\id PSA  - Dedua NT [ded] -Papua New Guinea 2005 (DBL -2014) 
\h MITIYEGEC 
\toc1 Mitiyegec 
\toc2 Mitiyegec 
\toc3 Mit 
\mt1 Mitiyegec  
\c 1  
\ms1 MITIYEGEC KIBI 1  
\mr Mitiyegec 1–41  
\s1 Faka yohockang  
\p
\v 1 Ngic goa yeni Anutu ngadehema mangana megecdeac ayemmeu ngic mong ye imoc wama yeneac dederecgeyoac mi modacande, me ngic kopocsicgoc yeneac sinnu mi kengande, nga ye desusuicngic, yeneac botucfu naric mi tarude, ngic ifia ye kenehagoc.  
\v 2 Ye Anutuac dedeseriyoacac songo negemma hadzing toforec imoc hennegeng amma negengising angkecde.   
\p
\v 3 Ngic yeneng doku eacdaeu ic mong homecgec nasoya hau fora amma maria mi dzanggeande, mong ye siriha imocacsoc kecma wiac sasawa angande, imoc forayagoc anu ngereeude.   
\p
\v 4 Ngic Anutu ngadehema mangana megecdeac ayemmeande, yeni ngic dindingac, yeni isoc kpac. Firangngo padi sebera homemea mefiranggeande, yeni ifia isoc.  
\v 5 Imocac ngic mangana yeni Anutuac yoacfu namma naric mi serigecde. Yeni kopocsicmemengo dindingac yeneac kpebunnu Anutuac kicfu mi serigecde.  
\v 6 Anutungo ngicngac dindingac yeneac sing hennegeng amma garengyunuude. Nga ngic Anutu ngadehema mangana megecdeac ayemmeande, yeni ine kpac anggecde.   
\c 2  
\s1 Meising ngictau  
\p
\v 1 Foracngoc, bangec monnunac ngicngac Anutu mi negemmidae, yeneng faka mangana anggecdeac yoac dedzege andae nga ngiha ngiha yeni negen negeng ua mema kpedzongemeandae.  
\v 2 Bangecac ngictau yeni efaigec ngic enara uayoacnginagoc, yeni kpeturanggema \sc KEBU\sc* memagecde. Nga yeng ngic meisinggema kerecdokungo nadzicmiec, ye ifingoc memagecdeac yoac yofi deandae,  
\v 3 “Yeri sengngo witicnunuoc, nenang imoc herecgema rekongngirango mendannunude, imoc merecgema ukubisina.”   
\p
\v 4 Ngic kurumenga kurumenga, imohai kecde, ye dzomorede. \sc KEBUNGO\sc* yenemma detenic ayemmema  
\v 5 yoac ngabayagoc deu herebuyango kengec meficgeyemmema yofi deude,  
\v 6 “Foracngoc, ni ngictauna neac Siong tiki kpetiacfu bic faiba tacde.”  
\v 7 \sc KEBUNGO\sc* yoac desima neac deec, imoc dekperagiba, yofi edenuec, “Ni yagucnoc megudua. Ge medacna nga ni geac Mangga.  
\v 8 Ge wiac gembadeac kpesinenna ni ngicngac bangec monnunac desigemba yeneng maridzomingga anggecde. Bangec tegia fekende, yeni sasawa geac anggec geng mingingngina annade.  
\v 9 Ngictauyasuga aiengngo memea mekecnec, ge imoc mema ngicngo enang kpedzameandae, ifi isoc yasugango kpedzameyununade.”   
\p
\v 10 Imocac ngictau ngeni yomoc negensibisia. Bangecac enara uayoacnginagoc kecdae, ngeni goroyoac yomoc negemma garengemema kecbisia.  
\v 11 Ngeni \sc KEBU\sc* kengecgoc kingang kpemima dzonong fede fedegoc desogai ammibisia.  
\v 12 Medac ye herebu bic angkecde. Yeng ngaba angemmeu ngeni sinnu manganema kpac ambauac haniau ngonducnema titikokoc ammibisia.  
\p Ngicngac yeac hoannu sufuma kecdae, yeni kenecnginagoc.   
\c 3  
\s1 Ngicngacfora garengyunuude  
\d Dawidingo medaha Absaronggac kicfunac worama yegec yofi heiec.  
\p
\v 1 O \sc KEBU\sc*, ngic ngabafocna yeni homac yombong nga ngic homacngo yacma nubeso andae.  
\v 2 Ngic homac yeneng neac yofi deandae, “Anutungo ye ebicfunac naric mi mesiude.” \it Selac\it*   
\p
\v 3 O \sc KEBU\sc*, gennoc oronnuma kasona annec. Geng kuc nga kibikpergiagoc ambadeac anengkecma orucna memiacma meserinukecnec.  
\v 4 Ni \sc KEBUARU\sc* seria kiacba yeng kpetiac tikiyau tacma yoacna turunga merennenude. \it Selac\it*   
\p
\v 5 \sc KEBUNGO\sc* nanggenuude, imocac ni mafema monggoc yacbade.  
\v 6 Ngic teng taoseng nga noc yeneng habuya habuya kpedzucnema noboc nobocnac hama nubeso oronnugec ni yeneac mi kengecnuude.   
\p
\v 7 O \sc KEBU\sc*, ge hama ebicfunac mesinuna. Anutuna, ge ngabafocna ngebacngina kpedzamema manganameme enacngina kpemoronggena mabeso.  
\v 8 \sc KEBU\sc* ye ebic mesi mesi mingina. Kebu, ge ngicngacfocga kenecnununa. \it Selac \it*   
\c 4  
\s1 Makpekpea yeneac nunumu  
\d Yegecgareng yearu. Gitakurere nga noc kpema yegec yomoc heibesonga. Dawidingo mitiyegec yofi heiec.  
\p
\v 1 O Anutu, ge dindingac kekecna, ni kpacguba ge kpakpacna negemma turunga merennenna. Ebicfu ubaebic meficgeba geng titing meficgenenna kekecna ngereeu naric kefai. Ge wosoefac anemma nunumuna negenna.   
\p
\v 2 Ngicac medacfora, ngeni neac eweheihei kekec heimeremma desofoc anengandae, imoc naso dafiguc angkecgecde? Ngeni yoac sicsauc foraya kpac, imocac songo negemma ikocac sing meficgegecdeac ua meandae, ngeni imoc naso dafiguc angkecgecde?   
\p
\v 3 \sc KEBUNGO\sc* yengena enac tofoc tofohongic bic segereu yengena areng ande, ngeni imoc negembisia. Ni \sc KEBU\sc* kpacba yeng ubaudumenna negenude.   
\p
\v 4 Ngeni herengina buu kopocsic mi meficgebisia nga fefenginau fema ubanginau wiac negensima waicke febisia. \it Selac\it*   
\p
\v 5 Ngeni sese sirihau meficgema faima \sc KEBU\sc* negenserima kecbisia.   
\p
\v 6 Ngicngac homacngo yofi deandae, “Wiac gombunga edzacnunugecdeac anemmede. O \sc KEBU\sc*, ge kicmesugaac kperagingo nerarannununa.”  
\v 7 Ngic goa yeni semeng uanginau wit nga waing gboria efea kpac fingeru sogaigecde anu geng sogac sogai herenau fainec, imocngo ine yeneac ubangerec ferahade.  
\v 8 O \sc KEBU\sc*, geng onggonnuna ruaegoc kecbadeac ruaegoc fefenau mama gau febade.   
\c 5  
\s1 Anutu ye memeficna  
\d Yegecgareng yearu. Kungac fima heibesonga. Dawidingo yegec yofi heiec.  
\p
\v 1 \sc KEBU\sc* ge kedzac faima yoacna negenna nga asoringa anende, imoc negensina.  
\v 2 Ngictauna nga Anutuna, ni numugenduaeac kedzac kpena nga meficnunadeac kpacguba ge kpakpacna nga enacudumenna negenna.  
\v 3 O \sc KEBU\sc*, ni asoacngoc kpacguba enacudumenna negengannec nga asoacngoc sesena mengerema gearu faima tomai kecbade.   
\p
\v 4 Anutu, geng ngic ngadeguma mangana megecdeac ayemmeande, yeneac ubangerec mi negennec nga ngic mong ye faka mangana hoanggeande, yeng gegoc naric mi kefude.  
\v 5 Ngic yoackpekpe yoac homac osoandae, yeni geac kicfu naric mi hama nanggecde. Ge yarengic ubango ukuyunudacma wayununade.  
\v 6 Geng ngic ikocyoac deandae, yeni kpetotieyununa kpac anggecde. Nga ngic ogofocngina kpebucyunuma sac hembeso ayemmeande nga ogofocngina tobangyunuandae, ngic ifia \sc KEBUNGO\sc* ubango wayunuude.   
\p
\v 7 Geng yoac dedzege amma imoc modackecnec. Imocac ni amagau erema kicna kpetiac womonggau fima eweheiheigoc fafoc heigemma numugembade.  
\v 8 O \sc KEBU\sc*, ni ngabafocna kecdaeac geangga faka dindingacfu hesicnuma singga mesorongainenna tima kembade.   
\p
\v 9 Yeni enanginau yoac fora mong mi fede nga herenginau ogofocngina memanganeyunugecdeac negen negensac fede. Yeni ubangina imoc kicsere angge anggea nga nedzarangnginango yoac deandae, imocngo ngicngac kerec ayemmema manganau faiyunugecde.  
\v 10 O Anutu, ge ngic ifia yoacfu faiyunuma kopocsicnginaac turunga yemmebesena. Yeni yenaoc yoac goa dzegegecac yoac imocngo memayunubeso. Yeni singyoac kpekecgec homac andeac kporacyununa yeni ngadeau kemema kecbisia. Yeni yoacga kpegec, imocac ge memayunubesena.  
\v 11 Ngicngac hoanggau hama sufuma kecdae, yeni sogac sogai meficgeyemmema ubangerec ayemmena nasosoc ubangerecac yegec heikecma sogac sogaigoc kecbisia. Geng orongyunuma onggongyununa. Ge ifi anna ngicngac yeneng kpacgaac songo negemma geac negenggec engena anu sogaigecde.  
\v 12 \sc KEBU\sc*, geng ngic dindingac kenehema gombunga ammina imocngo mariku isoc kasoya anude.   
\c 6  
\s1 Kebu, ge mengerenuna  
\d Yegecgareng yearu. Gitakurere nga noc kpema sheminic uba modacma heibesonga. Dawidingo mitiyegec yofi heiec.  
\p
\v 1 \sc KEBU\sc* ge ngaba amma ngabasiricfu yoac mi anenna amma herega buu numeme mi anenna.  
\v 2 O \sc KEBU\sc*, ni kucna kpac anu homebeso anduae nga kengec amma dzononna fededeac neac ubaga manganeu sebina mengerena.  
\v 3 O \sc KEBU\sc*, ni ongana kengectoa meficgema ebirima kecdeac ubaebicna bic meickenadeac tomai kecduae.   
\p
\v 4 O \sc KEBU\sc*, ge dzigene hama kekecna ebicfunac mesina. Ge yoac dedzege amma imoc modackecnecac ebicfunac mesinuna.  
\v 5 Homecfu kemegec, yeni ge mi negensigugecde nga mong ye homec amau kemema fede, yeng ge naric mi dengereguude.   
\p
\v 6 Ni asoringa anengkefu kucna kpac ande. Ni tofocnacsoc kiacba kickumana dokutoa isoc mama heifefena heiude. Amma ni homac kiacba kickumanango fefena meu boroc boroc yombong angande.  
\v 7 Ni ubahodunnagoc kecduaeac kiacba kicna ngopic kpede nga kiacba ngabafocna sasawa ebic meficgenenggec kicna kuha kpac ande.   
\p
\v 8 \sc KEBUNGO\sc* kedzac kpema neac kiac ubamangang bic negendacac manganameme ngic ngeni sasawango wanuma meickegec.  
\v 9 Ni ubamangang amma \sc KEBU\sc* dekpesi ammiba imoc bic negendac. \sc KEBU\sc* ye nunumuna negenu ngereede.  
\v 10 Ngabafocna yeni gameyunudaru homac yombong kengecyunuu fakanginaac amma gameyunuu wanuma bic yombong woragecde.   
\c 7  
\s1 Ngaba witiau kefec  
\d Yegec yomoc Shiggaiong uba modacma heibesonga. Dawidingo Benyaming ngic mong kpara Kushiac yoac negemma yegec yofi \sc KEBU\sc* heimiec.  
\p
\v 1 O \sc KEBU\sc*, Anutuna, ni geac hoannu hama sufuduae. Ngic yeni sasawango kisannuma menubauac onggonnuma ebicfunac mesinuna.  
\v 2 Ngic mongngo yeneac mariunac naric mi mesinuudeac raiong yangtoa isoc sorienacnginango sebina merecgegec kapuc kpeu menuma kembauac geng onggonnuna.   
\p
\v 3 O \sc KEBU\sc*, Anutuna, ni faka mangana dedaemoc anaiu me marinango ngicngac goa memanganeyunubai dede.  
\v 4 Me ngic mongngo nigoc ruae kecmanu mangana hoanggema ammibai me ngabangicnaac finac eng wangecma mekembai dede  
\v 5 ngabangicna geng negemmana kisannuma naric menubeso. Ye kpebucnuudeac ubana tindziru onganango bangecac gotennu febeso. \it Selac\it*   
\p
\v 6 O \sc KEBU\sc*, ge ngaba amma yacna. Ngabafocna yeni herengina buu geng yacma memayunubesena. O Anutuna, kopocsicac turunga fingecyemmeudeac deserinecac amma ge gborima yacma meficnuna.  
\v 7 Ngicngac yeni kicgau hama kpeturanggegec ge wi kurumennu ngictau tatacgau tacma garengyununa.  
\v 8 \sc KEBUNGO\sc* ngiha ngiha sasawa faka angammengina isinggedacma foraya deude. O \sc KEBU\sc*, ni dindingac kecma kopocsic mong mi meficgeai. Ge imocac faka angammemena yoacfu isinggema foraya dena faka dindingac meficgenenna firang ambesare.   
\p
\v 9 O, gennoc Anutu dindingac amma ngicngac negen negengngina nga herenginaac hengising mingina. Geng ngic mangana megedeac ayemmeande, yeneac yarefakaac kpae heina kpac ambeso nga ge ngicngac dindingac tatacngina meficgema faiyununa ihai seria tacbisia.   
\p
\v 10 Anutu Kuctoa mingina, ye neac kasona. Yeng ngicngac hereninau ikoc nga hamangec mong mi fede, nenang ebicfunac mesinunuude.  
\v 11 Anutungo ngicngac faka angammemengina yoacfu isinggema faka dindingac modacma foraya deude. Amma ye wenacsoc mangana hemma modzea tide.  
\v 12 Ngic mong ye ubea mi merendeu Anutungo soea dzumuma tebea kpesaiudeac efaiude.   
\p
\v 13 Ye kpebucyunuudeac dzikacac iwaiya mengerema tebemedaha gerec borangagoc memengere bic andac.  
\v 14 Negenggec, ngic imoc ye wiac mangana kpenanggema ebicngo tobangyunuudeac heregoc kecma wiac hereau meficgeu imohacnac fingerude, imoc kpara ikoc.  
\v 15 Ngicngac botacfu meyunuudeac negemma yeng teng keme kemea anudeac bangec homac usuma yengenaocngoc makpema tengau kemeude.  
\v 16 Ye tobangyunuudeac ebic arenggema ngicngac ogofora ayemmeu ebic imocngo dzigene hama yengena oruhau heiude. Nga ye ogofora memanganeyunuu faka imocngo yengenaaru dzigenema ye memanganema oruhau heiude.   
\p
\v 17 \sc KEBU\sc* ye dindingac, imocac ubangerec ammibade. Ni yegec heima \sc KEBU\sc* Kuctoa minginaac kpac kuneng heiwayong memibade.   
\c 8  
\s1 Ge kpacga Engenatoa  
\d Yegecgareng yearu. Gati yeneac musiwiac kpema heibesonga. Dawidingo mitiyegec yofi heiec.  
\p
\v 1 O \sc KEBU\sc*, ge Kebunina, bangectoa bangec fekendeu kpacga Engenatoa yombong feude. Ge kurumenga kurumenga feracyunuma kucga kibikperagiagoc wi yombong faina fede.  
\v 2 Ge nambarac kapia nga sabac namuu kecdae uayoac yemmena yeneng geac kpac kuneng heiwayong memigec faka kuhagoc fingerude. Ge ngabafocga kecdae, yeneac amma ifi annec. Nambarac yeni ifi anggec ngabafocga nga ngicngac goa yeni turung kpoukpouyoac homac osoandae, yeni yoacngina kpac anu waicke tacgecde.   
\p
\v 3 Geng kurumenga kurumenga meficyununa marikibiga andae nga ge afo nga asomeng sasawa wi faiyununa tatacnginau seria tacgec yenenganduae. Yenemma  
\v 4 yofi negensima deba, “Geng bangecfu ngicngacnec negensinunuma ngicac medacfora gombunga garengnunukecnec, imocac warecguduae.  
\v 5 Geng ngic meficgema tatahau faina yeng Anutuac siric anu Anutungo kunenga kecde. Ye kuc kibikperagigoc kefudeac ge imocngo iraya isoc heiminec.  
\v 6 Ge marikibiga sasawa meficgena yeng imocac mingina kefudeac fainec. Ge wiac sasawa yengena haniaac bageu fainec.  
\v 7 Imoc amau rama burumaka sasawa nga manennu yang sasawa  
\v 8 amma sawau neng sasawa nga kondunnu kondungyang amma kondung manau yang hania hania singngina mema kenghaandae, imoc yeac haniaac bageau faina garengyunuude.”   
\p
\v 9 O \sc KEBU\sc*, ge Kebunina, bangeha bangeha fekendaeu kpacga imoc engenatoa yombong fekefude.   
\c 9  
\s1 Makpekpea onggongyunuude  
\d Yegecgareng yearu. Yegec mong kpara Medac homeec, imocac uba modacma yegec yomoc heibesonga. Dawidingo mitiyegec yofi heiec.  
\p
\v 1 \sc KEBU\sc*, ni heregoc yombong ubangerec megemma yofi edeyunuba, “Ye ua sasawa mekecde, imoc bibiagoc yombong.”   
\m
\v 2 Ni ubangerec negemma geac amma sogaibade. O Kuctoa mingina, ni geac kpac kuneng heiwayong memima yegec heibade.   
\p
\v 3 Ngabafocna yeni gemma dzigenema tifainggema mayunuu kpac anggec.  
\v 4 Nga geng yoacfu nanggenuma yoacna faka dindingafu desina yoacfu firang anai. Ge ngictau tatacgau tacma faka dindingac modacma yoac isinggema desinec.   
\p
\v 5 Geng ngicngac bangec monnunac Anutu mi negemmidae, yeni yunumeting ayemmenec nga ngic Anutu ngadehema mangana megecdeac ayemmeande, yeni kpetotieyununa kpac anggec kpacngina meickenec. Nga imoc sufuma nasoya nasoya kpac anude.  
\v 6 Ngabafocnina yeni amangina sesuhasac wisic wisickea kpac anu ngaba yeneng imohai kpac anggec. Geng taongngina hembarackena kpac anggec ngic mongngo yeneac naric mi negensiude.   
\p
\v 7 \sc KEBU\sc* ye ngictau amma tatahau nasoya nasoya tarude. Ye ngictauac tataha faiu seria taru yoacfu faifai uaya meudeac efaide.  
\v 8 Ye faka dindingac modacma bangectoa bangecac ngicngac yoacngina isinggema foraya dema monde mondea kpac kecma ngiha ngiha yoacngina desiude.   
\p
\v 9 Ngicngac goa yeneng ngic ogofocngina ebic meficgeyemmegec ubaebicnginagoc kecgec, yeneac sufu sufuamangina seria, imoc \sc KEBUNOC\sc*. Naso mangana hau yeng amangina seria anu ihai sufugecde.  
\v 10 O \sc KEBU\sc*, ngicngac yeneng geac kpac kuneng negengandae, yeni negenserigugecde. Ngicngac yeneng ge hofocgugec geng yeni mi ngadeyunuma wayununade.   
\p
\v 11 \sc KEBUNGO\sc* Sionnu ngictau tatahau tacde, ngeni ye yegec heimima dengerebisia amma yeng ua mekecde, imoc ngiha ngiha botucnginau dekperagibisia.  
\v 12 Ye ngic sac hetinggegec, yeni negengyunuma kopocsicnginaac turunga kpouyemmeude. Ngicngac ebicnginagoc kecma ye kpacgec yeng imoc naric mi nigeckpeude.   
\p
\v 13 O \sc KEBU\sc*, ngabafocna yeneng ngadenuma kpendzeng nga ebic nenggec kecduae. Ge neac ubaga manganeu meficnuna. O Kebu, ni homecac naguu febare geng miacnuna monggoc imohacnac erebade.  
\v 14 Ge ifi anna ni faka gombunga angannec, imocac siduc andacma eriendzong megembade. Nga ge ebicfunac mesinunec, imoc Siong naroangaac naguu namma sogac sogaigoc dekperagiyemmebade.   
\p
\v 15 Ngicngac bangec monnunac Anutu mi negemmidae, yeni yenaoc teng usuma imohai kemegec nga ufic mesufuma faigec, imocngo haninginau meu mayunuec.  
\v 16 \sc KEBUNGO\sc* yoacfu faifai uaya ngicngac yenearu meu neni ye negemmidimbe. Ngic Anutu ngadehema mangana megecdeac ayemmeande, yeni maringinango ua megec, imocngo yenang botacngina amma witicyunuude. \it Higgaiong, Selac\it*   
\p
\v 17 Ngicngac Anutu ngadehema mangana megecdeac ayemmeande nga bangec monnunac ngicngac Anutu nigecyunuu kecandae, yeni ngic homegec, yeneac amau kemma kecgecde.  
\v 18 Ngicngac iwaiac obohoma kecandae, Kebungo yeneac ebicngina nasosoc mi nigeckpeude, kpac. Ngicngac makpekpea yeneng Anutungo meficyunuudeac negensima tomai kecandae, yeni nasoya hau wiac imocac fora henggecde.   
\m
\v 19 O \sc KEBU\sc*, ge bangecngic kpae heiyemmena firang mi ambisia. Bangec monnunac ngicngac yeni geac kicfu nanggec geng yoacfu faiyunuma fakangina isinggena.  
\v 20 O \sc KEBU\sc*, geng kengec meficgeyemmena. Ngicngac bangec monnunac yeni bangecngicsac andae, imoc edzacyununa negembisia. \it Selac\it*   
\c 10  
\s1 Ebicfunac mesi mesiac nunumu  
\p
\v 1 O \sc KEBU\sc*, ge nocac neac hereau yombong nannec nga ge nocac ebicnaso anu sufuma kecnec?  
\v 2 Ngic Anutu ngadehema mangana meudeac ammiande, ye yengenaac negenu engena ande. Ifi anu gereagoc kemma ngicngac kucmama kisangyunuma ebicngina arenggema mendangyunuude.  
\v 3 Ngic Anutu ngadehema mangana meudeac ammiande, ye hereau negensongo mangana fede, imocac negenu engena anu yoac homac osoude. Ye iwaiac kichodung amma wiac homac mekpedzuc amma mekefudeac ammiude amma \sc KEBU\sc* ngadehema yeac sowecyoac deude.  
\v 4 Ngic Anutu ngadehema mangana meudeac ammiande, ye sebia meemma deude, “Anutu ye wiac imocac mi kpesinenude.” Amma yofi negensima kecde, “Anutu mong mi kecde, kpac.”  
\v 5 Ngic mong ifi kecande, ye uaya nasosoc naric amma ngereeude. Ye ngabafora sasawa yeneac negenu wiac efeacnec andeac dzomoreyemmeude. Ye yoacga kpekefu geng wiac hengising amma foraya deannec, imoc yeac hereau fedeac imoc naric mi henude.  
\v 6 Ye yengenaac yofi negenude, wiac mongngo menuu goroc goroc naric mi ambade. Ni nga esangabofocna kecma ebic mong naric mi meficgenide.  
\v 7 Ye sowecyoac nga ikoc amma ogofocngina ebicfu faiyunuudeac yoac dekefude. Dekefu enara imocngo wakeu enacbibihau ngicngac tobangyunuudeac yoac nga ogofocngina memanganeyunuudeac yoac mesufuude.  
\v 8 Ye amabangec wegenacfu sufuma tomai tacande. Taru ngic mongngo mangana mi meande, ye hau ngic manganango ngic memanganeyunuudeac areng andae, kiwa yenearu fima sufu sufuu kpebucyunuude.   
\m
\v 9 Raiong yangtoango icbisic botucnginau sufuma tacande, yeng ifi isoc sufuma kucmama yeni meyunuudeac tomai taru ngicngac memeficngina kpac andae, yeni ufihau mendanggegec meyunuma kenude.  
\v 10 Ebicfu mayunugecdeac areng yeni ngonducnema bangecfu sufuma tacdae. Tacma memeficngina kpac kecma yeac mariu kpegec yeng kuhagoc meyunuude.  
\v 11 Ngic mangana ye ubeau yofi negensiude, “Anutu ye neac nigeckpeu kiwa semema naric mi nenude.”   
\p
\v 12 O \sc KEBU\sc*, ge yacna. Anutu, ge mariga miacna enu. Ngic goa yeneng ngic ogofocngina ebic meficgeyemmegec ebicgoc kecandae, ge yeneac mi nigecgubeso.  
\v 13 Ngic Anutu ngadehema mangana meudeac ammiande, ye nocac Anutu ngadehema yengenaac negemma yofi deude, “Ye kopocsicnaac turunga mi kpounenude.”  
\v 14 Anutu, geng sifu ngicngac ebic nga kpendzenggoc kecdae, yenemma ebicngina negensima marigango meficyununadeac negennec. Memangac manganea kecde, ye kekeha gearu waande nga geng beging yeneac memeficngic.  
\v 15 Geng ngic Anutu ngadehema mangana meudeac ammiande nga yarengic, yeneac maringina hetackena. Hetackema fakangina mangana hengising amma meficgekecna sasawa kpac andacbeso.   
\p
\v 16 \sc KEBU\sc* ye ngictau kecde nga kecengkefude. Nga bangec monnunac ngicngac Anutu mi negemmidae, yeneng yeac bangecfunac meickema kpac anggecde.   
\m
\v 17 O \sc KEBU\sc*, ngicngac yumia yeneng heresongongina edegugec ge imoc negemma herengina meseriyemmenade. Yeni kpacgugec ge kedzacga yenearu faina.  
\v 18 Nga ngicngac goa yeni ogofocngina ebicfu faiyunugec. Faiyunugec ge ngicngac ubaebicgoc kecdae nga nambarac beging kecdae, yenenggareng ayemmema faka dindingac modacma ayemmebesena. Ge ifi anna bangecngic yeneng kengectoa monggoc mi meficgeyemmegecde.   
\c 11  
\s1 Kebungo onggonnuude  
\d Yegecgareng yearu. Dawidingo yegec yofi heiec.  
\p
\v 1 Ni \sc KEBUAC\sc* hoannu hama sufuma kecba ngeni dafi negemma yoac yofi edenudae, “Ge neng isoc kemma tikigau worana.”  
\v 2 Negenna, ngic Anutu ngadehema mangana megecdeac ayemmeande, yeni ngic goa herenginau ikoc nga hamangec mong mi fede, yenemma tebemedahango wedecyunugecdeac negemma kundunnu namma gurutu taima kpesaigecde.  
\v 3 Ngic yeneng dedeseriyoaraac titiseri kpetotieyunuma meickegecdeu ngicngac dindingac yeneng wiac imoc mengeregecdeac obohogecde.   
\p
\v 4 \sc KEBUNGO\sc* womonga kpetiacfu tacde. Ye ngictau tatahau kurumennu tacma kiwango ngicac nambaracfora yenemma kiwa yenearu fima fakangina hennegeng anude.  
\v 5 \sc KEBUNGO\sc* ngic dindingac fakangina tobanggeude. Yeng ngic Anutu ngadehema mangana megecdeac ayemmeande, yeneac faka momoc tobanggeu ngic yarefakaac songo negengandae, yeni ubango wayunuude.  
\v 6 Ngicngac Anutu ngadehema mangana megecdeac ayemmeande, yeng yeneac witiu hoc gerec dzedzeagoc nga sarafa gerec borangagoc kpakeu yenereude. Yenereu firang gerea yenereu imocngo pakenginau kpakegec yenanggac wiac anu yeni ebic imoc pakeunac isoc negecde.   
\m
\v 7 \sc KEBU\sc* ye dindingac amma ye faka dindingac songea negende. Nga ngicngac uba kongaha amma ikoc nga hamangecngina kpac kecdae, yeneng yeac kicmesu henggecde.   
\c 12  
\s1 Kebuac yoacngo onggonnunuude  
\d Yegecgareng yearu. Yegec yomoc sheminic uba modacma gitakurere witingina 8ngo kpema heibesonga. Dawidingo mitiyegec yofi heiec.  
\p
\v 1 Ngicngac yoac modac modacfaka angandae, yeni bic kpac andacma ngicngac botucninau monggoc mi kecgecde. Nga Anutuac enac tofoc tofohongic, yeni kpac amma monggoc mi kecgecde. O \sc KEBU\sc*, imocac meficnunubesena.  
\v 2 Ngic sasawa yeni ogofocnginagoc denengeng amma ikoc andacgec enacbibicnginaunac yoackerec ikoha ereu herenginau manganango tobangyunugecdeac yoac degecde.  
\v 3 Ngicngac yeni enacnginau yoackerec ikoha anggecde nga nedzarangngina yenanggac yoac engena homac osogec \sc KEBUNGO\sc* imoc herecgema meickebeso.  
\v 4 Yeni yofi deandae, “Neni nedzaranninango kuc nemmeu seria nannide nga enacbibicninango meficnunuu ngic mongngo naric mi garennunuma dzegenunuude.”   
\p
\v 5 Ifi degec \sc KEBUNGO\sc* ine yoac yofi dede, “Yeni makpekpea memayunuma memanganeyunuandae. Nga ngicngac yeni ebic witiau kecma asoringa ayemmede, imocac yaguc yacma onggongyunubade. Yeni sufu sufuu ruaegoc tacgecdeac ayemmeu neng meyunuma hoannau faiyunubade.”  
\v 6 \sc KEBUNGO\sc* yoac deserima deec, imoc sasawa yoac kongaha nga seuha kpac. Ngic yeni siriwa gerec gereagoc ohogec atac 7 anu bangecfu mama kongac koporarac anude. \sc KEBUNGO\sc* yoac deserima deec, imoc ifi isoc ande.   
\p
\v 7 O \sc KEBU\sc*, geng onggonnunuma ngicngac yofinenggac kecdae, yenearunac nasosoc garennununa.  
\v 8 Ngicac medacfora botucnginau yarefakaac negenggec engena ande. Nga ngic Anutu ngadehema mangana megecdeac ayemmeande, yeni noboc noboc oronnunuma kengha andae.   
\c 13  
\s1 Ge kicmesuga mi mesufuna  
\d Yegecgareng yearu. Dawidingo yegec yofi heiec.  
\p
\v 1 O \sc KEBU\sc*, ebicna noc nasou wisickeude? Ge naso wisic wisickea kpac kecma neac mi nigecgubeso. Ge kicmesuga nearu mesufukecnec, ge faka imoc wanadeac tomai kecduae.  
\v 2 Ni ubaebicgoc kecduae, imoc wisickeudeac tomai kecma ubahodung wenacsoc negengkecduae, imoc kpac anudeac tomai kecduae. Ngabafocna yeni firang anggec yeneac bageu kecduae, imoc wisickeudeac tomai kecduae.   
\p
\v 3 O \sc KEBU\sc* Anutuna, ge neac negensima turunga merennenna. Ni homecfu heima febaiac kicnau kperagiga faina kecbesare.  
\v 4 Nocac ngabangicnango yofi debacac, “Ni firang bic andua.” ifi deu ni goroc goroc amma manubeso anu ye imocac sogaibacac meficnuna.  
\v 5 Geng yoac dedzege amma imoc modackecnecac negenseriguma kecduae. Geng ebicfunac mesinunecac amma ni heregoc geac desogai angkecduae.   
\p
\v 6 \sc KEBUNGO\sc* gombunga anengandeac yegec heimibade.   
\c 14  
\s1 Anutua kpac kekec  
\d Yegecgareng yearu. Dawidingo yegec yofi heiec.  
\p
\v 1 Ngic negen negengngina kpac, yeni herenginau yofi negemma deandae, “Anutu mong mi kecde, kpac yombong.” Yeni fakangina manganeu faka mangana yombong anggecde. Ngic mongngonec faka gombunga mi angkecde, imoc kpac yombong.  
\v 2 \sc KEBUNGO\sc* kurumennu kecma ngicac nambarac yenemma kefude. Nga ngic mong ye negen negentegehagoc kecma Anutu hofocande, Kebungo kic fiu mau ngic ifia yeac kicfifi angkecde.  
\v 3 Nga yeni ine sasawango ngade ngade monggoc kemedacma fakangina heimeremma manganedacgec. Ngic mongnga mong faka gombunga mi angkecde, mocdong kpac yombong.   
\p
\v 4 Yarengic yeni wiac negemma negen negentegecgnginagoc mi anggecde. Nga ngicngo yaka neandae, yeni ifi isoc ngicngacfocna neyunuma \sc KEBU\sc* ine naric mi kpacgecde.  
\v 5 Anutungo ngicareng dindingac kecandae, yenigoc kefudeac manganameme yeneng kengectoa amma homac yombong kpidohogecde.  
\v 6 Yarengic ngeneng ngic makpekpea arengngina memanganebeso angandae, fora. Nga \sc KEBU\sc* yennoc yeneac sufu sufuama.   
\p
\v 7 O, Israe neneac mengec mengere, ye Siong tikiunac mama habeso, imocac yombong anemmede. \sc KEBUNGO\sc* ngicngacfora monggoc mengerenunuu naric kecnide, naso imohai Yakoboac nambaracfora sogaigecde nga Israe neni ubangerec negennide.   
\c 15  
\s1 Anutuac womonnu  
\d Dawidingo yegec yofi heiec.  
\p
\v 1 O \sc KEBU\sc*, geac kporucwomongga kpetiacfu merang naric tarude? Nga merang tikiga kpetiacfu naric kefude?   
\p
\v 2 Ngic mong ye faka angammemeau kopocsic mong mi meficgeude nga mong ye faka gombunga angkecma hereaunac yoac fora ereu deude, yeng ihai naric kefude.  
\v 3 Ngic mong ye nedzarangango ngadeyoac mi deude nga ogea mi memanganeude nga mong ye ogofora yeac wegenac kecandae, yeni game kpekpeuu naric mi faiyunuude, yeng ihai naric kefude.  
\v 4 Ngic mong ye ngic mangana, yeneac modzea tiande nga ngicngac \sc KEBU\sc* eweheiheigoc hoanggeandae, yeneac ewengina heiude. Nga mong ye dedeseriyoac modaru imocngo ebic homac meficgemiudeu imoc sifu modarude nga ye imoc negenu wiac engena mi anude, ngic imocngo Kebuac tiki kpetiacfu naric kefude.  
\v 5 Ngic goa yeneng ngic mong yearu turung angkecdae amma kpougecde, imohai yeng profit dema dzo monggoc torokpema mi meude. Amma ngicngac goa kopocsicngina kpac kecdae, yeng yeni yoacfu memayunuudeac moneng naric mi meude, ngic ifia yeng Kebuac tiki kpetiacfu naric kefude.  
\p Ngic mong ye faka imoc angkecde, ye wiac mongngo meu goroc goroc naric mi anude.   
\c 16  
\s1 Kingangfora garengyunuude  
\d Yegec yomoc miktang uba modacma heibesonga. Dawidingo yegec yofi heiec.  
\p
\v 1 O Anutu, ni geac hoannu hama sufuma kecbadeac onggonnuna.  
\v 2 Ni \sc KEBU\sc* yofi ededuae, “Ge Kebuna, forangoc, gea kpac wiac mong gombunga naric mi mekecbai.”  
\v 3 Bangecfu ngicngac kpetiac yeni ngicngac eweheiheinginagoc, yeneac negemba ngereede.  
\v 4 Ngicngac nemuonga meisinggema hoanggeandae, yeni ine ubahodung kekecnginau kpedzigec hama ebicngina monggoc nga monggoc anude. Ni yeneac sese dema sac naric mi hetinggebade nga kpacngina enacbibicnango naric mi kpacbade.   
\p
\v 5 \sc KEBU\sc*, geng wiac noboha nennec, imoc pakene isoc anu imoc mema nebade. Geng maridzominna garenggena imoc neac amma fekefude.  
\v 6 Wiac mederema nemmegec, imohai neac maridzoming wiac gombungau heficgeu nenggec. Foracngoc, ni maridzominna imocac ubangerec negenduae.  
\v 7 \sc KEBUNGO\sc* dederecge anemma sing edzacnuudeac kenehebade.\f + \fr 16:7 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec, 26:12, 103:22 nga goa homac fede.)\f* Herenango tofocnac ifingoc edekpou anengande.   
\p
\v 8 Ni nasosoc kicna \sc KEBUARU\sc* fikecduae. Yeng marifoinau kecdeac wiac mongngo menuu goroc goroc naric mi ambade.  
\v 9 Imocac herenango ubangerec negemma ongana sogaiu sebina ifingoc ruaegoc anude.  
\v 10 Geng ongana wana homec amau naric mi kemeude. Amma ge enac tofoc tofohongicga onggonggena kicsere naric mi henude.  
\v 11 Geng kekecac sing kpounennec. Geac kicfu sogac sogai hafoangoc fede nga marifoigau ubangerec feengkefude.   
\c 17  
\s1 Kebu ge onggonnuna  
\d Dawidingo yofi numuec.  
\p
\v 1 O \sc KEBU\sc*, ni dindingac amma ebicfu kecma yoac deduae, imocac yoacna negenna. Ni arohoma kpacguba ge yoacna negenna. Enacbibicna ikoha kpacngo numugemba ge kedzac kpema nunumuna negenna.   
\m
\v 2 Ge yoacfu neac yoac faka dindingac modacma forana debesena nga geac kicngo faka dindingac hembeso.  
\v 3 Foracngoc, ge tofonac yugucnuma tobangge herena hennegeng annadeu nearu mangana mong mi meficgenade. Enacnango yoac kopocsihagoc mong mi debadeac negenseriai.  
\v 4 Ngic goa yeni faka angammemengina hania hania fede, fora. Nga ni sifu enacbibicgango yoac denec, imoc modacma garengemema yarengic yeneac sinnu mong mi kenai.  
\v 5 Ni serima geac sinnu tima kengha amma hanina mong mi tiposockeec.   
\p
\v 6 O Anutu, geng nunumunaac turunga merennennadeac kpacguduae. Ge kedzacga nearu faima yoacna negenna.  
\v 7 Geng yoac dedzege amma imoc modackecnec, wiac imoc bibiagoc andeac imoc edzacnuyombonggena. Ngicngac neni ngabafocnina yenearunac meickema sufunideac geac hoannu hani geng ebicfunac mesinununade. Nga ngaba yenearunac gearu hama marifoigau sufunide.  
\v 8 Ge geangga kicga garenggeannec, ge ifi isoc ni garennuma kpeganggaac debannu fainuma mesufununa.   
\m
\v 9 Ngic goa yeni Anutu ngadehema mangana megecdeac ayemmeu kpetotienubeso andae. Nga ngaba yeni kpebucnugecdeac negemma oronnuma nandae, ge yenearunac mesufununa.  
\v 10 Yeni herengina dzegegec yenearu ubamangang mong mi feyemmeu enacnginango yoackpekpe kpegecde.  
\v 11 Yeni hanina modacma kisannuma meficnuma yaguc oronnuma nandae. Yeni kicngina kucgoc nearu fima bangecfu kpefacnubeso andae.  
\v 12 Raiong yangtoango wiac kisamma sorienacngo sebia merecgeudeac ammiande nga raiong kuhagocngo sufu sufuu ngonducnema tomai feande, yeni ifi isoc andae.   
\p
\v 13 O \sc KEBU\sc*, ge yacma kemma ngabafocna kicnginau hama yunuma bangecfu ukuyununa. Ngic Anutu ngadehema mangana megecdeac ayemmeande, yeni menugecac dzikacbeanggango kekecna yeneac mariunac mesina.  
\v 14 O \sc KEBU\sc*, ge geangga maringo bangecngic yenearunac mesinuna. Bangecngic yeni bangec yomohai kecma imocac wiac mekpedzuc amma mekecdae, yeni imocac areng. Ge yeneac negemma wiac faina fede, imocngo herengina mewakeude. Mewakeu medacfocngina yeneng wiac imoc monggoc nga monggoc mekecma nambaracfocngina yeneac negemma noboha faigec tarude.   
\p
\v 15 Anu ni dindingac kecma kicmesuga hemma gauunac gborima geac kicsiric hemba gunucnude.   
\c 18  
\s1 Ngictaungo firang anec  
\d Yegecgareng yearu. \sc KEBUNGO\sc* kingang ngiha Dawidi ngabafora sasawa yeneac maringinaunac mesima Sauroac kuc memama yearunac meickeu Dawidingo \sc KEBU\sc* yegec yofi heimiec.  
\p
\v 1 O \sc KEBU\sc*, ge neac kucna, ni geac songo negenduae.  
\v 2 \sc KEBU\sc* ye neac hoc peperandzi seria, ye amana seria amma neac yungec yungecngic. Ye Anutuna nga neac hoc peperandzi seria anu ni yeac hoannu kemma sufuma kecbade. Ye kasona nga ye kuhagoc amma ebicfunac mesinuu yeac odaseriau kecbade.  
\v 3 \sc KEBU\sc* eriendzong memini ngereeyombonggede. Ni ye kpacba yeng ngabafocna yeneac witicfunac mesinuude.   
\p
\v 4 Homecac witicngo fusenuu doku tunggbaungngo wegenac hama memanganenubeso anu kucna kpac anec.  
\v 5 Nga homec amaac witicngo fusenuu homecac botacngo sinna hedzickegec.   
\m
\v 6 Ni ebicfu kecma Anutunango meficnuudeac kpacbare yeng womongau tacma ubaudumenna negemma kedzac kpema kiacna negenec.   
\p
\v 7 Yeng ngaba anecac bangecngo kockpac amma kpemindzaheu usoc meu tikiac titiseri yeni dendeng kpegec.  
\v 8 Ye samaha singausing hosuc mau gerecngo enarausing erema wiac dzerecgeu kpac andarec. Hoc gerecyohoagocngo enaraunac ereu singsararang kpema kenggec.  
\v 9 Ye kurumenga kurumenga merarangyunuma hau kundungtoango hania bageau tarec.  
\v 10 Ye kerobing witiau taru imocngo kpegangagoc kpututuckeu haec. Ye firanggac kpeganga witiau heima sawakebangau haec.  
\v 11 Ye kundung mema imocngo kperacemema kiahoeng dzadzungo bedzoya amma oronggeu imocac manau tarec.  
\v 12 Kibikperagingo waraimima hoeng mekperagiyunuu yeni yeac kicfu kenggec kia nomanggbomea kuneng amma mau hoc gerecyohoagocngo ifingoc hoeng manaunac maec.   
\p
\v 13 Nga nomanggbomeatoa nga hoc gerecyohoagocngo maec, imocac manaunac \sc KEBUNGO\sc* kurumenga kurumenga, imohai tacma gbumparandang meficgeu haec. Kuctoa minginango yoac deu yeni enacudumenga negenggec.  
\v 14 Ye tebe kperecgema tebemedac isoc kpesaiu ngabafora singsararang kpegec. Ye piratac kucnginagoc sing edzacyunuma faiu yeni sing imoc modacma kenggec.  
\v 15 O \sc KEBU\sc*, geng yoac ngabasiric edeyunuma samacgausing asu fifina kucgoc erema kondungtoa meu dzikeu kperemenga fingectegeru henggec. Nga bangectoa bangecac titiseri imoc didiu faina henggec.   
\p
\v 16 Ye sawau tacma maria sinema menuma doku dzohong keme kemeaunac kpedzinuec.  
\v 17 Neac ngabangic kuhagoc anu yeng yeac mariunac mesinuu ngic neac modzongina tiande, yeneac kucngo feracnuecac yeng yenearunac mesinuec.  
\v 18 Naso manganango ebihagoc neac wegenac hau ngabafocna yeneng kicnau hama namma nubeso anggec \sc KEBUNGO\sc* meserinuma mefinuec.  
\v 19 Ye neac songo negenecac amma ebicfunac mesinuma sawea homac meficgenemma hesicnu kemma ihai fainuec.   
\p
\v 20 \sc KEBUNGO\sc* neac faka dindingac henec, imocacsoc faka gombunga anenec. Nga marinango faka kongaha angkefaiac ye imocac turunga merennemma wiac gombunga nenec.  
\v 21 Ni Anutu wama faka mangana mong mi amma \sc KEBUAC\sc* sing gombunga modacanduaengoc.  
\v 22 Yeac dedesiyoac imoc sasawango kicnau feu ni nasosoc hemma yeac singyoac mong mi ngadehema wayai.  
\v 23 Amma ni yeac hehennu kopocsic mong mi meficgeai, kpac. Ni kopocsic meficgebaiac fagung amma garengemekefai.  
\v 24 Nga marinango faka kongaha angkefecac \sc KEBUNGO\sc* neac faka angammeme dindingac hemma gombungaac turunga kpounenec.   
\p
\v 25 O Kebu, ngic mongngo yoac modackefu ge yoacga modackecnec, imoc edzahanade. Nga mong ye kopocsic mong mi meficgeu geng kopocsic mong mi meficgeannec, imoc edzahana henude.  
\v 26 Mong ye uba kongahagoc kefu geng ubaga kongaha, edzahenade. Nga mong ye fakaya heimeremma mangana modackefu ge ifingoc fakaga gombunga heimeremma mangana ammina henude.  
\v 27 Geng ngicngac yumia ebicfunac mesiyununade. Nga ngic yenanggac negenggec wiac engena ande nga gamea kpac kecma kicngina miacandae, geng ine yeni memayununade.   
\p
\v 28 \sc KEBU\sc* Anutunango kundunna meickeu kperagia angkecde. Oc, gennoc kifana kpedzereckenade.  
\v 29 O, ge sing meficgenenna ngabahabu memayunubade. Anutunango kuc nenu odatoangina membarackema ferahabade.   
\p
\v 30 Anutu ye faka angammemea dindingac nga \sc KEBUNGO\sc* yoac deserima deu fora fingerudenoc. Ngicngac yeneng yeac hoannu hama sufudacgec yeng kasongina amma mesufuyunuude.  
\v 31 \sc KEBU\sc* ye mocgungo Anutu fora amma Anutunina mocgungo hoc peperandzi seria.  
\v 32 Ngicngac wamba heigec kemeande, ifi isoc Anutungo kuc heinenu kemeu sing ebiha kpac meficgenenu gombunga kengkecbade.  
\v 33 Yeng hanina mengereu kate yanggac haniherec isoc anu bic yombong nedzibade. Nga ye tikiu nambadeac kuc nenu naric mi manuude.  
\v 34 Ye marina mengereu dzikacac negen negenggoc anduaeac tebe seria aiengngo memea, imoc naric taibade.   
\p
\v 35 Ge ebicfunac mesinuna imocngo kasona angkecde. Ge marifoigango nanggenuna serima namba geng meficnuna ngickuneng anai.  
\v 36 Ni tiserima nambadeac geng tumiatoa meficgenenna haninango mong mi tiposockeec.  
\v 37 Amma ni ngabafocna kisangyunuma meficyunuma memanganeyunuba kpac andacgec monggoc dzigeneai.  
\v 38 Ni ngic yunuhomeai, yeni haninau makpema monggoc mi yacgec.   
\p
\v 39 Geng dzikac kpebadeac kuc heinemma ngabafocna neac bageau faiyununa mayunuu fegec.  
\v 40 Nga ge ngabafocna faka ayemmena yeni ngadengina nearu meremma wanuma kenggec. Nga ngic yeneng neac modzongina tiu neng kpetotieyunuba kpac anggec.  
\v 41 Yeni memeficac kiacgec nga ebicfunac mesiyunuudeac ngic mong ine mi tarec. Yeni \sc KEBUNGO\sc* meficyunuudeac kiacgec yeng yoacngina mong mi merenec.  
\v 42 Ni kpedzameyunuba yeni sendung firangngo mefiranggeande, ifi isoc anggec. Ni sinnu goteng isoc meicyunuma ngadeau ukuyunuai.   
\p
\v 43 Ngiha ngiha yeneng ngaba anenggec geng imohacnac mesinunec. Mesinuma sing meficgenenna bangec monnunac ngicngac yeneac garengtoa anai. Ni ngicngac areng goa mi negengyunuba yeneng neac bageu kecma kingang kpenenggec.  
\v 44 Ngic yeni siducna negemma yoacna bic tofohogec kuricngic yeneng hama neac kicfu ngonducnema ewena heigec.  
\v 45 Yeni kucngina mau dzonongngina fedeu amangina seria wama imohacnac mama hagec.   
\p
\v 46 \sc KEBU\sc* kecde. Neac hoc peperandzi seria, ye kenehebesonga.\f + \fr 18:46 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Anutu ebicfunac mesinuec, ye kpac kuneng mibesonga.  
\v 47 Anutungo ebicna negemma turunga kpouyemmema ngiha ngiha neac bageu kecgecdeac faiyunuec.  
\v 48 Oc, ye ngabafocna yeneac mariunac mesinuma kicnginau miacnuma kpac kuneng nenec. Ge yarengic kucnginagoc, yeneac mariunac mesinunec.  
\v 49 Imocac bangec monnunac ngicngac botucnginau namma afegubade. O \sc KEBU\sc*, ni yegec heima geac kpac kuneng heiwayong memibade.  
\v 50 Yeng ngictauya faka ammiu dzikatoau firang angkefude. Ye ngic meisinggema kerec nadzicmiu yeng yeac ngictau anu yegoc kecma yoac dedzege anec, imoc modackefude. Yeng Dawidi meisinggema nasoya nasoya ye nga esangaboforagoc kecde nga kecengkefude.   
\c 19  
\s1 Anutuac marikibi  
\d Yegecgareng yearu. Dawidingo yegec yofi heiec.  
\p
\v 1 Anutu ye kuc nga kibikperagiagoc, kurumenga kurumenga yeni siduc imoc dekperagikecdae nga sawango yeac marikibi deireckeude.  
\v 2 Hadzing mongngo hadzing ogea yoac imoc edeu tofocnac mongngo tofocnac ogea imoc dedekperagi ammiude.  
\v 3 Yeni yoacngina ning kpeu yoac mong mi dedae, fora. Ngic mongngo ubaudumengngina mi negenude.  
\v 4 Nga ubaudumengngina imoc sifu bangectoa bangec, imohai kengkecde. Yeni yoacnginango bangec noboc noboc wisic wisickeau kendarude. Anutungo kurumenga kurumenga, imohai wenacac kporucbedzo mong faiu fede.  
\v 5 Ye memeturang ngic mongngo memeturang ama manaunac ubangerecgoc maande, ifi isoc haude. Wenac ye nedzi nedzi ngic kuhagocngo firang anudeac sogac sogaigoc nedziande, ifi isoc hama  
\v 6 kurumenga kurumenga tegia monnusing erema singa modacma kemebesonga tegia nobocsing kemeude. Ye gerea yombong anu wiac mongngo yearu naric mi sufuude.   
\p
\v 7 \sc KEBUAC\sc* dedeseri imoc gombunga amma ngicngac ubaonganina heigboriude. Amma \sc KEBUNGO\sc* yoac dekperagi nemmeude, imoc fora yombong amma ngic negen negentegecac obohoande, ye negen negentegec meficgemiude.  
\v 8 \sc KEBUAC\sc* dederecgeyoac imoc dindingac amma sogac sogai hereninau meficgenemmeude. Amma \sc KEBUAC\sc* nonoyoac imoc kongaha amma kicnina mekperagiude.  
\v 9 \sc KEBUAC\sc* eweheiheigoc kekec imoc kongaha amma feengkefude. Nga \sc KEBUNGO\sc* dederecgeyoac modacnideac faiec, imoc seria amma dindingac.  
\v 10 Imoc gol ferahama gol tegeng momoc ferahaude. Amma imoc kukundzau songea ferahama songea yombong ande. Imoc kukundzau kpedzucneandimbe, imoc ferahayombonggeude.  
\v 11 Dederecgeyoacgango kingang ngicga goroya kpeu ye imoc modackefu, imocngo ubangerec wiac engena miude.   
\p
\v 12 Ngic yengenaocngoc isingemema kopocsiha naric mi hentegerude, kpac. Kebu, ge kopocsicna sufu sufuya wana.  
\v 13 Ni, kingang ngicgango kopocsicfaka goa yofi negemma mekecbai, “Faka imoc songea andeac angkecbadenoc.” Ni ifi amba geng sinna hedzickena kopocsicngo mi garennubeso. Ge ifi anna ni kopocsic mong mi meficgebade nga singyoac kpema faka mangana mi ambade.  
\v 14 Nga enacbibicnaunac yoac nga negen negeng herenau fede, imoc negenna ngereebeso.  
\p O \sc KEBU\sc*, gennoc neac hoc peperandzi seria nga ge bummenuma ebicfunac mesinunec.   
\c 20  
\s1 Ngictau kerec nadzicmiec  
\d Yegecgareng yearu. Dawidingo mitiyegec yofi heiec.  
\p
\v 1 \sc KEBUNGO\sc* ebicnasou yoacgaac turunga merenggembeso. Yakoboac Anutu, yeac kpac kunengngo ge onggonggubeso.  
\v 2 Yeng womongaunac memefic suegenu Siong tikiunac heimefic anggema mang anggembeso.  
\v 3 Ge sese mema faiannec, yeng imoc sasawa negenu febeso nga sesegerecga ohoannec, imocac negenu ngereebeso. \it Selac\it*   
\p
\v 4 Ge wiac monggac heresongoga anu ye wiac imoc gembeso nga geng areng sasawa faina yeng imocac fora meficgegembeso.  
\v 5 Ge firang andanggac ubangerecac arohoma sogac sogai ambisina. Nenang Anutuninaac kpacfu firanggac ma kpedzini embeso. \sc KEBUNGO\sc* kpesi kpesiga sasawa negemma foraya meficgebeso.   
\p
\v 6 \sc KEBUNGO\sc* ngictau meisinggema kerec nadzicmiec, ye ebicfunac mesiude, imoc yaguc negenduae. Ye kpetiac kurumengaunac yeac nunumuac turunga meremmima marifoiango faka kucgoc mema ye ebicfunac mesiu firang anude.   
\m
\v 7 Ngic goa yeni dzikacac keretac negenggec wiac engena anu yoac homac osogecde. Nga goa yeni becosiac negenggec wiac engena anu yoac homac osogecde. Nga nenang \sc KEBU\sc* Anutuninaac kpac kuneng negenserima negenni wiac engena ande.  
\v 8 Yeni kucngina kpac anu fafocnginango heima mayunuude. Nga nenang yacma hongngoc serima nannide.   
\p
\v 9 O \sc KEBU\sc*, ge ngictau meficgena firang ambeso. Neni kpacguni geng turunga merennemmena.   
\c 21  
\s1 Ngictaungo firang ande  
\d Yegecgareng yearu. Dawidingo mitiyegec yofi heiec.  
\p
\v 1 O \sc KEBU\sc*, ge kucgagoc, imocac ngictau ye geac ubangerec negenude. Nga geng ye meficgekecnecac ye firang amma homac yombong sogaima kecde.   
\m
\v 2 Hereau songo feec, ge imoc meficgemidang nga enacbibihango wiacac kpesigenu ge imoc sasawa mima mong mi wadang. \it Selac\it*   
\p
\v 3 Geng ye heitaima kenecgaac finactoa mima ngictau ira gol tegengo memea oruhau fainec.  
\v 4 Ye kekecac kpesigenu geng kekec mina nasoya nasoya fekengkefude.  
\v 5 Nga ge mefickena ye firang amma feracyunuma kuc nga kibikperagitoagoc ande. Ge ngickunenggac kuc nga kibikperagi mina ye kunengngina fekefude.  
\v 6 O, kenecgango yegoc nasosoc feengkefude. Ge yegoc kecnecac ye ubangerec negemma sogaima kefude.  
\v 7 Ngictau ye \sc KEBU\sc* negenserima kecde. Kebu Engenatoango yoac dedzege amma imoc modacma kecandeac wiac mongngo ngictau meu goroc goroc naric mi anude.   
\p
\v 8 Ge marigango ngabafocga mendangyununade nga marifoigango ngic geac modzongina tiande, yeni meyunuude.  
\v 9 Ge didiu fingectegecnade, naso imohai ngaba yeni ngic gerecfu manganeandae, ifi isoc kecgec gerecgango yonohoude. \sc KEBUNGO\sc* herebu amma gbokoyunuu gerecngo yonohou kpac anggecde.  
\v 10 Ge yeneac esafocngina kpetotieyunuma bangecfunac meicyununade. Amma ge yeneac gborifocngina ngic medacfocngina botucnginaunac meicyununa kpac anggecde.   
\m
\v 11 Yeni mangana arenggema gubeso amma ge tobanggugecdeac sing mengeregecdeu uangina imoc naric mi fingerude.  
\v 12 Ge tebega kicnginau kpesaina yeni dzigenema ngadeguma woragecde.   
\p
\v 13 O \sc KEBU\sc* kuctoagagoc, neni afeguma kuctoaga afehema yegec heinide.   
\c 22  
\s1 Ge nocac wanudang  
\d Yegecgareng yearu. Yegec yomoc yegec mong kpara Asoacac kebeseac, imocac uba modacma heibesonga. Dawidingo mitiyegec yofi heiec.  
\p
\v 1 Anutuna, Anutuna, ge ngadenuma wanudang, imoc naric mi ande. Ge neac hereau yombong kecma ebicfunac mi mesinunec, imoc mi ngereede. Ni asoring anenu kiacba ge nocac hereau namma yoacna mi negennec, ifi isoc ande.  
\v 2 O Anutuna, ni hadzing tofocnac kiacba turunga mi merennennec, ni waickema mong mi kecbade.   
\p
\v 3 Ge kpetiac, imoc fora. Israe neneng eriendzong megenni, imocngo ngictau tatacga anude.   
\m
\v 4 Bangecfocnina yeni warac negenseriguma kecgec. O, yeneng negenserigugec geng ebicfunac mesiyununec.  
\v 5 Yeni kpacgugec geng ebicfunac mesiyununec. Yeni negenseriguma seria nanggec ubangina kuha mi maec.   
\p
\v 6 Anu ni ngic kpac, ni gususac. Ngic yeneng desofoc anenggec ngicngac yeni neac modzongina tide.  
\v 7 Ngicngac sasawa yeni nemma detenic anemma nedzarang sinenemma orucngina kpatitickenemma yofi dedae,  
\v 8 “Ge ebicga \sc KEBUAC\sc* mariu fainecac yeng ebicfunac mesigubeso. Ye geac songo negendeac ebicfunac mesigubeso.”   
\p
\v 9 \sc KEBU\sc* gennoc nonggo heremanaunac menuna fingecma sabacfu nenggacnaac namu nema febareng geng garennumana ruaegoc fekefai.  
\v 10 Ni fingeraiunacngoc geac hoannu fainugec geac anai. Ni nonggo heremanau tacbareng kecma yaguc ge Anutuna kecnec.  
\v 11 Ebicngo mewegenenuu mongngo mi meficnuudeac geng neac hereau mi kecbesena.   
\p
\v 12 Burumaka ngiwa homacngo oronnuma nandae. Basanggac burumaka ngiwa kucnginagocngo oronnuma nandae.  
\v 13 Yeni mewegenenuma enacngina anggedae. Raiong yangtoa soringina nga enacnginango wiac mong merecgegecdeac kucgoc yombong arohoandae, yeni ifi isoc andae.   
\m
\v 14 Ngicngac yeneng doku bokonnunac kpakeandae, yeni ifi isoc ni kpakenugec kerengaiba sicna dzuhura sasawa fotockedacdac. Ni ubaherena kendokereha isoc amma herena manau sisingaima doku doku ande.  
