\id HOS - Kuna, San Blas - Bible -Panama 2014 (DBL -2014) 
\h Oseas 
\toc1 Oseas-Garda 
\toc2 Oseas 
\toc3 Os 
\mt1 OSEAS-GARDA 
\mt2 OSEAS 
\imt2 GEBE-SOGLENAID 
\imt1 Garda-nug 
\ip \it Oseas-Garda.\it* Oseas, Bab-gayaburbagi sunmakdii gusad. \it Abonolegedye,\it* Oseas-nug obarileged. 
\is1 Oseas-Gardagi weyob sunmaklenaid 
\ip Oseas Israel-yarginedid, Judá-yarginedsulid. Unnila Israel-yargingi Bab-Gayaburba-barsogdii gusad. 
\ip Binsaleged, we-garda (Cristo-idu) birga 750ʼsik, degi, 730ʼsik narmaklesye. We-ibagangine, we-reymar Judá-reyga maigusmalad: Uzías, Jotam, Acaz, degi, Ezequías. Degine, Israel-yalagindi, Joás-machi-Jeroboam reyga maigusad. 
\ip Oseas, Bab-Dummad-dulemar-sabedi magar itosad. Oseas, Bab-Dummad-ega-sogsadba ome-gambasaed nikusad. Oseas, e-ome gambasaega egi-wakitele, na e-ome-abegedba gannar aminaddaed. Deyobi, Bab-Dummad dule-egi-bangudele, dule-amididaed. E-dulamar egi bangubisuli abedaed. Oseas, Israel-dulemarga sabedba Bab-Dummad-gayaburbagi sunmaksad, adi, Israel-dulemar melle Bab-Dummadgi bangumalagar, unnila Bab-Dummadbarbi nanadii gumalagar. 
\ip We-gardagine, weyob ilemakar sunmaklenaid: 
\io1 1. Bab-Dummad, Oseas-ome-nikusadba, burbar Israel-dulemargi sunmaknaid (1:1–3:5). 
\io1 2. Bab-Dummad Israel-dulemargi sunmaked (4:1–14:9). 
\io2 2a. Israel-dulemar-nue-isgusmalad (4:1–5:15). 
\io2 2b. Israel-dulemar-sabsur-odurdaklegoed (6:1–10:15). 
\io2 2c. Bab-Dummad Israel-dulemar-sabesailad (11:1–14:9). 
\ip Be itogua. 
\c 1  
\ms1 1. BAB-DUMMAD, OSEAS-OME-NIKUSADBA, BURBAR ISRAEL-DULEMARGI SUNMAKNAID 
\mr (1:1–3:5) 
\s1 Oseas ome-gambasaed nikusad 
\p  
\v 1 Deunni, Judá-dulemar-e-reymar Uzías, Jotam, Acaz, degi, Ezequías, negsemamaigusad-ibagangine, degi, Israel-dulemar-e-rey Joás-machi-Jeroboam neg-semaigusmogad-ibagangine, Bab-Jehová weyob Beeri-machi-Oseasʼga sunmaknonikid. 
\p  
\v 2 Gebedgi, Bab-Jehová weyob Oseasʼga sunmaksad. Weyob ega sogsad: “Be nao, ome-gambasaed be nikuna, ebo be anagan-nikuo. Ar Israel-dulemar bela nue-isgusbukwad, ar bela angi bangudmalad.” 
\p  
\v 3 Degine, geb Oseas Bab-Dummad-sogedba imaksad. Agi, Oseas Diblaim-e-sisgwa Gomerʼye-nugad nikunonikid. Degiidbali, Gomer gurgin-nika gunonikid, geb ega susugwa uklenonikid. 
\p  
\v 4 Geb degine, Bab-Jehová Oseasʼga sogded: “We-susugwa Jezreelʼye be onug-imako. Ar ade, emisgwasaale, an Jehú-e-gwenadgan sabsur-wiogoed. Ar Jehúʼde Jezreel-nebagi dulemar-ogilos gusad. Deyob an Israel-yar-selemaid ilagwen-obelogar imakoed.  
\v 5 We-ibagangine, Jezreel-nebagi Israel-dulemar-e-bila-onomalad-e-gargangued an obelogoed.” 
\p  
\v 6 Geb ibagan-nasadgi, Gomer gurgin-nika gunonibalid, geb ega bunolo uklenonikid. Degine, geb Bab-Jehová Oseasʼga sogded: “We-goe Lo-Ruhamaʼye be onugsao. A-sogleged, ‘wiledaklegarsulidye.’ Ar ade, bar an Israel-dulemar wiledakosulid, ar e-isgusmalad an ega eliosulid.  
\v 7 Unnila Judá-dulemarginbi an ise-wile binsaoed, a-dulemardi an bendakoed. Bila-onogedgi Judá-dulemar-bendakegala, warsi an abesulid, es-suid an abesurbalid, molimar an abesurbalid, dule-moligi-sii-urwemalad an abesurbalid. Ar anbi walagwen unni gued. Ar ani an e-Bab-Dummad gued, ani an bendakoed.” 
\p  
\v 8 Lo-Ruhama mam-iargusgu, Gomer, gannar gurgin-nika gunonibalid, geb gannar ega susugwa-uklenonikid.  
\v 9 Agine, Bab-Jehová Oseasʼga sogded: “Lo-Ammiʼye be onug-imako. A-sogleged, ‘an-dulamarsulidye.’ Ar bemar bar an-dulasurmalad, degine, bar an be-Bab-Dummadsurmogad. 
\p  
\v 10 ”Ar ibagwengine, Israel-dulemar ukub-merguedyob dule-bukib-gunonimaloed. Dogdar-merguedba geg wilubsalege, geg ebislege gunonimaloed. Bia e-annik soglesa, ‘an-neggwebursulidye,’ agine, ‘Bab-Dummad-Dula-Maid-e-mimmiganye’ bilenonikoed.  
\v 11 Judá-dulemar, Israel-dulemarbo ambikunonimaloed, agi, e-iduedga dule-gwensak onugsanonimaloed. Gannar dule-soggwennayob e-yargi ambikudmaloed. Ar Jezreelʼga iba-dummad nagunonikoed.” 
\c 2  
\s1 Bab-Jehová e-dulamar-isgus-bukwadgi e-sabgued oyonaid 
\p  
\v 1 Bab-Jehová soged: 
\q1 “Agine be-gwenadganse, ‘Bab-Dummad-dulamarye’ be gormaloed. 
\q2 Be-bunmarsedi, ‘Wiledaklegarmaladye’ be gormarbaloed. 
\b  
\q1  
\v 2 ”Be-nan abargi-odolegega be imakmar, egi be yolemar. 
\q2 Ar we-ome, bar an-omesulid, 
\q2 bar an e-suisurmogad. 
\q1 Melle gambasamalad-damaladyob bar san-imake, 
\q2 machergan-egi-wergued obeloge. 
\q1  
\v 3 Ar deyob imaksulile, igi-gwalulesad-ibagi aidenonigusadyobi an imakoed. 
\q2 Uka-swili an imakoed. 
\q1 Nega-dulesulidganga an imakoed. 
\q2 Napa-dinnaregedga an saoed, 
\q2 uku-uku-itogedba-burgwega an imakoed. 
\q1  
\v 4 An e-mimmigan wile dakosulid, 
\q2 ade, gambasaed-mimmiganad. 
\q1  
\v 5 E-nande, gambasaedid. 
\q2 Ar we-ome-mimmigan-baksadde bingedsulidaedid. 
\q1 Ar ade, we-ome weyob sogsad: 
\q1 ‘An-suiganmarba an nabie, 
\q2 amar anga masgunned ukdaed, 
\q2 amar anga gobed ukmarbalid, 
\q1 amar anga mor-wawaad, degi, lino-dubgi-mor-sobaled ukdamarbalid, 
\q2 amar anga olivo-gwallu, degine, gobed-nuegan ukdamarbalid.’ 
\q1  
\v 6 A-ulale, ani an Bab-Dummad, an e-iduar igar omuroed, 
\q2 e-iduar ikomar-mie-mie an saoed, 
\q2 adi, degidbali, bar igar amiosulid. 
\q1  
\v 7 Ar e-suiganbina surbinsa miamakdii guoed. 
\q2 Gwen amisulidbali weyob sogdoed: 
\q1 ‘Bur an-sui-sailaginedse an gannar naoe, 
\q2 iduardi bur an nued gudiinad.’ 
\q1  
\v 8 Ar we-ome ani an ega masgunned-ukedye binsassulid, 
\q2 ani an ega vino-binigan-ukedye binsassulid, 
\q2 degi, olivo-gwallumar-ukedye, gwen binsassulid. 
\q1 Ar ani an ega manimar, olomar an ega omelosad. 
