\id TIT  
\h TITO 
\toc1 Nguscua San Pablo quityi ndyaa ca slo Tito 
\toc2 TITO 
\toc3 Tit. 
\mt1 Nguscua San Pablo quityi ndyaa ca slo Tito 
\c 1  
\p  
\v 1 Pablo laca naꞌ. Ndyaꞌa̱ naꞌ lo cña jiꞌi̱ ycuiꞌ Ndyosi, loꞌo juaꞌa̱ nguaꞌa̱ lo Jesucristo cña ꞌna chaꞌ tsaꞌa̱ chcuiꞌ naꞌ chaꞌ tsoꞌo jiꞌi̱ Jesús loꞌo xaꞌ ñati̱; ngaꞌa̱ chaꞌ chcuiꞌ naꞌ loꞌo ñati̱ nu cua laca ngusubi ycuiꞌ Ndyosi jiꞌi̱ chaꞌ caca nguꞌ ñati̱ jiꞌi̱ ycuiꞌ Ni, chaꞌ jlya tsoꞌo la tiꞌ nguꞌ biꞌ jiꞌi̱ Ni liꞌ. Cua nda Jesucristo ꞌna lijya̱a̱ chaꞌ ca cuayáꞌ tiꞌ nguꞌ lcaa chaꞌ liñi jiꞌi̱ Ni, chaꞌ taca cuaꞌni tlyu lcaa na jiꞌi̱ ycuiꞌ Ndyosi,  
\v 2 loꞌo juaꞌa̱ taca jatya na jiꞌi̱ chalyuu nu ná ngaꞌa̱ chaꞌ tye jiꞌna liꞌ. Ná cuiñi ycuiꞌ Ndyosi. Saꞌni tsa nchcuiꞌ Ni chaꞌ caja chalyuu biꞌ jiꞌna, tya loꞌo ngüiñá Ni chalyuu; tya liꞌ nda Ni chaꞌ loꞌo ñati̱ jiꞌi̱ Ni nde chalyuu chaꞌ taca tyiꞌi̱ nguꞌ slo Ni.  
\v 3 Loꞌo juani cua ntiꞌ Ni chaꞌ tsoꞌo tsa tyempo chaꞌ cañi tyijyuꞌ chaꞌ jiꞌi̱ ycuiꞌ Ndyosi nu ndyuꞌni lyaá jiꞌna, loꞌo juaꞌa̱ cua ngulo Ni cña jnaꞌ chaꞌ culuꞌu naꞌ chaꞌ tsoꞌo biꞌ jiꞌi̱ xaꞌ ñati̱.  
\v 4 Nscua naꞌ quityi re chaꞌ ca̱a̱ slo nuꞌu̱, Tito, chaꞌ ñiꞌya̱ si laca nuꞌu̱ sñiꞌ naꞌ, juaꞌa̱ ntiꞌ naꞌ ñaꞌa̱ naꞌ jinuꞌu̱, chaꞌ stuꞌba ti ngusñi na chaꞌ jiꞌi̱ ycuiꞌ Ndyosi. Ndiꞌya̱ ntiꞌ naꞌ chaꞌ ñaꞌa̱ ti cuaꞌni ycuiꞌ Ndyosi Sti na chaꞌ tsoꞌo loꞌo nuꞌu̱, juaꞌa̱ Jesucristo nu nguaꞌni lyaá jiꞌna; cuaꞌni Ni chaꞌ ti̱ ti tyiꞌi̱ tyiquee nuꞌu̱ liꞌ. 
\s1 Cña nu ndyuꞌni Tito ca loyuu Creta 
\p  
\v 5 Nguxtyanu naꞌ jinuꞌu̱ ca loyuu Creta biꞌ, chaꞌ cuaꞌni lyiji nuꞌu̱ cña nu ngaꞌa̱ chaꞌ cuaꞌni nuꞌu̱, chaꞌ subi nuꞌu̱ jiꞌi̱ nguꞌ cusuꞌ nu caca loo jiꞌi̱ taju ñati̱ tyaꞌa ngusñi na chaꞌ jiꞌi̱ Jesús lcaa quichi̱ cajua; subi nuꞌu̱ jiꞌi̱ nguꞌ cusuꞌ biꞌ ñiꞌya̱ nu nacui̱ naꞌ jinuꞌu̱ tya tsubiꞌ la.  
