\id 1TI 551TIDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 1 Tımothy 
\mt1 1 Tımothy ts'ǫ̀ aatł'è 
\c 1  
\p  
\v 1 Sı̨ Paul, Nǫ̀htsı̨ Edaxàgolee sìı eyıts'ǫ Zezì-Krı wet'ǫ̀ǫ̀ welǫ whìle ts'ǫ̀ ts'eeda ha sìı gıdahxà Zezì-Krı wecheekeèdeè aht'e. 
\p  
\v 2 Tımothy, nets'ǫ̀ eehtł'è. Sexè Zezì-Krı gha eghàlaı̨da t'à, xàè seza lanet'e. Nǫ̀htsı̨-Gotà eyıts'ǫ Zezì-Krı nets'ǫ̀ sǫgı̨ı̨wǫ welè, etenegeèɂı̨ welè, eyıts'ǫ nexè sìghà hòɂǫǫ̀ agııle. 
\s1 Dǫ Moses wenàowoò hoghàgogeehtǫǫ sìı gıxonehdı 
\p  
\v 3 Macedonıa nèk'e nawhıhtła ekò kǫ̀ta Ephesus wheęda nèehsı̨ ı̨lè. Įłaà ekǫ wheęda ha dehwhǫ. Hanì-ı̨dè dǫ mǫ̀hdaa nàowo ekǫ-le t'à dǫ hoghàgogeehtǫǫ sìı haget'ı̨ ha-le gìı̨dı.  
\v 4 Ekìı godı hòèlı̨ı̨ t'à eyıts'ǫ gòet'ı̨ gıızì łǫ dek'eèhtł'è hanıı t'à dǫ hoghàgıahtǫ-le, gìı̨dı. Eyı hanıı ts'ıhɂǫ̀ dǫ ełets'ǫ̀ nàyagehtı t'à Nǫ̀htsı̨ wılaà k'ę̀ę̀ dǫ hoghàgeetǫ-le; gogha ehkw'ı-ahodıı zǫ t'à Nǫ̀htsı̨ wılaà ghàlats'eeda hǫt'e.  
\v 5 Ełeghǫnıahtǫ ha dehwhǫ t'à eyı yatı naxıghàehɂǫ. Godzeè yìı hołı̨ı̨ whìle xè, goınì nezı̨ı̨ xè, eyıts'ǫ hotıì gogha ehkw'ı-ahodı xè ełeghǫnets'eètǫ ha hǫt'e.  
\v 6 Dǫ mǫ̀hdaa eyı nàowo gıtǫ̀-le agejà, godı wet'àaɂà-le ts'ǫ̀ tł'àk'e geède.  
\v 7 Moses wenàowoò hoghàgogeehtǫ ha gı̨ı̨wǫ eyıts'ǫ ayìı ghǫ agedıı sìı hotıì ehkw'ı ats'edı gı̨ı̨wǫ, hanìkò ayìı ghǫ gogedee sìı gınıedì-le. 
\p  
\v 8 Moses wenàowoò nezı̨ hǫt'e wek'èts'eezǫ, hanìkò dǫ ehkw'ıı yet'à eda nı̨dè zǫ nezı̨ hǫt'e.  
\v 9 Dǫ ehkw'ı geedaa sìı nàowodeè gıgha adlà nıìle, wek'èts'eezǫ, hanìkò dǫ eyı nàowo k'ègedì-le sìı gıgha adlà hǫt'e: nàowo-k'eezhìı-dǫǫ̀, dǫ k'èagı̨ı̨t'e-le dǫǫ̀, Nǫ̀htsı̨ gı̨ı̨wǫ-le dǫǫ̀, hołı̨ı̨-hogehtsı̨ı̨-dǫǫ̀, hołı̨ı̨ k'ę̀ę̀ geedaa dǫǫ̀, Nǫ̀htsı̨ nàowoò gıtǫ̀-le dǫǫ̀, dǫ edetà eyıts'ǫ edemǫ ełaàgehdee, eyıts'ǫ dǫ-ełahdee-dǫǫ̀,  
\v 10-11 ełexè hołı̨ı̨ hogehtsı̨ı̨ dǫǫ̀, dǫzhìı hołı̨ı̨ k'ę̀ę̀ ełek'alagedèe dǫǫ̀, dǫ gıghǫ nàedìı dǫǫ̀, hogets'ìı-dǫǫ̀, eyıts'ǫ nàyaetıı gonı ehkw'ı xàyagehtı-le dǫǫ̀. Dǫ hazǫǫ̀ Nǫ̀htsı̨ enıìyah t'à wegodıì nezı̨ı̨ k'ę̀ę̀ hoghàgoetǫ k'èch'a eghàlageedaa sìı gıgha adlà hǫt'e. Nǫ̀htsı̨ weghàsǫts'eedıı sìı wegodıì t'à dǫ hoghàgeehtǫ ha setł'aà wheɂǫǫ̀ ayį̀į̀là hǫt'e. 
\s1 Nǫ̀htsı̨ wesǫnıwǫ deɂǫ̀ǫ̀ ts'ǫ̀ Paul k'e ayį̀į̀là 
\p  
\v 12 Gots'ǫ̀ K'àowo Zezì-Krı sedzeè t'à masì weehwhǫ. Sınì nàtsoò asį̀į̀là t'à, ehkw'ı eghàlaedaa dǫǫ̀ aht'e sı̨ı̨hwhǫ t'à, eyıts'ǫ wegha eghàlaehda ha sį̀į̀hchì t'à masì weehwhǫ.  
\v 13 Įnę̀ę Nǫ̀htsı̨ wek'èch'a xàyahtı ı̨lèe, eyıts'ǫ yıdaeht'e t'à Nǫ̀htsı̨ wecheekeè dagìıhɂa ı̨lè. Hanìkò dàht'ı̨į̀-aht'ı̨ı̨ sìı wek'èehsǫ-le ı̨lè eyıts'ǫ segha ehkw'ı-ahodı-le t'à hanì eghàlaıhdà t'à Nǫ̀htsı̨ sets'ǫ̀ wedzeè eteèɂı̨ ı̨lè.  