\q2 Degite, ¿igi-wede we-ibmarmar imaksasunna? 
\q2 ¡Aka Baal-bab-dummadyob-imaklemalad egi sobsad! 
\b  
\q1  
\v 9 ”A-ulale, ibagan-omosadgi, e-annik gannar an bela an-ibmar-gwagmar-ega-uksad, 
\q2 an-vino-nuegan-ega-uksad an suoed. 
\q1 Mor-wawaad an ega yoega-uksad, 
\q1 degi, lino-dubgi-mor-sobarmalad an ega-uksad, 
\q2 bela gannar an ei sunonikoed. 
\q1  
\v 10 E-suigan-asabinni obingegsaegala, uka-swana an ogwisguoed. 
\q2 We-ibmargi gwen wakinnosulid, ar guedsegad. 
\q1  
\v 11 E-wergudiid bela an ei obelogoed: 
\q2 E-ibamar-onoged, e-nii-binigangi ibamar-onoged, 
\q1 degi, e-obunnoged-ibamar, e-itoakwaa-ibamar-onogedgi ibamar-onoged, 
\q2 e-ibe bela an obelogoed. 
\q1  
\v 12 E-uva-nainumar an ei bela maada imakoed, 
\q2 higuera-sapimar an ei bela obelogoed. 
\q1 Ar ‘we-ibmar an-suigan anga uksaye’ gordiid. Sapurbi-moodo nai an imakoed, 
\q2 ibmar-durgan-sapurbarmalad bela e-ibmar-naid ei gunmalaga an imakoed. 
\q1  
\v 13 An we-ome sabsur-odurdakoed, 
\q2 ar bab-dummadyob-imaklemaladga ina-wawagan-oburmakdii gusad. 
\q1 E-suiganba-naega olargan biiri yodii gusad, 
\q2 ordubmar ena nasikdii gusad, 
\q1 ar gwen angi binsassulid, 
\q2 agala, an sabsur-odurdakoed. 
\q1 Ani an Bab-Jehová-guedi we-ibmar soged. 
\b  
\q1  
\v 14 ”Anbina-sogega an imakoed: 
\q1 Nega-dulesulidganba an sedoed, 
\q2 ega sabedgi nuekwaa an sunmakoed. 
\q1  
\v 15 Agi, Acor-nebagi, uva-nainumar gannar an ega obiroed, 
\q2 sabsur-odurdakleged-neba an ega weligued-nebaga imakoed. 
\q1 A-nebagine igi-nuchukwa-unni angadga gusa, 
\q2 degi, igi-Egipto-yargi-noargusgu angadga an imaksa, 
\q2 deyob an gannar imakoed.” 
\p  
\v 16 Bab-Jehová weyob soged: 
\q1 “A-ibagangine, ‘an-dummadye’ be anse golosulid. 
\q2 ‘An-suiye’ be anse goloed. 
\q1  
\v 17 Be-bab-dummadyob-imaklemalad-e-nug-biega 
\q1 bar an be-imakosulid, 
\q2 degi, bipisaale bar ese be gorsii guosulid. 
\q1  
\v 18 A-ibagine, we-ibmar-durgan mer bese achamalaga an imakoed: 
\q2 Ibmar-durgan-sapurbarmalad, mulamar, ibmar-durgan-unimalad. 
\q1 Deginbali, we-yargine, warsigi-urweleged an obelobaloed, 
\q2 es-suidmargi-urweleged, bila-onolemaladi an obelobaloed, 
\q2 adi, bela na dobedsuli gabdii gumalagar. 
\q1  
\v 19 An-omega degisadegu an be-imakoed, 
\q2 igar-soglemaidba an-ome-sunnadga an be-imakoed. 
\q1 Ar an bela-bela be-sabsoggu, 
\q2 deyob an be-imakoed. 
\q1  
\v 20 An be-nikuoed, an be-dikarba noosulid. 
\q2 Degidbali, magar be an-daknonikoed, ani an Bab-Jehová gue.” 
\p  
\v 21 Bab-Jehová soged: 
\q1 “A-ibagine, mogirmar dii-wiega an imakoed, 
\q2 geb abali, napaneg ibmar-gwag-oniega an imakoed. 
\q1  
\v 22 Degidbali, trigoʼmar ainidagoed, 
\q2 vino-binid bukidar ainidagoed, 
\q1 olivo-gwallumar obinebakaoed. 
\q2 Bela we-ibmarmala, an Jezreel-neba-onasguega imakoed. 
\q1  
\v 23 An-dulamarga napaneg an uknonikoed, 
\q2 angadgarbi an-dulamar an imakoed. 
\q1 ‘Wiledaklegarsurmaladi’ an wiledaknonikoed. 
\q2 ‘An-dulasurmaladse, an-dulamarye,’ an gornonikoed 
\q2 ‘An-Bab-Dummadye,’ anse gormarmogoed.” 
\c 3  
\s1 Oseas, gannar e-ome-mononikid 
\p  
\v 1 Bab-Jehová gannar anga sogdebalid: “Be nae, we-ome-negsichigi-galagwensuli-nanaedse be monae, ar ade, dule-baid-e-ai-nuedga gudiid. Igi an Israel-dulemar-sabe, deyob be sabguo. Ar Israel-dulemar amba bab-dummadyob-imaklemaladba nanamar-inigwele, degi, uva-madu-olo bab-dummadyob-imaklemaladga-uklemalad gundimar-inigwele, amba an wile daked.” 
\p  
\v 2 Degisoggu, mani-sibugan-gwaambe-gakatar (15) an-ome-e-ai-nuedga-gudiid an bennuksad, degi, orosgisaar-dakleged-cebadaʼye-nugad galón-gwadulabake-gakabo (82) an ega uksabalid.  
\v 3 Geb an-omega an sogsad: “Be anbo iba-undar-nanadii guo. Galagwensuli bar be nanaosur. Bar bipisaale be machered-baidbo negsichigi nanaosur. ¡Anbela an ome-baidse achaosulid!” 
\p  
\v 4 Ar Israel-dulemar undar reysuli, degi, dule-negseedsuli gudii gumaloed. Degine, bar ibmar-ogumakar-ukleged-ailagi ibmar-ukdii guosurmalad, degi, dule-irwa-Bab-Dummadse-goled-mor-yoi guosurmalad, degine, ibmar-wagar-wilubganmar-sedii guosurmarbalid.  
\v 5 Geb sorbali, Israel-dulemar gannar na e-Bab-Dummad-Jehová amidmaloed, degi, e-rey-David amidmaloed. Ibagan-bergued-mosale, Bab-Jehová-dobekwaa gunonimaloed, degi, Bab-Dummad-e-nued-binsaed-egisnai gunonimaloed. 
\c 4  
\ms1 2. BAB-DUMMAD ISRAEL-DULEMARGI SUNMAKED 
\mr (4:1–14:9) 
\ms2 2a. Israel-dulemar-nue-isgusmalad 
\mr (4:1–5:15) 
\s1 Bab-Jehová Israel-dulemarse urwenaid 
\q1  
\v 1 Israel-dulemar, Bab-Jehová-gayaburba be nue itomar, 
\q2 Bab-Jehová dulamar-bukwadga igar-nabogesokalid. 
\p Bab-Dummad weyob soged: 
\q1 “Ar an-dulamar-abargine, dule-innikidaed bergusad, 
\q1 emar-sabgued bergusbalid, 
\q2 an-igar-amimalad bergusbalid. 
\q1  
\v 2 Aka bur we-ibmarmar burgusad: 
\q2 Gakangi yamo-ise-sogar-sogleged, 
\q2 gakansaed, atursaed, 
\q2 negsichigi-abirgunagwarsuli-nanaed, dule-gindakmalad. 
\q2 ¡Dulemar gindaklemamaigus nanaed! 
\q1  
\v 3 A-ulale, yar-naidgi wile-itoleged-dummad nagunonikoed, 
\q2 egi-dulemar-gudidiidi niga-galakudmaloed. 
\q1 Sapurgi ibmar-durgan-bukwamaladi, bela burgwidmaloed, 
\q2 nuumala, uamarse-bakale, bela girgudoed. 
\b  
\q1  
\v 4 ”Melle bemar dule-bamaladgi na be gwisgumalo, 
\q2 melle be dule-bamaladse urwemarbalo. 
\q1 An-urwenaidi, unnila dule-irwa-anse-goledgi an urwenaid. 
\q1  
\v 5 Ar bemala ibginedbali, degi, mutikidbali, oitolenonimaloed. 
\q2 Bemarbali dule-an-gayaburba-barsoged ibitononimarmogoed. 
\q1 ¡Be-nan an be-ibe obelogoed! 
