\id 2PE  
\h SEGUNDA PEDRO 
\toc1 Si₂ carta jë₁ca₂të́₂ tɨn₃ a₂ca₂jmo₃ SAN PEDRO 
\toc2 SEGUNDA PEDRO 
\toc3 2 P. 
\mt2 Si₂ carta jë₁ca₂të́₂ tɨn₃ a₂ca₂jmo₃ 
\mt1 SAN PEDRO 
\c 1  
\s1 Jmo₅ Pe₄ si₂ a₂chein₃ ne₄ dsa₂ 'én₂ 
\p  
\v 1 Jniá₂, Si₂mu₅₄ Pe₄, lɨ́ng₅ dsa₂ i₂jme₂ti₃ ne₄ Jesucristo, ton'₂ lɨ́ng₅ jan₂ i₂chen₄ quiáin₅. Jmo₂₃ si₂ carta la₂ a₂tsɨ́ng₂ ne'₅₄ 'nia'₂ i₂ma₂ca₂rë₃'éng'₂. Ia₁ të₂le₃ a₂ŋɨ́₄ lë₃ dsen₃ Diú₄ quián₂ jniog₄ quiain'₅₄ Jesucristo i₂ma₂ca₂lió₂, ma₂ca₂ŋɨ'₂ 'nia'₂ jág₁ dse₃ jlá'₁ a₂ca₂rë₃'éng'₂ juɨ₁lia'₂ 'éin₂ jnia'₅₄.  
\v 2 Juɨ₁chan'₂ bá₄ 'nia'₂ jme₂gu'₅₄ Diú₄, ton'₂ juɨ₁jmo₁₂ bá₄ 'ei₅ tei₄ lia'₂ qui₂rë₂tsón₂ të₂le₃ ia₁ a₂ma₂ca₂rë₃cuɨn'₂ 'nia'₂ 'a₂ lia'₂ lɨ́n₅ Diú₄ quian'₅₄ Jesucristo Te₁gui'₅₄ quián₂ jniog₄. 
\s1 'A₂ lia'₂ dsi₂ten₅₄ lén₂ dsa₂ 'én₂ 
\p  
\v 3 Diú₄ ma₂cuë₃ quian'₅₄ bí₂ quió'₅, ca₂le₃jë́₃ a₂'nió'₅ quián₂ jniog₄ le₃chong₂, a₂léi₂ jniog₄ dsa₂ jŋió₅ në́₃, ton'₂ ma₂jmo₃ ján₃ a₂ma₂ca₂rë₃cuɨin'₂ 'nia'₂ 'a₂ lia'₂ lɨ́in₅. Ma₂ca₂të₃ jniog₄ të₂le₃ quian'₅₄ juɨ₅bí₂ jlá'₁ quió'₅, 'uɨg₅₄ ia₁ a₂ŋɨ́₄ dse₃ dsɨ́₅.\f + \fr 1:3 \ft A₂lɨn₅₄ chog₅₄ si₂: “Ma₂ca₂të₃ jniog₄ a₂jme₁jnia₅ juɨ₅bí₂ jlá'₁ quió'₅ 'ŋiog₅.” \f* 
\v 4 Le₂në₅ ma₂ca₂quiog₂ 'lióng₂ jág₁ ca'₅₄ a₂quen₅ 'ŋio₅ lɨn₃ quió'₅, ia₁jaun₂ të₂le₃ quian'₅₄ jág₁ a₂ma₂cuë₃ jaun₂ dsi₁nó'₅ 'nia'₂ lióng'₂ juɨ₅ ja₁tión₂ dsa₂ mɨ₂güɨ́g₃ ja₁dsɨ₃'éin₂ 'uɨg₅₄ ia₁ a₂tsá₃ caun₂ 'ɨ́n₅ dsɨ́₅, ton'₂ dsi₁nó'₅ 'nia'₂ léng'₂ lia'₂ lɨ́n₅ Diú₄.  
\v 5 Jaun₂ lë₃, quen'₂ 'nia'₂ bí₂ ne₄ ia₁ a₂'éng'₂, quian₂ 'nia'₂ caun₂ juɨ₅ dse₃; ia₁jaun₂ ne₄ juɨ₅ dse₃ jaun₂, juɨ₁len'₅₄ 'nia'₂ dsa₂ i₂ŋɨ́'₂ dsɨ́₅;  
\v 6 ne₄ ja₁ŋó₄ jaun₂ táng₃, juɨ₁le₂ŋɨ́'₂ 'au'₂ 'nia'₂ 'a₂ lia'₂ jme₁'uang'₅₄ 'au'₂ guiong'₅₄; ne₄ ja₁ŋó₄ jaun₂ táng₃, juɨ₁len'₅₄ 'nia'₂ dsa₂ i₂juɨn'₂ dsɨ́₅; ne₄ juɨ₅ ja₁ŋó₄ jaun₂ táng₃, juɨ₁len'₅₄ 'nia'₂ dsa₂ i₂qui₂rë₂jɨn'₅₄ ne₄ Diú₄;  
\v 7 ja₁ŋó₄ jaun₂, jmo₄ 'nia'₂ 'ua₁ 'au'₂; jë₁ca₂tó'₂ guë́₄ në́₃, jme₁'nió₄ 'nia'₂ rɨ́ng'₂. 
