\id 1PE - Colorado [cof] NT (Ecuador) - 1990 (2012 bd. ) 
\h Pédrochi Caque 
\toc1 San Pedro caque chuteca jun pila 
\toc2 1 Pédrochi 
\toc3 1 P 
\mt1 San Pedro caque 
\mt2 chuteca jun pila 
\ip \bd Caque fiqui:\bd* Jesucrístobe penenaminla duque padeseilainasa, Pedro in pila chutenue yalaca sonba tenca suwachun. In pilabi yalaca payinae niyaque Jesucrístobe seque nenanola jonunca. Bersiculo 5:13-bi quirato tenhintsan joe Pedro Babilonia tinun postobi nechi in pila erenueque. Juntonan nun puebloca Babilonia tinanunca miituntsan joe. Pansile Roma puebloca Babilonia tica jonhoe. Wata 62 tsansite in pila quinue. 
\c 1  
\p  
\v 1-2 La Pedro Jesucrístochi mantá tan joto in pilaca nulachica erechun quinayoe. Nulari in tote tsachila itolajoe; Diosichi to tsachila jolajoe. Juntonan amana nulari uyan tobi uyan tobi chularae. Weyanla Ponto tobi, Galacia tobi, Capadocia tobi, Asia tobi, Bitinia tobi chularae. Junte chuno jonan, Apa Diosi nulaca numari mántanan wenteno tenca caya joto wentenue. Diosichi Tenca nulaca sen suwato, Diosichi josa carinue. Nulaca wentenue yape Jesucrístoca meráminla josa. Yachi asanca nulachi tencabi araleto, jutsa piyarinue. Junni lari Diosibe rocainayoe yape nulaca duque laquirato quirasa. Diosibe rocainayoe yape nula natiya wepanatuto duque pansi chularasa. 
\s1 Diosica méraminla 
\p  
\v 3 Apa Diosica se tintsan joe. Yari chiquilachi Miya Jesucrístochi Apa joto, ya puyacaca mansoncarinue. Yaca mansoncarito, chiquilacanan duque laquirato yachi nalala isa carinue. Junni chiquilari yachi nalala joto, yaca meralarayoe chiquilaca jamochi pansi sonnasa carichunaeque.  
\v 4 Yachi nalala joto, duque senca erensia cuwenta canola joyoe. Tsara sen erensia jochunae. Numatotiya yucapiyatun, unica itun, jochunae. Nulachi tenchi jamochi se rae.  
\v 5 Junni nulari Diosica tennanan, nulaca to yucapiyarino ma fecári cuidaichunae yape jun erensia tsanca calaquisa. Numari jera seca joe jun mate nulaca piyanlelachi cale jera se larichun. 
\p  
\v 6 Junca nulari duque son jolajoe. Amanari Diosichi tsachila joto, moora niyaquetiya padeseiminla joe. Tsan jotonan, jun erensiaca son timinla joe.  
\v 7 Aman nulachi tencari oro cuwenta joe. Oro chibaito piinan, petse lomanhe. Junni nulari Jesucrístochi tenchi padeseinasa, nulachi tencabi nechi jutsari petse cuwenta lochunae. Junni oro duque sen jotonan, yucapiyamanhe. Diosica tennano mantimini óroca fécari sen joe. Jesucristo manquiraino mate tsachilari tenhilaichunae nulari yaca quereimin jominlanueque. Quereiminla jonunca tenhito, nulaca respetaito seque pato, tsara seque quiminla joe tilatichunae. 
\p  
\v 8 Nulari Jesucrístocari quiratuminnan laquiralarae. Junsi quiratuminnan yabe cayaicala joe. Yabe cayaica joto, patuntsancari duque son timinla joe.  
\v 9 Junni yabe cayaica jonun tenchi nulachi tencaca se larichunae. 
\p  
\v 10-11 Matu mate Diosichi mantate paminlari junca cuenta quito, Diosi nulaca laquirato se larichunae latinue. Junsi Jesucrístochi Tenca yalachibi wito, cuenta quisa carinue. Junni yachi mantate cuenta quinato, itsanlatinue: Se larimin tsachi padeseitobi, tsara uraran mantá tan ichunae latinue. Junni tsantinatonan, yalanan miitominlanue mo numasi tsanhino jonunca. Junca miichi tinaminlanue. Tsachilaca se larino jonun fiquica duque miichi tinaminlanue.  
