\id EPH  
\h EFESIOS 
\toc1 Kityi nu ngwaꞌan Palyu ndyaa seꞌen ndiꞌin nten ꞌin Jesucristo nde kichen Efeso 
\toc2 EFESIOS 
\toc3 Ef. 
\mt1 Kityi nu ngwaꞌan Palyu ndyaa seꞌen ndiꞌin nten ꞌin Jesucristo nde kichen Efeso 
\c 1  
\p  
\v 1 Palyu lkaǎn nu ndaꞌaǎn kityi re. Ngulo Ndiose tñan ꞌñaǎn, kanꞌ chaꞌ ndaꞌaǎn nchkwiǐnꞌ chaꞌ ꞌin Jesucristo loꞌo neꞌ xka la kichen seꞌen tijyuꞌ la. Loꞌo ni, ndaꞌaǎn kityi re chaꞌ tsaa seꞌen ndiꞌin wan neꞌ Efeso, chaꞌ lka wan nten ꞌin Ndiose, chaꞌ suꞌwe ꞌa msñi wan chaꞌ ꞌin Jesucristo.  
\v 2 Ngwañaꞌan nchka tiǎnꞌ, chaꞌ ñaꞌan ti kuꞌni Ndiose Stian chaꞌ suꞌwe loꞌo wan, chaꞌ kuꞌni Ni chaꞌ tiin ti tyiꞌin niꞌ kasiya ꞌwan chaꞌ nu wa msñi wan chaꞌ ꞌin Xꞌnaan Jesucristo. 
\s1 Nchga chaꞌ suꞌwe nu kaja ꞌñaan chunꞌ tñan nu yꞌni Krixtu 
\p  
\v 3 Lye ꞌa tyaǎn xuꞌwe ꞌin Ndiose Stian, nu lka Sti Jesucristo nu nka Xꞌnaan. Wa ngwa suꞌwa chaꞌ ꞌñaan loꞌo Krixtu; kanꞌ chaꞌ loꞌo Ndiose, suꞌwe ꞌa nka tiye Ni ñaꞌan Ni ꞌñaan. Nchga loo chaꞌ suꞌwe nu ndiꞌin chaꞌ kaja ꞌñaan chaꞌ msñian chaꞌ ꞌin Jesucristo, wa mda Ni chaꞌ suꞌwe kanꞌ ꞌñaan loꞌo Krixtu.  
\v 4 Xa nu ti ji tyaꞌ chalyuu, ti bra kanꞌ ngulo suwi Ndiose ꞌñaan chaꞌ kaan nten ꞌin Ni, chaꞌ ka suꞌwa chaꞌ ꞌñaan loꞌo Krixtu. Nchka tiꞌ Ni chaꞌ kulaa yaanꞌ ꞌin nchga loo chaꞌ kuxi, chaꞌ ngwañaꞌan ja nchka tiꞌ Ni xtya Ni kiꞌya ꞌñaan siyaꞌ ti.  
\v 5 Suꞌwe ꞌa nka tiye Ndiose ñaꞌan Ni ꞌñaan, kanꞌ chaꞌ ti bra kanꞌ, ngwa tiꞌ Ni chaꞌ xñian chaꞌ ꞌin Ni, sa ñaꞌan si lkaan sñiꞌ Ni chabiyaꞌ ꞌin Jesucristo.  
\v 6 Loꞌo ni, ndiꞌin chaꞌ kuꞌni tnuan ꞌin Ndiose, chaꞌ tlyu ꞌa chaꞌ suꞌwe ngiꞌni Ni loꞌoan. Suꞌwe ꞌa nka tiye Ni ñaꞌan Ni ꞌñaan, kanꞌ chaꞌ wa msuꞌwa Ni ꞌin Sñiꞌ ykwiꞌ Ni nu yan lo chalyuu, ti kwiꞌ nu ndiya ꞌa tiꞌ Ni ꞌin, chaꞌ ngwañaꞌan ka suꞌwa chaꞌ ꞌñaan loꞌo Sñiꞌ Ni.  
\v 7 Wa mdoꞌo laan ꞌin chaꞌ kuxi nu ndiꞌin ꞌñaan, chunꞌ chaꞌ wa ngujwi Sñiꞌ ykwiꞌ Ndiose lo wsi siꞌyaan, chaꞌ wa yꞌni Ni chaꞌ tlyu tiꞌ ꞌñaan ꞌin kiꞌya nu mdiꞌin ꞌñaan ti bra kanꞌ; kanꞌ lka chaꞌ suꞌwe nu tlyu ꞌa nu wa yꞌni Ndiose loꞌoan.  
\v 8 Suꞌwe ꞌa nka tiye Ni ñaꞌan Ni ꞌñaan, kanꞌ chaꞌ yꞌni Ni ngwañaꞌan. Loꞌo yꞌni Ni chaꞌ ka jlyo tianꞌ nchga chaꞌ ꞌin Ni, chaꞌ ka biyaꞌ tianꞌ sa ñaꞌan ndiꞌin chaꞌ kanꞌ.  
\v 9 Sa ñaꞌan nu ngwiꞌya chaꞌ ke Ni ti sꞌni, ngwañaꞌan yꞌni Ni bra kanꞌ; ni siya ja ytsaꞌ Ni ꞌin nten chalyuu nu ngwa sꞌni sa ñaꞌan ndiꞌin chaꞌ kanꞌ, ti bra kanꞌ ngwa tiꞌ Ni chaꞌ kala Krixtu lo chalyuu re. Loꞌo ni, wa ngwa biyaꞌ suꞌwe tianꞌ sa ñaꞌan nu ngwa tiꞌ Ndiose chaꞌ kuꞌni Ni xa nu yan Krixtu;  
\v 10 ngwa tiꞌ Ni chaꞌ ka suꞌwa nchga loo nan nu nsuꞌwi lo chalyuu, loꞌo ska ti Xꞌnaan Krixtu ka ndloo la bra kanꞌ. Xa nu tiya tsan kanꞌ, bra kanꞌ xoꞌ tiꞌin Ndiose nchga loo nan nu nsuꞌwi lo chalyuu, loꞌo nchga loo nan nu nsuꞌwi niꞌ kwan; bra kanꞌ ska ti Krixtu ka ndloo la ꞌin nchga nan kanꞌ. 
\p  
\v 11 Nchga chaꞌ nu nchka lo chalyuu, nchka ran chunꞌ chaꞌ nchka tiꞌ Ndiose chaꞌ ka ran ngwañaꞌan. Kwiꞌ ngwañaꞌan nan ni, ti kulo ngulo suwi Ni ꞌñaan chaꞌ kaan nten ꞌin Ni, chaꞌ ka suꞌwa chaꞌ ꞌñaan loꞌo Krixtu, chaꞌ loꞌoan kaja nchga chaꞌ suꞌwe nu ta Ni ꞌñaan, chunꞌ chaꞌ ngwañaꞌan nchka tiꞌ Ndiose chaꞌ ka.  
\v 12 Ngwañaꞌan ngwa tñan nu yꞌni Ni, chaꞌ ka kuꞌni tnun nten ꞌin Ni, xa nu ñaꞌan neꞌ ꞌwa seꞌen ndiꞌin ba lo chalyuu; chaꞌ nu bare ni, wa msñi ba chaꞌ ꞌin Krixtu ti kulo la ke xka ta nten.  
\v 13 Loꞌo ti kwiꞌ ngwañaꞌan ngwa ꞌwan bra kanꞌ. Ti kulo ynan wan chaꞌ nu ñi nu ndiꞌin ꞌin Krixtu; suꞌwe ꞌa ngwa tiye wan xa nu ytsaꞌ neꞌ chaꞌ kanꞌ ꞌwan, chaꞌ wa ngulaa Ni ꞌwan ꞌin chaꞌ kuxi. Msñi wan chaꞌ ꞌin Krixtu, bra kanꞌ mda Ndiose Tyiꞌi ykwiꞌ chaꞌ kanun niꞌ kasiya ꞌwan, ñaꞌan tiꞌ si wa mjiꞌin kaꞌan Ni biyaꞌ nu ꞌin ykwiꞌ Ni chunꞌ wan chaꞌ lka wan nten ꞌin Ni; ti kwiꞌ tñan nu ndukwin Ni chaꞌ kuꞌni Ni, kwiꞌ kanꞌ yꞌni Ni bra kanꞌ.  
\v 14 Tyiꞌi Ndiose ni, kanꞌ lka nu nda Ni ꞌñaan kulo ndukwa la, chaꞌ ka biyaꞌ tianꞌ chaꞌ chañi kuꞌni Ni loꞌoan sa ñaꞌan nu ndukwin Ni chaꞌ kuꞌni Ni loꞌo nchga nten ꞌin Ni; ngiꞌni Tyiꞌi Ndiose chaꞌ ka biyaꞌ tianꞌ chaꞌ kulaa ji Ni ꞌñaan taꞌaan nu msñian chaꞌ ꞌin Ni. ¡Kanꞌ chaꞌ ndiꞌin chaꞌ kuꞌni tnuan ꞌin Ndiose, chaꞌ tlyu ꞌa chaꞌ suꞌwe nu ngiꞌni Ni loꞌoan! 
\s1 Nchka tiꞌ Palyu chaꞌ ka biyaꞌ suꞌwe la tiꞌ neꞌ chaꞌ ꞌin Krixtu 
\p  
\v 15 Wa ynaǎn sa ñaꞌan nu ngiꞌni wan ti bra nu msñi suꞌwe wan chaꞌ ꞌin Xꞌnaan Jesús; ndukwin neꞌ chaꞌ suꞌwe ꞌa nka tiye wan ñaꞌan wan ꞌin taꞌa msñi wan chaꞌ ꞌin Ndiose.  
\v 16 Kanꞌ chaꞌ ni, taꞌa ti ndyaǎn xuꞌwe ꞌin Ndiose chaꞌ ꞌwan; ndyuꞌwi tiǎnꞌ ꞌwan bra nu ndiꞌiǐn ngiꞌni tnuǔn ꞌin Ndiose.  
\v 17 Tlyu ꞌa chaꞌ suꞌwe ndiꞌin ꞌin Ndiose Stian, ti kwiꞌ Ndiose nu lka Sti Xꞌnaan Jesucristo. Njnaǎn ꞌin Ni chaꞌ ta Ni Tyiꞌi ykwiꞌ Ni ꞌwan, chaꞌ ngwañaꞌan ka biyaꞌ tiꞌ wan nchga chaꞌ bra kanꞌ; kwaꞌu Tyiꞌi Ni ꞌwan sa ñaꞌan lka Ndiose, loꞌo kanꞌ ka xuꞌwi lyo suꞌwe la wan ꞌin Ni.  
\v 18 Kwiꞌ ngwañaꞌan, nchkwiǐnꞌ loꞌo Ni chaꞌ slaa Ni ke wan, chaꞌ ka biyaꞌ suꞌwe tiꞌ wan nchga chaꞌ suꞌwe nu ka ꞌwan ni, chunꞌ wa ngulo suwi Ni ꞌwan; tlyu ꞌa chaꞌ suꞌwe nu ndukwin Ni chaꞌ kaja ꞌwan, loꞌo ꞌin nchga nten nu msñi chaꞌ ꞌin Ni.  