\v 14 Zezì-Krı wets'ıhɂǫ̀ Nǫ̀htsı̨ deɂǫ̀ǫ̀ sets'ǫ̀ sǫnıwǫ t'à segha ehkw'ı-ahodıì asį̀į̀là eyıts'ǫ dǫ ghǫneehtǫǫ̀ asį̀į̀là. 
\p  
\v 15 Dıı yatı sìı hotıì ehkw'ı hǫt'e, dǫ hotıì edegha gìhchı ha hǫt'e: Zezì-Krı hołı̨ı̨-hogehtsı̨ı̨-dǫǫ̀ edaxàgole ha, dıı nèk'e ts'ǫ̀ ajà. Sı̨ sìı gıta gots'ǫ denahk'e hołı̨ı̨-hohtsı̨ı̨-dǫǫ̀ aht'e ı̨lè.  
\v 16 Eyı ts'ıhɂǫ̀ Nǫ̀htsı̨ sets'ǫ̀ wedzeè eteèɂı̨ ı̨lè. Sı̨ hołı̨ı̨-hohtsı̨ı̨-dǫǫ̀ aht'e ı̨lè kò, set'à, dǫ hazǫǫ̀ ts'ǫ̀ wedzeè nezı̨ı̨ xè ts'èwhı̨į̀ godanaèhɂı̨ı̨ sìı wek'èedzǫǫ̀ adììdlà. Sexè ts'èwhı̨į̀ nıwǫ t'à, dǫ gıgha ehkw'ı-ahodıı sìı, eyıts'ǫ welǫ whìle ts'ǫ̀ geeda agììdlàa sìı Nǫ̀htsı̨ dǫ xè sıì ts'èwhı̨į̀ nıwǫ gık'èezǫǫ̀ agǫ̀ǫ̀là.  
\v 17 Gots'ǫ K'àowocho welǫ whìle ts'ǫ edaa, eładı̨į̀ ade-le, eyıts'ǫ wègaat'ı̨-le sìı, weghàsǫts'eedı welè. Gonǫ̀htsı̨ ı̨łàet'ee zǫ sìı welǫ whìle ts'ǫ̀ wexè enıìyah welè. Amen. 
\p  
\v 18 Tımothy seza lanet'e, Yedàyeh Nezı̨ı̨ dahxà neghǫ nadąą̀ xàyagı̨ı̨htı ı̨lèe k'ę̀ę̀ yatı neghàehɂà ha. Dıı yatı nets'ǫ̀ eehtł'èe sìı wek'ènedì nı̨dè, nınì nàtso xè nàowo ehkw'ıı gha hòtł'ò eghàlaı̨da ha,  
\v 19 eyıts'ǫ nınì nezı̨ı̨ xè negha ehkw'ı-ahodı k'ę̀ę̀ ı̨da ha. Dǫ mǫ̀hdaa hanì geeda-le agejà t'à Zezì gıgha ehkw'ı-ahodı-le agejà. Elà kwe k'e wetaı̨tł'ıı lagı̨ı̨t'e.  
\v 20 Hymenaeus eyıts'ǫ Alexander gıxè hagòjà. Wehłı̨ı̨ ghàgèehła, hanì-ı̨dè Nǫ̀htsı̨ k'èch'a gogede ha-le gha hoghàgeetǫ ha welì. 
\c 2  
\s1 Dànì ełexè nezı̨į̀ yats'ehtı 
\p  
\v 1 Eyıt'à t'akwełǫ̀ǫ̀ dǫ hazǫǫ̀ gha hòtł'ò yaahtı: gıgha Nǫ̀htsı̨ weahkè, gıgha nàdaahtì, eyıts'ǫ gıgha masì dahdı.  
\v 2 K'àowocho hazǫǫ̀, eyıts'ǫ dıı nèk'e gogha k'aodèe gı̨ı̨lı̨ı̨ hazǫǫ̀ gıgha yaahtı, hanì-ı̨dè ts'èwhı̨į̀ ts'eeda xè ts'èwhı̨į̀ goxè hòɂǫ ha, eyıts'ǫ Nǫ̀htsı̨ wegha degaı k'ę̀ę̀ ts'eeda ha.  
\v 3 Hats'et'ı̨ı̨ sìı nezı̨ hǫt'e eyıts'ǫ Nǫ̀htsı̨ Edaxàgolee elı̨ı̨ sìı yeghǫ sìghà anıwǫ hǫt'e.  
\v 4 Dǫ hazǫǫ̀ edaxàgeedè ha nıwǫ, eyıts'ǫ nàowo ehkw'ıı k'ègeezǫ xè gınıedì ha nıwǫ.  
\v 5 Nǫ̀htsı̨ ı̨łè zǫ gǫ̀hłı̨, eyıts'ǫ dǫ ı̨łè zǫ Nǫ̀htsı̨ eyıts'ǫ dǫ gogha tanı wheda hǫt'e, eyı dǫ sìı Zezì-Krı hǫt'e.  
\v 6 Dǫ hazǫǫ̀ gıhołı̨į̀ gıghǫ nahoezhe gha ełaı̨wo. Ehkw'ı nìhǫǫwo ekò Nǫ̀htsı̨ dǫ ts'ǫ̀ wek'èhoedzǫǫ̀ ayį̀į̀là.  
\v 7 Eyı weghǫ gohde ha t'à wecheekeèdeè ehłı̨ ha sìhchì, eyıts'ǫ dǫ Israel got'ı̨į̀ agı̨ı̨t'e-le sìı nàowo ehkw'ıı k'ę̀ę̀ Nǫ̀htsı̨ gıgha ehkw'ı-ahodı ha hoghàgeehtǫ. Ehkw'ı naxıts'ǫ̀ haehsı̨, hohts'ì gohde nıìle. 
\p  
\v 8 Hazǫǫ̀ ts'ǫ̀ dǫ edılà degaı ı̨dòo agı̨ı̨hwhǫ xè yagehtı ha geehwhǫ. Ełets'ǫ̀ gìch'ee eyıts'ǫ ełets'ǫ̀ nàyagehtıı sìı wedę agııle. 