\v 6 Xcuiꞌ tsoꞌo ti ngaꞌa̱ chaꞌ cuaꞌni nguꞌ cusuꞌ biꞌ, chaꞌ ná taca sta ñati̱ quiꞌya jiꞌi̱ nguꞌ. Caja clyoꞌo nguꞌ biꞌ loꞌo sca ti nu cunaꞌa̱, ni ná tsoꞌo tyuꞌu chaꞌ jiꞌi̱ nguꞌ biꞌ loꞌo xaꞌ nu cunaꞌa̱. Ntsuꞌu chaꞌ xñi sñiꞌ nguꞌ cusuꞌ biꞌ chaꞌ jiꞌi̱ Jesucristo, loꞌo juaꞌa̱ ná cuaꞌni subaꞌ sñiꞌ nguꞌ loꞌo xaꞌ ñati̱; ntsuꞌu chaꞌ taquiyaꞌ sñiꞌ nguꞌ jiꞌi̱ chaꞌ nu nchcuiꞌ nguꞌ cusuꞌ.  
\v 7 Loꞌo juaꞌa̱ nguꞌ nu caca loo jiꞌi̱ taju ñati̱ tyaꞌa na ni, ná tsoꞌo si ntsuꞌu chaꞌ sta ñati̱ quiꞌya jiꞌi̱ nguꞌ biꞌ, chaꞌ cña jiꞌi̱ ycuiꞌ Ndyosi ndyuꞌni nguꞌ biꞌ. Biꞌ chaꞌ clyana nuꞌu̱ jiꞌi̱ nguꞌ nu ná nduꞌni tyucuaa tiꞌ jiꞌi̱ tyaꞌa nguꞌ, nguꞌ nu ná ñasi̱ꞌ, nguꞌ nu ná cuꞌbi, nguꞌ nu ná ntsuꞌu chaꞌ cusu̱u̱ loꞌo tyaꞌa ñati̱, nguꞌ nu ná ndacui tsa tiꞌ jiꞌi̱ cñi;  
\v 8 clyana nuꞌu̱ jiꞌi̱ nguꞌ nu nda su tyiꞌi̱ ñati̱ nu lijya̱ tyijyuꞌ, nguꞌ nu ndiya tiꞌ cuaꞌni xcuiꞌ chaꞌ tsoꞌo, nguꞌ nu tsoꞌo ti nchcuiꞌ loꞌo ñati̱, nguꞌ nu sca ti chaꞌ jiꞌi̱ Jesús ntsuꞌu tyiquee nguꞌ, nu nduꞌni cua ñaꞌa̱ ca chaꞌ nu ntiꞌ ycuiꞌ Ndyosi chaꞌ cuaꞌni na, nguꞌ nu nchca jiꞌi̱ cuaꞌa jiꞌi̱ ycuiꞌ ca nguꞌ.  
\v 9 Tsoꞌo tsa ñati̱ nu cua nguiꞌi̱ tsa jiꞌi̱ chaꞌ liñi nu nguluꞌu na jiꞌi̱, ñati̱ nu nchca jiꞌi̱ culuꞌu chaꞌ liñi biꞌ jiꞌi̱ tyaꞌa ñati̱, ñati̱ nu nchca jiꞌi̱ tacu̱ꞌ tsiyaꞌ ti chaꞌ jiꞌi̱ nguꞌ cuiñi. 
