\id 1TH - Gwahatike NT [dah] -Papua New Guinea 2000 (DBL -2014) \h 1 Tesalonaika \toc1 Tesalonaika niŋ Yesuyen alya bereya hitte Pol beleŋ meheŋde asaŋ kayyiŋ \toc2 1 Tesalonaika \toc3 1Te \mt1 1 Tesalonaika \mt2 Tesalonaika niŋ Yesuyen alya bereya hitte Pol beleŋ meheŋde asaŋ kayyiŋ \c 1 \p \v 1 Be, ne Polya meteŋ kadne waraŋ Sailasya Timotiya beleŋ deŋ Yesu Kristuyen alya bereya sios Tesalonaika taunde haŋ kuruŋ goke teŋ asaŋ gago kaŋ hite. Deŋbe Adoniniŋ Al Kuruŋya Doyaŋ Al Kuruŋniniŋ Yesu Kristuya haŋ. Niŋgeb Al Kuruŋ beleŋ buniŋeŋ dirde igiŋ igiŋ dirde hugiŋeŋ bitiŋ yisikamke igiŋ hiwoŋ yeŋ nurde hite. \s1 Tesalonaika taunde niŋ mar goke teŋ Al Kuruŋ niŋ amaŋeŋ nurd unyiŋ \p \v 2 Be, neŋbe hugiŋeŋ deŋ ge Al Kuruŋ mere irde hityen. Irde deŋ ge teŋ igiŋ nurde uneŋ turuŋ irde hityen. \v 3 Deŋbe Al Kuruŋ niŋ hekkeŋ nurde heŋya meteŋ teŋ hinhan. Irde bitiŋde mat wor po yeŋya alya bereya niŋ amaŋeŋ nurde hinhan geb, Nanniniŋ Al Kuruŋ mere irde heŋyabe meteŋ dunyiŋ kuruŋ goyen keŋkela po pasi irniŋ yeŋ kurut yeŋ hinhan goyen goke bininiŋ sir ma yeŋ hiyen. Irdeb Doyaŋ Al Kuruŋniniŋ Yesu Kristu kame mulgaŋ heŋ wakeb yeŋya tumŋaŋ hitek yeŋ nurde hinhan geb, Al Kuruŋyen mere gama irde kanduk karkuwaŋ yeneŋ hinhan gega, goke mukku ma teŋ goya goya saŋiŋ heŋ hinhan goyen goke wor bininiŋ sir ma yeŋ hiyen. \p \v 4 Niŋgeb, kadne yago, mata gwahade goyen tumŋaŋ yintiriŋ geb, fudinde Al Kuruŋ beleŋ deŋ goyen bubulkuŋne wor po yeŋ nurde duneŋbe diriŋne weŋ dineŋ basiŋa diryiŋ yeŋ nurtiriŋ. \v 5 Neŋ beleŋ deŋ ge teŋ kuŋ deŋya heŋ mata teŋ hinhet kuruŋ gobe keŋkela nurde haŋ gogo. Haŋkapya deŋ hitte gor kuŋ Yesu niŋ yitiŋ mere igiŋ goyen tagalde hinhet goya goyenbe mere uliŋ po moŋ, Al Kuruŋyen tareŋ manaŋ kenamiŋ. Irde Holi Spirit beleŋ bitiŋde meteŋ kuruŋ wor po tikeb mere tagaltiriŋ gobe fudinde wor po yeŋ nuramiŋ. \p \v 6 Be, neŋya Doyaŋ Al Kuruŋya kanduk yintiriŋ gwahade goyen po, deŋ wor Al Kuruŋyen mere niŋ igiŋ ma nurde haŋ mar beleŋ buluŋ buluŋ dirde hinhan. Gega Holi Spirit beleŋ amaŋ dufay dunkeb mere goyen fudinde yeŋ amaŋeŋ nurde teŋ bitiŋde kerde gama irde hinhan. \v 7 Niŋgeb Masedonia naŋa deŋ haŋde gorya Akaia naŋa neŋ hitere garya niŋ Yesuyen alya bereya beleŋ deŋ mata teŋ hinhan go nurdeb, “Yesuyen alya bereya beleŋ mata teŋ hitekbe gwahade,” yeŋ nurdeb matatiŋ goyen po gama irde haŋyen. \v 8 Fudinde wor po, deŋ beleŋ Doyaŋ Al Kuruŋ niŋ yitiŋ mere goyen nurdeb Al Kuruŋ niŋ dufaytiŋ tareŋ iramiŋ goyen nuramiŋ marbe Masedoniaya Akaiaya naŋa bana ga niŋ mar po moŋ. Doyaŋ Al Kuruŋyen mereya deŋ mata tiyamiŋ gote mere momoŋyabe naŋa hoyaŋde niŋ mar manaŋ tumŋaŋ nurtiŋ ala tiyamiŋ. Niŋgeb goke neŋ beleŋ deŋ ge al hoyaŋ momoŋ yirtek yeŋ ma nurde hite. \v 9 Gobe mere momoŋtiŋ nuramiŋ mar beleŋ waŋbe deŋ beleŋ mereniniŋ fudinde yeŋ nurdeb igiŋ igiŋ dirde hinhan goyen tagalamiŋ, irde deŋ beleŋ det toneŋ al beleŋ yirtiŋ goyen doloŋ yirde hinhan goyen daha mat yubul teŋbe Al Kuruŋ fudinde hi goyen hitte waŋ yeŋ po doloŋ irde meteŋmiŋ teŋ hinhan goyen wor tagalamiŋ geb, matatiŋ goke gwaha kura yetek yeŋ ma nurde hite. \v 10 Irde Al Kuruŋ Urmiŋ Yesu, Al Kuruŋ beleŋ kamtiŋde mat isaŋ hiriŋ al goyen Al Kuruŋyen gasuŋde mat mulgaŋ hiyyeŋ yeŋ doyaŋ irde haŋyen mere momoŋ goyen manaŋ tagalamiŋ. Niŋgeb goke neŋ beleŋ gwaha kura yetek yeŋ ma nurde hite. Fudinde, Yesube neŋ dumulgaŋ tiyyiŋ geb, kame Al Kuruŋ beleŋ alya bereyat mata buluŋ gote muruŋgem buluŋ yunyeŋ nalure goyenter neŋbe muruŋgem buluŋ goyen go ma dunyeŋ. \c 2 \s1 Polyen mata \p \v 1 Be, kadne yago, neŋ beleŋ deŋ hitte kuŋ meteŋ teŋ hinhet gobe duldul ma meteŋ teŋ hinhet goyen nurde haŋ gogo. \v 2 Irde deŋ hitte ma kutiriŋya meheŋdebe Filipai taunde dahade hinhet goyen wor nurde haŋyen. Gor niŋ mar gore Al Kuruŋyen mere niŋ igiŋ ma nurdeb dineŋ teŋ sukal dirde buluŋ buluŋ dirke ulniniŋ misiŋ kattiriŋ. Gega goke kafura ma hitiriŋ. Irde gor mat deŋ hitte kuŋ Al Kuruŋyen mere tagaltiriŋ goyenbe gor niŋ mar wor Al Kuruŋyen mere goke igiŋ ma nurde asogo diramiŋ. Goyenpoga Al Kuruŋniniŋ beleŋ faraŋ durke goke kafura ma heŋ kawan po momoŋ dirde hinhet. \v 3 Gobe mere tagalde hinhet goyen usi dirhet yeŋya ma dineŋ hinhet, irde gwaha yinteke turuŋ dirde igiŋ igiŋ dirnaŋ yeŋ nurde ga ma dineŋ hinhet, irde mere gote miŋ keŋkela nurdeya ga saba dirde hinhet geb, gogo kafura ma heŋ kawan po momoŋ dirde hinhet. \v 4 Irde Al Kuruŋ beleŋ, “Mel gabe mere igiŋ Yesu niŋ yitiŋ goyen fudinde igiŋ mat tagalde tukunayiŋ,” yeŋ nurdeb meteŋ gago dunyiŋ geb, dufaymiŋ po gama irde meremiŋ tagalde hityen. Niŋgeb meteŋ teŋ hityen gabe al beleŋ deneŋ amaŋeŋ nurd dunnaŋ yeŋ ma meteŋ teŋ hityen. Gwaha titiŋ yarab dufayniniŋ keŋkela yeneŋ hi al Al Kuruŋ gore deneŋ amaŋeŋ nuryeŋ yeŋ meteŋ teŋ hityen. \v 5 Irdeb dindikeŋ deneŋ hinhan gwahade goyen po, merebe kirmiŋtiŋde po hapek yaŋ nurnayiŋ yeŋ ma tagalde hinhet. Irde sabaya mataya teŋ heŋyabe bininiŋde deŋ beleŋ igiŋ igiŋ dirde det dunnayiŋ dufay buluŋ gwahade goyen bana kerde heŋya ma meteŋ teŋ hinhet. Hubu wor po. Al Kuruŋbe nurde duneŋ hi. \v 6 Neŋbe al beleŋ turuŋ dird dird niŋ ma naŋkeneŋ hinhet. Deŋ beleŋ daw ma al hoyaŋ beleŋ daw turuŋ dirwoŋ yeŋ ma nurde hinhet. \p Fudinde, neŋbe Yesu Kristuyen mere basaŋ mar geb, igiŋ gwaha gwaha dirnaŋ dintewoŋ. \v 7 Goyenpoga gwaha ma dineŋbe diriŋ kura miliŋ beleŋ keŋkela doyaŋ irde okko irde hiyen go gwahade goyen po bekkeŋde mere dirde doyaŋ dirde hinhet. \v 8 Neŋbe gwaha mat bininiŋde mat wor po deŋ ge amaŋeŋ nurde