\id 1TH - Colorado [cof] NT (Ecuador) - 1990 (2012 bd. ) 
\h Caque Tesalónicalachi 
\toc1 San Pablo Tesalónicalachi caque ereca jun pila 
\toc2 1 Tesalónicalachi 
\toc3 1 Ts 
\mt1 San Pablo Tesalónicalachi caque 
\mt2 ereca jun pila 
\ip \bd Caque fiqui:\bd* Tesalónica wa pueblo jominue. Lamari quelote jominue. Junni jun pueblobi chumin Jesucrístobe penenaminlari problema tan jominlanue. Uyanlari yalaca padeseisa carinaminlanue Jesucrístobe penenaminla jonun tenchi. Junsi Jesucristo numasi jamochi nechi manpatano jonunca palaque tenca camin jominlanue. Weyanlari Jesucristo moora manpatano jonari ¿ti quichun trabajaquino jun? tito, lan chumin jominlanue. Junni Páblori Corinto pueblobi chuto meraca jominue ya problema talaraeque. Junca meráto, in pila chutenue yalaca mantucarichun. Wata 50 tsansite in pila quinue. 
\c 1  
\p  
\v 1 La Pablo in pilaca nulachi erechun quinayoe Tesalónicabi chuminlachi. Nulari Miya Jesucrístochi tsachi bolon joto, yabe Apa Diosibe man junni jolajoe. La Páblori Silvánobe Timotéobe in pilaca erelaquinayoe. Apa Diosibe Miya Jesucrístobe nulaca laquirato pansi chularasa carisa tenjalaquee yape wepanatuto chularasa. 
\s1 Tesalónicabi chuminla seque nenaminla jonunca 
\p  
\v 2 Nula jeralelachi tenchi numasitiya Diosibe acradeseimin jolajoyoe. Diosibe rocainato, nulachi tenchinan perocaimin jolajoyoe.  
\v 3 Nulanan chiquilachi Miya Jesucrístoca tennato, duque seque quiminla joe. Diosica laquirato, yaca meráno tenfeminla joe. Peleituto Jesucrístoca quereito ya manpatano fecári yaca meralarae. Junni tsanla jonunca tenca cato, chiquilachi Apa Diosibe rocaimin jolajoyoe. 
\p  
\v 4-5 Junni acola, soquila, Diosi nulaca laquirae. Junni chiquilari nulaca Diosichi sen fiquica micarinato, fiquichisiri micarilaquitiyoe. Diosichi Tencanan pepasa carinasa, tsara merántsanque micarilaquiyoe. Nula Jesube cayailaichunaeque tenca canato micarilaquiyoe. Tsanque miilaiyoe Diosi nulaca wenteca jonunca. 
\p Nulanan miralarae chiquilari nulachite niyaque nenalaranunca. Junni chiquila nulachi tenchi seque nenanan,  
\v 6 nulanan chiquila cuwenta ilaie. Junto nulari Diosichi fiquica meráchun duque padeseilaie. Tsanhinasatiya, Diosichi Tenca nulaca ayudaie yape ya fiquica son tito meralaquisa. Tsanque seque meránato, chiquila cuwenta, Miya Jesucristo cuwenta, nenamin ilaie.  
\v 7 Junni uyanlanan nulaca micato, yalanan Jesucrístobe seque nenanunca fécari miilainue. Macedonia tobi, Acaya tobi jerale Jesucrístobe cayaica junla tsanque jera micalaquinue.  
\v 8 Junni nula Macedonia tobi chuminla jonana, jerale nulachi tobi, junsi Acaya tobinan, Miya Jesuca paca fiqui mera joe. Junni junbisiri mera itoe; jerale totenan nulaca mera joe nula Diosibe cayaicala joeque. Junni chiquilari yalabe nulaca natiya pano itolajoyoe.  
\v 9-10 Chiquila pachinasanan, yalari chiquilabe caquenan paminla joe. Nulaca itsantiminla joe: Nula chiquilaca seque facarito, epe diosi joe tinunlaca purato, tsa Diosibe cayaicala joe timinlae. Amana tsarasica sonnamin Diosibe mantaito nenaminla joe timinlae. Yachi Nao Jesuca meralarae timinlae yape jamochi nechi manpatasa. Ya Jesús puyacaca Diosi mansoncarinue. Yari se larimin joe yape Diosi seitonlaca casticaquinato chiquilacari casticaquitusa. Junni nulaca meráminla tsanque chiquilabe cuenta manpolariminla joe. 
