\id ACT - Colorado [cof] NT (Ecuador) - 1990 (2012 bd. ) 
\h Mantá Tanla 
\toc1 Crístochi mantá tanla itsanquilaquinunca 
\toc2 Mantá Tanla 
\toc3 Hch 
\mt1 Crístochi mantá tanla itsanquilaquinunca 
\mt2 (Los Hechos) 
\ip \bd Caque fiqui:\bd* Lucas in pila chutenue. Yaca fécari miichun Lucas Chuteca Jun Sen Fiqui tenchi pila chutecaca quirade! Lucas in pilacanan aco Teófilochi erechun quinue. 
\ip In pilabi Lucas cuenta polarinue Jesucristo jamochi manlonunbi yachi tsachila niyanhilainunca. Aman bersiculo 1:8-bi quirato miintsan joe in pila tica pamin jonunca. Jun bersiculobi Jesucristo yachi tsachilabe itsantinue: \bd Laca cuenta polarinola joe. (1) Diosichi Tenca nulachica patatobi, nulaca duque sonba tenca suwachunae tinue. Jerale tote laca cuenta polaride nenalarana! tinue. (2) Jerusalén pueblobi, in Judea tobinan, ja Samaria tobinan, (3) junsi fe nuwiri tobinan cuenta polaride nenalarana! tinue.\bd* Jun bersiculobe jera Mantá Tanla pilaca itsanque entendeino podeintsan joe: 
\ip (1) 1:1-2:13 \bd Diosichi Tenca nulachica patanunbi ... (Jesucrístoca) cuenta polaride nenalarana! tinue.\bd* Aman 1:1-le nechi 2:13 fecári jerale Jesucrístochi tsachilaca pánae Jesucristo jamochi manlocale nechi Diosichi Tenca patano fecári. 
\ip (2) 2:14-12:25 \bd Jerusalén pueblobinan, in Judea tobinan, ja Samaria tobinan ... (Jesucrístoca) cuenta polaride nenalarana! tinue.\bd* Capitulo 2:14-le nechi capitulo 12 fecári Jerusalenbi, junsi Judéabi, junsi Samáriabi Diosichi fiquica micaride nenaminlaca chuteca joe. In capitulolabi Pédrocari fécari panun joe. 
\ip (3) 13:1-jeraicari: \bd Fe nuwiri tobinan (Jesucrístoca) cuenta polaride nenalarana! tinue.\bd* Capitulo 13-le nechi duque bare tobi Diosichi fiquica micarinanunca chuteca joe. In capitulolabi Páblocari fécari panun joe. 
\ip In pilabi Lúcari Diosichi Tencaca duque pamin joe. Jun tenchi weyanlari in pilaca estudiaito, uyan mumun pono jonhoe timinla joe. Crístochi Mantá Tanla Itsanlaquinunca tituto, Diosichi Tenca Itsanquinuca tino se jonhoe timinla joe. 
\c 1  
\s1 Diosichi Tenca patano joe tinunca 
\p  
\v 1-2 Amico Teófilo, in pilaca nuchi erechun quinayoe. Manqui pila numa quito nuchi erecayoe. Jun casale quica jun pilabi Jesuca in tote nenaminca chutecayoe. Diosichi toca manlono ma fecári ticatiya jera quito nenamin jonunca, ticatiya jera micarica jonunca, jera chutecayoe. Aman junni Jesús weyan tsachilaca wenteca jominue yape yachi mantá tanla josa. Jesús jamochi camanlotuminnan, yalaca Diosichi Tencachi sonbabe jera mantanue.  
\v 3 Junni Jesús puyato mansonhitobi, yalabe manquiraidede nenaminue. Duque ticatiya quinue yape tsa mansonhinueque tenhilaisa. Diosi mantananun tsachi bolon niyan jonola jonunca jera micarinaminue. Junni junpalu chunca ma fecári Jesús yalabe tsantin nenaminue. 
\p  
\v 4 Junto Jesús yalabe canenaminnan, itsanque mantanue: 
\p —Nula Jerusalén pueblobi nechi lotuto cameralarana! tinue. Lachi Apa Diosi pato, nulachica ticato ereyanae ticae tinue. Lari nulabe junca numa jera cuenta polaricayoe tinue.  
\v 5 Aman Mumunmin Juanbe penenaminlari pibiri mumunhilainue. Nula mantimini nanni ina Diosichi Tencachi mumunhilaichunae tinue. Yachi Tencaca erechunae tinue yape nulachibi wisa. Junni yaca ereno fecári Jerusalenbi cameralarana! tinue. 
\p Jesús yachi tsachilabe tsantinue. 
\s1 Jesucristo itsanque jamochi manlonunca 
\p  
\v 6 Junni Jesube penenaminla palaque tenca cato, yabe itsanque panhalaquinue: 
\p —Miya, ¿chiquilari israelítala jolajoyoco? ¿Aman nu numasi bare to románolachi mantaca manjosolechun? tilatinue yape chiquilachi tobi mantatulajosa. ¿Amana? 
\p  
\v 7 Jun fiquica meráto, Jesús beconan itsantinue: 
\p —Apa Diosiri junca mirae tinue. Nulari junca camiituntsan jochunae tinue numasi tsanhino jonunca. Apa Diosiri pato, junca yasiri mantano joyoe ticae tinue.  
\v 8 Aman nula mantimini laca cuenta polarinola joe. Diosichi Tenca nulachica patatobi, nulaca duque sonba tenca suwachunae tinue. Junni jerale tote laca cuenta polaridede nenalarana! tinue. Jerusalén pueblobinan, in Judea tobinan, ja Samaria tobinan, fe nuwiri tobinan cuenta polaridede nenalarana! tinue. 
\p  
\v 9 Junni Jesús tsantinunsi, Diosiri yaca jamochi manlaricanue. Quiranasanan loniinue. Aman lonaminnan, lonaminnan, numa poyobi doinue.  
\v 10 Junni Jesuri jamochi doicabinan, yabe penenaminlari jamochi caquiranaminlanue. Junni yalari quirato wirurasa quiranari, paluca tsachila yalabe quirainilainue. Ya tsachilari tsaracari fibaquin camisa pun wirurato  
\v 11 itsantilatinue: 
\p —Galilea tsachila, ¿ti quichun jamochi caquiralaquinayun? Ya Jesús nulachile nechi quirasa loto, Diosichi toca numa locae tinue. Junni aman tsanque loto, jun tsanquenan manpatachunae tinue. 
\p Ya anjelila Jesube penenaminlabe tsanlatinue. 
\s1 Júdachi tenchi Matíaca manwentelaquinunca 
\p  
\v 12 Junni Jesuchi tsachilari Olibo tinun dubi nechi manpatato, man quilon tsansica manjato, Jerusalén pueblobi manwilainue.  
\v 13 Junni aman Jerusalenbi manfato, yala chunun tamochinan manwilainue jamobi tamochi. Chunca manca Crístochi mantá tanla junte chuminlanue Pedro, Jacobo, Juan, Andrés, Felipe, Tomás, Bartolomé, Mateo, Jacobo, Simón Zelote, Judas. Aman manca Jacobo Alféochi nao jominue. Aman Judas Jacóbochi aco jominue.  
\v 14 Junni yala piyanlela jun parejo tenca cato, Diosibe rocaito chuminlanue. Sonalanan rocaichun pelayaimin jominlanue Jesuchi ayan Maríabe, Jesuchi acolabe. 
\p  
\v 15 Junni jun malate Jesucrístochi tsachila duque layaica jominlanue patsa palu chunca tsansi. Tsanque layaito chuminlabe, Pédrori quitsabi wiruito itsantinue: 
\p  
\v 16-17 —Acola, soquila, Judas Iscariote chiquilabe peayudaimin jominhe tinue. Chiquilabe peaconpanaimin jominhe. Tsan jominnan, ya Júdari Jesuca cuwaponue. Jesuca cachi timinlachi cuwaponue. Aman Diosichi Pilabi yaca chuteca jominue Jesuca tsanque osichunaeque. Matu to David Salmo pila quinasanan, Diosichi Tencari yaca pila chutesa carinue tinue. Itsanque jominue: 
\p  
\v 18 Aman Judas Iscariote Jesuca osito, cala canue. Junni jun seiton calachi to canue. Junni jun tobi palo tala darapatito, pecolo sipito pesili fofoduiniinue.  
\v 19 Junni Jerusalenbi chuminla jeralela junca meráto, ya toca “Asan To” tilatinue. (Aman israelítalachi fiquichi “asan to” tito “aséldama” tinun jominue.)  
\v 20 Aman Salmo pilabi itsanque chuteca joe: 
\q1 Yachi to yape epe jonijosa! tinue. 
\q1 Monantiya junbi chuno itochunae tinue. 
\p Diosichi Pilabi tsanque chuteca josa, jun tsanquenan patinue. Judas Iscariótechi to epe inue. 
\p Junni Pedro manpato itsantinue: 
\p —Junsi Diosichi matu pilabi man fiquinan cajoe tinue Salmo tinun pilabi. Junbi Judas Iscarióteca itsanque chuteca joe tinue: Yachi mantaca josoleto, uyanchi mancuwano joeque chuteca joe tinue.  
\v 21-22 Junni tsanquenan tsachi mancaca mantá tan suwantsan joe tinue yape Júdachi mantaca mancasa. Mantá petano jun tsachi chiquilabe jera peaconpanaimin jomin jochunae tinue. Miya Jesús chiquilabe penenasanan yanan parejo penenamin jomin jochunae. Juan mumunnanunle nechi Jesús Diosichi toca manlono fecári chiquilabe parejo penenamin jomin tsachi jochunae tinue. Junni ya tsachi chiquilabe Jesuca cuenta pepolarimin jochunae tinue puyato mansonhinueque. 
\p  
\v 23 Junni Pedro tsantitobi, yala tenpato, paluca tsachilaca wentelaquinue mancacari mantá tan suwachun. Aman manca José Barsabás tinun jominue. Manca Matías jominue. Aman Joseca Justo tensaato mumun tinun jominue.  
\v 24-25 Junni junbi layaica junlari Diosibe rocaito itsantilatinue: 
\p —Miya Diosi, nu jeralelachi tencaca miramin joe. ¿Junni in palucale nechi moca mantá tan suwantsan jun? tilatinue. Judas Iscariote jutsa quito, ya mantaca jera piyarinue ya jino jonun minu jichun. Junni Miya Diosi, nu chiquilachi micuwade! ¿Nu moca wentenayun? yape Crístochi mantá tan pejosa. 
\p  
\v 26 Junni Diosibe tsanque rocaitobi, palucachi mumunca pila chutelaquinue. Aman junca jera palacarito, manca mumunca larilaquinue mochi mumun lonunca miichun. Junni Matíachi mumun lonue. Junni Matíacanan Crístochi mantá tan pejoe tilatinue. 
\c 2  
\s1 Diosichi Tenca patanunca 
\p  
\v 1 Junni aman Pentecostés fiesta ma fanan, Jesube penenaminla jeralela layaito man tencari cato chuminlanue.  
\v 2 Jun quiranari jamochi nechi sonban wu quinasa tsanni mera jominue. Jun yabi jeralete mera jominue.  
\v 3 Junni jun quiranari nin lolonca tsanni patanue. Junsi ya nin lolonca tsan jera arajito, tsachilachi butuchi jera chudinue mancachibi mancachibi.  
\v 4 Tsanhinasa Diosichi Tenca patsa yalachica patato, jeralelachibi wito jera mantanue. Junsi Diosichi Tenca yalaca merátunun fiquichi jera cuenta quisa carinue. 
\p  
\v 5 Aman junni jun fiesta mate Jerusalenbi duque israelítala jato nenaminlanue. Diosica tenca camin israelítala junte penenaminlanue piyanle tobi nechi jato.  
\v 6 Junni yalari uyan fiquichi uyan fiquichi pánanunca meráto, quirachun layailainue. Layaito quiranari, jeralela tencachique fiquichi pánaminca meranilaquinue.  
\v 7 Junni ¿Ti jonhoncan? tito wepananato itsanlatinue: 
\p —¿Inte cuenta quiminla jeralela Galilea to israelítala jolajotuncan? latinue.  
\v 8 Tsanla jotori, ¿niyaito chiquilachi to fiquichi palaquinan? tilatinue. 
\p  
\v 9 Partia tobi chuminla Partia to fiquica meralaquinayoe latinue. Media tobi chuminlari Media to fiquica meralaquinayoe latinue. Jun tsanquenan Elam tobi chuminla, Mesopotamia tobi chuminla, Judea tobi chuminla, Capadocia tobi, Ponto tobi, Asia tobi,  
\v 10 Frigia tobi, Panfilia tobi, Egipto tobi, Cirene quelote Africa tobi chuminla jeralela yalachi fiquichi pánaminca meralaquinayoe latinue. Junsi uyanlari Roma pueblobi nechinan jaca jolajoe latinue weyanlari tsa israelítala, weyanla israelítalabe peito Diosica tenca pecaminla.  
\v 11 Junsi Creta tobi nechinan, Arabia tobi nechinan jaca jolajoe latinue. Junni jerale bare tobi nechi jaminlatiya Jesucrístochi mantá tanla pánaminlaca meráto wepanalainue. Diosi jera seque quica jonunca chiquila jerale tolachi fiquichi polarilaquinae tilatinue. 
\p  
\v 12 Jeralela junca niyaquenantiya tenca cano podeituto, duque wepanalainue. Niyaito tsanque palaquin quinanque beco beco panhalaquinue.  
\v 13 Aman weyanla mantimini cacarito, winanni jolajoe tilatinue. 
\s1 Pedro itsanque micarinunca 
\p  
\v 14 Junni chunca paluca Jesucrístochi mantá tanla wiruilaito, Pédrori sonba pato, layaica jun tsachilabe itsantinue: 
\p —Judea tobi chuminla, jerale Jerusalenca jaca junla, nulabe cuenta quino muquee. Niya josatiya la pánaminca seque meralaquede! tinue.  
\v 15 Weyanlari chiquilaca winan jolajoe tilatinae. Te, natiya winan itolajoyoe. Quepenanan cajoe. Nuebe tsansiri joe. Monantiya in órate winan caitulajochunae.  
\v 16 Inni Diosichi cosa joe. Joel matu tote Diosichi mantate pamin joto, itsan ichunaeque pato, itsanque pila chutenue tinue: 
\q1  
\v 17 To yucapiyarino ma quelo inasa, Diosi yachi Tencaca jeralelachica ereyanae tieque chuteca joe. 
\q1 Nulachi naolabe namalabe Diosichi mantate cuenta quilaquichunae. 
\q1 Diosi nalan nalan unilalachi quirajasa carichunae. 
\q1 Unicalachi quipi quirasa carichunaeque chuteca joe. 
\q1  
\v 18 Diosibe mantaiminlachica yachi Tencaca ereyanae tie unilalachibinan, sonalachibinan. 
\q1 Yalanan Diosichi mantate cuenta quilaquichunaeque chuteca joe. 
\q1  
\v 19 Yoquidobi duque ticatiya quirawoanae tie wepanarichun. 
\q1 Tobinan ticatiya quirawoanae tieque chuteca joe asanca, ninca, nin poyoca, yape tsachila junca quirato tenca calaquisa. 
\q1  
\v 20 Yo neme ichunae. Penan asan cuwenta luban ichunaeque chuteca joe. 
\q1 Jun tsanhichunaeque chuteca joe Miya Diosi to yucapiyarino ma quelo inasa. 
\q1 Seque wepanato quirantsan sen ma jochunae. 
\q1  
\v 21 Juntonan Miyabe rocaiminlaca se lariyanae tieque chuteca joe. 
\p  
\v 22 Junni Pedro Diosichi Pilabi chutecaca tsanque manpasi, ya tsachilabe itsantinue: 
\p —Israelita tsachila, la pánaminca meralaquede! tinue. Jesús Nasareno Diosi wenteca jun tsachi jominhe tinue. Yape nulari junca tenhilaisa, Jesús duque wepanato quirantsancari seque quimin jominhe. Diosichi mantate jera tsanquinaminhe tinue nula nenanunte. Nulanan yaca miralaranae.  
\v 23 Tsan josanan, nulari Jesuca totesa carinilaquinue tinue. Nulari Jesuca cato cuwapolaquinue tinue yape seiton tsachila yaca corosibi totelaquisa. Junnasa mantimini Diosiri junca natiya wepanatunue. Matulenan Diosi miraminue Jesuca totenola joeque. Diosi paca jominue tsanhiniino joeque.  
\v 24 Junni yari tsanle puyaca tsono itonan, Diosi ya puyaca jominca mansoncarinue tinue.  
\v 25 Aman matu to David Diosichi Pilaca chutenato, Jesuchi tenchi pato itsantinue tinue: 
\q1 Miya Diosi numasitiya labe pejochunaeque mirayoe tie tinue. 
\q1 Lachi tsa tede nanchi rato ayudainanan, peleituanae tie tinue. 
\q1  
\v 26 Junni lachi tencabi pansi joto, duque son tito cuenta quimin joyoe tie tinue. 
\q1 La puyano jotonan, wepanatiyoe; mansonhino joyoeque mirato, wepanatuto meranirayoe tie tinue. 
\q1  
\v 27 Diosi, nuri lachi tencaca puyan ocolachibi natiya puratuchunae tie tinue. 
\q1 Laca, nuchi sen tsachi jonan, nu petesa carituchunae tie tinue. 
\q1  
\v 28 Sonnanun minuca lachi micuwachunae tie tinue. 
\q1 Nu labe penenato, laca duque pansi josa carichunae tie tinue. 
\p  
\v 29 Junni David chuteca fiquica jera patobi, Pedro itsantinue: 
\p —Amicola, Miya Davica tuca pantsan joe tinue. Yari matu mate puyato menaito, ¿natiya camansonhituco? tinue. Amananantiya ya menaranun postoca quirantsan rae.  
\v 30-31 Tsan josanan, Diosi miya Davibe tsarasica juraquito pato, itsantinue tinue: Davichi alica mancaca miya suwanae tinue Davica cuwenta. Junni Davichi alicari puyato mansonhino jominue tinue. David Diosichi mantate pamin joto, yaca miramin jominue tinue. Junto Daviri puyan ocolachibi puraino itoyoe tito, tencachiquenan patue; Cristo tinun alicachi tenchiri pánaminue tinue. Junni jun tsanquenan patinue; Diosi Cristo tinunca puyan ocolachibi puratunue tinue. Yaca petesa caritunue tinue.  
\v 32 Diosi ya Jesuca mansonhisa carinue tinue puyaca jominca. Chiquilanan jeralela yaca manson nenaminca manquirato, jera cuenta polarilaquinayoe tinue.  
\v 33-35 Aman David man postote itsanque pila chutenue tinue: 
\q1 Miya Diosi lachi Miyaca jamochi losa tichunae tinue yape yachi tsa tede nanchi pechusa. 
\q1 Junte chude! tichunae tinue nube pa jominlaca fe losa carino fecári. 
\p Junni Pedro David chuteca fiquica tsanque pato, tsachilabe itsantinue: 
\p —Junni ya jamochi lomin tsachiri David itominue; Jesús jominue tinue. Diosi Jesuca mansoncarito, jamochi chutenue tinue. Yachi tsa tede nanchi chutenue yape yabe pemantasa. Junni Jesús junte chusanan, Diosi yachi mantaca cuwanue tinue yape Diosichi Tencaca chiquilachibi eresa. Junni amana ticatiya pánanunca jera wepanato meráto, ticatiya quinanunca jera wepanato quirato, nulari itsanque tenca calaquede! tinue: Tenca mánta tsanlaquitue; Diosichi Tencari tsansa carinaeque tenca cantsan joe tinue. Diosi matu mate cuenta quica jominue tinue tsanhino joeque.  
\v 36 Tsan josanan, nula israelítalari ya Jesuca corosibi totesa carilaquinue tinue. Tsanni nula Jesuca totesa carica josa, Diosi yaca wenteto miya suwanue tinue. Yaca wenteto Cristo tinun suwanue tinue. Nula jeralela junca meralaquede! Tsarasica pánayoe; nene pátiyoe tinue. 
\p Pedro tsanque cuenta polarinue.  
\v 37 Junni tsantinunca meráto, israelítalari tencabi duque wepanalainue jutsa quiminlayoeque. Junni Pédrobenan weyan Crístochi mantá tanlabenan itsanque panhalaquinue: 
\p —Acola, palaquede! tilatinue. ¿Ti quinola jowan? tilatinue. 
\p  
\v 38 Junni Pédrori yalabenan itsantinue: 
\p —Nula jeralela jutsa quinunca telaquepoto, casan tala tenca mancato, mumunhilaide! tinue Jesucrístochi icayoe tito. Junni Diosi nulachi jutsaca piyarito, yachi Tencaca nulachibi wisa carichunae tinue. Epe cuwanique cuwenta, yachi Tencaca nulachibi wisa carichunae.  
\v 39 Chiquilachi Miya Diosi jutsaca piyariyanae tito, nulachi tenchinan tsantinue tinue. Duque tsachilaca yabe cayaisa tinae tinue nulacanan, nulachi nalalacanan, barebi chuminlacanan. Jerale cayaisa tica jun tsachilachi jutsaca piyarino joe tinue. 
\p  
\v 40 Junni Pedro yalabe duque fiqui polarito, yalaca payito itsantinue: 
\p —Amana mate sonnamin tsachilachi tenca yucapiyaca jolajoe tinue. Junni nulari yalaca jera telato, se lolaide! tinue. Pedro tsanque payinue. 
\p  
\v 41 Junni Pedro pacaca quereiminlari mumunhilainue. Jun matenan peman mili tsachila tsansi Jesucrístochi tsachilabe peilainue.  
\v 42 Junni Jesucrístobe penenaminla duque ne layaimin jominlanue yape Crístochi mantá tanla yalaca micarilaquisa. Man junnique tenca cato nenaminlanue. Diosibe rocain, bibu pisulaito fin, quichun layaimin jominlanue. 
\s1 Jesucrístobe penenaminla itsanque chuminla jonunca 
\p  
\v 43 Junni Crístochi mantá tanla duque wepanato quirantsancari seque quinaminlanue yape tsachila tenca cato miilaisa. Junnan jeralela jele tilatinue.  
\v 44 Junni jerale Jesube cayaica junla layaito, man junni tenca cato, jeralela man layanni taminlanue.  
\v 45 Toca, ticatiya tanunca osito, jerale munaraminlachi cuwamin jominlanue.  
\v 46 Diosichi yabi ma cura layaito, tsachilachi ya curanan bibu pisulaito fimin jominlanue. Duque son tito, sen tenca tato, beco beco ano fimiyamin jominlanue.  
\v 47 Diosica seque pamin jominlanue. Junni jerale tsachila Jesucrístobe penenaminlaca quirato, sen jolajoe timin jominlanue. Junni Miya Diosi ma cura uyan tsachilacanan se larinan, yalanan Diosichi tsachilabe pelayailainue. 
\c 3  
\s1 Jancan tsachi manseinunca 
\p  
\v 1 Aman man nete Pédrobe Juanbe Diosichi yaca lolainue. Diosibe rocaino óra jominue tre de la tardete.  
\v 2 Junni loto quiranari, jancan tsachica tanjanaminlanue. Diosichi ya tamolan quelole chutebi tanjanaminlanue. Ya tamolanni Uraran Tamolan tinun jominue. Aman ya jancan tsachica ya tamolan quelole ma cura chutemin jominlanue yape Diosichi yabi wiminlachica lemosi calaca farisa. Nainunle nechi natiya nenano podeitumin jominue.  
\v 3 Junni aman jancan tsachi Pédrobe Juanbe tamolanse wilaichinaminca quirato, lemosi cala panhanue.  
\v 4 Junni Pédrobe Juanberi yacanan caca tala quirato, Pedro itsantinue: 
\p —Chiquilaca quirade! tinue. 
\p  
\v 5 Junni yalaca quiranue lemosi cala cuwachinaeque tenca cato.  
\v 6 Junni ya quiranunsi, Pedro itsantinue: 
\p —Cala itoyoe tinue. Oronan itoyoe tinue. Juntonan uyan cosaca cuwachinayoe tinue. Jesús Nasarénochi mantate mantanayoe tinue. Junni tsantisi, manwiruito nenade! tinue. 
\p  
\v 7 Junsi jancanca tsa tedele cato manwirucarinue. Junni tsannunsileri nede manseinue.  
\v 8 Junto jancan jomin tsachi sonba manwiruito, mannenaniraminue. Nenato, suloto, Diosica se tito, Pédrolabe Diosichi yabi pewinue.  
\v 9 Junni jeralela yaca quiralaquinue Diosica se tito nenaminca.  
\v 10 Yaca quirato, yari Uraran Tamolante chumin jominheque tenhilainue. Lemosi calaca panhato chumin jominheque tenhilainue. ¿Niyaito manseinun? tilatinue. Tsantinato, duque wepananaminlanue. 
\s1 Pedro Diosichi yabi micarinunca 
\p  
\v 11 Jancan jomin tsachiri Pédrobe Juánbeca cachurasanan, jeralela yalachica wepanato sujato layailainue. Salomonchi posto tinunte jera layailainue Diosichi yabi.  
\v 12 Junni Pedro jera layainaminlaca quirato itsantinue: 
\p —Israelita tsachila, ¿niyaito inca wepanalainayun? tinue. ¿Ti quichun chiquilaca wepanato quiralaquinayun? tinue. Chiquilari in tsachica mansechun natiya sonban itolajoyoe tinue. Diosi cuwenta natiya itolajoyoe in jancan jomin tsachica jera manse suwachun.  
\v 13 Chiquila tsanlaquitiyoe; Diosichi Nao tsanquee tinue. Diosi yachi Naochi duque mantá cuwanan, yari in jancan jominca manse suwae tinue. Aman Diosi chiquilachi matu to tatalaca, Abrahanbe, Isaabe, Jacóbobeca, aman yalaca Diosi wentenue yape yachi tsachila jolajosa. Junni nulachi tatalaca wentemin Diosi patsa Jesuchi mantá cuwaca joe. 
\p Junni tsan josanan nulari Jesuca cuwaponilaquee tinue yape yaca totelaquisa. Pilato miya yaca manlarichi tinasanan, nulari manlarisa carilaquitue tinue.  
\v 14 Nulari Diosichi tsara sen tsachicari manlaritude! tito, tsachilaca toteminca manlaride! tilatie tinue.  
\v 15 Sonnasa cariminca totesa carilaquee Jesucrístoca. Diosi mantimini yaca mansonhisa carinue tinue. Ya manson nenaminca chiquilari cacachi quiralaquiyoe tinue.  
\v 16 Junni in jancan jomin tsachi ya Jesuca tennanue tinue. Jun tenchi Jesús yaca sonba wiruisa carinue tinue. ¿Inni jancan jomin tsachi joco? Aman Jesuca quereito, jera manseinue tinue. Jeralela quiranilaquede! tinue. 
\p  
\v 17 Aman nulabe nulachi miyalabe Jesuca totesa cuwaponato, miitoto cuwapolaquee tinue. Junca mirayoe tinue.  
\v 18 Aman jerale Diosichi mantate paminla matu mate pila chutenato, Jesucrístoca itsanque cuenta polarica jominlanue tinue: Diosi wenteca Cristo tinun tsachi padeseino jochunaeque chutelaquinue tinue. Junni Diosichi Pilabi tsantica josa, Diosiri jun tsannan isa carie tinue. 
\p  
\v 19 Junni nulari jutsa quinunca telaquepoto, casan tala tenca mancalaquede! tinue. Diosibe cayailaide! tinue. Tsanlaquinari, Diosi nulachi jutsaca jera piyarichunae tinue. Miya Diosi nulaca pansi chusa carichunae tinue.  
\v 20 Junsi Jesucrístocanan numarile nechi manhereyanae tito, nulachica manherechunae tinue. Diosi yaca mantá tan suwaca joe yape nulachi tenchi Cristo tinun Miya josa. 
\p  
\v 21 Tsan josanan, Jesucrístori tsainaleri camanjatuchunae. Casaleri Diosi jeraleca mansechunae tinue. Matunan Diosichi mantate seque paminlari junca cuenta polarica jominlanue tinue. Junni jera manseno fecári Jesucristo jamochinan cachuno jochunae tinue.  
\v 22 Matu to Moisés Jesucrístoca pila chutenue tinue. Ya pilabi israelítalabe itsanque cuenta quinue tinue: Miya Diosi israelítalachile nechi tsachi mancaca wenteto mantá tan suwachunaeque paca joe yape Diosichi mantate pasa. Ya tsachi Moisés cuwenta mantá tan jochunaeque paca joe tinue. Junni ya tsachi jano mate israelítala yachi fiquica jera seque meránola jochunae tie tinue.  
\v 23 Ya pacaca merátuchi timinlacari casticaquito toteno jochunae tie tinue. 
\p  
\v 24 Junni Diosichi mantate matu tote paminlanan cuenta polarilaquinue tinue Jesucristo nenano mate niyan jono jonunca. Casale matu to Samuel junca cuenta quinue; junte nechi jeralelanan jun tsanquenan cuenta quilaquinue tinue.  
\v 25 Junni ya Diosichi mantate paminla israelítalanan pejominlanue nula cuwenta. Yalari Diosichi fiquica matu mate patonan, nulachi tenchinan pánaminlanue. Aman Diosi patsa matu to Abrahanbe itsantinue. La nuchi alica mancaca wenteyanae tinue yape piyanle tote chuminlachi tenchi sen quisa. Junto Diosi nulachi matu to tata Abrahanbe tsantinato, nulachi tenchinan tsantinaminue tinue.  
\v 26 Junni Diosi yachi Naoca mansoncaritobi, nulachica casale erenue tinue. Yaca erenue yape nulachi jutsaca telaqueposa carito nulaca jera sen quisa. 
\p Pedro Diosichi yabi layaica junlabe tsanque micarinue. 
\c 4  
\s1 Pédrobe Juánbeca dolaquinunca 
\p  
\v 1 Junni Pedro tsachilabe cuenta caquinasanan, israelita mantaminla jalainue. Patelelabe saduseo tinunlabe Diosichi yaca cuidaimin polisia capitanbe jalainue.  
\v 2 Aman Pédrobe Juanbe tsachilaca micarinato, Jesús puyato mansonhinueque micarinaminlanue. Jun tenchi jeralelanan mansonhicaichunaequenan micarinaminlanue. Junni Pédrola tsanque micarinaminlaca israelita mantaminla duque paito  
\v 3 yalaca calaquinue. Junni quebi cato, ayuna nanchi fecári Pédrolaca do taminlanue.  
\v 4 Tsan josanan duque tsachila Pedro micaricaca meráto, Jesube cayailainue. Unilalacasiri minan, mante mili tsansi cayaica junla inue. 
\p  
\v 5 Aman junni ayuna nanchi israelita mantaminla ya Jerusalén pueblobi layailainue. Mantá tan unicalabe, israelítala tala mantaca micariminlabe,  
\v 6 fe mantá tan patelebe, Caifabe, manca Juanbe, Alejándrobe, mantá tan patelechi uyan familialabe layailainue. Aman fe mantá tan patele Anasio mumun jominue.  
\v 7 Junni aman Pédrobe Juánbeca quitsabi wirucarito, itsanque panhalaquinue: 
\p —¿Ti mantate tsanlaquiyun? latinue. ¿Mo nulaca tsanquisa carin? latinue. 
\p  
\v 8 Junni Pedro Diosichi Tencabe jera seque mantaito itsantinue: 
\p —Israelita mantaminla, israelita unicala,  
\v 9 ¿nula chiquilabe tíca miino muquilaquin? tinue. ¿Jancan jomin tsachi manseica jonunca panhalaquinayun? Tsanque sen quinunca miino muquilaquinari,  
\v 10 junni meralaquede! tinue. Jerale israelita tsachila junca miinola joe. Jesús Nasareno yaca jera manse suwacae tinue. Jesucrístochi mantate in jancan jomin tsachi nulachi cale senan manwirurae tinue. Nulari Jesuca corosibi totesa carilaquee tinue. Diosi mantimini yaca puyaca jominca mansoncarinue tinue.  
\v 11 Meralaquede! Diosichi Pilabi itsanque chuteca joe: 
\q1 Suca ya quiminla su mancaca seitoe tito quepolaquichunaeque chuteca joe. 
\q1 Tsan josanan, ya suri uraran fe munaranun su patichunaeque chuteca joe. 
\m Junni nulari jun ya quiminla cuwenta jolajoe. Jesucristo jun su cuwenta joe tinue. Nulari yaca seiton joe tito quepocala josanan,  
\v 12 yasiri jutsa quinaminlaca se larimin joe tinue. Diosi yaca mumun pato mantá cuwanue tinue yape jerale tote chumin tsachila yabesiri se lolaisa. 
\p  
\v 13 Aman Pédrobe Juanbe epe tsachila jominlanue. Duquenan estudiaica iton jominlanue. Tsanla jotonan, luratuto paniquinaminlanue. Junni israelita mantaminla Pédrobe Juanbe pánaminca meráto wepanalainue. Junsi tenhilainue Jesube miicala joto tsan jolajoeque.  
