\id COL  
\h COLOSENSES 
\toc1 Si₂ carta a₂ca₂jmo₃ San Pablo ne₄ dsa₂ COLOSENSES 
\toc2 COLOSENSES 
\toc3 Col. 
\mt2 Si₂ carta a₂ca₂jmo₃ San Pablo ne₄ dsa₂ 
\mt1 COLOSENSES 
\c 1  
\s1 Jmo₅ Pa₄ si₂ a₂chein₃ ne₄ Guá'₅ i₂chan₂ juɨg₂ Colosas të₁lia'₂ 'ein₅₄ né'₃ 'má₃ 
\p  
\v 1 Jniá₂, Pa₄, ia₁ co₂në₅ 'nio₃ Diú₄ bá₄, lɨ́ng₅ jan₂ i₂chen₄ quián₅ Jesucristo. Co₂lë₅ quiang'₅₄ rɨn'₅₄ jniog₄ Timoteo,  
\v 2 jmo₂₃ si₂ carta la₂ a₂dsiang'₅₄ ne'₅₄ 'nia'₂ rɨn'₅₄ jniog₄a i₂chang'₂ juɨg₂ Colosas, dsa₂ i₂lë́₅ 'í₁ i₂jme₂ti₃ ja₁con₂ Cristo: 
\p Juɨ₁jme₂gu'₅₄ bá₄ Diú₄ i₂lɨ́n₅ Tia₅₄ quián₂, juɨ₁jmo₁₂ bá₄ 'ag₃ tei₄ tion'₅₄ 'nia'₂. 
\s1 Mɨ₅ Pa₄ ne₄ Diú₄ o₄quió'₄ dsa₂ i₂'én₂ 
\p  
\v 3 Cuë₂ jnia'₅₄ ti₁'mag'₄ Diú₄ Jmei₂ Jesucristo Te₁gui'₅₄ quián₂, co₂tan₅₄ bá₄ mɨ₂ jnia'₅₄ ne₅₄ o₄quián'₂ 'nia'₂.  
\v 4 Ia₁ ma₂ca₂rë₃ne₄ bá₄ jnia'₅₄ 'a₂ lia'₂ lë́₅ a₂'én'₂ 'nia'₂ le₃quió'₅ Cristo Jesús, 'a₂ lia'₂ lë́₅ 'nió'₃ 'nia'₂ ca₂le₃jɨ́n₃ i₂ma₂tén₅ le₃quió'₅ Diú₄,\f + \fr 1:4 \ft lit. “dsa₂ jŋió₅.” \f* 
\v 5 ia₁ cha₂ a₂'ɨ́n₂ 'au'₂ 'nia'₂ a₂ma₂rë₂'ma₄ a₂lé₂ quián'₂ 'nia'₂ guei'₅₄ i₂juɨ́g₃, jág₁ dse₃ a₂tí₅ a₂jme₁ma₂nei'₂ 'nia'₂ le₂jŋiá₅,  
\v 6 a₂jme₁ma₂dsióg₃ ja₁con'₂ 'nia'₂. Ca₂le₂con₂ ta₁caun₂ mɨ₂güɨ́g₃, ma₂léi₄ ma₂rë₂rau₂ a₂rë₂'én₂ dsa₂, le₂jaun₂ qui₂dsɨ₂cón₃ jág₁. Lë́₂ juɨ₁lia'₂ ma₂qui₂ma₂lë₅ quian'₅₄ 'nia'₂ ca₂le₃ jmɨg₄ jme₁ca₂nei'₂ 'nia'₂ jág₁ dse₃ a₂lión₂ dsa₂, jme₁ca₂rë₃ŋɨ́'₂ 'au'₂ 'nia'₂ në́₃, 'a₂ lia'₂ lë́₅ a₂të₃dsón'₂ bá₄ dsau₅ 'ua₁ dsɨ́₅ Diú₄.  
\v 7 A₂në₅ ma₂ca₂rë₃tɨ́n'₃ 'nia'₂ ca₂jme₃tag₅ Epafras i₂'nióg₃ guë́₄ lɨn₃, i₂ma₂já₅ co₂lë₅ quian'₅₄ jnia'₅₄ jme₂ti₃ ta₁ ne₄ Cristo. 'Éi₂ bá₄ chén'₅ ja₁con'₂ 'nia'₂ a₂lɨ́in₅ dsa₂ rë₂ti'₅₄ i₂jmo₅ ta₁ quió'₅ Cristo, o₄quián'₂ 'nia'₂.  
\v 8 'Éi₂ bá₄ ma₂o₃can₅ jág₁ 'a₂ lia'₂ 'nió'₃ 'nia'₂ rɨ́ng'₂ le₃quió'₅ Jme₂dsí₂. 
\p  
\v 9 'Uɨg₅₄ jaun₂, jnia'₅₄ në́₃, ca₂le₃ jmɨg₄ jme₁ca₂rë₃ne₄ jnia'₅₄, ma₂ja₂náu₅ tsá₃ ma₂tí₄ jnia'₅₄ jua'₅₄ tsá₃ chi₂len'₄ jnia'₅₄ Diú₄ o₄quián'₂ 'nia'₂. Mɨ₂ jnia'₅₄ juɨ₁jmo₁₂ juɨ₁qui₂le₂'an₂ 'au'₂ ia₁jaun₂ qui₂le₃ŋɨ́g'₂ le₃ŋi'₅₄ 'nia'₂ le₃quió'₅ jme₂dsí₂, 'e₂ jaun₂ a₂'nio₃ 'éi₂,  
\v 10 ia₁jaun₂ bá₄ i₁nio'₄ 'nia'₂ con'₂ dsi₂ten₅₄ jmo₃ dsa₂ quián₅ Te₁gui'₅₄, lia'₂ con'₂ lë́₅ 'ŋio₂ dsɨ́₅ 'éi₂. Juɨ₁le₂rau₂ bá₄ con'₂ dse₃ ca₂le₃jë́₃ ne₅₄ a₂dse₃ jmo'₂ 'nia'₂, caun₂ dsi₁nó'₅ 'nia'₂ le₃cuɨng'₂ guë́₄ dse₃ Diú₄.  
\v 11 Mɨ₂ jnia'₅₄ ne₄ 'éi₂ a₂chein'₃ 'nia'₂ tiá₂ quian'₅₄ juɨ₅bí₂ 'uan'₂ quió'₅, ia₁jaun₂ bá₄ tian'₃ 'nia'₂ ca₂le₃jɨ́ng'₃ a₂tió'₃ 'au'₂, a₂juɨn'₂ 'au'₂, ton'₂ o₂'ŋió₃ 'au'₂ në́₃.  
