\id 2TH  
\h SEGUNDA TESALONICENSES 
\toc1 Si₂ carta jë₁ca₂të́₂ tɨn₃ a₂ca₂jmo₃ San Pablo ne₄ dsa₂ TESALONICENSES 
\toc2 SEGUNDA TESALONICENSES 
\toc3 2 Ts. 
\mt2 Si₂ carta jë₁ca₂të́₂ tɨn₃ a₂ca₂jmo₃ San Pablo ne₄ dsa₂ 
\mt1 TESALONICENSES 
\c 1  
\s1 Pablo quiain'₅₄ rɨin'₅₄ jmo₂₃ si₂ a₂chein₃ ne₄ Guá'₅ i₂chan₂ juɨg₂ Tesalónica 
\p  
\v 1 Jniá₂ Pa₄, quian'₅₄ Silvano,\f + \fr 1:1 \ft Lia'₂ chen₂ Silvano, co₂rë₂ quian'₅₄ Silas.\f* quian'₅₄ Timoteo në́₃, dsian'₄ jnia'₅₄ si₂ la₂ ne'₅₄ 'nia'₂ rɨn'₅₄ jniog₄ i₂chan₂ juɨg₂ Tesalónica, 'nia'₂ dsa₂ 'ei₅ caun₂ jág₁ quian'₅₄ Diú₄ Jmei₂ jniog₄, quian'₅₄ Te₁gui'₅₄ Jesucristo.  
\v 2 Juɨ₁jme₂gu'₅₄ bá₄ Diú₄, juɨ₁jme₂gu'₅₄ Te₁gui'₅₄ Jesucristo në́₃, jmo₃ 'ua₁ dsɨ́₅ ja₁con'₂ 'nia'₂, juɨ₁'ei₅ dse₃ 'au'₂, tiong'₅₄ 'ei₅ tei₄. 
\s1 'Ë́₂ Diú₄ uɨg₅ ja₁con₂ dsa₂ i₂le₁cán'₄ dso₄ jë₁ma₂të́₂ rë₁guan'₂ táng₃ Cristo mɨ₂güɨ́g₃ 
\p  
\v 3 Rɨn'₅₄ jniog₄, ca₂le₃jë́₃ jmɨg₄ bá₄ ca₂tág₂ jnia'₅₄ cuë'₅₄ ti₁'mag'₄ Diú₄ o₄quián'₂ 'nia'₂, ia₁ le₂jaun₂ bá₄ dse₃ dsióg₅, ia₁ caun₂ dsɨ₂cón'₃ bá₄ 'nia'₂ a₂rë₂'éng'₂ jág₁ quió'₅ Diú₄, caun₂ jme₂'nióg'₃ bá₄ 'nia'₂ rɨ́ng'₂ 'ŋio₅ lɨn₃ le₂jang'₂ le₂jang'₂.  
\v 4 Jaun₂ lë₃, jmá'₃ lia'₂ jág₁ dse₃ bá₄ dsia₂ jnia'₅₄ 'ɨ́n₅ 'nia'₂ jɨn₄ guá'₅ quián₅ Diú₄, 'a₂ lia'₂ ma₂ca₂tian'₃ 'nia'₂ a₂ma₂ca₂jme₁juɨng'₂ 'au'₂ a₂'én'₂ 'nia'₂ ne₄ ca₂le₃jë́₃ a₂co₂'ein₅ dsa₂, a₂qui₂jmóg'₂ dsa₂ në́₃.  
\v 5 Jaun₂ le₂në₅ cuë₅ léi₄, con'₂ dsi₂ten₅₄ bá₄ qui₂dsɨ₅ Diú₄ 'éi'₃, ia₁jaun₂ lén'₂ 'nia'₂ dsa₂ i₂ca₂tɨ́n'₂ dsi₁niog'₃ ja₁gon₂ Diú₄; o₄quió'₄ a₂jaun₂ ŋag'₅₄ 'nia'₂ uɨg₅. 