\v 14 Junnasanan, ya manse suwaca jun tsachinan junbi Pédrolabe pemanwiruraminue. Jun tenchi israelita mantaminlari yaca quirato, man fiquinantiya beco pano podeitulajonue.  
\v 15 Junsi Pédrolaca tamochi nechi moora larito, israelita mantaminla talari tenpalaquinue.  
\v 16 Itsanlatinue: 
\p —¿In tsachilaca niyan quintsan junhun? latinue. Wepanato quirantsancari tsara seque quilaquee yape uyan tsachila jera quirato tennalarasa. Jerusalenbi chumin tsachila junca jera miralarae latinue. Jun tenchi chiquilari nene joe tino podeitulajoyoe latinue.  
\v 17 Junto aman yalaca sonba payito, jele pontsan joe latinue yape uyanlanan yalachi fiquica meralaquitusa. Jesuchi mantate mobenantiya cuenta manpolarilaquituna! tintsan joe latinue. Yachi mantate micarilaquinari, nulaca ura casticaquilaqueyanae tintsan joe latinue. 
\p  
\v 18 Junni Pédrolaca manwiyasa carito, Jesuchi mantate natiya manpatusa mantalaquinue. Jesuchi mantate micarilaquituna! tilatinue.  
\v 19 Junni tsantinaminlaca meráto, Pédrobe Juanbe beconan itsanlatinue: 
\p —Nulari tenca cato miilaide! Chiquilari Diosicari merátuto, nulacari meránari, ¿yari Diosibe sen jono jun?  
\v 20 Chiquila quiranuncari, meránuncari, cuenta manpolarinonan jolajoyoe latinue. 
\p Pédrola israelita mantaminlabe tsantilatinue.  
\v 21 Junni mantaminlari duque pa jolajosanan, jerale epe tsachilari Diosica duque sen joe latinaminue jancanca manse suwanun tenchi. Jun tenchi mantaminlari epe tsachilaca jelechi Pédrobe Juánbeca casticaquitulajonue. Junto yalaca manan manholeto, manlarilaquinue.  
\v 22 Aman ya jancan jomin manseica jun tsachiri junpalu chunca wata fe taminue. 
\s1 Sonban tenca suwadeque rocailainunca 
\p  
\v 23 Aman Pédrobe Juanbe manlolaitobi, Jesube penenaminlachica manjilainue. Junchi manjito, mantá tan patelelabe, mantá tan unicalabe palaquinanunca jera manpolarilaquinue.  
\v 24 Junni Jesuchi tsachila junca meráto, jeralela man parejori tenca cato Diosibe itsanque rocailainue: 
\p —Mantamin Diosi, nu yoquidoca quinue. Toca quinue. Lamarica quinue. Nu jeralete ticatiya sonnaminlaca jera quinue.  
\v 25 Matu to miya Daviri nube seque mantaimin jominue. Junni nuchi Tencabe mantaito David itsanque pila chutenue: 
\q1 Uyan to tsachilari paito cuenta quilaquichunaeque chutenue. 
\q1 In to tsachilanan seiton quino tenca calaquichunaeque chutenue. 
\q1 Juntonan yari epe jochunae. ¿Ti quichun tsanlatichunan? 
\q1  
\v 26 Uyan to miyalanan layailaichunaeque chutenue Diosibe quicaachun. 
\q1 In to mantaminlanan layailaichunaeque chutenue. 
\q1 Miya Diosica pachi, ya wenteca jun Cristo tinunca pachi layailaichunaeque chutenue. 
\m  
\v 27 Junni Diosi, nu tuca pila chutesa carinue latinue. Nuchi pilabi jera tsanhichunaeque chuteca josa, jun tsanquenan patinue latinue. In to miya Herodes, uyan to miya Poncio Pilato, aman yalabenan in to tsachilabenan, uyan to tsachilabenan, jeralela layaito Jesuchi contra jominlanue. Jesuri nuchi tsara sen Nao joe latinue. Nuri yaca wenteto, mantá tan suwanue. Tsan jominca yala jeralela yaca paito layaica jominlanue latinue.  
\v 28 Nu mantimini matulenan jera tenca caya jominue latinue Jesús jera niyan intsan jonunca. Nu tede ponue latinue. Junni Jesuca pa junlari jera ticatiya quinilaquee latinue. Nuri numa pato Itsanquichunae tica josa, jun tsannan quinilaquee latinue.  
\v 29 Chiquilari nube mantaiminla joyoe. Tsan josanan, chiquilaca seiton quichi latinae. Aman nu Diosi, junca meráto, chiquilaca sonba tenca suwade! chiquilari jeleratuto nuchi fiquica palaquichun.  
\v 30 Junni chiquila nuchi fiquica palaquinasanan, nu Diosi tede poto quiyanpunlaca manse suwade! latinue. Jesús nuchi tsara sen Nao joe. Junni chiquilaca Jesuchi mantate duque wepanato quirantsancari seque quisa caride! latinue yape tsachilari junca quirato nuca tenca calaquisa. 
\p  
\v 31 Junni Diosibe tsanque rocainunsi, layainun tamori wecainue. Junnasale Diosichi Tenca yalachibi jera seque mantaquebi winue. Junnan yalari luratuto, Diosichi fiquica seque pánaminlanue. 
\s1 Man layanni jera taminla jonunca 
\p  
\v 32-33 Junni Crístochi mantá tanla Miya Jesuca pánaminlanue yaca mansonhicaca quiracalayoeque. Diosi yala jeralelaca duque laquirato seque ayudainaminue. 
\p Junnan aman jerale Jesucrístobe cayaica junla man junni munaralarato, man tencari cato chuminlanue. Yala ticatiya tato, yaca tsacumin joyoe titumin jominlanue. Ticatiya tato, jeralela man parejo tamin jominlanue. Monantiya isapun itominlanue.  
\v 34 Ticatiya munajanasa nenamin tsachilanan itominlanue. Aman molatiya to tatori, o ya tatori, junca jera osito cala cato,  
\v 35 ya calaca Crístochi mantá tanlachi cuwamin jominlanue. Junni yalaman jerale munaraminlachi mancuwamin jominlanue.  
\v 36 Aman junnasa Chipre tobi nechi jaca tsachi manca jominue. Crístochi mantá tanlari yaca Bernabé tensaato mumun polaquinue. Yalachi fiquichiri laqui jominlaca payimin tsachica Bernabé tinun jominue. Yari Levichi bolon israelita tsachi jominue.  
\v 37 Junni yanan yachi toca osito, cala cato tanjato, Crístochi mantá tanlachi jera cuwanue. 
\c 5  
\s1 Ananíala nene panun tenchi puyalainunca 
\p  
\v 1 Junni aman manca tsachiman jominue Ananías mumun. Yachi sonari Safira mumun jominue. Aman yalaman to osilaquinue.  
\v 2 Junto cala casi, Ananías weyanca nosa larito, jun puchuca Crístochi mantá tanlachi cuwato, jera cuwanayoe tinue. Yachi sonanan miraminue ya weyan calaca nosa laricaya joeque.  
\v 3 Junni Ananías jera cala cuwanayoe tinunsi, Pédrori yabe itsantinue: 
\p —Ananías, nuri to tenchi cala cato, weyan calacari tsato, inni jera joe tito cuwanae tinue. Nuri Diosichi Tencabenan nene pánae. ¿Aman niyaito Satanás nuca tsanque encanasa carinan?  
\v 4 Ya toca caosituminnan, nu tsacumin jominue. Aman ositobinan, nunan calaca tsacumin jominue. ¿Junni ti quichun nene pano tenhiyun? Nuri tsachilaberi nene patue; Diosibenan nene pae tinue. 
\p  
\v 5 Junni Pedro tsantinaminca meráto, Ananías puyaca queereinue. Junni jerale junca meráminla duque jele tilatinue.  
\v 6 Junni Ananías puyanunsi unila tsachila jato, ya puyacaca lapito menabi tanjilainue. 
\p  
\v 7 Junni peman órate Ananíachi sonaman janue. Yachi unila puyaca joeque miituto janiinue.  
\v 8 Junni Pedro yabenan itsantinue: 
\p —¿Nulachi toca tsansiteri osilaquiyun? tinue. 
\p Junni ya sonari tsansitere tinue.  
\v 9 Pedro mantimini beconan pato, itsantinue: 
\p —¿Ti quichun nula palunan Miya Diosica tsanlaquinayun? Nula miichi tinaminlanue Diosichi Tenca nisi fecári jutsa tenchi casticaquituminnan wantaino jonunca. Junni meráde! tinue. Nuchi unila puyan ococa menaminlari tamolante merará manjalainae tinue. Junni nucanan menabi tanjilaichunae tinue. 
\p  
\v 10 Pedro tsantinunsi, ya sonari Pédrochi nedele queereito puyanue. Junni unila tsachilanan manwito, ya sona puyacacanan cato, yacanan tanjito, yachi unila puyan ocochile menalaquinue.  
\v 11 Junni jerale Jesucrístobe cayaica junla junca jele tinaminlanue. Uyanlanan junca meráto jeralela jele tinaminlanue. 
\s1 Sen quinaminla jonunca 
\p  
\v 12-14 Jerale Jesucrístobe penenaminla Diosichi yabi layaimin jominlanue Salomonchi tinun postote. Uyanlari Jesucrístochi tsachilabe layaino jeleratonan, yalaca sen jolajoeque cuenta quinaminlanue. Juntonan nantanancari fe tsachila Miya Jesucrístobe cayainaminlanue sonala, unilala. Junni tsachila quiralaquinasa Crístochi mantá tanlari duque wepanato quirantsancari seque quinaminlanue yape Diosica tenca calaquisa.  
\v 15 Junni tsachilari quiyanpunlaca minu quelote tanjato tsoremin jominlanue. Weyanlacari cuyanbi, weyanlacari lowa tsanbi tanjalainue. Pansile Pedro polenasanan, yachi ocopinchube doilaitotiya manseilaichunae latinue.  
\v 16 Aman quelole pueblobi nechinan quiyanpunlacanan, yucanchi ocobe padeseinaminlacanan Jerusalenca tanjalainue yape manseilaisa. Junni jerale tanjaca junla manseilainue. 
\s1 Pédrolaca manan mandolaquinunca 
\p  
\v 17-18 Tsantin nenalarasanan, fe mantá tan pateleri yachi tsachilabe Crístochi mantá tanlaca pailainue. Aman ya patelebe penenaminla saduseo tinun israelítala jominlanue. Junni yala jeralela Crístochi mantá tanlaca pailainue uyan israelítala ya patelelaca telaquepoto Crístochi mantá tanlaca fécari meralaquinaeque. Junto Crístochi mantá tanlaca cato dolaquinue yape wari tsachilaca nantari micarilaquitusa.  
\v 19 Junni doralarasanan, jun quepente Miya Diosi yachi anjelica erenue yape doranun tamolanca lasito cuwasa. Junni anjeliri Crístochi mantá tanlaca donun yabi nechi larisi, yalaca itsanque mantanue: 
\p  
\v 20 —Diosichi yaca jilaide! tinue. Junbi wiruito tsachilaca Diosibe pesonnanoca jera micaride! tinue. 
\p  
\v 21 Junni tsantinunca meráto, aman mantseinunsi Diosichi yabi manwito micarinaminlanue. Junnasa mantá tan patelebe yachi tsachilabe jerale israelita mantaminlaca layalaquinue. Junto jera layaitobi, donun yaca fiqui erenue yape Crístochi mantá tanlaca manlarito tanjalaisa.  
\v 22 Junni polisiala donun yabi féto quiranari, Crístochi mantá tanlari itominlanue. Junca quirasi, mantá tan patelechica manjito,  
\v 23 itsanlatinue: 
\p —Chiquila féto quiranari, donun yari sequenan doraminue latinue. Quiramin polisialanan tamolante quirato wiruraminlanue latinue. Junni aman tamolan manlasito quiranari, fu tamo jominue latinue. 
\p  
\v 24 Junni capitanbe mantá tan patelelabe ya fiquica meráto, duque wepanato, ¿Niyanhichunancan? tilatinue.  
\v 25 Tsanlatinasa mantimini, tsachi manca yalachica jato itsantinue: 
\p —Nula doca jomin tsachilari Diosichi yabi tsachilaca manmicarilaquinae tinue. 
\p  
\v 26 Junca merasi, capitanbe polisialabe Diosichi yaca manjito, Crístochi mantá tanlaca manan mancato tanjilainue. Aman yalaca canatonan, uyan tsachilaca jelechi natiya sonba catulajonue chiquilaca pansile su walaca tala quilaquichunae tito.  
\v 27 Junni Crístochi mantá tanlaca mantanjato, israelita mantaminlachibi tanwilainue. Junni fe mantá tan pateleri yalabe  
\v 28 itsantinue: 
\p —Chiquilari nulaca duque sonba mantalaquiyoe tinue Jesuchi mantate natiya manmicarilaquitunaque. Tsantica josanan, nulari jerale Jerusalenbi chuminlaca micarinilaquinae tinue. Junsi chiquilacanan culpa quichi latinae tinue Jesuca totesa caricalaeque. 
\p  
\v 29 Pédrobe uyan Crístochi mantá tanlabe beconan pato, ya mantaminlabe itsanlatinue: 
\p —Chiquilari tsachilacari merátuto, Diosicasiri meránola joyoe latinue.  
\v 30 Nulari Jesuca corosibi totesa carica josa, chiquilachi matu tatalachi Diosinan yaca mansoncarinue tinue.  
\v 31 Junsi yaca jamochi laricanue tinue yape yachi tsa tede nanchi pemantato chusa. Junni Jesús jamochi chuto, israelítalaca yalachi jutsaca jera telaqueposa carino munarae. Yari nulachi jutsaca piyarino podeichunae.  
\v 32 Aman chiquilari junca jera mirato, Diosichi tenchi tsanque cuenta polariniquinayoe. Diosichi Tencanan junca jera mirato, yanan tsachilaca tsarasi fiqui joeque tenhisa carinae. Junni Diosi yaca meráminlachica yachi Tencaca eremin joe tinue yape yalachibi wito chusa. 
\p Junni Pedro jun fiquicari cuenta polarinue.  
\v 33 Jun fecári meralaquinaminnan, israelita mantaminla Pédrolaca duque paito totechi latinue.  
\v 34 Junni totechi latinasa, manca mantamin tsachiri cuenta quichun wiruinue. Yari fariséolachi bolon israelita joto, yala tala mantaca micarimin jominue. Gamaliel tinun mumun jominue. Jeralela yaca duque respetaimin jominlanue. Junni ya mantimini Pédrolaca urachi moora larisa carito,  
\v 35 weyan mantaminlabe itsantinue: 
\p —Israelita tsachila, nulari ya Jesube penenaminlaca tsarasica tencabe nenalarana! tinue. Seque tenca catuminnan tína tede potulajona! tinue.  
\v 36 Aman meralaquede! Matulenan Teúda tinun tsachi mantamin joyoe tide janue tinue. Junpalu patsa tsachila tsansi yabe penenamin ica jominlanue. Junni ya Teúda totainunsi, yabe penenaminlari ara cura jera jilainue tinue. 
\p  
\v 37 Aman Teúdachi benete Judas tinun tsachiman Galilea tobi nechi janue. Senso quinasanan janue. Weyan tsachila yabenan penenamin ica jominlanue. Junni yanan tsanquenan totainunsi, yabe penenaminlanan ara cura jera jilainue. 
\p  
\v 38 Junto ya Jesucristo tinunbe penenaminlaca telaquede! tiyoe tinue. Tede tína potulajona! Tsachilachi mantatesiri micarilaquinatori, o tsachilachi mantatesiri manse suwato nenalaratori, yalanan epele ara cura jera jilaichunae tinue.  
\v 39 Junni pansile Diosichi mantate micariminla jonari, chiquilari yalaca numanan fe lono podeicaituchunae tinue. Fe lochique tenfelainatori, pansile Diosichi contranan jono paticaichunae tinue. 
\p  
\v 40 Junni jerale mantaminla ya pacaca meráto, seque pae tilatinue. Junto Crístochi mantá tanlaca tamochi manwiyasa carito, yalaca asotaquisa carito, Jesuchi mantate nantari micarilaquitunaque mantato, manherelaquinue.  
\v 41 Junni tsanque padeseitobi, ya mantaminlachibi nechi duque son tide manlolainue. Diosi yalaca Jesuchi tenchi padeseisa carica jominue. Jun tenchi yalari son tito Diosibe acradeseilainue.  
\v 42 Junni ma cura Jesucrístoca pato micarinaminlanue weyante Diosichi yabi, weyante tsachilachi yabi. 
\c 6  
\s1 Ano poto cuwasa mantá cuwanunca 
\p  
\v 1 Tsan josanan, nantanancari duque tsachila Jesucrístobe cayailainue. Junni tsantin chuminnan, griego fiqui paminlari israelita fiqui paminlaca pailainue. Chiquilachi bolon biudalaca seiton quilaquinae tinaminlanue. Ma cura fino itonlachi finoca cuwanato, ya biudalachiri layan cuwatuminla joe latinue.  
\v 2 Junni chunca paluca Crístochi mantá tanla piyanle Jesucrístobe penenaminlaca jera layaisa carito, itsanlatinue: 
\p —Chiquilari Diosichi fiquica micarinola joyoe. Chiquilari ano poto cuwachun junca puranari, ¿seitochunaco? latinue.  
\v 3 Jun tenchi, acola, soquila, meralaquede! Nula tala sieteca tsachilaca wentelaquede! Jera sen joe tinunla, Diosichi Tencabe jera mantaiminla, tenca tanla jonola joe. Junni chiquila yalaca ano poto cuwasa mantalaqueyanae latinue.  
\v 4 Chiquila mantimini Diosibe rocain, Diosichi fiquica micarin, quinilaquinanae latinue. 
\p  
\v 5 Junni Crístochi mantá tanla tsanticala josa, jeralela se joe latinue. Junsi casaleri Estébanca wentelaquinue. Yari Diosica tsara quereimin joto, Diosichi Tencabe jera seque mantaimin jominue. Junsi aman Felípeca, Prócoroca, Nicanórica, Timonca, Parménaca, Nicolaca wentelaquinue. Aman Nicolás mantimini Antioquíabi nechi jominue. Yari israelita itotonan, Jesube cacayaituminnan israelítalachi mite Diosica tenca camin ica jominue.  
\v 6 Junni yalaca jera wenteto, Crístochi mantá tanlachica tanjalainue. Junni Crístochi mantá tanlari Diosibe rocaito, tedechi tale quito, mantá cuwalaquinue. 
\p  
\v 7 Junni nantanancari tsachila Diosichi fiquica miinaminlanue. Tsanhinato Jerusalenbi duque Jesucrístobe penenamin ilainue. Duque israelita patelela jominlanan Jesucrístoca meráto cayailainue. 
\s1 Estébanca calaquinunca 
\p  
\v 8 Tsan josanan, Estébanni duque wepanato quirantsancari seque quinaminue yape tsachila junca quirato Diosica tennalarasa. Diosi Estébanca laquirato, duque sonba tenca suwanue.  
\v 9 Junni Esteban tsantin nenasanan, weyan israelítala yabe pacaalaquinue. Israelítala tala Diosichi fiqui miinun ya manca Liberto tinun jominue. Junni Estébanca pa jominla junbi nechi jominlanue. Yalari Cirene tobi nechi, weyanlari Alejandría pueblobi nechi, weyanlari Cilicia tobi nechi, weyanlari Asia tobi nechi jominlanue. Yalari Estébanbe pacaato,  
\v 10 yalanan jera pele ilainue. Esteban Diosichi Tencabe jera seque mantaito tsara sen tencabe pánaminue. 
\p  
\v 11 Junni yalari peleilaiyoeque tenhito, uyan tsachilachi nosa cala cuwalaquinue yape Estébanca seitonque nene palaquisa. Esteban Diosica seitonque pánaminca meralaquiyoe latinue. Matu to Moisécanan seitonque pánaminhe latinue. Estébanca tsanque nene palaquinue cala cachiqueri. 
\p  
\v 12 Junsi israelítalaca firara tisa carilaquinue yape Estébanca cato dolaquisa. Mantá tan unicalaca, mantaca micariminlacanan, uyan israelítalacanan tsanque firara tisa carilaquinue. Junto Estébanca cato, mantá tan israelítalachica tanjilainue.  
\v 13 Junni nene pamin testicolacanan petanjilainue yape Estébanca seitonque palaquisa. Nene pato, itsanlatinue: 
\p —In Esteban Diosichi yacanan, Diosichi mantacanan, duque seitonqueri pamin joe latinue.  
\v 14 Ya itsantinaminca chiquila meralaquiyoe tilatinue: Jesús Nasareno Diosichi yaca araleto, junsi Moisés micaricaca jera canbiyacarichunae tinaminca meralaquiyoe tilatinue. 
\p  
\v 15 Testicola tsanlatinasanan, jerale mantaminlari Estébanca quiralaquinasari, yachi caforori anjelichi caforonan quiran jominue. 
\c 7  
\s1 Estébanchi fiqui 
\p  
\v 1 Junni aman mantá tan pateleri Estébanbe panhato, ¿In testicolachi fiqui tsa jun? tinue.  
\v 2 Junni Estébanni beconan manpato, baren cuenta polarinue yala Diosibe cayaituchi timinla joeque. Itsantinue: 
\p —Israelita pejunla, laca meralaquede! tinue. Chiquilachi matu to tata Abraham casale Mesopotamia tobi chuminue. ¿Yanan Caldea tinun to joco? Junni Abraham Harán toca chubi cajitusanan, tsara sen Diosi yabe quiraito  
\v 3 itsantica jominue tinue: Nuchi familialaca purato, nuchi tobi nechi lode! tica jominue tinue. Nu jinasanan, manca toca nuchi micuwanae tica jominue tinue yape nu junbi chusa.  
\v 4 Junni Diosi tsantinunsiri, Abraham Caldea tobi nechi loto, Harán tobi chubi jinue. Junsi Abrahanchi apa puyanunbi, Harán tobi nechinan lonue. Junte nechi Diosi Abrahanca in tobinan chusa tanjanue tinue chiquila amana chunun tobi. 
\p  
\v 5 Junni Diosi Abrahanca inchi tanjaca jotonan, toca nasi nacánantiya tsacumin caisa caritunue tinue. Tsan josanan nanni ina cuwanae tinue yape nu tsacumin josa. Junni Abraham puyanunbi, yachi alicalanan in toca tsacuminla jolajochunaeque paca jominue tinue. Junni aman Diosi Abrahanbe tsantino mate Abraham na caquiratumin jominue.  
\v 6 Junsi Diosi Abrahanbe itsantica jominue: Nuchi alicala uyanlachi tobi chularachunae tinue. Jun bare tobi chuminlari yalaca seiton quito sonba trabajaquisa carilaquichunae natiya pacara quituto. Junpalu patsa wata fecári nuchi alicala jun tobi tsanque padeseito chularachunae tinue.  
\v 7 Junni Diosi jun tobi chuminlaca casticaqueyanae tinue nulabe seiton jonun tenchi. Junnan nuchi alicala jun tobi nechi manloto, in toca manjato, laca se tito, labe rocaito nenalarachunae tinue. Diosi Abrahanbe tsantica jominue tinue. 
\p  
\v 8 Junsi Diosi Abrahanbe tratoca quinue yachi quidoca poresa Diosichi joyoe tito. Junni Abrahanchi sona na quinan, jun naoca Isaac mumun polaquinue. Ya na ochu ma tanca yachi quidocanan porenue yacanan Diosichi joe tito. Junni Isaachi naoman Jacobo mumun jominue tinue. Jacobo mantimini chunca paluca naola taminue tinue. Yala chiquilachi matu to tatala jominlanue tinue. 
\p  
\v 9 Junsi Esteban israelita mantaminlabe cacuenta quinato itsantinue: 
\p —Junni aman Jacóbochi nao manca, ya José mumun jominue tinue. Junni Josechi acolari yaca pailainue tinue. Yari fe jochi tinae tito pailainue. Junto Joseca paito, yaca nosa tarinto osilaquinue tinue. Acolanan osilaquinue yape Joseca Egipto toca tanjilaisa. Diosi mantimini Joseca natiya puratunue tinue.  
\v 10 Diosiri yaca padeseinaminca seque ayudainue. Junsi Diosi Faraón tinun miyachi tenca cuwanue. Joseca tsara sen tenca tan tsachi joeque tenca casa carinue. Junto Faraonni Joseca duque mantá tan suwanue tinue. Yachi yacanan, jerale Egipto tocanan mantasa carinue. 
\p  
\v 11 Junni jun malate Egipto tobi ano itonan, duque padeseinaminlanue tinue. Aman Jacóbolanan in Canaán tobi cachuminnan, yalanan ano itominlanue.  
\v 12 Tsantin chularasanan, Egíptobi ticatiya finolaca seto taminlanue. Junni Jacóbori junca merasi, yachi naolaca Egíptoca casale man ne erenue tinue yape fino cato manjalaisa.  
\v 13 Junni wanbile yachi naolaca Egíptoca manan manherenue. Junni Josechi acolari yalachi apa ereca jun jito, Egíptoca manan manjilainue tinue. Manan fino cabi jilainue tinue. Junni jun jicate Joseri yalabe manpaniquito, nulachi aco Joséyoe tinue. Tsanque Egipto to miyari Joseca tile nechi jaca jonunca miinue. 
\p  
\v 14-15 Junsi Joseri yachi apachica fiqui manherenue tinue. Yachi apabe yachi familialabeca jeralelaca Josebe pechubi jalaideque fiqui erenue. Jerale nechi siete chunca manteca tsachila Egipto toca chubi jilainue tinue Jacóbobe yachi naolabe, weyan familialabe. Junni Jacobo Egíptobi chuminnan puyanue. Yachi naolanan, chiquilachi matu to familiala, yalanan Egíptobi chuminnan puyalainue tinue.  
\v 16 Junni wanbile yala puyacalaca Siquem puebloca menabi mantanjilainue tinue. Siquenbi Abraham pantiyon quichun to nasi nacá calachi caya jominue. Matulenan Hamórichi naolachica caya jominue. Junni chiquilachi matu to tatalaca jun pantiyonbi menalaquinue tinue. 
\p  
\v 17 Junni Esteban capánato, ya mantaminlabe itsantinue: 
\p —Junni chiquilachi matu to familiala Egíptobi cachularasanan, to cuwano ma queloinaminue. Diosi yalachi in toca cuwano ma queloinaminue tinue. Matulenan pato, Abrahánlachi cuwanae tica jominue. Junnasanan Abrahanchi alicala Egíptobi duque seranaminlanue tinue.  
\v 18 Tsan josanan, manca tsachi Egipto to miya inue. Yari Joseca natiya miratumin jominue tinue.  
\v 19 Ya miyari chiquilachi matu to familialaca encanato seiton quinue. Tsotsoca unila nalalaca queposa mantanue yape israelítala seralaitusa. 
\p  
\v 20 Junni tsantin chularasanan, Moisés nainue. Junni Diosinan yaca sen na joe tinue. Aman peman pe fecáriri yachi apari, ayanni ya náca tsato taminlanue tinue.  
\v 21 Junsi ya nácanan quepono patinue. Junni yaca epele tsoreto manjicala josa, Egipto miyachi namari Moisés náca mancanue tinue. Junni yachi naoca cuwenta Moiseca uwa suwanue.  
\v 22 Tsanque Moisés uwainato, Egipto tobi miranunca jera pemiinue. Ya sonba meracari pamin tsachi jominue. Ticatiya seque quimin tsachi jominue. 
\p  
\v 23 Junto Moisés junpalu chunca wata tato, ya israelita joto weyan israelítalaca manquirabi jino tenhinue.  
\v 24 Junte man ne jinato quiranari, Egipto tsachiri israelítaca seiton quinaminue. Junni Moiseri ya padeseinaminca isaito, Egipto tsachica totenue.  
\v 25-29 Junni ayuna nanchi paluca israelítalari pataato quicaanaminlanue tinue. Moisés mantimini yalaca quirato, yalachica jato, manse patarichi tito, itsantinue tinue: Israelítala, nulari familiala joto, ¿niyaito quicaalaquinayun? tinue. Junni fe seiton tsachiri Moiseca tulipoereto, itsantinue: ¿Nucari mo miya cuwenta josa mantaca jun? Nuri chiquilaca fe jochiqueri tsantinae. ¿Quisin Egipto tsachica totenun cuwenta, lacanan toteno muquin? tinue. 
\p Junni tsantinunca meráto, Moisés uyan toca sujinue tinue. Aman Diosi Moiseca ereca jominue israelítalaca Egíptobi nechi jera mantanlasa. Israelítala mantimini natiya quereituca jominlanue. Diosi Moiseca ereca jominheque quereituca jominlanue. Junni yalari quereitulajoeque Moiseri wepananaminue. Junni Moisés Egíptobi nechi sujito, uyan to tsachilabe chuminue Madián tinun tobi. Aman junbi chuto sona cato, paluca nao taminue. 
\p  
\v 30 Junni Esteban israelita mantaminlabe cacuenta quinato itsantinue: 
\p —Aman junni junpalu chunca wata polecabi, Moiseri niyanlanantiya chutunun to minu nenaminue. Junni Sinaí tinun du quelole nenasa quiranari, tape lunaminue tinue. Junnasa quiranari, jun nin lunanunbi anjeli jominue.  
\v 31 Junni Moisés junca quirato, duque wepananue tinue. Junni quelo féto quirabi jinaminnan, Miya Diosi pánanunca meránue.  
\v 32 Diosi itsantinue tinue: Nuchi matu to tatalachi Diosi joyoe. Abrahanchi, Isaachi, Jacóbochi Diosi joyoe tinue. Junni Moisés jun fiquica meráto, jelechi jowinponato quirano jeleinue. 
\p  
\v 33 Junsi Miya Diosi yabe itsantinue tinue: Nuri lachi sen postobi wirurae; junni laca respetaito, sapatoca laride! tinue.  
\v 34 Junni lachi israelita tsachilaca Egíptobi quirayoe tinue. Egipto to tsachila yalaca seiton quinaminlacanan quirayoe. Israelítala warenaminlaca meracayoe tinue. Junto yala padeseinaminlaca se laribi patacayoe. Meráde! tinue. Nucari Egíptoca manherechinayoe tinue yape israelítalaca se larisa. Diosi Moisebe tsantinue. 
\p  
\v 35 Junni aman nanni matulenan israelítala Moisebe mantaituchique yaca pato ¿Nuca mo miya cuwenta josa mantá cuwaca jun? tica jominlanue tinue. Junni yalari Moisebe mantaituchi tinasanan, Diosi mantimini Moisés patsacari wenteca jominue yape yalaca mantato se larisa. Tapebi ramin anjeli Diosichi mantate pato, Moiseca tsanquenan mantá cuwaca jominue tinue. 
\p  
\v 36 Junni nanni inale Moisés israelítalaca Egíptobi nechi manse larinue. Egíptobi nechi lolaito, Mar Rojo tinun wa pipilu polelaito, junpalu chunca wata fecári niyanlanantiya chutunun tobi nenaminlanue. Aman tiletiya nenato Moisés duque wepanato quirantsancari seque quede jinaminue yape israelítalari Diosica tenca calaquisa.  
\v 37 Junni ya Moiseri israelítalabe itsantinue tinue: Miya Diosi manca mate nulachile nechi manca tsachicaman wentechunae tinue. Lachi cuwenta yachi mantá cuwachunae tinue yape Diosichi mantate pasa. Junni yaca meránola jochunae tinue. Moisés matu to israelítalabe tsantinue.  
\v 38 Junni ya israelítala layaito, niyanlanantiya chutunun tobi nenato, ya Moisenan yalabe pejominue. Junni yari Sinaí dubi lonue. Junbi anjeli Diosichi sen fiquica Moisebe jera panue chiquilachi tenchi. Junni ya sen fiquica merasi, chiquilachi matu to familialabe manpolarinue. 
\p  
\v 39-40 Aman junni Esteban cuenta caquinato itsantinue: 
\p —Ya israelítala mantimini Moiseca merátuchi timin jominlanue tinue. Moisés Sinaí dubi nechi camanpatatusanan, yalari Moisechi aco Aaronbe cuenta quito itsanlatinue tinue: Moisés chiquilaca Egíptobi nechi larito puraniquee tilatinue tinue. ¿Amana wari yaca niyantiya ica jonhoncan? latinue tinue. Natiya miituntsan joe. Junni nuri Aarón, chiquilachi tenchi diosilaca quede! Uyan diosilaca quede! tilatinue tinue yape chiquilaca mantanjilaisa. Tsanque israelítala Egíptoca necanan manjino tenca calaquinue tinue Moiseca telaquepoto.  
\v 41 Junni jun mate wala nanan quiran molde quito, diosi joe tilatinue tinue. Junsi animalica toteto, ya wala nachi epe cuwalaquinue tsa Diosichi cuwanun cuwenta. Yala quica moldeca duque son tito, sen diosi joe tilatinue tinue.  
