\id 1PE 611PEDOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 1 Peter 
\mt1 1 Peter wenı̨htł'è 
\c 1  
\p  
\v 1 Sı̨ Peter Zezì-Krı wecheekeèdeè aht'e. Nǫ̀htsı̨ dǫ edegha gòį̀hchìı sìı eyıts'ǫ dıı nèk'e ts'ǫ dǫ gıta xàhtǫ lagı̨ı̨t'ee sìı gıts'ǫ̀ eehtł'è. Pontus nèk'e, Galatıa nèk'e, Cappadocıa nèk'e, Asıa nèk'e eyıts'ǫ Bıthynıa nèk'e hazǫǫ̀ ts'ǫ̀ nàgedèe gıts'ǫ̀ eehtł'è.  
\v 2 Nǫ̀htsı̨-Gotà edınì dahxà naxį̀į̀hchì hǫt'e, hòt'a hayele ha yek'èezǫ t'à. Zezì wek'èaht'e anaxele gha, wedoò naxık'e adle gha, eyıts'ǫ degaı aahłı̨ gha, Nǫ̀htsı̨ Yedàyeh Nezı̨ı̨ naxıdzeè yìı eghàlaedaà ayį̀į̀là. Nǫ̀htsı̨ deɂǫ̀ǫ̀ naxıts'ǫ̀ sǫnıwǫ welè eyıts'ǫ naxıxè sìghà hòɂǫǫ̀ ayııle. 
\s1 Godą̀ązhį̀ı̨ edaxàdè ha hǫt'e 
\p  
\v 3 Nǫ̀htsı̨, Zezì-Krı wetà, weghàsǫts'eedı welè. Sıì gots'ǫ̀ wedzeè eteèɂı̨ t'à k'achı̨ dǫ nats'edlı̨į̀ agǫ̀ǫ̀là hǫt'e. Gots'ǫ̀ K'àowo Zezì naìdà ts'ıhɂǫ̀, ts'eeda ha gogha hòɂǫǫ̀ ayį̀į̀là.  
\v 4 Nǫ̀htsı̨ ayìı naxıda ts'atà whehłaa sìı naxıghǫ̀t'à ha hǫt'e, yak'e naxıgha wek'èhodì ne t'à wezǫą ade hǫı̨lı̨ ha-le, ek'eèhtsǫ̀ ade hǫı̨lı̨ ha-le, eyıts'ǫ ı̨hjıì ade hǫı̨lı̨ ha-le.  
\v 5 Naxıgha ehkw'ı-ahodı t'à Gonǫ̀htsı̨ nàtsoo sìı deghàà edaxànaxelee dzęę̀ ts'ǫ̀ naxık'èdì ha hǫt'e. Nǫǫde dzęę̀ k'e nı̨dè dànì weghǫ enıìyah sìı wek'èts'eezǫ ha hǫt'e.  
\v 6 Eyı sìı naxıgha ehkw'ı-ahodı t'à sıì naxınà hǫt'e. Hanìkò dıì whaà-lea gots'ǫ̀ naxıgha kèhoedı-le xè t'asìı łǫ t'à daahɂa hǫt'e.  
\v 7 Naxıts'ǫ̀ hagot'ı̨ı̨ sìı wet'à naxınì sıì nàtsoò ade ha. Goınì nàtsoo sìı sǫǫ̀mbaekwo gots'ǫ nahk'e wet'àhoòɂà hǫt'e, sǫǫ̀mbaekwo sìı kǫ̀ t'à nezı̨į̀ hołè kò ek'eèhtsǫ̀ at'į̀ hǫt'e. Goınì nàtsoo xè ehkw'ıì adlà nı̨dè Zezì-Krı nǫ̀ǫtłaa dzęę̀ k'e wet'à enıìyah xè weghàsǫhoedı welè.  
\v 8 Weahɂı̨ gǫ̀hłı̨-le, hanìkò weghǫnıahtǫ eyıts'ǫ dıì naxıgha wègaat'ı̨-le kò, naxıgha ehkw'ı adı. Eyı ts'ıhɂǫ̀ sıì naxınà xè naxıgha enıìyah dìì.  
\v 9 Naxıdą̀ązhį̀ı̨ edaxàdè ha dahwhǫ t'à naxıgha ehkw'ı-ahodı xè naxınà. 
\p  
\v 10-11 Nǫ̀htsı̨ edesǫnıwǫǫ̀ naxıghàyeɂà ha sìı whaà gots'ǫ nakwenàoɂǫǫ eyı ghǫ gogı̨ı̨de ı̨lè. Dàht'e k'e eyıts'ǫ dànì Nǫ̀htsı̨ hayele ha sìı gıgòhɂà ha gı̨ı̨wǫ t'à hòtł'ò gıghǫ nànıgedè xè hotıì gıxàeta ı̨lè. Zezì-Krı wets'ǫ Inì Degaı dıı hagòhdı ı̨lè: “Nǫǫde nı̨dè Zezì-Krı daı̨ɂa ha hǫt'e eyı tł'axǫǫ̀ nı̨dè wexè enıìyah hòɂǫ agode ha hǫt'e.” Yedàyeh Nezı̨ı̨ gots'ǫ̀ hadı ı̨lè, hanìkò dàht'e dzęę̀ k'e eyıts'ǫ edı̨į̀ hagode ha sìı gık'èezǫ-le.  
