\id LUK - Cofan Bible (NT with OT portions) [con] (Ecuador) -2012 bd 
\h Lucas 
\toc1 Lucas Ñotsse Condase'cho Jesucristone 
\toc2 Lucas 
\toc3 Lc 
\mt1 Lucas 
\mt2 Ñotsse Condase'cho Jesucristone 
\c 1  
\s1 Chigambian'cho 
\p  
\v 1-3 In'jan'cho Teófilo: Majan a'i tseyi me'ttia'ye Jesúsi'ccu can'jemba osha'choma attepa va ñotsse condase'choma inginga conda'fa. Tsain'bio a'i pañamba pa'ccoma tansintsse tevaen'fa. Ña'qque bo'tssingae osha'choma ñotsse atesupa ja'ño asi'ttaemba gi in'jan tansintsse quenga tevaeñe.  
\v 4 Qquen tevaensi qui tansintsse que osha'chove paña'choma atesuya. 
\s1 Juanma isuya'chone condase'cho 
\p  
\v 5 Tayopi Herodes Judea ande na'suite Chigama afa'su Zacaríasja can'jen. Tisei'ccu fae'ngae Chigama afaye semasundeccuja Abiasundeccu tsu. Zacarías pushe'qque Chigama afa'su Aarón aindeccu'su pushesu tsu. Tise iniseja Elisabet.  
\v 6 Tsendeccuja Chigave in'jamba ño'a'fa. Pa'cco Chiga manda'choma ñotsse pañamba shaca mecho canse'fa.  
\v 7 Elisabetja du'shuve isumbe'yi coenza ccasheve da. Zacarías'qque ccashe'ye. 
\p  
\v 8 Tseyi tise Abiasundeccu Chiga ettini semajeinte Zacarías'qque Chigama afa'suve sema'jen.  
\v 9 Chigama afasundeccu in'janqquia'caen quini'ccocho'ccoma attufaen'fa majan Chiga ettinga ca'nimba ñome'bama oque oraeña'chove atesuye. Tsequi a'ta tsu quini'ccoja canjaen Zacarías ca'niña'chove.  
\v 10 Zacarías ca'nimba ñome'bama oque oraen'jen'ni poiyi'cco a'i tsotefanga ccutsupa Chigama iñajan'jen'fa.  
\v 11 Tsa'caen Zacarías tisuyi ca'nisi Chigama sefacconi'su shondo'suja tisenga attian ñome'bama oque'je'chombe tansinfani ccutsupa.  
\v 12 Zacaríasja tisema attepa asi'ttaemba dyo.  
\v 13 Tsa'ma Chigama sefacconi'su shondo'suja tisema su: 
\p —Dyojama Zacarías. Tayo tsu Chiga Quitsaja que iñajan'choma paña. Que pushe Elisabetja tsandie du'shuve tsu isuya. Tisema qui inisian'faya Juanme.  
\v 14 Que'i qui avujatssi'faya. Tisema isusi tsain'bio a'i'qque avujatssi'faya.  
\v 15 Nane Tiseja Na'su Chiga joccapitssia a'iya tsu. Osha'cho ccusianqque'suma tiseja cu'iya'bi. Tsa'ma toya isumbi'te tsu Chiga Qquendya'pa tisenga ca'nimba in'jaeña.  
\v 16 Du'shuja coenzave dapa tsu tsain'bio israendeccuma in'jaeña cuintsu Chiga Quitsama tise'pa Na'suve tta'tta'faye.  
\v 17 Tiseja Na'suma o'tie tsu jiya. Tayopi'su Chiga Aya'fama afa'su Elías injama'choma an'bianqquia'caen tise'qque osha'choma oshaya. Tiseja aindeccuma in'jaeña cuintsu yayandeccu tise'pa dushundeccuma in'jan'faye; cuintsu egae tsinconsundeccu'qque ño'a a'i in'jan'chove ttatta'faye. Tsa'caen aindeccuma in'jaensi tise'paja Na'suma shondo'faya. 
\p  
\v 18 Tsa'ma Zacaríasja Chigama shondo'suma su: 
\p —¿Ma'caen gi in'jaña que su'choja tansintssia've? Ñajan coenza ccashe'ye. Ña pushe'qque coenza ccashe. 
\p  
\v 19 Tsa'caen iñajampañasi Chigama sefacconi'su shondo'suja su: 
\p —Ña gi Gabriel. Ña gi Chiga can'jeni ccutsu'cho. Tiseja ñama moen va ñotsse condase'choma quenga condaseye.  
\v 20 Tsa'ma ¡que canjan! Ña suqquia'caen tsu ñoa'me tsoña. Tsa'ma queja ña su'choma in'jambipa qui ayafambie dapa can'jeña que pushe du'shuma isuya'ngae. 
\p  
\v 21 Tsa'caen condase'je'ni aindeccuja tsotefani Zacaríasve ro'ndá can'jen'fa. Junde sombombisi asi'ttaen'fa.  
\v 22 Tsa'caen asi'ttaen'jen'fani Zacaríasja sombopa afaye oshambipa tise tivei'ccu canjan'jaen. Tsa'caen afaye oshambisi poiyi'cco a'i in'jan'fa tise Chiga ettini can'jemba sefacconi'su attian'choma atte'chove. 
\p  
\v 23 Tsomba Zacarías Chiga ettini sema'jen'choma nanimba tise tsaoni ja.  
\v 24 Omboe tise pushe Elisabet surie dapa cinco ccovuve tsaoni can'jen. Can'jemba qquen in'jan:  
\v 25 “Ñajan du'shu mechopa ansangé can'jen. Tsa'ma Na'su Chiga ñama in'jamba ñama ñotsse tson cuintsu cca'i ñama afambe can'faye.” 
\s1 Jesúsma isuya'chone condase'cho 
\p  
\v 26 Seis ccovu pasasi Chigaja Tisema sefacconi'su shondo'su Gabrielma mandamoen Galilea ande'su Nasaret canqqueni.  
\v 27 Mandasi ja, chu'a pushesu, Maríanga condaye. Tsaja, toya tsandiema atesumbi'choa. Tsa'ma fae tsandie, José, tisema pusheye tayo iñajan. Joséja tayopi'su israe Na'su David a'i.  
\v 28 Gabrielja jipa Maríama ttu'sepa su: 
\p —¡María! Que qui Chiga in'jan'cho. Chigaja quei'ccu can'jen. 
\p  
\v 29 Tsama pañamba Maríaja injama'choni dyo. Jongoesie tsa'caen chigambian'chove atesumbipa asi'ttaen.  
\v 30 Tsa'caen dyosi Chigama sefacconi'su shondo'suja ti'tsse condase: 
\p —Dyombe canjan, María. Chigaja ñoa'me quema ñotsse in'jan.  
\v 31 Surie dapa qui tsandie du'shuve isuya. Tisema qui inisiaña Jesúsve.  
\v 32 Tise tsu joccapitssiaya. “Joccapitssia Chigambe Dutssi'ye” qquen tsu poiyi'cco tisema afa'faya. Nane Tayopi'su Na'su Davidnga mandaye antteqquia'caen Na'su Chigaja tisenga'qque antteya cuintsu na'suve dapa mandaye.  
\v 33 Tsangae tsu tiseja israe aindeccuma manda'jeya. Tise na'suve da'choja minga'ni'qque pasaya'bi tsu. 
\p  
\v 34 Tsama pañamba Maríaja su: 
\p —¿Ma'caen tsu tsa'caen tsoña ñajan tsa'ndu mechoamajan? 
\p  
\v 35 Tsa'ma Chigama sefacconi'su shondo'suja su: 
\p —Chigaja osha'choma joccapitssiapa osha'choma oshacho. Chiga Qquendya'pa quenga ca'nisi Joccapitssia Chigaja quema oppoeña. Tsa'caen oppoensi que du'shuja ñoa'me egave mechosi tsu Chiga Dutssi'ye qquen su'faya.  
\v 36 Toya'caen que antian coenza Elisabet ccasheve dajipa surie da. Tsa du'shuve mechoa qquen su'cho tsu ja'ñojan surie dapa seis ccovuve can'jen.  
\v 37 Nane Chigaja osha'choma oshacho. 
\p  
\v 38 Tsonsi Maríaja su: 
\p —Dasu'. Ña gi Na'su Chigama shondo'su pushesu. Cuintsu Tiseja que suqquia'caen ñanga tsonjan. 
\p Tsa'caen susi Chigama sefacconi'su shondo'suja ja. 
\s1 María Elisabetma can'su ja'cho 
\p  
\v 39 Tsonsi Maríaja ñoñamba Judea ande'su ccotta'cco'su canqqueni pasia'su ja.  
\v 40 Japa Zacarías tsa'onga ca'nimba Elisabetma chigambian.  
\v 41 María chigambian'choma Elisabet pañasi tise du'shuja ttopa'ye quia'me oya. Tse'faei'ccuyi Chiga Qquendya'pa in'jaensi  
\v 42 Elisabetja quia'me afapa su: 
\p —Quema tsu Chigaja poiyi'cco pushesuma ti'tsse'tsse injancho. Que du'shuma'qque tsu ñoa'me injancho.  
\v 43 Ña na'su chan ñama can'su jisi gi ñoa'me avuja.  
\v 44 Nane que chigambian'choma ña pañasi tsu tse'faei'ccuyi ña du'shu'qque avujapa ña ttopa'ye quia'me oya.  
\v 45 Chigaja Tise su'choma ñoa'me tsoña. Tsama pañamba in'jamba qui ñoa'me avujatssiya. 
\p  
\v 46 Tsonsi Maríaja su: 
\q1 —Ña injama'choi'ccu gi Na'su Chigama ñotsse afa. 
\q1  
\v 47 Chiga ñama ccushaen'su can'jensi tsu ña qquendya'pa'qque avujatssi. 
\q1  
\v 48 Ña gi utu'ccoa Chigama shondo'su. Tsa'ma Chigaja ñama attepa ñotsse in'jan. 
\q1 Tsa'cansi poiyi'cco a'i tsu ja'ño, jai'ngae'qque conda'faya ma'caen Chiga ñama ñotsse in'jan'choma. 
\q1  
\v 49 Tiseja Joccapitssiapa ñama ñotsse tson. 
\q2 Tise inise tsu Ño'a. 
\q1  
\v 50 Poiyi'cco majan Tise've in'jamba canse'nijan tsendeccuma tsu mendeyeya. 
\q1  
\v 51 A'i quin'an tisu tivema canjaenqquia'caen Chigaja osha'choma oshapa canjaen. 
\q1 Aindeccu “Ña gi ño'a” qquen in'jan'ni'qque Chigaja tise'pama joqquitssian maña. 
\q1  
\v 52 Tiseja Nasundeccuma joqquitssiamba bove'ccondeqquiama tsu ti'tsse'tssia've tson. 
\q1  
\v 53 Qquipoe'sundeccuma o'fianqquia'caen ñotssiama afe. 
\q1 Tsa'ma osha'choma an'biansundeccumajan me'ccoeyi maña. 
\q1  
\v 54 Israendeccuja Tisema shondosundeccusi Chigaja tise'pama fuite. 
\q1 Tayopi suqquia'caen tise'pamajan anttembe'yi tsangae mendeye'je. 
\q1  
\v 55 Tsa'caen Chigaja ingi tayopi'su coenzandeccuma conda. 
\q1 Nane Abraham, tise dushundeccuma'qque tsa'caen fuiteye conda. 
\p  
\v 56 Maríaja tsa'caen Chigama ñotsse afapa tres ccovuve Elisabeti'ccu can'jemba toequi tise tsaoni ja. 
\s1 Juanma isu'cho 
\p  
\v 57 Elisabet du'shuma isuya'cho napisi tsandie du'shuve isu.  
\v 58 Pporotsse can'jensundeccu, antiandeccu'qque Chiga tisema ñotsse tson'choma pañamba fae'ngae avuja'fa.  
\v 59 Ocho a'ta pasasi israendeccu in'janqquia'caen du'shumbe ttonoma chhiyitevaeñe poiyi'cco a'i bo'fa. Bopa du'shuma tise yaya iniseningae Zacaríasve inisiañe in'jan'fa.  
\v 60 Tsa'ma chan tsu su: 
\p —Me'i. Tsa'cambi. Juanme tsu inisiaña'cho. 
\p  
\v 61 Tsonsi tisema su'fa: 
\p —Tsa'ma me'i'on tsu que antian tsesu iniseve. 
\p  
\v 62 Tsomba du'shumbe yaya Zacaríasma iñajampañañe in'jamba tivei'ccu canjan'jen'fa cuintsu du'shuma jongoesuve inisiaña'choma condaye.  
\v 63 Tsonsi Zacaríasja canjan'jen'choma in'jamba canjan'jen cuintsu tisenga tevaenqque'suma afe'faye. Isupa tevaen: “Tise iniseja Juan.” Qquen tevaensi poiyi'cco a'i asi'ttaemba can'boen'fa.  
\v 64 Tse'faei'ccuyi Zacaríasja ccase afaye oshapa Chigama ñotsse afa.  
\v 65 Tsonsi pporotsse can'jensundeccuja dyopa can'boen'fa. Tsa'caen tson'chone tsain'bitsse condasecco'fa. Nane pa'cco ccotta'cco'su Judea ande'ye tsa'caen tson'chone condasecco'fa.  
\v 66 Poiyi'cco majan tsane pañamba injama'choni in'jamba su'fa: 
\p —¿Micoña tsu va du'shuja? 
\p Chigaja ñoa'me tisema in'jamba fuitepa angacan. 
\s1 Zacarías settapoen'cho 
\p  
\v 67 Chiga Qquendya'pa tisenga ca'nisi du'shumbe yaya, Zacaríasja, Chiga in'jaensi afa'choma afa: 
\q1  
\v 68 “Ñotssi tsu israe Na'su Chiga Quitsa. 
\q1 Tise aindeccuma can'su jipa ccushaemba Tiseja ñotssi. 
\q1  
\v 69 Tisema shondo'su David omba'su dutssiyendeccu'su quin'an ccushaen'suma ttu'sepa inginga moen. 
\q1  
\v 70 Tayopi Chiga Tisema afasundeccuma in'jaensi tise'paja ingi ccushaya'chone afa'fa. 
\q1  
\v 71 Ingima iyiccayesundeccu'ye, ingima chi'gasundeccuye'qque Chigaja ingima ccushaeña. 
\q1  
\v 72 Ingi tayopi'su coenzandeccuma mende'yeya qquen su'chopa tsu tsa'caen tsoña. 
\q1  
\v 73 Nane Chigaja Abrahami'ccu condasepa ñoa'me tsoña'choma tansintsse conda. 
\q1  
\v 74 Ma'caen ingija ingima iyiccayesundeccu'ye ccushapa tisema dyombi'tsse shondo can'faya'choma. 
\q1  
\v 75 Tisema shondocamba gi ño'ame dapa tsangae egae tsincombe'yi tisei'ccu can'jen'faya. 
\q1  
\v 76 Que, ña du'shuja, Sefacconi'su Chigama afa'su qui. 
\q2 Tsa'cansi tsu poiyi'cco a'i su'faya: 
\q1 ‘Na'suma o'tie japa tsu Tise jiya'chove ñoñaña.’ 
\q1  
\v 77 Egae tsincon'choma joqquitssiaña'chone tsu poiyi'cco a'inga condaya cuintsu atesu'faye tsa'caen Chiga a'ima ccushaeña'choma. 
\q1  
\v 78 Chiga Quitsa ñoa'me ingima mende'yepa tsa'caen tsoña. 
\q1 Nane a'ta a'taqquia'caen Chiga sefacconi ingima attiaña. 
\q1  
\v 79 Tsa'caen tsu paya'chondeccunga attiaña cuintsu tise'pa sinttia'ni can'jen'choma catipa a'tatssianga ji'faye. 
\q1 Inginga'qque attiaña cuintsu 
\q2 ingi'qque Tise've in'jamba cansepa 
\q2 dyombi'tsse opatsse canse'faye.” 
\m Tsa'caen tsu Zacaríasja Chigama ñotsse afa. 
\p  
\v 80 Du'shu Juan Chigave in'jamba coen. Tayo coemba a'i menia japa bo'tsse tseni can'jen. Nane tise israendeccuma candusiaña'cho napiya'ngae tseni ro'ndá can'jen. 
\c 2  
\s1 Jesúsma isu'cho 
\r (Mt 1.18-25) 
\p  
\v 1 Ande na'su Agosto na'suite tiseja manda poi ande'su a'ima agattoye.  
\v 2 Me'ttia'ye tsa'caen agattoye mandasi Cirenio tsu Siria ande'su governaror.  
\v 3 Poiyi'cco tsu tise a'i canqqueni ja'faya'cho tseni tise'pa inisema tevaensi cuintsu agatto'faye.  
\v 4 Tsa'cansi Joséja Galilea ande'su Nasaret canqquene sombopa Judea andeni ja. Joséja David a'ipa Judeani japa Belén canqqueni ja. Tsa canqque tsu tayopi'su Na'su Davidma isu'cho canqque.  
\v 5 Nane tise pushe Maríai'ccu tseni tise'pa inisema tevaeñe ja'fa. Maríaja tayo suri.  
\v 6 Tsa'cansi toya Beléni can'jen'ni tayo tsu María du'shuma isuya'cho napi.  
\v 7 A'i ana'jen'cho tsa'o panshaen on'basi vaura ettini can'jemba Maríaja tseni tise aishe tsandie du'shuma isu. Isupa sarupai'ccu findipa vaura an'jen'cho cafonga ppiña. 
\s1 Chigama sefacconi'su shondosundeccu attian'fa'cho 
\p  
\v 8 Beléni pporotsse tsu can'jen'fa oveja coirasundeccu. Cose potreroni can'jen'fa tise'pa ovejama coiraye.  
\v 9 Tse'faei'ccuyi Na'su Chigama sefacconi'su shondo'su tise'panga attian. Attiansi na'su Chiga a'tatssiaja tise'panga chanjun. Tsa'caen chanjunsi ñoa'me dyo'fa.  
\v 10 Tsa'ma Chigama sefacconi'su shondo'suja su: 
\p —Dyo'fajama. Ñotsse condase'choma condaye gi ji. Poiyi'cco a'i tsu vama pañamba avujatssi'faya.  
\v 11 Ja'ño a'ta tsu David canqqueni que'ima ccushaen'suve isu. Tsaja Na'su Cristo tsu.  
\v 12 Nane ña su'cho du'shumanda qui atte'faya sarupai'ccu findipa vaura an'jen'cho cafonga ppiña'choma. 
\p  
\v 13 Tise tsa'caen su'je'ni tse'faei'ccuyi tsain'bio Chigama sefacconi'su shondosundeccu tisei'ccu fae'ngae attian'fa. Tsa'caen attiamba Chigama ñotsse afapa su'fa: 
\p  
\v 14 Sefacconi'su Chigaja ñoa'me ñotssia tsu. 
\q1 Va ande'su aindeccuma ñotsse in'jamba Chigaja in'jan cuintsu poiyi'cco a'i tisupapora ñotsse in'jamba opatsse canse'faye. 
\p  
\v 15 Tsa'caen afa nanimba poiyi'cco Chigama sefacconi'su shondosundeccu ja'fasi oveja coirasundeccu tisupaporai'ccu condasecco'fa: 
\p —Jinge Beléni jaye. Na'su Chiga va ñotsse tson'choma inginga condase'choma japa atteye. 
\p  
\v 16 Cunshoa'me japa Maríama, Joséma'qque cachui'fa. Tsomba du'shuma'qque atte'fa, vaura an'jen'cho cafonga ppiña'choma.  
\v 17 Du'shuma attepa du'shune tise'panga condase'choma condase'fa.  
\v 18 Oveja coirasundeccu tsa'caen condase'fasi poiyi'cco pañasundeccu asi'ttaemba can'boen'fa.  
\v 19 Tsa'ma Maríaja osha'choma in'jamba injama'choni asi'ttaén can'jen.  
\v 20 Tsomba ovejama coirasundeccu toequi japa Chigama ñotsse afa'fa. Nane Chigama sefacconi'su shondo'su ma'caen conda'choma tayo pañamba tsa'caen attepa Chigama avujatsse afa'fa. 
\s1 Jesúsma Chiganga afe'fa'cho 
\p  
\v 21 Ocho a'ta pasasi du'shumbe ttonoma chhiyitevaemba tisema inisian'fa Jesúsve. Tsa'caen tsu Chigama sefacconi'su shondo'suja tayoe conda María toya surimbi'te. 
\p  
\v 22 Moisés manda'cho mandaqquia'caen pushesu asettupa onjoña'chone napisi Maríaja onjon. Onjomba du'shu Jesúsma Jerusaléni anga'fa tisema Chiganga afeye.  
\v 23 (Na'su Chiga manda'cho tsu su: Majan aisheve isu'cho tsandie du'shumajan tsama Chigaja in'jan Tise'beve.)  
\v 24 Toya'caen Na'su Chiga manda'cho tsu manda dos ppuppuju'choma, tsambi'ta dos manambema Chiganga afeye. Tsa'caen manda'chosi María, José tsama afeye ji'fa. 
\p  
\v 25 Tsaite Jerusaléni fae tsandie can'jen, tise inise Simeón. Tiseja ño'amba Chigama ñoa'me in'jan. Chiga Qquendya'pa tisei'ccu can'jensi tiseja israendeccuma ccushaeña'chove ronda'je.  
\v 26 Toya'caen Chiga Qquendya'pa tisema in'jaemba conda, tiseja toya pambi'te Na'su Chigambe Cristoma atteya.  
\v 27 Tsa'caen condapa in'jaensi Chiga ettini ja. Tseni japa can'jen'ni María, Joséi'ccu du'shu Jesúsma i'fa manda'cho suqquia'caen tisema tsoñe.  
\v 28 Tsa'caen i'fasi attepa Simeónjan du'shuma opipa Chigama ñotsse afapa qquen su: 
\q1  
\v 29 Na'su, ja'ñonda gi avujatsse paya. 
\q1 Que suqquia'caen  
\v 30 gi Que ccushaen'suma tayo atte. 
\q1  
\v 31 Queja poiyi'cco a'inga tisema moen cuintsu attepa in'jan'faye. 
\q1  
\v 32 Nane tiseja israembindeqquianga attiansi tsendeccu'qque queve in'jan'faya. 
\q1 Tise'qque israendeccu'susi israendeccuja ti'tsse'tssia've dapa avujatssi'faya. 
\p  
\v 33 Simeón tsa'caen susi José, María pañamba can'boen ccutsu'fa.  
\v 34 Tsonsi Simeón tise'pama ñotsse afapa du'shumbe chan Maríama su: 
\p —¡Que canjan! Va du'shuve in'jambi'ta tsain'bio israendeccu tsu qque'faya. Tsa'ma cca'indeccuja tise've in'jamba ti'tsse'tssia've dapa tsu avuja'faya. Aindeccu tisema afase'fasi  
\v 35 qui dansan'choi'ccu que injama'choma quiccu'fa'ma'caen injama'cho tsosipie ñombi'yeya. Nane tsain'bio a'i tsu tise'pa injama'cho tsosipie in'jan'choma tsa'caen poiyi'cconga canjaen'faya. 
\p  
\v 36-37 Toya'caen Chiga Aya'fama afa'su pushesuja Chiga ettini can'jen. Aser aindeccu'su Fanuel onque'nge tsu. Tise iniseja Ana. Tiseja ñoa'me ccashe, ochenta y cuatro canqque'fave tsu an'bian. Tseyi coemba tsa'ndupa siete canqque'fave can'jensi tise tsa'nduja pa. Tsa'caen pan'jaemba ja'ñojan Chiga ettini can'jen. Ni sombombi. Tsa'ma a'ta, cose'qque tseni can'jemba Chigama iñajan'jen. Maqui a'taja ambe'yi Chigama iñaján canse.  
\v 38 Simeón toya José, Maríai'ccu condase'je'ni Ana'qque jipa cachui. Cachuipa du'shuma attepa Chigama ñotsse afapa du'shu Jesúsne Jerusalensundeccunga condaseye ashaen. Condasesi majan Chiga ccushaeña'chove ronda'je'chondeccuja ñotsse paña'fa. 
\s1 Toequi Nasaretni ja'cho 
\p  
\v 39 Tsonsi pa'ccoma Na'su Chiga manda'cho mandaqquia'caen tsomba María, José, du'shui'ccu toequi Galileani ja'fa. Tise'pa Nasaret canqqueni japa can'jen'fa.  
\v 40 Du'shu Jesús coenjimba quinsetssia've da. Chiga tisema ñotsse in'jansi osha'choma atesupa in'jan. 
\s1 Jesús chuite Chiga ettini ja'cho 
\p  
\v 41 Jesús chan, tisema coeña'su yaya'qque poi canqque'fa Jerusaléni jaye atesu'fa Chiga panshaen'cho injienge'cho fiestama panshaeñe.  
\v 42 Jesús doce canqque'fave napiansi ccase tise'pa in'janqquia'caen fiestani jayipa Jesúsma'qque anga'fa.  
\v 43 Fiestama panshaemba toequi Galileani jayi'fasi Jesúsja toe Jerusaléni shanda. Tsa'caen shandasi tise chan, tise yaya'qque atesumbe'yi tsu jaja'fa.  
\v 44 Jesúsja tayo tise amigondeccui'ccu ja qquen in'jamba jaja'fa. Tsa'caen in'jamba fae a'ta já cosepa tise've ttatta'fa. Antiandeccu, amigondeccuni japa ttatta'ma attembi.  
\v 45 Attembipa toequi Jerusaléni ttattaye ja'fa. 
\p  
\v 46 Tsa'caen toequi japa tres a'ta tta'ttá jacamba tisema atte Chiga ettini Chiga manda'choma atesiansundeccui'ccu condasé dyai'choma. Nane atesiansundeccu su'choma pañamba osha'chove iñajampaña'jen.  
\v 47 Jesúsja osha'choma in'jamba tsa'caen condasesi poiyi'cco majan tisema pañasundeccu can'boen'fa.  
\v 48 Tsa'caen tson'jen'ni Jesús chan, tise yaya'qque tisema attepa can'boen ccutsupa Jesús chanjan su: 
\p —Jaricho, ¿jongoesie qui ingima a'tu maña? Tsa'caen que a'tu mañasi ingija ñoa'me ñombi'yepa tta'ttá vana'jen'fa. 
\p  
\v 49 Tsa'ma Jesús tise'pama su: 
\p —¿Jongoesie qui ñame ttatta'je'fa? ¿In'jan'fambi ti qui ñajan ña Quitsa tsaoni can'jemba semaña'cho? 
\p  
\v 50 Tsa'ma tsa'caen susi tise su'choma ñotsse paña'ma in'jan'fambi. 
\p  
\v 51 Tsa'caen supa Jesúsja tise'pai'ccu Nasaretni ja. Tseni japa tise'pama ñotsse pañamba canse. Toya'caen Jesús chanjan osha'choma in'jamba tisu injama'choni asi'taén can'jen.  
\v 52 Jesúsja ti'tsse coemba osha'choma atesu. Poi a'i tisema ñotsse in'jan'fa. Chiga Quitsa'qque tisema ñotsse in'jan. 
\c 3  
\s1 Feti'su Juan a'i menia candusian'cho 
\r (Mt 3.1-12; Mr 1.1-8; Jn 1.19-28) 
\p  
\v 1 Poi ande'suma joccapitssia na'su, Tiberio César, quince canqque'fave tayo mandasi Poncio Pilato, Judea ande'su governarorve can'jemba manda. Toya'caen Herodesja Galilea ande na'su tsu. Tise quinshin, Felipe tsu Iturea ande na'su. Traconite andema'qque manda. Lisaniasja Abilinia ande na'su.  
\v 2 Chigama afa'su nasundeccuja Anas, toya'caen Caifás'qque. Tsendeccu tsu Chiga ettini manda'fa. Poiyi'cco tsendeccu tsa'caen manda'fasi Zacarías dutssi'ye Juan a'i menia ro'ndá can'jen'ni Chigaja Tisu Aya'fai'ccu tisema in'jaen.  
\v 3 Tsa'caen in'jaensi pa'cco Jordán na'en utufa'ye candusiancan, a'i cuintsu tisu egae tsincon'choma catipa fettiye'faye, Chiga tise shacama aqquepoeñe.  
\v 4 Tsa'caen tsomba tsu tayopi'su Chiga Aya'fa afa'su Isaías qquen tevaenqquia'caen tson: 
\q1 A'i aya'fama qui paña'faya a'i menia'ñe qquen fundo'je'choma: 
\q1 “Na'su jiya'chove ñoña'faja. 
\q1 Tise tsaiquima tansianqquia'caen ñoña'faja. 
\q1  
\v 5 Sinjun'ccumajan oviviya'cho. 
\q1 Ccotta'ccomajan joqquitssiamba sefaccoa andema fae'ngaeña'cho. 
\q1 Tsaiqui cca'rutticcoa'ma tansiaña'cho. 
\q1 Ande ccutticcoa'ma ovivipa fae'ngaeña'cho. 
\q1  
\v 6 Nane tsa'caen tsu injama'choma ñoñaña'cho poiyi'cco a'i Chiga tise'pama ccushaeña'choma in'jañe.” 
\p  
\v 7 Tsain'bio a'i Juanga fetiyeye bo'fa. Tsa'caen bo'fasi Juanjan tise'pama iyu'upa su: 
\p —Ñoa'me qui iyo dushundeqquia'can'fa. ¿Majan tsu que'imajan dyoña? Chiga iyicca'yepa fi'ttiya'choma pañamba ¿fetiyepa ccushaye'ta ti qui in'jan'fa?  
\v 8 Injama'choni egae tsincon'choma catiye qquen in'jamba tsu egae tsincombe'yi canse'faya'cho. Aqquia injanga “Tayopi'su Abraham ingi yayasi gi ccusha'faya” qquen su'fajama tisupa injama'choma ñoquiañe. Israendeccu'qque cca'indeccuma bove ñotssimbi tsu. Chigaja in'jan'da va patundundu'ye a'ive tsoñe osha Abraham dushundeccuve dapa cuintsu Tisema iñajan'faye.  
\v 9 Nane quini'cco ñotsse nambisi a'ija tsama ttuttupa si'tsive oque'faya. Tsa'caen tsu Chigaja ttuttupoeñe ovacco'choma tsuiñaqquia'caen tayo ñoña que'i injama'choma somboeñe. 
\p  
\v 10 Tsonsi a'i bo'fa'chondeccuja Juanma iñajampaña'fa: 
\p —Tsa'caenda ¿jongoesuve gi tson'faya? 
\p  
\v 11 Juanjan tise'pama su: 
\p —Tisupapora ñotsse tson'faja. Dos contome an'bian'da conto mechoa'nga fae'cco afeja. Aña'choma an'bian'da attufaen'faja. 
\p  
\v 12 Govierno impuestoma isusundeccu'qque Juanga fetiyeye ji'fa. Juanma tsu iñajampaña'fa: 
\p —Atesian'su, ¿jongoesuve gi ingija tson'faya? 
\p  
\v 13 Juan tise'pama su: 
\p —Govierno isuye manda'choma pan'sha'en isu'fajama. 
\p  
\v 14 Toya'caen sundarondeccu'qque jipa iñajampaña'fa: 
\p —¿Jongoesuve gi ingija tson'faya? 
\p Juanjan su: 
\p —A'ima afopoemba cca'na'fajama. Ni cca'indeccuma tssai'fajama ti'tsse corifin'dima itsaye. Tsa'ma que'i na'su afepoen'choi'ccuyi opatsse canse'faja. 
\p  
\v 15 Poiyi'cco a'i Cristo jiya'chove ro'ndá canse'fa. Tsa'camba injama'choni “¿Juanda ti Cristo?” qquen in'jan'fa.  
\v 16 Tsa'ma Juanjan poiyi'cconga conda: 
\p —Ñajan tsa'ccui'ccu gi que'ima feti'je. Tsa'ma ñama ti'tsse'tssia tsu jiya. Ñajan utu'ccoa. Nane shaca gi tise sapato uga'choma ccupa'suve ca'niñe. Tise jipa tsu Chiga Qquendya'pai'ccu que'ima fetiya. Tsambi'ta si'ngei'ccu fetiqquia'caen tsu injama'choma somboeña.  
\v 17 Trigoma qque'shopa fingiain'ccu ttonoma ufattovaenqquia'caen tiseja jiya fundui'sui'ccu giya'tsse funduipa ñotssia trigoma boñaqquia'caen tise a'ima ñoñañe. Tsa'ma trigo ttonoma oque catiqquia'caen tise've in'jambindeqquiama tsangae catiya. 
\p  
\v 18 Tsa'caen candusiamba Juanjan Cristo jiya'chone ñotsse condase'choma a'inga conda.  
\v 19-20 Toya'caen Juanjan ande na'su Herodesma iyu'u. Herodesja osha'cho egave tsomba tise quinshimbe pushe, Herodíasma, itsapa fae'ngae can'jen. Tsa'caen egae tsinconsi Juanjan tisema iyu'u. Iyu'usi Herodesja ti'tsse egae tsincomba iyicca'yepa Juanma picco'je'cho ettinga ca'niamba picco. 
\s1 Jesús Juanga fetiye'cho 
\r (Mt 3.13-17; Mr 1.9-11) 
\p  
\v 21 Juanjan toya piccoyembi'te poiyi'cco a'ima fetipa Jesúsma'qque feti. Jesús fetiyepa Chigama iñajansi Chigaja sefaccoma fetta.  
\v 22 Fettasi Chiga Qquendya'pa ppuppuju'choa'caen attiamba Jesúsnga ande. Tsonsi sefaccone afa'choma paña'fa qquen su'choma: 
\p —Que qui ña in'jan'cho Dutssi'ye. Ñoa'me gi quema ñotsse in'jan. 
\s1 Jesúsne tayopi'su coenzandeccu 
\r (Mt 1.1-17) 
\p  
\v 23 Jesúsja treinta canqque'fave napiamba a'ima atesiañe ashaen. Tiseja José dutssi'ye qquen tsu poiyi'cco a'i in'jan'fa. 
\q1 Joséja Elí dutssi'ye tsu. 
\q1  
\v 24 Elí Matat dutssi'ye. 
\q1 Matatja Leví dutssi'ye. 
\q1 Levíja Melqui dutssi'ye. 
\q1 Tsaja Jana dutssi'ye. 
\q1 Tsaja José dutssi'ye. 
\q1  
\v 25 Tsaja Matatías dutssi'ye. 
\q1 Tsaja Amós dutssi'ye. 
\q1 Tsaja Nahúm dutssi'ye. 
\q1 Tsaja Esli dutssi'ye. 
\q1 Tsaja Nagai dutssi'ye. 
\q1  
\v 26 Tsaja Maat dutssi'ye. 
\q1 Tsaja Matatías dutssi'ye. 
\q1 Tsaja Semei dutssi'ye. 
\q1 Tsaja Josec dutssi'ye. 
\q1 Tsaja Judá dutssi'ye. 
\q1  
\v 27 Tsaja Joanán dutssi'ye. 