\p  
\v 6 Ján₃ bá₄ le₂jaun₂ dsi₂ten₅₄, Diú₄ bá₄ jme₃rë́₃ cuë́'₃ uɨg₅ a₂ca₂tɨ́n₂ dsa₂ i₂ma₂jmá'₂ 'nia'₂.  
\v 7 Jaun₂ 'nia'₂ dsa₂ i₂qui₂ma₂ŋag'₅₄ uɨg₅, Diú₄ jmo₃ a₂'ag₃ tei₄ 'au'₂ 'nia'₂, a₂'ag₃ tei₄ dsɨ₅ jnia'₅₄ ján₃ jë₁ma₂të́₂ rë₁jŋió'₂ Te₁gui'₅₄ Jesús juɨ₅ guei'₅₄ i₂juɨ́g₃ jë₄ si₂ ca₂jo'₅₄, quiain'₅₄ ángeles i₂'uan'₂ quiáin₅.  
\v 8 Jŋiói'₂ a₂cuë́'₃ uɨg₅ dsa₂ i₂tsá₃ cuɨn₅ Diú₄, ia₁ on₃ guë'₂ juɨ₅ ca₂tón'₃ jág₁ dse₃ quió'₅ Te₁gui'₅₄ Jesucristo.  
\v 9 Ca₂le₃jɨ́n₃ 'éi₂ gue₃ 'liain'₅₄ a₂dsɨ₃'éin₂ co₂ŋei'₅₄, co₂dsia₅ jŋiai'₃ ne₄ Te₁gui'₅₄, dsɨ₃toin'₅₄ uɨ́ng₂ ja₁tsá₃ ma₃'e₂ bí₂ jlá'₁ quió'₅ Diú₄ jniá₂.  
\v 10 Jmɨg₄ jaun₂, jë₁ma₂të́₂ rë₁guan'₂ Te₁gui'₅₄, a₂jme₃juag'₂ ca₂le₃jɨ́n₃ dsa₂ i₂'én₂ quiáin₅,\f + \fr 1:10 \ft lit. “dsa₂ jŋió₅ quiáin₅.” \f* jaun₂ dsa₂ i₂'én₂ në́₃ qui₂dsɨ₃gó'₃ dsɨ́₅ jág₃ jɨ́in₂ Te₁gui'₅₄. Ján₃ bá₄ o₁ton'₄ 'nia'₂ ja₁jaun₂, ia₁ a₂ma₂ca₂rë₃'én'₂ 'nia'₂ jág₁ dsau₅ quián₂ jnia'₅₄. 
\p  
\v 11 'Uɨg₅₄ jaun₂ bá₄ ján₃, chi₂len'₄ jnia'₅₄ Diú₄ ca₂le₃jë́₃ jmɨg₄ o₄quián'₂ 'nia'₂, juɨ₁i₂nio'₄ 'nia'₂ con'₂ dsi₂ten₅₄ i₃nio₄ dsa₂ i₂ma₂të́'₃ quiáin₅; juɨ₁jme₂ti₃ të₂le₃ quian'₅₄ bí₂ quió'₅ ca₂le₃jë́₃ a₂dse₃ a₂'ŋio₂ 'au'₂ 'nia'₂ jmó'₂, quian'₅₄ ca₂le₃jë́₃ ta₁ a₂jmo'₂ 'nia'₂ ia₁ a₂'éng'₂.  
\v 12 Jaun₂ le₂në₅ bá₄ lé₂ le₃juɨn'₂ Te₁gui'₅₄ Jesucristo quián₂ ja₁con'₂ 'nia'₂, ján₃ bá₄ le₂jaun₂ 'nia'₂ ja₁con₂ 'éi₂, lia'₂ con'₂ lë́₅ a₂'ua₁ dsɨ́₅ Diú₄ quian'₅₄ Te₁gui'₅₄ Jesucristo. 
