\id 1JN  
\h 1 Juan 
\toc1 Jiˋ laꞌuii˜ e cajmeꞌˊ JUAN 
\toc2 1 Juan 
\toc3 1 Jn. 
\mt1 Jiˋ laꞌuii˜ e cajmeꞌˊ JUAN 
\c 1  
\s1 E˜ uiing˜ e calɨ́ˉ e jiˋ la 
\p  
\v 1 Lalab fɨ́ɨˉɨ ꞌnʉ́ꞌˋ e fɨˊ ni˜ jiˋ la cuaiñ˜ quiáꞌˉ jaangˋ i̱ nɨseengˋ lají̱i̱ꞌ˜ mɨ˜ nʉ́ꞌˉguɨ nitɨro̱o̱ˇ jmɨgüíˋ. Jo̱ dseaˋ íˋ dseángꞌˉ nɨcanʉ́ˆbaaꞌ jial féꞌrˋ, jo̱guɨ nɨcaneem˜baaꞌr dseángꞌˉ quiniˇnaaꞌ lana, jo̱guɨ nɨcaléˆnaaꞌ cuente e dseaˋ la jneaa˜aabꞌ lɨ́ɨiñˊ, co̱ꞌ quiá̱ꞌˉ lanab nɨcalɨsé̱ˋnaaꞌ có̱o̱ꞌr˜ laꞌóꞌˋ jneaꞌˆ, dseaˋ ooˉnaaꞌ ta˜ quiáꞌˉ Fidiéeˇ. Jo̱ dseaˋ íbˋ Dseaˋ Jmáangˉ i̱ cuøˊ e ee˜ dseaˋ lata˜ có̱o̱ꞌ˜ Fidiéeˇ.  
\v 2 Jo̱ i̱ dseaˋ i̱ cuøˊ e jo̱ dseángꞌˉ nɨcaꞌéemˋ ꞌñiaꞌrˊ fɨˊ jmɨgüíˋ la, jo̱ nɨcaneem˜baaꞌr, jo̱baꞌ nɨcaníiꞌ˜naaꞌ júuˆ quiáꞌˉ jaléꞌˋ e nɨcaneˋnaaꞌ quiáꞌrˉ; jo̱guɨ lana guiaˋnaaꞌ júuˆ jee˜ ꞌnʉ́ꞌˋ quiáꞌˉ i̱ dseaˋ i̱ cuøˊ e ee˜ dseaˋ lata˜ có̱o̱ꞌ˜ Fidiéeˇ do, jo̱ dseaˋ íbˋ cajo̱ i̱ caguáˋ fɨˊ ñifɨ́ˉ lamɨ˜ jéengˊguɨ có̱o̱ꞌ˜ Tiquiáꞌrˆ, jo̱guɨ i̱ Tiquiáꞌrˆ do nɨcaꞌéemˋbre dseaˋ do jee˜ jneaa˜aaꞌ fɨˊ jmɨgüíˋ la.  
\v 3 Jo̱ lajo̱b júuˆ e guiaˋnaaꞌ jee˜ ꞌnʉ́ꞌˋ quiáꞌˉ lají̱i̱ꞌ˜ e nɨcane˜naaꞌ jo̱guɨ lají̱i̱ꞌ˜ e nɨcanʉ́ˆnaaꞌ quiáꞌˉ dseaˋ íˋ, co̱ꞌ ii˜naaꞌ e ꞌnʉ́ꞌˋ seengˋnaꞌ cøømˋ có̱o̱ꞌ˜ jneaꞌˆ laco̱ꞌguɨ jneaꞌˆ cøømˋ se̱e̱ˉnaaꞌ có̱o̱ꞌ˜ Tiquíˆiiꞌ Fidiéeˇ dseaˋ guiing˜ ñifɨ́ˉ co̱lɨɨng˜guɨ có̱o̱ꞌ˜ Jó̱o̱rˊ Dseaˋ Jmáangˉ.  
\v 4 Jo̱baꞌ jmoꞌˊnaaꞌ jaléꞌˋ e júuˆ la quíiˉnaꞌ e laco̱ꞌ nicuǿˉ e iáangˋ dsiˋnaaꞌ laco̱ꞌ sɨꞌíˆ. 
\s1 Fidiéeˇ lɨ́ɨiñˊ jaangˋ i̱ jɨngꞌˋ jloꞌˆ 
\p  
\v 5 Jo̱ e lab e júuˆ e caꞌeꞌˊ Dseaˋ Jmáangˉ jneaꞌˆ, jo̱ e jo̱b e éeˉnaaꞌ ꞌnʉ́ꞌˋ lana, e Fidiéeˇ lɨ́ɨiñˊ jaangˋ i̱ jɨngꞌˋ jloꞌˆ, jo̱ jí̱i̱ꞌ˜ capíꞌˆ e nʉʉˋ sǿꞌˋ jaˋ seaˋ quiáꞌrˉ.  
\v 6 Jo̱ mɨ˜ féꞌˋnaaꞌ e cøømˋ se̱e̱ˉnaaꞌ có̱o̱ꞌ˜ Fidiéeˇ, jo̱guɨ dsʉꞌ lajeeˇ jo̱ beáamꞌ˜ dseeˉ yee˜naaꞌ laco̱ꞌguɨ la jmóoˋ i̱ dseaˋ i̱ seengˋ fɨˊ lɨ˜ nʉʉˋ sǿꞌˋ, jo̱baꞌ jmɨgǿømˋ yee˜naaꞌ có̱o̱ꞌ˜ e féꞌˋnaaꞌ do jóng, co̱ꞌ jaˋ jmooˉnaaꞌ laco̱ꞌguɨ la iing˜ Fidiéeˇ e nijmóˆooꞌ.  