\v 42 Junnasa mantimini tsa Diosi junca jera quirato, yalacanan jera telaqueponue yape tsaboca tennato nenalarasa. Diosica cuwenta tsaboca tenca taminlanue. Aman matu to tsachi manca Diosichi mantate pamin joto, junca cuenta quinue tinue. Diosi itsantinueque chuteca joe tinue: 
\q1 Israelítala, nula junpalu chunca wata fecári niyanlanantiya chutunun tobi nenaminnan, animalica toteto cuwanato, lachi cuwalaquitue tinue. 
\q1 Uyanlachi cuwalaquee tinue. 
\q1  
\v 43 Moloc tinunbe rocaito, yachi yanan quiran nacáca nanalaquee tinue. 
\q1 Tsabo mancaca Renfán mumun diosi joe tito, yaca se tilatie tinue Diosica cuwenta. 
\q1 Manan Molobe Renfanbe tsan quiran moldesiri joe. 
\q1 Nula patsanan nulachi tedechi molde quito ya moldechi cale telenhilainae tinue. 
\q1 Junni tsan quiranlaca tennanun tenchi nulaca casticaqueyanae tinue. 
\q1 Nuwiri Babilonia to banachi ereyanae tinueque chuteca joe tinue. 
\p  
\v 44 Junni Esteban Diosichi mantate pamin tsachi pila chutecaca tsanque manpatobi, itsantinue: 
\p —Junni aman niyanlanantiya chutunun tobi canenato, Moisés Diosichi tenchi jali ya quinue tinue. Diosi yabe cuenta quito, itsanque ya quede! tica jominue tinue. Junni Moisés jun tsanquenan Diosichi tenchi jali ya quinue. Tsanque chiquilachi matu to familiala Diosichi yaca taminlanue tinue. Jun yaca quirato, tsarasica Diosica tenca cantsan jominue tinue.  
\v 45 Aman yalari puyanunbi, yalachi nalalaman Diosichi jali yaca taminlanue. Junto Josué yalachi miya joto, Diosichi jali yaca in toca tanjalainue tinue. Aman jun mate uyan ni tsachila in tobi chumin jominlanue tinue. Junni Diosi patsa yalaca larito suerenue yape israelítalari inte chularasa. Tsanque Diosichi jali ya in tote chuminue tinue David israelítalachi miya ino fecári. 
\p  
\v 46 Diosi Davica seque tenca camin jominue. Junni Daviri Diosibe itsanque rocainue tinue: Matu to Jacobo sonnano male nechi israelítala nube penenaminla joyoe. Junto nuchi tenchi tsa ya quino muquee tinue tinue.  
\v 47 David mantimini Diosichi ya quino podeitusanan, yachi nao Salomón Diosichi yaca quinue tinue.  
\v 48 Junni tsachila Diosichi tenchi ya quica josanan, Diosi jun yabisiri chutuchunae. Diosiri fe jamochi chue. Tsachi manca Diosichi mantate pato, junca itsanque pila chutenue tinue: 
\q1  
\v 49 Yoquido Diosi mantato chudinun cuwentasiri joe tinue. 
\q1 Tori Diosi tereranun teranca cuwenta joe tinue. 
\q1 Tsan jonari, ¿nulari Diosichi tenchi niyan quiran ya quilaquichun? tinue. 
\q1 ¿Diosi tile jasaino jochunan? tinue. 
\q1  
\v 50 Ya tenca mánta jera quiyoe tinueque chuteca joe. 
\m Diosichi mantate pamin tsanque Diosichi fiquica pila chuteca joe tinue. 
\p  
\v 51 Junni Esteban israelítalaca matu male nechi tsanque jera cuenta depolariquetobi, israelita mantaminlabe itsantinue: 
\p —Chiquilachi matu to familiala tsanquenan Diosichi Tencaca natiya merátuchi tito nenaminlanue. Junni nulanan jun tsanquenan merátuchi timinla joe tinue. Uyan tala tenca talarae. Nula Diosica merátumin tenca jolajoe. Diosichi itonla cuwenta natiya merátuminla joe tinue.  
\v 52 Aman chiquilachi matu to familialari jerale Diosichi mantate paminlaca seiton quimin jominlanue. Ya Diosichi mantate paminlari pato, sen tsachi jano joe latinue. Junni chiquilachi matu to familialari tsantiminlaca totelaquinue tinue. Junni nulaman ya jano jomin sen tsachicanan totesa carilaquinue. Uyanlachi cuwapoto, yaca totesa carilaquinue tinue.  
\v 53 Diosi matu tote anjelilaca erenue yape Diosichi mantaca cuwalaquisa. Junni nulari ya Diosichi mantaca tatonan, natiya merátuminla joe tinue. 
\p Aman Esteban tsanque israelita mantaminlabe cuenta quinue. 
\s1 Estébanca totelaquinunca 
\p  
\v 54 Junni israelita mantaminlari Estébanchi fiquica meráto, duque pailainue. Pachi tefun dato dato quinaminlanue.  
\v 55 Tsan josanan, Esteban Diosichi Tencabe seque jera mantaito, jamochi quirato, Diosichi toca quiranue. Diosicanan tsara senca quiranue. Junsi Jesúcanan Apa Diosichi tsa tede nanchi wiruraminca quiranue.  
\v 56 Junni Esteban junca jera quirato, itsantinue: 
\p —Quiralaquede! Yoquido lasaicaca quiranayoe tinue. Diosichi tsa tede nanchi Jesús tsachi ica jun joto wirurae tinue. 
\p  
\v 57 Junni ya fiquica merasi, israelita mantaminlari sonba pato, pachi punquica dole calaquinue merátuchique. Junsi layaito, Estébanchica sujito calaquinue.  
\v 58 Junni Estébanca pueblobi nechi muricade tanjito, su walaca tala quito totelaquinue. Junni su walaca tala quinaminla yalachi camisa larito, manca mosochile tsorelaquinue yape ya cuidaisa. Ya moso Saulo mumun jominue.  
\v 59 Junni Estébanca su walaca tala quilaquinasanan, yari itsanque Jesube rocainue: 
\p —Miya Jesús, lachi tencaca cade! tinue. 
\p  
\v 60 Junsi telenhito, sonba pato itsantinue: 
\p —Miya Jesús, inlaca in jutsa tenchi culpa quituna! tinue. 
\p Junni tsantisi puyanue. 
\c 8  
\s1 Saulo 
\p  
\v 1-3 Junni Diosica tenca tan tsachila Esteban puyacaca duque laqui tito menalaquinue. Aman israelita mantaminla Estébanca totelaquinasa, Sáulonan yaca totenilaquede! petinaminue. Junni jun male nechi Jesucrístochi tsachila Jerusalenbi duque padeseilainue. Seitonla yalaca Jesucrístobe penenaminla jonun tenchi padeseisa carinaminlanue. Sáulonan Jesucrístobe penenaminlabe duque seiton pejominue. Jesucrístobe penenaminlachi ya cura wito, yalaca muricade larito tanjinue. Unilalacanan, sonalacanan cato jera donue. Junni Jesuchi tsachila ara cura jera jilainue Judea tobinan, Samaria tobinan. Crístochi mantá tanlasiri ara cura jilaitunue. 
\s1 Samaria tobi Diosichi fiquica seque meralaquinunca 
\p  
\v 4 Junni aman Jesucrístobe penenaminla ara cura sujinato, Diosichi sen fiquica cuenta quedede jilainue.  
\v 5 Junni Felipe Samaria toca jito, pueblo máncabi wito, Jesucrístoca jera cuenta quinue.  
\v 6-7 Jun pueblobi yucanchi ocola duque tsachilachibi wica jominlanue. Junni Felíperi yucanchi ocolaca mansularinan, tsachilaca purato, sonba atide sujilainue. Felipe duque jancanlacanan, duque wecaino podeituminlacanan manse suwanue. Felipe tsanque wepanato quirantsancari seque quinaminue yape tsachila Diosica tenca calaquisa. Aman tsachilari junca jera quirato, Felipe pánanunca jera meráto, jeralela yaca seque meralaquinaminue.  
\v 8 Junni jun pueblobi chuminla tsara son tinaminlanue. 
\p  
\v 9 Tsan josanan jun pueblobi manca tsachi chuminue Simón mumun. Yari pone joto, duque podenyoe timin jominue. Jerale Samaria tobi chuminlaca wepanarinaminue.  
\v 10 Junni epe tsachilanan, mantaminlanan, yaca meraniquimin jominlanue. Ya pone tsachi Diosichi mantate duque sonba quimin joe latinue.  
\v 11 Ya Simón numarile nechi pone joto, yalaca encananaminue. Junnan yaca duque merámin jominlanue.  
\v 12 Junni Simón tsantin chusanan, Felipe Jesucrístoca cuenta quebi janue. Diosi ya mantananun tsachi bolon suwananuncanan micarinaminue. Junni duque tsachila, unilala, sonala, Felipe cuenta quinaminca quereito mumunhilainue.  
\v 13 Junsi Simonnan quereito mumunhito, Felípebe penenaminue. Felipe mantimini duque wepanato quirantsancari seque quinaminue yape tsachila Diosica tenca calaquisa. Junni Simonni junca quirato duque wepananue. 
\p  
\v 14 Junnasa mantimini Crístochi mantá tanlari Jerusalenbi chuto meralaquinue Samaria tobi chuminlanan Diosichi fiquica seque meralaquinueque. Junca meráto, Pédrobe Juánbeca junchi erelaquinue.  
\v 15 Junni Pédrobe Juanbe Samáriaca patito, Jesucrístobe penenaminlachi tenchi Diosibe rocailainue. Diosibe rocaito, nuchi Tencaca inlachibi erede! tilatinue yape yalachibi wito chusa.  
\v 16 Aman Diosichi Tenca yalachibi cawica itominue. Jesuchi icayoe titori mumunhica jominlanue.  
\v 17 Junnan Pédrobe Juanbe Jesuchi tsachilaca tedechi tale quilaquinue. Junni tsanquinan Diosichi Tenca yalachibi winue.  
\v 18 Aman Simonni junca jera quirato miito, aman Crístochi mantá tanlabe itsantinue: 
\p  
\v 19 —Lachinan tsanque mantá cuwade! tinue yape lanan mocatiya tedechi tale quinan Diosichi Tenca ya tsachichibi wisa. La cala cuwanae tinue. 
\p  
\v 20 Pedro mantimini ya Simonbe beconan manpato, itsantinue: 
\p —Nu nuchi calabe yucapiyade! tinue. Diosi epe cuwanacaca calachi cantsan joeque tenca canun tenchi padeseichunae tinue.  
\v 21 Nuri natiya Diosichi tenchi titiya pequimin itoe tinue. Nu Diosibe seque nenatumin joe; epele tenca cato nenamin joe.  
\v 22 Junni in jutsaca telaquepoto, casan tala tenca mancade! tinue. Junsi Diosibe rocaide! Pansile seitonque tenca cananunca perdonaichunae tinue.  
\v 23 La nuca mirayoe tinue. Nuri fe mantá tachi tito, nuchi tenca duque seiton joe. Nuchi tenca jutsabe cadenachi telepoca jun cuwenta joe tinue. 
\p  
\v 24 Pedro tsantinunsi, Simón beconan pato itsantinue: 
\p —Pedro, nulanan lachi tenchi Miya Diosibe rocailaide! tinue yape laca tsanque padeseisa caritusa. 
\p  
\v 25 Junni Pédrobe Juanbe Miya Jesucrístoca jera cuenta quetobi, Jerusalenca manjilainue Samaria tose poleto. Duque pueblobi wide wide jito, Jesucrístoca paca sen fiquica cuenta quedede manjilainue. 
\s1 Etiopía tsachi 
\p  
\v 26 Junni Miya Diosichi anjeli Felípebe itsantinue: 
\p —Wiruito jide! tinue. Nuri butunni tala jito, Gaza tinun puebloca jinun minuca jide! tinue. 
\p Aman Gázaca jinun minuri niyanlanantiya chutunun postose polenun minu jominue. Jerusalenbi nechi Gaza fecári jinunhe.  
\v 27 Junni Felipe anjelichi fiquica merasi, wiruito jiniinue. Junni ya minuse jinasa quiranari, Etiopía tsachi jinaminue. Etiopía to miya sona Candace mumun jominue. Junni ya tsachiri Candácechi tenchi tesorero jominue eunuco tinun tsachi. Yari Jerusalén puebloca Diosibe rocaibi jica joto  
\v 28 manjinaminue. Calu muricanun carobi chudito, Diosichi Pilaca quiradede manjinaminue. Aman matu to tsachi Isaías mumun Diosichi mantate pila chuteca jominue. Junni Etiopía tsachi ya pilaca quiradede manjinaminue.  
\v 29 Tsan josanan, Diosichi Tencari Felípebe itsantinue: 
\p —Ja carobe parejo parejo jinade! tinue. 
\p  
\v 30 Junni Felipe caroca sujito, Etiopía tsachica Diosichi Pila quiranaminca meránue. Isaías Diosichi fiqui chutecaca quiranaminue. Junni Felipe itsantinue: 
\p —¿Jun pilabi niyan tinan? ¿Entendeinayun? tinue. 
\p  
\v 31 Junni Etiopía tsachi itsantinue: 
\p —Monantiya micaritunari, miitiyoe tinue. 
\p Tsantisi, nuri lade! Lato chudide! tinue.  
\v 32 Aman Isaías chuteca jun pilabi itsanque chuteca jominue: 
\q1 Opisaca cuwenta totebi tanjichunae tinue. 
\q1 Jana opisa náca fu porecanasanan, atituto tsoniramanhe tinue. 
\q1 Junni yari jun tsanquenan beco patuchunae tinue. 
\q1  
\v 33 Yaca lucarito seitonque quilaquichunae tinue. 
\q1 Yaca totelaquichunae tinue. 
\q1 Yabe parejo pesonnaminlari patuntsancari seiton jolajochunae tinue. 
\p  
\v 34 Junni Etiopía tsachi ya pilaca quirato, itsanque panhanue: 
\p —Nu pade! tinue. ¿Mo tsanque padeseino jun? tinue. ¿Isaías patsa, o uyan? tinue. 
\p  
\v 35 Junni Felipe yabe tulanto cuenta quito, Jesuca paca joe tinue. Ya tsanque padeseica joe tinue. 
\p Junni Felíperi casale Isaías chutecaca cuenta quito, junsi Jesuca paca sen fiquica jera cuenta quinue.  
\v 36 Junni minuse jinaminnan, pi quelole polelainue. Junni Etiopía tsachiri itsantinue: 
\p —Quirade! Ina pi poe tinue. ¿Lari mumunhino podeino joinhin? tinue. 
\p  
\v 37 Junni Felíperi itsantinue: 
\p —Nuchi tencabi Jesucrístobe jera cayaitori podeichunae tinue. 
\p Junni Etiopía tsachiri manpato, Jesucristo Diosichi Nao joeque quereiyoe tinue.  
\v 38 Tsantisi, caroca tsoresa carito, Felípebe Etiopía tsachibe pibi patilainue. Pibi wito, Felipe yaca mumunnue.  
\v 39 Junni pibi nechi manlonaminnan, Felipe piyapoleniinue. Miya Diosichi Tenca yaca piyapolarinan, Etiopía tsachi Felípeca manquiratunue. Etiopía tsachi mantimini son tide manjito polenue.  
\v 40 Junni Felíperi Azoto pueblobi manquirainue. Junsi Azótobi nechi Cesarea puebloca jinue. Junni Cesaréaca jinato, pueblo cura Jesucrístoca paca sen fiquica micaridede jinue. 
\c 9  
\s1 Saulo Jesucrístobe cayainunca 
\p  
\v 1 Aman junnasa Saulo mantimini Miya Jesucrístobe penenaminlaca duque pa canenaminue. Tsaracari toteyanaequesiri pato nenaminue. Tsan jominnan israelítalachi mantá tan patelechica jito,  
\v 2 yabe rocainue donun pilaca cuwasa. Junni donun pila casi, Damasco puebloca jinaminue. Jun puebloca jito, Diosichi fiqui miinun yabi ya donun pilaca mancuwano jominue. Junto Jesucrístobe penenaminlaca neyato féto catori, mantanjino jominue jun patelechi donun pilachi. Jesucrístobe penenaminlaca cato, Jerusalenca doquebi mantanjino jominue unilalacanan, sonalacanan. 
\p  
\v 3 Junni aman Saulo Damasco pueblo quelobi jinasa, jamochi nechi tiri cuwenta duque tsequiniquinue yachi awinta.  
\v 4 Junni Sáulori tobi queereito, fiquica meránue. Itsantinue: 
\p —Saulo, Saulo, ¿nuri laca ti quichun seiton quinayun? tinue. 
\p  
\v 5 Ya fiquica merasi, Saulo itsantinue: 
\p —Miya, ¿nuri moyun? tinue. 
\p Junni beconan pato itsantinue: 
\p —Jesúyoe tinue. ¿Ti quichun laca seiton quinayun? tinue. Laca seiton quinato, nu tencachiquenan fécari padeseinae tinue. Nuri calu chide teyanca terachi quimin cuwenta jochunae tinue. 
\p  
\v 6 Junni Saulo duque wepanachi jowinponato itsantinue: 
\p —Miya Jesús, ¿la ti quino jowan? tinue. 
\p Junni Miya Jesucrístori Sáulobenan itsantinue: 
\p —Mancupato, puebloca jide! tinue. Junbi tsachi manca nube cuenta quichunae tinue ti quino jonunca. 
\p  
\v 7 Tsanhinasanan, Sáulobe pejinaminla jelechi pano podeitulajonue. Fiquica meránato, mocanantiya quiratulajonue.  
\v 8 Junni Saulo tobi nechi mancupato, caca mantsetonan, quirano podeiton inue. Junnan yaca tedele cato Damáscoca tanjilainue.  
\v 9 Junni peman ma fecári quirano podeiton, ano fitumin, pi cuchitumin, jominue. 
\p  
\v 10 Tsan josanan Damáscobi manca tsachi chuminue Ananías mumun. Yanan Jesucrístobe penenamin jominue. Junni Ananíachi quirajanasa Miya Jesucrístoca quiranue. Junni Jesucristo yabe pato, Ananías tinue. Junni Ananíari Miya tinue. Ina chuyoe tinue.  
\v 11 Junni Miya Jesucristo Ananíabe quiraito, itsantinue: 
\p —Nuri cupato, Júdachi yaca jide! tinue. Ya Júdari Derecha tinun cayebi chue tinue. Junchi jito, Saulo tinunca panhade! tinue. Ya Saulo Tarso pueblobi nechi joe. Yari tsaina labe rocainae tinue.  
\v 12 Junni Sáulonan labe rocainasa, yachinan quirajaca joe tinue. Yachi quirajanasa, nuca janaminca quiraca joe. Nu yaca tedechi tale quebi janaminca quiraca joe tinue. Junni nu yaca tale quinunsi, Saulo manquirano podeichunae tinue. Sáulochi tsanque quirajaca joe tinue. 
\p  
\v 13 Junni Jesucristo yabe tsantica josa, Ananíanan beconan pato itsantinue: 
\p —Miya Jesús, ya Sáulori seiton joe tinue. Yaca duque mera joe tinue. Jerusalenbi nuchi sen tsachilaca duque padeseisa carinaminue latie tinue.  
\v 14 Junni in pueblocanan jato, mantá tan patelelachi mantate jaca joe tinue nube rocaiminlaca cato jera dochun. 
\p  
\v 15 Miya Jesús mantimini Ananías tsantinunca tennatuto, yabe itsantinue: 
\p —Nuri jiniide! tinue. Lari Sáuloca wentecayoe tinue. Yari laca cuenta polarimin jochunae. Uyan tobi chuminlabe, mantaminlabe, israelítalabenan laca cuenta polarimin pejochunae tinue.  
\v 16 Yaca micarichinayoe tinue yanan lachi tenchi duque padeseino joeque. 
\p  
\v 17 Junni Jesucristo tsantinunsi, Ananíari Júdachi yaca jinue. Junbi fesi, Sáuloca tedechi tale quito itsantinue: 
\p —Aco Saulo, ¿nu janaminbe Miya Jesús quirainuco? tinue. Aman lanan Jesuchi joyoe tinue. Junni Miya Jesús ereca jun jayoe tinue yape nu manquirano podeisa. Junsi Diosichi Tencanan nuchibi jera pewichunae tinue. 
\p  
\v 18 Junni Ananías cuenta quinasaleri, Sáulochi cacabi nechi liquinan quiran bajinue. Tsanhinunsi manquirano podeinue. Junto mancupasi mumunhinue.  
\v 19 Junsi ano manfitobi, mansonbainue. Junni Damasco pueblobi Jesucrístochi tsachilabe nasi pechuminue. 
\s1 Saulo Jesucrístoca paca fiquica seque micarinanunca 
\p  
\v 20 Junni Saulo mansonbaisi, israelítala tala Diosichi fiqui miinun yabi winue. Junbi Jesuca paca fiquica micarinaminue Diosichi Nao joeque.  
\v 21 Aman junni junbi chuminla Saulo pánanunca meráto, jera wepanalaito itsantilatinue: 
\p —¿Inni Jesucrístoca pa jomin tsachi jotun? latinue. Aman yari Jesube rocaiminlaca Jerusalenbi duque seiton quinaminue. Inchi janatonan, yalaca cabi janaminue tilatinue mantá tan patelelachica mantanjichun. Tsan jotori, ¿niyaito Jesucrístoca paca fiquica micariniquinan? latinue. 
\p  
\v 22 Tsanlatinasanan Sáulori fe seque pade pade jiniinaminue. Damáscobi chumin israelítalari yaca meráto, beconan manpano podeilaitunue. Tenca jera palaicala joto podeilaitunue. Saulo mantimini seque micarinaminue Jesús Diosi wenteca Cristo tinun tsachi joeque. 
\s1 Sáuloca nosa manherenunca 
\p  
\v 23 Junni Saulo numari micarinasanan, israelítala tenpalaquinue yaca totechun.  
\v 24 Junni aman jun pueblo awinta wa serica jominue tamo cuwenta. Junni israelítala jun serica tamolante quirato Sáuloca méraminlanue. Quepen, malon méraminlanue Sáuloca cato totechun. Saulo mantimini junca jera meránue.  
\v 25 Junni Jesuchi tsachilari yaca se larilaquinue yape totelaquitusa. Quepen nosa epele jun pueblobi nechi manlarilaquinue. Tsalabi poto, serica urachi manpatarilaquinue. 
\s1 Saulo Jerusalenbi micarinunca 
\p  
\v 26 Aman Sáuloca manlarilaquinan, Jerusalenca manjinue. Junbi Jesuchi tsachilabe layaichique tenfenasanan, yalari jelechi facaritulajonue. Nene joe tito, Jesucrístochi tsachi iton jonhoe tilatinue.  
\v 27 Bernabé mantimini Sáuloca cato, Crístochi mantá tanlachica tanjinue. Junchi tanjito, Crístochi mantá tanlabe itsantinue: 
\p —In Saulo minuse jinasanan Miya Jesús yabe quiraito cuenta quinue tinue. Junni Damasco pueblobi Jesuchi mantate seque jeleratuto micarinaminue tinue. 
\p  
\v 28 Junni Bernabé tsantinunbi, Saulo Jerusalenbi pechuto, yalabe penenaminue.  
\v 29 Miya Jesuchi mantate seque jeleratuto micarinaminue. Griego fiqui pamin israelítalabe pacaanaminue. Junni yalaman Sáuloca paito totechi tinaminlanue.  
\v 30 Junni Jesucrístochi tsachilari junca miito, Sáuloca Cesarea puebloca tanjito Tarso puebloca manherelaquinue yape yaca totelaquitusa. 
\p  
\v 31 Junte nechi Judea tobi, Galilea tobi, Samaria tobi, Jesucrístochi tsachi bolonla pansi chuto sonba tenca jera ilainue. Miya Diosica respetaito jelerato chuminlanue. Diosichi Tenca yalachi seque tenca cuwanan, serade serade jinaminlanue. 
\s1 Eneas manseinunca 
\p  
\v 32 Junni aman Pedro jerale Jesucrístobe penenaminlaca quiradede nenaminue. Junto Lida pueblocanan jito, junbinan Diosichi sen tsachilaca quirabi jinue.  
\v 33 Aman junbi féto quiranari, jancan tsachi manca tsominue Eneas mumun. Ya Enéari wecaino podeituto, ochu wata fecári cupano podeiton tsominue.  
\v 34 Junni Pédrori yabe itsantinue: 
\p —Eneas, Jesucristo nuca tsaina manse suwanae. Cupato, jalica mantepade! tinue. 
\p Junni Pedro tsantinasaleri, Eneas mancupanue.  
\v 35 Junni jerale Lídabi chuminla, jerale Saronbi chuminla junca quirato, Miya Jesucrístobe cayailainue. 
\s1 Tabita puyacaca mansoncarinunca 
\p  
\v 36 Junnasa mantimini Jope pueblobi Jesucrístobe penenamin sona manca chuminue Tabita mumun. Aman Griego fiquichi paminla yaca Dorcas timin jominlanue. Ya sona tsarasi seque quito, titiya itonlachi duque epe cuwamin jominue.  
\v 37 Aman Pedro Lídabi nenasanan, Tabítari duque quiyaito puyanue. Junni puyacaca pipiyarito, jamo tamobi tsorelaquinue.  
\v 38 Aman Jope pueblori Lida quelote joe. Junni Jesucrístochi tsachila meraca jominlanue Pedro Lídabi raeque. Junni paluca tsachilaca erelaquinue yape Pédroca we jade! latisa. 
\p  
\v 39 Pédrori junca merasi, yalabe pejinue. Junni Jópebi manfalainunsi, Pédroca jamo lowabi tanloto puyaca sona tsonunbi tanlolainue. Aman Tabita casonnaminnan, biudalachi tenchi duque camisa, panu, titiya quito epe cuwamin sona jominue. Aman Pédrochi awinta jun camisa tsanlaca quirawoto, wareto wiruilainue.  
\v 40 Junni Pedro mantimini piyanlelaca urachi lolaide! tito, mancasiri telenhito Diosibe rocainue. Junni Diosibe rocaitobi, ya sona puyacaca manquirato, itsantie: 
\p —Tabita, mancupade! tinue. 
\p Junni Tabítari caca mantsequiniquito, Pédroca quirato mansonhinue.  
\v 41 Junni Pedro yaca tedele cato mancuparinue. Junto biudalaca, Diosichi uyan tsachilaca, jeralelaca manhoticanue. Junto Tabítaca sonca yalachi manquirawonue.  
\v 42 Junni jerale Jópebi chuminla junca miito, layanla Jesucrístobe cayailainue.  
\v 43 Junni Simón Pedro Jope pueblobi numari fecári manca Simonbe pechuminue. Aman ya Simonni quidoca cato se suwamin jominue. 
\c 10  
\s1 Pedro Cornéliochica jinunca 
\p  
\v 1 Aman Cesarea pueblobi soldado capitan manca jominue Cornelio mumun. “Italiano” tinun bolonbi mantamin jominue.  
\v 2 Yabe yachi familialabe Diosica respetaito jelerato, seque tenca camin jominlanue. Israelita itotonan, popere israelítalachi tenchi duque cala cuwamin jominue. Diosibe ma cura rocaimin jominue.  
\v 3 Junni manca mate tre de la tardete Cornéliochi ura jera quirajanue. Anjeliri Diosi ereca jun jato, Cornelio tinue.  
\v 4 Cornéliori anjelica duque jelenasa quirato, itsantinue: 
\p —Miya, ¿niyan jun? tinue. 
\p Junni anjeli yabe itsantinue: 
\p —Nu Diosibe rocain, poperelachi titiya cuwan, quimin joe tinue. Junnan Diosi nuca mantenhinae tinue.  
\v 5 Junni nuri tsachilaca Jope puebloca ereto, Simón Pédroca jasa caride! tinue.  
\v 6 Yari quidoca cato se suwamin Simónchibi chue tinue lamari quelote. Junni Pédrori inte jato, nu ti quino jonunca jera micarichunae tinue. 
\p  
\v 7 Junni anjeli manjinunsi, Cornelio pemanca tsachilaca jade! tinue peyun palucaca soldado mancaca. Cornéliobe mantaimin soldado jominue Diosica tenca camin soldado.  
\v 8 Junni yalabe jera cuenta manpolarinue anjeli cuenta quicaca. Junsi yalaca Jope puebloca erenue. 
\p  
\v 9 Aman ayuna nanchi ya tsachila Jópeca jalainasanan, Pedro terasabi lonue. Yotute Diosibe rocaibi lonue.  
\v 10 Junnasanan Pédrochi duque ano muquinaminue. Junni Pedro ano acari mérasanan, yachi quirajanue.  
\v 11 Yoquido lasaraminca quiranue. Junni wa jali tsan patanue. Jali junpalu puntabi tela jun to fecári patanue.  
\v 12 Junni jun jalibi duque animalila pominue. Quela, susu, pini, baro, titiya pominue.  
\v 13 Junni Pedro junca quiranaminnan fiqui meránue. Itsantinue: 
\p —Pedro, cupade! In animalilaca toteto fide! tinue. 
\p  
\v 14 Pedro mantimini beco pato itsantinue: 
\p —Te, fino miitoyoe tinue. Miya Diosi, nu mirae. La fitununca numanan fitumanyoe tinue. Chiranlaca fitumanyoe tinue. 
\p  
\v 15 Junni manaman fiquica manmeránue. Itsantinue: 
\p —Diosi ticatiya fintsan suwayoe tinari, nuri junca chiran tituna! tinue. 
\p  
\v 16 Peman ne jun tsan jun tsannan tilatinue. Junni jalica jamochi manlaricanue.  
\v 17 Junni Pedro yachi quirajacaca tenca canato, Diosi yaca tíca micarichi tinamin jonhoncanque tenca canaminue. Tsanque tenca cato chusanan, Cornelio ereca jun tsachila falainue. Simonchi yaca panhato jato, urachi wiruraminlanue.  
\v 18 Junni urachi wirurato otito, itsanlatinue: 
\p —¿Simón Pedro inte chunan? tilatinue. 
\p  
\v 19 Junnasa mantimini Pedro yachi quirajacaca tenca canasanan, Diosichi Tenca yabe itsantinue: 
\p —Meráde! tinue. Pemanca tsachila nuca quirachique meralarae tinue.  
\v 20 Junni cupato, yalaca quirabi jide! Junni natiya jele tituto, yalabe pejiniina! tiyoe tinue. Israelita itotonan, la mantaca jun jalaie tinue. 
\p  
\v 21 Junni Diosichi Tenca Pédrobe tsantinunsi, Pedro patinue janamin tsachilaca quirabi. Junto yalabe itsantinue: 
\p —La nula neyananun tsachi joyoe tinue. ¿Niyaito jalainayun? tinue. 
\p  
\v 22 Junni Cornelio ereca junla beconan pato itsanlatinue: 
\p —Capitan Cornelio chiquilaca eree latinue. Aman yari seque quimin joe latinue. Diosica respetaito jeleramin jonan, piyanle israelítalanan yaca sen joe timinlae latinue. Junni Diosichi anjeli Cornéliobe cuenta quito, nuca jasa caride! tie latinue. Nuri Cornéliochi yaca jato, micarino joe tie latinue yape ya merása. 
\p  
\v 23 Junni Pedro yalaca meráto, tamochi wiyato, mile chudilaide! tinue. Junni ayuna nanchi Pedro yalabe pejinue. Aman Jesucrístobe penenamin israelítalanan pejilainue Jópebi chuminla. 
\p  
\v 24 Junni junhayuna nanchi Pédrola Cesaréabi felainue. Junnasa Cornelio yachi familailaca, amicolaca jera layasuwato méraminlanue.  
\v 25 Junni Pedro tamochi winasanan, Cornelio quirabi jato, yachi cale telenhinue Diosichi cale cuwenta.  
\v 26 Pedro mantimini yaca manwirucarito itsantinue: 
\p —Manwiruide! Lari tsachiri joyoe tinue. 
\p  
\v 27 Tsantitobi, Pédrobe Cornéliobe cuenta quede parejo wilainue. Wito quiranari, duque tsachila layaica jominlanue.  
\v 28 Junni Pedro yalabe itsantinue: 
\p —Nulari israelítala itotonan, israelítalaca miralarae tinue. Chiquilachi mite israelita itonlabe natiya penenano itolajoyoe. Israelita itonlachi yabi winotiya itolajoyoe tinue. Tsan josanan Diosi laca uyan quiraque manmicaricae tinue. Amana mirayoe tinue. Uyan tsachilaca nin epe joe nin chiran joe tituntsan joe tinue. Diosi ya cuwaca animalilaca chiran titude! tinato, laca micarie tinue yachi tsachilacanan chiran tituntsan joeque.  
\v 29 Jun tenchi laca jasa tinan, lari natiya jele tituto janiiyoe. Junto lachi miino muquee tinue ¿niyaque laca munarato jasa tiyun? 
\p  
\v 30 Junni Pédrochi fiquica meráto, Cornelio itsantinue: 
\p —Junpalu ma poleca lachi yabi chuniramanyoe tinue. Junto Diosibe rocaino órate ano fitunca ito rocainamanyoe tinue tre de la tardete. Aman Diosibe rocainasanan, tsaracari fibaquin camisa pun tsachi quiraie tinue.  
