\id HEB - Cuiba NT -Colombia 2010 (DBL -2013) (DBL -2013) 
\h HEBREOS 
\toc1 Hebreos 
\toc2 Hebreos 
\toc3 Heb 
\mt1 Meje Po Carte Po Carta Nacom Pia Jiton Tatsi Tatina, Hebreomonae Tatinatsi 
\c 1  
\s1 Meje yabara xua Nacom Pexanto itoroba jiwitha petacueicueijeinexatsi 
\p  
\v 1 Caena bayatha Nacom itoroba pia peitorobi jume diwesi petacueicueijei jiwichi. Barapomonae Nacom tacueicueijeichi xua poxonae tsipaebatsi wamo susato jiwi. Barapomonae matowa tacueicueijei tsaibi xua Nacom tacueicueijei tsaibichi mataʉtano ainya coyeneintha tsipaeba xua Nacom tatsipaebatsi.  
\v 2 Ichitha nama anoxuae matapainya barapo matacabinthe po matacabin opi dubena Nacom itorobica Pexanto wanacata cueicueijeinexa, yawa wayabara yaputaenexa Nacom. Barapon Nacom Pexantoxae tatsi caena bayatha barapo nacue forota. Mataʉtano Nacom Pexanto caena barapoxonae cana exana xua Pexanto tatsi pecanamataxeinaenexa daxita coyeneintha.  
\v 3 Nacom Pexanto tatsi pexeinya peitʉpanae jʉntʉ coyenein xeina po jʉntʉ coyenein Nacom xeina. Bapon Nacom Pexanto cui coyene jontatsi. Mataʉtano bapon Nacom Pexanto tatsi pia pejume ayapusʉ itorobiwatha babatiya exana daxita carepaya nacuan. Nacom Pexanto tatsi nacui yabara jume weta xua Nacom Pexanto peyabara paebixae pejume diwesitha. Baxua exana poxonae naca tsitʉpa xua wanaca jʉntʉ coyene xanepana exanaenexa. Bapon naca capanepa abe waexanae cuiru coyenein weya. Bapoxonae bapon itaboco beicha pona penacuaretsinexa pexeinya peecaethopeibiwatha Nacom pia coxa weya tatsi xua itaboco beicha xua Nacom pia peecaethopeibiwatha tatsi beicha. 
\s1 Meje yabara xua Nacom Pexanto tatsi peainya cuin beyacaincha matatsunpiwi 
\p  
\v 4 Nacom Pexanto ainya cui cana exana beyacaincha matatsunpiwi. Nacom baxua tsita itapeinya xeina xua poxonae wʉn duta Pexanto xua po wʉn jei: “Nacom Pexanto”, jei, po wʉn bichocono ainya cui beyacaincha matatsunpiwi pewʉn.  
\v 5 Tsipei Nacom bapana jopa jeiyo matatsunpintha: 
\q1 “Xam Taxantom, anoxuae jiwi tsita itapeinya 
\q1 xeinan xua xan jinya axan”, 
\q1 jopa bapana jei Nacom matatsunpintha. 
\m Mataʉtano bapana jopa jei matatsunpin yabara: 
\q1 “Xan bapon pia paxa tatsin tsane, 
\q1 bapon bara taxanto tsane”, jopa 
\q1 bapana jei Nacom xua matatsunpin 
\q1 peyabara paebiwatsi. 
\q1 Saya ba meisa Nacom Pexantotha 
\q1 yabara paeba barapo jume. 
\p  
\v 6 Mataʉtano poxonae Pexanto itorobica po cae pin nacuamonaepiwitha tsique, pon yatsicaya compa tatsi, Pexanto yabara jei: 
\q1 “Barabʉ daxita tamatatsunpiwimonae 
\q1 Taxanto wʉnae jaintinchi”, jei Nacom. 
\m  
\v 7 Nacom yabara jei matatsunpiwi: 
\q1 “Tamatatsunpiwi itoroban xua nainya inta 
\q1 nacuita icha joibo ichi xua nainya pona 
\q1 poxonae itoroban barapo joibo. 
\q1 Barichi barapomonae itoroban xua inta 
\q1 daunweya nacuita icha nawa coicha ichi xua 
\q1 daunweya taxua poxonae itoroban barapo nawa”, 
\q1 jei Nacom. 
\m  
\v 8 Ichitha nama Nacom Pexantotha jei: 
\q1 “Jaina, xam ponxaem Nacom, ataya tsitecaeya 
\q1 itorobiya ewatsiname xua 
\q1 itorobathopequeibame jiwi. 
\q1 Jinya neitorobiya ewatsi coyenewa 
\q1 bara ataya pexainyei coyenewa. 
\q1  
\v 9 Xam ichichipame pocotsiwa exana 
\q1 pomonae xanepanaya peexanaewi. 
\q1 Mataʉtano bichocono aitafaetabim 
\q1 pocotsiwa exana pomonae abe peexaneibiwi. 
\q1 Daxota xan Nacom ponxaein, jinya Nacom 
\q1 bichocono cajʉntʉ coyene weiweina 
\q1 exanatsi, beyacaincha xua jinya jiwimonae 
\q1 jʉntʉ coyene weiweina exanan”, 
\q1 jei Nacom Pexantotha. 
\m  
\v 10 Equeicha Nacom Pexantotha jei: 
\q1 “Xam pon pepa Necanamataxeinaem jiwi, 
\q1 caena bayatha forotame barapo cae 
\q1 pin nacua poxonae aena. 
\q1 Jinya coya exaname peitaboco. 
\q1  
\v 11 Daxita baxuan pocotsiwan xua jinya 
\q1 neexanaewam weraweracaena. 
\q1 Tsipei daxita baxuan saya peruwan tsane, 
\q1 icha be poxonae paparuwa ichi xua 
\q1 peruwa tsane xua tsapatsapaca. 
\q1 Ichitha xam nama ataya 
\q1 tsitecaeya poponaename. 
\q1  
\v 12 Barapo cae pin nacua irʉ barapo itaboco 
\q1 poxoru peruwa tsane pichiname xua 
\q1 nexubinexa, xua pena ira equeicha 
\q1 neexanaenexa yawa xua itaboco. 
\q1 Barapocotsi jʉta coyeneya exanaename 
\q1 icha be poxonae pebin ichi xua peruwa 
\q1 nama xuena xua xuba, xua 
\q1 penawa penamaxatatsinexa. 
\q1 Ichitha xam nama ataya tsitecaeya poponame. 
\q1 Mataʉtano jinya nepoponae coyenewa 
\q1 ataya jopa weraweracae tsane”, 
\q1 jei Nacom Pexantotha. 
\m  
\v 13 Nacom bapana jopa jeiyo matatsunpintha: 
\q1 “Xam tacoxa weya ecare, beya poxonae abʉ 
\q1 caexanaeinchi xua itorobiname jinya 
\q1 necaaitafaetabi jiwi”, bapana jopa jeiyo 
\q1 Nacom matatsunpintha. 
\q1 Saya meisa Pexantotha baxua paeba. 
\m  
\v 14 Daxita matatsunpiwi peinya pejinompaewi jiwitha. Barapo matatsunpiwi exana dubenanaebiya pocotsiwa Nacom itoroba. Nacom itoroba barapomonae xua petayawenaenexa tsainchi pomonaetha pomonae bexa Nacom capanenebiyaena pomonae pejume cowʉntsi jiwixaetsi. 
\c 2  
\s1 Meje yabara xua poxonae naca muxuweta xua jopa bewa pepawi cana exanaetsi Nacom pia pecapanenebiyae coyenewa tatsi 
\p  
\v 1 Nacom Pexanto ainya cui cana exana beyacaincha matatsunpiwi. Daxota bewa matowa itapeta jume naitaewatichi pocotsiwa bapon yabara xua jume tainchi. Bapoxonae jopa wayabara jʉntemainaponae tsainchi po coyene xua Nacom pia pecapanenebiyae coyenewa tatsi.  
\v 2 Po peitorobi coyenein caena bayatha matatsunpiwi Nacom tacueicueijeichi, barapo coyenein bara xainyei. Pomonae jopa jume cowʉntsiyo barapo peitorobi coyenein xuano xua abe exanaponano, barapomonae atene exanaeinchi xua canacui matajʉpiya cana exanatsi.  
\v 3 Cristo naca cana exana xua panenebiyatsi abe waexanae cuiru coyenein weya. Cristo pia pecapanenebiyae coyenewa bichocono ainya cui coyenewa. Icha Cristo pia pecapanenebiyae coyenewa cayabara nanta xeinatsi xua pepawi xua jopa ainya cuiyiyo, waxainchi bapana jopa naca capanenebiyae tsane xua poxonae jiwi atene exanaeinchi abe peexanaexae. Barapon Cristo pon jiwi Pecanamataxeinaein barapo pecapanenebiyae coyenewa yabara tsipaeba copiya. Bapoxonae xuya barapo pecapanenebiyae coyenewa naca tsipaeba pomonae jume tane pocotsiwa xua bapon paeba pon jiwi Pecanamataxeinaein.  
\v 4 Nacom tsita itapeinya xeina xua barapomonae bara xaniwaicha yabara paeba Nacom pia pecapanenebiyae coyenewa. Baxua exana poxonae Nacom cana exana xua barapomonae pexeinya petsita itʉbi coyenewan muxuna exana poxonae cueicueijei. Mataʉtano baxua exana poxonae cana exana xua barapomonae muxuna exana pocotsiwa bichocono wʉnae xua jiwi nabenaeca cana exanatsi. Mataʉtano baxua exana poxonae cana exana xua barapomonae pexeinya peayapusʉ itorobi coyenewan muxuna cueicueijei. Mataʉtano Nacom tsita itapeinya xeina xua bara barapomonae xaniwaicha cueicueijei poxonae Nacom pia Pejumope tʉnaxʉ tatsi itoroba barapomonae pia jʉntʉ coyeneintha tatsi xua pecatsibinexa po cui coyeneya peexanaenexa daxita barompaya tsiniya. Baxua exana barapo Nacom pia Pejumope tʉnaxʉ tatsi icha be pocotsi coyenewa Nacom ichichipa xua barapomonae barapo cui coyeneya exanaena. 
\s1 Meje yabara xua Jesucristo be jiton coyeneya naexana 
\p  
\v 5 Nacom jopa copatsi tsane xua matatsunpiwi canamataxeinaena barapo pena nacuatha po nacua yabara xuaunxuae pacata tinatsi.  
\v 6 Jame nama Nacom Pejume Diwesitha ichʉn yabara jeye xua pomonae barapo pena nacua pecanamataxeinaewa tsane, jeye: 
\q1 “Nacom xam jiwi toxeincha bichocono 
\q1 pin jʉntʉ coyene xeiname. 
\q1 ¿Eta xua metha yabara nanta xeiname 
\q1 jiwi xua ainya cui exaname xua 
\q1 pecanamataxeinaenexa tsane ichamonae? 
\q1  
\v 7 Nacom copiya saya caetotha exaname xua 
\q1 jiwi be conotha ainya cui. 
\q1 Baxua exaname poxonae matatsunpiwi toxeinchiya 
\q1 ainya cui exaname beyacaincha jiwi. 
\q1 Ichitha cotacaya exaname xua jiwi 
\q1 ainya cui naexana. 
\q1 Jiwi cana exaname xua pexeinya 
\q1 peitʉpanae coicha xeina 
\q1 yawa catame barapomonae peayapusʉ 
\q1 itorobi coyenewa xua icha jiwi 
\q1 pecanamataxeinaewa tsainchi. 
\q1  
\v 8 Po jiwi cajume cowʉnta barapo 
\q1 jiwitha catame peayapusʉ itorobi 
\q1 coyenewa daxita xua pecanamataxeinaenexa 
\q1 xuantha xua forotame”, 
\q1 jei xua ichʉn tsipaeba Nacomtha. 
\m Poxonae Nacom cana exana jiwi xua canamataxeinaena daxita xua xuan forota, dapocotsi coyenewa aibi xua jiwi jopa itacʉpaetsi xua pecanamataxeinaewa. Daichitha awiya cataunxuae jopa jiwi cui taetsi xua daxita pecanamataxeinaewa.  
\v 9 Ichitha waxainchi Jesús yaputainchi pontha pon Nacom saya caetotha cana exana xua jopa ainya cuiyo. Matatsunpiwi conotha ainya cui beyacaincha xua Jesús xua poxonae caetotha cana exanatsi xua jopa ainya cuiyo xua poxonae popona be jiton. Nacom bichocono peantobexae daxita jiwi daxota bapon copata xua Cristo tsitʉpaena daxita jiwi abe pia peexanaexae. Anoxuae equeicha Nacom ainya cui cana exana xua Jesús ainya cui cana exanatsi. Mataʉtano Nacom cana exana xua Jesús jopa juniya ainya cuiyiyo xua jiwi itorobiya peewatsiwatsi. Mataʉtano Nacom Jesús catatsi pexeinya peitʉpanae coicha. Nacom baxua exana xua Jesús pia petsitʉpaexae jiwi. 
\p  
\v 10 Nacom forota daxita coyenein. Mataʉtano daxita baxuan Nacom nata exana. Mataʉtano Nacom ichichipa xua daxita piamonae tatsi pexeinaewa tsane pia pexeinya peitʉpanae coicha tatsi peponaenexa tsane pia nacuatheicha tatsi. Daxota Nacom tsita xanepanatsi xua poxonae Jesucristo atene exanatsi beta yatsicaewa pejʉntʉ coyene wʉnaetsinexatsi xua jiwi pecanamataxeinaenexatsi Nacom pia nacuatheicha. Baxua Nacom exana poxonae Jesucristo atene exanatsi poxonae tsitʉpa xua jiwi pecapanenebiyaenexatsi abe pia peexanae cuiru coyenein weya tatsi.  
\v 11 Tsipei daxita pomonae jʉntʉ coyene xanepana exanatsi Nacomtha, irʉrʉ Jesús pon cana exana baxua barapomonaetha, daxita barapomonae nantaʉta caein Paxa pon Nacom. Daxota Nacom Pexanto tatsi jopa auriyo poxonae naca yabara jei: “Tayapin jiwi pam”, poxonae jei.  
\v 12 Nacom Pexanto tatsi pon Jesucristo, caena bayatha Nacom Pejume Diwesitha xua salmos penaxʉnae weixi diwesintha jeye Nacomtha: 
\q1 “Cayabara paebinchi tayapinmonae jiwitha. 
\q1 Cata naxʉnaeinchi pewei xua wʉnae 
\q1 tacajainchinexa poxonae nanabarʉ 
\q1 nanacaetutsin jinya botha pomonae cajume 
\q1 cowʉnta”, jei Jesucristo Nacomtha. 
\m  
\v 13 Ichacuitha caena bayatha Jesucristo jeye xua Isaías pia diborotha: 
\q1 “Xan jume cowʉntsiya wʉnae ewatsin 
\q1 Nacom xua tana neyawenaewa”, jei. 
\m Equeicha Jesucristo jeye: 
\q1 “Xote ecan, barʉ ecan tapexui pomonae tana 
\q1 nejume cowʉntsiwi pomonae Nacom 
\q1 necata”, jei Jesucristo. 
\p  
\v 14 Pexui ba bara xeina pejana yawa pewito icha be coxiyeiwi ichi tsipei jiwixae. Barichi Jesús xeina jiton pia pepon tatsi pexeinaexae jiwi pia pewito tatsi xuano xua jiwi pia pejana tatsi. Jesús baxua xeina xua petsitʉpaenexa jiwi. Daxota itacʉpatsi xua peamanayabiwa pontha pon xua peayapusʉ itorobi coyenewa xeina xua jiwi pejutebiwatsi. Bapon apara pon caurimonae pia pentacaponaein tatsi.  
\v 15 Jesús baxua nacata exana wanaca capanenebiyaenexa wajunuwi coyene weya xua poxonae yabara junuwatsi xua wawerapaewa tsane. Jiwi daxita matacabin junuwiya jinompeiba xua pewerapaewayainwa.  
\v 16 Bara xaniyei Jesús jopa tsipatopeicaeyo xua peyawenaenexa tsane matatsunpiwi. Apara jame Jesús tsipatopeica peyawenaenexa tsane Abraham pia pemomoxi susato jiwi tatsi xua yatsicaewa jiwi.  
\v 17 Daxota Jesús poxonae naexana bewa yawa naexanaena daxita coyeneya icha jiwi pia pepon tatsi ichi. Bapon bewa baxua yawa naexanaena pia penaexanaenexa pepa wasacerdotepin pocotsin nacata paebeiba Nacom beicha. Mataʉtano bapon Jesús pon pepa wasacerdotepin xainyeya taexana po coyene xua ba sacerdotemonae pia petaexanae coyenewa xua Nacom tsita exanatsi. Bapon Jesús naca weyatane xua wanaca yawenaenexa, xua jiwi petsitʉpaenexatsi xua Nacom jiwi pejʉntʉ coyene yabara jʉntemainaenexa tsaibi tsainchi abe pia peexanae cuiru coyenein tatsi.  
\v 18 Jesús atene exanatsi poxonae caurimonae pia pentacaponaein tatsi jʉntʉ coyene jʉjʉtatsi petaenexa tsainchi icha abe exana. Daxota anoxuae bapon Jesús itacʉpatsi xua peyawenaewa pomonaetha pomonae irʉrʉ jʉntʉ coyene jʉjʉtatsi caurimonae xua abe peexanaewa tsane. 
\c 3  
\s1 Meje yabara xua Jesús peainya cuin beyacaincha Moisés 
\p  
\v 1 Nacom irʉ paca wʉn duba poxonae itapeta pomonae pepatsinexa tsane pia nacuatheicha tatsi. Tamonae pam, paxam jiwana pam pomonae pejume cowʉntsiwi Jesucristo, pomonae pam Nacom paca jʉntʉ coyene xanepana exana xua piamonae tatsi painya paca cana exanaenexa. Daxota Cristo Jesús pacayabara nanta xeinare. Bapon Jesús Nacom pia peitorobin tatsi pon naca tsipaeba Nacom nexa. Mataʉtano bapon wapepa sacerdotepin pon wanacata paebeibin Nacom beicha. Bapon payabara cueicueijan ichamonaetha wajume cowʉntsixae bapon.  
\v 2 Jesús bara xainyeya exana Nacom pia petanacuichiwa tatsi Nacom peyabara tsiwʉnae muxu dutsixae bapon barapo penacuichiwanexa xua Nacom pia peitorobin tatsi tsane yawa wapepa sacerdotepin tsane. Jesús beta xainyeya taexana, icha matha Moisés ichi xua poxonae daxita coyene beta xainyeya taexana Nacom piamonaetha xua Nacom nexa.  
\v 3 Jesús pecapanepaexae jiwi bewa bichocono toxeincha barʉ cui itara jinaetsi bapon beyacaincha xua barʉ cui itara jinatsi Moisés. Barapocotsi jʉta coyeneya ichi, bewa Jesús cana exanaetsi icha be poxonae jiton ichi xua bewa barʉ cui itura jinaeinchi xua ainya cui exanatsi peacabixae bo beyacaincha xua bo xua ainya cui tsuncuae.  
\v 4 Daxita ba bon tsoponae poxoru apara jiton peexanaexae. Ichitha jame pon yatsicaewa nama daxita coyenewan exana apara bapon Nacom.  
\v 5 Bayatha Moisés apara pon petanacuichinchi Nacom. Bapon xainyeya daxita exana Nacom pia botha pocotsiwa Nacom itoroba. Bapon Moisés pia penacuichiwa tatsi saya xua yabara tsiwʉnae caunuta pocotsiwan xua bexa Nacom exanaena.  
\v 6 Ichitha nama Cristo Nacom Pexantoxae tatsi xainyeya daxita exana Nacom nexa tsipei cana exana xua bapon canamataxeina daxita pomonae Nacom piamonae tatsi. Waxainchi Nacom piamonaetsi icha ajʉntʉyapusʉya jume cowʉntapoinchi Cristo beya xua poxonae tʉpaeinchi. Mataʉtano waxainchi Nacom piamonaetsi icha jʉntʉ coyene weiweinaya wʉnae ewatatsi pocotsiwa bexa Nacom wanaca tsiexanaewa tsane. 
