\id 2TI  
\h SEGUNDA TIMOTEO 
\toc1 Si₂ carta jë₁ca₂të́₂ tɨn₃ a₂ca₂jmo₃ San Pablo ne₄ TIMOTEO 
\toc2 SEGUNDA TIMOTEO 
\toc3 2 Ti. 
\mt2 Si₂ carta jë₁ca₂të́₂ tɨn₃ a₂ca₂jmo₃ San Pablo ne₄ 
\mt1 TIMOTEO 
\c 1  
\s1 Jmo₅ Pa₄ si₂ a₂chein₃ ne₄ Timoteo 
\p  
\v 1 Jniá₂ Pa₄, lɨ́ng₅ dsa₂ i₂chen₄ quián₅ Te₁gui'₅₄ Jesucristo, cheng₅₄ con'₂ në₅ 'nio₃ Diú₄ bá₄, con'₂ lë́₅ jág₁ ca₂cuë₃ Diú₄ jniog₄ a₂le₃chong₂ të₂le₃ quian'₅₄ Cristo Jesús.  
\v 2 Jmo₅ jniá₂ si₂ la₂ ne'₅₄ 'ne₂ jón₃ quiáng₃ Timoteo, 'nio₃ jniá₂ juɨ₁chang'₂ bá₄ ŋéi₂ dsɨ́₅ Diú₄, juɨ₁jme₂gu'₅₄ bá₄, juɨ₁chang'₂ bá₄ 'ei₅ tei₄, juɨ₁jmo₅₄ Diú₄ Jmei₂ jniog₄ quian'₅₄ Te₁gui'₅₄ Jesucristo quián₂. 
\s1 'A₂ lia'₂ dsi₂ten₅₄ jáng'₃ dsa₂ jág₁ dsau₅ të₂le₃ quió'₅ Cristo 
\p  
\v 3 Dsau'₂ dsɨ₃ co₂tan₅₄ bá₄ 'ne₂ jë₄ chi₂leng'₅₄ Diú₄ lia'₂ 'uë₂-jmɨ₂. Jaun₂ lë₃ cuë́₅ jniá₂ ti₁'mag'₄ jme₂tí₁ ta₁ ne₅₄ a₂ma₂le₁jë́₃ a₂qui₂dsɨ₂jŋi₅ të₂dsɨ₃ juɨ₁lia'₂ ca₂jmo₃ dsa₂ can'₅₄ quiáng₃ ma₂lɨ́g'₂.  
\v 4 Ca₂le₃jë́₃ jmɨg₄ bá₄ dsau'₂ dsɨ₃ lia'₂ con'₂ ca₂'o'₅₄ le₂jaun₂, jaun₂ jme₁'nio₃ i₁jɨng₁₂ táng₃ 'ne₂ ia₁jaun₂ jmo₅₄ 'io'₂.  
\v 5 Dsau'₂ bá₄ dsɨ₃, ia₁ 'éng'₂ të₃dsón'₂. Chi₁'io'₄ Loida quian'₅₄ chog'₂ Eunice, ján₃ bá₄ le₂në₅ ca₂rë₃'éin₂ le₂'uɨg₅₄. Jaun₂ të₃dsón'₂ lɨ́n₂ jniá₂ ján₃ bá₄ le₂jaun₂ 'én'₂ 'ne₂. 
\p  
\v 6 Jaun₂ lë₃ juá'₅ jniá₂, cuë'₅₄ bí₂ ca₂le₃jë́₃ a₂ma₂cuë₃ Diú₄ të₂'au'₂, a₂lë́₅ lia'₂ lë́₅ si₂ të₂'au'₂ a₂ca₂ŋɨg'₂ lia'₂ con'₂ jme₁ca₂co₃ jniá₂ gu₃ ne₄ quiáng'₂.  
\v 7 Ia₁ on₃jua'₅₄ jme₂dsí₂ i₂gó'₅ ma₂cuɨn₃ Diú₄ jniog₄. Jme₂dsí₂ 'éi₂ bá₄ ma₂cuɨin₃ i₂jmo₃ a₂nio₃ tiá₂ dsɨ₅ jniog₄, i₂jmo₃ a₂jme₁'nió₄ jniog₄ rɨn'₅₄, i₂jmo₃ a₂jme₂'uán₄ dsɨ₅ guio₅₄.  
\v 8 Tsá₃ lë₁jmo₂ gueng'₅₄ ja₁jang'₅₄ jág₁ dsau₅ o₄quió'₄ Te₁gui'₅₄ quián₂, on₃ guë'₂ jmo₂ gueng'₅₄ o₄quió₃ jniá₂ ia₁ 'eng₅₄ né'₃ 'má₃ o₄quió'₄ 'éi₂. Të₂le₃ guen₅₄ bá₄ ján₃ jë₂ jmɨ₁uɨg₅ a₂já₅ o₄quió'₄ jág₁ dse₃, con'₂ lë́₅ bí₂ a₂cuë₅ Diú₄  
\v 9 i₂ca₂lió₂ jniog₄ ton'₂ ca₂të₃ ia₁jaun₂ le₃chong₂ jniog₄ jŋió₅. On₃jua'₅₄ ia₁ cha₂ 'e₂ dse₃ ma₂jmó₁ jniog₄, ia₁ le₂në₅ ca₂lë₃ dsɨ́₅ 'ŋiog₅ ca₂jmo₃ 'ua₁ dsɨ́₅ ca₂rë₃'nio₃ jniog₄ të₂le₃ 'uɨg₅₄ o₄quió'₄ Cristo Jesús. Ia₁ le₂jaun₂ jme₁ma₂'nio₃ bá₄ Diú₄ jniog₄ ca₂le₂jŋiá₅ lia'₂ con'₂ tsá₃ mɨ₂güɨ́g₃ ma₂jmo₃.  
