\id 2CO  
\h 2 CORINTIOS 
\toc1 Jí² tɨ tún² 'e gasii¹in San Pablo tɨ́ɨ²i 'in tsá² 'in néei¹ Corinto 
\toc2 2 CORINTIOS 
\toc3 2 Co. 
\mt1 Jí² tɨ tún² 'e gasii¹in San Pablo tɨ́ɨ²i 'in tsá² 'in néei¹ Corinto 
\c 1  
\s1 Siin²¹in Poo² 'e jí² lo tya' 'in jai'² lɨ́ɨ²i néei¹ Corinto 
\p  
\v 1 Jna‑a, Poo², sɨ́ɨ³na 'e jí² lo tyii' tɨ́ɨ²i 'in tsá² néei¹ Corinto. Joon jna‑a, Poo², lɨ́ɨ¹na apóstol tya' Jesucristo to² tyʉ'² Dios Jmii²¹. 'Øøi'²¹‑tsi tsá² 'e gatyii'¹³in Dios jna 'e cwo'³oo tsá² júu³ tyʉ́² tya'a. Siin²¹² jna'a caan²¹mo coon'¹³ tsaru'¹u' Timoteo 'e jí² lo tɨ́ɨ²i 'in tsá² jai'² lɨ́ɨ²i Dios 'in néei¹ fuu²¹ Corinto coon'¹³ jileei'²¹ 'in jai'² lɨ́ɨ²i lɨcaain²¹ lɨ sii²¹ Acaya.  
\v 2 Cwauncwaa'³i Ñʉ'¹ʉ' Dios coon'¹³ Ña'ñʉ'¹ʉ' Jesucristo jilee'²¹naa' 'e cwoseen²¹naa' tyʉ́²‑ʉ. 
\s1 Ní² Poo² wúu¹ 
\p  
\v 3 Cwoo'¹³ jna'a 'maai'¹³ 'in Dios tya' Ña'ñʉ'¹ʉ' Jesucristo, 'ii Jmii²¹o jon. Joon fee'¹mo‑tsi 'wii²¹² tyii'i 'in Jmii²¹ do. Cwo'¹o 'in Dios do jna'a jilaa'²¹ fo'feei'¹ tya'a.  
\v 4 Joon Dios do cwo'¹o jna'a jilaa'²¹ fo'feei'¹ coon'¹³ jilaa'²¹ wúu¹ nee²¹e'e 'e coon'¹³ la joon jna'oo'o lí²‑i cwóo¹³o'o 'e fo'feei'¹ do 'e gacwo'¹o Dios jna'a tya' tsá² xeei'²¹ 'in seen²¹in fa'í².  
\v 5 Tsʉ lagɨ nee²¹e'e 'e wúu¹ 'áai¹ 'e ganí² Cristo la joon jon 'ii'¹³na'a coon²¹ fo'feei'¹ tya'a.  
\v 6 Tsʉ 'wii'¹³ joon mo ganee²¹e'e wúu¹ joon gacwo'¹ Dios jna'a fo'feei'¹ coon'¹³ la joon 'e galisá² fo'feei'¹ tyii'i 'e cwóo¹³o'o 'naa'. Joon coon'¹³ 'e fo'feei'¹ 'e ga'ii'¹³na'a joon gacwóo¹³o'o 'naa' jon, coon'¹³ la joon taa'²¹ jmaa²aa' 'e fee'¹‑'oo' coon'¹³ 'e wúu¹ i'óo²oo' 'e lɨ la lɨ 'e wúu¹ ganee²¹e'e. Jmoo¹o Dios la joon ilisá² fo'feei'¹ tyii' joon itiin'¹³naa'.  
\v 7 Joon jo cu'²‑tsii'i coon'¹³ 'naa' tsʉ nee²¹oo'o 'e xʉfiin'¹³ ñí³ 'naa' wúu¹ la ganee²¹e'e la joon jon i'ii'¹³naa' fo'feei'¹ tya' Dios la ga'ii'¹³ jna'a. 
\p  
\v 8 Tsaru'¹u', 'iin²¹²na'a 'e liñii²¹ 'naa' 'e fa'í³ 'e galiseen²¹na'a coon²¹ lɨ sii²¹ Asia. Tsʉ 'áa¹mo ganee²¹e'e wúu¹ ca jiin'¹³ jo itaa'²¹gɨɨ'ɨ. Joon galɨ́ɨ²na'a 'e jo iwóo¹³o'o 'e jiin'¹i'in.  
\v 9 Lɨ́ɨ¹na'a la lɨ́ɨ¹i tsá 'in tɨ lɨ ijúun²mo. Pe coon'¹³ la joon ga'e'²e Dios jna'a xiiala ngɨɨ²¹ɨ'ɨ jo cu'²‑tsii'i coon'¹³on. Joon 'in Dios do jmoo¹o jiin'¹in tsá² 'in najúin¹. Dios do ga'e'²e jna'a wa'a ngɨɨ²¹ɨ'ɨ coon'¹³ 'wa'pí³ tya'a jon'gɨ coon'¹³ 'wa'pí³ tyii'i yiia'a.  
\v 10 Dios ga'woo¹i jna'a jee²¹² 'e fa'í³ do ijúun²na'a joon ca no nogɨ i'wóo¹i jna'a. Joon jo cu'²‑tsii'i wa'a iwói¹gɨ jna'a tsa'oo²¹ 'yíia¹  
\v 11 wa'a 'naa'gɨɨ' uncoon'¹³ jna'a coon'¹³ 'e júu³ tyʉ́² tyii'. Joon mi lái¹ Dios jna'a 'wii'¹³ júu³ tyʉ́² 'láai² do 'e gafuu²¹² 'naa' do joon fúu¹mo icwo'² Dios 'maai'¹³. 
\s1 Cwoo¹ Poo² cwáain¹ 'e jo mo cwée¹i Corinto 
\p  
\v 12 Jløø'³moo'o 'wii'¹³ 'e 'ɨ¹‑tsii'i 'e nigangɨɨ²¹²ɨ'ɨ tyani²ii' 'e tyʉ́²‑ʉ joon jo mo tyii¹a'a 'naa' tóo² jiin'¹³xʉ. Gauncoon'¹³ Dios jna'a 'e gajmoo²¹o'o tyani tsá² la joon 'e tyʉ́²‑ʉ jon' wa'a 'e jmɨɨ¹‑tsii'i.  
\v 13 Joon mo gasii²¹²na'a jí² tɨ́ɨ²i 'naa' 'e taa'¹³ jiin'¹³ 'e júu³ tyii'i 'e lí² untsaa'¹³naa' joon lí² 'øø'²¹mo‑'oo'. Joon ga'ɨ¹‑tsii 'e lí² 'øø'²¹mo‑'oo' tyʉ́²‑ʉ.  
\v 14 Tsʉ nano cwii¹moo' jna'a capii'³ pe 'iin²¹²na 'e ilicwii¹moo' jna'a 'e tyʉ́²gɨ 'e coon'¹³ la joon lí²‑i jmaa²aa' jløø'³naa' 'wii'¹³ jna'a, lagɨ ijmoo²¹o'o jløø'³na'a 'wii'¹³ 'naa' mi tɨ́² jmɨɨ²¹² icwée¹i Ña'ñʉ'¹ʉ' Jesucristo. 
\p  
\v 15 Jo'¹o galɨ́ɨ²na jilaa'²¹ 'elo, joon tsʉ 'wii'¹³ joon, ga'ɨ¹‑tsii yajǿø²na 'naa' nifu 'e coon'¹³ la joon lí²‑i jløø'³naa' tún² fu.  
\v 16 'E ga'ɨ¹‑tsii li gangɨɨ²¹²na lɨ née²naa' mi ní³ii fu lɨ sii²¹ Macedonia. Joon mi gaa'¹³na tún¹ foo'¹³na 'naa'. Joon mi yuui'¹³ joon lí² uncoon'¹³ 'naa' jna fu¹ 'yuu²na fu Judea.  
\v 17 ¿Tɨ lɨ́ɨ²naa' 'e túin¹ júu³ tyiia mo ga'ɨ¹‑tsii jmóo³oo 'elo pe jo gajmáa³aa? ¿Tɨ lɨ́ɨ²naa' 'e lɨ́ɨ¹na la lɨ́ɨ¹i 'in tsá² taan²¹²in juncwii²¹ 'in jo untiin'¹³ júu³ tya'a? ¿Tɨ lɨ́ɨ²naa' ifuu²¹²uu 'naa': “'E joon ilí²”, pe 'ɨ¹‑tsii 'e jon'² la joon ilí²; sɨ ifuu²¹²uu 'naa' 'ee: “Jon'² la joon ilí²”, pe 'ɨ¹‑tsii 'e joon ilí²?  
\v 18 'Esa la joon‑on, tsʉ Dios jma'²a 'naa' júu³ 'e jo lɨ́ɨ¹na'a tsá² túin¹ júu³ tya'a.  
\v 19 Tsʉ Cristo Jesús, 'in Jóon¹ Dios, jo lɨ́ɨ¹i la lɨ́ɨ¹i 'in túin¹ júu³ tya'a, joon Silvano, coon'¹³ Timoteo coon'¹³ jna cwoo¹³o'o 'naa' jiin'¹³ 'e júu³ tya' 'ii. Jmai'² júu³ ja'²mo 'e sá² tya' Cristo.  
\v 20 Joon jilaa'²¹ júu³ ga'ɨɨ¹ɨ Dios itiin'¹³in coon'¹³ Cristo. Joon tsʉ 'wii'¹³ joon un'góo³o' Dios mi sɨ́ɨ¹³ɨ'ɨ 'e ja'²mo júu³ tya'a 'wii'¹³i Cristo Jesús.  
\v 21 Joon 'in Dios do, 'ii 'in nigajmaa¹a taa'²¹‑a jna'a joongɨ taa'²¹ 'naa' jon. Joon 'ii gatyii'¹³in jna'a.  
\v 22 Joon lawa sello tya'a gateen¹in jna' 'e lɨ́ɨ¹na' tsá² tya'a joon gasii'²¹i Espíritu Tyʉ́² tya'a tsi jna' 'e lɨ́ɨ¹i lawa coon²¹ 'e sɨjnɨɨi'¹³ 'e i'ii'¹³na' jilaa'²¹ 'e tɨ́ɨ²na'. 
\p  
\v 23 Pe fuu²¹²uu 'naa' tyani Dios jo mo gacwéi¹na jee²¹² 'naa' 'in néei¹ Corinto tsʉ jo mo gali'iin²¹²na jmáa³aa 'e gó² coon'¹³ 'naa'.  
\v 24 Jo mo gali'iin²¹²na'a tyʉʉ'¹³ʉ'ʉ 'naa' to² 'ee 'ná¹ jai'² lɨ́ɨ²naa', jiin'¹³ gali'iin²¹²na'a 'e lijløø'³mogɨɨ' tsʉ tá² taan²¹²naa' coon'¹³ 'e jai'² lɨ́ɨ²naa'. 
\c 2  
\p  
\v 1 Joon tsʉ 'wii'¹³ joon ga'ɨ¹‑tsii jo góo¹gɨɨ 'e lɨ́ɨ¹na fa'í³ tsʉ 'ná¹‑a jíi³na 'naa' joon sɨ cwo'³oo 'naa' fa'í³.  
\v 2 ¿Xiiala ilí² jmáa³aa jløø'³na coon'¹³ 'in do 'in jmáa³aa jmaa¹a fa'í³ 'ido? Coon'¹³ la joon jo lí² jmáa³aa jløø'³na coon'¹³ 'naa'.  
\v 3 Tsʉ 'wii'¹³ joon gajíi³na 'naa' coon'¹³ 'e jí² do 'e gasɨ́ɨ³na 'naa' tsʉ jo 'iin²¹²na góo³oo wa'a jmáa³aa fa'í³ coon'¹³ 'in 'ná¹ unjløø'³na coon'¹³. Tsʉ lɨ́ɨ²na wa'a ijløø'³na la joon jon 'naa' ijmaa²aa' jløø'³naa'.  
\v 4 Joon mo gajmáa³aa 'e jí² do joon ga'óo³‑oo fa'í³, xuui²¹²‑tsii gatoo'²¹o jmɨɨ²¹ uní³ii tsʉ jo 'iin²¹²na jmáa³aa 'e 'óo²oo' fa'í³ coon'¹³ 'e jí² do. Gali'iin²¹²na 'e lí² ñí²ii' xiiati 'áai¹ 'e 'iin²¹²na 'naa'. 
\s1 Jmaa²aa' feei'¹‑'oo' 'wii²¹² tya' 'in ga'láa¹ do 
\p  
\v 5 Joon jon'on jiin'¹³ jna 'in ga'aa¹a fa'í³ 'wii'¹³ 'e gajmaa¹a 'in tsá² do pe joon ga'aa²xʉʉ' fa'í³ jon. Gafuu²¹²uu 'naa': “Ga'aa²xʉʉ' fa'í³” tsʉ jo 'iin²¹²na lifee'¹gɨ tsaa² tya' 'ido.  
\v 6 Joon 'e wúu¹ ganí² 'in tsá² do to² tyʉʉ'²¹naa' la jee²¹² fúu¹moo', líin²mo 'e wúu¹ do.  
\v 7 Joon nano 'ná¹ jmaa²aa' feei'¹‑'oo' 'wii²¹² tya'a, joon 'ná¹ cwo²oo' fo'feei¹ tya'a 'e coon'¹³ la joon jo lí² xuui²¹²gɨ‑tsi.  