\s1 Meje yabara xua nafifina caewata Nacom piamonae tatsi 
\p  
\v 7 Cristo ainya cui peexanaexaetsi beyacaincha xua Moisés ainya cui exanatsi daxota Nacom pia Pejumope tʉnaxʉ tatsi naca itoroba xua bewa jume taetsi Cristo. Baxua paeba Nacom pia Pejumope tʉnaxʉ tatsi. Nacom Pejume Diwesitha, jeye: 
\q1 “Anoxuae pana nejume taema pocotsiwa 
\q1 paca tsipaebatsi ponxaein Nacomxaein. 
\q1  
\v 8 Painya xoba pana nejumefebame painya 
\q1 jʉntʉ coyenewatha xua daxota jopa 
\q1 painya tana nejume cowʉntsiwam. 
\q1 Jopa bara paichinde icha pomonae ichi 
\q1 xua poxonae bayatha nejume matawenta 
\q1 xua exanan poxonae jinompa ichaxota 
\q1 ira xuepana susato tsurucuae nacuatha. 
\q1 Barapomonae nefayacoteiba poxonae 
\q1 nejʉntʉ coyene jʉjʉteiba beya 
\q1 poxonae anaepanan barapomonaetha 
\q1 poxonae jopa xapain exaneibiyo. 
\q1  
\v 9 Barapomonae pomonae nejʉntʉ coyene 
\q1 jʉjʉta, apara painya amo susato jiwi. 
\q1 Barapomonae baxua inta exana poxonae 
\q1 jopa nejume cowʉntsiyo. 
\q1 Baxua exaneiba beya poxonae cuarenta po 
\q1 weibe tsuxubi bequein taiba pocotsiwa 
\q1 xua taexaneiban barapomonae xua beya 
\q1 cuarenta po weibetha. 
\q1  
\v 10 Daxota barapomonae caseban yawa yabara 
\q1 jan barapomonae: ‘Barapomonae jopa benejume 
\q1 cowʉntsiyo pejʉntʉ coyeneintha yawa 
\q1 jopa beyaputaeyo pocotsiwa ichichipan 
\q1 taexanan barapomonae’, jan. 
\q1  
\v 11 Barapomonae caseban. 
\q1 Tacoutha jume daunweya najan: 
\q1 ‘Barapomonae bapana jopa patsi tsane 
\q1 tanacuatha ichaxota po nacuatheicha 
\q1 nafifinacaewatsina pomonae tana nejume 
\q1 cowʉntsiwi’, najan”, jei Nacom 
\q1 pia Pejumope tʉnaxʉ tatsi, 
\q1 Nacom Pejume Diwesitha. 
\p  
\v 12 Tamonae pam, pomonae irʉ painya nejume cowʉntsi jiwixae Jesucristo. Painya xoba paxeiname po jʉntʉ coyene bichocono abe, po jʉntʉ coyene jopa ichipaeyo xua pejume cowʉntsiwa Nacom, pon xua asʉ popona.  
\v 13 Jame maisa daxita matacabin nantiya pana najʉntʉ coyene tsacabare xua ajʉntʉyapusʉya painya nejinompaewa tsane. Daxita pam baxua paexande anoxuae poxonae cataunxuae po dapaetha anoxuae petain paca itacʉpa xua paexaname baxua. Mataʉtano baxua paexande xua jopa pata tana nejumefebiwam painya jʉntʉ coyenewatha. Icha pana nejumefebame painya coutha pana namuxujainyabichipame xua daxota abe painya neexanaewa tsane.  
\v 14 Bewa xanepanaya ayapusʉya jume cowʉnta dubenanaebiyaeinchi Nacom xua beya poxonae tʉpaeinchi. Icha baxua betiya ayapusʉya jume cowʉnta dubenanaebiyaeinchi icha ichichi poxonae aena jume cowʉntatsi, bapoxonae nayawa muxuna xeinaeinchi Nacom pia nacuatheicha pocotsiwa Cristo xeina. 
\p  
\v 15 Daxota equeicha paca tsipaebatsi xuaunxuae po diwesi paca tsipaebatsi xua Nacom Pia Pejumope tʉnaxʉ tatsi cueicueijei, jeye: 
\q1 “Anoxuae pana nejume taema pocotsiwa paca 
\q1 tsipaebatsi, ponxaein Nacomxaein. 
\q1 Icha pana nejume taneme bapoxonae painya xoba 
\q1 pana nejumefebame painya jʉntʉ coyenewatha 
\q1 xua daxota jopa pata tana nejume 
\q1 cowʉntsiwam tsane. 
\q1 Jopa bara paichinde icha pomonae ichi xua 
\q1 poxonae nejume matawenta poxonae jinompa 
\q1 ichaxota ira xuepana susato tsurucuae nacuatha”, 
\q1 jei Nacom pia Pejumope tʉnaxʉ tatsi. 
\m  
\v 16 Payabara nanta xeinare pomonae jume tane xua Nacom pejume tatsi xua bapoxonae Nacom jume matawentatsi. Daxita bapomonae apara pomonae Moisés mata cawarapa Egipto nacua weya.  
\v 17 Payabara nanta xeinare Nacom xua caseba xua beya cuarenta po weibetha tsuxubi. Bapomonae apara israelmonae pomonae xua abe exana poxonae jinompa ichaxota ira xuepana susato tsurucuae nacua beya, xuano xua baxota werapano.  
\v 18 Payabara nanta xeinare pomonae Nacom daunweya yabara paeba, xua jei: “Barapomonae bapana jopa patsi tsane tanacuatha ichaxota po nacuatheicha nafifinacaewatsina pomonae tana nejume cowʉntsiwi”, jei. Bapomonae apara israelmonae pomonae xua jopa exanaeyo pocotsiwa Nacom itoroba.  
\v 19 Bara yaputainchi xua barapomonae jopa itacʉpaetsi xua pepatsiwa Nacom pia nacuatheicha tsipei jopa Nacom jume cowʉntsichi. 
\c 4  
\p  
\v 1 Waxainchi yabara jume cowʉnta dubenanaebiyatsi xua Nacom naca tsiwʉnae muxu duta. Nacom naca tsiwʉnae muxu duta xua bara wanaca itacʉpaewa tsane xua wapatsiwa pia nacuatheicha po nacua xua Nacom pia penafifinacaewatsi nacua. Daxota poxonae cataunxuae naca itacʉpa xua wapatsiwa tsane barapo nacuatha bewa yabara najʉntʉ coyene exabichi xua paxam jiwana jopa itacʉpaetsipaetsi xua pepatopaewa Nacom pia nacuatha.  
\v 2 Waxainchi barichichi jume tainchi barapo Nacom pia pecapanenebiyae diwesi, icha bayatha barapomonae ichi xua jume tane barapo diwesi. Ichitha barapo diwesi jopa yawenaetsi barapomonae xua pejume cowʉntsinexa Nacom, tsipei jopa jume cowʉntsiyo barapo diwesi.  
\v 3 Waxainchi nama barapomonaetsi xua wajume cowʉntsiwi barapo pecapanenebiyae diwesi. Daxota naca itacʉpa xua wapatsiwa Nacom pia nacuatheicha ichaxota bapon naca barʉ nafifinacaewatsina baxoteicha. Nacom wamo susato jiwi yabara paebatsi xuaunxuae paca tsipaebatsi. Jeye: 
\q1 “Barapomonae caseban. 
\q1 Tacoutha jume daunweya najan: 
\q1 ‘Barapomonae bapana jopa patsi tsane 
\q1 tanacuatha ichaxota po nacuatheicha 
\q1 nafifinacaewatsina pomonae tana nejume 
\q1 cowʉntsiwi’, najan”, 
\q1 jei Nacom Pia Pejumope tʉnaxʉ tatsi. 
\m Bequein baxua Nacom paeba ichitha caena bayatha weta barapo nacua ichaxota jiwi nafifinacaewatsina poxonae nacobe weta xua daxita forota barapo cae pin nacuathe.  
\v 4 Po matacabi pewʉn “siete matacabi”, jei, barapo matacabi Nacom Pejume Diwesitha yabara paeba. Bapon jeye: 
\q1 “Nacom nacuita seis po matacabibe. 
\q1 Bapoxonae nafifinacaeca po mataqueitha 
\q1 pewʉn ‘siete matacabi’, jei”, 
\q1 jei Nacom Pejume Diwesitha. 
\m  
\v 5 Equeicha Nacom Pejume Diwesitha jeye: 
\q1 “Barapomonae bapana jopa patsi tsane tanacuatha 
\q1 ichaxota po nacuatheicha nafifinacaewatsina 
\q1 pomonae tana nejume cowʉntsiwi”, jei Nacom. 
\m  
\v 6 Ichitha cataunxuae acoibi ichamonae pomonae xua bexa tsane Nacom copatsina xua nafifinacaewatsina ichaxota bapon nafifinacaewata. Barapomonae jume cowʉntsina xua Nacom paeba. Pomonae copiya bequein jume taetha Nacom pia pecapanenebiyae jume barapomonae Nacom caena bayatha jopa copatsiyo xua barapomonae nafifinacaewata tsipei jopa jume cowʉntsiyo pocotsiwa Nacom paeba.  
\v 7 Daxota Nacom nanta xeina xua equeicha pena matacabi exana. Barapo matacabi xua wʉn duta “anoxuae” jei xua pena coyene. Barapo matacabitha xua piamonae tatsi petaitacʉpaewatsi tsainchi xua nafifinacaewatsina. Baxua Nacom exana caena bayatha poxonae David popona xua ainya wei pirapae poxonae jinompa pomonae jopa copatsichi xua nafifinacaewata. Anoxuae Nacom bapocotsiwa naca tsipaeba pocotsiwa bayatha tsipaeba piamonae jiwitha, poxonae David popona, pon jeye: 
\q1 “Icha anoxuae pajume naitaewatame 
\q1 pocotsiwa Nacom paca tsipaeba jopa 
\q1 pajumefebinde painya jʉntʉ coyenewatha 
\q1 xua daxota jopa Nacom painya nejume 
\q1 cowʉntsiwam”, jei David caena 
\q1 bayatha Nacom nexa. 
\m  
\v 8 Josué caena bayatha wamo susato jiwi matacapoinchi Canaán nacua berena pomonae Israel piamonaexae tatsi. Apara jopa matacaponaeyo ichaxota po nacua Nacom yabara paeba xua barapomonae nafifinacaewatsina. Icha Josué bayatha matacaponaetsipa barapomonae barapo nacuatha bapoxonae Nacom jopa nantawenonaetsipae xua exanaena icha matacabi po matacabitha poxonae barapomonae itacʉpatsi xua pepatsiwa tsane barapo nacuatha, po nacua ichaxota Nacom yabara paeba.  
\v 9 Daxota cataunxuae awiya barapo matacabi tsoponae po matacabitha poxonae Nacom piamonae tatsi nafifinacaewatsina Nacom pia nacuatheicha.  
\v 10 Tsipei pon weta pia penacuichiwa pocotsiwa Nacom itoroba bara itacʉpatsi xua nafifinacaewata ichaxota Nacom nafifinacaewata. Bapon baxua exanaena icha Nacom ichi poxonae nafifinacaeca, poxonae nacobe weta pia penacuichiwa xua poxonae forota daxitan.  
\v 11 Daxota bewa ajʉntʉsʉya jume cowʉnta dubenanaebiyaeinchi xua wanafifinacaewatsinexa tsane ichaxota Nacom nafifinacaewata. Baxua exanaeinchi xua ichamonae waxainchi jiwanatsi jopa peyaseicaewa tsane xua nafifinacaewata. Waxainchi jopa ichipaetsi xua icha ichamonae ichi xua jopa nafifinacaewatsiyo jopa pejume cowʉntsixae pocotsiwa Nacom paeba. 
\p  
\v 12 Nacom Pejume Diwesi peajʉntʉyapusʉ diwesi xuano peayapusʉ itorobi coyene xeina. Barapo Nacom Pejume Diwesi barapocotsi jʉta coyeneya ichi xua icha ba cusi ichi xua po wato nantiya barʉ ducuabe. Barapo cusi tajʉ uncuiya pebarʉwa xua pepontha. Barapoxonae barapo cusi itapeinya xeina daxita pocotsiwan xeina wan iya xua matha iya dubeinya bʉpaniya. Ichitha Nacom Pejume Diwesi ayapusʉ beyacaincha cusi tsipei barapo Nacom Pejume Diwesi itacʉpatsi tajʉ bereca pona wajʉntʉ coyenewatha ichaxota nanta xeinatsi. Barapo diwesi naca yaputane exana po coyenein xua wajʉntʉ coyenewatha xeinatsi. Naca yaputane exanano po coyenein yabara nanta xeinatsi wajʉntʉ coyeneintha.  
\v 13 Dapocotsiwan aibi barapo cae pin nacuathe xua Nacom forota pocotsiwan xua xuan nantiyatarubena Nacom peitabaratha pocotsiwan xua bapon jopa taeyo. Daxitan naitʉtarubena xuano xua Nacom itacʉpatsi xua beta petaewa daxita coyenein. Nacomtha bexa yabara tsipaebinchi xua pocotsiwan bayatha exainchi. 
\s1 Meje yabara xua Jesús pepa sacerdotepin 
\p  
\v 14 Jesús apara Nacom Pexanto tatsi. Bapon wasacerdotepin, pon pepa sacerdotepin, pon bichocono yatsicaya peainya cuin. Bapon bayatha patopa Nacom peitabaratheicha tatsi. Daxota bewa ajʉntʉyapusʉya jume cowʉnta dubenanaebiyaetsi bapon, pon yabara cueicueijeichi ichamonaetha.  
\v 15 Barapo wasacerdotepin pon pepa sacerdotepin, naca weyatane xua wanaca yawenaenexa poxonae jʉntʉ coyene faefaenouneibatsi abe waexanaexae. Bapon baxua nacata exana, tsipei bapon barichichi jʉntʉ coyene jʉjʉtatsi xua abe peexanaenexa. Caurimonae pia pentacaponaein tatsi jʉntʉ coyene jʉjʉta icha naca ichi. Daichitha nama bapon Jesús bapana jopa abe exanae.  
\v 16 Daxota bewa ajʉntʉyapusʉya wʉcaetsi Nacom pon bichocono naca antobe. Jopa bewa junuwi tsainchi xua wacueicueijeiwa Nacomtha. Bapoxonae Nacom naca weyataena wanaca yabara jʉntemainaenexa xua abe waexanae cuiru coyenein. Mataʉtano bapon wanaca antobexae naca yawenaena poxonae po matacabitha canantawenoneibatsi, poxonae naca jʉntʉ coyene jʉjʉta. 
\c 5  
\p  
\v 1 Jiwi ba barompaya pia xantha tatsi jiwana taitapetatsi pomonae xua daxita cana exanatsi pepa sacerdotepiwi. Barapo sacerdotepiwi itorobatsi xua barapo sacerdotepiwi caunuta jiwi yabara poxonae cueicueijei Nacom peitabaratha xua jiwi nexa. Mataʉtano barapo sacerdotepiwi yabara tsiwʉn dubatsi po coyene jiwi petaexaneibiwa tsainchi Nacomtha pocotsiwan xua jiwi amanaya pecatsiwa Nacomtha abe peexanaexae. Mataʉtano barapo sacerdotepiwi yabara tsiwʉn dubatsi po coyene xua jiwi petaexaneibiwa tsaibi tsainchi xua poxonae duwei pejutebiwa pocotsi duwein xua jiwi amanaya pecatsiwa Nacomtha abe peexanaexae.  
\v 2 Barapo sacerdotepiwi ichacuitha jʉntʉ coyene faefaenouneiba, poxonae jʉntʉ coyene jʉjʉteibatsi caurimonae pia pentacaponaein tatsi xua abe peexanaenexa. Tsipei barapomonae nacui yaputane xua poxonae jʉntʉ coyene jʉjʉteibatsi, daxota bara itacʉpatsi xua peyawenaewa ichamonaetha. Itacʉpatsi xua peyawenaewa pomonaetha pomonae abe peexanaewi xua bequein jopa yaputaeyo xua abe exana, irʉrʉ pomonae yatsicaewa nacui yaputane xua abe exana.  
\v 3 Barapo sacerdotepiwi irʉrʉ abe exaneiba xua pejʉntʉ coyene faefaenaexae poxonae jʉntʉ coyene jʉjʉteibatsi caurimonae pia pentacaponaein tatsi. Daxota bewa irʉrʉ pia coutha nata exanae po coyene xua duwei penata tautsinexa Nacom nexa icha poxonae jiwi tacana ichichi poxonae abe peexanaexae.  
\v 4 Dapon ajibi xua pia coutha naexana pon pepa sacerdotepin. Jame ba Nacom bapocotsin yabara tsiwʉn duta xua penaexanaenexa pepa sacerdotepin. Mataʉtano bapontha Nacom cata barapo peainya cui yabara matawʉn dutsiwa icha bayatha Nacom cana ichi pon pewʉn Aarón pon copiya pepa sacerdotepin naexana.  
\v 5 Cristo bara cana ichichi. Bapon Cristo pia coutha jopa naexanaeyo pon pepa sacerdotepin xua peainya cuin penaexanaenexa. Apara jame Nacom cata barapo peainya cui yabara matawʉn dutsiwa xua pepa sacerdotepin penaexanaenexa. Bayatha Nacom yabara paeba Pexanto pejume diwesitha, barapo peainya cui yabara matawʉn dutsiwa xua penaexanaenexa pepa sacerdotepin, xua jeye: 
\q1 “Xam apara taxantom. 
\q1 Anoxuae xan jinya axaxaein. 
\q1 Yabara catsiwʉn dutatsi barapo jinya 
\q1 nenacuichiwanexa”, jei Nacom. 
\m  
\v 6 Equeicha Nacom Pejume Diwesitha xua Pexanto yabara paeba, jeye: 
\q1 “Xam pon sacerdotepim, xua bara ataya 
\q1 tsitecaeya tsane, icha Melquisedec matha 
\q1 ichi pon caena bayatha popona. 
\q1 Bapon pepa sacerdotepin naexana xua 
\q1 ataya tsitecaeya pepoponaein”, 
\q1 jei Nacom. 
\m  
\v 7 Poxonae cataunxuae Cristo popona po cae pin nacuathe bichocono jume daunweya tsipaebeiba Nacomtha xuano jume daunweya wʉqueibano beya poxonae bichocono wecoyei. Cristo wʉqueiba Nacomtha, pon bequein itacʉpatsi xua Cristo peyawenaewatsi xua jopa petʉpaewa. Mexeya poxoru bapon itapetsiya peexanaexae pocotsiwa Nacom ichichipa daxota bara Nacom jume tane pocotsiwa Cristo wʉca.  
\v 8 Bequein Cristo Nacom Pexanto tatsi, ichitha nacuiduba xua Paxa jume jejei xua exana pocotsiwa Paxa itorobatsi xua poxonae atene exanatsi xua ichamonae exana.  
\v 9 Bapon pia coutha daxita najʉntʉ cui yabara wʉnaeta poxonae atene xua penaexanaenexa pepa sacerdotepin. Daxota bapon Cristo exana xua jiwi capanenebiyatsi abe pia peexanae cuiru coyenein weya xua ataya tsitecaeya tsane daxita pomonae pia pejume cowʉntsiwichixaetsi.  
\v 10 Nacom yabara tsiwʉn duta xua Cristo pepa sacerdotepin naexana, icha matha Melquisedec ichichi xua yabara tsiwʉn dutatsi xua pepa sacerdotepin naexana, pon caena bayatha popona. 
\s1 Meje yabara xua poxonae muxuwetatsi pomonae Nacom pejume cowʉntsiwi xua pebarapentsiyainwa po coyene xua pejume cowʉntsiwa Nacom 
\p  
\v 11 Waxainchi xeinatsi nawita xua po coyene wayabara natsipaebinexa Cristo xuaunxuae anoxuae paca tsipaebatsi. Daichitha bichocono ayapube xua paca yaputane exainchi tsipei painya coutha jopa pana nayabara copatsim xua bara painya neyabara yaputaewa tsane baxuan.  
