\id 2PE  
\h 2 SAN PEDRO 
\toc1 Xka kityi nu ngwaꞌan Tyu, nu ndyaa seꞌen ndiꞌin nten ꞌin Jesucristo nu ndiꞌin tijyuꞌ 
\toc2 2 SAN PEDRO 
\toc3 2 P. 
\mt1 Xka kityi nu ngwaꞌan Tyu, nu ndyaa seꞌen ndiꞌin nten ꞌin Jesucristo nu ndiꞌin tijyuꞌ 
\c 1  
\p  
\v 1 Tyu Simón lkaǎn; ngiꞌniǐn tñan ꞌin Jesucristo, chaꞌ wa ngulo suwi Ni ꞌñaǎn chaꞌ tsaꞌaǎn chkwiǐnꞌ chaꞌ suꞌwe ꞌin Krixtu loꞌo neꞌ tyun kichen tijyuꞌ. Loꞌo ni, ndaꞌaǎn kityi re chaꞌ tsaa seꞌen ndiꞌin nchga nten nu msñi chaꞌ ꞌin Ndiose, ti kwiꞌ sa ñaꞌan chaꞌ nu msñian taꞌaan. Xkwiꞌ chaꞌ nu ñi ngiꞌni Ndiose Xꞌnaan, ti kwiꞌ Jesucristo nu ngulaa ꞌñaan ꞌin chaꞌ kuxi lka Ni; kanꞌ chaꞌ suꞌwa ti lkaan taꞌaan chabiyaꞌ ꞌin Ndiose, suꞌwe ꞌa nchka ꞌñaan taꞌaan chunꞌ wa ndyaa ñaꞌan tianꞌ ꞌin Ni. 
\p  
\v 2 Wa nchka biyaꞌ suꞌwe tiꞌ wan chaꞌ ꞌin Ndiose, kwiꞌ ngwañaꞌan nchka biyaꞌ tiꞌ wan chaꞌ ꞌin Jesús nu nka Xꞌnaan; kanꞌ chaꞌ nchka tiǎnꞌ chaꞌ ti kuꞌni Ni chaꞌ suꞌwe loꞌo wan nchga tsan, chaꞌ ti kuꞌni Ni chaꞌ tiin ti tyiꞌin niꞌ kasiya ꞌwan nchga bra. 
\s1 Sa ñaꞌan nu ndiꞌin chaꞌ ka ska nten ꞌin Jesucristo 
\p  
\v 3 Wa nda Ndiose chabiyaꞌ ꞌñaan chaꞌ kaja chalyuu nu ja tsaa tii ꞌa ꞌñaan; kwiꞌ ngwañaꞌan, wa nda Ni chabiyaꞌ ꞌñaan chaꞌ tyiꞌian lo chalyuu sa ñaꞌan nu nchka tiꞌ Ni chaꞌ tyiꞌin nten ꞌin Ni; kanꞌ lka chaꞌ nu nchka ꞌñaan ni, chaꞌ ndayaꞌ Ni ꞌñaan. Wa ngulo suwi Ni ꞌñaan, wa nda Ni chabiyaꞌ ꞌñaan chaꞌ xuꞌwi lyoan ꞌin Ni; kwiꞌ ngwañaꞌan, wa ngwa biyaꞌ tianꞌ chaꞌ ja nsuꞌwi ꞌa xka nu tnun la chaꞌ ꞌin, ja nsuꞌwi ꞌa xka nu nchka la ꞌin.  
\v 4 Tlyu ꞌa nka Ndiose, kwiꞌ ngwañaꞌan nchka ꞌin Ni kuꞌni Ni nchga lo tñan. Wa jlyo tianꞌ chaꞌ xkwiꞌ chaꞌ nu ñi lka chaꞌ nu nchkwiꞌ Ni. Kwiꞌ ngwañaꞌan, ndiꞌin taan chaꞌ kaja chaꞌ xuꞌwe tnun ꞌñaan, nu wa ytsaꞌ Ni ꞌñaan chaꞌ kaja ꞌñaan. Wa ngulaa Ni ꞌñaan ꞌin chaꞌ kuxi nu ndiꞌin ꞌñaan, chaꞌ ja tyijin lyo chaꞌ kuxi kanꞌ ꞌñaan; nchga chaꞌ kuxi nu ndiya ꞌa tianꞌ, kanꞌ lka nu yꞌni ñuꞌun ꞌñaan seꞌen ndiꞌian lo chalyuu. Loꞌo ni, ngiꞌni Ni chaꞌ xlyaan kuꞌnian nchga lo chaꞌ suꞌwe, sa ñaꞌan nu nchka tiꞌ Ni chaꞌ kuꞌnian.  
\v 5 Kanꞌ chaꞌ tyukwi ti tiye wan, loꞌo tyukwi jwersa ꞌwan, kuꞌni wan xkwiꞌ chaꞌ suꞌwe kanꞌ, chaꞌ katsaꞌ wan ꞌin xka ta nten chaꞌ chañi chaꞌ wa msñi wan chaꞌ ꞌin Jesucristo. Kwiꞌ ngwañaꞌan, ndiꞌin chaꞌ ka biyaꞌ la tiꞌ wan nchga chaꞌ, sa ñaꞌan chaꞌ nu ndiya la tiꞌ Ndiose.  
