\id 2TH  
\h 2 TESALONICENSES 
\toc1 Ngwaꞌan Palyu xka kityi ndyaa seꞌen ndiꞌin nten ꞌin Jesucristo nde kichen Tesalónica 
\toc2 2 TESALONICENSES 
\toc3 2 Ts. 
\mt1 Ngwaꞌan Palyu xka kityi ndyaa seꞌen ndiꞌin nten ꞌin Jesucristo nde kichen Tesalónica 
\c 1  
\p  
\v 1 Palyu, Silvano, Timu lka nin ba. Ndaꞌan ba kityi re chaꞌ tsaa seꞌen ndiꞌin taꞌa wan neꞌ kichen Tesalónica nu wa msñi wan chaꞌ ꞌin Ndiose Stian, ꞌwan nu wa msñi wan chaꞌ ꞌin Jesucristo nu nka Xꞌnaan.  
\v 2 Ngwañaꞌan nchka tiꞌ ba, chaꞌ ti kuꞌni Ndiose Stian chaꞌ suꞌwe loꞌo wan, chaꞌ kuꞌni Ni chaꞌ tiin ti tyiꞌin wan lo chalyuu chabiyaꞌ ꞌin Jesucristo nu nka Xꞌnaan. 
\s1 Ta Ndiose nu tiꞌí ꞌin nten nu ja xlyaa kunan chaꞌ nu nchkwiꞌ Ni 
\p  
\v 3 ꞌWan taꞌa msñian chaꞌ ꞌin Jesús, ndiꞌin chaꞌ tya ba xuꞌwe ꞌin Ndiose nchga yaꞌ nu chkwiꞌ ba loꞌo Ni chaꞌ ꞌwan; ndiꞌin chaꞌ kuꞌni ba ngwañaꞌan, chaꞌ nchga tsan suꞌwe la nganun chaꞌ ꞌin Jesús niꞌ kasiya ꞌwan, nchga tsan nsuꞌwi la tiye wan ñaꞌan wan ꞌin taꞌa nten wan.  
\v 4 Suꞌwe ꞌa bra kanꞌ. Suꞌwe ꞌa nka tiye ba chaꞌ ꞌwan, kanꞌ chaꞌ nchkwiꞌ ba chaꞌ ꞌwan loꞌo nchga nten taꞌa msñian chaꞌ ꞌin Ndiose. Nchkwiꞌ ba loꞌo neꞌ chaꞌ suꞌwe ꞌa ngiꞌni wan, chaꞌ ngula ꞌa tiꞌ niꞌ kasiya ꞌwan chaꞌ ꞌin Ndiose, ni siya ndijin ꞌa wan nu tiꞌí, ni siya lye ꞌa tiꞌí tiꞌ nten ꞌwan ni. Suꞌwe ꞌa chaꞌ ndalo wan ꞌin neꞌ, ni siya kuxi ꞌa ngiꞌni neꞌ kanꞌ loꞌo wan.  
\v 5 Ñi ꞌa ngiꞌni biyaꞌ Ndiose ꞌin nten; kanꞌ chaꞌ kaja seꞌen tyiꞌin wan nde seꞌen lka Ndiose ndloo nde loo la, ni siya xaꞌan ꞌa ngiꞌni neꞌ loꞌo wan ni, chunꞌ wa msñi wan chaꞌ ꞌin Ndiose.  
\v 6 Ñi ꞌa ngiꞌni Ndiose, kwiꞌ ngwañaꞌan chañi ꞌa chaꞌ chunꞌ ndiꞌin la ta Ndiose nu tiꞌí ꞌin nchga nten nu nda nu tiꞌí ꞌwan ni.  
\v 7 Bra kanꞌ, loꞌo ꞌwan loꞌo bare tyii nu tiꞌí ꞌñaan bra nu tyoꞌo tukwa Jesús nu nka Xꞌnaan nde niꞌ kwan. Kan Jesús loꞌo xaa nu tnun bra kanꞌ; suꞌwa ti kan Ni loꞌo kaꞌan ꞌa nten ꞌin Ni, chaꞌ tnun ꞌa tñan ngiꞌni angajle kanꞌ chabiyaꞌ ꞌin Ndiose.  