\v 10 Diú₄ ma₂ca₂jme₃jnia₂₃ léi₄ ja₁con₂ dsa₂ mɨ₂güɨ́g₃, a₂'nio₃, jme₁ca₂chein₃ Jesucristo i₂lió₂ quián₂ jniog₄, co₂dsia₅ ca₂'éin₂ bí₂ a₂'io₅ 'mú₃; ton'₂ ca₂jme₃jnia₂₃ të₂le₃ quian'₅₄ jág₁ dse₃, 'a₂ lia'₂ le₃chan₂ dsa₂ co₂tan₅₄. 
\p  
\v 11 'Uɨg₅₄ jaun₂ ca₂rë₃'ɨ́n₁ jniá₂, ia₁jaun₂ qui₂i₁'ë́₃ jág₁ dse₃ la₂, a₂léng₂ jan₂ të₅ i₂chen₄ quiáin₅.\f + \fr 1:11 \ft A₂lɨn₅₄ chog₅₄ si₂ juá'₂ ján₃: “a₂jme₁tɨn₂₃ dsɨ₂nau₂.” \f* 
\v 12 'Uɨg₅₄ jaun₂ bá₄ a₂ŋag₅₄ ca₂le₃jë́₃ ne₅₄ uɨg₅ la₂. La₁ tsá₃ o₂guí'₃ jéin₅ jniá₂, ia₁ guion₅₄ bá₄ 'ein₂ të₂le₃ quió'₅ ma₂ca₂'ag₃ caun₂ dsɨ₃, 'éng₂ bá₄ a₂'io₅ 'éi₂ bí₂ a₂jmo₃ 'í₁ a₂le₃tei₅₄ jniá₂ ta₁ a₂ma₂ca₂dsia₃ gu₃,\f + \fr 1:12 \ft o₃, “a₂jmo₃ 'í₁ a₂ma₂ca₂dsia₃ jniá₂ gu₂ 'éi₂.” \f* ca₂lia'₂ ca₂të́₂ jmɨg₄ jaun₂. 
\p  
\v 13 Caun₂ jmo₄ bá₄ juɨ₁lia'₂ ma₂ca₂jme₁tɨng₂₃ 'ne₂. Juɨ₁chang'₂ bá₄ 'éng'₂, jme₁'nió₄ rɨ́ng'₂ le₃quió'₅ Cristo Jesús.  
\v 14 Quian'₅₄ bí₂ quió'₅ Jme₂dsí₂ quián₅ Diú₄ i₂jiog₅ të₂dsɨ₅ jniog₄, jmo₄ 'í₁ a₂ma₂dsia₃ Diú₄ gog'₂. 
\p  
\v 15 Ma₂ŋi'₅₄ bá₄, ca₂le₃jɨ́n₃ bá₄ dsa₂ chan₂ 'uë₃ Asia ma₂ca₂téi₂ bá₄ jniá₂, i₂lɨn₅₄ 'éi₂ Figelo quian'₅₄ Hermógenes në́₃.  
\v 16 Juɨ₁dsia₅₄ bá₄ Te₁gui'₅₄ ŋéi₂ dsɨ́₅ ca₂le₃jɨ́n₃ dsa₂ dsi₂néi₂ quió'₅ Onesíforo, ia₁ 'lióng₂ ráun₂ bá₄ ma₂guain₂₃ o₃jag₅₄ ca₂jmo₃ ca₂rë₃güɨg'₂ jme₂dsí₂ quió₃. On₃jua'₅₄ a₂jaun₂ gui'₅₄ ja₃jag₅₄ ia₁ a₂'eng₅₄ né'₃ 'má₃.  
\v 17 Të₂le₃ ca₂o₃'niog'₂ bá₄ jniá₂ jme₁guain₃ Roma. Ca₂lia'₂ ca₂dsáu'₂ bá₄ ca₂jmo₃.  
\v 18 Juɨ₁dsia₅₄ bá₄ Te₁gui'₅₄ ŋéi₂ dsɨ́₅ ja₁coin₂ jë₁ma₂të́₂ jmɨg₄ jaun₂. Dsá₂ bá₄ 'au'₂ 'ne₂, ca₂jme₃'o₅₄ 'ŋio₅ lɨn₃ jniog₄ lia'₂ con'₂ jme₁tio'₅₄ juɨg₂ Efeso. 
\c 2  
\s1 Jan₂ 'lióg₂ dsen₃ quián₅ Jesucristo 
\p  
\v 1 La₁ 'ne₂ në́₃ jón₃ quiáng₃, quen'₂ bí₂ nau₂ tiá₂ ia₁ a₂'ua₁ dsɨ́₅ Diú₄ ca₂jmo₃ të₂le₃ quian'₅₄ Cristo Jesús.  
\v 2 Ca₂le₃jë́₃ a₂ma₂nei'₂ ma₂juá'₃ jniá₂ të₃jɨn₄ juɨn₅ dsa₂ i₂ca₂të́₂ ne₄, jág₁ jaun₂ dsia₄ gu₂ dsa₂ i₂rë₂ti'₅₄ i₂quɨ'₅₄ jmɨg₄ jme₃tɨn₅ i₂sián'₂ táng₃.  
