\id 2TH  
\h ⲐⲈⲤⲤⲀⲖⲞⲚⲒⲔⲎ Ⲃ ̅ 
\toc1 ⳰ⲠⲢⲞⲤ ⲐⲈⲤⲤⲀⲖⲞⲚⲒⲔⲎ Ⲃ ̅ 
\toc2 ⲐⲈⲤⲤⲀⲖⲞⲚⲒⲔⲎ Ⲃ ̅ 
\mt1 ⳰ⲠⲢⲞⲤ ⲐⲈⲤⲤⲀⲖⲞⲚⲒⲔⲎ Ⲃ ̅  
\c 1  
\p
\v 1 ⲠⲀⲨⲖⲞⲤ ⲘⲚ ⲤⲒⲖⲞⲨⲀⲚⲞⲤ ⲘⲚ ⲦⲒⲘⲞⲐⲈⲞⲤ ⲈⲨⲤϨⲀⲒ ⲚⲦⲈⲔⲔⲖⲎⲤⲒⲀ ⲚⲚⲈⲐⲈⲤⲤⲀⲖⲞⲚⲒⲔⲈⲨⲤ ϨⲘ ⲠⲚⲞⲨⲦⲈ ⲠⲈⲚⲈⲒⲰⲦ ⲘⲚ ⲠϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ.  
\v 2 ⲦⲈⲬⲀⲢⲒⲤ ⲚⲎⲦⲚ ⲘⲚ ϮⲢⲎⲚⲎ ⲈⲂⲞⲖ ϨⲒⲦⲘ ⲠⲚⲞⲨⲦⲈ ⲠⲈⲚⲈⲒⲰⲦ ⲘⲚ ⲠϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ.  
\v 3 ϢϢⲈ ⲈⲢⲞⲚ ⲈϢⲠϨⲘⲞⲦ ⲚⲦⲘ ⲠⲚⲞⲨⲦⲈ ⲚⲞⲨⲞⲈⲒϢ ⲚⲒⲘ ϨⲀⲢⲰⲦⲚ ⲚⲈⲤⲚⲎⲨ ⲔⲀⲦⲀ ⲐⲈ ϪⲈ ϤⲘⲠϢⲀ ϪⲈ ⲤⲢϨⲞⲨⲈ ⲀⲨⲜⲀⲚⲈ ⲚϬⲒ ⲦⲈⲦⲚⲠⲒⲤⲦⲒⲤ ⲀⲨⲰ ⲤⲀϢⲀⲒ ⲚϬⲒ ⲦⲀⲄⲀⲠⲎ ⲘⲠⲞⲨⲀ ⲠⲞⲨⲀ ⲘⲘⲰⲦⲚ ⲈϨⲞⲨⲚ ⲈⲚⲈⲦⲚⲈⲢⲎⲨ ⲦⲎⲢⲦⲚ.  
\v 4 ϨⲰⲤⲦⲈ ⲀⲚⲞⲚ ⲚⲦⲚϢⲞⲨϢⲞⲨ ⲘⲘⲞⲚ ⲚϨⲎⲦ ⲦⲎⲨⲦⲚ ϨⲚ ⲚⲈⲔⲔⲖⲎⲤⲒⲀ ⲘⲠⲚⲞⲨⲦⲈ ϨⲀⲦⲈⲦⲚϨⲨⲠⲞⲘⲞⲚⲎ ⲘⲚ ⲦⲈⲦⲚⲠⲒⲤⲦⲒⲤ ϨⲚ ⲚⲈⲦⲚⲆⲒⲰⲄⲘⲞⲤ ⲦⲎⲢⲞⲨ ⲘⲚ ⲚⲈⲐⲖⲒⲮⲒⲤ ⲈⲦⲈⲦⲚⲀⲚⲈⲬⲈ ⲚϨⲎⲦⲞⲨ  
\v 5 ⲈⲨⲘⲀⲈⲒⲚ ⲚⲦⲈⲔⲢⲒⲤⲒⲤ ⲘⲘⲈ ⲘⲠⲚⲞⲨⲦⲈ. ⲈⲦⲢⲈⲦⲚⲘⲠϢⲀ ⲚⲦⲘⲚⲦⲢⲢⲞ ⲘⲠⲚⲞⲨⲦⲈ ⲦⲀⲒ ⲈⲦⲈⲦⲚϢⲠϨⲒⲤⲈ ϨⲀⲢⲞⲤ.  