\p  
\v 9 Ts'èko sìı ehkw'ı k'ę̀ę̀ nàgehtł'ı̨ ha hǫt'e. Deɂǫ̀ǫ̀ edekwìghà degehtł'ı̨-le kò, t'asìı sǫǫ̀mbaekwo eyıts'ǫ sǫǫ̀mbakweè t'à hòèlı̨ı̨ sìı t'à-aget'ı̨-le kò, eyıts'ǫ goht'ǫ dètìı t'à-aget'ı̨-le kò.  
\v 10 Hanìkò ts'èko Nǫ̀htsı̨ gha ts'eeda gedıı sìı yek'ę̀ę̀ geeda ha hǫt'e eyıts'ǫ nezı̨į̀ k'ehogeɂa ha hǫt'e. 
\p  
\v 11 Ts'èko sìı ts'èwhı̨į̀ t'asìı hoghàdııtǫ eyıts'ǫ t'aats'ǫǫ̀ ıìkw'o ha.  
\v 12 Ts'èko sìı dǫzhìı hoghàgeehtǫ ha-le eyıts'ǫ dǫzhìı gha k'àowo gı̨ı̨lı̨ ha geehwhǫ-le, hanìkò ts'èwhı̨į̀ agı̨ı̨t'e ha hǫt'e.  
\v 13 Adǫ̀ t'akwełǫ̀ǫ̀ wehòèlı̨ ne wek'èts'eezǫ, eyı tł'axǫǫ̀ Eve wehòèlı̨.  
\v 14 Eyıts'ǫ Adǫ̀ ededı̨ weghǫyahoòɂǫ nıìle. Ts'èko sìı weghǫyahoòɂǫ t'à Nǫ̀htsı̨ k'èch'a hołı̨ı̨ hòèhtsı̨ hǫt'e.  
\v 15 Hanìkò ts'èko gızaa gǫ̀hłı̨ t'à dagı̨ı̨ɂa xè t'aats'ǫǫ̀ gıgha ehkw'ı-ahodı nı̨dè, dǫ ghǫnegeètǫ nı̨dè, degaı nàowoò k'ę̀ę̀ geeda nı̨dè, eyıts'ǫ edeghǫ xàdahogedì-le nı̨dè, edaxàgeedè ha hǫt'e. 
\c 3  
\s1 Dǫ gıgha ehkw'ı-ahodıı gha k'aodèe gı̨ı̨lı̨ı eyıts'ǫ gots'àgedıı-dǫǫ̀ gı̨ı̨lı̨ı̨ 
\p  
\v 1 Dıı yatı sìı hotıì ehkw'ı hǫt'e: Dǫ gıgha ehkw'ı-ahodıı gha k'àowo wehłè dǫ hòtł'ò hanıwǫ nı̨dè, la wet'àaɂàa-deè ghǫ hòtł'ò anıwǫ hǫt'e.  
\v 2 Nǫ̀htsı̨ wecheekeè gha k'àowo elı̨ı̨ sìı weghǫ godı nezı̨-le gǫ̀hłı̨ ha nıìle. Wets'èkeè ı̨łè zǫ gǫ̀hłı̨ xè ehkw'ı eda ha, hotıì edexoehdı ha, nàowołı̨ı̨ ch'à edek'èdì xè dǫ nezı̨į̀ gıts'ǫ̀ naɂa ha, wekǫ̀ dǫ gha enìxànı̨ı̨tǫ ayį̀į̀hwhǫ ha, eyıts'ǫ nezı̨į̀ dǫ hoghàehtǫǫ elı̨ ha hǫt'e.  
\v 3 Yeèhdee-dǫǫ̀ elı̨ ha-le, wınì nàìtło ha-le, hanìkò dǫ ts'ǫ̀ wedzeè nezı̨ ha, dǫ ts'ǫ̀ nàyaehtı ha-le, eyıts'ǫ sǫǫ̀mba gha edì ha-le.  
\v 4 Edekǫ̀ nezı̨į̀ gok'èdì ha, weza gık'èı̨t'e xè nezı̨į̀ gıts'ǫ̀ naɂa gha hoghàgoehtǫ ha.  
\v 5 (Dǫ edekǫ̀ nezı̨į̀ gok'èdì k'èezǫ-le nı̨dè dànì Nǫ̀htsı̨ wecheekeè gok'èdì welì?)  
\v 6 Dǫ dıìhk'ǫ̀ą gots'ǫ wegha ehkw'ı-ahodıì ajàa sìı Nǫ̀htsı̨ wecheekeè gha k'àowo elı̨ ha nıìle, hajà nı̨dè xàhodì ade ha sǫnı, eyıts'ǫ wehłı̨ı̨ xèht'eè wesınìyaetı ha.  
\v 7 Dǫ gıgha ehkw'ı-ahodı-le sìı gıghǫ nezı̨į̀ agı̨ı̨wǫ ha hǫt'e. Hanì-le-ı̨dè edahxǫ godı nezı̨-le t'à gıghǫ gode t'à, wehłı̨ı̨ yedaèt'è ha sǫnı. 
\p  
\v 8 Eyı lanì k'aodèe ts'àgedıı gı̨ı̨lı̨ı̨ sìı ehkw'ı geeda ha hǫt'e, hanì-ı̨dè dǫ nezı̨į̀ gots'ǫ̀ nageɂa ha. Eyı dǫ hanıı sìı gıdzeè ehkw'ı ha hǫt'e, jìetì geedè ha-le, eyıts'ǫ t'asìı ghǫ egedì-le ha-le xè dǫ ghǫyageeɂà ha nıìle.  
\v 9 Nǫ̀htsı̨ wenàowoò ehkw'ıı hoghàgoètǫǫ sìı hotıì gık'èdì welì eyıts'ǫ weghǫ edınì ehkw'ı agı̨ı̨hwhǫ ha hǫt'e.  
