\id 1TH  
\h 1 TESALONICENSES 
\toc1 Quityi nu nguscua San Pablo ndyaa ca slo ñati̱ jiꞌi̱ Jesucristo nde quichi̱ Tesalónica 
\toc2 1 TESALONICENSES 
\toc3 1 Ts. 
\mt1 Quityi nu nguscua San Pablo ndyaa ca slo ñati̱ jiꞌi̱ Jesucristo nde quichi̱ Tesalónica 
\c 1  
\p  
\v 1 Pablo laca naꞌ. Loꞌo Silvano loꞌo Timoteo ndiꞌi̱ nguꞌ ca nde loꞌo naꞌ. Nscua ya quityi re chaꞌ tsaa slo cuꞌma̱, ñaꞌa̱ taju ti ma̱ nguꞌ quichi̱ Tesalónica nu ntsuꞌu chaꞌ jiꞌi̱ ma̱ loꞌo ycuiꞌ Ndyosi Sti na, juaꞌa̱ ntsuꞌu chaꞌ jiꞌi̱ ma̱ loꞌo Jesucristo nu Xuꞌna na. Ntiꞌ tsa ya chaꞌ ñaꞌa̱ ti cuaꞌni ycuiꞌ Ndyosi chaꞌ tsoꞌo loꞌo ma̱, chaꞌ cuaꞌni Ni chaꞌ ti̱ ti tyiꞌi̱ tyiquee ma̱. 
\s1 Tsoꞌo tsa ngusñi nguꞌ biꞌ chaꞌ jiꞌi̱ ycuiꞌ Ndyosi 
\p  
\v 2 Lcaa quiyaꞌ loꞌo nchcuiꞌ ya loꞌo ycuiꞌ Ndyosi cuentya jiꞌi̱ cuꞌma̱, ndya ya xlyaꞌbe jiꞌi̱ ycuiꞌ Ni liꞌ.  
\v 3 Ntsuꞌu tiꞌ ya chaꞌ ntsuꞌu tsa chaꞌ tsoꞌo nu ndyuꞌni ma̱, chaꞌ ntsuꞌu tsa tyiquee ma̱ ñaꞌa̱ ma̱ jiꞌi̱ tyaꞌa ma̱, xquiꞌya chaꞌ ngusñi ma̱ chaꞌ jiꞌi̱ Jesucristo. Ndalo tsa tyiquee ma̱ xquiꞌya chaꞌ jlo tiꞌ ma̱ chaꞌ ntucua Jesucristo nu Xuꞌna na ca slo ycuiꞌ Ndyosi Sti na; biꞌ chaꞌ xcuiꞌ chaꞌ tsoꞌo ndyuꞌni ma̱, masi tlyu tsa cña.  
\v 4 Loꞌo juaꞌa̱ ntsuꞌu tsa tyiquee ycuiꞌ Ndyosi ñaꞌa̱ Ni jiꞌi̱ ma̱. Cuꞌma̱ nguꞌ tyaꞌa ngusñi na chaꞌ jiꞌi̱ Jesús, jlo tiꞌ ya chaꞌ cua ngusubi Ni jiꞌi̱ ma̱,  
\v 5 xquiꞌya chaꞌ ngusñi ma̱ chaꞌ tsoꞌo nu cua nchcuiꞌ ya loꞌo ma̱, la cuiꞌ chaꞌ tlyu nu nda Xtyiꞌi ycuiꞌ Ni chaꞌ chcuiꞌ ya loꞌo ma̱; Xtyiꞌi ycuiꞌ Ndyosi nguaꞌni cña laja loꞌo nchcuiꞌ ya loꞌo ma̱, biꞌ chaꞌ ngusñi ma̱ chaꞌ biꞌ. Loꞌo juaꞌa̱ jlo tiꞌ ma̱ ñiꞌya̱ ngua cña nu nguaꞌni ya loꞌo ngutiꞌi̱ ya ca slo cuꞌma̱. 
\p  
\v 6 Biꞌ chaꞌ juani ndyuꞌni ma̱ cña nu ndyuꞌni ya, la cuiꞌ tyaꞌa cña nu ndyuꞌni ycuiꞌ nu Xuꞌna na. Cua ngusñi ma̱ chaꞌ jiꞌi̱ ycuiꞌ Ni, masi tiꞌí tsa tiꞌ nguꞌ ñaꞌa̱ nguꞌ jiꞌi̱ ma̱; pana tsoꞌo tsa ntsuꞌu tyiquee ma̱ xquiꞌya Xtyiꞌi ycuiꞌ Ndyosi.  
\v 7 Loꞌo liꞌ naꞌa̱ xaꞌ la ñati̱ jiꞌi̱ Jesucristo ñiꞌya̱ ndyuꞌni ma̱; biꞌ chaꞌ juani ndyuꞌni nguꞌ ñiꞌya̱ nu ndyuꞌni cuꞌma̱, masi ca taꞌa nguꞌ Macedonia nu ngusñi chaꞌ jiꞌi̱ ycuiꞌ nu Xuꞌna na, masi ca taꞌa nguꞌ Acaya nu ngusñi chaꞌ biꞌ.  
\v 8 Cua ngañi chaꞌ jiꞌi̱ ycuiꞌ nu Xuꞌna na nde lcaa quichi̱ xquiꞌya cuꞌma̱. Siꞌi nguꞌ Macedonia ti, ni siꞌi nguꞌ Acaya ti, masi ca taꞌa ñati̱ jiꞌi̱ Jesucristo, cua ndyuna nguꞌ chaꞌ biꞌ tyucui ñaꞌa̱ chalyuu; ngaꞌaa ntsuꞌu chaꞌ ta ya chaꞌ loꞌo nguꞌ biꞌ cuentya jiꞌi̱ ma̱, chaꞌ ngusñi ma̱ chaꞌ jiꞌi̱ ycuiꞌ Ndyosi, chaꞌ cua jlo tiꞌ nguꞌ chaꞌ biꞌ.  
\v 9 La cuiꞌ nguꞌ biꞌ nda nguꞌ chaꞌ loꞌo ya ñiꞌya̱ ngua loꞌo ndyalaa ya slo ma̱ tya clyo, chaꞌ liꞌ nguxtyanu ma̱ jiꞌi̱ lcua ti lo joꞌó nu ntsuꞌu jiꞌi̱ ma̱ tya saꞌni la, chaꞌ cuaꞌni ma̱ cña jiꞌi̱ ycuiꞌ Ndyosi nu luꞌú ca, nu sca ti Ndyosi nu chañi ca.  