\p  
\v 8 Ia₁ në₁jua'₂ quian'₅₄ 'nia'₂ juɨ₅ le₂në₅, dsɨ₂cang'₅₄, tsá₃ lë́₅ jua'₅₄ a₂tsá₃ ta₁ tí₄ 'a₂ lia'₂ niog₅ chan'₂ 'nia'₂, tsá₃ jua'₅₄ a₂lë₁ma₂ca₂rë₃cuɨn'₂ 'nia'₂ Te₁gui'₅₄ Jesucristo quián₂.  
\v 9 Ia₁ juɨ₁lia'₂ dsa₂ i₂tsá₃ jme₂tɨn₅ dsɨ́₅ le₃chain₂ lia'₂ con'₂ lë́₅ jág₁ në₅, lɨ́in₅ në₂jag₄ bá₄ jan₂ dsa₂ ten₄, o₃ jan₂ dsa₂ i₂tsá₃ lɨn₄ uɨ́ng₂ jnió'₅, ia₁ ma₂ca₂i₃'én₂ bá₄ dsɨ́₅ a₂jme₁ma₂le₁chí₄ quió'₅, ca₂le₃jë́₃ dso₄ a₂jme₁rë₂cáin'₄ le₂jŋiá₅.  
\v 10 Jaun₂ në́₃ 'nia'₂ rɨn'₅₄ jniog₄, dsen₅₄ 'au'₂ 'nia'₂ cuë'₅₄, ia₁jaun₂ bá₄ chi₁dse₃ ta₁ a₂ma₂ca₂të₃ Diú₄ a₂ma₂quióin'₂ 'nia'₂. Ia₁ në₁jua'₂ ca₂tión'₂ 'nia'₂ quian'₅₄ juɨ₅ në₅, o₁lɨ́g'₂ tsá₃ ma₃tsɨ₃sén'₂ 'nia'₂.  
\v 11 Ia₁ le₂në₅ bá₄ tɨn'₃ 'nia'₂, caun₂ dse₃ ja₁o₁tong'₄ co₂tan₅₄ guei'₅₄ i₂juɨ́g₃ ja₁gon₂ Te₁gui'₅₄ Jesucristo quián₂ i₂lió₂. 
\p  
\v 12 Juɨ₁la₂ ma₂ŋi'₅₄ 'nia'₂, la₁ co₂tan₅₄ bá₄ ca₂tɨ́n₂ jniá₂ juá'₄ ia₁jaun₂ bá₄ dsiog'₂ 'au'₂ 'nia'₂ náu'₁ tiá₂ juɨ₅ dsau₅ a₂ma₂tión'₂ 'nia'₂ ja₂nóg'₅.  
\v 13 Ia₁ lɨ́n₂ jniá₂ 'ŋió₃, 'ŋio₅ lɨn₃ dsi₂ten₅₄, a₂juɨg₅₄ jniá₂ 'nia'₂ të₁lia'₂ chang₂ guë́₄ nɨ₁ŋɨ₃ la₂, jaun₂ dsiog'₂ 'au'₂ jág₁ në₅.  
\v 14 Ia₁ a₂ma₂ca₂rë₃guion₅₄, ŋi'₅₄ ta₁ bá₄ tí₄ nɨ₁ŋɨ₃\f + \fr 1:14 \ft lit. “tabernáculo la₂.” \f* lia'₂ con'₂ lë́₅ ma₂ca₂jme₃jnia₅ Jesucristo Te₁gui'₅₄ quián₂ jniog₄.  
\v 15 La₁ quɨ́n'₅ jniá₂ bí₂ juá'₅ ia₁jaun₂ dsiog'₂ 'au'₂ 'nia'₂ co₂tan₅₄, jë₁ma₂jong₂₃, ca₂le₃jë́₃ jág₁ në₅ ca₂juá'₃. 
\s1 Dsa₂ i₂qui₂ca₂të́₂ ne₄ 'a₂ lia'₂ lë́₅ juɨ₅bí₂ quió'₅ Cristo 
\p  
\v 16 Ca₂le₃jë́₃ a₂ma₂ca₂jme₁tag₅ jnia'₅₄ 'a₂ lia'₂ lë́₅ juɨ₅bí₂ quió'₅ Te₁gui'₅₄ Jesucristo, 'a₂ lia'₂ lé₂ i₁guain'₂ táng₃, jaun₂ tsá₃ o₁len'₂ 'nia'₂ jua'₅₄ a₂lɨ́ng'₂ jág₁ la₂ a₂lë₁qui₂ca₂'náu'₃ dsɨ́₅ dsa₂ i₂ŋɨ́₄ 'io₅ mai₅₄ 'a₂ lia'₂ jme₃gau₂₃. Ia₁ guio₅₄ dsón'₂ bá₄ jnia'₅₄ ca₂të́₂ ne₄ ton'₂ ca₂néi₄ jnia'₅₄ 'a₂ lia'₂ lë́₅ juɨ₅bí₂ a₂ca₂jme₃jniai₂₃ a₂jláin'₁.  
