\id 1TI  
\h 1 TIMOTI 
\toc1 1 Timoti 
\toc2 1 Timoti 
\toc3 1 Timoti 
\mt1 1 Timoti  
\c 1  
\p
\v 1 Aya, Pol, Negur neda Isennadaya ado Kristus Jesus neda wauda iseya neid nigiya od bunem Kristus Jesus nẽ aposel wõ aun,   
\p
\v 2 Timoti, momoiya bun neu kesu bagai, bun pas enei atotof.  
\p Tamada Negur ado neda Odug Kristus Jesus neid wau ifenẽya, wau yũya ado, wau inosiya, õ bun ibodõf.   
\s1 Idegẽya Lo Tai Fiya Tamo Nigin Weder Irouya  
\p
\v 3 Aya Masedonia provins alauf sain bun, aya õ totol bagai arokonon, Efesus an ubod ken, tamo tunĩ urokenẽdi di, idegẽya keleĩ anĩ baban to tai difediyouf.  
\v 4 Ago di, idi nenerĩ ege ado ibor idikeleya sã dir difedidig anĩ so difediyouf. Age fediya are momoiya bunem Negur nẽ kabĩ yaleya ban, luwa irouya dogol dalesedig.  
\v 5 Weder irouya od enei nẽ gariya are, wau laa fiya, are ĩ wau karẽtut, es fiya kisi biya ado, momoiya bagai bun tamal isidig.  
\v 6 Tunĩ enei bunem diya dile, od kaũ sã wogõya bun dilelen.  
\v 7 Idi lo tai fiya tamo wõya orodif, anĩ ere, idi ereb wogõ def ado, ereb nigin totol dinof are idi keleĩ sã.   
\p
\v 8 Ada keleĩ, taka ĩ lo dõf el fouf are, lo ĩ biya.  
\v 9 Ada keleĩ, lo ĩ madur tamo nigin to inof, ĩ lo wal fiya, idodõya, Negur dudum fiya, mosor temeleid, idi fateul sã, idi buru naumeĩ nigin kisi difedig, idi sineid temeid tar didenkesif, tamo yukesiya,  
\v 10 noliya, tamo tutur kayau tutur noliya, ferfer inouf nigin tamo bẽ yaleya, idegẽya, momoi nẽ od wa fiya, ereb ganan ifelnẽya biya wal difef anidi nigin lo inof.  
\v 11 Ifelnẽya biya anĩ, biya od fula fiya medeĩya, Negur el fiya barikã aya wogõya nigin ifanan anĩ susu felef.   
\s1 Odug Nẽ Wau Ifenẽya Pol Bun Ilen  
\p
\v 12 Aya neda Odug Kristus Jesus megeir ifanan anĩ de afiyek, ere nigin, ĩ aya yogon od dõ fiya biya anĩ ile fen, in kabĩ alouf nigin igirnan.  
\v 13 Aya kulu kono fiya tamo, tadũ fediya tamo, seye tamo, anĩ ere, aya wau yũya ifanan, ere nigin, aya to kelei ken, momoiya sa ken, age afen.  
\v 14 Neda Odug nẽ wau ifenẽya, Kristus Jesus nẽ momoiya wau laa fiya ado, mugi bagai aya bun foula felen.   
\p
\v 15 Od enei momoi bagai, ganan dale fen, momoi douf nigin: Kristus Jesus mosor tamo kel gei fiya nigin tenebur isin. Idi atun aya sane bagai, idi ganan wal fediya.  
\v 16 Anĩ ere, gariya eig fiya nigin, aya wau yũya ifanan, are aya mosor temeleid ganan wal fediya bun, Kristus Jesus in imatẽya mugi bagai aya bun ifelnẽdin, anĩ bunem idi momoi douf anidim dile fen, ĩ nigin momoi de fen, mata ibodkeleya anĩ dalouf nigin ĩ age fen.  
\v 17 Gama King ibodkeleya, ĩ mata ibodkeleya, ileya kisi feleya sã, Negur yogo dogol anĩ bun yana ado fula fiya medeĩya gai gai ibodkalauf. Momoi.   
