\id 2JN - SYN-Siyin Bible 
\h 2 JOHAN 
\toc1 2 JOHN 
\toc2 2 John 
\toc3 2Jn 
\mt1 JOHN  
\mt3 Laithak Ni Na  
\mt2 Second John  
\c 1  
\s1 Paupuina  
\p
\v 1 Upa pa in thutak sung ah ka it mama; keima bek hi ngawl in, thutak a he theampo in zong a it, tealtuam nupi nu le a tate tung ah;   
\p
\v 2 I sung ah om in, a tawntung in a om tu thutak hang in hong it khi hi.   
\p
\v 3 Pa Pathian kung pan a hi zong, Pathian Tapa Jesus Christ kung pan a hi zong, thutak le itna sung ah hesuakna, thuthiamna le thinnopna te note tung ah om tahen.   
\s1 Thutak Sungah Nungta  
\p
\v 4 Pa kung pan in i san thupiak te bang in na tate thutak sung ah nungta hi, ci ka mu ciang in ka lungdam mama hi.   
\p
\v 5 Tu in na kung ah thupiak a thak bang in hong at ngawl khi hi, ahihang, upat tak nupi nu, a ki patcil pan i nei sa bang in eite khat le khat ki it tu in kong thum hi.   
\p
\v 6 A thupiak te zui in i nuntak na sia itna hi. Piansakna pan na zaksa uh bang in ta sung ma ah na nuntak tu uh thupiak a hihi.   
\p
\v 7 Jesus Christ sia cilesa taw hongpai hi, ci a hil ngawl leilot ngual theam te hileitung ah tum zo hi. Hi te sia ngualtheam le Christ langpan te a hihi.   
\p
\v 8 I sepna te bothong ngawl in, thaman a cing in i nga thei natu, noma le noma kikeam vun.   
\p
\v 9 A kuamapo Christ i hilna sung ah kip ngawl in, a paikhial te in Pathian nei ngawl hi. Christ hilna sung ah a kho te in Pa le Tapa a ni ma in nei hi.   
\p
\v 10 Tua ki hil na a nei ngawl khatpo no kung ah hongpai a hile, na inn uh ah tungsak heak vun, Pathian min taw nukset in paupui heak vun:   
\p
\v 11 Banghangziam cile ama sia Pathian min taw nukset in na paupui uh le thupha ngawl a vawt na ah a pawlpui suak tu nu hi.   
\s1 A Khakbel Nuksetna  
\p
\v 12 No kung ah kong at nop tam mama om lai napi, laina le laitui taw at ngawl tu khi hi: ahihang keima noma kung ah hongpai in, maitang kisi in ki paupui tu lamen khi hi, tabang in i lungdam na dim tu hi.   
\p
\v 13 Tealtuam na suapui nu i tate in zong nangma nukset in hong paupui hi. Amen.