\id 2TI - Kuna, San Blas - Bible -Panama 2014 (DBL -2014) 
\h 2 Timoteo 
\toc1 Timoteoʼse-Narmaklesad-Garda-Sogbogwad 
\toc2 2 Timoteo 
\toc3 2tm 
\mt1 TIMOTEOʼSE-NARMAKLESAD-GARDA-SOGBOGWAD 
\mt2 2 TIMOTEO 
\imt2 GEBE-SOGLENAID 
\imt1 Garda-nug 
\ip Pablo, Roma-neggweburgi esgaryagi-mellesigu, we-garda-sogbogwad Timoteoʼse narmaksad. Binsamardo, we-garda birga 64ʼgi narmakles-insaye. Pablo, esgaryagi-mellesiid bar noosulid wisid, degi, dule-isganamaryobi Roma-dummad-e-oburgoed wisbalid. 
\is1 Timoteoʼse-Narmaklesad-Garda-Sogbogwadgi weyob sunmaklenaid 
\ip Pablo we-gardagi Timoteoʼga sunmaknaid, gwenadgan-Jesúsʼba-nanaimalad-idumalad Bab-Jesús-igargi igi-nanamalargebe. Pablo, napi Timoteoʼga garda narmaksiid, ega sogsiid Bab-Jesús-Igargi mer galakuoye. Pablo, Timoteoʼga soged, ede Bab-Jesús-Igargi-arbasad gwen galakussurye, degisoggu, ede weligwar itoye. Gwenadgan-Bab-Jesús-igargi-bangudmaladbardi ede bukib-binsaye. Timoteoʼga sogbalid, Bab-Igargi gwenadgan-odurdakdii be sadeguoye. 
\ip We-gardagine, weyob ilemakar sunmaklenaid: 
\io1 1. Gebe-sikwas-soglenaid (1:1-2) 
\io1 2. Pablo, Timoteoʼga soged, gatik Cristoʼgi sunmakoye (1:3-18). 
\io1 3. Jesucristoʼga-yeer-arbaed-dule (2:1-13). 
\io1 4. Dule-arbaed-nued igi-nanaewilubbi (2:14-26). 
\io1 5. Neg-dukumosar, dulemar igi gudamaloe (3:1-17). 
\io1 6. Bab-Dummad-Igargi gatik sunmako (4:1-8). 
\io1 7. Pablo, Timoteoʼga napi igar uksad (4:9-18). 
\io1 8. Napi-soglenaid (4:19-22). 
\ip Be itogua. 
\c 1  
\ms1 1. GEBE-SIKWAS-SOGLENAID 
\mr (1:1-2) 
\p  
\v 1 Ani Pablo, Bab-Dummad-sogedba Jesucristo-e-sapin-bur-dummadga-gumogaga nugsalesmogadid. Ar Cristo-Jesúsʼgi san-burba-geg-bergued-danikidi, a-san-burba-baramilegoye-soglesad-barsogegala, an barmilenaid.  
\v 2 Timoteo, be Bab-Jesúsʼba-naid-ular an-machi-sunnadyob an be-daked. An na nue be-sabed. We-garda na bese narmaked. 
\p Bab-Dummad-anmar-Baba, degi, anmar-Dummad-Jesucristo, begi nued binsamarsun, degine, wile be-dakbarsun, deginbali, ulubgi bogidik be-itogega imakbarsun. 
\ms1 2. PABLO, TIMOTEOʼGA SOGED, GATIK CRISTOʼGI SUNMAKOYE 
\mr (1:3-18) 
\p  
\v 3 An bega Babse gotele, mutikidba, neg-ibginedba, dog-nuedye Bab-Dummadga an sogdedaed. Igi an-dadgan Bab-Dummadga arbasa, abayobi an binsaed-swilidikidgi Bab-Dummadga alamaknaimogad. 
\p  
\v 4 An wisdo, be angi bangudgu, boed-abalagi be naded. Nue an be-dakbido, adi, an be-dakalile, weligwar an itogwichiguegar.  
\v 5 Deginbali, nue an wisbardo, be-Jesucristoʼgi-bensulid, napiragwadid. Be-muu-Loida, degine, be-nan-Eunice Jesucristoʼgi nue-bensuli gusmarmogad. Degisoggu, an wisdo, be amaryob Jesucristoʼgi nue-bensuli gudimogad. 