\v 6 ⲈϢϪⲈ ⲞⲨⲆⲒⲔⲀⲒⲞⲚ ⲠⲈ ⲚⲚⲀϨⲢⲘ ⲠⲚⲞⲨⲦⲈ ⲈⲦⲰⲰⲂⲈ ⲚⲞⲨⲐⲖⲒⲮⲒⲤ ⲚⲚⲈⲦⲐⲖⲒⲂⲈ ⲘⲘⲰⲦⲚ.  
\v 7 ⲀⲨⲰ ⲞⲨⲘⲦⲞⲚ ⲚⲎⲦⲚ ⲚⲘⲘⲀⲚ ⲚⲈⲦⲞⲨⲐⲖⲒⲂⲈ ⲘⲘⲞⲞⲨ ϨⲘ ⲠϬⲰⲖⲠ ⲈⲂⲞⲖ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲈⲂⲞⲖ ϨⲚ ⲦⲠⲈ ⲘⲚ ⲚⲀⲄⲄⲈⲖⲞⲤ ⲚⲦⲈϤϬⲞⲘ.  
\v 8 ϨⲚ ⲞⲨϢⲀϨ ⲚⲔⲰϨⲦ ⲈϤⲚⲀϮ ⲚⲞⲨⲔⲂⲀ ⲚⲚⲈⲦⲈⲚⲤⲈⲤⲞⲞⲨⲚ ⲀⲚ ⲘⲠⲚⲞⲨⲦⲈ. ⲀⲨⲰ ⲚⲈⲦⲈⲚⲤⲈⲤⲰⲦⲘ ⲀⲚ ⲚⲤⲀ ⲠⲈⲨⲀⲄⲄⲈⲖⲒⲞⲚ ⲘⲠⲈⲚϪⲞⲈⲒⲤ ⲒⲎⲤⲞⲨⲤ.  
\v 9 ⲚⲀⲒ ⲈⲦⲚⲀϪⲒ ⲚⲞⲨϨⲀⲠ ⲚⲦⲀⲔⲞ ⲚϢⲀ ⲈⲚⲈϨ ϨⲘ ⲠⲈⲘⲦⲞ ⲈⲂⲞⲖ ⲘⲠϪⲞⲈⲒⲤ ⲘⲚ ⲠⲈⲞⲞⲨ ⲚⲦⲈϤϬⲞⲘ.  
\v 10 ϨⲞⲦⲀⲚ ⲈϤϢⲀⲚⲈⲒ ⲈϪⲒⲈⲞⲞⲨ ϨⲚ ⲚⲈϤⲠⲈⲦⲞⲨⲀⲀⲂ ⲀⲨⲰ ⲈⲦⲢⲈⲨⲢϢⲠⲎⲢⲈ ⲘⲘⲞϤ ϨⲚ ⲚⲈⲦⲠⲒⲤⲦⲈⲨⲈ ⲦⲎⲢⲞⲨ. ϪⲈ ⲀⲨⲦⲀⲚϨⲈⲦ ⲦⲈϤⲘⲚⲦⲘⲚⲦⲢⲈ ⲈϪⲚ ⲦⲎⲨⲦⲚ ϨⲘ ⲠⲈϨⲞⲞⲨ ⲈⲦⲘⲘⲀⲨ.  
