\id 1JN  
\h 1 JUAN 
\toc1 Jí² 'láa² 'wii²¹² 'e gasii¹in San Juan tɨ́ɨ²i 'in jai'² lɨ́ɨi² Jesucristo 
\toc2 1 JUAN 
\toc3 1 Jn. 
\mt1 Jí² 'láa² 'wii²¹² 'e gasii¹in San Juan tɨ́ɨ²i 'in jai'² lɨ́ɨi² Jesucristo 
\c 1  
\s1 Júu³ tya' juncwii²¹ 'e cwo'¹ Dios tsá² 
\p  
\v 1 Jmoo²¹o'o 'e jí² lo cwáain¹ tya' 'in tyán¹ júu³ tya' Dios jacoon¹ jee²¹² jna' ca la jée¹gɨ la mo 'wiin²¹² seen²¹mo 'ii. Nanʉʉ²oo'o júu³ tya'a joon nanee²¹²moo'o coon'¹³ unnii²¹i'i joon gajǿø²moo'o, gasaan'¹³a'a tya'a coon'¹³ cwoo²¹o'o.  
\v 2 Joon gajnéi¹ 'e juncwii²¹ no jee²¹² jna'a joon gaee²¹e'e jmoo²¹o'o júu³ joon 'ee¹³e'e 'naa' 'e juncwii²¹ no 'e jo tyéi¹ do. E juncwii²¹ no gateen¹ coon'¹³ Ñʉ'¹ʉ' joon gajnée¹i jee²¹² jna'a.  
\v 3 Jmoo²¹o'o 'naa' júu³ jilaa'²¹ 'e ganee²¹e'e joongɨ ganʉʉ²¹ʉ'ʉ 'e ilisɨcaan²¹naa' coon'¹³ jna'a. Joon jna'oo'o 'e la ja'²mo sɨcaan²¹moo'o coon'¹³ Dios Jmii²¹ joongɨ coon'¹³ jóon¹on Jesucristo.  
\v 4 'Wii'¹³ joon siin²¹ jna'a 'e jí² lo tyii' itsíin²mo 'e jløø'³moo'. 
\s1 Dios jmoo¹o jná² joo'²¹ lɨ taain²¹² tsá² juncwii²¹ 
\p  
\v 5 'E júu³ lo ga'ee¹ Jesucristo jna'a, joon jmoo²¹o'o 'naa' júu³: Dios 'in² tyúi¹gɨ lɨɨlɨ́¹ joon ñi¹o jilaa'²¹, ce jiin'¹³xʉ 'e gó² jo sá² tya'a.  
\v 6 Wa jin'² tsá² 'e sɨcaain²¹ coon'¹³ Dios joon ngɨɨ¹ to² gó², tajuu²¹mo 'ii coon'¹³ jilaa'²¹ 'e faa'²¹a joongɨ jilaa'²¹ 'e jmoo¹o.  
\v 7 Pe wana ngɨɨ²¹ɨ' jmai'² 'e tyʉ́²‑ʉ la ngɨ¹ Dios 'in tyúi¹ sɨcaan²¹na' la jaain²¹ la jaan²¹na'. Joon iuntyúu¹i jna' jilaa'²¹ tsaa² tyi' coon'¹³ 'e jmɨ¹ 'øø²¹i 'e gatuun²un tya' Jóon¹ Dios 'in sii²¹ Jesucristo. 
\p  
\v 8 Wa faa¹³a' 'e jo 'e tsaa² 'óo³o' tyiin²an' tóo² yiia', lɨ́ɨ²na' tajuu²¹.  
\v 9 Pe wana røø²¹²na' tsaa² tyi' tyani Dios, i'íin²mo Dios tsaa² tyi' jiin'¹³ la nifo'²o. Joon iuntyúi¹ jna' jilaa'²¹ 'e 'laa²¹a' tsʉ 'ii'²¹ rǿø² jmoo¹ Dios.  
\v 10 Wana faa'¹³a' 'e jo mo ga'naa²¹a' tsaa² cwóo¹³o' Dios tsaa² 'e tajuu²¹mo 'i. Joon jo mo ga'ii'¹³na' júu³ tya' Dios 'e jai'² to². 
\c 2  
\s1 Jesucristo, 'in faa'²¹a 'wii²¹² tyi' 
\p  
\v 1 Sɨ́ɨ³na 'e jí² lo tyi'naa' yʉʉn²¹ tyiia 'e jo 'noo²oo' tsaa². Pe wana gatøøi'¹ tsá² tsaa² tya'a seein²¹ jaain²¹ sii²¹ Jesucristo 'in lí² faa'²¹a 'wii²¹² tya'a tyani Dios Jmii²¹.  
\v 2 Joon 'in Jesucristo jo ga'noo¹o jiin'¹³ coon²¹ tsaa². Joon coon'¹³ la joon 'in Jesús do gatyii¹ jilaa'²¹ tsaa² tyi' mo najúun²in. Joon coon'¹³ la joon gauntyʉ́²‑tsi Dios 'wii²¹² tyi'. Joon jon' jiin'¹³ tsaa² tyi' gatyí², gatyí² jon tsaa² tya' jilee'²¹ tsá² 'in taain²¹² juncwii²¹. 