\v 10 Loꞌo juaꞌa̱ nchcuiꞌ nguꞌ chaꞌ juani ndu̱ tiꞌ ma̱ ni jacuaꞌ tya̱a̱ Jesús nu sca ti Sñiꞌ ycuiꞌ Ndyosi, nu cua tyuꞌu ca su ntucua ycuiꞌ Ndyosi chaꞌ ca̱a̱ nde chalyuu chaca quiyaꞌ. La cuiꞌ Jesús nu ngujuii, loꞌo liꞌ nguaꞌni ycuiꞌ Ndyosi Sti yu chaꞌ ndyuꞌú yu chaca quiyaꞌ, biꞌ laca nu nguaꞌni lyaá jiꞌna chaꞌ ngaꞌaa xcubeꞌ ycuiꞌ Ndyosi jiꞌna, ngaꞌaa caca ñasi̱ꞌ Ni jiꞌna loꞌo tyalaa tsa̱ biꞌ. 
\c 2  
\s1 Cña nu nguaꞌni Pablo loꞌo ngutiꞌi̱ yu quichi̱ Tesalónica 
\p  
\v 1 Cuꞌma̱ nguꞌ tyaꞌa ngusñi na chaꞌ jiꞌi̱ Jesús, jlo tiꞌ ma̱ chaꞌ ná ngunaꞌ cña nu nguaꞌni ya loꞌo ngutiꞌi̱ ya slo cuꞌma̱.  
\v 2 Cua nguaꞌni ycuiꞌ Ndyosi chaꞌ tlyu tyiquee ya, chaꞌ nguluꞌu ya chaꞌ tsoꞌo nu ntsuꞌu jiꞌi̱ ycuiꞌ Ndyosi jiꞌi̱ ma̱ loꞌo ngulaa ya slo cuꞌma̱, masi lyaꞌ tsa tiꞌ nguꞌ jiꞌi̱ ya tya tsubiꞌ la ca quichi̱ Filipos. Jlo tiꞌ ma̱ chaꞌ cuxi tsa nguaꞌni nguꞌ biꞌ loꞌo ya liꞌ, loꞌo juaꞌa̱ ntsuꞌu nguꞌ quichi̱ tyi ma̱ nu cuxi ntiꞌ ñaꞌa̱ nguꞌ jiꞌi̱ ya.  
\v 3 Siꞌi chaꞌ cuiñi nguluꞌu ya jiꞌi̱ ma̱ nu ngua liꞌ, siꞌi na cuxi tyiquee ya ñaꞌa̱ ya jiꞌi̱ ma̱, ni siꞌi na nñiloꞌo ya jiꞌi̱ ma̱.  
\v 4 Cua nda ycuiꞌ Ni chaꞌ biꞌ loꞌo ya chaꞌ culuꞌu ya jiꞌi̱ ñati̱, biꞌ chaꞌ liñi nchcuiꞌ ya loꞌo nguꞌ nde lcaa quichi̱. Siꞌi ñati̱ chalyuu laca nu Xuꞌna na, ycuiꞌ Ndyosi laca nu Xuꞌna na; biꞌ chaꞌ cuentya jiꞌi̱ ycuiꞌ Ni ncluꞌu ya chaꞌ tsoꞌo biꞌ jiꞌi̱ Ni jiꞌi̱ lcaa ma̱, chaꞌ jlo tiꞌ Ni lcaa chaꞌ nu ntsuꞌu neꞌ cresiya jiꞌi̱ ya.  
\v 5 Siꞌi na tsoꞌo tsa ndyuꞌni ya loꞌo ma̱ chaꞌ cuaꞌni ya ngana jiꞌi̱ ma̱, ni siꞌi na tsoꞌo tsa nchcuiꞌ ya loꞌo ma̱ chaꞌ caja chaꞌ tsoꞌo nu ntsuꞌu jiꞌi̱ ma̱ jiꞌi̱ ya. Jlo tiꞌ ycuiꞌ Ndyosi chaꞌ xcuiꞌ chaꞌ liñi nchcuiꞌ ya; loꞌo juaꞌa̱ cuꞌma̱, cua ndyuna ma̱ chaꞌ biꞌ.  
\v 6 Ná ntiꞌ ya chaꞌ cuaꞌni chi̱ ma̱ loo ya, masi chacuayáꞌ jiꞌi̱ ycuiꞌ Jesucristo ndyalaa ya slo cuꞌma̱; siꞌi na nchcuiꞌ tyucuaa tiꞌ ya loꞌo ma̱, chaꞌ loo laca ya jiꞌi̱ ma̱, ni siꞌi na tyixi ya chaꞌ loo laca ya jiꞌi̱ xaꞌ ñati̱.  
\v 7 Pana ñiꞌya̱ nu ñaꞌa̱si̱i̱ sca nu cunaꞌa̱ jiꞌi̱ sñiꞌ, juaꞌa̱ ngunaꞌa̱si̱i̱ ya jiꞌi̱ ma̱, nu loꞌo ngutiꞌi̱ ya ca slo ma̱ nu ngua liꞌ.  
\v 8 Ntsuꞌu tsa tyiquee ya ñaꞌa̱ ya jiꞌi̱ ma̱, chaꞌ cua nda ya chaꞌ tsoꞌo jiꞌi̱ ycuiꞌ Ndyosi loꞌo ma̱; lye tsa nclyacua tiꞌ ya cuentya jiꞌi̱ ma̱, hasta tsoꞌo ntsuꞌu tyiquee ya masi cujuii nguꞌ jiꞌi̱ ya xquiꞌya cuꞌma̱.  
\v 9 Cuꞌma̱ nguꞌ tyaꞌa na, tyiꞌu tiꞌ ma̱ chaꞌ lye tsa nguaꞌni ya cña chaꞌ caja ñiꞌya̱ tyiji̱ yuꞌu ya chalyuu; tsa̱ loꞌo talya nguaꞌni ya cña loꞌo yaꞌ ti ya, chaꞌ ná culiji ma̱ cñi jiꞌi̱ ma̱ lo ya laja loꞌo nguluꞌu ya chaꞌ tsoꞌo biꞌ jiꞌi̱ ma̱. 
\p  
\v 10 Cua naꞌa̱ ma̱, loꞌo juaꞌa̱ cua naꞌa̱ ycuiꞌ Ndyosi, chaꞌ tsoꞌo ti ngutiꞌi̱ ya slo cuꞌma̱ nu ntsuꞌu chaꞌ jiꞌi̱ ma̱ loꞌo Ni. Ñati̱ lubii laca ya, ná ntsuꞌu chaꞌ jña nguꞌ quiꞌya jiꞌi̱ ya liꞌ.  