\v 17 Ca₂jme₃juag'₂ Diú₄ Jmei₂ lia'₂ con'₂ jme₁ca₂né'₂ jág₁ juë'₂ quió'₅ jme₁ca₂juá'₂: “I₂la₂ bá₄ jón₃ quiáng₃ i₂ŋɨ́₄ lë₃ 'nióg₃ guë́₄ lɨn₃; 'e₂ bá₄ 'ŋio₂ dsɨ₃ quiain'₅₄.”\f + \fr 1:17 \ft Mateo 17:5; Marcos 9:7; Lucas 9:35.\f* 
\v 18 Le₂në₅ ca₂néi₁ jnia'₅₄ guio₅₄ jág₁ në₅ a₂ca₂já₃ guei'₅₄ i₂juɨ́g₃, lia'₂ con'₂ jme₁quiain'₅₄ jnia'₅₄ ne₄ má'₂ jŋió₅ jaun₂. 
\p  
\v 19 Le₂në₅ bá₄ lë́₅ chi₁dse₃ 'ŋio₅ lɨn₃ bá₄ jág₁ ron₅ quió'₅ dsa₂ i₂jme₁'ë́₂ jág₁ quián₅ Diú₄ ma₂lɨ́g'₂. Jaun₂ 'nia'₂ në́₃, dse₃ lɨn₃ bá₄ dsi₁nóg'₅ në₁jua'₂ ca₂tion'₂ 'nia'₂ juɨ₅, ia₁ lë́₅ lia'₂ lë́₅ caun₂ nɨ₁tsɨ́₅ chi₁guí'₂ si₂ tág₅ jë₄ qui₁né'₃, ca₂lia'₂ ca₂jnia₃ ca₂lia'₂ ca₂'ŋia₂ Nei₅ 'Ióg₁\f + \fr 1:19 \ft Nei₅ 'Ióg₁ lë́₅ caun₂ 'a₂ lia'₂ chen₂ Jesús. 'Nio'₂ ja₁ton₅ Apocalipsis 2:28; 22:16.\f* i₂jmo₃ tág₅ të₂'au'₂ 'nia'₂.  
\v 20 La₁ ne₄ ca₂le₃jë́₃, dsá₂ 'au'₂ 'nia'₂ jmo₄ a₂la₂: 'i₁caun₂ jág₁ a₂rë₂'ë́₂ ne₄ Si₂ quió'₅ Diú₄ tsá₃ ca₂tó'₂ dsa₂ quián₅ Diú₄ jua'₅₄ 'a₂ con'₂ ca₂ŋɨ́'₂ dsɨ́₅ guioin₅₄.  
\v 21 Ján₃ bá₄ guë'₂ le₂jaun₂, tsá₃ jág₁ cha₂ jua'₅₄ ca₂rë₃lióg₃ 'uɨg₅₄ con'₂ 'ŋio₂ dsɨ́₅ dsa₂ mɨ₂güɨ́g₃. Dsa₂ 'éi₂ në́₃, të₂le₃ ca₂dsia₃ bá₄ o₄quió'₄ Diú₄ lia'₂ con'₂ lë́₅ ca₂jiog₃ Jme₂dsí₂ Jŋió₅. 
\c 2  
\s1 Dsa₂ i₂jme₂tag₅ jág₁ a₂tsá₃ tí₅ 
\r (Judas 4―13) 
\p  
\v 1 Le₂në₅ bá₄ ca₂rë₃chán₃ dsa₂ i₂juɨ₁gan₂ ján₃ i₂ca₂'ë́₂ jág₁ a₂tsá₃ tí₅ jɨn₄ dsa₂ juɨg₂ quián₅ Diú₄ ma₂lɨ́g'₂, le₂në₅ bá₄ qui₃'uɨ́n₃ jë₄ quián'₂ 'nia'₂ rë₂në́₃ të₅ i₂qui₂jme₃gau₅. Dsa₂ le₂'éi₂, 'a₂ con'₂ tsá₃ jme₁li₅₄ mei'₂ jme₃tag₂₃ juá'₅ a₂tsá₃ tí₅ a₂jiog₅ juɨ₅ ja₁dsɨ₃'én₂ dsa₂. Jmo₃ ca₂lia'₂ tsá₃ ma₃le₃ji'₅₄ 'éi'₃ quió'₅ Te₁gui'₅₄ i₂ca₂láu₂. La₁ tsá₃ uë́₂ le₃léi₄ dsɨ₃'éin₂ bá₄ guioin₅₄.  
\v 2 Juɨn₅ lɨn₃ dsa₂ i₂'en₃ juɨ₅ ja₁tión₂ dsa₂ 'éi₂, jmo₅-dsáu₅ lia'₂ lë́₂ dsɨ́₅, jaun₂ 'éi₂ bá₄ 'uɨn₄ në́₃ a₂qui₃táun₂ dsa₂ 'lɨg'₅₄ juɨ₅ tí₅.  
