\id TIT - Kwere Bible Version
\ide UTF-8
\h Tito
\toc1 Usenga wa Paulo kwa Tito
\toc2 Tito
\toc3 Tit
\mt2 USENGA WA PAULO KWA
\mt1 TITO
\imt Ulongozi
\ip Usenga wa Paulo kwa Tito ni umwe muna zisenga nne za Paulo woyomwandikila munhu na siyo bumbila da wahuwila wa Chilisito. Senga zimwenga ni 1 Timoseyo na 2 Timoseyo na Filimoni. Paulo kamwandikila Tito, mbali kamwandika fana usenga woudaha kusomigwa muna umwingi. Chovimanya vino kwaviya kafambula nhunya yake fana Mtumigwa, mbuli ija Tito kaimanya kamala. Yodahika Paulo kawandika usenga uno hagati ya mwaka 63-65 kwandusila viyelekigwe Yesu.
\ip Paulo kamulagiliza Tito kuyalanguliza mabumbila ya wahuwila wa Chilisito yakalile muna ichisiwa cha Chilete. Paulo kawandika usenga uno muladi kumulagiliza Tito kusagula na kufundiza walangulizi wa mabumbila ya wahuwila wa Chilisito. Kazilava ndagilizi zilingile zino muna usenga wake kwa Timoseyo. Usenga wake wolonga viya walangulizi wa bumbila da wahuwila wa Chilisito viwolondeka kuwa simwe muna zimbuli zose kwa kusang'hana yanogile. Mabumbila ya wahuwila wa Chilisito na walangulizi wa sambi wavimanye vinogile mbuli zowolondeka kutenda muna ulangulizi.
\iot Yeliumo
\ili 1. Paulo komulagiliza Tito kuwasagula walangulizi wokwaminika muna 1:1-16.
\ili 2. Kaidi komulagiliza kufundiza wanhu kukala kwa ugima wa kumnogeza Mulungu muna 2:1-3:11.
\ili 3. Kuuhelelo, Paulo kogotola kwa kwandika mbuli za kukomelezela muna 3:12-15.
\c 1
\p
\v 1 Niye Paulo mtumigwa wa Mulungu na mtumigwa wa Yesu Chilisito. Nisaguligwa na nitumigwa kuwataza wanhu wowasaguligwe na Mulungu muna uhuwilo wawo kwa kuwafundiza ukweli wa kukala kwa kumnogeza Mulungu, 
\v 2 chandusilo cha uhuwilo ni lolelo da kupata ugima wa siku zose. Mulungu halonga uvwizi bule, kachikila chilagano cha ugima uwo kwandusila mwanduso wa kulumbigwa kwa isi yose. 
\v 3 Kagubula mbuli yake kwa lusita lufaya kwa nzila ya kupeta, Mulungu Mulopozi wetu kanilagiliza kuigong'onda.
\p
\v 4 Nokwandikila weye Tito, mwanangu kweli muna uhuwilo.
\p Nokulondela unovu na tindiwalo kulawa kwa Mulungu Tata na Chilisito Yesu Mulopozi wetu.
\s Usang'hano wa Tito kuna ichisiwa cha Chilete
\p
\v 5 Nikuleka uko kuna ichisiwa cha Chilete muladi wike goya mbuli ziya zing'hali hazinakomelezeka bule, na kuwasagula walala walangulizi wa bumbila da wahuwila wa Chilisito muna ichila bululu, fana viya vinikulagilize. 
\v 6 Mulala mulangulizi wa bumbila da wahuwila wa Chilisito kolondeka sekeyawe mbananzi, yawe na muke imwe muhala, na wanage wolondeka wamuhuwile Chilisito na sekewawe na ugenzi wihile na hawategeleza. 