\v 19 Njnaǎn ꞌin Ni chaꞌ ka biyaꞌ suꞌwe tiꞌ wan nchga chaꞌ re, chaꞌ nu ngiꞌni ꞌa Ni tñan niꞌ kasiya ꞌñaan, nchgaan nu msñian chaꞌ ꞌin Ni. Tñan nu ngiꞌni Ni loꞌoan chaꞌ kaan nten ꞌin Ni,  
\v 20 ti kwiꞌ tñan tnun lka kanꞌ, sa ñaꞌan nu yꞌni Ni bra nu mda Ni Tyiꞌi Ni ngala niꞌ kasiya ꞌin Krixtu xiyaꞌ, chaꞌ ndyuꞌu yu xa nu ngujwi yu; chunꞌ ndiꞌin la ndyaa loꞌo Ni ꞌin yu chaꞌ ndyaa tukwa yu laꞌa seꞌen kwin ꞌin Ndiose Sti yu, xka chalyuu seꞌen nu suꞌwe la nde niꞌ kwan.  
\v 21 La kanꞌ lka Krixtu ndloo la ꞌin nchga nten ni siya ni, ni siya tyempu nde loo la; ja nsuꞌwi nu tlyu la ke Krixtu la kanꞌ, ja nsuꞌwi xka la nu ka kulo tñan ꞌin yu. Ja nsuꞌwi xka xꞌnan nten chalyuu nu ka ꞌin tyijin lyo ꞌin Krixtu; kwiꞌ ngwañaꞌan la xka chalyuu nde niꞌ kwan, ja nsuꞌwi kwiꞌin kuxi, ja nsuꞌwi nten chaꞌ ꞌin Ndiose nu ka tyijin lyo ꞌin Krixtu.  
\v 22 Siyaꞌ ti wa nda Ni nchga nan chaꞌ kulo Krixtu tñan ꞌin ran. Bra kanꞌ mstya Ni ꞌin Krixtu chaꞌ ka yu ndloo ꞌin nchga nten nu msñi chaꞌ ꞌin Krixtu kwenta ska kichen seꞌen ndiꞌin neꞌ, kanꞌ chaꞌ lka Ni Xꞌnan nchga nten chalyuu.  
\v 23 Taꞌaan nu msñian chaꞌ ꞌin Krixtu skaa kichen, sa tlyu ti ndiꞌin chaꞌ ꞌñaan loꞌo Krixtu. Ñaꞌan tiꞌ si lkaan ska tsuꞌ yaꞌ Krixtu, ngwañaꞌan lkaan chaꞌ ꞌin Krixtu, chaꞌ kuꞌnian tñan nu nsuꞌwi ꞌin Ni lo chalyuu. Kwiꞌ ngwañaꞌan, nchga loo nan nu nsuꞌwi lo chalyuu, ndiꞌin nan kanꞌ chaꞌ ꞌin Krixtu. 
\c 2  
\s1 Ngulaa Krixtu ꞌñaan xuꞌwe ti, chaꞌ suꞌwe ꞌa nka tiye Ni ñaꞌan Ni ꞌñaan 
\p  
\v 1 Wa nda Ndiose xka chalyuu ꞌwan chaꞌ wa ndyuꞌu Krixtu xiyaꞌ. Nu ngwa sꞌni la, sa ñaꞌan ngwa si wa mdyii chalyuu ꞌwan siyaꞌ ti, ngwañaꞌan ngwa ꞌwan siꞌya kiꞌya nu mdiꞌin ꞌwan loꞌo Ndiose, chaꞌ ja mdukwa wan chaꞌ nu nchkwiꞌ Ndiose loꞌo wan siyaꞌ ti.  
\v 2 Nu ngwa bra kanꞌ, loꞌo wan yꞌni wan nchga chaꞌ kuxi nu ngiꞌni nten chalyuu; mdukwa ꞌa wan tñan nu ngulo kuneꞌ xaꞌan nu nka ndloo la ꞌin nchga kwiꞌin kuxi nu nsuꞌwi lo chalyuu, ti kwiꞌ chaꞌ kuxi kanꞌ lka nu ndatsaa ꞌin nten chalyuu chaꞌ ja kunan neꞌ chaꞌ nu nchkwiꞌ Ndiose.  
\v 3 Nchgaan ni, chañi chaꞌ sa ñaꞌan nu ngiꞌni neꞌ kanꞌ chaꞌ kuxi, kwiꞌ ngwañaꞌan yꞌnian nu ngwa ti sꞌni; yꞌnian nchga chaꞌ kuxi nu mjñan kasiya ꞌñaan. Tñan nu ngwa tianꞌ kuꞌnian, ti ykwiinꞌ tian, xkwiꞌ tñan kanꞌ yꞌnian bra kanꞌ; nchga chaꞌ kuxi nu yan kean ti ykwiinꞌ tian, yꞌnian chaꞌ kanꞌ. Kanꞌ chaꞌ mdiꞌin chaꞌ ta Ndiose nu tiꞌí ꞌñaan, chaꞌ msinꞌ ꞌa tiꞌ Ni siꞌya chaꞌ kuxi nu yꞌnian; loꞌo suꞌwa ti ta Ndiose nu tiꞌí ꞌñaan loꞌo nchga nten chalyuu bra kanꞌ. 
\p  
\v 4 Loꞌo ni, chaꞌ suꞌwe ꞌa nka tiye Ni ñaꞌan Ni ꞌñaan, kanꞌ chaꞌ nchka tꞌnan ꞌa tiꞌ Ni ꞌñaan,  
\v 5 kanꞌ chaꞌ nda Ndiose xka chalyuu ꞌñaan, chaꞌ wa ndyuꞌu Krixtu xiyaꞌ. Wa mdyii chalyuu ꞌñaan, mskeꞌ tianꞌ nu ngwa sꞌni kanꞌ, chaꞌ ja mdukwaan ꞌaan chaꞌ nu nchkwiꞌ Ndiose loꞌoan; loꞌo ni, chaꞌ nchka tꞌnan ꞌa tiꞌ Ni ꞌñaan, kanꞌ chaꞌ wa mdoꞌo laan ꞌin chaꞌ kuxi, wa yꞌni tyii Ni kiꞌya nu ndukwian.  
\v 6 Wa kanaꞌ ti kasiya ꞌñaan sꞌni, loꞌo bra kanꞌ ngulaa Ni ꞌñaan, chaꞌ wa ngwa suꞌwa chaꞌ ꞌñaan loꞌo Jesús. Sa ñaꞌan nu yꞌni Ndiose bra nu mda Ni Tyiꞌi Ni ngala niꞌ kasiya ꞌin Jesucristo xiyaꞌ, chaꞌ ndyuꞌu yu xa nu ngujwi yu, ti kwiꞌ ngwañaꞌan yꞌni Ni loꞌoan, chaꞌ mdoꞌo laan ꞌin nchga chaꞌ kuxi. Nchka tiꞌ Ni chaꞌ ka suꞌwa chaꞌ ꞌñaan loꞌo Jesús, ni siya lo chalyuu re, ni siya la xka chalyuu nu suꞌwe la nde niꞌ kwan seꞌen lka Ndiose ndloo la.  
\v 7 Ska yaꞌ ti yꞌni Ni nchga chaꞌ kanꞌ, chaꞌ ka biyaꞌ tiꞌ nchga nten nu kan lo chalyuu chunꞌ ndiꞌin la, chaꞌ suꞌwe ꞌa nka tiye Ni ñaꞌan Ni ꞌin nten chalyuu. Chaꞌ suꞌwe ꞌa nka tiye Jesucristo ñaꞌan Ni ꞌñaan, kanꞌ chaꞌ ka biyaꞌ tianꞌ chaꞌ ja tsaa tii ꞌa chaꞌ kuꞌni Ndiose chaꞌ suꞌwe loꞌoan;  
\v 8 wa ndoꞌo laan ꞌin chaꞌ kuxi, chaꞌ nchka tꞌnan tiꞌ Ndiose ꞌñaan bra nu ndyaa ñaꞌan tianꞌ ꞌin Krixtu. Siꞌi ska tñan nu ngiꞌnian ti ykwiinꞌ tian lka kanꞌ, ska chaꞌ suꞌwe nu nda Ndiose ꞌñaan lka kanꞌ.  
\v 9 Ja ka chkwiꞌ siyeꞌ wan loꞌo xka ta nten sikwa, siꞌi ꞌwan nu yꞌni wan chaꞌ tnun kanꞌ, chaꞌ ngwañaꞌan nchka ꞌwan ni.  
\v 10 Ndiose ngwiñan Ni ꞌñaan taꞌaan, kwiꞌ Ni yꞌni suꞌwa Ni chaꞌ ꞌñaan loꞌo Jesucristo; loꞌo ni, nchka tiꞌ Ni chaꞌ xkwiꞌ chaꞌ suꞌwe ti kuꞌnian xa nu tyiꞌian lo chalyuu, chaꞌ wa lka nda Ni ska tñan suꞌwe nu ka kuꞌnian kwenta skaan lo chalyuu re. 
\s1 Yꞌni Jesús chaꞌ ska ti nten lkaan taꞌaan 
\p  
\v 11 ꞌWan neꞌ Efeso, taꞌa msñian chaꞌ ꞌin Krixtu, tyaa yuꞌwi tiꞌ wan sa ñaꞌan ngwa wan ti sꞌni; xka loo nten ngwa wan bra kanꞌ, xka kichen tijyuꞌ la ngula wan, siyaꞌ ti ja suꞌwa chaꞌ ꞌwan loꞌo neꞌ judío taꞌa bare nu ngwa bra kanꞌ. Nchkwiꞌ neꞌ judío ꞌwan chaꞌ lka wan nten nu ja nkwan; loꞌo ykwiꞌ neꞌ judío ni, wa nkwan neꞌ, ndukwin neꞌ. Nu nkwan neꞌ kanꞌ ni, kanꞌ lka ska señan, ska biyaꞌ seꞌen msiꞌyu kijin nu kiꞌyu sñiꞌ neꞌ judío.  
\v 12 Nten nu ndiꞌin xka chalyuu lka wan, kanꞌ chaꞌ ja ngwa suꞌwa chaꞌ ꞌwan loꞌo neꞌ judío, neꞌ nu wa ngulo suwi Ndiose ꞌin nu ngwa sꞌni, chaꞌ ka neꞌ kanꞌ nten ꞌin Ni. Ja siyaꞌ ytsaꞌ Ni chaꞌ kanꞌ ꞌwan neꞌ xka laꞌa tsuꞌ nu ngwa sꞌni; ja yuꞌwi chaꞌ suꞌwe nu kaja ꞌwan nde loo la, chaꞌ ja ska chaꞌ ꞌin Ndiose jlyo tiꞌ wan siyaꞌ ti lo chalyuu seꞌen ndiꞌin wan bra kanꞌ. Ja yuꞌwi chaꞌ ꞌwan loꞌo Krixtu siyaꞌ ti bra kanꞌ. 