\p  
\v 10 Cua ntsuꞌu tyu̱u̱ tyaꞌa nguꞌ nu ná ntajaꞌa̱ taquiyaꞌ nguꞌ jiꞌi̱ chaꞌ nu nchcuiꞌ nguꞌ nu laca loo, ntsuꞌu quiñaꞌa̱ tsa nguꞌ judío nu ndyuꞌni juaꞌa̱; cuiñi tsa chaꞌ nu nchcuiꞌ nguꞌ biꞌ, chaꞌ juaꞌa̱ cñiloꞌo nguꞌ jiꞌi̱ tyaꞌa nguꞌ.  
\v 11 Ngaꞌa̱ chaꞌ tacu̱ꞌ ma̱ tuꞌba nguꞌ cuiñi biꞌ, chaꞌ ná tacu̱ꞌ nguꞌ chaꞌ jiꞌi̱ quiñaꞌa̱ ñati̱, ñaꞌa̱ tyaꞌa ngaꞌa̱ niꞌi̱ ti nguꞌ nu cua ngusñi chaꞌ liñi biꞌ. Nclyuꞌu nguꞌ cuiñi biꞌ chaꞌ jiꞌi̱ tyaꞌa na; pana na cuiñi nguꞌ biꞌ, chaꞌ cua ntiꞌ nguꞌ caja cñi jiꞌi̱ nguꞌ. 
\p  
\v 12 Chaꞌ liñi nchcuiꞌ sca jyoꞌo cusuꞌ tyaꞌa quichi̱ tyi nguꞌ Creta su ndiꞌi̱ nuꞌu̱, nu ngua tuꞌba jiꞌi̱ joꞌó jiꞌi̱ nguꞌ cua saꞌni. Ndiꞌya̱ nchcuiꞌ biꞌ: “Cuiñi tsa lcaa nguꞌ Creta tyaꞌa naꞌ, xñaꞌa̱ tsa nguꞌ. Loꞌo juaꞌa̱ ndacu tsa nguꞌ, pana ná ntajaꞌa̱ nguꞌ cuaꞌni nguꞌ cña tsiyaꞌ ti”, nacui̱ jyoꞌo cusuꞌ biꞌ.  
\v 13 Chañi chaꞌ nu nchcuiꞌ jyoꞌo biꞌ; biꞌ chaꞌ lye chcuiꞌ nuꞌu̱ loꞌo nguꞌ biꞌ, chaꞌ tsoꞌo ti xñi nguꞌ lcaa chaꞌ jiꞌi̱ Jesús nu nchcuiꞌ na loꞌo nguꞌ,  
\v 14 chaꞌ ngaꞌaa cuaꞌa̱ jyaca̱ nguꞌ jiꞌi̱ cuentyu nu nchcuiꞌ nguꞌ judío, chaꞌ ngaꞌaa taquiyaꞌ nguꞌ jiꞌi̱ chaꞌ nu nchcuiꞌ ñati̱ chalyuu ti nu cua ngulochu̱ꞌ jiꞌi̱ lcaa chaꞌ liñi. 
\p  
\v 15 Lubii tsa laca lcaa lo na, juaꞌa̱ ntiꞌ sca nguꞌ nu lubii cresiya jiꞌi̱ cuentya jiꞌi̱ ycuiꞌ Ndyosi; pana ná ntsuꞌu na lubii tsiyaꞌ ti ntiꞌ nguꞌ nu cuxi tyiquee, chaꞌ ná jlya tiꞌ nguꞌ biꞌ jiꞌi̱ chaꞌ liñi. Loꞌo cuaꞌni nguꞌ nu cuxi tyiquee chaꞌ cuxi, liꞌ ngaꞌaa nda nguꞌ biꞌ cuentya chaꞌ xcuiꞌ chaꞌ cuxi laca nu nduꞌni nguꞌ.  
