\id 1JN  
\h PRIMERA JUAN 
\toc1 Si₂ carta le₂'uɨg₅₄ a₂ca₂jmo₃ SAN JUAN 
\toc2 PRIMERA JUAN 
\toc3 1 Jn. 
\mt2 Si₂ carta le₂'uɨg₅₄ a₂ca₂jmo₃ 
\mt1 SAN JUAN 
\c 1  
\s1 Jág₁ dse₃ juɨ₁lia'₂ 'a₂ lia'₂ le₃chan₂ dsa₂ 
\p  
\v 1 Jmo₂ jnia'₅₄ si₂ la₂ dsiang'₅₄ ne'₅₄ 'nia'₂, ja₁'ɨ́n₅ jnia'₅₄ i₂jme₁ma₂chan₂ lia'₂ con'₂ jme₁ca₂rë₃lióg₃ ca₂le₃jë́₃ a₂cha₂, ja₁'ɨ́n₅ jnia'₅₄ jan₂ i₂qui₂ma₂néi₁ jnia'₅₄ jág₁ quió'₅, ma₂ca₂néi₄ jnia'₅₄ quian'₅₄ jme₁ne₁ guio₅₄, ma₂qui₂ma₂tí₄ jnia'₅₄ gu₂ quió'₅ në́₃. Të₂le₃ quian'₅₄ jág₁ quió'₅ 'éi₂ bá₄ a₂le₃chan₂ dsa₂.  
\v 2 I₂chan₂ 'éi₂ në́₃ ca₂jme₃jniai₂₃ 'ŋiog₅ jë₄ quió'₅ dsa₂ mɨ₂güɨ́g₃. Jaun₂ jnia'₅₄ në́₃, ca₂néi₄, jaun₂ jang'₂ jnia'₅₄ jág₁ dsau₅ quió'₅ 'éi₂. Qui₂'ë́₅ jnia'₅₄ ja₁con'₂ 'nia'₂ 'a₂ lia'₂ le₃chan₂ dsa₂ co₂tan₅₄. Jme₁ma₂chain₂ bá₄ quiain'₅₄ Jmei₂, ton'₂ ma₂ca₂jme₃jniai₂₃ jë₄ quián₂ jnia'₅₄.  
\v 3 Jaun₂ 'ë́₅ jnia'₅₄ jág₁ juɨ₁lia'₂ a₂ma₂ne₅₄ a₂ma₂néi₁ në́₃, ia₁jaun₂ jme₁quiong'₅₄ 'nia'₂ jnia'₅₄ 'ei₅ caun₂ jág₁, juɨ₁lia'₂ jnia'₅₄ në́₃ 'ei₅ caun₂ jág₁ quian'₅₄ Diú₄ Jmei₂ jniog₄, quian'₅₄ Jesucristo Ja₁ŋi'₅₄ në́₃.  
\v 4 Jaun₂ bá₄ lë₃ jmo₂ jnia'₅₄ si₂ la₂ dsiang'₅₄ ne'₅₄ 'nia'₂, jua'₂ jnia'₅₄ ca₂le₃jë́₃ jág₁ la₂, ia₁jaun₂ rë₂'ŋia₅ a₂'io'₂ jein₂ jniog₄.\f + \fr 1:4 \ft A₂lɨn₅₄ chog₅₄ si₂: “a₂'io'₂ jén'₂ 'nia'₂.” \f* 
\s1 Diú₄ i₂lɨ́n₅ si₂ 
\p  
\v 5 A₂la₂ bá₄ jág₁ dse₃ a₂ma₂ca₂guéi₁ jnia'₅₄ quió'₅, a₂'ë́₄ táng₃ jnia'₅₄ ja₁con'₂ 'nia'₂: Lɨ́n₅ Diú₄ si₂; 'i₁caun₂ ja₁qui₁né'₃ tsá₃ cha₂ ja₁coin₂.  
\v 6 Në₁jua'₂ jua'₂ jniog₄ 'ei₅ caun₂ jág₁ quian'₅₄ Diú₄, la₁ në₁jua'₂ i₂nio₄ guë'₂ jniog₄ jë₄ qui₁né'₃, jmo₂ jniog₄ të₂jág₁; tsá₃ juɨ₅ dsau₅ chong₂.  
\v 7 La₁ në₁jua'₂ qui₂i₂nio₄ jniog₄ ja₁jniá₂ si₂, juɨ₁lia'₂ 'en₅₄ 'éi₂ ja₁jniá₂ si₂, 'ei₅ caun₂ jág₁ quian'₅₄ rɨn'₅₄ jniog₄ le₂jau₂ le₂jau₂, jaun₂ jmɨ₄ Jesucristo Ja₁ŋi'₅₄ qui₂chéi₂ ca₂le₃jë́₃ dsáu₁ jniog₄. 
\p  
\v 8 Në₁jua'₂ jua'₂ jniog₄ tsá₃ 'e₂ dso₄ le₁cáu'₄, jme₂gán₁ jniog₄ guio₅₄, tsá₃ tí₅ jág₁ quián₂.  
\v 9 La₁ në₁jua'₂ jmo₂ jniog₄ jág₁ dsau₅ a₂rë₂cáu'₄ dso₄, rë₂ti'₅₄ bá₄ Diú₄, rë₂ bá₄ qui₂dsɨ₂₃ 'éi'₃, 'éin₂ bá₄ dso₄ quián₂ jniog₄, qui₃chéi₂ ca₂le₃jë́₃ a₂'lɨg'₅₄.  
\v 10 La₁ në₁jua'₂ jua'₂ jniog₄ tsá₃ 'e₂ dso₄ ma₂'nióg₁, jmo₂ jniog₄ co₂'nió'₄ të₂jɨ́n₁ bá₄ Diú₄; tsá₃ 'i₄ jág₁ quió'₅ ja₁con₂ jniog₄. 
\c 2  
\s1 Cristo bá₄ lɨ́n₅ i₂chén'₅ ne₄ jág₁ quián₂ jniog₄ 
\p  
\v 1 'Nia'₂ chi'₂-guein₂ quiáng₃, jmo₅ jniá₂ si₂ la₂ ja₁juá'₅ ca₂le₃jë́₃ ia₁jaun₂ tsá₃ ma₃'náu'₁ 'nia'₂ dso₄. Në₁jua'₂ chan₂ i₂ca₂tán'₂ dso₄, chan₂ bá₄ jan₂ i₂chén'₅ ne₄ jág₁ quián₂ jniog₄ ne₄ Diú₄ Jmei₂. I₂'éi₂ lɨ́n₅ Jesucristo i₂dsen₃.  
\v 2 'Éi₂ bá₄ i₂ca₂ŋó₃ rë₂jen'₅₄ ne₄ Diú₄ 'uɨg₅₄ dsáu₁ jniog₄. On₃jua'₅₄ rë'₂ jmá'₃ 'uɨg₅₄ dsáu₁ jniog₄, 'uɨg₅₄ dsáu₁ ca₂le₃jɨ́n₃ dsa₂ mɨ₂güɨ́g₃ bá₄ ján₃. 