\p  
\v 13 Loꞌo xka ñaꞌan lka wan ni, ti bra nu ngwa suꞌwa chaꞌ ꞌwan loꞌo Jesucristo. Nu ngwa sꞌni la, ja yuꞌwi lyo wan ꞌin Ndiose siyaꞌ ti; tijyuꞌ ꞌa mdiꞌin Ndiose seꞌen ndiꞌin wan, mskeꞌ tiꞌ wan. Loꞌo ni, kwiꞌ seꞌen ti ndiꞌin Ndiose loꞌo wan; wa ndyija ꞌwan ti ka nu lka Ndiose, chunꞌ chaꞌ ngujwi Krixtu lo wsi.  
\v 14 Krixtu lka nu yꞌni chaꞌ nchka suꞌwe chaꞌ ꞌñaan loꞌo Ndiose. Kwiꞌ ngwañaꞌan, yꞌni Krixtu chaꞌ ngwa tiin chaꞌ ꞌin neꞌ judío taꞌa bare loꞌo neꞌ xka laꞌa tsuꞌ taꞌa wan; kanꞌ chaꞌ ni, wa nchka ska ti chaꞌ ꞌñaan taꞌaan loꞌo neꞌ kanꞌ. Nu ngwa sꞌni, wa yuꞌwi ska chaꞌ nu mdukunꞌ chaꞌ ꞌñaan loꞌo neꞌ kanꞌ; mdatsaa ꞌa chaꞌ kanꞌ ꞌñaan chaꞌ ja ka suꞌwa chaꞌ ꞌin neꞌ judío taꞌa ba loꞌo xka ta nten siyaꞌ ti, chaꞌ ja ngwa tyiꞌin suꞌwe ba loꞌo neꞌ xka laꞌa tsuꞌ.  
\v 15 Ti kwiꞌ chaꞌ kula nu ndyaa ñaꞌan ꞌa tiꞌ neꞌ judío taꞌa ba, kanꞌ lka nu mñi lyoꞌo ꞌwa chaꞌ ja ka tiin chaꞌ wsuun kanꞌ, chaꞌ nsuꞌwi ꞌa ñaꞌan ndatsaa chaꞌ kanꞌ ꞌwa. Wa yꞌni tyii Jesús ꞌin chaꞌ kula kanꞌ ni, chunꞌ wa ngujwi yu lo wsi; kanꞌ chaꞌ taꞌa tyukwaa ta nten taꞌaan, wa lkaan ska nten kwi ni, chaꞌ ngwa suꞌwa chaꞌ ꞌñaan loꞌo Ndiose. Kwiꞌ ngwañaꞌan yꞌni Jesús chaꞌ kaja ñaꞌan tyiꞌin suꞌwean loꞌo Ni, ngwañaꞌan loꞌo taꞌa ntean.  
\v 16 Ngwañaꞌan ngwa chaꞌ yꞌni tyii Krixtu chaꞌ wsuun nu mdiꞌin ꞌwa loꞌo wan neꞌ xka laꞌa tsuꞌ, bra nu ngujwi yu lo wsi; loꞌo ni, wa ngwa tiin chaꞌ ꞌin taꞌa tyukwaa ta nten loꞌo Ndiose chunꞌ tñan nu wa yꞌni Krixtu, chaꞌ nu yꞌni Ni chaꞌ nchkaan ska ti nten. 
\p  
\v 17 Wa yan Krixtu ni, ykwiꞌ yu ska chaꞌ nu suꞌwe ꞌa loꞌo nchgaan, chaꞌ suꞌwe ti tyiꞌian loꞌo Ndiose, kwiꞌ ngwañaꞌan loꞌo nchga taꞌa ntean; wa ykwiꞌ Krixtu loꞌo wan neꞌ ndiꞌin tijyuꞌ, kwiꞌ ngwañaꞌan ykwiꞌ yu loꞌo neꞌ judío taꞌa ba nu ndiꞌin kwiꞌ seꞌen ti.  
\v 18 Loꞌo ni, ja nꞌni chaꞌ ni siya neꞌ judío lka ba, ni siya xka ta nten lka wan, ska ti nten lkaan loꞌo nchga taꞌaan chabiyaꞌ ꞌin Krixtu, ska ti Tyiꞌi Ndiose ngiꞌni chaꞌ xuꞌwi lyoan ꞌin Ni;  
\v 19 kanꞌ chaꞌ ni, ja tijyuꞌ ndiꞌin Ndiose loꞌo wan. Chabiyaꞌ ꞌin Ndiose ja lka wan ñaꞌan tiꞌ nten nu mdoꞌo xka laꞌa tsuꞌ; nchga chabiyaꞌ nu nsuꞌwi ꞌin Ndiose wa nda Ni ꞌwan ni, chaꞌ lka wan nten ꞌin Ni. Suꞌwa ndiꞌin chaꞌ ꞌwan loꞌo nchga neꞌ xka la kichen nu msñi chaꞌ ꞌin Ndiose, kanꞌ chaꞌ nchka wan sa ñaꞌan lka si suꞌwa ti ndiꞌin wan loꞌo Ndiose.  
\v 20-21 Nchga wan nu msñi wan chaꞌ ꞌin Krixtu, wa lkaan taꞌaan; ska ti Krixtu lka ndloo la ꞌñaan. Chunꞌ tñan nu yꞌni Krixtu, kanꞌ chaꞌ wa nganun suꞌwe chaꞌ ꞌwan loꞌo Ndiose; chunꞌ Krixtu, kanꞌ chaꞌ wa mjwi tñan nu kuꞌni skaa wan, chaꞌ ka wan tñan ꞌin Ni, chaꞌ wa ngwa suꞌwa chaꞌ ꞌwan loꞌo Ni. Ñaꞌan tiꞌ ska naꞌan nu suꞌwe ꞌa ndyaꞌ, ngwañaꞌan lka wan. Tsaa ꞌa ndukwa kiyaꞌ naꞌan kanꞌ, chaꞌ nsuꞌwi ska kee tlyu kiyaꞌ naꞌan kanꞌ nu nda jwersa ꞌin naꞌan kanꞌ; chunꞌ kee kanꞌ ndyaꞌ tyukwi ñaꞌaan naꞌan kanꞌ bra kanꞌ. Loꞌo nten nu yꞌni xaꞌan chaꞌ ꞌin Jesús ti kulo, loꞌo ayman nu ykwiꞌ chaꞌ ꞌin Ndiose loꞌo nten nu ngwa sꞌni, ti kwiꞌ neꞌ kanꞌ mstya neꞌ kiyaꞌ chaꞌ kanꞌ, chaꞌ msñi wan chaꞌ ꞌin Ndiose; loꞌo ska ti Krixtu lka nu nduun loo la ꞌwan.  
\v 22 Wa ngwa suꞌwa chaꞌ ꞌwan loꞌo Krixtu; kanꞌ chaꞌ ni, loꞌo wan, loꞌo nchga nten nu msñi chaꞌ ꞌin Ndiose nchga kichen, nchka suꞌwa chaꞌ ꞌwan loꞌo Ndiose. Loꞌo kanꞌ ka tyiꞌin Ndiose loꞌo wan, loꞌo Tyiꞌi Ni nu wa nda Ni ꞌwan. 
\c 3  
\s1 Tijyuꞌ ndaꞌan Palyu, chaꞌ nchkwiꞌ yu chaꞌ ꞌin Krixtu loꞌo neꞌ xka laꞌa tsuꞌ 
\p  
\v 1 Siꞌya chaꞌ nu nchkwiǐnꞌ loꞌo wan re, kanꞌ chaꞌ kaꞌan chaꞌ njñaǎn ꞌin Krixtu chaꞌ ꞌwan. Ti kwiꞌ Palyu lkaǎn; nsuꞌwiǐn niꞌ ñaꞌan chkwan ni, chunꞌ nchkwiǐnꞌ chaꞌ ꞌin Jesucristo loꞌo nten, chunꞌ ndayaǎnꞌ ꞌwan ni siya ja lka wan neꞌ judío.  
\v 2 Wa ngwa biyaꞌ tiꞌ wan chaꞌ Ndiose nda tñan kanꞌ ꞌñaǎn, chaꞌ tayaǎnꞌ ꞌwan, chaꞌ nu suꞌwe ꞌa nka tiye Ni ñaꞌan Ni ꞌñaan.  
\v 3 Wa ytsaꞌ Ni ꞌñaǎn sa ñaꞌan nu nchka tiꞌ Ni chaꞌ kuꞌni Ni lo chalyuu. Ni siya ja ytsaꞌ Ni ꞌin nten sꞌni sa ñaꞌan nan kuꞌni Ni lo chalyuu, sa la ni wa ytsaꞌ Ni chaꞌ kanꞌ ꞌñaǎn, ti kwiꞌ chaꞌ nu ndukwa lo kityi ti sꞌni, chaꞌ ka chalyuu ni, kanꞌ lka chaꞌ nu ndaꞌaǎn lo kityi re chaꞌ tsaa seꞌen ndiꞌin wan.  
\v 4 Bra nu chkwiꞌ wan lo kityi re, bra kanꞌ ka biyaꞌ tiꞌ wan chaꞌ nu nchkwiǐnꞌ loꞌo wan chaꞌ ꞌin tñan nu nchka tiꞌ Krixtu kuꞌni lo chalyuu.  
\v 5 Ja tukwin ngwa biyaꞌ tiꞌ chaꞌ kanꞌ tyempu nu wa mdijin. Sa bra ni, loꞌo Tyiꞌi Ndiose wa ngwaꞌu Ni chaꞌ kanꞌ ꞌin nten nu ngiꞌni tñan ꞌin Ni, kwiꞌ nu yꞌni xaꞌan chaꞌ ꞌin Jesús ti kulo. Kwiꞌ ngwañaꞌan, ngwaꞌu Ni chaꞌ kanꞌ ꞌin neꞌ nu ti nchkwiꞌ chaꞌ ꞌin Ndiose loꞌo nten ni.  
\v 6 Ja ya kunan nten chalyuu chaꞌ nu wa ytsaꞌ Ni ꞌñaǎn. Nde ñaꞌan ndyoꞌo chaꞌ kanꞌ: Nten nu ja lka neꞌ judío ni, ka neꞌ kanꞌ ti kwiꞌ sa ñaꞌan lka neꞌ judío nu ndiꞌin chaꞌ ꞌin loꞌo Ndiose, bra nu ka biyaꞌ tiꞌ neꞌ chaꞌ ꞌin Krixtu; si xñi neꞌ kanꞌ chaꞌ ꞌin Jesucristo, loꞌo neꞌ kanꞌ ka suꞌwe kasiya ꞌin neꞌ tloo Ndiose bra kanꞌ. Ka suꞌwa chaꞌ ꞌin taꞌa tyukwaa ta nten bra kanꞌ, bra nu xñi neꞌ sa tlyu ti chaꞌ ꞌin Krixtu. Loꞌo nten nu ja lka neꞌ judío, kaja nchga chaꞌ nu wa ykwiꞌ Ndiose chaꞌ kaja ꞌin neꞌ loꞌo Jesucristo. 
