naxı̨ sı wedzeè nàtsoò awèahłà t'à godzeè nàtsoò adlà hǫt'e. Naxıdzeè t'à seahɂį̀ ha dahwhǫ, dànì ts'ǫǫ̀dahwhǫ, eyıts'ǫ dànì sıì seghǫ nànıahdèe sìı ghǫ goxè goado. Eyıt'à sıì denahk'e sınà hǫt'e. 
\p  
\v 8 Naxıts'ǫ̀ ııhtł'èe t'à naxıdzeè etseè ahłà sǫnı kò wek'eehłı̨-le. T'akwełǫ̀ǫ̀ wek'eehłı̨ ı̨lè, naxıts'ǫ̀ eehtł'è t'à naxıdzeè etseè ahłà t'à, hanìkò whaà-lea ts'ǫ̀ zǫ naxıdzeè etse hǫt'e.  
\v 9 Eyıt'à dıì sınà hǫt'e. Naxıdzeè etse t'à sınà nıìle, hanìkò naxıdzeè etse t'à edek'eahłı̨ xè naxınì ładı̨į̀ aahłà t'à sınà hǫt'e. Nǫ̀htsı̨ hanì edek'eahłı̨ naxı̨ı̨hwhǫ hǫt'e, eyıt'à goxı̨ dànaxèts'edıı t'à naxınì tsį̀ts'ı̨ı̨hwho nıìle.  
\v 10 Nǫ̀htsı̨ wınì k'ę̀ę̀ godzeè etse nı̨dè edek'ets'ı̨ı̨lı̨, eyı wet'à edaxàgotè hǫt'e. Hanì godzeè etse nı̨dè ı̨daà t'asìı wı̨ı̨zìı k'ets'ı̨ı̨lı̨ ha-le. Hanìkò dǫ gınàowoò k'ę̀ę̀ godzeè etsee sìı wet'à ełaàts'ede ha hǫt'e.  
\v 11 Nǫ̀htsı̨ wınì k'ę̀ę̀ naxıdzeè etse t'à eładı̨į̀ aahjàa sìı wedaànıahdè. Dıì wet'à Nǫ̀htsı̨ gha naxınì nàtsoò ajà, hołı̨ı̨ nàowoò wedę ha dahwhǫǫ̀ aahjà, dǫ hołı̨ı̨ hogehtsı̨ nı̨dè naxık'èch'a hǫt'e, wet'à dajıahdeè laahjà, eyı ts'ıhɂǫ̀ seahɂį̀ ha dahwhǫ, wet'à sedaànıahdè aahjà, t'asìı hazǫǫ̀ ekǫ-le sìı ı̨whąą̀ wesınìyaetı ha dahwhǫ. Eyı hazǫǫ̀ hołı̨ı̨ k'ę̀ę̀ k'ehokw'oo sìı naxı̨ naxıxè agot'ı̨ nıìle naxık'èedzǫǫ̀ aahłà hǫt'e.  
\v 12 Naxıts'ǫ̀ ııhtł'è ekò, dǫ ekǫ-le hòèhtsı̨ı̨ hanì-le-ı̨dè dǫ wets'ǫ̀ ekǫ-le eghàlaeda ts'ıhɂǫ̀ naxıts'ǫ̀ ııhtł'è nıìle. Hanìkò Nǫ̀htsı̨ wenadąą̀ dànì naxıdzeè t'à goghǫnıahtǫǫ sìı wek'èahsǫ ha dehwhǫ t'à, naxıts'ǫ̀ ııhtł'è hǫt'e.  
\v 13 Eyı hazǫǫ̀ wet'à sıì godzeè t'à nàts'etsoò ats'ejà. 
\p Eyı xè Tıtus sıì wınà awèahłà wek'èts'eezǫ t'à, denahk'e goınà hǫt'e.  
\v 14 Wets'ǫ̀ naxıghǫ xàdahohdì ı̨lè, eyıts'ǫ naxıghǫ į̀į̀zhaehłı̨-le asèahłà. T'asìı hazǫǫ̀ naxıts'ǫ̀ hats'edıı sìı ehkw'ı zǫ hǫt'e, eyı xèht'eè Tıtus ts'ǫ̀ naxıghǫ xàdahots'edìı sìı eyı sı ehkw'ı hǫt'e wek'èhoedzǫǫ̀ ajà.  
\v 15 Dànì hazǫǫ̀ wek'èaht'e yenadì nı̨dè denahk'e ededzeè t'à naxıghǫneètǫ hǫt'e. Dànaxèhdı ha sǫnı dahwhǫ t'à wets'àahjı̨ kò nezı̨į̀ wets'ǫ̀ naahɂa ı̨lè, eyıts'ǫ t'asìı hazǫǫ̀ t'à wek'èaht'e ı̨lè.  
\v 16 T'asìı hazǫǫ̀ ehkw'ı weghàlaahda ha hotıì wek'èehsǫ t'à sınà hǫt'e. 
\c 8  
\s1 Corınth got'ı̨į̀ Nǫ̀htsı̨ wets'ǫ dǫ gha sǫǫ̀mba nàgehtsį̀ 
\p  
\v 1 Sèot'ı̨ı̨, Macedonıa nèk'e kǫ̀ta gòlaa sìı dànì Nǫ̀htsı̨ edecheekeè gots'ǫ̀ sǫnıwǫǫ sìı wek'èahsǫ ha naxıts'ı̨ı̨hwhǫ.  
\v 2 Sıì gıxè hoìla łǫ kò sıì sǫgı̨ı̨wǫ, eyıts'ǫ sıì etegeèt'ı̨ kò ededzeè t'à t'aats'ǫǫ̀ t'asìı dǫ ghàgele.  
\v 3 Ehkw'ı anaxèehsı̨, t'asìı t'à dǫ ts'àgedı ha dìì-le sìı t'à dǫ ts'àgı̨ı̨dì, eyı wete ts'ǫ̀ dǫ ts'àgı̨ı̨dì. Ededı̨ xàè hagı̨ı̨wǫ t'à,  
\v 4 goxè Nǫ̀htsı̨ wets'ǫ dǫ ts'àgedı ha goghǫnàdageetì.  
\v 5 Haı̨hcho ts'ǫ̀ dǫ ts'àgedı ha ts'ı̨ı̨wǫ-le ı̨lè. T'akwełǫ̀ǫ̀ gots'ǫ̀ K'àowo ghàdegį̀ı̨la, eyı tł'axǫǫ̀ Nǫ̀htsı̨ wınì k'ę̀ę̀ goxı̨ sı goghàdegį̀ı̨la.  
\v 6 Tıtus ededı̨ naxıta dǫ gha sǫǫ̀mba nàhtsį̀ yexèhoį̀hwho ı̨lè t'à, naxıdzeè sǫnıwǫ t'à dǫ ts'àahdıı sìı deghàà nàyehtsį̀ ha wèts'edı hǫt'e.  