\q2  
\v 6 Ar an-dulamar aku an-daksamaladbali bela burgwismalad. 
\b  
\q1 ”Ar be aku an-daksamarsoggu, 
\q2 dule-irwa-anse-goled-igargi an be-obanmarmosunnad. 
\q1 Ar be an-igar-mamaid be obachasoggua, 
\q2 be-wagan-danimaloed an iemosunnoed. 
\q1  
\v 7 Ar dule-irwa-anse-gormalad-mergudedbali, aka bur bule angi yoled-nanaed. 
\q2 Degisoggu, an e-nug-odummoged-anar, anse wilemaloed. 
\q1  
\v 8 An-neggwebur-e-isguedgi mas gundimalad, 
\q2 aga bur gatik an-neggwebur-isgued abemalad. 
\q1  
\v 9 Degi-inigwele, dule-irwa-anse-gormalad sabsur-anse odurdaklemaloed, 
\q2 degine, dulamar e-damaladba sabsur-anse odurdaklebaloed. 
\b  
\q1  
\v 10 ”Bab-Jehováʼgi bangusmalad. 
\q2 Agala, aisaar mas-gunmalo-inigwele, gwen immelegosurmalad. 
\q1 Degine, negsichigi-galagwensur-nanamalo-inigwele, 
\q2 gwen dula-omelogosurmalad. 
\b  
\q1  
\v 11 ”Vinoʼgi mumgudimaladbali, gambasamaladbali, 
\q2 oes gudidimalad, bar itodisurmalad. 
\q1  
\v 12 An-neggwebur-dulamar suar-nuchuse idakmalad, 
\q2 a-suar ega ibmar sogdaed. 
\q1 Galagwensur-negsichigi-nanamaladbali aku-neg-itoge gudmalad. 
\q2 Negsichigi-galagwensur angi-yolegar nanadimalad. 
\q1  
\v 13 Yar-birigangine, yar-mullugangine, sapimar-urba e-bab-dummaganga ina-wawad oburmakdamalad, 
\q2 degi, ibmar-ogumakar ukdamarbalid. 
\q1 A-ulale, e-bunamala, galagwensuli negsichigi-nanaddamalad, 
\q2 degi, e-balamar abirgunagwarsuli negsichigi yoleddamalad. 
\q1  
\v 14 Be-bunamala galagwensuli negsichigi-nanadimalad-ular, 
\q2 be-balamar abirgunagwarsuli negsichigi-yoledimalad-ular, an sabsur-odurdakosulid. 
\q1 Ar ade, e-suimarmoga gambasamaladba nanadimarmogad, 
\q2 degi, bab-dummagan-neggi-gambasamaladbo ibmar-ogumakar ukmarbalid. 
\q1 Degisoggu, neggwebur aku-neg-itogedbali, 
\q2 bela bergudoed. 
\b  
\q1  
\v 15 ”Ar Israel-dulemar galagwensuli negsichidgi nanadimalad, 
\q2 Judá-dulemar, bemardi mer be deyob damarmogad. 
\b  
\q1 ”Judá-dulemar, melle Gilgalʼye-neg-nugadse be namalo, 
\q2 melle be Bet-Avénʼye-negye-nugadse be namalo. 
\q1 Melle be ‘Bab-Jehová-nuggi’ ise-sogar-imakmalo. 
\q2  
\v 16 Ar Israel-dulemar moli-bebe-nikad-bunolo-uayasulidyob guded. 
\q1 Degisoggu, ar igi sibad-wawaad-sapingana nainu-olloledgi gagangi omalenaidae, 
\q2 ¿ar Bab-Jehová, deyob Israel-dulemar-imakoe? 
\q2 Bar deyob imakosulid. 
\q1  
\v 17 Efraín-dulemar bab-dummadyob-imaklemaladgi alakwaa seledimalad. 
\q2 Mer ese bar gormar, ar na deyob nanabimarye soged. 
\q1  
\v 18 Ar Efraín-dulemar sisa-gobed ei bergudele, gambasaedgine burguddamalad. 
\q2 Ar e-dummagan-yar-semaladbela, igar-isgana-imakedbina sogdamalad, 
\q1  
\v 19 A-ulale, e-bab-dummaganga ibmar-ogumakar-ukmalad-ular, bingegunanai gudmaloed, 
\q2 burwa-ooregedbali bela bergumaloed.” 
\c 5  
\s1 Bab-Dummad Israel-dulemargi gwisgunaid 
\p Bab-Jehová soged: 
\q1  
\v 1 “¡Dule-irwa-anse-gormalad, nue be an-itomalo! 
\q2 ¡Israel-e-dulemar, nue be bogi an-itomalo! 
\q1 ¡Reyneg-yaginmalad, nue be an-itomalo! 
\q2 ¡An bemargi yolesokalid! 
\q1 Bemar Mizpaʼye-neg-nugadgi an-neggwebur-yardaklegega imaksamalad, 
\q2 Bemar Tabor-yalagi an-dulamar-yardaklegega imaksamarbalid. 
\q1  
\v 2 Bemar Sitim-nebagi dia-yaa-matusulidyobi an-neggweburga gusmalad. 
\q2 A-ulale, an sabsur-bemar-odurdakoed. 
\q1  
\v 3 An wisid, Efraín-dulemar igi-damala, 
\q2 an Israel-dulemar-daed ise-wisimakarbalid. 
\q1 Emide, Efraín-dulemar galagwensuli-negsichigi nanadmalad. 
\q2 Israel-dulemar bela isgudmalad. 
\b  
\q1  
\v 4 ”Na ibmar-isgana-imakmaladbali, geg anse gannar-dagega gumalad. 
\q2 Ar galagwensuli negsichigi-nanaedi, an-geg-magar-dake e-imaked. 
\q1  
\v 5 Israel-dulemar na e-san-dummarba-imakdimaladi, 
\q2 na dukin-egi-yolegega imakoed. 
\q1 Ar Israel-dulemar, Efraín-dulemar, na e-isguedgine dukin yolemaloed. 
\q2 Judá-dulemarse-bela deyob eba gumarmogoed. 
\q1  
\v 6 E-sibad-wawaadyalaba, e-molimaryalaba, an-amidii gumaloenad, 
\q2 degi-inigwele, gwen an-amiosurmalad. 
\q2 ¡Ar an e-idu bangudoed! 
\q1  
\v 7 Ar angi bela dodosmalad. 
\q2 Bab-baigangad mimmi nikusmalad. 
\q1 Degisoggu, bemala, be-nainumala, 
\q2 niigwengi ilagwen-berguar guoed.” 
\p Bab-Jehová soged: 
\q1  
\v 8 “Gabaa-neggweburgi moli-bebe-gar be ogormar, 
\q2 Ramá-neggweburgi gar-trompeta be ogormar. 
\q1 Bet-Avén-neggweburgi binnasuli be 
\q1 bila-onogedgi-gormakedyobi be gormakmar: 
\q2 ‘Benjamín-neggwebur, nue-salakar.’ 
\q1  
\v 9 Israel-dulemar, innikii an bemarga soged, 
\q2 ibmar-guoedi an oyogoed. 
\q1 Ar Efraín-neggwebur sabsur-odurdakleged-ibagi 
\q2 bela olloo melledoed. 
\q1  
\v 10 Judá-dulemar-e-dummagana, dule-nainu-odogedyob gued. 
\q2 Degisoggu, an-urwedi, dii-dummad-noedyobi an emargi onogoed. 
\q1  
\v 11 Efraín-dulemar mesagwar imakledisunnad, 
\q2 e-igar-nabolemaladgi egi gwisguledisunnad, 
\q2 ar ade, bab-dummadyob-imaklemaladba bur nanaed abemalad. 
\q1  
\v 12 Degisoggu, an Efraín-dulemarga samuyob an guoed. 
\q2 Deginbali, Judá-dulemarga sibebyob an guoed. 
\b  
\q1  
\v 13 ”Efraín-neggwebur, na e-boni-nika dakargua, 
\q2 Judá-neggwebur, e-boni-yaamar dakarmogua, 
\q1 Asiria-yalase abarmakdemaloenad, 
\q2 Asiria-e-reyse bendakleged aminamaloenad. 
\q1 Degi-inigwele, Asiria-e-rey gwen e-bendakosulid, 
\q2 degi, gwen Judá-neggweburga boni-yaamar nudakosurbalid. 
\q1  
\v 14 An Efraín-neggweburgala, achumigur-nono-wawaadyobi an guoed, 
\q2 Judá-neggweburgala, achumigur-nono-wawaad-senigwadyobi an guoed. 
\q1 An-sunnagwad an gaoed, 
\q2 geb an saga-saga imakoed, 
\q2 dule-wargwensaale, gwen bendaknonikosulid. 
