\id ROM - Colorado [cof] NT (Ecuador) - 1990 (2012 bd. ) 
\h Románolachi 
\toc1 San Pablo Románolachi ereca jun pila 
\toc2 Románolachi 
\toc3 Rm 
\mt1 San Pablo Románolachi 
\mt2 ereca jun pila 
\ip \bd Caque fiqui:\bd* Pablo in pilaca chutenue Roma pueblobi chumin Jesucrístobe penenaminlaca micarichun. (Jun mate Roma pueblori románolachi capital pueblo jominue. Amana mate Italia to capital pueblo joe.) Junni Páblori Rómabi micaritumin jominue; uyanla micarito yalaca Jesucrístobe cayaisa carica jominlanue. Junni Páblori ina Rómaca jino tenca canato, yalachi in pilaca quito erenue. Junni Diosichi Tenca yaca pila chutesa carinaminue yape in pilanan Diosichi Pilabi pejosa. 
\ip In pilabi Pablo doctrinaca tuca micarimin joe. Jerale tsachila jutsa quiminla joeque, jun tenchi casticaintsan joeque, tenca mánta sen tenca ino podeituntsan joeque, Jesucrístobe cayaitosiri se lono jolajoyoeque micarimin joe. Pablo Corinto pueblobi chuto in pilaca chutenue wata 57 tsansite. 
\c 1  
\p  
\v 1 La Pablo in pilaca Jesucrístochi tsachilachi erechun quinayoe. La Jesucrístochi peyun cuwenta joyoe. Laca yabe cayaisa tie yape yachi mantá tan josa. Laca wentee Diosichi sen fiquica micarimin josa tsachilaca Diosi se larinun fiquica.  
\v 2 Matu tote Diosichi mantate paminla yachi pilabi chuteto, jun sen fiquica cuenta polarilaquinue. Jun mate Diosi paca jominue tsachilaca se larino joyoeque.  
\v 3-4 Diosichi mantate paminlari yachi Naoca cuenta quilaquinue. Yari tsachila tala miya Davichi alica jominue. Junni tsachi jotonan, Diosichi Nao patsa jominue. Ya Nao puyaca jominca Diosichi sonban Tenca sen joto yaca mansoncarinue. Junbe miintsan joe Diosichi Nao joeque. Ya Naori chiquilachi Miya Jesucristo joe.  
\v 5 Yari chiquilaca laquirato, chiquilachi mantá cuwanue jerale tote tsachilaca micarilaquisa. Yachi mantá tanla joto, tsachilaca micarinola joyoe yape yabe cayaito yaca meralaquisa.  
\v 6 Nulacanan yabe cayailaisa tica jonan, nulanan Jesucrístochi tsachila jolajoe. 
\p  
\v 7 In pilaca Roma pueblobi jerale Diosichi tsachilachi erechun quinayoe. Diosi nulaca laquirato yachi sen tsachila jolajosa tie. Junni chiquilachi Apa Diosibenan, Miya Jesucrístobenan rocainayoe yape nulaca laquirato cuidailaisa yape wepanatuto pansi chularasa. 
\s1 Pablo Rómaca jino muquee tinunca 
\p  
\v 8 Casale nulachi tenchi Diosibe acradeseinayoe. Jerale tote nulaca mera joe Diosibe cayaito yabe penenalaraeque. Jun tenchi Jesucrístochi mantate Diosibe acradeseinayoe.  
\v 9 Junto la numasitiya Diosibe rocainato, nulachi tenchinan duque perocaimin joyoe. Diosi mirae la nulachi tenchi rocaimin joeque. Lachi jera tencabi Diosibe mantaito, yachi Naoca paca sen fiquica micarimin joyoe. 
\p  
\v 10 Junni yabe duque rocaimin joyoe nulaca quirabi jichun. Diosi tinari, niya quiraquetiya duque wanhitonan, nulaca quirabi jiyanae.  
\v 11 Nulaca quirano duque munarayoe ayudaichun. La nulaca ayudaino munarayoe yape Diosichi Tenca nulaca ticatiya quino poden suwasa. Nulachi tencabi fe sonban jolajosa ayudaino munarayoe.  
\v 12 Junni lacanan nulari ayudailaichunae. Labe nulabe layaito Diosica tennato, chiquila tala peayudaicaato chumin jocaichunae. 
\p  
\v 13-14 Junni acola, soquila, nulacanan pemirasa tenjae duque ne nulachica jino muquinaminheque. Tsan josanan in fecári podeica itomin joanue. La weyan israelita itonlaca ayudaica joto, nulacanan ayudaino muquee. Junni tsanque ayudaino mantá tayoe. Griégolaca, uyanlaca, tenca tanlaca, tenca itonlacanan ayudaino mantá tayoe. Junto nulachicanan jino muquiminhe nulacanan ayudaibi.  
\v 15 Nula Roma pueblobi chuminlacanan Jesucrístoca paca sen fiquica micarino duque muquee. 
\s1 Diosichi sen fiquibe se lono jonunca 
\p  
\v 16 Jesucrístoca paca sen fiquica lari luratiyoe. Jun fiquiri sonban jonan, Diosi jutsa quiminlaca junbe se larimin joe. Jerale jun fiquica quereiminlaca se larimin joe casale israelítalaca, jun benete israelita itonlacanan.  
\v 17 Jun fiquica meráto, tsachila miintsan joe niya quiraque Diosi tsachilachi tencaca sen suwamin jonunca. Diosi yabe cayaiminlacari sen jolajoe tichunae. Diosichi Pilabi junca itsanque chuteca joe: Diosibe cayaiminlaca se tichunaeque chuteca joe. Yalasiri sonnalarachunaeque chuteca joe. 
\s1 Tsachila culpa tanla jonunca 
\p  
\v 18 Diosi tuca pato, tsachilachi jutsaca pa joyoe tica joe. Yala seitonla joto, ti tsarasi jonunca miratonan, meramiyatuminla joe.  
\v 19 Ti tsarasi jonunca ura miralarae. Tsachila Diosica mirano podeinunca yalanan yalachi tencabi seque miralarae. Diosi yalaca junca miisa carie.  
\v 20 Diosi to quinunle nechi tsachilari yaca miino poden jolajoe. Diosi jera quica jonunca quirato, Diosi niyan jonunca miino poden jolajoe. Diosi patsacari quirano podeituto, ya quica jonuncari quirato miino poden jolajoe. Ya Diosi joeque, ya numatotiya sonban joeque miino poden jolajoe. Junca mirato, tsachila culpa polarino podeilaituchunae. 
\p  
\v 21 Diosica duque se tintsan joe. Ya tsachila mantimini Diosica miratonan, yaca natiya se tituminlae. Yabe acradeseituminlae. Jun tenchi culpa polarino podeilaituchunae. Epele tenca cato, tenca iton joto, miiton iminla joe.  
\v 22 Tsachila duque mirayoe tilatinatonan, tenca iton iminla joe.  
\v 23 Diosi puyatumin joto, tsaracari duque sen joe. Junni ya duque sen jominca duque se tintsan joe. Ya tsachila mantimini puyatumin Diosica telaquepoto, puyaminlaca se timinlae. Tsachilaca, pichulaca, pinica, wala, mese, susu, ticatiya Diosica cuwenta se timinla joe. 
\p  
\v 24 Junni Diosi tsanquiminlacanan telaquepomin joe yape yalachi tenca munate jelenquira quinilaquisa. Yalari yalachi puca tala seiton jelenquira quiminla joe.  
\v 25 ¿Diosica numatotiya se tintsan jotun? Ya jera quimin joe. Junni yala seitonla mantimini Diosichi tsarasi fiquica telaquepoto, nene fiquica quereiminla joe. Diosi piyanleca quimin jonan, yabe rocaintsan joe. Junsi yachi tenchi ticatiya quintsan joe. Aman ya seitonla mantimini Diosica telaquepoto, Diosi quica junbe rocaito, yachi tenchi titiya quiminla joe. 
\p  
\v 26 Jun tenchi Diosi yalacanan telaquepomin joe yape yalachi tenca munate nenalarasa. Tsantuntsan jominue. Jelenquira quiminla joe. Sonalari unilalabe nenatuto, sonala talanan munaticaito seiton quiminla joe.  
\v 27 Unilalanan sonalabe nenano jotonan, sonalabe nenatuto, unilala talanan munaticaito seiton quiminla joe. Tsanquiminlari yucapiyantsan joto, tencachiquenan yucapiyaminla joe. 
\p  
\v 28 Diosica telaquepochi timinlaca Diosinan telaquepomin joe yape tenca iton joto seiton quinilaquisa.  
\v 29 Duque seiton iminla joe. Uyan sonabe nosa seitonque nenaminla joe. Jutsa quiminla joe. Uyanlachi cosalaca munaito quiraminla joe. Papunla joe. Uyanlaca duque paiminla joe fe jotusa carichique. Pa tala nenato, tsachilaca totenaminnan quiminla joe. Encanaquin, uyanlaca nene pan,  
\v 30 yucacuran, quiminla joe. Diosica pa jolajoe. Fe jolajoyoe tito, merára timinla joe. Seiton quinocasiri tenfeminlae. Apalaca, ayanlaca merátuminla joe.  
\v 31 Tenca itonla joto, nene paminla, páca polarituminla joe. Laquiratuminla joto, padeseiminlacanan laquiratuminla joe.  
\v 32 Junni tsanlaca Diosi duque seitonla joe timin joe. Totentsanla joe timin joe. Diosi yalaca tsantimin joe. Yala mantimini junca miratonan, tsanquiniquiminla joe. Juntonan tsannaminlaca weyanlari quirato, se jonilajoe timinla joe. 
\c 2  
\s1 Diosi tsachilaca tuca miino jonunca 
\p  
\v 1 Tsan josanan, nula weyanla itsantiminla joe: Tsanque seiton quinaminlaca duque casticaquintsan joe timinla joe. Yalaca duque culpa quichi timinla joe. Tsantitulajona! Uyanlaca culpa quinatonan, nulanan jun tsanquenan jutsa quiminla joe. Uyanlaca culpa quinato, tencachiquenan culpa ilainae. Nula culpa polarino podeilaitue.  
\v 2 Diosi mantimini jutsa quiminlaca culpa quinato, tuca miitobi culpa quimin joe.  
\v 3 Junni Diosi tuca miitobi culpa quimin jonari, nulanan culpa ilaichunae. Nulanan seiton jotonan, uyanlaca culpa quiminla joe. Tsanquinun tenchi Diosiri duque sen joto nulacanan culpa quichunae. 
\p  
\v 4 Uyanlaca culpa quinatonan, jutsa quiminla joe. Tsan josanan, Diosi duque sen joto, nulaca castica caquitue. Pa jotonan wantainae. Junni epenan wantaitue. Nula jutsa quinunca telaquepoto, casan tala tenca mancasa tinae. Jun tenchi nulaca casticaquituto wantainae. Nula mantimini Diosi wantainaminca yape tito tennatuminla joe.  
\v 5 Junni Diosica tennatuto, casan tenca mancatutori, junto fécari duque culpa ide ide jinilaichunae to yucapiyarino ma fecári. Diosi jun mate tsachilaca tuca miichunae. Junto jun mate nantari wantaituto, nulaca duque paito casticaquichunae. 
\p  
\v 6 Diosi jeralela ti quica jonunca mirato, yalaca niyaque quintsan jonunca miito quichunae.  
\v 7 Weyanla peleituto senla joe. Yala duque tenfeminla joe Diosichi cale sen jochun. Diosi yalaca tsaracari sen suwanan, sen jolajoe tin, tisa tenfeminla joe. Diosi yalaca numatotiya sonnasa carisa tenfeminla joe. Junni Diosi yalacari numatotiya sonnato polesa carichunae.  
\v 8 Weyanla mantimini pa muquintsanla joe. Diosichi tsarasi sen fiquica merátuto, seiton fiquica meráminla joe. Yalacari Diosi duque paichunae.  
\v 9 Jerale seiton quiminlaca casticaquichunae casale israelítalaca, jun benete uyanlaca.  
\v 10 Sen quiminlacari tsaracari sen suwato, yalaca sen jolajoe tichunae. Yalaca pansi chularasa carichunae. Casale israelítalaca, jun benete uyanlacanan tsanquichunae. 
\p  
\v 11 Israelítala, israelita itonla, titiya Diosibe jun tsannan jolajoe.  
\v 12 Matu tote Moisés Diosichi mantaca chutenue. Junni israelítalari jun mantaca miraminlae jonan, Diosi yalaca jun mantate miichunae culpa talaranunca o itolajonunca. Uyanla jun mantaca miratunan, Diosi jun mantaca tennatuto yalaca miito casticaquichunae.  
\v 13 Israelítala Diosichi mantaca miratonan, titiya quino cajolajoe. Jun mantaca miratonan meralaquitunari, Diosi yalaca sen jolajoe tituchunae. Jun mantaca meráminlacari Diosi sen jolajoe tichunae.  
\v 14 Israelita itonla Diosichi mantá chutecaca miitolajoe. Tsan josanan, weyanlari tenca mántanan Diosichi mantate nenamin jolajoe. Junni mantá chutecaca miitotonan, yalachi tencabi Diosi niyaque nenasa munaranunca miralarae.  
\v 15 Yalari ti quilaquinanunca quirato tenhintsan joe yalachi tencabi miraminla jonunca. Diosichi mantá chutecaca miratutonan, yalachi tencabi miralarae Diosi tica munaranunca. Junto seque nenatori, seque nenalarayoeque tenhilaichunae. O seitonque nenatori, seitonque nenalarayoeque tenhilaichunae. 
\p  
\v 16 Junni miino mate Jesucristo tsachilaca miichunae sen jolajonunca o seiton jolajonunca. Diosichi mantate yalaca miichunae. Tsachila nosa seiton quicaca jun mate jera miintsan jochunae. La micarinanun sen fiquibe tsachilaca miichinae. 
\s1 Mo Diosichi tsachila jonola jonunca 
\p  
\v 17 Israelítala tala pachinayoe. Israelítala Diosichi mantá chuteca jonunca talarayoe. ¿Diosi israelítalaca wenteca joco? yape yachi tsachila jolajosa. Junni Diosi wenteca jonun tenchi nula itsanlatichunae: Israelítala joto, fe sen jolajoyoe tilatichunae.  