\v 12 Caena bayatha bewa pana naexanaem pomonae jiwi painya necuidubi jiwi pam. Daichitha cataunxuae panantawenoname xua ichamonae equeicha caewa yabara paca cuiduba Nacom Pejume Diwesi pocotsiwan xua jiwi nantawenona copiya nacuiduba poxonae aena jume cowʉnta. Paxam pomonae equeicha caewa pajʉntʉ coyene faefaename, xua painya nejume cowʉntsiwa. Barapo coyene icha be poxonae pexui ichi xua nantawenona mito, jopa peitacʉpaexaetsi xua pexaewa pewito.  
\v 13 Pexui poxi isainatsi ba nantawenona mito poxoru pewito jopa xaeyo. Barapocotsi jʉta coyeneya paichim. Paxam jopa paca itacʉpaeyo xua painya neyabara yaputaewa Cristo pia pecuidubiwa xua po coyene xanepanaya painya nejinompaewa.  
\v 14 Nama pewi jopa apara pexui nexiyo poxi isainatsi, jame apara ba pomonae pinyon nexa. Barapocotsi jʉta coyeneya ichi pomonae ba xaniwaicha jume cowʉnta pia jʉntʉ coyeneintha barapomonae jopa abe exanaeyo. Barapomonae nacuiduba xua yabara yaputane po coyene abe yawano po coyene wʉnae. 
\c 6  
\p  
\v 1 Barabʉ nacui barapentatsi xua nayabara cueicueijeichi pocotsi coyenein xua copiya naca cuiduba xua Cristo yabara poxonae aena jume cowʉntatsi. Jame barabʉ nanta xeinatsi, po coyene pepa pena coyene icha pomonae pinyon ichi xua pocotsiwan nanta xeina pomonae beta jume cowʉnta. Po coyenein xua bayatha copiya naca cuiduba xua Cristo yabara, jopa nantawenonaetsi xua equeicha wanacuidubiwatsi po coyenein xua abe waexanaexae bewa aura tsainchi xua daxota nacui barapentatsi po coyenein abe, po coyenein xua ba naca wepu tsana exana Nacom weya. Mataʉtano jopa nantawenonaetsi xua jume cowʉntsinchi Nacom.  
\v 2 Barapocotsiwanje jopa nantawenonaetsi xua equeicha caewa nayabara cueicueijeichi tsainchi tsipei bayatha payaputaneme. Mataʉtano jopa equeicha nantawenonaetsi xua caewa nayabara cueicueijei tsainchi xua bewa bautisabinchi. Mataʉtano jopa nantawenonaetsi xua equeicha caewa nayabara cueicueijei tsainchi xua poxonae Nacom pejume cowʉntsiwi pecobetha pemataboco jayabiwatsi xua pexeinaenexa pejʉntʉ cui coyenein po pejʉntʉ coyene Nacom pia Pejumope tʉnaxʉ tatsi cata. Mataʉtano jopa nantawenonaetsi xua equeicha caewa nayabara cueicueijei tsainchi xua equeicha jiwi asʉ peexanaewatsi petʉpae cuiru coyene weya. Barichi jopa nantawenonaetsi xua equeicha caewa nayabara cueicueijei tsainchi xua poxonae Nacom yabara paebina jiwi xua penatsicuentsiwa xua abe peexanaexae Nacomtha. Barapoxonae Nacom itawetsina xua bara ataya tsitecaeya tsane abe peexanaexae.  
\v 3 Jame barabʉ nayabara cueicueijei tsoponae tsainchi icha coyenein xua pena coyene icha Nacom bara naca cui yabara copatsina. 
\p  
\v 4 Ichamonae penta xua Cristo pejume cowʉntsiwatsi. Daxota jopa neyapucʉpaeyo xua equeicha tacuidubiwa Nacom Pejume Diwesi barapomonaetha. Barapomonae Nacom pia pejume xainyeiwa nacuiduba, xuano yaputane Cristo pon Nacom itoroba po cae pin nacuathe tsique. Mataʉtano barapomonae xeina po pejʉntʉ coyenein Nacom pia Pejumope tʉnaxʉ tatsi cata.  
\v 5 Mataʉtano barapomonae yabara jume cui jʉjʉta Nacom Pejume Diwesi xua daxota yaputane xua barapo diwesi bara xanepana. Mataʉtano barapomonae tane po peayapusʉ itorobi coyenewa Nacom pia Pejumope tʉnaxʉ tatsi cata jiwitha xua barapo jiwi barapo coyenewatha exana pexeinya petsita itʉbi coyenewan beya poxonae Cristo equeicha patopaena.  
\v 6 Icha daxita barapo coyenein barapomonae equeicha nacui barapenta xua jopa Nacom pejume cowʉntsixaetsi, bapoxonae nama jopa itacʉpaetsi xua equeicha caewa pejume cowʉntsiwa Nacom. Poxonae Nacom equeicha pentatsi baxua be barapomonae equeicha Jesús caewa bexotsi naetotha. Barapomonae exana xua jiwi Nacom Pexanto tatsi yabara jume cui caponatsi tsipei jopa Nacom jume cowʉntsichi. Baxua icha be poxonae ichamonae ichi poxonae matha Jesús naetotha bexotsi xua daxota daxita jiwi Jesús cui caponatsi.  
\v 7 Pabi ba po iratha ema mʉ jojoneca poxonae ema duneiba barapo iratha, barapo pabitha jiwi pexaewa ʉba. Nacom exana barapo iratha xua pexaewa xaniwaicha taxainwaetsina xua pomonae peʉbimonae taxainwaetatsi.  
\v 8 Ichitha icha icha pabi saya ʉ pesoiwan xuwa, barapo pabi jopa wʉnaeyo poxoru jiwi jopa yawenaetsi poxonae ʉba barapo pabitha. Daxota Nacom exana xua barapo pabi jiwi tautsina xua pesoiwan daxita tʉpa peexanaenexa. Icha Nacom cana ichi pabintha bara jʉta cana ichiya exana jiwitha. Icha jiwi Nacom jume cowʉnta dubenanaebiya, bara Nacom beta exanaena barapo jiwi. Ichitha icha barapo jiwi Nacom pentatsi, Nacom jopa yawenae tsane barapo jiwi. Saya jame Nacom itoroba xua barapo jiwi petautsiwa tsainchi po isototha xua bapana jopa itacounayiyo. 
\s1 Meje yabara xua wawʉnae ewatsiwa xua pocotsiwa Nacom yabara wanaca tsiwʉnae muxu dutsiwa 
\p  
\v 9 Tamonae pam, paxam pomonae tapaca caantobe jiwichi pam. Bequein baxuan yabara paca tsipaebatsi, xua jiwi petautsiwatsi ichitha paca yabara yaputainchi xua jopa papentsim Nacom. Yaputan xua bara beta paexaname Nacom painya nepaca capanenebiyaexae.  
\v 10 Tsipei Nacom bara xainyeya exana. Nacom jopa paca yabara jʉntemainae tsane pocotsiwan xua bayatha paexaname. Mataʉtano jopa paca yabara jʉntemainae tsane xua ichamonae painya neyawenaewa pomonae irʉ pejume cowʉntsiwi Nacom. Baxua patsita itapeinya xeiname xua painya neantobexae Nacom. Baxuan caena bayatha paexanaponame, awiya cataunxuae baxuan paexanaponame.  
\v 11 Bequein baxua paexaname daichitha paichichipan xua daxita paxam awiya payawenaponaename ichamonae. Ajʉntʉyapusʉya pawʉnae ewataponare pocotsiwa Nacom yabara paca tsiwʉnae muxu duta xua beya payacuiya werapaeya othopaename.  
\v 12 Jopa paichichipaeinyo xua payabara ajʉntʉcoyenefaetabim xua pawʉnae ewatame baxua tsipei jopa pana nayabara copatsim xua painya neyabara yaputaewa tsane baxua. Jame maisa bara jʉtiya paichiponaeinde, icha ichamonae ichi xua poxonae bichocono jume cowʉnta Nacom. Mataʉtano barapomonae jopa bepijawa aitaconaeyo xua wʉnae ewata pocotsiwa Nacom yabara tsiwʉnae muxu duta. 
\p  
\v 13 Poxonae Nacom yabara tsiwʉnae muxu duta Abrahamtha, Nacom pia wʉntha yabara tsiwʉnae muxu duta Abrahamtha. Baxua Nacom pia wʉntha paeba tsipei dapon aibi pon bichocono ainya cui xua beyacaincha Nacom. Nacom ataya jume xainyei paeba daxota Nacom jopa icha wʉntha paebiyo.  
\v 14 Nacom jeye Abrahamtha: “Bara xaniwaicha bichocono cayawenaeinchi. Jinya nemomoxi jiwi pia pemomoxi susato jiwi tatsi pinmonae exanaein”, jei Nacom.  
\v 15 Abraham abʉ saya beitatemaya wʉnae ewatapona pocotsiwa Nacom yabara tsiwʉnae muxu duta, jopa aitaconaeyo. Bapoxonae pirapae Abraham catatsi pocotsiwa Nacom bayatha yabara tsiwʉnae muxu duta bapontha.  
\v 16 Poxonae jiwi ba yabara natsiwʉnae muxu duta xua pocotsiwa bepa pinae exaneibina, pewʉntha paeba, po wʉn xua ichʉn pewʉn tatsi pon xua bichocono ainya cui beyacaincha xua barapomonae. Barapomonae baxua exana xua ichamonae peyaputaenexa xua bara xaniwaicha xainyeya peexaneibinexa pocotsiwa xua penayabara tsiwʉnae muxu dubeibixae. Bapoxonae ichamonae jopa itacʉpaetsi xua baxua yabara jume matsontsonoba barapomonaetha.  
\v 17 Nacom ichichipa xua tsita itapeinya xeina piamonaetha, pomonaetha pomonae pecatsixae tsane pia petsiwʉnae muxu dutsiwa xua jopa equeicha ichawa nanta xeinae tsane xua pocotsiwa exanaena. Nacom ichichipa xua barapomonae peyaputaewa tsane xua bapon xaniwaicha exanaena pocotsiwa bayatha yabara tsiwʉnae muxu duta Abrahamtha. Daxota Nacom yabara tsiwʉnae muxu duta pia wʉntha.  
\v 18 Ainya coyenewabe Nacom exana po coyenewabe xua jopa itacʉpaetsi xua ichawa yabara jume toxeinchiya exana. Meje baxue: Icha coyenewa Nacom yabara tsiwʉnae muxu duta; icha coyenewano xua Nacom pia wʉntha yabara paeba xua pocotsiwa exanaena. Nacom jopa itacʉpaetsi xua peyabara naerabiwa barapo naxobe coyenebe. Waxainchi pomonaetsi xua pentatsi po coyenein barapo nacue pia coyenein, po coyenein xua abe exanatsi naca cana exana. Mataʉtano jume cowʉntsiya wʉnae ewatatsi xua Nacom wanaca yawenaewa tsane xua naca capanenebiya abe waexanae coyenewa weya. Barapocotsiwa bayatha naca yabara tsiwʉnae muxu duta.  
\v 19 Waxainchi wʉnae ewatatsi xua Nacom bexa naca capanenebiya tsane. Wajume cowʉntsixae baxua daxota naca jʉntʉ coyene ayapusʉ exana. Naca itacʉpa xua wayabara jume cowʉntsiwa. Wawʉnae ewatsixae baxua naca yawena xua beta jinompatsi Nacom nexa. Baraxua icha be poxonae jera ichi xua tuwʉtha babatabaruta pocotsiwa xua xota bichocono arewe xua jera beta perucuaenexa. Tsipei xaniwaicha wʉnae ewatatsi pocotsiwa Nacom exanapaeba, baxua naca cana exana xua nacaewabatsi Nacomtha xua caemonae nanaexanatsi bapontha. Nacom itaboco beequiya, paparuwa peʉma werena pia botha eca xua tututhiya xua pin botha ichaxota wapatsiwa tsane.  
\v 20 Jesús itaboco beicha naca tsiwʉnae patopiya Nacom pexainya beicha tatsi. Bapon copiya bewa bara bepatopiyaena xua wanaca matacaponaenexa xua irʉ wanaca itacʉpaewa tsane xua wapatsiwa tsane bara beicha Nacomtha. Daxota poxonae baxua exana Jesús naexana pepa sacerdotepin icha matha Melquisedec ichi pon caena bayatha popona. 
\c 7  
\s1 Meje yabara xua Jesús pepa sacerdotepin naexana, icha matha Melquisedec ichi 
\p  
\v 1 Bapon Melquisedec caena bayatha Salem tomarapiwi itorobiya pia pepa peewatsinchi. Mataʉtano bapon sacerdotepin pon petsipaebin Nacomtha jiwi nexa, pon Nacom xua itaboco beequiya. Abraham caibe nawirena xua poxonae nawabchʉta xua poxonae yotaba ainya nacuanpiwi pomonae jiwi itorobiya pia pepa peewatsiwichi xuano xua poxonae Abraham juteba barapomonae. Bapoxonae Melquisedec matenta iya, Abraham matenta iyatsi. Melquisedec Abraham jeichichi: “Barabʉ Nacom beta cayawenaena”, jei Melquisedec.  
\v 2 Abraham nota pocotsiwan xeina pomonae jiwi itorobiya pia pepa peewatsiwichi xua peamanayabixae poxonae juteba. Abraham ainyawan capana, xua diez xuanbe. Jiwana wetsatsaba tsiniya xua Melquisedec pecatsinexatsi sacerdotepinxae. Bapon Melquisedec hebreomonae pijumetha yabara wʉn caunuta xua jei: “Bapon jiwi itorobiya pia pepa peewatsinchi pon xua beta peexanaein”, jei. Bapon Melquisedec Salem tomarapiwi itorobiya pia pepa peewatsinchi. Barichi barapo Salem wʉn hebreomonae pijumetha yabara wʉn caunuta xua jei: “Jʉntema popona”, jei. Daxota barapo naxobe wʉnbe yabara wʉn caunutatsi xua jeye: “Pon jiwi itorobiya pia pepa peewatsinchi xua beta peexanaein xuano xua jʉntema popona”, jei xua hebreo jumetha.  
\v 3 Nacom Pejume Diwesitha Melquisedec paxa tatsi pewʉn jopa yabara yopitichi. Mataʉtano pena tatsi jopa yabara yopitichi. Barichi jopa yabara yopitichi pia pamo susato jiwi tatsi. Mataʉtano bapon jopa yabara paebichi ichaxota naexana. Mataʉtano jopa yabara yopitichi ichaxota bapon naxuba. Bapon apara sacerdotepin xua ataya tsitecaeya pon petsipaebin Nacomtha jiwi nexa. Bapon sacerdotepin xua ataya tsitecaeya icha ichi pon Nacom Pexanto tatsi pon pepa sacerdotepin. 
\p  
\v 4 Payabara nanta xeinare xua bapon Melquisedec bichocono Abraham tsita ainya cuichi. Abraham pon wamo susatopin bapontha cata xua bayatha diez xuanbetha caewan jiwana wetsatsaba tsiniya. Baxua xua xuan Abraham cata apara xua bayatha yabara amanayaba pomonaetha pomonae jiwi itorobiya pia pepa peewatsiwichi xua poxonae Abraham juteba.  
\v 5 Moisés pia peitorobi coyenewatha jeye: “Sacerdotepiwi pomonae Leví pia pemomoxi susato jiwi tatsi, itacʉpatsi xua bara nota caewan pocotsiwa xua jiwi catsiba xua poxonae jiwi diez xuanbe caewan jiwana wetsaba pocotsiwan xua xuan xeina”, jei Moisés pia peitorobi coyenewatha. Barapo sacerdotepiwi baxuan exana barapo jiwitha yaitama piamonae tatsi. Mataʉtano exaneiba yaitama barapo jiwi Abraham pia pemomo susato jiwi tatsi icha barapo sacerdotepiwi ichi.  
\v 6 Ichitha Melquisedec jopa Leví pia pemomoxi susato jiwi tatsi. Bequein bapon jopa dapomonaeyo daichitha Abraham catsiba bapontha poxonae caewan jiwana wetsaba tsitsiniya daxita xua diez xuanbetha jiwanan. Abraham xeina peyabara tsiwʉnae muxu dutsiwan, po peyabara tsiwʉnae muxu dutsiwan bayatha Nacom yabara tsiwʉnae muxu duta. Bequein Abraham xeina po peitorobi coyenewa xua itacʉpatsi xua jeye ichamonaetha: “Barabʉ Nacom beta cayawenaena”, xua jei, ichitha Melquisedec baxua Abraham tsipaebatsi.  
\v 7 Jiwi ba yaputane xua ba bichocono ainya cui pon xua jeye: “Barabʉ Nacom beta cayawenaena”, pon jei. Bapon bichocono ainya cui beyacaincha pon xua pebaraunchixaetsi. Daxota yaputainchi xua Melquisedec bichocono ainya cui beyacaincha xua Abraham tsipei Melquisedec tsipaeba Abraham xua Abraham tsipaebatsi.  
\v 8 Anoxuae po dapaethe sacerdotepiwi pomonae pomonaetha xua jiwi catsibeiba xua poxonae diez jiwana wetsabeiba, barapo sacerdotepiwi saya jiwi xua saya pewerapaewa tsane. Ichitha nama Nacom Pejume Diwesitha Melquisedec yabara paebatsi pon xua ataya tsitecaeya pepoponaein xua jopa petʉpaewa.  
\v 9-10 Metha jame be icha iche: Poxonae Abraham cata Melquisedectha poxonae caewan jiwana wetsaba diez xuanbe jiwana, bapoxonae cataunxuae abʉ Leví jopa naexanaeyo. Mataʉtano Leví pia pexui tatsi cataunxuae jopa naexanaeyo. Barichi cataunxuae pia pemomoxi susato jiwi tatsi cataunxuae jopa naexanaeyo. Bapon Leví pon matapainya pepa sacerdotepin canamata canaexana poxonae cotacaya ichamonae irʉ sacerdotemonae naexana. Bapoxonae sacerdotepiwi naexanumenapona. Bapon tsipaebeiba Nacomtha jiwi nexa. Poxonae Abraham catsiba Melquisedectha xua poxonae caewan jiwana wetsaba diez xuanbe Nacom be tsitatsi xua apara be Leví irʉ cata xua irʉrʉ be bara Leví pia pemomoxi susato jiwi tatsi catsiba. Poxonae Abraham cata Melquisedectha xua diez xuanbe caewan jiwana wetsaba, bapoxonae yawa muxuna cata pia pemomoxi susato jiwi tatsi nexa bequein barapomonae jopa cataunxuae naexanaeyo. 
\p  
\v 11 Sacerdotepiwi po sacerdotepiwi Leví canamata canaexana sacerdotepin, barapo sacerdotepiwi israelmonae catatsi Moisés pia peitorobi coyenewa tatsi. Daxita barapo sacerdotepiwi Aarón pia pemomoxi susato jiwi tatsi. Barapo sacerdotepiwi jopa itacʉpaetsi xua jiwi cana exanatsi xua penajʉntʉ coyene xanepana exanaewa Nacomtha xua penatsicuentsiwa yabara xua abe peexanaexae Nacomtha. Bequein sacerdotepiwi exanapona pocotsiwa itoroba barapo Moisés pia peitorobi coyenewatha ichitha awiya jopa itacʉpaetsi xua jiwi yawenatsi. Daxota jiwi equeicha canamatawenona icha sacerdotepin. Barapo sacerdotepin jopa bewa exanae icha Aarón pia pemomoxi susato jiwi tatsi jiwana ichi. Jame barapo sacerdotepin bewa exanaena icha Melquisedec ichi.  
\v 12 Poxonae Nacom icha sacerdotepin cana exana be pocotsin icha Melquisedec ichi bapoxonae yawa muxuna bewa exanaena pena peitorobi coyenewa.  
