\id 1TH 531THkvn.sfm utf8 1Thessalonians CUK-Kuna San Blas-Panama 2009 
\h 1 Tesalonicenses 
\toc1 Tesalónicagi Gwenadgan-Bukmaladse Pablo Gebe Garda Narmaksad 
\toc2 1 Tesalonicenses 
\toc3 1 Tesalonicenses 
\mt1 Tesalónicagi Gwenadgan-Bukmaladse 
\mt1 Pablo Gebe Garda Narmaksad 
\mt2 1 Tesalonicenses 
\ip Tesalónica-neggweburse dulemar bukidar ibmarmar baknoni-damalad, degine, ibmarmar uknoni-damarbalid. Tesalónica-neggwebur dummadid, degine, ur-nagumalad-nuegan nikbalid. 
\ip Pablo gebe Tesalónicase nonigu, dulemar-bukidar Bab-Jesús-abingasmalad (Gusmalad 17). Deun Judiomar-Bab-Jesús-igar-istar-dakmalad Pablo-gabi-guarmargu, Pablo Berea-neggweburse wakicha-gusad. Bereagi mai, Atenas-neggweburse nade-gusad (Gusmalad 17). Pablo Atenasgi maigu, wisgualid dulemar gwenadgan-Tesalónicaginmalad-sabsur-imakdimarye. Agi Pablo Timoteo-barmis-gusad, adi Bab-igargi gwenadgan-ogannonaegar. Timoteo gannar nonigu, Pabloga sognonikid dulemar gwenadgan-Tesalónicagi-bukmalad-sabsur-imaksamar-inigwele, gwenadgan Bab-Jesús-gwen-iessurmarye. Bab Dummad Burba Nuedbali, Pablo we-garda narmaksad gwenadgan-Tesalónicagi-bukmalad-ogannogegar, adi Jesúsba bur-bule nagumalagar. Gwenadgan-bukib-itononikidbali Pablo sogsad Jesús-gannar-we-napnegse-danikoedgi, gwenadgan-burgwismalad, degi, dula-gudidimalad, amar na bulale mogir-imbaba Bab-Jesús-abingunamaloye, degine, eba dula degi-sadegu nibnegse megnamaloye. 
\ip Binsamardo, we-garda birga 51-gi narmaklesye. Be itomargua. 
\c 1  
\p  
\v 1 Ani Pablo, Silvano, degine, Timoteo, anmar bemarse garda narmakmalad, bemar Bab-Jesúsba-nanaimalad-danar-Tesalónica-neggweburgi-ambikunoni-damaladse, bemar Bab Dummadgi, degi, Dummad-Jesucristogi akananaimaladse. 
\p Bab Dummad anmar-Baba, degine, Dummad-Jesucristo, amar bitigi bemargi nued binsamalana-gadin, degine, ulubgi bogidik bemar-itogega imakbalina-yerban. 
\s1 Gwenadgan-Tesalónica-dor Jesúsgi-bensulid nue oyosmalad 
\p  
\v 2 Bemar Bab-Jesúsba nue-naid-ular, anmar gusgu Bab Dummadga dog-nuedye sogdiguad, degine, anmar Bab Dummadse gorsi sogele, bemarga Bab Dummadse goled gwen surgudisurbalid.  
\v 3 Ar Bab Dummad anmar-Baba, a-asabin anmar bemar-gwen-iedisurmalad, bemar Jesúsgi-bensuli arbasmalad, bemar sabedgi be ibmar imakmalad, degine, anmar-Dummad-Jesucristobina nue bensuli-edarbedimaladgi be alamaknanaimalad. 
\p  
\v 4 Gwenadgan, anmar wisid, Bab-Dummad-be-sabmalad bemar-susad.  
\v 5 ¿Igi anmar wissunna? Ar Bab-Dummad-gaya-burba-nued unnila gayaginbi bemar abingassulidba, ar ade bemar nue oyosmalad, bemar nue Bab-Jesús-abingasmalad, Bab-Dummad-Burba-Nued-nue-nikamalad, degine, we-igar nue-napiragwadye bemar oyogedba. Aginbali, bemar wismarbalid, igi bemar-abargi anmar bemar-sabedba gudigusa. 