\q1  
\v 15 Agine geb an gannar an-maidse nonikoed. 
\q2 Na magar e-isgusad-itononimaladse an indakoed. 
\q1 Na magar e-isgusad-itononimalale, degine, angi-yolesmalad na magar-itononimalale, suli-suli itodmaloed. 
\q2 Degidbali, geb bela-belad an-amidii gumaloed.” 
\c 6  
\ms2 2b. Israel-dulemar-sabsur-odurdaklegoed 
\mr (6:1–10:15) 
\s1 Israel-dulemar Bab-Dummadse-gannar-dagedgi sunmaked 
\p  
\v 1 Israel-dulemar sogdemalad: 
\q1 “Dagmar, gannar anmar Bab-Jehováʼse namalo. 
\q2 Bab-Dummad an-ichimaksa-inigwele, amba anmar-nudakoed. 
\q2 Anmar-onaglik-imaksad-inigwele, anmar-nudakoed. 
\q1  
\v 2 Ibabogwad-sorbali, anmarga burba-dulad ukoed, 
\q2 ibapaagine, gannar anmar-ogwisguoed. 
\q2 Geb, anmar e-asabin deyob gudii gumaloed. 
\q1  
\v 3 Anmar magar Bab-Jehová-dakmarsun, 
\q2 e-Igarmar-Mamaidi anmar durdakmarsun. 
\q1 Igi dad-ibeler-noedyobi, Bab-Dummad anmarse magar-guoed, 
\q2 dii-wiedyobi anmarse nonikoed. 
\q1 Igi gebe-dii-argwaned napa-nudakdae, 
\q2 deyobi anmarse nonikoed.” 
\s1 Bab-Dummad Israel-dulemar-abinsaded 
\p  
\v 4 Bab-Jehová sogded: 
\q1 “Efraín-dulemar, ¿igi-an bemar-saergebe? 
\q2 Judá-dulemar, ¿igi-an bemar-imakergebe? 
\q1 Ar bemar-an-sabed, mogir bolegoedba-ainakwialir-berguddaedyob guddaed, 
\q2 boo wakudaryalaba-ainakwialir-berguddaedyob guddabalid, 
\q2 deyobi, be-an-sabgued berguddaed. 
\q1  
\v 5 A-ulale, an-gayaburba-barsogmaladbali, an bemar-wiosad. 
\q2 An-sunmakedgine an bemar-onaglik-imaksad. 
\q2 An-igar-naboged mar-aidegeyob bemar-oitononikoed. 
\q1  
\v 6 Ibmar-uklemalad an abemaisulid, 
\q2 bur an-sabgued an bemar-abemaid. 
\q1 Ibmar-ogumakar-uklemalad an abemaisulid, 
\q2 unnila dulemar magar-an-dake-gumalad an abemaid. 
\q1  
\v 7 Bemar Adánʼyobi gumalad: 
\q2 Bemar, anbo-igar-mesisad bichismalad. 
\q2 Ar bemar, angi aibichamalad. 
\q1  
\v 8 Galaad-neggwebur dulemar-ibmar-isgana-imakmalad-neggweburad. 
\q2 E-dule-ibmar-imakmaladi, bela ber ablis-eogedbi gudinanaed. 
\q1  
\v 9 Dule-irwa-anse-gormaladi, Siquem-neggwebursik igar-nalemaidbali, 
\q1 emar-atursaega danagwen bin itos-bukwadamalad. 
\q2 Igi dule-ibmar-atursamalad, yogasaar ibmar-isgana-imakmala, 
\q2 deyobi, dule-irwa-anse-gormalad ibmar-isgana imakdamalad. 
\q1  
\v 10 Israel-yala-naidgi, ibmar-gwen-nabirsulid an daksad: 
\q2 A-yalagine, Efraín-dulemar galagwensuli negsichigi-nanabukmalad, 
\q2 Israel-dulemar bela isgus bukmalad. 
\b  
\q1  
\v 11 ”Judá-dulemar, be-isgued-nukad, 
\q2 bemar sabsur-odurdakleged abdakdiid.” 
\c 7  
\s1 Israel-dulemar Bab-Dummadgi dummad-isgusad 
\p  
\v 1 Bab-Jehová sogdebalid: 
\q1 “An-dulamar an na bendakbienad, 
\q2 an Israel-yar nudakbienad, 
\q1 degi-inigwele, Efraín-dulemar-isgued wilub-obichad, 
\q2 degi, Samaria-dulemar-isgued wilub-obichabalid. 
\q1 Ar ade, wemar gakangi gudimalad. 
\q2 Ar dule-atursaedyobi ibmar-atursaegala, negyaba dogmalad, 
\q2 gandikidgi danagwen galimbaba ibmar-atursaddamalad. 
\q1  
\v 2 Ar we-dulemar, gwen binsadasurmalad, 
\q2 na e-ibmar-isgana-imakmalad angi gwen yoggumaisurye. 
\q1 Ar e-ibmar-isgana-imakmaladi, bela na egi e-ebiris naid. 
\q2 We-ibmar, bela an-asabin oyolenaid. 
\b  
\q1  
\v 3 ”E-ibmar-isgana-imakmaladgi, e-rey-yeer-itogega imakmalad. 
\q2 Degi, e-gakansamaladgi, e-dummagan-yeer-itogega imakmarbalid. 
\q1  
\v 4 Bela we-dulemar, negsichigi abirgunagwarsuli yoledimaladid. 
\q2 Ar we-dulemar madu-yoed-soo ginnitibisiiyob gumalad, 
\q1 ar igi dule-madu-sobed bar soo-ogannoged abesurdae, 
\q2 unnila madu-mued edarbesidae, deyobi we-dulemar gumalad. 
\q1  
\v 5 Rey-ibagi, dummagan, vinoʼgi mumguddamalad. 
\q2 Rey, galagwensuli guddamogad. 
\q2 Deyobi, rey, dule-galagwensuli-mumgumalad e-aimarye na sognagusdaed. 
\q1  
\v 6 Urwed-onogega, e-gwage madu-yoed-diopisur-naddaedyob naddaed. 
\q2 Mutikgusale, e-urwed geb boggusiid. 
\q2 Neg-oibosale, e-urwed gannar egi noardaed. 
\q1  
\v 7 We-dulemar, madu-yoed-soo-diopisulidyobi gumalad. 
\q2 E-dummagan-negsemamaid-obeloddamalad. 
\q1 Bela deyobi e-reymar-obelosdamalad. 
\q2 Degite, wemar-wargwensaale, an-amiega gwen anse gorsurmalad. 
\b  
\q1  
\v 8 ”Efraín-dulemar neggwebur-baigan-angi-bengudimaladba apuruded. 
\q2 Ar an-dulamar, madu wagar-nailik-akwigusadyobi gumalad. 
\q1  
\v 9 Dule-baigan Israel-dulemar-e-gangued ei obelonanaid, 
\q2 degite, Israel-dulemar, deyob-neg-gunaid akusunna itomalad. 
\q1 Bela e-ibe e-gargangued obelosmalad, 
\q2 degite, amba aku itomalad. 
\q1  
\v 10 Israel-dulemar e-isguedga gwen wile-itobisurmalad, 
\q2 an e-Bab-Dummad-guedgi, gwen an-amibisurmalad. 
\q2 Na e-san-dummarba-imaked geg anse-dagega e-imaked. 
\b  
\q1  
\v 11 ”Efraín-dulemar nuu-aku-neg-itogedyob gumalad, 
\q2 gwen magar neg-itosurmalad. 
\q1 Imbagwenale, Egipto-dulemarse bendakleged egisdedaed, 
\q2 imbagwenar, Asiria-dulemarse bendakleged egisdedabalid. 
\q1  
\v 12 Ar deyob bendakleged-egisnadmalale, nuumar-galegeyobi an egi saki obatoed. 
\q2 E-isgued-ular, an ilagugle (7) sabsur odurdakoed. 
\q1  
\v 13 ¡Duledar-wilesmarsun! Ar angi bangusmalad. 
\q2 Angi gwisgusmaladba bergumarsunnoed. 
\q1 Ar sunna an na bendakenad, 
\q2 degi-inigwele, ar emardi unnila anga gakansaar sunmakmalad. 
\q1  
\v 14 Anse innikigwadgi gorsurmalad, 
\q2 unnila, e-gasgi bomamaidamalad. 
\q1 Ibmar-gwag-nikuegala, vino-binid-nikuegala, na dukin esgi san-wionanaidamarbalid. 
\q2 Degi, angi aibitedamarbalid. 
\q1  
\v 15 Amba an-igargi an odurdaksad-inigwele, 
\q1 amba an ega e-surgan-ogannosad-inigwele, 
\q2 degite, amba angi-aibinega angi ichakwa-binsananaid. 