\v 7 T'asìı hazǫǫ̀ t'à deɂǫ̀ǫ̀ nezı̨į̀ eghàlaahda hǫt'e. Nǫ̀htsı̨ ghǫ naxınì nàtsoo t'à, yatı t'à, t'asìı k'èahsǫ t'à, dǫ ts'àahdı ghǫ hòtł'ò aahwhǫ t'à, eyıts'ǫ sıì goghǫnıahtǫ sı t'à. Hotıì eyı xèht'eè naxıdzeè sǫnıwǫ t'à dǫ ts'àahdıı sìı eyı denahk'e nezı̨į̀ aahłe gha edeahdzà. 
\p  
\v 8 Eyı haahłe ha dehsı̨į̀-aehsı̨-le, hanìkò naxeèhdzà aht'ı̨. Dànì dǫ eyıì-le Nǫ̀htsı̨ wets'ǫ dǫ ghǫnegeètǫǫ sìı asį̀į̀ gıxèht'eè hòtł'ò gıghǫnıahtǫ gha naxeèhdzà aht'ı̨.  
\v 9 Gots'ǫ̀ K'àowo Zezì-Krı gots'ǫ̀ sǫnıwǫǫ sìı wek'èahsǫ hǫt'e. Ededı̨ sìı ahxe elı̨ ı̨lè hanìkò naxıgha eteèt'ı̨į̀ adììdlà hǫt'e. Eteèt'ı̨į̀ adììdlà t'à naxıxè ahxe hòɂǫ agode ha. 
\p  
\v 10 Ayìı naxıgha denahk'e nezı̨ı̨ sìı gha yatı naxıghàehɂà ha. Įdìı xok'e naxı̨ t'akwełǫ̀ǫ̀ Nǫ̀htsı̨ wets'ǫ dǫ sǫǫ̀mba t'à gıts'àahdı ı̨lè, eyı zǫ nıìle, naxı̨ t'akwełǫ̀ǫ̀ hanì eghàlaahda ha ghǫ hòtł'ò dahwhǫ ı̨lè.  
\v 11 Eyı la dıì weghǫ naaht'è ts'ǫ̀ weghàlaahda. Hanì-ı̨dè naxınì nezı̨ı̨ k'ę̀ę̀ dahwhǫ ı̨lèe sìı wexèht'eè deghàà weghàlaahdà. Eyıt'à ayìı dàtłǫ naxıts'ǫ sìı weghàà dǫ ts'àahdı.  
\v 12 Godzeè t'à t'asìı dǫ ghàts'eɂà nı̨dè Nǫ̀htsı̨ wegha nezı̨ hǫt'e. Ayìı dàtłǫ gots'ǫ weghàà t'asìı dǫ ghàts'eɂà ha goı̨hwhǫ hǫt'e, t'asìı gots'ǫ-le weghàà ats'et'ı̨ ha goı̨hwhǫ nıìle. 
\p  
\v 13 Naxıgha t'asìı whìle agode ha eyıts'ǫ dǫ eyıì-le gıxè t'asìı łǫ agode ha ts'ı̨ı̨wǫ nıìle, hanìkò hazǫǫ̀ ełèht'eè t'asìı naxıts'ǫ ha ts'ı̨ı̨wǫ.  
\v 14 Dıì t'asìı łǫ naxıts'ǫ sìı wet'à dǫ t'asìı gıts'ǫ-le ts'àahdı ha dìì-le. Hanì-ı̨dè ededı̨ t'asìı deɂǫ̀ǫ̀ gıts'ǫ nı̨dè naxıts'àgedıì agede ha. Hanì-ı̨dè hazǫǫ̀ ełèht'eè t'asìı gots'ǫ ha.  
\v 15 Dıı hanì dek'eèhtł'è k'ę̀ę̀: “Amìı t'asìı łǫ nàwhehtsı̨ı̨ sìı sıì deɂǫ̀ǫ̀ t'asìı łǫ wets'ǫ-le, eyıts'ǫ amìı t'asìı łǫ-lea nàwhehtsı̨ı̨ sìı sıì t'asìı wets'ǫ-le nıìle,” dek'eèhtł'è. 
\s1 Tıtus, kǫ̀ta Corınth ts'ǫ̀ adlà 
\p  
\v 16 Dànì naxıxè hòɂǫ ha dehwhǫǫ sìı Nǫ̀htsı̨ Tıtus hanì nànıwoò ayį̀į̀là hǫt'e, eyıt'à Nǫ̀htsı̨ masì weehwhǫ.  
\v 17 Tıtus naxıts'ǫ̀ wets'eèhɂàa sìı hayele ha zǫǫ̀-le, ededı̨ hanıwǫ t'à naxıts'àtła ha sıì wınà hǫt'e.  
\v 18 Nǫ̀htsı̨ cheekeè ı̨łè wexè ats'ele ha. Eyı dǫ godı nezı̨ı̨ gha nezı̨į̀ eghàlaı̨dà t'à Nǫ̀htsı̨ wecheekeè hazǫǫ̀ gıghǫ sìghà agedı hǫt'e.  
\v 19 Eyı zǫǫ̀-le, sǫǫ̀mba dǫ degaı ts'ǫ̀ ts'ewa gha goxè ade ha Nǫ̀htsı̨ wecheekeè eyı dǫ gį̀į̀hchì hǫt'e. Eyı sǫǫ̀mba gıghàts'ewa ha sìı, wet'à Nǫ̀htsı̨ ghàsǫhoedı eyıts'ǫ sıì gıts'àts'edı ha ts'ı̨ı̨wǫǫ sìı gık'èezǫ gha ats'et'ı̨.  
\v 20 Eyı sǫǫ̀mba haàtłǫǫ k'ets'elee sìı weghǫ yatı łǫ ha ts'ı̨ı̨wǫ-le.  
\v 21 Eyıt'à ehkw'ı weghàlats'eeda ha ts'ı̨ı̨wǫ. Nǫ̀htsı̨ wenadąą̀ zǫǫ̀-le hanìkò dǫ hazǫǫ̀ gınadąą̀ ehkw'ı k'ehots'eɂa ha ts'ı̨ı̨wǫ hǫt'e. 
\p  
\v 22 Eyıts'ǫ k'achı̨ dǫ ı̨łè eyı dǫ nàke gıxè ats'ele ha. Ededı̨ sìı goxè eghàlaı̨dà ı̨lè t'à wınì nàtsoo xè dànì la ghǫ hǫhtìı sìı wek'èts'eezǫ hǫt'e. Ehkw'ı eghàlaahda ha naxı̨ı̨hwhǫ t'à denahk'e goxè eghàlaeda ha nıwǫ hǫt'e.  