\v 8 Bra kanꞌ ta Ndiose nu tiꞌí ꞌin nchga nten nu ja xlyaa kunan chaꞌ nchkwiꞌ Ni. Kwiꞌ ngwañaꞌan, ta Ndiose nu tiꞌí ꞌin nten nu ja xlyaa xñi chaꞌ suꞌwe ꞌin Xꞌnaan Jesús.  
\v 9 Chañi chaꞌ ta Ndiose nu tiꞌí ꞌin neꞌ kanꞌ; kulo Ndiose tñan chaꞌ tyoꞌo neꞌ kanꞌ seꞌen ndiꞌin Ni, chaꞌ ja ñaꞌan ꞌa neꞌ kanꞌ ꞌin Xꞌnaan bra kanꞌ. Ndiꞌin chaꞌ tyaa neꞌ nde seꞌen ja tsaa tii ꞌa chaꞌ tyijin neꞌ nu tiꞌí. Loꞌo ja ñaꞌan ꞌa neꞌ kanꞌ xaa luwi ꞌin Ndiose bra kanꞌ, ja ñaꞌan ꞌa neꞌ ꞌin Ndiose nu nchka ꞌin kuꞌni nchga lo tñan.  
\v 10 Ngwañaꞌan ta Ndiose nu tiꞌí ꞌin neꞌ kanꞌ bra nu kan Jesús xiyaꞌ. Si nu ndiꞌin chaꞌ ꞌñaan loꞌo Ni, bra kanꞌ kuꞌniin tnuan ꞌin Ni tsan kanꞌ; kwiꞌ ngwañaꞌan, suꞌwe ꞌa chkwianꞌ loꞌo Ni loꞌo taꞌaan bra nu tiya tsan kanꞌ, chunꞌ msñian chaꞌ ꞌin Ni. Loꞌo ꞌwan, suꞌwa ti tyoꞌ tiꞌin wan loꞌo ba seꞌen ndiꞌin Jesús tsan kanꞌ, chaꞌ msñi wan chaꞌ ꞌin Jesús bra nu ngwaꞌu ba chaꞌ kanꞌ ꞌwan ti kulo. 
\p  
\v 11 Kanꞌ chaꞌ nchga tsan nchkwiꞌ ba loꞌo Ndiose Stian chaꞌ kuꞌni Ni tñan niꞌ kasiya ꞌwan, chaꞌ suꞌwe ti kuꞌni wan tñan nu nda Ni ꞌwan ti bra nu ngulo suwi Ni ꞌwan. Nchkwiꞌ ba loꞌo Ni chaꞌ tayaꞌ Ni ꞌwan, chaꞌ ngwañaꞌan kuꞌni ji wan nchga chaꞌ suꞌwe nu ndaꞌan tiye wan chaꞌ kuꞌni wan chabiyaꞌ ꞌin Ndiose, nchga lo chaꞌ suꞌwe nu ngiꞌni wan chaꞌ msñi wan chaꞌ ꞌin Ni.  
\v 12 Ngwañaꞌan ngiꞌni tlyu wan ꞌin Jesucristo nu nka Xꞌnaan, bra nu ngiꞌni wan tñan ꞌin Ni; ngwañaꞌan ka biyaꞌ tiꞌ nten bra kanꞌ chaꞌ nganun Tyiꞌi Ndiose niꞌ kasiya ꞌwan. Loꞌo kanꞌ ka biyaꞌ tiꞌ neꞌ chaꞌ suꞌwe ꞌa ngiꞌni Ndiose loꞌo wan, chaꞌ suꞌwa ti ngiꞌni Ndiose Stian tñan loꞌo Jesucristo nu nka Xꞌnaan. 
