\id TIT  - Dedua NT [ded] -Papua New Guinea 2005 (DBL -2014) 
\h TITO 
\toc1 Paurongo Tito Yeac Kibi Ohoec 
\toc2 Tito 
\toc3 Tit 
\mt2 Paurongo  
\mt1 Tito Yeac Kibi  
\mt2 Ohoec  
\c 1  
\p
\v 1 Ni Pauro, Anutuac wanacngic nga Yesu Kristoac aposoro. Anutuac meisingfora yeni yeac faka nga sing fora negensinggema negentegecgecdeac fainuec.  
\v 2 Yoac imocngo kekecseri meficgeude, imoc negensinggedimbe. Anutu memengerecnina yearu ikoc mong mi fede, yeng hanac hanaheaunacngoc kekecseri menideac enarango deseriec.  
\v 3 Anu yengena nasoya hau yoara didiu ngicngac faiyemmeu dekperagigec, imoc debadeac fainuec.  
\v 4 Tito, negen negensinnu medacyombonna, ni kibi yomoc gearu faiduae. Anutu Manggac nga memengerecnina Yesu Kristo yerearunac danggunuc nga ruaengo gegoc febeso.   
\p
\v 5 Ua noboha feec, imoc mesinadeac negemma Kreta nucfu waguba tacnec. Amma ua areng edzacguai, imoc modacma taong fekendaesoc, imohai kemma kpebunggac enara meisingyunuma uayoac yemmebesena.  
\v 6 Ngic mongngo dindingac kecma ngac mocguac ewea kecbeso. Ye nambaracfora negen negensingnginagoc kecdae amma yoackpekpe me ihoc bahoc kekec, yoacsiducngina ifia mong mi febeso. Ngic ifia yeng enara naric anude.  
\v 7 Imoc yofiac, kpebunggac enara ye Anutuac wiac garenggeude, imocac yeng ngic soronga kecbeso. Nga ye yengenaac negenu engena mi ambeso. Amma ye ngic gerea mi ambeso. Ye waing doku nema ubasufu ngic anu mi ngereeude. Ye yarengic mi ambeso amma kichodung faka mi mekecbeso.  
\v 8 Yeng ngicngac ama heiyemmekecbeso amma faka nga angammeme gombunga, imocac songo negembeso. Fakaya nomana ambeso amma dindingac nga kpetiac kecma fakaya nga kekeha garengemebeso.  
\v 9 Nga yoac fora edekpou aning, yoac imoc seria mekecbeso. Ifi amma ngicngac sing dindingac kpouyemmema ubangina midiude. Nga yoacnina kpeandae, yeneac yoac negen negentegecgoc merengyemmeu kucngina mabeso.   
\p
\v 10 Ngic enarafocnginaac bageu kekec waandae, ngic ifia homacngo kecdae. Yeni yoackpekpe amma yoac onea deandae amma ngicngac ogofocngina ikocfu wangecyunuandae. Nga ngic sebi tosangina herecgegec, yenennoc faka ifia angkecdae.  
\v 11 Ngic ifia yeneac enac medzickebesonga. Yenennoc dzofinactoa ikocfu meficgegecdeac yoac dedesifucgoc edekpou ayemmegecde. Ayemmegec ama areng goa hafoangoc tohoma manganegecde.  
\v 12 Kreta ngic yenang kpefing ngic mongngo yenanggac yofi deec, “Kretangic yeni nasoya nasoya ikoc angkecdae amma yaka ondzonggboc nekecma oyong kecma kateyang mangana isoc kecdae.”  
\v 13 Yeac yoac imoc fora, imocac yeni negen negensingngina mengerema sirihau anggecdeac nonosaeng seria edeyunubesena.  
\v 14 Amma yudangic yeni nemusiduc goa dema singyoac ngicfunac meserima yoac fora wama ngadeheandae. Yeni yoac ifi mi negembisia, imoc seriangoc edeyunubesena.   