\v 15 Enang dzame dzameaac noboha kerenga fede, ni ifi isoc gbanggema kucna dzikema kpac andac. Nedzarannango kerengaima dumbennau mendanggeu ge homecac sendunnu fainuna feduae.   
\m
\v 16 Kasi yeneng oronnuma sinna tidzickecdae nga yarengic habunginagoc yeneng oronnuma nangkecdae. Yeni hanimarina nendanggedau.  
\v 17 Sicna sasawa fingectegeru ni imoc osobadeacsoc anduae. Nga ngicngac yeneng kic nearu fiyombonggema ni ifi nemma negenggec ngereede.  
\v 18 Yeni wambana botucnginau mederema ngakpina merang meudeac kpeing kpedae.   
\p
\v 19 O \sc KEBU\sc*, ge neac hereau mi kecna. O, neac memeficngic, ge bic hama meficnuna.  
\v 20 Ge hama dzikacac beang, imohacnac mesinuna nga kekecna kasi yeneac kucfunac meickena.  
\v 21 Ge raiong yangtoaac enacfunac mesinuna. O, geng kpacna negemma ubaongana ubaebicgoc kecde, imoc kate burumakaac baicfunac onggonggenecac  
\v 22 ni munafocna geac kpac kuneng dekperagiyemmema kpebung botucnginau namma ge eriendzong megembade.   
\p
\v 23 Ngicngac \sc KEBU\sc* ewea heiandae, ngeni ye eriendzong memibisia. Nga Yakoboac gboricfora sasawa, ngeni ye afehebisia. Nga Israeac gboricfora sasawa, ngeni hemma yeac negenggec engena andeac kicngina yearu fima afehema nambisia.  
\v 24 Ye ngic kpendzengagoc hemma kpendzengtoaac amma ye mi ngadeheec nga ubango mi waec. Ye kicmesuya yearunac mi mesufuec nga kiaru yeng kiara negenec.  
\v 25 Geng oyang boyang ubanau faina ni habutoa yeneac botucfu namma ge eriendzong megembade. Nga ngic geac ewega heiandae, yeneac kicfu namma dedeserinaac turung kpoudacbade.   
\p
\v 26 Ngicngac makpekpea yeni nema gebecyunuude nga ngicngac \sc KEBU\sc* hofocandae, yeneng ye dengeregecde. O, ngeni herengina nasoya nasoya fekecbeso.  
\v 27 Bangec tegiaunac ngiha ngiha yeneng yeac negemma ubangina dzigeneu \sc KEBUARU\sc* kenggecde. Nga ngiha ngiha yeni sasawango tosofocnginagoc hama yeac kicfu ngonducnema numumigecde.  
\v 28 \sc KEBU\sc*, kuc minginango bangec monnunac ngicngac garengyunuude.   
\p
\v 29 O, bangecac ngicngac yeni yenanggac ngenggec wiac engena ande, yeni sasawango yeac kicfu ngonducnegecde. Yeni sasawango yeac kicfu ngonducnema bangecfu sendunnu kenggecde. Ngic yeni kekecngina garenggegecdeacsoc mi amma homedacgecde, yeni yeac kicfu ngonducnegecde.  
\v 30 Bangecfocngina ngade hagecde, yeneng kingang kpemigecde. Ngicareng ngade fingecgecde, yenemma Kebuac kpacsiduc dekperagiyemmegec negenggecde.  
\v 31 Yeneng yeac fakaya dindingac, imoc ngicngac areng ngade fingecgecde, yeni edeyunugecde. Ye uaya ifi mesiec, imoc edeyunugecde.   
\c 23  
\s1 Ramagareng gombunga  
\d Dawidingo mitiyegec yofi heiec.  
\p
\v 1 \sc KEBU\sc* ye neac gareng. Ramagarengngo ramafora garengyunuande, ye ifi isoc nenggareng anenu wiac monggac naric mi obohobade.  
\v 2 Ye maneng kpindzing sabayagoc fede, ihai fainuu febade nga doku tegiau hesicnuu ruaegoc kecnegeng ambade.  
\v 3 Ye ubaongana mengerema kuc gboria monggoc nenude. Amma ye yengena kparaac amma sing dindingacfu hesicnuu imohai kengkecbade.   
\m
\v 4 Nga ni homecac kperemennu kemema kundung kundunnu kembadeu wiac mangana fingeru imocngo kengec naric mi meficgenenude, nocac Kebu gennoc nigoc kecnec. Geac dzikac nga yasungo meserinuecde.   
\p
\v 5 Ge ngabafocna kicnginau yombong yakana mengerena neba kerecdokungo orucnau nadzicnenna sebinango ireckeude. Ge neac kpakenec mewakeyombonggena tosea ngadeau maude.  
\v 6 Ge faka gombunga anennade. Foracngoc, geng yoac dedzege amma imoc modackecnec nga fakaga imocngo hesicnuma kekecnaac uameme sasawau hesicnunadengoc.  
\p Nga ni \sc KEBUAC\sc* amau erema ihai nasoya nasoya kecengkecbade.   
\c 24  
\s1 Kuc nga kibikperagiaac ngictau  
\d Dawidingo mitiyegec yofi heiec.  
\p
\v 1 Bangeha bangeha nga wiac sasawa bangecfu fede, imoc \sc KEBUAC\sc*. Bangectoa bangec nga ngiha ngiha imocac witiau kecdae, yeni sasawa yeac.  
\v 2 Yennoc bangec meficgema imoc kondungdoku nga dokutoa witinginau faiu seria fede.   
\p
\v 3 Ngic merang \sc KEBUAC\sc* tikiu naric enude nga merang yeac ama kpetiacfu naric nanude?  
\v 4 Mong ye maria nga herea kongaha kecande nga nemuonga mi afeheude amma ikoc mi amma yoac mong mi deserima deude,  
\v 5 ye ifi kecmanu \sc KEBUNGO\sc* ye keneheu Anutu ebicfunac mesimesi minginango ye ngic dindingac demiude.  
\v 6 Ngicareng Anutu hofocandae, yeni siricngina ifi. Yeni Yakoboac Anutu, yeac kicfu nambeso ayemmede. \it Selac\it*   
\p
\v 7 Nagutoa ngeni hereema witigec. Nagu feengkecdae, ngeni kuc nga kibikperagiaac ngictaungo ereudeac hereema kunengngoc witigec.  
\v 8 Nga kuc nga kibikperagiaac ngictau imoc merac? Ye \sc KEBU\sc* kuctoa mingina amma \sc KEBU\sc* yennoc dzikacfu firang angkecde.   
\p
\v 9 Nagutoa ngeni hereema witigec. Nagu feengkecdae, ngeni kuc nga kibikperagiaac ngictaungo ereudeac hereema kunengngoc witigec.  
\v 10 Nga kuc nga kibikperagiaac ngictau imoc merac? Ye \sc KEBU\sc* wasai habuya habuya yeneac kunengngina, yennoc kuc nga kibikperagiaac ngictau. \it Selac\it*   
\c 25  
\s1 Ge kopocsicna nigecgubeso  
\d Dawidingo yegec yofi heiec.  
\p
\v 1 O\sc KEBUNA\sc*, ubaongana miacma gearu faiba hade.  
\v 2 O Anutuna, ni negenseriguma kecduae. Ngic yeneng game kpekpeu fainubauac geng kpae heiyemmebesena. Ngabafocna yeneng ebicnaac sogaima dedzomoc anembauac kpae heiyemmebesena.  
\v 3 Oc, ngic mong ye ge negensingguma tomai kefu yeneng desofoc ammibauac kpae heiyemmebesena. Nga ngicngac goa ikoc ayemmegecdeac areng faiandae, yeni ine game kpekpeu faiyunubesena.   
\m
\v 4 O \sc KEBU\sc*, ge singga edzacnuma hanisingga kpounenna.  
\v 5 Anutu ge neac ebicfunac mesi mesingic. Ge imocac yoacga forau hesicnuma faka fora edekpou anenna. Ni asoac kemma marai geac tomai kecduae.   
\p
\v 6 O \sc KEBU\sc*, ge wosoefacgagoc nga geng yoac dedzege amma imoc modackecnec, imocnoc hanac hanaheaunacngoc feec amma fehakecde, imoc negensina.  
\v 7 O \sc KEBU\sc*, ge gombunga. Amma yoac dedzege amma imoc modackecnec, imocac neac negenna febeso. Ni ngicmedac kecma singyoac kpekecma kopocsic meficgeai, ge imoc ine mi negenna febeso.   
\m
\v 8 \sc KEBU\sc* ye gombunga, ye dindingac yombong. Ye imocac ngicngac kopocsicgoc kecdae, yeni yengena sing edekpou ayemmeude.  
\v 9 Ye ngicngac yumia faka dindingac modacma hesicyunuma yengena sing edekpou ayemmeude.   
\p
\v 10 Ngicngac \sc KEBUAC\sc* dzadzahac nga dedekperagiyoac modacandae, yeni \sc KEBU\sc* hemma yofi negenggecde, ye yoac modac modac Kebu. Amma ye yoac dedzege amma imoc modackefude.  
\v 11 O \sc KEBU\sc*, ni kopocsic ebira yombong meficgeaiac kpac kunenggaac amma imoc sifu wana.  
\v 12 Ngic mong ye \sc KEBUAC\sc* ewea heikecde, ngic ifia ye merac? \sc KEBUNGO\sc* yenoc sing edekpou ammiu ngic ye sing imoc meisinggema modacbeso.  
\v 13 Amma ngic imoc ye kekeha ngereeu wiac monggac mi obohoude nga yeac esamedacfora yeni maridzoming dema bangec mema mingina anggecde.  
\v 14 Nga ngic \sc KEBUAC\sc* ewea heikecdae, yeneng yeac ogofora anggecde. Ye yengena dzadzahac dekperagiyemmeu yeni imoc negentegecgecde.   
\p
\v 15 \sc KEBUNGO\sc* hanina uficfunac mesiudeac meficnuudeac negeung amma kicna nasosoc yearu fikecbade.  
\v 16 \sc KEBU\sc*, ni tembucna amma ebicgoc kecduaeac neacnec wosoefac anemma dzigenema nearu monggoc hana.  
\v 17 Ni ebicna herenau fede, imoc monggoc yadide. Ge ubaebicfunac mesinuma ebicna sasawa meickena.  
\v 18 Ge kpendzenna nga hereebicna negensima kopocsicna wadacna.  
\v 19 Neac ngabangic yeni homac amma yeni ngabatoanginangoc amma ngadenuandae, imoc negensina.   
\m
\v 20 O, ni geac hoannu hama sufubadeac kekecna onggonggema ebicfunac mesinuna. Nga ngic yeneng desofoc anembauac ge kpae heiyemmebesena.  
\v 21 Ni geac tomai kecduaeac dindingac kecma kopocsic mong mi meficgeanduae amma ikoc nga hamangecna kpac kecanduaeac faka imocngo onggonnubeso.   
\p
\v 22 O Anutu, ge Israe ngicngac bummenunuma ebicfunac mesinunudacna.   
\c 26  
\s1 Ge yoacfu neac yoac dena  
\d Dawidingo yegec yofi heiec.  
\p
\v 1 O \sc KEBU\sc*, ni dindingac kecma kopocsic mong mi meficgeaiac nanggenuna yoacfu firang ambesare. Ni seria namma \sc KEBU\sc* negenserima kecanduae.  
\v 2 O \sc KEBU\sc*, geng faitobannu fainuma kekecna isinggema ubaherena ifingoc isinggema henna.   
\p
\v 3 Ge yoac dedzege amma imoc modackecnec, imoc hemma geac yoac tofohoma kecbade.  
\v 4 Ni ikocngic yenigoc naric mi kecbade nga ngic manganangina gombunga bageau mesufuandae, yenigoc naric mi kecbade.  
\v 5 Ni yarengic yenigoc naric mi kecbade nga ngic Anutu ngadehema mangana megecdeac ayemmeande, yenigoc naric mi tacbade.   
\p
\v 6 O \sc KEBU\sc*, ni kopocsic mong mi meficgema marina dzuacba kongac kpeu arataga wegenacfu yerecgebade.  
\v 7 Ni ubana miacma ubangerec megemma kucfakaga wiac engena negemma dekperagiba negenggecde.  
\v 8 O \sc KEBU\sc*, ge amagerecgau kuc nga kibikperagigagoc kecnec, ama imocac songo negenduae.   
\p
\v 9 Ge kopocsicmeme meicyununade, naso imohai ni yenigoc mi meicnuna. Nga ngic goa yeneng ngicngac ogofocngina yeneac sac hetinggegecdeac ayemmeande, ge meicyunuma neac kekec yenigoc mi meickebesena.  
\v 10 Ngic imoc yeni maringinau yarefaka anggecdeac wiac megecde nga marifoinginau hiedzo mema benukerere faka megec wakeude.  
\v 11 Ni neannaoc dindingac kecma kopocsic mong mi meficgekefai. Ge imocac wosoefac anemma ebicfunac mesinuna.   
\p
\v 12 Haninango bangec sorongau tima nambade nga habutoa yeneac kicfu \sc KEBU\sc* kenehebade.\f + \fr 26:12 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f*   
\c 27  
\s1 Kebu ye kperagi nga memefic  
\d Dawidingo yegec yofi heiec.  
\p
\v 1 \sc KEBU\sc* ye neac kperagi nga memengerec, ni wiac monggac kengec naric mi ambade. Ye sufu sufuamana amma ye kekecna onggonggema kecdeac monggac kengec mi ambade.  
\v 2 Yarengic yeneng wegenac hama gbokocnubesonga andae amma ngabafocna ogofocnginagoc wegenac hama tifainggema mayunuude.  
\v 3 Wasai ngic habutoagoc hama nugecdeac bedzongina mema oronnugecdeu ni naric mi kengecnuude. Yeni nugecdeac dzikac kpegecdeu ni negengyohocna kpac kecma seria nambade.   
\p
\v 4 Ni wiac mocgu imocac \sc KEBU\sc* numumima dekpesi ammima imoc hofockecduae, imoc yofi, ni \sc KEBUAC\sc* amau nasosoc tacyac amba kekecnasona wisickebeso. Ni yeac siriha gombunga yombong, imoc hemma yeac womonnu ye hembadeac anende.  
\v 5 Ye ebicnasou yengena oda manau onggonnuude. Ye kporucbedzoyau mesufunuma wi hoc peperandzi seriau fainuu gombunga kecbade.   
\m
\v 6 Ye orucna miaru ngabafocna oronnudae, yeni feracyunuma wi namma yenembade. Ni sogaima ubangerec negemma Anutu womongau sese faimima sogac sogaiac yegec heima \sc KEBU\sc* yaiyo kpemibade.   
\p
\v 7 O \sc KEBU\sc*, ni kunengngoc kiacba ge negennemma neac ubaga manganeu turunga merennenna.  
\v 8 Geng yofi denec, “Ge neac kicmesu hennadeac anggembeso.” Ge ifi dena herenango meremma dede, “O \sc KEBU\sc*, ni geac kicmesuga hembeso anende.”  
\v 9 O Anutu, ge ebicfunac mesinunade nga ni geac kingang ngicga. Ge kicmesuga nearunac mi mesufuna nga ngaba amma mi meicnuna. Ge meficnukecnecac mi ukununa. Ge ni mi ngadenuma wanuna.   
\m
\v 10 Nonggo manna yereng ngadenuma wanuec \sc KEBUNGO\sc* ine heitainuma nenggareng anenude.  
\v 11 O \sc KEBU\sc*, ngabafocna memanubeso ayemmedeac singga kpounemma sing sorongau hesicnuma kenna.  
\v 12 Ngic goa yeni enacnginaunac yareasu ereande, yeni yoacfu yacma neac yoac ikoha degecde. Ge yeneac songo mi modacna nga yeneac mariu mi fainuna.  
\v 13 Ni ngicngac gbori kecdae, yeneac bangecfu \sc KEBUAC\sc* kekec nga angammeme gombunga hembade, imoc negensinggeduae.   
\p
\v 14 Ge \sc KEBUAC\sc* tomai kecma seria nambesena. Heregango efaima kucgoc ambeso. Oc, ge \sc KEBUAC\sc* tomai kecbesena.   
\c 28  
\s1 Neac peperandzi seria  
\d Dawidingo yegec yofi heiec.  
\p
\v 1 O \sc KEBU\sc*, ge neac hoc peperandzi seria, ni kpacguduae. Ge kedzacga mi kpefonggena. Ge yoacga waickenadeu ni ngic homecamau kendae, yeni isoc ambade.  
\v 2 Ni kpesi kpesi gearu hama kiacba ge ubaudumenna negenna. Ni kicna kpetiac womonggaugeng fima marina miacba geng meficnunadeac numubade.   
\p
\v 3 Ngic Anutu ngadehema mangana megecdeac ayemmeande nga yarengic amma ngic enacnginango ruae dema herenginango ine tobangyunugecdeac mangana arenggeandae, meicyununade, imohai ni yenigoc mi meicnuna.   
\m
\v 4 Yeni fakangina mangana anggec nga megec, imocac turunga merengyemmena. Nga yeni mangana maringinango megec, ge imocac siricfu turunga yemmena.  
\v 5 \sc KEBUNGO\sc* ua mekecde nga mariango wiac meficgekecde, yeni imoc hemma wama mi negensiandaeac yeng kpedzameyunuma monggoc mi nanggeyunuude.   
\p
\v 6 \sc KEBUNGO\sc* neac kiac udumeng negendacac kenehebade.\f + \fr 28:6 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f*  
\v 7 \sc KEBU\sc* ye kucna nga kasona anu herenango ye negenserima kefude. Ye meficnuu herenango sogaiu ubangerecac yegec heimibade.   
\p
\v 8 \sc KEBU\sc* ye ngicngacfora yeneac kucngina. Ye ngiha meisinggema kerec nadzimima yeac sufu sufuamea amma ebicfunac mesiude.  
\v 9 O, ge ngicngacfocga ebicfunac mesiyununa amma maridzoming ngicngacfocga andae, yeni kenecyunuma yenenggareng ayemmema nasoya nasoya tofohoyunubesena.   
\c 29  
\s1 Anutuac kpakpac didiu fingecde  
\d Dawidingo yegec yofi heiec.  
\p
\v 1 O, anutu hania hania yeneac medacfocngina kucnginagoc kurumennu kecdae, ngeni \sc KEBU\sc* eriendzong memibisia. Amma ngeni \sc KEBUAC\sc* kuc kibikperagiagoc negensima eweheihei ammibisia.  
\v 2 Ngeni \sc KEBUAC\sc* kpara eweheiheigoc heiwayong memibisia. \sc KEBU\sc* ye kpetiac, imocac ngeni ngonducnema numumibisia.   
\p
\v 3 \sc KEBUAC\sc* ubaudumeng imoc doku witinginau fingerude. Anutu kuc nga kibikperagia minginango kondungtoa witiau gbururung amma heiude.  
\v 4 \sc KEBUAC\sc* ubaudumeng imoc kuhagoc yombong. \sc KEBUAC\sc* ubaudumeng imoc ngictauac ubaudumeng ande.  
\v 5 \sc KEBUAC\sc* ubaudumengngo yomondzoc ic kpetackeude. \sc KEBUNGO\sc* Rebanong bangecac yomondzoc ic kpedzameyunuude.  
\v 6 Yeng Rebanong bangec yoac edeu ye burumaka medaha isoc yuude nga Siriong bangec ye burumaka ngiwa isoc yuude.   
\m
\v 7 \sc KEBUAC\sc* ubaudumengngo gerecborang meficgema ukuyunuu singsararang kpegecde.  
\v 8 \sc KEBUAC\sc* ubaudumengngo bangec kisiu fingeru imocngo dzonoma fedeude. \sc KEBUNGO\sc* Kadesi bangec kisi kpemindzaheude.  
\v 9 \sc KEBUAC\sc* ubaudumengngo kateburumaka yoac edeyunuu medacfocngina fingecgecde. Yeng ic maria kpemoronggedarude. Yeac womonnu yofi dema arohodacgecde, “\sc KEBU\sc* eweheiheiagoc dengereni.”   
\p
\v 10 \sc KEBUNGO\sc* ngictau tatahau dokutunggbaung witiau tacde. Ye ngictau tatacfu tacma ngictau nasosoc kecengkefude.  
\v 11 \sc KEBUNGO\sc* ngicngacfora kuc nemmema kenecnunuu ruaegoc kecbisina.   
\c 30  
\s1 Kebu ye gombunga  
\d Dawidingo womong desi desinasoac mitiyegec yofi heiec.  
\p
\v 1 \sc KEBU\sc* ge keme kemeaunac tainuna ereduaac afegubade. Geng ngabafocna kpae heiyemmena yeneng neac amma ubangerec mi meficgebisia.   
\m
\v 2 O \sc KEBU\sc*, Anutuna, ni gearu memeficac kiacma numuba geng mengerenunec.  
\v 3 O \sc KEBU\sc*, ge homec amaunac menunec. Nga tennu keme kemeac arennu tacbareng geng menuma kekecna homecfu kemegecde, yeneac arennunac mesinunec.   
\p
\v 4 O, \sc KEBUAC\sc* ngicngac kpetiac, ngeni ye dengerema yegec heibisia. Ngeni yeac kpara kpetiac heiwayong memibisia.  
\v 5 Ye ngabaya naso wegenanec mekefude nga fakaya gombunga imoc kekecninau sasawa fekefudengoc. Ge tofocnac kiacade nga asoac sogac sogai meficgenade.  
\v 6 Ni naric kecma wiac monggac mi obohoai, imohai yofi deai, “Ni seria nanduaeac wiac mongngo nuu goroc goroc naric mi ambade.”  
\v 7 Nga ge kicga nearu sufuna ine kengecngo memanuec. O \sc KEBU\sc*, gennoc faka gombunga anemma tatacnau fainuna tiki seria isoc seria yombong nanai.  
\v 8 O \sc KEBU\sc*, ni kpacguma kpesi kpesi amba negennennadeac yofi numugenai,   
\m
\v 9 “\sc KEBU\sc*, ni homema homecamau kemebadeu wiac mong naric mi gembac. Bangecac sendungngo ge naric mi dengereguude nga ge yoac modac modac Kebu, imoc naric mi dekperagiude.  
\v 10 O \sc KEBU\sc*, geng negennemma ubamangang anenna, o \sc KEBU\sc*, ge meficnuna.”   
\p
\v 11 Geng ubaebicna heimerenna yegec fededuae nga songgonggac wamba heikefai, ge imoc meickema sogac sogaiac wamba heinenna kemeec.  
\v 12 Ge ifi anna ni waicke monggoc mi kecbade. Herenango yegec heima eweheiheigoc afegubade, o \sc KEBU\sc*, Anutuna, ni nasoya nasoya ge eriendzong megembade.   
\c 31  
\s1 Ruae meficgenide  
\d Yegecgareng yearu. Dawidingo yegec yofi heiec.  
\p
\v 1 O \sc KEBU\sc*, ni gearu hama sufubeso anduae. Ngicngac yeneng game kpekpeu fainubauac kpae heiyemmedacna. Ge dindingac, imocac ebicfunac mesinuna.  
\v 2 Ge kedzacga nearu faima nearu bic hama ebicfunac mesinuna. Ge neac hoc peperandzi seria anna imohai hama sufubade. Ge amana seria amma ebicfunac mesinubesena.   
\p
\v 3 Foranoc, ge neac hoc peperandzi nga amana seria. Ge kpac kunenggaac amma hesicnuma singga edzacnuna.  
\v 4 Ge neac sufu sufuama annecac ngic yeni ufic sufu sufuu faigec mendannuu, geng imohacnac yungecnuna.  
\v 5 Ni asuna marigau faiduae. O \sc KEBU\sc*, yoac modac modac Anutuna, geng bummenuma ebicfunac mesinunec.   
\p
\v 6 Ngicngac yeneng nemuonga ikocnginagoc hoangyunuma eweheihei ayemmeandae, ni ine yeni ubango wayunuma \sc KEBU\sc* negenserima kecbade.  
\v 7 Geng kpendzenna hengkecnec nga geng yoac dedzege amma imoc modackecnec, imocac ubangerec negemma sogaibade.  
\v 8 Ge ngabafocna yeneac mariu mi fainuma sawea homac meficgenenna haninango naric tima nambade.   
\p
\v 9 O \sc KEBU\sc*, ni ubaebicgoc kecduaeac amma ge neac ubaga manganeu. Ni ubahodunnagoc kecba kicna ngopic ande nga ongasebinango undzang kpema kecduae.   
\m
\v 10 Kekecna ubahodunggoc kefai nga asoringa anenu kifana kengkefec. Ni ngicngac memanganeyunukefaiac amma kucna kpac anu sicnango kucmama amma kpac ambeso ande.   
\m
\v 11 Ngabafocna sasawa yeneng desofoc anenggecde. Nga ngicngac nigoc wegenac kecandae, yeni neac modzongina tiu wanugec ogofocna yeneng sinnu meficnuma nemma woragecde.  
\v 12 Ngic ogofocngina homegec ngicngac yeneng yeneac nigecyunuande, yeni ifi isoc neac nigecyunuec. Enang mong tohou ngic yeneng imoc ukuandae, ni ifi isoc anduae.   
\m
\v 13 Ngicngac homacngo neac dengunuc kpengunuc anengkecdae imoc negenduae. Ni noboc noboc kemma kengectoa amma kpidohoba yeni nugecdeac yoac dedzege amma kpebucnugecdeac yoac dzegedae.   
\p
\v 14 O \sc KEBU\sc*, ni negenseriguma yoac yofi deba, “Ge Anutuna.”  
\v 15 Neac naso imoc geac mariu fede. Ge ngabafocna nukporac anendae, yeneac mariunac mesinuna.  
\v 16 Ni geac kingang ngicga, imocac kicmesugango nerarannuna. Geng yoac dedzege amma imoc modackecnecac ebicfunac mesinuna.   
\m
\v 17 O \sc KEBU\sc*, ni kpacguduaeac negennnenna. Ngaba yeneng game kpekpeu fainubauac ge kpae heiyemmena. Ngic Anutu ngadehema mangana megecdeac ayemmeande, yeni ine game kpekpeu faiyunubesonga nga yeni yoacngina kpac amma homecamau kemebisia.  
\v 18 Nga ngicngac enacbibicnginango ikoc angandae, ge yeneac enac medzickena. Ngic yeni yenanaggac negenggec engena anu ngic ogofocngina dindinga ngadeyunuma yeneac ubakpekpeyoac deandae, ge ngic imoc yeneac enac medzickena.   
\p
\v 19 Ngicngac ge eweheihei anggendae, yeni gombungagango garengyunuannec. Nga ngicngac neneng geac hoannu hama sufuni geng ngicngac sasawa yeneac kicfu gombungaga meficnununade, fakaga gombunga imoc homac yombong kpac.  
\v 20 Ge kasonina anna ngicngac yeneng memanganenunugecdeac arenggegec geng mesufununuannec. Ge kasonina amma hoangnununa ngic mangana yeneac yoac manganango naric mi memanganenunuude.   
\m
\v 21 \sc KEBU\sc* kenehebesonga. Ngaba yeneng taongtoa hedzickeandae, yeni ifi isoc sinna hedzikegec imohai Kebu yoac dedzege amma imoc modackecde, yeng wiac engena mema garennuec.  
\v 22 Foracngoc, ni kengec amma yofi deai, “Yeni kicgaunac meicnuma hereau fainugec.” Nga ni kpesi kpesi amma meficnunadeac kiacba gennoc kiacna negennec.   
\p
\v 23 \sc KEBUAC\sc* kpetiac ngicngac sasawa, ngeni ye songogoc hoanggebisia. Yeng ngicngac yeac yoac modacandae, yeni onggongyunuude.  
\m Ngic yeni yenanggac negenggec wiac engena anu angammeme hania hania angandae, imohai yeng turunga mangana efea kpac merengyemmeude.   
\m
\v 24 \sc KEBUAC\sc* tomai kecandae, ngeni herengina meserima serima nandacbisia.   
\c 32  
\s1 Kopocsic defic deficge  
\d Yegec yomoc masiki uba modacma heibesonga. Dawidingo yegec yofi heiec.  
\p
\v 1 Ngic mong ye singyoac kpeu Kebungo ebiha wamima kopocsihaac ebic semeec, ye kenehagoc.  
\v 2 Ngic mong ye ngicngac ogofora memanganeyunuu \sc KEBUNGO\sc* kopocsiha wau kpac andac deande nga ngic mong ye asuyau ikoc mong mi fede, ngic imoc ye kenehagoc.   
\p
\v 3 Ni kopocsicna mi deficgema waba feu asoacnac kemma marai asoringa anenu mi wisickemanu kecbare sebina kpac ambeso anec. Wenac nasou wiac kerenga amma moronggeande, ni kucna ifi isoc kpac anec.  
\v 4 Ge marigango hadzing toforec merandzinukecnecac wenacngo kpeu bangec gbanggeande, kucna ifi isoc gbanggema kpac ambeso anec. \it Selac\it*   
\p
\v 5 Anu ni kopocsicna gearu deficgeai. Ni kopocsicna mi semema yofi deai, “Ni singyoac kpekefai, imoc \sc KEBUARU\sc* deficgebade.” ifi deba geng kopocsicna wama ubamanganna meickena kpac anec. \it Selac\it*   
\p
\v 6 Anutuac enac tofoc tofohongic yeni ebic fingecyemmeu yeneng gearu numubisia. Numugec ebic kuneng me doku tunggbaungngo naric mi kpesereyunuude.  
\v 7 Ge neac sufu sufuama. Ebicngo memanubeso anu geng onggonnuna ebicngo naric mi memanganenuu geng sogac sogaiac aro kunengngo oronnunade. \it Selac\it*   
\p
\v 8 \sc KEBUNGO\sc* deec, “Ge singga tinade, imoc edekpou anggemba, imoc modacbesena. Kicnango modacguma dederecgeyoac anggembade.   
\m
\v 9 Becosic nga donggi yeni negen negengngina kpac kecdae. Ge yeni isoc mi ambesena. Yeni dumbengnginau witic kpena kemeu, imohai yoacga modacgecde nga witiha kpacngo geac wegenac naric mi hagecde.”   
\p
\v 10 Ngicngac Anutu ngadehema mangana megecdeac ayemmeande, yeni ebic homac meficgema mayunuude. Nga ngicngac yeni \sc KEBU\sc* negenserima kecgec \sc KEBUNGO\sc* yoac dedzege amma imoc modarude. Nga yeac faka imocngo orongyunuude.   
\m
\v 11 O ngicngac dindingac, ngeni sasawango sogaima \sc KEBU\sc* dengerebisia. Ngicwiac herenginau ikoc nga hamangec mong mi fede, ngeni sasawango sogaima dendzerenggema arohobisia.   
\c 33  
\s1 Dedengerecac yegec gboria  
\p
\v 1 O ngicngac dindingac, ngeni \sc KEBUAC\sc* amma sogaibisia. Ngicngac ngeni ikoc nga hamangecngina kpac kecdae, ngeni ye eriendzong memigec ngereede.  
\v 2 Ngeni kurerengo \sc KEBU\sc* dengerema gita witiha 10 kpema yeac musi gombunga kpebisia.  
\v 3 Ngeni yeac yegec gboria heimibisia. Ngeni gita mengerema kpegec musi gombunga fingeru dendzerenggema yegec heibisia.   
\p
\v 4 \sc KEBUAC\sc* yoacfu ikoc nga hamangec mong mi fede, kpac. Ye yoac dema imoc modacma uaya sasawa mekecma mesiude.  
\v 5 \sc KEBUNGO\sc* dindingac kekec nga sing dindingac modac modac fakaac songo negenude. \sc KEBUNGO\sc* yoac dedzege amma imoc modackecde, yeac faka imocngo bangec sokoma fede.  
\v 6 \sc KEBUNGO\sc* yoac dema kurumenga kurumenga meficyunuec. Ye enacasuyango wenac nga afo amma asomeng habutoanginagoc meficyunuec.  
\v 7 Ngicngac yeni doku kirunnu faiandae, yeng ifi isoc kondunggac doku kpedzucyunuu mocgu anggec amma kondung keme kemea dokunginagoc amangina mengerema tatacnginau faiyunuec.   
\p
\v 8 Bangectoa bangecngo \sc KEBU\sc* ewea heimibeso nga bangectoa bangecac ngicngac, ngeni sasawango hemma yeac negenggec engena ambeso.  
\v 9 Yeng yoac enacngo deu wiac imoc fingerec. Nga fingecgec deu imohaingoc wiac sasawa fingecdacma seria feec.  
\v 10 Bangec monnunac ngicngac Anutu mi negemmidae, yeneng negen negengngina arenggegec \sc KEBUNGO\sc* imoc meu kemma kpac anude. Nga ngiha ngiha yeneng ua mong mebesonga arenggegec yeng singngina hedzickeu imoc naric mi megecde.   
\m
\v 11 Nga \sc KEBUNGO\sc* wiac mong mebesonga negenude, wiac imocngo nasosoc fefeseri feengkefude. Yeac hereaac negen negeng, imongo fingecsahenina fekecdesoc, imohai feengkefude.   
\p
\v 12 Bangecareng mong yeni Anutungina \sc KEBU\sc* yeni kenecnginagoc. Ye yengena areng meisingyunuu yeac maridzoming areng anggec.   
\m
\v 13 \sc KEBUNGO\sc* kurumennunac kiwa fiu mau bangecngicngac sasawa yenendarude.  
\v 14 Ye ngictau tatahau tacma kiwa bangecac ngicngac yenearu fima nenendacma  
\v 15 ngicngac neneac woubocninaac siriha dema meficgedaru faka angammemenina sasawa hennegeng anude.   
\p
\v 16 Ngictau ye yengena wasai ngichabu yeneac kucfu dzikacfu firang naric mi anude nga wasaingic ye yengena kucfu ngaba yeneac mariunac naric mi woraude.  
\v 17 Dzikacac becosicac kucfu dzikacfu firang angandae anu negen negeng imocngo fora mi ande. Nga becosic kuctoanginagocngo ngaba yeneac mariunac naric mi mesiyunugecde.   
\m
\v 18 Foracngoc, ngicngac yeneng \sc KEBUAC\sc* ewea heiandae, Kebungo yeni kiwango yenenude. Yeng yoac dedzege amma imoc modackefude nga ngicngac yeneng imoc negensima fora fingerudeac tomai kecandae, ye kiwango yeninoc yenenude.  
\v 19 Yeng yenenggareng ayemmema homecfunac mesiyunuude. Ye bodi nasou yakaac garengyunuu kecgecde.   
\p
\v 20 \sc KEBU\sc* ye memefic nga kasonina nga wiac fingerudeac ubaonganinango yeac tomai kecde.  
\v 21 Neni yeac kpara kpetiac negenserima kecnideac hereninango yearu sogaima kecde.   
\m
\v 22 O \sc KEBU\sc*, geng yoac dedzege amma imoc modackecnecac hoannunubesena. Neni ge negensingguma tomai kecni fora fingecbeso.   
\c 34  
\s1 Ebicfunac mesiec  
\d Dawidingo Abimerecac kicfu fingecma ikoc amma uba sufu sufungic isoc anu Abimerecngo ye kporaru mama worama yegec yofi heiec.  
\p
\v 1 Ni nasosoc \sc KEBU\sc* keneheba,\f + \fr 34:1 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* yeac dedengerecngo neac enacbibicfu nasosoc fekefude.  
\v 2 Ubaonganango \sc KEBUAC\sc* negenu wiac engena anu ye dengereba. Ngicngac makpekpea yeneng imoc negemma sogaibisia.  
\v 3 O, ngeni nigoc \sc KEBU\sc* kpac kuneng mima nenahafoc yeac kpac kuneng heiwayong memini.   
\p
\v 4 Ni \sc KEBUNGO\sc* meficnuudeac ye hofocba yeng kengecna meickema ebicfunac mesinuec.  
\v 5 Ngicngac neni kicnina yearu fini sogac sogaiac kperagingo kicmesunina mekperagiu kperagigoc annide nga kicmesunina gameagoc amma sacsac naric mi kpeude.  
\v 6 Ni ngic makpekpeango kiacba \sc KEBUNGO\sc* neac kpakpac negemma ebicfunac mesinudarec.   
\p
\v 7 Ngicngac neneng Anutuac eweheiheigoc kecni \sc KEBUAC\sc* angerongo ebicfunac mesinunuudeac nenigoc kecma oronnunuude.   
\p
\v 8 \sc KEBU\sc* gombunga, ngeni imocnoc nehemma kicnginango hembisia. Ngic mong ye yeac hoannu kemma sufuma kecande, ye sogac sogaigoc kefude.  
\v 9 \sc KEBU\sc* eweheihei ammiandae, yeni wiac monggac naric mi obohogecde. Imocac ngicngacfora kpetiac kecdae, ngeni ye eweheimima kecbisia.  
\v 10 Raiong yang gboria yeni yaka hofocma herenginaac homegecde, fora. Anu ngicngac \sc KEBU\sc* hofocandae, yeni wiac gombunga monggac naric mi obohogecde.   
\p
\v 11 O nambarac, ngeni yei hama yoacna negembisia. Ni \sc KEBUAC\sc* eweheiheigoc kekec kpoungemmebade.  
\v 12 Ge kecnadeac anggendeu nga nasoga mehereema kekec gombunga kecnadeac anggendeu  
\v 13 ge nedzaranggango yoac mangana mi debesena amma ge enacbibicgango ikocyoac mong mi debesena.  
\v 14 Ge yarefaka wama gombunga angkecbesena amma ruaekekec meficgenadeac anggenu imoc meficgenadeac uatoa mebesena.   
\p
\v 15 \sc KEBUNGO\sc* kiwa ngicngac dindingac yenearu fima kedzac kpema kiacngina negenude.  
\v 16 Ye yarengic yenemma meicyunuu bangecfu ngicngac ninigec meficgeyemmeu yeneng monggoc mi negensiyunugecde.  
\v 17 Ngicngac dindingac yeni \sc KEBUNGO\sc* meficyunuudeac kiacgec yeng kiacngina negemma ebicfunac mesiyunudarude.  
\v 18 Ngicngac ubamanganggac wosongina toho tohoya kecgec \sc KEBUNGO\sc* yeneac wegenac kefude nga ngicngac asuu kpungge kpunggea kecdae, yeni ebicfunac mesiyunuude.  
\v 19 Ngic dindingacngo kpendzeng kpekecde, imoc wiac homac yombong, nga \sc KEBUNGO\sc* sifu ye ebicfunac mesidarude.  
\v 20 Ye sira gombunga garenggeu sira mongngo naric mi usuude.   
\m
\v 21 Ngic Anutu ngadehema mangana meudeac ammiande, ye yarefakaac wiac manganango kpebucgeude. Nga ngicngac ngic dindingac ngaba ayemmeande, yeni yoacfu kopocsicnginagoc deyemmegec makpegecde.   
\m
\v 22 \sc KEBUNGO\sc* kingang ngicfora kekecngina bummema ebicfunac mesiyunuude nga mong ye yeac hoannu hama sufuude, ye yoacfu naric mi makpeude.   
\c 35  
\s1 Nukporac anenggec garennuna  
\d Dawidingo yegec yofi heiec.  
\p
\v 1 O \sc KEBU\sc*, ngic yoackpekpe anendae, yeni yoakpekpe ayemmebesena. Nga ngic nigoc eweandae, yenigoc ewema yunubesena.  
\v 2 Kebu ge dzikacac kaso nga mariku mema yacma meficnuna.  
\v 3 Ge tebe nga dzikacac naka mema ni kisannuandae, yeni yununa. Ge ongana yofi edena, “Ni ebicfunac mesigubade.”   
\p
\v 4 Ngic yeni kpebucnubeso anggec geng feracyunuma game kpekpeu faiyununa eweheiheia kpac ambisia nga kpetotienubeso anggec geng kpae heiyemmena yeni dzigenema oboc kpoboc ambisia.  
\v 5 \sc KEBU\sc*, firangngo padihakoya fifiranggema kisangande, ifi isoc fingecbeso. Geac angerongo ifi kisangyunuu kembisia.  
\v 6 Ge negemmana yeni singngina kundung kpema pososoc anu \sc KEBUAC\sc* angerongo kisangyunubeso.  
\v 7 Yeni hania kpacfu eng memanganenubeso dema ufic mong mesufuma faigec nga kekecna eng megecdeac dema teng mong usugec.  
\v 8 Nga geng negemmana yeneng wiac mong mi negemmagec wiac manganango hama kpetotieyunubeso. Yeni ufic faigec, imohai imocngo yenang mendangyunubeso amma teng usugec, imohai yenaoc kemegec kpetotieyunuu kpac andacbisia.   
\p
\v 9 Ifi anu onganango \sc KEBUAC\sc* amma sogac sogai meficgeude amma yeng ebicfunac mesinudacac ubangerec negembade.  
\v 10 Sicna sasawango degecde, “O \sc KEBU\sc*, ge isoc mong mi kecde. Ngic kucnginagoc yeni kucmama feracyunugec geng yeneac mariunac mesiyununade. Ge ngic kucmama nga makpekpea godzungic maringinaunac mesiyunuannec.”   
\p
\v 11 Ngic yeni mangana arenggema yacma yoacfu nearu hama faka goa mi negenduae, imocac dekpesi anendae.  
\v 12 Ni yeneac faka gombunga amba yeneng ine turunga mangana merennendae, imocac ongana ebiride.   
\p
\v 13 Anu yeneng hafei amma kecgec, imohai ni sifu ubamanganggac wamba torungo memea heima yakasege kpendzenggoc kecma ngonducnema yeneac amma numuai.  
\v 14 Faka anai, imoc neanna sactosona monggac me dacnaac angang isoc ubamangang negengkefai. Amma nonggonango homeu ambai isoc songgonggac wamba heima ngonduc ngonduc kengha kefai.   
\m
\v 15 Anu ni tifainggeai, imohai yeneng ine ubangerec negemma adzoroma namma nubeso anggec. Yeneng memanugecdeac kpedzucnegec nga godzungic goa mi negengyunuduae, yeneng memanganenugec, imoc wisic wisickea kpac.  
\v 16 Ngic Anutu ngadehema mangana angkecdae, yeneng yeni isoc monggoc nga monggoc enac kisaranggedae.   
\p
\v 17 O \sc KEBU\sc*, ge naso dafiguc wiac imoc kicga fima hennade? Yeni memanganenudaeac yeneac mariunac meicnuna. Ge kekecna raiong yangtoa yenearunac meicnuna.  
\v 18 Geng ifi anna ni kpebung habutoa yeneac kicfu geac ubangerec megembade amma ngicngac habutoagoc nanggec ni yenigoc namma eriendzong megembade.   
\m
\v 19 Anu ngabafocna yeneng hania kpacfu ngaba anemma dedzomoc anembauac kpae heiyemmebesena. Yeni hania kpacfu neac modzongina tiu ebic imocac ubangerec negemma kicparac kpounembauac kpae heiyemmebesena.  
\v 20 Yeni ruaeac yoac mong mi deandae nga ngic bangecfu yumia kecdae, yeneac ikocyoac dema memanganeyunugecdeac negensidae.  
\v 21 Yeni enacngina anggema udumengtoa meficgema neac yofi deandae, “Yahec, imoc gennoc andang, neni gending.”   
\p
\v 22 O \sc KEBU\sc*, ge wiac sasawa bic hennec. Ge imocac yoacga mi waickena. O \sc KEBU\sc*, ge neac hereau mi kecbesena.  
\v 23 O Anutu, ge neac Kebu. Ge yacma kockpac amma yoacna nanggema meseribesena.  
\v 24 O \sc KEBU\sc* Anutuna, ngabafocna yeneng dedzomoc anembauac fakaga dindingac modacma nanggenuna yoacfu firang ambesare.   
\m
\v 25 Yeni ge negemmana yofi mi deemebisia, “Naric yombong, ifi yombonnoc fingecmiudeac negening.” nga yeni monggoc mi debisia, “Yagucnoc ye kpetotieni kpac andarude.”   
\m
\v 26 Yeni neac ebicac amma ubangerec negendae, imocac ge negemmana yeni oboc kpoboc anggec game kpekpeu faiyunubesonga. Ngicngac goa yeneng memanuma feracnuma ubangerec negendae, yeni gamengo wamba isoc semeyunuu eweheiheia kpac kecbisia.   
\p
\v 27 Nga ngicngac yeni neac yoacac fora dindingac fingerudeac ayemmeande, yeni ge negemmana ubangerec negemma sogaima dendzerenggema arohobisia. Yeni nasosoc yofi dekecbisia, “\sc KEBU\sc* ye engena yombong, ye kingang ngihango gombunga kefudeac songo negenude.”  
\v 28 Ifi anu neac nedzarangngo fakaga dindingac dekperagima asoacnac kemma marai dedengerecga deude.   
\c 36  
\s1 Manganaac faitobang  
\d Yegecgareng yearu. \sc KEBUAC\sc* kingangngic Dawidingo yegec yofi heiec.  
\p
\v 1 Ngic mong ye Anutu ngadehema mangana meudeac ammiu singyoackpekpengo yeac herea keme kemeau yombong kehema yoac edeude. Ye kiwango wiac hendacma Aunutuac kengec mong mi negenude.  
\v 2 Ye yoackerec nga ikoc angemema ubeau yofi negenude, “Ngicngac ogofocna memanganeyunudua, imoc ngic mongngo naric mi hennegeng anude nga fakana imocac modzongina mi tiude.”  
\v 3 Ngic imoc ye enacngo ogofocngina tobangyunuudeac yoac nga ikocyoac arenggema deude. Ye bicngoc negentegecma wiac gombunga angkefec, imoc bic wama eng kefude.  
\v 4 Nga ye fefeau fema ogofora tobangyunuudeac mangana arenggema sing manganasac modackefudeac negenude. Ye faka angammeme mangana mong mi ngadehema waude.   
\s1 Anutu ye memeficnina  
\p
\v 5 O \sc KEBU\sc*, geng yoac dedzege amma imoc modackecnec, fakaga imocngo emma kurumenga kurumenga kpesereyunuude. Nga yoac modac modac fakagango wi emma hoeng kpesereyunuude.  
\v 6 Tikitoa nangkendae, ifi isoc geac dindingac kekecga ande. Ge yoacfu sing dindingac modacma yoacngina desiyemmeannec, imocngo kondung keme kemea isoc ande. O \sc KEBU\sc*, ge ngicngac nga yang hania hania momoc onggongyununade.   
\m
\v 7 O Anutu, geng yoac dedzege amma imoc modackecnec, fakaga imoc wiac engena yombong. Neni, ngicngac yeneac nambaracfocnginango, geac hoannu hadacma kpegangga marabeau sufuma kecnide.  
\v 8 Geac amau yaka gombunga gombunga homac feu ubangerecga doku isoc hanemmeu nekecdimbe.   
\m
\v 9 Kekecac haniaac dokudzohong, imoc gearu fekefude nga neni geac kperagiu kperagi hengkecdimbe.   
\p
\v 10 O Kebu, geng yoac dedzege amma imoc modackecnecac fakaga imocac ngicngac negenggukecdimbe, nenearu fekecbeso. Ngicngac herenginau ikoc nga hamangec mong mi fede, geng yeni ebicfunac mesiyununa.  
\v 11 Ubakpekpe ngic ye haniango ni tifacnubaac kpae heimibesena. Amma ngic Anutu ngadehema mangana megecdeac ayemmeande, ge yeneac kpae heina yeneng ni mi kporacnubisia.  
\v 12 Yarengic yeni bangecfu mayunuu fedae, yeni mayunuu monggoc mi yacgecde.   
\c 37  
\s1 Bangec medacgecde  
\d Dawidingo yegec yofi heiec.  
\p
\v 1 Ngic Anutu ngadehema mangana megecdeac ayemmeande, ge yeneac modzoga mi tibeso. Nga faka mangana angandae, ge yeneac keracmangang mi ambesena.  
\v 2 Yeni naso wegenacnecsac kecma kpindzingngo dzanggeande, ifi isoc dzanggegecde. Wiac mong maria tengging tenggingngo homeande, yeni ifi isoc homegecde.   
\m
\v 3 Ge \sc KEBU\sc* negenserima kecma faka gombunga angkecbesena. Ge ifi amma bangecfu naso herea kecma bangec imocac hoannu sufuma ruaegoc kecnade.  
\v 4 Ge \sc KEBUAC\sc* songo negembesena. Ge ifi anna yeng heregaac songo modacma wiac genude.  
\v 5 Ge kekecgaac sing \sc KEBUAC\sc* mariu faima ye negenserima kecna yeng uaya mekefude.  
\v 6 Nga yeng nanggeguu ge firang anna imocngo wenac kperagia isoc mekperagiyunuude. Amma nanggeguu dindingac annade, fakaga imoc wenac nasou wenac kperagiande, ifi isoc kperagiude.   
\p
\v 7 Ge \sc KEBUAC\sc* kicfu waickema tomai kecma kucga mi mabeso. Ngic mongngo yarefaka arenggema iwai sasawa meficgema naric kefude, imoc fingeru ge yeac modzoga mi tibeso.  
\v 8 Ge ngaba mi ambesena nga herebufaka imoc ngadehema monggoc mi negembesena. Modzotitingo manganau wangecguudeac ngicngac ubango mi ukuyunubesena.   
\m
\v 9 Ngic Anutu ngadehema mangana megecdeac ayemmeande, ye meicyunuu kpac anggecde. Nga ngicngac \sc KEBUAC\sc* tomai kecandae, yeni maridzominggac arennu bangec mema mingina anggecde.  
\v 10 Ngic Anutu ngadehema mangana megecdeac ayemmeande, yeni naso mi hereemanu monggoc mi kecgecde. Ge tatahau kemma ye hofocyombonggema naric mi meficgenade.   
\m
\v 11 Anu ngicngac yumia yeni maridzoming arennu bangec mingina anggecde. Yeni finac hania hania efea kpac mekecma ubangerecgoc kecgecde.   
\p
\v 12 Ngic Anutu ngadehema mangana megecdeac ayemmeande, yeni ngic dindingac yunugecdeac areng faima enac kisaranggedae.  
\v 13 Nga \sc KEBUNGO\sc* ine yenemma dzomoreude, nocac nasongina wegena haude, imoc bic negende.   
\m
\v 14 Ngic Anutu ngadehema mangana megecdeac ayemmeande, yeni soe taima tebengina kpedzigecde. Yeni ngicngac makpekpea amma ngicngac iwaiac obohoma kecdae, yenemma ngicngac ikoc nga hamangecngina kpac kecandae, yeni yenemma yunugecdeac ayemmeude. Yeni ngicngac herengina dindingac kpebucyunugecdeac ayemmeande.  
\v 15 Soenginango yenang herengina nendanggeu tebengina usuude.  
\v 16 Nga ngic didingacngo wiac kapianec mekecde, imoc wiac gombunga. Anu ngic Anutu ngadehema mangana megecdeac ayemmeande, yeni wiac efea kpac feyemmeude, imocngo ngic dindingac yeac finacbisic, ifi isoc mi ngereeude.   
\p
\v 17 Ngic Anutu ngadehema mangana megecdeac ayemmeandae, yeni ebicfu enggec maringina kpetackeude. Anu \sc KEBUNGO\sc* ngicngac dindingac nanggeyunuu seria nanggecde.   
\m
\v 18 \sc KEBUNGO\sc* ngic kopocsic mong mi meficgeandae, yeneac nasongina negendacde. Nga yeni maridzoming negemma wiac megecde, imoc wisic wisickea kpac anu  
\v 19 naso ebihagoc hau yeni seria nanggecde. Mongngo game kpekpeu naric mi faiyunuude nga bodinaso hau wiac monggac naric mi obohogecde.   
\m
\v 20 Ngic Anutu ngadehema mangana megecdeac ayemmeande, yeneng ine kpac anggecde. Dzaring dzuria moronggema kpac angandae, ifi isoc \sc KEBUAC\sc* ngabafora kpac anggecde. Yeni hosuc engande, ifi isoc emma kpac anggecde.   
\p
\v 21 Ngic Anutu ngadehema mangana meudeac ammiude, ye wiac turung amma mema turunga imoc mi kpouande. Ngic dindinga, yeng ubangerec negemma wiac naric eng yemmeude.  
\v 22 Ngicngac \sc KEBUAC\sc* kenecgoc kecdae, yeneng maridzominggac arennu bangec mema mingina anggecde. Nga ngicngac Kebuac sowec bageau kecgec Kebungo meicyunuu kpac anggecde.   
\m
\v 23 \sc KEBUNGO\sc* ngic monggac singgac negenu ngereeudeu ye yeac kenghaya meseriu sing titia seria anude.  
\v 24 Ye todinggebac, fora. Nga Kebungo mariau medeac naric mi makpeude.   
\p
\v 25 Ni medacnaungoc kecerekecma yaguc ngickpengeng anduae, imohai hemba Anutungo ngic dindingac naric mi wau eng kecande, kpac. Nga yeac nambaracfora yeni yakaac mong mi derecgegecde.  
\v 26 Yeng nasosoc iwai eng yemmekecde nga nambaracfora yeni ogomefic amma ngicngac ogofocngina kenec meficgeyemmegecde.   
\m
\v 27 Ge faka angammeme mangana ngadehema wama faka gombunga amma bangecfu wisic wisickea kpac kecnade.   
\m
\v 28 \sc KEBUNGO\sc* ngicngac sing dindingac modacgecdeac ammiu yeac kpetiac areng, yeni naric mi ngadeyunuma wayunuude. Ye onggongyunuude, imoc wisic wisickea kpac. Ngic Anutu ngadehema mangana megecdeac ayemmeande, yeng yeac nambaracfora ine meicyunuu kpac anggecde.  
\v 29 Ngicngac dindingac yeneng maridzominggac arennu bangec mema mingina amma naso wisic wisickea kpac imohai kecgecde.   
\p
\v 30 Ngic dindingac ye enarango yoac negen negentegecgoc deude nga nedzarangango sing dindingac modacnideac yoac deude.  
\v 31 Ye \sc KEBUAC\sc* dedeseriyoac ubahereau feu hania naric mi tiposockeude.  
\v 32 Ngic Anutu ngadehema mangana megecdeac ayemmeande, yeni ngic dindingac yeneac kicfifi kecma kpebucyunubeso anggec  
\v 33 \sc KEBUNGO\sc* ngic dindingac naric mi wayunuude nga ngaba yeneac kucnginango naric mi feracyunuma memayunuude. Ngaba yeneng yeneac yoac mekemma yoacfu faiyunugec \sc KEBUNGO\sc* kpae heiyemmeu kopocsicac areng naric mi deyemmegecde.   
\m
\v 34 Ge \sc KEBUAC\sc* tomai kecma yeac sing modacbesena. Ge ifi anna yeng miacguma maridzominggac arennu bangec genu mingina annade. Nga yeni geac kicfu ngic Anutu ngadehema mangana megecdeac ayemmeande, meicyunugec kpac anggecde.  
\v 35 Ni ngic mong henai, ye Anutu ngadehema mangana meudeac ammiu ngicngac ogofora ebicfu faiyunukefec. Nga yeneng ubaebicgoc kecmagec yeng Rebanong bangecac yomondzoc ic herea isoc feracyunuma nangkecfec.  
\v 36 Nga ni monggoc ihai kemma nanangasac hemba yengena mi nanu hemba dema hofocba imohai mi nanec.   
\m
\v 37 Ngic kopocsic mong mi meficgeande, ngeni ye hentegecbisia. Ngic mong ye ikoc nga hamangeha kpac kecande, ye hembisia. Ngic ruaegoc kecande, yeng arengfora yenigoc naso herea kefude.  
\v 38 Nga singyoackpekpe ine kpetotieyunugec kpac andacgecde nga ngic Anutu ngadehema mangana megecdeac ayemmeande, yeni wiacngina ngereema feec, imoc meickegec kpac anude.  
\v 39 \sc KEBUNGO\sc* ngic dindingac ebicfunac mesiyunuma ebicnasou yeneac sufu sufuamangina anu ihai sufuma kecgecde.  
\v 40 \sc KEBUNGO\sc* meficyunuma ebicfunac mesiyunuude. Yeni yeac hoannu hama sufuma kecdaeac amma yeng ngic Anutu ngadehema mangana megecdeac ayemmeande, yeneac mariunac mesiyunuude.   
\c 38  
\s1 Kpendzenggoc nunumu  
\d Dawidingo sese fai faiac nunumuyegec yofi heiec.  
\p
\v 1 O \sc KEBU\sc*, ge ngaba amma yoac ngabasiric mi anenna nga herega buu kopocsicac amma numeting mi anenna.  
\v 2 Ge tebegango wedecnunec nga marigango witinau faima ferandzinunec.  
\v 3 Ge neac modzoga tikecdeac sebina sasawa manganeu hafei ande nga kopocsicnaac amma sicna yeni sasawango hafeinginagoc andae.   
\m
\v 4 Ni kopocsic meficgekecba imocngo feracnuma semenukecde. Nga finactoa ebirango ngicngac yiniande isoc niu imoc naric mi tofohobade.  
\v 5 Ni kopocsicnagoc kecma kapafaka angkecduaeac amma kubecna sasawa hoaema homuna fiu  
\v 6 patickema ngonducnema asoacnac kemma marai ubahodungtoa negengkecduae.   
\p
\v 7 Sebina gerea nohou hafeingo sokodaru gombunga mong mi ande.  
\v 8 Amma ni kucna kpac andaru manganema pereckema panggeduae. Amma herenau negengyohocgoc kpeborongtoa amma asoringa anenu kpacma arohoduae.   
\m
\v 9 Kebu, ni wiac sasawaac anende, imoc negendacnec. Nga ni asoringa anenu imocngo gearu mi sufuude.   
\m
\v 10 Ni wosona tantang anu kucna kpac andaru kicnaac kperagi bic pisickedac.   
\p
\v 11 Ni kpendzennagoc, imocac tosofocna nga amaarengfocna wanuma wegenac naric mi hagecde nga nonggo mang dacmunacfocna yeni hereau nandae.  
\v 12 Ngic kpebucnubeso ayemmede, yeneng botac faima kpetotienugecdeac yoac dedae. Yeni asoacnac kemma marai ikocfu faitobang anenggecdeac arenga faikecdae.  
\v 13 Ngic kedzacfongngo yoac mi negengande, ni ifi isoc anduae. Amma enacmedzicngo yoara kpac kecde, ni ifi isoc enac anggema yoac mong mi deduae.   
\p
\v 14 Oc, ni neannaoc ngic mong yoac mi negengande, ifi isoc amma kecduae. Ngic mong ye enacngo demetingyoac naric mi merengyemmeande, ni ifi isoc anduae.   
\m
\v 15 O \sc KEBU\sc*, ni geac tomai kecduae. O \sc KEBU\sc* Anutuna, gennoc yoacnaac turunga merennennade.  
\v 16 Ni numuma yofi deduae, “Ngaba yeneng feracnuma ubangerec negembauac nga tiposockeba yeneng negenggec wiac engena anu yoac homac osobauac kpae heiyemmebesena.”   
\p
\v 17 Ni manubeso anu kpendzenggoc kecbare imocngo mong mi wanuude.  
\v 18 Ni ngic memanganefaka angkefai, imoc deficgema kopocsicnaac amma ubahodung negemma kecduae.   
\m
\v 19 Ngabafocna yeni ine ngaba eng anendae amma yeni kucngina monggoc. Nga ngic endzirango hania kpacfu ubango ukunudae.  
\v 20 Ni faka gombunga amba yeneng ine imocac turunga yarefakango merennengecde. Ni faka gombunga modacma angkecduaeac yeni ngabafocna andae.   
\p
\v 21 O \sc KEBU\sc*, ge mi ngadenuma wanuna. O Anutuna ge neac hereau mi kecna.  
\v 22 O Kebu, memeficna, ge bic hama meficnuna.   
\c 39  
\s1 Kekecnina kpac anude  
\d Yegecgareng yearu. Yehudutung siriha modacma heibesonga. Dawidingo yegec yofi heiec.  
\p
\v 1 Ni negen nengengua mema deai, “Nedzarannango kopocsic meficgebaiac nedzaranna nga fakana garenggebade. Ngic Anutu wama magana megecdeac ayemmeande, yeneng nigoc wegenac kecmagec enacbibicna kpae heimiba yoac mong mi debeso.”   
\m
\v 2 Ni udumenga kpac waickema kecma wiac mong mi deba imoc memefihagoc mi anec, kpac. Kpendzenna imoc monggoc yombong yadiec.  