\v 16 Ñati̱ jiꞌi̱ ycuiꞌ Ndyosi laca nguꞌ biꞌ, nacui̱ ycuiꞌ nguꞌ, pana ná ndyuꞌni nguꞌ tsiyaꞌ ti ñiꞌya̱ nu ntiꞌ ycuiꞌ Ndyosi; biꞌ chaꞌ caca cuayáꞌ tiꞌ na chaꞌ cuiñi nguꞌ biꞌ. Cuxi tsa ndyuꞌni nguꞌ biꞌ, chaꞌ ná ntajaꞌa̱ nguꞌ taquiyaꞌ nguꞌ jiꞌi̱ chaꞌ nu liñi ca; ni sca chaꞌ tsoꞌo ná ca cuaꞌni nguꞌ biꞌ tsiyaꞌ ti. 
\c 2  
\s1 Chaꞌ liñi culuꞌu Tito jiꞌi̱ ñati̱ chaꞌ caca tsoꞌo tyiquee nguꞌ loꞌo tyaꞌa nguꞌ 
\p  
\v 1 Loꞌo nuꞌu̱ ni, Tito, xcuiꞌ chaꞌ liñi culuꞌu nuꞌu̱ jiꞌi̱ ñati̱.  
\v 2 Culuꞌu nuꞌu̱ jiꞌi̱ nguꞌ nu cusuꞌ la chaꞌ ná caca cuꞌbi nguꞌ, chaꞌ xcuiꞌ chaꞌ liñi jlya tiꞌ nguꞌ, chaꞌ cuaꞌa nguꞌ jiꞌi̱ ycuiꞌ ca nguꞌ, chaꞌ xcuiꞌ chaꞌ tsoꞌo cuaꞌni nguꞌ liꞌ; culuꞌu nuꞌu̱ jiꞌi̱ nguꞌ biꞌ chaꞌ jlya tsoꞌo tiꞌ nguꞌ lcaa chaꞌ liñi, chaꞌ tyuꞌu tyiquee nguꞌ ñaꞌa̱ nguꞌ jiꞌi̱ tyaꞌa ñati̱ nguꞌ, chaꞌ talo tyiquee nguꞌ loꞌo ndyuꞌni lyaꞌ tiꞌ ñati̱ jiꞌi̱ nguꞌ.  
\v 3 Loꞌo juaꞌa̱ culuꞌu nuꞌu̱ jiꞌi̱ maꞌ cusuꞌ ñiꞌya̱ nu ngaꞌa̱ chaꞌ tyiꞌi̱ maꞌ chaꞌ cuaꞌni chi̱ maꞌ loo ycuiꞌ Ndyosi, chaꞌ ná chcuiꞌ maꞌ cuentyu jiꞌi̱ ñati̱, chaꞌ ná ca cuꞌbi maꞌ, chaꞌ culuꞌu maꞌ xcuiꞌ chaꞌ tsoꞌo jiꞌi̱ tyaꞌa ñati̱ maꞌ.  
\v 4 Liꞌ loꞌo ñaꞌa̱ nu cunaꞌa̱ cuañiꞌ la jiꞌi̱ maꞌ cusuꞌ, juaꞌa̱ ca tsaꞌa̱ nguꞌ chaꞌ tsoꞌo tsa tyuꞌu tyiquee nguꞌ ñaꞌa̱ nguꞌ jiꞌi̱ clyoꞌo nguꞌ, ñaꞌa̱ nguꞌ jiꞌi̱ sñiꞌ nguꞌ;  
\v 5 ca tsaꞌa̱ nu cunaꞌa̱ cuañiꞌ la chaꞌ cuaꞌa nguꞌ jiꞌi̱ ycuiꞌ ca nguꞌ, chaꞌ xcuiꞌ chaꞌ tsoꞌo cuaꞌni nguꞌ, ñiꞌya̱ nu ngaꞌa̱ chaꞌ cuaꞌni nguꞌ nu cua ngua lubii cresiya jiꞌi̱ cuentya jiꞌi̱ ycuiꞌ Ndyosi; ca tsaꞌa̱ nguꞌ ñiꞌya nu tsoꞌo ti cuaꞌni nguꞌ cña toꞌ tyi nguꞌ, ñiꞌya̱ caca tyaꞌna tiꞌ nguꞌ jiꞌi̱ tyaꞌa ñati̱ nguꞌ, ñiꞌya̱ nu taquiyaꞌ nguꞌ jiꞌi̱ clyoꞌo nguꞌ. Si xcuiꞌ tsoꞌo ti nduꞌni nu cunaꞌa̱ cuañiꞌ ni, liꞌ ná ntsuꞌu chaꞌ chcuiꞌ cuxi xaꞌ ñati̱ jiꞌi̱ ycuiꞌ Ndyosi xquiꞌya nguꞌ biꞌ liꞌ. 
