\id 1TI  
\h 1 TIMOTEO 
\toc1 Quityi nu nguscua San Pablo tya clyo chaꞌ ndyaa ca slo Timoteo 
\toc2 1 TIMOTEO 
\toc3 1 Ti. 
\mt1 Quityi nu nguscua San Pablo tya clyo chaꞌ ndyaa ca slo Timoteo 
\c 1  
\p  
\v 1 Pablo laca naꞌ. Sca ñati̱ nu ndyaꞌa̱ nchcuiꞌ chaꞌ jiꞌi̱ Jesucristo nde xaꞌ quichi̱ laca naꞌ, chaꞌ ycuiꞌ Ndyosi nu nduꞌni lyaá jiꞌi̱ ñati̱ ngulo cña jnaꞌ chaꞌ cuaꞌni naꞌ cña biꞌ; ngulo Jesucristo cña jnaꞌ, la cuiꞌ nu Cristo nu ndu̱ tiꞌ na jiꞌi̱ chaꞌ tya̱a̱ Ni chaca quiyaꞌ.  
\v 2 Nscua naꞌ quityi re chaꞌ ca̱a̱ slo nuꞌu̱, Timoteo, chaꞌ ñiꞌya̱ si laca nuꞌu̱ sñiꞌ naꞌ, juaꞌa̱ ntiꞌ naꞌ ñaꞌa̱ naꞌ jinuꞌu̱, chaꞌ ngusñi nuꞌu̱ chaꞌ jiꞌi̱ Jesucristo tya loꞌo nguluꞌu naꞌ chaꞌ biꞌ jinuꞌu̱. Ndiꞌya̱ ntiꞌ naꞌ, chaꞌ ñaꞌa̱ ti cuaꞌni ycuiꞌ Ndyosi Sti na chaꞌ tsoꞌo loꞌo nuꞌu̱, chaꞌ cuaꞌni tyaꞌna tiꞌ Ni jinuꞌu̱, chaꞌ juaꞌa̱ cuaꞌni Ni chaꞌ ti̱ ti tyiꞌi̱ cresiya jinuꞌu̱ xquiꞌya Jesucristo nu Xuꞌna na. 
\s1 Ná tsoꞌo chaꞌ jlya tiꞌ nguꞌ cuentyu ti 
\p  
\v 3 Loꞌo cua tsaꞌa ti naꞌ ca Macedonia, liꞌ cua nchcuiꞌ naꞌ loꞌo nuꞌu̱ chaꞌ tyanu nuꞌu̱ nde quichi̱ Efeso; chaca quiyaꞌ chcuiꞌ naꞌ loꞌo nuꞌu̱ juani, chaꞌ tyanu nuꞌu̱ ca quichi̱ biꞌ. Ntsuꞌu nguꞌ quichi̱ Efeso nu ncluꞌu xaꞌ lo chaꞌ jiꞌi̱ nguꞌ tyaꞌa na; ngaꞌa̱ chaꞌ culo nuꞌu̱ cña jiꞌi̱ nguꞌ biꞌ, chaꞌ ngaꞌaa culuꞌu tsa nguꞌ xaꞌ la chaꞌ jiꞌi̱ tyaꞌa nguꞌ.  
\v 4 Loꞌo juaꞌa̱ culo nuꞌu̱ cña chaꞌ ngaꞌaa ca tsaꞌa̱ nguꞌ cuentyu cusuꞌ, ngaꞌaa cuaꞌa̱ jyaca̱ nguꞌ jiꞌi̱ cña cua̱ nu ndyanu jiꞌi̱ jyoꞌo cusuꞌ jiꞌi̱ nguꞌ saꞌni. Nguichi̱ tsa chaꞌ biꞌ, loꞌo juaꞌa̱ ná tye chca chaꞌ biꞌ tsiyaꞌ ti. Ná xtyucua chaꞌ biꞌ jiꞌna chaꞌ cuaꞌni na cña jiꞌi̱ ycuiꞌ Ndyosi; sca ti si xñi na chaꞌ jiꞌi̱ ycuiꞌ Jesús, liꞌ caca cuaꞌni na cña jiꞌi̱ Ni. 
\p  
\v 5 Culo nuꞌu̱ cña jiꞌi̱ nguꞌ chaꞌ tsoꞌo tsa tyuꞌu tyiquee nguꞌ ñaꞌa̱ nguꞌ jiꞌi̱ tyaꞌa nguꞌ, chaꞌ biꞌ laca cña nu nduꞌni ñati̱ nu ngua lubii cresiya jiꞌi̱ cuentya jiꞌi̱ ycuiꞌ Ndyosi; jlo tiꞌ ñati̱ biꞌ ñiꞌya̱ laca cña tsoꞌo, loꞌo juaꞌa̱ ndyuꞌni nguꞌ biꞌ cña tsoꞌo biꞌ liꞌ. Chañi chaꞌ ngusñi nguꞌ biꞌ chaꞌ jiꞌi̱ ycuiꞌ Ndyosi si ntsuꞌu tyiquee nguꞌ ñaꞌa̱ nguꞌ jiꞌi̱ tyaꞌa nguꞌ.  
\v 6 Pana ntsuꞌu xi xaꞌ la ñati̱ nu ná ntajaꞌa̱ nguꞌ cuna nguꞌ chaꞌ biꞌ; xaꞌ tyucui̱i̱ ngusñi nguꞌ biꞌ, chaꞌ nchcuiꞌ tsa nguꞌ cuentyu.  
\v 7 Mstru caca nguꞌ biꞌ, ntiꞌ nguꞌ, nguꞌ nu ncluꞌu ñiꞌya̱ cña nu ngulo ycuiꞌ Ndyosi jiꞌi̱ ñati̱, nu nguscua jyoꞌo Moisés; pana ná nda nguꞌ biꞌ cuentya ñiꞌya̱ ndyuꞌu chaꞌ nu nchcuiꞌ ycuiꞌ ca nguꞌ, ñiꞌya̱ ndyuꞌu chaꞌ nu nda chaꞌ cusuꞌ biꞌ, masi lye tsa ncluꞌu nguꞌ chaꞌ biꞌ jiꞌi̱ tyaꞌa ñati̱ nguꞌ. 
\p  
\v 8 Jlo tiꞌ na chaꞌ tsoꞌo tsa chaꞌ cusuꞌ nu nguscua jyoꞌo Moisés biꞌ, si taquiyaꞌ na jiꞌi̱.  
\v 9 Pana siꞌi xquiꞌya ñati̱ nu tsoꞌo tyiquee nda ycuiꞌ Ndyosi chaꞌ cusuꞌ biꞌ; na cua nda Ni chaꞌ biꞌ xquiꞌya ñati̱ nu ná ntiꞌ cuaꞌni chaꞌ tsoꞌo, xquiꞌya ñati̱ nu ná ntajaꞌa̱ taquiyaꞌ jiꞌi̱ chaꞌ biꞌ, xquiꞌya ñati̱ nu ná ntsuꞌu chaꞌ jiꞌi̱ loꞌo ycuiꞌ Ndyosi, xquiꞌya ñati̱ nu ntsuꞌu quiꞌya jiꞌi̱, xquiꞌya ñati̱ nu cuxi tyiquee, xquiꞌya ñati̱ nu nchcuiꞌ subaꞌ jiꞌi̱ ycuiꞌ Ndyosi, xquiꞌya ñati̱ nu ndujuii jiꞌi̱ sti nguꞌ, jiꞌi̱ xtyaꞌa̱ nguꞌ, xquiꞌya ñati̱ nu ndujuii jiꞌi̱ tyaꞌa ñati̱,  
\v 10 xquiꞌya ñati̱ nu nduꞌni subaꞌ loꞌo nu cunaꞌa̱, xquiꞌya nu cunaꞌa̱ nu nduꞌni subaꞌ loꞌo nu quiꞌyu, xquiꞌya nu quiꞌyu nu nduꞌni subaꞌ loꞌo tyaꞌa quiꞌyu ti, xquiꞌya ñati̱ nu ntucuaana jiꞌi̱ tyaꞌa ñati̱ chaꞌ tsaloꞌo jiꞌi̱ nguꞌ juaꞌa̱ ti, xquiꞌya nu cuiñi, xquiꞌya ñati̱ nu nchcuiꞌ chaꞌ cuiñi slo nguꞌ tisiya. Nda ycuiꞌ Ndyosi chaꞌ cusuꞌ biꞌ, chaꞌ juaꞌa̱ ca cuayáꞌ tiꞌ lcaa ñati̱ nu ná ntiꞌ taquiyaꞌ jiꞌi̱ cua ñaꞌa̱ ca chaꞌ nu liñi ca nu ncluꞌu na cuentya jiꞌi̱ ycuiꞌ Ndyosi.  
\v 11 La cuiꞌ chaꞌ tsoꞌo biꞌ ncluꞌu naꞌ chacuayáꞌ jiꞌi̱ ycuiꞌ Ndyosi juani, loꞌo ncluꞌu naꞌ chaꞌ tlyu tsa laca ycuiꞌ Ndyosi, chaꞌ tsoꞌo tsa ntsuꞌu tyiquee Ni ñaꞌa̱ Ni jiꞌna. 
\s1 Tsoꞌo tsa nduꞌni ycuiꞌ Ndyosi loꞌo na 
\p  
\v 12 Ndya tsa naꞌ xlyaꞌbe jiꞌi̱ Jesucristo nu Xuꞌna na chaꞌ nguaꞌni Ni chaꞌ caca cuaꞌni naꞌ cña jiꞌi̱ Ni; ndya naꞌ xlyaꞌbe jiꞌi̱ Ni chaꞌ ngusubi Ni jnaꞌ chaꞌ cuaꞌni naꞌ cña jiꞌi̱ Ni, chaꞌ jlo tiꞌ Ni chaꞌ ndaquiyaꞌ naꞌ jiꞌi̱ Ni.  
\v 13 Ngusubi Ni jnaꞌ, masi subaꞌ tsa nchcuiꞌ naꞌ jiꞌi̱ Ni cua saꞌni la, tyempo loꞌo nguxcubeꞌ naꞌ jiꞌi̱ ñati̱ jiꞌi̱ Jesucristo; tyaala tsa naꞌ nu ngua liꞌ. Pana ná jlo tiꞌ naꞌ tyempo biꞌ, chaꞌ bilya xñi naꞌ chaꞌ tsoꞌo jiꞌi̱ ycuiꞌ Ndyosi, biꞌ chaꞌ ngua tyaꞌna tsa tiꞌ Ni jnaꞌ.  
