\id 1CO 471CODOG.sfm post-publishing to usfm 20050616 bp 
\rem converted to Unicode Oct 2007 via DOG3.c2u 
\h 1 Corınth 
\mt1 1 Corınth got'ı̨į̀ gıts'ǫ̀ aatł'è 
\c 1  
\p  
\v 1-2 Sı̨ Paul aht'e, Nǫ̀htsı̨ wedahxà Zezì-Krı wecheekeèdeè ehłı̨ gha sìhchı hǫt'e. Gòet'ı̨ Sostenes wexè dıı enı̨htł'è kǫ̀ta Corınth Nǫ̀htsı̨ wecheekeè nàgedèe sìı gıts'ǫ̀ ts'eetł'è. Zezì-Krı wet'ǫ̀ǫ̀ Nǫ̀htsı̨ edegha gòį̀hchìı hǫt'e. Eyıts'ǫ hazǫǫ̀ nèk'e dǫ Zezì-Krı ghǫ gınì nàtsoo sìı ededı̨ sı gıts'ǫ̀ ts'eetł'è hǫt'e. Zezì gıts'ǫ̀ K'àowo elı̨ hǫt'e eyıts'ǫ goxı̨ sı gots'ǫ̀ K'àowo elı̨ hǫt'e. 
\p  
\v 3 Nǫ̀htsı̨-Gotà eyıts'ǫ gots'ǫ̀ K'àowo Zezì-Krı naxıxè sǫgı̨ı̨wǫ welè eyıts'ǫ naxıxè sìghà hòɂǫ agııle. 
\s1 Paul Nǫ̀htsı̨ ts'ǫ̀ masì nıwǫ 
\p  
\v 4 Nǫ̀htsı̨-Gotà, Zezì-Krı wets'ıhɂǫ̀ naxıts'ǫ̀ sǫnıwǫ t'à, t'aats'ǫǫ̀ naxıgha masì weehwhǫ.  
\v 5 Zezì-Krı wet'ǫ̀ǫ̀ t'asìı hazǫǫ̀ t'à naxıxè sìghà adlà. Dànì goahde gha, eyıts'ǫ nàowo ehkw'ıı hazǫǫ̀ k'èhoahsǫ gha naxıxè sìghà adlà hǫt'e.  
\v 6 Dànì Zezì-Krı weghǫ naxıts'ǫ̀ gots'ı̨ı̨dee sìı naxıgha ehkw'ı-ahodıì aahjà eyıts'ǫ wek'ę̀ę̀ aahdaà aahjà.  
\v 7 Eyıt'à gots'ǫ̀ K'àowo Zezì-Krı gots'ǫ̀ anade gha wedanaahɂı̨ gots'ǫ̀, Yedàyeh Nezı̨ı̨ t'asìı naxıghàı̨ɂǫǫ sìı hazǫǫ̀ naxıts'ǫ hǫt'e.  
\v 8 Nǫǫde dzęę̀ ts'ǫ̀ naxınì nàtsoò anaxį̀į̀hwhǫ ha, hanì-ı̨dè gots'ǫ̀ K'àowo nììtłaa dzęę̀ k'e nı̨dè t'asìı wı̨ı̨zìı naxık'e nìdahoet'à ha-le.  
\v 9 Nǫ̀htsı̨-Gotà, Edeza Zezì-Krı wexè ı̨łè laaht'e ha naxıkayaı̨htıı sìı t'aats'ǫǫ̀ gots'ǫ̀ edeyatıì k'èdì hǫt'e. 
\s1 Nǫ̀htsı̨ wets'ǫ dǫ ełek'ę̀ę̀ agı̨ı̨wǫ-le 
\p  
\v 10 Sèot'ı̨ı̨, Zezì wedahxà hazǫǫ̀ ı̨łè zǫ laaht'e naxèehsı̨, hanì-ı̨dè ełek'èch'a aaht'e ha-le eyıts'ǫ hotıì naxınì ı̨łè zǫ lanì ha.  
\v 11 Sèot'ı̨ı̨, dǫ mǫ̀hdaa Chloyı wekǫ̀ nàgedèe sìı ełets'ǫ̀ nàyaahtı naxègedı.  
\v 12 Dıı weghǫ aehsı̨: Naxıta gots'ǫ dǫ mǫ̀hdaa dıı hagedı, “Sı̨ Paul wek'ę̀ę̀ aht'ı̨,” mǫ̀hdaa, “Sı̨ Apollos wek'ę̀ę̀ aht'ı̨,” gedı. Eyıts'ǫ dǫ mǫ̀hdaa, “Sı̨ Peter wek'ę̀ę̀ aht'ı̨,” gedı. K'achı̨ ı̨łaà dǫ mǫ̀hdaa, “Sı̨ Zezì-Krı wek'ę̀ę̀ aht'ı̨,” gedı, eyı ghǫ aehsı̨. 
\p  
\v 13 Asį̀į̀ Zezì-Krı ı̨łak'aà awììdlà? Asį̀į̀ Paul naxıgha dechı̨et'aa k'e wedıìtsò nǫǫ̀? Paul wıızì dahxà naxık'ètaìdzǫ nì?  
\v 14 Naxıta gots'ǫ dǫ gık'ètaèhdzǫ-le ı̨lè, eyı gha masì dehwhǫ. Crıspus eyıts'ǫ Gaıus ededı̨ zǫ gık'ètaèhdzǫ ı̨lè.  
\v 15 Eyıt'à sıızì dahxà naxık'ètaìdzǫ dǫ wı̨ı̨zìı hagedı ha dìì.  
\v 16 (Hęɂę, Stephanas wekǫ̀ agı̨ı̨t'ee sìı hazǫǫ̀ gık'ètaèhdzǫ t'ıį̀t'e, eyı wenǫ̀ǫ̀ dǫ wı̨ı̨zìı gık'ètaèhdzǫ ha wek'èehsǫ-le.)  
\v 17 Zezì-Krı, dǫ k'ètaìhdzı̨ ts'ǫ̀ sı̨ı̨hɂà nıìle, godı nezı̨ı̨ t'à dǫ xè gohdo ha sı̨ı̨hɂà hǫt'e. Dıı nèk'e wet'à gogı̨ı̨zǫ t'à gohde nıìle. Hanì gòhde nı̨dè Zezì dànì gogha dechı̨et'aa k'e ełaı̨wo wegodıì sìı naxıgha nàtso-le ahłe ha. 
\s1 Godı nezı̨ı̨ sìı Nǫ̀htsı̨ wets'ǫ t'asìı nàtsoo hǫt'e 
\p  
\v 18 Dǫ gıdıhołè ha sìı dechı̨et'aa wegodıì t'à gots'ede nı̨dè, gıgha ezhı̨ne k'ę̀ę̀ gots'ede lanì, hanìkò goxı̨ edaxàts'ı̨ı̨dee sìı gogha Nǫ̀htsı̨ wets'ǫ t'asìı nàtsoo hǫt'e.  
\v 19 Dıı hanì dek'eèhtł'è hǫt'e: 
\mi \qt “Dǫ gogı̨ı̨zǫǫ sìı gınàowoò wedıhohtsı̨ ha, eyıts'ǫ gıt'à nànıgedèe sìı whìle ahłe ha,” dek'eèhtł'è.\qt* 
\p  
\v 20 Dǫ gogı̨ı̨zǫǫ edegeewǫǫ sìı amìı agı̨ı̨t'e edegeewǫ? Dǫ enı̨htł'è-deè ghàgeètǫ gı̨ı̨wǫǫ sìı amìı agı̨ı̨t'e edegeewǫ? Dıı nèè gots'ǫ nàowo t'à gogedee gı̨ı̨lı̨ı̨ sìı amìı agı̨ı̨t'e edegeewǫ? Nǫ̀htsı̨ sìı dıı nèè gots'ǫ nàowo sìı ezhı̨ne k'ę̀ę̀ ayį̀į̀là.  
\v 21 Dıı nèè gots'ǫ dǫ gogı̨ı̨zǫǫ sìı Nǫ̀htsı̨ k'ègeezǫ-le, Nǫ̀htsı̨ yatıì t'à dǫ ts'ǫ̀ gots'edee sìı gıgha ezhı̨ne lanì. Hanìkò godı nezı̨ı̨ t'à ezhı̨ne k'ę̀ę̀ gots'ede gogı̨ı̨hwhǫǫ sìı wet'à dǫ hazǫǫ̀ gıgha ehkw'ı-ahodıı sìı Nǫ̀htsı̨ edaxàgole hǫt'e. Nǫ̀htsı̨ hanì eghàlaedaa sìı yeghǫ sìghà anıwǫ hǫt'e.  
\v 22 Israel got'ı̨į̀ gı̨ı̨lı̨ı̨ sìı godaà enıìyah hołè ha gı̨ı̨wǫ, ekò Greece got'ı̨į̀ gı̨ı̨lı̨ı̨ sìı wet'à gots'ı̨ı̨zǫǫ nàowoò xàgeeta.  
\v 23 Hanìkò goxı̨ sìı Zezì-Krı dechı̨et'aa k'e ełaı̨wo ghǫ gots'ede hǫt'e. Israel got'ı̨į̀ gık'èch'a ats'edı eyıts'ǫ Greece got'ı̨į̀ gıgha ezhı̨ne k'ę̀ę̀ gots'ede.  
\v 24 Hanìkò Nǫ̀htsı̨ sìı Israel got'ı̨į̀ eyıts'ǫ Greece got'ı̨į̀ gòį̀hchìı sìı, Zezì-Krı wegodıì t'à Nǫ̀htsı̨ sıì nàtsoò wehòhɂǫ xè sıì gǫǫzǫ hǫt'e gık'èezǫǫ̀ agejà.  
\v 25 Nǫ̀htsı̨ gǫǫzǫ-le ha nı̨dè dıı nèk'e dǫ gogı̨ı̨zǫǫ nahk'e gǫǫzǫ hǫt'e, eyıts'ǫ Nǫ̀htsı̨ nàtso-le ha nı̨dè dǫ hazǫǫ̀ nahk'e nàtso hǫt'e. 
\p  
\v 26 Sèot'ı̨ı̨, Nǫ̀htsı̨ naxıkayaı̨htı kwe dǫ dàhòt'ı̨ı̨ aahłı̨ ı̨lèe sìı ghǫ nànıahdè. Dıı nèk'e dǫ gınàowoò k'ę̀ę̀ naxıta gots'ǫ dǫ łǫ gogı̨ı̨zǫ ts'edı ha dìì, dǫ łǫ k'aodèe gı̨ı̨lı̨ı̨ ts'edı ha dìì, eyıts'ǫ dǫ łǫ dǫ ahxee gots'ǫ gıgǫ̀hłı̨ ts'edı ha dìì.  
\v 27 Hanìkò Nǫ̀htsı̨ sìı dıı nèk'e dǫ gınàowoò k'ę̀ę̀ dǫ gogı̨ı̨zǫ-le lanıı sìı gòį̀hchì hǫt'e, dǫ gogı̨ı̨zǫ-le lanıı t'à dǫ gogı̨ı̨zǫǫ edeghǫ į̀į̀zhagı̨ı̨lı̨į̀ agole ha. Eyıts'ǫ dǫ nàgetso-le laòt'ı̨ t'à dǫ nàgetsoo edeghǫ į̀į̀zhagı̨ı̨lı̨į̀ agole ha.  
\v 28 Eyıts'ǫ dǫ t'asìı gı̨ı̨lı̨-le lanıı, dıı nèk'e ts'ǫ dǫ godzagı̨ı̨hwhǫǫ sìı Nǫ̀htsı̨ gòìhchı hǫt'e. Hanıı dǫ sìı gıt'à dǫ t'asìı aht'e edegeewǫǫ sìı Nǫ̀htsı̨ t'asìı gı̨ı̨lı̨-le agole ha.  
\v 29 Hanì-ı̨dè dǫ wı̨ı̨zìı Nǫ̀htsı̨ wenadąą̀ edeghǫ xàdahodì ha nıìle.  
\v 30 Nǫ̀htsı̨ wets'ıhɂǫ̀ Zezì-Krı wexè aaht'e. Nǫ̀htsı̨ sìı Zezì-Krı t'à gots'ı̨ı̨zǫǫ̀ agǫ̀ǫ̀là, wet'ǫ̀ǫ̀ ehkw'ıì ats'ejà, wet'ǫ̀ǫ̀ degaı ts'ı̨ı̨lı̨, eyıts'ǫ wet'ǫ̀ǫ̀ welǫ whìle ts'ǫ̀ edaxàts'eedè hǫt'e.  
\v 31 Eyıt'à Nǫ̀htsı̨ Nı̨htł'è k'e dıı hanì dek'eèhtł'è: “Amìı xàdahodì ha sìı gots'ǫ̀ K'àowo ghǫ xàdahodì welè,” dek'eèhtł'è. 
\c 2  
\p  
\v 1 Sèot'ı̨ı̨, t'akwełǫ̀ǫ̀ naxıts'ǫ̀ nèehtła ekò yatı wèdaat'ı̨ı̨ t'à naxıts'ǫ̀ goıhde nıìle. Eyıts'ǫ Nǫ̀htsı̨ wegodıì naxıts'ǫ̀ nèehɂǫ ekò dıı nèk'e gots'ǫ dǫ gogı̨ı̨zǫǫ gık'ę̀ę̀ k'ehoehɂa-le ı̨lè.  
\v 2 Naxıxè aht'e ekò Zezì-Krı wenǫ̀ǫ̀ t'asìı wı̨ı̨zìı k'èehsǫ ha dehwhǫ-le ı̨lè. Zezì-Krı eyıts'ǫ dànì dechı̨et'aa k'e wedıìtsò, eyı zǫ wek'èehsǫ ha dehwhǫǫ̀ ahjà.  
\v 3 Dǫ nàtso-lea laht'e eyıts'ǫ dehjı̨ xè sets'ehłı̨ lanì naxıts'ǫ̀ nèehtła ı̨lè.  
\v 4 Godı nezı̨ı̨ t'à naxıts'ǫ̀ gohde ekò wet'à gots'ı̨ı̨zǫǫ yatıì t'à naxıts'ǫ̀ goıhde-le ı̨lè, hanìkò Yedàyeh Nezı̨ı̨ nàhtsoò asį̀į̀là t'à naxınadąą̀ enıìyah k'ę̀ę̀ eghàlaehda ı̨lè.  
\v 5 Eyıt'à dıı nek'e dǫ gogı̨ı̨zǫǫ gınàowoò ts'ıhɂǫ̀ naxıgha ehkw'ı-ahodıì aahjà nıìle, hanìkò Nǫ̀htsı̨ t'asìı wegha dìì gǫ̀hłı̨-le sìı naxınadąą̀ enıìyah hòèhtsı̨ t'à naxıgha ehkw'ı-ahodı hǫt'e. 
\s1 Yedàyeh Nezı̨ı̨ wet'à gots'ı̨ı̨zǫ hǫt'e 
\p  
\v 6 Dǫ Nǫ̀htsı̨ k'ègeezǫǫ sìı wet'à gots'ı̨ı̨zǫǫ yatıì t'à gıts'ǫ̀ gots'ede hǫt'e. Eyı yatı sìı dıı nèè gots'ǫ dǫ gogı̨ı̨zǫǫ eyıts'ǫ k'aodèe gı̨ı̨lı̨ı̨ sìı gıgha wet'àaɂà nıìle, ededı̨ sìı gıdıhołè ts'ǫ̀ gıadè hǫt'e.  
\v 7 Nǫ̀htsı̨ wenàowoò gǫǫzǫǫ sìı dǫ ts'ǫ̀ weghǫ gots'ede hǫt'e, eyı sìı dǫ ts'ǫ̀ deɂı̨į̀ wheɂǫ ı̨lè. Dıı nèè hòèlı̨ kwe gots'ǫ gogha wheɂǫǫ̀ ayį̀į̀là ı̨lè, eyıts'ǫ wet'à welǫ whìle ts'ǫ̀ enıìyah xè edaxàgozhe ha.  
\v 8 Dıı nèk'e k'aodèe gı̨ı̨lı̨ı̨ sìı gınıedì-le ı̨lè. Gınıedì nı̨dè gots'ǫ̀ K'àowo enıìyah wehòhɂǫǫ sìı dechı̨et'aa k'e ełaàgıìhwhı ha-le ı̨lè.  
\v 9 Nǫ̀htsı̨ Nı̨htł'è k'e dıı hanì dek'eèhtł'è: 
\mi \qt “Dǫ Nǫ̀htsı̨ ghǫnegeètǫǫ sìı Nǫ̀htsı̨ ayìı ts'atà godawhehłaa sìı dǫ wı̨ı̨zìı yaɂı̨ whìle, eyıts'ǫ dǫ wı̨ı̨zìı yı̨ı̨hkw'ǫ̀ whìle, eyıts'ǫ dǫ wı̨ı̨zìı yedaànıwhewo whìle,” dek'eèhtł'è.\qt* 
\m  
\v 10 Hanìkò dıì sìı Nǫ̀htsı̨-Gotà edets'ǫ Įnì Degaı wedahxà dıı godı wek'èts'eezǫǫ̀ agǫ̀ǫ̀là. 
\p Yedàyeh Nezı̨ı̨ t'asìı hazǫǫ̀ yenıedì, eyıts'ǫ Nǫ̀htsı̨ ts'ǫǫ̀hk'e t'asìı deɂı̨į̀ whelaa sìı eyı kò yenıedì hǫt'e.  
\v 11 Dǫ wı̨ı̨zìı dǫ ı̨łè dànıwǫǫ sìı yek'èezǫ nıìle, eyı dǫ wets'ǫ ı̨nì zǫ yek'èezǫ hǫt'e. Eyı xèht'eè dǫ wı̨ı̨zìı Nǫ̀htsı̨ dànıwǫǫ sìı yek'èezǫ nıìle, Nǫ̀htsı̨ wets'ǫ Įnì Degaı zǫ yek'èezǫ hǫt'e.  
\v 12 Dıı nèè gots'ǫ ı̨nì goghǫ̀t'ǫ nıìle, hanìkò Nǫ̀htsı̨ edets'ǫ Įnì Degaı goghàı̨ɂǫ hǫt'e, eyıts'ǫ Nǫ̀htsı̨ t'asìı k'èxa-le ayìı goghàı̨ɂǫǫ sìı wets'ǫ Įnì Degaı t'à wenıts'eedì agole ha.  
\v 13 Eyı weghǫ gots'ede nı̨dè dıı nèk'e gots'ǫ wet'à gogı̨ı̨zǫǫ t'à gots'ede nıìle, hanìkò Yedàyeh Nezı̨ı̨ yatı hoghàgoèhtǫ t'à gots'ede hǫt'e. Yedàyeh Nezı̨ı̨ weyatıì ehkw'ı t'à Nǫ̀htsı̨ ts'ǫǫ̀hk'e t'asìı ghǫ gots'ede hǫt'e.  
\v 14 Dǫ Yedàyeh Nezı̨ı̨ dę edaa sìı Nǫ̀htsı̨ wets'ǫ Įnì gots'ǫ t'asìı yenıedì nıìle. Eyı sìı wegha ezhı̨ne lanì, eyıts'ǫ yenıedì ha dìì. Dǫ Yedàyeh Nezı̨ı̨ wets'ǫ̀-èlı̨ nı̨dè zǫ, Nǫ̀htsı̨ ts'ǫǫ̀hk'e t'asìı yenıedì hǫt'e.  
\v 15 Dǫ, Yedàyeh Nezı̨ı̨ wets'ǫ̀-èlı̨ı̨ sìı t'asìı hazǫǫ̀ k'e ehkw'ı xàyahtı hǫt'e, hanìkò ededı̨ sìı dǫ wı̨ı̨zìı yesınìyaehtı ha dìì.  
\v 16 Dıı hanì dek'eèhtł'è: 
\mi \qt “Amìı gots'ǫ̀ K'àowo wınì k'èhoezǫ t'à yegha k'eyaetı ha?” \qt* dek'eèhtł'è. 
\m Hanìkò goxı̨ sìı Zezì-Krı wınì gots'ǫ̀-èlı̨ hǫt'e. 
\c 3  
\s1 Nǫ̀htsı̨ wekǫ̀ lats'ı̨ı̨t'e 
\p  
\v 1 Sèot'ı̨ı̨, Yedàyeh Nezı̨ı̨ naxıts'ǫ̀-èlı̨ lanì naxıts'ǫ̀ gohde ha dìì ı̨lè, hanìkò dıı nèk'e gots'ǫ dǫ lanì nànıahdè k'ę̀ę̀ naxıts'ǫ̀ gohde ı̨lè, Zezì-Krı naxıgha ehkw'ı-ahodı ts'ǫǫ̀hk'e bebìa laaht'e ı̨lè t'à.  