\v 23 Tıtus ededı̨ sexè eghàlaeda hǫt'e, eyıts'ǫ setł'axǫǫ̀ naxıta eghàlaeda hǫt'e. Eyıts'ǫ wexè dǫ nàke sìı Nǫ̀htsı̨ cheekeè hazǫǫ̀ gha k'ehogeɂa t'à Zezì-Krı weghàsǫhoedıì adlà hǫt'e.  
\v 24 Eyıt'à eyı dǫ taı gıghǫnıahtǫǫ sìı gık'èezǫǫ̀ agıahłe, eyıts'ǫ ayìı ghǫ naxıghǫ xàhots'edìı sìı wek'ę̀ę̀ ehkw'ı eghàlaahda. Hanì-ı̨dè Nǫ̀htsı̨ wecheekeè hazǫǫ̀ gık'èezǫ ha. 
\c 9  
\p  
\v 1 Nǫ̀htsı̨ wets'ǫ dǫ dànì gıts'àts'ı̨ı̨dìı sìı weghǫ naxıts'ǫ̀ eehtł'è-le kò.  
\v 2 Dǫ degaı gıts'àahdı ha hòtł'ò aahwhǫ hǫt'e wek'èehsǫ. Macedonıa nèk'e Nǫ̀htsı̨ cheekeè nàgedèe sìı naxıghǫ gıts'ǫ̀ xàdahohdì ı̨lè. Įdìı xok'e naxı̨ Achaıa nèk'e nàahdèe sìı sǫǫ̀mba t'à dǫ degaı ts'àahdı ha dahwhǫ hǫt'e gèehsı̨ ı̨lè. Naxınà hanì eghàlaahda t'à Macedonıa got'ı̨į̀ ededı̨ sı sǫǫ̀mba ełègį̀ı̨la.  
\v 3 K'ètł'ǫ̀ naxıghǫ xàdahohdì ha-le t'à dıı dǫ taı naxıts'ǫ̀ gııhɂà hǫt'e. Hanì-ı̨dè eyı sǫǫ̀mba nàwhahtsı̨ı̨ sìı ts'atà gıtł'aahłe ha, wheahła gèehsı̨ ı̨lè t'à.  
\v 4 Macedonıa got'ı̨į̀ sexè naxıts'àgede ha sìı gıgha sǫǫ̀mba ts'atà wheahła-le nı̨dè goxı̨ naxıghǫ xàdahots'edì ı̨lèe sìı naxıghǫ į̀į̀zhats'ı̨ı̨lı̨į̀ ats'ede ha, eyıts'ǫ naxı̨ sı edeghǫ į̀į̀zhaahłı̨į̀ aahde ha.  
\v 5 Eyı hagode ch'à eyı dǫ taı gonakweè naxıts'àgede nı̨dè denahk'e nezı̨ ha dehwhǫ. Naxıdzeè t'à sǫǫ̀mba dǫ ghàahłe ha dahdı ı̨lèe sìı t'à naxıts'àgedı ha. Hanì-ı̨dè naxıdzeè t'à sǫǫ̀mba gıghàahłe ha, eyıts'ǫ naxınì k'èch'a aahłe ha-le. 
\s1 Godzeè t'à t'asìı dǫ ghàts'eɂà 
\p  
\v 6 Dıı hats'edıı hotıì wenaahdì: Amìı t'asìı dehshee łǫ-lea dèè goyìı yelee sìı t'asìı dehshee łǫ-lea nàhtsį̀ ha, hanìkò amìı wet'à t'asìı dehshee łǫ dèè goyìı yelee sìı t'asìı dehshee łǫ nàhtsį̀ ha.  
\v 7 Dǫ ededzeè t'à dàtłǫ sǫǫ̀mba dǫ ghàyele ha nıwǫǫ sìı k'ę̀ę̀ dǫ ghàyele ha hǫt'e. Edınì k'èch'a hanì-le-ı̨dè dǫ hayèhdı t'à t'asìı dǫ ghàyııɂà-le. Goınà xè t'asìı dǫ ghàts'ele nı̨dè Nǫ̀htsı̨ wınà hots'ehtsı̨ hǫt'e.  
\v 8 Nǫ̀htsı̨ sìı t'asìı hazǫǫ̀ wet'à nezı̨į̀ aahda ha deɂǫ̀ǫ̀ naxıghàyele ha wegha dìì nıìle. Hanì-ı̨dè t'aats'ǫǫ̀ t'asìı hazǫǫ̀ wet'à-aaht'ı̨ ha sìı naxıts'ǫ ha, eyıts'ǫ t'aats'ǫǫ̀ wet'à nezı̨į̀ dǫ ts'àahdı ha.  
\v 9 Dıı hanì dek'eèhtł'è k'ę̀ę̀: 
\mi \qt “T'asìı nezı̨ı̨ dǫ-teèt'ı̨ı̨ ghàı̨la hǫt'e. Ehkw'ı nàhohwhoo sìı welǫ whìle ts'ǫ̀ wheɂǫ ha,” dek'eèhtł'è.\qt* 
\m  
\v 10 Nǫ̀htsı̨ ededı̨ sìı wet'à t'asìı dehshee dǫ ghàyele hǫt'e, eyıts'ǫ łèt'è dǫ ghàyele hǫt'e. Eyıt'à t'asìı hazǫǫ̀ wet'à ts'eedaa sìı denahk'e naxıghàyele ha, eyı wet'à denahk'e ehkw'ı eghàlaahda anaxele ha.  
\v 11 Nǫ̀htsı̨ t'asìı hazǫǫ̀ deɂǫ̀ǫ̀ naxıghàyele ha, hanì-ı̨dè t'aats'ǫǫ̀ naxıdzeè t'à dǫ ts'àahdı ha dìì-le. Eyıts'ǫ goxı̨ got'ǫ̀ǫ̀ naxıdzeè t'à dǫ ts'àahdı t'à dǫ łǫ Nǫ̀htsı̨ ts'ǫ̀ masì gedı ha. 
\p  
\v 12 Eyı hanì eghàlaahdàa sìı Nǫ̀htsı̨ wets'ǫ dǫ t'asìı gıt'à edaa zǫ gıghàahłe nıìle, hanìkò eyı haahłà t'à dǫ łǫ masì gı̨ı̨wǫ xè deɂǫ̀ǫ̀ Nǫ̀htsı̨ ghàsǫgeedı hǫt'e.  
\v 13 Hanì dǫ ts'àahdı t'à dǫ naxık'ègeezǫ agèahłà hǫt'e. Zezì-Krı wegodıì nezı̨ı̨ naxıgha ehkw'ı-ahodıı k'ę̀ę̀ aahda t'à dǫ Nǫ̀htsı̨ ghàsǫgeedı ha, eyıts'ǫ dànì naxıdzeè t'à t'asìı dǫ ghàahłe, eyıts'ǫ dǫ hazǫǫ̀ gıts'àahdı t'à Nǫ̀htsı̨ ghàsǫgeedı ha hǫt'e.  