\v 18 Nula miralarayoe tilatichunae Diosi tsachilaca niyaque nenasa tinanunca. Yachi mantá chuteca jonunca mirato, ti sen jonunca, ti seiton jonunca jera mirato, sencari quintsan joe timinla jochunae.  
\v 19-20 Weyan tsachila tenca iton joto, quirano podeitonla cuwenta epele nenaminla jochunae. Junni nulari yalaca mantucarino podeilaiyoe tilatichunae. Weyanlanan miitoto, yalachi tencabi nemen cuwenta jolajochunae. Junni nulari yalachi tenca tenchi tseno cuwenta jolajoyoe latichunae. Diosi yachi mantá chutesa carito, ¿tica jera mirano jonuncatiya jun pilabi chutesa carinuco? Junni jun pilaca tato, jeralelaca seque micarino podeiyoe tilatichunae. 
\p  
\v 21 Junni nulari uyanlaca jun pilaca micarinato, nula tencachiquenan jun pilabe miinola joe. Uyanlaca tarinlaquitusa micarinatonan, nulanan tsanminla joe.  
\v 22 Uyanlaca leyan sona talaratusa micarinatonan, nulari leyan sona talarae. Epe diosi joe tinun moldeca seiton joe titonan, jun moldechi cuwanacaca tarinminla joe.  
\v 23 Diosichi mantá chuteca junca mirato fe sen joyoe tinatonan, jun mantaca merátuminla joe. Tsanque nenato, nulari Diosica lucariminla joe.  
\v 24 Diosi yachi pilabi junca chutesa carinue. Itsantica joe: Israelita itonlari nula seiton quinaminlaca quirato, junto yala Diosichi tsachilaca seitonla joe tito, Diosicanan seiton patariminla joeque chuteca joe. Nulachi tenchi Diosica seiton patariminla joe. Nula tsanque Diosica lucariminla joe. 
\p  
\v 25 Chiquila israelítalari quidoca poraicala joyoe. Israelítalachi mite quidoca poraica joto Diosichi tsachila jolajoyoe timinla joyoe. Junni meralaquede! Quidoca poraica joto, Diosichi mantá chuteca jonunca merátori, Diosichi tsachila jolajochunae. Tsan jotonan, jun mantaca jera merátutori, yachi tsachila itolajochunae quidoca poraica jototiya.  
\v 26 Quidoca poraituca junlari jun tsannan jolajochunae. Diosichi mantate nenatori, Diosichi tsachila jolajochunae quidoca poraicala cuwenta.  
\v 27 Nula Diosichi mantá chuteca junca tatonan, quidoca poraicala jotonan, jun mantaca merátuminlae. Uyanla quidoca poraitucala jotonan, Diosichi mantaca meráto nenaminlae. Junni yalari nulaca quirato, seitonla joe tilatichunae. 
\p  
\v 28-29 Diosichi tsachila iyoe tito, jamoleri tsantuntsan joe. Tencabi Diosichi tsachila jonola joyoe. Matu mate Diosi israelítalaca mantanue quidoca porailaisa. Junto yalachi tsachi pucabi uyan quiran suwachun tsanque mantatue. Te, casan tenca joyoeque tenhichun quidoca porainola jominue. Tsachi pucari canbiyaino itominue; tenca canbiyaino jominue. Tsanhiminlaca Diosi sen joe tichunae tsachilari yalaca seitonla joe tinasatiya. 
\c 3  
\p  
\v 1 ¿Junni ti quichun quidoca poraino jun? ¿Ti quichun israelita jono jun? ¿Israelita jono epe jun?  
\v 2 Te, epe itoe. Diosi israelítalaca wenteto yachi fiquica chiquilachi cuwaca joe uyanlaca micarilaquisa. Jun tenchi israelita jono fe se joe.  
\v 3 Weyan israelítala mantimini Diosica quereitumin jominlanue. Tsan josanan yala quereitumin josanan, Diosiri quereitunun patitue.  
\v 4 Diosi quereinun joe. Jerale tsachila nene punla josatiya, Diosica quereinun joeque pantsan joe. Diosi yachi pilabi junca pato itsanque chuteca joe: 
\q1 Diosi, nu pacaca meráto, nuca sen joe tilatichunaeque chuteca joe. 
\q1 Nuca culpa quechique tenfeminlaca fe lochunaeque chuteca joe. 
\m Diosichi Pilabi tsanque chuteca joe. 
\p  
\v 5 Junni tsan jonari, tsachila seitonque nenalaranan, Diosi duque sen joeque fe miintsan jochunae. Junni tsachilachi mite epe fiquica pachinayoe: Tsachila seitonque nenato, Diosica ayudaimin patilaichunae. Uyanlari seiton quinaminlaca quirato tenhilaichunae Diosi sen joeque. Tsanque seiton quinato, ayudaimin patinola jonhoe. ¿Junni tsan jochunan? Te, numanan tsan itochunae. Meralaquede! Tsan jomanpari, Diosi tsachilaca casticaquino podeino itono jomin jonhoe. Casticaquinatori, Diosica ayudainun tenchi casticaquino patino jomin jonhoe. Junni Diosinan seiton patino jomin jonhoe.  
\v 6 Junni tuca pato, Diosi numanan seiton patituchunae. Diosi casticaquinato, yanan seiton patino jomanpari, tsachilaca natiya miino podeituno jomin jonhoe mo culpa tanunca. 
\p  
\v 7 Junca manca epe fiquinan pachinayoe: Tenca calaquede! Tsachi manca nene pánari, junni Diosi jun tsachica duque fe sen jochunae. Tsachila junca tenhito, Diosica duque sen joeque fécari tenhilaichunae. Junni ya tsachiri nene panun tenchi uyanla Diosica fe se tilatichunae. Jun tsachi nene pacachi, Diosica ayudainayoe tichunae. Junni ¿tsanque ayudaiminca niyaito Diosi culpa quino podeichunan? tichunae.  
\v 8 Junni tsan jomanpari, chiquila seiton quinola jominla joinhie yape Diosi fe sen patisa. Weyanlari laca yucacurato seiton patarichique, la tsanquisa micarimin joe timinla joe. Diosi tsantiminlaca casticaquinato, seque quinachunae. 
\s1 Jeralela culpa talaranunca 
\p  
\v 9 ¿Junni niyan tintsan jun? Israelita jono se jonari, ¿junto chiquila israelítala joto uyanlaca fe sen jolajowan? Te, natiya fe sen itolajoyoe. Israelítala, israelita itonla, jeralelanan jutsa quiminla joyoe. Junca numa tuca payoe.  
\v 10 Diosichi Pilabinan junca itsanque chuteca joe: 
\q1 Monantiya sen itolajoe; nin mancatiya sen itolajoe. 
\q1  
\v 11 Monantiya Diosica miratulajoe; monantiya Diosica miichique tenfetuminla joe. 
\q1  
\v 12 Piyanlela topiyaca nenalarae; jeralela seiton minuca jicala joe. 
\q1 Monantiya seque quitumin jolajoe; nin mancatiya seque quitumin jolajoe. 
\q1  
\v 13 Menaranun forochi nechi peten puban lananun cuwenta, jun tsanquenan yalachi fiqui forochi nechi seiton fiqui lariminla joe. 
\q1 Encanato paminla joe; pini janpechi yucapiyarinun cuwenta, yalari yalachi fiquichi yucapiyariminla joe. 
\q1  
\v 14 Duque yucaquiminla joe; pa tala paminla joe. 
\q1  
\v 15 Tsachilaca toteno munaraminla joe. 
\q1  
\v 16 Seiton quito, padeseisa carito nenaminla joe. 
\q1  
\v 17 Pataatuto nenano miitonla joe. 
\q1  
\v 18 Diosica jelerato respetaituminla joe. 
\m Diosichi Pilabi tsanque pila chuteca joe.  
\v 19-20 Junni jun fiqui israelita itonlacasiri patue. Israelítalacanan pánae. Jun fiquica Diosichi Pilabi chuteca joe. Ya pila Diosichi mantá joe. Junni Diosi jun mantá chutecaca israelítalachi cuwanue. Tsan joto, jun fiqui israelítalacanan pánae. Tsan josanan, Diosichi mantá chutecaca man fiquiman pachinayoe: Jun mantaca meránun tenchi se lono itoe. Jun mantá chutecaca miito seituminlayoe. Jutsa quiminla joyoeque miiminlayoe. Monantiya jun mantaca meracachi se lolaituchunae. Junto monantiya Diosica beco pano podeilaituchunae. Diosi jeralelaca miino mate, jeralela culpa talarae tichunae. 
\s1 Jesucrístobe cayaito se lonola jonunca 
\p  
\v 21-23 Amana Diosi tsachilaca uyan quiraque se larichunae. Matu mate Diosichi mantate paminla yachi mantaca chutenato, junca pila chutelaquinue. Itsanque joe: Jerale Jesucrístobe cayaicalaca se larichunae. Junni Diosichi mantá chutecaca meracachi se lono itoe; Jesucrístobe cayaito se lono joe. Jeralela jutsa quiminla joto, monantiya Diosi cuwenta sen itoto, jeralela jun tsanquenan manse lonola joe Jesucrístoca quereitori.  
\v 24 Jesucristo puyato, chiquilachi jutsaca jera piyarichun pacara quinue. Jun tenchi chiquila tinantiya quitusanan, Diosi chiquilaca laquirato se larimin joe. 
\p  
\v 25 Jesuca caquereituminnan, jutsa quimin jominlayoe. Junni Diosi ya jutsaca casticaquitue. Duque wantaimin joto, chiquila ya jutsa quinasa, Diosi quiraniquinaminue. Junto Diosi chiquilachi jutsaca telaqueponiquimanpari, Diosinan seiton patino jomin jonhoe. Junto Jesucrístoca erenue yaca quereiminlachi jutsaca yachi asanchi piyarisa.  
\v 26 Amana junca quirato, Diosica miintsan joe sen joeque. Tsanque Diosi sen joto, Jesube cayaiminlacari sen jolajoe timin joe. 
\p  
\v 27 Diosi chiquilaca tsanque se larimin jonari, ¿junni chiquilari ti quichun sen jolajoyoe ticaichunan? Te, tsantino podeituntsan joe. Tenca mánta seque quinun tenchi Diosi chiquilaca sen jolajoe tino jomanpari, junni chiquilanan sen jolajoyoe tino jominla joinhie. Tsannan Jesucrístobe cayainun tenchi chiquilaca se larino jonari, chiquilari natiya tsantino podeilaitiyoe.  
\v 28 Junca jera tenca cato miilaiyoe cayaito se lonola joyoeque. Jesucrístoca quereinun tenchi se lonola joyoe; Diosichi mantá chutecaca meránun tenchi se lonola itoyoe. 
\p  
\v 29 ¿Diosi israelítalachisiri Diosi jun? ¿O jeralelachi Diosi jotun? Jeralelachi Diosi joe.  
\v 30 Junni mancasiri Diosi jeralelaca se larimin joto, jeralelaca jun tsanquenan se larichunae. Israelítalabenan, israelita itonlabenan Jesucrístobe cayaitosiri se lolaichunae.  
\v 31 Tsan jotonan, Jesucrístobe cayaito Diosichi mantaca epe suwalaquitiyoe. Diosichi mantaca fécari merása carinayoe. 
\c 4  
\s1 Abraham Diosica quereinun tenchi sen joe tinunca 
\p  
\v 1 In fiqui tsa jonari, ¿chiquilachi matu to tata Abrahanca niyan tintsan jun?  
\v 2 Abrahanni tencachique tenfeto seica jomanpari, ya fe poden joyoe tino podeino jomin jonhoe. Tsan jotonan, Diosichi cateri tsantino podeituntsan jomin jonhoe.  
\v 3 Junni Diosichi Pilaca quirato, miilaide! Diosichi Pilabi Abrahanca pato, itsantinue: Abraham Diosibe cayainun tenchi Diosi yaca sen joe tinueque chuteca joe.  
\v 4 Jana trabajaquiminlaca tenca calaquede! Yalachi pacara quinari, ya calaca epe cuwaca itochunae. Cuwanonan jochunae.  
\v 5 Trabajaquituminlachinan cala cuwatori, ya calaca epe cuwaca jochunae. Junni Diosibe se inori jun cuwentanan jochunae. Diosi seitonlacatiya sen jolajoe tichunae yabe cayailainari. Tencachique seino tenfetuminnan, Diosibe cayaiminlaca sen jolajoe tichunae epe cuwaca cuwenta. 
\p  
\v 6 Matu to miya Davinan Diosichi Pilaca chutenato, junca tsanquenan panue. Tsachila tencachique seinoca tenfetuminlaca pila quee. Tenfetuminlacanan Diosiri sen jolajoe tinari, yalari duque son jolajochunaeque pila chutenue.  
\v 7 David itsanque pila chutenue: 
\q1 Seiton quiminlacanan Diosi perdonainari, son jolajochunae. 
\q1 Jutsa quiminlacanan jutsaca piyarinari, son jolajochunaeque chuteca joe. 
\q1  
\v 8 Miya Diosi jutsa tenchi culpa quituca junlari son jolajochunaeque chuteca joe. 
\m David tsanque pila chuteca joe. 
\p  
\v 9 Junni David tsantitori, ¿molaca tsantinun? ¿Quidoca poraica junlacasiri tsantinun? ¿O uyanlacanan petsantinun? Abraháncanan tenca mancalaquede! ¿Abraham Diosibe cayainun tenchi Diosi yaca sen joe tinue tituan?  
\v 10 Junni Diosi yaca sen joe tino mate quidoca caporaica itominue. Caporaica itoncanan Diosi sen joe tinue.  
\v 11 Junto Abraham quidoca caporaitoncanan Diosi sen joe titobinan, quidoca poraisa mantanue yape ya Diosichi sen tsachi joeque miintsan josa. 