\v 12 Edegha eghàlageeda nıìle hanìkò ayìı ghǫ gogı̨ı̨dee sìı naxıgha agedıı gık'èezǫǫ̀ agììdlà hǫt'e. Dıì godı nezı̨ı̨ t'à naxıts'ǫ̀ gogedee sìı yak'e gots'ǫ Yedàyeh Nezı̨ı̨ gıts'ǫ̀ adlàa sìı wedahxà agedı hǫt'e. Ayìı ghǫ gogı̨ı̨dee sìı yak'eet'ı̨į̀ kò gıgòhɂà ha gı̨ı̨wǫ. 
\s1 Degaı aahłı̨ welè 
\p  
\v 13 Eyıt'à nezı̨į̀ k'ehoahɂa gha naxınì nàtsoò aahłe. Nàowołı̨ı̨ ch'à edek'èahdì. Zezì-Krı wègoèht'į̀ nı̨dè Nǫ̀htsı̨ naxıts'ǫ̀ sǫnıwǫǫ̀ ade ha eyı ghǫ hòtł'ò naxıgha ehkw'ı-ahodı welè.  
\v 14 Chekoa edetà k'èı̨t'ee lanì Nǫ̀htsı̨ k'èaht'e. Įnę̀ę godı nezı̨ı̨ k'èahsǫ-le ekò naxınìłı̨ı̨ k'ę̀ę̀ k'ehoahɂa ı̨lè, hanìkò dıì sìı hanì aahda ha nıìle.  
\v 15 Amìı naxıkayaı̨htıı sìı degaı hǫt'e, eyıt'à wexèht'eè degaı aaht'e ha hǫt'e.  
\v 16 Nǫ̀htsı̨ Nı̨htł'è k'e dıı hanì dek'eèhtł'è: “Sı̨ degaı aht'e t'à degaı aahłı̨,” dek'eèhtł'è. 
\p  
\v 17 Nǫ̀htsı̨-Gotà naxıgha ehkw'ı-ahodıı sìı dǫ hazǫǫ̀ ełèht'eè gosınìyaehtı ne t'à, dıı nèk'e dǫ gıta xàhtǫ laaht'e xè Nǫ̀htsı̨ t'asìı wegha dìì-le sìı wek'èaht'e ha hòtł'ò aahwhǫ.  
\v 18 Naxıcho wet'àaɂà-le k'ę̀ę̀ gı̨ı̨dàa sìı hanì aahda ch'à edaxàwhahde hǫt'e. T'asìı wedıhołè ha sìı, sǫǫ̀mbaekwo eyıts'ǫ sǫǫ̀mba degoo lanıı t'à edaxàwhahde nıìle,  
\v 19 hanìkò Zezì-Krı wedoò wet'àaɂàa t'à edaxàwhahde hǫt'e; ededı̨ Sahzǫ̀ą t'asìıjıı wek'e wheɂǫ-le sìı gohołı̨į̀ k'èxa ełaı̨wo hǫt'e.  
\v 20 Dèè hòèlı̨ kwe wììchì hǫt'e, hanìkò dıì nǫǫde dzęę̀ gha wègoèht'į̀ adlà.  
\v 21 Wets'ıhɂǫ̀ Nǫ̀htsı̨-Gotà naxıgha ehkw'ı-ahodı eyıts'ǫ edaxànaxeehtè gha naxınì nàtso. Nǫ̀htsı̨-Gotà ededı̨ sìı Zezì-Krı k'achı̨ naìdà ayį̀į̀là hǫt'e eyıts'ǫ wexè enıìyah hòɂǫǫ̀ ayį̀į̀là. 
\p  
\v 22 Hòt'a nàowo ehkw'ıı k'èaht'e t'à degaı k'ę̀ę̀ aahda adèahłà hǫt'e. Eyı ts'ıhɂǫ̀ naxèot'ı̨ sıì gıghǫnıahtǫ. Hęɂę, naxıdzeè t'à sıì ełeghǫnıahtǫ ha hǫt'e.  
\v 23 Naxı̨ sìı k'achı̨ naxıgǫ̀hłı̨į̀ aahjà hǫt'e. T'asìı wedıhołè ha sìı t'à aahjà nıìle, hanìkò Nǫ̀htsı̨ weyatıì welǫ whìle ts'ǫ̀ wheɂǫǫ sìı t'à k'achı̨ naxıgǫ̀hłı̨ hǫt'e.  
\v 24 Nǫ̀htsı̨ Nı̨htł'è k'e dıı hanì dek'eèhtł'è hǫt'e: 
\mi \qt “Dǫ hazǫǫ̀ tł'oh lagı̨ı̨t'e eyıts'ǫ ı̨t'ǫ̀chàa lanì gìdaat'ı̨; tł'oh whegǫǫ̀ at'į̀ eyıts'ǫ ı̨t'ǫ̀chàa dèè k'e ts'ǫ̀ hodàetł'ì,\qt* 
\v 25 \qt hanìkò gots'ǫ̀ K'àowo weyatıì sìı welǫ whìle ts'ǫ̀ wheɂǫ,” hanì dek'eèhtł'è.\qt* 
\m Eyı yatı sìı weghànaxeètǫ hǫt'e. 
\c 2  
\p  
\v 1 Hanìkò dıì sìı hołı̨ı̨ hazǫǫ̀ k'ę̀ę̀ k'ehoahɂaa, ełeghǫyaahɂàa, degaı daahtsı̨ı̨, ełeghǫ ts'oxoahdıı, ełıızì jıı aahtsı̨ı̨, eyı hazǫǫ̀ wedę aahłe.  