\v 2 Įłaà t'asìı dezhìı aahdè ha dìì t'à, bò dezhìı lanıı naxıghàehdı-le ı̨lè, ejıet'ò lanì naxıghàehdı ı̨lè. Dıì kò t'asìı dezhì aahde ha naxıgha ı̨łaà whìle hǫt'e.  
\v 3 Įłaà dıı nèk'e gots'ǫ dǫ lanì nànıahdè. Ełeghǫ ts'oxoahdı eyıts'ǫ ełets'ǫ̀ nàyaahtı nı̨dè, dıı nèk'e gots'ǫ dǫ gıxèahɂı̨ laaht'ı̨. Dǫ Nǫ̀htsı̨ k'ègeezǫ-le sìı gıxèahɂı̨ hǫt'e.  
\v 4 Naxı̨ mǫ̀hdaa dıı haahdı, “Sı̨ Paul k'ę̀ę̀ aht'ı̨,” eyıts'ǫ mǫ̀hdaa, “Sı̨ Apollos k'ę̀ę̀ aht'ı̨.” Haahdı nı̨dè dǫ Nǫ̀htsı̨ k'ègeezǫ-le sìı gıxèht'eè k'ehoahɂa hǫt'e. 
\p  
\v 5 Apollos eyıts'ǫ Paul, ayìı gı̨ı̨lı̨ı̨ ghǫ aahdı? Ekìı Nǫ̀htsı̨ wecheekeè awììt'e. Nǫ̀htsı̨ naxıts'ǫ̀ goı̨hɂà t'à naxıgha ehkw'ı-ahodıì aahjà hǫt'e. Goxı̨ ı̨łak'aà Nǫ̀htsı̨ la goghàı̨ɂǫ k'ę̀ę̀ weghàlawìda hǫt'e.  
\v 6 Sı̨ dèè goyìı wet'à t'asìı dehshee nèehɂǫ, Apollos tı yek'e ayį̀į̀là, hanìkò Nǫ̀htsı̨ sìı dehsheè ayį̀į̀là hǫt'e.  
\v 7 Eyıt'à dǫ dèè goyìı t'asìı nèyele, eyıts'ǫ dǫ tı yek'e ayehɂı̨ı̨ sìı t'asìı gı̨ı̨lı̨ı̨ nıìle, hanìkò Nǫ̀htsı̨, t'asìı hazǫǫ̀ dehsheè ayehɂı̨ ts'ıhɂǫ̀ ededı̨ zǫ wet'àaɂà hǫt'e.  
\v 8 Dǫ wet'à t'asìı dehshee dèè goyìı yelee, eyıts'ǫ dǫ tı yek'e ayehɂı̨ı̨ sìı ı̨łak'aà gılaà gıghǫ̀t'ǫ hǫt'e, eyıts'ǫ ı̨łak'aà dànì edılaà ghàlagı̨ı̨dà k'èxa t'asìı gıghǫ̀t'à ha hǫt'e.  
\v 9 Nǫ̀htsı̨ wexè eghàlats'eedaa ats'ı̨ı̨t'e, naxı̨ sìı Nǫ̀htsı̨ wedèè k'e t'asìı dehshee laaht'e, eyıts'ǫ Nǫ̀htsı̨ wekǫ̀ laaht'e. 
\p  
\v 10 Nǫ̀htsı̨ sets'ǫ̀ wedzeè sǫnıwǫ t'à la seghàı̨ɂǫ: dǫ la k'èezǫǫ lanì eghàlaehda t'à yìetł'aà nìıhtǫ, eyıts'ǫ dǫ eyıì-le yek'e kǫ̀ gòhtsı̨. Hanìkò dǫ gıtaàt'eè dànì kǫ̀ gogehtsı̨ı̨ sìı hotıì gıxoehdı ha hǫt'e.  
\v 11 Hòt'a yìetł'aà nìtǫǫ sìı dǫ wı̨ı̨zìı yìetł'aà eyıì-le nagohtsı̨ ha nıìle, eyı yìetł'aà nìtǫǫ sìı Zezì-Krı hǫt'e.  
\v 12 Dǫ, eyı yìetł'aà nìtǫǫ wek'e sǫǫ̀mbaekwo, sǫǫ̀mba degoo, sǫǫ̀mbakweè, dechı̨ hanì-le-ı̨dè tł'oh t'à yeka kǫ̀ gòhtsı̨ nı̨dè,  
\v 13 dànì edılaà ghàlaı̨dàa sìı nǫǫde dzęę̀ k'e wek'èhoedzǫǫ̀ adle ha. Ayìı hòèhtsı̨ı̨ sìı kǫ̀-dèk'ǫ̀ǫ t'à wek'èhoedzǫǫ̀ adle ha, kǫ̀ t'à weèdzà ha, eyıts'ǫ wılaà k'è hoı̨zı̨ nı̨dè wek'èhoedzǫǫ̀ adle ha.  
\v 14 Ayìı hòèhtsı̨ı̨ sìı wedıhòłı̨-le nı̨dè wek'èxa t'asìı nezı̨ı̨ weghǫ̀t'à ha.  
\v 15 Ekò ayìı hòèhtsı̨ı̨ sìı wek'enık'ǫ nı̨dè eyı weghǫ wedıhołè ha. Ededı̨ t'aa edaxàeda ha, hanìkò kǫ̀woò nı̨ı̨dà xàkwı̨ehsaà lade ha. 
\p  
\v 16 Naxı̨ sìı Nǫ̀htsı̨ wekǫ̀ laaht'e, eyıts'ǫ Nǫ̀htsı̨ wets'ǫ Įnì Degaı naxıdzeè yìı nàdè hǫt'e wek'èahsǫ-le nì?  
\v 17 Dǫ Nǫ̀htsı̨ wekǫ̀ yedıhohtsı̨ nı̨dè Nǫ̀htsı̨ yedıhohtsı̨ ha. Nǫ̀htsı̨ wekǫ̀ degaı hǫt'e, naxı̨ sìı eyı Nǫ̀htsı̨ wekǫ̀ laaht'e. 
\p  
\v 18 Dànì nànıahdè t'à edeghǫyaahɂà sǫ̀ǫ̀. Dǫ dıı nèè gots'ǫ nàowo k'ę̀ę̀ gohsǫ edeewǫ nı̨dè, ezhı̨ne ladıdle, hanì-ı̨dè sıì gǫǫzǫǫ̀ ade ha.  
\v 19 Dıı nèk'e gots'ǫ dǫ ayìı gıgha gǫǫzǫ hǫt'e sìı Nǫ̀htsı̨ wegha ezhı̨ne hǫt'e. Dıı hanì dek'eèhtł'è, “Dǫ gogı̨ı̨zǫǫ edegeewǫ xè ełeghǫyageeɂà k'ę̀ę̀ k'ehogeɂaa sìı Nǫ̀htsı̨ gınàowoò t'à gok'èchıìtła lagohɂį̀ hǫt'e,” dek'eèhtł'è.  
\v 20 Eyıts'ǫ k'achı̨ dıı hanì dek'eèhtł'è, “Dǫ gots'ı̨ı̨zǫǫ edegeewǫǫ sìı gınàowoò wet'àaɂà nıìle, gots'ǫ̀ K'àowo yek'èezǫ hǫt'e,” dek'eèhtł'è.  
\v 21 Eyıt'à k'achı̨ dǫ ghǫ xàdahoahdì-le! T'asìı hazǫǫ̀ naxıgha hǫt'e.  
\v 22 Paul, Apollos eyıts'ǫ Peter naxıgha agı̨ı̨t'e, eyıts'ǫ dıı nèè, ts'eedaa, ełaàts'ewıı, dıì goxè hòɂǫǫ, ı̨daà goxè hòɂǫǫ, eyı hazǫǫ̀ naxıgha hǫt'e,  
\v 23 eyıts'ǫ naxı̨ Zezì-Krı wets'ǫ aaht'e; eyıts'ǫ Zezì-Krı, Nǫ̀htsı̨ wets'ǫ hǫt'e. 
\c 4  
\s1 Zezì-Krı wecheekeèdeè 
\p  
\v 1 Eyıt'à dǫ Zezì-Krı wecheekeè ats'ı̨ı̨t'e k'ę̀ę̀ gogıhtà welì, eyıts'ǫ Nǫ̀htsı̨ ts'ǫǫ̀hk'e t'asìı deɂı̨į̀ whelaa sìı wek'èts'eezǫ ats'ı̨ı̨t'e, gogı̨ı̨hwhǫ welì.  
\v 2 Dǫ t'asìı gıtł'aà wheɂǫǫ̀ agììdlàa sìı t'aats'ǫǫ̀ gıt'à nezı̨į̀ eghàlageeda ha hǫt'e.  
\v 3 Naxı̨ sesınìyaahtı, hanì-le-ı̨dè nàyaetıı-kǫ̀ dǫ sesınìyagehtıı sìı segha wet'àaɂà nıìle, sı̨ kò edesınìyaehtı nıìle.  
\v 4 Ekǫ-le hòwhıhtsı̨ nıìle, sınì t'à wek'èehsǫ, hanìkò hanì ededaànıhwho t'à hołı̨ı̨ hòwhıhtsı̨ whìle dehsı̨į̀-aehsı̨-le. Gots'ǫ̀ K'àowo ededı̨ zǫ sesınìyahtı ha hǫt'e.  
\v 5 Eyıt'à eyı nèhòkw'ı kwe t'asìı wesınìyaahtı-le, hanìkò gots'ǫ̀ K'àowo nììtła ts'ǫ̀ naahɂı̨. Togoòtł'òo t'à t'asìı deɂı̨į̀ whelaa sìı wègaat'ı̨į̀ ayele ha, eyıts'ǫ dǫ dàgı̨ı̨wǫ t'à k'ehogı̨ı̨ɂaa sìı wek'èedzǫǫ̀ ayele ha. Eyı dzęę̀ k'e nı̨dè dànì godzeè t'à ehkw'ı nànıts'edèe sìı k'ę̀ę̀ Nǫ̀htsı̨ goghǫ sìghà adı ha. 
\p  
\v 6 Sèot'ı̨ı̨, eyı hazǫǫ̀ weghǫ naxıts'ǫ̀ eehtł'èe sìı sı̨ edeghǫ eyıts'ǫ Apollos weghǫ gohde aehsı̨. Edeghǫ aehsı̨ı̨ sìı xàè naxıgha aehsı̨ hǫt'e. Hanì-ı̨dè goxı̨ got'à dıı yatı dàhodıì-ahodıı sìı wek'èahsǫ ha, “Ayìı dek'eèhtł'èe sìı weɂǫ̀ǫ̀ hoahtsı̨-le,” dek'eèhtł'è. Eyı yatı k'ę̀ę̀ aaht'ı̨ nı̨dè dǫ ı̨łè denahk'e wet'àaɂà dahwhǫ t'à weghǫ xàdahoahdì ha nıìle.  
\v 7 Amìı dǫ nahk'e aaht'eè anaxį̀į̀là? T'asìı naxıts'ǫ sìı naxıghǫ̀t'ǫ hǫt'e. T'asìı naxıghǫ̀t'ǫ nı̨dè dànìghǫ t'asìı naxıghǫ̀t'ǫ-le lanì xàdahoahdì? 
\p  
\v 8 Hòt'a t'asìı hazǫǫ̀ naxıts'ǫ dahwhǫ nì? Naxı̨ hòt'a dǫ ahxee wheahłı̨ dahwhǫ nì? Godę kò k'àowocho wheahłı̨ dahwhǫ nì? Xàè k'àowocho wheahłı̨ nı̨dè dehwhǫ, hanì-ı̨dè goxı̨ naxıxè k'àowocho ts'ı̨ı̨lı̨ ha!  
\v 9 Weghǫ nànıhwho nı̨dè goxı̨ Nǫ̀htsı̨ wecheekeèdeè ts'ı̨ı̨lı̨ı̨ sìı nǫǫde ts'ǫ̀ ts'eèhkw'e lanì agǫ̀ǫ̀là. Sǫnàts'edèe k'è dǫ gınadąą̀ goweè hołè ha gosınìyaetı lagǫ̀ǫ̀là. T'asìı hazǫǫ̀ hòèlı̨ı̨ yak'eet'ı̨į̀ dǫ hazǫǫ̀ gınadąą̀ hanì gògaat'ı̨į̀ agǫ̀ǫ̀là.  
\v 10 Goxı̨ sìı Zezì-Krı wegha ezhı̨ne ats'ı̨ı̨t'e gogı̨ı̨hwhǫ, hanìkò naxı̨ sìı Zezì-Krı wets'ıhɂǫ̀ sıì goahsǫ dahwhǫ! Goxı̨ sìı nàts'etso-le, hanìkò naxı̨ sìı nàahtso dahwhǫ. Goxı̨ sìı dǫ gots'ǫ̀ nezı̨į̀ nageɂa-le hanìkò naxı̨ naxıts'ǫ̀ nezı̨į̀ nageɂa.  
\v 11 Dıì ts'ǫ̀ bò dę ts'eèhkw'e xè tı ghats'eewı, goht'ǫts'ıa t'à-ats'et'ı̨, sıì dagogį̀ı̨hɂa, eyıts'ǫ gokǫ̀ gòɂǫ-le.  
\v 12 Goılà t'à hòtł'ò eghàlats'eeda. Dǫ gots'ǫ̀ nàdahogeeɂà nı̨dè gıgha yats'ehtı, dagogį̀ı̨hɂa nı̨dè wexè kò ts'èwhı̨į̀ dats'ı̨ı̨ɂa.  
\v 13 Dǫ yatıjıı t'à gok'adageedè nı̨dè ek'èt'à nezı̨į̀ gıts'ǫ̀ gots'ede. Dıì ts'ǫ̀ dıı nèk'e dǫ gıgha t'asìı wejıı lats'ı̨ı̨t'e, eyıts'ǫ gıgha t'asìı-ts'ıì lats'ı̨ı̨t'e. 
\p  
\v 14 Edeghǫ į̀į̀zhaahłı̨ ha naxıts'ǫ̀ eehtł'è aht'ı̨ nıìle, hanìkò seza lanì naxıghǫneehtǫ t'à yatı nàtsoo t'à naxıts'ǫ̀ gohde.  
\v 15 Zezì-Krı wedahxà dǫ łǫ naxık'ègedì sǫnı kò naxıtà łǫ gǫ̀hłı̨ nıìle. Godı nezı̨ı̨ naxıts'ǫ̀ nèehɂǫ ts'ıhɂǫ̀ Zezì-Krı wedahxà naxıtà whıhłı̨ hǫt'e.  
\v 16 Eyıt'à hotıì sexèahɂı̨, dehsı̨ naxıghǫnàdaehtì.  
\v 17 Eyıt'à Tımothy naxıts'ǫ̀ weehɂà ha hǫt'e. Seza lanì weghǫneehtǫ, gots'ǫ̀ K'àowo gha wınì nàtso. Dànì Zezì-Krı wegha ehdaa sìı naxıts'ǫ̀ hadı ha. Kǫ̀ta hazǫǫ̀ Nǫ̀htsı̨ wecheekeè dànì hoghàgeehtǫǫ sìı t'aats'ǫǫ̀ hanì ehda hǫt'e. 
\p  
\v 18 Naxıta gots'ǫ dǫ mǫ̀hdaa naxıts'àhtła ha-le sǫnı gı̨ı̨wǫ t'à sıì xàhogedì agejà.  
\v 19 Hanìkò gots'ǫ̀ K'àowo hanıwǫ nı̨dè whaà-le-t'ıì naxıts'àhtła ha hǫt'e. Ekìıyeè k'e nı̨dè eyı dǫ ayìı ghǫ xàdahogedìı sìı wegòhɂà ha. Eyı zǫǫ̀-le, ayìı dahxà nàgetsoo sìı wegòhɂà ha hǫt'e.  
\v 20 Nǫ̀htsı̨ wenàowoò sìı yatı t'à zǫ wehòhɂǫ nıìle, hanìkò Nǫ̀htsı̨ wets'ǫ enıìyah nàtsoo t'à wehòhɂǫ hǫt'e.  
\v 21 Naxıts'ǫ̀ dànì eghàlaehda ha seahwhǫ? Naxıts'àhtła nı̨dè naxeehkwa ha seahwhǫ nì? Hanì-le-ı̨dè naxıghǫneehtǫ xè naxıts'ǫ̀ sedzeè nezı̨ ha dahwhǫ? 
\c 5  
\s1 Amìı hołı̨ı̨ nàowoò k'ę̀ę̀ edaa sìı naxıta gots'ǫ xàweahɂà 
\p  
\v 1 Naxıta dǫ hołı̨ı̨ k'ę̀ę̀ ełek'alagedè ghǫ ts'ıìkw'o. Hołı̨ı̨ hanıı sìı dǫ Nǫ̀htsı̨ k'ègeezǫ-le kò gıta hagòjà ghǫ ts'ıìkw'o whìle. Naxıta ts'ǫ dǫ ı̨łè edetà ts'èkeè xè nàdè gedı hǫt'e.  
\v 2 Eyıt'à dànì xàhoahdì welì? Eyı ghǫ naxıdzeè nànııtì ha ı̨lè, eyı dǫ hanì eghàlaı̨dàa sìı naxıta gots'ǫ xàweahɂà ha ı̨lè.  
\v 3 Sı̨ naxıta whıhda-le sǫnı kò sınì t'à naxıxè whıhda hǫt'e. Eyı dǫ hanì hołı̨ı̨ hòèhtsı̨ı̨ sìı eyı whıhda lanì hòt'a wesınìyahtı hǫt'e.  
\v 4 Zezì wıızì dahxà łą̀ą nìahde nı̨dè, eyıts'ǫ sınì t'à naxıxè whıhda nı̨dè, eyıts'ǫ Zezì wets'ǫ Įnì Degaı naxık'e at'ı̨ nı̨dè,  
\v 5 eyı dǫ sìı wehłı̨ı̨ tł'aàweahtè, hanì-ı̨dè wenàowołı̨ı̨ sìı wedıhołè ha, eyıts'ǫ gots'ǫ̀ K'àowo nììtłaa dzęę̀ k'e nı̨dè wedą̀ązhį̀ı̨ edaxàeda ha. 
\p  
\v 6 Edeghǫ xàdahoahdìı sìı nezı̨ nıìle. Łèt'èa łǫ-lea kò łètsı̨èhdıı hazǫǫ̀ ta ts'ǫ̀ at'į̀ hǫt'e, wek'èahsǫ ne sǫnaà?  
\v 7 Eyı łèt'èa wezǫǫ sìı wedę aahłe, hanì-ı̨dè łètsı̨èhdıı wegòò łèt'èa wedę hòèlı̨ı̨ laaht'e ha, hotıì eyı laaht'e ne t'à. Dzędeè Passover k'e Nǫ̀htsı̨ gha sahzǫ̀ą ełaàgį̀ı̨hwhoo sìı Zezì-Krı hǫt'e, eyı sìı wenıahdì welì.  
\v 8 Eyıt'à eyı dzędeè wek'èts'ııdì. Łèt'èa wezǫą wedę ats'ııle, eyı sìı gonàowołı̨ı̨ wedę ats'ehɂı̨ lanì hǫt'e. Hanì-ı̨dè łèt'èa dę ełexè łèt'è ghǫ shèts'ıızhe, eyı sìı godzeè nezı̨ı̨ xè ełets'ǫ̀ ehkw'ı ts'eeda lanì hǫt'e. 
\p  
\v 9 T'akwe naxıts'ǫ̀ ııhtł'èe ekò naxıta gots'ǫ dǫ hołı̨ı̨ k'ę̀ę̀ ełek'alagedèe sìı naxıxè agııt'į̀-le naxèehsı̨ ı̨lè.  
\v 10 Dıı nèk'e gots'ǫ dǫ hołı̨ı̨ k'ę̀ę̀ ełek'alagedèe hanıı, egedì-le-dǫǫ̀ hanıı, ełeghǫyageeɂàa-dǫǫ̀ hanıı, eyıts'ǫ nǫ̀htsı̨ą hòèlı̨ı̨ ts'ǫ̀ yagehtıı dǫǫ̀, hanıı sìı agèehsı̨ nıìle. Hanıı dǫ agèehsı̨ nı̨dè dıı nèè gots'ǫǫ̀ aahde zǫ t'à ha.  