\v 14 Ntsuꞌu tsa tyiquee nu Xuꞌna na ñaꞌa̱ Ni ꞌna, biꞌ chaꞌ ngusñi naꞌ chaꞌ jiꞌi̱ ycuiꞌ Jesucristo liꞌ; loꞌo nu juani ntsuꞌu tyiquee naꞌ ñaꞌa̱ naꞌ jiꞌi̱ Jesús, loꞌo juaꞌa̱ ntsuꞌu tyiquee naꞌ ñaꞌa̱ naꞌ jiꞌi̱ tyaꞌa ñati̱ naꞌ. 
\p  
\v 15 Taca xñi tsoꞌo nguꞌ chaꞌ nu nchcuiꞌ ndiꞌya̱: Cua ya̱a̱ Jesucristo nde chalyuu chaꞌ cuaꞌni lyaá Ni jiꞌi̱ ñati̱ chalyuu nu ntsuꞌu quiꞌya jiꞌi̱. Loꞌo naꞌ, tlyu la xquiꞌya naꞌ que xaꞌ la ñati̱, chaꞌ cuxi tsa cña nu nguaꞌni naꞌ loꞌo ñati̱ jiꞌi̱ Jesucristo nu ngua saꞌni la.  
\v 16 Ngüiꞌya tsa Jesucristo chaꞌ clyu tiꞌ ꞌna loꞌo ngüityi̱ Ni quiꞌya nu ntsuꞌu ꞌna, chaꞌ culuꞌu ycuiꞌ Ndyosi jiꞌi̱ xaꞌ la ñati̱ ñiꞌya̱ caca xñi nguꞌ chaꞌ jiꞌi̱ Ni. Ñiꞌya̱ loꞌo tyaꞌna tiꞌ Jesús jnaꞌ tya clyo, juaꞌa̱ ca tyaꞌna tiꞌ Ni jiꞌi̱ lcaa ñati̱ nu xñi chaꞌ jiꞌi̱ Jesús ca nde loo la, chaꞌ si jlya tiꞌ nguꞌ jiꞌi̱ Ni, ná ngaꞌa̱ chaꞌ tye chalyuu jiꞌi̱ nguꞌ liꞌ.  
\v 17 Biꞌ chaꞌ cuaꞌni tlyu na jiꞌi̱ ycuiꞌ Ndyosi juani, cuaꞌni chi̱ na loo Ni, chaꞌ ná tye tsa̱ nu laca Ni loo tyucui ñaꞌa̱ chalyuu; ná tye chaꞌ jiꞌi̱ ycuiꞌ Ndyosi, chaꞌ ná ntsuꞌu chaꞌ cajaa Ni. Ná nchca jiꞌna ñaꞌa̱ na jiꞌi̱ Ni chaꞌ laca na ñati̱ chalyuu ti, pana sca ti ycuiꞌ Ni laca ycuiꞌ Ndyosi. Juaꞌa̱ laca chaꞌ jiꞌi̱ Ni tuꞌni. 
\p  
\v 18 Culo naꞌ cña jinuꞌu̱ juani, Timoteo, chaꞌ ñiꞌya̱ ntiꞌ naꞌ ñaꞌa̱ naꞌ jiꞌi̱ sca sñiꞌ naꞌ, juaꞌa̱ ntiꞌ naꞌ ñaꞌa̱ naꞌ jinuꞌu̱: Tya cuaꞌni la nuꞌu̱ cña jiꞌi̱ ycuiꞌ Ndyosi ñiꞌya̱ nu cua nacui̱ nguꞌ nu laca tuꞌba jiꞌi̱ ycuiꞌ Ni chaꞌ cuaꞌni nuꞌu̱; tyiꞌu tiꞌ nuꞌu̱ chaꞌ nu cua nchcuiꞌ nguꞌ biꞌ jinuꞌu̱ tya tsubiꞌ la, chaꞌ caca nguula la tiꞌ tyiquee nuꞌu̱. Liꞌ ñiꞌya̱ caca jiꞌi̱ sca sendaru tsoꞌo, juaꞌa̱ taca jinuꞌu̱ xu̱u̱ tyaꞌa loꞌo nu cuxi nu ntsuꞌu chalyuu;  
\v 19 taca xu̱u̱ tyaꞌa nuꞌu̱ loꞌo nu cuxi biꞌ si xñi tsoꞌo nuꞌu̱ chaꞌ jiꞌi̱ Jesucristo, si xcuiꞌ chaꞌ tsoꞌo cuaꞌni nuꞌu̱ loꞌo ñati̱. Ntsuꞌu nguꞌ nu ngua jlo tiꞌ ñiꞌya̱ laca sca chaꞌ liñi, pana ngaꞌaa ndyuꞌni nguꞌ chaꞌ liñi biꞌ juani; cua ndyaꞌa̱chu̱ꞌ nguꞌ biꞌ jiꞌi̱ ycuiꞌ Ndyosi, chaꞌ nguxtyanu nguꞌ chaꞌ tsoꞌo biꞌ.  
\v 20 Ñiꞌya̱ ntiꞌ yu Himeneo loꞌo yu Alejandro ni, ngaꞌaa ndaquiyaꞌ nguꞌ jiꞌi̱ chaꞌ liñi, biꞌ chaꞌ cua nguxtyanu naꞌ jiꞌi̱ nguꞌ biꞌ yaꞌ nu xñaꞌa̱, chaꞌ ca cuayáꞌ tiꞌ nguꞌ chaꞌ tlyu tsa chaꞌ cuxi laca loꞌo nchcuiꞌ nguꞌ chaꞌ subaꞌ jiꞌi̱ ycuiꞌ Ndyosi. 
\c 2  
\s1 Ndiꞌya̱ cuaꞌni na loꞌo chcuiꞌ na loꞌo ycuiꞌ Ndyosi 
\p  
\v 1 Ngaꞌa̱ chaꞌ chcuiꞌ na loꞌo ycuiꞌ Ndyosi cuentya jiꞌi̱ lcaa ñati̱ chalyuu, nu loꞌo jña na chaꞌ jiꞌi̱ Ni, lcaa chaꞌ nu lyiji jiꞌi̱ ñati̱; chcuiꞌ na cuentya jiꞌi̱ xaꞌ ñati̱ loꞌo nchcuiꞌ na loꞌo ycuiꞌ nu Xuꞌna na, juaꞌa̱ loꞌo tya na xlyaꞌbe jiꞌi̱ ycuiꞌ Ndyosi cuentya jiꞌi̱ ñati̱.  
\v 2 Ngaꞌa̱ chaꞌ chcuiꞌ na loꞌo ycuiꞌ Ndyosi cuentya jiꞌi̱ lcaa nguꞌ nu laca loo, cuentya jiꞌi̱ lcaa nguꞌ nu laca cña; jña ma̱ chaꞌ cuaꞌni Ni chaꞌ ti̱ ti tyiꞌi̱ tyiquee na, chaꞌ ná xu̱u̱ tyaꞌa nguꞌ laca loo biꞌ loꞌo na, chaꞌ ta nguꞌ biꞌ chacuayáꞌ chaꞌ cuaꞌni na lcaa lo chaꞌ tsoꞌo, ñiꞌya̱ nu ntiꞌ ycuiꞌ Ndyosi chaꞌ cuaꞌni na.  
\v 3 Juaꞌa̱ ntiꞌ ycuiꞌ Ndyosi nu nduꞌni lyaá jiꞌna; tsoꞌo ntiꞌ Ni si juaꞌa̱ chcuiꞌ na loꞌo Ni,  
\v 4 chaꞌ ntiꞌ Ni chaꞌ cuaꞌni lyaá Ni jiꞌi̱ lcaa ñati̱ chalyuu, ntiꞌ Ni chaꞌ ca cuayáꞌ tiꞌ lcaa ñati̱ ñiꞌya̱ nu ntsuꞌu chaꞌ liñi jiꞌi̱ ycuiꞌ Ndyosi.  
\v 5 Sca ti ycuiꞌ Ndyosi ntsuꞌu tsiyaꞌ ti, loꞌo juaꞌa̱ ntsuꞌu sca ti ñati̱ nu ndiꞌi̱ slo ycuiꞌ Ni nu nchcuiꞌ loꞌo Ni cuentya jiꞌi̱ ñati̱ chalyuu; la cuiꞌ Jesucristo laca nu ñati̱ biꞌ.  
\v 6 Nda Jesucristo chacuayáꞌ chaꞌ ndyujuii nguꞌ jiꞌi̱ yu cua tsubiꞌ la; juaꞌa̱ nda yu cayaꞌ lo quiꞌya nu ntsuꞌu jiꞌi̱ ñati̱ chalyuu, nu loꞌo ngujuii yu lo crusi. Nguaꞌni ycuiꞌ Ndyosi cña biꞌ la cuiꞌ hora loꞌo ngua tiꞌ Ni chaꞌ cuaꞌni Ni jiꞌi̱.  
\v 7 Ngusubi Ni ꞌna chaꞌ ndyaꞌa naꞌ nda naꞌ chaꞌ tsoꞌo biꞌ loꞌo ñati̱ cuentya jiꞌi̱ ycuiꞌ Ni, chaꞌ loꞌo nguꞌ xaꞌ tsuꞌ ndyuna nguꞌ chaꞌ tsoꞌo biꞌ liꞌ; ndyaꞌa naꞌ nguluꞌu naꞌ jiꞌi̱ nguꞌ ñiꞌya̱ caca xñi nguꞌ chaꞌ jiꞌi̱ ycuiꞌ Ndyosi. Chaꞌ liñi nscua naꞌ nde, siꞌi chaꞌ cuiñi nchcuiꞌ naꞌ. 
\p  
\v 8 Biꞌ chaꞌ lacua, lcaa seꞌi̱ su ndyuꞌu tiꞌi̱ nguꞌ nu ntsuꞌu chaꞌ jiꞌi̱ loꞌo Jesucristo tsa tlyu ti, ntiꞌ naꞌ chaꞌ chcuiꞌ nguꞌ loꞌo ycuiꞌ Ndyosi. Tsoꞌo ti tyiquee nguꞌ ta nguꞌ chaꞌ loꞌo ycuiꞌ Ndyosi liꞌ, chaꞌ ná tsoꞌo chcuiꞌ nguꞌ loꞌo Ni si ñasi̱ꞌ nguꞌ, ni ná tsoꞌo chcuiꞌ nguꞌ loꞌo Ni laja loꞌo nxu̱u̱ tyaꞌa nguꞌ.  
