\id 1JN - Colorado [cof] NT (Ecuador) - 1990 (2012 bd. ) 
\h Juanchi Caque 
\toc1 San Juan caque chuteca jun pila 
\toc2 1 Juanchi 
\toc3 1 Jn 
\mt1 San Juan caque 
\mt2 chuteca jun pila 
\ip \bd Caque fiqui:\bd* Wata 85 o 90 tsansite weyanlari duque palaque micarinaminlanue. Diosichi mantate micarinayoe titonan, yala tenca mánta epele tenca caya jun fiquica micarinaminlanue. 
\ip Itsanque micarinaminlanue: Jerale taquirano podeinun cosala seiton jolajoe timin jominlanue. To, tape, chide, pi, ano, chiquilachi puca, titiya seiton joe tinaminlanue. Espíritu cosasiri sen joe. Chiquilachi tenca, Diosi, anjelila, Diosichi to cosala, yalasiri sen jolajoe. Junni chiquilachi puca seiton jonari, numanan Diosichi tsachi ino podeituntsan jochunae. Junni tsan jonari, Jesucristo Diosi joto, tsachi itunue timin jominlanue. Tsachinan quiran ica jotonan, tsachi patsa itunue. Junsi chiquilachi puca seitonari, pucaca padeseisa carintsan jominue. Juntonan jutsa quitonan culpa tenhituntsan joe. Winan itori, wepanatuntsan joe. Tenca sen joto jutsa quituca joe. Seiton pucari jutsa quica joeque tenca cantsan joe tinaminlanue. O uyanchi sonabe catsotori, culpa tenhituntsan joe. Chiran pucari jutsa quica jotonan, tencari sen joto culpa itoe timin jominlanue. Ya seitonlari tsanque micarimin jominlanue. 
\ip Junsi Diosibe seque nenachun, yalasiri miranun fiquica estudiaito miintsan joe tinaminlanue. Junni Juan in pilabi yalachi seiton fiquica quereilaituna! tinae. Ya fiquica meráminlaca mantucarichun in pila quinue. Wata 90 tsansite in pila quinue. 
\c 1  
\s1 Jesucristo Diosibe sonnasa carimin fiqui joe tinunca 
\p  
\v 1-2 Casale casaleri tinantiya caitosanan, Cristo numa jominue. Yari Diosi niyan jonunca micarimin joto, Fiqui tinun mumun joe. Diosibe sonnasa carimin Fiqui cuwenta joe. Ya sonnasa cariminni quiraie. Chiquilari yaca quiraca joto, cuenta quinayoe. Yari numatotiya Diosibe sonnasa carimin joe. Junto Apa Diosibenan pechumin joto, chiquilabenan quiraie. Junca nulabe cuenta quinayoe. Yaca merán, cacachi quiran, tedechi taquiran, quilaquiyoe.  
\v 3 Yaca quirato, yaca meráto, nulabe cuenta polarinayoe yape nulanan chiquilabenan man junni jolajosa. Chiquila mantimini Diosibenan yachi Nao Jesucrístobenan man junni jolajoyoe.  
\v 4 Junni pansi jolajosa itsanque pila chutenayoe yape natiya laqui itolajosa. 
\s1 Tsente cuwenta nenano jonunca 
\p  
\v 5 In fiquica Crístobe miito nulabe manpolarinayoe: Diosiri tsara sen joe tsen cuwenta. Natiya nemen itoe.  
\v 6 Tsachilari nemente cuwenta seitonque nenatonan, Diosibe man junni joyoe tilatitori, nene pun jolajochunae. Tsarasi paca fiquica tennatuto nenaminla jochunae.  
\v 7 Diosi mantimini tsente chue. Junni tsachilanan tsente cuwenta seque nenatori, yabe man junni jolajochunae. Chiquilari tsente nenalaranari, Diosichi Nao Jesucrístochi asan chiquilachi jutsaca jera tsalemin jochunae. 
\p  
\v 8 Jutsa itoyoe timinlari tsarasi paca fiquica miitoto, palaque tenca caminla jochunae.  
\v 9 Chiquilachi jutsaca Jesucrístobe jera panilaquinari, yari jera piyarichunae. Yari seque quimin joe. Junto chiquila seitonque tenca cananunca jera tsalechunae. Tsanno joe; nene patumin joe.  
\v 10 Juntonan Jutsa quitucayoe timinlari Diosica nene pun curaniquito, yachi fiquica merátuminla jochunae. 