\v 3 Ne₄ ia₁ a₂tsá₃ o₁jau₅₄ lí'₂ cu₄, qui₂jme₃tag₂₃ jág₁ a₂qui₂ma₂'náu'₃ dsɨ́₅ guioin₅₄, a₂con'₂ jŋia'₅₄ lë₁'nio₃ lí'₂ quián'₂ 'nia'₂. La₁ ma₂i₁jáun₃ bá₄ ma₂lë́₅ co₂jŋia₅₄ jág₁ a₂ma₂tioin'₅₄ 'éi'₃ a₂dsi₁qui₅ ŋi'₅₄ ta₁ ja₁dsɨ₃'éin₂; tion₅₄ bá₄ dsɨ₃'éin₂. 
\p  
\v 4 Chi₂jua'₂ le₂në₅ tsá₃ ca₂'én₂ Diú₄ dsáu₁ ángeles i₂ca₂sén'₂ dso₄ ma₂lɨ́g'₂, i₃gain'₅₄ bá₄ guio₃-juɨ́g₃ i₃léin₂ le₁'ŋei'₅₄ jë₄ qui₁né'₃, ja₁jaun₂ tioin'₅₄ lë́₅ co₂jŋia₅₄ jmɨg₄ i₁të₃dsɨ₅₄ 'éi'₃ quió'₅;  
\v 5 ján₃ bá₄ le₂në₅ chi₂jua'₂ tsá₃ ca₂'én₂ Diú₄ dsáu₁ dsa₂ i₂jme₁chan₂ mɨ₂güɨ́g₃ gui'₅₄ ma₂lɨ́g'₂, tion₅₄ bá₄ ca₂jme₃cain'₂ jmɨg₂ ca₂'éin₂ ca₂le₃jɨ́n₃ dsa₂ i₂tsá₃ Diú₄ cuɨn₅, jŋia'₅₄ lia'₂ Noé bá₄ i₂ca₂lióin₂ i₂jme₁'ë́₂ jág₁ a₂'ë₂₃ caun₂ juɨ₅ co₂dsau₅, quian'₅₄ guë́₄ guion₃ dsa₂;  
\v 6 chi₂jua'₂ le₂jaun₂ bá₄ ján₃, ca₂'én₂ Diú₄ le₃tɨn₃ juɨg₂ Sodoma quian'₅₄ Gomorra, ca₂dsɨ́'₂ ca₂lia'₂ ca₂lë₃ jua₂ li₁, jaun₂ le₂në₅ jáng'₅ caun₂ jág₁ dsau₅ co₂'nió'₄ a₂rë₂'ë́₂ jág₁ ja₁con₂ dsa₂ i₂tsá₃ Diú₄ cuɨn₅ i₂qui₂le₃chan₂ cang₂;  
\v 7 chi₂jua'₂ le₂në₅ ca₂lióin₂ bá₄ jan₂ Lot, i₂jme₁lɨ́n₄ guë́₄ dsa₂ dsen₃ jme₁chain₂ quian₅ o₂i₁ dsɨ₅ ia₁ jme₁të₅ ne₅₄ 'a₂ lia'₂ lë́₅ juɨ₅ le₁quian₅ dsa₂ 'lɨn'₅₄ jmɨg₄ jaun₂,  
\v 8 (jaun₂ jme₁ta'₂ quɨ'₂ dsɨ́₅ bá₄ dsa₂ dsen₃ 'éi₂, ia₁ ca₂le₃jë́₃ jmɨg₄ bá₄ jme₁të₅ ne₅₄, jme₁nag₂₃ në́₃ ca₂le₃jë́₃ ne₅₄ cosa 'lɨg'₅₄ a₂jme₁jmo₅-dsáu₅ dsa₂ juɨg₂ ja₁jme₁guá₄);  
\v 9 chi₂jua'₂ le₂në₅, jaun₂ ŋi₅ bá₄ Te₁gui'₅₄ 'a₂ lia'₂ lióin₃ dsa₂ dsen₃ ne₄ 'e₂ táu₂ dsɨ₂ŋɨ́i₂, ton'₂ ŋi₅ 'a₂ lia'₂ toin'₂ dsa₂ 'lɨn'₅₄ lë́₅ 'í₁ ca₂lia'₂ ca₂të₂ jmɨg₄ i₁gue₃ uɨg₅ i₁të₃dsɨ₅₄ 'éi'₃ quió'₅. 
\p  
\v 10 A₂në₅ në́₃, lë́₅ caun₂ jág₁ tí₅ dsón'₂ a₂jáng'₅ jág₁ dsau₅ ja₁con₂ juɨ₁lia'₂ dsa₂ i₂i₂nio₄ jme₂ti₃ a₂'lɨg'₅₄ a₂mɨ₅ nɨ₁ŋɨ₁₂, co₂'nió'₄ quió'₅ dsa₂ i₂tsá₃ ji'₅₄ 'éi'₃. I₂nioi₅₄ 'ŋio₅ lɨn₃ táin'₅, 'nio₃ jua'₅₄ 'éi'₃ quió'₅ 'éi₂ bá₄ lé₂, ton'₂ 'ŋio₅ lɨn₃ tiá₂ dsɨ́₅ 'e₂ caun₂ a₂'nio₃ jmo₃; tsá₃ gó'₅ táun₂ 'lɨg'₅₄ 'ɨin₂₃ juɨ₁lia'₂ i₂jlán'₁ chan₂ quián₅ Diú₄,  
\v 11 juɨ₁la₂ ángeles i₂'io₅ guë́₄ bí₂, i₂'uan'₂ guë́₄, tsá₃ le₂jaun₂ tiá₂ dsɨ́₅ jua'₅₄ 'ag₃ 'lɨg'₅₄, a₂'nɨi₃ dsa₂ 'éi₂ ne₄ Te₁gui'₅₄. 