\v 12 Junni Diosi yalaca miisa carinue jun fiquiri yalachi tenchi itominueque, chiquilachi tenchi jominueque. Nulari wari ya fiquica meracala joe. Diosichi Tencari jamochi nechi ereca jun patato tsachilabe panue yape jun sen fiquica nulabe cuenta polarilaquisa. Jun sen fiquica anjelilanan miino muquee timinla joe. 
\s1 Sen tenca tanla 
\p  
\v 13 Junni seque tenca cato, sonban tenca ilaina! Jesucristo manquiraitobi, nulaca laquirato seque quichunae. Junni juncasiri tenca cato nenalarana!  
\v 14 Matunan Diosichi fiquica miitoto, nulachi tenca munateri nenato, seitonque nenamin jominlanue. Amanari tsanque nenatuntsan joe. Merámin nalala cuwenta sen jolajona!  
\v 15-16 Diosi patsanan nulaca yabe cayailaide! tica joe. Junto yachi Pilabi itsanque chuteca joe: Diosi tsara sen joto, nulacanan ya cuwenta tsara sen jolajona! tieque chuteca joe. Junni Diosi nulabe tsantica jonan, nulanan tsanque seque nenalarana! 
\p  
\v 17 Diosi jeralelaca man parejori miimin joe. Junni jeralelaca man parejonan miimin joto, sen jominlacari se tichunae; seiton jominlaca se tituchunae. Junni yaca nulachi Apa joe titori, yaca jele nenalarana! ya Apachi toca lono fecári.  
\v 18 Junni seque nenachun in fiquica meralaquede! Nulachi tsa apalari Diosica tennatuto, tiri cuwenta epele nenanirano micarica jominlanue. Junni Jesucrístori nula epele nenaminlaca manse larinue. Orochinan, calachinan pacara quito se laritunue. Oronan calanan mica jotonan, yucapiyamanhe.  
\v 19 Crístori nulaca yachi asanchi se larica joe. Matu mate jutsa tenchi opisa nachi asanca larino jominue. Quiyanpun iton, bichi iton, sen opisa nácari totenun jominue. Junni Jesucrístori jun opisa na cuwenta yachi asanca larinue. Junni yachi asan nulaca se larimin joe yape epele nenalaratusa.  
\v 20 Diosi toca caquituminnan, yaca pato, puyano jochunae tinue. Junni to yucapiyarino ma quelo inasa, Cristo nulaca laquirato jamochi nechi patanue nulachi tenchi puyachun.  
\v 21 Junni Diosiri yaca mansoncarito, tsarasi uraran mantá tan suwanue. Junni nulari ya puyato mansonhinun tenchi Diosibe cayaicala joe. Tsanque Diosica tennato meralarae yape se quisa. 
\p  
\v 22 Tsarasi pacaca meráto, nulachi tenca manseilainue. Jesucrístobe pecayaica junlaca laquirachun manseilainue. Junto beco beco tsarasica laquiracaalaquina!  
\v 23 Nula Diosibe cayaica joto, casanle nechi na manhica cuwenta jolajoe. Uyan quiraque na manhicala joe. Puyamin ni cuwenta itolajoe; puyatumin ni cuwenta jolajoe. Diosichi fiquica meráto, yachi nalala icala joe. Yachi fiquiri sonban joe Diosibe sonnasa carichun.  
\v 24 Numatotiya jeraituchunae. Jun fiquica Diosichi Pilabi itsanque chuteca joe: 
\q1 Jerale tsachila lapa cuwenta moora puyamin jolajochunaeque chuteca joe. 
\q1 Tsaracari mantá tan tsachila jotonan, lapa luli cuwenta moora jeraiminla jochunae. 
\q1  
\v 25 Miya Diosichi fiqui mantimini numatotiya joto polechunaeque chuteca joe. 
\m Jun fiquiri nulabe numa cuenta quica jun sen fiqui joe. 
\c 2  
\p  
\v 1 Junni natiya pacaalaquituna! Niyaquenantiya natiya encanalaquituna! Nene pato, fe sen joyoe titulajona! Uyanla nulaca feinari, junni paitulajona! Quiranilaquina! Uyanlaca natiya yucacuratulajona!  
\v 2-3 Nulari Diosichi fiquica nasiri miito, Diosica sen joeque miicala joe. Junni amanari tsotsoca nalala cuwenta jonola joe. Nalalari sen cupi duque munaraminla joe tenca tan uwaichun. Junni nulari jun tsanquenan Diosichi sen fiquica munaralarana! fe seque miito se lochun. 
