\id 2TI 2TIM - SYN- Siyin Bible 
\ide 65001 - Unicode (UTF-8)
\h 2 TIMOTHY 
\toc1 2 TIMOTHY 
\toc2 2 Timothy 
\toc3 2 Tim 
\mt1 TIMOTHY  
\mt3 Laithak Ni Na  
\mt2 Second Timothy  
\c 1  
\s1 Paupuina  
\p
\v 1 Christ Jesus sung ah nuntakna kamciam bang in, Pathian deina tungtawn in Jesus Christ i sawltak keima Paul in,   
\p
\v 2 \x - \xo 1:2 \xt Sawl 16:1\x*Ka it ka tapa Timothy: na tung ah Pa Pathian le i Topa Jesus Christ tung pan thuthiamna, hesuakna le thinnopna hong om tahen.   
\s1 Lungdamko na le Thapiakna  
\p
\v 3 Pu le pa te hun pan kipan in a thiangtho khentel theina taw a na ka sep Pathian ka pok hi, sun le zan in ka thunget na theampo sung ah nangma sia tatsat ngawl in hong phawk tawntung khi hi;   
\p
\v 4 Na thitui te ka phawk ciang in, ka lungdamna a dim thei natu in nangma kong mu nuam mama hi;   
\p
\v 5 \x - \xo 1:5 \xt Sawl 16:1\x*Na sung a om upna tatak sia ka phawk ciang in, na pi Lois sung ah a masabel in om a, na nu Eunice sung ah zong om hi; taciang nangma sung ah zong om hi, ci ka um hi.   
\p
\v 6 Tua ahikom na tung ah khut ka ngakna tungtawn in na sung a om Pathian letsong sia mei bang in kuangsak tawntung tu, na phaw tawntung tu in kong son hi.   
\p
\v 7 Banghangziam cile Pathian in launa thaa hong pia ngawl hi; ahihang vangletna, itna le ngaisutna pha hong pia hi.   
\p
\v 8 Tua ahikom i Topa tettipanna le Ama hang in thongtak keima atu in maizum heak in: ahihang Pathian vangletna bang in lungdamna thupha hang in haksatna a thuakpui hi zaw in;   
\p
\v 9 Ama in eite hong ngum a, a thiangtho sapna taw hong sam hi, hi thu sia eite sepna bang hi ngawl in, Ama ngeal na le thuthiamna bang in hi a, tua thu sia leitung ki pat ma in Christ Jesus sung ah hong pia zo hi,   
\p
\v 10 Ahihang tu in eite hong ngum Jesus Christ hong kilaak na tungtawn in eite tung ah hong kilang hi, Ama in thina bosak a, lungdamna thupha tungtawn in nuntakna le thi thei ngawl na hong kilangsak zo hi:   
\p
\v 11 \x - \xo 1:11 \xt 1Tim 2:7\x*Tua sung ah keima sia thuhil tu, sawltak le Gentile te hil tu in nasep hongpia hi.   
\p
\v 12 Tua atu in hite ka thuak hi: ahihang ka mai a zum bua hi: banghangziam cile kua um khi ziam, ci ka he hi, taciang Ama tung ah ka ap te sia tua ni ciang dong Ama in keamcing thei hi, ci ka um hi.   
\p
\v 13 Christ Jesus sung ah upna le itna thu ka tung pan na zaksa ette tak thupha te khotak in len in.   
\p
\v 14 Eite sung a om Tha Thiangtho tungtawn in na tung ah hong ap na pha sia keamcing in.   
\p
\v 15 Asia sung a om te in hong nungngat uh hi, ci na he hi; tua te sung ah Phygelus le Hermogenes zong kihel hi.   
\p
\v 16 Topa in Onesiphorus te innkuan tung ah a hesuakna pia tahen; banghangziam cile ama in tu le tu thathak hong dimsak a, ka thikkol zong hong maizum pui ngawl hi:   
\p
\v 17 Ahihang ama sia Rome ah a om lai in, hanciamtak in hong zong a, hong mu hi.   
\p
\v 18 Tua ni ciang in Topa hesuakna a mu thei natu in Topa in pia tahen: ama in Ephesus ah bangza in hong khoi ziam, ci sia nangma in phatak in na he hi.   
\c 2  
\s1 Jesus Christ Ngalkap  
\p
\v 1 Tua ahikom ka tapa awng, Christ Jesus i thuthiamna sung ah thahat in.   