\v 11 Dǫ mǫ̀hdaa naxıxè Nǫ̀htsı̨ wecheekeè ats'ı̨ı̨t'e edègeedıı sìı eyı ghǫ naxıts'ǫ̀ eehtł'è. Hanìkò hołı̨ı̨ k'ę̀ę̀ ełek'alagedè nı̨dè, egedì-le nı̨dè, nǫ̀htsı̨ą hòèlı̨ı̨ ts'ǫ̀ yagehtı nı̨dè, dǫ gıızì jıı gehtsı̨ nı̨dè, t'aats'ǫǫ̀ gedǫ nı̨dè, sǫǫ̀mba gha dǫ ghǫyageeɂà nı̨dè, gıxè aaht'ı̨-le, eyıts'ǫ gıxè shèahzhe ha nıìle. 
\p  
\v 12 Dǫ, Nǫ̀htsı̨ wecheekeè agı̨ı̨t'e-le sìı sı̨ gısınìyahtı ha sı̨į̀dı nıìle. Dǫ Nǫ̀htsı̨ wecheekeè goxè aget'ı̨ı̨ sìı naxı̨ gısınìyaahtı ha hǫt'e.  
\v 13 Dǫ Nǫ̀htsı̨ wecheekeè agı̨ı̨t'e-le sìı Nǫ̀htsı̨ gosınìyaehtı ha hǫt'e. Dek'eèhtł'è k'ę̀ę̀: “Eyı dǫ wejıı sìı naxıta gots'ǫ xàgıahɂà,” dek'eèhtł'è. 
\c 6  
\s1 Nǫ̀htsı̨ wets'ǫ dǫ ełeghǫ nàyaetıì ałegehɂı̨ 
\p  
\v 1 Naxıta gots'ǫ dǫ ełek'e nìdahogeeɂà nı̨dè dànìghǫ dǫ-sınìyaehtıı-dǫǫ̀ Nǫ̀htsı̨ wecheekeè elı̨-le sìı ts'ǫ̀ aget'ı̨. Hanì ekǫ-le eghàlageedaa ts'àgeejı̨-le nì? Nǫ̀htsı̨ wets'ǫ dǫ ts'ǫ̀ aget'ı̨ gà gosınìyagıhtı welì.  
\v 2 Nǫ̀htsı̨ wets'ǫ degaı gı̨ı̨lı̨ı̨ sìı dıı nèk'e gots'ǫ dǫ gosınìyagehtı ha hǫt'e, wek'èahsǫ-le nì? Hanì hòɂǫ ha nı̨dè, naxıta t'asìı wet'àaɂà-lea sìı wesınìyaahtı ha naxıgha dìì nıìle.  
\v 3 Yak'eet'ı̨į̀ gısınìyats'ehtı ha wek'èahsǫ-le nì? Hanì hòɂǫ ha nı̨dè dıı nèk'e gota dàgot'ı̨ı̨ sìı denahk'e wesınìyats'ehtı ha hǫt'e!  
\v 4 Eyıt'à t'asìı wet'àaɂà-le ghǫ ełek'e nìdahogeeɂà nı̨dè, dǫ ı̨łè gosınìyaehtıì aweahłe. Naxıta dǫ t'asìı deè elı̨-le sìı eyı weahchı ha dìì-le!  
\v 5 Edeghǫ į̀į̀zhaahłı̨ ha, hanì naxıts'ǫ̀ gohde. Naxıta dǫ gosınìyaehtı ha dǫ gǫǫzǫǫ gǫ̀hłı̨-le nì?  
\v 6 Hanìkò ełeghǫ nàyaetıì ałaahɂı̨. Dǫ gıgha ehkw'ı-ahodı-le gınadąą̀ hanì k'ehoahɂa! 
\p  
\v 7 Hanì ełeghǫ nàyaetı ałaahɂı̨ı̨ sìı weghàà nàowo ehkw'ıı k'ę̀ę̀ aahda ts'ǫǫ̀hk'e hòt'a naxıghǫènǫǫ wek'èhoedzǫ hǫt'e. Ekǫ-le naxıts'ǫ̀ eghàlaedà eyıts'ǫ naxıghǫyahoòɂǫ kò eyı denahk'e nezı̨ hǫt'e.  
\v 8 Hanìkò hałaahɂı̨ t'à xàè naxèot'ı̨ gı̨ı̨lı̨ı̨ sìı gıghǫyaahɂà xè gıts'ǫ̀ ekǫ-le eghàlaahda hǫt'e. 
\p  
\v 9 Dǫ wejıı sìı Nǫ̀htsı̨ Wenàowoò k'ę̀ę̀ hòɂǫǫ sìı gıghàhòt'à ha nıìle wek'èahsǫ-le nì? Edeghǫyaahɂà sǫ̀ǫ̀. Dǫ edezhį̀į̀ t'à hołı̨ı̨ k'alagedèe, dǫ nǫ̀htsı̨ą hòèlı̨ı̨ ts'ǫ̀ yagehtıı, dǫ ełexè hołı̨ı̨ hogehtsı̨ı̨, sǫǫ̀mba k'èxa dǫzhìı et'ıì ełexè aget'ı̨ı̨, eyıts'ǫ dǫzhìı hołı̨ı̨ k'ę̀ę̀ ełek'alagedèe, \fig Nǫ̀htsı̨ą hòèlı̨ı̨|src="HK031I.tif" size="span" ref="6.9" \fig* 
\v 10 egeeɂį̀ı̨-dǫǫ̀, t'asìı gha egedì-le-dǫǫ̀, t'aats'ǫǫ̀ geèhdee dǫǫ̀, dǫ gıızì jıı gehtsı̨ı̨ dǫǫ̀, sǫǫ̀mba gha dǫ ghǫyageeɂàa dǫǫ̀, hanıı dǫ hazǫǫ̀ sìı Nǫ̀htsı̨ Wenàowoò k'ę̀ę̀ hòɂǫǫ sìı gıxè hòɂǫ ha nıìle.  
\v 11 Įnę̀ę naxı̨ mǫ̀hdaa hanıı dǫ yàahłı̨ ı̨lè. Hanìkò Zezì-Krı wedahxà eyıts'ǫ Nǫ̀htsı̨ wets'ǫ Įnì Degaı t'à naxıhołı̨į̀ k'enaatso, degaı anaxììdlà, eyıts'ǫ ehkw'ı anaxììdlà ı̨lè. 
\s1 Hołı̨ı̨ k'ę̀ę̀ ełek'alaahdèe ch'à edek'èahdì 
\p  
\v 12 “T'asìı hazǫǫ̀ gogha wets'àet'ǫ nıìle,” dahwhǫ sǫnı kò, t'asìı hazǫǫ̀ gogha nezı̨ nıìle. “T'asìı hazǫǫ̀ gogha wets'àet'ǫ nıìle,” sǫnı kò t'asìı wı̨ı̨zìı gots'ǫ̀ k'àowo ats'ı̨ı̨hwhǫ ha-le.  
\v 13 “Bò sìı gobò gha hòèlı̨, eyıts'ǫ gobò sìı bò gha hòèlı̨,” haahdı ha tahkò, hanìkò Nǫ̀htsı̨ eyı nàke sìı yedıhohtsı̨ ha hǫt'e. Gozhį̀į̀ wet'à hołı̨ı̨ k'ę̀ę̀ ełek'alats'edè gha hòèlı̨ nıìle, hanìkò gots'ǫ̀ K'àowo gozhį̀į̀ ts'ǫ̀ k'àowo ne t'à wegha wet'à-ats'et'ı̨ ha hòèlı̨ hǫt'e.  
\v 14 Nǫ̀htsı̨ t'asìı wegha dìì-le t'à gots'ǫ̀ K'àowo naìdà ayį̀į̀là, goxı̨ sı nats'ìdà agole ha hǫt'e.  
\v 15 Naxızhį̀į̀ sìı Zezì-Krı wets'ǫ hǫt'e wek'èahsǫ-le nì? Eyıt'à gozhį̀į̀ Zezì wets'ǫ ne sìı ts'èkojıı t'à whetı̨į̀ ats'ele ha nì? Į̀le, hats'et'ı̨ ha honàedı nıìle!  
\v 16 Dǫ, ts'èkojıı t'à whetı̨ı̨ sìı yexè ı̨łè zǫ lanì at'į̀ hǫt'e wek'èahsǫ-le nì? Nǫ̀htsı̨ Nı̨htł'è k'e dıı hanì dek'eèhtł'è, “Eyı nàke geet'èe sìı gızhį̀į̀ ı̨łè lade ha hǫt'e,” dek'eèhtł'è.  
\v 17 Hanìkò amìı gots'ǫ̀ K'àowo xè at'ı̨ı̨ sìı wets'ǫ Įnì t'à yexè ı̨łè zǫ lade ha. 
\p  
\v 18 Eyıt'à hołı̨ı̨ k'ę̀ę̀ ełek'alaahdèe ch'à edek'èahdì. Dǫ hołı̨ı̨ eyıì-le hohtsı̨ı̨ sìı edezhį̀į̀ t'à hołı̨ı̨ hohtsı̨ at'ı̨ nıìle, hanìkò amìı hołı̨ı̨ k'ę̀ę̀ ełek'alagedèe sìı edezhį̀į̀ t'à hołı̨ı̨ hogehtsı̨ hǫt'e.  
\v 19 Naxızhį̀į̀ sìı Yedàyeh Nezı̨ı̨ wekǫ̀ lanì hǫt'e wek'èahsǫ-le nì? Ededı̨ sìı naxıdzeè yìı nàdè hǫt'e, ededı̨ sìı Nǫ̀htsı̨ naxıghàyı̨ı̨ɂǫ hǫt'e. Eyıt'à naxızhį̀į̀ sìı xàè naxıts'ǫ nıìle.  
\v 20 T'asìı deè t'à nàgoèdì hǫt'e. Eyıt'à naxızhį̀į̀ t'à Nǫ̀htsı̨ ts'ǫ̀ nezı̨į̀ aahda. 
\c 7  
\s1 Dànì ełexè hots'et'ı̨ 
\p  
\v 1 T'asìı ghǫ sets'ǫ̀ aahtł'è ı̨lèe sìı wek'e naxıts'ǫ̀ xàyahtı ha. Dǫ honìda-le kò nezı̨ hǫt'e.  
\v 2 Hanìkò dıì dǫ łǫ hołı̨ı̨ k'ę̀ę̀ ełek'aladèe t'à dǫzhìı gıtaàt'eè xàè gıts'èkeè gǫ̀hłı̨ nı̨dè nezı̨ hǫt'e, eyıts'ǫ ts'èko sı gıtaàt'eè xàè gıdǫǫ̀ gǫ̀hłı̨ nı̨dè nezı̨ hǫt'e.  
\v 3 Dǫzhìı hǫet'ı̨ı̨ sìı edets'èkeè ghàdìtè ha hǫt'e, eyıts'ǫ ts'èko hoet'ı̨ı̨ sı ededǫǫ̀ ghàdìtè ha hǫt'e.  
\v 4 Ts'èko hoet'ı̨ı̨ sìı wezhį̀į̀ ededı̨ zǫ wets'ǫ nıìle, wedǫǫ̀ sı wets'ǫ hǫt'e. Eyı xèht'eè dǫzhìı hoet'ı̨ı̨ wezhį̀į̀ sìı ededı̨ zǫ wets'ǫ nıìle, wets'èkeè sı wets'ǫ hǫt'e.  
\v 5 Į̀łah naxınì k'ę̀ę̀ lenǫsıı ełets'ǫ̀ į̀le dahdı-le. Į̀łah hanì ha dahwhǫ nı̨dè whatsǫǫ̀ Nǫ̀htsı̨ ts'ǫ̀ xàyaahtı ha gòɂǫǫ̀ aahłe gha welè, hanìkò whaà-lea gots'ǫ̀ zǫ aaht'ı̨. Eyı tł'axǫǫ̀-ı̨dè ełets'ǫ̀ anaahde, naxınì nàtso-le t'à wehłı̨ı̨ naxeèhdzà ha sǫnı.  
\v 6 Hots'et'ı̨ gha nàowo naxıghàehɂǫ dehsı̨į̀-aehsı̨-le, hanìkò dıı hanì hǫaht'ı̨ ha dìì-le dehsı̨į̀-aehsı̨.  
\v 7 Dǫ hazǫǫ̀ sexèht'eè geeda nı̨dè dehwhǫ. Hanìkò Nǫ̀htsı̨ sìı dǫ hazǫǫ̀ gıtaàt'eè t'asìı eładı̨ı̨ goghàı̨ɂǫ hǫt'e. Dǫ ı̨łè hoet'ı̨ ha weghàhòt'ǫ, eyıts'ǫ dǫ eyıì-le t'asìı eładı̨ı̨ weghàhòt'ǫ hǫt'e. 
\p  
\v 8 Dǫ hoget'ı̨-le eyıts'ǫ ts'èko gıdǫzhıì whìle sìı gıts'ǫ̀ dıı haehsı̨ ha dehwhǫ: Sı̨ hoeht'ı̨-le k'ę̀ę̀ hoget'ı̨-le nı̨dè gıgha nezı̨ hǫt'e.  
\v 9 Hanìkò gıgha wèhoedı-le nı̨dè honìgııdè kò t'asanìle. Sıì ełegı̨ı̨wǫ nı̨dè honìgedè gıgha denahk'e nezı̨ hǫt'e. 
\p  
\v 10 Dǫ hoget'ı̨ı̨ sìı dıı nàowo gıghàehɂà ha, (sı̨ seyatıì nıìle, hanìkò gots'ǫ̀ K'àowo weyatıì ne): Ts'èko hoet'ı̨ı̨ sìı ededǫǫ̀ ts'ǫǫ̀ xàetła ha-le.  
\v 11 Hanìkò ededǫǫ̀ ts'ǫǫ̀ xàèhtła nı̨dè eyıì-le dǫzhìı xè hoet'ı̨ ha-le, hanì-le-ı̨dè ededǫǫ̀ xè sıìnagole ha. Eyıts'ǫ dǫzhìı sìı edets'èkeè ɂǫ̀ede ha-le. 
\p  
\v 12 Eyıts'ǫ dǫ eyıì-le sı hazǫǫ̀ gıts'ǫ̀ dıı haehsı̨ ha, (dıı sìı seyatıì ne, gots'ǫ̀ K'àowo weyatıì nıìle): Naxıta gots'ǫ amìı wets'èkeè wegha ehkw'ı-ahodı-le nı̨dè, hanìkò ı̨łaà ededǫǫ̀ xè nàdè ha nıwǫ nı̨dè, eyı dǫzhìı sìı edets'èkeè ɂǫ̀ede ha-le.  
\v 13 Eyıts'ǫ ts'èko sı wedǫǫ̀ wegha ehkw'ı-ahodı-le, hanìkò ı̨łaà edets'èkeè xè nàdè ha nıwǫ nı̨dè, eyı ts'èko sìı ededǫǫ̀ ɂǫ̀ede ha-le.  
\v 14 Dǫzhìı wegha ehkw'ı-ahodı-le sìı wets'èkeè ts'ıhɂǫ̀ degaı elı̨ gha wııtà hǫt'e. Eyıts'ǫ ts'èko wegha ehkw'ı-ahodı-le sìı wedǫǫ̀ ts'ıhɂǫ̀ degaı elı̨ gha wııtà hǫt'e. Hanì-le-ı̨dè naxıza degaı agı̨ı̨t'e ha-le ı̨lè, hanìkò dıì degaı agı̨ı̨t'e. 
\p  
\v 15 Hanìkò dǫ wegha ehkw'ı-ahodı-le sìı naxıts'ǫǫ̀ xàetła ha nıwǫ nı̨dè hadeè aweahłe. Hagòjà nı̨dè dǫzhìı wegha ehkw'ı-ahodıı sìı edets'èkeè xè nàdè-le kò, eyıts'ǫ ts'èko wegha ehkw'ı-ahodıı sìı ededǫǫ̀ xè nàdè-le kò. Nǫ̀htsı̨ sìı ts'èwhı̨į̀ ts'eeda gha gòį̀hchì hǫt'e.  
\v 16 Nı̨ dǫ ts'èkeè nelı̨ı̨ sìı nedǫǫ̀ edaxàwı̨ı̨htè ha hotıì wek'èı̨zǫ nıìle. Nı̨ ts'èko wedǫǫ̀ nelı̨ı̨ sìı nets'èkeè edaxàwı̨ı̨htè ha hotıì wek'èı̨zǫ nıìle. 
\p  
\v 17 Dǫ hazǫǫ̀ gots'ǫ̀ K'àowo edı̨į̀ nègòǫlaa sìı ekǫ geèhkw'e ha hǫt'e, eyıts'ǫ Nǫ̀htsı̨ ayìı ts'ǫ̀ gokayaı̨htıı sìı hagııle. Nǫ̀htsı̨ wecheekeè kǫ̀ta hazǫǫ̀ nàgedèe sìı eyı nàowo gıts'ǫ̀ haehsı̨.  
\v 18 Dǫ, Nǫ̀htsı̨ yekayaı̨htı kwe Moses wenàowoò k'ę̀ę̀ hòt'a wekwǫ̀ nàat'a ı̨lè nı̨dè eładı̨į̀ awede-le. Dǫ, Nǫ̀htsı̨ yekayaı̨htı kwe wekwǫ̀ nàat'a-le nı̨dè wekwǫ̀ nàt'à adııle-le.  
\v 19 Dǫ wekwǫ̀ nàt'àa, dǫ wekwǫ̀ nàt'à-le, eyı Nǫ̀htsı̨ wegha wet'àaɂà nıìle. Nǫ̀htsı̨ wenàowoò k'èts'edì eyı t'aa sıì wet'àaɂà hǫt'e.  
\v 20 Eyıt'à dǫ hazǫǫ̀ Nǫ̀htsı̨ gokayaı̨htı ekò edı̨į̀ geèhkw'e ı̨lèe sìı ekǫ et'ıì geèhkw'e kò.  
\v 21 Nǫ̀htsı̨ naxıkayaı̨htı ekò dǫ naxıts'ǫ̀ k'àowo ı̨lè nı̨dè, wet'à naxıgha gots'eèdı welè-le, hanìkò edets'ǫ̀ k'aehwho ha naxıgha hòɂǫ nı̨dè haahde.  
\v 22 Dǫ Nǫ̀htsı̨ yekayaı̨htı kwe wets'ǫ̀ k'àowo gǫ̀hłı̨ nı̨dè gots'ǫ̀ K'àowo Zezì gha edets'ǫ̀ k'àowo elı̨į̀ ajà hǫt'e. Eyı xèht'eè dǫ Nǫ̀htsı̨ yekayaı̨htı ekò edets'ǫ̀ k'àowo elı̨ ı̨lèe sìı Zezì-Krı yets'ǫ̀ K'àowo elı̨į̀ ajà hǫt'e.  
\v 23 T'asìı deè t'à nànaxèdì hǫt'e, eyıt'à dǫ naxıts'ǫ k'àowo gı̨ı̨lı̨į̀ adeahłe-le.  
\v 24 Sèot'ı̨ı̨, naxı̨ hazǫǫ̀ Nǫ̀htsı̨ wek'ę̀ę̀ aahda ha hǫt'e eyıts'ǫ dànì Nǫ̀htsı̨ naxıxè hòɂǫǫ̀ ayį̀į̀làa sìı k'ę̀ę̀ aahda. 
\p  
\v 25 Ekò ts'èko hogıat'į̀ whìle sìı gıghǫ gots'ǫ̀ K'àowo t'asasèhdı-le, hanìkò Nǫ̀htsı̨ wesǫnıwǫ t'à ehkw'ı eghàlaehda k'ę̀ę̀ sı̨ dàahwhǫǫ sìı yatı naxıghàehɂà ha:  
\v 26 Dıì goxè hoìla k'ehokw'o ts'ıhɂǫ̀ honìahdè-le kò nezı̨ hǫt'e dehwhǫ.  
\v 27 Dǫzhìı, hǫaht'ı̨ nı̨dè naxıts'èkeè ɂǫ̀weahdè-le. Hǫaht'ı̨-le nı̨dè ts'èko hak'èahta-le.  
\v 28 Hanìkò hǫaht'ı̨ nı̨dè hołı̨ı̨ hòwhàahtsı̨ nıìle, eyıts'ǫ ts'èko hǫat'į̀ı̨ whìle sìı honìdza nı̨dè hołı̨ı̨ hòèhtsı̨ nıìle. Hanìkò amìı honìgedèe sìı dıı nèk'e gıxè hoìla łǫ ha hǫt'e, eyı hoìla naxıts'ǫ ha dehwhǫ nıìle. 
