\id 2TI  
\h 2 TIMOTEO 
\toc1 Nguscua San Pablo chaca quityi nu ndyaa ca slo Timoteo 
\toc2 2 TIMOTEO 
\toc3 2 Ti. 
\mt1 Nguscua San Pablo chaca quityi nu ndyaa ca slo Timoteo 
\c 1  
\p  
\v 1 Pablo laca naꞌ. Cua nda ycuiꞌ Ndyosi cña ꞌna chaꞌ lijya̱ naꞌ tyijyuꞌ ca nde quichi̱ tyi ma̱, chaꞌ ta naꞌ chaꞌ jiꞌi̱ Jesucristo loꞌo ma̱. Nacui̱ Ni chaꞌ ná ngaꞌa̱ chaꞌ tye chalyuu jiꞌi̱ ñati̱ nu xñi chaꞌ jiꞌi̱ Jesucristo.  
\v 2 Nscua naꞌ quityi re chaꞌ ca̱a̱ slo nuꞌu̱, Timoteo, chaꞌ sñiꞌ naꞌ laca nuꞌu̱ ntiꞌ naꞌ, juaꞌa̱ ntsuꞌu tsa tyiquee naꞌ ñaꞌa̱ naꞌ jinuꞌu̱. Ndiꞌya̱ ntiꞌ naꞌ, chaꞌ ñaꞌa̱ ti cuaꞌni ycuiꞌ Ndyosi chaꞌ tsoꞌo loꞌo nuꞌu̱, chaꞌ cuaꞌni tyaꞌna tiꞌ Ni jinuꞌu̱, chaꞌ juaꞌa̱ cuaꞌni Ni chaꞌ ti̱ ti tyiꞌi̱ cresiya jinuꞌu̱ xquiꞌya Jesucristo nu Xuꞌna na. 
\s1 Nchcuiꞌ Pablo jiꞌi̱ chaꞌ tlyu nu ndyuꞌni ycuiꞌ Ndyosi loꞌo ñati̱ 
\p  
\v 3 Ñiꞌya̱ nu tyucui tyiquee jyoꞌo cusuꞌ jiꞌna nguaꞌni nguꞌ cña jiꞌi̱ ycuiꞌ Ndyosi nu ngua saꞌni la, juaꞌa̱ tyucui tyiquee naꞌ ndyuꞌni naꞌ cña jiꞌi̱ ycuiꞌ Ndyosi juani. Ndya naꞌ xlyaꞌbe jiꞌi̱ ycuiꞌ Ni loꞌo nchcuiꞌ naꞌ loꞌo Ni cuentya jinuꞌu̱, chaꞌ tsa̱ loꞌo talya nchcuiꞌ naꞌ loꞌo Ni.  
\v 4 Ntsuꞌu tiꞌ naꞌ chaꞌ ngusiꞌya nuꞌu̱ loꞌo nduꞌu naꞌ ndyaa naꞌ, biꞌ chaꞌ ntiꞌ tsa naꞌ ñaꞌa̱ naꞌ jinuꞌu̱ chaca quiyaꞌ chaꞌ ca chaa tiꞌ na.  
\v 5 Ntsuꞌu tiꞌ naꞌ chaꞌ chañi chaꞌ ngusñi nuꞌu̱ chaꞌ jiꞌi̱ Jesús. Xtyaꞌa̱ cusuꞌ nuꞌu̱, nu maꞌ Loida ni, biꞌ laca nu cua ngusñi chaꞌ biꞌ tya clyo; loꞌo liꞌ maꞌ Eunice xtyaꞌa̱ nuꞌu̱ cua ngusñi chaꞌ biꞌ; la cuiꞌ juaꞌa̱ nuꞌu̱, tsoꞌo tsa ngusñi nuꞌu̱ chaꞌ jiꞌi̱ Jesús. 
\p  
\v 6 Ta naꞌ sca cui̱i̱ loꞌo nuꞌu̱ juani: Cuaꞌni tyacaꞌa nuꞌu̱ jiꞌi̱ chaꞌ tsoꞌo nu cua nda ycuiꞌ Ndyosi jinuꞌu̱ tya loꞌo ngusta yaꞌ naꞌ hique nuꞌu̱, chaꞌ taca cuaꞌni nuꞌu̱ cña cuentya jiꞌi̱ ycuiꞌ nu Xuꞌna na.  
\v 7 Ná ntiꞌ ycuiꞌ Ndyosi chaꞌ cutsi̱i̱ na; biꞌ chaꞌ nda Ni Xtyiꞌi ycuiꞌ Ni chaꞌ tyanu neꞌ cresiya jiꞌna, chaꞌ ca tlyu tyiquee na, chaꞌ tsoꞌo ti tyuꞌu tyiquee na ñaꞌa̱ na jiꞌi̱ tyaꞌa ñati̱ na, chaꞌ taca cuaꞌni na ñiꞌya̱ nu ntiꞌ ycuiꞌ Ndyosi chaꞌ cuaꞌni na lcaa tsa̱.  
\v 8 Ná ca tyujuꞌu tiꞌ nuꞌu̱; ta nuꞌu̱ chaꞌ loꞌo nguꞌ, ñiꞌya̱ nu ngusñi nuꞌu̱ chaꞌ jiꞌi̱ ycuiꞌ nu Xuꞌna na. La cuiꞌ ti ná ca tyujuꞌu tiꞌ nuꞌu̱ chaꞌ ntsuꞌu naꞌ neꞌ chcua̱. Nchcubeꞌ nguꞌ jnaꞌ xquiꞌya chaꞌ nchcuiꞌ naꞌ chaꞌ jiꞌi̱ ycuiꞌ nu Xuꞌna na, biꞌ chaꞌ ná quiñaꞌa̱ tsa culacua tiꞌ nuꞌu̱ si loꞌo jinuꞌu̱ xcubeꞌ nguꞌ chaꞌ nchcuiꞌ nuꞌu̱ chaꞌ tsoꞌo jiꞌi̱ Jesucristo loꞌo nguꞌ. Ta ycuiꞌ Ndyosi juersa jiꞌna chaꞌ talo na,  
\v 9 chaꞌ ycuiꞌ Ndyosi laca nu nguaꞌni lyaá jiꞌna; cua ngusubi Ni jiꞌna chaꞌ cuaꞌni na cña nu ntiꞌ Ni chaꞌ cuaꞌni na. Ntajaꞌa̱ Ni cuaꞌni lyaá Ni jiꞌna chaꞌ tsoꞌo tyiquee ti Ni, masi siꞌi xquiꞌya chaꞌ tsoꞌo nu nguaꞌni ycuiꞌ ca na. Ntsuꞌu tsa tyiquee Ni ñaꞌa̱ Ni jiꞌna; juaꞌa̱ laca chaꞌ nu nguluꞌu Jesucristo jiꞌna, chaꞌ ngua tiꞌ ycuiꞌ Ndyosi cuaꞌni Ni chaꞌ tsoꞌo loꞌo na nu loꞌo tya lyiji cuiñá Ni chalyuu.  