\p
\v 15 Nga ngicngac kopocsicngina kpac kecdae, yeneac kekecfu wiac sasawa kongaha feude. Nga ngicngac goa bic manganema kongaha mi andae amma negen negensingnginagoc mi kecdae, yeneac negen negentegec nga herenegen negengngina momocngoc manganeu wiacngina kongaha mong mi feude.\f + \fr 1:15 \ft Paurongo dede yaka neneac kpaea mong mi fede. Goa yeneng ine degec, yaka goa imoc kpaeagoc. Mareko 7:19 Roma nadung 14 nga Sesememe nadung 11-15 imocac hania nga negen negeng ihai oho ohoya fede.\f*  
\v 16 Yeni Anutu negemmidae, imoc enacnginangosac deficgegecde nga fakanginango ine ye busic kpemigecde. Fakangina mangana imocac amma urumbeso anemmede. Yeni yoac kpekpeareng kecma wiac mong gombunga anganggac siric mi andae.   
\c 2  
\p
\v 1 Yoac gombunga nga dindingac fede, ge imoc modacma yofi kpouyemmebesena.  
\v 2 Ngic yada yeni nomana kecma garengemema fakangina eweheiheigoc mekecbisia. Nga yoac yofi edeyununa, yeni negen negensingngina garenggema ngicngac heresongogoc hoangyunuma modzotitia kpac Kebuac ua mebisia.  
\v 3 Nga ngac yada yeni ifingoc faka nga angammemenginaac arennu ngicngac kpetiac siricfu kecbisia, imoc kpouyemmebesena. Nga yeneng enacfu faifai mi ambisia amma waing doku nene, imocac ebicfu mi kecbisia. Wiac gombunga fede, ngeni imoc ngicngac ogofocngina kpouyemmebisia.   
\p
\v 4 Imocac ngac naroang ewefocnginagoc yofi kpouyemmebisia, Yeni ewefocngina nga nambaracfocngina heresongogoc hoangyunuma  
\v 5 garengemema kpetiac kecbisia. Amma yeni ama uangina negen negenggoc nga ubangerecgoc mema kecma ewefocngina yeneac yoac tofohobisia. Ifi anggec ngic mongngo Anutuac yoac naric mi demanganeude.  
\v 6 Ge sebigbori ngic ifingoc garengemegecdeac negen negengngina midima edeyunubesena.  
\v 7 Amma wiac sasawau geanggaoc angammemega gombungangoc kecma sirihau anna modacgubisia. Ge kpoukpouga mekecma eweheiheiagoc kecma yoac fora kpouyemmena.  
\v 8 Nga ngabafocga yeni gamenginagoc namma geac yoac mong mi megecdeac ngicngac ubadzidzigaunac yoac memefihagoc edeyunuma kecbesena.   
\p
\v 9 Wanac ngicngac mingingfocnginagoc kecdae, yeni mingingfocngina yeneac yoac sasawa tofohogecdeac imoc dederecge ayemmebesena. Nga yeni mingingfocngina yeneac yoac turunga mi merengyemmebisia. Amma yeni mingingfocngina yeneng negengyemmegec ngereeudeac uangina mekecbisia.  
\v 10 Yeni ine mingingfocngina yenearunac wiacbisic mong heikpesia kpac eng mi mekembisia, kpac. Yeni ua sasawa mekecma yoac modac modac ngicngac ambisia. Amma yeni faka ifia anggec Anutu memengerecninaac kpoukpouyoac imoc ngicngac yeni ubangerehagoc negenggecde.   
\p
\v 11 Anutu engenatoa yeac wosoefacngo ngicngac sasawa yenearu fingectegeru komoc kpegecdeac memengerec meficgeyemmeec.  
\v 12-13 Ye nga memengerecnina Yesu Kristo, yereng kuc nga kibikperagiau hama fingectegerecde, imocac amma kenehaac tomai kecdimbe. Ifi kecmina Anutuac wosoefacngo metinnunuu yofinenggac bangectoa bangec yomocac faka nga songo ngadehema kekecnina garenggema sing dindingac modacma Anutu eweheimima kecdimbe.  