\p  
\v 3 Wana nʉʉ²¹ʉ' júu³ tyʉ́² tya' Dios nee²¹o' 'e galicwii¹mo' 'ii.  
\v 4 Pe wana jin'² tsá²: “Cwíi³moo 'ii”, joon jo jmoo¹o nʉʉ'¹³ʉ, tajuu²¹mo 'ii.  
\v 5 'In jmoo¹o nʉʉ'¹³ júu³ tya' Dios 'e la ja'²mo 'iin²¹²in 'ido Dios jiin'¹³ la lɨ́² 'e 'iin²¹² Dios. Joon coon'¹³ la joon linee³e' 'e lɨcaan²¹mo' coon'¹³ Dios.  
\v 6 Joon 'in jin'² 'e sɨcaain²¹ coon'¹³ Dios tɨ́ɨi² ngɨ¹ la gangɨɨ¹ Jesucristo. 
\s1 'E júu³ 'múui² tyʉ'²ʉ to² 
\p  
\v 7 Tsaru'¹ʉ', jo 'múui² 'e to² tyʉ'³ʉʉ no. Ca la mo 'wiin²¹² ganʉʉ²ʉʉ'. Coon²¹ røø²¹ lɨ́¹ 'e to² tyʉ'³ʉʉ no la lɨ́¹ 'e niganʉʉ²ʉʉ' la mo jéei¹.  
\v 8 Pe Jesús gasɨɨ'²¹ jna' 'e 'mɨ́ɨ²mo 'e júu³ lo 'e to² tyʉ'³ʉʉ no. Jesús do ga'láa² 'wii²¹² jmaa¹a 'elo joon ga'ii'¹³naa' 'e jmaa²aa'. La mo jéei¹ la jo mo lɨcwii¹na' Jesucristo lawa'a ngɨɨ²¹ɨ' lɨ nʉʉ²¹. Pe tɨ lɨ ngɨɨ²¹mo 'e nʉʉ²¹ no. Na'láa² 'wii²¹² jná² joo'²¹ lɨ saan³an' tsʉ 'wii'¹³ galicwii¹mo' Jesucristo. 
\p  
\v 9 Joon wana jin'² tsá² 'e ngɨ¹ lɨ jná² joo'²¹ tya' Dios joon 'ee'¹mo ruu'²¹i ngɨɨ¹o lɨ nʉʉ²¹gɨ.  
\v 10 Tsʉ 'in 'iin²¹²in ruu'²¹i ngɨɨ¹ lɨ jná² joo'²¹ tya' Dios joon ce jiin'¹³ coon²¹ jo 'ee sóon³in.  
\v 11 Pe 'in tsá² 'in 'ee'¹ ruu'²¹i seein²¹ 'e ngɨ¹ lɨ nʉʉ²¹. Joon jo jnaa² jǿø²ø xiia'fu tsaa¹a. Lawa'a tsá² tiui² lɨ́ɨ¹i. 
\p  
\v 12 Sɨ́ɨ³na 'e jí² lo tyii', yʉʉn²¹ tyiia, tsʉ niga'íin²mo Dios tsaa² tyii' 'wii'¹³ tya' Jesucristo nityí² tya'a.  
\v 13 Sɨ́ɨ³na 'e jí² lo tyii' tsacøøi'¹³ tsʉ nigalicwii¹moo' 'in gaseein²¹ mo 'láa² 'wii²¹² juncwii²¹ coon'¹³ jilaa'²¹ 'e sá². Sɨ́ɨ³na 'e jí² lo tyii' sɨmii'²¹ tsʉ nigalɨ'²oo' 'in 'lɨɨi'³ do. 
\p Joon gasɨ́ɨ³na 'e jí² lo tyii', yʉʉn²¹ tyiia tsʉ nigalicwii¹moo' Dios Jmii²¹.  
\v 14 Joon gasɨ́ɨ³na 'e jí² lo tyii' tsacøøi'¹³ tsʉ nigalicwii¹moo' 'in seein²¹ mo 'láa² 'wii²¹² jilaa'²¹ 'e sá² juncwii²¹. Joon gasɨ́ɨ³na 'e jí² lo tyii' sɨmii'²¹ tsʉ 'wii'¹³ pii²¹‑'oo' joon ga'ii'¹³moo' júu³ tya' Dios. Joon galɨ'²oo' 'in 'lɨɨi'³ do. 
\p  
\v 15 Jo jmaa²aa' 'e 'iin²¹²naa' 'e juncwii²¹ lo jon'gɨ jmaa²aa' 'iin²¹²naa' jilaa'²¹ 'e sá² juncwii²¹. Tsʉ wana jmoo²oo' 'e 'iin²¹²naa' juncwii²¹ jo i'iin²¹²naa' Dios Jmii²¹.  