\p  
\v 29 Sèot'ı̨ı̨, whaà-lea gots'ǫ̀ zǫ ts'eeda dehsı̨į̀-aehsı̨. Jǫ gots'ǫ ı̨daà dǫ gıts'èkeè gǫ̀hłı̨ı̨ sìı gıts'èkeè gǫ̀hłı̨-le lanì gııdà,  
\v 30 dǫ ts'ǫǫ̀gı̨ı̨wǫǫ sìı ts'ǫǫ̀gı̨ı̨wǫ-le lagııt'è, dǫ sìgeèt'ı̨ı̨ sìı sìgeèt'ı̨-le lagııt'è, dǫ t'asìı nàgeehdìı sìı xàè gıts'ǫ nıìle lagııt'è.  
\v 31 Dǫ dıı nèk'e gots'ǫ t'asìı t'à-aget'ı̨ı̨ sìı gıgha wet'àaɂà-le lagııt'è. Dıı nèk'e dıì dànì hòɂǫǫ sìı whaà-le-t'ıì whìle agode ha t'à, hanì aahda. 
\p  
\v 32 Eyıt'à t'asìı wı̨ı̨zìı ghǫ nànıahdè ha dehwhǫ-le. Dǫzhìı hǫet'ı̨-le sìı Nǫ̀htsı̨ wenàowoò zǫ ghǫ nànıwo hǫt'e. Dànì Nǫ̀htsı̨ wınà hohtsı̨ ha sìı yedaànıwo hǫt'e.  
\v 33 Hanìkò dǫzhìı hǫet'ı̨ı̨ sìı dıı nèk'e t'asìı łǫ ghǫ nànıwo, eyıts'ǫ dànì edets'èkeè wınà hohtsı̨ ha sìı yedaànıwo hǫt'e,  
\v 34 eyıt'à wınì ełets'ǫǫ̀ ts'eht'ì lanì. Ts'èko hǫgeet'ı̨-le eyıts'ǫ t'eekogòò gı̨ı̨lı̨ı̨ sìı gots'ǫ̀ K'àowo wenàowoò zǫ daànıgewo hǫt'e. Ts'èko hanıı sìı edezhį̀į̀ eyıts'ǫ edınì t'à Nǫ̀htsı̨ ghàdìtı̨ hǫt'e. Hanìkò ts'èko hǫet'ı̨ı̨ sìı dıı nèk'e t'asìı łǫ ghǫ nànıwo eyıts'ǫ edànì ededǫǫ̀ wınà hohtsı̨ ha sìı ghǫ nànıwo hǫt'e.  
\v 35 Naxıgha hoezhì ahłe ha dehwhǫ t'à dıı hanì naxıts'ǫ̀ gohde nıìle, hanìkò naxıxè sìghà hòɂǫ ha welè dehwhǫ. Ehkw'ı aahda ha, eyıts'ǫ naxınì nàtso xè Nǫ̀htsı̨ zǫ gha eghàlaahda ha naxeehwhǫ t'à aehsı̨. 
\p  
\v 36 Dǫzhìı ts'èkogòò xè honìda ha yeekèe sìı ts'ǫ̀ nezı̨į̀ k'ehoɂa-le lat'ı̨ nı̨dè, eyıts'ǫ eyı ts'èko weghoò łǫ adaade xè dǫzhìı yexè honìda ha nıwǫ nı̨dè t'asanìle. Eyı dǫ sìı hołı̨ı̨ hohtsı̨ nıìle, eyıt'à yexè honìda ha t'asanìle.  
\v 37 Hanìkò dǫzhìı honìda ha-le k'ę̀ę̀ edınì whehtsı̨ nı̨dè, eyıts'ǫ edınì ts'ǫ̀ k'àowo nı̨dè, eyıts'ǫ t'eekogòò aakee sìı xè honìda ha-le k'ę̀ę̀ edınì whehtsı̨ nı̨dè, hanıı dǫzhìı sı ehkw'ı at'ı̨ hǫt'e.  
\v 38 Eyıt'à dǫzhìı ts'èkogòò aakee sìı xè honìdza nı̨dè ehkw'ı at'ı̨ hǫt'e, hanìkò dǫzhìı ts'èkogòò aakee sìı xè honìdza-le nı̨dè eyı sìı denahk'e ehkw'ı at'ı̨ hǫt'e. 
\p  
\v 39 Ts'èko wedǫǫ̀ ełaàwı gots'ǫ̀ wets'ǫ̀ dawhetł'ı̨ lanì hǫt'e. Hanìkò wedǫǫ̀ ełaı̨wo nı̨dè eyıì-le dǫzhìı xè honǫ̀ǫda ha nıwǫ nı̨dè edets'ǫ̀ k'àowo. Hanìkò eyı dǫzhìı sìı Nǫ̀htsı̨ wets'ǫ dǫ elı̨ ha hǫt'e.  
\v 40 Sı̨ anı̨hwhǫ nı̨dè eyı ts'èko honìdza-le kò denahk'e wınà ha hǫt'e. Sı̨ sı Nǫ̀htsı̨ wets'ǫ Įnì Degaı sets'ǫ̀-èlı̨ dehwhǫ t'à aehsı̨ hǫt'e. 
\c 8  
\s1 Nǫ̀htsı̨ hòèlı̨ı̨ ts'ǫ̀ bò k'eek'ǫ̀ 
\p  
\v 1 Bò nǫ̀htsı̨ hòèlı̨ı̨ ghàgeedıı sìı weghǫ dıı hanaxèehsı̨ ha: T'asìı łǫ k'èts'eezǫ ts'ı̨ı̨wǫ hǫt'e, hanìkò t'asìı łǫ k'èts'eezǫ nı̨dè wet'à xàhots'edì ats'et'į̀. Ekò ełeghǫnets'eètǫ nı̨dè wet'à nàts'etsoò ałets'ehɂı̨.  
\v 2 Dǫ t'asìı łǫ k'èezǫ edeewǫǫ sìı ayìı k'èezǫ ha ı̨lèe sìı ı̨łaà yek'èezǫ nıìle.  
\v 3 Hanìkò dǫ Nǫ̀htsı̨ ghǫneètǫǫ sìı Nǫ̀htsı̨ eyı dǫ k'èezǫ hǫt'e. 
\p  
\v 4 Eyıt'à bò nǫ̀htsı̨ hòèlı̨ı̨ ghàgeedı weghǫ dıı haehsı̨ ha: Dıı nèk'e nǫ̀htsı̨ hòèlı̨ı̨ sìı t'asìı wı̨ı̨zìı gha ıtà nıìle, Nǫ̀htsı̨ ı̨łè zǫ gǫ̀hłı̨ wek'èts'eezǫ hǫt'e.  
\v 5 Yak'e hanì-le-ı̨dè dıı nèk'e nǫ̀htsı̨ łǫ gǫ̀hłı̨ gedı t'ıį̀t'e, (“nǫ̀htsı̨” łǫ eyıts'ǫ “k'aodèe” łǫ gǫ̀hłı̨ı̨ sìı ehkw'ı agedı hǫt'e),  
\v 6 hanìkò goxı̨ gogha sìı Nǫ̀htsı̨ ı̨łè zǫ gǫ̀hłı̨, eyı sìı Nǫ̀htsı̨-Gotà hǫt'e. Ededı̨ t'asìı hazǫǫ̀ whehtsı̨ eyıts'ǫ ededı̨ wegha ts'eeda hǫt'e. Eyıts'ǫ gots'ǫ̀ K'àowo ı̨łè zǫ gǫ̀hłı̨, eyı sìı Zezì-Krı hǫt'e. Ededı̨ wet'ǫ̀ǫ̀ t'asìı hazǫǫ̀ hòèlı̨, eyıts'ǫ wet'à ts'eeda hǫt'e. 
\p  
\v 7 Hanìkò eyı sìı dǫ hazǫǫ̀ deghàà gık'èezǫ nıìle. Dǫ mǫ̀hdaa ı̨nę̀ę nǫ̀htsı̨ą hòèlı̨ı̨ ghǫ hòtł'ò agı̨ı̨wǫ ı̨lè t'à bò hanıı ghǫ shègezhe nı̨dè nǫ̀htsı̨ hòèlı̨ı̨ ghàɂaadìı ne gı̨ı̨wǫ ha. Gınì nàtso-le t'à ekǫ-le nànıgedè xè ekǫ-le eghàlagı̨ı̨dà gı̨ı̨wǫ ha.  
\v 8 Hanìkò bò t'à Nǫ̀htsı̨ ts'ǫ̀ ats'ede ha nıìle. Bò hanıı ts'edè-le nı̨dè deɂǫ̀ǫ̀ nezı̨-le ats'ede ha nıìle, ekò bò ts'edè nı̨dè wet'à denahk'e nezı̨į̀ ats'ede ha nıìle. 
\p  
\v 9 Eyıt'à edexoahdı, bò hanıı aahdè naxıgha t'asìı nıìle kò, naxèot'ı̨ wınì nàtso-le sìı naxıt'à ekǫ-le awede sǫ̀ǫ̀.  
\v 10 Eyı wek'èahsǫ t'à nǫ̀htsı̨ hòèlı̨ı̨ wekǫ̀ gocho goyìı shèahzhe ha sǫnı. Hanìkò dǫ bò nǫ̀htsı̨ hòèlı̨ı̨ ghàgeedı ghǫ shètı̨ı̨ sìı ekǫ-le hǫt'e nıwǫ xè ekǫ naxıaɂı̨ nı̨dè, ededı̨ sı bò hanıı ghǫ shètı̨į̀ ade ha sǫnı.  
\v 11 Eyı gòet'ı̨ wınì nàtso-le sìı Zezì-Krı yegha ełaı̨wo kò, ayìı k'èahsǫ t'à wedıhoahtsı̨ hǫt'e.  
\v 12 Hanì gòet'ı̨ k'èch'a hołı̨ı̨ hoahtsı̨ xè gınì tsį̀ahwhı nı̨dè, Zezì wek'èch'a hołı̨ı̨ hoahtsı̨ hǫt'e.  
\v 13 Eyıt'à ayìı ghǫ shèhtı̨ı̨ sìı wet'à sèot'ı̨ hołı̨ı̨ hohtsı̨į̀ awehɂı̨ nı̨dè, k'achı̨ bò wı̨ı̨zìı ghǫ shèhtı̨ ha-le, hanì-ı̨dè hołı̨ı̨ hohtsı̨į̀ awehɂı̨ ha-le. 
\c 9  
\s1 Nǫ̀htsı̨ wecheekeèdeè dànì gıghàhòt'ǫ 
\p  
\v 1 Sı̨ xàè edets'ǫ̀ k'aehwho-le nì? Sı̨ Zezì wecheekeèdeè aht'e-le nì? Sı̨ xàè gots'ǫ̀ K'àowo Zezì weehɂı̨-le nì? Gots'ǫ̀ K'àowo wegha naxıta eghàlaehda t'à naxıgha ehkw'ı-ahodıì aahjà hǫt'e.  
\v 2 Dǫ eyıì-le gıgha Nǫ̀htsı̨ wecheekeèdeè aht'e-le sǫnı kò, naxıgha sìı xàè Nǫ̀htsı̨ wecheekeèdeè aht'e. Sı̨ set'à naxıgha ehkw'ı-ahodıì aahjà t'à, gots'ǫ̀ K'àowo wecheekeèdeè aht'e gha sek'èhoedzǫ hǫt'e. 
\p  
\v 3 Dǫ seghǫ nàyagehtıı sìı gıts'ǫ̀ dıı haehsı̨į̀ edek'edaehdı ha dìì-le:  
\v 4 Weghǫ shèts'ezhee eyıts'ǫ t'asìı ts'edǫǫ sìı goxı̨ sı gogha nıìle nì?  
\v 5 Zezì wecheekeèdeè eyıì-le, gots'ǫ̀ K'àowo wechıke, eyıts'ǫ Peter, gıxèht'eè gots'èkeè gıgha ehkw'ı-ahodıı sìı edexè agets'ele ha goghàhòt'ǫ-le nì?  
\v 6 Hanì-le-ı̨dè asį̀į̀ Barnabas eyıts'ǫ sı̨ zǫ wet'à ts'eeda gha hòtł'ò eghàladıìda ha hǫt'e nì? 
\p  
\v 7 Dǫ eghǫǫ-dǫǫ̀ elı̨ı̨ sìı edets'àɂeehdì nıìle. Dǫ jìechochı̨į̀ k'èdìı elı̨ı̨ sìı yets'ǫ jìecho edè ha dìì-le. Dǫ sahzǫ̀ą k'èdìı elı̨ı̨ sìı yets'ǫ ejıet'ò edǫ ha dìì-le.  
\v 8 Dǫ dànì nànıgedè ghàà zǫ aehsı̨ nıìle. Moses wenàowoò kò eyı wexèht'eè dek'eèhtł'è.  
\v 9 Moses wenàowoò k'e dıı hanì dek'eèhtł'è: “Naxıts'ǫ ejıe tł'olà tàtsǫyeèhɂe nı̨dè wewà nadaahzà-le,” dek'eèhtł'è. Nǫ̀htsı̨ sìı ejıe ghǫ nànıwo t'à adı nıìle.  
\v 10 Nǫ̀htsı̨ hadıı sìı hotıì gogha godeè-adı hǫt'e. Dǫ ı̨łè dèè k'e t'asìı dehshee gha dèè k'e sıìgohɂı̨ hǫt'e, eyıts'ǫ dǫ eyıì-le sìı ejıe tł'olà k'e k'edaà ayehɂı̨ hǫt'e. Eyı į̀łah haget'ı̨ı̨ sìı t'asìı dehshee wets'ǫ t'asìı xàhogehwhı ha gı̨ı̨wǫ t'à aget'ı̨.  
\v 11 Eyı xèht'eè lanì t'asìı nezı̨ı̨ naxıdzeè yìı nèts'ı̨ı̨la hǫt'e, eyıt'à naxıdzeè yìı ayìı dıìdì ajà ts'ıhɂǫ̀ t'asìı wet'à ts'eedaa goghàahdı ha-le nì?  
\v 12 Dǫ eyıì-le t'asìı t'à gıts'àahdı ha gıghàhòt'ǫ nı̨dè, goxı̨ gınahk'e gots'àahdı ha-le nì? 
\p Goxı̨ sìı gots'àahdı ha goghàhòt'ǫ ı̨lè, hanìkò naxıts'ǫ t'asìı ts'ı̨ı̨wǫ-le ı̨lè. Į̀le, hoìla xè ts'eeda kò ts'ı̨ı̨wǫ, Zezì-Krı wegodıì nezı̨ı̨ t'asìı wı̨ı̨zìı t'à wehoeɂa ha ts'ı̨ı̨wǫ-le.  
\v 13 Nǫ̀htsı̨kǫ̀-gocho goyìı eghàlageedaa sìı Nǫ̀htsı̨kǫ̀ gots'ǫ t'asìı ghǫ shègezhe hǫt'e, wek'èahsǫ-le nì? Yahtıı kwe-ladà k'e t'asìı Nǫ̀htsı̨ ts'ǫ̀ k'egeehk'ǫ̀ǫ sìı wets'ǫ dǫ xè gıwàhodı hǫt'e, wek'èahsǫ-le nì?  
\v 14 Eyı xèht'eè lanì gots'ǫ̀ K'àowo gogha nàowo whehtsı̨ hǫt'e, dǫ godı nezı̨ı̨ t'à dǫ ts'ǫ̀ gogede k'èxa gıt'à edaa gıghǫ̀zhe ha hǫt'e, hadı. 
\p  
\v 15 Hanìkò sı̨ ayìı seghàhòt'à ha ı̨lèe sìı wedę kò dehwhǫ. Edahxǫ t'asìı seghàahłe ha dehwhǫ t'à dıı hanì naxıts'ǫ̀ ehtł'è nıìle. T'asìı k'èxa-le godı nezı̨ı̨ t'à naxıts'ǫ̀ gohdee sìı weghǫ xàdahohdì ha dìì-le. Eyı sìı dǫ seghǫ yìhchı nı̨dè bò dę ełaıhwho kò segha denahk'e nezı̨ hǫt'e.  
\v 16 Hanìkò godı nezı̨ı̨ t'à dǫ hoghàehtǫ nı̨dè edeghǫ xàdahohdì ha dìì. Godı nezı̨ı̨ t'à dǫ hoghàehtǫ eyı zǫ segha hòɂǫ hǫt'e. Godı nezı̨ı̨ t'à dǫ ts'ǫ̀ gohde-le nı̨dè segha hoìla ha hǫt'e!  
\v 17 Sı̨ xàè haehwhǫ t'à eyı la weghàlaehda nı̨dè, wek'èxa t'asìı seghǫ̀t'à ha ı̨lè. Ekò Nǫ̀htsı̨ eyı la seghàı̨ɂǫǫ̀ ayį̀į̀là nı̨dè ekìı sılaà weghàlaehda aht'ı̨.  
\v 18 Eyıt'à wek'èxa ayìı seghǫ̀t'à ha? Dıı zǫ k'èxa aht'ı̨: Godı nezı̨ı̨ t'à dǫ ts'ǫ̀ gohde nı̨dè t'asìı k'èxa-le yatı gıghàehɂà hǫt'e. Godı nezı̨ı̨ t'à gohde k'èxa t'asìı seghǫ̀t'à ha hòɂǫ kò, wedę ahɂı̨. 
\p  
\v 19 Edets'ǫ̀ k'aehwhoo aht'e xè dǫ wı̨ı̨zìı wets'ǫ aht'e-le kò, dǫ łǫ dehnè ha dehwhǫ t'à dǫ hazǫǫ̀ gıgha eghàlaehdaa dǫǫ̀ ehłı̨į̀ adèhłà.  
\v 20 Israel got'ı̨į̀ Zezì gha geehnè ha dehwhǫ t'à gıxèht'eè ehda. Dǫ, Moses wenàowoò tł'a geèhkw'ee sìı Zezì gha geehnè ha dehwhǫ t'à, gıxèht'eè Moses wenàowoò tł'a whıhda laht'e (Moses wenàowoò tł'a whıhda-le kò).  
\v 21 Eyıts'ǫ dǫ, Moses wenàowoò dę geedaa sìı gıxèht'eè ehda, Zezì-Krı gha geehnè ha dehwhǫ t'à. (Nǫ̀htsı̨ wenàowoò wedę ahłe ha dìì, Zezì-Krı wenàowoò tł'a whıhda t'à.)  
\v 22 Dǫ nàgetso-le sìı gıta aht'ı̨ nı̨dè gıxèht'eè nàhtso-le laht'e, hanì-ı̨dè edahxǫ Zezì gha geehnè ha welì. Dǫ hazǫǫ̀ xàɂaa gıxèwhıht'e ha dehwhǫ, hanì-ı̨dè edahxǫ gıta gots'ǫ dǫ mǫ̀hdaa edaxàgehłe ha welì.  
\v 23 Godı nezı̨ı̨ gha eyı hazǫǫ̀ hahɂı̨ hǫt'e. Hanì-ı̨dè godı nezı̨ı̨ wet'à sexè sìghà agode ha. 
\p  
\v 24 Dǫ ehdaàtı̨mǫgeedè nı̨dè dǫ ı̨łè zǫ hoehnè, wek'èts'eezǫ hǫt'e. T'asìı deè daahnè ha ehdaàtı̨mǫahdè welì.  
\v 25 Amìı ehdaàtı̨mǫgeedè goxè at'ı̨ ha nıwǫǫ sìı eyı gha edexè sınìhòɂà hǫt'e. Dǫ hanıı sìı t'asìı sǫǫ̀mbaekwo t'à hòèlı̨ı̨ eyıts'ǫ t'asìı whaà ts'ǫ̀ wheɂǫ ha-le sìı geehnè gha aget'ı̨, hanìkò goxı̨ sìı t'asìı deè welǫ whìle ts'ǫ̀ goghaelı̨ gha ats'et'ı̨ hǫt'e.  
\v 26 Eyıt'à dǫ edı̨į̀ ts'ǫ̀ at'ı̨ yek'èezǫ-le lanì k'etı̨mǫehda nıìle, eyıts'ǫ dǫ ekìı-ka eeht'ı lanì eeht'ı nıìle.  
\v 27 Į̀le, sezhį̀į̀ sek'èı̨t'e xè segha eghàlaedaà ahɂı̨. Hanì-ı̨dè godı nezı̨ı̨ t'à dǫ ts'ǫ̀ goıhde tł'axǫǫ̀ nı̨dè, t'asìı deè ts'eehnè gha sedę asedle ha nıìle. 