\q1 Tsaja Resa dutssi'ye. 
\q1 Tsaja Zorobabel dutssi'ye. 
\q1 Tsaja Salatiel dutssi'ye. 
\q1 Tsaja Neri dutssi'ye. 
\q1  
\v 28 Tsaja Melqui dutssi'ye. 
\q1 Tsaja Adi dutssi'ye. 
\q1 Tsaja Cosam dutssi'ye. 
\q1 Tsaja Elmadam dutssi'ye. 
\q1 Tsaja Er dutssi'ye. 
\q1  
\v 29 Tsaja Jesús dutssi'ye. 
\q1 Tsaja Eliezer dutssi'ye. 
\q1 Tsaja Jorim dutssi'ye. 
\q1 Tsaja Matat dutssi'ye. 
\q1  
\v 30 Tsaja Leví dutssi'ye. 
\q1 Tsaja Simeón dutssi'ye. 
\q1 Tsaja Judá dutssi'ye. 
\q1 Tsaja José dutssi'ye. 
\q1 Tsaja Jonam dutssi'ye. 
\q1 Tsaja Eliaquim dutssi'ye. 
\q1  
\v 31 Tsaja Melea dutssi'ye. 
\q1 Tsaja Mena dutssi'ye. 
\q1 Tsaja Matata dutssi'ye. 
\q1 Tsaja Natán dutssi'ye. 
\q1  
\v 32 Tsaja David dutssi'ye. 
\q1 Tsaja Isaí dutssi'ye. 
\q1 Tsaja Obed dutssi'ye. 
\q1 Tsaja Booz dutssi'ye. 
\q1 Tsaja Sala dutssi'ye. 
\q1 Tsaja Naasón dutssi'ye. 
\q1  
\v 33 Tsaja Aminadab dutssi'ye. 
\q1 Tsaja Admin dutssi'ye. 
\q1 Tsaja Arni dutssi'ye. 
\q1 Tsaja Esrom dutssi'ye. 
\q1 Tsaja Fares dutssi'ye. 
\q1 Tsaja Judá dutssi'ye. 
\q1  
\v 34 Tsaja Jacob dutssi'ye. 
\q1 Tsaja Isaac dutssi'ye. 
\q1 Tsaja Abraham dutssi'ye. 
\q1 Tsaja Taré dutssi'ye. 
\q1 Tsaja Nacor dutssi'ye. 
\q1  
\v 35 Tsaja Serug dutssi'ye. 
\q1 Tsaja Ragau dutssi'ye. 
\q1 Tsaja Peleg dutssi'ye. 
\q1 Tsaja Heber dutssi'ye. 
\q1 Tsaja Sala dutssi'ye. 
\q1  
\v 36 Tsaja Cainán dutssi'ye. 
\q1 Tsaja Arfaxad dutssi'ye. 
\q1 Tsaja Sem dutssi'ye. 
\q1 Tsaja Noé dutssi'ye. 
\q1 Tsaja Lamec dutssi'ye. 
\q1  
\v 37 Tsaja Matusalén dutssi'ye. 
\q1 Tsaja Enoc dutssi'ye. 
\q1 Tsaja Jared dutssi'ye. 
\q1 Tsaja Mahalaleel dutssi'ye. 
\q1 Tsaja Cainán dutssi'ye. 
\q1  
\v 38 Tsaja Enós dutssi'ye. 
\q1 Tsaja Set dutssi'ye. 
\q1 Tsaja Adán dutssi'ye. 
\q1 Adánjan Chiga dutssi'ye. 
\c 4  
\s1 Jesúsma qqueña qquen tson'cho 
\r (Mt 4.1-11; Mr 1.12-13) 
\p  
\v 1 Tsomba tse'i Chiga Qquendya'pa Jesúsnga ca'nimba in'jaen cuintsu a'i menia japa  
\v 2 cuarenta a'ta can'jeñe. Tseni can'jensi cocoya na'su Satana tisema qqueñacañe ji. Jesús ambe'yi can'jemba ñoa'me qquipoe'susi  
\v 3 Satanajan Jesúsma su: 
\p —Queja ñoa'me Chiga Dutssi'ye'ta mandaja cuintsu va patu panme dasi añe. 
\p  
\v 4 Jesúsja tisema su: 
\p —Chiga Tevaen'jenga qquen tsu tevaen: “A'ija aqquia panmeñi amba canse'faya'bi. Tsa'ma Chiga Aya'fa in'jaensi tsu canse'faya.” 
\p  
\v 5 Tsonsi Satanajan Jesúsma ccotta'cco se'fatssia tansin'choni angapa tse'faei'ccuyi pa'cco a'i can'jen'cho andema canjaemba  
\v 6 conda: 
\p —Ñanga anttesi gi pa'cco va ande na'su. Majanga ña in'jan'da tsanga gi afeye osha. Tsa'camba pa'tssima quenga afesi qui ti'tsse'tssia na'suve dapa mandaya.  
\v 7 Que ñanga ccarupa iñajan'ninda tsu pa'cco vaja quembe. 
\p  
\v 8 Jesúsja pañamba su: 
\p —Satana, biani jaja. Chiga Tevaen'jenga qquen tsu tevaen: “Na'su Chiga Quitsaveyi iñajaña'cho. Tise'veyi shondocaña'cho.” 
\p  
\v 9 Tsonsi Satana Jerusaléni Jesúsma angapa Chiga etti omba'su tsutopanga ccutsiamba su: 
\p —Queja ñoa'me Chiga Dutssi'ye'ta vane butto amppija.  
\v 10 Nane Chiga Tevaen'jenga qquen tsu tevaen: 
\q1 Chigaja Tisema shondosundeccuma manda quema coiraye. 
\q1  
\v 11 Tise'pa tivei'ccu quema ñotsse angacaña 
\q1 que tsu'tte patunga desi zuccopanshan amppisa'ne. 
\q1  
\v 12 Tsa'ma Jesúsja tisema su: 
\p —Chiga Tevaen'jenga qquen tsu su: “Chigaja que Na'su tsu. Tisema qqueña qquen tsonjama.” 
\p  
\v 13 Tsa'caen Satana Jesúsma qqueña qquen tson'ma oshambipa japa ronda'je ja'i ccase qqueñacañe. 
\s1 Galileani candusiañe ashaen'cho 
\r (Mt 4.12-17; Mr 1.14-15) 
\p  
\v 14 Chiga Qquendya'pa tisema in'jaemba quiñaensi Jesús toequi Galileani shanda. Tseni jasi poiyi'cco pporotsse can'jensundeccu tisene pañamba condase'fa.  
\v 15 Nane Jesús tise'pa Chigane atesian'jen'ttinga atesian'jensi poiyi'cco a'i tisene ñoa'me ñotsse afa'fa. 
\s1 Jesús Nasaret canqqueni can'jen'cho 
\r (Mt 13.53-58; Mr 6.1-6) 
\p  
\v 16 Tsonsi Jesús Nasaretni ja, tise chuite can'jemba coeni. Tise atesuqquia'caen Sabado a'ta Chigane atesian'jen'ttinga japa ca'ni. Ca'nimba Chiga Tevaen'jema camba afaye ccutsusi  
\v 17 Chigama afa'su Isaías tevaen'jema tisenga afe. Isupa fettapa tta'ttapa atte qquen tevaen'choma: 
\q1  
\v 18 Chiga Qquendya'pa tsu ñama in'jaemba manda 
\q1 va ñotsse condase'choma va'chandeccunga candusiañe. 
\q1 Ñama manda injama'choni ñombi'yesundeccuma ccushaeñe. 
\q1 Ñama manda indiye'chondeccunga tise'pama ccupaya'chone condaye. 
\q1 Ñama manda cuintsu binindeccu atte'faye. 
\q1 Ña gi noñangiañesundeccuma ccushaeña. 
\q1  
\v 19 Na'su Chiga tsu a'ima in'jamba ja'ño fuite'je. 
\q1 Tsane gi condaseye ji. 
\p  
\v 20 Tsomba Jesúsja tevaen'jema findipa tevaen'jen na'sunga afepa dyai a'ima candusiañe. Dyaisi Chigane atesian'jen'ttini can'jensundeccu poiyi'cco tisema can'boen'fa.  
\v 21 Can'boen'fasi Jesúsja qquen su: 
\p —Ja'ño a'ta tsu va que'i paña'jen'cho Chiga Tevaen'jen su'choja tayo napi. Ñane tsu condase. 
\p  
\v 22 Jesús ñotsse afa'je'choma poiyi'cco pañasundeccu tisene ñotsse afa'fa. Tsa'caen ñotsse afapa can'boemba su'fa: 
\p —¿Vaja José dutssi'yembi ti? 
\p  
\v 23 Tsonsi Jesúsja tise'pama su: 
\p —Ñoa'me gi in'jan que'ija asi'ttaemba qui tayopi'su condase'cho suqquia'caen ñama qquen su'faya: “Ccushaen'suta, tisuma o'tie ccushaenjan.” Toya'caen que'ija ña Capernaumni japa tson'choma pañamba in'jan'fa vani'qque ña tsa'caen canjaeñe. 
\p  
\v 24 Toya'caen Jesúsja ti'tsse candusiamba su: 
\p —Ñoa'me gi que'inga su, tisu andeni jisi tsu tisu aindeccu tsa Chiga Aya'fama afa'suma chi'ga'fa.  
\v 25 Tansintssi tsu tayopi'su Elíasne condase'cho. Tise can'jeinte tres canqque'fa pa'cco toya'caen faesu enttingeve unjin tuimbisi poiyi'cco a'i qquipoe'su'fa. Tsain'bio tsandupajen'chondeccu israe andeni can'jemba qquipoe'su'fa.  
\v 26 Tsa'ma Chigaja Elíasma manda cuintsu fae tsandupajen'choveyi fuiteye. Tsaja israe ande joccani Sidón ande'su Sarepta canqqueni can'jen.  
\v 27 Toya'caen Chigama afa'su Eliseo can'jeinte tsain'bio na congomba pajisundeccu israe andeni can'jen'fa. Tsa'ma Chigaja tsendeccuma ccushaembisi ccushambe canse'fa. Tsa'ma faesuma, Siria ande'su Naamámeñi tsu Chigaja ccushaen. 
\p  
\v 28 Ya'caen susi pañamba Nasaretsundeccu iyicca'yepa  
\v 29 Jesúsma indipa canqque'ye joqquitssian'fa. Tsa canqqueja ccotta'cconi jin. Tsa'cansi Jesúsma indipa utufani anga'fa tsene cofetta amppiamoensi cuintsu paye.  
\v 30 Tsa'ma Jesúsja tise'pa enttinge'ye panshamba ja. 
\s1 Cocoya ca'ni'choma ccushaen'cho 
\r (Mr 1.21-28) 
\p  
\v 31 Tsomba Jesúsja faesu Galilea'su canqqueni ja. Capernaum canqqueni japa can'jemba Sabado a'ta a'ima atesian'jen.  
\v 32 Ñoa'me na'sia'caen atesian'jensi poiyi'cco a'i pañamba asi'ttaen'fa. 
\p  
\v 33 Tse'tti Chigane atesian'jen'ttini tsu cocoya ca'ni'cho a'ija can'jen. Tiseja fundondo'e qquen afa: 
\p  
\v 34 —Ingima noñangianjama Jesús Nasareno'su. ¿Ingima fi'ttiye ti qui ji? Quemanda gi atesu. Nane queja Chiga in'jan'cho qui. 
\p  
\v 35 Tsa'ma Jesúsja tisema iyu'upa su: 
\p —Ziyapa tsa a'i'ye somboja. 
\p Tsonsi poiyi'cco a'i camboen'jen'fa'ni cocoyaja a'ima pan'jaensi andenga amppi. Tsa'caen amppisi a'ima iñacaembe'yi somboin ja.  
\v 36 Somboin jasi a'i bo'fa'cho can'boemba condasecco'fa: 
\p —¿Ma'caen tsu Jesúsja tsa'caen afaye osha? Na'sia'caen quia'me mandasi cocoyandeccu'qque pañamba somboin ja'fa. 
\p  
\v 37 Jesús tsa'caen tsonsi poiyi'cco tsa ande'su a'ija Jesúsne pañamba condasecco'fa. 
\s1 Simón chanccashema ccushaen'cho 
\r (Mt 8.14-15; Mr 1.29-31) 
\p  
\v 38 Jesúsja Chigane atesian'jen'tti'ye sombopa Simón tsaoni ja. Simón chanccasheja ajepa ccui. Si'ngia'ca'en ajepa ccuisi Jesúsnga conda'fa cuintsu ccushaeñe.  
\v 39 Jesús catsepa ajema iyu'usi ajeja chattian. Tse'faei'ccuyi pushesuja quinsetsse ccushapa jangipa poiyi'ccoma cui'ña. 
\s1 Jesús pajisundeccuma ccushaen 
\r (Mt 8.16-17; Mr 1.32-34) 
\p  
\v 40 Tsa'caen tsonsi tayo chiga amppisi poiyi'cco a'i tise'pani'su pajisundeccuma i'fa. Osha'cho paqque'sui'ccu paji'fa'choma isi Jesúsja tise tivei'ccu tise'pama pporaemba ccushaen.  
\v 41 Jesús mandasi cocoyandeccu'qque tsain'bio a'i'ye sombombopa qquen fundo'fa: 
\p —¡Queja Chiga Dutssi'ye qui! 
\p Tsa'ma Jesúsja cocoyama iyu'upa afaye se'pi. Cocoyandeccu'qque atesu'fa Jesúsja Chiga in'jan'cho Cristo tsu. 
\s1 Jesús Galileani japa candusian 
\r (Mr 1.35-39) 
\p  
\v 42 Cosepa a'tasi Jesúsja Pedro tsaone sombopa a'i menia ja. Aindeccuja tise've tta'ttapa attepa jaye se'pi'fa.  
\v 43 Tsa'ma Jesúsja su: 
\p —Ñanda gi faesu canqqueni jaya'cho tseni'qque Chiga aindeccuve daya'chone condaseye. Tsa ñotsse condase'choma condaseye gi va andeni ji. 
\p  
\v 44 Tsa'caen supa Jesúsja cca'tti cca'tti jacamba Galilea ande'su Chigane atesian'jen'ttinga japa candusian'jen. 
\c 5  
\s1 Avuma indisi canjaen'cho 
\r (Mt 4.18-22; Mr 1.16-20) 
\p  
\v 1 Fae a'ta Jesúsja Genesaret mar otafani ccutsupa candusian'jen. Tisema pañañe in'jamba aindeccuja panshaen catse'fa.  
\v 2 Tse'tti avuma vachosundeccu'qque dos rande shavoma tandan dusiamba tise'pa vacho'vama cashi'je'fa. Aindeccuja panshaen catse'fasi Jesúsja tsa shavoma attepa  
\v 3 otse. Otsepa Jesúsja shavo na'su Simónma afa cuintsu otafane re'riccoe cataemba duseye. Tsonsi shavoccunga dyaipa a'ima atesian'jen.  
\v 4 Atesian nanimba Jesúsja Simónma su: 
\p —Mar ti'tsse tso'sinia angapa que vacho'vama ttupa itoyian'faja avuma indiye. 
\p  
\v 5 Simónjan su: 
\p —Na'su, pa'cco cose va'chó jaca'ma gi avuma indimbipa quimbi'fa. Tsa'ma que su'ninda gi ña vacho'vama ttuya. 
\p  
\v 6 Tsa'caen supa ttusi tsain'bio avu indiyesi vacho'vaja chittaji.  
\v 7 Chittajisi tise'pai'ccu fae'ngae vachosundeccu faesu shavo'ni pporotsse duse'fasi fingi ttu'se'fa cuintsu fuite'faye. Jipa poiyi'cco shavonga avuma on'boen'fa. Ti'tssecan'da tsu poiyi'cco shavo andeccoye'can.  
\v 8 Simón Pedroja avuma indi'choma attepa dyopa Jesúsnga tsutta'choi'ccu ccaru dyaipa su: 
\p —Na'su, ña'ñe joqquitssija. Ñanda gi egae tsincon'su. 
\p  
\v 9 Nane Simón, poiyi'cco tisei'ccu can'jensundeccu'qque avuma indi'choma attepa can'boen'fa.  
\v 10 Tisei'ccu fae'ngae vachosundeccu Juan, Santiago'qque dyopa can'boen'fa. Tsendeccuja Zebedeo dutssiyendeccu. Tsonsi Jesúsja Simónma su: 
\p —Dyojama. Ja'ñoñi qui queja avuma ttuqquia'caen a'ima ttu'seya. 
\p  
\v 11 Tsonsi tise'pa shavoma ccattufaemba pa'tssima catipa Jesúsi'ccu jaja'fa. 
\s1 Na congomba paji'suma ccushaen 
\r (Mt 8.1-4; Mr 1.40-45) 
\p  
\v 12 Jesús fae canqqueni can'jen'ni na congomba paji'su tisenga ji. Nane pa'cco ai'vo tsa'caen dapa Jesúsma attepa andenga puntssan ccuipa iñajan: 
\p —Na'su, que in'jan'da qui ñama giya'tsse ccushaeñe osha. 
\p  
\v 13 Tsa'caen susi Jesús tisu tivei'ccu yasapa paji'suma pporaemba su: 
\p —In'jan gi ñajan. Giya'tsse qui ccusha. 
\p Tse'faei'ccuyi giya'tsse ccushasi  
\v 14 Jesús tisema manda: 
\p —Cca'indeccunga condajama. Tsa'ma japa Chigama afa'sunga tisuma canjaenjan. Moisés mandaqquia'caen ccusha'chone afeya'choma afeja cuintsu poiyi'cco a'i que ccusha'choma tsa'caen atesu'faye. 
\p  
\v 15 Tsa'ma Jesús tson'chone ti'tsse condasecco'fasi tsain'bio a'i bo'fa tisema pañañe. Pajisundeccu'qque bo'fa cuintsu tise'pa paji'choma ccushaeñe.  
\v 16 Tsa'ma tsa'caen bo'fa'nijan Jesúsja a'i menia japa Chigama iñajan'jen. 
\s1 Jesús ishopa paji'suma ccushaen'cho 
\r (Mt 9.1-8; Mr 2.1-12) 
\p  
\v 17 Fae a'ta Jesús a'ima atesian'jen'ni fariseo in'jan'chondeccu Chiga manda'choma atesiansundeccu'qque tisenga bo'fa. Nane poi Galilea ande'su canqquene, Judea ande'su canqquene'qque tsu ji'fa. Jerusaléne'qque jipa bopa paña'fa. Tsonsi Na'su Chiga Jesúsma quiñaensi a'ima ccushaen.  
\v 18 Tsa'caen a'ima ccushashaen'jen'ni cca'ija ishopa paji'suma Jesúsnga i'fa. Paji'suma tise ana'jen'chonga opi ipa tta'tta'fa ma'caen ca'nimba Jesús tsutteccofanga paji'suma ccuiñañe.  
\v 19 Tsa'ma tsain'bio a'i bo'fasi ca'niañe oshambipa tsao'cco omba'su ppappacconga ansunde'fa. Tsa'o'su patufin'dima shichhapa paji'suma andian'fa tise ana'jen'choi'ccu. A'i enttingenga Jesús tsutteccofanga andiansi  
\v 20 Jesúsja tise'pa Chigave in'jan'choma in'jamba paji'suma su: 
\p —Tsandie, tayo tsu que egae tsincon'cho joqquitssi. 
\p  
\v 21 Tsa'caen susi Chiga manda'choma atesiansundeccu, fariseondeccu'qque tisupapora iñajampañacco'fa: 
\p —¿Jongoesu qquen tsu va a'ija in'jan? Chigayi tsu egae tsincon'choma joqquitssian'su. ¿Tiseja Chiga qquen ti in'jan? 
\p  
\v 22 Jesúsja tise'pa iñajampañacco'fa'choma in'jamba su: 
\p —¿Jongoesie qui injama'choni qquen asi'ttaemba iñajampañacco'fa?  
\v 23 Tayo gi su: “Que egae tsincon'cho tayo joqquitssi.” ¿Bove aiye'pambi ti qquen suye “Jangipa tsui jaja.”?  
\v 24 Tsa'ma Na'su Chigaja antte Sefaccone Ji'cho A'i va ande'su a'i egae tsincon'choma joqquitssiañe. Ñajan Sefaccone jipa tsa'caen oshapa gi que'inga canjaeña. 
\p Tsomba Jesús ishopa paji'suma su: 
\p —Quema gi manda: Jangipa que ana'jen'choma isupa tisu tsaoni tsui jaja. 
\p  
\v 25 Tse'faei'ccuyi tiseja jangi. Poiyi'cco camboen'jen'ni tise ana'jen'choma onccamba Chigama ñotsse afapa tisu tsaoni ja.  
\v 26 Tsa'caen ccushapa jasi poiyi'cco a'i attepa can'boen ccutsupa Chigama ñotsse afa'fa. Toya'caen dyopa su'fa: 
\p —Ñoa'me ccaningae tson'choma gi ja'ño atte'fa. 
\s1 Jesús Levíma ttu'se'cho 
\r (Mt 9.9-13; Mr 2.13-17) 
\p  
\v 27 Tsonsi Jesúsja sombopa Levíma atte. Tiseja govierno impuestoma isu'su tsu. Leví impuestoma isu'je'ttini dyaisi Jesús tisema ttu'se: 
\p —Ñai'ccu jija. 
\p  
\v 28 Tsonsi Leví jangipa pa'ccoma catipa Jesúsi'ccu ja. 
\p  
\v 29 Tsomba Leví Jesúsnga pipa poiyi'cco a'ima ttu'se tise tsaoni añe. Tsain'bio govierno impuestoma isusundeccu'qque an'jen'cho mesa jin'tti piyive ccuipa an'jen'fa. Cca'indeccu'qque ccuipa an'jen'fa.  
\v 30 Majan fariseondeccu, toya'caen tsendeqquia'caen in'jamba Chiga manda'choma atesiansundeccu'qque can'jemba camboen'jen'fa. Jesúsma shondosundeccuma attepa iyu'uye ashaen'fa qquen iñajampañamba: 
\p —¿Jongoesie qui que'ija va impuestoma isusundeccui'ccu an'jen'fa? Tsendeccuja egae tsinconsundeccu tsu. 
\p  
\v 31-32 Tsama pañamba Jesúsja su: 
\p —Pajimbi'choa ccushaen'suma in'jambiqquia'caen ñajan jimbi gi tayo ño'a qquen in'jan'chondeccuma ccushaeñe. Tsa'ma ccushaen'su paji'suma ccushaeñe jiqquia'caen gi egae tsinconsundeccuma ccushaeñe ji cuintsu tise'pa egae tsincon'choma antte'faye. 
\s1 Ambe'yi asettu'chone atesian'cho 
\r (Mt 9.14-17; Mr 2.18-22) 
\p  
\v 33 Toya'caen tisema iñajampaña'fa: 
\p —Juanma shondosundeccuja asettupa zutsse ambe'yi Chigama iñajan'fa. Fariseoma shondosundeccu'qque tsa'caen atesu'fa. Tsa'ma quema shondosundeccuja asettumbe'yi injanga amba cu'i'fa. 
\p  
\v 34 Tsonsi Jesúsja tise'pama su: 
\p —Tsandie pusheye tson'jemba a'ima ttu'sesi bojin sheque'ta fae'ngae tsandiei'ccu avujatsse amba cui'je'fa. Ña gi tsa tsandieca'on ja'ño can'jen.  
\v 35 Tsa'ma maqui a'ta cca'indeccu tsandiema joqquitssiansi tsu tisupanaccu asettupa ambe'yi can'jen'faya. 
\p  
\v 36 Tsa'caen supa Jesúsja faesu condase'choma condase: 
\p —A'ija cuna ondiccu'jema chittaya'bi tssoruma pi'piye. Tsa'caen tson'da cunama'qque tsu dañoña. Toya'caen ma'ppa'ninda tsa pi'pi'cho zupa tssoru ondiccu'jema ti'tsse chittaya. 
\p  
\v 37 Toya'caen tsu a'ija vinoma cupoemba tssoru ttono botiyanga fiñañambi. Vinojan omppantssimba ttonoma chittaemba tsu catiyeya. Toya'caen ttono'qque tsu tsangae dañongeya.  
\v 38 Tsa'ma cuna vinomanda tsu cuna ttono botiyanga fiñaña'cho. Tsa'caen fiñasi vino, ttono'qque dañongembe'yi ccutsuya. 
\p  
\v 39 Tsa'caen tsu a'ija ñotssia tayoyi ccutsu'cho vinoma cu'ipa cuna ansintssia vinoma in'jambi. Tsa'ma “Tayoyi ccutsu'cho tsu bove ñotssi” qquen tsu suya. 
\c 6  
\s1 Sema'ma'qquia a'tane condase'cho 
\r (Mt 12.1-8; Mr 2.23-28) 
\p  
\v 1 Jesús sema'ma'qquia a'ta nasipa'ye jacansi tisema shondosundeccu'qque jacamba trigoma sintti isupa shuju qque'shopa an'fa.  
\v 2 Tsama attepa majan fariseondeccuja su'fa: 
\p —¿Micomba qui sema'ma'qquia a'ta qquen sema'jen'fa? Chiga manda'chota tsu se'pi sema'ma'qquia a'ta tsa'caen semañe. 
\p  
\v 3 Tsama pañamba Jesúsja su: 
\p —¿Paña'fambi ti qui tayopi'su David tson'choma? Tiseja tisei'ccu jacansundeccu'qque qquipoe'su'fa.  
\v 4 Tsomba Davidja Chiga ettinga ca'nimba Chiganga afe'cho panma isupa an. Tisei'ccu jacansundeccunga'qque afesi tise'pa'qque an'fa. Tsa panjan Chigama afasundeccuyi an'faya'cho. Chiga manda'choja se'pi faesu añe. Tsa'ma David tsa'caen tsonsi Chigaja se'pimbi. 
\p  
\v 5 Toya'caen Jesúsja su: 
\p —Ña, Sefaccone Ji'cho A'i gi sema'ma'qquia a'tane na'su. 
\s1 Tive samba dañonge'cho 
\r (Mt 12.9-14; Mr 3.1-6) 
\p  
\v 6 Faesu sema'ma'qquia a'ta Jesúsja Chigane atesian'jen'ttinga ca'nimba atesian'jen. Tse'tti tsu fae tsandie tansinfa'su tive samba dañonge'cho can'jen.  
\v 7 Fariseondeccu, Chiga Aya'fama atesiansundeccu'qque Jesúsma camboen'jen'fa. Nane sema'ma'qquia a'ta Jesús se'je ccushaen'ninda, tiseja egae tsincon'su qquen suye ronda'je'fa.  
\v 8 Tsa'ma Jesúsja tise'pa in'jan'choma in'jamba tive dañonge'choma su: 
\p —Jipa va'ttinga ccutsuja. 
\p Qquen susi tiseja jangipa Jesúsi'ccu ccutsu.  
\v 9 Tsonsi Jesús poiyi'ccoma iñajampaña: 
\p —Chiga manda'cho sema'ma'qquia a'ta egae tsoñe se'pi'ta ¿ñotsse tsoñe'qque ti se'pi? Fi'ttiye se'pi'ta ¿ccushaeñe'qque ti se'pi? 
\p  
\v 10 Qquen supa piyicamba poiyi'ccoma can'boemba paji'suma su: 
\p —Que tivema yasaja. 
\p Tsandie tsa'caen yasasi tise tiveja giya'tsse ccusha.  
\v 11 Tsa'ma tsa'caen tsonsi fariseondeccu, Chiga Aya'fama atesiansundeccu'qque ñoa'me iyicca'yepa condasecco'fa ma'caen Jesúsma patsuya'chove. 
\s1 Doce shondosundeccuma ttu'se'cho 
\r (Mt 10.1-4; Mr 3.13-19) 
\p  
\v 12 Faesu a'ta Jesús ccotta'cconi japa ansunde Chigama iñajañe. Pa'cco cose Chigama iñaján can'jen.  
\v 13 A'tasi tisema shondosundeccuma ttu'sepa docema tisene afasundeccuve inisian.  
\v 14 Tsendeccuja: Simón (Jesús tisema afa, Pedro); tsambe quinshin Andrés; Santiago; Juan; Felipe; Bartolomé;  
\v 15 Mateo; Tomás; Santiago (tsaja Alfeo dutssi'ye); Simón (Zelote qquen su'cho);  
\v 16 Judas (Santiago antian); Judas Iscariote (Jesúsma jai'ngae chi'gapa afeya'cho). 
\s1 Jesús aindeccuma atesian'jen'cho 
\r (Mr 4.23-25) 
\p  
\v 17 Tsomba Jesús tisema shondosundeccui'ccu ccotta'cco'ye andepa fae'ngatssia andeni ccutsu'fa. Tsain'bio a'i Judea andene, Jerusaléne'qque jipa tseni bo'fa. Toya'caen mar otafani'su Tiro canqque, Sidón canqquene'qque ji'fa Jesúsma pañañe. Tise'pa paji'choma ccushaye in'jamba tsu ji'fa.  
\v 18 Jesúsja cocoyanga noñangiañesundeccuma'qque ccushaen.  
\v 19 Poiyi'cco a'i tsu Jesúsma pporaeñe in'jan'fa. Nane pporaen'da tse'faei'ccuyi tsu ccusha'fa. 
\s1 Majan tsu avujatssi'fa 
\r (Mt 5.1-12) 
\p  
\v 20 Tsomba Jesús tisema shondosundeccuma camba su: 
\p —Que'i mechondeqquiaja ñoa'me qui avujatssi'fa. Nane Chiga aindeccu qui. 
\p  
\v 21 Que'i qquipoe'sundeccu ñoa'me qui avujatssi'fa. Que'i qui tteppu'faya. 
\p Que'i inasundeccu ñoa'me qui avujatssi'fa. Que'i qui feña'faya. 
\p  
\v 22 Ñajan Sefaccone Ji'cho A'i. Que'i ñame in'jansi cca'indeccu que'i inisema dañoñe afa'ni'qque ñoa'me qui avujatssi'fa. Aindeccu ñane que'ima chi'ga'fa'ni'qque qui avujatssi'fa. Ñane que'ima se'pipa afase'fa'ni'qque qui avujatssi'fa.  
\v 23 Nane tayopisundeccu'qque tise'pa can'jeinte'su Chiga Aya'fama afasundeccuma tsa'caen egae tson'fa. Maqui a'ta tsa'caen que'ima afase'nijan ti'tsse avujatssi'faja. Nane Chiga sefacconi qui osha'cho ñotssiama injantsse an'bian'fa. 
\p  
\v 24 Tsa'ma vana'faya qui que'i osha'choma an'biansundeccu. Que'imbe ñotssiama qui tayo an'bia'an. 
\p  
\v 25 Vana'faya qui que'i amba tteppu'chondeccu. Qquipoe'su'faya qui. 
\p Vana'faya qui que'i ja'ño feñasundeccu. Ñombi'yepa qui i'na'faya. 
\p  
\v 26 Vana'faya qui poiyi'cco a'inga ñotsse afayesundeccu. Nane tayopi'su Chiga Aya'fama afa'su qquen afopoensundeccu afopoensi tise'pa can'jeinte'su aindeccu tise'pama tsa'caen ñotsse afa'fa. 
\s1 Chi'ga'choma ñotsse in'jaña'cho 
\r (Mt 5.38-48; 7.12) 
\p  
\v 27 Tsa'ma que'i ñama pañasundeccunga gi conda: Que'ima egae tsinconsundeccuma ñotsse in'jan'faja. Que'ima chi'gasundeccuma ñotsse tson'faja.  
\v 28 Que'ima afasesundeccuma ñotsse afa'faja. Que'ima dañosundeccune Chigama iñajan'faja cuintsu tise'pama ñotsse tsoñe.  
\v 29 Majan a'i faefa'su tsovejuma tssai'ninda ccafa'su tsovejuma'qque canjaen'faja. Majan a'i que oppoen'cho sarupama itsa'ninda que ondiccu'jema'qque se'pimbe'yi afe'faja.  
\v 30 Majan a'i osha'chove quema iñajan'ninda se'pimbe'yi afe'faja. Majan a'i que an'bian'choma itsa'ninda toequi afeye iñajan'fajama.  
\v 31 Ma'caen cca'i que'ima tsoñe in'jan'da tsa'caen tise'panga'qque tson'faja. 
\p  
\v 32 ¿Tisuma in'jan'chondeccuve'yi ñotsse in'jan'da ti qui ñotsse tson'fa? Nane egae tsinconsundeccu'qque tsa'caen tisupapora ñotsse injancco'fa.  
\v 33 ¿Tisuma ñotsse tsonsundeccuveyi ñotsse tson'da ti qui ñotsse tson'fa? Nane egae tsinconsundeccu'qque tsa'caen tson'fa.  
\v 34 ¿Jai'ngae ccase isuye corifin'dima cca'indeccunga afe'ta ti qui ñotsse tson'fa? Nane egae tsinconsundeccu'qque tsa'caen tisupaporanga afeye atesu'fa jai'ngae ccase isuye.  
\v 35 Tsa'ma que'ija tisuma egae tsonsundeccuma ñotsse in'jan'faja. Tsendeccuma ñotsse tson'faja. Corifin'dima afe'ta ccase isuye in'jambe can'faja. Tsa'caen tson'da qui Ti'tsse'tssia Chiga que'ima in'jansi Tise dushundeccuve dapa ti'tsse ñotsse osha'choma isu'faya. Chiga Quitsaja Tisema chi'gasundeccuma in'jamba mende'ye. Egae tsinconsundeccuma'qque in'jamba mende'ye.  
\v 36 Chiga que'i Quitsa mendeyeqquia'caen que'i'qque cca'indeccuma mende'ye'faja. 
\s1 Egae tsincon'choma ttatta'fajama 
\r (Mt 7.1-5) 
\p  
\v 37 Cca'i egae tsincon'choma ttatta'fambian'da Chiga'qque que'i egae tsincon'choma tta'ttaya'bi. Ni cca'imbe egae tsincon'cho shacane qquen afambian'da Chiga'qque que'i egae tsincon'cho shacane afaya'bi. Cca'indeccu que'ima egae tsincon'ninda tise'pama in'jamba tise'pa egae tsincon'choma aqquepoen'faja. Tsa'caen aqquepoe'ninda Chiga'qque que'ima in'jamba que'i egae tsincon'choma aqquepoeña.  
\v 38 Cca'indeccunga tsu afe'faya'cho. Tsa'caen tso'ninda tsu Chiga'qque que'inga afeya. Agatto'cho tasanga on'boemba pisa'ñacca tssai oyae'ñacca on'batsse on'boenqquiacaen tsu Chigaja que'inga afeya. Nane que'i cca'indeccunga afeye agattoqquia'caen tsu Chiga'qque agattopa que'inga afeya. 
\p  
\v 39 Tsomba Jesús va condase'choma conda: 
\p —¿Bininda ti osha faesu binima angacañe? Me'i, fae'ngae tsu ande changonga amppi'faya.  
