\id 1TI  
\h 1 TIMOTEO 
\toc1 Kityi nu ngwaꞌan Palyu ti kulo chaꞌ tsaa seꞌen ndiꞌin Timu 
\toc2 1 TIMOTEO 
\toc3 1 Ti. 
\mt1 Kityi nu ngwaꞌan Palyu ti kulo chaꞌ tsaa seꞌen ndiꞌin Timu 
\c 1  
\p  
\v 1 Palyu lkaǎn. Ndaꞌaǎn nchkwiǐnꞌ chaꞌ ꞌin Jesucristo nde xka kichen, chaꞌ Ndiose nu ndlaa ꞌin nten ꞌin nchga chaꞌ kuxi, ngulo Ni tñan ꞌñaǎn chaꞌ kuꞌniǐn tñan kanꞌ; loꞌo ngulo Jesucristo tñan kanꞌ ꞌñaǎn, ti kwiꞌ Krixtu nu ndiꞌiin taan ꞌin chaꞌ kan xiyaꞌ.  
\v 2 Ndaꞌaǎn kityi re chaꞌ tsaa seꞌen ndiꞌin nuꞌwin, Timu, chaꞌ ñaꞌan tiꞌ sñiěnꞌ, ngwañaꞌan lka nuꞌwin, chaꞌ msñii chaꞌ ꞌin Jesucristo ti xa nu ngwaꞌuǔn chaꞌ kanꞌ ꞌiin. Nde tñan nchka tiǎnꞌ chaꞌ ka ꞌiin, chaꞌ ti kuꞌni Ndiose Stian chaꞌ suꞌwe loꞌoo, chaꞌ chka tꞌnan tiꞌ Ni ꞌiin, chaꞌ ngwañaꞌan kuꞌni Ni chaꞌ tiin ti tyiꞌin kasiya ꞌiin chunꞌ Jesucristo nu nka Xꞌnaan. 
\s1 Ja suꞌwe chaꞌ tsaa ñaꞌan tiꞌ neꞌ kwentu 
\p  
\v 3 Xa wa yiꞌaǎn nde Macedonia, bra kanꞌ ykwiǐnꞌ loꞌoo chaꞌ kanuun kichen Efeso; loꞌo xiyaꞌ chkwiǐnꞌ loꞌoo ni, chaꞌ kanuun kichen kwa. Ndiya chinꞌ neꞌ kichen Efeso kwa nu nduꞌu xka loo chaꞌ ꞌin neꞌ taꞌaan; nuꞌwin, ndiꞌin chaꞌ kuloo tñan ꞌin neꞌ kanꞌ, chaꞌ ja kwaꞌu ꞌa neꞌ chaꞌ kanꞌ nu ja suꞌwe nganen.  
\v 4 Kwiꞌ ngwañaꞌan, kuloo tñan ꞌin neꞌ chaꞌ ja kuꞌni xaꞌan ꞌa neꞌ kwentu ꞌin ska chaꞌ nu ngwa sꞌni. Mxtiyaaꞌ ꞌa chaꞌ kanꞌ, kwiꞌ ngwañaꞌan kanaꞌ tyempu ꞌñaan chaꞌ chan ꞌa nchkwiꞌ luwe neꞌ chaꞌ ꞌin ran. Ja nnanjoꞌo chaꞌ kanꞌ ꞌñaan chaꞌ kuꞌnian tñan ꞌin Ndiose; ska ti si xñiin suꞌwean chaꞌ ꞌin Jesús, bra kanꞌ ka kuꞌnian tñan ꞌin Ni. 
\p  
\v 5 Kuloo tñan ꞌin neꞌ chaꞌ suꞌwe ꞌa xuꞌwi tiye neꞌ ñaꞌan neꞌ ꞌin taꞌa nten neꞌ, chaꞌ kanꞌ lka tñan nu ngiꞌni nten nu ngwa luwi kasiya ꞌin loꞌo Ndiose; jlyo tiꞌ neꞌ kanꞌ sa ñaꞌan lka ska chaꞌ suꞌwe, loꞌo ngiꞌni neꞌ chaꞌ suꞌwe kanꞌ bra kanꞌ. Chañi chaꞌ wa msñi nten chaꞌ ꞌin Ndiose si suꞌwe nka tiye neꞌ ñaꞌan neꞌ ꞌin taꞌa nten neꞌ.  
\v 6 Loꞌo ndiya chinꞌ xka ta nten nu ja xlyaa kunan chaꞌ kanꞌ; xka tuwiin msñi neꞌ kanꞌ, chaꞌ lye ꞌa nchkwiꞌ neꞌ kwentu.  
\v 7 Mstru lka neꞌ kanꞌ, nxkeꞌ tiꞌ neꞌ, nduꞌu neꞌ sa ñaꞌan tñan nu ngulo Ndiose ꞌin nten, nu ngwaꞌan ayman Moisés lo kityi; loꞌo ykwiꞌ neꞌ ja ndiꞌya neꞌ kwenta sa ñaꞌan ndyoꞌo chaꞌ kula kanꞌ, ni siya lye ꞌa nduꞌu neꞌ chaꞌ kanꞌ ꞌin taꞌa nten neꞌ. 
\p  
\v 8 Jlyo tianꞌ chaꞌ suꞌwe ꞌa chaꞌ kula nu ngwaꞌan ayman Moisés kanꞌ, si kunaan suꞌwean ꞌin ran.  
\v 9 Siꞌi chaꞌ ꞌin nten nu suꞌwe tiye mda Ndiose chaꞌ kula kanꞌ; mda Ni chaꞌ kanꞌ chaꞌ ꞌin nten nu ja nchka tiꞌ kuꞌni chaꞌ suꞌwe, chaꞌ ꞌin nten nu ja xlyaa tukwa chaꞌ kanꞌ, chaꞌ ꞌin nten nu ja ndiꞌin chaꞌ ꞌin loꞌo Ndiose siyaꞌ ti, chaꞌ ꞌin nten nu ndiꞌin kiꞌya ꞌin, chaꞌ ꞌin nten nu kuxi tiye, chaꞌ ꞌin nten nu nchkwiꞌ chaꞌ kuxi ꞌin Ndiose, chaꞌ ꞌin nten nu ndujwi ꞌin sti, nu ndujwi ꞌin jyaꞌan, chaꞌ ꞌin nten nu ndujwi ꞌin taꞌa nten,  
\v 10 chaꞌ ꞌin nten nu ngiꞌni chaꞌ chen ñaꞌan loꞌo nu kunaꞌan, chaꞌ ꞌin nu kunaꞌan nu ngiꞌni chaꞌ chen ñaꞌan loꞌo yu kiꞌyu, chaꞌ ꞌin yu kiꞌyu nu ngiꞌni chaꞌ kuxi loꞌo taꞌa kiꞌyu yu, chaꞌ ꞌin nten nu ndiꞌya mnan ꞌin taꞌa nten neꞌ, chaꞌ ꞌin nu kwiñi, chaꞌ ꞌin nten nu nchkwiꞌ chaꞌ kwiñi tloo neꞌ wsiya. Mda Ndiose chaꞌ kula kanꞌ, chaꞌ ngwañaꞌan ka biyaꞌ tiꞌ nchga nten nu ja xlyaa kunan nchga chaꞌ nu ñi nu nduꞌuan chaꞌ ꞌin Ndiose.  
\v 11 Ti kwiꞌ chaꞌ suꞌwe kanꞌ nduꞌuǔn chabiyaꞌ ꞌin Ndiose. Nduꞌuǔn chaꞌ tnun ꞌa chaꞌ suꞌwe ngiꞌni Ndiose chaꞌ ndlaa Ni ꞌñaan ꞌin chaꞌ kuxi, loꞌo nduꞌuǔn chaꞌ suꞌwe ꞌa nka tiye Ni ñaꞌan Ni ꞌñaan. 
\s1 Suꞌwe ꞌa yꞌni Ndiose loꞌo Palyu 
\p  
\v 12 Ndyaǎn ꞌa xuꞌwe ꞌin Jesucristo nu nka Xꞌnaan chaꞌ nu yꞌni Ni chaꞌ ngwa ꞌñaǎn kuꞌniǐn tñan ꞌin Ni; ndyaǎn xuꞌwe ꞌin Ni chaꞌ ngulo suwi Ni ꞌñaǎn chaꞌ kuꞌniǐn tñan ꞌin Ni, chunꞌ jlyo tiꞌ Ni chaꞌ ndukwaǎn tñan nu ndlo Ni.  