\c 2  
\s1 Pablo tesalónicalabe beco manpato, tsanque micarimin jomanyoe tinunca 
\p  
\v 1 Acola, soquila, nula miralaranae chiquila nulachica jato, niyaque micariminla jonunca. Epele micarituminlayoe.  
\v 2 Diosichi sen fiquicari micariminlayoe. Filipos pueblobi seitonlari chiquilaca jelepochique tenfelaie. Nula miralaranae chiquila junbi duque padeseilaieque. Junni tsanque padeseinasatiya, Diosi chiquilaca sonba tenca suwae yape nulacanan yachi sen fiquica micarilaquisa.  
\v 3 Epele micarilaquitiyoe; seiton suwachique micaritulajoyoe; encanato micarituminlayoe.  
\v 4 Tsarasica pato micarimin jolajoyoe. Diosi chiquilaca se tito, chiquilachi mantá cuwae yape yachi sen fiquica micarilaquisa. Jun tenchi tsanque micariminla joyoe. Tsachilari sen joe tinun fiquica micarituminlayoe. Diosi sen joe tinun fiquicari micariminlayoe. Ya chiquilachi tencaca miimin joe.  
\v 5 Nulanan chiquilaca miralarae. Uyan tsachila amico ichiqueri seitonlaca sen joe timinla joe. Yalari cala cachiqueri micariminla joe. Chiquilari tsanque seitonqueri micarituminlayoe. Diosi chiquilaca mirae tsanlaquitununca.  
\v 6 Crístochi mantá tanla joto, chiquilaca respetailaisa mantano podeino jominla joinhie. Tsan jotonan, chiquila tsachilaca tsanque mantatulajoyoe. Nin nulacanan, nin uyanlacanan tsanque mantatuminlayoe.  
\v 7 Aman ayan yachi tsotsoca nalalaca seque cuidainun cuwenta, chiquila nulaca tsanque uraraque cuidailaiyoe.  
\v 8 Nulaca duque laquirato, Diosichi sen fiquica micaritobi, junsi chiquilachi tencacanan nulachi epe cuwano munarano jominla joinhie. 
\p  
\v 9 Nulabe sen jominlayoe. Mantenhilaide! Nulaca Diosichi sen fiquica micarinato, nulaca ticanantiya panhalaquitiyoe. Ti munaranuncatiya cachique chiquilanan quepen, malon trabajaquimin jominlayoe. Duque tenfemin jominlayoe yape nulari chiquilachi ticanantiya cuwano itolajosa.  
\v 10 Nula Jesucrístobe cayaica junla chiquilaca miralarae. Diosinan chiquilaca mirae. Yachi joto, nulabe sen jominlayoe. Monantiya culpa quituntsanque nenaminlayoe.  
\v 11 Nula miralarae chiquila nulachi apa cuwenta jominlaeque. Nula manca mancaca apa cuwenta payin, sonba tenca suwan, urara micarin, quimin jominlayoe.  
\v 12 Diosi nulaca yabe cayaisa ticae yape ya mantananun tsachi bolonbi pewilaisa, yape ya cuwentanan sen jolajosa. Junni yari nulabe duque sen jonan, nulari Diosichi sen tsachila jonola joe. Junni chiquilari tsanque seque nenalarasa payimin jominlayoe. 
\p  
\v 13 Junni nula chiquilachi fiquica meráto quereilaie. ¿Ya fiqui Diosichi fiqui joco? Junni nulari jun fiquica tsachilachi fiqui itoe tito, Diosichi fiquie tito, quereinilaie. Jun tenchi Diosibe numasitiya acradeseiminla joyoe. Jun fiquica meráto quereito, seilainae.  
\v 14 Junto acola, soquila, nulanan Jesucrístochi tsachila joto padeseilaie Judea tobi chuminla cuwenta. Yalari Jesucrístobe cayaito, Diosichi bolon tsachila ilaie nula cuwenta. Junni nulachi to tsachila nulabe seiton jonun cuwenta, israelítala yalabenan jun tsanquenan jominlae. 
\p  
\v 15-16 Israelítalari seitonque nenalarae. Miya Jesuca toten, israelítala talanan Diosichi mantate paminlaca toten, chiquilabe duque seiton jun, Diosi munaratununca quin, quiminla joe. Chiquilaca pa jolajoe yape israelita itonlaca micarilaquitusa. Israelita itonlaca se larisa carituchique, chiquilaca tsanque pasuwalaquinae. Tsanquinato, piyanle tsachilachi contra patilainae. Duque culpa ilainae. Junni Diosi duque wantainaminnan, ina michi culpa icaca casticaquichunae. 