\v 16 Tsʉ jilaa'²¹ 'e 'ɨ¹‑tsi tsá² coon'¹³ jilaa'²¹ 'e suun²¹in tsá² coon'¹³ unníi¹i coon'¹³ jilaa'²¹ 'e jmoo¹o jloo'³ tya'a jon' tya' Dios Jmii²¹ 'e la joon, 'e tya' juncwii²¹ jilaa'²¹ 'e la joon. Jiin'¹³ juncwii²¹ lo‑o taain²¹ tsá² 'e la joon. Jo cwo²gɨ Dios Jmii²¹ 'e la joon.  
\v 17 Tɨ lɨ tyé¹mo juncwii²¹ coon'¹³ jilaa'²¹ 'e gó² 'e jmoo¹o tsá² 'e jo 'e to² tí². Pe jileei'²¹ 'in jmoo¹o la to² tyʉ'² Dios seen²mo coon²¹ tøø²mo. 
\s1 Xiiala lɨ́¹ júu³ jai'² joongɨ xiiala lɨ́¹ júu³ tajuu²¹ 
\p  
\v 18 Yʉʉn²¹ tyiia, tyan'² 'áa¹mo nijó¹ i'íin² juncwii²¹. Joon nanʉ́ʉ²oo' 'e ijó¹ 'in 'eei'¹ Cristo joon seen²mo fúui¹ 'in 'eei'¹ Cristo nano, 'wii'¹³ joon nee²¹e' 'e tɨ lɨ tyéi¹ juncwii²¹.  
\v 19 'In tsá² do ga'wóo²i jee²¹² jna' pe jon' tsá² tyi' 'ii. Tsʉ wana galíin² tsá² tyi' la jai'² jo ga'wóo²i jee²¹² jna'. Pe la lo‑o galɨ́² iliñi¹ tsá² tyʉ́² 'e jileei'²¹ 'in ngɨ¹ coon'¹³ jna' jon' jileei'²¹ lɨ́ɨ¹i tsá² tyi'. 
\p  
\v 20 Pe Dios nigacwo'¹o 'naa' 'in Espíritu tyʉ́² tya'a 'wii'¹³ joon ñii²¹²oo' jilaa'²¹.  
\v 21 'E sɨ́ɨ³na 'e jí² lo tyii' 'wii'¹³ ñí³ 'naa' jilaa'²¹ 'e la jai'² jon' wa'a jo mo cwii¹ii'. Ñí³oo' jon 'e jiin'¹³ coon²¹ júu³ tajuu²¹ jo 'ee la jai'². 
\p  
\v 22 Joon wana 'in jin'² 'e jo jo'² gatyii'¹³in Dios Jmii²¹ Jesus 'in tyán¹ júu³ tya'a sii²¹ Cristo, tajuu²¹mo 'in jin'² la joon. 'In no 'in 'eei'¹ Cristo. Jileei'²¹ 'in la 'í jo rǿø²i Dios Jmii²¹ coon'¹³ Jóon¹on.  
\v 23 Jilee'²¹ 'in jo rǿø¹i Jóon¹ Dios jo cwii¹in jon Dios Jmii²¹. Pe wana jin'² tsá² Jóon¹ Dios Jmii²¹ Jesús, 'in no cwii¹mo jon Dios Jmii²¹. 
\p  
\v 24 'Wii'¹³ joon cwotii'¹³‑'oo' 'e ganʉʉ²ʉʉ' ca la mo 'wiin²¹². Joon wana jo tʉʉ²ʉʉ' 'e júu³ do 'e ganʉʉ²ʉʉ' ca la mo 'wiin²¹² ijoon²oon' lɨcaan²¹naa' coon'¹³ Jóon¹ Dios joongɨ coon'¹³ Dios Jmii²¹.  
\v 25 Joon Jesucristo ga'ɨ́ɨ² jna' júu³ 'e icwo'¹o jna' coon²¹ juncwii²¹ itoon²¹on' coon'¹³ Dios coon²¹ tøø²mo. 
\p  
\v 26 Jmoo'¹³oo'o 'naa' júu³ coon'¹³ jí² lo cwáain¹ tya' 'in 'iin²¹²in cón² 'naa' tóo².  
\v 27 Pe Jesucristo gacwo'¹ 'naa' Espíritu Tyʉ́² tya'a joon jo 'ná¹ jiin'¹³ jaain²¹ 'e'²e 'naa' tsʉ 'ña'o 'in Espíritu do i'e'²e 'naa'. Joon jilaa'²¹ 'e 'e'²e 'naa' jmai'² 'e ja'²mo jiin'¹³ coon²¹ 'e tajuu²¹. Cwoseen²¹naa' sɨcaan²¹naa' coon'¹³on la ga'e'²e 'in Espíritu Tyʉ́² do 'naa'. 
\p  
\v 28 Joon nano, yʉʉn²¹ tyiia, cwoseen²mogɨɨ' sɨcaan²¹naa' coon'¹³ Cristo. Coon'¹³ la joon jo cu'²‑tsi' mi jnéi¹ 'ido tún¹. Joon mi jó¹ jo fa'ɨɨ'²¹ lɨ́ɨ²naa' tyaníi¹i.  
\v 29 Tyʉ́²‑ʉ ñí³oo' 'e jmai'² 'e røø²¹ jmoo¹o Jesucristo. Cwoliñí³oo' jon 'e jilee'²¹ 'in jmoo¹o røø²¹ jóon¹ Dios 'ii. 