\v 14 Eyıt'à naxıgha yagehtı nı̨dè Nǫ̀htsı̨ naxıts'ǫ̀ deɂǫ̀ǫ̀ wesǫnıwǫ t'à hanì nezı̨į̀ eghàlaahda anaxį̀į̀là ghǫ masì gı̨ı̨wǫ xè ededzeè t'à naxıgha yagehtı ha hǫt'e.  
\v 15 Nǫ̀htsı̨ masì wets'ı̨ı̨hwhǫ ha hǫt'e! Ayìı goghàyı̨ı̨ɂǫǫ sìı sıì weghǫ enıìyah t'à wegha yatı whìle hǫt'e! 
\c 10  
\s1 Paul edek'edaedı 
\p  
\v 1 Dǫ mǫ̀hdaa seghǫ dıı hagedı, “Paul gogà wheda nı̨dè ts'èwhı̨ą gots'ǫ̀ gode hanìkò gogà wheda-le nı̨dè yatı nàtsoo t'à gots'ǫ̀ gode,” sègedı. Zezì-Krı dànì wedzeè nezı̨ı̨ xè ts'èwhı̨į̀ anıwǫ k'ę̀ę̀ naxıghǫnàdaehtì.  
\v 2 Naxıts'àwhıhtła nı̨dè dǫ mǫ̀hdaa dıı nèk'e dǫ k'ę̀ę̀ k'ehots'eɂa gogı̨ı̨hwhǫǫ sìı yatı nàtsoo t'à gıts'ǫ̀ gohde ha sǫnı. Hanìkò hanì naxıts'ǫ̀ gohde ha-le gha naxıghǫnàdaehtì.  
\v 3 Dıı nèk'e dǫ gıta nàts'edè kò, gık'ę̀ę̀ ełets'egǫ nıìle.  
\v 4 Goxı̨ wet'à ełets'egǫǫ sìı dıı nèk'e dǫ gıt'à ełegegǫǫ sìı xèht'eè nıìle. Į̀le, ełèht'eè nıìle! Nǫ̀htsı̨ wets'ǫ wet'à ełets'egǫǫ nàtsoò agohɂı̨ı̨ sìı wet'à wehłı̨ı̨ wenàowoò nàtsoo sìı hazǫǫ̀ wedıhots'ehtsı̨ hǫt'e.  
\v 5 Nǫ̀htsı̨ k'èch'a xàyaetıı hazǫǫ̀ eyıts'ǫ t'asìı hazǫǫ̀ Nǫ̀htsı̨ ch'à agohɂı̨ı̨ sìı wedıhots'ehtsı̨ eyıts'ǫ nànıhowo hazǫǫ̀ ts'ìhchı gà Zezì-Krı k'èı̨t'e ats'ehɂı̨ hǫt'e.  
\v 6 Deghàà Nǫ̀htsı̨ k'èaht'eè aahjà nı̨dè naxıta gots'ǫ dǫ mǫ̀hdaa Nǫ̀htsı̨ k'èch'a k'ehogeɂaa sìı nàgeekwa agets'ele ha hǫt'e. 
\p  
\v 7 T'asìı wègaat'ı̨ı̨ sìı zǫ ghàahda. Zezì-Krı wets'ǫ aht'e dǫ hotıì hadeewǫ nı̨dè goxı̨ sı wexèht'eè Zezì-Krı wets'ǫ ats'ı̨ı̨t'e yedaànıwo welì.  
\v 8 Gots'ǫ̀ K'àowo wedahxà nàahtsoò anaxets'ehɂı̨ hǫt'e, nàahtso-le anaxets'ehɂı̨ nıìle. Eyı ghǫ yaazea xàdahohdì gohde kò weghǫ į̀į̀zhaehłı̨ nıìle.  
\v 9 Dıı nı̨htł'è naxıts'ǫ̀ eehtł'èe sìı wet'à naxıdzeè dejı̨ ha ahłà nıìle.  
\v 10 Dǫ mǫ̀hdaa hagedı, “Paul gots'ǫ̀ eetł'è nı̨dè yatıì nàtsoo t'à gots'ǫ̀ gode, hanìkò goxè wheda nı̨dè t'asìı elı̨-le lanì wègaat'ı̨ eyıts'ǫ weyatıì gogha t'asìı nıìle,” gedı.  
\v 11 Eyı dǫ hagedıı sìı enı̨htł'è t'à dàts'edıı sìı wexèht'eè ats'ı̨ı̨t'e, gınıedì welì. Naxıta eghàlats'eeda nı̨dè naxıts'ǫ̀ ts'ı̨ı̨tł'è k'ę̀ę̀ k'ehots'eɂa ha. 
\p  
\v 12 Dǫ edeghǫ xàdahogedìı sìı gıxèts'ı̨ht'e ts'edı ha honàedı nıìle. Ededı̨ edeghàà dǫ edegeetsı̨ eyıts'ǫ edenàowoò ghàà edesınìyagehtı t'à gogı̨ı̨zǫ-le hǫt'e.  
\v 13 Hanìkò goxı̨ sìı deɂǫ̀ǫ̀ xàdahots'edì ha nıìle, Nǫ̀htsı̨ la goghàı̨ɂǫǫ sìı eyı zǫ ghǫ xàdahots'edì ha hǫt'e. Nǫ̀htsı̨ la goghàı̨ɂǫ t'à naxı̨ kò naxıta eghàlats'eeda hǫt'e.  
\v 14 Edeghǫ deɂǫ̀ǫ̀ xàdahots'edì ha nıìle. Naxıts'ǫ̀ ats'ejà-le nı̨dè ekìı gots'ede ha ı̨lè, hanìkò Zezì-Krı wegodıì nezı̨ı̨ xè naxıts'ǫ̀ ats'ejà ı̨lè.  
\v 15 Eyıts'ǫ dǫ eyıì-le naxıta eghàlagı̨ı̨dà ghǫ xàdahots'edì nı̨dè deɂǫ̀ǫ̀ ats'edı nıìle. K'èdaà naxınì nàtsoò ade ha ts'ı̨ı̨wǫ, hanì-ı̨dè naxıta eghàlats'eedaa sìı denahk'e nechà ade ha.  
\v 16 Hanì-ı̨dè dǫ eyıì-le naxınèè ɂǫ̀ǫ-ts'ǫ̀ nàgedèe sìı godı nezı̨ı̨ t'à gıts'ǫ̀ gots'ede ha dìì-le. Eyıì-le nèk'e Nǫ̀htsı̨ dahxà dǫ eghàlagı̨ı̨dàa sìı goxı̨ wek'e eghàlats'ı̨ı̨dà lanì wet'à edeghǫ xàdahots'edì ha ts'ı̨ı̨wǫ-le.  