\v 13 Barapo pena sacerdotepin pon Wanacanamataxeinaein, bapon baxua yabara paebatsi Nacom Pejume Diwesitha. Bapon apara Israel pemomoxi susato jiwi jiwanapin pomonae jiwana xua doce po bicheitobe. Ichitha bapon naexana icha bicheito dena xua Judas pia bicheito dena po bicheito dena bayatha bapana jopa jiwana naexanaeyo sacerdotepin.  
\v 14 Daxita jiwi yaputane xua barapon pon Wanacanamataxeinaein naexana Judá barompaya pia pemomoxi susato jiwi dena tatsi. Poxonae Moisés yabara paeba sacerdotepiwi Moisés jopa yabara paebiyo xua Judá pia pemomoxi susato jiwi jiwana tatsi naexanaena sacerdotepin. 
\p  
\v 15 Daxota waxainchi xaniwaicha bara yaputainchi xua barapo pena sacerdotepin naexana icha sacerdotepiwi yaiwi, icha Melquisedec ichi pon pepa sacerdotepin.  
\v 16 Bapon Cristo jopa naexanaeyo sacerdotepin xua poxoru Moisés pia peitorobi coyenewatha pepaebixae xua Leví pia pemomoxi susato jiwi jiwana tatsi bewa naexanaena sacerdotepin. Jame apara Cristo sacerdotepin naexana Nacom pia peayapusʉ itorobi coyenewatha xua pexeinaexae peajʉntʉcoyenesʉwa po peajʉntʉcoyenesʉwa ataya tsiteca xua jopa itacʉpaetsi xua peweraweracaewa.  
\v 17 Nacom Pejume Diwesitha Cristo baxua yabara jeichichi: 
\q1 “Xam sacerdotepim naexaname ataya xua 
\q1 petsitecaenexa, barapo sacerdote yajiwim 
\q1 icha Melquisedec ichi xua sacerdotepin”, 
\q1 jei Nacom Pejume Diwesitha, 
\q1 xua Cristo yabara paebatsi. 
\m  
\v 18 Nacom cana exana xua Moisés pia peitorobi coyenewa tatsi jiwi jopa canantawenonaeyo tsipei barapo coyenewa jopa xeinaeyo peayapusʉwa xua jiwi cana exanatsi xua jopa pexeinaewa penatsicuentsiwa xua abe peexanaexae Nacomtha. Mataʉtano jopa itacʉpaetsi xua jiwi pecanaexanaewatsi xua pecapanenebiwatsi abe pia peexanae cuiru coyene weya.  
\v 19 Barapo Moisés pia peitorobi coyenewa tatsi bapana jopa itacʉpaetsi xua jiwi jʉntʉ coyene xanepana exanatsi Nacomtha. Daxota anoxuae pena coyenewa xeinatsi xua ainya cui beyacaincha po coyene xua copiya. Barapo pena coyenewa naca cana exana xua wʉnae ewatatsi pocotsiwa Nacom exanapaeba xua barapo pena coyenewaxae daxota anoxuae Nacom naca yaputane xua piamonaexae tatsichi. 
\p  
\v 20 Nacom xainyeya yabara tsiwʉnae muxu duta pia pewʉntha xua Cristo naexanaena sacerdotepin xua ataya tsitecaeya. Jopa nama Nacom pia pewʉntha yabara tsiwʉnae muxu dutsiyo xua sacerdotepiwi penaexanaenexa pomonae Leví pia pemomoxi susatopiwi tatsi.  
\v 21 Ichitha poxonae Cristo pon jiwi Pecanamataxeinaein sacerdotepin naexana, bapoxonae ichʉn, Cristo yabara paebatsi Nacom Pejume Diwesitha, jeye: 
\q1 “Nacom pia pewʉntha yabara tsiwʉnae 
\q1 muxu duta, ichawa jopa toxeincha 
\q1 yabara exanae tsane. 
\q1 Poxonae Nacom yabara tsiwʉnae muxu duta, 
\q1 bapon jeye Pexantotha: ‘Xam sacerdotepim 
\q1 xua ataya petsitecaenexa’, jei Nacom”, 
\q1 jei ichʉn xua Nacom tapaebatsi 
\q1 Nacom Pejume Diwesi. 
\m  
\v 22 Poxoru Nacom tsiwʉnae muxu duta xua Jesús naexanapaeba sacerdotepin daxota Nacom tsita itapeinya xeina xua exanaena xua bayatha paeba barapo pena coyenewatha.  
\v 23 Bayatha sacerdotepiwi pinmonae tsoponae. Ichitha barapo sacerdotepiwi naitapataya werapouneiba, yawa ichamonae naexana sacerdotepiwi. Dapon aibi barapo sacerdotepiwi jiwana pon itacʉpatsi xua pewetsiwa pia peexanae coyenewan tsipei daxita werapouneiba.  
\v 24 Ichitha poxoru Jesús ataya asʉ pepoponaexae daxota ataya tsitecaeya exanaena pia peexanae coyenewa icha pepa sacerdotepin ichi. Jopa nantawenonaeyo xua ichʉn Jesús pecoutha tanacuitatsi pon xuya sacerdotepin naexana.  
\v 25 Daxota bapon ataya tsitecaeya itacʉpatsi xua jiwi ataya pecapanenebiwatsi pomonae xua pepatsiwa tsane Nacomtha pomonae xua Nacom peyaputaewi pejume cowʉntsi jiwixae Jesús. Jesús baxua exana ataya tsitecaeya asʉ pepoponaexae xua pewʉcaenexa Nacomtha xua barapo jiwi peyawenaenexatsi. 
\p  
\v 26 Nacom tsita xanepanatsi xua Jesús pepa sacerdotepin naexana xaniwaicha, po sacerdotepin wacanamatawenonaexae. Yatsicaewa bapon bichocono pejʉntʉ coyene xanepanaein Nacomtha. Bapon Jesús jopa abe exanaeyo ichamonaetha. Nacom tsitatsi xua Jesús jopa natsicuentsiyo poxoru abe jopa exanaeyo Nacomtha. Bapon Jesús seicaya exana ducuanaebiya. Jopa exanaeyo icha be ichi pomonae abe peexana dubenanaebiyaewi. Bapon Jesús Paxa capoinchi po itaboco tajʉ beicha po itaboco beyacaincha xua necoichatsi xua Jesús barapo itaboco beicha Paxa ainya cui exanatsi.  
\v 27 Pepa sacerdotepiwi ba bewa exaneibina po coyene xua duwei jutebeiba iboto matatsuntha xua tuxusi exaneiba Nacom nexa, daxita matacabintha tsaibi. Baxuan nata exaneiba copiya abe pia peexanae coyenewan nexa. Bapoxonae cotacaya jiwi taexaneibatsi abe pia peexanae coyenewan nexa. Nama Jesús jopa barichiyo. Nama seicayiya icha coyeneya exana. Bapon Jesús pia pepon nata caenaeta xua tʉpa exanatsi saya bara cae cui coyenetha daxita carepaya jiwi nexa xua jiwi abe pia peexanae cuiru coyenewan tatsi nexa.  
\v 28 Moisés pia peitorobi coyenewa tatsi canacui coyene exanatsi xua bara saya jiwi naexana pepa sacerdotepiwi. Barapo pepa sacerdotepiwi abe exana xua saya pecui pawi. Barapomonae jopa pejʉntʉ cui coyene xanepanae jiwi Nacomtha. Ichitha Nacom yabara tsiwʉnae muxu duta pia wʉntha xua Pexanto cana exana pepa sacerdotepin, po sacerdotepin yatsicaewa ataya tsitecaeya bichocono pejʉntʉ coyene xanepanaeinxae Nacomtha. Baxua Nacom exana xua yabara tsiwʉnae muxu duta xua pepuya weya tatsi poxonae Moisés catatsi peitorobi coyenewa. 
\c 8  
\s1 Meje yabara xua Jesús pon pejume yawenaein jiwi Nacomtha 
\p  
\v 1 Anoxuae xua pocotsiwa xua bichocono peainya cui coyenewa meje baxue: Waxainchi xeinatsi yatsicaya pepa wasacerdotepin, pon yatsicaewa bichocono pejʉntʉ coyene xanepanaein Nacomtha xuaunxuae yabara paca tsipaebatsi. Bapon eca pia peitʉpanae ecaethopaewatha Nacom pia pecoxa weya tatsi, peitabocotheicha.  
\v 2 Anoxuae Jesús nacuita Nacom pia xantheicha tatsi po penacuichi coyeneya sacerdotepiwi exana Nacom pia botha tatsi xua itabocotheicha. Barapo bo yatsicaewa Nacom pia pexainyei bo tatsi ichaxota popona xua itabocotheicha. Nacom pon jiwi Pecanamataxeinaein exana barapo bo. Jiwi jopa exanaeyo barapo bo. 
\p  
\v 3 Nacom daxita carepaya pepa sacerdotepiwi yabara tsiwʉn dubatsi xua jiwi petaexanaenexa tsaibi tsainchi po coyene pocotsiwa xua jiwi amanaya pecatsiwa Nacomtha. Mataʉtano barapo pepa sacerdotepiwi yabara tsiwʉn dubatsi xua jiwi petaexanaenexa tsaibi tsainchi po coyene xua duwei pejutebiwa pocotsi duwein xua jiwi amanaya pecatsiwa Nacomtha xua abe peexanaexae. Daxota Jesús irʉ bewa bara ichiya exanae xua Nacom taexanatsi ichi sacerdotepiwi ichi poxonae Nacom taexanatsi.  
\v 4 Icha metha barapo dapaetha Jesús poponaetsipa barapo irathe poxonae irʉrʉ jinompa barapo sacerdotepiwi po sacerdote Aarón yaiwi jopa itacʉpaetsipaetsi xua cana exainchi pepa sacerdotepin. Tsipei cataunxuae barapo irathe sacerdotepiwi yaiwi exanapona pocotsiwa Nacom nexa xua Moisés pia peitorobi coyenewatha pecui itorobixae.  
\v 5 Ichitha barapo sacerdotepiwi tanacuita be pocotsiwa xua saya penajʉpae coyenewa xua jopa pexainyei coyenewa. Pocotsiwa jame xua pexainyei coyenewa, baxua jame Jesús exana peitabocotha. Pocotsiwa xua barapo sacerdotepiwi tanacuita saya be penajʉpae coyenewa ichitha xaniwaicha jopa najʉpaeyo xua be pocotsiwa Jesús exana peitabocotha. Baxua yaputainchi poxonae Nacom Moisés tsipaebatsi. Poxonae Moisés muxu pecuaranotsi anseraboco xua ichaxota jiwi wʉnae jainteibina Nacomtha bapoxonae Nacom Moisés tsipaebatsi. Nacom jeye: “Yabara nanta xeinare xaniwaicha xua daxita beta neexanaenexa anseraboco xua bayatha pocotsiwa yabara catsita itapeinya xeinatsi demxuwatha. Barapocotsi anserabocotontha seicaya jiwi newʉnae jainchina”, jei Nacom.  
\v 6 Nama Cristo, yatsicaya pon wasacerdotepin, bapon exana itaboco beicha pocotsiwa xua yatsicaewa bichocono peainya cui coyenewa. Barapo coyene bichocono ainya cui beyacaincha po coyenewa xua peru coyenewa xua po coyeneya icha sacerdotepiwi exaneiba barapo irathe. Cristo jiwi yabara jume yawenatsi Nacom beicha xua jiwi pepatsinexa Nacomtha. Barapo pena coyenewa Nacom yabara tsiwʉnae muxu duta xua bichocono wʉnae beyacaincha barapo peru coyenewa po coyenewa pocotsiwa sacerdotepiwi exaneiba. Barapo pena coyenewa jiwi jʉntʉ coyene xanepana exanatsi Nacomtha. Ichitha barapo peru coyenewa jopa daichiyo. 
\p  
\v 7 Bayatha peru petsiwʉnae yabara muxu dutsiwa Nacom Moisés yabara tsiwʉnae muxu dutatsi. Icha barapo coyenewa xeinaetsipa peayapusʉwa xua daxota jiwi beta jʉntʉ coyene xanepana exanatsi Nacomtha, metha jopa nantawenonaetsipae icha pena petsiwʉnae muxu dutsiwa.  
\v 8 Ichitha Nacom tane xua barapo jiwi jopa pejʉntʉ coyene xanepanae jiwi bapontha poxonae barapo peru peyabara tsiwʉnae muxu dutsiwa xeina. Daxota ichʉn Nacom Pejume Diwesitha jeye: 
\q1 “Nacom jeye: Matacabin othopaena, po matacabintha 
\q1 pena petsiwʉnae muxu dutsiwa exanaein Israel 
\q1 nacuapiwi pia pemomoxi susato jiwitha tatsi 
\q1 irʉ Judea nacuapiwi pia pemomoxi 
\q1 susato jiwitha tatsirʉ. 
\q1  
\v 9 Jopa bara jʉta coyeneya ichin tsane poxonae 
\q1 matha icha ichin painya amo susato jiwitha. 
\q1 Barapo coyene barapomonaetha catan poxonae 
\q1 matacaponan Egipto nacua weya. 
\q1 Daichitha barapomonae jopa nacui yabara 
\q1 wʉnaetsiyo xua peexanaenexa pocotsiwa 
\q1 itoroban poxonae catan barapo peyabara 
\q1 tsiwʉnae muxu dutsiwa barapomonaetha. 
\q1 Daxota barapomonae punapentan, xua jopa 
\q1 tayawenaewa tsane, jei Nacom”, jei ichʉn. 
\m  
\v 10 Equeicha ichʉn jeye: 
\q1 “Nacom jeye: Barapo peyabara tsiwʉnae muxu 
\q1 dutsiwa Israel nacuamonaetha, poxonae barapo 
\q1 matacabin wetsina bara baxua exanaein. 
\q1 Janje: Jiwi pejʉntʉ coyenewatha ichaxota 
\q1 nanta xeina taitorobi coyenewa baxota dubin. 
\q1 Bapoxonae barapomonae neyaputaena yawa 
\q1 nejume cowʉntsiya jejei tsane. 
\q1 Tacoutha barapomonae pia Nacom 
\q1 tatsi naexanaein. 
\q1 Barapomonae tamonae naexanaena. 
\q1  
\v 11 Dapon aibi pon bewa cuidubina ichʉntha xua 
\q1 xan yabara, xuano xua cuidubina pia jitontha 
\q1 xua xan yabara, mataʉtano xua cuidubina 
\q1 peweicho xua xan yabara 
\q1 petana neyaputaewanexa tsane. 
\q1 Jopa bewa cuidubi tsane barapomonae tsipei 
\q1 daxita jiwi neyaputaena pomonae pecui pawi 
\q1 jiwi, irʉno pomonae peainya cui jiwi. 
\q1  
\v 12 Xan barapomonae cui yabara jʉntemainaein 
\q1 abe pia peexanae cuiru coyenein tatsi, xua 
\q1 jopa pexeinaewa tsane xua tana netsita 
\q1 natsicuentsiwa xua abe peexanaewaxae. 
\q1 Bapana ataya equeicha jopa yabara nanta 
\q1 xeinaein tsane barapo abe peexanae 
\q1 cuiru coyenein, jei Nacom”, jei ichʉn 
\q1 Nacom Pejume Diwesitha xua saya 
\q1 Nacom tapaebatsi. 
\m  
\v 13 Nacom yabara paeba pena peyabara tsiwʉnae muxu dutsiwa tsipei po peyabara tsiwʉnae muxu dutsiwa copiya Moisés yabara tsiwʉnae muxu dutatsi saya peru jume. Pocotsiwa ba peru coyenewa ba saya weraweraca. Daxota barapo peru peyabara tsiwʉnae muxu dutsiwa saya irʉ weraweraca. 
\c 9  
\s1 Meje yabara xua Nacom pin pia bo tatsi po bo xua itabocotheicha uncua xuano irʉrʉ po bo xua po irathe tsique uncua 
\p  
\v 1 Nacom copiya Moisés yabara tsiwʉnae muxu dutatsi. Barapo peyabara tsiwʉnae muxu dutsiwa peitorobi coyenein xeina xua pocotsi coyeneya israelmonae bewa exanaena poxonae nacaetuta xua wʉnae pejainchinexatsi Nacom. Mataʉtano barapo peyabara tsiwʉnae muxu dutsiwa itoroba xua jiwi xeina po bo xua Nacom pia bo tatsi xua po irathe.  
\v 2 Barapo Nacom pia bo jiwi exana duwein pebocoton xua be anseraboco. Barapo anseraboco ainya tutube xeina. Po tutu copiya dena pewʉn: “Nacom pia tutu po tutu ainya cui tutu xua jopa pexeinaewa peabe cuiru”, jei. Barapo tututha uncua penainto po penaintotha itanatanota penasiwa. Mataʉtano barapo tututha uncua xua pexaethopaewa po pexaethopaewatha xua baxota jeba pan, po pan xua Nacom catatsi.  
\v 3 Paparuwa xua dutsica barapo paparuwa peʉma werena icha tutu xeina po tutu pewʉn: “Yatsicaewa Nacom pia tutu po tutu bichocono pepa peainya cui tutu xua jopa xeinaeyo peabe cuiru”, jei.  
\v 4 Barapo tututha uncua xua be pecaxaethopaewa xua ʉ penainto xua oro wʉn nainto. Baraxota yʉbeibiya tauteibathopa petuxueiwa po petuxueiwa tuxusi tuxuei benata poxonae tauta. Mataʉtano barapo tututha uncua xua be caja po caja pewʉn: “Nacom pia peyabara tsiwʉnae muxu dutsi caja”, jei. Barapo caja peʉma weya daxita matapaeicha caxueba oro naintontha. Barapo caja juntututha eca coroto xua oro nainto. Barapo corototha tsijuntutu boca po pexaewa pewʉn maná matawʉn xua itaboco pia pexaewa. Mataʉtano barapo caja juntututha boca penacobenababi naewa po penacobenababi naewa bayatha Aarón xeina. Barapo naewa bayatha Nacom xuwa exana xua tsiwixi pirʉrʉrʉjei poxonae pexeinya petsita itʉtsi coyene exana pia peayapusʉ itorobi coyeneyatha. Mataʉtano barapo caja juntututha bobena iboton po ibotontha mata tinaduba Moisés pia peitorobi coyenewa.  
\v 5 Barapo caja pemata xatatsiwa jumatha nacueyatabe ecabe ainya querubinbe matawʉnbe xua jumope canaxobiya exana oro naintotha, ponbe be matatsunpinbe. Barapo ainya querubinbe matawʉnbe yabara caunuta xua Nacom baxota eca. Barapo ainya querubinbe matawʉnbe naitama taecabe yawa nacuarafe yeyetecabe xua itata barapo caja pemata xatatsiwa. Mataʉtano irabe tayecarecabe ichaxoya pejana nʉnʉbabareca po jana duwein jana. Barapo duwein sacerdotepin bexuba jiwi abe pia peexanae cuiru coyenein tatsi nexa. Anoxuae baxua yabara equeicha jopa bepaca tsipaebichi. 
\p  
\v 6 Daxita nacui wʉnaeta pocotsiwa xua barapo tutubetha nexa. Bapoxonae sacerdotepiwi jojoneibeibiya daxita matacabi po tututha xua copiya dena. Barapo sacerdotepiwi barapo tututha exaneiba pia penacuichiwa.  
\v 7 Ichitha nama po tutu dabeya saya meisa joniyeiba pon pepa sacerdotepin xua saya caetotha tsaibi xua daxita weithan tsaibi. Poxonae barapo pepa sacerdotepin barapo tutu iya joniya bewa nata cajoniyaena duwein jana. Barapo jana nʉnʉbaba ichaxota querubinbe matawʉnbe itabarayo deca xua bapon abe pia peexanae cuiru coyenewan tatsi nexa xuano xua irʉ jiwi abe pia peexanae cuiru coyenewan tatsi nexa xua poxonae jiwi jopa nacui yabara yaputaeyo.  