\p  
\v 6 Degisoggu, an bega sogsun, an-argan an begi mesisgu, deun Bab-Dummad bega gurgin-burbaled uksagusad. A-gurgin mer ebusuli guo, gatik be ebugo. Dule soo-ogannonaidyob be-gurgin be ogannomogo. 
\p  
\v 7 Ar Bab-Dummad anmarga burba-dobee-itogedi uksasulid, anmarga burba-gandikid uksad, sabgued uksad, degine, sunna-na-dukin-san-bargaed uksabalid. 
\p  
\v 8 Degisoggu, mer be anmar-Dummad-Jesúsʼgi-sunmakedgi bingeguo. Degine, an Bab-Jesúsʼgi-sunmaked-ular, esgaryagi-mellesiidgi mer bingegubalo. Bur be Bab-Dummad-Gayaburba-Nuedgi sunmaked-ular, an-gudimogayob be naibi-itodii gusun. Ar Bab-Dummad na e-gangued-bega-ukedba be-bendakdii guoed.  
\v 9 Bab-Dummad anmar-abonosad. Egadga guegala anmarse gochad, anmar-ibmar-nued-imaksadba anmarse gochasulid. Ar na wargwen na e-igar-mesisadba, na e-sogedba, amba yoo napneg-nagued-iduar, bato Cristo-Jesúsʼgi Bab-Dummad nabir-anmargi-binsasadbali anmarse gochad. 
\p  
\v 10 Bab-Dummad, anmarga anmar-Abonoged-Jesucristo-barmiargu, we-sabgued anmarga oyosad. A-Jesucristo burgwed-igar bisgenonikid, E-Gayaburba-Nuedba dulagudigued anmarga senonikid, degi, burba-geg-bergued anmarga uknonisunnad. 
\p  
\v 11 A-ulale, we-Gayaburba-Nuedgi-sunmakega Bab-Dummad an-nug-imaksad. An Jesucristo-e-sapin-bur-dummadga-gumogaga, an-nug-imaksabalid. Degine, Judíoʼsurmalad-odurdakega an-nugsasbalid.  
\v 12 Ar A-Gayaburbagi an sunmakdiidba, an esgaryagi mellesisunnad. Degi-inigwele, gwen binge an itosulid, ar an wisid doagi an bensuli gudii. Ar an nue-wisid, a-dule, gangued-nue-nikadba an-yardakosulid, an-edarbedii guoed. Anga-igar-uksad-obelogedse anba gudii guoed. We-napnegse-gannar-danikidse deyob guoed. 
\p  
\v 13 Bab-Jesús-Igar-napiragwad be-angi-durdaksad nue-akwedii be sao. Jesúsʼgi-bensulidgine, degine, sabguedgine, nue-nanadii be-sao.  
\v 14 Ar Bab-Burba-Isligwaled-anmargi-maidi be-bendakdii-guoedba bega-igar-nuegan-uklesad be nue-akwedii sao. 
\p  
\v 15 Emide, bato be wisbalid, bela Asia-yarginmalad an-obachamalad. Figelo, degine, Hermógenesʼse-bakar, an-metemarmogad. 
\p  
\v 16 Bab-Dummad Onesíforo-e-neguyaginmalad nue-wile daksun. Ar ade, a-dule yeer an-ogannodii gusad. An esgaryagi mellesi-inigwele, gwen angi binge itossulid.  
\v 17 Onesíforo Roma-neggweburse-nonigu, bela-bela nue an-amidii gusad, geb an-aminonigusad.  
\v 18 Bab-Jesús-danikoed-ibagi, Bab-Dummad, Onesíforo-nue-wile-daksun. Onesíforo Éfeso-neggweburgi-nue-anmar-bendaksagusad, be nue-wisimakarmogad. 
\c 2  
\ms1 3. JESUCRISTOʼGA-YEER-ARBAED-DULE 
\mr (2:1-13) 
\p  
\v 1 Timoteo, be an-machi-guedgi an bega soged, Cristo-Jesús-bela-bela-anmargi-nued-binsasadgi be gatik ganguo.  
\v 2 Igi an dule-bukidarad-abargi emar-odurdake be an-itosa, deyob be dulemar-Bab-Igargi-nue-inniki-nanadimalad odurdakmogoed. Adi, amar nabir baigan-odurdakmarmogagar. 