\v 17 Hanìkò, “Amìı xàdahodì ha nıwǫǫ sìı Nǫ̀htsı̨ ghǫ xàdahodì welè,” dek'eèhtł'è.  
\v 18 Eyıt'à amìı edeghǫ xàdahodìı sìı dǫ nezı̨ı̨ gha wııtà nıìle, hanìkò amìı Nǫ̀htsı̨ yeghǫ xàdahodìı sìı dǫ nezı̨ı̨ gha wııtà hǫt'e. 
\c 11  
\s1 Paul eyıts'ǫ dǫ xàè Zezì wecheekeèdeè agı̨ı̨t'e-le 
\p  
\v 1 Yaazea ezhı̨ne k'ę̀ę̀ naxıts'ǫ̀ eehtł'è sǫnı kò hotıì seàhkw'ǫ ha naxeehwhǫ. Hòt'a seàhkw'ǫ wek'èehsǫ.  
\v 2 Nǫ̀htsı̨ wınì k'ę̀ę̀ hotıì naxıxoehdı hǫt'e. T'eeko wetà dǫzhìı ghàyı̨ı̨htı̨ lanì Zezì-Krı ghànaxèehtè ha dehwhǫ. T'eekogòò lanì weghànaxèehtè ha dehwhǫ.  
\v 3 Hanìkò Eve gòocho yeghǫyaàɂǫ xèht'eè naxı̨ sı naxıghǫyaeɂà aweahłe ha sǫnı dehwhǫ t'à naxıghǫ dehjı̨. Naxıdzeè t'à Zezì-Krı ghàdeahtı̨ ı̨lèe sìı eyı ch'à naxınì ekǫ-le ayele ha sǫnı.  
\v 4 Dǫ ładı̨ı̨ naxıts'ǫ̀ nììtła gà Zezì eyıì-le ghǫ hoghànaxeehtǫ nı̨dè naxıgha t'asanìle. Yedàyeh Nezı̨ı̨ naxıghǫ̀t'ǫǫ sìı wedę ı̨nì eładı̨ı̨ naxıgha ehkw'ı-ahodı nı̨dè, hanì-le-ı̨dè godı nezı̨ı̨ naxıghǫ̀t'ǫǫ sìı wedę godı eładı̨ı̨ naxıgha ehkw'ı-ahodı nı̨dè, nàhotì-le gıyatıì ààhchı hǫt'e.  
\v 5 Eyı “Nǫ̀htsı̨ deɂǫ̀ǫ̀ wecheekeèdeè” ats'ı̨ı̨t'e edegeewǫǫ sìı gık'aɂį̀ aht'e edeehwhǫ nıìle.  
\v 6 Dǫ ts'ǫ̀ gohde gha nezı̨į̀ gohde aht'e-le kò, Nǫ̀htsı̨ ts'ǫǫ̀hk'e t'asìı k'èehsǫ hǫt'e. T'asìı łǫ hats'ı̨ı̨làa sìı eyı ghàà nezı̨į̀ wek'èahsǫǫ̀ anaxets'į̀į̀là hǫt'e. 
\p  
\v 7 Naxıgha sìghà ha t'à k'èeweèt'ı̨ k'ę̀ę̀ adèhłà, eyıts'ǫ t'asìı k'èxa-le Nǫ̀htsı̨ wegodıì nezı̨ı̨ t'à naxıts'ǫ̀ gohde t'à hołı̨ı̨ hòwhıhtsı̨ nì?  
\v 8 Nǫ̀htsı̨ wecheekeè kǫ̀ta eyıì-le nàgedèe sìı sǫǫ̀mba seghàgele t'à naxıgha eghàlaehda hǫt'e. Eyıt'à gısǫǫ̀mbaà gıghǫ dehɂį̀ lanì.  
\v 9 Naxıta aeht'è ekò, t'asìı segha whìle kò t'asìı naxeehkè t'à naxıgha hoezhì ahłà whìle. Nǫ̀htsı̨ wets'ǫ dǫ Macedonıa nèk'e gots'ǫ nègı̨ı̨dee sìı ayìı segha whìle sìı seghàgı̨ı̨la hǫt'e. Sets'àahdı t'à naxıgha t'asìı whìle ha dehwhǫ-le, ı̨łaà naxıts'ǫ̀ hanì ehda ha dehwhǫ hǫt'e.  
\v 10 Zezì-Krı wenàowoò ehkw'ıı sedzeè yìı wheɂǫ dahxà dıı hanaxèehsı̨: Dǫ wı̨ı̨zìı Achaıa nèk'e gots'ǫ hanì edeghǫ xàdahohdì ch'à asele ha nıìle.  
\v 11 Dànìghǫ sets'àahdı ha naxeehwhǫ-le dahwhǫ sǫnaà? Naxıghǫneehtǫ-le t'à aht'e nıìle. Dànì naxıghǫneehtǫǫ sìı Nǫ̀htsı̨ yek'èezǫ hǫt'e!  
\v 12 Hanì eghàlaehdaa sìı ı̨łaà hanì eghàlaehda ha hǫt'e. Hanì-ı̨dè dǫ edeghǫ xàdahogedì eyıts'ǫ goxèht'eè eghàlageeda gedıì k'ehogeɂaa sìı haget'ı̨ gha hòɂǫ-le agehłe ha. 
\p  
\v 13 Hanıı dǫ sìı ehkw'ı dǫ hoghàgogeehtǫ nıìle, eghǫyageeɂàa-dǫǫ̀ agı̨ı̨t'e, Zezì-Krı wecheekeèdeè edegeetsı̨ hǫt'e.  
\v 14-15 Eyı haget'ı̨ı̨ sìı gogha enıìyah nıìle, wehłı̨ı̨ ededı̨ kò yak'eet'ı̨į̀ degaı edeetsı̨ hǫt'e. Eyıt'à dǫ wehłı̨ı̨ gha eghàlageedaa sìı ededı̨ sı ehkw'ı eghàlageeda laget'ı̨. Nǫǫde nı̨dè dànì eghàlagı̨ı̨dà k'ę̀ę̀ gıghàhòt'à ha. 
\s1 Paul, dànì Zezì gha daı̨ɂàa sìı yeghǫ xàdahodì 
\p  
\v 16 K'achı̨ haehsı̨ ha: Dǫ wı̨ı̨zìı gǫǫzǫ-le aht'e sı̨ı̨hwhǫ welè sǫ̀ǫ̀. Hanì nànıahdè nı̨dè dǫ gǫǫzǫ-le gode lanì seàhkw'ǫ, hanì-ı̨dè yaazea xàdahohdì ha dìì-le.  