\v 40 Shondo'suja tisema atesian'suma ti'tsse'tssimbi tsu. Tsa'ma poi shondo'su osha'choma paña'da ñoa'me tise atesian'sia'caen tsu da'faya. 
\p  
\v 41 ¿Mingapa qui faenga'su tso'fe ccappi'choma atteqquia'caen tise egae tsincon'choma atte'fa? Tsa'ma tisu tso'feni quini'cco eje'choma qui atesu'fambi.  
\v 42 Toya'caen qui su'fa: “Faenga'su, ñajan que tso'fe ccappi'choma somboeña.” Tsa'ma tisu tso'feni quini'cco eje'choma atesumbiqquia'caen qui que'i egae tsincon'choma atesu'fambi. Queja ño'a qquen attiamba ñoa'me afopoen'su qui. O'tie tsu que tso'feni quini'cco eje'choma somboemba ñotsse atteya'cho. Tsomba qui faenga'suma fuitepa tise tso'fe ccappi'choma somboeñe osha. 
\s1 Teta'choma attepa quini'ccoma in'jan 
\r (Mt 7.17-20; 12.34-35) 
\p  
\v 43 Ega teta'choja ñotssia quini'jinga nambi. Ni ñotssia teta'cho'qque ega quini'jinga nambi.  
\v 44 Nane tise teta'choma attepa gi quini'jima atesu'fa. Higuerama pi'sho'fambi gi nojansifanga japa. Ni tsajama gi pi'sho'fambi ancco'singa japa.  
\v 45 Toya'caen ño'a a'ija tise injama'cho'su ñotsse in'jan'chone ñotssiama tsu canjaen. Tsa'ma ega a'ija tise injama'cho'su egae jincho'chone egama tsu canjaen. Nane tisu injama'cho jinchoqquia'caen tsu a'ija afa. 
\s1 Dos tsaone condase'cho 
\r (Mt 7.24-27) 
\p  
\v 46 ¿Micomba qui ñama su'fa: “Na'su, Na'su,” ña manda'choma chig'ga'ta?  
\v 47 Qquen tsu ñanga jipa ña su'choma ñoa'me pañamba canse'cho:  
\v 48 Fae a'i tsu tsaoña'jemba tso'sitsse dya'dyapa fattocconga ta'etsse dyaiña. Tsonsi tsu na'en jipa zonzoe'ma osiañe oshambi tise tsa'oma. Ñotssiave tsao'ñasi ta'etssi tsu.  
\v 49 Tsa'ma majan a'i ña manda'choma pañamba tson'sumbi'ta faesu tsao'ñasia'can tsu. Tsaja sisipandundunga tsao'ñasi na'en jipa tsa'onga zonzoensi junde osui. Osuipa tsa'oja tsangae ja. 
\c 7  
\s1 Capitámbe sema'suma ccushaen'cho 
\r (Mt 8.5-13) 
\p  
\v 1 Jesúsja aindeccuma candusian nanimba Capernaum canqqueni japa ca'ni.  
\v 2 Tse'tti tsu romano sundaro capitán can'jen. Tise in'jan'cho sema'su pajipa paye tson'jen.  
\v 3 Tsa'cansi capitánjan Jesúsne pañamba israe'su nasundeccuma manda moen Jesúsma afaye cuintsu tise'be sema'suma ccushaeñe.  
\v 4-5 Manda moensi Jesúsnga catsepa tsain'bitsse iñajan'fa qquen supa: 
\p —Va a'ija ñoa'me ñotssia tsu. Ingi a'ima ñotsse in'jamba corifin'dima afe ingi Chigane atesian'jen'ttima tsao'ñañe. Ñotssi tsu que tise in'jan'choma tsoñe. 
\p  
\v 6 Tsonsi Jesús tsendeccui'ccu japa capitán tsa'onga pan napiji'ni capitánjan tise amigondeccuma manda moen cuintsu Jesúsma cachui'nga'faye. Tsendeccuja jipa capitán qquen su'choma conda'fa: 
\p —Na'su, ñotssimbi gi que ña tsaoni jiye.  
\v 7 Tsa'camba ñajan cambajunaccu cachuiccoye jambi quema iñajañe. Tsa'ma queja toe'tti ccutsupa mandaja cuintsu ñambe sema'su ccushaye.  
\v 8 Ñajan sundaro a'i. Ña nasundeccuja ñama manda'fa. Ña'qque ñama bove'ccoa sundarondeccuma manda. Fae'ccoma “Jaja” qquen mandasi tiseja ja'je. Faesuma “Jija” qquen mandasi tiseja ji'je. Ña sema'suma “Qquen ñoñaja” qquen mandasi tsa'caen tiseja tson'jen. 
\p  
\v 9 Jesús tsama pañamba sundaro capitáne asi'ttaén ccutsu. Tsomba piyicamba tisei'ccu jacansundeccuma su: 
\p —Tsa a'ija ñoa'me tsu ñame in'jan. Ni fae israe'suyi'qque qquenda ñame in'jan'fambi. 
\p  
\v 10 Tsa'caen susi mandasicondasundeccu toequi capitán tsaoni japa sema'su ccusha'choma atte'fa. 
\s1 Du'shu pa'choma qquendyaen'cho 
\p  
\v 11 Tsomba tse'i Jesúsja Naín canqqueni ja. Tisema shondosundeccu, tsain'bio a'i'qque tisei'ccu fae'ngae jaja'fa.  
\v 12 Canqque sombo'ttinga catsepa a'i bo'fa'choma cachuicco'fa. A'i pasi canqque'ye sombo'fa pa'choma angapa a'tuye. Pa'choja tsandupajen'cho du'shu fae'ccoa tsu.  
\v 13 Na'su Jesús tsandupajen'choma attepa mende'yepa su: 
\p —I'nambe canjan. 
\p  
\v 14 Tsomba Jesús catsepa pa'choma ccuiña'cho asiccoma pporaensi angasundeccuja já ccutsu'fa. Tsonsi Jesúsja pa'choma su: 
\p —Jaricho, ¡qquendyaja! 
\p  
\v 15 Qquen susi pa'choja jangi dyaipa afaye ashaen. Tsonsi Jesús tisema fuite cuintsu tise mamani jaye.  
\v 16 Poiyi'cco a'i tsama attepa ñoa'me dyo'fa. Tsa'ma Chigama ñotsse afapa su'fa: 
\p —Joccapitssia Chiga Aya'fama afa'su tsu inginga attian. 
\p Toya'caen tsu su'fa: 
\p —Chigaja Tise aindeccuma in'jamba fuiteye ji. 
\p  
\v 17 Tsama condasesi poiyi'cco Judea andeni'su a'i'qque paña'fa. Poiyi'cco pporotsse can'jensundeccu'qque tsa'caen Jesúsne paña'fa. 
\s1 Feti'su Juan iñajampañasundeccu 
\r (Mt 11.2-19) 
\p  
\v 18 Juan toya picco'je'cho ettini piccoyepa can'jen'ni tisema shondosundeccu Jesús tson'choma tisenga condase'fa.  
\v 19-20 Condasesi pañamba Juanjan tsendeccu'suma dosve ttu'sepa Na'su Jesúsni maña. Tsendeccu jipa Jesúsma su'fa: 
\p —Feti'su Juan tsu ingima mandamaña quema qquen iñajampañañe: “¿Que ti qui Cristo, jiya'cho qquen su'choja? Tsambi'ta ¿faesuve ti gi ronda'je'faya?” 
\p  
\v 21 Tsendeccu caña'jen'ni Jesúsja tsain'bio pajisundeccuma ccushaen'jen. Nane osha'cho paqque'sui'ccu pajisundeccuma ccushaen. Cocoyama joqquitssiamba binindeccuma'qque bittaen.  
\v 22 Tsa'caen ccushaen'jemba Juanma shondosundeccuma su: 
\p —Japa que'i attepa paña'choma Juanga conda'faja. Binindeccu tsu bitta'fa. Ccutsumbindeccu tsu tsui jacan'fa. Na congomba pajisundeccu tsu giya'tsse ccushapa ja'fa. Tsosinambindeccu tsu paña'fa. Nane panjin ccui'chondeccu tsu ccase qquendya'fa. Va'chandeccu'qque tsu Chiga a'ima ccushaeña'chone ñotsse condase'choma paña'fa.  
\v 23 Majan ñame in'jamba ansangembi'ta ñoa'me tsu avujatssi'faya. 
\p  
\v 24 Juan mandasi iñajampañasundeccu jasi Jesúsja aindeccunga Juane qquen condase: 
\p —Que'ija a'i menia ja'ta ¿jongoesuma atteye qui ja'fa? ¿Fingian canttini'ccoma oyaen'jen'choma cañe ti qui ja'fa?  
\v 25 Tsambi'ta ¿jongoesuma atteye qui ja'fa? ¿A'i ñotssia sarupama ondiccucho'choma cañe ti qui ja'fa? Me'i, ñotssiama ondiccucho'chondeccuja na'su tsaoni can'jemba tsa'caen ñotsse canse'fa.  
\v 26 Tsa'ma ¿jongoesuma atteye qui ja'fa? ¿Chiga Aya'fama afa'suma atteye ti qui ja'fa? Ju, tsane qui japa atte'fa. Nane Juanjan Chiga Aya'fa afa'suma ti'tsse'tssia tsu.  
\v 27 Tisene tsu Chiga Aya'faja su: 
\q1 Que canjan. Quema o'tie gi ñane afa'suma manda moeña. 
\q1 Tise tsu o'tie japa que ji'je'choma ñoñañe. 
\m  
\v 28 Va andeni faesu a'i Feti'su Juanma ti'tsse'tssia've me'i'on tsu. Tsa'ma Chiga aindeccuve da'fasi ñoa'me utu'ccoa tsu Juanma ti'tsse'tssiya. 
\p  
\v 29 Jesúsma pañamba poiyi'cco a'i, nane govierno impuestoma isusundeccu'qque, “Chigaja ño'a” qquen tsu su'fa. Tsendeccuja tayoe Juanga fetiyepa can'jen'fa.  
\v 30 Tsa'ma fariseondeccu, Chiga manda'choma atesu'chondeccu'qque Juanga fetiyembipa Chiga tsa'caen tise'pama ccushaeña'choma chi'ga'fa.  
\v 31 Tsonsi Na'su Jesúsja su: 
\p —¿Jongoesui'ccu gi ja'ño'su aindeccui'ccu fae'ngae canjaeña cuintsu que'i ñotsse in'jan'faye? ¿Jongoesia'caen tsu tson'fa?  
\v 32 Ñoa'me dushundeccu chavaen'jen'tti'su atandunduni dyaipa fae'ngae co'fe'fambiqquia'caen tsu ja'ño'su aindeccuja fae'ngae in'jan'fambi. Nane dushundeccuja tisupaporai'ccu fundocco'fa: “Casara'chove co'feqquia'caen fendo'jesi qui boira'fambi. Pa'choma a'tuqquia'caen ñombi'ye cofe'jesi qui i'na'fambi.”  
\v 33 Feti'su Juan jipa aña'choma ambipa asettu. Tse'tse'pama'qque cu'imbi. Tsa'cansi que'ija su'fa: “Tsaja cocoya ca'ni'cho.”  
\v 34 Ja'ño ñajan Sefaccone Ji'cho A'i jipa gi osha'choma amba cu'i. Tsa'ma que'ija su'fa: “Va a'ija ñoa'me panshaen an'jemba tse'tse'pa singo tsu. Egae tsinconsundeccu, govierno impuestoma isusundeccu'qque tisei'ccu fae'ngae jacan'fa.”  
\v 35 Qquen qui su'fa. Tsa'ma tsaveqque'su tsu. Chiga dushundeccuja Chiga tansintsse in'jan'choma canjaen'fa. 
\s1 Jesús fariseo tsaoni japa an'cho 
\p  
\v 36 Tsonsi fa'e fariseo a'i Jesúsma ttu'se cuintsu tise tsaoni jipa añe. Jesúsja tseni japa cca'indeccui'ccu mesa jin'tti piyive ccui.  
\v 37 Tsa'caen ccuipa an'jen'ni pushesuja Jesús fariseo tsaoni can'jen'choma pañamba jipa ca'ni. Tsa pushesuja egae tsincon'su. Patuma ñoña'cho botiyanga ñome'bama ipa Jesús tsutteccofanga ccutsupa i'na.  
\v 38 I'namba tise inanzaccui'ccu Jesús tsu'ttema tssipoemba cashi. Tsomba tise tosei'ccu Jesús tsu'ttema ccucha. Ccuchapa tsu'ttema mochapa ñome'bai'ccu onjoen.  
\v 39 Pushesu tsa'caen tsonsi Jesúsma ttuse'su fariseoja attepa tisu injama'choni asi'ttaen: “Va a'ija ñoa'me Chiga Aya'fa afa'suta tsu tisema pporaen'su pushesuma atesuya. Nane pushesu ma'caen egae tsincon'choma tsu atesuya.”  
\v 40 Tsonsi Jesúsja fariseo in'jan'choma in'jamba su: 
\p —Simón, ñajan quenga condaye in'jan. 
\p Simónjan su: 
\p —Atesian'su, ¿jongoesuma qui condaye in'jan? 
\p Tsonsi Jesúsja tisema su: 
\p  
\v 41 —Na'su tsu dos a'inga shacaen. Fae a'i shacaja quiniento corifin'di. Faesu shacaja cincuenta corifin'di.  
\v 42 Tsendeccu afepoeñe osha'fambisi na'suja poimbe shacama fi'tti. ¿Majan tsa dos a'i'su tsu na'suma ti'tsse in'jaña? 
\p  
\v 43 Simónjan su: 
\p —Jm jḿ. ¿Tsa ti'tsse shacaen'sumbi ti? 
\p Tsonsi Jesús tisema su: 
\p —Ñotsse qui in'jamba su. 
\p  
\v 44 Tsomba piyicamba pushesuma canjaemba Simónma su: 
\p —Va pushesuma canjan. Ña que tsa'onga ca'nisi queja tsa'ccuma afembi ña tsu'ttema cashiye. Tsa'ma va pushesuja tise inanzaccui'ccu ña tsu'ttema tssipoemba cashipa tise tosei'ccu ccucha.  
\v 45 Queja ñama mochapa chigambiambi. Tsa'ma ña tseyi ca'nisi tiseja ánttembe'yi ña tsu'ttema mocha'je.  
\v 46 Que ña tsovema yayapoembisi tiseja ña tsu'ttema ñome'bai'ccu onjoen.  
\v 47 Tsa'cansi gi quema su: Tsa pushesuja tsain'bitsse egae tsincon'chopa pa'ccoma joqquitssiangepa ñame ñotsse in'jan. Tsa'ma majan a'i re'riccoe egae tsincon qquen in'jamba re'riccoe joqquitssiangepa aqquia re'riccoe ñame in'jan. 
\p  
\v 48 Tsomba Jesús pushesuma su: 
\p —Que egae tsincon'choja tayo joqquitssi. 
\p  
\v 49 Qquen susi cca'indeccu fae'ngae Jesúsi'ccu ansundeccuja qquen condasecco'fa: 
\p —¿Majan gi qquen te tiseja in'jan, tsa'caen egae tsincon'choma joqquitssiañe'jan? 
\p  
\v 50 Tsonsi Jesús pushesuma su: 
\p —Opatsse canseja. Ñame in'jamba qui ccusha. 
\c 8  
\s1 Pushesundeccu Jesúsma fuite'cho 
\p  
\v 1 Can'jenccapa Jesúsja faesu canqqueni, faesu a'i can'jen'ttinga japa ma'caen Chiga aindeccuve dapa canseya'chone condasepa candusian'jen. Tisema doce shondosundeccu'qque fae'ngae jacan'fa.  
\v 2 Toya'caen majan pushesundeccu'qque Jesús tise'pama ccushaensi fae'ngae jacan'fa. Majan tsendeccu'suta cocoya can'jensi joqquitssian'cho; majanda pajisi ccushaen'chondeccu. Fa'eja, María Magdalena, tsu siete cocoyave joqquitssian'cho.  
\v 3 Faesuja Juana. Tise tsa'nduja, Choza, tsu ande na'su Herodes tsa'o na'su. Toya'caen Susana, cca'indeccu'qque fae'ngae jacan'fa. Tise'pa an'bian'choi'ccu, tise'pa corifin'di'ccu Jesúsma, tisema shondosundeccuma'qque fuitepa osha'chove ñoña'fa. 
\s1 Gaiña jon'sune condase'cho 
\r (Mt 13.1-9; Mr 4.1-9) 
\p  
\v 4 Poiyi'cco A'i canqquene fae'ngae Jesúsnga bo'fasi tiseja qquen condase'choi'ccu atesian'jen: 
\p  
\v 5 —Jon'suja gaiña jon'su ja. Gaiñasi enttingeja tsaiqui utufanga sheque. A'i tsanga tsuisi chhiriria'qque jipa an'fa.  
\v 6 Enttingeja patupa andenga sheque. Sho'yopa pandipa samba, tsa'ccu me'i'onsi.  
\v 7 Enttingeja anccosiccunga sheque. Tsa'ma anccosi fae'ngae coensi ñotsse jon'cho nambe'yi pa.  
\v 8 Faesu enttingeja ñotssia andenga shequepa sho'yopa ñotsse na'fa. Fae cho tsu cieme atapa'fa. 
\p Jesúsja tsa'caen atesiamba fundopa afa: 
\p —Majan tsosinapaja paña'faja. 
\s1 Jesús condase'cho condaye in'jan'cho 
\r (Mt 13.10-17; Mr 4.10-12) 
\p  
\v 9 Jesúsma shondosundeccu condase'cho in'jan'chone tisema iñajampañasi  
\v 10 Jesúsja qquen su: 
\p —Tayoe ma'caen Chiga aindeccuve dapa canse'faya'chone Chigaja condambi. Tsa'ma ja'ño que'inga pañaeñe in'jan. Cca'indeccungaja aqquia condase'choi'ccu condaseya'cho cuintsu atte'ma atesu'fambiye; cuintsu paña'ma in'jan'fambiye. 
\s1 Gaiña jon'sune ma'caen in'jan'cho 
\r (Mt 13.18-23; Mr 4.13-20) 
\p  
\v 11 Condase'cho tsu qquen: Choja Chiga Aya'fa tsu.  
\v 12 Majan a'ija tsaiquinga sheque'choacan'fa tsu. Chiga Aya'fama pañasi cocoya na'su junde jipa choma itsaqquia'caen tise'pa paña'choma aqquepoen tise'pa in'jamba ccushasa'ne.  
\v 13 Majan a'ija patupa andenga sheque'choacan'fa tsu. Tseyi Chiga Aya'fama pañamba avujatsse in'jan'fa. Tsa'ma setsa'fa shacaqquia'caen injama'cho ta'etssimbi. Re'riccone in'jamba me'detsse canse'ta antte'fa.  
\v 14 Cca'ija cho anccosiccunga sheque'choacan'fa tsu. Tsendeccuja Chiga Aya'fama pañamba panshaen va ande'su jincho'choma in'jan'fa. Ricove daye in'jan'fa. In'jangae canseye in'jan'fa. Tsa'caen in'jamba Chiga Aya'fama paña'choma fi'ttiqquia'caen tise in'jan'choma nañámbi.  
\v 15 Tsa'ma majan a'ija ñotssia andenga jon'choa'caen Chiga Aya'fama pañamba injama'choi'ccu aqque'pambi'tsse in'jan'fa. Tise'pa injama'choja ñotssisi tsa'caen anttembe'yi ñotsse naqquia'caen canse'fa. 
\s1 Tuñoma setsaen'chone condase'cho 
\r (Mr 4.21-25) 
\p  
\v 16 A'ija tuñoma setsaemba ombanga apima puviaña'bi. Ni anambacco tsosiccunga tuñoma ccutsiaña'bi. Tsa'ma setsaemba sefani ancaeña'cho cuintsu poiyi'cco a'i cuartonga ca'ni'da ñotsse atte'faye.  
\v 17 Tsa'cansi tsangae a'tuya'choja jinchombi. Tsa'ma osha'cho jai'ngae attiansi qui atte'faya. Ni tsangae condayembitsse pasaye'ta jinchombi. Jai'ngae condasesi qui a'tatsse paña'faya.  
\v 18 Tsonsi ñotsse pañamba in'jan'faja. Majan tayo in'jan'chota ti'tsse tsu in'jan'faya. Tsa'ma majan in'jambi'choa'ta tise injanga in'jan'choma'qque tsu qqueñaña. 
\s1 Jesús antian bo'fa'cho 
\r (Mt 12.46-50; Mr 3.31-35) 
\p  
\v 19 Tsonsi Jesús chan, tise quinshingendeccu'qque can'su ji'fa. Tsa'ma tsain'bio a'i shequesi tisenga catseye osha'fambi.  
\v 20 Tsa'caen osha'fambisi cca'ija Jesúsma conda'fa: 
\p —Que mama, que quinshingendeccu'qque tsu tsotefani ccutsu'fa quema atteye in'jamba. 
\p  
\v 21 Tsama pañamba Jesúsja su: 
\p —Poiyi'cco majan Chiga Aya'fama pañamba tsa'caen tson'da ñoa'me ña mama, ña quinshingendeqquia'can'fa tsu. 
\s1 Jesús fingian, shave'pama iyu'u'cho 
\r (Mt 8.23-27; Mr 4.35-41) 
\p  
\v 22 Fae a'ta Jesús, tisema shondosundeccu'qque shavonga otse'fa. Jesúsja tise'pama su: 
\p —Jinge mar jonifani ise'faye. 
\p Tsa'caen susi ja'fa.  
\v 23 Fingian shavoma angajisi Jesúsja ana. Fingian ti'tsse quia'me fingiansi tsa'ccu shavonga ca'nisi a'ija cu'nosa'ne dyo'fa.  
\v 24 Dyopa Jesúsma qquendyaemba su'fa: 
\p —Na'su, Na'su cu'nomba gi paye tson'jen'fa. 
\p Tsonsi Jesúsja qquendyapa fingiama iyu'usi pasa. Rande shave'pama'qque iyu'usi ppimppianccuve da.  
\v 25 Tsomba Jesúsja su: 
\p —¿Mingapa qui ñame in'jan'fambi? 
\p Tise'paja dyopa Jesúsma can'boemba qquen condasecco'fa: 
\p —¿Majan tsu va a'ija? Tise mandasi fingian, shave'pa'qque tisema paña'fa. 
\s1 Gadara ande'su cocoya ca'ni'cho 
\r (Mt 8.28-34; Mr 5.1-20) 
\p  
\v 26 Tsomba Galilea ande isevetsse ccattufa'fa Gadara andeni.  
\v 27 Jesús shavo'ye sombosi fa'e tsa ande'su a'i tisema cachuiye ji. Táyoyi cocoyaja tisenga ca'nisi chu'cco jacamba tsaoni can'jembipa ayandeccu atú'ttini can'jen.  
\v 28-29 Jesúsma attepa fundopa Jesús tsutteccofanga ccarupa dyai. Nane tsain'bitssi cocoya tsa a'inga ca'nisi canqquesundeccuja tisema coiraye candena yoshavai'ccu tandamba an'bian'fa. Tsa'ma cocoya ca'ni'choja candenama oppattu catisi cocoya tisema anga a'i menia. Jesúsja tsa a'i'ye joqquitssiye cocoyama mandasi a'ija quia'me fundopa su: 
\p —Joccapitssia Chigambe Dutssi'ye qui, Jesús. ¿Jongoesie qui ñani ji? Chigáne ñama noñangianjama. 
\p  
\v 30 Tsonsi Jesúsja cocoyama iñajampaña: 
\p —¿Jongoesu inise qui? 
\p Tiseja su: 
\p —Legión (Injantssia Sundarondeccu) gi. 
\p Tsain'bitssi cocoya ca'ni'chopa tsu tsa'caen su.  
\v 31 Qquen supa cocoyandeccuja Jesúsma iñajan'fa cocoya can'jeni tise'pama moembe cañe.  
\v 32 Tse'tti ccotta'cco piyiccu'fani tsain'bitssi cochi an sheque'fasi cocoyandeccuja Jesúsma iñajan'fa cuintsu cochinga tise'pama mandaye. Iñajansi Jesús tsa'caen anttesi  
\v 33 cocoyandeccuja a'i'ye sombopa cochinga ca'ni'fa. Ca'nisi cochi sheque'cho sumbie dapa fattoccóccufanga butto amppi'fa marnga. Tsomba andeccopa pa'fa. 
\p  
\v 34 Cochima coirasundeccu cochi sumbie da'choma attepa buttoccoin ja'fa canqqueni. Tse'tti can'jensundeccu, biacca can'jensundeccunga'qque conda'fasi  
\v 35 aindeccuja ma'caen da'choma can'su ja'fa. Jesúsni jipa cocoya ca'ni'cho a'i ccusha'choma atte'fa. Tiseja ondiccupa ñotsse in'jamba Jesús tsu'tte jin'ttinga dyai. Tisema attepa poiyi'cco a'i dyo'fa.  
\v 36 Dyo'fasi tseni can'jensundeccu cocoya ca'ni'cho ma'caen ccusha'choma attepa poiyi'cco a'inga conda'fa.  
\v 37 Tsa'caen condasesi poiyi'cco tsa Gadara andesundeccu ñoa'me dyopa Jesúsma iñajan'fa cuintsu tise'pa ande'ye sombopa ccani jaye. Tsonsi Jesúsja shavonga otsepa toequi shanda.  
\v 38 Tayoe cocoya ca'ni'cho a'i ccusha'choja Jesúsma iñajan fae'ngae jaye. Tsa'ma Jesúsja tisema mandamaña qquen supa: 
\p  
\v 39 —Que tsaoni toequi shandapa poiyi'cconga condaseja ma'caen Chiga quema mende'yepa tson'choma. 
\p Tsa'caen mandasi tiseja japa poiyi'cco tsa canqquesundeccunga conda ma'caen Jesús tisema ccushaen'choma. 
\s1 Jesús Jairo onque'ngema ccushaen 
\s2 Ondiccu'jema pporaemba ccusha'cho 
\r (Mt 9.18-26; Mr 5.21-43) 
\p  
\v 40 Jesús Galilea andeni toequi shandasi a'i bopa tise've rondasundeccu avujatsse tisema chigambian'fa.  
\v 41 Tson'jen'ni Chigane atesian'jen'tti'su na'su, Jairo, jipa Jesús tsutteccofanga ccaru dyaipa Jesúsma iñajan cuintsu tise tsaoni jaye.  
\v 42 Tseni tise onque'nge fae'ccoa pajipa ccuipa paye tson'jen. Tsaja doce canqque'fave an'bian'cho. 
\p Jesús Jairoi'ccu jayisi tsain'bio a'i fae'ngae jayipa ñoa'me ta'yotssi.  
\v 43 Tsendeccu enttinge'ye pushesu'qque jayi. Tsa pushesuja tise egápai'ccu dañongepa doce canqque'fa me'detsse canse. Ccushambe'yi pa'cco tise corifin'dima afepoen cati sejesundeccunga.  
\v 44 Tsaja sepaccofae Jesúsnga catsepa tise ondiccu'je utufama pporaen. Pporaensi tse'faei'ccuyi tise egápaja samba. 
\p  
\v 45 Tsa'caen tsonsi Jesúsja iñajampaña: 
\p —¿Majan tsu ñama pporaen? 
\p Tsa'ma poiyi'cco a'i pporaembi qquen su'fa. Poiyi'cco tsa'caen su'fasi Pedroja su: 
\p —Na'su, vui'o a'imbipa shoquendipa ppororaensi, ¿ma'caen qui su: “¿Majan tsu ñama pporaen?”? 
\p  
\v 46 Tsa'ma Jesúsja su: 
\p —Fae'cco ñama pporaemba ccusha. Tayo gi in'jan ña ccushaen'jen'cho ña'ñe somboqquia'caen a'ima ccushaen. 
\p  
\v 47 Tsonsi pushesuja Jesús tayo atesu qquen in'jamba ttun'dundu'je japa Jesúsnga catsepa tise tsutteccofanga ccaru dyai. Tsomba poiyi'cconga condase tise injama'choni in'jamba Jesúsma pporaemba tse'faei'ccuyi ccusha'choma.  
\v 48 Tsonsi Jesúsja tisema su: 
\p —Shim'ppi, ñame in'jamba qui ccusha. Opatsse canseja. 
\p  
\v 49 Jesús toya pushesui'ccu condase'je'ni faesu a'i na'su Jairo tsaone jipa Jairoma su: 
\p —Tayo tsu que onque'ngeja pa'ya. Ti'tsse atesian'suma noñangiambe ántteja. 
\p  
\v 50 Tsama pañamba Jesúsja Jairoma su: 
\p —Dyombe canjan. Que ñame in'jan'ninda tsu que onque'ngeja ccushaya. 
\p  
\v 51 Tsaoni napipa Jesúsja se'pi poiyi'cco a'i tisei'ccu ca'niñe. Tsa'ma Pedro, Santiago, Juan, du'shumbe yaya, du'shumbe mamama'qque angapa tsa'onga ca'ni'fa.  
\v 52 Poiyi'cco tsaonisundeccu qquejeccopa ina'jen'fasi Jesúsja su: 
\p —Ina'fajama. Du'shuja pambi'tsse'yi ana'jen. 
\p  
\v 53 Tsa'ma tayo ñoa'me pa'chosi in'jamba Jesúsma feña'fa.  
\v 54 Tsonsi Jesús du'shu tive'ye indipa tisema qquendyaeñe ttu'se: 
\p —Du'shu, jangija. 
\p  
\v 55 Qquen susi tise qquendya'pa toequi jisi tse'faei'ccuyi du'shuja jangi. Tsonsi Jesúsja manda cuintsu du'shuma o'fiañe.  
\v 56 Du'shumbe yaya, du'shumbe mama'qque can'boen ccutsu'fa. Tsa'ma Jesúsja tise'pama manda cuintsu cca'indeccunga condambe can'faye. 
\c 9  
\s1 Candusiañe manda'cho 
\r (Mt 10.5-15; Mr 6.7-13) 
\p  
\v 1 Jesús tisema doce shondosundeccuma ttu'se boñamba tise'pama in'jaemba manda osha'cho cocoyama joqquitssiañe, pajisundeccuma ccushaen'faye.  
\v 2 Tsomba tise'pama mandamaña cuintsu japa ma'caen Chiga aindeccuve dapa canseya'chone candusiamba pajisundeccuma'qque ccushaen'faye.  
\v 3 Tise'pama su: 
\p —Me'ccoyi jaja'faja. Ni jacan'cho accuicco'cho, ni o'va, ni anqque'su, ni corifin'di, ni faesu ondiccu'jema anga'fajama.  
\v 4 Majan tsa'onga ca'ni'da tse'ttiniñi can'jen'faja canqqueni sombopa jaya'ngae.  
\v 5 Ma'tti pañañe in'jan'fambisi tse'ttie sombo'ta tsu'ttenga ancamba totopa'ma fanttundu'faja tise'pa egae tson'choma canjaeñe. 
\p  
\v 6 Tsonsi tsendeccuja sombopa cca'tti cca'tti poi canqquenga japa Chiga ñotsse condase'choma candusian'fa. Mani ja'a'qque pajisundeccuma ccushaen'fa. 
\s1 Na'su Herodes feti'su Juanma fi'tti 
\r (Mt 14.1-12; Mr 6.14-29) 
\p  
\v 7 Ande na'su Herodes osha'cho Jesús tson'choma pañamba injama'choni dyo. Majan a'ija “Feti'su Juan'ñe ccase qquendya” qquen tsu in'jan'fa.  
\v 8 Cca'indeccuja: “Tayopi'su Chiga Aya'fama afa'su Elías tsu attian” qquen tsu in'jan'fa. Toya'caen: “Tayopi'su Chiga Aya'fama afa'su ccase qquendya,”  
\v 9 Tsa'ma Herodesja su: 
\p —Tayo gi Juan tsovema chattuye mandasi tsu fi'tti. Tsa'ma ¿majan tsu va ña osha'chone paña'jen'cho? 
\p Qquen asi'ttaemba dyopa Jesúsma atteye in'jan. 
\s1 Jesús cinco mil a'ima o'fian'cho 
\r (Mt 14.13-21; Mr 6.30-44; Jn 6.1-14) 
\p  
\v 10 Jesúsne afasundeccu candusiañe japa toequi jipa tise'pa osha'cho tson'choma Jesúsnga condase'fa. Tsonsi Jesúsja tise'pama ccani anga. Betsaida canqque pporotsse japa can'jen'fa.  
\v 11 Tsa'ma a'i bo'fa'choja Jesús mani ja'choma pañamba omboe jaja'fa. Tsonsi Jesúsja tise'pama avujatsse chigambiamba ti'tsse ma'caen Chiga aindeccuve dapa canseya'chone candusian. Pajisundeccuma'qque Jesúsja ccushaen. 
\p  
\v 12 Tayo chiga ondusesi tsa doce Jesúsne afasundeccu tisenga jipa su'fa: 
\p —Aindeccu bo'fa'choma mandamañajan cuintsu canqqueni, cca'tti'su tsaoni'qque japa amba ana'faye. Nane vanijan a'i menia gi can'jen'fa. 
\p  
\v 13 Tsa'ma Jesúsja tise'pama su: 
\p —Que'i tise'pama o'fian'faja. 
\p Tsa'ma su'fa: 
\p —Nane cinco panmeñi dos avuveyi gi an'bian'fa. ¿Queta ti qui in'jan ingi japa anqque'suma chavapa poiyi'cco vandeccuma o'fiañe? 
\p  
\v 14 Nane tsandiendeccuyi tsu cinco milca'on can'jen'fa. Tsa'ma Jesúsja tisema shondosundeccuma su: 
\p —Aindeccuma manda'faja cuintsu cca'tti cincuenta cca'tti cincuenta bopa dyai'faye. 
\p  
\v 15 Tsa'caen mandasi a'i dyai'fasi  
\v 16 Jesúsja tsa cinco pan, dos avuma isupa Chiga sefacconima asuccocan. Asuccocamba Chiga tsu ñotssia qquen afapa pan, avuma'qque doñamba tisema shondosundeccunga afe cuintsu aindeccunga attufaen'faye.  
\v 17 Tsonsi poiyi'cco a'i amba tteppu'fa. Jesúsma shondosundeccuja pan, avu antteye'cho sheque'pama taipa doce saparove on'boen'fa. 
\s1 Pedro Jesúsja Cristo qquen conda'cho 
\r (Mt 16.13-19; Mr 8.27-29) 
\p  
\v 18 Fae a'ta Jesús tisema shondosundeccui'ccu tisuyi Chigama iñajan'jen. Tsomba Jesúsja tise'pama iñajampaña: 
\p —¿Majan qquen tsu ñamajan faesu a'ita su'fa? 
\p  
\v 19 Tise'paja su'fa: 
\p —Majanda tsu su'fa: “Feti'su Juan.” Cca'ija: “Tayopi'su Elías.” Cca'ija: “Tayopi'su Chiga Aya'fama afa'su ccase qquendya'cho.” 
\p  
\v 20 Tsonsi Jesúsja tise'pama iñajampaña: 
\p —Tsa'ma que'ija, ¿majan qquen qui ñamajan su'fa? 