\p  
\v 6 La cuiꞌ juaꞌa̱, ta nuꞌu̱ cui̱i̱ loꞌo nu nguꞌ quiꞌyu cuañiꞌ chaꞌ cuaꞌa nguꞌ jiꞌi̱ ycuiꞌ ca nguꞌ, chaꞌ xcuiꞌ chaꞌ tsoꞌo cuaꞌni nguꞌ.  
\v 7 Xcuiꞌ tsoꞌo ti cuaꞌni nuꞌu̱, chaꞌ juaꞌa̱ ca tsaꞌa̱ nu nguꞌ cuañiꞌ biꞌ lcaa chaꞌ tsoꞌo loꞌo ñaꞌa̱ nguꞌ cua ñaꞌa̱ ca chaꞌ nu ndyuꞌni nuꞌu̱; lcaa chaꞌ liñi culuꞌu tsoꞌo nuꞌu̱ jiꞌi̱ nguꞌ biꞌ, siꞌi chaꞌ laja ti chcuiꞌ nuꞌu̱ loꞌo nguꞌ.  
\v 8 Xcuiꞌ chaꞌ liñi culuꞌu nuꞌu̱ jiꞌi̱ nguꞌ, chaꞌ ná tucui taca ñacui̱ chaꞌ cuiñi nuꞌu̱. Ca tyujuꞌu tiꞌ nguꞌ nu cuxi tyiquee liꞌ, chaꞌ ná caja ñiꞌya̱ chcuiꞌ nguꞌ chaꞌ cuxi jiꞌna liꞌ. 
\p  
\v 9 Chcuiꞌ nuꞌu̱ loꞌo nguꞌ nu laca msu nu ngüiꞌya ñati̱ chaꞌ taquiyaꞌ nguꞌ jiꞌi̱ lcaa chaꞌ nu nchcuiꞌ xuꞌna nguꞌ, chaꞌ tsoꞌo ti cuaꞌni nguꞌ lcaa cña jiꞌi̱ nguꞌ, chaꞌ ná xlyú nguꞌ chaꞌ hichu̱ꞌ nu laca xuꞌna nguꞌ.  
\v 10 Ná tsoꞌo si cuaana nguꞌ msu na nu ntsuꞌu jiꞌi̱ xuꞌna nguꞌ, masi xtyi ti chaꞌ; xcuiꞌ chaꞌ liñi cuaꞌni nguꞌ msu lacua. Cuaꞌni chi̱ nguꞌ loo xuꞌna nguꞌ, chaꞌ ca cuayáꞌ tiꞌ xaꞌ ñati̱ chaꞌ tsoꞌo tsa laca chaꞌ jiꞌi̱ ycuiꞌ Ndyosi nu ndyuꞌni lyaá jiꞌna. 