\p  
\v 3 Në₁jua'₂ jme₂tí₁ 'éi'₃ quió'₅ në́₃, jaun₂ le₂në₅ bá₄ ne₄ a₂ma₂ca₂rë₃cuɨin₅ jniog₄.  
\v 4 La₁ në₁jua'₂ chan₂ i₂juá'₂: “Cuɨ́n₅ jniá₂ Diú₄”, la₁ në₁jua'₂ tsá₃ jme₂ti₃ guë'₂ 'éi'₃ quió'₅, i₂'éi₂ lɨ́n₅ dsa₂ të₂jág₁, tsá₃ 'i₄ jág₁ tí₅ ja₁coin₂.  
\v 5 La₁ të₂le₃ quió'₅ juɨ₁lia'₂ i₂jme₂ti₃ 'éi'₃ quió'₅ Diú₄, i₂'éi₂ guë'₂ dsón'₂ rë₂'ŋia₅ a₂'nioi₃ Diú₄. Jaun₂ le₂në₅ bá₄ ne₄ jniog₄ chong₂ a₂'ei₅ caun₂ jág₁ quiain'₅₄.  
\v 6 Juɨ₁lia'₂ i₂juá'₂ téin₅ le₃quió'₅ Diú₄, 'nió'₅ i₃nioi₅₄ juɨ₁lia'₂ ca₂ŋɨ₃ Jesucristo. 
\s1 Caun₂ 'éi'₃ mɨ́₂ 
\p  
\v 7 'Nia'₂ rɨn'₅₄ jniog₄ i₂'nióg₃, on₃jua'₅₄ 'éi'₃ 'mɨ́₂ la₂ tó'₅ jniá₂ ne₄ si₂ juɨ́g₂ 'nia'₂. A₂le₂jaun₂ bá₄ la₂ juɨ₁lia'₂ 'éi'₃ a₂jme₁ma₂cha₂ ja₁con'₂ 'nia'₂ ca₂le₃ jmɨg₄ le₂'uɨg₅₄ jme₁ca₂rë₃'én'₂ 'nia'₂. 'Éi'₃ gui'₅₄ la₂ lë́₅ jág₁ a₂ma₂nei'₂ 'nia'₂.  
\v 8 La₁ia₁ a₂tó'₅ jniá₂ ne₄ si₂ la₂ a₂tsɨ́ng₂ ne'₅₄ 'nia'₂, lë́₅ co₂'nió'₄ caun₂ 'éi'₃ 'mɨ́₂, a₂dsau₅ të₃dsón'₂ quió'₅ Cristo, ján₃ guë́₄ dsau₅ të₂le₃ ja₁con'₂ 'nia'₂ në́₃. Ia₁ ma₂ca₂ŋɨ́₂ bá₄ jë₄ qui₁né'₃, ma₂tág₅ si₂ a₂dsau₅ të₃dsón'₂. 
\p  
\v 9 Chi₂jua'₂ chan₂ i₂juá'₂ chain₂ ja₁jniá₂ si₂, la₁ në₁jua'₂ 'ŋiai₅₄ bá₄ guë'₂ rɨin'₅₄ në́₃, i₂le₂'éi₂ 'ein₅₄ bá₄ guë́₄ jë₄ qui₁né'₃.  
\v 10 La₂ i₂'nio₃ rɨn'₅₄ guë'₂ në́₃, të₂'ŋiai₅₄ ja₁jniá₂ si₂, ton'₂ 'i₁caun₂ tsá₃ 'e₂ cha₂ jua'₅₄ jmo₃ a₂qui₃niói'₃.  
\v 11 La₁ i₂'ŋia₅₄ rɨn'₅₄ guë'₂ në́₃, 'ein₅₄ jë₄ qui₁né'₃. Tsá₃ ŋi₅ 'a₂ juɨ₅ dsó₃, ia₁ co₂'nió'₄ tein₅₄ bá₄ ŋɨ₂₃ jë₄ nei₂. 
\p  
\v 12 Tsɨ́n₂ jniá₂ si₂ la₂ ne'₅₄ 'nia'₂ i₂lɨ́ng'₅ chi'₂-guein₂ quiáng₃, ia₁ ma₂rë₂'én₄ bá₄ dsáu'₂ 'nia'₂, ma₂ca₂'én₂ bá₄ Diú₄ të₂le₃ o₄quió'₄ Jesucristo.  
\v 13 'Nia'₂ dsa₂ i₂chan₂ chi'₂ quián₅, tsɨ́n₂ jniá₂ si₂ la₂ ne'₅₄ 'nia'₂ ia₁ ma₂ca₂rë₃cuɨn'₂ bá₄ 'nia'₂ i₂jme₁ma₂chan₂ lia'₂ con'₂ jme₁ca₂rë₃lióg₃ ca₂le₃jë́₃. 'Nia'₂ dsa₂ chi'₂, tsɨ́ng₂ si₂ la₂ ne'₅₄ 'nia'₂ ia₁ ma₂ca₂tian'₃ bá₄ 'nia'₂ ne₄ quió'₅ i₂së₃dsen₃. 
\p 'Nia'₂ guein₂ quiáng₃, jmo₅ jniá₂ si₂ la₂ tsɨ́ng₂ ja₁con'₂ 'nia'₂ ia₁ ma₂ca₂rë₃cuɨn'₂ 'nia'₂ Diú₄ Jmei₂ jniog₄.  
\v 14 'Nia'₂ dsa₂ i₂chan₂ chi'₂ quián₅, tsɨ́n₂ jniá₂ si₂ la₂ ne'₅₄ 'nia'₂ ia₁ ma₂ca₂rë₃cuɨn'₂ 'nia'₂ i₂jme₁ma₂chan₂ lia'₂ con'₂ jme₁ca₂rë₃lióg₃ ca₂le₃jë́₃. Ján₃ bá₄ tsɨ́n₂ jniá₂ si₂ la₂ ne'₅₄ 'nia'₂ dsa₂ chi'₂, ia₁ 'uan'₂ bá₄ 'nia'₂, ia₁ jág₁ dse₃ quió'₅ Diú₄ ma₂'i₄ 'au'₂ 'nia'₂, ia₁ ma₂ca₂tian'₃ 'nia'₂ ne₄ quió'₅ i₂së₃dsen₃. 
\p  
\v 15 Tsá₃ lë₁jmo₂ 'nia'₂ 'ɨ́n₅ 'au'₂ jua'₅₄ a₂le₃chang'₂ i₁niog'₄ juɨ₅ ja₁i₂nio₄ dsa₂ mɨ₂güɨ́g₃, on₃ guë'₂ jmó₁ 'nia'₂ 'ɨ́n₅ 'au'₂ 'e₂ niog₅ cha₂ mɨ₂güɨ́g₃. Chi₂jua'₂ chan₂ i₂'ɨ́n₅ dsɨ́₅ a₂jén'₅ mɨ₂güɨ́g₃, i₂le₂'éi₂ tsá₃ të₃dsón'₂ 'nioi₃ Diú₄ Jmei₂.  
\v 16 Ia₁ ca₂le₃jë́₃ a₂jén'₅ mɨ₂güɨ́g₃, juɨ₁lia'₂ ca₂le₃jë́₃ a₂'lɨg'₅₄ a₂mɨ₅ nɨ₁ŋɨ₁ dsa₂, a₂'ɨ́n₅ dsɨ́₅ dsa₂ jmo₃ ca₂le₃jë́₃ 'e₂ niog₅ të₅ jme₁ne₁₂, a₂jme₂rón₂ dsa₂ 'e₂ niog₅ cha₂ quió'₅ të₁lia'₂ chain₂: Ca₂le₃jë́₃ a₂në₅, on₃jua'₅₄ já₅ quió'₅ Diú₄ Jmei₂ jniog₄; a₂já₅ quió'₅ mɨ₂güɨ́g₃ bá₄ jaun₂.  
\v 17 La₁ a₂jë₁ca₂ŋɨ́₂ bá₄ mɨ₂güɨ́g₃, quian'₅₄ ca₂le₃jë́₃ 'e₂ 'lɨg'₅₄ a₂'ɨ́n₅ dsɨ́₅ dsa₂ chain₂ ne₄ gua'₅₄ 'uë₃. La₁ i₂jmo₅ a₂'ŋio₂ dsɨ́₅ Diú₄, le₃chain₂ co₂tan₅₄. 
\s1 Juɨ₁lia'₂ 'a₂ lia'₂ lë́₅ jág₁ dsau₅ dsón'₂, 'a₂ lia'₂ lë́₅ jág₁ të₂jág₁ táng₃ 
\p  
\v 18 'Nia'₂ chi'₂-guein₂ quiáng₃, jmɨg₄ jë₁ca₂tó'₂ bá₄ la₂ chong₂ jniog₄. Ma₂nei'₂ bá₄ 'nia'₂, já₅ jan₂ i₂'ŋia₅₄ Cristo. Rë₂në́₃ në́₃, juɨn₅ bá₄ i₂ma₂ca₂rë₃jniá₂ i₂'ŋia₅₄ Cristo. Jaun₂ bá₄ lë₃ ne₄ jniog₄ a₂ja₂quián₃ jmɨg₄ jë₁ca₂tó'₂.  
\v 19 I₂ca₂'uɨn₂ jë₄ quián₂ jniog₄ bá₄ 'éi₂. Dsón'₂ bá₄ dsau₅, on₃jua'₅₄ i₂quián₂ jniog₄ 'éi₂, ia₁ jua'₅₄ mei'₂ guë́₃ lɨ́in₅ i₂quián₂ jniog₄, jme₁jŋia₃ bá₄ quian'₅₄ jniog₄. La₁ le₂në₅ ca₂lë₃ ia₁jaun₂ le₃jniá₂, 'i₁jan₂ 'éi₂ tsá₃ lɨ́n₅ i₂quián₂ jniog₄.  
\v 20 La₁ 'nia'₂ në́₃, ma₂ca₂guen'₅₄ bá₄ 'nia'₂ Jme₂dsí₂ Jŋió₅, jaun₂ cuɨng'₂ bá₄ 'nia'₂ ca₂le₃jɨ́ng'₃\f + \fr 2:20 \ft o₃, “ca₂le₃jë́₃.” \f* jág₁ tí₅.  
\v 21 Jaun₂ tsɨ́ng₂ si₂ la₂ ne'₅₄ 'nia'₂, on₃jua'₅₄ ia₁ a₂tsá₃ cuɨn'₂ 'nia'₂ jág₁ tí₅, të₂le₃ ia₁ a₂cuɨn'₂ 'nia'₂. Jaun₂ ma₂le₁ŋi'₅₄ bá₄ 'nia'₂, 'i₁caun₂ jág₁ të₂jág₁ tsá₃ lé₂ le₃o₃'ag₅ jë₄ jág₁ dsau₅.  
\v 22 ¿'Ein₂ 'éi₂ i₂lɨ́n₅ të₂jág₁? I₂'éi₂ bá₄ i₂juá'₂ a₂tsá₃ lɨ́n₅ Jesús I₂rë₂'ɨ́n₁ quián₅ Diú₄. 'Éi₂ bá₄ i₂'ŋia₅₄ Cristo, i₂tsá₃ jen₅₄ Diú₄ Jmei₂, on₃ guë'₂ Ja₁ŋi'₅₄ në́₃.  
\v 23 Ca₂le₃jɨ́n₃ i₂tsá₃ jen₅₄ Ja₁ŋi'₅₄ Diú₄, ján₃ bá₄ le₂jaun₂ tsá₃ quiain'₅₄ Diú₄ Jmei₂. La₁ juɨ₁lia'₂ i₂jme₂jnia₅ jáng'₅ jág₁ dsau₅ të₂le₃ quió'₅ Ja₁ŋi'₅₄, ján₃ bá₄ le₂jaun₂ quiain'₅₄ Jmei₂ në́₃. 
\p  
\v 24 Jaun₂ lë₃, 'ma₄ 'nia'₂ të₂'au'₂ jág₁ dse₃ a₂ma₂nei'₂ 'nia'₂ le₂'uɨg₅₄. Ia₁ në₁jua'₂ ma₂të₁'ŋiá₄ të₂'au'₂ 'nia'₂, jaun₂ të₃'ŋiá'₄ bá₄ 'nia'₂ ja₁con₂ Ja₁ŋi'₅₄, quiain'₅₄ Jmei₂ në́₃.  
\v 25 Jaun₂ a₂la₂ bá₄ jág₁ quió'₅ a₂ca₂cuë₃: A₂le₃chong₂ jniog₄ co₂tan₅₄. 
\p  
\v 26 Jaun₂ tsɨ́n₂ jniá₂ si₂ la₂ ne'₅₄ 'nia'₂ ja₁'ɨ́ng₅ juɨ₁lia'₂ i₂'nio₃ jiog₃ cau₅.  
\v 27 La₁ quian'₅₄ bá₄ 'nia'₂ Jme₂dsí₂ Jŋió₅ i₂ma₂të₁'ŋiá₄ të₂'au'₂ 'nia'₂ i₂ma₂cuɨn₃ Cristo. Jaun₂ tsá₃ ma₃i₂sián'₂ 'nió'₅ jme₃tag₅. La₁ juɨ₁të₂'ŋiá'₄ bá₄ 'nia'₂ le₃quió'₅ 'éi, ia₁ 'ŋiog₅ bá₄ Jme₂dsí₂ Jŋió₅ jme₃tɨin₂₃ 'nia'₂ ca₂le₃jë́₃ con'₂ lë́₅ jág₁ tí₅ dsón'₂, on₃jua'₅₄ jág₁ të₂jág₁. 
\p  
\v 28 Jaun₂ në́₃, 'nia'₂ chi'₂-guein₂ quiáng₃, juɨ₁të₂'ŋiá'₄ bá₄ 'nia'₂ quiain'₅₄, ia₁jaun₂ caun₂ bá₄ le₁'ág₄ dsɨ₅ jniog₄ jë₁ma₂të́₂ jmɨg₄ i₁jme₃jniai₂₃ táng₃. Tsá₃ 'nió'₅ jmó₁ jniog₄ gui'₅₄ ne₅₄ jë₁ma₂guáin'₅.  