\v 12 Mɨ₂ jnia'₅₄ ia₁jaun₂ bá₄ cuë'₅₄ 'nia'₂ ti₁'mag'₄ Tia₅₄, ia₁ ma₂jmo₃ a₂lén'₄ 'nia'₂\f + \fr 1:12 \ft A₂lɨn₅₄ chog₅₄ si₂ juá'₂: “ma₂jmo₃ ma₂léi₄ jniog₄.” \f* dsa₂ i₂lë́₅ 'í₁\f + \fr 1:12 \ft lit. “dsa₂ jŋió₅.” \f* quiáin₅, i₂ca₂tɨ́n₂ le₃quen'₄ ja₁tág₅ si₂.  
\v 13 Ma₂ca₂lió₂ Diú₄ jniog₄ o₄gú₃ i₂gon₂ jë₄ qui₁né'₃, a₂ma₂ca₂dsiog₃ táng₃ ja₁gon₂ Ja₁ŋi'₅₄ i₂ŋɨ́₄ lë₃ 'nioi₃.  
\v 14 'Éi₂\f + \fr 1:14 \ft A₂lɨn₅₄ chog₅₄ si₂ juá'₂: “Quian'₅₄ jmɨ₂ 'an₅₄ 'éi₂.” \f* bá₄ ca₂láu₂, ca₂'éin₂ dsáu₁ jniog₄. 
\s1 'Ei₅ tei₄ quian'₅₄ Diú₄ o₄quió'₄ a₂ca₂jon₃ Cristo 
\p  
\v 15 'Éi₂ bá₄ lɨ́n₅ nió'₄ quió'₅ Diú₄ i₂tsá₃ jniá₂; 'éi₂ bá₄ i₂ca₂tɨ́n₂ lén₂ gon₂ ne₄ ca₂le₃jë́₃ a₂ca₂rë₃chá₃.  
\v 16 Të₂le₃ quian'₅₄ 'éi₂ bá₄, ca₂jmo₃ Diú₄ ca₂le₃jë́₃ 'e₂ a₂cha₂ guei'₅₄ i₂juɨ́g₃ quian'₅₄ gua'₅₄ 'uë₃, ca₂le₃jë́₃ a₂jniá₂ quian'₅₄ guë́₄ ca₂le₃jë́₃ a₂tsá₃ jniá₂ në́₃: co₂'nió'₄ a₂ca₂jmói'₂ ca₂le₃jɨ́n₃ i₂jmo₅ 'éi'₃, ca₂le₃jɨ́n₃ i₂'io₅ bí₂, ca₂le₃jɨ́n₃ i₂gon₂, ca₂le₃jɨ́n₃ i₂lɨ́n₅ ta₁ në́₃. Ca₂le₃jɨ́n₃ i₂në₅ ca₂lɨn₃ të₂le₃ quian'₅₄ 'éi₂, ton'₂ o₄quió'₄ 'éi₂ në́₃.  
\v 17 'Éi₂ bá₄ i₂jme₁ma₂chan₂ lia'₂ con'₂ né'₃ guë́₄ a₂le₃cha₂ ca₂le₃jë́₃; 'éi₂ bá₄ jmo₅ a₂niog₅ lë́₂ rë₂ ca₂le₃jë́₃.  
\v 18 'Éi₂ bá₄ lɨ́n₅ ján₃ mɨ₂dsi₄ nɨ₁ŋɨ₁₂, co₂'nió'₄ le₃jua'₅₄ guá'₅ quiáin₅. 'Éi₂ bá₄ lɨ́n₅ i₂ca₂jme₃lióg₃ ca₂le₃jë́₃; ton'₂ 'éi₂ bá₄ lɨ́n₅ ján₃ i₂le₂'uɨg₅₄ i₂ca₂jen'₅₄ jɨn₄ 'lag₄, ia₁jaun₂ lén₂ 'éi₂ i₂dsen₅₄ guë́₄ ne₄ quió'₅ ca₂le₃jë́₃.  
\v 19 Ia₁ ca₂rë₃'ŋió₃ dsɨ́₅ Diú₄ ca₂të₁gua₁ të₂le₃ ja₁con₂ 'éi₂ ca₂le₃jë́₃ 'a₂ lia'₂ lɨ́in₅ 'ŋiog₅;  
\v 20 ca₂rë₃'ŋió₃ dsɨ́₅ ján₃, të₂le₃ quian'₅₄ 'éi₂, ca₂'ág₂ táng₃ caun₂ jág₁ quiain'₅₄ 'ŋiog₅, ca₂le₃jë́₃ a₂cha₂: lia'₂ ta₁caun₂ guei'₅₄ mɨ₂güɨ́g₃ lia'₂ quian'₅₄ ne₄ gua'₅₄ 'uë₃, ca₂jmo₃ ca₂'ág₂ táng₃ tei₄ të₂le₃ quian'₅₄ jmɨ₂ 'ain₅₄ a₂ca₂tein₃ ne₄ cróg₄. 
\p  
\v 21 'Nia'₂ në́₃, tsá₃ jág₁ jme₁nióg'₅ quian'₅₄ Diú₄ le₂jŋiá₅; të₂le₃ jme₁'ŋiai'₅₄ bá₄ 'nia'₂, juɨ₅ 'a₂ lia'₂ jme₁qui₂dsɨ₂jiog₅ 'au'₂, juɨ₅ 'a₂ lia'₂ jme₁jmo'₂-dsáu'₅ 'nia'₂ në́₃.  
\v 22 La₁ rë₂në́₃ në́₃, ma₂ca₂jmo₃ Diú₄ ca₂'ág₂ táng₃ caun₂ jág₁ 'nia'₂ quiain'₅₄, të₂le₃ quian'₅₄ 'mú₃ a₂ca₂can₃ Cristo juɨ₅ ŋɨ₅₄. A₂në₅ ca₂jmo₃ ia₁jaun₂ chein'₃ 'nia'₂ ne₅₄, jme₃jniai₂₃ 'nia'₂ dsa₂ i₂ma₂lë́₅ 'í₁,\f + \fr 1:22 \ft lit. “dsa₂ jŋió₅.” \f* i₂tsá₃ ma₃'e₂ rë₂'ŋió₄, on₃ guë'₂ ma₂'e₂ dso₄ rɨn'₂ 'nia'₂.  
\v 23 A₂jaun₂ chi₂jua'₂ caun₂ náu'₂ 'nia'₂ tiá₂ a₂'éng'₂, në₂jag₄ quian'₅₄ jmú₄ tio'₅₄ 'ei₄; jaun₂ tsá₃ qui₂dsɨ₃mú'₃ 'nia'₂ cau₅ a₂'ɨ́n₂ 'au'₂ të₂le₃ quian'₅₄ jág₁ dse₃ a₂ma₂nei'₂ 'nia'₂. Jág₁ dse₃ në₅ ma₂qui₂rë₂'ë́₂ ne₄ le₂jan₂ le₂jan₂ i₂chan₂ ne₄ gua'₅₄ 'uë₃. Jniá₂ Pa₄, jaun₂ në́₃, lɨ́ng₅ jan₂ i₂qui₂jme₂'o₅₄ dsɨ₂'ë́₃ jág₁ jaun₂. 