\v 9 Loꞌo nu nguꞌ cunaꞌa̱ ni, cacuꞌ nguꞌ steꞌ tsoꞌo ti, siꞌi lateꞌ nu quiñaꞌa̱ tsa ngaꞌa̱; ná talyaꞌ lye nguꞌ quicha̱ꞌ hique nguꞌ, ná cacuꞌ lye nguꞌ oro ni quee ndubi nu quiñaꞌa̱ tsa ngaꞌa̱, chaꞌ ná tsoꞌo chaꞌ cuaꞌni tyixi tsa nguꞌ jiꞌi̱ ycuiꞌ ca nguꞌ chaꞌ xñaꞌa̱ xaꞌ nu quiꞌyu jiꞌi̱ nguꞌ liꞌ;  
\v 10 tsoꞌo la ñaꞌa̱ nu cunaꞌa̱ nu xcuiꞌ chaꞌ tsoꞌo nduꞌni cuentya jiꞌi̱ ycuiꞌ Ndyosi.  
\v 11 Ngaꞌa̱ chaꞌ tyiꞌi̱ ti̱ ti nguꞌ cunaꞌa̱ loꞌo culuꞌu nguꞌ chaꞌ jiꞌi̱ ycuiꞌ Ndyosi laja loꞌo ndyuꞌu tiꞌi̱ nguꞌ, chaꞌ loꞌo nguꞌ cunaꞌa̱ biꞌ ca tsaꞌa̱ loꞌo nguꞌ, chaꞌ loꞌo nguꞌ cunaꞌa̱ taquiyaꞌ jiꞌi̱ chaꞌ biꞌ.  
\v 12 Ná ta naꞌ chacuayáꞌ jiꞌi̱ sca nu cunaꞌa̱ chaꞌ culuꞌu chaꞌ jiꞌi̱ ycuiꞌ Ndyosi jiꞌi̱ tyaꞌa nguꞌ loꞌo ndyuꞌu tiꞌi̱ nguꞌ tsa tlyu ti, chaꞌ ná tsoꞌo si culo nu cunaꞌa̱ cña jiꞌi̱ nu quiꞌyu juaꞌa̱. Ti̱ ti tyiꞌi̱ nguꞌ cunaꞌa̱ tsoꞌo la.  
\v 13 Nu ngua tya clyo ni, ngüiñá ycuiꞌ Ndyosi jiꞌi̱ nu quiꞌyu Adán; tiyaꞌ la xi, liꞌ ngüiñá Ni jiꞌi̱ sca nu cunaꞌa̱ nu ngua naa Eva.  
\v 14 Loꞌo juaꞌa̱ siꞌi jiꞌi̱ jyoꞌo Adán biꞌ nguaꞌni nu xñaꞌa̱ ngana tyempo biꞌ; jiꞌi̱ nu cunaꞌa̱ jiꞌi̱ yu nguaꞌni biꞌ ngana, nu loꞌo nguaꞌni jyoꞌo Eva biꞌ chaꞌ cuxi.  
\v 15 Biꞌ chaꞌ tlyu tsa cña ntsuꞌu jiꞌi̱ nguꞌ cunaꞌa̱ loꞌo cala sñiꞌ nguꞌ juani; pana cuaꞌni lyaá ycuiꞌ Ndyosi jiꞌi̱ nguꞌ cunaꞌa̱ si xñi tsoꞌo nguꞌ chaꞌ jiꞌi̱ Ni, si ntsuꞌu tyiquee nguꞌ ñaꞌa̱ nguꞌ jiꞌi̱ tyaꞌa nguꞌ. Cuaꞌni Ni chaꞌ ca lubii cresiya jiꞌi̱ nguꞌ cunaꞌa̱ biꞌ, si talo nguꞌ cuaꞌni nguꞌ chaꞌ tsoꞌo biꞌ, si nchca jiꞌi̱ nguꞌ cunaꞌa̱ biꞌ cuaꞌa jiꞌi̱ ycuiꞌ ca nguꞌ chaꞌ ná ca tyucuaa tiꞌ nguꞌ jiꞌi̱ ñati̱. 
\c 3  
\s1 Ñati̱ nu caca loo jiꞌi̱ tyaꞌa ngusñi na chaꞌ jiꞌi̱ Jesús 
\p  
\v 1 Ngaꞌa̱ chaꞌ jlya tsoꞌo tiꞌ ma̱ chaꞌ liñi nu nchcuiꞌ ndiꞌya̱: Tsoꞌo tsa si tyajaꞌa̱ sca nguꞌ tyaꞌa ma̱ caca loo jiꞌi̱ ñaꞌa̱ taju ti ma̱ nu ngusñi ma̱ chaꞌ jiꞌi̱ ycuiꞌ Ndyosi, chaꞌ tsoꞌo tsa cuentya jiꞌi̱ ycuiꞌ Ndyosi si ntiꞌ sca ñati̱ cuaꞌni cña biꞌ.  
\v 2 Si laca sca ñati̱ loo jiꞌi̱ ñaꞌa̱ taju tyaꞌa ñati̱ jiꞌi̱ Jesucristo, liꞌ ntsuꞌu chaꞌ cuaꞌni yu xcuiꞌ chaꞌ tsoꞌo loꞌo ñati̱, chaꞌ ná caja ñiꞌya̱ jña nguꞌ quiꞌya jiꞌi̱ yu liꞌ. Caja clyoꞌo yu biꞌ loꞌo sca ti nu cunaꞌa̱; juaꞌa̱ ntsuꞌu chaꞌ culacua tsoꞌo tiꞌ yu, chaꞌ cuaꞌa yu jiꞌi̱ chaꞌ cuxi nu ntsuꞌu tyiquee ycuiꞌ ca yu, chaꞌ tsoꞌo ti tyiꞌi̱ yu loꞌo tyaꞌa ñati̱. Ntsuꞌu chaꞌ ta yu niꞌi̱ jiꞌi̱ yu loꞌo jña ñati̱ nu lijya̱ tyijyuꞌ, juaꞌa̱ ntsuꞌu chaꞌ ta yu na cacu nguꞌ biꞌ. Ntsuꞌu chaꞌ culuꞌu yu chaꞌ jiꞌi̱ ycuiꞌ Ndyosi jiꞌi̱ ñati̱, biꞌ chaꞌ ná tsoꞌo si ná nchca jiꞌi̱ yu.  
\v 3 Ná caca yu cña biꞌ si cuꞌbi yu, si xu̱u̱ tyaꞌa yu loꞌo ñati̱; ngaꞌa̱ chaꞌ talo tyiquee yu jiꞌi̱ tyaꞌa ñati̱ yu, chaꞌ ná caja tyaꞌa cusu̱u̱ yu. Ná tsoꞌo chaꞌ jña yu cñi jiꞌi̱ tyaꞌa ñati̱, chaꞌ caca culiyaꞌ tsa ycuiꞌ ca yu.  
\v 4 Ntsuꞌu chaꞌ culo tsoꞌo yu biꞌ cña jiꞌi̱ nguꞌ tyaꞌa ndiꞌi̱ ti yu, chaꞌ juaꞌa̱ taquiyaꞌ sñiꞌ yu cña nu nclyo yu jiꞌi̱ nguꞌ, chaꞌ cuaꞌni chi̱ sñiꞌ yu loo yu.  
\v 5 Ná caca jiꞌi̱ sca ñati̱ caca loo jiꞌi̱ taju tyaꞌa ñati̱ jiꞌi̱ ycuiꞌ Ndyosi si ná loꞌo culo tsoꞌo yu biꞌ cña toꞌ tyi yu;  
\v 6 biꞌ chaꞌ ná tsoꞌo caca loo sca ñati̱ nu ngusñi ca ti chaꞌ jiꞌi̱ ycuiꞌ Ndyosi, chaꞌ tya lyiji ca tsaꞌa̱ tsoꞌo yu. Ná tyiqueeꞌ lye tsa cuaꞌni tyucuaa tiꞌ yu jiꞌi̱ tyaꞌa yu, loꞌo liꞌ ntsuꞌu chaꞌ xcubeꞌ ycuiꞌ Ndyosi jiꞌi̱ yu ñiꞌya̱ loꞌo xcubeꞌ Ni jiꞌi̱ nu xñaꞌa̱.  
\v 7 Nu ñati̱ nu caca loo biꞌ ni, tsoꞌo si caca yu sca ñati̱ nu nchcuiꞌ nguꞌ quichi̱ jiꞌi̱ yu chaꞌ tsoꞌo ti nduꞌni yu, masi nguꞌ nu ná ndaquiyaꞌ chaꞌ jiꞌi̱ Jesucristo tsiyaꞌ ti chcuiꞌ nguꞌ juaꞌa̱ jiꞌi̱ yu. Loꞌo liꞌ ná caca chcuiꞌ nguꞌ cuentyu jiꞌi̱ yu biꞌ, ná caca cojolaqui nu xñaꞌa̱ jiꞌi̱ yu biꞌ, chaꞌ cuaꞌni yu chaꞌ cuxi. 
\s1 Ñati̱ nu laca cña jiꞌi̱ nguꞌ tyaꞌa ngusñi na chaꞌ jiꞌi̱ Jesús 
\p  
\v 8 Loꞌo juaꞌa̱ ñati̱ nu laca cña jiꞌi̱ nguꞌ tyaꞌa ngusñi na chaꞌ jiꞌi̱ Jesús ni, loꞌo nguꞌ biꞌ ntsuꞌu chaꞌ cuaꞌni nguꞌ xcuiꞌ chaꞌ tsoꞌo. Ná tsoꞌo si tucua chaꞌ ntsuꞌu tyiquee nguꞌ biꞌ loꞌo nduꞌni nguꞌ cña biꞌ; ná tsoꞌo si cuꞌbi nguꞌ biꞌ, ni ná tsoꞌo si jña nguꞌ biꞌ cñi jiꞌi̱ tyaꞌa ñati̱ chaꞌ caca culiyaꞌ tsa ycuiꞌ ca nguꞌ.  