\v 8 Tsʉ 'wii'¹³ joon mɨ́³ɨɨ tyaní²ii' 'iin²¹²moo' 'ido tún¹ jiin'¹³ la nigali'iin²¹²moo'.  
\v 9 Joon mo gajmáa³aa 'e jí² do, gajmáa³‑oo yʉto² ijøø³na wa'a 'iin²¹²naa' jmaa²aa' jiin'¹³ la fuu²¹²uu 'naa'.  
\v 10 Joon wana jmaa²aa' feei'¹‑'oo' coon'¹³ doñi'iin tsá², jna‑a jon feei'¹mo‑tsii tya'a. Jmóo³oo feei'¹‑tsii tya'a, wa'a la jai'² niga'láa¹a tyiia. Jmóo³oo la joon 'wii²¹² tyii' tyani Cristo.  
\v 11 Jmóo³oo la joon 'e jo lí² tsa'i² Satanás jee²¹² jna' tsʉ ñé³o' xiiala jmoo¹o 'ido. 
\s1 Mo taan¹in Poo² fu Troas 
\p  
\v 12 Joon mo gacwéi¹na 'e fuu²¹ Troas 'e cwó³oo 'e júu³ tyʉ́² tya' Cristo tya' 'in néei¹ do lawa'a ganá¹ Dios coon²¹ fu¹ fee'¹ tyiia 'e icwó³oo 'e júu³ tya' Ña'ñʉ'¹ʉ'.  
\v 13 Pe jo gatsee'²¹na 'in tsaru'¹u' Tito 'e fuu²¹ do, joon gajmaa¹a cu'²u‑tsii tsʉ jo gatsee'²¹na. Tsʉ 'wii'¹³ joon ga'ɨ́ɨ³ɨɨ júu³ 'in tsá² do joon gangóo³oon fu lɨ sii²¹ Macedonia. 
\s1 Lɨ'²o' 'wii'¹³i Cristo 
\p  
\v 14 Cwóo¹³o' 'maai'¹³ Dios tsʉ coon'¹³ 'ii'²¹ tya'a ilii'¹i' 'in 'lɨɨi'³ do 'wii'¹³ Cristo Jesús. Joon la nii'¹³ coon²¹ jmá² jmafuu²¹ la caain²¹, la joon gajmaa¹a Dios 'wii'¹³ jna'a, ganii'¹³ 'e júu³ tyʉ́² tya'a la caain²¹ lɨ lí² nuu¹ tsá².  
\v 15 Tsʉ, jna'o', lɨ́ɨ¹na' lawa coon²¹ 'e lɨ́ɨ¹na' jmafuu²¹ 'e cwo'¹o Cristo Dios. Joon 'e jmafuu²¹ do nii'¹³ la 'o'² 'in tiin'¹³in tiin'¹³ la 'in jo tiin'¹³in.  
\v 16 Joon tya' 'in jo tiin'¹³ 'e jmafuu²¹ do lɨ́² lawa coon²¹ jmá² jmaxʉʉ² 'e jngoo'² tya' tsá². Nuu¹o pe jo nʉʉ'¹³ʉ. Pe tya' 'in tsá² 'in tiin'¹³ 'e jmá² do lɨ lawa coon²¹ jmafuu²¹ 'e cwo'¹ fu juncwii²¹ tya' tsá². Joon jiin'¹³ jna'oo'o lí² jmá¹ jilaa'²¹ 'elo tsʉ jo lɨ́ɨ¹na'a la lɨɨ¹i 'in catyaai²¹ 'in cwo¹ júu³ tya' Dios wa'a lí² jna'¹a cuu².  
\v 17 Lɨ' cɨɨ'¹³ɨ jmoo²¹o'o, tsʉ faa'¹³a'a 'e cwáain¹ tya' Cristo tyani Dios coon'²¹ cee tún²‑un lawa tsá² 'in gasii²¹in Dios. 
\c 3  
\s1 'E júu³ 'múui² 'e ga'ɨɨ¹ɨ Dios 
\p  
\v 1 Mi faa'¹³ jna'a la no, ¿tɨ lɨ́ɨ²naa' 'e jiin'¹³ 'e untyuu²¹²na'a yiia'a tún¹? ¿Sɨ lɨ́ɨ²naa' 'ee 'e 'ná¹‑a cwoo¹³o'o 'naa' jí² 'e jin'² xiiala lɨ́ɨ¹na'a, sɨ 'ná¹‑a 'ee mɨɨ²¹ɨ'ɨ 'naa' 'e cwo²oo' jna'a jí² la joon la jmoo¹o 'inlɨ́ɨi¹³?  
\v 2 Jo 'ná¹ mɨɨ²¹ɨ'ɨ la joon tsʉ 'naa'oo' yaanaa' lɨ́ɨ¹naa' lawa coon²¹ jí² 'e jin'² xiiala lɨ́ɨ¹na'a. Jo 'ná¹gɨɨ'ɨ coon²¹ jí² xiia'. Tsʉ mo jǿøi² tsá² 'naa' cón² tsá² cwáain¹ xiiala lɨ́ɨ¹na'a.  
\v 3 Tsʉ 'naa', lɨ́ɨ¹naa' lawa coon²¹ jí² 'e gajmaa¹a Cristo joon jna'oo'o gajoon'¹³oo'o tya' tsá². Pe jo lɨ́ɨ¹naa' coon²¹ jí² 'e gajmaa¹a tsá² coon'¹³ 'in¹ jmɨjní². Galɨ́ɨ¹naa' lawa coon²¹ jí² 'e gajmaa¹a 'in Espíritu Tyʉ́² tya' Dios. Joon 'in Dios 'in jiin'¹ 'ii. Jo galɨ́ɨ¹naa' lawa jí² 'e gataan²an tsá² tsaa'² cuun²¹² pe 'in Espíritu Tyʉ́² do gataan²an 'e júu³ do tsi corazones tyii'. 
\p  
\v 4 Lí²‑i sii'¹³ jna'a 'naa' la joon tsʉ jo cu'²‑tsii'i coon'¹³ Dios 'wii'¹³i Cristo.  
\v 5 Jo lí² jmoo²¹o'o jiin'¹³ coon²¹ yiia'a pe jmoo²¹o'o jilaa'²¹ 'ii'²¹ tya' Dios.  
\v 6 Joon Dios do cwo'¹o jna'a pí³ wa'a cwóo¹³o'o 'e júu³ 'múui² 'e ga'ɨɨ¹ɨ. Joon 'e júu³ 'múui² do jo lɨ́² wa'a jmaa¹a tsá² nʉʉ'¹³ʉ 'e júu³ gajmaa¹a 'lɨɨ²¹² Moisés tsaa'² cuun²¹². Pe 'e júu³ 'múui² do lɨ́² lawa coon²¹ juncwii²¹ 'múui² 'e cwo'¹ 'in Espíritu tya' Dios tsá². Tsʉ 'e júu³ gacwo¹ 'lɨɨ²¹² Moisés do jmoo¹o júun²na'. Pe 'in Espíritu Tyʉ́² tya' Dios do cwoo¹o fu juncwii²¹ tyi'. 
\p  
\v 7 Joon 'e ley do 'e gacwo¹ 'lɨɨ²¹² Moisés galɨ́² tsaa'² cuun²¹². Joon mo gacwo'¹ 'lɨɨ²¹² Moisés tsá² Israel 'e cuun²¹² 'e taa'¹³ ley do galí² lawa coon²¹ 'e 'ya'²gɨ 'áai¹. Joon 'e ni² Moisés do galijɨɨ'¹mo 'áai¹ ca 'in tsá² Israel do jo lí² jǿø²ø níi¹i xʉfiin'¹³ nigaguui²¹ 'e jɨɨ'¹ do. Pe wana gacwo¹ Dios coon'¹³ 'e 'ya'²gɨ 'áai¹ 'e ley do 'e jmoo¹o júuin² tsá²  
\v 8 'e fee'¹gɨ 'áai¹ 'e 'ya'²gɨ tya' 'e júu³ 'múui² 'e cwo'¹ 'in Espíritu Tyʉ́² jna'.  
\v 9 Coon'¹³ 'e 'ya'²gɨ ga'ii'²¹ tsá² 'e ley do 'e píin² tsá² lɨ 'ii²¹ pe 'e 'ya'²gɨ 'áa¹mo 'e júu³ 'múui² tya' Dios 'e jin'² 'e jo tsaa² røøi²¹gɨ'.  
\v 10 Tsʉ 'e 'ya'²gɨ tya' 'e ley do jo 'áai¹ 'ya'²gɨ mo 'ɨ¹‑tsi tsá² tya' 'e 'ya'²gɨ 'áai¹gɨ tya' 'e júu³ 'múui² do.  
\v 11 Joon wa'a 'ya'²gɨ 'e itaa'²¹a catá² 'e 'ya'²gɨ 'áa¹mo 'e itaa'²¹a coon²¹ tøøi². 
\p  
\v 12 Joon tsʉ 'wii'¹³ né³e'e xiiala lɨ́² júu³ tyii'i lí²‑i faa'¹³ jna'a jo cu'²‑tsii'i.  
\v 13 Jo jmoo²¹o' la gajmaa¹a Moisés do tsʉ 'in Moisés do gajlɨɨ²¹ɨ níi¹i coon'¹³ coon²¹ 'mɨ'² 'e coon'¹³ la joon jo lí² cón² 'in tsá² Israel do cwáain¹ 'e gaguu¹i 'e jɨɨ'¹ níi¹i. Tsʉ jo taa'²¹a 'e jɨɨ'¹ níi¹i do.  
\v 14 Pe galɨ́² tuun²¹mo 'e 'øøi'²¹‑tsi 'in tsá² Israel do. Joon ca jmɨɨ²¹² no mo untsáa¹a tsá² Israel 'e júu³ tsáai² gacwo¹ Moisés lawa'a 'íi¹³gɨ 'e 'mɨ'² do tyaníi¹i joon jo 'øøi'²¹‑tsi. Jo mo gajan'²an 'in tsá² Israel do 'e 'mɨ'² do tsʉ jiin'¹³ Cristo lí² jan'²an 'e 'mɨ'² do.  
\v 15 Joon ca jmɨɨ²¹² no jo 'øøi'²¹‑tsi tsá² Israel mi untsáa¹a 'e jí² tya' Moisés tsʉ lawa'a coon²¹ 'e jnɨɨ'¹³mo 'e 'mɨ'² do joon jo tsatoo'¹³ alma tya'a 'e júu³ do.  
\v 16 Pe lawa'a coon²¹ 'e gajan'¹an 'e 'mɨ'² do mo ja'²mo galɨ́ɨ²i Ña'ñʉ'¹ʉ'.  
\v 17 Joon 'in Ña'ñʉ'¹ʉ' do lɨ́ɨ¹i Espíritu Tyʉ́² tya' Dios. Joon jo injnɨɨi'¹³gɨ 'e 'øøi'²¹‑tsi tsá² 'e 'mɨ'² do jileei'²¹ 'in 'ii'²¹i 'in Espíritu Tyʉ́² do.  
\v 18 Joon jo jnɨɨi'¹³gɨ ní²i' coon'¹³ 'e 'mɨ'² do pe lawa coon²¹ 'u¹ lɨ́² ní²i' joon la jɨɨ'¹ coon²¹ 'u¹ coon'¹³ 'yiiañi'¹ la joon jon ní²i' jɨɨ'¹ coon'¹³ 'e 'ya'²gɨ tya' Ña'ñʉ'¹ʉ'. Joon tɨ'²xʉ tɨ'²xʉ‑ʉ isɨ́ɨ¹³ jna' ilɨ́ɨ¹na' la lɨ́ɨ¹i. Tsʉ 'e 'ya'²gɨ tya' 'e lí² tyʉ²gɨ jee²¹² jna'. Joon 'in Ña'ñʉ'¹ʉ' do jmoo¹o jilaa'²¹ 'elo joon 'ii lɨ́ɨ¹i Espíritu do. 
\c 4  
\p  
\v 1 Joon Dios gacwo'¹ jna'a 'e to² jmoo²¹o'o 'wii'¹³ 'wo²‑tsio. Joon tsʉ 'wii'¹³ joon jo mo gajóon¹³o'on jiin'¹³xʉ jmoo²¹o'o 'e to² lo cwóo¹³o'o 'e júu³ tyʉ́² do.  
\v 2 Pe gatuu²¹²oo'o jilaa'²¹ 'e jmoo¹o tsá² li'ooin²¹ coon'¹³ jilaa'²¹ 'e cwo¹ tsá² fa'ɨɨ'²¹. Joon jo tyiian'¹³ jna'a tsá² tóo² jon'²gɨ unsɨ́ɨ²na'a 'e júu³ tyʉ́² tya' Dios. Pe síi¹³i'i jileei'²¹ tsá² jiin'¹³ la tí² 'e júu³ jai'² do. Joon coon'¹³ la joon la jaain²¹ la jaain²¹ lí² cón² cwáain¹ tyani Dios xiiala jmoo²¹o'o sɨ 'e tyʉ́² sɨ 'e gó² 'ee.  
\v 3 'E la ja'²mo 'e sɨjnɨɨi'¹³ tya' 'inlɨ́ɨi¹³ 'e júu³ tyʉ́² tyii'i tya' 'e tiin'¹³ tsá² pe sɨjnɨɨ'¹³mo jiin'¹³ tya' 'in tsá² 'in 'yuui² fu¹ lɨ 'ii²¹.  
