\id 1JN  
\h 1 JUAN 
\toc1 Quityi sube nu nguscua San Juan clyo, nu ndyaa ca slo lcaa ñati̱ jiꞌi̱ Jesucristo 
\toc2 1 JUAN 
\toc3 1 Jn. 
\mt1 Quityi sube nu nguscua San Juan clyo, nu ndyaa ca slo lcaa ñati̱ jiꞌi̱ Jesucristo 
\c 1  
\s1 Jesucristo laca nu nda chaca chalyuu cucui jiꞌi̱ ñati̱ 
\p  
\v 1 Cua laca ntucua Jesús loꞌo ycuiꞌ Ndyosi Sti yu nu loꞌo nguxana chalyuu tya clyo; la cuiꞌ yu laca nu nchcuiꞌ ya jiꞌi̱, nu loꞌo nscua ya tilaca laca Jesucristo. Cua jlo tsoꞌo tiꞌ ya chaꞌ biꞌ, chaꞌ cua naꞌa̱ tsoꞌo ya jiꞌi̱ yu loꞌo cloo ya, chaꞌ stuꞌba ti ngutaꞌa̱ ya loꞌo yu; cua ndyuloo ya jiꞌi̱ yu loꞌo cua nguaꞌni caꞌa̱ yaꞌ ya jiꞌi̱ ycuiꞌ yu. Cua nchcuiꞌ ya loꞌo cuꞌma̱ chaꞌ Jesucristo laca nu nda chaca chalyuu cucui jiꞌi̱ ñati̱.  
\v 2 Ngula Jesucristo nde lo yuu chalyuu su ndiꞌi̱ ya, loꞌo juaꞌa̱ cua naꞌa̱ ya jiꞌi̱ ycuiꞌ yu; biꞌ laca chaꞌ nu ndachaꞌ ya jiꞌi̱ ma̱ juani, chaꞌ chañi tsa laca chaꞌ biꞌ. Nclyuꞌu ya jiꞌi̱ ma̱ ñiꞌya̱ laca chaꞌ tyucui tyempo luꞌú Jesucristo, chaꞌ ntucua yu ca slo ycuiꞌ Ndyosi Sti na clyo; juaꞌa̱ nclyuꞌu ya ñiꞌya̱ ngua chaꞌ naꞌa̱ ya jiꞌi̱ yu nde chalyuu re.  
\v 3 Juani culuꞌu ya jiꞌi̱ ma̱ cua ñaꞌa̱ ca chaꞌ nu cua naꞌa̱ ya, culuꞌu ya cua ñaꞌa̱ ca chaꞌ nu cua ndyuna ya. Chañi laca chaꞌ stuꞌba ntsuꞌu tyiquee na loꞌo ycuiꞌ Ndyosi Sti na, juaꞌa̱ loꞌo Jesucristo nu sca ti Sñiꞌ ycuiꞌ Ni. Loꞌo juani cua ntiꞌ ya chaꞌ stuꞌba ti caca tyiquee ma̱ loꞌo ya;  
\v 4 biꞌ chaꞌ nscua ya quityi re, chaꞌ lcaa tsa̱ tsoꞌo ti tyiꞌi̱ tyiquee na. 
\s1 Xcuiꞌ lubii tsa cresiya jiꞌi̱ ycuiꞌ Ndyosi 
\p  
\v 5 Nde culuꞌu ya jiꞌi̱ ma̱ chaꞌ nu cua nda Jesucristo loꞌo ya: Ñiꞌya̱ ntiꞌ sca xee nu ndubi tsa ñaꞌa̱, juaꞌa̱ ntiꞌ ycuiꞌ Ndyosi si tyuꞌu tucua Ni slo na; xcuiꞌ lubii tsa cresiya jiꞌi̱ Ni, chaꞌ neꞌ cresiya jiꞌi̱ ycuiꞌ Ni ná ntsuꞌu su talya ñaꞌa̱, ná ntsuꞌu chaꞌ cuxi tsiyaꞌ ti.  
\v 6 Chaꞌ cuiñi laca nu nda na si ñacui̱ na chaꞌ stuꞌba ntsuꞌu tyiquee na loꞌo ycuiꞌ Ndyosi, loꞌo liꞌ ñaꞌa̱ ti tya ndiya tiꞌ na chaꞌ cuxi; ndiꞌi̱ na chalyuu ñiꞌya̱ laca si talya tsa ñaꞌa̱ su ndiꞌi̱ na liꞌ, chaꞌ ná tsoꞌo nduꞌni na.  
\v 7 Pana si lubii cresiya jiꞌna ñiꞌya̱ loꞌo lubii cresiya jiꞌi̱ ycuiꞌ Ni, nduꞌni na chaꞌ tsoꞌo liꞌ; stuꞌba ti caca tyiquee na loꞌo tyaꞌa ngusñi na chaꞌ jiꞌi̱ Jesús liꞌ. Loꞌo juaꞌa̱ cuityi̱ Ni quiꞌya nu ntsuꞌu jiꞌna, xquiꞌya chaꞌ cua ndyalú tañi Jesús Sñiꞌ ycuiꞌ Ni loꞌo ngujuii yu lo crusi. 
\p  
\v 8 Si ñacui̱ na chaꞌ ná ntsuꞌu quiꞌya jiꞌna tsiyaꞌ ti, na ñiloꞌo na jiꞌi̱ ycuiꞌ ca ti na liꞌ, chaꞌ ná nchca chcuiꞌ na chaꞌ liñi.  
\v 9 Pana taca jlya tiꞌ na jiꞌi̱ ycuiꞌ Ndyosi chaꞌ cuaꞌni clyu tiꞌ Ni jiꞌna jiꞌi̱ quiꞌya nu ntsuꞌu jiꞌna, nu loꞌo ñii na jiꞌi̱ Ni chaꞌ ntsuꞌu quiꞌya jiꞌna. Tsoꞌo tsa nduꞌni Ni loꞌo na liꞌ; hasta cuityi̱ Ni lcaa chaꞌ cuxi nu ntsuꞌu neꞌ cresiya jiꞌna, xquiꞌya chaꞌ ngujuii Jesús lo crusi.  
\v 10 Ñiꞌya̱ si cua nacui̱ na chaꞌ na cuiñi ycuiꞌ Ndyosi, juaꞌa̱ ndyuꞌu chaꞌ si ñacui̱ na chaꞌ ná ntsuꞌu quiꞌya jiꞌna tsiyaꞌ ti; ná ngusñi su̱u̱ chaꞌ jiꞌi̱ ycuiꞌ Ndyosi neꞌ cresiya jiꞌna, si tya ñacui̱ na juaꞌa̱. 
\c 2  
\s1 Cristo nu laca tuꞌba jiꞌna chaꞌ chcuiꞌ loꞌo ycuiꞌ Ndyosi cuentya jiꞌna 
\p  
\v 1 Ñiꞌya̱ ntiꞌ naꞌ ñaꞌa̱a̱ jiꞌi̱ sñiꞌ naꞌ, juaꞌa̱ ntiꞌ naꞌ ñaꞌa̱a̱ jiꞌi̱ cuꞌma̱, chaꞌ tyacaꞌa tsa ma̱ ꞌna; biꞌ chaꞌ nscua naꞌ quityi re chaꞌ ca̱a̱ ca slo cuꞌma̱, chaꞌ ná ntiꞌ naꞌ chaꞌ sta ycuiꞌ Ndyosi quiꞌya jiꞌi̱ ma̱. Pana si ntsuꞌu chaꞌ sta Ni quiꞌya jiꞌna loꞌo cua ngusñi na chaꞌ jiꞌi̱ Jesucristo, la cuiꞌ Jesucristo laca nu cua nchcubeꞌ yu cña loo na. Sca ñati̱ nu lubii tsa laca nu Jesucristo biꞌ.  
\v 2 Ngua cuxi tyiquee na cuentya jiꞌi̱ ycuiꞌ Ndyosi Sti na, xquiꞌya chaꞌ nguaꞌni na chaꞌ cuxi; biꞌ chaꞌ nchcubeꞌ Jesucristo cña loo na, chaꞌ quiꞌya ycuiꞌ yu yabeꞌ nu ntsuꞌu jiꞌna xquiꞌya chaꞌ cuxi nu nguaꞌni na. La cuiꞌ juaꞌa̱ quiꞌya Jesucristo yabeꞌ nu ntsuꞌu jiꞌi̱ lcaa ñati̱ chalyuu nu tsoꞌo ntsuꞌu tyiquee ñaꞌa̱ jiꞌi̱ ycuiꞌ Ni. 
\p  
\v 3 Nu loꞌo ntiꞌ na taquiyaꞌ na cua ñaꞌa̱ ca cña nu ntiꞌ Ni chaꞌ cuaꞌni na, liꞌ taca jlo tiꞌ na chaꞌ chañi chaꞌ ntsuꞌu chaꞌ jiꞌna loꞌo Jesucristo.  