\p  
\v 7 Wa nda Ndiose tñan kanꞌ ꞌñaǎn chaꞌ tsaꞌaǎn chkwiǐnꞌ loꞌo nten, ni siya tijyuꞌ ndiꞌin neꞌ, chunꞌ chaꞌ suꞌwe ꞌa nka tiye Ndiose ñaꞌan Ni ꞌñaǎn. Tlyu ꞌa tñan yꞌni Ni loꞌoǔn chaꞌ kaǎn tñan kanꞌ,  
\v 8 ni siya ja suꞌweěn siyaꞌ ti. Suꞌwe la ya ñaꞌan ti nten nu msñi chaꞌ ꞌin Ndiose ti kulo la, nxkeꞌ tiǎnꞌ, loꞌo nda Ni chabiyaꞌ ꞌñaǎn chaꞌ tsaꞌaǎn seꞌen ndiꞌin nten nu ndiꞌin xka laꞌa tsuꞌ. Suꞌwe ꞌa tñan nda Ni ꞌñaǎn, chaꞌ katsaǎnꞌ chaꞌ suꞌwe kanꞌ ꞌin nten, ni siya ti ji ꞌa ka jlyo suꞌwe tiǎnꞌ nchga chaꞌ suꞌwe nu ngiꞌni Krixtu loꞌo nten.  
\v 9 Wa ykwiꞌ Ni loꞌoǔn sikwa. Ndiose nu ngwiñan nchga nan nu nsuꞌwi lo chalyuu, nchka tiꞌ Ni chaꞌ kwaꞌuǔn chaꞌ kanꞌ ꞌin nchga nten, chaꞌ ka biyaꞌ tiꞌ neꞌ sa ñaꞌan tñan nu nchka tiꞌ Ni chaꞌ kuꞌni neꞌ bra kanꞌ. Nu ngwa sꞌni, ja ya kunan nten ñaꞌan chaꞌ nu ngwa tiꞌ Ndiose kuꞌni Ni Krixtu;  
\v 10 loꞌo ni, ka biyaꞌ tiꞌ nchga kwiꞌin nu nka ndloo la nde niꞌ kwan, bra nu ñaꞌan kwiꞌin kanꞌ ꞌin nten chalyuu nu ngiꞌni tnun ꞌin Krixtu sa tlyu ti. Loꞌo kwiꞌin nu ngwa tiꞌ tyijin lyo ꞌin Ndiose nu ngwa sꞌni, loꞌo kwiꞌin kanꞌ ka biyaꞌ tiꞌ chaꞌ nchka la ꞌin Ndiose ke ska nan nu ngwiñan Ni.  
\v 11 Yꞌni Ni chaꞌ tnun kanꞌ, bra nu msuꞌwa Ni ꞌin Xꞌnaan Jesucristo chaꞌ yan Ni lo chalyuu, ti kwiꞌ sa ñaꞌan nu ngwa tiꞌ Ni kuꞌni Ni ti bra nu ja ya tyaꞌ chalyuu.  
\v 12 Loꞌo ni, wa nsuꞌwi chabiyaꞌ ꞌñaan chaꞌ xuꞌwi chaꞌ ꞌñaan loꞌo Ndiose chabiyaꞌ ꞌin Jesucristo; tyukwi ti kasiya ꞌñaan ka chkwianꞌ loꞌo Ndiose chaꞌ wa msñian chaꞌ ꞌin Jesucristo nu lka Sñiꞌ Ni. Loꞌo ngwañaꞌan, ja ndiꞌin chaꞌ kutsean bra nu chkwianꞌ loꞌo Ndiose.  
\v 13 Kanꞌ chaꞌ ni, chkwiǐnꞌ loꞌo wan chaꞌ ja ka ndaja tiꞌ wan, chaꞌ ja kulaa yaꞌ wan ꞌin Ndiose. Ni siya tyijiǐn chinꞌ nu tiꞌí seꞌen ndiꞌiǐn re chaꞌ ꞌwan, ska chaꞌ suꞌwe ꞌwan lka chaꞌ kanꞌ. 
\s1 Suꞌwe ꞌa nka tiye Krixtu ñaꞌan Ni ꞌin nten 
\p  
\v 14 Ndyuǔn xtyiǐnꞌ chaꞌ chkwiǐnꞌ loꞌo Ndiose nu lka Sti Xꞌnaan Jesucristo sikwa.  
\v 15 Ti kwiꞌ Ndiose nda chabiyaꞌ chaꞌ luꞌu nchga nan, chaꞌ ngwiñan Ni nchga loo nten, ni siya nde niꞌ kwan, ni siya lo chalyuu. Kwiꞌ ngwañaꞌan, nda Ni nin nchga nan.  
\v 16 Nchkwiǐnꞌ loꞌo Ndiose Stian chaꞌ ꞌwan; kaꞌan ꞌa chaꞌ suꞌwe nsuꞌwi ꞌin Ndiose, kanꞌ chaꞌ ka ꞌin Ni tayaꞌ Ni ꞌwan. Njñaǎn ꞌin Ni chaꞌ ta Ni jwersa nu kanun niꞌ kasiya ꞌwan, chaꞌ ka ngula la tiꞌ niꞌ kasiya ꞌwan chunꞌ nda Ndiose Tyiꞌi ykwiꞌ Ni chaꞌ tyiꞌin loꞌo wan;  
\v 17 njñaǎn ꞌin Ni chaꞌ ka biyaꞌ tiꞌ wan chaꞌ nganun Tyiꞌi ykwiꞌ Jesús niꞌ kasiya ꞌwan, bra nu msñi suꞌwe wan chaꞌ ꞌin Ndiose; njñaǎn ꞌin Ni chaꞌ suꞌwe xuꞌwi tiye wan siyaꞌ ti ꞌin taꞌa nten wan, chaꞌ suꞌwe ꞌa xñi suun chaꞌ kanꞌ niꞌ kasiya ꞌwan;  
\v 18 njñaǎn ꞌin Ni chaꞌ ka biyaꞌ tiꞌ wan sa ñaꞌan ngiꞌni Krixtu loꞌoan, chaꞌ suꞌwe ꞌa nka tiye Ni ñaꞌan Ni ꞌñaan. Chaꞌ suꞌwe nka tiye Krixtu loꞌo taꞌaan nu lkaan nten chalyuu, ka biyaꞌ tianꞌ chaꞌ ngwañaꞌan kuꞌni Ni loꞌo nchga nten, chunꞌ suꞌwe nsuꞌwi tiye Ni ꞌin neꞌ, ni siya nten nu tnun nchka, ni siya nten nu tiꞌi.  
\v 19 Kanꞌ chaꞌ nchka tiǎnꞌ chaꞌ ka biyaꞌ suꞌwe tiꞌ wan chaꞌ suꞌwe ꞌa nka tiye Krixtu ñaꞌan Ni ꞌñaan, ni siya ska chaꞌ tlyu ꞌa nu ja nchka ka biyaꞌ suꞌwe tianꞌ lka chaꞌ kanꞌ. Loꞌo ngwañaꞌan, nchka tiǎnꞌ chaꞌ tyiꞌin Ndiose loꞌo nchga wan, chaꞌ ja xuꞌwi tiye wan ꞌin xka la chaꞌ nu kuxi siyaꞌ ti. 
\p  
\v 20 Suꞌwe sikwa. Chkwianꞌ chaꞌ tlyu ꞌa lka Ndiose. Nchka ꞌa ꞌin Ni, ngiꞌni Ni kwenta ꞌin nchga chaꞌ nu njñaan ꞌin Ni, ni siya ti ji chkwianꞌ loꞌo Ni; ja nchka ka biyaꞌ tianꞌ sa ñaꞌan ngiꞌni Ni nchga chaꞌ kanꞌ. Ti kwiꞌ Ndiose ngiꞌni tñan loꞌoan, la niꞌ kasiya ꞌñaan siyaꞌ ti, chaꞌ kuꞌni Ni nchga tñan nu nchka tiꞌ Ni kuꞌni Ni loꞌoan.  
\v 21 ¡Kuꞌni tnuan ꞌin Ndiose sikwa, nchgaan nu ngiꞌni tnuan ꞌin Ni tsa tlyu ti; ti kwiꞌ ti chaꞌ, tlyu ꞌa lka Ni chunꞌ tñan nu yꞌni Jesucristo! ¡Ngwañaꞌan ka ꞌin Ni tyukwi tyempu lo chalyuu, kwiꞌ ngwañaꞌan ja tsaa tii ꞌa chaꞌ ꞌin Ni siyaꞌ ti! Ngwañaꞌan ka sikwa. 
\c 4  
\s1 Suꞌwa ndiꞌin chaꞌ ꞌñaan taꞌaan nu wa msñian chaꞌ ꞌin Krixtu 
\p  
\v 1 Presu lkaǎn ni, chaꞌ nchkwiǐnꞌ chaꞌ ꞌin nu nka Xꞌnaan loꞌo nten. Nchkwiǐnꞌ loꞌo wan ni, chaꞌ suꞌwe ti kuꞌni wan loꞌo xka ta nten; sa ñaꞌan nchkwiꞌ chaꞌ ꞌin Ndiose nu yꞌni xaꞌan wan ti kulo, bra nu ngulo suwi Ni ꞌwan, ti kwiꞌ ngwañaꞌan kuꞌni wan loꞌo xka ta nten.  
\v 2 Ja kuꞌni siyeꞌ wan loꞌo taꞌa nten wan, suꞌwe ti chkwiꞌ wan loꞌo nchga nten, kuꞌni wan chaꞌ tlyu tiꞌ ꞌin neꞌ; kwiꞌ ngwañaꞌan, tayaꞌ wan ꞌin neꞌ, chaꞌ ka biyaꞌ tiꞌ xka ta nten chaꞌ chañi chaꞌ suꞌwe ꞌa nka tiye wan loꞌo taꞌa nten wan.  
\v 3 Kuꞌni wan tñan sikwa, loꞌo ngwañaꞌan tayaꞌ Tyiꞌi Ndiose ꞌwan, chaꞌ nchga tsan ska ti chaꞌ xuꞌwi tiye wan loꞌo nchga taꞌa ndiꞌin chaꞌ ꞌwan loꞌo Krixtu. Ngwañaꞌan ka suꞌwa chaꞌ ꞌwan loꞌo taꞌa wan, chaꞌ ka tyiꞌin suꞌwe ti wan loꞌo neꞌ.  
\v 4 Taꞌaan nu msñian chaꞌ ꞌin Krixtu, ska ti nten lkaan, ska ti Tyiꞌi Ndiose ndiꞌin loꞌoan; ti kwiꞌ ti chaꞌ, suꞌwa ti ngataan ꞌin chaꞌ suꞌwe nu ta Ndiose ꞌñaan chalyuu nde loo la, kanꞌ chaꞌ wa ngulo suwi Ni ꞌñaan.  