\v 11 ⲀⲨⲰ ⲈⲚϢⲖⲎⲖ ⲈⲠⲀⲒ ⲚⲞⲨⲞⲈⲒϢ ⲚⲒⲘ ϨⲀⲢⲰⲦⲚ ϪⲈⲔⲀⲀⲤ ⲈⲢⲈ ⲠⲈⲚⲚⲞⲨⲦⲈ ⲦⲢⲈⲦⲚⲘⲠϢⲀ ⲘⲠⲦⲰϨⲘ ⲀⲨⲰ ⲚϤϪⲈⲔ ⲦⲎⲨⲦⲚ ⲈⲂⲞⲖ ϨⲚ ⲞⲨⲰϢ ⲚⲒⲘ ⲈⲦⲚⲀⲚⲞⲨϤ ⲀⲨⲰ ⲠϨⲰⲂ ⲚⲦⲠⲒⲤⲦⲒⲤ ϨⲚ ⲞⲨϬⲞⲘ.  
\v 12 ϪⲈⲔⲀⲀⲤ ⲈϤⲈϪⲒ ⲈⲞⲞⲨ ⲚϬⲒ ⲠⲢⲀⲚ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲚϨⲎⲦ ⲦⲎⲨⲦⲚ. ⲀⲨⲰ ⲚⲦⲰⲦⲚ ⲚϨⲎⲦϤ ⲔⲀⲦⲀ ⲦⲈⲬⲀⲢⲒⲤ ⲘⲠⲈⲚⲚⲞⲨⲦⲈ ⲘⲚ ⲠϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ.   
\c 2  
\p
\v 1 ⲦⲚⲤⲞⲠⲤ ⲆⲈ ⲘⲘⲰⲦⲚ ⲚⲈⲤⲚⲎⲨ ϨⲀ ⲦⲠⲀⲢϨⲞⲨⲤⲒⲀ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ. ⲀⲨⲰ ⲠⲈⲚⲤⲰⲞⲨϨ ⲈⲢⲞϤ.  
\v 2 ⲈⲦⲘⲦⲢⲈⲦⲚⲔⲒⲘ ϨⲘ ⲠⲈⲦⲚϨⲎⲦ ϨⲚ ⲞⲨϬⲈⲠⲎ ⲀⲨⲰ ⲈⲦⲘϢⲦⲞⲢⲦⲢ ⲘⲎⲦⲈ ϨⲒⲦⲚ ⲞⲨⲠⲚⲈⲨⲘⲀ ⲘⲎⲦⲈ ϨⲒⲦⲚ ⲞⲨϢⲀϪⲈ ⲘⲎⲦⲈ ϨⲒⲦⲚ ⲞⲨⲈⲠⲒⲤⲦⲞⲖⲎ ϨⲰⲤ ⲈⲂⲞⲖ ϨⲒⲦⲞⲞⲦⲚ ⲚⲐⲈ ϪⲈ ⲀⲠⲈϨⲞⲞⲨ ⲘⲠϪⲞⲈⲒⲤ ϨⲰⲚ ⲈϨⲞⲨⲚ.  
\v 3 ⲘⲠⲢⲦⲢⲈ ⲖⲀⲀⲨ ϬⲈ ⲢϨⲀⲖ ⲘⲘⲰⲦⲚ ⲔⲀⲦⲀ ⲖⲀⲀⲨ ⲤⲘⲞⲦ ϪⲈ ⲈⲢϢⲀⲚⲦⲘ ⲦⲀⲠⲞⲤⲦⲀⲤⲒⲀ ⲈⲒ ⲚϢⲞⲢⲠ ⲀⲨⲰ ⲚϤϬⲰⲖⲠ ⲈⲂⲞⲖ ⲚϬⲒ ⲠⲢⲰⲘⲈ ⲚⲦⲀⲚⲞⲘⲒⲀ ⲠϢⲎⲢⲈ ⲘⲠⲦⲀⲔⲞ.  