\v 31 Lachi cale wiruito, itsantie tinue: Cornelio, Diosi nu rocainunca meránae tie tinue. Poperelachi ticatiya cuwamin jonun tenchi nuca mantenhinae tie tinue.  
\v 32 Junni tsachilaca Jópeca erede! Jun pueblobi Simón Pédroca neyasa caride! Aman Pédrori quidoca cato se suwamin Simónchibi chue tie tinue lamari quelote. Junni Pedro jato nuca micarichunae tie tinue.  
\v 33 Junni anjeli tsantinunsi, tsachilaca ereyoe tinue yape nuca jasa tilatisa. Junni nu sen joto janiinue tinue. Junni intele jera layaito chularayoe tinue nuca meráchun. Diosinan chiquilaca quiranae. Junni paniquede! tinue Miya Diosi nuca jera pasa mantanunca. 
\s1 Pedro Cornéliolaca micarinunca 
\p  
\v 34 Junni aman Cornelio tsanque cuenta quinunsi, Pedro itsantinue: 
\p —Aman tsarasica miiyoe tinue Diosi jeralelaca jun parejonan laquiraeque.  
\v 35 Diosica jelerato respetaito seque nenaminlaca Diosi sen jolajoe tichunae. Aman nun bolonbi nechi tsachila jototiya, o israelítala jototiya, o israelita itonla jototiya, Diosiberi jun tsannan jolajochunae tinue. 
\p  
\v 36 Junni aman Diosi israelítalaberi sen fiquica pasa carinue. Ya Jesucrístoca paca fiqui joe. Ya Jesucrístori se patarimin joe tinue yape tsachilabe Diosibe pa tala itolajosa. Jesucristo jeralelachi Miya joe tinue.  
\v 37 Aman nulanan Jesuca numa meracala jonhoe tinue. Casale Galilea tobi, junsi jerale Judea tobi, jera mera jominhe. Aman casale Mumunmin Juan Diosichi fiquica micaricae tinue mumunhinola joeque.  
\v 38 Junsi Diosi Jesús Nasarénoca wenteto, yaca sonba tenca suwanue tinue. Diosichi Tenca Jesube tsaracari seque penenaminue. Junni Jesús seque quito nenaminue. Yucan pasuwaca junlaca Jesús mansemin jominue. Diosibe ura mantaito tsanque seque nenaminue. 
\p  
\v 39 Junca chiquila ura pemiralarayoe tinue. Israelítalachi tobi, Jerusalén pueblobinan Jesús titiya jera quinaminca quiracalayoe tinue. Jun tenchi jera tsanque cuenta quilaquinayoe tinue. Aman junni Jesucrístoca titiya seque quinamincanan corosibi eruncarito totelaquee.  
\v 40 Junni ya puyaca jominca peman mate Diosi yaca mansoncarito manquiraisa carinue.  
\v 41 Jeralelaberi manquiraitue. Diosi chiquilacasiri wentenue Jesucrístoca manquirato uyanlabe cuenta manpolarilaquisa. Yari puyan ocolachibi nechi manjatobi chiquilabe ano pemanfin, pi pemancuchin quicae tinue. 
\p  
\v 42 Aman junni meralaquede! tinue. Diosi Jesucrístochi mantá cuwanue jeralelaca quirato miisa senla jonunca o seitonla jonunca. Numa puyaca junlacanan, casonnaminlacanan quirato miichunae tinue. Junni Jesucristo chiquilaca mantanue yape tsachilabe ya cuentaca jera polarilaquisa.  
\v 43 Jesucrístori jutsa piyarimin joe tinue. Jerale yabe cayaiminlacari jutsa piyarichunae tinue. Jerale matu tote Diosichi mantate paminlanan jun tsanquenan cuenta polarimin jominlanue tinue. 
\s1 Diosichi Tenca israelita itonlachibi winunca 
\p  
\v 44 Junni Pedro tsanque camicarinasaleri, Diosichi Tenca patato, jerale meráminlachibi winue.  
\v 45-46 Junni merátunun fiquichi pato, Diosica seque palaquinue. Israelita itonla josanan Diosichi Tenca yalachibi winiinue. Aman Pédrobe pejaminlari Jesucrístobe penenaminla jotonan, israelítala jominlanue. Junni yalari junca quirato duque wepanalainue.  
\v 47 Junni Pedro itsantinue: 
\p —Quiralaquede! Diosichi Tenca inlachibinan winue tinue chiquilachibi cuwenta. Tsanhica jonari, inlanan mumunhino podeilaichunae tinue. 
\p  
\v 48 Junni Pedro tsantisi, yalaca mumunsa mantanue Miya Jesuchi jolajoe tito. Junni Pédroca rocailainue yalabe nasi pechusa. 
\c 11  
\s1 Pedro niyaito Cornéliochica jiyoe tinunca 
\p  
\v 1 Tsanqueri israelita itonlanan Diosichi fiquica meráto quereilainue. Junni Crístochi mantá tanlabe uyan Jesucrístobe penenamin israelítalabe Judea tobi junca meralaquinue.  
\v 2 Junto weyan weyanla israelítala talasiri nenantsan joe tito, Pédrolaca pailainue. Junni Pedro Jerusalenca manjaca josa, yaca seitonque pato,  
\v 3 itsanlatinue: 
\p —¿Nuri niyaito israelita itonlachica jito yalabe ano pefiyun? latinue. 
\p  
\v 4 Junni Pedro yalachi fiquica merasi, yalabe beconan pato, tsarasi tuca pato itsantinue: 
\p  
\v 5 —La Jope pueblobi chuto Diosibe rocainamanyoe tinue. Junto lachi quirajanasa wa jali cuyan tsanni quiranca quirayoe tinue. Jamochi nechi junpalu puntabi tela jun patae tinue. Lachite patae tinue.  
\v 6 Junni ya jalibi quiranan, duque animali poe tinue. Jelenquiran animalila, quela, susu, pini, baro titiya poe tinue.  
\v 7 Junnasa mantimini itsanque fiqui mera jae. Lachi mumunca pato, Pedro tie. Cupade! In animalilaca toteto fide! tie tinue. 
\p  
\v 8 La mantimini itsantiyoe tinue: Te, fino miitoyoe. Miya Diosi, nu mirae. Lari numanan fitununcari fitumanyoe. Chiranlaca fitumanyoe tiyoe tinue.  
\v 9 Junnasa jamochi nechi itsanque fiqui manmerajae: Diosi ticatiya fintsan suwayoe tinari, nuri junca chiran tituna! tie tinue.  
\v 10 Junni peman ne jun tsan jun tsannan tilatiyoe. Junsi jalica jamochi manlaricae tinue. 
\p  
\v 11 Junni jali jamochi manlonasaleri, pemanca tsachila la chunun yabi falainue. Ya pemanca tsachilari Cesarea pueblobi nechi ereca jun jaca jominlanue laca neyabi.  
\v 12 Junni yala jalainasanan, Diosichi Tenca labe itsantie tinue: Natiya jeleratuto ya tsachilabe pejiniide! tie tinue. Junni in sotaca Jesucrístobe penenaminla labe pejica jominlae tinue. Chiquila layaito Cesaréaca jito, ya capitanchi yabi wilaiyoe tinue.  
\v 13 Junni yari chiquilabe cuenta quito yachi yabi anjelica wiruraminca quirayoe tie tinue. Anjeli yabe itsanque pae tie tinue: Jope puebloca tsachilaca ereto, junbi nechi Simón Pédroca tanjasa carideque mantanue tie tinue.  
\v 14 Pedro micarinun fiquica meralaquito, nunan nuchi yabi chuminlanan se lono podeilaichunae tie tie tinue. 
\p  
\v 15 Junni ya capitan pacaca tsanque manpolarito, Pedro itsantinue: 
\p —Lari ya capitanbe nasiri cuenta quiyoe tinue. Junnasaleri Diosichi Tenca patato yalachibi wie tinue. Chiquilachibi casale winun cuwenta, jun tsanquenan yalachibinan wie tinue.  
\v 16 Junca quirato, Miya Jesús paca jun fiquica mantenhiyoe tinue. Jesucristo chiquilabe itsantica jominue tinue: Mumunmin Juanbe penenaminlari pibiri mumunhilainue. Nula mantimini Diosichi Tencachi mumunhilaichunae. Yachi Tencaca erechunae tica jominue tinue nulachibi wisa.  
\v 17 ¿Aman chiquila Jesucrístobe cayailainunbi, Diosi yachi Tencaca chiquilachibi tsanque ereco? tinue. Junni Diosichi Tenca jun tsachilachibinan jun tsanquenan patae tinue chiquilachibi cuwenta. Aman junca quirato, lari Diosichi contra natiya pano podeitiyoe tinue. 
\p  
\v 18 Junni Pedro tsantinaminca meráminla, natiya beco pano podeilaitunue. Junni Diosica duque seque pato itsantilatinue: 
\p —Junni Diosi israelita itonlacanan jutsa quinunca telaqueposa carito, casan tala tenca mancasa carinae tinue yape yalanan numatotiya Diosibe sonnato polelaisa. 
\s1 Antioquíabi Jesucrístobe cayaito penenaminla 
\p  
\v 19 Aman junsi israelítala Estébanca totetobi, jerale Jesucrístobe penenaminlabe seiton ica jominlanue. Junni israelítalaca jelechi Jesucrístobe penenaminla ara cura jera sujica jominlanue. Fenecia toca, Chipre toca, Antioquía puebloca sujica jominlanue. Junchi sujito nenato, Diosichi fiquica micaridede nenaminlanue. Junni casale israelítalacasiri micarinaminlanue.  
\v 20 Tsan josanan weyan weyanla Antioquía pueblocanan jito, junbi israelita itonlacanan micarilaquinue. Ya micariminla Chipre tobi nechi, Cirene tobi nechi joto, israelita itonlabenan Miya Jesuca panilaquinue.  
\v 21 Junni yala micarilaquinasanan, Miya Diosinan sonba peayudainaminue yape antioquíalanan quereilaisa. Junni duque tsachila ya micaricaca quereito, Miya Jesucrístobe cayailainue. 
\p  
\v 22 Junni Jerusalenbi chumin Jesucrístobe penenaminlari layaito junca meralaquinue. Tsanque merasi, Bernabeca Antioquía puebloca erenue.  
\v 23-24 Bernaberi sen tsachi jominue. Diosichi Tencabe jera seque mantaito nenato, Diosica tsara quereimin jominue. Yari Antioquíaca jito, Diosi junbi seque quinanunca quirato, duque son tinue. Junsi piyanlelacanan payinue. Miya Jesuca telaquepotuto, sonba tenca cato nenalarana! tito payinue. Junni nantanancari duque tsachila Miya Jesube cayailainue. 
\p  
\v 25 Junsi Bernaberi Tarso puebloca jito, Sáuloca manneyanue. Junni Sáulobe mantulaito, Antioquíaca mantanjato,  
\v 26 man wata fecári Antioquíabi chuminlanue. Jesucrístochi tsachilabe pelayailaito, duque tsachilaca micarinaminlanue. Junni Antioquíabi chuminlari Jesucrístobe penenaminlaca cristianola timin jominlanue. Jun pueblobi casalele nechi Crístobe penenaminlaca ya mumun polaquinue. 
\p  
\v 27-28 Junnasa mantimini Diosichi mantate paminla jominlanue. Yala manca Agabo mumun jominue. Junni Jerusalenbi nechi Antioquíaca jato, Agábori, Diosichi tsachilachi quitsale wiruito, yalabe cuenta quinue. Diosichi Tencabe mantaca jun yalabe itsantinue: 
\p —Inale jerale tote chuminla ano itonan padeseilaichunae tinue. 
\p Junni inale Claudio miya josanan, jun tsanquenan ano itonan padeseino patilainue.  
\v 29 Junni Jesucrístobe penenaminla Agabo pacaca merasi, ayudaichun tenca calaquinue. Judea toca calaca erechun tenca calaquinue yape junbi chumin Jesucrístobe penenaminla, yalanan padeseilaitusa. Duque tanla duque cuwalaquinue; nasi tanla nasi cuwalaquinue.  
\v 30 Junni tsanque calaca layaquetobi, Bernabeca, Sáuloca erelaquinue yape Jesucrístochi tsachila tala mantá tanlachi cuwapolaquisa. 
\c 12  
\s1 Jacóboca toten, Pédroca doquin, quinunca 
\p  
\v 1 Junnasa mantimini Herodes tinun miya Jesucrístochi tsachilaca duque seiton quinue.  
\v 2 Juanchi acoca espadachi totesa carinue ya Jacobo tinunca.  
\v 3 Junni israelítalari yaca toteca jonunca se joe tilatinan, Herodes Pédrocanan dosa carinue. Casa ma fiesta quilaquinasa yaca dosa carinue.  
\v 4 Aman Pédroca doto, junpalu bolon soldadolaca mantanue yaca turno tala quiralaquisa. Bolon cura junpaluca soldadola jominlanue. Junni jun fiesta polenunbi Herodes Pédroca manlarito israelítalachi cale juisio quino jominue.  
\v 5 Junni Pedro do chusanan, Jesucrístobe penenaminlari layaito yachi tenchi Diosibe duque rocainaminlanue. 
\p  
\v 6 Junni larino ma quepen Pedro dorato catson tsominue. Paluca soldadolachi quitsabi tsoto, cadenachi tela jun jominue. Aman donun ya urachi tamolante paluca soldadola quirato wiruraminlanue.  
\v 7 Tsan josanan Miya Diosi ereca jun anjeli jato, junbi quirainue. Junni aman donun yabi duque tsen inue. Junsi anjeli Pédroca quilinchile taquirato wecacarito mansoncarinue. Yaca mansoncarisi, wewe manwiruide! tinue. Junni Pédrochi tedebi cadena telaramin wojiniinue.  
\v 8 Junsi anjeli Pédrobe manpato, sendori manquito, sapato manpode! tinue. Pedro tsanquinue. Junsi panu oto, lachi benele pejade! tinue. 
\p  
\v 9 Junni Pedro anjelichi benele jito, doranun yabi nechi loniinue. Casale tenca canato, anjelica tsa joeque tenhitunue. Tsa josanan, yachi quirajanaeque tenca canaminue.  
\v 10 Aman man paluca soldadolaca poleto, fiero tamolanbi felainue. Ya tamolan donun yabi nechi jera lonun tamolan jominue. Junni ya fiero tamolan jotonan, tenca mánta lasainiinue. Junni junse loto, minubi mannenaminlanue. Junsi ya anjeliri Pédrobe man cuadra fecári penenaminnan manpiyapoleniinue.  
\v 11 Junni aman Pedro tenhinue tsa jominueque. Junni Pedro mancasirinan cuenta quito, itsantinue: 
\p —Herodes laca seiton quinono tinaminue tinue. Israelítalanan méraminlanue yape Herodes laca seiton quisa. Aman tsan josanan, Miya Diosi yachi anjelica erenue yape laca manse larisa. Junca amana tsa mirayoe tinue. 
\p  
\v 12 Tsanque jera tenca catobi, Maríachica jinue. Aman ya María Juan Márcochi ayan jominue. Junni yalachi yabi duque Jesucrístobe penenaminla layaito Diosibe rocainaminlanue.  
\v 13 Junni Pedro minubi tamolanca toleponue yape lasisa. Junni peyun sona, Rode mumun, tamolanca janue mo jonunca miibi.  
\v 14 Junni Róderi Pédrochi fiquica manmiito, duque son tito, tamolanca lasino pansito, tamochi mansuwito, uyanlabe panue Pedro urachi manwiruraeque.  
\v 15 Yala mantimini Ródebe itsanlatinue: 
\p —¿Pedro jochinan? Nu loca joe latinue. 
\p Rode mantimini fe sonba pato, Pedroré tinue. Junni yachi anjeliri jonhoe latinue.  
\v 16 Tsanlatinasanan, Pedro urachi rato tamolanca catoleponaminue. Junni tamolanca lasito quiranari, Pedro junte wiruraminue. Yalari duque wepanalainue.  
\v 17 Junni Pedro tedechi nosaide! quito, jera cuenta manpolarinue Miya Diosi yaca donun yabi nechi manse larieque. Junni Jacóbobenan, Jesuchi uyan tsachilabenan in cuentaca jera manpolaride! tisi, Pedro junchi nechi manjito uyanchi manjinue. 
\p  
\v 18 Junni aman mantseinunsi, soldadola duque wepanalainue Pedro itoeque.  
\v 19 Junni Herodes Pédroca neyanaminnan neyanaminnan, te, fetunue. Junsi quiranamin soldadolabe duque panhanue Pedro niyaito manlonunca. Junsi yalaca totesa mantanue. Junni Herodes tsanque mantato, israelítalachi tobi nechi manloto, Cesarea puebloca jito, junbi chuminue. 
\s1 Herodes puyanunca 
\p  
\v 20 Junni aman Herodes paluca pueblobi chuminlabe duque pa jominue. Manca pueblo Tiro, manca pueblo Sidón jominue. Aman ya pueblobi chuminla Heródechi tobi nechi ano cato tanjito fimin jominlanue. Junni yalari layaito, Heródebe amico manhichique jalainue yalachi ano faltaitusa. Casaleri Blasto tinun tsachibe amico ilainue. Yari Heródechi mantate nenamin tsachi jominue. Junni Blástobe amico ito, yaca Heródebe rocaisa carilaquinue yape wari pa itosa.  
\v 21 Junni jeralelabe layaichun trato quito, jun mate Heróderi jera urara seito ya mantato chudinunbi chudito, jera layaica junlabe panue.  
\v 22 Junni yaca meráminla otito, Heródeca itsanlatinue: 
\p —Tsara seque pamin joe. Herodes tsachiri itoe; ya diosi joe latinue. 
\p  
\v 23 Yala tsanlatinasa, Heróderi Diosi itoyoe titunue. Tsachilaca natiya patunue tsantitulajodeque. Junnasa Miya Diosichi anjeli moora jato, Heródeca casticaquinue. Junni Heróderi malun fica jun puyanue. 
\p  
\v 24 Junni Herodes puyanunbi, nantanancari duque tsachila Miya Jesucrístoca paca fiquica miin, merán, quinaminlanue. 
\p  
\v 25 Junni Bernabebe Sáulobe Jerusalenbi jera quito, Antioquía puebloca manjilainue. Aman Juan Márcoca petanjilainue. 
\c 13  
\s1 Bernabebe Sáulobeca erelaquinunca yape micarilaquisa 
\p  
\v 1 Junni Antioquíabi Jesucrístochi tsachila tala Bernabé, Simón, Lucio, Manaén, Saulo mantá tan jominlanue. Aman Simonca tensaato mumun Pabacán timin jominlanue; Lucio, ya Cirene tobi nechi tsachi jominue. Manaenni miya Heródechi aco cuwenta jominue. Inlari weyanla micarimin, weyanla Diosichi mantate pamin jominlanue.  
\v 2 Junni yala ano fitunca ito, Miya Diosichi cale telenhinaminlanue. Junni tsanlainasa Diosichi Tenca yalabe itsantinue: 
\p —La Bernabebe Sáulobeca wenteto mantaca joyoe tinue yape lachi tenchi ticatiya quito nenalarasa. Junni nulanan yalaca mantalaquede! tinue. 
\p  
\v 3 Junni yalari ano fitunca ito, Diosibe rocailainue. Junsi Bernabebe Sáulobeca tedechi tale quito, yalachi tenchi Diosibe rocaito erelaquinue. 
\s1 Chipre tobi Diosichi fiquica micarilaquinunca 
\p  
\v 4 Junni Bernabebe Sáulobe Diosichi Tenca ereca jun jito, casale Seleucia puebloca jilainue. Junbi nechi Chipre tinun pisaca barcochi jilainue.  
\v 5 Juan Márconan pejinue yalabe peayudaichun. Aman Chipre tobi féto, Salamina pueblobi barcobi nechi patilainue. Junbi israelítala tala Diosichi fiqui miinun ya cura micarilaquinue. Junbi Jesucrístoca paca fiquica micarilaquinue.  
\v 6-8 Aman Chipre tobi micaride nenato, Pafos pueblo fecári jilainue. Junbi israelita ponebe tulailainue Barjesús mumun. Yachi manca mumun Elimas jominue. Yari nene pato, Diosichi mantate pamin joyoe timin jominue. Aman ya poneri jun pisaca mantamin miyabe pechuminue. Ya miyari Sergio Paulo tinun jominue. Junni ya miyari tenca tan tsachi joto, Bernabebe Sáulobeca jasa tinue Diosichi fiquica meráchun. Junni Sáulola micarilaquinasanan, ya poneri duque seitonque pánaminue yape Sergio Páulori Jesucrístobe cayaitusa.  
\v 9 Junni Pablo itsantinue. (Aman Sáuloca tensaato mumun pato, Pablo tinun jominue.) Junni Pablo Diosichi Tencabe jera mantaito, ya poneca cacabi quirato, itsantinue: 
\p  
\v 10 —Nuri ti quira seiton encanamin tsachi joe tinue. Nu yucanbe penenamin joto, jera sen jonuncatiya paimin joe. ¿Ti quichun Miya Diosichi sen minuca jera pala suwachique tenfenayun? tinue.  
\v 11 Junni Miya Diosiri nuca casticaquichunae tinue. Wan fecári ticanantiya quirano podeituchunae tinue. Nin yocatiya quirano podeituchunae tinue. 
\p Junni Pablo tsantinunsi, Barjesús quirano podeiton iniinue. Junni quirano pode itoto, tsachilaca neyanue yape yaca tedele nasi cato tanjilaisa.  
\v 12 Junni Chipre to miyari junca jera quirato, Miya Jesuca paca fiquica duque wepanato, Jesucrístobe cayainue. 
\s1 Pisidia tobi micarilaquinunca 
\p  
\v 13 Junsi Páblola Pafos pueblobi nechi loto, Panfilia toca barcochi jilainue. Panfilia toca jito, Perge pueblobi felainue. Juan Marco mantimini yalaca purato, Jerusalenca manjinue.  
\v 14 Junni Pérgebi nechi jito, manca Antioquía tinun puebloca jilainue ya Pisidia tobi. Junto jasaino mate israelítala tala Diosichi fiqui miinun yabi wito chudilainue.  
\v 15 Junni jun yabi mantaminla Diosichi Pila quiratobi, Páblolachi fiqui ereto itsanlatinue: 
\p —Acola, chiquilachi tenchi titiya cuenta quino munaratori, panilaquede! latinue. 
\p  
\v 16 Junni Pablo wiruito, tedechi nosasailaide! quito itsantinue: 
\p —Israelítala, laca meralaquede! Aman inte weyanla israelita itotonan, Diosica tenca tanla joe. Nulanan laca meralaquede! tinue.  
\v 17 Diosi chiquilachi matu to tatalaca wentenue tinue yape yachi tsachila jolajosa. Yala Egipto tobi cachularasanan, yalaca duque serawonue yape wa bolon ito seque chularasa. Junsi sonbaito, yalaca Egíptobi nechi manlarinue tinue.  
\v 18 Junni yalari Egíptobi nechi loto, junpalu chunca wata fecári niyanlanantiya chutunun tobi nenato, seiton quito nenaminlanue. Diosi tsanhinaminlaca wantaito,  
\v 19 yalaca Canaán tobi manchutenue. Canaán tobi nechi siete bolon tsachilaca jera sularinue yape chiquilachi matu to tatala junbi chularasa. 
\p  
\v 20 Junni junpalu patsa mante chunca wata fecári Diosi tsachila mancaca mancaca wentenue tinue yape israelítalaca mantasa. Samuel sonnano fecári israelítala ya wenteca junlabe mantaito chuminlanue tinue. Aman Samuel Diosichi mantate pamin tsachi jominue.  
\v 21 Junni Samuel israelítalaca mantanasanan, tsa miyaca munaralarayoe tilatinue tinue. Junnan Diosi yalaca meráto tsachi mancaca mantaponue yape miya josa. Yari Saúl mumun jominue. Yachi apa, Cis tinun, ya Benjaminchi bolon israelita jominue tinue. 
\p Junni Saúl junpalu chunca wata fecári mantanasanan,  
\v 22 Diosi yaca telaquepoto, Davica miya suwanue. Diosi Davica itsantinue tinue: Lachi tenca munate nenamin tsachica neyato fecayoe. David joe tinue Isaíchi nao. Lachi titiya quisa tenjanari, yari jera tsanquichunae tinue.  
\v 23 Junsi Diosi man fiquiman pato itsantinue tinue: Israelítalachica manca tsachica ereyanae tinue yape se larimin josa. Ya se larimin tsachi Davichi alica jochunae tinue. 
\p Junni Pablo Diosichi Pilabi chuteca fiquica tsanque pasi, itsantinue: 
\p —Junni Diosi tsantica josa, ya tsachica numa ereca joe tinue. Jesús mumun joe tinue.  
\v 24 Aman Jesús micaribi jano inasale, Mumunmin Juan yaca pae. Jerale israelítalabe pato, jutsa quinanunca telaquepoto, casan tala tenca mancato mumunhilaide! tie tinue.  
\v 25 Junni Juan puyano quelo inato itsantie tinue: ¿Laca niyan tiyun? tie tinue. ¿Diosi wenteca jun Cristo tinun joe latinayun? Te, itoyoe. Yari lachi benechi jachunae tie tinue. Yari tsaracari fécari sen jonun tenchi, yachi sapato silicari woleto cuwanotiya michi sen itoyoe tie tinue. Mumunmin Juan tsantie tinue. 
\p  
\v 26 Junni nula israelítala, Abrahanchi alicala joto laca meralaquede! Diosica respetaito jeleraminla, nulanan meralaquede! tinue. Jesuca paca sen fiqui nulachi tenchinan joe tinue. Tsara sen fiqui joe tinue jutsa quimin jomin jotonan manse lonola joeque.  
\v 27-29 Matu tote Diosichi mantate paminla Jesuca pila chuteto yaca totesa carilaquichunae tilatie tinue. Junni Jerusalenbi chuminlabe yalaca mantaminlabe jun fiquica tennatumin jominlanue. Jasaino ma cura ya pilacanan quiraminla jotonan, natiya tennatumin jominlanue tinue. Jun tenchi Jesús jaca josa, ya Diosichi tsachi joeque tenhilaitunue. Aman Jesús sen jominue. Junni ya israelítala yaca paito culpa quechique tenfelainue yaca totesa carichun. Junni tsa culpa quino podeitutonan, Jerusalenbi chuminlari miya Pilátobe rocailainue yape Jesuca toteniquisa. 
\p Tsanqueri Jesuca totesa carino podeilainue. Tsanque matu mate Jesuca totesa carilaquichunae tica fiquiri tsa patinue. Junni aman Jesús puyacaca tsachila corosibi nechi manpataricato mantanjato, menalaquinue tinue.  
\v 30 Tsan josanan wari Diosi Jesuca puyan tsominca mansoncarinue.  
\v 31 Junni Jesuri Diosi mansoncarica jun joto, duque ma fecári manquiraide nenaminue tinue. Yabe Galilea tobi nechi Jerusalenca pejaca jominla yaca manson nenaminca quiralaquinue. Junto ya tsachila amana matenan Jesuca cuenta polaridede nenalarae tinue yape jeralela junca miilaisa. 
\p  
\v 32 Junni Pablo Diosichi fiqui miinun yabi camicarinato itsantinue: 
\p —Junsi chiquilanan ya sen cuentaca polarilaquinayoe. Meralaquede! tinue. Diosi chiquilachi matu to tatalabe pato, nulachi tenchi tsara seque queyanae tica joe tinue.  
\v 33 Junni Jesús puyan tsominca mansoncarinato, tsara seque queyanae tica joto tsanquinue. Diosichi Pilabi yaca chuteca joe. Salmo dobi Diosi Jesube cuenta quicaca itsanque chuteca joe: Nu lachi Nao joe; amana nuca Nao joeque payoe tie tinue. 
\p  
\v 34 Junsi man postobi Diosichi Pilabi man fiquiman joe: Diosi miya Davibe cuenta quinato, nuca duque se queyanae tie tinue. Junni Diosi Davibe tsantinatonan, nulachi tenchinan tsantinamanyoe tie tinue. Duque quereintsan fiqui joe tie tinue. Junni Diosi nulachi tenchi seque queyanae tito, Jesucrístoca mansoncarino joyoeque tsantinaminue. Junni Jesucrístori numa mansonhica joto, wari numatotiya manpuyato petetuchunae tinue.  
\v 35 Yape juncanan miilaisa, Diosi manca Salmobi Davica itsanque pila chutesa carinue: Diosi yachi tsara sen tsachi jominca petesa carituchunae tie tinue. 
\p  
\v 36 Junni David tsantinato, tencachiquecanan patunue. Uyanca tsantinaminue. Daviri Diosichi mantate jun mate miya jominnan, puyato menaito peteniinue. Junni yari Diosi petesa carituchunae tinato, tencachiqueca paca itominue tinue. Jesucrístoca pánaminue tinue.  
\v 37 Yacari Diosi mansoncarinan, tsanle petetunue tinue. 
\p  
\v 38 Junni Pablo tsanque micarisi, man fiquiman cuenta quinue. Itsantinue: 
\p —Israelítala, lanan israelita pejoyoe. Junni laca meralaquede! tinue. Nulabe tuca pato itsantinayoe tinue: Ya Jesuri nulachi jutsaca jera piyarino podeichunae tiyoe tinue.  
\v 39 Aman matu mate Moisés Diosichi mantaca jera pila chutenue yape israelítala meralaquisa. Junni nulari jun mantaca meráchique tenfenatonan, natiya jera sen tenca ino podeilaituchunae tinue. Jesucristo mantimini yabe cayaiminlaca jera sen tenca suwano podeichunae tinue.  
\v 40-41 Junni junca seque tenca calaquede! tinue. Aman matu tote Diosichi mantate pamin tsachi itsanque pila chutenue tinue: 
\q1 Nula merátuchi timinla joe tinue. 
\q1 Junni quiralaquede! tinue. 
\q1 Yape wepanato puyanilaide! tinue. 
\q1 Nula sonnano mate Diosi tsara seque quechinayoe tinue. 
\q1 Nula mantimini junca quereilaituchunae tinue. 
\q1 Nulabe jera paca josatiya, natiya quereilaituchunae tinue. 
\m Tsanque Diosichi Pilabi chuteca joe tinue. Junni nulari ya matu chuteca fiquica meráto, seque tenca canilaquede! tinue nulanan yala quereituminla cuwenta itochun. 
\p  
\v 42 Junni Pablo tsanque cuenta polaritobi, Diosichi fiqui miinun yabi nechi jera manlolainue. Manlolainato, israelita itonlari Páblolabe rocailainue manca jasaino matenan ya fiquica manaman micarilaquisa.  
\v 43 Junsi jeralela manlotobi, duque tsachila Páblolabe pejilainue. Weyan weyan israelítala jominlanue; weyan weyanlari israelita itotonan israelítalachi mite Diosica petenca camin jominlanue. Junni Páblola yalabe jera cuenta quito payilaquinue. Diosi nulaca laquiranan, nulanan yabe seque canenalarana! tilatinue. 
\p  
\v 44 Junni manca jasaino mate duque tsachila Diosichi fiquica meráchun layailainue. Jun pueblobi jeralelaban layaica jominlanue.  
\v 45 Junni israelítala duque tsachila layaicaca quirato mantimini wepanato pailainue. Tsachila yalaca puratuto, Páblolabe penenalaratusa pailainue. Junto Pablo cuenta quinaminca nene joe tito, epele palaquinue yape tsachila israelítala micarinanunca telaquepolaquitusa. Pábloca duque seiton fiqui pánaminlanue.  
\v 46 Juntonan Páblobe Bernabebe natiya jeleratuto, israelítalabe itsanlatinue: 
\p —Nulacari Diosichi fiqui casale micarino jominlayoe latinue. Nula mantimini ya fiquica natiya merátuchi tilatinae latinue. Diosibe numatotiya sonnato poleno munaitumin tsanni jolajoe. Jun tenchi chiquila nulaca telaquepoto, israelita itonlachica jilaichinayoe tilatinue. Yalaca Diosichi fiquica micaribi jilaichinayoe latinue.  
\v 47 Aman Miya Diosi patsa chiquilaca uyanlachica erenue. Diosichi Pilabi junca itsanque chuteca joe: 
\q1 Diosi nulaca erecayoe tinue yape israelita itonlaca micarilaquisa. 
\q1 Micaribi jilaide! tinue jerale bare tobi chuminlanan jera miilaisa Diosiri jutsa quiminlaca se larimin joeque. 
\m Diosichi Pilabi tsanque pila chuteca joe tilatinue. 
\p  
\v 48 Junni israelita itonlari ya fiquica meráto, son tilatinue. Miya Jesucrístoca paca fiquica tsara sen fiqui joe tilatinue. Junni Diosibe numatotiya sonnato poleno jono jominla Jesucrístobe cayailainue.  