\v 6 Ndiꞌin chaꞌ ka biyaꞌ la tiꞌ wan sa ñaꞌan ndiꞌin chaꞌ ꞌin Ndiose; bra kanꞌ ka kuꞌni suꞌwe wan kwenta ꞌwan, ti ykwiꞌ ti wan, chaꞌ ja tyijin lyo ya ñaꞌan ti chaꞌ kuxi ꞌwan. Si ka kuꞌni suꞌwe wan kwenta ꞌwan, ti ykwiꞌ ti wan, bra kanꞌ talo ꞌa wan ni siya ndiꞌin ꞌa chaꞌ kuxi seꞌen ndiꞌin wan. Si ndalo ꞌa wan ꞌin chaꞌ kuxi kanꞌ, bra kanꞌ ka tyiꞌin wan sa ñaꞌan nu nchka tiꞌ Ndiose chaꞌ tyiꞌin wan lo chalyuu.  
\v 7 Si ngwañaꞌan nchka tiꞌ wan tyiꞌin wan lo chalyuu, bra kanꞌ ndiꞌin chaꞌ chka tꞌnan tiꞌ wan ꞌin taꞌa nten wan; ndiꞌin chaꞌ suꞌwe ti xuꞌwi tiye wan ñaꞌan wan ꞌin nchga nten. 
\p  
\v 8 Bra nu kuꞌni wan nchga lo tñan kanꞌ tyukwi tyempu nu ndiꞌin wan lo chalyuu, bra kanꞌ ka biyaꞌ la tiꞌ wan sa ñaꞌan ndiꞌin nchga chaꞌ ꞌin Jesucristo nu nka Xꞌnaan. Ja ka ndaja tiꞌ wan sikwa, chaꞌ suꞌwe ꞌa kunanjoꞌo wan ꞌin Ndiose bra kanꞌ.  
\v 9 Bra nu ja kuꞌni wan chaꞌ kanꞌ, loꞌo ja ndiꞌin suꞌwe wan bra kanꞌ, wa lka wan ñaꞌan tiꞌ ska nu kwityiinꞌ nu ndukunꞌ kiloo, ti ykwiꞌ ti. Ja nchka tiꞌ yu kwityiinꞌ kanꞌ tyuꞌwi tiꞌ yu sa ñaꞌan nu yꞌni luwi Ndiose kasiya ꞌin yu, bra nu yꞌni tyii Ni chaꞌ kuxi nu ndiꞌin niꞌ kasiya ꞌin yu.  
\v 10 Kanꞌ chaꞌ ti kuꞌni la wan nchga chaꞌ suꞌwe kanꞌ, sa ñaꞌan chaꞌ ngwaꞌaǎn lo kityi ti kulo; kwiꞌ ngwañaꞌan, tyuꞌwi la tiꞌ wan chaꞌ wa ngulo suwi Ndiose ꞌwan, chaꞌ ka wan nten ꞌin Ni. Loꞌo bra kanꞌ ja ndiꞌin chaꞌ kanaꞌ kasiya ꞌwan, si ngwañaꞌan kuꞌni wan nchga lo chaꞌ suꞌwe kanꞌ.  
\v 11 Kanꞌ ka tyaꞌan suꞌwe la wan tuwiin ꞌin Ndiose bra kanꞌ. Jesucristo, Xꞌnaan nu nka ndloo la ꞌwan, ti kwiꞌ lka nu ngulaa ꞌñaan ꞌin nchga chaꞌ kuxi. Loꞌo ja tsaa tii ꞌa tsan chaꞌ ka Ni ndloo la. Bra kanꞌ suꞌwe ti stean seꞌen ndiꞌin Ndiose nde niꞌ kwan. 
\p  
\v 12 Ti tyun yaꞌ nka tiyeěn chkwiǐnꞌ loꞌo wan chaꞌ ꞌin nchga chaꞌ nu ñi ꞌin Ndiose, ni siya wa jlyo tiꞌ wan chaꞌ kanꞌ. Loꞌo ngwañaꞌan, jlyo tiǎnꞌ chaꞌ wa msñi suꞌwe wan nchga chaꞌ nu ngwaꞌaǎn lo kityi.  
\v 13 Laja nu ti luꞌuǔn, kuꞌniǐn chaꞌ ja kjlyaa tiꞌ wan chaꞌ nu ñi kanꞌ. Suꞌwe la si kuꞌniǐn ngwañaꞌan, nxkeꞌ tiǎnꞌ,  
\v 14 chaꞌ ndii tiǎnꞌ chaꞌ wa tyii ti chaꞌ ꞌñaǎn lo chalyuu; wa ytsaꞌ Jesucristo nu nka Xꞌnaan ꞌñaǎn chaꞌ wa ndla ti kajaǎn.  
\v 15 Kanꞌ chaꞌ kuꞌniǐn chaꞌ kanun chaꞌ kanꞌ loꞌo wan, chaꞌ ka tyuꞌwi tiꞌ wan chaꞌ suꞌwe nu ndiꞌin ꞌin Jesucristo nchga tsan, ni siya wa ngujwiǐn. 
\s1 Nten nu wa naꞌan chaꞌ tnun ꞌa nu ndiꞌin ꞌin Jesucristo 
\p  
\v 16 Siꞌi kwentu, siꞌi chaꞌ ngwiꞌya ke ti ba lka chaꞌ nu ykwiꞌ ba loꞌo wan, bra nu ytsaꞌ ba ꞌwan chaꞌ tnun ꞌa chaꞌ ka ꞌin Xꞌnaan Jesucristo bra nu tyaan Ni xiyaꞌ. Ykwiꞌ bare wa naꞌan ba ꞌin Jesús chaꞌ tnun ꞌa chaꞌ ndiꞌin ꞌin yu.  