\v 29 Chi₂jua'₂ ma₂ŋi'₅₄ 'nia'₂, Cristo bá₄ i₂lɨ́n₅ i₂jmo₅ con'₂ dsi₂ten₅₄, jaun₂ juɨ₁le₂ŋi'₅₄ bá₄ 'nia'₂ ján₃, ca₂le₃jɨ́n₃ i₂jmo₅ con'₂ dsi₂ten₅₄, lɨ́in₅ chi'₂-guein₂ quián₅ Diú₄. 
\c 3  
\s1 Chi'₂-guein₂ quián₅ Diú₄ 
\p  
\v 1 Jag₄ 'nia'₂ jaun₂, 'ŋio₅ lɨn₃ 'nio₃ Diú₄ Jmei₂ jniog₄, juá'₂ dé₄ jmá'₃ të́₂ jniog₄ a₂lág₅ chi'₂-guein₂ quiáin₅. 'Uɨg₅₄ në₅, dsa₂ mɨ₂güɨ́g₃ tsá₃ cuɨg₂₃ jniog₄ ia₁ tsá₃ ma₂ca₂rë₃cuɨin₂₃ Diú₄.  
\v 2 'Nia'₂ rɨn'₅₄ jniog₄ i₂'nióg₃, ma₂lág₅ jniog₄ chi'₂-guein₂ quián₅ Diú₄. O₁jŋia'₅₄ la₂ tsá₃ ma₂ne₄ guë́₄ jniog₄ 'a₂ lia'₂ léi₂ jë₁ca₂tó'₂, la₁ ne₄ jniog₄, jmɨg₄ jë₁ma₂të́₂ rë₁jme₃jnia₅ 'éi₂, léi₂ jniog₄ juɨ₁lia'₂ lɨ́in₅ 'ŋiog₅, ia₁ néi₄ jniog₄ ton'₂ le₃cuɨin₅ jniog₄ 'a₂ lia'₂ jniái₂.  
\v 3 Ca₂le₃jɨ́n₃ i₂'ɨ́n₂ dsɨ́₅ jág₁ në₅, jmo₂₃ le₁jë́₃ të₂dsɨ́₅, juɨ₁lia'₂ le₁jɨ́n₃ 'éi₂. 
\p  
\v 4 Dsa₂ i₂caun₂ 'no₅ dso₄, rë₂cáin'₄ 'Éi'₃ quió'₅ Diú₄. Ia₁ juɨ₁'ein₂ guë́₃ i₂ca₂i₁juɨn₅₄ con'₂ lë́₅ 'Éi'₃, dso₄ bá₄ jaun₂.  
\v 5 Ia₁ ma₂ŋi'₅₄ bá₄ 'nia'₂, ta₁ jaun₂ ca₂guan₃ dsa₂ i₂rë₂'ɨ́n₁ 'éi₂ quián₅ Diú₄, a₂qui₃'éin₂ dsáu₁ jniog₄. Ia₁ 'i₁caun₂ dso₄ tsá₃ 'e₂ ca₂rë₃cáin'₂ 'ŋiog₅.  
\v 6 Jaun₂ le₂në₅, 'i₁jan₂ i₂chan₂ le₃quió'₅ 'éi₂ tsá₃ ma₃ŋɨ₂₃ jua'₅₄ caun₂ qui₂'no₂₃ guë́₄ dso₄. La₁ juɨ₁lia'₂ i₂caun₂ i₂nio₄ 'no₅ dso₄ në́₃, tsá₃ ma₂ca₂jág₂, on₃ guë'₂ ma₂ca₂rë₃cuɨg₂₃ në́₃.  
\v 7 'Nia'₂ chi'₂-guein₂ quiáng₃, tsá₃ 'ein₂ juɨ₁jiog₅₄ cau₅ quián'₂ 'nia'₂. Juɨ₁lia'₂ i₂jmo₅ con'₂ dsi₂ten₅₄, dsein₃ bá₄, juɨ₁lia'₂ dsen₃ 'éi₂ 'ŋiog₅.  
\v 8 La₁ juɨ₁lia'₂ i₂caun₂ 'no₅ dso₄, i₂quián₅ i₂së₃dsen₃ bá₄ 'éi₂, ia₁ i₂së₃dsen₃ në́₃ ma₂já₅ 'no₂₃ dso₄ ca₂le₃ jme₁ca₂rë₃lióg₃ mɨ₂güɨ́g₃. La₁ Ja₁ŋi'₅₄ Diú₄ në́₃, ta₁ jaun₂ ca₂guain₃ a₂qui₂'éin₂ ta₁ quió'₅ i₂së₃dsen₃. 
\p  
\v 9 'I₁jan₂ juɨ₁lia'₂ i₂ma₂ca₂rë₃chán₃ le₃quió'₅ Diú₄, jua'₅₄ caun₂ qui₂'no₂₃ guë́₄ dso₄, ia₁ quion₂ quió'₅ Diú₄ Jmei₂. Jaun₂ tsá₃ ma₂lé₂ jua'₅₄ caun₂ 'no₃ guë́₄ dso₄, ia₁ ma₂ca₂rë₃cháin₃ ma₂lɨ́in₅ guein₂ quián₅ Diú₄ bá₄.  
\v 10 Jaun₂ le₂në₅ bá₄ lé₂ jióg'₂ 'í₁ 'ein₂ lɨ́n₅ i₂quián₅ Diú₄, 'ein₂ lɨ́n₅ i₂quián₅ i₂së₃dsen₃ në́₃. Ia₁ juɨ₁'ein₂ guë́₃ i₂tsá₃ dse₃ jmo₅, o₃ juɨ₁lia'₂ i₂tsá₃ 'nio₃ rɨn'₅₄, on₃jua'₅₄ chi'₂-guein₂ quián₅ Diú₄ 'éi₂. 
\s1 Juɨ₁jme₁'nió₄ jniog₄ rɨn'₅₄ le₂jau₂ le₂jau₂ 
\p  
\v 11 Jág₁ dse₃ a₂ma₂nei'₂ 'nia'₂ le₂'uɨg₅₄, a₂la₂ bá₄ jaun₂: a₂jme₁'nió₄ jniog₄ rɨn'₅₄ le₂jau₂ le₂jau₂.  
\v 12 Tsá₃ 'nió'₅ jmó₁ jniog₄ juɨ₁lia'₂ ca₂jmo₃ Caín i₂jme₁lɨ́n₄ i₂quián₅ i₂së₃dsen₃, jaun₂ ca₂jŋɨi'₃ dsó₂ rɨin'₅₄. ¿'E₂ lë₃ ca₂jŋag'₃? Ia₁ a₂'lɨg'₅₄ bá₄ jme₁jmo₅-dsáu₅ 'éi₂ 'ŋiog₅; rɨin'₅₄ guë'₂ në́₃, a₂dse₃ bá₄ jme₁jmo₂₃. 