hinhet. Irdeb diriŋ kura naniŋ beleŋ gone muŋ yeŋ nurde hiyen gwahade goyen neŋ beleŋ deŋ ge amaŋeŋ nurde hinhet. Niŋgeb Al Kuruŋ beleŋ mere igiŋ Yesu niŋ yitiŋ dunyiŋ goyen momoŋ dird dird niŋ amaŋeŋ nurde hinhet. Irde deŋ ge teŋ kamtek wor igiŋ yeŋ nurde hinhet. \v 9 Niŋgeb, kadniniŋ yago, neŋbe gwahade nurde hinhet geb, Al Kuruŋ beleŋ Yesu niŋ yitiŋ mere igiŋ dunyiŋ goyen deŋ hitte tagalde hinhetyabe deŋ hantiŋ doyaŋ po ma hinhet. Moŋgo deŋ po kanduk kuruŋ duntek goke teŋbe wawuŋya naŋkahalya nindikeŋ ge nurdeb hora meteŋ kuruŋ po teŋ hinhet. Niŋgeb deŋbe neŋ meteŋ kuruŋ gwahade teŋ nufol durde hinhin gobe bitiŋ sir ma yeŋ hi yeŋ nurde hite. \p \v 10 Be, neŋbe deŋ Al Kuruŋ niŋ dufaytiŋ saŋiŋ irtiŋ marya heŋ mata igiŋ Al Kuruŋ diliŋde wukkeŋ, irde huwak wor po goyen teŋ hiteke al beleŋ gwaha mat kura tagal duntek moŋ hinhet goyen dindikeŋ deneŋ hinhan. Irde Al Kuruŋ wor deneŋ hinhin geb, ga dineŋ hime gayenbe fudinde yeŋ nurde hi. \v 11 Neŋbe deŋ nurde haŋyen gwahade goyen po, neŋbe al kura dirŋeŋ weŋ keŋkela doyaŋ yirde hiyen gwahade goyen dirde hinhet. \v 12 Gwaha dirde heŋyabe mata igiŋ teŋ teŋ dufaytiŋ tareŋ irde kanduk yeneŋ hike bitiŋ yurum yirde hinhet. Irde mata Al Kuruŋyen alya bereya beleŋ titek goyen po teŋ hinayiŋ yeŋ tareŋ po mere dirde hinhet. Al Kuruŋbe deŋ goyen alya bereyamiŋ doyaŋ yird yird bana hurkuŋ saŋiŋmiŋ turŋuŋ yaŋ keneŋ hitiŋ haŋ goyen kame wor gwahade po titek mar henayiŋ yeŋ hoy dirde hi. \p \v 13 Be, neŋ beleŋ deŋ ge teŋ Al Kuruŋ igiŋ nurde uneŋ hityen gote miŋ hoyaŋ kurabe neŋ beleŋ Al Kuruŋyen mere momoŋ dirtekeb, “Mere dirde haŋ gabe fudinde Al Kuruŋyen mere, mali mere moŋ,” yeŋ nurde hinhan. Niŋgeb goyen goke manaŋ Al Kuruŋ igiŋ nurd uneŋ hityen. Fudinde wor po, saba dirde hinhet gobe Al Kuruŋyen mere, deŋ Yesu niŋ dufaytiŋ tareŋ irde haŋ mar bana meteŋ teŋ hi mere go goyen. \v 14 Fudinde, kadne yago, deŋbe Yudia naŋare niŋ Al Kuruŋyen sios Yesu Kristuya haŋ mar kanduk yeneŋ hinhan gwahade goyen po, deŋ wor kanduk yeneŋ hinhan. Mel gobe naŋamde niŋ mar beleŋ buluŋ buluŋ yirde hinhan gwahade goyen po, deŋ wor dende naŋare niŋ mar beleŋ buluŋ buluŋ dirde hinhan. \v 15 Munaŋ Yudia naŋare niŋ mar gobe Doyaŋ Al Kuruŋniniŋ Yesu mayamiŋ. Irde neŋ wor buluŋ buluŋ dirde dakira tiyamiŋ. Bikkeŋ asem yago wor Al Kuruŋyen mere basaŋ mar porofet gasa yirde hinhan. Mel gobe al miŋ hoyaŋya awalikde hitek ma yirde hikeb mata gwahade teŋ haŋyen gogo. Irkeb Al Kuruŋ beleŋ goke igiŋ ma nurd yuneŋ hinhin. \v 16 Go mar gobe al miŋ hoyaŋ Yuda mar moŋbe epte ma Al Kuruŋyen dirŋeŋ weŋ henayiŋ yeŋ nurde haŋyen. Niŋgeb neŋ beleŋ al miŋ hoyaŋ hitte kuŋ Al Kuruŋyen dirŋeŋ weŋ heŋ heŋ belŋeŋ goyen tagalde hitekeb igiŋ ma nurde meteŋniniŋ walde haŋyen. Mata buluŋ gwahade