\v 11 Ñiꞌya̱ nduꞌni sca ñati̱ loꞌo sñiꞌ, juaꞌa̱ nguluꞌu ya jiꞌi̱ ma̱ liꞌ: nu loꞌo nguaꞌni ma̱ chaꞌ tsoꞌo, liꞌ nguxtyucua ya jiꞌi̱ ma̱; nu loꞌo nguaꞌni ma̱ chaꞌ cuxi, liꞌ nda ya sca cui̱i̱ loꞌo ma̱.  
\v 12 Nguxtyucua ya jiꞌi̱ ma̱ chaꞌ tyucui tyiquee ma̱ cuaꞌni ma̱ ñaꞌa̱ chaꞌ tsoꞌo nu ntiꞌ ycuiꞌ Ndyosi chaꞌ cuaꞌni na nde chalyuu, chaꞌ juaꞌa̱ xñi ma̱ chaꞌ jiꞌi̱ ycuiꞌ Ndyosi chaꞌ tsaa ma̱ ca su tlyu su xee tsa su laca Ni loo. 
\p  
\v 13 Loꞌo juaꞌa̱ lcaa hora ndya ya xlyaꞌbe jiꞌi̱ ycuiꞌ Ndyosi cuentya jiꞌi̱ ma̱, xquiꞌya chaꞌ nu loꞌo ndyuna ma̱ chaꞌ tsoꞌo jiꞌi̱ ycuiꞌ Ndyosi, la cuiꞌ chaꞌ nu cua nda ya loꞌo ma̱, liꞌ jlya tiꞌ ma̱ chaꞌ biꞌ. Ngua cuayáꞌ tiꞌ ma̱ chaꞌ laca chaꞌ biꞌ nu chaꞌ liñi jiꞌi̱ ycuiꞌ Ndyosi, siꞌi chaꞌ nguaꞌya hique sca ñati̱ ti; ngusñi ma̱ chaꞌ biꞌ liꞌ, biꞌ chaꞌ ndyuꞌni ycuiꞌ Ndyosi cña neꞌ cresiya jiꞌi̱ ma̱.  
\v 14 Ñiꞌya̱ nu ngua tya tsubiꞌ la, chaꞌ nguaꞌni lyaꞌ tiꞌ nguꞌ judío jiꞌi̱ ñaꞌa̱ taju ñati̱ tyaꞌa ntsuꞌu chaꞌ jiꞌna loꞌo Jesucristo ca loyuu su cuentya Judea, juaꞌa̱ nguaꞌni lyaꞌ tiꞌ nguꞌ tyaꞌa quichi̱ tyi ma̱ jiꞌi̱ cuꞌma̱ liꞌ. Cuꞌma̱ nguꞌ tyaꞌa na, la cuiꞌ tyaꞌa chaꞌ tiꞌí ngua jiꞌi̱ ma̱ ñiꞌya̱ nu ngua jiꞌi̱ nguꞌ judío tyaꞌa na biꞌ.  
\v 15 Ñiꞌya̱ loꞌo ndyujuii nguꞌ judío cuxi nu ngutiꞌi̱ nu ngua saꞌni la jiꞌi̱ jyoꞌo nu ngua tuꞌba jiꞌi̱ ycuiꞌ Ndyosi, la cuiꞌ juaꞌa̱ cua ndyujuii nu nguꞌ judío cuxi biꞌ jiꞌi̱ ycuiꞌ Jesús nu Xuꞌna na cua tsubiꞌ. Ca tiyaꞌ la liꞌ loꞌo jiꞌi̱ cuare nguloꞌo nu nguꞌ judío biꞌ. Ná ndiya tiꞌ ycuiꞌ Ndyosi chaꞌ ndyuꞌni nguꞌ biꞌ juaꞌa̱, chaꞌ nxu̱u̱ tyaꞌa nguꞌ biꞌ loꞌo lcaa ñati̱.  
\v 16 Ná nda nguꞌ judío cuxi biꞌ chacuayáꞌ jiꞌi̱ ya chaꞌ chcuiꞌ ya chaꞌ jiꞌi̱ Jesucristo loꞌo nguꞌ xaꞌ tsuꞌ, chaꞌ cuaꞌni lyaá Ni jiꞌi̱ nguꞌ xaꞌ tsuꞌ biꞌ liꞌ; biꞌ chaꞌ juaꞌa̱ nchca tlyu la quiꞌya nu ntsuꞌu jiꞌi̱ nguꞌ judío cuxi biꞌ, ñaꞌa̱ cuayáꞌ nchca ñasi̱ꞌ tsa ycuiꞌ Ndyosi jiꞌi̱ nguꞌ biꞌ. Ntsuꞌu chaꞌ xcubeꞌ tsa Ni jiꞌi̱ nguꞌ biꞌ nde loo la. 
\s1 Ntiꞌ tsa Pablo tsaa naꞌa̱ jiꞌi̱ nguꞌ chaca quiyaꞌ 
\p  
\v 17 Masi xaꞌ quichi̱ ndiꞌi̱ ya juani, ntiꞌ ya xtyu̱u̱ ya slo cuꞌma̱ tyaꞌa ngusñi na chaꞌ jiꞌi̱ Jesús; ndyiꞌu tsa tiꞌ ya jiꞌi̱ ma̱, masi ná nchca ñaꞌa̱ ya jiꞌi̱ ma̱, biꞌ chaꞌ ntiꞌ ya tya̱a̱ ya tya̱a̱ naꞌa̱ ya jiꞌi̱ ma̱ chaca quiyaꞌ.  
\v 18 Tyu̱u̱ quiyaꞌ ngua tiꞌ ya ca̱a̱ ya nquichaꞌ. Loꞌo naꞌ ni, la cuiꞌ Pablo laca naꞌ, ntiꞌ tsa naꞌ ca̱a̱ naꞌ; pana lcaa quiyaꞌ nguaꞌa Satanás chaꞌ jiꞌi̱ ya chaꞌ ná ca̱a̱ ya.  
\v 19 Tsoꞌo tsa ntsuꞌu tyiquee ya xquiꞌya cuꞌma̱, chaꞌ loꞌo cuꞌma̱ nscua chaꞌ tyatu̱ ma̱ loꞌo ya slo Jesucristo nu Xuꞌna na loꞌo tya̱a̱ Jesús nde chalyuu chaca quiyaꞌ. Liꞌ tsoꞌo tsa caca tyiquee Ni ñaꞌa̱ Ni jiꞌi̱ ya, xquiꞌya chaꞌ tsoꞌo tsa ngusñi ma̱ chaꞌ jiꞌi̱ Ni nu cua nchcuiꞌ ya loꞌo ma̱.  