\s1 Son su cuwenta jonunca 
\p  
\v 4-8 Jesucrístobe cayaicala joto, Diosi chunun ya cuwenta jolajochunae. Diosichi Pilabi matu tote Jesucrístoca itsanque pato pila chuteca joe: 
\q1 Quiralaquede! Diosiri israelítalachibi ya quichun su cuwenta tsoreno joyoe tie tinue. 
\q1 Diosi jun suca duque mica sen su jochunae tie tinue. 
\q1 Jun suca tsorechun wentecayoe tie tinue. 
\q1 Junto ya quichun fécari munaranun su cuwenta jochunae tie tinue. 
\p Junni Diosi tsanque suca cuenta quinato, Crístoca tsantinaminue. Yari son su cuwenta joe. Jun tenchi Diosichi Pilabi itsanquenan chuteca joe: 
\q1 Yabe cayaiminlari lu tituminla jochunaeque chuteca joe. 
\p Nulari yabe cayaicala joto, yasiri duque sen joe timinla jochunae. Uyanla mantimini Jesucrístoca quereituto, yaca telaquepolaquinue. Jun tenchi Diosichi Pilabi Jesucrístoca su tito itsanque chuteca joe: 
\q1 Suca ya quiminlari jun suca quirato, seitoe tito, telaquepolaquichunaeque chuteca joe. 
\q1 Tsan josanan, ya quichun fécari munaranun su cuwenta jochunaeque chuteca joe. 
\m Junni suca telaqueponun cuwenta Jesucrístoca quereituto munaratiyoe latie. Tsan josanan Diosiri Jesucrístoca wenteto, tsara sen joe tinue. Diosichi Pilabi chuteca jominue yalari quereituminla jochunaeque. Itsantinue: 
\q1 Jun suri quepoisa carimin su jochunae tinue yape quepoilaisa. 
\p Junni Diosichi Pilaca merátuto quepoiminlae. Matute tsanhichunae tica josa, jun tsanquenan patinue. Junni nulanan son su cuwenta jonola joe. Aman jana suca ya quinun joe. Junni nulanan layaito, Diosichi ya cuwenta jolajochunae yape nulachibi chusa. 
\p Junni man talaman cuenta quilaquisa! Diosi nulaca yachi sen patelela suwanue. Patelelari Diosica se tito, yachi ticatiya epe cuwaminla joe. Aman nulari jeralela patelela joto, nulachi tencacanan Diosichi cuwalaquichunae. Jesucrístochi mantate tsanque cuwanari, Diosi se joe tichunae. 
\s1 Diosichi tsachila niyaque nenanola jonunca 
\p  
\v 9 Junni nulari tsara mantá tan sen patelela jolajoto, Diosi wenteca sen bolon tsachila jolajoe. Diosichi tsachila jotori, yari tsara se quimin joeque cuenta quinola jochunae. Yucanbe canenaminlanan, nemen minu cuwenta seitonque nenamin jominlanue. Junni Diosi nulaca nemenbi nechi manlaricato, yachi uraran tsenbi seque penenasa carinue.  
\v 10 Casale nulari Diosichi tsachila itominlanue; amanari Diosichi tsachila pejolajoe. Casaleri laquiratunun jominlanue; amanari Diosi nulaca laquirae. 
\p  
\v 11 Lanan nulaca laquirato payinayoe. Nulari in tote tsachila itolajoe; Diosichi to tsachila jolajoe. Junto Diosichi tobi chuminla cuwenta in totenan seque nenalarana! Uyan tsachilari yalachi tenca munate nenato, seiton quichi timinlae. Yalari seiton quinato, tencabi yucapiyaminla joe. Junni nulari tsanque nenatuchique tenfelaina!  
\v 12 Nulari Diosica quereituminlachi quelote chutonan, seque nenalarana! Nulari seque nenalarasanan, pansile nulaca seiton jolajoe tinilatichunae. Junni seque quinaminlaca quirato, Diosi yalaca tenhisa carino mate uyan tala palaquichunae. Jun mate Diosica duque seque panola jochunae nula seque quinun tenchi. 
\p  
\v 13 Mantaminlaca meralaquina! chiquilachi Miya Jesucrístochi tenchi. Nula jeralelaca mantamin miyaca fe merántsan jochunae.  