tike kuŋ kuŋ kuruŋ wor po hekeb Al Kuruŋ beleŋ yeneŋ wasak titek moŋ geb, Al Kuruŋyen bearar bana po haŋ. \s1 Polbe Tesalonaika niŋ mar kuŋ yenmewoŋ yeŋ nurde hinhin \p \v 17 Be, kadne yago, neŋ gayenterbe al kura dirŋeŋ weŋ miŋyaŋ goyen bur yirtiŋ yara diramiŋ geb, belŋeŋeŋ po hoyaŋ hoyaŋ hite. Gega dufayniniŋdebe deŋ ge hugiŋeŋ nurde hityen. Niŋgeb daha mat kura araŋeŋ kuŋ dentewoŋ yeŋ nurde kurut wor po yeŋ hinhet. \v 18 Fudinde wor po, ne Polbe kuŋ dentek wor po nirde hiyen. Goke teŋbe deŋ hitte kuŋ kuŋ niŋ kurut wor po yeŋ hinhem. Gega Satan beleŋ, “Mel gore daha kuŋ tareŋ yirnayiŋ,” yeŋbe beleŋ pet dirde hinhin. \p \v 19 Be, kame Doyaŋ Al Kuruŋ Yesu wakeb diliŋ mar huwardeb da ikala irniŋ? Neŋ beleŋ ikala irtek detbe deŋ gogo po geb. Neŋ beleŋ deŋ goyen Al Kuruŋ diliŋde saŋiŋ heŋ heŋ ge doyaŋ heŋ hityen, irde deŋ ge dufay heŋbe amaŋeŋ nurde hityen. Irde deŋbe meteŋniniŋ gote igineŋ geb, goke teŋbe Yesu beleŋ deŋe turŋuŋ yaŋ dunyeŋ. \v 20 Fudinde wor po, deŋ ge teŋ meteŋ teŋ hinhet goke Doyaŋ Al Kuruŋ beleŋ deŋe turŋuŋ yaŋ dunyeŋ. Niŋgeb goke teŋbe deŋ ge amaŋeŋ wor po nurde hityen. \c 3 \s1 Pol beleŋ Timoti teŋ kerke Tesalonaika kuriŋ \p \v 1 Niŋgeb Atens taunde gar hinhetyabe araŋeŋ deŋ hitte mulgaŋ hetek wor po dirde hinhin. Gega neŋ tumŋaŋ kuŋ kuŋ gobe meteŋeŋ dirkeb mere sege irde Sailasya neyabe Atens taunde hirekeb \v 2 Timoti po deŋ hitte kuyeŋ yitiriŋ. Timotibe Al Kuruŋyen diriŋ, deŋya neŋya yara po. Yeŋbe neŋya Yesu niŋ yitiŋ mere igiŋ goyen tagalde tukuŋ hityen. Niŋgeb yeŋ beleŋ kuŋ dufaytiŋ Yesu Kristu niŋ tareŋ iramiŋ goyen faraŋ durkeb sopte dindikeŋ dufaytiŋ goyen tareŋ po irnayiŋ yeŋbe gogo teŋ kermeke kuriŋ. \v 3 Moŋgo kanduk yeneŋ hinhan gore dirke Yesu harhoktiŋ unnak yeŋbe gogo Timoti teŋ kermeke kuriŋ. Neŋ Yesuyen alya bereyabe kanduk gwahade po yeneŋ hitek geb, gogo deŋ wor kanduk yeneŋ hinhan goyen deŋbe keŋkela nurde haŋ. \v 4 Niŋgeb neŋbe deŋya hinhetyabe, “Al beleŋ buluŋ buluŋ dirke kanduk yentek geb,” dineŋ tebaŋ dirde hinhet go gogo. Niŋgeb gwahade po forok yeke yenamiŋ nurde haŋ gogo. \v 5 Niŋgeb goke teŋbe deŋ hitte mulgaŋ heŋ kuniŋ yeŋ hinhet goyen kuŋ ulyaŋde po hekeb Yesu niŋ dufaytiŋ saŋiŋ po irde haŋ ma dahade goyen bebak tiye yeŋbe Timoti gogo teŋ kermeke kuriŋ. Moŋgo Satan beleŋ dufay buluŋ duneŋ usi dirkeb Yesu gama ird ird mata tubul tikeb meteŋniniŋbe igineŋ ga moŋ hiyyeŋ yeŋ galgalŋeŋ nurdeb gogo Timoti teŋ kermeke kuriŋ. \s1 Timotibe Pol hitte mulgaŋ hiriŋ \p \v 6 Be, Timoti deŋ hitte kuriŋ goyen mulgaŋ heŋ waŋ forok yiyuŋ. Irdeb deŋbe Yesu niŋ dufaytiŋ tareŋ po irde haŋ irde bitiŋde mat wor po Yesuya al hoyaŋya niŋ amaŋeŋ nurde haŋ mere momoŋtiŋ igiŋ goyen momoŋ diruŋ. Irde neŋ beleŋ deŋ dentek nurde hite gwahade goyen