\p  
\v 12 La₁ dsa₂ 'éi₂, lɨ́in₅ juɨ₁lia'₂ lɨ́n₅ já'₂ náu₂ i₂tsá₃ 'en₅₄ dsɨ́₅, chain₂ tsá₃ 'e₂ ŋɨ́'₂ dsɨ́₅ 'e₂ jmo₅-dsáu₅, rë₂chain₂ a₂jŋia'₅₄ con'₂ tsáun'₂ dsa₂ jme₃dsiog₂₃. Të₃jŋiá₅ bá₄ ma₂'ë₂₃ 'lɨg'₅₄ 'e₂ a₂tsá₃ ma₂ŋɨ́i'₂. La₁ le₂jaun₂ bá₄ dsiáin₃ ján₃ juɨ₁lia'₂ dsan₂ já'₂ náu₂.  
\v 13 Le₃chain₂ ŋág₃ uɨg₅ co₂'nió'₄ 'liain'₅₄ juɨ₁lia'₂ qui₂ma₂jmái'₂ i₂sián'₂. Jmo₂₃ dsɨ́₅ 'ŋio₅ lɨn₃ dse₃ chain₂ lɨ́in₂ ia₁ cuë́'₅ o₂'ŋió₃ o₂jŋia₃ dsɨ₅ o₁jŋia'₅₄ a₂jmɨ₂. Lɨ́n₅ dsa₂ 'éi₂ co₂'nió'₄ caun₂ 'mé'₅ 'lɨg'₅₄ a₂rë₂'ióg₄ a₂quian₅ o₂guí'₃ jë₄ quián'₂ 'nia'₂, 'ŋio₅ të₅ dsɨ́₅ cuë́'₅ o₂'ŋió₃ dsɨ₅ a₂jme₂gau₂₃ tóin'₅ jmo₂₃ jmɨg₄ jɨn'₄ 'nia'₂. 
\p  
\v 14 Co₂tan₅₄ lia'₂ ma₂dsɨ₂jiog₅ dsɨ́₅ 'lɨg'₅₄ bá₄ jë₁ma₂ca₂jɨ́in₂ jan₂ dsa₂ mɨ́₂, tsá₃ mag'₂ dsɨ́₅ jua'₅₄ a₂tsá₃ 'no₂₃ dso₄; 'ŋio₅ lɨn₃ 'io₂₃ mai₅₄ ŋi₅ 'a₂ lia'₂ jme₃gain₂₃ dsɨ́₅ juɨ₁lia'₂ dsa₂ 'uan₅₄ i₂tsá₃ tiá₂ tión₂; 'ŋio₅ lɨn₃ tɨin₂ ŋi₅ táng₃ 'a₂ lia'₂ jme₃'ŋiói'₃ 'e₂ caun₂ 'nio₃ jme₃'ŋiói'₃; ia₁ lɨ́in₅ jaun₅ i₂ma₂tion'₅₄ juɨ₅ dsɨ₃'én₂.  
\v 15 Ma₂qui₂ma₂tí₄ juɨ₅ co₂dsau₅, ton'₂ ma₂i₂cóin'₅, ma₂qui₂le₁quian₅ juɨ₅ quió'₅ Bala'am\f + \fr 2:15 \ft Bala'am: 'Í₂ Números 22 - 24.\f* ja₁ŋi'₅₄ Beor, i₂'éi₂ jme₁'nio₃ lí'₂ cu₄ quian'₅₄ caun₂ a₂'lɨg'₅₄ a₂jme₁jmo₃.  
\v 16 Jan₂ dsɨ₂bú'₄ i₂tsá₃ lé₂ dsia₃ jág₁ bá₄ ca₂jí₂ quió'₅ 'uɨg₅₄ dsáu₁, ia₁ já'₂ 'éi₂ ca₂'ŋiai₂ jág₁ lia'₂ lë́₅ jag₄ dsa₂ mɨ₂güɨ́g₃. Ca₂jné₃ juɨ₅ co₄ quió'₅ dsa₂ i₂'ë́₂ jág₁ quián₅ Diú₄ 'éi₂. 