\v 10 K'aodèe ts'àgedıı gı̨ı̨lı̨ ha nı̨dè t'akwełǫ̀ǫ̀ gogeèhdzà ha hǫt'e. T'asìı wejıı goghǫ gıgòhɂǫ-le nı̨dè, k'aodèe ts'àgedıı gı̨ı̨lı̨ ha dìì-le. 
\p  
\v 11 Eyı xèht'eè gıts'èkeè ehkw'ı geeda ha hǫt'e, hanì-ı̨dè dǫ nezı̨į̀ gots'ǫ̀ nageɂa ha. Yatıjıı t'à dǫ ghǫ gogede ha-le, edexogııhdı ha, eyıts'ǫ ehkw'ı nàhogehwho gha gııtà ha hǫt'e. 
\p  
\v 12 K'aodèe ts'àdıı elı̨ı̨ sìı wets'èkeè ı̨łè zǫ gǫ̀hłı̨ ha hǫt'e. Edekǫ̀ eyıts'ǫ edeza nezı̨į̀ gok'èdì ha hǫt'e.  
\v 13 Dǫ ts'àgedıı gı̨ı̨lı̨ı̨ sìı nezı̨į̀ edılaà ghàlageeda nı̨dè dǫ nezı̨į̀ gots'ǫ̀ nageɂa ha, eyıts'ǫ denahk'e Zezì-Krı gha gınì nàtsoò ade ha. 
\p  
\v 14 Whaà-le-t'ıì nets'àhtła ha sǫnı kò, dıı yatı weghàà k'ehoı̨ɂa gha nets'ǫ̀ eehtł'è hǫt'e.  
\v 15 T'asìı ts'ıhɂǫ̀ ı̨whąą̀ nets'ǫ̀ ahjà-le nı̨dè eyı nı̨htł'è weghàà dànì Nǫ̀htsı̨ wets'ǫ dǫ k'ehogeɂaa sìı wek'èı̨zǫ ha. Nǫ̀htsı̨ wets'ǫ dǫ sìı Nǫ̀htsı̨ edaa wecheekeè agı̨ı̨t'e; yìetł'aà whetǫǫ kǫ̀ yàıtǫ̀ lanì wecheekeè Nǫ̀htsı̨ wenàowoò ehkw'ıı k'ègedì hǫt'e.  
\v 16 Nǫ̀htsı̨ Zezì weghǫ ayìı k'èts'eezǫǫ̀ agǫ̀ǫ̀làa sìı sıì enıìyah dìì: 
\q1 Dǫ k'ę̀ę̀ wègoèht'į̀ı̨, 
\q2 Yedàyeh Nezı̨ı̨ ehkw'ı eghàlaı̨dà yeghǫ hadı, 
\q1 yak'eet'ı̨į̀ ts'ǫ̀ wègoèht'į̀ı̨, 
\q2 wegodıì dǫ hazǫǫ̀ xàɂaa ts'ǫ̀ nègı̨ı̨ɂǫǫ, 
\q1 hazǫǫ̀ nèk'e wegodıì dǫ gıgha ehkw'ı-ahodı, 
\q2 eyıts'ǫ enıìyah xè ı̨dòo yak'e ts'ǫ̀ nıwıìtı̨. 
\c 4  
\s1 Tımothy ayìı dàyele ha hǫt'e 
\p  
\v 1 Yedàyeh Nezı̨ı̨ hotıì dıı hadı: Nǫǫde dzęę̀ ts'ǫ̀ hawe nı̨dè dǫ mǫ̀hdaa yatı ehkw'ıı sìı wedę agele ha. Įnì eghǫyaeɂàa sìı k'èagı̨ı̨t'e ha, eyıts'ǫ ı̨nìłı̨ı̨ nàowoò k'ę̀ę̀ geeda ha.  
\v 2 Dǫ negezı̨-le sìı eyı nàowo dǫ hoghàgogeehtǫ hǫt'e. Eyı dǫ nezı̨į̀ gìgaat'ı̨ hanìkò hogets'ì agı̨ı̨t'e. Gınì ełaı̨dèe lanì, ayìı ehkw'ıı eyıts'ǫ ayìı ekǫ-le sìı gınıehdì-le.  
\v 3 Hots'et'ı̨ı̨ sìı ehkw'ı nıìle gedı ha, eyıts'ǫ weghǫ shèts'ezhee mǫ̀hdaa geɂà-le agogehɂı̨ ha. Nǫ̀htsı̨ weghǫ shèts'ezhee yèhtsı̨ hǫt'e, eyıt'à dǫ gıgha ehkw'ı-ahodıı xè nàowo ehkw'ıı k'ègeezǫǫ sìı gıghǫ shèzhe xè weghǫ masì gı̨ı̨wǫ ha hǫt'e.  
\v 4 Nǫ̀htsı̨ t'asìı hazǫǫ̀ whehtsı̨ı̨ sìı nezı̨ hǫt'e, t'asìı wı̨ı̨zìı wedę ats'ele ha nıìle, shèts'ezhe xè weghǫ masì ts'ı̨ı̨wǫ ha hǫt'e.  
\v 5 Nǫ̀htsı̨ weyatıì t'à eyıts'ǫ goxı̨ xàyats'ehtı t'à degaı adlà hǫt'e. 
\p  
\v 6 Gòet'ı̨ hanì hoghàgı̨ı̨htǫ nı̨dè, Zezì-Krı wegha nezı̨į̀ eghàlaı̨da ha hǫt'e. Haąt'ı̨ nı̨dè Zezì-Krı weyatıì ehkw'ıı wet'à negeèhsǫǫ sìı wek'ę̀ę̀ anet'ı̨ hǫt'e, eyıts'ǫ ayìı ehkw'ıı hoghàneètǫǫ xè ayìı wek'èaneet'èe sìı wek'ę̀ę̀ eghàlaı̨da ha hǫt'e.  
\v 7 Godı wet'àaɂà-le, eyıts'ǫ godı Nǫ̀htsı̨ ts'ǫ nıìle sìı wedę anele, hanìkò Nǫ̀htsı̨ wınì k'ę̀ę̀ ı̨da gha hòtł'ò eghàlaı̨da.  