\v 13 Wa ngulo suwi Ni ꞌñaǎn, ni siya kuxi ꞌa ykwiǐnꞌ chaꞌ ꞌin Ni nu ngwa sꞌni, bra nu lye ꞌa ndaǎn nu tiꞌí ꞌin nten ꞌin Jesucristo; tláǎn ꞌaǎn nu ngwa bra kanꞌ. Sa kanꞌ ti chaꞌ, ja ska chaꞌ jlyo tiǎnꞌ bra kanꞌ, chaꞌ ja ya sñiǐn chaꞌ suꞌwe ꞌin Ndiose, kanꞌ chaꞌ ngwa tꞌnan ꞌa tiꞌ Ni ꞌñaǎn.  
\v 14 Loꞌo suꞌwe ꞌa ngwa tiye Xꞌnaan naꞌan Ni ꞌñaǎn, kanꞌ chaꞌ loꞌoǔn, msñiǐn chaꞌ ꞌin Jesucristo bra kanꞌ; loꞌo ni, suꞌwe ꞌa nka tiyeěn naꞌaǎn ꞌin Jesús, kwiꞌ ngwañaꞌan suꞌwe nka tiyeěn naꞌaǎn ꞌin nchga nten. 
\p  
\v 15 Chañi chaꞌ ka xñiin suꞌwean chaꞌ re: Wa yan Jesucristo lo chalyuu chaꞌ kulaa Ni ꞌin nten chalyuu nu ndiꞌin kiꞌya ꞌin. Loꞌoǔn, tnun la kiꞌya ndukwiǐn ke xka ta nten, chaꞌ kuxi ꞌa tñan nu yꞌniǐn loꞌo nten ꞌin Jesucristo nu ngwa sꞌni.  
\v 16 Loꞌo yꞌni ꞌa Jesucristo chaꞌ tlyu tiꞌ ꞌñaǎn bra nu yꞌni tyii Ni kiꞌya nu ndiꞌin ꞌñaǎn; ngwañaꞌan ngwaꞌu Ndiose ꞌin xka ta nten sa ñaꞌan ka xñi neꞌ chaꞌ ꞌin Ni. Sa ñaꞌan nu ngwa tꞌnan tiꞌ Jesús ꞌñaǎn ti kulo, kwiꞌ ngwañaꞌan chka tꞌnan tiꞌ Ni ꞌin nchga nten nu xñi chaꞌ ꞌin Jesús nde loo la, chaꞌ nu ja tsaa tii ꞌa chalyuu ꞌin neꞌ bra kanꞌ, si tsaa ñaꞌan tiꞌ neꞌ ꞌin Ni.  
\v 17 Kanꞌ chaꞌ kuꞌniǐn tnuǔn ꞌin Ndiose ni, suꞌwe ꞌa chkwiǐnꞌ chaꞌ ꞌin Ni, chunꞌ ja tsaa tii ꞌa tsan nu nka Ni ndloo tyukwi ñaꞌan chalyuu; ja tyii chaꞌ ꞌin Ndiose, chunꞌ ja kaja ꞌa Ni. Ja nchka ꞌñaan ñaꞌaan ꞌin Ni chunꞌ lkaan nten chalyuu; ska ti Ni lka Ni ykwiꞌ Ndiose, ska ti Ni jlyo tiꞌ Ni nchga chaꞌ. Ngwañaꞌan ka chaꞌ ꞌin Ni sikwa. 
\p  
\v 18 Kuloǔn tñan ꞌiin ni, Timu, chaꞌ ñaꞌan tiꞌ sñiěnꞌ, ngwañaꞌan nka nuꞌwin, nxkeꞌ tiǎnꞌ: Ti kuꞌnii la tñan ꞌin Ndiose sa ñaꞌan nu ndukwin neꞌ ꞌiin, ti kwiꞌ neꞌ nu nchkwiꞌ chaꞌ ꞌin Ndiose; tyuꞌwi tiiꞌ chaꞌ nu ykwiꞌ neꞌ kanꞌ loꞌoo nu ngwa ti kulo, chaꞌ ka ngula la tiyee. Bra kanꞌ sa ñaꞌan lka ꞌin ska sndaru suꞌwe, kwiꞌ ngwañaꞌan taloo xuun loꞌo chaꞌ kuxi nu ndiꞌin chalyuu. Ka ꞌiin xuun loꞌo chaꞌ kuxi kanꞌ si xñii suꞌwe chaꞌ ꞌin Jesucristo, si xkwiꞌ chaꞌ suꞌwe kuꞌnii loꞌo nten.  
\v 19 Ndiya nten nu jlyo tiꞌ sa ñaꞌan lka chaꞌ nu ñi, loꞌo ja ngiꞌni ñi neꞌ chaꞌ kanꞌ; wa mxiꞌin chunꞌ neꞌ kanꞌ ꞌin Ndiose, wa mxnun neꞌ chaꞌ suꞌwe kanꞌ.  
\v 20 Ñaꞌan tiꞌ Himeneo loꞌo Jantru ni, ja nnan neꞌ chaꞌ nu ñi, kanꞌ chaꞌ wa mxnuǔn ꞌin neꞌ kanꞌ yaꞌ kuneꞌ xaꞌan, chaꞌ ka biyaꞌ tiꞌ neꞌ chaꞌ tnun ꞌa chaꞌ kuxi lka bra nu chkwiꞌ neꞌ chaꞌ kuxi ꞌin Ndiose. 
\c 2  
\s1 Nde ñaꞌan kuꞌnian bra nu chkwianꞌ loꞌo Ndiose 
\p  
\v 1 Ndiꞌin chaꞌ chkwianꞌ loꞌo Ndiose chaꞌ ꞌin nchga nten chalyuu, bra nu jñaan chaꞌ ꞌin Ni, ya ñaꞌan ti chaꞌ nu lyiji ꞌin nten; chkwianꞌ chaꞌ ꞌin xka ta nten bra nu chkwianꞌ loꞌo nu nka Xꞌnaan, ngwañaꞌan bra nu tyaan xuꞌwe ꞌin Ndiose chaꞌ ꞌin nchga nten.  
\v 2 Ndiꞌin chaꞌ chkwianꞌ loꞌo Ndiose chaꞌ ꞌin nchga neꞌ nu nka ndloo, chaꞌ ꞌin nchga neꞌ nu nka tñan; jñan wan ꞌin Ni chaꞌ kuꞌni Ni chaꞌ tiin ti tyiꞌian, chaꞌ ja xuun neꞌ nu nka ndloo loꞌoan, chaꞌ ta neꞌ kanꞌ chabiyaꞌ kuꞌnian nchga loo chaꞌ suꞌwe, sa ñaꞌan nu nchka tiꞌ Ndiose chaꞌ kuꞌnian.  
\v 3 Kwiꞌ ngwañaꞌan nchka tiꞌ Ndiose nu ndlaa ꞌñaan ꞌin chaꞌ kuxi; suꞌwe nka tiye Ni si ngwañaꞌan chkwianꞌ loꞌo,  
\v 4 chaꞌ nchka tiꞌ Ni kulaa Ni ꞌin nchga nten chalyuu, nchka tiꞌ Ni chaꞌ ka biyaꞌ tiꞌ nchga nten sa ñaꞌan chaꞌ nu ñi nu ndiꞌin ꞌin Ni.  
\v 5 Ska ti Ndiose nsuꞌwi, kwiꞌ ngwañaꞌan ndiya ska ti nten nu ndiꞌin seꞌen ndiꞌin Ndiose nu nchkwiꞌ loꞌo Ni chaꞌ ꞌin nten chalyuu; ti kwiꞌ Jesucristo lka yu kanꞌ.  
\v 6 Ti ykwiꞌ ti Jesucristo mda chabiyaꞌ yjwi neꞌ ꞌin yu ti ngwa xkanꞌ; kwiꞌ ngwañaꞌan mda yu liyaꞌ lo kiꞌya nu ndiꞌin ꞌin nten chalyuu, bra nu ngujwi yu lo wsi. Yꞌni Ndiose tñan kanꞌ ti kwiꞌ tyempu nu mstya Ni ꞌin ran chaꞌ kuꞌni Ni.  
\v 7 Ngulo suwi Ni ꞌñaǎn chaꞌ ndaꞌaǎn nchkwiǐnꞌ chaꞌ suꞌwe kanꞌ loꞌo nten chabiyaꞌ ꞌin Ni chaꞌ loꞌo neꞌ xka laꞌa tsuꞌ kunan neꞌ chaꞌ suꞌwe kanꞌ bra kanꞌ; ndaꞌaǎn nduꞌuǔn ꞌin neꞌ sa ñaꞌan ka xñi neꞌ chaꞌ ꞌin Ndiose. Chañi nchga chaꞌ nu ndaꞌaǎn re, siꞌi chaꞌ kwiñi nchkwiǐnꞌ. 