\p
\v 18 Timoti, neu kesu, aya tai fiya od eig fiya afonok, are õ nigin profet od wogõya yenen anĩ dõ wo di, õ sã biya kusĩ wouf nigin.  
\v 19 Momoiya ado wau karẽtut biya urou kafĩ wol. Tunĩ anĩ ditoraran nigin dogo neid momoiya tadũ difelen.  
\v 20 Age difen atun are Himeneus Aleksanda ado, idi Negur to kono difiyẽf anĩ keleĩ youf nigin, Satan ima bun anenẽdin.   
\c 2  
\s1 Negur Yana Yaleseya Nigin Fadedya  
\p
\v 1 Aya õ totol bagai orokonok, uruwa bagai, are nonĩ fiya, kosẽya, taka nigin Negur irokenẽya, de fiyẽya anĩ, tamo ganan nigin agouf.  
\v 2 King ado kabĩ nẽ mudur ganan nigin agouf, are ada wauda inosiya ado foro tausil, Negur orof ganan ado fateul bun tabodõf nigin agouf.  
\v 3 Agouf are biya, Negur neda Isennadaya wau al fef,  
\v 4 Negur ĩ tamo adok ganan kel gei fouf nigin ado, momoi nẽ keleĩ bun disiyouf nigin orof.  
\v 5 Are, Negur ĩ tekelei, agef fen, atun tamo tekelei, Negur ado tamo atun ifaref, tamo are Kristus Jesus,  
\v 6 tamo ganan fotokar ĩ yogo bouwa itoron, anĩ yogon sain bun bagai Negurem tenebur tamo kayau keleĩ youf nigin yaoren.  
\v 7 Age fiya nigin, aya arũ tamo, aposel igirnan, aya momoi bagai orok, aya idegẽya sã, aya, haiden atun, momoiya bagai nẽ ifelnẽdiya tamo igirnan.   
\p
\v 8 Tamo fõ fõ ganan imeid fateul ilun dales fen, kosẽ douf anĩ aya orouf, seye sã, monẽ sã.   
\p
\v 9 Takag, aya kayau kolos biya, taka mama ifenẽya nẽ ani sã, tamo kayau nẽ lo fiya biya bun ifonũya anĩ orouf, fatiya kori fiya sã, gol sã, maaĩ tuwa meli bagai pel nẽ kilelei sã, meein odug nẽ kolos sã anĩ orouf.  
\v 10 Anĩ ere, aya idi tobonunã biya dõ difouf anĩ orouf, are kayau Negur yana dalesef ya anĩ susu falauf.   
\p
\v 11 Kayau ĩ foro yel dẽ yesil fen, dõ fouf anĩ bunem keleĩ yalouf.  
\v 12 Aya kayaum tamo ifelnẽya be, wal fiye ken, uyu iroukenẽya nigin to yo auf, ĩ foro yalauf bagai.  
\v 13 Ere nigin, Adam ketem inon, agef fen, Eva inon.  
\v 14 Agef fen, Adam anĩ to idegnen, kayau anĩ idegnẽ di, mosor bun kubũ yen.  
\v 15 Anĩ ere, kayau idi toku tobonunã biya bun momoi douf, waud laa fouf, fateul dibodõf are, idi kesu gõ fiya bun isennẽya dalouf.   
\c 3  
\s1 Uyu Iroudiya Ado Uyu Iroudiya Farumen Kabĩ Tamo  
\p
\v 1 Od enei are momoi bagai: Taka ĩ uyu irouya wõ youf nigin wau irõf, ĩ kabĩ biya yaleya nigin orof.  
\v 2 Uyu irouya, yana sane sã, ĩ kayau aiwauf, anĩ ere, ĩ kayau tekelei youf, ĩ molol tamo, yogo nigin el fe kulatun fouf, ĩ karĩ difiyẽf, tamo dor yalouf, tai fiya kisi feleya,  
\v 3 aai to yõdig, to kusĩ youf, imatẽya, monẽya sã, moni nigin wau laa fiya sã.  
\v 4 Ĩ kayau kesu el fe, lo fediyouf bagai. Age fe di, in kesu el de dõ de fen, karĩ difiyẽf.  