\v 8 Peyabara exanaewa daxita baxuan Nacom pia Pejumope tʉnaxʉ tatsi naca cuiduba xuaje: Poxonae cataunxuae sacerdotepiwi taexana dubenanaebiya Nacom po tututha xua copiya dena, jiwi jopa copatsichi xua pata po tutu dabeya ichaxota Nacom popona.  
\v 9 Daxita pocotsiwan barapo anserabocototha caena bayatha exana yabara caunuta xua anoxuae wayabara yaputaenexa baxua xua pocotsiwa anoxuae exana. Jiwi Nacom wʉnae jainteibatsi poxonae sacerdotepin exaneiba pocotsiwa xua jiwi pecatsiwa Nacomtha xuano xua poxonae exaneibano xua duwei pejutebiwa xua tuxusi exana Nacom nexa. Bara bequein jiwi baxua exaneiba ichitha cataunxuae pia jʉntʉ coyenein tatsi cana exanatsi xua awiya yabara nanta xeina dubenanaebiya abe pia peexanae cuiru coyenein tatsi. Barapo coyene po coyene jiwi exana jopa beta jʉntʉ coyene xanepana exanaetsi xua jopa penatsicuentsiwa tsane Nacomtha xua abe peexanaexae.  
\v 10 Barapo peru peitorobi coyenewa xua Moisés pia peitorobi coyenewa tatsi jiwi jopa yawenaetsi xua penajʉntʉ coyene xanepana exanaewa Nacomtha. Saya apara yabara paeba xua jiwi bewa pocotsiwa xaibina poxonae nabaneiba, mataʉtano xua xuan pocotsiwa bewa apeibina. Mataʉtano jiwi itorobatsi xua po coyenein yabara xua jiwi beta penaperʉ xainwaetsiya nowaewa yabara pia wʉnae jainteibichi Nacom. Barapo coyenein xua saya jiwi bewa cana exanae pia pepontha beya xua anoxuae Nacom pena coyenewa equeicha exana. 
\p  
\v 11 Nama Cristo patopa pon pepa sacerdotepin. Bichocono yatsicaewa pexeinya coyenewa xua pena coyenewa nacata capatopa po coyenewa xua anoxuae waxainchi xeinatsi. Po tutu ichaxota bapon nacuiteiba icha pepa sacerdotepin ichi xua itabocotheicha bichocono wʉnae tsipei Nacom daxita matapaeicha wetsiya exana. Barapo tutu bichocono wʉnae beyacaincha po tutu ichaxota sacerdotepiwi tanacuita Nacom xua barapo cae pin nacuathe. Jiwi jopa acabiyo barapo tutu xua itabocotheicha tsipei barapo tutu jopa apara po cae pin nacuathe tsique nexiyo.  
\v 12 Cristo joniya ichaxota yatsicaewa Nacom pia xantha. Bara xoteicha Cristo jopa caponaeyo duwein jana po duwein pewʉn chivo, xuano xua vaca jana jopa caponaeyo xua penʉn jana, xua pebto jana. Saya jame Cristo Nacom tsita itʉtatsi xua bapon jiwi tsitʉpatsi xua abe pia peexanae coyenewan tatsi. Bapon Cristo saya bara cae coyenewatha joniya baxoteicha xua daxita carepaya jiwi nexa. Daxota bapon Cristo bara ataya tsitecaeya naca capanepa.  
\v 13 Sacerdotepiwi ba nota vaca pebton pia pejanan, yawa chivo pia pejana xuano ipuna xua poxonae tautatsi vaca pesowatiyo peweinyo. Sacerdotepiwi mata wenʉnʉbaba jiwi daxita baxuantha pomonaetha pomonae xua abe peexanae cuiru coyenein peexanaewixae. Bara bapoxonae barapo coyene jiwi itacʉpatsi xua cana exanatsi xua jopa penataxobiwa pia pepontha bequein awiya xeina penatsicuentsiwa.  
\v 14 Bequein bara baxuan barapo jiwi tsiwiyo yawenatsi xua jopa petaxobiwatsi pia pepontha ichitha nama Cristo pia pejana tatsi barapomonae bichocono yawenatsi. Cristo pejana bichocono peayapusʉ coyenewa xeina beyacaincha xua duwein pejana. Nacom pia Pejumope tʉnaxʉ tatsi po jumope ataya tsitecaeya popona barapo pejumope tʉnaxʉ tatsi Cristo yawenatsi poxonae saya Cristo nayabara cui copata xua bara pebexubinexatsi poxonae pejana pichapabarena pewan weya petʉpaewatha. Bapon Cristo jopa bapana exanaeyo peacoyenebewa. Cristo wanaca tsitʉpaexae Nacom naca jʉntʉ coyene xanepana exana. Daxota Nacom jopa tsita natsicuentichi abe waexanaexae. Wajʉntʉ coyene equeicha jopa yabara wanaca tsipaebinexa abe waexanae coyene. Daxota jopa bewa ponae tsainchi ichaxota ataya atene tsaibi pomonae jopa pejume cowʉntsiwi. Anoxuae jame naca itacʉpa xua ajʉntʉsʉya taexana dubenanaebiyatsi Nacom pon xua ataya tsitecaeya asʉ pepoponaein. 
\p  
\v 15 Daxota bapon Cristo naexana pon nacata paeba Nacomtha yawa pon naca tsipaeba Nacom nexa. Bapon Cristo nacata catsica Nacom pia pena peyabara tsiwʉnae muxu dutsiwa tatsi. Bapon naca cana exana xua daxitatsi caemonae naexanatsi Nacomtha. Poxonae naca tsitʉpa Nacom yabara jʉntemaina abe peexanae cuiru coyene po peabe exanae cuiru coyenein xua jiwi caena bayatha exana poxonae cataunxuae exanapona po coyene bayatha Nacom Moisés yabara tsiwʉnae muxu dutatsi xua peru peyabara tsiwʉnae muxu dutsiwa. Daxita pomonae Nacom pewabixae barapomonae catsibinchi peajʉntʉyapusʉwa po peajʉntʉyapusʉwa xua ataya tsitecaeya tsane xua bayatha Nacom peyabara tsiwʉnae muxu dutsixae barapomonaetha.  
\v 16 Poxonae pebin ba ichichipa cata pia pecopiniwa ichamonaetha xua poxonae tʉpaena, copiya matha yabara caununaya wʉn tinaduba paperatha pomonae xua pecopiniwa xeinaewa tsainchi. Pomonae xua pecopiniwa xeinaewa tsainchi barapomonae bewa tsita itapeinya xeinaena xua barapo pebin xaniwaicha bara tʉpaba xua poxonae beya pewʉnaeya tsane xua pecopiniwa notsinexatsi pon xua tʉpa. Bapoxonae barapomonae bara itacʉpatsi xua pexeinaewa pocotsiwa xua bapon xeina pon tʉpa.  
\v 17 Barapo papera, po paperatha bayatha pebin nacopiniwa yabara jume tinaduba cataunxuae jopa ainya cuiyiyo poxonae abʉ cataunxuae bapon popona tsipei jopa copiniwa notichi barapomonae. Saya jame poxonae bapon yatsicaewa tʉpaba bapoxonae jame ainya cui barapo papera, tsipei barapomonae itacʉpatsi xua pexeinaewa tsane pocotsiwa bapon xeina.  
\v 18 Barichi barapo copiya peyabara tsiwʉnae muxu dutsiwa. Pewʉnaeya tsane xua poxonae jiwi xeinaena pocotsiwa bayatha Nacom Moisés yabara tsiwʉnae muxu dutatsi sacerdotepin bewa matha duwein bexubina xua bapoxonae barapo coyene jiwi pexeinaewa tsane.  
\v 19 Moisés daxita pia peitorobi coyenewan yabara paeba daxita jiwitha. Nexata bapon pena xua oveja na xua tsobia naewiyotha opi yarabaxuba, po naewiyotha pewʉn hisopo naeyo. Bapon mene muxunaxuba vaca jana poyo peweinyo pebtiyo xuano xua muxunaxuba chivo jana. Bapoxonae baxuan bapon Moisés nʉnʉbaba Nacom Pejume Diwesitha. Mataʉtano daxita jiwitha mata wenʉnʉbaba.  
\v 20 Bapoxonae Moisés daxita jiwitha jeye: “Barapo jana po janatha paca mata wenʉnʉbabatsi apara Nacom itoroba xua tapacata exanaewatsi tsainchi. Baxua paca tsita itapeinya xeina xua Nacom xaniwaicha bara pacata exanaena pocotsiwa pia peyabara tsiwʉnae muxu dutsiwa”, jei Moisés.  
\v 21 Barichino Moisés exana xua anseraboco mata wenʉnʉbaba pejanatha. Mataʉtano muxuna mata wenʉnʉbaba xua xuan barapo anserabocototha tututha umena pocotsiwan sacerdotepiwi canacuiteiba poxonae jiwi nacaetuteiba xua Nacom wʉnae pejainchinexatsi.  
\v 22 Moisés pia peitorobi coyenewantha tatsi itoroba xua bara imoxoyo daxita coyeneintha bewa pejanantha mata wenʉnʉbabi xua daxita baxuan Nacom jopa petsita nataxobinexatsi. Nacom jopa yabara jʉntemainaeyo jiwi abe pia peexanae cuiru coyenein tatsi icha jopa pejana epa-epacaeyo xua barapo jiwi nexa. 
\s1 Meje yabara xua Cristo tsitʉpa jiwi abe pia peexanae cuiru coyenewan tatsi 
\p  
\v 23 Sacerdotepiwi bewa jutebina duwei pemata wenʉnʉbabinexa pejanatha anseraboco. Bapoxonae Nacom petsita xanepanaenexatsi xua jopa nataxobiyo barapo anseraboco xuano xua xuan tututha umena. Barapo coyene saya yabara caunuta xua yatsicaewa pepa coyenewa Cristo exana peitabocotheicha. Ichitha nama barapo yatsicaewa pepa coyenewatha peexanaenexa peitabocotheicha jame bewa pejana epa-epacae pejana pon pejʉntʉ coyene xanepanaein pon peainya cuin pia pejana tatsi xua Nacom tsita jiwi xanepanatsi xua jopa penatsicuentsiwa xua abe peexanaexae Nacomtha. Barapo jana bichocono ainya cui beyacaincha duwein jana po jana xua sacerdotepiwi nʉnʉbaba po cae pin nacuathe.  
\v 24 Poxonae Cristo joniya Nacom pin pia botha tatsi xua itabocotheicha jopa joniyaeyo po bo saya jiwi exana po cae pin nacuathe xua Nacom pin pia bo tatsi. Barapo bo xua Nacom pin pia bo saya yabara caunuta xua yatsicaewa peitabocotheicha xeina pepa Nacom pin pia bo tatsi. Jame Cristo joniya Nacom pin pia botha tatsi, xua Nacom pia nacuatheicha tatsi xua itabocotheicha. Baxoteicha anoxuae Cristo naitʉta Nacomtha xua wanacata tsipaebinexa Nacom peitabaratha.  
\v 25 Pon pepa sacerdotepin bewa joniyaena bara saya caetotha tsaibi xua daxitan weithan tsaibi ichaxota po tutu yatsicaewa Nacom pia tutu xua po tutu bichocono yatsicaewa peainya cui tutu xua barapo anserabocototha. Barapon pejana capaneiba barapo tututha xua duwein jana xua jopa barompaya pia pejana tatsi. Nama Cristo jopa nantawenonaeyo xua nayabara cui copata xua matowa tʉpa pecana exanaewatsi xua jiwi abe peexanae cuiru coyenein tatsi nexa.  
\v 26 Icha baxua tsipae bapoxonae bapon matowa tʉpa exaneibichipatsi xua bexubeibatsi xua poxonae Nacom aena barapo cae pin nacue forota xua beya anoxuae. Ichitha nama anoxuae weta xua peru dapae tsipei bapon Cristo patopeica barapo cae pin nacuathe petʉpaenexa xua saya bara cae coyenewatha ataya petsitecaenexa tsane. Bapon Cristo naetotha tsitʉpa jiwi xua Nacom jiwi peyabara cui jʉntemainaenexatsi abe pia peexanae cuiru coyenein tatsi.  
\v 27 Daxita jiwi ba werapouneibina saya caetotha. Bapoxonae pirapae Nacom yabara paebina daxita jiwi xua penatsicuentsiwa xua abe peexanaexae.  
\v 28 Barichirʉ, icha jiwi ichi Cristo saya caetotha tsitʉpa jiwi pinmonae, xua Nacom jiwi abe pia peexanae cuiru coyenein tatsi pecayabara jʉntemainaenexa tsainchi. Equeicha bexa tsane patopeicaena po cae pin nacuathe. Jopa tsipatopeicae tsane xua equeicha petsitʉpaewa tsane jiwi abe pia peexanae cuiru coyenein tatsi. Jame tsipatopeicaena xua pecapanenebiyaenexa pomonaetha pomonae pia pewʉnae ewatsi jiwixaetsi xua bapon pepatopaewa po cae pin nacuathe tsique. 
\c 10  
\p  
\v 1 Moisés pia peitorobi coyene tatsi, baxua saya yabara caunuta xua yaputane wanaca exanaenexa po coyene xua wʉnae po coyene xua bexa Nacom exanaena itabocotheicha. Barapo coyene, jopa pepa coyenewiyo poxoru jopa jʉpaeyo po coyene xua Nacom yatsicaewa xeina itabocotheicha. Moisés pia peitorobi coyenewa tatsi jopa itacʉpaetsi xua jiwi pejʉntʉ coyene xanepana exanaewatsi Nacomtha pomonae wʉnae jainteiba Nacom. Bequein pepa sacerdotepiwi daxita weitha exaneiba xua duwei jutebeiba jiwi abe pia peexanae cuiru coyenein tatsi nexa daichitha cataunxuae jopa itacʉpaetsi xua jiwi jʉntʉ coyene xanepana exanatsi xua jopa pexeinaenexa xua penatsicuentsiwa xua abe peexanaexae Nacomtha.  
\v 2 Icha Moisés pia peitorobi coyene tatsi jiwi jʉntʉ coyene xanepana exanaetsipatsi Nacomtha bapoxonae sacerdotepiwi jopa equeicha nantawenonaetsipae xua equeicha pejutebeibiwa duwei jiwi abe pia peexanae cuiru coyenein tatsi nexa. Icha jiwi caetotha jʉntʉ coyene xanepanaetsipa Nacomtha, bapoxonae jiwi jopa natsicuentsipae xua abe peexanaexae Nacomtha.  
\v 3 Ichitha poxonae barapo sacerdotepiwi jutebeiba duwei jiwi abe pia peexanae cuiru coyenein tatsi nexa bequein baxua exana cataunxuae jiwi cana exanatsi xua yabara jʉntanaina barapo abe pia peexanae cuiru coyenein tatsi. Jiwi yabara jʉntanaineiba baxuan daxita weitha poxonae duwein jutebeibatsi barapo jiwi nexa.  
\v 4 Vaca pebto pia pejana tatsi yawa chivo pia pejana tatsi jopa bapana jiwi jʉntʉ coyene wenotichi abe pia peexanae cuiru coyenein tatsi xua jopa penatsicuentsiwa nexa Nacomtha xua abe peexanaexae. 
\p  
\v 5 Daxota poxonae Cristo patopa po cae pin nacuathe tsique, Cristo jeye Nacomtha: 
\q1 “Xam jopa ichichipaem po coyene xua duwein 
\q1 pebexubiwa jiwi abe pia peexanae cuiru 
\q1 coyenein tatsi nexa. 
\q1 Mataʉtano jopa ichichipaem xua po coyenein 
\q1 xua jiwi amanaya necacatsiwa. 
\q1 Jame pebaxuanexa yatsicaewa pepa 
\q1 jiton necana exaname xua naexanan, 
\q1 tatsitʉpaenexa jiwi abe pia peexanae 
\q1 cuiru coyenein tatsi nexa. 
\q1  
\v 6 Xam jopa cajʉntʉ coyene weiweina exanaeyo 
\q1 poxonae duwein ompin tautatsi xuano xua 
\q1 pexaewa tauta petuxusi exanaenexano xua xam 
\q1 neyabara jʉntemainaenexa jiwi abe pia 
\q1 peexanae cuiru coyenein tatsi. 
\q1  
\v 7 Bapoxonae xan Cristo, janje: 
\q1 ‘Xam Tanacom. 
\q1 Xan xote po nacuathe patopeicanje taexanaenexa 
\q1 xua pocotsiwa ichichipame be pocotsi 
\q1 coyeneya necui yabara tina jinya diwesitha’, 
\q1 jan”, jei Cristo. 
\m  
\v 8 Copiya Cristo paeba xua jeye: “Xam jopa ichichipaem yawa jopa cajʉntʉ coyene weiweina exanaeyo po coyene xua poxonae jiwi bexuba duwein xuano poxonae exaneiba po coyene poxonae jiwi amanaya cacatsibeiba. Mataʉtano jopa ichichipaem poxonae duwein ompin tautatsi xua jiwi abe pia peexanae cuiru coyenein tatsi nexa”, jei Cristo. Baxua Cristo paeba tsipei Moisés pia peitorobi coyenewatha itoroba xua jiwi bewa exanaena barapo coyenein Nacom nexa.  
\v 9 Equeicha bapoxonae Cristo cotacaya jeye: “Xan xote po cae pin nacuathe patopeicanje taexanaenexa pocotsiwa ichichipame”, jei. Poxonae Cristo baxua caunutsiya paeba copiducua cana exana po coyene peru coyene. Cristo anoxuae equeicha pecoutha pena coyene exana poxonae naetotha tsitʉpa jiwi abe pia peexanae cuiru coyenein tatsi.  
\v 10 Nacom naca jʉntʉ coyene xanepana exana wanaca cana exanaenexa piamonae tatsi poxoru Jesucristo exana pocotsiwa Nacom peichichipaexae. Jesucristo pia pepon nacaenaeta Nacomtha xua naetotha petsitʉpaenexa daxita jiwi abe pia peexanae cuiru coyenein tatsi xua bara cae coyenewatha xua ataya petsitecaenexa tsane. 
\p  
\v 11 Daxita sacerdotepiwi pomonae judiomonae daxita matacabi exaneiba xua duwein pebexubiwa, bequein barapo coyenewa jopa itacʉpaetsi xua jiwi jʉntʉ coyene wenotatsi abe pia peexanae cuiru coyenein tatsi.  
\v 12 Nama Jesucristo bara cae coyenewatha exana poxonae naetotha tsitʉpa jiwi abe pia peexanae cuiru coyenein tatsi, xua bara ataya tsane. Poxonae Cristo baxua nacui weta Nacom pia pecoxatheicha tatsi equiya xua itabocotheicha.  
\v 13 Baxoteicha Cristo abʉ ewata beya poxonae abʉ tsane poxonae Nacom cana exanaena xua Cristo cana exanaeinchi xua pecanamataxeinaenexa pia peaitafaetabi jiwichi.  
\v 14 Cristo piamonae jʉntʉ coyene xanepana exana xua ataya tsane poxonae naetotha tsitʉpa cae coyenewatha. Barapomonae pomonae xua Nacom tsitatsi xua jopa xeinaeyo penatsicuentsiwa pomonae piamonaexae tatsi.  
\v 15 Nacom Pia Pejumope tʉnaxʉ tatsi baxua yabara irʉ naca tsipaeba bayatha Nacom Pejume Diwesitha, jeye: 
\q1  
\v 16 “Matacabin othopaena po matacabintha xan 
\q1 tayabara tsiwʉnae muxu dutsiwa xua pena 
\q1 coyenewa exanaein barapomonaetha. 
\q1 Jiwi pia jʉntʉ coyenewantha xua ichaxota 
\q1 nanta xeina taitorobi coyenewa baxota dubin”, 
\q1 jei Nacom pia Pejumope tʉnaxʉ tatsi. 
\p  
\v 17 Bapoxonae equeicha Nacom pia Pejumope tʉnaxʉ tatsi jeye: 
\q1 “Bapana ataya equeicha jopa yabara 
\q1 jʉntanainaein tsane jiwi abe pia 
\q1 peexanae cuiru coyenein tatsi”, jei 
\q1 Nacom pia Pejumope tʉnaxʉ tatsi, 
\q1 Nacom Pejume Diwesitha. 
