\id 1JN - Cuiba NT -Colombia 2010 (DBL -2013) (DBL -2013) 
\h 1 SAN JUAN 
\toc1 1 San Juan 
\toc2 1 Juan 
\toc3 1 Jn 
\mt1 Meje Po Carte Juan Copiya Tatina, Pomonae Jesucristo Pejume Cowʉntsiwi Tatinatsi. Barapo Carte Peopi Carucuae Carta. 
\c 1  
\s1 Meje yabara po diwesi xua pon naca ajʉntʉyapusʉya exana 
\p  
\v 1 Pacata yabara tinatsi pon pewʉn “Pejume”, baraichi, pon jiwi ajʉntʉyapusʉya exainchi. Bapon asʉ caena bayatha poxonae Nacom abʉ cataunxuae jopa exanaeyo wanacua. Poxonae bapon naexana wanacuatha, bapoxonae bexa poxonae bapon cueicueijei diwesi bara bapoxonae barapon pajume tan. Barapon bara yatsicaya patan. Yawa bapon bara pacobe jayabeiban.  
\v 2 Barapo peajʉntʉyapusʉwa Nacom exana, po peajʉntʉyapusʉwa xua ataya tsiteca, xua pata yabara yaputaewa baxua. Barapon Nacom Pexanto tatsi xeina barapo peajʉntʉyapusʉwa, mataʉtano patan barapon. Daxota yabara paca tsipaebatsi bapon. Yawano daxota yabara paca tsipaebatsi barapo peajʉntʉyapusʉwa xua bapon xeina, pon Paxatha peecaexae.  
\v 3 Paca tsipaebatsi xua bayatha patan yawa xua pajume tanno, caemonae painya naexanaenexa paxantha, pebʉrʉya wajume cowʉntsixae Jesucristo. Icha paxan paichin xua Nacomtha Waxatha caemonae panaexanan yawa Pexantotha pon Jesucristo, bara paichinderʉ.  
\v 4 Daxota bara po coyenein pacata tinatsi xua bichocono pata tajʉntʉ coyene weiweinaewa tsane. 
\s1 Meje yabara xua Nacom pexainyei jʉntʉ coyene peyacuiya jinaein 
\p  
\v 5 Po diwesi Jesucristo pana cuiduba barapo diwesi xuya paca tsipaebatsi xua Nacom pexainyei jʉntʉ coyene peyacuiya jinaein. Bapon jopa xeinaeyo peacuirube coyenewa pejʉntʉ coyenewatha, tsipei bapon bichocono pejʉntʉ coyene xeicaein.  
\v 6 Icha jeichichi: “Waxainchi Nacom yawa jinompatsi, be caemonae pebʉrʉya nacayawa jinompatsi Nacomtha”, jeichichi, daichitha caena poxonae saya abe exanatsi, bapoxonae saya apara naerabatsi xua pocotsiwa wapaebiwa baxua, yawa naerabatsi xua exanatsi. Mataʉtano jopa yawa muxuna jinompaetsi Nacom pia pexainyei coyenewa tatsi.  
\v 7 Ichitha icha cajinompaetsipatsi Nacom Pejume Diwesi wajʉntʉ coyeneintha yawa xua exanaetsipatsi pocotsiwa xua Nacom ichichipa bara nexata pebʉrʉya caemonae naexanatsi. Jesucristo jana pichapabarena poxonae tʉpa, pon Nacom Pexanto tatsi. Barapon pon Nacom Pexanto tatsi petʉpaexae naetotha, daxota Nacom naca jʉntʉ coyene wejʉntemaina exana daxita abe waexanae cuiru coyenein. 
\p  
\v 8 Icha jeichichi: “Jopa abe taexanaewa”, jeichichi, apara bara wacoutha namuxujainyabatsi pocotsiwa wapaebixae. Mataʉtano wajʉntʉ coyeneintha jopa xeinaetsi pexainyei coyenewa.  
\v 9 Ichitha icha Nacomtha yabara tsipaebatsi xua abe waexanaewa, xua jeichichi: “Nacom auran yaitama abe exanan”, jeichichi, bapoxonae Nacom naca jʉntʉ coyene wejʉntemaina exana abe waexanae cuiru coyenein xua daxita naca wexuba. Baxua Nacom exana, tsipei bapon yabara barʉ jume cui cowʉntatsi xua peexanaewa tsane pocotsiwa pepaebiwa. Mataʉtano tsipei bapon bara xaniwaichiya peexanaein.  
\v 10 Icha jeichichi: “Jopa abe exanaetsi”, jeichichi, apara bara yabara jume cuiya exanatsi xua Nacom pon jiwi pemuxuitorobin, tsipei Nacom naca yabara jei: “Barapomonae abe peexanaewi”, naca yabara jei. Yawano Nacom Pejume Diwesi jopa xeinaetsi wajʉntʉ coyeneintha. 
\c 2  
\s1 Meje yabara xua Cristo pon wanaca yabara jume yawenaein Nacomtha 
\p  
\v 1 Pomonae be tamonae tapaca canatsicotaewichi pam, irʉ painya nejume cowʉntsixae Jesucristo, yabara pacata tinatsi barapo coyene xua abe painya neexanaeyainwa. Daichitha icha waxainchi abe exanatsi barapara waxainchi nantaʉtatsi Jesucristo pon wanaca yabara jume yawenaein Nacomtha xua Paxathaxae. Bapon mataʉta jʉntʉ coyene xanepanaya peexanaein.  
\v 2 Barapon Jesucristo petʉpaexae naca yantomata daxota Nacom naca capanepa abe waexanae cuiru coyenein weya. Jopa meisa waxainchi nexa apara bara irʉ daxita barapo cae pin nacuanthapiwi tatsitʉpatsi abe pia peexanae cuiru coyenein tatsi. 
\p  
\v 3 Icha jume cowʉntsiya exanatsi pocotsiwa Nacom pia peitorobi jume diwesitha paeba, nexata bara yaputainchi, xua bara xaniwaicha wayaputaewaba Nacom.  
\v 4 Icha ichʉn jei: “Xan Nacom yaputan”, jei, xua daichitha jopa exanaeyo pocotsiwa Nacom pia peitorobi jume diwesi paeba, apara bapon pon jiwi pemuxuitorobin, yawa pejʉntʉ coyenewatha jopa xeinaeyo pexainyei coyenewa.  
\v 5 Seicaya nama pon exana pocotsiwa xua Nacom itoroba pon waxainchi jiwanatsi, nexata bara yaputainchi xua bapon xanepanaya antobe Nacom. Daxota waxainchi nayaputainchi xua bara pebʉrʉya caemonae nacayawa jinompatsi Nacomtha.  
\v 6 Pon xua jei: “Nacom yawa poponan, caemonae pebʉrʉya nacayawa poponan Nacom”, jei, bapon bewa yajʉntʉ coyene wʉnaeya poponae, icha bayatha Jesucristo ichi xua bapon beta xanepanaya yajʉntʉ coyeneya popona. 
\s1 Meje yabara xua Nacom pia pena peitorobi diwesi jume 
\p  
\v 7 Tamonae pam pomonae bichocono tapaca caantobewichi pam, irʉ painya nejume cowʉntsixae Jesucristo, anoxuae pacata tinatsi barapo peitorobi diwesi xua jopa pena diwesiyo, tsipei caena bayatha barapo diwesi paxeiname poxonae aena pajume cowʉntame. Barapo peru itorobi diwesi jume caena bayatha pajume taneme.  
\v 8 Ichitha po diwesi xua anoxuae pacata tinatsi, barapo diwesi be pena diwesi naexana. Barapo peitorobi diwesi Cristo bara tsita pexainyei diwesichi, irʉrʉ paxam paca tsita pexainyei diwesi jume. Tsipei jiwi, copitha jopa yaputaeyo barapo Nacom pia pena peitorobi coyenewa tatsi ichaxota xua jei: “Nantiya pana naantobeinde”, jei. Icha be pocotsi coyeneya jʉta ichi poxonae jiwi jopa beta taeyo poxonae quirei. Ichitha anoxuae jiwi yaputane barapo Nacom pia pena peitorobi coyenewa tatsi daxota bara itacʉpatsi xua xanepanaya pejinompaewa, icha be pocotsi coyeneya jʉta ichi poxonae jiwi beta jinompa mataqueitha. 
\p  
\v 9 Icha ichʉn jei: “Xan Nacom yaputan”, jei, xua daichitha ita aenae-aeneya caseba nawita pontha xua irʉ jume cowʉntarʉ Cristo, bapon apara cataunxuae jopa yaputaeyo Nacom.  
\v 10 Pon antobe pontha xua irʉ jume cowʉntarʉ Cristo, bapon apara jame yaputane Nacom. Daxota bapon jopa exanaeyo po coyenein xua abe peexanaewa xua irʉ ichamonae peexanaewa tsane.  
\v 11 Ichitha pon ita aenae-aenei pontha xua irʉ jume cowʉnta Cristo, bapon acuicoyenebeya popona be pocotsin jopa yaputaeyo Nacom. Bapon jopa xanepanaya poponaeyo, icha be pocotsi coyene jʉta ichi poxonae pon peitata nacʉtsin catsawa pona poxoru jopa xapain taeyo. 
\p  
\v 12 Pomonae pexui pam, pacata tinatsi tsipei Nacom paca jʉntʉ wejʉntemaina exana abe painya neexanae cuiru coyenewan xua Jesucristo painya nejume cowʉntsixae.  
\v 13 Pomonae pinyon pam, pacata tinatsi tsipei payaputaneme Nacom, pon Waxa, pon ataya pepoponaein, pon copiya popona poxonae aena daxita forota. Pomonae pewowi jiwi pam, pacata tinatsi, tsipei caurimonae pia pentacaponaein tatsi paamanayabame poxonae paca jʉntʉ coyene jʉjʉta xua abe painya neexanaewam tsane. 
\p  
\v 14 Pomonae pexui pam, pacata tinatsi, tsipei payaputaneme Nacom, pon Waxa. Pomonae pinyon pam, pacata tinatsi tsipei payaputaneme Nacom, pon ataya popona, pon copiya popona poxonae aena daxita forota. Mataʉtano pewowi jiwi pam, pacata tinatsi tsipei bichocono paajʉntʉcoyenesʉm, yawano xanepanaya pajume cowʉntame Nacom Pejume Diwesi, mataʉtano tsipei pajʉntʉ coyene amanayabame caurimonae pia pentacaponaein tatsi. 
\p  
\v 15 Jopa bichocono paichichipaeinde pocotsiwa xua abe po cae pin nacuathe. Mataʉtano jopa bichocono pacayabara nanta xeinaeya ichichipaeinde xuan pocotsiwan xeina pomonae jopa pejume cowʉntsiwi pomonae jinompa po cae pin nacuathe. Icha ichʉn saya ichichipa bichocono xua xuan xeina pomonae jopa pejume cowʉntsiwi bapon jopa apara antobeyo Nacom, pon Waxa.  
