\id JON  
\h SONA 
\toc1 Sona 
\toc2 Sona 
\toc3 Sona 
\mt1 Sona  
\ib  
\is1 Kapas akom  
\iot I. Iten ei puk: Sona, pun mine a mak lon, püsin pworausan. Wewen ei it Sona: Lisom  
\iot II. Chon makei ei puk: Sona  
\iot III. Itelapemongen ei puk: Kot a pwäri an tong ngeni chon lükün Israel, usun chök an tongei chon Israel.  
\iot IV. Kapas aüchean ei puk: Aramasen eu telinimwen chon lükün Israel mi fokun watte ra ekieksefäl o kul ngeni Kot pokiten än ewe soufos Sona afalafal ngeniir.  
\iot V. Masouen ei puk Sona: Ei puk a sokofesen seni ekewe puken soufos lon Paipel. Lon ei puk a mak pworausen ewe soufos Sona mi aleasolap ngeni mine Kot a akünö ngeni. Kot a üreni Sona pwe epwe feila Ninifa samolun telinimwen ewe mwün Asiria mi fokun watte. Ewe mwün Asiria a fokun oput ewe mwün Israel. Nge Sona esap mochen feila Ninifa o föri mine Kot a akünö ngeni, pun a mefi pwe Kot esap apwönüetä an ekiekin ataela ewe telinimw. Mürin fisin ekoch mettoch mi amwarar ngeni Sona, Sona a asopwisekin aleasochis ngeni Kot. Nge lesopolan a amwünümwünüla, lupwen esap fis ewe feiengau a afalafal usun. Lon ei puk sa küna usun epilolen än Kot nemenem won unusen förian meinisin. Nge mine a kon lap seni ei, pwe Kot a eäni tong o ümöümöch, a mochen amusala tipisin chokewe mi oput nöün aramas o amanaueer, lap seni an epwe apwüngüür o aroserela.  
\iot VI. Tettelin masouen ei puk:  
\io1 Kot a akünöü Sona, nge Sona a aleasolap ngeni \ior 1.1-17\ior*  
\io1 Sona a ekieksefäl o ngasala \ior 2.1-10\ior*  
\io1 Sona a aronga usun feiengauen Ninifa \ior 3.1-10\ior*  
\io1 Kot a eäni ümöümöch ngeni chon Ninifa \ior 4.1-11\ior*  
\c 1  
\s1 Sona a aleasolap ngeni Kot  
\sr 1.1-17  
\p
\v 1 Iwe, lon eu rän ewe Samol mi Lapalap a kapas ngeni Sona nöün Amittai we mwän o üreni, \x + \xo 1.1 \xt 2.King 14.25\x*  
\v 2 “Kopwe ütä o feila Ninifa ewe telinimw mi lapalap, pwe kopwe apwüngü aramasan, pun üa küna ar föför mi fokun ngau.”  
\v 3 Iwe, Sona a ütä, nge esap feila Ninifa, pwe a sü seni fän mesen ewe Samol mi Lapalap. A feila Joppa, nge ikenan a küna efoch sip epwe sai ngeni Tarsis \f + \fr 1.3 \ft Tarsis eu telinimw lon Spain\f*. Iwe, a mönätiu liwinin an sai won ewe sip pwe epwe fiti tori Tarsis, pun a mochen sü seni fän mesen ewe Samol mi Lapalap.   
\p
\v 4 Nge ewe Samol mi Lapalap a tinato eu asepwäl mi pöchökül won matau. Iwe, ewe sip a arap ngeni an epwe ta ren watten ewe mölümöl.  
\v 5 Mürin ekewe säla ra fokun niuokus o köri koten en me fanüan pwe repwe alisiir. Iwe, ra pwal aturala leset üttenen war we sip, pwe epwe pänätä. Nge Sona a tötiu leföön ewe sip, a konola o anutochou.  
\v 6 Iwe, ewe pölü a tötiu ren, a föngüni o apasa, “Pwota ka anutochou? Kopwe pwätä o köri koten fanüom pwe epwe alisikich. Eli epwe tongeekich pwe sisap feiengau.”   
\p
\v 7 Mürin, ekewe säla ra kapasfengen lefiler, “Ou etto, sipwe asisil pwe sipwe silei iö leich a atoto woch ei feiengau.” Nge lupwen ra asisil, a pwä pwe Sona.  
\v 8 Iwe, ra aisini, “Kopwe pwäri ngenikem met popun a torikich ei feiengau? Met wisom? Ia ka feito me ie? Ifa fanüom? En re ia?”  
\v 9 Sona a pälüeniir, “Ngang eman re Ipru. Üa fel ngeni ewe Samol mi Lapalap, ewe Koten läng mi föri matau me fanü.”  