\m  
\v 18 Daxota poxonae Nacom yabara jʉntemaina jiwi abe pia peexanae cuiru coyenein tatsi, equeicha jopa nantawenonaeyo xua jiwi duwein pebexubiwa xua tuxusi exana Nacom nexa xuano xua po coyene exaneiba xua po coyene Nacom amanaya pecatsibeibiwatsi. 
\s1 Meje yabara xua waxainchi bewa wajʉntʉ coyeneyatha nanta xeinaetsi xua bara apara imoxoyo itiya jinompatsi Nacom 
\p  
\v 19 Tamonae pam, daxota anoxuae naca itacʉpa xua jopa junuwiya patsi tsainchi itabocotheicha ichaxota yatsicaewa Nacom pia tutu, po tutu bichocono peainya cui tutu. Daxota baxua naca itacʉpa tsipei Nacom yabara copata xua bara Jesucristo naca tsiwanaya patopa barapo tututha pejana pichapabarenaexae poxonae naetotha naca tsitʉpa.  
\v 20 Anoxuae naca itacʉpa xua wapatsiwa Nacomtheicha pena jʉntʉ coyene waxeinaexae po pena jʉntʉ coyene ataya ayapusʉ xua poxonae Cristo wanaca tsitʉpaexae. Baraxua be poxonae metha Cristo nacata pataxubichipa paparuwa po paparuwa yacaincha ducua Nacom pia tutu po tutu yatsicaewa peainya cui tutu. Daxota jojoniyaeinchi wajinompaenexa Nacomtha.  
\v 21 Bapon Jesús, yatsicaewa wasacerdotepin, pon canamataxeina Nacom pia bo tatsi xua itabocotheicha.  
\v 22 Daxota bewa wajʉntʉ coyeneyatha nanta xeinaetsi xua bara apara imoxoyo itiya jinompatsi Nacom, xua yatsicaewa xainyeya wajʉntʉ coyene xanepanaexae bapontha. Mataʉtano bewa wajʉntʉ coyeneyatha nanta xeinaetsi xua bara apara imoxoyo itiya jinompatsi Nacom xanepanaya wajume cowʉntsiya jinompaexae. Mataʉtano bewa wajʉntʉ coyeneyatha nanta xeinaetsi xua bara apara imoxoyo itiya jinompatsi Nacom tsipei jopa jʉntʉ coyene auratsi xua jopa watsita natsicuentsixae xua abe waexanaexae. Mataʉtano bewa wajʉntʉ coyeneyatha nanta xeinaetsi xua bara apara imoxoyo itiya jinompatsi Nacom tsipei poxonae ichamonae naca bautisaba meratha tsita itapeinya xeinatsi xua Nacom bayatha naca jʉntʉ coyene xanepana exana.  
\v 23 Barabʉ naajʉntʉcoyenesʉ exainchi xua jopa junuwiya wayabara paebiwa tsainchi wawʉnae ewatsiwa. Baxua exanaponaeinchi tsipei bara yaputainchi xua Nacom bara exanaena pocotsiwa bayatha yabara naca tsiwʉnae muxu duta xua jopa yabara ainya ʉnthʉtontsi.  
\v 24 Barabʉ yabara nanta xeinaeinchi po coyenewa xua nantiya nacui tsacabinchi xua wanayawenaewatsi. Bapoxonae nantiya naantobe tsainchi, mataʉtano xua xanepanaya beta nantiya nata exanaeinchi.  
\v 25 Jopa bewa bara jʉta coyeneya ichiya exanaetsi be pocotsimonae waxainchi jiwanatsi pomonae jopa pateibiyo poxonae nacaetuteibatsi xua poxonae Nacom wawʉnae jainchinexa. Ichitha jame bewa nantiya najʉntʉ coyene tsacabichi xua jʉntema wajinompaewatsi. Barapo coyene bewa exanaponaetsi beyacaincha xua po cui coyene copiya bayatha. Baxua exanatsi tsipei anoxuae yaputainchi xua matacabi jopaena, po mataqueitha pon jiwi Pecanamataxeinaein patopaetsica. 
\p  
\v 26 Tsipei icha ichamonae waxainchi jiwanatsi icha barapomonae awiya abe exanapona xua pocotsiwa peichichipaexae xua abe exana xua poxonae bequein peyaputaewatha po coyene pexainyei jume, nama icha coyenewa ajibi, xua ichʉn equeicha petsitʉpaenexa barapo peabe coyenewa.  
\v 27 Saya jame meisa tanacopatatsi pomonae awiya abe exanapona xua matacabi cunuwa po mataqueitha poxonae Nacom yabara paebina jiwi xua penatsicuentsiwa xua abe peexanaexae. Mataʉtano tanacopatatsi xua isoto yabara cunuwa, po isoto bichocono atou, po isototha Nacom weraweraca cana exanaena daxita pomonae pia peaitafaetabi jiwichi.  
\v 28 Po pebin jumefeba po coyene Moisés itoroba pia peitorobi coyenewatha, xua poxonae nacueyatabe pebinbe ichacuitha poxonae acoibi poyobe baponbe yabara paebabe: “Bapon pajume tan poxonae jumefeba”, jei, bapoxonae bapon bewa tʉpaena. Tsipei pomonae bapon yabara paebatsi xua penatsicuentsiwa xua abe peexanaexae, barapomonae tsita itapeinya xeinatsi xua bara bapon xainyeya abe exana. Daxota bapon bewa tʉpaena tsipei barapomonae jopa yabara nanta xeinaeyo xua bapon peyawenaewatsi.  
\v 29 Xuaje payabara nanta xeinare: Nacom bichocono atene exana pomonaetha pomonae Pexanto tatsi itaweta. Mataʉtano atene exana pomonaetha pomonae abe yabara paeba xua pinae Jesús pejana jopa ainya cuiyo bequein Jesús tsitʉpa jiwi. Jesús petsitʉpaexae daxota Nacom yabara tsiwʉnae muxu duta xua jiwi pejʉntʉ coyene xanepana exanaenexatsi Nacom. Mataʉtano barapomonae jopa natsicuentsi tsane xua abe peexanaexae. Mataʉtano Nacom atene exana pomonaetha pomonae Nacom pia Pejumope tʉnaxʉ tatsi tsʉmʉ jumeya barʉ paebatsi po pejumope jiwi yawenatsi pia peantobexaetsi. Barapomonae nama bichocono atene exanaeinchi beyacaincha xua ichamonae atene exanaeinchi pomonae jopa exanaeyo pocotsiwa Moisés itoroba.  
\v 30 Waxainchi yaputainchi xua Nacom bayatha jeye: “Xan tacoya exanaein pentoma xua jiwi atene tsane abe peexanaexae”, jei Nacom. Equeicha Nacom Pejume Diwesitha jeye: “Nacom yabara paebina piamonae xua penatsicuentsiwa xua abe peexanaexae”, jei.  
\v 31 Po pebin abe exana bichocono junuwa cana exanatsi poxonae Nacom yabara paebina bapon tsipei barapo pebin Nacom tsitatsi xua bapon bara penatsicuentsiwa xua abe peexanaexae. Bapoxonae Nacom, pon ataya asʉ pepoponaein, bichocono jopa juniya atene cana exanae tsane bapontha. 
\p  
\v 32 Bara ataya payabara jʉntanainare po dapaetha poxonae bequein aena pajume cowʉntame Nacom, xua ichitha beta paexaname. Bapoxonae awiya ichitha jʉntema parubenanaebiyame poxonae bequein ichamonae pacata abe exana.  
\v 33 Ichamonae xua paxam jiwana pam barapomonae tsʉmʉ jumeya biatainchi xuano jiwi itʉtha atene exaneibatsi. Irʉrʉ ichamonaerʉ pomonae paxam jiwana pam barapomonae nacayabara nanta xeina xua barapara irʉrʉ atene exaneibatsi poxonae ichamonae atene exaneibatsi.  
\v 34 Paxam painya antobexae pacayabara nanta xeiname pomonae jiwi pecʉbi botha jebatsi xua painya neyawenaenexa. Bequein bara ichamonae daunweya pacata nota xua xuan daxita paxeiname, daichitha awiya cataunxuae pajʉntʉ coyene weiweiname. Bara payaputaneme xua paxeiname itabocotheicha pocotsiwa bichocono yatsicaewa wʉnae beyacaincha pocotsiwa po cae pin nacuathe paxeiname. Baxua xua pocotsiwa paxeiname itabocotheicha ataya tsitecaeya paxeinaename baxua.  
\v 35 Jopa pana nacui barapentsinde xua payabara jume cowʉnta dubenanaebiyame xua painya nepaca catsinexa pocotsiwa bayatha Nacom yabara paca tsiwʉnae muxu duta. Tsipei wajume cowʉnta dubenanaebiyaexae tsane Nacom, baxua nexa Nacom pentoma naca catsibina xua bichocono nawita xua pia nacuatheicha.  
\v 36 Paxam panantawenoname xua ajʉntʉyapusʉya parubenanaebiyama awiya xua jopa paaitaconaem bequein ichamonae pacata abe exana xua painya neexanaenexa pocotsiwa Nacom ichichipa. Bapoxonae Nacom paca catsibina pocotsiwa xua bayatha yabara paca tsiwʉnae muxu duta.  
\v 37 Nacom Pejume Diwesitha jeye: 
\q1 “Methaunxuae patopaetsica, pon 
\q1 bewa patopeicaena. 
\q1 Jopa bayathiyo tsane. 
\q1  
\v 38 Pon bara netsita pejʉntʉ coyene 
\q1 xanepanaein, bapon bara ataya poponaena 
\q1 tana nejume cowʉnta ducuanaebiyaexae. 
\q1 Ichitha icha bapon equeicha caewa jopa 
\q1 nejume cowʉntsiyo jopa xanepanaya beyabara 
\q1 jʉntʉ coyene weiweinaeinyo, pocotsiwa 
\q1 bapon peexanaexae”, jei Nacom. 
\m  
\v 39 Ichitha nama waxainchi jopa be barapomonaetsi, pocotsimonae equeicha caewa jopa jume cowʉntsiyo Nacom. Barapomonae Nacom weraweraca exanaena. Nama waxainchi pomonaetsi awiya jume cowʉnta dubenanaebiyatsi Nacom beya poxonae wajʉntʉ coyenewa nacata capanepa exanaeinchi. 
\c 11  
\s1 Meje yabara xua Nacom pejume cowʉntsiwatsi 
\p  
\v 1 Pon jume cowʉnta ducuanaebiya Nacom, bapon bara xaniwaicha yaputane xua xeinaena pocotsiwa wʉnae ewata. Mataʉtano pejʉntʉ coyene tsita najume itapeinya xeinatsi xua barapara xainyei po coyene xua barapon yabara jume cowʉnta bequein cataunxuae yatsicaewa jopa taeyo.  
\v 2 Wamo susato jiwi xanepanaya beta yabara paebatsi xua Nacom beta yabara paeba ayapusʉya pejume cowʉntsiwaxaetsi. 
\p  
\v 3 Waxainchi wayabara jume cowʉntsixae xua Nacom naca yawenapaeba daxota yaputainchi xua barapo cae pin nacue irʉ barapo itaboco susato forotatsi, Nacom peitorobixae. Pocotsiwan xua anoxuae tainchi, Nacom forota pocotsiwan weya xua bapana jopa taetsi, pocotsiwan xua peinyaxae. 
\p  
\v 4 Abel pon caena bayatha popona yabara jume cowʉnta xua Nacom yawenapaeba. Daxota bapon duwein bexuba xua tuxusi exana Nacom nexa. Nacom tsita xanepanatsi pocotsiwa Abel exana. Daxota Nacom yabara paeba xua bara bapon pon pejʉntʉ coyene wʉnaein. Irʉrʉ Caín Abel pentapin tatsi, bapon irʉrʉ bequein pexaewa exana po coyene xua Nacom pecatsiwatsi. Daichitha barapo coyene Nacom jopa tsita xanepanaetsi. Nacom bichocono beita cui jichatsi pocotsiwa Abel exana, beyacaincha xua pocotsiwa Caín exana. Nacom baxua beita cui jichatsi tsipei Abel peyabara jume cowʉntsixae pocotsiwa Nacom exanapaeba. Bequein Abel bayatha tʉpa ichitha naca itacʉpa xua awiya wayabara nacuidubaponaewatsi pocotsiwa Nacom exanapaeba poxonae yabara yorobatsi Abel pia pejume cowʉntsiwa tatsi. 
\p  
\v 5 Enoc pon caena bayatha popona yabara jume cowʉnta xua Nacom yawenapaeba. Daxota bapon Enoc pichicatsi. Nacom pichica xua bapon pecapanaenexatsi itabocotheicha, xua bapon Enoc jopa petʉpaenexa bara po cae pin nacuathe. Enoc piamonae jopa caxinaetsi, poxoru Nacom pichica. Nacom Pejume Diwesitha paeba xua poxonae pewʉnaeya tsane xua pichicaeinchi Enoc, Nacom tsita xanepanatsi pocotsiwa Enoc peexanaexae.  
\v 6 Jopa itacʉpaetsi xua jiwi Nacom tsita xanepanatsi icha barapo jiwi jopa beta jume cowʉntsiyo Nacom. Pon xua ichichipa imoxoyo itiya popona Nacomtha jame bewa matha yabara jume cowʉntsina xua Nacom bara xaniwaicha popona. Mataʉtano jame bewa yabara jume cowʉntsina xua Nacom bara cata pocotsiwa bayatha yabara tsiwʉnae muxu duta pomonaetha pomonae pia pejeichiwichi xua pejume cowʉntsinexatsi. Barapomonae Nacom yaputainchi. 
\p  
\v 7 Noé pon caena bayatha popona yabara jume cowʉnta xua Nacom yawenapaeba. Daxota Noé piamonae tsiexana pin jera nae xua piamonae matabʉxʉyo pebarʉ nacapanepaenexa. Nacom Noé pewʉnaeya yabara muxuwetatsi xua pocotsiwa bexa exanaena pocotsiwa Noé bapana bayatha jopa taeyo, xua pin awʉbo tsane xua Nacom itorobina. Noé bara jume cowʉntsiya exana pocotsiwa Nacom itoroba poxonae pin jera nae exana xua piamonae matabʉxʉyo pebarʉ nacapanepaenexa. Noé pejume cowʉntsixae Nacom, bapon tsita itapeinya xeina xua pomonae barapo cae pin nacuepiwi apara abe exana poxonae jopa yabara jume cowʉntsiyo xua Nacom itorobapaeba pin awʉbo. Nacom tsitatsi xua barapo jiwi atene tsane penatsicuentsiwaxae jopa pejume cowʉntsixaetsi. Jame Noé Nacom jʉntʉ tsita coyene xanepanatsi pejume cowʉntsixaetsi bapon. Daxota Nacom Noé piamonae matabʉxʉyo barʉ capanepatsi. 
\p  
\v 8 Abraham pon caena bayatha popona yabara jume cowʉnta xua Nacom yawenapaeba. Daxota poxonae Nacom pewabixae, bapon bara exana pocotsiwa Nacom itoroba. Bapon Abraham pia nacua weya pona xua peponaenexa icha nacuatha, po nacua bayatha Nacom yabara tsiwʉnae muxu duta, xua bapon catapaebatsi. Bapon Abraham pia ira weya pona xua icha nacua beya pona po nacua bequein jopa yaputaeyo ichaxota pona.  
\v 9 Abraham peyabara jume cowʉntsixae Nacom, bapon popona po iratha xua bayatha Nacom yabara tsiwʉnae muxu duta. Bapon Abraham be pon penanapaincha poponaein xua icha nacua werena poponaexae xua poxonae icha nacuatha popona. Bapon Abraham poponeiba anserabocon bomʉxʉxitha icha Isaac ichi irʉ icha Jacob ichi poxonae poponeibabe anserabocon bomʉxʉxitha. Abraham, irʉ Isaac, irʉ Jacob barapoyobe Nacom tsiwʉnae yabara muxu duta barapo ira xua Nacom pecatsinexa.  
\v 10 Abraham nacui yabara wʉnae ewata xua patopaena po tomaratha ichaxota xua pepu umenae bon xua Nacom pia nacuatheicha. Apara Nacom bapon pon yabara nanta xeina xua forotsina barapo tomara po tomara xua Nacom pia coya bara exana. 
\p  
\v 11 Barichi Sara Abraham piseuri tatsi yabara jume cowʉnta xua Nacom yawenapaeba. Bequein bapowa acue xua jopa peitacʉpaewatsi xua pexeinaewa pexui awiya jume cowʉnta Nacom. Sara pejume cowʉntsixae, Nacom cata barapowa catatsi peajʉntʉyapusʉwa, xua barapowa pepabetsinexa pexuyo. Baxua barapowa taexanatsi tsipei barapowa jume cowʉnta pocotsiwa Nacom taexanaena bapowatha xua bayatha Nacom yabara tsiwʉnae muxu duta.  
\v 12 Bara barichi Abraham. Bapon bichocono amo tsecae xua bara imoxoyo petʉpaewaba tsane xua jopa itacʉpaetsi xua peexanaewa pexui. Daichitha Nacom copata xua bapon pexanto xeina xua daxota bapoxonae bapon pia pemomoxi jiwi tatsi bichocono pinmonae naenaexanapona. Barapo bicheito bichocono pinmonae icha opiteimonae ichi xua bichocono nawita. Mataʉtano barapomonae icha taetowa beno ichi xua bichocono beno cʉcʉjei xua mar mene itapatha. Jopa itacʉpaetsi xua barapo jiwi peununaewatsi icha taetowa beno ichi. 
\p  
\v 13 Daxita pomonae jume cowʉnta Nacom barapomonae yajume cowʉntsiya werapa. Abʉ cataunxuae jopa catsibichi pocotsiwa bayatha Nacom yabara tsiwʉnae muxu duta xua pocotsiwa bapomonae catsibapaebatsi. Daichitha barapomonae yabara jume cowʉnta xua pocotsiwan bexa xeinaena xua Nacom bexa catsibina. Barapomonae baxuan yabara jume cowʉntsiya tsita xanepanatsi. Barapomonae nantiya nayabara nanta xeina, jeye: “Waxainchi pomonae be wananapaincha jinompaewichi barapo pena nacuathe xua be icha nacua werena waponaewi, pomonaetsi xua awiya jeita dubenanaebiyatsi po nacua yatsicaewa pepa wanacua”, jei daxita barapomonae.  
\v 14 Tsipei barapomonae baxua paeba, naca yaputane exana xua awiya jeitapona po nacua yatsicaewa pia nacua tatsi.  
\v 15 Barapomonae jopa apara yabara caunutsiyo ichaxota copiya po nacua weya Abraham pona. Icha metha baxua yabara paebichipa metha bara itacʉpaetsipatsi xua caewa pewarapaewa pia nacuatha ichaxota copiya bayatha jinompa.  
\v 16 Ichitha barapomonae ichichipa po nacua xua bichocono wʉnae beyacaincha xua icha nacuan. Baraxua xua po nacua ichichipa, apara Nacom pia nacua tatsi. Daxota Nacom jopa auriyo xua barapomonae yabara paebatsi xua pinae Nacom barapomonae pia Nacom tatsi. Daxota Nacom barapomonae tsiwʉnaetatsi tomara. 
\p  
\v 17 Nacom Abraham jʉntʉ coyene jʉjʉtatsi peyaputaenexa icha bara metha yatsicaya jume cowʉntatsi. Daxota Nacom Abraham itorobatsi xua pexanto pebexubiwa tsane icha be pocotsi coyeneya ichi xua poxonae duwein bexuba Nacom nexa. Abraham pejume cowʉntsixae Nacom daxota pexanto capana atororo beya pon yatsicaewa compa tatsi pon pewʉn Isaac. Abraham muxu pexanto pebexubi icha be pocotsi coyeneya ichi xua poxonae duwein bexuba Nacom nexa. Bapon baxua exana bequein Nacom yabara tsiwʉnae muxu duta barapo Abraham pexanto tatsi, jeye:  
\v 18 “Barapo nexanto Isaacxae nantaʉtsiname nemomoxi susato jiwi”, jei Nacom.  