\v 4 Cuiñi tsa ñati̱ nu nacui̱ chaꞌ ntsuꞌu chaꞌ jiꞌi̱ nguꞌ loꞌo Jesucristo, si ná ndaquiyaꞌ nguꞌ jiꞌi̱ cña nu nclyo Ni jiꞌi̱ nguꞌ; ná liñi chaꞌ nu ntsuꞌu tyiquee nguꞌ biꞌ.  
\v 5 Si chañi laca chaꞌ ntucuá na lcaa chaꞌ nu nda Jesucristo loꞌo na, liꞌ chañi laca chaꞌ ntsuꞌu tyiquee na ñaꞌa̱ na jiꞌi̱ ycuiꞌ Ndyosi Sti yu; juaꞌa̱ caca cuayáꞌ tiꞌ na chaꞌ chañi chaꞌ laca na ñati̱ jiꞌi̱ Jesucristo masi tya ndiꞌi̱ na chalyuu.  
\v 6 Ñati̱ nu nchcuiꞌ loꞌo xaꞌ la nguꞌ chaꞌ ñati̱ jiꞌi̱ Jesucristo laca ycuiꞌ, ntsuꞌu chaꞌ cuaꞌni ñati̱ biꞌ cña, cua ñaꞌa̱ ca cña nu nguaꞌni ycuiꞌ Jesucristo. 
\s1 Sca cña cucui chaꞌ cuaꞌni na 
\p  
\v 7 Cuꞌma̱ tyaꞌa ngusñi na chaꞌ jiꞌi̱ Jesús, cua nscua chaꞌ lo quityi re chaꞌ tyajaꞌa̱ ma̱ tyuꞌu tsoꞌo tyiquee ma̱ ñaꞌa̱ ma̱ jiꞌi̱ tyaꞌa ñati̱ ma̱. Siꞌi sca chaꞌ nu bilya cuna ma̱ laca chaꞌ biꞌ; cua ndyuna ma̱ chaꞌ biꞌ tya loꞌo ngusñi ma̱ chaꞌ jiꞌi̱ Jesucristo tya clyo la, chaꞌ la cuiꞌ ti chaꞌ biꞌ laca nu cua nscua cua saꞌni.  
\v 8 Pana siꞌi juaꞌa̱ ndyuꞌni ñati̱, biꞌ chaꞌ nacui̱ na chaꞌ sca cña cucui laca biꞌ. Tsubiꞌ ti nguxana Jesucristo nguluꞌu yu jiꞌna ñiꞌya̱ ntsuꞌu chaꞌ tyuꞌu tsoꞌo tyiquee na ñaꞌa̱ na jiꞌi̱ xaꞌ la tyaꞌa ñati̱ na, nguaꞌni Jesús chaꞌ taca cuaꞌni na juaꞌa̱. Sca chaꞌ cucui laca biꞌ, chaꞌ cua tye ti chaꞌ talya ñaꞌa̱ neꞌ cresiya jiꞌna; juani tyanu nu chaꞌ tsoꞌo jiꞌi̱ Jesucristo neꞌ cresiya jiꞌna, ñiꞌya̱ ntiꞌ si ntyijiꞌi̱ sca xee nu ndubi tsa ñaꞌa̱ su ndiꞌi̱ na. 
\p  
\v 9 Ñati̱ nu ñacui̱: “Cua ngusñi ya chaꞌ jiꞌi̱ Jesucristo, lubii tsa cresiya jiꞌi̱ ya juani”, ñacui̱ nguꞌ, pana tya tiꞌí tiꞌ nguꞌ biꞌ ñaꞌa̱ nguꞌ jiꞌi̱ tyaꞌa ñati̱ nguꞌ, ñaꞌa̱ ti tya ntsuꞌu tsa chaꞌ cuxi neꞌ cresiya jiꞌi̱ nguꞌ biꞌ, ñiꞌya̱ laca sca seꞌi̱ su talya tsa ñaꞌa̱.  
\v 10 Ñati̱ nu ntsuꞌu tsa tyiquee ñaꞌa̱ jiꞌi̱ tyaꞌa ñati̱, biꞌ laca ñati̱ nu ntsuꞌu xee jiꞌi̱ Jesucristo neꞌ cresiya jiꞌi̱. Ni sca chaꞌ cuxi ná cuaꞌni nguꞌ biꞌ, nu cuaꞌni chaꞌ tyaꞌa̱chu̱ꞌ xaꞌ la ñati̱ jiꞌi̱ chaꞌ jiꞌi̱ Jesucristo.  
\v 11 Ñati̱ nu tiꞌí tiꞌ jiꞌi̱ tyaꞌa ñati̱ ni, tya ntsuꞌu tsa chaꞌ cuxi neꞌ cresiya jiꞌi̱ nguꞌ biꞌ; ñiꞌya̱ ntiꞌ nguꞌ loꞌo ndiꞌi̱ nguꞌ su talya ñaꞌa̱, juaꞌa̱ ti ntiꞌ nguꞌ biꞌ ndiꞌi̱ nguꞌ chalyuu, chaꞌ ná nchca quije tyucui̱i̱ liñi su tsaa nguꞌ, chaꞌ lye tsa ndacu̱ꞌ talya xee nu ñaꞌa̱ nguꞌ biꞌ liꞌ. 
\p  
\v 12 Cuꞌma̱ sñiꞌ naꞌ, nscua naꞌ quityi re chaꞌ ca̱a̱ slo ma̱, xquiꞌya chaꞌ nguaꞌni clyu tiꞌ ycuiꞌ Ndyosi jiꞌi̱ ma̱; xquiꞌya Jesucristo cua ngüityi̱ Ni quiꞌya nu ntsuꞌu jiꞌi̱ ma̱.  
\v 13 Nscua naꞌ quityi re chaꞌ ca̱a̱ slo cuꞌma̱ nguꞌ cusuꞌ, chaꞌ cua ngujui ñiꞌya̱ nu tyuꞌu chaꞌ jiꞌi̱ ma̱ loꞌo Jesucristo nu stuꞌba ti ntucua loꞌo ycuiꞌ Ndyosi Sti yu tya loꞌo nguxana chalyuu. Loꞌo juaꞌa̱ nscua naꞌ quityi re chaꞌ ca̱a̱ slo cuꞌma̱ nguꞌ cuañiꞌ, chaꞌ cua ntiji̱loo ma̱ jiꞌi̱ nu xñaꞌa̱. 
\p Cuꞌma̱ sñiꞌ naꞌ, cua ngujui ñiꞌya̱ nu tyuꞌu chaꞌ jiꞌi̱ ma̱ loꞌo ycuiꞌ Ndyosi Sti na, biꞌ chaꞌ nscua naꞌ quityi re chaꞌ ca̱a̱ slo ma̱.  
\v 14 Cuꞌma̱ nguꞌ cusuꞌ, cua ngusñi ma̱ chaꞌ jiꞌi̱ Jesucristo, la cuiꞌ Cristo nu cua luꞌú loꞌo ycuiꞌ Ndyosi Sti yu tya clyo, biꞌ chaꞌ nscua naꞌ quityi re chaꞌ ca̱a̱ ca slo ma̱. Cuꞌma̱ nguꞌ cuañiꞌ, nguula ti tiꞌ ma̱ ndiꞌi̱ ma̱, chaꞌ cua ndyanu tsoꞌo chaꞌ jiꞌi̱ ycuiꞌ Ndyosi neꞌ cresiya jiꞌi̱ ma̱; cua ntiji̱loo ma̱ jiꞌi̱ nu xñaꞌa̱, biꞌ chaꞌ laca nscua naꞌ quityi re chaꞌ ca̱a̱ slo ma̱. 
\p  
\v 15 Ná tyuꞌu tyiquee ma̱ ñaꞌa̱ ma̱ chaꞌ cuxi nu ntsuꞌu chalyuu, ni ná ca tiji̱ꞌ tsa tiꞌ ma̱ jiꞌi̱ cua ñaꞌa̱ ca chaꞌ culiyaꞌ nu ndyiji jiꞌi̱ ñati̱ chaꞌ ndiya la tiꞌ nguꞌ jiꞌi̱. Si ndiya la tiꞌ na nu cuxi nu ntsuꞌu chalyuu, ná caca jiꞌna tsiyaꞌ ti tyuꞌu tyiquee na ñaꞌa̱ na jiꞌi̱ ycuiꞌ Ndyosi Sti na.  
\v 16 Lcaa chaꞌ cuxi nu ndacaꞌa jiꞌi̱ ñati̱ chaꞌ ná xñi tsoꞌo nguꞌ chaꞌ jiꞌi̱ ycuiꞌ Ndyosi, siꞌi ca su ntucua ycuiꞌ Ndyosi Sti na ndyuꞌu chaꞌ biꞌ. Lcaa chaꞌ cuxi nu ndiya tiꞌ ñati̱ jiꞌi̱, chaꞌ tyaalaꞌ xi tyiquee nguꞌ; juaꞌa̱ lcaa chaꞌ cuxi nu ntiꞌ nguꞌ cuaꞌni nguꞌ loꞌo ñaꞌa̱ nguꞌ jiꞌi̱; juaꞌa̱ lcaa na nu ntiꞌ nguꞌ chaꞌ caja jiꞌi̱ nguꞌ, chaꞌ juaꞌa̱ cuaꞌni tyixi ti nguꞌ loꞌo tyaꞌa nguꞌ, nde chalyuu ti ndyuꞌu lcaa chaꞌ cuxi biꞌ.  