\v 17 Wa yꞌni tnun Ndiose Sti Jesús ꞌin yu, loꞌo ndyuwi ꞌa tyukwi ñaꞌaan Jesús loꞌo xaa ꞌin Ndiose bra kanꞌ. Ni siya ja naꞌan ba ꞌin Ndiose nu nka ndloo ꞌin nchga xꞌnan chalyuu, jlyo tiꞌ ba chaꞌ mdiꞌin Ni kwiꞌ seꞌen ti tsan kanꞌ, chaꞌ bra kanꞌ ynan ba chaꞌ nu ykwiꞌ Ni loꞌo nten: “Nu nde lka Sñiěnꞌ nu ndiya ꞌa tiǎnꞌ. Suꞌwe ꞌa nka tiyeěn naꞌaǎn ꞌin yu” ndukwin Ni.  
\v 18 Ykwiꞌ bare wa ynan ba chaꞌ nu ykwiꞌ Tyiꞌi Ni nu mdoꞌo nde niꞌ kwan, chaꞌ loꞌo bare mdiꞌin ba lo kiꞌya kanꞌ nu ngwa tsan kanꞌ. 
\p  
\v 19 Ngwañaꞌan ka biyaꞌ tianꞌ chaꞌ ñi ꞌa lka nchga chaꞌ nu ykwiꞌ ayman nu ykwiꞌ chaꞌ ꞌin Ndiose loꞌo nten nu ngwa sꞌni. Suꞌwe la si tukwaan chaꞌ kanꞌ, chaꞌ ñaꞌan tiꞌ ska xaa luwi nu suꞌwe ꞌa njyiꞌin la seꞌen tla ꞌa, kwiꞌ ngwañaꞌan lka chaꞌ ꞌin Jesús kanꞌ. Kwaꞌu xaa kanꞌ tuwiin suꞌwe seꞌen tsaan bra wa kiꞌya ti xaa xa wa mdiya tsan kanꞌ. Bra kanꞌ tyoꞌo tukwa ska kwi kulasiin tnun ñaꞌan tiꞌ nu ndyukwa xa wa kiꞌya ti xaa; kanꞌ lka ñaꞌan tiꞌ Krixtu, chaꞌ nda yu xaa nu xuꞌwi niꞌ kasiya ꞌñaan.  
\v 20 Ndiꞌin chaꞌ ka biyaꞌ tiꞌ wan chaꞌ ja tukwin ka ꞌin kwaꞌu chaꞌ ꞌin ti ykwiꞌ ti ꞌin nten, sa ñaꞌan nu ndyoꞌo ska chaꞌ nu ngwaꞌan ayman ꞌñaan lo kityi ꞌin Ndiose nu ngwa sꞌni. Ska ti si tayaꞌ Tyiꞌi Ndiose ꞌin neꞌ chaꞌ ka biyaꞌ suꞌwe tiꞌ neꞌ, bra kanꞌ ka kwaꞌu neꞌ chaꞌ kanꞌ ꞌin xka ta nten chabiyaꞌ ꞌin Ndiose.  
\v 21 Nchga nten nu ykwiꞌ chaꞌ ꞌin Ndiose loꞌo nten nu ngwa sꞌni, ja ykwiꞌ neꞌ ya ñaꞌan ti chaꞌ nu ndiya ti tiꞌ neꞌ, bra nu ykwiꞌ neꞌ chabiyaꞌ ꞌin Ni; xkwiꞌ chaꞌ nu ngwaꞌu Tyiꞌi ykwiꞌ Ni ꞌin neꞌ kanꞌ, kanꞌ lka chaꞌ nu ykwiꞌ neꞌ chabiyaꞌ ꞌin Ni. 
\c 2  
\s1 Nten nu nduꞌu chaꞌ kwiñi 
\p  
\v 1 Wa yuꞌwi chinꞌ yu kwiñi nu mdiꞌin laja neꞌ Israel nu ngwa sꞌni; chaꞌ ꞌin Ndiose nchkwiꞌ ba, ndukwin yu kwiñi kanꞌ. Kwiꞌ ngwañaꞌan, ti kan la nten kwiñi seꞌen ndiꞌin wan ni; mnan ti kwaꞌu yu kwiñi kanꞌ ꞌwan nchga chaꞌ nu kiꞌya ke ykwiꞌ ti yu. Loꞌo chkwiꞌ yu kwiñi kanꞌ, chaꞌ chabiyaꞌ ꞌin Ndiose nchkwiꞌ yu. Si kunan wan chaꞌ nu chkwiꞌ yu kanꞌ, bra kanꞌ tyisnan tyiꞌin wsuun wan loꞌo taꞌa wan sa ñaꞌan yaꞌ nu suꞌwe taꞌa wan. Bra kanꞌ ka wan tukwa ta wan siꞌya chaꞌ kwiñi kanꞌ. Tnun ꞌa tñan nu yꞌni Xꞌnaan chaꞌ kulaa ꞌñaan taꞌaan loꞌo ꞌin yu kwiñi kanꞌ, ni siya ja nchka ꞌa tiꞌ yu kwiñi kanꞌ chaꞌ ka Ndiose Xꞌnan yu; ja siyaꞌ ndiꞌin chaꞌ ꞌin yu kanꞌ loꞌo Ndiose, kanꞌ chaꞌ ndla ti tyii chaꞌ ꞌin yu kwiñi kanꞌ.  
\v 2 Kwiꞌ ngwañaꞌan, tukwa tyun neꞌ taꞌaan chaꞌ nu nchkwiꞌ yu kwiñi kanꞌ; loꞌo ndiya neꞌ taꞌaan nu kuꞌni chaꞌ chen ñaꞌan loꞌo taꞌa neꞌ bra kanꞌ, sa ñaꞌan chaꞌ nu kwaꞌu yu kwiñi kanꞌ ꞌin neꞌ chaꞌ kuꞌni neꞌ. Ja suꞌwe ngwañaꞌan. Kanꞌ chaꞌ kaꞌan ꞌa chaꞌ kuxi chkwiꞌ nten ꞌñaan bra kanꞌ, nten kichen nu ja siyaꞌ msñi chaꞌ ꞌin Ndiose.  