\p
\v 2 Tetti tampi sung ah, ka tung pan na zak thu te sia, ngualdang a hil sawn thei a muantak mihing te tung ah ap in.   
\p
\v 3 Tua ahikom Jesus Christ i ngalkap pha bang in, haksatna thuak in.   
\p
\v 4 Ngalkap tu in hong teal sia lungkimsak thei natu in, ngalsim te in hi leitung nuntakna nasep dang tatuam taw ngawmkhawm bialbual ngawl hi.   
\p
\v 5 Taciang mi khat in kidemna ah kidem napi, ngeina bang in a kidem bua ahile, kham lukhu nga ngawl tu hi.   
\p
\v 6 Lo thopa zong naseam masa tu a, tua zawkciang in lo an te nei pheang tu hi.   
\p
\v 7 Kong son te na ngaisun tawntung in; taciang Topa in na theampo ah heak theina hong pia tahen.   
\p
\v 8 Keima lungdamna thupha bang in David i suan Jesus Christ sia thina pan thokik hi, ci zong phawk tawntung in:   
\p
\v 9 Tua lungdamna thupha hang in, na pha ngawl vawt bang in haksatna sia lehhenna dong ka thuak hi; ahihang Pathian thu sia ki hencip thei ngawl hi.   
\p
\v 10 Tua ahikom Pathian tealsa te in, Christ Jesus sung ah tawntung minthanna taw ngupna a nga thei natu in na theampo ka thuak hi.   
\p
\v 11 Banghangziam cile Ama taw i thile, Ama taw i nungta veve tu hi:   
\p
\v 12 \x - \xo 2:12 \xt Matt 10:33; Lk 12:9\x*I thuak ahile, Ama taw i uk veve tu hi: Ama i nial ahile, Ama in zong hong nial tu hi:   
\p
\v 13 I um bua zong in, Ama sia thuman tawntung hi: Ama le ama ki nial thei ngawl hi, ci sia a thuman kammal a hihi.   
\p
\v 14 Hi thu te phawk tawntung tu in son in, bangma a phatuam ngawl, thu nei te susia zaw ahikom in, thu ki nial ngawl tu in Topa mai ah vaitha in.   
\s1 Pathian Naseam Pha  
\p
\v 15 Nangma sia Pathian i heakpui le a san tak, maizum kul ngawl naseam, thuman thu a mantak in a khentel thei hi tu in, hanciamtak in laisim in.   
\p
\v 16 Ahihang leitung ngeina le a mannung ngawl kammal te pial in: banghangziam cile tua te in Pathian nei ngawl nuntakzia te khangsak seseam hi.   
\p
\v 17 Taciang amate kammal in khensa\f + \fr 2:17 \fq khensa \ft cancer\f* bang in hong ne tu hi: tua te sung ah Hymenaeus le Philetus te kihel hi;   
\p
\v 18 Amate in thawkikna sia kantan zo hi, ci uh a, thuman taw kisai in khial uh hi; taciang pawlkhat te i upna lumlet siat hi.   
\p
\v 19 \x - \xo 2:19 \xt Ngam 16:5\x*Ahitazong Pathian i doppha sa sia khin ngawl in ding paisuak a, Pathian in Ama mite he hi, ci le Christ min a lo peuma in phatngawlna sia nusia tahen, ci ceptena siil nei hi.   
\p
\v 20 Ahihang inn lianpi sung ah kham le ngun taw a kivawt um le beal te bek hi ngawl in, thing le lei taw a kivawt te zong om hi, pawlkhat te ki thupisak a, pawlkhat te ki thupisak ngawl hi.   
\p
\v 21 Tua ahikom mi khatpo in amate le amate a ki thiangsak le, ama sia a thupi beal hi tu a, thiansakna topa i zak thei le nasep pha papo atu in a kinging khol pa a hihi.   
\p
\v 22 Khangno lai cilesa deina nusia in a: thutang suana, upna, itna le thinnopna te sia a thiangtho thinsung pan in Topa a sam te taw del in.   
\p
\v 23 Ahihang a mawmaw le hilna nei ngawl te thudokna te sia ki nialna piangsak thei ci he na hikom pial in.   