\p  
\v 13 Rɨn'₅₄ jniog₄, tsá₃ juɨ₁dsi₂gó'₃ 'au'₂ 'nia'₂ në₁jua'₂ 'iog₅₄ dsa₂ mɨ₂güɨ́g₃,  
\v 14 ia₁ ma₂ca₂ŋag₅ bá₄ jniog₄ ja₁jme₁dsióg₃; ma₂ca₂rë₃chóng₃ táng₃ jniog₄ jë₁le₃chong₂ co₂tan₅₄. Ne₄ jniog₄ a₂në₅ ia₁ 'nio₃ bá₄ jniog₄ rɨn'₅₄. La₁ i₂tsá₃ 'nio₃ rɨn'₅₄, i₂caun₂ ŋɨ₅ 'lɨn₄ bá₄ 'éi₂.  
\v 15 Ca₂le₃jɨ́n₃ juɨ₁lia'₂ i₂'ŋia₅₄ rɨn'₅₄, i₂rë₂cán'₄ dso₄ co₂'nió'₄ i₂jme₂dsian₅ dsa₂ bá₄ 'éi₂. Ŋi'₅₄ bá₄ 'nia'₂ jaun₂, 'i₁jan₂ dsa₂ i₂jme₂dsian₅ dsa₂ tsá₃ 'i₄ jme₂dsí₂ a₂chain₂ co₂tan₅₄.  
\v 16 Le₂la₂ bá₄ ne₄ jniog₄ 'e₂ jaun₂ a₂'nio₃ dsa₂ rɨn'₅₄, ia₁ chan₂ jan₂ i₂ca₂guen₃ 'mú₃ o₄quián₂ jniog₄. Ján₃ bá₄ le₂jaun₂ ca₂tág₂ jniog₄ guén₄ 'mú₃ o₄quió'₄ rɨn'₅₄.  
\v 17 Juɨ₁lia'₂ i₂cha₂ quió'₅ ne₄ gua'₅₄ 'uë₃ la₂, në₁jua'₂ chan₂ jan₂ rɨin'₅₄, i₂ŋɨ₅ 'ɨn₂ quió'₅, në₁jua'₂ tsá₃ ca₂dsia₃ guë'₂ ŋéi₂ dsɨ́₅ ja₁coin₂, ¿'a₂ lia'₂ lé₂ le₃juá'₂ ma₂të₁'ŋiá₄ të₂dsɨ́₅ a₂'nio₃ Diú₄?  
\v 18 'Nia'₂ guein₂ quiáng₃, on₃jua'₅₄ jmá'₃ quian'₅₄ jág₁ tio'₅₄ 'o₄ jniog₄ dsi₂ten₅₄ jua'₅₄ a₂'nio₃ jniog₄ rɨn'₅₄. A₂ca₂tág₂ jniog₄ jme₁'nió₄ të₃dsón'₂ rɨn'₅₄, të₂le₃ quian'₅₄ a₂léi₄ a₂qui₂rë₂jniá₂ 'e₂ a₂jmo₂ jniog₄. 
\s1 'Ei₅ caun₂ dsɨ₅ jniog₄ të₂le₃ quió'₅ Diú₄ 
\p  
\v 19 Le₂në₅ bá₄ ne₄ jniog₄ a₂téi₅ le₃quió'₅ juɨ₅ dsau₅, jaun₂ guë́₄ le₃'éi₁ jniog₄ caun₂ dsɨ₅ ne₄ Diú₄.  
\v 20 La₁ në₁jua'₂ cha₂ a₂qui₂dsɨ₂jŋi₅ dsɨ₅ jniog₄ a₂jme₂cáu'₂, Diú₄ bá₄ i₂lɨ́n₅ i₂juɨn'₂ guë́₄ lia'₂ con'₂ guë́₄ 'e₂ a₂qui₂dsɨ₂jŋi₅ dsɨ₅; 'éi₂ bá₄ ŋi₅ ca₂le₃jë́₃.  
\v 21 Le₂në₅ jaun₂ rɨn'₅₄ jniog₄ i₂'nióg₃ guë́₄ lɨn₃, chi₂jua'₂ lei₅₄ jniog₄ të₂dsɨ₅ guio₅₄ tsá₃ 'e₂ rë₂cáu'₄, caun₂ bá₄ lé₂ le₃'éi₁ jniog₄ dsɨ₅ ne₄ Diú₄,  
\v 22 jaun₂ cuë₃ bá₄ 'éi₂ ca₂le₃jë́₃ 'e₂ a₂mɨ₂, të₂le₃ ia₁ jme₂tí₁ jniog₄ 'éi'₃ quió'₅, ton'₂ ia₁ jmo₂ bá₄ jniog₄ ne₄ 'éi₂ a₂të₅ dsɨ́₅.  
\v 23 A₂la₂ bá₄ 'éi'₃ quió'₅: a₂le₃'éin₂ jniog₄ të₂le₃ quió'₅ Jesucristo Ja₁ŋi'₅₄, ton'₂ ján₃ guë'₂ jme₁'nió₄ jniog₄ rɨn'₅₄ le₂jau₂ le₂jau₂. Con'₂ në₅ bá₄ lë́₅ 'éi'₃ quió'₅ ca₂tság₃ jnia'₅₄.  
\v 24 Ca₂le₃jɨ́n₃ i₂jme₂ti₃ 'éi'₃ në₅ në́₃, chain₂ le₃quió'₅ 'éi₂; ján₃ guë'₂ le₂jaun₂ 'éi₂ 'ŋiog₅ chain₂ ja₁con₂ 'éi₂ në́₃. Le₂në₅ bá₄ ne₄ jniog₄ a₂guá₅ 'éi₂ të₂dsɨ₅ jniog₄: të₂le₃ quian'₅₄ Jme₂dsí₂ i₂ma₂cuɨin₃. 
\c 4  
\s1 Jme₂dsí₂ quián₅ Diú₄ quian'₅₄ jme₂dsí₂ i₂'ŋia₅₄ Cristo 
\p  
\v 1 'Nia'₂ guein₂ quiáng₃ i₂'nióg₃ guë́₄ lɨn₃, tsá₃ o₁len'₂ 'nia'₂ jua'₅₄ ca₂le₃jɨ́n₃ i₂juá'₂, jiog₅ Jme₂dsí₂ quián₅ Diú₄. Rë₂ de'₂ quion₂ 'nia'₂ 'í₁ quió'₅, chi₂jua'₂ të₃dsón'₂ lɨ́in₅ i₂quián₅ Diú₄. Ia₁ juɨn₅ dsa₂ juɨ₁gan₂ ma₂i₂nio₄ qui₂'ë́₂ jág₁ mɨ₂güɨ́g₃ la₂.  
\v 2 Le₂la₂ bá₄ lé₂ le₃caun'₅₄ 'nia'₂ 'í₁ quió'₅ i₂juá'₂ jiog₅ Jme₂dsí₂ quián₅ Diú₄: ca₂le₃jɨ́n₃ jme₂dsí₂ i₂jmo₅ jág₁ a₂ca₂guan₃ Jesucristo chi₁dsáin₃ mɨ₂güɨ́g₃ la₂, i₂le₂'éi₂ bá₄ lɨ́n₅ i₂quián₅ Diú₄.  