\q1  
\v 16 Gwen anse Bab-Dummad-Bur-Biriginedse dagbisurmalad. 
\q2 Warsi-biir-daklegedyob gumalad. 
\q1 E-dummagan sabsur-sunmakmaladbali, es-suidgi oburgwilenai gumaloed, 
\q2 degine, Egipto-dulemar egi dodonanai gumarbaloed.” 
\c 8  
\s1 Bab-Dummadsurmaladse-gordimalad-ular, sabsur-odurdaklegoed 
\p  
\v 1 Bab-Jehová sogdebalid: 
\q1 “¡Gar-trompeta be ogole! 
\q2 Ar sulubagi anse-goled-neggi sigdanikid. 
\q1 Ar Israel-dulemar, anbo-igar-mesisad obelosmalad, 
\q2 an-Igar-Maidgi yolesmalad. 
\q1  
\v 2 Emide, anse wiledanimalad. Weyob sogmalad: 
\q2 ‘Israel-Bab-Dummadye, be anmar-Bab-Dummadid, anmar wisye.’ 
\q1  
\v 3 Degi-inigwele, Israel-dulemar igar-nued obachamalad, 
\q2 a-ulale, e-isdarmalad e-baleginmaloed. 
\q1  
\v 4 An-sogedbarsuli reymar-omesdimalad. 
\q2 Yogasaar dulemar-an-akudaked dummaganga nug-imakdimalad. 
\q1 Na dukin san-wiomalaga e-manimargine, e-ormargine, 
\q2 bab-dummadyob-imaklemalad sobdimalad. 
\q1  
\v 5 ¡Samaria-dulemar! Moli-bebe-nikad-sapingwagwad bab-dummadyob be sedimalad be metemala. 
\q2 An bemargi an nue-urwed. 
\q2 ¿Ar sana bemar san-swilidiksuli-gudii gumaloe? 
\q1  
\v 6 ¡Israel-dulemar! We-moli-bebe-nikad-sapingwagwad Bab-Dummadsulid. 
\q2 Ar wede, dule-sobedid. 
\q2 Samaria-dulemar-e-moli-sobaled, an bela bibisgoed. 
\b  
\q1  
\v 7 ”Ibmar-isgana be imaksamalad, 
\q2 degisoggu, boni-dummad begi aibinnonikoed. 
\q1 Trigo-e-war san sated, degisoggu, madubur nikuosulid. 
\q2 Ar trigo-e-war wis e-san-nikunonikile, dule-bamalad-e-masga guoed. 
\q1  
\v 8 Israel-yar bela ibitosad, 
\q2 emi-ibagi, dulemar-yar-baid-baidgi-bukwamalad-abargi bai daklesulid. 
\q1  
\v 9 Israel-dulemar aka Asiria-dulemarse bendakleged egichisgusmalad. 
\q2 Moli-sapur-uayasuid-aku-neg-itogedyob angi bangudmalad. 
\q1 Efraín-dulemar, igi-ome mani-amiega sui-bamaladbo mege, 
\q2 deyobi gudmalad. 
\q1  
\v 10 Efraín, bendaked-amiega, we-neggwebur-bamalad-manigi-bennus-inigwele, 
\q1 gwen ega igarga guosulid. 
\q2 Anse neggwebur-bamalad-dikasuli-bukwadse gales barmiledmaloed. 
\q1 Rey-buledsega, dummagansega 
\q2 sikwas sabsur-odurdakledii gumargweloed. 
\b  
\q1  
\v 11 ”Efraín-dulemar, na be-isgued-eliegala, 
\q1 bemar bab-dummadyob-imaklemaladga 
\q2 ibmar-ogumakar-ukleged-aila-bukidar sobsamalad. 
\q2 Ar wede, unnila isgued-ailaga be obinnismalad. 
\q1  
\v 12 Ar sunna an bemarga igar-nuegan-narmakar bukidar uksaled, 
\q2 degi-inigwele, ar bemar an-igar gwen bai daksasurmalaled. 
\q1  
\v 13 Be anga ibmar-ogumakar-uked yeer-itodamalad, 
\q2 be a-san gundamarbalid. 
\q1 Degi-inigwele, ulubgi-napiragwadgi-imaksulidba we-ibmar-imakleged, 
\q2 an gwen nabir daksulid. 
\q1 Degisoggu, bemar-isgued an iegosulid, 
\q2 an sabsur-bemar-odurdakedsemalad. 
\q2 Gannar bemar Egipto-yarse namaloed. 
\q1  
\v 14 Israel-dulemar, ani an bemar-obinyedid, 
\q2 degite, bemar an-iedmalad. 
\q1 Nega-dummagan-yeerdaklemalad be sobdemalad. 
\q2 Judá-dulemar, neggwebur-galu-matusurmalad omelodmalad. 
\q1 Degi-inigwele, bela bergumalaga, e-neggweburmargi, e-galu-matusurmaladgi, 
\q2 soo an odegoed.” 
\c 9  
\s1 Israel-dulemar sabsur-odurdaklegoed 
\p  
\v 1 Oseas, Israel-dulemarga sogded: 
\q1 “Israel-dulemar, mer be weligwar-itomar, 
\q2 mer be neggwebur-baiganyob iba-onomar. 
\q1 Ar bemar galagwensuli nanadmalad. 
\q2 Be-Bab-Dummadgi be bangudmalad, 
\q2 bab-dummad-baigan-nug be odummodmalad. 
\q1 Bela ibmar-gwag-omukuleged-neggi gambasaed-e-mani-bennukleged bur be abeged. 
\q2  
\v 2 A-ulale, ibmar-gwagmar, uvaʼmar gwen be-oimmogosurmalad. 
\q2 Vino-binid bar yeer-goblege guosulid. 
\q1  
\v 3 Efraín-dulemar Bab-Jehová-yargi bar ambikuosurmalad, 
\q2 gannar Egipto-yarse-namaloed. 
\q2 Asiria-yargi mas-isemalad gunmaloed. 
\q1  
\v 4 Bab-Jehováʼga bar vino-eoleged ukosurmalad, 
\q2 e-ibmar-Bab-Dummadga-ukmalad, bar ega ibnuedga guosulid. 
\q1 Madu-gullegoedi dulemarga madu-dule-burgwaled-neggi-gullegedyob ega guoed. 
\q2 Dule a-madu-guchale, swilidiksuli guoed. 
\q1 Unnila sikwas nabir-itogega ega guoed. 
\q2 Degi-inigwele, we-madu, Bab-Jehová-negse seledosulid. 
\b  
\q1  
\v 5 ”Bab-Dummadga-iba-onolegedgi ¿ibu-be imakmaloe? 
\q2 Bab-Dummadga-itoakwaa iba-onolegedgi, ¿ibu-be imakmarbaloe? 
\q1  
\v 6 Amba sabsur-odurdaklegedgi be wakinye sogmalale, 
\q2 Egipto-dulemarse be galemaloed, 
\q2 degi, Menfis-neggweburgi be-digmaloed. 
\q1 Be-ibmar-nuegan-manigi-sobarmaladgi, dakemar ammurudoed, 
\q2 be-dordonegmargi ikomar ammurudoed. 
\q1  
\v 7 Sabsur-odurdakleged-iba noni, 
\q2 buged-imakleged-iba noni. 
\q1 Israel-dulemar, ¡be wisigarmar! 
\q2 Be-isgued dogdargusad, 
\q2 isdar-emar-dakedi be baligannosad. 
\q1 Emide bemar, Bab-Dummad-gayaburba-barsoged dule-gegegwaga imakmalad. 
\q2 Deginbali, nia-saedga be Dule-Bab-Dummad-burbaba-ibmar-soged imakmalad. 
\q1  
\v 8 Bab-Dummad-gayaburba-barsogedi, Bab-Dummadmala, Efraín-neggweburga nakulegedga gumalad. 
\q2 Wemar-yolemalagala, bemardi sakiyob e-idu galumar-urbedamalad, 
\q2 deginbali, Bab-Dummadse-goled-neggi bemardi wemar-sae-dakdamarbalid. 
\q1  
\v 9 Bemar Gabaaʼgi-dulemar-gusmaladyobi, 
\q2 nue bela-belad be isgudmalad. 
\q1 Ar Bab-Dummadi, be-isgued iegosulid, 
\q2 be-isguedba sabsur-bemar-odurdakoed.” 
\p  
\v 10 Bab-Jehová sogded: 
\q1 “An Israel-dulemar-aminonigu, 
\q2 nega-dulesulidganba uva-san-amilegedyob an amisgusad. 
\q1 An gebe e-dadgan-dakargua, 
\q2 higuera-sapigi-e-san-dutuu-ainidanikiyob an daksad. 
