\id 1TI  
\h 1 TIMOTY 
\toc1 Aeuin nöün Paulus Toropwe ngeni Timoty 
\toc2 1. Timoty 
\toc3 1.Tim 
\mt2 Aeuin nöün Paulus Toropwe ngeni  
\mt1 Timoty  
\is1 Kapas akom  
\iot I. Chon makkei ei toropwe: Ewe soukünö Paulus.  
\iot II. A mak ngeni iö: Ngeni ewe alüal Timoty, eman chon angang ngeni Kot.  
\iot III. Itelapemongen ei toropwe: Kapasen öüröür me fön ngeni Timoty lon wisan me an angang ngeni ewe Pworausen Manau.  
\iot IV. Kapas aüchean ei toropwe: Kopwe tümwünü masouen om afalafala ewe Pworausen Manau mi feito seni Kot.  
\iot V. Masouen ei toropwe: Timoty, eman alüal mi souläng seni Asia Kisikis, i nöün eman fefin seni Jutea, nge saman eman re Krik. A chieneni Paulus o alisi i lon an angangen missionari. Aeuin nöün Paulus toropwe ngeni Timoty a kapas usun ülüngat sokun ekiek mi aüchea.  
\ip Ewe aeuin ekiek mi aüchea eu kapasen fön usun än Timoty epwe ü ngeni ekewe afalafal chofona mi fis lon mwichefel. Ei sokun afalafal a nofitifengeni ekiekin chon Juta me ekiekin ekewe aramas sap ir chon Juta. A longolong won ewe lükülük pwe ei fanüfan a ngau, o esap wor eman a küna manau chilon chök ir mi eäni och sokun silelap mi monomon, pwal ir mi tümwünüfichi ar resap mongö ekoch sokun mongö, resap pwal pwüpwülü. Pwal masouen ei toropwe a mak kapasen öüröür usun emweni mwichefel me usun fel ngeni Kot. A pwal aweweni met sokun manau eman chon emweni mwichefel me eman chon alisi epwe manaueni. Lesopolan Paulus a öüröüra Timoty usun an epwe eman nöün Jesus Kraist chon angang mi mürina, pwal usun wisan ngeni ekewe chon lükülük lon ekewe sokopaten mwich.  
\iot VI. Tettelin masouen ei toropwe:  
\io1 Kapas akom \ior 1.1-2\ior*  
\io1 Kapasen öüröür usun angangen lon mwichefel, pwal usun ekewe nöüwis \ior 1.3–3.16\ior*  
\io1 Kapasen öüröür ngeni Timoty usun an angang \ior 4.1–6.21\ior*  
\c 1  
\s1 Kapong  
\sr 1.1-2  
\p
\v 1 Ngang Paulus, eman nöün Kraist Jesus soukünö fän än Kot ach we Chon Amanau allük me Kraist Jesus ach apilükülük,  
\v 2 üa kapong ngonuk Timoty wesewesen nei lon lükülük: Samach Kot me ach Samol Kraist Jesus epwe ngonuk ümöümöch, tong me kinamwe. \x + \xo 1.2 \xt Föf 16.1\x*   
\s1 Kapasen fön usun än Timoty epwe ü ngeni ekewe afalafal chofona  
\sr 1.3-11  
\p
\v 3 Üa mochen pwe kopwe nonometiu lon Efisos, usun üa fen tüngor ngonuk lupwen üa saila Masetonia. Mi wor ekoch aramas ikenan ra afalafalafeili sokun afalafal chofona usun ewe lükülükün souläng. Iwe, kopwe allük ngeniir, pwe repwe ükütiu.  
\v 4 Kopwe üreniir, pwe resap asolapala ar fansoun le apworausa ekewe tutulap me tettelin uruwon ekewe lewo, pun ra chök afisätä anini, nge resap apwönüetä än Kot akot fän itach, ewe sia silei ren ach lükü.  
\v 5 Popun ai ei allük pwe epwe afisätä ewe chen mi pop seni eu leluk mi limöch me eu mwelien letip mi mürina, pwal eu lükülük mi let.  
\v 6 Ekoch aramas ra kul seni ekei sokun mettoch o ra tokola seni aler ren sokopaten kapasen anini mi lomotongau.  