\v 17 Yala ti tye chalyuu re, culiji juaꞌa̱ ti lcaa chaꞌ cuxi nu ndiya tiꞌ ñati̱ chalyuu; pana ñati̱ nu taquiyaꞌ jiꞌi̱ chaꞌ nu nchcuiꞌ ycuiꞌ Ndyosi ni, ná ngaꞌa̱ chaꞌ tye chalyuu jiꞌi̱ nguꞌ biꞌ. 
\s1 Ntsuꞌu chaꞌ liñi loꞌo ntsuꞌu chaꞌ cuiñi 
\p  
\v 18 Cuꞌma̱ sñiꞌ naꞌ, cua ndyalaa hora chaꞌ tye lcaa chaꞌ nu ntsuꞌu chalyuu. Cua jlo tiꞌ ma̱ chaꞌ cua lijya̱ sca ñati̱ tlyu nu cñiloꞌo jiꞌi̱ tyaꞌa ñati̱ na chaꞌ Cristo laca ycuiꞌ yu; xu̱u̱ tyaꞌa yu biꞌ loꞌo lcaa na nu ntsuꞌu chaꞌ jiꞌna loꞌo Cristo. Masi tyempo juani, quiñaꞌa̱ tsa nguꞌ cuiñi ntsuꞌu chalyuu, nu ntiꞌ xu̱u̱ tyaꞌa loꞌo ñati̱ jiꞌi̱ Cristo; biꞌ chaꞌ cua ngua cuayáꞌ tiꞌ na chaꞌ cua ngulala ti tye lcaa chaꞌ.  
\v 19 Tya clyo ndyuꞌu tiꞌi̱ nu nguꞌ cuiñi biꞌ loꞌo na, loꞌo liꞌ ngutuꞌu nguꞌ biꞌ ndyaa nguꞌ; siꞌi ñati̱ tyaꞌa ntsuꞌu chaꞌ jiꞌna loꞌo Jesucristo laca nguꞌ biꞌ. Si chañi chaꞌ tyaꞌa ndyaꞌa̱ na laca nguꞌ biꞌ, cua ndyanu nguꞌ loꞌo na nquichaꞌ; pana ngutuꞌu nguꞌ biꞌ, chaꞌ taca ca cuayáꞌ tiꞌ na chaꞌ siꞌi lcaa ñati̱ nu ndyuꞌu tiꞌi̱ loꞌo na laca tyaꞌa ngusñi na chaꞌ jiꞌi̱ Jesucristo. 
\p  
\v 20 Cua nda Cristo Xtyiꞌi ycuiꞌ Ni chaꞌ tyanu neꞌ cresiya jiꞌi̱ lcaa nguꞌ tyaꞌa ngusñi ma̱ chaꞌ jiꞌi̱ Ni, biꞌ chaꞌ cua ngua cuayáꞌ tsoꞌo tiꞌ lcaa tyaꞌa ma̱ lcaa chaꞌ nu nclyuꞌu ycuiꞌ Ndyosi jiꞌna.  
\v 21 Cua nscua naꞌ quityi re, xquiꞌya chaꞌ nchca cuayáꞌ tiꞌ ma̱ ñaꞌa̱ chaꞌ liñi nu ntsuꞌu jiꞌi̱ Cristo. Siꞌi chaꞌ ná jlo tiꞌ ma̱ chaꞌ liñi biꞌ; cua jlo tiꞌ ma̱ ñaꞌa̱ chaꞌ liñi nu nchcuiꞌ na, chaꞌ siꞌi chaꞌ cuiñi ti laca chaꞌ biꞌ. 
\p  
\v 22 ¿Tilaca laca nu cuiñi lacua? Ñati̱ cuiñi biꞌ laca nu ñacui̱ chaꞌ siꞌi Cristo laca Jesús, la cuiꞌ Cristo nu cua nda ycuiꞌ Ndyosi jiꞌi̱ chaꞌ ya̱a̱ yu chalyuu. Nxu̱u̱ tyaꞌa nguꞌ biꞌ loꞌo ñati̱ nu ntsuꞌu chaꞌ jiꞌi̱ loꞌo Cristo, chaꞌ ñacui̱ nguꞌ biꞌ chaꞌ siꞌi nu sca ti Sñiꞌ ycuiꞌ Ndyosi laca Jesucristo, chaꞌ siꞌi ycuiꞌ Ndyosi laca Sti Jesucristo.  
\v 23 Si ñacui̱ na jiꞌi̱ ñati̱ chaꞌ siꞌi Sñiꞌ ycuiꞌ Ndyosi laca Jesucristo, ná ntsuꞌu chaꞌ jiꞌna loꞌo ycuiꞌ Ndyosi Sti Jesucristo, juaꞌa̱ ndyuꞌu chaꞌ biꞌ liꞌ; pana loꞌo xñi na chaꞌ jiꞌi̱ Sñiꞌ ycuiꞌ Ni, cua ntsuꞌu chaꞌ jiꞌna loꞌo ycuiꞌ Ndyosi Sti yu, juaꞌa̱ ndyuꞌu chaꞌ biꞌ liꞌ. 
\p  
\v 24 Biꞌ chaꞌ ngaꞌa̱ chaꞌ tyanu tachaa chaꞌ biꞌ neꞌ cresiya jiꞌi̱ ma̱, chaꞌ nu cua ndyuna ma̱ jiꞌi̱ Jesús tya loꞌo ngusñi ma̱ chaꞌ jiꞌi̱ yu tya clyo. Si tya ndyanu chaꞌ biꞌ neꞌ cresiya jiꞌi̱ ma̱, stuꞌba tsa ntsuꞌu tyiquee ma̱ loꞌo Jesucristo masi tya ndiꞌi̱ ma̱ chalyuu, loꞌo juaꞌa̱ stuꞌba ntsuꞌu tyiquee ma̱ loꞌo ycuiꞌ Ndyosi Sti na liꞌ.  
\v 25 Biꞌ laca chaꞌ nu ngüiñi jiꞌi̱ Jesucristo loꞌo na, chaꞌ taca caja chaca chalyuu cucui nu ná ngaꞌa̱ chaꞌ tye jiꞌna. 
\p  
\v 26 Tsa biꞌ ti chaꞌ nchcuiꞌ naꞌ cuentya jiꞌi̱ ñati̱ nu nñiloꞌo jiꞌi̱ ma̱ juaꞌa̱.  
\v 27 Nu cuꞌma̱ ni, cua ndyanu Xtyiꞌi ycuiꞌ Ndyosi neꞌ cresiya jiꞌi̱ ma̱, biꞌ chaꞌ ngaꞌaa ntiꞌ chaꞌ culuꞌu xaꞌ ñati̱ jiꞌi̱ ma̱; Xtyiꞌi ycuiꞌ Ndyosi ni, biꞌ laca nu culuꞌu jiꞌi̱ ma̱ lcaa chaꞌ nu lyiji chaꞌ ca tsaꞌa̱ ma̱ jiꞌi̱. Nu loꞌo nclyuꞌu Xtyiꞌi ycuiꞌ Ndyosi jiꞌi̱ ma̱ ni, liñi tsa laca chaꞌ biꞌ; siꞌi chaꞌ cuiñi nda nu biꞌ. Biꞌ chaꞌ lacua, ñiꞌya̱ nu nclyuꞌu Xtyiꞌi ycuiꞌ Ni jiꞌi̱ ma̱, la cuiꞌ juaꞌa̱ ngaꞌa̱ chaꞌ xñi ma̱ chaꞌ jiꞌi̱ Jesús. 
\p  
\v 28 Nu juani ti, cuꞌma̱ sñiꞌ naꞌ, xñi tsoꞌo ma̱ chaꞌ jiꞌi̱ Jesucristo. Loꞌo liꞌ, loꞌo ca̱a̱ Jesucristo chalyuu chaca quiyaꞌ, ngaꞌaa ntsuꞌu chaꞌ ca tyujuꞌu tiꞌ na loꞌo ñaꞌa̱ na jiꞌi̱ Ni chaꞌ ca̱a̱ Ni; tyucui tyiquee na tyacua tyaꞌa na loꞌo Ni liꞌ.  
\v 29 Cua nchca cuayáꞌ tiꞌ ma̱ chaꞌ lubii tsa cresiya jiꞌi̱ Jesucristo, biꞌ chaꞌ tsoꞌo si ca cuayáꞌ tiꞌ ma̱ chaꞌ cua ñaꞌa̱ ca ñati̱ nu nduꞌni chaꞌ tsoꞌo ñiꞌya̱ ndyuꞌni ycuiꞌ Jesús, caca nguꞌ biꞌ sñiꞌ ycuiꞌ Ndyosi. 