\v 5 (Taka ĩ yogon kayau kesu lo feid fen, tutuk fediya kisi feleya sãf are, naig fe fen, ĩ Negur nẽ sios lo fouf?)  
\v 6 Ĩ gama bagai momoiya tamo wõ ye fen, to uyu irouya ifarauf bagai, age fouf are, ĩ bilãya bunem fasikor fele di, Negur Satan es fiyen gen, ĩg es fiyẽf be.  
\v 7 Ĩ serẽ temeleid buneg yana biya adouf bagai, anĩ bunem, ĩ yana sane to yale fen, Satan nẽ kor bun to ilauf.   
\p
\v 8 Uyu iroudiya farumen kabĩ tamo anidi, areg age fiya, tamo idi karĩ difiyẽdidig, idi baleid to kara urudig, aai fatuk to dõdig, idegẽya bunem safina to daledig.  
\v 9 Idi momoiya nẽ keleĩ mugi, kisi karẽtut atata feleya ado dirouwauf bagai.  
\v 10 Uruwa idi kisi difediyouf, age de fen, idi bun od taka sãf are, utornẽdig len, uyu irouya farumen kabĩ tamo wõ de fen, tamo kayau disennẽdiyouf.   
\p
\v 11 Naab tekelei anĩ bunem, nedi aiweid tar idig karĩ difiyẽdiyouf, idi dumen od to wogõ douf, anĩ ere, idi molol fen, ereb ereb ganan kulatun fiya kisi falauf.   
\p
\v 12 Uyu irouya farumen kabĩ tamo ĩ kayau aiwauf, anĩ ere, kayau tekelei fen, in kesu tar ado fõ ereb ereb ganan anĩ el fe, kulatun fediyouf bagai.  
\v 13 Idi kabĩ biya dalen, are yeneid biya bagai dalef, age de fen, idi Kristus Jesus bun momoiya nigin kukĩya sã wogõ def.   
\p
\v 14 Aya õ gein kaisã bagai isiya nigin wau yenek, anĩ ere, aya faded enei atotkonok, anĩ bunem,  
\v 15 aya foi auf are, tamo kayau Negur nẽ fõ bun naig de age difouf are õ keleĩ youf, Negur nẽ fõ anĩ mata ibodõya Negur nẽ sios, are momoi nẽ monog tor ado gariya.  
\v 16 Neda momoiya nẽ waa anĩ odug, are taka nem wa fiya kisi feleya sã:  
\b  
\q1 Ĩ bouwa ado wõ yen,  
\q2 Awa Uurem ĩ madur bagai anĩ yaoren,  
\q1 age fe di, engelem dilen,  
\q2 age de fen, teneub ganan bun ĩ nigin wogõ de,  
\q1 momoi de di,  
\q2 fula fiya medeĩya bun yalesnen.   
\c 4  
\s1 Pol Timoti Faded Fiyen  
\p
\v 1 Awa Uur yaor bagai irok, dum bun tunĩ fau momoiya ditor ken, idegẽya uur ado ereb ereb kaa sesen idim difelnẽdiyouf anĩ, idi dõ difouf.  
\v 2 Ifelnẽdiya age fediya are, idegẽya tamo neid meleid yaleya bunem isif, idi neid kisi ain uruwam ifalege di, galig leya gen.  
\v 3 Idi tamo kayau yaleya katũ difiyeĩd fen, saaf tunĩ nigineg katũ difiyẽdiyouf, saaf are Negurem tamo momoi de fen, momoi nigin keleĩ anidi Negur de difiye ken, dãf nigin inodin.  
\v 4 Ereb ereb ganan Negur inon are biya, ereb ereb Negur de fiye ken, yaleyauf anĩ, to sese fiyẽyauf,  
\v 5 ere nigin, are Negur nẽ od ado kosẽ bunem fateul ifenek.   
\p
\v 6 Ereb ereb enei turã tar bun ufelnẽdiyouf are, momoiya od ado ifelnẽya biya dõ wodig anim megeir ifonõ di, Kristus Jesus nẽ kabĩ tamo biya wõ wouf.  