\v 4 Joon 'in tsá² do jo jo'³ lɨ́ɨ²i tsʉ 'wii'¹³ 'in Satanás, 'in tyʉ'² to² juncwii²¹ lo, gajmee¹i 'in tsá² do lawa'a tsá² tʉʉ²mo coon'¹³ 'e 'øøi'²¹‑tsi. Joon jo jnée²i xiiala jná² joo'²¹ 'e júu³ tyʉ́² tya' Cristo tyíin¹in fu ñʉ'fú². Joon 'in Cristo do lɨ́ɨ¹i la lɨ́ɨ¹i Dios.  
\v 5 Joon mi cwóo¹³o'o 'e júu³ tyʉ́² do, jo faa'¹³a'a cwáain¹ tyii'i yiia'a pe faa'¹³a'a cwáain¹ tya' Jesucristo 'in lɨ́ɨ¹i Ña'ñʉ'¹ʉ'. Joon jna'oo'o jiin'¹³ lɨ́ɨ¹na'a tsá² 'in unjíi²in 'naa' 'wii'¹³ Cristo.  
\v 6 Tsʉ Dios do gajin'²in: “Cwojneei²¹ joo'²¹ lɨ 'íi¹ nʉʉ²¹.” 'Ii jon lawa'a gajmaa¹a 'e jná² joo'²¹ tsi alma tyi' coon'¹³ 'e 'øøi'²¹‑tsi' 'e coon'¹³ la joon liné²e' 'e 'ya'²gɨ tya' Dios 'e 'e'²e Jesucristo jna'. 
\s1 'Ii'²¹ tya' Cristo saan²¹o' 
\p  
\v 7 Joon 'e júu³ tyʉ́² tyii'i lo lee²¹e'e coon'¹³ cuerpos tyii'i 'e lɨ la lɨ tu'² cwoo'¹³ 'e 'wó¹mo 'áai¹ tsʉ coon'¹³ la joon lí² ñí² tsá² 'e 'ii'²¹ fee'¹ tya' Dios jilaa'²¹ 'elo jon' tyijna'a yiia'a.  
\v 8 Joon xʉfiin'¹³ 'oo²¹o'o fa'í³ doñixiia' tsaa²¹a'a jo tyʉʉ²¹ʉ'ʉ 'e fu¹ taa²aa'a, joon xʉfiin'¹³ 'ɨ¹‑tsii'i 'láai² 'áai¹ jo 'goo'²¹o'o jmoo²¹o'o.  
\v 9 Joon xʉfiin'¹³ 'ǿø¹mo tsá² jna'a jo tiuui²gɨ Dios jna'a. Joon xʉfiin'¹³ tyʉʉi'¹³ tsá² jna'a ca tɨ ni wó² jo júun²na'a.  
\v 10 Joon doñixiia' ngɨɨ²¹ɨ'ɨ, ngɨɨ²¹ɨ'ɨ coon²¹ fu¹ lɨ lí² júun²na'a la gajúin¹ Jesús. Joon coon'¹³ la joon lí² ñi² tsá² 'e 'ii'²¹ tya' Jesús do 'e uncoon'¹³ jna'a 'e jo júun²na'a.  
\v 11 Joon la 'ɨɨ²¹² toon²¹o'on fu juncwii²¹ lo ngɨɨ²¹ɨ'ɨ ijúun²moo'o 'wii'¹³i Jesús 'e coon'¹³ la joon lí² cón² tsá² cwáain¹ 'e ngɨɨ²¹ɨ'ɨ 'wii'¹³ cwáain¹ tya' Jesús la 'ɨɨ²¹² too²¹o'o cuerpo tyii'i.  
\v 12 Joon ngɨɨ²¹ɨ'ɨ ijúun²moo'o 'e coon'¹³ la joon ilisá² fu juncwii²¹ tyii'. 
\p  
\v 13 Ni jí² tya' Dios 'e jin'²: “Ja'²mo galɨ́ɨ²na, tsʉ 'wii'¹³ joon gafo'³oo.” Joon la jai'² galɨ́ɨ²i 'in tsá² do la joon jon ja'²mo lɨ́ɨ²na'a joon faa'¹³oo'o.  
\v 14 Tsʉ né³oo'o 'e Dios gaunjiin'¹in Ña'ñʉ'¹ʉ' Jesús jee²¹² 'lɨɨ²¹² joon né³oo'o jon 'e Dios do iunjiin'¹in jna'a caan²¹mo coon'¹³ Jesús. Joon caan²¹mo coon'¹³ 'naa' itee²e jna'a fu lɨ tyíin¹in.  
\v 15 Joon jilaa'²¹ 'elo galɨ́² tya' 'e tyʉ́² tyii', tsʉ mo gangafuu¹i 'in tsá² do 'in ga'ii'²¹i 'e tyʉ́² 'e cwo'¹ Dios tsá² la joon gacwo'¹ 'láai²gɨ 'maai'¹³ Dios joon coon'¹³ la joon untyúi¹gɨ tsá² Dios. 
\p  
\v 16 Tsʉ 'wii'¹³ joon jo tʉʉ²¹ʉ'ʉ 'e fu¹ taa²a'a jiin'²¹xʉ. Joon xʉfiin'¹³ 'e ngú¹ taan²¹²na'a ningatsáa²i tɨ' xʉ‑ʉ, 'e espíritu tyii'i ningalimú²mo la coon²¹ jmɨɨ²¹².  
\v 17 Tsʉ jo 'ii²¹ 'e wúu¹ saan²¹a'an fu juncwii²¹ lo tsʉ jmoono ityeei²¹. Pe 'e wúu¹ saan²¹a'an lo ijná² tyijna'a coon²¹ 'e fee'¹ 'e tyʉ́²gɨ tyii'i, 'e 'ya'²gɨ 'áai¹ 'e jo tyéi¹.  
\v 18 Tsʉ 'wii'¹³ joon jo cwáain¹ lee²¹e'e coon'¹³ 'e lí² jnée²i tsá² pe lee²¹e'e cwáain¹ coon'¹³ 'e jo jnée²i tsá². Tsʉ jo taa'²¹a 'e lí² jnée²i tsá² pe taa'²¹a coon²¹ tøø²mo 'e jo jnée²i tsá². 
\c 5  
\p  
\v 1 Tsʉ né³‑oo'o 'e moo¹ taa²na'a lɨ la lɨ coon²¹ 'nʉ́¹ 'e jo taa'²¹. Joon wa'a gaxéi¹ 'e moo¹ taa²na'a no nigatyaa¹a Dios tyʉ́² coon²¹ 'e 'mɨ́ɨ² fu ñʉ'fú² 'e taa'²¹ coon²¹ tøø²mo. Joon jo gajmaa¹ tsá² 'e 'mɨ́ɨ² do.  
\v 2 Joon la 'ɨɨ²¹² taa²na'a 'e moo¹ no 'óon² jna'a tsʉ 'iin²¹²na'a 'áai¹ 'e tyii'¹³i'i pe lawa'a sɨn'¹ɨ'ɨn 'e 'mɨ́ɨ² do 'e sá² fu ñʉ'fú².  
\v 3 Joon coon'¹³ la joon jo tɨ' rɨngú¹na'a tsʉ ityii'¹³i'i 'e sɨn'¹ɨ'ɨn 'mɨ́ɨ² do.  
\v 4 Joon la 'ɨɨ²¹² taa²na'a 'e moo¹ taa²na'a, 'e lɨ́² lawa 'nʉʉ²¹ʉ'ʉ, 'óon² jna'a joon saan²¹ jna'a fa'í³. Pe jo 'iin²¹²na'a wóo¹³o'o 'e sɨn'¹ɨ'ɨn tsáai² pe 'iin²¹²mogɨɨ'ɨ 'áai¹ 'e tyii'¹³i'i 'e sɨn'¹ɨ'ɨn 'mɨ́ɨ² do 'e sá² fu ñʉ'fú² 'e coon'¹³ la joon 'e jo taa'²¹ tyii'i iunsɨ́ɨ²moo'o coon'¹³ coon²¹ juncwii²¹ 'mɨ́ɨ².  
\v 5 Joon 'yʉ² to² la joon gajmee¹i Dios jna'a joon gacwo'¹o jna' 'in Espíritu Tyʉ́² tya' ilí² tsaa²¹mo‑tsii'i i'ii'¹³na'a jilaa'²¹ icwo'¹ Dios tsá². 
\p  
\v 6 Tsʉ 'wii'¹³ joon jo cu'²‑tsii'i joon né³oo'o 'e la 'ɨɨ²¹² taa²na'a 'e moo¹ taa²na'a lo jo toon²¹²o'on coon'¹³ Ña'ñʉ'¹ʉ'.  
\v 7 Joon coon'¹³ 'e jai'² lɨ́ɨ²na'a ngɨɨ²¹ɨ'ɨ jon' coon'¹³ 'e nee²¹e'e.  
\v 8 Jo cu'²‑tsii'i joon 'iin²¹²mogɨɨ'ɨ 'e tʉʉ²¹ʉ'ʉ 'e moo¹ taa²na'a lo joon tsacwoo²¹o'o coon'¹³ Ña'ñʉ'¹ʉ'.  
\v 9 Tsʉ 'wii'¹³ joon cwo'¹‑tsii'i jmoo²¹o'o jiin'¹³ la 'iin²¹²in Ña'ñʉ'¹ʉ' xʉfiin'¹³ taa²na'a moo¹ taa²na'a no sɨ jo taa²na'a 'ee.  
\v 10 Joon Cristo ijmáa¹a 'ii'²¹ tya' jile'¹e' joon la jaain²¹ la jaain²¹ i'ii'²¹i 'e tɨ́ɨ²i tya' 'e gajmaa¹a mo táa¹i moo¹ táa¹i. I'ii'²¹i jiin'¹³ la 'e nigajmaa¹a sɨ 'e tyʉ́² sɨ 'e gó² 'ee. 
\s1 Tyʉ́² 'íi¹ fu juncwii²¹ 'wii'¹³i Cristo 
\p  
\v 11 Joon tsʉ 'wii'¹³ né³e'e 'e 'ná¹ li 'gøøi'²¹ tsá² Ña'ñʉ'¹ʉ' cwo'¹‑tsii'i 'e liñí² tsá² xiiala lɨ́ɨ¹na'a. Pe ñí² Dios xiiala lɨ́ɨ¹na'a joon 'ɨ¹‑tsii 'e 'naa'oo' jon ñí²ii'.  
\v 12 Jo faa'¹³a'a 'naa' 'e untyuu²¹moo'o yiia'a tyaní²ii'. Pe 'ii²¹² jna'a 'e jløø'³naa' 'wii'¹³ jna'a. Joon coon'¹³ la joon 'e sá² 'e fuu²¹² 'naa' 'in tsá² do 'in unjløøi'³ yaai jiin'¹³ coon'¹³ 'e lí² jnee¹i tsá² jon' coon'¹³ 'e sá² 'e 'yʉ²‑tsi.  
\v 13 Joon wa'a 'ɨ¹‑tsi 'in tsá² do 'e tsá² caa²¹²mo jna'a cwáain¹ tya' Dios 'e joon, pe wa'a jo caai²¹² jna'a jmai'² 'e tyʉ́² tyii' jmoo²¹o'o.  
\v 14 Joon tsʉ 'wii'¹³ gali'iin²¹²in Cristo jna'a 'ná¹ untiin'¹³ jna'a jiin'¹³ la to² nʉʉ'¹³ʉ'ʉ. Joon 'ɨ¹‑tsii'i 'e gajúin¹ jaain²¹ tsá² tya' jilee'²¹mo, joon wana gajúin¹ 'in jaain²¹ do tya' jilee'²¹mo joon nijúin¹ jileei'²¹.  
\v 15 Joon Cristo gajún¹mo 'wii²¹² tya' jileei'²¹. Joon tsʉ 'wii'¹³ gajún¹mo Cristo 'wii²¹² tya'a joon gajiin'¹o jee²¹² 'lɨɨ²¹² 'e coon'¹³ la joon 'ná¹ jmá¹ tsá² taan²¹²in fu juncwii²¹ jiin'¹³ la to² tyʉ'²ʉ, jo 'ná¹gɨ jmáa¹a jiin'¹³ la to² tyʉ'² yaai.  
\v 16 Tsʉ 'wii'¹³ joon jo lé²gɨɨ'ɨ cwáain¹ tya' tsá² la jmoo¹o 'in tsá² 'in 'ɨ¹‑tsi jiin'¹³ 'e sá² fu juncwii²¹ lo. La joon ga'ɨ¹‑tsii'i tya' Cristo la mo jéei¹ pe jo 'ɨ¹gɨ‑tsii'i la joon no.  
\v 17 Tsʉ mo licaan²¹in tsá² coon'¹³ Cristo galɨ́² 'mɨ́ɨ²mo 'ii. Gatsé¹mo 'e sɨɨin'¹³ do tsʉ gacwá² 'e 'mɨ́ɨ². 
\p  
\v 18 Joon Dios gajmaa¹a jilaa'²¹ 'elo. Joon 'in Dios do gajmaa¹a 'e saan²¹an' røø²¹ coon'¹³on 'wii'¹³i Cristo. Joon gacwo'¹o Dios jna'a to² 'e jmoo²¹o'o 'e seein²¹ tsá² tyʉ́² coon'¹³ Dios.  
\v 19 'E 'øøi'²¹‑tsi tsá² 'e 'wii²¹² Cristo jmoo¹o Dios 'e seein²¹ tsá² taain²¹² juncwii²¹ røø²¹ coon'¹³on, jo cón²gɨ cwáain¹ tsaa² 'noo¹o tsá². Joon gatyaa¹a Dios cwoo²¹o'o 'e júu³ tyʉ́² do 'e jmoo¹o tsá² røø²¹ coon'¹³ Dios. Joon jna'oo'o 'ná¹ cwoo'¹³o'o tsá² xeei'.  