\p  
\v 17 Dsa₂ 'éi₂ lɨ́in₅ juɨ₁lia'₂ lë́₅ caun₂ o₄tu₁ jmɨg₂ a₂tsá₃ 'e₂ jmɨg₂ cha₂; o₃ le₃jua'₅₄ lɨ́in₅ juɨ₁lia'₂ lë́₅ ti₁jnei₅ a₂lë₁qui₂ŋag₅ tiá₂ quian'₅₄ dsí₂. Ma₂tioin'₅₄ juɨ₅ a₂dsi₁lein₅ jë₄ qui₁né'₃ 'ŋio₅ lɨn₃, ja₁ma₂lë́₅ co₂jŋia₅₄ quió'₅.\f + \fr 2:17 \ft Niog₅ a₂lɨn₅₄ chog₅₄ si₂ a₂juá'₂: “ja₁ma₂lë́₅ co₂jŋia₅₄ ja₁dsi₁toin'₄ co₂tan₅₄.” 'Nio'₂ ja₁ton₅ Judas 13.\f* 
\v 18 Ia₁ qui₂'uë́'₅ mɨ₂'o₅₄ jág₁ tá'₅ a₂tsá₃ ta₁ tí₄, qui₂cáin₂ dsa₂ a₂jmo₃ dsó₃ a₂jme₃ti₃ a₂'ɨ́n₅ dsɨ́₅ nɨ₁ŋɨ₁₂; qui₂jme₂gain₂₃ dsa₂ i₂lag₃ ma₂lión₂ o₄gú₃ dsa₂ i₂le₁quian₅ juɨ₅ a₂ma₂i₂cóin'₅.  
\v 19 Qui₂cuë₂₃ jág₁ a₂juá'₂ a₂lió₂, la₁ guioin₅₄ guë'₂ në́₃ i₂nioi₅₄ le₁'ŋei'₅₄ juɨ₅ ja₁dsɨ₃'éin₂. Ia₁ le₂jaun₂ dsón'₂ lë́₅ bá₄, lé₂ le₃jua'₅₄ chi₁'ŋe'₅₄ dsa₂ ne₄ juɨ₁'e₂ caun₂ juɨ₅ 'lɨg'₅₄ a₂quian₅, ia₁ dso₄ jaun₂ ca₂lë₃ juɨg₅₄ bá₄ dsa₂. Ia₁ a₂jaun₂ jiog₅ jmo₅ 'éi'₃ ja₁coin₂.  
\v 20 La₁ juɨ₁lia'₂ dsa₂ i₂ma₂ca₂rë₃cuɨn₅ Te₁gui'₅₄ Jesucristo i₂lɨ́n₅ i₂ma₂ca₂lió₂ quió'₅ ne₄ juɨ₅ lë₁'iog₅ a₂le₁quian₅ dsa₂ mɨ₂güɨ́g₃, la₁ në₁jua'₂ siá'₂ ca₂dsi₃lein₅ ca₂guioin'₂ táng₃ quian'₅₄ a₂'lɨg'₅₄, o₃ në₁jua'₂ ca₂jme₃gón₃ táng₃ a₂'lɨg'₅₄ jaun₂ të₂dsɨ́₅, dsi₁lein₅ tsón₂ guë́₄ le₃'lɨin'₅₄ con'₂ guë́₄ le₂jŋiá₅.\f + \fr 2:20 \ft 'Nio'₂ ja₁ton₅ Mateo 12:45; Lucas 11:26.\f* 
\v 21 Juɨ₁lia'₂ dsa₂ le₂'éi₂, ja₂lɨn₃ guë́₄ dse₃ jua'₅₄ co₂ŋei'₅₄ bá₄ tsá₃ ca₂rë₃cuɨ́'₅ juɨ₅ co₂dsau₅, lia'₂ con'₂ guë́₄ a₂ma₂ca₂rë₃ŋi₅, në₁jua'₂ cang₂ jaun₂ ca₂tí₂ bá₄ táng₃ 'éi'₃ jŋió₅ a₂jme₁ma₂ŋɨi₂.\f + \fr 2:21 \ft 'Nio'₂ ja₁ton₅ Hebreos 6:4-6.\f* 
\v 22 La₁ ja₁jaun₂ rë₃ti₃ quian'₅₄ dsa₂ le₂'éi₂ juɨ₁lia'₂ lë́₅ caun₂ jag₄ dsa₂ jme₁juá'₂: “Guë́'₅ táng₃ dsɨ₂jɨ'₅₄ te₁ŋi₅₄ quió'₅”,\f + \fr 2:22 \ft Proverbios 26:11.\f* con'₂ siá'₂ táng₃: “Juɨ₁lia'₂ i₂ŋí₅ i₂lia'₂ ma₂në₂sei₃ dsa₂, dsó₅ qui₂ba₂lɨ́in'₂ táng₃ jë₄ ti₁jéin₃.” 
\c 3  
\s1 Jmɨg₄ i₁jŋió'₂ Te₁gui'₅₄ 
\p  
\v 1 'Nia'₂ rɨn'₅₄ jniog₄ i₂'nióg₃, jë₁ca₂të́₂ tɨn₃ si₂ bá₄ la₂ tsɨ́ng₂ ne'₅₄ 'nia'₂. Jë₁le₃tɨn₃ si₂ në₅ ma₂ca₂jme₁jnio₂ jniá₂ ne'₅₄, ma₂ca₂jmo₃ dsá₂ 'au'₂ a₂dsɨ₃jiog₅ 'au'₂ jmá'₃ lia'₂ a₂le₁jë́₃.  