\v 7 Mana Mulala mulangulizi wa bumbila da wahuwila wa Chilisito yolola mbuli za wanhu ni ndolezi wa sang'hano ya Mulungu. Kolondeka yawe munhu halongigwa vihile na wanhu wamwenga na yelibule ludoko na siyo mkolwa na yelibule ndwagi na yelibule magoda na halonda kupata hela kwa nzila ihile, 
\v 8 kolondeka sekeyawe mgila na yalonde mbuli zinogile. Kolondeka yatende yanogile haulongozi ha Mulungu na yawe yotenda mbuli voilondeka na yelile na yoilanguliza mwenyewo. 
\v 9 Kolondeka yamhe chigangamavu mbuli ya kweli fana viyafundizigwe, muladi yawagume moyo wanhu wamwenga kwa kuweng'ha mafundizo ya ukweli na kuwahuma waja wowolema.
\p
\v 10 Kwaviya wauko wanhu wengi haswa waja walawile muna inzila ya kumsondelela Mulungu ya Chiyahudi wolema kuwategeleza walangulizi na kuwavwizila wanhu wamwenga kwa ubozi wawo. 
\v 11 Wanhu wawo wolondeka wafudazigwe, kwaviya wabananga lukolo lose kwa kuwafundiza mbuli ziya hazilondeka kufundiza. Wotenda ivo kwa lungilo dihile da kupata hela. 
\v 12 Hata imwe wa walotezi wawo, na yeye iviya Mchilete kalonga, “Wachilete siku zose wavwizi, wang'onyo wehile na wabwa na wamelo.” 
\v 13 Usindila uno ni kweli. Bwakila kwa ukali, muladi wawe na uhuwilo wa kweli. 
\v 14 Na sekewategeleze simo za Chiyahudi na ndagilizi izo zozilawa kwa wanhu waulemile ukweli. 
\v 15 Vino vose vela kwa wanhu waja welile, mbali habule chinhu chelile kwa wanhu waja wafilile na hawamuhuwila Mulungu, kwaviya nzewele zawo na udaho wawo wa kusagula yanogile hebu yehile ubanangika. 
\v 16 Wanhu fana wawo woitanga kuwa wommanya Mulungu. Mbali kwa sang'hano zawo womulema. Ni wanhu wouzi ng'hani na hawategeleza, hawafaya kwa sang'hano yoyose inogile.
\c 2
\s Mafundizo ya kweli
\p
\v 1 Mbali weye kolondeka ufundize mbuli zozilondeka na mafundizo ya kweli. 
\v 2 Wafundize walala wa chilume kuwa wolondeka wawe na kulinganya na wawe na ugenzi unogile haulongozi ha wanhu na wawe na ubala, weme chigangamavu muna uhuwilo na ulondo na kufunya umoyo. 
\v 3 Iviya wafundize walala wa chike watende mbuli zinogile haulongozi ha Mulungu. Hawalondeka wawe wadelenya na sekewawe wanhu wa kukolwa. Mbali wolondeka kufundiza yanogile, 
\v 4 muladi wawafundize wandele kuwalonda walume zawo na wana wawo, 
\v 5 wawe na kulinganya na watende yanogile haulongozi ha Mulungu, wolondeka wasang'hane vinogile muna zikaye zawo na wawategeleze walume zawo, muladi Mbuli ya Mulungu sekeiligigwe.
\p
\v 6 Iviya uwazume wabwanga wawe wa kulinganya muna zimbuli zose. 
\v 7 Weye mwenyewo kolondeka uwe simwe muna zimbuli zose kwa kusang'hana yanogile. Kaidi mafundizo yayo, uyamhe na kuyahuwila. 
\v 8 Mbuli zako ziwe za kweli zilibule ubananzi, muladi hata wehi wako waja wokulema wapate chinyala kwaviya wezapuwa chochose chihile cha kulonga kusonhela cheye.
\p
\v 9 Uwafundize watumwa wawategeleze wenevale wawo na wawanogeze muna zimbuli zose. Wolondeka sekewaibishile nawo, 
\v 10 na sekewawabawile wenevale wawo. Mbali wailaguse kuwa wodaha kuwa wanoga na wokwaminika muladi wayahambe mafundizo ya Mulungu Mulopozi wetu kwa chila chiusang'hana.