\v 49 Junni Miya Diosichi fiquica jerale jun tobi mera jominue.  
\v 50 Israelítala mantimini tsachilaca payilaquinue yape Pábloca, Bernabeca, seiton quilaquisa. Israelítalachi mite Diosica tenca camin sonalacanan payilaquinue respetainun sonalaca. Jun pueblobi mantamin unilalacanan payilaquinue. Junni yala jeralela layaito, Páblobe Bernabébeca seiton quito, junbi nechi suerelaquinue. 
\p  
\v 51 Junni Páblola jun pueblobi nechi suereca jun manjinato, to poyo nedebi caraicaca manpiquisilaquinue suereminlaca seitolajoe tito. Junni junbi nechi loto, Iconio puebloca jito polelainue.  
\v 52 Junnasa mantimini ya Antioquía pueblobi Jesucrístobe casan cayaica jominla duque son tinaminlanue. Diosichi Tencabe jera seque mantaito penenaminlanue. 
\c 14  
\s1 Icóniobi micarinaminlanan Lacaóniaca mansujilainunca 
\p  
\v 1 Junni aman Páblobe Bernabebe Iconio pueblobi féto, israelítala tala Diosichi fiqui miinun yabi wilainue. Junbi wito micarilaquinue. Junni icóniolari jun fiquica meráto, duque tsachila Jesucrístobe cayailainue. Israelítalanan israelita itonlanan cayailainue.  
\v 2 Aman cayaituchi timinla mantimini duque pasuwalaquinue. Israelítala Jesube penenaminlaca yucacurato, israelita itonlaca paimiyalaquinue.  
\v 3 Tsan josanan Páblola Icóniobi duque wanca raminlanue. Jeleratuto, Miya Diosichi fiquica micarinaminlanue duque laquiramin joeque. Junni Diosi Páblobe Bernabébeca duque wepanato quirantsancari seque quisa carinue yape tsachila jun fiquica meráto tenca calaquisa. 
\p  
\v 4 Tsantin chularasanan Icóniobi chuminlari man tala man tala tenca canaminlanue. Weyan weyanlari israelítalachi parte jominlanue; weyan weyanlari Crístochi mantá tanlachi parte jominlanue. 
\p  
\v 5 Junni tsachila nosa layaito Crístochi mantá tanlaca tenpalaquinue. Israelítalabe, israelita itonlabe, mantaminlabe tsanque tenpalaquinue yalaca seiton quilaquichun. Yalaca su walaca tala quito totelaquisa! tilatinue.  
\v 6-7 Junni Crístochi mantá tanla mantimini junca meráto, Lacaonia toca sujilainue. Junsi Lacaóniabinan Jesucrístoca paca sen fiquica micarilaquinue Listra pueblobi, Derbe pueblobi, jun quelolate. 
\s1 Pábloca suchi totewiyalajonunca 
\p  
\v 8 Junni Páblola Listra pueblobi nenato quiranari, jancan tsachi manca chuminue. Na mántanan jancan joto, wiruino podeiton jominue.  
\v 9 Ya mantimini Pablo pánaminca meráto chumincanan Páblori tule quiranue. Junsi Páblori jancanca quirato tenhinue manseinonocari Diosica tennamin tsachi joeque.  
\v 10 Junnan Páblori sonba pato, nuri tuca wiruide! tinue. Tsantinunsileri wiruisi nenanue.  
\v 11 Aman duque tsachila Pablo tsanquinanunca quiralaquinue. Junto yalari Lacaonia to fiquichi pato, itsantilatinue: 
\p —Diosila tsachilanan quiran ito, chiquilachica patacala joe latinue. 
\p  
\v 12 Junsi Bernabeca Júpiter tinun diosi joe tilatinue. Aman Pablo fe cuenta quimin jonan, yaca Mercurio tinun diosi joe tilatinue.  
\v 13 Aman jun pueblo misule Júpiterchi ya tinun chuminue. Wa iclesia cuwenta jominue. Junni patele manca, ya Júpiter tinun diosichi patele jominue. Aman junni ya pateleri walabi luli chuteto tanjanue pueblo misule. Junsi patelebe uyanlabe ya walaca Páblolachi cuwachun totechi latinaminue. Páblolaca diosila joe tito cuwachi tinaminlanue.  
\v 14 Junni Bernabebe Páblobe Crístochi mantá tanla joto junca merasi, tencachique camisaca chilelaquinue wepanalainaeque tenhilaisa. Junsi jerale tsachilachibi sonba pato itsantide sujalainue: 
\p  
\v 15 —Amicola, ¿ti quichun tsanlaquinayun? latinue. Chiquilari diosila itolajoyoe. Tsachilanan jolajoyoe nula cuwenta. Nulachi tenchi sen fiquica cuenta quebi jacalayoe latinue. In Diosi joe tinun molderi epe joe. Junni yaca jera telaquepoto, tsa son Diosibe cayailaide! tilatiyoe tinue. Tsa Diosi yoquidoca, toca, lamarica, jerale junlabi nenaminlacanan quica joe.  
\v 16 Matuteri jerale tote chuminla yalachi tenca munate nenalarasanan, Diosiri casticaquituto quiraniquinaminue.  
\v 17 Aman tsanque quiraniquinatonan, nulaca micarimin joe yasiri tsa Diosi joyoeque. Nulachi titiya jera seque cuwaniquimin joe tinue. Jamochi nechi suwa quisa carin, ticatiya waquecaca se suwan, quimin joe yape nulari michi ano finoca talarasa. Nulachi tencaca son josa carimin joe tinue. Junbe Diosi nulaca micarimin joe tinue tsa Diosi jamochi chueque. 
\p  
\v 18 Aman Páblola tsanque micarinasatiya, ya lacaónialari walaca toteto cuwano munaraminlanue. Diosichi cuwanun cuwenta yalachi epe cuwano munaraminlanue. Páblola duque catuchique tenfenato catulajonue. 
\p  
\v 19 Junnasa mantimini israelítalari Antioquíabi nechi, Icóniobi nechi jalainue. Yalari jasi, Lacaonia tsachilacaman payilaquinue yape yalanan Páblolaca seiton quilaquisa. Junni layaito Pábloca cato, su walaca tala quilaquinue. Junto Pábloca puyanhie tito, pueblo dechi muricato queerelaquinue.  
\v 20 Tsan josanan weyan Jesucrístobe penenaminlari jato, Páblochi awinta wirurasanan, manse polenue. Junsi Pablo manwiruito, jun pueblobi manwito, ayuna nanchi Bernabebe Derbe puebloca jilainue. 
\p  
\v 21 Aman Páblolari Dérbebi féto, junbinan Jesucrístoca paca sen fiquica micarilaquinue. Junni duque tsachila yala pacaca meráto, Jesucrístobe penenamin ilainue. Junni Páblola necanan manjilainue. Lístrase, Icóniose, Antioquíase manpoledede manjilainue.  
\v 22 Jesucrístobe penenaminlaca sonba tenca suwadede manjilainue. Yalaca seque payito, nula Crístobe cayaica joto, yaca natiya telaquepotuto nenalarana! tilatinue. Nulari Diosi mantananun tsachi bolonbi pejochun duque padeseino patilaichunae tilatinue.  
\v 23 Aman pueblo mancaca jito, Miya Jesucrístobe cayaica junlabe pelayaimin jominlanue. Junsi yalabe pelayaito, ano fitunca ito, Diosibe rocailainue. Junto weyanlaca wenteto, yalachi mantá cuwalaquinue yape jun pueblobi Jesucrístochi tsachila tala mantá tanla josa. Junni Páblobe Bernabebe ya pueblobi nechi manlochinato, Jesucrístobe manan manrocailainue junbi chuminlaca seque cuidaideque. Junni jun pueblobi nechi jito, jerale Jesuchi tsachi bolon cura jun tsannan quedede manjilainue. 
\s1 Páblobe Bernabebe Antioquíaca manjalainunca 
\p  
\v 24 Junni Páblola Pisidia tose manpoleto, Panfilia toca manjalainue.  
\v 25 Junsi Perge puebloca jalainue. Junbi Diosichi fiquica micaritobi, Atalia puebloca jalainue.  
\v 26 Junsiri barcobi wito, manca Antioquía puebloca manjalainue. Casale Páblola ya Antioquíabi nechi jica jominlanue. Jilaichinasanan Jesucrístochi tsachila Diosibe rocaica jominlanue yape Páblolaca laquirato cuidaisa. Junni Diosichi fiquica jera polaridede nenaminnan, juntenan manjalainue.  
\v 27 Junni Antioquíaca manjasi, Jesucrístochi tsachilaca layaisa carito, yalabe cuenta quilaquinue. Diosi yalaca ticatiya jera quisa carica jonunca, Diosi niyaque israelita itonlacanan Jesucrístobe cayaisa carica jonuncanan jera cuenta polarilaquinue.  
\v 28 Junsi Páblobe Bernabebe junbi Jesucrístochi tsachilabe duque ma chuminlanue. 
\c 15  
\s1 Jerusalenbi tenpalaquinunca 
\s2 (Israelítalaca quidoca porenoca miichun, Caque Cosala 17:1-14 quirade!) 
\p  
\v 1 Junnasa mantimini israelítala Judea tobi nechi jalainue. Antioquíaca jato, Jesuchi tsachilaca itsanque micarilaquinue: 
\p —Matu to Moisés israelítalaca Diosichi mantate mantanue latinue. Chiquilachi quidoca poresa mantanue latinue Diosichi tsachila jolajoyoeque. Junni nulanan israelita itotonan, jun tsannan quinola joe chiquila cuwenta. Tsanlaquitunari, Diosiri nulaca se larituchunae latinue. 
\p  
\v 2 Junni Páblobe Bernabéberi jun fiquica merasi, palaque palaquinae tito, jun israelítalabe duque sonba pacaalaquinue. Junni aman Jesube penenaminla layaito, Pábloca, Bernabeca, weyanlacanan Jerusalenca erechun tenca calaquinue yape ya fiquica panhalaquisa. Jerusalenca jito, Crístochi mantá tanlabenan, uyan Jesucrístochi tsachila tala mantaminlabenan ya fiquica panhano jominlanue.  
\v 3 Junni Jesucrístobe penenaminlari layaito yalaca erenan, Jerusalenca jilainue. Junni junchi jinato, israelita itonlanan Jesube cayailaieque cuenta polaridede jinaminlanue. Fenecia tose, Samaria tose tsanque cuenta polaridede polelainue. Aman acolanan, soquilanan jun fiquica meráto, jeralela duque son tilatinue. 
\p  
\v 4 Aman Jerusalenbi felainunsi, Crístochi mantá tanla, Jesucrístochi tsachila tala mantá tanlanan, junsi jerale uyan Jesucrístobe penenaminla, jeralela layaito yalaca facarilaquinue. Junni Páblola cuenta quito, Diosi yalaca ticatiya quisa carinanunca jera cuenta manpolarilaquinue.  
\v 5 Aman fariséolachi bolon israelítalanan weyanlari Jesucrístobe cayaica junla joto junte peraminlanue. Junni yalari wiruito itsanlatinue: 
\p —Israelita itonla Jesucrístobe cayailainari, yalacanan israelítalaca cuwenta quidoca poresa carino joe latinue. 
\p  
\v 6 Junni jerale Jesucrístochi tsachila tala mantá tanla layaito junca tenpalaquinue.  
\v 7 Junni duque tenpanaminnan, Pedro wiruito itsantinue: 
\p —Acola, matuleri Diosiri laca wenteto mantanue tinue yape israelita itonlaca Diosichi sen fiquica micarisa. Jun fiquica meráto, Jesucrístobe cayailaie tinue.  
\v 8-9 Aman Jesube cayainan, Diosi yalachi jutsaca piyarinue. Junsi aman Diosi yalachi tencaca miraminue tinue Diosichi tsachila icala joeque. Junto Diosi yachi Tencaca yalachibi wisa carinue tinue chiquilachibi cuwentanan. Tsanquinato, chiquilacanan tenhisa carinue tinue yalanan Diosichi tsachila icala joeque. Chiquilanan, yalanan, jeralelanan Diosibe jun tsannan jolajoyoe tinue. 
\p  
\v 10 Junni tsan jonari, ¿ti quichun Diosicari tsanque pasuwalaquinayun? tinue. ¿Nulari ti quichun israelita itonlaca tenfe jono jonunca mantachi tilatinayun? Chiquilachi tatalanan ya mantaca meráto nenano podeitumin jominlanue. Chiquilanan meráno podeitumin jolajoyoe tinue. ¿Junni wari yala israelita itonla meráno podeilaichinan? tinue.  
\v 11 Junni chiquilari ya mantaca meráno podeitumin jonan, Miya Jesucrístori chiquilaca laquirato se larimin joeque quereiminlayoe tinue. Junto israelita itonlacanan jun tsanquenan laquirato se larichunae tinue. 
\p  
\v 12 Aman Pedro tsantinunsi, uyanla nosale cayaito jera chuminlanue. Junni Bernabebe Páblobe jera cuenta manpolarilaquinue Diosi ticatiya jera seque quica jonunca. Diosi chiquilacanan wepanato quirantsancari seque quimiyae tinue yape israelita itonlanan Diosica quereilaisa.  
\v 13 Aman Páblola jun cuenta jera quinunsile, Jacobo itsantinue: 
\p —Acola, laca meralaquede! tinue.  
\v 14 Diosi israelita itonlacanan laquirato quereisa carinue yachi tsachila pejolajosa. Casaleri Simón Pédroca yalachica erenue yape yalaca micarisa. Pedro junca tsaina cuenta quinaminhe tinue.  
\v 15 Junsi matu tote Diosichi mantate paminlanan cuenta quica jominlanue tinue israelita itonlanan Diosichi tsachila jolajochunaeque. Itsanque pila joe tinue: 
\q1  
\v 16 Davichi tobi chuminla, yala israelita tinunlari, epe jera icala jochunae tinue ya arajica cuwenta. 
\q1 Petse cuwenta jera icala jochunae tinue. 
\q1 Junni Miya Diosiri jun tsachilaca manse suwanae tinue. 
\q1 Diosi manjato, jun arajica jun yaca mansequeyanae tinue. 
\q1  
\v 17 Diosi tsanqueyanae tinue yape jerale tobi chuminlari Miya Diosica miichun neyalaquisa. 
\q1 Yalari israelita itonla jotonan, Diosica neyalaquichunae tinue. 
\q1 Yalacanan Miya Diosichi tsachila tinunla jochunae tinue. 
\q1  
\v 18 Aman Miya Diosi patsa tsantinue tinue. 
\q1 Yari matu male nechi yaca cuenta polarica joe tinue. 
\p  
\v 19 Junni Jacobo matu tote chuteca fiquica tsanque manpolarisi, itsanquenan mancuenta quinue: 
\p —Lari itsanque tenca cuwachinayoe tinue: Israelita itonla Diosibe cayailainari, yalaca israelítala cuwenta nenasa carituntsan joe tinue.  
\v 20-21 Tsan jotonan, israelítalacanan paisa carituntsan joe. Matule nechi jerale pueblobi israelítalanan pechularae tinue. Yalari matu to Moisés chuteca pilaca micariminla joe tinue. Jasaino ma cura Diosichi fiqui miinun yabi ya pilaca quiraminla joe tinue. Junni israelita itonlaca payinola joyoe tinue yape israelítalabe seque nenalarasa. Chiquilari pilaca erenato, itsanque mantanola joyoe tinue: Diosi tinun moldechi cuwacaca, o betepoto toteca tsachicaca, o asanca natiya fituntsan joe. Uyan sonalabe o uyan unilalabe nosa seitonque nenatuntsan joe tinue. Tsanqueri mantanola joyoe tiyoe tinue. 
\p  
\v 22 Junni jerale Jesucrístochi tsachila tala mantá tanlabe, jerale uyan Jesucrístobe penenaminlabe layailainue. Junsi yala tala paluca tsachilaca wenteto, Páblolabe peereno tenca calaquinue. Manca Silas mumun jominue; manca Judas Barsabás mumun jominue. Respetainun tsachila jominlanue. Junni yalaca Páblobe Bernabebe Antioquíaca pejisa mantalaquinue.  
\v 23 Junni yalaca erenato, yalabenan pila erelaquinue. Ya pilaca Antioquíabi, Síriabi, Cilíciabi chuminlachi cuwasa erelaquinue. Itsanque pilaca chuteto erelaquinue: 
\p Crístochi mantá tanlabe Jesucrístochi tsachila tala mantá tanlabe, uyan acolabe soquilabe jera layaito in pilaca nulachica erelaquinayoe. Nulari israelítala itotonan, Jesucrístobe penenaminla joe. Jun tenchi in pilaca nulachica ereto saludailainayoe.  
\v 24 Aman weyanlari chiquilachite nechi nulachica jito, epele micarinaminlanue. Nulaca duque wepanarinaminlanue. Yalari epele pato, nulanan israelítala cuwenta nenanola joe tinato, nulachi tencaca jera palaponaminlanue. Nulachi quidoca israelítala cuwentanan porenola joe tilatinue. Junni yalari chiquila mantatusanan tsantilatinae. 
\p  
\v 25 Aman junni chiquilari yala pánanunca meráto layailaiyoe. Junni layaito, piyanlela jun tsan jun tsanquenan tenca canato, nulachica in pilaca ereno tenca calaquiyoe. Junsi paluca tsachilacanan wentelaquiyoe Júdabe Sílabeca. Yalabe Páblobe Bernabebe in pilaca nulachica parejo petanjilaichunae. Aman Páblobe Bernabebe chiquilachi duque laquiranun acola jolajoe.  
\v 26 Yalari Miya Jesucrístochi tenchi ticatiya seque quito nenaminla joe. Pansile puyanotiya patilaiyanaeque tenca canatonan, seque quiminla joe.  
\v 27 Junni chiquilari inte nechi Júdabe Sílabeca yalabe peerelaquinayoe. Yalanan in pila chutecaca jun tsanquenan palaquichunae.  
\v 28-29 Aman nulaca itsanquesiri mantanola joyoe: 
\p Meralaquede! Diosi tinun moldechi cuwacaca, o betepoto toteca tsachicaca, o asanca natiya fituntsan joe. Uyan sonalabe o uyan unilalabe nosa seitonque nenatuntsan joe. Chiquilaberi wari in mantári michi jochunae. Diosichi Tencanan jun tsantinae. Junni nulari in mantacari jera merátori michi jochunae. Seque nenalarana! 
\b  
\p  
\v 30 Junni Crístochi mantá tanla ya pila chutecaca Páblola Antioquía puebloca tanjilainue. Antioquíabi felaitobi, jerale Jesucrístobe penenaminlaca layaisa carito, ya pilaca yalachi cuwalaquinue.  
\v 31 Junni Antioquíabi chuminla jun pilaca quirato, duque son tilatinue duque sen fiquica erelaquee tito. 
\p  
\v 32 Aman Júdanan Sílanan Diosichi mantate pamin jominlanue. Junni yalanan Jesucrístobe penenaminlaca duque payito seque micarilaquinue.  
\v 33 Junni Júdabe Sílabe Antioquíabi duque ma micaritobi, Crístochi mantá tanlachica manjichinaminlanue. Junni Antioquíabi chuminla yalaca seque manherelaquinue.  
\v 34 Tsan josanan, Sílari jituchi tito, juntenan chuniraminue.  
\v 35 Aman Páblonan, Bernabenan Antioquíabinan chularaminue. Jun pueblobi duque tsachila Miya Diosichi fiquica micarinaminlanue. Pablo, Bernabé, weyanlanan jominlanue. 
\s1 Pablo Diosichi fiquica manan micaribi jinunca 
\p  
\v 36 Junni inale Pablo Bernabebe itsantinue: 
\p —Jisa! Chiquila duque pueblobi Miya Jesucrístoca paca fiquica micaridede nenamin jominlayoe tinue. Junni aman jun pueblolase manpoleto Jesucrístobe penenaminlaca niyan jolajonunca manquirabi jisa! tinue. 
\p  
\v 37 Junni Bernaberi se joe tito, Juan Márcocanan petanjilaisa! tinue.  
\v 38 Pablo mantimini yaca tanjituchi tinue. Itsantinue: 
\p —Yari matulenan Panfilia pueblobi chiquilaca purato manjicae tinue. Diosichi fiquica micaribi pejino peleicae tinue. 
\p  
\v 39 Junto Pablo tsantisi, yabe Bernabebe pacaato, chican chican jilainue. Bernaberi Juan Márcoca petanjito, Chipre toca barcochi jilainue.  
\v 40 Junni Páblori Sílaca manwentenue yape yabe penenasa. Junni Jesucrístobe penenaminla Miya Diosibe rocaito, itsantilatinue: 
\p —Páblolaca nuchi cuwapolaquinayoe latinue yape yalaca laquirato quiranasa. 
\p  
\v 41 Junni Páblola Siria tose, Cilicia tose polelainue. Jesucrístochi tsachi bolon cura sonba tenca suwade nenaminlanue. 
\c 16  
\s1 Timotéonan Páblobe pejinunca 
\p  
\v 1 Junni Páblola Derbe pueblocanan, Listra pueblocanan jilainue. Junni aman Lístrabi manca Jesucrístobe penenamin tsachi chuminue Timoteo mumun. Yachi ayan Jesucrístobe cayaica jun israelita sona jominue. Yachi apa mantimini griego jominue.  
\v 2 Junni jerale Jesucrístobe penenaminla, Lístrabi chuminla, Icóniobi chuminlanan, Timotéoca seque pamin jominlanue.  
\v 3 Junni Páblori Timotéocanan labe pejisa! tinue. Junni aman jun pueblobi jerale israelítala Timotéochi apaca miraminlanue griego joeque. Jun tenchi Pablo Timotéoca israelítaca cuwenta quidoca poresa carinue yape israelítala pailaitusa. 
\p  
\v 4 Junsi Pablo, Silas, Timoteo pueblo cura cuenta polaridede jinaminlanue. Aman Jerusalenbi jerale Jesucrístochi tsachila tala mantaminlari pila quica jominlanue israelita itonla niyaque nenanola jonunca. Aman Páblolari ya fiquica micaridede jinaminlanue yape jeralela meralaquisa.  
\v 5 Tsanque micarinan, Jesucrístobe penenaminla layaito Diosica fécari quereito nenato, ma cura fécari seranaminlanue. 
\s1 Macedonia tsachi quipibi pato, jasa tinunca 
\p  
\v 6 Aman Páblola Diosichi fiquica micaridede nenalarasanan, Diosichi Tenca yalaca Asia tobi micarisa caritunue. Junsi Frigia tose, Galacia tose polelainue.  
\v 7 Junni Misia to quelobi jinaminnan, Bitinia toca jichi latinue. Diosichi Tenca mantimini junchinan jisa caritunue.  
\v 8 Junto Misia tose poleto, Troas pueblobi felainue.  
\v 9 Junbi chusanan, man quepente Páblochiri quirajanue. Quirajanasa Macedonia to tsachica quiranue. Junni ya tsachi Páblobe itsantinue: 
\p —Macedonia toca pola jato, chiquilaca ayudaide! tinue. 
\p  
\v 10 Junni Páblochi tsanque quirajanunbi, labe Páblolabe Macedonia toca jichun tenhilaiyoe. Diosi chiquilaca junchi erenae tilatiyoe yape Macedonia tsachilacanan Diosichi sen fiquica micarilaquisa. 
\s1 Filipos pueblobi micarinaminla doilainunca 
\p  
\v 11 Junni aman barcobi wito, Tróabi nechi Samotracia to fecári tuca jilaiyoe. Junni ayuna nanchi Neápolis pueblobi felaiyoe.  
\v 12 Junte nechi nedechi jito, Filipos pueblobi felaiyoe Macedonia tobi. Aman Filipos romano tsachilachi pueblo jominue. Romano soldadola junbi pechumin jominlanue. Uyan quelote puebloca fe wa pueblo jominue. Junni ya pueblobi nasi ma fecári chudilaiyoe.  
\v 13 Junni jasaino mate pueblo dechi loto, pibi patilaiyoe. Junte Diosibe rocainun posto jominue. Junni junbi layaica jun sonalabe cuenta quilaquiyoe.  
\v 14 Junni yala manca Lidia mumun jominue. Yari israelita itotonan, israelítalachi mite Diosica tenca camin jominue. Yari Tiatira pueblobi nechi jato, morado panuca osimin jominue. Junni Pablo micarinasa, Miya Diosi Lídiaca yachi fiquica quereisa carinue.  
\v 15 Junni Lídiabe yachi familialabe mumunhilaie. Mumunhitobi, chiquilabe itsanque rocaie: 
\p —Nulari chiqueca Miya Jesucrístobe cayaica joe titori, chiquilachite pechularana! tie. 
\p Junni michi rocainasanan, yachica pechubi jilaiyoe. 
\p  
\v 16 Junnasa mantimini peyun sona chiquilabe tulaie. Yari yucanchi oco wica jun sona jominue. Junni chiquila Diosibe rocainun postoca jinaminlabe tulaie. Junni yari yucanchi ocobe miimin jominue. Junni ya sonaca tsacuminlari duque cala camin jominlanue ya sona miinun tenchi.  
\v 17 Junni ya sonari chiquilaca bene tanjanato, sonba pato itsantinaminhe: 
\p —Inlari tsaracari sen Diosichi mantate paminla joe tinaminhe. Nulaca Diosi se larinun minuca micariminla joe tinaminhe. 
\p  
\v 18 Junni duque ma tsantinasanan, Páblori paito, yaca quiraereto, yucanchi ocobe itsantie: 
\p —Nuca Jesucrístochi mantate pánayoe tie. In sonachibi nechi manlode! tie. 
\p Junni Pablo tsantinasale, yucanchi oco manlonue.  
\v 19 Junni ya sonaca tsacuminlari ¿Niyaito cala cayaichunan? tilatinue. Junni Páblobe Sílabeca paito calaquee. Yalaca chuito, plasaca muricade tanjito, mantaminlachica tanjilaie.  
\v 20-21 Junni mantaminlachibi felaito, Páblolaca itsanlatie: 
\p —In tsachila israelítalari jolajoe latie. Yalari seiton costumbreca micarito, chiquilachi pueblobi epele palaque tenca casa carilaquinae latie. Aman chiquilari románola joto, ya costunbrebe nenano itolajoyoe latie. 
\p  
\v 22 Junto duque tsachila Páblolaca pailaie. Junsi mantaminla Páblolachi camisaca chitalulu larito, chidechi asotaquilaquede! tilatie.  
\v 23 Junni asotaquetobi dosa carito, polisiaca sele cuidaina! tilatie.  
\v 24 Junni polisiabe tsantinan, Páblolaca tenpe tamochi doto, nedeca cutapechi dilacarinue yape natiya lono podeilaitusa. 
\p  
\v 25 Junni quitsa quepente Páblobe Sílaberi Diosibe rocaito canta quinaminlanue. Uyan doraminla yalaca meranaminlanue.  
\v 26 Jun quiranari pansile nechi to weto, donun yaca wecacarinue. Junnan tamolan jera lasainiinue. Junsi jerale telaraminla manwojinilainue.  
\v 27 Tsanhinasanan, polisiari mansonhito quiranari, tamolan jera lasaraminue. Junni yari duque wepanato, doraminla jera sujicala jonhoe tito, espadaca larito, tencachique tileito puyachinaminue.  
\v 28 Junni tsanhichinasanan, Páblori sonba pato, Tsanhituna! tinue. Jeralelanan chularayoe tinue.  
\v 29 Junni polisia yaca meráto, tsenoca tanjade! tide donun yabi suwinue. Junsi jelechi jowinponato, Páblobe Sílabechi cale telenhinue.  
\v 30 Junsi yalaca manlarito, itsantinue: 
\p —Amicola, ¿la ti quino jowan? yape Diosi laca se larisa. 
\p  
\v 31 Junni Páblola yachi fiquica merasi itsantilatinue: 
\p —Miya Jesucrístobe cayaide! Yabe cayainari, nuca se larichunae latinue. Nuchi yabi chuminlanan jeralela jun tsanquenan se lono podeilaichunae tilatinue. 
\p  
\v 32 Junni Páblola tsantisi, jeralelaca Diosichi fiquica micarilaquinue. Polisiaca, yachi yabi chuminlaca, jera micarilaquinue.  
\v 33 Junni jun quepen Diosichi fiquica jera micarinunsi, ya polisia Páblola fudaicaca tsaleto cuwanue. Junsi jeralela mumunhilainue ya polisiabe yachi yabi chuminlabe.  
\v 34 Junsi Páblolaca yachi yabi tanwito, ano poto cuwanue. Aman yabe yachi yabi chuminlabenan jeralela duque son tilatinue Diosibe cayaicalayoeque. 
\p  
\v 35 Junni mantseinunbi, jun pueblobi mantaminla polisialaca erenue israelita tsachilaca manlarito manheredeque mantato.  
\v 36 Junni doraminlaca cuidaimin polisiari yalachi fiquica Páblolabe itsanque manpolarinue: 
\p —Mantaminla inlabe fiquica erecala joe tinue yape nulaca manlarisa. Junni loto seque manjinilaide! tinue. 
\p  
\v 37 Tsantinunsiri, Páblori polisialabe itsantinue: 
\p —Chiquilari israelítala jotonan, romano siudadanolanan jolajoyoe tinue. Tsan josanan, mantaminlari chiquilaca asotaquisa carilaquee tinue tsachila quiralaquinasa. Culpa tanunca o culpa itonunca natiya miituminnan chiquilaca asotaquisa carilaquee. Junsi chiquilaca dosa carinilaquee tinue. Junsi amana chiquilaca nosa manlarichi latinae tinue. Te. Yala patsa inte jato, chiquilaca manlarinola joe tinue. 
\p  
\v 38 Pablo tsantinunsi, polisialari mantaminlachica manjito, jun fiquica jera manpolarilaquinue. Junni romano siudadanola jolajoyoe tilatieque meráto, duque jele tilatinue.  
\v 39 Junsi Páblolachica jato, seque cuenta quito, perdonailaide! tilatinue. Junsi yalaca manlarito, jun pueblobi nechi manlodeque rocailainue.  
\v 40 Junni Páblola donun yabi nechi manloto, Lídiachica manjilainue Jesucrístobe penenaminlaca manquirabi. Junto yalaca jera seque manpayito, jilainue. 
\c 17  
\s1 Tesalónica pueblobi firara tilatinunca 
\p  
\v 1 Junni aman Páblobe Sílabe Filípobi nechi manjito, Tesalónica puebloca jilainue. Anfípolise poleto, Apolóniase poleto, Tesalónica pueblobi felainue. Jun pueblobi israelítala Diosichi fiqui miinun ya taminlanue.  
\v 2 Aman nunchitiya nenato, Pablo Diosichi fiqui miinun yabi pewimin jominue. Junto jun pueblobinan jasaino ma cura junbi pewinue peman tominco fecári. Junto Páblori junbi layaica junlabe itsantinue: 
\p  
\v 3 —Diosi wenteca jun Cristo tinun tsachi padeseito puyano jominue tinue. Puyato, junsi mansonhinonan jominue. Diosichi Pilabi junca jera chuteca joe tinue. Jun tenchi nulabe Jesuca paca fiquica micarichinayoe tinue. Yari Diosi wenteca jun Cristo tinun tsachi joe tinue. 
\p  
\v 4 Tsantinunbi duque meráminla tsa joe tito, Páblolabe pelayainaminlanue. Israelítalari narin quereilainue. Israelita itonla mantimini layanla quereilainue. Yala israelítalachi mite Diosica tenca camin icala jominue. Junsi duque respetainun sonalanan layanla quereilainue.  
\v 5 Tsantin nenalarasanan, Jesucrístoca quereitumin israelítalari pailainue yape weyan israelítala canbiyailaitusa. Junni ya pa jominlari seiton epe tsachilaca cato, duque tsachilaca layato, jun pueblobi jera firara timiyanaminlanue. Aman Páblolari Jasón tinunchibi chuminlanue. Junni pa jominlari Jasónchica jito, sonba ito yachi yabi wilainue Páblolaca neyato. Yalaca juisio quisa carichun cachi tinaminlanue.  
\v 6 Junni Páblolaca Jasónchibi fetuto, Jasóncari calaquinue. Jun pueblobi fe mantá tanlachica Jasonca tanjilainue. Weyan Jesucrístochi tsachilacanan petanjilainue. Junni mantaminlabe duque sonba pato itsanlatinue: 
\p —Páblolari jerale tote tsachilachi tencaca jera pala suwaminla joe latinue. Junsi inchinan tsanquenan pasuwabi jacala joe latinue.  
\v 7 Junni Jasonni yalaca yachi yabi facaricae latinue. Yalari románolachi miya mantacaca merátuchi timinla joe latinue. Uyan miya joe timinla joe latinue Jesús mumun miya. 
\p  
\v 8 Junni tsantinunca meráto, mantá tanlanan, jerale weyan tsachilanan duque wepanalainue.  
\v 9 Junni Jasónlaca cala calaquinue. Páblolaca jun pueblobi nechi manlarinunbi, ya calaca mancuwalaqueyanae tito calaquinue. Junni Jasonla ya calaca cuwatobi, manjino podeilainue. 