po, deŋ wor neŋ ge bitiŋ sir ma yeke dentewoŋ wor po yeŋ nurde haŋ goyen momoŋ diruŋ. \v 7 Niŋgeb, kadne yago, dufaytiŋ Doyaŋ Al Kuruŋ niŋ tareŋ iramiŋ mere momoŋ goyen nurdeb amaŋeŋ wor po nurtiŋ. Niŋgeb meteŋ teŋ hitekeya al beleŋ buluŋ buluŋ dirke kanduk yeneŋ ulniniŋ misiŋ kateŋ hityen goke ma nurtiŋ. Irde gayenter manaŋ gwahade po nurde hite. \v 8 Fudinde wor po, deŋbe Doyaŋ Al Kuruŋya heŋ saŋiŋ heŋ haŋ geb, neŋbe goyen nurde goke amaŋ niŋ pultik wor po yeŋ hite. \v 9 Niŋgeb Al Kuruŋ diliŋde huwarde mere irde heŋya deŋ ge teŋ Al Kuruŋ igiŋ nurd uneŋ uneŋ gobe ep gago yetek moŋ yeŋ nurde hite. \v 10 Irdeb Yesu niŋ dufaytiŋ tareŋ ird ird matatiŋ kura tareŋ moŋ kenem nindikeŋ kuŋ deneŋbe saba dirde saŋiŋ dirtek yeŋ nurdeb bininiŋde mat wor po naŋkahalya wawuŋya hugiŋeŋ Al Kuruŋ gusuŋaŋ irde hite. \p \v 11 Be, Nanniniŋ Al Kuruŋ yiŋgeŋya Doyaŋ Al Kuruŋniniŋ Yesuya beleŋ deŋ hitte kuŋ kuŋ beleŋ goyen kerde dunkeb kutewoŋ yeŋ nurde Al Kuruŋ gusuŋaŋ irde hite. \v 12 Irde bininiŋde mat deŋ ge amaŋeŋ nurde hityen gwahade goyen po, deŋ wor kadtiŋ yagoya al hoyaŋ kuruŋ goyen goke manaŋ bitiŋde mat amaŋeŋ nurd nurd mata goyen Doyaŋ Al Kuruŋ beleŋ kuruŋ po irwoŋ yeŋ nurde hite. \v 13 Irdeb yeŋ ge po dufaytiŋ tareŋ irwoŋ yeŋ nurde hite. Gogab kame Doyaŋ Al Kuruŋ Yesu goyen miyoŋmiŋya tumŋaŋ mulgaŋ heŋ heŋ nalureb deŋbe Al Kuruŋniniŋ diliŋ mar huwarkeb yeŋ beleŋ al wukkek, uliŋde merem moŋ yeŋ dinyeŋ. \c 4 \s1 Al Kuruŋ beleŋ amaŋeŋ nurtek mata po teŋ hinayiŋ \p \v 1 Niŋgeb, kadne yago, deŋ mata gwahade teŋ hike Al Kuruŋ beleŋ igiŋ dinyeŋ yeŋ saba dirde hinhet. Irkeb gayenter wor gama irde haŋ. Niŋgeb Doyaŋ Al Kuruŋ Yesuya heŋ kadtiŋ yago hitiŋ hite gare matatiŋ igiŋ goyen kuŋ kuruŋ heŋ hiyeŋ yeŋ gago gusuŋaŋ dirde tebaŋ dirde hite. \v 2 Deŋbe gwaha gwaha teŋ hinayiŋ yeŋ neŋ beleŋ Doyaŋ Al Kuruŋyen tareŋde saba dirde hinhet goyen nurde haŋ. \p \v 3 Saba goyen gama irde mata teŋ Al Kuruŋ diliŋde wukkek heŋ heŋ gobe Al Kuruŋyen dufay geb, alya bereya leplep mata ma teŋ hinayiŋ. \v 4 Irde deŋ duŋkureŋ duŋkureŋ ultiŋ po amaŋ hetek mata buluŋ teŋ teŋ belŋeŋ pet teŋ hinayiŋ, irde Al Kuruŋ diliŋde wukkek al hoyaŋ wor deneŋ palap dirtek mata teŋ teŋ niŋ tuŋaŋ urde hinayiŋ. \v 5 Al Kuruŋ niŋ ma nurde megen niŋ mata po gama irde haŋ mar beleŋ biŋ harke go po gama irde haŋyen yara ma teŋ hinayiŋ. \v 6 Niŋgeb al kura mata gwahade goyenter kadomde berem leplep irde kadom buluŋ ma iryeŋ. Gwaha tinayiŋbe bikkeŋ neŋ beleŋ saba dirde hayhay dirde hinhet gwahade goyen po, Doyaŋ Al Kuruŋ beleŋ mata buluŋtiŋ goke buluŋ wor po diryeŋ. \v 7 Gobe Al Kuruŋbe mata buluŋ teŋ hinayiŋ yeŋ hoy dirtiŋeŋbe mata igiŋ Al Kuruŋ diliŋde wukkek goyen teŋ hinayiŋ yeŋ hoy diryiŋ geb, gogo mata buluŋtiŋ goke buluŋ wor po