\p Tsanque Diosi Abrahanca sen joe tinue yape jeralela jun tsanquenan sen joe tinunla josa. Israelita itonlari Abraham cuwenta jolajoyoe latichunae. Quidoca poraica itotonan, Diosibe cayaito, Abraham cuwenta jolajoyoe tilatichunae. Jun tenchi Diosi Abrahanca sen joe tinun cuwenta chiquilacanan sen jolajoe tichunae tilatichunae.  
\v 12 Junni israelítalanan Abraham cuwenta jolajoyoe tilatichunae. Quidoca poraicala joto, Abraham cuwenta poraica jolajoyoe tilatichunae. Abrahanni caporaica itotonan Diosibe cayaimin cuwenta, chiquilari numa poraicala joto Diosibe cayailaiyoe. Jun tenchi Diosi Abrahanca sen joe tinun cuwenta chiquilacanan sen jolajoe tichunae tilatichunae. Tsanque israelítalanan, israelita itonlanan Abraham cuwenta jolajochunae. 
\s1 Abraham Diosica quereimin jonunca 
\p  
\v 13 Junni Diosi Abrahanbe tuca pato, jerale toca yachi cuwano joyoe tinue. Yachi alicalachinan jerale toca cuwanae tinue. ¿Junni Diosi niyaito tsantin? Abraham tenca mánta Diosichi mantá chutecaca meránun tenchi sen joe tito tsantitunue. Diosibe cayaimin jonun tenchi tsantinue.  
\v 14 Diosiri ticatiya epe cuwano joyoe titori, ¿mochi cuwano se jochunan? Tenca mánta Diosichi mantá chutecaca jera meráno podeiminlachisiri cuwano joyoe tinari, ¿se jochunan? Numanan seitochunae. Diosi tsantinari, Diosibe cayaiminla tinantiya iton purailaichunae ya mantaca merátuminla joto. Junni yachi mantá chutecaca meráchi timinlanan, yalanan tinantiya iton purailaichunae jun mantaca jera merátuminla joto. Junni tsanque meráminlachi epe cuwano joyoe tinari, epe fiqui patichunae.  
\v 15 Ti mantá jonatiya, tsachila ya mantaca jera merátuminla manpatilaichunae. Junni ya mantaca cuwaminni pa jochunae merátuminla jonun tenchi. Ya mantá tenchi culpa patituchun, ya mantacanan piyarino jochunae. 
\p  
\v 16 Jun tenchi Diosi ticatiya epe cuwano joto, itsantinue: Mantá chutecaca meráminlachisiri cuwano itoyoe tinue. Diosibe cayaiminlachiri cuwanae tinue tsachilaca laquichisiri cuwachun. Tsan jotori, jerale Abrahanchi alicalari tsarasi cano podeilaichunae. Diosichi tsachilari weyanlari israelítala joto Abrahanchi tsa alicala jolajoyoe. Weyanlari Abraham cuwenta Diosibe cayaiminla joto, yachi alicala cuwenta jolajoe. Tsanque jeralela Abrahanchi alicala patilaiyoe. 
\p  
\v 17 Aman Diosi yachi pilabi junca chuteca joe. Junni jun pilabi Abrahanbe pato, nuca duque serawono joyoe tinue. Aman Abrahanni Diosibe cayaica jonan, Diosichi cate chiquilanan yachi alicala jolajoyoe. Diosiri duque sonban joto, puyacalaca mansonhisa carin, titiya itonunca isa mantaquin, quimin joe. Junni Diosi tsanque sonban joto, Abrahanbe pato itsantinue: Nuca duque serawoto, nuchi alicalaca duque tsachi bolon suwano joyoe tinue. Junni tsanquenan amana chiquilari yachi alicala jolajoyoe. 
\p  
\v 18 Junni Diosi nuca duque serawono joyoe tino mate Abraham unica jotonan, na caquiratuca jominue. Junni Abrahanni na caquiratuminnan jun fiquica meráto, Diosica tsarasica quereito meraniraminue. Náca quirasa carichunaeque tenca cato méraminue. Uyan tsachila quereituntsan jonuncanan yari quereiniimin jominue.  
\v 19 Natiya quereino peleitunue. Patsa wata tsansi tan joto, na tano polencari unica jominue. Yachi sonari, Sara tinun sinuca, yari numanan na quino podeitumin jominue. 
\p  
\v 20-21 Tsan josanan, Diosichi fiquiri tsa jochunae tito quereiniinue natiya peleituto. Diosi ticatiya queyanae titori tsanno podeichunae tito tsarasica quereinue. Diosica duque seque pato, fe quereide quereide jinaminue.  
\v 22 Jun quereimin jonun tenchi Diosi yaca sen joe tinue.  
\v 23 Junni yaca sen joeque pila chuteto, Abrahanchi tenchisiri tsanque chuteca itoe.  
\v 24-25 Chiquilachi tenchinan pila chuteca joe. Chiquilachi Miya Jesús chiquilachi jutsa tenchi puyaca jominca Diosi mansoncarinue chiquilaca sen jolajoe tichun. Junni Jesuca mansoncariminbe cayainari, chiquilacanan sen jolajoe tichunae. 
\c 5  
\s1 Sen jolajoe tinunla son timinlayoe tinunca 
\p  
\v 1 Cayaica jonan, Diosi chiquilaca sen jolajoe tinue. Jun tenchi chiquilari Diosibe man tencari jolajoyoe. Chiquilachi Miya Jesucristo chiquilaca Diosibe man tencari suwanue.  
\v 2 Junni Jesucrístobe cayainan, Diosi chiquilaca laquirato, chiquilabe sen joe. Diosi chiquilaca duque sen suwachunae yape ya cuwenta jolajosa. Junca tenhito, duque son timinlayoe.  
\v 3 Juncasiri son tituminlayoe. Padeseinanuncanan son timinlayoe. Padeseinato, peleitumin iminlayoe. Junca mirato, padeseinunca son timinlayoe.  
\v 4 Junni peleituminlaca Diosi sen jolajoe tichunae. Junni chiquilaca sen jolajoe tinato, to yucapiyarino matenan chiquilaca se larichunaeque miralarayoe.  
\v 5 Junni junca miralarasanan, jun tsanquenan patichunae. Diosi yachi Tencaca chiquilachi cuwanue. Yachi Tencaca cuwato, chiquilaca duque laquirae. Tsanque miralarayoe Diosi chiquilabe sen jono joeque. 
\p  
\v 6 Chiquila cumana joto tenca mánta se lono podeitusanan, Cristo seitonlachi tenchi puyanue Diosi mantaca jun ma fanunsi.  
\v 7 Tsachilari sen tsachilachi tenchinantiya puyatuchi latichunae. Tsan josanan, pansile tsara sen tsachi jonari, yachi tenchi puyano jochunae.  
\v 8 Cristo mantimini chiquila seitonlachi tenchi puyanue. Diosi chiquilaca tsanque micarie chiquilaca duque laquirayoeque.  
\v 9 Cristo yachi asan larito puyanun tenchi Diosi chiquilaca sen jolajoe tinue. Tsan jonari, sen joe tisa carito, se larichunae yape Diosi paino mate chiquilaca paitusa.  
\v 10 Diosichi Nao puyato, chiquilaca amicola mansuwanue. Pa tala cajominlacanan Diosibe amico suwanue. Junni puyato amico suwaca jotori, mansonhito chiquilaca se larino jochunae.  
\v 11 Junni jun mate Jesucristo se larino josanan, amananan Diosica son tilatinayoe. Chiquilachi Miya Jesucristo chiquilaca amico suwato, son tisa carinae. 
\s1 Adanbe Jesucrístobeca tenca cato, inca miintsan joe 
\p  
\v 12 Matu mate tsachi manca, Adán tinun, jutsa quinue. Junni ya Adán jutsa quinun tenchi puyano patinue. Juntele nechi jeralela jutsa quito, jeralela puyano paticalayoe.  
\v 13 Diosi yachi mantá chutecaca cacuwatusanan, jutsa quimin jominlanue. Junni tsan josanan, ti mantanantiya itomanpari, jutsa quino culpa itono jomin jonhoe.  
\v 14 Tsan josanan, jun matenan jerale tsachila puyamin jominlanue. Adán sonnano male nechi Moisés Diosichi mantá chuteno ma fecári tsachilari yalachi jutsa tenchi puyamin jominlanue. Adannan quiraque jutsa quituminlanan, uyan quiraque jutsa quiminla jonun tenchi puyamin jominlanue. Adán matu mate duque tsachilaca ya cuwenta suwaca josa, numari ma polenunbi Jesucrístonan duque tsachilaca ya cuwenta suwamin joe. 
\p  
\v 15-16 Tsan jotonan Jesucristo Adán cuwenta itominue. Itsanque jolajominue. Matu mate tsachi manca Adán tinun, jutsa quito duque tsachilabe seiton jominue. Jutsa quito puyano patarinue. Junni manca tsachi, Jesucristo tinun, yari duque laquiramin joto duque tsachilabe sen jominue. Tsachilaca laquirato, epe cuwanique cuwenta tsachilabe sen jominue. Adán man neri jutsa quinan jerale tsachila yabe culpa tan ilainue. Juntonan tsachila duque jutsa quiminla jotonan, Jesucrístobe culpa iton manpatilaichunae. Epe cuwanique cuwenta yalaca perdonaichunae.  
\v 17 Manca tsachi jutsa quito jeralelaca puyasa carinue. Tsan josanan, manca tsachi, Jesucristo tinun, yari tsachilaca manse larimin joe. Yari tsachilaca laquirato, sen jolajoe tichunae tsachilachi epe cuwanique cuwenta. Junni sen joe tinunla fe loto, Diosibe sonnalarachunae. 
\p  
\v 18 Junni manca tsachi jutsa quito jeralelaca culpa patarinue. Junni jun cuwentanan manca tsachi se quito jeralelaca perdonaito sonnasa carimin joe.  
\v 19 Junni manca tsachi merán iton joto, duque tsachilaca jutsa quimin suwanue. Jun cuwentanan manca tsachi merámin joto, duque tsachilaca manse suwanue.  
\v 20 ¿Junni ti quichun Diosi yachi mantá chutecaca cuwan? Mantá chutecaca cuwanue yape seiton quinun tenchi fécari culpa jolajosa. Junni fécari culpa taminlaca Diosi fécari laquirato perdonaimin joe  
\v 21 yape tsachila numatotiya sonnato polelaisa. Jutsa quinun tenchi puyasa mantá jomin josanan, amana mate chiquilachi Miya Jesucrístobe numatotiya sonnato polechun mantá talarayoe. Chiquilachi Miya Jesucristo chiquilaca laquirato sen tenca suwanue yape numatotiya yabe sonnato polelaisa. 
\c 6  
\s1 Diosibe mantaito jutsa quituto nenano jonunca 
\p  
\v 1 ¿Junni niyan tintsan jun? ¿Diosi chiquilaca fécari perdonaisa, fécari layan jutsa quintsan jun?  
\v 2-3 Te, numannan tsanquituntsan joe. Puyacala jutsa quituminla joe. Junni mumunhinoca tenca calaquede! Chiquila Crístochi tsachila joto yachi icayoe tito mumunhito, yabe puyaca cuwenta ilaiyoe. Junni puyaca cuwenta jotori, ¿niyaito jutsa quito nenacaichunan?  
\v 4 Mumunhinato, menaica cuwenta ilaiyoe. Crístochi ica joto, ya cuwenta menaito puyaca cuwenta ilaiyoe casan tala Crístobe penenachun. Aman Apa Diosi Jesucrístoca mansoncarinato, tsaracari sonba mantá tato tsanquinue. Puyaca jominca mansoncarinue. Junni chiquilacanan jun tsanque mansoncarica cuwenta casan tala mannenasa carichunae. 
\p  
\v 5 Itsanque joe: Cristo puyaca jonan, chiquilanan Crístobe man junni joto puyaca cuwenta nenalarayoe. Junni Cristo mansonhica jonan, chiquilanan yabe man junni joto mansonhica cuwenta inola joyoe.  
\v 6 Junsi man fiquiman miralarayoe: Jesús corosibi puyato, chiquilachi jutsaca jun corosibi piyarinue. Chiquilachi jutsaca fe lonue yape chiquilari jutsabe mantaito nenalaratusa.  
\v 7 Tsanque puyaca cuwenta inola joyoe. Puyaca junlari jutsa tinantiya quituminla joe.  
\v 8 Junni Crístobe puyaca cuwenta nenamin joto, yabe mansonhiyanaeque quereiminlayoe. 
\p  
\v 9 Junsi man fiquiman miralarayoe: Cristo puyato mansonhica joto, numanan manpuyatuchunae. Crístori puyatumin inue.  
\v 10 Jutsaca piyarichun man neri puyanue. Man neri puyato, ya michi jominue. Amana Diosichi tenchi sonnae.  
\v 11 Junni nulanan jutsa quechinatori, itsanque tenca calaquina! Puyaca cuwenta icayoeque tenca calaquina! Junsi puyaca cuwenta ito, jutsa quitumin jonola joyoeque tenca calaquina! Junsi chiquilachi Miya Jesucrístochi joto, Diosichi tenchi sonnano jolajoyoeque tenca calaquina! 
\p  
\v 12 Junni jutsabe mantailaituna! Seiton quisa carichinasa, natiya peleitulajona!  
\v 13 Nulachi tede, nede, misu, caca, fiqui foro, titiya jera nulachi eramienta cuwenta joe. Junni eramientalaca jutsachi cuwapotuna! yape seiton quisa caritusa. Diosichi cuwapona! yape ticatiya sen quisa carisa. Nulachi tenca puyaca cuwenta jominca Diosi mansoncarinue. Junni yabe mantailaina!  
\v 14 Nulari se lolaichun Diosichi mantaca tenca mánta jera meráno tenfetuminla joe. Diosicari tennaminla joe yari nulaca laquirato se larichunaeque. Junni tsan jonari, jutsari nulaca mantano podeituchunae. 
\s1 Jutsachi peyun cuwenta itoto, Diosichi peyun jono jonunca 
\p  
\v 15 Junni Diosichi mantaca meracachiri se lotutori, Diosi laquichi se larica jonari, ¿jutsa quiniquintsan jun? Numanan.  