\c 2  
\s1 Le₃jniá₂ jan₂ dsa₂ i₂tsá₃ 'e₂ 'éi'₃ gó'₅ 
\p  
\v 1 Jaun₂ në́₃, 'nia'₂ rɨn'₅₄ jniog₄, juɨ₁lia'₂ jë₁ma₂të́₂ rë₂guan'₂ Te₁gui'₅₄ Jesucristo, jë₁ma₂të́₂ rë₁tió'₄ lo'₂ quiain'₅₄, mɨ₂ jnia'₅₄ chei₂ 'nia'₂, rɨn'₅₄ jniog₄,  
\v 2 a₂tsá₃ caun₂ lë₁jme₁tsɨ́n₄ 'nia'₂ a₂dsɨ₃jiog₅ 'au'₂ le₂siá'₂, on₃ guë'₂ can₂ 'nia'₂ go₂'i₃, në₁'e₂ guë́₃ jág₁ a₂já₅ të₂le₃ quian'₅₄ jan₂ jme₂dsí₂, on₃ guë'₂ jág₁ a₂dsia₅ dsa₂, on₃ guë'₂ në₁'e₂ si₂ carta a₂chen₅ dsa₂ ne'₅₄ 'nia'₂ në₂jag₄ bá₄ a₂jmo₂ jnia'₅₄, jë₁juá'₂ dsa₂ a₂ma₂ca₂të́₂\f + \fr 2:2 \ft o₃, “a₂ma₂ja₂quián₃.” \f* jmɨg₄ quió'₅ Te₁gui'₅₄.  
\v 3 Tsá₃ lë₁cuɨ́n₅ 'nia'₂ jmɨg₄ a₂jme₃gau₅ dsa₂. Ia₁ né'₃ a₂te₅₄ jmɨg₄ jaun₂, jmo₃ dsa₂ caun₂ jág₁ a₂jme₃'ŋiai₅₄ Diú₄, jaun₂ le₃jniá₂ jan₂ dsa₂ i₂tsá₃ 'e₂ 'éi'₃ gó'₅ 'i₁caun₂, i₂ma₂'i₄ 'éi'₃ dsɨ₃'én₂.  
\v 4 Dsa₂ 'éi₂ náu₃ quein₅ ne₄ ca₂le₃jë́₃ a₂jmo₅ dsa₂ dsɨ́₅ lɨ́n₅ Diú₄, o₃ a₂jme₂juag'₂ dsa₂ 'e₂. Ca₂lia'₂ dsióg₄ guá₃ të₂ dsi₂néi₂ guá'₅ templo quió'₅ Diú₄, a₂jmo₂₃ lɨ́in₅ Diú₄. 
\p  
\v 5 ¿Tsa₁ dsá₂ 'au'₂ 'nia'₂, lia'₂ con'₂ jme₁'eng₅₄ guë́₄ quian'₅₄ 'nia'₂, ca₂juá'₃ jniá₂ le₃jë́₃ a₂në₅?  
\v 6 Jaun₂ në́₃ ma₂ŋi'₅₄ bá₄ 'nia'₂ 'ein₂ 'éi₂ i₂jné₅ juɨ₅, jaun₂ tsá₃ jme₃jniog₂₃ jŋiá₅ né'₃ a₂të₅₄ jmɨg₄ quió'₅.  
\v 7 La₁ tion₅₄ bá₄ ma₂jmo₅ i₂'lɨn'₅₄ 'éi₂ bí₂ rë₂'ma₄ quió'₅ ia₁jaun₂ tsá₃ le₃ji'₅₄ dsa₂ 'éi'₃ quió'₅ Diú₄. Jŋia'₅₄ lia'₂ chi₁jŋia₂₃ a₂jŋia'₃ i₂chén'₅ dsi₂jo₂ i₂jmo₅ jnág₅ juɨ₅.  
\v 8 Jaun₂ guë́₄ jme₃jnia₅ dsa₂ 'lɨn'₅₄ 'éi₂. Jaun₂ Te₁gui'₅₄ Jesús në́₃ jŋag'₃ quian'₅₄ dsí₂ tio'₅₄ 'o₅₄, 'éin₂ 'éi₂ quian'₅₄ a₂co₂tág₅ co₂'né'₅ quió'₅ në́₃ jë₁jŋiói'₂.  