\v 8 Gozhį̀į̀ hòtł'ò eghàlaeda ats'ehɂı̨ı̨ sìı yaazea zǫ wet'àaɂà, ekò Nǫ̀htsı̨ wınì k'ę̀ę̀ ts'eedaa sìı t'asìı hazǫǫ̀ gha wet'àaɂà hǫt'e, dıì ts'eedaa gha eyıts'ǫ ı̨daà ts'eeda gha Nǫ̀htsı̨ edeyatıì goghàı̨ɂǫ ne t'à. 
\p  
\v 9 Eyı yatı sìı hotıì ehkw'ı hǫt'e, dǫ hotıì edegha gìhchı welì.  
\v 10 Eyıt'à wek'ę̀ę̀ hòtł'ò eghàlats'eeda xè wet'à dats'ı̨ı̨ɂa, Nǫ̀htsı̨ edaa sìı wegha goınì nàtsoò ats'ı̨ı̨là t'à. Nǫ̀htsı̨ sìı dıı nèk'e ts'ǫ dǫ hazǫǫ̀ edaxàlee elı̨ı̨ hǫt'e, eyıts'ǫ dǫ gıgha ehkw'ı-ahodıı sìı denahk'e edaxàgole hǫt'e. 
\p  
\v 11 Eyı yatı dǫ hoghàgı̨ı̨htǫ xè wek'èaht'e gį̀ı̨dı.  
\v 12 Cheko anet'e t'à dǫ negı̨ı̨hwhǫ-le kò gıts'ǫnıɂà-le, hanìkò ı̨łaà dǫ nezı̨ı̨ k'ę̀ę̀ ı̨da. Eyıt'à dàı̨dıì goı̨dee, dànì k'ehoı̨ɂaa, dànì dǫ ghǫneę̀tǫǫ, dànì negha ehkw'ı-ahodıı xè degaı k'ę̀ę̀ ı̨da nı̨dè, dǫ nexègeɂı̨ ha dìì-le hǫt'e.  
\v 13 Nets'ǫ̀ nèehtła gots'ǫ̀, nınì nàtso xè gıts'ǫ̀ Nǫ̀htsı̨ Nı̨htł'è k'eyaąhtı, wet'à gıts'ǫ̀ goı̨de, eyıts'ǫ wet'à hoghàgı̨ı̨htǫ.  
\v 14 Ayìı neghǫ̀t'ǫǫ sìı wek'ę̀ę̀ eghàlaı̨da, wedę anele-le. Nǫ̀htsı̨ wets'ǫ dǫ k'aodèe edılà nek'e agį̀į̀là ekò Yedàyeh Nezı̨ı̨ dahxà neghǫ xàyagı̨ı̨htı ı̨lè hǫt'e. 
\p  
\v 15 Eyı hazǫǫ̀ hòtł'ò weghàlaı̨da ha hǫt'e, eyıts'ǫ wegha nınì nàtso anehwhǫ, hanì-ı̨dè dànì Nǫ̀htsı̨ yatıì t'à nànetsoò anejàa sìı dǫ hazǫǫ̀ gık'èezǫ ha.  
\v 16 Eyıt'à dànì ı̨daa eyıts'ǫ ayìı dǫ hoghàı̨htǫǫ sìı t'à hotıì edexonehdı. Nàowo ehkw'ıı t'aats'ǫǫ̀ netǫ̀. Hanì ı̨da nı̨dè edaxàdı̨ı̨tè ha, eyıts'ǫ dǫ negeèhkw'ǫǫ sı edaxàgı̨ı̨le ha. 
\c 5  
\s1 Paul dǫ mǫ̀hdaa dànì geeda ghǫ xàyaı̨htı 
\p  
\v 1 Ǫhdah ekǫ-le hòèhtsı̨ nı̨dè yatı nàtsoo t'à wets'ǫ̀ goı̨de-le, hanìkò netà ts'ǫ̀ goı̨de lanì weghǫnàdaı̨tì. Eyıts'ǫ cheko sìı nechı lanì gıts'ǫ̀ k'ehoı̨ɂa.  
\v 2 Ts'èko ǫhdaà sìı nemǫ lagı̨ı̨hwhǫ, eyıts'ǫ t'eeko sı nedè lagı̨ı̨hwhǫ; gıts'ǫ̀ nınì-jıı welè-le. 
\p  
\v 3 Ts'èko gıdǫǫ̀ ełaı̨dèe sìı gık'èdì whìle nı̨dè hotıì nezı̨į̀ gıts'àądı.  
\v 4 Ekò gıza eyıts'ǫ gıchaà gǫ̀hłı̨ nı̨dè ededı̨ t'akwełǫ̀ǫ̀ edèot'ı̨ ts'àgedı ha hoghàdegııtǫ. Gıgha ehkw'ı-ahodı k'ę̀ę̀ edèot'ı̨ k'ègedì ha hǫt'e. Edèot'ı̨ ts'ǫ̀ hanì geeda nı̨dè ek'èt'à t'asìı goghǫ̀gele lanì ha hǫt'e, eyıts'ǫ Nǫ̀htsı̨ eyı ghǫ sìghà anıwǫ hǫt'e.  
\v 5 Ts'èko gıdǫǫ̀ ełaı̨dèe, sıì etegeèt'ı̨ı̨ xè dǫ wı̨ı̨zìı gok'èdì-le sìı hotıì Nǫ̀htsı̨ ghǫ hòtł'ò agı̨ı̨wǫ ha hǫt'e. Nǫ̀htsı̨ gots'àdı gha toò, dzęę̀ ehk'ę̀ę̀ t'aats'ǫǫ̀ Nǫ̀htsı̨ ts'ǫ̀ yagehtı welì.  
\v 6 Hanìkò ts'èko gıdǫǫ̀ ełaı̨dèe sìı sìgoèt'ı̨ı̨ zǫ gı̨ı̨wǫ nı̨dè, ı̨łaà geeda et'ıì dǫ ełaı̨dèe lagı̨ı̨t'e.  