\p Tsonsi Pedroja su: 
\p —Queja Chiga in'jan'cho Cristo qui. 
\s1 Jesús tisu paya'chone conda'cho 
\r (Mt 16.20-28; Mr 8.30–9.1) 
\p  
\v 21 Qquen susi Jesúsja tise'pama quia'me manda cuintsu majangayi'qque condambe can'faye.  
\v 22 Qquen tsu su: 
\p —Sefaccone Ji'cho A'i gi osha'choi'ccu vanaña. Ingi ande'su coenzandeccu, Chigama afa'su nasundeccu, Chiga Aya'fama atesiansundeccu'qque ñama chi'ga'faya. Ñama fi'ttisi papa gi tres a'tangae ccase qquendyaya. 
\p  
\v 23 Toya'caen Jesúsja poiyi'cco a'ima su: 
\p —Majan a'i ñai'ccu fae'ngae jiye in'jan'chota, tisu in'jan'choma tsu catiya'cho. Tisu avuja'ccoma opiqquia'caen tsu tiseja poi a'ta ña'caen paya'ngae vanaña'cho. Toya'caen ñai'ccu fae'ngae jacaña'cho.  
\v 24 Majan a'i tisuma ccushaeñe in'jan'da tsu papa catiyeya. Tsa'ma majan ñame in'jamba pa'ta ñoa'me tsu ccushaya.  
\v 25 A'i poiyi'ccoma patsupa osha'choma an'biamba toya'caen tisuma qqueña'ninda, ¿jongoesune tsu bareya?  
\v 26 Majan a'ija ñane, ña aya'fane'qque ansange'fa. Tsa'ma ña, Sefaccone Ji'cho A'i gi ccase jipa ccane'qque tise'pane ansangeya. Ña joccapitssia've dapa attiansi Chiga ña Quitsaja ñama ñotssiave canjaeña. Sefacconi'su ñotssia Chigama shondosundeccu'qque ñama ñotssiave canjaen'faya.  
\v 27 Jai'ngae tsu tsa'caen tsoña'cho. Tsa'ma majan que'i'su toya pambi'te qui Chiga aindeccuve daya'choma atte'faya. 
\s1 Jesús ccaningae da'cho 
\r (Mt 17.1-8; Mr 9.2-8) 
\p  
\v 28 Tsa'caen supa ocho a'ta'caen pasasi Jesúsja Pedro, Juan, Santiagoma'qque anga ccotta'cconi Chigama iñajañe.  
\v 29 Jesús Chigama iñajansi tsu tise cambajuja ccaningae da. Tise ondiccu'je'qque chhariccotssia totoave da.  
\v 30-31 Dos a'i'qque a'tatssia've attiamba Jesúsi'ccu condase'je'fa. Tsendeccuja tayopi'su Moisés, tayopi'su Elías'qque. Jesús Jerusaléni japa paya'chone tsu condase'je'fa.  
\v 32 Pedro, tisei'ccu fae'ngae can'jensundeccu'qque anae'supa anae'su'je'ttie qquendyapa Jesús ñotssia a'tatssia've da'choma atte'fa. Jesúsi'ccu fae'ngae ccutsusundeccuma'qque atte'fa.  
\v 33 Tsendeccu Jesúsma chigambiamba jaye tson'jensi Pedroja Jesúsma su: 
\p —Na'su, ñotssi tsu ingi va'tti can'jeñe. Jinge tres tsao'cho'ccoe tsao'ña'faye –fae'cco quembe, faesuja Moisésmbe, faesuja Elíasmbe. 
\p Pedroja tisu su'choma atesumbi'ma injanga afa.  
\v 34 Tsa'caen susi ccuttopa'si tise'pama picco. Tsa'caen piccosi Jesúsma shondosundeccuja dyo'fa.  
\v 35 Ccuttopa'si'ye aya'faja qquen afa: 
\p —Vaja ña in'jan'cho Dutssi'ye tsu. Tisema paña'faja. 
\p  
\v 36 Aya'fa qquen afa'nijan Jesúsja tisuyi ccutsu. Shondosundeccuja tsama atte'ma condambi'tsse can'jen'fa. Nane Jesús toya can'jeinte cca'indeccunga tsama conda'fambi. 
\s1 Shanccopajasheve da'cho du'shu 
\r (Mt 17.14-21; Mr 9.14-19) 
\p  
\v 37 Ccaqui a'ta ccotta'cco'ye andesi tsain'bio a'i tisema cachui'cco'fa.  
\v 38 Fa'e tse'tti can'jen'choja fundondo'e afa: 
\p —Atesian'su, chigáne ña du'shuma mende'yeja. Ña dutssi'yeja fae'ccoa tsu.  
\v 39 Cocoya tisema indi'nijan tse'faei'ccuyi fundopa cunshomboen dapa aya'fa'ye ttottomboemba pa'je. Cocoyaja anttembe'yi tisema ma'dyisi si'ma'en da.  
\v 40 Tsama somboeñe quema shondosundeccuma iñajansi tise'paja osha'fambi. 
\p  
\v 41 Tsa'caen susi Jesúsja su: 
\p —Que'i ja'ño'su aindeccuja itoyetsse in'jamba Chigave in'jambindeqquia qui. ¿Min'ge'e gi tsuin'da quei'ccu can'jemba angacaña? I'ngaja que dutssi'yema. 
\p  
\v 42 Du'shu jiñasi cocoyaja tisema mandyi indi pan'jaen. Tsa'ma Jesúsja cocoyama iyu'upa du'shuma ccushaemba tise yayanga afe.  
\v 43 Tsa'caen ccushaensi poiyi'cco a'i can'boemba in'jan'fa Chigaja ti'tsse'tssia've. 
\s1 Jesús tisu paya'chone ccase conda 
\r (Mt 17.22-23; Mr 9.30-32) 
\p Aindeccu toya tsa'caen Jesús tson'choma camboen'jen'fa'ni Jesúsja tisema shondosundeccuma su: 
\p  
\v 44 —Va condase'choma ñotsse pañamba in'jan'faja: Ñajan Sefaccone Ji'cho A'i. Tsa'ma ñama indipa a'inga afe'faya cuintsu fi'tti'faye. 
\p  
\v 45 Jesús tsa'caen tisune condasesi paña'ma atesu'fambi. Nane ccaningae in'jamba ñoa'me su'choma atesuye osha'fambi. Toya'caen dyojopa tise su'chone Jesúsma iñajampaña'fambi. 
\s1 ¿Majan tsu ti'tsse joccapitssia? 
\r (Mt 18.1-5; Mr 9.33-37) 
\p  
\v 46 Tsomba Jesúsma shondosundeccu tisupaporai'ccu majan tsu ti'tsse'tssia qquen afacco'fa.  
\v 47 Tsa'ma Jesús tise'pa injama'cho in'jan'choma in'jamba du'shuma ipa tisu'ttinga ccutsiamba  
\v 48 su: 
\p —Majan ña a'ive dapa va du'shuma ñoa'me in'jan'da tsu ñama'qque ñoa'me in'jan. Majan ñama ñoa'me in'jan'da tsu ñama moen'su Chigama'qque ñoa'me in'jan. Majan que'i'su utu'ccoa'ta tsaja ñoa'me ti'tsse'tssia tsu. 
\s1 Majan chi'gambi'ta fuite'su tsu 
\r (Mr 9.38-40) 
\p  
\v 49 Juanjan pañamba su: 
\p —Na'su, atte'fa gi a'i'ma que inisema afapa cocoyama joqquitssian'jen'choma. Tsa'ma tise ingi'ccu fae'ngae jacambisi gi tisema se'pi'fa. 
\p  
\v 50 Tsa'ma Jesúsja su: 
\p —Tisema se'pi'fajama. Majan que'ima chi'gambi'ta que'ima fuite'su tsu. 
\s1 Jesús Santiago, Juanma iyu'u'cho 
\p  
\v 51-52 Tisu papa sefacconi jaya'cho pan napijisi Jesúsja tansintsse Jerusaléni jaye ashaen. Tisema o'tie a'ima moensi japa Samaria ande'su canqqueni ca'ni'fa tsa'ove afaye.  
\v 53 Tsa'ma Samariasundeccuja Jesús Jerusaléni jayi qquen pañamba se'pipa tsa'oma afe'fambi.  
\v 54 Tsonsi Jesúsma shondosundeccu, tsa Santiago, Juan'qque pañamba iyicca'yepa su'fa: 
\p —Na'su, ¿in'jan ti qui ingi Elías'caen Chigama iñajañe cuintsu si'nge sefaccone amppipa va samariasundeccuma oque catiye? 
\p  
\v 55 Tsa'ma Jesúsja piyicamba tise'pama iyu'upa su: 
\p —¿Atesu'fambi ti qui que'inga ca'ni'cho Qquendya'pama?  
\v 56 Sefaccone Ji'cho A'i gi jimbi a'ima fitti'ttiye. Tsa'ma a'ima ccushaeñe gi ji. 
\p Qquen supa faesu canqqueni ja'fa. 
\s1 Jesúsi'ccu fae'ngae jacansundeccu 
\r (Mr 8.19-22) 
\p  
\v 57 Tsaiqui'ye jayisi a'ija Jesúsma su: 
\p —Na'su, mani que ja'ni'qque ña'qque fae'ngae jaya. 
\p  
\v 58 Jesúsja tisema su: 
\p —Quiyata tsu tise'pa ana'jen'cho changove an'bian'fa. Chhiriria'qque tise'pa tsao'pave an'bian'fa. Tsa'ma Sefaccone Ji'cho A'i gi mani japa anaña'chove an'biambi. 
\p  
\v 59 Cca'ima Jesús qquen su: 
\p —Ñai'ccu fae'ngae jija. 
\p Tsa'ma tsa a'ija su: 
\p —Na'su, shondo'jeja. Ña yaya pasi a'tupa gi quei'ccu jaya. 
\p  
\v 60 Tsa'ma Jesúsja tisema su: 
\p —Antteja cuintsu ñame in'jambindeqquia tsa'caen vasepa pa'chondeccuma a'tuye. Tsa'ma queja ñame in'jamba japa ma'caen Chiga aindeccuve dapa canseya'chone condaseja. 
\p  
\v 61 Faesu a'ija su: 
\p —Na'su, ña gi quei'ccu fae'ngae jaya. Tsa'ma o'tie tsaoni japa gi ña antiama chigambiamba jiya. 
\p  
\v 62 Tsa'ma Jesúsja tisema su: 
\p —A'ija vaurai'ccu andema chhochho'jepa sepacconima piyican'da tansintsse jaye oshambi. Tsa'caen majan a'i ñame in'jamba toya'caen tayo'su in'jan'choma in'jan'da Chiga a'ive daye oshaya'bi. 
\c 10  
\s1 Jesús setentama manda moen'cho 
\p  
\v 1 Omboe Jesúsja faesu setenta tisema shondosundeccuma ttu'sepa mani tisu jaye tson'jen'ni dosve dosve mandamaña. Majan canqqueni tise jayani tsendeccuma o'tie mandamaña.  
\v 2 Tise'pama su: 
\p —Nasipanga jon'cho cu'chosi taiya'cho napiqquia'caen tsu a'ija pañañe ronda'je'fa. Tsa'ma taisundeccu shacaqquia'caen tsu Chiga ñotsse condase'choma condasesundeccuja shaca. Chiga Quitsaja taiya'cho na'su tsu. Tisema iñajan'faja cuintsu ti'tsse'o a'ima ttu'sesi fuite'faye.  
\v 3 Que'ija vama in'jamba jaja'faja: Oveja du'shuma ttesi andenga mandamañaqquia'caen gi que'ima mandamaña'jen.  
\v 4 Tsa'ma corifin'di bosama angajama. Ni o'va, ni sapatoma angajama. Tsaiqui'ye japa cca'indeccuma bia've chigambian'fajama.  
\v 5 Majambe tsa'onga ansunde'ta na'suma chigambian'faja cuintsu opatsse canseye.  
\v 6 Chigave in'jan'chondeccu tseni can'jen'da tsu que'i chigambian'choma pañamba tsa'caen opatsse canse'faya. Tsambi'ta chi'ga'fasi que'i su'cho toequi shandasi qui que'i opatsse canse'faya.  
\v 7 Majan tsa'onga ca'ni'da tse'tti can'jen'faja. Can'jemba tise'pa anqque'suma an'faja. Tise'pa cui'ccuma cu'i'faja. Nane sema'su semasi tsu afepoeña'cho. Que'ija atesiansi tsu o'fiaña'cho. Cca'tti cca'tti faesu tsa'onga ja'fajama.  
\v 8 Tsa'ma fae canqquenga ca'nimba que'ima ñotsse chigambiansi tise'pa que'inga afe'cho anqque'suma an'faja.  
\v 9 Tise'pani'su pajisundeccuma ccushaen'faja. Tsenisundeccunga conda'faja: “Ca'tsa tsu napiji que'i Chiga aindeccuve da'faya'cho.”  
\v 10 Tsa'ma majan canqquenga ca'nisi ñotsse chigambian'fambian'da tsa canqque'su atandundunga japa tsa'su a'ima qquen condase'faja:  
\v 11 “Que'i ingima chi'gasi ccane'qque gi va canqque'su andema chi'ga'fa. Nane ingi tsu'ttema'qque gi ccucha'fa. Va ccuchaye'je'cho ande tsu que'i egae tsincon'choma canjaen. Tsa'ma Chiga aindeccuve daya'choja ca'tsa napiji qquen condasesi qui ja'ño tayo paña'fa.”  
\v 12 Ñoa'me gi su maqui a'ta Chiga a'i injama'choma somboe'nijan tsa canqquesundeccu tsu bove dyo'otsse da'faya. Nane tayopi'su Sodoma canqque'su egae tsinconsundeccuma bove dyo'otsse tsu da'faya. 
\s1 Majan canqquesundeccu paña'fambi 
\r (Mt 11.20-24) 
\p  
\v 13 ¡Vana'faya qui Corazín canqquesundeccu! ¡Vana'faya qui Betsaida canqquesundeccu! Que'ija ñotsse Chiga tson'choma atte'fa. Nane Chiga tsa'caen Tiro, Sidón canqquema tsoña'choecan'da tsu junde tseni'su aindeccuja tise'pa egae tsincon'choma chi'gapa Chigama iñajan'faye'can. Ñombi'ye'choma canjaenqque'su sarupama ondiccupa cusepai'ccu tsu onjon'faye'can tise'pa in'jan'choma canjaeñe.  
\v 14 Tsa'ma injama'choma somboeña'cho a'ta napisi Tiro, Sidón canqquesundeccuja que'ima bove aiye'pambi'ccoe vana'faya.  
\v 15 Toya'caen que'i Capernaum canqquesundeccu: ¿Asi'ttaen'fa ti qui Chiga que'ima in'jamba sefacconi angaye'ja? Me'i, tsa'ma si'nge anchanda'je'chonga tsu que'ima catiya. 
\p  
\v 16 Majan que'ima paña'da ñama tsu paña'fa. Majan que'ima chi'ga'ta ñama tsu chi'ga'fa. Majan ñama chi'ga'ta ñama moen'su Chiga Quitsama'qque tsu chi'ga'fa. 
\s1 Setenta toequi jipa conda'fa'cho 
\p  
\v 17 Tsa setenta Jesúsma shondosundeccu ja'fa'cho toequi jipa avujatsse bopa su'fa: 
\p —Na'su, que inisema afapa gi osha'choma manda'fa. Cocoyama'qque a'iye somboye mandasi tsu sombo'fa. 
\p  
\v 18 Tsa'caen susi Jesúsja tise'pama su: 
\p —Ju ñoa'me tsanda veyenqquia'caen Satana sefaccone amppi'choma gi atte.  
\v 19 ¡Que canjan! Tayo gi antte que'ija tini, iyonga tsui'a'qque qui vana'faya'bi. Que'ima chi'gasundeccuma qui patsu'faya. Me'i'on tsu jongoesu que'ima dañoña'chove.  
\v 20 Tsa'ma tsa'caen cocoya que'ima pañamba sombo'fa'ni'qque panshaen avuja'fajama. Que'i Chiga a'ive dasi tsu Chigaja que'i inisema sefacconi tevaen. Tsane avujatssi'faja. 
\s1 Jesús avuja'cho 
\r (Mt 11.25-27; 13.16-17) 
\p  
\v 21 Tse'faei'ccuyi Chiga Qquendya'pa Jesúsma in'jaensi avujapa Chiga Quitsama qquen afa: 
\p —Yaya Chiga Quitsa, Que qui Sefacconi'su Na'su. Pa'cco ande'su Na'su qui. Tsa'ma va ande'su injama'pandeqquianga qui tisuma canjaembi. Atesu'chondeccunga canjaembipa qui va aindeccunga tisuma canjaen. Ñotssia du'shu pañaqquia'caen tise'paja ñotsse pañamba in'jan'fa. Yaya, ñotsse qui tson. In'jamba que tsa'caen anttesi gi avujatssi. 
\p  
\v 22 Tsa'caen Chigama iñajamba Jesúsja su: 
\p —Tayo tsu ña yayaja osha'choma ñanga afe. Cca'i ñama atesu'fambisi Chiga Quitsayi tsu ñama atesu'cho. Ñajan Tise Dutssi'ye. Toya'caen cca'ija Chiga Quitsama atesu'fambisi ñañi gi Tisema atesu'cho. Tiseja ña yaya tsu. Toya'caen ñajan Chiga Dutssi'yepa gi majama in'jan'da tsanga condase cuintsu tsendeccu'qque Chiga Quitsama atesu'faye. 
\p  
\v 23 Tsomba Jesúsja piyicamba tisema shondosundeccunga a'tutsse su: 
\p —Que'i tso'fei'ccu osha'cho va tson'choma attepa qui ñoa'me avujatssi'fa.  
\v 24 Ñoa'me gi su: Tayopi'su nasundeccu, tayopi'su Chiga Aya'fama afasundeccu'qque que'i atte'choma atteye in'jan'ma osha'fambi. Que'i paña'jen'choma pañañe in'jan'ma osha'fambi. 
\s1 Ño'a samaritanone condase'cho 
\p  
\v 25 Tsonsi Chiga manda'choma atesu'cho jangi ccutsupa Jesúsma qqueñañe in'jamba su: 
\p —Na'su, ¿jongoesuma gi tsoña tsangae canseye'ta? 
\p  
\v 26 Jesúsja tisema su: 
\p —¿Jongoesu qquen tsu Chiga manda'choja su? Queja Chiga tevaen'jema zutsse can'da ¿jongoesu qquen qui in'jan? 
\p  
\v 27 Tiseja pañamba su: 
\p —Na'su que Chigama ñotsse in'jaña'cho. Nane pa'cco injama'choi'ccu, pa'cco que in'jan'choi'ccu, pa'cco que quin'sui'ccu tsu Na'su Chigama ñotsse in'jaña'cho. Toya'caen faenga'suma tisuma'caen ñotsse in'jaña'cho. 
\p  
\v 28 Tsonsi Jesúsja tisema su: 
\p —Ñotsse qui in'jamba su. Tsa'caen tson'da qui canseya. 
\p  
\v 29 Tsa'ma Chiga manda'choma atesu'choja toya Jesúsma qqueñañe in'jamba tsu condase'chone ti'tsse iñanjampaña: 
\p —¿Majan tsu “ña faenga'suta”? 
\p  
\v 30 Tsonsi Jesúsja su: 
\p —A'i Jerusaléne sombopa Jericó canqqueni ande jisi ccanambandeccuja tisema indi'fa. Indipa tsu pa'tssima cca'na'fa. Tise ondiccu'je'cho sarupama'qque oshichhaemba tisema ochhai iñaccaen'fa. Paye tson'jen qquen in'jamba tisema catipa ja'fa.  
\v 31 Tsama atesumbi'ma Chigama afa'su'qque tsa tsaiqui'ye jayipa ccanange'suma atte'ma catsembe'yi tsaiqui ccafa'su utufa'ye tsui panshamba ja.  
\v 32 Toya'caen Leví a'i'qque tsangae napipa a'ima atte'ma ccafa'su utufa'ye panshamba ja.  
\v 33 Tsonsi fa'e samaria'su a'i'qque tsu tsaiqui'ye jayipa atte. Nane samariasundeccu israendeccui'ccu ñotsse jincho'fambi. Tsa'ma tsa samaria'su a'ija ccanange'suma attepa mende'ye.  
\v 34 Mende'yepa catsepa vino, yayapai'ccu tise iñacca'choma se'je. Se'jepa sarupai'ccu tandan. Tsomba tisu boronga a'ima otsian dyaiñamba anga jacansundeccu ana'jen'cho tsa'onga. Tseni tisema coira'je.  
\v 35 Ccaqui a'ta jaye tson'jemba tsa'o na'suma ttu'sepa cincuenta corifin'dive afepa su: “Tisema ñotsse coiraja. Tisema coiraye ti'tsse chavasi shaca'nijan ña toequi jayipa gi pa'ccoma quenga afepoeña.”  
\v 36 Jen'da, va tres a'i'su, Chigama afa'su, Leví a'i, samaria'su a'i, ¿majan tsu ñoa'me tsa ccanange'suma “tisu faenga'su” qquen in'jan? 
\p  
\v 37 Chiga manda'choma atesu'choja su: 
\p —Tisema mendeye'su tsu “faenga'su” qquen gi in'jan. 
\p Tsonsi Jesúsja su: 
\p —Que'qque tsa'caen poiyi'ccoma ñotsse in'jamba canseja. 
\s1 Jesús can'su ja'cho Marta tsaoni 
\p  
\v 38 Jesús, tisema shondosundeccu'qque japa faesu canqquenga ca'ni'fa. Fa'e pushesuja, Marta, tseni can'jen. Martaja Jesúsma tisei'ccu jacansundeccuma'qque chigambiamba tise tsa'onga ca'nian.  
\v 39 Marta que'tte, María, Martai'ccu fae'ngae can'jemba Jesús atesian'jen'choma pañañe in'jamba tise tsutteccofanga dyaipa paña'jen.  
\v 40 Tsa'ma Martaja osha'choma ñoñañe tisuyi vase'jepa iyicca'yepa Jesúsnga jipa su: 
\p —Na'su, in'jambi ti qui ña que'tte ñama catisi gi tisuyi vase'je. Tisema mandaja cuintsu ñama fuiteye. 
\p  
\v 41 Tsa'ma Na'su Jesús Martama su: 
\p —Marta, Marta, iyicca'yembe canjan. Panshaen qui asi'ttaemba osha'chove ñoñañe vase'je.  
\v 42 Ingima cui'ñambayi antteja. Maríata tsu ñotssiama in'jamba paña'jensi gi tisema se'pimbi. 
\c 11  
\s1 Chigama iñajaña'chone atesian'cho 
\r (Mt 6.9-15; 7.7-11) 
\p  
\v 1 Maquita Jesúsja Chigama iñajan'jen. Iñajan nanisi fa'e tisema shondo'suja jipa su: 
\p —Na'su, ingima atesianjan ma'caen Chigama iñajañe. Nane feti'su Juanjan tisema shondosundeccuma tsa'caen atesian.  
\v 2 Tsonsi Jesúsja tise'pama su: 
\p —Que'ija Chigama iñajañe in'jan'da qquen su'faja: 
\q1 Sefacconi Canjen'su Na'su, ingi Quitsa, que qui ñoa'me joccapitssia. 
\q1 Que inise tsu egave metssipa ti'tsse'tssia. 
\q1 Queyi Na'suve dapa poima mandaja. 
\q1 Que in'janqquia'caeñi pa'cco tsu jinchoja. 
\q2 Que sefacconi mandaqquia'caen va andeni'qque mandaja. 
\q1  
\v 3 Poi a'ta coirapa ingima an'bianjan ingi cu'ipa amba canseye. 
\q1  
\v 4 Ingi quema egae tsincomba shacaen'choma aqquepoenjan, 
\q2 ingima egae tsincomba shacaensundeccuma aqquepoenqquia'caeñi. 
\q1 Ingi egae tsinconsa'ne ottuni ttupa coiraja. 
\q1 Tsomba osha'cho ega'ye ingima ccushaenjan. 
\p  
\v 5 Tsomba Jesús tisema atesiamba su: 
\p —Va aqquia condase'choma asi'ttaen'faja: Majan que'i'su enttinge cose faenga'su tsaoni japa qquen tsu su: “Ccashe'ye, tres panme ñanga afeja.  
\v 6 Faesu ña amigo biani jacamba ña tsa'onga napisi gi ñajan jongoesuma o'fiaña'chove mecho.”  
\v 7 Qquen susi tsu suya: “Ñama noñangianjama. Tayo sombo'ttima piccopa gi ña dushundeccui'ccu ana'jen'fa. ¿Ma'caen gi ja'ñojan jangipa panma quenga afeya?”  
\v 8 Tsa'ma ñoa'me gi su, tiseja tisu amigombi'ma'caen jangipa quenga afembipa pashaen noñangiansa'ne tsu jangipa osha'cho que in'jan'choma afeya.  
\v 9 Tsa'cansi gi que'inga su: Iñajan'ninda tsu Chigaja afeya. Ttatta'ta qui atte'faya. Sombo'ttima tssai jeña'ninda na'su tsu fettaya.  
\v 10 Nane poiyi'cco majan iñajan'da tsu isu'faya. Poiyi'cco majan tta'tta'ta tsu atte'faya. Poiyi'cco majan tssai jeña'da na'su fettasi tsu ca'ni'faya. 
\p  
\v 11 Majan que'i'suja du'shuma an'bian'fa. ¿Que du'shu panme iñajan'ninda ti qui patuma afeya? ¿Avuve iñajan'ninda ti qui avuma se'pipa iyoma afeya?  
\v 12 ¿Arapandusu'chove iñajan'ninda ti qui tinima afeya? Me'i.  
\v 13 Que'ija ño'ambi'a'qque tsa'caen que'i dushundeccunga ñotssiama afeye atesusi ñoa'me tsu Sefacconi'su Na'su Chiga Quitsaja bove ñotssiama afeya. Nane majan Tisema iñajan'ninda tsu tsanga Tise Qquendya'pama afeya. 
\s1 A'i Jesúsma afase'cho 
\r (Mt 12.22-30; Mr 3.20-27) 
\p  
\v 14 Ayafambie da'choma Jesúsja cocoyama joqquitssian. Cocoya joqquitssisi afa'jembi'choa afa'jesi poiyi'cco a'i can'boen'fa.  
\v 15 Tsa'ma majan a'ija su'fa: 
\p —Cocoya na'su Beelzebú va Jesúsma in'jaensi tsu tsa'caen cocoyama joqquitssiañe osha. 
\p  
\v 16 Tsa'ma cca'indeccuja Jesúsma qqueñañe in'jamba tisema iñajan'fa cuintsu sefacconi'su canjaen'choma canjaeñe.  
\v 17 Tsa'ma Jesúsja a'i qqueñañe in'jan'choma in'jamba tise'pama su: 
\p —Majan ande'su a'i tisupanaccui'ccu chi'gacco'fa'nijan tsa ande tsu népiya. Fae etti'sunaccu iyicco'ta fae'ttini can'jeñe osha'fambi.  
\v 18 Tsa'caen Satana tsa Beelzebú qquen su'cho tisuma chi'ga'ta ¿ma'caen tsu tiseja na'sia'caen mandaya? “Beelzebú Jesúsma in'jaensi cocoyama joqquitssian'jen” qquen qui su'fa.  
\v 19 Ñama tsa'caen tsa in'jaen'ninda ¿majan tsu que'ima shondosundeccuma in'jaen cuintsu tise'pa cocoyama joqquitssian'faye? Nane que'ima shondosundeccuja que'i qque'choma tsu canjaen'faya.  
\v 20 Tsa'ma Chiga Qquendya'pa ñama in'jaensi gi cocoyama joqquitssian'jen. Tsa'caen in'jaemba canjaensi qui Chiga osha'choma oshachopa ma'caen manda'choma atte'fa. 
\p  
\v 21 Quin'an a'i tise matichi'ccu tisu tsa'oma ñotsse coira'ninda ¿majan tsu tise an'bian'choma cca'nañe oshaya? Nane Satanajan tsa'can tsu.  
\v 22 Tsa'ma faesu tisema ti'tsse quin'an iyiccoye ji'ta tisema tsu patsuya. Nane tsa quin'an a'imbe matichima itsa'ninda ¿ma'caen tsu tisuma ccushaeña? Tisema patsupa tise an'bian'choma angapa attufaeña'cho. 
\p  
\v 23 Majan fae'ngae ñai'ccu semambi'ta ñai'ccu iyicco'su tsu. Toya'caen majan ñai'ccu fae'ngae taimbi'ta ñoa'me shequian cati'su tsu. 
\s1 Cocoya toequi ca'ni'cho 
\r (Mt 12.43-45) 
\p  
\v 24 Cocoyaja a'i'ye joqquitssipa cocoya can'jeni ñombi'ye jacán. Tsa'ma tsa'caen ñombi'yepa oshambipa tisuma su: “Ña mane somboni gi toequi jaya.”  
\v 25 Toequi japa atte tayo tsa'oma funduipa ñoñaqquia'caen tsu a'ija ñotsse injienge.  
\v 26 Attepa japa tisema bove ega siete cocoyama'qque i'ngasi poiyi'cco tsu tsa a'inga ca'nimba can'jen'fa. Tsonsi tayoe'ma bove ega tsu tsa a'ine. 
\s1 Ñoa'me avujatssiya'cho 
\p  
\v 27 Jesús tsa'caen su'je'ni pushesuja a'i bo'cho'ye fundondo'e tisema su: 
\p —Que mamajan quema isupa coeña'supa tsu ñoa'me avujatssi. 
\p  
\v 28 Tsa'ma Jesúsja su: 
\p —Ju, tsa'ma majan Chiga Aya'fama pañamba tson'da tsa tsu ti'tsse avujatssi. 
\s1 Aindeccu canjaen'chove iñajan'fa'cho 
\r (Mt 12.38-42; Mr 8.12) 
\p  
\v 29 A'i ti'tsse bo'fasi Jesúsja su: 
\p —Ja'ño'su aindeccuja egae in'jamba sefacconi'su canjaen'choma in'jan'fa. Tsa'ma tayopi'su Chiga Aya'fama afa'su Jonás canjaen'chove'yi canjaemba Chigaja faesu canjaen'chove canjaeña'bi.  
\v 30 Tayopi'su Jonásja Nínive canqque'su aindeccunga Chiga canjaen'chove tsu da. Ñajan Sefaccone Ji'cho A'ipa gi ja'ño'su aindeccunga Chiga canjaen'chove daya.  
\v 31-32 Osefaeña'cho a'ta napisi ja'ño'su aindeccuja Nínivesundeccuma bove egae tsu canjaen'faya. Tsendeccuja Jonásma pañamba tisupa egae tsincon'choma chi'ga'fa. Jonásma ti'tsse'tssia gi ja'ño can'jen'ma qui que'i egae tsincon'choma chi'ga'fambi. Toya'caen tayopi'su Sabá ande na'su pushesuja biane ji Salomón ñotsse in'jamba su'choma pañañe. Osefaeña'cho a'ta napisi tise'qque ja'ño'su aindeccu bove ega qquen canjaeña. Salomónma ti'tsse'tssia gi ja'ño can'jen'ma que'ija ñama paña'fambi. 
\s1 Tso'feja ai'vo'su tuño tsu 
\r (Mt 5.15; 6.22-23) 
\p  
\v 33 A'ija tuñoma setsaemba a'tu'faya'mbi. Ni cafon tsosiccunga ccutsian'faya'bi. Tsa'ma sefani tsu ancaeña'cho cuintsu majan ca'ni'da ñotsse atte'faye.  
\v 34 Que tso'fe'qque ai'vo'su tuño tsu. Tso'fe ñotssimajan ai'voja a'tatssiani can'jen. Tsa'ma tso'fe ñotssimbian'da ai'voja sinttia'ni can'jen.  
\v 35 Tsa'cansi injama'tse, sinttia'ni can'jenqquia'caen que'i injama'cho egae in'jaensi egae cansesa'ne.  
\v 36 Tsa'ma ai'vo a'tatssiani can'jenqquia'caen que'i injama'cho ñotsse in'jaensi egae in'jan'chove me'isi qui ñotsse a'tatsse canse'faya. Tuño a'tatsse attianqquia'caen tsu que'i tso'feja que injama'choma attian. 
\s1 Jesúsja atesiansundeccuma iyu'u 
\r (Mt 23.1-36; Mr 12.38-40; Lc 20.45-47) 
\p  
\v 37 Jesús afa nanisi fa'e fariseo a'i tisema ttu'se tise tsaoni japa añe. Ttu'sesi japa Jesúsja an'jen'cho mesa jin'ttinga dyai.  
\v 38 Jesús añe tson'jemba fariseo in'janqquia'caen tivema otishimbisi fariseoja can'boen.  
\v 39 Tsa'ma Na'su Jesúsja tisema su: 
\p —Que'i fariseondeccuja apisho'tto, tasa sepaccoma cashisi naccuja toya amundetssiqquia'caen ñotsse attiamba que'i injama'choni toya egae in'jamba qui egae tsincon'fa.  
\v 40 ¡Ñoa'me injamambi'fa qui! ¿Sepaccove ñoña'suta ti naccuve'qque ñoñambi?  
\v 41 Bove ñotssi tsu que injama'choni ñotsse in'jamba tsa'caen cca'indeccunga ñotsse tsoña'cho cuintsu Chigama ñoa'me avujaeñe. Que'i injama'cho ñotssimanda qui ñoa'me pa'cco giya'tssi. 
\p  
\v 42 ¡Tsa'ma vana'faya qui fariseondeccu! Que'ija osha'choma fae decimoveyi Chiganga afeye atesu'fa Tisema avujaeñe. Nane pa'cco ccoma, pa'cco shinccapama'qque qui fae decimoveyi Chiganga afeye atesu'fa. Tsa'ma ñotsse qui tson'fambi ni Chiga a'ima in'janqquia'caen in'jan'fambi qui. Que'i Chiganga afe'je'choma aqque'pambe'yi a'ima in'jamba ñotsse tson'faya'cho. 
\p  
\v 43 ¡Vana'faya qui fariseondeccu! Chigane atesian'jen'ttinga japa bove ñotssia dyaipa'chove qui in'jan'fa. Chava'je'cho atandundunga japa qui chigambianccoye in'jan'fa cuintsu poiyi'cco a'i que'ima attepa que'ija ti'tsse'tssia qquen in'jan'faye. 
\p  
\v 44 ¡Vana'faya qui Chiga Aya'fama atesu'chondeccu, fariseondeccu'qque! ¡Ñotsse attianqquia'caen tsomba injama'choni egae in'jansundeccu qui! A'i atesumbe'yi pa'chombe atu'ttimbe omba'ye tsui jaqquia'caen a'ija que'i egae in'jan'choma atesu'fambi. 
\p  
\v 45 Tsonsi fa'e Chiga Aya'fama atesu'cho Jesúsma su: 
\p —Atesian'su, tsa'caen fariseondeccune condasepa qui ingima'qque afase. 