\v 20 Nchcuiꞌ tsa ya loꞌo xaꞌ ñati̱ chaꞌ tsoꞌo tsa nduꞌni ma̱, chaꞌ tsoꞌo tsa ntsuꞌu tyiquee ya xquiꞌya cuꞌma̱. 
\c 3  
\p  
\v 1-2 Loꞌo liꞌ ngaꞌaa ndalo ya, xñiꞌi̱ tsa tiꞌ ya chaꞌ tyijyuꞌ tsa ndiꞌi̱ ma̱; biꞌ chaꞌ nda naꞌ jiꞌi̱ Timoteo ndyaa yu slo ma̱. Tsoꞌo la tyanu naꞌ quichi̱ Atenas ngua tiꞌ naꞌ, masi ná loꞌo tyaꞌa ndyaꞌa̱ naꞌ. Tyaꞌa na laca nu Timoteo biꞌ ni, la cuiꞌ cña jiꞌi̱ ycuiꞌ Ndyosi ndyuꞌni ya; tyaꞌa ndyuꞌni ya cña laca yu loꞌo nda ya chaꞌ tsoꞌo jiꞌi̱ Jesucristo loꞌo ñati̱. Liꞌ ndyaa nu Timoteo biꞌ nde slo ma̱ chaꞌ xñi la tiꞌ tyiquee ma̱, chaꞌ caca tlyu la tyiquee ma̱ loꞌo ngusñi ma̱ chaꞌ tsoꞌo biꞌ.  
\v 3 Ná ntiꞌ ya chaꞌ ca taja tiꞌ ni tsaca nguꞌ tyaꞌa ma̱, masi lye tsa ndyuꞌni lyaꞌ tiꞌ nguꞌ jiꞌi̱ ma̱; jlo tiꞌ ma̱ chaꞌ juaꞌa̱ ndyuꞌni nguꞌ loꞌo ñati̱ jiꞌi̱ Jesucristo lcua ti lo quichi̱.  
\v 4 Loꞌo tya ngutiꞌi̱ ya slo ma̱, liꞌ tyu̱u̱ quiyaꞌ nda ya chaꞌ loꞌo ma̱ ndiꞌya̱: “Cuaꞌni lyaꞌ tiꞌ nguꞌ jiꞌna”, nacui̱ ya. Loꞌo chañi lyaꞌ tsa tiꞌ nguꞌ jiꞌi̱ ma̱ juani.  
\v 5 Loꞌo ngua cuayáꞌ tiꞌ naꞌ chaꞌ biꞌ, ngaꞌaa ndalo naꞌ liꞌ; xñiꞌi̱ tsa tiꞌ naꞌ chaꞌ ná jlo ta̱ꞌ ñiꞌya̱ ndyaca chaꞌ jiꞌi̱ ma̱. Biꞌ chaꞌ nda naꞌ jiꞌi̱ yu tyaꞌa na ñaa yu slo ma̱, chaꞌ ca cuayáꞌ ta̱ꞌ si ñaꞌa̱ ti nxñi tsoꞌo ma̱ chaꞌ tsoꞌo jiꞌi̱ ycuiꞌ Ndyosi, si tyiji̱loo ma̱ jiꞌi̱ nu xñaꞌa̱ nu ntiꞌ chaꞌ cuaꞌni ma̱ chaꞌ cuxi. Cua ngunaꞌ cña jiꞌi̱ ya loꞌo ma̱ si ná caca tyiji̱loo ma̱ jiꞌi̱ nu xñaꞌa̱ biꞌ. 
\p  
\v 6 Loꞌo juani tsoꞌo tsa ntsuꞌu tyiquee ya xquiꞌya cuꞌma̱. Cua ndyalaa Timoteo ca nde chaca quiyaꞌ; cua ndachaꞌ yu jiꞌi̱ ya ñiꞌya̱ ndyuꞌni ma̱, chaꞌ tya ngusñi ma̱ chaꞌ tsoꞌo jiꞌi̱ ycuiꞌ Ni, chaꞌ ntsuꞌu tsa tyiquee ma̱ ñaꞌa̱ ma̱ jiꞌi̱ tyaꞌa ma̱ xquiꞌya ycuiꞌ nu Xuꞌna na. Nacui̱ yu chaꞌ ndube tsa tiꞌ ma̱ jiꞌi̱ ya, ndu̱ tsa tiꞌ ma̱ ni jacuaꞌ tyacua tyaꞌa na chaca quiyaꞌ. Stuꞌba ti ntsuꞌu tyiquee na, ¿ni jacuaꞌ tyacua tyaꞌa na lacua?  
\v 7 Loꞌo cua ndyuna ya chaꞌ juaꞌa̱ ndyaca chaꞌ biꞌ jiꞌi̱ ma̱, ngua chaa la tiꞌ ya liꞌ, masi lyaꞌ tsa tiꞌ nguꞌ jiꞌi̱ ya ca nde, masi ndyiji tsa chaꞌ tiꞌí jiꞌi̱ ya. Ngusñi tsoꞌo ma̱ chaꞌ biꞌ,  
\v 8 biꞌ chaꞌ chaa la tiꞌ ya; nguula la tiꞌ ya xquiꞌya cuꞌma̱, chaꞌ tlyu tyiquee ma̱ cuentya jiꞌi̱ ycuiꞌ nu Xuꞌna na.  
\v 9 Ná nchca tye chaꞌ tya ya xlyaꞌbe jiꞌi̱ ycuiꞌ Ndyosi Sti na xquiꞌya cuꞌma̱, chaꞌ tsoꞌo tsa ntsuꞌu tyiquee ya xquiꞌya cuꞌma̱.  
\v 10 Nchcuiꞌ ya loꞌo ycuiꞌ Ndyosi nde tsa̱ loꞌo nde talya. Tyaꞌna tsa nchcuiꞌ ya loꞌo Ni chaꞌ ta Ni chacuayáꞌ jiꞌi̱ ya chaꞌ tyacua tyaꞌa na chaca quiyaꞌ, chaꞌ bilya tye culuꞌu ya jiꞌi̱ ma̱ lcaa chaꞌ tsoꞌo nu ngaꞌa̱ chaꞌ caca cuayáꞌ tiꞌ ma̱, chaꞌ juaꞌa̱ xñi tsoꞌo ma̱ chaꞌ jiꞌi̱ Jesús. 