\p  
\v 6 Degisoggu, bemar anmar-daedba, degi, Bab-Jesús-daedba nanadigusmalad. Bab-Dummad-gaya-burba bemar beedse-wilesmalad-abargi abingasmar-inigwele, weligwar bemar Bab Dummad Burba Nuedgi abingasmalad.  
\v 7 Degisoggu, belagwapa Bab-Jesúsgi-bensurmalad Macedonia-yargi-bukmaladga, degi, Acaya-yargi-bukmaladga, bemar be-daedgi, nue be oyosmalad, igi Bab-Jesúsba-nair nanamalar-gebe.  
\v 8 Bab-Dummad-gaya-burba bemarba unnila Macedonia-yalaganba, degine, Acaya-yalaganbarbi mimmilessulid. Bela nega-gwen-obessuli, Bab-Dummadgi-bemar-bensulid bemargi sunmakedbimalad. 
\p Degisoggu, geg anmar bemargi bar sunmaksundo, ar bela bato bemar-wismalad.  
\v 9 Bela anmarga sogedbimalad igi bemar anmar-abingasa, anmar bese mosmargu, degi, igi bemar bab-dummadga-imakleged-metemala, Bab-Dummad-dulasaila-maid, Bab-Dummad-napiragwad, asebi golegar, e-nug odummogegar.  
\v 10 Anmarga sogmarbalid, bemarde Bab-Dummad-Machi nibneg-akar gannar-danikoed edarbebukmarye. Bab Dummad na E-Machi-Jesús burgwar-maigu gannar odulosad. A-Jesúsde dulemar-Bab-Dummadse-dummad-odurdaklegoedgi anmar-abonosad. 
\c 2  
\s1 Pablo Tesalónicagi Babga arbasad 
\p  
\v 1 Gwenadgan, ar bemar-sunnad wismalad, anmar bese atakapgu, binsa an gwen gamaksasurmalad.  
\v 2 Ar bemar wismalad, anmar bese-naed-iduar, Filipos-neggweburgi igi ise-bibyolegar, degi, ise-mesagwar anmar-imaksamala. Degi-inigwele, Bab Dummad anmar-gwage-ogannosad, adi dobsuli, bukidar-anmargi-gwisgusmalad-abargi Bab-Dummad-gaya-burba-nuedgi sunmakegar. 
\p  
\v 3 Ar anmar noar bemarga we-gaya-burba-nuedgi sunmaksasurmalad, ichakwa-binsaedginsulid, degine, yamo-bemar-yardakar sunmaksasurbalid.  
\v 4 Suli, ar degisuli. Bab Dummad na-e-sogedba, anga igar-uksad, adi anmar E-gaya-burba-nuedgi-sunmakegar. A-ular anmar deyob sunmakmalad. Dulemar nabir anmar-itogegala an sunmaksurmalad. Suli, degisuli. Unnila Bab Dummad weligwar an imakegala, an sunmakmalad, ar abi unnila anmar-binsaed-dakmaid. 
\p  
\v 5 Ar bemar-sunnad wismalad, anmar yamo be-yardakar, nabir be an-itomalaga an sunmaksasurmalad, degine, bemar-yardakar bemargi-mani-onogegala anmar sunmaksasurbalid. We an bega sogmalad, Bab Dummad we nue wisid.  
\v 6 Anmar gwen binsadisurmalad, dulemar anmar-nug-odummogena-gadinye, igi, bemar-dibe, igi, dule-baigan-dibe. 
\p Ar anmar Cristo-nuggi barmilealidsoggu, anmar-ibmar-abeged bemar anmarga uke-wilubbinad, degi-inigwele, deyob bemar an-imaksasurmalad.  
\v 7 Suli, degisuli. Igi na nan mimmi ise-sabguar, degi, ise-edarbiar imake, ayobi anmar be-imaksamalad, anmar bese modapgu. 
\p  
\v 8 Ar anmar nue-be-sabmarsoggu, unnila Bab-Dummad-gaya-burba-nuedbi anmar bega ukbi-gussurmalad, anmar-san-burbase-bakar ar bemarga ukye sogele, anmar uksamalanad, ar anmar nue bemar-sabedba.  
\v 9 Gwenadgan, bemar insamalo, mani-onogegala igi anmar arbasa, degine, igi anmar alamaknai-gusbali. Anmar mutikidba, degi, ibginedgi arbanai-gusmalad, adi mer bemarga arbaed-dummad onogegar, deun anmar Bab-Dummad-gaya-burba-nuedgi bemarga sunmakdigusgu. 
