\id TIT  - Gwahatike NT [dah] -Papua New Guinea 2000 (DBL -2014) 
\h Taitus 
\toc1 Taitus hitte Pol beleŋ asaŋ kayyiŋ 
\toc2 Taitus 
\toc3 Tai 
\mt1 Taitus  
\mt2 Taitus hitte Pol beleŋ asaŋ kayyiŋ  
\c 1  
\p
\v 1 Taitus, nebe Pol, Al Kuruŋyen meteŋ al, irde Yesu Kristuyen mere basaŋ al aposel. Nebe alya bereya Al Kuruŋ beleŋ basiŋa yirtiŋ mar goyen faraŋ yurde himeke Al Kuruŋ niŋ hekkeŋ nurde hinayiŋ yeŋ aposel heŋ meteŋ teŋ hime gago. Irde Al Kuruŋ palap irtek mata gote mere fudinde saba yird yird meteŋ goke manaŋ aposel heŋ meteŋ teŋ hime.  
\v 2 Irde Al Kuruŋya hugiŋeŋ heŋ heŋ goke doyaŋ heŋ himyen geb, go hende huwarde meteŋ goyen teŋ himyen. Hugiŋeŋ heŋ heŋ gobe usi ma teŋ hiyen al Al Kuruŋ gore naŋkiŋya megeŋya forok ma yekeya detmiŋ kura neŋ duneŋ yeŋ biŋa tiyyiŋ go goyen.  
\v 3 Niŋgeb nalu bikkeŋ kiryiŋ goyen forok yekeb meteŋ marmiŋ hulyaŋ yirke meremiŋ tagalde hikeb bikkeŋ biŋa tiyyiŋ goyen kawan forok yiriŋ. Ne wor Dumulgaŋ teŋ teŋ Alniniŋ Al Kuruŋ gore meteŋ go tiya ninkeb meremiŋ gago tagalde tukuŋ hime.   
\p
\v 4 Munaŋ Taitus, gebe ne beleŋ Al Kuruŋ niŋ momoŋ girmekeb ne timiriŋ gwahade goyen po, ge wor yeŋ ge dufayge saŋiŋ irariŋ. Niŋgeb goke teŋ gebe urne wor po yara nurde guneŋ hime.  
\p Niŋgeb Adoniniŋ Al Kuruŋya Dumulgaŋ teŋ teŋ Alniniŋ Yesu Kristuya beleŋ buniŋeŋ girde igiŋ igiŋ girde bege isikamke igiŋ hiwoŋ yeŋ gusuŋaŋ yirde himyen.   
\s1 Yesuyen alya bereya sios gote doyaŋ mar igiŋ kura basiŋa yirayiŋ  
\p
\v 5 Be, ne beleŋ Krit motmotde gubul teŋ wamiriŋ gobe meteŋ kura pasi ma irdeya wamiriŋ goyen ge beleŋ gab pasi irayiŋ yeŋbe gogo gubul teŋ wamiriŋ. Irde ginmiriŋ gwahade po, naŋa goyen bana niŋ taun kurar mat kurar kuŋbe taun goyenter niŋ Yesuyen alya bereya bana al kura basiŋa yirde yeŋ goyen doyaŋ yird yird mar yirayiŋ yeŋ nurdeb gogo gubul timiriŋ.  
\v 6 Yesuyen alya bereya doyaŋ yird yird mar goyen basiŋa yire yeŋbe matamiŋ keŋkela yeneŋ ga basiŋa yirayiŋ. Matamiŋbe gahade hinayiŋ: al gobe uliŋde merem moŋ, irde bere yuŋkureŋ po yawartiŋ mar. Irde dirŋeŋ weŋbe Al Kuruŋ niŋ dufaymiŋ tareŋ irtiŋ, irde dapŋa duwi yara heke merere yukutiŋ ma heŋ miliŋya naniŋyat mere keŋkela gama irde hinayiŋ.  
\v 7 Be, Yesuyen alya bereyat doyaŋ marbe Al Kuruŋ beleŋ po meteŋne tinayiŋ yeŋ basiŋa yirtiŋ. Niŋgeb go mar gobe uliŋde merem moŋ hinayiŋ, yiŋgeŋ ge turuŋ turuŋ ma teŋ hinayiŋ, araŋeŋ bearar ma teŋ hinayiŋ, kukuwa fe nene kukuwa heŋ heŋ mata ma teŋ hinayiŋ, det kuraŋ al kwep kwep ma yirde hinayiŋ, irde al mali ma gasa yirde hinayiŋ. Irdeb usi matare al kurate hora ma yade hinayiŋ.  