\v 16 Tenca calaquede! Peyunla cuwenta jolajochunae. Nula tilabetiya mantainari, ya nulachi patron jochunae. Jutsabe mantaitori, jutsachi peyunla jolajochunae. Junto tsanque nenatori, nulachi tenca puyalaichunae. Diosibe mantaiminla jotori, sen ilaichunae.  
\v 17 Junni nulachi tenchi Diosibe acradeseimanyoe. Casaleri jutsachi peyunla jominla jotonan, Diosichi sen fiquica merámin ilainue. Junni nula jun fiquica meráto, tencabi merán pun ilainue.  
\v 18 Jutsachi peyunla jominlaca se larinan, Diosichi peyunla ilainue sen tsachila ilaichun.  
\v 19 (Peyun inoca pato, tsachilachi cosaca pánayoe micarichun yape nulari seque entendeilaisa. Uyan quiraque pánari, nula tuino podeilaituchunae.) Junni matule nula nanni fécari seiton ide ide jiniimin jominlanue. Junni amanari Diosibe mantailaina! yape nulaca fécari se suwade se suwade jisa. 
\p  
\v 20 Nula jutsachi peyun joto, seque nenano tenca catumin jominlanue.  
\v 21 Jun mate jutsa quicaca amanari nula luralarae. Junni tsanque nenato ¿niyanhilaiyun? ¿Jutsa quinun tenchi ti calaquiyun? Tinantiya catulajoe. Jutsa quito nenaminlachi tenca jutsa quinun tenchi puyaniichunae.  
\v 22 Junni nulari jutsachi peyun jominlanan, amana se loto Diosichi peyun cuwenta icala joe. Yabe mantaito nenaminca se suwachunae. Junni ya sen suwaca junlaca numatotiya sonnato polesa carichunae.  
\v 23 Jutsachi peyun jotori, pacara cantsan joe jutsa quinun tenchi; jutsachi pacara canun cuwenta jutsa quiminlachi tenca puyanilaichunae. Diosi mantimini pacara quitumin joe. Epe cuwamin joe. Epe cuwanique cuwenta numatotiya sonnato polesa carichunae. Chiquilachi Miya Jesucrístochi tsachilaca tsanque sonnasa carichunae. 
\c 7  
\s1 Casalaica sonala cuwenta jochunae tinunca 
\p  
\v 1 Aman Diosichi mantá chutecaca quiraminlabe cuenta quinayoe. Nula miralaranae jun mantá sonnaminlachi tenchisiri joeque. Puyaca junlachi tenchi itoe.  
\v 2-4 Aman casalaica jun sonala cuwenta jochunae. Diosichi Pilabi mantá chuteca joe casalaica jun sonala yalachi unilalabesiri sonnanola joeque. Uyanlachi sona ino podeilaituchunae. Tsanhiminlaca jutsa quilaquinae tintsan jochunae. Jun tsanquenan nula acola, soquila, Diosichi mantá chutecabe culpa tan nenaminnan, Jesuchi tsachila ino podeituminlanue. Tsan josanan, sonalachi unilala casonnalarasari yalachi sonala jolajochunae. Unilala puyacabi yalachi sonala itolajochunae. Junte nechi uyanlachi sona manhino podeilaichunae. Tsanhinari, jutsa itochunae. 
\p Junni nula jun tsannan jolajoe. Jesucristo puyaca jonan, nulanan puyaca cuwenta jolajoe. Puyaca tsachi cuwenta, Diosichi mantabe culpa itulajochunae. Jun tenchi Diosichi mantabe culpa iton nenato, Jesucrístochi tsachila ino podeilaichunae. Ya puyato mansonhinue, yape chiquila Diosichi tenchi seque nenalarasa. 
\p  
\v 5-6 Casaleri chiquilachi tenca munate nenamin jominlayoe. Juntonan Diosichi mantá pila chutecabi paca jominhe jutsa quilaquitunaque. Junni jun mantabi Jutsa quilaquituna! tica jonun tenchi, nantanancari jutsa quimin jominlayoe. Jerale tsanque nenaminla puyalaichunae. Aman jutsabe mantaito, doraminla cuwenta jominlayoe. Jutsari chiquilaca mantánan, seiton quimin jominlayoe. Junni jun mantá tenchi doraminla cuwenta jominnan, amanari manloca cuwenta jolajoyoe. Puyaca cuwenta icalayoe jutsa manquituchun. Matu mantabi chutecabe culpa itoto, casan tala nenalarayoe Diosichi Tencabe nenato. 
\s1 Jutsacanan, sen mantacanan meráyoe tinunca 
\p  
\v 7 ¿Junni niyan tintsan jun? Diosichi mantá tenchi culpa tenhinari, ¿seiton mantá jun? Te, numanan seiton itochunae. Tsan josanan, Diosichi mantá itomanpari, lari jutsaca miratuno jomin joinhie. Uyanlachi ticatiya munaito quiralaquitunaque mantá chuteca itomanpari, jutsa joeque tenhino itomin joinhie.  
\v 8 Tsan josanan, lachi tenca jutsa pun joe. Jun tenchi uyanlachi ti jonuncatiya munaito quiratunaque mantaca jonan, uyanlachi ti jonuncatiya nantanancari munaito quiraniquiyoe. Jutsa quitusa mantá itonari, jutsacanan tenhitumin jocaichunae.  
\v 9 Junni matu mate Diosichi mantaca miitomin jomanyoe. Diosichi mantaca miitoto, lari culpaca tenhituto sonnamin jomanyoe. Junni Diosichi mantaca merasi, jutsaca tenhinan, lachi tenca puyae.  
\v 10 Diosi yachi mantaca tsachilachi cuwaca jominhe yape tenca sonnalarasa. La mantimini jun mantabe sonnatiyoe; puyayoe.  
\v 11 Diosichi mantaca miito, jutsabe encanaito, lachi tenca jutsa tenchiri puyae.  
\v 12 Junni Diosichi mantári duque sen mantá joe. Tuca joe. 
\p  
\v 13 Junni Diosichi mantá sen jonari, ¿niyaito jun mantabe puyano patinun? ¿Mantári seiton mantá jono iton? Te, natiya tsan itoe. Diosichi mantachi culpa itoe; jutsachi culpa joe. Seiton jutsa tan joto, sen mantabe puyayoe. Junto miintsan joe jutsa duque seiton joeque. Diosichi mantaberi fécari miintsan joe jutsa jelecari seiton joeque.  
\v 14 Diosichi Tencari yachi mantaca cuwanan, sen mantá joe. Junca miralarayoe. Lachi tencari seiton joe. Jutsabe cayaito nenamanyoe. 
\p  
\v 15 Junni la ti quinanunca miitoyoe. La quino munaranunca quitumanyoe. Natiya quino munaratununca quimanyoe.  
\v 16 Junni la quinanunca seitoe titori, la Diosichi mantabe man panni quinayoe. Diosichi mantaca sen joe tino patíyoe.  
\v 17 Junni tsan jonari, la patsari seiton quimin itoyoe. Lachi tencabi jutsa wito, seiton quimiyamin joe. 
\p  
\v 18 Lachi tencabi ti sen cosanantiya itoe. Seque nenano munaratonan, seque nenano podeitiyoe.  
\v 19-20 Seque nenano munaratonan, seitonque nenaniramanyoe. Junni quino munaratununca quitori, la patsa seiton quitiyoe. Jutsari laca mantato seiton quisa cariniquiminhe. 
\p  
\v 21 La itsanque patica joyoe: Seque nenano munaratonan, seque nenano podeitiyoe.  
\v 22 Lachi tencabi Diosichi mantaca sen joe tiyoe.  
\v 23 Juntonan lachi tencabinan man cosa cajoe. Jutsa quino mowin tayoe. Junni lari man quiraque quichi tinatonan, ya mowin uyan quiraque quisa carichi timin joe. Diosichi mantabe jutsa mowinbe pataato, jutsa mowinnan fe lomin joe.  
\v 24 Duque padeseinayoe. In jutsa jelenquiran joe puyan oco cuwenta. ¿Junni mo laca se larichunan? yape jutsabe mantaitusa.  
\v 25 Chiquilachi Miya Jesucristo, ya se larino joe. Jun tenchi Diosibe duque acradeseimin joyoe. 
\p Junni itsanque patica joyoe: La patsa Diosica tenca cato, yachi mantaca merámin joyoe. Junnasanan, lachi tencabi jutsa mowin ponnan cajoto, yacanan camerániquimin joyoe. 
\c 8  
\s1 Diosichi Tencabe sonnano jonunca 
\p  
\v 1-2 Diosichi mantá chutecabe duque jutsa tayoeque miinan, jun mantári lachi tencaca totenue. Jun mantaca miito, doramin cuwenta ramanyoe. Amana mantimini Jesucrístochi joyoe. Junni Jesucrístochi jominca Diosichi Tenca mantanue yape la doramin manse losa. Ya sonnasa carimin joe. Junni amanari jutsabe nenatiyoe; Diosichi Tencabe nenamin joyoe. Yachi Tencabe nenato, Jesucrístochi tsachila jolajoto, natiya casticaino itolajoyoe.  
\v 3-4 Diosichi Pilabi mantá chuteca joe titiya quinola joeque. Junni tsanque mantá tan jotonan, duque cumana jominla joanue. Jun mantári sonban tenca suwatue yape jun mantaca meráno podeilaisa. Junni Diosi yachi Naoca erenue yape tsachi isa. Jutsa tanlanan quiran pejosa carinue. Junni chiquilachi jutsa tenchi ereto, yaca casticaquinue. Ya tsachi icaca casticaquinue uyan tsachilachi jutsa tenchi. Tsanque erenue yape chiquilari jutsabe nenatuto yachi Tencabe nenato, yachi mantaca meráno podeilaisa. 
\p  
\v 5-6 Yalachi tenca munate nenaminla seitonque tenca cato nenaminlae. Tsanque tenca cato nenaminla puyanola joe. Aman Diosichi Tencabe penenaminla mantimini Diosi munaranunca tenca cato nenalarachunae. Tsanque tenca cato nenaminlari wepanatuto pansi sonnalarachunae.  
\v 7 Yalachi tenca munate nenaminlari Diosica pa nenalarae. Diosichi mantaca obedeseituto, natiya obedeseino podeilaituchunae.  
\v 8 Tenca munate nenaminlacari, niyan quilaquinasatiya, Diosi yalaca natiya se tituchunae. 
\p  
\v 9 Diosichi Tenca nulachi tencabi chunari, nulachi tenca munate nenaminla itochunae. Diosichi Tencachi munate nenaminla jochunae. Tsan jotonan, Crístochi Tenca itonlari, Crístochi natiya itolajochunae.  
\v 10 Cristo nulachi tencabiri chunari, jutsa quituminla jochunae puyacala cuwenta joto. Ti sencatiya quichunni nulachi tenca son cuwentanan jochunae.  
\v 11 Diosichi Tenca Jesucristo puyaca jominca mansoncarinue. Junni Diosichi Tenca nulachibi chutori, Jesucrístoca mansoncarica cuwenta nulachi tencacanan tsanquenan mansoncarichunae. Yachi Tencaca nulachi tencabi wito chudichunae nulachi tencaca mansoncarichun. 
\p  
\v 12 Junni acola, soquila, chiquilachi tenca munate nenatuntsan joe.  
\v 13 Tsanque nenatori, puyanola joichunae. Diosichi Tencachi sonbachi jutsaca piyarica jotori, sonnacaichunae. 
\p  
\v 14 Diosichi Tencabe nenamin tsachila yachi nalala jolajochunae.  
\v 15 Junto Diosi yachi Tencaca chiquilachibi erenue. Junni chiquilachibi wito chiquilaca jele pobi witunue. Peyunlaca cuwenta sonba mantaquebi witunue. Diosichi Tenca chiquilaca yachi nalala suwabi winue. Chiquilari Diosica Apa tinanan,  
\v 16 yachi Tenca chiquilachibi miisa carinae yachi nalala jolajoeque.  
\v 17 Junni yachi nalala jotori, ya tanunca chiquilanan talaranae. Crístobe tanola joyoe. Tsan jotonan Cristo cuwentanan pepadeseinola joyoe yape chiquilaca tsaracari sen suwasa Crístobe. 
\p  
\v 18 Junni padeseinanunca tennatuntsan joe. Man mate Diosi chiquilaca tsaracari sen suwachunae. Junca tenca cato, amana padeseinanunca tennatuntsan joe tinayoe.  
\v 19-21 Meralaquinana! Titiya Diosi quica jun cosala jera yucapiyaca joe. Tenca mánta yucapiyaca itoe. Diosi tsachilachi jutsa tenchi ya cosalaca jera yucapiyarintsan joe tito yucapiyarinue. Junni yucapiyarinayoe titonan, tsanleri yucapiyaritunue. Inale jera manse suwachunae. Junni jera manseino mate natiyanan yucapiyatumin, ni petenan itumin jochunae. Diosichi nalala jera senhinan, titiya Diosi quica jun cosala jun tsanquenan jera manse jochunae. Junni jun mate Diosi yachi jerale nalalacanan quirawochunae senla jonunca. Junni Diosi quica cosala jera meralarae yape Diosi yachi nalalaca quirawosa. Yalaca quirachique duque meralarae jera manseichun. 
\p  
\v 22 Junca mérato padeseilainae. Amana fecári Diosi quica cosala capadeseilainae na quechinamin sona cuwenta.  
\v 23-24 Diosi quica cosalasiri mératue; chiquilanan tsanquenan meralarayoe jera sen jochun. Diosichi Tenca chiquilachibi wito micarie jun sen mate niyan jono jonunca. Junni jun maca quirachique chiquilachi tencabi padeseinato meralarayoe. Jun mate Diosi chiquilaca yachi nalala joeque piyanlelachi cale quirawochunae. Diosi chiquilachi tencaca se larito, chiquilachi pucacanan se larino joyoe tinue. Junni jun mate chiquilachi pucacanan se larichunae. Junni tsan jono josanan, cacachiri caquiralaquitiyoe. Junto cameralarayoe. Ticatiya wari quiratori mératunoe; numa quiraca jonola joyoe.  