\v 7 Negur ditoron anĩ nẽ od ado kayau tubau neid nenerĩ ege anĩ to urou, Negur nẽ tobonunã dõ fiya biya wõ wouf nigin, õ ogo tai wouf.  
\v 8 Bouwa buru nẽ tai fiya are naal isennadaf, anĩ ere, Negur nẽ tobonunã dõ fiya biya are ereb ereb ganan nigin isennadaf, anim gama mata ibodõya nẽ ado dumen mata ibodõya nẽ promis od irouf.   
\p
\v 9 Od enei momoi bagai, ganan dale fen, momoi douf nigin  
\v 10 (enei nigin, ada kabĩ tale fen, lakĩ tafef), are ada neda wauda iseya mata ibodõya Negur bun tanon, ĩ tamo ganan nẽ isennẽya, idi momoi def anidi neid bagai.   
\p
\v 11 Ereb ereb eneidi urokeneĩd, su agog wiyeĩd fen, ufelneĩd.  
\v 12 Õ kesu oosi de fen, takam to lai yõi, anĩ ere, wogõya bun, ibodõya bun, wau laa fiya bun, momoiya bun, amuyẽ sã karẽtut bun, momoiya tamo neid suma ago fen, idi age de dõ difouf nigin ufelnẽdiyouf.  
\v 13 Atun meleid bun Negur nẽ Itotoya uwesauf, faded wediyouf, ago fen, ufelnẽdif ule mog, aya asiyouf.  
\v 14 Uyu irouya imeid õ teten dino fen, profet od bunem uur nẽ ege luwa walen anĩ to welebi wo.   
\p
\v 15 Õ suma enei ganan dõ fen, waũ adok wenẽdiyouf, anĩ bunem, tamo kayau ganan ogon kabĩ naig fe ilef anĩ dilouf.  
\v 16 Õ ogo nigin ado ogon ifelnẽdiya nigin lo walauf. Anĩ feseya sã toku agouf, anĩ bunem, õ ogo ado idi karĩ diyõf anidi isennẽya walogouf.   
\c 5  
\s1 Momoiya Tamo Kayau Kulatun Fediya Nigin  
\p
\v 1 Tamo tubau totol bagai to kãkã wiyẽf, anĩ ere, õ tamã gen urokenẽf. Kesu oosi, turã tar gen walediyouf,  
\v 2 kayau biyeid are sinã gen, kayau momoul are main tar gen, kisi karẽ bagai ado walediyouf.   
\p
\v 3 Kayau waab bagai kesu sã anidi el ge lo wedigouf.  
\v 4 Anĩ ere, waab taka ĩ gere tar be, tubu tar adouf are, uruwa idi neid Negur dõ fiya nẽ tobonunã biya tai fiya nigin, idi neid ibor el de kulatun difouf, nedi sineid temeid tar simõ bun lo difedin anĩ kilei abag age de kulatun difediyouf, anim Negur wau al fouf.  
\v 5 Kayau waab bagai taka, ĩ mugu bagai, isennẽya yaleya nigin yogon wau iseya Negur bun ino fen, bõ ado gaa ado toku kosẽ ye fen, Negur bun isennẽya yaleya nigin to fiyẽf.  
\v 6 Anĩ ere, waab taka ĩ bouwa sigigi fiya nigin dogol ibodõf are, ĩ mata ibodok, anĩ ere, ĩ laa fen.  
\v 7 Faded eneig tamo kayau wenẽdiyouf, ago di, taka bouwa bun od to dinouf.  
\v 8 Taka ĩ yogon ibor tar to kulatun fediyouf, yogon sina tama kayau kesu bagai anĩ to kulatun fediyouf are, in wau momoiya wa fef, anĩ bunem, ĩ sane bagai, taka to momoi yef anĩ wal fiya.   
\p
\v 9 Waab taka ĩ aiwa tekelei ado el de dibodok dile 60 yar wal fen ouf are, waab neid daũ bun unenẽf,  
\v 10 agef fen, ĩ yogo tobonunã biya nigin yana ado, ĩ kesu kulat biya, ĩ tamo yaledig, momoiya tamo kayau yeid kulo fedig, morõ adodo isenneĩd fen, ĩ yogo ereb ereb biya ganan age fedig.   
