\id 1TH  
\h 1 Tesalonicenses 
\toc1 Júuˆ e to̱o̱˜ fɨˊ ni˜ jiˋ laꞌuii˜ quiáꞌˉ Paaˉ e catɨ́ɨngˉ dseaˋ seengˋ fɨˊ TESALÓNICA 
\toc2 1 Tesalonicenses 
\toc3 1 Ts. 
\mt1 Júuˆ e to̱o̱˜ fɨˊ ni˜ jiˋ laꞌuii˜ quiáꞌˉ Paaˉ e catɨ́ɨngˉ dseaˋ seengˋ fɨˊ TESALÓNICA 
\c 1  
\p  
\v 1 Jnea˜ Paaˉ, co̱lɨɨng˜ có̱o̱ꞌ˜ Silvano jo̱guɨ Timoteo, jmoꞌˊnaaꞌ e jiˋ la e catɨ́ɨngˉ jaléngꞌˋ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ i̱ seengˋ fɨˊ na fɨˊ Tesalónica, dseaˋ nɨlɨ́ɨngˊnaꞌ dseaˋ quiáꞌˉ Tiquíˆiiꞌ Fidiéeˇ có̱o̱ꞌ˜guɨ Fíiˋnaaꞌ Dseaˋ Jmáangˉ. Jo̱ mɨ́ɨꞌ˜naaꞌ Fidiéeˇ e niꞌɨ́rˉ güeaꞌˆ quiáꞌrˉ jee˜ ꞌnʉ́ꞌˋ jo̱guɨ e nicuǿꞌrˉ ꞌnʉ́ꞌˋ e nilɨseengˋnaꞌ juguiʉ́ˉ júuˆ røøˋ. 
\s1 Guiꞌmáangꞌˇ Fidiéeˇ e calɨcuíingˋ dseaˋ seengˋ fɨˊ Tesalónica Dseaˋ Jmáangˉ 
\p  
\v 2 Jo̱ laco̱o̱ˋ ya̱ꞌˊ mɨ˜ féngꞌˊnaaꞌ Fidiéeˇ, cuǿøˉbaaꞌr guiꞌmáangꞌˇ uii˜ quíiˉ ꞌnʉ́ꞌˋ lajɨɨngˋnaꞌ, jo̱guɨ laco̱o̱ˋ ya̱ꞌˊ mɨ˜ mɨ́ɨꞌ˜naaꞌ Fidiéeˇ, mɨ́ɨꞌ˜baaꞌr la quie̱ˊ tɨˊ uii˜ quíiˉ ꞌnʉ́ꞌˋ cajo̱.  
\v 3 Jo̱guɨ laco̱o̱ˋ ya̱ꞌˊ mɨ˜ féngꞌˊnaaꞌ Tiquíˆiiꞌ Fidiéeˇ, jmiguiéngꞌˊ dsiˋnaaꞌ lají̱i̱ꞌ˜ ta˜ quíiˉnaꞌ e jmooˋnaꞌ laꞌeáangˊ e nɨcajáangꞌ˜ yaang˜naꞌ fɨˊ jaguóˋ Dseaˋ Jmáangˉ; jo̱guɨ jmiguiéngꞌˊ dsiˋnaaꞌ uíiꞌ˜ e ta˜ e nɨcajmeeˇnaꞌ e iáangˋ óoˊnaꞌ laꞌeáangˊ e ꞌneáangˋnaꞌ Dseaˋ Jmáangˉ; jo̱guɨ jmiguiéngꞌˊ dsiˋnaaꞌ cajo̱ jial nɨcateáꞌˉnaꞌ lají̱i̱ꞌ˜ fɨˊ teáangˉnaꞌ có̱o̱ꞌ˜ Dseaˋ Jmáangˉ e sɨjeengˇnaꞌ mɨ˜ nijáaˊtu̱ dseaˋ do.  
\v 4 Dseaˋ rúꞌˋnaaꞌ, ꞌneáamˋ Fidiéeˇ ꞌnʉ́ꞌˋ, jo̱guɨ nɨne˜bɨ́ɨꞌ e íˋbre dseaˋ caguíñꞌˋ ꞌnʉ́ꞌˋ e nɨlɨ́ɨngˊnaꞌ dseaˋ quiáꞌrˉ.  
\v 5 Jo̱ mɨ˜ caguiáˆnaaꞌ júuˆ quiáꞌˉ Dseaˋ Jmáangˉ fɨˊ jee˜ ꞌnʉ́ꞌˋ e quiáꞌˉ jial laangˋ dseaˋ jee˜ dseeˉ quiáꞌrˉ, jaˋ cajmóˆnaaꞌ có̱o̱ꞌ˜ jí̱i̱ꞌ˜ layaang˜ júuˆ quíˉnaaꞌ yee˜naaꞌ, co̱ꞌ caguiáˆnaaꞌ e júuˆ do laꞌeáangˊ có̱o̱ꞌ˜ e ꞌgøngꞌˊ quiáꞌˉ Jmɨguíˋ quiáꞌˉ Fidiéeˇ, jo̱guɨ e lajamꞌˉbaꞌ ta˜ dsiˋnaaꞌ e dseángꞌˉ jábꞌˉ e júuˆ jo̱ cajo̱. Jo̱guɨ nɨñíˆbaꞌ jial nɨcaꞌeeˉnaaꞌ có̱o̱ꞌ˜ ꞌnʉ́ꞌˋ e laco̱ꞌ guiʉ́bˉ niꞌuíingˉ quíiˉnaꞌ. 
\p  
\v 6 Jo̱ ꞌnʉ́ꞌˋ, eeˉbaꞌ laco̱ꞌguɨ la eeˉ jneaꞌˆ laco̱ꞌguɨ la éeˋ Fíiˋnaaꞌ Dseaˋ Jmáangˉ ꞌñiaꞌrˊ cajo̱. Jo̱ jaˋ e lɨ́ɨˊ e cangɨ́ɨngˋnaꞌ iihuɨ́ɨˊ uíiꞌ˜ e caꞌíingꞌ˜naꞌ e júuˆ quiáꞌˉ Dseaˋ Jmáangˉ do, dsʉꞌ iáamˋ óoˊnaꞌ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ.  
\v 7 Jo̱ co̱ꞌ guiʉ́bˉ eeˉ ꞌnʉ́ꞌˋ, jo̱baꞌ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ lɨ˜ se̱ꞌˊ Macedonia có̱o̱ꞌ˜guɨ fɨˊ lɨ˜ se̱ꞌˊ Acaya nɨñirˊ jial ꞌnéˉ érˉ cajo̱.  
\v 8 Jo̱ laꞌeáangˊ có̱o̱ꞌ˜ ꞌnʉ́ꞌˋ, dseaˋ seengˋnaꞌ fɨˊ Tesalónica, jaléngꞌˋ dseaˋ seengˋ fɨˊ lɨ˜ se̱ꞌˊ Macedonia có̱o̱ꞌ˜guɨ fɨˊ lɨ˜ se̱ꞌˊ Acaya nɨcanúurˉ júuˆ quiáꞌˉ Dseaˋ Jmáangˉ. Jo̱ jaléngꞌˋ dseaˋ seengˋ doñiˊ jiéꞌˋ fɨˊ lɨ˜ dséeˊnaaꞌ nɨñirˊ e dseángꞌˉ nɨcajáamꞌ˜ yaang˜naꞌ fɨˊ jaguóˋ Fidiéeˇ. Jo̱ jí̱i̱ꞌ˜ o̱ꞌ ꞌnéˉ féꞌˆguɨ jneaꞌˆ e jo̱ uíiꞌ˜ quíiˆ ꞌnʉ́ꞌˋ,  
\v 9 co̱ꞌ yaam˜ i̱ dseaˋ íˋ nɨsɨ́ꞌrˋ jneaꞌˆ jial mɨ˜ caꞌíingꞌ˜ ꞌnʉ́ꞌˋ júuˆ quiáꞌˉ Dseaˋ Jmáangˉ e léeˊnaaꞌ mɨ˜ caguiéˉnaaꞌ e cangoꞌeeˇnaaꞌ jaléngꞌˋ ꞌnʉ́ꞌˋ, dseaˋ seengˋnaꞌ fɨˊ na fɨˊ Tesalónica. Jo̱guɨ sɨ́ꞌrˋ jneaꞌˆ cajo̱ jial mɨ˜ catʉ́ʉˊnaꞌ e jmiféngꞌˊnaꞌ lɨ́ꞌˆ doñiˊ eeˋ lafaꞌ diée˜ i̱ o̱ꞌ jáꞌˉ, jo̱ lajo̱b canaangˉnaꞌ e jmooˋnaꞌ lají̱i̱ꞌ˜ e iing˜ i̱ Fidiéeˇ i̱ dseángꞌˉ jáꞌˉ do.  