\v 7 Ra mochen asukula än Kot kewe allük, nge resap silei mine ra kapas usun ika ekewe mettoch ra fos won fän watten ar apilükülük.   
\p
\v 8 Kich sia silei pwe ekewe Allük ra mürina are sia eäniir lon met pwüngün.  
\v 9 Sia pwal silei pwe ekewe allük resap för fän iten ekewe chon pwüng, nge ra för fän iten ekewe chon atai allük me chon ü ngeni mwü, fän iten chokewe resap meniniti Kot me chon tipis, fän iten chokewe resap mochen apini manauer me chokewe resap meniniti lamalam, fän iten chokewe mi niela semer me iner, pwal fän iten ekewe chon niela aramas,  
\v 10 fän iten chokewe mi föri föförün lisowu me chokewe mi föri sokun föförün lisowu lefilen mwän me mwän, fän iten chokewe mi soläni aramas me chokewe mi eäni kapas chofona o pwärätä pwärier mi mwäl, pwal fän iten chokewe meinisin mi ü ngeni ewe kapasen Kot mi let sia afalafala.  
\v 11 Ei sokun afalafal a pwä lon ewe Pworausen Manau mi lükülük ngeniei pwe üpwe arongafeili, iei ewe Pworausen Manau seni ewe Kot mi ling o pin.   
\s1 Än Paulus kilisou fän iten än Kot ümöümöch  
\sr 1.12-20  
\p
\v 12 Üa kilisou ngeni Kraist Jesus ach Samol, ewe mi fang ngeniei pöchökül fän iten ai angang. Üa kilisou ngeni ren an ekieki pwe ngang mi allükülük o a awisaei pwe üpwe angang ngeni.  
\v 13 Inamwo ika me lom üa kapasingau usun i, üa ariaföüü o turunufaseei. Nge Kot a eäni tong ngeniei, pun esap mwo wor ai lükülük, iei mine üsap silei mine üa föri. \x + \xo 1.13 \xt Föf 8.3; 9.4-5\x*  
\v 14 Iwe, ach Samol a tinatiu woi an ümöümöch mi somwola o fang ngeniei lükülük me chen mi nom lon Kraist Jesus. \fig Kraist Jesus a feito lon ei fanüfan pwe epwe amanaua chon tipis.|src="avnt089.tif" size="col" loc="87" ref="1.15" \fig*  
\v 15 A allükülük ewe kapas pwe aramas repwe fokun etiwa o lükü: Kraist Jesus a feito lon ei fanüfan pwe epwe amanaua chon tipis. Ngang eman chon tipis mi ngau seniir meinisin.  
\v 16 Nge Kot a eäni tong ngeniei, pwe Kraist Jesus epwe pwärala unusen an mosonotam lon met a föri ngeniei, ngang eman chon tipis mi ngau seniir meinisin, pwe üpwe eu minen awewe ngeni chokewe repwe lükü i me mürin o repwe küna ewe manau esemüch.  
\v 17 Ewe King mi nonom tori feilfeilachök, ewe eman chök Kot, ewe esap tongeni mäla, esap wor eman a tongeni küna, sipwe meniniti o alinga tori feilfeilachök! Amen.   
\p
\v 18 En nei Timoty, üpwe ngonuk ei allük, a usun chök mine ekewe soufos ra apasa usumw me lom. Kopwe aea ekei kapas pwe om pisekin fiu, pwe kopwe mauneni ewe maun mi öch,  
\v 19 kopwe pwal amwöchü om lükülük me eu mwelien letip mi mürina. Ekoch aramas resap rongorong ngeni mwelien letiper, iwe, ra küna wata lon ar lükülük.  
\v 20 Ruoman me leir Himenäus me Aleksanter, ätekei üa likitiir ngeni Satan pwe epwe apwüngüür. Ren ei repwe kaiö pwe repwe ükütiu le turunufasei Kot.   
\c 2  
\s1 Än Paulus kapasen öüröür usun angangen fel  
\sr 2.1-15  
\p
\v 1 Iwe, mwen mettoch meinisin üa pese ngonuk, pwe souläng repwe iotekin tüngor me kilisou ngeni Kot fänäsengesin aramas meinisin,  
\v 2 fänäsengesin ekewe king me ekewe nöüwis meinisin, pwe sipwe manaueni eu manau fän mosonoson me kinamwe, sipwe pwal asamolu Kot o aramasöch ngeni aramas.  