\c 2  
\s1 Tyoꞌo tukwa ska neꞌ nu xaꞌan ꞌa lo chalyuu 
\p  
\v 1 ꞌWan taꞌa msñian chaꞌ ꞌin Jesús, jlyo tianꞌ chaꞌ ti kan Jesucristo nu nka Xꞌnaan xiyaꞌ, chaꞌ tsaa loꞌo Ni ꞌñaan chaꞌ tyukwa taꞌaan loꞌo Ni la kanꞌ; kanꞌ chaꞌ ñi ꞌa katsaꞌ ba ꞌwan ni,  
\v 2 chaꞌ ja xiꞌin chunꞌ wan ꞌin chaꞌ suꞌwe kanꞌ. Ja kutsen wan ni siya nchka tiꞌ nten xitsen ꞌwan. Ni siya chkwiꞌ neꞌ chabiyaꞌ ꞌin Tyiꞌi Ndiose, nchkwin neꞌ, ni siya chañi ꞌa chaꞌ nu kwaꞌu neꞌ ꞌwan, nchkwin neꞌ ꞌwan, ni siya chkwiꞌ neꞌ lo kityi nu msuꞌwa ba ndijyan seꞌen ndiꞌin wan, nchkwin neꞌ, chaꞌ kwiñi lka si chkwiꞌ neꞌ chaꞌ wa mdiya tsan nu mdiyan Xꞌnaan xiyaꞌ, chaꞌ ja jlyo tiꞌ neꞌ siyaꞌ ti.  
\v 3 Ja tsaa ñaꞌan tiꞌ wan ꞌin nu kwiñi nu chkwiꞌ ngwañaꞌan. Bra nu ti ji tiya tsan kanꞌ, bra kanꞌ lye ꞌa xuun nten chalyuu loꞌo Ndiose; bra kanꞌ kan ska nten nu kuꞌni tñan ꞌin kuneꞌ xaꞌan lo chalyuu, ti kwiꞌ nu ndiꞌin chaꞌ tyaa lo jwlyaa xa wa tsaa tii chalyuu.  
\v 4 Kanꞌ lka nu nchka tiꞌ kuꞌni tyii chaꞌ ꞌin nchga lo joꞌo, chaꞌ ja kuꞌni tnun nten ꞌin ran; kwiꞌ ngwañaꞌan, nchka tiꞌ yu xaꞌan kanꞌ chaꞌ ja kuꞌni tnun nten ꞌin Ndiose, chaꞌ kuꞌni tnun neꞌ ꞌin ykwiꞌ yu. Sten yu niꞌ lyaa tnun, tsaa tukwa yu la kanꞌ; bra kanꞌ chkwiꞌ yu loꞌo nchga nten chaꞌ kuꞌni tnun neꞌ ꞌin ykwiꞌ yu, chaꞌ Ndiose lka ykwiꞌ yu, nchkwin yu. 
\p  
\v 5 Wa jlyo tiꞌ wan chaꞌ tyun ta ykwiǐnꞌ loꞌo wan chaꞌ ꞌin yu xaꞌan kanꞌ, bra nu ti mdiꞌiǐn loꞌo wan;  
\v 6 kwiꞌ ngwañaꞌan, jlyo tiꞌ wan ti ka lka nu ndukunꞌ chaꞌ ꞌin yu xaꞌan kanꞌ ni, chaꞌ ja ka ꞌin yu ka yu ndloo, sa bra nu tiya tsan kanꞌ nde loo la.  
\v 7 Wa mdyisnan chaꞌ xaꞌan kanꞌ loꞌo nten chalyuu, ni siya ni ti ndukunꞌ Ni chaꞌ ꞌin yu xaꞌan kanꞌ. Loꞌo kanꞌ bra nu ja tukunꞌ la Ni chaꞌ ꞌin yu xaꞌan kanꞌ, xa wa mdoꞌo tsuꞌ Ni chinꞌ,  
\v 8 bra kanꞌ ka yu xaꞌan kanꞌ ndloo ti chinꞌ ti bra. Chunꞌ ndiꞌin la kan Jesús nu nka Xꞌnaan, loꞌo kanꞌ kujwi Jesús ꞌin yu xaꞌan kanꞌ loꞌo wtsin ndyoꞌo tuꞌwa ti Ni; tyii chaꞌ ꞌin yu xaꞌan kanꞌ bra nu kan Jesús xiyaꞌ, chaꞌ ja talo yu ñaꞌan yu ꞌin xaa ndyuwi nu ndijyan loꞌo Xꞌnaan.  