\c 3  
\s1 'In lɨ́ɨ¹i jóon¹ Dios 
\p  
\v 1 Cwo'ii²du'‑'oo' xiiala 'iin²¹²in Dios Jmii²¹ jna' 'e gaunsii²¹ jna' 'e jóon¹ Dios jna'. Joon la joon lɨ́ɨ¹na'. 'Wii'¹³ joon 'in jo cwii¹in Dios taain²¹² juncwii²¹ jo cwii¹in jna' jon tsʉ jo mo galicwii¹in Dios.  
\v 2 Tsaru'¹u' 'in 'iin²¹²na, la no lɨ́ɨ¹na' jóon¹ Dios joon jo galinee²¹e' 'ee ilíin²na' pe nee²¹o' 'e mi jnéi¹ Jesucristo ilíin²mo' la lɨ́ɨ¹i tsʉ inee²¹mo' jiin'¹³ la lɨ́ɨ¹i.  
\v 3 Joon jilee'²¹ 'in jéein¹ 'ii untyúi¹ yaai tsʉ tyú¹mo Jesucristo. 
\p  
\v 4 Jileei'²¹ 'in 'noo¹o tsaa² jo untiin'¹³in júu³ tya' Dios. La joon lɨ́¹ tsaa² mo jo untiin'¹³ tsá² júu³ tya' Dios.  
\v 5 Ñí³oo' 'e Jesucristo nicweei¹ ni cwoo'¹³ juncwii²¹ 'e tyii²¹ tsaa² tyi'. Joon jo mo ga'noo¹o 'ido jiin'¹³ coon²¹ tsaa².  
\v 6 La joon jon jilee'²¹ 'in sɨcaain²¹ coon'¹³on, jo ngɨ¹ to² 'noo¹o tsaa². Tsʉ jilee'²¹ 'in ngɨ¹ to² 'noo¹o tsaa² jo mo ní² tiin'¹³ jo mo licwii¹in Jesucristo.  
\v 7 Yʉʉn²¹ tyiia, jo cwoo²oo' 'e cón² tsá² 'naa' tóo²: 'In jmoo¹o 'e tyʉ́², 'in tyú¹mo 'i la tyúi¹ Jesucristo.  
\v 8 La joon jon jileei'²¹ 'in ngɨ¹ to² 'noo¹o tsaa² 'in 'lɨɨ'³mo 'i. Tsʉ la mo 'wiin²¹² ga'noo¹o 'in 'lɨɨi'³ do tsaa². Joon najó¹ 'in Jóon¹ Dios jaxée¹i 'e nigajmaa¹a 'in 'lɨɨi'³ do. 
\p  
\v 9 Jiin'¹³ jaain²¹ jóon¹ Dios jo ngɨ¹ to² 'noo¹o tsaa² tsʉ Dios nigacwo'¹o 'in tsá² do coon²¹ juncwii²¹ 'múui². Jo lí² 'noo¹gɨ tsaa² tsʉ jóon¹ Dios 'ii.  
\v 10 Lí²‑i licwii¹mo' 'iin jóon¹ Dios joongɨ 'iin jóon¹ 'in 'lɨɨi'³ tsʉ jilee'²¹ 'in jo jmoo¹o 'e tyʉ́² jon'gɨ 'iin²¹²in ruu'²¹i jo lɨ́ɨ¹i jóon¹ Dios. 
\s1 Ili'nee²mo' la jaain²¹ la jaan²¹na' 
\p  
\v 11 Tsʉ joon 'e júu³ niganʉʉ²ʉʉ' ca la mo 'wiin²¹² lɨ́¹ 'elo: Cwoli'iin²¹²na' la jaain²¹ la jaan²¹na'.  
\v 12 Jo jmoo²¹o' la gajmaa¹a Caín, 'in lɨ́ɨi¹ jóon¹ 'in 'lɨɨi'³ joon gajngaa'¹²mo ruu'²¹i. ¿'Ee 'wii²¹² gajngaa'¹³i? Gajnga'²mo 'wii'¹³ 'in ruu'²¹i do gajmaa¹a 'e tyʉ́² joon 'ii‑gɨ gajmaa¹a 'e gó². 
\p  
\v 13 Tsaru'¹u', jo jmaa²aa' tsa'goo²¹‑'oo' 'e 'eei'¹ 'naa' 'in tsá² 'in jo cwii¹in Dios, 'in tɨ́²‑tsi jiin'¹³ 'e sá² fu juncwii²¹ lo.  
\v 14 Née³o' 'e ca la mo jéei¹ jo 'in caan²¹na' coon'¹³ Dios pe la no galɨcaan²¹mo' coon'¹³ Dios tsʉ 'iin²¹²mo' 'in ru'¹u' catyaai² do. 'In jo 'iin²¹²in ruu'²¹i jo mo lɨcaain²¹ coon'¹³ Dios.  