\v 9 Satanás bá₄ jmo₃ jiá₃ dsa₂ 'lɨn'₅₄ 'éi₂, ia₁ guáin₂ ján₃ quian₅ bí₂ a₂o₂dsain₂ jmo₃ léi₄ juë'₂ jme₃gau₂₃.  
\v 10 Ca₂le₃jë́₃ ne₅₄ cosa 'lɨg'₅₄ jmo₃ a₂jme₃gain₂₃ dsa₂ i₂tion'₅₄ juɨ₅ dsɨ₃'én₂ ia₁ tsá₃ guë'₂ ca₂rë₃'nio₃ gue₃ jág₁ tí₅ dsón'₂ a₂jme₁lió₂.  
\v 11 Jaun₂ bá₄ lë₃ cuë₃ Diú₄ jmɨg₄ a₂le₃gain₂, ia₁jaun₂ juɨ₁le₂'éin₂ co₂ŋei'₅₄ jág₁ të₂jág₁,  
\v 12 ia₁jaun₂ 'ë́₂ Diú₄ uɨg₅ quió'₅ ca₂le₃jɨ́in₃ ia₁ tsá₃ guë'₂ ca₂rë₃'éin₂ jág₁ tí₅ dsón'₂, ia₁ ja₂lɨn₃ guë́₄ të₅ dsɨ́₅ cosa 'lɨg'₅₄. 
\s1 Dsa₂ i₂ma₂quion'₅₄ quián₅ Diú₄ 
\p  
\v 13 La₁ jnia'₅₄ në́₃, ca₂le₃jë́₃ jmɨg₄ bá₄ cuë₂ ti₁'mag'₄ Diú₄ o₄quián'₂ 'nia'₂, rɨn'₅₄ jniog₄, i₂'nió₄ quián₅ Te₁gui'₅₄. Jaun₂ lë₃ lia'₂ con'₂ jme₁ca₂rë₃lióg₃ jmɨg₄ bá₄ ca₂quión'₂ Diú₄ 'nia'₂ ia₁jaun₂ tɨ́n'₄ 'nia'₂, lén'₂ 'nia'₂ dsa₂ i₂le₁jë́₃ të₂dsɨ́₅ të₂le₃ quian'₅₄ Jme₂dsí₂ quián₅ Diú₄, të₂le₃ quian'₅₄ jág₁ dsau₅ a₂ma₂'én'₂ 'nia'₂ në́₃.  
\v 14 Ta₁ jaun₂ ca₂të₃ Diú₄ 'nia'₂ të₂le₃ quian'₅₄ jág₁ dse₃ a₂ca₂jme₁tag₅ jnia'₅₄, ia₁jaun₂ dsi₁nó'₅ 'nia'₂ quen'₅₄ quiang'₅₄ a₂jlá'₁ a₂lɨ́n₅ Te₁gui'₅₄ Jesucristo quián₂ jniog₄. 
\p  
\v 15 Jaun₂ le₂në₅, rɨn'₅₄ jniog₄, caun₂ 'éi₂ 'nia'₂ 'au'₂, chan'₂ tiá₂ jág₁, tsá₃ juɨ₁dsi₂'én₂ 'au'₂ 'nia'₂ jág₁ a₂qui₂ma₂cuë́₁ jnia'₅₄, lia'₂ jág₁ quian'₅₄ si₂ cartas në́₃.  
\v 16 Jaun₂ 'ŋiog₅ Te₁gui'₅₄ Jesucristo quian'₅₄ Diú₄ Jmei₂ jniog₄, i₂ma₂jmo₃ 'ua₁ dsɨ́₅ 'nio₃ jniog₄, cuë₂₃ lián'₂ co₂tan₅₄, cuë₂₃ a₂'ɨ́n₂ dsɨ₅ jniog₄ tág'₄ në́₃,  
\v 17 juɨ₁cuë́'₄ bí₂ të₂'au'₂ 'nia'₂ ia₁jaun₂ caun₂ bá₄ 'ag₃ 'au'₂ 'nia'₂, jë₁dsiá'₁ jág₁, jë₁jmó'₂ 'nia'₂ ca₂le₃jë́₃ ne₅₄ a₂dse₃. 