\v 9 Bra nu kan yu xaꞌan kanꞌ, kan yu loꞌo chabiyaꞌ ꞌin ykwiꞌ Satanás kanꞌ, tnun ꞌa chaꞌ kwiñi kan yu kuꞌni yu chaꞌ ñaꞌan kwiꞌya nten chalyuu ꞌin yu, chaꞌ kwiñi lyoꞌo yu ꞌin nten.  
\v 10 Tukwa chaꞌ nsuꞌwi tiye yu kanꞌ, loꞌo tsaa ñaꞌan tiꞌ nten chalyuu ꞌin nchga chaꞌ kwiñi nu chkwiꞌ yu kanꞌ, tsaa ñaꞌan tiꞌ neꞌ ꞌin yu chaꞌ loꞌo neꞌ wa tsaa ti neꞌ lo jwlyaa; chaꞌ ja xlyaa neꞌ xñi neꞌ chaꞌ suꞌwe nu ka kulaa ꞌin neꞌ,  
\v 11 kanꞌ chaꞌ kulaa yaꞌ Ndiose ꞌin neꞌ, chunꞌ ndyaa ñaꞌan la tiꞌ neꞌ ꞌin chaꞌ kwiñi kanꞌ.  
\v 12 Chañi chaꞌ tsaa neꞌ seꞌen ja tsaa tii ꞌa chaꞌ tyijin neꞌ nu tiꞌí, nchga nten nu ja ndyaa ñaꞌan tiꞌ chaꞌ suꞌwe ꞌin Ndiose, nten nu ndiya la tiꞌ kuꞌni nchga lo chaꞌ kuxi. 
\s1 Ngulo suwi Ni ꞌñaan chaꞌ tyoꞌo laan ꞌin chaꞌ kuxi 
\p  
\v 13 ꞌWan taꞌa msñian chaꞌ ꞌin Jesús, suꞌwe ꞌa nka tiye Xꞌnaan ñaꞌan ꞌwan. Kwiꞌ ngwañaꞌan, ndiꞌin chaꞌ tya ba xuꞌwe ꞌin Ndiose chaꞌ ꞌwan, chaꞌ ngulo suwi Ni ꞌwan ti bra nu mdyisnan chalyuu, chaꞌ kulaa Ni ꞌwan; kanꞌ chaꞌ yꞌni Tyiꞌi Ndiose chaꞌ ngwa luwi kasiya ꞌwan bra nu msñi wan chaꞌ suꞌwe ꞌin Ndiose.  
\v 14 Wa ngulo suwi Ni ꞌwan, kanꞌ chaꞌ ynan wan chaꞌ suꞌwe ꞌin Jesucristo nu ngwaꞌu ba ꞌwan; nchka tiꞌ Ni chaꞌ suꞌwa ti tyiꞌin wan loꞌo Jesucristo nu nka Xꞌnaan la seꞌen tlyu seꞌen ndukwa ykwiꞌ Ni, seꞌen nu xaa ꞌa. 
\p  
\v 15 Loꞌo ni, ꞌwan neꞌ taꞌaan, tyuꞌwi suꞌwe tiꞌ wan nchga chaꞌ nu ngwaꞌu ba ꞌwan; ndiꞌin chaꞌ ka biyaꞌ suꞌwe tiꞌ wan nchga chaꞌ nu wa ykwiꞌ ba loꞌo wan, nchga chaꞌ nu wa ngwaꞌan ba lo kityi chaꞌ tsaa seꞌen ndiꞌin wan.  
\v 16-17 Ngwañaꞌan nchka tiǎnꞌ chaꞌ kuꞌni Ni loꞌo wan, ni siya Jesucristo nu nka Xꞌnaan, ni siya Ndiose Stian: kuꞌni Ni chaꞌ ka ngula la tiꞌ niꞌ kasiya wan, chaꞌ talo wan kuꞌni wan nchga chaꞌ suꞌwe, chaꞌ xkwiꞌ chaꞌ suꞌwe chkwiꞌ wan loꞌo taꞌa wan. Suꞌwe ꞌa nka tiye Ndiose ñaꞌan Ni ꞌñaan, kanꞌ chaꞌ suꞌwe ꞌa ngiꞌni Ni loꞌoan, chaꞌ tiin ti tyiꞌian nchga bra, bra nu ndiꞌin taan chaꞌ kan Jesús xiyaꞌ. 