\p  
\v 46 Qquen susi Jesúsja su: 
\p —¡Vana'faya qui que'i Chiga Aya'fama atesu'chondeccu! Que'i'qque osha'cho manda'choi'ccu a'ima vanaen'fa. Tise'pa oshambi'ni'qque qui fuite'fambi. Ni tive utufa'su tsimian'ccoi'ccuyi'qque qui fuite'fambi. 
\p  
\v 47 ¡Va'cha'fa qui! Que'i yayandeccu Chiga Aya'fama afasundeccuma fi'ttisi que'i'qque Chiga Aya'fama afasundeccumbe atu'ttive patui'ccu ñotsse ñoña'fa.  
\v 48 Tsa'caen tsomba qui que'i yayandeqquia'caen fae'ngae ega'fa. Que'i yayandeccu a'ima fi'tti'fasi que'ija ñotssi tsu qquen in'jamba pa'chombe atu'ttive ñoña'fa. 
\p  
\v 49 Chigaja osha'chone in'jamba tayoe su: “Ña aya'fama afasundeccuma ñane condasesundeccuma'qque gi manda moeña. Tsa'ma aindeccuja majan tsendeccu'suma fi'tti'faya. Majan tsendeccu'suma noñangiamba vanaen'faya.”  
\v 50 Nane Chiga suqquia'caen a'ija tsa'caen ande agattointe ashaemba Chiga Aya'fama afasundeccuma fittitti'fa. Nane Chigaja tsendeccu shacane'qque tsu va ja'ño'su aindeccuma iñajaña.  
\v 51 Me'ttia'ye tayopi'su Abelma fi'tti ashaemba fitti'tti canse'fa. Voeyiyitsse Zacaríasja Chiga ettini ccutsupa Chiganga oque oraen'jen'cho jin'tti Chiga Aya'fama condase'je. Condase'je'ni tisema fi'tti'fa. Tsa'caen tsomba tsu shacapa'fa. Shacama tsa'caen boñasi tsu Chigaja va ja'ño'su aindeccuma iñajan. 
\p  
\v 52 ¡Vana'faya qui manda'choma atesu'chondeccu! Que'ija tansintssia Chiga Aya'fama atesupa se'pi'fa cca'indeccu paña'sa'ne. Tansintsse su'choma atesu'ma qui tsama chi'ga'fa. Cca'indeccu atesuye in'jan'ninda qui se'pi'fa. 
\p  
\v 53 Jesús tsene sombojisi Chiga Aya'fama atesiansundeccu, fariseondeccu'qque iyicca'yepa Jesúsma noñangiamba zutsse iñajansepoen'fa cuintsu Jesús osha'chone afapa qqueye.  
\v 54 Ron'da'fa Jesús ccaningae su'chove su'ninda pañamba tise injama'choma somboeñe. 
\c 12  
\s1 Ñotsse attiamba afopoensundeccu 
\p  
\v 1 Tsomba tse'i ti'tsse'o a'i bopa tayosi tisupapora tsuicco'fa. Tsa'caen bo'fasi Jesúsja tisema shondosundeccuma su: 
\p —Injama'tse. Fariseondeccuja ñotsse attiañe in'jamba afopoemba tsa'caen tson'fa. Injama'tse, tise'pa'caen tsonsa'ne. Nane tise'pa egaja cupana'ccoa'caen a'tu'cho tsu.  
\v 2 Osha'cho ja'ño a'tu'chota jai'ngae canjaeña'cho. Ja'ño atesumbi'choa'qque jai'ngae atesuya'cho.  
\v 3 Que'i jongoesuma a'tutsse cose condase'ni'qque jai'ngae a'ta'nijan poiyi'cco tsu a'tatsse paña'faya. Que'i tsa'o'su cuarto'ye a'tutsse afa'ni'qque jai'ngae tsao'cco ombanga ccutsupa fundo'faya. 
\s1 Majama tsu dyo'faya'cho 
\r (Mt 10.26-31) 
\p  
\v 4 In'jan'chondeccu, ñoa'me gi su dyo'fajama majanda que'i ai'voma fi'ttiye osha. Tsa'caen fi'tti'ma ti'tsse dañoñe oshambi.  
\v 5 Tsa'ma que'inga gi condaya majama dyo'faya'chove. Chigaja a'ima fi'tti'ta tise canse'pama'qque si'nge anchanda'je'chonga catiye osha. Tsa'cansi gi que'ima su: Chigama tsu dyo'faya'cho. 
\p  
\v 6 A'ija chhiririama chavaen'fa. Cinco chhiririama tsu dos reave chavaen'fa. Tsa'ma tsa'caen baratosi toya tsu Chigaja tsesu chhiririave injan'jen.  
\v 7 Nane Chigaja que tsove'su tosema agattopa injan'jen. Tsa'cansi dyombe can'faja. Chhiririama ti'tsse tsu Chigaja que'ima in'jan. 
\s1 Cristove in'jamba condaya'cho 
\r (Mt 10.32-33; 12.32; 10.19-20) 
\p  
\v 8 Ñoa'me gi que'inga su: Majan ñame in'jamba dyombi'tsse cca'indeccunga condase'ninda ccane'qque ñajan tsane ñotsse afaya. Chiga sefacconi'su shondosundeccu paña'jen'ni gi afaya.  
\v 9 Tsa'ma majan ñama chi'gapa cca'indeccunga ñama a'tie'ninda ccane'qque ñajan tsa a'ima chi'gapa Chiga sefacconi'su shondosundeccu caña'jen'ni tisema a'tieña. 
\p  
\v 10 Poiyi'cco majan Sefaccone Ji'cho A'ima afase'ninda tise tsa'caen egae tsincon'choja joqquitssiqque'su. Tsa'ma majan Chiga Qquendya'pama afase'ninda ñoa'me tsu tise egae tsincon'choja joqquitssi'masia. 
\p  
\v 11 Ñame in'jansi que'ima indipa Chigane atesian'jen'ttinga anga'faya cuintsu nasundeccu, joccapitssiandeqquia'qque que'i injama'choma somboeñe. Que'ima tsa'caen iñanjansepoen'fa'ni'qque dyo'fajama jongoe qquen asi'ttaemba suya'chove tisuma ccushaeñe.  
\v 12 Que'i tseni ccutsu'ninda Chiga Qquendya'pa tsu que'ima in'jaeña jongoe qquen suya'chove. 
\s1 Osha'choma an'biamba qque'faya'cho 
\p  
\v 13 A'i bo'fa'cho'su fae a'i Jesúsma qquen iñajampaña: 
\p —Atesian'su. Ña quindya tsu se'pi. Tisema mandaja cuintsu yaya'ye pasi inginga afe'choma ñai'ccu attufaeñe. 
\p  
\v 14 Tsa'caen susi Jesúsja tisema su: 
\p —Ccashe'ye, ñajan jimbi gi tsa'caen a'i injama'choma somboeñe ni osha'choma attufaeñe. 
\p  
\v 15 Tsomba Jesúsja poiyi'cconga su: 
\p —Injama'tse. Faesumbema in'jan'fajama. Osha'choma an'biambi'a'qque toya qui ñotsse canse'faya. 
\p  
\v 16 Tsomba Jesús va condase'choma conda: 
\p —Fae a'i osha'choma an'bian. Tise andeja ñotssiasi osha'cho ñotsse sho'yopa na.  
\v 17 Tsa'cansi a'ija asi'ttaemba tisuma su: “¿Ma'caen gi tsoña? Tayo tsu tsa'o on'ba pa'cco ña tai'choma boñamba an'biañe.”  
\v 18 Ti'tsse asi'ttaemba tsu qquen in'jan: “Qquen gi tsoña: Ña taipa boña'cho tsa'oma asittapa gi faesu ti'tsse randeve tsao'ñaña. Tsanga gi pa'cco tai'choma an'biamba osha'cho ña an'bian'choma'qque coiraya.  
\v 19 Tsa'caen tsomba gi tisu injama'choni asi'ttaemba tisuma qquen suya: ‘Ñoa'me osha'choma an'biamba gi bo'tssingae ñotsse canseya. Semambe'yi gi canseya. An'jemba, cui'jepa avujatsse gi canseya.’ ”  
\v 20 Tsa'ma Chiga Quitsaja tisema su: “¡Injamambi! Ja'ño cose qui paya. Que osha'choma boñamba an'bian'choja, ja'ño ¿majambe tsu?”  
\v 21 Tsa'caen tsu daya poiyi'cco a'i majan Chiga in'jan'choma in'jambipa tisupa in'jan'choma boña'da. 
\s1 Chiga tisembema ñotsse coira'je'cho 
\r (Mt 6.25-34) 
\p  
\v 22 Tsomba Jesúsja tisema shondosundeccuma su: 
\p —Tsa'cansi gi que'ima su: Que'i vani canse'chone panshaen asi'ttaen'fajama. Que'i anqque'sune panshaen asi'ttaen'fajama. Que'i ai'voni jinqque'su sarupave'qque jongoesuma ondiccuye panshaen asi'ttaen'fajama.  
\v 23 Ingi canse'cho tsu ingi anqque'suma ti'tsse'tssia. Ingi ai'vo tsu ingi ondiccu'je'choma ti'tsse'tssia.  
\v 24 Pindoma canjan. Tsendeccuja jon'fambi ni tai'fambi. Ni taipa boña'je'cho tsa'ove an'bian'fambi. Tsa'ma Chiga Quitsa tsu tise'pama ofian'jen. Que'i qui ñoa'me pindoma ti'tsse joccapitssia.  
\v 25 Toya'caen ¿majan qui que'i'suja in'jamba fae a'ta ti'tsse canseye'ta oshaya? Ñoa'me qui oshambi.  
\v 26 Tsa'caen que'ija va re'riccoa'ma oshambi'ta ¿ma'caen qui osha'chone panshaen asi'ttaen'fa? 
\p  
\v 27 Ñotssia te'tama can'faja. Aqquia tsu sho'yopa te'ta. Semambi ni tise'pa ondiccu'jema anchombi. Tsa'ma ¿majan tsu tisia'caen ondiccucho? Nane ti'tsse'tssia na'su Salomón'qque tisia'caen ñotsse ondiccu'chombi.  
\v 28 Shoshovija ja'ño injanga sho'yopa cansesi tu'i a'ija tsama taipa panme matssañe oque'faya. Tsa'ma Chiga Quitsaja tsa'caen te'tai'ccu shoshovima ñotsse ondiqquiamba ti'tsse tsu que'imajan ondiqquiamba coira'je. ¿Micomba qui in'jambe canse'fa?  
\v 29 Panshaen asi'ttaen'fajama. Que'i anqque'suve, que'i cuiqque'suve ttatta'fajama.  
\v 30 Poi ande'su aindeccu tsu tsa'caen in'jamba canse'fa. Tsa'ma Chiga que'i Quitsaja tayo tsu in'jan que'i osha'chove in'jamba shaca'choma.  
\v 31 Bove ñotssi tsu Chigave in'jamba Tise in'jan'chove tta'ttaye. Tsa'caen cansesi tsu Chigaja que'ine osha'cho ñotssiave ñoñaña. 
\s1 Sefacconi an'biaña'cho 
\r (Mt 6.19-21) 
\p  
\v 32 Que'i qui ña in'jan'cho ovejandeccu. Re'ricco'fa qui. Tsa'ma dyombe can'faja. Chiga que'i Quitsave in'jamba Tise in'jan'chove tta'ttasi tsu Tiseja que'ima na'suve tsoña.  
\v 33 Que'i vani an'bian'choma chavaen'faja mendeqquianga afeye. Tsa'caen afepa qui Chiga sefacconi osha'cho ñotssiama boña'faya. Tseni an'bian'choja mingui'te'qque sefaya'bi ni tssoruve daya'bi. Ccanamba'qque cca'nañe oshambi ni shipicco añe oshambi.  
\v 34 Mani que'i an'bian'choma coira'je'ta tsenima qui ti'tsse injan'jen'fa. 
\s1 Ñoñamba ronda'jeya'cho 
\p  
\v 35 Ondiccupa que'i tuñoma setsaemba ronda'je'faja.  
\v 36 A'i tise na'suve ronda'jeqquia'caen canse'faja. Nane tise'pa na'su casara'je'cho fiestane jipa sombo'ttima tssai jeña'nijan junde fettaye ronda'je'faya'cho.  
\v 37 Majan semasundeccuja tise'pa na'su ji'je'ni toya anambi'ta ñoa'me tsu avujatssi'faya. Ñoa'me gi su tsama attepa tsu na'suja mandaya cuintsu an'jen'cho mesanga dyai'faye. Tsomba na'suja osha'choma ñoñamba tise'be semasundeccunga o'fiaña.  
\v 38 Nane enttinge cose tsambi'ta a'taningae na'su jipa tsa'caen ronda'je'choma atte'ninda ñoa'me tsu tsa semasundeccuja avujatssi'faya.  
\v 39 Toya'caen vama paña'faja: Tsa'o na'suja ccanamba jiya'chove atesuchoecan'da tsu tayo bittapa tise tsa'oma coiraye'can ccanamba ca'nisa'ne.  
\v 40 Que'i'qque ñoñamba ron'da'faya'cho. Atesu'fambi qui maqui Sefaccone Ji'cho A'i ccase jiya'choma. Que'i in'jambi'te gi ñajan jiya. 
\s1 Semasundeccu ma'caen tson'faya'cho 
\r (Mt 24.45-51) 
\p  
\v 41 Tsa'caen susi Pedroja Jesúsma iñajampaña: 
\p —Na'su, ¿ingingayi ti qui va condase'choma condase? Tsambi'ta ¿poiyi'cconga ti qui condase? 
\p  
\v 42 Tsonsi Na'suja su: 
\p —A'ija ñotsse in'janchopa na'su in'janqquia'caen tso'ninda tsama na'suja ti'tsse in'jan. Nane na'suja biani jaye tson'jemba tsanga manda antte cuintsu tise tsa'oma semasundeccuma coirapa poi a'ta tise'pama ofian'jeñe.  
\v 43 Tsomba na'su jai'ngae toequi jisi tsa sema'su, na'su mandaqquia'caen tso'ninda ñoa'me avujatssi tsu.  
\v 44 Ñoa'me gi su, na'su jipa pa'cco tise an'bian'choma tsu tsa sema'sunga afeya cuintsu coiraye.  
\v 45 Tsa'ma majan sema'su: “Ña na'suja uta jiya'bi” qquen in'jamba tsa sema'su faesu semasundeccuma tssaiye ashaemba majan tsandie, majan pushesuma'qque tsse'tsse tsincomba toya'caen an'jemba tse'tse'pama cu'ipa ccusi'ninda  
\v 46 tsa sema'su in'jambi'te tsu na'suja jiya. Na'su jipa tsu tsa sema'suma ma'ppipa in'jambindeccui'ccu fae'ngae tisema catiya. 
\p  
\v 47 Majan sema'su na'su in'jan'choma atesu'ma ñoñambipa tsa'caen tsombian'da ñoa'me tsu na'su tisema quia'me ma'ppiya.  
\v 48 Tsa'ma majan sema'su na'su in'jan'choma atesumbipa tsa'caen ñotsse tsombian'da re'riccoe tsu tisema ma'ppiya. Nane poiyi'cco majan ti'tsse isu'ta ti'tsse tsu tsoña'cho. A'ija majanga ti'tsse afe'ta ti'tsse tsu tsendeccune in'jan'faya. 
\s1 Jesúsve in'jamba attufacco'fa'cho 
\r (Mt 10.34-36) 
\p  
\v 49 Ñajan va andeni ji si'ngema setsaeñe. Ñoa'me tayo anchanda'je'ma'caen gi in'jan.  
\v 50 Ñajan fetiyeqquia'caen vanaña'cho. Toya tsa'caen fetiyembipa gi injama'choni ñoa'me vana'jen. Tsa'caen gi vanaña'cho tsa feti'cho naniña'gae.  
\v 51 ¿Jongoesu qquen qui asi'ttaemba in'jan'fa? ¿Ñanda ti gi va andeni ji cuintsu poiyi'cco a'i opatsse canse'faye? Me'i. Ñoa'me gi su, ñajan ji a'ima iyiccoeñe.  
\v 52 Ja'ño tsu fae tsa'o'su ñoa'me iyicco'faya'cho. Tres ñame in'jansi dos ñama chi'ga'faya. Tsambi'ta dos ñame in'jansi tres tsu ñama chi'ga'faya.  
\v 53 Yaya tsu tise dutssi'yema iyicca'yeya. Dutssi'ye'qque tise yayama iyicca'yeya. Chanjan tise onque'ngema iyicca'yesi onquenge'qque tise mamama ccane'qque iyicca'yeya. Chan ccashe tise chinama iyicca'yesi china'qque ccane'qque chan ccashema iyicca'yeya. 
\s1 Jai'ngae tsoña'chove canjaen'cho 
\r (Mt 16.1-4; Mr 8.11-13) 
\p  
\v 54 Toya'caen tsu Jesúsja a'i bo'fa'chonga su: 
\p —Que'ija chiga amppije'ni unjimba jinchoma attepa qui: “Unjin tuiye tson'jen” qquen su'fa. Qquen su'fa'nijan tsa'caen tsu tui.  
\v 55 Neguev andefae fingian jisi que'ija su'fa: “Ñoa'me coe'jeye tson'jen.” Qquen susi tsa'caen tsu coe'je.  
\v 56 Ñotsse in'janqquia'caen supa aqquia afopoensundeccu qui. Que'ija sefaccoma camba qui osha'choma tsa'caen atesu'fa. Tsa'ma ña ja'ño tsoña'choma atte'ma qui atesu'fambi. 
\s1 Tisuma iyiccaye'suma ñoquiaña'cho 
\r (Mt 5.25-26) 
\p  
\v 57 ¿Micomba qui injama'choni asi'ttaen'fambi ñotsse tsoña'chove in'jañe?  
\v 58 Nane a'i quema iyicca'yepa na'sunga angaji'ninda toya na'sunga napimbi'teyi tsu tisema ñoquiaña'cho. Ñoquiambian'da na'su tsu capitáma mandaya cuintsu que'ima indiye. Capitán tsu picco'je'cho ettinga que'ima piccoya.  
\v 59 Ñoa'me gi su, tseni picco'ninda pa'ccoma nane reama'qque tsu afepoeña'cho tisu somboye. 
\c 13  
\s1 Egae tsincon'choma chi'ga'faya'cho 
\p  
\v 1 Tsequi a'ta majan a'i Jesúsnga jipa condase'fa ma'caen ande na'su governaror Pilato Galilea aindeccuma fi'tti'choma. Tsa aindeccuja Chigama iñajañe tise'pa afe'cho ovejama ipa fi'tti'fa. Oveja anjampa tssain jasi pa'fasi Pilatoja sundarondeccuma mandasi tsa aindeccuma fi'tti'fa. Fi'tti'fasi tise'pa anjampa'qque oveja anjampai'ccu echhoen fae'ngae tssain ja.  
\v 2 Jesúsja pañamba su: 
\p —¿Jongoesu qquen qui asi'ttaen'fa? ¿Va Galileasundeccuta ti cca'i Galileasundeccuma ti'tsse egae tsincon'fa? ¿Tsa'camba ti tsa'caen vaná'fa?  
\v 3 Me'i. Tsa'ma que'i'qque que'i egae tsincon'choma chi'gapa ántteya'cho tsendeqquia'caen pasa'ne.  
\v 4 Toya'caen voeyi tsu Siloé'su se'fatssia tsa'o osuipa amppisi diez y ocho a'i pa'fa. ¿Tsendeccuta ti poiyi'cco Jerusalensundeccuma ti'tsse shacapa'fa?  
\v 5 Me'i. Tsa'ma que'i egae tsincon'choma chi'gapa ánttembi'ta que'i'qque qui tsa'caen pa'faya. 
\s1 Higuera tetachojine condase'cho 
\p  
\v 6 Tsomba Jesúsja va condase'choma conda: 
\p —A'ija higuera teta'choma tise ovaccuni jon. Tise naite na'suja jipa name tta'tta'ma attembi.  
\v 7 Tsomba ovaccuma coira'sunga su: “Tres canqque'fave gi jipa name tta'tta'ma attembi. Ttuttu catija. Ño'a andenga najema'can qui aqquia aten'jeña.”  
\v 8 Tsa'ma coira'suja su: “Na'su, cuintsu ttuttumbe'yi va canqque'fama ronda'jeja. Ñajan va quini'cco setsa'cho'su andema vuviamba vaura ccopai'ccu echhochhoeña.  
\v 9 Tsonsi faesu naite na'ninda tsu ñotssi. Tsa'ma nambian'da ttuttu catiya'cho.” 
\s1 Sema'ma'qquia a'ta ccushaen'cho 
\p  
\v 10 Fae sema'ma'qquia a'ta Jesúsja Chigane atesian'jen'ttinga japa atesian'jen.  
\v 11 Tse'tti pushesu paji'su can'jen. Diez y ocho canqque'fave cocoya tisenga ca'nisi puntssan antteyepa tansintsse ccutsuye oshambi.  
\v 12 Jesúsja tisema attepa ttu'sepa su: 
\p —Pushesu, tayo qui ccusha que paji'choma. 
\p  
\v 13 Qquen supa tise tivei'ccu pushesuma pporaen. Tse'faei'ccuyi tise ai'vo tansinsi pushesuja Chigama ñotsse afa.  
\v 14 Tsa'ma Chigane atesian'jen'tti'su na'suja Jesús sema'ma'qquia a'ta ccushaensi iyicca'yepa a'inga su: 
\p —Seis a'ta tsu semaña'choja. Tsesu a'tayi tsu jipa ccushaengeya'cho. Tsa'ma sema'ma'qquia a'taja ji'masia. 
\p  
\v 15 Tsonsi Na'su Jesús su: 
\p —Que'ija ñotsse attianqquia'caen supa aqquia afopoensundeccu qui. ¿Majan que'i'su qui sema'ma'qquia a'ta tisupa vaurama tisupa boroma'qque ccupa'fambi naini angapa cui'ñañe?  
\v 16 Tsa'candeqquia'ta ¿ma'caen qui cocoya na'su Satana va pushesuma diez y ocho canqque'fave noñangiansi sema'ma'qquia a'ta ña ccupaqquia'caen ccushaen'ninda se'pi'fa? Nane tise'qque tayopi'su Abraham aindeccumbe onque'nge tsu. 
\p  
\v 17 Jesús tsa'caen susi poiyi'cco tisema iyiccayesundeccu ansange'fa. Poiyi'cco a'i Jesús ñotsse tson'choma attepa ñoa'me avujatssi'fa. 
\s1 Mostasa chone condase'cho 
\r (Mt 13.31-32; Mr 4.30-32) 
\p  
\v 18 Tsa'caen tsonsi Jesúsja su: 
\p —A'ija Chiga aindeccuve dapa ti'tsse tsu atapa'faya. Tsane condaseye in'jan'ma ¿jongoesui'ccu gi condaseya?  
\v 19 Ñoa'me tsu a'i Chiga aindeccuve da'faya'cho chipiri mostasa cho'can'chocco. A'ija mostasa choma tise nasipanga jonsi sho'yopa quini'jime dasi chhajeqque'su chhiriria jipa ttembanga tsao'paen'fa. 
\s1 Cupana'ccone condase'cho 
\r (Mt 13.33) 
\p  
\v 20 Toya'caen Jesúsja su: 
\p —Ma'caen a'i Chiga aindeccuve dapa ti'tsse atapa'faya'chone condaseye in'jan'ma ¿jongoesui'ccu gi condaseya?  
\v 21 Nane cupana'ccoa'ca'on tsu. Pushesu panme ñoñaqque'su tres agatto'chonga cupoensi coemba pa'ccoma atapoen. 
\s1 Ta'yoquiccoa sombo'tti 
\r (Mt 7.13-14, 21-23) 
\p  
\v 22 Tsomba Jesús rande canqque, chipiri canqque'ye jacamba a'ima atesian'jen. Tsa'caen jacamba Jerusaléni napisi  
\v 23 fae a'i tisema iñajampaña: 
\p —Na'su, ¿re'ricco a'i ti ccusha'faya? 
\p Jesúsja tisema su: 
\p  
\v 24 Ta'yoquicco tsu Chiga sefacconi ca'niña'choja. Tsa'ma tsangae ca'nicanjan. Nane tsain'bio a'i ca'niñe in'jan'ma osha'faya'bi.  
\v 25 Tsa'o na'su tayo jangipa sombo'ttima piccosi qui que'ija tsotefanga ccutsupa tssai jeñañe ashaen'faya qquen supa: “Na'su, sombo'ttima fettaja ingi ca'niñe.” Tsa'ma tiseja que'ima suya: “Ñanda gi que'ima atesumbi. Ni mane ji'chove'qque gi atesumbi.”  
\v 26 Tsonsi qui qquen su'faya: “Tsa'ma fae'ngae quei'ccu an'jemba gi cu'i'fa. Queja ingi tsaiquini japa atesian.”  
\v 27 Tsa'ma tiseja suya: “Ñoa'me gi su: Ñajan que'i mane ji'chove atesumbi. Que'i egae tsinconsundeccuja, ña'ñe joqquitssi'faja.”  
\v 28 Abrahamma qui atte'faya. Isaac, Jacob, nane poiyi'cco Chiga Aya'fama afasundeccuma'qque qui atte'faya. Tsendeccu Chigai'ccu can'jensi que'ija tsotefanga joqquitssiangepa qui i'na'faya. Ñoa'me ttun'dundu'jeve iyicca'yepa qui i'na'faya.  
\v 29 Nane poi andene tsu a'ija jipa bo'faya Chigai'ccu an dyaiye.  
\v 30 ¡Que canjan! Majan ja'ño utu'ccoa'ta ti'tsse'tssia've tsu da'faya. Tsa'ma majan ja'ño ti'tsse'tssia'ta utu'ccoa've tsu da'faya. 
\s1 Jesús Jerusalénma attepa i'na'cho 
\r (Mt 23.37-39) 
\p  
\v 31 Toya Jesús tsa'caen atesian'jen'ni majan fariseondeccu jipa tisema su'fa: 
\p —Va'ttieja junde jaja. Ande na'su Herodes tsu quema fi'ttiye in'jan. 
\p  
\v 32 Jesúsja pañamba tise'pama su: 
\p —Herodesja afopoen'su tsu. Japa tisenga qquen su'faja: “¡Que canjan! Ñajan ja'ño a'ta, tu'i'qque cocoyama joqquitssiamba a'ima ccushaen'jeña'cho. Tui've gi naniña.”  
\v 33 Tsa'ma que'inga gi su: Ja'ño a'ta, tu'i, tui've'qque gi dyombi'tsse jacaña'cho. Nane Chiga Aya'fama afa'su Jerusaléni can'jembian'da ¿ma'caen tsu tisema fi'tti'faya? 
\p  
\v 34 Jerusalén, Jerusalensundeccu, Chiga Aya'fama afasundeccuma qui fi'tti'fa. Chigaja majama que'inga moensi atesiansi qui patui'ccu fi'tti'fa. Tsain'bitsse gi in'jan que'ima coiraye. Nane arapa chan tise du'shuma sanccopai'ccu piccopa coiraqquia'caen gi que'ima coiraye in'jan. Tsa'ma que'ija in'jan'fambi.  
\v 35 ¡Que canjan! Chigaja que'i can'jen'ttima tsu catiya. Ñoa'me gi su, Ccatsse qui ñama atte'faya'bi que'i ñama qquen suya'ngae: “Ñoa'me ñotssia tsu Na'su Chiga moensi ji'cho.” 
\c 14  
\s1 Ttun'dundu'je'e dapa paji'cho 
\p  
\v 1 Fae sema'ma'qquia a'ta Jesúsja fariseo in'jan'cho na'sumbe tsaoni añe ja. Cca'i fariseondeccu Jesúsma camba ronda'je'fa egae afaye.  
\v 2 Toya'caen tsa tsaoni tsu can'jen a'i ttun'dundu'je'e dapa paji'cho.  
\v 3 Jesúsja Chiga Aya'fama atesu'chondeccuma, fariseondeccuma'qque su: 
\p —¿Chiga manda'chota ti se'pi sema'ma'qquia a'ta a'ima ccushaeñe'ja? Tsambi'ta ¿se'pimbi ti? 
\p  
\v 4 Tsa'ma tisema pañasundeccuja ziyapa afa'fambi. Tsonsi Jesúsja paji'choma pporaemba tisema ccushaen. Ccushaemba tisema manda mañamba  
\v 5 fariseondeccuma su: 
\p —¿Majan que'i'su qui tisupa vaura, tisupa boro tsa'ccu posonga amppi ca'ni'ninda junde somboen'fambi? Nane ¿sema'ma'qquia a'ta'qque ti qui somboen'fambi? 
\p  
\v 6 Tsa'caen susi paña'ma jongoesu qquen suye osha'fambi. 
\s1 Casara'cho fiestane condase'cho 
\p  
\v 7 Añe ttu'sesi ji'chondeccuja bopa poiyi'cco tsu ttatta'fa ti'tsse joccapitssia dyaini dyaipa añe. Tsama attepa Jesúsja va condase'choma tise'panga conda: 
\p  
\v 8 —A'i casara'cho fiestanga que'ima ttu'sesi ja'ta ti'tsse joccapitssia dyaipa'chonga dyaijama. Tsa'caen dyai'ninda faesu que'ima ti'tsse joccapitssia jisi  
\v 9 ttuse'suja queni jipa condaya: “Joqquitssija cuintsu va a'i dyaiye.” Tsonsi qui ansangepa utu'ccoa dyaipa'chonga dyaiya.  
\v 10 Tsa'ma ttuseyepa ja'ta utu'ccoa dyaipa'chonga dyaija cuintsu ttuse'su jipa quenga suye: “In'jan'cho, bove ñotssianga dyaija.” Tsonsi tsu fae'ngae mesani dyaisundeccu attepa quene ñotsse afa'faya.  
\v 11 Poiyi'cco majan patsuye in'jan'da utu'ccoe tsu da'faya. Tsa'ma poiyi'cco majan patsuye in'jambi'ta ti'tsse joccapitssia've tsu da'faya. 
\p  
\v 12 Tsomba Jesúsja tisema ttuse'suma qquen su: 
\p —Queja fiestaemba a'ima o'fiañe in'jan'da que in'jan'chondeccuve'yi ni que antiandeccuve'yi ni pporotsse canjen'su ricondeccuveyi ttu'sejama. Tsendeccuja tise'pa fiestani ccane'qque quema ttu'sepa afepoeñe osha'faya.  
\v 13 Tsa'ma fiestaen'jen'da va'chandeccuma ttu'seja. Toya'caen dañonge'chondeccu, ccareshendeccu, binindeccuma'qque ttu'seja.  
\v 14 Tsendeccuja ccane'qque quenga afepoeñe oshambisi qui ñoa'me avujatssi'faya. Toya'caen Chigaja ño'andeccuma ccase qquendyaemba que'inga'qque ñotsse afepoeña. 
\s1 Na'su fiestane condase'cho 
\r (Mt 22.1-10) 
\p  
\v 15 Tsama pañamba fae a'i mesani an dyai'su Jesúsma su: 
\p —Majan a'i Chiga aindeccuve dapa tseni'su anqque'suma an'jen'da ñoa'me avujatssiya'cho tsu. 
\p  
\v 16 Tsa'ma Jesúsja tisema su: 
\p —A'ija tayoe rande fiestave fiestaemba tsain'bio a'ima ttu'se.  
\v 17 Fiesta pan napijisi tisema shondo'suma manda cuintsu ttuseye'chondeccuma qquen conda'ngaye: “Tayo tsu ñoña osha'choma. Junde ji'faja.”  
\v 18 Tsa'ma ttuseye'chondeccuja pañamba poiyi'cco ccaningae tsoña'chove condaseye ashaen'fa. Fa'eja tisema su: “Ñajan jiye oshambi. Nasipama chavapa gi can'su jayi. Chigáne ñama anttéja ña jimbecañe.”  
\v 19 Faesuja su: “Diez sema'jen'cho vaurama chavapa gi jayi tise'pama semoencañe. Chigáne ñama anttéja ña jimbecañe.”  
\v 20 Cca'ija su: “Voeyi pushepa gi jiye oshambi.”  
\v 21 Tsa'caen su'fasi na'suma shondo'suja jipa na'sunga conda. Tsonsi tsa'o na'suja iyicca'yepa tisema shondo'suma su: “Canqqueni japa poi tsaiquima tta'ttapa va'chandeccu, dañonge'chondeccu, binindeccu, ccareshendeccuma'qque ttu'sepa ija.”  
\v 22 Shondo'suja tsa'caen tsomba su: “Na'su, que suqquia'caen tso'ma toya on'bambi tsu que tsa'o.”  
\v 23 Tsonsi na'suja shondo'suma manda: “Joccani'su tsaiquinga, nasipanga'qque japa majama cachui'ta ttu'seja cuintsu a'i bosi ña tsa'o on'baye.  
\v 24 Ñoa'me tsu o'tie ttuseye'chondeccuja ña aña'choma an'faya'bi.” 
\s1 Cca'ima catipa Jesúsveyi in'jaña'cho 
\r (Mt 10.37-38) 
\p  
\v 25 Ñoa'me tsain'bio a'i Jesúsi'ccu jacan'fasi tiseja piyicamba tsendeccuma su: 
\p  
\v 26 —Majan a'i ñani ji'ta cca'ima tsu chi'ga'faya'cho. Nane tisu yaya, tisu mama, tisu pushe, du'shu, quindyandeccu, quinshingendeccu, shesheyendeccu, quetteyendeccu, nane tisuma'qque chi'gambi'ta ñoa'me ñama shondo'suve daye oshambi.  
\v 27 Majan ña'caen vanañe tise avuja'ccoma opi angambi'ta ñama shondo'suve daye oshambi.  
\v 28 Majan que'i'suja se'fatssia tsa'ove tsao'ñañe in'jan'da o'tie tsu dyaipa bare'choma agattoya'cho naniñe'me'se qquen atesuye.  
\v 29 Tsambi'ta dyaiña'choma dyaiñamba ti'tsse tsao'ñamba naniñe oshambian'da poiyi'cco a'i tsu can'boemba  
\v 30 su'faya: “Tsaja tsa'ove tsao'ñañe ashae'ma naniñe oshambi.”  
\v 31 Toya'caen majan ande na'su faesu na'sui'ccu geraeñe tson'jen'da o'tie tsu dyaipa asi'ttaeña'cho. Tisema fuitesundeccui'ccu condasecco'faya'cho atesuye tise'paja diez mil sundarondeccui'ccu faesu na'su veinte mil sundarondeccuma patsuve'se.  
\v 32 Asi'ttaemba oshambi qquen in'jan'da faesu na'su toya catsembi'te tsu aindeccuma moeña'cho tisema ñoquiañe cuintsu antte'faye.  
\v 33 Tsa'cansi que'i'qque majan tisumbe osha'choma chi'gambi'ta ñama shondo'suve daye osha'fambi qui. 