\s1 Jme₂ti₃ Pa₄ ja₁con₂ guá'₅ 
\p  
\v 24 Në₃ në́₃ 'io'₂ jéin₅ jë₄ dsɨ₂ŋɨ́g₂ uɨg₅ o₄quián'₂ 'nia'₂, ia₁ le₂la₂ bá₄ 'eng₅₄ juɨ₅ a₂jme₁'ŋiag₅, quian'₅₄ ŋɨ₃ 'ŋió₃ a₂'nió'₅ guë́₄ juɨ₁lia'₂ jmɨ₁uɨg₅ a₂ca₂i₃ŋɨ́₂ Cristo o₄quió'₄ guá'₅ quiáin₅, a₂lë́₅ ŋɨ₅₄.  
\v 25 A₂ma₂ca₂dsióg₃ jniá₂ a₂lɨ́ng₅ jan₂ i₂jme₂ti₃ ja₁con₂ guá'₅ ján₃, con'₂ lë́₅ ca₂dsia₃ Diú₄ gu₃, a₂dse₃ quián'₂ 'nia'₂, a₂'ë́₄ jniá₂ lia'₂ qui₂rë₂'ŋia₅ jág₁ quió'₅,  
\v 26 co₂'nió'₄ le₃jua'₅₄, jág₁ a₂tsá₃ jme₁ca₂rë₃jniá₂ a₂jme₁rë₂'ma₄ quió'₅ Diú₄ ca₂le₃ ma₂lɨ́g'₂ lɨn₃ ma₂qui₂ma₂ŋɨ́₂ juɨn₅ lɨn₃ tsɨ₁jon₂ dsa₂ në́₃. La₁ rë₂në́₃ ma₂cuë₃ a₂le₃cuɨ́'₅ dsa₂ i₂lë́₅ 'í₁\f + \fr 1:26 \ft lit. “dsa₂ jŋió₅.” \f* quiáin₅.  
\v 27 Ja₁con₂ dsa₂ quiáin₅ 'éi₂ bá₄ ca₂rë₃'ŋió₃ dsɨ́₅ Diú₄ ca₂jmo₃ a₂le₃cuɨ́'₅ dsɨ₂nau₂ 'e₂ jaun₂ a₂jlá'₁ lɨn₃ jág₁ a₂jme₁rë₂'ma₄ jaun₂: co₂'nió'₄ le₃jua'₅₄, 'en₅₄ bá₄ Cristo jë₄ quián'₂ 'nia'₂, 'éi₂ bá₄ lɨ́n₅ i₂'ɨ́n₂ 'au'₂ ja₁dse₃ ja₁jlá'₁ a₂guéi'₁ 'nia'₂.  
\v 28 Jnia'₅₄ në́₃ qui₂'ë́₅ jág₁ a₂'ɨ́n₅ 'éi₂, le₂jan₂ le₂jan₂ dsa₂ qui₂tioin'₂ jnia'₅₄ jág₁, le₂jan₂ le₂jan₂ bá₄ dsa₂ qui₂jme₂tɨ́in₁ ia₁jaun₂ le₃ŋɨ́i'₂, ia₁jaun₂ lé₂ jme₁jnia₅ jnia'₅₄ le₂jan₂ le₂jan₂ dsa₂ a₂ma₂lɨ́in₅ dsa₂ ma₂ron₂ le₃quió'₅ Cristo.  
\v 29 'Uɨg₅₄ jaun₂ bá₄ në́₃, jmo₅ jniá₂ ta₁, quɨ́n'₅ jniá₂ bí₂ lia'₂ con'₂ lë́₅ ta₁ bén₂ a₂jmo₅ 'éi₂ ja₁cong₂. 
\c 2  
\p  
\v 1 Ia₁ 'nio₃ jniá₂ juɨ₁le₃ŋi'₅₄ 'nia'₂ 'a₂ lia'₂ ŋɨ́₄ lë₃ quian₅ ta₁ a₂quɨ́ng'₅ bí₂ o₄quián'₂ 'nia'₂, quian'₅₄ o₄quió'₄ i₂chan₂ juɨg₂ Laodicea, o₄quió'₄ ca₂le₃jɨ́n₃ i₂tsá₃ cuɨg₅ i₂tsá₃ jág₂ dsi₁ne₁ në́₃.  
\v 2 Jmo₅ jniá₂ bí₂ le₂në₅ ia₁jaun₂ qui₂le₁'ág₄ lián'₂ dsɨ́₅ 'éi₂, caun₂ 'ei₅ jág₁ jme₂'nioi₃ rɨin'₅₄; ia₁jaun₂ bá₄ 'io₃ a₂quen₅ lɨn₃ a₂le₂jaun₂ a₂caun₂ le₁'ág₄ dsɨ́₅ ia₁ a₂qui₂ma₂'an₂ dsɨ́₅; ton'₂ ia₁jaun₂ le₃ŋɨ́i'₂ jág₁ a₂rë₂'ma₄ quió'₅ Diú₄. Jág₁ jaun₂ në́₃, Cristo 'ŋiog₅ bá₄ 'éi₂.\f + \fr 2:2 \ft A₂lɨn₅₄ chog₅₄ si₂: “jág₁ a₂rë₂'ma₄ quió'₅ Diú₄ Jmei₂, quió'₅ Cristo në́₃.” \f* 
\v 3 Ia₁ të₂le₃ ja₁con₂ 'éi₂ bá₄ qui₂rë₂'ma₄ jë₂ jág₁ a₂quen₅ lɨn₃ a₂lé₂ le₃ŋɨ́'₂ dsɨ́₅ dsa₂, a₂lé₂ le₃ŋi₅ dsa₂ në́₃.  
\v 4 A₂në₅ juɨ́g₂ 'nia'₂ ia₁jaun₂ 'i₁jan₂ tsá₃ 'ein₂ juɨ₁jme₂gau₅ 'nia'₂ quian'₅₄ jág₁ a₂'io'₂ quió'₅.  
\v 5 Jaun₂ o₁jŋia'₅₄ la₂ tsá₃ quian'₅₄ jniá₂ 'nia'₂ dsi₁ne₁ 'ŋió₃ dsón'₂, la₁ 'eng₅₄ bá₄ quian'₅₄ 'nia'₂ të₂le₃ quian'₅₄ jme₂dsí₂, jmo₂₃ 'io'₂, jág₅ 'a₂ lia'₂ tiong'₅₄ rë₂ con'₂ dsi₂ten₅₄, ton'₂ tióng'₂ bá₄ tiá₂ a₂'éng'₂ le₃quió'₅ Cristo.  