\v 10 Cua nchca cuayáꞌ tiꞌ na chaꞌ biꞌ juani, xquiꞌya chaꞌ cua ya̱a̱ Jesucristo chalyuu, chaꞌ biꞌ laca nu nguaꞌni lyaá jiꞌna; ntiji̱loo Jesús tsiyaꞌ ti jiꞌi̱ nu xñaꞌa̱ nu loꞌo ndyuꞌú yu chaca quiyaꞌ loꞌo cua ngujuii yu, biꞌ chaꞌ ná ngaꞌa̱ chaꞌ tye chalyuu jiꞌi̱ lcaa na nu xñi na chaꞌ jiꞌi̱ Ni, chaꞌ nguaꞌni lyaá Jesús jiꞌna. 
\p  
\v 11 Chaꞌ jiꞌi̱ Jesucristo, biꞌ laca chaꞌ nu nchcuiꞌ naꞌ loꞌo ñati̱. Cua ngusubi ycuiꞌ Ndyosi ꞌna chaꞌ ndyaꞌa naꞌ nclyuꞌu naꞌ chaꞌ biꞌ jiꞌi̱ nguꞌ xaꞌ tsuꞌ cuentya jiꞌi̱ ycuiꞌ Ni,  
\v 12 biꞌ chaꞌ ndyiji chaꞌ tiꞌí ꞌna juani. Pana ná tyujuꞌu tiꞌ naꞌ, chaꞌ cua jlo tiꞌ naꞌ tilaca laca nu ngusñi naꞌ chaꞌ jiꞌi̱ Ni. Jlo tiꞌ naꞌ chaꞌ nchca jiꞌi̱ Ni ñaꞌa̱si̱i̱ Ni ꞌna; nchca jiꞌi̱ Ni xtyucua Ni ꞌna loꞌo ndyuꞌni naꞌ cña nu nda Ni ꞌna, chaꞌ taca tyuꞌu tsoꞌo cña ꞌna tsa̱ biꞌ loꞌo tya̱a̱ Jesús nde chalyuu chaca quiyaꞌ. 
\p  
\v 13 Ñaꞌa̱ ti tya tyiꞌu tiꞌ nuꞌu̱ lcaa chaꞌ nu cua nguluꞌu naꞌ jinuꞌu̱ lacua. Chaꞌ liñi laca biꞌ, juaꞌa̱ tsoꞌo tsa si xñi tsoꞌo nuꞌu̱ chaꞌ biꞌ. Tsoꞌo ti tyuꞌu tyiquee nuꞌu̱ ñaꞌa̱ nuꞌu̱ jiꞌi̱ ñati̱, xquiꞌya chaꞌ ntsuꞌu chaꞌ jinuꞌu̱ loꞌo Jesucristo.  
\v 14 Cuaꞌni tyacaꞌa nuꞌu̱ jiꞌi̱ chaꞌ tsoꞌo nu nda ycuiꞌ Ndyosi loꞌo na; xtyucua Xtyiꞌi ycuiꞌ Ni jinuꞌu̱ chaꞌ cuaꞌni nuꞌu̱ cña biꞌ, biꞌ chaꞌ ndyanu Xtyiꞌi ycuiꞌ Ni neꞌ cresiya jiꞌna. 
\p  
\v 15 Jlo tiꞌ nuꞌu̱ chaꞌ quiñaꞌa̱ ñati̱ jiꞌi̱ Jesucristo cua nguxtyanu nguꞌ ꞌna; masi cua ñaꞌa̱ ca nguꞌ nde loyuu su cuentya Asia, loꞌo yu Figelo, loꞌo yu Hermógenes, cua nguxtyanu nguꞌ biꞌ ꞌna.  
\v 16 Sca ti yu Onesíforo ni, nguxtyucua tsa yu biꞌ ꞌna; ná ngua tyujuꞌu tiꞌ yu chaꞌ ntsuꞌu naꞌ neꞌ chcua̱, pana ndyaa yu ndyaa naꞌa̱ yu ꞌna ca biꞌ. Biꞌ chaꞌ ntiꞌ naꞌ chaꞌ cuaꞌni tyaꞌna tiꞌ ycuiꞌ Ndyosi jiꞌi̱ yu, loꞌo juaꞌa̱ jiꞌi̱ lcaa nguꞌ nu ndiꞌi̱ slo yu biꞌ.  
\v 17 Nu loꞌo ndyalaa yu nde quichi̱ Roma re, liꞌ ngulana tsa yu ꞌna chaꞌ ca̱a̱ yu ca slo naꞌ.  
\v 18 Ntiꞌ naꞌ chaꞌ cuaꞌni tyaꞌna tiꞌ ycuiꞌ nu Xuꞌna na jiꞌi̱ yu biꞌ, nu loꞌo tyalaa tsa̱ nu cuaꞌni cuayáꞌ Ni jiꞌi̱ lcaa ñati̱. Loꞌo juaꞌa̱ cua jlo tsoꞌo tiꞌ nuꞌu̱ lcaa ñaꞌa̱ cña tsoꞌo nu nguaꞌni yu loꞌo na ca quichi̱ Efeso. 
\c 2  
\s1 Tlyu cuaꞌni tyiquee Timoteo, ntiꞌ Pablo 
\p  
\v 1 Sñiꞌ naꞌ, ntiꞌ naꞌ chaꞌ ta naꞌ chaca cui̱i̱ loꞌo nuꞌu̱ juani: Caca tlyu tyiquee nuꞌu̱ xquiꞌya Jesucristo nu xcuiꞌ chaꞌ tsoꞌo nduꞌni loꞌo na.  
\v 2 Cua ndyuna nuꞌu̱ lcaa chaꞌ nu nguluꞌu naꞌ jiꞌi̱ tyu̱u̱ tyaꞌa ñati̱; nu juani la cuiꞌ ñiꞌya̱ nu nguluꞌu naꞌ, juaꞌa̱ culuꞌu nuꞌu̱ jiꞌi̱ ñati̱ nu tyucui tyiquee ntiꞌ nguꞌ culuꞌu nguꞌ chaꞌ biꞌ jiꞌi̱ xi xaꞌ la ñati̱, chaꞌ ca tsaꞌa̱ tsoꞌo nu xaꞌ la nguꞌ biꞌ chaꞌ jiꞌi̱ ycuiꞌ Ndyosi. 