\v 15 Jilee'²¹ 'in 'ee'¹ ruu'²¹i lawa'a 'in jngaai'¹² tsá² 'ii. Joon ñí³oo' 'e jiin'¹³ jaain²¹ 'in jngaai'¹² tsá² jo téen²in juncwii²¹ tya' Dios coon²¹ tøøi².  
\v 16 Nee²¹o' 'e gacwo¹ Jesucristo juncwii²¹ tya'a 'wii'¹³ tyi'. Joon coon'¹³ la joon galitsáa¹mo‑tsi' xiiala 'ná¹ 'e 'iin²¹²mo' Dios coon'¹³ tsá² xeei'²¹. La gacwo¹ 'ii juncwii²¹ tya'a la joon jon jna' 'ná¹ cwoo²¹o' juncwii²¹ tyi' tya' tsaru'¹u'.  
\v 17 Wa jaain²¹ tsá² 'in 'oo¹o jilaa'²¹ 'e jmaa'²i to² tya'a jǿø²i jaain²¹ tsaruu'²¹i 'in sɨtyéein¹ jmɨɨ²¹² joon jo jmoo¹o feei'¹‑tsi 'wii²¹² tya' 'ido jo ñí³ii xiiala cwéi¹ jin'² 'in tsá² do: “'Iin²¹²moo Dios.”  
\v 18 Yʉʉn²¹ tyiia, jo to² 'íi³ wa'a jiin'¹³ fáa³a': “'Iin²¹²mo' Dios coon'¹³ tsá².” Tyʉ́²gɨ wa'a 'ee²e' tsá² 'e 'e la ja'²mo 'iin²¹²mo' Dios coon'¹³ tsá² coon'¹³ jilaa'²¹ 'e jmoo²¹o'. 
\s1 'E jo cu'²‑tsi' tyani Dios Jmii²¹ 
\p  
\v 19 Joon wa ngɨɨ²¹ɨ' la joon cwoo'¹³na' cwáain¹ yiia' 'e jo nitajuui²¹ jna'. Joon cwoo'¹³na' cwáain¹ yiia' 'e jo nitajuui²¹ jna' tyani Dios.  
\v 20 Wana cwóo¹³o' tsaa² yiia' nee²¹o' 'e feei'¹gɨ Dios lagɨ jna' joon ñi¹ Dios jilaa'²¹.  
\v 21 La joon, tsaru'¹u' 'in 'iin²¹²na, wa'a jo cwóo¹³o' tsaa² yiia' lí²‑i seen²na' jo cu'²‑tsi' tyani Dios.  
\v 22 Joon icwo'¹o Dios jna' jilaa'²¹ 'e mɨɨ²¹ɨ' tsʉ jmoo²¹o' nʉ́ʉ¹³ʉ' to² tyʉ'²ʉ coon'¹³ jilaa'²¹ 'e 'yaai¹‑tsi tyi'.  
\v 23 Joon to² tyʉ'²ʉ 'e ja'²mo lɨ́ɨ²na' Jóon¹on Jesucristo joon tyʉ'²ʉ jna' jon to² 'e 'iin²¹²mo' la jaain²¹ la jaan²¹na' jiin'¹³ la nigajin'²in.  
\v 24 Jileei'²¹ 'in jmoo¹o la to² tyʉ'²ʉ téen¹in sɨcaain²¹ coon'¹³ Dios la joon jon téen¹in Dios sɨcaain²¹ coon'¹³ 'ii. Joon linee²¹e' 'e téen¹in Dios sɨcaain¹ coon'¹³ jna' 'wii'¹³ 'in Esíritu Tyʉ́² tya'a 'in gacwei'² jna'. 
\c 4  
\s1 Xiiala lɨ́ɨ¹i 'in Espíritu Tyʉ́² tya' Dios joongɨ xiiala lɨ́ɨ¹i 'in sii²¹ anticristo 
\p  
\v 1 Tsaru'¹u' 'in 'iin²¹²na, jo jai'² cwolíin²¹naa' jileei'²¹ 'in jin'² 'e faa'²¹o cwáain¹ tya' Dios. Cóon²oon' cwáain¹ coon'¹³ ce tún² 'ee 'e faa'²¹a 'ido. Nuu²uu' wana faa'²¹a cwáain¹ tya' Dios owa jo faa'²¹a 'ee. Rǿø²mo cwoo'¹³ juncwii²¹ coon'¹³ 'in tsá² tajuui²¹ 'in jin'²in 'e faa'²¹o cwáain¹ tya' Dios pe jo jo'².  
\v 2 Pe 'naa' cwii¹moo' 'in Espíritu Tyʉ́² tya' Dios. Joon jilee'²¹ 'in jin'² 'e Jesucristo najó³ lɨ́ɨ¹i tsá² faa'²¹o 'ii'²¹ tya' Espíritu Tyʉ́² tya' Dios.  
\v 3 Joon jilee'²¹ 'in jin'² 'e jo mo jó¹ Jesucristo 'e lɨ́ɨ¹i tsá² jo faa'²¹a 'ii'²¹ tya' Dios. Joon 'in jin'² la joon 'ee'¹mo Jesucristo. Joon 'in tsá² 'in jin'² la joon seen²mo fu juncwii²¹ nano jiin'¹³ la nanúu²uu' ijalíin². 