\c 2  
\s1 Jesucristo chiquilachi abocado jonunca 
\p  
\v 1 Junni lachi nalalaca cuwenta payinayoe. Jutsa natiya quitusa payinato, in pilaca quinayoe. Juntonan jutsa quitori, tsara sen abocado talarayoe. Jesucristo chiquilachi abocado jochunae Diosichi cale.  
\v 2 Yari chiquilachi jutsa tenchi puyaca jominhe. Juntonan chiquilachi tenchisiri itominue. Piyanlelachi tenchi puyaca jominhe. 
\p  
\v 3 ¿Juntonan niyaito miintsan jochunan? yachi tsachila jolajoyoeque. Yachi mantaca seque meráminla jotori, miintsan jochunae yachi tsachila jolajoyoeque.  
\v 4 Yachi mantaca merátuminnan yachi jolajoyoe timinlari nene pato yachi tsarasi fiquica merátuminla jochunae.  
\v 5-6 Aman Diosi pacaca seque meráminla mantimini yaca seque laquiraminla joyoe. Jesucrístobe penenamin joyoe titori, Jesucristo cuwenta nenantsan joe. Tsanque miinola joyoe yachi tsachila jolajoyoeque. 
\s1 Casan tala mantá 
\p  
\v 7 Acola, soquila, in pilabi nulachi tenchi casan mantaca chutetiyoe. Matu mantá joe. Nula casalebi nechi meraca fiquicanan, yacanan manchutenayoe.  
\v 8 Junni man quiraque patori, ya mantaca casan mantá tintsan jochunae. Jesucristo ya mantaca casanle nechi paca joe. Nulanan casanle nechi meralaquee. Tsanque mantá cuwato, nulachi tencabi jera tsen suwanae nemen jominca jera piyarito. 
\p  
\v 9 Junni acola talanan pa nenaminla jotonan, tsente nenamin joyoe latitori, nene paminla jochunae.  
\v 10 Acola tala laquiracaaminla mantimini tsente cuwenta nenalarachunae. Yalari jutsa quisa cariminla itochunae.  
\v 11 Acolaca pa nenaminla mantimini nemenbi cuwenta nenalarachunae. Nemenbi nenato, nunchi jino jonunca miitolajochunae. Nemenbi caca yucapiyaca jochunae. 
\p  
\v 12 Nalala, Jesucristo nulachi jutsaca piyarica jonan, nulachica erechun pila quinayoe.  
\v 13 Uwanla, tinantiya caitosanan, Cristo numa jominue. Junni nulari yabe cayaicala jonan, nulachica erechun pila quinayoe. Mosola, nulari yucanca fe locala jonan, nulachica erechun pila quinayoe. Nalala, nulari Apa Diosica quereiminla jonan, nulachica erechun pila quinayoe.  
\v 14 Uwanla, tinantiya caitosanan, Cristo numa jominue. Junni nulari yabe cayaicala jonan, nulachica erechun pila quinayoe. Mosola, nulari Diosichi fiquica meráminla joto sonban tenca joto, yucanca fe locala joe. Junnan nulachica erechun pila quinayoe. 
\p  
\v 15-16 In tote cosalaca laquiratulajona! Jerale tote chuminlari Diosica tennatuto seitonque nenalarae. Yalachi tenca munateri nenalarae. Uyanchi sonalaca munaito, jilu joto, quiratuntsanca quirato, nenaminlae. Junsi mantá tan jochi timinlae. Junsi oco ichi timinlae. Uyanlaca fe joyoeque tenca cato nenaminlae. Juntonan nulari tsanque nenanoca laquiratulajona! Tsanque seitonque nenanoca laquiraminla jotori, Apa Diosica natiya laquiratuminla jochunae.  
\v 17 Aman tori jeraino joe. Seitonque nenaminlari numatotiya yalachi tenca munateri nenato poleno podeilaituchunae. Deilaichunae. Diosica meráto nenaminla mantimini deino itoto, numatotiya sonnato polelaichunae. 
\s1 Epele micariminla 
\p  
\v 18 Nulari lachi nalala cuwenta laca meralaquede! To yucapiyarino queloinae. Junni nulanan meracala joe Crístoca pa pun miya jochunaeque. Amananan duque tsachila Crístoca pa nenalarae. Junbe miralarayoe to yucapiyarino queloinaeque.  