\p  
\v 11 Ntajatya ya jiꞌi̱ ycuiꞌ Ndyosi Sti na loꞌo jiꞌi̱ Jesús nu Xuꞌna na ni jacuaꞌ ta Ni chacuayáꞌ tsaa ya ca slo cuꞌma̱.  
\v 12 Loꞌo juaꞌa̱ ndijña ya jiꞌi̱ nu Xuꞌna na chaꞌ cuaꞌni Ni chaꞌ tsoꞌo la tyuꞌu tyiquee ma̱ ñaꞌa̱ ma̱ jiꞌi̱ tyaꞌa ma̱, loꞌo juaꞌa̱ jiꞌi̱ lcaa ñati̱, chaꞌ ntsuꞌu tsa tyiquee ya ñaꞌa̱ ya jiꞌi̱ cuꞌma̱ xquiꞌya ycuiꞌ Ndyosi;  
\v 13 ndijña ya chaꞌ cuaꞌni Ni chaꞌ caca lubii cresiya jiꞌi̱ ma̱, chaꞌ tyanu tsoꞌo chaꞌ jiꞌi̱ ycuiꞌ Ndyosi neꞌ cresiya jiꞌi̱ ma̱. Liꞌ ngaꞌaa ntsuꞌu chaꞌ sta ycuiꞌ Ndyosi Sti na quiꞌya jiꞌi̱ ma̱ tsa̱ biꞌ, nu loꞌo ca̱a̱ Jesús nu Xuꞌna na nde chalyuu chaca quiyaꞌ. Ca̱a̱ ycuiꞌ nu Xuꞌna na loꞌo lcaa ñati̱ jiꞌi̱ Ni tsa̱ biꞌ. 
\c 4  
\s1 Chaꞌ tsoꞌo nu ntiꞌ ycuiꞌ Ndyosi chaꞌ cuaꞌni na nde chalyuu 
\p  
\v 1 Cuꞌma̱ nguꞌ tyaꞌa na, juani ndijña ya jiꞌi̱ ma̱ chacuayáꞌ jiꞌi̱ Jesús nu Xuꞌna na, chaꞌ ñaꞌa̱ ti cuaꞌni ma̱ lcaa ñaꞌa̱ chaꞌ tsoꞌo nu ntiꞌ ycuiꞌ Ndyosi chaꞌ cuaꞌni ma̱ laja loꞌo tyiꞌi̱ ma̱ chalyuu. Liꞌ tsoꞌo la caca cuaꞌni ma̱ cña jiꞌi̱ ycuiꞌ Ndyosi. Chañi chaꞌ tsoꞌo tsa ndyuꞌni ma̱, pana cua ntiꞌ ya chaꞌ ñaꞌa̱ ti tya cuaꞌni la ma̱ la cuiꞌ cña nu cua nguluꞌu ya jiꞌi̱ ma̱ tya tsubiꞌ la cuentya jiꞌi̱ ycuiꞌ Ndyosi. 
\p  
\v 2 Tyiꞌu tiꞌ ma̱ jiꞌi̱ cña nu ngulo ya jiꞌi̱ ma̱ cuentya jiꞌi̱ Jesús nu Xuꞌna na,  
\v 3 chaꞌ ndiꞌya̱ ntiꞌ ycuiꞌ Ndyosi: caca lubii cresiya jiꞌi̱ ma̱, ná cuaꞌni subaꞌ ma̱ loꞌo ñati̱;  
\v 4 lcaa cuꞌma̱, tsoꞌo caja clyoꞌo ma̱, pana ngaꞌaa ñaꞌa̱ ma̱ jiꞌi̱ xaꞌ nu cunaꞌa̱ liꞌ. Loꞌo juaꞌa̱ tsoꞌo ti tyiꞌi̱ ma̱ loꞌo clyoꞌo ma̱; tyuꞌu tyiquee ma̱ ñaꞌa̱ ma̱ jiꞌi̱ clyoꞌo ma̱,  
\v 5 chaꞌ ná ntiꞌ ycuiꞌ Ndyosi chaꞌ cuaꞌni subaꞌ ma̱ loꞌo clyoꞌo ma̱, ñiꞌya̱ nu nduꞌni nguꞌ nu ná ndaquiyaꞌ jiꞌi̱ ycuiꞌ Ni tsiyaꞌ ti.  
\v 6 Ngaꞌaa xlyaá ma̱ jiꞌi̱ nu cunaꞌa̱ jiꞌi̱ nguꞌ tyaꞌa ma̱, masi jiꞌi̱ clyoꞌo nguꞌ, masi jiꞌi̱ sñiꞌ nguꞌ. Cua nchcuiꞌ tsa ya loꞌo ma̱ chaꞌ lcaa chaꞌ ñaꞌa̱ ycuiꞌ nu Xuꞌna na; jlo tiꞌ ycuiꞌ Ndyosi, loꞌo juaꞌa̱ ntsuꞌu chaꞌ xcubeꞌ Ni jiꞌi̱ lcaa ñati̱ nu ná taquiyaꞌ jiꞌi̱ chaꞌ biꞌ,  
\v 7 chaꞌ cua ngusubi ycuiꞌ Ndyosi jiꞌna chaꞌ caca na ñati̱ nu lubii cresiya jiꞌi̱, siꞌi chaꞌ caca na ñati̱ nu ndyuꞌni subaꞌ.  
\v 8 Siꞌi sca chaꞌ nu nchcuiꞌ ñati̱ chalyuu ti laca chaꞌ nu nchcuiꞌ naꞌ loꞌo ma̱ juani, chaꞌ liñi nu cua nda ycuiꞌ Ndyosi loꞌo na laca chaꞌ biꞌ; biꞌ chaꞌ si ná taquiyaꞌ ma̱ jiꞌi̱ chaꞌ biꞌ, na cua nguxtyanu ma̱ jiꞌi̱ ycuiꞌ Ndyosi nu nda Xtyiꞌi ycuiꞌ Ni chaꞌ tyanu Ni neꞌ cresiya jiꞌna. 