\v 14 Aman ya miyari uyanlacanan mantá tan suwamin joe. Manca tobi manca tobi mantasa timin joe yape seitonque nenaminlaca casticaquilaquisa, seque nenaminlacari sen jolajoe tilatisa. Junni ya mantaminlacanan merántsan jochunae.  
\v 15 Diosiri nulaca tsanque mantaca joe yape nulari ya mantá tanlaca meralaquisa. Junni seque nenato, tenca itonlaca nosa isa carilaquinachunae. 
\p  
\v 16 Peyun ituminlari patronbe mantaituto yalachi tenca munate pansi nenalarachunae. Junni nulanan tsanquenan pansi nenanola joe. Weyanla mantimini uyanlabe mantaitiyoe tito, seiton quito nenaminla joe. Junni yala cuwenta itolajona! Diosichi peyunla cuwenta jolajoyoeque tenca cato nenalarana!  
\v 17 Jeralelaca respetailaina! Acolaca, soquilaca laquiralarana! Diosica jeleralarana! Miyaca respetailaina! 
\s1 Jesucristo cuwenta padeseinunca 
\p  
\v 18 Peyunlari yalachi patronlaca respetaito yala panunca meránola joe. Seque mantaminlacasiri merátuntsan joe. Paito paminlacanan meránola joe.  
\v 19 Junni pansile seque nenamincanan patronla casticaquilaquichunae. Tsanlaquinari, Diosica tenca cato yaca wantainari, nulaca sen jolajoe tichunae.  
\v 20 Nula seiton quilaquinari, ¿niyaito casticaquituno junhun? Junni nula tsanque casticaito paituto wantaitori, sen tsachi joyoe titulajona! Aman seque quinamincanan nulaca epele casticaquinari, uyan quiraque joe. Yaca paituto wantailainari, Diosi nulaca sen tsachila jolajoe tichunae. 
\p  
\v 21 Diosiri nulaca tsanque mantanae yape padeseinanunca wantailaisa. Crístori nulachi tenchi padeseie. Junni junca tenca cato, ya cuwentanan nenanola joe.  
\v 22 Yari natiya jutsa quitumin jominue. Junsi nene patumin jominue.  
\v 23 Yaca yucacuralaquinasa, beconan patue. Casticaquinasanan, paito patue. Diosi seque miito casticaquimin joe tito, pansi jonijominhe.  
\v 24 Chiquilachi jutsa tenchi corosibi wiloito puyae. Yari chiquilachi jutsaca piyarichun puyae yape seque nenalarasa. Ya fudainun tenchi nula manseilaie.  
\v 25 Nulari opisa cuwenta epele topiyaca nenamin jominlanue. Topiyaca nenaminnan, nulachi tencaca mantato cuidaiminchica manjalaie. 
\c 3  
\s1 Unilalacanan, sonalacanan payinunca 
\p  
\v 1-2 Sonalanan tencachique unilalabe mantainola joe. Junni yalachi unilala weyanlari pansile Diosichi fiquica merátuchi timin jotonan, yalachi sonalaca seque nenaminlaca quirato Jesucrístobe cayainilaichunae. Nula sonalari respetaito seque nenaminlaca quirato, nulachi unilalanan pansile cayailaichunae payitusanan.  
\v 3 Junni moso sonala jono muquilaquinari, jamoleri moso itolajona! Aca jera moso suwan, óroca quica jun win winquin, uraran tsanpa pun, quitori, jamoleri moso jolajochunae.  
\v 4 Man malon fecáriri moso ilaichunae; junteri poleniichunae. 
\p Nula mantimini uyan tala moso ilaina! Paituto, seque tenca calaquina! Tsanquitori, jamoleri moso itolajochunae; tencabinan moso jolajochunae. Diosiri junca tsara se joe tichunae.  
\v 5 Matu mate Diosibe penenamin sen sonalari yalachi unilalaca meráminla joto, tsanque moso jominlanue.  
\v 6 Sara tinun sona tsan jominue matute Abrahanchi sona. Yari Abrahanbe merámin joto, chiqueca mantamin joe tinue. Junni nulari natiya jeleratuto seque nenatori, ya sona cuwenta jolajochunae. 