\p  
\v 10 Bab Dummad nue an-wisid, degine, bemar-sunnad nue wismarmogad, bemar-Jesúsgi-bensurmalad-abargi igi an nue-gwage-swilidik, nue-napiragwadgine, degine, dulemar angi ibmar akar-soged satedgine, an nanasad. 
\p  
\v 11 Deginbali, bemar wismarbalid, igi bab na e-mimmigan-unae, degi, igi na gwage-ogannoge, debayobi an bela bemar gwenna-gwenna imaksamalad.  
\v 12 Deginbali, an bemarga sogsamarbalid, igi Bab-Dummad-mimmigan nanamala, deyob bemar nanamarye. Ar Bab Dummad bemarse gochad na e-neg-dakmaidse bemar-odogegar, degine, na e-gangued-yeer-daklegedba bemar wergumarmogagar. 
\p  
\v 13 A-ulale anmar Bab Dummadga dog-nuedye sogdimarsunnad. Ar anmar bemarga Bab-Dummad-gaya-burbagi sunmaksamargu, bemar nue Bab-Dummad-gaya-burba sunsoged-dake be abingasmalad, dule-gaya-burbaye gwen be binsassurmalad. Ar nue napiragwad, we Bab-Dummad-gaya-burba-sunsogedid, ar bemar-Bab-bensurmaladgi nue mag-dakle imaked. 
\p  
\v 14 Gwenadgan, bemar be-yarginmaladse ise-wilegagwar gusmargua, Cristo-Jesúsba-nanaimalad-danar-Judea-yargi-ambikunoni-damalad-sunnaa be gusmarmogad. Ar amar deyob na e-gwenadganmalad-Judiomarse wilesmarmogad.  
\v 15 Wemar-Judiomala, Dummad-Jesús-oburgwismalad, ar igi gusgu Bab-Dummad-gaya-burba-berbemalad-oburgwedanigumaladyob. Deyob sabsur anmar-imaksamarmogad, neggwebur-magaba anmar-onosmalad, Bab Dummad nabir-ito gwen imaksurmalad, degine, bela-dulemar-nabir-daksurmarbalid.  
\v 16 A-Judiomar Bab-Jesús-igargi Judiosurmaladga gwen sunmakbi anmar-abesurmalad, adi Judiosurmalad mer abonolemalagar. Ar weyob na e-iskued omelosmarsoggu, Bab Dummad amar-odurdakleged-iba ega nasiknonisunnad. 
\s1 Pablo gwenadgan-Tesalónicaginmaladse gannar ataknabied 
\p  
\v 17 Gwenadgan, wis an bemargi sikwas bangusgu, anmar be-wagar daksurmar-inigwele, anmar gwagegi na be-sedigumalad, degine, na bemarse nue bela-bela ataknabi-gusmalad, adi bemar-dakegar.  
\v 18 Anmar a-ular nue bese ataknabi-gusmalanad. Ani Pablo, irbigbagus nue bese ataknaoye sokar-daenad, degi-inigwele, nia-saila-Satanás anmargi igar oburnoni-daed.  
\v 19 Degite, anmar Bab-Jesucristo gannar-danikoed-ibagi e-asabin ¿anmar doagi benguosursunna? ¿Anmar ibiga werguosunna? ¿Doagi anmar yeer itogosunna? ¿Ar anmar bemargi yeer itogosursi? Eye, bemargi anmar yeer itogoed.  
\v 20 Nabiri, bemar nabir-ito anmar-imaked, degine, bemar weligwar-ito anmar-imakbalid. 
\c 3  
\p  
\v 1 Ar anmar bela-bela nue be-dakbigusmarsoggu, Atenasgi walagwen an beoye an binsaarsunnad.  
\v 2 A-ulale anmar-gwenad-Timoteo bemarse an barmismalad, be-daknamalagar. We-Timoteo Bab-Dummadga-arbadimogad-duled, degine, anmarba Bab-Dummad-gaya-burba-nued Cristogi-sunmaklegedgi sunmakdimogad-dulebalid. Timoteo an bemarse barmismalad, adi bemar-Cristogi-bensulidba gwagegi bemar-ogannomalagar, degine, nabir-ito-bemar-imakmalagarbar.  