\v 19 Abraham jume cowʉnta xua icha Isaac tʉpaetsipa Nacom itacʉpatsi xua equeicha Isaac caewa asʉ exanatsi poxonae bequein pexanto bexubichipa. Poxonae Abraham muxu pexanto pebexubi, apara bara be xua bayatha tʉpa, mataʉtano apara be xua Abraham pexanto equeicha caewa asʉ taexainchi. 
\p  
\v 20 Barichi Isaac yabara jume cowʉnta xua Nacom yawenapaeba. Daxota bapon Isaac pexantobe tsipaeba, jeye: “Barabʉ Nacom paca yawenaena pia paca necaantobexaebe”, jei Isaac pexantobetha, Jacob irʉ Esaú. 
\p  
\v 21 Barichi Jacob yabara jume cowʉnta xua Nacom yawenapaeba. Daxota poxonae bapon juntucuru imoxoyo tʉpaenaba barompaya tsipaebabe José pia pexantobetha tatsi xua pia pemomobexae tatsi. Bapon jeye: “Barabʉ Nacom paca yawenaenabe pia paca necaantobexaebe”, jei Jacob José pia pexantobetha tatsi. Bapoxonae bapon Nacom wʉnae jaintatsi poxonae naewatha nabʉxʉ babatanotsiya yʉyʉtanota tsipei bichocono amo tsecae. 
\p  
\v 22 Irʉ José yabara jume cowʉnta xua Nacom yawenapaeba. Daxota poxonae bara imoxoyo tʉpaenaba yabara paeba israelmonae. José yabara paeba xua bexa tsane Israel pia pemomoxi susato jiwi tatsi warapaena Egipto nacua weya, xua po nacuatha beya po nacua bayatha Nacom yabara tsiwʉnae muxu duta xua Nacom catapaeba. Mataʉtano José pia pexui cui itoroba, xua José pia pexui piwa capanaeinchi Egipto nacua weya po nacua beya ichaxota israelmonae warapaena po nacua xua Nacom yabara tsiwʉnae muxu duta xua Nacom catapaeba. 
\p  
\v 23 Moisés pena tatsi irʉ paxa tatsi yabara jume cowʉnta xua Nacom yawenapaeba. Daxota Moisés matsiyatatsi botha acoibi po xometobe poxonae aena naexana. Moisés pena yabara nanta xeinatsi yawa paxa yabara nanta xeinatsi xua Moisés itʉbʉn tsecae. Baponbe jopa yabara jume cuitaya junuwiyobe xua po coyene cui itoroba Faraón pon Egipto nacuapiwi itorobiya pia pepa peewatsinchi xua pinae daxita pexui pebin wʉtixi bewa jutebinchi. 
\p  
\v 24 Irʉrʉ Moisés yabara jume cowʉnta xua Nacom yawenapaeba. Daxota poxonae bayatha pinyoba Moisés jume aichaxaibiya naitemata, jeye: “Xan barapowa jopa pexanton tatsin powa Faraón pexantiyo tatsi”, jei Moisés.  
\v 25 Saya jame bapon Moisés itapetatsi xua irʉ yawa muxuna atene exanaeinchi Nacom piamonae tatsi xua poxonae barapomonae atene exanaeinchi xua ichamonae atene exanaena pomonae Egipto nacuamonaexae. Moisés ichichipa xua pecana exanaewa tsainchi icha piamonae tatsi tacana ichichi. Moisés jopa benaexanaeyo xua daxitan pexeinaewa tsane pecoutha pocotsiwan xua Faraón xeina. Icha baxuan xeinaetsipa Moisés jʉntʉ coyene weiweina exanaetsipatsi barapo nacuatha xua saya caepatiyo nexa tsipae po coyene xua jiwi weiweina exanatsi xua abe peexanaponaewa. Moisés piamonae jopa benaitematsiyo daxota jopa benotsiyo Faraón pecopiniwa tatsi.  
\v 26 Ichamonae Moisés tsʉmʉ jumetha biatainchi xua ajʉntʉcoyenetane exanatsi icha Mesías ichichi pon Nacom itoroba. Poxonae Moisés nayabara jume tane baxua tsita coyene xanepanatsi, beyacaincha xua poxonae barapo copei pexeinaewa tsane Egipto nacuatha. Baxua Moisés itapeta tsipei ichichipa xua pexeinaewa po pentoma bexa tsane Nacom catsina bapontha peatenexae po pentoma bayatha Nacom yabara tsiwʉnae muxu duta. 
\p  
\v 27 Moisés yabara jume cowʉnta xua Nacom Moisés yawenapaebatsi. Daxota najʉntʉ coyene weta xua pewarapaewa tsane Egipto nacua weya. Moisés jopa junuwiyo bequein yaputane xua Faraón bara casebina. Bapon Moisés bara saya amsiya pona bara be xaniwaicha tane Nacom xua be yatsicaewa barʉ poinchi pon peinya peponaein xua jiwi jopa itacʉpaetsi xua petaewa.  
\v 28 Moisés pejume cowʉntsixae Nacom, piamonae cui itoroba xua peexanaenexa penabanaewa xua Pascua wʉn matacabi nexa. Mataʉtano bapon cui itoroba piamonae xua pejanantha pecapibinexa daxita bomʉxʉ pecoibotontha. Barapo Moisés piamonae tatsi pomonae Israel pia pemomoxi susato jiwixae tatsi baxuan exana xua daxota matatsunpin jopa tʉpa exanaeyo piamonae. Barapo matatsunpin merawi patopaena xua pejutebiwa tsane matapin jiwi pomonae pia bontha jopa xeinaeinyo po jana xua Moisés cui itoroba xua jiwi bomʉxʉ pecoibotontha pecapibiwa tsane. 
\p  
\v 29 Barapo Israel pia pemomoxi susato jiwi tatsi yabara jume cowʉnta xua Nacom yawenapaeba. Daxota Mar Rojo mene mentha icha muxunene beya panenebiya xua epataʉta iya pona be poxonae xua ira tsewa iya peponaewa. Ichitha poxonae Egipto nacuamonae baraxoya iyiya daxita bunothopa. 
\p  
\v 30 Israel pia pemomoxi susatopiwi tatsi yabara jume cowʉnta xua Nacom yawenapaeba. Daxota matawacaicha tocuecueniya enaponeiba pemʉxʉbʉrʉ iya siete po matacabibe xua barapo Jericó tomara peyacaincha toxorotsi dutsiwa xua be iboton. Barapoxonae barapo Jericó tomara peyatoxorotsiya yacaincha dutsiwa baxua iratha jopiya.  
\v 31 Bayatha yabʉyo powa Jericó tomarapiwayo Rahab yabara jume cowʉnta Nacom pon Israel pia pemomoxi susato jiwi tatsi pia Nacom tatsi. Daxota bapowa jopa barʉ tʉpaeyo piamonae xua pia tomarapiwixae poxonae tomarapiwi werapa jopa pejume cowʉntsixae Nacom pon Israel pia pemomoxi susato jiwi tatsi pia Nacom tatsi. Bapowa Rahab powa copiya bayatha pesi cui weiweinaewa pebiwitha. Poxonae Israel pia pemomoxi jiwanamonae namicha pata xua pecui amanayabiya taenexa Jericó tomaratha, bapoxonae barapowa Rahab matenta weyataeya waba, xua barapo israelmonae jiwanamonae wabatsi pia botha tatsi. 
\p  
\v 32 Jopa equeicha paebinyo xua equeicha pinmonae tayabara paebiwa pomonae pejume cowʉntsiwi Nacom. Jopa neyapu jʉpaeyo xua jopa taxeinaewa matacabi xua tacueicueijeinexa Gedeón yabara, irʉno Barac yabara, irʉno Sansón yabara, irʉno Jefté yabara, irʉno David yabara, irʉno xua Samuel yabara, irʉno pomonae Nacom pia peitorobi jume petapaebiwi tatsi yabara.  
\v 33 Daxita barapomonae jume cowʉnta Nacom. Ichamonae barapomonae jiwana, amanayaba ainya nacuanpiwitha, pejume cowʉntsixae xua Nacom yawenaena. Ichamonae pejume cowʉntsixae Nacom daxota jiwitha beta xaniwaicha canamata itoroba. Ichamonae pejume cowʉntsixae Nacom barapomonae catsibatsi pocotsiwan xua bayatha Nacom yabara tsiwʉnae muxu duta. Ichamonae pejume cowʉntsixae Nacom, Nacom exana xua coibo acaba neʉthʉn, xua barapomonae jopa atene peexanaenexatsi barapo neʉthʉn.  
\v 34 Mataʉtano ichamonae pejume cowʉntsixae, daxota Nacom yawena barapomonae poxonae Nacom itaxutaba exana po isoto bichocono pin isoto xua barapomonae po isototha tautatsi. Barichi ichamonae pejume cowʉntsixae daxota Nacom capanenebiya tsaibi barapomonae poxonae muxu pejutebeibichi peopi sojeiwantha xua be cusi. Mataʉtano pomonae faefaena, equeicha Nacom daunwei exana. Daxota barapomonae daunwei poxonae naba. Ichamonae Nacom peyawenaexae amanayaba pia peaitafaetabi jiwichi xua ainya soldadomonaein bicheitontha.  
\v 35 Barichi ichamonae yabʉxi pejume cowʉntsixae equeicha caewa piamonae xeina, pomonae equeicha caewa taasʉtsi petʉpaewa weya. 
\p Ichamonae itacʉpatsi xua panenebiya xua jopa werapae tsane xua icha poxonae Nacom itawetatsina. Nama barapomonae jopa bepaebiyo baxua daxota barapomonae werapa poxonae bichocono caitacueintatsi ichamonae. Barapomonae, pomonae pewerapaewi yaputane xua pejume cowʉntsixae Nacom, daxota Nacom equeicha asʉ exanaena xua barapomonae pepatsiwa tsane Nacom pia nacuatheicha.  
\v 36 Ichamonae pejume cowʉntsixae Nacom, bichocono ajʉntʉcuicoyenetane tsipei bichocono cui capanebatsi ichamonae. Mataʉtano ichamonaerʉ cuaintebatsi. Ichamonaerʉ penain mʉtontha cʉbebatsi. Ichamonaerʉ jiwi pecʉbi bontha cuaranobatsi.  
\v 37 Ichamonae pejume cowʉntsixae Nacom, ibotontha tʉpa exanatsi poxonae cuinbabatsi. Mataʉtano ichamonae werapa poxonae epa nantarabobiya thabebatsi seruchotha. Irʉrʉ ichamonae pejume cowʉntsixae jutebatsi peopi sojeiwantha xua cusin. Ichamonaerʉ pejume cowʉntsixae Nacom, taseicatsi pexaewa, yawa taseicatsi bon, xua daxota saya dubenanaebiya, yawa naxataba oveja bocoton xuano xua cabra bocoton. Barapomonae acopeibiwi tsobenae, barainebatsino abe taexanebatsino.  
\v 38 Pomonae barapo cae pin nacuathepiwi Nacom pejume cowʉntsiwi yabara paebatsi, yabara jeichiche: “Jopa be cui copatichi xua barapomonae pejinompaewa tsane watomaratha”, yabara jeichichi. Ichitha barapomonae Nacom tsita ainya cuichi beyacaincha barapomonae pomonae barapo cae pin nacuathepiwixae. Barapo Nacom pejume cowʉntsiwi dubenanaebiya ichaxota ira xuepana susato tsurucuae nacuatha. Mataʉtano barapomonae demxuwantha dubenanaebiya, mʉthʉnthano jinompa, xuano xua duwei pia mʉthʉntha jinompano. 
\p  
\v 39 Bequein Nacom yabara paeba barapomonae xua beta peexanaexae pejume cowʉntsixaetsi, daichitha cataunxuae abʉ barapomonae jopa catsibichi pocotsiwa Nacom bayatha yabara tsiwʉnae muxu duta barapomonae, mataʉtano xua caeinthano.  
\v 40 Barapomonae cataunxuae abʉ jopa catsibichi baxua tsipei Nacom naca yabara nanta xeina xua bexa tsane irʉ naca catsibina pocotsiwa bapon tsita xanepanatsi. Pocotsiwa bapon catsibina xua apara barapomonae Nacom naca cayawa muxuna jʉntʉ coyene xanepana exanaena. 
\c 12  
\s1 Meje yabara xua waxainchi bewa exanaponaetsi icha Jesús ichi poxonae exanapona 
\p  
\v 1 Pomonae xuaunxuae yabara pacata tinatsi barapomonae bichocono pin bicheitomonae, pomonae pejume cowʉntsiwi po coyene xua Nacom yawenapaeba. Barapomonae naca tsita itapeinya xeina xua awiya xanepanaya jume cowʉnta dubenanaebiya bequein atene exanatsi ichamonae. Baxua naca cuiduba xua irʉ bewa xanepanaya jume cowʉnta dubenanaebiyaeinchi bequein naca atene exana ichamonae. Barabʉ waxainchi daxita nacui barapentinchi abe waexanae cuiru coyenein pocotsi coyenein xua jopa naca yawenaeyo xua Nacom beta wataexanaewatsi. Barabʉ waxainchi beitatemaya ajʉntʉsʉya awiya exanapoinchi pocotsiwa Nacom naca cui itoroba.  
\v 2 Saya meisa Jesús jʉntanainaeya jinompatsi wanaca yawenaenexa. Bapon copiya bichocono pejume cowʉntsixae Nacom daxota bapon wanaca canamataxeinaein xua wajume cowʉntsinexa. Mataʉtano bapon betiya naca exana xua beta wajume cowʉntsiwa poxonae cataunxuae awiya wajinompaewa barapo cae pin nacuathe. Jesús bara saya copata xua atene exanadutatsi naetotha ichamonae poxonae tʉpa exanatsi. Bapon jopa auriyo bequein naetotha tʉpa exanatsi jiwi peitʉtha tatsi. Ichamonae ba bichocono aura xua poxonae petʉpae exanaewatsi naetotha. Nama bapon Jesús jopa auriyo poxoru nayabara yaputane xua pirapae poxonae nacana cui wetinchi xua atene exanatsi, xuano xua poxonae tʉpa exanatsi naetotha, bapoxonae bichocono jʉntʉ coyene weiweinaena. Anoxuae bapon Jesús eca pia pexeinya peecaethopeibiwatha xua Nacom pia pecoxa weya tatsi xua itabocotheicha ichaxota Nacom eca pia pexeinya peecaethopeibiwatha. 
\p  
\v 3 Jesús pacayabara jʉntanainaponde xua bayatha po coyene Jesús abeya exanatsi pomonae abe peexanae jiwi. Jesús awiya beitatemaya saya popona poxonae bequein bichocono atene exanatsi barapomonae pomonae abe peexanaewi. Daxota jopa paraichinde xua poxonae jopa pana najʉntʉ coyene tsacabim. Mataʉtano jopa paajʉntʉcoyenefaetabinde xua poxonae daxota jopa beta painya taexanaewa Nacom.  
\v 4 Painya jʉntʉ coyenewatha pajume torobabame abe peexanae cuiru coyenein xua painya neexanaeyainwa barapo coyenein. Bapoxonae jopa panaitematsim xua painya nejume cowʉntsiwa Nacom. Bequein bara baxua daunwei paexaname ichitha awiya cataunxuae jopa pawerapaem xua barapo coyene painya neexanaexae icha bayatha Cristo ichi xua tʉpa xua bichocono daunweya peexanaexae barapo coyene.  
\v 5 Paxam pajʉntemainame xua bayatha Nacom paca muxuweta xua paxam bara Nacom pia pexui tatsi pam. Baxua yabara Nacom Pejume Diwesitha paca jeye: 
\q1 “Tapexui pam, jopa amsiya payabara nanta 
\q1 xeinaeinde pocotsiwa yabara paca muxuwetatsi 
\q1 tapaca cuidubinexatsi. 
\q1 Poxonae atene paca exanatsi jopa 
\q1 ajʉntʉcoyenefaetabiya pajinompaeinde xua 
\q1 yabara tapana nejume cowʉntsiwam. 
\q1  
\v 6 Tsipei muxuwetsiya cuiduban pomonaetha 
\q1 pomonae antobein. 
\q1 Mataʉtano atene exananno pomonaetha pomonae 
\q1 tapexui tsicotan”, jei Nacom Pejume Diwesitha. 
\m  
\v 7 Awiya jʉntema pajinompare poxonae bequein Nacom paca atene exana xua paca necacuidubixae. Baxua Nacom pacata exana tsipei paca nacana exana pia pexui tatsi pam. Dapo pexuyo ajibi, po pexuyo jopa paxa muxuwetsiya cuidubichi xua poxonae icha bichocono antobetsi paxa.  
\v 8 Nacom pia pexui muxuwetsiya cuiduba. Icha Nacom jopa paca muxuwetsiya cuidubichipae, bapoxonae paxam jopa Nacom pia pexui tatsi pam tsipae. Saya be catsa pexui pam tsipae icha be pocotsi pexui ichi po pexui seicaya icha paxa barompa.  
\v 9 Mataʉtano caena bayatha poxonae cataunxuae pexuichi waxeiwi naca atene exana wanaca muxuwetsiya cuidubixae. Daichitha waxeiwi barʉ cui itura jinatsi. Waxainchi bewa ichichipaetsi xua waexanaewatsi pocotsiwa naca cui itoroba pon Waxa Nacom, pon itabocotheicha popona. Barapocotsiwa bewa exanaeinchi beyacaincha pocotsiwa exanatsi xua poxonae waxeiwi naca cui itoroba poxonae jinompatsi barapo cae pin nacuathe. Baxua bewa exanaeinchi Waxa Nacom pon itabocotheicha popona wanaca catsinexa peajʉntʉyapusʉ coyenewa.  
\v 10 Waxeiwi poxonae pexuichi barapo cae pin nacuathe saya caepatiyo naca muxuwetsiya cuiduba. Baxua nacata exana icha be pocotsi coyeneya xua ichichipa xua tsita xanepanatsi. Ichitha nama Nacom naca muxuwetsiya cuiduba wanaca yawenaewa tsane. Mataʉtano baxua nacata exana xua wanaca cana exanaewa tsane xua bichocono wajʉntʉ coyene xanepanaewichi, icha Nacom ichi xua bichocono pejʉntʉ coyene xanepanaein.  
\v 11 Poxonae naca atene exana bara bapoxonae nanta xeinatsi xua jopa nacata xaexaenaecaeyo, tsipei bara xaniwaicha naca atene exana. Ichamonae yabara cui copaba xua bara nacuiduba xua poxonae bequein Nacom atene exana, pemuxuwetsiya cuidubixae. Barapomonae jame jopa natsicuentsi tsane xua abe peexanaexae bapontha. Barapomonae xeinaena pejʉntʉ coyene xanepanaewa Nacomtha xuano jʉntema dubenanaebiyaena. 
\s1 Meje yabara xua poxonae Nacom naca muxuweta xua jopa bewa Nacom itawetichi 
\p  
\v 12 Yaitama pajʉntʉ coyene faefaename, xua painya nejume cowʉntsiwa daxota painya coutha pana najʉntʉ coyene tsacabare xua beta painya nejume cowʉntsiwa tsane Nacom. Mataʉtano xua payabara ajʉntʉcoyenerewem tsaibi ichawan. Pana najʉntʉ coyene itorobare xua awiya ayapusʉya painya neexanaponaewa tsane.  
\v 13 Painya xoba icha diwesi pajume cowʉntame po diwesi xua jopa Nacom Pejume Diwesi tatsi. Ʉ meisa paexanare pocotsiwa Nacom Pejume Diwesitha yabara paeba xua beta painya nejume cowʉntsiwa. Icha baxua paexanaetsipame irʉ ichamonae barichipae. Bequein barapomonae copiya jʉntʉ coyene faefaenaetsipa pejume cowʉntsiwatha ichitha bapoxonae beta exanaponaetsipa xua pejume cowʉntsiwa pia paca cui taexae. 