\p  
\v 3 Ñiꞌya̱ ndalo sca sendaru loꞌo ndyaꞌa̱ yu cusu̱u̱, juaꞌa̱ talo nuꞌu̱ si cajá chaꞌ tiꞌí jinuꞌu̱ loꞌo ndyuꞌni lyaꞌ tiꞌ nguꞌ jinuꞌu̱, chaꞌ sendaru jiꞌi̱ Jesucristo laca nuꞌu̱ juani.  
\v 4 Sca ti cña sendaru caca cuaꞌni sendaru; ná caca cuaꞌni yu xi xaꞌ lo cña, si ntiꞌ yu chaꞌ ca tsoꞌo tyiquee xuꞌna yu loꞌo yu, chaꞌ biꞌ laca nu cua ngusubi jiꞌi̱ yu chaꞌ caca yu sendaru.  
\v 5 Juaꞌa̱ si ntsuꞌu sca chaꞌ cuijya jiꞌi̱ nguꞌ loꞌo tyaꞌa nguꞌ ni, cua laca nscua chaꞌ ñiꞌya̱ nu tsoꞌo la quijya nguꞌ, chaꞌ taca cuaꞌni tsaca yu ngana jiꞌi̱ tyaꞌa yu. Si ná taquiyaꞌ nguꞌ jiꞌi̱ chaꞌ nu cua nscua biꞌ, liꞌ ná caja chaꞌ xlyaꞌbe jiꞌi̱ ñati̱ nu cua nguaꞌni ngana jiꞌi̱ tyaꞌa yu loꞌo cua ndye chaꞌ cuijya jiꞌi̱ nguꞌ liꞌ.  
\v 6 Chaca chaꞌ ni, sca ñati̱ nu tlyu tsa cña nguaꞌni lo xtya̱ jiꞌi̱ yu, clyo cacu ycuiꞌ yu na nu ndyuꞌu lo xtya̱ biꞌ.  
\v 7 Culacua xi tiꞌ nuꞌu̱ jiꞌi̱ chaꞌ nu nguluꞌu ca ti naꞌ jinuꞌu̱, loꞌo juaꞌa̱ xtyucua ycuiꞌ nu Xuꞌna na jinuꞌu̱ chaꞌ ca cuayáꞌ tiꞌ nuꞌu̱ lcaa chaꞌ biꞌ. 
\p  
\v 8 Tyiꞌu tiꞌ nuꞌu̱ jiꞌi̱ Jesucristo, chaꞌ ycuiꞌ laca nu ndyuꞌú chaca quiyaꞌ loꞌo ngujuii yu. Tyaꞌa ñati̱ jiꞌi̱ jyoꞌo David laca yu biꞌ. La cuiꞌ chaꞌ tsoꞌo jiꞌi̱ Jesús nu luꞌú ca nda naꞌ loꞌo ñati̱,  
\v 9 biꞌ chaꞌ nduꞌni lyaꞌ tiꞌ nguꞌ ꞌna juani. Ñiꞌya̱ nu nchcubeꞌ nguꞌ jiꞌi̱ sca ñati̱ cuxi, juaꞌa̱ ngusca̱ꞌ nguꞌ jnaꞌ neꞌ chcua̱ juani. Ngusuꞌba nguꞌ jnaꞌ neꞌ chcua̱ tuꞌni, pana ná nchca jiꞌi̱ nguꞌ suꞌba yacu̱ꞌ nguꞌ jiꞌi̱ chaꞌ tsoꞌo jiꞌi̱ ycuiꞌ Ndyosi juaꞌa̱;  
\v 10 biꞌ chaꞌ talo tyiquee naꞌ jiꞌi̱ nguꞌ, masi nchcubeꞌ tsa nguꞌ jnaꞌ. Talo naꞌ jiꞌi̱ chaꞌ cuxi biꞌ cuentya jiꞌi̱ ca taꞌa ñati̱ nu ngusubi ycuiꞌ Ndyosi jiꞌi̱, chaꞌ loꞌo ñati̱ biꞌ nguaꞌni lyaá Jesucristo jiꞌi̱, chaꞌ caja chalyuu nu ná ngaꞌa̱ chaꞌ tye jiꞌi̱ ñati̱ biꞌ. Caca tyiꞌi̱ nguꞌ biꞌ ca slo ycuiꞌ Ndyosi su tsoꞌo tsa ñaꞌa̱ lcaa chaꞌ. 
\p  
\v 11 Ngaꞌa̱ chaꞌ xñi tsoꞌo ma̱ chaꞌ liñi nu ndiꞌya̱ nchcuiꞌ: 
\q1 Si cajaa na chaꞌ laca na ñati̱ jiꞌi̱ Jesucristo, loꞌo ti tyaa na tyiꞌi̱ na loꞌo ycuiꞌ Ndyosi liꞌ. 
\q1  
\v 12 Si talo na loꞌo xcubeꞌ nguꞌ jiꞌna xquiꞌya chaꞌ jiꞌi̱ Ni, liꞌ caja su tyiꞌi̱ na loꞌo ycuiꞌ Jesús ca su laca Ni loo ca biꞌ. 
\q1 Si ñacui̱ na chaꞌ ná ntsuꞌu chaꞌ jiꞌna loꞌo Jesucristo, juaꞌa̱ ycuiꞌ Ni, ñacui̱ Ni chaꞌ ná ntsuꞌu chaꞌ jiꞌi̱ Ni loꞌo na. 
\q1  
\v 13 Masi tyaꞌa̱chu̱ꞌ na jiꞌi̱ ycuiꞌ Ni, ñaꞌa̱ ti tya tsoꞌo tsa nduꞌni Jesucristo loꞌo na; 
\q1 ná nchaꞌa̱ chaꞌ jiꞌi̱ Jesús, ñaꞌa̱ ti tya cuaꞌni Ni ñiꞌya̱ nu cua nacui̱ ycuiꞌ Ni chaꞌ cuaꞌni Ni. 