\v 10 Jo̱guɨ féꞌˋbɨr cajo̱ e sɨjeemˇ ꞌnʉ́ꞌˋ e nijáaˊtu̱ Jesús fɨˊ ñifɨ́ˉ i̱ lɨ́ɨngˊ Jó̱o̱ˊ Fidiéeˇ i̱ cajmijí̱ꞌˊtu̱ Fidiéeˇ quiáꞌrˉ jee˜ jaléngꞌˋ ꞌlɨɨ˜. Jo̱ íbˋ dseaˋ i̱ láangˋ jneaa˜aaꞌ có̱o̱ꞌ˜ jaléꞌˋ iihuɨ́ɨˊ eáangˊ e nɨjaquiéengˊ e niꞌíngꞌˋ dseaˋ uíiꞌ˜ jaléꞌˋ dseeˉ quiáꞌrˉ e nɨcaꞌéerˋ. 
\c 2  
\s1 Jaléꞌˋ e cajméeˋ Paaˉ fɨˊ Tesalónica 
\p  
\v 1 Jo̱ ꞌnʉ́ꞌˋ, dseaˋ rúꞌˋnaaꞌ, nɨñíˆbaꞌ guiʉ́ˉ e lɨɨm˜ ta˜ calɨꞌíingˆ jaléꞌˋ e cajmóˆnaaꞌ lajeeˇ cataang˜naaꞌ có̱o̱ꞌ˜ ꞌnʉ́ꞌˋ fɨˊ Tesalónica.  
\v 2 Co̱ꞌ nɨñíbˆ ꞌnʉ́ꞌˋ guiʉ́ˉ e nʉ́ꞌˉguɨ e nidséˆnaaꞌ fɨˊ na, lajeeˇ cataang˜naaꞌ fɨˊ co̱o̱ˋ fɨɨˋ e siiˋ Filipos, eáamˊ gaˋ cajmeángꞌˋ i̱ dseaˋ íˋ jneaꞌˆ, jo̱guɨ féꞌrˋ gaˋ uii˜ quíˉnaaꞌ uíiꞌ˜ e guiaˋnaaꞌ júuˆ quiáꞌˉ Dseaˋ Jmáangˉ. Jo̱ mɨ˜ caguiáˆnaaꞌ e júuˆ jo̱ jee˜ ꞌnʉ́ꞌˋ, ꞌníꞌˋ níibˉ dseaˋ quíˉnaaꞌ; dsʉꞌ jaˋ e lɨ́ɨˊ e jo̱, co̱ꞌ Fidiéebˇ eáangˊ cajmɨcó̱o̱ꞌ˜ quíˉnaaꞌ e calɨseáˋ bíˋ quíˉnaaꞌ e caguiáˆnaaꞌ e júuˆ jo̱.  
\v 3 Jo̱ lají̱i̱ꞌ˜ júuˆ e caguiáˆnaaꞌ jee˜ ꞌnʉ́ꞌˋ do, jmangꞌˉ júuˆ jábꞌˉ, jo̱guɨ e carˋ ngocángˋ dsiˋbaaꞌ caguiáˆnaaꞌ e júuˆ do cajo̱. Jo̱ dseángꞌˉ jaˋ ɨˊ dsiˋbaaꞌ faꞌ e nijmɨgǿøngˋnaaꞌ dseaˋ có̱o̱ꞌ˜ jaléꞌˋ e júuˆ e guiaˋnaaꞌ do.  
\v 4 Jo̱ dseángꞌˉ jaˋ jmooˉbaaꞌ lajo̱, co̱ꞌ Fidiéeˇbingꞌ i̱ caguíngꞌˋ jneaꞌˆ jo̱guɨ cacuøꞌrˊ jneaꞌˆ ta˜ e guiaˋnaaꞌ júuˆ quiáꞌˉ jial laangˋ dseaˋ jee˜ dseeˉ quiáꞌrˉ; jo̱ co̱ꞌ lajo̱b lɨ́ɨˊ, jo̱baꞌ féꞌˋnaaꞌ e júuˆ jo̱. Co̱ꞌ jaˋ ꞌnéˉnaaꞌ e lɨco̱ꞌ nijá̱ˆnaaꞌ guiʉ́ˉ có̱o̱ꞌ˜ jí̱i̱ꞌ˜ dseaˋ jmɨgüíˋ, co̱ꞌ lají̱i̱ꞌ˜ e iing˜ Fidiéeˇbaꞌ jmooˉnaaꞌ, co̱ꞌ jí̱i̱ꞌ˜ íbˋ dseaˋ nɨñirˊ jo̱guɨ nɨcuíirˋ dsiˋnaaꞌ lajaangˋ lajaangˋnaaꞌ.  
\v 5 Jo̱ nɨñíbˆ ꞌnʉ́ꞌˋ guiʉ́ˉ e jí̱i̱ꞌ˜ co̱o̱ˋ néeꞌ˜ jaˋ caféengꞌ˜naaꞌ ꞌnʉ́ꞌˋ có̱o̱ꞌ˜ júuˆ ꞌgooˋ e laco̱ꞌ nijmɨcǿøngꞌˇnaaꞌ ꞌnʉ́ꞌˋ lajeeˇ e ngɨˋnaaꞌ guiaˋnaaꞌ júuˆ quiáꞌˉ Dseaˋ Jmáangˉ, o̱ꞌguɨ cajmóˆnaaꞌ faꞌ e cajmɨgǿøngˋnaaꞌ ꞌnʉ́ꞌˋ e lɨ́ꞌˆ laco̱ꞌ nilíꞌˋnaaꞌ cuuˉ quíˉnaaꞌ; lɨ́ꞌˆ Fidiéeˇbɨguɨ nɨnírˋ lajaléꞌˋ e la.  
\v 6 Jo̱ dseángꞌˉ jaˋ mɨˊ cajmóˆnaaꞌ faꞌ e nijmiféngꞌˊ dseaˋ jneaꞌˆ o̱ꞌguɨ ꞌnʉ́ꞌˋ faꞌ nijmiféngꞌˊnaꞌ jneaꞌˆ o̱ꞌguɨ dseaˋ jiéngꞌˋ cajo̱. Co̱ꞌ nañiˊ faꞌ cuǿømˋbre e jmóˆ jneaꞌˆ e lɨ́ɨˊnaaꞌ lafaꞌ dseaˋ niingˉ i̱ quiʉꞌˊ ta˜ jee˜ ꞌnʉ́ꞌˋ uíiꞌ˜ e lɨ́ɨˊnaaꞌ dseaˋ i̱ casíingˋ Fidiéeˇ i̱ quie̱ˊ júuˆ quiáꞌˉ Dseaˋ Jmáangˉ jee˜ jaléngꞌˋ dseaˋ,  
\v 7 dsʉꞌ jaˋ cajmóˆnaaꞌ lajo̱. Co̱ꞌ guiʉ́bˉ caꞌeeˉnaaꞌ jee˜ ꞌnʉ́ꞌˋ lɨ́ꞌˆ laco̱ꞌ jaangˋ niquiáꞌˆ jiuung˜ jmóoˋbre íˆ jó̱o̱rˊ jo̱guɨ to̱ꞌˋ fɨ́ɨmˋbre laco̱ꞌ catɨ́ɨngˉ co̱ꞌ ꞌneáamˋbre.  
\v 8 Jo̱ co̱ꞌ eáamˊ ꞌneáangˋnaaꞌ ꞌnʉ́ꞌˋ, jo̱baꞌ ii˜naaꞌ e nicuǿøˆnaaꞌ ꞌnʉ́ꞌˋ e júuˆ quiáꞌˉ Fidiéeˇ e quiáꞌˉ jial laangˋ dseaˋ jee˜ dseeˉ quiáꞌrˉ; dsʉꞌ o̱ꞌ dseángꞌˉ jí̱i̱ꞌ˜ júuˆ jo̱ cajo̱, co̱ꞌ cartɨˊ jáangꞌ˜ yee˜baaꞌ song ꞌnéˉ lajo̱ uíiꞌ˜ e ꞌneáangˋnaaꞌ ꞌnʉ́ꞌˋ.  