\p  
\v 14 Nantiya daxita jiwi ajʉntʉyapusʉya betiya pana nabarʉ jʉntemiya jinompare. Bichocono pana najʉntʉ coyene xanepana exande Nacomtha xua jopa painya nenatsicuentsinexa xua abe painya neexanaexae bapontha, xua painya netaenexa bapon. Tsipei pomonae jopa xeinaeyo barapo coyene jopa itacʉpaetsi xua Nacom petaewatsi tsainchi.  
\v 15 Dota pam xua ichamonae pomonae paxam jiwana pam pia xoba jopa ichipaeyo po coyenewa Nacom yawena barapomonaetha pia peantobewaxae. Mataʉtano barapo ichamonae pomonae painyamonae jiwanaxae pia xoba abe exana ichamonae peitʉtha tatsi xua daxota irʉ ichamonae pebarichinexa xua abe peexanaewa.  
\v 16 Ichamonae pomonae paxam jiwana pam, pia xoba nota icha yabʉxitha, powaxi jopa xapain barompaya pia seurixi. Mataʉtano dota pam xua ichamonae paxam jiwana pam jopa tsita pecui pawi tsainchi po coyenewan xua Nacom piawan tatsi. Barapo coyene Esaú exana pon caena bayatha tʉpa. Bapon Esaú jopa tsita ainya jume cuiyotsi pocotsiwa bayatha Nacom yabara tsiwʉnae muxu duta xua bepa pinae Nacom Esaú yaweneibichi. Barapon Esaú piyainxae peyapintha Jacobtha cata po coyene xua pia coya pecanamataxeinae coyenewa po coyene matapin ba xeina. Tsipei Esaú jopa jume cowʉntsiyo Nacom daxota nata caenaeta barapo coyenewa xua nata matomata pexaewa xua saya cae penabanaewiyo.  
\v 17 Paxam payaputaneme xua bapon Esaú pirapaeyo ichichipa xua equeicha caewa pexeinaewa tsane xua po coyene peainya cui coyene po coyene matapin ba xeinaena xua paxa catatsi. Barapo coyene po coyene xua coxiyʉn tawʉca pexanto pon matapin xua Nacom peyawenaewa tsane. Ichitha bapon Esaú peyapin cata barapo coyene xua matomata pʉpara. Bequein bara bapon auranaya caunutsiya wecoyeya paeba, ichitha jopa itacʉpaetsi xua caewa xeinaena barapo coyene po coyene xua ba matapin xeina. 
\p  
\v 18 Caena bayatha pia Nacom caquita ponaetsi Israel pia pemomoxi susato jiwi tatsi demxuwa itabaratha umena poxonae Nacom Moisés catatsi pia peitorobi coyenewa. Barapomonae jume tane pocotsiwa Nacom paeba yawa tane demxuwa. Ichitha nama paxam jopa beparaichim. Jopa panantawenonaem xua paumenaename demxuwa itabaratha xua painya necaquita ponaenexa Nacom. Poxonae Israel pia pemomoxi susato jiwi tatsi umena barapo demxuwa itabaratha, baxoyo pin isoto uncueica barapo demxuwatha. Mataʉtano bapoxonae bichocono quirei, yawano nobonno. Mataʉtano pin joibo baxoyo uncueica. Ichitha jopa bara paichim, jopa pataem baxuan.  
\v 19 Paxam jopa pajume taem peobiwa jume po peobiwa pewʉn trompeta nain matawʉn, icha poxonae barapo Israel pia pemomoxi susato jiwi tatsi ichi xua jume tane barapo trompeta jume. Paxam jopa pajume taem Nacom pejume poxonae Nacom cueicueijei barapo Israel pia pemomoxi susato jiwitha tatsi barapo demxuwatha. Pomonae jume tane barapo jume, barapo israelmonaexae Moisés jume itorobatsi xua bepa pinae Nacom equeicha jopa pepaebiwa tsane.  
\v 20 Barapomonae baxua Nacom jume matawentatsi tsipei bichocono pijunuwi xua pocotsiwa Nacom itorobina. Poxonae itoroba Nacom jeye: “Pon nataxuna jayata barapo demxuwa bewa bapon pabexubim ibotontha. Jopa ainya cuiyo bequein icha metha duwein tsipae, xuano icha metha bequein jiton tsipae”, jei Nacom.  
\v 21 Barapomonae bichocono junuwa pocotsiwa xua tane barapo demxuwatha irʉ Moisés bichocono junuwa. Daxota paeba, jeye: “Bichocono tajunuwi jijiyan”, jei Moisés. 
\p  
\v 22 Jame anoxuae painya nejume cowʉntsixae Nacom, bapon paca yabara cui copata xua painya nepatsiwa tsane bapon pia tomaratha tatsi, po tomara pewʉn Jerusalén tomara. Barapo tomara eca ichaxota po demxuwa pewʉn Sión. Barapo tomara Nacom pia tomara tatsi pon ataya tsitecaeya asʉya pepoponaein. Barapo tomara xua pepa Jerusalén tomara Nacom pia nacuatheicha tatsi eca. Mataʉtano papatsiname baxoteicha ichaxota jinompa ayeimonae matatsunpiwi, xua weiweinaeya nanacaetutsina xua pia nanabarʉ wʉnae jainchinexa Nacom.  
\v 23 Mataʉtano pajume cowʉntame Jesús xua painya nepatsinexa ichaxota Nacom piamonae tatsi nacaetuta pomonae Nacom pia diborotha wʉn dubena xua itabocotheicha. Barichi papatsiname Nacomtha, pon yabara paebina daxita jiwi xua penatsicuentsiwa xua abe peexanaexae. Mataʉtano papatsiname ichaxota jiwi pia jumopein tʉnaxʉ tatsi jinompa pomonae xua beta exana xuano xua Nacom beta cana jʉntʉ coyene wetsiya xanepanaya exana.  
\v 24 Mataʉta papatsiname ichaxota Jesús popona pon jiwi peyabara jume yawenaein Nacomtha xua jiwi pepatsiwa tsane Nacomtheicha. Mataʉtano bapon nacata catsica Nacom pia pena peyabara tsiwʉnae muxu dutsiwa tatsi. Bapon pia pejana tatsi xua barapo jana pepichapabarenaexae Nacom naca yabara jʉntʉ coyene jʉntemaina abe waexanae cuiru coyenein. Barapon pia pejana tatsi jiwi beta cana exanatsi beyacaincha Abel pia pejana tatsi. Tsipei poxonae bapon bexotsi, jopa nantawenonaeyo xua bapon peyantomatsiwatsi. Ichitha poxonae Abel bexotsi, nantawenona xua peyantomatsiwatsi. 
\p  
\v 25 Dota pam. Jopa bewa pajume itawetsim Cristo pon wanaca tsipaebixae Nacom yabara. Pomonae bayatha Nacom jume itawetatsi poxonae bequein Moisés muxuweta jiwi barapo irathe Nacom nexa, barapomonae jopa Nacom capanenebiyaeyo xua atene abe pia peexanaexae. Waxainchi jopa naca itacʉpaeyo xua panenebiyatsi xua atenetsi abe waexanae coyenewantha icha jopa Nacom jume naitaewatichi xua itaboco wetsica wanaca tsipaebiwa. Waxainchi bichocono nama atenetsi, beyacaincha barapomonae xua atene abe pia peexanae coyenewantha pomonae Moisés barʉ popona.  
\v 26 Caena bayatha Nacom tsipaeba barapo irathepiwi tsique poxonae Moisés popona, Nacom pia jumetha ira jijiyata exana. Ichitha anoxuae Nacom tsiwanaya jeye: “Abʉ equeicha bara caeto tsane ira jijitsin yawano itabocotheichano jijitsin”, jei Nacom.  
\v 27 Poxonae Nacom jei: “Abʉ equeicha bara caeto tsane”, jei, naca yaputane exana xua Nacom aichurucuae exanaena pocotsiwan xua barapo cae pin nacuathe xeina pocotsiwan itacʉpatsi xua pejijiyatsiwatsi. Saya meisa jopa aichurucuae exanae tsainchi pocotsiwan xua jopa itacʉpaetsi xua pejijiyatsiwatsi xua pocotsiwan Nacom piamonaetha peyabara tsiwʉnae muxu dutsi coyenewa.  
\v 28 Nacom pia nacua, ichaxota Nacom itoroba, yawano xua waxainchi baxota itorobatsi, barapo nacua jopa itacʉpaetsi xua jijiyatatsi xua aichurucuae peexanaenexatsi. Daxota bewa jeichichi Nacomtha: “Nacom, maisa pajʉntʉ coyene weiweinan pebaxuaxae”, bewa jeichichi. Poxonae Nacom wʉnae jaintinchi waxainchi bewa yabara nanta xeinaetsi pia pejʉntʉ coyene xanepanae coyenewa tatsi. Mataʉtano bewa bapon cunuwiya wʉnae jaintichi pia peayapusʉwa pexeinaexae.  
\v 29 Wanacom weraweraca cana exana jiwi, pomonaetha pomonae jopa pejume cowʉntsiwichi. Nacom baxua exanaena icha be poxonae nawa ichi xua poxonae daxita topowa poxonae taxua. 
\c 13  
\s1 Meje yabara xua pocotsiwa bewa exanaetsi xua pocotsiwa Nacom tsita xanepanatsi 
\p  
\v 1 Jopa pana nacui barapentsinde xua caemonae nantiya painya nenaantobewam pomonae be painya eweicho jiwi painya nenatsicotae jiwi pam painya nejume cowʉntsixae Jesucristo.  
\v 2 Jopa pajʉntemainaeinde xua beta painya netaexaneibiwa tsane pomonae pateiba painya bontha pomonae irʉ pejume cowʉntsiwi Nacom tsipei metha beya jemeicha barapomonae tsipae pomonae Nacom itoroba xua beta painya nepacata exanaenexa. Caena bayatha ichamonae pexaewa apata poxonae matha jemeicha pia botha tapatatsi, xua poxonae jopa xapain yaputaeyo xua deta cou apara matatsunpiwi. 
\p  
\v 3 Payabara nantʉ coyene xeinare pomonae jiwi pecʉbi botha cuaranobebatsi painya neyawenaenexa barapomonae icha be poxonae paichim xua irʉ jiwi pecʉbi botha paca cuaranobarʉ. Payabara nantʉ coyene xeinare pomonae peraxa jʉbebatsi xua ichamonae exana painya neyawenaenexa barapomonae. Tsipei paxam irʉ jiwi pam, paca yabara itacʉpatsi xua ichamonae paca necaperaxa jʉbiwa. 
\p  
\v 4 Paxam bewa beta pananta xeinaem poxonae jitha paename xua barapo coyene paca tsita ainya cui. Daxota jopa bewa ichawa beya panasi cui weiweina exanaem poxoru painya seurixi bayatha paxeiname. Tsipei Nacom yabara paebina jiwi xua penatsicuentsiwa xua abe peexanaexae pomonaetha pomonae jopa xapain exanaeyo xua be poxonae yabʉxi jeita xua po coyene jiwi jopa yabara copatsiyo. Mataʉtano barichi Nacom yabara paebina jiwi xua penatsicuentsiwa xua abe peexanaexae pomonaetha pomonae nasi cui weiweina exana poxonae bequein pia seurixi xeina. 
\p  
\v 5 Jopa bichocono paichichipaeinde paratixi. Jame maisa pajʉntʉ coyene weiweinare painya nexeinaexae pocotsiwa Nacom paca catsiba. Baxua paexande tsipei Nacom jeye: “Bapana jopa compa capopona exanae tsainchi. Bapana jopa cacuenta ponae tsainchi”, jei Nacom.  
\v 6 Daxota naca itacʉpa xua jume cowʉntsiya jeichichi: 
\q1 “Nacom, pon jiwi Pecanamataxeinaein, 
\q1 bapon pon xua tana neyawenaein. 
\q1 Jopa junuwinyo poxonae jiton xua 
\q1 abe tana exanaewa”, jeichichi. 
\p  
\v 7 Payabara cui jʉntanainare painya nepaca canamataxeinaewi pomonae bayatha paca cuiduba Nacom Pejume Diwesi. Barapomonae pacui taema, tsipei barapomonae beta jume cowʉntsiya jinompa beya poxonae barapomonae yacuiya werapa. Paxam beta pajume cowʉntsiya jinompare icha barapomonae ichi xua beta jume cowʉntsiya jinompa. 
\p  
\v 8 Jesucristo saya tsitecaeya pepu jʉpa exanaponae. Baxua exana caena bayatha, anoxuaeno, xuano xua bara ataya tsitecaenano xua jiwi beta peyawenaewatsi.  
\v 9 Daxota jopa pacopatsinde xua ichamonae painya nepaca cuidubiwa icha pecuidubi diwesin po diwesin pia diwesin barompa, po diwesin jopa Cristo pia diwesin tatsi. Jame ainya cui xua naajʉntʉyapusʉ exainchi Nacom pia peantobe coyenewatha. Po coyenein xua itoroba xua penabanaewa yabara barapo coyenein jopa naca ajʉntʉyapusʉ exanaeyo Nacomtha. Barapo peitorobi coyenewan bapana jopa yawenaetsi pomonae bequein xua exanapona barapo coyenewan. 
\p  
\v 10 Waxainchi xeinatsi barompaya wacoyene po coyene be poxonae xua tuxusi exanatsi Nacom nexa poxonae caein naetotha naca tsitʉpa xua daxota Nacom jopa tsitatsi xua penatsicuentsiwa xeinatsi xua abe waexanaexae. Baxua apara xua poxonae Cristo tʉpa naetotha abe waexanae cuiru coyenein nexa. Po sacerdotepiwi xua nacuita Nacom pia tututha anserabocototha xua caena bayatha barapocotsi coyene jopa itacʉpaetsi xua pexeinaewa barapo coyene tsipei barapo sacerdotemonae cataunxuae jutebeiba duwei jiwi abe pia peexanae cuiru coyenein tatsi nexa.  
\v 11 Caena bayatha pon pepa sacerdotepin, duwein jana capaneiba ichaxota po tutu yatsicaewa Nacom pia tutu tatsi po tutu bichocono peainya cui tutu. Bapon baxua exana xua Nacom peyabara jʉntemainaenexa jiwi abe pia peexanae coyenewan tatsi. Bapoxonae barapo duwein ompin tautatsi tomara cuariya beya.  
\v 12 Cristo barichichi. Tomara cuariya beya tʉpa exanadutatsi naetotha, xua daxita jiwi pejʉntʉ coyene xanepana exanaenexa tsainchi Nacom. Cristo pejana pichapabarenaexae poxonae tʉpa, Nacom jopa tsitatsi xua jiwi penatsicuentsiwa xua abe peexanaexae.  
\v 13 Ichamonae Jesús aura exanatsi poxonae tomara cuariyatha tʉpa exanadutatsi naetotha. Barabʉ copatatsi xua ichamonae irʉ naca aura exana wajume cowʉntsixae Jesús xua daxota naca atene exana icha Jesús ichichi.  
\v 14 Barapo cae pin nacuathe jopa xeinaetsi tomara, po tomara ataya tsitecaeya ayapusʉ tsuncuae. Jame wʉnaeya ewatatsi, po tomara xua bexa patopaetsica Nacom pia nacua wetsica tatsi.  
\v 15 Daxota waxainchi bewa wʉnae jainteibichi Nacom tsipei Jesucristo naca tsitʉpa. Poxonae Nacom wʉnae jaintatsi wajumetha baxua icha be poxonae ichi poxonae duwein tautatsi poxonae tuxusi exanatsi Nacom nexa. Nacom wʉnae jaintatsi jeichichi: “Nacom maisa bichocono nejʉntʉ coyene xanepanaein”, jeichichi.  
\v 16 Jopa pajʉntemainaeinde po coyene xua beta painya taexanaewa ichamonae. Painyawan panata jiwana wetsabare pocotsiwan xua paxeiname xua painya necatsibinexa pomonae xua jopa xeinaeyo. Tsipei poxonae baxua paexaname, bichocono xanepana icha be ichi poxonae paexaname poxonae duwein patautame xua patuxusi exaname Nacom nexa pocotsiwa Nacom tsita xanepanatsi. 
\p  
\v 17 Paexande pocotsiwa paca cui itoroba pomonae painya nepacacanamataxeinaewi. Mataʉtano saya barapomonaetha pajume naitaeware. Pabarʉ cui itura jinare barapomonae tsipei barapomonae paca jʉntʉ coyene eeniya ewata. Barapomonae yaputane xua bexa tsane Nacom barapomonae yabara paebina xua penatsicuentsiwa xua abe peexanaexae icha barapomonae jopa beta paca jʉntʉ coyene eeniya ewatsiyo. Bara pacopare xua barapomonae jʉntʉ coyene weiweina exanatsi poxonae paca jʉntʉ coyene eeniya ewata xua jopa pejʉntʉ coyene wecoyeinexa xua abe painya neexanaexae. Tsipei icha barapomonae jʉntʉ coyene wecoyei baxua xapain jopa paca yawenaeyo. 
\p  
\v 18 Nacomtha painta wʉcare. Bara payaputan xua pata jʉntʉ coyene pana netsipaeba xua pinae bara beta paexanan. Paxan paichichipan xua awiya beta pata exanaewa daxita coyenewan.  
\v 19 Paca wʉcatsi xua painya inta wʉcaenexam tsane Nacomtha xua Nacom bara inta pecopatsinexa xua methaunxuae tapaca siwa ponaewa tsainchi equeicha. 
\s1 Meje yabara xua najume wetsiya paeba pon tina 
\p  
\v 20 Nacom, barapon peyajʉntʉ coyene jinaein xua jʉntema pepoponaewa. Barapon Nacom Jesús caewa asʉ exanatsi petʉpaewa weya pon Wanacanamataxeinaein. Bapon Jesucristo pon pepa Peewatsin xua daxita carepaya jiwi peewatsinchi icha be pocotsin oveja beta peewatsin ichi. Bapon Jesucristo pejana pichapabarenaexae poxonae tʉpa, canacui wetsiya exana po coyene xua bayatha Nacom yabara tsiwʉnae muxu duta po coyene xua ataya tsitecaeya tsane.  
\v 21 Barabʉ barapon Nacom paca jʉntʉ coyene xanepana exanaena xua jopa painya nenatsicuentsinexa xua abe painya neexanaexae. Mataʉtano bʉ bara paca catsina xua daxita pocotsiwan panantawenoname xua xuan xanepanaya painya exanaenexa po coyenein Nacom ichichipa. Barichi barabʉ Jesucristo pia peayapusʉwa naca cana exanaena xua exanaeinchi po coyene Nacom tsita xanepanatsi. ¡Barabʉ jiwi Cristo ataya wʉnae jaintinchi pexeinaexae peayapusʉ coyenewan! Je, bara ichi tsane. 
\p  
\v 22 Tamonae pam, pomonae pam irʉ painya nejume cowʉntsixae paca itorobatsi xua bepijawa jopa payabara jume cui aitaconaeinde po jumein paca muxuwetatsi, barapo tsica cartiyo po cartiyo imoxoyo jume tsecae.  
\v 23 Maisa ichichipan xua painya neyaputaewa tsane xua Timoteo bayatha copatatsi jiwi pecʉbi bo weya. Barapon be wayapin watsicotaein pejume cowʉntsixaerʉ Jesucristo. Ichaunxuae bapon taxantha patopaena bapon methaunxuae nebarʉ iya tsane painya xainya beya xua equeicha tapaca siwa ponaewa tsainchi. 
\p  
\v 24 Painta jacobare daxita pomonae painya nepaca canamataxeinaewi. Irʉno painta daxita jacobare pomonae pejume cowʉntsiwirʉ Jesucristo. Italia nacuamonaepiwi barapomonae paca jacoba, pomonae irʉ pejume cowʉntsiwi. 
\p  
\v 25 Barabʉ Nacom daxita pam bichocono paca yawenaena pia painya nepaca caantobewaxae.