\v 3 Pun iei a mürina o apwapwai Kot ach Chon Amanau,  
\v 4 i ewe mi mochen pwe aramas meinisin repwe küna manau, repwe pwal silei ewe let.  
\v 5 Pun mi wor eman chök Kot, pwal eman chök chon afför lefilen Kot me aramas kana, iei i ewe aramas Kraist Jesus,  
\v 6 i ewe mi fangala püsin manauan, pwe epwe angasala aramas meinisin seni tipis. Iei och minen pwärätä lon fansoun mi fich, pwe Kot a mochen pwe aramas meinisin repwe küna manau.  
\v 7 Iei popun üa fil pwe üpwe eman soukünö me eman senseen ekewe chon lükün Israel ai üpwe arongafeili ewe kapasen lükülük me let. Ngang üa kapas wenechar, üsap chofona. \x + \xo 2.7 \xt 2.Tim 1.11\x*   
\p
\v 8 Üa mochen pwe lon ekewe lenien fel meinisin mwän repwe iotek, ir mwän mi pin fän iten Kot, repwe aitietä pöür lon ar iotek, nge resap song ika anini.   
\p
\v 9 Üa pwal mochen pwe ekewe fefin repwe üföüföch, repwe öüköchü üfer o üföüf sokun üf mi fich ngeni souläng. Resap firesi mökürer ren sokopaten fifires, ika mwärämwär kolt ika fau aüchea ika üföüf üf mi mömong, \x + \xo 2.9 \xt 1.Pet 3.3\x*  
\v 10 nge repwe foute ngeniir föför mürina usun a fich ngeni fefin kana mi souläng.  
\v 11 Ekewe fefin repwe kaiö fän mosonoson me tipetekison.  
\v 12 Üsap mwüt ngeniir pwe repwe asukul ika repwe nemenem won mwän. Repwe fokun tipemosonoson.  
\v 13 Pun Kot a akomwen föri Atam, mürin a föri Efa. \x + \xo 2.13 \xt Ken 2.7,21-22\x*  
\v 14 Iwe, esap Atam a tupula, nge ewe fefin a tupula o atai än Kot allük. \x + \xo 2.14 \xt Ken 3.1-6\x*  
\v 15 Nge ekewe fefin repwe küna manau ren ar nöünöü, are repwe likitü lon ar lükü, lon ar eäni chen, lon ar pin me mirit.   
\c 3  
\s1 Usun ekewe soumasen mwichefel  
\sr 3.1-7  
\p
\v 1 A let ewe kapas: Are eman a mochen wiseni ewe wisen soumasen mwichefel, a tipeni eu angang mi aüchea.  
\v 2 Iwe, eman soumas epwe fokun unusöch lon manauan. Epwe pwülüeni eman chök fefin, epwe tipefesir, epwe tufichin nemeni püsin inisin, epwe mirit, epwe etiwaöchü wasöla, epwe pwal lipwäköch le asukul.  
\v 3 Esap ünüpuch are rochongau, nge epwe tipepwetete o afisätä kinamwe, esap eman mi mochenian moni.  
\v 4 Epwe emwenöchü püsin chon an famili o aörüni ngeni nöün kana ar repwe aleasochis ngeni fän menin.  
\v 5 Pun are eman esap silei usun an epwe emwenöchü püsin chon an famili, ifa usun an epwe tongeni tümwünüöchü mwichefelin Kot?  
\v 6 Esap öch an epwe eman souläng mi fö, pwe ete lamalamtekia o tolong lon kapwüng usun än ewe Tefil küna kapwüng.  
\v 7 Iwe, epwe pwal iteüöch me ren ekewe chon lükün, pwe esap tolong lon itengau o tup lon än Tefil sär. \x + \xo 3.7 \xt Tit 1.6-9\x*   
\s1 Usun ekewe soualilis lon mwichefel  
\sr 3.8-13  
\p
\v 8 Ekewe soualilis repwe usun chök ekewe soumas, repwe aramasöch, resap aweruu, resap ünümong wain ika tipemong won moni.  