\c 3  
\s1 Chi₁len'₄ 'nia'₂ Diú₄ o₄quián₂ jnia'₅₄ 
\p  
\v 1 Jë₁ca₂tó'₂ rɨn'₅₄ jniog₄, chi₁len'₄ 'nia'₂ Diú₄ o₄quián₂ jnia'₅₄, ia₁jaun₂ ma₂në₃ cón'₅ dsióg₄ jág₁ dse₃ quió'₅ Te₁gui'₅₄ ca₂le₃jë́₃ juɨg₂. Juɨ₁gue₅₄ bá₄ dsa₂ 'ŋio₂ dsɨ́₅ juɨ₁jme₂juë'₂ bá₄ dsa₂ jág₁ la₂ juɨ₁lia'₂ ca₂lë₃ quian'₅₄ 'nia'₂.  
\v 2 Mɨ₄ 'nia'₂ o₄quián₂ jnia'₅₄ ján₃, ia₁jaun₂ lió₂ jnia'₅₄ o₄gú₃ dsa₂ 'lɨn'₅₄ i₂jmóg'₂ mɨ'₅₄, ia₁ tsá₃ 'én₂ ca₂le₃jɨ́n₃.  
\v 3 La₁ tí₅ bá₄ jág₁ quió'₅ Te₁gui'₅₄ quián'₂ 'nia'₂. Jmo₃ bá₄ 'ag₃ caun₂ 'au'₂ 'nia'₂ qui₂jmo₃ 'í₁, ia₁jaun₂ tsá₃ jmóg'₂ i₂së₃dsen₃.  
\v 4 Caun₂ bá₄ 'ei₅ dsɨ₅ jnia'₅₄ të₂le₃ quió'₅ Te₁qui'₅₄, a₂jmo'₂ ton'₂ a₂jmó'₂ 'nia'₂ në́₃, ca₂le₃jë́₃ 'e₂ a₂ma₂jua'₂ jnia'₅₄ jmó'₂ 'nia'₂.  
\v 5 Juɨ₁jiog₅₄ bá₄ Te₁gui'₅₄ të₂'au'₂ 'nia'₂ ja₁'nio₃ Diú₄, ja₁jme₁juɨn'₂ 'nia'₂ 'au'₂ juɨ₁lia'₂ juɨn'₂ dsɨ́₅ Cristo në́₃. 
\s1 Ca₂tɨ́n₂ bá₄ dsa₂ jmo₃ ta₁ 
\p  
\v 6 Rɨn'₅₄ jniog₄, cuë₂ jnia'₅₄ 'éi'₃ të₂le₃ o₄quió'₄ Te₁gui'₅₄ Jesucristo, jmo₄ 'nia'₄ cau₅ juɨ₁'ein₂ guë́₃ rɨn'₅₄ jniog₄ juɨ́n'₅ jmo₃ ta₁ on₃ guë'₂ jmo₂₃ con'₂ lë́₅ a₂ca₂jme₁tɨn₅ jnia'₅₄ 'nia'₂.  
\v 7 Jaun₂ ŋi'₅₄ bá₄ 'nia'₂ 'a₂ lia'₂ 'nió'₅ tiáng'₄ a₂jmó'₂ con'₂ lë́₅ 'a₂ lia'₂ chong₂ jnia'₅₄. Tsá₃ jua'₅₄ a₂tsá₃ ca₂jmó₁ jnia'₅₄ ta₁ të₁lia'₂ ca₂tió'₄ quian'₅₄ 'nia'₂,  
\v 8 on₃ guë'₂ jua'₅₄ ca₂que₅₄ jnia'₅₄ a₂lë₁ca₂que₅₄ quió'₅ rɨn'₅₄, jua'₅₄ tsá₃ ca₂qui₅₄. Të₂le₃ qui₂ca₂jmó₁ bá₄ jnia'₅₄ ta₁ 'ŋio₅ lɨn₃ lia'₂ 'uë₂-jmɨ₂ ia₁jaun₂ tsá₃ cán'₁ 'nia'₂ guei₂ o₄quián₂ jnia'₅₄.  