\s1 Pablo Tesalónicabi chuminlaca manquirano munarayoe tinunca 
\p  
\v 17 Junni acola, soquila, amana nulaca numari fecári manquiratuto laquiilaiyoe. Juntonan, nulaca manquiratutonan, nulaca duque tenhiminla joyoe. Tsanhinatonan, nulaca chiquilachi cale fécari duque manquirano munaralarayoe.  
\v 18 Juntonan nulachi minu jino muquinasanan, natiya jino capodeilaitiyoe. La Pablo duque neca jichique tenfeyoe. Junni jino tenfenaminlaca Satanari chiquilaca porequiniquee.  
\v 19 Junni meralaquede! Chiquilachi Miya Jesucristo manpatano mate yachi cale wirurasa, nulacanan junte pewiruralarasa tenjae. Chiquila junca meralarayoe. Nulaca junte manquiranato, duque son tito manquiralaqueyanae chiquila nulaca ayudaicalayoe tito.  
\v 20 Nulaca tenca canato, Diosica duque seque pato, son timinlayoe. Jun tenchiri nulaca quirabi jino muquilaquee. 
\c 3  
\p  
\v 1 Junni nula tenchi nantari laquiino muquetuca jominhe. Junni chiquilari nulachica jino podeituto, Atenas pueblobi puraito,  
\v 2 aco Timotéoca ereca jominlayoe. Yari Crístoca paca sen fiquica micarimin joto, Diosibe seque mantaimin joe. Nulaca sonba tenca suwasa yaca ereca jominlayoe yape nula fe quereilaisa. Yari nulaca payibi jica jominhe  
\v 3 yape nula padeseinatonan, monantiya Jesuca quereino peleilaitusa. Nulari miralarae padeseinola joyoeque.  
\v 4 Nulabe cachuminnan palaquiyoe jera Jesucrístobe penenaminla padeseinola joyoeque. Chiquila tsanque paca josanan, jun tsanquenan patilaiyoeque miralaranae.  
\v 5 Tsan josanan yucan seiton quisa carichique tenfemin joe. Junni la wepanato tenca canamanyoe pansile ya nulaca peleisa carinueque. Tsanque peleica jomanpari, chiquila nulaca epenan micarica jono jominla joinhie. Junni nulaca miituto wepanato, Timotéoca ereyoe yape nulaca niyaque quereiminla jonunca manmiibi jisa. 
\p  
\v 6 Junni amanari pansi manjoyoe. Timoteo chiquilachica manjato cuenta quee. Nula Diosica duque tennato, nula tala laquiracaalaquito, seque chularae tie. Chiquilacanan laquirato mantenhiminla joe tie. Chiquila manquirachi tica cuwentanan, nulanan chiquilaca manquirachi latinae tie.  
\v 7 Junni chiquilari duque padeseinatonan, jun fiquica merasi son tilatiyoe. Nula duque seque quereilainaeque meráto, chiquila duque pansi jolajoyoe.  
\v 8 Nula Miya Jesube seque nenanari, chiquilari chiquilachi tencabi son timinlayoe.  
\v 9 Nulachi tenchi Diosibe duque acradeseinola joyoe. Nulachi tenchi Diosichi cale duque son tilatinayoe. Juncanan Diosibe tsanquenan duque acradeseinola joyoe.  
\v 10 Quepen, malon, Diosibe duque rocaiminla joyoe nulaca cale quirachun. Nula caquereitununca quereisa carino muquilaquee. 
\p  
\v 11 Chiquilachi Apa Diosibe, junsi chiquilachi Miya Jesúbenan chiquilaca ayudaideque rocailainayoe nulachica jichun.  
\v 12 Chiquilari nulaca duque laquiralarayoe. Junto Miya Diosibe rocailainayoe yape nula talanan jun tsanquenan fécari laquiracaalaquisa. Nula talanan fécari laquiracaato, piyanlelacanan jun tsanquenan laquiralarasa tenjae.  
\v 13 Chiquilachi Miya Jesús manpatano mate yabe yachi jerale sen tsachilabe parejo manpatalaichunae. Junni chiquilachi Apa Diosibe rocailainayoe yape nulanan jun mate yachi cale tsara sen jolajosa. Sonban tenca suwasa rocailainayoe yape sen jolajosa, monantiya nulaca culpa quitusa. 
\c 4  
\s1 Diosica pansi josa carito nenalaranunca 
\p  
\v 1-2 Junni acola, soquila, nulaca numa micaricalayoe niyaque seque nenano jonunca yape Diosi nulaca miito son josa. Nulanan jun fiquica meráto nenalaranae. Junnasanan, Miya Jesuchi mantate nulaca payilaquinayoe yape fécari seque nenalarasa. Nulabe rocailainayoe tsanque nenalarana! tito.  