\v 25 Junni quiraca itotori, peleituto mérantsan joe. 
\p  
\v 26 Junni chiquila tsanque cumana jonan, Diosichi Tenca chiquilabe peayudaimin joe. Diosibe sele rocainonan miitolajoyoe. Junni Diosichi Tenca patsanan chiquilachi tenchi rocaimin joe. Ya rocainato, fiquichi pano podeitununca rocaimin joe.  
\v 27 Diosi mantimini yachi Tenca rocainanunca jera entendeimin joe. Itsanque joe: Diosichi Tenca Diosichi tsachilachi tenchi rocainato, Diosi munaranunca rocaimin joe. Junnan Diosi jera entendeimin joe. Aman Diosiri chiquilachi tencacanan jera mirae. Junsi yachi Tenca chiquilachi tenchi rocainuncanan jera mirae. 
\s1 Jesucristo chiquilaca fe losa carimin jonunca 
\p  
\v 28 Diosi yaca laquiraminlachi tenchi ticatiya jera seto cuwamin joe. Diosi ya laquiraminlaca yabe cayaisa tica jominue yalacanan se suwachun.  
\v 29 Itsanque joe: Diosibe cacayaitusanan miraminue mo mo yachi tsachila inola jonunca. Junni yalaca wenteto, yachi Nao cuwenta suwano joyoe tinue yape yachi mancari Nao duque acola, soquila tasa.  
\v 30 Junni wenteca junlaca yabe cayaisa tinue. Junni tsanticalaca culpa itonla joe tinue. Junni culpa itonla joe tinunlaca duque sen suwanue. 
\p  
\v 31 ¿Junni juncari niyan tintsan jun? Itsanque joe: Diosi chiquilachi fabor jonari, niyanlatiya chiquilachi contra jolajosatiya yape jochunae.  
\v 32 Diosi yachi Nao patsaca isá tituto, chiquilachica ereca jotori, uyan ticatiya jun tsanquenan jera cuwachunae.  
\v 33 Diosi chiquilaca wenteca jonari, niyanlatiya chiquilaca culpa quichi tilatinasatiya yape jonijochunae. Diosiri chiquilaca culpa itonla joe tica joe.  
\v 34 Monantiya chiquilaca falta patarino podeilaituchunae. Jesucristo puyato, mansonhito, jamochi manloca joe. Junto Diosichi tsa nan tala chuto, chiquilachi tenchi Diosibe rocainae.  
\v 35 Junni niyan inasatiya, Cristo chiquilaca laquirachunae. Chiquila padeseilainasa, o wepanalainasa, o tsachila pasuwalaquinasa, o ano fino falta jonari, o panu itonari, o pelicro jonari, o tsachila chiquilaca totechi latinari, Cristo chiquilaca laquiranirachunae.  
\v 36 Diosichi Pilabi junca itsanque chuteca joe: 
\q1 Chiquila Diosichi tsachila jonun tenchi numasitiya totainonan jolajoyoeque chuteca joe. 
\q1 Junni seitonlaberi chiquilari yalachiri totenun animalila cuwenta jolajoyoeque chuteca joe. 
\m  
\v 37 Junni tsan jolajosatiya, Jesucristo chiquilaca laquirato tsaracari fe losa carimin joe.  
\v 38 Inca mirayoe: Puyaca junlacanan, son jominlacanan, amana o nanni ina, niyan ino jonuncatiya Cristo chiquilaca laquirachunae. Anjelila, yucanchi ocola, uyan mantá tanla,  
\v 39 jamochi chuminla o to tenpe chuminla, niyanlaquinasatiya Diosi chiquilaca calaquirachunae. Chiquilachi Miya Jesucrístochi tsachilaca Diosi laquirachunae. Junni monantiya yaca laquiraminca desuwano podeilaituchunae. 
\c 9  
\s1 Diosi israelítalaca wenteca jonunca 
\p  
\v 1 Crístochi joto, tsarasica pánayoe nene patuto. Diosichi Tenca laca tenhisa carinae seque pánayoeque.  
\v 2-3 La israelita joto, lachi tencabi weyan israelítalachi tenchi duque laqui joyoe. Lanan Crístochile nechi chican lonoyoe tsanhito weyan israelítalaca Crístobe cayaisa carino pode jomanpari.  
\v 4 Yala israelítala joto, Diosichi tsara sen nalala jonola joe. Diosi yalabe trato quinue tsachilaca se lariminca erechun. Diosichi mantá chutecaca yalachi cuwanue. Yalaca wentenue yape yaca se timinla josa. Yalabe cuenta quinue nulachi tenchi duque sen quino joyoeque.  
\v 5 Matu tote Diosi wenteca junlachi alicala jolajoe. Tsachi tala patori, Diosi wenteca Cristo tinun tsachinan israelita tsachi jominue. Yari jeralelaca mantamin Diosi jonun tenchi, yaca numatotiya se tintsan joe. Tsanque joe. 
\p  
\v 6 Junni israelítala jeralela Crístobe cayaica itosanan, Diosichi fiqui epe fiqui itominue. Diosi Israel tinun tsachichi alicalaca wentenue yape ya israelita tinunla Diosichi tsachila jolajosa. Juntonan, Israel tinunchi jerale alicalaca wentetunue. Weyanlacari wenteto, weyanlacari wentetunue.  
\v 7-9 Aman israelítalachi fécari matu to tataca, Abraham tinunca, tenca calaquede! Diosi yaca wenteto, yachi alicalacanan wenteno joyoe tinue yape Diosichi tsachila jolajosa. Junni yachi alicalaca wenteno jotonan, jeralelaca wentetunue. Diosi Abrahanbe pato itsantinue: Watate nuchi sonari, Sara tinun, unila na quichunae tinue. La mantánan na quichunae tinue. Junni ya náca Isaac tinun jominue. Junni Diosi Abrahanchi jerale alicalaca wentetuto, Isaachi alicalacasiri wenteno joyoe tinue. Diosiri “alicala” tito, jerale alicalaca tsantitunue. Ya patsa tsantinunlacasiri “alica” tinun joe. 
\p  
\v 10 Junni chiquilachi matu tata, ya Isaac tinun, Abrahanchi nao jominue. Junsi Isaachi sona Rebécari man quiminni paluca na quinue. Isaac paluca nachi apa jominue.  
\v 11-13 Junni Diosi manan manwentenue. Yachi tenca munate wenteniquinue. Nalalachi ayanbe pato itsantinue: Caque na benechi naicabe mantaichunae tinue. Junni junca Diosichi Pilabi itsanque chuteca joe: Benechi na, Israel tinun, tsa mumunni Jacobo, yaca laquirayoeque chuteca joe. Caque na, Esaúcari, laquiratiyoeque chuteca joe. Junni Diosi Israel tinun náca wenteno mate, yabe yachi acobe na caica itominlanue. Palunan tinantiya caquitumin jominlanue. Nin sen, ni seiton quica itominlanue. Junni Israel bene na joto seque nenaeque quirato wenteca jomanpari, sen jonun tenchi wentenueque patino jomin jonhoe. Jun tenchi na caica itoncanan Diosi wentenue yachi tenca munatesiri wentenueque patisa. 
\p  
\v 14 ¿Junni junca niyan tintsan junhun? Diosi mancacari fe laquiratori, ¿Diosi seiton jochunan? Te, seiton itochunae.  
\v 15 Nanni inale Diosi Moisebe cuenta quito itsantinue: Molaca laquirano jototiya, yalaca laquiranae tinue. Niyanlaca laqui tino jototiya, yalaca laqui tiyanae tinue.  
\v 16 Junni Diosi tsachilaca wentenato, tsachila tenfenan, o tsachila munaranan wentetumin joe. Diosi yachi tenca mánta tsachilaca laquirato yalaca wentemin joe.  
\v 17 Diosichi Pilabi itsanque chuteca joe: Diosi Faraón tinun miyaca casticaquinato, yaca itsantinueque chuteca joe: Nuca miya suwayoe tinue yape jerale tote chuminla nu niyan inanunca meráto laca duque sonba joe tilatisa.  
\v 18 Junni Diosi weyanlaca laquirano munaratori, laquiramin joe. Weyanlaca merátuchi timin tenca suwano muquinari, tsan suwaniquimin joe. 
\p  
\v 19 Junni nula weyanla in pilaca quirato, labe itsanlatichunae: Tsan jonari, monantiya Diosichi contra ino podeilaituchunae latichunae. Diosiri jeraca titiya quisa carimin jotori, ¿niyaito tsachilaca culpa quichunan? tilatichunae.  
\v 20 Te, tsantituntsan joe. Nu tsachiri joto, ¿niyaito Diosibe beco pachun? To nidari to nida quiminca pato, ¿niyaito laca itsanquiyun? tinun cuwenta jochunae.  
\v 21 To nida quimin tsachiri jun tocanan paluca to nida quichunae. Mancari urara quica jochunae titiya senca ponun. Mancacari jamo jamo quica jun jochunae petseca ponun. Junni toca tsacumin joto tsanquiniquintsan joe. 
\p  
\v 22-23 Junni weyan tsachilari seitonla jonan, yalaca casticaquintsan joe seiton to nidaca yucapiyarinun cuwenta. Pa tintsan quiran jolajoe. Weyanla mantimini seque quica to nida cuwenta laquirantsan jolajoe. Diosi yalaca numarile nechi wenteca jominue yape sen jolajosa. Junni Diosi seitonlaca casticaquintsan jochunae yape ya sonban joto jutsaca pa joeque mirantsan josa. Tsanquintsan josanan, seitonlaca casticaquica itoe; yalaca wantainato mérae. Yalaca wantaito mérato, junto laquiranunlaca se larichunae yape jeralela duque sen Diosi joeque miralarasa.  
\v 24 Ya laquiranunla chiquila jolajoyoe. Diosiri chiquilaca yabe cayaisa tica joe. Israelítalacasiri yabe cayaisa titue; israelita itonlacanan yabe cayaisa tinae.  
\v 25 Oseas Diosichi Pilaca chutenato yaca panue. Itsanque chuteca joe: 
\q1 Diosichi itomin jominlaca yachi jolajoe tichunaeque chuteca joe. 
\q1 Laquiratunun jominlaca Diosi laquirayoe tichunaeque chuteca joe. 
\q1  
\v 26 Yalaca chiquilachi bolon tsachila itolajoe tinun jominlanue. 
\q1 Tsan josanan, yalaca tsa son Diosichi nalala jolajoe latichunaeque chuteca joe. 
\m  
\v 27 Diosichi Pilabi man postote Isaías israelítalaca wepanato itsanque chutenue: 
\q1 Israelítala lamari tsalan ni cuwenta layan seraca jotonan, narin se lolaichunaeque chuteca joe. 
\m  
\v 28 Miya Diosi jerale tote chuminlaca casticaqueyanae tica joto, moora tsanquichunae.  
\v 29 Junsi Isaías nanni caquenan pato, itsantica jominue: 
\q1 Jera mantamin Miya chiquilaca casticaquichunaeque chuteca joe. 
\q1 Chiquilaca casticaquito, narin puchuchunae. 
\q1 Puchutumanpari, itono jominla joinhieque chuteca joe. 
\q1 Sodoma pueblo, Gomorra pueblobi cuwenta jono jominla joinhieque chuteca joe. 
\s1 Israelítala Crístoca quereituminla jonunca 
\p  
\v 30 ¿Junni Isaíachi fiquica niyan tintsan jun? Itsanque patinue: Weyanla israelita itonla tenca mánta se ichique tenfetutonan, seilainue. Crístobe cayainan Diosi yalaca sen suwanue.  
\v 31 Israelítala mantimini seichique tenfenatonan seilaitunue. Diosichi mantaca jera meráminlacasiri Diosi sen jolajoe tichunae tito, junto duque tenfenatonan jun mantaca meráno podeilaitunue.  
\v 32-33 ¿Junni niyaito podeilaitunun? Crístobe cayaituto, yalachi sonbaberi tenfelainue. Junto podeilaitunue. Diosichi Pilabi junca chuteca joe. Itsanque joe: 
\q1 Tsachi manca israelítalachibi su tsoreca cuwenta rachunaeque chuteca joe yape jun subi tutulailaisa. 
\q1 Diosi yaca tsorechinayoe tinueque chuteca joe yape jun subi tutulailaisa. 
\q1 Ya tsachibe cayaiminla mantimini natiya luralaratuchunaeque chuteca joe. 
\m Junni israelítala yaca quereituto, tenca mántanan seichique tenfenato, jun subi tutulailainue. 
\c 10  
\p  
\v 1 Acola, soquila, lachi tencabi israelítalaca duque se lolaisa tenjae. Diosibe rocaimin joyoe yape yalaca se larisa.  
\v 2 Yala Diosica duque tenca camin jolajoe. Junca mirato tsantinayoe. Junni Diosica duque tenca cato chuminla jotonan, yalari tenca iton tala tenca caminla joe.  
\v 3 Diosi yalaca niyaque se suwano jonunca miitoto, yalachi tenca munateri sen jochique tenfeminla joe. Diosi yalaca se suwachi tinasanan, merátuchi timinla joe.  
\v 4 Crístobe cayaica jotori, Diosichi mantaca jera meracachiri seichique tenfeno itoe. Tsanque tenca canaminlari deinola joe. 
\p  
\v 5 Moisés Diosichi Pilaca matu tote chutenue. Yari junbi jera chutenue niyaque Diosichi mantaca meráto seinola jonunca. Itsanque chutenue: 
\q1 Diosichi jera mantáca meráto nenaminlari numatotiya sonnato polelaichunaeque chutenue. 
\m  
\v 6 Crístobe cayaito seino jonunca mantimini uyan quiraque chuteca joe: Tsachila yaca ayudaitusanan Crístori jera quino podeino joeque pato, itsanque chuteca joe. Nula wepanatulajonaque chuteca joe mo jamochi loto Crístoca patarino jonunca.  
\v 7 Junsi mo puyan ocolachica jito Crístoca manlarino jonuncanan tennatulajona! tinue.  