\s1 Ega ansine condase'cho 
\r (Mt 5.13; Mr 9.50) 
\p  
\v 34 Patu ansinjan ñotssi tsu. Tsa'ma patu ansi'ñe ansin tssutssu catiye'ninda ¿ma'caen tsu ccase ansinpave daya?  
\v 35 Ñoa'me barembi tsu. Andema tsu daño'jen. Ni vaura ccopa'caen andema fuitembi. Injanga tsu catiya'cho. Majan tsosinapa'ta ñotsse paña'faja. 
\c 15  
\s1 Oveja qque'chone condase'cho 
\r (Mt 18.10-14) 
\p  
\v 1 Govierno impuestoma isusundeccu, poiyi'cco egae tsinconsundeccu'qque Jesúsnga catse'fa pañañe.  
\v 2 Tsonsi fariseondeccu, Chiga Tevaen'jema atesu'chondeccu'qque Jesúsma qquen afase'fa: 
\p —Va a'ija egae tsinconsundeccuma in'jamba tise'pai'ccu fae'ngae an'jen. 
\p  
\v 3 Jesúsja tsama pañamba va condase'choma conda: 
\p  
\v 4 —Majan que'i'su cien ovejave an'biamba fae'ccoe qqueña'da noventa y nuevema toeni a'i menia ántteya'cho tsa qque'choveyi tta'ttaye. Nane atteya'ngae tta'ttaya'cho.  
\v 5 Attepa andu'ta avujatsse shanda.  
\v 6 Tsaoni napipa tise amigondeccu, tisei'ccu porotsse can'jendeccuma'qque ttu'sepa tsu su: “Ñai'ccu fae'ngae avujatssi'faja. Tayo gi atte oveja qque'choma.”  
\v 7 Ñoa'me gi su tsa'caen tsu Chiga sefacconi. Nane noventa y nueve ño'andeccu egae tsincon'chove mecho'fasi Chiga sefacconisundeccu tise'pai'ccu avujatssipa fae'cco egae tsincon'su tise egae tsincon'choma chi'gapa antte'ninda ti'tsse tsu avujatssi'fa. 
\s1 Corifin'di qque'chone condase'cho 
\p  
\v 8 Toya'caen majan pushesu diez totoa corima ñoña'cho corifin'dive an'biamba fae'ccoe qqueña'da tuñoma setsaemba pa'cco tsa'oma fundu'ndu tta'ttaya atteya'ngae.  
\v 9 Atte'ta tsu amigondeccuma, pporotsse can'jensundeccuma'qque ttu'sepa qquen suya: “Ñai'ccu avujatssi'faja. Tayo gi atte ña corifin'di qque'choma.”  
\v 10 Tsa'cansi gi su, fae egae tsincon'su tise egae tsincon'choma chi'gapa antte'ninda Chiga sefacconi'su shondosundeccuja avujatssi'faya. 
\s1 Dutssi'ye qque'chone condase'cho 
\p  
\v 11 Tsomba Jesúsja su: 
\p —A'ija dos dutssi'yeve an'bian.  
\v 12 Chu'a tsu tise yayama su: “Yaya, junde ñanga afeja que pasi ña jai'ngae isuya'choma.” Yayaja “Ju” qquen supa tsa'caen tise osha'choma dutssiyendeccunga attufaen.  
\v 13 Tise yayai'ccu can'jenccambeyi tsu chu'aja pa'cco tise isu'choi'ccu biani'su andenga ja. Tseni can'jemba in'jangae cansepa tisu an'bian'choma injanga catiti.  
\v 14 Pa'cco corifin'dima catiti sefaensi tsa andeni ñoa'me egae qquipoesuite tsu napi. Tsa'cansi tise'qque aña'cho mechoe dapa qquipoe'supa  
\v 15 japa tsa ande'su a'imbe sema'suve da. Tsa a'ija tisema manda moen cuintsu tise cochima coirapa ofian'jeñe.  
\v 16 Qquipoe'supa ñoa'me cochi anqque'su teta'cho ttonoma añe ñombi'ye. Tsa'ma majan ni fae teta'choveyi'qque tisenga afembi.  
\v 17 Tsonsi chu'aja injama'choni tisuma in'jamba su: “Poiyi'cco ña yayambe semasundeccuja ttepupa tsu can'jen'fa. Nane an antteye'choma'qque aqquia cati'je'fa. Tsa'ma ñajan vani ti'tsse can'jen'da qquipoe'supa paya.  
\v 18 Ja'ño gi ña yayani jaya. Napi'ta gi tisema suya: ‘Yaya, ñajan egae tsincomba gi Chigama egae tsomba quema'qque egae tson.  
\v 19 Barembi gi que “Ña dutssi'ye” qquen ñama afaye. Ñama mendeye'ta quembe sema'sia'caen ñama an'bianjan.’ ”  
\v 20 Tsa'caen asi'ttaemba jangipa tise yayani ja. 
\p Tsa'ma toya tise catsembi'te tise yayaja bianima attepa mende'yepa buttoin jipa cachuipa musimba mocha.  
\v 21 Tsonsi dutssi'yeja su: “Yaya, ñajan egae tsincomba gi Chigama egae tsomba quema'qque egae tson. Barembi gi que ‘Ña dutssi'ye’ qquen ñama afaye...”  
\v 22 Tsa'ma yayaja tisema shondosundeccuma su: “Ñotssia ondiccu'jema i'ngapa tisema ondiqquian'faja. Tise tivenga sotijama ejian'faja. Sapatoma'qque tandan'faja tise tsu'ttenga.  
\v 23 Yayapatssia vaura du'shuma fi'ttipa sho'ccoen'faja. Jinge avujatsse an'faye.  
\v 24 Va ña dutssi'ye pa'cho'ye qquendyaqquia'caen tsu canse. Tsangae nepi'choma gi atte'fa.” Qquen susi poiyi'cco avujaye ashaen'fa. 
\p  
\v 25 Tsa'caen tson'jen'ni quindyaja nasipani sema'jemba jiñamba tsa'onga catsepa settapoen'jen'choma paña. Boira'je'choma'qque pañamba  
\v 26 sema'suma ttu'sepa tsane iñajampaña.  
\v 27 Sema'suja tisenga su: “Tayo tsu que quinshinjan ji. Pambe'yi jisi que yayaja avujapa yayapatssia vaura du'shuma fi'ttipa shoccoen'jen avujatsse añe.”  
\v 28 Tsa'ma quindyaja iyicca'yepa tsa'onga ca'niñe chi'gapa tsotefani ccutsu. Tsonsi tise yayaja sombopa tisema ca'nian qquen tson.  
\v 29 Tsa'ma tiseja tise yayama su: “Tsain'bio canqque'fa gi quema shondopa sema'jen. Que manda'nijan tsa'caeñi gi tson'jen. Tsa'ma ni fae chivo du'shuveyi'qque qui ñanga afembi ña amigondeccui'ccu fiestaeñe.  
\v 30 Tsa'ma va que dutssi'ye tayo que corifin'dima in'jangae pushesundeccui'ccu injanga catitipa jisi ja'ñojan tisene qui yayapatssia vaura du'shuma fi'ttipa shoccoen'jen.”  
\v 31 Tsama pañamba yayaja su: “Ña dutssi'ye, queja tsangae ñai'ccu can'jensi osha'cho ña an'bian'cho tsu quembe'yi.  
\v 32 Tsa'ma ja'ñojan ñotssi tsu ingi avujaye. Que quinshinjan tayo paqquia'can tsu ja'ñojan canse. Tsangae nepi'choma gi ccase atte'fa.” 
\c 16  
\s1 Ega shondo'sune condase'cho 
\p  
\v 1 Toya'caen Jesúsja tisema shondosundeccuma su: 
\p —Ricoja can'jen. Tsambe shondo'suja tise an'bian'choma coira'je. Tsa'ma shondo'su osha'choma ñotsse coirambisi cca'indeccuja na'sunga conda'fa.  
\v 2 Tsama pañamba na'suja shondo'suma ttu'sepa iñajampaña: “¿Jongoesu tsu va ña quene paña'jen'choja? Pa'cco que chavapa chavaen'choma tevaenjan ña atteye. Tsa'ma queja ti'tsse ña corifin'dima coira'suve can'jeñambi qui.”  
\v 3 Na'su tsa'caen susi shondo'suja tisuma su: “Ña na'su ñama joqquitssia'ninda ¿jongoesuma gi tsoña? Quin'ambi gi matichi'ccu semañe. Injanga corifin'dima iñajañe'qque gi ansange.”  
\v 4 Tsa'caen asi'ttaemba in'jamba su: “Unjun, tayo gi in'jan jongoesuma ña tsonsi cca'indeccu ñame in'jamba amigoen'faya'choma. Tsonsi na'su ñama joqquitssia'ninda gi tsendeccumbe tsaoni can'jeña.”  
\v 5 Tsa'caen in'jamba fae'cco fae'ccoveyi tise na'suma shacaendeccuma ttu'se. Fa'e jisi tisema iñajampaña: “¿Min'getsse qui shacaen ña na'suma?”  
\v 6 Tiseja su: “Yayapa cien rata randeve gi shacaen.” Shondo'suja tisema su: “Que tevaen'jema isupa junde cuname tevaenjan cincuenta rataveyi.”  
\v 7 Tsomba faesu shacaen'suma su: “¿Queja mi'getsse qui shacaen?” Tiseja su: “Cien saparo trigove gi shacaen.” Shondo'suja tisema manda: “Que tevaen'jema isupa junde cuname tevaenjan ochenta saparoveyi.”  
\v 8 Ega shondo'su tsa'caen shacama andiansi tise na'suja pañamba asi'ttaemba iyicca'yembe'yi tisema ñotsse afa. Ñoa'me tsu va ande'su aindeccuja ma'caen tisupanaccu canseya'chove ñotsse in'jan'fa. Tsa'ma Chiga aindeccuja toya tsa'caen tisupanaccu caseya'chove in'jan'fambi. 
\p  
\v 9 Ñoa'me gi que'inga su: Corifin'dija ega na'su tsu. Tsa'ma ñotsse in'jamba que'i corifin'di'ccu cca'indeccuma fuite'faja corifin'di sefasi sefacconi osha'choma ñotsse an'biamba tsangae Chigai'ccu canseya. 
\p  
\v 10 Majan a'i re'riccoama ñotsse coirapa an'bian'da ti'tsse'tssiama'qque tsu ñotsse coirapa an'biaña. Tsa'ma majan re'riccoama ñotsse coirambi'ta ti'tsse'tssiama'qque ñotsse coirambipa cca'naña.  
\v 11 Que'i va andeni jinchoma ñotsse coirambian'da ¿majan tsu ñoa'me ñotssiama que'inga afeya?  
\v 12 Que'i cca'imbema ñotsse coirambian'da ¿majan tsu ñoa'me que'imbetssiama que'inga afeya? 
\p  
\v 13 Ni majan sema'suyi'qque dos na'suma shondoye oshambi. Nane fa'ema chi'gapa tsu faesuma in'jaña. Tsambi'ta fa'ema ñotsse in'jamba tsu faesuma chi'gaya. Chigama, que'i corifin'dima'qque fae'ngatsse in'jañe osha'fambi qui. 
\p  
\v 14 Fariseondeccuja tsain'bitssi corifin'dive in'jañe atesuchopa Jesús su'choma pañamba tisema feña'jen'fa.  
\v 15 Tsa'ma Jesúsja tise'pama su: 
\p —Que'i afopoensi aindeccuja que'ija ñotssi qquen in'jan'fa. Tsa'ma Chiga Quitsaja que'i injama'choma ñotsse atesu. Nane a'i jongoesuve asi'ttaemba ti'tsse'tssi tsu qquen in'jan'ninda Chigaja tsama chi'ga. 
\s1 Chiga Manda'choja pasaya'bi 
\p  
\v 16 Chiga manda'cho, Chiga Aya'fa afasundeccu tevaen'jen'qque ingima tayoe atesian. Tsa'ma Juan jipa ma'caen Chiga aindeccuve dapa canseya'chone ñotsse condase'choma candusiañe ashaen. Ja'ño tsain'bio a'i pañamba quia'me in'jan'fa Chiga aindeccuve daye.  
\v 17 Tsa'ma Chiga manda'choja pasaya'bi. Ni fae tevaen'ttiyi'qque pasaya'bi. Nane bove aiye'pambicco tsu sefacco, ande pasa'faya'cho. Tsa'ma Chiga manda'choja pasaya'bi. 
\s1 Pushema cati'chone Jesús atesian 
\r (Mt 19.1-12; Mr 10.1-12) 
\p  
\v 18 Poiyi'cco majan tise pushema catipa faesu pushesuma pushe'ta ñoa'me tsu egae tsincomba canse. Toya'caen tsa'caen tise pushema catisi majan tsa pushesuma pushe'ta tsa'qque egae tsincomba canse. 
\s1 Lázaro, rico'qque pa'fa'cho 
\p  
\v 19 Ricoja can'jen. Ñotssia tototssia sarupama ondiccupa na'su cu'a omba'su ondiccu'jema ondiccucho. Poi a'ta tiseja osha'cho ñotssiama an'jen.  
\v 20 Tsa'ma tise'pa sombo'tti jin'tti tsu va'cha a'ija pa'cco ai'vo ccopi'pa ccui. Tiseja Lázaro qquen inise'chocho.  
\v 21 Tsaja ñombi'ye ricombe mesa'ye amppipa catiye'je'choma añe. Toya'caen ainjan jipa tise cco'pima be'ya'fa.  
\v 22 Tsa'caen canse va'cha pasi Chiga sefacconi'su shondosundeccu tisema anga'fa cuintsu tayopi'su Abrahami'ccu can'jeñe. Omboe rico'qque pasi a'tu'fa.  
\v 23 Papa si'nge anchanda'je'chonga me'detsse vana'jemba bianima camba Abrahamma atte. Tisei'ccu Lázaroma'qque attepa  
\v 24 quia'me fundo: “¡Yaya Abraham, ñama mende'yeja! Lázaroma mandaja cuintsu tise tsimian'ccoma tsa'ccunga tssipoemba ña menzanza'fama pporaen'giye. Ñoa'me gi vana'jen va si'nge anchanda'je'chonga.”  
\v 25 Tsa'ma Abrahamjan su: “Dusu'tssi ñotsse in'janjan que canseite osha'cho ñotssiave an'biamba qui ja'ñojan vana'jen. Tsa'ma Lázaroja tise canseite osha'cho egave vana'jemba ja'ño mende'yeyepa vani ñotsse can'jen.  
\v 26 Toya'caen ingi enttingeni tsu ampashan'masia changoja jin. Ñajan que'ini jiye in'jan'ma tsama panshañe oshambi. Toya'caen tseni quei'ccu can'jensundeccu'qque vafanga panshañe osha'fambi.”  
\v 27 Tsonsi su: “Yaya Abraham, Chigáne Lázaroma mandamoenjan ña yaya tsaoni  
\v 28 ña cinco quinshingendeccunga. Tsendeccuma tsu condaya'cho vani vana'jen'chonga ji'fasa'ne.”  
\v 29 Tsa'ma Abrahamjan su: “Tsendeccuja Moisés manda'choma an'bian'fa. Chiga Aya'fama afasundeccu tevaen'jema'qque an'bian'fa. Tsa'suma tsu paña'faya'cho.”  
\v 30 Tsa'ma tiseja su: “Me'i, Yaya Abraham. Tsa'ma fa'e pa'chondeccu'su tise'panga jasi tsu pañamba tise'pa egae tsincon'choma chi'gapa cati'faya.”  
\v 31 Tsa'ma Abrahamjan tisema su: “Moisés manda'choma pañambi'ta, Chiga Aya'fama afasundeccu tevaen'jema pañambi'ta ñoa'me pa'cho qquendya'pa ja'ni'qque tisema paña'faya'bi.” 
\c 17  
\s1 Egae tsincon'chone condase'cho 
\r (Mt 18.6-7, 21-22; Mr 9.42) 
\p  
\v 1 Tsomba Jesúsja tisema shondosundeccuma su: 
\p —Tsaveqque'su tsu va andenijan osha'cho tsu jin a'ima qqueñasi cuintsu egae tsincon'faye. Tsa'ma va'cha tsu tsa a'i majan cca'ima egae tsoñe injaen'suja.  
\v 2 Majan va ñame in'jan'cho du'shuma egae tsoñe in'jaen'ninda tisene bove ñotssi tsu toya tsa'caen injaembite sunda'cho patuma tise tsifonga tandamba singu'ccunga andeccoemoeñe.  
\v 3 Tisuma ñotsse coira'faja tsa'caen tsonsa'ne. 
\p Que faenga'su quema egae tsincon'nijan tisema candusiaña'cho. Tsa'ma tsa a'i tise egae tsincon'choma chi'ga'nijan aqquepoeña'cho.  
\v 4 Tiseja fae a'ta siete se quema egae tsincomba siete se quema ñoquiañe in'jan'ninda tise egae tsincon'choma tsu aqquepoeña'cho. 
\s1 In'jan'da osha'choma oshaya'cho 
\p  
\v 5 Tisema shondosundeccuja Na'suma su'fa: 
\p —Ingima in'jaenjan queve ti'tsse in'jañe. 
\p  
\v 6 Na'su tise'pama su: 
\p —Que'ija ñame re'riccoe in'jan'da ñoa'me qui osha'choma osha'faya. Nane mostasa choja ñoa'me'qque chipiri tsu. Que'i in'jan'choja tsa'caen chipiri'ccu qui va rande quini'jin joqquitssiye mandaye osha'faya. “¡Joqquitssipa na'enga amppija!” qquen manda'ninda tsa'caen tsu daya. 
\s1 Semasundeccu sema'faya'cho 
\p  
\v 7 Majan que'imbe semasundeccuja andema pa'fupa joñe sema'fa. Majan semasundeccuja que'i ovejama coira'je'fa. Tsa'ma sema nanimba tsaoni jisi ¿majan que'i'suja tisema qquen suya: “Junde ca'nimba dyaipa anjan”?  
\v 8 Me'i. Tsa'caen qui su'faya'bi. Ñoa'mejan qquen qui tisema su'faya: “Ña anqque'suma sho'ccoenjan. Osha'chove ñoñamba ñama o'fiamba cui'ñajan. Ña an nanisi qui omboe amba cu'iya.”  
\v 9 Sema'suja ñotsse pañamba tsa'caen tsonsi ¿na'suta ti sema'suma ñotsse afaya'cho?  
\v 10 Me'i, tsaveqque'su tise'pambe sema'sumajan. Toya'caen que'i'qque osha'cho Chiga manda'choma pañamba tson'da qui qquen su'faya'cho: “Aqquia semasundeccu gi. ¿Ma'caen tsu ingine ñotsse afa'faya? Aqquiatsse ingima mandasi gi tson'jen'fa.” 
\s1 Diez na congomba pajisundeccu 
\p  
\v 11 Jesúsja Jerusaléni jayipa Galileane sombopa Samariani napipa  
\v 12 chipiri canqquenga ca'ni. Ca'ni ji'ni diez na congomba pajisundeccu tisema cachui'fa. Biane ccutsupa  
\v 13 quia'me fundopa afa'fa: 
\p —¡Na'su Jesús, ingima mende'yeja! 
\p  
\v 14 Jesúsja tise'pama attepa su: 
\p —Japa Chigama afasundeccunga tisuma canjaen'faja. 
\p Tise'pa jayi'fa'ni Jesúsja tise'pama ccushaen.  
\v 15 Tsonsi fae'cco tsendeccu'su tisu ccusha'choma attepa toequi shanda. Quia'me fundopa Chigane ñotsse afa'je.  
\v 16 Tsomba Jesús tsutteccofanga puntssamba camba'jui'ccu andenga ccuipa Jesúsma ñotsse afa. Tiseja samaria'su a'i.  
\v 17 Tsonsi Jesúsja su: 
\p —¿Diezyi'cco a'i ti ccusha'fa? ¿Mani tsu faesu nueveta?  
\v 18 ¿Aqquia ti va israembi'su toequi jipa Chigama ñotsse afa? ¿Faesuveja me'i'on ti? 
\p  
\v 19 Tsomba Jesúsja tisema su: 
\p —Jangipa japa canseja. Queja ñame in'jamba qui ccusha. 
\s1 ¿Chiga aindeccuve da'faya'cho? 
\r (Mt 24.23-28, 36-41) 
\p  
\v 20 Fariseondeccuja Jesúsma iñajampaña'fa: “¿Minga'ni tsu a'ija Chiga aindeccuve da'faya?” Tsa'caen iñajampaña'fasi Jesúsja tise'pama su: 
\p —A'i Chiga aindeccuve da'faya'choma que'ija atteye osha'faya'bi.  
\v 21 Ni a'ija qquen su'faya'bi: “Va'tti tsu tsa'caen da,” ni “Tse'tti tsu tsa'caen da.” Ñoa'me tsu Chigaja que'i injama'chonga ca'nisi qui tayo Tise aindeccuve da'fa. 
\p  
\v 22 Tsa'caen supa Jesúsja tisema shondosundeccuma su: 
\p —Junde qui que'ija Sefaccone Ji'cho A'i que'i'ccu fae a'tayi'qque can'jeñe in'jan'faya. Tsa'ma ñajan que'i'ccu can'jeña'bisi qui ñombi'ye'faya.  
\v 23 Cca'indeccuja que'inga conda'faya: “Joni tsu tiseja can'jen”, Toya'caen “Va'tti tsu Jesúsja can'jen.” Tsa'ma paña'fajama ni ñame ttatta'fajama.  
\v 24 Ña jiña'nijan poiyi'cco tsu fae'ngatsse ñama atte'faya. Nane tsanda veyaensi poiyi'cco fae'ngatsse atteqquia'caen tsu poiyi'cco ñama atte'faya.  
\v 25 Tsa'ma o'tieta gi ñoa'me vanaña'cho. O'tie tsu poiyi'cco vani'su aindeccuja ñama chi'ga'faya.  
\v 26 Tayopi'su Noé can'jeinteqquia'caña tsu ña ccase jiya'ngae.  
\v 27 Noé tsa'o shavonga otseya'ngae a'ija an'jemba cui'je'fa. A'ija pushe'fa. Tise'pa onquengendeccuma'qque antte'fa. Tsa'caen canse'fa'ni na'en jipa poiyi'ccoma piccosi tsangae pa'fa.  
\v 28 Toya'caen tsa'caeñi tsu tayopi'su Lot can'jeinte'qque da'fa. Nane a'ija an'jen'fa, cui'je'fa, chava'je'fa, chavaen'jen'fa, jon'jen'fa, tsaoña'jen'fa.  
\v 29 Tsa'ma Lot Sodoma canqque'ye sombosi tsu si'ngeja asufrei'ccu sefaccone amppipa poiyi'ccoma oque cati.  
\v 30 Tsa'caeñi tsu ja'ño'su aindeccu'qque Chigave in'jambe'yi injanga canse'faya ña ccase jiya'ngae. 
\p  
\v 31 Tsequi a'ta majan a'i tsa'o omba'su ppappacconi dyaipa tise an'bian'choma tsa'onga an'bian'da i'ngambe'yi tsu catipa ccuyaya'cho. Toya'caen majan nasipani sema'jen'da toequi tise tsaoni jimbe'yi ccuyin jaya'cho.  
\v 32 Lot pushene condase'choma ñotsse injan'jen'faja.  
\v 33 Majan tisu canse'pama ccushaeñe in'jan'da tsu qqueñaña. Tsa'ma majan tisu canse'pama cati'ta tsu ñoa'me ccushaya. 
\p  
\v 34 Nane tsequi cose fae ana'jen'choni dos a'i ana'jen'choma fae'ccoe angapa faesuma catiya.  
\v 35 Toya'caen dos pushesu fae'ngae sunda'je'fa'choma fae'ccoe angapa faesuma catiya.  
\v 36 Dos a'i nasipani sema'jen'choma'qque fae'ccoe angapa faesuma catiya. 
\p  
\v 37 Tsonsi tisema shondosundeccuja Jesúsma su'fa: 
\p —Na'su, ¿mani tsu tsa'caenjan daya? 
\p Jesúsja tise'panga su: 
\p —Congomba ccuini tsu ccompanajan bo'je'fa. Ña su'cho napisi qui in'jan'faya. 
\c 18  
\s1 Tsandupajen'chone condase'cho 
\p  
\v 1 Zutsse Chigama iñajaña'chove tisema shondosundeccunga atesiañe in'jamba condase'choi'ccu Jesúsja condase. Nane a'ija anttembe'yi tsu Chigama iñajaña'cho tise'pa iñajan'choma isuya'ngae.  
\v 2 Qquen tsu Jesúsja condase: 
\p —Fae canqqueni ñoquian'suja can'jen. Chigave in'jambipa dyojombipa ni fae a'i faesuma bove ñotssi qquen in'jambi.  
\v 3 Toya'caen tsandupajen'choqque tsa canqqueni can'jen. Faesu a'i tisema egae tsonsi tsa ñoquian'suma iñajan cuintsu tsambe injama'choma somboeñe. Zutsse jipa iña'jansi  
\v 4 ñoquian'suja fuiteye in'jambi'ma asi'ttaen: “Ñajan Chigave in'jambipa dyojombi ni fae a'i faesuma ti'tsse'o qquen in'jambi.  
\v 5 Tsa'ma va tsandupajen'cho panshaen ñama noñangia'ninda gi tisema fuiteya. Tisema egae tsincon'sumbe injama'choma gi somboeña. Tsa'caen tsombian'da panshaen jipa ñama noñangian'jensi gi quimbiya.” 
\p  
\v 6 Qquen supa Na'su Jesúsja su: 
\p —Va ñoquian'suja ega a'i tsu. Tsa'ma paña'fa qui tise su'choma.  
\v 7 Nane tiseja ega'ma tsandupajen'choma pañamba fuite'ninda tsu Chiga'qque tisema iñajansundeccuma pañamba ccushaeña. A'ta toya'caen cose'qque Chigave in'jamba iñajan'ninda ¿Chigata ti tise'pama se'piya?  
\v 8 Me'i, se'pimbipa junde tsu tise'pama ccushaeña. Tsa'ma ñajan Sefaccone Ji'cho A'i ccase ji'ta ¿jongoesuma gi va andeni atteya? ¿Ñame in'jamba tsa'caen iñajamba ronda'je'chondeccuma ti gi atteya? 
\s1 Dos a'i Chigama iñajan'fa'cho 
\p  
\v 9 Majan a'i tisuja ño'a qquen in'jamba tisupaporama chi'ga'fa. Jesúsja va condase'pama tsendeccunga condase: 
\p  
\v 10 —Dos a'i Chiga ettini ja'fa Chigama iñajañe. Fa'eja fariseo in'jan'cho a'i, osha'cho Chiga manda'choma paña'su. Faesuja govierno impuestoma isu'su.  
\v 11 Fariseoja ccutsupa tisuma afaqquia'caen qquen iñajan: “Chiga, ñajan faesu a'ia'cambipa gi Quema ñotsse afa'je. Cca'indeccuja a'ima dyoña'fa corifin'dima itsaye. Afopoemba a'ima daño'jen'fa. Faesu pushesui'ccu ana'jen'fa. Ñajan tsa'caen tsincombi ni va impuestoma isu'sia'caen tsincombi.  
\v 12 Ñajan fae avujaquive dos a'ta ambe can'jen. Toya'caen jongoesuma isu'ta gi enttingeve Chiganga afe'je.”  
\v 13 Tsa'ma impuestoma isu'suja ccani catsembe'yi ccutsu. Tsa'caen ccutsupa puntssamba sefanima cambe'yi tivei'ccu tise utu'choma tssaipa su: “¡Chiga Quitsa, ña gi egae tsincon'su! Ñama mende'yeja.”  
\v 14 Ñoa'me gi su, impuestoma isu'suja avujatsse tise tsaoni ja tayo Chiga tise egae tsincon'choma joqquitssiansi. Tsa'ma Fariseoja me'i. Injanga afapa ja. Nane poiyi'cco majan patsuye in'jan'da bove'ccoe tsu da'faya. Tsa'ma poiyi'cco majan patsuye in'jambi'ta ti'tsse joccapitssia've tsu da'faya. 
\s1 Jesús dushundeccuma me'de'cho 
\r (Mt 19.13-15; Mr 10.13-16) 
\p  
\v 15 Toya'caen chambanaccu tise'pa dushundeccuma Jesúsnga i'fa cuintsu tise'pama pporaeñe. Isi Jesúsma shondosundeccuja attepa chambanaccuma iyu'u'fa.  
\v 16 Tsa'ma Jesúsja tise'pama ttu'sepa su: 
\p —Antte'faja cuintsu dushundeccu ñani ji'faye. Se'pi'fajama. Nane Chiga aindeccuta tsu va dushundeqquia'can'fa.  
\v 17 Ñoa'me gi su: Va dushundeccuja ñame in'jan'fa. Majan tise'pa'caen ñame in'jan'da Chiga aindeccuve dapa Chigama paña'faya. Tsa'ma majan ñame in'jambi'ta ca'ni'faya'bi Chigai'ccu tsangae canseye. 
\s1 Na'su rico Jesúsi'ccu condase'cho 
\r (Mt 19.16-30; Mr 10.17-31) 
\p  
\v 18 Ande nasundeccu'su Jesúsma iñajampaña: 
\p —Ñotssia atesian'su, ¿jongoesuma gi tsoña tsangae canseye'ta? 
\p  
\v 19 Jesúsja tisema su: 
\p —¿Jongoesie qui ñama su “Ñotssia”? Chiga Quitsayi tsu ñotssia. A'ija poiyi'cco ñotssimbi tsu.  
\v 20 Tsa'ma tsangae canseye tsoña'chone iñajampaña'da, ¿queta ti qui atesu Chiga manda'choma? Nane qquen tsu su: Faesumbe pushei'ccu anajama. Cca'ima fi'ttijama. Cca'najama. Afopoenjama. Que yaya, que mamama'qque ñotsse pañajan. 
\p  
\v 21 Tiseja pañamba su: 
\p —Chuitepie gi tsa'caen in'jamba pañamba canse. 
\p  
\v 22 Jesúsja su: 
\p —Toya fae'ccoe qui shaca. Que osha'cho an'bian'choma chavaemba pa'cco corifin'dima va'chandeccunga attufaenjan. Tsa'caen afe'ta qui sefacconi ricove daya. Tsomba ñai'ccu fae'ngae jija. 
\p  
\v 23 Tsa'ma tsama pañamba ande na'suja ñombi'ye osha'choma an'biamba.  
\v 24 Jesúsja tisema camba su: 
\p —Aiye'pa tsu osha'choma an'bian'su Chiga a'ive daye.  
\v 25 Bove aiye'pambi tsu camello nojan'cco changoma panshañe. Nane osha'choma ambian'suta tsu ti'tsse vana'jen Chiga a'ive daye. 
\p  
\v 26 Tsonsi pañasundeccuja su'fa: 
\p —Tsa'camanda ¿majan tsu ccushaya? 
\p  
\v 27 Tsa'ma Jesúsja su: 
\p —A'i oshambi'ni'qque tsu Chigaja oshaya. 
\p  
\v 28 Tsonsi Pedroja su: 
\p —Que canjan. Ingija tsa'o, antiama'qque catipa gi quei'ccu fae'ngae jacan'fa. 
\p  
\v 29 Jesús tise'pama su: 
\p —Ñoa'me gi su, majan a'i tise tsa'o, tise pushe, antian, mama, yaya, du'shuma'qque catipa Chiga in'jan'chove in'jan'da  
\v 30 ñoa'me tsu toya vani can'jemba ti'tsse an'biaña. Toya'caen jai'ngae Chiga sefacconi'qque tsu tsangae canse'faya. 
\s1 Ccase Jesús tisu paya'chone condase 
\r (Mt 20.17-19; Mr 10.32-34) 
\p  
\v 31 Tsomba Jesúsja tisema doce shondosundeccuma ttu'sepa su: 
\p —Paña'faja. Ingija Jerusaléni jayi'fa. Chiga Aya'fama afasundeccuja Sefaccone Ji'cho A'i vanaña'chone tayopi conda'fa. Ja'ño ingi Jerusaléni jasi tsu pa'cco tsa vanaña'chone su'choja ñanga napiya.  
\v 32 Nane Chiga Tevaen'jen condaqquia'caen israendeccuja israembindeqquianga ñama afe'faya. Tsa'caen afesi ñama afasepa egave noñangiamba chi'gapa ñanga attupoen'faya.  
\v 33 Ñama ma'ppipa avuja'cconga fi'tti'faya. Tsa'ma papa tres a'tangae gi ccase qquendyaya. 
\p  
\v 34 Tsa'caen Jesús su'choma paña'ma shondosundeccuja atesu'fambi. Nane injama'cho shacapa ñotsse paña'fambi. 
\s1 Jesús Jericó'su binima ccushaen'cho 
\r (Mt 20.29-34; Mr 10.46-52) 
\p  
\v 35 Tsomba Jericó canqqueni pan napiji'fa'ni binijan tsaiqui utufani dyaipa corifin'dive iñajan'jen.  
\v 36 Tsain'bio a'i panshanjin'fasi pañamba faesuma iñajampaña: 
\p —¿Jongoesie tsu a'ija panshanjin'fa? 
\p  
\v 37 Qquen iñajampañasi tisenga su: 
\p —Jesús Nasareno panshanjinsi tsu tsain'bio a'i tisei'ccu jayi'fa. 
\p  
\v 38 Tsa'caen pañamba tiseja quia'me fundondo'e afa: 
\p —¡Jesús, David Dutssi'ye, ñama mende'yeja! 
\p  
\v 39 Qquen fundosi o'tie jayisundeccuja tisema se'pipa su'fa: 
\p —¡Ziyaja! 
\p Tsa'ma ti'tsse quia'me fundo: 
\p —David Dutssi'ye, ñama mende'yeja. 
\p  
\v 40 Tsonsi Jesúsja tse'ttinga napipa ccutsupa manda binima i'faye. Bini catsesi Jesúsja iñajampaña: 
\p  
\v 41 —¿Jongoesuve ña quenga tsoñe qui in'jan? 
\p Binijan su: 
\p —Na'su, atteye gi in'jan. 
\p  
\v 42 Tsonsi Jesúsja tisema su: 
\p —¡Tayo qui atteye osha! Queja ñame in'jamba qui ccusha. 
\p  
\v 43 Tse'faei'ccuyi atteye oshapa tise'qque Jesúsi'ccu fae'ngae ja. Ñoa'me Chigama ñotsse afa. Nane poiyi'cco a'i ccushaen'choma attepa Chigama ñotsse afa'fa. 
\c 19  
\s1 Jesús Zaqueo tsaoni japa can'jen'cho 
\p  
\v 1 Jesúsja Jericó canqquema ca'nimba panshanjin.  
\v 2 Tse'tti tsu govierno impuestoma isusundeccumbe na'suja can'jen. Tise iniseja Zaqueo. Tiseja osha'choma an'bian.  
\v 3 Jesúsma atteye in'jan'ma panshaen re'richoccopa oshambi tsain'bio a'i bo'fasi.  