\p  
\v 9 Ná ngaꞌa̱ chaꞌ scua la naꞌ lo quityi re chaꞌ tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ ñati̱ tyaꞌa ngusñi ma̱ chaꞌ jiꞌi̱ ycuiꞌ Ni; cua laca ntsuꞌu tsa tyiquee ma̱ ñaꞌa̱ ma̱ jiꞌi̱ nguꞌ biꞌ, xquiꞌya chaꞌ cua nguluꞌu ycuiꞌ Ndyosi jiꞌi̱ ma̱ ñiꞌya̱ nu cuaꞌni ma̱ loꞌo tyaꞌa ma̱.  
\v 10 Ni siꞌi sca ti jiꞌi̱ nguꞌ tyaꞌa quichi̱ tyi ti ma̱ ntsuꞌu tyiquee ma̱, loꞌo juaꞌa̱ ntsuꞌu tsa tyiquee ma̱ ñaꞌa̱ ma̱ jiꞌi̱ lcaa nguꞌ tyaꞌa ntsuꞌu chaꞌ jiꞌi̱ ma̱ loꞌo ycuiꞌ Ndyosi nde lcaa lo quichi̱ loyuu su cuentya Macedonia. Tyaꞌa na laca nguꞌ biꞌ, biꞌ chaꞌ nchcuiꞌ ya loꞌo ma̱ chaꞌ tya cuaꞌni la ma̱ chaꞌ tsoꞌo biꞌ.  
\v 11 Tsoꞌo ti cuaꞌni ma̱ loꞌo tyaꞌa ma̱ chaꞌ ti̱ ti tyiꞌi̱ tyiquee ma̱ liꞌ. Ná tsoꞌo si culo ma̱ cña jiꞌi̱ taju ñati̱ tyaꞌa ma̱, loꞌo liꞌ taja ycuiꞌ ma̱; cuaꞌni ma̱ cña chaꞌ caja xi na cacu ma̱ ñiꞌya̱ nu cua nchcuiꞌ ya loꞌo ma̱,  
\v 12 chaꞌ caca chcuiꞌ nguꞌ jiꞌi̱ ma̱ chaꞌ tsoꞌo tsa ndyuꞌni ma̱ cña. Ná ntsuꞌu na laca nu lyiji jiꞌi̱ ma̱ liꞌ. 
\s1 Tya ca̱a̱ Jesús nu Xuꞌna na chaca quiyaꞌ 
\p  
\v 13 Cuꞌma̱ tyaꞌa ngusñi na chaꞌ jiꞌi̱ Jesús, juani ta ya xi chaꞌ loꞌo ma̱ cuentya jiꞌi̱ nguꞌ tyaꞌa na nu cua ngujuii, chaꞌ ca cuayáꞌ tiꞌ ma̱ chaꞌ ñiꞌya̱ laca si na lajaꞌ ti nguꞌ, juaꞌa̱ laca jyoꞌo biꞌ. Ná ca xñiꞌi̱ tiꞌ ma̱ cuentya jiꞌi̱ jyoꞌo tyaꞌa ma̱ lacua, chaꞌ ná stuꞌba laca na loꞌo ñati̱ nu bilya xñi chaꞌ jiꞌi̱ Jesucristo.  
\v 14 Jlo tiꞌ na chaꞌ ngujuii Jesús, loꞌo liꞌ ndyuꞌú yu chaca quiyaꞌ; biꞌ chaꞌ caca cuayáꞌ tiꞌ na chaꞌ loꞌo ca̱a̱ ycuiꞌ Jesús nde chalyuu chaca quiyaꞌ, liꞌ cuaꞌni ycuiꞌ Ndyosi chaꞌ chaca quiyaꞌ tyuꞌú lcaa jyoꞌo nu ngusñi chaꞌ jiꞌi̱ Jesucristo tya clyo la, chaꞌ stuꞌba ti ca̱a̱ nguꞌ loꞌo Jesús liꞌ. 
\p  
\v 15 Cua nchcuiꞌ ycuiꞌ nu Xuꞌna na ñiꞌya̱ caca jiꞌi̱ lcaa na tsa̱ biꞌ, nu loꞌo ca̱a̱ ycuiꞌ nu Xuꞌna na chaca quiyaꞌ: Lcaa na nu tya luꞌú na ni, ná tyiji̱loo na jiꞌi̱ nguꞌ tyaꞌa na nu cua ngujuii.  
\v 16 Ndiꞌya̱ caca chaꞌ loꞌo tyalaa tsa̱ biꞌ: Nde cua̱ ca̱a̱ ycuiꞌ nu Xuꞌna na, caꞌya Ni lo yuu; liꞌ stuꞌba ti cañi Xtyiꞌi ycuiꞌ Ni loꞌo xtyiꞌi xca̱ jiꞌi̱ Ni nu laca loo, juaꞌa̱ cañi cuiꞌchcua̱ jiꞌi̱ ycuiꞌ Ndyosi liꞌ. Clyo tyacuí̱ lcaa jyoꞌo ñati̱ jiꞌi̱ Jesucristo tyaa nguꞌ nde cua̱;  
\v 17 liꞌ tyacuí̱ lcaa nguꞌ tyaꞌa na ñaꞌa̱ luꞌú ti na, chaꞌ tyaloꞌo ycuiꞌ Ni jiꞌna. Ca laja coo nde cua̱ tyacua tyaꞌa na loꞌo jyoꞌo tyaꞌa na liꞌ, chaꞌ lcaa na, stuꞌba ti tyacua tyaꞌa na loꞌo ycuiꞌ nu Xuꞌna na ca biꞌ. Tsa cuꞌ ti tyiꞌi̱ na loꞌo ycuiꞌ Ndyosi liꞌ.  
\v 18 Biꞌ chaꞌ lacua, ta ma̱ chaꞌ biꞌ loꞌo nguꞌ tyaꞌa ma̱, chaꞌ tsoꞌo ti caca tyiquee lcaa ma̱. 
\c 5  
\p  
\v 1 Cuꞌma̱ tyaꞌa ngusñi na chaꞌ jiꞌi̱ Jesús, ná ntsuꞌu chaꞌ scua ya sca quityi chaꞌ cachaꞌ ya jiꞌi̱ ma̱ ni jacuaꞌ tyalaa tsa̱ loꞌo ca̱a̱ Jesús chaca quiyaꞌ, ni jacuaꞌ tyalaa tyempo biꞌ;  
\v 2 cua laca ngua cuayáꞌ tiꞌ ma̱ chaꞌ ni sca ñati̱ chalyuu, ná jlo tiꞌ nguꞌ ni tsa̱ ca̱a̱ ycuiꞌ nu Xuꞌna na. Ñiꞌya̱ ndyalaa sca nu cuaana toꞌ niꞌi̱ jiꞌi̱ nguꞌ talya, juaꞌa̱ cuaana ti ca̱a̱ Jesús.  