\v 8 Gwaha titŋeŋbe al wake gargar yirde hinayiŋ, mata igiŋ teŋ teŋya igiŋ heŋ heŋya niŋ amaŋeŋ nurde hinayiŋ, uliŋde po amaŋ hetek mata goyen epte fole irtek hinayiŋ, irde Al Kuruŋ diliŋde al huwak wukkeŋ wor po hinayiŋ. Irde meteŋmiŋbe kumhaka ma heŋ keŋkela po meteŋ teŋ hinayiŋ.  
\v 9 Yeŋbe deyya beleŋ saba yirtiŋ mere fudinde hekkeŋ nurtek goyen tareŋ po tanarde hinayiŋ. Gogab saba fudinde gore po al hoyaŋ igiŋ saba yirdeb saŋiŋ heŋ heŋ ge faraŋ yurde hinayiŋ. Irdeb al kura saba fudinde goyen asogo irde hinayiŋ mar goyen igiŋ bebak yirke, “Fudinde, buluŋ teŋ hite,” yeŋ nurnayiŋ.   
\p
\v 10 Be, ga gineŋ hime gabe Krit motmotde gorbe al budam Al Kuruŋ asogo irdeb merebe miŋ miŋmoŋ teŋ al usi yirde haŋyen geb, gago gineŋ hime. Go teŋ haŋyen mar goyen buluŋ wor pobe Yesu nurd untiŋ gega Yuda marte tikula gama irde guba yeŋ yeŋ mata teŋ haŋyen gogo.  
\v 11 Go mar gobe det goke al saba yirtek moŋ goyen hora yad yad niŋ po nurdeb Al Kuruŋyen dirŋeŋ weŋ usi saba yirde dufaymiŋ buluŋ yirde haŋyen. Niŋgeb usi saba mar goyen utaŋ yirkeb mata go bada po henayiŋ.  
\v 12 Usi matamiŋ goke teŋbe yiŋgeŋde al kura saba mar karkuwaŋ yeŋ nurde yuneŋ haŋyen mar goyen kuramiŋ kura beleŋ mere kura gahade tiyyiŋ: “Krit motmotde niŋ marbe hugiŋeŋ usi po teŋ haŋyen, irde al gasa yirde buluŋ po yirde haŋyen, irde kumhaka po heŋ dulaŋ po teŋ haŋyen,” yiriŋ.  
\v 13 Al gore mere tiyyiŋ gobe fudinde. Niŋgeb usi saba mar goyen kuŋ yineŋ teŋ saba yirayiŋ. Gogab Yesu niŋ dufay tareŋ ird ird saba fudinde goyen po tanardeb  
\v 14 Yuda marte tikula ma gama irnayiŋ. Irde Al Kuruŋyen mere fudinde pel iramiŋ mar gote saba gobe yubul po tinayiŋ.   
\p
\v 15 Fudinde, al kura Al Kuruŋ beleŋ wukkeŋ iryeŋ al gobe Al Kuruŋ diliŋde tikiŋ miŋmoŋ geb mata dahade kura teŋ hiyeŋ kuruŋ gobe wukkeŋ ala po hiyeŋ. Goyenbe al kura biŋde dufay buluŋ po kerde Al Kuruŋ niŋ dufaymiŋ tareŋ ma irde hiyeŋ albe dufaymiŋya biŋyabe buluŋ hitiŋ geb, Al Kuruŋ diliŋde al gobe wukkeŋ moŋ, irde yeŋ beleŋ mata daha kura teŋ hiyeŋ kuruŋ gobe tikiŋ miŋyaŋ ala po hiyeŋ.  
\v 16 Go mar gobe yiŋgeŋ ge yeŋ, “Neŋbe Al Kuruŋ nurd uneŋ hite,” yeŋ haŋ gega, matamiŋ beleŋbe Al Kuruŋ harhok uneŋ haŋ yeŋ yentek. Gwahade mar gobe Al Kuruŋ beleŋ yentek ma irde hiyen mata go po teŋ haŋyen, irde meremiŋ pel irde mata igiŋ kura titek ma haŋyen.   
\c 2  
\s1 Yesuyen alya bereya beleŋ gama irtek mata  
\p
\v 1 Be, gebe Yesu niŋ yitiŋ mere gote saba igiŋ goyen gor niŋ Yesuyen alya bereya saba yirde hayiŋ.  