diryeŋ. \v 8 Niŋgeb saba gayen al kura gama ma irde hi al gobe alyen saba pel irhem usi teŋbe Al Kuruŋ, Holi Spirit dunyiŋ al gote saba goyen pel irde hi. \p \v 9 Be, deŋbe bitiŋde mat kadom amaŋeŋ nurd guneŋ teŋ hinayiŋ yeŋ Al Kuruŋ beleŋ saba dirtiŋ geb, goke asaŋde gar sopte ma momoŋ dirtek yeŋ nurde hite. \v 10 Irde fudinde wor po deŋbe kadtiŋ yago Yesuyen alya bereya Masedonia naŋa bana haŋ kuruŋ goyen goke bitiŋde mat amaŋeŋ nurde faraŋ yurde haŋyen. Niŋgeb, kadne yago, matatiŋ gobe gwahade po teŋ hinayiŋ. Irkeb kuŋ kuruŋ hiyyeŋ yeŋ gago dineŋ tebaŋ dirde hite. \p \v 11 Irde dintiriŋ gwahade po, keŋkela heŋ hiburŋeŋ ma hinayiŋ. Irde det kura deŋya deŋya moŋ goyen goke tonaŋtiŋ hilwa ma yirde hinayiŋ. Irde kumhaka heŋ al haniŋ doyaŋ po ma hinayiŋ. Dindikeŋ ge nurde meteŋ teŋ hinayiŋ. \v 12 Gogab Yesuyen alya bereya moŋ siŋare haŋ mar beleŋ deneŋbe palap dirde hinayiŋ. Irde det kuraŋ nurde al hoyaŋ hitte faraŋ niŋ ma naŋkeneŋ hinayiŋ. \s1 Al kamtiŋ gobe kame huwarnayiŋ geb goke buluŋ wor po ma nurde hinayiŋ \p \v 13-14 Be, kadne yago, neŋbe fudinde Yesube kamyiŋde mat huwaryiŋ yeŋ nurde hite. Niŋgeb gwahade goyen po yeŋ ge dufaymiŋ saŋiŋ irde kamtiŋ mar goyen Al Kuruŋ beleŋ Yesu wayyeŋ nalureb yisaŋ hiyyeŋ yeŋ nurde hite. Niŋgeb al kamtiŋ mar goke yitiŋ mere fudinde goyen deŋ beleŋ nurde bebak tiwoŋ yeŋ nurde hite. Gogab Al Kuruŋ niŋ ma nurde haŋ mar beleŋ al kamtiŋ gobe epte ma huwarnayiŋ yeŋ nurde al kamtiŋ goke buniŋeŋ nurde eseŋ haŋyen gwahade ma teŋ hinayiŋ. \v 15-17 Be, al kamtiŋde mat huwarnayiŋ goke Doyaŋ Al Kuruŋ beleŋ yiŋgeŋ mohoŋde yiriŋ goyen momoŋ dirniŋ tihit. Doyaŋ Al Kuruŋbe Al Kuruŋyen gasuŋde mat mulgaŋ heŋ katyeŋ goyarebe al kamtiŋ goyen kuware, “Huwarnaŋ!” yinyeŋ. Irkeb Al Kuruŋyen miyoŋ gote kuruŋmiŋ beleŋ wor gwahade po yinyeŋ. Irkeb Al Kuruŋyen bigul mere tiyyeŋ. Irkeb al Yesu Kristu nurd uneŋ ga kamtiŋ mar go wa huwarnayiŋ. Go kamereb mel goya Yesu Kristuyen alya bereya diliŋ gergeŋ hinayiŋ goya tumŋaŋ Al Kuruŋyen tareŋ beleŋ yade hurkukeb naŋa kota kigariŋkiŋ faykek hende hurkuŋ Doyaŋ Al Kuruŋ tupi tinayiŋ. Gwaha teŋ gab yeŋya hugiŋeŋ hinayiŋ. Niŋgeb Doyaŋ Al Kuruŋ wayyeŋ goyenter al diliŋ gergeŋ hinayiŋ marbe igiŋ hinayiŋ munaŋ bikkeŋ kamtiŋ marbe igiŋ ma hinayiŋ yeŋ ma nurde hinayiŋ. \v 18 Niŋgeb mere gayen dindigeŋ uliŋ kadom momoŋ gird teŋbe tareŋ heŋ heŋ ge kadom faraŋ gurd teŋ hinayiŋ. Gogab kuratiŋ kura kamkeb hugiŋeŋ dubul tiya yeŋ buniŋeŋ ma nurde hinayiŋ. \c 5 \s1 Yesu waŋ waŋ niŋ gitik teŋ hinayiŋ \p \v 1-2 Be, kadne yago, Doyaŋ Al Kuruŋ waŋ waŋ nalu gobe kawe al beleŋ watiŋ yara tiyyeŋ gwahade goyen po, yeŋ wor nalu goyare wayyeŋ yeŋ ma nurde hikeya wayyeŋ goyen deŋbe keŋkela nurde haŋ gogo. Niŋgeb Doyaŋ Al Kuruŋ waŋ waŋ nalumiŋ goke asaŋde gar sopte katek yeŋ ma nurde hite. \v 3 Be, al megen niŋ kuruŋ gabe, ‘Kanduk miŋmoŋ, igiŋ ala po hite,’ yeŋ nurde hikeya kanduk kuruŋ gore waŋ bemel po buluŋ wor po yiryeŋ. Gobe bere biŋ yaŋ kura diriŋ kawaŋ kertek heŋ uliŋ misiŋ katyeŋ yara gwaha mat kura busahartek moŋ henayiŋ. \p \v 4 Goyenpoga, kadne yago, deŋbe megen niŋ mar kidoma bana haŋ gwahade moŋ geb, Yesu waŋ waŋ nalu gobe kawe al beleŋ bemel po watiŋeŋ dirkeb hurkuŋkat ma tinayiŋ. \v 5 Deŋbe Doyaŋ Al Kuruŋ gama irde haŋ geb, matatiŋya dufaytiŋyabe igiŋ wor po. Al fareŋde heŋ det keŋkela yeneŋ beleŋ kuŋ haŋ go gwahade goyen haŋ. Fudinde wor po, neŋbe megen niŋ mar kidoma bana haŋ gwahade moŋ. Mel gobe kidoma bana heŋ det keŋkela ma yeneŋ haŋ go gwahade tiŋtuŋeŋ wor po haŋ. \p \v 6 Niŋgeb neŋbe Doyaŋ Al Kuruŋ mulgaŋ heŋ heŋ niŋ ma nurde haŋ mar beleŋ mata buluŋ teŋ haŋ gwahade ma teŋ hitek. Irde Uŋgura beleŋ tuŋaŋ durde buluŋ dird dird mata goke keŋkela nurde ga hitek. Irde ulniniŋde po amaŋ hetek mata fole irde hitek. \p \v 7 Munaŋ Doyaŋ Al Kuruŋ ma nurde uneŋ haŋ marbe al wawuŋ ferd ug po heŋ naŋa migiriŋ ma nurde haŋ go gwahade goyen, Satan beleŋ lom yirde buluŋ yirde hiyen goyen bebak ma teŋ haŋyen. Irde mel gobe al wawuŋ fe nene kukuwa heŋ haŋyen go gwahade goyen po, megen niŋ mata teŋ teŋ dufay hika titek moŋ geb, go po gama irde kuŋ kuŋ buluŋ heŋ haŋyen. \p \v 8 Gega neŋbe al gwahade moŋ. Neŋbe Doyaŋ Al Kuruŋyen mere gama irde hityen geb, al fareŋde beleŋ keŋkela keneŋ kuŋ haŋyen go gwahade goyen po, heŋ heŋniniŋ manaŋ igiŋ po hityen. Niŋgeb ulniniŋde po amaŋ hetek dufay fole irde Doyaŋ Al Kuruŋ niŋ hekkeŋ nurdeb Al Kuruŋya al hoyaŋya bininiŋde mat wor po amaŋeŋ nurde yuneŋ hitek. Mata gobe fuleŋa mar beleŋ kili misiŋ pet teŋ teŋ ain beleŋ po irtiŋ dumuŋde yerde haŋyen go gwahade geb, Satan beleŋ epte ma buluŋ diryeŋ. Irde neŋbe Al Kuruŋ beleŋ nalu funaŋde neŋ tumŋaŋ dumulgaŋ tiyyeŋ yeŋ nurde goke doyaŋ heŋ hitek. Go mata gobe fuleŋa mar beleŋ kili misiŋ pet teŋ teŋ ge tonaŋ aw yerde haŋyen go gwahade geb, Satan beleŋ epte ma buluŋ diryeŋ. \v 9 Munaŋ Al Kuruŋ beleŋ dumulgaŋ tiyyiŋ gobe beararmiŋ bana heŋ heŋ ge ma basiŋa diryiŋ. Gwahade yarabe Doyaŋ Al Kuruŋ Yesu Kristu gama irteke dade dirŋeŋ weŋ dire yeŋ basiŋa diryiŋ. \v 10 Yesu Kristube kame mulgaŋ heŋ wayyeŋya goyare neŋ al kura diliŋ gergeŋ hinayiŋya al kamtiŋya tumŋaŋ yeŋya hugiŋeŋ heŋ heŋ goke teŋ kamyiŋ. \v 11 Niŋgeb mata igiŋ teŋ haŋyen gwahade goyen po, Al Kuruŋyen mere keŋkela gama irtek yeŋbe saŋiŋ heŋ heŋ ge kadom faraŋ gurd teŋ hinayiŋ. \s1 Saba funaŋ \p \v 12 Be, kadne yago, gor niŋ Doyaŋ Al Kuruŋyen meteŋ mar deŋ doyaŋ dirde saba dirde huwa dirniŋ yeŋ meteŋ kuruŋ teŋ haŋ mar goyen meremiŋ nurde palap yirde hinayiŋ yeŋ gago