\v 3 'Ŋiag'₂ guë'₂ në́₃, tiang'₃ jmo₄ ŋag'₅₄ uɨg₅ o₄quió'₄ Jesucristo, jmo₄ bá₄ juɨ₁lia'₂ ja₁jmo₅ jan₂ 'lióg₂ tió'₃ dsɨ́₅ juɨ₁lia'₂ jme₁'ein₅₄ ne₄ 'nei₂.  
\v 4 'I₁jan₂ 'lióg₂ i₂jme₂ti₃ dse₃ ta₁ a₂chéin'₅ jua'₅₄ lé₂ le₃qui₂tiáin₂ tsɨ₃nei₃ jág₁ a₂ca₂tɨ́n₂ dsa₂ lë₁dsa₂, ia₁jaun₂ bá₄ lé₂ jme₃ti₃ con'₂ 'ŋio₂ dsɨ́₅ juɨg₅₄.  
\v 5 Ján₃ bá₄ le₂jaun₂ juɨ₁lia'₂ dsa₂ i₂co₅, tsá₃ a₁jaun₂ jua'₅₄ a₂lí'₂ 'e₂ lí'₂ në₁jua'₂ tsá₃ ca₂quɨ́n'₃ bí₂ co₃ con'₂ dsi₂ten₅₄ quí'₅ 'éi'₃.  
\v 6 Ján₃ bá₄ le₂jaun₂ juɨ₁lia'₂ dsa₂ i₂jmo₅ ta₁ ja₁nau₂, ca₂tɨ́in₂ bá₄ gue₃ le₂'uɨg₅₄ con'₂ ca₂tɨ́in₂ jë₁ma₂rau₂.  
\v 7 'Nio'₂ 'au'₂ a₂juá'₅ jniá₂ la₂. Te₁gui'₅₄ bá₄ jmo₃ le₃ŋɨ́g'₂ ca₂le₃jë́₃. 
\p  
\v 8 Dsau'₂ 'au'₂ jmo₄, tsá₃ juɨ₁dsi₂'én₂ 'au'₂ Te₁gui'₅₄ Jesucristo i₂ca₂jen'₅₄ táng₃ jɨn₄ 'lag₄, i₂jme₁lɨ́n₄ tsɨ₁jon₂ David; a₂la₂ bá₄ jág₁ dse₃ a₂lión₂ dsa₂, a₂'ë́₅ jniá₂.  
\v 9 'Uɨg₅₄ jág₁ dse₃ la₂ bá₄, jmo₅ jniá₂ tió'₅ dsɨ₃ ŋag₅₄ uɨg₅. Rë₂'ŋeg'₅₄ quian'₅₄ ŋí₁ cadena co₂jmóg'₂ dsa₂ juɨ₁lia'₂ ja₁jmá'₂ dsa₂ jan₂ dsa₂ i₂rë₂cán'₄ dso₄ juë'₂. La₁ jág₁ dse₃ quió'₅ Diú₄ në́₃, tsá₃ rë₂'ŋe'₅₄ quian'₅₄ ŋí₁ cadena.  
\v 10 Jaun₂ bá₄ lë₃, o₄quió'₄ dsa₂ i₂ma₂quión'₂ Diú₄ jmo₂₃ tió'₅ dsɨ₃ ca₂le₃jë́₃, ia₁jaun₂ bá₄ tɨ́n'₄ 'éi₂ ján₃ le₃quió'₅ Cristo Jesús ja₁lë́₄ co₂tág₅ co₂'né'₅ co₂tan₅₄. 
\p  
\v 11 Të₃dsón'₂ bá₄ dsau₅ a₂la₂: 
\q1 Në₁jua'₂ ca₂dsau₃ jniog₄ quian'₅₄ Jesucristo, 
\q2 ján₃ bá₄ le₂jaun₂ le₃chong₂ jniog₄ quiain'₅₄. 
\q1  
\v 12 Në₁jua'₂ ca₂náu₂ jniog₄ tiá₂,\f + \fr 2:12 \ft o₃, “Në₁jua'₂ ŋag₄ jniog₄ uɨg₅.” \f* 
\q2 ján₃ bá₄ le₂jaun₂ jme₁gon₂ jniog₄ quiain'₅₄. 
\q1 Në₁jua'₂ tsá₃ tión₅ jniog₄ a₂cuɨin₅, 
\q2 ján₃ bá₄ le₂jaun₂ tsá₃ 'ag₃ jniog₄ ján₃. 
\q1  
\v 13 Në₁jua'₂ tsá₃ ca₂rë₃tei₅₄ jniog₄, 
\q2 la₁ le₃ti'₅₄ bá₄ 'ŋiog₅, 
\q1 ia₁ caun₂ jág₁ ma₂juá'₂ Diú₄ 
\q2 tsá₃ a₁jaun₂ lé₂ jua'₅₄ tsá₃ jme₃ti₃. 
\s1 Juɨ₁lia'₂ dsa₂ i₂jme₂ti₃ dse₃ ta₁ ne₄ Diú₄ 
\p  
\v 14 A₂la₂ chei'₅₄ dsa₂ i₂jme₂tɨ́ng'₁: dsá₂ dsɨ́₅ juɨ₁jmo₁₂ o₄quió'₄ Te₁gui'₅₄ a₂tsá₃ tsɨin₃ quiain'₅₄ dsa₂, jág₁ a₂tsá₃ ta₁ tí₄, ia₁ në₁jua'₂ tsɨn₅ dsa₂ në́₃, tsá₃ 'e₂ a₂dse₃ jmo₂₃, jŋia'₅₄ con'₂ jmo₂₃ a₂gon₃ a₂'én₂ dsa₂ i₂nag₅ bá₄.  