\p  
\v 11 Tsoꞌo tsa nduꞌni ycuiꞌ Ndyosi loꞌo ñati̱ chalyuu chaꞌ cua ntiꞌ Ni chaꞌ clyaá nguꞌ jiꞌi̱ nu cuxi;  
\v 12 juaꞌa̱ cua nguluꞌu Ni jiꞌna ñiꞌya̱ taca tyiꞌi̱ tsoꞌo ti na nde chalyuu. Ntiꞌ Ni chaꞌ cuaꞌa na jiꞌi̱ ycuiꞌ ca na, chaꞌ tsoꞌo ti cuaꞌni na loꞌo tyaꞌa ñati̱ na. Taca cuaꞌni tlyu na jiꞌi̱ ycuiꞌ Ndyosi nu loꞌo cua ngulochu̱ꞌ na jiꞌi̱ lcaa chaꞌ cuxi nu ná ndiya tiꞌ Ni jiꞌi̱, nu loꞌo ngaꞌaa nduꞌni na lcaa chaꞌ subaꞌ nu ndiya tiꞌ ñati̱ chalyuu ti.  
\v 13 Juaꞌa̱ ti nguluꞌu Ni jiꞌna, chaꞌ taca ca tsoꞌo tyiquee na laja loꞌo ntajatya na jiꞌi̱ ycuiꞌ Ndyosi nu tlyu tsa chaꞌ nu ntsuꞌu jiꞌi̱ Ni, ni jacuaꞌ ca̱a̱ Ni chaca quiyaꞌ. Ndubi tsa xee ntsuꞌu jiꞌi̱ Ni liꞌ, nu loꞌo tyuꞌu tucua Jesucristo nu nguaꞌni lyaá jiꞌna.  
\v 14 Nu loꞌo nda Jesús chacuayáꞌ chaꞌ ndyujuii nguꞌ jiꞌi̱, nda yu tyucui ñaꞌa̱ ycuiꞌ ca yu chaꞌ taca clyaá na jiꞌi̱ nu cuxi. Nguaꞌni lubii Ni jiꞌi̱ cresiya jiꞌna liꞌ chaꞌ caca na ñati̱ jiꞌi̱ Ni, chaꞌ tyajaꞌa̱ na cuaꞌni na xcuiꞌ chaꞌ tsoꞌo liꞌ. 
\p  
\v 15 Juaꞌa̱ laca chaꞌ nu ngaꞌa̱ chaꞌ ta nuꞌu̱ loꞌo nguꞌ, pana lye chcuiꞌ nuꞌu̱ lcaa chaꞌ biꞌ loꞌo nguꞌ. Culo nuꞌu̱ cña jiꞌi̱ nguꞌ, lcaa lo chaꞌ tsoꞌo nu cuaꞌni nguꞌ, lcaa lo chaꞌ nu ná tsoꞌo chaꞌ cuaꞌni nguꞌ, chaꞌ nuꞌu̱ laca loo; ná ta nuꞌu̱ chacuayáꞌ jiꞌi̱ nguꞌ chaꞌ chcuiꞌ nguꞌ chaꞌ cuxi jinuꞌu̱. 
\c 3  
\s1 Ñiꞌya̱ nu ngaꞌa̱ chaꞌ cuaꞌni na si laca na ñati̱ jiꞌi̱ Jesús 
\p  
\v 1 Culuꞌu nuꞌu̱ jiꞌi̱ nguꞌ chaꞌ taquiyaꞌ nguꞌ jiꞌi̱ lcaa nguꞌ nu laca loo, jiꞌi̱ lcaa nguꞌ tisiya; ngaꞌa̱ chaꞌ cuaꞌni nguꞌ lcaa lo cña tsoꞌo nu culo nguꞌ biꞌ jiꞌi̱ nguꞌ chaꞌ cuaꞌni nguꞌ.  
\v 2 Ná tsoꞌo chcuiꞌ nguꞌ cuentyu jiꞌi̱ xaꞌ ñati̱, ni ná tsoꞌo xu̱u̱ tyaꞌa nguꞌ loꞌo ñati̱; ntsuꞌu chaꞌ cube tiꞌ nguꞌ jiꞌi̱ xaꞌ ñati̱, chaꞌ tsoꞌo ti chcuiꞌ nguꞌ loꞌo lcaa ñati̱. 