\v 9 Repwe kamwöchünük won ewe monomonen lükülük mi let ren mwelien letiper mi limöch.  
\v 10 Iwe, repwe akomwen küna sosot, mürin are a pwä pwe esap wor eman a atipisiir, repwapw alilis lon angangen mwichefel.  
\v 11 Pwal ina chök usun ekewe soualilis fefin repwe aramasöch, resap luapas, repwe tipefesir o allükülük lon mettoch meinisin.  
\v 12 Eman soualilis epwe pwülüeni eman chök fefin, epwe pwal emwenöchü püsin nöün kana me chon an famili.  
\v 13 Iwe, ekana soualilis mi angangöch repwe küna iteüöch me ren aramas, repwe pwal tufichin pworacho le kapas usun ar lükü Kraist Jesus.   
\s1 Usun monomonen ach lükülük  
\sr 3.14-16  
\p
\v 14 Lupwen üa makkei ei toropwe ngonuk, üa apilükülük pwe üpwe müttirila reöm pwe üpwe churuk.  
\v 15 Nge are üpwe mang, ei toropwe epwe afata ngonuk usun ach föför lein chon ewe familien Kot, iei än Kot, ewe mi manau we mwichefel, ewe ürelap me longolongun ewe let.  
\v 16 Kich sia pwärätä pwe a fokun lapalap monomonen ach lükülük:  
\q1 I a pwäla lon fituk,  
\q2 a pwä pwe a pwüng me ren Ngünmifel,  
\q1 chon läng kana ra küna i,  
\q2 chon fanüfan ra rongorong pworausan,  
\q1 won fanüfan mi wor chon lükü itan,  
\q2 Kot a angeatä lon lingan.   
\c 4  
\s1 Ekewe chon afalafal chofona  
\sr 4.1-5  
\p
\v 1 Iwe, ewe Ngünmifel a afata, pwe lon ekewe fansoun mürin ekoch aramas repwe pöütala ar lükülük, repwe rongorong ngeni ekewe ngün mi chofona o aleasochis ngeni aitien ekewe anün rochopwak.  
\v 2 Ekei sokun kapasen kait ra chöüfeil ren ekewe chon chofona mi atuputup, mwelien letiper a mä, ra usun itä nge ra kar ren efoch mächä mi fokun sarara.  
\v 3 Ekei sokun aramas ra afalafala pwe a ngau pwüpwülü, ra pwal apini ekoch sokun mongö. Nge Kot a awora ekei sokun mongö pwe sipwe mongö. Iwe, kich mi lükü o silei ewe let sipwe eni ewe mongö fän ach iotekin kilisou.  
\v 4 Pun meinisin mine Kot a föri a mürina. Esap wor och sipwe oput are sipwe angei fän ach iotekin kilisou,  
\v 5 pun än Kot kapas me ewe iotek ra afisätä pwe epwe mürina me ren Kot.   
\s1 Eman chon angangen Kraist Jesus mi mürina  
\sr 4.6-16  
\p
\v 6 Iwe, are kopwe aiti ngeni pwiüm kewe souläng ekei kapasen öüröür, kopwe eman chon angangen Kraist Jesus mi mürina. Kopwe püsin amongöni ngünum ekewe kapasen lükülük, pwal ekewe kapasen kait ka fen aleasochisi tori ikenai.  
\v 7 Kopwe afäluk ren ekewe tutulap mi ü ngeni ewe kapasen Kot, esap wor lomoten ach sipwe apworausa, nge kopwe chök achocho le asipok lon om souläng.  
\v 8 Pun ach achocho le asipa inisich a atoto ekis chök feiöch, nge ach achocho le asipakich lon ach souläng a atoto rech feiöch meinisin, pun a pwon ngenikich manau lon ei fansoun ikenai pwal lon ekewe fansoun repwe feito.  
\v 9 A allükülük ei kapas pwe aramas repwe fokun etiwa o lükü.  
\v 10 Iei popun sia achocho le angang weires, pun sia anomu ach apilükülük won ewe Kot mi manau, i ewe Chon Amanau fän iten aramas meinisin, nge lapalan fän iten chokewe mi lükü ewe kapasen Kot.   