\v 17 Hanì edeghǫ xàdahohdì gohdee sìı dǫ gǫǫzǫ-le laehsı̨ hǫt'e. Gots'ǫ̀ K'àowo dànì gode ha sìı k'ę̀ę̀ gohde nıìle.  
\v 18 Hanìkò dǫ łǫ dıı nèk'e dǫ k'ę̀ę̀ edeghǫ xàdahogedì gogede t'à, sı̨ sı edeghǫ xàdahohdì ha dìì-le.  
\v 19 Sıì goahsǫ t'à dǫ gogı̨ı̨zǫ-le sìı gıahkw'ǫ ha naxınà.  
\v 20 Dǫ t'ahoòyį̀ı̨ naxıts'ǫ̀ k'ahogedè, hanì-le-ı̨dè naxıghǫ egeeɂį̀ı̨, naxıt'à edegha sìghà hogehtsı̨, eyıts'ǫ naxınahk'e dǫ nechàa edegeetsı̨, tsį̀naxegeekà kò, hanì naxıts'ǫ̀ eghàlageeda kò naxıgha t'asanìle.  
\v 21 Goxı̨ hanì k'ehots'eɂa gha nàts'etso-le dehsı̨ı̨ sìı weghǫ į̀į̀zhats'ı̨ı̨lı̨ ha nì? 
\p Dǫ gǫǫzǫ-le laehsı̨ kò, dǫ ayìı ghǫ xàdahogedìı sìı sı̨ sı eyı xèht'eè haehsı̨ ha dìì-le hǫt'e.  
\v 22 Hebrew got'ı̨į̀ agı̨ı̨t'e ghǫ xàdahogedì nı̨dè sı̨ sı Hebrew got'ı̨į̀ aht'e. Israel got'ı̨į̀ agı̨ı̨t'e nì? Sı̨ sı Israel got'ı̨į̀ aht'e. Abraham wets'ıhɂǫ̀ǫ-dǫǫ̀ agı̨ı̨t'e nì? Sı̨ sı Abraham wets'ıhɂǫ̀ǫ-dǫǫ̀ aht'e hǫt'e.  
\v 23 Zezì-Krı wecheekeè agı̨ı̨t'e nì? Sı̨ gınahk'e wecheekeèdeè aht'e. (Sıì ezhı̨ne k'ę̀ę̀ gohde laehsı̨.) Gınahk'e hòtł'ò eghàlaıhdà, gınahk'e dǫ-danìı̨laa-kǫ̀ ıhdà, gınahk'e nàsegı̨ı̨hkwa, eyıts'ǫ gınahk'e gǫı̨tłǫǫ̀ ełaıhwho-t'e.  
\v 24 Israel got'ı̨į̀ sı̨làı-eht'aà taènǫ-daats'ǫ̀-łǫǫ̀tǫ nàsegı̨ı̨hkwa hǫt'e.  
\v 25 Taà-eht'aà dechı̨ t'à sekwǫ̀ǫyaà-segį̀į̀là, ı̨łàà kwe t'à segııhdè ı̨lè, taà-eht'aà nı̨hts'ı nàtso t'à sexè elàcho wetaı̨tǫ̀, ı̨łè toò eyıts'ǫ ı̨łè dzęę̀ gots'ǫ̀ tıdeè k'e daehłe ı̨lè.  
\v 26 T'aats'ǫǫ̀ t'asį̀ı̨ sek'eèhoowo. Deh nàtso t'à sexè hoejı̨ k'ehokw'o, dǫjıı ch'à sexè hoejı̨ k'ehokw'o, xàè sèot'ı̨ sı ch'à sexè hoejı̨ k'ehokw'o, dǫ ładı̨ı̨ ch'à sexè hoejı̨ k'ehokw'o, kǫ̀godeè nı sexè hoejı̨ k'ehokw'o, whatsǫǫ̀ gòɂǫǫ nı sexè hoejı̨ k'ehokw'o, tıdeè k'e sexè hoejı̨ k'ehokw'o, eyıts'ǫ dǫ gòet'ı̨ edegeetsı̨ t'à sexè hoejı̨ k'ehokw'o.  
\v 27 T'aats'ǫǫ̀ hòtł'ò eghàlaehda xè gǫı̨tłǫǫ̀ ıhtè-le. Bò dę xè tı dę aeht'è, eyıts'ǫ goht'ǫ dę aeht'è xè segha edza ı̨lè.  
\v 28 Eyı hazǫǫ̀ wedę, dzę taàt'eè Nǫ̀htsı̨ wecheekeè kǫ̀ta yàgòlaa nı nàgedèe sìı gıghǫ hòtł'ò nànıhwho hǫt'e.  
\v 29 Dǫ nàtso-le nı̨dè sı̨ sı wexè nàhtso-le hǫt'e. Dǫ hołı̨ı̨ hòèhtsı̨į̀ adlà nı̨dè sıì segha hoìla hǫt'e. 
\p  
\v 30 Edeghǫ xàdahohdì gohde ha nı̨dè ayìı wet'à nàhtso-le sìı eyı ghǫ xàdahohdì ha hǫt'e.  
\v 31 Nǫ̀htsı̨, gots'ǫ̀ K'àowo Zezì Wetà, welǫ whìle ts'ǫ̀ weghàsǫts'eedıı sìı hohts'ì gohde nıìle yek'èezǫ hǫt'e.  
\v 32 Kǫ̀godeè Damaskus whıhda ekò, k'àowo ı̨łè, k'àowocho Aretas gha k'àowo elı̨ı̨ sìı, dasegeechı ha nıwǫ t'à kǫ̀godeè hazǫǫ̀ hogııhdì agǫ̀ǫ̀là ı̨lè.  
\v 33 Hanìkò dǫ mǫ̀hdaa sets'àgı̨ı̨dìı t'à tł'ohtǫ nechàa yìı segıachì gà kǫ̀ta edzak'è gots'ǫ hodàsegeèlì. Hanì wech'à kwı̨èhsa t'à dasegıachì-le. \fig Tł'ohtǫ nechàa yìı segıachì gà kǫ̀ta edzak'è gots'ǫ hodàsegeèlì|src="HK014C.tif" size="span" ref="11.33" \fig* 
\c 12  
\s1 Paul nàtso-le kò wenazhıı enıìyah k'ehokw'o 
\p  
\v 1 Wet'àaɂà nıìle wek'èehsǫ kò edeghǫ xàdahohdì ha t'ıį̀t'e. Gots'ǫ̀ K'àowo wedahxà senazhıı xègoèht'į̀ eyıts'ǫ ayìı k'èehsǫǫ̀ asį̀į̀làa sìı, weghǫ gohde ha.  