\v 2 Bebìa k'ǫǫ̀t'a dǫ gı̨ı̨lı̨ı̨ sìı edemǫ wet'ò wedeèdlı̨ı̨ ghageewı lanì Nǫ̀htsı̨ wenàowoò ghaahwhı welì. Hanì-ı̨dè edaxàahdè gha naxınì nàtsoò ade ha,  
\v 3 gots'ǫ̀ K'àowo gots'ǫ̀ wınì nezı̨ı̨ wek'èahsǫǫ̀ aahjà t'à. 
\s1 Nǫ̀htsı̨ wets'ǫ dǫ aaht'e 
\p  
\v 4 Amìı wets'ǫ̀ aahjàa sìı “kwe wet'à ts'eedaa” wìyeh. Dıı nèk'e ts'ǫ dǫ eyı kwe gı̨ı̨wǫ-le, hanìkò Nǫ̀htsı̨ eyı kwe wegha sıì wet'àhoòɂà ne t'à yį̀į̀hchì hǫt'e.  
\v 5 Eyı lanì naxı̨ sı kwe edaa laaht'e. Naxı̨ sìı Nǫ̀htsı̨ wekǫ̀ gocho laaht'e eyıts'ǫ yahtıı degaı lanì wegha k'ehoahɂa. Zezì-Krı naxıgha ehkw'ı adı t'à, Nǫ̀htsı̨ wınì k'ę̀ę̀ weghàdeahła.  
\v 6 Nǫ̀htsı̨ Nı̨htł'è k'e dıı hanì dek'eèhtł'è: 
\mi \qt “Aàhkw'o! Jerusalem ekǫ kwe wheɂǫ ahłà. Eyı kwe ìhchì hǫt'e eyıts'ǫ segha wet'àaɂà hǫt'e. Amìı yegha ehkw'ı adıı sìı yek'eelı̨ hǫı̨lı̨ ha nıìle,” hanì dek'eèhtł'è.\qt* 
\m  
\v 7 Naxıgha ehkw'ı adı t'à eyı kwe naxıgha sıì wet'àhoòɂà hǫt'e. Hanìkò amìı wegha ehkw'ı-ahodı-le sìı gıgha dıı hanì dek'eèhtł'è: 
\mi \qt “Kwekǫ̀-gogehtsı̨ı̨-dǫǫ̀ kwe ɂǫ̀geèhk'aa sìı eyı kwe denahk'e wet'àhoòɂà whelı̨,” \qt* 
\m  
\v 8 eyıts'ǫ dıı hanì dek'eèhtł'è: 
\mi \qt “Eyı kwe wet'à dǫ dagıìtà eyıts'ǫ wet'à dèè k'e nàgeetł'ì hǫt'e,” hanì dek'eèhtł'è.\qt* 
\m Godı nezı̨ı̨ k'ę̀ę̀ geeda-le ts'ıhɂǫ̀ dagıìtà. Gıts'ǫ̀ hagot'ı̨ı̨ sìı hanì gıgha hòɂǫǫ̀ adlà hǫt'e. 
\p  
\v 9 Hanìkò naxı̨ sìı naxììchì hǫt'e, Nǫ̀htsı̨ wedahxà yahtıı aaht'e, Nǫ̀htsı̨ wets'ǫ aaht'e eyıts'ǫ dǫ degaı aaht'e. Eyı ts'ıhɂǫ̀ Nǫ̀htsı̨ ghàsǫahdı; ededı̨ sìı togoòtł'òo yìı gots'ǫ dzęh nı̨ı̨dı̨ı̨ ts'ǫ̀ naxıkayaı̨htı hǫt'e.  
\v 10 Įnę̀ę Nǫ̀htsı̨ wets'ǫ dǫ aaht'e-le ı̨lè, hanìkò dıì sìı Nǫ̀htsı̨ wets'ǫ aaht'e. Įnę̀ę etenaxeèɂı̨-le ı̨lè, hanìkò dıì sìı etenaxeèɂı̨ hǫt'e. 
\p  
\v 11 Seàgı̨ą, dıı nèk'e ts'ǫ dǫ gıta xàhtǫ laaht'e t'à hołı̨ı̨ naxıdą̀ązhį̀ı̨ k'alawoo sìı wek'ę̀ę̀ aahda ha-le naxıghǫ hòtł'ò hahwhǫ.  
\v 12 Dǫ Nǫ̀htsı̨ k'ègeezǫ-le sìı gıta t'aats'ǫǫ̀ ehkw'ı aahda. Hanì aahda nı̨dè ekǫ-le eghàlaahda naxık'e nìdahogeeɂà kò, t'asìı nezı̨ı̨ haahłàa sìı gıghàeda ha hǫt'e, hanì-ı̨dè Nǫ̀htsı̨ gots'ǫ̀ adee dzęę̀ k'e nı̨dè gıghàsǫedı ha hǫt'e. 
\s1 Dèe-ts'ǫ̀-k'àowo eyıts'ǫ k'aodèe gı̨ı̨lı̨ı̨ sìı gık'èaht'e 
\p  
\v 13 Nǫ̀htsı̨ wınì k'ę̀ę̀ dǫ naxıts'ǫ̀ k'aodèe gıhòèlı̨ı̨ sìı gık'èaht'e. Eyıt'à k'àowocho t'asìı hazǫǫ̀ gha k'àowo elı̨ı̨ sìı wek'èaht'e,  
\v 14 eyıts'ǫ wedahxà dèe-ts'ǫ̀-k'àowo naxıts'ǫ̀ gohɂaa sìı gık'èaht'e. Ededı̨ sìı dǫ ekǫ-le hogehtsı̨ nı̨dè nàgogeehkwa ha hǫt'e, eyıts'ǫ dǫ ehkw'ı geedaa sìı nezı̨į̀ goghǫ gogede hǫt'e.  