momoŋ dirde hite. \v 13 Irdeb meteŋmiŋ goke bitiŋde mat amaŋeŋ nurde yuneŋbe turuŋ yirde palap wor po yirde hinayiŋ. Irde dindikeŋ uliŋ wor kadom buluŋ nurde guneŋ ma teŋ awalikde igiŋ po hinayiŋ. \p \v 14 Gega, kadne yago, deŋ bana goyen al kura kumhaka heŋ hike yeneŋbe saba yirde hayhay yirde hinayiŋ. Irdeb al kura kanduk yeneŋ kafura heŋ araŋ po yul yeŋ haŋ mar kura hike yeneŋbe faraŋ yurde tareŋ yirde hinayiŋ. Irdeb megen niŋ mataya dufay buluŋya pel ird ird tareŋ miŋmoŋ mar kura yeneŋbe go mar goyen wor faraŋ yurde hinayiŋ. Irde kadtiŋ kura matamiŋ igiŋ hewoŋ yeŋ doyaŋ heŋ heŋ ge piŋeŋ ma heŋ hinayiŋ. \v 15 Irde deŋ kuruŋ goyen al hoyaŋ beleŋ buluŋ dirke wol ma heŋ hinayiŋ. Gwaha titŋeŋbe kadtiŋya al hoyaŋya goyen tumŋaŋ igiŋ igiŋ yird yird niŋ kurut yeŋ hinayiŋ. \p \v 16 Irdeb kanduk yeneŋ hinayiŋ ma kanduk ma yeneŋ hinayiŋ nalure goyenbe hugiŋeŋ amaŋ hende po hinayiŋ. \v 17 Irdeb Al Kuruŋya mere teŋ teŋ niŋ bada ma henayiŋ. \v 18 Irdeb nalu igiŋde po ma Al Kuruŋ igiŋ nurd uneŋ hinayiŋ. Nalu igiŋya buluŋya waŋ hiyeŋ goyenbe hugiŋeŋ gwahade po teŋ hinayiŋ. Mata gwahade teŋ hinayiŋ yitiŋ kuruŋ gobe deŋ Yesu Kristuya haŋ mar beleŋ gama irde hinayiŋ yeŋ Al Kuruŋ beleŋ dunyiŋ geb, mata goyen po teŋ hinayiŋ. \p \v 19 Irde Holi Spirit beleŋ bitiŋ bana heŋ meteŋ tike okohom po yeŋ ge naŋa mala teŋ unnayiŋ. Gwaha ma tinayiŋbe kak isikamtiŋeŋ irke meteŋ ma tiyyeŋ. \v 20 Irdeb Al Kuruŋ beleŋ al kura hard unke mere tike keneŋbe det karimŋeŋ kura yeŋ ma nurnayiŋ. Det kuruŋ wor po momoŋ dira yeŋ nurnayiŋ. \v 21 Goyenpoga al kura beleŋ, “Holi Spirityen saŋiŋde mere teŋ hite, irde meteŋ teŋ hite,” yeke yeneŋbe fudinde ma dahade goyen keŋkela yeneŋ bebak teŋ hinayiŋ. Irdeb fudinde yeŋ kenem gama irde hinayiŋ. \v 22 Irde mata buluŋbe tumŋaŋ gama ma yirde hinayiŋ. \p \v 23 Be, Al Kuruŋbe bininiŋ kamke igiŋ heŋ heŋ dufay duneŋ duneŋ al. Niŋgeb yeŋ beleŋ deŋ tareŋ dirke diliŋde wukkek igiŋ wor po hiwoŋ yeŋ nurde hite. Irde bitiŋ, dufaytiŋya ultiŋya goyen igiŋ wor po hekeb Doyaŋ Al Kuruŋniniŋ Yesu Kristu waŋ waŋ nalureb gwaha mat kura mere ultiŋde irtek miŋmoŋ hiwoŋ yeŋ nurde hite. \v 24 Deŋ hoy dirde hi al Al Kuruŋbe deŋ gwaha direŋ yeŋ biŋa tiyyiŋ goyen biŋ sir ma yeŋ hiyen. Niŋgeb meremiŋ go po gama irde yiŋgeŋ diliŋde wukkek diryeŋ. \p \v 25 Be, kadne yago, neŋ ge nurde Al Kuruŋ gusuŋaŋ irde hinayiŋ. \v 26 Irde kadniniŋ yago Yesuyen alya bereya hoyaŋ kura goyen yeneŋbe neŋ beleŋ yeŋ ge dufay heŋ hityen goyen momoŋ yirnayiŋ. \v 27 Irde asaŋ kaŋ dunhem gabe kadtiŋ yago Yesuyen alya bereya tumŋaŋ kapyaŋ heŋ yunnayiŋ yeŋ gago Doyaŋ Al Kuruŋ diliŋ mar mere tareŋ po dirde hime. \p \v 28 Be, Doyaŋ Al Kuruŋniniŋ Yesu Kristu beleŋ buniŋeŋ dirde igiŋ igiŋ diryeŋ yeŋ gusuŋaŋ irde hime. Gogo po.