\v 2 Juɨ₁dsiog'₂ 'au'₂ 'nia'₂ ca₂le₃jë́₃ jág₁ a₂qui₂ca₂juá'₂ dsa₂ jŋió₅ i₂jme₁'ë́₂ jág₁ quián₅ Diú₄ ma₂lɨ́g'₂ quian'₅₄ guë́₄ 'éi'₃ a₂ca₂quiog₂ Te₁gui'₅₄ i₂ma₂lió₂ jniog₄, a₂ma₂ca₂ŋag₅ ja₁con'₂ 'nia'₂ të₂le₃ quian'₅₄ dsa₂ i₂chen₄ quiáin₅.  
\v 3 Jë₁le₂'uɨg₅₄ jmo₄ 'nia'₂ dsá₂ 'au'₂ a₂juá'₅ jniá₂ la₂. Jmɨg₄ jë₁ca₂tó'₂ të₁ja₃lén₂ dsa₂ i₂caun₂ lë₁qui₃táun₂ 'lɨg'₅₄, le₃chain₂ jmá'₃ lia'₂ jŋia'₅₄ con'₂ lë́₂ 'ɨ́n₅ dsɨ́₅ guioin₅₄.  
\v 4 Dsa₂ 'éi₂ ŋag₃, juá'₂: “¿'E₂ ca₂lë₃ quian'₅₄ jág₁ a₂ron₅, a₂juá'₂ 'nia'₂ a₂guan'₂ táng₃ Cristo? Ia₁ ca₂le₃ ca₂dsan₃ dsa₂ can'₅₄ quián₂ jniog₄, jua'₂ lia'₂ ma₂lë́₅ jaun₂ bá₄ mɨ₂güɨ́g₃ lia'₂ con'₂ lë́₅ jme₁ca₂nio₃ le₂'uɨg₅₄.”  
\v 5 La₁ a₂ta₁ dsɨ́₅ bá₄ dsa₂ 'éi₂ tsá₃ 'nio₃ le₃ŋɨ́i'₂, a₂ca₂lë₃ të₂le₃ quian'₅₄ jág₁ quió'₅ Diú₄ dsɨ₄ guei'₅₄ mɨ₂güɨ́g₃ ma₂lɨ́g'₂, quian'₅₄ gua'₅₄ 'uë₃, quian'₅₄ jmɨg₂ a₂ca₂jmo₃ jma₃quén₅ gua'₅₄ 'uë₃ quian'₅₄ jmɨg₂ në́₃.  
\v 6 Ton'₂ quian'₅₄ jmɨg₂ bá₄ ján₃, ca₂'én₂ Diú₄ mɨ₂güɨ́g₃ jmɨg₄ jaun₂.  
\v 7 Ján₃ bá₄ le₂në₅, të₂le₃ quian'₅₄ jág₁ quió'₅ 'ŋiog₅ bá₄ Diú₄, dsɨ₄ guei'₅₄ quian'₅₄ gua'₅₄ 'uë₃, ron₅ ma₂lë₅ co₂jŋia₅₄ a₂cáu₃ jë₁ma₂të́₂ jmɨg₄ i₁qui₃dsɨ₅ Diú₄ 'éi'₃ i₁'éin₂ co₂ŋei'₅₄ dsa₂ i₂tsá₃ Diú₄ cuɨn₅. 
\p  
\v 8 Con'₂ siá'₂ rɨn'₅₄ jniog₄, tsá₃ juɨ₁dsi₂'én₂ 'au'₂ 'nia'₂, ia₁ të₂le₃ quió'₅ Te₁gui'₅₄, lë́₅ caun₂ jmɨg₄ co₂'nió'₄ caun₂ mei₅ ŋi₂; ton'₂ caun₂ mei₅ ŋi₂ guë'₂, lë́₅ co₂'nió'₄ caun₂ jmɨg₄.  
\v 9 La₁ tsá₃ o₁lei₅₄ jniog₄ jua'₅₄ a₂jme₂'ag₄ Te₁gui'₅₄ a₂jme₃ti₃ jág₁ quió'₅, juɨ₁lia'₂ lɨ́n₂ i₂lɨn₅₄; a₂jmo₂₃ juɨn'₂ dsɨ́₅ bá₄ ja₁con'₂ 'nia'₂, ia₁ 'nio₃ jua'₅₄ 'i₁jan₂ bá₄ tsá₃ 'ein₂ dsɨ₃'én₂, 'nio₃ jua'₅₄ ca₂le₃jɨ́n₃ bá₄ dsi₁quén'₅ dsɨ́₅. 
\p  
\v 10 Ia₁ jmɨg₄ jaun₂ quió'₅ Te₁gui'₅₄ guá₂ con'₂ tsá₃ 'ein₂ rë₂ján₁, lé₂ juɨ₁lia'₂ ja₁'í₂ jan₂ 'ang₂. Jaun₂ guë́₄ të₃tsɨ'₅₄ co₂mɨ'₅₄ gau₂ lɨn₃ lé₂ dsɨ₃'én₂ dsɨ₄ guei'₅₄; qui₂dsɨ₃'én₂ ca₂le₃jë́₃ a₂cha₂ qui₃jmág₂ quian'₅₄ si₂; lia'₂ rë₂cuá'₃\f + \fr 3:10 \ft A₂lɨn₅₄ chog₅₄ si₂: “qui₂dsɨ₃'én₂ cáu₃.” \f* gua'₅₄ 'uë₃ lé₂, lia'₂ jma₃quian'₅₄ 'e₂ niog₅ ca₂jmo₃ dsa₂ ja₁jaun₂. 