\v 4 ⲠⲀⲚⲦⲒⲔⲈⲒⲘⲈⲚⲞⲤ ⲈⲦϪⲒⲤⲈ ⲘⲘⲞϤ ⲈϪⲚ ⲞⲨⲞⲚ ⲚⲒⲘ ⲈⲦⲞⲨⲘⲞⲨⲦⲈ ⲈⲢⲞⲞⲨ ϪⲈ ⲚⲞⲨⲦⲈ ⲎⲞⲨⲞⲠ ϨⲰⲤⲦⲈ ⲚϤⲂⲰⲔ ⲈϨⲞⲨⲚ ⲈⲠⲢⲠⲈ ⲘⲠⲚⲞⲨⲦⲈ ⲚϤϨⲘⲞⲞⲤ ⲈϤⲞⲨⲰⲚϨ ⲘⲘⲞϤ ⲈⲂⲞⲖ ϪⲈ ⲞⲨⲚⲞⲨⲦⲈ ⲠⲈ.  
\v 5 ⲚⲦⲈⲦⲚ ⲢⲠⲘⲈⲈⲨⲈ ⲀⲚ ϪⲈ ϪⲒ ⲚⲈⲒϨⲀⲦⲈ ⲦⲎⲨⲦⲚ ⲚⲈⲒϪⲰ ⲚⲎⲦⲚ ⲚⲚⲀⲒ ⲠⲈ.  
\v 6 ⲦⲈⲚⲞⲨ ϬⲈ ⲦⲈⲦⲚⲤⲞⲞⲨⲚ ⲘⲠⲈⲦⲔⲀⲦⲈⲬⲈ ⲈⲦⲢⲈϤϬⲰⲖⲠ ⲈⲂⲞⲖ ϨⲘ ⲠⲈϤⲞⲨⲞⲈⲒϢ.  
\v 7 ⲠⲘⲨⲤⲦⲎⲢⲒⲞⲚ ⲄⲀⲢ ⲚⲦⲀⲚⲞⲘⲒⲀ ⲈⲚⲈⲢⲄⲒ ϪⲒⲚ ⲦⲈⲚⲞⲨ. ⲘⲞⲚⲞⲚ ⲠⲈⲦⲔⲀⲦⲈⲬⲈ ⲦⲈⲚⲞⲨ ϢⲀⲚⲦϤⲖⲞ ⲚⲦⲘⲎⲦⲈ.  
\v 8 ⲀⲨⲰ ⲦⲞⲦⲈ ϤⲚⲀⲞⲨⲰⲚϨ ⲈⲂⲞⲖ ⲚϬⲒ ⲠⲀⲚⲞⲘⲞⲤ. ⲠⲈⲦⲈⲢⲈ ⲠϪⲞⲈⲒⲤ ⲒⲎⲤⲞⲨⲤ ⲚⲀⲦⲀⲔⲞϤ ϨⲘ ⲠⲈⲠⲚⲈⲨⲘⲀ ⲚⲢⲰϤ. ⲀⲨⲰ ⲚϤⲔⲀⲦⲀⲢⲄⲈⲒ ⲘⲘⲞϤ ϨⲘ ⲠⲞⲨⲰⲚϨ ⲈⲂⲞⲖ ⲚⲦⲈϤⲠⲀⲢϨⲞⲨⲤⲒⲀ.  
\v 9 ⲠⲀⲒ ⲈⲦⲈⲢⲈ ⲦⲈϤⲠⲀⲢϨⲞⲨⲤⲒⲀ ⲚⲦⲞϤ ϢⲞⲞⲠ ⲔⲀⲦⲀ ⲦⲈⲚⲈⲢⲄⲒⲀ ⲘⲠⲤⲀⲦⲀⲚⲀⲤ. ϨⲚ ϬⲞⲘ ⲚⲒⲘ. ⲘⲚⲘⲘⲀⲈⲒⲚ ⲘⲚ ⲚⲈϢⲠⲎⲢⲈ ⲚϬⲞⲖ.  