\p
\v 11 Kayau waab fau gaũ idi, waab neid daũ bun to unouf. Ere nigin, idi neid bouwa nẽ oroya anĩ, Kristus nigin momoiya anĩ wal fese di, idi tamo yaleya nigin orodiyouf.  
\v 12 Anĩ bunem, idi es fiya dogo bouweid bun dinof, ere nigin, idi uruwa bun waud kuturol fen iron anĩ narĩ difen.  
\v 13 Takag, idi fõ fiya tobonuneid ado fen, fõ fõ dalef diyõdig. Fõ fiya dogol sã, dumen od wogõya ado, taka nigin wogõ yef iyõya, idim to wogõya nẽ anĩ wogõ dedig.  
\v 14 Anĩ nigin, kayau waab fau gaũ, tamo dalouf, kesu adouf, nedi fõ el de lo difouf, kiwaim idi dumedin irõya nigin naab to dukenẽdiyouf anĩ aya orouf.  
\v 15 Tunĩ mogo ditor ken, Satan dõ difen.   
\p
\v 16 Kayau taka ĩ momoiya ado, in ibor bun waab adodiyouf are, ĩ yogo isennẽdiyouf, idi nigin sios morõ to ifenẽf, anĩ bunem, sios waab idi isennẽdiya nigin bagai yenek anidi isennẽdiyouf.   
\p
\v 17 Uyu irouya sios nẽ kabĩ el de diroulef, yana biya ado mala solo biya bagai dalouf, are idi biya od wogõ def ado difelnẽdif anidi, age difouf bagai.  
\v 18 Negur nẽ Itotoya eig ye irok, “Bulmakau wit faat biya nẽ gabar yalelauf nigin lalai feid mog, yogon awa to ufokol,”\f + \fr 5:18  \ft Diuteronomi 25:4\f* takag, “Kabĩ tamo, yogon kabĩ mala yalouf.”\f + \fr 5:18  \ft Luk 10:7\f*  
\v 19 Uyu irouya taka nigin bouwa yũya od to urouwauf, fau uruwom be towom dirõ di, anĩ urouwauf.  
\v 20 Idi mosor dinof are tamo kayau meleid bun ou wiyẽdiyouf, are tunĩ wedereid fokõ youf nigin agouf.   
\p
\v 21 Negur, Kristus Jesus ado, engel igirnẽdin meleid bun, aya õ totol bagai orokonok, faded enei dõ fen, taka dogol waũ to wenẽf, õ anĩ kinau ya anĩ bunem ereb taka to agouf.   
\p
\v 22 Tetedin imã inoya nigin to sibu wo, tunĩ neid mosor bun to kababal wo. Õ karẽ bagai ubodõf.   
\p
\v 23 Naan dogol to wãf, wain naal bagai walouf, ere nigin, ogon name darau nigin ado, ogon dagi baba baban wõ yedig nigin.   
\p
\v 24 Tamo tunĩ neid mosor are yaor, anĩ ketem es fiya bun ifaref, anĩ ere, tunĩ neid mosor dum yaorouf.  
\v 25 Age fiya gen bagai, biya age fiya are yaor, idi biya age fiya gama yaor sã areg, iminẽya kisi feleya sã.   
\c 6  
\p
\v 1 Ferfer idi ganan, nedi moroid tar yana biya dino fen, karĩ difiyẽdiyouf, anĩ bunem, Negur nẽ yana ado ama mafelnẽdif anĩ, to kono difouf.  
\v 2 Tunĩ idi, nedi moroid tar momoiya adouf are, amã tura tura de fen, to karĩ difiyẽdig gen to age difouf. Age fiya ban, idi el de aruneid dalouf, ere nigin, idi neid kabĩ bunem biya dalef are momoiya tamo, idi neid oboiyeid. Enei ganan anĩ ufelneĩd fen, totol bagai urokenẽdiyouf.   