\v 9 Jo̱guɨ tó̱o̱bˋ áaˊnaꞌ, dseaˋ rúꞌˋnaaꞌ, jial cacuǿøꞌ˜ bíˋ yee˜naaꞌ e cajmóˆnaaꞌ ta˜ e quiáꞌˉ lɨ́ꞌˆjiʉʉꞌ e ꞌnéˉnaaꞌ lajeeˇ taang˜naaꞌ fɨˊ na. Co̱ꞌ ie˜ jo̱ cajmóˆnaaꞌ ta˜ e lɨco̱ꞌ cajneáˉ jo̱guɨ cartɨˊ canʉʉˋ e laco̱ꞌ jaˋ nicuǿøꞌ˜naaꞌ iihuɨ́ɨˊ jí̱i̱ꞌ˜ jaangˋ ꞌnʉ́ꞌˋ lajeeˇ e guiaˋnaaꞌ júuˆ quiáꞌˉ Fidiéeˇ fɨˊ na. 
\p  
\v 10 Jo̱ nɨñíbˆ ꞌnʉ́ꞌˋ, jo̱guɨ nɨñiˊbɨ Fidiéeˇ cajo̱, e eáamˊ guiʉ́ˉ nɨcaꞌeeˉnaaꞌ jee˜ ꞌnʉ́ꞌˋ, dseaˋ lɨ́ɨngˊnaꞌ dseaˋ quiáꞌˉ Dseaˋ Jmáangˉ, jo̱ jaˋ jmooˉnaaꞌ gaˋ có̱o̱ꞌ˜ jí̱i̱ꞌ˜ jaangˋ ꞌnʉ́ꞌˋ, jo̱guɨ lajaléꞌˋbaꞌ e nɨcajmóˆnaaꞌ dseángꞌˉ nɨcajmóˆnaaꞌ røøˋ laco̱ꞌ sɨꞌíbˆ, jo̱guɨ jí̱i̱ꞌ˜ co̱o̱ˋ dseeˉ jaˋ cuǿøngˋ cuǿꞌˉ dseaˋ jneaꞌˆ.  
\v 11-12 Jo̱guɨ ñíˆbɨ ꞌnʉ́ꞌˋ guiʉ́ˉ e nɨcacuǿøꞌ˜baaꞌ ꞌnʉ́ꞌˋ bíˋ jo̱guɨ nɨcajmitiiˉbaaꞌ óoˊnaꞌ lajaangˋ lajaangˋnaꞌ lɨ́ꞌˆ laco̱ꞌguɨ la jmóoˋ jaangˋ tiquiáꞌˆ dseaˋ có̱o̱ꞌ˜ jó̱o̱rˊ. Jo̱guɨ síiꞌ˜naaꞌ ꞌnʉ́ꞌˋ e eeˉbaꞌ røøˋ laco̱ꞌguɨ catɨ́ɨngˉ e jmóoˋ dseaˋ quiáꞌˉ Fidiéeˇ, co̱ꞌ íbˋ catǿꞌrˉ ꞌnʉ́ꞌˋ e nimóˆnaꞌ jial tíiˊ niingˉ ꞌgøiñꞌˊ jo̱guɨ jial quiʉꞌrˊ ta˜ fɨˊ laꞌúngˉ fɨˊ jmɨgüíˋ. 
\p  
\v 13 Jo̱ uíiꞌ˜ jo̱baꞌ contøøngˉ cuǿøˉnaaꞌ guiꞌmáangꞌˇ Fidiéeˇ, dsʉco̱ꞌ mɨ˜ laꞌuii˜ canʉ́ʉˉ ꞌnʉ́ꞌˋ e júuˆ quiáꞌˉ Dseaˋ Jmáangˉ e caguiሠjneaꞌˆ jee˜ ꞌnʉ́ꞌˋ, dsifɨbˊ caꞌíingꞌ˜naꞌ e júuˆ jo̱, co̱ꞌ calɨlíꞌˆbaꞌ e quiáꞌˉ Fidiéeˇ e júuˆ jo̱, jo̱ o̱ꞌ quiáꞌˉ dseaˋ jmɨgüíˋ. Dsʉco̱ꞌ dseángꞌˉ lajamꞌˉbaꞌ e júuˆ e caguiáˆnaaꞌ do lɨ́ɨˊ júuˆ quiáꞌˉ Fidiéebˇ, jo̱ laꞌeáangˊ Fidiéebˇ cajo̱ jmóoˋ ta˜ e júuˆ jo̱ fɨˊ áaˊnaꞌ có̱o̱ꞌ˜ jaléꞌˋ e jmooˋnaꞌ, ꞌnʉ́ꞌˋ dseaˋ jáꞌˉ lɨ́ɨngˋnaꞌ júuˆ quiáꞌˉ Dseaˋ Jmáangˉ.  
\v 14 Jo̱guɨ jaléngꞌˋ ꞌnʉ́ꞌˋ, dseaˋ rúꞌˋnaaꞌ, mɨ˜ caꞌíingꞌ˜naꞌ jaléꞌˋ iihuɨ́ɨˊ e cacuøˊ dseaˋ góoˊnaꞌ uíiꞌ˜ e lɨ́ɨngˊnaꞌ dseaˋ quiáꞌˉ Dseaˋ Jmáangˉ, røøbˋ caꞌíingꞌ˜naꞌ e jo̱ laco̱ꞌguɨ caꞌíngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ lɨ˜ se̱ꞌˊ Judea, dsʉco̱ꞌ lajo̱b iihuɨ́ɨˊ cangáˉ íˋ cajo̱ e cacuøˊ dseaˋ góorˋ dseaˋ Israel.  
\v 15 Jo̱ i̱ lɨɨng˜ i̱ dseaˋ Israel cajo̱, íbˋ i̱ cajngangꞌˊ jaléngꞌˋ dseaˋ rúiñꞌˋ i̱ caféꞌˋ cuaiñ˜ quiáꞌˉ Fidiéeˇ malɨɨ˜guɨ eáangˊ. Jo̱ mɨ˜ cangɨ́ˋguɨ e jo̱, i̱ lɨɨng˜guɨ i̱ dseaˋ íˋ cajngaiñꞌˊ Fíiˋnaaꞌ Dseaˋ Jmáangˉ i̱ lɨ́ɨngˊ dseaˋ góorˋ cajo̱. Jo̱guɨ i̱ lɨɨng˜guɨiñꞌ do cajmeáiñꞌˋ gaˋ jneaꞌˆ cajo̱, dseaˋ lɨ́ɨˊnaaꞌ dseaˋ quiáꞌˉ Dseaˋ Jmáangˉ. Jo̱ jaˋ jmóorˋ laco̱ꞌ tɨˊ dsíiˊ Fidiéeˇ, jo̱guɨ ꞌníꞌˋ níimˉbre lajaléngꞌˋguɨ dseaˋ jmɨgüíˋ cajo̱.  
\v 16 Co̱ꞌ mɨ˜ ii˜naaꞌ guiáˆnaaꞌ júuˆ quiáꞌˉ Dseaˋ Jmáangˉ jee˜ jaléngꞌˋ dseaˋ i̱ jaˋ lɨ́ɨngˊ dseaˋ Israel e laco̱ꞌ jial nileáiñˋ jee˜ dseeˉ quiáꞌrˉ, dsʉꞌ i̱ dseaˋ Israel do jaˋ cacuøꞌrˊ jneaꞌˆ fɨˊ lajo̱, jo̱ lajo̱baꞌ eáamˊ nɨcajmɨꞌmɨ́ɨiñꞌ˜ dseeˉ quiáꞌrˉ uíiꞌ˜ jaléꞌˋ e nɨcajméerˋ do. Jo̱baꞌ lanaguɨ catɨ́bˋ íꞌˋ quiáꞌˉ i̱ dseaˋ do e niꞌíñꞌˋ iihuɨ́ɨˊ e eáangˊ e jáaˊ quiáꞌˉ Fidiéeˇ. 