\s1 Ñati̱ nu tsoꞌo tsa cña ndyuꞌni 
\p  
\v 14 Luꞌba ti chcuiꞌ nuꞌu̱ loꞌo nguꞌ chaꞌ taquiyaꞌ nguꞌ lcaa chaꞌ nu nscua naꞌ re. Cua jlo tiꞌ ycuiꞌ nu Xuꞌna na lcaa ñaꞌa̱ nu ndyuꞌni scaa nguꞌ, biꞌ chaꞌ culo nuꞌu̱ cña chaꞌ ngaꞌaa xtyacui nguꞌ chaꞌ loꞌo tyaꞌa nguꞌ cuentya jiꞌi̱ cua ñaꞌa̱ ca cuentyu nu nchcuiꞌ ñati̱. Ná tsoꞌo tsiyaꞌ ti juaꞌa̱, chaꞌ lye tsa quichi̱ chaꞌ hique nguꞌ nu ndyuna chaꞌ biꞌ.  
\v 15 Lye tsa cuaꞌni nuꞌu̱ cña nu cua nda ycuiꞌ Ndyosi jinuꞌu̱, chaꞌ ná ca tyujuꞌu tiꞌ nuꞌu̱ xquiꞌya cña nu nguaꞌni nuꞌu̱ nu loꞌo tsaa nuꞌu̱ tyiꞌi̱ ca slo Ni. Chañi tsa laca chaꞌ jiꞌi̱ ycuiꞌ Ndyosi, biꞌ chaꞌ tya culuꞌu la nuꞌu̱ chaꞌ liñi biꞌ jiꞌi̱ nguꞌ lacua; tsoꞌo ti caca tyiquee Ni ñaꞌa̱ Ni jinuꞌu̱ liꞌ.  
\v 16 Ná cuaꞌa̱ jyaca̱ nuꞌu̱ tsiyaꞌ ti jiꞌi̱ chaꞌ cuxi nu nchcuiꞌ nu nguꞌ cuiñi biꞌ, chaꞌ tyijyuꞌ tsa ndyaꞌa̱chu̱ꞌ nguꞌ biꞌ jiꞌi̱ ycuiꞌ Ndyosi; ngaꞌaa ndyaꞌa̱ nguꞌ biꞌ tyucui̱i̱ jiꞌi̱ ycuiꞌ Ndyosi tsiyaꞌ ti.  
\v 17 Chaꞌ cuxi laca nu ncluꞌu nguꞌ biꞌ, loꞌo juaꞌa̱ tlyu la caca chaꞌ cuxi biꞌ nde loo la. Ñiꞌya̱ ndyaluu sca quichuꞌ tyaala nu ngaꞌa̱ lo cuañaꞌ na, ñaꞌa̱ cuayáꞌ cuaꞌni ñuꞌu̱ jiꞌi̱ ñaꞌa̱ tsaca cuañaꞌ na, la cuiꞌ juaꞌa̱ laca chaꞌ cuiñi nu nclyuꞌu yu Himeneo loꞌo yu Fileto biꞌ.  
\v 18 Nguxtyanu nguꞌ biꞌ chaꞌ liñi jiꞌi̱ ycuiꞌ Ndyosi, loꞌo nu juani nacui̱ nguꞌ biꞌ chaꞌ ngaꞌaa tyuꞌú na chaca quiyaꞌ: “Na cua ndyuꞌú nguꞌ chaca quiyaꞌ, lcaa nguꞌ nu ntsuꞌu chaꞌ tyuꞌú”, nacui̱ nguꞌ cuiñi biꞌ. Pana ntsuꞌu xi nguꞌ tyaꞌa na nu cua ngusñi chaꞌ nu nchcuiꞌ nguꞌ biꞌ, loꞌo juani ngaꞌaa jlo tsoꞌo tiꞌ nguꞌ ni chaꞌ nu jlya tiꞌ nguꞌ tya clyo.  
\v 19 Liñi tsa laca chaꞌ nu nchcuiꞌ ycuiꞌ Ndyosi; cuaꞌni Ni chaꞌ ná xtyanu na chaꞌ biꞌ, si jlya tiꞌ na chaꞌ nu nchcuiꞌ ycuiꞌ Ndyosi ndiꞌya̱: “Cua nslo ycuiꞌ nu Xuꞌna na tilaca laca ñati̱ jiꞌi̱ Ni”. Loꞌo chaca chaꞌ nchcuiꞌ ndiꞌya̱: “Cua ñaꞌa̱ ca ñati̱ nu ntsuꞌu chaꞌ jiꞌi̱ loꞌo Cristo ni, ntsuꞌu chaꞌ xtyanu nguꞌ biꞌ lcaa chaꞌ cuxi”. Juaꞌa̱ nacui̱ quityi jiꞌi̱ ycuiꞌ Ndyosi. 
\p  
\v 20 Ntsuꞌu tsa yaꞌ xña neꞌ cosiña jiꞌi̱ sca niꞌi̱ tlyu: ntsuꞌu na oro, juaꞌa̱ ntsuꞌu na plata, juaꞌa̱ ntsuꞌu na yaca, loꞌo juaꞌa̱ ntsuꞌu na yuu. Xcuiꞌ cña tsoꞌo ti nduꞌni nguꞌ loꞌo caꞌña oro, loꞌo caꞌña plata; pana ná ndube tiꞌ nguꞌ jiꞌi̱ caꞌña yaca, jiꞌi̱ caꞌña yuu, chaꞌ tsaꞌña ti ngaꞌa̱ biꞌ.  
\v 21 Ñiꞌya̱ ntiꞌ yaꞌ xña nu ntsuꞌu neꞌ cosiña, juaꞌa̱ laca ñati̱ jiꞌi̱ Jesucristo; ntiꞌ na chaꞌ cuaꞌni ycuiꞌ nu Xuꞌna na chaꞌ tsoꞌo loꞌo na, chaꞌ cube tiꞌ Ni jiꞌna ñiꞌya̱ loꞌo ndube tiꞌ xuꞌna niꞌi̱ jiꞌi̱ caꞌña jiꞌi̱, nu quiñaꞌa̱ tsa ngaꞌa̱. Ná caca cuaꞌni na chaꞌ tsoꞌo biꞌ si ná lubii cresiya jiꞌna; biꞌ chaꞌ nduꞌni chaꞌ xtyanu na lcaa chaꞌ cuxi chaꞌ caca lubii cresiya jiꞌna, chaꞌ sca ti cña nu nda ycuiꞌ Ndyosi jiꞌna cuaꞌni na liꞌ. 