\v 20 Tsʉ 'wii'¹³ joon lɨ́ɨ¹na'a lawa'a tsá² 'in gasii¹in Cristo. Joon lawa 'e mɨ́² Dios tyaní²ii' mi mɨɨ²¹ɨ'ɨ tyaní²ii'. Joon mɨɨ²¹ɨ'ɨ tyaní²ii': Cwoseen²¹naa' røø²¹ coon'¹³ Dios.  
\v 21 Jo ga'ngo¹o Cristo jiin'¹³ coon²¹ tsaa². Pe 'wii'¹³i tyijna' gacwo'¹ Dios Cristo tsaa² tyi' 'e coon'¹³ la joon lí²‑i lisaan²¹ jna' 'in tyúi¹ la tyúi¹ Dios. 
\c 6  
\p  
\v 1 Caan²¹mo jmoo²¹o'o to² coon'¹³ Dios, joon mɨɨ²¹ɨ'ɨ tyaní²ii' jo cwóo²oo' wa tsáa¹a lɨ' caai¹ 'e gajmaa¹a Dios feei'¹‑tsi 'wii²¹² tyi'naa'.  
\v 2 Tsʉ ni jí² tya' Dios jin'²in: 
\q1 Ganúu³oo júu³ tyi'i mo galɨ́² feei'¹‑tsii; 
\q1 gauncoon'¹³ jna 'nʉ 'e jmɨɨ²¹² gajmáa³aa tiin'¹³ 'nʉ. 
\m Joon nano sii'¹³i'i 'naa' jmɨɨ²¹² no‑o 'e feei'¹‑tsi Dios tya' tsá²; 'e jmɨɨ²¹² no‑o 'iin²¹²in Dios jmaa¹a tiin'¹³ tsá². 
\p  
\v 3 Joon jo jmoo²¹o'o jín¹ tya' jiin'¹³ jaain²¹ tsʉ la joon jo lí² faa'²¹ tsá² 'laa'²¹ tya' 'e to² jmoo²¹o'o.  
\v 4 Pe 'iin²¹²moo'o 'ee'¹³e'e tsá² coon'¹³ jilaa'²¹ 'e jmoo²¹o'o 'e jmoo²¹o'o jiin'¹³ 'e to² tyʉ'² Dios. Coon'¹³ jilaa'²¹ 'e ngɨɨ¹i jna'a 'ee'¹³e'e tsá², coon'¹³ jilaa'²¹ wúu¹ 'e ganee²¹e'e joongɨ coon'¹³ jilaa'²¹ jmɨɨ²¹² 'aa²¹² tyii'i joongɨ coon'¹³ jilaa'²¹ fa'í³ galɨ́² saan²¹a'an 'ee'¹³e'e tsá² 'e jmoo²¹o'o to² tyʉ'² Dios.  
\v 5 Nigapó² tsá² moowoo²¹o'o; joon nigatain'² tsá² jna'a 'nʉñí³; joon gajmee'²¹mo tsá² jna'a mɨɨ'¹³. Joon nigajmoo²¹o'o to² 'ii²¹. Sá²‑a mo jo gacwuu²u'u joon gangɨɨ²¹na'a 'e jo sá² tye'¹e'e.  
\v 6 Joon coon'¹³ 'e jmoo²¹o'o jmai'² 'e tyʉ́²; joon coon'¹³ 'e 'øøi'²¹‑tsii'i 'ee'¹³e'e tsá² 'e jmoo²¹o'o to² tya' Dios. 'Ee¹³e'e jon coon'¹³ 'e 'wó²‑tsii'i joongɨ coon'¹³ 'e feei'¹‑tsii'i joongɨ coon'¹³ 'in Espíritu Tyʉ́² 'in uncoon'¹³ jna'a. 'Ée¹³e'e jon coon'¹³ xiiala 'iin²¹²moo'o tsá² xeei' 'e jmoo²¹o'o tó² tyʉ'² Dios.  
\v 7 Joon lini¹ tsá² 'e jmoo²¹o'o 'e to² tyʉ'² Dios 'wii'¹³ coon'¹³ 'e júu³ jai'² 'e cwoo'¹³o'o tsá² joon 'wii'¹³ 'e 'ii'²¹ tya' Dios 'e 'oo²¹o'o. Joon tsʉ 'wii'¹³ jmoo²¹o'o jiin'¹³ 'e tyʉ́²‑ʉ lawa'a un'gøø'¹³na'a yiia'a.  
\v 8 Sá²mo 'e un'goo¹ tsá² jna'a, sá²mo jon jo un'goo¹ tsá² jna'a. Sá²mo 'e faa'²¹ tsá² tyʉ́² tyii'i, sá²mo jon faa'²¹ tsá² 'laa'²¹ tyii'i. 'Inlɨ́ɨi¹³ jin'² 'e tsá² tajuu²¹mo jna'a, 'inlɨ́ɨi¹³gɨ jin'² 'e ja'²mo júu³ tyaa²¹a'a.  
\v 9 Sá²mo faa'²¹a lawa'a jo cwii¹in jna'a, pe sá²mo jon 'e faa'²¹a lawa'a cwii¹in jna'a. Mo lɨ́ɨi¹³ ngɨɨ²¹ɨ'ɨ tóin¹ 'mó¹ pe saan²¹gɨɨ'ɨ. Nee²¹e'e wúu¹ 'áai¹ pe jo mo gajúun²na'a.  
\v 10 Joon xʉfiin'¹³ toon²¹o'on fa'í³, toon²¹o'on 'e jløø'³moo'o jon. Joon xʉfiin'¹³ tañíi²moo'o fúu¹mo tsá² 'ii'²¹i 'láai² 'e jmaai¹ to² tya'a 'wii²¹² tyii'i. Joon xʉfiin'¹³ jo 'e sá² tyii'i Dios cwo'¹o jna'a jilaa'²¹ 'e 'naa²¹na'a. 
\p  
\v 11 Tsaru'¹u' 'in néei¹ Corinto, nigafee'¹³na'a 'naa' coon'¹³ júu³ coon²¹ tsáa¹. Nigafee'¹³na'a 'naa' jiin'¹³ la tí² 'e 'ɨ¹‑tsii'i.  
\v 12 Jløø'³moo'o 'wii'¹³ 'naa' pe 'naa'gɨɨ' jo jløø'³naa' coon'¹³ jna'a.  
\v 13 Tsʉ 'wii'¹³ joon mɨ́ɨ³ɨɨ tyaní²ii' lawa jaain²¹ jmii²¹ tsá², untyuu²¹‑'oo' 'wii²¹² tyiia la galɨ́² tyú²‑tsii 'wii²¹² 'naa'. 
\s1 Taain²¹² Dios jee²¹² jna' 
\p  
\v 14 Jo uncaan²¹naa' coon'¹³ 'in tsá² 'in jo jai'² lɨ́ɨ²i tsʉ jo jmee¹i tyii'. Jo lí² uncaain²¹ tsá² 'e tyʉ́² coon'¹³ 'e gó². Jo lí² cai'² tsá² 'yiiañi' coon'¹³ 'e nʉʉ²¹.  
\v 15 Jo lí² jmá¹ tsá² coon²¹ røøi²¹ Cristo coon'¹³ Satanás. Wa'a la joon, ¿xiiala ilí² uncaain²¹ 'in tsá² jai'² lɨ́ɨi coon'¹³ 'in jo jai'² lɨ́ɨ²i?  
\v 16 ¿Xiiala lí² tsa'í² dioses 'in gajmee¹i tsá² lɨ tyʉ'² Dios to²? Pe 'naa' lɨ́ɨ¹naa' tsá² 'in tyʉ'² Dios, 'in jiin'¹, to². Jiin'¹³ la nigajin'² Dios: 
\q1 Intaan²¹²na joon ingɨɨ²¹²na jee²¹² 'ii; joon ilɨ́ɨ¹na Dios tya'a, joon 'in tsá² do ilíin² tsá² tyiia. 
\m  
\v 17 Tsʉ 'wii'¹³ joon gajin'²o jon Ña'ñʉ'¹ʉ': 
\q1 Jeen'¹³naa' jee²¹² 'in tsá² do joon siin'¹³naa' coon'²¹. 
\q1 Jo un'lɨɨ'²¹naa' yaanaa' coon'¹³ 'e gó² 
\q1  
\v 18 joon i'ii'¹³na 'naa' joon ilɨ́ɨ¹na lawa jaain²¹ 'Ñʉ́²ʉʉ' joon 'naa'gɨɨ' ilíin²naa' lawa xuui²¹² tsañʉʉ'¹ joon xuui²¹² tsamɨ́² tyiia. 
\q1 La jon jin'² 'in Ña'ñʉ'¹ʉ' 'in jmaa¹a jilaa'²¹ 'e 'iin²¹²in. 
\c 7  
\p  
\v 1 'E lo‑o 'e júu³ ga'ɨɨ¹ɨ Dios tyi', tsaru'¹u', 'in 'iin²¹²na. Tsʉ 'wii'¹³ joon 'ná¹‑a tʉʉ²¹²ʉ' jilaa'²¹ 'e un'lɨɨi'²¹ jna', tiin'¹³ la ngú¹ toon²¹²o' lagɨ espíritu tyi'. Joon tsʉ 'wii'¹³ un'goo²o' Dios 'ná¹ cwoo'¹³‑tsi' 'e ngɨɨ²¹ɨ' 'e tyú²na' tyaníi¹i. 
\s1 Jløø'³mo Poo² coon'¹³ 'in tsá² néei¹ Corinto 
\p  
\v 2 ¡Wa'a núu³duu' júu³ tyiia! Jo mo ga'laa²¹a'a tya' jiin'¹³ jaain²¹ 'naa' jon'gɨ ga'ée¹³e'e júu³ gó² jon'gɨ mo gatyíin¹³a'an 'naa' tóo² jiin'¹³ jaain²¹.  
\v 3 Joon jo fuu²¹²uu 'naa' wa'a cwo'²oo 'naa' tsaa² tsʉ la mo gafuu²¹²uu 'naa' la jéei¹ jløø'³moo coon'¹³ 'naa' wa'a saan²¹gɨ' sɨ júun²mogɨ' caan²mo 'ee.  
\v 4 Jo cu'²‑tsii coon'¹³ 'naa' joon jløø'³moo 'áai¹ coon'¹³ 'naa'. Joon xʉfiin'¹³ nee²¹e'e wúu¹ jo tʉ́ʉ³ʉʉ 'e fu¹ 'yuu²na joon jløø'³moo. 
\p  
\v 5-6 Tsʉ nicwée¹i Tito joon coon'¹³ júu³ tyaan¹an Dios gatyá²‑tsii'i 'e unjløø'³na'a 'wii'¹³ 'naa'. Joon xʉfiin'¹³ jo mo ga'ii'² wo'¹oo'o ca gatyalii²¹i'i fu Macedonia, ñí² Dios xiiala tya¹‑tsi tsá² 'in seen²¹in fa'í³. Tsʉ doñixiia' ngɨɨ²¹ɨ'ɨ lawa'a coon²¹ 'e injnɨɨ'¹³moo'o. Gali'iin²¹²in tsá² jmaa¹a 'e gó² tyii'i joon 'ɨ¹‑tsii'i 'áai², 'goo'²¹‑oo'o wa' coon²¹ to² tyii'i 'e ngó¹ lɨ caai¹. Pe gatya‑tsii'i mo gacwéi¹ Tito.  
\v 7 Gatya¹‑tsii'i tsʉ 'wii' gacwéi¹ Tito pe gatya¹‑tsii'i jon tsʉ 'wii'¹³ jløø'³mo Tito 'wii'¹³ 'naa'. Joon gatyaa¹o júu³ xiiala 'iin²¹²naa' jøø²¹²naa' jna'a. Gatyaa¹o jon júu³ xiiala galixuui²¹²‑'oo' joongɨ xiiala ga'ɨ¹‑'oo' 'áai¹ 'wii²¹² tyiia. Joon mo gatyaa¹a 'e júu³ lo galijløø'³na 'áai¹gɨ. 
\p  
\v 8 Caan'²¹moxʉ galɨ́ɨ¹na mo galixuu²¹²mo‑'oo' 'wii'¹³ 'e jí² do 'e gasɨɨ²na 'naa'. Pe jo lɨ́ɨi¹gɨɨ la joon. Tsʉ wana ga'ɨ¹‑tsii caan'²¹mo 'wii'¹³ xuu²¹²mo‑'oo' coon²¹ sii'¹³xʉ,  
\v 9 pe nano jløø'³moo. Jløø'³moo jon' tsʉ 'wii'¹³ galixuu²¹²mo‑'oo' pe jløø'³moo tsʉ 'wii'¹³ gajo'²o‑'oo' coon'¹³ 'e galixuu²¹²mo‑'oo' do. Joon gajmaa²aa' jiin'¹³ la gali'iin²¹²in Dios tsʉ 'wii'¹³ joon jo gajmee'¹³na'a 'naa' coon'¹³ 'e xuu²¹²mo‑'oo' do.  
\v 10 Tsʉ wa'a jmoo¹o tsá² la 'iin²¹²in Dios 'wii'¹³ galixuu²¹²mo‑tsi itiin'¹³mo joon jo 'ná¹ caain'²¹ lɨ́ɨ²i. Pe wa'a jmoo¹ tsá² xuui²¹²‑tsi jiin'¹³ la lɨ́ɨ¹i tsá² taain²¹ fu juncwii²¹, ijúun¹mo jon.  