\v 3 “Ti̱ ti ndiꞌi̱ chalyuu, tsoꞌo ti ndiꞌi̱ na”, ñacui̱ nguꞌ; pana la cuiꞌ hora biꞌ tye chaꞌ jiꞌi̱ lcaa ñati̱ chalyuu, ngaꞌaa caja mala xna nguꞌ liꞌ. Ñiꞌya̱ laca sca nu cunaꞌa̱ tana, chaꞌ ná jlo tiꞌ ni hora caca nu cala sñiꞌ, ni hora ca̱a̱ nu tiꞌí jiꞌi̱; juaꞌa̱ caca loꞌo cua tyalaa ti hora biꞌ liꞌ, chaꞌ ná jlo tiꞌ na ni tsa̱ caca.  
\v 4 Pana nu cuꞌma̱ ni, ná ntsuꞌu chaꞌ xcutsi̱i̱ tsa̱ biꞌ jiꞌi̱ ma̱, masi jlo tiꞌ ma̱ chaꞌ cuaana ca ti tyalaa tsa̱ biꞌ; siꞌi na ndyaꞌa̱ ma̱ su talya ñaꞌa̱ xquiꞌya chaꞌ cuxi, ñiꞌya̱ ndyaꞌa̱ xaꞌ la ñati̱.  
\v 5 Cua ntsuꞌu xee nu nda ycuiꞌ Ndyosi neꞌ cresiya jiꞌi̱ ma̱; biꞌ chaꞌ ñati̱ nu ndyaꞌa̱ su xee laca ma̱, ñati̱ nu lubii cresiya jiꞌi̱ laca ma̱. Ná laca na ñati̱ nu ndyaꞌa̱ su talya ñaꞌa̱, chaꞌ siꞌi ñati̱ nu ngunaꞌ chalyuu jiꞌi̱ xquiꞌya chaꞌ cuxi laca na.  
\v 6 Biꞌ chaꞌ tii ti tiꞌ na tyiꞌi̱ na chalyuu; siꞌi ñiꞌya̱ ntiꞌ si xcuiꞌ na lajaꞌ ti na tyiꞌi̱ na chalyuu, masi juaꞌa̱ nduꞌni xaꞌ la ñati̱ nu ná ndaquiyaꞌ jiꞌi̱ Jesucristo tsiyaꞌ ti. Loꞌo juaꞌa̱ ñaꞌa̱si̱i̱ na jiꞌi̱ ycuiꞌ ca na chaꞌ ná caca cuꞌbi na.  
\v 7 Xcuiꞌ na ndyijaꞌ ti ñati̱ ñiꞌya̱ si talya laca, xquiꞌya chaꞌ ná ndube tiꞌ nguꞌ; xcuiꞌ na cuꞌbi ti nguꞌ biꞌ, chaꞌ ná ndube tiꞌ nguꞌ tsiyaꞌ ti.  
\v 8 Pana nu na ni, ntsuꞌu xee jiꞌi̱ ycuiꞌ Ndyosi neꞌ cresiyaꞌ jiꞌna, biꞌ chaꞌ tii ti tiꞌ na tyiꞌi̱ na chalyuu; cua ngusñi na chaꞌ jiꞌi̱ ycuiꞌ Ni, na cua ntsuꞌu tyiquee na ñaꞌa̱ na jiꞌi̱ tyaꞌa ñati̱ na xquiꞌya Ni, loꞌo juaꞌa̱ ngaꞌa̱ chaꞌ cuaꞌa na jiꞌi̱ ycuiꞌ ca na chaꞌ ná cuaꞌni na chaꞌ cuxi nu ntiꞌ cuaꞌni ñuꞌu̱ jiꞌi̱ cresiya jiꞌna. Na ndu̱ tiꞌ na jiꞌi̱ ycuiꞌ Ndyosi, ni jacuaꞌ tye cuityi̱ Ni jiꞌi̱ lcaa chaꞌ cuxi nu ntsuꞌu jiꞌna, biꞌ chaꞌ ngaꞌa̱ chaꞌ ñaꞌa̱si̱i̱ na jiꞌi̱ ycuiꞌ ca na.  
\v 9 Ná ngusubi ycuiꞌ Ni jiꞌna chaꞌ xcubeꞌ Ni jiꞌna; cua ngusubi Ni jiꞌna chaꞌ cuaꞌni lyaá Ni jiꞌna xquiꞌya Jesucristo nu Xuꞌna na,  
\v 10 la cuiꞌ nu ngujuii chaꞌ cuityi̱ quiꞌya nu ntsuꞌu jiꞌna. Biꞌ chaꞌ taca tyiꞌi̱ na slo ycuiꞌ Ndyosi liꞌ, masi ñaꞌa̱ ti tya luꞌú na chalyuu loꞌo ca̱a̱ Jesús, masi cua ngujuii na liꞌ; stuꞌba ti tyiꞌi̱ na ca slo Ni liꞌ.  
\v 11 Laja loꞌo ndu̱ tiꞌ na jiꞌi̱ Jesús, tya culuꞌu ma̱ chaꞌ biꞌ jiꞌi̱ nu xaꞌ la nguꞌ tyaꞌa ma̱, chaꞌ caca tlyu la tyiquee ma̱ liꞌ. Jlo tiꞌ naꞌ chaꞌ juaꞌa̱ nduꞌni ma̱ tuꞌni. 
\s1 Xaꞌ la cui̱i̱ nu nda Pablo loꞌo nguꞌ 
\p  
\v 12 Cuꞌma̱ tyaꞌa ngusñi na chaꞌ jiꞌi̱ Jesús, ndijña ya jiꞌi̱ ma̱ chaꞌ cuiꞌya ma̱ cuentya jiꞌi̱ lcaa ñaꞌa̱ chaꞌ tsoꞌo nu ndyuꞌni nguꞌ nu laca cña jiꞌi̱ ma̱. Cua nda ycuiꞌ nu Xuꞌna na cña jiꞌi̱ nguꞌ biꞌ chaꞌ caca nguꞌ loo, chaꞌ culuꞌu nguꞌ biꞌ jiꞌi̱ ma̱ cua ñaꞌa̱ ca chaꞌ tsoꞌo nu caca cuaꞌni ma̱ cuentya jiꞌi̱ ycuiꞌ Ndyosi.  