\v 19 Crístoca pa jun tsachilari Diosichi tsachilaca purato, chican lolainue. Junto Diosichi tsachila itominlanue. Diosichi tsachila jominla jomanpari, chiquilaca puratuto, chiquilabenan penenano cajominla jonhoe. Chiquilaca puranan, miintsan joe yala jeralela Diosichi tsachila itolajoeque.  
\v 20 Nula mantimini yala cuwenta itolajoe. Tsarasi micaricaca miralarae. Nula jeralela Diosichi Tencabe penenaminla joto, miralarae.  
\v 21 Junni nula miitolajonun tenchi in pilaca quitiyoe. Tsarasica jonunca miralarae. Tsarasi paminlari nene palaquituchunaeque miralarae. Jun tenchi in pilaca nulachica erechun quinayoe. 
\p  
\v 22 ¿Junni mola nene paminla jun? Jesuca Diosi wenteca jun Cristo tinun tsachi itoe timinlari nene paminla joe. Tsantiminlari Crístoca pa junla joe. Apa Diosibe yachi Naobeca laquiratuminlae.  
\v 23 Junto Diosichi Naoca laquiratuminla joto, Apa Diosibe cayaituminla jochunae. Diosichi Naoca laquiraminlari Apa Diosibe cayaicala jochunae. 
\p  
\v 24 Matu meraca Diosichi fiquica tenca cato nenalarana! Matu meraca fiquica tenca cato nenaminla jotori, Diosibenan, yachi Naobenan penenaminla jochunae.  
\v 25 Junnan Jesucristo chiquilaca numatotiya Diosibe sonnato polesa cariyanae tinue. 
\p  
\v 26 Aman weyanlari nulaca encanaquechique tenfelainae. Yalaca pila quinayoe yape yalari nulaca encanano podeilaitusa.  
\v 27 Nula mantimini Diosichi Tencabe jera sele miilainae. Yabe miica jotori, uyanlabenan miitutotiya sen jonijochunae. Yari nene patuto, tsarasica micarimin joe. Junni nulari yabe seque miito nenalarana! 
\p  
\v 28 Junni nulari lachi nalala cuwenta laca meralaquede! Crístoca puratuto penenalarana! ya manpatanasa luratuchun.  
\v 29 Yari sen joe. Yaca sen joeque mirato, man fiquiman miintsan joe: Seque nenaminlari yachi nalala jolajoyoe. 
\c 3  
\s1 Diosichi nalala 
\p  
\v 1 Seque meralaquede! Apa Diosi chiquilaca duque laquirato, yachi nalala jolajoe ticae. Junni tsanla joyoe. Junni uyanlari yaca miitotori, chiquilacanan miitolajochunae.  
\v 2 Nulaca laquirato payinayoe. Numa Diosichi nalala jolajoyoe. Juntonan Jesucristo manpatanasa niya quiraque jocaichunanque camiitolajoyoe. Incari miralarayoe: Ya quirainasa, chiquilanan yaca seque quirato, ya cuwentanan jocaichunaeque.  
\v 3 Jesucrístochi mantate tsanhino joyoeque tenca cato meralarayoe. Junni tsanque méraminlari ya cuwentanan seicala jochunae. 
\p  
\v 4 Jerale jutsa quiminlari Diosichi mantaca merátuminla joto, culpa talarae. Diosichi mantaca merátuminla jutsa quiminla joe.  
\v 5 Jesucristo jutsaca piyaribi patanueque, yari jutsa itoeque nulari miralarae.  
\v 6 Yaca telaquepotuto penenaminlari jutsa quede nenaminla itochunae. Jutsa quede nenaminlari yaca tsanle miitucala joe. 
\p  
\v 7 Junni nulari lachi nalala cuwenta meralaquede! Tencabe nenalarana! nene pánanunca quereituchun. Seque quimin tsachilari Jesucristo cuwenta sen tsachila jolajochunae.  
\v 8 Yucanni casalebi nechi jutsa quimin joe. Junni jutsa quimin tsachilari yucanchi jolajoe. Diosichi Nao mantimini yucan seiton suwacaca manse suwabi patanue. 
\p  
\v 9 Diosichi nalala itori, jutsa quito nenalaratuchunae. Tsachila Diosichi nalala jotori, yachi Apa Diosi cuwenta jolajochunae. Junni Diosichi nalala joto, jutsa quede nenano podeilaituchunae.  