\v 16 Penasi cui tatae coyene Nacom jopa itorobiyo xua barapo cae pin nacuathe tsique nexa. Apara pomonae jopa pejume cowʉntsiwi pia coutha exana barapo penasi cui tatae coyene. Mataʉtano Nacom jopa itorobiyo xua abeya peichichipae coyene xua peuwiya tae coyene. Mataʉtano Nacom jopa itorobiyo po coyenein xua peaebi coyenein ichamonaetha, xua pexeinaexae copei. Barapocotsi coyenein Waxa Nacom werena jopa pichipaeyo. Saya apara pomonae jopa pejume cowʉntsiwi pia coyene tatsi.  
\v 17 Barapo cae pin nacue weraweracaena, yawano muxuna weraweracaena xua xuan abe peexanae cuiru coyenein. Ichitha pon exana pocotsiwa Nacom ichichipa bapon jame ataya poponaena Nacomtha. 
\s1 Meje xua pexainyeiwa yabara, yawa xua penaerabiwa yabara 
\p  
\v 18 Pomonae pexui pam, bara nama imoxoyo tsane po matacabi Nacom daxita weraweraca exanaena barapo cae pin nacua. Bayatha pajume taneme xua jei: “Imoxoyo patopaena pon Cristo pia peaitafaetabinchi”, jei. Ichitha bayatha pata pinmonae, pomonae Cristo pia peaitafaetabiwichi. Daxota yaputainchi xua bara nama imoxoyo tsane po mataqueitha Nacom weraweraca exanaena barapo cae pin nacue.  
\v 19 Barapomonae pomonae Cristo pia peaitafaetabiwichi copiya naca barʉ nacaetuta poxonae nacaetuteibatsi, ichitha anoxuae bara weya naca wepu pona. Icha xaniwaicha barapomonae waxainchi jiwana tsipaetsi metha awiya cataunxuae naca barʉ nacaetuta dubenanaebiyaetsipa. Barapomonae waxainya weya pona, xua daxota jiwi taena xua barapomonae bara jopa wamonae jiwiyo xua jopa pejume cowʉntsi jiwixae Cristo. 
\p  
\v 20 Ichitha paxam Cristo paca cata Nacom pia Pejumope tʉnaxʉ tatsi pia painya nepaca barʉ jinompaenexa. Daxota paxam daxita yabara paca yaputane exana pexainyei coyenewa.  
\v 21 Paxam pacata tinatsi tsipei payaputaneme xua pexainyeiwa. Icha jopa payaputaetsipaem baxua, jopa pacata tinaetsipaetsi. Paxam payaputaneme pon ba xua xaniwaicha pepaebin jopa ba naerabiya paebiyo.  
\v 22 ¿Jintam pon pemuxuitorobinda? Pon xua jei: “Jesús apara Mesías aibi, pon Nacom itoroba”, jei, bapon apara pon pemuxuitorobin. Bapon Cristo pia peaitafaetabi jitontsi tsipei jume matawenta poxonae jiwi paeba xua pinae Cristo Nacom Pexanto tatsi xuano xua Nacom Cristo Paxa tatsi.  
\v 23 Pomonae xua Nacom Pexanto tatsi jume itawetatsi xua pejume cowʉntsiwa, barapomonae jopa nantaʉtsiyo Nacomtha xua be Paxa tatsi. Ichitha pon Nacom Pexanto tatsi xanepanaya yabara paebatsi, xua jei: “Jesús apara Mesías pon Nacom itoroba”, jei, jame bapon nantaʉta Nacom be Paxa tatsi. 
\p  
\v 24 Daxota painya jʉntʉ coyeneintha pajume xeinare Nacom Pejume Diwesi xua bayatha pajume taneme poxonae aena pajume cowʉntame. Icha painya jʉntʉ coyeneintha pajume xeiname xua pajume taneme bayatha, nexata bapoxonae pebʉrʉya caemonae pana naexanaename Pexanto tatsitha yawa coxiyʉntha, xua Nacomtha.  
\v 25 Mataʉtano Jesucristo yabara naca tsiwʉnae muxu duta, naca jei: “Peajʉntʉyapusʉwa paca catinchi po peajʉntʉyapusʉwa xua ataya tsiteca”, naca jei. 
\p  
\v 26 Yabara pacata tinatsi barapo coyenein pomonae xua painya nepaca muxujainyabiwa.  
\v 27 Ichitha paxam Nacom pia Pejumope tʉnaxʉ tatsi paxeiname, po pejumope tʉnaxʉ tatsi paca cata Jesucristo. Bapoxonae jopa nantawenonaeyo xua ichamonae paca cuiduba poxoru barapo Nacom pia Pejumope tʉnaxʉ tatsi paca cuiduba daxita coyenein. Po coyenein Nacom pia Pejumope tʉnaxʉ tatsi paca cuiduba baraxua pexainyeiwa, mataʉtano jopa pemuxuitorobiwa. Bara paichinde caemonae pebʉrʉya pana naexande Cristotha, icha Nacom pia Pejumope tʉnaxʉ tatsi ichi xua yabara paca cuiduba xua po coyene painya neexanaewa tsane. 