\q1 Degi-inigwele, emar aka bab-dummadyob-imakleged-Baal-Peorʼba nanadmalad. 
\q2 Abali na isgudmalad, dule-isguedga gudmalad. 
\q2 We-bab-dummadbina sulibinsa-itode gudmalad. 
\q1  
\v 11 Efraín-dulemar-e-ibmar-nuegan-bukidar-nikadi bar daklegosulid. Nuu-gukudeyob guoed. 
\q2 E-omegan bar gurgin-nika guosurmalad, bar mimmigan-nikuosulid. 
\q2 E-dula bar sapibeneggi-mai guosulid. 
\q1  
\v 12 Ar amba e-mimmigan-dungumamai-dakdemalale, 
\q2 we-napneggi amba an ei obelogoed. 
\q1 An egi bangudele, ¡dummad-wilemaloed! 
\q2  
\v 13 Efraín-yala, Tiro-yalayob-dakleged. 
\q1 Yala-nuedgi bukwamalad. 
\q2 Degi-inigwele, Efraín-dulemardi burgwed-igarba na e-mimmigan-semamaid.” 
\s1 Oseas-Bab-Dummadse-gochad 
\p  
\v 14 Oseas sogded: 
\q1 “Bab-Jehová, ega be ibmar-ukbied ukdo. 
\q2 Ega e-omegan mellegega be imake, 
\q2 e-omegan-e-nunismar be odinnoge.” 
\s1 Bab-Dummad Oseas-abin-imaksad 
\p  
\v 15 Bab-Jehová soged: 
\q1 “Israel-dulemala, Gilgal-neggweburgi bela isguali gudmalad. 
\q2 De-akale, an bemar isdar dakded. 
\q1 Bemar-isgued-ulale, anse-goled-neggi an bemar-onioed. 
\q2 Bar an bemar-sabguosulid, 
\q2 ar ade, bela be-dummagan uayasulidamalad. 
\q1  
\v 16 Efraín-dulemar galakuded: 
\q2 Sapi-mali-dingudedyob nadmalad, 
\q1 sapi-bar-sanmaksurmaladyob nadmalad. 
\q2 Amba na mimmigan-nikudmalale, an ei oburgoed.” 
\s1 Oseas Israel-dulemarga sogded 
\p  
\v 17 Oseas Israel-dulemarga sogded: 
\q1 “Ar bemar, an-Bab-Dummadba ibsassurmarsoggu, Bab-Dummad bemar-obanoed. 
\q2 Neggwebur-baigan-abargi yarsuli be gudii gumaloed.” 
\c 10  
\p  
\v 1 Oseas sogdebalid: 
\q1 “Israel-dulemar uva-saila-yeer-sanmakedyob guenad, 
\q2 ichesuli sanmakdaenad. 
\q1 Ar bur bukidar-sanmakdedaed-inigwele, 
\q2 aka bur bab-dummadyob-imaklemaladga bukidar ailamar sobdedamalad. 
\q1 Ar e-yar nue-nasguddaed-inigwele, 
\q2 aka bur bule e-bab-dummaganga ailamar yeerdakle imakdedamalad. 
\q1  
\v 2 Ar we-dulemar darbo-binsadamalad, 
\q2 agala, Bab-Dummad, e-isgumalad-ular sabsur odurdakoed. 
\q1 Bab-Jehová e-bab-dummagan-ailamar bela obelogoed, 
\q2 e-akwa-sobar-gwismalad bela ei obelobaloed. 
\b  
\q1  
\v 3 ”Ar sunna weyob sogmalad: 
\q1 ‘Ar anmar Bab-Dummad-dobsuli-gudii gusye, 
\q2 a-ulale, anmar reysuli gudimarye. 
\q1 Ar anmar rey-nikana, 
\q2 ¿ibugi wis anmar-bendakoena?’ 
\q1  
\v 4 Ar unnila binsa sunmakdamalad, 
\q2 gakansaar ise-sogar ibmar-sogdamalad, 
\q1 binsa dulemarbo igar-omesdamalad. 
\q2 Agala, abin-abin-imakmalad, 
\q2 gagan-isgana-ainiardaedyobi noardaed. 
\q1  
\v 5 Samaria-dulemar, Bet-Avén-yargi moli-bebe-nikad-sapingwagwad-orbiid-e-nug-odummodiidga bukib-binsanonimaloed. 
\q2 E-dulemar, a-ulale, na wiles itononimaloed, 
\q1 e-dule-irwa-ese-gormaladmoga bukib ega binsadmarmogoed, 
\q2 ar ade, e-ibe dikasuli yar-baidse sedmaloed. 
\q1  
\v 6 Moli-bebe-nikad-sapingwagwad-orbiidi, Asiria-yarse rey-maniga-guega seledoed. 
\q2 Efraín-dulemar bingegumaloed. 
\q2 Israel-dulemardina, na e-bab-dummadga-ibmar-imakdimaladgi dummad-bingegunai guoed. 
\q1  
\v 7 Samaria-dulemala, e-reybogwa obelolemaloed. 
\q2 Diwar-noedba suarmar-selemaidaedyobi selemai gumaloed. 
\q1  
\v 8 Bab-dummadyob-imaklemalad-e-negmar, yarmar-birigi-bukwamaladi bela bibislegoed. 
\q2 Israel-dulemar egi isgudidamaladid. 
\q1 E-aila-matusurmaladgi gagan-ikobimalad egi ammurnai gudoed. 
\q2 Degisoggu, yarmarga sogdemaloed: 
\q2 ‘¡Be anmargi batedage!’ 
\q1 Yar-mulluganga sogdemaloed: 
\q2 ‘¡Be anmar-omursunna!’ ” 
\p  
\v 9 Bab-Jehová Israel-dulemarga sogded: 
\q1 “¡Bemar, Israel-dulemar! Gabaaʼgi-neggusad-akale, be isgudanigumalad. 
\q1 De-akale, bemar gwen isgued iesurmalad. 
\q2 A-ulale, bemar be-isguedba Gabaa-yargi bila-onolegoedgi be obelolemaloed. 
\q1  
\v 10 An-itolegedba an bemar sabsur-odurdakoed. 
\q2 Bemargi-yolemalagala, neggwebur-baigan-atomalaga an imakoed. 
\q1 Agi bemar sogbo-ibmar-isgana-imaksadba, 
\q2 an sabsur-bemar-odurdakoed. 
\q1  
\v 11 Efraín-dulemar moli-bebe-nikad-bipigwad-nuekwa-odurdaklegaledyobinad, 
\q2 ibmar-gwag-weed yeer-itodaenad. 
\q1 An ega yapa e-dukargi suar nasikgusanad. 
\q2 Emisgindi an, Efraín-dulemar-e-dukargi suar nasiksunnoed. 
\q1 Judá-dulemar napa-imuedga gudsunnoed, 
\q2 Jacob-wagan napa-imulesad-durwinai gudsunnoed.” 
\p  
\v 12 Oseas Israel-dulemarga sogded: 
\q1 “¡Bab-Jehová-amiega be guakwamalo! 
\q2 Ar bemar nainu-binidyob gumalad. 
\q1 Gwagegi igar-napiragwad be nasikmar, 
\q2 adi, egi sabgued-igar be amimaloed. 
\q1 Geb agine, Bab-Jehová, bemar-bendakegala, 
\q2 bemarbina danikoed. 
\q1 Ar igi dii-wiedi, napa-dinnaregedgi batenonidae, 
\q2 deyobi, Bab-Jehová bemar-bendaknonikoed. 
\q1  
\v 13 Ar bemar, ibmar-isgana imaksamalad, 
\q2 agala, bemar boni-dummaganba galitonanaid, 
\q2 gakan-imaksadbali be ibitonanaid. 
\q1 Ar ade, bemar, be-moli-ur-bila-onomaladmargi bensulid nikusmalad, 
\q2 ar sorda-bila-onomaladgi be bensulid nikusmarbalid. 
\q1  
\v 14 Emide, be-neggweburgine bila onoledoed, 
\q2 bela be-neg-gandikmalad bibichidoed. 
\q1 Igi Rey-Salmán bila-ononaidgi Bet-Arbel-neggwebur-obelosgusayob negguoed. 
\q2 Deunni, nangan na e-mimmiganbo sabsur-odurdaklegar burgwis nanaed. 
\q2 Deyob neg guoed. 
\q1  
\v 15 Weyobi Betel-dulemar bemar-imakoed, 
\q1 ar bemar doggus-isgued wilub-obichaa nikad. 
\q2 Neg-oibononikile, Israel-e-rey yog-berguar guoed.” 