\c 10  
\s1 Israel got'ı̨į̀ gıxè dàgoat'į̀ı̨ sìı weghàà nànıahdè 
\p  
\v 1 Sèot'ı̨ı̨, gocho sìı Nǫ̀htsı̨ wets'ǫ k'oh wezhıı agı̨ı̨t'è ı̨lè, eyıts'ǫ tıdeè yìı dexageède ı̨lè, eyı wek'èahsǫ ha dehwhǫ.  
\v 2 Hazǫǫ̀ Moses xè k'oh yìı eyıts'ǫ tıdeè yìı gık'ètaìdzǫ lagejà ı̨lè.  
\v 3 Hazǫǫ̀ yak'e gots'ǫ łèt'è degaı ghǫ shègıazhe,  
\v 4 eyıts'ǫ hazǫǫ̀ Nǫ̀htsı̨ tı goghànııdìı sìı gıadǫ. Nǫ̀htsı̨ wets'ǫ kwe gıxè at'ı̨ı̨ sìı gots'ǫ tı gıadǫ lanì. Eyı kwe sìı Zezì-Krı hǫt'e.  
\v 5 Hanìkò Nǫ̀htsı̨ sìı gocho deɂǫ̀atłǫ goghǫ wek'èch'a ı̨lè. Eyıt'à ełaàgı̨ı̨dèe t'à, ekìı-ka nèk'e gıkw'ǫǫ̀ k'eanìı̨la. 
\p  
\v 6 Eyı hagòjàa sìı weghàà gocho gıxèht'eè godzeè t'à hołı̨ı̨ ts'ı̨ı̨wǫ ha-le gha hoghàdets'eetǫ gha agòjà hǫt'e.  
\v 7 Gocho mǫ̀hdaa gıxèht'eè nǫ̀htsı̨ hòèlı̨ı̨ ts'ǫ̀ yaahtı-le. Dıı hanì dek'eèhtł'è, “Dǫ shègezhe xè gedǫ gha łą̀ą nègı̨ı̨de, eyı tł'axǫǫ̀ ededzeè t'à dǫ Nǫ̀htsı̨ k'ègeezǫ-le lanì gıgha sìgoèt'ı̨ xè ełexè sǫnàgedè,” dek'eèhtł'è.  
\v 8 Gocho mǫ̀hdaa gıxèht'eè gozhį̀į̀ t'à hołı̨ı̨ k'alats'ııdè-le. Įłè dzęę̀ t'à naènǫ-daats'ǫ̀-taı-lemì dǫ haàtłǫǫ ełaı̨dè ı̨lè, eyı wenaahdì.  
\v 9 Gocho mǫ̀hdaa gıxèht'eè, gots'ǫ̀ K'àowo wets'eèhdzà ha hòɂǫ nıìle. Hagıat'į̀ ts'ıhɂǫ̀ gòocho t'à ełaàgı̨ı̨dè ı̨lè, eyı wenaahdì.  
\v 10 Eyıts'ǫ gocho mǫ̀hdaa hagı̨ı̨dì lanì, Nǫ̀htsı̨ ts'ǫ̀ sǫahdı-le. Hagı̨ı̨dì ts'ıhɂǫ̀ yak'eet'ı̨į̀ dǫ dıhohtsı̨ı̨ elı̨ı̨ sìı ełaàgòı̨hdè ı̨lè, eyı wenaahdì. 
\p  
\v 11 Goxı̨ dıì nǫǫde dzęę̀ k'e ts'eedaa sìı, eyı hazǫǫ̀ gıts'ǫ̀ hagòjàa sìı wet'à hoghàgoetǫ gha agòjà hǫt'e, eyıts'ǫ wenats'edì ha t'à gogha dek'eèhtł'è hǫt'e.  
\v 12 Eyıt'à amìı nàhtso edeewǫǫ sìı, hołı̨ı̨ t'à naxık'èchıìtła ch'à edexoahdı!  
\v 13 Dǫ hazǫǫ̀ hołı̨ı̨ t'à dànì geèdzàa sìı wedaats'ǫ̀ naxeèdzà ha nıìle. Nǫ̀htsı̨ sìı t'aats'ǫǫ̀ goxoehdı ha hǫt'e, naxınì nàtso nahk'e ts'ǫ̀ naxeèdzà anaxele ha nıìle. Hanìkò hołı̨ı̨ t'à naxeèdzà nı̨dè, weghǫahnè ha naxınì nàtsoò ayele ha. 
\s1 Gots'ǫ̀ K'àowo welıbò eyıts'ǫ  //  ı̨nìłı̨ı̨ welıbò į̀łah gots'ǫ ts'edǫ ha dìì 
\p  
\v 14 Eyıt'à seàgı̨ą nǫ̀htsı̨ą hòèlı̨ı̨ hazǫǫ̀ xàɂaa ts'ǫ̀ yaahtı ch'à eyıts'ǫ gınàowoò ààhchı ch'à hotıì edek'èahdì.  
\v 15 Dǫ ehkw'ı nànıgedèe sìı gıts'ǫ̀ gohde aehsı̨ hǫt'e, eyıt'à ayìı dàehsı̨ı̨ sìı asį̀į̀ ehkw'ı gohde lì edegha wedaànıahdè.  
\v 16 Lıbò wek'eèyats'ehtı xè weghǫ Nǫ̀htsı̨ masì wets'ı̨ı̨hwhǫ nı̨dè Zezì wedoò gogha xàı̨tł'ıı sìı wexè ats'et'ı̨ gha goıtà hǫt'e. Eyıts'ǫ łèt'è tàts'eezhìı xè weghǫ shèts'ezhe nı̨dè Zezì-Krı goghàdį̀htı̨ı̨ sìı wexè ats'et'ı̨ hǫt'e.  
\v 17 Łèt'è ı̨łè zǫ hǫt'e eyıts'ǫ goxı̨ hazǫǫ̀ eyı łèt'è ı̨łè weghǫ shèts'ezhe t'à, goxı̨ goı̨tłǫ ats'ı̨ı̨t'e kò wezhį̀į̀ ı̨łè zǫ lats'ı̨ı̨t'e. 
\p  
\v 18 Israel got'ı̨į̀ gıdaànıahdè: dǫ Nǫ̀htsı̨ ghàɂaadìı gots'ǫ shètı̨ı̨ sìı dǫ Nǫ̀htsı̨ ghàgı̨ı̨dì xè aget'ı̨ gha gııtà hǫt'e.  
\v 19 Bò nǫ̀htsı̨ hòèlı̨ı̨ ghàgeedıı sìı t'asìı deè hǫt'e dehsı̨į̀-aehsı̨-le, eyıts'ǫ eyı nǫ̀htsı̨ hòèlı̨ı̨ sìı t'asìı deè elı̨ dehsı̨į̀-aehsı̨-le.  
\v 20 Į̀le, haehsı̨į̀-aehsı̨-le, hanìkò dǫ Nǫ̀htsı̨ k'ègeezǫ-le sìı ı̨nìłı̨ı̨ ts'ǫ̀ kǫ̀ ghàgeedı hǫt'e, Nǫ̀htsı̨ ghàgeedıì aget'ı̨ nıìle. Eyıt'à ı̨nìłı̨ı̨ gıxè aaht'ı̨ ha naxeehwhǫ nıìle.  
\v 21 Gots'ǫ̀ K'àowo welıbò eyıts'ǫ ı̨nìłı̨ı̨ welıbò gots'ǫ į̀łah aahdǫ ha dìì hǫt'e. Gots'ǫ̀ K'àowo weladà eyıts'ǫ ı̨nìłı̨ı̨ weladà, į̀łah gots'ǫ shèahzhe ha dìì hǫt'e.  
\v 22 Gots'ǫ̀ K'àowo ts'ohoedı awets'ele ha hots'eèhdzà ats'et'ı̨ nì? Į̀le, wenahk'e nàts'etso nıìle. 
\s1 T'asìı hazǫǫ̀ gogha sìghà nıìle 
\p  
\v 23 “T'asìı hazǫǫ̀ gots'ǫ̀ wets'àet'ǫ nıìle,” haahdı sǫnı, hanìkò t'asìı hazǫǫ̀ gogha sìghà nıìle. “T'asìı hazǫǫ̀ gots'ǫ̀ wets'àet'ǫ nıìle,” haahdı sǫnı, hanìkò t'asìı hazǫǫ̀ t'à goınì nàtsoò ade ha nıìle.  
\v 24 Edegha zǫ nezı̨į̀ k'ehoahɂa-le, hanìkò dǫ eyıì-le dànì gıgha sìghà hòɂǫ ha sìı ghǫ nànıahdè. 
\p  
\v 25 Nàedìı k'è gots'ǫ bò t'alàa-sìı ghǫ shèahzhe, asį̀į̀ ehkw'ı aaht'ı̨, hanì-le-ı̨dè ekǫ-le aaht'ı̨ weghǫ daɂaahke-le,  
\v 26 dıı hanì dek'eèhtł'èe wek'èts'eezǫ t'à: “Dèè eyıts'ǫ t'asìı hazǫǫ̀ wek'e whelaa sìı gots'ǫ̀ K'àowo wets'ǫ hǫt'e,” dek'eèhtł'è. 
\p  
\v 27 Dǫ wegha ehkw'ı-ahodı-le sìı sexè shènetı̨ nèhdı nı̨dè, eyıts'ǫ nı̨ haneewǫ nı̨dè, weghǫ shèts'ezhee negà nèyı̨ı̨laa sìı hazǫǫ̀ weghǫ shènetı̨. Asį̀į̀ ehkw'ı ne, asį̀į̀ ekǫ-le ne neewǫ t'à, weghǫ daɂı̨hke-le.  
\v 28 Hanìkò dǫ dıı hanaxèhdı nı̨dè, “Dıı bò sìı nǫ̀htsı̨ą hòèlı̨ı̨ ghàɂaadì hǫt'e,” naxèhdı nı̨dè, weghǫ shèahzhe-le. Dǫ naxıts'ǫ̀ hadıı sìı wegha eyıts'ǫ wınì sı gha eyı bò weghǫ shèahzhe-le.  
\v 29 Dǫ eyıì-le wınì gha aehsı̨, naxınì gha aehsı̨-le. T'asìı segha ekǫ-le k'ę̀ę̀ nıìle dehwhǫ t'à dǫ eyıì-le gıgha ehkw'ı nıìle sìı ayìıha sesınìyagehtı welì?  
\v 30 Dǫ gıxè shèhtı̨ gha Nǫ̀htsı̨ masì weehwhǫ nı̨dè, ayìıha eyı ghǫ dǫ sesınìyagehtı welì? 
\p  
\v 31 Eyıt'à t'asìı ghǫ shèahzhe xè t'asìı aahdǫ, eyıts'ǫ t'asìı t'ahoòyį̀ı̨ haahɂı̨ nı̨dè, wet'à Nǫ̀htsı̨ weghàsǫahdı.  
\v 32 Naxıt'à dǫ wı̨ı̨zìı ekǫ-le awede sǫ̀ǫ̀, Israel got'ı̨į̀, Greece got'ı̨į̀, hanì-le-ı̨dè Nǫ̀htsı̨ wecheekeè hazǫǫ̀ ts'ıɂǫ̀ ageahłe sǫ̀ǫ̀.  
\v 33 Sı̨ sı dǫ hazǫǫ̀ gıgha sìghà k'ę̀ę̀ eghàlaehda ha edeèhdzà. Sı̨ edegha sìghà zǫ k'ę̀ę̀ eghàlaehda ha dehwhǫ-le, hanìkò dǫ hazǫǫ̀ gıgha sìghà k'ę̀ę̀ ha dehwhǫ, hanì-ı̨dè edahxǫ edaxàgeedè ha welì. 
\c 11  
\p  
\v 1 Sı̨ Zezì-Krı wek'ę̀ę̀ k'ehoehɂa lanì sek'ę̀ę̀ k'ehoahɂa. 
\s1 Dànì ełexè ehkw'ı yats'ehtı 
\p  
\v 2 T'asìı hazǫǫ̀ dànaxèehsı̨ı̨ sìı wenaahdì, eyıts'ǫ ayìı hoghànaxeèhtǫǫ sìı hotıì yàahtǫ̀, eyı gha naxıghàsǫehdı. 
\p  
\v 3 Zezì-Krı dǫzhìı hazǫǫ̀ gha K'àowo hǫt'e wek'èahsǫ ha dehwhǫ, eyıts'ǫ dǫzhìı ts'èko gha k'àowo gı̨ı̨lı̨ı̨ hǫt'e, eyıts'ǫ Nǫ̀htsı̨-Gotà Zezì-Krı gha K'àowo hǫt'e.  
\v 4 Dǫzhìı edekwì k'e t'asìı whaèhɂǫ xè Nǫ̀htsı̨ ts'ǫ̀ yahtı nı̨dè, hanì-le-ı̨dè Yedàyeh Nezı̨ı̨ dahxà xàyahtı nı̨dè Zezì-Krı ts'ǫ̀ nezı̨į̀ naɂa nıìle.  
\v 5 Eyıts'ǫ ts'èko edekwì k'e t'asìı whehchì-le xè yahtı hanì-le-ı̨dè Yedàyeh Nezı̨ı̨ dahxà xàyahtı nı̨dè, dǫzhìı ts'ǫ̀ nezı̨į̀ naɂa nıìle. Wekwìghà hazǫǫ̀ xaet'à xèht'eè lanì hǫt'e.  
\v 6 Ts'èko edekwì k'e t'asìı whehchì-le sìı wekwìghà hazǫǫ̀ xawet'à. Ts'èko wekwìghà xaet'à t'à edeghǫ į̀į̀zhaelı̨ nı̨dè, edekwì k'e t'asìı whehchì ha hǫt'e.  
\v 7 Dǫzhìı sìı Nǫ̀htsı̨ enıìyah wehòhɂǫ k'ę̀ę̀ wehòèlı̨ ne t'à, edekwì k'e t'asìı whehchì ha nıìle, hanìkò ts'èko sìı dǫzhìı enıìyah wehòhɂǫ k'ę̀ę̀ wehòèlı̨ hǫt'e.  
\v 8 T'akwełǫ̀ǫ̀ dǫzhìı wehòèlı̨ı̨ sìı ts'èko gots'ǫ wehòèlı̨ nıìle, hanìkò t'akwełǫ̀ǫ̀ ts'èko wehòèlı̨ı̨ sìı dǫzhìı gots'ǫ wehòèlı̨ hǫt'e,  
\v 9 eyıts'ǫ dǫzhìı sìı ts'èko gha wehòèlı̨ nıìle, hanìkò ts'èko sìı dǫzhìı gha wehòèlı̨ hǫt'e.  
\v 10 Eyı ts'ıhɂǫ̀, eyıts'ǫ yak'eet'ı̨į̀ gıts'ıhɂǫ̀ ts'èko edekwì k'e t'asìı whehchì ha hǫt'e. Eyı weghàà ts'èko wedǫǫ̀ tł'a wheda wek'èhoedzǫ hǫt'e. 
\p  
\v 11 Gots'ǫ̀ K'àowo wenadąą̀ ts'èko sìı dǫzhìı dę t'asìı elı̨ nıìle, eyıts'ǫ dǫzhìı sı ts'èko dę t'asìı elı̨ nıìle.  
\v 12 Ts'èko sìı dǫzhìı gots'ǫ wehòèlı̨ hǫt'e, eyıts'ǫ dǫzhìı ts'èko gots'ǫ wegǫ̀hłı̨ hǫt'e. Hanìkò t'asìı hazǫǫ̀ Nǫ̀htsı̨ gots'ǫ hǫt'e.  
\v 13 Ts'èko t'asìı kwìhchı-le xè Nǫ̀htsı̨ ts'ǫ̀ yahtı nı̨dè asį̀į̀ eyı ehkw'ı ne? Edegha wedaànıahdè.  
\v 14 Gonàowoò k'ę̀ę̀ dànì k'edets'eetł'ı̨ı̨ sìı wek'èch'a dǫzhìı edekwìghà nedè ayį̀į̀hwhǫ nı̨dè eyı sìı dǫ gıgha į̀į̀zhagohwhǫ hǫt'e.  
\v 15 Ekò ts'èko wekwìghà nedè nı̨dè wet'à dǫ gıghàsǫedı. Wekwìghà nedèe wekwì k'e whela gha weghǫ̀zha hǫt'e.  
\v 16 Dǫ eyı ghǫ ełets'ǫ̀ nàyagehtı ha gı̨ı̨wǫ nı̨dè, goxı̨ gogha eyıts'ǫ Nǫ̀htsı̨ wecheekeè hazǫǫ̀ gıgha nàowo eyıì-le gǫ̀hłı̨ nıìle. 
\s1 Dànì gots'ǫ̀ K'àowo wełèt'è ghǫ shèts'ezhe 
\p  
\v 17 Ayìı naxıts'ǫ̀ haehsı̨ ha sìı ghǫ naxıts'ǫ̀ nezı̨į̀ gohde ha nıìle. Łą̀ą nìahdè nı̨dè ełets'ǫ̀ hoìla hoahtsı̨ zǫ deɂǫ̀atłǫ, ełets'àahdı gha sìı dek'aɂį̀ hǫt'e.  
\v 18 T'akwełǫ̀ǫ̀ dıı haehsı̨ ha dehwhǫ: Naxı̨ Nǫ̀htsı̨ wecheekeè yàahłı̨ı̨ sìı łą̀ą nìahdè nı̨dè, ełek'ę̀ę̀ aahwhǫ-le weghǫ eèhkw'o hǫt'e, segha ehkw'ı agedı lanì.  
\v 19 Naxıta dǫ ełek'ę̀ę̀ nànıgedè ha-le t'ıį̀t'e, hanì-ı̨dè amìı Nǫ̀htsı̨ wınì k'ę̀ę̀ geedaa sìı wek'èhoedzǫ ha.  
\v 20 Łą̀ą nìahdè nı̨dè gots'ǫ̀ K'àowo wełèt'è ghǫ shèahzhe gha aaht'ı̨ nıìle.  
\v 21 Ełexè shèahzhe nı̨dè, ełedanaahɂı̨-le et'ıì shèahzhe. Dǫ mǫ̀hdaa ı̨łaà degeèhdì, eyıts'ǫ dǫ mǫ̀hdaa geèhde.  
\v 22 Naxıkǫ̀ shèahzhe xè aahdǫ ha dìì-le sǫnaà? Nǫ̀htsı̨ wecheekeè dǫ k'ę̀ę̀ gıahtà-le nì, eyıts'ǫ dǫ-teèt'ı̨ı̨ sìı į̀į̀zhagı̨ı̨lı̨į̀ agıahłe ha nì? Eyı ghǫ naxıts'ǫ̀ nezı̨į̀ aehsı̨ ha nì? 
\p  
\v 23 Gots'ǫ̀ K'àowo yatı seghàı̨ɂǫǫ sìı eyı yatı naxıghàehɂǫ hǫt'e: Gots'ǫ̀ K'àowo Zezì k'aodèe tł'aàgį̀ı̨htı̨ toò k'e łèt'è nıìchì,  
\v 24 yek'eèyaı̨htı tł'axǫǫ̀ tàyı̨ı̨zhì gà hadı, “Dıı sezhį̀į̀ hǫt'e, eyı sìı naxıgha adlà hǫt'e. Dıı haaht'ı̨ xè senaahdì nǫǫ̀,” Zezì hadı ı̨lè.  
\v 25 Eyı xèht'eè shègıazhe tł'axǫǫ̀ lıbò neyı̨į̀hgè gà hadı, “Dıı sedoò naxıgha xàı̨tł'ıı sìı wet'à nakenahòdlı̨ı̨ wegòò naxıgha hòèlı̨ hǫt'e. Dıı lıbò wets'ǫ aahdǫ taàt'eè senaahdì nǫǫ̀,” Zezì hadı ı̨lè.  
\v 26 Dıı łèt'è ghǫ shèahzhe eyıts'ǫ dıı lıbò wets'ǫ aahdǫ taàt'eè, gots'ǫ̀ K'àowo nǫ̀ǫtła gots'ǫ̀, dànì gogha ełaı̨woo sìı dǫ gık'èezǫǫ̀ agıahɂı̨ hǫt'e. 
\p  
\v 27 Eyıt'à amìı ekǫ-le hohtsı̨ xè łèt'è yeɂàa eyıts'ǫ lıbò gots'ǫ yedǫǫ sìı Zezì wezhį̀į̀ eyıts'ǫ wedoò k'èch'a hołı̨ı̨ hohtsı̨ hǫt'e.  
\v 28 Amìı, łèt'è yeɂàa eyıts'ǫ lıbò gots'ǫ yedǫ kwe sìı hotıì edınì eyıts'ǫ ededzeè k'aehta welì.  