\v 3 La₁ juɨ₁'ein₂ guë́₃ jme₂dsí₂ i₂tsá₃ jmo₅ jág₁ le₂në₅ 'ɨin₂₃ Jesús, on₃jua'₅₄ i₂quián₅ Diú₄ 'éi₂. I₂quián₅ i₂'ŋia₅₄ Cristo bá₄ i₂le₂'éi₂, i₂ma₂nei'₂ 'nia'₂ jág₁ a₂jiá₃, i₂ma₂'en₅₄ mɨ₂güɨ́g₃ rë₂në́₃. 
\p  
\v 4 'Nia'₂ chi'₂-guein₂ quiáng₃, lɨ́n'₅ bá₄ 'nia'₂ i₂quián₅ Diú₄; ia₁ ma₂ca₂tian'₃ bá₄ 'nia'₂ dsa₂ i₂të₂jɨ́n₁. Ia₁ i₂'uan'₂ lɨn₃ guë́₄ bá₄ Jme₂dsí₂ i₂quian'₅₄ 'nia'₂, lia'₂ con'₂ guë́₄ i₂quian'₅₄ dsa₂ mɨ₂güɨ́g₃.  
\v 5 Dsa₂ mɨ₂güɨ́g₃ bá₄ 'éi₂, jaun₂ jmá'₃ lia'₂ ca₂ne₅₄ a₂cha₂ mɨ₂güɨ́g₃ bá₄ jme₂tag₂₃. Jaun₂ lë₃ dsa₂ mɨ₂güɨ́g₃ në́₃ nag₂₃ jág₁ a₂jme₂tag₅ dsa₂ 'éi₂.  
\v 6 La₁ dsa₂ quián₅ Diú₄ bá₄ lág₅ jniog₄; jaun₂ lë₃, juɨ₁lia'₂ dsa₂ i₂cuɨn₅ Diú₄ në́₃, nag₂₃ jág₁ quián₂ jniog₄. La₁ dsa₂ i₂tsá₃ quián₅ Diú₄ në́₃, tsá₃ 'nio₃ nag₃ jág₁ quián₂ jniog₄. Jaun₂ le₂në₅ bá₄ rë₂cuɨn₅ jniog₄ juɨ₁lia'₂ i₂jiog₅ Jme₂dsí₂ quió'₅ jág₁ tí₅. Ján₃ guë'₂ le₂jaun₂ rë₂cuɨn₅ jniog₄ juɨ₁lia'₂ i₂jiog₅ jme₂dsí₂ i₂juɨ₁gan₂. 
\s1 Diú₄ bá₄ i₂'nio₃ jniog₄ 
\p  
\v 7 Rɨn'₅₄ jniog₄, juɨ₁jme₁'nió₄ jniog₄ rɨn'₅₄ le₂jau₂ le₂jau₂, ia₁ ja₁con₂ Diú₄ bá₄ já₅ a₂'nio₃ dsa₂ rɨin'₅₄. Ca₂le₃jɨ́n₃ i₂'nio₃ rɨn'₅₄ ca₂rë₃cháin₃ të₂le₃ quió'₅ Diú₄, ton'₂ cuɨin₂₃ Diú₄.  
\v 8 I₂tsá₃ 'nio₃ rɨn'₅₄ në́₃, tsá₃ ma₂ca₂rë₃cuɨin₂₃ Diú₄, ia₁ Diú₄ lɨ́n₅ i₂'nio₃.  
\v 9 Ca₂jme₃jnia₅ Diú₄ a₂'nio₃ jniog₄ jme₁ca₂chein₃ Ja₁ŋi'₅₄ i₂jan₂ tan₅₄ 'éi₂ mɨ₂güɨ́g₃ la₂.  
\v 10 Le₂la₂ bá₄ lë́₅ a₂'nio₃ Diú₄: on₃jua'₅₄ a₂ma₂ca₂jme₁'niói₄ jniog₄ ja₁ma₂ja₂náu₅. 'Ŋiog₅ bá₄ Diú₄ ca₂dsia₃ ŋéi₂ dsɨ́₅ ca₂rë₃'nio₃. Jaun₂ ca₂chein₃ Ja₁ŋi'₅₄ ia₁jaun₂ 'éi₂ quí₃ a₂rag₂ jniog₄. 
\p  
\v 11 Rɨn'₅₄ jniog₄, chi₂jua'₂ le₂në₅ ca₂rë₃'nio₃ Diú₄, ján₃ bá₄ le₂në₅ ca₂tág₂ jniog₄ jme₁'nió₄ rɨn'₅₄ le₂jau₂ le₂jau₂.  
\v 12 'I₁jan₂ tsá₃ 'ein₂ ma₂jɨ́n₂ Diú₄. La₁ në₁jua'₂ 'nio₃ jniog₄ rɨn'₅₄ le₂jau₂ le₂jau₂, guá₅ bá₄ Diú₄ të₂dsɨ₅ jniog₄, ton'₂ qui₂rë₂'ŋia₅ bá₄ të₂dsɨ₅ a₂'nio₃ Diú₄.  
\v 13 Le₂në₅ bá₄ jau'₂ 'í₁ a₂téi₅ jniog₄ të₂le₃ quió'₅ Diú₄, ton'₂ 'ein₅₄ të₂dsɨ₅ jniog₄ në́₃: ia₁ ma₂cuɨin₃ Jme₂dsí₂ quiáin₅.  
\v 14 Jnia'₅₄ guio₅₄ ca₂néi₄, jaun₂ jang'₂ jnia'₅₄ jág₁ dsau₅ la₂: Diú₄ Jmei₂ ca₂chein₃ Ja₁ŋi'₅₄ a₂ca₂o₃lioin₅₄ dsa₂ mɨ₂güɨ́g₃.  
\v 15 Juɨ₁'ein₂ guë́₃ i₂'ɨn₅ Jesús, a₂lɨ́n₅ 'éi₂ Ja₁ŋi'₅₄ Diú₄, quiain'₅₄ bá₄ Diú₄, ton'₂ guá₅ bá₄ Diú₄ quiong'₅₄ táng₃. 
\p  
\v 16 Le₂në₅ ma₂ca₂rë₃ne₄, ma₂ca₂rë₃'éin₂ jniog₄ a₂'nio₃ Diú₄. Diú₄ lɨ́n₅ i₂'nio₃; jaun₂ i₂chan₂ 'nio₃ rɨn'₅₄ në́₃, chain₂ le₃quió'₅ Diú₄, ton'₂ chan₂ Diú₄ ja₁coin₂ ján₃.  
\v 17 Le₂në₅ bá₄ rë₂'ŋia₅ ja₁con₂ jniog₄ a₂jme₁'nió₄ jniog₄ rɨn'₅₄, ia₁jaun₂ jë₁ma₂ca₂të́₂ jmɨg₄ i₁qui₃dsɨ₅ Diú₄ 'éi'₃, lé₂ le₃'éi₁ jniog₄ caun₂ dsɨ₅. Ia₁ lág₅ jniog₄ chong₂ mɨ₂güɨ́g₃ la₂ lia'₂ lɨ́n₅ Jesucristo.  