\v 11 Joon tsʉ 'wii'¹³ galixuu²¹²mo‑'oo' coon'¹³ 'e jí² do gajmaa²aa' la 'iin²¹²in Dios. ¡Joon jǿø²øø' xiiala cwo'ɨ́ɨ¹i! Ga'ɨ¹‑'oo' coon'²¹ tún² 'e cwáain¹ do. Joon gali'iin²¹²naa' jmaa²aa' jna júu³ jiin'¹³ la tí². Gatɨɨ²¹² 'nii'²¹‑'oo' 'wii²¹² tyii' yaanaa'. Pe joon gafoo'²moo' jon. Pe mo ngɨ́ɨ²i joon gali'iin²¹²naa' jøø²¹²naa' jna joon gali'iin²¹²naa' 'e²ee' wúu¹ 'in tsá² 'in ga'láa¹a do. Coon'¹³ jilaa'²¹ 'elo ga'ee'¹³oo' jna 'e jo 'e tsaa² tyii' sá².  
\v 12 Joon gasɨɨ²¹na 'e jí² do tyii' pe jo gasɨɨ²¹na 'e jí² do wa'a 'e 'iin²¹²na uncoon'¹³ 'in tsá² do 'in ga'láa¹ jon'gɨ 'wa'a 'iin²¹²na uncoon'¹³ 'in ga'láa¹ tya'a do. Gasɨɨ²¹na 'e jí² do tyii' wa'a icón² 'naa' cwáain¹ xiiati 'e 'ɨ¹‑tsii'i 'naa' tyani Dios.  
\v 13 Joon gatya¹‑tsii'i mo ganʉʉ²¹ʉ'ʉ 'e júu³ do. 
\p Gatya¹‑tsii'i 'e júu³ do pe jløø'³mogɨɨ'ɨ 'áai¹ 'e tyʉ́²‑ʉ 'íi¹‑tsi Tito, tsʉ jilee'²¹naa' gauncoon'¹³ 'ii tsʉ joon jo cu'²gɨ‑tsi tyii'.  
\v 14 Tsʉ gafuu²¹²uu Tito 'e tyʉ́²‑ʉ tyii' joon 'naa' jo mo gacwóo²oo' fa'ɨɨ'²¹ tyiia. Pe gatiin'¹³ 'naa' jilaa'²¹ júu³ jai'² 'e gafuu²¹²uu Tito tyii' joon la jai'² 'e júu³ gafuu²¹²uu Tito tyii' la joon jon júu³ ja'²mo 'e júu³ gafuu²¹²uu 'naa'.  
\v 15 Joon 'áa¹mo gali'iin²¹²gɨ Tito 'naa' mo gatɨ'²‑tsi xiiala gajmaa²aa' nʉ́ʉ¹³ʉʉ', joon ga'ii'¹³naa' 'ii joon 'gøø'²¹moo' wa'a jo jmaa²aa' jiin'¹³ la 'iin²¹²in.  
\v 16 Joon nano jløø'³moo 'e jo 'e 'ná¹gɨ ngɨɨ²¹²na cu'²‑tsii coon'¹³ 'naa'. 
\c 8  
\s1 Cwó²oo' cuu² 'e 'yaai¹‑'oo' 
\p  
\v 1 Joon, tsaru'¹u', 'ii²¹² jna'a jmoo'¹³o'o júu³ 'naa' xiiala lɨ́ɨ¹i 'in tsá² néei¹ Macedonia 'in jai'² lɨ́ɨ²i Dios, xiiala gauncoon'¹³ Dios 'ii.  
\v 2 'In tsaru'¹u' 'in néei¹ Macedonia do ga'aa¹a fa'í³ 'áai¹ joon xʉfiin'¹³ nii¹in wúu¹ 'áai¹ jløø'³mo. Tañíi²mo 'áai¹ pe tsʉ 'wii'¹³ jløø'³mo 'áa¹mo gacwo'¹o cúu¹u tya' 'in tsaru'¹u' néei¹ Judea lawa lɨ́ɨ¹i tsá² sá² cuu².  
\v 3 Joon jmáa³aa júu³ jai'² 'e 'in tsá² do gacwo'¹o 'yaai¹‑tsi ce xiia'²¹ jiin'¹³ lí². Pe 'ɨ¹‑tsii 'e 'in tsá² gacwo'¹o 'láai²gɨ ce xiia'²¹ jiin'¹³ lí².  
\v 4 'Áai¹ gamɨɨ¹ɨ 'in tsá² do tyanii²¹i'i wa'a cwooi²¹² jna'a 'ido 'e uncoon'¹³on 'in tsaru'¹u' catyaai² néei¹ Judea.  
\v 5 Joon gajmaa¹a 'láai²gɨ la ga'ɨ¹‑tsii'i. Tsʉ nifu gacwóo¹i 'yaai tya' Ña'ñʉ'¹ʉ' joon ngɨɨi¹ joon gacwóo¹i 'yaai tyijna'a jiin'¹³ la 'iin²¹²in Dios.  
\v 6 Joon tsʉ 'wii'¹³ ga'láa² Tito 'wii²¹² la mo jéei¹ 'e uncaan²¹in 'e cuu² do 'e 'iin²¹²naa' cwóo²oo' gamɨ́³ɨɨ tyaníi¹i wa' 'e untiin'¹³mo 'e to² do.  
\v 7 'Naa' nigajmaa²aa' jilaa'²¹ 'e tyʉ́²‑ʉ. Ja'²mo lɨ́ɨ²naa' júu³ tya' Dios, joon ñí² 'naa' 'é²ee' 'e júu³ do. Joon røø²¹ 'øøi'²¹‑'oo'. 'Áa¹mo 'iin²¹²naa' jna'a. Joon nano fee'¹gɨ jmaa²aa' coon'¹³ 'e licaain²¹ 'e cuu² do. 
\p  
\v 8 Jo fuu²¹²uu 'naa' 'elo wa'a tyʉ'²ʉʉ 'naa' to² jiin'¹³ 'iin²¹²na 'e liñii'²¹ 'naa' xiiala jmoo¹o 'in tsá² catyaai² 'in 'yaai¹‑tsi. Jiin'¹³ 'iin²¹²na litsáai¹‑tsii wa'a la ja'²mo 'iin²¹²moo' Dios coon'¹³ tsá².  
\v 9 Tsʉ ñii²¹ 'naa' xiiala gajmaa¹a Ña'ñʉ'¹ʉ' Jesucristo feei'¹‑tsi 'wii'¹³ 'naa'. Fu ñʉ'fú² ga'aa¹a jilaa'²¹, pe tsʉ 'wii'¹³ gali'iin²¹²in 'ido 'naa' gatʉʉ¹ʉ jilaa'²¹ 'e sá² tya'a joon galíin²in lawa tsá² tañíi²mo 'wii'¹³ 'naa'. Joon tsʉ 'wii'¹³ galɨ́ɨ¹i Cristo lawa'a tsá² tañíi²mo 'naa'gɨɨ' galɨ́ɨ¹naa' lawa'a tsá² 'in 'oo¹o jilaa'²¹. 
\p  
\v 10 No‑o 'e 'ɨ¹‑tsii 'e tyʉ́²gɨ tyii' cwáain¹ tya' 'e cuu² do. Ningóo¹ coon²¹ jiin²¹ 'e 'naa' nifu ga'láa² 'wii²¹² uncaain²¹ 'e cuu² do. Jo gacwó²oo' tyitsaai²¹² pe 'yaai¹‑'oo' gacwó²oo'.  
\v 11 Joon nano cwóo²gɨɨ' 'e 'yaai¹‑'oo' ce gatséi¹ jiin¹³ la ga'láa² 'wii²¹². Cwóo²oo' la jaan²¹naa' jiin'¹³ la tí² 'e 'oo²oo'.  
\v 12 Tsʉ wa'a tsai'² 'iin²¹²in tsá² cwo¹ pe xʉ‑ʉ 'oo¹o 'iin²¹²in Dios 'e cwo¹ tsá² 'e 'oo¹o jon' 'e jo 'oo¹o. 
\p  
\v 13 Jo 'iin²¹²na 'e uncoon'¹³ 'naa' tsá² xeei'²¹ joon 'naa'gɨɨ' tuu²naa' jo 'e sá² tyii'.  
\v 14 Jiin'¹³ 'e 'iin²¹²na 'e lɨ́² coon²¹ røø²¹mo jee²¹² jna'. Tsʉ nano 'oo²oo' 'e iuncoon'¹³ coon'¹³ jmɨɨ²¹² 'aa²¹² tya' 'ido pe ijó¹ coon²¹ jmɨɨ²¹² i'oo¹o 'ido 'e iuncoon'¹³ 'naa' coon'¹³ jmɨɨ²¹² 'aa²¹² tyii'. Coon'¹³ la joon ilí² coon²¹ røø²¹i.  
\v 15 Jiin'¹³ la jin'² ni jí² tya' Dios: “Joon 'in 'oo¹o 'láai²gɨ jo gasái¹ tya'a; joon 'in 'oo¹o xʉ jo ga'naai²¹ tya'a.” 
\s1 Ijaa'²mo Tito tún¹ 
\p  
\v 16 Pe cwo'³‑oo 'maai'² Dios tsʉ 'wii'¹³i Dios do‑o 'ɨ¹‑tsi Tito 'naa' jiin'¹³ la 'ɨ¹‑tsii.  
\v 17 Joon mo gafuu²¹²uu Tito wa'a itsajøøi²¹² 'naa' ga'ii'²¹mo júu³ røø²¹ tsʉ lɨ́ɨ¹gɨ 'aa¹mo 'naa'. Joon nano itsajøøi²¹² 'naa' 'e 'yaai¹‑tsi 'ña'‑o. 
\p  
\v 18 Joon caan²¹mo coon'¹³ Tito siin²¹na'a jaain²¹gɨ tsaru'¹u' 'in jileei'²¹ tsaru'¹u' catyaai²gɨ faa'²¹ tyʉ́² tya'a. Faa'²¹ tsá² tyʉ́² tya'a tsʉ røø²¹ gajmaa¹a to² tya' 'e júu³ tyʉ́² tya' 'e tiin'¹³ tsá².  
\v 19 Joon 'in tsá² jai'² lɨ́ɨ²i Cristo 'in néei¹ lo gatyii'¹³in 'in tsaru'¹u' no 'e tsáa¹a caan²¹mo coon'¹³ jna'a 'e uncoon'¹³ jna'a la 'ɨɨ²¹² uncaan²¹na'a 'e cuu² do. Jmoo²¹o'o la joon tsʉ 'iin²¹²na'a 'e cwo'¹ tsá² 'maai'¹³ Ña'ñʉ'¹ʉ' joon 'e 'iin²¹²na'a uncoon'¹³ jna'a tsá² xeei'²¹.  
\v 20 Joon coon'¹³ la joon lí²‑i tyuu'¹³na'a 'e cwo'¹ tsá² jna'a tsaa² cwáain¹ tya' 'e cuu² 'e uncaain²¹ jna' no.  
\v 21 Tsʉ cwoo'¹³‑tsii'i jmoo²¹o'o jilaa'²¹ 'elo 'e tyʉ́²‑ʉ jon'on jiin'¹³ tyani Ña'ñʉ'¹ʉ' pe tyani jilee'²¹mo tsá² jon. 
\p  
\v 22 Joon, caan²¹mo coon'¹³ 'ido siin²¹ jna'a jaain²¹gɨ tsaru'¹u' 'in ga'e'² jna'a 'e cwo'²‑tsi tsáa¹a joon 'áai¹gɨ nano 'e jo cu'²gɨ‑tsi coon'¹³ 'naa'.  
\v 23 Joon wa'a ungɨɨ¹ɨ tsá² 'naa' cwáain¹ tya' Tito, cwosii'¹³duu' 'e jaain²¹ 'in ngɨ¹ coon'¹³ jna 'ido joon jmaa¹a to² coon'¹³ jna wa'a uncoon'¹³ 'naa'. Joon wana ungɨɨ¹ɨ tsá² 'naa' cwáain¹ tya' 'in tsaru'¹u' catyaai² do cwosii'¹³duu' 'e 'in tsá² jai'² lɨ́ɨ²i Dios néei¹ Macedonia gasiin²¹ 'ii joon jmaa'¹³a tsá² júu³ 'e 'ya'²gɨ tya' Cristo.  
\v 24 Tsʉ 'wii'¹³ joon mi cwolíin²in 'in tsá² lo jee²¹² 'naa' 'é²ee' 'in tsá² lo xiiala 'iin²¹²naa' 'ii joongɨ 'ee 'wii²¹² jløø'³na'a coon'¹³ 'naa'. Joon iliñí² jileei'²¹ 'in catyaai² 'in jai'² lɨ́ɨ²i. 
\c 9  
\s1 Cuu² gauncaain²¹ do 
\p  
\v 1 Joon cwáain¹ tya' 'e cuu² do 'e uncaan²¹na' tya' 'in tsá² tya' Dios néei¹ Judea jo 'ná¹ fuu²¹²uu 'naa'  
\v 2 tsʉ ñíi³oo 'e 'iin²¹²naa' uncóon¹³oon'. Jløø'³moo mo fuu²¹²uu 'in tsá² néei¹ lɨ sii²¹ Macedonia 'e ningóo¹ coon²¹ jiin²¹ 'e gali'iin²¹²naa' 'in néei¹ Acaya 'e jmoo²oo'. Joon tsʉ 'wii'¹³ 'iin²¹²naa' jmaa²aa' 'e 'yaai¹‑'oo' gatya¹‑tsi 'in tsá² néei¹ Macedonia 'e jmoo¹o jon.  