\v 29 Amìı, gots'ǫ̀ K'àowo wezhį̀į̀ ghǫ hotıì nıwǫ-le xè łèt'è yeɂà eyıts'ǫ lıbò gots'ǫ yedǫ nı̨dè, ekǫ-le eghàlaeda hǫt'e. Dǫ lahot'ı̨-le k'ę̀ę̀ yeghǫ shètı̨ t'à wesınìyaetıì adehɂı̨ hǫt'e.  
\v 30 Haaht'ı̨ ts'ıhɂǫ̀ naxıta gots'ǫ dǫ łǫ nàgetso-le xè eyagı̨ı̨lı̨ı̨, eyıts'ǫ naxıta gots'ǫ dǫ mǫ̀hdaa ełaàgı̨ı̨dè hǫt'e.  
\v 31 Hanìkò ehkw'ı edesınìyats'ehtı nı̨dè Nǫ̀htsı̨ hoìla ts'ǫ̀ gosınìyaehtı ha nıìle.  
\v 32 Gots'ǫ̀ K'àowo gosınìyaehtı taàt'eè ehkw'ı ts'eeda gha hoghàgoetǫǫ̀ at'ı̨ hǫt'e, hanì-ı̨dè dıı nèk'e ts'ǫ dǫ gıxè welǫ whìle ts'ǫ̀ ełaàts'ede gha gosınìyaetı ha-le. 
\p  
\v 33 Eyıt'à sèot'ı̨ı̨, shèahzhe ha łą̀ą nìahdè nı̨dè ełedanaahɂı̨.  
\v 34 Amìı deèhdìı sìı t'akwełǫ̀ǫ̀ edekǫ̀ shèwetı̨, hanì-ı̨dè shèahzhe gha łą̀ą nìahdè nı̨dè ekǫ-le aaht'ı̨ gha naxısınìyaetı ha-le. 
\p Naxıts'àwhıhtła nı̨dè ayìı dàahłe ha sìı ı̨łaà denahk'e naxıts'ǫ̀ haehsı̨ ha. 
\c 12  
\s1 Yedàyeh Nezı̨ı̨ t'asìı wet'à-ats'et'ı̨ı̨ goghàyele 
\p  
\v 1 Sèot'ı̨ı̨, Yedàyeh Nezı̨ı̨ t'asìı wet'à-ats'et'ı̨ı̨ goghàyelee sìı hotıì nezı̨į̀ wek'èahsǫ ha naxeehwhǫ.  
\v 2 Įnę̀ę Nǫ̀htsı̨ k'èahsǫ-le ekò naxıts'ǫ̀ dàgòjàa sìı wek'èahsǫ hǫt'e. Ts'ıɂǫ̀ anaxììdlà t'à nǫ̀htsı̨ eda-le sìı ts'ǫ̀ yaahtı ı̨lè.  
\v 3 Eyıt'à dıı hanaxèehsı̨: Yedàyeh Nezı̨ı̨ dǫdzeè yìı nàdè nı̨dè eyı dǫ, “Zezì ts'ǫ̀ hoìla welè,” hadı hǫı̨lı̨ ha nıìle. Eyıts'ǫ Yedàyeh Nezı̨ı̨ dǫdzeè yìı nàdè-le nı̨dè eyı dǫ, “Zezì sets'ǫ̀ K'àowo hǫt'e,” hadı ha nıìle. 
\p  
\v 4 T'asìı eładı̨ı̨ xàɂaa goghǫ̀zhe hǫt'e, hanìkò Yedàyeh Nezı̨ı̨ ededı̨ et'ıì goghàyele hǫt'e.  
\v 5 La ładı̨ı̨ łǫ xàɂaa ghàlats'eeda hǫt'e, hanìkò gots'ǫ̀ K'àowo ı̨łè zǫ gha eghàlats'eeda hǫt'e.  
\v 6 Goxı̨ hazǫǫ̀ t'asìı ładı̨ı̨ t'à eghàlats'eeda ha goghàhòt'ǫ hǫt'e, hanìkò Nǫ̀htsı̨ ededı̨ zǫ dǫ hazǫǫ̀ t'à eghàlaeda hǫt'e. 
\p  
\v 7 Yedàyeh Nezı̨ı̨ ayìı goghàɂà t'à dǫ xè eghàlaedaa sìı Nǫ̀htsı̨ wets'ǫ dǫ hazǫǫ̀ gıxè sìghà gha at'ı̨ hǫt'e.  
\v 8 Dǫ ı̨łè Yedàyeh Nezı̨ı̨ wedahxà yatı gǫǫzǫ t'à gode, eyıts'ǫ dǫ ı̨łè Yedàyeh Nezı̨ı̨ dahxà t'asìı k'èezǫ wegodıì t'à gode,  
\v 9 eyıts'ǫ dǫ ı̨łè Yedàyeh Nezı̨ı̨ wedahxà wınì nàtso ha weghàhòt'ǫ, eyıts'ǫ k'achı̨ dǫ ı̨łè Yedàyeh Nezı̨ı̨ wedahxà dǫ k'aàt'ıì ahɂı̨ ha weghàhòt'ǫ hǫt'e,  
\v 10 eyıts'ǫ k'achı̨ ı̨łè enıìyah hohtsı̨ ha, k'achı̨ ı̨łè Yedàyeh Nezı̨ı̨ dahxà xàyahtı ha, k'achı̨ ı̨łè ı̨nì dàhòt'ı̨ı̨ dǫ ts'ǫ̀ at'ı̨ı̨ sìı k'èhoezǫ ha, k'achı̨ ı̨łè yatı eładı̨ı̨ t'à gode ha, eyıts'ǫ k'achı̨ ı̨łè yatı ełek'èch'aòt'ı̨ı̨ gha etaehtıı elı̨ ha weghàhòt'ǫ hǫt'e.  
\v 11 Yedàyeh Nezı̨ı̨ ı̨łè zǫ hǫt'e, hanìkò eyı hazǫǫ̀ yeghàlaeda hǫt'e. Hotıì dànıwǫǫ sìı k'ę̀ę̀ edets'ǫ dǫ t'asìı goghàɂà hǫt'e. 
\s1 Gozhį̀į̀ k'e t'asìı łǫ xàɂaa whela 
\p  
\v 12 Gozhį̀į̀ ı̨łè zǫ hǫt'e hanìkò wek'e t'asìı łǫ xàɂaa whela. T'asìı ładı̨ı̨ łǫ wek'e whela kò gozhį̀į̀ ı̨łè zǫ elı̨ hǫt'e. Zezì wexè eyı lanì hǫt'e.  
\v 13 Yedàyeh Nezı̨ı̨ ı̨łè zǫ t'à hazǫǫ̀ gok'ètaìdzǫ hǫt'e, eyıt'à Zezì-Krı wezhį̀į̀ ı̨łè zǫ ts'ı̨ı̨lı̨į̀ ats'ejà. Israel got'ı̨į̀ ts'ı̨ı̨lı̨, Greece got'ı̨į̀ ts'ı̨ı̨lı̨ kò eyı wet'àaɂà-le ajà, eyıts'ǫ edets'ǫ̀ k'àts'ewo, edets'ǫ̀ k'àts'ewo-le eyı hazǫǫ̀ wet'àaɂà-le ajà, goxı̨ hazǫǫ̀ Yedàyeh Nezı̨ı̨ godzeè yìı adlà, eyı wet'à ı̨łè zǫ lats'ı̨ı̨t'e. 
\p  
\v 14 Gozhį̀į̀ sìı t'asìı ı̨łè zǫ wek'e wheɂǫ nıìle, t'asìı łǫ wek'e whela hǫt'e.  
\v 15 Gokè dıı hadı nı̨dè, “Goılà aht'e-le t'à gozhį̀į̀ wets'ǫ aht'e-le,” hadı kò ı̨łaà gozhį̀į̀ ts'ǫ hǫt'e.  
\v 16 Eyıts'ǫ godzıìhkw'ǫ dıı hadı nı̨dè, “Godaà aht'e-le t'à gozhį̀į̀ wets'ǫ aht'e-le,” hadı kò ı̨łaà gozhį̀į̀ ts'ǫ hǫt'e.  
\v 17 Gozhį̀į̀ hazǫǫ̀ godaà zǫ elı̨ nı̨dè dànì ets'eèhkw'ǫ welì? Eyıts'ǫ gozhį̀į̀ hazǫǫ̀ godzıìhkw'ǫ zǫ elı̨ nı̨dè dànì t'asìı ts'ehtsǫ welì?  
\v 18 Hanìkò Nǫ̀htsı̨ sìı gozhį̀į̀ k'e t'asìı ładı̨ı̨ łǫ whelaà ayį̀į̀là, hazǫǫ̀ hotıì dànì ha nıwǫ k'ę̀ę̀ ayį̀į̀là.  
\v 19 Gozhį̀į̀ t'asìı ı̨łè zǫ elı̨ nı̨dè dànì gozhį̀į̀ xè hòɂǫ ha?  
\v 20 Hanì nıìle, t'asìı łǫ gozhį̀į̀ k'e whela hanìkò gozhį̀į̀ ı̨łè zǫ gǫ̀hłı̨ hǫt'e. 
\p  
\v 21 Godaà, goılà ts'ǫ̀ dıı hadı ha dìì, “Nedę kò ehda ha dìì-le!” eyıts'ǫ gokwì, gokè ts'ǫ̀ dıı hadı ha dìì, “Nedę kò ehda ha dìì-le!”  
\v 22 Į̀le hanì nıìle. T'asìı mǫ̀hdaa gozhį̀į̀ k'e whelaa sìı nàtso-le ts'ı̨ı̨wǫ kò wedę ts'eeda ha dìì hǫt'e,  
\v 23 eyıts'ǫ t'asìı mǫ̀hdaa gok'e whelaa wet'àaɂà-le lanıı sìı hotıì nezı̨į̀ wek'èts'edì hǫt'e. Eyıts'ǫ t'asìı mǫ̀hdaa gok'e whelaa sìı wègaat'ı̨ ha-le ts'ı̨ı̨wǫǫ sìı hotıì deɂı̨į̀ ats'ı̨ı̨hwhǫ hǫt'e.  
\v 24 Ekò t'asìı gok'e whela wègaat'ı̨ ha ts'ı̨ı̨wǫǫ sìı nezı̨į̀ wek'èts'edì-le kò t'asanìle. Nǫ̀htsı̨ sìı gozhį̀į̀ k'e t'asìı whelaa sìı ełexè nezı̨į̀ whelaà ayį̀į̀là, eyıts'ǫ ayìı gogha wet'àaɂà-le lanıı sìı wet'àaɂà ayį̀į̀là.  
\v 25 Hanì-ı̨dè gozhį̀į̀ k'e t'asìı whelaa sìı ełek'èch'a aget'ı̨ ha-le, eyıts'ǫ ełèht'eè nezı̨į̀ ełek'ègedì ha.  
\v 26 Gozhį̀į̀ k'e t'asìı ı̨łè daı̨ɂa nı̨dè eyıì-le hazǫǫ̀ wexè dagı̨ı̨ɂa hǫt'e; gozhį̀į̀ k'e t'asìı ı̨łè weghàhodì nı̨dè eyıì-le hazǫǫ̀ wexè gınà hǫt'e. 
\p  
\v 27 Eyı xèht'eè Zezì-Krı wezhį̀į̀ laaht'e, eyıts'ǫ naxı̨ hazǫǫ̀ wezhį̀į̀ gots'ǫ aaht'e.  
\v 28 Nǫ̀htsı̨ sìı t'akwełǫ̀ǫ̀ wecheekeè gıta gots'ǫ edecheekeèdeè gǫį̀hchìı hǫt'e, eyı k'èè nakwenàoɂǫǫ, eyı k'èè dǫ-hoghàehtǫǫ-dǫǫ̀, eyı k'èè enıìyah-hogehtsı̨ı̨-dǫǫ̀, eyı k'èè dǫ-k'aàt'ıì-agehɂı̨ı̨-dǫǫ̀, eyı k'èè dǫ-ts'àdıı-dǫǫ̀, eyı k'èè t'asìı-gha-k'aodèe-gı̨ı̨lı̨ı̨-dǫǫ̀, eyıts'ǫ eyı k'èè yatı-ładı̨ı̨-t'à-gogedee-dǫǫ̀ gǫį̀hchìı hǫt'e.  
\v 29 Dǫ hazǫǫ̀ Zezì wecheekeèdeè agı̨ı̨t'e nì? Dǫ hazǫǫ̀ nakwenàoɂǫǫ agı̨ı̨t'e nì? Dǫ hazǫǫ̀ dǫ-hoghàehtǫǫ-dǫǫ̀ agı̨ı̨t'e nì? Dǫ hazǫǫ̀ enıìyah hogehtsı̨ nì?  
\v 30 Dǫ hazǫǫ̀ dǫ k'aàt'ıì agehɂı̨ ha gıghàhòt'ǫ nì? Dǫ hazǫǫ̀ yatı ełek'èch'aòt'ı̨ı̨ t'à gogede nì? Dǫ hazǫǫ̀ yatı ełek'èch'aòt'ı̨ı̨ t'à gogede gha etagehtı nì? Į̀le ne!  
\v 31 Nǫ̀htsı̨ sìı nàowo denahk'e nezı̨ı̨ naxıghàɂà ha nıwǫ, hotıì naxıdzeè t'à weahwhǫ welì. Eyı nàowo denahk'e nezı̨ı̨ sìı dıì naxıts'ǫ̀ haehsı̨ ha. 
\c 13  
\s1 Ełeghǫnets'eètǫǫ sìı wet'àhoòɂàa-deè hǫt'e 
\p  
\v 1 Dǫ gıyatıì xàɂaa eyıts'ǫ yak'eet'ı̨į̀ gıyatıì t'à gohde kò, dǫ ghǫneehtǫ-le nı̨dè ekìı satsǫ̀ dèekw'ǫ zǫ laehsı̨.  
\v 2 Yedàyeh Nezı̨ı̨ dahxà xàyahtı ha seghàhòt'ǫ nı̨dè, t'asìı deɂı̨į̀ whelaa eyıts'ǫ t'asìı dezhìı hazǫǫ̀ wenıehdì nı̨dè, eyıts'ǫ sıì segha ehkw'ı-ahodı t'à shìh nechàa nàèhdǫ ahłe ha dìì-le, hanìkò dǫ ghǫneehtǫ-le nı̨dè t'asìı ehłı̨ nıìle.  
\v 3 T'asìı hazǫǫ̀ sets'ǫ sìı dǫ-teèt'ı̨ı̨ gıghàehłe eyıts'ǫ sezhį̀į̀ wek'eek'ǫ̀ ha adèhłà kò dǫ ghǫneehtǫ-le nı̨dè t'asìı wı̨ı̨zìı dehnǫ nıìle. 
\p  
\v 4 Dǫ ghǫnets'eètǫ nı̨dè dǫ xè ts'èwhı̨į̀ ts'ı̨ı̨wǫ eyıts'ǫ dǫ ts'ǫ̀ godzeè nezı̨ hǫt'e. Dǫ ghǫnets'eètǫ nı̨dè dǫ ghǫ ts'ohots'eedı-le, edeghǫ xàdahots'edì-le, eyıts'ǫ xàhots'edì-le.  
\v 5 Dǫ ghǫnets'eètǫ nı̨dè dǫ ts'ǫ̀ yedats'ı̨ı̨t'e-le, edeghǫ zǫ nànıts'ewo-le, goınì nàìtło-le, eyıts'ǫ dǫ gots'ǫ̀ ekǫ-le eghàlaı̨dà kò, wenats'edì-le.  
\v 6 Dǫ ghǫnets'eètǫ nı̨dè nàowołı̨ı̨ ghǫ goınà nıìle, hanìkò nàowo ehkw'ıı sìı ghǫ goınà hǫt'e.  
\v 7 Dǫ ghǫnets'eètǫ nı̨dè t'aats'ǫǫ̀ dǫ xè sìghà hots'ehtsı̨, t'aats'ǫǫ̀ gogha ehkw'ı-ahodı, t'aats'ǫǫ̀ edahxǫ welì ts'ı̨ı̨wǫ, t'aats'ǫǫ̀ goınì nàtso ats'ı̨ı̨hwhǫ xè weghǫ nats'et'è-le. 
\p  
\v 8 Ełeghǫnets'eètǫǫ sìı welǫ nèhòkw'ı ha nıìle. Hanìkò Yedàyeh Nezı̨ı̨ dahxà xàyats'ehtıı sìı welǫ nèhòkw'ı ha, yatı ełek'èch'aòt'ı̨ı̨ t'à gots'edee sìı weghǫnats'et'è ha, eyıts'ǫ t'asìı k'èts'eezǫǫ sìı whìle ade ha.  
\v 9 Dıì t'asìı mǫ̀hdaa zǫ k'èts'eezǫ, eyıts'ǫ Yedàyeh Nezı̨ı̨ weyatıì mǫ̀hdaa zǫ t'à xàyats'ehtı,  
\v 10 hanìkò t'asìı hazǫǫ̀ deghàà agòjà nı̨dè t'asìı deghàà-le sìı whìle ade ha.  
\v 11 Chekoa ehłı̨ ekò chekoa lanì gohde ı̨lè, chekoa lanì nànıhwho ı̨lè, chekoa wınì k'ę̀ę̀ t'asìı danıhwho ı̨lè. Ǫhdah whıhłı̨ ekò chekoa wenàowoò wedę ahłà.  
\v 12 Dıì gogha deghàà xègaat'ı̨-le, wet'à daàts'eedaa nezı̨-le yìı k'ets'eet'į̀ lanì. Dıì sìı deghàà wek'èts'eezǫ nıìle hanìkò ı̨daà nı̨dè dànì wègaat'ı̨ı̨ sìı deghàà gogha wègaat'ı̨ ha, ededı̨ gok'èezǫ lanì wek'èts'eezǫǫ̀ ats'ede ha. 
\p  
\v 13 Dıì nàowo taı sìı welǫ whìle ts'ǫ̀ whela ha: gogha ehkw'ı-ahodıı, edaxàts'eedè kanıts'eèɂàa, eyıts'ǫ ełeghǫnets'eètǫǫ. Eyı nàowo taı gots'ǫ sìı ełeghǫnets'eètǫǫ denahk'e elı̨ hǫt'e. 
\c 14  
\s1 Nǫ̀htsı̨ yatıì t'à eyıts'ǫ yatı ełek'èch'aòt'ı̨ı̨ t'à gots'ede 
\p  
\v 1 Ełeghǫnets'eètǫǫ nàowoò k'ę̀ę̀ aahda, Yedàyeh Nezı̨ı̨ ayìı goghàyelee sìı eyı denahk'e weahwhǫ. Yedàyeh Nezı̨ı̨ wedahxà xàyaahtıı sìı eyı denahk'e weahwhǫ.  
\v 2 Amìı Yedàyeh Nezı̨ı̨ dahxà yatı ełek'èch'aòt'ı̨ı̨ t'à godee sìı dǫ ts'ǫ̀ godeè-adı nıìle, hanìkò Nǫ̀htsı̨ ts'ǫ̀ godeè-adı hǫt'e. Dàdıı sìı dǫ wı̨ı̨zìı yenıedì nıìle eyıt'à edets'ǫ ı̨nì t'à t'asìı dǫ yenıedì-le sìı t'à gode hǫt'e.  
\v 3 Hanìkò amìı Yedàyeh Nezı̨ı̨ dahxà xàyahtıı sìı dǫ gınì nàtsoò ayele gha, eyıts'ǫ gıdzeè nàtso xè gıxè sìghà hòɂǫǫ̀ ade gha adı hǫt'e.  
\v 4 Amìı yatıì ełek'èch'aòt'ı̨ı̨ t'à godee sìı edınì nàtsoò ayehɂı̨ hǫt'e, hanìkò amìı Yedàyeh Nezı̨ı̨ dahxà xàyahtıı sìı Nǫ̀htsı̨ wecheekeè gınì nàtsoò agohɂı̨ hǫt'e.  
\v 5 Naxı̨ hazǫǫ̀ yatı ełek'èch'aòt'ı̨ı̨ t'à goahde nı̨dè dehwhǫ, hanìkò eyı wenahk'e Yedàyeh Nezı̨ı̨ dahxà xàyaahtı nı̨dè dehwhǫ. Amìı Nǫ̀htsı̨ yatıì t'à godee sìı yatı ełek'èch'aòt'ı̨ı̨ t'à gode nahk'e dǫ gha wet'àaɂà hǫt'e. Hanìkò dàdıı sìı edegha etaehtı nı̨dè, Nǫ̀htsı̨ wecheekeè gınì nàtsoò agole ha. 