\p  
\v 4 Yʉʉn²¹ tyiia, lɨ́ɨ¹naa' jóon¹ Dios joon galɨɨ'²oo' 'in tajuui²¹ do tsʉ 'in feei'¹gɨ 'in cwo'¹ 'naa' pí³ lagɨ 'in cwo'¹ pí³ 'in catyaai²¹ do xʉfiin'¹³ tyʉ'² 'ido to² juncwii²¹.  
\v 5 'In tsá² tajuui²¹ do faa'²¹o jmai'² tya' 'e sá² ni cwoo'¹³ juncwii²¹ tsʉ tɨɨi²¹ jmai' 'e sá² juncwii²¹ lo. Joon lɨ́ɨ¹ tɨ́²‑tsi tsá² taain²¹² juncwii²¹ núu²un júu³ tya'a.  
\v 6 Pe jileei'²¹ jna' líin²na' jóon¹ Dios. Joon jileei'²¹ 'in cwii¹in Dios núu²o 'e faa'¹³a' joon 'in jo núu²un 'e faa'¹³a' do jo lɨ́ɨ¹i tsá² tya' Dios. Joon coon'¹³ la joon lí² tsáa¹mo‑tsi' 'iin faa'²¹ la jai'² joongɨ 'iin faa'²¹ júu³ tajuu²¹. 
\s1 'Iin²¹²mo Dios jna' 'áa¹mo 
\p  
\v 7 Tsaru'¹u' 'in 'iin²¹²na, cwoli'iin²¹²mo' la jaain²¹ la jaan²¹na'. Dios jmaa¹a 'ii'²¹ 'e li'iin²¹²na' la jaain²¹ la jaan²¹na'. Joon jileei'²¹ 'in 'iin²¹²in Dios joon 'iin²¹²mo jon tsá² lɨ́ɨ¹mo jóon¹ Dios joon cwii¹mo Dios.  
\v 8 'In jo 'iin²¹²in Dios la joon jon jo 'iin²¹² tsá² jon'gɨ Dios mo licwii¹in tsá² tsʉ jilaa'²¹ 'e jmoo¹o Dios Jmii²¹ 'e 'e'²e tsá² 'e 'iin²¹²mo Dios Jmii²¹ tsá².  
\v 9 Jaan²¹mo Jóon¹ Dios 'in seein²¹ joon gasii¹in Dios 'i fu juncwii²¹ 'e 'wii²¹² 'ii lí² cwo'¹ jna' coon²¹ juncwii²¹ 'múui². Coon'¹³ la joon ga'e'²e Dios jna' xiiala 'iin²¹²in jna'.  
\v 10 Gali'iin²¹²mo Dios Jmii²¹ jilaa'²¹ 'e gajmaa¹a. Joon gasii¹in Jóon¹on fu juncwii²¹ lawa coon²¹ fa'¹ 'e jatyíi¹i jilaa'²¹ tsaa² tyi' 'e jo jmaa¹gɨ Dios Jmii²¹ 'nii'²¹‑tsi tyi'. Gajmaa¹ Dios Jmii²¹ la joon 'wii'¹³ 'iin²¹²mo jna' jon' wa'a jna' 'ná¹ 'e li'iin²¹²na' 'ii. 
\p  
\v 11 Tsaru'¹u' 'in 'iin²¹²na, wana nagali'iin²¹² Dios jna' la joon jon jna' 'ná¹‑a li 'iin²¹²mo' tsaru'¹u'.  
\v 12 Jiin'¹³ jaain²¹ jo mo ganii²in Dios pe wana 'iin²¹²mo' la jaain²¹ la jaan²¹na' ngɨɨ¹ Dios coon'¹³ jna' joon coon'¹³ la joon untsiin²¹ jna' 'e 'iin²¹²mo Dios jna'.  
\v 13 Gacwo'¹o Dios Jmii²¹ jna' 'in Espíritu Tyʉ́² tya'a, 'wii'¹³ joon tsáa¹mo‑tsi' 'e ngɨɨ²¹ɨ' sɨcaan²¹na' coon'¹³ Dios 'e joon ngɨɨ¹ 'ido jon coon'¹³ jna'.  
\v 14 Joon niganee²¹e' joon jmoo²¹o' júu³ 'e Dios Jmii²¹ gasii¹in Jóon¹on 'e jmaa¹a tiin'¹³ tsá² taain²¹² fu juncwii²¹.  
\v 15 Joon doñi'iin ijin'² 'e Jesús lɨ́ɨ¹i Jóon¹ Dios Jmii²¹ ngɨɨ¹ Dios caain²¹ coon'¹³ 'i la joon jon ngɨ¹ 'ii caain²¹ coon'¹³ Dios. 
\p  
\v 16 Galinee²o' joon galija'²mo lɨ́ɨ²na' 'e 'iin²¹² Dios Jmii²¹ jna'. Jilaa'²¹ 'e jmoo¹o Dios 'e 'e'²e tsá² 'e 'iin²¹²mo Dios Jmii²¹ tsá² joon jileei'²¹ 'in ngɨ¹ 'née²i tsaruu'²¹i ngɨɨ¹ 'i coon'¹³ Dios joon Dios ngɨɨ¹o jon coon'¹³ 'i.  