\v 8 Junsi itsantinue: Diosichi fiqui nulachi quelote joe. Ya fiquica miralarae. Nulari meránori cajolajoe tinue. Junni ya fiqui chiquila itsanque micariminlayoe yape nulari quereilaisa.  
\v 9-10 Junni meralaquinana! Tencabi quereica junlaca Diosi sen jolajoe tichunae. Jeralelabe cuenta quinato Jesucrístochi joyoe timinla se lolaichunae. Junni Jesús Miya joeque paniquinola joe. Diosi Jesús puyacaca mansoncarinueque tencabi quereinola joe. Tsanlaitori, se lolaichunae. 
\p  
\v 11 Diosichi Pilabi itsanque chuteca joe: Jerale Crístobe cayaiminla luralaratuchunaeque chuteca joe.  
\v 12 Junni Diosiberi israelítalanan, israelita itonlanan, jun tsannan jolajoe. Ya Miya joto, jeralelachi Miya joe. Junni jerale yabe rocaiminlaberi sen joe.  
\v 13 Junni man postobi Diosichi Pilabi Miya Jesuca pato itsanque chuteca joe: Jeralela Miyabe rocaiminla se lolaichunaeque chuteca joe.  
\v 14 Tsan jonari, yabe cayailaitutori, ¿niyaito yabe rocailaichunan? Junsi yaca miica itotori, ¿niyaito yabe cayailaichunan? Junsi yalaca micarilaquitunari, ¿niyaito miilaichunan?  
\v 15 Junsi micariminlaca eretulajonari, ¿niyaito micarilaquichunan? Juncanan Diosichi Pilabi chuteca joe. Itsantinue: Diosichi sen fiquica micaribi jiminlari duque seque jilaichunae tinue. 
\p  
\v 16-17 Junni itsanque patie: Crístoca paca sen fiqui micarinanunca merántsan joe. Junni meráto, cayaintsan joe. Junni tsan josanan, weyan israelítalari ya fiquica miratonan, cayaituminla joe. Isaías yalaca pato itsanque chutenue: Miya Diosi, narin tsachila chiquila pacaca quereilaichunae tinue. 
\p  
\v 18 Israelítala miracachiri miralarae. Diosichi Pilabi itsantinue: Jun fiqui jerale tote mera jochunae tinue.  
\v 19 Junni israelítala punquichi merátonan, ¿entendeilaitun? Diosichi Pilabi chutecaca manan manquiralaquisa! Casale Moisés itsanque pila chutenue: 
\q1 Diosi israelita itonlacanan laquiranae tinue yape israelítala pailaisa yalacasiri laquirano joe tito. 
\q1 Diosi tenca itonlabenan sen joanae tinue yape israelítala pailaisa. 
\m  
\v 20 Junni Isaías fe sonba pato, itsanque Diosichi Pilabi chutenue: 
\q1 Laca neyatuminlari laca felaichunae tinutie. 
\q1 Laca panhatuminlabe quiraiyanae tinutie. 
\m  
\v 21 Junto israelítalacari pato, Isaíari itsantinue: 
\q1 Diosi yalaca numasitiya ayudaichi tinasanan, merátuchi timin uyan tenca pun tsachila jolajoe tinutie. 
\c 11  
\s1 Crístoca quereimin israelítalaca 
\p  
\v 1 ¿Junni niyaque patin? Diosi israelítalaca wenteca jotonan, ¿amana yalaca telaquepoca jun? Te, Diosi israelítalaca telaquepotunue. Lanan israelita jotonan quepoitiyoe. Matu to Abrahanchi alica joto, Benjaminchi alica bolon israelita tsachi joyoe.  
\v 2 Numari mate Diosi israelítalaca yachi jolajoe tica joto, amananan yalaca telaquepotunue. 
\p Matu to Elíaca Diosichi Pilabi chutecaca mantenhilaide! Elías israelítalaca Diosichi cale culpa quinato itsantinueque chuteca joe:  
\v 3 Miya Diosi, israelítala nuchi mantate paminlaca totelaquinue tinutie. Nube rocainun postoca jera yucapiyarilaquinue tinutie. Nube penenaminla talari lasiri puchuiyoe. Junni lacanan totechi latinae tinutie.  
\v 4 Junni Diosi Elíabe manpacaca mantenhilaide! Itsanque panue: Te, nu mancari itoe tinutie. Siete mili israelítalaca cuidaiyoe tinutie laberi penenalarasa. Yalari Baal tinun diosi moldechi cale natiya telenhilaitunue tinutie. 
\p  
\v 5 Junni Elías nenanun matenan amana matenan jun tsanquenan jochunae. Duque israelítala Crístoca quereilaitusanan, weyan weyanlari quereiminla joyoe. Diosi chiquilaca laquirato wentenue quereiminla isa.  
\v 6 Junni chiquilaca laquichiri wentenue. Chiquilaca sen jonun tenchi wentetunue. Sen jonun tenchi wenteca jomanpari, Diosi chiquilaca laquirato wenteca itono jomin jonhoe. 
\p  
\v 7 ¿Junni niyan tintsan jun? Israelítala Diosibe sen jochique tenfelainatonan podeilaitunue. Mannan Diosi wenteca junlari podeilainue. Uyanlacari merátuchi timin tenca suwanue.  
\v 8 Junlacanan Diosichi Pilabi chuteca joe. Itsanque chuteca joe: 
\q1 Diosi yalaca merátuchi timin tenca suwanueque chuteca joe. 
\q1 Quirasa caritunue; merása caritunueque chuteca joe. 
\q1 Amananan tsannan jolajoeque chuteca joe. 
\m  
\v 9 Junni David man postote Diosichi Pilabi ya seiton tsachilaca itsanque pila chutenue: 
\q1 Diosica paiminla casticainola joeque chuteca joe. 
\q1 Titiya sen tato, jun senchinan yucapiyanan se jochunaeque chuteca joe. 
\q1 Pichu labi cayainun cuwenta, epele tenca cato nenaminnan casticainola joeque chuteca joe. 
\q1  
\v 10 Caca itonla cuwenta inola joeque chuteca joe. 
\q1 Jadonca panáminla cuwenta numatotiya padeseinola joeque chuteca joe. 
\s1 Israelita itonlanan se lonola jonunca 
\p  
\v 11 ¿Junni niyan inun? ¿Israelítala Diosibe mancayailaituchun yaca telaquepolaquin? Te, mancayailaichunae. Itsanque joe: Israelítala Diosica telaquepolaquinan, Diosinan yalaca moorari purato, israelita itonlaca se larichunae. Israelita itonlaca se larichunae yape israelítala junca quirato yalanan se lono tenca calaquisa.  
\v 12 Junni israelita Diosica telaqueponan, uyanlachi tenchi duque se patinue yalari se lonola joeque. Israelítala seiton quilaquinan, uyanlachi duque se patinue. Tsan josanan, israelítala Diosibe jera mancayailainari, nantanancari fe se patichunae. 
\p  
\v 13 Amana nula israelita itonlabe cuenta quinayoe. Diosi lachi mantá cuwato, israelita itonlaca fécari micarisa mantaquee. Jun tenchi nulaca duque seque micarino muquee  
\v 14 israelítalanan manca manca se lolaisa. Yala tenhilaichunae la israelita jotonan israelita itonlaca fécari micarinaeque. Junni junca tenhito, pansile yalanan manca manca se lono munaralarachunae.  
\v 15 Israelítala Diosica telaqueponan, israelita itonlachi tenchi se patinue Diosibe cayailainan. Junni israelítalanan Diosibe mancayailainari, fécari se patichunae. Puyaca junla mansonhilaichunae.  
\v 16 Junni israelítalanan Diosichi tsachilanan cajolajoe. Itsanque joe: Jana bibu man piti sen jonari, manca bibu jera sen jochunae. Jana chide pele telenle Diosichi jonari, alinan Diosichi jochunae. Junni matu to israelítala Diosichi jominla jonari, yalachi alicalanan Diosichinan jolajochunae. 
\p  
\v 17 Junni chide peleca manan tenca calaquede! Israelítala mantimini tsachi tanun sen olibo tinun chide pele cuwenta jolajoyoe. Israelita itonlari jelen olibo pele cuwenta jolajoe. Junni tsachi tanun olibo pele ali poreereto, nulaca junbi tulannue. Junni nulari tsachi tanun olibo pelebi pealimentailainae.  
\v 18 Tsan jotonan, poreereca junlaca fe sen jolajoyoe titulajona! Fe sen jolajoyoe tino tenca catori, junni mantenhilaide! Sen pele nulabe alimentaitumin joe; nula sen pelebe alimentaiminla joe. 
\p  
\v 19 Nula mantimini itsanlatichunae: Chiquilaca sen pelebi tulachun weyan alica poreerenue tilatichunae.  
\v 20-21 Tsa tilatie. Tsan jotonan, nula fe sen jonan yalaca poretunue. Ya israelítala Diosibe cayaituchi tito porailainue. Nula israelita itonla mantimini cayaito sen chidebi tulailainue. Diosi jun chide ali cuwenta junlaca casticaquito poretori, nulacanan jun tsanquenan quichunae. Junni fe sen joyoe tito nenatulajona! Diosica jelebe nenalarana! 
\p  
\v 22 Tenca calaquede! Diosi duque laquiratonan, casticanan quimin joe. Yaca telaquepoto, quereituchi timinlaca quirato casticaquimin joe. Nula quereimin jonunca quirato laquiramin joe. Junni nulanan yaca telaquepolaquituna! Tsannari, nulacanan manporeerechunae.  
\v 23 Yalanan quereituto nenanunca mantelaquepoto, manquereilainari, Diosi yalacanan mantulano podeichunae. Jun sen chide pelebi mantulachunae.  
\v 24 Nula jelen ali cuwenta jominlacari tsachi tanun chide pelebi tulanue. Junni tsanca jotori, ¿sen ali cuwenta jominlaca yalachi tsa chidebi mantulano jotuchinan? 
\s1 Nanni ina israelítala se lonola jonunca 
\p  
\v 25 Acola, soquila, nulabe man fiquinan pano muquee yape junca mirato fe sen joyoe tilatitusa. Itsanque joe: Weyan israelítalari merátumin tenca jolajochunae israelita itonla Diosibe jera cayaino fecári.  
\v 26 Junnunbi jerale israelítala se lolaichunae. Diosichi Pilabi yalaca pato itsanque chuteca joe: 
\q1 Se larimin tsachi Sion postobi nechi jachunaeque chuteca joe. 
\q1 Yari Jacóbochi alicalaca jutsaca telaqueposa carichunaeque chuteca joe. 
\q1  
\v 27 Diosi tsanque trato queyanae tinueque chuteca joe yalachi jutsaca piyarino mate. 
\p  
\v 28-29 Amana israelítala Diosichi sen fiquica munaratuto, junsi nulari jun fiquica quereilainanan ya israelítalari Diosica pailainue. Tsan josanan, Diosi tsachilaca wentetobi, yachi fiquica canbiyaquitumin joe. Junni Diosi israelítalaca wenteca jonan yachi tsachila cajolajoe. Matu tatalachi tenchi yalacanan Diosi calaquirae.  
\v 30 Nula casaleri merátumin jominlanue. Junni israelítala merátuminla jonan, Diosi nulaca laquirato ayudainue.  
\v 31 Junni yalanan jun tsanquenan patilaichunae. Diosi nulaca laquirato ayudainan, yalari Diosica merátuchi timinla joe. Junni inale Diosi nulaca laquiranun cuwentanan, ya israelítalacanan laquirato ayudaichunae.  
\v 32 Tsanque Diosi jeralelaca culpa quito, merátuminla joe tica joe tsanquenan jeralelaca laquirato ayudaichun. 
\p  
\v 33 Diosiri ura jera miramin joe. Yari niyaque tenca cananunca, o niyan quinanunca tsachilari miino podeilaituchunae.  
\v 34 Diosichi Pilabi junca itsanque chuteca joe: 
\q1 Diosi niyaque tenca cananunca monantiya miratuchunaeque chuteca joe. 
\q1 Monantiya yachi tenca cuwano podeituchunaeque chuteca joe. 
\q1  
\v 35 Monantiya yachi ticatiya cuwano podeituchunaeque chuteca joe yape Diosi mancuwano josa. 
\m Tsanque Diosichi Pilabi chuteca joe.  
\v 36 Diosiri titiya jera quinue. Ya itomanpari, tinantiya itono jomin jonhoe. Titiya jerale yachi tenchisiri joe. Numasitiya yaca duque se tino jochunae. Tsanque joe. 
\c 12  
\s1 Diosichi tsachila niyaque nenanola jonunca 
\p  
\v 1 Junni acola, soquila, Diosi nulaca laquiranan, nulabe rocainayoe tencachiquenan Diosichi cuwapoilaisa. Israelítala wala, opisa, paloma tsanlaca toteto, Diosichi cuwamin jolajoe. Junni nulari son jotonan, jun wala tsanla cuwenta tencachiquenan Diosichi cuwapoilaide! yachi jolajochun. Tsanhinari, ya nulaca sen jolajoe tichunae. Tsanlaitori, nulachi tencabi yachi cale telenhica cuwenta yaca seque tennalarachunae.  
\v 2 Diosica tennatuminla cuwenta nenalaratuna! Te, casan tenca ide ide manjilaina! Tsanhitori, miralarachunae Diosi niyaque munaranunca. Junni nulanan jera sen jonunca miralarachunae yape Diosi nulaca sen jolajoe tisa. 
\p  
\v 3 Diosi laca laquirato mantá tan suwacae yape yachi tenchi micarisa. Junto nulaca manan payichinayoe: Duque sen jolajoyoeque tenca catulajona! Seque tenca calaquina! Diosica quereinan, nulaca niyantiya quino poden suwaca jochunae. Junni Diosi nulaca tsansiri poden suwaca jonari, fécari poden joyoeque tenca catulajona!  
\v 4-5 Jeralela Crístochi jotori, yachi puca cuwentanan jolajoyoe. Tsachi pucabi caca, punqui, tede, nede, titiya jera layaito man pucari joe. Junni chiquilanan jun tsanquenan jeralela layaito Crístochi puca cuwenta jolajoyoe. Junni pucabi cacari man tala quimin joe; punquinan man tala quimin joe; tede, nede, titiya man talasiri jera quimin joe.  