\v 3 Kwiꞌ ngwañaꞌan, nxitukwi ꞌa tiꞌ yu kwiñi kanꞌ ꞌin nan nu nsuꞌwi ꞌwan; nchka ꞌa tiꞌ yu tyijin lyo yu ꞌwan, kanꞌ chaꞌ sa ti chkwiꞌ yu chaꞌ kwiñi loꞌo wan. Ndiꞌin chaꞌ ta Ndiose nu tiꞌí ꞌin yu kwiñi kanꞌ, chaꞌ wa sꞌni ykwiꞌ Ni chaꞌ kuxi ꞌa kuꞌni neꞌ ngwañaꞌan. Siꞌi nan lajaꞌ Ndiose; jlyo tiꞌ Ni sa ñaꞌan ngiꞌni yu kwiñi kanꞌ, kanꞌ chaꞌ kuꞌni tyii Ni ꞌin yu ndla ti. 
\p  
\v 4 Nu ngwa sꞌni, ja yꞌni Ni chaꞌ tlyu tiꞌ ꞌin angajle ꞌin Ni nu ja mslyaa tukwa tñan ꞌin Ni; msuꞌwa Ni ꞌin angajle kanꞌ yaꞌ kuneꞌ xaꞌan kanꞌ, ndyaa angajle kanꞌ nde lo jwlyaa, nde seꞌen tla ꞌa siyaꞌ ti. Nde kwa, ndiꞌin nchkanꞌ angajle kanꞌ loꞌo karenan, chaꞌ kanun nde kwa sa ñaꞌan bra tiya tsan chaꞌ kuꞌni biyaꞌ Ni ꞌin nchga nten chalyuu, loꞌo ꞌin angajle kanꞌ.  
\v 5 Nchga nten chalyuu nu ngwa ti sꞌni, nu ja mdukwa ꞌin Ndiose, ja yꞌni Ni chaꞌ tlyu tiꞌ ꞌin neꞌ kanꞌ; yꞌni Ni chaꞌ ngwiꞌya tyoo tlyaa, sa ñaꞌan nu wa ytsaꞌ Ni ꞌin neꞌ kanꞌ chaꞌ ka. Wa ytsaꞌ ayman Noé chaꞌ ꞌin Ndiose ꞌin nchga nten, loꞌo ja ynan neꞌ kanꞌ. Ngujwi nchga neꞌ kanꞌ bra kanꞌ; ska ti Noé kanꞌ loꞌo taꞌa kati nten ꞌin yu, ngulaa Ni ꞌin neꞌ kanꞌ, chunꞌ nu ynan neꞌ kanꞌ chaꞌ nu ykwiꞌ yu loꞌo neꞌ.  
\v 6 Ti kwiꞌ ti chaꞌ, ngwa kuxi ꞌin neꞌ kichen Sodoma loꞌo ꞌin neꞌ kichen Gomorra, chaꞌ kuxi ꞌa yꞌni neꞌ kanꞌ; siyaꞌ ti yꞌni tyii Ni taꞌa tyukwaa kichen kanꞌ. Xa wa mdyii mkin kichen kanꞌ, jii loꞌo nsuwiꞌ ti nganun seꞌen mdiꞌin kichen kanꞌ nu ngwa xkanꞌ. Ngwañaꞌan yꞌni Ndiose nu ngwa bra kanꞌ, chaꞌ ka biyaꞌ tiꞌ nchga nten nu ndiya tiꞌ kuꞌni nchga lo chaꞌ kuxi, ni siya ni ti, ni siya chunꞌ ndiꞌin la, chaꞌ ta Ni nu tiꞌí ꞌin neꞌ kanꞌ bra nu wa tyii ti chaꞌ ꞌin neꞌ kanꞌ siyaꞌ ti.  
\v 7 Ska ti ayman Lot, ngulaa Ni ꞌin yu chaꞌ mdoꞌo yu kichen Sodoma kanꞌ; kanꞌ chaꞌ ska ti yu kula Lot kanꞌ ja ngujwi yu bra nu mdyii chaꞌ ꞌin kichen Sodoma kanꞌ. Nten suꞌwe ngwa Lot; kanꞌ chaꞌ mdaꞌan ꞌa chaꞌ tiye yu, lye ꞌa ngwa xiꞌin tiꞌ yu, chaꞌ ꞌin nchga chaꞌ chen ñaꞌan, nchga chaꞌ kuxi nu yꞌni nchga nten kichen kanꞌ.  
\v 8 Suꞌwe tiye Lot kanꞌ, nchga tsan lye ꞌa yuwe tiꞌ yu chaꞌ naꞌan yu nchga chaꞌ kuxi kanꞌ; kaꞌan ꞌa chaꞌ mdaꞌan tiye yu bra nu ynan yu chaꞌ chen ñaꞌan nu ykwiꞌ nten kichen kanꞌ.  
\v 9 Ngwañaꞌan ka biyaꞌ tianꞌ chaꞌ nchka ꞌin Xꞌnaan kulaa ꞌin nten nu suꞌwe kasiya ꞌin, chaꞌ ja tyijin lyo chaꞌ kuxi ꞌin neꞌ kanꞌ. Kwiꞌ ngwañaꞌan, jlyo tiꞌ Ni ti ka lka nu ta Ni nu tiꞌí ꞌin bra nu kuꞌni biyaꞌ Ni ꞌin nchga nten. Wa jlyo tiꞌ Ni ti ka nu ndiꞌin chaꞌ kuxi tiye. 