\v 3 Herena gerea anu negen negeng ua meba herena gerec dzeu nedzarannango yoac deai.   
\p
\v 4 Yoac yofi deai, “O \sc KEBU\sc*, ni nasona wisickebeso ande, negen negeng imoc dekperaginembesena. Ge uameme nasona kpeteagoc bic nennec kecduae, imoc edzacnuna negentegecbesare.  
\v 5 Negenna, ge uameme nasona faina neneng imoc maringo naric edzacyununi, imoc wegenac yombong ande. Kekecna imoc geac kicfu wiac wegenacnec ande. Ngic tembuc tembuc neneac kekec imoc wiac engena kpac, geng asu naso mocgu heiannec, ifi isoc ande.” \it Selac\it*   
\p
\v 6 “Nga wenac nasou ic ongea fingecande, ngicngo ifi isoc kengha anu wisickeude. Ye uatoa homac mekecde nga imoc eng fingeru foraya mong mi fingecde. Ngicngo wiac mekpedzuc angkecde nga wiac imoc merang ngade meude, imoc ine mi negenude.”   
\p
\v 7 “Kebu, ifi anu ni wiac mong fingecnenudeac tomai mi kecbade. Geng meficnunadeac tomai kecba negen negenna gearu fede.  
\v 8 Ni singyoac kpema mangana angkefai. Nga ngic negen negengngina kpac yeni desofoc anembauac kpae heiyemmebesena.   
\m
\v 9 Nga gennoc faka yomoc meficgena fingecnendacac amma ni waicke kecma enacna mong mi anggebade, kpac.  
\v 10 Geng ni kpendzeng nennec, imoc nearunac meickena. Ge marigaac kucngo nuu kpac ambeso anduae.   
\m
\v 11 Geng bangecngic kopocsicninaac amma yoac ngabasiric dema turunga merengnemmema kpemeting anemmeannec.  
\m Gisicngo wamba neande, ge ifi isoc songowiacnina nedacna kpac andarude. Foracngoc, ngicngac sasawa neni wiac engena kpac, geng naso mocgu asu heiannec, ifi isoc andimbe.” \it Selac\it*   
\p
\v 12 “O \sc KEBU\sc*, ge nunumuna negenna memeficac kiacba ge kedzac faima negenna. Ni kickumana madeac ihoc bahoc mi anna. Ni kuricngic amma hama naso wegenacnecsac kecbade. Ni esangabofocna isoc kuricngicsac anduae.”   
\p
\v 13 “Ge wanuma kicga nearu mi fina. Geng ifi anna ni sogac sogai monggoc meficgemaguc yomoc wama kendacma kpac ambade.”   
\c 40  
\s1 Ni Kebu kpacba  
\d Yegecgareng yearu. Dawidingo yegec yofi heiec.  
\p
\v 1 Ni modzotitia kpac kecma \sc KEBUAC\sc* tomai kecbare yeng kiwa nearu faima kpakpacna negenec.   
\m
\v 2 Ye kpetotiekekecac tennunac kpedzinuma goteng yohoctaunac tainuma hoc peperandzi seria witiau fainuu namba hanina meseriu tiseriduae.  
\v 3 Ye yegec gboria enacnau faiu heianduae, imoc Anutuninaac dedengerec yegec. Ngicngac homacngo imoc hemma \sc KEBU\sc* eweheihei ammima ye negenserima kecgecde.   
\m
\v 4 Ngic mong ye \sc KEBU\sc* negenseriande, ye kenehagoc. Yeng ngic yenanggac negenggec wiac engena angkecde, yeneac hoannu mi kemma yenigoc naric mi kefude. Ye sing mi segeude, nga ye ngic nemu ikoha modacandae, yenearu naric mi kenude.   
\p
\v 5 O \sc KEBU\sc* Anutuna, ge isoc mong mi kecde. Ge neneac negemma kucfaka wiac engena homac meannec, imoc monggoc nga monggoc mekecnec. Ni imoc dekperagima ngicngac edeyunubade dema kpetengina homac amma imoc memeac siriha kpac.   
\m
\v 6 Ge sesegerec nga kopocsicac sese hania haniaac mi anggengande. Ge sese dema yang nga burumaka hafoa oho oho me kopocsic meic meickeac sese, imocac mi kpesiannec. Geng kedzacna mesarinec, imocac ni geac kingang ngic amma kecbade.  
\v 7 Ifiac amma yoac yofi deai, “Kibi kpou kpouya manau neac siduc bic ohogec fede nga ni bic hadua.  
\v 8 O Anutuna, ni geac songo sogac sogaigoc modacbade nga geac dedeseriyoac imoc herenau fede.”   
\p
\v 9 O \sc KEBU\sc*, ni siduc gombung bic edeyunuai. Geng ebicfunac mesinunukecnec, ni habutoa yeneac kicfu namma siduc imoc dekperagiyemmema enacbibicna mong mi kidzickeai, ge imoc negennec.  
\v 10 Amma geac faka dindingac imoc herenau mi mesufuai. Ge yoac modac modac Kebu amma ge ngicngac ebicfunac mesinunukecnec, ni habutoa yeneac kicfu namma imoc dekperagiyemmeai. Geng yoac dedzege amma imoc modackecnec amma ge yoac modac modac Kebu, imoc mi mesufuma habu sasawa edeyunudacba negendacgec.   
\m
\v 11 O \sc KEBU\sc*, ge ubamangangga mi dzegenenna. Geng yoac dedzege amma imoc modackecnec amma ge yoac modac modac Kebu. Geac fakaga imocngo hoannuma nasosoc onggonnubeso.   
\p
\v 12 Yarefakanaac kpetea osobadeacsoc mi amba yeni oronnukecdae. Ni ngicngac ogofocna memanganeyunukefai, faka imocngo feracnumanu wiac mong naric mi hembade. Nga imoc homac yombong amma orucna dzoea ferahau herena kuha kpac ande.   
\m
\v 13 O \sc KEBU\sc*, ge neac negenna ngereeu onggonnuna. O \sc KEBU\sc*, ge bicbic hama meficnuna.   
\p
\v 14 Ngic yeni kekecna hamangec mebeso andae, imocac ge yenemma game kpekpeu faiyununa oboc kpoboc ambisia. Ngic yeni ni memanganenubeso ayemmeande, ge negemmana ngic imoc dzigenegecdeac ayemmena yeni worama eweheiheingina kpac ambisia.   
\p
\v 15 Ngic yeneng neac deendema yoac yofi deandae, “Yahec, yahec!” Yeni yenaoc gameyunuudeac amma manganema nambisia.   
\m
\v 16 Ngicngac ge hofocgukecdae, yenennoc sogaima geac ubangerec negembisia. Ngicngac geac memengerecac songo negendae, yeni yofi dekecbisia, “\sc KEBU\sc* dengereni.”   
\m
\v 17 Neng ine makpekpea amma iwaiac obohoma kecma naric mi meficemeba Kebungo sifu ebicna henu wiac monggac mi obohobade. O Anutuna, ge memeficna nga ebicfunac yungec yungecngicna, ge naso mi ukuma nearu bic hana.   
\c 41  
\s1 Hafeigoc yeac nunumu  
\d Yegecgareng yearu. Dawidingo yegec yofi heiec.  
\p
\v 1 Ngic mong ye ngicngac makpekpea yenenggareng ayemmeande, ye kenehagoc. Ebicnasou \sc KEBUNGO\sc* ye ebicfunac mesima  
\v 2 onggonggema kekeha garenggeu ye bangehau sogac sogaigoc kefude. Ngabafora yeneng megecdeac ayemmeu \sc KEBUNGO\sc* yeneac mariu naric mi faiude.  
\v 3 Ye hafei ammiu femanu \sc KEBUNGO\sc* meserima hafeia meickema monggoc mengereeude.   
\p
\v 4 Neng yoac yofi deai, “O \sc KEBU\sc*, ni gearu kopocsic meficgeai. Ge imocac neac ubaga manganeu mengerenuna.”  
\v 5 Ngabafocna yeneng neac yoac mangana dema yofi deandae, “Ye homeu kpara kpac ambeso.”   
\m
\v 6 Ngic mongngo yugucnubeso hama ni tobannuudeac negen negeng ubahereau arenggeude. Ye yoac fora mong mi dema monggoc mama kemma imoc deyadiude.  
\v 7 Ngic neac modzongina tiande, yeni sasawango neac yoac sangic sangic denengeng amma wiac mangana yombong fingecnenudeac negemma  
\v 8 yofi deandae, “Ye hafei mangana yombong ammiu fefeunac monggoc naric mi yarude.”   
\m
\v 9 Nga tosona nigoc wegenac kecande, ye negenserima kefai. Ye warac yaka nigoc nekefec nga yeng ifingoc gofoc gofohango tifacnuma docfu fainuec.   
\m
\v 10 O \sc KEBU\sc*, ge ubaga sifu neac manganeu miacnuna ngereema namma turunga merengyemmebade.   
\p
\v 11 Ngabafocna yeni firang amma mi memanugec, imocac yofi negenduae, ge neac negenna ngereede.  
\v 12 Ni dindingac kecma kopocsic mong mi meficgeaiac geng nanggenuma geac hoannu fainuna ni imohai nasosoc kecbade.   
\p
\v 13 \sc KEBU\sc* Israeac Anutu, ye nasoya nasoya kenehema keneengkecbesonga. Imoc fora nga fora yombong.   
\c 42  
\ms1 MITIYEGEC KIBI 2  
\mr Mitiyegec 42–72  
\s1 Ubaonganango Anutuac ammide  
\d Yegecgareng yearu. Yegec yomoc masiki uba modacma heibesonga. Kora medacfora yeneng yegec yofi heigec.  
\p
\v 1 Kate burumakabisicngo dokuac ammiu doku hofocande, ubaonganango ifi isoc Anutu ge hofocgude.   
\m
\v 2 Ni dokuac homeanduae, ifi isocngoc ubaonganango Anutu kekehagoc yeac ammide. Ni kemma Anutuac kicfu namma ye hembade, naso imocac homac yombong tomai kecduae.  
\v 3 Ni hadzing toforec kickumanango yakana angkefu ngicngac yeni nasosoc kpesinendae, “Geac Anutu mong mi hendimbe, kpac yombong.”   
\m
\v 4 Ni onganaac negen negeng hafoangoc widicma edzacguma wiac yomoc negemba fede, ni warac ngicngac arengnginagoc kenggec waraiyemmeba Anutuac womonnu kening. Neni ngicngac habutoango hombang nasoninau sogac sogaiac arohoma ubangerecac yegec heikefing.   
\p
\v 5 O ubaongana, ge kucmama mi kecbesena amma ge herena manau dewaidzoc mi ambesena. Ni monggoc Anutu eriendzong memibade. Ge imocac ye negensima tomai kecna fora fingecbeso. Ye memeficna nga Anutuna.   
\m
\v 6 Ni Yodang bangecfu nga Hermong amma Midza tikiu kecduae. Amma ubaherenaac kuha madeac Anutuna ni geac negemba fede.   
\p
\v 7 Ni ubana ebirima yofi isoc ande, geac dokudundung yeni kpeborongtoa kpemagec dzohong mongngo dzohong ogea kparu geac kondungsiri yeni kucgoc hama semenudau.   
\m
\v 8 \sc KEBUNGO\sc* yoac dedzege amma modackecde, ye imoc hadzinnu sing edzahau nigoc kefude. Nga tofocnac yeac yegec nigoc feu heikecba Anutu kekecna sasawangoc garennukecde, numumibade.  
\v 9 Anutu ye neac hoc peperandzi seria anu yeac deba, “Ge neac nigecgudac, ifi isoc ande. Ngabafocna yeneng ebicfu fainugec ubaebicgoc kecduae, imoc nocac fingecnende, imoc mi negentegecduae.”   
\m
\v 10 Ngabafocna yeni deendema anemma deandae, “Ge Anutuga mong mi hendimbe, kpac yombong.” ifi degec kubec manganaac kpendzeng kpeandimbe, kpendzeng ifi isoc sebinau kpeduae.   
\p
\v 11 O ubaongana, ge kucmama mi ambesena, herena ge dewaidzoc mi ambesena. Ni monggoc Anutu eriendzong memibade, imocac ge ye negensima tomai kecna fora fingecbeso.  
\m Ye memeficna nga Anutuna.   
\c 43  
\s1 Ge nocac ngadenuma wanunec  
\d Yegec 42ac tosea  
\p
\v 1 O Anutu, ngic Anutu wama kecandae, yeneng memanubauac geng nanggenuna firang ambesare. Ge ngic ikocnginagoc nga ngic faka dindingac mi modacandae, yeneac mariunac mesinuna.  
\v 2 Anutu, ni geac hoannu hama sufuma kecba ge nocac ngadenuma wanunec. Ngabafocna yeni ebicfu fainugec ubaebicgoc kecduae, imoc fingecnendeac titiha mi negentegecduae.  
\v 3 O Kebu, ge kperagiga nga yoacga fora faina maec yereng sinnu hesicnuma kenec geng kpetiac tikigau kecnec, imohai habesare.   
\m
\v 4 Ifi anu ni Anutuac aratau kembade. O, sogac sogaitoaac Anutuna, ni gearu kemma gita kpema dengeregubade. O Anutu, ge Anutuna.   
\p
\v 5 O ubaongana, ge kucmama mi kecbesena amma ge herena manau dewaidzoc mi ambesena. Ni monggoc Anutu eriendzong memibade. Ge imocac ye negensima tomai kecna fora fingecbeso.  
\m Ye memeficna nga Anutuna.   
\c 44  
\s1 Ebicnasoac nunumu  
\d Yegecgareng yearu. Yegec yomoc masiki uba modacma heibesonga. Kora medafora yeneng yegec yofi heigec.  
\p
\v 1 O Anutu, ge bicngoc esangabofocnina yeneac nasou kucfaka meannec, imoc edenunugec kedzacninango negening.  
\v 2 Ge marigango bangec monnunac ngicngac kporacyunuma neneac bangecfocnina semeng uau isoc homecyununa ihai kecgec. Ge bangecareng tosea ebicfu faiyununec, fora. Nga ge bangecfocnina witicfunac yungecyununa witicngina kpac kecgec.   
\m
\v 3 Yeni yenang dzikacac beangngo firang amma bangec mi megec, kpac. Amma yenang maringinaac kucngo firang mi anggec, kpac. Geng yeneac songo negennec amma marifoigango kucfaka menec, yeni imocac firang amma bangec megec. Geng marigaac kuc nga kicmesugaac kperagingo meficyununec.   
\p
\v 4 O Anutu, ge ngictauna nga Anutuna. Geng yoac dena, Yakoboac arengngo, firang annide.  
\v 5 Ngabafocnina yeneng wegenac hagec neni geac kucfu igocyununi worama kenggec geac kpacfu ngabafocnina tidzicyunuma memayununide.  
\v 6 Ni tebena mong mi negenserima kecanduae nga dzikacac beannango ebicfunac naric mi mesinuude.  
\v 7 Geng warac ngabafocnina yenearunac mesinununec. Ngicngac yeneng ubango ukununugec geng faka ayemmena oboc kpoboc anggec.   
\m
\v 8 Neni Anutuac negenni engena angkecde. Geac kpac kuneng heiwayong memima nasoya nasoya ifi angkecnide. \it Selac\it*   
\p
\v 9 Ge yaguc ine ngadenunuma neneac wasai areng yenigoc mi hama kecnecac game kpekpeu fainununec.   
\m
\v 10 Ge ngabafocnina kpae mi heiyemmena neni yenearunac worama hani yeneng finacnina medacgec.  
\v 11 Rama yeni memeficngina kpac kecmagec ngic yeni meyunuma kpehou angkecdae, neni ifi isoc aning nga geng ngic imoc kpae mong mi heiyemmenec, kpac. Ge meicnununa singsararang kpema bangec monnunac ngicngac botucnginau fainununec.  
\v 12 Ge ngicngacfocga fainunuma bung efeanecsac dena menunugec. Ge neneac bung kuneng mong mi denec. Imoc hemba mi ngereede.   
\m
\v 13 Ge ngicngac wegenac kecdae sing meficgeyemmenecac yeni deendema anemmeandae nga ngicngac oronnunuandae, yeni detenic anemmema desofoc anemmegecde.  
\v 14 Nga ge bangec monnunac ngicngac sing meficgeyemmena yeneng neneac yoac dekecgec yeneac dzomoc tirea andimbe. Ngicngac areng hania hania yeni dedzomoc anemmema orucngina kpatitickenemmegecde.   
\m
\v 15 Ni asoacnac kemma marai eweheiheia kpac kecba gamengo kicmesuna semeu kecduae.  
\v 16 Nocac yeni deendema anemma demanganenugec yoacngina negenganduae. Ngabafocna nga ngic yeni turung kpougecdeac ayemmeande.   
\p
\v 17 Imoc sasawa fingecnemmeec, fora. Nga neneng sifu geac mong mi nigecnunuec, kpac. Ge nenigoc dzadzahac menec, imoc wama ikoc mong mi anggening.  
\v 18 Neni hereninango geac hereau mong mi kefing nga geac sing modackecma faka imoc mi wanide.  
\v 19 Geng ine eng kate yang yeneac kekecfu fainununa kecmina kpedzamenunuma kundungtoango semenununec.   
\m
\v 20 Neni Anutuninaac kpac kuneng nigecnunuu marinina miacma nemu furia afehebinnu  
\v 21 Anutungo imoc meficgema negendacbac. Ye hereninau wiac sufu sufu fede, imoc negendacde.  
\v 22 Geac areng andimbeac amma yeni asoacnac kemma marai homecfu fainunukecdae. Yeneng nenemma yofi negendae, neni rama kpebucyunuandae isoc andimbe.   
\p
\v 23 O Kebu, ge gauunac yacma negenggborina. Ge naso wisic wisickea kpac mi wanunuma kecbesena.  
\v 24 Ge kicmesuga mesufuma neneac kpendzeng nigecguec, imoc naric mi ande. Ngic yeneng ebicfu fainunugec neni ubaebicgoc kecdimbe. O, Kebu, imoc mi nigecgubeso.  
\v 25 Ubaonganina bangecfu sendunnu ngonducneu sebininango bangecfu mendanggema fede.  
\v 26 O Kebu, ge gborima yacma ebicfunac yungecnununa. Ge yoac dedzege amma imoc modacanecac amma meficnunuma bummenunuma ebicfunac yungecnununa.   
\c 45  
\s1 Ngictau nga enembingeha  
\d Yegecgareng yearu. Yegec yomoc masiki yegec kpara Lili dzaring, imocac uba modacma heibesonga. Kora medacfora memeturangyegec yofi heigec.  
\p
\v 1 Yoac gombunga gombungango herena wakeu ni ngictauac yegec yofi heibade. Nedzarannango kibi oho ohongic gombunga yeac pen isoc ande.   
\p
\v 2 Ngictau, ge siricga gombunga yombong, ge isoc bangecngic mong ifia mi kecde. Nga geac enacbibicgaunac yoac songea ereude. Anutungo kenecguma monggoc wisic wisickeac kpac kenecgubeso.   
\p
\v 3 O Firangngic kucgagoc, ge ngictauac kuc nga kibikperagigagoc kecnec. Ge dzikacac soega kebanggau dzegema dzikacac efaina.  
\v 4 Ge ngictau kucgagoc kecma dzikacac becosicfu tacma yoac fora nga yumiakekec amma dindingac kekec meseriyununadeac kucgoc kemma firang ambesena. Ge marifoigango kucfaka wiac engena yombong kpougembeso.  
\v 5 Ge tebemedaha enaragocngo ngictauac ngabafora yeneac woubocfu wedecna kemebeso. Ngiha ngiha yeni geac bageu kemema kecbisia.   
\p
\v 6 O Anutu, geac ngictau tatacga imoc wisic wisickea kpac amma feengkecfu ge ngicngacfocga ngictauyasugango garengyununade amma yoacga imoc monde mondea kpac.  
\v 7 Ge dindingac kekecac anggenu ngicngac Anutu ngadehema mangana megecdeac ayemmeande, yeneac faka imocac modzoga tiande. Imocac Anutu, geac Anutungonoc tosofocga yeneac botucfunac meisingguma feracyunuma sogac sogaiac kerec nadzicgenu sebigango ireckeude.   
\m
\v 8 Ngicngac yeni wambagau mira nga aroe amma kassia heigec homuna gombunga gombunga fiande. Yeni erefang yanggac baihango wiac gombunga gombunga mema ngictauamagau faigec siriha gombunga anude. Yeni imohai gitakurere kpegec udumeng gombunga meficgegenggec ubangerec negengannec.   
\m
\v 9 Ngictau yeneac naroangfocngina yeni ngac yenigoc amagau kecma geac kingang kpema oronggudae. Enembingecga ye Ofiri bangecfunac gol heima foigaugeng tacde.   
\p
\v 10 O naroang, negenna, ge kedzac kpema yoacna negemma negensina. Ge arengfocga nga manggaac ama imoc nigecgubeso.  
\v 11 Ngictau ye geac siricga gombunga imoc hembokoma kecde. Ye geac kebu, imocac ge yeac kicfu ngonducnema eweheihei ammina.  
\v 12 Ge yeneac negenna ngereeudeac negemma ngicngac Tiro taonnunac yeneng geac ubangerecac wiacngina mehama genggecde. Yeni dzofinactoanginagoc amma ngicngac sasawa feracyunudae.  
\v 13 Nga ngictauac naroang ye ngackereng yombong yengena manau tacde. Ye ngakpia imoc gol mucngo memea nga  
\v 14 wamba kibiagoc kpebimigec, imoc yearu heigec kemeu ye hesickema ngictau yearu mehagec ngacnaroang tosofora yeneng ye hesickegec yenahafoc gearu hagecde.  
\v 15 Yeni ubangerec nga sogac sogaigoc hesicyunuma kemma ngictauac ama manau endae.   
\p
\v 16 O ngictau, ge medacfocga fingecma mangfocga yeneac tatac megec geng areng faina yeneng bangectoa bangec garenggegecde.  
\v 17 Fingecsahenina fekecdesoc, yeneac kicfu geac kpac kuneng miacba yeneng afegugecde. Ngicngac areng sasawa yeneng wisic wisickea kpac eriendzong megenggecde.   
\c 46  
\s1 Amanina seria  
\d Yegecgareng yearu. Yegec yomoc aramoc uba modacma heibesonga. Kora medafora yeni yegec yofi heigec.  
\p
\v 1 Anutu ye sufu sufuamanina nga kucnina. Ye ebicnasou nenigoc nasosoc kecma meficnunuude.  
\v 2 Imocac kengec naric mi annide. Bangec kpemindzaheudeu me tiki kondung keme kemeau turic turic anggecdeu  
\v 3 nga doku tunggbaungtoango udumeng kunengngoc meficgema kporoc tima tiki yunuu dendeng kpegecde, fora. Nga neneng sifu kengec mi annide. \it Selac\it*   
\p
\v 4 Doku mong mahama Anutuac taonnu sogac sogai meficgede. Anutu Engenatoango kpetiac ama imohai kecde.  
\v 5 Anutungo taong imocac botuhau yombong kecdeac wiac mongngo meu imoc goroc goroha kpac kecma naric mi makpeude. Anutungo ama werec wereckenggac ye meficgeude.  
\v 6 Bangec monnunac ngicngac Anutu mi negemmidae, yeneng dzomugerec mekecdae nga bangecac eucerereng yeni goroc goroc amma mayunuude. Ye ubia miacma kparu bangectoa bangecngo sisingaima kpac andarude.  
\v 7 \sc KEBU\sc* kurumenggac wasaiareng kunengnginango nenanggoc kecde. Yakoboac Anutu ye sufu sufuamanina. \it Selac\it*   
\p
\v 8 Ngeni hama \sc KEBUAC\sc* ua hembisia. Ye bangecfu faka bibiagoc meec, ngeni imoc hembisia.  
\v 9 Yeng bangec tegia noboc noboc dzikac menomanema tebe pokong sasawa kpetackedacma dzikacac kasongina gerecfu faiu dzeude.   
\m
\v 10 Anutungo yofi dede, “Ni Anutungina, ngeni waicke tacma imoc negembisia. Bangec monnunac ngicngac yeneng yaiyo kpenenggecde nga bangectoa bangec yeni afenugecde.”  
\v 11 \sc KEBU\sc* kurumenggac wasaiareng kunengnginango nenanggoc kecde, Yakoboac Anutu ye sufu sufuamanina. \it Selac\it*   
\c 47  
\s1 Ngictaungo tatahau matacde  
\d Yegecgareng yearu. Kora medacfora yeni mitiyegec yofi heigec.  
\p
\v 1 Ngiha ngiha sasawa, ngeni mari kpema Anutuac yegec sogac sogaigoc dendzerenggema heimibisia.  
\v 2 \sc KEBU\sc* Engenatoa ye bibiagoc, ye bangectoa bangec imoac ngictautoa.  
\v 3 Ye ngiha ngiha memayunuma nenang bageu faiyunuec. Ye bangec monnunac ngicngac hanininaac bageau faiyunuec.   
\m
\v 4 Yeng Yakoboac songo negendeac amma bangec imoc meisinggeu Yakobongo imoc negenu wiac engena anec. Kebungo bangec imoc maridzominggac arennu nemmeec. \it Selac\it*   
\p
\v 5 Anutungo sogac sogaiac arogoc kurumennu enec. \sc KEBUNGO\sc* trampet udumengtoagoc kurumennu enec.  
\v 6 Ngeni Anutuac oheha mema yegec heima eriendzong memima yegec heimibisia. Ngeni ngictaunina yaiyo kpemima yegec heimima dedengerec yegec heimibisia.   
\m
\v 7 Anutu ye bangectoa bangec imocac ngictau. Ngeni yeac yegec heimima ye dengerebisia.  
\v 8 Anutu ye ngictau amma bangec monnunac ngicngac areng kucgoc garengyunuma kecde. Ye ngictau tataha kpetiacfu tacde.   
\m
\v 9 Ngiha ngiha yeneac ngictauac medacfocngina yeni Abarahanggac Anutu yeac ngicngacfora. Nga yeni hama kpedzucnema tacgecde. Ngicngac bangectoa bangec imocac kaso amma kecandae, yeni Anutuac ngic. Imocac ye afehema afehekecbesonga.   
\c 48  
\s1 Anutuac taong  
\d Kora medacfora yeni mitiyegec yofi heigec.  
\p
\v 1 \sc KEBU\sc* ye engena, ye oyang boyang memibesonga. Yeac tiki kpetiacfu, Anutuninaac amatoau, ye dengerebesonga.  
\v 2 Tiki imoc herea nga gombunga yombong amma bangectoa bangec sogac sogai meficgeyemmeude. Imoc Siong tiki, imoc not bigeng yombong tacde amma imoc ngictau Engenatoa, yeac taong.  
\v 3 Anutungo ngictau amatoau tacma amea onggonggema gombunga henggareng ammiude, imoc hengkecdimbe.  
\v 4 Negenggec, ngictau yeneng kpedzucnema yenahafoc dzikac kpegecdeac hama  
\v 5 taongtoa imoc hemma kpidohoma kengec homac yombong yunuu woragec.  
\v 6 Yeni hemma kengecyunuu dzonongngina fedeec. Ngacngo ngadze kiu kpendzeng kpeande, yeni ifi isoc kpendzeng kpegec.  
\v 7 Geng wenac ere ereaunac firang dena imocngo hama Tarsisi taonggac wage kpedzameyunuande, ge ifi isoc memanganeyununa yeni kengectoa anggec.   
\m
\v 8 Neni warac siduha negening, imocac fora hening. Nga kicninango \sc KEBU\sc* kurumenggac wasaiareng kunengngina Anutuninaac taonnu hening. Anutungo amatoa imoc tatahau faiu nasoya nasoya seria feengkefude. \it Selac\it*   
\p
\v 9 O Anutu, geng yoac dedzege amma imoc modackecnec, imoc geac womonnu namma negensiandimbe.  
\v 10 O Anutu, geac kpac kuneng nga geac eriendzong imoc bangec tegia fekendaemoc kpesereyunuu negendacgecde. Ge marifoigango firang angkecnecac mariga imocngo wakede.  
\v 11 Siong tiki ye ubangerec negembeso nga ge wiac foraya deannecac Yudaac amafora yeni sogaibisia.   
\p
\v 12 Ngeni Siong yerecgema yeac odaac ama herec herec osoma kpetengina mebisia.  
\v 13 Ngeni Siong tikiac oda dafia, imoc mengere hemma ngictauac amaseria hembisia. Hemma fingecsahenina fekefude, imocac siduc yofi meyemmebisia.   
\m
\v 14 Anutu yomoc nenang Anutu, ye nasoya kpac kecengkefude. Yeng sing edzacnunukefungoc kekecnina wisickeude.   
\c 49  
\s1 Yeni sasawango homegecde  
\d Yegecgareng yearu. Kora medacfora yeni mitiyegec yofi heigec.  
\p
\v 1 Ngiha ngiha ngeni yoac yomoc negembisia nga ngicngac bangectoa bangecfu kecdae, ngeni kedzac kpema yoac yomoc negembisia.  
\v 2 Ngicngac kpactoanginagoc nga kpacngina kpac, dzofinactoanginagoc nga makpekpea, ngeni yoac yomoc negembisia.   
\m
\v 3 Enacnango negen negentegecac yoac debade nga herenango negen negengua mema wiac hania hania negentegecma kecbade.  
\v 4 Ngic yeni yoac heima degec ni kedzac kpema imoc negembade. Ni gita kpema udumeng gombunga negemma yoac heiheiac hania deireckebade.   
\p
\v 5 Naso manganango hau ngic yeni nukporac anenggec ngabafakanginango oronnuu kengec naric mi ambade.  
\v 6 Ngicngac imoc yeni hiedzongina negenserima kecandae, yeni dzofinactoanginaac negenggec wiac engena anu imocac yoac homac osogecde.   
\m
\v 7 Foracngoc, ngic mongngo munia monggac kekec dzofinacngo bung naric mi meude, kpac. Ye buma imoc naric mi meficgeude nga yeac bung Anutu naric mi miude.  
\v 8 Ngickekecac bung imoc engena yombong nga imocac hiedzo homac yombong faigecdeu imoc sifu naric mi kpoudarude.  
\v 9 Imocac ngic mongngo naso herea wisic wisickea kpac mi kefude. Ngicngac sasawa yeneng kicsereu kemema imoc hendacgecde.  
\v 10 Oc, ngic negen negentegecnginagoc yeni ifingoc homeandae, imoc hengandimbe. Ngic negen negengngina kpac nga oboc kpoboc yeneng ifi isocngoc homegecde. Yeni hiedzongina wagec goa yeneng imoc megecde.  
\v 11 Yeni amangina fefeseri feudeac negemma bangec goa ifingoc yenaoc wase meandae, fora. Nga kicserengo sifu yeneac amabangecngina feengkefude. Yeni fingecsahengina fekefudesoc kicserenginau kemema kecgecde.  
\v 12 Ngic mong wiac kibiagoc gombunga gombunga mekecma heiu wiac ifiango ye kefudeac naric mi meficgeude, kpac. Ye ine yang hania hania yeni homeandae, ifi isoc homema kpac anude.   
\p
\v 13 Ngicngac yeneng ubafong amma yenanggac negensima kecandae, yeneac kekec imoc ifinoc. Nga ogofocngina goa yeneac yoacnginaac songo negemma modacyunuandae, yeneng sing ifiangoc kenggecde. \it Selac\it*   
\p
\v 14 Ngic yeni rama meisingyunuma homec amaac arennu faiyunuandae, yeni ifi isoc andae. Homecngo rama garengngina amma hesicyunuu yeni kemema kicsereu fegec sebingina hoaeu homec amango amangina anude. Anu ama wereckenu ngic ikoc nga hamangecngina kpac kecandae, yeneng kunengngina amma garengyunugecde.   
\m
\v 15 Anutungo sifu ni hoannuma menuudeac ubaongana homec amaac kucfunac bummema mesiude. \it Selac\it*   
\p
\v 16 Ngic mong ye dzofinaha homac nga amagereha nga finatoaya monggoc anu ge imoc hemma imocac negenna wiac engena mi ambeso.   
\m
\v 17 Ye homeude, imohai wiac imohacnac mong mi tofoma kenu iwaiya sasawa imocngo ye modacma homec amau naric mi kenude.  
\v 18 Foracngoc, ye gbori kecma yengenaac yofi negengande, ni kenecnagoc. Ngic ye kekeha sasawa ngereeu ngicngac yeneng imoc hemma ye dengerekecgecde  
\v 19 nga ye sifu homeude. Ye bangecfora bic kemma kperagi monggoc mi hengandae, yenearu kemeude.  
\v 20 Ngic mong ye kecma wiac kibiagoc gombunga gombunga mekecma heiu wiac ifiango ye fekefudeac naric mi meficgeude, kpac.  
\m Ye ine yang hania hania homeandae, ifi isoc homema kpac anude.   
\c 50  
\s1 Sese gombunga  
\d Asafango mitiyegec yofi heiec.  
\p
\v 1 Anutu Kuctoa mingina, \sc KEBU\sc* yeng yoac dema bangec kparu wenac ere ereaunac kengkecma wenac keme kemeau wisickeude.  
\v 2 Siong ye siriha gombunga yombong ande nga Anutungo imohacnac fingectegecma kperagiango nerarannunude.  
\v 3 Anutuninango hama naric mi waickeude. Yeac kicfu gerecngo dzema waraimiude nga kiafirang kuhagocngo ye yerecgeude.   
\m
\v 4 Ye ngicngacfora yoacngina isinggema forangina deudeac kurumenga kurumenga wi fekendae amma bangec momoc kpacyunuude.  
\v 5 Kpacyunuma yofi deude, “Ngicngacfocna yoac tofohoma kecandae, ngeni yeni kpedzucyunuma sueyunugec nearu hadacbisia. Yeneng neac hosuc heima sese ohoma nigoc dzadzahac megecac kpacyunuduae.”   
\m
\v 6 Anutungo yoacngina isinggema deudeac amma kurumenga kurumenga yeni yoac yofi dekperagikecdae, “Anutu ye dindinga.” \it Selac\it*   
\p
\v 7 “Ni neannaoc Anutu, ngeneac Anutu. Ngicngacfocna, ni yoac deba negembisia. Israe habu, yoacfu faingunuma yoacngina debade.  
\v 8 Ngeni ubangerecac sese meandae nga neac sese ohogec imoc hengkecduae. Ni ine wiac monggac negemma gorongina kpeduae, imoc yofi, ngeni Anutu Engenatoaac kpacfu wiac deserima dema imocac fora mi meficgegec.  
\v 9 Ngeni burumaka ngiwa me noning ngiwa odangina manaunac mema nenggec, imoc sifu mi ngereeude, kpac.   
\m
\v 10 Imoc yofiac, kateu yang sasawa yeni neac nga rama burumaka sasawa bangec buma taosennu kecdae, imoc yeni ifingoc neac.  
\v 11 Sawakebangau neng sasawa kecdae, yeni negengyunuduae. Nga wiac sasawa kekecnginagoc manennu kenghaandae, yeni ifingoc neac.  
\v 12 Bangectoa bangec nga wiac sasawa imohai fedacde, imoc neac andeac herenaac homebadeu imoc ngeni mi edengunubai, kpac.   
\m
\v 13 Ni burumakaac busia mi neanduae nga noninggac sawa ifingoc mi neanduae, kpac.   
\m
\v 14 Ngeni Anutu ubangerec ammigec imocngo sesengina ambeso. Ngeni Anutu Engenatoaac kpacfu wiac deserima dema imocac fora meficgegec  
\v 15 ebicnaso hau ngeni ni kpacnugec neng ebicfunac mesingunuba ngeneng ni afenubisia.”   
\p
\v 16 Ngic Anutu ngadehema mangana megecdeac ayemmeande, yeneac ine Anutungo yofi deande, “Ngeni neac enac mema singyoacna degec, imocac kpae heingemmeba imoc naric mi debisia. Nga dzadzahac meai, imoc kpacma yoac mong mi debisia, imoc kpaeagoc.   
\m
\v 17 Ngeni neac dederecgeyoacac modzongina tiu yoacna ngadehema waandae.  
\v 18 Ngeni hamangecngic hemma yegoc torokpema yeac ogofora anggecde. Nga ngeni kaisero ngic yenemma yenigoc tacyac angandae.  
\v 19 Ngeni enacbibicngina mi dzegema imocngo ngicngac ogofocngina memanganeyunugecdeac yoac mangana deandae nga nedzarangnginango ikocyoac degecdeac sing arengggeandae.”   
\p
\v 20 “Ngeni ngenang dacmunafocngina yoacnginango memanganeyunuandae nga nenggacyombongnginaac medaha enacfu faifai ammiandae.  
\v 21 Ngeni faka ifi anggec ni waickema kecba ngeneng negenggec, ‘Ni kecduaengoc, ye neni isoc, ye siriha mong mi ande.’ Nga imoc kpac, ni yaguc ine ngeni demeting angemmema mesunginau kpebade.  
\v 22 Ngeni Anutu nigecngunuande, ngeni wiac imoc negensibisia. Ifi mi negensigecdeu neng ine kpedzamengunuba mongngo naric mi onggongngunuude.   
\m
\v 23 Nga ngic mong ye neac ewena heima ubangerecac sese heinemma sing dindingac modackecde, ye ebicfunac mesiba yeng Anutuac faka henude.”   
\c 51  
\s1 Anutu ge kopocsicna wana  
\d Yegecgareng yearu. Dawidingo Batsebagoc serofaka anu profetengic Natangngo yearu kemma dzigeneu Dawidingo yegec yofi heiec.  
\p
\v 1 O Anutu, geng yoac dedzege amma imoc modackecnecac neac ubaga manganeu. Geac wosoefac imoc efea kpac, imocac neng singyoac kpema kopocsic meficgeai, imoc dzuacdacna kpac ambeso.  
\v 2 Ni ngicngac ogofocna faka mangana ayemmeai. Ge dzuacnuna kongaha ambesare. Ge kopocsicna medzuacna kongac kpebesare.   
\m
\v 3 Ni singyoac kpeai, imoc negengkecduae nga kopocsicna imoc nasosoc hensiduae.  
\v 4 Gearusac kopocsic meficgema kicgau faka mangana yombong anai. Ifi anu geng yoac denec imoc fora fingectegerude ge ngic hania isinggema yoacngina desinec, imoc dindingac.   
\m
\v 5 Foracngoc, nengganango kopocsicgoc kecma ni kpenannuma menuu kopocsicnagoc fingerai.  
\v 6 Nga herenau yoac forasac febeso, ge imocac negenna ngereeude. Ge imocac here sufu sufunau negen negentegec kpounenna.   
\p
\v 7 Ge babacmeac mema dzuacnuna kongac kpeba dzuacnuna hoeng kongaha feracyunuma kongac ambesare.  
\v 8 Ge negemmana ni sogac sogai nga ubangerec negembesare. Geng sicna kpedzamenec nga ge negemmana yeni monggoc sogaibisia.  
\v 9 Ge kopocsicna imohacnac kicga mesufubesena amma ni ngic ogofocna memanganeyunudarai, imoc dzuacdacna kpac ambeso.   
\p
\v 10 O Anutu, ge herena kongaha gboria meficgenemma asu gboria nga dindingac meficgema herena manau fainenna.  
\v 11 Geac hoannunac mi ukununa amma kpetiac Asuga nearunac mi meickena.  
\v 12 Ge ebicfunac mesinunecac sogac sogai monggoc mengere nemma enactofoc tofoho nga ogomeficac asu nemma nanggenuna.  
\v 13 Ge ifi anna ni singyoackpekpengic geac sing kpouyemmeba kopocsicgoc yeneng ubangina dzigeneu gearu monggoc hagecde.   
\m
\v 14 O Anutu, memengerecnaac Anutu, ni ngic kopocsiha kpacfu eng kpehomebaiac imohacnac mesinuna. Ge ifi anna ni nedzarannango imocac sogac sogai yegec kunengngoc heigemma geng ebicfunac mesinunec, imoc edeyunubade.  
\v 15 O Kebu, ni enacnango dengeregubadeac enacbibicna mesina.   
\p
\v 16 Ni sesegerec megemba ge imocac songo mi negennade nga sese dema hosuc ohogemba ge imocac negenna ifingoc mi ngereebac.  
\v 17 O Anutu, ni ine asuna ebicngo kipac kipactanggea gemba imocngo sesena anude. O Anutu, ubamangangngo ngichereu ebic meficgema kipatanggeu ge imoc hemma naric mi wanade.   
\p
\v 18 Ge Sionggac songo negemma gombunga ammima Yerusarenggac hocodatoa monggoc heimengere anna.  
\v 19 Ge ifi anna sese gombunga nga dindingac megenni imocac negenna ngereeu sese ohogemma seseyang hafoangoc ohogennide. Neni sese dema burumaka ngiwa aratagau faiyunuma ohogennide.   
\c 52  
\s1 Yarefaka fingerec  
\d Yegecgareng yearu. Yegec yomoc masiki uba modacma heibesonga. Edomingic mong kpara Doege ye Sauroaru kemma yofi edeec, “Dawidi ye Ahimerecac amau kemma kecde.” imohai Dawidingo yegec yofi heiec.  
\p
\v 1 O ngic kuctoagagoc, ge Anutuac enac tofoc tofohongic tobanggema kpenec. Ge imocac defefec amma yoac homac osokecnec. Ge ngic kpetotieyununa kpac anggecde, ifi negemma asoacnac kemma marai negeng areng angkecnec.  
\v 2 Ge nedzarangga imoc resa enaragoc, ifi isoc anu ikoc ayemmema kpetotieyunuannec.  
\v 3 Ge manganaac songo homac negemma gombungaac songo mong mi negemma ikocyoac debesonga anggenu yoac fora deneadeac mong mi anggengande, kpac. \it Selac\it*   
\m
\v 4 Is, nedzarang ikohagoc, yoac manganango ngicngac memanganeyunuande, ge imocac songo negengannec.   
\p
\v 5 Anutungo ine kpedzameguu nasoga kpac ambeso. Ye kporucbedzogau hama imohacnac kucgoc meicguma ukuguu kekecnginagoc yeneac bangecfunac meicgudaru imohai monggoc mi kecnade. \it Selac\it*   
\p
\v 6 Ngic dindingac yeni imoc hemma kpidohoma kengec amma yarengic hemma dzomoremima yofi degecde,  
\v 7 “Henggec, ngic imoc ye Anutuac hoannu kemma mi sufuec. Ye ine ngicngac ogofora memanganeyunuma yengena dzofinactoaya negenserima kefu wiac imocngo sufu sufuamea anec.”  
\v 8 Anu oriwa icngo sabayagoc nangande, ni ifi isoc Anutuac amau namba Anutungo yoac dedzege amma imoc modackecde, ni nasoya nasoya wiac imoc negenserikecduae.   
\m
\v 9 Anutu, geng ua menec, ni nasoya nasoya imocac ubangerec megembade. Geac kpac kuneng, imoc gombunga nga ni imocac negensima fora fingerudeac negemma kecbade. Amma geac enac tofoc tofohongicngacfocga yeneac kicfu geac kpac kuneng heiwayong memibade.   
\c 53  
\s1 Yeni negen negengngina kpac  
\d Yegecgareng yearu. Yegec yomoc maharatac sing masiki uba modacma heibesonga. Dawidingo yegec yofi heiec.  
\p
\v 1 Ngicngac negen ngentegecngina kpac, yeni herenginau yofi negemma deandae, “Anutu mong mi kecde, kpac yombong.” Yeni fakangina manganeu faka mangana yombong hania hania angkecma yenearunac mongngo faka gombunga mi anude.   
\m
\v 2 Anutungo kurumennunac kic fiu mau ngicngac yenengkecde. Ye ngicngac negen negentegecgoc kecma Anutu hofocandae, ngic ifia hofocyunuma kecde.  
\v 3 Yeni sasawango ine faka gombunga ngadehedacma fakangina manganedaru yenearunac mongngo mong faka gombunga mi angande, mocdong kpac.   
\p
\v 4 Ngicngo yaka dzegoc neandae, yarengic yeni ifi isoc ngicngacfocna neyunuandae, yeni memeficac Anutu mi kpacgecde. Yeni negen negengtegecngina kpac.  
\v 5 Ngic ge gugecdeac kpedzucnegec yeni Antungo sicngina kpedzameude. Imocac wiac mong kengehagoc mi fingeru yeni ine kengectoa amma kpidohogecde. Anutungo wayunuecac gameyunuu nanggecde.   
\p
\v 6 O, ebicfunac mesi mesi, imocngo Siong, imohacnac habeso, imocac yombong anemmede. Anutungo ngicngacfora mengereyunuu kekecngina ngereeude, imohai Yakoboac areng yeni sogaigecde nga Israeac areng yeni ubangerec negenggecde.   
\c 54  
\s1 Memeficac nunumu  
\d Yegecgareng yearu. Gitakurere kpema heibesonga. Sifingic yeneng Sauroaru kemma yofi edegec, “Dawidi ye nenanggoc sufuma kecde.” Ifi anggec Dawidingo masikiyegec yofi heiec.  
\p
\v 1 O Anutu, ge kpac kunenggaac amma ebicfunac mesinuma kucgango onggonnuna ngic yeneac yoacfu firang ambesare.  
\v 2 O Anutu, ge nunumuna negemma yoacnaac kedzac kpena.   
\m
\v 3 Kuricngic yeni yacma nubeso andae nga ubakpekpe ngicngo Anutuac negenggec engena mi angkecde, yeni ngaba anemma kpebucnubeso andae. \it Selac\it*   
\p
\v 4 Foracngoc, Anutu ye memeficngicna. Kebungo kekecna garenggekecdae, yenigoc kecma nanggeyunuu seria nanggecde.  
\v 5 Ngic neac ngabayoac degec yeng ngadeyoacngina merenu yeni imocac ebic meficgegecde. Kebu, ge yoac modac modac Anutu, imocac memanganeyununa kpac ambisia.   
\m
\v 6 O Kebu, ni ubaefac amma geac sese megembade. Ge kpacga gombunga, imocac geac kpac kuneng heiwayong memibade.  
\v 7 Geng ebicfunac mesinudacma ngabafocna memanganeyununa ni firang amma kicnango yenenai.   
\c 55  
\s1 Tosofocna yeni wanugec  
\d Yegecgareng yearu. Gitakurere nga noc kpema heibesonga. Dawidingo masikiyegec yofi heiec.  
\p
\v 1 O Anutu, ge neac nunumunaac kedzac faina wiac monggac kpesigemba ge imoc negemma ihoc bahaoc mi ambesena.   
\m
\v 2 Ubaebicnango feracnuu negen negennango sicsauc andeac ge negennemma yoacna turunga merennenna.  
\v 3 Ngabafocna yeni kpeborong kpekecdae nga ngic Anutu ngadehema mangana megecdeac ayemmeande, yeni kicngina nearu fima ngaba anemma ebicfu fainugec ubaebicgoc kecduae. Yeni ngaba amma nubeso andae.  
\v 4 Herenau ubaebic mema homecac kengectoa amma kpidohoma manganebeso anduae.  
\v 5 Ni kpidohoma kengecnuu dzononna fedede. Ni kpidohoba kengectoango feracnuu ubaebicgoc kecduae.   
\p
\v 6 Ni yofi deduae, “Ni kebesac neng isoc kpegannagoc ambai dede kpututuckema bangec monnu kemma ruae meficgebesare, imocac yombong anende.  
\v 7 Foracngoc, ni kpututuckema bangec ngiha kpacfu kemma amagerecna ihai mema kecbai. \it Selac\it*  
\v 8 Kia firangtoa kpeu ni sufu sufuamana mong meficgema ihai bicbic kpututucke kemma sufubai.”   
\p
\v 9 O Kebu, ni taonnu ngic yenemba yeni ngaba angemema yarefaka angandae. Ge imocac negen negengngina kpetotiena yoacnginau tohoemebisia.   
\m
\v 10 Yeni hadzing tofocnac taonggac odatoa witiau kengha amma yerecgema nangandae nga taong manau tosongo ngicngac tosofocngina memanganeyunugec ebic homac fede.  
\v 11 Yeni wiac kpetotiegecdeac negen negeng mekecgec, imocngo taong botuhau wiac kuneng ande. Ngic yeni ngicngac ogofocngina ebicfu faiyunugec ubaebicgoc kecdae nga goa yeni ikoc amma hiedzo kiregecandae. Faka imocngo emenecnginau fekecma mi kpac anude.   
\p
\v 12 Neac ngabangicngo yoac deendema anembac ni naric serima imoc negengkecbai nga ngaba mongngo ubakpekpe anenu yearunac naric sufubai.  
\v 13 Faka ifia ine gennoc ogona angkecnec. Nerang arennira mocgu amma ge ngic ni isoc amma wegenac kecandipe, ge tosoyombonna, gennoc faka ifia anengkecnecac ubahodung negenduae.  
\v 14 Neri nerahafoc kecma desogai angkecma habutoagoc Anutuac womonnu nerahafoc kengkefic.   
\p
\v 15 Homecngo ngabafocna meyunubeso. Yarefakango amangina nga herengina mewakeudeac yeni sebingina gbori femanu homec amau kemebisia.   
\m
\v 16 Anu ni sifu Anutu kpacba \sc KEBUNGO\sc* ebicfunac mesinuude.  
\v 17 Ebicngo memanuu asoringa anenu ni asoac nga marai amma tofocnac imocac kiacma ebicyoacna edeba yeng ubaudumenna negenude.  
\v 18 Foracngoc, ngic homac yeni ngaba anemma nubeso andae nga Kebungo dzikacfu garennuma bummenuma onggonnuude.   
\m
\v 19 Anutungo ngictau tatahau bicngoc tarec amma nasosoc tarude. Ngic imoc, yeni ine ubangina naric mi dzigeneude. Yeni Anutu kengec nga eweheiheigoc naric mi hoanggegecde. Imocac ye neac kiac negemma kpendzennu faiyunuude. \it Selac\it*   
\p
\v 20 Tosonango yeac dzadzahac kpema maria sinema ngic ogea kpebeso anec.  
\v 21 Yeac yoac yumia hosonec kerec isoc deu herea manau ine dzikacngo feu yoac deec, imoc ine ruaegoc yombong kerecdokuya isoc amma soengo yenereande, ifi isoc yenereec.   
\p
\v 22 Ge ebic sasawa tofohonec, imoc \sc KEBU\sc* wamina yeng ebic imoc tofohodacma meserigubeso. Ye ngic dindingac garenggema kpae heimiu wiac mongngo ye meu goroc goroc naric mi anude.  
\v 23 Ngic yeni ngic ogofocnginaac sac hetinggebeso ayemmeande nga ikocngic, yeni kekecngina kebangau homegecde. O Anutu, geng kpefacyununa yeni teng keme kemeau kemeyombonggegecde.  
\p Anu ni negenserigukecbade.   
\c 56  
\s1 Ge kickumuna mi nigecgubeso  
\d Yegecgareng yearu. Yegec mong kpara Kebesac neng aga saruc icfu tacde, imocac uba modacma miktangyegec yomoc heibesonga. Firistiareng yeneng Dawidi Gata amau meficgema mendanggegec yeng yegec yofi heiec.  
\p
\v 1 O Anutu, ngicngac yeneng ni mematiti anendae nga ngabafocna yeneng asoacnac kemma marai ebicfu fainugec ubaebicgoc kecduae. Ge imocac neac ubaga manganeu.  
\v 2 O Kebu Engenatoa, ngabafocna yeni asoacnac kemma marai enacfu faifai amma sebingina meemma mematiti anemma ngaba anengkecdae.   
\m
\v 3 Ni kengecnuu negenseriguanduae.  
\v 4 Ni Anutuac yoac dengerema ye negenserikecma kengec mi ambade. Ngic yeneng wiac mong naric mi anenggecde.   
\p
\v 5 Yeneng asoacnac kemma marai enacfu faifai anemma memangenenukecdae. Yeni ebic hania hania fingecnenudeac negen negengua ebirangoc mekecdae.  
\v 6 Yeni memanganenugecdeac denegeng amma neac tomai sufuma namma kpebucnugecdeac ayemmeu ni kengha ambadesoc garennukecdae.   
\m
\v 7 O Anutu, ge ngicngac areng sasawa yarefakanginaac turunga kpouyemmema herebugaac ebic witicnginau ukuna mau.  
\v 8 Yeni nukporac anenggec wenac dafiguc ama heidac kefai imocac kpetea osoma medacnec. Amma kickumana bic osoma kibigau ohonec fede, imocac kpetea negensibesena.  
\v 9 Anutungo nigoc kecde, imoc negenduae. Yeng ni meficnuudeac kpacba imohai ngabafocna dzigenema woragecde.   
\m
\v 10 Ni Anutuac yoac dengerema Kebuac yoac dengerema  
\v 11 ye negenserikecma kengec mi anganduae. Ifi amba bangecngic yeneng wiac mong anenggecdeacsoc mi ande.   
\p
\v 12 O Anutu, ni yoac deserima ge edeguai, imoc tofohobesare. Ni ubangerecnaac sese megembade.  
\v 13 Ge ubaongana homecfunac mesima hanina meserina mong mi tifainggeai. Ge ifi anna ni Anutuac kicfu kekecac kperagiau kecbade.   
\c 57  
\s1 Ngiha ngiha botucnginau afegubade  
\d Yegecgareng yearu. Yegec kpara: Ge mi kpetotiebesena, imocac uba modacma miktangyegec yomoc heibesonga. Dawidingo Sauro yearunac worama hocsingau sufuma yegec yofi heiec.  
\p
\v 1 O Anutu, ge neac ubaga manganeu. Ubaonganagoc geac hoannu sufuduaeac amma ge neac ubamangang negenna. Ni geac kpeganggaac debannu sufuma kecbare kiafirang mangana kpac andacbeso.   
\m
\v 2 Ni Anutu Engenatoango meficnuudeac kpacduae. Anutu yennoc neac kekecareng uayagoc faima uaya nearu mesidarude.  
\v 3 Ye memefiha kurumennunac sueu imocngo ebicfunac mesinuude amma ngic mematiti anenggec imoc yenemma game kpekpeu faiyunude. Anutungo yoac dedzege amma imoc modackecde nga ye yoac modac modac Kebu amma faka imoc faiu hanemmeude. \it Selac\it*   
\p
\v 4 Raiong yangtoa yeni yang siricfu herenginaac homema bangecngic medacfocngina neyunuandae, ni botucnginau feduaenoc. Ngic yeneac enacngina imoc pokong nga tebemedaha isoc amma nedzarangngina imoc dzikacac soe isoc enara monggoc.  
\v 5 O Anutu, afegugec imocngo kurumenga kurumenga ferahema embeso. Ge kucga nga kibikperagiaga bangecfu faina mau bangectoa bangec sokoma fedacbeso.   
\p
\v 6 Yeneng neac ufic faigecac ni ebic kuneng meficgeba neac sinnu teng mong usuma yenaoc teng imohai kemegec. \it Selac\it*   
\p
\v 7 O Anutu, herenango ge seria meguma kecbade, oc, herenango seria meguma kecbade. Ni yegec heima music mema afegubade.  
\v 8 Ubaongana ge negengboribesena. Gitakurere ngeni gboribisia. Ni ama negemma yegec heima amabangecac kperagi midibade.   
\m
\v 9 O Kebu, ni ngiha ngiha botucnginau ge ubangerec megemma bangec monnunac ngicngac botucnginau namma geac yegec heima dengeregubade.  
\v 10 Geng yoac dedzege amma imoc modackecnec nga imocngo wiac herea amma kurumenga kurumenga manau naric enude nga ge yoac modac modac Kebu. Geac faka imocngo wiac herea amma sawau emma hoeng kpesereyunuude.  
\v 11 O Anutu, ngicngac afegugec, imocngo kurumenga kurumenga ferahama embeso nga ge kucga nga kibikperagiga faina bangecfu mau bangectoa bangec sokoma fedacbeso.   
\c 58  
\s1 Anutu wadae  
\d Yegecgareng yearu. Yegec kpara: Ge mi kpetotiebesena, imocac uba modacma miktangyegec yomoc heibesonga. Dawidingo yegec yofi heiec.  
\p
\v 1 Nemu hania hania, ngeni yoara kpac kecma desi desi ua dindingac mi megecde. Ngeni yoacfu ngicngac yeneac yoac isingising ikohau meandae.  
\v 2 Ngeni herenginango negen negeng mangana arenggekecma maringinanango bangecfu yarefaka fingerudeac ua mederema yemmeandae.   
\p
\v 3 Ngicngac Anutu ngadehema mangana megecdeac ayemmeande, yeni nonggo heremanaunacngoc sing segema fingecma kecdae. Yeni fingecgecfunacngoc sing segema ikocyoac deandae.  
\v 4 Yeni marasingngina mangana imoc boidzocac marasing mangana isoc ande nga kpate kedzafongngo kedzaha mefonggeande, yeni ifi isoc andae.  
\v 5 Boidzoc ifiango dzinacngic ubaudumengngina naric mi negenude nga dzinacngicngo ye tobanggema uatoa mema udumeng gombunga meficgeu kpatengo imoc naric mi negenude.   
\p
\v 6 O Anutu, geng enacsicngina dumbengnginaunac kpedzamena. O \sc KEBU\sc*, geng raiong gboria baicngina kpetackema meickena.  
\v 7 Geng sueyununa yeni dokungo worama kengande, ifi isoc kembisia. Nga ngicngac yeneng kpindzing tidzamegec moronggeande, yeneng ifi isoc ge negemmana ngic Anutu ngadehema mangana megecdeac ayemmede, yeni tidzameyunubisia.  
\v 8 Geng negemmana yeni gowohahacngo homema hoaeande, ifi isoc hoaebisia. Nga geng negemmana yeni sabacngo yadiseri mi amma nonggo heremanaunac homemea fingecma wenackiwa naric mi henude, ye isoc ambisia.  
\v 9 Ngic Anutu ngadehema mangana megecdeac ayemmeande, yeni sabanginagoc me dzangge dzanggea kecgec yeng meicyunuu kpac ambisia. Enang bebedaha gerecngo dzeu fitickema yacande, Anutuac herebungo dzefiticyunuu yeni ifi isoc yacbisia.   
\p
\v 10 Yeni kopocsicnginaac turunga ifi fingecyemmeu ngic dindingac yeni imoc hemma sogaigecde. Yeni ngic Anutu wama kopocsic meficgegecdeac ayemmeande, yeneac sacngina tima haningina dzuacgec  
\v 11 ngicngac yeneng degecde, “Foracngoc, ngicngac dindingac yeni angammemenginaac foraya gombunga fingecyemmeude. Foracngoc, Anutu kecde, ye bangecfu desi desi ua mekecde.”   
\c 59  
\s1 Ge mesinuna  
\d Yegecgareng yearu. Yegec kpara Ge mi kpetotiebesena, imocac uba modacma miktangyegec yomoc heibesonga. Saurongo ngicfora Dawidi kpebugecdeac sueyunuu Dawidiac ama garenggema nanggec yeng yegec yofi heiec.  
\p
\v 1 O Anutuna, ge ngabafocna yeneac mariunac mesinuna. Ngic nubesonga andae, geng yenearunac onggonnuna.  
\v 2 Yarengic nga ngic sacna hetinggebeso ayemmede, ge yeneac mariunac mesinuna.   
\m
\v 3 O Kebu, ni singyoac kpema kopocsic mong mi meficgeai nga yeni ine yagungoc kekecna meickegecdeac nembima ngonducnema tomai kecdae nga yarengic ngabatoanginagoc yeni nugecdeac negemma yoac dzegedae.  
\v 4 Ni faka mangana mong mi anai nga yeneng ine efaima hama nubeso andae. Ge kic fima ebicna hemma yacma meficnuna.  
\v 5 O \sc KEBU\sc*, Anutu kurumenggac wasaiareng kunengngina, ge Israe neneac Anutu. Ge gauunac yacma bangec monnunac ngicngac mi negenggudae, yeni sasawa kopocsicnginaac amma turunga kpouyemmena. Ngic ikocngina mesufuma yarefaka arengandae, yeni mi onggongyunubesena. \it Selac\it*   
\p
\v 6 Yeni wenasoc ama marai anu dzigenema hama kasi isoc taua kpema taonnu hofoc hofoc kengha angandae.  
\v 7 Yeni enacnginausing wiac urunggec maude, imoc hembesena. Yeni enacbibicnginaunac wiac urunggec maude, imoc dzikacac beang isoc. Imoc enara monggoc anu deandae, “Mongngo yoacnina naric mi negenude.”   