\v 3 Jo 'e sɨ'neei'¹³ isɨ́ɨ³na 'in tsaru'¹u' no 'e jo ngɨ́ɨ¹i lɨcaai²¹ jilaa'²¹ júu³ tyʉ́² 'e gafuu²¹²uu tsá² 'wii²¹² tyi'naa' cwáain¹ tya' cuu² do. Joon coon'¹³ la joon lí²‑i tyaa²aa' tyʉ́² 'e cuu² jiin'¹³ la gafuu²¹²uu 'in tsá² néei¹ Macedonia.  
\v 4 Tsʉ wa'a yíi³aa coon'¹³ 'in tsá² seein²¹ Macedonia joon jo náa¹ tyʉ́² tyii' mi cwée¹na fa'ɨɨ'²¹ ilíin²na'a tsʉ jo 'ee galɨ́² cu'²‑tsii'i coon'¹³ 'naa'. Joon 'naa'gɨɨ' i'oo²oo' fa'ɨɨ'²¹ jon.  
\v 5 Tsʉ 'wii'¹³ joon galitsáa¹mo‑tsii 'e tyʉ́²gɨ wa'a 'e sɨ́ɨ³na 'in tsaru'¹u' do tsajøøi²¹² 'naa' jéei¹gɨ lagɨ jna. Joon coon'¹³ la joon lí²‑i uncoon'¹³ 'naa' 'e licaain²¹ 'e cuu² do jiin'¹³ la júu³ 'ɨɨ²¹ 'naa' la mo jéei¹. Joon 'e cuu² do 'e lɨ́² lawa'a coon²¹ 'e 'yaai¹‑'oo' jon' coon²¹ 'e gatyii²¹i'i tyitsaa²¹mo. 
\p  
\v 6 Untɨɨ'¹³duu'‑'oo' 'e júu³ lo: 'In tsá² 'in jñí² ca pii'³, ca pii'³‑i jon cóon¹on mo garoo²¹o, pe 'in gajñí² 'láai²gɨ, la joon jon 'láai²gɨ incoon¹on.  
\v 7 Joon la jaain²¹ 'ná¹ cwo¹ jiin'¹³ 'e 'yaai¹‑tsi jon' tsʉ 'wii'¹³ 'e 'ɨ¹‑tsi 'e 'ná¹‑a jon'gɨ tyitsaai²¹ 'ee. Tsʉ 'iin²¹²mo Dios 'in cwo'¹o júu³ røø²¹.  
\v 8 Joon Dios lí²‑i cwo'¹o 'naa' coon²¹ tøø²mo jilaa'²¹ 'e jmaa¹i to² tyii' joon jiin'¹³ tya' 'e tɨɨi'²¹ tyii' yaamoo' pe ilisá²gɨ 'e uncóon¹³oon' tsá² xeei'²¹.  
\v 9 Jiin'¹³ la jin'² ni jí² tya' Dios: 
\q1 Cwo'¹ Dios tsá² taníi² 'e 'wo²‑tsio. 
\q1 Joon 'e tyʉ́²‑tsio taa'²¹a coon²¹ tøø²¹mo. 
\m  
\v 10 Cwoo¹o Dios 'e jún² 'e jñii²¹i', cwoo¹‑o jon 'e 'í¹ 'e tyee²e'. La joon jon icwo'¹o 'naa' jilaa'²¹ 'e jmaa¹i to² tyii' 'e lí² uncóon¹³oon' tsá² xeei'²¹ 'e cwaiin²¹ 'e to² tyʉ́² tyii'.  
\v 11 Joon coon'¹³ la joon ilisá² tyii' 'e cwó²oo' 'e 'wo²‑'oo'. Joon mi joon'¹³o'o 'e cuu² do 'e gauncaan²¹naa' tya' 'in tsaru'¹u' néei¹ Judea, 'in tsá² do icwo'¹o 'maai'¹³ Dios.  
\v 12 Tsʉ mi uncoon'¹³oon' 'in tsá² tya' Dios do jon' wa'a uncoon'¹³oon' 'e jmɨɨ²¹² 'aa²¹² tya' 'ido pe 'wii'¹³ 'naa' icwo'¹o 'maai'¹³ Dios 'áai¹.  
\v 13 Joon tsʉ 'wii'¹³ 'e to² tyʉ́² do 'e gajmaa²aa' iun'goo²¹o tsá² Dios. Iun'goo²¹o tsá² Dios tsʉ 'wii'¹³ gauntiin'¹³naa' júu³ tyii' 'e ja'²mo lɨ́ɨ²naa' 'e júu³ tyʉ́² tya' Cristo. Joon iun'goo²¹o Dios 'wii'¹³ 'e cuu² gacwóo¹³oo' 'ido coon'¹³ jileei'²¹ 'in catyaai² do 'e 'wo²‑'oo'.  
\v 14 Joon 'in tsá² do cwáain¹ tya'‑o ifaa'²¹o júu³ tyʉ́² 'wii²¹² tyi'naa' tsʉ 'iin²¹²mo 'naa'. Tsʉ Dios nigauncoon'¹³on 'ido coon'¹³ 'e tyú²moo'.  
\v 15 ¡Cwoo²¹o' 'maai'¹³ Dios 'wii²¹² jilaa'²¹ 'elo! ¡Jo 'øøi'²¹‑tsi' jilaa'²¹ 'e gajmaa¹a Dios Tyi'! 
\c 10  
\s1 Tyʉ'² to² Poo² lɨ́ɨ¹i apóstol 
\p  
\v 1 Tsʉ né³e' 'e 'wo²‑tsi joongɨ 'e feei'¹‑tsi Cristo, joon jna, Poo², 'iin²¹²na foo'¹³na 'naa' lagɨ 'e feei'¹ Cristo 'naa'. Joon seen²¹mo tsá² 'in jin'²in 'e tsá² 'wó¹mo jna mo taan¹na jee²¹² 'naa' pe soo²¹‑tsii mo taan¹na lɨ wíin².  
\v 2 Joon seen²¹mo 'inlɨ́ɨi¹³ jee²¹² 'naa' 'in jin'²in 'e jmoo²¹o'o jilaa'²¹ la jmoo¹o tsá² taain²¹² fu juncwii²¹, 'in jmoo¹o jiin'¹³ la 'iin²¹²in 'yaai. Pe mɨ́³ɨɨ tyani²ii' 'e jmáa²gɨɨ' 'e tyʉ́² 'e mi yíi³aa jee²¹² 'naa' jo 'ná¹ jmáa³aa soo²¹‑tsii coon'¹³ 'naa' la ijmáa³aa coon'¹³ 'in catyaai² do.  
\v 3 'E la ja'²mo lɨ́ɨ¹na'a tsá² taain²¹ fu juncwii²¹ pe jo tɨ́ɨi¹ jna'a la tɨ́¹i tsá² taain²¹² fu juncwii²¹.  
\v 4 Tsʉ 'wii'²¹ 'e 'oo²¹o'o 'ii'²¹ gøøi'¹³ tya' Dios 'e joon lii'¹oo'o jileei'²¹ 'in 'eei'¹ jna'a. Joon 'e 'ii'²¹ joon jo lɨ la lɨ 'ii'²¹ 'e sá² fu juncwii²¹ lo.  
\v 5 Joon coon'¹³ la joon ilii'¹i'i jileei'²¹ 'in coon'²¹ tsá² tóo² coon'¹³ júu³ jloo'³. Ilii'¹i'i jon jileei'²¹ 'in jo cwo'¹ júu³ ruu'²¹o coon'¹³ jna'a cwáain¹ tya' xiiala lí² cwii¹in tsá² Dios. Joon lii'¹i'i jilaa'²¹ 'e 'ɨ¹‑tsi tsá² 'e jmoo¹o jo nʉʉ'¹³ʉ to² tyʉ'² Cristo.  
\v 6 Joon mi ngɨɨ¹i 'e jmoo²oo' nʉ́ʉ¹³ʉʉn' jiin'¹³ la tí² to² tyʉ'² Cristo 'e tyʉ́² tyii'i náa¹a 'e 'e'²e wúu¹ jileei'²¹ 'in jo jmaa¹a nʉʉ'¹³. 
\p  
\v 7 'Ná¹ cón²oon' cwáain¹ coon'²¹ tún²‑un. Wa'a 'ɨ¹‑tsi tsá² 'e lɨ́ɨ¹i 'e tsá² tya' Cristo 'ii, 'ná¹ tɨ'²‑tsi jon 'e lɨ́ɨ¹na'a tsá² tya' Cristo jon.  
\v 8 Joon xʉfiin'¹³ foo'¹³na 'naa' 'láai² lagɨ 'e tɨ́ɨ²na cwáain¹ tya' 'e to² gacwo'¹ Cristo jna'a jo 'e fa'ɨɨ'²¹ lɨ́ɨ²na, tsʉ Ña'ñʉ'¹ʉ' gacwo'¹ jna'a 'e to² do wa'a lí² uncoon'¹³ jna'a 'naa' 'e cwii¹mogɨɨ' Dios jon' wa'a 'e xee²na'a 'e jai'² lɨ́ɨ²naa'.  
\v 9 Joon 'e jí² gasɨ́ɨ³na tɨ́ɨ²i 'naa' jo 'yʉto² wa'a ton'²oon' fo'²‑'oo'.  
\v 10 Pe 'inlɨ́ɨi¹³ jin'²in 'e jmóo³oo 'gøøi'¹³ coon'¹³ jí² tyiia pe mo taan²¹²na jee²¹² 'naa' lawa'a 'yʉ'goo'²¹oo joon 'wo² 'áai¹ júu³ tyiia.  
\v 11 Pe cwoliñí² 'in tsá² do, 'in tsá² 'in jin'² la joon, 'e ijmoo²¹o'o 'gøøi'¹³ coon'¹³ jilaa'²¹ ijmoo²¹o'o la 'gøøi'¹³ júu³ tyii'i 'e sii'²¹na'a lɨ wíin² mi gatyalii²¹i'i jee²¹² 'naa'. 
\p  
\v 12 Xuun² 'ɨ¹‑'oo' 'e 'ii²¹²na'a jmoo²¹o'o la jmoo¹o 'in tsá² 'in faa'²¹a 'e tyʉ́² tya' yaai, tsʉ jiin'¹³ tsá² caa²¹mo jmoo¹o coon²¹ røøi²¹ coon'¹³ tsá² xeei'²¹.  
\v 13 Joon ifaa'¹³a'a 'e tyʉ́² tyii'i yiia'a jiin'¹³ tya' 'e to² 'e 'oo²¹o'o, joon Dios gacwo'¹ jna'a wa'a cwóo¹³o'o 'e júu³ tyʉ́² ca jee²¹² 'naa' 'in néei¹ Corinto.  
\v 14 Joon tsʉ 'wii'¹³ jna'oo'o nifu gacwó¹ júu³ tyʉ́² tya' Cristo jee²¹² 'naa' jo faa'¹³a'a 'láai²gɨ lagɨ 'e tɨ́ɨ²na'a.  
\v 15 Jon'gɨ faa¹³a'a 'láai²gɨ tyii'i yiia'a tya' to² nigajmaa¹a tsá² xeei'²¹ lawa'a to² tyii'i yiia'a. Pe 'ɨ¹‑tsii'i mo nigafee'¹ 'e jai'¹ lɨ́ɨ²na'a la joon ilifee'¹ to² tyii'i jee²¹² 'naa'.  
\v 16 Joon mi ngɨɨ¹i joon 'ɨ¹‑tsii'i 'e cwoo²¹o'o 'e júu³ tyʉ́² tya' 'e tiin'¹³ tsá² lɨ 'ngoo'¹³ lɨ née¹²naa'. Tsʉ jo 'ii²¹² jna'a faa'¹³a'a tyʉ́² tyii'i cwáain¹ tya' to² nigajmaa¹a tsá² xeei'²¹. 
\p  
\v 17 Joon wa'a 'iin²¹² tsá² faa'²¹a júu³ tyʉ́² tya'a yaai, cwofaa'²¹a jilaa'²¹ 'e tyʉ́² 'e gajmaa¹a Ña'ñʉ'¹ʉ' tya'o.  
\v 18 Tsʉ jon' 'in tsá² do 'in faa'²¹a tyʉ́² tya'a yaai 'in 'ii'²¹ Dios pe 'ii'²¹mo Dios 'in tsá² 'in faa'²¹a Ña'ñʉ'¹ʉ' tyʉ́² tya'a. 
\c 11  
\s1 Un'øøi'¹ Poo² 'ña'a 
\p  
\v 1 ¡Jmaa²aa' feei'¹‑'oo' 'wii²¹² tyiia jiin'¹³ la nigajmaa²aa' la 'ɨɨ²¹² jmáa³aa caa²¹na!  
\v 2 Tsʉ tsá tyii'²¹ jna coon'¹³ 'naa' 'wii'¹³ Dios. Tsʉ lawa cwo'¹ tsá² júu³ tya'a 'e 'ii'²¹i 'in gamúui¹ jamɨ́ɨ¹ɨ la joon jon 'iin²¹²na jmáa³aa coon'¹³ 'naa' tya' Cristo. 'Iin²¹²na jée¹na 'naa' tyaníi¹i lɨ́ɨ¹naa' lawa jaain²¹ sɨmɨ́² 'in tyúi¹, 'in jo mo ga'láa¹a. Lawa'a jaain²¹ sɨmɨ́² 'in nacui'² cwoo²¹o coon'¹³ jaan²¹mo tsañʉʉ'¹.  