\p  
\v 22 Nguꞌ cuañiꞌ laca nuꞌu̱, loꞌo juaꞌa̱ ntsuꞌu tsa chaꞌ cuxi nu ndiya tiꞌ nguꞌ cuañiꞌ; pana ngaꞌaa cuaꞌni nuꞌu̱ chaꞌ biꞌ. Ñaꞌa̱ ti tya cuaꞌni nuꞌu̱ chaꞌ tsoꞌo ndiꞌya̱: xñi tsoꞌo nuꞌu̱ chaꞌ liñi biꞌ, tsoꞌo ti tyuꞌu tyiquee nuꞌu̱ ñaꞌa̱ nuꞌu̱ jiꞌi̱ ñati̱; tsoꞌo ti tyiꞌi̱ nuꞌu̱ loꞌo tyaꞌa ma̱ nu cua ngua lubii cresiya jiꞌi̱ nguꞌ, la cuiꞌ tyaꞌa ntsuꞌu chaꞌ jiꞌi̱ ma̱ loꞌo ycuiꞌ nu Xuꞌna na.  
\v 23 Ngaꞌaa xacui̱ nuꞌu̱ chaꞌ jiꞌi̱ ñati̱ nu ná jlo tiꞌ tsiyaꞌ ti ñiꞌya̱ laca sca chaꞌ liñi; ná sca chaꞌ jlo tiꞌ nguꞌ biꞌ, pana ntiꞌ nguꞌ xu̱u̱ tyaꞌa nguꞌ loꞌo nuꞌu̱ xquiꞌya sca chaꞌ laja ti.  
\v 24 Nu ñati̱ nu ndyuꞌni cña jiꞌi̱ ycuiꞌ nu Xuꞌna na ni, ná tsoꞌo si xcuiꞌ nxu̱u̱ ti nguꞌ ndiꞌi̱ nguꞌ loꞌo tyaꞌa nguꞌ; ntsuꞌu chaꞌ chcuiꞌ tsoꞌo ti nguꞌ biꞌ loꞌo lcaa ñati̱. Tsoꞌo si nchca jiꞌi̱ nguꞌ biꞌ culuꞌu nguꞌ chaꞌ jiꞌi̱ ycuiꞌ Ndyosi jiꞌi̱ xaꞌ ñati̱; juaꞌa̱ ntsuꞌu chaꞌ talo tyiquee nguꞌ biꞌ jiꞌi̱ ñati̱ nu cuaꞌni lyaꞌ tiꞌ jiꞌi̱ nguꞌ,  
\v 25 juaꞌa̱ jiꞌi̱ ñati̱ nu ñasi̱ꞌ jiꞌi̱ nguꞌ. Tsoꞌo ti chcuiꞌ nguꞌ biꞌ loꞌo ñati̱ nu ñasi̱ꞌ, chaꞌ juaꞌa̱ taca cuaꞌni ycuiꞌ nu Xuꞌna na cña neꞌ cresiya jiꞌi̱ ñati̱ nu ñasi̱ꞌ biꞌ, chaꞌ taca culuꞌu Ni jiꞌi̱ nguꞌ ñiꞌya̱ laca loꞌo chaꞌ liñi biꞌ. Tsoꞌo tsa si culochu̱ꞌ ñati̱ nu ñasi̱ꞌ biꞌ lcaa chaꞌ cuxi nu ndyuꞌni nguꞌ,  
\v 26 chaꞌ liꞌ taca culo Ni jiꞌi̱ nguꞌ yaꞌ nu xñaꞌa̱. Na cua ngusñi nu xñaꞌa̱ jiꞌi̱ ñati̱ nu ñasi̱ꞌ biꞌ tya tsubiꞌ la chaꞌ cuaꞌni nguꞌ cña cuxi cuentya jiꞌi̱. 
\c 3  
\s1 Tyempo cuxi nu caca loꞌo cua tye ti chalyuu 
\p  
\v 1 Culacua tsoꞌo xi tiꞌ nuꞌu̱, Timoteo; nu loꞌo cua tye ti chalyuu, liꞌ lye tsa caca chaꞌ jiꞌi̱ nguꞌ xquiꞌya quiñaꞌa̱ tsa chaꞌ cuxi.  
\v 2 Tyempo nde loo la, liꞌ tyiꞌi̱ tsa nguꞌ cuxi: masi nguꞌ nu sca ti cña jiꞌi̱ ycuiꞌ ca nguꞌ cube tiꞌ, masi nguꞌ nu tyacaꞌa tsa cñi jiꞌi̱, masi nguꞌ nu tyixi tsa cuaꞌni loꞌo tyaꞌa nguꞌ, masi nguꞌ nu ntiꞌ chaꞌ tlyu tsa ycuiꞌ ca nguꞌ, masi nguꞌ nu subaꞌ tsa chcuiꞌ jiꞌi̱ ycuiꞌ Ndyosi, masi nguꞌ nu ná taquiyaꞌ jiꞌi̱ sti nguꞌ, ni jiꞌi̱ xtyaꞌa̱ nguꞌ, masi nguꞌ nu ná tya xlyaꞌbe jiꞌi̱ ycuiꞌ Ndyosi, ni jiꞌi̱ tyaꞌa ñati̱ nguꞌ, masi nguꞌ nu ná tyajaꞌa̱ cuaꞌni chi̱ nguꞌ loo ycuiꞌ Ndyosi tsiyaꞌ ti,  
\v 3 masi nguꞌ nu ná ntsuꞌu tyiquee ñaꞌa̱ nguꞌ jiꞌi̱ tyaꞌa nguꞌ, masi nguꞌ nu ná cuiꞌya chaꞌ clyu tiꞌ jiꞌi̱ tyaꞌa nguꞌ, masi nguꞌ nu lye tsa chcuiꞌ cuentyu jiꞌi̱ tyaꞌa nguꞌ loꞌo xaꞌ ñati̱, masi nguꞌ nu ná tyajaꞌa̱ cuaꞌa jiꞌi̱ ycuiꞌ ca nguꞌ chaꞌ ntiꞌ nguꞌ cuaꞌni nguꞌ lcaa chaꞌ cuxi nu ndiya tiꞌ nguꞌ cuaꞌni nguꞌ, masi nguꞌ nu tyaala tsa cuaꞌni, masi nguꞌ nu ná ndiya tiꞌ tsiyaꞌ ti ni sca chaꞌ tsoꞌo,  
\v 4 masi nguꞌ nu nñiloꞌo jiꞌi̱ tyaꞌa tsoꞌo ti nguꞌ, masi nguꞌ nu ná cube tiꞌ tsiyaꞌ tiꞌ si lye tsa ndyuꞌni tyucuaa tiꞌ jiꞌi̱ tyaꞌa nguꞌ; cuaꞌni nguꞌ cua ñaꞌa̱ ca chaꞌ cuxi nu jña cresiya jiꞌi̱ ycuiꞌ ca nguꞌ, chaꞌ ngaꞌaa ntiꞌ nguꞌ biꞌ taquiyaꞌ nguꞌ jiꞌi̱ ycuiꞌ Ndyosi.  