\v 15 Dǫ gogı̨ı̨zǫ-le sìı yatıjıı t'à naxıghǫ gogede kò dàgedıì-agedıı sìı gık'èezǫ-le. Nǫ̀htsı̨ sìı nezı̨į̀ aahda ha nıwǫ, hanì-ı̨dè eyı dǫ agııdì whìle ageahłe ha.  
\v 16 Dǫ Moses wenàowoò tł'a geèhkw'e-le lanì nàahdè, hanìkò dıı haahwhǫ-le, “Hòt'a Moses wenàowoò tł'a ts'eèhkw'e-le t'à hołı̨ı̨ hots'ehtsı̨ ha dìì-le,” dahwhǫ-le. Į̀le, Nǫ̀htsı̨ wecheekeè lanì nàahdè ha hǫt'e.  
\v 17 Nezı̨į̀ ełets'ǫ̀ naahɂa xè dıı hanì aahda: Amìı naxıxèht'eè gıgha ehkw'ı-ahodıı sìı gıghǫnıahtǫ, Nǫ̀htsı̨ wek'èaht'e, eyıts'ǫ k'àowocho wets'ǫ̀ nezı̨į̀ naahɂa. 
\p  
\v 18 Dǫ gıcheekeè yàahłı̨ı̨ sìı naxıts'ǫ̀ k'àowo ts'ǫ̀ nezı̨į̀ naahɂa xè gık'èaht'e ha hǫt'e. Naxıts'ǫ̀ k'àowo naxıts'ǫ̀ dǫ nezı̨ı̨ elı̨ nı̨dè zǫ wets'ǫ̀ dǫ nezı̨ı̨ aahłı̨-le, hanìkò k'àowo naxıts'ǫ̀ wenàhǫǫht'è kò wets'ǫ̀ dǫ nezı̨ı̨ aahłı̨.  
\v 19 Amìı Nǫ̀htsı̨ ehkw'ı adı nıwǫ xè nezı̨į̀ eda k'èxa nàweekwa nı̨dè eyı dǫ sìı eyı k'èxa weghàsǫedı ha hǫt'e.  
\v 20 Hanìkò ekǫ-le hòahtsı̨ k'èxa naxıkwǫ̀ǫyaà-naxììdlà kò naxıgha t'asanìle nı̨dè dànì naxıgha hoǫzı̨ lì? Hanìkò nezı̨į̀ aahda k'èxa nànaxeekwa xè ts'èwhı̨į̀ daahɂa nı̨dè eyı sìı Nǫ̀htsı̨ wegha nezı̨ hǫt'e.  
\v 21 Zezì-Krı naxıgha daı̨ɂà ne t'à, hanì aahda gha naxıkayaetı hǫt'e. Ededı̨ hanì gogha daı̨ɂàa sìı wek'ę̀ę̀ ts'eeda ha agǫ̀ǫ̀là.  
\v 22 Ededı̨ sìı 
\mi \qt “Hołı̨ı̨ wı̨ı̨zìı hòèhtsı̨-le eyıts'ǫ hots'ì whìle,” dek'eèhtł'è. \qt* 
\m  
\v 23 Yatıjıı t'à gık'adaedè kò ek'èt'à yatıjıı t'à gots'ǫ̀ nagode-le; daı̨ɂà kò gots'ǫ̀ yedaı̨t'e xàyaı̨htı-le. Į̀le, Nǫ̀htsı̨ ehkw'ı dǫ sınìyaehtıı sìı ghàdìtı̨.  
\v 24 Ededı̨ sìı edezhį̀į̀ t'à dechı̨et'aa k'e ts'ǫ̀ gohołı̨į̀ edexè ayį̀į̀là hǫt'e. Hanì-ı̨dè hołı̨ı̨ ts'ǫ̀ ełaàts'ede ha, hanìkò ehkw'ı k'ehots'eɂa gha ts'eedaà ats'ede ha; eyıts'ǫ wekaà wek'e whela t'à k'aàt'ıì anaxììdlà hǫt'e.  
\v 25 Naxı̨ hazǫǫ̀ sahzǫ̀ą dıkǫèdee laaht'e, hanìkò dıì amìı sahzǫ̀ą k'èdìı elı̨ı̨ sìı ts'ǫ̀ anaahde; ededı̨ sìı naxıdą̀ązhį̀ı̨ k'èdìı elı̨ hǫt'e. 
\c 3  
\s1 Dǫzhìı eyıts'ǫ gıts'èkeè 
\p  
\v 1 Ts'èko gı̨ı̨lı̨ı̨ sìı ededǫǫ̀ k'èagı̨ı̨t'e ha hǫt'e. Hanì-ı̨dè gıdǫǫ̀ godı nezı̨ı̨ gıgha ehkw'ı-ahodı-le nı̨dè gıts'èkeè gıt'ǫ̀ǫ̀ gıgha ehkw'ı-ahodıì agode ha sǫnı. Gıgha ehkw'ı-ahodıì agejà nı̨dè gıts'èkeè gots'ǫ̀ dàgedıı sìı ts'ıhɂǫ̀ nıìle, hanìkò gots'ǫ̀ dànì geeda ts'ıhɂǫ̀ gıgha ehkw'ı-ahodıì agede ha.  
\v 2 Dànì degaı k'ę̀ę̀ eyıts'ǫ k'èeweèt'ı̨ k'ę̀ę̀ aahdaa sìı gıghàeda ha hǫt'e.  