\p
\v 24 Taciang Topa i sila sia ngual taw a kihau te hi heak tahen; ahihang mi theampo tung ah a thinsau, ngual a hil thei le a thuakzo,   
\p
\v 25 Ama a langpan te sia thinsauna taw a hil te hi tu hi; thuman lungkimpui tu in Pathian in maw ki sikkik na pha pia thei hi;   
\p
\v 26 Tabang in doaimangpa i deina bang in a mat thak te in thang sung pan in suaktak kik thei tu hi.   
\c 3  
\s1 Ni Tawpkhak Ni  
\p
\v 1 Ni tawpkhak sang ciang haksatna hun tampi hong theng tu hi, ci zong phawk in.   
\p
\v 2 Banghangziam cile mihing te sia amate le amate a ki it te, duhop te, a ki phasak te, a ki hisak te, ngual sonsia te, nu le pa thu ni ngawl te, a lungdam thei ngawl te, a thiangtho ngawl te,   
\p
\v 3 Ngeina omsa bang in thangaina nei ngawl te, kilemna a susia te, a man ngawl ngual mawsiat te, ki tekna nei ngawl te, a ngilo te, mipha thusimngawl te,   
\p
\v 4 Thukham paltan te, lungtang khauh te, ama le ama a ki thupisak te, Pathian sang in ama lungkimna a dei zaw te;   
\p
\v 5 Pathianmi hi na nei bang in om napi, a vangletna te nial tu uh hi: tabang te pial in.   
\p
\v 6 Banghangziam cile tabang mihing te sia innsung ah tum in mawna vanngit a pua numei mawmaw te man a, cilesa deina a tatuam taw zol siat hi,   
\p
\v 7 Sin napi, thuman heakna ah theng zo ngawl hi.   
\p
\v 8 \x - \xo 3:8 \xt Ex 7:11\x*Jannes le Jambres te in Moses a khak uh bang in, hi te in zong thuman khak uh hi: hi te sia thinsung pha ngawl le upna taw kisai ngina ngawl uh hi.   
\p
\v 9 Ahihang Jannes le Jambres te mawmawtna a kilang bang in, hi te i mawmawtna zong mi theampo mai ah kilang tu ahikom, a khuala mama dong paipui thei ngawl tu hi.   
\s1 Pathian Mi le Pathian Thu  
\p
\v 10 Ahihang nang nahile kong hilna, nuntak zia, tupna sawm na, upna, thinsau na, itna le thuakzawkna,   
\p
\v 11 \x - \xo 3:11 \xt Sawl 13:14-52; \xt Sawl 14:1-7; \xt Sawl 14:8-20.\x*Antioch, Iconium le Lystra ah ka kung hong theng vawtsiatna te, haksatna te, ka thuakna te a kicing in na he siat zo hi: ahihang tua te theampo sung pan Topa in hong suaktasak hi.   
\p
\v 12 Hi hi, taciang, Christ Jesus sung ah Pathianmi hi na bang in a nungta theampo in vawtsiatna thuak tu hi.   
\p
\v 13 Ahihang mipha ngawl le ngual theam te kisia seseam tu hi, taciang amate in ngual theam tu a, amate zong ngual in theam tu hi.   
\p
\v 14 Ahihang nang na hile na sinsa le a khotak in na upna thu te sia kua kung pan sin khi ziam, ci na heak ahikom, tua thu sung ah om paisuak in;   
\p
\v 15 Laithiangtho sia na nolai pan in na heaksa hi zo a, tua laithiangtho sia Christ Jesus na upna tungtawn in ngupna ah theng tu in hong pilsak thei tu hi.   
\p
\v 16 Laithiangtho theampo sia Pathian i humop nataw a kipia hi a, ki hil na, ki tek na, a maw te puaphat na le thutang suana ah hilna tu in manpha hi.   
\p
\v 17 Tabang in Pathian i mihing sia picing tu a, nasep pha theampo atu in ki cialcingsak tu hi.   
\c 4  
\p
\v 1 Tua ahikom, Ama hong kilang ciang in a kumpingam sung ah mihing te le mithi te thu a khen tu Topa Jesus Christ le Pathian mai ah kong vaitha hi;   
\p
\v 2 Pathian thuhil in; hunpha a om ciang ahizong, hunpha a om ngawl ciang ahizong, thinsau in hilna taw tek in a, tei in hanthawn in.   
\p
\v 3 Banghangziam cile hilna mantak a ngai zawk ngawl uh hun hong theng tu a; amate cilesa deina bang in thuhil te sia amate tung ah ki khawmtuasak tu hi, amate bil te thak tu a;   
\p
\v 4 Thuman pan in amate i bil te kihei siat tu hi, taciang phuatawm tangthu te nakheng daw in ngai zaw tu uh hi.   