\v 3 Adi bemar solegagwar guarmalar, mer bemar wargwensaar galakumalagar. Ar bemar-sunnad nue wismalad, ar weyob anmar wilemalar-gebed. 
\p  
\v 4 Deginbali, anmar bemar-abargi gudigua, bato an bemarga sogsamalad, anmar nue wilemaloye. Ar bemar nue wismalad, anmar bemarga igi sogsamala, deyob anmar bela wilesmalad.  
\v 5 A-ulale, ani Pablo, nue be-dakbigusmarsoggu, bemarse egisegala, an Timoteo-barmisad, adi an wisguegar, igi bemar-Jesúsgi-bensurmalad gudimar-dibeye, abakalegi nia-saila bemar-binsaed gasale, degiir, binsa an arbas-itole. 
\s1 Timoteo sognonikid, Jesúsba-nanaimalad nued gudidimarye 
\p  
\v 6 Timoteo Tesalónicase-gudiid gannar anmarse nonigu, anmarga gaya-nued senonikid, anmarga sognonikid, bemar Bab-Jesúsgi nue bensurmarye, degine, gwenadgan-nue-sabmarbarye. Anmarga sognonibalid, bemarde nue-sabedgine anmargi binsadiiye, degine, nue anmar-dakbi-gudiiye, igi anmar bemar-dakbigudimogadyob.  
\v 7 A-ulale gwenadgan, anmar wileged-abargi, degi, nue naibi-itoged-abargi, anmar yeer itonaded, anmar itoarmargu, bemar Bab-Jesúsgi nue bensuli-gudimarye.  
\v 8 A-ulale bemar nue anmar-ogannosmarmogad, bemar gandikidba Bab-Jesúsgi akanaid-ular. 
\p  
\v 9 Degisoggu, unniguarsulid Bab Dummadga anmar sogmalad bemar-nuggi, dog-nuedye, ar bemar nue-weligwar Bab-Dummad-asabin anmar-imaked.  
\v 10 Ise-egisar, mutikidba, degine, ibginedba, anmar Bab Dummadse gornaid, bitigi bemar-daked anmarga imaksana-gadinye, adi bemar Cristogi bensulid wis galakunaidgi bemar-bendakegar. 
\p  
\v 11 Bitigi Bab-Dummad-sunnad anmar-Baba, degine, anmar-Dummad-Jesucristo, anmarga igar-egaena-gadin, adi anmar bemar-daknamalagar.  
\v 12 Bitigi Bab-Jesús gatik muchub-muchub sabguedgi bemar-ogannomai, degine, gatik bemar-onasgumai imakena-gadin. Degine, bela bemar dulemar-sabguena-gadin, igi anmar bemar-sabmarmogadyob.  
\v 13 Adi Bab Dummad anmar-Baba, a-asabin bemar gwage-swilidik, gutu-naisuli, degi-sadegu guegar, anmar-Bab-Jesucristo bela egi-akananaimalad-abargi danikoed ibase. 
\c 4  
\s1 Gwage-swilidikidgi be nanamar 
\p  
\v 1 Emigindi gwenadgan, Dummad-Jesús-nuggi anmar bemarga ise-wilesagwar sogsun, degi, bemar-unamarsun: Ar igi anmar bemar-odurdaksa, bemar igi gudiguele, Bab Dummad nabir-ito imake, deyob bemar gatik bur-bule nanamarsun. 
\p  
\v 2 Ar bato bemar wisid, igi anmar Dummad-Jesús-nuggi bemarga sogsamala.  
\v 3 Bab Dummad unnila egarbi gwage-swilidik nanadii bemar-abemaid. Degisoggu, mer neg-sichigi na abirgunagwarsuli yolemalo.  
\v 4 Bemar wala-walagwen unnila be-ome-ebo nanadii be imakmarsun. Gwage-swilidikidgi, degi, nued-binsaedgi be-ome-sedii be gumarsun.  
\v 5 Melle be-omegi galagwensuli binsae be nanamalo, dulemar-Bab-Dummad-wichurmalad nanamaladyob.  
\v 6 An bemar-walik gudigu, bato an bemarga we-igar sogsamalad, we-igargi mer na gwenad-bensudii nanamaloye. Ar Bab Dummad beedse dulemar-degi-gudimalad-odurdakoed. 