\m
\v 8 O \sc KEBU\sc*, geng ine dzomoreyemmema bangec monnunac ngicngac ge mi negenggudae, yeni tenicfu faiyununade.  
\v 9 O Anutu, ge neac memeserina nga amana seria, imocac ni kic gearu fibade.  
\v 10 Anutuna yeng yoac dedzege amma imoc modarude. Ye warainemma kemma sinnu meficnuude. Anutunango sing meficgeu ni firang amma ngabafocna memayunuma yenembade.   
\m
\v 11 O \sc KEBU\sc*, ngicngacfocna yeneng wiac imoc nigecyunubaac ngabafocna mi kpebucyununa. Ge ngic ifia kucgango memayununa kucmama nga goroc goroc amma kecbisia. O Kebu, ge kasonina.  
\v 12 Yeni enacnginaunac yoac mangana mau kopocsicgoc amma sowec nga ikocyoac degecde. Yeni wiac imoc negenggec engena anu imocngo botacngina amma meyunubeso.  
\v 13 Ge herebugango gbokoyunubesena. Oc, ge gbokoyununa kpac andacbisia. Ifi anna bangectoa bangec tegia fekendaeu ngicngac yeneng yofi negenggecde, “Anutungo Yakoboac areng garengyunukecde.” \it Selac\it*   
\p
\v 14 Yeni wenacsoc ama marai anu dzigenema hama kasi isoc taua kpema taonnu hofoc hofoc kengha angandae.  
\v 15 Yeni yaka meficgegecdeac hofocma kengha amma mi gebecyunuudeu ngaba yombong amma arohogecde.   
\m
\v 16 Ni ine kucgaac amma yegec heigembade. Geng neac amana seria nga ebicnasou geac hoannu haba geng sufu sufuamana angkecnec. Ge yoac dedzege amma imoc modackecnec, imocac asoacngoc ubana miacma fakaga imocac ubangerec yegec heibade.  
\v 17 O Anutu, ge memeserina nga amana seria, imocac geac dedengerec yegec heibade. Anutu ge yoac nigoc dedzege amma imoc modacnade.   
\c 60  
\s1 Anutu, ge wanununec me?  
\d Yegecgareng yearu. Yegec kpara: Dzadzahaac lili dzaring, imocac uba modacma miktangyegec yomoc heima ubau faibesonga. Dawidingo yegec yofi heiec.  
\p
\v 1 O Anutu, ge nagdenunuma kpetotienunuma neneac ngaba annec. O Kebu, ge monggoc mengerenununa.  
\v 2 Ge bangec kpemindzahena usoc meu titing kuneng fingeru goroc goroc andeac geng titinga monggoc mengerena.   
\m
\v 3 Ge ngicngacfocga kpendzengtoau fainunuma waing seria gumecnununa neinggac hanititinina goroc goroc anu sicsaufu kengha aning.  
\v 4 Ngicngac ge eweheiheigoc hoanggugec yeni ine tebemedahaac sinnunac hesicyununadeac firac mong miacna yeni imoc hemma ihai kpedzucnema nanggecde. \it Selac\it*  
\v 5 Ge ngicngacfocga neneac songo negennec, nga ebicfunac mesiyununadeac neni marifoigango dzikacfu meficnununa firang ambisina. Ge nunumuninaac turunga merennemmena.   
\p
\v 6 Anutu ye womongau tacma yoac deserima yofi deec, “Ni firang amma sogaima Sikeng ama mederema Sukoc bangec tume imoc medereba noboha noboha anu ngicngacfocna yemmebade.  
\v 7 Gireade nga Manasse yeri neac. Efaraing imoc wasai opocna nga Yuda ye ngictau yasuna.  
\v 8 Moabi imoc dzuac dzuac sokocna nga ni Edonggaru hanitabena ukuba yunuude amma ni firang amma Firistia bangec arohomiba negenggecde.”   
\p
\v 9 Mongngo nigoc kemma taong odaya seria imohai menuma Edong bangecfu hesicnuma kembeso.  
\v 10 O Anutu, gennoc wanunuma ukununudacnec. Ge wasaingicnina yenigoc dzikacfu monggoc mi kengannec.   
\p
\v 11 Ngicngo meficnunuude, imoc memefihagoc kpac. Imocac gennoc meficnununa ngabafocnina yunubesena.  
\v 12 Neni Anutugoc namma kuctoaninagoc amma firang annide. Yennoc ngabafocnina mematiti ayemmeude.   
\c 61  
\s1 Kpegangga bageu  
\d Yegecgareng yearu. Gitakurere nga noc kpema yegec yomoc heibesonga. Dawidingo mitiyegec yofi heiec.  
\p
\v 1 O Anutu, ge kpakpacna negemma nunumunaac kedzac kpema negenna.  
\v 2 Ni bangectoa bangec tegiau namba woubocna kucmama anu kpacguduae. Ge hesicnuna hoc peperandzi herea mong feracnude, imohai kemma nambisira.  
\v 3 Ge neac sufu sufuama. Ngabafocna yeneng nubeso anggec geng amana herea nga seria annec.   
\m
\v 4 Ge kporucbedzogau fainuna ni nasoya nasoya ihai kecbade. Ni geac kpegangga bageu sufuma kecbadeac anende. \it Selac\it*   
\p
\v 5 O Anutu, ni yoac deserima deai, imohai ge imoc negemma ngicngac eweheiheigoc hoangguandae, ge maridzoming desiyemmenec, imoc ni ifingoc desinennec.  
\v 6 Ge ngictauac kekeha mehereena kifa homac kecbeso amma apangabofora yenembeso.  
\v 7 Anutu, ye geac kicfu nasoya nasoya ngictau tatahau takecbeso. Ge yoac modac modac Kebu amma yoac dedzege amma yoacga imoc modackecnecac amma fakaga imocngo ge negemmana ngictau henggareng ammibeso.   
\m
\v 8 Geng ifi anna ni dedeserina imoc wenacsoc modackecma geac kpac kuneng nasoya nasoya heiwayong memibade.   
\c 62  
\s1 Anutuac kicfu ruae  
\d Yegecgareng yearu. Yegec kpara: Yehudutung, imocac uba modacma yegec yomoc heibesonga. Dawidingo mitiyegec yofi heiec.  
\p
\v 1 Anutungo ebicfunac mesinuu ubaonganango yeac hoannu ruae meficgeude.  
\v 2 Ye neac hoc peperandzi seria amma ebicfunac mesinuude. Ye amana seria anu mongngo menuu goroc goroc naric mi amba yeng naric mi meicnuude.   
\m
\v 3 Ngeni ngic kuha kpac ngabaac siricfu kpekecdae, imoc wisickebeso. Ngeni sasawango ye kpema bangecfu ukuyombonggebeso andae. Ye oda kuha kpac nga odabisic dzame dzamea isoc nanu ngeni ye memanganegec todinggema makpeudeac negemma kpekecdae.   
\m
\v 4 Ye ngickuneng tatahau taru yeni negen negengina arenggema yofi negengandae, “Ye tatahaunac meickebesonga.” Yeni ikocyoac negenggec ngereeu enacnginaunac kenecyoac maande nga herenginango ine sowecyunugecde. \it Selac\it*   
\p
\v 5 Ni Anutu negensima tomai kecba foraya fingerudeac ubaonganango yeac hoannu ruae meficgeude.  
\v 6 Yennoc neac hoc peperandzi seria amma ni ebicfunac mesinuude. Ye amana seria, imocac wiac mongngo menuu goroc goroc naric mi ambade.  
\v 7 Neac memengerec nga eweheihei imoc Anutuarunac haude. Yennoc neac hoc peperandzitoa seria nga ni Anutuac hoannu kemma sufubade.   
\p
\v 8 O ngicngac, ngeni nasoya nasoya Anutu negenserima kecbisia. Yeac hoannu kemma sufuma kecnide. Ngeni herenginau wiac sasawa fedacde, imoc ye edebisia. \it Selac\it*   
\m
\v 9 Ngic mamea yeni ngicngo asu naso mocgu heiandae, imoc wiac ifi. Ngic engena kecdae, yeni firang onga ikoha fifiu kpac angande, ifi isoc andae. Sigeriu faiyunugec yeni ebicngina kpac. Yeni efea yombong nga enacasuac ebic sigeriu yeneac ebic ferahede.   
\m
\v 10 Ngeni hodzinnu wiac mema finacgoc anggecdeac mi negensibisia nga yarefaka amma finacnginagoc anggecdeac mi negensima sicsauc amma imocac tomai kecbisia. Ngeni dzofinacngina monggoc nga mongoc anu mekecgecdeu negen negengngina imohai mi faigec febeso.   
\p
\v 11 Anutungo naso mocgu yoac yofi deec, imoc atac yohockang anu negenai, “Ni Anutu kuc mingina nga  
\v 12 ni yoac dedzege amma imoc modacbade.” Kebu ge ngicngac tembuc tembuc angammemengina hennegeng amma turunga kpouyemmenade.   
\c 63  
\s1 Wosoefacga  
\d Dawidingo Yuda bangec kisiu sufuma kecma mitiyegec yofi heiec.  
\p
\v 1 O Anutu, neac Anutuna, ni ge hofocgukecduae, imoc bangec gbangge gbanggeango dokuac ammiande, ni geac ifi isoc anende.  
\v 2 Ni kuc nga eweheiheiga hembadeac kicna aratagau fima genai.   
\m
\v 3 Geng yoac dedzege amma imoc modackecnec, fakaga imocngo kekec ferahadeac amma dengeregubade.   
\p
\v 4 Ifi anu ni kecbadesoc kenecgubade\f + \fr 63:4 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* amma geac kpacfu numuma marina miacba enu.  
\v 5 Geng ubaongana yakaac kuc nga kerehagoc megume ammina wakeu enacbibicnango sogac sogaiac yegec heiu enacnango ge dengereguude.   
\m
\v 6 Ni kecnegeng naso amma tofocnacsoc fefenau fema ge negensiguma geac negensikecma feanduae.  
\v 7 Gennoc neac memeficngic, imocac geac kpegangga bageu sogaima kecma yegec heigembade.  
\v 8 Ubaongana gearu kpeketaheu marifoigango nanggenunade.   
\p
\v 9 Ngicngac kekecna kpetotiebeso andae, yeni ine homec amau kemegecde.  
\v 10 Yeni dzikacfu kenggec beangngo feracyunuma kpebucyunuu katekasi yeneng sebingina negecde.   
\p
\v 11 Ngictaungo Anutuac sogaiu ngicngac sasawa yeac kpacfu dedeseri deandae, yeneng yeac negenggec engena angande. Ikocngic yeneac enac ine fitec kpegecde.   
\c 64  
\s1 Sufu sufuu mi tarude  
\d Yegecgareng yearu. Dawidingo mitiyegec yofi heiec.  
\p
\v 1 Anutu, ni ebicyoacna edeguba ge ubaudumenna negenna. Ngaba yeneng nubeso andaeac kengecnude. Ge imocac onggonnuna.  
\v 2 Ngic yeneng Anutu ngadehema mangana megecdeac ayemmeu sufu sufuu yoac dedzege angandae. Geng yenearunac mesufununa yeni mi meficnubisia. Yarengic yeni memanganenugecdeac areng faigec ge mesufununa yeni mi meficnubisia.   
\m
\v 3 Ngic yeni soe dzumuandae, yeni ifi isoc nedzarangngina dzumugecde. Ngic yeni tebemedaha kpesaima ukuandae, ifi isoc kpesaima yoacngina hodungagoc ukugecde.  
\v 4 Yeni sufuma fema ngic kopocsic mong mi meficgeec, ye wedecandae. Yeni kengecngina kpac kecma bic yombong wedecgecde.  
\v 5 Yeni yarefaka megecdeac negen negeng seria mekecma ning kpema sufu sufuu subangina idegecdeac yoac denegeng angandae. Yeni yofi negemma deandae, “Mongngo naric mi nenenude, kpac.”  
\v 6 Yeni mangana dedzege amma deandae, “Neni wiac imoc gombunga yombong arenggedinggac naric annide.” Foracngoc, ngic ubaherenginaac negen negeng, imoc keme kemea yombong, i.   
\p
\v 7 Ifi ammagec Anutungo tebea yenearu kpesaima wedecyunuu yeni bic yombong kubecnginagoc amma mayunuude.  
\v 8 Ye nedzarangngina mangana imocngo kpetotieyunuu kpac anggec ngicngac ogofocngina yenengandae, yeni faka imoc hemma hata gigigecde.   
\m
\v 9 Ngicngac sasawa yeneng Anutungo faka meec, imoc negensima deyadigec ngicngac sasawa kengec anggecde.   
\p
\v 10 Anu ngic dindingac yeni \sc KEBUNGO\sc* faka meecac sogaima yeac hoannu hama sufuma kecbisia. Ngicngac uba kongaha kecandae amma herenginau ikoc nga hamangec mong mi fede, yeni Kebuac negenggec wiac engena ambeso.   
\c 65  
\s1 Wiac gombunga nemmeude  
\d Yegecgareng yearu. Dawidingo yegec nga mitiyegec yofi heiec.  
\p
\v 1 O Anutu, Siong taonnu ge eriendzong megembesonga nga geac kicfu namma dedzegeninaac fora modacbisina.  
\v 2 O Kebu, ge nunumuac turunga merengannec. Bangecngicngac sasawa yeni gearu hakecdae.  
\v 3 Neni ngicngac ogofocnina memanganeyunuinggac ebic imocngo memanunuu geng singyoac kpeinggac kopocsicnina wanec.   
\m
\v 4 Geng ngic mong meisinggema hoanggema wangecna womonggau kefudeac haude, ngic imoc ye kenehagoc. Neni geac amaac nga womong kpetiacac gombungagoc kecni gebecnunuu kecnide.  
\v 5 O Anutu, memengerecnina, ge nunumunina negemma fakaga mi hehena amma turunga merennemmema ebicfunac mesinununade. Bangec tegia fekende, imocac ngicngacfora nga ngicngac kondung ferahema tegiau kecdae, yeni sasawango kekecnginau wiac fora fingerudeac ge negensiguma tomaiga kecgecde.  
\v 6 Ge kucga heina kemeu kucgango tiki meficyunuma tatacnginau faiyununec.  
\v 7 Kondung yeni kunengngoc arohogec ge arongina menomanena ning kpegecde nga kondunggac siri udumengtoagoc kpeande, imoc menomanena ning kpema feude. Ge ngiha ngiha yeneac dzomugerec ifingoc menomanenade.   
\m
\v 8 Ge ngicngac negensinggugecdeac kucfaka meannec, imohai ngicngac bangec feracyunudacma tegiau kecdae, yeni imocac kerectegec anggecde. Geng ama werec wereckengaunac hanahema kemma bangec wenac keme kemeau wisickeude, imohai ubangerec ayemmena ubangerec negemma kunengngoc arohogecde.   
\p
\v 9 Ge bangec yugucke kia mina bangec kerehagoc yombong anudeac amminade nga Anutuac doku, imohai doku efea kpac fede. Ge bangec ifi mengerema ngicngac semengngina meficgeyemmenade.  
\v 10 Ge kia dena kpema semeng sereau kia kehema semeng homac nadzicmiude. Ge bangec buriric mesorongaina kia kpema bangec meyumeu bangecac semeng sasawa kenehena fora gombunga fingerude.  
\v 11 Ge kifaacsoc semeng homac meficgena imocngo kifaac iraya isoc anude. Geac hanititigaac bangec imoc kerehagoc nga semengtoayagoc.  
\v 12 Bangec kisiu ramaburumakaac bangec imoc kpindzingngo wakedarude. Bangec buma yeni ubangerec heigec kemeu sogac sogai anggecde.  
\v 13 Ramaburumakaac bangec yeni ramaburumaka habu homac wamba isoc heigec kemeu sokodacgecde nga bangec tumia emai imoc semengngo mewakeyunude. Wiac sasawa imoc yeni kpeturanggema arohoma yaiyo kpema yegec heigecde.   
\c 66  
\s1 Dendzerenggegec  
\d Yegecgareng yearu. Yegec nga mitiyegec.  
\p
\v 1 Bangecfu wiac sasawa, ngeni Anutu dendzerenggema yaiyo kpema  
\v 2 yegec heima yeac kpac kuneng heiwayong memima ye oyang boyang memima  
\v 3 yofi debisia, “Geng wiac angannec, imoc wiac engena yombong, imocac kerectegec andimbe. Ge kucga monggoc, imocac ngabafocga geac bageu kecma ngonducnegecde.   
\m
\v 4 Bangec sasawango geac kicfu ngocducnema numugemma yaiyo kpema yegec heigendae. Yeni geac kpac kuneng heiwayong memima yegec heidae.” \it Selac\it*   
\p
\v 5 Ngeni hama Anutungo ua meec, imoc hembisia. Ye bangecngicngac nenanggoc kecma ua bibiagoc meude.  
\v 6 Yeng kondung heimerenu bangec kerenga anu ngicngac yeni haningo doku imoc ferecgegec. Ye faka imoc meecac amma nenang sogac sogaigoc kefing.  
\v 7 Ye nasoya nasoya kuhagocngo wiac sasawa garenggema kiwango bangec monnunac ngicngac sasawa yenemma kefude. Yoackpekpe yeni sebingina mi meembisia. \it Selac\it*   
\p
\v 8 Ngiha ngiha ngeni Anutunina kenehema\f + \fr 66:8 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* enac udumengnginango ye oyang boyang ammigec ngicngac yeni negendacbisia.  
\v 9 Yeng garennunuu gbori kecdae, yenigoc kecni ye haninina garenggeu mong mi tiposockenide.   
\p
\v 10 O Anutu, imoc yofiac, ngic yeni siriwa isingeandae, geng ifi isoc faitobannu fainunuma isinnununec.  
\v 11 Ge uficfu fainununa kemeni ge ebic kuneng witininau faina imoc tofohokefing.  
\v 12 Geng negemmana ngic yeneng orucninau tima kenggec. Neni gerec manau kehema dokuu kemema kening, fora. Nga geng yaguc menunuma amabangec tumiatoau fainununa wiac monggac mi obohonide.   
\p
\v 13 Ni womonggau hama sese ohogemma wiac ambadeac dedeseri deai, imoc ambade.  
\v 14 Ni ebicfu kecma wiac ambadeac enacbibicnango yoac deserima deai nga yoac enacnango deai, imocac  
\v 15 ramaburumaka kerehagoc sese negemma gembade. Nga rama ngiwa sese dema ohoma hosuc heima burumaka nga noning ngiwa gemba sese ambeso. \it Selac\it*   
\p
\v 16 Ngicngac Anutu eweheiheigoc hoanggeandae, ngeni hama yoacna negembisia. Yeng nearu ua meec, imoc edengunuba.  
\v 17 Enacbibicnango ye kunengngoc kpacba nedzarannango ye bic afeheec.   
\m
\v 18 Ni ngicngac ogofocna memanganeyunubadeac negen negeng herenau arenggebai dede Kebungo neac kedzac mi kpebac.  
\v 19 Amma forangoc, Anutungo negennemma nunumunaac yoac negensima kefec.  
\v 20 Ye nunumuna mi ngadehema yoac nigoc dzegeec, imoc mi waec, imocac Anutu kenehebesonga.   
\c 67  
\s1 Yaiyo kpegembisia  
\d Yegecgareng yearu. Yegec nga mitiyegec, gitakurere nga noc kpema heibesonga.  
\p
\v 1 Anutungo wosoefac anemmema kenecnunuma kicmesuyango nerarannunubeso. \it Selac\it*  
\v 2 Ifi anna ngicngac bangecfu kecdae, yeni geac haniaga negembisia nga ge ebicfunac mesiyununadeac kuc fegende, bangec monnunac ngicngac botucnginau kecdae, yeni imoc negembisia.   
\p
\v 3 O Anutu, ngiha ngiha yeneng afegubisia, yeni sasawango ge yaiyo kpegembisia.  
\v 4 Ge monde mondega kpac kecma ngiha ngiha siric mocguu isingyununade nga bangec monnunac ngicngac sing edzacyununa imoc modacgecdeac yeni ubangerec negemma sogac sogai yegec heigembisia. \it Selac\it*   
\p
\v 5 O Anutu, ngiha ngiha yeneng afegubisia, yeni sasawango ohecga megembisia.  
\v 6 Anutu ye nenang Anutu. Yeng kenecnunuu bangecngo semeng gombunga meficgenemmeude.   
\m
\v 7 Anutungo kenecnunubeso nga ngicngac bangec tegia fekendaesoc, yeni sasawango ye eweheimima hoanggebisia.   
\c 68  
\s1 Anutungo firang ande  
\d Yegecgareng yearu. Dawidingo yegec nga mityegec yofi heiec.  
\p
\v 1 Anutungo yacma ngabafora yunuu singsararang kpema kecbisia nga yeac modzongina tiande, yeni yearunac worama kendacbisia.  
\v 2 Firangngo hosuc mefiranggeu kengkecde, geng ifi isoc kporacyununa worama kendacbisia. Ngicngac Anutu ngadehema mangana megecdeac ayemmeande, yeni ge negemmana kerecngo gerec wegenau tacma sisingaiande, yeni ifi isoc Anutuac kicfu sisingaima kpac ambisia.   
\m
\v 3 Anu ngicngac dindingac, ngeni ubangerec negemma Anutuac kicfu sogaima kecbisia. Ngeni ubangerec homac yombong negemma sogaibisia.   
\p
\v 4 Ngeni Anutuac yegec heibisia, ngeni yeac kpac kuneng heiwayong memima dedengerec yegec heibisia. \sc KEBU\sc* hoennu tacma kengande, ngeni yeac kicfu sogaima yegec heima oeha memibisia.   
\m
\v 5 Anutungo kpetiac womongau tacde. Ye beging mang ayemmema hodzec yenenggareng ayemmema onggongyunuude.  
\v 6 Anutungo ngicngac dzengong amagerec meficgeyemmeu tosofocnginagoc kecgecde. Ye witicngic witicamaunac mesiyunuu yeneng mama kecma wiac monggac mi obohogecde. Yoackpekpe ngic yeni ine bangec dzangge dzanggeau kecgecde.   
\p
\v 7 O Anutu, geng warac ngicngacfocga waraiyemmema bangeckisiusing wangecyununa kenggec. \it Selac\it*  
\v 8 Imohai bangecfu usoc meu Anutu, Sinai bangec gbangge gbanggeac Anutu amma Anutu, Israeac Anutu, kurumenga kurumenga yeneng geac kicfu kia faigec maec.   
\m
\v 9 O Anutu, geng kia faina bangecfu mau dokuac mi obohoing. Ge bangec gbangge gbanggea soc kpema nemmema kuha mina icngo monggoc kpedzienu bangec imoc kerehagoc anec.  
\v 10 Ifi anu kpebunggango bangec imohai kemma tacngisigec. O Anutu, ge wiacga homac fedeac ubangerecgaac imoc mema makpekpea yemmena wiac monggac mi obohogec.   
\p
\v 11 Kebungo yoac deu ngicngac homacngo siduc imoc tofohoma dekperagima  
\v 12 degec, “Ngictau yeni wasaingicfocnginagoc bic kemma woradacgec ngicngo dzikacfu firang amma iwai megec ngac yeneng amanginau kecma imoc hedzicma megecde.  
\v 13 Amma dzikacac hepuc amau tacgec yeni neng dzongina siriwa nga gol tengging tengging isoc ifiango sebingina soko sokoa feec.”  
\v 14 Anutu kpudamuyagocngo ngictau yunuu singsararang kpegec imohai nomang kia isoc mama Dzarimong tiki semeec.   
\p
\v 15 O Basang tikitoa tiki, ge bumaga homac nga herea herec, o Basang tiki.  
\v 16 Tiki bumaga homac nga herea herec, geng nocac kichodung amma Anutuac tikiu kic finec? Anutu yengenaoc tiki yomoc yeac anudeac segerema ye ihai ngictau kecma nasoya nasoya tacyac anude, ge nocac imoc kihodung amma hengkecnec?   
\p
\v 17 Anutungo dzikacac keretaha tausenga tausenga mehadac. Ye Sinai bangec wama kpetiac womongau emma kecde.  
\v 18 Geng wi sawau yombong emma witicareng witicyunuma wangecyununa arenggau kenggec. Ngic yeneng ubangerecac wiac genggec. O \sc KEBU\sc* Anutu, geng ihai kecnec nga ngic yeni geac modzongina tiu yoacga kpeandae, yeni ifingoc ubangerecac wiac genggecde.   
\p
\v 19 Kebungo nasosoc sesehenunuma nanggenunukecde, ye kenehebesonga. Anutu ye memengerecnina. \it Selac\it*  
\v 20 Anutunina ye memengerec mingina nga KEBU Israeac Anutu, ye homecfunac mesinunuudeac mingina.   
\p
\v 21 Ye ngabafora yeneac oruc kpedzameu ngic mangana mekecma nasosoc kopocsicnginagoc kecandae, yeneac orucsicngina dzoeagoc hetackeude.   
\m
\v 22 Kebungo yofi deec, “Ni ngic imoc Basang bangecfunac merengyunubade nga kondung buya keme kemeaunac meyunuma erebade.  
\v 23 Ifi amba ngeni haningina yeneac sacngo nadzicgecde nga kasifocngina tosea ifingoc yemmegec sacngina aberegecde.”   
\p
\v 24 O Anutu, hombanggac habuga arenggoc hagec ngicngac yeneng gengecde. Neac Anutu ngictauna habuya arennu hama kpetiac womongau enu ye henggecde.  
\v 25 Yegec heihei areng yeneng waraima wiac kpegec music fingecande, yeni wisic wisickeau hagec ngacnaroang yeni tambaringngina kpema botucnginau hadae.   
\m
\v 26 “Kpebung habutoa manau Anutu kenehebesonga.\f + \fr 68:26 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* O, Israeac fingecsahe, ngeni sasawango \sc KEBU\sc* kenehebisia.”   
\p
\v 27 Benyaming areng yeni areng kapiango enara meyemmeu kendae. Yuda arennunac ngictau kekecac areng habutoango kecmagec Dzeburung arenggac ngictauac areng nga Naftari arenggac ngictauac areng yeni ifingoc modacyunudae.   
\p
\v 28 Anutu ge kucga kpedzucnema efaina. O Anutu, ge kucgaac hania warac mekperagima edzacnununec, imoc monggoc edzacnununa.  
\v 29 Womongga Yerusarennu tacdeac ngictau yeneng ubangerecac wiac mehama gendae.   
\p
\v 30 Yang hania hania dokuac haseng manau kecandae, ge yeneac yoac ngabasiric dena kate burumaka ngiwa yeni habunginagoc kenggec ngic yeneac burumaka medaha kapia botucnginau kecgec ge gorongina kpebesena.\f + \fr 68:30 \ft Dawidi ye Israe yeneac ngabafocngina Aigita ngic yeneac negensima yoac heima deec.\f* Geng yeni memayununa siriwa toseatoa mehama gembisia. Ngic sasawa dzikacac songea negengandae, yeni yununa singsararang kpebisia.  
\v 31 Ngic kuneng yeni Aigita bangecfunac hagec ngic Etiopia bangecfunac yeni maringina bic miacma Anutuaru hagecde.   
\m
\v 32 Bangec areng ngictaunginagoc kecdae, ngeni Anutu yegec heimima Kebu yegecfu yaiyo kpemibisia. \it Selac\it*   
\p
\v 33 Negenggec, yeng kurumenga kurumenga hanahema fingecgec, yeneac witinginau tacma kende. Ye ubaudumenga miacma kunengngoc yombong kpacde.   
\m
\v 34 Anutu ye kuhagoc, imoc deyadibesonga. Yeng ngictauac kucgoc amma Israe ngicngacfora garengyunude. Yeac kuc imoc sawau fedengoc.  
\v 35 O Anutu, ge damu damugagoc amma ge kpetiac womonggau kecnec. Israeac Anutu ye ngicngacfora gareng anggecdeac kuc nga sebinginaac kuc yemmeude.  
\m Anutu kenehebesonga, hallelu Yac.   
\c 69  
\s1 Ebic witiau kecduae  
\d Yegecgareng yearu. Yegec kpara Lili dzaring, imocac uba modacma yegec yomoc heibesonga. Dawidingo mitiyegec yofi heiec.  
\p
\v 1 O Anutu, dokungo ubanau erema feracnubeso andeac ebicfunac mesinuna.  
\v 2 Ni goteng dzohonnu kemebeso anduae, imohai titiseriac wiac mong mi fede. Ni doku dzohong kunennu kemeba doku tunggbaungngo semenuu  
\v 3 memeficac kiackecba kucna kpac anu ngorucbonna gbanggede. Ni Anutungo meficnuudeac kicfifi kecba kicna kundung kpebeso ande.   
\p
\v 4 Ngic yeni hania kpacfu ubango ukunudae, yeneac kpete imoc orucdzonaac kpete ferahade. Ngabafocna yeni homac nga ngic kucnginagoc ikoc amma neac ngadeyoac dema memanganenubeso anggecde. Ni wiac mong hamangec mi meai nga yeneng ine turunga yemmebadeac dekecdae.   
\p
\v 5 O Anutu, ni kapa ua mekefai, imoc geng negennec nga manganana hania hania, imoc geac kicfu naric mi sufuude.  
\v 6 O \sc KEBU\sc* Anutu, kurumenggac wasaiareng kunengngina, ge negensigugec fora fingerudeac tomai kecdae, yeni neac amma ngic yeneng game kpekpeu faiyunubauac kpae heiyemmebesena. O Israeac Anutu, ngicngac ge hofocgudae, yeni neac amma eweheiheia kpac kecbauac faka imoc kpetaribesena.   
\m
\v 7 Yeni geac ammanoc deendema anenggec gamenuu imocngo kicmesuna semeu kicmesuna sufukecduae.  
\v 8 Ngic ogofocna yeni negennenggec ni monnunac isoc anduae nga dacmunafocna yeni negennenggec kuric isoc anduae.   
\m
\v 9 Ni amawomonggaac amma herena gerec dzema dzendandannuude nga ge dedenggbaring anggenggec imocngonoc neac witiu enude.  
\v 10 Ni kiacma yaka waba yeni detenic anenggec  
\v 11 ubamanganggac wamba heiba desusuic anenggec.   
\m
\v 12 Ngicngac yeni taonggac sobennu tacma ni dedzomoc anenggec ngic doku seria neandae, yeni neac kiki kpema yegec heiandae.   
\p
\v 13 O \sc KEBU\sc*, ni sifu gearu numuduae. O Anutu, geng yoac dedzege amma imoc modackecnec, imocngo mi kpac anudeac amma nasoya hau geng turunga merennembesena. Yoac modac modac Anutu, ge meficnubesena.   
\m
\v 14 Ni goteng dzohonnu kemebaiac meicnuna. Geng negemmana yeni ngabafocna yeneac mariunac mesinuma doku dzohonnunac onggonnubisia.  
\v 15 Doku tunggbaungngo semenubaac kpae heimina. Doku dzohongngo gbokonubaac me tengngo menuma naguya heibaac geng kpae heiyemmena imoc wabisia.   
\m
\v 16 O \sc KEBU\sc*, geng yoac dedzege amma imoc modackecnec, imoc gombunga yombong nga ge wosoefacga efea kpac, imocac kicmesuga nearu monggoc merenna.  
\v 17 Ge kicmesuga kingang ngicga nearu mi sufubesena. Ebic witiau yombong kecduaeac ge bic yombong turunga merennenna.  
\v 18 Ge neac wegenac hama bummenuma ebicfunac mesinuma ngabafocna yeneac amma witicfunac mesinubesena.   
\p
\v 19 Ngic dedenggbaring anemma game kpekpeu fainugec goiheiheia kpac kecduae, ge imoc negemma ngabafocna sasawa negengyunudacnec.  
\v 20 Yeni dedenggbaring anemma herena kpedzamegecac ubaebictoa meficgema kecduae. Ni negemba goa yeneng neac ubangina manganeudeac kic fima mong mi meficyunuma memeseringic hofocyunuma mong mi meficyunuai.  
\v 21 Yeni wiac marasing manganagoc nebadeac gumecnuma doku aengagoc nebadeac nenggec.   
\m
\v 22 Yeneac tatac nasoac nenedoku, imoc geng negemmana botac isoc amma mendangyunubeso nga ogofocnginagoc sesegerec yang negec, imocngo suba isoc amma meyunubeso.  
\v 23 Yeni ge negemmana kicngina kundung kpeu wiac mong naric mi hemma tinicngina nasosoc dendeng kpekecbeso.  
\v 24 Ge herebuga yenearu kpakena imoc gerec isoc dzema feracyunuma yeneac witiu feu  
\v 25 yeni amabangecngina kisi fingeru ngic mongngo yeneac kporucbedzonginau mi tacbeso.   
\m
\v 26 Geng ngic hanahema yununa yeneng torokpema yunukporac ayemmedae. Geng ngic dzoboya yununa yeneng kpendzengngina monggoc meyadiandae.  
\v 27 Geng yoacfu torokpeu torokpe faiyunubesena, yeni geac memengerecfu mi torokpebisia.  
\v 28 Geng negemmana yeni kpacngina kekecac kibiunac dzuacbesonga amma ngic dindingac kecandae, yeneac kpacarennu mi kpeturanggebesonga.  
\v 29 Ni ine ubaebicgoc kecma kpendzeng kpema kecduae. O Anutu, ge memengerecgango ni onggonnubeso.   
\p
\v 30 Ni Anutuac kpac kuneng yegecfu yaiyo kpemima ubangerec memima afeheba  
\v 31 \sc KEBUNGO\sc* imocac negenu ngereede. Imocngo burumaka ngiwaac sese ferahama burumaka baiha nga gbongagoc, imocac sese ferahade.   
\m
\v 32 Ngic yeni ogofocngina ebicfu faiyunugec yeneng ubaebicgoc andae, yeninoc imoc hemma ubangerec negembisia. Ngicngac Anutu hofocandae, ngeni herengina kekecgoc monggoc anude.  
\v 33 \sc KEBUNGO\sc* ngicngac iwaiac obohokecandae, yeneac nunumu negengkecde, ye ngicngacfora witicamau kecdae, yeni naric mi wayunuude.   
\p
\v 34 Kurumeng nga bangec ngeri ye dengereec kondung nga kondung manau wiac sasawa kenghaandae, ngeni ye dengerebisia.   
\m
\v 35 Imoc yofiac, Anutungo Siong ebicfunac mesima Yudaac taong fekendaemoc monggoc heigboriyunuma amangina meyemmeude. Yeac kingang ngicngacforango tacngisima bangec imoc mema mingina anggecde.  
\v 36 Kingang ngicfora yeneac nambaracfocngina yeneng maridzoming dema bangec imoc megec ngicngac yeac kpac kuneng songogoc hoanggeandae, yeni ihai kecgecde.   
\c 70  
\s1 Ge bic hama meficnuna  
\d Yegecgareng yearu. Dawidingo nunumuac mitiyegec yofi heiec.  
\p
\v 1 O Anutu, ge hama ebicfunac mesinubesena. O \sc KEBU\sc*, ge bic hama meficnuna.  
\v 2 Ngic kpebucnubeso andae, yeni geng negemmana game kpekpeu faiyunugec oboc kpoboc ambisia. Nga memanganenubeso ayemmeande, geng yeni memayununa eweheiheia kpac kecma dzigenebisia.  
\v 3 Ngic yofi denengandae, “Naric yombong, naric yombong.” yeni yenang gameyunuu dzigenebisia.   
\p
\v 4 Anu ngicngac ge hofocgudae, yeni geac amma sogaima ubangerec negenggec ngicngac geac memengerecga songogoc hoanggeandae, yeni monggoc nga monggoc yofi debisia, “Anutu ye engenatoa.”   
\m
\v 5 Ni ine makpekpea amma iwaiac obohoma kecduae. O Anutu, ge nearu bic hana. Ge memeficna nga ebicfunac yungec yungecngicna. O \sc KEBU\sc*, ge naso mi ukuma nearu bic hana.   
\c 71  
\s1 Yada yeneac nunumu  
\p
\v 1 O \sc KEBU\sc*, ni geac hoannu hama sufuma kecbade. Ngic yeneng desofoc anembauac nasosoc kpae heiyemmekecma  
\v 2 fakaga dindingac modacma ebicfunac yungecnuna. Ge kedzacga nearu faima ebicfunac mesinuna.  
\v 3 Geng neac hoc peperandzi seria nga sufu sufuamana amma ama seria anembesena. Ge neac hoc peperandzi seria nga amana seria annecac yoac edeyununa ebicfunac mesinubisia.  
\v 4 O Anutuna, ge yarengic yeneac mariunac mesinuna. Ngic singkpekpe nga godzungic menugec geng maringinaunac mesinuna.   
\m
\v 5 Kebu, ni negen negensinna gearu faiba fora fingerudeac tomai kecduae. Ni hanahema sebigbori kefai kecma yaguc, imoc \sc KEBU\sc* negenseriguma kecduae.  
\v 6 Ni nonggo heremanaunac mi fingecmangoc, imohacnac geng naggenuna kefai nga gennoc nonggo heremanaunac meficnunec. Ni nasosoc ge yaiyo kpegembade.  
\v 7 Neac kekecna imoc ngic homac yeneac kicfu wiac kengehagoc yombong nga gombunga kpac, ifi isoc angande, fora. Nga ge sufu sufuamana seria.  
\v 8 Enacnau geac dedengerecngo wakeu asoacnac kemma marai ge eweheihei anggembade.   
\p
\v 9 Ni ngickpengeng ambade, naso imohai ge mi ukunubesena nga kucna kpac anu ge ngadenuma mi wanubesena.   
\m
\v 10 Ngabafocna yeni neac yoac dema kpebucnubeso amma kpedzucnema denengeng amma  
\v 11 yofi deandae, “Anutungo ngic imoc ngadehema wamanu mongngo naric mi onggonggeudeac nenang ngic imoc kisamma kemma meni.”   
\p
\v 12 O Anutu, neac hereau yombong mi kecbesena. O Anutuna, ge bic hama meficnuna.  
\v 13 Mesunau nuandae, yeni geng negemmana game kpekpeu faiyunugec kpac ambisia. Ngic memanganenubeso andae, yeni desofoc ayemmegec goiheiheia kpac kecbisia.   
\m
\v 14 Ni sifu nasosoc ge negensiguma fora fingerudeac tomai kecma monggoc nga monggoc dengeregubadeac anende.  
\v 15 Enacnango fakaga dindingac edeyunuba geac memengerec uagaac kpetengo engena anu imoc naric mi osobade. Ni asoacnac kemma marai imoc dekperagibade.   
\m
\v 16 O \sc KEBU\sc*, Israeac Anutu, geng ua kuhagoc mekecnec, ni hama imoc dekperagibade. Ge faka dindingac mingina, imocac ohec megembade.   
\p
\v 17 O Anutu, ni sebigborinaungoc kecba geng wiac edekpou anennec nga ni naso yofinenggac kucfakaga wiac engena hemma dekperagima kecduaengoc.  
\v 18 O Anutu, ni kpengeng yegbonnagoc ambade, ge imohai ifingoc mi ngadenuna amma mi wanuna. Ge nigoc kecmana fingecsahe hakecgecdesoc, yenearu ifingoc geac kucfaka engena dekperagiyemmebade.   
\m
\v 19 O Anutu, geac fakaga dindingac imocngo wi engkecma kurumenga kurumenga kpesereyunuude. Geng wiac engena mema kecnec. O Anutu, ge isoc mong mi kecde.   
\p
\v 20 Geng negemmana ebic nga wiac mangana homac fingecnenu henai nga gennoc megborinuma kekec monggoc nennade. Ge bangec keme kemeaunac monggoc hesicnuna erebade.  
\v 21 Ge kpacna meyadina imoc eweheiheigoc monggoc anude nga ge monggoc meserinuna herena nomaneude.   
\m
\v 22 O Anutuna, ge yoac modac modac Anutu. Ni gitana kpema udumeng gombunga megembade. O, ge Israeac kpetiac ngic, ni gita kpema afeguma  
\v 23 dedengerec yegec heigemma enacbibicnango sogaima arohobade. Ge ubaongana ebicfunac mesinec, imocac dengeregubade.  
\v 24 Ge faka dindingac amma meficnunecac nedzarannango asoacnac kemma marai imoc dekperagibade. Nocac ngic memanganenubeso anggec, ngicngac yeneng yeninoc game kpekpeu faiyunuma wayunugec yeni goiheiheingina kpac anggec.   
\c 72  
\s1 Ngictauac amma numubesonga  
\d Ngictau Saromongngo yofi numuec.  
\p
\v 1 O Anutu, ngictau ye geac desi desifakaga dindingacgoc kefudeac derecgemina. Ge ni, ngictauac medac, fakaga dindingacgoc ambadeac derecgenenna.  
\v 2 Ge ifi anna yeng faka dindingacfu ngicngacfocga yoacngina desibeso nga sing dindingac modacma makpekpea yoacngina desibeso.  
\v 3 Tiki yeneng ngicngac ruae meficgeyemmebisia nga fagang yeneng dindingac kekecac fora meficgeyemmebisia.   
\p
\v 4 Ngictauac ngicngacfora tosea makpekpea kecdae, yeni yoacfu nanggeyunuma yoacngina deu firang ambisia. Nga ngicngac iwaiac obohoma eng kecdae, yeni meficyunuma wiac yemmebeso. Ngic mongngo ngicngac ogofora ebicfu faiyunuu ubaebicgoc kecgec ngictaungo hemma kpedzameu kuha kpac ambeso.  
\v 5 Wenacngo feengkefude, ye imoc isoc kekec herea kecbeso. Nga afo fekefude, ye ifi isoc fekecma ngicngac fingecsahengina fekefudesoc kecbeso.   
\p
\v 6 Neni semeng uanina mengereni kiango imohai heiande, ye semeng ua ifia isoc amma kiango bangecfu heiu dokuyagoc angkecde, ye bangec ifia isoc ambeso.  
\v 7 Afo imoc nasosoc fekefude, ifi isocngoc ngictauac nasou faka dindingac sabayagoc amma ruae kunengtoa fefeseri fekecbeso.   
\p
\v 8 Ngictau ye kondunga kondunga tegiau nga Eufrate dokutoa hanahema bangec tegiau wisickede, bangec imocac mingina amma imoc garenggebeso.  
\v 9 Ngabafora bangec kisiu kecandae, yeni yeac kicfu ngonducnema sendung nedzarangnginango aberebisia.  
\v 10 Tarasis bangec nga nuha nuha bangecngina fekendae, imocac ngictau yeneng yeac ubangerec wiac mehama ye mibisia. Arabiaac Saba bangec nga Etiopiaac Seba bangecac ngictau yeneng ifingoc ubangerec wiac mehama ye mibisia.   
\m
\v 11 Ngictau sasawa yeneng yeac kicfu ngonducnegec bangec monnunac ngicngac yeni sasawango yeac kingang kpemibisia.  
\v 12 Imoc yofiac, ngicngac iwaiac obohoma kecandae, yeneng ye kpacgec yeng ebicfunac mesiyunuude nga ngicngac makpekpea nga memeficngina kpac kecdae, yeneng kpacgec yeng ebicfunac mesiyunuude.  
\v 13 Ye ngicngac kucmama nga iwaiac obohokecdae, yeneac uba mangang negemma iwaiac obohokecdae, yeneac kekec onggonggeude.  
\v 14 Ye yeneac sacngina negenu engena angkecdeac amma ngic yeneng yarefaka amma ogofocngina ebicfu faiyunugec ubaebicgoc kecgec yeng ebicgoc yeneac kekecngina bummema ebicfunac mesiyunuude.   
\p
\v 15 Ngictau ye naso hereangoc kecbeso. Arabiaac Seba bangecfunac ngicngac yeneng gol mema ye mibisia. Yeac tatahoc numuma asoacnac kemma marai ye kenehebesonga.  
\v 16 Bangecfu semeng homac fingeru ngicngac yeneng monggoc yakaac mi obohobisia. Semeng imoc tiki buma bumau mekemmeha amma Rebanong bangec isoc ambeso. Taong sasawa fekendae, ngicngac yeneng imohai kecdae, yeni kpindzingngo manennu sabayagoc yombong angande, ifi isoc ambisia.   
\m
\v 17 Ngictauac kpac kuneng imoc nasoya nasoya feengkecbeso. Wenacngo tatacseri takecde, ifi isoc yeac kpac kuneng deyadigec nasoya nasoya fekecbeso. Yeng bangec monnunac ngicngac sing meficgeyemmeu yeni kenecnginagoc amma yofi debisia, “Ye kenehagoc.”   
\p
\v 18 \sc KEBU\sc* kenehebesonga.\f + \fr 72:18 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Israeac Anutu yengsac kucfaka engena mekefu neneng imoc negenni wiac engena ande.  
\v 19 Yeac kpac kuneng imoc kuc nga kibikperagiagoc, imocac nasoya nasoya ye kenehebesonga. Yeac kuc nga kibikperagiango bangeha bangeha sokodacbeso. Imoc fora nga fora yombong.   
\p
\v 20 Isaiac medac Dawidi, yeac nunumu yofi wisickede.   
\c 73  
\ms1 MITIYEGEC KIBI 3  
\mr Mitiyegec 73–89  
\s1 Anutuac hoannu kekec  
\d Asafango mitiyegec yofi heiec.  
\p
\v 1 Foracngoc, Anutungo Israe areng faka gombunga ayemmeude. Ngicngac uba kongaha amma ikoc nga hamangecngina kpac kecandae, yeni faka gombunga ayemmeude.   
\p
\v 2 Ni ine hanina pososoc anu tifainggema manubeso anec.  
\v 3 Ngic yoackpekpe angandae nga ngic Anutu ngadehema mangana mebeso ayemmeande, yenemba yeni naric kecma wiac monggac mi obohogec, imohai keracmangang anai.  
\v 4 Yeni kpendzengngina kpac eng kecma sebingina kuhagoc anu kucmamea kpac kecgecde.  
\v 5 Ngicngac goa yeni ebicgoc kecandae nga ngic imoc yeneng ine ifi isoc mi kecgecde, kpac. Ngicngac goa yeni kpendzeng kpema kecandae nga ngic imoc yeneng kpendzenga kpac kecgecde.   
\m
\v 6 Imocac amma yeni yenanggac negenggec wiac engena angkecde, faka imoc kubu isoc ubahema godzufaka ngakpingina isoc heigecde.  
\v 7 Yeni herenginau negen negeng sicsauc hania hania dzacgoc fema ereu kichabungina ngopic amma yadiande.  
\v 8 Yeni deendema ayemmema yoac mangac manganea dema ngicngac ebicfu faiyunugecdeac ngabasiricfu yoac degecde.  
\v 9 Yeni enacbibicnginango kurumeng demanganema nedzarangnginaunac yoacngo bangec ferecgema kenude.   
\m
\v 10 Imocac ngicngac yeni yeneac hoannu kemma yoacngina imoc doku neandae, ifi isoc efea kpac negebec amma  
\v 11 yofi deandae, “Autungo wiac imoc naric mi negenude. Anutu Engenatoa ye wiac ifia naric mi negenude.”  
\v 12 Negenggec, ngic mangana yeni ifia. Yeni nasosoc wiac monggac negengyohoha kpac kecma hiedzongina meyadigecde.   
\p
\v 13 Foracngoc, herena garenggeba kongaha feec, fakana imoc uaya kpac yombong anec. Ni kopocsicna kpac kecma marina dzuacba wononga kpac anec, fakana imoc uaya kpac yombong.  
\v 14 Kebungo numengere anengkefu ni asoacnac kemma marai kpendzeng kpekecma asoacsoc kopocsicac amma numengere anenggec.  
\v 15 “Ni yoac ifia dekecbade.” Ni ine ifi debai dede nambaracfocgaac areng tobangyunuma ikoc ayemmema wayunubai.  
\v 16 Nga manganango kuhagoc fekecde, ni wiac imocac hania negentegecbadeac uaya mema negemba osiec.  
\v 17 Amma ni ngade Anutuac womonnu emma noc wiacngo wisic wisickeau fingecyemmeude, ni imohainoc negentegerai.   
\p
\v 18 Foracngoc, ge ngic ifia bangec gbafiringau faiyunuma kpetotieyununa kpac andacgecde.  
\v 19 Yeni bic yombong manganema kpac anggecde. Yeni kengectoa amma kpidohogec wiac imocngo meicyunudarude.  
\v 20 O Kebu, ngicngac gau hemma yacma imoc nigecyunuande, yeni ifi isoc. Geng yacma yeni gauac siric andae dema wayununade.   
\p
\v 21 Ubaonganango negenghodungaiba imocngo herena biring isoc nendanggeu  
\v 22 ni ubafong amma negen negenna kpac kecma yang yeneng memanganeyunuandae, ni ifi isoc geac kicfu ubakpekpe anggenai, fora.   
\m
\v 23 Amma ni sifu gegoc kecba geng marifoinau menunade.  
\v 24 Ge dederecgeyoac nemma garennukecna wisic wisickeau goiheihei anemma heitainuma hoannunade.  
\v 25 Kurumennu geng neac areng angkecnec, mongngo kpac. Ni bangecfu ge meficgubadeac anende, wiac monggac mi anende.  
\v 26 Sebina nga woubocna yeri kucngira kpac ambeso angandapeu dede Anutu geng neac woubocnaac kuc amma ge nasoya nasoya neac Anutu kecnec.   
\p
\v 27 Foracngoc, geac hereau kecandae, yeni kpac anggecde nga ngicngac geac kicfu faka forau mi kecandae, ge yeneac kekec herecgena kpac anude.  
\v 28 Nga ni Anutuac wegenac kecba ngereede. Ni \sc KEBU\sc* Israeac Anutuac hoannu kemba yeng neac sufu sufuamana amma onggonnuma kecde. Ni geng wiac sasawa annec, imoc desahebade.   
\c 74  
\s1 Hadzing nga toforec yeri geac  
\d Yegec yomoc masiki uba modacma heibesonga. Asafango yegec yofi heiec.  
\p
\v 1 O Anutu, ge nocac wanunuma ukunudacnec? Rama habufocga geac bangecfu kecdimbe, ge nocac herebugango nunuma hosuc isoc kporacnununec?  
\v 2 Ge kpebung habufocga warac yombong menununec, imoc negenna febeso. Neni geangga maridzoming ngicngac areng annideac geng bummenunuma ebicfunac mesinununec. Geng Siong tikiu tacannec, imoc negenna febeso.   
\p
\v 3 Ngabafocnina yeneng kpetiac womongga kpetotiedacgec amabangec sesuhasac amma ifi feengkefude, ge hama imoc hembesena.  
\v 4 Ngabafocga yeni amabangecga kpetiacfu hama kunengngoc arohoma yenang onga hania hania ihai faigec tacde.   
\m
\v 5 Yeni nagu wi tacde, imocacsing hama wiac icngo memea imoc nakango heima hembarackedacma  
\v 6 onga marikibi gombunga icngo memea, imoc naka nga hamango hedzamedacgec.  
\v 7 Yeni womongga faigec dzema bangecfu maec amma geac kpac kunenggac amagerec, yeni imoc heidzadzu kpema kpedzamegec bangecfu mau  
\v 8 negemma degec, “Memayunuyombonggenide.” yeni ifi negemma bangecninau Anutuac kpekpeturangama fekendae, imoc sasawa faigec dzedarec.   
\p
\v 9 Anu geac faka bibiagoc hengandimbe, imoc monggoc mi hengandimbe nga profete mongngo mi kecde. Ebic imoc noc nasoac kpac anude, imoc nenearunac mongngo mi negende.  
\v 10 O Anutu, ngabafocnina yeneng naso dafiguc detenic anggenggecde? Ngabangic yeni nasoya nasoya geac kpac kuneng ngadeheandae, imoc mi ngereede.  
\v 11 Ge onggongyunuma marigango mi meyununec amma marifoiga segerekecnec, imoc mi ngereede.  
\p Ge mariga monggoc mi mesufuma mariga sinema memanganeyununa kpac ambisia.   
\p
\v 12 O Anutu ngictauna, gennoc waracngoc kecma kecnecngoc amma ge bangecfu yagucngoc memengerec ua mekecnec.  
\v 13 Anutu ge kucgango kondung kperecgena yohockang anec nga ge doku dzohonggac wasaiyang orucngina kpedzameyununec.  
\v 14 Rewiatang ye wasaiyang oruha homac nga gennoc yeac oruha sasawa kpedzamedacma sebia imoc bangeckisiac yang yeni gumecyununec.  
\v 15 Geng doku kiwa nga doku tunggbaung singngina kpendzicna yeni fingecma hakecdae. Ge doku fefeseri hakecgec yeni singngina hedzickena gbanggedacgec.   
\m
\v 16 Hadzing nga toforec yeri geac. Geng kperagia amma wenac tatacngirau warac faiyuruna seria nandape.  
\v 17 Ge bangecac ma faima meseriyununec. Geng wenac nga kia naso meficyurunec.   
\p
\v 18 O \sc KEBU\sc*, ngabafocga yeni ngadeguma deendema anggenggec ngic negen negengngina kpac, yeni geac kpac kuneng demanganeandae, imoc negenna febeso.  
\v 19 Ni geac kebesac neng isoc anduae, ge kebesacgaac ubaonga onggonggena wasai yang yeneng mi menubisia. Ge ngicngacfocga makpekpea kecdae, yeneac kekec nasoya nasoya mi nigecgubeso.   
\m
\v 20 Bangec noboc noboc kundung kundung imoc godzufakango mewakeu homac fede. Ge dzadzahac menec, imocac negensikecbesena.  
\v 21 Ngicngac yeni ngicngac ogofocngina meenti memati ayemmema game kpekpeu faiyunubauac kpae heiyemmena ngicngac makpekpea nga iwaiac obohoma kecandae, yeneng geac kpac kuneng heiwayong memibisia.  
\v 22 O \sc KEBU\sc*, ge yacma geangga yoac nanggebesena. Ngic mangana yeneng asoacnac kemma marai geac dedzomoc angandae, imoc negenna febeso.  
\v 23 Ngabafocga yeneng kunengngoc arohogec, imoc mi nigecguu yeneng nasosoc yoackpekpe kunengngoc kpekecdae, ge imoc mi nigecgubeso.   
\c 75  
\s1 Ni monde mondena kpac  
\d Yegecgareng yearu. Yegec kpara Mi kpetotiebesena, imocac uba modacma yegec yomoc heibesonga. Asafango mitiyegec yofi heiec.  
\p
\v 1 Anutu, geac kpac kuneng wegenac fedecac amma ge ohec megendimbe. Ngicngac yeni kucfakaga negenggec wiac engena angkecdeac imocac yoacsiduc deandae.   
\p
\v 2 Ge yofi denec, “Ni monde mondena kpac nga kecma naso mong faiba hau faka angammemengina isinggema desibade.  
\v 3 Bangec nga bangecfu ngicngac kecdae, yeni imohai goroc goroc amma kockpac anggecde. Ni neannaoc bangecac wotungtoa meseriyunuma nanggeyunuma kecduae.” \it Selac\it*   
\p
\v 4 Ngic yeni yenanggac negenggec wiac engena anu yoac homac osoandae, yeneac yofi debade, “Ngeni ngenanggac negenggec wiac engena angkecde, yoacngina imoc wadacbisia.” Nga ngicngac Anutu ngadehema mangana megecdeac ayemmeande, yeni yoac yofi edeyunubade, “Ngeni kucngina mi miacbisia.  
\v 5 Ngeni kucngina wi kurumennugeng miacma ubangina meemma yoackpekpe kpeandae, faka imoc wadacbisia.”   
\p
\v 6 Imoc yofiac, ngic mong ye wenac ere ereaunac me wenac keme kemeaunac bangec kisiunac haude, ye ngic ogea miarudeacsoc mi ande, kpac.  
\v 7 Anutungo desi desi ua mekecma ngic mong memama ngic ogea miarude.   
\m
\v 8 \sc KEBUNGO\sc* mariau kpakenec mong menande, imocac manau Anutuac ngabaac waing faifaia, imoc wiac homunagoc yerec yerecgea kporoc tima wake wakea fede. Ye imoc bangecfu kpakedaru ngic Anutu ngadehema mangana megecdeac ayemmeande, yeneng doku mangana imoc hafoangoc nedacgecde.   
\p
\v 9 Ni nasosoc sogac sogaigoc kecma Yakoboac Anutu yegec heimima dengerebade.  
\v 10 Ngic Anutu ngadehema mangana megecdeac ayemmeande, minginango yeneac kucngina meickeu kpac anu ngic dindingac yeneac kucngina monggoc meenude.   
\c 76  
\s1 Geac kengectoa negembesonga  
\d Yegecgareng yearu. Gitakurere nga noc kpema yegec yomoc heibesonga. Asafango mitiyegec yofi heiec.  
\p
\v 1 Yuda bangecfu Anutu negengkecdae nga Israe bangecfu yeac kpac kuneng heiwayong memigecde.  
\v 2 Yeac bedzo tatahau faigec Sareng bangecfu tacde nga amagereha Sionnu faigec  
\v 3 ye imohai kecma tebemedaha piratac isoc hagec, imoc kpetackema dzikacac kaso nga beang nga noc, imoc sasawa kpetackedarec. \it Selac\it*   
\p
\v 4 Anutu, geac kuc nga kibikperagi, imoc wiac engena. Tiki yeni wiac engena amma herea herec yeneng nasoya nasoya fekecdae, ge ngictau kucgagoc engena yombong, imocngo yeni feracyunuude.  
\v 5 Ngic ubaherengina kuhagoc kecandae, yeni serima kecma iwai dzikacfu megec goa yeneng firang amma yenang wiacngina wangecyunugec. Ngic kucnginagoc yeni todinggema mama homema fegec nga wasaingic yeni maringina miacgecdeacsoc mi anggec.   
\m
\v 6 O Yakoboac Anutu, ge yoac seria ngabasiricfu edeyununa becosi nga ngic witiau tacma kisangyunuandae, yeni mayunuu homema fegec.  
\v 7 Geac kengectoa negembesonga. Ge herebu negemmana ngic mongngo geac kicfu nanudeacsoc mi ande, imoc kpac yombong.  
\v 8 Anutu, ge kurumenga kurumenga fekendae, imohai tacma imohacnac desi desiyoacga dena bangecngo kengec amma waickeec.  
\v 9 Ge foraya dede nasoya fainadeac yacnec, imohai ifi fingerec. Ngic yeni ngic ogofocngina ebic meficgeyemmegec yeneng ubaebicgoc kecgec geng ebicfunac mesiyunudacnadeac hanec. \it Selac\it*   
\p
\v 10 Bangecngic yeneac herebu, imocngo ge dengereguude. Ge herebuac tosea kebanggau dzegena dzikacac wiacga ande.   
\m
\v 11 Ngeni \sc KEBU\sc* Anutunginaac kicfu yoacngina deserima imoc modacbisia. Bangec monnunac ngicngac yerecgema kecdae, ngeni Anutuac kengec amma ubangerec wiac mehama mibisia.  
\v 12 Nocac yeng ngictau medacfocngina yeneac onganginaac kuc meickema bangecac ngictau kengectoa meficgeyemmeude.   
\c 77  
\s1 Ebic nasou Anutu numumini  
\d Yegecgareng yearu. Yegec kpara Yehudutung modacma heibesonga. Asafango mitiyegec yofi heiec.  
\p
\v 1 Ni Anutuaru kunengngoc kpacduae, Anutungo negennudeac seriangoc kpacba.  
\v 2 Ni ebicnasou Kebu meficgebadeac uatoa mekecma tofocnac kucmamea kpac kecma marina Kebuaru miackecba ubaonganango memeseriac memefic naric mi meude.   
\p
\v 3 Ni Anutu negensiba asoringa anenu ye hennegeng amma negensikecba ongana ebiriude. \it Selac\it*   
\m
\v 4 Geng kicna tapea miacna gauya kpac kecba herenango ebic meficgedeac enacnaunac yoac mong naric mi ereude.  
\v 5 Ni naso bicngoc feec, imoc negensima kecba kifa bic wisickeec, imoc negemba fede.  
\v 6 Ni yegecna negemba fede, imoc tofocnac negensiba asunango negengising anu herenango imoc hennegeng amma negensiude.   
\p
\v 7 “Kebu ye nasoya nasoya wanuma gombunga monggoc mi anenude.” ni negengyohoc amma ifi negemma kecduae.  