\v 6 Jaun₂ lë₃, le₂në₅ juɨ₁lia'₂ ca₂guen'₅₄ 'nia'₂ Cristo Jesús\f + \fr 2:6 \ft o₃, “Jesucristo.” \f* a₂lɨ́in₅ juɨg'₂ 'nia'₂, caun₂ juɨ₁i₂nio'₄ bá₄ 'nia'₂ le₃quió'₅ 'éi₂;  
\v 7 juɨ₁të₂ton₅₄ bá₄ jmú₄ juɨ₅ jme₂dsí₂ quián'₂ 'nia'₂ të₂le₃ quió'₅ 'éi₂, juɨ₁qui₂dsɨ₂cón'₃ bá₄ 'nia'₂ le₃quió'₅ 'éi₂ të₂le₃ ia₁ a₂'éng'₂, lia'₂ con'₂ lë́₅ a₂ca₂rë₂tɨ́n'₃ 'nia'₂, a₂rë₂tsón₂ të₂'au'₂ a₂cuë'₅₄ ti₁'mag'₄ Diú₄. 
\s1 A₂le₃chan₂ dsa₂ caun₂ juɨ₅ 'mɨ́₂ le₃quió'₅ Cristo 
\p  
\v 8 'Í₁ jmo₄ 'nia'₂, ia₁ con'₂ tsá₃ ŋó₅ në₁ca₂tág₃ dsa₂\f + \fr 2:8 \ft o₃, “në₁ca₂'ang₃ a₂'én'₂ 'nia'₂.” \f* të₂le₃ quian'₅₄ jág₁ a₂jŋia'₅₄ ŋɨ́'₂ dsɨ́₅ dsa₂ mɨ₂güɨ́g₃, a₂jme₂gau₅, a₂tsá₃ ta₁ tí₄, lia'₂ con'₂ lë́₅ tag₄ chí'₅ quió'₅ dsa₂, a₂cha₂ 'uɨg₅₄ 'a₂ con'₂ jŋia'₅₄ lë́₂ a₂cha₂ mɨ₂güɨ́g₃ la₂, on₃jua'₅₄ rë'₂ lia'₂ con'₂ lë́₅ jág₁ quió'₅ Cristo.  
\v 9 Ia₁ ja₁con₂ Cristo bá₄ të₁gua₁ chi₁dsáin₃ ca₂le₃jë́₃ lia'₂ con'₂ lë́₅ niog₅ lɨ́n₅ Diú₄.  
\v 10 Jaun₂ 'nia'₂ në́₃, ma₂le₁'ŋia'₅ 'nia'₂ le₃quió'₅ 'éi₂, i₂lɨ́n₅ co₂'nió'₄ mɨ₂dsi₄ ne₄ quió'₅ ca₂le₃jɨ́n₃ i₂gon₂, ca₂le₃jɨ́n₃ i₂jiog₅ 'éi'₃ ján₃.  
\v 11 Le₂jaun₂ bá₄ ján₃, ia₁ a₂quian'₅₄ 'nia'₂ Cristo, co₂'nió'₄ bá₄ ma₂qui₂rë₂uɨng₄ quián'₂ 'nia'₂, ma₂lë́₅ léi₄. La₁ on₃jua'₅₄ rë'₂ lia'₂ lë́₅ jmo₅ dsa₂ mɨ₂güɨ́g₃, të₂le₃ a₂ma₂qui₂ma₂tí'₃ 'nia'₂ 'nau'₄ dso₄ lia'₂ 'ɨ́n₅ dsɨ́₅ nɨ₁ŋɨ'₁; ma₂qui₂le₁lɨ́n'₅ 'nia'₂ léi₄ le₃quió'₅ Cristo.  
\v 12 Ia₁ lia'₂ con'₂ jme₁ca₂qui₂ca₂jŋó'₂ 'nia'₂ jmɨg₂,\f + \fr 2:12 \ft lit. “lia'₂ con'₂ jme₁ca₂i₃tian'₃ 'nia'₂ jmɨg₂.” \f* në₂jag₄ bá₄ ca₂i₃'on'₃ 'nia'₂ co₂lë₅ quian'₅₄ Cristo, ján₃ guë'₂ le₂jaun₂ ca₂jen'₅₄ 'nia'₂ co₂lë₅ quian'₅₄ 'éi₂, ia₁ ca₂rë₃'én'₂ 'nia'₂ juɨ₅bí₂ quió'₅ Diú₄ a₂ca₂jme₃jein'₅₄ ja₁jme₁rë₂'lɨin₅₄.  
\v 13 Lia'₂ con'₂ jme₁rë₂'lɨn'₄ 'nia'₂ le₃quió'₅ jme₂dsí₂, jme₁qui₂le₁cán'₂ jme₁qui₂le₁quian'₄ 'nia'₂ dsáu'₂, në₂jag₄ bá₄ a₂tsá₃ jme₁rë₂uɨng₄ lo'₄ 'nia'₂ jme₁chang'₂; la₁ Diú₄ në́₃ ma₂to'₂ táng₃ jme₂dsí₂ 'nia'₂ co₂lë₅ quian'₅₄ Cristo, qui₂ca₂'éin₂ bá₄ jë₂ dsáu'₂ 'nia'₂.  
\v 14 Co₂dsia₅ ca₂'éin₂ bá₄ jág₁ a₂jme₁chi₁ton₅ ne₄ si₂ a₂jme₁ron₅ a₂jme₁juá'₂ a₂jme₁rag₂ jniog₄, Si₂ 'Éi'₃ jaun₂ a₂jme₁'liog'₅ jniog₄; ma₂ca₂jŋiá'₂ cau₅ co₂ŋei'₅₄, në₂jag₄ bá₄ a₂ca₂i₃ba₅₄ mɨ₂ŋí₁ si₂ jaun₂ dso'₂ cróg₄.  
\v 15 Le₂në₅ co₂dsia₅ ca₂chein'₃ 'uɨn₃ jme₂dsí₂ i₂jme₁gon₂, i₂jme₁jiog₅ 'éi'₃ në́₃, jaun₂ ca₂jiog₃ cha₂ juɨ́g₃ të₃ jág₅ ca₂le₃jɨ́n₃ dsa₂, jme₁ca₂tió'₃ ca₂tiain'₃ 'éi₂ jág₁, ne₄ cróg₄.\f + \fr 2:15 \ft 'Nio'₂ ja₁ton₅ Efesios 4:8.\f* 
\s1 'Nio'₂ 'nia'₂ a₂cha₂ le₃quió'₅ guei'₅₄ i₂juɨ́g₃ 
\p  
\v 16 Jaun₂ lë₃, 'i₁jan₂ tsá₃ 'ein₂ qui₂o₁'ag₅₄ 'nia'₂ o₄quió'₄ 'e₂ má₃ quë́'₂, o₃ juɨ₁lia'₂ 'e₂ qui₂'ág'₂ 'nia'₂, o₃ quian'₅₄ juɨ₁lia'₂ jmɨg₄ jme₁niog₅ jmɨg₄, o₃ juɨ₁lia'₂ jmɨg₄ tsɨ'₂ 'io'₅₄,\f + \fr 2:16 \ft lit. “tsɨ'₂ guen₂.” \f* o₃ juɨ₁lia'₂ jmɨg₄ sa₅₄ në́₃.  