\p  
\v 8 Kanꞌ chaꞌ sikwa, nchka tiǎnꞌ chaꞌ chkwiꞌ nten loꞌo Ndiose nde nchga kichen seꞌen ndyoꞌ tiꞌin neꞌ sa tlyu ti, neꞌ nu ndiꞌin chaꞌ ꞌin loꞌo Jesucristo. Ndiꞌin chaꞌ chkwiꞌ neꞌ loꞌo Ndiose bra nu suꞌwe nka tiye neꞌ, chaꞌ ja suꞌwe chkwiꞌ neꞌ loꞌo Ni si msinꞌ tiꞌ neꞌ, loꞌo ja suꞌwe chkwiꞌ neꞌ loꞌo Ni bra nu ndiꞌin wsuun neꞌ.  
\v 9 Loꞌo nu kunaꞌan ni, ndiꞌin chaꞌ kuꞌ neꞌ teꞌ sa biyaꞌ nu suꞌwe ti ngaꞌan, siꞌi teꞌ nu kaꞌan ꞌa ngaꞌan; kwiꞌ ngwañaꞌan, ja kuꞌni siyeꞌ lye neꞌ loꞌo kichanꞌ ke neꞌ, ja ndiꞌin chaꞌ kuꞌ lye neꞌ oro, ja kuꞌ neꞌ kee xaa nu kaꞌan ꞌa ngaꞌan, chaꞌ ja suꞌwe nu kuꞌni siyeꞌ neꞌ ꞌin ti ykwiꞌ ti neꞌ chaꞌ lye ꞌa ñaꞌan kwiꞌya yu kiꞌyu ꞌin neꞌ bra kanꞌ.  
\v 10 Chaꞌ ꞌin Ndiose, suꞌwe la ñaꞌan nu kunaꞌan nu xkwiꞌ chaꞌ suꞌwe ngiꞌni.  
\v 11 Ndiꞌin chaꞌ tiin ti tyiꞌin nu kunaꞌan bra nu nduꞌu nten chaꞌ ꞌin Ndiose seꞌen ndyoꞌ tiꞌin taꞌa neꞌ, chaꞌ loꞌo nu kunaꞌan kuꞌni xaꞌan loꞌo neꞌ, chaꞌ loꞌo nu kunaꞌan kunan chaꞌ kanꞌ.  
\v 12 Ja taǎn chabiyaꞌ ꞌin nu kunaꞌan chaꞌ kwaꞌu chaꞌ ꞌin Ndiose ꞌin taꞌa nten bra nu ndyoꞌ tiꞌin nten sa tlyu ti, chaꞌ ja suꞌwe si kulo nu kunaꞌan tñan ꞌin yu kiꞌyu ngwañaꞌan. Tiin ti tyiꞌin nu kunaꞌan suꞌwe la.  
\v 13 Nu ngwa ti kulo ni, ngwiñan Ndiose ꞌin yu kiꞌyu Adán; chunꞌ ndiꞌin la ngwiñan Ni ska nu kunaꞌan nu ngwa naan Eva.  
\v 14 Kwiꞌ ngwañaꞌan, ja mñi lyoꞌo kuneꞌ xaꞌan ꞌin ayman Adán bra kanꞌ; mñi lyoꞌo kuneꞌ xaꞌan ꞌin nu kunaꞌan ꞌin yu kanꞌ, chaꞌ Eva, kanꞌ nu yꞌni chaꞌ kuxi.  
\v 15 Kanꞌ chaꞌ tnun ꞌa tñan ndiya ꞌin neꞌ kunaꞌan bra nu kala sñiꞌ neꞌ ni, loꞌo kulaa Ndiose ꞌin neꞌ kunaꞌan si xñi suꞌwe neꞌ chaꞌ ꞌin Ni, si suꞌwe ka tiye neꞌ ñaꞌan neꞌ ꞌin taꞌa nten neꞌ. Kuꞌni Ni chaꞌ ka luwi kasiya ꞌin nu kunaꞌan nu ngwañaꞌan ngiꞌni; si talo neꞌ kuꞌni neꞌ chaꞌ suꞌwe kanꞌ, si nchka ꞌin nu kunaꞌan kanꞌ kuꞌni kwenta ꞌin ti ykwiꞌ ti, chaꞌ ja ka siyeꞌ neꞌ loꞌo taꞌa nten neꞌ. 
\c 3  
\s1 Nten nu ka ndloo ꞌin nchga taꞌa msñian chaꞌ ꞌin Jesús 
\p  
\v 1 Ndiꞌin chaꞌ xñi suꞌwe wan chaꞌ nu ñi nu nchkwiǐnꞌ re: Suꞌwe ꞌa si xlyaa ska yu taꞌa wan ka ndloo ꞌin nchga taꞌa wan nu msñi wan chaꞌ ꞌin Ndiose, chaꞌ suꞌwe ꞌa chabiyaꞌ ꞌin Ndiose si nchka tiꞌ ska nten kuꞌni tñan kanꞌ.  
\v 2 Bra nu lka ska nten ndloo ꞌin nchga taꞌa nten ꞌin Jesucristo ska kichen, bra kanꞌ ndiꞌin chaꞌ kuꞌni yu xkwiꞌ chaꞌ suꞌwe loꞌo nten, chaꞌ ja kaja ñaꞌan jñan neꞌ kiꞌya ꞌin yu bra kanꞌ. Kaja kwilyoꞌo yu kanꞌ loꞌo ska ti nu kunaꞌan; ngwañaꞌan ndiꞌin chaꞌ suꞌwe ti tyaꞌan chaꞌ tiye yu, chaꞌ kulaa yaꞌ yu nchga chaꞌ kuxi nu nsuꞌwi tiye ykwiꞌ yu, chaꞌ suꞌwe ti tyiꞌin yu loꞌo taꞌa nten yu. Ndiꞌin chaꞌ ta yu naꞌan tyi yu chaꞌ tyiꞌin neꞌ nu ndoꞌo xka kichen, kwiꞌ ngwañaꞌan ndiꞌin chaꞌ ta yu nan ku neꞌ kanꞌ. Ndiꞌin chaꞌ kwaꞌu suꞌwe yu chaꞌ ꞌin Ndiose ꞌin nten.  
\v 3 Ja ka yu tñan kanꞌ si taꞌa ti kuꞌwi yu, si ndiꞌin wsuun yu loꞌo nten; ndiꞌin chaꞌ kuꞌni yu chaꞌ tlyu tiꞌ ꞌin taꞌa nten yu, chaꞌ ja kaja nu xuun loꞌo ꞌin yu. Ja suꞌwe si nu jñan yu tñi ꞌin taꞌa nten yu, chaꞌ ka kuliyaꞌ la yu.  
\v 4 Ndiꞌin chaꞌ kulo suꞌwe yu kanꞌ tñan ꞌin taꞌa ndiꞌin yu, chaꞌ ngwañaꞌan tukwa sñiꞌ yu tñan nu ndlo yu ꞌin neꞌ, chaꞌ kuꞌni tnun sñiꞌ yu ꞌin yu.  
\v 5 Ja ka ꞌin ska nten ka ndloo ꞌin taꞌa nten ꞌin Ndiose ska kichen si ja kulo suꞌwe yu kanꞌ tñan naꞌan tyi yu;  
\v 6 kanꞌ chaꞌ ja suꞌwe ka ska nten ndloo nu tka msñi ti chaꞌ ꞌin Ndiose, chaꞌ ti ji kuꞌni xaꞌan suꞌwe yu chaꞌ kanꞌ. Ja chan lye ꞌa kuꞌni siyeꞌ yu ꞌin taꞌa nten yu, loꞌo kanꞌ ta Ndiose nu tiꞌí ꞌin yu sa ñaꞌan nu ta Ni nu tiꞌí ꞌin kuneꞌ xaꞌan.  
\v 7 Nten nu ka ndloo kanꞌ ni, suꞌwe si chkwiꞌ neꞌ taꞌa kichen tyi yu chaꞌ ꞌin yu chaꞌ suꞌwe ti ngiꞌni yu, ni siya nten nu ja ya xñi chaꞌ ꞌin Jesucristo chkwiꞌ neꞌ ngwañaꞌan ꞌin yu. Loꞌo kanꞌ ja ka chkwiꞌ neꞌ kwentu ꞌin yu kanꞌ, ja ka jwakii kuneꞌ xaꞌan ꞌin yu kanꞌ, chaꞌ kuꞌni yu chaꞌ kuxi. 
\s1 Nten nu nka tñan ꞌin taꞌa nten ꞌin Jesús ska kichen 
\p  
\v 8 Kwiꞌ ngwañaꞌan nten nu nka tñan ꞌin taꞌa nten ꞌin Jesús ska kichen, loꞌo neꞌ kanꞌ ndiꞌin chaꞌ kuꞌni neꞌ xkwiꞌ chaꞌ suꞌwe. Ja suꞌwe si tukwa chaꞌ ndaꞌan tiye neꞌ kanꞌ bra nu kuꞌni neꞌ tñan kanꞌ; ja suꞌwe si kuꞌwi neꞌ kanꞌ, ja suꞌwe si lye ꞌa jñan neꞌ kanꞌ tñi ꞌin taꞌa nten neꞌ chaꞌ ka kuliyaꞌ neꞌ, ti ykwiꞌ ti neꞌ.  