\v 2 Al parguwakbe gahade saba yirde hayiŋ: araŋeŋ bearar ma teŋ hinayiŋ, al beleŋ palap yirtek mata po teŋ hinayiŋ, uliŋde po amaŋ hetek dufay fole irde hinayiŋ. Yeŋbe Yesu niŋ dufay saŋiŋ ird ird gote saba fudinde po gama irde hinayiŋ. Irde al hoyaŋ niŋ amaŋeŋ nurd yuneŋ hinayiŋ. Irdeb kanduk yeneŋ hinayiŋ gega, mukku ma teŋ goya goya tareŋ po hinayiŋ.   
\p
\v 3 Gwahade goyen po, bere parguwak wor saba yirde hike alya bereya hoyaŋ beleŋ palap yirtek mata po teŋ hinayiŋ. Irde mere buluŋ mat ma teŋ hinayiŋ, kukuwa fe ug po ma nen hinayiŋ. Gwaha titŋeŋbe mata igiŋ po ga diriŋ saba yirde hinayiŋ.  
\v 4 Gwaha teŋ hinayiŋbe bere hoyaŋ yeŋ kamekkeŋ goyen igiŋ saba yirde hike uŋya goya dirŋeŋ weŋya goyen biŋde mat amaŋeŋ nurd yuneŋ hinayiŋ.  
\v 5 Irdeb uliŋde amaŋ hetek dufay fole irde hinayiŋ. Matamiŋya dufaymiŋyabe Al Kuruŋ diliŋde wukkeŋ po hinayiŋ, irde yamiŋyaŋ meteŋ tareŋ po teŋ hinayiŋ. Irde alya bereya igiŋ igiŋ yirde hinayiŋ, uŋ yagot mere nurde gama irde hinayiŋ. Gogab matamiŋ goke al kura beleŋ Al Kuruŋyen mere niŋ buluŋ mat ma tagalde hinayiŋ.   
\p
\v 6 Be, gwahade goyen po, al foŋeŋ wor uliŋde amaŋ hetek dufay fole ird ird niŋ saŋiŋ henaŋ yeŋ faraŋ yurde hayiŋ.  
\v 7 Irdeb mereya mataya teŋ hayiŋ kuruŋ gobe igiŋ mat po teŋ hayiŋ. Irkeb al foŋeŋ gore ge mata teŋ hayiŋ go yeneŋ goyen po gama yirde hinayiŋ. Irde al saba yirde heŋyabe hende hendem ma saba yirde hayiŋ, irde nanosak hende ma saba yirde hayiŋ.  
\v 8 Irde merebe huwak mat po teŋ hayiŋ. Irkeb al beleŋ mere kura tiyayiŋ goke epte ma ulger merem yaŋ girnayiŋ. Gogab asogo girde haŋ mar beleŋ gwaha mat kura neŋ gayen ulniniŋde merem yaŋ dirtek ma heŋbe yiŋgeŋ po ga memya henayiŋ.   
\p
\v 9 Be, al kura al kurate yufukde heŋ muruŋgem moŋ duliŋ meteŋ teŋ haŋ marbe doyaŋ marmiŋ beleŋ yineŋ hinayiŋ kuruŋ goyen nurde gama irde hinayiŋ yeŋ saba yirde hayiŋ. Meteŋ mar gobe doyaŋ marmiŋ amaŋ hetek mat meteŋ teŋ hinayiŋ. Irde gwahade gwahade tinayiŋ yinkeb uker ma yirde hinayiŋ.  
\v 10 Irdeb doyaŋ marmiŋde det kawe ma teŋ hinayiŋ. Gwaha titŋeŋbe doyaŋ marmiŋ beleŋ, “Meteŋ marniniŋbe igiŋ,” yeŋ hekkeŋ wor po nurd duntek mata po teŋ hinayiŋ. Gogab al beleŋ mel gote mata kuruŋ goyen yeneŋbe Al Kuruŋ neŋ Dumulgaŋ teŋ teŋ Al niŋ yitiŋ saba goke buluŋeŋ ma nurdeb mere goyen nurtek yiryeŋ.   
\p
\v 11 Be, ga gineŋ hime gabe Al Kuruŋ beleŋ alya bereya buniŋeŋ yirde igiŋ igiŋ yirde yumulgaŋ tiye yeŋbe Yesu teŋ kerke al megen haŋ kuruŋ gake wayyiŋ geb, gago gineŋ hime.  