\v 10 Tsanque miintsan jochunae mola Diosichi nalala jonunca, mola yucanchi nalala jonunca. Seque nenatuminlari Diosichi itolajochunae. Acolaca laquiratuminlanan Diosichi itolajochunae. 
\s1 Laquiraminla 
\p  
\v 11 Beco beco laquiracaanola joyoe. Ya fiquica nulari casalebi nechi meracala joe.  
\v 12 Junni matu to Caín cuwenta itonola joyoe. Yari yucanchi joto, yachi acoca totenue. Yari seitonque nenasa, yachi acori seque nenamin jominue. Junnan yaca paito totenue.  
\v 13 Lachi acola, soquila, laca seque meralaquede! Diosica tennatuminlari nulaca pa jonari, wepanatulajona!  
\v 14 Chiquilari Jesucrístochi tsachilaca laquiralarayoe. Junbe miralarayoe Diosichi minuca nenalarayoeque. Puyano jonun minuca purato, sonnano jonun minuse nenalarayoe. Laquiratuminlari puyano jonun minuse canenalarae.  
\v 15 Uyanlaca pa jominlari tsachilaca toteminla cuwenta jolajochunae. Aman tsachilaca toteminlari numatotiya Diosibe sonnato polelaituchunae. 
\p  
\v 16 Jesucristo chiquilachi tenchi puyanue. Junnan miralarayoe ya tsa laquiramin joeque. Junni chiquilanan uyan Jesucrístobe penenaminlaca laquiratori, yalachi tenchi puyano patinari, puyanola joyoe.  
\v 17 Junni nulachi acola o soquila tinantiya itoto padeseinanunca miitori, ticatiya cuwanola jochunae. Diosi cuwenta laquiraminla jotori, acola ticatiya munaranunca mirato, cuwanilaquichunae.  
\v 18 Lachi nalala cuwenta meralaquede! Fiquichisiri laquiratulajona! Uyanlabe sen joto, tsa laquiralarana! 
\p  
\v 19-20 Tsanque nenatori miicaichunae tsarasi jonunca tenca cato nenaminla joyoeque. Junsi pansile chiquilachi tencabi culpa tenhicaichunae. Junni tsanque seque nenamin jomin jonan, chiquilachi tenca Diosichi cale pansi manjochunae. Diosiri chiquilachi tencaca fe joto jera mirae. Junni Diosiri jera miraeque tenca cato, chiquilachi tencaca manpansi suwano podeilaiyoe Diosichi cale culpa tenhituchun. 
\p  
\v 21 Junni amicola, chiquilachi tencabi culpa tenhitutori, Diosibe luracaituchunae.  
\v 22 Junni yabe luratuto, ticatiya cuwasa rocaino podeilaiyoe. Junni yachi mantaca meráto nenaminla jonan, ticatiya cuwasa rocainunca cuwaniquichunae.  
\v 23 Yachi mantá mantimini itsanque joe: Beco beco laquiracaato, yachi Nao Jesucrístoca quereintsan joe. Aman Jesucrístonan jun tsanquenan mantanue.  
\v 24 Junni jerale Diosichi mantaca meráminla yabe penenalarae. Yanan yalabe penenae. ¿Aman niyaito miintsan jochunan? chiquilabe penenanunca. Yachi Tencaca chiquilachibi ereca joe. Junca tenhito miintsan jochunae. 
\c 4  
\s1 Seitonque micariminla 
\p  
\v 1 Nulaca laquirato payinayoe. Duque tsachilari nene pato, Diosichi Tencachi mantate micarinayoe tito nenalarae. Junni jerale micariminlaca quereituntsan joe. Casaleri yalaca miintsan jochunae Diosichi mantate paminla jonunca o yucanchi mantate paminla jonunca.  
\v 2 Junni itsanque miintsan jochunae mo Diosichi Tencabe micarimin jonunca: Jesucristo jamochi nechi patato tsachi ica junca quereiyoe timinlari Diosichi jolajoe.  
\v 3 Jesuca tsantituminlari Diosichi itolajoe. Crístoca pa jun miyabe penenaminla joe. Ya pa jun miya jono joeque nulari numa meracala joe. Junto tencabe nenalarana! Weyan micariminla yachi mantate numa micarilaquinae. 