\v 5 Ska ti Xꞌnaan taꞌaan, ska ti chaꞌ ndyaa ñaꞌan tianꞌ chaꞌ ꞌin Krixtu, ska ñaꞌan ti ndyukwatyaan chaꞌ ꞌin Krixtu,  
\v 6 chaꞌ ska ti Ndiose ꞌñaan, ti kwiꞌ Ni kanꞌ lka Ni Stian taꞌaan, ngwañaꞌan ti kwiꞌ Ni ndiꞌya loo la Ni ꞌñaan. Ngiꞌni Ni tñan loꞌo nchga nten nu wa msñi chaꞌ ꞌin Ni; kwiꞌ ngwañaꞌan, ndiꞌin Ni loꞌo nchga nten ꞌin Ni. 
\p  
\v 7 Wa nda Ni ska tñan ꞌin Ni chaꞌ kuꞌnian kwenta skaan; sa ñaꞌan nu yꞌni Krixtu chaꞌ kaan kwenta skaan, ngwañaꞌan ka kuꞌnian tñan kanꞌ.  
\v 8 Ndukwa chaꞌ re lo kityi kula kanꞌ: 
\q1 Bra nu mdoꞌo Ni ndyaa Ni nde niꞌ kwan, ndyaa loꞌo Ni ꞌin kaꞌan ꞌa nten nu ngwa presu lo chalyuu. 
\q1 Bra kanꞌ mda Ni tyun loo chaꞌ suꞌwe ꞌin nten chalyuu nu msñi chaꞌ ꞌin Ni. 
\m Ngwañaꞌan nchkwiꞌ kityi kanꞌ. 
\p  
\v 9 ¿Ni chaꞌ lka nchkwiꞌ kityi kanꞌ chaꞌ “wa ndyaa Ni nde niꞌ kwan”? Chaꞌ ti kulo wa mbiꞌya Ni yan Ni lo chalyuu nde seꞌen ndiꞌian, nan neꞌ kuxi, kanꞌ chaꞌ nchkwiꞌ kityi ngwañaꞌan.  
\v 10 Ti kwiꞌ Jesús nu mbiꞌya lo chalyuu, kanꞌ lka nu mdoꞌo ndyaa nde seꞌen nu tlyu la, nde seꞌen ndiꞌin Ndiose nde niꞌ kwan. Loꞌo ni, wa nsuꞌwi Tyiꞌi ykwiꞌ Jesús tyukwi ñaꞌaan lo chalyuu, tyukwi ñaꞌaan nde niꞌ kwan.  
\v 11 Chaꞌ tyun loo chabiyaꞌ nda Jesús ꞌin nten chalyuu, kanꞌ chaꞌ ka kuꞌni nten tñan nu nda Ni ꞌin neꞌ chaꞌ kuꞌni neꞌ: Ti kulo wa nda Krixtu tñan kanꞌ ꞌin nten nu yꞌni xaꞌan chaꞌ ꞌin yu; bra kanꞌ nda Ni tñan ꞌin nten nu ka chkwiꞌ nan lka nu wa kuꞌni ti Ndiose lo chalyuu; loꞌo xka ta nten ni, mjwi chabiyaꞌ chaꞌ katsaꞌ ñi neꞌ ꞌin nten sa ñaꞌan nu ka tyoꞌo laa neꞌ ꞌin nchga chaꞌ kuxi; kwiꞌ ngwañaꞌan, nda Ni chabiyaꞌ ꞌin nten nu tyuun loo la ꞌin taꞌa nten neꞌ, chaꞌ ka neꞌ kanꞌ mstru, chaꞌ kwaꞌu neꞌ kanꞌ chaꞌ ꞌin Ndiose ꞌin taꞌa nten neꞌ.  
\v 12 Ngwañaꞌan yꞌni xuꞌwe Ni ꞌñaan, taꞌaan nu ndiꞌin chaꞌ ꞌñaan loꞌo Ni, chaꞌ ka kuꞌnian tñan ꞌin Ni, chaꞌ kanun tsaa la chaꞌ kanꞌ niꞌ kasiya ꞌñaan nan nu msñian chaꞌ ꞌin Krixtu sa tlyu ti.  
\v 13 Loꞌo ngwañaꞌan taꞌaan, ska ñaꞌan ti ka xñian chaꞌ ꞌin Krixtu, ska ñaꞌan ti ka xuꞌwi lyoan ꞌin Jesús nu lka ska ti Sñiꞌ Ndiose. Bra kanꞌ kaan nten nu tyukwi ti tiye, kaan sa ñaꞌan nu nchka tiꞌ Krixtu chaꞌ kaan.  
\v 14 Bra kanꞌ ja kuꞌnian sa ñaꞌan nu ngiꞌni nu xuwe ti nu taꞌa ti nxaꞌan tñan ꞌin, bra nu ndiꞌin jya neꞌ; ja taan chabiyaꞌ chaꞌ tsaa loꞌo neꞌ ꞌñaan xka tuwiin, bra nu chkwiꞌ neꞌ loꞌoan ska chaꞌ nu ja ya kunaan. Nsuꞌwi ꞌa chaꞌ kwiñi nu nchkwiꞌ nten loꞌoan, kwiꞌ nten nu nchka ꞌa nchkwiꞌ, nten nu nchka ꞌa tiꞌ chaꞌ tsaa loꞌo ꞌñaan tuwiin kuxi.  
\v 15 Xka ñaꞌan kuꞌnian. Chkwianꞌ loꞌo nten nchga chaꞌ nu ñi nu nsuꞌwi ꞌin Ndiose; kwaꞌuan ꞌin neꞌ chaꞌ suꞌwe ꞌa nka tiyean ñaꞌaan ꞌin nchga nten, chaꞌ ndiꞌin chaꞌ xñi suꞌwean nchga chaꞌ ꞌin Krixtu, chaꞌ ka suꞌwa chaꞌ ꞌñaan loꞌo Ni. Loꞌo Krixtu ni, ti kwiꞌ nka ndloo la ꞌñaan taꞌaan nu msñian chaꞌ ꞌin Ni sa tlyu ti;  
\v 16 chabiyaꞌ ꞌin Krixtu, kanꞌ chaꞌ lkaan ska ti nten tloo Ndiose. Nsuꞌwi tñan chaꞌ kuꞌnian kwenta skaan; ndiꞌin chaꞌ tayaanꞌ ꞌin taꞌaan chaꞌ ja xñi neꞌ xka tuwiin kuxi, chaꞌ ngwañaꞌan suꞌwa ti ka tiyean loꞌo taꞌaan. Si suꞌwe ti ndiꞌian loꞌo taꞌaan, bra kanꞌ sa tlyu ti tayaanꞌ ꞌin taꞌaan, chaꞌ kanun tsaa la chaꞌ ꞌin Jesús niꞌ kasiya ꞌñaan skaan, chunꞌ suꞌwe ꞌa nka tiyean ñaꞌaan ꞌin taꞌaan. 
\s1 Chalyuu kwi nu mjwi ꞌñaan chabiyaꞌ ꞌin Krixtu 
\p  
\v 17 Chabiyaꞌ ꞌin ykwiꞌ Xꞌnaan chkwiǐnꞌ chinꞌ loꞌo wan ni. Nchka tiǎnꞌ kuloǔn tñan ꞌwan chaꞌ ja kuꞌni wan sa ñaꞌan nu ngiꞌni nten nu ja nsuꞌwi lyo ꞌin Ndiose siyaꞌ ti; nchga chaꞌ kuxi nu ndiꞌya ke neꞌ, xkwiꞌ ngwañaꞌan ngiꞌni neꞌ kanꞌ lo chalyuu. Tintu ꞌa ngiꞌni neꞌ kanꞌ,  
\v 18 tla ꞌa chalyuu ꞌin neꞌ siyaꞌ ti; kanꞌ chaꞌ ja nchka ka biyaꞌ tiꞌ neꞌ. Ja ndiꞌin chaꞌ ꞌin neꞌ kanꞌ loꞌo chalyuu kwi nu wa nda Ndiose ꞌñaan chaꞌ tyiꞌiin suꞌween tian, chunꞌ chaꞌ ja jlyo tiꞌ neꞌ kanꞌ siyaꞌ ti, chaꞌ ja xlyaa neꞌ xñi neꞌ ska chaꞌ nu ñi.  
\v 19 Ja nsuꞌwi chaꞌ jyuꞌu ꞌin neꞌ kanꞌ, kanꞌ chaꞌ kaꞌan ꞌa chaꞌ kuxi ngiꞌni neꞌ, loꞌo nda neꞌ chabiyaꞌ ꞌin nchga chaꞌ kuxi chaꞌ tyijin lyo ran ꞌin neꞌ. Ja tukwin ka tyuun loo la ꞌin neꞌ kanꞌ bra nu ngiꞌni neꞌ nchga chaꞌ chen ñaꞌan loꞌo taꞌa neꞌ.  
\v 20 ꞌWan ni, ja ngwaꞌu Krixtu ꞌwan chaꞌ kuꞌni wan chaꞌ kuxi ngwañaꞌan.  
\v 21 Chañi chaꞌ wa ynan wan chaꞌ ꞌin Krixtu, wa yꞌni xaꞌan suꞌwe wan chaꞌ nu ñi ꞌin Jesús nu ngwaꞌu nten ꞌwan;  
\v 22 kanꞌ chaꞌ kuꞌni tyii wan chaꞌ kuxi nu yꞌni wan nu ngwa sꞌni. Kaꞌan ꞌa chaꞌ ndatsaa chaꞌ kuxi kanꞌ ꞌwan nu ngwa bra kanꞌ, mdiya ꞌa tiꞌ wan chaꞌ kuxi kanꞌ, loꞌo siyaꞌ ti kanaꞌ chalyuu ꞌwan siꞌya chaꞌ kuxi kanꞌ.  
\v 23 Ndiꞌin chaꞌ kuꞌni kwi Ndiose nchga chaꞌ nu nsuꞌwi niꞌ kasiya ꞌwan, loꞌo nchga chaꞌ nu kiꞌya ke wan;  
\v 24 ndiꞌin chaꞌ xñi suꞌwe wan chaꞌ ꞌin Ndiose, chaꞌ xka ñaꞌan kuꞌni wan seꞌen ndiꞌin wan lo chalyuu, chaꞌ ka kuꞌni wan sa ñaꞌan nu nchka tiꞌ Ndiose chaꞌ kuꞌni wan. Kanꞌ chaꞌ xkwiꞌ chaꞌ nu suꞌwe kuꞌni wan lo chalyuu, xkwiꞌ chaꞌ nu luwi kuꞌni wan, si chañi chaꞌ lka wan nten ꞌin Ndiose. 
\p  
\v 25 Ja chkwiꞌ wan chaꞌ kwiñi loꞌo taꞌa nten wan sikwa; xkwiꞌ chaꞌ nu ñi ti chkwiꞌ wan loꞌo taꞌa wan, chaꞌ ska ti nten lkaan, ska ti chaꞌ ndiꞌin ꞌñaan loꞌo taꞌaan.  