\p  
\v 28 Pomonae pexui pam, antʉbʉsʉya caemonae pebʉrʉya pana naexande Cristotha xua jopa wajunuwinexa xua poxonae bapon patopaetsica barapo cae pin nacuathe. Yawa caemonae pana naexande Cristotha xua jopa waaura tsane barapon peitabaratha xua abe waexanaexae poxonae patopaetsica.  
\v 29 Bayatha payaputaneme xua Jesucristo pon jʉntʉ coyene xanepanaya peexanaein. Barichi bewa payaputaename pomonae jʉntʉ coyene xanepanaya peexanaewi, barapomonae barapara Nacom pia pexui tatsi. 
\c 3  
\s1 Meje yabara xua Nacom pia pexuimonae tatsi 
\p  
\v 1 Maisa Nacom Waxa jopa juniya naca antobeyo. Daxota Nacom copata xua naca yabara jei: “Nacom pia pexui tatsi”, naca yabara jei. Jopa jume, bara barapomonaetsi. Daxota barapo cae pin nacuepiwi jopa naca yaputaeyo xua Nacom pia pexuimonaetsi, tsipei barapomonae jopa bayatha yaputaeyo Nacom.  
\v 2 Pomonae tapaca caantobewichi pam xua irʉ painya nejume cowʉntsixae Nacom, waxainchi bara Nacom pia pexuimonaetsi. Anoxuae cataunxuae jopa nayaputaetsi xua bexa tsane eta po coyeneya naca cana exanaena. Ichitha yaputainchi xua poxonae Jesucristo patopaetsica, waxainchi naexanaeinchi icha barapon jʉta coyeneya ichi. Tsipei bapon bara yatsicaewa taeinchi.  
\v 3 Pomonae Jesucristo wʉnae ewatatsi xua pepatopae wʉnae, barapomonae najʉntʉ coyene xanepana exana, xua jopa xeinaeyo peabe coyenewa, icha Jesucristo ichi xua bichocono pejʉntʉ coyene xanepanaein xua jopa xeinaeyo peabe coyenewa. 
\p  
\v 4 Daxita pomonae abe peexanaewi, barapomonae Nacom yabara paebina xua penatsicuentsiwa abe peexanaexae bapontha. Tsipei poxonae abe exana taacoibichi xua exana pocotsiwa Nacom pia peitorobi diwesi jume paeba.  
\v 5 Paxam payaputaneme xua Jesucristo patopeica barapo cae pin nacuathe, wanaca jʉntʉ coyene jʉntemaina exanaenexa abe waexanae cuiru coyenein. Mataʉtano payaputaneme xua bapon jopa abe exanaeyo.  
\v 6 Daxita pomonae pebʉrʉya caemonae naexana Cristotha, barapomonae jopa abe exana dubenanaebiyaeyo. Ichitha nama pomonae abe exana dubenanaebiya, barapomonae jopa Jesucristo yaputaetsi, mataʉtano jopa pijimonae tatsichi.  
\v 7 Pomonae pexui pam, jopa pacopatsinde xua bara ichamonae paca muxujainyabina. Pon ba xanepana exana bapon ba bichocono pejʉntʉ coyene xanepanaein, icha Jesucristo ichi xua bichocono pejʉntʉ coyene xanepanaya exanaein.  
\v 8 Ichitha pon ba xua abe exana ducuanaebiya, apara bapon ba caurimonae pia pentacaponaein tatsi pijimonae jiwanapin tatsi. Tsipei caena bayatha, poxonae aena Nacom daxita forota, caurimonae pia pentacaponaein tatsi bapon abe peexanaein. Nacom Pexanto tatsi patopeica xua cana coyene weraweraca peexanaenexa caurimonae pia pentacaponaein tatsi pia coyenewan tatsi. 
\p  
\v 9 Pomonae Nacom pia pexui tatsi barapomonae jiwana dapon ba aibi pon ba abe exana ducuanaebiya, tsipei bapon yajʉntʉ cui coyeneya popona Nacom pia cui coyenewa tatsi. Bapon jopa itacʉpaetsi xua abe exana ducuanaebiya tsipei Nacom pia pexui tatsi jiwanapin tatsi.  
\v 10 Daxota yaputainchi pomonae Nacom pia pexui tatsi, mataʉtano yaputainchi pomonae caurimonae pia pentacaponaein tatsi pia pexui tatsi. Yabara yaputainchi pomonae jopa xanepanaya exanaeyo, barapomonae jopa Nacom pia pexui tatsi. Mataʉtano yabara yaputainchi pomonae jopa antobeyo ichamonae pomonaetha pomonae irʉ pejume cowʉntsiwi, barapomonae jopa Nacom pia pexui tatsi. 
\s1 Meje yabara xua poxonae jei: “Caemonae pebʉrʉya bara nantiya naantobe tsainchi”, jei 
\p  
\v 11 Poxonae aena pajume cowʉntame, xua beya anoxuae, pajume taneme Nacom Pejume Diwesi. Barapo diwesitha jeye: “Caemonae pebʉrʉya bara nantiya naantobe tsainchi”, jei barapo diwesitha.  
\v 12 Waxainchi jopa bewa naexanaetsi icha ichi pon pewʉn Caín, pon caena bayatha tʉpa. Bapon Caín caurimonae pia pentacaponaein tatsi pia jiton tatsi. Bapon peweicho bexuba. ¿Eta xua metha Caín peweicho bexuba? Caín peweicho uwiya bexuba, tsipei pocotsiwa Caín exana Nacom nexa, Nacom tsita abetsi. Ichitha nama pocotsiwa Caín peweicho tatsi exana Nacom nexa baxua jame Nacom tsita xanepanatsi. 