\p  
\v 4 Lachi nalala cuwenta meralaquede! Nulari Diosichi jolajoe. Diosiri nulabe penenae. Yucanni yalabe penenae. Diosiri yucanca fe joe. Jun tenchi nulari seitonque micariminlaca fe locala joe.  
\v 5 Yalari Diosica tennatuminla joe. Junto Diosica quereituto, uyan quiraque micariminla joe. Junni Diosica tennatuminlari yalaca meralaquichunae.  
\v 6 Chiquila mantimini Diosichi jolajoyoe. Junni Diosica tennaminla chiquilaca meralaquichunae. Diosichi itonlari chiquilaca meralaquituchunae. Tsanque miintsan jochunae mo tsarasi paca fiquica meráchi timinla jonunca o mo nene paca fiquica meráchi timinla jonunca. 
\s1 Diosi laquirasa carimin jonunca 
\p  
\v 7 Nulaca laquirato payinayoe. Nulanan beco beco laquiracaalaquina! Diosiri laquirasa carimin joe. Laquiraminlari Diosica tennato, yachi nalala jolajochunae.  
\v 8 Diosiri laquirasa carimin jonan, laquiratuminlari Diosibe cayaica itolajochunae.  
\v 9 Diosi yachi mancari Naoca chiquilachi tenchi toca erenue yape chiquilari yachi sonbachi sonnalarasa. Junnan miintsan joe chiquilaca laquiraeque.  
\v 10 Diosi tsa laquiramin joe. Chiquila Diosica nasi laquirasanan, yari casalenan chiquilaca duque fe laquiraminue. Chiquilaca laquirato, yachi Naoca erenue yape chiquilachi jutsa tenchi puyasa. 
\p  
\v 11 Diosi chiquilaca tsanque laquiranari, chiquilanan beco beco laquiracaanola joyoe. Nulaca laquirato tsanque payinayoe.  
\v 12 Monantiya Diosica quiratucala joe. Juntonan beco beco laquiracaalaquinari, Diosi chiquilabe penenachunae. Yari tsarasi laquiramin joto, chiquila tala tsanquenan laquirasa carimin joe.  
\v 13 Yachi Tencaca chiquilachibi erenue. Junnan miino podeilaiyoe yabe penenalaranan, yanan chiquilabe penenaeque.  
\v 14 Apa Diosiri yachi Naoca erenue yape jerale tote chuminlaca se larisa yape yucan catusa. Chiquila Crístoca quiraminla joto, tsanque micarino podeilaiyoe.  
\v 15 Junni Jesuca Diosichi Nao joeque quereito paminlari Diosibe penenaminla jochunae. Diosi yalabenan penenamin jochunae. 
\p  
\v 16 Diosi chiquilaca laquiranunca mirato junca tennalarayoe. Diosiri laquirasa carimin joe. Laquiraminlari Diosibe penenalarachunae. Diosi yalabenan penenachunae.  
\v 17 In tote canenaminnan, Jesucristo cuwenta laquiraminla joyoe. Junni Diosica tsarasica laquiratori, natiya jeleracaituchunae to yucapiyarino mate.  
\v 18 Tsarasi laquiratori, jele ticaituchunae. Jele timinlari yalachi tencabi culpa talarayoeque tenca canato, numa tencabi padeseiminla jochunae. Tsarasi laquiraminla itolajochunae. Tsarasi laquiraminlari jele tituminla jochunae. 
\p  
\v 19 Diosi chiquilaca casale laquiranan, yacanan laquiralarayoe.  
\v 20 Junto Diosica laquirayoe timinlari yalachi acolabe pa tala nenaminla jotori, nene pun jolajochunae. Yalachi acolaca quiraminla jotonan, Diosicari quiratuminla jochunae. Junto yalachi acolaca quiraminla jotonan laquiratutori, Diosicanan laquiratuminla jochunae.  
\v 21 Diosi chiquilaca itsanque mantanue: Laca laquiraminla yalachi acolacanan laquiranola joe tinue. 
\c 5  
\s1 Jesuca Diosichi Nao joe tinunca 
\p  
\v 1 Jesuca Diosi ereca Cristo tinun joeque quereiminlari jeralela Diosichi nalala jolajochunae. Junni Apa Diosica laquiraminlari jerale Diosichi nalalacanan laquiralarachunae.  
\v 2 Diosica laquirato, yachi mantaca meráminlayoe. Junbenan miralarayoe Diosichi nalalaca tsarasica laquiralarayoeque.  