\p
\v 11 Kopwe afalafala o aiti ngeni ekewe souläng ekei kapasen öüröür me ekei kapasen kait.  
\v 12 Kopwe tümwünuk, pwe esap wor eman epwe urumwoteek pokiten om alüal, nge kopwe eu lenien apirü ngeni ekewe chon lükü lon om kapas, lon om föför, lon om chen, lon om lükülük, pwal lon om limöch.  
\v 13 Tori ai üpwe war, kopwe likitü lon om aleani ekewe Toropwe mi Pin ngeni ekewe souläng, kopwe afalafaleer usun o asukula ngeniir.  
\v 14 Kosap tümwününgau ngeni ewe lifang seni ewe Ngünmifel, a toruk ren än ekewe soufos kapas, lupwen ekewe souakom ra iseis pöür womw.  
\v 15 Kopwe föri pwüngün ekei mettoch o fokun achocho ngeni om kopwe apwönüretä, pwe aramas meinisin repwe küna om fefeitä lon om souläng.  
\v 16 Kopwe püsin tümwünuk, kopwe pwal tümwünü mine ka afalafal won. Kopwe likitü le föri ekei mettoch, pun are kopwe föri iei usun, kopwe püsin amanauok me chokewe mi aüselingok.   
\c 5  
\s1 Pwüngün wisen Timoty ngeni ekewe souläng  
\sr 5.1–6.2  
\p
\v 1 Kosap apwüngüchou eman mwän mi chinlap, nge kopwe chök fönöü usun itä nge om kopwe fönöü semom. Kopwe fönöü ekewe alüal usun itä nge ir pwiüm kewe.  
\v 2 Kopwe fönöü ekewe chinlap fefin usun itä nge ir inelap, kopwe pwal fönöü ekewe föpwül usun itä nge ir fefinom. Kopwe föri ei ren limöchün lelukom.   
\p
\v 3 Kopwe meniniti ekewe fefin mi mä pwülüer, chokewe mi wesewesen akaleman, esap wor eman a tümwünüür.  
\v 4 Nge ika eman fefin mi mä pwülüan a wor nöün ika nöün nöün, ir repwe akomwen apwönüetä pwüngün wiser lon ar souläng ngeni püsin ar famili. Ren ei repwe liwini ngeni semer me iner, pwal ngeni semen me inen semer me iner mine ra piin föri ngeniir, pun iei met Kot a pwapwa ren.  
\v 5 Eman fefin mi mä pwülüan o akaleman, esap wor eman a tümwünü, a anomu an apilükülük won Kot, a sopwela le iotek lerän me lepwin o tüngor ngeni Kot pwe epwe alisi.  
\v 6 Nge eman fefin mi mä pwülüan nge a chök apwapwai inisin lon sokun pwapwan fanüfan, neminei a fen mäla, inamwo ika a chüen manau lon inisin.  
\v 7 Kopwe aiti ngeni ekewe aramas ekei kapasen öüröür, pwe esap wor och mine eman epwe atipisimwäliir won.  
\v 8 Nge are eman esap püsin tümwünü aramasan, fokun püsin chon an famili, a amamäsini an lükülük o an föför a ngau seni föförün eman esap souläng.   
\p
\v 9 Kopwe makkeelong eman fefin mi mä pwülüan lon tettelin ewe mwichen fefin mi mä pwülüer are a ierini wone feitä. Pwal eu, are neminewe a chök pwülüeni eman chök mwän,  
\v 10 a pwal sil me ren aramas ren an föför mürina, a foleniöchü nöün kana, a etiwaöchü wasöla lon imwan, a talü pechen ekewe chon pin, a alisi aramas mi nom lon osupwang o fokun achocho le föri föför mürina fansoun meinisin.   
\p
\v 11 Nge kosap apachalong ekewe fefin mi mä pwülüer lon ewe tettel are ierir a kis seni wone, pun lupwen ra mochen pwüpwülü lon ar mochenia, repwe kul seni Kraist.  
\v 12 Iei usun repwe tipis ren ar atai ar we pwon ngeni Kraist ra eäni me mwan.  