\v 17 Ca₂le₃jë́₃ a₂në₅, lë́₅ co₂'nió'₄ caun₂ 'én'₁ quió'₅ a₂'i₄ 'éi'₃ jiá₃ bá₄ jaun₂, la₁ia₁ juɨ₁lia'₂ a₂tí₅ të₃dsón'₂, Cristo bá₄ 'éi₂.  
\v 18 Tsá₃ cuë₂ 'nia'₂ jmɨg₄ jua'₅₄ 'liog'₃ dsa₂ cau₅ 'nia'₂, juɨ₁lia'₂ dsa₂ i₂jmo₅ a₂lɨ́in₅ mei'₂, ton'₂ jme₂juɨin'₂ ángeles në́₃. Qui₂tiáin₂ 'ŋio₅ lɨn₃ a₂cha₂ të₅ ne₅₄ a₂lë₁qui₂jág₅,\f + \fr 2:18 \ft A₂lɨn₅₄ chog₅₄ si₂ juá'₂: “qui₂tiáin₂ 'ŋio₅ lɨn₃ juɨ₁lia'₂ a₂tsá₃ ma₂jág₃.” \f* 'ŋio₅ jme₂cain'₅₄ jmo₂₃ róin₂ a₂qui₂ŋɨ́'₂ dsɨ́₅ guioin₅₄.  
\v 19 Dsa₂ i₂le₂'éi₂ në́₃, tsá₃ chi₁chain'₅ le₃quió'₅ Cristo, i₂lɨ́n₅ mɨ₂dsi₄ i₂jme₂tau₅₄ ca₂le₃jë́₃ ja₁qui₂le₁tion'₅₄ quió'₅, jmo₂₃ qui₂dsɨ₂cón₃ ta₁caun₂ nɨ₁ŋɨ₁₂, lia'₂ con'₂ lë́₅ 'ŋio₂ dsɨ́₅ Diú₄. 
\p  
\v 20 Chi₂jua'₂ jaun₂ ma₂dsan'₃ bá₄ 'nia'₂ quian'₅₄ Cristo, ja₁con₂ jág₁ le₂'uɨg₅₄ lia'₂ ŋɨ́'₂ dsɨ́₅ dsa₂ mɨ₂güɨ́g₃, ¿'e₂ guë'₂ 'uɨg₅₄ lë₃ në́₃, qui₂tián'₅ guë́₄ 'nia'₂ 'éi'₃ në₂jag₄ a₂lɨ́ng'₅ bá₄ guë́₄ 'nia'₂ dsa₂ mɨ₂güɨ́g₃?  
\v 21 Co₂'nió'₄ a₂juá'₂ 'éi'₃: “Tsá₃ i₂tí₅ gog'₂, tsá₃ i₂quë́'₂ má₃ ó₃, tsá₃ i₂jmá'₂ a₂ó₃ në́₃.”  
\v 22 Ta₁jë₂ bá₄ a₂në₅ dsiá₃ juɨ₁lia'₂ jë₁jmó'₂ ta₁. Të₂le₃ ia₁ con'₂ lë́₅ 'éi'₃ a₂jme₂tag₅ dsa₂ mɨ₂güɨ́g₃ bá₄ jaun₂.  
\v 23 Jág₁ a₂le₃ŋɨ́'₂ dsɨ́₅, jág₁ le₂në₅, lé₂ le₃lɨ́n₂ dsa₂, ia₁ qui₂chi₂quióng₂ jmɨg₄ 'ŋio₅ lɨn₃ a₂jmo₃ dsa₂ a₂ŋɨ́₄ cuɨin₂₃ Diú₄, a₂qui₂jmo₂₃ mei'₂, a₂qui₂cuë́'₅ uɨg₅ nɨ₁ŋɨ₁₂ në́₃; la₁ 'i₁ca₂juɨg₄ tsá₃ 'e₂ ta₁ jmo₃ jua'₅₄ quian'₅₄ a₂në₅ lé₂ le₃guia'₃ dsa₂ cau₅ a₂'ág'₄ dsɨ́₅ a₂mɨ₅ nɨ₁ŋɨ₁₂. 
\c 3  
\p  
\v 1 Le₂në₅ bá₄ jaun₂, ia₁ a₂ma₂ca₂jen'₅₄ guë'₂ 'nia'₂ quian'₅₄ Cristo, 'nio'₂ 'nia'₂ jaun₂ a₂lë́₅ le₃quió'₅ guei'₅₄ i₂juɨ́g₃, ja₁guá₄ Cristo të₂le₃ gu₂ ne₁ quió'₅ Diú₄.  
\v 2 Jmo₄ bá₄ 'nia'₂ 'ɨ₅ 'au'₂ a₂ca₂tɨ́n₂ guei'₅₄ i₂juɨ́g₃, on₃jua'₅₄ rë'₂ a₂ca₂tɨ́n₂ ne₄ gua'₅₄ 'uë₃.  
\v 3 Ia₁ ma₂dsan'₃ bá₄ 'nia'₂, jaun₂ ma₂rë₂'ma₄ a₂chan'₂ 'nia'₂ quian'₅₄ Cristo ja₁con₂ Diú₄.  
\v 4 Jë₁ma₂të́₂ rë₁jme₃jnia₅ Cristo në́₃, i₂lɨ́n₅ i₂jmo₅ a₂chong₂ jniog₄, jaun₂ në́₃, ján₃ guë'₂ le₂jaun₂ 'nia'₂ le₃jniág'₂ co₂lë₅ quiain'₅₄ jë₄ co₂tág₅ co₂'né'₅ quió'₅. 