\v 17 Coon'¹³ la joon untii'¹³ jna' 'e 'iin²¹²mo' Dios coon'¹³ tsá² 'e jo cu'²‑tsi' mi cwá¹ jmɨɨ²¹² lɨ tséi¹ mi jmáa¹a Dios Jmii²¹ 'ii'²¹ tsʉ la lɨ́ɨ¹i Jesucristo lɨ́ɨ¹na' toon²¹on' juncwii²¹ lo.  
\v 18 Jo 'goo'²¹o tsá² mo 'iin²¹²in la jai'² Dios coon'¹³ tsá². Mo 'iin²¹²in tsá² Dios coon'¹³ tsá² xeei'²¹ la jai'² jo cwoo¹i li'goo'²¹o. Tsʉ mo jmoo¹o tsá² 'goo'²¹o ní³ tsá² wúu¹ coon'¹³ 'e jmoo¹o 'goo'²¹o. Joon 'in jmoo¹o 'goo'²¹o jo mo gaun'yee²¹i 'e 'iin²¹²in Dios la jai'². 
\p  
\v 19 Jna'o' 'iin²¹²mo' Dios coon'¹³ tsá² tsʉ 'wii'¹³ nigali'iin²¹²mo Dios jna' jéei¹gɨ.  
\v 20 Wana jin'² tsá²: “'Iin²¹²moo Dios”, pe joon 'ee'¹mo ruu'²¹i, tajuu²¹mo 'ii. Tsʉ jo ñí³ii xiiala cwoí¹ 'e jin'²in 'e 'iin²¹²in Dios 'in jo mo nii¹i pe 'ee'¹mo ruu'²¹i 'in niganí².  
\v 21 Dios nigatyʉ'²ʉ jna' to²: Jilee'²¹ 'in 'iin²¹² Dios 'ná¹‑a jon 'iin²¹²in ruu'²¹i. 
\c 5  
\s1 'E nilɨ'¹o' jilaa'²¹ 'e gó² 
\p  
\v 1 Jileei'²¹ 'in jai'² lɨ́ɨi² 'e Jesús lɨ́ɨ¹i Cristo, ('øøi'²¹‑tsi tsá² jaain²¹ 'in Dios gasii¹in jajmaa¹a tiin'¹³ tsá²) jaain²¹ jóon¹ Dios 'ii. Joon wa'a 'iin²¹²in tsá² jmii²¹ xuui²¹² i'iin²¹²mo jon 'in xuui²¹² do.  
\v 2 Wana 'iin²¹²na' Dios joon jmoo²¹o' jilaa'²¹ to² tyʉ'²ʉ coon'¹³ la joon tsáa¹mo‑tsi' 'e 'iin²¹²mo' jon jileei'²¹ 'in tsaru'¹u' 'in lɨ́ɨ¹i jóon¹ Dios.  
\v 3 'Iin²¹²mo tsá² Dios jiin'¹³ mo jmoo¹o tsá² nʉʉ'¹³ʉn jilaa'²¹ to² tyʉ'²ʉ joon jo 'áai¹ 'ii²¹ to² tyʉ'²ʉ,  
\v 4 tsʉ jilee'²¹ 'in lɨ́ɨ¹i jóon¹ Dios galɨ'¹o 'naai²¹² jilaa'²¹ 'e gó² jmoo¹o tsá² taain²¹² juncwii²¹. Joon lɨɨ'¹³o' 'naai²¹² jilaa'²¹ 'e gó² 'e jmoo¹o tsá² 'in 'eei'¹ jna' 'wii'¹³ galija'²mo lɨ́ɨ²na' Jesús.  
\v 5 Joon jiin'¹³ 'in nigaja'²mo lɨ́ɨi² 'e Jesús lɨ́ɨi¹ Jóon¹ Dios lí²‑i lii'¹i 'naai²¹² 'e gó² 'e jmoo¹o tsá². 
\s1 'E júu³ ja'²mo ga'ɨɨ¹ Dios Jmii²¹ 'wii²¹² tya' Jóon¹on 
\p  
\v 6 Gasaai¹ Wó³ 'in Jesús do jmɨɨ²¹. Joon coon'¹³ jmɨɨ²¹ 'e gasaai¹ Wó³ do joon coon'¹³ jmɨ¹ 'e tuun²¹ tya'a mo júun²in je tún² do gajmaa¹a júu³ 'e la ja'²mo najó³ Jesucristo. Jon' wa' jiin'¹³ jmɨɨ²¹ do pe coon'¹³ jmɨɨ²¹ joongɨ coon'¹³ jmɨ¹ do. La joon jon 'in Espíritu Tyʉ́² tya' Dios jmaa¹a júu³ joon 'in ja'²mo 'in Espíritu Tyʉ́² do.  