\v 3 Naxıkwìghà deèhtł'ı̨ t'à, sǫǫ̀mbaekwo whǫǫ̀zaa t'à, eyıts'ǫ goht'ǫ dètìı t'à naxèdaat'ı̨į̀ edaahɂı̨-le. Dànì naxègaat'ı̨ı̨ sìı t'à naxèdaat'ı̨ nıìle,  
\v 4 hanìkò naxıdzeè t'à naxèdaat'ı̨ ha hǫt'e. Dǫ ts'ǫ̀ naxıdzeè nezı̨ı̨ eyıts'ǫ ts'èwhı̨į̀ dahwhǫ nı̨dè Nǫ̀htsı̨ wegha t'asìı nechàa hǫt'e.  
\v 5 Įnę̀ę whaà gots'ǫ ts'èko degaı Nǫ̀htsı̨ gıgha ehkw'ı-ahodıı sìı gınaahdì. Ededǫǫ̀ k'èagı̨ı̨t'e t'à gìdaat'ı̨į̀ adegììdlà hǫt'e.  
\v 6 Sarah wenaahdì, Abraham k'èaı̨t'è eyıts'ǫ “sets'ǫ̀ k'àowo” yèhdı ı̨lè. Ehkw'ı eghàlaahda eyıts'ǫ t'asìı ts'àahjı̨-le nı̨dè Sarah wetì k'ę̀ę̀ naxııtà hǫt'e. 
\p  
\v 7 Eyı xèht'eè dǫzhìı naxıts'èkeè ts'ǫ̀ naxıdzeè nezı̨ı̨ welì. Naxıts'èkeè naxıxèht'eè nàgetso nıìle t'à gıts'ǫ̀ nezı̨į̀ naahɂa welì. Naxıxèht'eè Nǫ̀htsı̨ wesǫnıwǫ t'à welǫ whìle ts'ǫ̀ geeda ha agǫ̀ǫ̀là hǫt'e. Gıts'ǫ̀ naxıdzeè nezı̨ nı̨dè nezı̨į̀ yaahtı ha dìì-le. 
\s1 Nezı̨į̀ eghàlats'eeda k'èxa dats'ı̨ı̨ɂa 
\p  
\v 8 Nǫǫde t'à naxıts'ǫ̀ dıı haehsı̨ ha dehwhǫ: ts'èwhı̨į̀ ełexè aahdaa; ełets'ǫ̀ naxıdzeè nezı̨ı̨ aaht'ı̨ı̨, ełèot'ı̨ lanì ełeghǫnıahtǫǫ, etełeahɂı̨ı̨ eyıts'ǫ xàhoahdì-le k'ę̀ę̀ ełets'ǫ̀ naahɂa.  
\v 9 Dǫ naxıts'ǫ̀ hojıì eghàlageeda nı̨dè ek'èt'à gıts'ǫ̀ hojıì eghàlaahda-le, dǫ naxık'adageedè nı̨dè ek'èt'à gık'adaahdè-le, hanìkò gıgha yaahtı. Dǫ ts'ǫ̀ sìghà eghàlaahda ha naxììchì hǫt'e, hanì-ı̨dè Nǫ̀htsı̨ naxıts'ǫ̀ sìghà eghàlaeda ha hǫt'e.  
\v 10 Hanì dek'eèhtł'è, 
\mi \qt “Amìı whaà ts'ǫ̀ ıhdà nıwǫ eyıts'ǫ wexè sìghà welè nıwǫǫ sìı hołı̨ı̨ yatıì t'à gode eyıts'ǫ hots'ì gode ch'à edewà k'èdì ha hǫt'e.\qt* 
\v 11 \qt Hołı̨ı̨ hohtsı̨ ghǫ nat'è ha eyıts'ǫ nezı̨į̀ eda ha hǫt'e; dǫ hazǫǫ̀ xè sìghà welè nıwǫ ha eyıts'ǫ eyı gha hòtł'ò eghàlaeda ha hǫt'e.\qt* 
\v 12 \qt Amìı ehkw'ı edaa sìı Nǫ̀htsı̨ yek'èdì hǫt'e eyıts'ǫ ayìı gha yahtıı sìı yeèhkw'ǫ, hanìkò amìı hołı̨ı̨ hòèhtsı̨ı̨ sìı gots'ǫ̀ K'àowo wets'ǫ̀ wınì-le hǫt'e,” hanì dek'eèhtł'è.\qt* 
\p  
\v 13 Dǫ ts'ǫ̀ nezı̨į̀ eghàlaahda k'èxa amìı naxıts'ǫ̀ hoìla eghàlaeda ha?  
\v 14 Ehkw'ı aahda kò daahɂa nı̨dè ı̨łaà naxıxè sìghà hǫt'e. Dıı hanì dek'eèhtł'è, “Ayìı ts'àgeejı̨ı̨ sìı wets'àahjı̨-le eyıts'ǫ t'asìı ts'àahye-le,” dek'eèhtł'è.  
\v 15 Hanìkò naxıdzeè t'à Zezì-Krı naxıts'ǫ̀ K'àowo elı̨į̀ aahłe. Naxıgha ehkw'ı-ahodı ghǫ dǫ danaxeehke nı̨dè eyı ghǫ yatı weahɂà gha ts'atà dahkw'e ha hǫt'e. Naxıdzeè nezı̨ı̨ t'à wets'ǫ̀ goahde eyıts'ǫ eyı dǫ nezı̨į̀ wets'ǫ̀ naahɂa.  