\v 9 On₃jua'₅₄ ia₁ a₂tsá₃ ca₂tág₂ jnia'₅₄; a₂jŋia'₅₄ lia'₂ ca₂quián₁ jnia'₅₄ caun₂ juɨ₅ ne₄ 'nia'₂, ia₁jaun₂ 'nia'₂ në́₃ cán'₁ juɨ₅ jaun₂ a₂ca₂quián₁ jnia'₅₄.  
\v 10 Ia₁ lia'₂ con'₂ jme₁tio'₅₄ jnia'₅₄ quian'₅₄ 'nia'₂, ca₂cuë́₁ 'éi'₃ la₂: Juɨ₁lia'₂ dsa₂ i₂juɨ́n'₅ jmo₃ ta₁, tsá₃ juɨ₁guë́'₄.  
\v 11 Ma₂ne₄ jnia'₅₄ dsia₅ dsa₂ tság₅ jnia'₅₄, chan₂ 'nia'₂ i₂lɨn₅₄ tián'₅ tsá₃ ta₁ 'nio₃ jmo₃, 'ŋio₅ bá₄ tsá₃ jɨin₅₄ qui₂tiáin₂ ja₁tsá₃ ca₂tɨ́in₂.  
\v 12 Jaun₂ dsa₂ 'éi₂ në́₃ chei₂ jnia'₅₄ le₃quió'₅ Te₁gui'₅₄ Jesucristo quián₂, juɨ₁jmo₁₂ ta₁ quió'₅ ia₁jaun₂ cha₂ a₂qui₂dsɨ₃ŋɨ́i₂. 
\p  
\v 13 Rɨn'₅₄ jniog₄, tsá₃ jmo₂ 'nia'₂ a₂ca₂'ong'₃ jmo'₂ cosa dse₃.  
\v 14 Chi₂jua'₂ chan₂ i₂tsá₃ tón'₂ juɨ₅ a₂jua'₂ jnia'₅₄ ne₄ si₂ la₂, jag₄ 'nia'₂ 'ein₂ 'éi₂ jaun₂ tsá₃ ma₃jme₁quiain'₅₄ 'nia'₂, ia₁jaun₂ le₃gui'₅₄.  
\v 15 La₁ tsá₃ jme₁'ŋiai'₅₄ 'nia'₂, të₂le₃ cuë'₅₄ tioin'₂ 'nia'₂ jág₁ dse₃ co₂'nió'₄ rɨ́ng'₂. 
\s1 Juɨ₁jme₂gu'₅₄ bá₄ Diú₄: Jág₁ jë₁ca₂tó'₂ quió'₅ Pa₄ 
\p  
\v 16 'Ŋiog₅ Te₁gui'₅₄ i₂jmo₅ 'ag₅ tei₄ dsɨ́₅ dsa₂, juɨ₁jmo₁₂ le₁'ág₄ tei₄ 'au'₂ 'nia'₂ quian'₅₄ ca₂le₃jë́₃ a₂jmo'₂ 'nia'₂. Juɨ₁'en₅₄ bá₄ Diú₄ quian'₅₄ ca₂le₃jɨ́n'₃ 'nia'₂. 
\p  
\v 17 Jniá₂ Pa₄ jmo₂₃ si₂ la₂ quian'₅₄ gu₃\f + \fr 3:17 \ft 'Nio'₂ ja₁ton₅ 1 Corintios 16:21; Gálatas 6:11; Colosenses 4:18; Filemón 19.\f* cuɨ́ng₅ Diú₄ 'nia'₂, co₂'nió'₄ léi₄ a₂tó'₅ jniá₂ ne₄ ca₂le₃jë́₃ si₂ a₂jmo₂₃. Le₂la₂ lë́₅ letra quió₃.  
\v 18 Juɨ₁jme₂gu'₅₄ Te₁gui'₅₄ Jesucristo quián₂ jniog₄ ca₂le₃jɨ́n'₃ 'nia'₂. 
\p Co₂në₅.