\v 7-8 Joon ni cwoo'¹³ juncwii²¹ 'nɨ¹ 'ii'¹³ 'in 'elo jmoo'¹³ júu³. Joon 'e 'láa² 'wii²¹² 'in Espíritu Tyʉ́² tya' Dios Jmii²¹, joon tɨ́² tún² jmɨɨ²¹ joon tɨ́² 'nɨ¹ jmɨ¹ 'øø²i. Joon jee²¹² 'nɨ¹ do røø²¹ júu³ jmoo'¹³.  
\v 9 Wa 'ii'¹³mo' lawa 'e jai'² júu³ jmoo¹o tsá², 'e tyiin²gɨ 'e 'ii'¹³mo' júu³ gajmaa¹a Dios tsʉ feei'¹gɨ Dios lagɨ tsá². Joon 'e júu³ gajmaa¹a Dios jmo'²o jna' júu³ cwáain¹ tya' Jóon¹on.  
\v 10 Joon jileei'²¹ 'in jai'² lɨɨ²i Jóon¹ Dios ñi¹o yaai 'e ja'²mo 'e júu³ ga'ɨ́ɨ² Dios cwáain¹ tya'a. Pe jileei'²¹ 'in jo jai'² lɨ́ɨi² Dios sáa¹i Dios lawa jaain²¹ tsá² tajuui²¹ tsʉ jo mo ga'ii'²¹i júu³ ga'ɨ́ɨ² Dios cwáain¹ tya' Jóon¹on.  
\v 11 Joon 'e júu³ jai'² ga'ɨ́ɨ² Dios cwáain¹ tya' Jóon¹on jin'² 'e Dios nigacwo'¹ jna' coon²¹ juncwii²¹ 'múui² 'e taa'²¹ coon²¹ tøø²mo. 'Wii'¹³ tya' Jóon¹on gacwo'¹ Dios jna' 'e juncwii²¹ 'múui² do.  
\v 12 Joon jilee'²¹ 'in ngɨ¹ sɨcaain²¹ coon'¹³ Jóon¹ Dios niga'ii'²¹mo 'e juncwii²¹ 'muui²¹ do. Pe jileei'²¹ 'in jo jai'² lɨ́ɨi² Jóon¹ Dios jo mo ga'ii'²¹ 'e juncwii²¹ do. 
\s1 Júu³ tyʉ́² lɨ gatséi¹ 
\p  
\v 13 Nigasɨɨ¹na 'e jí² lo tyii' 'in jai'² lɨ́ɨi² Jóon¹ Dios 'e litsáa¹mo‑'oo' 'e niga'ii'¹³mo' coon²¹ juncwii²¹ 'múui² 'e jo tyéi¹. 
\p  
\v 14 Jo cu'²‑tsi' coon'¹³ Dios tsʉ nee²o' wa mo mɨɨ²¹ɨ' 'e 'yaai¹‑tsi Dios itɨ́² júu³ tyi'.  
\v 15 Joon nee²o' wa ganúu²uun Dios júu³ tyʉ́² tyi' nee²o' jon 'e ga'ii'¹³mo' 'e gamɨɨ²¹ɨ'. 
\p  
\v 16 Wa nali'³i' 'e 'noo¹o jaain²¹ ru'¹u' tsaa² 'e jmoo¹ jo júun²in tsá² 'ná¹‑a faa'¹³a' júu³ tyʉ́² 'wii²¹² tya'a. Joon i'íin¹mo Dios tsaa² tya'a wa jo ga'noo¹o tsaa² 'e jmoo¹o júun²in tsá². Sá²‑a tsaa² 'e jmá¹ júun²in tsá² joon jo 'ná¹ faa'¹³a' júu³ tyʉ́² tya'a 'e joon.  
\v 17 Jilaa'²¹ 'e gó² jmoo¹o tsá² lɨ́² tsaa² tyani Dios pe sá²‑a coon²¹ tsaa² 'e jo júun²in tsá². 
\p  
\v 18 'Nee²o' 'e jileei'²¹ tsá² 'in lɨɨ¹i jóon¹ Dios jo ngɨ¹ to² 'noo¹o tsaa² tsʉ un'øø'¹mo Jóon¹ Dios 'ii. Joon jo lii'²¹i 'in 'lɨɨi'³ 'ii. 
\p  
\v 19 Nee²o' 'e líin²na' jóon¹ Dios joon tyʉ'²ʉ 'in 'lɨɨi'³ to¹ jilee'²¹ 'in catyaai², 'in jo cwii¹in Dios. 
\p  
\v 20 Nee²o' jon 'e najó³ Jóon¹ Dios. Joon 'ii‑o nagacwo'¹ jna' 'e licwii¹mo' Dios 'in jai'². Joon toon²¹on' sɨcaan²¹na' coon'¹³ 'in jai'² do. 'Iin 'in Jóon¹ Dios Jesucristo. Joon Jesucristo Dios 'in jai'² joon 'oo¹‑o coon²¹ juncwii²¹ 'e cwo'¹ Dios tsá² 'e jo tyéi¹.  
\v 21 Yʉʉn²¹ tyiia, un'øøi'²¹ yaanaa' coon'¹³ jilee'²¹ dioses 'in gajmeei¹ tsá² 'in jo jai'². Amén.