\v 2 Hoònǫ-daats'ǫ̀-dı̨ xo ekò Zezì wecheekeè ı̨łè yak'e denahk'e dagǫǫwà ts'ǫ̀ newıìtı̨ ı̨lè. Eyı dǫ edezhį̀į̀ yìı wheda, edezhį̀į̀ yìı wheda-le, wek'èehsǫ-le, Nǫ̀htsı̨ zǫ yek'èezǫ hǫt'e.  
\v 3-4 Eyı dǫ Hoı̨zı̨-Nèk'e ts'ǫ̀ newıìtı̨ ı̨lè wek'èehsǫ. Eyı dǫ edezhį̀į̀ yìı whedaa, edezhį̀į̀ yìı wheda-le, wek'èehsǫ-le, Nǫ̀htsı̨ zǫ yek'èezǫ hǫt'e. T'asìı sıì enıìyah t'à dǫ wı̨ı̨zìı yeghǫ gode ha dìì sìı yeèhkw'ǫ ı̨lè. Eyı sìı dǫ yeghǫ gode ha wegha wets'àet'ǫ ı̨lè.  
\v 5 Eyı dǫ wexè hagòjàa sìı weghǫ xàdahohdì ha hǫt'e, hanìkò edeghǫ xàdahohdì ha-le. Ayìı t'à nàhtso-le sìı eyı zǫ weghǫ xàdahohdì ha.  
\v 6 Edeghǫ xàdahohdì gohde ha dehwhǫ nı̨dè, ehkw'ı gohde t'à ezhı̨ne k'ę̀ę̀ sııtà ha-le. Hanìkò deɂǫ̀ǫ̀ t'asìı deè aht'e segı̨ı̨hwhǫ ha-le t'à edeghǫ xàdahohdì ha-le. Dànì eghàlaehda eyıts'ǫ ayìı dàehsı̨ k'ę̀ę̀ zǫ dǫ wet'àaɂàa k'ę̀ę̀ sııtà ha dehwhǫ. 
\p  
\v 7 Eyı t'asìı enıìyah deè hazǫǫ̀ weehɂı̨ t'à xàdahohdì ch'à ı̨chį̀ghoò lanıı sekwǫ̀ ghaı̨ɂaà asììdlà hǫt'e. Eyı sìı wehłı̨ı̨ wecheekeè sek'alawoò at'ı̨ hǫt'e.  
\v 8 Taà-eht'aà gots'ǫ̀ K'àowo seghǫ yìhchı wèehsı̨ weghǫnàdaehtì ı̨lè.  
\v 9 Hanìkò sets'ǫ̀ hadı, “Nets'ǫ̀ sǫdehwhǫǫ sìı eyı negha hòt'a hǫt'e. Dǫ nàgetso-le nı̨dè, gıdzeè yìı denahk'e enıìyah eghàlaehda hǫt'e,” sèhdı. Eyıt'à ayìı t'à nàhtso-le sìı weghǫ sınà xè weghǫ denahk'e xàdahohdì ha. Hanì-ı̨dè Zezì-Krı wedahxà nàhtsoò asedle ha hǫt'e.  
\v 10 Eyıt'à Zezì-Krı wets'ıhɂǫ̀ nàhtso-le nı̨dè, dǫ sek'adageedè nı̨dè, segha nàhotì nı̨dè, dǫ dasegį̀ı̨hɂa nı̨dè, sexè hoìla k'ehokw'o nı̨dè sınà hǫt'e. Nàhtso-le nı̨dè hǫdaats'ǫ̀ nàhtso hǫt'e. 
\s1 Paul, Corınth got'ı̨į̀ goghǫ nànıwo 
\p  
\v 11 Ezhı̨ne edèwhıhtsı̨ hanìkò naxı̨ asèahłà hǫt'e. T'asìı aht'e-le sǫnı kò seghǫ nezı̨į̀ goahde ha ı̨lè. Eyı “Nǫ̀htsı̨ deɂǫ̀ǫ̀ wecheekeèdeè,” gìahdıı sìı gık'aɂį̀ aht'e nıìle.  
\v 12 Dǫ enıìyah hazǫǫ̀ xàɂaa hohtsı̨ı̨ sìı eyı weghàà Zezì wecheekeèdeè elı̨ wek'èhoedzǫ hǫt'e. Naxıxè aeht'è ekò sınì nàtso xè naxıta enıìyah łǫ hòwhıhtsı̨ ı̨lè.  
\v 13 Nǫ̀htsı̨ wecheekeè kǫ̀ta eyıì-le ta nàgedèe sìı gık'aɂį̀ aaht'e naxeehwhǫ dahwhǫ nì? Nǫ̀htsı̨ wecheekeè eyıì-le sets'àgedıì agèhłà kò naxı̨ hanaxèhłà whìle; eyı gha seghǫ nahoahłe! 
\p  
\v 14 Nàakeè naxıts'àwhıhtła ı̨lè, dıì k'achı̨ naxıts'àhtła ha, hanìkò t'asìı t'à sets'àahdı ha naxeehwhǫ-le, t'asìı naxıts'ǫ sìı weehwhǫ-le t'à, hanìkò naxı̨ naxeehwhǫ hǫt'e. Chekoa sìı edèot'ı̨ gha t'asìı k'ègedì nıìle wek'èts'eezǫ, gìot'ı̨ sìı edeza gha t'asìı k'ègedì hǫt'e.  
\v 15 Eyıt'à t'asìı hazǫǫ̀ sets'ǫ sìı naxıts'ǫ̀ wek'ehoehwhı gha sınà, eyıts'ǫ naxıghàdèehtè gha sınà hǫt'e. Denahk'e naxıghǫneehtǫ nı̨dè dek'aɂį̀ seghǫnıahtǫ ha nì?  
\v 16 T'asanìle, naxeehkè t'à naxıgha hoezhì ahłà-le. Hanìkò ts'àhohtsı̨ t'à naxıghǫyaàɂǫ seahwhǫ nì?  
\v 17 Dǫ naxıts'ǫ̀ gııhɂà ekò, sedahxà t'asìı naxıghǫ gį̀į̀hchì nǫǫ̀?  
\v 18 Tıtus naxıts'àtła ha naxıts'ǫ̀ wııhɂà ı̨lè, eyıts'ǫ gòet'ı̨ ı̨łè wexè ahłà ı̨lè. Tıtus sǫǫ̀mba gha naxık'adaawo-le ı̨lè. Eyıt'à ełèht'eè k'ehodıìɂa xè ełèht'eè nànedıìwo hǫt'e. 
\p  
\v 19 Dıı haı̨wa gots'ǫ̀ edek'edats'eedıì ats'edı dahwhǫ ı̨lè nì? Zezì-Krı wexè ats'ı̨ı̨t'e k'ę̀ę̀ Nǫ̀htsı̨ wenadąą̀ edeghǫ gots'ede hǫt'e. Goàgı̨ą, t'asìı hazǫǫ̀ hats'ehɂı̨ı̨ sìı wet'à naxınì nàtsoò ade gha ats'et'ı̨ hǫt'e.  