\v 9 Ndiꞌin chaꞌ xñi suꞌwe neꞌ kanꞌ nchga chaꞌ nu ñi ꞌin Ndiose, taꞌa chaꞌ nu msñian taꞌaan, chaꞌ ngwañaꞌan tyukwi ti tiye neꞌ kuꞌni neꞌ xkwiꞌ chaꞌ suꞌwe.  
\v 10 Kwiꞌ ngwañaꞌan, ndiꞌin chaꞌ kuꞌni biyaꞌ wan ꞌin nten kanꞌ, chaꞌ ñaꞌan wan si xkwiꞌ chaꞌ suꞌwe ngiꞌni neꞌ. Nten nu ngiꞌni suꞌwe ni, ka ꞌin neꞌ ka neꞌ tñan chaꞌ ꞌin taꞌa neꞌ, chaꞌ tayaꞌ neꞌ ꞌin taꞌa nten ꞌin Jesús, chaꞌ chabiyaꞌ ꞌin Ndiose kuꞌni neꞌ kanꞌ tñan bra kanꞌ.  
\v 11 Loꞌo nu kunaꞌan ni, ndiꞌin chaꞌ kuꞌni neꞌ xkwiꞌ chaꞌ suꞌwe bra nu ka neꞌ tñan chaꞌ tayaꞌ neꞌ ꞌin taꞌa neꞌ; ja suꞌwe chkwiꞌ nu kunaꞌan kanꞌ kwentu ꞌin taꞌa nten neꞌ. Ndiꞌin chaꞌ suꞌwe ti ka tiye nu kunaꞌan kanꞌ, chaꞌ talo neꞌ kuꞌni neꞌ tñan nu wa nda Ndiose ꞌin neꞌ.  
\v 12 Nten nu nka tñan ꞌin taꞌa nten ꞌin Jesús ska kichen, ni siya yu kiꞌyu, ni siya neꞌ kunaꞌan, ska ti nu ka kwilyoꞌo neꞌ. Ndiꞌin chaꞌ suꞌwe ti kulo neꞌ kanꞌ tñan ꞌin sñiꞌ neꞌ, chaꞌ kunan suꞌwe nchga nten nu ndiꞌin naꞌan tyi neꞌ chaꞌ nu nchkwiꞌ neꞌ.  
\v 13 Kwiꞌ ngwañaꞌan suꞌwe ꞌa chkwiꞌ nchga nten ꞌin neꞌ kanꞌ si suꞌwe ti kuꞌni neꞌ chaꞌ nu nka neꞌ tñan, chaꞌ ndayaꞌ neꞌ ꞌin neꞌ taꞌaan; bra kanꞌ sten la neꞌ chaꞌ ꞌin Jesucristo, chaꞌ ngwañaꞌan ka ngula la tiye neꞌ chaꞌ kwaꞌu neꞌ chaꞌ nu ñi ꞌin xka ta nten. 
\s1 Sa ñaꞌan lka chaꞌ ꞌin Jesús nu wa msñian 
\p  
\v 14-15 Ndla ti kaǎn seꞌen ndiꞌiin, nka tiyeěn. Ngwañaꞌan nka tiyeěn, ni siya ja jlyo tiǎnꞌ ni ñaꞌan bra nu ka ꞌñaǎn, si ndiꞌin chaꞌ tiyaꞌ ꞌñaǎn; kanꞌ chaꞌ ni, ndaꞌaǎn kityi re chaꞌ ka biyaꞌ la tiiꞌ sa ñaꞌan kuꞌni nten ꞌin Jesucristo loꞌo taꞌa neꞌ, sa ñaꞌan kuꞌni neꞌ kanꞌ bra nu tyoꞌ tiꞌin neꞌ sa tlyu ti. Tyempu kanꞌ nu ndiꞌian loꞌo taꞌaan chaꞌ kuꞌni tnuan ꞌin Ndiose nu luꞌu, kwiꞌ tyempu kanꞌ nduꞌu neꞌ taꞌaan chaꞌ nu ñi ꞌin nu nka Xꞌnaan ꞌin taꞌa nten. Loꞌo ja tsaa tii chaꞌ nu ñi kanꞌ siyaꞌ ti lo chalyuu chunꞌ nchga neꞌ taꞌaan nchga kichen nchkwiꞌ chaꞌ kanꞌ.  
\v 16 Chañi chaꞌ tnun ꞌa chaꞌ suꞌwe ꞌin Jesucristo nu wa msñian. Nde ndukwa chaꞌ kanꞌ: 
\q1 Nu ngwa sꞌni, ja tukwin ngwa biyaꞌ tiꞌ sa ñaꞌan nu kulaa Ndiose ꞌin nten; 
\q1 loꞌo ni, jlyo tianꞌ, chaꞌ ngula Jesucristo yan Ni chalyuu, chaꞌ ngwa Ni nten. 
\q1 Kwiꞌ ngwañaꞌan nchkwiꞌ Tyiꞌi Ndiose chaꞌ ꞌin Ni, chaꞌ ska nten nu luwi ꞌa lka Ni; 
\q1 wa naꞌan angajle ꞌin Jesús, yu nu luwi kanꞌ. 
\q1 Loꞌo ni, nduꞌu nten chaꞌ ꞌin Jesucristo ꞌin nten nu ndiꞌin tyukwi ñaꞌaan chalyuu; 
\q1 loꞌo nxñi neꞌ nchga kichen chaꞌ nu nchkwiꞌ neꞌ bra kanꞌ. 
\q1 Chunꞌ ndiꞌin la ndyaa Jesús nde seꞌen ndiꞌin Ndiose Stian nde niꞌ kwan, loꞌo ni, tlyu ꞌa lka Jesús seꞌen ndiꞌin Ni nde kwa. 
\c 4  
\s1 Ndiya neꞌ nu xiꞌin chunꞌ ꞌin chaꞌ nu ñi ꞌin Ndiose chunꞌ ndiꞌin la 
\p  
\v 1 Loꞌo Tyiꞌi Ndiose nchka biyaꞌ tianꞌ sa ñaꞌan ka chaꞌ tyempu nde loo la, chaꞌ ndiya nten nu wa msñi tuwiin ꞌin Jesucristo ti kulo, loꞌo chunꞌ ndiꞌin la tyoꞌo tsuꞌ neꞌ kanꞌ tuwiin ꞌin nu nka Xꞌnaan. Kulaa yaꞌ neꞌ kanꞌ ꞌin Ndiose bra kanꞌ, chaꞌ kwiñilyoꞌo kwiꞌin kuxi ꞌin neꞌ, ti kwiꞌ kwiꞌin kuxi nu ngiꞌni tñan chabiyaꞌ ꞌin kuneꞌ xaꞌan; tyijin lyo kwiꞌin kuxi kanꞌ ꞌin neꞌ kanꞌ bra kanꞌ.  
\v 2 Ndiya nten nu nchkwiꞌ tukwa chaꞌ, nu ja njyuꞌu tiꞌ chaꞌ wa msñi neꞌ chaꞌ kwiñi nu nchkwiꞌ kwiꞌin kuxi kanꞌ; loꞌo kunan chinꞌ neꞌ taꞌaan chaꞌ kwiñi nu chkwiꞌ neꞌ kanꞌ, tyoꞌo tsuꞌ neꞌ tuwiin suꞌwe bra kanꞌ. Mnuꞌun chaꞌ suꞌwe nsuꞌwi tiye neꞌ, ñaꞌan tiꞌ si wa msuwenꞌ ran loꞌo ska chkwan nu tikeeꞌ ꞌa.  
\v 3 Nduꞌu neꞌ kwiñi kanꞌ, chaꞌ ja suꞌwe kaja kwilyoꞌoan; nduꞌu neꞌ chaꞌ nsuꞌwi ꞌa nan nchkuan nu ja suꞌwe, ndukwin neꞌ kanꞌ. Tlyu ꞌa chaꞌ kwiñi nu nchkwiꞌ neꞌ kanꞌ. Loꞌo Ndiose ni, suꞌwe wa ngwiñan Ni nchga nan nu ndiꞌin chaꞌ kuan, taꞌaan nu ndiꞌin chaꞌ ꞌñaan loꞌo Jesucristo; kanꞌ chaꞌ tyaan xuꞌwe ꞌin Ndiose bra nu wa kuun tian, chaꞌ nu jlyo tianꞌ chaꞌ suꞌwe ran.  