\v 9 Ntsuꞌu chaꞌ xñi tsoꞌo nguꞌ biꞌ lcaa chaꞌ liñi jiꞌi̱ ycuiꞌ Ndyosi, tyaꞌa chaꞌ nu ngusñi lcaa na, chaꞌ juaꞌa̱ tyucui tyiquee nguꞌ cuaꞌni nguꞌ xcuiꞌ chaꞌ tsoꞌo.  
\v 10 Loꞌo juaꞌa̱ ntsuꞌu chaꞌ cuaꞌni cuayáꞌ ma̱ jiꞌi̱ ñati̱ biꞌ, chaꞌ ñaꞌa̱ ma̱ si xcuiꞌ chaꞌ tsoꞌo nduꞌni nguꞌ. Ñati̱ nu nduꞌni tsoꞌo ni, taca caca nguꞌ cña jiꞌi̱ tyaꞌa nguꞌ chaꞌ xtyucua nguꞌ jiꞌi̱ ñaꞌa̱ taju nguꞌ nu ngusñi chaꞌ jiꞌi̱ Jesús, chaꞌ cuentya jiꞌi̱ ycuiꞌ Ndyosi cuaꞌni nguꞌ biꞌ cña liꞌ.  
\v 11 Loꞌo nu nguꞌ cunaꞌa̱ ni, ntsuꞌu chaꞌ cuaꞌni nguꞌ xcuiꞌ chaꞌ tsoꞌo nu loꞌo caca nguꞌ cña chaꞌ xtyucua nguꞌ jiꞌi̱ ñaꞌa̱ taju nguꞌ nu ngusñi chaꞌ jiꞌi̱ Jesús; ná tsoꞌo chaꞌ chcuiꞌ nu cunaꞌa̱ biꞌ cuentyu jiꞌi̱ tyaꞌa nguꞌ loꞌo xaꞌ ñati̱. Ngaꞌa̱ chaꞌ culacua tsoꞌo tiꞌ nu cunaꞌa̱ biꞌ, chaꞌ talo jiꞌi̱ cña nu nda nguꞌ jiꞌi̱.  
\v 12 Ñati̱ nu laca cña jiꞌi̱ ñaꞌa̱ taju nguꞌ nu ngusñi chaꞌ jiꞌi̱ Jesús ni, caja clyoꞌo ñati̱ biꞌ loꞌo sca ti nu cunaꞌa̱; ngaꞌa̱ chaꞌ culo tsoꞌo ñati̱ biꞌ cña jiꞌi̱ sñiꞌ nguꞌ, chaꞌ taquiyaꞌ tsoꞌo lcaa ñati̱ nu ndiꞌi̱ toꞌ tyi nguꞌ chaꞌ nu chcuiꞌ nguꞌ biꞌ.  
\v 13 Loꞌo juaꞌa̱ tsoꞌo tsa chcuiꞌ cua ñaꞌa̱ ca ñati̱ jiꞌi̱ nguꞌ biꞌ si tsoꞌo nduꞌni nguꞌ chaꞌ laca nguꞌ cña, chaꞌ nxtyucua nguꞌ jiꞌi̱ nguꞌ tyaꞌa na; liꞌ tyatí̱ la tiꞌ nguꞌ jiꞌi̱ Jesucristo, loꞌo juaꞌa̱ caca tlyu tyiquee nguꞌ chaꞌ culuꞌu nguꞌ chaꞌ liñi jiꞌi̱ xaꞌ ñati̱. 
\s1 Ñiꞌya̱ laca chaꞌ jiꞌi̱ Jesús nu cua ngusñi na 
\p  
\v 14-15 Yala ti ca̱a̱ naꞌ slo nuꞌu̱, ntiꞌ naꞌ. Juaꞌa̱ nta̱ꞌ, pana ná jlo tiꞌ naꞌ ni jacuaꞌ caca ꞌna, si ntsuꞌu nu tacu̱ꞌ tyucui̱i̱ jnaꞌ; biꞌ chaꞌ juani nscua naꞌ quityi re chaꞌ caca cuayáꞌ la tiꞌ nuꞌu̱ ñiꞌya̱ ngaꞌa̱ chaꞌ cuaꞌni ñati̱ jiꞌi̱ Jesucristo loꞌo tyaꞌa nguꞌ, ñiꞌya̱ nu ntsuꞌu chaꞌ cuaꞌni nguꞌ loꞌo ndyuꞌu tiꞌi̱ nguꞌ tsa tlyu ti. Nduꞌni tlyu na jiꞌi̱ ycuiꞌ Ndyosi nu luꞌú ca, lcaa taju na loꞌo tyaꞌa na, loꞌo juaꞌa̱ ncluꞌu lcaa nguꞌ tyaꞌa na chaꞌ liñi jiꞌi̱ ycuiꞌ nu Xuꞌna na jiꞌi̱ xaꞌ ñati̱. Ná tye chaꞌ liñi biꞌ tsiyaꞌ ti nde chalyuu xquiꞌya lcaa taju nguꞌ tyaꞌa na liꞌ.  
\v 16 Chañi chaꞌ tlyu tsa chaꞌ tsoꞌo jiꞌi̱ Jesucristo nu ngusñi na. Ndiꞌya̱ nchcuiꞌ chaꞌ biꞌ: 
\q1 Nu ngua saꞌni la ni, ni sca ñati̱ ná ngua cuayáꞌ tiꞌ ñiꞌya̱ cuaꞌni lyaá ycuiꞌ Ndyosi jiꞌi̱ nguꞌ; 
\q1 pana nu juani jlo tiꞌ na, xquiꞌya chaꞌ ngula Jesucristo chalyuu, chaꞌ ngua ycuiꞌ Ni sca ñati̱. 
\q1 Loꞌo juaꞌa̱ nchcuiꞌ Xtyiꞌi ycuiꞌ Ni chaꞌ jiꞌi̱ yu, chaꞌ sca ñati̱ nu lubii tsa laca yu; 
\q1 cua naꞌa̱ xca̱ jiꞌi̱ ycuiꞌ Ndyosi jiꞌi̱ Jesús, nu ñati̱ lubii biꞌ. 
\q1 Liꞌ nclyuꞌu nguꞌ chaꞌ jiꞌi̱ Jesucristo biꞌ jiꞌi̱ ñati̱ ca quiñaꞌa̱ tsa quichi̱ tyucui ñaꞌa̱ chalyuu; 
\q1 ngusñi ñati̱ lcaa quichi̱ chaꞌ nu nchcuiꞌ nguꞌ jiꞌi̱ Ni liꞌ. 
\q1 Cua ndyaa Jesús ca slo ycuiꞌ Ndyosi Sti na nde cua̱, loꞌo juani tlyu tsa laca Jesús cajua. 
\c 4  
\s1 Tyaꞌa̱chu̱ꞌ nguꞌ jiꞌi̱ chaꞌ liñi jiꞌi̱ ycuiꞌ Ndyosi ca tiyaꞌ la 
\p  
\v 1 Xquiꞌya Xtyiꞌi ycuiꞌ Ndyosi nchca cuayáꞌ tiꞌ na ñiꞌya̱ caca tyempo nde loo la, chaꞌ ntsuꞌu ñati̱ nu cua ngusñi tyucui̱i̱ jiꞌi̱ Jesucristo nquichaꞌ, loꞌo liꞌ tyuꞌutsuꞌ nguꞌ biꞌ tyucui̱i̱ jiꞌi̱ ycuiꞌ nu Xuꞌna na. Xtyanu ñati̱ biꞌ jiꞌi̱ Ni liꞌ, chaꞌ cñiloꞌo cuiꞌi̱ cuxi nu nduꞌni cña cuentya jiꞌi̱ nu xñaꞌa̱ jiꞌi̱ nguꞌ; tyiji̱loo cuiꞌi̱ cuxi biꞌ jiꞌi̱ nguꞌ biꞌ liꞌ.  
\v 2 Ntsuꞌu nguꞌ nu nchcuiꞌ tucua lo chaꞌ, nu ngaꞌaa ntyujuꞌu tiꞌ chaꞌ ngusñi nguꞌ chaꞌ cuiñi nu nchcuiꞌ nu xñaꞌa̱; jiꞌi̱ nguꞌ cuiñi biꞌ cuna xi nguꞌ tyaꞌa na, tyuꞌutsuꞌ nguꞌ jiꞌi̱ tyucui̱i̱ tsoꞌo liꞌ.  
\v 3 Ncluꞌu nguꞌ cuiñi biꞌ chaꞌ ná tsoꞌo caja clyoꞌo na; ncluꞌu nguꞌ chaꞌ ntsuꞌu tsa na ndacu na nu ná tsoꞌo cacu na, nacui̱ nguꞌ biꞌ. Tlyu tsa chaꞌ cuiñi nu nda nguꞌ biꞌ. Pana ngüiñá ycuiꞌ Ndyosi lcaa na nu ndacu na chaꞌ tsoꞌo ti cacu na jiꞌi̱, lcaa tyaꞌa na nu ntsuꞌu chaꞌ jiꞌna loꞌo Jesucristo; biꞌ chaꞌ tya na xlyaꞌbe jiꞌi̱ ycuiꞌ Ndyosi loꞌo cua cacu ti na, chaꞌ jlo tiꞌ na chaꞌ tsoꞌo jiꞌi̱ ycuiꞌ Ni.  
\v 4 Tsoꞌo tsa cña nguaꞌni Ni, tsoꞌo ngüiñá Ni lcaa lo na; biꞌ chaꞌ ná tsoꞌo si xcua̱a̱ na sca chaꞌ tsoꞌo nu ngüiñá Ni. Xñi na lcaa chaꞌ tsoꞌo biꞌ, loꞌo liꞌ ndiꞌya̱ chcuiꞌ na loꞌo ycuiꞌ Ndyosi: “Tsaa xlyaꞌbe jinuꞌu̱, Ndyosi Sti ya”, ñacui̱ na.  
\v 5 Juaꞌa̱ chcuiꞌ na loꞌo ycuiꞌ Ndyosi chaꞌ nda Ni lcaa na nu tsoꞌo chaꞌ cacu na; culacua̱ Ni jiꞌi̱ lcaa na nu ndacu na liꞌ, chaꞌ chacuayáꞌ jiꞌi̱ ycuiꞌ Ndyosi ndacu na jiꞌi̱. 