\p  
\v 11 Chi₂jua'₂ le₂në₅ dsɨ₃'én₂ ca₂le₃jë́₃, ¡'e₂ guë́₄ 'ŋio₅ lɨn₃ dsi₂ten₅₄ 'nió'₅ jmó'₂ 'nia'₂ dsen₅₄ 'au'₂ le₃chang'₂ jŋió₅, a₂'nióg'₃ Diú₄!  
\v 12 Jmo₄ 'nia'₂ co₂jŋiag'₅₄ rë₂jáng'₁ ia₁jaun₂ ŋi'₅₄ ta₁ guá₂ jmɨg₄ jaun₂ quió'₅ Diú₄. Jmɨg₄ jaun₂ guei'₅₄ mɨ₂güɨ́g₃ qui₂dsɨ₃'én₂ quian'₅₄ si₂, ca₂le₃jë́₃ 'e₂ a₂cha₂ qui₃jmág₂ jë₁ma₂ca₂dséi₃ 'ŋio₅ lɨn₃.  
\v 13 La₁ jniog₄ në́₃, le₁jŋia₁ dsi₁no₃ caun₂ guei'₅₄ i₂juɨ́g₃ 'mɨ́₂ quian'₅₄ caun₂ gua'₅₄ 'uë₃ 'mɨ́₂ ja₁ma₂lë́₅ jág₁ cuë₃ Diú₄, ja₁të₂'ŋiá₄ jmá₃ a₂jŋió₅. 
\p  
\v 14 Le₂në₅ jaun₂ në́₃ rɨn'₅₄ jniog₄, të₁lia'₂ tsá₃ ma₂të́₂ jmɨg₄ jaun₂, quen'₂ 'nia'₂ bí₂ ia₁jaun₂ bá₄ dsiog'₂ Diú₄ qui₂le₁'ág₄ bá₄ tei₄ 'au'₂ 'nia'₂, tsá₃ 'e₂ cha₂ jua'₅₄ lë́₅ qui₂rë₂'ióg₄ jme₂dsí₂ quiáng'₂, jua'₅₄ a₂rë₂cán'₄ 'nia'₂ dso₄.  
\v 15 Jmo₄ 'nia'₂ 'au'₂ a₂juɨn'₂ dsɨ́₅ bá₄ Te₁gui'₅₄ ia₁jaun₂ cuɨn₅ jmɨg₄ lión'₂ 'nia'₂. Le₂në₅ bá₄ ján₃, Pa₄ rɨn'₅₄ jniog₄ ma₂dsiáin'₂ si₂ ne'₅₄ 'nia'₂, con'₂ lë́₅ ma₂ŋɨ́'₂ dsɨ́₅ a₂ma₂ca₂cuë₃ Diú₄.  
\v 16 Jë₄ ca₂le₃jë́₃ Si₂ quió'₅, ma₂ca₂tsɨ́'₃ 'nia'₂ ján₃ ca₂le₃jë́₃ a₂në₅, o₁jŋia'₅₄ la₂ juɨ́'₅ le₃ŋág'₂ a₂lɨn₅₄; 'uɨg₅₄ jaun₂ dsa₂ i₂tsá₃ lɨn₄ ŋɨ́'₂ dsɨ́₅ i₂tsá₃ tiá₂ tión₂, le₃jen₅ bá₄ jme₂tɨin₂₃ dsa₂, ján₃ bá₄ le₂jaun₂ ca₂le₃jë́₃ guë́₄ rɨn'₅₄ Si₂ quió'₅ Diú₄ në́₃, la₁ a₂'uɨin₅₄ guioin₅₄ bá₄ a₂dsɨ₃'éin₂ ia₁ a₂jmo₂₃ le₂jaun₂. 
\p  
\v 17 Jaun₂ lë₃ 'nia'₂ rɨn'₅₄ jniog₄, ia₁ të₃jŋiá₅ bá₄ ma₂le₁ŋi'₅₄ 'nia'₂ 'a₂ lia'₂ niog₅ lé₂, jmo₄ 'nia'₂ 'í₁ ia₁jaun₂ tsá₃ qui₃tsag'₂ dsa₂ 'lɨn'₅₄ i₂jme₂gau₅, jaun₂ tsá₃ sén'₂ 'nia'₂ juɨ₅ ja₁tióng'₂ tiá₂.  
\v 18 La₁ juɨ₁dsi₂can'₅₄ bá₄ 'nia'₂ juɨ₅ ja₁'ua₁ dsɨ́₅ Te₁gui'₅₄ Jesucristo quián₂ jniog₄ i₂ma₂lió₂, jaun₂ dsi₁nó'₅ 'nia'₂ le₃cuɨin'₂ guë́₄ dse₃. 'Éi₂ bá₄ ca₂tɨ́n₂ le₃juɨn'₂, jmɨg₄ në₃, co₂tan₅₄. ¡A₂méi₃! 
\p Co₂në₅.