\v 7 Dıı yatı wet'à ts'eedaa sìı dǫ gıghàı̨ɂà, hanì-ı̨dè dǫ wı̨ı̨zìı gok'e nìdahogeeɂà ha-le.  
\v 8 Dǫ edèot'ı̨ ts'àgedı-le, xàè edèot'ı̨ gots'àgedı-le nı̨dè ayìı wegha ehkw'ı-ahodıı sìı k'ę̀ę̀ eda nıìle. Dǫ wegha ehkw'ı-ahodı-le nahk'e ekǫ-le hòèhtsı̨ hǫt'e. 
\p  
\v 9 Ts'èko gıdǫǫ̀ ełaı̨dèe eyıts'ǫ ek'ètaènǫ daats'ǫ̀ gıghoò sìı ededı̨ zǫ gıızì dek'eèhtł'è aahłe. Gıdǫǫ̀ ı̨łè zǫ gòı̨lèe xè ededǫǫ̀ xè ehkw'ı gı̨ı̨dà nı̨dè,  
\v 10 eyıts'ǫ dǫ ts'ǫ̀ nezı̨į̀ eghàlageeda gha gık'èhoedzǫ nı̨dè, nezı̨į̀ chekoa geèhsǫ nı̨dè, wekǫ̀ dǫ gha enìxànı̨ı̨tǫ nı̨dè, gıdzeè nezı̨ı̨ xè Nǫ̀htsı̨ wets'ǫ dǫ gha eghàlageeda nı̨dè, dǫ gıgha hoìlaa sìı ts'àgedıı, eyıts'ǫ gınì nàtso xè t'aats'ǫǫ̀ dǫ ts'ǫ̀ nezı̨į̀ eghàlageeda nı̨dè, gıızì dek'eèhtł'è ha hǫt'e. 
\p  
\v 11 Ekò ts'èko ı̨łaà gıghoò łǫ-le et'ıì gıdǫǫ̀ ełaı̨dèe sìı gıts'àahdı gha gıızì dek'enèahtł'è-le. Zezì-Krı ts'ǫ̀ yatı nàtsoo gèhtsı̨ sǫnı kò nǫǫde nı̨dè dǫzhìı gı̨ı̨wǫǫ̀ agede ha eyıts'ǫ honìgedè gı̨ı̨wǫ ha sǫnı.  
\v 12 Hagejà nı̨dè Zezì ghàyatıgı̨ı̨ɂǫǫ sìı nàgı̨ı̨zhì t'à gısınìyaetıì adegììdlà hǫt'e.  
\v 13 Zezì ts'ǫ̀ edeyatıì k'egı̨ı̨zhì wedaats'ǫ̀ gots'egeedì agede ha sǫnı, eyıt'à ekìı kǫ̀ta k'egedè agede ha. Gots'egeedì agede wedaats'ǫ̀ yatıts'ıì kǫ̀ta k'egeɂa xè t'asìı gı̨į̀dı-le sìı ghǫ gogedeè agede ha, eyıts'ǫ t'asìı gıghǫ gode ha-le sìı ghǫ gogedeè agede ha.  
\v 14 Eyıt'à ts'èko gıghoò łǫ-le et'ıì gıdǫǫ̀ ełaı̨dèe sìı honìgııdè kò dehwhǫ hǫt'e. Gıza gǫ̀hłı̨ xè edekǫ̀ k'ègedì kò eyı denahk'e gıgha nezı̨ hǫt'e. Hanì-ı̨dè wehłı̨ı̨ goızì jıı ehtsı̨ ha gıghàhòɂà ha-le.  
\v 15 Dǫ mǫ̀hdaa sìı hòt'a gıgha ehkw'ı-ahodı-le agejà, eyıts'ǫ wehłı̨ı̨ nàowoò k'ę̀ę̀ geedaà agejà. 
\p  
\v 16 Ts'èko wegha ehkw'ı-ahodıı sìı wèot'ı̨ gıta ts'èko gıdǫǫ̀ ełaı̨dèe gǫ̀hłı̨ nı̨dè, gıts'àdı ha hǫt'e. Hanì-ı̨dè Nǫ̀htsı̨ wecheekeè deɂǫ̀ǫ̀ gıts'ǫ̀ hoèlı̨ ha-le, ts'èko sıì gıts'àwedì whìle sìı ts'àgedı ha dìì-le. 
\p  
\v 17 Nǫ̀htsı̨ wecheekeè gha k'aodèe gı̨ı̨lı̨ı̨ sìı nezı̨į̀ edılaà eghàlageedaa k'èxa nezı̨į̀ gıts'ǫ̀ nageɂa welì. Dǫ Nǫ̀htsı̨ yatıì t'à gogedee xè dǫ hoghàgogeehtǫǫ sìı wek'èxa denahk'e hanì nezı̨į̀ gıts'ǫ̀ nageɂa welì.  
\v 18 Nǫ̀htsı̨ Nı̨htł'è k'e dıı hanì dek'eèhtł'è: “Ejıe tł'olà tàtsǫyeèhɂe nı̨dè shètı̨ ch'à wewà xèɂehchıì aahłe ha-le,” dek'eèhtł'è. Eyıts'ǫ dıı hanì dek'eèhtł'è: “Dǫ eghàlaedaa sìı wek'èxa wets'àɂeedì ha hǫt'e,” dek'eèhtł'è.  
\v 19 Dǫ ı̨łè zǫ weyatıì k'e naxıgha k'àowo k'e nìdahoet'à nı̨dè wǫǫ̀hkw'ǫ-le. Dǫ nàke, hanì-le-ı̨dè dǫ taı gıdaà ekǫ-le eghàlaı̨dà gedı nı̨dè zǫ gı̨į̀kw'ǫ ha.  
\v 20 Hołı̨ı̨ hòèhtsı̨ nı̨dè dǫ hazǫǫ̀ gınadąą̀ eyı ghǫ wets'ǫ̀ goahde ha. Hanì-ı̨dè dǫ gıgha ehkw'ı-ahodıı sìı hołı̨ı̨ hogehtsı̨ ch'à edexogııhdı ha. 