\c 3  
\s1 Chkwiꞌ wan loꞌo Ndiose chaꞌ ꞌwa 
\p  
\v 1 ꞌWan taꞌa msñian chaꞌ ꞌin Jesús, chkwiꞌ wan loꞌo Ndiose chaꞌ ꞌwa, chaꞌ tayaꞌ Ni ꞌwa laja nu nduꞌu ba chaꞌ ꞌin Xꞌnaan ꞌin nten, chaꞌ ja tukunꞌ xka ta nten xaꞌan lo nchga chaꞌ nu nduꞌu ba ꞌin neꞌ. Sa ñaꞌan nu msñi wan chaꞌ kanꞌ ni, ngwañaꞌan nchka tiꞌ ba chaꞌ ndla ti xñi kaꞌan la nten chaꞌ kanꞌ, nde nchga kichen seꞌen chkwiꞌ ba chaꞌ kanꞌ.  
\v 2 Chkwiꞌ wan loꞌo Ndiose chaꞌ kulaa Ni ꞌwa chaꞌ ja tyijin lyo neꞌ xaꞌan ꞌwa, ni siya neꞌ nu chen ñaꞌan ngiꞌni; nsuꞌwi ꞌa nten chalyuu nu ja ndyaa ñaꞌan suꞌwe tiꞌ ꞌin Ndiose.  
\v 3 Chañi chaꞌ kuꞌni Xꞌnaan nchga tñan nu ndukwin Ni ꞌñaan, loꞌo kuꞌni Ni chaꞌ ka ngula la tiꞌ niꞌ kasiya ꞌwan, kulaa Ni ꞌwan chaꞌ ja kalaꞌ kuneꞌ xaꞌan ꞌwan.  
\v 4 Jlyo tiꞌ Xꞌnaan chaꞌ ngiꞌni wan tñan nu ngulo ba ꞌwan, chaꞌ ti kuꞌni la wan tñan kanꞌ.  
\v 5 Kwiꞌ ngwañaꞌan, kuꞌni Xꞌnaan tñan niꞌ kasiya ꞌwan, chaꞌ tyuꞌwi tiꞌ wan chaꞌ suꞌwe ꞌa nka tiye Ndiose ñaꞌan Ni ꞌwan; bra kanꞌ talo wan sa ñaꞌan mdalo Krixtu bra nu mdiꞌin yu loꞌo nten ti kulo. 
\s1 Ndiꞌin chaꞌ kuꞌnian tñan 
\p  
\v 6 ꞌWan taꞌa msñian chaꞌ ꞌin Jesús, xiyaꞌ kulo ba tñan ꞌwan chabiyaꞌ ꞌin Jesucristo nu nka Xꞌnaan: Ja tyaꞌan wan suꞌwa ti loꞌo xka ta taꞌa msñian chaꞌ kanꞌ nu ja xlyaa kuꞌni tñan, ti kwiꞌ neꞌ taꞌa wan nu ja xlyaa xñi chaꞌ nu ykwiꞌ ba loꞌo wan.  
\v 7 Ja yꞌni ndaja tiꞌ ba bra nu mdiꞌin ba loꞌo wan nu ngwa bra kanꞌ, kanꞌ chaꞌ suꞌwe si xlyaa wan kuꞌni wan tñan loꞌo yaꞌ wan sa ñaꞌan nu yꞌni ba.  
\v 8 Ja yku xuꞌwe ti ba seꞌen ndiꞌin wan nu ngwa bra kanꞌ; mda ba liyaꞌ chaꞌ mxku wan ꞌwa, chunꞌ nu yꞌni ba tñan chaꞌ kaja ñaꞌan nu tyijin yuꞌwi ꞌwa. Tsan loꞌo tla yꞌni ba tñan loꞌo yaꞌ ba, chaꞌ siꞌi ꞌwan nu msiꞌi wan nan yku ba bra kanꞌ.  