\s1 Mɨ˜ caꞌɨ́ˋ dsíiˊ Paaˉ e nidséˉtu̱r fɨˊ Tesalónica 
\p  
\v 17 Jo̱ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ, e mɨ˜ cangohuíingˉnaaꞌ quíiˉ ꞌnʉ́ꞌˋ e huǿømˉjiʉ, nañiˊ faꞌ jaˋ neeng˜ rúꞌˋnaaꞌ dseángꞌˉ lana, dsʉꞌ contøømˉ guiing˜ dsiˋnaaꞌ uii˜ quíiˉnaꞌ, jo̱ dseángꞌˉ ii˜naaꞌ faꞌ e dsiꞌeebˇtú̱u̱ꞌ ꞌnʉ́ꞌˋ fɨˊ na caléꞌˋ catú̱ˉ.  
\v 18 Jo̱ cajmóˆbaaꞌ quijí̱ˉ e nidséˆnaaꞌ fɨˊ na; jo̱ jnea˜ Paaˉ, eáangˊguɨ jmiguiʉˊ ya̱ꞌˊ cajméˉe quijí̱ˉ e ninii˜tú̱u̱ fɨˊ na, dsʉꞌ fii˜ i̱ ꞌlɨngꞌˆ i̱ siiˋ Satanás cajnirˊ fɨˊ quíˉnaaꞌ e jaˋ cajmóˆnaaꞌ lajo̱.  
\v 19 Jo̱ yaam˜ ꞌnʉ́ꞌˋ dseaˋ cuøꞌˊnaꞌ jneaꞌˆ e tab˜ dsiˋnaaꞌ jo̱guɨ e iáangˋ dsiˋnaaꞌ jo̱guɨ e guiʉ́bˉ féꞌˋnaaꞌ uii˜ quíiˉnaꞌ. Co̱ꞌ dseángꞌˉ ꞌnʉ́ꞌˋbingꞌ i̱ nicuǿꞌˉ jneaꞌˆ e iáangˋ dsiˋnaaꞌ mɨ˜ tɨˊ lɨ˜ nitɨ́ˉ íꞌˋ e nijáaˊtu̱ Fíiˋnaaꞌ Dseaˋ Jmáangˉ fɨˊ jmɨgüíˋ la.  
\v 20 Dsʉꞌ e jábꞌˉ, dseángꞌˉ ꞌnʉ́ꞌˋbingꞌ i̱ cuøꞌˊ jneaꞌˆ e guiʉ́bˉ féꞌˋnaaꞌ uii˜ quíiˉnaꞌ jo̱guɨ e nijmiꞌiáangˋ dsiˋnaaꞌ uii˜ quíiˉnaꞌ cajo̱. 
\c 3  
\s1 Paaˉ casíiñˋ Timoteo fɨˊ Tesalónica 
\p  
\v 1 Jo̱ co̱ꞌ eáamˊ calɨꞌiin˜n e ninuu˜u júuˆ quíiˉnaꞌ caléꞌˋ catú̱ˉ, jo̱baꞌ caꞌɨ́ˋ dsiiˉ e guiʉ́ˉguɨ e cajá̱ˋbaa ꞌñiáꞌˋa fɨˊ la fɨˊ Atenas,  
\v 2 jo̱ casɨ́ɨnˉn fɨˊ na jaangˋ dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ i̱ siiˋ Timoteo. Jo̱ i̱ dseaˋ íˋ lɨ́ɨiñˊ jaangˋ dseaˋ i̱ jmóoˋ lají̱i̱ꞌ˜ e iing˜ Fidiéeˇ, jo̱guɨ jmóorˋ ta˜ røøˋ có̱o̱ꞌ˜ jnea˜ e guiaˋnaaꞌ júuˆ quiáꞌˉ Dseaˋ Jmáangˉ. Jo̱ casɨ́ɨnˉnre fɨˊ na e laco̱ꞌ dsiꞌeer˜ ꞌnʉ́ꞌˋ jo̱guɨ tíiˊ nir˜ jial seengˋnaꞌ jo̱guɨ cuøꞌrˊ ꞌnʉ́ꞌˋ bíˋ e laco̱ꞌ teáangˉnaꞌ teáˋ có̱o̱ꞌ˜ júuˆ quiáꞌˉ Dseaˋ Jmáangˉ.  
\v 3 Jo̱ casɨ́ɨnˉnre fɨˊ na e laco̱ꞌ jí̱i̱ꞌ˜ jaangˋ ꞌnʉ́ꞌˋ, dseaˋ seengˋnaꞌ fɨˊ na fɨˊ Tesalónica, nijmɨtúngˆ óoˊnaꞌ có̱o̱ꞌ˜ jaléꞌˋ iihuɨ́ɨˊ e móoˉnaꞌ uíiꞌ˜ e nɨlɨ́ɨngˊnaꞌ dseaˋ quiáꞌˉ Dseaˋ Jmáangˉ. Dsʉco̱ꞌ nɨñíˆbɨꞌ e dseángꞌˉ nɨsɨꞌíˆbaꞌ e nidsingɨ́ɨngˉnaaꞌ iihuɨ́ɨˊ uíiꞌ˜ e lɨ́ɨngˊnaaꞌ dseaˋ quiáꞌˉ Dseaˋ Jmáangˉ.  
\v 4 Jo̱ nɨñíbˆ ꞌnʉ́ꞌˋ guiʉ́ˉ e lajeeˇ e taam˜bɨ́ɨꞌ fɨˊ na có̱o̱ꞌ˜ ꞌnʉ́ꞌˋ, cajmóꞌˆbaaꞌ ꞌnʉ́ꞌˋ júuˆ e dseángꞌˉ nidsingɨ́ɨmˉbaaꞌ jaléꞌˋ iihuɨ́ɨˊ uíiꞌ˜ e lɨ́ɨˊnaaꞌ dseaˋ quiáꞌˉ Dseaˋ Jmáangˉ, jo̱ lajo̱b lɨ́ɨˊ e calɨ́ˉ.  
\v 5 Jo̱ co̱ꞌ lahuɨ́ɨmˊ calɨꞌiin˜n calɨñiiˉ júuˆ quíiˉnaꞌ, jo̱baꞌ casɨ́ɨnˉn Timoteo fɨˊ na e laco̱ꞌ calɨñiiˉ jial seengˋnaꞌ lají̱i̱ꞌ˜ fɨˊ teáangˉnaꞌ có̱o̱ꞌ˜ Dseaˋ Jmáangˉ. Co̱ꞌ jmoobˉ jneaꞌˆ fɨꞌíˆ fɨng song fii˜ i̱ ꞌlɨngꞌˆ casíñꞌˋ ꞌnʉ́ꞌˋ fɨˊ gaˋ. Dsʉco̱ꞌ fɨng song lajo̱, jaˋ e ta˜ nilɨꞌíingˆ lají̱i̱ꞌ˜ ta˜ quíˆnaaꞌ e nɨcajmóˆnaaꞌ jee˜ ꞌnʉ́ꞌˋ fɨˊ na jóng. 
\s1 Mɨ˜ caguiéngꞌˉtu̱ Timoteo fɨˊ Atenas 
\p  
\v 6 Dsʉꞌ lanaguɨ nɨcagüeamꞌˉ Timoteo e jaiñꞌˊ fɨˊ na fɨˊ Tesalónica, jo̱ quié̱e̱rˋ jmangꞌˉ júuˆ guiʉ́bˉ quíiˉnaꞌ e teábˋ teáangˉnaꞌ có̱o̱ꞌ˜ júuˆ quiáꞌˉ Dseaˋ Jmáangˉ jo̱guɨ e ꞌneáamˋbaꞌ dseaˋ rúngꞌˋnaꞌ. Jo̱guɨ jíngꞌˉguɨ Timoteo e contøømˉ dséngꞌˊ óoˊ ꞌnʉ́ꞌˋ jneaꞌˆ, co̱ꞌ eáamˊ ꞌneáangˋnaꞌ jneaꞌˆ, jo̱guɨ eáamˊ iing˜naꞌ nimáang˜tu̱ꞌ jneaꞌˆ laco̱ꞌguɨ jneaꞌˆ ii˜naaꞌ e nineeng˜tú̱u̱ꞌ ꞌnʉ́ꞌˋ.  