\s1 Páblola Berea pueblobi nenalaranunca 
\p  
\v 10 Junni jun quepente Jesucrístobe penenaminla Páblobe Sílabeca Berea pueblo fecári erelaquinue. Junni Beréabi felaito, Diosichi fiqui miinun yabi pewilainue.  
\v 11 Junni Beréabi chumin israelítala Tesalónicabi chuminlaca fe seque tenca camin jominlanue. Pablo micarica fiquica tsaracari meráto, Diosichi Pilaca manquiralaquinue. Ma cura Diosichi Pilabi seque neyato quiralaquinue Pablo tsarasica pánanunca miichun.  
\v 12 Ya israelítalari Diosichi Pilabi tsanque quiralaquinato, layanla Jesucrístobe cayailainue. Junsi israelita itonlanan cayailainue. Duque unilalanan, respetainun sonalanan Jesube cayailainue. 
\p  
\v 13 Tsantin chularasanan, Tesalónicabi chumin israelítala meralaquinue Pablo Beréabinan Diosichi fiquica micarinae latieque. Junto Beréaca jato, ya tsachilaca payilaquinue yape yalanan Pábloca pailaisa.  
\v 14 Junni Beréalanan pailainasanan, Jesucrístobe penenaminlari Pábloca lamari fecári wewe mantanjilainue. Aman Sílabe Timotéoberi Beréabi purailainue.  
\v 15 Junni Pábloca tanjinaminlari Atenas pueblo fecáriri peaconpanaito manjilainue. Junni Páblori yalabe fiqui manherenue. Sílaca, Timotéoca lachica wewe jadeque fiqui manherenue. 
\s1 Atenas pueblobi Pablo micarinunca 
\p  
\v 16 Junni aman Pablo Atenas pueblobi Sílabe Timotéobeca mérato quiranari, duque diosi joe tinun molde jominue. Junni Pablo yalaca jera quirato, yachi tencabi jelecari wepananue.  
\v 17 Junni israelítala tala Diosichi fiqui miinun yabi wito junbi micarinaminue. Aman yaca meráminlari weyanla israelítala jominlanue; weyanlari israelítala itotonan, israelítalachi mite Diosica tenca camin jominlanue. Aman plasatenan ma cura Pablo micarinaminue junte nenaminlaca. 
\p  
\v 18 Aman junte micarinasa, ticatiya miichique duque tenfeminlari yaca merábi jalainue. Weyanla epicúriola tala min jominlanue; weyanla estóicola tala min jominlanue. Aman Pablo Jesuca pánaminue puyato mansonhinueque. Junni yala ticatiya miichique tenfeminlari Pablo pacaca meráto, epele paniquimin joe tito, ¿niyan tichi tin tinan? latinue. Uyanlari pato, casan diosilaca pamin jonhoe latinue.  
\v 19 Junni Pábloca cato, mantaminla layainun postoca tanjilainue Areópago tinun postoca. Junchi tanjito, Páblobe itsantilatinue: 
\p —Chiquilachiri nu casan fiqui micaricaca miino muquilaquee latinue. ¿Tica micarinayun?  
\v 20 Nuri uyan quiraque fiquica pánae. Nu pánanunca chiquila natiya camerátuminlayoe latinue. Junni yaca jera miino muquilaquee latinue. 
\p Atenas tsachila tsanque Páblobe cuenta quilaquinue.  
\v 21 Aman ti casan fiquitiya joe tinari, Aténabi chuminlari duque meráchi timinla joe. Uyanchi nechi jaminlanan Aténabi chuto jun tsannan jolajoe. Casan fiquica meráchiqueri junbi chularae. 
\p  
\v 22 Junni Páblori jun layainun postobi quitsale wiruito, itsantinue: 
\p —Atenas tsachila, nulari diosi joe tinun moldeca duque tennaminla joeque tenhiyoe tinue. Nulachi pueblobi  
\v 23 nenato, diosi tinun moldeca quirade nenamanyoe. Junni manca ya nacábi pila itsanque chuteca joe: \sc INTE MIITONUN DIOSICHI CALE TELENHINUN POSTO JOE \sc*que chuteca joe tinue. Nulari wari ya Diosica miitotonan yachi cale telenhiminla joe. Aman la mantimini ya Diosica nulabe jera pachinayoe. 
\p  
\v 24 Ya Diosiri jerale toca quinue. Tobi titiya jomincanan jera quinue tinue. Jamochinan, totenan jeralelaca mantamin Miya joe. Junni ya Diosi mantimini tsachilachi tedechi quica jun iclesia ya nacábi chumin itoe tinue.  
\v 25 Ya Diosi sonnano podeichun, tsachila quica junca natiya munaratue tinue. Yanan wari jera tae. Ya patsa jeralelachi jera cuwamin joe tinue. Jasaca cuwato, tsachilaca sonnasa carimin joe tinue.  
\v 26 Diosi casaleri mancasiri tsachi quinue yape serasa. Yachi alicalaca jerale tote chusa carica joe. Numasi sonnano jonunca yari mantamin joe. Tile chunola jonuncanan yari mantamin joe.  
\v 27 Diosi tsachilaca tsanque seque cuidaimin joe tinue yape Diosica neyalaquisa. Diosica neyano jominue. Pansile quirano podeitonla taquiracachi fenun cuwenta, yacanan pansile feyanaeque tenca cato neyano jominlanue. Juntonan Diosi nuwiri itoe; jeralelachi quelote joe. Tsachila chutori, o nenatori, o titiya quinatori, Diosibe jolajoyoe.  
\v 28 Aman nula tala canta quinun pila chutemin tsachiri itsanque pila chutenue: Diosichi alicala jolajoyoeque chutenue tinue. 
\p  
\v 29 Tsan josanan nula mantimini Diosica inan quiran joe tito molde quito, yaca diosi joe timinla joe tinue. Oroca o calaca o suca tedechi quiniquito, diosi joe timinlae. Aman nulari Diosichi alicala jotori, wari Diosica tsanque epele tenca calaquituna! tinue.  
\v 30 Nula miratunun mate epele tenca cato nenanunca Diosi wantainiimin jominue tinue. Tsan josanan amanari jerale tote piyanle tsachilaca jutsaca jera telaquepoto casan tala tenca mancalaquedeque mantanae tinue.  
\v 31 Diosi miinun mate yari jerale tsachilaca quirato miichunae senla jonunca o seitonla jonunca. Diosi tsachi máncachi mantá cuwaca joe tinue yape Diosichi tenchi tsanque quirato miito cuwasa. Junni ya tsachi puyaca jominca Diosi mansoncarinue yape jeralela miilaisa Diosi yachi mantá cuwaca joeque. 
\p Pablo jun Areópago tinun postote tsanqueri cuenta quinue.  
\v 32 Junni puyato mansonhinue tinunca merasi, weyanlari lucarilaquinue. Aman weyanla mantimini man nete manan manmeráno muquee tilatinue.  
\v 33 Tsanlatinunbi Pablo yalachibi nechi manlonue.  
\v 34 Aman weyanla mantimini Páblobe penenato Jesucrístobe cayailainue. Manca Areópagobi mantamin jominue Dionisio mumun. Manca sonari, Dámaris mumun jominue. Yalanan, uyanlanan Jesucrístoca quereilainue. 
\c 18  
\s1 Corinto pueblobi Pablo micarinunca 
\p  
\v 1 Junni aman Pablo Atenas pueblobi nechi manloto, Corinto puebloca jinue.  
\v 2 Junbi israelita mancabe tulainue Aquila mumun. Yachi sonari Priscila mumun jominue. Yalari Ponto to israelítala joto, casale Roma pueblobi chumin jominlanue Italia tobi. Junbi aman jerale tote mantamin miya Claudio mumun jominue. Junni yari jerale israelítalaca paito, jera manlariereca jominue yape Roma pueblobi chularatusa. Junni Aquílala junbi nechi loto jito, Coríntobi pechuminlanue. Junbi chusanan, Pablo yalachica quirabi jinue.  
\v 3 Aman Aquílalari jali ya quinunca oromin jominlanue. Junni Páblonan jali ya quinunca oromin joto, yalabe chuto petrabajaquinaminue.  
\v 4 Junni jasaino ma cura Pablo Diosichi fiqui miinun yabi seque pánaminue. Israelítalacanan, israelita itonlacanan micarinaminue yape Jesucrístoca quereilaisa. 
\p  
\v 5 Pablo tsanque micarito chusanan, Sílabe Timotéobe Macedóniabi nechi jalainue. Junni yala jalainunbi uyan trabajo purato, micariminsiri jominue. Israelítalaca seque micarinato, Jesús Diosi wenteca Cristo tinun tsachi joe tinaminue.  
\v 6 Junni israelítalari Pábloca duque paito, yachi fiquica merátuchi tito, duque seitonque palaquinue. Junni tsanlatinan, Páblori yachi camisaca piquisito, in to poyoca telaqueponun cuwenta, nulaca telaqueponayoe tinue. Junsi itsantinue: 
\p —Diosi nulaca casticaquinari, laca culpa quitulajona! tinue. Nulachisiri culpa jochunae. Amanale nechi nulaca telaquepoto, israelita itonlacari micarichinayoe tinue. 
\p  
\v 7 Pablo tsantisi, junbi nechi manloto, Jústochica jinue. Yari israelita itotonan, israelítalachi mite Diosica tenca camin jominue. Yachi ya Diosichi fiqui miinun yabe palucale chuminue.  
\v 8 Junni miinun yabi mantamin, Crispo tinun, yanan Jesucrístobe cayaito mumunhinue. Yachi yabi chuminlanan Jesucrístobe cayailainue. Junsi duque Coríntobi chuminlanan Jesucrístobe cayaito mumunhilainue.  
\v 9 Junni man quepente Páblochi quipibi Miya Jesucristo yabe itsanque cuenta quinue: 
\p —Jeleratuna! tinue. Micariniquina! Nosasaituna!  
\v 10 Nuca cuidainayoe tinue yape monantiya nuca seiton quilaquitusa. In pueblobi duque tsachila labe cayailaichunae tinue. 
\p  
\v 11 Junni Páblori Jesucrístochi fiquica tsanque meráto, wata man quitsa fecári jun pueblobi Diosichi fiquica micarito chuminue. 
\p  
\v 12 Tsantin chusanan, israelítalari Pábloca manaman pailainue. Galión tinun tsachi Acaya tobi miya josanan tsanque pailainue. Junni israelítala layaito, Pábloca cato, Galiónchica tanjilainue.  
\v 13 Junchi tanjito, Pábloca duque seitonhe tito itsanlatinue: 
\p —In Pablo tsachilaca micarito, Diosica palaque tenca casa carimin joe latinue. Matu to mantaca telaquepode! timin joe latinue. 
\p  
\v 14 Junni Pablo beco pachinasanan, Galionni yaca de suwato, israelítalabe itsantinue: 
\p —Israelítala, in Páblori seiton quica itoe tinue. Yari jelenquira quimin jomanpari, junni lari nulaca meráno jomin joinhie.  
\v 15 Aman tsan itoe. Nulachi costunbre tenchisiri pacaalaquinae tinue. Nulari epe fiquica, epe mantaca cuenta quilaquinae tinue. Junca merátiyoe tinue. Nula talanan manseilaide! tinue. 
\p  
\v 16 Junni Galión tsantisi, israelítalaca yachite nechi jera manherenue.  
\v 17 Aman manca israelita Diosichi fiqui miinun yabi mantamin jominue Sóstenes mumun. Junni Galiónchibi nechi manlalainasa, israelita itonlari Sósteneca cato, Galionchi cale quilaquinue. Galionni junca quiraniquinue. 
\s1 Pablo Antioquíaca manjato, manan mannenabi jinunca 
\p  
\v 18 Junni Pablo jun pueblobi numari chuminue. Junto Jesuchi tsachilabe pato, manjinayoe tito jinue. Páblobe, Priscílabe, Aquílabe barcochi jito, Siria toca jilainue. Junchi jinato, Pablo Cencrea pueblobi aca jera porenue israelítalachi mite Diosibe trato quica joto.  
\v 19-21 Junni Efeso pueblobi felaito, Pablo Diosichi fiqui miinun yabi wito, yalaca micarinue. Junni yaca meráminlari rocailainue jun pueblobi cachusa. Tsanlatinasanan Páblori yalabe itsantinue: 
\p —Chuno podeitiyoe tinue. Jerusalenbi fiesta ichinae tinue. Jun fiestate Jerusalenbi rano joyoe tinue. Diosi tinari, nulachica manjanae tinue. 
\p Junni Pablo tsantisi, Aquílalaca purato, Efésobi nechi barcochi jito,  
\v 22 Cesarea pueblo fecári jinue. Junni barcobi nechi manloto, Jerusalén fecári jinue. Jesucrístochi tsachila layaicabe saludaibi jinue. Junsi Antioquía puebloca manjanue.  
\v 23 Junni junbi nasiri chuminnan, manan mannenabi jinue. Galacia tose, Frigia tose jinaminue. Pueblo cura Jesucrístobe penenaminlaca sonba tenca mansuwadede nenaminue. 
\s1 Apolo Efeso pueblobi Diosichi fiquica micarinunca 
\p  
\v 24 Tsan josanan manca israelita tsachi Efeso puebloca janue Apolo mumun. Yari Alejandría pueblobi nechi jominue. Diosichi Pilaca seque mirato, tsara seque pamin jominue.  
\v 25 Junni Apolo mantimini matulenan Mumunmin Juanchi fiquica meráto, Miya Jesucrístoca nasiri miraminue. Juntonan sonbaque tenca cato Jesucrístoca paca fiquica micarinaminue. Juánbesiri miica jotonan, sequebanan micarimin jominue.  
\v 26 Junni Apólori Diosichi fiqui miinun yabi wito, Jesucrístoca paca fiquica natiya luratuto micarinaminue. Junni Aquílabe Priscílabe yaca meráto, yalachibi jacarito, Jesucrístoca paca fiquica nanni sele tucarilaquinue. 
\p  
\v 27 Junni Apolo nanni sele miisi, Acaya toca jino muquee tinue. Junni acolari yaca seque jiniide! tito, yachi pila chuteto cuwalaquinue. Acaya tobi fetobi, ya pilaca Jesucrístobe penenaminlachi mancuwano jominue yape yalari Apóloca seque facaricalaquisa. Aman Diosi ya Acáyabi chuminlaca laquirato, Jesucrístobe cayaisa carica jominue. Junni Apólonan yalachibi féto, yalaca nantanancari sonba tenca suwanue.  
\v 28 Apolo Diosichi Pilaca quirato, seque pamin jominue. Jesuri Diosi wenteca Cristo tinun tsachi joe tinue. Junni piyanlelachi cale tuca micarinasa, israelítalari beconan manpano podeilaitunue. 
\c 19  
\s1 Efeso pueblobi Pablo micarinunca 
\p  
\v 1 Junni Apolo Coríntobi chusanan, Pablo duse poleto Efeso puebloca jinue. Junsi Diosibe cayaiminlabe tulaito,  
\v 2 itsanque panhanue: 
\p —¿Nulari Diosibe cayainan, yachi Tencaca nulachibi wisa carin? tinue. 
\p Junni yalari itsantilatinue: 
\p —Te, Diosichi Tencaca natiya camerátucala joyoe tilatinue. 
\p  
\v 3 Junni Páblonan itsantinue: 
\p —Diosichi Tencaca cameracá itotori, ¿ti micarica fiquica meracá joto mumunhilaiyun? tinue. 
\p Junni yalari Mumunmin Juanchi fiquica meráto mumunhilaiyoe latinue.  
\v 4 Junni Páblori yalabe itsantinue: 
\p —Juanbe mumunhinato, ¿nulari jutsa quinunca telaquepoto, casan tala tenca mancayoe tito mumunhilainuco? tinue. Juan mantimini nulaca mumunnato, man fiquicanan nulaca micarinue. Juanchi benechi jano jominbe cayailaina! tie tinue. Aman Juan tsantinato, Jesucristo tinunca tsantinaminue tinue. 
\p  
\v 5 Junni ya tsachila Páblochi fiquica meráto, Miya Jesuchi iyoe tito manan manmumunhilainue.  
\v 6 Junni Pablo yalaca tedechi tale quinan, Diosichi Tenca yalachibi patanue. Diosichi Tenca patato, yalaca merátunun fiquichi pasa carinue. Junsi Diosichi mantate palaquinue.  
\v 7 Jerale nechi chunca paluca tsachila tsansi jominlanue. 
\p  
\v 8 Junni aman Pablo Diosichi fiqui miinun yabi wito, Diosi mantananun tsachi bolon niyan ino jonunca jera micarinue. Luratuto, sele tuca pánaminue. Junni peman pe fecári tsanque micarinasa,  
\v 9 weyanlari paito merátuchi latinue. Quereituchi tito, junsi jeralelachi cale pato, Jesucrístoca duque seitonque palaquinue. Tsanlatinan, Pablo yalaca purato, Jesucrístochi tsachilabe chicanle lonue. Tiranno mumunchi escuela tamochi wito, junbi Diosichi fiquica ma cura micarinaminue.  
\v 10 Palu wata fecári junbi micarinaminue. Junni jerale Asia tobi chuminla, israelítalabenan israelita itonlabenan, Miya Jesucrístoca paca fiquica meralaquinue.  
\v 11 Junni Diosi Pábloca uyan quiraqueman wepanato quirantsancari seque quisa carinue.  
\v 12 Tsachila Pablo talanun tsanpaca cato, quiyanpunlachica tanjilainue. Junni jun panube quiyanpunla manseilainue. Junsi yucanchi ocolanan jun panube tsachilachibi nechi manloto sujilainue. 
\p  
\v 13 Junni tsan josanan uyan israelítalanan manca manca yucanchi ococa mansularide nenaminlanue. Junni weyanlari Jesucrístochi tsachila itotonan, Jesucrístochi mantate yucanchi ocolaca mansularichique tenfenaminlanue. Yucanchi ocobe itsantimin jominlanue: Pablo panun Jesuchi mantate nuca mantanayoe timin jominlanue. 
\p  
\v 14 Junni sieteca acola tsantin nenaminlanue. Esceva mumun mantá tan patelechi naola jominlanue. Junni yalari yucanchi oco mancaca suerechi latinasanan,  
\v 15 yucanchi ocori beco pato itsantinue: 
\p —Jesuca quiramanyoe tinue. Páblocanan mirayoe. Nulaberi mantaitiyoe tinue. 
\p  
\v 16 Tsantisi, yucanchi oco wica jun tsachi yalaca cawiyale tito quiniquinue. Junsi yalaca fe lonan, tamochi nechi fupuca mansujilainue fudachi.  
\v 17 Junni piyanle Efésobi chuminla junca meralaquinue israelítalabenan, israelita itonlabenan. Junto jele tito, Miya Jesucrístoca tsara seque cuenta quinaminlanue. 
\p  
\v 18 Junsi Efésobi duque Jesucrístobe cayaica jun tsachila ti seiton quiminla jototiya jera cuenta quito, tsanque seiton quimin jominlayoe tilatinue.  
\v 19 Aman weyanlari duque majia pila tamin jominlanue. Junto jun pilaca tanjato, jera nin polaquinue jerale tsachila quiralaquinasanan. Nisi mica jonuncari minari, mante chunca mili duque mica cala piti tsansi jominue.  
\v 20 Junni ya pilaca nin polaquinunbi, nantanancari duque tsachila Miya Jesucrístoca paca fiquica meralaquinue. 
\p  
\v 21-22 Jera tsanquinunbi, Pablo Jerusalenca jino tenhinue. Junni casale paluca peayudaiminlaca Macedonia to fecári yachi caquenan erenue Timotéobe Erástobeca. Aman Páblori Asia tobi nasi cachutobi, yanan Macedóniaca jino jominue. Junni Macedóniase polede, junsi Acaya tose polede jito, Jerusalenca jiyanae tinue. Aman junchi jitobi, Roma pueblocanan jino joyoe tinue. 
\s1 Efeso pueblobi firara tilatinunca 
\p  
\v 23 Aman Pablo Asia tobi nechi calotuminnan, Efésobi canenasanan, duque firara tilatinue. Efésolari Jesucrístobe penenatuchique duque paito firara tilatinue.  
\v 24 Itsanque jominue: Jun pueblobi weyanla calaca yanan quiran nacá quimin jominlanue. Jun yanan quiran calaca quito, Diana tinun diosichi ya joe tito osimin jominlanue. Junni calaca yanan quiran nacá quimin manca Demetrio tinun jominue. Yari jun necosioca duque serawomin jominue.  
\v 25-27 Junni Demétriori weyanla Diánachi yanan quiran quiminlaca jera layaisa carito, weyan calaca quiminlacanan jera layaisa carito, yalabe itsantinue: 
\p —Amicola, jerale Asia tobi chuminla Diana tinun diosica tennamin jolajoyoe tinue. Piyanle tobinan Diánaca tennaminla joe tinue. Aman nula tsara miralarae chiquila Diánachi ya nacaca ositosiri duque cala calaquinayoeque. Tsan josanan case jerale Asia tobi Pablo chiquilaca seiton quinae tinue. Pablo chiquilaca seitonque pato, Tedechi quica diosiri tsa diosi itoe timinhe tinue. Pablo tsantinato, duque tsachilaca uyan tala jera tenca casa carimin joe tinue yape Diánaca telaquepolaquisa. Aman tsachilari Diánaca tennatulajonari, chiquilari duque perdeicaichunae tinue. Junsi pansile tsachilari Diánachi wa iclesia yacanan epele telaquepolaquichunae tinue. O Diana patsacanan telaquepolaquichunae tinue. Telaqueponari, nantanancari seitochunae tinue. 
\p  
\v 28 Demetrio tsantinanunca meráto, calaca quiminlari duque paito, biba Diana tilatinue. Yasiri Efésobi chuminlachi diosi joe tilatinue. Tsanque sonba pato,  
\v 29 jerale Efésobi duque firara tinaminlanue. Junto Páblochi amicola palucaca cato, layainun yabi muricade tanjilainue. Ya amicolari Gáyobe Aristárcobe mumun jominlanue. Páblobe Macedóniabi nechi pejaca jominlanue.  
\v 30 Junni Páblonan layainun yabi wichi tinasanan, Jesucrístobe penenaminla yaca wisa carilaquitunue yape totelaquitusa.  
\v 31 Asia tobi mantá tanlanan Páblochi amicola joto fiqui ereto, layainun yabi tina wituna! tilatinue. 
\p  
\v 32 Tsan josanan, layainun yabi weyan weyanla man tala otilatinue; weyan weyanlari uyan tala otilatinue. Firara tinatonan fécari tsachila niyaito layaicala jonunca miitominlanue.  
\v 33 Junni israelítala Alejándroca cato, layainun yabi wisa carito, tsachilachi cale wirucarilaquinue yape yalabe pasa. Junni Alejándrori tedechi nosasa ilaide quinue isa pachun.  
\v 34 Tsanquinasanan layaiminlari Alejándroca quirato, israelita joeque tenhilainue. Junca tenhito yaca natiya merátuchi latinue. Case palu óra fecári sonba pato, biba Diana tinaminlanue. Diánasiri Efésobi chuminlachi diosi joe tinaminlanue.  
\v 35 Junnasa Efeso pueblo secretarionan pato, yari jeralelaca nosasa isa carino podeinue. Junni yari itsantinue: 
\p —Efésobi chuminla, laca meralaquede! tinue. Diana tsara sen joe tinue. Efésobi chuminla Diánachi wa iclesia yaca cuidaimin jolajoyoe. Jamochi nechi pataca Diánanan quiran sucanan cuidaiminlayoe. Jeralela yaca miralarae tinue.  
\v 36 Ya fiquica nene joe tino natiya podeilaituchunae tinue. Junni nula deinilaide! tinue. Tenca iton tala quilaquituna!  
\v 37 In israelítalari Diánaca seitonque paminla itolajoe tinue. Diánachi yacanan tarintuminlae. Tsan josanan, nulari yalaca epe inchi tanjalaie tinue.  
\v 38 Aman Páblola Demétrioca seiton quica jonari, o Diánachi ya quiminlaca seiton quica jonari, comisariochica jito cuenta quintsan joe. Culpa quicaano muquinari, junbi quintsan joe tinue. ¿Jun tenchi comisariola jotuncan? tinue.  
\v 39 Junni nulachiri fécari cuenta caquino muquilaquinari, tsa layaino mate cuenta quintsan joe.  
\v 40 Aman epenan firara tilatinayoe. Wari miya chiquilabe manpanhato ¿Ti quichun layailaiyun? tinari, ¿niyan ticaichunan? Pansile chiquilacanan culpa quichunae tinue in firara tinun tenchi. 
\p  
\v 41 Secretario tsantitobi, layaica junlaca jera manherenue. 
\c 20  
\s1 Macedóniabi, griégolachi tobi Páblola nenanunca 
\p  
\v 1 Junni firara tinanun deinunbi, Páblori piyanle Jesucrístobe penenaminlaca jasa tinue. Junto yalaca payitobi, jinayoe tito, Macedonia toca jinue.  
\v 2 Aman junni Macedóniase polenato, Jesucrístobe penenaminlaca tsara sonba tenca suwade jinaminue. Junsi griégolachi tobi fanue.  
\v 3-4 Junni peman pe fecári junte nenatobi, Siria toca barcochi jichinayoe tie. Junni in tsachila Páblobe Asia to fecári peaconpanaino jominlae: Beréabi nechi Sópater jominhe. Junsi Tesalónicabi nechi Aristárcobe Segúndobe jominlae. Junsi Dérbebi nechi Gayo jominhe. Junsi Asia to tsachila Tíquicobe Trófimobe jominlae. Aman yalanan, Timotéonan Páblobe pejano jominlae. 
\p Junni jinola inasa israelítalari nosa tenpato, Pábloca toteno tenca calaquinue. Junni Páblori junca tenhito, Macedóniase necanan manjichinayoe tie yape yaca totelaquitusa.  
\v 5 Junni Páblobe labe necanan manjilainasanan, amicolari caquenan barcochi jito, Troas fecári tule jilainue. Junbi caquenan chiquilaca meralaranue.  
\v 6 Páblobe labe manan griégolachi tobi nechi loto, Filipos pueblo fecári nedechi jito, junte barcobi wilaiyoe casa ma poletobi. Junni mante maca barcochi jitobi, chiquilanan Tróabi felaiyoe. Junni junbi siete ma raminlayoe. 
\s1 Tróabi Pablo manan manmicarinunca 
\p  
\v 7 Junni tominco maca Jesucrístobe penenaminla layailaie Jesucrístoca tenca cato bibu pisuleto fichun. Junbi Páblori micarinaminhe. Aman ayuna nanchi jino joto, quitsa quepen fecári micariniquee.  
\v 8 Jamobi tamochi layaito, duque lanparin chuteto chuminlayoe.  
\v 9 Junnasanan manca moso Eutico tinun, bentanate chuminue. Junni Páblori wan fecári micarinasanan, Euticochi duque capiya janue. Junto Euticori catsonamin peman decan lowabi nechi darapatito puyanue.  
\v 10 Junni Páblori patito, puyacaca amanto tiliito, itsantie: 
\p —Wepanatulajona! Sonnan joe tie. 
\p  
\v 11 Junni Pablo manlotobi, bibu pisuleto fitobi, ano filaquiyoe. Junsi tseino fecári micaritobi manjilaiyoe.  
\v 12 Junni Euticoca duque pansi joto sonca mantanjilaie. 
\s1 Milétoca jinunca 
\p  
\v 13 Junni junbi nechi jito, chiquila Asón tinun puebloca barcochi jichinaminlayoe. Junni Páblori Asón fecári nedechi jichinayoe tie. Junbi barcobi manwíyanae tito jie.  
\v 14 Junni chiquilari Asonbi Páblobe mantulailaiyoe. Junni yanan barcobi pewito, Mitilene tinun pueblobi felaiyoe.  
\v 15-16 Junsi junbi nechinan barcochi jinato, ayuna nanchi Quío tinun pisase polelaiyoe. Junsi junhayuna nanchi Samos tinun pisabi felaiyoe. Aman Páblori Jerusalenca duque wewe jichi tinaminhe. Pode jotori, Pentecostés fiesta mate Jerusalenbi rano muquee tie. Jun tenchi Asia tobi nenano jola itoyoe tito, Efeso pueblobi wituminnan polenilaiyoe. Junsi Trogíliobi nasi jasaito, ayuna nanchi Mileto pueblo fecári jilaiyoe. 
\s1 Efésobi chuminlaca Pablo itsanque manpayinunca 
\p  
\v 17 Junni Páblori Milétobi nechi Efeso pueblo fecári fiqui manherenue Jesucrístochi tsachila tala mantá tanla yachica jalaideque.  
\v 18 Junni yala jalainunsi, Pablo yalabe itsantinue: 
\p —Nulari laca tsara miralarae tie. Asia toca casale janunle nechi nulabe seque chumin jomanyoe.  
\v 19 Fe joyoe tituto, nulaca duque laquirato, Miya Jesucrístobe seque mantaito nenamin jomanyoe tie. Israelítalari laca totechique duque tenfelainasanan, Diosibe seque mantainiinamanyoe.  
\v 20 Tiletiya, nulachi yabi o layainun yabi, nulaca micariniquimanyoe jeleratuto. Jera miintsan jonunca nulaca micaricayoe.  
\v 21 Israelítalacanan, israelita itonlacanan, jeralelaca micarimin jomanyoe tie. Diosichi ichun jutsa quinunca telaquepoto casan tala tenca mancalaquede! timin jomanyoe tie. Chiquilachi Miya Jesucrístobe cayailaide! timin jomanyoe tie. Tsanque jera micarimin jomanyoe. 
\p  
\v 22 Junni amanari Diosichi Tenca laca Jerusalenca jisa carinae tie. Junni lari miitoyoe ¿junbi niyaiichunancan?  
\v 23 Tsan josanan, pueblo cura Diosichi Tenca laca man cosari miisa carinae. Tsachila laca doto, seiton quilaquichunae tie. Nantari miitoyoe tie.  
\v 24 Tsanquinola josanan jeleratiyoe. Miya Jesucristo lachi mantaca cuwaca joe yape sen fiquica micarisa. Diosiri tsachilaca laquirato jutsaca piyarimin joequenan micarino joyoe. Jun fiquicari micarino pode jotori, puyanoca natiya jeleratiyoe tie. 
\p  
\v 25 Junsi Páblori Jesucrístochi tsachila tala mantá tanlabe cacuenta quinato itsantie: 
\p —Aman nulachibi micarinato, Diosi mantananun tsachi bolonla niyan jonola jonunca jera micarito nenamanyoe tie. Junni amanale nechi nulari laca natiya manquiralaquituchunae tie.  
\v 26 Aman manquiraino itoto, nulabe amana tsarasica pato itsantino muquee tie. Diosi mocatiya casticaquinari, lachi culpa itochunae. Ya casticaiminchinan culpa jochunae tie.  
\v 27 La natiya jeleratuto, Diosi jera paca junca nulabe manpolariyoe. 
\p  
\v 28 Junni nulanan tencabe nenato, Miya Diosichi tsachilaca seque payito cuidailaina! tie. Miya Jesucrístochi tsachi bolonla jolajoe. Yachi asanchi yalachi jutsaca piyarica joe. Junni Diosichi Tenca nulachi mantá cuwaca joe yape yachi tsachilaca micarito cuidailaisa. Junni seque cuidailaina! tie.  
\v 29 La itonte seitonque palaque micariminla jalaichunae tiyoe tie. Papun lobo cuwenta joto, Jesucrístochi tsachilaca yucapiyarichique tenfelaichunae.  
\v 30 Nula talanan manca manca palaque micarimin ilaichunae tie yape Diosichi tsachila Jesucrístoca telaquepoto yalaca tennalarasa. 
\p  
\v 31 Junni lari peman wata fecári nulaca payito micarinamanyoe tie. Quepen, malon nula jeralelaca duque laquirato micarinamanyoe. Junni junca mantenhito, tencabe nenalarana! tie.  
\v 32 Junni aman Diosibe rocainayoe tie yape nulaca seque cuidaisa. Diosiri Jesucrístobe penenaminlaca sen suwamin joe tie yape yachi jolajosa. Junto inale Diosi yachi jerale tsachilachi tenchi nantanancari seque quichunae. Junni nulanan Diosichi fiquica jera meralaquinari, nulachi tenchinan tsanquenan seque quichunae tie. Diosichi fiquiri sen fiqui joe Diosi nulaca laquirayoeque. Nulari jun fiquica seque meralaquitori, sonban tenca ilaichunae tie. 
\p  
\v 33 Junni Pablo cacuenta quinato itsantie: 
\p —Lari nulachite micarinato, uyanlachica natiya munaito quiratucayoe. Uyanlachi calaca o oroca o tsanpaca munaito quiratucayoe tie.  
\v 34 Nulari miralarae. La ticatiya munajanari, trabajaquito cala camin jomanyoe. Labe penenaminlachinan cato cuwayoe trabajaquito.  