\v 18 Juɨ₁lia'₂ jë₁'nio₃ dsa₂ rɨin'₅₄, tsá₃ 'e₂ gau₂ cha₂. La₁ juɨ₁lia'₂ jë₁'nio₃ dsa₂ rɨn'₅₄ lia'₂ rë₂'ŋia₅, quian'₅₄ a₂në₅ jŋia'₅ a₂gó'₅ dsa₂. Ia₁ juɨ₁lia'₂ a₂gó'₅ dsa₂, caun₂ jmɨ₁uɨg₅ bá₄ jaun₂ rë₂'ë́₄ ja₁coin₂. Ia₁ juɨ₁lia'₂ i₂gó'₅, tsá₃ ma₂ca₂rë₃'ŋia₅ ja₁coin₂ 'a₂ lia'₂ jme₃'nioi₃ rɨin'₅₄. 
\p  
\v 19 'Nio₃ jniog₄ Diú₄ ia₁ 'ŋiog₅ de'₂ le₂'uɨg₅₄ ca₂rë₃'nio₃ jniog₄.  
\v 20 La₁ në₁jua'₂ chan₂ i₂lɨn₅₄ juá'₂: “'Nió₃ jniá₂ Diú₄”, la₁ në₁jua'₂ 'ŋiai₅₄ bá₄ guë'₂ rɨin'₅₄ në́₃, jan₂ dsa₂ të₂jág₁ bá₄ 'éi₂. Ia₁ në₁jua'₂ tsá₃ 'nio₃ dsa₂ rɨin'₅₄ i₂jɨ́in₂, ¿'a₂ bá₄ lia'₂ lé₂ jme₃'nioi₃ Diú₄ i₂tsá₃ ma₂jɨ́in₂?  
\v 21 'Ŋiog₅ bá₄ Diú₄ ma₂cuë₃ 'éi'₃ la₂: I₂'nio₃ Diú₄, ca₂tɨ́in₂ jme₃'nioi₃ rɨin'₅₄ ján₃. 
\c 5  
\s1 Ca₂tián₃ jniog₄ ne₄ cosas 'lɨg'₅₄ a₂jén'₅ mɨ₂güɨ́g₃ 
\p  
\v 1 Ca₂le₃jɨ́n₃ i₂'én₂ a₂lɨ́n₅ Jesús të₃dsón'₂ I₂rë₂'ɨ́n₁ quián₅ Diú₄, lɨ́in₅ chi'₂-guein₂ quián₅ Diú₄. Juɨ₁lia'₂ ja₁'nio₃ dsa₂ jan₂ dsa₂, ján₃ bá₄ 'nioi₃ chi'₂ quián₅ dsa₂ 'éi₂.  
\v 2 Le₂në₅ bá₄ ne₄ jniog₄ 'a₂ lia'₂ jme₁'nió₄ chi'₂-guein₂ quián₅ Diú₄: chi₂jua'₂ dsón'₂ 'nió₃ jniog₄ Diú₄, ton'₂ jme₁tí₁ jniog₄ 'éi'₃ quió'₅.  
\v 3 A₂la₂ bá₄ a₂'nio₃ jniog₄ Diú₄, a₂jme₁tí₁ jniog₄ 'éi'₃ quió'₅ bá₄. 'Éi'₃ quió'₅ në́₃, on₃jua'₅₄ 'e₂ ŋɨ́₄ guei₂.  
\v 4 Ia₁ ca₂le₃jɨ́n₃ i₂ma₂lɨ́n₅ chi'₂-guein₂ quián₅ Diú₄, lí'₂ ne₄ cosas a₂jén'₅ mɨ₂güɨ́g₃. Jaun₂ quian'₅₄ a₂'éin₂ bá₄ jniog₄, léi₂ ne₄ cosas a₂jén'₅ mɨ₂güɨ́g₃.  
\v 5 ¿'Ein₂ 'éi₂ i₂lí'₂ ne₄ cosas a₂jén'₅ mɨ₂güɨ́g₃? Jŋia'₅₄ lia'₂ i₂'éi₂ bá₄ i₂'én₂ a₂lɨ́n₅ Jesús Ja₁ŋi'₅₄ Diú₄. 
\s1 Jág₁ dsau₅ 'ein₂ 'éi₂ lɨ́n₅ Ja₁ŋi'₅₄ Diú₄ 
\p  
\v 6 Lia'₂ con'₂ jme₁guan₃ Jesucristo, ca₂jáng'₃ Diú₄ Jmei₂ jág₁ dsau₅ a₂lɨ́n₅ Jesús Ja₁ŋi'₅₄ të₃dsón'₂. Ia₁ ca₂cuë₃ léi₄ jme₁ca₂jŋó₂ 'éi₂ jmɨg₂. Jaun₂ on₃jua'₅₄ jmá'₃ jme₁ca₂jŋói₂ jmɨg₂ ca₂cuë₃ léi₄. Jme₁ca₂jon₃ Jesús, jme₁ca₂i₃'o₅₄ jmɨ₂ 'ain₅₄ në́₃, ca₂cuë₃ léi₄ táng₃. Quian'₅₄ le₃tɨn₃ léi₄ në₅ ca₂jáng'₃ Jme₂dsí₂ quián₅ Diú₄ jág₁ dsau₅, ia₁ Jme₂dsí₂ 'éi₂ bá₄ i₂lɨ́n₅ jág₁ dsau₅.  
\v 7 Ún₂ i₂lɨ́n₅ i₂jáng'₅ jág₁ dsau₅ në₅:  
\v 8 Jme₂dsí₂ Jŋió₅ i₂jŋia₄ jniog₄ të₂dsɨ₅, Diú₄ Jmei₂ i₂ca₂cuë₃ léi₄ con'₂ jme₁ca₂jŋó₂ Jesús jmɨg₂, 'ŋiog₅ Jesús në́₃ ca₂cuë₃ léi₄ lia'₂ con'₂ jme₁ca₂join₃, ca₂i₃'o₅₄ jmɨ₂ 'ain₅₄. Le₃ún₂ i₂në₅ caun₂ bá₄ jág₁ lë́₅ quió'₅.\f + \fr 5:8 \ft A₂lɨn₅₄ chog₅₄ si₂ a₂ca₂lë₃ cang₂ quian'₅₄ jág₁ jmei₅ latín, juá'₂ le₂la₂: “i₂jáng'₅ jág₁ dsau₅ në₅ guei'₅₄ i₂juɨ́g₃: Diú₄ Jmei₂, Ja₁ŋi'₅₄ i₂lɨ́n₅ jág₁ quió'₅, quiain'₅₄ Jme₂dsí₂ Jŋió₅. Le₃ún₂ i₂në₅ ca₂ne₅₄ bá₄ lɨ́n₅. Ján₃ bá₄ ún₂ i₂lɨ́n₅ i₂jáng'₅ jág₁ dsau₅ ne₄ gua'₅₄ 'uë₃.” \f* 
\v 9 Guén₅ bá₄ jniog₄ juɨ₁lia'₂ 'e₂ caun₂ jág₁ dsau₅ jáng'₅ dsa₂ mɨ₂güɨ́g₃, la₁ 'ŋio₅ lɨn₃ guë́₄ quen₅ jág₁ dsau₅ a₂ca₂cuë₃ Diú₄ 'ŋiog₅, ia₁ quian'₅₄ jág₁ dsau₅ a₂ca₂jáng'₃ jaun₂ në́₃, ca₂'ë₃ 'ein₂ lɨ́n₅ Ja₁ŋi'₅₄.  