\v 26 Ndiya bra msinꞌ tiꞌ wan, kanꞌ chaꞌ kiꞌya wan kwenta chaꞌ ja kanun kiꞌya ꞌwan chunꞌ ndiꞌin la; ja suꞌwe si kasinꞌ tiꞌ wan tyukwi tsan, sa tyijin ti kasinꞌ tiꞌ wan.  
\v 27 Ja siyaꞌ ta wan chabiyaꞌ ꞌin kuneꞌ xaꞌan, chaꞌ tyijin lyo ꞌwan. 
\p  
\v 28 ꞌWan nu yꞌni wan kunan nan nu nsuꞌwi ꞌin nten ti ngwa xkanꞌ, ndiꞌin chaꞌ kulaa yaꞌ wan ꞌin chaꞌ kuxi kanꞌ ni. Kunaan wan tñan suꞌwe la nu kuꞌni wan; suꞌwe la si kuꞌni wan tñan loꞌo yaꞌ wan, chaꞌ ngwañaꞌan kaja chinꞌ nan nu ta wan ꞌin taꞌa wan nu lyiji nan ꞌin. 
\p  
\v 29 Ja chkwiꞌ ꞌa wan chaꞌ tiꞌí loꞌo taꞌa nten wan, kunaan wan chaꞌ suꞌwe ti nu chkwiꞌ wan loꞌo taꞌa wan; kunaan wan sa ñaꞌan nu ka tayaꞌ wan ꞌin neꞌ chaꞌ sten la neꞌ chaꞌ ꞌin Ndiose, chaꞌ kanun ska chaꞌ suꞌwe niꞌ kasiya ꞌin neꞌ bra nu kunan neꞌ chaꞌ nu chkwiꞌ wan.  
\v 30 Ja kuꞌni wan chaꞌ ka xiꞌin tiꞌ Tyiꞌi Ndiose; nu lka Tyiꞌi Ndiose ni, sa ñaꞌan lka si wa mstya Ndiose biyaꞌ ꞌin Ni chuanꞌ, chaꞌ lkaan nten ꞌin Ni, ngwañaꞌan ndyoꞌo chaꞌ kanꞌ. Loꞌo kanun chaꞌ kanꞌ chuanꞌ sa ñaꞌan bra nu tsaa tii chalyuu ꞌñaan, bra nu tiya tsan nu kulaa ji Ni ꞌñaan. 
\p  
\v 31 Kuꞌni tyii wan nchga chaꞌ kuxi nu nsuꞌwi tiye wan ñaꞌan wan ꞌin taꞌa nten wan sikwa; loꞌo chaꞌ tiꞌí tiꞌ wan ꞌin neꞌ, loꞌo chaꞌ msinꞌ tiꞌ wan ꞌin neꞌ, kuꞌni tyii wan nchga chaꞌ kuxi kanꞌ. Ja ta ꞌa wan kiꞌya ꞌin taꞌa wan, ja chkwiꞌ wan kwentu ꞌin taꞌa wan, ja siyaꞌ chkwiꞌ wan chaꞌ kuxi loꞌo taꞌa wan.  
\v 32 Xka ñaꞌan kuꞌni wan ni. Xkwiꞌ suꞌwe ti kuꞌni wan loꞌo taꞌa nten wan, kuꞌni wan chaꞌ tlyu tiꞌ ꞌin taꞌa nten wan; kuꞌni wan chaꞌ tlyu tiꞌ ꞌin neꞌ ꞌin kiꞌya nu yꞌni neꞌ loꞌo wan, chaꞌ ngwañaꞌan wa yꞌni Ndiose chaꞌ tlyu tiꞌ ꞌñaan chaꞌ ꞌin Krixtu. 
\c 5  
\s1 Ndiꞌin chaꞌ kuꞌnian chaꞌ suꞌwe bra nu ndiꞌian lo chalyuu, chaꞌ lkaan sñiꞌ Ndiose 
\p  
\v 1 Suꞌwe ꞌa nka tiye Ndiose ñaꞌan Ni ꞌwan, chaꞌ lka wan sñiꞌ Ni; kanꞌ chaꞌ ndiꞌin chaꞌ kuꞌni wan sa ñaꞌan nu ngiꞌni Ndiose.  
\v 2 Suꞌwe ti xuꞌwi tiye wan ñaꞌan wan ꞌin taꞌa nten wan, chaꞌ kwiꞌ ngwañaꞌan suꞌwe ꞌa nka tiye Krixtu ñaꞌan ꞌñaan. Bra nu yan Jesús lo chalyuu, mslyaa yu mda yu tyukwi ñaꞌaan yu chaꞌ ngwa yu ska lomstan ꞌin Ndiose chaꞌ ꞌñaan. Suꞌwe ꞌa ngwa tiye Ndiose bra kanꞌ. 
\p  
\v 3 Loꞌo ni, chaꞌ lka wan nten ꞌin Ndiose, ja suꞌwe si xkwiꞌ chaꞌ ꞌin nu kunaꞌan ndaꞌan chaꞌ tiye wan, ja ska chaꞌ chen ñaꞌan kuꞌni wan loꞌo nten; ni ja siyaꞌ chkwiꞌ wan chaꞌ kanꞌ loꞌo taꞌa nten wan, ja xitukwi tiꞌ wan chaꞌ suꞌwe nu nsuꞌwi ꞌin nten.  
\v 4 Ja ndiꞌin chaꞌ chkwiꞌ wan chaꞌ kuxi. Ti kwiꞌ ti chaꞌ, ja chkwiꞌ wan chaꞌ tintu, chaꞌ wxtye, ja chkwiꞌ wan ska chaꞌ nu mnaꞌ loꞌo taꞌa nten wan; suꞌwe la si tya wan xuꞌwe ꞌin Ndiose.  
\v 5 Ska chaꞌ nu ñi ꞌa lka re: Nten nu ngwañaꞌan xkwiꞌ chaꞌ kuxi ngiꞌni, ja kaja chabiyaꞌ tyaa neꞌ kanꞌ nde seꞌen ndiꞌin Ndiose loꞌo Krixtu chunꞌ ndiꞌin la, bra nu ka Ni ndloo la; nten nu xkwiꞌ chaꞌ ꞌin nu kunaꞌan ndaꞌan chaꞌ tiye neꞌ, nten nu ngiꞌni chaꞌ chen ñaꞌan, nten nu nxitukwi tiꞌ ska nan, ja kaja chabiyaꞌ tyaa neꞌ kanꞌ nde seꞌen ndiꞌin Ndiose. (Bra nu nxitukwi tianꞌ ska nan ni, sa ñaꞌan si nu ngiꞌni tnuan ꞌin ska joꞌo, ngwañaꞌan nchka tiꞌ chaꞌ kanꞌ.)  
\v 6 Ja ta wan chabiyaꞌ chaꞌ tyijin lyo nten ꞌwan loꞌo ya ñaꞌan ti chaꞌ kwiñi. Siꞌya chaꞌ kuxi kanꞌ msinꞌ ꞌa tiꞌ Ndiose ꞌin nten chalyuu nu ja nnan chaꞌ nchkwiꞌ Ni; loꞌo lye ꞌa ta Ni nu tiꞌí ꞌin neꞌ kanꞌ bra nu tyii chalyuu.  
\v 7 Kanꞌ chaꞌ nchkwiǐnꞌ loꞌo wan, chaꞌ ja sten yuꞌwi wan loꞌo nten nu ngiꞌni ngwañaꞌan. 
\p  
\v 8 Nu ngwa sꞌni, siyaꞌ ti tla chalyuu ꞌwan; loꞌo ni, wa ndiya xka chalyuu ꞌwan, ti bra nu msñi wan chaꞌ ꞌin Xꞌnaan Jesús. Sa ñaꞌan ngiꞌni nten nu ndiꞌin lo xaa ꞌin Krixtu, ngwañaꞌan ndiꞌin chaꞌ kuꞌni wan seꞌen ndiꞌin wan lo chalyuu ni.  
\v 9 Loꞌo ni, wa ndiꞌin xaa luwi ꞌin Ndiose niꞌ kasiya ꞌwan, kanꞌ lka nu ngiꞌni loꞌo wan chaꞌ kuꞌni wan chaꞌ suꞌwe ti; ngiꞌni Ni chaꞌ suꞌwe ꞌa ka tiye wan ñaꞌan wan ꞌin xka ta nten, chaꞌ xkwiꞌ chaꞌ nu ñi chkwiꞌ wan.  
\v 10 Kunaan wan nchga chaꞌ suꞌwe nu nchka tiꞌ ykwiꞌ Xꞌnaan chaꞌ kuꞌni wan, loꞌo bra kanꞌ kuꞌni xaꞌan wan chaꞌ suꞌwe kanꞌ.  
\v 11 Ja xuꞌwi chaꞌ ꞌwan loꞌo nten nu xkwiꞌ chaꞌ ndiꞌin jya ti, nten nu ngiꞌni xkwiꞌ chaꞌ tintu ti, siꞌya chaꞌ tla ꞌa chalyuu nu ndiꞌin neꞌ; chkwiꞌ wan loꞌo neꞌ kanꞌ, chaꞌ ka biyaꞌ tiꞌ neꞌ chaꞌ kuxi ꞌa ngiꞌni neꞌ.  
\v 12 Ndiya chaꞌ kuxi nu ngiꞌni nten mnan ti; ka jyuꞌu ꞌa tianꞌ bra nu chkwianꞌ ꞌin chaꞌ kuxi nu ngiꞌni nten kanꞌ.  
\v 13 Bra nu tyija lyo sa ñaꞌan nchka chaꞌ kuxi kanꞌ ꞌin taꞌa nten neꞌ, bra kanꞌ suꞌwe ꞌa ka biyaꞌ tiꞌ nchga nten chaꞌ kuxi nu ngiꞌni neꞌ. Laa ꞌa ndiꞌin nchga chaꞌ xa nu wa ndyija lyo chaꞌ kanꞌ lo xaa ꞌin Jesús.  
\v 14 Kanꞌ chaꞌ nchkwiꞌ kityi kula chaꞌ re: 
\q1 Xaa tiꞌ wan, chaꞌ ñaꞌan tiꞌ si lajaꞌ wan, ñaꞌan tiꞌ si ngujwi wan, ngwañaꞌan ngiꞌni wan siꞌya kiꞌya nu ndiꞌin ꞌwan. 
\q1 Ja xuꞌwi ꞌa chaꞌ ꞌwan loꞌo chaꞌ kuxi, chaꞌ bra kanꞌ ta Krixtu xaa nu xuꞌwi niꞌ kasiya ꞌwan. 
\m Ngwañaꞌan nchkwiꞌ kityi kanꞌ. 
\p  
\v 15 Suꞌwe sikwa, kuwe suꞌwe tiꞌ wan sa ñaꞌan nu kuꞌni wan bra nu ndiꞌin wan lo chalyuu; ja kuꞌni wan sa ñaꞌan nu ngiꞌni nten nu ja nnan siyaꞌ ti, kuꞌni wan sa ñaꞌan nu ngiꞌni nten nu suꞌwe ti chaꞌ ndaꞌan tiye.  