\v 4 Suꞌwe ꞌa tñan ngiꞌni Ni, suꞌwe ꞌa ngwiñan Ni nchga loo nan; kanꞌ chaꞌ ja suꞌwe si xkwaan ska chaꞌ suꞌwe nu ngwiñan Ni. Xñian nchga chaꞌ suꞌwe kanꞌ, loꞌo bra kanꞌ chkwianꞌ chaꞌ re loꞌo Ni: “Ngwa xuꞌwe ꞌiin, Sti ba Ndiose” nchkwiin.  
\v 5 Ngwañaꞌan chkwianꞌ loꞌo Ndiose chaꞌ wa nda Ni nchga nan nu suꞌwe chaꞌ kuan; lkwaan ꞌin nchga nan nchkuan bra kanꞌ, chaꞌ chabiyaꞌ ꞌin Ndiose kuan ꞌin ran. 
\s1 Ti kuꞌnii suꞌwe tñan ꞌin Ndiose 
\p  
\v 6 Loꞌo nuꞌwin Timu, kwaꞌuu nchga chaꞌ nu ndaꞌaǎn lo kityi re ꞌin taꞌa nten ꞌin Jesucristo nde kwa, chaꞌ ka nuꞌwin ska nten nu suꞌwe ꞌa ngiꞌni tñan ꞌin Jesucristo. Tyuꞌwi suꞌwe tiiꞌ nchga chaꞌ nu wa msñii, kwiꞌ chaꞌ ꞌin Ndiose; loꞌo ti xñii suꞌwe tuwiin ꞌin Xꞌnaan bra kanꞌ, sa ñaꞌan nu ngiꞌnii ni.  
\v 7 Ja kunaan kwentu nu ja nchkwiꞌ ñi chaꞌ ꞌin Ndiose, chaꞌ kuxi ꞌa chaꞌ kanꞌ. Suꞌwe la si tyaꞌan tiiꞌ kuꞌnii xkwiꞌ tñan nu ndiya la tiꞌ Ndiose.  
\v 8 Suꞌwe ꞌa si tyoꞌo taꞌaan chinꞌ chaꞌ xñaan tyukwin kiyaanꞌ, suꞌwe si kuꞌnian chinꞌ tñan chaꞌ xñaan chinꞌ tyukwin yaanꞌ; loꞌo suꞌwe la si tyaꞌan tiꞌ niꞌ kasiya ꞌñaan chaꞌ kunaan chaꞌ nu nchkwiꞌ Ndiose nchga bra. Suꞌwe ti tyiꞌian lo chalyuu re, si kuꞌnian nchga tñan nu nchka tiꞌ Xꞌnaan chaꞌ kuꞌnian; ti kwiꞌ ti chaꞌ, suꞌwe ti tyiꞌian seꞌen ndiꞌin Ndiose, si kuꞌnian sa ñaꞌan tñan nu nchka tiꞌ Ni chaꞌ kuꞌnian.  
\v 9 Chañi ꞌa chaꞌ nu ndaꞌaǎn nde, loꞌo ndiꞌin chaꞌ xñiin suꞌwean chaꞌ kanꞌ.  
\v 10 Ndyaa ñaꞌan tianꞌ ꞌin Ndiose nu luꞌu; kanꞌ chaꞌ lye ꞌa kuꞌnian tñan ꞌin Ni, ni siya tiꞌí ꞌa tiꞌ nten ꞌñaan. Loꞌo Ndiose ni, kulaa Ni ꞌin nchga nten nu kunan chaꞌ ꞌin Ni. Bra nu xñian chaꞌ ꞌin Ni, bra kanꞌ ka biyaꞌ suꞌwe la tianꞌ chaꞌ kanꞌ. 
\p  
\v 11 Kuloo tñan nu ngwaꞌaǎn lo kityi re ꞌin nchga neꞌ taꞌa wan, kwaꞌuu suꞌwe chaꞌ re ꞌin neꞌ.  
\v 12 Ja taa chabiyaꞌ xtyi lyoꞌo neꞌ ꞌiin chaꞌ ti kuneeꞌ, xkeꞌ tiꞌ neꞌ. Xkwiꞌ luwi ti kuꞌnii tñan chaꞌ ñaꞌan taꞌa nten ꞌin Jesucristo ꞌin ran; xkwiꞌ chaꞌ suꞌwe chkwiiꞌ, xkwiꞌ chaꞌ suꞌwe kuꞌnii; kwiꞌ ngwañaꞌan, suꞌwe ꞌa xuꞌwi tiyee ñaꞌaan ꞌin nchga nten. Bra kanꞌ ka biyaꞌ tiꞌ neꞌ chaꞌ suꞌwe ꞌa msñii chaꞌ ꞌin Jesucristo, chaꞌ xkwiꞌ luwi kasiya ꞌiin ngiꞌnii tñan.  
\v 13 Bra nu ti ji kalaǎn seꞌen ndiꞌiin, ti chkwiiꞌ nchga chaꞌ nu ndukwa lo kityi ꞌin Ndiose loꞌo neꞌ; ti chkwiiꞌ la sa ñaꞌan lka chaꞌ nu ñi kanꞌ, ti kwaꞌuu la chaꞌ suꞌwe kanꞌ ꞌin neꞌ bra nu tyoꞌ tiꞌin neꞌ ska seꞌen ti.  
\v 14 Nan wa nda Ndiose tyukwi chabiyaꞌ ꞌin Tyiꞌi Ni ꞌiin, bra nu mstya yaꞌ neꞌ kula kanꞌ kee, chaꞌ steen tñan chaꞌ ꞌin Xꞌnaan, kanꞌ chaꞌ kiꞌyaa suꞌwee kwenta ꞌin chaꞌ tiya nu wa mda Ndiose ꞌiin tsan kanꞌ, chaꞌ taloo kuꞌnii tñan nu ndiꞌin chaꞌ kuꞌnii. 
\p  
\v 15 Kanꞌ chaꞌ ni, kuꞌni suꞌwe nchga chaꞌ nu ngwaꞌaǎn nde; bra kanꞌ kiꞌya neꞌ kwenta chaꞌ wa yꞌnii xaꞌan suꞌwe chaꞌ kaa ndloo ꞌin nten.  
\v 16 Taloo kuꞌnii tñan kanꞌ sikwa. Kuꞌnii kwenta ꞌin ti ykwiiꞌ tii chaꞌ xkwiꞌ chaꞌ suꞌwe kuꞌnii. Suꞌwe ti kwaꞌuu ꞌin neꞌ taꞌaan, chaꞌ ngwañaꞌan kunan suꞌwe neꞌ chaꞌ nu nduꞌuu ꞌin neꞌ, chaꞌ kulaa Ndiose ꞌin neꞌ kanꞌ ꞌin chaꞌ kuxi bra kanꞌ. Kwiꞌ ngwañaꞌan kulaa Ni ꞌiin bra kanꞌ. 
\c 5  
\s1 Suꞌwe ti kuꞌnian loꞌo taꞌa msñian chaꞌ ꞌin Jesús 
\p  
\v 1 Ja kuꞌnii tlá ꞌin ska yu kula si kuꞌni yu chaꞌ kuxi; suꞌwe ti chkwiiꞌ loꞌo yu ñaꞌan tiꞌ si nchkwiiꞌ loꞌo stii. Ti kwiꞌ ti chaꞌ, loꞌo ska yu kiꞌyu kuneꞌ, taa ska chaꞌ tiya ꞌin yu sa ñaꞌan lka si nduꞌuu ꞌin taꞌaa.  
\v 2 Loꞌo ska neꞌ kula, suꞌwe ti chkwiiꞌ loꞌo ñaꞌan tiꞌ si nchkwiiꞌ loꞌo jyaꞌaan; ti kwiꞌ ti chaꞌ, loꞌo nu kunaꞌan kuneꞌ, taa ska chaꞌ nu ñi loꞌo neꞌ ñaꞌan tiꞌ si nchkwiiꞌ loꞌo ska nu kunaꞌan taꞌaa. Xkwiꞌ luwi kasiya ꞌiin ñaꞌaan ꞌin neꞌ kanꞌ. 
\p  
\v 3 Ndiꞌin chaꞌ ñaꞌansiin neꞌ ꞌin nchga nu kunaꞌan tiꞌi nu wa ngujwi kwilyoꞌo neꞌ, loꞌo nganun neꞌ ska ti neꞌ.  
\v 4 Si ndiya sñiꞌ nu kunaꞌan tiꞌi kanꞌ, ni siya ska sñiꞌ steꞌ, ndiꞌin chaꞌ ñaꞌansiin neꞌ kanꞌ ꞌin jyaꞌan neꞌ bra kanꞌ; ndiꞌin chaꞌ kuꞌni xaꞌan sñiꞌ neꞌ chaꞌ ñaꞌansiin neꞌ ꞌin neꞌ kula ꞌin neꞌ, sa ñaꞌan ngwa bra nu mnaꞌansiin neꞌ kula kanꞌ ꞌin sñiꞌ ti bra nu ngwa kuneꞌ. Kanꞌ lka tñan nu ndiꞌin chaꞌ kuꞌni neꞌ kuneꞌ loꞌo neꞌ kula ꞌin neꞌ, chaꞌ suꞌwe nka tiye Ndiose bra nu ñaꞌan Ni ꞌin neꞌ kuneꞌ nu ñaꞌansiin suꞌwe ꞌin neꞌ kula ꞌin neꞌ.  