\s1 Ñaꞌa̱ ti cuaꞌni tsoꞌo nuꞌu̱ cña jiꞌi̱ ycuiꞌ Ndyosi 
\p  
\v 6 Culuꞌu nuꞌu̱ lcaa chaꞌ nu nscua naꞌ lo quityi re jiꞌi̱ ca taꞌa ñati̱ jiꞌi̱ Jesucristo cajua, chaꞌ caca nuꞌu̱ sca ñati̱ nu tsoꞌo tsa nduꞌni cña jiꞌi̱ Jesucristo, Timoteo. Tyiꞌu tsoꞌo tiꞌ nuꞌu̱ lcaa chaꞌ liñi nu cua ngusñi nuꞌu̱, chaꞌ jiꞌi̱ ycuiꞌ Ni; ñaꞌa̱ ti xñi tsoꞌo nuꞌu̱ tyucui̱i̱ jiꞌi̱ ycuiꞌ nu Xuꞌna na liꞌ, ñiꞌya̱ nu ndyuꞌni ti nuꞌu̱.  
\v 7 Ná taquiyaꞌ nuꞌu̱ jiꞌi̱ cuentyu nu ná nchcuiꞌ chaꞌ liñi jiꞌi̱ ycuiꞌ Ndyosi, chaꞌ cuxi tsa laca chaꞌ biꞌ. Pana nuꞌu̱ ni, ntsuꞌu chaꞌ quiꞌi̱ nuꞌu̱ chaꞌ cuaꞌni nuꞌu̱ xcuiꞌ cña nu ndiya tiꞌ ycuiꞌ Ndyosi.  
\v 8 Tsoꞌo xi chaꞌ nguiꞌi̱ quiyaꞌ na chaꞌ tyaꞌa̱ na, nguiꞌi̱ yaꞌ na chaꞌ cuaꞌni na cña; pana tsoꞌo la si quiꞌi̱ tyiquee na chaꞌ taquiyaꞌ na jiꞌi̱ ycuiꞌ Ndyosi lcaa tyempo. Tsoꞌo ti tyiꞌi̱ na nde chalyuu, nu loꞌo cuaꞌni na cua ñaꞌa̱ ca cña nu ntiꞌ nu Xuꞌna na chaꞌ cuaꞌni na; la cuiꞌ tsoꞌo ti tyiꞌi̱ na ca slo ycuiꞌ Ndyosi, si cuaꞌni na ñiꞌya̱ nu ntiꞌ Ni chaꞌ cuaꞌni na.  
\v 9 Chañi tsa chaꞌ nu nscua naꞌ nde, juaꞌa̱ ntsuꞌu chaꞌ xñi tsoꞌo na chaꞌ biꞌ.  
\v 10 Jlya tiꞌ na jiꞌi̱ ycuiꞌ Ndyosi nu luꞌú ca; biꞌ chaꞌ lye cuaꞌni na cña jiꞌi̱ Ni, masi lyaꞌ tsa tiꞌ nguꞌ jiꞌna. Loꞌo ycuiꞌ Ndyosi ni, cuaꞌni lyaá Ni jiꞌi̱ lcaa ñati̱ si taquiyaꞌ nguꞌ jiꞌi̱ Ni. Loꞌo xñi na chaꞌ jiꞌi̱ Ni, liꞌ ca cuayáꞌ tsoꞌo la tiꞌ na chaꞌ biꞌ. 
\p  
\v 11 Culo nuꞌu̱ cña nu nguscua naꞌ re jiꞌi̱ lcaa nguꞌ tyaꞌa ma̱, culuꞌu tsoꞌo nuꞌu̱ chaꞌ biꞌ jiꞌi̱ nguꞌ.  
\v 12 Ná ta nuꞌu̱ chacuayáꞌ xtyí loꞌo nguꞌ jinuꞌu̱ chaꞌ tya cuañiꞌ nuꞌu̱, ntiꞌ nguꞌ. Cuaꞌni nuꞌu̱ xcuiꞌ cña tsoꞌo chaꞌ ñaꞌa̱ lcaa tyaꞌa ñati̱ jiꞌi̱ Jesucristo; xcuiꞌ chaꞌ tsoꞌo chcuiꞌ nuꞌu̱, xcuiꞌ chaꞌ tsoꞌo cuaꞌni nuꞌu̱, loꞌo juaꞌa̱ tsoꞌo tsa tyuꞌu tyiquee nuꞌu̱ ñaꞌa̱ nuꞌu̱ jiꞌi̱ xaꞌ la ñati̱. Liꞌ ca cuayáꞌ tiꞌ nguꞌ chaꞌ tsoꞌo tsa ngusñi nuꞌu̱ chaꞌ jiꞌi̱ Jesucristo, xquiꞌya chaꞌ xcuiꞌ lubii ti cresiya jinuꞌu̱ ndyuꞌni nuꞌu̱ cña.  
\v 13 Laja loꞌo tya lyiji ti tyalaa naꞌ slo nuꞌu̱, ñaꞌa̱ ti tya chcuiꞌ nuꞌu̱ lcaa chaꞌ nu nscua lo quityi jiꞌi̱ ycuiꞌ Ndyosi loꞌo nguꞌ; tya chcuiꞌ la nuꞌu̱ ñiꞌya̱ laca chaꞌ liñi biꞌ, tya culuꞌu la nuꞌu̱ chaꞌ tsoꞌo biꞌ jiꞌi̱ nguꞌ tsa tlyu ti loꞌo tyuꞌu tiꞌi̱ nguꞌ.  
\v 14 Na cua nda ycuiꞌ Ndyosi tyucui chacuayáꞌ jiꞌi̱ Ni jinuꞌu̱ loꞌo ngusta yaꞌ nguꞌ cusuꞌ hique nuꞌu̱, chaꞌ cuaꞌni nuꞌu̱ cña cuentya jiꞌi̱ ycuiꞌ nu Xuꞌna na. Cua nchcuiꞌ nguꞌ cuentya jiꞌi̱ Xtyiꞌi ycuiꞌ Ndyosi chaꞌ cuaꞌni nuꞌu̱ cña biꞌ; biꞌ chaꞌ cuiꞌya tsoꞌo nuꞌu̱ cuentya jiꞌi̱ chaꞌ tsoꞌo nu cua nda ycuiꞌ Ndyosi jinuꞌu̱ tsa̱ biꞌ, chaꞌ talo nuꞌu̱ jiꞌi̱ cña nu ntsuꞌu jinuꞌu̱. 
\p  
\v 15 Loꞌo ycuiꞌ nuꞌu̱ ni, cuiꞌya tsoꞌo nuꞌu̱ cuentya jiꞌi̱ lcaa chaꞌ nu nguscua naꞌ nde; liꞌ ñaꞌa̱ nguꞌ chaꞌ cua ndyaca tsaꞌa̱ tsoꞌo nuꞌu̱ chaꞌ caca nuꞌu̱ loo jiꞌi̱ nguꞌ.  
\v 16 Talo nuꞌu̱ jiꞌi̱ cña biꞌ. Cuaꞌa nuꞌu̱ jiꞌi̱ ycuiꞌ ca chaꞌ xcuiꞌ chaꞌ tsoꞌo ti cuaꞌni nuꞌu̱. Tsoꞌo ti culuꞌu nuꞌu̱ jiꞌi̱ nguꞌ tyaꞌa na, chaꞌ juaꞌa̱ cuna tsoꞌo nguꞌ chaꞌ nu ncluꞌu nuꞌu̱ jiꞌi̱ nguꞌ, chaꞌ cuaꞌni lyaá ycuiꞌ Ndyosi jiꞌi̱ nguꞌ biꞌ liꞌ. Loꞌo juaꞌa̱ cuaꞌni lyaá Ni jinuꞌu̱ liꞌ. 
\c 5  
\s1 Tsoꞌo ti cuaꞌni na loꞌo tyaꞌa ngusñi na chaꞌ jiꞌi̱ Jesús 
\p  
\v 1 Ná cuaꞌni tyaala nuꞌu̱ jiꞌi̱ sca nguꞌ cusuꞌ si nguaꞌni cuxi yu; ta nuꞌu̱ sca cui̱i̱ loꞌo yu ñiꞌya̱ loꞌo nchcuiꞌ na loꞌo sti na. La cuiꞌ ti chaꞌ loꞌo nu nguꞌ quiꞌyu cuañiꞌ ni, ta sca cui̱i̱ loꞌo nguꞌ ñiꞌya̱ loꞌo ncluꞌu na jiꞌi̱ tyaꞌa na.  
\v 2 Loꞌo sca maꞌ cusuꞌ ni, ta sca cui̱i̱ loꞌo maꞌ ñiꞌya̱ loꞌo nchcuiꞌ na loꞌo xtyaꞌa̱ na; la cuiꞌ ti chaꞌ loꞌo nu nguꞌ cunaꞌa̱ cuañiꞌ ni, ta sca cui̱i̱ loꞌo nguꞌ ñiꞌya̱ loꞌo ncluꞌu na jiꞌi̱ sca nu cunaꞌa̱ tyaꞌa na. Pana xcuiꞌ lubii ti cresiya jinuꞌu̱ ñaꞌa̱ nuꞌu̱ jiꞌi̱ nguꞌ biꞌ. 
\p  
\v 3 Ntsuꞌu chaꞌ ñaꞌa̱si̱i̱ nguꞌ jiꞌi̱ lcaa nguꞌ cunaꞌa̱ tiꞌi si cua ngujuii nu laca clyoꞌo nguꞌ, si ndyanu ycuiꞌ ti nguꞌ.  
\v 4 Si ntsuꞌu sñiꞌ nu cunaꞌa̱ tiꞌi, masi sca sñiꞌ steꞌ, ntsuꞌu chaꞌ ñaꞌa̱si̱i̱ nguꞌ biꞌ jiꞌi̱ xtyaꞌa̱ nguꞌ liꞌ; ngaꞌa̱ chaꞌ ca tsaꞌa̱ sñiꞌ nguꞌ chaꞌ ñaꞌa̱si̱i̱ nguꞌ jiꞌi̱ nguꞌ cusuꞌ jiꞌi̱, ñiꞌya̱ loꞌo ngunaꞌa̱si̱i̱ nguꞌ cusuꞌ biꞌ jiꞌi̱ sñiꞌ nguꞌ loꞌo ngua cuañiꞌ nguꞌ. Biꞌ laca cña nu ndacui jiꞌi̱ nguꞌ cuañiꞌ chaꞌ cuaꞌni nguꞌ cuentya jiꞌi̱ nguꞌ cusuꞌ jiꞌi̱, chaꞌ tsoꞌo ntsuꞌu tyiquee ycuiꞌ Ndyosi loꞌo ñaꞌa̱ Ni jiꞌi̱ nguꞌ cuañiꞌ nu ñaꞌa̱si̱i̱ tsoꞌo jiꞌi̱ nguꞌ cusuꞌ jiꞌi̱.  