\v 16 Naxınì hołı̨ı̨ ch'à wek'èahdì, hanì-ı̨dè Zezì-Krı wedahxà dànì k'ehoahɂaa sìı ghǫ dǫ naxık'adageedè nı̨dè, dǫ naxıızì jıı gehtsı̨ ı̨lèe sìı nǫǫde nı̨dè eyı ghǫ sıì į̀į̀zhagı̨ı̨lı̨į̀ agede ha hǫt'e.  
\v 17 Nezı̨į̀ eghàlats'eeda k'èxa Nǫ̀htsı̨ dats'ı̨ı̨ɂa ha goı̨hwhǫ nı̨dè hołı̨ı̨ hots'ehtsı̨ k'èxa dats'ı̨ı̨ɂa denahk'e nezı̨ hǫt'e.  
\v 18 Įłàà zǫ Zezì-Krı hołı̨ı̨ hazǫǫ̀ k'èxa ełaı̨wo hǫt'e eyıts'ǫ k'achı̨ hanade ha nıìle. Ededı̨ ehkw'ı elı̨ı̨ sìı naxı̨ ehkw'ı aaht'e-le gha ełaı̨wo, eyıt'à Nǫ̀htsı̨ ts'ǫ̀ anaxį̀į̀là. Wezhį̀į̀ ełaàgıìhwho, hanìkò Yedàyeh Nezı̨ı̨ t'à naìdà awììdlà hǫt'e,  
\v 19 eyıts'ǫ Yedàyeh Nezı̨ı̨ t'à dǫ gıdą̀ązhį̀ı̨ danìı̨laa sìı godı nezı̨ı̨ t'à gots'ǫ̀ goı̨de.  
\v 20 T'akwe whaà Noah elàcho whehtsı̨ ekò ekìıyeè k'e Nǫ̀htsı̨ k'èagı̨ı̨t'e-le ı̨lè. Ekò k'e Nǫ̀htsı̨ ts'èwhı̨į̀ godanaèhɂı̨ ı̨lè, hanìkò eyı elàcho wet'à dǫ łǫ-lea zǫ edaxàwhede; dǫ ek'èdı̨ zǫ tı t'à ełaàgı̨ı̨dè-le ı̨lè.  
\v 21 Eyı tı sìı wet'à naxık'ètaìdzǫ lanì hǫt'e, wet'à edaxàwhahde ne t'à. Naxızhį̀į̀ k'e tsǫ̀ whìle adle gha naxık'ètaìdzǫ nıìle, hanìkò wet'à Nǫ̀htsı̨ ts'ǫ̀ sıì naxınì ehkw'ıì ade gha naxık'ètaìdzǫ hǫt'e. Zezì-Krı k'achı̨ naìdà eyıts'ǫ naxık'ètaìdzǫ t'à edaxàwhahde hǫt'e.  
\v 22 Zezì-Krı yak'e ts'ǫ̀ ajà xè Nǫ̀htsı̨ gà nàgòts'ehnèe wheda, eyıts'ǫ yak'eet'ı̨į̀ hazǫǫ̀ eyıts'ǫ k'aodèe gı̨ı̨lı̨ı̨ hazǫǫ̀ gık'į̀ı̨t'eè agììdlà. 
\c 4  
\s1 Nǫ̀htsı̨ gha ts'eeda 
\p  
\v 1 Zezì-Krı dıı nèk'e ı̨ı̨dà ekò edezhį̀į̀ t'à daı̨ɂà hǫt'e, Zezì-Krı lanì naxı̨ sı naxızhį̀į̀ t'à daahɂa ha naxınì nàtsoò aahłe. Amìı edezhį̀į̀ t'à daı̨ɂaa sìı hołı̨ı̨ nàowoò k'ę̀ę̀ eda-le at'į̀ hǫt'e.  
\v 2 Eyı ts'ıhɂǫ̀ dıı nèk'e eda gots'ǫ̀ wınìłı̨ı̨ k'ę̀ę̀ eda-le, hanìkò Nǫ̀htsı̨ wınì k'ę̀ę̀ eda.  
\v 3 Įnę̀ę hòt'a whaà hołı̨ı̨ nàowoò k'ę̀ę̀ aahda ı̨lè, dǫ Nǫ̀htsı̨ k'ègeezǫ-le lanì aahda ı̨lè: ełexè hołı̨ı̨ nàowoò k'ę̀ę̀ eghàlageedaa, hołı̨ı̨ ghats'eewıı, geèhdee, gıgha sìgoèt'ı̨ı̨ zǫ gı̨ı̨wǫǫ, eyıts'ǫ nǫ̀htsı̨ą hòèlı̨ı̨ ts'ǫ̀ yagehtı t'à sıì hołı̨ı̨ hogehtsı̨.  
\v 4 Gıxè hołı̨ı̨ nàowoò hazǫǫ̀ k'alaahdè ha dahwhǫ-le sìı gınıedì-le, eyıt'à yatıjıı t'à naxık'adageedè.  
\v 5 Hanìkò Nǫ̀htsı̨ nadąą̀ edek'e xàyagehtı ha hǫt'e. Dǫ hazǫǫ̀ geedaa eyıts'ǫ dǫ hazǫǫ̀ ełaı̨dèe sìı hòt'a Nǫ̀htsı̨ gosınìyaehtı ha nìkw'o hǫt'e.  