\v 7 Jo̱ lajo̱b lɨ́ɨˊ, dseaˋ rúꞌˋnaaꞌ, e jee˜ jaléꞌˋ iihuɨ́ɨˊ e íingꞌ˜naaꞌ có̱o̱ꞌ˜guɨ e jmángꞌˋ dseaˋ gaˋ jneaꞌˆ, jee˜ jo̱b quiéengˋ e jmiꞌiáangˋ dsiˋnaaꞌ mɨ˜ calɨne˜naaꞌ e teáˋ teáangˉnaꞌ có̱o̱ꞌ˜ júuˆ quiáꞌˉ Dseaˋ Jmáangˉ.  
\v 8 Jo̱ mɨ˜ calɨne˜naaꞌ e jo̱, jo̱baꞌ cuøꞌˊguɨ bíˋ jneaꞌˆ lají̱i̱ꞌ˜ fɨˊ té̱e̱ˉnaaꞌ có̱o̱ꞌ˜ Dseaˋ Jmáangˉ.  
\v 9 Jo̱baꞌ ɨˊ dsiiˉ jial cuǿøngˋ e nicuǿøꞌ˜naaꞌ Fidiéeˇ jmiguiʉˊguɨ guiꞌmáangꞌˇ uii˜ quíiˉ ꞌnʉ́ꞌˋ jo̱guɨ uii˜ quiáꞌˉ e jmiꞌiáangˋ dsiˋ jneaꞌˆ uii˜ quíiˉ ꞌnʉ́ꞌˋ fɨˊ quinirˇ ꞌñiaꞌrˊ cajo̱.  
\v 10 Jo̱guɨ uǿøˋ jmɨ́ɨbˋ dseángꞌˉ mɨ́ɨꞌ˜naaꞌ Fidiéeˇ e nijmɨcó̱o̱ꞌr˜ jneaꞌˆ e nineeng˜tu̱ rúꞌˋnaaꞌ fɨˊ na caléꞌˋ catú̱ˉ, jo̱guɨ e nijmɨcó̱o̱ꞌˇguɨ́ɨꞌ ꞌnʉ́ꞌˋ jial laco̱ꞌ nisíngꞌˉguɨꞌ teáˋ có̱o̱ꞌ˜ júuˆ quiáꞌˉ Dseaˋ Jmáangˉ cartɨˊ niꞌiéꞌˋ quíiˉnaꞌ laco̱ꞌ sɨꞌíˆ. 
\p  
\v 11 Jo̱ mɨ́ɨꞌ˜naaꞌ Fidiéeˇ i̱ lɨ́ɨngˊ Tiquíˆiiꞌ do có̱o̱ꞌ˜ Fíiˋnaaꞌ Jesús, e nijmɨcó̱o̱ꞌr˜ jneaꞌˆ e laco̱ꞌ nilíꞌˋnaaꞌ nineeng˜tu̱ rúꞌˋnaaꞌ caléꞌˋ catú̱ˉ fɨˊ na fɨˊ Tesalónica.  
\v 12 Jo̱guɨ mɨ́ɨꞌ˜naaꞌ Fíiˋnaaꞌ Dseaˋ Jmáangˉ e nijmɨcó̱o̱ꞌr˜ ꞌnʉ́ꞌˋ e nilɨꞌneáangˋguɨꞌ dseaˋ rúngꞌˋnaꞌ lɨ́ꞌˆ lajaléngꞌˋ dseaˋ laco̱ꞌguɨ jneaꞌˆ eáamˊ ꞌneáangˋnaaꞌ jaléngꞌˋ ꞌnʉ́ꞌˋ cajo̱.  
\v 13 Jo̱guɨ mɨ́ɨꞌ˜naaꞌr cajo̱ e nijmɨcó̱o̱ꞌr˜ ꞌnʉ́ꞌˋ e laco̱ꞌ jaˋ nilɨtúngˉ áaˊnaꞌ lají̱i̱ꞌ˜ fɨˊ nɨteáangˉnaꞌ có̱o̱ꞌ˜ Dseaˋ Jmáangˉ, jo̱guɨ e nilíingˉguɨꞌ dseángꞌˉ dseaˋ quiáꞌˉ Tiquíˆiiꞌ Fidiéeˇ i̱ joˋ dseeˉ seaˋ quiáꞌˉ fɨˊ quiniˇ dseaˋ do mɨ˜ nitɨ́ˉ íꞌˋ e nigüéengˉtu̱ Fíiˋnaaꞌ Jesús fɨˊ jmɨgüíˋ la co̱lɨɨng˜ có̱o̱ꞌ˜ jaléngꞌˋ dseaˋ quiáꞌrˉ. Jo̱ lajo̱b ꞌnéˉ lɨti˜. 
\c 4  
\s1 Jial iáangˋ dsíiˊ Fidiéeˇ có̱o̱ꞌ˜ jneaa˜aaꞌ 
\p  
\v 1 Jo̱ lanaguɨ, dseaˋ rúꞌˋnaaꞌ, nɨcaꞌéeˆbaaꞌ ꞌnʉ́ꞌˋ jial seengˋnaꞌ e laco̱ꞌ iáangˋ dsíiˊ Fidiéeˇ lɨ́ꞌˆ laco̱ꞌguɨ seengˋnaꞌ lana. Jo̱baꞌ mɨ́ɨꞌ˜bɨ́ɨꞌ ꞌnʉ́ꞌˋ jo̱guɨ síiꞌ˜bɨ́ɨꞌ ꞌnʉ́ꞌˋ cajo̱ laꞌeáangˊ có̱o̱ꞌ˜ Fíiˋnaaꞌ Jesús e güɨlɨseemˋbaꞌ laco̱ꞌguɨ la iáangˋ dsíiˊ Fidiéeˇ, jo̱ jméeˆbɨꞌ lajo̱ cajo̱. 
\p  
\v 2 Co̱ꞌ ꞌnʉ́ꞌˋ nɨñíˆbaꞌ guiʉ́ˉ jaléꞌˋ e nɨcaꞌéeˆnaaꞌ ꞌnʉ́ꞌˋ, jo̱ e jo̱ nɨcajmóˆnaaꞌ laꞌeáangˊ có̱o̱ꞌ˜ Fíiˋnaaꞌ Jesús.  
\v 3 Co̱ꞌ lají̱i̱ꞌ˜ e iing˜ Fidiéeˇ e lɨ́ɨngˊnaꞌ dseángꞌˉ dseaˋ quiábꞌˉ dseaˋ do e jaˋ jméeˆnaꞌ jaléꞌˋ e lɨ́ˋ dsíiˊ ngúuˊ táangˋnaꞌ.  
\v 4 Co̱ꞌ iing˜ Fidiéeˇ e lajaangˋ lajaangˋ ꞌnʉ́ꞌˋ ñíˆnaꞌ jial ꞌnéˉ eeˉnaꞌ røøˋ có̱o̱ꞌ˜ lají̱i̱ꞌ˜ dseamɨ́ˋ quíiˉnaꞌ, jo̱guɨ jial ꞌnéˉ e jmɨꞌgooˋnaꞌre cajo̱ laco̱ꞌ catɨ́ɨngˉ.  
\v 5 Co̱ꞌ jaˋ catɨ́ɨngˉ e jméeˆnaꞌ jaléꞌˋ e jaˋ dseengˋ lajo̱ laco̱ꞌguɨ la jmóoˋ dseaˋ jmɨgüíˋ i̱ jaˋ cuíingˋ Fidiéeˇ e suuiñˋ dseaˋ i̱ o̱ꞌ quiáꞌrˉ.  
\v 6 Dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, jaˋ cuǿøngˋ e jí̱i̱ꞌ˜ jaangˋ dseañʉꞌˋ nijmérˉ jaléꞌˋ e jaˋ dseengˋ lajo̱ e nijmɨgǿøiñˋ jaangˋguɨ dseaˋ rúiñꞌˋ dseaˋ quiáꞌˉ Dseaˋ Jmáangˉ lɨ́ꞌˆ laco̱ꞌguɨ jí̱i̱ꞌ˜ e nɨcafɨ́ɨˉɨ ꞌnʉ́ꞌˋ na. Dsʉꞌ iihuɨ́ɨˊ eáamˊ nicuǿꞌˉ Fidiéeˇ jaléngꞌˋ i̱ dseaˋ i̱ jmóoˋ lajo̱ lɨ́ꞌˆ laco̱ꞌguɨ ꞌgooˋ nɨcaꞌíˆnaaꞌ quíiˉnaꞌ jéengˊguɨ.  