\v 5 Na cuiñi ti lcaa nguꞌ biꞌ loꞌo cuaꞌni tlyu nguꞌ jiꞌi̱ ycuiꞌ Ndyosi, chaꞌ ná ndaquiyaꞌ nguꞌ biꞌ jiꞌi̱ chaꞌ jiꞌi̱ Ni tsiyaꞌ ti. 
\p Xtyanu nuꞌu̱ jiꞌi̱ lcaa nguꞌ biꞌ.  
\v 6 Loꞌo juaꞌa̱ ntsuꞌu xi nguꞌ cuxi biꞌ nu nñiloꞌo jiꞌi̱ ñati̱, nu ndyaꞌa̱ neꞌ niꞌi̱ jiꞌi̱ ñati̱ chaꞌ culuꞌu nguꞌ chaꞌ cuiñi ti jiꞌi̱ nguꞌ cunaꞌa̱ nu ná nclyacua tsoꞌo tiꞌ. Na tonto tsa nguꞌ cunaꞌa̱ biꞌ, chaꞌ ntsuꞌu tsa quiꞌya jiꞌi̱ nguꞌ, chaꞌ ntiꞌ tsa nguꞌ xñi nguꞌ jiꞌi̱ cua ñaꞌa̱ ca chaꞌ cuxi.  
\v 7 Ntiꞌ tsa nu nguꞌ cunaꞌa̱ biꞌ ca tsaꞌa̱ nguꞌ sca chaꞌ, pana ná nchca ca cuayáꞌ tiꞌ nguꞌ ni sca chaꞌ liñi.  
\v 8 Ñiꞌya̱ ngua tiꞌ jyoꞌo Janes loꞌo jyoꞌo Jambres, nu nguꞌ cuchaꞌa̱ nu ngusu̱u̱ tyaꞌa loꞌo jyoꞌo Moisés nu ngua saꞌni, juaꞌa̱ ntiꞌ nu nguꞌ cuxi biꞌ; biꞌ chaꞌ nxu̱u̱ tyaꞌa nguꞌ loꞌo lcaa chaꞌ liñi. Ngaꞌaa nchca culacua tsoꞌo tiꞌ nguꞌ, chaꞌ ná jlya tiꞌ nguꞌ biꞌ jiꞌi̱ Jesús tsiyaꞌ ti.  
\v 9 Pana ná talo tyiquee ñati̱ tyu̱u̱ tsa̱ jiꞌi̱ chaꞌ cuxi nu ndyuꞌni nu nguꞌ cuxi biꞌ. Ñiꞌya̱ loꞌo ngua cuayáꞌ tiꞌ nguꞌ saꞌni chaꞌ cuiñi tsa jyoꞌo Janes loꞌo jyoꞌo Jambres nu ngua liꞌ, la cuiꞌ juaꞌa̱ ca cuayáꞌ tiꞌ lcaa ñati̱ chaꞌ xcuiꞌ na nñiloꞌo ti nguꞌ cuxi biꞌ jiꞌi̱ ñati̱ chalyuu juani. 
\s1 Chaca quiyaꞌ nclyo Pablo cña jiꞌi̱ Timoteo 
\p  
\v 10 Loꞌo nuꞌu̱ ni, Timoteo, jlo tiꞌ naꞌ chaꞌ ná nduꞌni nuꞌu̱ ñiꞌya̱ nu nduꞌni nu nguꞌ cuxi biꞌ. Stuꞌba ti ntiꞌ nuꞌu̱ loꞌo naꞌ, biꞌ chaꞌ nduꞌni nuꞌu̱ ñiꞌya̱ nu nguluꞌu naꞌ jinuꞌu̱; ndyuꞌni nuꞌu̱ cña ñiꞌya̱ nu ndyuꞌni naꞌ cña, chaꞌ jlya tiꞌ nuꞌu̱ chaꞌ jiꞌi̱ Jesús ñiꞌya̱ jlya tiꞌ naꞌ jiꞌi̱. Cua naꞌa̱ nuꞌu̱ chaꞌ ndalo tyiquee naꞌ jiꞌi̱ ñati̱, chaꞌ ntsuꞌu tyiquee naꞌ ñaꞌa̱ naꞌ jiꞌi̱ ñati̱, chaꞌ ndalo naꞌ,  
\v 11 masi lye tsa ndyuꞌni lyaꞌ tiꞌ nguꞌ ꞌna, masi quicha tiꞌ naꞌ. Cua jlo tiꞌ nuꞌu̱ ñiꞌya̱ ndalo naꞌ ca quichi̱ Antioquía, ca quichi̱ Iconio, ca quichi̱ Listra, nu loꞌo nguaꞌni lyaꞌ tiꞌ nguꞌ ꞌna ca biꞌ; pana cua ngulo ycuiꞌ nu Xuꞌna na ꞌna jiꞌi̱ lcaa chaꞌ cuxi biꞌ.  
\v 12 Chañi chaꞌ xcubeꞌ ñati̱ jiꞌi̱ lcaa tyaꞌa na nu ntiꞌ na chaꞌ caca lubii cresiya jiꞌna cuentya jiꞌi̱ Jesucristo.  
\v 13 Pana nguꞌ nu nduꞌni chaꞌ cuxi ni, cua nscua chaꞌ tya cuxi la cuaꞌni nguꞌ biꞌ; nguꞌ cuiñi ni, cua nscua chaꞌ tya cuiñi la cuaꞌni nguꞌ, juaꞌa̱ ñaꞌa̱ ti tya jlya la tiꞌ ycuiꞌ ca nguꞌ chaꞌ cuiñi liꞌ. 
\p  
\v 14 Pana nuꞌu̱ ni, ñaꞌa̱ ti xñi tsoꞌo nuꞌu̱ lcaa chaꞌ nu ngua tsaꞌa̱ nuꞌu̱; na cua ngua cuayáꞌ tiꞌ nuꞌu̱ jiꞌi̱ chaꞌ biꞌ, chaꞌ liñi laca biꞌ. Cua jlo tiꞌ nuꞌu̱ tilaca laca nu nguluꞌu chaꞌ biꞌ jinuꞌu̱ tya clyo.  
\v 15 Tya cuañiꞌ tsa nuꞌu̱ loꞌo nguxana nuꞌu̱ ndyaca tsaꞌa̱ nuꞌu̱ lo quityi jiꞌi̱ ycuiꞌ Ndyosi; quityi biꞌ laca nu culuꞌu liñi jiꞌna ñiꞌya̱ taca clyaá na jiꞌi̱ nu cuxi, si xñi tsoꞌo na chaꞌ jiꞌi̱ Jesucristo.  