\p  
\v 3 Be Jesucristoʼga-nued-arbaed-dulesoggu, naibi-itoged-abargi-be-gudiidi mer be bai itogo. 
\p  
\v 4 Dule sordaga-gubiele, geg dulemar-yogsaar-gudimalad-igarba akadii gued. Ar ade, e-dummad-sogedbarbi gudiguergebed, adi, e-dummad-yeer-ito imakegar. 
\p  
\v 5 Deginbali, dule-dodomalad bengunanair, dodoleged-igar-maidba-dasulir, geg emargi obined. 
\p  
\v 6 Dule-nainugi-arbaed, ibmar-gunbiele, bina arbagwelergebed. 
\p  
\v 7 An bega-ibmar-soged nue be itogo. Ar we an bega-ibmar-soged, Bab-Dummad magasaila-ito be-imakoed. 
\p  
\v 8 David-wagwa-Jesucristo be insao, burgwisgu, gannar durgusad. We-Gayaburba-Nuedgi an sunmakdiid.  
\v 9 We-Bab-Dummad-Gayaburbagi an sunmakdiid-ular, an naibid itosisunnad. Dule-isgana neg-ichodiidyob an esgoro-dubgi edilles siid. Ar Bab-Dummad-Gayaburbadi gwen galenaisulid, bur bule nasgumai gued.  
\v 10 Degisoggu, Bab-Dummad-na-dulemar-susad-ular, an wiledisunnad, igi-barsaye an sogdisunnad, adi, amar nabir Cristo-Jesúsʼgi abonoleged-nikumarmogagar, degine, degisadegu eba wergudii gubaligar. 
\p  
\v 11 Ar we napira sogleged: 
\q1 “Ar anmar Cristoʼba burgwisale, 
\q2 anmar eba dula gudigubaloed. 
\q1  
\v 12 Anmar Jesúsʼba naibigued itosale, 
\q2 Jesús-negsemaidba anmar eba neg semogoed. 
\q1 Ar anmar Jesús-osulosale, 
\q2 Jesús anmar-osulomogoed. 
\q1  
\v 13 Anmar Jesús-obanmalale, 
\q2 Jesúsʼdi anmar-obanosurguoed. 
\q1 Ar Bab-Jesúsʼdi gege na gakansaed.” 
\ms1 4. DULE-ARBAED-NUED IGI-NANAEWILUBBI 
\mr (2:14-26) 
\p  
\v 14 We-ibmar an bega Bab-Dummad-asabin-sogsiidi, dulemarga be nue sogmogo. Ega be sogo: Mer na be binsa abin-abin sunmakmaloye. Ar ade, we-ibmardi anmar-bendakosulid, ar igar nabiridsulid, binsa dulemar-baigan-be-itobukmalad-oichogedid. 
\p  
\v 15 Be-arbaedgi gatik nue arbanai be sae, adi, be nued-arbasadba Bab Dummad yeer be-dakegar. Be Bab-Dummad-Gayaburba-napiragwad, nued dulemarga-odulogedba be-arbaedgi be bingegugwichi guosulid. 
\p  
\v 16 Galagwensuli binsa ee sunmaklemaladba mer be dao. Ar degi-sunmaklemalad bur bule isgumai dule-imaked.  
\v 17 Ar we-odurdaklegedi, boni dule-san-malemaiyob emar-imaked. Himeneo, degine, Filetoʼmala, dule-degimaladid.  
\v 18 Wemar, Bab-Jesús-Igar-Napiragwad-Maidgi bangudmalad. Wemar-ebogwad sogmalad, dulemar-gannar-durguleged-iba bato nasye. Degisoggu, wemala, gwenadgan-Jesúsʼba-nanaimalad-gwenna-gwenna-e-binsaed gadisundo.  
\v 19 Degi-inigwele, Bab-Dummad-Igar-Mesisaddi, geg gwaged. Ar weyob anmarga oyomaid: 
\q1 “Bab-Dummad na wisid, doamar e-sordamala.” 
\qr Números 16:5 
\p Degine, weyob oyomaibalid: “Bela dulemar-Cristoʼba-nanaimaladi, isguedgi banguergebed.” 