\c 3  
\s1 Sñiꞌ ycuiꞌ Ndyosi laca na 
\p  
\v 1 Tlyu tsa chaꞌ tsoꞌo laca chaꞌ ntsuꞌu tsa tyiquee ycuiꞌ Ndyosi Sti na ñaꞌa̱ Ni jiꞌi̱ ca taꞌa nguꞌ tyaꞌa ntsuꞌu chaꞌ jiꞌna loꞌo Jesucristo; biꞌ chaꞌ laca chaꞌ nchcuiꞌ ycuiꞌ Ndyosi jiꞌna chaꞌ sñiꞌ ycuiꞌ Ni laca na, loꞌo juaꞌa̱ chañi laca chaꞌ biꞌ. Ná ntajaꞌa̱ ñati̱ chalyuu tyuloo jiꞌna chaꞌ sñiꞌ Ni laca na; la cuiꞌ juaꞌa̱ loꞌo ngutiꞌi̱ Jesucristo chalyuu, ná ntajaꞌa̱ nguꞌ tyuloo nguꞌ jiꞌi̱ yu liꞌ.  
\v 2 Cuꞌma̱ nguꞌ tyaꞌa na nu tyacaꞌa tsa ma̱ ꞌna, nu juani ti laca na sñiꞌ ycuiꞌ Ndyosi; pana bilya caja chaꞌ jiꞌna ñiꞌya̱ nu tsoꞌo la ñaꞌa̱ na, nu loꞌo tyiꞌi̱ na loꞌo ycuiꞌ Ni nde loo la. Ñiꞌya̱ laca ycuiꞌ Jesucristo, juaꞌa̱ caca na loꞌo culuꞌu loo Jesucristo jiꞌna loꞌo cua ndye chalyuu re; liꞌ taca ñaꞌa̱ na jiꞌi̱ Jesucristo ñiꞌya̱ nu laca ycuiꞌ. Tsa biꞌ ti chaꞌ nchca cuayáꞌ tiꞌ na juani.  
\v 3 Lcaa ñati̱ nu ntiꞌ ñaꞌa̱ jiꞌi̱ Ni ca liꞌ, ngaꞌa̱ chaꞌ cuaꞌni lubii nguꞌ jiꞌi̱ cresiya jiꞌi̱ nguꞌ, ñiꞌya̱ nu lubii cresiya jiꞌi̱ ycuiꞌ Jesucristo. 
\p  
\v 4 Si nduꞌni na chaꞌ cuxi, laca chaꞌ ná ntajaꞌa̱ na cuaꞌni na cña nu ngulo ycuiꞌ Ndyosi jiꞌna; ntsuꞌu quiꞌya jiꞌna xquiꞌya chaꞌ ná ntajaꞌa̱ na taquiyaꞌ na jiꞌi̱ chaꞌ nu nchcuiꞌ Ni loꞌo na.  
\v 5 Cua jlo tiꞌ ma̱ chaꞌ cua ya̱a̱ Jesucristo chalyuu chaꞌ cuityi̱ Ni quiꞌya nu ntsuꞌu jiꞌi̱ ñati̱; pana ycuiꞌ Cristo ni, ná ntsuꞌu quiꞌya jiꞌi̱ yu tsiyaꞌ ti.  
\v 6 Ni sca ñati̱ nu nxñi tsoꞌo chaꞌ jiꞌi̱ Jesucristo lcaa tsa̱, ngaꞌaa nscua chaꞌ cuaꞌni nguꞌ biꞌ chaꞌ cuxi. Nu ñati̱ nu nduꞌni chaꞌ cuxi lcaa tsa̱, nduꞌni nguꞌ chaꞌ cuxi xquiꞌya chaꞌ bilya tyuꞌu chaꞌ jiꞌi̱ nguꞌ biꞌ loꞌo Jesucristo, bilya xñi nguꞌ chaꞌ jiꞌi̱ Ni.  
\v 7 Cuꞌma̱ sñiꞌ naꞌ, ná ntiꞌ naꞌ chaꞌ cñiloꞌo xaꞌ ñati̱ jiꞌi̱ ma̱. Xcuiꞌ tsoꞌo ti nguaꞌni Jesucristo nde chalyuu; biꞌ chaꞌ lacua, lcaa ñati̱ nu ntsuꞌu chaꞌ jiꞌi̱ loꞌo Jesucristo, cua nscua chaꞌ xcuiꞌ chaꞌ tsoꞌo ti cuaꞌni nguꞌ biꞌ laja loꞌo tyiꞌi̱ nguꞌ chalyuu.  
\v 8 Lcaa ñati̱ nu nduꞌni xcuiꞌ chaꞌ cuxi, cua laca nguꞌ biꞌ sñiꞌ ycuiꞌ nu xñaꞌa̱ nu laca xuꞌna cuiñaja; tya lyiji tye chaꞌ cuaꞌni nu xñaꞌa̱ biꞌ chaꞌ cuxi. Sca ti Jesús nu Sñiꞌ ycuiꞌ Ndyosi, cua ya̱a̱ Ni chalyuu chaꞌ cuaꞌni tye Ni jiꞌi̱ lcaa cña nu ndyuꞌni nu xñaꞌa̱ biꞌ. 
\p  
\v 9 Ñati̱ nu laca sñiꞌ ycuiꞌ Ndyosi ni, ngaꞌaa nscua chaꞌ cuaꞌni nguꞌ chaꞌ cuxi, chaꞌ cua nda ycuiꞌ Ndyosi chaca chaꞌ tsoꞌo la nu tyanu neꞌ cresiya jiꞌi̱ nguꞌ biꞌ xquiꞌya Xtyiꞌi ycuiꞌ Ndyosi. Ngaꞌaa tyajaꞌa̱ nguꞌ biꞌ cuaꞌni nguꞌ chaꞌ cuxi, chaꞌ sñiꞌ ycuiꞌ Ndyosi laca nguꞌ biꞌ.  
\v 10 Biꞌ chaꞌ nchca cuayáꞌ tiꞌ ma̱ juani ñiꞌya̱ laca ñati̱ nu laca sñiꞌ ycuiꞌ Nydosi, loꞌo juaꞌa̱ nchca cuayáꞌ tiꞌ ma̱ ñiꞌya̱ nduꞌni ñati̱ nu laca sñiꞌ ycuiꞌ nu xñaꞌa̱. Siꞌi sñiꞌ ycuiꞌ Ndyosi laca ñati̱ nu nduꞌni chaꞌ cuxi lcaa tsa̱, ni siꞌi sñiꞌ ycuiꞌ Ndyosi laca ñati̱ nu ná ntsuꞌu tyiquee ñaꞌa̱ jiꞌi̱ tyaꞌa ñati̱. 
\s1 Ngaꞌa̱ chaꞌ tyuꞌu tyiquee na ñaꞌa̱ na jiꞌi̱ tyaꞌa ñati̱ na 
\p  
\v 11 Nde nscua la cuiꞌ chaꞌ nu cua ndyuna ma̱ loꞌo ngusñi ma̱ chaꞌ jiꞌi̱ Jesús tya clyo: ngaꞌa̱ chaꞌ tyuꞌu tyiquee na ñaꞌa̱ na jiꞌi̱ tyaꞌa ñati̱ na.  
\v 12 Ná cuaꞌni na ñiꞌya̱ nu nguaꞌni jyoꞌo Caín; sñiꞌ ycuiꞌ nu xñaꞌa̱ ngua yu biꞌ, chaꞌ ndyujuii yu jiꞌi̱ tyaꞌa yu. ¿Ni chaꞌ laca nguaꞌni yu juaꞌa̱? Ndyujuii yu jiꞌi̱ tyaꞌa yu xquiꞌya chaꞌ xcuiꞌ chaꞌ cuxi nguaꞌni jyoꞌo Caín biꞌ, biꞌ chaꞌ ná ndiya tiꞌ yu chaꞌ xcuiꞌ chaꞌ tsoꞌo nguaꞌni yu tyaꞌa yu biꞌ. 
\p  
\v 13 Cuꞌma̱ tyaꞌa ngusñi na chaꞌ jiꞌi̱ ycuiꞌ Ndyosi, ná quiñaꞌa̱ tsa chaꞌ culacua tiꞌ ma̱ si liyeꞌ tsa tiꞌ ñati̱ chalyuu ñaꞌa̱ nguꞌ jiꞌi̱ ma̱.  
\v 14 Xcuiꞌ ngunaꞌ tya ndiꞌi̱ na chalyuu cua tsubiꞌ la xquiꞌya quiꞌya nu ntsuꞌu jiꞌna; pana juani, cua nda ycuiꞌ Ndyosi chaca chalyuu cucui jiꞌna, chaꞌ tsoꞌo ti ndiꞌi̱ tyiquee na juani. Ntsuꞌu tsa tyiquee na ñaꞌa̱ na jiꞌi̱ xaꞌ la tyaꞌa ntsuꞌu chaꞌ jiꞌna loꞌo Jesucristo; biꞌ chaꞌ taca jlo tiꞌ na chaꞌ cua ntsuꞌu chaca chalyuu cucui jiꞌna juani, chaꞌ ñati̱ nu ná ntsuꞌu tyiquee ñaꞌa̱ jiꞌi̱ tyaꞌa ñati̱, ngunaꞌ tya ndiꞌi̱ nguꞌ chalyuu.  