\v 14 Anu Yesu Kristongo singyoac kpekpe arennunac yungecnunuudeac yengenaoc ngabafora maringinau faiemeec. Nga nenang yengena ngicngac amma kpetiac kecma ua gombunga mamangkima menideac faka imoc anec.   
\p
\v 15 Ge yoacna imoc mema dederecge ayemmema ubangina midibesena. Ge yoac sasawa imoc kuc genggena, imocac sirihau edeyunubesena. Nga ngic mongngo geac negenu mamea mi ambeso.   
\c 3  
\p
\v 1 Ge yoac yofi heigboriyemmena, ngicngac yeneng gawamangfocngina yeneac yoacngina negemma tofohoma ua gombunga megecdeac nasosoc efaima kecbisia.  
\v 2 Amma yeni ngic me ngac mong demanganegecde, imoc mi ngereeude, kpac. Yeni deendema mi amma yumea kecma ngicngac yeneac ebic negentegecma ubangerec faka ayemmedacbisia.  
\v 3 Nga nenang ifingoc warac negen negentegecgoc mi kecma yoac kpeni goa yeneng ikocfu wangecnunugec sing segeing. Amma bangecac hensongo nga negensongo hania hania imocngo witicnunuec. Nenang herebugoc nga ogo yeneac keracmanganggoc kecma ubango ukuemeing.  
\v 4 Anu Anutu memengerecnina, yeac danggunuc nga ubaefacngo didiu fingectegeru  
\v 5 yeng dzuacnunuu Tiri Asungo ua meu fingec fingec gboria fingering. Ye ua gombunga meinggac amma mi mengerenunuec. Ye nenanggac ubamangang negemma mengerenunuu komoc kpeing.  
\v 6 Anu yeng memengerecnina Yesu Kristo yeac amma Tiri Asu ebiriangoc kpakenemmeec.  
\v 7 Kpakenemmema wosoefahaac amma dindingac denemmeu kecdimbe. Amma maridzominnina kekec wisic wisickea kpac, imoc menideac negensima tomai kecdimbe.  
\v 8 Yoac imoc fora yombong.  
\p Yoac imoc kucgoc edekpou ayemmenadeac negenduae. Ifi anna ngicngac Anutu negensinggema kecdae, yeneng faka gombunga isinggema imoc anggecdeac homac ayemmeude. Ua ifia imoc gombunga nga ngicngac yeneac memeficngina anude.  
\v 9 Ngicngac goa yeni yoac siriha kpac engemmama deandae amma esangabo yeneac kisic kpema dedeseriac yoac goaac yoacngina engemmama anu ngaba angandae. Geng ine yoac ifia negemma ngadehebesena. Yoac ifia imoc memefiha kpac nga imocngo fora mong mi meficgeude.  
\v 10 Gurunegic ngic mongngo hau naso mocgu nonoyoac edena mi negenu edena atac yohockang ambeso nga yoacga mi negenudeu wana tembuha kecbeso.  
\v 11 Ngic ifia ye sing segema kopocsic meficgema yengenaoc yoacfu faiemeude.   
\p
\v 12 Ni Atema me Tikiko gearu sueba hau naso mi wama nearu Nikopori taonnu bic habesena. Ni kianomang nasou ihai kecbadeac bic negensiai.  
\v 13 Aporo nga desi desi ngic kpara Dzena yeri singgac wiac mong mi obohoecdeac ge memefic seriangoc ayecmebesena.  
\v 14 Anu ngicngacfocnina uaac fora mi meficgebauac yeneng ifingoc ngicngac ebicngina hemma faka gombunga mema meficyunugecdeac sing kpouyemmena negenggecde.  
\v 15 Ngicngac nigoc kecdimbe, yeneng wenacngerecngina gearu faigec hade. Nga ngicngac Anutu negensinggema neneac songo negendae, yeni wenacngerecnina edeyununa. Danggunucngo ngeni sasawa ngenearu febeso.