\v 5 Ska nu kunaꞌan tiꞌi nu nganun ska ti chaꞌ ngujwi kwilyoꞌo, chañi chaꞌ suꞌwe la ka ꞌin tsaa ñaꞌan tiꞌ ꞌin Ndiose si kanun ska ti; ska ti Ndiose tayaꞌ Ni ꞌin neꞌ nka tiye neꞌ, kanꞌ chaꞌ nchkwiꞌ neꞌ loꞌo Ndiose tsan loꞌo tla, njñan neꞌ ꞌin Ni nan ka nu lyiji ꞌin neꞌ.  
\v 6 Siꞌi ngwañaꞌan kuꞌni nu kunaꞌan tiꞌi nu kuꞌni ya ñaꞌan ti chaꞌ nu ndaꞌan tiye neꞌ; xkeꞌ tiꞌ neꞌ chaꞌ suꞌwe ti tyiꞌin neꞌ lo chalyuu, loꞌo wa tyii ti chaꞌ ꞌin neꞌ kanꞌ, chaꞌ ꞌin Ndiose.  
\v 7 Ndiꞌin chaꞌ kuloo tñan ꞌin nchga nu kunaꞌan kanꞌ, chaꞌ ja ka xtya xka ta nten kiꞌya ꞌwan chaꞌ ꞌin nu kunaꞌan tiꞌi nu ngiꞌni chaꞌ kuxi kanꞌ.  
\v 8 Ja suꞌwe ngiꞌni nten nu ja nduwe tiꞌ ꞌin taꞌa, ni siya sti, ni siya jyaꞌan, ni siya sñiꞌ; chaꞌ kwiñi nchkwiꞌ neꞌ kanꞌ bra nu nchkwiꞌ neꞌ chaꞌ wa msñi neꞌ chaꞌ ꞌin Jesucristo, loꞌo ja ñaꞌansiin neꞌ ꞌin taꞌa neꞌ; suꞌwe la ngiꞌni xka ta nten nu ja nnan ꞌa chaꞌ ꞌin Jesucristo. 
\p  
\v 9 Ndiꞌin chaꞌ kwaꞌan yu kula nin nchga nu kunaꞌan tiꞌi nu wa mdyii snan yla yijan nsuꞌwi neꞌ, nchga neꞌ kula nu ska ti yaꞌ mjwi kwilyoꞌo neꞌ, nu ska ti loꞌo kwilyoꞌo neꞌ mdiꞌin neꞌ lo chalyuu.  
\v 10 Kwaꞌan neꞌ nin neꞌ kula nu chkwiꞌ nten chaꞌ ꞌin neꞌ chaꞌ suꞌwe ꞌa tñan ngiꞌni neꞌ: si wa yꞌni kuꞌu suꞌwe neꞌ ꞌin nu lyuꞌ sñiꞌ neꞌ; si wa mda neꞌ seꞌen ndiꞌin neꞌ xka kichen nu mdiyan naꞌan tyi neꞌ; si wa mdayaꞌ neꞌ ꞌin taꞌa nten ꞌin Jesucristo, ni siya lye tñan mskeꞌ tiꞌ neꞌ; si ngwa tꞌnan tiꞌ neꞌ ꞌin nten nu tiꞌí tiꞌ ꞌin neꞌ. Si ngwañaꞌan xkwiꞌ tñan suꞌwe wa yꞌni neꞌ kula kanꞌ, kwaꞌan yu nin neꞌ lo kityi kanꞌ sikwa. 
\p  
\v 11-12 Ja kwaꞌan neꞌ nin nu kunaꞌan kuneꞌ bra nu tka nganun ska ti neꞌ, chaꞌ ndiya yaꞌ ja talo nu kunaꞌan kuneꞌ kanꞌ. Nu kunaꞌan nu tyukwa nin lo kityi, ndiꞌin chaꞌ tyaꞌan chaꞌ tiye neꞌ ska loo ti tñan ꞌin Jesucristo tyukwi bra nu ndiꞌin neꞌ lo chalyuu, kanꞌ chaꞌ ka suꞌwa chaꞌ ꞌin neꞌ loꞌo Ndiose bra kanꞌ. Xka ta nu kunaꞌan kuneꞌ kanꞌ, si kaja kwilyoꞌo neꞌ xiyaꞌ, loꞌo kanꞌ ja kuꞌni neꞌ sa ñaꞌan nu ndukwin neꞌ chaꞌ kuꞌni neꞌ chaꞌ ꞌin Jesucristo bra kanꞌ, ja chan tyiꞌin kiꞌya ꞌin nu kunaꞌan kanꞌ bra kanꞌ.  
\v 13 Kanꞌ chaꞌ suꞌwe la si ja kwaꞌan yu nin nu kunaꞌan kuneꞌ nu tka nganun ska ti. Ja chan xkwiꞌ paseya ti tyaꞌan nu kunaꞌan kanꞌ seꞌen ndiꞌin nten; si ngwañaꞌan kuꞌni nu kunaꞌan kanꞌ, ka ndaja neꞌ bra kanꞌ, tyisnan neꞌ chkwiꞌ ꞌa neꞌ kwentu ꞌin xka nten bra kanꞌ, ni siya taꞌa neꞌ, ni siya xka la nten. Loꞌo kaꞌan la chaꞌ kuxi ka bra kanꞌ, loꞌo chkwiꞌ ꞌa nu kunaꞌan kanꞌ loꞌo taꞌa neꞌ ti ndyuwa ti chaꞌ nu ja suꞌwe chkwianꞌ.  
\v 14 Kanꞌ chaꞌ suꞌwe la si xiyaꞌ kaja kwilyoꞌo nu kunaꞌan kuneꞌ kanꞌ, nxkeꞌ tiǎnꞌ; kaja sñiꞌ neꞌ bra kanꞌ, ñaꞌansiin neꞌ naꞌan tyi neꞌ, loꞌo ja kaja ñaꞌan nu xtya neꞌ kiꞌya ꞌñaan siꞌya nu kunaꞌan kanꞌ.  
\v 15 Ngwañaꞌan nchka tiǎnꞌ chaꞌ kuꞌni wan, chaꞌ wa ndiya chinꞌ nu kunaꞌan kuneꞌ nu nganun ska ti nu wa mxiꞌin chunꞌ neꞌ chaꞌ ꞌin Ndiose, chaꞌ wa msñi neꞌ tuwiin ꞌin Satanás nu lka kuneꞌ xaꞌan bra kanꞌ. 
\p  
\v 16 Kuloo tñan ꞌin taꞌa nten ꞌin Jesucristo nde kwa, ni siya yu kiꞌyu, ni siya nu kunaꞌan, chaꞌ ñaꞌansiin neꞌ ꞌin nu kunaꞌan tiꞌi taꞌa neꞌ; ja xnun neꞌ ꞌin nu kunaꞌan tiꞌi taꞌa neꞌ chaꞌ ka neꞌ chaꞌ ꞌin taꞌa nten ꞌin Jesucristo. Bra kanꞌ ska ti nu kunaꞌan nu chañi chaꞌ tiꞌi, kanꞌ kanun chaꞌ ꞌin taꞌa nten ꞌin Jesucristo; ka tayaanꞌ ꞌin nu kunaꞌan tiꞌi nu ja tukwin la ndiya chaꞌ ñaꞌansiin ꞌin neꞌ. 
\p  
\v 17 Kuꞌni tnun wan ꞌin yu kula nu nka ndloo ꞌin taꞌa wan si suꞌwe ti kuꞌni yu tñan. Loꞌo lye la kuꞌni tnun wan ꞌin yu kula nu nchkwiꞌ chaꞌ ꞌin Ndiose loꞌo wan, yu kula nu nduꞌu chaꞌ kanꞌ ꞌwan. Ta wan nchga nan nu kunanjoꞌo ꞌin yu kula kanꞌ chaꞌ tyijin yuꞌwi ꞌin yu chalyuu.  
\v 18 Kanꞌ chaꞌ ndukwa chaꞌ re lo kityi ꞌin Ndiose: “Ja skanꞌ wan tuꞌwa toro bra nu nxta iꞌ kiyaꞌ iꞌ ꞌin trigu chaꞌ tyoꞌo mta; ka ku iꞌ chinꞌ, suꞌwe la bra kanꞌ” ndukwin kityi. Loꞌo nchkwiꞌ kityi kanꞌ xka chaꞌ: “Ñi ndyoꞌo chaꞌ xñi neꞌ liyaꞌ loo tñan nu yꞌni neꞌ” ndukwin kityi. 