\v 15 Ñiꞌya̱ laca ñati̱ nu ndyujuii jiꞌi̱ tyaꞌa ñati̱, juaꞌa̱ laca na si liyeꞌ tiꞌ na ñaꞌa̱ na jiꞌi̱ tyaꞌa ñati̱ na. Jlo tiꞌ ma̱ chaꞌ ngaꞌaa caja chalyuu cucui biꞌ jiꞌi̱ ñati̱ si ndyujuii nguꞌ jiꞌi̱ tyaꞌa ñati̱ nguꞌ, pana la cuiꞌ tyaꞌa chaꞌ laca si liyeꞌ tsa tiꞌ na ñaꞌa̱ na jiꞌi̱ tyaꞌa ñati̱ na.  
\v 16 Nu loꞌo cube tiꞌ na chaꞌ cuentya jiꞌna ntajaꞌa̱ Cristo ngujuii yu lo crusi, chaꞌ ntsuꞌu tsa tyiquee Ni ñaꞌa̱ Ni jiꞌna, liꞌ ca cuayáꞌ tiꞌ na ñaꞌa̱ chaꞌ nu tsoꞌo la cuaꞌni na, si ntsuꞌu tyiquee na ñaꞌa̱ na jiꞌi̱ tyaꞌa ngusñi na chaꞌ jiꞌi̱ Ni. Tsoꞌo si tyajaꞌa̱ na xtyucua na jiꞌi̱ tyaꞌa na juaꞌa̱, masi hasta cajaa ycuiꞌ na cuentya jiꞌi̱ nguꞌ tyaꞌa na.  
\v 17 Ntsuꞌu nguꞌ tyaꞌa na nu ngaꞌaa ntsuꞌu na nu lyiji jiꞌi̱ nguꞌ tsiyaꞌ ti chaꞌ tyiji̱ yuꞌu jiꞌi̱ nguꞌ chalyuu. Si juaꞌa̱ tsoꞌo ti ndiꞌi̱ na, loꞌo liꞌ ñaꞌa̱ na jiꞌi̱ tyaꞌa na nu ntsuꞌu na nu lyiji jiꞌi̱ nguꞌ, pana ná ntajaꞌa̱ na cuaꞌni tyaꞌna tiꞌ na jiꞌi̱ tyaꞌa na, liꞌ ná taca jiꞌna ñacui̱ na chaꞌ ntsuꞌu tyiquee na ñaꞌa̱ na jiꞌi̱ ycuiꞌ Ndyosi, chaꞌ nu ycuiꞌ Ndyosi ni, ntsuꞌu tsa tyiquee Ni ñaꞌa̱ Ni jiꞌna.  
\v 18 Cuꞌma̱ sñiꞌ naꞌ, nu loꞌo ntsuꞌu tsa tyiquee na ñaꞌa̱ na jiꞌi̱ ycuiꞌ Ndyosi loꞌo jiꞌi̱ tyaꞌa ñati̱ na, siꞌi sca cui̱i̱ ti laca nu chcuiꞌ na loꞌo nguꞌ, siꞌi sca chaꞌ nu nda ti na loꞌo nguꞌ caca biꞌ; tyucui tyiquee na ngaꞌa̱ chaꞌ xtyucua na jiꞌi̱ nu nguꞌ tyaꞌa na biꞌ. 
\s1 Taca jlo tiꞌ na chaꞌ chañi chaꞌ ntsuꞌu chaꞌ jiꞌna loꞌo ycuiꞌ Ndyosi 
\p  
\v 19 Si juaꞌa̱ nduꞌni na, liꞌ caca cuayáꞌ tiꞌ na chaꞌ liñi tsa laca chaꞌ nu cua nda ycuiꞌ Ndyosi loꞌo na, chaꞌ nu jlya tiꞌ na jiꞌi̱; ca tii na chaꞌ cua ngüiñi tsoꞌo chaꞌ jiꞌna loꞌo ycuiꞌ Ndyosi.  
\v 20 Nu loꞌo jlo tiꞌ cresiya jiꞌna chaꞌ ntsuꞌu quiꞌya jiꞌna, liꞌ taca ca cuayáꞌ tiꞌ na chaꞌ loꞌo ycuiꞌ Ni jlo tiꞌ Ni chaꞌ biꞌ. Loꞌo juaꞌa̱ tlyu la laca ycuiꞌ Ni, taca jiꞌi̱ Ni cuaꞌni lyaá Ni jiꞌna jiꞌi̱ chaꞌ cuxi biꞌ.  
\v 21 Cuꞌma̱ nguꞌ tyaꞌa na nu tyacaꞌa tsa ma̱ ꞌna, si jlo tiꞌ na chaꞌ ná ntsuꞌu quiꞌya jiꞌna, tyucui tyiquee na taca chcuiꞌ na loꞌo ycuiꞌ Ndyosi liꞌ;  
\v 22 nu loꞌo jña na chaꞌ jiꞌi̱ ycuiꞌ Ni, caja cua ñaꞌa̱ ca chaꞌ jiꞌna si taquiyaꞌ na jiꞌi̱ cña nu cua nda ycuiꞌ Ni jiꞌna, si cuaꞌni na cña nu ndiya la tiꞌ ycuiꞌ Ni.  
\v 23 Nde laca cña nu cua nda ycuiꞌ Ndyosi chaꞌ cuaꞌni sa scaa na: ngaꞌa̱ chaꞌ xñi tsoꞌo na chaꞌ jiꞌi̱ Jesucristo Sñiꞌ ycuiꞌ Ni; la cuiꞌ juaꞌa̱ tsoꞌo ti tyuꞌu tyiquee na ñaꞌa̱ na jiꞌi̱ tyaꞌa ñati̱ na, ñiꞌya̱ nu cua nacui̱ ycuiꞌ Ni jiꞌna.  
\v 24 Nu loꞌo taquiyaꞌ na jiꞌi̱ cña nu cua ngulo ycuiꞌ Ndyosi jiꞌna chaꞌ cuaꞌni na, liꞌ cua ntsuꞌu chaꞌ jiꞌna loꞌo ycuiꞌ Ndyosi, loꞌo juaꞌa̱ ntsuꞌu chaꞌ jiꞌi̱ Ni loꞌo na liꞌ. Jlo tiꞌ na chaꞌ biꞌ, xquiꞌya chaꞌ cua nda ycuiꞌ Ndyosi Xtyiꞌi ycuiꞌ Ni chaꞌ tyanu neꞌ cresiya jiꞌna. 
\c 4  
\s1 Cuaꞌni cuayáꞌ na ñiꞌya̱ nu ntsuꞌu neꞌ cresiya jiꞌi̱ scaa ñati̱ 
\p  
\v 1 Cuꞌma̱ tyaꞌa ngusñi na chaꞌ jiꞌi̱ Cristo nu tyacaꞌa tsa ma̱ ꞌna, ná xñi ma̱ chaꞌ jiꞌi̱ cua ñaꞌa̱ ca ñati̱ nu ñacui̱ chaꞌ cua nda ycuiꞌ Ndyosi Xtyiꞌi ycuiꞌ Ni jiꞌi̱ nguꞌ biꞌ. Cuaꞌni cuayáꞌ ma̱ jiꞌi̱ nguꞌ biꞌ clyo, chaꞌ quijeloo chaꞌ jiꞌi̱ ma̱ loꞌo nguꞌ si chañi chaꞌ cua ndyanu Xtyiꞌi ycuiꞌ Ndyosi neꞌ cresiya jiꞌi̱ nguꞌ biꞌ, si chaꞌ cuiñi ti laca nu nchcuiꞌ nguꞌ biꞌ. Cua nduꞌu tucua tyu̱u̱ tsa tyaꞌa nguꞌ cuiñi chalyuu juani, nu nñiloꞌo jiꞌi̱ ñati̱ chaꞌ cuentya jiꞌi̱ ycuiꞌ Ndyosi nchcuiꞌ nguꞌ.  
\v 2 Ndiꞌya̱ ca cuayáꞌ tiꞌ na ñiꞌya̱ laca ñati̱ nu cua ndyanu Xtyiꞌi ycuiꞌ Ndyosi neꞌ cresiya jiꞌi̱: lcaa ñati̱ nu nchcuiꞌ chaꞌ chañi chaꞌ nu sca ti Sñiꞌ ycuiꞌ Ndyosi laca Jesucristo loꞌo ngula yu chalyuu chaꞌ ngua yu ñati̱, lcaa ñati̱ biꞌ cua ntsuꞌu Xtyiꞌi ycuiꞌ Ndyosi neꞌ cresiya jiꞌi̱ nguꞌ;  
\v 3 pana ñati̱ nu nacui̱ chaꞌ siꞌi Sñiꞌ ycuiꞌ Ndyosi laca Jesucristo loꞌo ngula yu chalyuu ñiꞌya̱ nu nclya ñati̱, ná ntsuꞌu Xtyiꞌi ycuiꞌ Ni neꞌ cresiya jiꞌi̱ nguꞌ biꞌ. Chaꞌ jiꞌi̱ nu cuiñi nu ntiꞌ tyiji̱loo jiꞌi̱ Jesucristo laca chaꞌ nu ntsuꞌu neꞌ cresiya jiꞌi̱ nguꞌ biꞌ; juaꞌa̱ cua ngua cuayáꞌ tiꞌ ma̱ chaꞌ cua lijya̱ ti nu cuiñi biꞌ, chaꞌ masi juani cua laca ndiꞌi̱ biꞌ chalyuu. 