\v 8 “Yeng yoac dedzege amma imoc modackecde, fakaya imoc yaguc kpac amma nasoya nasoya kpac andarude. Nga ye yoac deserima deec, imoc yaguc kpac anu nasoya nasoya kpac andarude.” ifi isoc ande.   
\m
\v 9 “Anutungo wosoefac anemmeande, imocac nigeckpeec nga ubamangang anemmeande, fakaya imoc ngaba amma kpae heimiec, ifi isoc ande.” \it Selac\it*   
\m
\v 10 Ifi negemma yofi deai, “O Kebu Engenatoa, ge mariga warac angkefec, ifi isoc monggoc mi amma siriha merennecac ubahodunggoc kecduae.”   
\p
\v 11 \sc KEBUNGO\sc* faka warac meec, imoc negensibade. Oc, geng warac kucfaka bibiagoc menec, imoc negen negennau faiba fekefude.  
\v 12 Geng ua sasawa medacnec, imoc hennegeng amma negensikecba geac kucfakaga engena, imoc ubangerecgoc negensima kecbade.   
\m
\v 13 O Anutu, geac sing imoc kpetiac. Nemu mongngo Anutunina mi feraheude, kpac.  
\v 14 Anutu ge mocgungo kucfaka bibiagoc mekecnec. Ge kucuaga ngicngac areng botucnginau mena yeneng imoc bic henggec.  
\v 15 Ge mariga kuhagocngo ngicngacfocga Yakobo nga Yosefeac gboricfora bummeyunuma ebicfunac yungecyununec. \it Selac\it*   
\p
\v 16 O Anutu, doku nga dzohong yeneng warac gemma kengec anggec. Bangec manau keme kemeango gemma dendeng kpeec.  
\v 17 Hoeng yeneng doku kpakegec sawango gbururung heiu tebemedahango piratac heima noboc noboc kpesaiec.  
\v 18 Firang kunengngo amabangec heimerenu imocac manau geac gbururunggac udumengtoa fingerec. Geac piratacngo bangeha bangeha mekperagiyunuu bangecngo kengec amma dendeng kpekecfec.  
\v 19 Geac sing imoc kondungtoa dzongiau kenu singbisicga imoc kondungtoa manau tima kengannec, fora. Nga haniga ongea sifu mi hening.   
\m
\v 20 Ge ngicngacfocga Mose nga Arong yereac mariu faiyununa yereng rama isoc heitaiyunuma wangecyunuoc.   
\c 78  
\s1 Ngicngacfora waraiyemmekecfec  
\d Yegec yomoc masiki uba modacma heibesonga. Asafango yegec yofi heiec.  
\p
\v 1 Ngicngacfocna, ngeni neac kpoukpouac kedzac faigec enacnaunac yoac mau kedzac faima negembisia.  
\v 2 Ni yoac heima deba, imoc enacnaunac maudeac ande nga wiac warac kundunnu sufu sufuya feec nga wiac ngade fingecbesande, imocac yoac debade.  
\v 3 Esangabofocnina yeni warac yoac degec, imoc kedzacngo negening nga imoc negen negenninau fede.   
\m
\v 4 Neni nambaracfocninango imoc negenggecdeac wiac mong naric mi mesufunide nga fingecsahenina ngade feengkefude, yeni edeyununide. \sc KEBUNGO\sc* kuc nga kibikperagiagoc kecma uatoa meec, imoc edeyununide. Nga yeng kucfaka bibiagoc mekefec, imocac siduc ayemmenide.   
\p
\v 5 Kebungo Yakoboac areng dederecgeyoac yemmema edeyunuma kpouyemmeec nga Israe habu dedeseriyoac yemmema edeyunuma kpouyemmeec. Ye esangabocfocnina yeneng nambaracfocngina edekpou ayemmegecdeac edeyunuec.  
\v 6 Fingecsahe ngade feengkefude, yeneng imoc negenggecdeac negenec. Nga nambaracfocngina mi fingecgecngo ngade fingecgecde, yeni imoc negenggecdeac edeyunugecde.   
\m
\v 7 Ifi anggec yeneng Anutu negensima fora fingerudeac tomai kecma yoacngina negemma Anutuac kucfaka bibiagoc mi nigecyunubeso. Yeni yeac nonoyoac tofohoma kecbisia.  
\v 8 Yeni mangesafocngina yeni isoc ambauac ifi anec. Mangesafocngina yeni serima kecma yoackpekpe areng amma herenginango ye seria mi modacgec nga asunginango Anutu wama kecgec.   
\m
\v 9 Efarainggac areng tebe mema kecma dzikac nasou dzigenema woragec.  
\v 10 Yeni Anutungo dzadzahac meec nga yeac dedeseriyoac mi modacma wadacgec.  
\v 11 Yeng wiac bic meec nga kucfakaya bibiagoc edzacyunuu kicnginango imoc henggec, yeni wiac imoc nigecyunudarec.   
\p
\v 12 Ye Aigita bangecac Dzoang yeneac bangec nobohau esangabo yeneac kicfu kucfakaya bibiagoc meec.  
\v 13 Ye kondung kperecgeu doku tegecma yohockang amma noboc noboc emma serima nanu yeng sing faiyemmeu yeni botuhau ferecgema kenggec.  
\v 14 Yeni wenacfu hoengngo waraiyemmema hesicyunuec nga tofocnac gerecac kperagingo mekperagiyunudarec.   
\m
\v 15 Ye bangec kisiu hoc kpendziru keme kemeunac doku efea kpac ereu imoc gumecyunuu nekecgec.  
\v 16 Ye doku hocfunac kpeu dokungo doku dzuamagoc maande, ifi isoc mama feec.   
\p
\v 17 Ngicngac yeneng imoc henggec, fora. Nga yeni ine yeac uba kpema kopocsic monggoc meficgema bangec kisiu Kebu Engenatoaac yoac kpekecgec.  
\v 18 Yeni songongina yaka siriha monggac ayemmeu imocac serima dekecma Anutu igockema  
\v 19 yoara kpema degec, “Anutungo bangec gbangge gbanggea yomohai yaka meficgenemmeudeacsoc mi ande, kpac.  
\v 20 Foracngoc, ye hoc kpendziru dokutoa nga doku tunggbaung endzirango mama feec. Nga yaka ine naric mi nemmeude, kpac. Ye ngicngacfora yang naric mi meficgenemmeude.”   
\p
\v 21 Imocac amma \sc KEBUNGO\sc* yoacngina negemma herebu kuneng yombong negemma Yakoboac areng yenereudeac gerec mong fiu dzeu ngabayango Israe yenearu fingecma feec.  
\v 22 Yeni Anutu mi negensinggema ye ebicfunac mesiyunuudeac kuctoa femide, imoc mi negenserigec, fora.   
\m
\v 23 Nga ye sifu hoeng wi sawau edeyunuma kurumenggac nagu witiu  
\v 24 uaya meu manna yakango kia isoc witinginau mau ngicngac yeneng negecdeac yemmeec. Ye kurumenggac yaka yemmeu nekecgec  
\v 25 yaka efea kpac faiu mau nema kecgec. Bangecngicngo angero yeneac yaka nekecgec.   
\m
\v 26 Nga yeng kurumenga kurumenga imohai wenac ere ereaunac firang mong sing meficgemima sueu haec. Ye kuhagocngo saot bigeng imocac firang mong ameaunac hesickema hau ngadeau haec.  
\v 27 Hau sendung homac angande, ye ifi isoc yang homac ukuu kia isoc maec. Neng kpegangnginagoc yeni kpetengina kondunggac sangi isoc anec, yeni kia isoc magec.  
\v 28 Yeng negemmanu neng yeni ngicngac bedzongina mema nandacgec, imohai mama tacgec.  
\v 29 Ngicngac yeni songonginango noc wiacac anu derecgegec, imoc yemmeecac ngicngac yeneng neng imoc nema negebec anggec.  
\v 30 Songongina imoc mi wisickemanu yaka enacnginau femanungoc  
\v 31 Anutungo ine ngaba ayemmema ngicfocngina kucnginagoc kecgec, yeni kpebucyunuec. Israeac arengfora yeneng semeng sabayagoc isoc kecgec, yenemma memayunuma kekecngina herecgeu kpac anec.   
\p
\v 32 Ye wiac sasawa ifi anu yeneng ine kopocsic meficgemangoc kecgec. Yeng kucfakaya bibiagoc mekefec, imoc fora. Nga yeneng ine imoc wama mi negensinggegec.  
\v 33 Ifi anu ye kekecac wenacnaso faiyemmeec. Imoc naso mocgu asu taigec kpac angande, naso ifi faiyemmeu kpac anec. Yeni kengectoa amma kpidohoma ubaebicgoc kecmagec kifangina kpac anec.   
\m
\v 34 Nga Anutungo yunukpebuc anec, yeni naso imohaingoc ubamereng amma herenginango hofocma ye modacgec.  
\v 35 Anutu ye yeneac hoc peperandzi seria nga Anutu Engenatoango bummeyunuma ebicfunac mesiyunuec, yeni imoc negenggec feec.  
\v 36 Nga yeni enacnginango ine kerecyoac ammima nedzarangnginango ikocyoac ammigec.  
\v 37 Yeni herengina yearu seria mi feu yeac dzadzahac imoc faka forau mi modacgec.   
\p
\v 38 Yeni kopocsicnginagoc kecgec, forangoc, nga yeng sifu yeneac ubea manganeu manganangina wama mi kpetotieyunuec. Ye naso homac ngabaya dzegema herebuya erebacac imoc kpetarimiec.   
\m
\v 39 Yeni bangecngicngacsac, ye imoc negenu feec. Yeni ngicngo asu taiu erema kemma monggoc mi dzigeneande, yeni ifiasac.   
\p
\v 40 Yeni bangec kisiu kecma naso homac yombong yeac yoac kpema bangec gbangge gbanggeau ubaebic fingecmiudeac ammigec.  
\v 41 Ifi ammima Anutu monggoc nga monggoc faitobannu faima Israeac Kpetiac Ngic heremiac miac ammikecgec.   
\m
\v 42 Ye kuc mingina, imoc mi negensigec nga yeng ngaba yeneac mariunac bummeyunuma mesiyunuec, wenac imocac mong mi negensigec.  
\v 43 Ye Aigita bangecfu ngic yeneng negensinggegecdeac kucfaka mi hengena meficgema Soang manennu kucfakaya bibiagoc hania hania mekefec, yeni naso imoc mong mi negensima kecgec.  
\v 44 Yeng dokutoangina merenu sac andacgec yeni doku imohai negecdeac osigec.  
\v 45 Mogoc enaragoc areng kuneng yombong sueyunuu botucnginau hama neyunudacgec nga sepeng homac sueyunuu kpetotieyunugec.  
\v 46 Ye semengngina kpembong gumecyunuu nedacgec uanginaac semeng imoc ipua gumecyunuu nedacgec.  
\v 47 Ye nomanggbomea kia isoc faiu waing uanginau mama imoc kpetotieu kpac andaru nomang sueu nomangngo figi icnginaac gbomea dzedarec.  
\v 48 Yeng negemmanu nomanggbomea kia isoc burumakanginaac witiu mama memanganeyunudaru gbumparandang kiafirangagocngo rama nga noning memanganeyunudarec.   
\m
\v 49 Yeac ngaba imoc gerec dzeande, ifi isoc dzeu ye witiha mesiu yenereec. Ye herea buu mangananginaac amma ubea hodungaiu ubaebic kuneng mema kpetotie uaac angero habunginagoc sueyunuu hagec.  
\v 50 Ye herea buu imocac singa meficgema homefunac mi onggongyunuec. Ye kekecngina homeac kpae mi faima hafei manganaac enarau faiyunudarec.  
\v 51 Ye Aigita yeneac warac nambaracfocngina kpebucyunudarec. Ye Hanggac esangabo kporucamanginau kecgec, yeneac kucnginaac waracmedacfocngina sasawa kpebucyunudarec.   
\p
\v 52 Imoc wisickeu Anutungo ngicngacfora meyunuma rama wangecyunuma waraiyemmeandae, ifi isoc waraiyemmema kenec. Ngic yeneng bangec kisi dokuya kpacfu ramahabu hesicyunuandae, ifi isoc wangecyunuu kenggec.  
\v 53 Ye yenenggareng ayemmema onggongyunuma hesicyunuu yeni kengeha kpac kecmagec kondungngo ngabafocngina semeyunuec.   
\m
\v 54 Ye meyunuma yengena bangec kpetiacfu kenec. Ye firang amma ngabafora feracyunuma yengena marifoiaac kuhango tiki imoc warac firang amma meecac ngicngacfora imohai meyunuu kenggec.  
\v 55 Yeng yeni hagecdeac amma bangec monnunac ngicngac Anutu mi negemmidae, yeni kporacyunuu kenggec bangec imoc Israe habu medereyemmeu yeni amagerecngina ihai feudeac kporucbedzocnginau faiyunuu tacgec.   
\p
\v 56 Ye ifi anec, fora. Nga yeneng ine Anutu Engenatoa tobanggekecma yeac yoac kpekecma dederecgeyoac mi modacma eng kecgec.  
\v 57 Yeni mangesafocngina warac angkecgec, ifi isoc Anutu wama ye mi negensinggegec. Ngic yeni tebe gbaring gbaring kpesaigec dindingac mi kengande, yeni ifi isoc ihai nga ihai kenggec.  
\v 58 Yeni nemu yeneac arata hania hania tiki bumau meyunuma Anutu woseau mema ngaba meficgemima nemunginagoc kecma yeac keracmangang meficgemigec.   
\m
\v 59 Anutungo imoc negemma herebu kuneng fingecmiu Israe habu wayunudarec.  
\v 60 Ye amagereha Siro fekefec, imoc wama kporucbedzoya ngicngac yeneac botucfu tarec, imoc ifingoc wama  
\v 61 kuhaac katapa wama ngaba yeneac mariu faiu yeneac witicamau feec. Yeng kuc nga kibikperagia wama ngaba yeneac mariu faiu feec.  
\v 62 Ye maridzomingfora herebu negengyemmema ngicngacfora wayunuu ngic yeneng dzikacac beangngo kpebucyunugec.   
\m
\v 63 Gerecngo sebigbori medacfocngina yonohou homegec naroangfocngina ngiha kpac kecma memeturanggac yegecngina mong mi heigec.  
\v 64 Ngic yeneng womong garengfocngina dzikacac beangngo yunuma kpebucyunuu enengfocngina yeni kiac ubamangang anggecdeacsoc mi anggec.   
\p
\v 65 Anu ngicngo gauunac yacandae, Kebungo ifi isoc amma yarec. Ngic seria mongngo waing dokuac kucfu arohoande, ye ifi isoc arohoec.  
\v 66 Ye ngabafora yunuma firang amma game kpekpeu faiyunuu nasoya nasoya ifi kecgecde.   
\p
\v 67 Ye Yosefeac kporucbedzo ngadehema Efarainggac areng mi meisinggema  
\v 68 Yuda areng meisinggeec. Ye Siong tikiac songo negendeac imoc meisinggema  
\v 69 womong kpetiac meec imoc kurumenga kurumenga wi fekendae, yeni isoc anec. Ye bangec meficgema faiu feengkefude, womonga kpetia ifi isoc meec.   
\m
\v 70 Ye kingang ngiha Dawidi meisinggema rama odaunac meu haec.  
\v 71 Ye Yakoboac areng garengyunuma yeng waraiyemmeudeac faima Israe habu garengyunuudeac ye faiec. Meisinggeu yeng rama nonggo medac yenenggareng ayemmekefec, ua imoc wama Anutuac maridzomingfora garengyunuec.  
\v 72 Dawidiac hereu ikoc nga hamangec mong mi feu yenenggareng ayemmema negen negenggoc uaya mema mariango garengyunuma wangecyunuu kecgec.   
\c 79  
\s1 Yerusareng kpedzamedacgec  
\d Asafango mitiyegec yofi heiec.  
\p
\v 1 O Anutu, bangec monnunac ngicngac mi negenggudae, yeneng maridzoming bangecgau eredau. Yeni eweheihei faka mi amma womongga kpetiacfu eregec imoc gotengagoc anu Yerusareng ama kpedzamedacgec amabangec sesuhasac ande.  
\v 2 Yeni geac kingang ngicngacfocga kpebucyunuma farengngina koec koec nga huntoc yemmegec imocngo yeneac yaka anu neyunugec. Yeni geac ngicngac kpetiac kpebucyunuma sebingina imoc bangecfu yang kecdae, imoc yemmegec negec.   
\m
\v 3 Yeni sacngina hetinggegec imocngo Yerusareng fekendeu doku isoc nedzima feu farengngina tonggoudeac areng mong mi kefec.  
\v 4 Ngicngac nenigoc wegenac kecandae nga oronnunuma kecdae, yeneng deendema anemmema dzomorenemmedae.   
\p
\v 5 O \sc KEBU\sc*, faka imoc wisickeudeac tomai kecdimbe. Ge herebu negennemmena imocngo wisic wisickea kpac fekefude, ifi isoc ande. Nga ge keracmangang anemmena imocngo gerec isoc dzeu mi wisickede, ifi isoc ande.   
\m
\v 6 Bangec monnunac ngicngac yeneac witinginau herebuga hetinggena mau nga bangec areng goa yeni geac kpac kuneng mi kpacandae, ge herebuga yenearu kpakena mau.  
\v 7 Yeni Yakoboac areng yaka isoc gbokoyunuma amabangecnina kpetotiegec kisi fede.   
\m
\v 8 Mang esafocninango kopocsic meficgegec, geng imocac mi negenna feu nga ge imocac turunga mi kpounemmena. Yeni memanunugec wiac sasawa obohoyombonggedimbeac neneac ubaga manganeu bic yombong hama sinnu meficnununa.   
\p
\v 9 O Anutu memengerecnina, kpacga imoc kuc nga kibikperagiagoc, imocac meficnununa. Ge kpac kunenggaac amma ebicfunac mesinunuma kopocsicnina wana.  
\v 10 Bangec monnunac ngicngac Anutu mi negemmidae, yeneng yofi debau, “Ngeni Anutungina mong mi hendimbe, kpac.” yeni ifi degec negemba naric mi ande. Ngic yeneng kingang ngicngacfocga sacngina kpakegec, imocac turunga bangec monnunac ngicngac yenearu kpouyemmena neni kicninango hemma nambisina.  
\v 11 Witicngic asoringa ayemmede, yeneac ebicnginango gearu hasikeu imoc negembesena. Ngic yeneng ngic ogofocngina homegecdeac bic desiyunugec geng hama kuctoagango onggongyununa.  
\v 12 O Kebu, ngicngac nenigoc wegenac kecdae, yeni ge deendema anggenggecac kopocsicnginaac turunga naso seweng kekecnginau kpouyemmena.   
\m
\v 13 Ifi anna neneng ngicngacfocga nga rama habufocga anni geng garennunukecna, neni nasoya nasoya ge eriendzong megennide. Nga fingecsahenina ngade feengkefude, yeneng fingecma nenigoc torokpema ge ifingoc dedengerec anggenggecde.   
\c 80  
\s1 Ge neneac mi nigecgubeso  
\d Yegecgareng yearu. Yegec kpara Dzadzahaac lili dzaring, imocac uba modacma heibesonga. Asafango mitiyegec yofi heiec.  
\p
\v 1 O Israeac rama gareng, ge kedzac faima yoacnina negenna. Geng Yosefeac areng rama habu isoc wangecyununade. Kerobing yeneng miacguma ngictautatacga anggec geng yeneac witiu tacannec, gennoc hama kperagigango nerarannunubesena.  
\v 2 Ge Efaraing areng nga Bengyaming amma Manasse areng, yeneac kicfu kucga hafoangoc heina kemedaru hama ebicfunac mesinununa.  
\v 3 O Anutu, geng monggoc mengerenununa komoc kpenideac kicmesugango mekperaginununa.   
\p
\v 4 O \sc KEBU\sc* Anutu, kurumenggac wasaiareng kunengngina, ge ngicngacfocga neneac nunumuac ngaba negengkecnec, imoc wisickeudeac tomai kecdimbe.  
\v 5 Geng kickumanina gumecnununa imocngo yaka nga dokunina ande.  
\v 6 Geng sing meficgena ngicngac wegenac kecdae, yeneng desofoc anemmeandae nga ngabangic yeneng detenic anemmeandae.   
\m
\v 7 O Anutu, kurumenggac wasaiareng kunengngina, ge monggoc mengerenunuma kicmesugango nerarannununa komoc kpebisina.   
\p
\v 8 Gennoc neni waingkomoha isoc Aigita bangecfunac menunuma hanec. Ge bangec monnunac ngicngac mi negenggudae, yeni kporacyununa woragec neni bangec imohai waing isoc homecnununa kecdimbe.  
\v 9 Ge waing ic imocac bangec memengere amma homecna ye bangec imohai godea mema kemema fingesahe amma bangec sokodarec.  
\v 10 Sokodaru fawango tiki fekendae, imoc semeyunuma nokumuc meficgeyemmema yomondzoc ic fawatoanginagoc ifingoc kperacyunuu yeni imocac bageau nanggec.  
\v 11 Ye fawa sinema imocngo kemma kondungtoanina meficgeu sera sinema Eufarata dokutoa kpeseregec.   
\p
\v 12 Anu ge odaya hembarackenec, imoc negenni naric mi ande. Ge ifi anna titinga fingeru ngicngac yeneng imohai ferecgedacma ic imocac fora sicsauc mesinec anggecde.  
\v 13 Nga kateberec ngiwa yeneng godea suruhegec manennu yang yeneng seraac kiwa kirecgenec angandae.   
\p
\v 14 O Anutu, kurumenggac wasaiareng kunengngina, ge monggoc nenearu dzigenema nenenna. Ge kurumennunac kicga fina mau nenemma waing ic yomocnec henggareng ambesena.  
\v 15 Gennoc ic komoha imoc marifoigango homecnec. Gennoc medacga imoc gegoc kefudeac garenggena yadiseri anec.  
\v 16 Ngic yeneng waing icga imoc kperecgema gerecfu faigec dzeu geng fingecyemmema yoac ngabasiricfu edeyununa yeni manganema kpac ambisia.   
\m
\v 17 Gennoc ngicga meisinggena kuhagoc anudeac amminec, yeng marifoigau tacmanu marigango nanggebesena.  
\v 18 Ge ifi anna neneng monggoc mi ngadegunide, kpac. Geng megborinununa geac kpac kuneng kpacma afegunide.  
\v 19 O Anutu, kurumenggac wasaiareng kunengngina, ge monggoc mengerenunuma kicmesugango nerarannununa komoc kpebisina.   
\c 81  
\s1 Israe ge sogaibesena  
\d Yegecgareng yearu. Gatingic yeneac musiwiac kpema heibesonga. Asafango yegec yofi heiec.  
\p
\v 1 Anutu ye kucnina. Ngeni dendzerenggema yegec heimima Yakoboac Anutu sogac sogaigoc arohoma oheha memibisia.  
\v 2 Ngeni tambaring nga gita amma kurere kpema udumeng gombunga meficgema yegec heibisia.  
\v 3 Afo gboria mau nga nasotoanina afo dzongiau trampet fifigec arohobeso.   
\m
\v 4 Anutungo Israeac singyoac ngemmeec. Yakoboac Anutungo yoac ifi deseringemmeec.  
\v 5 Anutu yengenaoc Aigita bangecfu kemma dzikac kpema firang anec, imohai dederecgeyoac imoc Yosefeac areng yemmeec.  
\p Ni ubaudumeng nga yoac warac mi negengkefai, imoc naso imohai negenai.   
\m
\v 6 Negemba yofi deec, “Ni fuanginaunac ebic mesima maringinaunac uaac sakac ebira meickeba  
\v 7 ngeni ebicnginagoc kecma kpacnugec ebicfunac mesingunuai. Ni hoennu gbururunggac manau sufuma yoacnginaac turunga merengngemmema Meriba doku imohai faitobannu faingunuyai.” \it Selac\it*   
\p
\v 8 “O ngicngacfocna, ngeni kedzac faigec goroyoac edengunuba. O Israe habu, ngeni neac yoac negembisia.  
\v 9 Ngeni anutu furia mong mi mekecbisia nga bangecareng goa yeneac anutu fafoc mi heimibisia.   
\m
\v 10 Ni ngeneac \sc KEBU\sc* nga Anutungina. Nennoc Aigita bangecfunac mengunuma hayai. Ngeni enacngina anggegec mewakengunubade.”   
\p
\v 11 “Ngicngacfocna ngeneng ine ubaudumennaac kedzac mong mi kpegec, kpac yombong. Israe areng ngeni wanuma neac yoac mi tofohogec.  
\v 12 Imocac wangunuba ngeni ubaseringinagoc kecma ngenang negen negeng modacgec.   
\m
\v 13 O ngicngacfocna, ngeni neac yoac modacma kedzac kpebau, imocac yombong anende. Nga Israe ngeneng neac sing modacbau, imocac homac anende.  
\v 14 Ngeni ifi ambau neng ngabafocngina bic memayunuma marinango singngina hedzickebai.”   
\p
\v 15 “Ifi amba ngicngac \sc KEBU\sc* ubango ukudae, yeneng yeac kicfu hama fafoc heimibau. Yeni kopocsicnginaac turunga ebicgoc kecdae, imoc nasoya nasoya feengkecbac.  
\v 16 Ifi kefu Israe areng, ni wit yaka gombunga ngemmeba nebau nga ni hoc peperandziac kukundzau meficgema ngemmeba nebau.”   
\c 82  
\s1 Anutu tosea yoacngina desiude  
\d Asafango mitiyegec yofi heiec.  
\p
\v 1 Anutungo anutu hania hania yeneac adzoc adzorotoau enara amma tatahau anutu hania hania botucnginau tacma isingyunuma yaocngina desima  
\v 2 yofi dede, “Fakangina yomoc mi ngereede, ngeni sing dindingac wama ngic yoacngina desiandae. Ngeni monde monde angandae nga ngic Anutu ngadehema mangana megecdeac ayemmeude, ngeni yeni meficyunukecdae nga fakangina imoc mi wisickede, kpac.” \it Selac\it*   
\p
\v 3 “Ngeni ngic kucmama nga beging kecdae, yeneac yoac sing dindingac modacma desibisia. Ngicngac ogofocngina ebic witiau kecma wiac sasawa obohokecdae, ngeni yenenggareng ayemmema yeneac yoac sing dindingacfu desibisia.   
\m
\v 4 Ngic Anutu ngadehema mangana megecdeac ayemmeande, yeneng ngicngac kucmama nga iwaiac obohoma kecandae, yeni meyunugec ngeneng meficyunuma yeneac mariunac mesiyunubisia.  
\v 5 Yeni ine wiac mong mi negemma wiac naric mi negentegecma kundung manau kengkecdae. Ifi anu bangecac titiseri sasawango goroc goroc andae.”   
\m
\v 6 Ni yofi deai, “Ngeni sasawango anutuareng nga Anutu Engenatoa neac medacfocna.”  
\v 7 “Foracngoc, ngeni bangecngic homeandae, ifi isoc homegecde. Ngictauac medacfoc, ngeni ngictau yeneac nambaracfocngina sasawa mayunuande, ngeni ifi isoc mangunuude.”   
\p
\v 8 O Anutu, bangeha bangeha ngicngac areng sasawa yeni geac. Imocac ge yacma bangecfu desi desi uaga mebesena.   
\c 83  
\s1 Israe yunubeso andae  
\d Asafango mitiyegec yofi heiec.  
\p
\v 1 O Anutu, ge mi waickena amma kedzacga mi kpefonggena, o Anutu, ge eng mi tacna.  
\v 2 Henna, ngabafocga yeni kpeborongtoa kpedae nga ngic ubango ukugudae, yeni orucngina miacma nandae.  
\v 3 Yeni geac ngicngacfocga tobangyunugecdeac negemma areng faima yoac dedzege andae. Geng ngicngacfocga nenenggareng amma onggongnunuannec, yeni neninoc memanganenunubeso amma  
\v 4 dedae, “Hagec, nenang Israe bangec areng meicyununi kpac andacbisia nga ngicngac yeneng Israe kpacngina monggoc mi negenggec febeso.”   
\m
\v 5 Yeni uba mocgu amma yoac dedzege amma Israe memanganegecdeac dzadzahac mekecdae.  
\v 6 Ngic imoc Edonggac areng kporucbedzonginau kecandae. Yeni Ismaeac areng nga Moabi areng amma Hagiri, yeac areng.  
\v 7 Yeni Gebare nga Among amma Amareke ngic. Yeni Firisti bangecac ngicngac areng nga Tiro taonnunac hagec  
\v 8 Asiria habu ifingoc yenigoc torokpeyunudau. Yeni kucnginagoc amma Rotiac gboricfora yeni nonggo tacyemmedae. \it Selac\it*   
\p
\v 9 Geng warac Midiangbangec kpemeting amminec, ifi isoc yeni ayemmema Kisong doku tegiau ngictau Sisera nga Yabing faka ayecmenec, ge ifi isoc kpemeting ayemmebesena.   
\m
\v 10 Geng warac Eng Doro amau ngic kpetotieyununa farengnginango bangecfu kerac isoc hoaema kpac anggec.  
\v 11 Ge ngickunengngina meyununa Orebe nga Dzebe yeri manganeec, ifi isoc ayemmema ngictau yeneac medacfocngina kucnginagoc sasawa meyununa yeni Dzeba nga Dzarimuna ayecmenec, yeni ifi isoc ayemmebesena.  
\v 12 Nocac yeni degec, “Neni Anutuac manengbangec meni imocngo nenang ambeso.”   
\p
\v 13 O Anutuna, geng ngic ifia meyununa sendungngo firannu yerecgeande, ifi isoc yerecgebisia. Ngic yeneng padi seuha firangngo mefiranggeande, ifi isoc mefirangyununa.  
\v 14 Nga gerecngo ickate dzeande nga gerecborangngo tikiu fekengkecma bangec faiu dzeande, ge ifi isoc amma  
\v 15 kiafiranggango kisangyunuma firangngo kuneng kpeu kengectoa meficgeyemmebesena.   
\m
\v 16 O \sc KEBU\sc*, geng kicmesungina game kpekpeu faiyunudacna yeneng geac kpac kuneng hofocbisia.  
\v 17 Yeni geng negemmana gameyunuu nasoya nasoya negeng manganggoc kecma imocngo nasosoc mebucyunuu ngicngac yeneng wayunugec kpac ambisia.  
\v 18 Geac kpac kuneng imoc \sc KEBU\sc*. Ge mocgungo bangectoa bangec fekendacde, imocac Engenatoa kecnec, yeni imoc negembisia.   
\c 84  
\s1 Anutuac amawomonnu kengandae  
\d Yegecgareng yearu. Gatingic yeneac musiwiac kpema heibesonga. Kora medacfora yeneng mitiyegec yofi heigec.  
\p
\v 1 O \sc KEBU\sc*, kurumenggac wasaiareng kunengngina, geac ama womong imoc songogoc nga sogac sogaigoc wakema fede.  
\v 2 \sc KEBU\sc*, ni ongaasunango geac womong sobenggaac ammiu imohai kebadeac homema kecde. Ni heresebinango Anutu kekehagoc, yeac sogac sogai yegec heide.   
\p
\v 3 Dzinuc nengbisic ye ifingoc amea meficgeande nga dzibirarec ye medacfora fingecgecdeac negemma faeha geac aratagau heide. O \sc KEBU\sc*, kurumenggac wasaiareng kunengngina, ge neac ngictau nga Anutu.  
\v 4 Ngicngac geac amau kecdae, yeni kenecnginagoc amma yeni nasoya nasoya dengereguma yegec heigenggecde. \it Selac\it*   
\p
\v 5 Ngicngac yeni kucngina gearu fede, yeni kenecnginagoc amma yeneac herenginau Sionggac singtoa modacma Sionnu kenggecdeac ayemmeude.  
\v 6 Yeni Bakaac kickuma kperemennu ferecgema kengkecmagec dokukiwa homac imohai fingecgecde. Nga semeng homec homecnasoac kia kpema doku dzohongngo bangec imoc mewakeude.  
\v 7 Yeni kuc meficgema kuc monggoc nga monggoc torokpema mema kengkecma anutu hania hania yeneac Anutu Sionnu henggecde.   
\p
\v 8 O \sc KEBU\sc* Anutu, kurumenggac wasaiareng kunengngina, ge nunumuna negenna. Yakoboac Anutu ge kedzac faina. \it Selac\it*   
\p
\v 9 O Anutu, ge kasonina henna. Ge ngic kerecngo nadzicminec, yeac kicmesuya henna.   
\p
\v 10 Imoc yofiac, ni geac sobenggau uameme mocgu kecbade, imocngo ama goau uameme tausengngoc kecbai, imoc ferahade. Ni Anutunaac nagugareng nambeso anende nga ngic Anutu ngadehema mangana megecdeac ayemmeande, yeneac kporuc amanginau naric mi kecbade.   
\m
\v 11 Nocac \sc KEBU\sc* Anutu ye wenac nga kaso. Ye wosoefac nga eweheihei anemmema ngicngac dindingac kecandae, yeni faka gombunga ayemmema wiac gombunga mong naric mi segereyemmeude.   
\m
\v 12 O \sc KEBU\sc*, kurumenggac wasaiareng kunengngina, ngic mongngo negenseriguma kecande, yennoc kenehagoc.   
\c 85  
\s1 Ngicngafora ruae yemmeude  
\d Yegecgareng yearu. Kora medacfora yeneng yegec yofi heigec.  
\p
\v 1 \sc KEBU\sc* ge bangecga gombunga yombong ammima Yakoboac areng monggoc mengereyununa naric kecgec.   
\p
\v 2 Ngicngacfocga yeneng ngicngac ogofocngina memanganeyunugec, fora. Nga geng imoc wama kopocsicngina sasawa wayemmenec. \it Selac\it*   
\m
\v 3 Ge herebuga wama ngaba gereagoc angkecnec, imoc wadacnec.  
\v 4 O Anutu memengerecnina, ge monggoc mengerenununa. Nga neni wosogau meing, imoc monggoc mi negensina.   
\p
\v 5 Ge neni nasoya nasoya ngaba anemmekecma fingecsahenina fekefudesoc, ge yeneac herebu ifingoc negengkecnade, imoc henni mi ngereede.  
\v 6 Ngicngacfocga neneng desogai anggenni ngereede. Ge imocac sifu kekecnina monggoc heigborinemmebesena.   
\m
\v 7 O \sc KEBU\sc*, geng yoac dedzege amma imoc modackecnec, imoc edzacnunuma ebicfunac mesinununadeac deserinemmena.   
\p
\v 8 \sc KEBU\sc* Anutungo yoac deude, imoc negembeso anende. Ngicngac ubaherengina meremma yearu haandae, yeni yeac kpetiac ngicngacfora nga yeng ngicngacfora imoc ruaeyoac edeyunuude.  
\v 9 Foracngoc, yeac kuc kibikperagiagoc bangecninau fekefudeac amma yeng ngicngac yeac eweheiandae, yenemma ebicfunac mesiyunuude.   
\m
\v 10 Anutungo yoac dedzege amma imoc modackecde, faka imoc nga yoac modac modacfaka yereng meficemeec dindingac kekec amma ruae kekec yereng titikokoc angemeecde.  
\v 11 Yoac modac modac faka, imocngo bangecfunac nemonggema ereu dindingac kekecngo kurumennunac fiu maude.   
\m
\v 12 Fora, \sc KEBUNGO\sc* wiac gombunga nemmeu bangecninaac semeng uango semeng monggoc meficgeude.  
\v 13 Dindingac kekecngo waraimima yeac haniaac sing mengeremiude.   
\c 86  
\s1 Ge singga edzacnuna  
\d Dawidingo yofi numuec.  
\p
\v 1 O \sc KEBU\sc*, ni ngic makpekpeango iwaiac obohoma kecduaeac kedzaga faima yoacnaac turunga merennenna.  
\v 2 Ni geac enac tofoc tofohoga nga ge neac Anutuna. Ge imocac kekecna onggonggena. Ni geac kingang ngicngo negenseriguma kecduaeac ebicfunac mesinuna.  
\v 3 O Kebu, ni asoacnac kemma marai gearu kiackecduaeac ge neac ubaga manganeu.  
\v 4 O Kebu, ubaongana memiacma gearu faiduaeac ubaonganaac ubangerec meficgenenna.   
\m
\v 5 Ge gombunga anemmema kopocsic wanemmenade. O Kebu, geng yoac dedzege amma imoc modackecnec. Nga ngic yeneng hofocgugec geng faka imoc modacma wiac gombunga efea kpac ayemmenade.  
\v 6 O \sc KEBU\sc*, ge kedzac faima nunumuna negenna. Ni kpesi kpesi amma kiacba ge kedzac kpema negenna.  
\v 7 Geng turunga merennennadeac ebicnasonau kpacgubade.   
\p
\v 8 O Kebu, anutu hania hania kecdae, yeneac botucfu mongngo ge isoc mi kecde. Anu geng ua mekecnec, ua ifi isoc mongngo mi mekecde, kpac.  
\v 9 O Kebu, ge bangeha bangeha ngicngac areng meficyununec, yeneng gearu hadacma kicgau fafoc heigemma hama geac kpac kuneng heiwayong memigecde.  
\v 10 Ge mocgungo Engenatoa kecma faka bibiagoc mekecnec amma geng Anutu.   
\p
\v 11 O \sc KEBU\sc*, ni yoacga fora modackecbadeac singga kpounenna. Ge herenau ubayohoc meickena geac kpac kuneng eweheiheigoc hoanggebesare.  
\v 12 O Kebu Anutuna, ni heregoc ge ubangerec megemma geac kpac kuneng nasoya nasoya heiwayong memibade.  
\v 13 Geng yoac dedzege amma imoc modackecnec, ge imoc anenna wiac engena ande. Kekecnango emu homec amau feu gennoc kekecna imohacnac mesina ereec.   
\p
\v 14 O Anutu, ubakpekpe ngic yeneng yacma nubeso anggec yarengic yeni habutoagoc hama kpebucnubeso andae.  
\v 15 O Kebu, ge Anutu ubamangang nga wosoefac mingina. Ge ngaba bic mi annade nga geng yoac dedzege amma imoc modackecnec, fakaga imoc wiac engena. Ge yoac modac modacac Kebu nga faka imocngo wake wakea fegende.   
\m
\v 16 Ge nearu dzigenema neac ubaga manganeu. Ge kingang ngicga kuc nemma kingang ngacgaac medac, imoc ni, ebicfunac mesinuna.  
\v 17 \sc KEBU\sc*, geng meficnuma meserinunade. Ge imocac ngic ubango ukunudau, yeneng geac fakaga hemma gameyunuudeac geng neac negenna ngereeande, imocac ma mong edzacnubesena.   
\c 87  
\s1 Siong taonnu fingerec  
\d Kora medacfora yeneng mitiyegec yofi heigec.  
\p
\v 1 \sc KEBUNGO\sc* tiki kpetiacfu taong mong faiu fede.  
\v 2 \sc KEBUNGO\sc* Sionggac nagutoaac songotoa negemma Yakoboac ama noboha yeneac songo ifi mi negenude.  
\v 3 O Anutuac taong, geac yoacsiduc imoc damuyagoc. \it Selac\it*   
\m
\v 4 “Bangec areng goa ni negennudae, imoc kpacyunubade, Aigita nga Babirong amma Firisti yeneac bangec nga Tiro amma Etiopia, yeneng deandae, ‘Ngic yomoc ye ihai fingerec.’”  
\v 5 Engenatoango ye tatahau Sionnu faiu seria tarudeac amma Siong manaungoc degecde, “Ngic yomoc amma ngic imoc, yeni imohai fingecgec.”  
\v 6 \sc KEBUNGO\sc* bangec areng yeneac kpacngina kpedzucnema arengyunuma yofi ohoude, “Yomocngo ihai fingerec.” \it Selac\it*   
\p
\v 7 Yegec fede fedeac ngicngac sasawa yeneng yegec yofi dema heiandae, “Neac dokudzohong sasawa yeni Sionnu tacdae.”   
\c 88  
\s1 Ubaebic meficgeec  
\d Kora medacfora yeni yegec yofi heigec. Yegecgareng yearu. Esrangic Hemang amaunac, yeng masiki yegec heiec, ifi isoc yegec yomoc Maharac rennoc, imocac uba modacma heibesonga.  
\p
\v 1 O \sc KEBU\sc*, Anutuna, ge neac ebicfu mesi mesingic. Ni hadzing tofocnac geac arohoma kiackecba  
\v 2 geng nunumunaac kedzac kpena nga kiacnango gearu hau negenna.   
\p
\v 3 Ubaonganango ebic wakeyombonggeu kekecnango homec ama bic mewegenede.  
\v 4 Yeni neac yofi negendae, “Ye ngic bic homegec, yeni isoc ande.” Ni ngic kucngina kpac, yeni isoc anduae.  
\v 5 Ngic wayunuma homec yeneac botucfu faiyunuandae, yeni isoc feduae. Yeni ngic kpebucyunuma kicsereu faiyunugec fedae, ifi isoc anduae. Ge ninigec meficgema neac monggoc naric mi negenna fede, ni ifi isoc anduae. Ge ngic marigaunac meicyunuma monggoc mi garengyununa kpac angandae, ni ifi isoc anduae.   
\m
\v 6 Ge teng mana keme kemeau kicsere menuma kundung dzic manau fainunec.  
\v 7 Geac herebungo neac witiu emma mepetannuma kondungsiri isoc semenuna kucna kpac anec. \it Selac\it*   
\p
\v 8 Geng ifi anenna ogofocna yeni imoc hemma ngadenuma neac ebic hemma kengectoa amma kpidohoma nandae. Ni witicfu ifi kecduaeac naric mi worabade.  
\v 9 Ni ubahodunggoc kecba kicna kundung kpebeso ande. O \sc KEBU\sc*, ni wenacsoc kpacguma marina gearu sinekecduae.  
\v 10 Ni homebeso anduae nga ge ngic homemea yenearu kucfaka bibiagoc mi menade, kpac. Homegec yeneng onga amma naric mi yacgecde nga yeni eriendzong naric mi megenggecde. \it Selac\it*   
\p
\v 11 Geng yoac dedzege amma imoc modackecnec, ngic kicsereu yeneng yoac imoc mi dekperagiandae nga ge yoac modac modac Anutu, imoc homec amau naric mi deyadigecde.  
\v 12 Kundung manau geac kucfaka bibiagoc naric mi negenggecde. Nga geng meficyunuma ebicfunac mesiyunuannec, imocngo ninigec amau naric mi fingectegerude.   
\p
\v 13 O \sc KEBU\sc*, ni sifu asoac anu memeficac kiacgemma arohoma gearu nunumuna faiba haude.  
\v 14 O \sc KEBU\sc*, ge ni wanuma kicmesuga nearu mesufunec, imocac hania mi negentegecduae.   
\m
\v 15 Ni sebigborinaungoc kpendzenggoc kecma homecfu heima kefai. Ge kengec efea kpac meficgenenna kpidohoma ubaebicgoc amma memeficna kpac kecduae.  
\v 16 Geac herebungo semenuu kengec efea kpac gearunac meficgema kengecnuu manganema kpac anai.  
\v 17 Geac kengectoa imoc asoacnac kemma marai doku tunggbaung isoc yadima oronnuma noboc nobocnac hama semenukefu  
\v 18 geng negemmana songo ogona nga arengfocna yeni sasawango wanuma ngadenugec kundungngo tosoyombonna ande.   
\c 89  
\s1 Kebu, ge dahai?  
\d Esrangic Etangngo masikiyegec yofi heiec.  
\p
\v 1 O \sc KEBU\sc*, geng yoac dedzege amma imoc modackecnecac nasoya nasoya yegec heigembade. Ge yoac modac modac Kebu, imoc enacbibicnango dekperagiba fingecsahe fekefudesoc, yeneng imoc negendacgecde.  
\v 2 Ni yofi deba, “Geng yoac dedzege amma imoc modackecnec, fakaga imoc nasoya nasoya faina fekefude. Ge yoac modac modac Anutu. Kurumenga kurumenga nasosoc fefeseri fekecdae, ifi isoc geac fakaga ifingoc fekefude.”   
\p
\v 3 Geng yofi denec, “Ni ngicna Dawidi meisinggema yegoc dzadzahac mema ye kingangngicna anu yofi deserima edeai,  
\v 4 ‘Ni geac gborifocga tatacnginau faiyunuba yeneng nasoya nasoya seria tacgecde. Yeni fingecsahengina fekefudesoc ngictau tatacfu tacma ua imoc torokpeu torokpe medacgecde.’” \it Selac\it*   
\p
\v 5 O \sc KEBU\sc*, ge kurumenga kurumenga sing faiyemmena yeni geac kucfaka bibiagoc oyang boyang mebisia. Ge yoac modac modac Kebu, fakaga imoc kpetiac areng yeneac adzoc adzorou dengerebesonga.   
\m
\v 6 \sc KEBU\sc*, wi sawakebangau ge isoc mong mi kecde. Nga anutu hania hania yeneac medacfocngina kecdae, botucnginau ge isoc mong mi kecde.  
\v 7 Kpetiac areng yeneac adzoc adzorou tacandae, yeneng yofi negengandae, Anutu ye damu damuyagoc. Ye engenatoa amma yeng kurumenggac areng ye yerecgema nandae, yeni feracyunuu yeneng yeac kengec homac angandae.   
\m
\v 8 O Anutu, kurumenggac wasaiareng kunengngina, \sc KEBU\sc*, mongngo ge isoc kuhagoc mi kecde. O \sc KEBU\sc*, ge yoac modac modac Kebu nga fakaga imocngo orongguma fede.   
\p
\v 9 Kondungngo kpeborong kuhagoc kpeu geng mingina amma kuha memana siri kuneng kpeu mengisiyununade.  
\v 10 Ngic yeneng ngic goa yunuma memanganeyunugec, geng Aigita bangec medzamena ifi isoc feec. Ge mariga kuhagocngo ngabafocga kisangyununa yeni singsararang kpegec.   
\m
\v 11 Ge kurumenga kurumenga yeneac mingingngina nga bangec imoc ifingoc geac. Geng bangectoa bangec nga wiac sasawa ihai fedae faiyununa seria kecgecde.  
\v 12 Geng bangec noboc noboc not nga saut meficyununec. Taboro nga Herimong tiki yereng sogaima geac kpac kuneng oyang boyang memiecde.  
\v 13 Fuakpegangga imoc kuhagoc nga mariga imoc kuhagoc, ge marifoiga sawau miacnec.  
\v 14 Ge fakaga dindingac nga ge sing dindingac modacma yoac desiannec, wiac imocngo ngictau tatacgaac sering ande. Geng yoac dedzege amma imoc modackecnec amma ge yoac modac modac Kebu, fakaga imocngo waraigendape.   
\p
\v 15 O \sc KEBU\sc*, ngicngac geac kicmesugaac kperagiau kecandae, yeneng afegugecdeac sing negemma sogaima kpacma afeguandae, yenennoc kenecnginagoc.  
\v 16 Yeni geac kpac kunenggac amma asoacnac kemma marai sogaima kecma fakaga dindinga afehegecde.   
\m
\v 17 Ge ngicngac imoc yeneac kibikperagi nga kucngina. Amma ge wosoefac anemmena kucninagoc amma firang annide.   
\m
\v 18 Ngictau ye kasonina nga \sc KEBU\sc* ye kasonina mingina. Ye Israeac kpetiac ngic amma yeng neneac ngictau, yeac mingina.   
\p
\v 19 Ge warac onga nga kpefingyoacfu singyoacga dena ngicngacfocga geac yoac modac modac kecgec, yeni yofi edeyununec,  
\m “Ni ngic mong kuhagoc meficgema ye ngictauac ira heimiai. Ni ngicngac yeneac botucfunac sebigbori medac mong meisinggema gununggeai.  
\v 20 Ni kingang ngicna Dawidi meisinggema kerecna kpetiacngo nadzicmiai.  
\v 21 Ifi anu marinango ye nasoya nasoya nanggema marinaac kucngo meseribade.   
\m
\v 22 Ngabangic mongngo ye tobanggema naric mi feraheude nga ngic Anutu ngadehema mangana megecdeac ayemmede, yeni ye mi memagecde.  
\v 23 Ni ngabafora yeac kicfu kpedzameyunubade nga ngic ye ubango ukudae, yeni kpefacyunuba mayunuude.   
\m
\v 24 Ni yoacna modacma yoac dedzege amma imoc modacbade, fakana imocngo ye garenggekefude. Ni neannaac kpacfu nanggeba yeng kuhagoc amma firang anude.  
\v 25 Ni kondung yeac mariu faiba yeng imoc garenggema marifoiango doku haandae, yeni garengyunuude.  
\v 26 Yeng kpacnuma yofi deude, ‘Ge Manna nga Anutuna amma memengerecnaac hoc peperandzi seria.’   
\m
\v 27 Ni ye meisinggeba yeng neac morocmedac anu bangecfu ngictau yeneac kunengngina anudeac faiba kefude.  
\v 28 Ni yoac yegoc dedzege amma imoc nasoya nasoya modacma dzadzahacna yegoc mebade, imocngo yegoc fefeseri feude.  
\v 29 Ni Dawidiac nambarac nga esamedac fingeckecgecdesoc tatacnginau faiyunuba nasoya nasoya seria tacgecde. Yeac ngictau tatac nanggeba nasoya nasoya fekefu kurumenga kurumenga yeneac wenac dafiguc fede, kpetea ifi isoc anude.”   
\p
\v 30 “Esangaboforango neac dedeseri wama ngadehema dederecgeyoacna kpema imoc mi modacgecdeu  
\v 31 me yeni kpema nonoyoac edeyunuai, imoc mi modacgecdeu  
\v 32 ni yeneng singyoac kpegecac amma turunga kpouyemmema gbarucngo yunubade. Yeni ngicngac ogofocngina memanganeyunugecac dzikacngo yunuba kpendzeng kpegecde.  
\v 33 Ni Dawidigoc yoac dedzege amma imoc modacduae, fakana imoc naric mi wangecbade. Ni ikoc mi ambade nga yoac modac modac fakana naric mi wabade.  
\v 34 Ni dzadzahac meai, imoc mi kpebade nga enacnaunac yoac maec, imoc mengerema siriha mong mi debade.   
\m
\v 35 Ni naso mocgu kpetiac kekecnau namma dedeseri seria deai, imoc nasosoc fora angkefude, ‘Ni Dawidi ikoc mi ammibade.’  
\v 36 Yeac bangecfora yeni kpac angana kpac torokpeu torokpe kecengkecgecde. Wenac kiwango nasoya nasoya neac kicfu fekecde, ngictau yeac ngictau tatacngo ifi isoc fekefude.  
\v 37 Sawakebanggac hepuc, imoc afo, ye tataha mi wama takecde. Nga ni ngictau tatahau faiba ye ifi isoc nasoya nasoya seria tackefude.” \it Selac\it*   
\p
\v 38 Geng kingang ngicga Dawidi kerecdokungo nadzicminec, fora. Nga geng ine yeac herebu negemma ye ngadehema wanec.  
\v 39 Ge kingang ngicgagoc dzadzahac menec, imoc wana wisickeu ngictau iraya bangecfu sendunnu ukuna gotengagoc andarec.  
\v 40 Ge yeac taonggac hocoda kpembarackedacma amea seria kpedzamedacna sesuhasac andae.   
\m
\v 41 Nga ngicngac yeneng imohai ferecge kengha angandae, yeni iwaiya mema woraandae. Ngicngac yeac wegenac kecandae, yeneng desofoc ammidae.  
\v 42 Ge ngabafora marifoingina memiacna dzikacfu serigec ngabafora sasawa sogaigecdeac sing meficgeyemmenec.  
\v 43 Fora, ge ngictau dzikacfu mi nanggenec nga yeac dzikacac beang, imocac enara merenna ngadeaubigeng kenec.  
\v 44 Ge ngictau yasuya mariaunac wangecma ngictau tataha bangecfu ukuna maec.  
\v 45 Ye sebigbori kecmanu ge wenahaac kpete mewegenena homac mi anec. Ye game kpekpeu faina imocngo ye semeu kecde. \it Selac\it*   
\p
\v 46 O \sc KEBU\sc*, ge mesufuemema monggoc kicninau fingecnadeac tomai kecduae. Ge nasoya nasoya ifi sufuma kecnade, ifi isoc ande. Geac herebu gerec isoc dzekecde, imoc wisickeudeac tomai kecduae.   
\m
\v 47 O Kebu, kekecna imoc wegenacnecsac ande, imoc negenna febeso. Ge ngicac medacfora fainununa eng fingecma kpac annide.  
\v 48 Ngic mong ye keengkecma mi homeude, ifia mong mi kecde, kpac. Homec amau ngic kucgoc meyunugec ngic mongngo imohacnac naric mi mesiude. \it Selac\it*   
\p
\v 49 O Kebu, geng yoac dedzege amma imoc modackecnec nga yoacga modackecnec, imoc warac Dawidi deserima desiminec, imocac fora hofocduae.  
\v 50 O Kebu, yeni ni, kingang ngicga deendema anengandae, imoc negenna febeso. Ngicngac yeneng deendema anenggec ebic imoc herenau tofohokecduae.  
\v 51 O \sc KEBU\sc*, ge ngictau meisinnuma kerec nadzicnennec nga ngabafocna yeneng ine deendema anengandae. Ni sing tikengkecba yeneng hanititina hemmodacma desusuic anemma yoac mangana denenggecde.   
\p
\v 52 \sc KEBU\sc* nasoya nasoya kenehebesonga. Imoc fora nga fora yombong.   
\c 90  
\ms1 MITIYEGEC KIBI 4  
\mr Mitiyegec 90–106  
\s1 Naso wegenanec kefude  
\d Anutuac ngic Mosengo yofi numuec.  
\p
\v 1 O Kebu, neni fingecsahenina bic fekefec, geng yeneac sufu sufuamangina angkecnec.  
\v 2 Ge Anutu, tiki mi fingecmagec geng marigango bangec nga bangectoa bangec mi meficgemangoc imohai bic kecnec. Ge nasoya nasoya kecnec nga kecbesannec.   
\p
\v 3 Geng yoac dena ngic yeni monggoc sendung anggecde. Ge yofi deannec, “Ngicac nambarac, ngeni monggoc bangecfu dzigenema sendung ambisia.”   
\m
\v 4 Imoc yofiac, kifa tauseng imocngo geac kicfu uameme mocgu kemma bic kpac andac, ifi isoc ande. Imoc tofocnac monggac noboha isoc ande.   
\m
\v 5 Ge ngic wanggenununa seuc isoc kengandimbe nga kekecnina imoc gau negengandimbe, ifi isoc ande. Kpindzingngo asoac gborima monggoc ereande, ifi isoc.  
\v 6 Imocngo asoac gboria nga sabayagoc anu marai anu sokuema ururueude.   
\p
\v 7 Geac herebungo neni memanganenunuu kpac andimbe. Geac heregerecngo ebicfu fainunuu kecdimbe.  
\v 8 Neni ngicngac ogofocnina memanganeyununi geng wiac imoc kicgau arenggema hengkecnec. Nga kopocsic sufu sufuu meficgeing, ge imoc kicgaac kperagiu faina feu hengkecnec.  
\v 9 Anu kekecninaac uameme sasawa geac herebugaac bageau kecni nasonina kpac anude. Ngicngo asoringa ammiu kpac angande, neni kifanina ifi isoc kecni kpac andarude.   
\m
\v 10 Kekecninaac kpete imoc kifa 70 me kucnina feudeu kifa 80 kecnide. Kifa imocac manau kekecnina gombunga yombong kecandimbe, imohai ine ebic nga ubahodunggoc ifingoc kecandimbe. Kifanina bic meickegec kpac andaru neni kpututukema kendacnide.  
\v 11 Ngic mongngo geac ngabagaac kuc mi negensiude, kpac. Kengecgoc geac eweheihei kuneng anggembesonga nga heregerecga kuneng imoc ifingoc imocacsoc ande.   
\m
\v 12 Kekecnina uameme dafigucacsoc fede, imoc negensinideac wiac imoc kpounemmena. Ge ifi anna neni hereninango negen negentegecgoc anude.   
\p
\v 13 O \sc KEBU\sc*, ge monggoc dzigenena. Naso dafiguc monggoc geac tomai tacbesonga? Ge kingang ngicfocga neneac ubaga manganeu.  
\v 14 Neni uameme kecnidesoc sogac sogaigoc kecma ubangerec negennideac amma geng yoac dedzege amma imoc modackecnec, imoc asoacngoc mewakenunubesena.  
\v 15 Ge wenac homac ebicfu fainununec, uameme ifi isocngoc ubangerec nemmena. Neni kifa homac yarefaka hengkefing, imocacsoc ifingoc kifa ubangerecgoc meficgenemmena.  
\v 16 Geng ua mekecnec, imoc kingangngicfocga nenearu didiu edzacnunuma kucga damu damuyagoc imoc esamedacfocninango hembisia.  
\v 17 Kebu Anutuninaac ubangerecngo semennunubeso. Ge marininaac ua tataha meficgena seria febeso. Fora, ge marininango ua meandimbe, imoc tataha meficgena seria febeso.   
\c 91  
\s1 Engenatoango garennunukecde  
\p
\v 1 Anutu Engenatoango ngic mong garenggema mesufuu yeng Kuctoa minginaac debannu kecnegeng kecande,  
\v 2 ye \sc KEBU\sc* edeude, “Ge sufu sufuamana nga amana seria, ge Anutuna nga ni negenseriguma kecduae.”   
\p
\v 3 Ye nengmeme ngic yeac botacfunac mesiguude nga homecac hafei manganango memanganegubaac yeng onggongguude.  
\v 4 Ye kpegang dzoeango kperacguu geng yeac kpeganga bageau sufuma kecnade. Ye yoac modac modac Kebu nga fakaya imocngo geac kasoga amma odaga seria ande.   
\m
\v 5 Ge tofocnac wiac mong manganaac kengec mi annade nga wenacfu tebemedahaac kengectoa amma naric mi kpidohonade.  
\v 6 Hafeitoa kundung manau haande, imocac kengec naric mi amma homecac hafei mangana wenacfu fingecma yunuande, imocac kengec mi annade.   
\p
\v 7 Ngic tauseng yeneng hoanggau namma homegec ten tauseng yeneng foigaugeng namma homegecdeu wiac mangana mongngo gearu naric mi fingerude.  
\v 8 Ge kicgango yenemmana ngic Anutu ngadehema mangana megecdeac ayemmeande, yeni angammemenginaac amma turunga megecde.   
\m
\v 9 Geng yofi denec, “Ni \sc KEBUAC\sc* hoannu sufuma kecduae nga Kebu Engenatoa ye kecnegeng amana.”  
\v 10 Yarefakaac ebicngo gearu naric mi hau ebic mangana mongngo geac kporuc amagaac wegenac naric mi haude.  
\v 11 Ye angerofora uayoac yemmeu yeneng sing sasawa kengkecnec, imohai garenggugecde.  
\v 12 Ge haniga hocngo heibacac yeneng maringina witiau faiguma sesehegugecde.  
\v 13 Ge raiong yangtoa witiau nga kpate witingirau eng tikemma raiong sebigbori nga boidzocac witingirau tima tidzameyununade.   
\p
\v 14 Kebungo yofi dede, “Ye neac songo negemma nigoc kpeketahema kecdeac ebicfunac mesibade. Ye neac kpac kuneng negendeac neng henggareng amma ongonggebade.  
\v 15 Ye kpacnuu ni turunga meremmibade. Ye ebic witiau kefu ni yegoc kecma ebicfunac mesima eweheihei ammibade.   
\m
\v 16 Ni kekeha mehereeba kecma gebeckpeu memengerecna edzahabade.”   
\c 92  
\s1 Ge marigango ua menec  
\d Sondaac mitiyegec.  
\p
\v 1 O \sc KEBU\sc*, ge Engenatoa. Ni ubangerec negemma geac kpac kuneng heiwayong memima yegec heigemba, faka imocngo ngereede.  
\v 2 Geng yoac dedzege amma imoc modacnade, imoc asoac dekperagibade. Nga ge yoac modac modac Kebu, imoc tofocnac dekperagima  
\v 3 gita witiha tengngo kpema udumeng mema kurere hania hania kpema udumeng yumiango geac kpac kuneng heiwayong memibade, imocngo wiac ubangerehagoc ande.  