\p  
\v 10 Loꞌo nten nu xkwiꞌ chaꞌ chen ñaꞌan ngiꞌni, lye la ta Ndiose nu tiꞌí ꞌin neꞌ kanꞌ, chaꞌ ja ndukwa neꞌ kanꞌ chaꞌ nu nchkwiꞌ nu nka ndloo ꞌin neꞌ; ja nduwe tiꞌ neꞌ kanꞌ, chaꞌ siyeꞌ ꞌa neꞌ. Ja ntsen neꞌ kanꞌ, ni siya chkwiꞌ lyoꞌo neꞌ ꞌin angajle ꞌin Ndiose.  
\v 11 Angajle kanꞌ, ngula la tiꞌ, nchka la ꞌin ke nten chalyuu; loꞌo ja ykwiꞌ angajle kanꞌ chaꞌ kuxi ꞌin nten chalyuu, ja mstya kiꞌya ꞌin yu kwiñi kanꞌ tloo Xꞌnaan. 
\p  
\v 12 Ñaꞌan tiꞌ ꞌni nu nsuꞌwi niꞌ kixinꞌ nu ja nduwe tiꞌ, ngwañaꞌan lka nten kwiñi kanꞌ, chaꞌ xkwiꞌ chaꞌ chen ñaꞌan nchkwiꞌ neꞌ kanꞌ ꞌin nchga chaꞌ nu ja nchka biyaꞌ tiꞌ neꞌ. Nxñian ꞌin ꞌni tlá nu nsuꞌwi niꞌ kixinꞌ, ndujwian ꞌin iꞌ bra kanꞌ. Kwiꞌ ngwañaꞌan neꞌ kwiñi kanꞌ, ngiꞌni ñuꞌun neꞌ ꞌin nchga lo nan suꞌwe ni siya ja nchka biyaꞌ tiꞌ neꞌ chaꞌ kanꞌ. Loꞌo tyii chaꞌ ꞌin neꞌ kanꞌ siyaꞌ ti nde loo la;  
\v 13 tyijin neꞌ kanꞌ nu tiꞌí sa ñaꞌan nu tiꞌí nu nda ykwiꞌ neꞌ ꞌin xka ta nten. Tsan loꞌo tla ngiꞌni neꞌ chaꞌ kuxi kanꞌ, chaꞌ ja nchka ndaja tiꞌ neꞌ ꞌin chaꞌ kuxi kanꞌ; ja nchka jyuꞌu tiꞌ neꞌ kanꞌ siyaꞌ ti, ni siya kuxi ꞌa tñan nu ngiꞌni neꞌ. Sa ñaꞌan si chañi chaꞌ taꞌaan lka neꞌ kanꞌ, kwiꞌ ngwañaꞌan suꞌwa ti ndyoꞌ tiꞌin neꞌ kanꞌ loꞌo wan bra nu ngiꞌni tnun wan taꞌa. 
\p  
\v 14 Xkwiꞌ chaꞌ kuxi ndaꞌan tiye neꞌ kwiñi kanꞌ bra nu ñaꞌan neꞌ ꞌin ska nu kunaꞌan, chaꞌ ja tyii chaꞌ xitukwi tiꞌ neꞌ ꞌin nu kunaꞌan chaꞌ kuꞌni neꞌ chaꞌ kuxi loꞌo. Kwiꞌ ngwañaꞌan, bra ti kwaꞌu neꞌ kanꞌ chaꞌ kuxi ꞌin xka ta nten nu ja ya ka biyaꞌ suꞌwe tiꞌ chaꞌ ꞌin Jesucristo. Wa yꞌni xaꞌan ꞌa neꞌ kwiñi kanꞌ nchga lo chaꞌ kuxi, kanꞌ chaꞌ lye ꞌa nxitukwi tiꞌ neꞌ ska nan; loꞌo ja ngalaꞌ tiꞌ neꞌ kanꞌ siyaꞌ ti. Wa lka ngulo Ndiose yuweꞌ ꞌin neꞌ kwiñi kanꞌ.  
\v 15 Wa mdoꞌo tsuꞌ neꞌ kanꞌ tuwiin nu tsaan seꞌen ndiꞌin Ndiose, loꞌo xka tuwiin msñi neꞌ kanꞌ. Kwiꞌ ngwañaꞌan, mnaꞌ ꞌa kasiya ꞌin neꞌ kanꞌ, chaꞌ ti kwiꞌ tuwiin seꞌen mdaꞌan ayman Balaam sñiꞌ Beor ndaꞌan neꞌ kanꞌ ni. Balaam kanꞌ, lye ꞌa mxitukwi tiꞌ yu ꞌin tñi, kanꞌ chaꞌ yꞌni yu chaꞌ kuxi, chaꞌ kaja la tñi ꞌin yu, ngwa tiꞌ yu.  
\v 16 Chaꞌ ꞌin Ndiose ykwiꞌ Balaam kanꞌ nu ngwa sꞌni; kanꞌ chaꞌ yꞌni Ni chaꞌ ykwiꞌ buru ꞌin yu loꞌo yu kanꞌ, chaꞌ xitsen iꞌ ꞌin yu kanꞌ, chaꞌ ja kuꞌni ꞌa yu chaꞌ kuxi kanꞌ. 