\p  
\v 13 Tamonae pam, pomonae irʉ painya nejume cowʉntsixae Jesucristo. Painya xoba panantʉ exabame icha ichamonae paca ita aenae-aenei pomonae jinompa po cae pin nacuathe, pomonae jopa pejume cowʉntsiwi.  
\v 14 Waxainchi yaputainchi xua bewa werapaeinchi abe waexanaexae. Ichitha anoxuae peajʉntʉyapusʉwa xeinatsi, po peajʉntʉyapusʉwa ataya tsiteca waantobexae pomonaetha pomonae irʉ pejume cowʉntsixae. Pon xua jopa antobeyo piamonae jiwanapin tatsi, pon irʉ pejume cowʉntsin Nacom, bapon bequein popona ichitha jopa xeinae tsane peajʉntʉyapusʉwa.  
\v 15 Pon ita aenae-aeneya caseba ichamonae pomonaetha pomonae irʉ pejume cowʉntsiwirʉ Nacom, bapon Nacom tsitatsi be pon jiwi pejutebin. Payaputaneme xua pon jiwi pejutebin bapana jopa xeinae peajʉntʉyapusʉwa pejʉntʉ coyenewatha, po peajʉntʉyapusʉwa ataya tsiteca.  
\v 16 Waxainchi yabara yaputainchi xua Nacom wanaca antobewa, tsipei Jesucristo naca tsitʉpa naetotha wanaca antobexae. Daxota bewa copatinchi xua bara ichamonae naca atene exanaena, xua bequein beya poxonae tʉpa naca exanaena ichamonae nexa pomonae irʉ pejume cowʉntsiwirʉ.  
\v 17 Pebin ba xeina nawita xuan pocotsiwa ba nantawenona xua jʉntema popona penaexanaewa tsane. Bapon cui tane pia jiton pon irʉ pejume cowʉntsindʉ Nacom xua pon jopa xeinaeyo pocotsiwa nantawenona. Icha bapo pebin jopa pia jiton yabara nantanuweya nanta xeinaeyo xua peyawenaenexa, barapo pebin apara jopa Nacomtha tsita xeinaeyo peantobewa, po peantobewa Nacom xeina jiwi nexa.  
\v 18 Tamonae pam, pomonae irʉ painya nejume cowʉntsixae Jesucristo. Jopa bewa saya ichamonaetha jeichi: “Paca antobetsi”, jopa bewa saya jeichi, poxonae jopa yawenaetsi barapomonae. Jame bewa xaniwaicha yawenaetsi barapomonae, bapoxonae jame yatsicaewa antobe tsainchi barapomonae. 
\s1 Meje yabara xua wajume cowʉntsiya jinompaewa Nacomtha 
\p  
\v 19-20 Poxonae yawenatsi ichamonae bapoxonae yaputainchi xua bara xeinatsi po coyene pexainyei coyenewa. Xaniwaicha yaputainchi xua Nacom ichichipa pocotsiwa waxainchi exanatsi, bara bequein wajʉntʉ coyene naca jei: “Jamaisa jopa beta exanaem”, bequein naca yabara jei. Waxainchi yaputainchi xua Nacom bichocono ainya cui, beyacaincha wajʉntʉ coyene poxonae abe naca yabara paeba, tsipei Nacom daxita yaputane.  
\v 21 Tamonae pam, paxam pomonae tapaca caantobe jiwichi pam, painya nejume cowʉntsixae Jesucristo. Bequein wajʉntʉ coyene jopa abeya naca yabara jeiyo: “Jamaisa jopa beta exanaem”, jopa jeiyo, daxota awiya Nacom jume cowʉntatsi xua waexanaewa pocotsiwa Nacom ichichipa.  
\v 22 Yawa Nacom naca cata pocotsiwa wʉcatsi wajume cowʉntsixaetsi pia peitorobi diwesi jumein tatsi, yawano poxoru waexanaexae pocotsiwa Nacom ichichipa.  
\v 23 Yawa Nacom pia peitorobi diwesi jume naca itorobiya jeye: “Taxanto Jesucristo pajume cowʉnde, yawa nantiya pana naantobeinde”, naca jei.  
\v 24 Daxita pomonae ba exana pocotsiwa Nacom pia peitorobi diwesitha paeba, barapomonae Jesucristo yawa jinompa, barichi barapomonae Jesucristo barʉ jinompatsi. Waxainchi yaputainchi xua bapon naca yawena ducuanaebiya, tsipei nanajumope cata waxantha wanaca cuidubinexa barapo coyene. 
\c 4  
\s1 Meje yabara xua Nacom pia Pejumope tʉnaxʉ tatsi, irʉ pomonae Jesucristo abe peyabara paebiwichi 
\p  
\v 1 Tamonae pam, pomonae tapaca caantobe jiwichi pam, irʉ painya nejume cowʉntsixae Jesucristo. Jopa pajume cowʉntsinde xua daxita pomonae paca jei: “Paxan Nacom peitorobi jume pata paebiwi pan”, paca jei. Jame maisa pajʉjʉre saya barapomonae painya neyaputaenexa barapomonae icha metha bara Nacom itoroba barapomonae. Tsipei barapo cae pin nacuathepiwi jiwi ayei pomonae penaerabiwi, pomonae jei: “Paxan Nacom peitorobi jume pata paebiwi pan”, jei.  