\v 9 Suꞌwe si ta wan chinꞌ liyaꞌ ꞌin neꞌ nu kwaꞌu ꞌwan; ni siya bare, ka tayaꞌ wan chinꞌ ꞌwa si jñan ba ꞌwan. Loꞌo ja msñi ba liyaꞌ nu ngwa bra kanꞌ, chaꞌ ngwa tiꞌ ba kwaꞌu ba ꞌwan chaꞌ ja kuꞌni ndaja tiꞌ wan, chaꞌ kuꞌni wan tñan chaꞌ kaja nan nu lyiji chaꞌ tyijin yuꞌwi ꞌwan chalyuu.  
\v 10 Bra nu ti ndiꞌin ba seꞌen ndiꞌin wan, ti bra kanꞌ ngulo ba tñan re ꞌwan, chaꞌ ja ta wan nan ku nten nu ja xlyaa kuꞌni tñan.  
\v 11 Loꞌo ni, wa ynan ba rsun chaꞌ ndiya chinꞌ neꞌ taꞌa wan nu ja suꞌwe ngiꞌni; ja ngiꞌni neꞌ kanꞌ tñan, xkwiꞌ ndaꞌan neꞌ nchkwiꞌ neꞌ chaꞌ kwiñi loꞌo taꞌa neꞌ, chunꞌ ndaja tiꞌ neꞌ.  
\v 12 Kanꞌ chaꞌ ni, ndlo ba tñan ꞌin neꞌ kanꞌ chabiyaꞌ ꞌin Jesucristo nu nka Xꞌnaan, chaꞌ ndiꞌin chaꞌ kuꞌni neꞌ kanꞌ tñan; ngwañaꞌan kaja nan ku neꞌ kwenta skaa neꞌ. 
\p  
\v 13 ꞌWan neꞌ taꞌaan, ja ka ndaja tiꞌ wan chaꞌ kuꞌni wan chaꞌ suꞌwe loꞌo nten.  
\v 14 Nten nu ja xlyaa kunan nchga chaꞌ nu ndaꞌan ba lo kityi re ni, kiꞌya wan kwenta ti ka nu lka neꞌ kanꞌ; bra kanꞌ ja tyaꞌan wan suꞌwa ti loꞌo neꞌ kanꞌ, chaꞌ ngwañaꞌan ka jyuꞌu tiꞌ neꞌ.  
\v 15 Xka chaꞌ ni, siꞌi nan nxuun neꞌ kanꞌ loꞌo wan, taꞌa wan lka neꞌ; kanꞌ chaꞌ ndiꞌin chaꞌ ta wan ska chaꞌ tiya ꞌin neꞌ, sa ñaꞌan lka si chkwianꞌ loꞌo ska taꞌa ngulaan. 
\s1 Mdyii ykwiꞌ Palyu loꞌo neꞌ 
\p  
\v 16 Kuꞌni Xꞌnaan chaꞌ tiin ti tyiꞌin wan nchga tsan, ni siya tsan suꞌwe ꞌwan, ni siya tsan kuxi ꞌwan, chunꞌ nchga bra tiin ti ndiꞌin Ndiose. Kwiꞌ ngwañaꞌan, kanun Tyiꞌi Xꞌnaan loꞌo wan bra kanꞌ. 
\p  
\v 17 Nchga neꞌ taꞌa ba suꞌwe ꞌa nchkwiꞌ ba loꞌo wan. Palyu lkaǎn; ykwiǐnꞌ ndaꞌaǎn letra ni, chaꞌ ka biyaꞌ tiꞌ wan chaꞌ chañi chaꞌ naꞌ ngwaꞌaǎn kityi re nu ndijyan seꞌen ndiꞌin wan.  
\v 18 Nchka tiꞌ ba chaꞌ ti kuꞌni Jesucristo nu nka Xꞌnaan chaꞌ suꞌwe loꞌo nchga wan. Ngwañaꞌan ka sikwa.