\v 6 Junni chiquilanan jeralela jun tsanquenan jolajoyoe. Diosi chiquilaca niyantiya quino poden suwato, mancaca man tala, mancaca man tala quino poden suwaca joe yape peayudaicaalaquisa. 
\p Junni Diosi chiquilaca niyantiya quino poden suwaca jonan, junca seque quintsan joe. Yachi mantate paminlari yaca quereito seque pantsan joe. Fe quereitori, fe seque pano podeilaichunae.  
\v 7 Nula uyanlaca ayudaino poden suwaca jonari, sele ayudaintsan joe. Micarino poden suwaca jonari, sele micarintsan joe.  
\v 8 Payino poden suwaca jonari, sele payintsan joe. Poperelachi titiya cuwano poden suwaca jonari, isa tituto cuwantsan joe. Uyanlaca fe mantá tan jono poden suwaca jonari, seque jamimin mantaquintsan joe. Padeseinaminlaca ayudaino poden suwaca jonari, son tito ayudaintsan joe. 
\s1 Jesucrístochi tsachila laquiracaato nenanola jonunca 
\p  
\v 9 Jamoleri laquiralaratuna! Tsa laquiracaalaquina! Seiton jonunca seiton joe tilatina! Sequesiri nenalarana!  
\v 10 Acola tala cuwenta laquiracaalaquina! Uyanlaca fécari respetaintsan joe ticaalaquina! 
\p  
\v 11 Seque nenanoca puratulajona! Miya Jesucristo ticatiya jera munaranunca quiminla jona! Nulachi tencabi junca munaralarana! 
\p  
\v 12 Nanni ina Diosi nulachi tenchi titiya jera seque quichunaeque son tito meralarana! Crístochi tenchi padeseino patitori, peleituto padeseinilaina! Numasitiya Diosibe rocailaina! 
\p  
\v 13 Diosichi tsachila tala poperelachi epe cuwalaquina! Tsachila ano muquin tilatinanari, cuwanilaquina! O tile catsochun panhalaquinari, catsosa carilaquina! 
\p  
\v 14 Crístochi joto, nulaca seiton quiminlachi tenchi Diosibe rocailaina! Seitonlaca padeseisa munaralaratuna! Pansi josa munaralarana! 
\p  
\v 15 Son timinlabe son tilatina! Laquichi wareminlabe pewarelaquina! 
\p  
\v 16 Uyanlabe sen tala nenalarana! Weyanlaca fe joyoeque tenca calaquituna! Mantá iton tsachilabenan penenanilarana! Nulari fe min joyoeque tenca calaquituna! 
\p  
\v 17 Nulaca seiton quiminlaca nula seiton quilaquituna! Seque nenalarana! yape jeralela nulaca quirato, sen jolajoe tilatisa.  
\v 18 Pode jotori, jeralelabe seque nenalarana! Nulari pataatuto nenanoca tenfelaina!  
\v 19 Nulaca laquirato itsantinayoe: Beconan seiton quitulajona! Miya Diosi yachi pilabi itsantinue: Lasiri beconan yucapiyarino joyoe tinue. Lasiri casticaquino joyoe tinue. Junni nulari telaquinilaquina! yape Diosi casticaquisa.  
\v 20 Nula mantimini manca fiqui Diosichi Pilabi chutecaca meralaquede! Nulaca pa nenaminla ano muquin tilatinari, ano cufilaquinaque chuteca joe. Pi muquin tilatinari, yalachi pi cutsawolaquinaque chuteca joe. Tsanlaquinari, ya pa jominla duque luilaichunaeque chuteca joe.  
\v 21 Seitonla nulaca seiton quicachi fe lochi latichunae. Junca tsanhisa carilaquituna! Nulari seitonlaca duque sen quicachisiri fe lolaina! 
\c 13  
\p  
\v 1 Cobiernolaca jeralela meránola joyoe. Diosi patsa jun mantaminlachi mantá cuwanue. Diosi mantá tan suwatumanpari, monantiya mantá itono jominla jonhoe.  
\v 2 Junni mantaminlaca merátuchi titori, Diosi mantá cuwanuncanan merátuchi latichunae. Tsan jominlaca casticaquilaquichunae.  
\v 3-4 Senlari mantaminlaca jeleralaratuchunae. Seitonlari jeleralarachunae. Mantaminlaca jelerano muquetulajonari, seque nenalarana! Junni yala nulachi tenchi Diosibe mantaiminla joto, nulaca sen jolajoe latichunae. Seiton quitori, ¿junni mantaminlaca jelerano jotuchinan? Yalachi espada epe tatulajoe. Yalari Diosibe mantaiminla joe seitonlaca casticaquichun.  
\v 5 Junni mantaminlaca meralaquina! Casticaquino joeque jelechiri meralaquituna! Meráno se joeque tenca cato meralaquina! 
\p  
\v 6 Jun tenchi inpuesto calaca cuwanola joe. Mantaminlari Diosibe mantaiminla joto mantaminla joe.  
\v 7 Junnan jerale mantaminlabe sen jolajona! Inpuesto cala caminlachi inpuesto cala cuwalaquina! Respetainunlaca respetailaina! 
\p  
\v 8 Nelo nenatulajona! Neloratutori, cala mancuwanoca tennatuminnan, jeralelaca laquiranocasiri tennanola jochunae. 
\p Uyanlaca laquiraminla Diosichi jera mantaca meráminla jochunae.  
\v 9 Diosichi mantaca yachi pilabi jera chuteca joe: Uyan sonalabe o uyan unilalabe nosa seitonque nenalaratunaque, tsachilaca totelaquitunaque, tarinlaquitunaque, nene patulajonaque, titiya uyanlachica munaito quiratulajonaque chuteca joe. Ti uyan mantatiya cachuteca joe. Junni man postotenan manca fe merántsan mantá itsanque chuteca joe: Tencachique laquiranun cuwenta, uyanlacanan laquiralaranaque chuteca joe. Aman jun mantaca merátori, Diosichi jera mantacanan meráminla jochunae.  
\v 10 Uyanlaca laquiratori, yalaca natiya seiton quitulajochunae. Junni laquiraminlari Diosichi mantaca jera meráminla jochunae. 
\p  
\v 11-12 Jesucristo chiquilaca tsanle se larino ma fécari quelo inae. Jun tenchi nulaca tsanque payinayoe. Itsanque jochunae: Chiquilachi tencari nemente catsoca cuwenta jominlayoe. Amanari nemen jomin mantseichinae wari. Mansonhino óra joe. Casaleri nulachi tencabi jutsa pun joto, nemen cuwenta jominlanue. Amanari jutsaca telaquepontsan joe. Junni nulachi tencabi jera tsen mansuwaca joto, yucanbe quera quicaachun jera seito nenalarana!  
\v 13 Junni tsente nenaminla talari seque nenantsan joe. Jilu itoto, winan ituto, uyan sonalabe o uyan unilalabe nosa seitonque nenatuto, pacaatuto nenantsan joe. Uyanlaca fe jochique pataato nenatuntsan joe.  
\v 14 Seque nenato, Miya Jesucristo cuwenta nenalarana! Niyaque jutsa quino jonunca tenca cato nenalaratuna! 
\c 14  
\s1 Acolaca seitonla joe tituntsan jonunca 
\p  
\v 1-2 Weyanla mantimini layan quereituto, pele tenca jolajoe. Yalari nula tsachica filaquinasanan, yalari pele tenca joto tsachicaca fituntsan joe timinla joe. Junni yalaca telaquepotuntsan joe. Tsan jotonan, yalachi epe fiquica pachi latinari, merátulajona!  
\v 3 Tsachicaca fiminlari fituminlaca lucarituntsan joe. Fituminlanan fiminlaca seiton jolajoe tituntsan joe. ¿Diosi senla joe tica junlacari ti quichun nulari seitonla joe tilatichun?  
\v 4 Yala Diosichi tsachila jolajoe. Yasiri yalaca tsacumin joto niyan jonunca pano podeichunae. Diosisiri yalaca seitonla jonunca o senla jonunca pano joe. Nulari junca pano itolajoe. Junni yalari sen patilaichunae. Diosi yalaca sen patarino poden joe yape yalaca sen jolajoe tinunla josa. 
\p  
\v 5-6 Tsachica finunca pasi, fe sen tinun macaman pachinayoe. Weyan tsachila weyan maca fe respetainun ma joe tito, uyan maca epe ma joe timinla joe. Weyanla mantimini jerale maca jun parejonan ma joe timinla joe. Junni tenca calaquede! Fe respetainun ma joe timinla Diosica duque tennato tsantiminla joe. Junsi jerale maca jun parejonan ma joe timinlanan Diosica duque tennato tsantiminla joe. Tsachica fiminla Diosibe acradeseito fiminla joe. Diosica tennato finiquintsan joe timinla joe. Junsi tsachica fituminlanan Diosica tennaminla joe. Diosica tennato, yalanan fituntsan joe timinla joe. Yalanan Diosibe acradeseiminla joe. Junni jeralela junca tencabi seque tenca cantsan joe. Tenca cato wenteniquintsan joe niyan tino jonunca. 
\p  
\v 7 Tsan jotonan, sonnaminnan o puyaca jotonan, tenca mánta tenca cano itolajoyoe.  
\v 8 Casonnatonan, Miya Jesucrístobe sonnalarayoe. Puyaca jotonan, Miya Jesucrístobenan cachularanae. Junni sonnatonan o puyaca jotonan, Miya Jesucrístochi jolajoyoe.  
\v 9 Jun tenchi Cristo puyato mansonhinue yachi tsachila casonnalarasanan o puyaca jolajosanan yalachi Miya ichun. 
\p  
\v 10 ¿Junni ti quichun nulachi acolaca seitonla joe timinlayun? ¿O ti quichun nulachi acolaca epe jolajoe timinlayun? Chiquila jeralelaca Diosisiri pachunae sen jonunca o seiton jonunca. Yachi cale wiruraminlaca miito pachunae.  
\v 11 Junca Diosichi Pilabi itsanque chuteca joe. 
\q1 Miya Diosi itsantieque chuteca joe. 
\q1 ¿La sonnamin Diosi jotuan? tinutie. 
\q1 Tsan jonari, wari jeralela lachi cale telenhilaichunae tinutie. 
\q1 Jeralela labe tuca panola jochunae tinutie. 
\m  
\v 12 Junni jeralela Diosichi cale jera panola joichunae niyaque nenaminla jonunca. 
\s1 Nulachi acolaca, soquilaca jutsa quisa carituntsan jonunca 
\p  
\v 13 Junni chiquila talari culpa quituntsan joe. Culpa quicaatuchun seque tenca cato nenantsan joe. Junsi acolaca jutsa quisa carituchunnan tenfeto nenanola joyoe.  
\v 14 Ticatiya finari jutsa itochunae. Miya Jesuchi joto junca seque mirayoe. Weyanla mantimini ticatiya fitori, jutsa quinayoeque tenca caminla joe. Tsanque tenca caminlanan filaquinari, jutsa patichunae.  
\v 15 Junni pansile nulachi acolari nula ticatiya finaminca quirato, yalari wepanato laquiito, seitoe latichunae. Junni nula junca miratonan finari, nulachi acolaca laquiratuminla jochunae. Cristo yalachi tenchi puyaca jonari, ¿ti quichun yalaca seiton quilaquichun?  
\v 16 Junni nulari titiya jutsa iton cosaca quilaquinasanan, weyanlari junca seitoe latinari, quituntsan jochunae. 
\p  
\v 17 Junni nula Diosi mantananun tsachi bolonbi pewito, ticatiya finoca o cuchinoca tenca cachun pewilaitunue. Diosichi Tencabe sen ichun, wepanatuto pansi chuchun, son jochun, Diosi mantananun tsachi bolonbi pewilainue.  
\v 18 Crístobe tsanque mantaito nenalaranari, Diosinan tsachilanan nulaca sen jolajoe latichunae. 
\p  
\v 19 Junni pataatuto nenanoca tenfelaina! Beco beco tencaca sonba suwacaachun tenfelaina!  
\v 20 Anoca fichiqueri Diosichi weyan tsachilaca yucapiyarilaquituna! Jerale anoca fintsan joe. Junni tsan josanan, nula ano finanunca quirato, manca tsachi jutsa quinanari, seitochunae.  
\v 21 Nula tsachica finaminca quirato, o bino cuchinaminca quirato, o uyan titiya quinaminca quirato, nulachi acola jutsa quilaquinanari, junni tsantuntsan jochunae.  
\v 22 Junni nula sen quilaquinayoeque quereitori, nosari quereilaina! nulabe Diosiberi. Diosibe seque nenayoeque tsarasi miratori, culpa tenhituminla jochunae. Son jolajochunae.  
\v 23 Weyanla mantimini miitolajoe sen quinanunca o seiton quinanunca. Tsachica fino jonunca o fino itonunca miitolajoe. Tsantiminlanan filaquitori, quereituto filaquichunae. Junni culpa tan patilaichunae. Titiya quinato, Diosica quereituminnan quinanari, jutsa jochunae. 
\c 15  
\s1 Uyanlaca sonba tenca suwano jonunca 
\p  
\v 1 Pele tenca tan tsachila seque nenalaratunari, chiquilari sonban tenca joto, yalaca wantainola joyoe. Chiquilachi tenca munate nenano itolajoyoe.  
\v 2 Uyanlacanan ayudaito, yalaca fe sonban tenca suwachique tenfeto nenanola joyoe.  
\v 3 Crístonan tsanquenan nenamin jominue. Yachi tenca munate nenatumin jominue. Matu tote Diosichi Pilabi itsanque chutenue: Diosica yucacuraminla labenan seiton jolajoe tinue.  
\v 4 Jerale matu to Diosichi Pilabi chuteca fiqui chiquilachi tenchinan joe. Jun fiquibe Diosi chiquilaca micarito payimin joe yape sonban tenca ilaisa. Tsanque payimin joe yape peleituto meralarasa Diosi chiquilachi nanni ina senca cuwachunaeque.  