\v 4 O \sc KEBU\sc*, geng ua mekecnec, imocngo ubangerec meficgenenu marigango ua menec, imoc hentegecma sogac sogaiac yegec heibade.   
\p
\v 5 O \sc KEBU\sc*, geng ua meannec, imoc bibiagoc nga geac negen negeng imoc engena nga keme kemea yombong.  
\v 6 Ngic kapayango imoc naric mi negenude nga ngic negen negenga kpac, ye wiac yomoc naric mi negentegerude.  
\v 7 Imoc ine yofi, ngic yeneng Anutu ngadehema mangana megecdeac ayemmeande, yeni kpindzing isoc erema sabanginagoc anggecde nga yarengic yeni faka mangana angkecma yadiseri anggecde. Nga yeneng yoacngina bic desigec fede, yeni manganaac areng deyec deyecmea.   
\m
\v 8 O \sc KEBU\sc*, gennoc engenatoa nga ge nasoya nasoya ifi kechereema kecbesannec.  
\v 9 Foracngoc, \sc KEBU\sc*, geac ngabafocga yeni homecac areng andae nga yarengic sasawa yeni singsararang kpegecde.   
\p
\v 10 Kateburumakango kuhagoc kecande, ge sifu kuc ifia nemma nanggenuna kucgoc amma firang ambade. Ge kerec gombunga kpakema nadzicnennec.  
\v 11 Ni kic fima ngabafocna mayunuu yenenai. Nga yarengic yeneng wegenac hama nubeso anggec, yeni kopocsicnginaac turunga ebira megec, imoc kedzacnango negenai.   
\m
\v 12 Ngic dindingac yeneng pam ic gombunga sabayagoc, ifi isoc andae. Yeni Rebanong bangecac yomondzoc ic herea yadiseri angande, ifi isoc yadiseri anggecde.  
\v 13 Yeni ic isoc \sc KEBUAC\sc* amau homehomera, yeni Anutuac amasobennu sabanginagoc anggecde.  
\v 14 Yeni esea anggecde, fora. Nga yeni sifu fora meficgema maringina besaima fora homac gbarigoc angkecma  
\v 15 yofi degecde, “\sc KEBU\sc* ye faka angammemea dindingac. Yeng neac hoc peperandzi seria yombong nga yearu faka mangana mong mi fede.”   
\c 93  
\s1 \sc KEBU\sc* ye ngictau  
\p
\v 1 \sc KEBUNGO\sc* ngictauac kuc, imoc ngakpi isoc heiu kemeu ngicngac garengyunuude. Ye ngictauac kuc heiu ngakpia ande. Ye kuha bic heima kebangau dzegeec.  
\p O, yeng bangectoa bangec tatahau faiu seria tacdeac wiac mongngo meu goroc goroc naric mi anude.  
\v 2 O \sc KEBU\sc*, geng ngictau tatacga bicngoc tatahau faina seria feu ge nasoya nasoya kecnec nga kecbesannec.  
\v 3 O \sc KEBU\sc*, dokutoa yeneng ubaudumeng miacgec, dokutoa yeneng ubaudumengngina miacgec, dokutoa yeneng kucgoc arohoma ubaudumengngina miacgec.  
\v 4 \sc KEBU\sc* wi kecde, ye damu damuyagoc. Ye doku dundung yeneac udumeng ferahama kondung siri yeneac kuc ifingoc ferahade.   
\m
\v 5 O \sc KEBU\sc*, geac singyoac imoc sasawa seria nga fora. Geac amau nasoya nasoya kpetiac feengkecbeso.   
\c 94  
\s1 Ge yoacfu faiyununa  
\p
\v 1 O \sc KEBU\sc*, ge turung kpoukpou Anutu. Turung kpoukpouac Anutu, ge kperagigagoc fingectegecna.  
\v 2 O bangecac desi desi ngic, ge yacna. Ngic goa yenanggac negenggec engena angkecde, geng ngic imoc angammemenginaac turunga merengyemmebesena.  
\v 3 O \sc KEBU\sc*, ngic Anutu ngadehema mangana megecdeac ayemmeande, yeni nasoherec bic kecgecac nasongina kpac anudeac tomai kecduae. Yeni naso herea bic kecma ngicngac yeneac ebicac amma sogaima kecandaeac nasona herecgena kpac ambeso.  
\v 4 Yeni enacnginaunac ubakpekpe yoac makecde nga yarengic sasawa yeni sebingina meemma yoac homac osokecdae.   
\m
\v 5 O \sc KEBU\sc* yeni geac ngicngacfocga kpedzameyunuma maridzomingfocga kpendzennu faiyunuma  
\v 6 ngac hodzec nga kuricngic yunuma beging kpebucyunuma  
\v 7 yofi deandae, “\sc KEBU\sc* ye naric mi nenenude nga Yakoboac Anutungo imoc naric mi negensiude.”   
\p
\v 8 Ngicngac ubafong, ngeni kedzac faima yoacna negembisia. Oboc kpobocngic, ngeni negen negenggoc anggecdeac yoac edengunubade.  
\v 9 Anutungo kedzac ngicfu faiu fede amma ye wiac imoc naric negenude. Nga kic imoc Anutuac marikibi. Imocac ye wiac imoc henudengoc.  
\v 10 Yennoc bangeha bangeha ngicngac areng kpemeting ayemmema yunuude. Ye negen negeng minginango ngicngac kpouyemmeu yeneng negen negeng arenggegecde.   
\m
\v 11 \sc KEBUNGO\sc* ngicngac negen negennina negendacde. Ye ngicngac negen negengngina hennegeng amma negenu imoc uaya kpac. Nenang asu mocgu taiandimbe, ifi isoc.   
\p
\v 12 O \sc KEBU\sc*, ge ngic mong kopocsicac kpemeting amma dedeseriyoacga edekpou ammiannec, ngic imoc ye kenehagoc.  
\v 13 Geng ruae mina ebicnaso mong mi henude. Nga ngic goa Anutu ngadehema mangana megecdeac ayemmeande, yeneng ine kecma kemegecdeac amma teng usuyemmegecde.   
\m
\v 14 \sc KEBUNGO\sc* ngicngacfora mi ngadeyunuma wayunuude. Ye maridzomingfora naric mi wayunuude.  
\v 15 Ngic mong ye sing dindingac modarude, imohai desi desingic yeneng yeac yoac sing dindingacfu desima monggoc degecde. Ngicngac herenginau ikoc nga hamangec mong mi fede, yeneng desi desi yoac dindingac imoc modacgecde.   
\p
\v 16 Ngic goa yeni Anutu ngadehema mangana megecdeac ayemmeande. Nga merang ni meficnuude nga merang yacma kicnginau nanude? Ni imocac tomai kecduae. Ngic mongngo meficnuma yarengic yeneac kicfu nanudeac tomai kecduae.   
\m
\v 17 \sc KEBUNGO\sc* hama ni mi meficnubacfu ubaonganango bic kemema ngicac ubaudumenga kpacfu nga kicsereu febac.  
\v 18 Ni yofi deai, “Hanina pososoc anu manubeso ande.” O \sc KEBU\sc*, ni ifi debareng fakaga modacma yoac dedzege amma imoc modacma nanggenunec, imohai mi manuec.  
\v 19 Herenau negengyohoc homac mekecba geng meserinuma ubaonganaac ubangerec meficgenennec.   
\p
\v 20 Ngicenara goa yeni Anutu ngadehema mangana megecdeac ayemmeande, yeneng geac ogofocga naric mi anggecde. Yeni singyoac hania hania ohoandae, imocngo ngicngac ogofocngina faitobang ayemmema memangnaneyunugecde.  
\v 21 Yeni ngic dindingac kpehomegecdeac yoac dedzege angkecma ngic kopocsiha kpac homecac arennnu desigecde.   
\m
\v 22 Anu \sc KEBU\sc* ye neac ama seria nga Anutuna. Ye neac hoc peperandzi seria amma sufu sufuamana.  
\v 23 Ngicngac yeneng ogofocngina memanganeyunugec yeng imocac turunga kpouyemmeude. Yeni Anutu wama faka mangana meandaeac yeng meicyunuu kpac anggecde. \sc KEBU\sc* Anutuninango meicyunuude.   
\c 95  
\s1 Yeac enac tofohobesonga  
\p
\v 1 Hagec, \sc KEBUAC\sc* yegec heima oeha memini. Ye hoc peperandzi serinina nga memengerecnina. Nenang sogaima yeac yegec dendzerenggema heima  
\v 2 yeac hoannu kemma ye ubangerec memibisina. Neni yeac afe afeheyegec sogaima dendzerenggema heibisina.   
\m
\v 3 \sc KEBU\sc* ye Anutu engena yombong, ye anutu sasawa yeneac ngictau engenatoa.  
\v 4 Yeng bangectoa bangec manau keme kemea fede, imoc mariau mema garenggeude. Bangec kperec kperemenga nga tiki sasawa imoc yeac.  
\v 5 Yennoc kondung meec, imocac amma kondung imoc yeacngoc. Amma yeng bangec kerenga meu imocngo yeac marikibi ande.   
\p
\v 6 Hagec ngonducnema numumini. \sc KEBUNGO\sc* meficnunuec, nenang yeac kicfu fafoc heimini.  
\v 7 Ye Anutunina nga nenang yeac ngicngacfora. Ye yengena odayau fainunuma nenenggareng angkefu ramafora anni yeng mariango menunuu kecdimbe.  
\p O, ngeni yaguc kedzac kpema yeac enacudumeng negembau, imocac yombong anende.  
\v 8 Mang esafocngina yeni Meriba dokuu ubaseri amma Massa bangecfu kecgec, naso imohai bangec kisiu faka anggec, ngeni ifi isoc mi ambisia.  
\v 9 Ni faka kuhagoc meba yeni imoc hengkecgec, imoc fora. Nga yeni sifu tobannuma faitobannu fainugec.   
\m
\v 10 Ifi anggec ni kifa 40 ngicngac areng yeneac modzona tiu yofi deai, “Ngicngac imoc yeni ubaherenginau sing segema neac sing ngadehema kecdae.”  
\v 11 Imocac ni yeneac ngaba amma yofi deserima deai, “Yeni neac kecnegeng kekecfu naric mi enggecde.”   
\c 96  
\s1 Yegec gboria heimini  
\p
\v 1 \sc KEBUAC\sc* yegec gboria heimibesonga. Bangectoa bangec, ge \sc KEBU\sc* yegec gboria heimibesena.  
\v 2 \sc KEBU\sc* oeha mema yegec heimima yeac kpac kuneng kenehebesonga.\f + \fr 96:2 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Ngeni wenaha wenaha memengerec uayaac yoac edeyunukecbisia.  
\v 3 Kebu ye kuc nga kibikperagiagoc, imoc bangeha bangeha ngicngac areng botucnginau dekperagima edeyunugec yeng kucfaka bibiagoc meec, imoc ngiha ngiha botucnginau edeyunubisia.   
\p
\v 4 \sc KEBU\sc* ye engenatoa nga ye oyang boyang memibesonga. Ye tatahau wi yombong tacma anutu hania hania feracyunudacdeac ye kengec nga eweheiheigoc hoanggebesonga.  
\v 5 \sc KEBUNGO\sc* kurumenga kurumenga meficyunuec. Nga bangec monnunac ngicngac, yeneac anutufocngina hania hania, yeni ine nemuongasac andacdae.  
\v 6 Eweheihei nga ngictauac kuctoa kibikperagiagoc imoc \sc KEBUARU\sc* fede. Yeac kpetiac amau kuc nga kibikperagia fede.   
\p
\v 7 Ngiha ngiha arengnginagoc kecdae, ngeni \sc KEBU\sc* dengerema yeac kuc nga kibikperagia afehebisia.  
\v 8 \sc KEBUAC\sc* kpac kuneng imoc kuhagoc nga kibikperagiagoc. Imoc eweheiheigoc hoanggebesonga. Ngeni sese mema yeac amawomongau hama meembisia.  
\v 9 Ngeni kpetiac kekec heigec kemeu siricngina gombunga anu \sc KEBU\sc* numumibisia. Bangectoa bangecac ngicngac areng, ngeni yeac kicfu kengec amma dzonong fede fedegoc nambisia.   
\m
\v 10 Ngeni bangec monnunac ngicngac Anutu mi negemmidae, yeneac botucfu yoac yofi dekperagiyemmebisia, “\sc KEBU\sc* ye ngictau. Ye kuc imoc mekecma garengyununuma kecde. Foracngoc, ye bangectoa bangec tatahau faiec, imoc nasoya nasoya seria feu wiac mongngo meu goroc goroc naric mi anude. Ye monde mondea kpac kecma ngiha ngiha faka angammemengina yoacfu isinggema desiude.”   
\p
\v 11 Kurumenga kurumenga ngeni ubangerec negenggec bangecngo sogaibeso. Kondung nga wiac sasawa imohai wakema fedacdae, ngeni udumeng kuneng meficgebisia.  
\v 12 Maneng nga semeng ua nga wiac sasawa imohai fedacdae, ngeni sogaibisia. Nga kateu ic sasawa, ngeni sogac sogaiac yegec heibisia.   
\m
\v 13 \sc KEBUNGO\sc* hadeac amma yeac kicfu sogaibisia. Ye bangecfu desi desi ua meudeac hama bangec sasawa faka dindingacfu isingyunuma ngiha ngiha faka forau yoacngina desiude.   
\c 97  
\s1 Anutu ye ngictau  
\p
\v 1 \sc KEBU\sc* ye ngictauac kuc minginango bangectoa bangec garenggema kecde. Imocac bangecngo sogaibeso nga kondung tegiau bangec fekendae, yeni ubangerecgoc kecbisia.   
\p
\v 2 Hoeng nga kundung kunengngo ye oronggema fedape. Faka dindingac nga sing dindingac, imocngo yeac ngictautatahaac sering seria.  
\v 3 Gerecngo waraimiu ngabafora noboc noboc ye oronggeandae, yeni yonohodarude.  
\v 4 Yeac piratacngo bangectoa bangec mekperagiu bangec ye imoc hemma dendeng kpeude.  
\v 5 Bangec sasawaac \sc KEBU\sc* hau tiki yeni \sc KEBUAC\sc* kicfu pereckema kendo kereha sisingaiande, ifi isoc sisingaigecde.  
\v 6 Kurumenga kurumenga yeni yeac faka dindingac dekperagigec ngiha ngiha yeneng yeac kuc nga kibikperagia henggecde.   
\p
\v 7 Ngic yeni nemuongaac kicfu ngonducnema numuyemmeandae nga imocac negenggec wiac engena yombong anu yoac homac osoandae. Nga nemuongangina yeni wiac fora mi meficgeyemmegecde, kpac. Yeni game kpekpeu faiyunugec eng nanggecde. Nga anutu hania hania yeni Kebuac kicfu ngonducnemigecde.   
\m
\v 8 Ge anutu hania hania isingyunuma yoacngina desinadeac Siong ye imoc negemma ubangerec meficgeu Yudaac ngacnaroang yeni sogaigecde.  
\v 9 O \sc KEBU\sc*, ge Anutu engenatoa yombong nga bangec sasawaac ngic kunenga. Ge anutu hania hania feracyunudacnecac afeguyombonggeni.   
\p
\v 10 \sc KEBUNGO\sc* kpetiac ngicngacfora kekecngina onggonggeude. Ngic yeni yarefaka henggec imocac modzongina tiande, \sc KEBUNGO\sc* yeni songogoc hoangyunuude. Ngic goa Anutu ngadehema mangana megecdeac ayemmeande, yeng ngicfora yeneac mariunac mesiyunuude.  
\v 11 Ngicngac dindingac kecandae, yenearu ama wereckenude. Nga ngicngac uba kongahagoc kecdae amma herenginau ikoc nga hamangec mong mi fede, yeni sogac sogai meficgegecde.  
\v 12 Ngicngac dindingac ngeni \sc KEBUAC\sc* sogac sogaigoc kecma yeac kpara kpetiac yaiyo kpemibisia.   
\c 98  
\s1 Bangec sasawaac ngictau  
\d Mitiyegec.  
\p
\v 1 \sc KEBUNGO\sc* faka kuhagoc nga bibiagoc meu yegec gboria heimibesonga. Ye marifoia nga fuaya kpetiac sinema ngabafora feracyunuma firang anec.  
\v 2 \sc KEBUNGO\sc* firang bic anec, imoc dekperagiyemmeec. Ye faka dindingac modacma ngicngac yoacngina dema nanggeyunuec, imoc bangec monnunac ngicngac ye mi negemmidae, yeni imoc didiu edzacyunuu yeni imoc kicnginango henggec.  
\v 3 Ye Israe habu yenigoc yoac dedzege amma imoc modackecde, ye imoc negenu fekecde nga ye yoara modarudeac faka mong mi nigeckpeec. Anutuninango firang anec, imoc ngicngac bangec tegiau fekendae, yeneng henggec.   
\p
\v 4 Bangecfu ngicngac sasawa, ngeni sogaima \sc KEBU\sc* dendzerenggema yegec heimibisia. Ngeni dendzerenggema oeha memima yegec heimima kpara heiwayong memibisia.  
\v 5 Ngeni gita kpema \sc KEBUAC\sc* yegec heibisia. Ngeni gita kpegec yegec udumenga gombunga fingecbeso.  
\v 6 Ngeni trampet nga tomengtoa fifigec musi udumeng gombunga fingecbeso. Ngeni \sc KEBU\sc* ngictauninaac kicfu kecma yegec dendzerenggema sogac sogaigoc heimibisia.   
\p
\v 7 Kondung, ge nga geac manau wiac sasawa fedae, ngeni udumengtoa meficgebisia. Bangectoa bangec nga imocac manau kecdae, ngeni ifingoc udumeng kuneng meficgebisia.  
\v 8 Doku ngeni mari kpegec tiki ngeni sogaima yegec ngenahafoc heibisia.   
\m
\v 9 \sc KEBUNGO\sc* desi desi ua meudeac bangecfu hade. Imocac yeac kicfu yegec heibisia. Ye faka dindingacfu bangectoa bangecac ngicngac areng isingyunuma yoacngina desima monde mondea kpac kecma ngiha ngiha faka angammemengina isinggema yoacfu desiude.   
\c 99  
\s1 Anutu ye kpetiac  
\p
\v 1 \sc KEBU\sc* ye ngictau amma ye ngiha ngiha garengyunuu yeni dzonong fede fedegoc kecbisia. Ye kerobing botucnginau ngictau tatahau taru usocngo bangecfu mebeso.   
\m
\v 2 \sc KEBU\sc* ye Siong manau kunennina kecde. Ye engena amma ngiha ngiha sasawa feracyunuude.  
\v 3 Geac kpacga imoc damu damuyagoc. Yeneng imoc dengerebisia. Kebu ye kpetiac.   
\p
\v 4 Ngictau ye kuctoayagoc. Ye faka dindingac fingerudeac ammide. Geng faka mongang mongangga kpac, imoc faina seria fede. Ge Yakoboac areng yeneac botucfu faka angammemengina isinggema yoacfu desima sing dindingac modacma yoacngina desinec.   
\m
\v 5 \sc KEBU\sc* Anutunina ye kpetiac. Ngeni afehema yeac haniaac tatacfu ngonducnema numumibisia.   
\p
\v 6 Mose nga Arong yereng yeac womong gareng habugoc kefoc nga Samue ye yeac kpac kuneng kpacma nunumu ua mekefec. Yeni desambic ammigec yeng negengyemmema turunga merengyemmekefec.   
\m
\v 7 \sc KEBUNGO\sc* hoeng mong hereatoaac manau tacma yoac edeyunuu yeni yeac dedekperagiyoac nga singyoac tofohoma kecgec.  
\v 8 O \sc KEBU\sc* Anutunina, geng ngicngac nunumunginaac turunga merengyemmenec. Ge kopocsic wawa Anutungina amma kopocsicnginaac turunga ifingoc merengyemmenec.   
\m
\v 9 \sc KEBU\sc* Anutunina ye kpetiac. Ngeni imocac amma afehema tiki kpetiacfu emma fafoc heimima numumibisia.   
\c 100  
\s1 Kebuac womonnu kenni  
\d Ubangerecseseac mitiyegec.  
\p
\v 1 Bangec sasawa, ngeni \sc KEBU\sc* dendzerenggema sogac sogai yegec heimibisia.  
\v 2 Ngeni \sc KEBU\sc* ubangerecgoc kingang kpemima sogac sogaiac yegecgoc yeac kicfu habisia.  
\v 3 \sc KEBU\sc* ye Anutu, ngeni imoc negembisia. Yennoc meficnunuma menunuu nenang yeac ngicngac areng andimbe. Nga yeac ngicngac areng amma yeac rama habufora amma yeac oda manau kecdimbe.  
\v 4 Ye ubangerec ammima yeac nagutoau embesonga amma ama sobengau dedengerecac yegec heibesonga. Yeac ubangerec dema yeac kpac kuneng kenehebesonga.\f + \fr 100:4 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f*   
\m
\v 5 \sc KEBU\sc* ye gombunga. Yeng yoac dedzege amma imoc modackecde, fakaya imoc nasoya nasoya feengkefude. Ye yoara modackecde, imocngo fingecsahengina fekefudesoc, yenearu feengkefude.   
\c 101  
\s1 Yoac deserima deec  
\d Dawidingo mitiyegec yofi heiec.  
\p
\v 1 O \sc KEBU\sc*, gearu yoac modac modac faka fede. Nga sing dindingac modacma yoacngina desinade, imocac yegec heigembade.  
\v 2 Ni kopocsiha kpac kecma sing imohai kengkecbadeac negensima kecduae. O, ge dafinenggac nearu hanade? Ni ngic ogofocna mong mi memanganeyunuma herenau dindingac nga kopocsicna kpac kecma amanau kecbade.  
\v 3 Wiac mongngo sinna gombunga memanganenuudeacsoc anu ni kic imohai naric mi fibade. Ngicngac sing segema negen negensingngina kpac kecandae, yeneac uaac modzona tiu wiac imocngo nigoc mi kpeketaheude.   
\m
\v 4 Herenau sing gombunga modacma imoc naric mi wabade nga kekec mangana imoc nigoc kpac. Yare faka hania hania, imocac negen negeng nearu mi febeso.  
\v 5 Mong ye ogea wegenac kecma yeac ngadeyoac sufu sufuu deude, ni ngic ifia memanganeba kpac ambeso. Ngic mong ye yengenaac negenu wiac engena anu ngic ogofora yenemma yeneac negenu mamea angande nga hereau ubakpekpe faka meande, yeac modzona tiude.   
\p
\v 6 Bangecnau yoac modac modac ngic nigoc kecgecdeac kicna yenearu fima negemba ngereeude. Mong ye kopocsiha kpac kecande, yeng neac kingang ngic amma uana mebeso.  
\v 7 Ngic mong ye faitobang amma ngicngac ikocfu faiyunuande, yeng neac amau mi kecbeso. Nga ngic mong ikocyoac deande, yeng neac hoannu naric mi kefude.   
\p
\v 8 Ngic Anutu ngadehema mangana megecdeac ayemmeande, yeni asoacsoc bangecfu memanganeyunudacba kpac anggecde. Ni yarengic sasawa meicyunuba kpac anggecde. Yeni \sc KEBUAC\sc* taonnu mi kecbisia.   
\c 102  
\s1 Ge ngictau tatacgau tacna  
\d Kucmamango \sc KEBUAC\sc* kicfu hama desambic amma yoac yofi edede.  
\p
\v 1 O \sc KEBU\sc*, ge nunumuna negenna memeficac kiacba imocngo gearu habeso.  
\v 2 Ge neac ebicnasou kicga nearu mi sufuma kedzacga nearu faina. Ni kpacguba turunga bic merennenna.   
\p
\v 3 Uamemena imoc hosuc ereande, ifi isoc erema kpac anggec sicnango gerea yombong amma gerec isoc dzekecde.  
\v 4 Kpindzing herecgegec dzanggema homeande, herenango ifi isoc dzanggede. Kucna kpac yombong anu yaka nenena nigecnude.  
\v 5 Ni kpendzeng kpema kunengngoc arohoduaeac amma sebi fusinango kemma sicnau kpeketahade.  
\v 6 Ni bangec gbangge gbanggeau kpendzo neng isoc anduae nga kpabekuruc mong amabangec sesuhau kecde, ifi isoc kecduae.  
\v 7 Ni gaugbori kecba neng mongngo ama witiau tembuha tacande, imoc isoc anduae.   
\m
\v 8 Ngabafocna yeneng asoacnac kemma marai game kpekpeu fainuma deendema anemma kpacna soweckegecde.  
\v 9 Ni ic sogong nebadeac anenu hamango yakana angkecde nga kickumanango sokocfu kemema dokuna anu nekecduae.  
\v 10 Ge ubaga manganeu ngaba anennec, imocac menu emma ukununa mayai.  
\v 11 Uamemena sasawa maraiac onganinango hereeande, ifi isoc ande nga ni kpindzing isoc homema dzanggeduae.   
\p
\v 12 O \sc KEBU\sc*, ge nasoya nasoya ngictau tatacgau tacna geac kpac kuneng imoc ngicngac fingecsahenina fekefudesoc, nenearu feengkefude.  
\v 13 Ge monggoc yacma Sionggac ubaga manganeu. Yagucnoc ubamangang amminadeac naso memea hade.  
\v 14 Kingang ngicngacfocga yeneng Sionggac hoc songea negemma yeac sendunggac ubamangang negendae.   
\p
\v 15 Bangeha bangeha ngicngac yeneng \sc KEBUAC\sc* kpac kunenggac kengec amma eweheimigec bangecfu ngictau sasawa yeneng geac kuc nga kibikperagigaac ewea heibisia.  
\v 16 \sc KEBUNGO\sc* Siong ama monggoc mema heigboriu kuc kibikperagiagoc fingectegeru henggecde.  
\v 17 Ye ngicngac makpekpea neneac nunumuac kedzac faiu wiacac desambic ammini imoc naric mi waude.   
\p
\v 18 Ngicngac fingecsahe ngade anggecde, yeneac amma yoac yomoc kibiu ohogec ngicngac yeneng ngade fingecma \sc KEBU\sc* eriendzong memibisia.   
\m
\v 19 “Ye yengena kpetiac tikiau wi tacma kiwa fiu maec. \sc KEBUNGO\sc* kurumennunac kiwa fima bangec henec.  
\v 20 Ngic witicamau kecdae, yeng kiacngina negemma kiwa bangecfu fima homecac areng yungecyunuudeac kiwa fiu maec.”  
\v 21 Ifi anu \sc KEBUAC\sc* kpac kuneng Siong taonnu dekperagibesonga nga Yerusarennu eriendzong memibesonga.  
\v 22 Ngiha ngiha yeni ngictau areng yenigoc kpeturanggema \sc KEBUAC\sc* kicfu ngonducnema numumigecde.   
\p
\v 23 Ye kucna dzongiau memama uameme nasona mewegeneu  
\v 24 deai, “O Anutuna, ge kifaga nasoya nasoya ngicngac fingecsahengina fekefudesoc, imoc feracyunuma feengkefude. Ge uameme nasona dzongiau herecgema mi meicnuna.”  
\v 25 Ge hanac hanaheaunacngoc kecma bangecac titiseri fainec seria fede. Kurumenga kurumenga yeni geangga marikibinoc.  
\v 26 Wiac imoc sasawa yeni kpac anggec, fora. Nga ge sifu kecengkecnade. Yeni ngakpi isoc esea anggecde nga wamba hesikpe amma ukuandimbe, ge ifi isoc wayunuma gboria fainade.   
\m
\v 27 Geng nasoya nasoya siric ifiangoc kecengkecnade nga geac kifaga imoc wisic wisickea kpac.  
\v 28 Geac kingang ngicfocga yeneac nambaracfocngina, yeneng geac hoannu kecgec geng esamedacfocngina hoanggau faiyununa yeneng gegoc serima kecgecde.   
\c 103  
\s1 Wosoefactoa anemmeude  
\d Dawidingo mitiyegec yofi heiec.  
\p
\v 1 O ubaongana, ge \sc KEBU\sc* kenehena.\f + \fr 103:1 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Wiac sasawa neac manau fede, imocngo yeac kpara kpetiac kenehebeso.  
\v 2 O ubaongana, ge \sc KEBU\sc* kenehena. Yeng faka gombunga anggenec, imoc mi nigecgubeso.   
\p
\v 3 Geng ngicngac ogofocga memanganeyununa yennoc kopocsicga imoc waude. Ye hafeidzoicga sasawa mengerema  
\v 4 kekecga bummema homecfunac mesiude. Yeng yoac dedzege amma imoc modacma wosoefac anggenu imocngo kekecgau iraga isoc anude.  
\v 5 Ge wiac monggac anggenu yeng wiac kereng kereng genu soha anu naric yombong kecnade. Huntoc neng ye dzoea heigboriu sebigbori isoc angande, imoc isoc sebiga monggoc gboriude.   
\p
\v 6 \sc KEBUNGO\sc* ngic garengyunuu goango ngic ogofocngina ebicfu faiyunugec ubaebicgoc kecgec yeng sing dindingac modacma yoacngina faka dindingacfu isinggema desiude.   
\p
\v 7 Ye singa Mose edzahama uaya mema Israe habu imoc edzacyunuec.   
\m
\v 8 \sc KEBUNGO\sc* wosoefac anemmema neneac ubamangang negemma ngaba bic mi anude. Ye yoac dedzege amma imoc modackecde, faka imocngo yearu wiac engena.  
\v 9 Ye nasosoc mesuninau mi nunukefude nga ye ngaba nasoya nasoya mi mekefude.  
\v 10 Nenang kopocsic meficgeing, ye imocacsoc faka mi anemmeude nga fakanina manganaac siricfu turunga mi kpounemmeude.   
\m
\v 11 Ngicngac yeneng eweheimigec yeng yoac yenigoc dedzege amma imoc modarude. Yeac faka siriha yofi, kurumenga kurumenga yeni bangec ferahama wi enggec fedae, ye ifi isoc ngicngacfora yeneac songo efea kpac negenude.  
\v 12 Wenac ere erea imocngo keme kemeagoc wegenac naric mi tacde, imoc herea yombong. Nenang singyoac kpema mangana meficgeing, ifi isoc imoc meickeu nenanggac hereau kenude.   
\m
\v 13 Manggac mongngo nambaracfora yeneac ubea manganeu hoangyunuande, ye ifi isoc ngicngac \sc KEBU\sc* eweheimiandae, yeneac ubamangang negemma hoangyunuude.  
\v 14 Nga dafiu fingering, imoc yeng negende. Nenang sendungsac, ye imoc negennu fede.   
\p
\v 15 Kpindzingngo manennu kpafuya kpeande, imoc uameme nasoya wegenacsac ande. Nga bangecfu ngic ye uameme nasoya ifi isoc ande. Dzaring dzuria sabayagoc anu  
\v 16 firangngo mefiranggeu morongge mama kpac anu wiac imoc tacande, tatahango imoc monggoc mi negenude. Ngic ye kekeha bangecfu ifi isoc ande, fora.   
\m
\v 17 Nga \sc KEBUNGO\sc* sifu yoac dedzege amma imoc modarude. Ngicngac yeneng eweheihei ammigec yeng nasoya nasoya hoangyunuma kecengkefude, fakaya dindingac imocngo nambarac nga esamedacfocngina fingecgecdesoc, yenearu fekefude.  
\v 18 Nga ngicngac yeneng yeac dzadzahac seria modacgec yeng ifi ayemmeude. Nga ngicngac yeac nonoyoac negenggec fede, yeni ifingoc ifi ayemmeude.   
\p
\v 19 \sc KEBUNGO\sc* ngictau tataha kurumenga kurumenga fekendaeu tatahau faiu seria nande. Ye ngictau amma eucererenga wiac sasawa feracyunuma mingina ande.  
\v 20 O \sc KEBUAC\sc* angero, ngeni ye kenehebisia. Yeac areng kucnginagocngo yeac yoac negengkecma yoara tofohoma ua mekecdae nga yeac ubaudumeng negenggecdeac kedzac kpeandae, ngeni ye kenehebisia.   
\m
\v 21 Kurumenggac wasai arengfora nga kingang ngicngacfora yeac songo modacandae, ngeni \sc KEBU\sc* kenehebisia.  
\v 22 \sc KEBUAC\sc* marikibifora sasawa bangecfu yeac bageau kecdae, ngeni sasawango \sc KEBU\sc* kenehebisia.  
\m O ubaongana, ge \sc KEBU\sc* kenehena.\f + \fr 103:22 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f*   
\c 104  
\s1 Wiac sasawa mefigeec  
\p
\v 1 O ubaongana, ge \sc KEBU\sc* kenehena. O \sc KEBU\sc*, Anutuna, ge engenatoa yombong amma eweheihei nga ngictauac kuc kibikperagiagoc heima kecannec.  
\v 2 Ngicngac yeneng wamba heiandae, ge ifi isoc kperagiango kperacemema kecnec. Geng kurumenga kurumenga meficyunuma kporucbedzo isoc kpedziyununa fekendae.  
\v 3 Ge ama managaac kpete doku witiau mena hoeng imoc geac keretac anu geng firanggac kpegang mema witiau tacma kisanna firangngo meguma kenude.  
\v 4 Geng firang sueyununa yeneng yoacga mema kenggec gerecborang uayoac edeyununa yeneng kingang kpegenggecde.   
\p
\v 5 Geng bangec mena imocngo goroc goroc amma kengha ambacac ge imoc titiseria tatahau fainecac wiac mongngo meu goroc goroc naric mi anude.  
\v 6 Geng dzohongtoa mema imocngo bangec kperahana kporuc isoc heiu kemeu dokungo tiki feracyunuma feu  
\v 7 geng doku yoac ngabasiric edeyununa yeni kengec amma woradacgec. Ge parandanggac mingina nga doku yeneng geac parandang udumeng negemma kengecyunuu woragec.  
\v 8 Ge tiki kperemeng tatacngina deseriyemmena tiki yeni yacgec kperemeng yeni kemema ihai fegecde.  
\v 9 Geng kpetengina faina feu bangec monggoc semebauac ferahegecdeac kpae heiyemmenec.   
\p
\v 10 Ge bangec keme kemeau doku kiwa faina doku kucgoc hakecma tiki botucnginau mama feec.  
\v 11 Fema manennu yang sasawa doku gumecyunuu nekecgec kateu donggi yeneng dokuac homema doku imoc nekecgecde.  
\v 12 Kateu neng yeneng faecngina doku tegiau mema ihai fema ic fawau tacma arohogecde.   
\m
\v 13 Ge wi amagau tacma tikiu doku kpema uaga mema kecna foragoc anu bangecngo fora negebec anude.  
\v 14 Geng kpindzing dena fingeru ramaburumakango imoc negecde. Geng dzaring nga semeng meficgena fingeru ngicngac neneng semeng ua meni bangecfu yaka fingerudeac edena neandimbe.  
\v 15 Ngichereu ubangerec fingerudeac waing meficgenec nga ngicngac kicsiricnina pirac pirac anudeac geng kerec meficgenec. Amma ngicngac herengina kucgoc anudeac yaka meficgema yemmenec.   
\m
\v 16 \sc KEBUNGO\sc* Rebanong bangecac yomondzoc ic homecyunuma doku efea kpac kpeyemmeu nekecgec  
\v 17 neng yeneng faecngina ihai megec kpendzo neng ye faeha yomondzoc icfu mema ihai fekecde.  
\v 18 Tiki kuneng herea yeneng kate noning yeneac amabangec nga mandzang yeneng hoc peperandzi singau sufuma kecgecde.   
\p
\v 19 Geng afo faina imocngo kifasoc kecnideac kpete angkefu wenac yengenaocngoc keme keme nasoya negenude.  
\v 20 Geng kundung faina ama toforeu kateu yang yeneng kenghaanggecde.  
\v 21 Raiong yang sebigbori yeni Anutungo yakangina meficgeudeac negemma yang yunuma negecdeac kucgoc arohogecde.  
\v 22 Wenac ereu yeni monggoc meickema faecnginau kemma fegecde.   
\m
\v 23 Imohai ngicngo ama uayau kemma ua mema kefu ama marai anude.   
\m
\v 24 O \sc KEBU\sc*, ge wiac hania hania medacnec, imocac kpetea engena yombong. Ge negen negentegecgango imoc sasawa mena wiac sasawa kekecnginagoc yeneng geac marikibiga amma bangec mewakedae.  
\v 25 Kondung ye kuneng kpererema edi feu kondungyang nga yang kuneng kapia hania hania homac yombong imocac manau fedae, yeneac kpete naric mi osodacnide.  
\v 26 Wage yeni imohai kengha angkecdae. Nga geng kondunggac kondungyang kuneng ifingoc meficyununa yeneng kondunnu yuengyuma anggecde.   
\p
\v 27 Wiac imoc sasawa yeni kicngina gearu figec geng nasoya hau yaka yemmenadeac negeung kecgec  
\v 28 geng wiac yemmena imoc mekecgecde. Geng mariga mederena yeni wiac gombunga homac negebec angkecdae.   
\m
\v 29 Ge kicga yenearu sufuna yeni kpidohoma kengecyunuude. Ge asungina wangecyununa yeni homema bangecnginau monggoc dzigenegecde.  
\v 30 Geng meficyunuma Asuga monggoc fifina yeneng monggoc gborigecde. Ge bangecac siriha heigborikecna monggoc gboria fingerude.   
\p
\v 31 \sc KEBUAC\sc* kuc nga kibikperagi imoc nasoya nasoya feengkecbeso. \sc KEBUNGO\sc* marikibia hemma ubangerec negembeso.  
\v 32 Yeng kiwa bangecfu fiu bangecngo dendeng kpeu mariango tiki kpesereyunuu tikingo hosuc kpegecde.   
\p
\v 33 Ni kekecna kecbadesoc \sc KEBU\sc* yegec heimibade. Ni kekecna kecma Anutu dengerekecbadengoc.  
\v 34 Ni \sc KEBUARU\sc* sogac sogai meficgekecma yeac wiac hennegeng angkecba yeng imocac negenu ngereebeso.  
\v 35 Ngic kopocsicgoc bangecfunac meicyunubesonga nga ngic Anutu ngadehema mangana megecdeac ayemmeande, yeni kpac ambisia.  
\p O ubaongana, ge \sc KEBU\sc* kenehena.\f + \fr 104:35 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* \sc KEBU\sc* eriendzong memini, hallelu Yac.   
\c 105  
\s1 Fora meficgeude  
\p
\v 1 O ngicngac, \sc KEBU\sc* ubangerec memima yeac kpac kuneng hofocbesonga. Yeng ua sasawa meande, imoc ngiha ngiha dekperagiyemmema edeyunugec yeneng imoc negendacbisia.  
\v 2 Ngeni yeac yegec heimibisia. Ngeni dedengerec yegec heimima yeng ua bibiagoc meande, imoc ngicngac edeyunubisia.  
\v 3 Yeac kpara kpetiac. Ngeni imocac negenggec wiac engena ambeso. Ngicngac \sc KEBU\sc* hofocandae, ngeni sogaibisia.  
\v 4 Ngeni \sc KEBU\sc* hofocma yeac kuhaac kic fima yeac hoannu kemma kecgecdeac nasosoc angemmebeso.  
\v 5 Yeng ua bibiagoc amma kucfaka bibiagoc mekecma desi desiyoac enarango dekefec, ngeni imoc negenggec febeso.  
\v 6 O, yeng ngeni meisingngunuec. Ye kingang ngiha Abarahanggac gboricfora nga Yakoboac medacfora meisingngunuec.   
\p
\v 7 Yennoc \sc KEBU\sc* Anutunina nga yeng ngicngac yoacngina isinggema desiude, faka imoc bangecfu sokoma fede.  
\v 8 Ye dzadzahac meec, imoc nasosoc negensima dedeseriyoac edengunuec, imoc ngicngac fingecsahengina fekefude, imoc andenga tauseng feenude, imocacsoc negensima kefude.  
\v 9 Ye Abarahanggoc dzadzahac imoc mema Isakaac yoac deserimima edema  
\v 10 Yakoboaru dedeseriyoac imocnoc meserima Israegoc dzadzahac imoc fefeseri feudeac dema  
\v 11 yofi deec, “Ni maridzoming arennu Kanaang bangec ge gembade, imocnoc geac bangec noboha anude.”   
\p
\v 12 Ngicngac imoc yeni kpetengina kuneng kpac. Yeni ngicngac efeanecsac amma bangec imohai kemma kuric kecgec.  
\v 13 Bangecareng yeneac bangecngina fekende, yeni imohai yerecgema ngictau monggac bangec yerecgema ngictau monggac bangecfu kengkecma ngicngacareng mong yenigoc kecma wayunuma monggaru kengkecgec.   
\m
\v 14 Kebungo ngic kpae heiyemmeu mongngo mong ebicfu mi faiyunuec. Ye yeneac amma ngictau yoac ngabasiricfu ayemmema  
\v 15 yofi edeyunukefec, “Ni ngic meisinggema kerecdokungo nadzicyemmeai, ngeneng mi kpesereyunubisia nga profetefocna mangana mong mi ayemmebisia.”   
\p
\v 16 Yeng bangec imohai boditoa fingerudeac edeec, imohai nenesemengngina sasawa kpetotieu kpac anudeac negemma  
\v 17 ngic mong bic sueu waraiyemmeec, imoc Yosefe. Yeneng ye wanac ngic anudeac dema suema dzo megec.  
\v 18 Yeni hania ic gigidangau faima ubiau becsac aiengngo memea dzegegec.   
\p
\v 19 Yeng ifi kefu yeac kpefing yoac dedea, imoc erema heiu \sc KEBUAC\sc* yoacngo Yosefeac hania tobanggeu seriec.  
\v 20 Seriu Aigita yeneac ngictaungo ngicfora sueyunuu kemma Yosefe yungecgec. Ngiha ngiha yeneac ngictaungo Yosefe witicfunac yungerec.   
\m
\v 21 Ngictaungo ye amea manaac enara faiu yeng iwaiya sasawa garenggeudeac uayoac demiec.  
\v 22 Demiu Yosefengo songeaac arennu ngictauac medacfora dederecge ayemmema ngic enarafora negen negentegec edekpou ayemmekefec.   
\p
\v 23 Ifi anu Israe yeneng Aigita bangecfu hagec. Yakobongo Hanggac bangecfu kuric kefu  
\v 24 \sc KEBUNGO\sc* ngicngacfora meficyunuu fingecsahe kuneng nga kucgoc amma ngabafocngina yeneac kuc ferahagec.  
\v 25 Ferahegec yeng Aigita ngic yeneac negen negeng merenu yeneng ngicngacfora ubango ukuyunugec. Yeni yenahafoc yoac denegeng amma Kebuac kingang ngicfora faitobannu faiyunugec.   
\m
\v 26 If anggec Kebungo kingang ngiha Mose suema Arong ifingoc meisinggeu  
\v 27 yereng yeneac botucfu faka kuhagoc meoc. Yeri Hanggac bangecfu kucfaka mi hehena mekefoc.   
\p
\v 28 Anutungo kundung sueu bangec mekundungkpeu yeneng ine yeac yoac kpema wagec.  
\v 29 Ye dokungina sasawa heimerenu sac andaru kondungyang kpebucyunuu homedacgec.   
\m
\v 30 Sepeng yeneng hama bangecngina sokodacma ngickunengfocngina yeneac fefeamanginaungoc engkecgec.  
\v 31 Yeng yoac deu dawec nga dokuac mogocbisic habutoanginagoc hama ama bangecngina sasawa sokodarec.   
\m
\v 32 Yeni kia kpeudeac negenggec yeng nomanggbomea yemmeu piratacngo amabangecngina sokoma heidarec.  
\v 33 Yeng waing icngina kpezamema fig ic amma icngina goa bangecnginau kpetackedarec.   
\m
\v 34 Ye ipua yoac edeyunuu yeneng hagec. Ipua gboria kucnginagoc hagec, yeneac kpetengina naric mi mebesonga.  
\v 35 Yeneng hama bangecfu wiac maria tengging tengging sasawa nedacma bangecnginaac semeng nedacgec kpac anec.   
\m
\v 36 Yeng bangecnginau warac medacfocngina sasawa kpebucyunudacma kucnginaac fora warac fingecgec, yeni kpebucyunuu homedacgec.   
\m
\v 37 Imoc sasawa fingeru wisickeu ye Israe habu meyunuu Aigita bangec wama kenggec. Yeni siriwa nga gol momoc mema kenggec yeac ngicngac arengfora yenearunac mongngo mi tifainggema makpeec.  
\v 38 Aigita ngicngac yeneng Israe ngicngac yeneac homac kengecyunuecac amma yeneng wayunuma kenggec, imocac ubangerec negenggec.   
\p
\v 39 Anutungo hoeng tiameu imocngo kperacngina amma witinginau feu tofocnac gerec yemmeu imocngo mekperagiyunuec.  
\v 40 Yeni kpesimigec yeng neng negecdeac yemmema kurumenggac yaka efea kpac yemmeu negebec anggec.  
\v 41 Ye hoc kpendziru doku dundungngo mama bangec dokuya kpac, imohai dzuamagoc mekeng feec.   
\m
\v 42 Nocac ye dedeseri kpetiac deserima bic deec. Nga ye kingang ngiha Abarahang, yeac ifingoc negenu feu  
\v 43 ngicngacfora sogac sogaigoc wangecyunuec. Ye meisingfora hesicyunuu yeni yegec heima arohoma sogaima kenggec.  
\v 44 Yeng bangec monnunac ngicngac yeneac bangec wangecyunuma meisingngicngacfora imoc yemmeu ngicngac yeneac semeng uaac mingina amma fora mema nekecgec.  
\v 45 Yeneng yeac singyoac mekecma dedeseri yoara seria modacgecdeac ifi anec.  
\p \sc KEBU\sc* eriendzong memini, hallelu Yac.   
\c 106  
\s1 \sc KEBU\sc* eriendzong memini  
\p
\v 1 \sc KEBU\sc* eriendzong memini, hallelu Yac. \sc KEBUNGO\sc* yoac dedzege amma imoc modarude nga wosoefaha imoc nasoya nasoya feengkefude amma ye gombunga, imocac ubangerec memibesonga.  
\v 2 \sc KEBUNGO\sc* faka kuhagoc mekecde, ngic mongngo kucfaka ifia naric mi deude nga ye kucfaka imoc dengereudeacsoc kpac.   
\m
\v 3 Ngicngac sing dindingac nasosoc modacbeso ayemmeande nga faka dindingac angandae, yeni kenecnginagoc.  
\v 4 O \sc KEBU\sc*, ge ngicngacfocga gombunga ayemmema neac ifingoc negenna febeso. Ge ngicngac ebicfunac mesiyunuma ni ifingoc meficnubesena.  
\v 5 Geng ngicngacfocga meisingyununa yeni naric kecma wiac monggac mi obohogecde, imoc hembeso anende. Ngicngac arengfocga yeneng ubangerec negengandae, imoc hemma sogaibadeac anende. Geac maridzoming ngicngacfocga yeni sogaima ge dengeregugecde, imohai ni yenigoc sogaibadeac anende.   
\p
\v 6 Warac mangesafocnina yeni kopocsic meficgegec nenang meficyunuma Anutu ngadehema mangana menideac anemmeu ngicngac ogofocnina memanganeyunuma faka mangana ayemmeing.  
\v 7 Esangabofocnina yeni Aigita bangecfu kecma geac kuc fakaga bibiagoc hengwa anggec. Geng yoac dedzege amma imoc modacnade, imoc wiac engena. Yeneng ine imoc nigecyunuu kondung sacsac tegiau kecma Anutu Engenatoaac yoac kpegec  
\v 8 ye yengena kparaac amma ebicfunac mesiyunuma kuhaac hania mekperagiyemmeec.   
\m
\v 9 Yeng kondung sacsac yoac ngabasiric ammiu gbanggeec. Nga yeng dzohong keme kemeausing bangec gbangge gbanggeau kengandae, ifi isoc wangecyunuma nobocgeng enec.   
\m
\v 10 Ye ifi amma ngic ngadeyunugec, yeneac mariunac mesiyunuma ngabafocngina yeneac kucfunac mesiyunuec.  
\v 11 Doku imocngo ngabafocngina semeyunudaru kpac anggec yenearunac mongngo mi kefec.  
\v 12 Ifi anu yeneng yeac yoac negensinggema dedengerec yegec heimigec.  
\v 13 Nga yeni ine bic yombong ye uaya mekefec, imoc nigecyunuu yoac dederecge ayemmeudeac tomai mong mi anggec.  
\v 14 Yeni bangec kisiu yakaac songo kuneng negemma imoc mi garenggema bangec gbangge gbanggeau Anutu faitobannu faigec.  
\v 15 Nga ye wiac mong yemmeudeac derecgegec, imohai yeng imoc yemmema hafei kuneng mong botucnginau sueu yenearu haec.   
\p
\v 16 Anu ngic yeneng kporucbedzongina nangkenec, ihai kecma Moseac keracmangang amma Arong, \sc KEBUAC\sc* kpetiacngic, yeac keracmangang ifingoc anggec  
\v 17 bangecngo anggema Datang gbokoma Abirang arengforagoc semeyunuec.  
\v 18 Gerecngo mama ngicngac yeni modacyunukecgec, yeni sasawa yonohoec. Gerecborangngo yarengic yonohodarec.   
\p
\v 19 Anu yeni Horebe tikiu kecma burumaka medahaac ongea mong mema nemuonga aiengngo mema, imoc eweheimima numumigec.  
\v 20 Yeni Anutuac kuc nga kibikperagia wama imoc merenggec burumaka kpindzing neande, onga imocngo yeac tataha meudeac negemma faigec. Faima fafoc heimima numumigec.   
\p
\v 21 Anutu memengerecnginango Aigita bangecfu faka kuneng mekefec, yeac nigecyunuec.  
\v 22 Yeng Hanggac bangecfu kucfaka bibiagoc mema kondung sacsacfu faka kicfuria meu kerectegec anggec.  
\v 23 Yeneng ifi anggec yeng kpetotieyunuudeac deu Mose meising ngihango Anutuac kicfu namma yeac herebu menomaneec. Ye ifi mi nambac dede Anutungo kpetotieyunuu kpac ambau.   
\p
\v 24 Anutungo yoac deserima deu yeneng imoc mi negensinggema bangec gombunga yemmeu megecdeac dedea, imoc ngadehegec.  
\v 25 Yeni kporucbedzonginau Anutuac pandzeng kpouma tacma \sc KEBUAC\sc* ubaudumeng negemma imoc mi tofohogec.  
\v 26 Imocac yeng maria miacma yoac yofi deserima deec, “Ni bangec kisiu yunuba homema fedacbisia nga  
\v 27 esamedacfocngina medereyunuba bangeha bangeha ngicngac areng yeneac botucfu kecgecde. Yeni ifi kecgec ngicngac yeneng yunukpebuc ayemmegec neng bangeha bangeha fekendae, imohai sueyunuba singsarang kpema kecbisia.”   
\p
\v 28 Imocac witiau yeni Peore tiki Baari nemuac ongagoc kpeketehama kecma nemuonga homemea yeneac sesegerec oho ohoya, imoc nekecgec.  
\v 29 Yeni ifi amma \sc KEBUAC\sc* here miacgec yeng angammemenginaac amma ngaba ayemmeu hafei mangana mongngo yenearu fingerec.   
\m
\v 30 Anu Pinehasingo sifu yacma \sc KEBUARU\sc* nunumu ua meu hafei mangana imocac kuha mau kpac anec.  
\v 31 Yeng ifi anecac amma fingecsahe feerekecgecde, yeni sasawango Pinehasiac fakaya dindingac, imoc negensikecgecde.   
\p
\v 32 Anu yeni Meriba dokuu kecma \sc KEBU\sc* ngaba ifingoc meficgemigec Mosengo yeneac ebicac amma ebicfu enec.  
\v 33 Yeneng Moseac asu mehodungaigec yeng yoac mi negentegecma deec.   
\p
\v 34 \sc KEBUNGO\sc* dederecgeyoac ayemmeec nga yeni ine ifi isoc habu goa mi kpetotieyunuma meicyunugec, kpac.  
\v 35 Yeneng ine bangeha bangeha ngicngac areng yenigoc kengha amma yeneac faka arenggema imoc modacgec.   
\m
\v 36 Yeni yeneac nemuonga hania hania modacgec. Faka imocngo botacngina amma mendangyunuu  
\v 37 yeni naroangmedacfocngina meyunuma kpebucyunugec. Faka imocngo asu manganaac hosuc heiyemmekecgec.  
\v 38 Yeni nambaracfocngina yeneac sac kopocsiha kpac kpakegecac bangecngina seuhagoc anec. Yeni naroang medacfocngina sese dema kpebucyunuma Kanaang bangecac nemuonga yeneac sesegerec ohogec bangecngo sacac kopocsicac seuhagoc anec.   
\m
\v 39 Ngicngac yeni angamemengina ifia angkecgecac amma uba seucnginagoc amma Anutuac kicfu yeni kaisero siric anggec.   
\p
\v 40 Imocac \sc KEBUNGO\sc* ngicngacfora ngaba ayemmema maridzoming ngicngacfora yenenu seucnginagoc anggec negemma modzea tiu wayunuec.  
\v 41 Wayunuma bangec monnunac ngicngac ye mi negemmidae, yeneac mariu faiyunuu yeneng ubango ukuyunuma garengyunugec.  
\v 42 Ngabafocnginango ebicfu faiyunugec ubaebicgoc kecgec yeneng meyunuma memayunuma kucngina bageau faiyunugec.  
\v 43 Kebungo naso homac ebicfunac mesiyunukefec nga yeneng ine yoackpekpengic amma faka imocsac negensima kecgec. Yeni ngicngac ogofocngina memanganeyunukecgecac yeng memayunuu memeficac obohoma  
\v 44 kpendzeng kpekecma kiacgec, fora. Nga yeng sifu ebicngina negensima memeficac kiacngina negenec.   
\p
\v 45 Ye warac dzadzahac yenigoc meec, imoc yeneac amma negenu feec. Yeng yoac dedzege amma imoc modackecde, imocngo efea kpac femideac amma yeneac ubamangang negengkefec.  
\v 46 Ngic witicfu faiyunuma meyunuma kecdacgec, yeng faka ayemmeu yeneng yeneac ubahodung negenggec.   
\p
\v 47 O \sc KEBU\sc*, Anutunina, ge ebicfunac mesinunuma bangec monnunac ngicngac ge mi negenggudae, yeneac botucfunac menunuma kpedzucnununa. Geng ifi anna neni geac kpacga kpetiacac ubangerec negemma homac dengeregunide.   
\m
\v 48 \sc KEBU\sc* Israeac Anutu, ye nasoya nasoya kenehebesonga. Imoc fehereema fekecbeso.  
\m Ngicngac sasawango yofi debisina, “Imoc Fora.” \sc KEBU\sc* eriendzong memini, hallelu Yac.   
\c 107  
\ms1 MITIYEGEC KIBI 5  
\mr Mitiyegec 107–150  
\s1 Amabangec gombunga meficgeec  
\p
\v 1 \sc KEBU\sc* ye gombunga. Ye yoac dedzege amma imoc modackecde, fakaya imocngo nasoya nasoya feengkefude. O, ngeni imocac ubangerec memibisia.  
\v 2 \sc KEBUNGO\sc* ngicngac bummenunuma ebicfunac mesinunuec, ngeneng ifi dekecbisia.  
\v 3 Ngeni bangeha bangeha kecgec yeng imohacnac mengunuec. Goa ngeni wenac ere ereau kecgec nga goa wenac keme kemeau kecgec. Goa ngeneng not bigeng kecgec nga goa saot bigeng kecgec nga yeng imohacnac mengunuma kpedzucngunuec.   
\p
\v 4 Goa ngeni taong monnu kemma kecgecdeac sing hofocma bangec kisi gbangge gbangeau kengha angkecma  
\v 5 yakaac nga dokuac homema ubaongangina herenginau homeec.  
\v 6 Ngeni ebicfu ifi kecma \sc KEBUARU\sc* kiacgec yeng kpendzeng imohacnac mesingunuma  
\v 7 sing wegenacfu wangecngunu kengkecma taong nga amabangec gombunga meficgengemmeu ihai kecgec.   
\m
\v 8 \sc KEBUNGO\sc* yoac dedzege amma imoc modackecde, ngeni imocac ubangerec memibisia. Yeng bangecngic medacfocngina meficngunuma faka bibiagoc mekecdeac ngeni ubangerec memibisia.  
\v 9 Mongngo dokuac ammiu yeng doku miu negebec anude nga mongngo yakaac homeu yeng wiac gombunga miu neu gebeckpeude.   
\p
\v 10-11 Goa yeni Anutu Engenatoa yeac yoac kpema dederecgeyoara ngadehekecgecac kundung manau kengkpung hakpung anggec witicngo witicyunugec tacandae, ifi isoc tacma kpendzeng kpegec.  
\v 12 Yeni uatoa mekecgec herenginango kuha kpac anu bangecfu mayunuu mongngo mi meficyunuec.   
\m
\v 13 Yeni ebicfu ifi kecma \sc KEBUARU\sc* kiacgec yeng kpendzeng imohacnac mesiyunuma  
\v 14 kundung dzic imohacnac meyunuu erema witicngina herecgeec.   
\m
\v 15 \sc KEBUNGO\sc* yoac dedzege amma imoc modarude nga yeneng imocac ubangerec memibisia. Yeng bangecngic medacfocngina meficyunuma faka bibiagoc mekecdeac ubangerec memibisia.  
\v 16 Yeng nagu seria aiengngo memea sasawa, imoc hembarackeu aiengngo kpae heiheia imoc kpetackeude.   
\p
\v 17 Goa yeni kopocsicac fakagoc kecgecac hafei ayemmeec. Yeni ngicngac ogofocngina memanganeyunugecac amma kpendzeng kpekecma  
\v 18 yaka negecdeac mi ayemmeu yaka sasawa wama homecac naguu heima fegec.  
\v 19 Yeni ebicfu ifi kecma \sc KEBUARU\sc* kiacgec yeng kpendzeng imohacnac mesiyunuma  
\v 20 yoara sueu mama hafeingina mengereu wiac kpetotieyunuu kpac ambeso anggec, imohacnac mesiyunuec.   
\m
\v 21 \sc KEBUNGO\sc* yoac dedzege amma imoc modackecde, yeneng imocac ubangerec memibisia. Yeng bangecngicac medacfocngina meficyunuma faka bibiagoc mekecdeac ye ubangerec memibisia.  
\v 22 Yeni ubangerecac sese ohoma yeng uaya sasawa mekecde, imocac oyang boyang memima imoc ngicngac edeyunubisia.   
\p
\v 23 Goa ngeni kondunnu wageu emma kenggec nga goa ngeni dokutoau kengkecma finac mehama ngicngac yenearu suegec.  
\v 24 Ngeni ihai kecma \sc KEBUNGO\sc* ua kuneng sasawa mekefec, imoc hengkecgec. Ngeni yeac ua bibiagoc kondunggac keme kemeau henggec.  
\v 25 Yeng enacngo deu firang kucgoc kpema kondunggac siri miaru kucgoc kpeu  
\v 26 wagenginango sawau yombong emma emu keme kemeau yombong kemegec ngic ngeni ebic imoc hemma ongangina worau kengecngunuec.  
\v 27 Ngeni kicngina gigiu ngic doku seria neandae, ifi isoc goroc goroc amma kengha amma negen negengngina mi ireckeec.  
\v 28 Ngeni ebicfu ifi kecma \sc KEBUARU\sc* kiacgec yeng kpendzeng imohacnac mesingunuma  
\v 29 firangnomang menomaneu kpac anec nga kondung siri menomaneu ning kpema feec.  
\v 30 Kondung kuha mau ngeneng ruaegoc kecgecac ubangerec negenggec. Nga yeng wangecngunuu ngeni ihai me ihai kembesonga negenggec, ihai kengsikegec.   
\m
\v 31 \sc KEBUNGO\sc* yoac dedzege amma imoc modackecde, ngeneng imocac ubangerec memibisia. Yeng bangecngic medacfocngina meficngunuma faka bibiagoc mekecdeac ngeni dangge memibisia.  
\v 32 Ngeni habu yeneac kpekpeturannu Kebu oyang boyang memima enarafocngina yeneac botucfu namma ye eriendzong memibisia.   