\v 15 Jmo₄ dsen₅₄ 'au'₂ a₂jme₁jŋiag'₅ ne₄ Diú₄ a₂léi₄ ma₂ca₂tiang'₃ táu₂ a₂ma₂i₂ŋɨ́g'₂, a₂lɨ́ng'₅ jan₂ dsa₂ i₂jmo₅ ta₁, i₂tsá₃ 'e₂ jua'₅₄ cha₂ a₂jéin'₂ o₂guí'₃, i₂jme₂tag₅ rë₂ jág₁ tí₅.  
\v 16 Tsá₃ lë₁cuɨ́n₅ jmɨg₄ jua'₅₄ a₂dsiá'₁ jág₁ quió'₅ mɨ₂güɨ́g₃ a₂tsá₃ ta₁ tí₄. Ia₁ dsa₂ i₂co₂jmo₅ le₂jaun₂ caun₂ qui₂dsɨ₃léin₂ ne₄ juɨ₅ jë₄ cosa 'lɨg'₅₄.  
\v 17 Cosa a₂jme₂tag₂₃ qui₂dsɨ₂jón₃ lia'₂ jë₁qui₂dsɨ₂jón₃ caun₂ dso₄ a₂jmo₅ a₂dsa₂ nɨ₁ŋɨ₁ dsa₂. Le₂në₅ bá₄ ca₂lë₃ quian'₅₄ Himeneo quian'₅₄ Fileto në́₃.  
\v 18 Ma₂i₃léin₂ të₂le₃ cau₅ ja₁tsá₃ tí₅ jág₁, a₂qui₂jme₂tɨin₂₃ dsa₂ a₂juá'₂ ma₂ca₂të́₂ bá₄ jmɨg₄ a₂jen'₅₄ 'lag₄, jmo₂₃ a₂qui₂nió₅ i₂lɨn₅₄ 'a₂ lia'₂ 'éin₂.  
\v 19 La₁ Diú₄ ma₂chi'₃ caun₂ cho'₅₄ 'uɨg₅₄ a₂chí'₅ tiá₂ co₂tan₅₄. A₂jaun₂ jáng'₅ léi₄ a₂juá'₂: “I₂cuɨn₅ bá₄ Te₁gui'₅₄ i₂lɨ́n₅ dsa₂ quiáin₅”;\f + \fr 2:19 \ft Números 16:5.\f* jaun₂ në́₃: “Ca₂le₃jɨ́n₃ i₂quian₅ lia'₂ chen₂ Cristo\f + \fr 2:19 \ft o₃, “Ca₂le₃jɨ́n₃ i₂mɨ₅ ne₄ Te₁gui'₅₄.” \f* ca₂tɨ́in₂ jmo₃ cau₅ ca₂le₃jë́₃ ja₁jmo₅ dsa₂ cosa 'lɨg'₅₄.” 
\p  
\v 20 Juɨ₁lia'₂ caun₂ dsi₂néi₂ pa₁, on₃jua'₅₄ jmá'₃ ca₂ne₅₄ cosa jlá'₁ a₂lë́₅ quian'₅₄ cu₄nióg₄ quian'₅₄ cu₄tiog₂ tio'₅₄, ia₁ ján₃ bá₄ tio'₅₄ cosa a₂lë́₅ quian'₅₄ nɨ₁'ma₂, a₂lë́₅ quian'₅₄ ti₁gua'₅₄ ján₃. A₂lɨn₅₄ a₂lë́₅ 'í₁ a₂jmó'₂ dsa₂ ta₁ jmá'₃ lia'₂ ne₄ a₂jlá'₁; a₂lɨn₅₄ guë'₂ qui₂jmó'₂ dsa₂ ta₁ lia'₂ 'ei₅ ne₅₄ cosa.\f + \fr 2:20 \ft 'Nio'₂ ja₁ton₅ Romanos 9:21.\f* 
\v 21 Në₁jua'₂ ca₂jŋiá'₃ 'ne₂ ca₂le₃jë́₃ ne₅₄ juɨ₅ 'lɨg'₅₄, a₂jmó'₂ jmá'₃ ca₂ne₅₄ cosa dse₃, jaun₂ guë́₄ léng'₂ lia'₂ lë́₅ caun₂ nɨ₁uɨng₅ jlá'₁ a₂lë́₅ 'í₁, jaun₂ guë́₄ téng'₃ ta₁ cáun₂ Juɨg'₂ 'ne₂ jmó'₂ ca₂ne₅₄ ta₁ dse₃ quió'₅. 
\p  
\v 22 Cuɨn'₅₄ 'ne₂ ca₂le₃jë́₃ ne₅₄ cosa 'lɨg'₅₄ a₂ja₂ dsɨ́₅ dsa₂ jmo₃ të₁lia'₂ mei'₂. Quian₂ caun₂ juɨ₅ co₂dsau₅ a₂'éng'₂, a₂'nióg'₃ rɨ́ng'₂, a₂'ei₅ tei₄ 'au'₂ quian'₅₄ ca₂le₃jɨ́n₃ dsa₂ i₂ma₂le₁jë́₃ të₂dsɨ́₅, i₂jme₂juɨn'₂ Te₁gui'₅₄.  
\v 23 Tsá₃ lë₁tón'₂ juɨ₅ 'e₂ jág₁ tsá₃ ta₁ tí₄ a₂tsɨ₂jɨn₅ dsa₂ i₂tsá₃ ma₂'en₅₄ dsɨ́₅. Ia₁ ma₂ŋi'₅₄, a₂jŋia'₅₄ dsiog₅ mɨ'₅₄ bá₄ a₂jaun₂.  