\v 3 Diosi nulaca nantanancari fe seque nenalarasa munarae. Seque nenato, uyan sonalabe o uyan unilalabe nosa seitonque nenasa munaratue.  
\v 4 Jeralela tencachique sonaca seque mantanola joe. Sona canato, Diosibe mantaito seque canola joe.  
\v 5 Diosibe penenatuminlari sona cato, delanocasiri tenca cato sona caminlae. Nulari tsanquira itolajona!  
\v 6 Monantiya yachi acolaca seiton quito encanatulajona! Chiquila nulaca wari payicalayoe tsanque nenaminlacari Diosi casticaquichunaeque.  
\v 7 Diosi chiquilaca cato, seitonque nenalarasa catucae; seque nenalarasa caya joe yape Diosichi tsachila nenalarasa.  
\v 8 In fiquica merátuchi timinlari fiquicasiri merátuchi timin itolajochunae; Diosicanan merátuchi timinla jochunae. Yari yachi Tencaca nulachibi wisa carinan, yaca merátuchi timinla jochunae. 
\p  
\v 9 Acola, soquila, nula laquiracaanola joyoeque miralaranae. Diosi nulaca junca micarie. Junto juncari pila quituntsan joe.  
\v 10 Junni nulari laquiraminla joda. Jerale Macedóniabi chuminlaca laquiralarae Jesucrístobe penenaminla tala. Tsanla josanan payilaquinayoe yape fécari laquirano tenfelaisa.  
\v 11 Fécari seque chuchique tenfelaina! Uyanlachi cosabi tede potulajona! Tedechi trabajaquilaquina! Wari mantacalayoe yape nula tsanque nenalarasa.  
\v 12 Junni tsanque nenalaranari, nulachi tinantiya falta itochunae. Junni uyan tsachilanan nulaca respetailaichunae. 
\s1 Miya Jesucristo niya quiraque manpatano jonunca 
\p  
\v 13 Acola, soquila, puyaca junlaca miralarasa tenjae. Jesucrístobe penenatuminla manca puyanari, yachi familiala, yachi amicola duque laquiiminla joe tsa mansonhino itoeque tenca cato. Aman nulari seque miraminla joto, yala cuwenta laquiilaituchunae.  
\v 14 Chiquila quereilaiyoe Jesús puyatonan mansonhica joeque. Junca quereimin joto, man fiquiman quereiminlayoe: Diosi Jesuca manpatasa carinato, Jesube penenaminlaca yabe pejasa carichunae. Jesús mansonhica joeque quereimin jotori, jun fiquicanan quereiminlayoe.  
\v 15 Junsi man fiquiman pachinayoe: Miya Jesús manpatano mate sonnan cajominlari puyaca junlaca caquenan lono itolajochunae. Miya Jesuchi mantate tsanlatinayoe.  
\v 16 Itsanque jochunae: Sonba mantá mera jochunae. Junsi mantá tan anjeli oticaya fiqui mera jochunae. Junsi Diosichi tutu mera jochunae. Tsanquinunsi Miya patsa jamochi nechi manpataniichunae. Junni Crístobe penenamin puyaca junlari casale mansonhilaichunae.  
\v 17 Tsanhinunsile casonnaminlanan yalabe pelayailaichunae. Jeralelaca cato, poyoca tanjichunae yape Miya Jesube poyote tulailaisa. Junto aman Miya Jesube numatotiya chuto polecaichunae.  
\v 18 Junni nula tala in fiquica tenca cato, seque payicaato chularana! laqui itolajochun. 
\c 5  
\p  
\v 1 Acola, soquila, Jesucristo numasi manpatano jonunca nulachi pila quituntsan joe.  
\v 2 Nulanan numa miralarae monantiya yari numasi manpatano jonunca miitolajoeque. Aman meralaquede! Monantiya miituminla joe numasi tarinpunla janola jonunca. Junni Jesucristo manpatano ma jun tsanquenan jochunae. Yaca quiraituchunae latinasanan manquiraichunae.  
\v 3 Jana na pun sonalaca tenhilaide! Yala moora sen jominnan quiyaiminla joe. Jun tsanquenan tsachila wepanatuto pansi chularayoe latinasanan, moora to yucapiyarino ma patichunae. Natiya se lono podeilaituchunae. 
\p  
\v 4 Nula mantimini yala cuwenta itolajoe. Nulachi tenca nemen cuwenta seiton itolajoe. Tarinlaca cuwenta wepanatuntsan jochunae.  