\p  
\v 21 Nǫ̀htsı̨ eyıts'ǫ Zezì-Krı gınadąą̀, eyıts'ǫ yak'eet'ı̨į̀ gììchìı sìı gınadąą̀ dıı yatı nàtsoo neghàehɂǫ: Dǫ hazǫǫ̀ eyı nàowo ełèht'eè k'ę̀ę̀ gısınìyaı̨htı ha hǫt'e, eyıts'ǫ dǫ wı̨ı̨zìı denahk'e nezı̨į̀ wets'ǫ̀ k'ehoı̨ɂa ha-le. 
\p  
\v 22 Nǫ̀htsı̨ la eghàlageeda gha dǫ k'eèyatıı sìı ekòet'ıì nılà gık'e anele-le. Hanejà nı̨dè gıhołı̨į̀ k'ę̀ę̀ eghàlaı̨daà anede ha sǫnı. Hołı̨ı̨ nàowoò ch'à edek'ènedì. 
\p  
\v 23 Gǫı̨tłǫǫ̀ nebò t'à eyanelè t'à tı zǫ nedǫ-le, hanìkò jìetì łǫ-lea nedǫ. 
\p  
\v 24 Hołı̨ı̨ hogehtsı̨ gha sìı, dǫ mǫ̀hdaa gıhołı̨į̀ hoɂıì wègaat'ı̨, gıhołı̨į̀ gınakweè wek'èhoedzǫ. Ekò dǫ mǫ̀hdaa sìı gıhołı̨į̀ ekòet'ıì wègaat'ı̨-le t'à nǫǫde nı̨dè wek'èhoedzǫ hǫt'e.  
\v 25 Eyı xèht'eè, Nǫ̀htsı̨ gha nezı̨į̀ eghàlats'ı̨ı̨dà nı̨dè hoɂıì wègaat'ı̨ ha hǫt'e, ekò goılaà mǫ̀hdaa hoɂıì wègaat'ı̨-le kò wek'èhoedzǫǫ̀ adle ha hǫt'e. 
\c 6  
\p  
\v 1 Dǫ hazǫǫ̀ gıts'ǫ̀ k'aodèe wets'ǫ agı̨ı̨t'ee sìı edets'ǫ̀ k'àowo ts'ǫ̀ nezı̨į̀ nageɂa xè gık'èı̨t'e ha hǫt'e. Hagı̨ı̨t'e nı̨dè Nǫ̀htsı̨ wıızì eyıts'ǫ ayìı dǫ hoghàgıts'eehtǫǫ sìı k'adageedè ha-le.  
\v 2 K'àowo gı̨ı̨lı̨ı̨ eyıts'ǫ gıcheekeè į̀łah gıgha ehkw'ı-ahodı t'à ełèot'ı̨ agı̨ı̨t'e. Gıcheekeè gı̨ı̨lı̨ı̨ sìı dek'aɂį̀ gots'ǫ̀ nageɂa ha-le, hanìkò dǫ got'à hogeehwhıı sìı gıgha ehkw'ı-ahodı xè goghǫnegeètǫ agı̨ı̨t'e t'à denahk'e hòtł'ò gıgha eghàlageeda ha hǫt'e. Gıcheekeè gı̨ı̨lı̨ı̨ sìı eyı nàowo hoghàgı̨ı̨htǫ welì eyıts'ǫ hotıì weghàà aahda gìı̨dı. 
\s1 Sǫǫ̀mba ghǫnets'eètǫ ha-le 
\p  
\v 3 Dǫ ekǫ-le hoghàgoehtǫǫ xè gots'ǫ̀ K'àowo Zezì weyatıì ehkw'ıı sìı k'ę̀ę̀ anıwǫ-le, eyıts'ǫ Nǫ̀htsı̨ nàowoò k'èch'a dǫ hoghàehtǫǫ sìı,  
\v 4 xàhodì xè t'asìı wı̨ı̨zìı nıedì-le hǫt'e. Yatı ghǫ dǫ ełek'ę̀ę̀ agı̨ı̨wǫ-le xè ełets'ǫ̀ nàyagehtıì agohɂı̨ ghaewı t'à wınì nezı̨-le. Eyıt'à dǫ ełeghǫ ts'ohogeedıì agohɂı̨, ełek'èch'a geedaa, yatıjıı t'à ełeghǫ gogedee, eyıts'ǫ hołı̨ı̨ t'à ełeghǫ nànıgedè agohɂı̨.  
\v 5 Eyıts'ǫ dǫ gınì hołı̨ı̨ xè t'aats'ǫǫ̀ ełek'èch'a eghàlageedaà agohɂı̨. Dǫ haget'ı̨ı̨ sìı nàowo ehkw'ıı gıghǫ wedıhòłı̨, eyıts'ǫ Nǫ̀htsı̨ gha ts'eeda nı̨dè wet'à sǫǫ̀mba łǫ gots'ǫ at'į̀ gı̨ı̨wǫ. 
\p  
\v 6 Hanìkò Nǫ̀htsı̨ wınì k'ę̀ę̀ ts'eeda nı̨dè, eyıts'ǫ masì ts'ı̨ı̨wǫ nı̨dè t'asìı nechàa ts'eehnè hǫt'e.  
\v 7 Gogǫ̀hłı̨ ekò t'asìı wı̨ı̨zìı dıı nèk'e nèts'ı̨ı̨ɂǫ nıìle, eyıts'ǫ ełaàts'ewı nı̨dè t'asìı wı̨ı̨zìı edexè ats'ele ha nıìle.  
\v 8 Hanìkò weghǫ shèts'ezhee eyıts'ǫ goht'ǫ gots'ǫ nı̨dè, wet'à masì ts'ı̨ı̨wǫ ha hǫt'e.  
\v 9 Dǫ deɂǫ̀ǫ̀ sǫǫ̀mba łǫ gı̨ı̨wǫǫ sìı hołı̨ı̨ nàowoò k'ę̀ę̀ geeda aget'į̀ t'à, gık'èchıìtła laget'į̀. Ezhı̨ne laget'į̀ xè hołı̨ı̨ zǫ k'alagedè ha gı̨ı̨wǫ. Hanì geeda nı̨dè wet'à gıdıhołè ha.  