\p
\v 33 Yeng dokutoa heimerenu bangec gbangge gbanggea anggec. Nga doku kiwagocngo kerengaima bangec gbangge gbanggea anggec.  
\v 34 Ngicngac areng goa yeneng bangecnginau kecma Anutu ngadehema mangana megecdeac ayemmeec. Imocac yeng bangec kerehagoc imoc merenu bangec kisi kondungagoc anec.  
\v 35 Ye bangec kisi gbangge gbanggea heimerenu doku dzohong homac fingecgec nga bangec dzangge dzanggea merenu doku dzuamagoc fingecgec.  
\v 36 Ye ngicngac yakaac homegec, yeni ihai faiyunuu kecma taongngina ihai megec amagerecngina seria anec.  
\v 37 Yeni semeng nga waing uanginau homecgec fora homac anec.   
\m
\v 38 Yeng kenecyunuu nambaracfocngina homac fingecgec. Amma ramaburumakangina keneheu yeneac kpetengina mi maec.  
\v 39 Ngic yeneng ebicfu faiyunugec ubaebicgoc kecma memeficac obohoma ebicfu nga ubahodunggoc kecgec kpetengina mau habu kapianec anggec.  
\v 40 Anutungo ine ngictauac medacfora yeneac modzea tiu ebic meficgeyemmema bangec kisi singa kpac, ihai faiyunuu kengkpung hakpung ihai kengkecgec.  
\v 41 Nga ngicngac yeni iwaiac obohoma kpendzennu kecgec, yeng yeni ebicfunac mesiyunuu nambaracfocngina yeneng fingecsahetoa amma rama habutoa angandae, ifi isoc anggec.  
\v 42 Ngicngac ikoc nga hamangecngina kpac kecandae, yeneng imoc hemma ubangerec negenggecde. Nga ngic Anutu ngadehema mangana megecdeac ayemmeande, yeneng ine yoacngina waickegecde.   
\p
\v 43 Mong ye negen negentegecgoc kecde, yeng wiac yomoc hensima negentegecbeso. \sc KEBU\sc* ye yoac dedzege amma imoc modarude, bangecfu ngicngac yeneng imoc negenghomebisia.   
\c 108  
\s1 Anutuac dangge  
\d Dawidingo mitiyegec yofi heiec.  
\p
\v 1 O Anutu, herenango efaiu udumeng gombunga amma yegec heibade. Ubaongana, ge gaunac yacna.  
\v 2 O, ni ama werec wereckenggac yombong midibade nga gitakurere ngeri negenggboribesera.   
\m
\v 3 O \sc KEBU\sc*, ni ngiha ngiha botucnginau ge ohec megemma bangec monnunac ngicngac yeneac botucfu yegec heima ge dengeregubade.  
\v 4 Geng yoac dedzege amma imoc modackecnec, imocngo wiac engena amma engkecma kurumenga kurumenga feracyunuma enude. Nga ge yoac modac modac angkecnec, faka imocngo sawau emma hoeng kpesereyunuude.   
\m
\v 5 O Anutu, ge oyang boyang megengandae, imocngo kurumenga kurumenga ferahema erebeso. Ge kucga nga kibikperagiga bangecfu faina mama bangectoa bangec sokodacbeso.  
\v 6 Geng ngicngacfocga neneac songo negennec, neni ebicfunac mesinununadeac marifoigango meficnunuma nunumuninaac turunga merennemmena.   
\p
\v 7 Anutungo womonga kpetiacfu tacma yoac yofi deserima deec, “Ni firang amma sogac sogaigoc Sikeng ama nga Sukocac bangec tumia medereyemmebade.  
\v 8 Gireac nga Manasse imoc neac, Efaraing imoc wasaiopocna nga Yuda ye ngictauyasuna.  
\v 9 Moabi ye dokunadzic terana nga Edonggaru hanitabena ukuma Firistia bangecfu firang amma arohobade.”   
\p
\v 10 Dawidingo monggoc yofi deec, “Taong odaya seria fede, mongngo imohai hesicnuu kendedeac negenduae. Mongngo naric hesicnuu Edong bangecfu kendedeac negenduae.”  
\v 11 O Anutu, ge wanunuma ukununudacma neneac wasaingichabugoc monggoc mi kengannec.   
\p
\v 12 Ngicngo meficnunuande, imoc memefihagoc kpac. Imocac geng meficnununa ngabafocnina yunubisina.  
\v 13 Neni Anutugoc namma kuctoaninagoc amma firang annide. Gennoc ngabafocnina tidzicyununa bangecfu fegecde.   
\c 109  
\s1 Ni kopocsicna kpac  
\d Yegecgareng yearu. Dawidingo mitiyegec yofi heiec.  
\p
\v 1 O dedengerec Anutuna, ge yoacga mi waickena.  
\v 2 Ngic goa ge waguma mangana megecdeac ayemmeande nga faitobang ngic ikocnginagoc, yeneng memanganenubeso enacngina anggema nedzarangngina ikohagoc neac yoac mangana dema  
\v 3 ngadenuma oronnuma memangac manganeyoac denemma hania kpacfu hama nugecde.  
\v 4 Ni songogoc hoangyunuba yeneng mesunnau nuandae, fora. Nga ni sifu yeneac numubade.  
\v 5 Ni faka gombunga ayemmeba yeneng turunga mangana merennenggec. Ni songogoc hoangyunuba yeneng ubango ukunugecde.   
\p
\v 6 Yeni yofi dedae, “Ngic mong Anutu ngadehema mangana meudeac ammiande, ye uayoac mina yeng ngic manganaac yoac kpebeso. Ngic mongngo yoacfu marifoiau namma yeac mesuyau kpebeso.  
\v 7 Desi desingicngo ye isinggema yoac desima ngic imocac manganaya hembeso nga yeac nunumuya imoc Anutungo negenu kopocsihagoc angkecde, ifi desibeso.  
\v 8 Kekecnasoya imoc wegenanec anu ngic mongngo yeac ngicenaraac tatac mebeso.   
\m
\v 9 Nambaracfora yeneng beging anggec enemango hodzec ambeso.  
\v 10 Nambaracfora yeneng amaheidac kecma yakaac derecgema kecbisia. Yeni amabangec sesuhau kecgec imohai meficyunuma imohacnac ifingoc kporacyunubesonga.  
\v 11 Ngic mong ye faka sirihau mi amma hiedzo meande, yeng finaha segereu kuricngic yeneng uayaac fora mekecbisia.   
\m
\v 12 Mongngo ye ubangerec mi ammibeso nga begingfora yeneac ubamangang mi negengyemmebisia.  
\v 13 Yeac esamedacfora meicyunugec kpac ambisia. Ye esamedacfora yeneac arennu yeac kpac meickebesonga.  
\v 14 Mangesafora yeneng ngicngac ogofocngina memanganeyunugec, \sc KEBUNGO\sc* kopocsicngina imoc negenu febeso. Nga nonggeaac kopocsic imoc naric mi wabesonga.  
\v 15 Yeneac kopocsic imoc nasosoc \sc KEBUAC\sc* kicfu feu hengkecbeso. Ngic imoc bangecfunac meickegec kpac anu yeac nigecyunudacbeso.”   
\p
\v 16 “Ye wiac gombunga anudeac nigeckpeu makpekpea nga iwaiac obohoma kecgec, yeni yunukporac ayemmema ubaebicgoc kisangyunuma homecfu faiyunuec.  
\v 17 Ye sowecyoac deudeac songo negengkefec, imocac yeneng soweckebisia. Ye kenecyoac mi ammiecac kenec yeac hereau febeso.  
\v 18 Ye sowec ngakpi isoc heima kefecac sowecngo sebifusiau doku isoc kemema sirau kerec isoc kemebeso.  
\v 19 Sowecngo ngakpitoaya anu kperacemebeso nga kebangau fadeng isoc anu wenacsoc dzegebeso.”   
\m
\v 20 Ngabafocna yeneng yoacfu nukecgec \sc KEBUNGO\sc* turunga imoc kpouyemmebeso. Yeni ngadeyoac denenggec yeng ifi ayemmebeso.   
\p
\v 21 O \sc KEBU\sc* Anutuna, ge kpac kunenggac amma yoacna dema nanggenuna. Geng yoac dedzege amma imoc modackecnec, imoc fedeac ebicfunac mesinuna.  
\v 22 Ni ngic makpekpea amma iwaiac obohoma kecduae. Nga yeni herena manau woubocna kpegec tohoec.  
\v 23 Maraiac ongango hereema tofocnac kpac angkecde, ni ifi isoc kpac ambeso anduae. Firangngo ipua mefiranggeu kengandae, ifi isoc kenduae.  
\v 24 Ni yakasege kecma fafocna kuha kpac anu sicnasac anduae.  
\v 25 Ngic mesunau nudae, yeneng desofoc anemma orucngina kpatitickenendae.   
\m
\v 26 O \sc KEBU\sc*, Anutuna, ge meficnuna. Geng yoac dedzege amma imoc modackecnecac ebicfunac mesinuna.  
\v 27 O \sc KEBU\sc*, ge marigango wiac imoc menec, yeni imoc negentegecbisia. O Kebu, geng ua imoc menec.  
\v 28 Yeni sowecyoac dekecdae, naric, nga ge sifu kenecyoac debesena. Ngicngac neac wegenac hama memanganenubeso angandae, yeni ge negemmana game kpekpeu faiyunubesonga. Geac kingang ngicngo ubangerec negemma kecbeso.  
\v 29 Ngicngac mesunau nuandae, yeni eweheiheia kpac kecbisia. Imocngo wamba isoc sangoyunubeso. Yeni gameyunuu kecdae, imocngo ngakpitoa isoc witinginau embeso.   
\p
\v 30 Enacbibicnango \sc KEBU\sc* oyang boyang ammima ngicngac habutoanginagoc kecdae, yeneac botucfu namma ye oyang boyang memibade.  
\v 31 Ngic mong ye wiac sasawaac obohoma kefu yeng marifoiau nanude. Yeneng yeac degecde, “Ye manganaac areng amma homebeso.” Ifi degec Anutungo ye yeneac mariunac mesiude.   
\c 110  
\s1 Ngictau uau faigec  
\d Dawidingo mitiyegec yofi heiec.  
\p
\v 1 \sc KEBUNGO\sc* neac Kebuna yofi edeec, “Ge marifoinau tacmana ngabafocga hanigaac bageau faiyunuba yeni hanigaac tatac anggecde.”   
\m
\v 2 \sc KEBUNGO\sc* Siong amau tacma ngictauyasuga faiu hau ge imoc mema ngabafocga yeneac botucfu ngictau amma ngic kunengngina kecbesena.  
\v 3 Ngicfocga yeni dzikac nasou gegoc kenggecdeac songo negemma hama edegugec geng hesicyununa tiki kpetiacfu enggecde. Sacgbori habunginagoc yeni ubaefac amma wamba kpetiac heima asoacac dzimbong heima feande, ifi isoc amma gearu hagecde.   
\p
\v 4 \sc KEBUNGO\sc* yoac yofi bic deseriec, imoc naric mi meickeude, “Geng Merikisedeac siricfu womonggareng wisic wisickea kpac kecengkecnade.”   
\p
\v 5 Kebu foigaugeng nande, ye herebunasoya hau ngictau kpedzameyunuude.  
\v 6 Ye bangeha bangeha ngicngac areng botucnginau tacma isingyunuma yoacngina desiu homegec farengnginango bangecnginau feemeude. Ye bangeha bangeha fekendeu ngic enarafocngina kpetotieyunuude.   
\p
\v 7 Ye sing tegiau doku mahama feu hemma neudeac oruha miacma kuhagoc nanude.   
\c 111  
\s1 Anutuac ua feengkefude  
\p
\v 1 \sc KEBU\sc* eriendzong memibesonga, hallelu Yac. Ngicngac uba kongaha amma ikoc nga hamangecngina kpac kecdae, yeneac kpebung habugoc namma heregoc yombong \sc KEBU\sc* ubangerec ammibade.   
\m
\v 2 \sc KEBUNGO\sc* uaya mekecde, imoc wiac engena nga imocac songo negengandae, yeneng imoc negengising angkecdae.  
\v 3 Kebungo wiac sasawa meec, imocngo ngictauac kuhagoc nga damuyagoc wakema fede. Ye fakaya dindingacngo nasoya nasoya feengkefude.   
\m
\v 4 Ye uaya bibiagoc meec, imoc yeng negemmanu negenggec fekefude. \sc KEBUNGO\sc* neneac ubea manganeu ubangerec anemmeude.  
\v 5 Ngicngac eweheihei ammiandae, ye yeni yaka yemmeude nga dzadzahac meec, imoc nasoya nasoya negensikefude.  
\v 6 Kebu ye ngicngacfora uayaac kuc edzacyunuma maridzoming dema bangec monnunac ngicngac yeneac bangec imoc ngicngacfora yemmeec.   
\m
\v 7 Yeng wiac mariango meande, imoc yoara modacma faka dindingacgoc. Nenang yeac dederecgeyoac sasawa negenserima mekecbisina.  
\v 8 Ye dederecgeyoac faiu imocngo nasoya nasoya seria fema fefeseri feengkefude. Imoc ikoc nga hamangeha kpac kecma modacma kecbesonga.  
\v 9 Yeng wiacfora sueyunuu yeneng ngicngacfora yungecyunugec. Ye dzadzaha feengkefudeac yoac seria edeyunuec. Yeac kpac imoc kpetiac nga bibiagoc.   
\p
\v 10 \sc KEBU\sc* eweheihei ammima ye hoanggebesonga. Faka imoc negen negentegecac hania ande. Ye eweheiheigoc hoanggeandae, yeni negen negengngina irec ireckea. Yeac eriendzong, imoc nasoya nasoya feengkefude.   
\c 112  
\s1 Kperagingo neraranggeude  
\p
\v 1 \sc KEBU\sc* eriendzong memibesonga, hallelu Yac. Ngic mong ye \sc KEBU\sc* eweheihei ammiande nga yeac nonoyoac songotoagoc hoanggeande, ye kenehagoc.   
\m
\v 2 Yeac esamedacfora yeni bangecfu kucnginagoc kecgecde. Ngicngac areng ikoc nga hamangecngina kpac andae, yeni kenecnginagoc.  
\v 3 Yeac amau hiedzo finactoa endzirangoc feude amma yeac faka dindingacngo nasoya nasoya feengkefude.   
\p
\v 4 Ngicngac uba kongaha amma ikoc nga hamangecngina kpac kecandae, yeni kundung manau kecmagec kperagi fingecyemmeude. Kebu ye ubangerec ayemmema ubamangang negengyemmema dindingac kefude.  
\v 5 Ngic mong ye sing dindingac modacma ngic wosoefac ayemmema yengena wiac turung dema maringinau faiu ua goa meandae, ngic ifia ye naric kecde.   
\m
\v 6 Ngic dindingac ye seria nanu wiac mongngo meu goroc goroc naric mi anude. Amma ngicngac yeneng yeac negenggec fekefude.  
\v 7 Ye yarefakaac yoacsiduc negemma kengec naric mi anude. Ye hereango \sc KEBU\sc* negenserima kefude.  
\v 8 Yeac herea imoc seri seria. Ye kengeha kpac serima kecma firang amma ngabafora yenenude.  
\v 9 Ye songea modacma wiac mederema ngicngac makpekpea yemmeude. Yeac faka dindingac, imoc nasoya nasoya feengkefude nga ye kuhagoc anu ngic yeneng eweheihei ammima nanggegecde.   
\p
\v 10 Ngic Anutu ngadehema mangana meudeac ammiande, yeng ngic mong dindingac henu kekeha ngereeude, imohai enac kisaranggeu dzameude. Ye wiac mong meudeac negensiande, imoc fora naric mi fingerude, kpac yombong.   
\c 113  
\s1 Engentoango wosoefac anemmeude  
\p
\v 1 \sc KEBU\sc* eriendzong memibesonga, hallelu Yac. O, \sc KEBUAC\sc* kingang ngicfora, ngeni \sc KEBU\sc* oyang boyang memima \sc KEBUAC\sc* kpac kuneng heiwayong memibisia.   
\m
\v 2 \sc KEBUAC\sc* kpac kuneng, imoc yaguc kenehema nasoya nasoya kenehekecbesonga.  
\v 3 Wenac ere ereaunac kengkecma wenac keme kemeau wisickede, imohai \sc KEBUAC\sc* kpac kuneng heiwayong memibesonga.   
\p
\v 4 \sc KEBUNGO\sc* bangeha bangeha ngicngac areng feracyunuma kecde. Yeac kuc kibikperagigoc, imoc kurumenga kurumenga feracyunuma emma feude.  
\v 5 \sc KEBU\sc* Anutunina kecde, ye isoc mongngo mi kecde, kpac yombong. Ye wi tatahau tacma  
\v 6 kiwa fiu mau kurumenga kurumenga nga bangec yenenude.  
\v 7 Yeng ngic makpekpea sendunnunac memiacyunuude nga ngicngac iwaiac obohoma kecandae, yeni hamaseucfunac meyunuu eregecde.  
\v 8 Eregec yeng ngictauac medacfocngina yenigoc tatacfu faiyunuu tacgecde. Ye ngicngacfora yeneac ngictauac medacfocngina, yenigoc faiyunuude.   
\m
\v 9 Ye ngac kufing amagerec miu ye sabac nonggea amma sogaima kefude.  
\p \sc KEBU\sc* eriendzong memibesonga.   
\c 114  
\s1 Anutuac kicfu dzonoma fedebeso  
\p
\v 1 Israengo Aigita bangec wama erema kenec. O, Yakoboac areng yeni ngicngac kuricyoac dekecgec, yeni wayunuma kenggec.  
\v 2 Yuda ye Anutuac womong kpetiac anec nga Israe imoc yeac eucererenga anec.   
\p
\v 3 Kondung ye imoc hemma kpidohoma kenu Yodang doku dzigeneec.  
\v 4 Tiki yeneng rama ngiwango futuckeandae, ifi isoc futuckegec nga fagang yeneng ramamedaha yuma engemmama angandae, ifi isoc sogac sogaigoc yuma engemmama anggec.   
\m
\v 5 Kondung ge kpidohoma woranec nga Yodang ge kpidohoma dzigenenec.  
\v 6 O tiki, ngeni kpidohoma rama ngiwa isoc futuckedae nga fagang ngeni kpidohoma ramamedaha isoc yuma engemmama andae.   
\m
\v 7 O bangec, ge \sc KEBUAC\sc* kicfu dendeng kpekecbesena. Ge Yakoboac Anutu yeac kicfu gbigbihebesena.  
\v 8 Yennoc hoc peperandzi seria heimerenu doku dzohong angkecde nga harongang heimerenu doku kiwa anude.   
\c 115  
\s1 Ge Kebu negensinggena  
\p
\v 1 O \sc KEBU\sc*, ge neneac kpac mi miacbesena, kpac. Geng yoac dedzege amma imoc modackecnec nga ge yoac modac modac Kebu, imocac geac kpac kuneng imoc eweheiheigoc kpacbesonga.  
\v 2 Bangec monnunac ngicngac Anutu mi negemmidae, yeneng deandae, “Yeni Anutungina mong mi hendimbe, kpac.” Yeni nocac ifi deandae?  
\v 3 Anutuninango kurumenga kurumenga, imohai kecma songoya modacma uaya mekecde.   
\p
\v 4 Ngicngac Anutuac yoac ifi deandae, yeneac nemuongangina siriwa nga golngo memea, yeni bangecngic yeneac marikibisac.  
\v 5 Yeni enacbibicnginagoc nga yoac ine naric mi degecde. Yeni kicngina noboc noboc amma wiac naric mi henggecde.  
\v 6 Yeni kedzacngina noboc noboc amma wiac mong naric mi negenggecde. Yeni samacnginagoc amma wiac monggac homuna naric mi homunggegecde.  
\v 7 Yeni maringinagoc nga maringinango wiac mong naric mi menegenggecde. Yeni haninginagoc nga haninginango sing naric mi kenggecde amma ubanginango udumeng mong naric mi meficgegecde.   
\p
\v 8 Ngicngac nemuonga meyunuandae, yeni nemuonga isoc angggec. Nga nemuonga negenserima kecandae, yeni sasawango nemuongangina isocngoc anggecde.   
\p
\v 9 O Israe ngicngac, ngeni \sc KEBU\sc* negenserima kecbisia, yennoc memeficngina nga kasongina.  
\v 10 O Aronggac ama areng, ngeni \sc KEBU\sc* negenserima kecbisia, yennoc ngeneac memefic nga kasongina.  
\v 11 Ngicngac \sc KEBU\sc* eweheiheigoc hoanggeandae, ngeni \sc KEBU\sc* negenserima kecbisia, yennoc ngeneac memefic nga kasongina.   
\p
\v 12 \sc KEBUNGO\sc* neneac negenside. Yeng kenecnunuude, ye Israeac ama areng kenecyunuma Aronggac ama areng kenecyunuma  
\v 13 ngicngac \sc KEBU\sc* eweheiheigoc hoanggeandae amma ngicngac kuneng nga kapia kenecyunuude.  
\v 14 \sc KEBUNGO\sc* ngeni nga nambaracfocngina mesahengunubeso.  
\v 15 \sc KEBU\sc* kurumeng nga bangec meficyuruec, yeng kenecngunubeso.   
\p
\v 16 Kurumenga kurumenga yeni \sc KEBU\sc* yengena ama nga bangec imoc ngicac medacfocngina kecdimbeac nemmeu ihai kecdimbe.  
\v 17 Homemea yeni \sc KEBU\sc* eriendzong naric mi memigecde, kpac. Ngicngac ningkpe fedae, yeneng ye naric mi dengeregecde, fora.  
\v 18 Nga \sc KEBU\sc* dengerenide. Neni ye yofinenggac kenehema\f + \fr 115:18 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* kecma nasoya nasoya kenehenide.  
\p \sc KEBU\sc* eriendzong memibesonga, hallelu Yac.   
\c 116  
\s1 Kebu ye memeficnina  
\p
\v 1 Ni \sc KEBUARU\sc* kpesi kpesi faiba yeng ubaudumenna negenecac ye songogoc hoanggebade.  
\v 2 Ye kedzaha nearu faiecac amma ni kecbadesoc kpakpacna yearu kpacba kengkefude.   
\p
\v 3 Homecac witicngo dedecnuu homec amaac kengec amma ubaebicngo mendannuu ni ubaebic nga kengecgoc kecma  
\v 4 \sc KEBUAC\sc* kpac kuneng kpacma yofi deai, “O \sc KEBU\sc*, ge kekecna ebicfunac mesina.”   
\p
\v 5 \sc KEBU\sc* ye wosoefac nga faka dindingacac \sc KEBU\sc*. Anutuninango ubamangang anemmeude.  
\v 6 Ngicngac negen negengtoangina kpac kecgec \sc KEBUNGO\sc* yeni onggongyunuude. Ni memeficac obohobare yeng ebicfunac mesinuec.   
\p
\v 7 O ubaongana, \sc KEBUNGO\sc* ubangerec homac anggenu naric kecnecac amma ge ruaegoc monggoc kecbesena.  
\v 8 Ge ubaongana homecfunac mesima kickumana mekerenggena tifainggema manubacac hanina onggonggenec.  
\v 9 \sc KEBU\sc*, ni geac kicfu kekecnginagoc yeneac bangecfu kengkecbadeac ifi annec.   
\p
\v 10 Ni yofi deai, “Ni kpendzeng kuneng kpema kecduae.” Ni negen negensinggoc kefaiac ebicnasou ifingoc negensinggumangoc kefai.  
\v 11 Nga ubaebicnagoc kecma deai, “Ngic sasawa yeni ikocnginagoc.”  
\v 12 \sc KEBUNGO\sc* ni gombunga anemma wiac sasawa nenu ni naric kecma imocac turunga noc wiac ammiba ngereeudeac obohoude.  
\v 13 Ni memengerecac kpakenec mema miacma \sc KEBUAC\sc* kpac kuneng kpacbade.  
\v 14 Ni yoac \sc KEBUAC\sc* kicfu deseriai, imoc ngicngacfora sasawa yeneac kicfu namma fora meficgebade.   
\p
\v 15 \sc KEBUAC\sc* ngicngac kpetiac homedae, imocngo yeac kicfu wiac buma kuneng ande.  
\v 16 O \sc KEBU\sc*, ni geac kingang ngicga amma uangacgaac medac. Gennoc witicfunac mesinunec.  
\v 17 Ni ubangerecac sese faigemma \sc KEBUAC\sc* kpac kuneng kpacbade.  
\v 18 Ni yoac \sc KEBUAC\sc* kicfu deseriai, imoc ngicngacfora sasawa yeneac kicfu namma fora meficgebade.  
\v 19 Imoc Yerusareng, geac botuhau \sc KEBUAC\sc* ama tacde, imocac amabangecfu ambade.  
\p \sc KEBU\sc* eriendzong memini, hallelu Yac.   
\c 117  
\s1 Ngeni Kebu dengerebisia  
\p
\v 1 Bangec monnunac ngicngac, ngeni \sc KEBU\sc* fendzonggema dengerebisia. Ngiha ngiha sasawa ngeni \sc KEBU\sc* afehebisia.  
\v 2 Yeng yoac dedzege amma imoc modackecde, faka imocngo hoannunuude, imoc wiac engena. \sc KEBUNGO\sc* yoara modackecde, faka imocngo nasoya nasoya feengkefude.  
\p \sc KEBU\sc* eriendzong memini, hallelu Yac.   
\c 118  
\s1 Kebu ge meficnununa  
\p
\v 1 O, \sc KEBU\sc* ye gombunga, yeng yoac dedzege amma imoc modackecde, faka imoc nasoya nasoya feengkefude, imocac ubangerec memibesonga.  
\v 2 Israe habu ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.”  
\v 3 Aronggac ama areng ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.”  
\v 4 Ngicngac \sc KEBU\sc* eweheiheigoc hoanggeandae, ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.”   
\p
\v 5 Ni ebic kuneng mema \sc KEBU\sc* kpacba \sc KEBUNGO\sc* kpakpacnaac turunga meremma ebicfunac yungecnuec.  
\v 6 \sc KEBU\sc* ye nigoc kefu ni naric mi kengecnuude. Ngic yeneng wiac mong naric mi anenggecde.  
\v 7 \sc KEBU\sc* ye memeficna amma nigoc wegenac kecdeac ni firang amma ngic ubango ukunudae yenemma nambade.   
\p
\v 8 Nenang \sc KEBUAC\sc* hoannu kemma sufuma kecni ngereede. Ngic negensingyununi memefihagoc yombong mi ande.  
\v 9 \sc KEBUAC\sc* hoannu kemma sufuma kecni ngereede. Ngictau medacfocngina negensingyununi memefihagoc mi ande.   
\p
\v 10 Bangec monnunac ngicngac Kebu mi negendae, yeni sasawango oronnudacgec ni \sc KEBUAC\sc* kpacfu firang amma kporacyunuba kpac anggec.  
\v 11 Yeni noboc noboc oronnuma kecgec, fora. Nga ni sifu \sc KEBUAC\sc* kpacfu firang amma kporacyunuba kpac anggec.  
\v 12 Yeni sangobide isoc noboc noboc oronnugec kate dzema borang tima bic bokoande, ifi isoc anggec. Ni \sc KEBUAC\sc* kpacfu firang amma kporacyunuba kpac anggec.  
\v 13 Yeneng kucgoc kpefacnugec manubesonga anec, fora. Nga \sc KEBUNGO\sc* ine meficnuec.   
\m
\v 14 \sc KEBU\sc* ye neac kuc nga yegecna. Yennoc neac memengerecna.   
\p
\v 15 Ngicngac dindingac yeneng firang amma kporucbedzonginau sogac sogaiac yegec heigec yegecngina negembisia. “\sc KEBUAC\sc* marifoingo faka bibiagoc amma firang andac.  
\v 16 \sc KEBUNGO\sc* marifoia miaru sawau yacde. \sc KEBUAC\sc* marifoiango faka bibiagoc amma firang andac.”   
\p
\v 17 Ni naric mi homebade. Ni ine gbori kecma \sc KEBUNGO\sc* uaya mekefec, imoc dekperagibade.  
\v 18 \sc KEBUNGO\sc* kopocsicnaac amma kpemeting ebirangoc anenec, fora. Nga homecac mariu mong mi fainuec.  
\v 19 Ngeni dindingac kekec womongamaac nagutoa witinenggec ni imohai emma \sc KEBU\sc* ubangerec memibade.   
\p
\v 20 \sc KEBUAC\sc* nagu yomoc nga ngicngac dindingac yeneng imohai enggecde.  
\v 21 Ge yoacna turunga merennenna memengerecna amma meficnunec. Imocac geac ubangerec megembade.  
\v 22 Amameme ngic yeneng hoc mong mangana dema ukugec. Nga hoc imocngo amaac hoc wotung amma seria nanude.  
\v 23 \sc KEBUNGO\sc* faka meu imocngo nenang kicfu wiac bibiagoc ande.  
\v 24 \sc KEBUNGO\sc* uamemenaso yomocnoc meu nenang naso yofinenggac sogaima ubangerec negenni.  
\v 25 O \sc KEBU\sc*, neni kpacsambic amma yofi dedimbe, “Ge ebicfunac mesinununa. O \sc KEBU\sc*, neni naric kecnideac gombunga anemmena.”   
\p
\v 26 Ngic \sc KEBUAC\sc* kpacfu erahade, ye kenehagoc. Neni \sc KEBUAC\sc* amau namma kenecngunukecdimbe.   
\p
\v 27 \sc KEBU\sc* ye Anutu. Yeng kperagi nemmeu imocngo mekperaginunuec amma mekperaginunuude. Ngeni ic maria sabayagoc maringinau mema arennu hakecma hombanggac sese mehagec, imoc witicngo arata baihau dedeckebisia.   
\p
\v 28 Ge Anutuna. Ni eriendzong megembade. Ge Anutuna, imocac afegubade.  
\v 29 \sc KEBU\sc* ye gombunga, yeng yoac dedzege amma imoc modackecde, faka imoc nasoya nasoya feengkefude, imocac ubangerec memibesonga.   
\c 119  
\s1 Kebuac dedeseriyoac  
\p
\v 1 Ngicngac yeni kopocsic mong mi meficgema kecma \sc KEBUAC\sc* dedeseri modacandae, yeni kenecnginagoc.  
\v 2 \sc KEBUNGO\sc* yoac ngicngac dekperagiyemmeu yeneng imoc modacma heregoc ye hofocandae, yeni kenecnginagoc amma  
\v 3 kopocsic mong mi meficgema yeac hanising modacma kengkecgecde.  
\v 4 \sc KEBU\sc*, geng dederecgeyoacga nemmena imoc serima modacnideac negennec.   
\p
\v 5 Ni geac singyoac seria tofohoma sing imoc hafoangoc yombong modacma kecbadeac yombong anende.  
\v 6 Ni geac nonoyoac sasawa hengkecba ngic yeneng game kpekpeu naric mi fainugecde.   
\m
\v 7 Ni geac dederecgeyoac dindingac negen negennau arenggeba herenau ikoc nga hamangec mong mi feu ge dengeregubade.  
\v 8 O, ni geac singyoac modacbade. Kebu ge ni mi ngadenuma wanudacna.   
\s1 Kebuac dedeseriyoac tofohobesonga  
\p
\v 9 Sebigbori medac ye singau garengemema uba kongaha kefude, sing imoc eng mi meficgeude, kpac. Ye geac yoac gombunga modacma garengemeude, imohai naric kefude,   
\m
\v 10 Ni heregoc hofocguduae. Geac nonoyoac kpebaiac garennuma kpae heinenna.  
\v 11 Ni yoacga kpema kopocsic meficgebaiac yoacga herena manau faiba feude.   
\p
\v 12 O \sc KEBU\sc*, kenecgubisina.\f + \fr 119:12 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Ge singyoacga kpounenna ni imoc negen negennau arenggema mekecbade.  
\v 13 Enacgaac dederecgeyoac sasawa, imoc enacbibicnango dekperagibade.  
\v 14 Ngicngac yeneng dzofinacnginaac sogaiandae, ni ifi isoc geac dedekperagiyoac negemma sing imoc modacma sogaibade.  
\v 15 Ni geac dederecgeyoac hennegeng amma imoc negensikecma kicna fima geac sing hengkecbade.   
\m
\v 16 Ni singyoacgaac ubangerec negemma geac yoac naric mi nigecnuude, kpac.   
\s1 Dedeseriyoacngo ubangerec meficgenende  
\p
\v 17 Ni, kingang ngicgango gbori kecma yoacga tofohobadeac gombunga anenna.  
\v 18 Wiac gombunga gombunga dedeseriyoacgau fede, imoc hembadeac kicna merecgena.   
\p
\v 19 Ni bangecfu kuric kecduae. Ge nonoyoacga nearunac mi mesufuna.  
\v 20 Ubaonganango nasosoc geac dederecgeyoac negembeso ammiu kuha kpac ambeso ande.   
\m
\v 21 Anutu ge ubakpekpe ngic yoac ngabasiric ayemmeannec, yeni geac nonoyoac wama ngadehema kecgec ge sowecyununec.   
\p
\v 22 Ni geac dedekperagiyoac modackecduaeac amma yeni desofoc nga desusuic anendae. Ge faka imoc meickenenna kpac ambeso.  
\v 23 Ngictau yeneac medacfocngina yeneng tacma ni memanganenugecdeac yoac denegeng angandae, fora. Nga ni, geac kingang ngicngo sifu geac singyoac hennegeng amma imoc negensikecbade.  
\v 24 Geac dedekperagiyoacngo ni ubangerec meficgenemma dederecge gombunga anenude.   
\s1 Dedseriyoac tofohobade  
\p
\v 25 Ubaonganango sendunggoc kpeketahema homebeso ande. Ge yoacga dema deserinec, imoc modacma kekecna monggoc megborina.  
\v 26 Ni haniana edeguba geng imocac turunga merennemma singyoacga kpounenna.  
\v 27 Geng meefainuna dederecgeyoacgaac sing negentegecma uaga bibiagoc hennegeng amma negensikecbade.  
\v 28 Ubaebicngo ubaongana meebiriu sisingaima kpac ambeso ande. Ge yoacga denec, imoc modacma monggoc meserinuna.  
\v 29 Ge ikocfakaunac onggonnuma ubangerec anemma dedeseriyoacga kpounenna.   
\m
\v 30 Ni yoac modac modac ngic ambeso negenduaeac sing imoc meisinggema kengkecduae. Ni dederecgeyoacga kicnau faiba fede.  
\v 31 O \sc KEBU\sc*, ge dedekperagiyoacga nennec imoc seria mekecduaeac goa yeneng desofoc anembauac kpae heiyemmebesena.  
\v 32 Ge negen negentegecna meyadikecna geac nonoyoacgaac sinnu nedzikecbade.   
\s1 Negen negentegec nembesena  
\p
\v 33 O \sc KEBU\sc*, ge singyoacga fainec, imocac sing kpounenna. Ni imoc negen negennau arenggema modacma kengkecba kekecna wisickebeso.  
\v 34 Ni dedeseriyoacga modacma heregoc imoc tofohobadeac negen negentegec nenna.  
\v 35 Nonoyoacgaac ubangerec negenduaeac sing imohai hesicnuna.  
\v 36 Ge herenaunac bangecac songo meickema geac dedekperagiyoacngo seria febeso.  
\v 37 Wiac hania hania uaya kpac fede, ni kicna imohai fibaiac kicna garenggena kekecna geac sinnu kengkecbeso.   
\p
\v 38 Ngicngac goi heigengandae, yeni wiac yemmebesonga deserima denec, imoc kingang ngicga nearu meserima edzacnuna.  
\v 39 Geac dederecgeyoac sasawa imoc gombunga. Game kpekpeu fainugec kengecgoc kecbaiac ebic imoc meickenenna.   
\m
\v 40 Ge fakaga dindingac imocac amma kekecna megborima kekec monggoc nenna. Negenna, ni geac dederecgeyoac negembadeac anende.   
\s1 Kebuac dedeseri negensima ruaegoc kecbade  
\p
\v 41 O \sc KEBU\sc*, geng yoac dedzege amma imoc modackecnec, geac faka imocngo nearu habeso. Ge ebicfunac mesinunadeac deserima denec, faka imocngo ifingoc nearu habeso.  
\v 42 Ifi anu ngic goa deendema anengandae, yeni turunga naric merengyemmebade. Ni geac yoac negenserima kecbade.   
\p
\v 43 Ni yoac forau kecma yoac fora dekecduae, imoc kpac ambacac ge imoc enacnaunac mi meickebesena. Ni geac dederecgeyoac negensikecba fora fingerudeac tomai kecduae.  
\v 44 Ni geac dedeseriyoac nasoya nasoya modackecbade.  
\v 45 Ni geac dederecgeyoac meficgebadeac ua mekefaiac witiha kpac kengha ambade.   
\m
\v 46 Ni ngictau yeneac kicfu ifingoc geac dedekperagiyoac ayemmeba game kpekpeu naric mi fainugecde.  
\v 47 Ni geac dedeseriyoacac songo negemma yoac imoc ubangerecgoc debade.  
\v 48 Ni nonoyoacgaac songo negemma marina miacma fendzonggema singyoacga hennegeng amma negensikecbade.   
\s1 Dedeseri hoanggema ruaegoc kecbade  
\p
\v 49 Ge ni, kingang ngicga yoac edenunec, imoc negenna febeso. Ge imoc denenna negensikecba fora fingerudeac tomai kecduae.  
\v 50 Geac dedeserigango kekec meficgenenu kpendzeng kpekecbare wiac imocngo meserinuude.   
\m
\v 51 Ngic Anutu ngadehema kecdae, yeneng deendema anengandae, fora. Nga ni sifu geac dedeseriyoac mong mi ngadehema wabade.  
\v 52 O \sc KEBU\sc*, ge dederecgeyoacga warac yombong denec, imoc negensikecba imocngo meserinuude.   
\p
\v 53 Ngic Anutu ngadehema mangana megecdeac ayemmeande, yeneng geac dederecgeyoac ngadehema wagec, imocac amma herebu negemba herena gerec dzeude.   
\m
\v 54 Ni yei kuricngic amma amanginau kecbare singyoacgango ubangerecyegecna anu heibade.  
\v 55 O \sc KEBU\sc*, ni tofocnac geac kpac kuneng negemba feu geac dedeseriyoac modackecduae.  
\v 56 Ni dederecgeyoacga modackecba imoc fingecnenu neac kenec ande.   
\s1 Uba hafoangoc  
\p
\v 57 O \sc KEBU\sc*, ge neac areng nga yeneng bangec isoc mederema noboha nenggec, imoc ge. Ni yoacga modacbadeac geac kicfu deserima deduae.  
\v 58 Ge neac negenna ngereeude, imoc meficgebadeac herenango hafoa uatoa meai. Ge yoac deserima denennec, imoc modacma wosoefac anenna.   
\m
\v 59 Ge faka modackecnec, imoc negensima geac dedekperagiyoacga modacbadeac nananna mengereba geac yoacgau kenude.  
\v 60 Ni naso mi ukuma geac nonoyoac bic yombong modacma uaya mebade.   
\p
\v 61 Ngic Anutu ngadehema mangana megecdeac ayemmeande, yeneac witicngo dedecnuande, fora. Nga ni geac dedeseriyoac sifu mong mi nigecnuude.  
\v 62 Ni tofocnac dzongiau yacma dedeseriga dindingac negemma imocac dengeregukecbade.   
\m
\v 63 Ngicngac geac eweheihei angandae nga dederecgeyoacga modacandae, yeneac ogongina.  
\v 64 O \sc KEBU\sc*, geng yoac dedzege amma imoc modacnade, fakaga imocngo bangec sokoma fede. Ge singyoacga kpounenna.   
\s1 Dedeseri imoc wiac engena  
\p
\v 65 O \sc KEBU\sc*, ge yoacga modacma ni, kingang ngicga, gombunga anengkecnec.  
\v 66 Ni geac nonoyoac negensinggeduaeac negen negentegec nga negengising faka gombunga kpounenna.  
\v 67 Ni kpendzenga kpac kefai, imohai sing segema kengkefai. Nga yofinenggac geac yoac modacbade.   
\m
\v 68 \sc KEBU\sc*, ge gombunga amma faka gombunga angannec. Ge singyoacga kpounenna.   
\p
\v 69 Ngic Anutu ngadehema kecdae, yeneng ikoc amma ngadeyoac dema enacfu faifai anengkecdae, fora. Nga ni sifu geac dederecgeyoac heregoc modackecbade.  
\v 70 Ngic Anutu wagec, yeni ubaseri amma tosofocngina yeneac ubamangang negenggecdeacsoc mi ande, fora.  
\m Nga ni sifu geac dedeseriyoacac ubangerec negengkecbade.   
\m
\v 71 Ge ebic meficgenennec, imoc negemba ngereede. Ge ifi anna geac singyoac haniaac negen negeng mema arenggekecbade.  
\v 72 Geac enacgaac dedeseriyoac, imocngo wiac engena ande. Imocngo ngereenende nga imoc hoc gol nga siriwango memea taoseng nga taoseng feracyunuude.   
\s1 Dedeseri imoc dindinga  
\p
\v 73 Geng meficnuma marigango menuma memengere anennec. Ni nonoyoacgaac negen negeng arenggema mekecbadeac anende. Ge imocac negen negentegec nenna.  
\v 74 Ni geac yoac negensiba fora fingerudeac tomai kefaiac amma ngicngac goa eweheihei anggengandae, yeneng nemma sogaigecde.   
\m
\v 75 O \sc KEBU\sc*, geac singyoac imoc dindingac nga gennoc yoac modac modac Kebu, imocac ebic meficgenennec, imoc negenduae.  
\v 76 Ge ni, kingang ngicga, yoac deserinennec. Ge yoac imoc modacma faka anenna. Geng yoac dedzege amma imoc modackecnec, ge efaima fakaga imocngo ni, kingang ngicga, meserinuna.  
\v 77 Ni dedeseriyoacgaac ubangerec negenduaeac ubamangang anenna gbori kecbade.   
\p
\v 78 Ngic Anutu ngadehema kecdae, yeneng hania kpacfu mangana anenggecac ge negemmana game kpekpeu faiyunubesonga. Ni geac dederecgeyoac hennegeng amma imoc negensikecbade.  
\v 79 Ge eweheiheigoc hoangguma kecandae, yeneng naric nearu hama geac dedekperagiyoac negembisia.  
\v 80 Ngicngac goa yeneng gameu fainubauac herenango geac singyoacfu seria kpeketaheu kopocsic mong mi meficgebesare.   
\s1 Naso dafiguc tomai kecbesare?  
\p
\v 81 Ubaonganango geac memengerecac ammikefu yoacga negensiba fora fingerudeac tomai kecduae.  
\v 82 Kicnango dedeseriga fora fingeru hembadeac fikecba kuha kpac anu yofi deanduae, “Ge hama meserinunade, naso imocac tomai kecduae.”   
\m
\v 83 Ni waing sebera hosucfu fekecma harandanggeande, ifi isoc anai, fora. Amma dedeseriyoacga sifu mi nigecnuec, kpac.  
\v 84 Ni, kingang ngicgango naso dafiguc ebicfu kecma tomai kecbesare? Ngic nukporac anengandae, yeni turunga yemmenade, naso imocac tomai kecduae.   
\m
\v 85 Ngic Anutu ngadehema kecdae, yeneng menugecdeac teng keme kemea usugec. Ngic imoc yeni geac dedeseriyoac kpema kecdae.   
\m
\v 86 Ge nonoyoac sasawa dekecnec, imoc yoac fora. Ngic yeneng ine ikoc amma nukporac anengkecdaeac meficnuna.  
\v 87 Yeni bangecfu kekecna kpetotiebeso anggec, fora. Nga ni sifu dederecgeyoacga mekecma imoc ngadehema mi wayai.   
\p
\v 88 Geng yoac dedzege amma imoc modackecnec. Ni enacgaac dedekperagiyoac modacbadeac fakaga imocngo kekecna onggonggena.   
\s1 Dedeseriyoac negensinggebesonga  
\p
\v 89 O \sc KEBU\sc*, geac yoac imoc kekecseri. Imoc nasoya nasoya kurumenga kurumenga, imohai fefeseri fekefude.  
\v 90 Ge yoacga modackecnec, imocngo fingecsahenina fekefudesoc, yenearu feengkefude. Geng bangec tatahau faina seria tarudengoc.  
\v 91 Geng yoac dema wiac sasawa faiyemmenec. Imocac amma imoc yofinenggac fedengoc. Wiac sasawa fedacde, yeni geac enac tofohogecde.   
\p
\v 92 Geac dedeseriyoacngo ubangerec mi meficgenembacfu kpendzennango mebucnuu kpac ambai.  
\v 93 Ge dederecgeyoacga faima kekec nennecac amma dederecgeyoacga naric mi nigecnuude.  
\v 94 Ni geac ngic nga dederecgeyoacga meficgebadeac ua mekefaiac ebicfunac mesinuna.   
\m
\v 95 Ngic Anutu ngadehema mangana megecdeac ayemmeande, yeneng memanganenuma meicnugecdeac tomai feandae, fora. Nga ni sifu dedekperagiyoacga negensima kecbade.   
\p
\v 96 Wiac gombunga nga sirihau, imoc sasawa hemba wisic wisickea feu maya kpesereai. Nga geac dederecgeyoac imoc maya kpac feecngoc fede.   
\s1 Dedeseriac songo negembesonga  
\p
\v 97 O, ni geac dedeseriyoacac songo homac yombong negemma asoacnac kemma marai imoc hennegeng amma negensima kecanduae.  
\v 98 Geac dedeseriyoac, imoc nasoya nasoya nearu fekecdeac imocngo ngabafocna feracyunuma negen negentegec homac meficgenenude.  
\v 99 Ni dedekperagiyoacga hennegeng amma negensikecduaeac negen negentegecgoc amma kpoukpoufocna feracyunubade.  
\v 100 Ni geac dederecgeyoac modackecduaeac ngicngac kifangina homac kecgec feracyunuma monggoc negentegecbade.   
\p
\v 101 Ni yoacga modacbadeac amma haninango yarengic yeneac sing mangana hania hania tibaiac hanina kpae heimima garenggekecbade.  
\v 102 Geng dederecgeyoacga kpounennecac amma imoc naric mi ngadehema wabade.   
\m
\v 103 Ni yoacga negemba songea yombong ande, enacnau imoc kukundzauac songea ferahade.   
\p
\v 104 Geac dederecgeyoacngo negen negentegec nenudeac sing ikoha sasawa imocac modzona tiude.   
\s1 Dedeseringo mekperaginunuude  
\p
\v 105 Geac yoac, imocngo haninaac kifa amma sinna mekperagiude.   
\m
\v 106 Ni dedeseriyoacga dindingac modacbadeac yoac deserima imoc meseriai.   
\m
\v 107 O \sc KEBU\sc*, ni ebicnagoc yombong kecduae. Ge yoacga modacma kekec nenna.  
\v 108 O \sc KEBU\sc*, ni efaima enacnango dedengerec sese megenduae, imocac negenna ngereebeso. Ge dederecgeyoacga kpounendacna negen negeng imoc arenggema mekecbade.   
\m
\v 109 Ni kekecna marinau mekecduae, fora. Nga dederecgeyoacga sifu mong mi nigecnuude.  
\v 110 Ngic Anutu ngadehema mangana megecdeac ayemmeande, yeneng botac faima menubesonga angandae, fora. Nga ni dederecgeyoacga modackecma sing mi segebade, kpac.   
\m
\v 111 Geac dedekperagiyoac, imoc nasoya nasoya maridzominna fefeseri fenenude. O, herenango imoc negemma sogaima kecbade.  
\v 112 Herenango geac singyoac nasoya nasoya angammemenango modacbadeac isinggeai, ni ifi kecba naso wisickeude.   
\s1 Dedeseri modacma ruaegoc kecni  
\p
\v 113 Ngic monde monde kecdae, yeneac modzona tiu geac dedeseriyoacac songo negengkecduae.  
\v 114 Ge sufu sufuamana nga kasona nga ni geac yoac negensiba fora fingerudeac tomai kecbade.   
\m
\v 115 Ni Anutunaac nonoyoac modacbadeac negenduae. Yarengic ngeni imocac wanuma kembisia.   
\m
\v 116 Ge yoac deserima denec, imoc modacma garennuna gbori kecbade. Ni negen negensina foragoc mi ambacac ngic yeni geng negemmana game kpekpeu mi fainubisia.  
\v 117 Ge marinau menuma nanggenuma onggonnuna. Ni geac singyoac negensima kecbade.   
\p
\v 118 Ngicngac sing segema singyoacga kpeandae, yeni ikocnginagoc kecgec uatoanginango fora mong mi meficgeude. Ge imocac ngadeyunudacnec.  
\v 119 Geng ngic Anutu ngadehema mangana megecdeac ayemmeande, yenenna seuc isoc angkecde, imocac amma ni dedekperagiyoacgaac songo negengkecduae.   
\p
\v 120 Ni geac kengec amba sebinango gbigbihekecde nga geng yoacna isinggema desinade, imoc negemma negengfagunggoc kecduae.   
\s1 Dedeseriyoac tofohobesonga  
\p
\v 121 Ni singyoac mi kpema faka dindingac angkefai. Ngic yeneng ebicfu fainubeso ambauac onggonnuma yeneac mariu mi fainuna.  
\v 122 Ni, kingang ngicgango naric kecbadeac nenggareng anenna. Nga ngic Anutu wama kecandae, yeneng ebicfu fainubauac geng onggonnuna.   
\m
\v 123 Ge faka dindingac modacma deserima ebicfunac mesinunadeac denec, imocac fora fingerudeac kicfifi kecba kicna kuha kpac ande.   
\m
\v 124 Geng yoac dedzege amma imoc modackecnec. Ge ni, kingang ngicga gombunga anemma singyoacga kpounenna.  
\v 125 Ni geac kingang ngic amma dedekperagiyoacga arenggema negembadeac negen negentegec nenna.   
\m
\v 126 Ngicngac yeneng dedeseriyoacga kpegecac \sc KEBU\sc*, ge efaina, uaga menadeac naso bic hade.   
\m
\v 127 Ni imocac geac nonoyoacac songo negenduae. Nga imocngo golac songo ferahaude, imoc goltegeng pirac pirac, imocac songo ferahaude.   
\m
\v 128 Ni imocac geac dederecgeyoac sasawa modacma imocac sing tikecma sing ikoha hania hania tibeso modzona tiude.   
\s1 Dedeseri modacbadeac anende  
\p
\v 129 Geac dedekperagiyoac imoc wiac engena, imocac ubaonganango imoc modackefude.  
\v 130 Ge yoacgaac nagu witina imocngo ngicngac mekperagiyemmema ngicngac negen negengngina efea, yeni negen negentegec yemmeude.   
\p
\v 131 Ni nonoyoacgaac homac anenu enacna anggema asoringa anenu kecanduae.  
\v 132 Ngicngac geac kpac kunenggaac songo negengandae, ge neneac anggengandeac nearugeng dzigenema neac ubaga manganeu.  
\v 133 Faka manganango kekecna garenggeu ngicngac ogofocna memanganeyunubaiac singtitina meserina. Ge yoac deserima denec, imoc modacbesare.  
\v 134 Ge meficnuna dederecgeyoacga modackecbade. Ngic yeneng ebicfu fainugec ubaebicgoc kecbaiac bummenuma yeneac witicfunac yungecnuna.  
\v 135 Ge ni, kingang ngicga kicmesugango nerarannuma singyoacga kpounenna.   
\m
\v 136 Ngicngac yeneng geac dedeseriyoac mi modacandaeac kickumanango doku isoc made.   
\s1 Dedeseriyoac monde mondea kpac  
\p
\v 137 O \sc KEBU\sc*, ge dindingac nga yoac isinggema foraya desiannec, imoc dindingac sasawa.  
\v 138 Ge dedekperagiyoacgaac sing dindingac modacma yoacga imoc faima modackecma fainemmenec.   
\m
\v 139 Ngabafocna yeneng geac yoac nigecyunuandeac herena gerec dzeu kpac ambeso anduae.   
\m
\v 140 Geng yoac deserima denec, imoc ngicngac bic tobanggegec fora ande. Nga ni, kingang ngicgango imocac songo negenduae.  
\v 141 Ni ngictehec nga sure surea, fora. Nga geac dederecgeyoac imoc naric mi nigecnuude.   
\m
\v 142 Geac dindingac kekec imocngo nasoya nasoya fefeseri feude nga geac dedeseriyoac, imocngo fora.  
\v 143 Ebic nga kpendzeng nearu fingecande, fora. Nga geac nonoyoacngo ubangerec meficgenenude.   
\m
\v 144 Geac dedekperagiyoac sasawango nasoya nasoya dindingac feengkefude. Ge negen negentegec nenna gbori kecbesare.   
\s1 Dedeseri negensikebade  
\p
\v 145 O \sc KEBU\sc*, ni heregoc kpacguduaeac negennenna. Ge ifi anna ni geac singyoac modacbade.  
\v 146 Ni gearu yofi kpacba, “Ni dedekperagiyoacga gombunga modacbadeac, ge ebicfunac mesinuna.”   
\m
\v 147 Negen negenna geac yoacfu faima tomai kecba ama mi wereckemmanu geng meficnunadeac yacma kpacgubade.  
\v 148 Ge yoac deserima denec, imoc tofocnacsoc hennegeng amma negensikecbadeac naso herea gaugbori kecanduae.   
\p
\v 149 O \sc KEBU\sc*, geng yoac dedzege amma imoc modacnade, imocac ubaudumenna negenna. Ge sing dindingac modacma ngic isinnunuma yoacnina desiannecac kekecna onggonggena.   
\m
\v 150 Ngic goa yeneng geac dedeseriyoacac hereau yombong kecma yarefaka megecdeac ayemmeu imoc arenggema neac wegenac hama nukporac anenggecde.  
\v 151 O \sc KEBU\sc*, geng sifu neac wegenac kecnecngoc. Geac nonoyoac imoc sasawa fora ande.  
\v 152 Ni geac dedekperagiyoac bicngoc negemma yofi negengkefai, “Geng yoac imoc fainec nga imoc nasoya nasoya feengkefude.”   
\s1 O Kebu, meficnuna  
\p
\v 153 Ni geac dedeseriyoac imoc mi nigecnuude. Ge imocac kpendzenna hemma imohacnac mesinuna.  
\v 154 Ge yoacfu meficnuma nanggenuma bummenuma yungecnuna. Ge yoac deserima denec, imoc modacma kekec monggoc nenna.   
\p
\v 155 Ngic Anutu ngadehema mangana megecdeac ayemmeande, yeni geac singyoac meficgegecdeac ua mong mi mekecdae. Yeni imocac geac memengerecac hereau kecdae.   
\m
\v 156 O \sc KEBU\sc*, geac ubamangang imoc wiac engena. Ge sing dingdingac modacma isinnunuma yoacnina desiannec, imocacsoc anenna kekecgoc ambade.  
\v 157 Ngic homacngo nukporac anemma ngaba anengandae, fora. Nga ni geac dedekperagiyoac sifu mong mi wabade.  
\v 158 Ngicngac goa yeni negen negensingngina kpac kecandae, yeni geac dedeseriyoac mi modacandaeac ni yenemma modzona tide.   
\m
\v 159 Kebu, ni geac dederecgeyoacac songotoa negenduaeac geng imoc negensikecna. Geng yoac dedzege amma imoc modackecnec, imocac kekecna onggonggena.  
\v 160 Yoacga sasawa imoc fora nga geac dederecgeyoac dindingac imoc sasawa tembuc tembuc nasoya nasoya feengkefude.   
\s1 Efaima dedeseri hoanggebisia  
\p
\v 161 Ngictauac medacfora yeneng hania kpacfu nukporac anengandae, fora. Nga herenango sifu geac yoac bibiagoc, imoc hengkefude.  
\v 162 Ngic mongngo finac hania hania buma kuneng bummema sogaiande, ni ifi isoc geac yoacac sogaibade.  
\v 163 Ni ikocfakaac negemba wiac mangana yombong anu imocac modzona tide. Nga geac dedeseriyoac, imocac songo negemma kecduae.   
\m
\v 164 Ni geac dederecgeyoac dindingacac amma uamemesoc naso seweng dengeregukecbade.  
\v 165 Ngicngac yeneng geac dedeseriyoacac songo negengandae, yeni ruae kekec kuneng meficgekecma wiac monnu tifotockema naric mi mayunuude.   
\m
\v 166 O \sc KEBU\sc*, ni geac memengerecac negensikecba imoc fingerudeac tomai kecma nonoyoacgaac uaya mekecduae.  
\v 167 Ubaonganango geac dedekperagiyoac modacma imocac songo kuneng negengkecduae.  
\v 168 Wiac sasawa angkecduae, imoc negennecac dederecgeyoacga nga dedekperagiyoacga modacbade.   
\s1 Kebu, ge meficnuna  
\p
\v 169 O \sc KEBU\sc*, kiacnango gearu hau ge negennenna. Yoacga modacma negen negentegecgoc ambadeac anenna.  
\v 170 Ni kpesi kpesi gearu haba geng negemma yoac deserima denec, imoc modacma ebicfunac mesinuna.   
\m
\v 171 Geng singyoacgaac negen negeng kpounengannecac enacbibicnango geac dedengerec yoac homac dekecbeso.  
\v 172 Geac nonoyoac imoc fora nga dindingac sasawa, imocac nedzarannango geac yoacac yegec gombunga heibeso.  
\v 173 Ni geac dederecgeyoac segerema meaiac marigango meficnunadeac efaima kecbesena.   
\m
\v 174 O \sc KEBU\sc*, geng ebicfunac mesinunadeac anende nga ni dedeseriyoacgaac songo negenduae.  
\v 175 Ge onggonnuna kekecnagoc ambadeac anenna dengereguma kecbade. Geac dederecgeyoacngo meficnubeso.  
\v 176 Rama sufu sufuyango sing segema kengande, ni ifi isoc sing segema kenai. Ni, kingang ngicgango geac nonoyoac mi nigecnuudeac hama meficnuna.   
\c 120  
\s1 Ruaengicac nunumu  
\d Hombannu kekenggac yegec.  
\p
\v 1 Ni ebicgoc kecma \sc KEBU\sc* kpacba yeng kiacna negemma turunga merennembeso.   
\m
\v 2 O \sc KEBU\sc*, ngic goa enacbibicngina ikohagoc nga nedzarangnginaunac ngic ogofocngina tobangyunugecdeac yoac maande, ge yenearunac mesinuna.  
\v 3 Nedzarang ge ngicngac tobangyununadeac yoacgoc kecnec, ge yoacna negenna. Ge noc wiac anggembesonga? Amma geac turunga noc wiac gembesonga?  
\v 4 Wasaingic yeneac tebemedaha nga icngina gerecyohohagoc, imoc genggecde.   
\p
\v 5 Ni nocac Meseke bangecfu kuric kecduae nga Kedare yeneac kporucbedzoac botucfu kecduae.   
\m
\v 6 Ngicngac ruaeac modzongina tiande, ngic ifia yenigoc naso hereangoc kefaiac modzona tide.  
\v 7 Ni ruaengic nga ruaeyoac deba yeneng ine dzikacac ngic andae.   
\c 121  
\s1 \sc KEBU\sc* ye kasonina  
\d Hombannu kekenggac yegec.  
\p
\v 1 Ni kicna tikiu fiba ende. Ni memeficac obohoduae, imocngo dahacnac haude, ifi kpesiduae.  
\v 2 \sc KEBUNGO\sc* kurumeng nga bangec meficgeec nga memeficna yearunac haude.   
\p
\v 3 Kebu genggareng anggengkecde, yeng gau mi feude, kpac. Ye haniga garenggeu seria nanu wiac mongngo meu goroc goroc naric mi anude.  
\v 4 Negenggec, Kebu Israe habu onggongyunuande, ye gaunec mong mi feande nga gau ebira mong mi feude.  
\v 5 \sc KEBUNGO\sc* onggongguma marifoigau nanu ge yeac debannu kecna  
\v 6 wenacfu wenacngo mi guude nga tofocnac afongo mi memanganeguude.   
\m
\v 7 \sc KEBUNGO\sc* onggongguu yarefaka hania hania fede, imocngo naric mi memaguude. Kebu ye kekecga onggonggeude.  
\v 8 Ge amaunac manade me amau ennade dena \sc KEBUNGO\sc* yofinenggac nga nasoya nasoya onggonggukefude.   