\v 13 Tsoꞌo ti cuaꞌni ma̱ loꞌo nguꞌ biꞌ lacua, chaꞌ tsoꞌo tsa cña ndyuꞌni nguꞌ biꞌ cuentya jiꞌi̱ ycuiꞌ Ndyosi; tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ nguꞌ biꞌ. La cuiꞌ juaꞌa̱ tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ lcaa tyaꞌa ma̱, chaꞌ ngaꞌaa tyuꞌu chaꞌ cusu̱u̱ jiꞌi̱ ma̱ loꞌo tyaꞌa ma̱ liꞌ. 
\p  
\v 14 Cuꞌma̱ tyaꞌa ngusñi na chaꞌ jiꞌi̱ Jesús, ndiꞌya̱ chcuiꞌ ya loꞌo ma̱: Culo ma̱ cña jiꞌi̱ nguꞌ tyaꞌa ma̱ nu ná ntiꞌ cuaꞌni cña, nu xcuiꞌ na taja ti ntiꞌ nguꞌ; cuaꞌni ma̱ chaꞌ caca tlyu la tyiquee nguꞌ tyaꞌa ma̱ nu xñiꞌi̱ ti tiꞌ, chaꞌ xñi tsoꞌo la nguꞌ chaꞌ jiꞌi̱ Jesús; xtyucua ma̱ jiꞌi̱ nguꞌ tyaꞌa ma̱ nu ná ndyiji juersa jiꞌi̱ chaꞌ xu̱u̱ tyaꞌa nguꞌ loꞌo nu cuxi, juaꞌa̱ talo tyiquee ma̱ jiꞌi̱ cua ñaꞌa̱ ca nguꞌ tyaꞌa ma̱. 
\p  
\v 15 Si cuaꞌni xñaꞌa̱ ñati̱ loꞌo ma̱, ná chcuiꞌ ma̱ chaꞌ tiꞌí jiꞌi̱ nguꞌ biꞌ liꞌ; xtyucua ma̱ jiꞌi̱ nguꞌ tyaꞌa ma̱ chaꞌ talo ma̱ jiꞌi̱ nguꞌ xñaꞌa̱, chaꞌ xcuiꞌ tsoꞌo ti cuaꞌni ma̱ loꞌo lcaa ñati̱, masi loꞌo tyaꞌa ma̱, masi loꞌo xaꞌ ñati̱. 
\p  
\v 16 Tsoꞌo ti caca tyiquee ma̱ lcaa tsa̱.  
\v 17 Tyucui tyempo chcuiꞌ ma̱ loꞌo ycuiꞌ Ndyosi.  
\v 18 Loꞌo juaꞌa̱ tya ma̱ xlyaꞌbe jiꞌi̱ ycuiꞌ Ndyosi cuentya jiꞌi̱ cua ñaꞌa̱ ca chaꞌ nu ndyaca jiꞌi̱ ma̱. Ntiꞌ Ni chaꞌ cuaꞌni ma̱ juaꞌa̱ si chañi chaꞌ ngusñi ma̱ chaꞌ jiꞌi̱ Jesucristo. 
\p  
\v 19 Ñiꞌya̱ ntiꞌ sca xee, juaꞌa̱ laca Xtyiꞌi ycuiꞌ Ndyosi; ná xubiꞌ ma̱ jiꞌi̱ xee biꞌ.  
\v 20 Ná xtyí loꞌo ma̱ jiꞌi̱ tyaꞌa ma̱ loꞌo chcuiꞌ nguꞌ sca chaꞌ jiꞌi̱ ycuiꞌ Ndyosi loꞌo ma̱;  
\v 21 pana cuaꞌni cuayáꞌ ma̱ jiꞌi̱ cua ñaꞌa̱ ca chaꞌ nu nchcuiꞌ nguꞌ biꞌ, si tsoꞌo ndyuꞌu chaꞌ, si ná tsoꞌo. Liꞌ xñi ma̱ chaꞌ tsoꞌo biꞌ,  
\v 22 pana culochu̱ꞌ ma̱ jiꞌi̱ lcaa chaꞌ cuxi liꞌ. 
\p  
\v 23 Nduꞌni ycuiꞌ Ndyosi chaꞌ ti̱ ti tyiꞌi̱ tyiquee na. Biꞌ chaꞌ juani cuaꞌni Ni chaꞌ caca ma̱ ñati̱ liñi tsiyaꞌ ti; caca tsoꞌo tyiquee ma̱, caca lubii cresiya jiꞌi̱ ma̱, caca ma̱ ñati̱ nu tyucui tyiquee tsiyaꞌ ti. Si lubii cresiya jiꞌi̱ ma̱ loꞌo ca̱a̱ ycuiꞌ Jesucristo nu Xuꞌna na chaca quiyaꞌ, liꞌ ngaꞌaa ntsuꞌu chaꞌ sta Ni quiꞌya jiꞌi̱ ma̱;  
\v 24 cua ngusubi ycuiꞌ Ndyosi jiꞌi̱ ma̱ chaꞌ caca ma̱ ñati̱ jiꞌi̱ Ni tsiyaꞌ ti. Siꞌi sca chaꞌ cuiñi nu nda Ni loꞌo nchcuiꞌ Ni loꞌo ma̱ juaꞌa̱, chañi chaꞌ cuaꞌni Ni chaꞌ caca ma̱ ñati̱ nu lubii cresiya jiꞌi̱ cuentya jiꞌi̱ ycuiꞌ Ndyosi. 
\s1 Ngusalyaꞌ Pablo loꞌo nguꞌ 
\p  
\v 25 Cuꞌma̱ nguꞌ tyaꞌa na, ñaꞌa̱ ti tya chcuiꞌ ma̱ loꞌo ycuiꞌ Ndyosi cuentya jiꞌi̱ ya. 
\p  
\v 26 Xlyo niꞌi̱ jiꞌi̱ lcaa cuꞌma̱ nguꞌ tyaꞌa na. 
\p  
\v 27 Nde cña nu culo naꞌ jiꞌi̱ ma̱ chaꞌ cuaꞌni ma̱ cuentya jiꞌi̱ ycuiꞌ nu Xuꞌna na, chaꞌ chcuiꞌ ma̱ lcaa chaꞌ nu nscua lo quityi re ñaꞌa̱ cuayáꞌ cuna lcaa nguꞌ tyaꞌa na. 
\p  
\v 28 Ndiꞌya̱ ntiꞌ ya chaꞌ ñaꞌa̱ ti cuaꞌni ycuiꞌ Jesucristo nu Xuꞌna na chaꞌ tsoꞌo loꞌo ma̱. Juaꞌa̱ caca chaꞌ lacua.