\v 7 Dsʉco̱ꞌ jaˋ catǿꞌˉ Fidiéeˇ jneaa˜aaꞌ faꞌ e nijmóˆnaaꞌ jaléꞌˋ e ꞌlɨꞌˆ, co̱ꞌ catǿꞌrˉ jneaa˜aaꞌ e lɨ́ꞌˆ laco̱ꞌ nilɨse̱e̱ˉnaaꞌ e lɨ́ɨˊnaaꞌ dseángꞌˉ dseaˋ quiáꞌˉbre.  
\v 8 Jo̱ doñiˊ i̱i̱ˋ dseaˋ i̱ guiaˊ caꞌˊ e júuˆ quiáꞌˉ Dseaˋ Jmáangˉ e guiaˋ jnea˜ do, jo̱baꞌ jaˋ ꞌnéˉ ɨ́ˉ dsíirˊ e júuˆ quiáꞌˉ dseaˋ jmɨgüíˋ e guiarˊ caꞌˊ do, co̱ꞌ júuˆ quiáꞌˉ Fidiéebˇ e jo̱. Jo̱ Fidiéebˇ cajo̱ i̱ cacuøꞌˊ jneaa˜aaꞌ dseángꞌˉ Jmɨguíˋ quiáꞌrˉ. 
\p  
\v 9 Jo̱ joˋ ꞌnéˉ faꞌ jnea˜guɨ nifɨ́ɨˆɨ ꞌnʉ́ꞌˋ e ꞌnéˉ nijmiꞌneáangˋ rúngꞌˋnaꞌ laꞌóꞌˋ lɨ́ɨngˊnaꞌ dseaˋ quiáꞌˉ Dseaˋ Jmáangˉ, dsʉco̱ꞌ ꞌñiabꞌˊ Fidiéeˇ nɨcaꞌeꞌrˊ ꞌnʉ́ꞌˋ jial nijmiꞌneáangˋnaꞌ dseaˋ rúngꞌˋnaꞌ.  
\v 10 Jo̱guɨ lajo̱b jmooˋ ꞌnʉ́ꞌˋ, dseaˋ rúꞌˋnaaꞌ, co̱ꞌ ꞌneáangˋnaꞌ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ laꞌúngˉ lɨ˜ se̱ꞌˊ Macedonia. Jo̱ síiꞌ˜guɨ́ɨꞌ ꞌnʉ́ꞌˋ e güɨlɨꞌneáangˋguɨ rúngꞌˋnaꞌ laco̱o̱ˋ jmɨɨ˜ laco̱o̱ˋ jmɨɨ˜.  
\v 11 Jo̱guɨ jmɨꞌúungˋnaꞌ e nilɨseengˋnaꞌ juguiʉ́ˉ júuˆ røøˋ có̱o̱ꞌ˜ jaléngꞌˋ dseaˋ, jo̱guɨ jaˋ jmooˋnaꞌ e quɨ́ngꞌˋnaꞌ lɨ˜ jaˋ catɨ́ɨngˉnaꞌ, jo̱guɨ jmeeˇnaꞌ ta˜ có̱o̱ꞌ˜ layaang˜ guóoˋnaꞌ lɨ́ꞌˆ laco̱ꞌguɨ nɨcasíiꞌ˜naaꞌ ꞌnʉ́ꞌˋ lamɨ˜ jéengˊguɨ do.  
\v 12 Jo̱ lajo̱b ꞌnéˉ jméeˆnaꞌ e laco̱ꞌ nijmɨꞌgóˋ jaléngꞌˋ dseaˋ i̱ jaˋ cuíingˋ Dseaˋ Jmáangˉ ꞌnʉ́ꞌˋ jo̱guɨ e laco̱ꞌ nilɨseabˋ jaléꞌˋ e ꞌnéˉ quíiˉnaꞌ cajo̱. 
\s1 Mɨ˜ nijáaˊtu̱ Dseaˋ Jmáangˉ fɨˊ jmɨgüíˋ la 
\p  
\v 13 Jo̱ e labaꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ, co̱ꞌ ii˜ jneaꞌˆ faꞌ e ꞌnʉ́ꞌˋ nilɨñíˆnaꞌ jial lɨ́ɨˊ có̱o̱ꞌ˜ jaléngꞌˋ dseaˋ quiáꞌˉ Dseaˋ Jmáangˉ i̱ nɨcajúngˉ e laco̱ꞌ jaˋ cuǿꞌˆ fɨꞌíˆ yaang˜naꞌ laco̱ꞌguɨ la jmóoˋ dseaˋ i̱ jaˋ jáꞌˉ lɨ́ɨngˋ e jí̱ꞌˊtu̱ jaléngꞌˋ ꞌlɨɨ˜.  
\v 14 Jo̱ co̱ꞌ jábꞌˉ lɨ́ɨˋnaaꞌ e cajúmˉ Jesús jo̱guɨ cají̱bꞌˊtu̱r caléꞌˋ catú̱ˉ, jo̱baꞌ lajo̱b jáꞌˉ lɨ́ɨˋnaaꞌ cajo̱ e Fidiéeˇ có̱o̱ꞌ˜guɨ Jesús nijmérˉ e nijí̱ꞌˊtu̱ jaléngꞌˋ dseaˋ quiáꞌrˉ i̱ cajúngˉ e jáꞌˉ lɨ́ɨiñˋ júuˆ quiáꞌrˉ. 
\p  
\v 15 Jo̱baꞌ síiꞌ˜guɨ́ɨꞌ ꞌnʉ́ꞌˋ, dseaˋ rúꞌˋnaaꞌ, lɨ́ꞌˆ laco̱ꞌguɨ júuˆ e caꞌeˊ Fíiˋnaaꞌ Dseaˋ Jmáangˉ, e jaléngꞌˋ jneaa˜aaꞌ, dseaˋ lɨ́ɨˊnaaꞌ dseaˋ quiáꞌrˉ, e se̱e̱ˉbɨ́ɨꞌ mɨ˜ tɨˊ lɨ˜ nitɨ́ˉ íꞌˋ e nigüéengˉtu̱r fɨˊ jmɨgüíˋ la caléꞌˋ catú̱ˉ, jaˋ nidseáꞌˆnaaꞌ có̱o̱ꞌr˜ jéengˊguɨ laco̱ꞌguɨ dseaˋ quiáꞌrˉ i̱ nɨcajúngˉ lamɨ˜ jéengˊguɨ.  
\v 16 Jo̱ ie˜ jo̱ nijgiáangˋ Fíiˋnaaꞌ Dseaˋ Jmáangˉ fɨˊ lɨ˜ guiiñ˜ fɨˊ ñifɨ́ˉ. Jo̱ lajeeˇ jo̱ ninʉ́ꞌˋ luu˜ Fidiéeˇ e quiʉꞌrˊ ta˜ fɨˊ yʉ́ꞌˆ jmɨgüíˋ, jo̱guɨ ninʉ́ꞌˋ e guiniféꞌˋ jaangˋ ángel i̱ niingˉguɨ lajeeˇ lajaléngꞌˋ, jo̱guɨ ninʉ́ꞌˋ e niꞌi̱i̱˜ lúuˊ trompéꞌˆ quiáꞌˉ Fidiéeˇ fɨˊ yʉ́ꞌˆ jmɨgüíˋ cajo̱. Jo̱guɨ jaléngꞌˋ dseaˋ quiáꞌˉ Dseaˋ Jmáangˉ i̱ nɨcajúngˉ, íˋbingꞌ i̱ nijí̱ꞌˊtu̱ laꞌuii˜ mɨ˜ nitɨ́ˉ e íꞌˋ jo̱.  
\v 17 Jo̱ mɨ˜ ningɨ́ˋ jo̱, jaléngꞌˋ jneaa˜aaꞌ, dseaˋ i̱ jí̱ꞌˋguɨ, co̱lɨɨm˜ nidseáꞌˆnaaꞌ có̱o̱ꞌr˜ fɨˊ guiáꞌˆ güíˋ, jo̱ nijí̱ꞌˊ rúꞌˋnaaꞌ có̱o̱ꞌ˜ Fíiˋnaaꞌ Dseaˋ Jmáangˉ fɨˊ yʉ́ꞌˆ jmɨgüíˋ, jo̱ lajo̱b nilɨse̱e̱ˉnaaꞌ có̱o̱ꞌr˜ lata˜.  