\p
\v 11 Kwaviya unovu wa Mulungu ugubuligwa muladi ugale ulopozi kwa wanhu wose. 
\v 12 Unovu uwo wochifundiza chileke wihi na malondo yehile na chikale kwa kulinganya na chikale vinogile voilondeka na chikale kwa kumnogeza Mulungu muna ulusita luno, 
\v 13 ihawa chogozela zuwa diya da deng'ho kulu dochidilolela lusita vondaulawilile utunhizo wa Mulungu mkulu na Mulopozi Yesu Chilisito. 
\v 14 Yesu kailava mwenyewo kwa ichimu chetu kwa kuchikombola kulawa muna uwihi wose na kuwasafya wanhu wake yeye mwenyewo, kuwa na hamu ya kutenda yanogile. 
\v 15 Fundiza mbuli izo kwa kuwazuma wanhu na kuwabwakila kwa udaho wose. Sekeutogole munhu yoyose yakwehule.
\c 3
\s Kutenda yanogile
\p
\v 1 Wakumbuse wanhu wako kuinyendanyenda kwa watawala na weli na udaho, wolondeka kuwategeleza na kuisasala kwa kusang'hana sang'hano inogile. 
\v 2 Uwalongele sekewamulonge vihile munhu yoyose, mbali wakale kwa tindiwalo na umbwiya na waulaguse uhole wose kwa wanhu wose. 
\v 3 Kwaviya usenga umwaka chikala wabozi na chikala hachitegeleza na chivwiziligwa na kuno chisang'hanila kulonda yehile na madambwa mbasakanyo. Chikala muna uwihi na migongo na chiwehila wanhu nawo wachihila cheye. 
\v 4 Mbali unovu na ulondo wa Mulungu Mulopozi wetu viugubuligwe, 
\v 5 kachilopola cheye, siyo kwaviya chitenda yanogile mbali kwa ubazi wake, kufosela Muhe Yelile yachitendile kuwa wanage kwa kwelekigwa mwanza wekaidi na kuching'ha ugima wa sambi kwa kuchisunha na mazi. 
\v 6 Mulungu kaching'ha Muhe Yelile mvunyo kufosela Yesu Chilisito Mulopozi wetu, 
\v 7 muladi kwa unovu wake chipate kutogoligwa kuwa chinoga haulongozi ha Mulungu na kuhokela ugima wa siku zose wochiulolela. 
\v 8 Ulonzi uno wa ukweli.
\p Nokulonda uzigangamize mbuli zino, muladi waja womuhuwila Mulungu wailave kutenda yanogile, mbuli zino zinoga na zowafaya wanhu wose. 
\v 9 Mbali uyepule na ubishi wa chibozi na ndwagi na simo za ludongo lwa mawasaho na kugomba kwa mbuli ya Malagilizo ya Mulungu yoyamwing'hile Musa. Mbuli zino zabule utazi wowose na hazifaya. 
\v 10 Mzume munhu yotenda wanhu waigole, mulamule mosi maabaho mulamule pili, maabaho muleke. 
\v 11 Kovimanya munhu fana ino kaleka nzila ya kweli, na uhasanyi wake wolagusa kabananga.
\s Ndagilizi za ukomelezelo
\p
\v 12 Vondaniwatume Alitema hebu Tukiko kumwako, iyohe kwiza Nikopoli, kwaviya nilamula kukala uko chipindi cha chihuhwe. 
\v 13 Iyohe kumtaza Zeno munhu wa malagilizo na Apolo, muna umwanza wawo na kupata chila chinhu chowochilonda. 
\v 14 Wanhu wetu wolondeka waifunze kutenda yanogile lusita lose muladi wadahe kupata vinhu viwolonda muna ugima wawo, na sekewakale bule.
\p
\v 15 Wanhu wose weli hamwe na niye womulamsani. Walamse wahuwila wayetu wowochilonda muna uhuwilo.
\p Nowapulileni unovu wa Mulungu.