\v 35 Miya Jesucristo itsantinue tie: Cuwamin tsachiri caminca fe pansi jochunae tinue tie. Junni jun fiquica tenca cato, podeituminlaca ayudainola joyoe tie. Yape nulanan tsanque ayudaino miilaisa, lanan jun tsanquenan podeituminlaca ayudaimin jomanyoe tie. 
\p  
\v 36 Junni Pablo tsanque cuenta quetobi, jeralela telenhito Diosibe rocailaiyoe.  
\v 37 Junni tsachilari duque warenato, Pábloca amanhito, motilatie tsanle manjinae tito.  
\v 38 Yalari Pábloca manquiranola itochunae tinun tenchi fécari duque laqui jominlanue. Junni Páblolabe barco fecári peaconpanaito manjilaie. 
\c 21  
\s1 Páblola Jerusalenca manjinunca 
\p  
\v 1 Aman Efeso tsachilaca purato, chiquilari Cos tinun pisa fecári barcochi tule jilaiyoe. Junsi ayuna nanchi Rodas tinun pisase poleto, Pátara pueblobi felaiyoe.  
\v 2 Junni Pátarabi manca barcoca neyato, Fenéciaca jimin barcoca féto, junbi wito jilaiyoe.  
\v 3 Aman Chipre tinun pisaca quirato, tsa tede nanchi polelaiyoe. Junni Siria toca jito, Tiro pueblobi manpatilaiyoe. Junbi barcobi panaricaca purano jominlanue.  
\v 4 Junni panaricaca larinasanan, Jesucrístobe penenaminlaca neyato felaiyoe. Aman siete ma fecári yalabe pechuminlayoe. Junnasa niyanhino jonunca Diosichi Tencabe miito, Pábloca payilaquee yape Jerusalenca jitusa.  
\v 5 Junnasatiya junbi siete ma chutobi jinilaiyoe. Aman jerale Jesucrístochi tsachila chiquilabe pejilaie pueblo de fecári. Unilalanan, sonalanan, nalalanan pejilaie. Junni lamari fiquite telenhito Diosibe rocailaiyoe.  
\v 6 Diosibe rocaitobi, pansile manquiracaichunae tito, barcobi manwito jilaiyoe. Junni Tírobi chuminlari manjilaie. 
\p  
\v 7 Junni Tírobi nechi jito, Tolemáidaca jilaiyoe. Junto junte nechi jerale Jesucrístobe penenaminlabe saludaito,  
\v 8 ayuna nanchi Cesarea puebloca jilaiyoe chiquilabe Páblobe. Junbi Felipe tinun tsachichi yaca jilaiyoe. Matulenan Crístochi mantá tanlari sieteca tsachilaca wenteca jominlanue yape yalabe peayudailaisa. Junni jun sietecale nechi Felipe manca pejominue. Tsaracari Diosibe cayaisa carimin tsachi jominue.  
\v 9 Yari junpaluca namala mancari junla taminue. Yalanan Diosichi mantate pepamin jominlanue.  
\v 10 Junni junte chularasanan, aman Judea tobi nechi Agabo tinun tsachinan Cesaréaca jae. Yanan Diosichi mantate pepamin jominue.  
\v 11 Junni chiquilachi quelo jato, Páblochi sendorica wole cato, tencachique tedebinan, nedebinan telee. Junni Diosichi Tenca itsantinae tie: 
\p —Israelítala in sendori tsacuminca Jerusalenbi telelaquichunae tinae tie. Yaca cato teleto, israelita itonlachi cuwapolaquichunae tinae tie. 
\p  
\v 12 Tsantinunca meráto, Páblobe duque rocailaiyoe Jerusalenca jitudeque. Chiquilabe Cesaréabi chuminlabe tsantinasanan,  
\v 13 Páblori beconan pato itsantie: 
\p —¿Ti quichun lachi tenchi warelaquinayun? Laca duque laqui suwalaquinae tie. Miya Jesuchi tenchi Jerusalenbi totenola jonatiya, tennatiyoe tie. Puyano jototiya tennatiyoe; Jesuchi tenchi puyaniinoyoe tie. 
\p  
\v 14 Junni Páblori chiquila payinasanan, natiya merátunan, payino deilaiyoe. Miya Jesucrístochi munate, yape tsanquiniquisa! tilatiyoe.  
\v 15 Junsi weyan ma poletobi jera michi itobi, Jerusalenca jilaiyoe.  
\v 16 Junni Cesaréabi chumin Jesucrístobe penenaminlanan chiquilabe Jerusalenca pejilaie. Yalari chiquilaca Mnasónchica tanjilaie yape junbi chularasa. Mnasón fe numarile nechi Jesucrístobe penenamin jominue. Chipre tobi nechi jaca jominue. 
\s1 Páblobe Jacóbobe itsanque cuenta quilaquinunca 
\p  
\v 17 Junni chiquila Jerusalenca manjalainan, Jesucrístobe penenaminla son tito yalachibi seque facarilaquee.  
\v 18 Junni ayuna nanchi chiquilari Jacóboca quirabi jilaiyoe. Jesucrístochi tsachila tala mantá tanlanan Jacóbobe pelayaica jominlae.  
\v 19 Aman Diosiri Pábloca israelita itonlachi tenchi duque seque quisa carica jominue. Junni Pablo Jacóbolachica jito saludaito, Diosi titiya quinunca jera cuenta polarie.  
\v 20 Jacóbolari yaca meráto, Diosica tsara sen quimin joe latie. Tsantitobi, Páblobe itsanlatie: 
\p —Aco, ¿duque mili israelítala Jesucrístobe cayaicala joco? tie. Yala jeralela israelítalachi mantaca meráto nenaminla joe tie.  
\v 21 Junni yalari nuca seitonque cuenta meralaquinue tie. Nu uyan tobi chumin israelítalaca seitonque micarimin joeque meralaquinue. Moisés mantacaca telaqueposa timin joeque mera joe. Israelita nalala jolajosanan, quidoca poretusa mantamin joeque mera joe. Nunan israelita pejotonan, israelítalachi mite nenatusa timin joeque mera joe. Uyanla nuca tsanque seitonque cuenta polaricala joe tie inte chuminlabe.  
\v 22 Junni ¿niyan quicaichunan? Nu manjanueque merasi, inte chumin israelítalari layailaichunae tie. 
\p  
\v 23 Junni chiquilachi tencari nuri itsan quino joe: Meráde! Intele junpaluca israelítala Diosibe trato quicala joto, jun tsanquino ma faca joe.  
\v 24 Junni nuri in junpalucalaca tanjide! tie. Yalari israelítalachi mantaca meráto, pipiyanola joe. Junni nuri yalabe pepipiyade! tie. Junni yala Diosichi ticatiya epe cuwanun tenchi nu pacara quede! yape a poreno podeilaisa. Aman nu tsanquinari, jeralela nuca tsarasica miilaichunae tie. Nu israelita joto, israelítalachi mantaca meráto nenamin joeque miilaichunae tie. Nuca seitonque cuenta quica jonunca nene jominueque tenhilaichunae tie.  
\v 25 Aman israelita itonlanan Jesucrístobe cayailainari, yalacari israelítalachi mite nenasa carilaquitiyoe. Yalachi numa pila erecalayoe. Itsanqueri erecalayoe: Diosi joe tinun moldechi cuwacaca, o asanca, o betepoto toteca tsachicaca filaquitunaque mantalaquiyoe. Junsi uyan sonalabe o uyan unilalabe nosa seitonque nenalaratunaque mantalaquiyoe. Israelita itonlaca tsanqueri mantacalayoe tinue. 
\s1 Pábloca Diosichi yabi nenaminca calaquinunca 
\p  
\v 26 Junni Pablo ya junpaluca israelítalaca tanjito, ayuna nanchi israelítalachi matu mantaca meráto pipiyalaquinue. Diosibe trato quicalayoe tito pipiyalaquinue. Junto Diosichi yabi wilainue siete mate Diosichi ticatiya epe cuwanola joyoe tibi. 
\p  
\v 27-29 Junni siete ma caitusanan, Páblobe manca tsachibe Jerusalenbi nenaminlanue. Ya tsachiri israelita itominue. Efeso pueblo tsachi jominue Trófimo mumun. Junni uyan israelítala mantimini Asia tobi nechi jato, Páblobe Trófimobeca quiralaquinue. Epele nenaminlaca quiralaquitonan, Pablo israelita iton tsachicanan Diosichi yabi tanwica jomin jonhoe latinue. Trófimoca junbi tanwica jomin jonhoe latinue. Junsi siete ma jerainasa Pábloca manan manquiralaquinue. Diosichi yabi mancasiri nenaminca quiralaquinue. Junto jeralelaca firara timiyato, Pábloca cato, sonba otito itsantilatinue: 
\p —Israelítala, ayudailaide! tilatinue. Inni duque seiton tsachi joe latinue. Chiquilacanan, israelítalachi mantacanan, Diosichi yacanan seitonque pamin joe. Junsi israelita itonlacanan Diosichi yabi tanwiniinue latinue. Diosichi sen postoca seiton suwanue tilatinue. 
\p  
\v 30 Junni Pábloca tsanlatinasanan, piyanle Jerusalenbi chuminla firara tito layailainue. Layaito, Pábloca cato, Diosichi yabi nechi muricade larito, wewe tamolanca dolaquinue.  
\v 31 Junsi Pábloca totechi latinasanan, soldado coroneli junca meránue. Weyanlari coronelichica jato, jerale Jerusalenbi chuminla firara tilatinae latinue.  
\v 32 Junni coroneli junca merasi, capitanlaca, soldadolacanan cato, firara tinaminlaca quirabi sujilainue. Aman israelítalari Pábloca quinaminlanue. Junni coronelica, soldadolaca quirato deilainue. 
\p  
\v 33 Junni coroneli jato, Pábloca cato, palu sili cadenachi telesa mantanue. Junto mo jonunca, ti quimin jonunca panhanue.  
\v 34 Aman weyanlari man quiraque otilatinue; weyanlari uyan quiraque otilatinue. Junni firara tilatinanan, coroneli natiya meráto tuino podeitunue. Junto Pábloca cuartelica tanjasa mantanue.  
\v 35-36 Junni cuartelica tanjinasa, israelítala bene jato yaca totelaquedeque otinaminlanue. Junni teranca fesi, soldadola Pábloca jamobi jalitale tanlolainue yape pa junla catulajosa. 
\s1 Pablo israelítalabe beco panunca 
\p  
\v 37 Junni Pábloca cuartelibi tanwilaichinasa, coronelibe itsantinue: 
\p —Nube cuenta quino muquee tinue. 
\p Junni coroneli itsantinue: 
\p —¿Griego fiqui pamanyun? tinue.  
\v 38 ¿Nu Egipto to tsachi itoyun? Matuleri Egipto tsachi junpalu mili toteminlaca epele tanjinue. Chiquilabe quicaachun nenaminlanue. ¿Ya jotiyun? tinue. 
\p  
\v 39 Junni coroneli tsantinunsi, Pablo itsantinue: 
\p —Te, itoyoe. ¿Cilicia tobi manca wa pueblo Tarso joco? Junbi nechi joto, romano siudadano joyoe tinue. Junni nube se jonari, tsachilabe cuenta quino muquee tinue. 
\p  
\v 40 Junni cuenta quiniquede! tinan, Pablo terancabi wiruito, tedechi nosasailaide! quinue. Junni nosasailainunbi, yalabe israelítalachi fiquichi cuenta quito itsantinue: 
\c 22  
\p  
\v 1 —Israelítala, amana nulabe tuca cuenta quechinayoe tinue la titiya quica jonunca. Meralaquede! tinue. 
\p  
\v 2 Junni Páblori yalachi fiquichi cuenta quinanunca meráto, israelítalari nantanan nosasailainue. Junni Pablo itsantinue: 
\p  
\v 3 —Lanan israelita joyoe tinue. Cilicia tobi, Tarso pueblobi naiyoe. Junsi aman inte Jerusalenbi uwaiyoe. Gamaliel laca micarimin jominhe. Chiquilachi tatalachi mantaca laca micaricae yape israelítalachi mite Diosica tennasa. Uyan tala nenachi timinlaca paimin jomanyoe. Nulari amana jun tsannan jolajoe.  
\v 4 Junni la tsanque pa jomin joto, Jesucrístochi minuca nenaminlaca seiton quimin joto, totechi timin jomanyoe tinue. Yalaca cato teleto, dosa carimin jomanyoe tinue unilalacanan, sonalacanan. 
\p  
\v 5 La pacaca tsa jonunca miino muquilaquinari, mantá tan patelelabe panhalaquede! Mantá tan unicalabenan panhalaquede! tinue. Yalari lachi pila cuwaca jominlae yape Jesucrístochi tsachilaca cato dosa. La Damasco puebloca jito ya pilaca israelita mantaminlachi mancuwano jomanyoe tinue. Junni jun pilachi Jesucrístobe penenaminlaca cato doto, Jerusalenca mantanjano jomanyoe casticaquilaquisa. 
\p  
\v 6 Junnasa aman yotute Damasco quelobi jinasanan, jamochi nechi lachi awinta tsequiniquee.  
\v 7-9 Junnasa lari tobi queereisi, fiqui meráyoe. Aman labe pejinaminlari tsenanunca wepanato quiratonan, juntonan fiquica entendeitulajoe tinue. Junni jun fiquiri lachi tsa mumunca pato, Saulo, Saulo tie tinue. ¿Ti quichun laca seiton quinayun? tie tinue. Junni lari beconan manpato, Miya, ¿moyun? tiyoe tinue. Junni Jesús Nasareno joyoe tie tinue. Laca nu seiton quinae tie.  
\v 10 Junni lari Miya, ¿niyan quino join? tiyoe tinue. Junni Miya Jesucristo labe itsantie tinue: Manwiruito, Damáscoca jiniide! tie tinue. Junbi nube jera cuenta quichunae nu ti quino jonunca.  
\v 11 Junni Miya Jesús labe tsantinunsi, quirano podeitiyoe tinue duque tsenun tenchi. Labe penenaminla laca tedele cato, Damasco pueblobi tanfelaie tinue. 
\p  
\v 12 Junsi Pablo israelítalabe cacuenta quinato, itsantinue: 
\p —Junnasa mantimini Damáscobi israelita manca chuminue tinue Ananías mumun. Jerale Damáscobi chumin israelítala Ananíaca sen joe timin jominlanue tinue. Israelítalachi mantaca meráto nenamin jominue.  
\v 13 Junni yari lachica jato, quelole wiruito, Aco Saulo tie. Diosi nuca manse suwanae tie tinue yape manquirano podeisa. Junni Ananías tsantinasale quirano podeito, yaca quirayoe tinue.  
\v 14 Junsi Ananías labe itsantie tinue: Chiquilachi matu to tatalachi Diosi nuca wenteca joe tie tinue yape nunan yaca miisa. Nuri Diosi ti quisa tinunca miichunae tie. Junsi Diosichi sen Naoca quirachunae tie tinue. Jesucristo patsanan nube cuenta quichunae tie.  
\v 15 Junni nuri jeralelaca yachi fiqui micarichunae. Nuri quiranuncanan, meránuncanan jera micarichunae tie tinue.  
\v 16 ¿Junni amana tica camérayun? Cupato mumunhide! tie tinue. Miya Jesube rocaide! tie tinue yape nuchi jutsaca piyarisa. Ananías tsanqueri labe cuenta quicae tinue. 
\p  
\v 17 Junni Páblori pa jun israelítalabe beco capánato itsantinue: 
\p —Junni inale Jerusalenca manjito, Diosichi yabi wito, Diosibe rocainamanyoe tinue. Junni Diosibe rocainasa, lachi quirajae tinue.  
\v 18 Junni quirajanasa Miya Jesuca quirayoe tinue. Yari labe cuenta quito, laca Jerusalenbi nechi wewe losa mantaquee tinue. Yachi fiquica pánaminca weyan israelítalari numanan meralaquituchunae tie tinue. 
\p  
\v 19 Junni lari Miya Jesube beco manpato, itsantiyoe tinue: Weyan israelítalari laca meralaquichunae. Yalari laca miraminlae tiyoe tinue. Lanan israelita pejoto, nube cayaica jun tsachilaca domin jomanyoe. Jerale Diosichi fiqui miinun yabi yalaca cato, asotaquimin jomanyoe.  
\v 20 Nuchi tenchi pamin, Esteban tinunca, uyan israelítalari yaca totelaquinasanan, lanan junte pequiranamanyoe tiyoe tinue. Yaca toteniquede! tito, toteminlachi panuca cuidainamanyoe tiyoe tinue yalabe penenamin joto. ¿Junto amana laca meralaquituchinan? tiyoe tinue.  
\v 21 Junni Jesucrístori la tsanque pacaca natiya tennatuto, labe itsantie tinue: Jide! tie. Nuca bare toca erechinayoe tie tinue israelita itonlachica. 
\p  
\v 22 Junni israelítala jun fecáriri Pábloca meralaquinue. Junni israelita itonla tinunca merasi, Pábloca duque paito, sonba otilatinue. Yaca totede! Puyano joe latinue. 
\s1 Coroneli Pábloca canunca 
\p  
\v 23 Junni israelítalari Pábloca duque paito, otin, panu walaquin, to poyo jamochi quepon, quilaquinue.  
\v 24 Junni coroneli Pábloca cuartelibi tanwisa tinue. Junsi yaca asotaquisa tinue ti culpa tenchi otilatinanunca miichun.  
\v 25 Junni asotaquichun telepolaquinue. Junni teleponasa, Pablo capitanbe itsantinue: 
\p —¿Nulari romano siudadanolaca culpa tanunca camiituminnan, asotaquino mantá talarayun? tinue. 
\p  
\v 26 Junni capitan junca merasi, coronelichica jito, yabe cuenta manpolarinue. Itsantinue: 
\p —¿Nu ti quichun tsannato? Pablo romano siudadano joyoe tie tinue. 
\p  
\v 27 Junni coroneli wepanato jato, Páblobe panhanue: 
\p —Nu israelita jotonan, ¿romano siudadano joyun? tinue. 
\p Junni Páblori tsan joyoe tinue.  
\v 28 Junni coroneliri yabe itsantinue: 
\p —Lanan romano siudadano joyoe. Duque cala cuwacayoe tinue siudadano ichun. 
\p Junni Páblori na mánta romano siudadano joyoe tinue.  
\v 29 Junni coroneliri junca meráto, jele tinue romano siudadanoca telepolaquiyoeque. Junto asotaquino jominlanan wepanato mantelaquepolaquinue. 
\s1 Israelítala Pábloca culpa quichi latinunca 
\p  
\v 30 Junnasanan coroneli panhano muquee tinue israelítalari ti tenchi Pábloca pa jonunca. Junto ayuna nanchi mantá tan patelelabe jerale israelita mantaminlabeca layaisa mantanue. Junni Páblocanan cadena silica manwoleto tanjato, israelítalachi cale wirucarinue. 
\c 23  
\p  
\v 1 Junni Pablo israelita mantaminlaca tenca cato quirato, itsantinue: 
\p —Israelítala, lari na mánta Diosibe seque nenamanyoe tinue luratuchun. 
\p  
\v 2 Junni Pablo tsantinaminca, Ananías tinun mantá tan pateleri yaca painue. Junni quelole raminlaca mantanue Pábloca fiqui forole tedechi quedeque.  
\v 3 Junni Páblori patelebe beconan pato itsantinue: 
\p —Diosi nucanan quichunae tinue. Nuri Diosichi mantate laca miichi tinae culpa tanunca. Tsan jotonan, nunan Diosichi mantaca merátuto laca quede! tie tinue. Tsanquinato, nu fiban pintaquica serica cuwenta joe. Urachi uraran jotonan, tenperi seiton joe tinue. 
\p  
\v 4 Junni Pablo tsantinunsi, junte raminla itsantilatinue: 
\p —¿Niyaito Diosichi pateleca yucacurayun? latinue. Mantá tan patele joe latinue. 
\p  
\v 5 Junni Páblori itsantinue: 
\p —Tsa tie tinue. Diosichi Pilabi mantaca joe tinue israelita mantaminlaca yucacuratusa. Junni lari miitomanyoe tinue mantá tan patele jonunca. 
\p  
\v 6 Junni mantaminlari weyan weyanlari saduséola jominlanue man tala Diosica tenca caminla. Aman weyan weyanlari fariséola jominlanue uyan tala Diosica tenca caminla. Junni Páblori junca mantenhito, sonba pato itsantinue: 
\p —Israelítala, la fariseo joyoe tinue. Lachi apalanan fariséola jominlanue. La fariseo joto, puyaca junlaca mansonhilaichunae timin joyoe tinue. Tsantinun tenchisiri nulari laca amana culpa quilaquinae tinue. 
\p  
\v 7 Aman Pablo tsantinunsi, fariséolabe saduséolabe beco beco pacaalaquinue. Mantaminla tala pataato pacaalaquinue.  
\v 8 Aman jerale fariséola itsantiminla joe: Anjelilanan, ocolanan jolajoe timinla joe. Puyaca junlanan mansonhilaichunae timinla joe. Aman saduséola mantimini junca epe pato tsanlatinae timinla joe. Jun tenchi saduséolabe fariséolabe pacaalaquinaminue.  
\v 9 Junni firara tinato, fariséola weyan weyanla wiruilainue mantaca micariminla. Yala wiruito, itsanlatinue: 
\p —Páblori culpa itoe latinue. Pansile anjeli yabe paca jonari, o sen espíritu yabe paca jonari, junni culpa iton patichunae latinue. Tsan jonari, Pábloca casticaquilaquitori, Diosibe pa tala patilaiyanae latinue. 
\p  
\v 10 Junni duque sonba pacaanasanan, coroneli jele tinue Pábloca jera pisulelaquichunaeque. Junto soldadolaca mantanue yape Pábloca josoleto cuartelica mantanjisa.  
\v 11 Junni jun quepen Miya Jesucristo Páblobe quirainue. Yachite wiruito, itsantinue: 
\p —Sonba tenca cade! tinue. Nuri Jerusalenbi lachi tenchi panun cuwenta, Roma pueblobinan lachi tenchi pano jochunae tinue. 
\s1 Pábloca totechun tenca calaquinunca 
\p  
\v 12-13 Junni ayuna nanchi quepente junpalu chunca fécari israelítala yala tala trato quilaquinue. Pábloca totelaquechinayoe tilatinue. Ano fitun, pi cuchitun, joto nenalaranae tilatinue Pábloca toteno fecári. Juraquito, tsarasica pánayoe tilatinue.  
\v 14 Junsi mantá tan israelítalachica jilainue. Patelelanan, mantá tan unicalanan junte raminlanue. Junni trato quiminlari itsantilatinue: 
\p —Chiquilari tsarasica pato, juraquito, trato quilaquiyoe tilatinue. Pábloca toteno fecári anoca man pititiya fitulajoanae latinue.  
\v 15 Junni nulabe uyan mantaminlabe chiquilaca ayudailaide! yaca totechun. Coronelibe rocailaide! latinue yari ayuna Pábloca inchi eresa. Nanni fe tuca miino muquee tilatina! latinue. Junni chiquilari inchi janaminca totechun meralaranae tilatinue. 
\p  
\v 16 Junca Páblochi soquichi nao meránue Pábloca totechi latinunca. Yaca merasi, Páblobe jera cuenta manpolaribi cuartelica jinue.  
\v 17 Junni Pablo jun fiquica meráto, capitanca jasa tito, in mosoca coronelichica tanjide! tinue. Yabe ticatiya pano joe tinue.  
\v 18 Junni capitan ya mosoca coronelichica tanjinue. Doramin Pablo labe rocaie tinue yape in mosoca nuchica tanjasa. Nuchi fiqui tanjae tinue.  
\v 19 Junni coroneliri yaca tedele cato, chicanle tanjito, nosale itsantinue: 
\p —¿Labe niyan tino muquin? tinue. 
\p  
\v 20 Junni Páblochi sobrino itsantinue: 
\p —Israelítala tala tenpato, nube rocailaichunae tinue. Ayuna Pábloca yalachica tanjanaque rocailaichunae tinue yaca nanni fe tuca miichun.  
\v 21 Junni yala panunca tina merátuna! tinue. Junpalu chunca fécari israelítala Pábloca totechun meralarae tinue. Yalari tsarasica pato, juraquito, trato quilaquinue Pábloca totechun. Yaca toteno fecári ano fitun, ni pi cuchitun, nenanola joyoe latinue. Aman israelítala tsaina meralarae tinue yape nu Pábloca ereyanae tisa. 
\p  
\v 22 Junni coroneli jun mosoca jera meráto manherenato, itsantinue: 
\p —Mobenantiya patuna! tinue labe tsantiyoeque. 
\s1 Pábloca Félichica erenunca 
\p  
\v 23 Junsi coroneli paluca capitanlaca jasa carito, itsantinue: 
\p —Soldadolaca seisa carilaquede! tinue. Nula Cesarea puebloca jilaichunae. Palu patsa espadachi quicaamin soldadolabe, siete chunca calubi chudimin soldadolabe, palu patsa lansachi quicaamin soldadolabeca tanjinola joe tinue. Nuebe de la nochete jilaina! tinue.  
\v 24 Aman Páblochi tenchinan calu manca sede! tinue yape yanan pechudito jisa. Junto Pábloca Félix tinun cobernadorichi fecári seque tanjino podeilaichunae tinue. 
\p  
\v 25 Junto coroneli tsantisi, pila quinue. Capitanlabe peerechun, itsanque pila quinue: 
\p  
\v 26 Mantamin Félix cobernadori, la Claudio Lisias nuchi saludo erenayoe.  
\v 27 In pilaca erenato, doramin tsachi Pablo mumunca peerenayoe. Israelítala yaca sonba inato cato, totechinaminlanue. Junnasa Páblocari romano siudadano joeque miiyoe. Junto soldadolabe jito yaca josoleyoe yape totelaquitusa.  
\v 28 Yaca josoleto, miino munaramanyoe ti quichun yaca totechi latinanunca. Junca miichun Pábloca israelita mantaminlachica tanjiyoe.  
\v 29 Junni yalachi mantá chutecabe culpa quinaminlanue. Tsanlaquinanan, yaca natiya toteno itominue. Dononan itominue. Aman Pábloca tsanque miiyoe.  
\v 30 Junnasa tsachi manca labe cuenta quee israelítalari Pábloca nosa totechi latinaeque. Aman junca miisi, yaca nuchica wewe erenayoe. Junni yaca culpa quiminlaca nuchica jisa mantaquechinayoe Pablo niyaque culpa tanunca manpabi. Tsanqueri pano joyoe. 
\p  
\v 31 Junni coroneli tsanque pila quinunsi, soldadolari yachi mantate jilainue. Jun quepente Pábloca Antípatris pueblo fecári tanjilainue.  
\v 32 Junsi ayuna nanchiri caluchi jimin soldadolasiri Pábloca catanjilainue. Weyanlari cuartelica manjalainue.  
\v 33 Junni Cesarea pueblobi féto, Pábloca cobernadorichi cuwapolaquinue pilabele.  
\v 34 Junni cobernadoriri ya pilaca quirato, Páblobe panhanue ti tobi nechi jayunque. Junni Cilíciabi nechi janueque miito,  
\v 35 itsantinue: 
\p —Nuca culpa quiminla jalainunbi nucanan meránae tinue. 
\p Jun fecári Pábloca miya Heródechi wa yabi dosa mantanue. 
\c 24  
\s1 Pablo Félibe cuenta quinunca 
\p  
\v 1 Junni mante ma polenunbi, Ananías mumun mantá tan patele Jerusalenbi nechi Cesaréaca janue. Mantá tan unicalanan, Tértulo mumun abocadonan yabe pejalainue. Ya abocadori Pábloca culpa quichun jominue.  
\v 2-3 Junni Pábloca jasa carinunbi, Tértulo yaca culpa quichi tinue. Cobernadoribe itsanque cuenta quinue: 
\p —Nuri in tobi cobernadori josanan tsara pansi joto chuminlayoe tinue. Nuri chiquilaca jera seque mantamin joto, nunchitiya duque ayudaimin joe. Tsanquinun tenchi nube duque acradeseilaiyoe tinue. Nuri tsara sen cobernadori joe tinue.  
\v 4 Jun tenchi nube sen jonari rocaichinayoe laca man fiqui nacá merádeque. Moorari pachinayoe nuca layan pasuwatuchun. 
\p  
\v 5 Chiquilari in tsan quiran Páblocari tuca miralarayoe. Duque pa muquiminhe. Jerale tote israelítalaca seiton suwamin joe yape yala tala pa tala nenalarasa. Jesús Nasareno tinunbe penenaminla tala mantamin joe.  
\v 6 Páblori Diosichi yaca seiton suwachinaminhe tinue. Junni chiquilari yaca calaquiyoe yape Diosichi yaca seiton suwatusa. Chiquilari mantá chuteca talarayoe. Aman jun mantabe miichi tinaminlayoe ya culpa tanunca.  
\v 7 Junnasa coroneli Lisias janue. Yari tede poto sonba ito, Pábloca josolenue yape chiquila casticaquitulajosa.  
\v 8 Junto ya coroneli mantanue yape Pábloca culpa quiminla nuchica jilaisa. Aman la tsarasica pánanunca jera miichun nu patsa Páblobe panhano podeichunae tinue. 
\p  
\v 9 Junni abocado tsantinasa, israelítala tsa tinae tinaminlanue.  
\v 10 Junni abocado jera cuenta quinunbi, cobernadori Pábloca tedechi mantato, nunan pade! tinue. Junni Páblori pato, cobernadoribe itsantinue: 
\p —Nuri duque watale nechi israelítalaca mantamin joe tinue. Jun tenchi pansi joto nubenan beconan pachinayoe.  
\v 11 Nuri laca tuca miino podeichunae. Chunca palu ma caitoe la Jerusalenca Diosibe rocaibi jica jonun.  
\v 12 Aman Diosichi yabi seque, mobenantiya pataatuto nenamanyoe. Diosichi fiquica miinun yabi, o pueblobi tsachilaca firara timiyatiyoe tinue.  
\v 13 Aman israelítalari duque nene patosiri culpa quichi latinae tinue. Wari laca tsarasica culpa quino podeilaituchunae. Nene joe. 
\p  
\v 14 Junni laca duque nene pánatonan, man fiquicari tsarasica palaquee. Jesucrístochi minuca nenamin joyoe tinue. Inlari jun casan minuca Diosichi minu itoe timinla joe. Aman lachi matu to tatalachi Diosibe mantaito Jesucrístochi minuca nenayoe tinue. Matu to Moisés Diosichi mantate mantaca junca jera quereimin joyoe tinue. Matu tote Diosichi mantate pila quica junca tsabi cayoe.  
\v 15 Junto Diosica tenca cato mérayoe tinue piyanle puyaca junlaca mansoncarichunaeque. Senlacanan, seitonlacanan mansoncarichunae tinue. Aman uyan israelítalanan jun tsanquenan tenca cato meralarae tinue.  
\v 16 Jun tenchi lari numasitiya tenfenayoe seque nenachun, Diosibenan tsachilabenan luratuchun. 
\p  
\v 17 Junsi Páblori cobernadoribe cacuenta quinato itsantinue: 
\p —Junni bare tobi duque wata nenato, lachi toca manjayoe tinue poperelachi lemosi cala cuwabi. Junsi Diosichinan ticatiya cuwabi jayoe tinue.  
\v 18 Junto Diosichi yabi wito ramanyoe. Moisechi mantá tala pipiyaca jun nenamanyoe. Duque tsachilaca layatuto, firara timiyatuto nenamanyoe tinue.  
\v 19 Junnasa Asia tobi chumin israelítalari laca quirato pailaie Diosichi yabi seque nenamincanan. Ya israelítala laca seiton quinaminca quiramanpari, yalanan inte jano jominla jonhoe tinue nuchi cale cuenta quichun.  
\v 20 Yala itonari, junni inte raminla panola joe tinue laca culpa quichun. Israelita mantaminlachi cale wiruraminca laca culpa quino podeitucalae tinue.  
\v 21 Man cosa tenchisiri pansile nasi culpa quino podeilaichunae tinue. Yalachi cale rato, sonba pato, itsanticayoe tinue: Piyaca junla mansonhinola joe tinun tenchi nula laca culpa quilaquinae tiyoe tinue. Yala tala pacaasa carichun tsantinun tenchisiri laca pansile nasi culpa quino podeilaichunae tinue. 
\p Pablo tsanque cuenta polarinue.  
\v 22 Junni cobernadori mantimini Jesucrístobe penenanoca jera miramin jominue. Junto Pablo pacaca jera meráto, israelítalabe itsantinue: 
\p —Camiituntsan joe tinue. Coroneli Lisias janunbi nula pacaca nanni fe sele miintsan jochunae tinue. 
\p  
\v 23 Junsi capitanca mantanue Pábloca cadoto tasa. Tsan jotonan, cadena potuna! tinue. Amicola quirabi jachi latinari, jasa cariniquina! tinue yape Páblochi ticatiya cuwalaquisa. 