\v 2 Ichitha paca itacʉpa xua payaputaneme pomonae xeina Nacom pia Pejumope tʉnaxʉ tatsi. Icha barapomonae paca jei: “Nacom Pexanto tatsi, pon Jesucristo, pepa jiton naexana barapo cae pin nacuathe”, jei, bapoxonae payaputaneme xua barapomonae apara Nacom pia Pejumope tʉnaxʉ tatsi yawa jinompa.  
\v 3 Icha ichamonae paca jei: “Nacom jopa itorobiyo Pexanto barapo cae pin nacuathe xua penaexanaenexa pepa jiton pewʉn Jesús”, paca jei, bapoxonae paxam payaputaneme xua barapomonae ba jopa yawa jinompaeyo Nacom pia Pejumope tʉnaxʉ tatsi. Barapomonae ba seicaya xeina icha pejumope tʉnaxʉ po jumope tʉnaxʉ Cristo ita aenae-aeneichi. Paxam bayatha pajume taneme xua barapo pejumope tʉnaxʉ bewa patopaetsica po cae pin nacuathe tsique. Bara xainyei bara bayatha barapo jumope tʉnaxʉ patopa po cae pin nacuathe tsique. 
\p  
\v 4 Tamonae pam, paxam Nacom pijimonae tatsi pam. Paxam pacui coyene amanayabame barapo penaerabi jiwitha. Tsipei po pejumope tʉnaxʉ paca yawa popona xua Nacom pia Pejumope tʉnaxʉ tatsi, barapo pejumope tʉnaxʉ bichocono peayapusʉ itorobiya coyenewa pexeinaein, beyacaincha po pejumope tʉnaxʉ po cae pin nacuathepiwi jʉntʉ coyene itoroba dubenanaebiyatsi xua abe peexanaenexa.  
\v 5 Barapo jiwi apara barapo cae pin nacuathepiwi, daxota barapomonae yabara cueicueijei pocotsiwan barapo cae pin nacuathe xeina. Ichamonae irʉ pomonae po cae pin nacuathepiwixae barapo coyene baxuan jume naitaewatsiya exana.  
\v 6 Ichitha waxainchi Nacom piamonaetsi. Pomonae Nacom yaputainchi, barapomonae bara naca jume naitaewata. Ichitha nama pomonae jopa Nacom yaputaetsi, barapomonae jopa naca jume naitaewatsiyo. Daxota naca itacʉpa xua wayaputaewa pomonae cueicueijei pexainyei jume. Mataʉtano naca itacʉpa xua wayaputaewa pomonae cueicueijei pemuxuitorobi jume. 
\s1 Meje yabara xua Nacom peyawa cui jinaein xua bichocono peantobe coyenewa 
\p  
\v 7 Tamonae pomonae tapaca caantobewichi pam, irʉ painya nejume cowʉntsixae Nacom. Bewa waxainchi nantiya naantobe tsainchi. Tsipei barapo peantobe coyenewatha Nacom naca cana exana xua waxeinaewa waantobe coyenewa. Daxita pomonae xua antobe ichamonae apara barapomonae bara Nacom pia pexui tatsi naexana. Mataʉtano barapomonae bara Nacom yaputainchi.  
\v 8 Nacom ba peyacuiya jinaein peantobe coyenewa. Daxota pon jopa tsita xeinaeyo ichamonae peantobe coyenewa apara poxoru jopa yaputaeyo Nacom, tsipei Nacom peyacuiya jinaein peantobe coyenewa.  
\v 9 Poxonae Nacom Pexanto itoroba Nacom naca tsita itʉta pia peantobe coyenewa. Nacom Pexanto itoroba pon yatsicaya compa tatsi, barapo cae pin nacuathe tsique waxeinaenexa tsane peantʉyapusʉwa, po peantʉyapusʉwa ataya tsiteca.  
\v 10 Barapo yatsicaewa pepa peantobe coyenewa meje baxue: Poxonae ba Nacom antobetsi, baraxua ba jopa pepa peantobe coyenewiyo. Jame ba Nacom naca antobe baraxua ba jame yatsicaewa pepa peantobe coyenewa. Poxoru Nacom itorobica Pexanto wanaca wejʉntemaina exanaenexa abe waexanae cuiru coyenein. Barapo coyene jame yatsicaewa pepa peantobe coyenewa. 
\p  
\v 11 Tamonae, pomonae tapaca caantobe jiwichi pam, irʉ painya nejume cowʉntsixae Nacom. Tsipei Nacom bichocono naca antobe, daxota xuya waxainchi bewa nantiya naantobe tsainchi.  
\v 12 Dapon ba aibi pon bayatha Nacom tainchi. Ichitha icha waxainchi nantiya naantobe tsainchi, bapoxonae Nacom naca yawa poponaena. Nacom beta xaniwaichiya cana exana pia peantobe coyene wajʉntʉ coyene berena.  
\v 13 Waxainchi natsita itapeinya xeinatsi, xua bara Nacom yawa jinompatsi, yawa xua Nacom naca yawa popona, tsipei Nacom nanajumope tʉnaxʉ cata waxantha.  
\v 14 Paxan patan Jesucristo poxonae Nacom Pexanto itorobica. Daxota pajan: “Bara xainyei xua Nacom Pexanto itorobica, xua barapon pecapanenebiyaenexa po cae pin nacuathepiwi xua abe pia peexanae cuiru coyenein weya tatsi”, pajan.  