\v 16 Kunaan wan chaꞌ suꞌwe nu kuꞌni wan xa nu ndiꞌin wan lo chalyuu, chaꞌ ja xuꞌwi chaꞌ ꞌwan loꞌo chaꞌ kuxi nu ngiꞌni xka ta nten chalyuu;  
\v 17 ja kuꞌni wan chaꞌ tintu sikwa, kuꞌni xaꞌan wan nchga chaꞌ nu nchka tiꞌ ykwiꞌ Xꞌnaan chaꞌ kuꞌni wan lo chalyuu.  
\v 18 Ja ka kuꞌwi wan; ngiꞌni ñuꞌun ꞌa kuneꞌ xaꞌan ꞌin nten chaꞌ kanaꞌ chalyuu ꞌin neꞌ, siꞌya chaꞌ kuꞌwi ꞌin neꞌ. Xka ñaꞌan kuꞌni wan, chaꞌ ka tayaꞌ Tyiꞌi Ndiose ꞌwan loꞌo nchga tñan nu kuꞌni wan lo chalyuu.  
\v 19 Kula tuꞌwa wan nchga lo kantu ꞌin Ndiose bra nu tyoꞌ tiꞌin wan loꞌo taꞌa wan chaꞌ kuꞌni tnun wan ꞌin Ni, ni siya salmos nu ndukwa lo kityi ti sꞌni, ni siya ya ñaꞌan ti kantu nu nchkwiꞌ chaꞌ ꞌin Ndiose nu kiꞌya ke wan; tyukwi ti tiye wan kuꞌni tnun wan ꞌin Ndiose loꞌo kantu kanꞌ.  
\v 20 Nchga bra suꞌwe chaꞌ tya wan xuꞌwe ꞌin Ndiose Stian chabiyaꞌ ꞌin Xꞌnaan Jesucristo; tya wan xuꞌwe ꞌin Ni chaꞌ ꞌin nchga chaꞌ nu nchka ꞌwan, ni siya chaꞌ suꞌwe, ni siya chaꞌ nu ja suꞌwe. 
\s1 Xa wa msñi neꞌ chaꞌ ꞌin Ndiose taꞌa tyukwaa neꞌ loꞌo kwilyoꞌo neꞌ 
\p  
\v 21 Tukwa suꞌwe wan chaꞌ nu nchkwiꞌ kwilyoꞌo wan chabiyaꞌ Ndiose. 
\p  
\v 22 ꞌWan neꞌ kunaꞌan ni, sa ñaꞌan nu ndukwaan chaꞌ nu nchkwiꞌ Ndiose Xꞌnaan, ngwañaꞌan tukwa wan chaꞌ nu nchkwiꞌ kwilyoꞌo wan loꞌo wan.  
\v 23 Ndloo la lka ska yu kiꞌyu ꞌin kwilyoꞌo yu. Kwiꞌ ngwañaꞌan, Krixtu nka ndloo la ꞌin nchga nten nu ngiꞌni tnun ꞌin Ni sa tlyu ti; Krixtu lka nu ndlaa ꞌin nchga nten ꞌin yu, chaꞌ ja kuꞌni ñuꞌun nu kuxi ꞌin neꞌ loꞌo taꞌa neꞌ.  
\v 24 ꞌWan neꞌ kunaꞌan taꞌa msñian chaꞌ ꞌin Krixtu, ndiꞌin chaꞌ kuꞌni tnun wan ꞌin kwilyoꞌo wan; sa ñaꞌan nu ndukwa wan tñan nu ndlo Krixtu, nchga taꞌa wan nu ngiꞌni tnun wan ꞌin Krixtu sa tlyu ti, ngwañaꞌan tukwa wan nchga tñan nu kulo kwilyoꞌo wan ꞌwan. 
\p  
\v 25 ꞌWan yu kiꞌyu ni, suꞌwe xuꞌwi tiye wan ñaꞌan wan ꞌin kwilyoꞌo wan, chaꞌ kwiꞌ ngwañaꞌan suꞌwe ꞌa nka tiye Krixtu ñaꞌan Ni ꞌin nten ꞌin Ni lo chalyuu; kanꞌ chaꞌ mslyaa yu chaꞌ ngujwi yu lo wsi chaꞌ kulaa ꞌin nten nu xñi chaꞌ ꞌin Ni chunꞌ ndiꞌin la.  
\v 26 Ngwa tiꞌ Jesús chaꞌ kunan nten nu xñi chaꞌ ꞌin Ni nchga chaꞌ nu nchkwiꞌ yu, kanꞌ chaꞌ ngujwi yu chaꞌ kaja ñaꞌan kuꞌni luwi Ni ꞌin neꞌ kanꞌ, chaꞌ ka kuꞌni tyii Ni kiꞌya nu ndiꞌin ꞌin neꞌ, chaꞌ ta Ni chalyuu kwi ꞌin neꞌ. Ngwañaꞌan yꞌni Jesús chaꞌ ska yaꞌ ti ka neꞌ kanꞌ nten ꞌin Ni. Loꞌo kanꞌ ka tukwatya nten ꞌin neꞌ kanꞌ chaꞌ ꞌin Jesús.  
\v 27 Ngwa tiꞌ Krixtu chaꞌ tyiꞌin nten ꞌin Ni seꞌen ndiꞌin Ndiose bra nu tyii chalyuu; tlyu ꞌa chaꞌ suꞌwe ka xa nu tyiꞌian sa tlyu ti seꞌen ndiꞌin ykwiꞌ Ndiose, xa nu luwi tiyean, xa nu ja ndukwian kiꞌya, xa nu ja ndiꞌin ꞌa yuweꞌ ꞌñaan, chaꞌ nu ja loꞌo xka la chaꞌ kuxi ꞌñaan, chaꞌ ja nchka tiꞌ Ndiose ñaꞌan Ni ska chaꞌ nu kuxi.  
\v 28 ꞌWan yu kiꞌyu nu ndiꞌin kwilyoꞌo wan ni, ndiꞌin chaꞌ tiya tiꞌ wan ꞌin kwilyoꞌo wan, ndiꞌin chaꞌ chka tꞌnan tiꞌ wan ꞌin kwilyoꞌo wan, sa ñaꞌan nu ndiya tiꞌ wan ꞌwan, ti ykwiꞌ ti wan. Xa nu ndiya tianꞌ ꞌin kwilyoꞌoan, ngiꞌnian ska chaꞌ suꞌwe loꞌoan, ti ykwiinꞌ tian bra kanꞌ,  
\v 29 chaꞌ ja skaan ngiꞌnian chaꞌ kuxi loꞌoan, ti ykwiinꞌ tian. Nchkuun suꞌwean, ñaꞌansiin suꞌwean ꞌñaan, ti ykwiinꞌ tian; kwiꞌ ngwañaꞌan nchka tꞌnan tiꞌ Krixtu ꞌin nten ꞌin Ni,  
\v 30 chaꞌ ska ta ti nten ka taꞌaan chaꞌ ꞌin Krixtu, chaꞌ nsuꞌwi tñan nu kuꞌni nchgaan chaꞌ ꞌin Ni.  
\v 31 Nde ndiya ska chaꞌ nu ndukwa lo kityi kula: “Ska nten nu ndyiji kwilyoꞌo ndiꞌin chaꞌ ska ta tyiꞌin yu loꞌo kwilyoꞌo yu; ja ndiꞌin ꞌa chaꞌ tyiꞌin yu loꞌo sti yu loꞌo jyaꞌan yu. Loꞌo kanꞌ, ska ti nten ka taꞌa tyukwaa neꞌ kanꞌ chaꞌ ꞌin Ndiose siyaꞌ ti” ndukwin kityi kanꞌ.  
\v 32 Tnun ꞌa chaꞌ nchkwiꞌ kityi kula kanꞌ. Nxkeꞌ tiǎnꞌ chaꞌ chaꞌ ꞌin Krixtu nchkwiꞌ kityi kanꞌ, ngwañaꞌan chaꞌ ꞌñaan taꞌaan nu ngiꞌniin tnuan ꞌin Ni sa tlyu ti, kanꞌ lka chaꞌ nu nchkwiꞌ Ndiose lo kityi kanꞌ.  
\v 33 Loꞌo ngwañaꞌan, nchkwiꞌ kityi kanꞌ chaꞌ ꞌin nchga wan, chaꞌ ꞌwan yu kiꞌyu, chka tꞌnan tiꞌ wan ꞌin kwilyoꞌo wan sa ñaꞌan nu nchka tꞌnan tiꞌ wan ꞌwan, ti ykwiꞌ ti wan. Loꞌo ꞌwan neꞌ kunaꞌan wan, ndiꞌin chaꞌ kuꞌni tnun wan ꞌin kwilyoꞌo wan. 
\c 6  
\p  
\v 1 ꞌWan yu kuneꞌ ni, tukwa wan tñan nu kulo neꞌ kula ꞌwan, chaꞌ ngwañaꞌan nchka tiꞌ Ndiose Xꞌnaan chaꞌ kuꞌni wan.  
\v 2 Ska chaꞌ nu ykwiꞌ Ndiose loꞌo nten ti kulo lka chaꞌ re: “Tukwa wan chaꞌ nu nchkwiꞌ sti wan, chaꞌ nu nchkwiꞌ jyaꞌan wan.” Loꞌo ndiya xka chaꞌ nu ykwiꞌ Ndiose loꞌoan si kuꞌnian ngwañaꞌan:  
\v 3 “Ka suꞌwe ka tiye wan bra kanꞌ, kaꞌan yijan talo wan tyiꞌin wan lo chalyuu bra kanꞌ” ndukwin Ndiose. 
\p  
\v 4 ꞌWan nu lka wan sti nu xuwe ni, ja ta wan seꞌen chaꞌ tyiꞌin wsuun wan loꞌo sñiꞌ wan. Bra nu ngiꞌni kuꞌu wan ꞌin sñiꞌ wan, kaꞌni neꞌ chinꞌ si chañi ndiya chaꞌ kuxi ngiꞌni neꞌ; kwaꞌu suꞌwe wan ꞌin neꞌ chaꞌ kunan neꞌ chaꞌ nu nchkwiꞌ Xꞌnaan. 
\p  
\v 5 ꞌWan, msu nu msiꞌi nten ꞌwan chaꞌ kuꞌni wan tñan ꞌin neꞌ xuꞌwe ti, kuꞌni wan nchga tñan nu kulo xꞌnan wan ꞌwan lo chalyuu. Kuwe chinꞌ tiꞌ wan sa ñaꞌan nu kuꞌni wan tñan ꞌin neꞌ, chaꞌ tyukwi ti tiye wan kuꞌni wan tñan kanꞌ; kuꞌni wan tñan kanꞌ sa ñaꞌan lka si ngiꞌni wan tñan ꞌin Krixtu. 