\p  
\v 20 Ar neg-dummagangi unnila or-nogbi, degi, mani-batebi niksulid. Suar-bate, degi, napa-bate nikabalid. Amar-bate gwenna-gwenna iba-gualirginbi ebuleged, baigandi bane-bane ebuleged.  
\v 21 Degisoggu, ar Bab-Dummadga ibmar-nuedga be gubiele, ibmar-isganagi be banguergebed, gwage-swilidik na be imakergebed. Geb degi, Bab-Dummadga ibmar-nuedga be gunonikoed, degi geb be, bela ibmar-nuegan imakega guagwar gudii guoed. 
\p  
\v 22 Ibmar-galagwensuli sapingana-oichomaladgi be banguo. 
\p Bur be dule-gwage-swilidikidgi-Bab-Dummadse-gordimaladba be we-igarmargi alamaknai guo: Igar-inniki-imaklegedgi, Jesúsʼgi-bensulidgi, sabguedgi, degi, ulubgi-bogidik-itogedba, be nanadii guo. 
\p  
\v 23 Mer binsa na galagwensuli-abin-abin-imakmalad be itogo, ar be wisid, we-degimalad urwedga guddaed. 
\p  
\v 24 Ar dule-Bab-Dummadga-arbaedi dulemar-baiganbo abin-abin-imaknai guedsulid. Bur dulemar-baigangi nued daergebed, nued emar-odurdakbalirgebed, deginbali, na san-bargaakwaar nanabalirgebed. 
\p  
\v 25 Degisoggu, be dule-begi-gwisgudimaladga binnalee sunmakoed, ar abakalegi Bab-Dummad a-dule-e-gwage ogwaalile, adi, a-dule igar-napiragwad amiarmogale,  
\v 26 degi, nabir nia-sailagi wakinnalile. Ar ade, a-dule nia-sogedba gudiid. 
\c 3  
\ms1 5. NEG-DUKUMOSAR, DULEMAR IGI GUDAMALOE 
\mr (3:1-17) 
\p  
\v 1 Deginbali, we-igargan be wisgubalirgebed: 
\p Neg-dukumosale, iba-bulegan nagunonikoed. 
\p  
\v 2 Ar ade, dulemar-weyobid nonikoed: 
\q2 Dukin-e-sanginbi binsamalad. 
\q2 Maniginbi-binsamalad. 
\q2 Sunmakedgi-na-san-dummarba-imakmalad. 
\q2 Dukin-san-ogannomalad. 
\q2 Bab-Dummadgi-dodoar-sunmakmalad. 
\q2 E-babgan-sogedba-dasurmalad. 
\q2 Dule-ega-ibmar-imaksar, dog-nuedye-gwen-sogsurmalad. 
\q2 Bab-Dummadgi-gwen-binsasurmalad. 
\q2  
\v 3 Dule-sabed-gwen-niksurmalad. 
\q2 Dulemar egi yolesar, geg-na-san-bargamalad. 
\q2 Gadi-gakan-berbemalad. 
\q2 Wissur-na-san-bargamalad. 
\q2 Sabsur-aimar-imakmalad. 
\q2 Ibmar-nuegan-isdar-dakmalad. 
\q2  
\v 4 E-aimargi-aibinmalad. 
\q2 Dake-dakesur-ibmar-imakmalad. 
\q2 Dukin-san-dummarba-itomalad. 
\q2 Unnila bur bule na dukin san-yeer-itogedgi binsamalad, Bab-Dummadgindi-binsasurmalad. 
\q2  
\v 5 Yamo Bab-Dummad-Igar-Maidba-daeyob damalad. 
\q2 Degi-inigwele, binsa asgi gordidimalad, Bab-Igar-sunsogedba nanasurmalad. 
\q3 Dule-degidamaladba mer be akao. 
\p  
\v 6 Ar we-dulemar, negayaa-negayaa doge-doge gudidamalad, adi, omegan-binsaed-satemalad-binsaed-gaegar. Degi, omegan-isguedgi-nanadimalad-binsaed-gaegar. Ar we-omegana galagwensuli bina-gutuu damaladid.  
\v 7 Ar we-omegan, ibmar-durdakdimalan-inigwele, gege igar-napiragwad-maid durdakmalad.  
\v 8 Ar we-dulemala, igi Janes, Jambresʼbogwa Moisés-abin-gwisgusmala, abayobi we-dulemarde, igar-napiragwadgi gwisgudimarmogad. We-dulemar-e-binsaed nue-isgusmalad. Jesúsʼgi-bensulid-igargi amba benmalad.  