\p
\v 5 Ahihang nang na hile na theampo ah ngak in, haksatna te thuak in, thuphapuak nasep seam in, Pathian nasep sia khetnei ngawl in seam siat in.   
\p
\v 6 Banghangziam cile keima sia tu in biakpiakna ah ki piak tu in ka kinging zo hi, taciang ka pusua tu hun hong nai zo hi.   
\p
\v 7 Ki do na ah phatak in ka do zo hi, tai kidem na ah a tawpdong ka tai zo hi, upna zong ka keamcing zo hi:   
\p
\v 8 Tu pan kipan in thutang suana kham lukhu sia keima atu in koi zo hi, tasia in a thutang thukhen pa Topa in tua ni ciang in hong pia tu hi: taciang keima bek hi ngawl in Ama hong kilang tu a ngakla te theampo zong pia tu hi.   
\s1 A Khakbel Vaithakna  
\p
\v 9 Ka kung ah a manlang pai tu in hanciam in:   
\p
\v 10 \x - \xo 4:10 \xt Col 4:14; Phillm 1:24; \xt 2 Cor 8:23; Gal 2:3; Tit 1:4.\x*Banghangziam cile Demas in hi leitung a it hu in hong nusia a, Thessalonica khua ah pai hi; Crescens sia Galatia ah pai a, Titus sia Dalmatia ah pai hi.   
\p
\v 11 \x - \xo 4:11 \xt Col 4:14; Philm 1:24; \xt Sawl 12:12,25; 13:13; 15:37-39; Col 4:10; Philm 1:24.\x*Ka kung ah Luke bek om hi. Mark zong pa kawm tan a, ka kung ah hong paipui tan: banghangziam cile ama sia Pathian nasep na sung ah keima atu in phatuam mama hi.   
\p
\v 12 \x - \xo 4:12 \xt Sawl 20:4; Eph 6:21,22; Col 4:7,8.\x*Taciang Tychicus sia Ephesus ah ka paisak zo hi.   
\p
\v 13 \x - \xo 4:13 \xt Sawl 20:6\x*Nongpai ciang in Troas a om Carpus kung ah ka nusiat ka puantual tungsil sia hong keng kawm tan, taciang laibu te zong hong keng tan a, a tuan in savun laizial te hong keng tan.   
\p
\v 14 \x - \xo 4:14 \xt 1Tim 1:20; \xt Ps 62:12; Rom 2:6.\x*Tau seak pa Alexander in ka tung ah siatna tampi vawt hi: ama hong vawt nate bang in Topa in thukkik tahen:   
\p
\v 15 Ama taw kisai nangma zong kidawm in; banghangziam cile ama in i thuhil nate nasiatak in hong do hi.   
\p
\v 16 A masabel thu ka zo lai in kuama in hong panpui ngawl a, mi theampo in hong nusia siat hi: Pathian in amate mawsiat ngawl tu in thu ka ngen hi.   
\p
\v 17 Ahihang Topa in hong panpui a, tha hong pia hi; tabang in ka thuhil na sia mihing theampo in a heak thei natu in le Gentile the theampo in a zak thei natu in humpi nealkai kam sung pan hong suaktasak hi.   
\p
\v 18 Taciang Topa in nasep pha ngawl theampo sung pan in hong suaktasak tu hi, taciang Ama in vantung kumpingam hong thet dong hong suaktaksak tu hi; Ama tung ah minthanna om tawntung tahen. Amen.   
\s1 A Khakbel Vaithakna  
\p
\v 19 \x - \xo 4:19 \xt Sawl 18:2; \xt 2Tim 1:16,17.\x*Priscilla, Aquila le Onesiphorus innkuanpui te paupui in.   
\p
\v 20 \x - \xo 4:20 \xt Sawl 19:22; Rom 16:23; \xt Sawl 20:4; 21:29.\x*Erastus sia Corinth ah om a: ahihang Trophimus sia a cina ahikom in Miletus ah ka nusia hi.   
\p
\v 21 Phalbi ma in ka kung pai tu in hanciam in. Eubulus, Pudens, Linas, Claudia le suapui theampo in hong paupui hi.   
\p
\v 22 Topa Jesus Christ sia na thaa taw om tahen. Thuthiamna na tung ah hong om tahen. Amen.