\v 24 Jan₂ dsa₂ i₂jme₂ti₃ ta₁ ne₄ Te₁gui'₅₄ tsá₃ ca₂tɨ́in₂ tsɨ₃nei₃ jë₄ mɨ'₅₄, të₂le₃ 'nió'₅ jme₃dsein₃ bá₄ quian'₅₄ ca₂le₃jɨ́n₃. 'Nió'₅ léin₂ jan₂ dsa₂ i₂quɨ'₅₄ jmɨg₄ jme₃tɨin₂₃ dsa₂, juɨn'₂ dsɨ́₅,  
\v 25 jmo₃ 'ua₁ dsɨ́₅ jë₁chein'₃ juɨ₅ rë₂ juɨ₁lia'₂ dsa₂ i₂nau₂ quen₅, con'₂ tsá₃ ŋó₅ në₁jua'₂ ca₂cuë₃ Diú₄ jmɨg₄ a₂le₃tsɨ́n₃ dsɨ́₅ dsa₂ 'éi₂, ia₁jaun₂ le₂në₅ le₃cuɨ́'₅ jág₁ tí₅;  
\v 26 ia₁jaun₂ lióin₂ 'uɨ́in₃ tsɨ₁cág'₅ quió'₅ i₂së₃dsen₃ i₂ca₂jo₃ ia₁jaun₂ jmo₃ a₂'ŋio₂ dsɨ́₅ 'éi₂. 
\c 3  
\s1 'A₂ lia'₂ niog₅ lén₂ dsa₂ jmɨg₄ jë₁ca₂tó'₂ 
\p  
\v 1 'Nió'₅ le₃ŋi'₅₄ 'ne₂ ján₃, jë₁ma₂ja₂quián₃ jmɨg₄ jë₁ca₂tó'₂, 'ŋio₅ lɨn₃ le₃gau₂, quian₅ ta₁ lé₂.  
\v 2 Jmɨg₄ jë₁ca₂tó'₂ le₃chan₂ dsa₂ i₂jŋia'₅₄ 'nioi₃ guioin₅₄ bá₄ quian'₅₄ cú₁; le₃chan₂ dsa₂ i₂jŋia'₅₄ jme₃jlán'₁ jmo₃ róin₂ guioin₅₄; le₃chan₂ dsa₂ i₂lë₁të₂'o'₂ të₂'oin'₂ rɨin'₅₄; le₃chan₂ dsa₂ i₂tsá₃ ma₃jme₃gan₃ Diú₄, i₂tsá₃ ma₃jme₃gan₃ chog₅₄-jmei₂ në́₃. Le₃chan₂ dsa₂ i₂tsá₃ 'e₂ ti₁'mag'₄ cha₂ ja₁coin₂, on₃ guë'₂ ma₃jme₃gó'₃ juá'₅ quió'₅ Diú₄.  
\v 3 Le₃chan₂ dsa₂ i₂tsá₃ 'nio₃ rɨn'₅₄, i₂tsá₃ ma₃'e₂ ŋéi₂ dsɨ́₅ dsa₂ mɨ₂güɨ́g₃ rɨn'₅₄; le₃chan₂ dsa₂ i₂tsá₃ ma₃jme₃ti₃ 'e₂ jág₁ lɨ'₅₄ quian'₅₄ rɨin'₅₄; le₃chan₂ dsa₂ të₂jág₁ i₂lë₁qui₃'nɨ₃ rɨn'₅₄; le₃chan₂ dsa₂ i₂tsá₃ ŋi₅, tsá₃ tɨin₂ 'a₂ lia'₂ jme₃'uán₂ dsɨ́₅; le₃chan₂ dsa₂ i₂lén₂ juɨ₁lia'₂ já'₂ tsau₂ dsɨ́₅; le₃chan₂ dsa₂ i₂le₃'io'₅₄ ca₂le₃jë́₃ cosa dse₃.  
\v 4 Le₃chan₂ dsa₂ i₂qui₃jɨ́n'₂ rɨn'₅₄; le₃chan₂ dsa₂ i₂tsá₃ 'en₅₄ dsɨ́₅ jmo₃ të₂le₃ dséi₂ në₁'e₂ caun₂ cosa jmo₃ juɨ₁le₅₄ bá₄ 'e₂ ca₂lë₃; 'ŋio₅ cain'₅₄ 'ŋio₅ ŋi₅ jmo₃; le₃chan₂ dsa₂ i₂'no'₂ jmá'₃ juɨ₅ ja₁le₃chain₂ o₂'ŋió₃ o₂jŋia₃ dsɨ₅ bá₄ 'nió'₄ jme₁'niai'₂ Diú₄.  
\v 5 Le₃chan₂ dsa₂ i₂jmo₃ a₂ŋɨ́₄ lë₃ cuɨin₂₃ Diú₄, la₁ le₃léi₄ bá₄ 'a₂ lia'₂ të₁i₃nioi₅₄ le₃chain₂, tsá₃ 'e₂ bí₂ quió'₅ Diú₄ cha₂ ja₁coin₂. 
\p Co₂dsia₅ jŋiag'₃ cau₅, tsá₃ lë₁'ú₅ quian'₅₄ dsa₂ i₂le₂'éi₂.  
\v 6 Jë₄ quió'₅ dsa₂ le₂'éi₂, chan₂ i₂lɨn₅₄ i₂qui₂dsɨ₂ton'₅₄ tsɨ₁'né₅, qui₂jme₂gain₂₃ 'io₅₄ 'uan₅₄ i₂qui₂rë₂cán'₄ dsáu₁ 'ŋio₅ lɨn₃, i₂ma₂lë́₅ dsɨ́₅ jmo₃ ca₂le₃jë́₃ guë́₄ cosa 'lɨg'₅₄.  