\p  
\v 3 Cua saꞌni la ná nda na cuentya tsiyaꞌ ti ñiꞌya̱ ntsuꞌu chaꞌ jiꞌi̱ ycuiꞌ Ndyosi; ná ndaquiyaꞌ na jiꞌi̱ Ni liꞌ, chaꞌ cua ngüiñiloꞌo nu xñaꞌa̱ jiꞌna chaꞌ cuaꞌni na lcaa chaꞌ cuxi nu ndijña cresiya jiꞌna chaꞌ cuaꞌni na. Ngua chaa tiꞌ na loꞌo ndyuꞌni na chaꞌ cuxi biꞌ liꞌ, masi nguaꞌni lyaꞌ tiꞌ na jiꞌi̱ ñati̱, masi ngua liyeꞌ tiꞌ na ñaꞌa̱ na jiꞌi̱ nguꞌ, masi ngua tiꞌí tiꞌ na ñaꞌa̱ na jiꞌi̱ tyaꞌa na; loꞌo juaꞌa̱ nguꞌ tyaꞌa na, ngua tiꞌí tiꞌ nguꞌ ñaꞌa̱ nguꞌ jiꞌna.  
\v 4 Loꞌo liꞌ ngua tsaꞌa̱ na chaꞌ ntiꞌ tsa ycuiꞌ Ndyosi cuaꞌni lyaá Ni jiꞌna, chaꞌ ntsuꞌu tsa tyiquee Ni ñaꞌa̱ Ni jiꞌna, ñati̱ chalyuu na.  
\v 5 Loꞌo liꞌ nguaꞌni lyaá Ni jiꞌna chaꞌ tyaꞌna tsa tiꞌ Ni ñaꞌa̱ Ni jiꞌna; pana siꞌi chaꞌ nguaꞌni na sca chaꞌ tsoꞌo, sca cña tacati, loꞌo liꞌ xquiꞌya biꞌ nguaꞌni tyaꞌna tiꞌ Ni jiꞌna. Siꞌi juaꞌa̱. Na cua nguaꞌni lubii Ni jiꞌi̱ cresiya jiꞌna, biꞌ chaꞌ caca chcuiꞌ na chaꞌ cua ngula na chaca quiyaꞌ; cua ngua cucui cresiya jiꞌna xquiꞌya cña nu cua nguaꞌni Xtyiꞌi ycuiꞌ Ndyosi loꞌo na.  
\v 6 Tsoꞌo tsa nda Ni Xtyiꞌi ycuiꞌ Ni chaꞌ tyanu neꞌ cresiya jiꞌna chacuayáꞌ jiꞌi̱ Jesucristo nu nguaꞌni lyaá jiꞌna;  
\v 7 tlyu tsa chaꞌ tsoꞌo nu nguaꞌni ycuiꞌ Ndyosi loꞌo na juaꞌa̱, chaꞌ caca na ñiꞌya̱ si laca na sñiꞌ ycuiꞌ Ni, nu ndu̱ tiꞌ na chaꞌ caja chalyuu cucui nu ná ngaꞌa̱ chaꞌ tye jiꞌna. 
\p  
\v 8 Ngaꞌa̱ chaꞌ jlya tsoꞌo tiꞌ ma̱ chaꞌ liñi nu nscua naꞌ re, biꞌ chaꞌ lye chcuiꞌ nuꞌu̱ chaꞌ biꞌ loꞌo lcaa ñati̱ nu ngusñi chaꞌ jiꞌi̱ ycuiꞌ Ndyosi ca biꞌ, chaꞌ xcuiꞌ chaꞌ tsoꞌo cuaꞌni ma̱ liꞌ. Tsoꞌo tsa laca chaꞌ liñi, taca xtyucua chaꞌ biꞌ jiꞌi̱ cua ñaꞌa̱ ca ñati̱;  
\v 9 pana ná tsoꞌo chcuiꞌ ma̱ chaꞌ laja ti, juaꞌa̱ ná tsoꞌo si xlyú ma̱ chaꞌ hichu̱ꞌ tyaꞌa ma̱ xquiꞌya jyoꞌo cusuꞌ jiꞌna, masi xquiꞌya sca chaꞌ nu nguscua jyoꞌo Moisés nu ngua saꞌni la. Ná sca chaꞌ tsoꞌo ná taca cuaꞌni ma̱ juaꞌa̱. Chcunaꞌ tyempo jiꞌi̱ ma̱ juaꞌa̱, chaꞌ xcuiꞌ chaꞌ nu ndacui lo cuiꞌi̱ ti nchcuiꞌ ma̱ liꞌ. 