\v 5 Sca ti jiꞌi̱ ycuiꞌ Ndyosi ndu̱ tiꞌ nguꞌ cunaꞌa̱ tiꞌi nu chañi chaꞌ ndyanu ycuiꞌ ti nguꞌ; sca ti ycuiꞌ Ni xtyucua Ni jiꞌi̱ nguꞌ ntiꞌ nguꞌ, biꞌ chaꞌ nchcuiꞌ nguꞌ loꞌo ycuiꞌ Ndyosi tsa̱ loꞌo talya, ndijña nguꞌ jiꞌi̱ Ni na ca nu lyiji jiꞌi̱ nguꞌ.  
\v 6 Siꞌi juaꞌa̱ nduꞌni nu cunaꞌa̱ tiꞌi nu ndyuꞌni cua ñaꞌa̱ ca chaꞌ, ñiꞌya̱ nu ntiꞌ ti cresiya jiꞌi̱ ycuiꞌ nguꞌ; ntiꞌ nguꞌ chaꞌ tsoꞌo ti ndiꞌi̱ nguꞌ chalyuu, pana cua tye ti chaꞌ jiꞌi̱ nguꞌ biꞌ cuentya jiꞌi̱ ycuiꞌ Ndyosi.  
\v 7 Ntsuꞌu chaꞌ culo nuꞌu̱ cña jiꞌi̱ lcaa nguꞌ biꞌ, chaꞌ ná caca sta xaꞌ la ñati̱ quiꞌya jiꞌi̱ cuꞌma̱ ñati̱ jiꞌi̱ Jesucristo xquiꞌya nguꞌ cunaꞌa̱ tiꞌi biꞌ.  
\v 8 Ná tsoꞌo nduꞌni ñati̱ nu ná ndube tiꞌ jiꞌi̱ tyaꞌa, masi jiꞌi̱ sti nguꞌ, masi jiꞌi̱ xtyaꞌa̱ nguꞌ, masi jiꞌi̱ sñiꞌ nguꞌ; chaꞌ cuiñi nchcuiꞌ nguꞌ loꞌo nacui̱ nguꞌ chaꞌ ngusñi nguꞌ chaꞌ jiꞌi̱ Jesucristo si ná ñaꞌa̱si̱i̱ nguꞌ jiꞌi̱ tyaꞌa nguꞌ, chaꞌ tsoꞌo la ndyuꞌni xaꞌ ñati̱ nu ná ndaquiyaꞌ chaꞌ jiꞌi̱ Jesucristo tsiyaꞌ ti. 
\p  
\v 9 Tsoꞌo la scua nguꞌ cusuꞌ xtañi lcaa nu cunaꞌa̱ tiꞌi nu cua ndye snayala yija̱ jiꞌi̱, maꞌ cusuꞌ nu sca ti quiyaꞌ ngujui clyoꞌo, nu sca ti loꞌo clyoꞌo maꞌ ngutiꞌi̱ maꞌ chalyuu.  
\v 10 Scua nguꞌ xtañi maꞌ cusuꞌ nu nchcuiꞌ nguꞌ jiꞌi̱ chaꞌ tsoꞌo tsa cña nduꞌni maꞌ cusuꞌ biꞌ: si cua nguaꞌni cuꞌú tsoꞌo maꞌ jiꞌi̱ nu sube; si cua nda maꞌ su tyiꞌi̱ ñati̱ nu lijya̱ tyijyuꞌ; si cua nguxtyucua maꞌ jiꞌi̱ tyaꞌa ñati̱ jiꞌi̱ Jesucristo, masi tlyu cña ntsuꞌu chaꞌ cuaꞌni maꞌ; si ngua tyaꞌna tiꞌ maꞌ jiꞌi̱ ñati̱ nu quicha tiꞌ. Si juaꞌa̱ xcuiꞌ cña tsoꞌo nduꞌni maꞌ cusuꞌ biꞌ, scua nguꞌ xtañi maꞌ lo quityi biꞌ lacua. 
\p  
\v 11-12 Ná scua nguꞌ xtañi nu cunaꞌa̱ cuañiꞌ la nu ndyanu tiꞌi, chaꞌ ntsuꞌu quiyaꞌ ná talo nu nguꞌ cuañiꞌ biꞌ. Pana nu cunaꞌa̱ nu nscua xtañi lo quityi ni, sca ti cuaꞌni nguꞌ cña jiꞌi̱ Jesucristo ntiꞌ nguꞌ, biꞌ chaꞌ ngüiñi chaꞌ jiꞌi̱ nguꞌ loꞌo ycuiꞌ Ndyosi liꞌ. Ñiꞌya̱ caca si tiyaꞌ la xaꞌ caja clyoꞌo nu cunaꞌa̱ cuañiꞌ biꞌ, loꞌo liꞌ ngaꞌaa cuaꞌni nguꞌ ñiꞌya̱ nu nacui̱ nguꞌ chaꞌ cuaꞌni nguꞌ cuentya jiꞌi̱ Jesucristo liꞌ, juaꞌa̱ ntsuꞌu quiꞌya jiꞌi̱ nu cunaꞌa̱ biꞌ liꞌ.  
\v 13 Biꞌ chaꞌ tsoꞌo la si ná scua nguꞌ tsiyaꞌ ti xtañi nu cunaꞌa̱ cuañiꞌ nu ndyanu tiꞌi. Ná tyiqueeꞌ xcuiꞌ paseya ti tyaꞌa̱ nguꞌ cuañiꞌ biꞌ slo ñati̱; pana si juaꞌa̱ cuaꞌni nguꞌ, caca taja nguꞌ cunaꞌa̱ biꞌ, chcuiꞌ tsa nguꞌ cuentyu jiꞌi̱ xaꞌ ñati̱ liꞌ, masi jiꞌi̱ tyaꞌa nguꞌ, masi jiꞌi̱ xaꞌ la ñati̱. Ni siꞌi sca ti chaꞌ taja nu cunaꞌa̱ tiꞌi nu nduꞌni juaꞌa̱, masi loꞌo chcuiꞌ tsa nguꞌ cunaꞌa̱ biꞌ loꞌo tyaꞌa nguꞌ lcua ti lo chaꞌ nu ná tsoꞌo chaꞌ chcuiꞌ na.  
\v 14 Biꞌ chaꞌ tsoꞌo la si xaꞌ caja clyoꞌo nu cunaꞌa̱ cuañiꞌ nu ndyanu tiꞌi, ntiꞌ naꞌ; caja sñiꞌ nguꞌ liꞌ, ñaꞌa̱si̱i̱ nguꞌ toꞌ tyi ycuiꞌ nguꞌ, chaꞌ ná caja ñiꞌya̱ nu sta nguꞌ quiꞌya jiꞌna xquiꞌya nu cunaꞌa̱ biꞌ.  
\v 15 Juaꞌa̱ nta̱ꞌ chaꞌ cuaꞌni ma̱, chaꞌ cua ntsuꞌu xi nguꞌ cunaꞌa̱ cuañiꞌ nu ndyanu tiꞌi nu cua ngulochu̱ꞌ jiꞌi̱ chaꞌ jiꞌi̱ ycuiꞌ Ndyosi, chaꞌ cua ngusñi nguꞌ tyucui̱i̱ jiꞌi̱ Satanás nu xñaꞌa̱ liꞌ. 
\p  
\v 16 Culo nuꞌu̱ cña jiꞌi̱ ca taꞌa ñati̱ jiꞌi̱ Jesucristo jua, masi jiꞌi̱ nguꞌ quiꞌyu, masi jiꞌi̱ nguꞌ cunaꞌa̱, chaꞌ ñaꞌa̱si̱i̱ nguꞌ jiꞌi̱ nu cunaꞌa̱ tiꞌi tyaꞌa nguꞌ; ná xtyanu nguꞌ jiꞌi̱ nu cunaꞌa̱ tiꞌi tyaꞌa nguꞌ chaꞌ caca biꞌ cuentya jiꞌi̱ taju ñati̱ jiꞌi̱ Jesucristo. Liꞌ caca xtyucua tyucui taju nguꞌ biꞌ jiꞌi̱ nu cunaꞌa̱ nu chañi chaꞌ tiꞌi nguꞌ, nu nguꞌ cunaꞌa̱ tiꞌi nu ná ntsuꞌu ni sca ñati̱ jiꞌi̱ chaꞌ xtyucua jiꞌi̱. 
\p  
\v 17 Cuaꞌni chi̱ ma̱ loo nguꞌ cusuꞌ nu laca loo jiꞌi̱ taju jiꞌi̱ ma̱ si tsoꞌo ti nduꞌni nguꞌ loꞌo ma̱. Lye la cuaꞌni chi̱ ma̱ loo nguꞌ cusuꞌ nu nchcuiꞌ chaꞌ jiꞌi̱ ycuiꞌ Ndyosi loꞌo ma̱, nguꞌ cusuꞌ nu ncluꞌu chaꞌ biꞌ jiꞌi̱ ma̱. Ta ma̱ cayaꞌ jiꞌi̱ nguꞌ cusuꞌ biꞌ.  
\v 18 La cuiꞌ ti chaꞌ nscua lo quityi jiꞌi̱ ycuiꞌ Ndyosi nu nchcuiꞌ ndiꞌya̱: “Ná sca̱ꞌ ma̱ tuꞌba toro laja loꞌo nxatá niꞌ jiꞌi̱ trigo chaꞌ tyuꞌu siꞌyu; cacu niꞌ xi, tsoꞌo la liꞌ”, nacui̱ quityi. Xaꞌ nchcuiꞌ lo quityi biꞌ ndiꞌya̱: “Liñi ndyuꞌu chaꞌ xñi nguꞌ cayaꞌ lo cña nu nguaꞌni nguꞌ”, nacui̱ quityi. 