\v 5 Diosi chiquilachi tencaca sonban suwamin joe yape peleilaitusa. Junni yabe rocaimin joyoe nulaca seque penenalarasa carideque. Man junni josa tenca casa carideque rocaimanyoe yape nula tala Jesucristo cuwenta penenalarasa.  
\v 6 Tsanque nenatori, jeralela layaito man junni joto, Diosica fe duque se tino podeilaichunae. Yari chiquilachi Miya Jesucrístochi Apa joe. 
\s1 Israelita itonla Jesucrístoca meralaquinunca 
\p  
\v 7 Junni Cristo nulaca facaricaya jonan, nula talanan jun tsanquenan facaricaalaquina! yape jeralela Diosica tsara sen joe tilatisa.  
\v 8 Junni nulabe man fiquiman pachinayoe: Diosi matute chiquilachi matu tatalabe paca jominue se lariminca ereno joyoeque. Junni Cristo israelítalachi tenchi janue yape yala miilaisa Diosi tsarasica pamin joeque.  
\v 9 Israelita itonlachi tenchinan janue yape yalanan Diosica duque se tito, yalaca laquiramin joeque miilaisa. Diosichi Pilabi israelita itonlanan Diosichi tsachila inola joeque itsanque chuteca joe: 
\q1 Israelita itonlachite Diosica tsara se tito, yachi tenchi cantaqueyanaeque chuteca joe. 
\m  
\v 10 Man postobi itsanque chuteca joe: 
\q1 Israelita itonla, nulanan Diosichi tsachila tala son tilatinaque chuteca joe. 
\m  
\v 11 Junsi man postobi itsanque joe: 
\q1 Jerale israelita itonlanan Diosica tsara se tilatinaque chuteca joe. 
\q1 Piyanlela yaca se tinola joeque chuteca joe. 
\m  
\v 12 Junsi man postobi Isaíari Crístoca pato, itsanque chuteca joe: 
\q1 Isaíchi alica manca jato, mantá tan joto, israelita itonlacanan mantachunaeque chuteca joe. 
\q1 Yalari yaca tennalarachunaeque chuteca joe. 
\p  
\v 13 Wari chiquilari Crístoca tennato meralarayoe chiquilachi inale sen cuwano joeque. Diosi chiquilaca tsanque mérasa carinae. Junni Diosibe rocaimin joyoe nula yaca tennaminlaca tsaracari son suwasa. Yaca tennalarasanan, nulaca wepanatuto pansi chusa carideque rocaimin joyoe. Tsanque Diosibe rocaimin joyoe yape nula Diosichi Tencachi sonbabe Crístoca seque tennato meralarasa. 
\p  
\v 14 Acola, soquila, nula tsara sen joto, duque mirato, nula tala micaricaano podeilaichunae. Junca tsarasica mirato, nulachi tenchi son joyoe.  
\v 15 Tsan jotonan, nulabe man fiquica man fiquica sonba pacayoe yape nula numa miranunca mantenhilaisa. Diosi laca laquirato wenteca joe  
\v 16 yape israelita itonlaca Jesucrístochi mantate micarisa. Patelela Diosichi ticatiya cuwanun cuwenta, lanan israelita itonlaca tsanque Diosichi cuwamin joyoe. Diosichi Tenca yalaca jera sen suwaca jonan, Diosi yalaca sen jolajoe tichunae. 
\p  
\v 17 Junto Diosichi tenchi seque quimin joyoe tino poden joyoe. Jesucrístochi mantate tsanquinato, tsantino poden joyoe.  
\v 18-19 Cristo laca duque quisa carie yape israelita itonla yaca meráminla josa. Junni la quinuncari pachinayoe. Uyanla quicacari pátiyoe. La wepanato quirantsancari quimanyoe Diosichi Tencachi sonbabe. Junni israelita itonla la ticatiya quinanunca quirato, ticatiya pánanunca meráto, Crístoca merámin ilaie. Jerusalenbi nechi Ilírico fecári Crístochi sen fiquica jera micaricayoe.  
\v 20 Jesucrístoca camerátunun tobi yachi sen fiquica micarino muquiminhe. Uyanla micaricateri micarino muquetuminhe.  
\v 21 Diosichi Pilabi junca chuteca joe camerátunun tobi yaca meralaquichunaeque. Itsanque joe: 
\q1 Camicarica itonla yaca miilaichunaeque chuteca joe. 
\q1 Camerátucalanan yaca meralaquichunaeque chuteca joe. 
\s1 Pablo Roma puebloca jino tenca cananunca 
\p  
\v 22 Junni Jesucrístoca numa meraca junlachicari jino itoto, amana fecári nulachica jino podeica itomanyoe.  
\v 23 Amanari inte nantari quino itoyoe. Junni duque wata mánta nulachica jino munarato,  
\v 24 aman España toca jinato, nulachise poleno muquee. Junni nulabe nasi chuto jinasa, nula laca nasi ayudailaichunae España toca jisa.  
\v 25-26 Junni tsainari España toca cajitiyoe; casale Jerusalenca jino joyoe. 
\p Macedóniabi chuminlabe Acáyabi chuminlabe Jerusalenbi chumin poperelaca ayudaino tenca calaquee. Jesucrístochi tsachila tala tsanque poperelachi cala ereto ayudaino tenca calaquee. Junni lanan Jerusalenca jito, jun calaca cato petanjino joyoe.  
\v 27 Yala Macedóniabi, Acáyabi chuminlari israelítala itotonan, ya popere israelítalachi cala cuwachi latinae. Junni tsanque cuwano se joe. Yalaca Diosibe cayaisa carito cuwaminlari israelítala jominlayoe. Junni yalanan israelítalachi titiya munaranunca beconan mancuwano se joe. 
\p  
\v 28 Junni in calaca yalachica tanjito cuwatobi, España toca jino tenca canayoe. Junchi jinato nulachise poleno muquee.  
\v 29 Junni la nulachica jito, Crístoca paca jun sen fiquica micarinasa Diosi duque bendesiquichunaeque mirayoe. 
\p  
\v 30 Meralaquinade! Nula chiquilachi Miya Jesucrístoca seque quereiminla joe. Diosichi Tenca nula tala laquiracaasa carimin joe. Jun tenchi nulabe rocainayoe yape nula Diosibe rocainato lachi tenchinan perocailaisa.  
\v 31 Diosi laca isaisa rocailaina! Jerusalenbi weyanla Jesucrístoca quereituminla joe. Junnan Diosibe laca isaisa rocailaina! yape yala pasuwalaquitusa. Junni Jesucrístochi tsachilachi tenchi cala tanjichinayoe. Junni jun calaca cuwano jonun tenchinan Diosibe rocailaina! yape Jerusalenla seque calaquisa.  
\v 32 Jerusalenbi sequenan jotori, junsi Diosi ayudainari nulachica jano podeiyanae. Nulachica son tito jato, aman junbi rato jasaino podeiyanae.  
\v 33 Diosi chiquilaca wepanatuto pansi chusa carimin joe. Junni yabe rocainayoe nulabe seque penenasa. Amen. 
\c 16  
\s1 Roma pueblobi chuminlachi saludo erenunca 
\p  
\v 1 Aman soqui Febe nulachica jichunae. Ya sen sona joe. Cencrea pueblobi Jesuchi tsachila bolonbi peayudaimin joe.  
\v 2 Yari Miya Jesuchi jonan, yaca sele jacarilaquina! Diosichi tsachila tala tsanque seque jacarintsan joe. Soqui Febe la Páblobe duque ayudaimin jominhe. Uyanlabenan tsanquenan ayudaimin jominhe. Junnan ya ti munaranuncatiya nulanan pecuwanilaquina! 
\p  
\v 3 Junsi Priscílachinan, Aquílachinan saludo erenayoe. Nula Jesucrístochi tenchi labe titiya pequimin jominlae.  
\v 4 Laca totelaquechinasanan, nulanan petotainono inaminlanue laca totesa carituchique. La Pablo nulabe acradeseinayoe. Israelita itonlanan jeralela Jesucrístobe penenaminla nulabe acradeseilainae.  
\v 5 Nulachi yabi Jesucrístochi tsachila layaiminla joe. Junni yalachinan jera saludo peerenayoe. 
\p Junsi Epeneto, nuca duque laquirato, saludo erenayoe. Acaya tobi Jesucrístobe cayaica junla tala nu casale jominhe. 
\p  
\v 6 Junsi Maríachinan saludo erenayoe. Nunan nulachite Diosichi tenchi duque titiya quito nenaminhe. 
\p  
\v 7 Junsi Andrónicochinan, Júniachinan saludo erenayoe. Nula israelítala pejoto, labe pedoramin jominlae. Crístochi mantá tanla nulaca duque respetaiminla joe. La Jesucrístobe cacayaica itosanan, nulari numa cayaica jominlanue. 
\p  
\v 8 Junsi Ampliochinan saludo peerenayoe. Miya Jesucrístochi tsachila tala nuca laquirayoe. 
\p  
\v 9 Junsi Urbánochinan saludo erenayoe. Nu chiquilabe Jesucristo tenchi duque ticatiya quimin jominhe. Junsi Estáquicanan duque laquirato, nuchi saludo erenayoe. 
\p  
\v 10 Junsi Apélechinan saludo erenayoe. Nu Crístochi tenchi padeseinatonan, natiya peleitunue. 
\p Junsi Aristóbulochi familialachinan saludo erenayoe. 
\p  
\v 11 Junsi Herodión israelita pejonan, nuchi saludo erenayoe. 
\p Junsi Narcísochi familiala weyanla Miya Jesucrístoca quereiminla joe. Junni nulachinan saludo peerenayoe. 
\p  
\v 12 Junsi Trifénachinan, Trifósachinan saludo erenayoe. Nula Miya Jesucrístochi joto, yachi tenchi ticatiya quito penenamin jolajoe. 
\p Junsi Pérsidacanan duque laquirato, nuchi saludo peerenayoe. Nunan Miya Jesucrístochi joto yachi tenchi duque ticatiya pequimin joe. 
\p  
\v 13 Junsi Rúfochinan saludo erenayoe. Nu Miya Jesucrístochi tsachila tala sen tsachi joe. Nuchi ayanchinan saludo peerenayoe. Labe ya lachi ayan cuwenta jominhe. 
\p  
\v 14 Junsi Asíncritochinan, Flegóntechinan, Hérmachinan, Patróbachinan, Hérmechinan, yalabe pejunlachinan saludo erenayoe. 
\p  
\v 15 Junsi Filólogochinan, Júliachinan, Neréochinan, Neréochi soquichinan, Olímpachinan saludo erenayoe. Junsi Olímpalachite Jesube penenamin tsachila junte jerale pelayaiminlachinan saludo erenayoe. 
\p  
\v 16 Nula tala Diosichi tsachila jolajoto, lachi tenchi mo tito saludaicaalaquina! Jerale Crístochi tsachi bolonla nulachi saludo erelaquinae. 
\s1 Seiton fiquica micariminlabe penenatulajona! tinunca 
\p  
\v 17 Acola, soquila, nula tala weyanla uyan tala micarichi timinla joe. Nulaca man bolon, man bolon suwachi timinla joe. Jutsa quisa carichi timinla joe. Nulaca seque micarica jun fiquicari munaratuminla joe. Junni nulaca payinayoe yalaca meralaquitusa. Molatiya tsanque nenaminlaca quirato, yalabe penenatuto, chican nenanola joe.  
\v 18 Tsanque micariminla chiquilachi Miya Jesucrístoca merátuto, yalachi tenca munateri nenaminla joe. Otoque sen fiquinan quiranca pato micarito, tenca itonlacari querecariminla joe. 
\p  
\v 19 Piyanle tsachila miralarae nulari Diosichi sen fiquica meráminla joeque. Junnan nulachi tenchi son timanyoe. Juntonan ti fe sen jonuncatiya nulaca seque mirasa munarayoe. Seiton quinoca mantimini tenca iton jolajosa munarayoe.  
\v 20 Diosi pansi chusa carimin joe yape wepanatuto chularasa. Junni nula tsanque seque nenanari, pansi chusa carimin Diosi nulaca moora yucanca feisa carichunae. Junni chiquilachi Miya Jesucristo nulaca laquirato, nulabe sen josa tenjae. 
\s1 Pablo chununbi chuminla saludo erenunca 
\p  
\v 21 Timoteo nulachi saludo erenae. Yari labe Diosichi tenchi ticatiya quito nenamin joe. Junsi Lúciobe, Jasonbe, Sosípateribenan, yala israelítala joto, nulachi saludo erelaquinae. 
\p  
\v 22 Junni Pablo in carta quichun pánasa, la Tercio pila chutenayoe. Junni lanan Miya Jesucrístochi tsachila tala pejoto nulachi saludo peerenayoe. 
\p  
\v 23 Gáyonan nulachi saludo peerenae. La Pablo yalachibi chuyoe. Jesucrístochi tsachila tala yalachi yabinan layaiminla joyoe. Junsi Erástonan nulachi saludo peerenae. Yari munisipiobi tesorero joe. Junsi Cuarto mumun aconan nulachi saludo peerenae. 
\p  
\v 24 Junni chiquilachi Miya Jesucristo nula jeralelaca laquirato seque quisa rocainayoe. Amen. 
\s1 Diosica seque panunca 
\p  
\v 25 Nulachi tencaca sonba suwano podeimin Diosica tsara seque palaquina! Lari nulaca Jesucrístoca paca sen fiquica micarinato, Diosi nulaca sonba tenca suwamin joequenan micariyoe. To caquitununle nechi jun sen fiquica miratunun  
\v 26 jomin jotonan, amanari miintsan joe. Diosichi mantate paminlari ya fiquica matu mate pila chuteca jominlanue. Junni amana mate ya pilaca manquirato, ya fiquica jera entendeintsan joe yape jerale tote chuminla yaca quereito obedeseilaisa. Numatotiya jeraitumin Diosiri tsanque micarisa mantacae. 
\p  
\v 27 Yasiri Diosi joe. Yasiri jera mirae. Chiquila Jesucrístochi joto, Diosica numatotiya duque seque pantsan joe. Tsanqueri joe.