\v 10 Iwe, Sona a pwal üreniir pwe a sü seni fän mesen ewe Samol mi Lapalap. Iwe, ekewe säla ra fokun niuokus o aisini, “Pwota ka föri ei sokun?”  
\v 11 Mürin ra pwal aisini, “Met aipwe föri ngonuk pwe epwe lüala won matau?” Pun nonoon won matau a fokun wattela seni me mwan.  
\v 12 Iwe, Sona a üreniir, “Oupwe aturueitiu leset, mürin epwe lüala won matau. Pun üa silei pwe ei mölümöl mi watte a chök feito womi pokitei.”  
\v 13 Nge ekewe säla ra chök achocho le fatülei war we sip pwe epwe tori fanü. Iwe, nge resap fokun pwäk ngeni, pun ewe mölümöl mi watte a chök aliwiniir.  
\v 14 Iei mine ra siö ngeni ewe Samol mi Lapalap, “Äm Samol mi Lapalap, aia tüngor ngonuk, kose mochen kosap afeiengaua manauem are aipwe angei manauen ätei, nge kosap pwal liwini ngenikem tipisin äm aipwe afeiengaua eman are esap tipis. Pun en, Samol mi Lapalap, ka föri mine ka efich.”  
\v 15 Mürin ra angei Sona o aturätiu lematau. Iwe a lüala won matau.  
\v 16 Ren ei ekewe säla ra fokun niuokusiti ewe Samol mi Lapalap, pwe ra asor ngeni o pwon pwe repwe angang ngeni.  
\v 17 Iwe, ewe Samol mi Lapalap a akünöü eman ik mi watte pwe epwe oromala Sona. Iwe, Sona a nonom lon upwen ewe ik lon ükükün ülüngat rän me ülüngat pwin. \x + \xo 1.17 \xt Mat 12.40\x*   
\c 2  
\s1 Sona a iotekin kilisou  
\sr 2.1-10  
\p
\v 1 Iwe, Sona a iotek ngeni ewe Samol mi Lapalap an we Kot me lon upwen ewe ik. A apasa,   
\q1
\v 2 “Üa köruk, ai Samol mi Lapalap, lon ai riaföü,  
\q1 iwe, ka aüselingaei.  
\q1 Üa siö ngonuk seni lon lenien sotup,  
\q1 nge ka rongorong mweliei.   
\q1
\v 3 Ka aturueitiu fänilolun lukalapen matau,  
\q1 sät a pwelifeiliei,  
\q1 nge no kana ra tekiatä o pwölüeila.   
\q1
\v 4 Iwe, üa ekieki pwe üa pöüt seni fän mesom.  
\q1 Ifa usun, üpwe chüen tongeni künasefäli imwom imwenfel?   
\q1
\v 5 No kana ra pwölüeila pwe üa ächetä ren,  
\q1 üa nonom fänilolun matau,  
\q1 nge irän lematau ra fitti mökürei.   
\q1
\v 6 Üa kokotiu tori lepopun chuk kana,  
\q1 üa tori eu fanü asaman ra lokola tori feilfeilachök.  
\q1 Iwe, nge en, Samol mi Lapalap ai Kot, ka efieita seni epin fanüfan o amanauaei.   
\q1
\v 7 Lupwen üa mefi pwe üpwe le mäla,  
\q1 üa chechemenuk ai Samol mi Lapalap.  
\q1 Iwe, ai iotek a toruk lon imwom mi pin.   
\q1
\v 8 Iwe, chokewe mi fel ngeni uluulun anümwäl mi lomotongau  
\q1 ra likitukela, en echök mi tongeni ümöümöch ngeniir.   
\q1
\v 9 Nge ngang üpwe kölün kilisou ngonuk,  
\q1 üpwe asor ngonuk o föri mine üa eäni pwon ngonuk.  
\q1 Pun en chök, ai Samol mi Lapalap, ka tufichin angasaei.”  
\v 10 Mürin, ewe Samol mi Lapalap a kapas ngeni ewe ik. Iwe, ewe ik a musäsinätä Sona wilifanü.   
\c 3  
\s1 Chon Ninifa ra ekieksefäl  
\sr 3.1-10  
\p
\v 1 Iwe, ewe Samol mi Lapalap a kapas ngeni Sona fän aruuan o üreni,  
\v 2 “Kopwe ütä o feila Ninifa ewe telinimw mi lapalap, pwe kopwe aronga ngeni aramasen lon ewe pworaus üa aiti ngonuk.”  