\p  
\v 10 Tucua quiyaꞌ chcuiꞌ nuꞌu̱ loꞌo nguꞌ chaꞌ cuaꞌa nuꞌu̱ jiꞌi̱ nguꞌ nu ntiꞌ xuꞌba chaꞌ cusu̱u̱ laja cuꞌma̱ nu laca ma̱ ñati̱ jiꞌi̱ Jesucristo. Si ná cuna nguꞌ biꞌ, liꞌ xtyanu ma̱ jiꞌi̱ nguꞌ biꞌ.  
\v 11 Cua ngunuꞌu̱ tsiyaꞌ ti chaꞌ nu ntsuꞌu hique nguꞌ, loꞌo juaꞌa̱ ntsuꞌu quiꞌya jiꞌi̱ nguꞌ biꞌ; hasta ycuiꞌ nguꞌ biꞌ jlo tiꞌ nguꞌ chaꞌ ntsuꞌu quiꞌya jiꞌi̱ nguꞌ. 
\s1 Ngusalyaꞌ Pablo loꞌo Tito 
\p  
\v 12 Nu loꞌo tyalaa ti masi Artemas, masi Tíquico, nu cua nda naꞌ jiꞌi̱ chaꞌ ca̱a̱ slo nuꞌu̱, liꞌ yala ti tsaa nuꞌu̱ ca quichi̱ Nicópolis si caca jinuꞌu̱; tyacua tyaꞌa na cajua liꞌ, chaꞌ tyiꞌi̱ naꞌ ca quichi̱ biꞌ tyempo tlyaꞌ nta̱ꞌ.  
\v 13 Xtyucua nuꞌu̱ jiꞌi̱ Zenas, nu yu nu laca tuꞌba biꞌ, loꞌo jiꞌi̱ Apolos. Liꞌ cuiꞌya nuꞌu̱ cuentya chaꞌ ngaꞌaa ntsuꞌu na nu lyiji jiꞌi̱ nguꞌ loꞌo tya tsaa la nguꞌ tyucui̱i̱.  
\v 14 Ntsuꞌu chaꞌ ca tsaꞌa̱ ca taꞌa ñati̱ jiꞌi̱ Jesucristo tyaꞌa na chaꞌ cuaꞌni nguꞌ lcaa lo chaꞌ tsoꞌo, chaꞌ taca xtyucua nguꞌ jiꞌi̱ tyaꞌa ñati̱ nguꞌ nu lyiji xi jiꞌi̱; ná tsoꞌo si taja ti ndiꞌi̱ nguꞌ chalyuu. 
\p  
\v 15 Lcaa nguꞌ ca nde loꞌo naꞌ nchcuiꞌ ya xlyo niꞌi̱ jinuꞌu̱. Tsoꞌo ti chcuiꞌ nuꞌu̱ loꞌo lcaa nguꞌ nu tsoꞌo ti ntsuꞌu tyiquee ñaꞌa̱ nguꞌ jiꞌi̱ cua chaꞌ laca nguꞌ tyaꞌa ngusñi na chaꞌ jiꞌi̱ Jesús. Ñaꞌa̱ ti cuaꞌni ycuiꞌ Ndyosi chaꞌ tsoꞌo loꞌo lcaa cuꞌma̱. Juaꞌa̱ caca chaꞌ lacua.