\v 10 ⲀⲨⲰ ϨⲚ ⲀⲠⲀⲦⲎ ⲚⲒⲘ ⲚϪⲒ ⲚϬⲞⲚⲤ ⲚⲚⲈⲦⲚⲀⲦⲀⲔⲞ ⲈⲂⲞⲖ ϪⲈ ⲘⲠⲞⲨϢⲰⲠ ⲈⲢⲞⲞⲨ ⲚⲦⲀⲄⲀⲠⲎ ⲚⲦⲘⲈ ⲈⲦⲢⲈⲨⲞⲨϪⲀⲒ.  
\v 11 ⲀⲨⲰ ⲈⲦⲂⲈ ⲠⲀⲒ ⲠⲚⲞⲨⲦⲈ ⲚⲀⲦⲚⲚⲞⲞⲨ ⲚⲀⲨ ⲚⲞⲨⲈⲚⲈⲢⲄⲒⲀ ⲘⲠⲖⲀⲚⲎ ⲈⲦⲢⲈⲨⲠⲒⲤⲦⲈⲨⲈ ⲈⲠϬⲞⲖ.  
\v 12 ϪⲈ ⲈⲨⲈⲔⲢⲒⲚⲈ ⲚⲞⲨⲞⲚ ⲚⲒⲘ ⲈⲦⲈⲘⲠⲞⲨⲠⲒⲤⲦⲈⲨⲈ ⲈⲦⲘⲈ. ⲀⲖⲖⲀ ⲈⲀⲨⲦⲰⲦ ⲚϨⲎⲦ ϨⲘ ⲠϪⲒ ⲚϬⲞⲚⲤ.  
\v 13 ⲀⲚⲞⲚ ⲆⲈ ϢϢⲈ ⲈⲢⲞⲚ ⲈϢⲠϨⲘⲞⲦ ⲚⲦⲘ ⲠⲚⲞⲨⲦⲈ ⲚⲞⲨⲞⲈⲒϢ ⲚⲒⲘ ϨⲀⲢⲰⲦⲚ ⲚⲈⲤⲚⲎⲨ ⲘⲘⲈⲢⲒⲦ ⲚⲦⲘⲠϪⲞⲈⲒⲤ. ϪⲈ ⲀⲠⲚⲞⲨⲦⲈ ⲤⲈⲦⲠ ⲦⲎⲨⲦⲚ ϪⲒⲚ ⲚϢⲞⲢⲠ ⲈⲨⲞⲨϪⲀⲒ ϨⲚ ⲞⲨⲦⲂⲂⲞ ⲘⲠⲚⲈⲨⲘⲀ. ⲘⲚ ⲞⲨⲠⲒⲤⲦⲒⲤ ⲚⲦⲈⲦⲘⲈ.  
\v 14 ⲈⲀϤⲦⲈϨⲘ ⲦⲎⲨⲦⲚ ⲈⲠⲀⲒ ϨⲒⲦⲘ ⲠⲈⲚⲈⲨⲀⲄⲄⲈⲖⲒⲞⲚ ⲈⲠⲞⲨϪⲀⲒ ⲘⲠⲈⲞⲞⲨ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ.  
\v 15 ⲀⲢⲀ ϬⲈ ⲚⲀⲤⲚⲎⲨ ⲀϨⲈⲢⲀⲦ ⲦⲎⲨⲦⲚ ⲚⲦⲈⲦⲚ ⲀⲘⲀϨⲦⲈ ⲚⲘⲠⲀⲢⲀⲆⲞⲤⲒⲤ ⲈⲚⲦⲀⲚⲦⲤⲀⲂⲈ ⲦⲎⲨⲦⲚ ⲈⲢⲞⲞⲨ. ⲈⲒⲦⲈ ϨⲒⲦⲘ ⲠϢⲀϪⲈ. ⲈⲒⲦⲈ ϨⲒⲦⲚ ⲚⲈⲚⲈⲠⲒⲤⲦⲞⲖⲎ.  