\p  
\v 7 Unilalanan nulachi sonalaca seque tenca tan nenalarana! Diosi sonalacanan laquirato, yalacanan numatotiya jamochi sonnato polesa carichunae nulaca cuwenta. Jun tenchi sonalaca fe cumana jolajoe tito, yalaca seque cuidailaina! Tsanquitunari, Diosibe rocainasa merátuchunae. 
\s1 Seque quinun tenchi padeseino jonunca 
\p  
\v 8 Junni jeralelabe man fiquiman pano muquee. Man junni tenca calaquina! Laqui jominlabe pelaquiilaina! Acola tala cuwenta beco beco laquiracaalaquina! Weyanlaca fe joyoe tituto, laquiramin tenca jolajona!  
\v 9 Seiton quiminlacanan beconan seiton quitulajona! Yucacuraminlacanan beconan yucacuratulajona! Te, uyan quiraque nenalarana! Diosiri nulaca seque quichun cayaisa tie. Junni nulanan uyanlachi tenchinan Diosibe rocainola joe yape yalacanan ticatiya seque quisa.  
\v 10 Diosichi Pilabi junca itsanque chuteca joe: 
\q1 Seque pansi sonnano muquinari, tencabe nenalarana! tinue seitonque patuchun. 
\q1 Nene patulajona! tinue. 
\q1  
\v 11 Seiton quinanunca jera telaquepoto, seque nenalarana! tinue. 
\q1 Pataatuchique tenfelaina! 
\q1  
\v 12 Miya Diosiri senlaca sele cuidaichunae. 
\q1 Tsanque seque nenato yabe rocailainari, meráchunae tinue. 
\q1 Seitonlaca mantimini paimin joe tinue. 
\m Diosichi Pilabi tsanque chuteca joe. 
\p  
\v 13 Junni seque nenachique tenfelainanari, tsachila nulaca pailaituchunae.  
\v 14 Junnasanan, pansile seque nenanun tenchi casticaquilaquinari, pansi jolajochunae. Jun tenchi paiminlaca jele tituto, wepanatulajona!  
\v 15 Jesucrístoca Miya joeque seque tennalarana! Pansile weyanlari nulabe panhalaquichunae ti quichun Jesucrístobe cayailaiyunque. Tsanlatinari, tuca tenca calaquina! niyaque beconan manpano jonunca. Fe joyoe tituto, respetaito, cuenta jera quiniquintsan jochunae.  
\v 16 Junni Jesucrístoca tenca calaquito, nulaca culpa quituntsanque seque nenalarana! Junni nula Crístochi tsachila joto seque nenaminlaca quirato, epele yucacuraminlari luilaichunae.  
\v 17 Aman pansile Diosi nulaca padeseiniisa tichunae. Tsan jonari, seiton quinun tenchi padeseitulajona! Padeseinola jotori, seque quinun tenchi padeseilaina! Ya fe se jochunae. 
\p  
\v 18 Jesucrístori jun tsanhinue. Sen jotonan, jerale seitonlachi tenchi puyanue yalachi jutsaca piyarito Diosibe cayaisa carichun. Yachi pucari puyaca josanan, Diosichi Tenca yaca mansoncarinue.  
\v 19 Junto Diosichi Tencachi mantate doramin puyaca junlaca meracaribi jica jominue.  
\v 20 Ya puyaca junla matu mate Diosica merátumin jominlanue. Jun mate Diosi yalaca casticaquituto, duque méraminue Noé barco quinasanan. Jun barcobi ochuca tsachilasiri mapiya mate se lolainue.  
\v 21 Pibi mumunhiminlari jun cuwenta se lolaichunae. Junasanan mumunhinun piri to midicaca cuwenta jutsaca mantsaletumin joe. Mumunhinaminlari Diosibe rocaiminla jochunae culpa iton joyoeque tenhichun Jesucristo mansonhica jonun tenchi.  
\v 22 Crístori jamochi loto, Apa Diosichi tsa tede nanchi mantato pechue. Junni jerale jamochi nenaminla, anjelilanan, mantá tanlanan, yabe mantaiminla joe. 
\c 4  
\s1 Jutsaca telaqueponola jonunca 
\p  
\v 1-2 Aman tsachi pucari Diosichi tenchi padeseica junlari jutsaca telaquepoca junla jochunae. Junto puyano fecári tsachilachi mite nenatuto, Diosichi tenca munate nenano podeilaichunae. Junni Crístochi puca padeseinun cuwenta, nulanan jun tsanquenan padeseino tenca calaquina!  