\v 10 I₂'én₂ të₂le₃ quió'₅ Ja₁ŋi'₅₄ Diú₄, 'i₄ jág₁ dsau₅ në₅ të₂dsɨ́₅. I₂tsá₃ 'én₂ të₂le₃ quió'₅ Diú₄ në́₃, jmo₂₃ dsɨ́₅ co₂'nió'₄ të₂jɨ́n₁ bá₄ Diú₄, ia₁ tsá₃ 'éin₂ jág₁ dsau₅ a₂ma₂cuë₃ Diú₄ të₂le₃ quió'₅ Ja₁ŋi'₅₄.  
\v 11 ¿'E₂ jaun₂ a₂ma₂juá'₂ Diú₄? Ma₂ca₂juá'₂ a₂ma₂cuë₃ jág₁ quió'₅ a₂le₃chong₂ jniog₄ co₂tan₅₄. Jaun₂ le₃chong₂ jniog₄ co₂tan₅₄ të₂le₃ quian'₅₄ Ja₁ŋi'₅₄.  
\v 12 Dsa₂ i₂quian'₅₄ Ja₁ŋi'₅₄ Diú₄, jéin'₃ bá₄. La₁ juɨ₁lia'₂ i₂tsá₃ quian'₅₄ Ja₁ŋi'₅₄ Diú₄, tsá₃ jéin'₃. 
\s1 Toin'₂ jág₁ rɨin'₅₄ jë₁ca₂tó'₂ 
\p  
\v 13 Jmo₅ jniá₂ si₂ la₂ tsɨ́ng₂ ne'₅₄ 'nia'₂ dsa₂ i₂'én₂ të₂le₃ quió'₅ Ja₁ŋi'₅₄ Diú₄, ia₁jaun₂ ŋi'₅₄ 'nia'₂ chang'₂, a₂'i₄ të₂'au'₂ jme₂dsí₂ a₂chang'₂ co₂tan₅₄.\f + \fr 5:13 \ft A₂lɨn₅₄ chog₅₄ si₂ a₂ca₂lë₃ cang₂ guë́₄, juá'₂ ján₃: “ton'₂ ia₁jaun₂ le₃'éng'₂ le₃quió'₅ Ja₁ŋi'₅₄ Diú₄.” \f* 
\p  
\v 14 Caun₂ 'ei₅ dsɨ₅ jniog₄ chong₂ të₂le₃ quió'₅ Diú₄, ia₁ ne₄ jniog₄ në₁jua'₂ 'e₂ caun₂ a₂mɨ₂ jniog₄ lia'₂ con'₂ lë́₅ 'ŋio₂ dsɨ́₅, nag₃ bá₄ jág₁ quián₂.  
\v 15 Chi₂jua'₂ ne₄ jniog₄, a₂nag₂₃ jág₁ a₂chi₂lein'₅₄ jniog₄, ne₄ bá₄ jniog₄ ján₃, në₂jag₄ bá₄ a₂ma₂në₂guéi₁ 'e₂ mɨ₂. 
\p  
\v 16 Në₁jua'₂ chan₂ i₂ca₂jɨ́n₂ rɨn'₅₄ 'no₂₃ dso₄, la₁ në₁jua'₂ tsá₃ lë́₅ dso₄ a₂jiog₅ juɨ₅ 'mú₃, 'nió'₅ mɨ₃ dsa₂ ne₄ Diú₄ ia₁jaun₂ jmo₃ Diú₄ a₂le₃chan₂ táng₃ dsa₂ 'éi₂; co₂'nió'₄ le₃jua'₅₄ dso₄ on₃jua'₅₄ a₂jiog₅ juɨ₅ 'mú₃. Ia₁ cha₂ dso₄ a₂jiog₅ juɨ₅ 'mú₃. Tsá₃ juá'₅ jniá₂ a₂'nió'₅ mɨ₃ dsa₂ o₄quió'₄ dsa₂ i₂'no₅ dso₄ le₂jaun₂.  
\v 17 Ca₂le₃jë́₃ a₂'lɨg'₅₄, dso₄ bá₄ jaun₂. La₁ cha₂ dso₄ a₂tsá₃ jiog₅ juɨ₅ 'mú₃. 
\p  
\v 18 Ne₄ bá₄ jniog₄, juɨ₁lia'₂ i₂ca₂rë₃chán₃ le₃quió'₅ Diú₄, tsá₃ ma₂ŋɨ₂₃ jua'₅₄ caun₂ qui₂'no₂₃ guë́₄ dso₄; ia₁ Ja₁ŋi'₅₄ Diú₄ bá₄ jmo₅ 'í₁,\f + \fr 5:18 \ft o₃, “juɨ₁lia'₂ i₂ca₂rë₃chán₃ le₃quió'₅ Diú₄, jmo₂₃ 'í₁ 'ŋiog₅.” \f* jaun₂ tsá₃ téi₂ i₂së₃dsen₃ gu₂. 
\p  
\v 19 Jaun₂ ne₄ bá₄ jniog₄ a₂lág₅ dsa₂ quián₅ Diú₄; ton'₂ ne₄ bá₄ jniog₄ ján₃, a₂ma₂rë₂'i₄ bí₂ quió'₅ i₂së₃dsen₃ ta₁caun₂ mɨ₂güɨ́g₃. 
\p  
\v 20 Ján₃ bá₄ ne₄ jniog₄, ta₁ jaun₂ ca₂guan₃ Ja₁ŋi'₅₄ Diú₄ a₂jme₃tag₂₃ ia₁jaun₂ le₃ŋág'₂ jniog₄ 'a₂ lia'₂ 'nió'₅ le₃cuɨn₅ jniog₄ i₂lɨ́n₅ të₃dsón'₂. Jaun₂ chong₂ bá₄ jniog₄ 'ei₅ caun₂ jág₁ le₃quió'₅ i₂lɨ́n₅ të₃dsón'₂, co₂'nió'₄ le₃jua'₅₄ le₃quió'₅ Jesucristo Ja₁ŋi'₅₄ Diú₄. 'Éi₂ bá₄ lɨ́n₅ Diú₄ të₃dsón'₂ i₂cuë₅ a₂le₃chan₂ dsa₂ co₂tan₅₄. 
\p  
\v 21 'Nia'₂ chi'₂-guein₂ quiáng₃, jmo₄ 'nia'₂ 'í₁ jaun₂ tsá₃ le₃gan'₂ 'nia'₂ quian'₅₄ diú₄ lag₄. 
\p Co₂në₅.