\v 20 Naxıts'àwhıhtła nı̨dè sınì k'ę̀ę̀ aaht'e ha-le sǫnı, eyıts'ǫ sı̨ sı naxınì k'ę̀ę̀ aht'e ha-le sǫnı, eyı weghǫ nànıhwho hǫt'e. Ełek'èch'a aahdı ha sǫnı, ełeghǫ ts'oxoahdı ha sǫnı, naxık'èch'a t'à naxınì nàìtło ha sǫnı, ełek'èch'a aahda ha sǫnı, ełeghǫ goahde ha sǫnı, xàhoahdì ha sǫnı, eyıts'ǫ naxıxè hoı̨zı̨ hòɂǫ ha-le sǫnı, eyı hazǫǫ̀ ghǫ hòtł'ò nànıhwho hǫt'e.  
\v 21 K'achı̨ naxıts'àhtła nı̨dè, Senǫ̀htsı̨ naxıghǫ į̀į̀zhaehłı̨į̀ asele ha sǫnı. Naxıta dǫ łǫ ı̨nę̀ę gots'ǫ hołı̨ı̨ hogèhtsı̨ı̨ sìı gıghǫ sedzeè nànııtì ha sǫnı. Hołı̨ı̨ nàowoò k'ę̀ę̀ ełek'alagedèe sìı weghǫ edek'egı̨ı̨lı̨-le sǫnı dehwhǫ t'à, gıghǫ hòtł'ò nànıhwho. 
\c 13  
\s1 Paul, nǫǫde xàyaı̨htı 
\p  
\v 1 Dıì taà-eht'aà naxıts'àhtłaà ade ha hǫt'e. Dıı hanì dek'eèhtł'è, “Dǫ nàke hanì-le-ı̨dè dǫ taı gıdaà agòjàa sìı ełèht'eè dǫ ghǫ xàyagı̨ı̨htı nı̨dè gıgodıì ıtà ha hǫt'e,” dek'eèhtł'è.  
\v 2 Nàekeè t'à naxıts'àwhıhtła ekò nadąą̀ yatı nàtsoo naxıghàehɂǫ ı̨lè. Dıì setł'axǫǫ̀ k'achı̨ hanaxèehsı̨ ha. K'achı̨ naxıts'àwhıhtła nı̨dè ı̨dìı dǫ hołı̨ı̨ hogèhtsı̨ı̨ sìı eyıts'ǫ dǫ eyıì-le hazǫǫ̀ eładı̨į̀ agejà-le nı̨dè ts'èwhı̨į̀ gıghàhoehɂà ha nıìle,  
\v 3 ayìı ghàà Zezì-Krı set'à gode sèahdıì daseahke t'à. Zezì nàtso-le k'ę̀ę̀ naxıta eghàlaeda nıìle, hanìkò naxıta enıìyah t'à nàtso hǫt'e.  
\v 4 Nàtso-le k'ę̀ę̀ dechı̨et'aa k'e wedıìtsò t'ıį̀t'e, hanìkò dıì Nǫ̀htsı̨ dahxà nàtso eda hǫt'e. Eyı lanì goxı̨ sı wexè nàts'etso-le lats'ı̨ı̨t'e, hanìkò Nǫ̀htsı̨ dahxà naxıgha eghàlats'eeda gha nàts'etsoò ts'eeda hǫt'e. 
\p  
\v 5 Asį̀į̀ naxıgha ehkw'ı-ahodı k'ę̀ę̀ aahda gha ededaànıahdè. Zezì-Krı naxıdzeè yìı nàdè hǫt'e wek'èahsǫ-le nì? Naxıgha ehkw'ı-ahodı k'ę̀ę̀ aahda-le wek'èahsǫ nı̨dè Zezì naxıdzeè yìı eda-le wek'èahsǫ ha hǫt'e.  
\v 6 Goxı̨ gogha ehkw'ı-ahodı k'ę̀ę̀ ts'eeda wek'èahsǫ welì dehwhǫ hǫt'e.  
\v 7 Eyıts'ǫ ekǫ-le eghàlaahda ch'à naxıgha Nǫ̀htsı̨ ts'ǫ̀ yats'ehtı. Goxı̨ nezı̨į̀ gògaat'ı̨ gha ats'et'ı̨ nıìle, hanìkò ehkw'ı eghàlaahda gha ats'et'ı̨ hǫt'e, golaà ghàlats'ı̨ı̨dà-le dǫ hagogı̨ı̨hwhǫ kò.  
\v 8 Nàowo ehkw'ıı sìı wek'èch'a eghàlats'eeda ha dìì hǫt'e, hanìkò nàowo ehkw'ıı wegha zǫ eghàlats'eeda hǫt'e.  
\v 9 Goxı̨ nàts'etso-le t'à naxı̨ nàahtso nı̨dè goınà hǫt'e, eyıts'ǫ deghàà degaı aahde ha naxıgha yats'ehtı hǫt'e.  
\v 10 Eyıt'à naxıta whıhda-le nı̨dè hanì naxıts'ǫ̀ eehtł'è hǫt'e. Hanì-ı̨dè naxıts'àwhıhtła nı̨dè Nǫ̀htsı̨ wedahxà hoìla naxıts'ǫ̀ xàyahtı ha-le. Naxınì nàtsoò ahłe gha Nǫ̀htsı̨ seghàhòı̨ɂǫ hǫt'e, naxıdıhołè gha nıìle. 
\s1 Naxıxè sìghà welè, Paul gòhdı 
\p  
\v 11 Sèot'ı̨ı̨, nǫǫde t'à dıı hanaxèehsı̨ ha: naxıxè sìghà welè, deghàà degaı aahde gha hòtł'ò eghàlaahda, ayìı dànaxèehsı̨ı̨ sìı seyatıì ààhchı, naxınì ı̨łè zǫ welè, ts'èwhı̨į̀ ełexè aahda. Hanì-ı̨dè Nǫ̀htsı̨ goghǫneètǫǫ, wexè ts'èwhı̨į̀ hòɂǫǫ sìı naxıxè wehòhɂǫ ha. 
\p  
\v 12 Nàowo degaı k'ę̀ę̀ ełeahts'į̀ xè, “Nexè sìghà welè,” ełèahdı.  
\v 13 Nǫ̀htsı̨ wets'ǫ dǫ hazǫǫ̀, “Naxıxè sìghà welè,” naxègedı. 
\p  
\v 14 Gots'ǫ̀ K'àowo Zezì-Krı naxıxè sǫnıwǫ welè, Nǫ̀htsı̨ naxıghǫneètǫ welè, eyıts'ǫ Yedàyeh Nezı̨ı̨ wenàowoò naxıxè welè.