\s1 Moni Nigin Wau Laa Fiya  
\p
\v 3 Taka ĩ idegẽya keleĩ ifelneĩd fen, Odug Jesus Kristus nẽ faded fiya biya ado fateul ibodõya ifelnẽdiya anĩ nigin wau to irõf are,  
\v 4 ĩ idegẽyam idegnẽ di, bilã yef, ĩ ereb taka to keleĩ. Ĩ monẽya ado od luwa irouya nigin oroya sane ado, anĩ bunem, kiyeĩ, kusĩ, bou yũya od, sisiniya kisi sane irou fen,  
\v 5 tamo kisi sesen ado atun toku koũkã ya ibodõf, tamo kisi sesen ado anidi, momoi anĩ ditor ken, fateul ibodõya are moni odug yaleya nigin de fen, kisi difedig.   
\p
\v 6 Anĩ ere, safina nigin wau morõ sã ado fateul ibodõya anĩ, mala biya ado.  
\v 7 Ere nigin, ada teneub enei bun gemũ tasin nigin, age fiya bagai gemũ ke tauf.  
\v 8 Anĩ ere, ada saaf ado kolos adouf are, ada nigin de tauf.  
\v 9 Tamo kayau safineid ado ibodõya kisi difef anidi, kisi fiya bun, kor bun ado, neneya kisi ado waila dĩ fiya kisi musei bun kuku def, kisi anim tamo daũf sane lauf.  
\v 10 Moni nigin wau laa fiya, are ereb ereb sesen ganan nẽ gariya. Tamo kayau tunĩ moni nigin waud ditenen, momoiya ditor ken, idi dogo waud darau musei dalen.   
\s1 Polem Timoti Ago Dõ Woi Fiyen  
\p
\v 11 Anĩ ere, õ, Negur nẽ tamo, enei ganan nigin so rel fen, madur bagai ibodõya, fateul ibodõya, momoiya, wau laa fiya, feseya sã ifareya ado, molol dõ wouf.  
\v 12 Momoiya nigin kusĩ biya walouf. Mata ibodkeleya are, õ musei meleid bun el wo, kurõ wesin sain bun, õ anĩ nigin iweignon anĩ urou kafĩ wol.  
\v 13 Negur ereb ereb ganan mata ifenẽdidig ado, Kristus Jesus ĩ Pontius Pailat mala bun el fe kurõ fesin, idi meleid bun, aya õ orokonok,  
\v 14 od enei dõ, kerema sã dõ wo ule, neda Odug Jesus Kristus wõ youf,  
\v 15 are Negur yogon sain bun irou isiyouf, Negur ĩ el fiya ado ĩ dogol Uyu Irouya, king neid King ado odudug neid Odug,  
\v 16 ĩ dogol ĩ mata ibodkeleya, agef fen, ĩ lalan medeĩya barikã tamom an ileya nigin kisi feleya sã anĩ bun ibodõdig, taka nem to ilen, taka nemeg to ilouf. Ĩ bun yana ado megeir faimud ibodkalauf. Momoi.   
\p
\v 17 Teneub enei bun safina musei adodo urokenẽdig len, yeneid to dales fen, moni nigin waud to diten, moni are gai to ibodkalauf, anĩ ere, idi neid waud Negur bun dinouf, ĩ ada wauda al fouf nigin, ereb ereb ganan kisi feleya ifanadadig.  
\v 18 Idi tobonunã biya age dife di, tobonunã biya inid ado dibodõf nigin, dor yaleya nigin ado, ne tã isennẽya nigin urokenẽdiyouf.  
\v 19 Naab enei bunem, idi safina biya dogo neid dumen nẽ nigin gariya megeir ado dino fen, mudu dino di, iselauf, age de fen, idi mata are mata bagai anĩ dalouf.   
\p
\v 20 Timoti, ereb ereb õ bun inon anĩ kulatun wo. Momoiya sã neid od ado, kiwai kisi are idegẽya bunem keleĩ biya dedig anĩ so wiyẽ,  
\v 21 are tunĩ mogo wogõ den, anĩ age de fen, idi momoiya bun tamal ditor diyalelen.  
\p Wau ifenẽya õ bun ibodõf.