\p  
\v 19 Ná tucuá nuꞌu̱ chaꞌ jiꞌi̱ nguꞌ si sta sca ñati̱ quiꞌya jiꞌi̱ sca nguꞌ cusuꞌ biꞌ; sca ti si stuꞌba ti sta tucua sna tyaꞌa ñati̱ quiꞌya biꞌ jiꞌi̱ nguꞌ cusuꞌ biꞌ, liꞌ ngaꞌa̱ chaꞌ tucuá nuꞌu̱ chaꞌ jiꞌi̱ nguꞌ.  
\v 20 Si chañi chaꞌ ndyuꞌni nguꞌ cusuꞌ biꞌ chaꞌ cuxi, liꞌ chcuiꞌ nuꞌu̱ loꞌo nu cusuꞌ biꞌ slo tyucui taju ñati̱ jiꞌi̱ Jesucristo biꞌ, chaꞌ cube tiꞌ lcaa nguꞌ, chaꞌ ná cuaꞌni cuxi nguꞌ juaꞌa̱.  
\v 21 Nclyo naꞌ cña biꞌ jinuꞌu̱, Timoteo, chaꞌ cuaꞌni nuꞌu̱ lcaa cña nu nguscua naꞌ lo quityi re; loꞌo juaꞌa̱ jlo tiꞌ ycuiꞌ Ndyosi chaꞌ nu nguscua naꞌ re, jlo tiꞌ Jesucristo, jlo tiꞌ xca̱ nu ngusubi ycuiꞌ Ndyosi jiꞌi̱. Nu loꞌo ntsuꞌu chaꞌ cuaꞌni cuayáꞌ nuꞌu̱ jiꞌi̱ sca nguꞌ tyaꞌa ma̱ ni, jatya nuꞌu̱ xi chaꞌ ca cuayáꞌ tsoꞌo tiꞌ nuꞌu̱ lcaa lo chaꞌ jiꞌi̱ nguꞌ biꞌ, chaꞌ sca ti cuayáꞌ liñi tyuꞌu chaꞌ jiꞌi̱ nguꞌ biꞌ, masi tyaꞌa tsoꞌo nuꞌu̱, masi chaca tyaꞌa nguꞌ.  
\v 22 Ná yala tsa cuaꞌni nuꞌu̱ chaꞌ sta yaꞌ nuꞌu̱ hichu̱ꞌ sca ñati̱, chaꞌ caca yu loo jiꞌi̱ sca taju ñati̱ jiꞌi Jesucristo; jatya xi chaꞌ ñaꞌa̱ si chañi chaꞌ ñati̱ nu xcuiꞌ nduꞌni chaꞌ tsoꞌo laca yu, si chañi chaꞌ tsoꞌo tsa cña ndyuꞌni yu, chaꞌ ná tyanu quiꞌya yu hichu̱ꞌ nuꞌu̱ si ntsuꞌu chaꞌ cuxi neꞌ cresiya jiꞌi̱ yu biꞌ. Loꞌo nuꞌu̱ ni, xcuiꞌ lubii ti cresiya jinuꞌu̱ cuaꞌni nuꞌu̱ cña. 
\p  
\v 23 Jlo tiꞌ naꞌ chaꞌ quicha xi tiꞌ nuꞌu̱; biꞌ chaꞌ ngaꞌaa coꞌo nuꞌu̱ xcuiꞌ hitya ti, tsoꞌo coꞌo nuꞌu̱ xi vino nu ndyuꞌu lo siꞌyu losuꞌ chaꞌ caca joꞌo neꞌ nuꞌu̱. 
\p  
\v 24 Ntsuꞌu ñati̱ nu ntsuꞌu quiꞌya jiꞌi̱, pana jlo tiꞌ xaꞌ ñati̱ ni chaꞌ cuxi ndyuꞌni nguꞌ biꞌ, masi bilya caca cuayáꞌ jiꞌi̱ nguꞌ biꞌ. Loꞌo juaꞌa̱ ntsuꞌu ñati̱ nu cuxi tyiquee nguꞌ, pana ná jlo tiꞌ xaꞌ ñati̱ ni chaꞌ cuxi ndyuꞌni nguꞌ biꞌ; loꞌo caca cuayáꞌ jiꞌi̱ nguꞌ biꞌ, hasta liꞌ ca cuayáꞌ tiꞌ xaꞌ ñati̱ ñiꞌya̱ laca quiꞌya nu ntsuꞌu jiꞌi̱ nguꞌ biꞌ.  
\v 25 La cuiꞌ juaꞌa̱ loꞌo ñati̱ nu tsoꞌo tsa tyiquee, jlo tiꞌ xaꞌ ñati̱ ni chaꞌ tsoꞌo nu ndyuꞌni nguꞌ biꞌ. Pana si ntsuꞌu ñati̱ nu tsoꞌo tyiquee, nu ná jlo tiꞌ xaꞌ ñati̱ jiꞌi̱, ca nde loo la tyuꞌu tucua chaꞌ, ca cuayáꞌ tiꞌ nguꞌ jiꞌi̱ chaꞌ tsoꞌo nu nguaꞌni nguꞌ biꞌ liꞌ. 
\c 6  
\p  
\v 1 Lcaa ñati̱ jiꞌi̱ Jesucristo nu laca msu nu ngüiꞌya ñati̱ ntsuꞌu chaꞌ cuaꞌni chi̱ nguꞌ loo xuꞌna nguꞌ, masi tiꞌi̱ tsa cña nu nda xuꞌna jiꞌi̱. Liꞌ ná caca chcuiꞌ cuxi nguꞌ jiꞌi̱ ycuiꞌ Ndyosi xquiꞌya msu biꞌ, ni ná caca chcuiꞌ cuxi nguꞌ jiꞌi̱ chaꞌ jiꞌi̱ Jesucristo nu ncluꞌu na.  
\v 2 Ñati̱ nu laca msu nu cua ngüiꞌya tyaꞌa ñati̱ jiꞌi̱ Jesucristo saꞌni la ni, ná tsoꞌo si cuaꞌni tyixi msu biꞌ loꞌo xuꞌna nguꞌ, chaꞌ stuꞌba ntsuꞌu tyiquee nguꞌ loꞌo Jesucristo; ntsuꞌu chaꞌ lye la cuaꞌni chi̱ msu biꞌ loo xuꞌna nguꞌ, tsoꞌo la cuaꞌni msu biꞌ cña jiꞌi̱ xuꞌna nguꞌ, chaꞌ nu tyaꞌa ngusñi nguꞌ chaꞌ jiꞌi̱ Jesús laca nguꞌ juani, loꞌo juaꞌa̱ ntsuꞌu tyiquee nguꞌ ñaꞌa̱ nguꞌ jiꞌi̱ tyaꞌa nguꞌ. Stuꞌba ti ngusñi nguꞌ chaꞌ jiꞌi̱ Jesucristo, biꞌ chaꞌ culuꞌu nuꞌu̱ chaꞌ biꞌ jiꞌi̱ nguꞌ, loꞌo juaꞌa̱ culo nuꞌu̱ cña jiꞌi̱ nguꞌ chaꞌ cuaꞌni nguꞌ lcaa lo chaꞌ nu nscua lo quityi re. 
\s1 Ná culacua tsa tiꞌ na chaꞌ jiꞌi̱ cñi 
\p  
\v 3 Liñi tsa chaꞌ jiꞌi̱ ycuiꞌ Jesucristo nu Xuꞌna na; cua ñaꞌa̱ ca ñati̱ nu ncluꞌu xi xaꞌ la chaꞌ jiꞌi̱ ma̱, ná liñi ndyuꞌni nu ñati̱ biꞌ, ná ntajaꞌa̱ nguꞌ tsiyaꞌ ti taquiyaꞌ nguꞌ jiꞌi̱ chaꞌ liñi biꞌ.  
\v 4 Na ncluꞌu nguꞌ biꞌ xaꞌ la chaꞌ xquiꞌya chaꞌ ná jlo tiꞌ nguꞌ biꞌ tsiyaꞌ ti, chaꞌ tyixi tsa tyiquee nguꞌ. Ná tsoꞌo tyiquee nguꞌ biꞌ, chaꞌ xcuiꞌ na ndiya tsa tiꞌ nguꞌ xu̱u̱ tyaꞌa nguꞌ cuentya jiꞌi̱ scaa chaꞌ nu nchcuiꞌ nguꞌ; ná tsoꞌo cña nu nduꞌni nguꞌ biꞌ, chaꞌ juaꞌa̱ caca liyeꞌ tiꞌ nguꞌ jiꞌi̱ tyaꞌa nguꞌ, loꞌo juaꞌa̱ xu̱u̱ tyaꞌa nguꞌ biꞌ liꞌ, chaꞌ xcuiꞌ cuentyu chcuiꞌ nguꞌ jiꞌi̱ tyaꞌa nguꞌ, loꞌo juaꞌa̱ sta nguꞌ quiꞌya laja ti jiꞌi̱ tyaꞌa nguꞌ liꞌ.  
\v 5 Lye tsa nchcuiꞌ nguꞌ biꞌ, xquiꞌya chaꞌ ná ngusñi tsoꞌo nguꞌ chaꞌ liñi jiꞌi̱ ycuiꞌ Ndyosi, juaꞌa̱ ngaꞌaa nclyacua tsoꞌo tiꞌ nguꞌ biꞌ; chaꞌ cuiñi ti nduꞌni tlyu nguꞌ biꞌ jiꞌi̱ ycuiꞌ Ndyosi chaꞌ caja cñi jiꞌi̱ nguꞌ, ntiꞌ nguꞌ. Ná tyaꞌa̱ nuꞌu̱ stuꞌba ti loꞌo nguꞌ biꞌ.  
\v 6 Chañi chaꞌ ntsuꞌu xi chaꞌ tsoꞌo nu tyacua jiꞌna xquiꞌya ycuiꞌ Ndyosi, si cuaꞌni tlyu na jiꞌi̱ Ni tyucui tyiquee na; pana sca ti si nguaalaꞌ tiꞌ na loꞌo lcaa chaꞌ tsoꞌo nu ntsuꞌu jiꞌna nde chalyuu.  
\v 7 Ná sca na loꞌo jiꞌna nu loꞌo ngula na chalyuu, loꞌo juaꞌa̱ ná sca na tyaloꞌo na loꞌo cajaa na.  