\p  
\v 6 Sèot'ı̨ı̨, yatı ełek'èch'aòt'ı̨ı̨ t'à naxıts'ǫ̀ gohde nı̨dè dànì naxınì nàtsoò ahłà lì? Dàehsı̨ı̨ sìı wek'èahsǫǫ̀ anaxèhłà lenǫsıı, Yedàyeh Nezı̨ı̨ dahxà dàgode ha sìı ghǫ, ayìı wek'èahsǫ ha ghǫ, eyıts'ǫ ayìı dàahłe ha ghǫ xàyahtı lenǫsıı, naxıgha wet'àaɂà ha nıìle.  
\v 7 Wet'à shı̨ ts'eehdıı, dechı̨shì lanıı, eyıts'ǫ tł'ık'eetı̨ı̨ hanıı wedaànıahdè. Eładı̨į̀ dedıì ats'ehɂį̀ lenǫsıı shı̨ dàhòt'ı̨ı̨ agodıı sìı dànì dǫ gık'èezǫ lì? Dànì dèekw'ǫ weghàà shı̨ dàhòt'ı̨ı̨ dedıı sìı wek'èts'eezǫ hǫt'e.  
\v 8 Eghǫǫ-dǫǫ̀ gıkayaetı gha satsǫ̀ dechı̨shì hok'èedzǫ-le dedı nı̨dè, dànì eghǫǫ-dǫǫ̀ ełegegǫ gha sınìgedè welì?  
\v 9 Naxıxè hagǫ̀ht'e lanì. Yatı t'à goahdee sìı dǫ gınıehdì lenǫsıı ayìı ghǫ goahdee sìı gık'èezǫ lì? Ayìı ghǫ goahdee sìı gınıedì-le nı̨dè, ekìı naxıyatıì xàewì hǫt'e.  
\v 10 Dıı nèk'e yatı łǫ xàɂaa gǫ̀hłı̨ hǫt'e, hanìkò yatı hazǫǫ̀ sìı t'asìı ghǫ ahodı hǫt'e.  
\v 11 Dǫ sets'ǫ̀ gode kò weèhkw'ǫ-le nı̨dè segha eyıì-le nèk'e gots'ǫ dǫ eładı̨ı̨ lanì hǫt'e, eyıts'ǫ ededı̨ sı wegha dǫ eładı̨ı̨ laht'e hǫt'e.  
\v 12 Naxı̨ sı naxıxè hagǫ̀ht'e. Yedàyeh Nezı̨ı̨ t'asìı naxıghàɂà ha sìı hòtł'ò weahwhǫ t'à, Nǫ̀htsı̨ wecheekeè ayìı t'à gınì nàtsoò aahłe ha sìı eyı gha nàhǫhoahdè. 
\p  
\v 13 Eyıt'à dǫ yatı ełek'èch'aòt'ı̨ı̨ t'à gode nı̨dè, dàdıì-adıı sìı yet'à dǫ ts'ǫ̀ etaehtı gha yawehtı.  
\v 14 Yatı ełek'èch'aòt'ı̨ı̨ t'à yahtı nı̨dè sets'ǫ ı̨nì yahtıì-adı hǫt'e, hanìkò dàehsı̨ı̨ sìı sınì t'à wenıehdì nıìle.  
\v 15 Eyıt'à dıı haht'ı̨ ha: sets'ǫ ı̨nì t'à yahtı ha, eyıts'ǫ sınì sı t'à yahtı ha. Sets'ǫ ı̨nì t'à ehjı̨ ha, eyıts'ǫ sınì sı t'à ehjı̨ ha.  
\v 16 Naxıts'ǫ ı̨nì t'à Nǫ̀htsı̨ weghàsǫahdı nı̨dè dǫ naxıgıìkw'o-le sìı dànì naxıxè “Hęɂę!” gedı lì? Dàahdıı sìı gık'èezǫ nıìle.  
\v 17 Naxı̨ sìı Nǫ̀htsı̨ ts'ǫ̀ masì dahdı sǫnı kò, dǫ gınıedì-le nı̨dè wet'à gınì nàtsoò ade ha nıìle. 
\p  
\v 18 Naxı̨ hazǫǫ̀ naxınahk'e yatı ełek'èch'aòt'ı̨ı̨ t'à gohde hǫt'e, eyı gha Nǫ̀htsı̨ masì weehwhǫ hǫt'e.  
\v 19 Hanìkò, Nǫ̀htsı̨ wecheekeè gıta whıhda nı̨dè, yatı ełek'èch'aòt'ı̨ı̨ łǫ dǫ gık'èezǫ-le nahk'e, yatı łǫ-lea dǫ gık'èezǫǫ sìı t'à hoghàgeehtǫ ha dehwhǫ. 
\p  
\v 20 Sèot'ı̨ı̨, hòt'a chekoa nàowoò k'ę̀ę̀ nànıahdè-le. Nàowołı̨ı̨ ts'ǫǫ̀hk'e nı̨dè bebìa hołı̨ı̨ k'ègeezǫ-le laaht'e, hanìkò naxınì t'à ǫhdah k'ę̀ę̀ nànıahdè.  
\v 21 Nǫ̀htsı̨ Nı̨htł'è k'e dıı hanì dek'eèhtł'è: 
\mi \qt “Eyıì-le nèk'e gots'ǫ dǫ yatı ełek'èch'aòt'ı̨ı̨ t'à gogedee sìı t'à gıts'ǫ̀ gohde ha, hanìkò ı̨łaà segeèhkw'ǫ ha nıìle,” gots'ǫ̀ K'àowo hadı dek'eèhtł'è.\qt* 
\p  
\v 22 Eyıt'à yatı ełek'èch'aòt'ı̨ı̨ t'à gots'edee sìı dǫ gıgha ehkw'ı-ahodıı sìı gıgha nıìle, hanìkò dǫ gıgha ehkw'ı-ahodı-le sìı gıgha hǫt'e, wet'à nànıgedè gha hǫt'e. Hanìkò Yedàyeh Nezı̨ı̨ dahxà xàyats'ehtıı sìı dǫ gıgha ehkw'ı-ahodıı gıgha hǫt'e, dǫ gıgha ehkw'ı-ahodı-le gıgha nıìle.  
\v 23 Eyıt'à Nǫ̀htsı̨ wecheekeè ełègehdè xè hazǫǫ̀ yatı ełek'èch'aòt'ı̨ı̨ t'à gogııde-le. Dǫ mǫ̀hdaa gogıìkw'o-le, hanì-le-ı̨dè dǫ gıgha ehkw'ı-ahodı-le gota nègı̨ı̨de nı̨dè dàgedı ha sǫnı? Goahsǫ-le aahjà naxègedı ha hǫt'e.  
\v 24 Ekò Yedàyeh Nezı̨ı̨ dahxà xàyaahtı ekìıyeè k'e dǫ wegha ehkw'ı-ahodı-le, hanì-le-ı̨dè dǫ naxık'èezǫ-le naxıgà goyaèhtła nı̨dè, hołı̨ı̨-hohtsı̨ı̨-dǫǫ̀ elı̨ nǫǫ̀ edek'èezǫǫ̀ ade ha, naxı̨ hazǫǫ̀ dàahdı t'à wesınìyaetıì ade ha,  
\v 25 eyıts'ǫ ededzeè yìı ayìı nàehɂı̨ı̨ sìı ghǫ gogedeè-agedı yek'èezǫǫ̀ ade ha. Eyı ts'ıhɂǫ̀ nàgòhge xè Nǫ̀htsı̨ ghàsǫedı ha, hòtł'ò dıı hadı ha, “Xàè Nǫ̀htsı̨ naxıta wheda nǫǫ̀!” hadı ha. 
\s1 Łą̀ą ełexè yats'ehtı nı̨dè ełek'èdaà nezı̨į̀ k'ehots'eɂa ha hǫt'e 
\p  
\v 26 Eyıt'à sèot'ı̨ı̨, łą̀ą nìahdè nı̨dè dıı haaht'ı̨ welì: dǫ mǫ̀hdaa shı̨ t'à gejı̨, dǫ mǫ̀hdaa hoghàgogeehtǫ, dǫ mǫ̀hdaa Nǫ̀htsı̨ ayìı gots'ǫ̀ hadıı sìı dǫ ts'ǫ̀ hagedı, dǫ mǫ̀hdaa yatı ełek'èch'aòt'ı̨ı̨ t'à gogede, dǫ mǫ̀hdaa yatı ełek'èch'aòt'ı̨ı̨ gha etagehtı welì. Eyı hazǫǫ̀ gıghàlaıdà, wet'à Nǫ̀htsı̨ wecheekeè gınì nàtsoò ade ha.  
\v 27 Yatı ełek'èch'aòt'ı̨ı̨ t'à gogede ha nı̨dè dǫ nàke, hanì-le-ı̨dè dǫ taı gogede ha, hanìkò taı weɂǫ̀ǫ̀ gogede ha nıìle. Įłè ełek'èdaà gogede ha, eyıts'ǫ dǫ ı̨łè gogha etaehtı ha hǫt'e.  
\v 28 Etaehtı gǫ̀hłı̨-le nı̨dè dǫ yatı ełek'èch'aòt'ı̨ı̨ t'à godee sìı xàyawehtı-le, hanìkò edınì t'à Nǫ̀htsı̨ ts'ǫ̀ gowede. 
\p  
\v 29 Dǫ nàke, dǫ taı Nǫ̀htsı̨ yatıì t'à dǫ ts'ǫ̀ gogııde, eyıts'ǫ dǫ eyı geèhkw'ee sìı dàhodıı sìı hotıì gıdaànıedè welì.  
\v 30 Eyıts'ǫ dǫ gota whedaa sìı Nǫ̀htsı̨ t'asìı nıedì ayį̀į̀là nı̨dè, dǫ t'akwełǫ̀ǫ̀ gode ı̨lèe sìı nadaèt'è ha hǫt'e.  
\v 31 Hazǫǫ̀ ełek'èdaà Yedàyeh Nezı̨ı̨ dahxà xàyaahtı nı̨dè, dǫ hazǫǫ̀ hoghàgeetǫ ha eyıts'ǫ gıdzeè t'à nàgetsoò agede ha.  
\v 32 Dǫ Yedàyeh Nezı̨ı̨ dahxà xàyagehtı ha gıghàhòt'ǫǫ sìı dàht'e k'e gogede ha sìı edets'ǫ̀ k'ahogedè hǫt'e.  
\v 33 Nǫ̀htsı̨ wexè nàdahoowo nıìle, hanìkò wexè ts'èwhı̨į̀ hòɂǫ hǫt'e. 
\p Kǫ̀ta hazǫǫ̀ Nǫ̀htsı̨ wets'ǫ dǫ łą̀ą ełègehdèe sìı dıı nàowo k'ę̀ę̀ aget'ı̨ welì:  
\v 34 Nǫ̀htsı̨ wecheekeè łą̀ą nègııdè nı̨dè ts'èko gogede ha nıìle. Moses wenàowoò k'ę̀ę̀ dıı hanì dek'eèhtł'èe ne t'à, gogede ha gıghàhòt'ǫ nıìle, k'aodèe gı̨ı̨lı̨ı̨ sìı k'èagı̨ı̨t'e ha hǫt'e.  
\v 35 T'asìı ghǫ dagogeehke ha gı̨ı̨wǫ nı̨dè, edekǫ̀ ededǫǫ̀ dageehke ha hǫt'e. Ts'èko, Nǫ̀htsı̨ wecheekeè łą̀ą dèhkw'ee sìı gots'ǫ̀ gode ha weghǫ į̀į̀zhagohwhǫ hǫt'e. 
\p  
\v 36 Sèot'ı̨ı̨, Nǫ̀htsı̨ weyatıì t'akwełǫ̀ǫ̀ naxıghǫ̀t'ǫ ne dahwhǫ nì? Eyıts'ǫ naxı̨ zǫ Nǫ̀htsı̨ yatıì naxıts'ǫ̀ nììt'ǫ dahwhǫ nì? Į̀le, hanì nıìle.  
\v 37 Naxıta gots'ǫ dǫ nakwenàoɂǫǫ elı̨ nıwǫǫ sìı, hanì-le-ı̨dè Yedàyeh Nezı̨ı̨ gots'ǫ t'asìı nezı̨ı̨ sets'ǫ̀ ajà nıwǫǫ sìı, dıı ayìı ghǫ naxıts'ǫ̀ eehtł'èe sìı gots'ǫ̀ K'àowo wenàowoò hǫt'e, yenıedì welì.  
\v 38 Yets'ǫnıɂà-le nı̨dè Nǫ̀htsı̨ yets'ǫnıɂà ha nıìle. 
\p  
\v 39 Eyıt'à sèot'ı̨ı̨, Yedàyeh Nezı̨ı̨ dahxà xàyaahtı ha weghǫ hòtł'ò aahwhǫ, eyıts'ǫ yatı ełek'èch'aòt'ı̨ı̨ t'à gogede ha gı̨ı̨wǫ nı̨dè nàgıahɂǫ-le.  
\v 40 Hanìkò t'asìı hazǫǫ̀ ehkw'ı weghàlaahda xè ełek'èdaà weghàlaahda. 
\c 15  
\s1 Zezì-Krı naìdà 
\p  
\v 1 Sèot'ı̨ı̨, godı nezı̨ı̨ t'à naxıts'ǫ̀ goıhdee sìı wenaahdì ha dehwhǫ. Eyı godı nezı̨ı̨ sìı naxıgha ehkw'ı-ahodı xè hotıì wek'ę̀ę̀ aahda ha dahwhǫ hǫt'e.  
\v 2 Eyı godı nezı̨ı̨ t'à edaxànaxeètı̨ hǫt'e, eyıts'ǫ eyı yatı naxıghàıhɂǫǫ sìı hòtł'ò yàahtǫ̀. Hanì-le-ı̨dè k'ètł'ǫ̀ naxıgha ehkw'ı-ahodı hǫt'e. 
\p  
\v 3 Yatı sets'ǫ̀ nìt'ǫǫ sìı yatı t'akwełǫ̀ǫ̀ wek'èahsǫ ha naxıghàehɂǫ hǫt'e. Eyı yatı sìı Zezì-Krı gohołı̨į̀ k'èxa ełaı̨wo hǫt'e, eyı sìı Nǫ̀htsı̨ Nı̨htł'è k'ę̀ę̀ agòjà.  
\v 4 Zezì wekw'ǫǫ̀ nìtǫ ı̨lè, eyıts'ǫ taı dzęę̀ k'ehǫǫwo tł'axǫǫ̀ naìdà, eyı sìı Nǫ̀htsı̨ Nı̨htł'è k'ę̀ę̀ agòjà.  
\v 5 Eyıts'ǫ Peter ts'ǫ̀ wègoèht'į̀, eyı tł'axǫǫ̀ wecheekeèdeè ts'ǫ̀ wègoèht'į̀ ı̨lè.  
\v 6 Eyı tł'axǫǫ̀ Nǫ̀htsı̨ wecheekeè sı̨làekw'eènǫ daats'ǫ̀ ełègehdee sìı gots'ǫ̀ wègoèht'į̀. Dǫ gıaɂı̨ı̨ sìı deɂǫ̀atłǫ ı̨łaà geeda, hanìkò gıta gots'ǫ dǫ mǫ̀hdaa ełaàgı̨ı̨dè.  
\v 7 Zezì-Krı dǫ haàtłǫǫ ts'ǫ̀ wègoèht'į̀ tł'axǫǫ̀ James ts'ǫ̀ wègoèht'į̀, eyıts'ǫ wecheekeèdeè hazǫǫ̀ ts'ǫ̀ wègoèht'į̀ ı̨lè.  
\v 8 Nǫǫde t'à sı̨ sı sets'ǫ̀ wègoèht'į̀; sı̨ sììdì k'ę̀ę̀ wecheekeèdeè whıhłı̨ hǫt'e. 
\p  
\v 9 Wecheekeèdeè gha sìı hazǫǫ̀ t'à sı̨ denahk'e dek'aɂį̀ aht'e. Nǫ̀htsı̨ wecheekeè dagı̨ı̨ɂaà agèhłà ı̨lè t'à, wecheekeèdeè ehłı̨ gha xèeht'e-le.  
\v 10 Hanìkò Nǫ̀htsı̨ wesǫnıwǫ ts'ıhɂǫ̀ wecheekeèdeè whıhłı̨, wesǫnıwǫ t'à dǫ eładı̨ı̨ whıhłı̨į̀ asį̀į̀là. Wecheekeèdeè hazǫǫ̀ gınahk'e hòtł'ò eghàlaıhdà, hanìkò sı̨ adehɂı̨ nıìle, Nǫ̀htsı̨ wesǫnıwǫ seyìı eghàlaedaa sìı at'ı̨ hǫt'e.  
\v 11 Eyıt'à sı̨ naxıts'ǫ̀ gohde, hanì-le-ı̨dè wecheekeèdeè naxıts'ǫ̀ gogede, ehk'ę̀ę̀, eyı godı nezı̨ı̨ t'à naxıts'ǫ̀ gots'ı̨ı̨de t'à naxıgha ehkw'ı-ahodıì ajà. 
\s1 Dǫ ełaı̨dèe sìı nagìdà ha hǫt'e 
\p  
\v 12 Zezì-Krı ełaı̨wo gots'ǫ naìdà naxèts'edı nı̨dè, dànìghǫ naxıta gots'ǫ dǫ mǫ̀hdaa, dǫ ełaı̨dèe sìı nagìdà ha nıìle, gedı?  
\v 13 Dǫ ełaı̨dèe sìı nagìdà-le nı̨dè Zezì-Krı ededı̨ sı naìdà-le hǫt'e.  
\v 14 Zezì-Krı naìdà-le nı̨dè k'ètł'ǫ̀ godı nezı̨ı̨ t'à naxıts'ǫ̀ gots'ede, eyıts'ǫ k'ètł'ǫ̀ naxıgha ehkw'ı-ahodı hǫt'e.  
\v 15 Eyı zǫǫ̀-le, dǫ naìdà-le nı̨dè Nǫ̀htsı̨ Zezì-Krı naìdà ayį̀į̀làa weghǫ gots'ı̨ı̨de t'à, Nǫ̀htsı̨ weghǫ dǫ ts'ǫ̀ hots'ets'ì gha goıtà ha ı̨lè. Hanìkò, dǫ nagìdà-le ghǫ ehkw'ı-ahodı nı̨dè, Nǫ̀htsı̨ Zezì naìdà ayį̀į̀là nıìle.  
\v 16 Dǫ ełaı̨dèe sìı nagìdà-le nı̨dè Zezì-Krı ededı̨ sı naìdà-le hǫt'e.  
\v 17 Zezì-Krı naìdà-le nı̨dè k'ètł'ǫ̀ naxıgha ehkw'ı-ahodı, eyıts'ǫ ı̨łaà naxıhołı̨į̀ naxık'e whela hǫt'e.  
\v 18 Hanì-ı̨dè dǫ Zezì gıgha ehkw'ı-ahodıı xè ełaàgı̨ı̨dèe sìı edaxàgı̨ı̨de-le hǫt'e.  
\v 19 Dıı nèk'e ts'eedaa zǫ gha Zezì-Krı edaxàgohtè ha ts'ı̨ı̨wǫ nı̨dè dǫ hazǫǫ̀ nahk'e etets'eèt'ı̨ ats'ı̨ı̨t'e hǫt'e. 
\p  
\v 20 Hanìkò Zezì-Krı ełaı̨wo gots'ǫ hotıì naìdà awììdlà hǫt'e, eyıt'à Nǫ̀htsı̨ wenadąą̀, dǫ hazǫǫ̀ ełaı̨dèe sìı gıta gots'ǫ ededı̨ t'akwełǫ̀ǫ̀ naìdà hǫt'e.  
\v 21 Dǫ ı̨łè wets'ıhɂǫ̀, dǫ hazǫǫ̀ ełaàde hǫt'e, eyıts'ǫ dǫ ı̨łè wets'ıhɂǫ̀, dǫ nagìdà ha hǫt'e.  
\v 22 Adǫ̀ wets'ıhɂǫ̀, dǫ hazǫǫ̀ ełaàde hǫt'e, eyıts'ǫ Zezì-Krı wets'ıhɂǫ̀, dǫ hazǫǫ̀ nagìdà ha hǫt'e.  
\v 23 Hanìkò nàke ts'ǫ̀ ełek'èdaà hòɂǫ agode ha: Zezì-Krı t'akwełǫ̀ǫ̀ naìdà hǫt'e, eyıts'ǫ jǫ ts'ǫ̀ anajà nı̨dè wets'ǫ dǫ gı̨ı̨lı̨ı̨ sìı hazǫǫ̀ nagìdà ha.  