\v 3 Iei mine Sona a aleasochis ngeni ewe Samol mi Lapalap o feila Ninifa. Iwe, Ninifa eu telinimw mi fokun watte, pun ükükün toauen ach fetal seni epek tori epek ülüngat rän.  
\v 4 Iwe, Sona a tolong lon ewe telinimw ükükün fetalin eu rän. Iwe, a kökö, “Mürin faik rän Ninifa epwe tala.”  
\v 5 Iwe, ekewe chon Ninifa ra lükü än Kot we kapas. Ra arongafeili pwe aramas meinisin seni ekewe aramas tekia tori ekewe aramas kis repwe echikefel o üföüf üf seni tuk, pwe asisilen ar ekieksefäl. \x + \xo 3.5 \xt Mat 12.41; Luk 11.32\x*   
\p
\v 6 Nge lupwen ewe pworaus a tori ewe kingen Ninifa, a ütä seni an lenien motun king, a pwilitawu üfan üfen king o üföüf üf seni tuk, a pwal mot lon falangen ekkei.  
\v 7 Iwe, ewe king a aronga eu kapasen asilesil ngeni chon Ninifa, “Iei än ewe king me nöün kewe nöüwis allük: Esap wor eman aramas are man epwe tongeni mongö are ünümi och.  
\v 8 Nge aramas tori man meinisin repwe üföüf üf seni tuk. Aramas meinisin repwe kechü ngeni Kot fän leüömong. Ewer, eman me eman epwe likitala an lapalap mi ngau me an föför esepwüng.  
\v 9 Eli Kot epwe siwili an ekiek o likitala an song mi fokun watte, pwe sisap mäfeiengau?”  
\v 10 Iwe, lupwen Kot a küna ar ekieksefäl me ar kul seni föförür mi ngau, a siwili an ekiek. Esap chüen ngeniir liwinin ar tipis usun a apasa epwe föri.   
\c 4  
\s1 Sona esap efich pwe Kot a eäni ümöümöch  
\sr 4.1-11  
\p
\v 1 Iwe, lupwen Sona a küna ei, a oput o song ren.  
\v 2 Mürin a iotek ngeni ewe Samol mi Lapalap o apasa, “Ai Samol mi Lapalap, ifa usun, sap iei usun mine üa apasa pwe kopwe föri, lupwen üa chüen nonom won fanüei? Iei popun ai süla Tarsis, pun üa silei pwe en eman Kot mi ümöümöch o lukpwetete, ka pwal songomang o tongotam. Iwe, üa pwal silei pwe ka tipemecheres le siwili om ekiekin afeiengaua aramas kana. \x + \xo 4.2 \xt Eks 34.6\x*  
\v 3 Iei mine, ai Samol mi Lapalap, üa fokun tüngor ngonuk pwe kopwe angei seniei manauei, pun üa efich ai üpwe mäla mwen ai üpwe manau.” \x + \xo 4.3 \xt 1.King 19.4\x*  
\v 4 Iwe, ewe Samol mi Lapalap a aisini Sona, “Ifa usun, mi pwüng om song?”  
\v 5 Iwe, Sona a towu seni ewe telinimw o feila ötiuan. A aüetä eu likachoch o mot fän nürün, a witiwit pwe epwe küna mine epwe fis ngeni ewe telinimw.   
\p
\v 6 Mürin, Kot ewe Samol mi Lapalap a amärätä efoch irä, pwe epwe anürü möküren Sona o angasa seni an weires. Iwe, Sona a fokun pwapwa ren ewe irä.  
\v 7 Iwe, lupwen a tötä mallen rän, Kot a tinato eman man pwe epwe eni uapwalen ewe irä, pwe a pwasala o mäla.  
\v 8 Nge lupwen akkar a tötä, Kot a tinato och asepwäl mi pwichikar seni ötiu. Iwe, akkar a pwichiti möküren Sona pwe a fokun aiengau. Iwe, a tüngor pwe epwe mäla. A pwal apasa, “A mürina ai üpwe mäla mwen ai üpwe manau.”  
\v 9 Iwe, Kot a aisini Sona, “Ifa usun, a pwüng om song ren ewe irä?” Nge Sona a pälüeni, “Mi pwüng ai song, inamwo are üpwe mäla lon ai song.”  
\v 10 Iwe, ewe Samol mi Lapalap a üreni, “Ka achika ewe irä, nge kosap angang ngeni, kosap pwal amärätä. Pun a püsin märitä lon eu pwin, nge a pwal pwasala lon eu pwin.  
\v 11 Nge ifa usun, ngang üsap achika Ninifa ewe telinimw mi lapalap, ia a wor ie lap seni ipükü rüengeröü aramas resamwo silei lefilen öch me ngau, a pwal wor chomong man lon?”