\v 13 Ra pwal aörüni ngeniir ar repwe asolapala ar fansoun ren ar einimweifeil. Nge resap chök asolapala ar fansoun, pwe ra pwal aörüni ngeniir ar epwe luapas o fosolong lon än eman angang, ra kakapas won mettoch esap wiser pwe repwe kapas won.  
\v 14 Iei mine üa mochen pwe ekewe fefin mi mä pwülüer nge ra ier kükün repwe pwüpwülüsefäl, repwe nöünöü o tümwünü angangen lon imwer. Repwe föri ei pwe resap awora ngeni ekewe chon oputakich och popun ar repwe kapasingau usuch.  
\v 15 Pun ekoch me leir ra fen tokola o ra aleasochis ngeni Satan.  
\v 16 Nge are eman souläng fefin a wor ren fefin mi mä pwülüer, i epwe fokun tümwünüür, nge esap wätä won mwichefel och weires, pwe mwichefel epwe tongeni tümwünü ekewe fefin mi mä pwülüer, ir chokewe mi akaleman chök.   
\p
\v 17 Ekewe souakom mi angangöch le emweni mwichefel a aüchea ngeniir ar repwe angei liwiniir fän ruu, fokun ätekewe mi angang weires lon ar afalafal me asukula aramas ewe kapasen Kot.  
\v 18 Pun iei usun mine a mak lon ekewe Toropwe mi Pin, “Kosap föti awen eman ätemwänin kow lupwen a puri ekewe irän wiich, pwe föür repwe towu seni pöör.” A pwal mak, “Eman chon angang epwe angei liwinin.” \x + \xo 5.18 \xt Tut 25.4; Mat 10.10; Luk 10.7\x*  
\v 19 Kosap aüseling ngeni än eman atipisi eman souakom are esap wor ruoman ika ülüman chon pwärätä an tipis. \x + \xo 5.19 \xt Tut 17.6; 19.15\x*  
\v 20 Kopwe apwüngüchou ekewe souakom mi föri tipis mwen mesen souläng meinisin, pwe pwal ekewe ekoch souläng repwe niuokus.   
\p
\v 21 Me mwen mesen Kot me Kraist Jesus me ekewe chon läng mi fil üa fokun allük ngonuk pwe kopwe aleasochis ngeni ekei kapasen öüröür, nge kosap oput eman ika efich eman lon meinisin mine ka föri.  
\v 22 Kosap müttir le iseis poumw won eman om kopwe afeiöchü fän iten ewe angangen ach Samol. Kosap atolongok lon tipisin pwal ekoch aramas. Kopwe püsin tümwünuk om kopwe limöch.  
\v 23 Kosap ünümi koluk echök, nge kopwe ünümi ekis wain pokiten chükünükanom, pwal pokiten ka samau fän chomong.  
\v 24 Tipisin ekoch aramas ra fokun pwäpwäla, ra akomwola mwer lon ewe lenien kapwüng, nge tipisin ekoch a chök pwä me mürin.  
\v 25 Ina chök usun föför mi mürina ra fokun pwäpwäla, inamwo ika ekoch ekei föför resap kon pwäpwäla, nge resap tongeni monola.   
\c 6  
\p
\v 1 Iwe, ätekewe ir amanau repwe fokun asamolu ar kewe masta, pun iei pwüngün mine repwe föri ngeniir, pwe esap wor eman epwe kapasingau usun iten Kot pwal usun ach afalafal.  
\v 2 Nge ekewe amanau mi nom fän nemenien ekewe masta mi souläng resap turunufasei ar kewe masta pokiten ir pwiir souläng. Nge repwe alapala ar achocho le angang ngeniir, pun chokewe mi feiöch seni ar angang, ir chon lükü Kraist ra chen me rer. Ikei ekewe kapas kopwe aiti ngeni ekewe souläng o pese ngeniir pwe repwe aleasochis ngeni.   
\s1 Afalafal chofona me mochenian moni  
\sr 6.3-10  
\p
\v 3 Nge are eman a asukula och sokun kapas, esap pwal tipeeu ngeni ewe kapas enlet än ach Samol me ewe kapasen kait lon ach lamalam,  
\v 4 i a uren lamalamtekia o esap silei och. A chök mochen akanini o afitikoko won kapas mi afisätä lolowo, tipefesen, turunufas me ekiekingau,  
\v 5 pwal fitikoko lefilen aramas. Än ekei aramas ekiek a fokun ngau, resap silei mine a let, ra ekieki pwe ach souläng a awora ngenikich ach win.   