\v 24 Eyı tł'axǫǫ̀-ı̨dè nǫǫde dzęę̀ k'e nèhòkw'ı ha. Eyı dzęę̀ k'e Zezì-Krı, ı̨dòo yat'a k'aodèe hazǫǫ̀ godıhòèhtsı̨ tł'axǫǫ̀ nı̨dè, Nǫ̀htsı̨ Wenàowoò k'ę̀ę̀ hòɂǫǫ sìı Nǫ̀htsı̨-Gotà wetł'aà wheɂǫǫ̀ ayele ha.  
\v 25 Nǫ̀htsı̨ amìı yets'ǫ̀ xànegı̨ı̨ɂaa sìı hazǫǫ̀ goghǫehnè gots'ǫ̀, Zezì-Krı K'àowocho elı̨ ha hǫt'e.  
\v 26 Nàowo wet'à ełaàts'edee sìı Nǫ̀htsı̨ ts'ǫ̀ xànıɂa hǫt'e, Zezì eyı nàowo sìı nǫǫde ts'ǫ̀ yedıhohtsı̨ ha hǫt'e.  
\v 27 Dıı hanì dek'eèhtł'è hǫt'e, “T'asìı hazǫǫ̀ ts'ǫ̀ K'àowo ayį̀į̀là.” Nǫ̀htsı̨ ededı̨ t'asìı hazǫǫ̀ Zezì-Krı wetł'aà whelaà ayį̀į̀làa ne t'à, “T'asìı hazǫǫ̀ ts'ǫ̀ K'àowo ayį̀į̀là,” dek'eèhtł'èe sìı Nǫ̀htsı̨-Gotà ts'ǫ̀ K'àowo ha awèts'edı nıìle.  
\v 28 Nǫ̀htsı̨ t'asìı hazǫǫ̀ Edeza wetł'aà whelaà ayį̀į̀là tł'axǫǫ̀ nı̨dè, Weza sìı, Nǫ̀htsı̨-Gotà ghàdìhtè ha. Nǫ̀htsı̨-Gotà t'asìı hazǫǫ̀ edeza ghàı̨la ekò, weza t'asìı hazǫǫ̀ yetł'aà nayeele ha. Hanì-ı̨dè Nǫ̀htsı̨ sìı ededı̨ zǫ t'asìı hazǫǫ̀ eyıts'ǫ dǫ hazǫǫ̀ ts'ǫ̀ K'àowo ha. 
\p  
\v 29 Dǫ nagìdà-le nı̨dè dǫ geedaa sìı ayìıha dǫ ełaı̨dèe gha gık'ètaìdzǫ welì? Dǫ nagìdà-le nı̨dè k'ètł'ǫ̀ dǫ ełaı̨dèe gha gık'ètaìdzǫ hǫt'e.  
\v 30 Eyıts'ǫ goxı̨ sìı ayìıha t'aats'ǫǫ̀ hoejı̨į̀ edeghàlats'eeda welì?  
\v 31 Sèot'ı̨ı̨, dzę taàt'eè seweè hołè ha lanì. Ehkw'ı anaxèehsı̨, Zezì-Krı naxıgha ehkw'ı-ahodı t'à naxıghǫ sıì sınà hǫt'e.  
\v 32 Kǫ̀ta Ephesus ekǫ tıts'aàdìı wets'àhoejı̨ı̨ lanıı gık'aıhwho hǫt'e. Ekìı dǫ nàowoò zǫ gha aht'ı̨ nı̨dè t'asìı wı̨ı̨zìı dehnǫ nıìle. Dǫ ełaı̨dèe naìdà-le nı̨dè, “Satsǫ ełaàts'ede ha t'à dıì shèts'ıızhe xè ts'ııdǫ̀,” dehsı̨ ha ı̨lè.  
\v 33 Dǫ ts'ıɂǫ̀ anaxegııle sǫ̀ǫ̀. “Dǫ wejıı gıxè aaht'ı̨ nı̨dè, naxınì nezı̨ı̨ sìı wejıì at'į̀ hǫt'e.”  
\v 34 Hòt'a ezhı̨ne k'ę̀ę̀ k'èhoahɂa-le, hołı̨ı̨ hoahtsı̨-le. Naxıta gots'ǫ dǫ mǫ̀hdaa Nǫ̀htsı̨ k'ègeezǫ-le hǫt'e, eyı ghǫ į̀į̀zhaahłı̨ welì. 
\s1 Gozhį̀į̀ dàhòt'ı̨ı̨ t'à nats'ìdà ha 
\p  
\v 35 Hanìkò dıı hasèahdı ha tahkò: “Dǫ ełaı̨dèe sìı nagìdà ha nı̨dè gızhį̀į̀ dàhòt'ı̨ı̨ t'à nagìdà ha?” sèahdı ha sǫnı.  
\v 36 Goahsǫ-le dìì! T'asìı dèè goyìı adlàa sìı ełaı̨wo lenǫsıı dehshe xè eda ha nıìle.  
\v 37 Tł'olà, hanì-le-ı̨dè t'asìı eyıì-le ts'eehshe ha nı̨dè wets'ǫ ı̨t'ǫ̀ dèè goyìı ts'eechı nıìle, wejìì zǫ dèè goyìı ts'eechı hǫt'e.  
\v 38 Hanìkò Nǫ̀htsı̨ sìı weɂı̨t'ǫ̀ dàhòt'ı̨ ha nıwǫ k'ę̀ę̀ xàesheè ayehɂı̨ hǫt'e, wet'à t'asìı dehshee wejìì wetaàt'eè ı̨t'ǫ̀ą dàhòt'ı̨ı̨ xàeshe ha nıwǫǫ sìı hanì ayehɂı̨ hǫt'e.  
\v 39 Hazǫǫ̀ gozhį̀į̀ ełèht'eè nıìle. Dǫ sìı whatsǫǫ̀ gızhį̀į̀ gǫ̀hłı̨ hǫt'e, tıts'aàdìı whatsǫǫ̀ gızhį̀į̀ gǫ̀hłı̨ hǫt'e, yat'a k'edèe sı whatsǫǫ̀ gızhį̀į̀ gǫ̀hłı̨ hǫt'e, eyıts'ǫ łıwe sı whatsǫǫ̀ gızhį̀į̀ gǫ̀hłı̨ hǫt'e.  
\v 40 T'asìı yat'a gha hòèlı̨ı̨ sìı gǫ̀hłı̨, eyıts'ǫ t'asìı dıı nèk'e gha hòèlı̨ı̨ sìı gǫ̀hłı̨ hǫt'e. Yat'a t'asìı whelaa sìı gìdaat'ı̨ı̨ ı̨łè xàɂa hǫt'e, eyıts'ǫ dıı nèk'e t'asìı whelaa gìdaat'ı̨ı̨ ı̨łè xàɂa hǫt'e.  
\v 41 Sa wèdaat'ı̨ı̨ ı̨łè xàɂa hǫt'e, adzęzah eładı̨į̀ k'ę̀ę̀ wèdaat'ı̨, eyıts'ǫ whǫ̀ sı eładı̨į̀ k'ę̀ę̀ gìdaat'ı̨; eyıts'ǫ whǫ̀ hazǫǫ̀ ełek'ę̀ę̀ gìdaat'ı̨ nıìle. 
\p  
\v 42 Dǫ naìdàa dzęę̀ k'e nı̨dè eyı lagǫ̀ht'e ha. Gozhį̀į̀ sìı t'asìı dehshee wejìì dèè goyìı ı̨hjı lade ha, hanìkò nats'ìdà nı̨dè gozhį̀į̀ welǫ whìle ts'ǫ̀ eda ha.  
\v 43 Gozhį̀į̀ ełaàwı nı̨dè weatıgòdlì hǫt'e, hanìkò nats'ìdà nı̨dè gozhį̀į̀ wèdaat'ı̨ ha hǫt'e. Gozhį̀į̀ nàtso-le xè ełaàwı, hanìkò nats'ìdà nı̨dè gozhį̀į̀ nàtso ha hǫt'e.  
\v 44 Gozhį̀į̀ ełaàwıı sìı dıı nèè gots'ǫ hǫt'e, hanìkò nats'ìdà nı̨dè gozhį̀į̀ yak'e gots'ǫ hǫt'e ha. 
\p Eyıt'à dıı nèk'e gots'ǫ gozhį̀į̀ gǫ̀hłı̨ nı̨dè, yak'e gots'ǫ sı gozhį̀į̀ gǫ̀hłı̨ hǫt'e.  
\v 45 Dıı hanì dek'eèhtł'è: “Adǫ̀ t'akwełǫ̀ǫ̀ gots'ǫ ne sìı Nǫ̀htsı̨ edaà ayį̀į̀là,” dek'eèhtł'è. Adǫ̀ nǫǫde sìı ı̨nì hǫt'e, wets'ıhɂǫ̀, dǫ eda hǫt'e.  
\v 46 Yak'e gots'ǫ ne sìı t'akwełǫ̀ǫ̀ ajà-le, hanìkò dıı nèk'e gots'ǫ ne sìı t'akwełǫ̀ǫ̀ ajà hǫt'e, eyı tł'axǫǫ̀-ı̨dè yak'e gots'ǫ ne sìı wexè hòɂǫǫ̀ ade ha.  
\v 47 T'akwełǫ̀ǫ̀ dǫ wehòèlı̨ı̨ sìı dıı nèk'e gots'ǫ ehtł'è t'à hòèlı̨ hǫt'e, hanìkò dǫ nǫǫde ajàa sìı yak'e gots'ǫ hǫt'e.  
\v 48 Dıı nèk'e dǫ hazǫǫ̀, dǫ t'akwełǫ̀ǫ̀ wehòèlı̨ı̨ sìı lagı̨ı̨t'e. Eyıts'ǫ dǫ hazǫǫ̀ yak'e gots'ǫ agı̨ı̨t'ee sìı yak'e gots'ǫ dǫ lagı̨ı̨t'e.  
\v 49 Dıı nèk'e gots'ǫ dǫ t'akwełǫ̀ǫ̀ wehòèlı̨ı̨ sìı wexèht'eè gògaat'ı̨ hǫt'e, eyı lanì dǫ yak'e gots'ǫ ne sìı wexèht'eè gògaat'ı̨ ha. 
\p  
\v 50 Sèot'ı̨ı̨, ehkw'ı anaxèehsı̨, dıı nèk'e gots'ǫ gozhį̀į̀ t'à Nǫ̀htsı̨ Wenàowoò k'ę̀ę̀ hòɂǫ ts'ǫ̀ ats'ede ha dìì hǫt'e. T'asìı ełaàwıı sìı welǫ whìle ts'ǫ̀ edaà awedle ha dìì hǫt'e.  
\v 51 Seàhkw'ǫ, yatı dǫ gha deɂı̨į̀ wheɂǫǫ sìı naxıdaehsı̨ ha: Hazǫǫ̀ ełaàts'ıde ha nıìle, hanìkò hazǫǫ̀ eładı̨į̀ ats'ede ha hǫt'e.  
\v 52 Dechı̨shì nǫǫde dedı nı̨dè kǫ̀-naìtł'ı̨ı̨ lanì eyıts'ǫ godaà nagoxò lanì hǫtsaa eładı̨į̀ ats'ede ha. Dechı̨shì hotıì dedı ha hǫt'e, dǫ ełaı̨dèe sìı welǫ whìle ts'ǫ̀ nagìdà ha eyıts'ǫ goxı̨ hazǫǫ̀ eładı̨į̀ ats'ede ha.  
\v 53 Gozhį̀į̀ ehjı ha sìı wek'èxa gozhį̀į̀ ehjı-le goghǫet'a ha, eyıts'ǫ gozhį̀į̀ ełaàwı ha sìı wek'èxa gozhį̀į̀ ełaàwı-le goghǫet'a ha.  
\v 54 Gozhį̀į̀ ehjı ha sìı wek'èxa gozhį̀į̀ ehjı-le goghǫet'a ha nı̨dè, eyıts'ǫ gozhį̀į̀ ełaàwı ha sìı wek'èxa gozhį̀į̀ ełaàwı-le goghǫet'a ha nı̨dè, dıı hanì dek'eèhtł'èe sìı wek'ę̀ę̀ agòjà hǫt'e, 
\mi \qt “Nàowo wet'à ełaàts'edee sìı weghǫèhnǫ hǫt'e,” dek'eèhtł'è.\qt* 
\mi  
\v 55 \qt “Nàowo wet'à ełaàts'edee sìı k'achı̨ hoehnè hǫı̨lı̨ ha nıìle! Nàowo wet'à ełaàts'edee sìı k'achı̨ wet'à dats'ı̨ı̨ɂa hǫı̨lı̨ ha nıìle!” dek'eèhtł'è.\qt* 
\m  
\v 56 Gohołı̨į̀ k'èxa ełaàts'ede eyıt'à dats'ı̨ı̨ɂa hǫt'e, eyıts'ǫ Moses wenàowoò ts'ıhɂǫ̀ gohołı̨į̀ k'èxa gosınìyaetı hǫt'e.  
\v 57 Hanìkò Nǫ̀htsı̨ masì wets'ı̨ı̨hwhǫ hǫt'e! Gots'ǫ̀ K'àowo Zezì-Krı wets'ıhɂǫ̀ hots'eèhnǫǫ̀ agǫ̀ǫ̀là. 
\p  
\v 58 Eyıt'à sèot'ı̨ı̨, naxınì nàtsoò aahłe. T'asìı wı̨ı̨zìı t'à naxınì nàtso-le awede sǫ̀ǫ̀. Naxıdzeè t'à t'aats'ǫǫ̀ gots'ǫ̀ K'àowo wegha eghàlaahda, k'ètł'ǫ̀ gots'ǫ̀ K'àowo wegha eghàlaahda nıìle, wek'èahsǫ hǫt'e. 
\c 16  
\s1 Nǫ̀htsı̨ wets'ǫ dǫ gıgha sǫǫ̀mba nàahtsį̀ 
\p  
\v 1 Nǫ̀htsı̨ wecheekeè gıgha sǫǫ̀mba nàwhahtsı̨ı̨ sìı weghǫ xàyahtı ha dehwhǫ: Galatıa nèk'e Nǫ̀htsı̨ wecheekeè dàget'ı̨ ha gèehsı̨ı̨ sìı naxı̨ sı haaht'ı̨.  
\v 2 Dzęahta xèhoìwı taàt'eè, hazǫǫ̀ naxıtaàt'eè sǫǫ̀mba dàtłǫ whahtsı̨ı̨ sìı weghàà sǫǫ̀mba whatsǫǫ̀ nìahłe. Eyı sǫǫ̀mba sedawek'èahdì nı̨dè, naxıts'ǫ̀ nèehtła nı̨dè sǫǫ̀mba nàahtsį̀ ha-le.  
\v 3 Dǫ naxıgha nezı̨ı̨ sìı mǫ̀hdaa ààhchı. Naxıts'ǫ̀ nèehtła nı̨dè, enı̨htł'è gıgha eehtł'è gà gıghàehɂah ha, eyı nı̨htł'è weghàà gık'èhoedzǫ ha. Sǫǫ̀mba nàwhahtsı̨ı̨ sìı eyı dǫ gıxè kǫ̀ta Jerusalem ts'ǫ̀ ahłe ha.  
\v 4 Jerusalem ts'ǫ̀ ahde ha segha ehkw'ı nı̨dè sexè agede ha. 
\s1 Naxıgha k'aodèe sìı nezı̨į̀ gıts'ǫ̀ naahɂa 
\p  
\v 5 Macedonıa nèk'e gok'eèhtła tł'axǫǫ̀ nı̨dè naxıts'àhtła ha.  
\v 6 Whaà-lea ts'ǫ̀ naxıxè aht'e ha, hanì-le-ı̨dè xo ghàà naxıxè aht'e ha tahkò. Hanì-ı̨dè t'asį̀ı̨ ahde ha nı̨dè t'asìı t'à sets'àahdı ha dìì-le.  
\v 7 Whaà-lea gots'ǫ̀ zǫ naxıts'àhtła ha dehwhǫ-le t'à, dıì-t'ıì naxeehɂį̀ ha-le. Gots'ǫ̀ K'àowo hanıwǫ nı̨dè łatsaa naxıgà whıhda ha dehwhǫ.  
\v 8 Dıì sìı dzędeè Pentecost gots'ǫ̀ kǫ̀ta Ephesus whıhda ha dehwhǫ,  
\v 9 jǫ la wet'àaɂàa ghàlaehda ha seghàhòt'ǫ t'à. Dǫ łǫ sek'èch'a agedı kò la wet'àaɂàa segha wheɂǫ. 
\p  
\v 10 Tımothy sexèht'eè gots'ǫ̀ K'àowo gha eghàlaeda ne t'à, naxıts'ǫ̀ nììtła nı̨dè, naxıgà wheda gots'ǫ̀ t'asìı wı̨ı̨zìı ghǫ nànıwo aweahłe-le.  
\v 11 Naxıta gots'ǫ dǫ wı̨ı̨zìı t'asìı elı̨-le yı̨ı̨hwhǫ sǫ̀ǫ̀. Ts'èwhı̨į̀ sets'ǫ̀ naweahɂà nǫǫ̀. Hanì-ı̨dè dǫ gıxè eghàlageeda xè wexaehłı ha. 
\p  
\v 12 Sèot'ı̨ Apollos weghǫ dıı haehsı̨ ha dehwhǫ: Gòet'ı̨ gıxè naxıts'àtła ha wèehsı̨ hǫt'e. Dıì naxıts'àtła ha nıwǫ-le, hanìkò wegha hòɂǫ nı̨dè naxıts'àtła ha. 
\p  
\v 13 Sèot'ı̨ı̨, edexoahdı; gots'ǫ̀ K'àowo weghǫ naxınì nàtso welè; t'asìı ghǫ dahjı̨-le, nàahtsoò edeahłe.  
\v 14 Ełeghǫnıahtǫ xè t'asìı hazǫǫ̀ ghàlaahda. 
\p  
\v 15-16 Stephanas eyıts'ǫ dǫ wekǫ̀ nàgedèe sìı Achaıa nèk'e gogha t'akwełǫ̀ǫ̀ gots'ǫ̀ K'àowo ghàdegį̀ı̨laa sìı wek'èahsǫ hǫt'e. T'aats'ǫǫ̀ Nǫ̀htsı̨ wets'ǫ dǫ gha eghàlagı̨ı̨dà hǫt'e. Sèot'ı̨ı̨, dǫ hanıı sìı gık'èaht'e, eyıts'ǫ dǫ hazǫǫ̀ Nǫ̀htsı̨ gha hòtł'ò eghàlageedaa sìı gık'èaht'e.  
\v 17 Stephanas, Fortunatus eyıts'ǫ Achıyus gots'ǫ̀ nègı̨ı̨de ekò sıì sınà ı̨lè. Naxıghaehwho ı̨lè t'à naxıts'ǫ dǫ sets'ǫ̀ nègı̨ı̨dee sìı sınà agòjà.  
\v 18 Sedzeè t'à sınà hogèhtsı̨, eyıts'ǫ naxı̨ sı hanaxegį̀į̀là. Dǫ hanıı sìı nezı̨į̀ gıts'ǫ̀ k'ehots'eɂa ha hǫt'e. 
\s1 Naxıxè sìghà welè 
\p  
\v 19 Nǫ̀htsı̨ wecheekeè Asıa nèk'e nàgedèe sìı, “Naxıxè sìghà welè,” naxègedı. Aquıla eyıts'ǫ Prıscılla, eyıts'ǫ dǫ gıkǫ̀ yatı gha łą̀ą nègedèe sìı, “Naxıxè sìghà welè,” naxègedı.  
\v 20 Nǫ̀htsı̨ cheekeè hazǫǫ̀ jǫ geèhkw'ee sìı “Naxıxè sìghà welè,” gedı. Nàowo degaı k'ę̀ę̀ ełeahts'į̀ xè, “Nexè sìghà welè,” ełèahdı. 
\p  
\v 21 Sı Paul, xàè sılà t'à dıı yatı naxıts'ǫ̀ eehtł'è hǫt'e. 
\p  
\v 22 Amìı, gots'ǫ̀ K'àowo ghǫneètǫ-le sìı wexè hoìla welè. Gots'ǫ̀ K'àowo, gots'ǫ̀ anaąde! 
\p  
\v 23 Gots'ǫ̀ K'àowo Zezì naxıxè sǫnıwǫ welè. 
\p  
\v 24 Zezì-Krı wexè hazǫǫ̀ naxıghǫneehtǫ hǫt'e. Amen.