\v 6 Eyı ts'ıhɂǫ̀ dǫ ełaı̨dèe kò godı nezı̨ı̨ gıghǫ̀t'ǫ hǫt'e. Hanì-ı̨dè gızhį̀į̀ ełaàde gha gısınìyaetı hǫt'e, hanìkò Yedàyeh Nezı̨ı̨ t'à gıgǫ̀hłı̨į̀ agejà nı̨dè Nǫ̀htsı̨ xè geeda ha hǫt'e. 
\p  
\v 7 T'asìı hazǫǫ̀ welǫ agode ha nìhǫǫwo. Eyıt'à naxınì ehkw'ıì aahłe eyıts'ǫ nàowołı̨ı̨ ch'à edek'èahdì, hanì-ı̨dè nezı̨į̀ yaahtı ha dìì-le.  
\v 8 T'asìı hazǫǫ̀ nahk'e ełeghǫnıahtǫ. Ełeghǫnets'eètǫ nı̨dè hołı̨ı̨ łǫ whìle ats'ehɂį̀.  
\v 9 Dǫ naxıkǫ̀ aget'ı̨į̀ agıahɂı̨, eyı ghǫ sǫahdı-le.  
\v 10 Naxı̨ hazǫǫ̀ Nǫ̀htsı̨ wesǫnıwǫ t'à t'asìı hazǫǫ̀ xàɂaa naxıghǫ̀t'ǫǫ sìı wet'à ełets'àahdı.  
\v 11 Dǫ gode nı̨dè, xàè Nǫ̀htsı̨ weyatıì t'à gode ha hǫt'e. Amìı dǫ ts'àdıı sìı Nǫ̀htsı̨ ayìı t'à nàtsoò ayı̨į̀làa sìı t'à-at'ı̨ ha hǫt'e. Hanì-ı̨dè Zezì-Krı wets'ıhɂǫ̀ Nǫ̀htsı̨ weghàsǫhoedı ha. Enıìyah t'à welǫ whìle ts'ǫ̀ K'àowocho elı̨ welè. Amen. 
\s1 Zezì-Krı wecheekeè ts'ı̨ı̨lı̨ ts'ıhɂǫ̀ dats'ı̨ı̨ɂa 
\p  
\v 12 Seàgı̨ą, naxıgha kèhoedı-le t'à daahɂaa sìı naxıgha enıìyah welè-le. Naxıxè hoìla agode ha-le dahwhǫ-le.  
\v 13 Hanìkò Zezì-Krı wexè daahɂaa sìı ghǫ naxınà welè, hanì-ı̨dè Zezì-Krı enıìyah t'à K'àowocho k'ę̀ę̀ wègoèht'į̀ nı̨dè sıì naxınà ha hǫt'e.  
\v 14 Zezì-Krı naxıgha ehkw'ı adı t'à dǫ naxık'adageedè nı̨dè, naxıxè sìghà hǫt'e; Nǫ̀htsı̨ wets'ǫ Yedàyeh Nezı̨ı̨ enıìyah t'à naxıts'ǫ̀-èlı̨ hǫt'e.  
\v 15 Naxıgha hoìla nı̨dè dǫ ełaahwho k'èxa welè-le, eeɂį̀ı̨-dǫǫ̀ aaht'e k'èxa welè-le, dǫjıı aaht'e k'èxa welè-le, eyıts'ǫ dǫ naxıìdı geeda-le kò gıghǫ goahde k'èxa welè-le.  
\v 16 Ekò “Zezì-Krı wek'èaht'ee dǫǫ̀” naxììyeh t'à naxıgha hoìla nı̨dè eyı ghǫ į̀į̀zhaahłı̨-le, hanìkò Zezì-Krı wıızì k'ę̀ę̀ naxììyeh t'à Nǫ̀htsı̨-Gotà weghàsǫahdı.  
\v 17 Hòt'a dǫ hazǫǫ̀ gısınìyaetı ha nìkw'o; Nǫ̀htsı̨ wets'ǫ dǫ sìı t'akwełǫ̀ǫ̀ gısınìyaetı ha hǫt'e. Goxı̨ t'akwełǫ̀ǫ̀ gosınìyaetı ha nı̨dè dǫ Nǫ̀htsı̨ wegodıì nezı̨ı̨ k'ę̀ę̀ geeda-le sìı gıxè dàgǫ̀ht'e ha sǫnı? 
\p  
\v 18 Dıı hanì dek'eèhtł'è: 
\mi \qt “Dǫ ehkw'ı geeda kò edaxàgeedè ha gıgha kèhoedı-le nı̨dè dǫ Nǫ̀htsı̨ k'ègeezǫ-le eyıts'ǫ hołı̨ı̨-hogehtsı̨ı̨-dǫǫ̀ sìı gıgha dàgǫ̀ht'e ha sǫnı?” hanì dek'eèhtł'è.\qt* 
\p  
\v 19 Nǫ̀htsı̨ gòèhtsı̨ xè t'aats'ǫǫ̀ gok'èdì ne t'à dǫ yınì k'ę̀ę̀ dagı̨ı̨ɂaa sìı Nǫ̀htsı̨ gha nezı̨į̀ geeda ghǫ nagııt'è-le. 
\c 5  
\s1 K'aodèe eyıts'ǫ cheko gı̨ı̨lı̨ı̨ sìı 
\p  
\v 1 Naxıgha k'aodèe gı̨ı̨lı̨ı̨ sìı gıdanatıehɂà ha. Naxıxèht'eè k'àowo aht'e eyıts'ǫ sedaà Zezì-Krı daı̨ɂà hǫt'e. Zezì-Krı enıìyah t'à K'àowocho k'ę̀ę̀ wègoèht'į̀ nı̨dè sı̨ sı wexè aht'ı̨ ha hǫt'e.  