\v 3 Nulari Diosichi tsachila caituminnan, seitonque nenamin jominlanue uyanla cuwenta. Leyan sona tan, tenca munatenan nenan, winan in, lupiyayan tin nenan, seiton fiesta quin, quito nenaminlanue. Jelenquiran molde quito, yaca diosi joe tito se timin jominlanue.  
\v 4 Junni tsanque canenaminla nulaca wepanaminlae. Niyaito tsanque nenatumin icalayunque panhato wepanaminlae. Wepanato, junsi nulaca seiton tito yucacuraminla joe. 
\p  
\v 5 Juntonan nulari yalaca natiya tennatulajona! Manca mate yalari niyan quica jonuncatiya Diosibe jera cuenta quilaquichunae. Diosiri jeralelaca tsanque miichunae casticaquintsan jonunca. Cason jominlacatiya, o numa puyaca jominlacatiya, miiniichunae.  
\v 6 Jun tenchi puyacalabenan sen fiquica meracarinue. Junni jerale tsachila cuwenta yalachi puca yucapiyaca jotonan, yalachi tenca Diosi cuwenta casonnalarachunae. 
\s1 Diosichi mantate seque quino podeiminla 
\p  
\v 7 To jeraino ma queloinae. Jun tenchi tencabe nenato, seque tenca calaquinana! nula Diosibe rocaino podeilaichun.  
\v 8 Junni seque tenca cantsan fiquica chutechinayoe: Nula tala tsarasi laquiracaalaquina! Nulari nulaca duque jutsa quiminlaca laquiratori, yalaca pailaituchunae.  
\v 9 Junsi sen tenca tato, yaca o ano finoca isapunla itolajona! 
\p  
\v 10-11 Diosiri nula jeralelaca man quiraque man quiraque poden suwaca joe. Junni nulari Diosibe man cosa quino podeitori, junca sele quinilaquina! Diosichi tenchi pánatori, seque panilaquina! ya fiqui Diosichi fiqui joeque. Poperelaca ayudainatori, Diosichi sonbabe seque ayudailaina! Beco beco tsanquito nenalarana! Tsanque nenalaranari, tsachila Diosica fécari se tilatichunae. Tsantino jochunae. Diosica duque se tito, numatotiya mantá tan joe tintsan jochunae. 
\s1 Jesucristo cuwenta padeseinola jonunca 
\p  
\v 12 Nulaca duque laquirato payichinayoe. Nula duque padeseino patinatori, wepanalaituna! Chiquilasiri tsanque padeseilainayoe tituntsan jochunae. Jerale Diosichi tsachila jun tsanquenan padeseicaichunae. Junto wepanalaituna! Nula padeseilainari, Diosi nulaca micarinachunae yape padeseinunca wantaito fe sen jolajosa.  
\v 13 Aman Jesucrístonan padeseinue. Junni nulanan padeseilaitori, ya cuwenta jolajochunae. Junni duque son jolajona! Aman inale jeralela Jesucrístoca sele quiralaquichunae tsarasi mantá tan jominca. Junni nula amana ya cuwenta padeseitori, jun mate fécari pansi jolajochunae ya cuwenta joyoe tito. 
\p  
\v 14 Nulaca Crístochi jonun tenchi yucacuralaquinari, son tilatina! Diosichi tsara sen Tencari nulachi tencabi perachunae. Uyanlari Crístoca seitonque paminla josanan, nulari yaca se timinla joe.  
\v 15-16 Junni Jesucrístochi tenchi padeseino jonuncasiri pánayoe. Tarintori, o tsachilaca totetori, o uyanlaca pasuwatori, o niyaquetiya seiton quitori, padeseicachiri padeseinola jochunae. Aman tsanque padeseinoca pátiyoe; Jesucrístochi tenchi padeseinocari pánayoe. Yachi tenchi padeseitori, natiya luratulajona! Jesucrístochi joyoe tito, Diosica duque seque pato, yabe acradeseinola joe. 
\p  
\v 17-18 Aman Diosi jeralelaca miino óra fechinae. Casaleri yachi tsachila patsaca miichunae. Diosichi Pilabi itsanque chuteca joe: Diosi miinasa, sen tsachila jominlatiya duque tenfenato se lolaichunaeque chuteca joe. Junni sen jominlanan tenfenato se lolainari, aman Diosica tennatuto jutsa quiminlari wari jelecari padeseilaichunaeque chuteca joe. Tsanque casaleri Diosi chiquilaca miichunae. Junto chiquilacanan miino jotori, yachi fiquica merátuminlacari fécari miito casticaquichunae.  