\p  
\v 4 Cuꞌma̱ sñiꞌ naꞌ, cua ntsuꞌu chaꞌ jiꞌi̱ ma̱ loꞌo ycuiꞌ Ndyosi, juaꞌa̱ cua ngua nguula la tiꞌ tyiquee ma̱ xquiꞌya Xtyiꞌi ycuiꞌ Ndyosi nu ndyanu neꞌ cresiya jiꞌi̱ ma̱ liꞌ; biꞌ chaꞌ nchca jiꞌi̱ ma̱ tyiji̱loo ma̱ jiꞌi̱ nguꞌ cuiñi nu cua ntsuꞌu chaꞌ jiꞌi̱ loꞌo ycuiꞌ nu xñaꞌa̱. La cuiꞌ nu xñaꞌa̱ laca nu nclyo cña jiꞌi̱ ñati̱ cuxi nde chalyuu.  
\v 5 Cua ntsuꞌu chaꞌ jiꞌi̱ nu nguꞌ cuiñi biꞌ loꞌo nu cuxi nu ntsuꞌu chalyuu, loꞌo juaꞌa̱ xcuiꞌ chaꞌ jiꞌi̱ nu xñaꞌa̱ laca chaꞌ nu nchcuiꞌ nguꞌ biꞌ; biꞌ chaꞌ ndiya tsa tiꞌ ñati̱ chalyuu cuna nguꞌ chaꞌ nu nda nu nguꞌ cuiñi biꞌ, lcaa ñati̱ nu ná ndaquiyaꞌ jiꞌi̱ Jesucristo tsiyaꞌ ti.  
\v 6 Pana ñati̱ jiꞌi̱ ycuiꞌ Ndyosi laca na. Nu loꞌo ntsuꞌu chaꞌ jiꞌi̱ ñati̱ loꞌo ycuiꞌ Ndyosi, cuna nguꞌ lcaa chaꞌ nu chcuiꞌ na loꞌo nguꞌ liꞌ; ñati̱ nu ná ntsuꞌu chaꞌ jiꞌi̱ loꞌo ycuiꞌ Ndyosi tsiyaꞌ ti, biꞌ ñati̱ laca nu ná nduna chaꞌ nu nchcuiꞌ na. Juaꞌa̱ taca quijeloo chaꞌ jiꞌna tilaca laca nu ntsuꞌu chaꞌ liñi jiꞌi̱, tilaca laca nu ntsuꞌu chaꞌ cuiñi jiꞌi̱. 
\s1 Xcuiꞌ ntsuꞌu tyiquee ycuiꞌ Ndyosi ñaꞌa̱ Ni jiꞌi̱ ñati̱ 
\p  
\v 7 Cuꞌma̱ nguꞌ tyaꞌa na nu tyacaꞌa tsa ma̱ ꞌna, ngaꞌa̱ chaꞌ tyuꞌu tsoꞌo tyiquee na ñaꞌa̱ na jiꞌi̱ tyaꞌa ñati̱ na; ycuiꞌ Ndyosi laca nu nclyo cña chaꞌ xcuiꞌ tsoꞌo ti tyuꞌu tyiquee na ñaꞌa̱ na jiꞌi̱ tyaꞌa ñati̱ na. Lcaa ñati̱ nu ntsuꞌu tyiquee ñaꞌa̱ jiꞌi̱ tyaꞌa ñati̱, sñiꞌ ycuiꞌ Ndyosi laca nguꞌ biꞌ, loꞌo juaꞌa̱ tyuꞌu chaꞌ jiꞌi̱ nguꞌ biꞌ loꞌo ycuiꞌ Ni.  
\v 8 Pana ñati̱ nu ná ntsuꞌu tyiquee ñaꞌa̱ jiꞌi̱ tyaꞌa ñati̱, ná caja ñiꞌya̱ nu tyuꞌu chaꞌ jiꞌi̱ nguꞌ biꞌ loꞌo ycuiꞌ Ndyosi tsiyaꞌ ti, chaꞌ ycuiꞌ Ndyosi ni, ntsuꞌu tsa tyiquee Ni ñaꞌa̱ Ni jiꞌi̱ ñati̱.  
\v 9 Nguluꞌu Ni jiꞌna ñiꞌya̱ ntsuꞌu tsa tyiquee Ni ñaꞌa̱ Ni jiꞌna, nu loꞌo cua nda Ni jiꞌi̱ nu sca ti Sñiꞌ ycuiꞌ ca Ni ya̱a̱ chalyuu, chaꞌ juaꞌa̱ taca caja chalyuu cucui jiꞌna.  
\v 10 Nde laca chaꞌ nu nchcuiꞌ naꞌ loꞌo ma̱: Siꞌi chaꞌ ntsuꞌu tyiquee na ñaꞌa̱ na jiꞌi̱ ycuiꞌ Ndyosi, masi ycuiꞌ Ndyosi laca nu ntsuꞌu tsa tyiquee Ni ñaꞌa̱ Ni jiꞌna tya clyo, biꞌ chaꞌ nda Ni jiꞌi̱ Sñiꞌ ycuiꞌ ca Ni ya̱a̱ chalyuu chaꞌ ngujuii yu lo crusi, chaꞌ cua ngua cuxi tyiquee na loꞌo ycuiꞌ Ndyosi nu Xuꞌna na xquiꞌya chaꞌ cuxi nu nguaꞌni na; pana Jesucristo nu sca ti Sñiꞌ ycuiꞌ Ni, biꞌ laca nu cua nchcubeꞌ cña loo na, ngüiꞌya Ni yabeꞌ nu ntsuꞌu jiꞌna. 
\p  
\v 11 Cuꞌma̱ nguꞌ tyaꞌa na nu tyacaꞌa tsa ma̱ ꞌna, ngaꞌa̱ chaꞌ tsoꞌo ti tyuꞌu tyiquee na ñaꞌa̱ na jiꞌi̱ tyaꞌa ñati̱ na, chaꞌ juaꞌa̱ ntsuꞌu tsa tyiquee ycuiꞌ Ndyosi ñaꞌa̱ Ni jiꞌna.  
\v 12 Ni sca ñati̱ chalyuu, bilya ñaꞌa̱ nguꞌ jiꞌi̱ ycuiꞌ Ndyosi; pana taca ca cuayáꞌ tiꞌ na chaꞌ stuꞌba ntsuꞌu tyiquee na loꞌo Ni juani, nu loꞌo ñaꞌa̱ na jiꞌi̱ lcaa na loꞌo tyaꞌa na, chaꞌ ntsuꞌu tsa tyiquee na ñaꞌa̱ na jiꞌi̱ tyaꞌa ñati̱ na. Ñiꞌya̱ ntsuꞌu tsa tyiquee Jesucristo ñaꞌa̱ yu jiꞌi̱ ñati̱ chalyuu, juaꞌa̱ ngaꞌa̱ chaꞌ cuaꞌni na loꞌo tyaꞌa ñati̱ na liꞌ.  
\v 13 Cua nda ycuiꞌ Ndyosi Xtyiꞌi Ni chaꞌ tyanu neꞌ cresiya jiꞌna, biꞌ chaꞌ cua ngua jlo tiꞌ na chaꞌ stuꞌba ntsuꞌu tyiquee na loꞌo ycuiꞌ Ndyosi, loꞌo juaꞌa̱ stuꞌba ntsuꞌu tyiquee Ni loꞌo na.  
\v 14 Cua naꞌa̱ ycuiꞌ ya jiꞌi̱ Jesús. Chañi laca chaꞌ nu nchcuiꞌ ya loꞌo ma̱ juani, chaꞌ cua nda ycuiꞌ Ndyosi Sti Jesús chacuayáꞌ jiꞌi̱ Sñiꞌ ycuiꞌ ca Ni chaꞌ cuaꞌni lyaá jiꞌi̱ cua ñaꞌa̱ ca ñati̱ jiꞌi̱ nu cuxi.  
\v 15 Ñati̱ nu tyajaꞌa̱ cachaꞌ jiꞌi̱ tyaꞌa ñati̱ chaꞌ nu sca ti Sñiꞌ ycuiꞌ Ndyosi laca Jesucristo, stuꞌba ntsuꞌu tyiquee ycuiꞌ Ni loꞌo nguꞌ biꞌ liꞌ; juaꞌa̱ stuꞌba ntsuꞌu tyiquee nguꞌ biꞌ loꞌo ycuiꞌ Ni. 