\v 15 Pon ba xua jeye: “Bapon Jesús Nacom Pexanto tatsi”, jei, bapon apara bara yawa popona Nacom, irʉ Nacom yawa popona bapon. 
\p  
\v 16 Daxota waxainchi Nacom yaputainchi, yawa jume cowʉntatsi xua xaniwaicha bara Nacom naca antobe. Nacom apara pon peyanthʉthʉya jinaein xua pocotsiwa bichocono peantobe coyenewa. Pon xua bichocono antobe ichamonae, bapon apara bara yawa popona Nacom, irʉ Nacom yawa popona bapon.  
\v 17 Daxota waxainchi yabara nacuiduba dubenanaebiyatsi xua bichocono peantobe coyenewa. Poxonae matacabi tsuxubi tsane po mataqueitha Nacom jiwi yabara paebina xua penatsicuentsiwa Nacomtha, barapo matacabitha jopa junuwi tsainchi. Jume cowʉntinchi xua Nacom jopa wanaca yabara paebiwa tsane xua abe waexanaexae. Icha Jesucristo ichi xua jopa abe exana ducuanaebiyaeyo poxonae popona po cae pin nacuathe, waxainchi barapocotsi coyeneya ichichi poxonae jinompatsi po cae pin nacuathe.  
\v 18 Poxonae antobetsi ichamonae barapo jʉntʉ coyenewatha ba jopa cunuwichi barapomonae. Tsipei barapo peantobe coyenewatha torotatsi pocotsiwa xua pejunuwiwa xua wajʉntʉ coyene weya. Tsipei pon junuwa nayaputane xua atene tsaneba, penayaputaexae xua abe exana. Pon ba junuwa jopa xeinaeyo peantobe coyenewa, po peantobe coyenewa Nacom weya. 
\p  
\v 19 Waxainchi daxota Nacom antobetsi tsipei bapon copiya pewʉnaeya naca antobe.  
\v 20 Icha pebin jei: “Xan Nacom antobein”, jei, xua daichitha caena ita aenae-aeneya caseba pia jiton pontha xua irʉ jume cowʉntarʉ Nacom, apara barapo pebin pon jiwi pemuxuitorobin. Icha jopa antobeyo pia jiton pon peyaitaexae, barichi bapon jopa antobeyo Nacom pontha xua jopa yaitaeyo.  
\v 21 Nacom nacata itoroba pia peitorobi diwesi jume. Barapo diwesitha naca jeye: “Pon ba xua Nacom antobetsi, bapon ba bewa muxuna antobe tsane pia jiton pontha xua irʉ jume cowʉntarʉ Nacom”, naca jei barapo diwesitha. 
\c 5  
\s1 Meje yabara poxonae xua waxainchi jʉntʉ coyene amanayabatsi pomonae jopa pejume cowʉntsiwi 
\p  
\v 1 Pon ba bichocono tsita xeina pejume cowʉntsiwa Jesús pon xua jei: “Jesús apara bara bapon pon Nacom itorobica, pon Mesías jeichichi”, jei, bapon jame Nacom Pexanto tatsi naexana. Daxita pomonae antobe Nacom xua paxatha, barichi barapomonae muxuna antobe Nacom pia pexui tatsi pomonae irʉrʉ pejume cowʉntsixae.  
\v 2 Poxonae waxainchi Nacom antobetsi xuano exainchi pocotsiwa Nacom pia peitorobi coyenewantha itoroba, bapoxonae yaputainchi xua bara antobetsirʉ Nacom pia pexui tatsi.  
\v 3 Poxonae Nacom antobetsi, bapoxonae jume cowʉntsiya exanatsi pocotsiwa paeba Nacom pia peitorobi diwesi jumeintha. Nacom pia peitorobi diwesi jumein jopa ayapubeyo xua yabara jume cui cana exana.  
\v 4 Daxita pomonae Nacom piamonae tatsi, barapomonae jʉntʉ coyene amanayaba pontha pon jiwi jʉntʉ coyene itorobatsi po cae pin nacuathepiwi xua abe peexanaewa tsane. Wajume cowʉntsi coyenewa Nacomtha, barapo coyenewatha naca yawena xua wajʉntʉ coyene amanayabiwa pontha pon jiwi jʉntʉ coyene itorobeibatsi po cae pin nacuathepiwi xua abe peexanaewa tsane.  
\v 5 Saya pomonae jame jume cowʉnta, xua pejeiwa: “Jesús apara Nacom Pexanto tatsi”, jei, jame barapomonae jʉntʉ coyene amanayaba bapontha pontha pon jiwi jʉntʉ coyene itorobeibatsi po cae pin nacuathepiwi xua abe peexanaewa tsane. 
\s1 Meje yabara xua po diwesi Nacom Pexanto tatsi yabara 
\p  
\v 6 Bapon Jesucristo patopeica po cae pin nacuathe tsique. Poxonae bapon bautisabatsi, yawa poxonae naetotha tʉpa exanatsi, xua poxonae jana pichapabarena, barapo naxobe cui coyenebe naca yaputane exana xua bapon Jesucristo, apara bara Nacom Pexanto tatsi. Saya meisa jopa naca yaputane exanaeyo xua poxonae bautisabatsi, bara yawa irʉ naca yaputane exana xua poxonae naetotha tʉpa exanatsi, yawa xua poxonae jana pichapabarena. Nacom pia Pejumope tʉnaxʉ tatsi yabara paeba daxita baxua. Barapo Nacom pia Pejumope tʉnaxʉ tatsi bara xaniyeya pepaebin.  