\p
\v 6 Ewer, ach souläng eu win mi lapalap are a wor rech menemenöch. \fig Esap wor och mettoch sia uwalong lon fanüfan, esap pwal wor och sipwe uwawu me lon.|src="avnt090.tif" size="span" loc="55" ref="6.7" \fig*  
\v 7 Pun esap wor och mettoch sia uwalong lon fanüfan, esap pwal wor och mine sipwe uwawu me lon.  
\v 8 Iei mine are a wor anach me üfach sipwe menemenöch ren.  
\v 9 Nge chokewe mi mochen ar repwe pisekisek ra tolong lon sosot o ra tup lon eu särin chomong sokun mochenia mi umwes me afeiengau, ra atururelong lon feiengau me pöütüla.  
\v 10 Pun mochenian moni iei popun sokopaten ngau meinisin. Ekoch mi ekieki ar repwe pisekisek ra mwalech seni ar lükülük o ra püsin aworato wor chomong riaföü mi fokun aweires.   
\s1 Än Paulus kapasen öüröür ngeni Timoty  
\sr 6.11-21  
\p
\v 11 Nge en nöün Kot aramas, kopwe sü seni ekei mettoch meinisin. Kopwe fokun achocho ngeni om kopwe eäni pwüng, soulängöch, lükülük, chen, likitü me kirikiröch.  
\v 12 Kopwe eäni ewe maunen lükülük mi fokun mürina, iwe, kopwe angei ewe manau esemüch, pun iei met Kot a köruk ngeni, lupwen ka pwora le pwärätä om lükülük mwen mesen chomong chon pwärätä.  
\v 13 Üa allük ngonuk mwen mesen Kot mi fang manau ngeni mettoch meinisin, pwal mwen mesen Kraist Jesus mi pwora le pwärätä an lükülük mwen mesen Pontius Pilatus, \x + \xo 6.13 \xt Joh 18.37\x*  
\v 14 pwe kopwe aleasochisi ekei allük fän allükülük, pwe esap wor eman epwe tongeni atipisuk tori ewe rän lupwen ach Samol Jesus Kraist epwe wareto.  
\v 15 An wareto epwe fis lon ewe otun Kot a filätä. Kot i ewe eman chök Sounemenem sipwe mwareiti, i ewe King mi lapalap seni king meinisin, pwal i ewe Samol mi lapalap seni samol meinisin.  
\v 16 I chök ewe eman esap tongeni mäla, a nom lon eu leni mi fokun saram, pwe esap wor eman a tongeni arap ngeni. Esap wor eman a piin küna, esap pwal fokun wor eman epwe tongeni küna i. I epwe angei iteüöch me nemenem tori feilfeilachök! Amen.   
\p
\v 17 Kopwe allük ngeni ekewe mi pisekisek lon mettochun ei fanüfan pwe resap lamalamtekia. Resap pwal anomu ar apilükülük won wöür epwe morola, nge repwe apilükülükü Kot mi fangesom ngenikich mettoch meinisin pwe sipwe feiöch ren.  
\v 18 Kopwe allük ngeniir, pwe repwe föri mine a mürina, pwe repwe pisekisek lon ar föför mürina, repwe kichiöch o mochen alisi aramas.  
\v 19 Ren ei repwe iseis fän iter och wöü epwe eu longolong mi nükünük fän iten ewe fansoun epwe feito. Mürin repwe angei ewe manau, iei ewe enletin manau.  
\v 20 Iwe, en Timoty, kopwe tümwünü met Kot a lükü ngonuk. Kosap aüseling ngeni kapas mi ngau me ekewe kapasen anini mi lomotongau, ekoch aramas ra aita ngeni “silelap”, nge a mwäl rer.  
\v 21 Pun ekoch ra apasa pwe ra eäni ei silelap, iei mine ra tokola seni ar lükülük.  
\p Än Kot ümöümöch epwe nonom remi meinisin.