\v 7 Co₂tan₅₄ bá₄ jmo₂₃ lia'₂ jmo₅ dsa₂ i₂ŋɨ́₄ lë₃ 'nio₃ le₃tɨn₂ jág₁, la₁ tsá₃ a₁jaun₂ quɨ'₅₄ jmɨg₄ le₃cuɨ́'₅ jág₁ tí₅ dsón'₂.  
\v 8 Juɨ₁lia'₂ ca₂jmo₃ on₃ dsa₂ 'lɨn'₅₄ i₂jme₁chen₂ Janes quian'₅₄ Jambres ca₂rë₃'ŋiai₅₄ Moisés, ján₃ bá₄ le₂jaun₂ 'io'₅₄ dsa₂ 'éi₂ jág₁ dsau₅ dsón'₂. Dsa₂ i₂le₂'éi₂ në́₃ co₂dsia₅ ma₂ŋɨ́'₂ të₂le₃ jen₅ bá₄ dsɨ́₅, 'uɨg₅₄ jaun₂ tsá₃ ma₂'e₂ tió'₅ a₂le₃ŋɨ́'₂ dse₃ dsɨ́₅ juɨ₁lia'₂ ja₁ŋɨ́'₂ dsɨ́₅ dsa₂ i₂'én₂.  
\v 9 La₁ tsá₃ jua'₅₄ ja₁uɨ́ng₂ dsi₁léin₂, ia₁ ca₂le₃jɨ́n₃ bá₄ dsa₂ le₃cuɨg₅ a₂lɨ́in₅ dsa₂ co₄, juɨ₁lia'₂ ca₂i₃ŋɨ́₂ le₃on₃ i₂ca₂jme₃'ŋia₅₄ Moisés. 
\s1 Jág₁ jë₁ca₂tó'₂ a₂ca₂cuë₃ guë́₄ Pa₄ ca₂tsɨ́'₃ Timoteo 
\p  
\v 10 La₁ 'ne₂ në́₃ ma₂ca₂rë₃tɨ́ng'₃ bá₄ dse₃ jë₂ lia'₂ lë́₅ juá'₅ a₂ca₂jme₁tag₅ jniá₂; ma₂ŋi'₅₄ 'a₂ lia'₂ lɨ́ng₅, chang₂ ma₂guio₃; ma₂cuɨng'₂ bá₄ 'e₂ ta₁ ma₂guio₃ jniá₂ jmo₂₃; 'éng'₂ bá₄ ján₃ 'a₂ lia'₂ 'én₂ jniá₂; jme₂juɨ́ng'₁ bá₄ 'au'₂ juɨ₁lia'₂ ma₂ca₂jme₁juɨn'₂ jniá₂ dsɨ₃; jme₂'nióg'₃ bá₄ rɨ́ng'₂ juɨ₁lia'₂ ma₂jmo₃ jniá₂; tiang'₃ bá₄ ján₃ juɨ₁lia'₂ ca₂tió₃ jniá₂.  
\v 11 Ma₂qui₂ma₂'ein₃ dsa₂, ma₂qui₂ma₂ŋag₅₄ uɨg₅, juɨ₁lia'₂ ca₂i₃ŋɨ́g₂ juɨg₂ ciudad Antioquía, juɨg₂ Iconio quian'₅₄ juɨg₂ Listra në́₃. Qui₂ca₂co₃'ein₃ dsa₂, la₁ ne₄ ca₂le₃jë́₃ a₂në₅, ca₂lió₂ bá₄ Te₁gui'₅₄.  
\v 12 Jaun₂ a₂dsón'₂ bá₄ jaun₂, ca₂le₃jɨ́n₃ i₂'nio₃ le₃chan₂ lë́₅ 'í₁ quián₅ Cristo Jesús, tion₅₄ le₂jaun₂ dsɨ₃ŋɨ́i₂ uɨg₅ co₂'ein₃ dsa₂.  
\v 13 La₁ dsa₂ 'lɨn'₅₄ në́₃ quiain'₅₄ ca₂le₃jɨ́n₃ dsa₂ i₂qui₂jme₂gau₅, tsá₃ ma₂'e₂ dse₃ jua'₅₄ le₃chain₂, ia₁ caun₂ le₃'lɨin'₅₄ bá₄, qui₂jme₃gau₂₃, qui₂rë₂gain₂ guioin₅₄ në́₃. 
\p  
\v 14 La₁ 'ne₂ në́₃, nau₂ tiá₂ a₂ma₂ca₂rë₃tɨ́ng'₃, caun₂ bá₄ 'ei₅ 'au'₂ jág₁ a₂ma₂ca₂rë₃'éng'₂. 'Ŋiag'₂ bá₄ ŋi'₅₄ 'ein₂ ca₂jme₃tag₅.  
\v 15 Lia'₂ con'₂ bɨng'₅₄ bá₄ ma₂ŋe'₃ cuɨng'₂ Si₂ jŋió₅ quió'₅ Diú₄. Si₂ në₅ bá₄ a₂jiog₃ quiáng'₂, a₂tɨ́ng'₄ të₂le₃ quian'₅₄ Cristo Jesús ia₁ 'éng'₂.  