\v 19 Jun tenchi Diosichi mantate padeseino jotori, wepanalaituna! Seque nenato, Diosica tennana! yape nulaca seque cuidaisa. Yari nulaca quica joto nulaca pansituchunae. 
\c 5  
\s1 Jesucrístobe penenaminlaca payinunca 
\p  
\v 1-2 Jesucrístochi tsachila tala mantá tanlacanan payichinayoe. Diosichi tsachilaca cuidainola joe opisaca cuidaiminla cuwenta. Junni lanan nula cuwenta mantá tan pejoto, tsanque payinayoe. La Jesucristo padeseinaminca quiracayoe. Junni ina uraran mantá tan manquirainasanan, lanan yabe man junni pejoichunae. Junto nulaca payichinayoe. Nulari Diosichi tsachilaca laquirato, seque cuidainola joe cuidaino muquetue tituto. Encanato cala cachiqueri cuidaituntsan joe; Diosichi tsachilaca ayudaichunni yalaca cuidailaina!  
\v 3 Nulabe miiminlaca sonba mantato patron cuwenta itulajona! Yalabe seque nenalarana! Junni yalari Diosichi opisala cuwenta joto, nulaca quirato, tsanquenan seque nenalarachunae.  
\v 4 Aman Jesucrístori jerale Diosichi tsachilaca cuidaimin joe opisa tsacumin cuwenta. Junni nulari yachi tenchi Diosichi tsachilaca seque cuidailainari, yari manquiraitobi, nulacanan beconan seque quichunae yape numatotiya seque mantá tan joto polelaisa. 
\p  
\v 5 Junni mantaminlaca payisi, mosolacanan payichinayoe. Nulari unicalaca meralaquina! Junsi jeralelacanan itsanque payichinayoe: Monantiya fe jochi tituntsan joe. Uyanlacari fe jolajoe tintsan joe. Beco beco tsanque tenca cato nenantsan joe. Diosichi Pilabi junca itsanque chuteca joe: 
\q1 Fe joyoe timinlaca Diosiri paichunae. 
\q1 Fe joyoe tituminlaca laquirato ayudaichunaeque chuteca joe. 
\m  
\v 6 Junni Diosi duque sonban joto, nulaca niyantiya isa carinari, tsanhino muquetue titulajona! Tsantitulajonari, inale Diosiri nulaca fe josa carichunae.  
\v 7 Yari nulaca cuidainae. Junni yaca tennato, ticanantiya wepanatulajona! 
\p  
\v 8 Yucan nulaca pa joto, luquela cuwenta atide nenae niyanlacatiya mancato fichique. Jun tenchi seque tenca cato tencabe nenalarana!  
\v 9 Diosica seque tennato, yucanca merátuchique tenfelaina! Padeseinatotiya yucanbe mantaituchique tenfelaina! Jerale tótenan Diosichi tsachila nula cuwenta padeseilainae.  
\v 10 Junni nulari nasi padeseinunbi, Diosiri nulaca jera manse patarito, jera sonba tenca mansuwachunae. Nulaca laquirato, niyaquetiya se quimin joe. Junsi Jesucrístobe cayaisa ticae yape numatotiya yabe uraran tsente pechuto polelaisa.  
\v 11 Diosiri numatotiya mantamin joto poleno jochunae. Tsanqueri joe. 
\s1 Saludo erenunca 
\p  
\v 12 Silvano in pilaca lachi tenchi chutenae. Lachi tencari yari Diosica seque quereimin aco joe. 
\p In pila nacábiri nulaca payito, tuca cuenta quinayoe. Inni Diosi tsarasica paca fiqui joe tinayoe tsachilaca laquirato se suwamin joeque. Junni jun fiquica tennato, natiya peleilaituna! 
\p  
\v 13 Babilóniabi chumin Jesucrístobe penenaminlanan jera layaito, nulachi saludo erelaquinayoe. Chiquilanan nula cuwentanan Diosi wenteca jun jolajoyoe. Junni Márconan, lachi nao cuwenta joto, saludo peerenae.  
\v 14 Nulari duque laquiracaato, caforole mo tito saludaicaalaquina! Jerale Jesucrístobe cayaica junlaca pansi wepanatuto chusa tenjae.