\c 11  
\ms2 2c. Bab-Dummad Israel-dulemar-sabesailad 
\mr (11:1–14:9) 
\s1 Bab-Dummad Israel-dulemar-wiledaked 
\p  
\v 1 Bab-Jehová Israel-dulemarga sogded: 
\q1 “Bipigwaunni an be-sabgusad, 
\q2 Egipto-yar-akale an-machise an gochagusad. 
\q1  
\v 2 An bur bule bese gornaigusdae-inigwele, 
\q2 aka bur bule be angi banguddaed. 
\q1 Aka bur bule be bab-dummadyob-imaklemaladga ibmar-ogumakar ukdedaed. 
\q2 Bab-dummadyob-imaklemaladga ina-wawadikmalad be oburmakdedaed. 
\q1  
\v 3 Ani an Efraín-dulemar nanaedgi odurdaksad, 
\q2 ani an argangi seali gusad. 
\q1 Ani an be-onudaked-gudiid-inigwele, 
\q2 degite, gwen deyob be an-daksasulid. 
\q1  
\v 4 Sabedgi an be-nisad, 
\q2 wiledakedgi an be-sesad. 
\q1 Mailediidgi an be-onosad, 
\q2 wiledakedgi masgi an be-oguchad. 
\b  
\q1  
\v 5 ”Egipto-yarse be naosurmalad, 
\q2 Asiria-dulemar bemar-dummadga guoed. 
\q1 Ar ade, anse bemar dagbisur-gusmarsoggua, 
\q2 a-nukad be deyob gumaloed. 
\q1  
\v 6 Be-yargine bila-onoleged nagunonikoed, 
\q2 be-isdarmalad bela be-yawagak-bargamalad bibisgemaloed, 
\q2 bela be-ibmar-imakoed-igar-mamaid obelolenonikoed. 
\q1  
\v 7 Bemar, an-neggwebur-gumaladi, angi nue-banguega be alamaknanaid. 
\q2 Degisoggu, amba anse gorye sogmalale, bar an bendakosulid. 
\b  
\q1  
\v 8 ”Efraín-dulemar, ¿igi an be-iegosunna? Gege an be-ieged. 
\q2 Israel-dulemar, ¿igi an dule-bamaladga be-urmakosunna? Gege an be-urmaked. 
\q1 Ar gege an Adma-neggwebur-urmaksadyob bemar-urmaked, 
\q2 gege an Zeboim-neggwebur-iesayob bemar-ieged. 
\q1 An-ulubgine, an-gwage bemar-sabedba bipirmaksiiyob itoleged, 
\q2 bela an-samurmar bemar-sabedba nakwamaksiiyob itoleged. 
\q1  
\v 9 Bar an begi urwosulid, 
\q2 bar an Efraín-obelogosurbalid, 
\q2 ar an dulemaryob gusulid. 
\q1 Ar an Bab-Dummad-Isligwaled gued, 
\q2 an-neggwebur-abargi an gudiid. 
\b  
\q1  
\v 10 ”An achumigur-nono-wawaadyob uurmakdoed, 
\q2 geb bemar anba ibsadmaloed. 
\q1 An binnasuli-uurmakdele, 
\q2 be-wagan, dad-nakwed-akale, dobed-abalagi anse nonimaloed. 
\b  
\q1  
\v 11 ”Egipto-yala-akale, nuu-emar-dobgudiiyobi, dobed-abalagi anse nonimaloed. 
\q2 Asiria-yala-akale, sikwi-emar-dobgudiiyobi, dobed-abalagi anse nonimaloed. 
\q1 Ani an e-negmargi-megmalaga imakoed. 
\q2 Ani an Bab-Jehová-guedi we-ibmar soged.” 
\s1 Israel-dulemar-e-isgued 
\p Bab-Jehová sogded: 
\q1  
\v 12 “Efraín-dulemar dummad-anga gakansadimalad. 
\q2 Israel-dulemar gusgu an-yardakdimalad. 
\q1 Judá-dulemar angi aibacha gudimalad, 
\q2 bemar, angine dikasur-yoggus gudimalad.” 
\c 12  
\s1 Efraín-dulemar e-isgued-nukad ese ululesad 
\p Bab-Jehová sogded: 
\q1  
\v 1 “Efraín-dulemar unnila burwa-goledba gudidimalad, 
\q2 dad-nakwedsik-burwa-goled-sorba gudidimalad. 
\q1 Aka bur bule emar-wionaigusdamalad, 
\q2 bane-bane gakanginbi gudimalad. 
\q1 Asiria-dulemarbo igar mesdidamalad, 
\q2 Egipto-dulemarga olivo-gwallu ukdidamarbalid.” 
\p  
\v 2 Oseas weyob sogded: 
\q1 “Bab-Jehová, Judá-dulemargi yolenonikoed, 
\q2 Jacob, e-ichakwadaedba sabsur-odurdaklegoed, 
\q2 e-ibmar-isgana-imaksadba sabsur-odurdaklegoed. 
\q1  
\v 3 Jacob, gwaluleged-iduale, bato sapibeneggi e-ia-yamosad. 
\q2 Degine, bato uka-selebagwadgi, Bab-Dummadbo gala-maada nagusad. 
\q1  
\v 4 Baliwiturbo bengusgusad, 
\q2 baliwiturgi obicha gusad. 
\q1 Jacob, ise-boale baliwiturga sognaigusad: 
\q2 ‘Wile be an-dakye.’ 
\q1 Ar Bab-Dummadi Betel-neggweburgi Jacob-abingusad, 
\q2 agine Jacobʼbo sunmaksad. 
\q1  
\v 5 Jacob, Bab-Dummad-Bela-Gangued-Nikadbo sunmaksad. 
\q2 A-Bab-Dummadi, Bab-Jehováʼye nugad. 
\q1  
\v 6 Israel-dulemar, ar bemardina, be-Bab-Dummadse be gannar dagergebed, 
\q2 sabgued be oyogergebed, 
\q1 igar-napiragwad be imakergebed, 
\q2 Bab-Dummadgi-bensuli be nanaergebbalid.” 
\p  
\v 7 Bab-Dummad Israel-dulemarga sogded: 
\q1 “Bemar Canaán-dulemar-ibmar-ukmaladyobid. 
\q2 Ar we-dulemar, gadi emar-yardakmalad, 
\q2 yamo nibir-isganagi dulemarga ibmar-wilubsadamalad. \fig Dule ibmar-wilubsaedgi ibmar-wilubsanaid. (Oseas 12:7) |src="LB00124B.TIF" size="col" ref="Oseas 12:7" \fig* 
\q1  
\v 8 Efraín-dulemar na san-bule-bule-sunmakmalad. 
\q1 Weyob sogmalad: ‘Ibiyobi an ibmar-ibedga gusa, 
\q2 ibmar-bukidar an nikad. 
\q1 Dule gwen angi isgued amiosulid, 
\q2 degine, an-arbadiidgi dule gwen isgued amiosurbalid.’ 
\b  
\q1  
\v 9 ”Ar bemar Egipto-yargi-bukwamalad-akale, bato ani an bemar-Bab-Dummadid. 
\q2 Gannar dordoneggi-megmalaga an bemar-imakoed. 
\q1 Igi nega-dulesulidganba an bemar-imaksagusa, 
\q2 deyob an bemar-imakoed. 
\q1  
\v 10 Ani an anga-gayaburba-barsogmaladba an bemarga sunmaksad. 
\q2 Wemar bukidar-negburgan-dakega an imaksad. 
\q2 Wemarbali an burbar-sunmaklegedgi an sunmaksad. 
\b  
\q1  
\v 11 ”Israel-dulemar-Galaad-yargi-gudimalad dule-isgumaladid. 
\q2 Gilgalʼye-neg-nugadse naddamalad, 
\q1 agi, moli-bebe-nikad oburgwedamalad, 
\q2 adi, e-bab-dummadyob-imaklemaladga ogumakar ukegar. 
\q1 Agala, e-aila-matusurmalad bela an ei bibisgoed, 
\q2 e-nainugi e-aila-akwamarbi-omilede an imakoed.” 
\p  
\v 12 Oseas weyob sogded: 
\q1 “Be-dad-Jacob, Aram-yarse wakite gusad, 
\q2 agi ome-nikuega sibad-wawaad-edarbedgi arbas gusad. 
\q1  
\v 13 Bab-Jehováʼdi, Egipto-yargi Israel-dulemar-onogegala, degi, amar-akwebaligala, 
\q2 dule-e-gayaburba-barsoged ebusgusad, 
\q1  
\v 14 Degi-inigwele, Efraín-dulemar e-Bab-Jehová-ourwega imaksamalad, 
\q2 Bab-Dummad-sae-itogega imaksamalad. 