\p  
\v 16 Ngua cuayáꞌ tiꞌ na liꞌ, chaꞌ ntsuꞌu tsa tyiquee ycuiꞌ Ndyosi ñaꞌa̱ Ni jiꞌna; juaꞌa̱ jlya tiꞌ na liꞌ, chaꞌ xcuiꞌ ntsuꞌu tsa tyiquee ycuiꞌ Ni ñaꞌa̱ Ni jiꞌi̱ ñati̱ chalyuu. Loꞌo ñati̱ nu juaꞌa̱ tsoꞌo ntiꞌ ñaꞌa̱ nguꞌ jiꞌi̱ tyaꞌa ñati̱, nu xcuiꞌ juaꞌa̱ nduꞌni nguꞌ laja loꞌo ndiꞌi̱ nguꞌ chalyuu, cua stuꞌba ntsuꞌu tyiquee nguꞌ biꞌ loꞌo ycuiꞌ Ndyosi; la cuiꞌ juaꞌa̱ stuꞌba ntsuꞌu tyiquee ycuiꞌ Ndyosi loꞌo nguꞌ biꞌ liꞌ.  
\v 17 Tsoꞌo ti ntsuꞌu tyiquee na ñaꞌa̱ na jiꞌi̱ ycuiꞌ Ndyosi, chaꞌ nu loꞌo tyalaa tsa̱ loꞌo tya̱a̱ Jesucristo chaca quiyaꞌ chaꞌ cuaꞌni cuayáꞌ Ni jiꞌi̱ lcaa ñati̱, liꞌ tyucui tyiquee na taca tyacua tyaꞌa na loꞌo ycuiꞌ Ni. Ndyaꞌa̱ Ni loꞌo na laja loꞌo ndiꞌi̱ na chalyuu, ñiꞌya̱ ngutaꞌa̱ Ni loꞌo Jesucristo loꞌo ngutiꞌi̱ yu nde chalyuu, biꞌ chaꞌ ngaꞌaa ntsuꞌu chaꞌ cutsi̱i̱ na.  
\v 18 Ná ntsuꞌu chaꞌ cutsi̱i̱ na chaꞌ xcubeꞌ ycuiꞌ Ndyosi jiꞌna, si chañi chaꞌ ntsuꞌu tyiquee na ñaꞌa̱ na jiꞌi̱ ycuiꞌ Ni; pana tya lyiji chaꞌ tsoꞌo ti tyuꞌu tyiquee na ñaꞌa̱ na jiꞌi̱ ycuiꞌ Ndyosi, si ñaꞌa̱ ti tya ntsi̱i̱ na chaꞌ xcubeꞌ Ni jiꞌna. Ñati̱ nu ntsi̱i̱ tsa jiꞌi̱ ycuiꞌ Ndyosi ni, cua nda tiꞌ nguꞌ chaꞌ xcubeꞌ Ni jiꞌi̱ nguꞌ. 
\p  
\v 19 Ntsuꞌu tyiquee na ñaꞌa̱ na jiꞌi̱ ycuiꞌ Ni, xquiꞌya chaꞌ tya clyo ntsuꞌu tsa tyiquee Ni ñaꞌa̱ Ni jiꞌna.  
\v 20 Nguꞌ nu ñacui̱ ndiꞌya̱: “Ntsuꞌu tsa tyiquee naꞌ ñaꞌa̱ naꞌ jiꞌi̱ ycuiꞌ Ndyosi”, loꞌo liꞌ ñaꞌa̱ ti tya liyeꞌ tiꞌ nguꞌ biꞌ ñaꞌa̱ nguꞌ jiꞌi̱ tyaꞌa nguꞌ, chaꞌ cuiñi ti laca nu nchcuiꞌ nguꞌ biꞌ. Ndiꞌya̱ ndyuꞌu chaꞌ biꞌ: taca ñaꞌa̱ na jiꞌi̱ tyaꞌa ñati̱ na, pana ycuiꞌ Ndyosi ni, bilya ñaꞌa̱ na jiꞌi̱ Ni tsiyaꞌ ti; biꞌ chaꞌ lacua, si ná ntsuꞌu tyiquee na ñaꞌa̱ na jiꞌi̱ tyaꞌa ngusñi na chaꞌ jiꞌi̱ Jesucristo, liꞌ ná taca ñacui̱ na chaꞌ ntsuꞌu tyiquee na ñaꞌa̱ na jiꞌi̱ ycuiꞌ Ndyosi Sti na.  
\v 21 Cua ngulo Ni cña biꞌ jiꞌna ndiꞌya̱: Tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ ycuiꞌ Ndyosi, loꞌo juaꞌa̱ xcuiꞌ tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ tyaꞌa ñati̱ ma̱. 
\c 5  
\s1 Ntiji̱loo na jiꞌi̱ nu cuxi nu ntsuꞌu chalyuu 
\p  
\v 1 Lcaa ñati̱ nu jlya tiꞌ jiꞌi̱ Jesús, chaꞌ laca yu Cristo nu cua nda ycuiꞌ Ndyosi jiꞌi̱ ya̱a̱ chalyuu, chañi chaꞌ laca nguꞌ biꞌ sñiꞌ ycuiꞌ Ndyosi. Ycuiꞌ Ndyosi laca Sti na, loꞌo juaꞌa̱ ntsuꞌu tsa tyiquee na ñaꞌa̱ na jiꞌi̱ Ni, biꞌ chaꞌ ntsuꞌu tyiquee na ñaꞌa̱ na jiꞌi̱ xaꞌ la sñiꞌ ycuiꞌ Ni, tyaꞌa ngusñi na chaꞌ jiꞌi̱ Jesús.  
\v 2 Nu loꞌo ntsuꞌu tyiquee na ñaꞌa̱ na jiꞌi̱ ycuiꞌ Ndyosi Sti na, loꞌo juaꞌa̱ taquiyaꞌ na jiꞌi̱ lcaa cña nu nda Ni loꞌo na, liꞌ tsoꞌo ti taca tyuꞌu tyiquee na ñaꞌa̱ na jiꞌi̱ xaꞌ la sñiꞌ ycuiꞌ Ni.  
\v 3 Si chañi chaꞌ ntsuꞌu tyiquee na ñaꞌa̱ na jiꞌi̱ Ni, taquiyaꞌ na jiꞌi̱ chaꞌ nu chcuiꞌ Ni loꞌo na liꞌ, chaꞌ siꞌi sca cña nu tucui tsa laca chaꞌ taquiyaꞌ na jiꞌi̱ scaa chaꞌ nu nchcuiꞌ Ni.  
\v 4 Cua ñaꞌa̱ ca sñiꞌ ycuiꞌ Ndyosi taca tyiji̱loo jiꞌi̱ lcaa nu cuxi nu ntsuꞌu chalyuu; taca tyiji̱loo na jiꞌi̱ nu cuxi, xquiꞌya chaꞌ cua ngusñi na chaꞌ jiꞌi̱ Jesucristo.  
\v 5 Pana ñati̱ nu jlya tiꞌ chaꞌ Jesús laca nu sca ti Sñiꞌ ycuiꞌ Ndyosi, biꞌ ti ñati̱ nu caca jiꞌi̱ tyiji̱loo jiꞌi̱ lcaa nu cuxi nu ntsuꞌu chalyuu. 
\s1 Ndiꞌya̱ ntsuꞌu chaꞌ jiꞌi̱ Jesús nu laca Sñiꞌ ycuiꞌ ca Ndyosi 
\p  
\v 6 Nu sca ti Sñiꞌ ycuiꞌ ca Ndyosi laca Jesucristo, nu ya̱a̱ chalyuu. Ntyucuatya nguꞌ jiꞌi̱ yu liꞌ. Ngujuii yu lo crusi, ndyalú tañi ycuiꞌ yu liꞌ. Siꞌi xquiꞌya chaꞌ nu cua ntyucuatya ti yu, masi loꞌo xquiꞌya chaꞌ cua ngujuii yu lo crusi ndyalú tañi yu, biꞌ chaꞌ nchca cuayáꞌ tiꞌ na juani chaꞌ nu sca ti Sñiꞌ ycuiꞌ Ndyosi laca Jesucristo. Biꞌ laca chaꞌ nu ndachaꞌ Xtyiꞌi ycuiꞌ Ndyosi jiꞌna, loꞌo juaꞌa̱ chañi tsa laca chaꞌ biꞌ.  
\v 7 Nde cua̱ ntucua sna tyaꞌa nguꞌ nu nchcuiꞌ chaꞌ chañi laca chaꞌ jiꞌi̱ Jesús biꞌ: ycuiꞌ Ndyosi Sti yu laca tsaca nguꞌ biꞌ; juaꞌa̱ Jesucristo nu ntsuꞌu tyucui chaꞌ jiꞌi̱ ycuiꞌ Ndyosi jiꞌi̱, biꞌ laca chaca; loꞌo juaꞌa̱ Xtyiꞌi ycuiꞌ Ni, chaca laca biꞌ. Stuꞌba ti nchcuiꞌ nu ca taꞌa sna biꞌ, chaꞌ chañi laca chaꞌ biꞌ.  