\p  
\v 24 Weyan ma poletobi, cobernadori Félibe yachi sonabe Pábloca manmerábi jalainue. Aman Félichi sona israelita jominue Drusila mumun. Junni yalari Páblocanan jasa carito, Jesucrístobe cayainoca panhalaquinue.  
\v 25 Junni Pablo duque cuenta polarinue seque nenantsan joeque, seichun tencachique mantaquintsan joeque, to yucapiyarino mate Diosi casticaquichunaeque. Pablo tsanque cuenta quinasa, Féliri duque jele tito manmerátuchi tinue. Junni manmerátuchiqueri itsantinue: 
\p —Manjiniide! Man nete jola jonari nuca manmeránae tinue. 
\p  
\v 26 Félichi tencari, Pablo manlochique calaca nosa cuwaniquichunae tenca jominue. Jun tenchi yaca duque ne jasa carinue.  
\v 27 Junni palu watate casan cobernadori manwinue Porcio Festo mumun. Félix mantimini israelítalabe amico ichun Pabloca doraminca puraniquinue. 
\c 25  
\s1 Páblori Féstobe cuenta quinunca 
\p  
\v 1 Junni Festo cobernadori itobi, peman mate Cesaréabi nechi Jerusalenca jinue.  
\v 2 Aman Festo janunsi, mantá tan patelelabe uyan israelita mantaminlabe Pábloca duque seiton joeque cuenta quilaquinue.  
\v 3 Féstobe duque rocailainue Pábloca Jerusalenca manheredeque. Junni Pablo janaminca nosale nechi toteno jominlanue.  
\v 4 Festo mantimini beco manpato, itsantinue: 
\p —Eretiyoe tinue. Pablo Cesaréabi dorae. Lanan ina junchinan manjino joyoe tinue.  
\v 5 Junni nula tala miraminla labe pejintsan joe. Junni Pablo seiton quimin jonari, junte culpa quilaquina! tinue. 
\p  
\v 6 Junni Festo man tominco nasi fesile Jerusalenbi chutobi, Cesaréaca manjinue. Junsi ayuna nanchi mantanunte chudito, Pábloca tanjasa mantanue culpa jonunca meráchun.  
\v 7 Junni Pablo janunsi, Jerusalenbi nechi jamin israelítala yachi awinta wiruilaito yucacurato, culpa quichi tilatinue. Junni duque culpa quichi tinatonan, podeitulajonue.  
\v 8 Junni Pablo Féstobe manpato, itsantinue: 
\p —Israelítalachi mantaca merátumin itoyoe tinue. Diosichi yacanan seiton suwatiyoe tinue. Románolachi miyachi contranan natiya quitiyoe tinue. 
\p Pablo tsanque cuenta quinue.  
\v 9 Junni Festo mantimini israelítalachi amico ichun, Páblobe itsantinue: 
\p —¿Nuri Jerusalenca jinoyun? tinue. ¿La junbi jera tuca miino nube se jochunan? tinue. 
\p  
\v 10 Junni Páblori jitiyoe tinue. Junsi itsantinue: 
\p —Nuri inte románolachi mantá tala miichi tinae la culpa jonunca o itonunca. Tsanquiniquintsan joe tinue. Aman israelítalaca natiya seiton quitiyoe. Nuri junca seque mirae tinue.  
\v 11 Junni la totentsancari jutsa quica jonari, laca totesa cariniquede! tinue. Juntonan israelítalari laca nene patosiri epele culpa quichi latinae. Tsan jonari, monantiya laca yalachi cuwapono podeilaituchunae. Laca Jerusalenca eretuna! tinue. Románolachi fe mantá tan miyachica erede! tinue yape ya patsa merása culpa jonunca o itonunca. 
\p  
\v 12 Junni Pablo tsantinunsi, Festo uyan mantaminlabe tenpato, Páblobe itsantinue: 
\p —Nuri romano siudadano pejoto, ¿Chiquilachi fe mantá tan miyachica jino muquee tico? Se joe. Junchi jichunae tinue. 
\s1 Miya Agrípachi cale Pábloca wirucarinunca 
\p  
\v 13 Junni weyan ma polenunbi, Agripa tinun miyari Cesarea puebloca jinue. Agrípabe yachi sona Berenícebe Féstoca quirabi jilainue.  
\v 14 Junto duque ma junte rasanan, Féstori Agrípabe Pábloca jera cuenta quinue. Itsantinue: 
\p —La cobernadori caitusanan, Féliri israelita mancaca doca jominue Pablo mumunca. Junto cobernadori jomin jeraito, ya doraminca purato manjinue.  
\v 15 Junni la Jerusalenca jito rasa, israelítala in doraminca duque seitonque cuenta quito culpa quichi latie tinue. Mantá tan patelelabe mantá tan unicalabe duque rocailaie yape Pábloca totesa. 
\p  
\v 16 Junni lari itsantiyoe tinue: Te, románola tsanquituminlayoe tiyoe tinue. Románolachi mite casale nulabe Páblobeca cale cale wirucarintsan joe yape Pablo beconan pasa. Cale cale wirucaritobi, aman toteno jotori wari totesa carintsan jochunae tiyoe tinue.  
\v 17 Junni israelítala inte layainunbi, lari wanhitiyoe. Ayuna nanchi mantanunte chudito, Pábloca jasa mantayoe.  
\v 18 Junni israelítala yaca tsaracari seiton quinunca culpa quilaquichunae tenjaca jominhe. Tsan josanan seiton quinunca culpa quitulajoe tinue.  
\v 19 Yalachi mi talasiri culpa quilaquee tinue. Aman puyan oco tsachica cuenta quilaquee Jesús tinunca. Ya Jesús puyaca josanan, aman Pablo yaca puyaca itoe timin joe tinue. Mansonhica joe timin joe tinue. Yacasiri culpa quilaquee tinue. 
\p  
\v 20 Junni niyaque culpa quilaquinanunca seque miino podeituto, Pábloberi itsantiyoe: ¿Nuri Jerusalenca jinoyun? tiyoe nuca culpa jonunca junbi meráchun.  
\v 21 Aman Páblori Jerusalenca jituchique, románolachi fe mantá tan miyachica erede! tie yanan la culpa tanunca miisa. Aman tsantinunbi lari yaca mandosa mantayoe fe mantá tan miyachica ereno fecári. 
\p  
\v 22 Junni Festo tsanque jera cuenta quinunbi, Agripa itsantinue: 
\p —Lachinan jun doraminca meráno muquee tinue. 
\p Junni Féstori ayuna yaca meráchunae tinue.  
\v 23 Junni ayuna nanchi Agrípabe Berenícebe mantaminla joto duque urara seito jalainue. Jun pueblobi mantaminlabe, soldado mantaminlabenan meránun tamochi pewilainue pemeráchun. Junni Festo mantanue Pábloca jasa carilaquisa.  
\v 24 Junni Pábloca tanjanunsi, Festo itsantinue: 
\p —Miya Agripa, nuri inca quirade! tinue. Uyan pejaminla, nulanan inca pequiralaquede! tinue. Jerale israelítala in tsachica totesa latinae tinue. Jerusalénbinan, junsi intenan labe duque rocailainae yape yaca totesa.  
\v 25-27 Aman tsan josanan, Pablo labe rocaie tinue fe mantá tan miyachica eredeque. Junni ereyanae tiyoe yape ya miya Pablo culpa tanunca miisa. Aman doraminca miyachica erenato, ti niyaque seiton jonunca pila quito peerentsan joe. Ya pilaca peeretunari, epelenan erenaca jun patichunae tinue. Junni la Pábloca erenatori, ¿niyaque pila quino joinhin? ti culpa tanunca miitotori. Yaca numa nasi miito, duque seiton quitumin joeque miicayoe tinue. Totentsancari jutsa quitumin joe. Junto tuino capodeitiyoe miyachi tenchi niyaque pila quito peereno jonunca. Jun tenchi nulachi cale Pábloca tanjayoe tinue yape nulanan yabe panhalaquisa. Miya Agripa, nu panhato miide! Junni Pablo manpánaminca meráto, la sele miino podeiichunae tinue niyaque pila quintsan jonunca. 
\c 26  
\s1 Pablo Agrípalabe cuenta quinunca 
\p  
\v 1 Junni Festo tsantinunsi, Agripa Páblobe itsantinue: 
\p —Nuri cuenta quiniquede! tinue. 
\p Junni Pablo tede jalitanue cuenta quechinayoe tito. Junsi isa pato itsantinue: 
\p  
\v 2 —Miya Agripa, lachi pansi tenjae tinue amana nube cuenta quechinayoeque. Uyan israelítalari laca duque culpa quichi latinae. Junni amana nuca jera tucarichinayoe tinue.  
\v 3 Nuri chiquilachi mica seque mirae. Chiquila panuncanan nu jera mirae. Junni nube rocainayoe yape laca de fecári merása. 
\p  
\v 4 Jerale israelítala laca miralarae tinue. Na mánta lachi tobinan, junsi Jerusalénbinan yalabe pesonnamin jomanyoe.  
\v 5 Nalalan mánta fariseo tala Diosica tenca camin jomanyoe tinue. Aman fariséolari uyanlaca fécari tenfeminlae israelítalachi mantaca meráchique. Junni lari fariseo pejomanyoe tinue. Israelítala junca jera miralarae. Yalachi tsa pano muquilaquinari, junca pano jominlanue.  
\v 6 Aman Diosiri chiquilachi matu to tatalabe trato quinato, puyaca junlaca mansoncariyanae tica joe tinue. Junni amana yaca tsa joe tito me nenayoe. Jun tenchisiri amana nuchi cale wirurayoe tinue. Jun tenchisiri laca culpa quichi latinae.  
\v 7-8 Aman jerale chunca palu bolon israelítalanan jun tsanquenan tenca caminla joe Diosi puyaca junlaca mansoncarino joeque. Yalari quepen, malon Diosichi tenchi titiya quichi timinla joe yalanan mansonhiminla ichique. Nulanan junca quereituntsan joe titulajona! Junni miya, israelítalari tsanque tenca caminla jotonan, laca culpa quichi latinae puyaca junla mansonhinola joeque quereinun tenchi. 
\p  
\v 9 Junni Páblori Agrípalabe cacuenta quinato itsantinue: 
\p —Matute lanan Jesús Nasarénoca seiton quintsan joe timin jomanyoe tinue.  
\v 10 Jerusalenbi mantá tan patelelachi mantate Diosichi sen tsachilaca duque dosa carimin jomanyoe. Junni uyanla Jesucrístochi tsachilaca totelaquinasa, lanan totenilaquede! petimin jomanyoe tinue.  
\v 11 Junto Diosichi fiqui miinun yabi yalaca casticaquimin jomanyoe yape Jesucrístoca telaquepolaquisa. Yalaca duque paito, uyan pueblobinan yalaca casticaquichun neyabi jimin jomanyoe tinue. 
\p  
\v 12 Junto mantá tan patelelachi mantate la Damasco puebloca jinamanyoe tinue.  
\v 13 Junni miya, seque meráde! tinue. Yotute labe uyanlabe jinaminlayoe. Junto jinaminnan, aman jamochi nechi duque tsenca quirayoe chiquilachi awinta. Yoca fécari tsequee tinue.  
\v 14 Junni jeralela tobi queereitonan lari fiquica meráyoe. Israelítalachi fiquichi pato, lachi tsa mumunca pato, Saulo, Saulo, ¿ti quichun laca seiton quinayun? tie tinue. Laca seiton quinato, nu tencachiquenan fécari padeseinae tie calu chide puntabi terachi quimin cuwenta. 
\p  
\v 15 Junni lari jun fiquica merasí, Miya, ¿moyun? tiyoe tinue. Junni Miya Jesús beconan pato, Jesúyoe tie tinue. Laca nu seiton quinae tie.  
\v 16 Junni Jesuri laca cupato manwiruide! tie tinue. Junsi laca yabe mantaito nenamin ide! tie tinue. Jun tenchi labe quirainayoe tie tinue. Junni jun mate quirananunca cuenta polarimin jona! tie tinue. Junni Jesucristo labe manan manquirainan, juncanan cuenta manpolarimin jochunae tie tinue.  
\v 17 Junsi laca israelita itonlachica erechinayoe tie. Junsi laca isaichinayoe tie tinue yape israelítalanan, israelita itonlanan totelaquitusa.  
\v 18 Junni laca israelita itonlachica jito, yalaca tuca tenca casa caride! tie tinue yape cuni jun cuwenta canenalaratusa. Junni meráminla seiton tenca canunca purato, sen tenca mancalaquichunae tie tinue. Satanachi mantabi nechi loto, Diosi mantananun tsachi bolonbi manwilaichunae tie tinue. Yalari Jesube cayaica jonan, Diosi yalachi jutsaca piyarito, yalaca sen tenca suwachunae tie tinue. Diosichi weyan tsachilaca cuwenta, yalacanan tsanque sen tenca suwachunae. 
\s1 Pablo Jesucristo pacaca meráto nenamanyoe tinunca 
\p  
\v 19 Junni Pablo Jesucrístoca cacuenta quinato, Agrípalabe itsantinue: 
\p —Junni Jesucristo jamochi nechi labe quiraito pacaca meráto nenayoe.  
\v 20 Junni jun fiquica meráto, tsachilabe cuenta quito, jutsa quinanunca telaquepoto Diosibe cayailaide! tito nenamanyoe. Junsi seque nenalarana! timanyoe tinue yape jutsaca telaquepoeque tenhilaisa. Casale Damáscobi, junsi Jerusalenbi, junsi jerale israelítalachi tobi, junsi israelita itonlachi tobi tsanque cuenta polaridede nenamanyoe tinue. 
\p  
\v 21 Junni tsanque cuenta quinun tenchisiri israelítalari laca Diosichi yabi cato totechi latie tinue.  
\v 22-23 Tsan josanan Diosi laca isainue yape totelaquitusa. Junto amanachitiya inte Jesucrístoca cuenta caquito wirurayoe. Jeralelabe, mantá tanlabenan, mantá itonlabenen, jun cuentaca quinayoe tinue. Matu tote Moisebe uyanlabe Diosichi mantate pila chutelaquinue Diosi wenteca Cristo tinun tsachi padeseino jochunaeque. Puyato, ya caquenan mansonhichunae latinue. Tsanque israelítalabe israelita itonlabe Diosica tsarasica miino podeilaichunae latinue. Junni lanan jun tsanquenan manpánayoe tinue Moisela matu tote pilabi chutelaquinunca. 
\s1 Agrípaca Jesucrístobe cayaisa tenjae tinunca 
\p  
\v 24 Junni Pablo tsantinasanan, Féstori sonba pato, Pablo, nuri loco joe tinue. Duque miichique tenfenaminnan, misu yucapiyanue tinue.  
\v 25 Junni Páblori Féstoca duque respetaito manpato, itsantinue: 
\p —Te, loco itoyoe. Tenca tan joto, tsarasica pánayoe tinue.  
\v 26 Junca miya Agripa jera mirae tinue Jesucrístoca paca fiquica. Jun tenchi luratuto yabe cuenta quiniquinayoe tinue. Yari junca jera miranae tinue. Jesucristo nosa nenatumin jominhe tinue. 
\p  
\v 27 Junni Pablo Féstobe tsantisi, miya Agrípabe itsantinue: 
\p —¿Nuri Diosichi Pilaca quereiyun? ya matu to Diosichi mantate pila chutecaca. La mirayoe tinue nu quereimin joeque. 
\p  
\v 28 Junni Agripa Páblobe beconan itsantinue: 
\p —Nuri cuenta nasi caquitori, lacanan Jesucrístobe penenamin suwano jonhoe tinue. 
\p  
\v 29 Junni Páblori itsantinue: 
\p —O nasi cuenta caquito, o duque cuenta caquito, se jonijochunae tinue. Nuca la cuwenta josa tenjae. Diosibe rocainayoe tinue yape tsanhisa carisa. Jerale amana meranaminlanan la cuwenta josa tenjae tinue. Juntonan nulacari la cuwenta telarasa tenjatue tinue. 
\p  
\v 30 Junni Pablo tsantinasaleri, miyabe cobernadoribe Berenícebe uyanlabe jeralela wiruito manlolainue.  
\v 31 Junni manlotobi, Pábloca tenpalaquinue. Culpa itoe latinue. Totentsancari jutsa natiya quica itoe latinue. Doranonan itoe latinue.  
\v 32 Junsi Agripa Féstobe itsantinue: 
\p —Pablo románolachi fe mantá tan miyachica eresa rocaica itomanpari, yaca manlarino podeino jominla joinhie tinue. 
\c 27  
\s1 Pábloca Roma puebloca erenunca 
\p  
\v 1 Junni Pábloca Italia toca ereno tenca calaquinue Roma puebloca. Junni Páblocanan, uyan doraminlacanan capitanchi cuwapolaquinue yape Rómaca barcochi tanjisa. Ya capitan romano miyachi soldado capitan jominue Julio mumun. Junsi labe  
\v 2 Aristárcobe pejilaiyoe. Aman Aristárcori Macedonia to tsachi jominhe Tesalónicabi nechi. Junnasa barco manca Adromítobi nechi jato tsonue. Ya barco Asia to puebloca jino jominue. Junni chiquilari jun barcobi wito jilaiyoe.  
\v 3 Junni ayuna nanchi Sidón pueblo fecári jilaiyoe. Junbi Júliori Páblobe duque sen joto, amicolachica jasaibi jiniide! tie.  
\v 4 Junni junte nechi barcobi manwito jinasanan, cachi nechi wu quinaminhe. Jun tenchi Chipre tinun pisaca wu nanni iton nanchi polelaiyoe.  
\v 5 Junni Cilicia to, Panfilia to dequelose jito, Licia tobi felaiyoe Mira tinun pueblobi. 
\p  
\v 6 Junni capitan junbi manca barcoman neyato fee. Jun barco Alejandría pueblobi nechi jato, Itáliaca jino jominue. Junni chiquilari junbi wilaiyoe.  
\v 7 Junni duque maca tenfeto jamimin jinato, Gnidu pueblo quelose polelaiyoe. Junni wu cachi nechi quinanan, tule jino podeilaitiyoe. Junto Salmón quelose poleto, Creta tinun pisaca wu nanni iton nanchi polelaiyoe.  
\v 8 Creta quelose tenfeto jinato, Buenos Puertos tinun postoca felaiyoe Lasea pueblo quelole. 
\p  
\v 9 Aman jun fecári jinaminnan duque wanhilaiyoe. Israelítalachi fiesta ma numa poleca joto, lamaribi barcochi jituntsan jominue pilu ma inanan. Junni Pablo junca tenhito, yalaca payito,  
\v 10 itsantie: 
\p —Mantaminla, inte nechi cajinanari, duque yucapiyachunae. Barconan barcobi pominnan yucapiyachunae tiyoe tie. Chiquilanan pansile puyacaichunae tiyoe tie. 
\p  
\v 11-12 Junni junbi man pilu entero poleno seitochunae tinaminlae. Jun tenchi uyanlari junte nechi jichi latinaminhe. Pansile jun pisa quelole cajinato, Fenice pueblo fecári jino podeicaichunae latie. Junte man pilu entero chun polentsan joe latie. Junte barco tsoreno pi teyunca doica joe latie yape pilu poleno fecári barco seque tsosa. Junni capitanni Pablo pacaca merátue. Tsacuminbe tuminbe pacacari meráto, jichun tie. 
\s1 Wa suwa quito, barcoca epele tanjinunca 
\p  
\v 13 Tsan tin chusanan, manchi nechi wu nasi quee butunni tala nechi. Junni jino sen jochunae tito, Creta dequelose barcochi jilaiyoe.  
\v 14 Junni jinasanan, inale wa suwabe wube Creta pisabi nechi quee. Euroclidón tinun wu jominhe.  
\v 15 Junni barco wu cayainato, wu jananun nanchi jino podeitue. Junni tuquechique tenfenaminnan peleito, wuchi epele jinilaiyoe.  
\v 16 Junni Clauda tinun pisase wu nanni iton nanchi polelaiyoe. Junni barcobi nechi to fecári jinun canoa jominue. Junchi jinato, duque tenfeto, jun canoaca barcobi manpocano podeilaiyoe.  
\v 17 Canoa barcobi laricatobi, barcocari cabo silichi jera lapiquilaquee yape bojitusa. Junni jele tilatie pansile Sirte tinun tsalan to duranunbi icayalaichunae tito. Junto tsalan to tsonun minu jituchique wuchi jinun jalica patarilaquee. Junni wu chiquilaca epele erenaminhe. 
\p  
\v 18 Junni latsachi duque sonba wecacarinan, ayuna nanchi panarito tanjinanunca pibi jera quepolaquee yape barco nanni manquefoisa.  
\v 19 Junni junhayuna nanchi barcobi titiya pominca tedechi pibi jera quepolaquee.  
\v 20 Junni duque ma fecári poyo jonun tenchi yocanan, tsabocanan quiratulajoyoe. Tsaracari wube wa suwabe latsabesiri quee. Aman jeralela manse lono itolajoyoe tilatiyoe. 
\p  
\v 21 Aman jeralela numari ma fecári ano fitun nenaminlayoe. Junto Pablo quitsabi wiruito itsantie: 
\p —Amicola, laca merántsan jominue tie Crétate nechi jitusa tinunca. Jatumanpari, barco tsanque yucapiyano itomin jonhoe tie.  
\v 22-24 Juntonan amanari sonba tenca mancalaquede! Lari Diosichi joyoe tie. Yabe mantaimin joyoe tie. Junni amana quepen anjeli manca Diosichibi nechi jato, lachite wiruito itsantie tie: Pablo tie. Natiya jeleratuna! tie. Roma pueblobi féto, miyachi cale wiruino joe tie tie. Junni lachi tenchi Diosi nulacanan peisaichunae tie tie yape mancanantiya puyalaitusa. Diosichi anjeli labe tsanque cuenta quee tie.  
\v 25 Amicola, sonba tenca mancalaquede! Diosi pacaca quereiyoe tie. La meraca jun, jun tsanquenan patichunaeque quereiyoe tie.  
\v 26 Aman pisa máncabi quepoicaichunae tie. Pablo tsanqueri cuenta quee. 
\p  
\v 27 Junni palu tominco fecári Adriático tinun lamaribi epele jinaminlayoe. Junni quitsa quepente barcobi trabajaquimin tsachilari tenhilaie to feno queloilainayoeque.  
\v 28 Junni pi tenpe mito quiranari, aman peman chunca sota metro wapunnan cajominue. Nasi jabile manan manmito quiranari, chunca siete metrori wapun jominue.  
\v 29 Junni wepanato, subi icayaichunae tito, junpaluca fieroca sili telepoto, barco bene nanchi lamaribi quepolaquee yape barco jitusa. Junsi mantseisa méraminlayoe.  
\v 30 Méraminnan, barcobi trabajaquiminla canoaca pibi manpatarilaquee barco cachi. Manca fierocaman manquepolaquechinayoe latie. Aman nene tsantinaminlae canoachi nosa mansujichique.  
\v 31 Junni Pablo junca tenhito, capitanbenan soldadolabenan itsantie: 
\p —Inlari barcobi nechi loto sujilainari, nulari se lono podeilaituchunae tie. 
\p  
\v 32 Junni soldadola cabo silica butunlaquee yape canoa epele jisa. 
\p  
\v 33 Junni tseino inasanan, Pablo jeralelabe pae yape ano filaquisa. Itsantie: 
\p —Nula palu tominco fecári wepananato ano fitun nenalarae tie.  
\v 34 Jun tenchi nulabe rocainayoe tie ano finilaquedeque. Ano fitori, mansonbailaichunae pi dechi manlochun. Wepanatulajona! tie. Monantiya puyanola itoe. Monantiya fudainola itoe tie. 
\p  
\v 35 Junni Pablo tsantisi, aman bibuca cato Diosibe acradeseito finiquee jeralela quiralaquinasa.  
\v 36 Junni jeralela manan mantenca cato chiquilanan ano finilaquiyoe.  
\v 37 Jerale nechi palu patsa siete chunca sotaca tsachila barcobi pominlayoe.  
\v 38 Junni michi fitobi, puchuica tricoca lamaribi quepolaquee yape barco nanni fe quefoisa. 
\s1 Barco itsanque yucapiyanunca 
\p  
\v 39 Junni tseinunbi jun toca quirato, nun to jonunca miilaitiyoe. Aman pi teyuncabi tsalan tsominca quiralaquiyoe. Podeitori, barcoca junbi nancarichi latie.  
\v 40 Junsi fiero telepoca silica porelaquee yape barco jino podeisa. Fierocari lamaribi puranilaquee. Junni barco tunun cutapecanan cuto, erenun jalica jamochi larilaquee yape wu cayaito jisa. Tsanque to nan tala jilaiyoe.  
\v 41 Aman jinaminnan, tsalan du ranunbi nanhichun jilaiyoe. Aman barco ca nanchi sitaicaca manlarino podeilaitiyoe. Tsan josanan, peca nanchi nechi pi sonba latsa ereto barcoca piti talulu jera quee.  
\v 42 Junni soldadolari doraminlaca totechi latie yape marecachi sujilaitusa.  
\v 43 Aman capitan mantimini Pábloca totetuchique doraminlaca totetulajona! tie. Junsi capitan jeralelaca mantato, casale mareno minla lamaribi queerailaide! tie. To fecári marelaquede! tie.  
\v 44 Junni uyanlacari cutapebi caraito, o barco pitibi caraito jilaina! tie. Tsanque jeralela to fecári sequenan manlolaiyoe. 
\c 28  
\s1 Pablo Malta pisabi nenanunca 
\p  
\v 1 Aman se lotobi miilaiyoe jun pisa Malta mumun jominueque.  
\v 2 Junni junbi chuminla chiquilaca laqui tito, chiquilabe duque sen jominlae. Aman suwa quinasa, jidá jelequira jominhe. Junni nin quilaquee yape chiquila lobailaisa. Chiquilaca mile pechularana! latie.  
\v 3 Junsi Páblori te man tuntu cato, ninbi nancarie. Junni janpe pun pini nin chibachi tebi nechi loto, Pábloca tedele siniito erunhie.  
\v 4 Junni Máltabi chumin tsachilari pini erunhinunca quirato, Pábloca nosa pato itsanlatie: 
\p —In tsachiri tsachilaca totemin jomin jonhoe latie. Jun tenchi lamaribi nechi se loca jotonan, pini jalinan puyaniichunae latie totemin joto. 
\p  
\v 5 Junni Pablo tedeca piquisi piquisiquee yape piniri ninbi manqueereisa. Junni Páblori niyanantiya itue.  
\v 6 Junni ya tsachila méraminlae pini jalinari towachunan, o moora puyan queereichunanque. Tsanni duque mérasanan Páblori niyanantiya itue. Junni manan mantenca cato, yaca diosi jonhoe latie. 
\p  
\v 7 Aman jun pisa cobernadori jun quelote chuminue Publio mumun. Junte yachi wita jominue. Junni yari chiquilaca facarito, peman ma fecári seque chusa carie.  
\v 8 Junnasa Públiochi apari cuparabe pe quiyanbe tato, quiyanpun tsominue. Junni Páblori quiyanpunca quirabi jito, tedechi tale quito, Diosibe rocainan manseie.  
\v 9 Manseinan, uyan quiyanpunlanan manseichique jalaie jun pisabi chuminla. Junni yalanan jera manseilaie. 
\s1 Roma pueblobi fenunca 
\p  
\v 10-11 Junni Malta pisabi chuminlari chiquilachi duque ticatiya epe cuwalaquee. Junnasa manca barco jun pisabi peman pe me tsominue yape pilu polesa. Ya barconan Alejandría pueblobi nechi jaca jominue. Cástor y Pólux mumun barco jominue. Junni chiquilanan peman pe pisabi mératobi, jun barcobi wito jilaiyoe. Junni chiquilari barcobi wilaichinasa, ya pisabi chuminlari barcobi titiya munarano jonunca cuwalaquee.  
\v 12 Junni barcochi jito, Siracusa pueblobi féto, junte peman ma fecári chularayoe.  
\v 13 Junni junbi nechi to quelose Regio pueblo fecári jilaiyoe. Junni ayuna nanchi wu butunni tala quinanan, cajino podeilaiyoe. Junto junhayuna nanchi Puteoli pueblobi felaiyoe. 
\p  
\v 14 Junte barcobi nechi loto, Jesucrístobe penenaminlabe tulailaiyoe. Yalari rocailaie man tominco fecári pechularadeque. Junni yalabe man tominco fecári chutobi, Roma puebloca jilaiyoe.  
\v 15 Junni Rómabi chumin Jesucrístobe penenaminla chiquila jananunca meráto, minute tulaibi jalainue. Weyan weyanla Tres Tabernas tinun pueblo fecári jalainanue; weyan weyanlari Foro de Apio tinun pueblo fecári chiquilaca tulaibi jalainanue. Junni Páblori yalaca quirato, Diosibe acradeseito, sonba tenca cae.  
\v 16 Junsi aman Roma pueblobi felaiyoe. Junni capitanni doraminlaca coronelichi cuwaponue. Pábloca mantimini donun yabi potuto, chicanle chusa carilaquee yaca cuidaimin soldadobe. 
\s1 Roma pueblobi Pablo Diosichi fiquica micarinunca 
\p  
\v 17 Junni Pablo peman ma Rómabi chuminnan, junbi chumin israelita mantaminlaca jasa carie. Junni layailainunbi, Pablo yalabe itsantie: 
\p —Israelítala, lanan israelítayoe. Tsan jomincanan Jerusalenbi chumin israelítalari laca románolachi cuwapoto dosa carilaquee. La israelítalaca natiya seiton quitusanan, chiquilachi tatalachi mite nenanoca natiya yucacuratusanan, laca dosa carilaquee.  
\v 18 Junni románolari laca miitobi, manlarichi latie. Totentsancari jutsa iton joe latie.  
\v 19 Tsan josanan, israelítalari laca manlaritulajona! latie. Jun tenchi la románolabe rocaiyoe nulachi fe mantá tan miyachica erelaquedeque. Aman tsan josanan, romano miyachi cale israelítalaca beconan culpa quino muquetue.  
\v 20 Junto nula israelítalaca quiran, cuenta quin, quebi jasa rocaiyoe. Aman puyaca junlaca Diosi mansoncarichunae tito mérayoe uyan israelítala cuwenta. Jun tenchisiri amana in cadenachi telarayoe tie. 
\p  
\v 21 Junni Pablo tsantinunsi, Rómabi chumin israelítalari yabe itsanlatie: 
\p —Israelítalachi tobi nechi nuca paito pila eretulajoe. Junsi junbi nechi jamin israelítalanan nuca seitonque patulajoe latie.  
\v 22 Aman Jesucristo tinunbe penenaminlaca meracalayoe. Aman jerale tote nulaca seitonhe latie. Junni nu niyan tinunca meráno muquilaquee latie. 
\p  
\v 23 Israelítala tsantito, man mate Páblochica jachun trato quilaquee. Junni jun mate duque israelítala junchi jalaie. Yalabe Pablo man malon yalaca tucarichun cuenta quee. Diosi mantananun tsachi bolon niyan jono jonunca micarie. Aman Moisechi mantacanan, Diosichi mantate chuteca pilacanan cuenta quee. Tsanque Diosichi Pilaca duque micarie yape Jesús Diosichi Nao joeque quereilaisa.  
\v 24 Junni weyan weyanla tsa joe latie; weyan weyanlari nene joe tilatie.  
\v 25 Junto tsanque man tala man tala tenca canaminnan manjilaie. Junni yalari manjilaichinasanan, Páblori itsantie: 
\p —Matu to Isaíachi fiquica mantenhilaide! tie. Diosichi Tenca yaca matu to israelítalabe tsarasica cuenta quisa carinue.  
\v 26 Diosi Isaíaca israelítalachica ereto, yalabe itsanque cuenta quisa carinue: 
\q1 Nulari merátonan, numanan seque meralaquituchunae tinue. 
\q1 Nulari quiratonan, seque quiralaquituchunae tinue. 
\q1  
\v 27 Nula tenca catuchique nulachi tenca peleilaie tinue. 
\q1 Merátuchique nulachi punqui doica cuwenta jolajoe tinue. 
\q1 Quiratuchique nulachi caca doica cuwenta jolajoe tinue. 
\q1 Diosibe cayaituchique, nulachi tenca manseituchique tsanlainae tinue. 
\p  
\v 28 Junto Isaías pila chutecaca Pablo tsanque manpolarito, israelítalabe man fiquinan mancuenta quee: 
\p —Meralaquede! Diosichi sen fiquica israelita itonlacanan micarilaquinayoe tie Diosi jutsaca puyarimin joeque. Nula merátuminla josanan, yalari meralaquichunae tie. 
\p  
\v 29 Junni Pablo tsantinunsi, israelítala tala duque pacaanato manjilaie. 
\p  
\v 30 Junsi Pablo palu wata fecári Rómabi doratonan, tenca mánta ya arendaito chuminhe. Motiya yachica janari, seque facariminhe.  
\v 31 Yalabe cuenta quito Diosi mantananun tsachi bolonca pamin jominhe. Miya Jesucrístocanan cuenta quimin jominhe. Luratuto micarinaminhe; monantiya yaca deisa caritue.