\v 8 Cuayáꞌ jiꞌna nde chalyuu si ntsuꞌu na cacu na, si ntsuꞌu steꞌ na;  
\v 9 pana ntsuꞌu ñati̱ nu ntiꞌ tsa chaꞌ caca culiyaꞌ nguꞌ. Ná tsoꞌo chaꞌ biꞌ, chaꞌ liꞌ cuaꞌni cuayáꞌ nu xñaꞌa̱ jiꞌi̱ nguꞌ si caca tyuꞌu chaꞌ cuxi tyiquee nguꞌ; tye chalyuu jiꞌi̱ nguꞌ liꞌ, chcunaꞌ cresiya jiꞌi̱ nguꞌ.  
\v 10 Loꞌo ntsuꞌu tsa tyiquee ñati̱ jiꞌi̱ cñi, biꞌ laca su̱u̱ quiñaꞌa̱ tsa chaꞌ cuxi. Ntsuꞌu ñati̱ nu tiji̱ꞌ tsa tiꞌ jiꞌi̱ cñi, biꞌ chaꞌ cua ngulochu̱ꞌ nguꞌ chaꞌ jiꞌi̱ nu Xuꞌna na, chaꞌ ngaꞌaa taquiyaꞌ nguꞌ biꞌ chaꞌ jiꞌi̱ Ni. Xñiꞌi̱ tsa tiꞌ ndiꞌi̱ nguꞌ biꞌ liꞌ, chaꞌ nchcubeꞌ nguꞌ jiꞌi̱ ycuiꞌ ca nguꞌ. 
\s1 Tya nda Pablo xi chaꞌ loꞌo yu Timoteo 
\p  
\v 11 Loꞌo nuꞌu̱ Timoteo, ñati̱ jiꞌi̱ ycuiꞌ Ndyosi laca nuꞌu̱, biꞌ chaꞌ xtyanu nuꞌu̱ jiꞌi̱ lcaa chaꞌ cuxi biꞌ; xcuiꞌ chaꞌ liñi cuaꞌni nuꞌu̱, cua ñaꞌa̱ ca lo chaꞌ tsoꞌo nu ntiꞌ ycuiꞌ Ndyosi chaꞌ cuaꞌni na. Tya nxñi tsoꞌo nuꞌu̱ chaꞌ jiꞌi̱ ycuiꞌ Ndyosi, juaꞌa̱ cuaꞌni nuꞌu̱ chaꞌ tsoꞌo tsa ntsuꞌu tyiquee nuꞌu̱ ñaꞌa̱ nuꞌu̱ jiꞌi̱ lcaa ñati̱; talo nuꞌu̱ masi xcubeꞌ nguꞌ jinuꞌu̱, juaꞌa̱ cuaꞌni tyaꞌna tiꞌ nuꞌu̱ jiꞌi̱ ñati̱.  
\v 12 Tyucui tyiquee nuꞌu̱ cuaꞌni nuꞌu̱ cña jiꞌi̱ ycuiꞌ nu Xuꞌna na, xquiꞌya chaꞌ ngusñi tsoꞌo nuꞌu̱ chaꞌ jiꞌi̱ Ni. Cua jlo tiꞌ nuꞌu̱ chaꞌ ná ngaꞌa̱ chaꞌ tye chalyuu jinuꞌu̱, chaꞌ ngusubi ycuiꞌ Ndyosi jinuꞌu̱, loꞌo liꞌ cua nda nuꞌu̱ chaꞌ loꞌo tyu̱u̱ tyaꞌa ñati̱ ñiꞌya̱ ngua loꞌo ngusñi nuꞌu̱ chaꞌ jiꞌi̱ Jesucristo; siꞌi sca chaꞌ cuaana ti ngua biꞌ.  
\v 13 Culo naꞌ cña jinuꞌu̱ juani chacuayáꞌ jiꞌi̱ ycuiꞌ Ndyosi nu nduꞌni cuꞌú jiꞌi̱ lcaa na luꞌú nu ntsuꞌu chalyuu; la cuiꞌ juaꞌa̱ culo naꞌ cña jinuꞌu̱ chacuayáꞌ jiꞌi̱ Jesucristo nu tsoꞌo tsa nguxacui̱ chaꞌ jiꞌi̱ Poncio Pilato nu laca loo nu loꞌo ngua cuayáꞌ jiꞌi̱ Jesús. Ná ntsi̱i̱ yu nguxacui̱ yu chaꞌ cuentya jiꞌi̱ cña nu ndyaca jiꞌi̱ yu chaꞌ nu sca ti Sñiꞌ ycuiꞌ Ndyosi laca yu.  
\v 14 Culo naꞌ cña jinuꞌu̱ chaꞌ xcuiꞌ tsoꞌo ti cuaꞌni nuꞌu̱, chaꞌ cuaꞌni lyiji nuꞌu̱ lcaa chaꞌ nu nguscua naꞌ lo quityi re, loꞌo juaꞌa̱ ná ta nuꞌu̱ tyempo nu caja ñiꞌya̱ sta nguꞌ quiꞌya jinuꞌu̱. Na ntajatya na jiꞌi̱ Jesucristo nu Xuꞌna na ñaꞌa̱ cuayáꞌ tya̱a̱ Ni chaca quiyaꞌ,  
\v 15 chaꞌ tsa̱ nu ntiꞌ ycuiꞌ Ndyosi chaꞌ ca̱a̱ Jesús, liꞌ tyuꞌu tucua Ni chaca quiyaꞌ. Nu ycuiꞌ Ndyosi ni, tsoꞌo ntsuꞌu tyiquee Ni tyucui tyempo, loꞌo juaꞌa̱ ycuiꞌ Ni laca loo tsiyaꞌ ti; laca Ni rey nu tlyu la, nu Xuꞌna nu laca loo la.  
\v 16 Ná ntsuꞌu chaꞌ cajaa ycuiꞌ Ndyosi tsiyaꞌ ti, ná tye chaꞌ jiꞌi̱ Ni. Ndubi tsa ñaꞌa̱ xee ca su ntucua ycuiꞌ Ndyosi, ni ná ntsuꞌu ñati̱ nu caca tsaa ca slo Ni juaꞌa̱ ti xquiꞌya xee tlyu biꞌ. La cuiꞌ juaꞌa̱ ná ntsuꞌu ñati̱ nu cua naꞌa̱ jiꞌi̱ ycuiꞌ Ndyosi, chaꞌ ná nchca ñaꞌa̱ ñati̱ jiꞌi̱ Ni nde chalyuu. Biꞌ chaꞌ cuaꞌni chi̱ na loo ycuiꞌ Ndyosi lacua, chaꞌ laca Ni nu tlyu la. Juaꞌa̱ laca chaꞌ tuꞌni. 
\p  
\v 17 Loꞌo juaꞌa̱ ntsuꞌu chaꞌ culo nuꞌu̱ cña jiꞌi̱ nguꞌ culiyaꞌ tyaꞌa ngusñi ma̱ chaꞌ jiꞌi̱ Jesús, chaꞌ ná cuaꞌni tyucuaa tiꞌ nguꞌ biꞌ loꞌo tyaꞌa nguꞌ. Ná tsoꞌo si xcuiꞌ culacua tsa tiꞌ nguꞌ biꞌ jiꞌi̱ cñi jiꞌi̱ nguꞌ; la cuiꞌ ti ná culacua tsa tiꞌ nguꞌ jiꞌi̱ lcaa chaꞌ tsoꞌo nu ntsuꞌu jiꞌi̱ nguꞌ, chaꞌ yala ti ndye cñi jiꞌna. Tsoꞌo la si cube tiꞌ nguꞌ biꞌ jiꞌi̱ ycuiꞌ Ndyosi nu luꞌú ca, chaꞌ cua nda Ni lcaa lo na nu ntsuꞌu jiꞌna chaꞌ caca tsoꞌo tyiquee na nde chalyuu.  
\v 18 Culo nuꞌu̱ cña jiꞌi̱ nguꞌ culiyaꞌ biꞌ ndiꞌya̱: Xcuiꞌ chaꞌ tsoꞌo cuaꞌni nguꞌ; cuaꞌni tyaꞌna tiꞌ nguꞌ jiꞌi̱ xaꞌ ñati̱, loꞌo juaꞌa̱ tyiꞌu tiꞌ nguꞌ jiꞌi̱ nguꞌ tiꞌi, chaꞌ ta nguꞌ na nu lyiji jiꞌi̱ nguꞌ tiꞌi biꞌ.  
\v 19 Juaꞌa̱ ti caca culiyaꞌ nguꞌ slo ycuiꞌ Ndyosi xquiꞌya chaꞌ tsoꞌo nu nguaꞌni nguꞌ ca nde, xquiꞌya chaꞌ ngusñi nguꞌ chaꞌ tsoꞌo jiꞌi̱ ycuiꞌ Ni. Ná ngaꞌa̱ chaꞌ tye chalyuu jiꞌi̱ nguꞌ biꞌ liꞌ. 
\s1 Chaca tya cña nclyo Pablo jiꞌi̱ yu 
\p  
\v 20 Loꞌo nuꞌu̱ Timoteo, cuaꞌni tyacaꞌa nuꞌu̱ jiꞌi̱ chaꞌ nu ntsuꞌu chaꞌ culuꞌu nuꞌu̱ jiꞌi̱ ñati̱ cuentya jiꞌi̱ ycuiꞌ Ndyosi. Ná taquiyaꞌ nuꞌu̱ tsiyaꞌ ti jiꞌi̱ chaꞌ cuxi nu nchcuiꞌ nu nguꞌ cuiñi biꞌ. Jlo tsa tiꞌ ycuiꞌ ca nguꞌ, juaꞌa̱ ntiꞌ nu nguꞌ cuiñi biꞌ; pana ná nda nguꞌ biꞌ cuentya tsiyaꞌ ti ñiꞌya̱ laca sca chaꞌ liñi.  
\v 21 Ntsuꞌu nguꞌ nu jlya tiꞌ chaꞌ cuiñi nu nchcuiꞌ nguꞌ cuiñi biꞌ, pana juani ngaꞌaa ndyaꞌa̱ stuꞌba nguꞌ biꞌ loꞌo nguꞌ tyaꞌa ngusñi na chaꞌ jiꞌi̱ ycuiꞌ Ndyosi. 
\p Ñaꞌa̱ ti cuaꞌni ycuiꞌ Ndyosi chaꞌ tsoꞌo loꞌo nuꞌu̱. Juaꞌa̱ caca chaꞌ lacua.