\p  
\v 7 Ar Bab Dummad anmarse gochagua, igar-iskanaba-nanaega anmarse gochasulid, anmarse gochad, gwage-swilidik nanaegar.  
\v 8 Degisoggu, ar doa-dule we-igar istar dak-dibe, dule-istar-daksulid, Bab-Dummad-istar-daked, ar ade Bab Dummad anmarga E-Burba-Nued-uksad. 
\p  
\v 9 Na-gwenadgan-sabgumalad-igargindi an bemarse narmaked itolesulid, ar bemar-sunnad Bab Dummadgi be durdaksamalad, na be muchub-muchub sabgumarye.  
\v 10 Ar bato deyobi bela gwenadgan-Macedoniagi-bukmalad bemar imakbukwad. Unnila an bemarga, ise-wilesagwar sogsun, gatik bur-bule gwenadgan be sabgumaloye. 
\p  
\v 11 Bogidik be emar-abargi gudisamar, mer dule-baidgi yoledigumar, unnila be-ibmarbi be imakdisamar. Igi anmar bemar-odurdaksamala, deyob na be arbamar,  
\v 12 adi dulemar-Bab-Jesúsba-naisurmalad be-nug odummomalagar, degine, bela bemar ibmar-bina-sogedi be nika-gudigumalagar. 
\s1 Bab-Jesús-gannar-danikoed-igar 
\p  
\v 13 Gwenadgan, dulemar-Jesúsba-nagusmalad-burgwismalad igi guoe, a-igar bemar wisii-gudii an be-abemardo, adi mer bemar dule-baigan-Bab-negse-dogosurmalad bukib-binsadamaladyob be dogdar bukib binsamarmogagar.  
\v 14 Ar igi anmar bensurmala, Jesús burgwisad, degine, gannar durgusad, debayobi anmar bensurbalid, Bab Dummad dule-Jesúsgi-bensurmalad-burgwismalad Jesúsba gannar durgus sedanibaloed. 
\p  
\v 15 A-ular anmar bemarga sogsunnad, Bab-Jesús sogeyob, anmar amba we-napneggi dula gudii Bab-Jesús danikir, anmar-inse gwenadgan-burgwismalad-idugosulid.  
\v 16 Ar Bab-Jesús-sunnad na nibneggi Bab-Dummad-gaya-burba-ganguedba, anger-dummad-gayaba, degine, Bab-Dummad-gala gollalir, Dummad-Jesús aidedagoed. Geb degine, dulemar Cristogi-bengussuli-burgwismalad-inse durgudagoed. 
\p  
\v 17 A-sorbali, anmar-amba-dula-gudimalad, eba seledmarmogoed, mogir-imbaba Bab-Jesús-abinguegar. Degi anmar Bab-Jesúsba mai sadegumaloed.  
\v 18 Degisoggu, we-gaya-burbagi na be muchub-muchub ogannodii imakmarsun, mer dogdar bukib-binsamalagar. 
\c 5  
\s1 Jesús-danikoed-idu guagwar be gudi-samar 
\p  
\v 1 Gwenadgan, sana Bab-Jesús-danikoed-ibagan, degine, e-wachigandi an geg bemarga soged.  
\v 2 Ar bemar nue wismalad, Bab-Jesús-danikoed-e-ibagan ukiar nonikoed, igi atursamalad bemar wichuli ukiar mutik noni-dae, deyob Bab-Jesús nonikoed.  
\v 3 Ar dulemar sogdimaladgin: “Belagwapa neg-bogidik-itole, anmar nue bukwamar-itole.” A-ibagangine iba-buleddi ukiar nagunonikoed, igi ome-wargwen ukiar e-bonigan itoar-dae. Dulemar we-igargangi gwen wakinnosurmalad. 
\p  
\v 4 Gwenadgan, bemardi neg-sichidgi gwen gudisurmarsoggu, Bab-Jesús-danikoed-iba geg ukiar be imakmalad, igi atursaed ukiar ibmar-atursanoni daedyob.  
\v 5 Ar bemardi bela gwallu-meegwadginedid, degine, ibgined-mimmigan gumalad. Anmar neg-mutikid, degine, neg-sichidginedsurmalad.  
\v 6 Degisoggu, mer dulemar-baigangii anmar gabmarmogo. Suli, degisuli. Guagwar gudisamalo, nue neg-itoakwaa. 