\v 18 Jo̱baꞌ fɨ́ɨˉɨ ꞌnʉ́ꞌˋ e cuǿøꞌ˜ bíˋ rúngꞌˋnaꞌ có̱o̱ꞌ˜ lajaléꞌˋ e júuˆ na. 
\c 5  
\p  
\v 1 Jo̱baꞌ fáꞌˋguɨ́ɨ, dseaˋ rúꞌˋnaaꞌ, jaˋ ꞌnéˉ jméeꞌ˜e quíiˉnaꞌ e fɨˊ ni˜ jiˋ la lana lɨ˜ dseángꞌˉ nidsijéeˊ jaléꞌˋ e fáꞌˋa la.  
\v 2 Co̱ꞌ nɨñíbˆ ꞌnʉ́ꞌˋ røøˋ e jí̱i̱ꞌ˜ jaangˋ dseaˋ ñirˊ jéengˊguɨ e˜ jmɨɨ˜ e nigüéengˉtu̱ Fíiˋnaaꞌ Dseaˋ Jmáangˉ, lɨ́ꞌˆ laco̱ꞌguɨ mɨ˜ jaangˋ dseaˋ jaˋ ñirˊ jéengˊguɨ lɨ˜ niguiéeˊ jaangˋ ɨ̱ɨ̱ˋ i̱ dsiꞌlee˜ fɨˊ quiáꞌrˉ mɨ˜ uǿøˋ.  
\v 3 Jo̱ mɨ˜ nijíngꞌˉ jaléngꞌˋ dseaˋ i̱ jaˋ cuíingˋ Dseaˋ Jmáangˉ: “Tiibˉ íiˊ jo̱guɨ juguiʉ́bˉ seaˋ”, dsʉꞌ ie˜ jo̱b dseángꞌˉ niꞌíñꞌˋ iihuɨ́ɨˊ e joˋ tó̱o̱ˋ jmɨɨ˜ nileáiñˋ lajeeˇ e jaˋ ñiing˜ dsíirˊ, lɨ́ꞌˆ laco̱ꞌguɨ jaangˋ dseamɨ́ˋ i̱ quiéengˋ jiuung˜ jí̱i̱ꞌ˜ jaˋ ñirˊ lɨ˜ dseángꞌˉ ninángˋ e dseáˋ jmohuɨ́ɨˊ quiáꞌrˉ e nilɨseengˋ yʉ̱ʉ̱ˋ quiáꞌrˉ. Jo̱ ie˜ jo̱, jí̱i̱ꞌ˜ jaangˋ i̱ dseaˋ íˋ quɨ́ꞌˉ jmɨɨ˜ nileángˋguɨr e jaˋ niꞌíñꞌˋ e iihuɨ́ɨˊ do.  
\v 4 Dsʉꞌ ꞌnʉ́ꞌˋguɨ, dseaˋ rúꞌˋnaaꞌ, joˋ seengˋguɨꞌ e jaˋ ꞌgaꞌˊ lɨˊ ñíˆnaꞌ laco̱ꞌguɨ la lɨ́ɨngˊ dseaˋ i̱ seengˋ fɨˊ lɨ˜ nʉʉˋ, jo̱baꞌ jaˋ nidsigáˋ óoˊnaꞌ mɨ˜ tɨˊ lɨ˜ nitɨ́ˉ íꞌˋ e nijáaˊtu̱ Dseaˋ Jmáangˉ fɨˊ jmɨgüíˋ la laco̱ꞌguɨ dsigáˋ dsíiˊ jaangˋ dseaˋ mɨ˜ guiéeˊ jaangˋ i̱ dsijméeˉ ɨ̱ɨ̱ˋ fɨˊ quiáꞌrˉ mɨ˜ uǿøˋ.  
\v 5 Co̱ꞌ lajalémꞌˋ ꞌnʉ́ꞌˋ, dseaˋ rúꞌˋnaaꞌ, lɨ́ɨngˊnaꞌ dseaˋ quiáꞌˉ Dseaˋ Jmáangˉ i̱ jmóoˋ jmangꞌˉ e guiʉ́ˉ, jo̱ fɨˊ lɨ˜ jneábˋ seengˋnaꞌ. Jo̱ jaˋ lɨ́ɨngˊnaꞌ dseaˋ i̱ jaˋ cuíingˋ Dseaˋ Jmáangˉ i̱ jmóoˋ jaléꞌˋ e ꞌlɨꞌˆ, co̱ꞌ fɨˊ lɨ˜ nʉʉbˋ seengˋ i̱ laꞌíˋ;  
\v 6 jo̱baꞌ ꞌnéˉ e jaˋ sɨjlɨ́ɨˆ jminíˆnaꞌ laco̱ꞌguɨ la lɨ́ɨngˊ dseaˋ i̱ jaˋ cuíingˋ Dseaˋ Jmáangˉ, dsʉꞌ ꞌnéˉ e sɨjnéebˋ dsiˋnaaꞌ contøøngˉ jo̱guɨ ꞌnéˉ e ɨˊ dsiˋnaaꞌ dseángꞌˉ laco̱ꞌ catɨ́ɨmˉ cajo̱.  
\v 7 Co̱ꞌ jaléngꞌˋ dseaˋ i̱ jaˋ cuíingˋ Dseaˋ Jmáangˉ lɨ́ɨiñˊ la lɨ́ɨngˊ dseaˋ i̱ sɨjlɨ́ɨˆ jminiˇ mɨ˜ uǿøˋ, jo̱guɨ jmóorˋ ta˜ ɨ̱́ꞌˋ mɨ˜ uǿøˋ cajo̱.  
\v 8 Dsʉꞌ jneaa˜guɨ́ɨꞌ, dseaˋ se̱e̱ˉnaaꞌ fɨˊ lɨ˜ jneáˋ, contøømˉ ꞌnéˉ ɨ́ˆ dsiˋnaaꞌ dseángꞌˉ laco̱ꞌ catɨ́ɨmˉ. Jo̱ co̱ꞌ nɨcajáamꞌ˜ yee˜naaꞌ fɨˊ jaguóˋ Fidiéeˇ jo̱guɨ jmiꞌneáamˋbɨ́ɨꞌ dseaˋ do cajo̱, jo̱baꞌ e jo̱ lɨ́ɨˊ lafaꞌ co̱o̱ˋ ꞌmɨꞌquiꞌˊ ñíˆ có̱o̱ꞌ˜ e jmɨꞌǿngꞌˋ yee˜naaꞌ. Jo̱ co̱ꞌ nɨtab˜ dsiˋnaaꞌ e dseángꞌˉ nileámˋbaaꞌ jee˜ dseeˉ quíˉnaaꞌ, jo̱baꞌ e la lɨ́ɨˊ lafaꞌ co̱o̱ˋ loguiˇ ñíˆ có̱o̱ꞌ˜ e lɨꞌǿngꞌˋ moguiˋnaaꞌ.  
\v 9 Co̱ꞌ jaˋ sɨꞌíingˆnaaꞌ quiáꞌˉ Fidiéeˇ e nicuǿꞌrˉ jneaa˜aaꞌ iihuɨ́ɨˊ, dsʉꞌ sɨꞌíimˆbaaꞌ quiáꞌrˉ e laco̱ꞌ nileángˋnaaꞌ jee˜ jaléꞌˋ dseeˉ quíˉnaaꞌ laꞌeáangˊ có̱o̱ꞌ˜ Fíiˋnaaꞌ Dseaˋ Jmáangˉ.  
\v 10 Co̱ꞌ Dseaˋ Jmáangˉ cajúiñˉ cuaiñ˜ quíˉiiꞌ e laco̱ꞌ nilɨse̱e̱ˉnaaꞌ cøøngˋ có̱o̱ꞌr˜ lata˜, song se̱e̱ˉnaaꞌ táꞌˉ saˋ se̱e̱ˉnaaꞌ mɨ˜ nijáaˊtu̱r.  
\v 11 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ, cuǿøꞌ˜ bíˋ rúngꞌˋnaꞌ jo̱guɨ jmɨcó̱o̱ꞌˇ rúngꞌˋnaꞌ e jaˋ tiúung˜naꞌ lají̱i̱ꞌ˜ fɨˊ nɨteáangˉnaꞌ lɨ́ꞌˆ laco̱ꞌguɨ la jmooˋnaꞌ lana. 