\v 16 ⲚⲦⲞϤ ⲆⲈ ⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ ⲀⲨⲰ ⲠⲚⲞⲨⲦⲈ ⲠⲈⲚⲈⲒⲰⲦ ⲠⲀⲒ ⲈⲚⲦⲀϤⲘⲈⲢⲒⲦⲚ. ⲀⲨⲰ ⲀϤϮ ⲚⲀⲚ ⲚⲞⲨⲤⲞⲠⲤ ⲚϢⲀ ⲈⲚⲈϨ. ⲀⲨⲰ ⲞⲨϨⲈⲖⲠⲒⲤ ⲈⲚⲀⲚⲞⲨⲤ ϨⲚ ⲞⲨⲬⲀⲢⲒⲤ.  
\v 17 ⲈϤⲈⲠⲀⲢⲀⲔⲀⲖⲈⲒ ⲚⲚⲈⲦⲚϨⲎⲦ. ⲀⲨⲰ ⲚϤⲦⲀϪⲢⲈ ⲦⲎⲨⲦⲚ ϨⲚ ϨⲰⲂ ⲚⲒⲘ. ⲘⲚ ⲠϢⲀϪⲈ ⲈⲦⲚⲀⲚⲞⲨϤ.   
\c 3  
\p
\v 1 ⲦⲈⲚⲞⲨ ⲆⲈ ⲚⲈⲤⲚⲎⲨ ϢⲖⲎⲖ ϨⲀⲢⲞⲚ ϪⲈⲔⲀⲀⲤ ⲈⲢⲈ ⲠϢⲀϪⲈ ⲘⲠϪⲞⲈⲒⲤ ⲘⲞⲞϢⲈ. ⲀⲨⲰ ⲚϤϪⲒⲈⲞⲞⲨ. ⲔⲀⲦⲀ ⲐⲈ ⲈⲚⲦⲀϤϪⲒ ϨⲀⲦⲈ ⲦⲎⲨⲦⲚ.  
\v 2 ⲀⲨⲰ ϪⲈⲔⲀⲀⲤ ⲈⲚⲈⲚⲞⲨϨⲘ ⲈⲂⲞⲖ ϨⲒⲦⲞⲞⲦⲞⲨ ⲚⲚⲢⲰⲘⲈ ⲈⲦϢⲦⲢⲦⲰⲢ ⲀⲨⲰ ⲘⲠⲞⲚⲎⲢⲞⲤ. ⲦⲠⲒⲤⲦⲒⲤ ⲄⲀⲢ ⲚⲦⲀ ⲞⲨⲞⲚ ⲚⲒⲘ ⲀⲚ ⲦⲈ.  
\v 3 ⲞⲨⲠⲒⲤⲦⲞⲤ ⲆⲈ ⲠⲈ ⲠϪⲞⲈⲒⲤ ⲠⲀⲒ ⲈⲦⲚⲀⲦⲀϪⲢⲈ ⲦⲎⲨⲦⲚ. ⲀⲨⲰ ⲚϤϨⲀⲢⲈϨ ⲈⲢⲰⲦⲚ ⲈⲠⲠⲞⲚⲎⲢⲞⲤ.  
\v 4 ⲦⲚⲚⲀϨⲦⲈ ⲆⲈ ϨⲘ ⲠϪⲞⲈⲒⲤ ϨⲀⲢⲰⲦⲚ ϪⲈ ⲚⲈⲦⲚⲞⲨⲈϨⲤⲀϨⲚⲈ ⲘⲘⲞⲞⲨ ⲚⲎⲦⲚ ⲀⲦⲈⲦⲚⲀⲀⲨ ⲀⲨⲰ ⲦⲈⲦⲚⲈⲒⲢⲈ ⲘⲘⲞⲞⲨ. ⲀⲨⲰ ⲦⲈⲦⲚⲀⲀⲀⲨ.  