\v 16 Ca₂le₃jë́₃ bá₄ Si₂ quió'₅ Diú₄ ca₂lë₃ të₂le₃ quian'₅₄ Jme₂dsí₂ quiáin₅, a₂tí₅ ta₁ jme₃tag₅ a₂dse₃, të₂jí₂, chein'₂ dsa₂ caun₂ juɨ₅ rë₂, jme₃tag₅ 'a₂ lia'₂ i₂nio₄ dsa₂ juɨ₅ co₂dsau₅,  
\v 17 ia₁jaun₂ lén₂ dsa₂ quián₅ Diú₄ jan₂ dsa₂ ma₂ron₂, rë₂ rë₂qui₂rë₂'an₂ dsɨ́₅, rë₂'ŋia₅ ca₂le₃jë́₃ a₂'nió'₅ quió'₅ jaun₂ jmo₃ ca₂le₃jë́₃ ne₅₄ a₂dse₃. 
\c 4  
\p  
\v 1 Jág₅ bá₄ Diú₄ quian'₅₄ Te₁gui'₅₄ Jesucristo në́₃ i₂lë́₅ jág₁ jŋió'₂ ja₃goin₂, i₂qui₃dsɨ₅ 'éi'₃ ne₄ quió'₅ i₂chan₂ lia'₂ i₂ma₂dsan₃ në́₃. Jaun₂ lë́₃ chi₂quian₅₄ jniá₂ jmɨg₄ 'ne₂:  
\v 2 'Ë́₃ jág₁ dse₃. Ma₂rë₂jáng'₁ 'nio'₂ juɨ₅ 'a₂ lia'₂ jme₁tɨng'₂ dsa₂ jme₁cuɨn₅ jmɨg₄ o₃ tsá₃ cuɨn₅ jmɨg₄ 'e₂. Jmó'₂ jme₁'uang'₅₄ dsɨ́₅ dsa₂, të₂jén₃ dsa₂, tioin'₂ jág₁ dse₃, o₁lɨ́g'₂ jmɨg₄ jua'₅₄ a₂jmó'₂ a₂tsá₃ jme₁juɨn'₂ 'au'₂ quiain'₅₄ jë₁jme₂tɨ́in'₂.  
\v 3 Ia₁ já₅ jmɨg₄ a₂tsá₃ ma₃jmo₃ dsa₂ tió'₅ dsɨ́₅ quian'₅₄ juá'₅ dse₃. Të₂le₃ lia'₂ con'₂ lë́₅ dsɨ́₅ guioin₅₄ qui₃'nai'₂ juɨn₅ lɨn₃ të₅ i₂jme₃tag₅ jmá'₃ a₂'ɨ́n₅ dsɨ́₅ guioin₅₄ nag₃ bá₄.  
\v 4 Cau₅ bá₄ jéin'₃ táng₃ juɨ₁lia'₂ ja₁jme₂tag₅ dsa₂ jág₁ tí₅ dsón'₂. Cang₂ jaun₂ në́₃, tóin'₃ juɨ₅ dsɨ₃léin₂ nag₃ ca₂lia'₂ 'ei₅ ne₄ jág₁ cuento ga₂ a₂'én₂ dsa₂.  
\v 5 La₁ 'ne₂ në́₃, 'en₅₄ 'au'₂ jmo₄, tiang'₃ jmo₄ ŋag'₅₄ uɨg₅. Caun₂ qui₂'ë́₃ bá₄ jág₁ dse₃ a₂lión₂ dsa₂. Jme₁ti₁ dse₃ ta₁ quiáng'₂. 
\p  
\v 6 Jniá₂ në́₃, ca₂të́₂ jmɨg₄ jë₁o₃'ɨng₅ mɨ₂güɨ́g₃ la₂, ia₁ në₃ guë́₄ jŋag'₃ dsa₂ juɨ₁lia'₂ ja₁jŋɨ'₂ dsa₂ já'₂ i₂jén'₂ dsa₂ ne₄ Diú₄.  
\v 7 Ma₂ca₂quɨ́n'₃ jniá₂ bí₂, ma₂jmo₃ a₂dse₃ juɨ₁lia'₂ ja₁jmo₅ jan₂ 'lióg₂ ne₄ 'nei₂; ma₂ca₂ŋɨ₃ jniá₂ lia'₂ con'₂ lë́₅ juɨ₅ quió'₅ Te₁gui'₅₄, ca₂dsióg₃ jniá₂ të₂ jë₁ca₂tó'₂ juɨ₅; ma₂ca₂jmá'₃ tiá₂ a₂'éng₂.  
\v 8 Në₃ guë́₄ në́₃ ma₂lë́₅ co₂jŋia₅₄ ja₁le₃chang₃ dse₃, co₂'nió'₄ caun₂ corona a₂cuë₃ Te₁gui'₅₄ jmɨg₄ jaun₂. Ia₁ Te₁gui'₅₄ 'éi₂ bá₄ i₂qui₃dsɨ₅ 'éi'₃ co₂rë₂ jmɨg₄ jaun₂, on₃jua'₅₄ a₂cuë₃ jmá'₃ jan₂ jniá₂ corona; a₂cuë́'₃ ca₂le₃jɨ́n₃ i₂le₁jŋiog₅ 'ŋio₂ dsɨ́₅ ca₂lia'₂ ca₂të́₂ jmɨg₄ jaun₂ a₂guain'₂ táng₃. 
\s1 Cuë́'₅ jág₁ rɨin'₅₄ con'₂ ca₂tɨ́in₂ guioin₅₄ 
\p  
\v 9 Jmo₄ dsen₅₄ 'au'₂ a₂i₁jag'₄ jniá₂ ŋi'₅₄ ta₁ la₂.  