\s1 Jaléꞌˋ e casɨ́ꞌˉ Paaˉ dseaˋ quiáꞌˉ Dseaˋ Jmáangˉ 
\p  
\v 12 Jo̱ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ, e jmɨꞌgooˋbaꞌ dseaˋ quiáꞌˉ Dseaˋ Jmáangˉ i̱ jmóoˋ ta˜ jmɨcó̱o̱ꞌ˜ ꞌnʉ́ꞌˋ e quie̱rˊ nifɨˊ quíiˉnaꞌ jo̱guɨ eꞌrˊ ꞌnʉ́ꞌˋ jial laco̱ꞌ catɨ́ɨngˉ e nilɨseengˋnaꞌ, dseaˋ lɨ́ɨngˊnaꞌ dseaˋ quiáꞌˉ Dseaˋ Jmáangˉ.  
\v 13 Jo̱ eáamˊ ꞌnéˉ eeˉnaꞌ guiʉ́ˉ có̱o̱ꞌr˜, jo̱guɨ ꞌnéˉ jmiꞌneáangˋnaꞌre quiáꞌˉ jaléꞌˋ e ta˜ e jmóorˋ jee˜ ꞌnʉ́ꞌˋ. Jo̱ güɨlɨseemˋbaꞌ juguiʉ́ˉ júuˆ røøˋ có̱o̱ꞌ˜ jaléngꞌˋ dseaˋ rúngꞌˋnaꞌ. 
\p  
\v 14 Jo̱guɨ síiꞌ˜guɨ́ɨ ꞌnʉ́ꞌˋ cajo̱, dseaˋ rúꞌˋnaaꞌ, e jíingˉnaꞌ jaléngꞌˋ dseaˋ i̱ jaˋ iing˜ jméˉ ta˜, jo̱guɨ cuǿøꞌ˜naꞌ bíˋ jaléngꞌˋ dseaˋ i̱ lɨtúngˉ dsíiˊ có̱o̱ꞌ˜ júuˆ quiáꞌˉ Fidiéeˇ, jo̱guɨ jmɨcó̱o̱ꞌˇnaꞌ jaléngꞌˋ dseaˋ i̱ jaˋ mɨˊ seaˋ bíˋ quiáꞌˉ laꞌiéꞌˋ faꞌ dseángꞌˉ nɨlɨ́ɨiñˊ dseaˋ quiáꞌˉ Dseaˋ Jmáangˉ, jo̱guɨ jmeeˇnaꞌ féngꞌˊ óoˊnaꞌ có̱o̱ꞌ˜ lajɨɨngˋ dseaˋ. 
\p  
\v 15 Jo̱ ñiing˜ óoˊnaꞌ e jí̱i̱ꞌ˜ jaangˋ dseaˋ quírˉ có̱o̱ꞌ˜ e gaˋ quiáꞌˉ jaangˋguɨ dseaˋ rúiñꞌˋ uii˜ quiáꞌˉ e gaˋ e jmóoˋ íˋ quiáꞌrˉ. Co̱ꞌ lají̱i̱ꞌ˜ e ꞌnéˉ jméeˆnaꞌ e jmɨꞌúungˋnaꞌ jméeˆnaꞌ jmangꞌˉ e guiʉ́bˉ có̱o̱ꞌ˜ jaléngꞌˋ dseaˋ rúngꞌˋnaꞌ, lɨ́ꞌˆ lajaléngꞌˋ dseaˋ jmɨgüíˋ. 
\p  
\v 16 Jo̱ jmiꞌiáangˋ óoˊnaꞌ contøøngˉ.  
\v 17 Jo̱ féengꞌ˜naꞌ Fidiéeˇ yejí̱ˉ.  
\v 18 Jo̱guɨ cuǿøꞌ˜baꞌr guiꞌmáangꞌˇ quiáꞌˉ lɨ́ꞌˆ doñiˊ eeˋ catɨ́ɨngˉnaꞌ, co̱ꞌ lajo̱baꞌ iiñ˜ e nijméeˆnaꞌ laco̱ꞌguɨ catɨ́ɨngˉ e jmóoˋ dseaˋ quiáꞌˉ Dseaˋ Jmáangˉ. 
\p  
\v 19 Jo̱ jaˋ jnɨɨng˜naꞌ lají̱i̱ꞌ˜ e iing˜ Jmɨguíˋ quiáꞌˉ Fidiéeˇ e jmérˉ jee˜ ꞌnʉ́ꞌˋ.  
\v 20 Jo̱ jaˋ guiáˆnaꞌ caꞌˊ jaléꞌˋ e féꞌˋ i̱ dseaˋ i̱ féꞌˋ cuaiñ˜ quiáꞌˉ Fidiéeˇ.  
\v 21 Dsʉꞌ quie̱ˋnaꞌ cuente lají̱i̱ꞌ˜ júuˆ quiáꞌˉ i̱ dseaˋ íˋ, su dseengˋ o̱si jaˋ dseengˋ é, jo̱ ꞌmea˜baaꞌ lají̱i̱ꞌ˜ e guiʉ́ˉ.  
\v 22 Jo̱ ꞌnaangˉ yaang˜naꞌ có̱o̱ꞌ˜ jaléꞌˋ e ꞌlɨꞌˆ e seaˋ fɨˊ jmɨgüíˋ. 
\p  
\v 23 Jo̱ mɨ́ɨꞌ˜naaꞌ Fidiéeˇ i̱ cuøˊ juguiʉ́ˉ júuˆ røøˋ e nijmeáiñꞌˋ ꞌnʉ́ꞌˋ dseángꞌˉ jí̱i̱ꞌ˜ dseaˋ quiáꞌˉbre. Jo̱guɨ mɨ́ɨꞌ˜naaꞌr cajo̱ e nijmérˉ íˆ ꞌnʉ́ꞌˋ lají̱i̱ꞌ˜ fɨˊ nɨteáangˉnaꞌ có̱o̱ꞌ˜ jaléꞌˋ e ɨˊ áaˊnaꞌ, jo̱guɨ e nijmérˉ íˆ ꞌnʉ́ꞌˋ jial laco̱ꞌ seengˋnaꞌ fɨˊ ngúuˊ táangˋnaꞌ e laco̱ꞌ jaˋ dseeˉ nilɨseaˋ quíiˉnaꞌ jí̱i̱ꞌ˜ co̱o̱ˋ mɨ˜ nitɨ́ˉ íꞌˋ e nijáaˊtu̱ Fíiˋnaaꞌ Dseaˋ Jmáangˉ fɨˊ jmɨgüíˋ la.  
\v 24 Jo̱ Fidiéebˇ dseaˋ catǿꞌrˉ jneaa˜aaꞌ e laco̱ꞌ niꞌuíingˉnaaꞌ dseaˋ quiáꞌrˉ, jo̱guɨ dseángꞌˉ jmiti˜bre e jo̱. 
\s1 Júuˆ guicó̱o̱ꞌˇ quiáꞌˉ Paaˉ lɨ˜ cadséngˉ 
\p  
\v 25 Dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, féemꞌ˜baꞌ Fidiéeˇ uii˜ quíˉiiꞌ. 
\p  
\v 26 Jo̱ røøngˉ rúngꞌˋnaꞌ e ngocángˋ óoˊnaꞌ có̱o̱ꞌ˜ jaléngꞌˋ dseaˋ quiáꞌˉ Dseaˋ Jmáangˉ i̱ neáangˊ fɨˊ na. 
\p  
\v 27 Jo̱ fɨ́ɨˉɨ ꞌnʉ́ꞌˋ, laꞌeáangˊ có̱o̱ꞌ˜ Fíiˋnaaꞌ Dseaˋ Jmáangˉ, e ɨ́ˆnaꞌ e jiˋ la fɨˊ quiniˇ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ na. 
\p  
\v 28 Güɨꞌíibˋ Fíiˋnaaꞌ Dseaˋ Jmáangˉ güeaꞌˆ quiáꞌrˉ jee˜ ꞌnʉ́ꞌˋ. 
\p Jo̱ lanab jí̱i̱ꞌ˜ féꞌˋ jiˋ laꞌuii˜ quiáꞌˉ Paaˉ e catɨ́ɨngˉ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ Tesalónica.