\v 3 Pe 'goo'²¹‑oo 'e nigacon'² tsá² 'naa' tóo² la nigacon'² 'in mɨɨ'²¹ do tóo² Eva coon'¹³ 'e jmɨɨ¹‑tsi tya'a. Canii²¹mo gali'iin²¹²naa' Cristo mo 'wiin²¹ pe 'goo'²¹‑oo 'e la mo tʉ́ʉ¹³ʉʉ' 'e jai'² lɨ́ɨ²naa' do.  
\v 4 Tsʉ 'ii'¹³naa' júu³ røø²¹ 'in tsá² jalíin²in cwo'¹ 'naa' júu³ tya' jaain²¹ Jesús 'in sɨɨi²¹gɨ lagɨ 'in Jesús 'in gacwoo'¹³o'o 'naa'. Joon jløø'³moo' 'ii'²¹naa' 'e espíritu 'e jon' 'in Espíritu Tyʉ́ gacwo'¹ Dios 'naa'. Joon 'e júu³ tya' 'in tsá² do sɨsɨɨ²¹i lagɨ 'e júu³ tya' 'e tiin'¹³ tsá² 'e ganʉʉ²¹ʉʉ'.  
\v 5 Pe lɨ́ɨ²na 'e jo xáai¹gɨɨ jiin'¹³xʉ lagɨ 'in tsá² do 'in 'ɨ¹‑tsi 'e lɨɨ¹i apóstoles 'in tyiin²gɨ 'áai¹.  
\v 6 Joon xʉfiin'¹³ jo tɨ́ɨ²na foo'²¹oo cwú¹ la tɨ́ɨ²i 'ido, 'øø'²¹mo‑tsigɨɨ lagɨ 'ido. Joon coon'¹³ jilaa'²¹ 'e gajmoo²¹o'o ga'e'² jna'a 'naa' la joon. 
\p  
\v 7-8 Joon mo taan²¹²na jee²¹² 'naa' 'in tsá² jai'² lɨ́ɨ²i Cristo 'in néei¹ lɨ xiia' gacwo'¹o jna cuu² la 'ɨɨ²¹² cwo'³oo 'naa' 'e júu³ tyʉ². Coon²¹ jo ngáa¹mo gajmáa³aa 'e gó²‑o tyi'naa' mo gacwo'³oo 'naa' 'e júu³ tyʉ́² jo 'e 'laa'²¹ gacón³oon. Gajmée¹na 'ñii'a 'in wéi¹ tsʉ gali'iin²¹²na jmáa³aa 'e tyʉ́² tyii'.  
\v 9 Joon mo ga'óo³oo jmɨɨ²¹² 'aa²¹² jiin'¹³ jaain²¹ jee²¹² 'naa' ga'íin²in cúu¹u 'wii²¹² tyiia, tsʉ 'in tsaru'¹u' 'in néei¹ Macedonia gacwoo¹o 'e jmaai¹ to² tyiia. Joon coon'¹³ la joon jo gauntyíi²na jiin'¹³ jaain²¹ 'naa'. Joon la joon‑on ijmáa³gɨɨ.  
\v 10 Ñí³oo 'e júu³ jai'² tya' Cristo la joon jon ñi³oo 'e tɨ́²‑tsii cwó³oo 'e júu³ tyʉ́² tya' Cristo jo 'ee 'laa'¹³ cón³oon. Joon jiin'¹³ jaan²¹naa' 'in néei¹ Acaya ityuu'¹³mo jna 'e jmóo³oo la joon.  
\v 11 Joon mo jmóo³oo la joon, ¿tɨ lɨ́ɨ¹naa' 'e jo 'iin²¹²gɨɨ 'naa'? Jo lɨ́ɨ¹naa' la joon tsʉ ñí² Dios xiiala 'e 'iin²¹²na 'naa'. 
\p  
\v 12 Joon ijmáa³gɨɨ jiin'¹³ la nigajmáa³aa. Joon coon'¹³ la joon jo lí² faa'²¹a tyʉ́² tya'a yaai 'in tsá² do 'in 'iin²¹²in jmáa¹a coon²¹ røøi²¹ coon'¹³ jna'a coon'¹³ 'e to² jmoo²¹o'o.  
\v 13 Tsʉ 'in tsá² do jo tsei'² lɨ́ɨ¹i apóstoles, coon'²¹ 'ido tóo². Lɨ' jmoo¹‑o 'e lɨ́ɨ¹i apóstoles tya' Cristo.  
\v 14 Joon jo 'ná¹ jmoo²¹o' tsa'goo'²¹‑tsi' mi líin²in la joon, tsʉ 'wii' 'ña'a Satanás jmeei'¹³ 'ña'a 'e lɨ́ɨ¹i lawa jaain²¹ ángel 'in tyúi¹.  
\v 15 Joon wana gajmee¹i fii²¹²i 'ña'a 'in tsá² do 'e lɨ́ɨ¹i 'in tyúi¹, la joon ijmáa¹a tsá² tya'a. Pe mo lɨ tséi¹ i'ii'²¹i 'in tsá² do jiin'¹³ la tɨ́ɨ²i tya' 'e gajmaa¹a. 
\s1 Wúu¹ 'e ganí²¹ Poo² 
\p  
\v 16 Fuu²¹²uu 'naa' tún¹: jo lɨ́ɨ²naa' 'e tsá² caa²¹na. Pe wana lɨ́ɨ²naa' la joon, nuu²¹duu' 'e júu³ lo 'e faa'²¹a jaain²¹ tsá² caai²¹ 'e tyʉ́² tya'a 'ña'a.  
\v 17 Jo gatyʉ'² Ña'ñʉ'¹ʉ' jna to² 'e fuu²¹²uu 'naa' 'e júu³ lo, jiin'¹³ 'iin²¹²na fuu²¹²uu 'naa' 'e tyʉ́² tyiia 'ñii'a lawa'a jaain²¹ tsá² caa²¹na.  
\v 18 La faa'²¹a júu³ tyʉ́² tya'a yaai la joon ifuu²¹²uu.  
\v 19 Tsʉ 'naa' jmaa²aa' 'e 'wo²‑'oo' coon'¹³ jileei'²¹ tsá² caai²¹ tsʉ jmɨɨ¹‑'oo' 'áai¹.  
\v 20 Joon 'naa' jmaa²aa' 'e 'wo²‑'oo' coon'¹³ jileei'²¹ 'in 'iin²¹²in líin²in fii²¹² 'naa', sɨ 'in 'iin²¹²in cón² jilaa'²¹ 'e 'oo²oo' 'ee, sɨ 'in 'iin²¹²in tyʉ'² to² 'naa' 'ee, sɨ jo tsáai¹‑tsi 'naa' 'ee, sɨ jnáa¹a ní²ii' 'ee. 'Áai¹ 'wo²‑'oo' coon'¹³ jileei'²¹ la 'ii.  
\v 21 Pe jna'oo'o, jo gatya¹‑tsii'i jmoo²¹o'o jilaa'²¹ 'elo joon tsʉ 'wii'¹³ joon jo galɨtsáai¹‑'oo' jna'a. 
\p Joon wana lí² faa'²¹a tsá² xeei'²¹ 'e tyʉ́² tya'a 'ña'a la joon jon lii'¹ii jna, xʉfiin'¹³ lawa'a tsá² caa²¹na ifaa'²¹a.  
\v 22 ¿Tɨ faa'²¹a 'in tsá² do jmíi¹ tya' tsá² Israel? Fo'²oo jna jon. ¿Tɨ lɨ́ɨ¹i 'in tsá² do tsá² Israel? Jna jon lɨ́ɨ¹na la joon. ¿Tɨ lɨ́ɨ¹i 'in tsá² do jún² tya' 'lɨɨ²¹² Abrraham? Lɨ́ɨ¹na la joon jon.  
\v 23 ¿Tɨ jmoo¹o 'ido to² tyʉ'² Cristo? Jna jmóo³gɨɨ lagɨ 'ido xʉfiin'¹³ lagɨ tsá² caa²¹mo fo'²oo. Nijmáa³aa to² 'ii²¹gɨ lagɨ 'ido, joon gapoo¹i tsá² jna 'láai²gɨ lagɨ 'ido, joon gatain'² tsá² jna 'nʉñí³ 'láai²gɨ lagɨ 'ido, joon 'láai² naa'¹³ coon²¹xʉ‑ʉ jo gajún¹na.  
\v 24 Joon 'ñá² naa'¹³ gapoo¹i 'in tsá² Israel jna coon'¹³ 'nii²¹² azote. Dyadyá² tsi 'ñʉ́¹ tsi gapoo¹i jna la cafu.  
\v 25 Joon 'nɨ¹ naa'¹³ gapoo¹i tsá² jna coon'¹³ sɨɨ². Joon cafu gatyuui'¹³ tsá² jna coon'¹³ cuun²¹². Joon 'nɨ¹ fu gatá² 'e barco do 'e 'yúu³na. Joon cafu 'yúu³na jmɨ'ñi'³ coon²¹ nʉ́ʉ¹ coon²¹ jmɨɨ²¹².  
\v 26 Coon²¹ tøø²mo 'yúu³na fu¹ lɨ licón² jmɨɨ²¹ jna, joon lɨ seen²¹in 'uun²¹. Joon 'iin²¹²in tsá² jmee'¹i jna la tsá² góo³oo tiin'¹³ la 'in jo lɨ́ɨ¹i la joon. Joon doñixiia' ngɨ́ɨ³ɨɨ ngɨ́ɨ¹na tói¹ 'mó¹ sɨ 'yúu³na ciudad 'ee, sɨ jee²¹² tyiia²¹ 'ee, sɨ ni jmɨ'ñi'³ 'ee, sɨ jee²¹² tsá² 'e lɨ'² jin'²o 'e jai'² lɨ́ɨ²i 'ee.  
\v 27 Ga'woo'²¹oo 'áai¹ joon gamóo³oo wúu¹, 'láai²gɨ fu jo cwúu³na lɨ ngɨ́ɨ³ɨɨ joon tsaun'áa³na joon unjmɨ́ɨ³na tsʉ jo 'e sá² døø'¹³øø. Joon galɨcwocɨ́ɨ³na tsʉ jo 'ee sɨn'³ɨɨn sá². 
\p  
\v 28 Joon fee'¹gɨ lagɨ jilaa'²¹ 'elo ga'ɨ¹‑tsii 'áai¹ tya' jileei'²¹ 'in tsá² jai'² lɨ́ɨ²i Cristo catyaai².  
\v 29 La lɨ́ɨ¹i 'ii lɨ́ɨ¹i jna jon, wa'a 'woo¹i, la joon jon 'woo¹i jna jon. Joon wa'a xuu'²¹i tsaa², jna jon 'ɨ¹‑tsii 'áai¹ 'wii²¹² tya'a.  
\v 30 Tsʉ 'wii'¹³ joon wa fuu²¹²uu 'naa' 'e tyʉ́²ʉ tyiia 'ñii'a ifuu²¹²uu 'naa' jilaa'²¹ 'e 'e'²e 'naa' 'e wa'a jo pí³‑tsii.  
\v 31 Joon Dios, Jmii²¹ Ña'ñʉ'¹ʉ' Jesucristo, ñii¹o 'e fuu²¹²uu la jai'². Joon jiin'¹³ 'ii tɨ́ɨ²i wa'a un'goo¹o tsá² 'ii coon²¹ tøø²mo.  
\v 32 Joon mo taan²¹²na fuu²¹ Damasco 'in tsaa'to² do to² tyʉ' rǿøi¹³ Aretas gali'iin²¹²in taain'¹³ jna 'ñʉñí³. Joon gasɨɨ'²¹ɨ 'láa² wa jǿø²ø la caain²¹ li ngɨ́ɨ¹i tsá² 'e 'oo²¹ 'e ngó¹ cu'² lɨ'² 'e fuu²¹ do.  
\v 33 Pe gaxaa¹mo tsá² jna, yúu³na mɨ'tó², coon²¹ 'ootoo²¹ tsi 'e 'oo² do. Joon galáa²moo la joon. 
\c 12  
\s1 La wa'a 'e gacɨɨ¹o Poo² 
\p  
\v 1 Jo 'ee to² 'íi³gɨ tyiia wa'a fuu²¹²gɨɨ 'e tyʉ́² tyiia 'ñii'a pe 'ná¹‑a fuu²¹²gɨɨ jilaa'²¹ 'e gacɨ́ɨ³ɨɨ coon'¹³ jilaa'²¹ 'e ga'e'² Ña'ñʉ'¹ʉ' jna.  
\v 2 Cwii¹moo jaain²¹ tsá² 'in jai'² lɨ́ɨ²i Cristo. Joon ningóo¹ dyatyʉ́n² jiin²¹ 'e gasaa¹i 'ido fu ñʉ'fú². Gangóo¹ fu coon²¹ lɨ sii²¹ ñʉ'fú² tɨ'² 'nɨ¹. Jo ñíi³ii wa'a gangóo¹ moo¹ taa²i sɨ jo ngóo¹ 'ee. Jiin'¹³ Dios ñii¹i.  
\v 3 Pe ñíi³oo 'e gasaa¹i 'in tsá² do fu ñʉ'fú² jiin'¹³ jo ñíi³ii wa'a 'yuu¹i moo¹ taa²i sɨ jo 'yuu¹i 'ee. Jiin'¹³ Dios ñii¹i.  
\v 4 Joon fu ñʉ'fú² do ganúu²u júu³ 'uuin²¹ 'áai¹ 'e jiin'¹³ jaain²¹ tsá² tɨ́ɨ²i faa'²¹a.  
\v 5 Lí²‑i jmáa³aa jløø'na 'nii'a 'wii'¹³ jaain²¹ tsá² la 'ii, pe jo lí² jmáa³aa jløø'³na 'wii'¹³ 'ñii'a. Unjløø'³na 'ñii'a jiin'¹³ wa'a jo pí‑tsii.  