\v 16 Ycuiꞌ Ndyosi nguaꞌni chaꞌ nguaꞌya chaꞌ hique ñati̱ chalyuu, chaꞌ xcua nguꞌ tyucui chaꞌ jiꞌi̱ Ni lo quityi biꞌ, biꞌ chaꞌ tsoꞌo tsa si tya culuꞌu la na chaꞌ nu nscua lo quityi biꞌ jiꞌi̱ ñati̱, chaꞌ ca cuayáꞌ tiꞌ nguꞌ tyucui chaꞌ jiꞌi̱ ycuiꞌ Ndyosi, chaꞌ cuaꞌa jiꞌi̱ nguꞌ loꞌo ndyuꞌni nguꞌ chaꞌ cuxi. Culuꞌu quityi biꞌ jiꞌna ñiꞌya̱ caca xñi tsoꞌo na chaꞌ jiꞌi̱ Ni chaca quiyaꞌ, ñiꞌya̱ caca ca tsaꞌa̱ na chaꞌ cuaꞌni na xcuiꞌ chaꞌ tsoꞌo.  
\v 17 La cuiꞌ quityi biꞌ laca nu culuꞌu jiꞌi̱ lcaa tyaꞌa na nu laca na ñati̱ jiꞌi̱ ycuiꞌ Ndyosi, ñiꞌya̱ taca cuaꞌni tsoꞌo na lcaa cña nu nda Ni jiꞌna chaꞌ cuaꞌni na nde chalyuu. 
\c 4  
\s1 Cua ngulala ti tye chalyuu jiꞌi̱ Pablo 
\p  
\v 1 Culo naꞌ cña jinuꞌu̱ chacuayáꞌ jiꞌi̱ ycuiꞌ Ndyosi, juaꞌa̱ chacuayáꞌ jiꞌi̱ Jesucristo nu cuaꞌni cuayáꞌ jiꞌi̱ lcaa ñati̱ luꞌú loꞌo jiꞌi̱ lcaa ñati̱ nu cua ngujuii. Ca̱a̱ Jesucristo chaca quiyaꞌ chaꞌ caca Ni loo jiꞌi̱ lcaa ñati̱.  
\v 2 Culo naꞌ cña jinuꞌu̱ chaꞌ culuꞌu nuꞌu̱ chaꞌ jiꞌi̱ ycuiꞌ Ndyosi jiꞌi̱ ñati̱; ñaꞌa̱ ti tya culuꞌu nuꞌu̱ chaꞌ biꞌ jiꞌi̱ lcaa ñati̱, masi ntiꞌ nguꞌ cuna nguꞌ chaꞌ biꞌ, masi ná ntiꞌ nguꞌ cuna nguꞌ chaꞌ biꞌ. Tyucui tyiquee nuꞌu̱ culuꞌu nuꞌu̱ jiꞌi̱ nguꞌ, chaꞌ ta nguꞌ cuentya jiꞌi̱ lcaa chaꞌ cuxi nu ntsuꞌu neꞌ cresiya jiꞌi̱ nguꞌ; juaꞌa̱ xtyucua nuꞌu̱ jiꞌi̱ nguꞌ chaꞌ culochu̱ꞌ nguꞌ chaꞌ cuxi biꞌ. Talo tyiquee nuꞌu̱ jiꞌi̱ nguꞌ chaꞌ tsoꞌo ti culuꞌu nuꞌu̱ chaꞌ tsoꞌo biꞌ jiꞌi̱ nguꞌ,  
\v 3 chaꞌ ca nde loo la ngaꞌaa tyajaꞌa̱ nguꞌ cuna nguꞌ chaꞌ tsoꞌo biꞌ liꞌ; culana nguꞌ jiꞌi̱ quiñaꞌa̱ xaꞌ la ñati̱ nu culuꞌu jiꞌi̱ nguꞌ lcua ti chaꞌ cuxi nu ndiya la tiꞌ nguꞌ biꞌ cuna nguꞌ.  
\v 4 Liꞌ culochu̱ꞌ nguꞌ jiꞌi̱ lcaa chaꞌ liñi nu cua ndyuna nguꞌ nquichaꞌ, chaꞌ ngaꞌaa ntiꞌ nguꞌ cuna nguꞌ chaꞌ liñi biꞌ; pana xñi tsoꞌo nguꞌ cua ñaꞌa̱ ca chaꞌ cuiñi, lcaa cuentyu liꞌ.  
\v 5 Loꞌo nuꞌu̱ ni, culacua xi tiꞌ nuꞌu̱ na laca nu tsoꞌo la chaꞌ cuaꞌni nuꞌu̱, chaꞌ talo tyiquee nuꞌu̱ loꞌo lyaꞌ tsa tiꞌ nguꞌ jinuꞌu̱, chaꞌ ñaꞌa̱ ti chcuiꞌ nuꞌu̱ chaꞌ tsoꞌo jiꞌi̱ ycuiꞌ Ndyosi loꞌo ñati̱, chaꞌ tya cuaꞌni la nuꞌu̱ lcaa cña nu ntsuꞌu chaꞌ cuaꞌni nuꞌu̱ cuentya jiꞌi̱ ycuiꞌ Ndyosi. 
\p  
\v 6 Loꞌo naꞌ ni, cua tye ti cña jnaꞌ nde chalyuu cuentya jiꞌi̱ chaꞌ tsoꞌo jiꞌi̱ ycuiꞌ Ndyosi; cua ngulala ti cajaa naꞌ, ntiꞌ naꞌ.  
\v 7 Cua ngusu̱u̱ tyaꞌa naꞌ loꞌo nu cuxi; cua ndye ngutaꞌa̱ naꞌ tyucui̱i̱ jiꞌi̱ Jesucristo, biꞌ chaꞌ cua tyalaa ti naꞌ ca slo ycuiꞌ Ndyosi. Nu chaꞌ tsoꞌo nu cua ngusñi naꞌ ni, cua ndyanu tsoꞌo chaꞌ biꞌ neꞌ cresiya ꞌna,  
\v 8 biꞌ chaꞌ jlo tiꞌ naꞌ chaꞌ ntsuꞌu sca chaꞌ tsoꞌo nu tyacua ꞌna; ta ycuiꞌ nu Xuꞌna na chaꞌ tsoꞌo biꞌ jnaꞌ nu loꞌo tyalaa tsa̱ loꞌo cuaꞌni cuayáꞌ Ni jiꞌi̱ lcaa ñati̱, chaꞌ liñi tsa nduꞌni cuayáꞌ ycuiꞌ Ndyosi. Ta Ni chaꞌ tsoꞌo biꞌ jiꞌi̱ lcaa ñati̱ nu ntajatya tsa jiꞌi̱ Cristo ni jacuaꞌ ca̱a̱ Ni chaca quiyaꞌ, xquiꞌya chaꞌ ntsuꞌu tsa tyiquee nguꞌ ñaꞌa̱ nguꞌ jiꞌi̱ Ni; siꞌi jnaꞌ ti ta Ni chaꞌ biꞌ. 