\v 12-13 Neŋbe Al Kuruŋ beleŋ buniŋeŋ dirde igiŋ igiŋ diryiŋ goyen nurdeb saba kura titiŋ. Gobe gahade: Al Kuruŋ tareŋmiŋ hende wor po goya Dumulgaŋ teŋ teŋ Al Yesu Kristuyabe deŋem turŋuŋ yaŋ wayiryeŋ. Niŋgeb neŋbe goyen goke doyaŋ heŋ hite. Irkeb doyaŋ heŋ hite goke Al Kuruŋ beleŋ guram dirde tareŋ dirde hi. Niŋgeb doyaŋ heŋyabe Al Kuruŋ palap ma irtek mataya ulniniŋde po amaŋ hetek dufayya gobe pel po yirtek. Irdeb ulniniŋde amaŋ hetek dufay fole irde hitek, irde mata huwak po teŋ hitek, irde Al Kuruŋ palap irtek mata po teŋ hitek.  
\v 14 Munaŋ Yesu Kristu gobe neŋ gayen mata buluŋ kuruŋ goyen bana mat dad siŋa diryiŋ. Irdeb yende alya bereya po dirde Al Kuruŋ diliŋde wukkeŋ dirde mata igiŋ teŋ hitek dufay po dunyiŋ. Yeŋbe neŋ gayen gwaha dire yeŋbe gogo nende gasuŋ teŋ kamyiŋ.   
\p
\v 15 Be, saba girhem kuruŋ gabe al gwaha mat saba yirde hayiŋ yeŋ saba girde hime. Gebe Yesuyen alya bereya gor haŋ gote doyaŋ al geb, go hende saŋiŋ huwardeb mel gore saba gayen keŋkela gama ird ird niŋ dufaymiŋ tareŋ irde hayiŋ. Munaŋ saba go pel irde haŋ marbe kuŋ kimiŋ mat po buluŋmiŋ goyen goke yineŋ teŋ utaŋ yirde hayiŋ. Irde yubul tike sabage goyen nurde wasak ma teŋ hinayiŋ.   
\c 3  
\p
\v 1 Irdeb tiyuŋmiŋde niŋ doyaŋ marya doyaŋ mar karkuwaŋyat yufukde heŋ bitiŋde mat meremiŋ nurd nurd niŋ sopte bebak yirayiŋ. Irde mata igiŋ teŋ teŋ niŋ gitik teŋ ga hinayiŋ yeŋ bebak yirayiŋ.  
\v 2 Mel gobe al kura mere buluŋ mat ma yirde hinayiŋ, al hoyaŋya awalikde hinayiŋ, al hoyaŋ kuruŋ goyen igiŋ nurd yuntiŋ ala teŋ hinayiŋ, irde al diliŋ mar yiŋgeŋ ge turuŋ teŋ teŋ mata ma po teŋ hinayiŋ.   
\p
\v 3 Bikkeŋbe neŋ wor Al Kuruŋ ma nurd uneŋbe kukuwa po heŋ hinhet. Irde meremiŋ ma gama irde hinhet geb, megen niŋ mata buluŋ teŋ ulniniŋde amaŋ heŋ heŋ dufay kurayen kurayen gore usi dirke gote yufukde po heŋ go po gama yirde hinhet. Gwahade geb neŋbe mata buluŋ teŋ hinhet, irde kadniniŋ igiŋ mat hike yeneŋbe daniŋ neŋ gwahade moŋ yeŋ nurde hinhet irde kadom asogo gird teŋ hinhet.  
\v 4 Goyenpoga Dumulgaŋ teŋ teŋ Alniniŋ Al Kuruŋ beleŋ igiŋ igiŋ dirde bubulkuŋne wor po yeŋ nurde dunyiŋ goyen kawan forok iryiŋ.  
\v 5 Irdeb neŋ gayen dumulgaŋ tiyyiŋ. Dumulgaŋ tiyyiŋ gobe neŋ beleŋ mata huwak kura titekeb goke ma dumulgaŋ tiyyiŋ. Neŋ ge buniŋeŋ nurde dumulgaŋ tiyyiŋ. Yeŋ beleŋ dumulgaŋ tiye yeŋbe mata buluŋniniŋ halde dunyiŋ. Irkeb halde dunyiŋ gobe Holi Spirit beleŋ sopte kawaŋ hitiŋ yara dirde al gergeŋ diryiŋ.  