\v 10 Sǫǫ̀mba ghǫ ets'edì-le nı̨dè wets'ıhɂǫ̀ hołı̨ı̨ hazǫǫ̀ xàɂaa hots'ehtsı̨. Dǫ mǫ̀hdaa sıì sǫǫ̀mba ghageewı t'à, Zezì-Krı gha gınì nàtso-le aget'į̀. Eyıt'à edegha hoìla hogehtsı̨. 
\s1 Negha ehkw'ı-ahodıı sìı t'aats'ǫǫ̀ wek'ę̀ę̀ ı̨da 
\p  
\v 11 Hanìkò Tımothy, nı̨ sìı Nǫ̀htsı̨ wets'ǫ dǫ anet'e, eyı hołı̨ı̨ nàowoò hazǫǫ̀ ch'à edek'ènedì. Nàowo ehkw'ıı zǫ neewǫ, Nǫ̀htsı̨ wınì k'ę̀ę̀ ı̨da, wets'ǫ̀ nınì nàtso anehwhǫ, dǫ ghǫneę̀tǫ, negha hoìla kò enaąt'è-le, eyıts'ǫ dǫ ts'ǫ̀ nedzeè nezı̨ welè.  
\v 12 Daneeɂa ha sǫnı kò, Zezì negha ehkw'ı-ahodıı sìı t'aats'ǫǫ̀ wek'ę̀ę̀ ı̨da. Dǫ gınadąą̀, “Zezì segha ehkw'ı-ahodı,” nı̨ı̨dıì xàyanehtı ekò, welǫ whìle ts'ǫ̀ ı̨da ha nekayaı̨htı. Eyı yatı nezı̨ı̨ neghǫ̀t'ǫǫ sìı wedı̨ı̨chı-le, hanì-ı̨dè welǫ whìle ts'ǫ̀ ı̨da ha hǫt'e.  
\v 13 Nǫ̀htsı̨ wet'à t'asìı hazǫǫ̀ edaa sìı wenadąą̀, eyıts'ǫ Zezì-Krı, k'àowo Pılate yesınìyaehtı ekò edeghǫ ehkw'ı yets'ǫ̀ xàyaı̨htı ı̨lèe sìı wenadąą̀ dıı yatı nàtsoo neghàehɂǫ hǫt'e:  
\v 14 Gots'ǫ̀ K'àowo Zezì-Krı nììtłaa dzęę̀ gots'ǫ̀, yatı wek'ę̀ę̀ ı̨da ha neghàehɂǫǫ sìı hotıì wek'èędì.  
\v 15 Nǫ̀htsı̨ sìı t'aa dzę k'e nıwǫǫ sìı Zezì wègoèt'į̀ ayele ha. Nǫ̀htsı̨ zǫ weghàsǫts'eedı ha hǫt'e, ededı̨ zǫ gots'ǫ̀ K'àowo hǫt'e, k'àowocho hazǫǫ̀ gha K'àowocho elı̨ı̨, eyıts'ǫ k'àowo hazǫǫ̀ ts'ǫ̀ K'àowo elı̨ hǫt'e.  
\v 16 Nǫ̀htsı̨ ededı̨ zǫ ełaàwı-le sìı sadeè nàtso lanì wehòhɂǫ t'à dǫ wı̨ı̨zìı yets'ǫ̀ nıwà-le ade ha dìì, eyıt'à dǫ wı̨ı̨zìı yaɂı̨ whìle eyıts'ǫ dǫ wı̨ı̨zìı yeɂį̀ ha dìì. Ededı̨ weghàsǫts'eedı welè, eyıts'ǫ welǫ whìle ts'ǫ̀ gots'ǫ̀ K'àowo enıìyah t'à nàtso welè. Amen. 
\p  
\v 17 Dıı nèk'e dǫ ahxee gı̨ı̨lı̨ı̨ sìı dıı yatı gıghàı̨ɂà. Xàhogııdì-le eyıts'ǫ t'asìı gıts'ǫ sìı ghǫ hòtł'ò agı̨ı̨wǫ ha-le, hǫtsaa gıghǫ whìle ade ha sǫnı t'à. Hanìkò Nǫ̀htsı̨ gha gınì nàtso ha hǫt'e. Ededı̨ sìı wet'à sìts'eèt'ı̨ı̨ nàts'edè gha t'asìı hazǫǫ̀ goghàyele hǫt'e.  
\v 18 Dǫ gha nezı̨į̀ eghàlageeda ha gìı̨dı, hanıı la nezı̨ı̨ t'à dǫ ahxee gı̨ı̨lı̨ ha. Ededzeè t'à t'asìı ełeghàgele ha eyıts'ǫ gınà xè ełets'àgedı ha hǫt'e.  
\v 19 Haget'ı̨ nı̨dè edegha t'asìı nezı̨ı̨ nègele lanì ha, eyı sìı ı̨daà gogha wet'à nàgetsoò geeda ha. Hanì-ı̨dè hotıì dànì ehkw'ı ts'eedaa sìı k'ę̀ę̀ geedaà agede ha. 
\p  
\v 20 Tımothy, Nǫ̀htsı̨ ayìı netł'aàyı̨ı̨ɂǫǫ sìı hotıì nezı̨į̀ wehonehdı. Dǫ łǫ ełek'ę̀ę̀ agı̨ı̨wǫ-le kò nàowo łǫ wet'à gots'ı̨ı̨zǫ gı̨ı̨wǫ ghǫ gogede. Hanì Nǫ̀htsı̨ wınì k'ę̀ę̀-le sìı wedę anele.  
\v 21 Gota ts'ǫ dǫ mǫ̀hdaa eyı nàowo gıgha ehkw'ı-ahodıı t'à Nǫ̀htsı̨ wenàowoò gogha ehkw'ı-ahodıı sìı ts'ǫǫ̀ agejà. 
\p Nǫ̀htsı̨ nets'ǫ̀ sǫnıwǫ welè.