\v 7 Nacom naca yaputane exana xua Jesucristo bara Nacom Pexanto tatsi poxonae cueicueijei acoibi po jumeyobe peitaboco wetsica.  
\v 8 Barapo jume apara poxonae Nacom naca tsipaeba wajʉntʉ coyenewatha. Yawano barapo jume po jume xua cueicueijei poxonae Jesús bautisabatsi. Yawano barapo jume po jume xua cueicueijei poxonae bara nama imoxoyo tʉpaena Jesús. Barapo acoibi jumeyobe pebʉrʉya cuita caunuta xua jei: “Bapon Jesús apara Nacom Pexanto tatsi”, jei.  
\v 9 Ba jume cowʉntatsi po jumein jiwi paeba. Ichitha po jume nama Nacom Pexanto yabara paeba, barapo jume jame bichocono peainya cui jume, beyacaincha po jumein xua jiwi paeba. Daxota bewa jume cowʉntichi po coyene xua Nacom Pexanto yabara paeba.  
\v 10 Pon ba Nacom Pexanto tatsi jume cowʉntatsi, bapon ba pia jʉntʉ coyenewa tsipaebatsi xua bara bapon ba Jesucristo yatsicaewa Nacom Pexanto tatsi. Pon jopa Nacom jume cowʉntichi, bapon nanta xeina xua Nacom naeraba xua pon jiwi pemuxuitorobin, tsipei bapon jopa jume cowʉntsiyo po coyene Nacom Pexanto yabara paeba.  
\v 11 Barapo jume, po jume Nacom Pexanto yabara paeba, barapo jume wajʉntʉ coyenewatha jume tainchi, naca jeye: “Nacom peajʉntʉyapusʉwa naca cata po peajʉntʉyapusʉwa ataya tsiteca, po peajʉntʉyapusʉwa Nacom Pexanto tatsi pia xainya werena tapichapatsi”, jei barapo jume.  
\v 12 Pon ba Nacom Pexanto tatsi yawa popoinchi, bapon xeina barapo peajʉntʉyapusʉwa. Ichitha pon Nacom Pexanto tatsi, jopa yawa poponaetsi, bapon jopa xeinaeyo barapo peajʉntʉyapusʉwa, po peajʉntʉyapusʉwa ataya tsiteca. 
\s1 Meje yabara poxonae Juan muxu tsipaeba, poxonae imoxoyo nacobe weta xua tina 
\p  
\v 13 Pacata tinatsi paxam, pomonae pajume cowʉntame, Nacom Pexanto tatsi. Po coyenein xua pacata tinatsi, apara xua painya neyaputaenexa xua bara paxeiname peantʉyapusʉwa, po peantʉyapusʉwa xua ataya tsiteca. 
\p  
\v 14 Waxainchi bichocono yabara jume cowʉntatsi Nacom xua wanaca yawenaewa tsane. Tsipei yaputainchi poxonae wʉcatsi pocotsiwa Nacom ichichipa, bapoxonae Nacom bara naca jume tane pocotsiwa yabara xua wawʉcaexae.  
\v 15 Tsipei yaputainchi xua Nacom naca jume tane poxonae wʉcatsi, daxota yaputainchi xua bara xeinatsi pocotsiwa wʉcatsi Nacom. 
\p  
\v 16 Icha taneme xua ichʉn abe exana pon irʉ jume cowʉnta, xua ichitha pocotsiwa bapon exana jopa tʉpa naexanaeyo, bapoxonae Nacomtha tawʉcare bapon. Bapoxonae Nacom cana exana xua bapon xeina peantʉyapusʉwa. Ichitha icha jiton abe exana pocotsiwa xua tʉpa naexana jopa catsipaebichi xua Nacomtha tawʉcame bapon.  
\v 17 Daxita pocotsiwan jiwi abe exana daxita baxuan Nacom tsita abetsi. Daichitha barapo abe peexanae coyene jiwana xua icha abe peexanae coyenewa barapo abe peexanae coyene jopa tʉpa naca cana exanaeyo. 
\p  
\v 18 Yaputainchi pon yawa popona Nacom xua pia Paxaxae, bapon jopa exanae ducuanaebiyaeyo abe peexanae cuiru coyenein, tsipei Nacom Pexanto tatsi yawena xua bapon yawenatsi. Mataʉtano caurimonae pia pentacaponaein tatsi jopa itacʉpaetsi xua bapon peitorobiwatsi xua abe peexanaewa tsane.  
\v 19 Yaputainchi xua bara Nacom piamonae tatsichi, yawa yaputainchi xua caurimonae pia pentacaponaein tatsi itoroba daxita po cae pin nacuathepiwi xua abe peexanaewa tsane.  
\v 20 Yaputainchino xua Nacom Pexanto tatsi bayatha patopeica barapo cae pin nacuathe, yawa naca tsipaeba Nacom Pejume Diwesi wayaputaenexa Nacom, pon pexainyein. Mataʉtano yawa jinompatsi Nacom Pexanto tatsi, pon pexainyein, pon Jesucristo. Barapo Nacom pexainyein pon naca cata peantʉyapusʉwa, po peantʉyapusʉwa xua ataya tsiteca.  
\v 21 Tamonae pam, jopa pajume cowʉntsinde ibo nacomʉn. 
\p Baja Juan.