\v 5 ⲠϪⲞⲈⲒⲤ ⲆⲈ ⲈϤⲈⲤⲞⲞⲨⲦⲚ ⲚⲚⲈⲦⲚϨⲎⲦ ⲈϨⲞⲨⲚ ⲈⲦⲀⲄⲀⲠⲎ ⲘⲠⲚⲞⲨⲦⲈ. ⲀⲨⲰ ⲈⲐⲨⲠⲞⲘⲞⲚⲎ ⲘⲠⲈⲬⲢⲒⲤⲦⲞⲤ.  
\v 6 ⲦⲚⲠⲀⲢⲀⲄⲄⲈⲒⲖⲈ ⲆⲈ ⲚⲎⲦⲚ ⲚⲈⲤⲚⲎⲨ ϨⲘ ⲠⲢⲀⲚ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ ⲈⲤⲀϨⲈ ⲦⲎⲨⲦⲚ ⲈⲂⲞⲖ ⲚⲤⲞⲚ ⲚⲒⲘ ⲈⲦⲘⲞⲞϢⲈ ⲀⲦⲀⲔⲦⲰⲤ. ⲀⲨⲰ ⲈⲚⲔⲀⲦⲀ ⲦⲈⲤⲂⲰ ⲀⲚ ⲈⲚⲦⲀⲦⲈⲦⲚϪⲒⲦⲤ ⲚⲦⲞⲞⲦⲚ.  
\v 7 ⲚⲦⲰⲦⲚ ⲄⲀⲢ ⲦⲈⲦⲚⲤⲞⲞⲨⲚ ϪⲈ ϢϢⲈ ⲚⲀϢ ⲚϨⲈ ⲈⲦⲚⲦⲚ ⲦⲎⲨⲦⲚ ⲈⲢⲞⲚ. ϪⲈ ⲘⲠⲚⲀⲦⲀⲔⲦⲒ ⲚϨⲎⲦ ⲦⲎⲨⲦⲚ.  
\v 8 ⲞⲨⲆⲈ ⲘⲠⲚⲞⲨⲈⲘ ⲞⲨⲞⲈⲒⲔ ⲚϪⲒⲚϪⲎ ⲚⲦⲚ ⲞⲨⲀ. ⲀⲖⲖⲀ ϨⲚ ⲞⲨϨⲒⲤⲈ ⲘⲚ ⲞⲨⲘⲔⲀϨ ⲈⲚⲢϨⲰⲂ ⲚⲦⲈⲨϢⲎ ⲘⲚ ⲠⲈϨⲞⲞⲨ ϪⲈ ⲚⲚⲈⲚϨⲢⲞϢ ⲈⲞⲨⲀ ⲘⲘⲰⲦⲚ.  
\v 9 ⲈⲂⲞⲖ ⲀⲚ ϪⲈ ⲘⲚⲦⲀⲚ ⲦⲈⲜⲞⲨⲤⲒⲀ ⲘⲘⲀⲨ. ⲀⲖⲖⲀ ϪⲈⲔⲀⲀⲤ ⲈⲚⲈⲦⲀⲀⲚ ⲚⲎⲦⲚ ⲚⲤⲘⲞⲦ ⲈⲦⲚⲦⲚ ⲦⲎⲨⲦⲚ ⲈⲢⲞⲚ.  
\v 10 ⲔⲀⲒ ⲄⲀⲢ ⲈⲚϨⲀⲦⲈ ⲦⲎⲨⲦⲚ ⲚⲈⲚⲠⲀⲢⲀⲄⲄⲈⲒⲖⲈ ⲚⲎⲦⲚ ⲘⲠⲀⲒ. ϪⲈ ⲠⲈⲦⲈⲚϤⲞⲨⲈϢⲢϨⲰⲂ ⲀⲚ. ⲞⲨⲆⲈ ⲘⲠⲢⲦⲢⲈϤⲞⲨⲰⲘ.  