\v 3 Diosica laquiratori, yachi mantaca meracaichunae. Yachi mantate nenano tenfe itoe.  
\v 4-5 Junni Diosica tennatuminlari chiquilaca ya mantaca merátusa carichi timinla joe. Tsan josanan, jerale Diosichi nalalari ya seitonlaca merátuto, fe lono podeilaichunae. Fe lominlari Jesuca Diosichi Nao joeque quereiminla joe. Chiquilanan yaca quereito fe lominlayoe. 
\s1 Diosichi Naoca paca sen fiqui 
\p  
\v 6 Jesucristo toca patato mumunhinue. Junsi puyanue. Mumunhibisiri patatunue. Mumunhitobi, asan larito puyanue. Diosichi Tenca junca chiquilaca micarimin joe. Yari tsarasica pamin testico joe.  
\v 7 Junni Diosichi tobi pemanca testicola jolajoe. Casale Apa Diosi joe; junsi yachi Nao, ya Fiqui tinun, yanan joe; junsi yachi Tenca joe. Yala pemancala jotonan, mancari jolajoe.  
\v 8 Junni in totenan tsanquenan peman neca Jesucrístoca miintsan joe: Casale Diosichi Tencabe miintsan joe. Junsi Jesucristo mumunhica joeque tenca cato miintsan joe. Junsi Jesucristo asan larica joeque tenca cato miintsan joe. Jun pemancale nechi man junni miintsan joe. 
\p  
\v 9 Junni aman jana tsachila paca fiquicanantiya tsarasica jonhoe timinlayoe. Junto Diosi paca fiquicari fécari tsarasica joe tintsan jochunae. Junni Diosi patsanan yachi Naoca paca joe.  
\v 10 Tsan josanan, weyan weyanlari Diosi yachi Naoca pacaca quereituminla joe. Yalari Diosica tsabi catuto, junto yacanan nene pun curaminla joe. Diosichi Naoca quereiminla mantimini Diosichi fiquica tencabi talarachunae.  
\v 11 Diosi yachi Naoca itsantinue: Yari yachi Naobe penenaminlaca numatotiya sonnato polesa carimin joyoe tinue.  
\v 12 Yachi Naobe cayaica junlari numatotiya yabe sonnato polelaichunae. Cayaituminlari yabe sonnatulajochunae. 
\s1 Seque meránun fiqui 
\p  
\v 13 Aman nulari Diosichi Naobe cayaicala joto, numatotiya sonnato polelaichunae. Junni junca seque miilaisa, nulachica erechun in pila tsanque quinayoe. 
\p  
\v 14 Chiquilari Diosichi mantate yabe ticatiya rocainari, chiquilaca meráchunae. Junnan luratuto rocaino podeilaiyoe.  
\v 15 Junni chiquilaca meráno joeque miratori, chiquila rocainunca cuwano joequenan miracaichunae. 
\p  
\v 16 Jesucrístobe penenamin tsachi manca pansile jutsa quichunae. Puyatuntsancari jutsa quichunae. Junni weyanlari tsanquinaminca quirato, Diosibe rocaintsan jochunae yape yaca perdonaisa. Tsanque rocainari, Diosi ya jutsa quiminca perdonaito, ya tsachica puyasa carituchunae. Junni weyan jutsa mantimini puyantsancari jutsa joe. Tsan jutsacari perdonainiideque rocaisa titiyoe.  
\v 17 Ti seiton quinatiya jutsasiri joe. Aman weyan jutsa mantimini puyantsancari jutsa itoe. 
\p  
\v 18 Diosichi nalala jutsa quede nenaminla itochunae. Diosichi Nao yalaca cuidainachunae yape yucan yalaca yucapiyaritusa. Junca miralarayoe.  
\v 19 Junsi man fiquinan miralarayoe. Chiquilari Diosichi jolajoyoe. Jerale uyanlari yucanchi jolajoe.  
\v 20 Junsi man fiquicaman miralarayoe. Diosichi Nao patato, chiquilachi tenca cuwaca joe yape tsa Diosica mirano podeilaisa. Chiquilari tsa Diosibenan, yachi Naobenan, penenaminla joyoe. Yari tsa Diosi joto, yasiri numatotiya sonnato polesa carimin joe. 
\p  
\v 21 Junni nulaca lachi nalalaca cuwenta payinayoe. Tencabe nenalarana! epe diosi joe tinun moldebe penenatuchun. Tsanqueri joe.