\v 9 Ar we-dulemar-e-igar gwen nasguosulid. Igi Moisés-e-ibagangi, Janes, Jambres-ebo-igar-noar-imaksamalad magar-daksamala, deyob, we-dulemar-noar-e-ibmar-imaked magar daklemogoed. 
\s1 Pablo, napi Timoteo-unasad 
\p  
\v 10 Timoteo, bedi, an-ibmar-odurdaksadba be nanadiid. Degi, an-daedba be nanadiid. Ibi-ular-an-gudigusadba be nanadibalid. Degi, igi an Jesúsʼgi-bensuli-nanadii, deyob be nanadiid. An bonigan-abin-galakusurdaed be daksad. An-sabgued, degine, gwae-gwae-an-itosulid be nue-daksabalid.  
\v 11 Deginbali, dulemar an-baregindiid nue be wisbalid, an-solegagwar-naibi-itodiid be wisbalid. Degine, igi-an Antioquíaʼgi-gusa, igi-an Iconioʼgi-gusa, degi, igi-an Listraʼgi-gusa, be wisbalid. Bab-Dummaddi ise-baregillear-an-wilesad bela amargi an-bendaksad.  
\v 12 Ar deyobi, bela Cristo-Jesúsʼgi-nue-islimakar-nanabimaladga solegagwar-naibi-itoged-igar ega nue-maibalid.  
\v 13 Dule-isganamardi, dulemar-yardakdimaladdi, aka bur bule isgumai gudoed. Dulemar-yardakdii, degine, na dukin yardakledii gudmaloed. 
\p  
\v 14 Timoteo, bedina, ibmar-durdaksadgi-bensuli be gudii guo, ibmar-durdaksadba be gatik nanao. Ar be wisid, doamar be-odurdaksananae.  
\v 15 Ar bato be bipigwaunni Bab-Dummad-Garda-Islidikid-Maid be wisi gudiid. Ar we-gardade sunna igar-abonolegedsik, Cristo-Jesúsʼgi-bensuliguedgi, ibmar-wisi be-imaked. 
\p  
\v 16 Bab-Dummad-Garda-Narmakar-Maid bela Bab-Dummad-sogsadba narmaklesad. Bab-Dummad-Garda ibnuedid: 
\q2 Dulemar-odurdakega, 
\q2 dulemarga-sabsur-ibmar-sogega, 
\q2 dulemar-unaega, 
\q2 degi, igar-innikigwadgi dulemar-odurdakegar. 
\p  
\v 17 Adi, Bab-Dummad-sordamar inniki-Bab-Dummad-Garda-durdaksadba, bela guagwar nabir ibmar-nueganbi imakdii guegar. 
\c 4  
\ms1 6. BAB-DUMMAD-IGARGI GATIK SUNMAKO 
\mr (4:1-8) 
\p  
\v 1 Bab-Jesucristo we-napneg-naid-seegala gannar danikoed. Adi, dule-burgwismaladga, degi, dula-gudidimaladga igar-itogegar. Degisoggu, we-Bab-Jesucristo-asabin, degi, Bab-Dummad-asabin, an bega soged: 
\p  
\v 2 Gatik Bab-Dummad-Gayaburbagi nue be sunmako. Dulemar be-itobidibe, dulemar be-itobisurbardibe, amba ega be sunmako. Dule-nodimaladga be gandikidgi-ibmar-sogo, adi, bur-nuekwaa Bab-Igargi nanamalagar. Degi, Bab-Igarba dulemar-nodimalad be nuekwaa odurdako, adi, mer noar bar nanamalagar. Binnalegwadgi be dulemar nue-ogannodii imako, adi, Bab-Jesúsʼba bur-bule nagumalagar. Mer be Bab-Igargi odurdaksuli guo. 
\p  
\v 3 Ar Bab-Jesús-Igar-Nued-Maid-gwen-itobisur-gudamaloed-ibagan danikoed, unnila e-itogedba nanadmaloed. Amar bukidar na e-dule-odurdakmalad amidmaloed, adi, na e-ibmar-itobiedbi ega sogegar. 