\v 11 ⲦⲚⲤⲰⲦⲘ ⲄⲀⲢ ⲈⲦⲂⲈ ϨⲞⲒⲚⲈ ϪⲈ ⲤⲈⲘⲞⲞϢⲈ ⲚϨⲎⲦ ⲦⲎⲨⲦⲚ ⲀⲦⲀⲔⲦⲰⲤ ⲚⲤⲈⲢⲖⲀⲀⲨ ⲚϨⲰⲂ ⲀⲚ. ⲀⲖⲖⲀ ⲈⲨⲞ ⲚⲢⲈϤⲦⲰϨ.  
\v 12 ⲚⲀⲒ ⲆⲈ ⲚⲦⲈⲈⲒⲘⲒⲚⲈ ⲦⲚⲠⲀⲢⲀⲄⲄⲈⲒⲖⲈ ⲚⲀⲨ. ⲀⲨⲰ ⲦⲘⲠⲀⲢⲀⲔⲀⲖⲈⲒ ⲘⲘⲞⲞⲨ ϨⲘ ⲠϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ. ϪⲈⲔⲀⲀⲤ ⲈⲨⲢϨⲰⲂ ϨⲚ ⲞⲨⲤϬ ⲢⲀϨⲦ ⲚⲤⲈⲞⲨⲰⲘ ⲘⲠⲈⲨⲞⲈⲒⲔ.  
\v 13 ⲚⲦⲰⲦⲚ ⲆⲈ ⲚⲈⲤⲚⲎⲨ ⲘⲠⲢⲈⲄⲔⲀϬⲒ ⲈⲦⲈⲦⲚⲈⲒⲢⲈ ⲘⲠⲠⲈⲦⲚⲀⲚⲞⲨϤ.  
\v 14 ⲈϢϪⲈ ⲞⲨⲚ ⲞⲨⲀ ⲆⲈ ⲈⲚϤⲤⲰⲦⲘ ⲀⲚ ⲈⲠⲈⲚϢⲀϪⲈ ϨⲒⲦⲚ ⲦⲈⲚⲈⲠⲒⲤⲦⲞⲖⲎ ⲠⲀⲒ ϮⲘⲀⲈⲒⲚ ⲈⲢⲞϤ ⲚⲦⲈⲦⲚ ⲦⲘⲦⲰϨ ⲚⲘⲘⲀϤ. ϪⲈⲔⲀⲀⲤ ⲈϤⲈϢⲒ ⲠⲈ  
\v 15 ⲀⲨⲰ ⲘⲠⲢⲞⲠϤ ϨⲰⲤ ϪⲀϪⲈ. ⲀⲖⲖⲀ ϮⲤⲂⲰ ⲚⲀϤ ϨⲰⲤ ⲤⲞⲚ.  
\v 16 ⲚⲦⲞϤ ⲆⲈ ⲠϪⲞⲈⲒⲤ ⲚϮⲢⲎⲚⲎ ⲈϤⲈϮ ⲚⲎⲦⲚ ⲚϮⲢⲎⲚⲎ ⲚⲞⲨⲞⲈⲒϢ ⲚⲒⲘ ϨⲚ ⲤⲘⲞⲦ ⲚⲒⲘ. ⲠϪⲞⲈⲒⲤ ⲚⲘⲘⲎⲦⲚ ⲦⲎⲢⲦⲚ.  
\v 17 ⲠⲀⲤⲠⲀⲤⲘⲞⲤ ⲈⲚⲦⲀⲒⲤϨⲀⲈⲒϤ ⲚⲦⲀϬⲒϪ ⲠⲀⲨⲖⲞⲤ ⲈⲠⲀⲒ ⲠⲈ ⲠⲘⲀⲈⲒⲚ ϨⲚ ⲈⲠⲒⲤⲦⲞⲖⲎ ⲚⲒⲘ ⲈⲈⲒⲤϨⲀⲒ ⲚⲦⲈⲈⲒϨⲈ.  
\v 18 ⲦⲈⲬⲀⲢⲒⲤ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ ⲚⲘⲘⲎ ⲦⲚ ⲦⲎⲢⲦⲚ