\s1 Chaꞌ nu nda Pablo loꞌo ndye quityi 
\p  
\v 9 Quiñi clya tyucui̱i̱ jinuꞌu̱ chaꞌ ca̱a̱ ca nde slo naꞌ yala ti.  
\v 10 Cua nguxtyanu Demas ꞌna xquiꞌya chaꞌ ndiya la tiꞌ yu jiꞌi̱ chaꞌ cuxi nu ntsuꞌu chalyuu, ndyaa yu ca quichi̱ Tesalónica. Nda naꞌ jiꞌi̱ Crescente ndyaa ca Galacia, juaꞌa̱ nda naꞌ jiꞌi̱ Tito ndyaa ca Dalmacia;  
\v 11 sca ti Lucas tya ndiꞌi̱ ca nde loꞌo naꞌ. Tsaana nuꞌu̱ jiꞌi̱ Marcos chaꞌ ca̱loꞌo jiꞌi̱ yu ca nde, chaꞌ nchca jiꞌi̱ yu xtyucua yu xi ꞌna loꞌo cña re.  
\v 12 Ngulo naꞌ cña jiꞌi̱ Tíquico chaꞌ tsaa yu ca quichi̱ Efeso.  
\v 13 Nu loꞌo ca̱a̱ nuꞌu̱ ca nde, ca̱loꞌo jiꞌi̱ capa jnaꞌ nu nguxtyanu naꞌ toꞌ tyi Carpo ca quichi̱ Troas, loꞌo juaꞌa̱ lcaa quityi ꞌna ca̱loꞌo nuꞌu̱ jiꞌi̱, chaꞌ tiji̱ꞌ tsa tiꞌ naꞌ jiꞌi̱ quityi nu nguscua naꞌ lo. 
\p  
\v 14 Alejandro, nu cuityi chcua̱ biꞌ ni, lye tsa nguaꞌni lyaꞌ tiꞌ yu ꞌna; cuxi tsa cña nguaꞌni yu loꞌo naꞌ. Cua jlo tiꞌ ycuiꞌ nu Xuꞌna na lcaa chaꞌ biꞌ, juaꞌa̱ tya ta Ni chaꞌ cuxi jiꞌi̱ yu biꞌ.  
\v 15 Pana tii tiꞌ nuꞌu̱ chaꞌ ná tacu̱ꞌ nu Alejandro biꞌ chaꞌ jinuꞌu̱, nu loꞌo ta nuꞌu̱ chaꞌ tsoꞌo jiꞌi̱ ycuiꞌ Ndyosi loꞌo ñati̱. 
\p  
\v 16 Loꞌo ngutaꞌa̱ naꞌ slo nguꞌ tisiya clyo, ni sca ñati̱ ná nguxtyucua nguꞌ ꞌna liꞌ, chaꞌ ngusna nguꞌ; biꞌ chaꞌ ndijña naꞌ jiꞌi̱ ycuiꞌ Ndyosi chaꞌ cuiꞌya Ni chaꞌ clyu tiꞌ jiꞌi̱ nguꞌ biꞌ.  
\v 17 Nguxtyucua ycuiꞌ nu Xuꞌna na jnaꞌ liꞌ, cua nda Ni juersa ꞌna chaꞌ tya nguluꞌu la naꞌ chaꞌ tsoꞌo jiꞌi̱ Jesucristo ñaꞌa̱ cuayáꞌ ndyuna lcaa ñati̱ xaꞌ tsuꞌ nu ndiꞌi̱ ca nde. Cua nguaꞌa ycuiꞌ Ni ꞌna jiꞌi̱ cuichi tyaala biꞌ.  
\v 18 Loꞌo juaꞌa̱ tya cuaꞌa Ni jnaꞌ jiꞌi̱ lcaa lo chaꞌ cuxi nu tyacua naꞌ jiꞌi̱; jlo tiꞌ naꞌ chaꞌ ñaꞌa̱ ti tya ñaꞌa̱si̱i̱ Ni jnaꞌ, chaꞌ tsoꞌo ti tyalaa naꞌ su nclyo ycuiꞌ Ndyosi cña. Ngaꞌaa tye tsa̱ chaꞌ cuaꞌni tlyu na jiꞌi̱ ycuiꞌ Ndyosi ca biꞌ. Juaꞌa̱ caca chaꞌ tuꞌni. 
\s1 Ngusalyaꞌ Pablo loꞌo nguꞌ 
\p  
\v 19 Ta nuꞌu̱ xlyo niꞌi̱ jiꞌi̱ Prisca, loꞌo jiꞌi̱ Aquila, loꞌo jiꞌi̱ lcaa nguꞌ ca toꞌ tyi Onesíforo cuentya jnaꞌ.  
\v 20 Ndyanu Erasto ca quichi̱ Corinto, loꞌo juaꞌa̱ cua nguxtyanu naꞌ jiꞌi̱ Trófimo ca quichi̱ Mileto chaꞌ quicha tiꞌ yu.  
\v 21 Quiñi clya tyucui̱i̱ jinuꞌu̱ chaꞌ tyalaa nuꞌu̱ ca nde loꞌo bilya xana tyempo tlyaꞌ. Lcaa nguꞌ re nda nguꞌ xlyo niꞌi̱ jinuꞌu̱, loꞌo Eubulo, loꞌo Pudente, loꞌo Lino, loꞌo Claudia, loꞌo lcaa tyaꞌa ñati̱ jiꞌi̱ Jesucristo quichi̱ re. 
\p  
\v 22 Tyanu Xtyiꞌi ycuiꞌ Jesucristo loꞌo nuꞌu̱, chaꞌ taca caca nguula la tiꞌ tyiquee nuꞌu̱. Ñaꞌa̱ ti cuaꞌni ycuiꞌ Ndyosi chaꞌ tsoꞌo loꞌo lcaa cuꞌma̱. Juaꞌa̱ caca chaꞌ lacua.