\p  
\v 6 Kuꞌni wan tñan ꞌin neꞌ sikwa; ja kuꞌni wan tñan kanꞌ chaꞌ kanun suꞌwe ti wan loꞌo neꞌ, xa nu nduun ti neꞌ nsñi neꞌ kwenta ꞌwan si ngiꞌni wan tñan. Suꞌwe la si tyuꞌwi tiꞌ wan chaꞌ ti kwiꞌ msu ꞌin Krixtu lka wan ni, kanꞌ chaꞌ tyukwi ti tiye wan kuꞌni wan nchga tñan nu nchka tiꞌ Ndiose chaꞌ kuꞌnian.  
\v 7 Suꞌwe ti kuꞌni wan nchga tñan sikwa, tyuꞌwi tiꞌ wan chaꞌ tñan ꞌin ykwiꞌ Xꞌnaan lka nu ngiꞌni wan, siꞌi tñan ꞌin nten chalyuu ti.  
\v 8 Ja nꞌni chaꞌ ni siya msu nu msiꞌi ti nten lka wan, ni siya msu nu ndiꞌin suꞌwe ti lka wan; wa jlyo tianꞌ chaꞌ nda Xꞌnaan chaꞌ suꞌwe ꞌin nchga nten nu suꞌwe ngiꞌni tñan chaꞌ ꞌin Ni. 
\p  
\v 9 ꞌWan xꞌnan msu ni, kwiꞌ ngwañaꞌan ndiꞌin chaꞌ ñaꞌansiin suꞌwe wan ꞌin msu ꞌwan. Ja xitsen wan ꞌin neꞌ, ja kuꞌni tlá wan ꞌin neꞌ kanꞌ; tyaa yuꞌwi tiꞌ wan chaꞌ ska ti Xꞌnaan nu nduun loo la ꞌwan loꞌo neꞌ kanꞌ, loꞌo ska ti biyaꞌ ngiꞌni Ni loꞌo nchga nten. 
\s1 Yaꞌ xñan nu kunanjoꞌo ꞌin neꞌ nu msñi chaꞌ ꞌin Krixtu, chaꞌ xuun neꞌ loꞌo kuneꞌ xaꞌan 
\p  
\v 10 Loꞌo ni, ndiꞌin chaꞌ chka ngula la tiꞌ wan niꞌ kasiya ꞌwan, chaꞌ suꞌwa ti ngiꞌni wan tñan loꞌo ykwiꞌ Xꞌnaan, loꞌo ngwañaꞌan tnun ꞌa jwersa nsuꞌwi ꞌin Ndiose.  
\v 11 Nchga bra tyaꞌan chaꞌ tiye wan chaꞌ ꞌin nchga chaꞌ nu wa ykwiꞌ Ndiose loꞌo wan, chaꞌ ka kuꞌni wan kwenta ꞌwan, ti ykwiꞌ ti wan, chaꞌ ja kwiñi lyoꞌo kuneꞌ xaꞌan ꞌwan.  
\v 12 Ja nxuan loꞌo nten chalyuu ti, nu chinꞌ ti jwersa nsuꞌwi ꞌin neꞌ; nu nxuun loꞌoan lka nchga kwiꞌin kuxi nu nsuꞌwi nde niꞌ kwan. Ngula ꞌa tiꞌ kwiꞌin kanꞌ, kwiꞌ kanꞌ lka nu nchka ꞌa tiꞌ tyijin lyo ꞌin Ndiose; loꞌo ja nchka ꞌin ran. Ti kwiꞌ kwiꞌin kuxi kanꞌ nchka tiꞌ ka xꞌnan chalyuu, loꞌo ngwañaꞌan ndlo ran tñan ꞌin nten chaꞌ kuꞌni neꞌ nchga loo chaꞌ kuxi lo chalyuu bra ni.  
\v 13 Chaꞌ nu wa ykwiꞌ Ndiose loꞌoan ni, sa ñaꞌan lka steꞌ sndaru nu ndaꞌan wsuun, ngwañaꞌan lka chaꞌ kanꞌ ꞌin Ndiose; xkwiꞌ chkwan lka steꞌ sndaru, chaꞌ kunanjoꞌo ꞌin yu xa nu nxuun yu. Kwiꞌ ngwañaꞌan ꞌwan, tukwa wan nchga chaꞌ nu nchkwiꞌ Ndiose, xñi suꞌwe wan chaꞌ kanꞌ ni; loꞌo xa nu tiya bra nu kuxi kanꞌ, ka talo wan chaꞌ xuun wan loꞌo kuneꞌ xaꞌan bra kanꞌ. Si ngwañaꞌan kuꞌni wan, xa wa mdyii chaꞌ wsuun kanꞌ ti tyiꞌin suꞌwe kasiya ꞌwan sa ñaꞌan nu mdiꞌin wan ti kulo.  
\v 14 Kanꞌ chaꞌ kuꞌni tiya tiꞌ wan sikwa; sa ñaꞌan nu ndiꞌin kijin siꞌ sndaru chaꞌ chkanꞌ suꞌwe steꞌ yu, ngwañaꞌan ꞌwan, xñi suꞌwe wan chaꞌ nu nchkwiꞌ Ndiose. Xkwiꞌ chaꞌ nu ñi chkwiꞌ wan, chaꞌ bra kanꞌ ka xuun taꞌa wan loꞌo nu kuxi. Ska sndaru ni, nchkunꞌ chkwan ñaꞌaan lo tiye yu loꞌo nde chunꞌ yu. Kwiꞌ ngwañaꞌan ꞌwan, ja ka xtya neꞌ kiꞌya ꞌwan si xkwiꞌ tñan nu ñi kuꞌni wan.  
\v 15 Ngula kanan nsuꞌwi kiyaꞌ sndaru. Kwiꞌ ngwañaꞌan ꞌwan, kuꞌni xuꞌwe wan ꞌwan chaꞌ tsaa wan chkwiꞌ wan chaꞌ ꞌin Ndiose loꞌo nten; chkwiꞌ wan loꞌo neꞌ chaꞌ ka kulaa Ni ꞌin neꞌ kanꞌ, chaꞌ kuꞌni Ni chaꞌ tiin ti tyiꞌin niꞌ kasiya ꞌin neꞌ.  
\v 16 Loꞌo ndukwa ska chkwan kwajaꞌ skun sndaru; bra nu kuun nu nxuun loꞌo yu kilya nu ndukwa kiiꞌ loo ꞌin yu, bra kanꞌ tukunꞌ yu loo kilya kanꞌ loꞌo chkwan kwajaꞌ kanꞌ. Ngwañaꞌan ka ꞌwan si chañi chaꞌ msñi wan chaꞌ ꞌin Ndiose, ka kuꞌni wan kwenta ꞌwan, ti ykwiꞌ ti wan nchga bra chaꞌ ja kuꞌni nu kuxi kanan ꞌwan.  
\v 17 Skwaꞌ chkwan ndukwa ke sndaru chaꞌ skunꞌ ke neꞌ. Kwiꞌ ngwañaꞌan ꞌwan, wa ngulaa Ni ꞌwan, kanꞌ chaꞌ wa ndiya nu ñaꞌansiin ꞌwan bra kanꞌ. Xñi wan nchga chaꞌ nu nchkwiꞌ Tyiꞌi Ndiose loꞌo wan chaꞌ kaja chaꞌ nu chkwiꞌ wan loꞌo xka ta nten, sa ñaꞌan lka si wa msñi wan ska xtyi nu cha ꞌa ꞌin sndaru.  
\v 18 Chkwiꞌ wan loꞌo Ndiose bra nu xuun wan loꞌo nu kuxi, jñan wan chabiyaꞌ ꞌin Ni; nchga bra tayaꞌ Tyiꞌi Ndiose ꞌwan chaꞌ ka chkwiꞌ wan loꞌo Ni. Kwiꞌ ngwañaꞌan ndiꞌin chaꞌ chkwiꞌ wan loꞌo Ni chaꞌ ꞌin nchga nten nu wa msñi chaꞌ ꞌin Ni. Kanꞌ chaꞌ sikwa, ndii ti tiꞌ wan chkwiꞌ wan loꞌo Ni, chaꞌ ja ka ndaja tiꞌ wan.  
\v 19 Loꞌo ngwañaꞌan suꞌwe si chkwiꞌ wan loꞌo Ndiose Stian chaꞌ ꞌñaǎn, chaꞌ ti ta la Ni chaꞌ nu chkwiǐnꞌ loꞌo nten, chaꞌ ka ngula la tiꞌ kasiya ꞌñaǎn chkwiǐnꞌ loꞌo nten sa ñaꞌan yaꞌ nu ka biyaꞌ suꞌwe tiꞌ neꞌ, chaꞌ ka kulaa Krixtu ꞌin neꞌ yaꞌ nu kuxi; ska chaꞌ nu ja ya kunan neꞌ lka chaꞌ kanꞌ.  
\v 20 Wa ngulo suwi Ni ꞌñaǎn chaꞌ tsaꞌaǎn tijyuꞌ, chaꞌ chkwiǐnꞌ chaꞌ kanꞌ loꞌo nten; kanꞌ chaꞌ lkaǎn presu ni. Chkwiꞌ wan loꞌo Ndiose chaꞌ ꞌñaǎn sikwa, chaꞌ ka chkwiǐnꞌ ñi chaꞌ kanꞌ loꞌo nten, sa ñaꞌan nu ndiꞌin chaꞌ chkwiǐnꞌ. 
\s1 Mslaaꞌ Palyu ꞌin neꞌ 
\p  
\v 21 Wa msuꞌwaǎn ꞌin Tíquico chaꞌ tsaa yu seꞌen ndiꞌin wan. Suꞌwe ꞌa nka tiye ba chaꞌ suꞌwa ꞌa yꞌni ba tñan ꞌin ykwiꞌ Xꞌnaan loꞌo yu. Katsaꞌ ji yu ꞌwan nchga chaꞌ nu nchka ꞌñaǎn nde re, sa ñaꞌan tñan nu ngiꞌniǐn.  
\v 22 Kanꞌ chaꞌ wa msuꞌwaǎn ꞌin yu ndijyan yu seꞌen ndiꞌin wan, chaꞌ suꞌwe la kanun kasiya ꞌwan xa nu kunan wan sa ñaꞌan chaꞌ nu nchka ꞌware. 
\p  
\v 23 Loꞌo ni, chkwiǐnꞌ loꞌo Ndiose Stian, loꞌo Xꞌnaan Jesucristo chaꞌ ꞌwan, taꞌa msñian chaꞌ ꞌin Krixtu; kuꞌni Ni chaꞌ tiin ti tyiꞌin kasiya ꞌwan, chaꞌ suꞌwe ti xuꞌwi tiye wan ñaꞌan wan ꞌin taꞌaan, chunꞌ chaꞌ nchga bra ndyaa ñaꞌan tiꞌ wan ꞌin Ndiose.  
\v 24 Kwiꞌ ngwañaꞌan nchka tiǎnꞌ chaꞌ ñaꞌan ti kuꞌni Ni chaꞌ suꞌwe loꞌo taꞌa wan nu suꞌwe nsuꞌwi tiye wan ꞌin Xꞌnaan Jesucristo, nchga wan nu ja nchka tiꞌ wan kulaa yaꞌ wan ꞌin Krixtu. Ngwañaꞌan ka sikwa.