\v 6 Joon wana fuu²¹²uu 'e tyʉ́² tyiia 'ñii'a jo 'yʉʉ² caa²¹na tsʉ fuu²¹²uu jiin'¹³ la jai'² pe jo fuu²¹²uu la joon. Tsʉ jo 'iin²¹²na wa'a 'ɨ¹‑tsi tsá² 'e fee'¹gɨ tyiia lagɨ jǿø²ø 'e jmóo³oo sɨ 'e ganúu²uu foo'²¹oo 'ee. 
\p  
\v 7 Joon xʉfiin'¹³ fee'¹ 'áai¹ jilaa'²¹ 'e ga'e'² Dios jna, jo unjløø'³na 'ñii'a tsʉ Dios gacwo'¹o jna 'e galɨ́ɨ¹na coon²¹ jmoowúu¹ 'e lɨ́² lawa coon²¹ tóon¹ yʉ² ngú³uu. Lawa'a 'e'²e Satanás jna wúu¹.  
\v 8 Joon gamɨ́ɨ³ɨɨ 'nɨ¹ naa'¹³ tyani Ña'ñʉ'¹ʉ' wa'a i'láa²na 'e jmoowúu¹ tyán³aan do.  
\v 9 Pe Ña'ñʉ'¹ʉ' gajin'²o sɨɨ'²¹ɨ jna: “Líin²mo tyi'i 'e 'iin²¹²na 'nʉ. Joon mo 'woo²i tsá², joon lí² li'²i tsá² 'e 'ii'²¹ tyiia uncoon'¹³ 'ido.” Tsʉ 'wii'¹³ joon unjløø'³na 'e jo pí³ 'oo²oo tsʉ coon'¹³ la joon lí² li'²i tsá² 'e coon'¹³ 'ii'²¹ tya' Cristo jmóo³oo jilaa'²¹.  
\v 10 Unjløø'³na 'e jo pí³ 'oo²oo, unjløø'³na jon mo ungøø²i tsá² jna, coon'¹³ jilaa'²¹ jmɨɨ²¹² 'aa²¹², joongɨ mo 'ǿøi¹ tsá² jna coon'¹³ jilaa'²¹ fa'í³ ga'oo²oo 'wii²¹² Cristo. Tsʉ mo jo pí³ 'oo²oo 'ñii'a lí² cwo'² Cristo jna pí³. 
\s1 'Ɨ́¹‑tsi Poo² 'in tsá² jai'² lɨ́ɨ²i Cristo néei¹ Corinto 
\p  
\v 11 Tyitsaa²¹²mo gafuu²¹²uu 'e tyʉ́² tyiia 'ñii'a tsʉ jo mo faa'¹³naa' la joon. Joon 'naa'oo' 'ná¹ foo'¹³naa' 'e tyʉ́² tyiia, tsʉ jiin'¹³xʉ 'e feei'¹gɨ lagɨ jna 'in tsá² do 'in jin'²in 'e lɨ́ɨ¹i apóstoles 'in tyiin²gɨ lagɨ jna, 'in tsá² do 'in lɨ́ɨ¹naa' tsá² tya'a. Joon jo 'ee to² 'íin³ jna.  
\v 12 Joon la 'ɨɨ²¹² taan²na jee²¹² 'naa' gajmáa³aa la jmoo¹o apóstoles 'e litsaa²mo‑'oo' 'e la ja'²mo lɨ́ɨ¹na apóstol tya' Cristo. Gajmáa³aa milagros, joon gajmáa³aa jon li² 'e ganga'goo²¹‑'oo' xʉfiin'¹³ gafaa'²¹ tsá² 'laa'²¹ tyiia.  
\v 13 Joon cwáain¹ tyii' jo gajmee¹na 'naa' xaai²¹gɨ lagɨ 'in tsá² jai'² lɨ́ɨ²i Cristo 'in néei¹ lɨ xiia', jiin'¹³ jo mo gacóon³oon 'laa'¹³ tya' jiin'¹³ jaan²¹naa' 'wii'¹³ 'e júu³ tyʉ́² do. ¡Feei'¹ jmáa²‑'oo' 'wii²¹² tyiia! 
\p  
\v 14 Tɨ lɨ́² tɨ 'nɨ¹ naa'¹³ 'e yajǿø³na 'naa' joon jo 'iin²¹²na untyíi²na 'naa'. Tsʉ jo 'iin²¹²na 'e 'oo²xʉʉ', jiin'¹³ 'e 'iin²¹²na wa'a 'ii'¹³naa' jna 'e 'yaai¹‑'oo'. Tsʉ sáa³ jmii²¹ tsá² 'ná¹ uncaain²¹ cuu² tya' jóon¹on jon'on jóon¹on tya' sáa³ jmii²¹.  
\v 15 Joon 'e 'yaai¹‑tsii 'in'íin³na jilaa'²¹ 'e 'oo²oo tya' 'e tyʉ́² tyii' joon ca icwo'³oo 'ñii'a tya' 'e tyʉ́² tya' almas tyii' xʉfiin'¹³ lɨ́ɨ²na 'e 'láai²gɨ 'e 'iin²¹²na 'naa' 'e xʉgʉ 'iin²¹²naa' jna. 
\p  
\v 16 Joon xʉfiin'¹³ 'inlɨ́ɨi¹³ jee²¹² 'naa' ñii¹o 'e jo gacóon³oon 'laa'¹³ tyi'naa', 'in tsá² do jin'²in 'e tɨɨ²¹na 'áai¹ joon gacon'³oon 'naa' tóo².  
\v 17 Fee'¹³naa' jna: ¿Tɨ gacon'³oon 'naa' tóo² 'wii'¹³i 'in tsá² do 'in gasíin³na jee²¹² 'naa'?  
\v 18 Gamɨ́³ɨɨ tyani Tito wa'a tsajøø²¹²i 'naa' joon gasíi³na 'in tsaru'¹u' catyaai²¹ do. ¿Tɨ gacon'² Tito do 'naa' tóo²? 'E la ja'²mo, 'in tsá² do 'ɨ¹‑tsi la 'ɨ¹‑tsii cwáain¹ tyi'naa' joon jmoo¹o la jmóo³oo tyii'.  
\v 19 ¿Tɨ lɨ́ɨ²naa' 'e un'øø'¹na'a yiia'a tyaní²ii'? Jo jmoo²¹o'o la joon tsʉ tyani Dios fee'¹³na'a 'naa' joon coon'¹³ 'e sii²¹ Cristo. Joon jilaa'²¹ 'e jmoo²¹o'o, tsaru'¹u' 'in 'iin²¹²na, jmoo²¹o'o wa'a lí² licwii¹mogɨɨ' Dios.  
\v 20 Tsʉ 'goo'²¹oo 'e mi yajøø²¹²na 'naa' jo ngɨ¹ 'naa' jiin'¹³ la 'yaai¹‑tsii jon'gɨ jmóo³oo jiin'¹³ la 'yaai¹‑'oo' 'naa'. 'Goo'²¹oo 'e xee²¹naa' ruu'²¹naa', joongɨ 'óo²oo' tsiiwúu¹. Seen²¹mo jee²¹² 'naa' 'in 'nii'²¹‑tsi, joongɨ 'in 'ɨ¹‑tsi yaai, joongɨ 'in jmoo¹o 'atsáa¹‑a, 'in faa'²¹a 'e gó² tya' ruu'²¹i, 'in unjløø'³i yaai, joon 'in to'² mɨɨ'¹³.  
\v 21 Joon 'goo'²¹oo 'e 'áa³aa fa'ɨɨ'²¹ tyani Dios 'wii'¹³ 'inlɨ́ɨi¹³ 'naa' mi yajøø²¹²na 'naa' joon 'wii'¹³ 'inlɨ́ɨi¹³ 'naa' cɨ'³oo 'áai¹ 'wii'¹³ tsaa² ga'naa¹a 'naa' la mo jéei¹. Joon jo gatʉ́ʉ² 'naa' jilaa'²¹ 'e galɨ'lɨɨ'³naa', joon jo gatʉ́ʉ² 'naa' feei'²¹ tsamɨ́² tsá² xeei'²¹ coon'¹³ jilaa'²¹ 'e gó²gɨ 'e gajmaa²aa'. 
\c 13  
\s1 Júu³ lɨ gatséi¹ 
\p  
\v 1 Tɨ lɨ tɨ 'nɨ¹ naa'¹³ 'e yajøø²¹²na 'naa'. Joon lí²‑i 'nɨɨ¹i tsaruu'²¹i jiin'¹³ coon'¹³ 'e júu³ røø²¹ coon'¹³ tya' gái¹ gaai²¹ testigo.  
\v 2 Joon mo gataan²¹²na jee²¹² 'naa' lɨ tɨ tún² gafuu²¹²uu 'naa' joon fuu²¹²uu 'naa' lɨ wíin² jileei'²¹ 'naa' coon'¹³ 'in tsá² do 'in ga'noo¹o tsaa² 'e jo jmáa³gɨɨ feei'¹‑tsii tya' 'in 'noo¹o tsaa² mi yíi³aa tún¹.  
\v 3 Cwoliñii²ii' 'e faa'²¹a Cristo 'wii²¹² jna, joon jo galɨ́ɨ¹i Cristo 'e 'wói¹ jee²¹² 'naa' pe ga'e'² 'naa' 'e 'ii'²¹ tya'a.  
\v 4 'E la ja'²mo, gajúun²mo Cristo tsaa' crúu¹ lawa jaain²¹ tsá² 'wói¹ pe jiin'¹o coon'¹³ 'ii'²¹ tya' Dios. La joon jon jna'a, lɨ́ɨ¹na'a tsá² 'wó¹mo la 'ii, pe sɨcaan²¹na'a coon'¹³on jiin'¹i'in jon coon'¹³ 'ii'²¹ tya' Dios. 'E coon'¹³ la joon lí² uncoon'¹³na'a 'naa' cwii¹naa' Dios. 
\p  
\v 5 Cón²oon' cwáain¹ wa'a ngɨɨ²ɨɨ' jiin'¹³ la jai'² lɨ́ɨ²naa'. Cón²oon' cwáain¹ yaanaa'. Cwoliñii¹ii' 'e ngɨ¹ Jesucristo jee²¹² 'naa' wa' 'e la ja'²mo jai'² lɨ́ɨ²naa' 'ii.  
\v 6 Joon lɨ́ɨ²na 'e liñii² 'naa' 'e ngɨ¹ Jesucristo coon'¹³ jna'a.  
\v 7 Joon mɨɨ²¹ɨ'ɨ tyani Dios 'e jo jmaa²aa' jiin¹³ coon²¹ 'e gó². Jo mɨɨ²¹ɨ'ɨ la joon wa'a 'ɨ¹‑tsi tsá² tyʉ́² tyii'i. Jiin'¹³ 'e 'ii²¹² jna'a 'e jmaa²aa' jilaa'²¹ 'e tyʉ́². Jo 'ee lɨ́¹ wa'a 'ɨ¹‑tsi tsá² 'e jo tseein²¹ to² tyii'i.  
\v 8 Tsʉ 'wii'¹³ joon, wa'a jmoo²oo' 'e jai'² jo 'e sá² 'e fee'¹³na'a 'naa' jiin'¹³ li uncoon'¹³na'a 'naa' 'e jai'²gɨ lɨ́ɨ²naa'.  
\v 9 Joon jløø'³moo'o mo lɨ́ɨ¹na'a tsá² 'wói¹ pe 'naa'gɨɨ' lɨ́ɨ¹naa' tsá² pí³‑tsi joon mɨɨ²¹ɨ'ɨ tyani Dios 'wii'¹³ 'naa' 'e ijmee'¹³i Dios 'naa' tsá² 'in galityú¹mo 'naa'.  
\v 10 'Yʉto² joon sɨ́ɨ³na 'e jí² lo tɨ́ɨ²i 'naa' mo jo taan²¹²na jee²¹² 'naa' 'e jo 'ná¹‑a jmáa³aa 'gøøi'¹³gɨɨ coon'¹³ 'e to² 'óo³oo mi yíi³aa, tsʉ 'in Ña'ñʉ'¹ʉ' gacwo'¹o jna 'e to² do wa'a lí² uncoon'¹³ jna 'naa' 'e licwii¹naa' 'ii jon' wa'a 'e xée¹na 'e jai'² lɨ́ɨ²naa'. 
\p  
\v 11 Tsee²mo júu³ tyiia, tsaru'¹u', joon mɨ́³ɨɨ tyaní²ii' wa'a 'noo²oo' jiin¹³ 'e tyʉ́²‑ʉ, joon nuu²uu' júu³ tyiia, canii²mo 'ɨ¹‑'oo', joon cwoseen²¹moo' 'e tyʉ́². Joon 'in Dios 'in 'iin²¹²in jna' joon jmoo¹o 'e tyʉ́² sɨ'ɨ́ɨ¹³‑tsi' ingɨ¹ coon'¹³ 'naa'.  
\v 12 'Aa²¹²moo' la jaain²¹ la jaan²¹naa' coon'¹³ júu³ tyʉ́².  
\v 13 Joon 'in tsá² jai'² lɨ́ɨ²i Cristo 'in néei¹ lo jin'²in 'aa²¹²moo'. 
\p  
\v 14 'E 'ii'¹³naa' 'e cwa'³ tya' Ña'ñʉ'¹ʉ' Jesucristo. Cwoliñi²ii' 'e 'iin²¹²in Dios 'naa' joon 'e ngɨ¹ 'in Espíritu Tyʉ́² tya' Dios jee²¹² 'naa'. Amén.