\s1 Juɨ₅ gui'₅₄, quian'₅₄ juɨ₅ 'mɨ́₂ 
\p  
\v 5 Jaun₂ lë́₃, co₂dsia₅ jmo₄ 'nia'₂ juɨ₁dsian₂ gog'₂-tag'₅₄ a₂jmo₅-dsáu₅ juɨ₁lia'₂ a₂lë́₂ gua'₅₄ 'uë₃ la₂: juɨ₁lia'₂ a₂nió'₅ dsa₂ jág₁ a₂tsá₃ dsi₂ten₅₄ nió'₃; juɨ₁lia'₂ a₂jmo₅ dsa₂ cosa lë₁'iog₅, juɨ₁lia'₂ a₂'ɨ́n₅ dsɨ́₅ cosa 'lɨg'₅₄, juɨ₁lia'₂ a₂'ɨ́n₅ dsɨ́₅ dsa₂ jme₃'ŋiói'₃ a₂ca₂tɨ́n₂ i₂sián'₂. Ia₁ a₂co₂jaun₂ bá₄ në₅ juɨ₁lia'₂ a₂jme₂gan₃ dsa₂ diú₄ lag₄.  
\v 6 Ia₁ 'uɨg₅₄ quió'₄ a₂le₂në₅ bá₄ já₅ uɨg₅ gau₂ a₂'ë́₂ Diú₄ ne₄ quió'₅ jaun₅ dsa₂ i₂tsá₃ ne'₅₄.\f + \fr 3:6 \ft A₂lɨn₅₄ chog₅₄ si₂ tsá₃ chi₁ton₅ jág₁: “ne₄ quió'₅ jaun₅ dsa₂ i₂tsá₃ ne'₅₄.” \f* 
\v 7 Juɨ₅ le₂në₅ jme₁i₂nio'₄ 'nia'₂ lia'₂ lë́₅ jme₁chan'₂ 'nia'₂ le₂jŋiá₅.  
\v 8 La₁ rë₂në́₃ në́₃, tí₃ ca₂le₃jë́₃ a₂le₂në₅: juɨ₁lia'₂ a₂'i₄ 'nei₂ 'au'₂ 'nia'₂, juɨ₁lia'₂ a₂lë₁qui₂rë₂'neg'₂, juɨ₁lia'₂ a₂'lɨg'₅₄ a₂qui₂dsɨ₂jŋia₅ 'au'₂ 'nia'₂, juɨ₁lia'₂ a₂'ɨ́n'₅ 'nia'₂ uɨg₅ rɨ́ng'₂, juɨ₁lia'₂ jág₁ ga₂ a₂'uë₂ mɨ₂'o'₅₄.  
\v 9 Tsá₃ ma₃dsia₂ 'nia'₂ jág₁ të₂jág₁ quian'₅₄ rɨ́n'₂ 'nia'₂ le₂jang'₂ le₂jang'₂, ia₁ ma₂dsian'₅₄ 'nia'₂ cau₅ dsa₂ 'ón₅ 'a₂ lia'₂ jme₁lɨ́n'₄ 'nia'₂ le₂jŋiá₅, quian'₅₄ guë́₄ ca₂le₃jë́₃ a₂jme₁jmo₅-dsáu₅,  
\v 10 co₂'nió'₄ ma₂ca₂qui'₂ táng₃ 'nia'₂ caun₂ a₂'mɨ́₂, co₂'nió'₄ a₂lɨ́ng'₅ dsa₂ 'mɨ́₂; a₂caun₂ qui₂rë₂'mag'₂ 'nia'₂, ia₁jaun₂ dsi₁nóg'₅ ja₁le₃cuɨn'₂ 'nia'₂ dse₃ lɨn₃ Diú₄, ja₁le₃lén'₂ 'nia'₂ lia'₂ lɨ́n₅ 'éi₂ i₂ca₂jmó'₂ 'nia'₂.  
\v 11 Ja₁jaun₂ tsá₃ 'ein₂ jmo₅ jma₃quén₅ juɨ₁lia'₂ dsɨ₂nau₂ o₃ dsa₂ judíos 'e₂, juɨ₁lia'₂ dsa₂ i₂rë₂uɨng₄ o₃ tsá₃ rë₂uɨng₄ quió'₅ 'e₂, juɨ₁lia'₂ dsa₂ i₂chan₂ uɨ́ng₂, o₃ i₂chan₂ má'₂ 'e₂, juɨ₁lia'₂ dsa₂ i₂jme₂ti₃ ta₁ ne₄ juɨg₅₄, o₃ i₂tsá₃ 'ein₂ ne₄ jme₂ti₃; la₁ Cristo bá₄ quen₅ ne₄ ca₂le₃jë́₃, ton'₂ 'ein₅₄ ja₁con₂ ca₂le₃jɨ́n₃. 
\p  
\v 12 Jaun₂ lë₃, rɨn'₅₄ jniog₄, juɨ₁lia'₂ ca₂tɨ́n₂ jmo₃ dsa₂ i₂ma₂quión'₂ Diú₄, i₂ma₂lë́₅ 'í₁ quiáin₅, i₂ŋɨ́₄ lë₃ 'nioi₃ 'éi₂: qui'₂ 'nia'₂ a₂rë₂lɨng'₅₄ a₂ŋéi₂ 'au'₂, a₂'ua₁ 'au'₂, a₂jmó'₂ meg'₂, a₂jme₁gan'₃ 'nia'₂ rɨ́ng'₂, a₂juɨn'₂ 'au'₂ 'nia'₂ në́₃.  
\v 13 Jmo₄ 'nia'₂ tió'₃ 'au'₂ quian'₅₄ rɨ́ng'₂ le₂jang'₂ le₂jang'₂, ton'₂ 'én₃ 'nia'₂ dsáu₁ rɨ́ng'₂, në₁jua'₂ chan₂ i₂dsia₅ dsáu₁ rɨn'₅₄. Juɨ₁lia'₂ ca₂'én₂ Te₁gui'₅₄ dsáu'₂ 'nia'₂ guiong'₅₄, le₂jaun₂ jmo₄ 'nia'₂ ján₃.  
\v 14 A₂dsen₅₄ guë́₄ jë₄ ca₂le₃jë́₃, qui'₂ 'nia'₂ quian'₅₄ a₂jme₁'nió'₄ 'nia'₂ rɨ́ng'₂,\f + \fr 3:14 \ft 'Nio'₂ ja₁ton₅ 1 Corintios 13:13.\f* a₂në₅ bá₄ jmo₃ 'ag₃ co₂dsia₅ caun₂ jág₁ 'nia'₂.  
\v 15 Juɨ₁le₂gon₂ të₂'au'₂ 'nia'₂ a₂'ei₅ tei₄ quió'₅ Cristo,\f + \fr 3:15 \ft o₃, “quió'₅ Diú₄.” \f* ia₁ ta₁ jaun₂ ma₂qui₂rë₂té₄ 'nia'₂ a₂lén'₂ caun₂ bá₄ ŋɨ́₅. Jaun₂ jmo₄ 'nia'₂ 'au'₂ cuë'₅₄ ti₁'mag'₄.  