\p  
\v 19 Ja tukwaa chaꞌ ꞌin neꞌ si xtya ska nten kiꞌya ꞌin ska yu kula kanꞌ; ska ti si suꞌwa ti xtya tukwa snan nten kiꞌya kanꞌ ꞌin yu kula kanꞌ, bra kanꞌ ndiꞌin chaꞌ tukwaa chaꞌ ꞌin neꞌ.  
\v 20 Si chañi chaꞌ ngiꞌni yu kula kanꞌ chaꞌ kuxi, bra kanꞌ chkwiiꞌ loꞌo yu kula kanꞌ tloo taꞌa nten ꞌin Jesucristo kanꞌ, chaꞌ kuwe tiꞌ nchga neꞌ, chaꞌ ja kuꞌni neꞌ chaꞌ kuxi ngwañaꞌan.  
\v 21 Ndloǔn tñan re ꞌiin, Timu, chaꞌ kuꞌnii nchga tñan nu ngwaꞌaǎn lo kityi re; chunꞌ jlyo tiꞌ Ndiose chaꞌ nu ngwaꞌaǎn re, jlyo tiꞌ Jesucristo, jlyo tiꞌ angajle nu ngulo suwi Ni chaꞌ ka tñan ꞌin Ni. Bra nu ndiꞌin chaꞌ kuꞌnii biyaaꞌ ꞌin ska yu taꞌaan ni, kataa chinꞌ chaꞌ ka biyaꞌ suꞌwe tiiꞌ nchga loo chaꞌ ꞌin yu kanꞌ, chaꞌ ska ti biyaꞌ nu ñi tyoꞌo chaꞌ ꞌin yu, ni siya taꞌa suꞌwe ndiꞌian, ni siya xka nten.  
\v 22 Ja xtyaa yaaꞌ ndla ꞌa ke ska nten, chaꞌ ka yu ndloo ꞌin ska ta nten ꞌin Jesucristo; kataa chinꞌ chaꞌ ñaꞌaan si chañi chaꞌ nten nu xkwiꞌ chaꞌ suꞌwe ngiꞌni lka yu, si chañi chaꞌ suꞌwe ꞌa tñan ngiꞌni yu. Ja chan si ndiya chaꞌ kuxi niꞌ kasiya ꞌin yu kanꞌ, xtya neꞌ kiꞌya ꞌñaan siꞌya yu kanꞌ. Loꞌo nuꞌwin ni, xkwiꞌ luwi kasiya ꞌiin kuꞌnii tñan. 
\p  
\v 23 Jlyo tiǎnꞌ chaꞌ tiꞌii chinꞌ; kanꞌ chaꞌ ja koꞌoo xkwiꞌ tyiꞌa ti, suꞌwe si koꞌoo chinꞌ mñun nu ndyoꞌo lo siꞌyu chi kutun chaꞌ kuꞌni chinꞌ rmiyu ꞌiin. 
\p  
\v 24 Ndiya nten nu ndiꞌin kiꞌya ꞌin, loꞌo jlyo tiꞌ xka ta nten ni ñaꞌan chaꞌ kuxi ngiꞌni neꞌ kanꞌ, ni siya ja ya ka biyaꞌ ꞌin neꞌ kanꞌ. Loꞌo ngwañaꞌan, ndiya nten nu kuxi tiye, loꞌo ja jlyo tiꞌ nten ni ñaꞌan chaꞌ kuxi ngiꞌni neꞌ kanꞌ; bra nu ka biyaꞌ ꞌin neꞌ kanꞌ, kanꞌ ka biyaꞌ tiꞌ xka ta nten sa ñaꞌan kiꞌya nu ndiꞌin ꞌin neꞌ kanꞌ.  
\v 25 Ti kwiꞌ ti chaꞌ nchka loꞌo nten nu suꞌwe ꞌa tiye, jlyo tiꞌ xka ta nten ni ñaꞌan chaꞌ suꞌwe nu ngiꞌni neꞌ kanꞌ. Si ndiya nten nu suꞌwe tiye, loꞌo ja jlyo tiꞌ xka ta nten chaꞌ kanꞌ, nde loo la tyoꞌo tukwa chaꞌ, ka biyaꞌ tiꞌ nten chaꞌ suꞌwe nu yꞌni neꞌ kanꞌ bra kanꞌ. 
\c 6  
\p  
\v 1 ꞌWan nten ꞌin Jesucristo nu lka wan msu nu msiꞌi nten, ndiꞌin chaꞌ kuꞌni tlyu wan ꞌin xꞌnan wan, ni siya lye ꞌa tñan ta xꞌnan wan ꞌwan. Bra kanꞌ ja ka chkwiꞌ nten chaꞌ kuxi ꞌin Ndiose siꞌya wan, kwiꞌ ngwañaꞌan, ja ka chkwiꞌ neꞌ chaꞌ kuxi ꞌin chaꞌ ꞌin Jesucristo nu nduꞌuan.  
\v 2 ꞌWan nu lka wan msu nu wa msiꞌi nten, si nu lka taꞌa nten ꞌin Jesucristo nu wa msiꞌi ꞌwan sꞌni, ja suꞌwe si kuꞌni siyeꞌ wan ꞌin xꞌnan wan, chaꞌ ska ti chaꞌ ndiꞌin ꞌwan loꞌo xꞌnan wan ni chabiyaꞌ ꞌin Jesucristo; ndiꞌin chaꞌ lye la kuꞌni tlyu wan ꞌin xꞌnan wan ni, chaꞌ lka wan msu ꞌin neꞌ, suꞌwe la kuꞌni wan tñan ꞌin xꞌnan wan, chaꞌ taꞌa msñi wan chaꞌ ꞌin Jesús lka neꞌ ni, kwiꞌ ngwañaꞌan suꞌwe la ka tiye wan ñaꞌan wan ꞌin taꞌa wan ni. Suꞌwa ti msñi neꞌ kanꞌ chaꞌ ꞌin Jesucristo loꞌo wan. Kanꞌ chaꞌ ni, Timu, kwaꞌuu chaꞌ re ꞌin neꞌ, kwiꞌ ngwañaꞌan, kuloo tñan ꞌin neꞌ chaꞌ kuꞌni neꞌ nchga loo tñan nu ngwaꞌaǎn lo kityi re. 
\s1 Ja ndiꞌin chaꞌ lye ꞌa tyaꞌan chaꞌ tiyean chaꞌ ꞌin tñi 
\p  
\v 3 Ñi ꞌa chaꞌ ꞌin Jesucristo nu nka Xꞌnaan; loꞌo nchga nten nu nduꞌu xka chaꞌ ꞌwan, ja ñi ngiꞌni neꞌ kanꞌ, ja siyaꞌ mslyaa neꞌ kunan neꞌ chaꞌ nu ñi kanꞌ.  
\v 4 Nduꞌu neꞌ kanꞌ xka chaꞌ, chaꞌ ja ska chaꞌ jlyo tiꞌ neꞌ, chaꞌ siyeꞌ ꞌa neꞌ. Ja suꞌwe tiye neꞌ kanꞌ, chaꞌ xkwiꞌ ndiya la tiꞌ neꞌ xuun neꞌ siꞌya ska chaꞌ nu nchkwiꞌ ti neꞌ; ja suꞌwe tñan nu ngiꞌni neꞌ kanꞌ, chaꞌ tiꞌí ꞌa tiꞌ neꞌ ꞌin taꞌa nten neꞌ, kwiꞌ ngwañaꞌan nxuun neꞌ kanꞌ bra kanꞌ. Xkwiꞌ kwentu nchkwiꞌ neꞌ ꞌin taꞌa neꞌ, chaꞌ ꞌin ti neꞌ nxtya neꞌ kiꞌya ꞌin taꞌa neꞌ bra kanꞌ.  
\v 5 Lye ꞌa nchkwiꞌ neꞌ kanꞌ, chunꞌ ja msñi suꞌwe neꞌ chaꞌ nu ñi ꞌin Ndiose, kwiꞌ ngwañaꞌan ja suꞌwe ndaꞌan chaꞌ tiye neꞌ kanꞌ; chaꞌ kwiñi ti ngiꞌni tnun neꞌ kanꞌ ꞌin Ndiose chaꞌ kaja tñi ꞌin neꞌ, nka tiye neꞌ. Ja tyaꞌaan suꞌwaan loꞌo neꞌ kanꞌ.  