\q1 Agala, Bab-Jehováʼdi, wemar emar-ablis-eosmalad-nukad sabsur-odurdakoed. 
\q2 E-isgumaladba na dukin odurdaklemaloed.” 
\c 13  
\s1 Bab-Dummad sabsur Israel-dulemar-odurdakoed 
\q1  
\v 1 Gebeunni, Efraín-dulemar, Israel-yargi nuga-nikarbamaladinad. 
\q2 Ibmar-sogdemalale, dulemar, dobee itodamalad. 
\q1 Emide, Efraín-dulemar, bab-dummad-Baalʼye-nugad-e-nug odummod gusmalad. 
\q2 A-isgued-nukad, Efraín-dulemar burgwenoni gusad. 
\q1  
\v 2 Degi-inigwele, amba bur bule isguedgi nanabukmalad. 
\q2 Dulemar-ega-ibmar-sobmaladga sogdedamalad: 
\q1 “Be anga bab-dummagan-imaklegoyob-manibiid be sobye.” 
\q2 Geb a-dulemar na e-dakedba ega sobdamalad. 
\q1 Degi, bab-dummadyob-imaklemalad-e-wagar-uddamalad, 
\q2 degine, dule-ogumakar-ukleged ega ukdedamarbalid. 
\q1  
\v 3 Agala, igi-bolegoe-boo-bate, 
\q2 igi-boo wakudaryalaba-milege, 
\q2 deyob gumaloed. 
\q1 Igi-gagan-dinnagana burwaba-seleddae, 
\q2 igi-waa soogi-ainakwider seleddae, 
\q2 deyob gumaloed. 
\p  
\v 4 Bab-Dummad Israel-dulemarga sogded: 
\q1 “Israel-dulemar, Egipto-yargi be bukwamargua, 
\q2 bato an bemar-Bab-Dummadid. 
\q1 An-imbagi Bab-Dummad-baid be nikuosurmalad, 
\q2 an-imbagi Abonoged-baid be nikuosurbalid. 
\q2 Unnila anbi be-Bab-Dummadga gued. 
\q1  
\v 5 Ar ani an nega-dulesulidganba, napa-uedikidba be gudigu be-akwisad. 
\q1  
\v 6 An bemarga masgunned uksagusad, 
\q2 agi bemar nue-immeles gusmalad. 
\q1 Degi-inigwele, ar bemardi san-dummarbaa itosgusmalad, 
\q2 degidbali, be an-ies gusmalad. 
\q1  
\v 7 Degisoggu, an bemarga achumigur-nono-wawaadyob gumaloed. 
\q2 An bemar-idu achu-sapur-barbadyob dukumaloed. 
\q1  
\v 8 Igi wiob-ome ei mimmigan-sulesale, uluardae, 
\q2 deyobi an bemargi gwichigudoed. 
\q2 Be-gwage-dubmar-mamaid an bei itiroed. 
\q1 Achumigur-nono-wawaadyobi an bemar-obelogoed. 
\q2 Ibdurgan-ursilimaladyob an bemar-ichimakoed. 
\b  
\q1  
\v 9 ”Israel-dulemar, ani an bemar-obelogoed, 
\q2 ar bemar, be-bendakdiidgi be gwisgunanaid. 
\q1  
\v 10 Ar bemar gordigusmalad: ‘Anga be rey-udaye, 
\q2 dule-negsemalad be anga udabarye.’ 
\q1 Degite, bemar-neggwebur-bendakega, ¿bia be-reymarde? 
\q2 ¿Bia dulemar-bega-negsemaladde? 
\q1  
\v 11 An-urwedgi an bemarga rey-uksad, 
\q2 an-urwedgi an bemar-annik susbalid. 
\q1  
\v 12 Efraín-dulemar-e-ibmar-isgana-imakmaladi nue-narmakar maid, 
\q2 bela an e-isgumalad semaid. 
\q1  
\v 13 Israel-dulemarga gwaluleged-ibagan nonikinad, 
\q2 degi-inigwele, igi sikwi muu-neggi aidegega geg nuekwaa mege, 
\q2 deyobi be binsaedsuli gusmalad. 
\b  
\q1  
\v 14 ”¿Degite, amba neg-uan-e-ganguedgi bemar-bendakbi be an-abede? 
\q2 ¿Burgwedgi an bemar-bendakode? 
\q1 Burgwed, ¿bia be-boni-dummadgande nadsunna? 
\q2 Neg-uan, ¿bia be-dule-obeloged nadsunna? 
\q1 Burgwed, neg-uan, be dagmar, 
\q2 wile bar an wemar-dakosulid. 
\b  
\q1  
\v 15 ”Ar bemar, Efraín-dulemar, be-gwenadgan-abargi be nasgudele, 
\q2 ani an bemar-obelogoed. 
\q1 Igi-burwa-dad-nakwedsikid nega-dulesulidgansik-goledi, dianmaid, degi, diwarmaid dinnaa imake, 
\q2 deyobi an bemar-imakoed. 
\q1 Geb agi, be-isdarmalad be-ibe 
\q2 bela be-ibmar-nuegan sumaloed. 
\q1  
\v 16 Samaria-dulemar, e-isgusad-nukad, an sabsur-odurdakoed, 
\q2 ar e-Bab-Dummadgi yolesmalad. 
\q1 E-dulemar bila-onogedgi burgwemaloed, 
\q2 e-mimmigan napagi sabsur-omukulenai gumaloed. 
\q1 E-omegan-gurgin-nikamalad-ibe, 
\q2 saban sabsur-egalenai guoed.” 
\c 14  
\s1 Isguedga-wile-itogedba bendaklegoed 
\p  
\v 1 Oseas Israel-dulemarga weyob sogded: 
\q1 “Israel-dulemar, be-Bab-Dummad-Jehováʼse be gannar dagmar. 
\q2 Ar bemar na be-isguedgi-argwanega na be imaksamalad. 
\q1  
\v 2 Bab-Dummadga be ibmar-sogmaloedi, nue egi be binsamalo. 
\q2 Bab-Jehováʼse gannar be namar, 
\q1 ega be ise-wilesakwaa weyob be sogmaloed: 
\q2 ‘Be anmarga isgued elie, 
\q2 begi-isgussulidyob be anmar-dake. 
\q1 Wiledakedgi be anmar-abingae, 
\q2 ar anmar na be-nug odummobimalad. 
\q1  
\v 3 Bab-Jehováʼye, Asiria-dulemar gwen anmar-bendakosulid, 
\q2 bar anmar molimar-bila-onoged-birgi nakosulid. 
\q1 Anmar, anmar-ibmar-sobsamaladse anmar-bab-dummaganye, bar golosulid. 
\q2 Bab-Jehová, unnila begine babgan-satemalad wile daklesiid.’ ” 
\s1 Bab-Dummad Israel-dulemarga ibmar-sogsad 
\p  
\v 4 Bab-Dummad Israel-dulemarga weyob sogded: 
\q1 “Ani an bemar-isgued nudakoed, 
\q2 wile-be-dakedba an be-sabgumaloed, 
\q2 ar ade, bar an bemarse urwosulid. 
\q1  
\v 5 Boo-milegedyob an Israel-dulemarga guoed. 
\q2 Dutu-achunnedyob an Israel-dulemar-imakoed. 
\q1 Igi Líbano-urwarmar-e-sailamar neg-urba-diglegwichi, 
\q2 deyobi, an bemar-imakmaloed. 
\q1  
\v 6 E-anagan nasgudoed, 
\q2 olivo-sapi-gandikidba-yeerdaklegwichiyob bemar guoed. 
\q2 E-yapannedi, Líbano-urwar-yeer-yapannedyob yapanmaloed. 
\q1  
\v 7 An-argan-yaurgi gannar ambikunonimaloed, 
\q2 orosgi-dakleged-trigoʼyob dungudmaloed. 
\q1 Uva-dub-ainiedyob e-wagan ainidoed, 
\q2 Líbano-yar-e-vinoʼyobi, nug-dummarbaa gumaloed. 
\q1  
\v 8 Efraín-dulemar, Bab-dummadyob-imaklemalad be iemarsun. 
\q2 Ani an bemar-abinsadiidid, 
\q2 ani an bemar-edarbediidid. 
\q1 Baryawar-aramakgwichiyob an gued, 
\q2 be-sanmakedi angi danikid.” 
\b  
\q1  
\v 9 Ar dule, binsaed-ibedile, we-ibmarmar magar itogoed. 
\q2 Ar dule, nue-ibmar-wisile, we-ibmarmar magar itogoed. 
\q1 Bab-Jehová-igarmala bela innikigwadbiid. 
\q1 A-igarbali, dule-innikimalad nanamalad. 
\q2 Dule-uayasulidamaladdi, we-igargi yoleddamalad.