\v 4 Tsa'caen oshambipa tise jayani buttopa japa quini'jinga ansundepa dyai tsene Jesús panshanjin'choma ñotsse atteye.  
\v 5 Jesúsja tse'ttinga napipa asuccocamba tisema attepa su: 
\p —Zaqueo, junde andeja. Ñanda gi ja'ño a'ta que tsaoni japa can'jeña. 
\p  
\v 6 Tse'faei'ccuyi Zaqueoja andepa avujatsse Jesúsma ca'nian tise tsa'onga.  
\v 7 Poiyi'cco a'i can'boemba afaccoye ashaen'fa: “Jesúsja egae tsincon'sumbe tsa'onga ca'nimba can'jen” qquen su'fa.  
\v 8 Tsa'ma Zaqueoja jangi ccutsupa Na'su Jesúsma su: 
\p —Na'su, que canjan. Ña an'bian'choma enttingeve gi va'chandeccunga afeya. Ñajan majama afopoemba cca'na'da gi cuatro se ti'tsse'e'qque toequi afeya. 
\p  
\v 9 Tsonsi Jesúsja su: 
\p —Zaqueo'qque Abraham dutssi'yepa tisia'caen ñame in'jan. Tsa'cansi ja'ño a'ta tsu va tsa'o'su aindeccuja ccusha'fa.  
\v 10 Nane Sefaccone Ji'cho A'i'ta gi a'i qque'chondeccuma ccushaeñe ji. 
\s1 Diez corifin'dima coirasundeccu 
\r (Mt 25.14-30) 
\p  
\v 11 Jesús Jerusaléni pan napijisi a'i tisema pañamba junde Chigaja Jesúsma na'suve tsoña qquen in'jan'fa. Tsa'caen in'jan'fasi Jesúsja va condase'choma condase.  
\v 12 Qquen tsu su: 
\p —Ti'tsse'tssia ande na'su ttu'sesi joccapitssia a'i, tise ande'su na'suve dapa jiye, faesu andeni ja.  
\v 13 Tsa'ma toya jambite diez tisema shondosundeccuma ttu'sepa poiyi'cconga mil corifin'dive afe cuintsu tise ccase jiya'ngae chavapa chavaemba ti'tsse gana'jen'faye.  
\v 14 Tsa'ma majan tise aindeccuja tisema chi'gapa cca'indeccuma omboe moen'fa ti'tsse'tssia ande na'sunga qquen condaye: “Va a'ima na'suve tsoñe in'jan'fambi gi.”  
\v 15 Tsa'ma tsa a'ija tisu ande'su na'suve dapa toequi shandapa jipa tise corifin'dima afe'cho a'ima ttu'seye manda. Ttu'sepa mi'getsse gana'chove poiyi'ccoma iñajampaña.  
\v 16 Fae'ccoja na'sunga jipa su: “Na'su, que mil corifin'di'ccu gi diez mil corifin'dive gana.”  
\v 17 Qquen susi na'suja su: “Ñotsse qui tson. Queja ñotssia shondo'su qui. Re'riccoi'ccu ñotsse tsonsi gi quema ccutsiaña na'suve diez canqquema mandaye.”  
\v 18 Faesuja jipa su: “Na'su, que mil corifin'di'ccu gi cinco mil corifin'dive gana.”  
\v 19 Na'suja tisenga su: “Quema gi na'suve ccutsiaña cinco canqquema mandaye.”  
\v 20 Tsonsi faesuja jipa su: “Na'su, va'tti tsu que mil corifin'di. Pañeronga onccamba gi coira.  
\v 21 Queja dyo'tssia a'i. Afembi'ma qui itsa'je. Jombi'ma qui tai'je. Tsa'cansi gi ñajan quema dyojo.”  
\v 22 Na'suja tisema su: “Que su'choyi tsu que injama'choma somboeña. Ñoa'me qui queja ega shondo'su. Ñajan dyo'tssia na'su, afembi'ma itsa'su, jombi'ma tai'su, qquen qui in'jan.  
\v 23 Tsa'caen in'jan'da ¿mingapa qui ña corifin'dima banco na'sunga afembi cuintsu ña jipa ñambema isuye corifin'di gana'choi'ccu?”  
\v 24 Tsomba na'suja pporotsse ccutsusundeccuma su: “Tsambe mil corifin'dima itsapa diez mil corifin'dive an'bian'chonga afe'faja.”  
\v 25 Tsendeccuja su'fa: “Tsa'ma, na'su, tayo tsu tiseja diez mil corifin'dive an'bian.”  
\v 26 Na'suja su: “Ñoa'me gi su, majan an'bian'nijan ti'tsse tsu tisenga afeya'cho. Tsa'ma majan an'biambian'da tise re'riccoama'qque tsu itsaya'cho.  
\v 27 Toya'caen ñama chi'gasundeccuma i'faja. Tise'paja na'suve ñama in'jan'fambi. Tsa'ma tise'pama ipa ña caña'jen'ni fi'tti'faja.” 
\s1 Jesús Jerusaléni japa ca'ni'cho 
\r (Mt 21.1-11; Mr 11.1-11; Jn 12.12-19) 
\p  
\v 28 Tsa'caen condase nanimba ccase Jerusaléni jaye ja.  
\v 29 Betfagéni, Betaniani pan napijipa Olivo ccotta'cconi pporotsse can'jemba tisema shondosundeccu'suma dosve manda moen  
\v 30 qquen supa: 
\p —Va canqquenga japa ca'nimba qui boro du'shuma atte'faya. Tsangaja majañi'qque toya dyaipa jacambi. Ccupapa vani i'faja.  
\v 31 Majan a'i: “¿Jongoesie qui boro du'shuma ccupa'je?” qquen iñajampaña'ninda: “Na'su tisenga dyaipa jaye” qquen tsu suya'cho. 
\p  
\v 32 Manda moensi japa Jesús suqquia'caen atte'fa.  
\v 33 Attepa ccupa'je'fasi boro du'shumbe nasundeccu tise'pama su'fa: 
\p —¿Jongoesie qui boro du'shuma ccupa'je'fa? 
\p  
\v 34 Tsonsi su'fa: 
\p —Na'su tisenga dyaipa jaye. 
\p  
\v 35 Jesúsnga ipa tise'pa ondiccu'jema boro du'shu sepacconga oppoensi Jesúsja otsepa dyai.  
\v 36 Tsanga Jesús dyaipa jayisi a'ija tise'pa ondiccu'je'cho sarupama tsaiquinga ppappa'fa.  
\v 37 Olivo ccotta'ccoma andepa Jerusaléni catsesi tsain'bio tisema shondosundeccu bopa avujatsse afaye ashaen'fa. Jesús ñotsse tsonsi attepa quia'me fundopa Chigama ñotsse afa'fa.  
\v 38 Qquen tsu su'fa: 
\p —Chigaja na'suma inginga afe. Ñoa'me ñotssia tsu. Sefacconi opatsse canse'faja. Pa'cco Chiga sefacconi Chigane ñotsse afa'faja. 
\p  
\v 39 Tsonsi majan fariseondeccu a'i bo'fa'choi'ccu can'jemba Jesúsma su'fa: 
\p —Atesian'su, quema shondosundeccuma iyu'uja. 
\p  
\v 40 Tsa'ma Jesúsja su: 
\p —Ñoa'me gi su, tsendeccu ziya'ninda va tsaiqui'su patu'qque fundopa Chigama ñotsse afa'faya. 
\p  
\v 41 Canqquenga pan napijipa attepa Jesúsja i'namba  
\v 42 su: 
\p —Ñajan in'jan cuintsu que'i Jerusalensundeccu opatsse canse'faye. Tsa'ma ja'ñonda qui tsa'caen canseye in'jan'ma toya osha'fambi. Nane tso'fema tsapiqquia'caen qui tta'tta'fambi ma'caen opatsse canseya'chove.  
\v 43 Tayo tsu napiji que'ima iyiccayesundeccu jipa que'i sombosa'ne shoquendi ttu'faya'cho. Toya'caen andema'qque ovivi'faya que'i ttuccuma panshamba ca'niñe.  
\v 44 Ca'nimba que'ima fitti'tti'faya. Que'i dushundeccuma'qque ttova amppian fi'tti'faya. Nane canqque ttu'choma asittapa ni fae patuveyi'qque faesumbe patu ombanga ántte'faya'bi. Nane que'ija Chiga que'ini jipa ccushaen'choma in'jambisi tsu tsa'caen tson'faya. 
\s1 Chiga ettini'su chavaensundeccu 
\r (Mt 21.12-17; Mr 11.15-19; Jn 2.13-22) 
\p  
\v 45 Tsomba Jesús Chiga ettini ca'nimba chavaensundeccuma tteyamoeñe ashaen. Chavasundeccuma'qque joqquitssian.  
\v 46 Tise'pama su: 
\p —Tise Tevaen'jenga Chigaja su; “Ña tsa'oja ñama iñajan'jen'tti tsu.” Tsa'ma que'ija va Chiga ettima ccanamba tsa'ove cambian'fa. 
\p  
\v 47 Jesúsja poi a'ta Chiga ettini can'jemba atesian'jen. Chigama afa'su nasundeccu, Chiga Tevaen'jema atesu'chondeccu, joccapitssia israendeccu'qque ttatta'fa ma'caen Jesúsma fi'ttiya'chove.  
\v 48 Tsa'ma ma'caen tsoña'chove atesu'fambi. Nane poiyi'cco a'i Jesúsma in'jamba tise pa'cco afa'choma paña'jen'fa. 
\c 20  
\s1 Jesús na'sia'caen atesian'jen'cho 
\r (Mt 21.23-27; Mr 11.27-33) 
\p  
\v 1 Fae a'ta Jesúsja Chiga ettini can'jemba a'ima atesian'jen. Chiga ccushaeña'chone ñotsse condase'choma candusian'jensi Chigama afa'su nasundeccu, Chiga Tevaen'jema atesu'chondeccu, israe'su coenzandeccu'qque jipa tisema  
\v 2 su'fa: 
\p —Inginga condaja majan na'su tsa'caen in'jaensi qui queja tsa'caen atesian'jen. ¿Majan tsu quema manda antte na'sia'caen afaye? 
\p  
\v 3 Jesúsja pañamba tise'pama su: 
\p —Ña'qque gi que'ima iñajampañaña. Ñanga condaja:  
\v 4 ¿Juan feti'chota ti sefacconi'su Chiga mandasi feti'cho? ¿Tsambi'ta ti a'i mandasi feti'cho? 
\p  
\v 5 Tsa'caen susi aindeccuja tisupaporai'ccu qquen condase'cco'fa: 
\p —Ingi “Sefacconi'su Chiga mandasi feti'cho tsu” qquen su'ninda tsu tiseja suya: “Tsa'camanda ¿micomba qui Juanma pañamba in'jan'fambi?”  
\v 6 Tsa'ma “A'i mandasi feti'cho” qquen su'ninda tsu ñoa'me poiyi'cco a'i iyicca'yepa ingima patui'ccu tovaccoen'faya. Poiyi'cco a'i tsu Juanjan Chiga Aya'fama afa'su qquen in'jan'fa. 
\p  
\v 7 Tsa'caen asi'ttaemba Jesúsma qquen su'fa: 
\p —Majan Juanma fetiye manda'chove atesu'fambi gi. 
\p  
\v 8 Tsonsi Jesúsja tise'pama su: 
\p —Jen'da ña'qque que'inga condaya'bi gi majan na'su mandasi ña qquen atesian'jen'choma. 
\s1 Ega coirasundeccune condase'cho 
\r (Mt 21.33-44; Mr 12.1-11) 
\p  
\v 9 Tsomba Jesús va condase'choma a'inga condase: 
\p —A'ija o'fa tsa'jaccuve jomba faesu coirasundeccunga afepa faesu andeni japa bo'tsse can'jen.  
\v 10 Taiya'cho napijisi tisema shondo'suma coirasundeccunga manda moen cuintsu tise'pa tai'fa'cho'suma enttingeve isupa iye. Tsa'ma coirasundeccuja shondo'suma ma'ppipa me'ccoeyi moen'fa.  
\v 11 Tsonsi na'suja faesu shondo'suma moen. Tsama'qque ma'ppipa afasepa me'ccoeyi moen'fa.  
\v 12 Tsonsi ccase tres se faesu shondo'suma'qque moen. Tsendeccuma'qque iñaccaemba joqquitssian'fa. 
\p  
\v 13 Tsonsi o'fa tsajaccumbe na'suja su: “¿Ma'caen gi tsoña? Ña in'jan'cho dutssi'yema gi moeña. Tisemanda tsu paña'faya.”  
\v 14 Tsa'ma coirasundeccuja na'sumbe dutssi'yema attepa tisupaporai'ccu qquen condasecco'fa: “Vaja jai'ngae osha'choma isupa na'suve daya'cho. Jinge tisema fi'ttipa o'fa tsajaccuma tisumbe isu'faye.”  
\v 15 Tsa'caen supa tisema joqquitssiamba fi'tti'fa. 
\p Tsa'caen tson'fa'ninda ¿ma'caen tsu na'suja ega coirasundeccuma tsoña?  
\v 16 Nane tiseja jipa tsu coirasundeccuma fi'ttiya. Tsendeccuma fi'ttipa o'fa tsajaccuma cca'indeccunga afeya. 
\p Chigama afasundeccuja vama pañamba su'fa: 
\p —Chigaja tsa'caen ántteya'bi. 
\p  
\v 17 Tsa'ma Jesús tise'pama camba qquen su: 
\p —Tsa'cambian'da jongoesie tsu Chiga Tevaen'jenjan qquenda su: 
\q1 Tsaoñasundeccu joqquitssian'fa'cho patu tsu 
\q1 Ñoa'me ti'tsse injienge'cho patuve da. 
\m  
\v 18 Majan tsa patunga zuccopanshan amppi'ta tsu tisu uccaya. Tsa'ma tsa patu majan a'inga amppi'ninda tsaja vuviangeya. 
\p  
\v 19 Chiga Tevaen'jema atesu'chondeccu, Chigama afa'su nasundeccu'qque tse'faei'ccuyi Jesúsma indiye in'jan'ma antte'fa aindeccuma dyojopa. Nane nasundeccuja pañamba in'jan'fa tise'pane Jesús va condase'pama tsa'caen condase. 
\s1 Govierno impuestone condase'cho 
\r (Mt 22.15-22; Mr 12.13-17) 
\p  
\v 20 Tsa'caen indiye oshambipa a'tutsse tisema can'boen'fa. Toya'caen cca'indeccuma moen'fa Jesúsma shondosundeqquia'caen attian'faye. Tsendeccuja Jesúsma can'boemba tise jongoesu qquen su'choma ttatta'fa tisema afopoemba indipa governaroronga afeye.  
\v 21 Jipa Jesúsma iñajampaña'fa: 
\p —Atesian'su, queja tansintsse condapa qui tansintsse atesian'jen. Queja poiyi'cco a'i fae'ngatssi qquen in'jamba qui dyombi'tsse Chigane atesian'choma atesian'jen. Tsa'caen in'jamba gi quema iñajampañañe in'jan:  
\v 22 ¿Chiga manda'chota ti antte cuintsu ingija na'su Césarnga impuestoma afeye? ¿Tsambi'ta se'pi ti? 
\p  
\v 23 Tsa'caen Jesúsma qqueñañe iñajampaña'fasi Jesúsja tise'pa in'jan'choma in'jamba qquen tise'pama su: 
\p  
\v 24 —Corifin'dima ñanga canjaenjan. ¿Majambe tsove, majambe tevaen'cho tsu vaja? 
\p Tise'paja su'fa: 
\p —Na'su Césarmbe. 
\p  
\v 25 Jesúsja tise'pama su: 
\p —Tsa'caen Césarmbemajan Césarnga afe'faja. Toya'caen Chigambemajan Chiganga afe'faja. 
\p  
\v 26 Tsa'caen Jesúsma iñajampaña'jen'fa'choma poiyi'cco a'i tsu paña'jen'fa. Tsa'ma nasundeccuja Jesús afa'chone tisema qqueñañe oshambipa “Ñotsse tsu afa” qquen in'jamba ziya'fa. 
\s1 Papa ccase qquendyaya'cho 
\r (Mt 22.23-33; Mr 12.18-27) 
\p  
\v 27 Tsonsi majan Saduseondeccu Jesúsni ji'fa. Saduseondeccuja su'fa a'i pa'chota ccase qquendyaya'bi.  
\v 28 Jipa qquen Jesúsma iñajampaña'fa: 
\p —Atesian'su, tayopi'su Moisésta tsu ingima mandapa tevaen cuintsu a'i du'shu mechoyi pasi tise pushe toya canse'ninda pa'chombe quinshiñi tsu tsa pushesuma pusheya'cho. Du'shuma tsu isuya'cho tise quindya'yembe inisema aqque'pasa'ne.  
\v 29 Nane siete a'i antiandeccuja can'jen'fa. Quindyaja o'tie pushepa du'shuve mechoyi pa.  
\v 30 Pasi tise quinshin pa'chombe pushema pushepa tsa'caen du'shuve mechoyi pa.  
\v 31 Tsa'caeñi faesu quinshinjan tisema pushepa pasi ñoa'me poiyi'cco siete antian tsa pushesuma pushepa du'shuve mechoyi tsu pa'fa.  
\v 32 Omboe pushesu'qque pa.  
\v 33 Tsa'caen tsonsi a'i ñoa'me ccase qquendya'ninda ¿majambe pushe tsu va pushesuja? Ñoa'me poiyi'cco siete antiandeccu tsu tisema pushe'fa. 
\p  
\v 34 Jesús tise'pama su: 
\p —Va andeni tsandiendeccuja pushepa canse'fa. Pushesundeccuja tsa'ndupa canse'fa.  
\v 35 Tsa'ma Chigaja majan a'ima in'jamba Tisei'ccu can'jeñe ánttesi pa'cho'ye ccase qquendyapa tseni Chiga Sefacconijan pushe'faya'bi ni tsa'ndu'faya'bi.  
\v 36 Tsangae pa'masiave dapa Chigama sefacconi'su shondosundeqquia'caen canse'faya. Nane tsendeccuja ccase qquendyapa tsu Chiga dushundeccuve da'fa.  
\v 37 Tsa'ma pa'chondeccu ccase qquendyaya'chone Moisés'qque tayopi tevaen. Chigaja quini'si anchanda'je'cho'ye Moisésnga attiansi tevaen'choja qquen tsu su: “Na'su Chigaja Abraham Chiga tsu. Isaac Chiga tsu. Jacob Chiga tsu.” Nane tsa'caen Chigaja tise'pa Chiga qquen supa tsendeccu'qque toya canse'fa qquen tsu su.  
\v 38 Nane Na'su Chigaja pa'chombe Chigambi tsu. Tsa'ma cansendeqquiambe Chiga tsu. Nane Chiganejan toya cansendeccu tayo pa'chondeccu'qque toya ñoa'me canse'fa tsu. 
\p  
\v 39 Tsonsi majan Chiga Tevaen'jema atesu'chondeccuja su'fa: 
\p —Atesian'su, ñotsse qui su. 
\p  
\v 40 Tsa'ma dyojopa tisema ti'tsse iñajampaña'fambi. 
\s1 Majambe du'shu tsu Cristoja 
\r (Mt 22.41-46; Mr 12.35-37) 
\p  
\v 41 Toya'caen Jesúsja tise'pama qquen iñajampaña: 
\p —¿Ma'caen tsu atesiansundeccuja su'fa Cristoja David Dutssi'ye tsu?  
\v 42 Nane Davidja tise settapoen'cho tevaen'jenga qquen tsu su: 
\q1 Na'su Chigaja ña Na'sunga su: 
\q1 Ñai'ccu fae'ngae na'suve dapa va'ttinga dyaija ña tansinfanga 
\q1  
\v 43 ña quema iyiccayesundeccuma patsusi que tsu'tte tsosiccunga ccuiqquia'caen oshambipa quema paña'faya'ngae. 
\m  
\v 44 David tsa'caen “Ña Na'su” qquen su'ninda ¿ma'caen tsu Cristoja David dutssi'yeya? 
\s1 Jesúsja atesu'chondeccuma iyu'u 
\r (Mt 23.1-36; Mr 12.38-40; Lc 11.37-54) 
\p  
\v 45 Tsomba poiyi'cco a'i paña'jen'fa'ni Jesúsja tisema shondosundeccunga su: 
\p  
\v 46 —Injama'tse, que'i'qque manda'choma atesu'chondeqquia'caen tsonsa'ne. Tsendeccuja bia'a ondiccu'jema ondiccu'fa. Canqque atandundunga a'i chavaeñe bo'fa'ni'qque tsendeccuja bia'ave tisupapora chigambianccoye in'jan'fa. Chigane atesian'jen'ttinga ja'ta ti'tsse joccapitssia dyaipa'chove tsu in'jan'fa. Bopa an'jen'fa'ni ja'ta tsa'caen joccapitssianga dyaiye in'jan'fa.  
\v 47 Tise'pa coiraye qquen afopoemba tsandupajen'chondeccu an'bian'choma cca'namba itsa'fa. Tsa'caen cca'namba bia'ave Chigama iñajan'fa ño'a qquen attiañe. Tsendeccuma tsu Chigaja ti'tsse tise'pa injama'choma somboeña. 
\c 21  
\s1 Tsandupajen'cho Chiganga afe'cho 
\r (Mr 12.41-44) 
\p  
\v 1 Jesúsja ricondeccu tise'pa afe'cho corifin'dima Chiga etti'su corifin'dima ppiña'jen'chonga ppiñasi atte.  
\v 2 Toya caña'jen'ni tsandupajen'cho'qque jipa dos reama ppiña.  
\v 3 Tsama attepa Jesúsja su: 
\p —Ñoa'me gi su, va tsandupajen'choja poiyi'cco ricondeccuma ti'tsse tsu ppiña.  
\v 4 Tsendeccuja osha'choma tayo chavapa an'biamba tise'pa antteye'cho corifin'dima afe'fa. Tsa'ma tsandupajen'choja mechopa pa'cco tise chavapa canseye an'bian'cho corifin'dima afe. 
\s1 Chiga etti osui catiyeya'cho 
\r (Mt 24.1-2; Mr 13.1-2) 
\p  
\v 5 Majan a'ija Chiga ettine Jesúsi'ccu condasecco'fa. Nane ñotssia patuma tsao'ñamba osha'cho ñotssia afe'choi'ccu Chiga ettima ñoña'chone condaseccopa Jesúsja su: 
\p  
\v 6 —Que'ija osha'cho va ñotssiama atte'fa. Tsa'ma jai'ngae ni fae patu faesu patumbe ombani ottaya'bi. Pa'cco tsu osui catiyeya'cho. 
\s1 Osefaeña'cho a'tane canjaeña'cho 
\r (Mt 24.3-28; Mr 13.3-23) 
\p  
\v 7 Tsonsi tisema iñajampaña'fa: 
\p —Atesian'su, ¿minga'ni tsu tsa'caen daya? ¿Jongoesu canjaen'choma attepa gi tsa'caen daya'chove atesu'faya? 
\p  
\v 8 Tsonsi Jesúsja tise'pama su: 
\p —Injama'tse majandeccu que'ima afopoemba qqueñasa'ne. Chigaja ñama moen a'ima ccushaen'suve. Tsa'ma tsain'bio a'i tsu jipa “Ña gi Chiga in'jan'cho Cristo” qquen afopoen'faya. “Ja'ño tsu Chigaja a'ima ccushaeña” qquen tsu su'faya. Tsa'ma tise'pama paña'fajama.  
\v 9 Toya'caen osha'cho gera, iyicco'je'choma paña'an'qque dyombe can'faja. Tsaveqque'su tsu. O'tie tsu tsa'caen tsoña'cho. Tsa'ma tse'faei'ccuyija osefaeña'bi. 
\p  
\v 10 Tsomba Jesús ti'tsse conda: 
\p —Fae ande'su tsu faesu ande'sui'ccu iyicco'faya. Fae na'su tsu faesu na'sui'ccu iyicco'faya.  
\v 11 Ande'qque oyaya. Cca'tti, cca'tti aindeccuja qquipoe'su'faya. Osha'cho paqque'suma'qque setsa'faya. Osha'cho dyoqque'sui'ccu tise'pama dyoñansi a'ija sefacconi'su canjaen'choma'qque atte'faya. 
\p  
\v 12 Tsa'ma osha'cho tsa'caen toya napimbi'te cca'indeccuja que'ima indipa noñangian'faya. Que'ima Chigane atesian'jen'ttinga anga'faya que'i injama'choma somboeñe. Picco'je'ttinga'qque que'ima picco'faya. Que'ija ña aindeccusi ande nasundeccu, goviernondeccu'qque que'ima iyu'u'faya.  
\v 13 Tsa'caen que'ima iyu'uye angasi qui tansintsse ñane conda'faya.  
\v 14 Tsa'ma toya tsa'caen tsombi'te asi'ttaen'fajama jongoe qquen supa ccushaya'chove.  
\v 15 Nane ña gi que'ima in'jaemba afaeña que'i tansintsse afasi cuintsu que'ima noñangiansundeccu ziyaye.  
\v 16 Tsa'ma que'i antiandeccu, nane que'i yaya, mama, quindya, que'i amigondeccu'qque que'ima a'tiemba noñangiansundeccunga afe'faya. Majan que'i'suma'qque fi'tti'faya.  
\v 17 Que'ija ña aindeccusi tsu poiyi'cco que'ima chi'ga'faya.  
\v 18 Tsa'ma que'imajan qqueñañe osha'faya'bi. Ni fae tsove'su toseveyi'qque qqueña'faya'bi.  
\v 19 Que'i ñame ta'etsse in'jamba qui ccushapa tsangae canse'faya. 
\p  
\v 20 Tsa'ma tsain'bio sundarondeccu Jerusalén canqquema shoquendi'je'fasi attepa qui in'jan'faya Jerusalén canqquema osefaeña'cho tsu tayo napi.  
\v 21 Majan Judea andeni can'jen'da ccotta'cconga tsu ccuya'faya'cho. Majan canqqueni can'jen'da tsu sombo'faya'cho. Majan tayo joccani can'jen'da Jerusaléni ca'nimbe'yi tsu jaya'cho.  
\v 22 Nane tsequi a'ta tsu Chigaja israendeccumbe injama'choma somboeña. Osha'cho Tise Aya'fa su'cho tsu napiya.  
\v 23 Va'cha pushesundeccuja majan suri'je'cho. Majan du'shuma chochoen'jendeccu tsequi a'ta tsu vana'faya. Nane poi andeni'su aindeccu vana'jen'fasi Chigaja israendeccuma iyicca'yepa tise'pa injama'choma somboeña.  
\v 24 Sundarondeccuja matichi'ccu tise'pama fi'tti'faya. Majamanda tsu indipa poi biani'su andeni maña ja'faya cuintsu tseni canse'faye. Toya'caen israembindeqquia tsu Jerusalénma patsupa an'bian'faya tise'pa manda'cho tsangae naningeya'ngae. 
\s1 Sefaccone Ji'cho A'i ccase jiya'cho 
\r (Mt 24.29-35, 42-44; Mr 13.24-37) 
\p  
\v 25 Coejechigai'ccu canjaeña'choma qui atte'faya. Cose'suchigai'ccu, o'fei'ccu'qque tsa'caen canjaensi qui atte'faya. Toya'caen andenga mar'su shave'pa jangipa zonzoemba quia'me jensi poiyi'cco a'i dyopa zucco'faya. Nane govierno nasundeccu'qque ma'caen tsoña'chove atesumbipa dyo'faya.  
\v 26 A'ija jai'ngae tsoña'choma asi'ttaemba tsu dyopa paqquia'caen da'faya. Nane sefacconi'su o'fe'qque ccaningae ja'fasi tsu aindeccuja tsa'caen da'faya.  
\v 27 Tsonsi tse'i tsu atte'faya Sefaccone Ji'cho A'i osha'choma oshapa mandaye jiña'choma. Nane osha'cho ñotssiai'ccu unjimba'ye jiña'choma tsu atte'faya. Ña ji'ninda poiyi'cco tsu ñama atte'faya.  
\v 28 Osha'cho tsa'caen daye ashaensi asuccopa can'faja. Ñoa'me tsu que'i ccushaya'choja pan napiji. 
\p  
\v 29 Tsomba Jesús va condase'choma condase: 
\p —Higuera tetachojima can'faja. Nane poi tetachojima can'faja.  
\v 30 Ccaqueje sho'yosi atte'ta qui qquen in'jan'fa: “Coejefa tsu jiye tson'jen.”  
\v 31 Tsa'caeñi qui que'ija osha'cho ña su'choma atte'ta qquen in'jan'faya: “Chiga tsu jiye tson'jen. Ja'ño gi Tise aindeccuve da'faya.” 
\p  
\v 32 Ñoa'me gi su va ja'ño can'jensundeccu pambi'te tsu osha'cho tsa'caen napiya.  
\v 33 Chiga sefacconi tsu pasaya. Va ande'qque pasaya. Tsa'ma ña aya'faja tsangae tsu jinchoya. 
\p  
\v 34 Majan a'ija ñoquimbipa injanga canse'fa. Majan a'ija ccusi'fa. Majan a'ija tise'pa an'bian'choma panshaen in'jan'fa. Tsa'ma injama'tse. Tsa'caen ñoquimbi'fajama. Ña su'choma'qque aqque'pa'fajama pan ña jisi atte jangipa dyosa'ne.  
\v 35 Ña ji'ninda tsu chhiriria quendecco'chonga indiyeqquia'caen a'ija atte jangi'faya.  
\v 36 Tsa'ma que'ija camba ronda'jepa ñama iñajan'jen'faja. Tsayita qui osha'cho va vanaña'cho su'choma vanambe'yi ccushapa Sefaccone Ji'cho A'inga ccutsu'faya. 
\p  
\v 37 Poi a'ta Jesúsja Chiga ettini can'jemba atesian'jen. Tsa'ma cose'ninda Olivo ccotta'cconga japa ana'jen.  
\v 38 Poi a'ta sinte'yi poiyi'cco a'i Chiga ettinga bo'fa tisema pañañe. 
\c 22  
\s1 Jesúsma indiye ñoña'fa 
\r (Mt 26.1-5, 14-16; Mr 14.1-2, 10-11; Jn 11.45-53) 
\p  
\v 1 Israendeccu pan cupana'cco mechoa fiesta pan napiji. Tsaja Chiga panshaen'cho injienge'cho a'ta'su fiesta.  
\v 2 Chigama afa'su nasundeccu, Chiga Tevaen'jema atesu'chondeccu'qque Jesúsma fi'ttive in'jamba tta'tta'fa ma'caen a'tutsse fi'ttiya'chove. A'i bo'fa'choma dyopa tise'pama qquejeccoeñe in'jan'fambi. 
\p  
\v 3 Fa'e Jesúsma shondo'suja, Judas Iscariote tsu. Cocoya na'su, Satana, tise injama'choma in'jaensi  
\v 4 Judasja japa Chigama afa'su nasundeccui'ccu sundaro capitándeccui'ccu condasecco ma'caen Jesúsma tise'panga afeya'chove.  
\v 5 Tsendeccuja avujapa Judasnga corifin'dima afeye su'fa.  
\v 6 Tsonsi Judasja afeye qquen supa japa tta'tta maqui a'i bo'fambi'te Jesúsma afeye cuintsu indi'faye. 
\s1 Na'su Jesús an'jen'cho 
\r (Mt 26.17-29; Mr 14.12-25; Jn 13.21-30; 1 Co 11.23-26) 
\p  
\v 7 Pan cupana'cco mechoama aña'cho a'ta napi. Tsequi a'ta tsu Chiga panshaen'cho injienge'cho ovejama'qque fi'ttiya'cho.  
\v 8 Tsa'cansi Jesúsja Juani'ccu Pedroma moen qquen supa: 
\p —Japa ñoña'faja Chiga panshaen'cho injienge'cho aña'choma aña'chove. 
\p  
\v 9 Tise'paja su'fa: 
\p —¿Mani qui in'jan ingi ñoña'faye? 
\p  
\v 10 Jesúsja tise'pama su: 
\p —Que can'faja. Canqquenga ca'nimba qui a'i tsa'ccu tsoripama angaji'choma cachui'faya. Tisema omboemba ja'faja. Mani tise ca'ni'ninda que'i'qque ca'nimba  
\v 11 tsa tsa'o na'sunga conda'faja: “Atesian'su Jesús tsu quema iñajampaña: ¿Mani tsu queni pasiasundeccu cuarto? Tseni gi ñajan ñama shondosundeccui'ccu Chiga panshaen'cho injienge'cho aña'choma aña.”  
\v 12 Sefani'su ppappacco rande cuartoma tsu tiseja que'inga canjaeña. Tseni tsu osha'cho jin que'i sho'ccoemba ñoña'faya'cho ingi añe. Tseni japa ñoña'faja. 
\p  
\v 13 Tise'paja japa osha'choma Jesús suqquia'caen attepa Chiga panshaen'cho injienge'cho aña'choma sho'ccoen'fa. 
\p  
\v 14 Añe bopa Jesúsja tisema shondosundeccui'ccu an'jen'cho mesa jin'tti piyive ccuipa  
\v 15 tise'pama su: 
\p —Ñoa'me gi va injienge'cho aña'choma que'i'ccu añe in'jan ña vanaña'cho toya napimbi'te.  
\v 16 Ccase añambi gi va panshaen'cho injienge'cho aña'choma Chiga a'i egae tsincon'choma panshaemba joqquitssiaña'gae. Tsequi a'ta gi poiyi'cco Chiga aindeccui'ccu fae'ngae bopa ccase an'faya. 
\p  
\v 17 Tsomba tasama isupa tsane Chigama ñotsse afapa tisema shondosundeccuma su: 
\p —Vama isupa poiyi'cco fae'ngae re'riccoe cu'i'faja.  
\v 18 Ñoa'me gi su ja'ño cu'ipa gi ccase va o'fa tsaja tsa'ccuma cu'iya'bi Chigai'ccu poiyi'cco Tise aindeccu fae'ngae bo'faya'ngae. 
\p  
\v 19 Tsomba Jesús panma isupa tsane'qque Chigama ñotsse afapa doñamba tise'panga attufaen qquen supa: 
\p —Vaja ña ai'vo tsu. Que'ine gi ña ai'voma afe. Tsa'cansi va panma an'da ña que'ine afe'choma injan'jen'faja. 
\p  
\v 20 Omboe pa'ccoma an nanimba tasama'qque isupa afe. Tasama afepa qquen tsu su: 
\p —Chiga Quitsa aindeccui'ccu cuname injancco'fa'choma condasesi ña anjampa tsu tsane tssaña'cho. Que'ine gi ña anjampama tssañaña. Va o'fa tsaja tasa tsu ña anjampa tssamba ccushaen'choma canjaen. 
\p  
\v 21 Tsa'ma que can'faja ñama chi'gapa afe'su tsu fae'ngae va mesani ñai'ccu an'jen.  
\v 22 Ñajan Sefaccone Ji'cho A'i gi Chiga mandaqquia'caen paya. Tsa'ma va'cha tsu ñama chi'gapa afe'su. 