\p  
\v 17 Ñaꞌan tiꞌ ska niꞌ chku tiyu nu wtyi siyaꞌ ti, seꞌen nu ja nsuꞌwi tyiꞌa, ngwañaꞌan lka neꞌ kanꞌ. Ñaꞌan tiꞌ ska koo ngaten ti, nu nxnan ꞌa lo kwiꞌin ti, nu ja nda chaꞌ kiꞌya tyoo; nan ndaꞌan ti ran niꞌ kwan, ngwañaꞌan lka neꞌ kanꞌ. Yu kwiñi kanꞌ, ja ndiꞌin chaꞌ suꞌwe tiye neꞌ siyaꞌ ti, kanꞌ chaꞌ ndiꞌin chaꞌ tsaa neꞌ kanꞌ seꞌen tla ꞌa; nde kwa wa mñan Ndiose ska seꞌen nu kuxi ꞌa ñaꞌan, seꞌen tsaa neꞌ nu ngiꞌni ngwañaꞌan.  
\v 18 Jlyo ꞌa tiꞌ neꞌ kwiñi kanꞌ chaꞌ chkwiꞌ loꞌo nten sa ñaꞌan ka kwiñi lyoꞌo neꞌ kanꞌ ꞌin nten nu tka msñi ti chaꞌ suꞌwe ꞌin Jesucristo. Nchka ꞌa tiꞌ neꞌ kwiñi kanꞌ chaꞌ loꞌo nten kanꞌ kuꞌni chaꞌ chen ñaꞌan. Sa ñaꞌan yꞌni neꞌ chaꞌ kuxi ti kulo, bra nu ja ya kunan neꞌ chaꞌ suꞌwe ꞌin Ndiose, kwiꞌ ngwañaꞌan nchka tiꞌ neꞌ kwiñi kanꞌ kuꞌni neꞌ xiyaꞌ.  
\v 19 Nchkwiꞌ neꞌ kwiñi kanꞌ loꞌo xka ta nten chaꞌ ja ndiꞌin chaꞌ tukwa neꞌ nchga tñan nu ngulo Ndiose ꞌin nten, chaꞌ wa mdoꞌo laa neꞌ ꞌin chaꞌ kanꞌ, ndukwin neꞌ kwiñi kanꞌ; loꞌo ja ya ka biyaꞌ tiꞌ neꞌ kwiñi kanꞌ, chaꞌ ykwiꞌ neꞌ lka neꞌ msu ꞌin ya ñaꞌan ti chaꞌ kuxi nu ngiꞌni neꞌ. Nchga nten nu ta chabiyaꞌ ꞌin ska chaꞌ kuxi chaꞌ tyijin lyo ꞌin, wa nda neꞌ chabiyaꞌ ꞌin chaꞌ kuxi kanꞌ chaꞌ ka xꞌnan neꞌ bra kanꞌ.  
\v 20 Kuxi la ka ꞌin nten nu wa ngulaa yaꞌ ꞌin chaꞌ kuxi ska yaꞌ, loꞌo bra kanꞌ ta neꞌ chabiyaꞌ ꞌin chaꞌ kuxi chaꞌ tyijin lyo ꞌin neꞌ xiyaꞌ; wa mdoꞌo laa neꞌ kanꞌ ꞌin nchga chaꞌ kuxi nu nsuꞌwi lo chalyuu nu ngwa sꞌni la, ngiꞌni xaꞌan neꞌ chaꞌ ꞌin Jesucristo nu nka Xꞌnaan, ti kwiꞌ Ni nu wa ngulaa ꞌñaan ꞌin chaꞌ kuxi.  
\v 21 Suꞌwe la si ja yꞌni xaꞌan neꞌ siyaꞌ ti tuwiin nu ñi seꞌen tsaan nde seꞌen ndiꞌin Ndiose; ja suꞌwe chaꞌ ngwa biyaꞌ tiꞌ neꞌ chaꞌ kanꞌ, loꞌo bra ti mdoꞌo tsuꞌ neꞌ tuwiin nu ñi kanꞌ. Ja ndukwa ꞌa neꞌ kanꞌ chaꞌ nu wa ykwiꞌ Krixtu loꞌoan bra kanꞌ.  
\v 22 Bra nu ñaꞌaan ꞌin nten nu wa ngulaa yaꞌ chaꞌ ꞌin Krixtu, bra kanꞌ ka biyaꞌ tianꞌ chaꞌ nu ñi ꞌa ndyoꞌo chaꞌ re: “Ska xneꞌ nu ndukwen nan yku iꞌ, bra ti tsaa iꞌ ku iꞌ nan nu wa ykwen iꞌ xiyaꞌ. Kwiꞌ ngwañaꞌan ska kuweꞌ tyeꞌ ni, bra wa yta iꞌ chku, bra ti tsaa sti iꞌ lo yuu kutsuuꞌ xiyaꞌ.” 
\c 3  
\s1 Nde ñaꞌan ka bra nu tyaan Xꞌnaan xiyaꞌ 
\p  
\v 1 ꞌWan taꞌa suꞌwe nsuꞌwian, wa ngwaꞌaǎn xka kityi ndyaa seꞌen ndiꞌin wan ti ngwa xkanꞌ la. Ni ndaꞌaǎn kityi re, chaꞌ ka tyaa yuꞌwi tiꞌ wan nchga chaꞌ ꞌin Krixtu loꞌo taꞌa tyukwaa kityi, chaꞌ ngwañaꞌan ka tyaꞌan suꞌwe chaꞌ tiye wan nchga bra.  
\v 2 Ndiꞌin chaꞌ taꞌa ti tyaa yuꞌwi tiꞌ wan chaꞌ ꞌin Ndiose nu wa ykwiꞌ neꞌ loꞌo nten nu ngwa sꞌni, loꞌo nchga chaꞌ nu wa ykwiꞌ ti kwiꞌ Xꞌnaan nu ngulaa ꞌñaan. Wa ngulo suwi Ni ꞌwa chaꞌ kwaꞌu ba chaꞌ ꞌin Ndiose ꞌwan, kanꞌ chaꞌ suꞌwe si tukwa wan nchga chaꞌ nu wa ynan wan bra nu ngwaꞌu ba ꞌwan. 