\v 5-7 Nulari Diosichi tsente nenato, tenca nemen nenatuminla joe. Nula tenca calaquede! Catsominlari quepen catsolaimanhe. Winan iminlari quepen winan ilaimanhe. Junni Jesucrístobe penenatuminlachi tenca jun tsanquenan jolajoe. Yalachi tenca catsoto, winan ica cuwenta jolajoe. Chiquilari tsanque nenalaratuntsan joe. Son cuwenta nenanola joyoe. Quepen nenaminla cuwenta itolajoyoe; malon nenamin cuwenta tsente nenaminlayoe.  
\v 8 Tsan jotori tenca tan nenantsan joe. 
\p Soldadola cuwenta jolajoichunae. Soldadola poloquin camisa, casco polarachunae isaichun. Tsan punlari pa jominlaca jeleralaratuchunae. Junni chiquilari jun soldadola cuwenta jolajoyoe. Diosica tennato, tsachilaca laquirato nenanola joyoe. Tsanque nenatori, poloquin camisa pun cuwenta jolajoichunae. Chiquilaca Diosi se larichunaequeri tenca cato nenantsan joe. Tsanque nenatori, yucanca jelenasa nenacaituchunae casco pun cuwenta joto.  
\v 9 Diosi chiquilaca wentenato, casticaquichunni wentetue. Chiquilachi Miya Jesucrístobe se lolaisa wentee.  
\v 10 Ya chiquilachi tenchi puyae yape casonnatonan, o puyaca jotonan, yabe sonnalarasa.  
\v 11 Junni nula tala sonban tenca suwacaalaquina! Tsanlaquinato, fécari tsanlaquina! 
\s1 Pablo Diosichi tsachilaca debi payinunca 
\p  
\v 12 Acola, soquila, Miya Jesucrístochi tsachila tala, weyan weyanlari mantá tanla joe. Yalari nulaca cuidainato payiminla joe. Aman nulabe rocailainayoe yalaca respetailainaque.  
\v 13 Nulaca seque cuidailainan, yalaca laquirato respetailaina! Junsi nula tala pacaatuto nenalarana! 
\p  
\v 14 Acola, nula tala itsanque nenalarana! Lan punlaca payilaquina! Pele tencalacanan sonba tenca suwalaquina! Cumana tenca junlacanan ayudailaina! Junsi tsachila niyan tilatinasatiya, pailaituna!  
\v 15 Seiton quinaminlaca nulanan beconan seiton quilaquituna! Numasitiya uyanlabe sen jochique tenfelaina! Nula tala laquiracaato nenalarana! Uyan jeralelabenan sen jolajona!  
\v 16 Numasitiya son tilatina!  
\v 17 Junsi numasitiya Diosibe rocailaina!  
\v 18 Nulaca niyan quilaquinasatiya, Diosibe acradeseilaina! Nulaca Jesucrístochi tsachila jolajonan, Diosi tsanque seque nenalarasa munarae. 
\p  
\v 19 Diosichi Tenca nulaca ticatiya quisa carichi tinari, yaca tina porelaquituna!  
\v 20 Diosichi mantate paca jun fiquica epe fiqui joe tilatituna!  
\v 21 Tsan jotonan, jerale fiquica sen joe titulajona! Seque meráto miintsan joe seiton fiqui jonunca o sen fiqui jonunca. Junni sen fiquicari meralaquina!  
\v 22 Titiya seitonari, meralaquituna! 
\p  
\v 23 Diosi chiquilaca pansi chusa carimin joe yape wepanatuto chularasa. Junni yabe rocainayoe yape nulaca jera se suwasa. Nulaca cuidaisa rocainayoe yape nulachi tencanan, nulachi pucanan, sen jolajosa. Se suwasa rocainayoe yape Jesucristo manpatano mate culpa iton jolajosa.  
\v 24 Diosi epele patumin joe. Nulaca yachi tsachila josa tito, yanan nulaca jera se suwachunae. 
\p  
\v 25 Acola, soquila, nulanan chiquilachi tenchinan Diosibe perocailaina! 
\p  
\v 26 Acola, soquila, Diosichi tsachila jolajoto, jeralelabe caforole mo tito saludaicaalaquina!  
\v 27 Jesucrístochi cale nulaca mantanayoe yape in pilaca jerale Jesucrístochi tsachilaca merása carilaquisa. 
\p  
\v 28 Chiquilachi Miya Jesucristo nulaca laquirasa rocainayoe. Tsanqueri joe.