\p  
\v 7 Dulemar-gabmalad mutik ise-gabar gabmalad. Mungumalad, mutik mungumalad.  
\v 8 Ar anmardi neg-ibgined-mimmigansoggu, nue neg-itoakwaa gudisamalo. Jesucristogi bensulidgi, degi, sabguedgi, anmar dukubukwa imakmarsun, igi Roma-sorda-wargwen na gwage-odukued nika e-binasgargi nasikdaedyob. Degine, bensulidgi Bab-anmar-abonoged edarbedii imakmarsun, igi Roma-sorda-wargwen na e-nono bendakega, bormo-gurgin na nonogi siedyob. 
\p  
\v 9 Ar Bab Dummad beedse anmar-odurdakega anmar-urbissulid. Anmar urbisad, adi anmar Dummad-Jesucristoba abonolegegar.  
\v 10 Jesucristo anmar-ular burgwisad, adi Jesucristo gannar danikir, anmar dula gudi-dibe, igi, burgwar-dibe, eba dula megnaegar.  
\v 11 A-ulale, na be muchub-muchub ogannomarsun, adi Bab-igargi bemar nasgumai-guegar, ar igi bato na be imakdimaladyob. 
\s1 Pablo we-gardagi napi gwenadgan-unasad 
\p  
\v 12 Gwenadgan, nue-wilesakwaa bemar-abargi-arbadidimaladgi nue-binsaed-nikaa damalo. Bab-Jesús-igargi bemar-idudidid, degine, bemarga Bab-Jesús-nuggi be-unadimalad mag be dakee nanamaloed.  
\v 13 Ar Bab-Jesús-igargi-arbadiidba, bemar amargi nue-binsaed-nikaa, degine, nue-sabee dae-wilubmalad. Bogidik-itolegedgi na be gudii imakmarsun, mer na be urwemar. 
\p  
\v 14 Gwenadgan, anmar bese wilesakwaa egismarbar, dulemar-arbabisurmalad nue unao, adi arbamalagar, gwage-nollo-gudimalad-ogannogo, dule-burba-nollomalad be bendako, degine, binnalegwadgi bela dulemar-sedii be nanamaloed. 
\p  
\v 15 Gwenadgan, nue-be-dakoed, mer ibmar-iskana-imaksad-dulegi ibmar-iskana-imaked be imakoed. Suli, degisuli. Bur ibmar-nued na be muchub-muchub imakmar, degine, bela dulemar-baiganga ibmar-nuedbi be imakmarbarsun. 
\p  
\v 16 Weligwarbi itodigu be gumar.  
\v 17 Bali-bali gatik Bab Dummadse gordigu be gumar.  
\v 18 Ar ibmar-dargwen bega wis gusale, bela dog-nuedye Bab Dummadga be sogmar, ar weyob Cristo-Jesúsgi Bab Dummad abemaid. 
\p  
\v 19 Mer Bab-Dummad-Burba-Nued-bargaed sao. Suli, degisuli. Bur-gatik oarbaed be sae.  
\v 20 Bab-Dummad-gaya-burba-berbemalad bega Bab-Dummad-gaya-burbagi sunmakalir, mer baisur be dakoed.  
\v 21 Bela ibmar nue wilubdako, unnila igar-nueganbi be suoed.  
\v 22 Bela ibmar-iskana-galagwensur-daklemaladgi be bangu. 
\p  
\v 23 Bab-Dummad-sunnad, Bab Dummad ulubgi-bogidik-itogega dule-imakedi, bitigi bela bemar gwage-swilidik imakena-gadin. Be-sana, be-san-burba, degine, be-burba bela gutusuli bemarga imakena-gadin, anmar-Dummad-Jesucristo danikidse.  
\v 24 Ar Jesús-anmarse-gochadi dule-yardakedsulid, anmarga-ibmar-saoye-sogsadi bela anmarga imakedsegad. 
\p  
\v 25 Gwenadgan, anmarga Bab Dummadse gormalo. 
\p  
\v 26 Bela gwenadgan na nue-angaagwaledgi, na be nued sogeye be sogmar. 
\p  
\v 27 Bab-Jesús-nuggi an bemarga sogmarsun, we-garda bela gwenadgan-Bab-Jesúsba-akananaimaladga absomalo. 
\p  
\v 28 Anmar Dummad-Jesucristo bela bitigi bemargi nued binsamalana-gadin. Be itomargua.