\p  
\v 4 Amar degisoggu, igar-napiragwadgi bangudmaloed, unnila igar-sergan-binsarmaladbi itobi gudamaloed. 
\p  
\v 5 Timoteo, bedina, itoakwaa be nanadii sao, naibid mer bai be itogo. Gatik Bab-Jesús-Gayaburba-Nuedgi sunmakdii be sao, gatik a-igar-bega-uklesadgi be nue arbao. 
\p  
\v 6 Ar andi bato ibmar-Babga-uklegedyob-gued-ibagan warmakdanikid, an-burgwed-iba omosad. 
\p  
\v 7 Bab-Dummadba-ibsaedgi an alamakdigusad. Emide, Babga-arbaed an ogwinmaknonisunnad. Bab-Jesús-Igargi gwen an galakussulid. 
\p  
\v 8 Degisoggu, emigindi, dule-inniki-ibmar-imakmaladga ologurgin-nued-ukleged anga sabolesisunnad. 
\p Igar-naboged-napiragwad-Bab-Jesús e-gannar-danikoed-ibagangi, anga ologurgin ukoed. Unnila angarbi uklegosulid. Dulemar-sabedgi-Bab-Jesús-edarbedimarmogadga ologurgin uklemogoed. 
\ms1 7. PABLO, TIMOTEOʼGA NAPI IGAR UKSAD 
\mr (4:9-18) 
\p  
\v 9 Timoteo, gwae-gwaesaar anse be daged imako.  
\v 10 Crescente, Galacia-yalaganba naded. Titoʼdi, Dalmacia-yarse nadmogad. 
\p Demasʼdi, we-napneg-naid-e-ibmarbina bur-nue sogsoggu, an-mete, Tesalónicaʼse naded. 
\p  
\v 11 Unnila Lucasʼbi an-walik gudiid. Be anse alir, Marcos be nidago, ar ade, an-arbaedgi an-bendakoed.  
\v 12 Tíquicoʼdi, Éfeso-neggweburse an barmisad. 
\p  
\v 13 Be anse alile, Troasʼgi Carpo-neggi-an-suba-obesad be anga sedago. Gardamar anga sedabalo, gardamar-bipirmakaled-mamaid bur be sedago. 
\p  
\v 14 Esnongi-ibmar-sobed-Alejandro, beedse angi yoledii gusad, an-ichodii gusad. Degisoggu, Bab-Dummad na e-sogedba, a-dule e-ibmar-imaksadba sabsur-odurdaksun.  
\v 15 Degisoggu, a-dulegi nue-salakarmo, ar ade, anmar-Gayaburba-Nued-sunmakdidgi nue-dummad yolediid. 
\p  
\v 16 Gebe dummagan anga igar-itoarmargu, amar-asabin an na sanawalagwen san-bendaksad, dule gwen an-bendaksasulid. Bela angi bangudgusmalad. Bab-Dummad a-dulemar degigussuliyob-dakena gadin. 
\p  
\v 17 Ar Bab-Jesúsʼdi anba gudigusad an-metesulid. Geb an-bendaksad, degine, an-ogannosbalid, adi, Bab-Jesúsʼgi-Abonoleged-Igargi an sunmakegar. Adi, bela Judíoʼsurmalad a-igar itomarmogagar. Degidbali, nabir Bab-Jesús burgwedgi an-abonosad.  
\v 18 Degine, Bab-Dummad bela ibmar-isgana-birgi an-bendakoed. Na E-negdakmaidse nuedgi an-odogoed. Degisoggu, Bab-Dummad-nug ogannomarsun, degisadegu gusun. Ar deyobdo. 
\ms1 8. NAPI-SOGLENAID 
\mr (4:19-22) 
\p  
\v 19 Priscilaʼga, degi, Aquilaʼga, degine, Onesíforo-e-neguyaginmaladga, bela bemar nueganbimar-sogeye ega be sogoed.  
\v 20 Erastoʼdi Corinto-neggweburgi besad, Trófimoʼdi, Mileto-neggweburgi uelle an obesad.  
\v 21 Dii-wied-nii-iduar be daged-sao. Gwenadgan Eubulo, Pudente, Lino, Claudia, degine, bela gwenadgan-baiganmo, bemargi binsadimalad. 
\p  
\v 22 Dummad-Jesucristo be-burbaba gudii guoed. Bab-Dummad nued bemargi binsamarsun.