\v 10 Ia₁ i₂chen₂ Demas ma₂téi₂ bá₄ 'uɨg₅₄ ia₁ 'ŋio₅ lɨn₃ guë́₄ 'ɨ́n₅ dsɨ́₅ cosa a₂cha₂ mɨ₂güɨ́g₃ la₂, jaun₂ ma₂ŋó₅ juɨ₅ juɨg₂ Tesalónica. I₂chen₂ Crescente guë'₂ në́₃, ma₂ŋó₅ juɨ₅ 'uë₃ Galacia; Tito guë'₂ në́₃ ma₂ŋó₅ juɨ₅ Dalmacia.  
\v 11 Jŋia'₅₄ lia'₂ jan₂ Lucas bá₄ i₂quian'₅₄ guë́₄ jniá₂ ja₁lá₃. 'Nia'₂ Marcos ia₁jaun₂ jain'₅₄ ŋe'₅₄ quiain'₅₄, ia₁ téin₅ ta₁ jme₃ti₃.  
\v 12 Tíquico guë'₂ në́₃ ca₂tsɨ́in₂ juɨ₅ juɨg₂ Efeso.  
\v 13 Jë₁ma₂të́₂ rë₁ŋe'₅₄, quian₂ co₂nio₄ tsɨ₁'mɨ'₂ dsiog₂ quió₃ a₂ca₂dsia₃ juɨg₂ Troas ja₁quió'₄ Carpo. Ján₃ bá₄ le₂jaun₂ quian₂ si₂ rë₂bɨn₅ quió₃. La₁ 'ŋio₅ guë́₄ dsen₅₄ 'nió'₅ nɨ₁lo₁ já'₂ a₂lë́₅ tsɨ₁mɨ₂si₂. 
\p  
\v 14 Alejandro i₂lɨ́n₅ të₅ŋí₁ 'ŋio₅ lɨn₃ tsá₃ 'e₂ dse₃ ma₂jmóg'₂. Te₁gui'₅₄ bá₄ quí₃ quió'₅ lia'₂ con'₂ lë́₅ a₂ma₂jmo₃.  
\v 15 'Í₁ jmo₄ 'ne₂ ján₃ ia₁jaun₂ tsá₃ jo₅₄, ia₁ 'ŋio₅ lɨn₃ ma₂nau₂ quein₅ a₂'io'₅₄ jág₁ dse₃ quián₂. 
\p  
\v 16 Le₂'uɨg₅₄ con'₂ jme₁ca₂chei'₃ dsa₂ ne₄ dsɨ₂tan₅₄ jë₁ca₂cáun₃ dsa₂ le₂'uɨg₅₄ jág₁ dsau₅ quió₃, 'i₁jan₂ tsá₃ 'ein₂ ca₂jme₃quiong'₅₄, ca₂téi₂ ca₂le₃jɨ́n₃. Tsá₃ juɨ₁quion₂ bá₄ Diú₄ 'í₁ quió'₅ ia₁ ca₂jmóg'₂ le₂jaun₂.  
\v 17 La₁ 'ŋiog₅ bá₄ Te₁gui'₅₄ ca₂jme₃quiong'₅₄ ca₂cuë₃ bí₂ ia₁jaun₂ të₂le₃ quian'₅₄ jniá₂ ca₂rë₃ti₃ ca₂jme₁tɨng₂₃ dsɨ₂nau₂, ca₂lia'₂ rë₂'ŋia₅ jág₁ dse₃. Jaun₂ le₂në₅ bá₄ ca₂lió₂ Te₁gui'₅₄ jniá₂ mɨ₂'o₄ dsɨ₂'ia'₂.  
\v 18 La₁ Te₁gui'₅₄ bá₄ caun₂ lió₂ guë́₄ ia₁jaun₂ tsá₃ dsɨ₃ŋɨ́g₂ ca₂le₃jë́₃ cosa 'lɨg'₅₄, jaun₂ jniá₂ i₂lë́₅ 'í₁ quiáin₅, të₂ guei'₅₄ i₂juɨ́g₃ ja₁goin₂. ¡Juɨ₁jme₂juag'₂ bá₄ dsa₂ co₂tan₅₄! ¡A₂méi₃! 
\s1 'Ág'₅ jág₁ jë₁ca₂tó'₂, cuag₂₃ Diú₄ në́₃ 
\p  
\v 19 Dsian'₄ jniá₂ jág₁ cuɨ́ng₅ Diú₄ Priscila\f + \fr 4:19 \ft griego: Prisca.\f* quian'₅₄ Aquila në́₃, quian'₅₄ ca₂le₃jɨ́n₃ dsa₂ dsi₂néi₂ quió'₅ Onesíforo në́₃.  
\v 20 Juɨg₂ Corinto bá₄ ca₂jŋia₃ Erasto. I₂chen₂ Trófimo guë'₂ ca₂të₁'ŋiá₄ dso'₅₄ jme₁o₃'ɨ́ng₃ juɨg₂ Mileto.  
\v 21 Quen'₂ bí₂ ŋe'₅₄ ŋi'₅₄ ta₁ né'₃ a₂të₅₄ jein₂ güɨ́g₂. Eubulo quiain'₅₄ Pudente, Lino quiain'₅₄ Claudia në́₃ quiain'₅₄ ca₂le₃jɨ́n₃ rɨn'₅₄ jniog₄ dsiáin'₂ jág₁ ne'₅₄ a₂cuɨin₂₃ Diú₄ 'ne₂. 
\p  
\v 22 Juɨ₁'en₅₄ bá₄ Te₁gui'₅₄ Jesucristo ja₁con₂ jme₂dsí₂ quiáng'₂; juɨ₁jme₂gu'₅₄ bá₄ Diú₄ 'nia'₂. 
\p Co₂në₅.