\p  
\v 3 Ti kulo ndiꞌin chaꞌ ka biyaꞌ tiꞌ wan chaꞌ xa wa tiya tsan nu tyii chalyuu, bra kanꞌ tyoꞌo tukwa nten nu xtyi lyoꞌo ꞌa ꞌin chaꞌ ꞌin Ndiose. Kuꞌni neꞌ kanꞌ nchga chaꞌ kuxi nu ndiya tiꞌ neꞌ kuꞌni neꞌ, ti ykwiꞌ ti neꞌ.  
\v 4 Bra kanꞌ nde ñaꞌan nchkwin neꞌ kanꞌ ꞌwan: “¿Ñaꞌan bra kan Krixtu sikwa a? ¿Ni chaꞌ ti ndiꞌin taa ꞌa wan ꞌin yu chaꞌ tyaan yu a? Wa mdijin ꞌa bra kanꞌ, chaꞌ wa ngujwi nchga neꞌ kula ꞌñaan, loꞌo ngwañaꞌan, wa kulaan ꞌaan ni. Ñaꞌan ti ndiꞌin chalyuu re, sa ñaꞌan nu ndiꞌin ran ti bra mdyisnan ran ti kulo.”  
\v 5 Ngwañaꞌan nchkwin neꞌ kwiñi kanꞌ, chaꞌ ja nchka tiꞌ neꞌ tyaa yuꞌwi tiꞌ neꞌ tñan nu wa yꞌni Ndiose. Nu ngwa ti kulo ja mdiꞌin chalyuu siyaꞌ ti, bra kanꞌ kwiꞌ Ndiose ykwiꞌ ska chaꞌ, loꞌo bra ti ngwiñan Ni nchga nan nu nsuꞌwi nde niꞌ kwan. Loꞌo tyiꞌa ti ngwiñan Ni tyukwi ñaꞌaan chalyuu, kwiꞌ ngwañaꞌan jluꞌwe la lo tyiꞌa mdoꞌo yuu wtyi lo chalyuu ti kulo.  
\v 6 Chunꞌ ndiꞌin la, kwiꞌ loꞌo tyiꞌa ti yꞌni tyii Ni chalyuu kanꞌ bra nu ngwiꞌya tyoo tlyaa.  
\v 7 Bra kanꞌ xiyaꞌ ngulo Ndiose tñan chaꞌ ñaꞌan ti kanun nchga nan nu nsuꞌwi nde niꞌ kwan, ñaꞌan ti kanun nchga lo nan nu nsuꞌwi lo chalyuu, xa wa tiya tsan nu kuꞌni biyaꞌ Ni ꞌin nchga nan loꞌo kiiꞌ. Bra kanꞌ tyii nchga nan kanꞌ skin ran, kwiꞌ ngwañaꞌan tyii chaꞌ ꞌin nchga nten nu ja ndiꞌin chaꞌ ꞌin loꞌo Ndiose. 
\p  
\v 8 ꞌWan taꞌa suꞌwe nsuꞌwian, suꞌwe la si kuwe tiꞌ wan chaꞌ ñaꞌan tiꞌ ska tsan ti, ngwañaꞌan lka ska mi yijan chaꞌ ꞌin Ndiose; loꞌo ndiya yaꞌ ñaꞌan tiꞌ ska mi yijan, kwiꞌ ngwañaꞌan lka ska tsan chaꞌ ꞌin Ni.  
\v 9 Siꞌi nan tiyaꞌ ꞌa tiꞌ Ndiose chaꞌ kuꞌni Ni tñan nu ndukwin Ni chaꞌ kuꞌni Ni nu ndyaa nde loo la; lka chaꞌ ndiꞌin ta ꞌa Ni ꞌñaan nten chalyuu, chaꞌ ja nchka tiꞌ Ni chaꞌ tnaꞌ Ni ni siya ska ti nten. Nchka la tiꞌ Ni chaꞌ ka biyaꞌ tiꞌ nchga nten chaꞌ ndiꞌin chaꞌ kuxi ꞌin neꞌ; loꞌo bra kanꞌ ka jyuꞌu tiꞌ neꞌ ꞌin chaꞌ kuxi kanꞌ, kulaa yaꞌ neꞌ chaꞌ kuxi kanꞌ bra kanꞌ. Ngwañaꞌan ka ꞌin neꞌ, nchka tiꞌ Ndiose. 
\p  
\v 10 Chañi chaꞌ tiya ska tsan bra nu tyaan Xꞌnaan xiyaꞌ, ni siya ja jlyo tianꞌ ni tsan ka kanꞌ. Sa ñaꞌan lka si kan ska nu kuꞌni kunan naꞌan tyian bra nu ja ndii tianꞌ, ngwañaꞌan ka tsan kanꞌ. Ngwa ti ñaꞌan katin nchga nan nu nsuꞌwi niꞌ kwan, lye ꞌa kanen chaꞌ kanꞌ, tyii nchga nan kanꞌ skin ran ska yaꞌ ti. Ngwañaꞌan tyukwi ñaꞌaan chalyuu ni, tyii ran siyaꞌ ti bra kanꞌ.  
\v 11 Tyii nchga nan bra nu tiya tsan kanꞌ, kanꞌ chaꞌ ꞌwan ni, ¿ni sa ñaꞌan tyiꞌin wan lo chalyuu sikwa? Ndiꞌin chaꞌ ka wan nten nu luwi kasiya ꞌin, chaꞌ ka wan nten nu ngwa suꞌwe kasiya ꞌwan chaꞌ ꞌin Ndiose.  