\v 16 Juɨ₁të₂gua₄ të₂'au'₂ 'nia'₂ lia'₂ rë₂tsón₂ jág₁ dse₃ quió'₅ Cristo; quian'₅₄ ca₂le₃jë́₃ a₂ŋɨ́'₂ dsɨ́₅ Diú₄, jë₁jme₂tɨ́n'₂ 'nia'₂ rɨ́ng'₂, jë₁qui₂ton'₂ 'nia'₂ jág₁ rɨ́ng'₂ të₂le₃ quian'₅₄ salmos, himnos, son₅₄ a₂gu₂dsí₂ në́₃, a₂qui₁'ë́'₂ 'nia'₂ a₂cuë'₅₄ ti₁'mag'₄ Diú₄ juɨ₅ të₂'au'₂ 'nia'₂.  
\v 17 Juɨ₁'e₂ guë́₃ a₂jmó'₂, o₃ 'e₂ jág₁ dsiá'₁ 'nia'₂, jmo₄ 'nia'₂ ca₂le₃jë́₃ o₄quió'₄ Te₁gui'₅₄ Jesús, qui₁cuë'₅₄ 'nia'₂ ti₁'mag'₄ Diú₄ Jmei₂ jniog₄ le₃quió'₅ 'éi₂. 
\s1 A₂ca₂tɨ́n₂ dsa₂ quián₅ Cristo jmo₃ quiain'₅₄ rɨin'₅₄ 
\p  
\v 18 'Nia'₂ dsa₂ mɨ́₂ i₂chan₂ dsɨ₂i₂gu₂, tión'₂ 'nia'₂ 'éi'₃ quió'₅ dsa₂ ŋe'₂ quiáng'₂, juɨ₁lia'₂ dsi₂ten₅₄ ia₁ lɨ́ng'₅ dsa₂ 'én₂ le₃quió'₅ Te₁gui'₅₄.  
\v 19 'Nia'₂ guë'₂ dsa₂ ŋe'₂ i₂chan₂ dsa₂ mɨ́₂ quián₅, jme₁'nió₄ 'nia'₂ dsa₂ mɨ́₂ quiáng'₂, tsá₃ jmo'₂ 'nia'₂ 'ua'₂ 'au'₂ ja₁coin₂.  
\v 20 'Nia'₂ chi'₂-guein₂, nei₂ 'nia'₂ gau₂ jág₁ quió'₅ chog'₂-ŋéi'₅ jë₄ le₃jë́₃, ia₁ a₂në₅ bá₄ të₅ dsɨ́₅ Te₁gui'₅₄.  
\v 21 'Nia'₂ guë'₂ në́₃, jmei₂ chi'₂, tsá₃ tó'₂ 'nia'₂ 'nei₂ dsɨ́₅ chi'₂-guein₂ quián'₂ 'nia'₂, ia₁jaun₂ tsá₃ jén₂ dsɨ́₅.  
\v 22 'Nia'₂ dsa₂ i₂jme₂ti₃ ne₄ dsa₂, jme₁ti₁ 'nia'₂ ca₂le₃jë́₃ 'e₂ ta₁ ti₂néi'₂ juɨg'₂ i₂lɨ́n₅ juɨg'₂ të₂le₃ ne₄ gua'₅₄ 'uë₃ la₂, on₃jua'₅₄ jmá'₃ jme₁jág₅ ia₁jaun₂ të₃tsɨn'₅₄ 'nia'₂ dse₃ quiain'₅₄, la₁ jmo₄ bá₄ juɨ₅ të₂'au'₂ a₂tí₅ të₃dsón'₂, ia₁ të₂le₃ a₂gang'₃ Te₁gui'₅₄.  
\v 23 Juɨ₁'e₂ guë́₃ caun₂ a₂jmó'₂ 'nia'₂, jmo₄ 'nia'₂ a₂'ŋio₂ 'au'₂ co₂'nió'₄ a₂jmo'₂ ta₁ le₃quió'₅ Te₁gui'₅₄, on₃jua'₅₄ le₃quió'₅ dsa₂.  
\v 24 Ia₁ ma₂ŋi'₅₄ bá₄ 'nia'₂, Te₁gui'₅₄ bá₄ cuë₃ 'liang'₅₄ a₂ma₂lë́₅ jág₁ ca₂tɨ́ng'₂. Ia₁ ne₄ Te₁gui'₅₄ Cristo jme₂tí'₁ 'nia'₂ ta₁.  
\v 25 La₁ juɨ₁lia'₂ i₂jmo₅-dsáu₅ a₂'lɨg'₅₄, gue₃ bá₄ 'liain'₅₄ lia'₂ con'₂ lë́₅ 'lɨg'₅₄ a₂jmo₂₃. Ia₁ tsá₃ jma₃quén₅ jɨ́n₂ Diú₄ le₂jan₂ le₂jan₂ dsa₂. 
\c 4  
\p  
\v 1 'Nia'₂ dsa₂ i₂lɨ́n'₅ juɨg₅₄ quián₅ dsa₂, ca₂tɨ́n'₂ 'nia'₂ jmó'₂ lia'₂ con'₂ dsi₂ten₅₄, 'i'₅₄ jág₁ 'nia'₂ quiang'₅₄ dsa₂ i₂qui₂jme₂ti₃ ne'₅₄. Juɨ₁dsiog'₂ bá₄ 'au'₂ 'nia'₂ a₂chan₂ jan₂ Juɨg'₂ 'nia'₂ ján₃ i₂guá₅ guei'₅₄ i₂juɨ́g₃. 
\p  
\v 2 Caun₂ chi₂len'₄ 'nia'₂ Diú₄ a₂léi₄ rë₂jnio₄ ne'₅₄ 'nia'₂, cuë'₅₄ ti₁'mag'₄.  
\v 3 Mɨ₄ 'nia'₂ ne₄ Diú₄ o₄quián₂ jnia'₅₄ ján₃, ia₁jaun₂ bá₄ cuë₃ Te₁gui'₅₄ juɨ₅ rë₂na₄ jnia'₅₄ ia₁jaun₂ lé₂ le₃qui₁'ë́₄ jág₁ dse₃ a₂qui₁chei₅₄ jnia'₅₄ dsa₂ jág₁ a₂rë₂'ma₄ quió'₅ Cristo; 'uɨg₅₄ jág₁ në₅ bá₄ 'eng₅₄ rë₂jnɨ́g₅.  
\v 4 Chi₂len'₄ 'nia'₂ Diú₄ ia₁jaun₂ lé₂ le₃'ë́₄ lia'₂ qui₂rë₂jiá₃ jág₁ lia'₂ con'₂ dsi₂ten₅₄ jmo₅₄. 
\p  
\v 5 Tián'₂ 'nia'₂ 'en₅₄ 'au'₂ jmo₄ quian'₅₄ juɨ₁lia'₂ dsa₂ i₂tsá₃ 'én₂, 'ŋio'₄ 'nia'₂ jmo₄ a₂dse₃ jë₁cuɨn₅ jmɨg₄.  