\v 2 Nǫ̀htsı̨ wesahzǫ̀ą nezı̨į̀ gık'èahdì. Eyı la naxıghǫ̀t'ǫ ne t'à, k'àowo nezı̨ı̨ aahłı̨. Hanì naxıgha hòɂǫ zǫ t'à gıxoahdı-le, hanìkò Nǫ̀htsı̨ wınì k'ę̀ę̀ naxıdzeè t'à gıxoahdı. Sǫǫ̀mba ghǫ hòtł'ò aahwhǫ-le, hanìkò dǫ ts'àahdı gha ts'atà dahkw'e.  
\v 3 Dǫ gıxoahdı ha anaxììdlàa sìı gıts'ǫ̀ k'adahoahdè-le, hanìkò Nǫ̀htsı̨ wesahzǫ̀ą gıgha k'aodèe nezı̨ı̨ aahłı̨, hanì-ı̨dè naxıxègeɂı̨į̀ agede ha hǫt'e.  
\v 4 Haaht'ı̨ nı̨dè Nǫ̀htsı̨ wesahzǫ̀ą-k'èdìı-deè nììtła nı̨dè welǫ whìle ts'ǫ̀ enıìyah k'ę̀ę̀ aahdaà anaxedle ha hǫt'e. 
\p  
\v 5 Naxı̨ cheko yàahłı̨ı̨ sìı dǫzhìı ǫhdaà gık'èaht'e. Hazǫǫ̀ ełets'ǫ̀ k'èeweèt'ı̨ k'ę̀ę̀ aahda, dıı hanì dek'eèhtł'è t'à: 
\mi \qt “Nǫ̀htsı̨ dǫ xàhodìı sìı ts'ǫ̀ wınì-le hǫt'e, hanìkò amìı k'èeweèt'ı̨ı̨ elı̨ı̨ sìı ts'ǫ̀ sǫnıwǫ hǫt'e,” hanì dek'eèhtł'è.\qt* 
\m  
\v 6 Eyıt'à Nǫ̀htsı̨ t'asìı wegha dìì-le sìı wenadąą̀ k'èeweèt'ı̨ k'ę̀ę̀ aahda, hanì-ı̨dè wegha sìghà dzęę̀ k'e nı̨dè daà anaxele ha hǫt'e.  
\v 7 Naxıghǫneètǫ ne t'à t'asìı hazǫǫ̀ ghǫ nànıahdèe sìı weghàahłe. 
\p  
\v 8 Nàowołı̨ı̨ ch'à edek'èahdì eyıts'ǫ hotıì kexoahdı. Wehłı̨ı̨ naxıdzaı̨hwhǫǫ sìı, goìjìıcho ı̨ghǫǫ lanì dǫ godzıìhɂà ha gotak'etło hǫt'e. \fig Goìjìıcho ı̨ghǫǫ|src="HK011E.tif" size="span" ref="5.8" \fig* 
\v 9 Wek'ę̀ę̀ eghàlaahda-le, hanìkò Nǫ̀htsı̨ gha naxınì nàtsoò aahwhǫ, dıı nèk'e dǫ gıgha ehkw'ı-ahodıı hazǫǫ̀ naxıxèht'eè dagı̨ı̨ɂa wek'èahsǫ hǫt'e. 
\p  
\v 10 Nǫ̀htsı̨ t'aats'ǫǫ̀ naxıts'ǫ̀ sǫnıwǫǫ sìı Zezì-Krı wedahxà welǫ whìle ts'ǫ̀ enıìyah k'ę̀ę̀ aahda ha naxıkayaı̨htı hǫt'e. Whaà-lea gots'ǫ̀ daahɂa tł'axǫǫ̀ xàè ededı̨ naxıxè sìghà hòɂǫǫ̀ ayele ha eyıts'ǫ t'aats'ǫǫ̀ naxınì nàtsoò ayele ha hǫt'e.  
\v 11 Welǫ whìle ts'ǫ̀ Nǫ̀htsı̨ enıìyah nàtso wets'ǫ̀-èlı̨ welè. Amen. 
\s1 Naxıxè sìghà welè 
\p  
\v 12 Naxıts'ǫ̀ eehtł'è gha sèot'ı̨ Sılas sets'àı̨dì. Ededı̨ sìı t'aats'ǫǫ̀ segha nezı̨į̀ eghàlaeda hǫt'e. Naxınì nàtsoò ahłe ha eyıts'ǫ Nǫ̀htsı̨ wesǫnıwǫ k'ę̀ę̀ aahda ha dehwhǫ t'à t'asìı mǫ̀hdaa ghǫ naxıts'ǫ̀ ııhtł'è hǫt'e. Nǫ̀htsı̨ naxıts'ǫ̀ sǫnıwǫ ts'ıhɂǫ̀ t'aats'ǫǫ̀ naxınì nàtsoò aahwhǫ. 
\p  
\v 13 Kǫ̀godeè Babylon Nǫ̀htsı̨ wets'ǫ dǫ naxıxèht'eè gìhchìı sìı naxıxè sìghà welè naxègedı. Eyıts'ǫ Mark seza lanì elı̨ı̨ sìı, ededı̨ sı naxıxè sìghà welè naxèhdı.  
\v 14 Nàowo degaı k'ę̀ę̀ ełeahts'į̀ xè, “Nexè sìghà welè,” ełèahdı. 
\p Zezì-Krı wets'ǫ aaht'ee sìı naxıxè sìghà welè.