\v 12 Kwiꞌ ngwañaꞌan ndiꞌin chaꞌ ka wan, laja nu ti ji tiya tsan nu tyaan Ndiose, chaꞌ ngwañaꞌan ka ꞌwan tayaꞌ wan ꞌin Ndiose loꞌo tñan ꞌin Ni lo chalyuu re. Tsan kanꞌ skin tyukwi ñaꞌaan niꞌ kwan, kwiꞌ ngwañaꞌan tyii nchga nan nu nsuꞌwi niꞌ kwan kalaa ran lo kiiꞌ tnun kanꞌ; tyii nchga chaꞌ siyaꞌ ti bra kanꞌ. Loꞌo kwii kulasiin, loꞌo kwichaa, loꞌo koꞌ, loꞌo nchga nan, tyii ran kalaa ran.  
\v 13 Xiyaꞌ kwiñan Ni xka chalyuu kwi, kwiꞌ ngwañaꞌan xiyaꞌ kwiñan Ni nchga lo nan nu nsuꞌwi niꞌ kwan; kwiñan Ni ska chalyuu nu suꞌwe ꞌa, seꞌen xkwiꞌ suꞌwe ti kuꞌni neꞌ loꞌo taꞌa neꞌ bra kanꞌ. Ngwañaꞌan ndukwin Ni chaꞌ ka; loꞌo jlyo tianꞌ chaꞌ ngwañaꞌan ka kanꞌ, chaꞌ xkwiꞌ chaꞌ nu ñi nchkwiꞌ Ndiose. Kanꞌ chaꞌ ndiꞌin taan ꞌin Ni ñaꞌan bra ka chaꞌ kanꞌ sikwa. 
\p  
\v 14 ꞌWan taꞌa suꞌwe nsuꞌwian, ndiꞌin ta wan ꞌin chaꞌ kanꞌ, kanꞌ chaꞌ ndiꞌin chaꞌ kuꞌni wan xkwiꞌ chaꞌ suꞌwe ti, xkwiꞌ chaꞌ luwi ti loꞌo taꞌa nten wan, chaꞌ tiin ti tyiꞌin niꞌ kasiya ꞌwan bra nu ñaꞌan Ndiose ꞌwan.  
\v 15 Tyuꞌwi tiꞌ wan chaꞌ ndalo ꞌa Ndiose ꞌñaan, wa nda ꞌa Ni tyempu ꞌñaan chaꞌ tyoꞌo laan ꞌin chaꞌ kuxi. Kwiꞌ ngwañaꞌan Palyu taꞌaan ni, ti kwiꞌ taꞌa chaꞌ ngwaꞌan yu lo kityi; taꞌa suꞌwe nsuꞌwian lka yu kanꞌ, loꞌo suꞌwe ꞌa nchkwiꞌ kityi nu ngwaꞌan yu ngala seꞌen ndiꞌin wan. Ndiose lka nu ngwaꞌu ꞌin yu nchga chaꞌ suꞌwe nu ngwaꞌan yu lo kityi kanꞌ.  
\v 16 Tyun kityi ngwaꞌan Palyu kanꞌ, ska ti biyaꞌ nchkwiꞌ taꞌa kityi kanꞌ, chaꞌ ꞌin Ndiose nu nchkwianꞌ ni. Ndiya chinꞌ chaꞌ nu ngwaꞌan Palyu kanꞌ nu tukwi chinꞌ chaꞌ ka biyaꞌ suꞌwe tianꞌ ꞌin ran; kwiꞌ ngwañaꞌan, ndiya nten nu lye ꞌa nduꞌu chaꞌ kwiñi loꞌo kityi kanꞌ, chaꞌ ja nchka biyaꞌ tiꞌ neꞌ kanꞌ chaꞌ kanꞌ siyaꞌ ti. Ja yꞌni xaꞌan suꞌwe neꞌ kanꞌ, chaꞌ ja ya ka biyaꞌ suꞌwe tiꞌ neꞌ chaꞌ kanꞌ; kanꞌ chaꞌ ja ska kityi ꞌin Ndiose nduꞌu ñi neꞌ kanꞌ ꞌin ran. Kanꞌ chaꞌ tyii chaꞌ ꞌin neꞌ kanꞌ siyaꞌ ti siꞌya chaꞌ kwiñi nu nduꞌu neꞌ ꞌin taꞌa nten neꞌ. 
\p  
\v 17 ꞌWan taꞌa suꞌwe nsuꞌwian ni, wa ngwaꞌaǎn nchga chaꞌ re chaꞌ ndii ti tiꞌ wan, chaꞌ ja ta wan chabiyaꞌ ꞌin neꞌ kwiñi kanꞌ chaꞌ kwaꞌu neꞌ xka chaꞌ ꞌwan. Chañi lka chaꞌ nu yꞌni xaꞌan wan ti kulo, loꞌo ni, ja suꞌwe si tukwa wan chaꞌ kwiñi nu nduꞌu neꞌ kanꞌ; ja suꞌwe kulaa yaꞌ wan ꞌin chaꞌ nu ñi ꞌin Jesús bra kanꞌ.  
\v 18 Suꞌwe la si kuꞌni xaꞌan la wan chaꞌ suꞌwe ꞌin Jesucristo nu nka Xꞌnaan, nu wa ngulaa ꞌñaan; bra kanꞌ ka tyiꞌin suꞌwe la niꞌ kasiya ꞌwan chaꞌ ꞌin Xꞌnaan. ¡Kuꞌniin tnuan ꞌin Ndiose lo chalyuu, loꞌo ngwañaꞌan, ja tsaa tii ꞌa tsan nu kuꞌniin tnuan ꞌin Ni nde seꞌen ndiꞌin Ni! Ngwañaꞌan ka sikwa.