\v 6 Jág₁ a₂dsia'₂ 'nia'₂ co₂tan₅₄ bá₄ ca₂tɨ́n'₂ 'nia'₂ dsiá'₁ a₂'ua₁ 'au'₂, jág₁ a₂'ŋio₂ dsɨ₅ a₂ja₂ mɨ₂juɨg₂. Ca₂tɨ́n'₂ 'nia'₂ ján₃ le₃ŋi'₅₄ 'a₂ lia'₂ qui₁jein'₄ jág₁ ja₁con₂ le₂jan₂ le₂jan₂ dsa₂. 
\s1 Cuag₂₃ Diú₄ jë₁ca₂tó'₂ 
\p  
\v 7 Tíquico rɨn'₅₄ jniog₄ i₂'nióg₃ guë́₄ lɨn₃, i₂ma₂já₅ jme₂'o₅₄ qui₂rë₂ti'₅₄, jme₂ti₃ quian'₅₄ jniá₂ ne₄ Te₁gui'₅₄, 'éi₂ bá₄ dsia₃ ca₂le₃jë́₃ 'a₂ lia'₂ lë́₅ chang₂.  
\v 8 'Uɨg₅₄ jaun₂ tsɨ́in₂ jniá₂ ja₁con'₂ 'nia'₂ ia₁jaun₂ dsia₃ 'a₂ lia'₂ chong₂ jnia'₅₄ ja₁lá₃, ton'₂ ia₁jaun₂ cuë́'₃ 'nia'₂ lián'₂;  
\v 9 quiain'₅₄ Onésimo në́₃, jan₂ rɨn'₅₄ jniog₄ i₂rë₂ti'₅₄, i₂lɨ́n₅ jan₂ i₂quian'₄ 'nia'₂: i₂në₅ bá₄ dsia₃ ca₂le₃jë́₃ 'e₂ niog₅ lë́₂ ja₁lá₃. 
\p  
\v 10 Aristarco, i₂quiong'₅₄ jniá₂ né'₃ má₃, dsiáin'₂ jág₁ a₂cuɨin₂₃ Diú₄ 'nia'₂, ján₃ bá₄ le₂jaun₂ Marcos, i₂lɨ́n₅ chi'₂ rɨn'₅₄\f + \fr 4:10 \ft o₃, “primo.” \f* Bernabé. Të₂le₃ quió'₅ Marcos 'éi₂ në́₃, ma₂gue'₅₄ bá₄ 'nia'₂ jág₁ 'a₂ lia'₂ jmó'₂; në₁jua'₂ ca₂dsióg₃ dsi₁jɨin₁₂ 'nia'₂, guein₅₄ bá₄ 'nia'₂ dse₃.  
\v 11 Ján₃ bá₄ cuag₅ Diú₄ i₂chen₂ Jesús i₂të́'₂ dsa₂ Justo ján₃. Jŋia'₅₄ lia'₂ i₂në₅ bá₄ lɨ́n₅ i₂ún₂ tan₅₄ i₂rë₂uɨng₄ quió'₅, i₂jmo₅ ta₁ quian'₅₄ jniá₂ o₄quió'₄ ja₁gon₂ Diú₄, i₂ma₂ja₂lén₂ jmo₅ lián'₂ dsɨ₃.  
\v 12 Epafras në́₃ jan₂ i₂lɨ́n₅ rɨ́n'₂ 'nia'₂, dsiáin'₂ jág₁ a₂cuɨin₂₃ Diú₄ 'nia'₂, jan₂ rɨn'₅₄ i₂jme₂ti₃ ne₄ Cristo Jesús. Co₂tan₅₄ bá₄ chi₂lén'₂ 'éi₂ Diú₄ 'ŋio₅ lɨn₃ o₄quián'₂ 'nia'₂, ia₁jaun₂ tón'₂ 'nia'₂ rë₂'ŋiag'₅, 'ei₅ caun₂ jág₁ 'nia'₂ jë₄ ca₂le₃jë́₃ 'a₂ lia'₂ 'ŋio₂ dsɨ́₅ Diú₄.  
\v 13 Lé₂ jáng'₄ jniá₂ jág₁ dsau₅ 'a₂ lia'₂ ma₂já₅ 'éi₂ dsan₂ dsɨ́₅ 'nia'₂, ján₃ bá₄ le₂jaun₂ o₄quió'₄ i₂tián'₅ juɨg₂ Laodicea quian'₅₄ guë'₂ i₂tián'₅ Hierápolis ján₃.  
\v 14 Lucas, i₂lɨ́n₅ të₅mɨ́₅ i₂'nió₄ guë́₄ lɨn₃, cuɨin₂₃ Diú₄ 'nia'₂; ján₃ guë'₂ le₂jaun₂ i₂të́'₂ Demas.  
\v 15 Cuɨn₅₄ 'nia'₂ Diú₄ rɨn'₅₄ i₂tián'₅ juɨg₂ Laodicea. Cuɨn₅₄ 'nia'₂ Diú₄ ján₃ 'io₅₄ Ninfas, quian'₅₄ co₂nió'₃ guá'₅ i₂ŋɨ'₂ dsi₂néi₂ quió'₅ në́₃.  
\v 16 Jë₁ma₂ca₂'í'₂ 'nia'₂ si₂ la₂ jë₄ quián'₂ 'nia'₂, jaun₂ tsɨng'₅₄ 'nia'₂ guá'₅ chan₂ Laodicea ia₁jaun₂ 'ɨ₃ táng₃ rɨn'₅₄ jniog₄ ja₁jaun₂; ton'₂ ján₃ guë'₂ 'í₂ 'nia'₂ si₂ a₂ca₂dsióg₃ ne₄ i₂chan₂ Laodicea.  
\v 17 A₂la₂ chei'₅₄ Arquipo: “Tion'₂ 'ne₂ juɨ₅ ta₁ a₂ma₂gue'₅₄ a₂ma₂dsia₃ Te₁gui'₅₄ gog'₂, a₂jme₁ti'₄ rë₂.” 
\p  
\v 18 Jniá₂ Pa₄, cuɨ́ng₅ Diú₄ 'nia'₂ quian'₅₄ letra quió₃ 'ŋió₃.\f + \fr 4:18 \ft 'Nio'₂ ja₁ton₅ 1 Corintios 16:21; Gálatas 6:11; 2 Tesalonicenses 3:17; Filemón 19.\f* Juɨ₁dsiog'₂ bá₄ 'au'₂ 'nia'₂ a₂'eng₅₄ rë₂jnɨ́g₅. Juɨ₁jme₂gu'₅₄ bá₄ Diú₄ 'nia'₂. 
\p Co₂në₅.