\v 6 Chañi chaꞌ ndiya kaꞌan chaꞌ suꞌwe nu kaja ꞌñaan yaꞌ Ndiose, si kuꞌni tnuan ꞌin Ni tyukwi ti tiyean. Ska ti si suꞌwe ka tiyean loꞌo sa ñaꞌan nan nu ndyiji ti ꞌñaan lo chalyuu,  
\v 7 chunꞌ ja ska nan ndiya loꞌoan bra nu mdiyaan lo chalyuu, kwiꞌ ngwañaꞌan ja ska nan kwiꞌyaan tyaan bra nu kajaan.  
\v 8 Kala ꞌñaan lo chalyuu re si ndiya nan kuan, si ndiya steanꞌ.  
\v 9 Ndiya nten nu nchka ꞌa tiꞌ chaꞌ ka kuliyaꞌ la neꞌ. Ja suꞌwe chaꞌ kanꞌ, chaꞌ bra kanꞌ tatsaa ꞌa kuneꞌ xaꞌan ꞌin neꞌ chaꞌ sten la neꞌ chaꞌ kuxi; chunꞌ ndiꞌin la tyii chalyuu ꞌin neꞌ bra kanꞌ, kanaꞌ kasiya ꞌin neꞌ.  
\v 10 Bra nu ndiya ꞌa tiꞌ nten tñi, kanꞌ ka seꞌen ndukwa kiyaꞌ kaꞌan ꞌa chaꞌ kuxi. Loꞌo ndiya nten nu nchka tiꞌ kaꞌan ꞌa tñi, kanꞌ chaꞌ wa ngulaa yaꞌ neꞌ chaꞌ ꞌin Xꞌnaan, ja ndukwa ꞌa neꞌ kanꞌ chaꞌ ꞌin Ni. Loꞌo xiꞌin ꞌa tiꞌ neꞌ kanꞌ ni, chunꞌ ti ykwiꞌ ti neꞌ nda neꞌ nu tiꞌí ꞌin neꞌ. 
\s1 Ti lye ꞌa kuꞌnian tñan chaꞌ suꞌwe ꞌa tsaa toꞌo chaꞌ ꞌin Jesucristo lo chalyuu 
\p  
\v 11 Loꞌo nuꞌwin, Timu, nten ꞌin Ndiose lkaa, kanꞌ chaꞌ ndiꞌin chaꞌ kulaa yaaꞌ nchga chaꞌ kuxi; xkwiꞌ chaꞌ nu ñi kuꞌnii, nchga loo chaꞌ suꞌwe nu nchka tiꞌ Ndiose chaꞌ kuꞌnian. Ti xñii suꞌwe la chaꞌ ꞌin Ndiose; suꞌwe ꞌa xuꞌwi tiyee ñaꞌaan ꞌin nchga nten; taloo ni siya ta neꞌ nu tiꞌí ꞌiin; chka tꞌnan tiiꞌ ꞌin nten.  
\v 12 Tyukwi ti tiyee kuꞌnii tñan ꞌin nu nka Xꞌnaan, chunꞌ nu wa msñii suꞌwe chaꞌ ꞌin Ni. Wa jlyo tiiꞌ chaꞌ ja tsaa tii ꞌa chalyuu ꞌiin ni, chaꞌ wa ngulo suwi Ndiose ꞌiin, loꞌo kanꞌ tyun yaꞌ wa ykwiiꞌ loꞌo nten chaꞌ wa msñii chaꞌ ꞌin Jesucristo; loꞌo siꞌi ska chaꞌ mnan ti ngwa kanꞌ.  
\v 13 Kuloǔn tñan ꞌiin ni chabiyaꞌ ꞌin Ndiose nu ngiꞌni kuꞌu nchga nan luꞌu nu nsuꞌwi lo chalyuu; kwiꞌ ngwañaꞌan, kuloǔn tñan ꞌiin chabiyaꞌ ꞌin Jesucristo nu suꞌwe ꞌa mxkwen ꞌin Poncio Pilato bra nu ngwa biyaꞌ ꞌin yu tloo nu nka ndloo kanꞌ. Ja ytsen yu mxkwen yu tñan nu ngiꞌni yu chaꞌ lka yu ska ti nu lka ykwiꞌ Sñiꞌ Ndiose.  
\v 14 Kuloǔn tñan ꞌiin chaꞌ xkwiꞌ suꞌwe ti kuꞌnii, chaꞌ kuꞌnii ji nchga tñan nu ngwaꞌaǎn lo kityi re, chaꞌ ja ska tñan ti ji kuꞌnii, chaꞌ ja kuꞌnii ꞌa ska chaꞌ kuxi. Ndiꞌin taan ꞌin Jesucristo nu nka Xꞌnaan ñaꞌan bra nu kan Ni xiyaꞌ.  
\v 15 Loꞌo bra nu tiya tsan nu nchka tiꞌ Ndiose chaꞌ kan Jesús, bra kanꞌ kan yu. Ndiose ni, suꞌwe ꞌa nka tiye Ni nchga bra, kwiꞌ ngwañaꞌan Ndiose nka ndloo la ti; lka Ni ree nu tlyu la, lka Ni Xꞌnaan nu nduun loo la ti.  
\v 16 Ja ndiꞌin ꞌa chaꞌ kaja Ni, ja tsaa tii ꞌa chaꞌ ꞌin Ni. Ndyuwi ꞌa xaa seꞌen ndukwa Ni, loꞌo ja ka ꞌa ꞌin nten tsaa nde seꞌen ndiꞌin Ni ngwañaꞌan ti siꞌya xaa tnun kanꞌ. Kwiꞌ ngwañaꞌan, ja tukwin wa naꞌan ꞌin Ni, chaꞌ ja ka ꞌin nten chalyuu ñaꞌan ꞌin Ni. Kanꞌ chaꞌ kuꞌniin tnuan ꞌin Ni sikwa, chaꞌ lka Ni Ndiose nu tlyu la ti. Kwiꞌ ngwañaꞌan ka chaꞌ. 
\p  
\v 17 Ndiꞌin chaꞌ kuloo tñan ꞌin nu kuliyaꞌ taꞌa msñi wan chaꞌ ꞌin Jesús, chaꞌ ja kuꞌni siyeꞌ neꞌ loꞌo taꞌa nten neꞌ. Ja suꞌwe si xkwiꞌ chaꞌ ꞌin tñi tyaꞌan ꞌa chaꞌ tiye neꞌ; ti kwiꞌ ti chaꞌ ja nꞌni chaꞌ tyaꞌan ꞌa chaꞌ tiye neꞌ chaꞌ ꞌin nchga chaꞌ suꞌwe nu nsuꞌwi ꞌin neꞌ, chaꞌ bra ti tyii tñi ꞌñaan. Suꞌwe la si ska ti ꞌin Ndiose nu luꞌu kuwe tiꞌ neꞌ; kanꞌ lka nu wa nda nchga loo nan nu nsuꞌwi ꞌñaan chaꞌ kunanjoꞌo ꞌñaan lo chalyuu.  
\v 18 Nde ndiya tñan nu kuloo ꞌin neꞌ kuliyaꞌ kanꞌ: Xkwiꞌ chaꞌ suꞌwe kuꞌni neꞌ lo chalyuu; chka tꞌnan tiꞌ neꞌ ꞌin xka ta nten, tyuꞌwi tiꞌ neꞌ ꞌin nu tiꞌi, ta neꞌ nan nu lyiji ꞌin nu tiꞌi kanꞌ.  
\v 19 Ska ti ngwañaꞌan ka kuliyaꞌ neꞌ nde seꞌen ndiꞌin Ndiose bra nu suꞌwe ngiꞌni neꞌ lo chalyuu re chunꞌ msñi suꞌwe neꞌ chaꞌ ꞌin Ndiose. Ja tsaa tii ꞌa chalyuu ꞌin neꞌ kanꞌ bra kanꞌ. 
\s1 Wa tyii ti tñan nu ndloo Palyu ꞌin yu 
\p  
\v 20 Loꞌo nuꞌwin, Timu, xñii kwenta chaꞌ ti kwaꞌuu chaꞌ nu ñi ꞌin Ndiose ꞌin nten. Ja la kunaan chaꞌ kuxi nu nchkwiꞌ yu kwiñi kanꞌ. Wa jlyo ꞌa tiꞌ neꞌ ti ykwiꞌ ti neꞌ, nxkeꞌ tiꞌ nu kwiñi kanꞌ; loꞌo ja ndiꞌya ꞌa neꞌ kwenta sa ñaꞌan ndyoꞌo ska chaꞌ nu ñi.  
\v 21 Wa ndiya taꞌaan nu ndyaa ñaꞌan tiꞌ chaꞌ nu nchkwiꞌ yu kwiñi kanꞌ, loꞌo ni, ja suꞌwa ndaꞌan neꞌ kanꞌ loꞌo taꞌa msñian chaꞌ ꞌin Ndiose. 
\p Ñaꞌan ti kuꞌni Ndiose chaꞌ suꞌwe loꞌo wan. Kwiꞌ ngwañaꞌan ka sikwa.