\v 8 Loꞌo juaꞌa̱ nde lo yuu cua ngua sna quiyaꞌ loꞌo nchcuiꞌ ycuiꞌ Ndyosi chaꞌ chañi laca chaꞌ Jesucristo laca nu sca ti Sñiꞌ ycuiꞌ Ni: tsaca laca chaꞌ nu nchcuiꞌ Xtyiꞌi ycuiꞌ Ndyosi loꞌo na; juaꞌa̱ chaca laca chaꞌ nu nchcuiꞌ Ni laja loꞌo ntyucuatya Jesucristo; loꞌo juaꞌa̱ chaca laca chaꞌ nu cua nchcuiꞌ Ni laja loꞌo ngujuii Jesucristo lo crusi, ndyalú tañi yu liꞌ. Sca ti chaꞌ nchcuiꞌ Ni ca taꞌa sna quiyaꞌ biꞌ.  
\v 9 Ntucuá na jiꞌi̱ chaꞌ nu nchcuiꞌ ñati̱ chalyuu loꞌo na, pana juani ndulo la chaꞌ nu nda ycuiꞌ Ndyosi loꞌo na. Ca taꞌa sna chaꞌ nu nda ycuiꞌ Ndyosi, lcaa chaꞌ biꞌ nchcuiꞌ chaꞌ sca ti Jesucristo laca Sñiꞌ ycuiꞌ Ndyosi.  
\v 10 Ñati̱ nu jlya tiꞌ jiꞌi̱ yu chaꞌ laca yu nu sca ti Sñiꞌ ycuiꞌ Ndyosi, ycuiꞌ ca nguꞌ jlo tiꞌ nguꞌ neꞌ cresiya jiꞌi̱ nguꞌ chaꞌ chañi tsa laca chaꞌ biꞌ; ñati̱ nu ná ntajaꞌa̱ tucuá chaꞌ jiꞌi̱ Ni, chaꞌ laca Jesucristo Sñiꞌ ycuiꞌ ca Ni, biꞌ nguꞌ laca nu ná jlya tiꞌ tsiyaꞌ ti chaꞌ cua nchcuiꞌ ycuiꞌ Ndyosi chaꞌ jiꞌi̱ Sñiꞌ ycuiꞌ ca Ni. Ñati̱ cuiñi laca ycuiꞌ Ndyosi ntiꞌ nguꞌ biꞌ.  
\v 11 Nde laca chaꞌ liñi nu tsoꞌo tsa chaꞌ xñi na jiꞌi̱, chaꞌ cua nda ycuiꞌ Ndyosi chalyuu nu ná ngaꞌa̱ chaꞌ tye jiꞌna; Jesucristo laca nu nguluꞌu jiꞌna ñiꞌya̱ caca chalyuu biꞌ.  
\v 12 Cua ñaꞌa̱ ca ñati̱ nu ntsuꞌu chaꞌ jiꞌi̱ loꞌo Jesús nu laca Sñiꞌ ycuiꞌ ca Ni, biꞌ ñati̱ laca nu ntsuꞌu chalyuu nu ná ngaꞌa̱ chaꞌ tye jiꞌi̱; ñati̱ nu ná ntsuꞌu chaꞌ jiꞌi̱ loꞌo nu sca ti Sñiꞌ ycuiꞌ Ndyosi, ná ntsuꞌu chaꞌ ta Ni chalyuu biꞌ jiꞌi̱ nguꞌ. 
\s1 Cua tye ti chaꞌ nu nguscua Juan 
\p  
\v 13 Cua nscua naꞌ quityi re lacua, chaꞌ ca̱a̱ ca slo ma̱, lcaa tyaꞌa ngusñi ma̱ chaꞌ jiꞌi̱ Jesús nu sca ti Sñiꞌ ycuiꞌ Ndyosi; xquiꞌya chaꞌ re taca ca cuayáꞌ tiꞌ ma̱ chaꞌ cua ngujui chalyuu cucui jiꞌi̱ ma̱, nu cua nda ycuiꞌ Ndyosi jiꞌna. 
\p  
\v 14 Tyucui tyiquee na taca chcuiꞌ na loꞌo ycuiꞌ Ndyosi lacua. Loꞌo jña na sca chaꞌ jiꞌi̱ ycuiꞌ Ndyosi nu stuꞌba ntiꞌ loꞌo sca chaꞌ nu ntiꞌ ycuiꞌ Ni, liꞌ taca jlo tiꞌ na chaꞌ taquiyaꞌ Ni jiꞌi̱ chaꞌ nu chcuiꞌ na loꞌo Ni.  
\v 15 Si jlo tiꞌ na chaꞌ nduna ycuiꞌ Ndyosi loꞌo jña na sca chaꞌ jiꞌi̱ Ni, la cuiꞌ juaꞌa̱ taca jlo tiꞌ na chaꞌ cua caja ti chaꞌ biꞌ jiꞌna liꞌ. 
\p  
\v 16 Loꞌo ñaꞌa̱ na jiꞌi̱ sca ñati̱ tyaꞌa ngusñi na chaꞌ jiꞌi̱ Jesucristo chaꞌ ndyuꞌni yu sca chaꞌ cuxi, pana nda na cuentya chaꞌ ná nscua chaꞌ chcunaꞌ chalyuu jiꞌi̱ yu xquiꞌya chaꞌ cuxi biꞌ, liꞌ tsoꞌo la si jña na chaꞌ clyu tiꞌ jiꞌi̱ ycuiꞌ Ndyosi cuentya jiꞌi̱ yu tyaꞌa na biꞌ, chaꞌ ná ta Ni chacuayáꞌ chaꞌ chcunaꞌ chalyuu jiꞌi̱ yu tyaꞌa na biꞌ. Pana ntsuꞌu quiꞌya tlyu nu ná taca cuaꞌni clyu tiꞌ ycuiꞌ Ndyosi jiꞌi̱; ná ñacui̱ naꞌ chaꞌ jña na chaꞌ clyu tiꞌ jiꞌi̱ Ni liꞌ, si juaꞌa̱ ntsuꞌu quiꞌya jiꞌi̱ nguꞌ.  
\v 17 Chañi chaꞌ sta ycuiꞌ Ndyosi quiꞌya jiꞌi̱ lcaa na loꞌo tyaꞌa na xquiꞌya chaꞌ cuxi nu ndyuꞌni na. Pana ntsuꞌu sca lo quiꞌya nu ná taca cuiꞌya Ni chaꞌ clyu tiꞌ jiꞌi̱ tsiyaꞌ ti. 
\p  
\v 18 Jlo tiꞌ na chaꞌ ngaꞌaa nduꞌni ñati̱ jiꞌi̱ Jesucristo chaꞌ cuxi. Jesucristo nu laca nu sca ti Sñiꞌ ycuiꞌ Ndyosi, biꞌ laca nu ndacaꞌa jiꞌi̱ nguꞌ, chaꞌ ná taca calaꞌ nu xñaꞌa̱ jiꞌi̱ nguꞌ biꞌ liꞌ. 
\p  
\v 19 Jlo tiꞌ na chaꞌ ñati̱ jiꞌi̱ ycuiꞌ Ndyosi laca na, xquiꞌya chaꞌ cua ngusñi na chaꞌ jiꞌi̱ Jesucristo; pana xaꞌ la ñati̱ chalyuu nu ná ndaquiyaꞌ jiꞌi̱ Ni tsiyaꞌ ti, ñaꞌa̱ ti tya laca nu xñaꞌa̱ loo jiꞌi̱ ñati̱ biꞌ. 
\p  
\v 20 Cua jlo tiꞌ na chaꞌ cua ya̱a̱ nu sca ti Sñiꞌ ycuiꞌ Ndyosi nde lo yuu chalyuu, loꞌo juaꞌa̱ cua nda biꞌ chacuayáꞌ chaꞌ caca tyuꞌu chaꞌ jiꞌna loꞌo ycuiꞌ Ndyosi. Chañi chaꞌ stuꞌba ntsuꞌu tyiquee na loꞌo ycuiꞌ Ndyosi juani, xquiꞌya chaꞌ stuꞌba ntsuꞌu tyiquee na loꞌo Jesucristo nu laca Sñiꞌ ycuiꞌ ca Ni. Chañi chaꞌ ycuiꞌ Ndyosi tsiyaꞌ ti laca nu Jesús biꞌ, loꞌo juaꞌa̱ chañi chaꞌ ná ngaꞌa̱ chaꞌ tye chalyuu cucui nu ta Ni jiꞌna.  
\v 21 Cuꞌma̱ sñiꞌ naꞌ, tii ti tiꞌ ma̱ tyiꞌi̱ ma̱ chalyuu, chaꞌ ná tyatí̱ yuꞌu ma̱ loꞌo xaꞌ joꞌó. Juaꞌa̱ laca chaꞌ biꞌ lacua.