\c 122  
\s1 Ge ruaegoc kecbesena  
\d Hombannu kekenggac yegec. Dawidingo yegec yofi heiec.  
\p
\v 1 “Nenang \sc KEBUAC\sc* amau enni.” Yeneng ifi edenugec ubangerec negenai.   
\p
\v 2 O Yerusareng, neni hanininango geac naguusing ekemma odaga manau tinandimbe.  
\v 3 Yerusareng imoc taongtoa isoc megec nande. Imoc meserima mocgutoa megec ama nga ama wegenacfu ifi tackendae.  
\v 4 Nga ngicngac neni arenninasoc modacma imohai engandimbe. Imoc Israe areng neneac dema yoac deserigec fede. \sc KEBUAC\sc* ngicngac areng neneng ihai emma \sc KEBUAC\sc* kpac kuneng heiwayong meminide.   
\m
\v 5 Ihainoc fora dedeac ngictau tatac faigec homac tacdae, imoc Dawidiac esangabo yeneac ngictau tatac sasawa.   
\p
\v 6 Ngeni ruae Yerusarennu feudeac numubisia. “Geac songo negengandae, yeni naric kecma wiac monggac mi obohobisia.  
\v 7 Geac odaga manau ruae febeso. Nga amaherec amaga onggonggekecdae, imocac manau mangang kpangang mong mi febeso.”   
\p
\v 8 Sactosofocna nga ogofocna yeneng naric kecgecdeac amma yofi debade, “Geac ama manau ruaengo kecbeso.”   
\m
\v 9 \sc KEBU\sc* Anutuninaac ama, imocac gombunggac amma ngeneng naric kecgecdeac nunumu uatoa mekecbade.   
\c 123  
\s1 Ge neneac ubaga manganeu  
\d Hombannu kekenggac yegec.  
\p
\v 1 \sc KEBU\sc* ge kurumenga kurumenga imohai ngictau tatacgau tacna ni kicna gearu fiba erede.   
\m
\v 2 Kingang ngic yeneng ngic kunengnginaac negeung kecandae nga kingang naroang yeni ngac kunengnginaac negeung kecma kic fiandae. Negenna, nenang ifi isocngoc kicnina \sc KEBU\sc* Anutunina, yearu fikecmina yeng nenanggac ubea manganebeso.   
\p
\v 3 O \sc KEBU\sc*, ge ubamangang anemmena. Ngicngac yeneng homac deendema anemmegec imocac witiau kecdimbeac ubamangang anemmena.   
\m
\v 4 Ngicngac goa yeneng ebiha kpac kecma desofoc anemmegec naso herea monggoc bic ande. Nga ngic goa yenanggac negenggec engena yombong angkecde, yeni ngadenunuma desusuic anemmekecgec ubaonganinango ebic imoc mekecma gebeckpede.   
\c 124  
\s1 \sc KEBUNGO\sc* onggonnuude  
\d Hombannu kekenggac yegec. Dawidingo yegec yofi heiec.  
\p
\v 1 Israe ngeni yofi debisia, “\sc KEBUNGO\sc* nenanggoc mi kecbacfu neni dafi ambesonga obohobing.”   
\m
\v 2 Ngic yeneng yacma nunubeso anggec, imohai \sc KEBUNGO\sc* nenanggoc mi kecbacfu  
\v 3 yeneng nenanggac herebu kuneng negemma gboringoc gbokonunubau.  
\v 4 Tunggbaungngo meicnunubac me doku dundungngo nebucnunubau.  
\v 5 Amma dokutoa kucnginagoc yeneng semenunudacbau.   
\p
\v 6 \sc KEBU\sc* keneheni.\f + \fr 124:6 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Ye onggonnunuu yeneac enacfu mi ening.  
\v 7 Uficngic yeneng ufic faigec nga nengngo uficfunac woraande, ifi isoc woraing. Ufic imoc barackeu uficfunac woraing.   
\m
\v 8 \sc KEBUNGO\sc* kurumeng nga bangec meficgeec. Nga memeficnina imoc yeac kpacfu fede.   
\c 125  
\s1 Israe ye ruaegoc kecbeso  
\d Hombannu kekenggac yegec.  
\p
\v 1 Ngicngac \sc KEBU\sc* negenserima kecdimbe, nenang Siong tiki isoc. Wiac mongngo meu goroc goroc mi amma nasoya nasoya nangkefude.  
\v 2 Tikingo Yerusareng yerecgema tackendae, ifi isocngoc \sc KEBUNGO\sc* ngicngacfora yerecyunuma yofinenggac nga nasoya nasoya ifi kefude.   
\m
\v 3 Ngicngac dindingac yeni maringina sinema angammeme mangana ambauac. Ngic Anutu ngadehema mangana megecdeac ayemmeande, Anutungo yeni kpae heiyemmeu ngictau yasunginango ngic dindingac yeneac bangec naric mi garenggeude.   
\p
\v 4 O \sc KEBU\sc*, ngicngac gombunga nga herenginau ikoc nga hamangec mong mi fede, geng yeni faka gombunga ayemmena.  
\v 5 Ngicngac goa ine efaima sing mangana noboc noboc modacgec \sc KEBUNGO\sc* yarengic meicyunuma yeni ifingoc yenigoc meicyunuu kenggec kpemeting ayemmeude.  
\p Ruaengo Israe areng yenearu febeso.   
\c 126  
\s1 Sionggac kekec mengerena  
\d Hombannu kekenggac yegec.  
\p
\v 1 \sc KEBUNGO\sc* Siong monggoc mengereu ngicngacfora naric kecgec, naso imohai nenang negenni imoc gau negendimbe isoc anec.  
\v 2 Nenang enacbibicfu dzomocngo wakeu sogac sogaiac yegecngo nedzaranninau feu bangec monnunac ngicngac botucnginau degec, “\sc KEBUNGO\sc* yeni wiac kuneng yombong ayemmeec.”   
\m
\v 3 \sc KEBUNGO\sc* wiac kuneng yombong anemmeecac nenang sogac sogaingo mewakenunuude.   
\p
\v 4 O \sc KEBU\sc*, ge Negewe bangec kisiu dokukperemeng gbangge gbanggea, yeni mengereyununa doku monggoc haande, ge ifi isoc monggoc mengerenununa naric kecni.  
\v 5 Ngicngac kickumagoc wiac homecandae, ngeni sogac sogaigoc arohoma fora megecde.  
\v 6 Ngicngac ngeni kiac ubamanganggoc kemma wit komoha tofohoma ngade wit gbomea bodangagoc tofohoma amanginau dzigene hama sogaima arohogecde.   
\c 127  
\s1 Nambarac nemmeude  
\d Hombannu kekenggac yegec, Soromongngo yegec yofi heiec.  
\p
\v 1 \sc KEBUNGO\sc* ama mi meudeu ngic yeneng uatoa mema ama mekecdae, imocngo memefihagoc mong mi anude, kpac. \sc KEBUNGO\sc* amabangec mi garenggeudeu ama gareng yeni gaugbori anggec uangina sifu memefihagoc mi anude.  
\v 2 Ngeni neneyaka meficgegecdeac asoac bic yacma uatoa mema kecma fefe nasongina ferahakecma uamemeac negengyohocgoc kecma yakangina nekecgecde, imoc ifingoc memefihagoc mi anude. \sc KEBUNGO\sc* ngicngac songogoc hoangyunude, yeni gau femagec yaka meficgeyemmeude.   
\p
\v 3 Negenggec, nambarac sasawa yeni \sc KEBUARUNAC\sc* maridzoming nga ngac hereaunac fora fingecande, imoc uanginaac bung.  
\v 4 Wasaingicac mariu tebemedaha homac femide, ngic sebigboringo medacfocngina meficyunuu kecdae, yeni medacfocnginagoc kecma wasaingic imoc isoc andae.  
\v 5 Ngic mong ye medacfora ifia homac kpedzucyunuma meyunukecde, ye kenehagoc.  
\p Ngabafora taong naguu yoacfu nangandae, yeng imohai yenigoc nanu yeneng game kpekpeu naric mi faigecde.   
\c 128  
\s1 Kebu eweheihei ammini  
\d Hombannu kekenggac yegec.  
\p
\v 1 Ngicngac \sc KEBUAC\sc* eweheiheigoc kecma yeac sing modacandae, yeni sasawango kenecnginagoc.  
\v 2 Ge ua marigango mena fora fingeru menec amma sogac sogaigoc kecma naric kecnade.  
\v 3 Enenggango amaga manau kecde, ye waing ic fora homac amma nangande, ifi isoc anude. Nga nambaracfocga yeneng oriwa benama, ifi isoc tatacga yerecgema tackenggecde.  
\v 4 Negenggec, ngic mong \sc KEBU\sc* eweheimima kefude, yearu kenec ifinoc feude.   
\p
\v 5 \sc KEBUNGO\sc* Sionnu kecma kenecguu. Yerusareng ye naric kecma wiac monggac mi obohoude, imoc hembesena.  
\v 6 Ge esafocga fingecgec yenennade.  
\p Ruaengo Israe areng yenearu febeso.   
\c 129  
\s1 Ngicngacfora mefinunuude  
\d Hombannu kekenggac yegec.  
\p
\v 1 Israengo yofi debeso, “Ni sebigborinaungoc kecbareng ngic yeneng ebic kunennu fainugec.”  
\v 2 “Ni sebigborinaungoc kecbareng ngic yeneng ebic kunennu fainukecma firang mong mi anggec.  
\v 3 Bangec mendzic mendzic yeneng bangec mendzicgec areng fingecande, yeni ifi isoc ngadenau kpendzicgec areng herea fingecgec.”   
\p
\v 4 \sc KEBU\sc* ye dindingac. Ngic Anutu ngadehema mangana megecdeac ayemmeande, yeng yeneac witic herecgema yungecnunuec.  
\v 5 Ngicngac Siong ubanginango ukuandae, yeni merengyunugec yeni game kpekpeu faiyunugec monggoc dzigenema kembisia.   
\m
\v 6 Yeni ama witiau kpindzingngo erema bic homeande, ifi isoc ambisia.  
\v 7 Mekpedzuc ngicngo imoc meudeac maria mi sineude nga semeng dedeckeande, imoc mi abaranggema mekenude.  
\v 8 Ngicngac goa yeni kengha angandae, yeneng yofi naric mi degecde, “\sc KEBUNGO\sc* kenecngunuu. Neni \sc KEBUAC\sc* kpacfu kenecngunudimbe.”   
\c 130  
\s1 Kebu, ni kpacguduae  
\d Hombannu kekenggac yegec.  
\p
\v 1 O \sc KEBU\sc*, ni ubaebicnagoc emu keme kemeau isoc kecma kpacguduae.  
\v 2 Kebu, ge enacudumenna negemma kedzac kpena. Kpesi kpesina gearu hade.   
\p
\v 3 O \sc KEBU\sc*, ge kopocsicnina kicgau arenggema negenna febacfu ngic mongngo serima naric mi kecbac.  
\v 4 Nga gearu sifu kopocsic wawa fedeac eweheiheigoc hoanggubesonga.   
\p
\v 5 Ni \sc KEBUAC\sc* tomai kecduae. Ubaonganango tomai kefu ni yeac yoac negensikecma fora fingerudeac tomai kecduae.  
\v 6 Tofocnacgareng yeneng asoac haudeac tomai kecandae, ni yeni feracyunuma ubaonganango \sc KEBUAC\sc* tomai kecduae. Ni yeac tomai kecduae amma monggoc ferahama tomai kecduae.   
\p
\v 7 \sc KEBUNGO\sc* yoac dedzege amma imoc modarude. O Israe, ge \sc KEBU\sc* negensima fora fingerudeac tomai kecna. Yeng bummenunudacma ebicfunac mesinunuudeac kuc engena femide.  
\v 8 Israe areng yeni ngicngac ogofocngina memanganeyunuma kopocsicnginagoc anggec. Nga yennoc bummeyunuma manganameme fakanginaunac mesiyunuude.   
\c 131  
\s1 Wiac monggac mi ammide  
\d Hombannu kekenggac yegec. Dawidingo yegec yofi heiec.  
\p
\v 1 O \sc KEBU\sc*, herenau sebiengeng mi anganduae nga ubakpekpe arennu kicna wi mi meemma fibade. Wiac kuneng me bibiagoc amma ni feracnuma neacsoc mi ande. Ni imocac negen negeng ua mi mebade.  
\v 2 Ubaongana menomaneba waicke fede. Sabac mongngo nonggeaac namu nema waicke feande, ubaonganango ifi isoc waickema fekecde.   
\p
\v 3 O Israe, ge yofinenggac amma nasoya nasoya Kebu negensina fora fingerudeac tomai kecbesena.   
\c 132  
\s1 Dawidi nga Siong meisingyuruec  
\d Hombannu kekenggac yegec.  
\p
\v 1 O \sc KEBU\sc*, Dawidingo ebicfu engkefec, imoc negenna feu yeac negenna ngereebeso.  
\v 2 \sc KEBU\sc*, Yakoboac Anutu Kuctoa mingina, ge yomoc negensibesena, yeng geac yoac deserima yofi deec,  
\v 3 “Ni amana manau mi embade me fefenau naric mi febade,  
\v 4 ni kicna gauac kpetarimima gau naric mi febade  
\v 5 kecma \sc KEBU\sc* geac amatatac nga Kuctoa mingina Yakobogoc kecande, geac amagerec meficgebade.”   
\p
\v 6 Negenggec, neni Efrata bangecfu Anutuac dzadzahac katapaac siduc negemma Yara manennu imoc meficgeing.  
\v 7 “Hagec \sc KEBUAC\sc* amau kenni, nenang yeac hanitatahau fafoc heimima numumini.   
\m
\v 8 O \sc KEBU\sc*, ge yacma kucgaac katapagoc tacnegeng amagau hana.  
\v 9 Womong garenga, ngeni dindingac kekec heigec kemebeso nga ngicngacfora kpetiac kecandae, ngeneng desogai amma arohobisia.”   
\p
\v 10 Ge kingang ngicga Dawidiac gombunggac amma ngicga kerecngo nadzicminec, ye mi ngadehebesena.  
\v 11 \sc KEBUNGO\sc* yoac deserima Dawidi yoac edeec, imoc naric mi meickeude. Ye yofi deec, “Ni geac bangecyombongga yeneac arennunac medacga mong meisinggema ye ngictautatacgau faiba tacbeso.  
\v 12 Neac dzadzahac nga dedekperagiyoacna kpouyemmeba geac medacfocga yeneng imoc modacgecdeu yeneac medacfocngina ifingoc geac ngictau tatacfu nasoya nasoya takecgecde.”   
\p
\v 13 \sc KEBUNGO\sc* Siong meisinggema ihai kefudeac ammide.  
\v 14 Ye yofi deec, “Ni ama yomocac negensongo negengkecba imocngo nasoya nasoya neac tacnegeng ama seria anu imohai tacyac ambade.   
\m
\v 15 Nga imohai wiac sasawa fede, imoc homac yombong kenehebade. Yeac ngicngac makpekpea semeng gumecyunuba negebec anggecde.  
\v 16 Ni womong garengfora ebicfunac yungecyunubade, faka imoc ngakpi isoc heiyemmeba kemeu kecgec ngicngacfora kpetiac kecandae, yeni sogac sogaiac yegec heigecde.   
\m
\v 17 Ni imohai Dawidiac arennununac ngic mong faima yeac kuc heigboriba besaiude. Ni ngicna kerecdokungo nadzicmiba kefu yeac kifa mong mengeremiai.  
\v 18 Nga yeac ngabafora yeni ine game heiyemmeba kemeude. Ni ngictauac ira pirac pirac heimiba kemeu imocngo ye mekperagiude.”   
\c 133  
\s1 Kopocsic waemema kecbesonga  
\d Hombannu kekenggac yegec. Dawidingo yegec yofi heiec.  
\p
\v 1 Negenggec, ngicngac daramuna ngeneng negen negengngina kpeturanggema ruaegoc kecandae, imocngo wiac songea yombong.  
\v 2 Faka imocngo kerec homuna gombunga nga buma kuneng, imoc orucfu kpakegec mama ngebacdzo momoc nadzicmiande, ifi isoc. Imoc Aronggac ngebacdzou mama ferecgema ngakpia ubiau ifingoc nadzicmiude.  
\v 3 Imoc Herimong tikiac songoroc, ifi isoc. \sc KEBUNGO\sc* Siong tikiu keneha nga kekeha wisic wisickea kpac kpakenemmeude, imocngo imohai mama kecde.   
\c 134  
\s1 Maraiac dedengerec yegec  
\d Hombannu kekenggac yegec.  
\p
\v 1 \sc KEBUAC\sc* kingang ngic \sc KEBUAC\sc* amau tofocnac nangandae, ngeni sasawango hadacma \sc KEBU\sc* kenehebisia.\f + \fr 134:1 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f*  
\v 2 Ngeni maringina miacma amabangec kpetiac, imohaigeng maringina sinema \sc KEBU\sc* kenehebisia.   
\m
\v 3 \sc KEBUNGO\sc* kurumeng nga bangec meficgeec, yeng Sionnu kecma kenecgubeso.   
\c 135  
\s1 Kebu ye damu damuyagoc  
\p
\v 1 \sc KEBU\sc* yaiyo kpemini, hallelu Yac. \sc KEBUAC\sc* kpac kuneng heiwayong memibesonga. O \sc KEBUAC\sc* kingang ngic sasawa, ngeni ye dengerebisia.  
\v 2 \sc KEBUAC\sc* amau nga Anutuninaac womong sobengau nangandae,  
\v 3 ngeni \sc KEBU\sc* ohec waec memibisia nocac \sc KEBU\sc* ye gombunga. Ye wosoefac anemmeandeac yeac kpac kuneng heiwayong memima yegec heimibisia.   
\m
\v 4 \sc KEBUNGO\sc* Yakobo yengena areng segerema Israe yengena areng yombong anggecdeac meisingyunuec.   
\p
\v 5 \sc KEBU\sc* ye kuneng, imoc negenduae. Nenang Kebu yeng anutu hania hania sasawa feracyunudacde.   
\m
\v 6 \sc KEBUNGO\sc* wiac mong meudeac songo meficgema imoc naric kurumennu me bangecfu me kondunnu me keme kemea hania hania fekendae, imohai uaya meude.  
\v 7 Yennoc bangec tegiau hoeng uayoac yemmeu yacgecde. Nga yeng kia nga piratac meficyuruu heiandape nga firang tohongameaunac memau ngadeau mama fingecande.   
\p
\v 8 Yennoc Aigita ngic yeneac warac medacfocngina nga rama burumakanginaac warac areng kpebucyunudarec.  
\v 9 O Aigita bangec, ye gearu hama geac botucfu negensinggegecdeac faka kuhagoc amma kucfaka bibiagoc sueyunuu fingecma Farao nga habufora memanganeyunuec.  
\v 10 Ye firang amma bangec monnunac ngicngac homac yunuma ngictau kucnginagoc kpebucyunudarec.   
\m
\v 11 Ye Amori yeneac ngictau Sihong kpema Basang bangecac ngictau Ogie kpema Kanaanggac ngictau sasawa yunuma  
\v 12 bangec maridzoming dema ngicngacfora Israe yemmeec. Ye maridzominga imoc yemmeec.   
\p
\v 13 O \sc KEBU\sc*, geac kpac kuneng imoc nasoya nasoya feengkefu ngicngac esamedacfocngina fingecsahe anggecde, yeneng geac kpac kuneng negenggec feude.  
\v 14 \sc KEBUNGO\sc* yoacfu ngicngacfora nanggeyunuu yeni yoacfu firang ambisia. Ye kingang ngicfora yeneac ubea manganeude.   
\p
\v 15 Bangec monnunac ngicngac yeni nemuongangina siriwa nga gol tegengngo memea. Yeni bangecngic yeneac marikibisac andae.  
\v 16 Yeni enacbibicnginagoc nga yoac ine naric mi degecde. Yeni kicnginagoc nga kicnginango ine wiac naric mi henggecde.  
\v 17 Yeni kedzacnginagoc nga kedzacnginango ine wiac mong mi negemma enacnginausing asu mong mi heigecde.   
\p
\v 18 Ngic nemuonga meandae, yeneng nemuonga isoc anggecde. Ngicngac yeni nemuonga negenseriandae, ngicngac ifia yeni sasawango nemu ongangina isoc andacgecde.   
\p
\v 19 O Israeac areng, ngeni \sc KEBU\sc* kenehebisia.\f + \fr 135:19 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* O Aronggac areng ngeni \sc KEBU\sc* kenehebisia.  
\v 20 O Rewiac areng, ngeni \sc KEBU\sc* kenehebisia. Ngicngac ngeneng \sc KEBU\sc* eweheiheigoc hoanggema kecandae, ngeni \sc KEBU\sc* kenehebisia   
\m
\v 21 Ngicngac Sionnu kecdae, ngeni \sc KEBU\sc* Yerusarennu kecande, ye kenehebisia. \sc KEBU\sc* eriendzong memibesonga, hallelu Yac.   
\c 136  
\s1 Kebuac wosoefac  
\p
\v 1 \sc KEBU\sc* ye gombunga, imocac ubangerec memibesonga. Yeng yoac dedzege amma imoc modackecde, faka imocngo fefeseri feengkefude.  
\v 2 Anutu hania hania yeneac Anutu ubangerec memibesonga. Yeng yoac dedzege amma imoc modackecde, faka imocngo fefeseri feengkefude.  
\v 3 Kebu yeneac Kebu ubangerec memibesonga. Yeng yoac dedzege amma imoc modackecde, faka imocngo fefeseri feengkefude.   
\p
\v 4 Kebu kucfaka bibiagoc mekecde, ye ubangerecyoac memibesonga. Yeng yoac dedzege amma imoc modackecde, faka imocngo fefeseri feengkefude.   
\m
\v 5 Kebu wiac sasawa negentegecma kurumenga kurumenga meficyunuec, yeac marikibi gombunga yombong ande nga ye ubangerec memibesonga. Yeng yoac dedzege amma imoc modackecde, faka imoc fefeseri feengkefude.   
\m
\v 6 Kebu doku witiau bangec faiec, ye ubangerec memibesonga. Yeng yoac dedzege amma imoc modackecde, faka imocngo fefeseri feengkefude.  
\v 7 Anutu kperagia kuneng faiyuruec, ye ubangerec memibesonga. Yeng yoac dedzege amma imoc modackecde, faka imocngo fefeseri feengkefude.  
\v 8 Ye wenacngo hadzing garenggeudeac faiec. Yeng yoac dedzege amma imoc modackecde faka imocngo fefeseri feengkefude.  
\v 9 Ye afo nga asomeng yeneng tofocnac garenggegecdeac faiyunuec. Yeng yoac dedzege amma imoc modackecde, faka imocngo fefeseri feengkefude.   
\p
\v 10 Kebu Aigita bangecfu waracmedacfocngina kpebucyunuec, ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.   
\m
\v 11 Ye Israe areng yeneac botucfunac hesicyunuu kenggec, ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.  
\v 12 Ye mariseria nga kuctoayagoc amma maria sinema ua imoc meec. Yeng yoac dedzege amma imoc modackecde, faka imocngo fefeseri feengkefude.  
\v 13 Kebu kondung sacsac kpendziru yohockang anec, ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.  
\v 14 Ye Israe areng sing faiyemmeu yeneng imocac dzongiau ferecgegec. Ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.  
\v 15 Yeng firang amma Farao nga wasai arengfora heimerengyunuu kondung sacsacngo semeyunuec. Yeng yoac dedzege amma imoc modackecde, faka imocngo fefeseri feengkefude.   
\p
\v 16 Ye ngicngacfora meyunuma bangec gbangge gbanggea feec, imohai wangecyunuma kenec, ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.  
\v 17 Kebu firang amma ngictau kucnginagoc yunuec, ye ubangerec edebesonga. Yeng yoac dedzege amma imoc modackecde, faka imocngo fefeseri feengkefude.  
\v 18 Ye firang amma ngictau kpac kunengnginagoc yunuec. Yeng yoac dedzege amma imoc modackecde faka imocngo fefeseri feengkefude.   
\m
\v 19 Ye firang amma Amori ngic yeneac ngictau Sihong kpeec. Yeng yoac dedzege amma imoc modackecde faka imocngo fefeseri feengkefude.  
\v 20 Ye firang amma Basang yeneac ngictau Oge kpeec. Yeng yoac dedzege amma imoc modackecde, faka imocngo fefeseri feengkefude.   
\p
\v 21 Ye yeneac bangecngina maridzoming dema ngicngac areng mong yemmeec. Yeng yoac dedzege amma imoc modackecde, faka imocngo fefeseri feengkefude.  
\v 22 Ye maridzoming dema bangec imoc kingang ngiha Israe miec. Yeng yoac dedzege amma imoc modackecde, faka imocngo fefeseri feengkefude.  
\v 23 Neni sure surea kecmina yennoc neneac negenu feec. Yeng yoac dedzege amma imoc modackecde, faka imocngo fefeseri feengkefude.  
\v 24 Ye ngabafocnina yeneac mariunac mesinunuec. Yeng yoac dedzege amma imoc modackecde, faka imocngo fefeseri feengkefude.   
\p
\v 25 Yennoc wiac sasawa meficyunuma kekecnginagoc anggec semeng yemmeude. Yeng yoac dedzege amma imoc modarude, faka imocngo fefeseri feengkefude.   
\m
\v 26 O, kurumenggac Anutu ubangerec memibesonga. Yeng yoac dedzege amma imoc modackecde, faka imocngo fefeseri feengkefude.   
\c 137  
\s1 Babirong doku tegiau  
\p
\v 1 Neni Babirong bangecac doku tegiau tacma Siong negensima kiacma  
\v 2 gitanina ic fawau gbedickeing.   
\m
\v 3 Ngic yeneng menunuma kemma ebic meficgenemmegec, yeneng ubangerec meficgegecdeac degec, “Ngeni Sionggac yegec heigec negenni.”   
\m
\v 4 Neni ine kuric bangecfu kecma \sc KEBUAC\sc* yegec heinideac obohodimbe.   
\p
\v 5 Yerusareng, ni geac nigecnuudeu marifoinango dzanggema kuha kpac ambeso.  
\v 6 Yerusareng imoc neac sogac sogaiac enaratoa, ni ifi mi negemma geac nigecnuudeu nedzarannango ngorucbonnau mendanggebeso.   
\p
\v 7 O \sc KEBU\sc*, ngic yeneng Yerusareng kpetotiegec, naso imohai Edonggac ngic yeneng degec, “Kpembarackegec, kpembarackegec mama seringau wisickeu.” Kebu ge imoc negenna febeso.   
\m
\v 8 O Babironggac naroang, ge kpetotiegugecdeac areng, imoc bic degenggec. Ge mangana anennecac ngic mong ye imocac turunga merenude, ye kenehagoc.  
\v 9 Mong ye geac sabac mema hoc peperandziu yunuma kpebucyunuude, ye kenehagoc.   
\c 138  
\s1 Wi yombong kecde  
\d Dawidingo mitiyegec yofi heiec.  
\p
\v 1 O \sc KEBU\sc*, ni heregoc ubangerec megemma anutu hania hania kecdae, yeneac kicfu geac dedengerec yegec heigembade.  
\v 2 Ni womongga kpetiacfubigeng ngonducnebade. Geng yoac dedzege amma imoc modacnade amma ge yoac modac modac Kebu, imocac kpac kunenggaac ubangerec dekecbade. Ge kpac kunenggagoc nga geng yoacga deserima denec, ge wiac imoc miacna enu imocngo wiac sasawa feraheude.  
\v 3 Ni kpacguai naso imohai geng turunga merennenna kengeha kpac amma serima kecbadeac anennec.   
\p
\v 4 O \sc KEBU\sc*, bangecac ngictau sasawa yeneng geac enacgaunac yoac negenggecac dengeregubisia.  
\v 5 \sc KEBUAC\sc* kuc nga kibikperagitoa, imoc wiac engena. Yeni imocac \sc KEBUAC\sc* sing fekende, imocac yegec heigecde.   
\m
\v 6 \sc KEBUNGO\sc* wi yombong kecde, fora, amma ye sifu ngictehec nenang nenenggareng anemmekefude. Ngicngac goa yenanggac nengenggec engena angande, yeng herenginau kecma fakangina negenude.   
\p
\v 7 Ni ebic witiau kecduae, fora. Nga geng sifu kekecna onggonggekecnec. Ngabafocna yeneng herebu anenggec geng mariga sinema marifoigango ebicfunac mesinunade.  
\v 8 \sc KEBUNGO\sc* efaima neac kekecareng uayagoc faima imoc sasawa nearu mesidarude.  
\m O \sc KEBU\sc*, geng yoac dedzege amma imoc modackecnade, fakaga imocngo nasoya nasoya feengkefude. Ge marikibiga mi ngadehema wana.   
\c 139  
\s1 Kebu ge negennunec  
\d Yegecgareng yearu. Dawidingo mitiyegec yofi heiec.  
\p
\v 1 O \sc KEBU\sc*, ge neac herena hennegeng amma negennunec.  
\v 2 Ni takecduae nga yacma nangkecduae, geng imoc sasawa negendacma hereaungoc tacma negen negenna hentegecdacnec.  
\v 3 Ni kengha anduae nga fefenau feduae, imoc hennegeng amma sing sasawa kenganduae, imoc negendacnec.   
\m
\v 4 O \sc KEBU\sc*, ni yoac debesonga enac mi anggebareng geng yoac imoc bic negendacnec.  
\v 5 Ge kicnau nga ngadenau oronnukecma marigau fainuma menunade.   
\m
\v 6 Negen negeng ifia imoc keme kemea nga engenatoa amma kuneng andeac imocac ubangerec negenduae, fora. Nga imoc sifu naric mi negentegecbade.   
\p
\v 7 Ni ihai me ihai kembadesoc geac Asuarunac agac naric mi kecbade. Nga geac kicfu kekec, imoc wama sufubadeacsoc mi anduae.  
\v 8 Ni kurumennu embadeu ge ihainoc kecnec. Nga homec amau kemema fefena faima fema naric mi sufubai nocac ge ihai ifingoc kecnec.  
\v 9 Ni asoac ama negenggac kpegang kpema kpututuckebade me kondung tegiau edi noboc kemma ihai tacbaiu  
\v 10 ge marigango ihai ifingoc hesicnuma marifoigango seria menunade.   
\m
\v 11 Ni yofi gedang debai, “Kundungngo semenuu kperagia nearu fede imoc kundung kpebeso.”  
\v 12 ifi deba kundung imoc ine geac kicfu kundung mi anude, kpac. Nga tofocnac imoc wenac isoc kperagiude. Nocac kundung imoc geac kicfu kperagi angkecde.   
\p
\v 13 Geng ubaherena sasawa meficgema nonggo heremanau kecbare geanggaoc sebifusina nga ubaherena kpedzucnema meficnunec.  
\v 14 Ge meficnuma menunec imoc faka bibiagoc nga damuyagoc annecac dengeregubade. Geng uaga mekecnec, imoc wiac bibiagoc yombong, imoc negengyombonggeduae.  
\v 15 Geng sufu sufuu menunec, imohai ni forakebannagoc kicgango bic nennec. Sebina imoc emu bangec keme kemeau feu geng kpedzucnunec.  
\v 16 Sebinango mi torokpemanungoc kicgango sebinaac hanac hanahea hennec nga uamemena mong mi hamanungoc imoc sasawa tembuc tembuc geac kibiu oho ohoya fede.   
\m
\v 17 O Anutu, geng wiac negensiannec, imocac negemba wiac engenatoa ande. Imocac ni imoc kpeturanggeba kpetea engena yombong fingerude.  
\v 18 Imoc homac yombong sangi ferahadeac imoc osobesonga osiduae. Nga gborima yacbade, imoc gegocngoc kecbade.   
\p
\v 19 O Anutu, ngic Anutu ngadehema mangana megecdeac ayemmeande nga ngic sacnina hetinggegecdeac ayemmeande, yeni kpebucyununa wanubisia, imocac yombong anende.   
\m
\v 20 Yeni mangana negemma geac yoac deandae nga ikoc fingerudeac ngabafocga nanggeyunugecde.  
\v 21 O \sc KEBU\sc*, ngic geac modzongina tiande, ni yeneac modzona homac tide. Ngicngac yeneng geac yoac kpeandae, yeni manganaac areng, ifi negemma wayunudacbade.  
\v 22 Foracngoc, ni yeneac modzona tiu ngicngac imoc yeni ngabafocna, ifi negemma ubango ukuyunubade.   
\p
\v 23 O \sc KEBU\sc*, ge herena isinggema herenaac hania hennegeng amma faitobang anemma negen negenna henna.  
\v 24 Ni manganaac sinnu kengkecduae me kpac, imoc hennegeng amma sing feengkefude, imohai hesicnuna.   
\c 140  
\s1 Ngicngac memanganenubauac  
\d Yegecgareng yearu. Dawidingo mitiyegec yofi heiec.  
\p
\v 1 O \sc KEBU\sc*, ge yarengic yenearunac yungecnuma ngic mangana herebunginagoc yenearunac onggonnuna.  
\v 2 Yeni herenginau yarefaka hania hania arenggema nasosoc dzikac kpegecdeac sing meficgekecdae.  
\v 3 Yeni nedzarangngina dzomugec boidzocac nedzarang enaragoc, ifi isoc anude. Yeni ngedzarangnginango ikoc ayemmeandae amma bibicnginau boidzocac marasing mekecdae. \it Selac\it*   
\p
\v 4 O \sc KEBU\sc*, ngic Anutu ngadehema mangana megecdeac ayemmeande, yeneac mariunac onggonnuna. Yarengic yeneng hanina kpesigecdeac negensima areng faigec ge onggonnuna.  
\v 5 Ubakpekpe ngic yeneng botac mong mesufuma faima menubeso angkecdae. Yeni witic mema ufic faima suba sing tegiau faima menubeso angkecdae. \it Selac\it*   
\p
\v 6 \sc KEBU\sc* yoac yofi ededuae, “Ge neac Anutu.” O \sc KEBU\sc*, ge neac ubaga manganeudeac kpacguba ge kedzac kpema negembesena.   
\m
\v 7 O \sc KEBU\sc* Kuctoa mingina, ge neac yungec yungecna seria. Geng dzikac nasou orucna garenggema onggonnunec.  
\v 8 O \sc KEBU\sc*, ngic Anutu ngadehema mangana mebeso ayemmeande, yeni yenanggac negenggec wiac engena ambaac songongina modacma wiac mong mi meficgeyemmebesena. Yeni yarefaka arenggekecdae, imoc fora mi fingecbeso. \it Selac\it*   
\p
\v 9 Ngic ni oronnudae, yeni enacbibicnginango yoac dema ngicngac ebicfu faiyunuandae. Ebic imocngo geng negemmana orucngina semeu  
\v 10 gerec seriango kia isoc witinginau mabeso. Yeni emu tengtoau ukuyunugec kemema monggoc mi erebisia.  
\v 11 Ngic ngadeyoac deande, ye bangecfu titiseria faibacac geng imoc kpetarimina. Faka mangana yengenaoc yarengic bic yombong kisamma firang amma ye meickebeso.   
\p
\v 12 Ngicngac ebic witiau kecgec \sc KEBUNGO\sc* yeneac yoac henggareng amma nanggeyunuude. Ngicngac iwaiac obohoma kecandae, yeni sing dindingac modacgec yeng isingyunuma yoacngina desiude, imoc negenduae.  
\v 13 Foracngoc, ngic dindingac yeneng geac kpac kuneng heiwayong memima ubangerec degecde. Nga ngicngac ikoc nga hamangecngina kpac kecdae, yeneng geac kicfu kecgecde.   
\c 141  
\s1 Ni manubeso ande  
\d Dawidingo mitiyegec yofi heiec.  
\p
\v 1 O \sc KEBU\sc*, ni kpacguduae. Ge nearu bic hana. Ni kpacguba ge kedzac nearu faima ubaudumenna negenna.  
\v 2 Nunumunango geac kicfu hama hosuc homuna gombunga, ifi isoc ambeso nga marina gearu miacba imocngo maraiac sese gombunga, ifi isoc ambeso.   
\p
\v 3 O \sc KEBU\sc*, ge enacnau kpae mong mengerema bibicnaac naguya garenggekecbesena.  
\v 4 Herenango mangana hoanggebacac nga ngic ngicngac ogofocngina memanganeyunuandae, yenigoc kecma haifaka mangana angkecbaiac ge imocac kpae heinembesena. Ni yenigoc tama wiac emenec mi ambesare.   
\m
\v 5 Ngic gombungango yoac yumiau edenuma demengere naric anembeso. Imocngo kerec orucnau nadzicnenggec sebinango ireckeande, ifi isoc andeac orucnango imoc naric mi waude. Ni manganameme yeneac negemma numuanduae, imocac turungaac nasoya hau fora fingecdarude.  
\v 6 Imohai ngic Anutu ngadehema mangana megecdeac ayemmeande, yeni wi nanggec enarafocngina ukuyunugec hofeu kemegecde. Nga yeni imohai yofi negenggecde, \sc KEBUAC\sc* yoac imoc fora.  
\v 7 Ngicngo bangec mendzicgec hocngo erema fingecande, yarengic yeneac sicngo ifi isoc homec amaac naguu singsararang kpema feemeude.   
\p
\v 8 O \sc KEBU\sc*, Israeac Anutu, ni sifu kicna gearu fima geac hoannu hama sufubeso anduaeac onggonnuma mi wanubesena.  
\v 9 Ngic mangana yeneng menugecdeac botac faigec nga yarengic yeneng suba faigec ge imohacnac onggonnuna.   
\m
\v 10 Ni gombunga kembare ngic goa Anutu ngadehema mangana megecdeac ayemmeande, yeni yenang botacngo meyunubeso.   
\c 142  
\s1 Nukporac anenggec  
\d Masiki uba modacma heibesonga. Dawidingo hoc singau tacma numuyegec yofi heiec.  
\p
\v 1 Ni ubana miacma \sc KEBU\sc* kpacba yeng neac ubea manganeudeac ubana miacma numubade.  
\v 2 Ni ebicyoacna hafoangoc yeac kicfu kpakema kpendzennaac yoacsiduc yeac kicfu deficgebade.   
\p
\v 3 Asuna ukuba kpeu geng haniana bic negennade. Ni sing kenganduae, imohai ngic yeneng menugecdeac botac faima sufuma takecdae.  
\v 4 Ni kicna foinaugeng fima hemba mongngo ni mi nengsiude. Nga ni sufu sufuama hofocba kpac anu ngic mongngo nenggareng mi anenude.   
\p
\v 5 O \sc KEBU\sc*, ni kpacguma deba, “Ge sufu sufuamana nga ge gbori kekec bangecnginau neac wiac angkecnec.  
\v 6 Ni memeficac obohoyombonggema kecma kiacduaeac kiacna negemma ngic nukporac anengandae, yenearunac yungecnuna. Yeni serima feracnudae.  
\v 7 Ge yungecnuma ebicnaac witicamaunac wangecnubesena. Ge ifi anna ni geac kpac kuneng heiwayong memima ubangerecyoac debade. Ge gombunga anengannecac amma ngicngac dindingac yeneng hama oronnugecde.”   
\c 143  
\s1 Kopocsicninagoc andimbe  
\d Dawidingo mitiyegec yofi heiec.  
\p
\v 1 O \sc KEBU\sc*, ge nunumuna negenna. Ni kpacguma desambic anggemba ge kedzac faima yoacna negenna. Ge yoac modac modac Kebu nga ge dindingac kecnecac amma turunga merennenna.  
\v 2 Ngic mong kekehagoc ye geac kicfu dindingac naric mi kecde. Nga ni kingang ngicga anduaeac yoacfu mi fainubesena.   
\m
\v 3 Ngabangicnango kporacnuma kekecna bangecfu kpefahau ni kundung manau homecngic bic homegec, yeni isoc tacbadeac fainuec.  
\v 4 Imocac asuna herena manau worau herenango ebic meficgema hoc isoc ande.   
\m
\v 5 Ni warac naso, imoc negemba fede nga geng ua mekecnec, imoc hennegeng amma negensikecduae. Ge marigango marikibi meficgenec, imocac ubangerec negemma hennegeng angkecduae.  
\v 6 Marina gearu miacduae. Bangec dzangge dzanggeango dokuac ammiande, ubaonganango ifi isoc geac ammide. \it Selac\it*   
\p
\v 7 O \sc KEBU\sc*, asuna woradeac turunga bic merennenna. Ni kecma ngic homema bangecfu kemeandae, ifi isoc kemebaiac ge kicmesuga nearunac mi mesufuna.  
\v 8 Ni negenseriguma yofi deba, “Geng yoac dedzege amma imoc modackecnec, ge asoacngoc imocac yoac edenubesena. Ubaongana gearu miacba ereudeac sing kpounenna ni imoc modacma kengkecbade.”   
\m
\v 9 O \sc KEBU\sc*, ni worama geac hoannu sufubadeac hadua. Ge ngabafocna yeneac mariunac yungecnuna.  
\v 10 Ge neac Anutu. Ge imocac songoga kpounenna arenggeba geac Asu gombunggango bangec sorongau hesicnubeso.   
\p
\v 11 O \sc KEBU\sc*, ge kpac kunengga gombunggaac amma kekecna onggonggena. Nga fakaga dindingacac amma ebicfunac mesinuna.  
\v 12 Ni geac kingang ngicga kecduaeac geng yoac dedzege amma imoc modackecnec, fakaga imocngo ngabafocna nga ngic sasawa ubana kpeandae, meicyunudacna kpac ambisia.   
\c 144  
\s1 Kebungo meficnunuu firang annide  
\d Dawidingo mitiyegec yofi heiec.  
\p
\v 1 \sc KEBU\sc* ye neac hoc peperandzi seria, ye kenehebesonga.\f + \fr 144:1 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* Yeng marina dzikacac mengerekecma dzikac kpebadeac gbonna meefaiude.  
\v 2 Neac Anutungo yoac dzegema imoc modarude. Ye neac hoc peperandzi seria nga amana seria amma ye ebicfunac mesinuude. Ye kasona anenu ni yeac hoannu kemma sufubade. Ye firang amma ngiha ngiha neac bageu faiyunuude.   
\p
\v 3 O \sc KEBU\sc*, bangecngic ye gombungaya kpac kecde, fora. Nga geng ngicac medac sifu henggareng anemmema negensinade.  
\v 4 Bangecfu ngic neni ine wiac engena kpac. Ngic neneng asu naso mocgu taiandimbe, ifisac. Nga kekecnina imoc wenacfu onganinango hereande, ifi isoc ande.   
\p
\v 5 O \sc KEBU\sc*, ge kurumenga kurumenga merarangyunuma yacma mama tiki kpesereyununa hosuc kpebisia.  
\v 6 Ge piratac sueyununa ngabafocga yunugec singsararang kpema kendacbisia. Ge tebemedaha kpesaima wedecyunubesena.  
\v 7 Ge wi tacma mariga sinema menuma doku tunggbaung kucnginagoc hakecdae, imohacnac mesinuna. Ge kuricngic yeneac mariunac mesinuna.  
\v 8 Yeni enacbibicnginau ikocyoac wakeu deandae nga marifoinginango tobannunuma ua meandae.   
\p
\v 9 O Anutu, ni geac yegec gboria mong heibade. Ni gita witiha teng kpema imocngo udumeng gombunga meficgegembade.  
\v 10 Gennoc dzikacfu ngictau kuc yemmena firang anggecde. Dzikaac beangngo ni, kingang ngicga Dawidi kpebeso anu geng imohacnac onggonnunec.   
\m
\v 11 Ge dzikac beang mangana yombong, imohacnac onggonnuma kuricngic yeneac mariunac yungecnuna. Yeni enacbibicnginango ikocyoac deandae nga marifoinginango tobanunudeac uatoa meandae.   
\p
\v 12 Medacfocnina yeni sebigbori kecma ic barama gombunga, ifi isoc ambisia nga naroangfocnina yeneng ngictauac ama mana tuturunggac sering marikibi gombunga heiandae, ifi isoc siricnginagoc ambisia.  
\v 13 Uaninaac tohonnu semeng hania haniango wakema febeso. Nga ramafocnina manennu yeneng fingecsahe kuneng ambisia, imoc taoseng nga taoseng naso teng ifi sahebisia.  
\v 14 Nga burumakafocnina yeneng medac heregoc kecma ebiria yombong amma medac megecde, imohai mongngo mi manganebeso me homebeso, kpac. Taongtoaninaac sinnu ebicac nga kiacac udumeng mong mi fingecbeso.   
\m
\v 15 Ngicngac sasawa Kebuac kenecgoc ifi kecandae, yeni sogac sogainginagoc. \sc KEBUNGO\sc* ngicngac ngeneac Anutungina ande, ngeni kenehagoc amma kecgecde.   
\c 145  
\s1 Anutuac marikibi ye afehebisia  
\d Dawidingo dedengerec yegec yofi heiec.  
\p
\v 1 Anutu nga \sc KEBUNA\sc*, ni afeguma geac kpac kuneng nasoya nasoya kenehekecbade.  
\v 2 Ni wenacsoc kenecguma\f + \fr 145:2 \ft Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)\f* geac kpac kuneng nasoya nasoya heiwayong memibade.  
\v 3 \sc KEBU\sc* ye engenatoa amma damu damuyagoc. Ngic mongngo yeac negen negeng nga siriha naric mi arenggema negentegerude, kpac. Kebu eriendzong memibesonga.   
\p
\v 4 Ngicngac yofinenggac kecdae, yeneng angammemegaac siduc nambaracfocngina edeyunugec yeni ngade fingecgecde, yenearu deyadiyemmekecma kucfakaga damu damuyagoc dekperagiyemmegecde.  
\v 5 Ge kibikperagiagoc nga ngictauac kucgagoc amma ua bibiagoc mekecnec, yeni imocac yoac degec ni imoc hennegeng amma negensikecbade.  
\v 6 Ngic yeneng uaga damu damuyagoc nga kuhagoc mekecnec, imoc dekperagiyemmebisia. Nga ge engenatoa, imoc dekperagibade.  
\v 7 Geng gombunga anemmekecnec, imoc wiac efea kpac. Yeneng imocac siduc degec ni fakaga dindingacac desogai amma yegec heibade.   
\p
\v 8 \sc KEBUNGO\sc* ubangerec anemma neneac ubea manganeude. Ye ngaba bic mi anemmeude amma yeng yoac dedzege amma imoc modackecde, faka imocngo wiac engena ande.  
\v 9 \sc KEBUNGO\sc* ngicngac sasawa gombunga anemmema marikibifora neneac ubamangang anemmeude.  
\v 10 O \sc KEBU\sc*, ge wiac sasawa mefiyununec, yeni geac ubangerec megembisia. Nga ngicngacfocga kpetiac yeneng kenecguma  
\v 11 eucererenggac kibikperagiaac siduc dekperagima kucgaac yoacsiduc dekperagibisia.  
\v 12 Ifi anggec ngic sasawango uaga kuhagoc mekecnec, imoc negenggecde. Yeni eucererenggaac kuc kibikperagiagoc, imocac siduha negenggecde.   
\m
\v 13 Geac eucerereng imoc nasoya nasoya feengkefu geng ngictauac kucngo garengyunukecnec, imoc ngic fingecsahenina fekefude, imocacsoc feengkefude.  
\p \sc KEBUNGO\sc* yoara sasawa deec, imoc modarude nga faka angammemea imoc ubangerecgoc.  
\v 14 Ngicngac manunubeso anu \sc KEBUNGO\sc* nenang sasawa nanggenunuude. Ye ngicngac tipetangyunuyunuya miacyunuude.  
\v 15 Geng nasoya hau yaka yemmenadeac sasawango geac negeung amma kicngina gearu figecde.  
\v 16 Wiac kekecnginagoc sasawa yeni wiac monggac ayemmeu geng mariga mekpacgema yemmena soha megecde.   
\p
\v 17 \sc KEBUNGO\sc* fakaya dindingac modacma wiac sasawa meande, imoc ubangerecgoc anemmeude.  
\v 18 Ngicngac \sc KEBU\sc* kpacgec yeng yeneac wegenac kefude. Nga ngicngac ikocngina kpac kecma ye kpacandae, ye yenigoc wegenac kefude.  
\v 19 Ngicngac eweheihei ammiandae, yeni wiac monggac me monggac ayemmeu yeng imoc yemmeu naric kecgecde. Yeng kpakpacngina negemma ebicfunac mesiyunuude.  
\v 20 Ngicngac yeneng \sc KEBU\sc* songogoc hoanggekecgec Kebungo onggongyunuude. Anu ngic Anutu ngadehema mangana megecdeac ayemmeande, yeni memanganeyunuu kpac andacgecde.   
\p
\v 21 Enacbibicnango \sc KEBUAC\sc* dedengerec yoac deude. Ngicngac bangecsebigoc kecdae, ngeni sasawango yeac kpara kpetiac nasoya nasoya kenehebisia.   
\c 146  
\s1 Yoac modac modac Kebu  
\p
\v 1 \sc KEBU\sc* yoyomo heimini, hallelu Yac. O ubaongana, ge \sc KEBU\sc* dengerebesena.  
\v 2 Ni kekecnau \sc KEBU\sc* afehema kekec kecbadesoc Anutunaac dedengerec yegec heibade.   
\p
\v 3 Ngeni ngictauac medacfocngina nga bangecngicac medac sasawa mi negenseriyunubisia, imoc negembisia. Yeneng naric mi meficngunugecde.  
\v 4 Asunginango wayunuma kenu yeneng homema emu bangecfu monggoc kemegecde. Nga yeni ua hania hania megecdeac arenggekecgec, imoc uameme imohaingoc kpac andarude.   
\p
\v 5 Yakoboac Anutungo ngic monggac memeficngic anude, imohai ngic imocngo kenehagoc anude. Ngic mong ye \sc KEBU\sc* Anutu negensima fora fingerudeac tomai kecande, ye kenehagoc.  
\v 6 Anutungo kurumeng nga bangec meficgema kondung nga kondung manau wiac sasawa fede, imoc meficgedarec. Ye yoac modac modac \sc KEBU\sc*. Ye ifi kecde nga nasoya nasoya ifi kecengkefude.  
\v 7 Ngic goa yeneng ngic ogofocngina ebicfu faiyunugec ubaebicgoc kecgec Kebungo sing dindingac modacma isingyunuma yoacngina desiude. Ngicngac herenginaac homegec yeng yaka gumecyunuude. \sc KEBUNGO\sc* ngicngac witicamau tacandae, yeni witicngina yungerude.  
\v 8 \sc KEBUNGO\sc* ngicngac kicpisic kicngina merecgeude nga ngadehokuc ngadengina mesorongaima miacyunuude. \sc KEBUNGO\sc* ngicngac dindingac kecandae, yeni songogoc hoangyunuude.  
\v 9 Ngicngac kuric kecgec \sc KEBUNGO\sc* yenenggareng ayemmema ngac hodzec nga beging nanggeyunuude. Ngic Anutu ngadehema mangana megecdeac ayemmeande, yeneac singngina ine memanganeude.   
\p
\v 10 \sc KEBU\sc* Sionggac Anutu, ye nasoya nasoya geac ngictau anggengkefude. Ye fingecsahega fekefudesoc geac ngictau anggengkefude.  
\m \sc KEBU\sc* eriendzong memini, hallelu Yac.   
\c 147  
\s1 Wiac sasawa nemmekecde  
\p
\v 1 \sc KEBU\sc* eriendzong memini, hallelu Yac. Anutunina yegec heimima dengereni, imoc wiac gombunga yombong. Ye ubangerec anemmeandeac amma ye sesehema yegec heimini, imoc ubangerehagoc nga faka imoc ngereede.   
\p
\v 2 Ngic yeneng Israe arenggac ngicngac bic ukuyunugec. Nga \sc KEBUNGO\sc* Yerusareng taong ine monggoc mema megboriu yeni monggoc kpedzucyunuma hoangyunuude.  
\v 3 Ngicngac herenginau ebic mema manganeyombonggeu yeng mengereyunuma kubecngina sangohoude.  
\v 4 Yeng asomeng kpetengina meserima kpacngina tembuc tembuc kparude.  
\v 5 \sc KEBUNINA\sc* ye damu damuyagoc nga ye kuha engena yombong. Ngic mongngo yeac negen negentegecac kpetea naric mi meude, kpac.  
\v 6 Ngic yeneng ngicngac ogofocngina memayunugec \sc KEBUNGO\sc* monggoc miacyunuma nanggeyunuude. Nga ngic Anutu ngadehema mangana megecdeac ayemmeande, yeni ine meyunuma bangecfu ukuyunuude.   
\p
\v 7 \sc KEBU\sc* ubangerecac yegec heimima Anutuninaac gita kpema imocngo udumeng gombunga memini.   
\m
\v 8 Yeng kurumenga kurumenga hoengngo kperacyunuma kia faiu bangecfu mama fagannu kpindzing meficgeu ereude.  
\v 9 Yeng yang hania hania yakangina meficgeyemmeude. Neng yeneac medacngina yakaac derecgegec yeng yaka yemmeude.  
\v 10 Yeng becosi kuhagoc henu wiac engena mi ande nga ngic kuhagoc ye haningo sing herea tiu ye imoc henu wiac engena mi ande.  
\v 11 Ngicngac ye eweheiheigoc hoangeandae, yeng yenemma nengenu ngereeude. Yeng yoac dedzege amma imoc modarude. Nga ngicngac yeneng imocac negensima fora fingerudeac tomai kecandae, ye yeneac negenu ngereeu sogaiude.   
\p
\v 12 O Yerusareng, ge \sc KEBU\sc* yoyomo heimina. Siong, ge Anutuga yaiyo kpemibesena.  
\v 13 Ye taongga oda mengerema naguyaac aieng meseriu seria monggoc nanude. Yeng amaga manau medacfocga kenecyunuude.  
\v 14 Ye bangecgau ma faima ngicngacfocga onggongngunuu ruaegoc kecgecde. Ye wit semeng gombunga yombong meficgengemmeu negebec anggecde.   
\p
\v 15 Ye dederecgeyoara bangecfu sueu imocngo bic yombong nedzima haude.  
\v 16 Ye nomang sueu imoc rama dzoea, ifi isoc amma bangecfu maude. Ye nomang bangecfu haudeac deu imocngo hama isoc bangec semeude.  
\v 17 Ye nomanggbomea minginango nomanggbomea imoc wiac kotaha isoc ukuu mau mongngo yeac nomang imohai serima naric mi nanude.  
\v 18 Ye nomanggbomea yoac edeyunuu yeni sisingaima doku monggoc anggecde. Ye firang minginango firang sueu bangec fifiranggeu doku dzuamagoc hakecgecde.   
\p
\v 19 Ye yoara Yakobo mekperagimiu sing nga dederecgeyoara imoc Israe areng mekperagiyemmeec.  
\v 20 Ye bangec areng goa yeni faka ifia mong mi ayemmeec. Yeneng yeac dederecgeyoac mi negendae, kpac.  
\p \sc KEBU\sc* eriendzong memini, hallelu Yac.   
\c 148  
\s1 Bangec kurumeng Kebu dengerebisia  
\p
\v 1 \sc KEBU\sc* heiwayong memini, hallelu Yac. Kurumenga kurumenga areng kecdae, ngeni \sc KEBU \sc* ohec memibisia nga sawau kecdae, ngeni Kebu dengerebisia.  
\v 2 Kebuac angero sasawa ngeni ye dengerebisia. Kurumennu yeac wasai areng, ngeni ye dengerebisia.  
\v 3 Wenac nga afo amma asomeng kperagiagoc, ngeni yoyomo heimibisia.  
\v 4 Kurumenga kurumenga wi yombong nga kurumenga kurumenga witinginau doku fedae, ngeni \sc KEBU\sc* dengerebisia.   
\m
\v 5 Yennoc yoac deu fingecgecac ngeni sasawango \sc KEBUAC\sc* kpac kuneng heiwayong memibisia.  
\v 6 Yeng tatacnginau seria tacgecdeac faingunuma mangina faiec, imoc naric mi ferahagecde.   
\p
\v 7 Ngicngac bangecfu kecdae, ngeni \sc KEBU\sc* eriendzong memibisia. Kondunggac yangtoatoa amma kondung kunenggac dzohongtoa keme kemea, ngeni \sc KEBU\sc* dengerebisia.  
\v 8 Piratac nga nomanggbomea amma nomang maande nga nomang bangecfu fingecande amma kia firang, ngeni sasawango yeac enac tofohobisia.  
\v 9 Tiki fagang nga ic foragoc amma yomondzoc ic sasawa,  
\v 10 kateu yang nga amaac yang sasawa, gisicgbiriring nga neng kpututuckegecde.   
\m
\v 11 Bangectoa bangecac ngictau nga ngiha ngiha nga ngictauac medacfocngina nga bangecac ngic enara kecdae,  
\v 12 sebigbori medac nga naroang momoc, ngicngac kpengeng nga nambarac,  
\v 13 ngeni sasawango \sc KEBUAC\sc* kpac kuneng heiwayong memibisia. Ye kpactoayagoc, imocac ye afehebesonga. Yeac kuc kibikperagiagoc kurumeng nga bangec feracyunuma wi fede.  
\v 14 Ye ngicngacfora yeneac amma ngictau mong nanggeu kuhagoc amma firang anude. Yeac ngicngacfora kpetiac kecandae, ngeni ye dengerebisia. Kebu ye Israe habufora yeac wegenacfu hama kecdae, ngeneac amma ngictau faiec.  
\p \sc KEBU\sc* eriendzong memibesonga, hallelu Yac.   
\c 149  
\s1 Ngeni ubangerecgoc kecbisia  
\p
\v 1 \sc KEBU\sc* eriendzong memini, hallelu Yac. \sc KEBUAC\sc* yegec gboria heimibesonga. Ngicngacfora yeac yoac modackecdae, ngeni kpekpeturangnginau yeac yegec gboria heimibisia.  
\v 2 Yeng Israe meficngunuu ngeni yeac ubangerec negembisia. Sionggac medacfora, ngeni ngictaunginaac sogaibisia.  
\v 3 Ngeni yegec fedema yeac kpac kuneng heiwayong memibisia. Ngeni tambaring nga gita kpema udumeng gombunga meficgema oeha memibisia.   
\p
\v 4 \sc KEBUNGO\sc* ubangerecgoc ngicngacfora ngeneac negenu ngereeude. Yeng ngicngac yumia ebicfunac mesingunuu imocngo wiacngina sirihau anu heingemmeu kemeude.   
\m
\v 5 Yoac modac modac ngicngac ngeni sogaima fefenginau fema ubangerec negemma yegec heimibisia.  
\v 6 Ngeni enacnginango dendzerenggema Anutu dengerema maringinau soe mana ngadea enaragoc mema kecma  
\v 7 imocngo bangec monnunac ngicngac yenearu turungngina kpouyemmebisia. Ngeni ngiha ngiha kopocsicnginaac turunga kpouyemmema  
\v 8 seng mema imocngo ngictaufocngina witicyunugec ngickunengfocngina aiennu mendanggyunubisia.  
\v 9 Yoac yofi bic oho ohoya fede, “Yeneac yoac imoc modacma yoacngina isinggema desibesonga.” Nga imocngo Anutuac ngicngac yeac yoac modacma kecdae, yeneac kuc kibikperagiagoc anude.  
\p \sc KEBU\sc* eriendzong memini, hallelu Yac.   
\c 150  
\s1 Kebu dengerebesonga  
\p
\v 1 \sc KEBU\sc* eriendzong memini, hallelu Yac. Anutu womongau eriendzong memibesonga. Yeac kurumenga kurumenga seria fekendae, ngeni imohai yaiyo kpemibisia.  
\v 2 Kebungo kucfaka damu damuyagoc mekecde amma ye engenatoa kpembibihagoc, imocac yoyomo heimibesonga.   
\m
\v 3 Ngeni trampet fifima udumeng meficgema ye dengerema yoming nga gita kpema udumeng meficgema heiwayong memibisia.  
\v 4 Ngeni tambaring kpema yegec fedema ye dengerema gitakurere kpema kungac fifima dengerebisia.  
\v 5 Ngeni kpeng kpema ye dengerema kpeng udumenga kunengngoc fifima dengerebisia.   
\m
\v 6 Wiac sasawango asu heiandae, ngeni \sc KEBU\sc* eriendzong memibisia.  
\p \sc KEBU\sc* eriendzong memini, hallelu Yac.