\p  
\v 23 Jesús qquen susi tisema shondosundeccu tisupaporai'ccu condasecco'fa majan tsu tsa'caen Jesúsma chi'gapa afeya'cho. 
\s1 Majan tsu ti'tsse'tssia qquen afacco'fa 
\p  
\v 24 Toya'caen tsu afacco'fa majan tise'pa'su ti'tsse joccapitssia.  
\v 25 Tsonsi Jesús tise'pama su: 
\p —Israembindeqquia nasundeccuja tise'pa a'ima manda'fa. A'ima fuiteye tsa'caen manda'fa qquen tsu su'fa.  
\v 26 Tsa'ma que'inejan tsa'cambi tsu. Que'inejan majan ti'tsse'tssia tsu utu'ccoe daya'cho. Manda'su tsu shondo'sia'caen daya'cho.  
\v 27 ¿Majan tsu ñoa'me ti'tsse'tssia? ¿Mesani an dyai'su? Tsambi'ta ¿semamba o'fian'su? Ju, mesani an dyai'su tsu ti'tsse'tssia. Tsa'ma ñajan tsa sema'sia'caen que'i'ccu can'jen. 
\p  
\v 28 Que'ija ñai'ccu fae'ngae jacamba qui ñai'ccu fae'ngae vana'jen'fa.  
\v 29 Chiga ña Quitsaja tayo tsu ñama na'suve manda. Tsonsi tsa'caen gi ña'qque que'ima na'suve manda cuintsu  
\v 30 ña na'suve dasi que'i'qque ñai'ccu ña an'jen'cho mesanga fae'ngae amba cu'i'faye. Que'ija na'su dyaipa'chonga dyaipa qui poiyi'cco israendeccumbe injama'choma somboeñe manda'faya. 
\s1 Pedro atieña'chone Jesús conda 
\r (Mt 26.31-35; Mr 14.27-31; Jn 13.36-38) 
\p Toya'caen tsu Na'suja su: 
\p  
\v 31 —Simón, Simón, vama canjan. Satanajan poiyi'cco que'ima in'jamba iñajan trigoma qque'shoqquia'caen que'ima vanaeñe.  
\v 32 Tsa'ma ñajan quene gi Chigama iñajan que ñame in'jan'choma qquesa'ne. Vana'jen'cho panshansi ccushapa que faengasundeccuma'qque quiñaenjan. 
\p  
\v 33 Tsama pañamba Pedro tisema su: 
\p —Na'su, quema picco'je'ttinga picco'fa'ninda gi ña'qque quei'ccu fae'ngae piccoyeya. Quema fi'tti'fa'ninda gi ña'qque quei'ccu fae'ngae paya. 
\p  
\v 34 Jesúsja su: 
\p —Pedro, ñoa'me gi quenga su: Arapa gayo toya ja'ño a'ta se'yombi'te queja ñane tres se a'tieña “Tisema atesumbi gi” qquen supa. 
\s1 Jesús vanaña'cho tayo napi 
\p  
\v 35 Tsomba Jesús poiyi'ccoma iñajampaña: 
\p —Ña que'ima bosa ni o'va ni sapatove'qque me'ccoe manda moe'ninda ¿jongoesu tsu shaca? 
\p Tise'paja su'fa: 
\p —Me'i, shaca'fambi. 
\p  
\v 36 Tsonsi Jesúsja su: 
\p —Tsa'caen tayoe mandapa gi ja'ñojan que'ima conda: Majan bosapa'ta tsama angaya'cho. O'vama'qque tsa'caen. Majan a'i sundaro matichive mechota bove ñotssi tsa tise omba'su ondiccu'jema chavaemba sundaro matichima chavaye.  
\v 37 Ñoa'me gi su: Va Chiga Tevaen'jen ñane su'choja ja'ño tsu napi: “Egae tsinconsundeccui'ccu tisema in'jan'fa.” Pa'cco ñane tevaen'cho tsu junde napiya'cho. 
\p  
\v 38 Tise'paja su'fa: 
\p —Na'su, que canjan. Vani gi an'bian'fa dos sundaro matichima. 
\p Jesúsja camba su: 
\p —Nanitssi tsu. 
\s1 Jesús Getsemaníni Chigama iñajan 
\r (Mt 26.36-46; Mr 14.32-42) 
\p  
\v 39 Tsomba Jesúsja sombopa tise in'janqquia'caen Olivo ccotta'cconga ja. Tisema shondosundeccu'qque fae'ngae jaja'fa.  
\v 40 Tseni napipa Jesús tise'pama su: 
\p —Chigama iñajan'jen'faja egae tsinconsa'ne. 
\p  
\v 41 Tsomba tiseja ti'tsse joccani ja –biambi'ccoe– patuma ttovaqquia'can'ccoe. Japa ccaru dyaipa Chigama iñajamba  
\v 42 su: 
\p —Yaya, que in'jan'da va ña vanaña'choma joqquitssianjan. Tsa'ma joqquitssiañe in'jambi'ta que in'janqquia'caen tsonjan. Ña in'jan'chomajan me'i. 
\p  
\v 43 Tsonsi Chigama sefacconi'su shondo'su Jesúsnga attiamba tisema quiñaen.  
\v 44 Tsa'caen ñoa'me vana'jemba ti'tsse quia'me Chigama iñajan. Poipa'su'qque sombopa ñoa'me injan'tsse anjampa tssanqquia'caen andenga amppi'je. 
\p  
\v 45 Chigama iñajan nanimba jangipa tisema shondosundeccunga japa tise'pa ñombi'yepa ana'jen'choma atte.  
\v 46 Attepa tise'pama su: 
\p —¿Micomba qui ana'jen'fa? Jangipa Chigama iñajan'jen'faja egae tsinconsa'ne. 
\s1 Jesúsma indi'fa'cho 
\r (Mt 26.47-56; Mr 14.43-50; Jn 18.2-11) 
\p  
\v 47 Tise toya afa'je'ni tsain'bio a'i jiña'fa. Jesúsma shondo'su Judas tsu a'ima angacan. Tiseja Jesúsma mochaye catse.  
\v 48 Tsa'ma Jesús tisema su: 
\p —Judas, ¿Aqquia ti qui in'janqquia'caen mochapa Sefaccone Ji'cho A'ima cca'indeccunga afeya? 
\p  
\v 49 Tsonsi Jesúsi'ccu jacansundeccuja ma'caen tsoña'chove in'jamba su'fa: 
\p —Na'su, ¿matichi'ccu iyicco'faya'an ti gi? 
\p  
\v 50 Qquen supa fa'e tise'pa'su Chigama afa'su na'sumbe sema'suma atuipa tise tansinfa'su tsosinama qquerui ttova.  
\v 51 Tsa'ma Jesúsja su: 
\p —¡Anttéja! Panshaen jova'caen tsinconjama. 
\p Qquen supa sema'sumbe tsosinama pporaemba toeningatsse ccushaen.  
\v 52 Omboe Chigama afa'su nasundeccu, sundaro capitándeccu, israe'su coenzandeccu'qque tsa'caen Jesúsma indiye ji'fasi Jesúsja tise'panga su: 
\p —¿Ccanambama indiye jiqquia'caen ti qui sundaro matichi, quini'ccoi'ccu ji'fa?  
\v 53 Ñajan Chiga ettini poi a'ta que'i'ccu can'jen'ma qui ñama pporaen'fambi. Tsa'ma va tsu que'i patsuya'cho hora. Sinttia'su na'su, Satana, tsu ja'ño patsu. 
\s1 Pedro Jesúsne a'tien'cho 
\r (Mt 26.57-58, 69-75; Mr 14.53-54, 66-72; Jn 18.12-18, 25-27) 
\p  
\v 54 Tsonsi Jesúsma qquitssa indipa anga'fa. Chigama afa'su na'su ettinga angapa ca'nian'fa. Pedroja omboe biacca jacan.  
\v 55 Aindeccu tsa'o atandundunga si'ngema setsaemba sa'vuye dyai'fasi Pedro'qque fae'ngae tise'pai'ccu dyai.  
\v 56 Pedro si'nge anchanda'cho a'tatssiani dyaisi sema'su pushesu tisema attepa can'boemba su: 
\p —Va a'i'qque tsu Jesúsi'ccu canjen'su. 
\p  
\v 57 Tsa'ma Pedroja qquen supa a'tien: 
\p —Pushesu, ni ñajan tisema atesumbi. 
\p  
\v 58 Omboe faesu'qque Pedroma attepa su: 
\p —Que'qque tsendeccu'su qui. 
\p Tsa'ma Pedroja su: 
\p —Tsandie, me'i gi. 
\p  
\v 59 Fae hora'ca'en pasasi faesuja quia'me qquen su: 
\p —Ñoa'me tsu va tsandieja Jesúsi'ccu canjen'su. Tise'qque Galilea'su. 
\p  
\v 60 Tsa'ma Pedroja su: 
\p —Tsandie, atesumbi gi que jongoe qquen su'choma. 
\p Tse'faei'ccuyi arapa gayoja se'yo.  
\v 61 Se'yosi Na'su Jesúsja piyicamba Pedroma can'boen. Tsonsi Pedroja Na'su Jesús qquen su'choma in'jan: “Arapa gayo toya ja'ño a'ta se'yombi'te queja ñane tres se a'tieña.”  
\v 62 Tsa'caen in'jamba Pedroja sombopa quia'me i'na. 
\s1 Jesúsma afase'fa'cho 
\r (Mt 26.67-68; Mr 14.65) 
\p  
\v 63 Tsonsi Jesúsma indisundeccuja tisema afasepa tsse'tsse'fa.  
\v 64 Tise tso'fema sarupai'ccu tandamba tise cambajuma tssaipa iñajampaña'fa: 
\p —Injama'choi'ccu in'jamba condaja majan tsu quema tssai. 
\p  
\v 65 Toya'caen osha'cho egae afa'choi'ccu tisema afase'fa. 
\s1 Jesúsma iñajampaña'fa'cho 
\r (Mt 26.59-66; Mr 14.55-64; Jn 18.19-24) 
\p  
\v 66 Cosepa a'tasi poiyi'cco israe'su coenzandeccuja bo'fa. Poiyi'cco Chigama afa'su nasundeccu, poiyi'cco Chiga Tevaen'jema atesu'chondeccu'qque bo'fa. Tsa'caen bo'fa'chonga Jesúsma angasi nasundeccuja tisema su'fa: 
\p  
\v 67 —¿Queta ti qui Chigambe Cristo? Inginga condaja. 
\p Tsa'ma Jesúsja su: 
\p Que'inga conda'ni'qque qui ñama paña'faya'bi.  
\v 68 Ña que'ima iñajampaña'ni'qque qui ñanga conda'faya'bi.  
\v 69 Tsa'ma Chigaja osha'choma oshacho. Ñajan Sefaccone Ji'cho A'i. Jai'ngae gi Chiga Quitsai'ccu dyaipa fae'ngae osha'choma mandaya. 
\p  
\v 70 Tsonsi tsu poiyi'cco su'fa: 
\p —¿Tsa'caenda ti qui Chiga Dutssi'ye? 
\p Jesúsja tise'pama su: 
\p —Ju, que'i suqquia'can gi. 
\p  
\v 71 Tsonsi tsu su'fa: 
\p —¿Micomba gi camba afasundeccuve ti'tsse ttatta'je'fa? Tayo gi tise aya'fai'ccu tise su'choma paña'fa. 
\c 23  
\s1 Na'su pilato Jesúsma iñajampaña'cho 
\r (Mt 27.1-2, 11-14; Mr 15.1-5; Jn 18.28-38) 
\p  
\v 1 Tsomba tse'i poiyi'cco bo'fa'chondeccu fae'ngae jangipa Jesúsma anga'fa Na'su Pilatonga. Tseni napipa  
\v 2 Jesús ma'caen tsincon'choma condaseye ashaemba su'fa: 
\p —Ingija va a'ima attepa gi indi'fa. Tiseja ingi aindeccuma afopoemba atesian'jen. Ingima tsu se'pi Na'su César iñajan'cho impuestoma afeye. Tiseja Cristo qquen tsu su, ande na'su qquen su'cho. 
\p  
\v 3 Tsonsi Pilatoja Jesúsma iñajampaña: 
\p —¿Queta ti qui israe'su na'su? 
\p Jesúsja conda: 
\p —Que suqquia'caen, ña gi. 
\p  
\v 4 Tsonsi Pilatoja Chigama afa'su nasundeccuma, a'i bo'fa'chondeccuma'qque su: 
\p —Ñajan tisene shacapave attembi gi. 
\p  
\v 5 Tsa'ma tise'paja ti'tsse iyicca'yepa qquen su'fa: 
\p —Tiseja poiyi'cco Judea aindeccuma qquejeccoen'su tsu. Nane Galileani atesiañe ashaemba ja'ñojan va canqqueni'qque tsa'caen atesian'jen. 
\s1 Herodes Jesúsma iñajampaña'cho 
\p  
\v 6 Pilatoja tsama pañamba qquen iñajampaña: “¿Jesústa ti Galilea'su?”  
\v 7 “Ju,” qquen susi Pilatoja Jesúsma angaye manda Herodesnga. Galilea ande na'su Herodesja tsequi a'ta Jerusaléni can'jen.  
\v 8 Herodesja Jesúsma attepa ñoa'me avuja. Osha'choma tisene pañamba bo'tssingae tisema atteye ñombi'ye. Toya'caen tsu in'jan cuintsu Jesús majan sefani'su canjaen'choma attiansi atteye.  
\v 9 Tsa'caen in'jamba tsain'bitsse Jesúsma iñajampaña. Tsa'ma Jesúsja afambi.  
\v 10 Chigama afa'su nasundeccu, Chiga Tevaen'jema atesu'chondeccu Herodesnga fae'ngae ccutsupa ñoa'me Jesúsne osha'cho egave conda'fa.  
\v 11 Herodes, tise sundarondeccu'qque Jesúsma chi'gapa afase feña'jen'fa. Ñotssia na'su sarupa'cain'ccu tisema ondiqquiamba toequi Pilatonga maña.  
\v 12 Tayoeja Herodesja Pilatoi'ccu iyiccaye'su. Tsa'ma tsequi a'ta tsu ñoquicco'fa. 
\s1 Jesúsma fi'ttiye manda'cho 
\r (Mt 27.15-26; Mr 15.6-15; Jn 18.39–19.16) 
\p  
\v 13 Tsomba tse'i Pilatoja Chigama afa'su nasundeccuma, israe'su nasundeccuma, poiyi'cco a'ima'qque ttu'se boñamba  
\v 14 su: 
\p —Tiseja aindeccuma quejeccoen'su qquen supa qui va a'ima ñanga i'fa. Que'i caña'jen'ni gi tisema iñajampaña'ma que'i suqquia'caen egae tsincon'chove attembi.  
\v 15 Toya'caen Herodes'qque tisema iñajampaña'ma shacapave attembipa tisema toequi moen. Va a'ija jongoesuma'qque egae tsincombi tisema fi'ttiya'chove.  
\v 16 Tsa'cansi gi tisema ma'ppipa ccupaya. 
\p  
\v 17 Poi canqque'fa Chiga panshaen'cho injienge'cho fiestama panshaen'jenqui tsu na'su Pilatoja fae indiye'choma ccupaye atesu.  
\v 18 Jesúsma ccupaye qquen susi poiyi'cco a'i fae'ngatsse fundondo'e afa'fa: 
\p —¡Va a'ima fi'ttipa Barrabásma ccupaja! 
\p  
\v 19 Nane voeyi Jerusaléni tsa Barrabásja nasundeccuma joqquitssiañe in'jamba a'ima fi'ttisi tisema indipa piccopa an'bian.  
\v 20 Pilatoja toya Jesúsma ccupaye in'jamba ccase aindeccunga tsa'caen su.  
\v 21 Tsa'ma ti'tsse fundondo'e su'fa: 
\p —¡Avuja'cconga otija! ¡Avuja'cconga otipa fi'ttija! 
\p  
\v 22 Ccase, tres se Pilatoja aindeccunga su: 
\p —¿Jongoesune qui tisema fi'ttiye in'jan'fa? ¿Jongoesian tsu egaeta tsincon? Attembi gi jongoesuve egae tsincon'choma tisema fi'ttiya'chove. Tsa'camba gi tisema ma'ppipa ccupaya. 
\p  
\v 23 Tsa'ma aindeccuja iyicca'yepa quia'me fundondo'e afapa Pilatoma manda'fa cuintsu avuja'cconga Jesúsma fi'ttiye. Tsa'caen fundo'jepa Pilatoma patsu'fa.  
\v 24 Tsonsi Pilatoja Jesúsma fi'ttiye manda tise'pa in'janqquia'caen.  
\v 25 Tsomba indiye'cho Barrabásma, tsa nasundeccuma joqquitssiañe in'jamba a'ima fi'tti'su, tsama tiseja ccupa. Tsa'ma Jesúsma a'inga afe cuintsu tise'pa in'janqquia'caen tson'faye. 
\s1 Avuja'cconga fi'tti'cho 
\r (Mt 27.32-44; Mr 15.21-32; Jn 19.17-27) 
\p  
\v 26 Tsonsi sundarondeccu Jesúsma fi'ttiye angaji'fa'ni Simón, Cirene ande'su a'i, canqquenga ca'nisi cachuiccopa tisema indi'fa. Indipa manda'fa cuintsu Jesús avuja'ccoma andupa Jesús sepaccofae jiye.  
\v 27 Toya'caen tsain'bio a'i Jesús sepaccofae jiña'fa. Tsain'bio pushesundeccu'qque jiñamba ñombi'yepa ina'jen'fa.  
\v 28 Tsa'ma Jesúsja piyicamba tise'pama su: 
\p —Jerusaléni'su pushesundeccu, ñane i'na'fajama. Tsa'ma que'ine, que'i dushundeccune i'na'faja.  
\v 29 Nane jai'ngae napisi tsu a'ija qquen su'faya: “Avujatssiya tsu majan pushesu du'shu mechoaja. Nane majan du'shuve isumbi'ta, majan du'shuma chochoembi'ta avujatssiya tsu.”  
\v 30 Tsequi a'ta tsu a'ija paye in'jamba ccotta'cco tisenga amppipa a'tuye ñombi'ye'faya. Tsa'caen in'jamba tsu ccotta'ccoma qquen su'faya: “¡Inginga amppi otssija!”  
\v 31 Nane cuna ttemba re'riccoe si'ngenga ju'ruqquia'caen ñajan ja'ño vanaña. Tsa'ma quini'cco samba quia'me ju'ruqquia'caen qui que'ija ti'tsse'tsse vana'faya'cho. 
\p  
\v 32 Toya'caen faesu dos a'i, egae tsinconsundeccuma'qque Jesúsi'ccu fae'ngae fi'ttiye anga'fa.  
\v 33 “Tsove tsu'tta” qquen su'cho ccotta'cconga napipa tse'ttinga Jesúsma avuja'cconga otipa ccutsian'fa. Tsa dos egae tsinconsundeccuma'qque faesu avuja'cconga otipa ccutsian'fa fa'emajan Jesús tansinfanga, faesumajan Jesús pavefanga.  
\v 34 Ccutsiansi Jesúsja su: 
\p —Yaya, tise'pa'ye va egae tsincon'choma joqquitssianjan. Va aindeccuja tise'pa tson'jen'choma atesu'fambi. 
\p Toya'caen sundarondeccuja gana qquen cofe'je'fa Jesús ondiccu'je'cho sarupama attufaenccoye.  
\v 35 Aindeccuja can ccutsu'fa. Toya'caen nasundeccuja tisema afase'fa qquen supa: 
\p —Tiseja faesuma ccushaen. Cuintsu faesuma ccushaenqquia'caeñi tisuma'qque tsa'caen ccushaenjan. Tiseja ñoa'me Chiga in'jan'cho Cristota tsa'caen tsu canjaeña'cho. 
\p  
\v 36 Sundarondeccu'qque tisenga catsepa inzatssia o'fa tsaja tsa'ccuma cui'ña qquen co'fe'fa.  
\v 37 Toya'caen afasepa tsu qquen su'fa: 
\p —¡Queja ñoa'me israe'su na'suta tisuma ccushaenjan! 
\p  
\v 38 Toya'caen Jesús tsove omba'ttinga qquen tevaen'choma avuja'cconga ancaen'fa. 
\q1 Vaja israe'su na'su. 
\p  
\v 39 Fa'e egae tsincon'su Jesúsi'ccu pporotsse avuja'cconga otiye'choja Jesúsma afasepa su: 
\p —¡Queja ñoa'me Cristota Tisuma ccushaemba ingima'qque ccushaenjan! 
\p  
\v 40 Tsa'ma faesu otiye'choja tise faenga'suma iyu'upa su: 
\p —¿Dyombi ti qui Chiganejan? Que'qque va a'ia'caen paya.  
\v 41 Ingija egae tsincomba gi ja'ño vanamba tsane afepoen'jen'fa. Nane manda'cho mandaqquia'caen gi pa'faya. Tsa'ma va a'ija egae tsincombi. 
\p  
\v 42 Tsomba tiseja Jesúsma su: 
\p —Jesús, que na'suve da'ta ñama injan'jenjan. 
\p  
\v 43 Jesúsja tisema su: 
\p —Ñoa'me gi su, ja'ño a'ta qui ñai'ccu Chiga ñotssiani can'jeña. 
\s1 Jesús pa 
\r (Mt 27.45-56; Mr 15.33-41; Jn 19.28-30) 
\p  
\v 44 Tayo chiga tansia'ni pa'cco ande'ye sintsse coseqquia'ca'en da. Nane chiga ondu'setsse tsa'caen sintsse da.  
\v 45 Tsa'caen coejechiga da'je'ni Chiga etti'su Chigai'ccu cachuicco'je'cho cuartoma picco'je'cho sarupa'qque chittain ja.  
\v 46 Tsonsi Jesúsja quia'me afapa su: 
\p —¡Yaya, ña qquendya'pama gi quenga afe'je! 
\p Qquen susi tise qquendya'pa somboin jasi pa. 
\p  
\v 47 Tsonsi sundaro capitán tsa'caen da'choma attepa Chigama ñotsse afapa su: 
\p —Ñoa'me va a'ija egae tsincombi. 
\p  
\v 48 Tsain'bio a'i avuja'cconga fi'tti'choma atteye bopa Jesús tayo pasi attepa tise'pa utu'choma tssai'fa ñombi'ye'choma canjaeñe. Tsa'caen ñombi'yepa tise'pa tsaoni jaja'fa.  
\v 49 Toya'caen Jesús amigondeccu'qque biapieyi ccutsupa pa'tssima atte'fa. Majan pushesundeccu'qque, Jesúsi'ccu fae'ngae Galileane ji'chondeccu'qque tsendeccui'ccu fae'ngae ccutsupa atte'fa. 
\s1 Jesúsma a'tu'fa'cho 
\r (Mt 27.57-61; Mr 15.42-47; Jn 19.38-42) 
\p  
\v 50-51 Israe'su nasundeccu bopa Jesúsma fi'ttiye mandasi fa'eja tansintsse in'jamba fi'ttiye se'pi. Tsaja ño'a a'i, tise iniseja José. Judea ande'su Arimatea canqque'su a'i tsu. Tiseja in'jamba Chiga tisu aindeccuma ccushaemba mandaya'chove ronda'je.  
\v 52 Tise tsu Pilatoni japa Jesús ai'vove iñajan.  
\v 53 “Isupa angaja” qquen susi avuja'cco'ye andiamba totoa sarupai'ccu findipa ñoña'cho fattocco chango atu'ttinga ccuiña'fa. Tseccungaja faesu pa'choma toya a'tumbi'choa.  
\v 54 Sema'ma'qquia a'ta tayo napijisi toya tsu ñoña'jen'cho a'ta. 
\p  
\v 55 Tsonsi pushesundeccu'qque Jesúsi'ccu fae'ngae Galileane ji'chondeccu omboe jipa atu'ttima atte'fa. Ai'voma ma'caen ccuiña'choma'qque attepa  
\v 56 toequi Jerusaléni ja'fa. Tsa'caen japa pa'chombe ai'voma onjoenqque'su ñome'bama'qque ñoña'fa Jesús ai'voma onjoeñe. Manda'cho mandaqquia'caen sema'ma'qquia a'ta tseni ño'fá can'jen'fa. 
\c 24  
\s1 Jesús ccase qquendya'cho 
\r (Mt 28.1-10; Mr 16.1-8; Jn 20.1-10) 
\p  
\v 1 Cuna avujaquive a'tapa coe'je tseyi deji'ni tsesu pushesundeccuja atu'ttini ja'fa. Ñome'bama tayo ñoñamba anga'fa.  
\v 2 Napipa atte'fa picco'cho patuma tayo joqquitssian'choma.  
\v 3 Tsa'ma atu'ttinga ca'nimba Na'su Jesús ai'voma atte'fambi.  
\v 4 Toya dyopa asi'ttaén ccutsu'fa'ni dos a'i, ondiccu'je chhariccotssia'ma ondiccucho'chondeccu, fae'ngae fae'tti ccutsu'fa.  
\v 5 Tsama attepa pushesundeccuja dyopa puntssan ccutsu'fa. Tsa'ma tsa tsandiendeccuja tise'pama su'fa: 
\p —¿Jongoesie qui a'ija cansiama pa'cho ccuini ttatta'je'fa?  
\v 6 Tiseja va'tti can'jembi. Tayo tsu qquendyapa ja. ¿Injan'jen'fambi ti qui Jesús que'inga su'choma? Nane toya Galileani can'jemba tiseja conda  
\v 7 ma'caen Sefaccone Ji'cho A'i egae tsinconsundeccunga afeyeya'choma. Tsendeccu avuja'cconga tisema fi'ttisi tres a'ta pasasi ccase qquendyaya'chone conda. 
\p  
\v 8 Tsa'caen susi Jesús su'choma in'jamba  
\v 9 atu'ttine sombopa japa Jesúsma once shondosundeccunga conda'fa. Cca'i Jesús aindeccunga'qque pa'ccoma conda'fa.  
\v 10 María Magdalena, Juana, faesu María (tsaja Santiago chan) tise'pai'ccu jacan'su pushesundeccu'qque pa'ccoma attepa Jesúsma shondosundeccunga condase'fa.  
\v 11 Tsa'ma tsendeccuja pañamba “Aqquia su'cho” qquen in'jamba in'jan'fambi. 
\p  
\v 12 Tsa'ma Pedroja tse'faei'ccuyi jangipa buttopa atu'ttini ja. Ccarupa ppoicamba oppoen'cho sarupaveyi atte. Attepa ma'caen da'choma asi'ttaemba toequi tsaoni ji. 
\s1 Jesús tsaiqui'ye attian'cho 
\r (Mr 16.12-13) 
\p  
\v 13 Tsequi a'ta dos a'i Emaús canqqueni jayi'fa. Tsa canqqueja Jerusaléne once kilometro tsu.  
\v 14 Jayipa osha'cho voeyi tson'chone condase'je'fa.  
\v 15 Tsa'caen condase'je'fasi Jesúsja catsepa fae'ngae jayi.  
\v 16 Tsa'ma a'ija Jesúsma atte'ma tise've atesu'fambi.  
\v 17 Tsonsi Jesúsja tise'pama iñajampaña: 
\p —¿Jongoesune qui condasé jayi'fa? 
\p Tsa'caen iñajampañasi ñombi'yepa zu ccutsu'fa.  
\v 18 Tsa'caen zu ccutsupa fa'e, Cleofás, qquen inisecho'cho, tisema su: 
\p —Poiyi'cco biani can'jensundeccu tsu Jerusaléni jipa tseni voeyi tson'choma atesu'fa. ¿Queyi ti qui tsama atesumbi'choa? 
\p  
\v 19 Tsonsi Jesús tise'pama su: 
\p —¿Jongoesuma tsu tson'fa? 
\p Tsonsi tisenga conda'fa: 
\p —Jesús Nasarenoma tson'cho tsu. Tiseja Chiga Aya'fama afa'su. Osha'cho ñotssiave atesiamba osha'cho ñotssiave tson. Chiga tisei'ccu can'jensi poiyi'cco a'i tise've in'jan'fa.  
\v 20 Tsa'ma Chigama afa'su nasundeccu, ingi nasundeccu'qque, tsa Jesúsma indipa Na'su Pilatonga afe'fa cuintsu fi'ttiye. Pilato fi'ttiye mandasi sundarondeccu tisema avuja'cconga otipa fi'tti'fa.  
\v 21 Ingija asi'ttaemba in'jan'fa'a tiseja israendeccuma ccushaen'su. Tsa'ma ja'ño tres a'ta tsu pasa osha'cho tsa'caen tson'fa'cho.  
\v 22 Toya'caen ja'ño a'ta majan ingi'su pushesundeccu ccaningae tson'choma'qque inginga conda'fa. Ja'ño sinte'yi atu'ttini japa  
\v 23 Jesús ai'voma atte'fambi. Tsa'ma sefacconi'su Chigama shondosundeccuma attepa “Jesúsja tayo qquendya” qquen paña'fa. Tsa'caen tsu inginga conda'fa.  
\v 24 Majan ingi'su tsandiendeccu'qque atu'ttini japa pushesundeccu suqquia'caen atte'fa. Tsa'ma Jesúsma atte'fambi. 
\p  
\v 25 Tsonsi Jesúsja tise'pama su: 
\p —¡Tsosinambi'fa qui! Ñoa'me qui injama'cho shaca'fa osha'cho Chiga Aya'fama afasundeccu su'choma in'jañe.  
\v 26 Nane tsendeccuja tansintsse tsu conda'fa. Cristoja toya joccapitssia've dambi'te tsu tsa'caen osha'chone vanaña'cho. 
\p  
\v 27 Tsomba Moisés condase'choi'ccu ashaemba pa'cco Chiga Aya'fama afasundeccu Cristone condase'choma a'tatsse tise'panga atesian. 
\p  
\v 28 Emaús canqqueni pan napijipa Jesúsja ti'tsse joccani jaya'caen jayisi  
\v 29 tisema se'pi'fa qquen supa: 
\p —Tayo tsu sime. Coseya tsu. Ingi'ccu can'jenjan. 
\p Tsonsi Jesúsja tise'pa tsaoni japa ca'ni.  
\v 30 Tise'pai'ccu mesanga dyaipa Jesúsja panma isupa Chigama iñajan. Tsomba panma doñamba tise'panga afe.  
\v 31 Panma afesi tse'faei'ccuyi tise'pa tso'fe fettayeqquia'caen Jesúsve attepa in'jan'fa. In'jan'fasi Jesúsja atte'masiave dapa ja.  
\v 32 Tsonsi tisupanaccu condasecco'fa: 
\p —¿Injama'cho tsosipie avujatssi'fambi ti gi tiseja tsaiquinga ingi'ccu condase'jesi? Nane Chiga Tevaen'jema inginga atesian'jensi gi ñoa'me avuja'fa. 
\p  
\v 33 Tse'faei'ccuyi jangipa toequi Jerusaléni shanda'fa. Jipa Jesúsma once shondosundeccu faesundeccui'ccu fae'ngae can'jen'choma atte'fa.  
\v 34 Tsonsi Jesúsma shondosundeccuja tise'pama su'fa: 
\p —Ñoa'me tsu Na'suja ccase qquendya. ¡Simónga tsu Tisuma attian! 
\p  
\v 35 Tsonsi Emaús can'jensundeccu'qque poiyi'cconga condase'fa Jesús tise'pai'ccu tsaiqui'ye ja'choma. Toya'caen Jesús doñamba afesi in'jan'choma'qque condase'fa. 
\s1 Shondosundeccunga attian'cho 
\r (Mt 28.16-20; Mr 16.14-18; Jn 20.19-23) 
\p  
\v 36 Tsa'caen condase'je'fa'ni Jesús tise'panga attiamba enttingenga ccutsupa su: 
\p —Dyombe can'faja. 
\p  
\v 37 Poiyi'cco dyopa can'boen'fa aya qquen in'jamba.  
\v 38 Tsa'ma Jesúsja su: 
\p —¿Micomba qui dyo'fa? ¿Micomba qui injama'choni asi'ttae'ma toya in'jan'fambi?  
\v 39 Ña tive, ña tsu'ttema'qque can'faja. Ñañi gi. Ñama pporaemba can'faja. Camba qui in'jan'faya ñajan nama, tsu'ttama'qque an'bian. Ayaja tsa'caen an'biambi. 
\p  
\v 40 Qquen supa tise tive, tsu'ttema'qque canjaen.  
\v 41 Tsa'ma tsendeccuja avuja'ma toya in'jañe osha'fambi. Toya asi'ttaen'jen'fa'ni Jesúsja su: 
\p —¿Aña'chomanda ti qui an'bian'fa? 
\p  
\v 42 Tsonsi avu san'jama, tuño cuñajun'choma'qque afesi  
\v 43 isupa poiyi'cco caña'jen'ni an.  
\v 44 Tsomba Jesúsja tise'pama su: 
\p —Ña toya que'i'ccu can'jeinte gi ja'ño tsoña'chone conda'a. Nane Moisés manda'cho, Chiga Aya'fama afasundeccu tevaen'jen, settapoen'cho tevaen'jen'qque ñama tsoña'chone condase'fa. Tsa tayoe ña que'inga condase'choma tsu ja'ño tson'fa. 
\p  
\v 45 Tsomba tise'pa injama'choma in'jaen cuintsu Chiga Tevaen'jema in'jan'faye.  
\v 46 Toya'caen tsu su: 
\p —Tayo tsu tevaen: Ccushaen'su Cristoja vanamba papa tres a'tangae ccase qquendyaya'cho.  
\v 47 Toya'caen tsu tevaen: Jerusaléne ashaemba tsu Cristone ñotsse condase'choma poi ande'su aindeccunga condaseya'cho cuintsu paña'faye. Pañamba tise'pa egae tsincon'choma chi'gapa Cristove in'jan'ninda tiseja a'i egae tsincon'choma joqquitssiaña.  
\v 48 Que'ija pa'cco vama camba cca'indeccunga condase'faya'cho.  
\v 49 Ja'ño gi ña Yaya afeya'cho qquen su'choma que'inga afeya. Tsa'ma Jerusaléni ronda'je'faja sefacconi'su Chiga Qquendya'pa que'ima in'jaeña'ngae. 
\s1 Jesús sefacconi ansunde'cho 
\r (Mr 16.19-20; Tson 1.6-11) 
\p  
\v 50 Tsomba sombopa Jesúsja tise'pama Betaniani angaji. Tsa'caen angajipa tise tivema sefaningae yasapa Chigama iñajan cuintsu Chiga tisema shondosundeccuma fuiteye.  
\v 51 Toya tsa'caen iñajan'jen'ttie Jesúsja tise'pama catipa sefacconi ansundin ja.  
\v 52 Tsa'caen jasi shondosundeccuja Jesúsne ñotsse afapa ñoa'me avujapa toequi Jerusaléni shanda'fa.  
\v 53 Poi a'ta Chiga ettini can'jemba Chigama ñotsse afa'je'fa. 
\p Tsangaeyi.