\v 6 Dumulgaŋ teŋ teŋ Al Yesu Kristu beleŋ dumulgaŋ tikeb gogo Al Kuruŋ beleŋ Holi Spirit dunkeb kateŋbe tareŋ wor po meteŋ teŋ hiyen.  
\v 7 Gogab Al Kuruŋ beleŋ buniŋeŋ dirde igiŋ igiŋ dirde al huwak dinyeŋ, irde yeŋya hugiŋeŋ heŋ heŋ gobe nende hiyyeŋ. Fudinde, Al Kuruŋya hugiŋeŋ heŋ heŋ gobe neŋ beleŋ goyen goke po doyaŋ heŋ hityen.  
\v 8 Ga ginhem gabe fudinde ginhem geb, ge wor Al Kuruŋ niŋ dufaymiŋ saŋiŋ irtiŋ mar geya haŋ goyen mere gayen tareŋ po momoŋ yirde hayiŋ. Irkeb mel gobe mata igiŋ teŋ teŋ niŋ kurut wor po yeŋ hinayiŋ. Gwaha teŋ hinayiŋbe igiŋ wor po, irde go teŋ hinayiŋ goreb al budam wor po faraŋ yuryeŋ.   
\p
\v 9 Irdeb mere miŋ miŋmoŋ goke kadom mohoŋde teŋ hinayiŋ gobe kukuwamŋeŋ geb, gwaha ma teŋ hayiŋ. Irde mel gore yiŋgeŋde tikula gama irde tagalde haŋyen goyen gebe gwaha ma teŋ hayiŋ. Irde dufaymiŋ hoyaŋ hoyaŋ goke teŋ geya kadom mohoŋde ma teŋ hinayiŋ. Irde Moseyen saba goke kadom mohoŋde ma teŋ hayiŋ. Mata gwahade gobe buluŋ geb, gore kura faraŋ ma duryeŋ. Niŋgeb mata goyen ma teŋ hayiŋ.  
\v 10 Irde al kura saba hoyaŋ tawaŋ alya bereya saba yirde biŋ yade mel goyen bana bipti forok irde hiyen al goyen mata gobe bada hawa ineŋ utaŋ irayiŋ. Goyenbe merege ma nurkeb sopte inayiŋ. Gwaha irayiŋ gega, go ma nurkeb okohom po tubul tiyayiŋ.  
\v 11 Al gwahade gote dufaymiŋbe buluŋ hitiŋ, irde mata buluŋmiŋ gore po al gobe buluŋ gwahade yeŋ kawan irde hi gobe nurde hayen gogo.   
\s1 Taitusbe Pol kuŋ kinyeŋ  
\p
\v 12 Be, nebe makaŋ buluŋ heŋ heŋ nalureb Nikopolis taunde kuŋ gor heŋ yeŋ nurde hime. Niŋgeb Atemas daw ma Tikikus wet kura teŋ kermeke kuŋ momoŋ girkeb makaŋ igiŋ hiya gayenter araŋ po ne hitte waŋ waŋ niŋ kurut wor po yawayiŋ.  
\v 13 Be, Apolosya Roma gabmanyen merere huwarde mere nurde sope ird ird meteŋ teŋ teŋ al Senasyabe geya gor har. Goyenbe irem goyen naŋa hoyaŋde kura kure yeke yeneŋbe keŋkela po faraŋ yurayiŋ. Det goke kura nuriryeŋ gobe tumŋaŋ yade yunayiŋ.  
\v 14 Irdeb nende alya bereya goyen saba yirde hike hugiŋeŋ mata igiŋ po teŋ teŋ niŋ kurut yeŋ hinayiŋ. Kurut yeŋ heŋyabe al kura beleŋ det niŋ amu heŋ hike yeneŋbe faraŋ yurde hinayiŋ. Mali po gwaha kura tihit miŋmoŋ teŋ titmiŋeŋ ma teŋ hinayiŋ.   
\p
\v 15 Be, al neya hite mar gare ge niŋ dufay heŋ haŋ goke momoŋ irayiŋ ninkeb gago momoŋ girde hime. Neŋ beleŋ gor niŋ al Yesu niŋ dufaymiŋ tareŋ irde neŋ ge amaŋeŋ nurde haŋ mar goke dufay heŋ hite goke momoŋ yirayiŋ.  
\p Al Kuruŋ beleŋ deŋ kuruŋ goyen buniŋeŋ dirde igiŋ igiŋ dirwoŋ yeŋ gusuŋaŋ irde hime. Gogo po.