\v 7 Dsʉꞌ song se̱e̱ˉnaaꞌ cøøngˋ có̱o̱ꞌ˜ Fidiéeˇ i̱ jɨngꞌˋ jloꞌˆ do, jo̱baꞌ cøømˋ se̱e̱ˉnaaꞌ lajeeˇ laꞌóꞌˋ rúꞌˋnaaꞌ, dseaˋ lɨ́ɨˊnaaꞌ dseaˋ quiáꞌˉ Dseaˋ Jmáangˉ, jo̱guɨ nileámˋbaaꞌ jee˜ dseeˉ quíˉiiꞌ laꞌeáangˊ có̱o̱ꞌ˜ jmɨꞌøøngˉ Jesús i̱ lɨ́ɨngˊ Jó̱o̱ˊ Fidiéeˇ e catu̱u̱ˋ mɨ˜ cajúiñˉ. 
\p  
\v 8 Jo̱ mɨ˜ féꞌˋnaaꞌ e jaˋ dseeˉ røøˉnaaꞌ jí̱i̱ꞌ˜ co̱o̱ˋ, jo̱baꞌ lɨ́ɨˊ lɨ́ꞌˆ jmɨgǿøngˋ yee˜baaꞌ jóng, co̱ꞌ jaˋ léeˊeeꞌ júuˆ jáꞌˉ quiáꞌˉ Fidiéeˇ.  
\v 9 Jo̱ dsʉꞌ song jmooˉbaaꞌ júuˆ røøˋ uii˜ quiáꞌˉ jaléꞌˋ dseeˉ quíˉiiꞌ fɨˊ quiniˇ Fidiéeˇ, jo̱baꞌ dseángꞌˉ nɨsɨtaˇ dsiˋnaaꞌ e guiʉ́bˉ éeˋ Fidiéeˇ có̱o̱ꞌ˜ jneaa˜aaꞌ, jo̱guɨ jmiti˜bre júuˆ quiáꞌrˉ e íimˉbre jaléꞌˋ dseeˉ quíˉiiꞌ jo̱guɨ láaiñˋ jneaa˜aaꞌ jee˜ jaléꞌˋ e gaˋ e jmooˉnaaꞌ.  
\v 10 Jo̱ dsʉꞌ song féꞌˋnaaꞌ e jaˋ dseeˉ mɨˊ caꞌeeˉnaaꞌ jí̱i̱ꞌ˜ co̱o̱ˋ, jo̱baꞌ lɨ́ɨˊ e lafaꞌ féꞌˋnaaꞌ e adseaamˋ Fidiéeˇ song lajo̱; jo̱ jaˋ léeˊeeꞌ dseángꞌˉ lajangꞌˉ júuˆ jáꞌˉ quiáꞌˉ dseaˋ do song lajo̱b féꞌˋeeꞌ. 
\c 2  
\s1 Dseaˋ Jmáamˉbingꞌ mɨꞌˊ Fidiéeˇ cuaiñ˜ quíˉiiꞌ 
\p  
\v 1 Dseaˋ rúꞌˋnaaꞌ i̱ ꞌneáanˋn eáangˊ, jmoꞌˊo e júuˆ la e catɨ́ɨngˉnaꞌ e laco̱ꞌ jaˋ eeˉnaꞌ dseeˉ. Jo̱ nañiˊ faꞌ seaˋbre mɨ˜ jiúngꞌˋnaꞌ ni˜ dseeˉ, dsʉꞌ seemˋ jaangˋ i̱ jmɨcó̱o̱ꞌ˜ jneaa˜aaꞌ i̱ mɨꞌˊ Tiquíˆiiꞌ dseaˋ guiing˜ ñifɨ́ˉ cuaiñ˜ quíˉiiꞌ, jo̱ íbˋ Dseaˋ Jmáangˉ i̱ éeˋ guiʉ́ˉ do.  
\v 2 Jo̱guɨ dseaˋ íbˋ i̱ cajúngˉ fɨˊ dseꞌˋ crúuˆ e laco̱ꞌ caꞌíngˉ lají̱i̱ꞌ˜ dseeˉ quíˉiiꞌ e røøˉnaaꞌ fɨˊ quiniˇ Fidiéeˇ. Dsʉꞌ o̱ꞌ jí̱i̱ꞌ˜ dseeˉ quíˉiiꞌ yee˜eeꞌ dseaˋ lɨ́ɨˊɨɨꞌ dseaˋ quiáꞌˉ Dseaˋ Jmáangˉ e caꞌíiñˉ, co̱ꞌ lajo̱b caꞌíiñˉ dseeˉ quiáꞌˉ lajɨɨngˋ dseaˋ jmɨgüíˋ cajo̱. 
\p  
\v 3 Jo̱ song nʉ́ʉꞌ˜baaꞌ jaléꞌˋ júuˆ quiáꞌˉ Fidiéeˇ, jo̱baꞌ nɨsɨtabˇ dsiˋnaaꞌ e nɨcalɨcuíimˋbaaꞌre jóng.  
\v 4 Jo̱ song seengˋ dseaˋ jíñꞌˉ e cuíimˋbre Fidiéeˇ jo̱ dsʉꞌ jaˋ nʉ́ʉꞌr˜ lají̱i̱ꞌ˜ júuˆ quiáꞌˉ dseaˋ do, jo̱baꞌ i̱ dseaˋ íˋ lɨ́ɨiñˊ jaangˋ i̱ adseaangˋ, co̱ꞌ jaˋ quie̱rˊ júuˆ jáꞌˉ quiáꞌˉ Fidiéeˇ.  
\v 5 Jo̱ dsʉꞌ song seengˋguɨ dseaˋ i̱ contøømˉ nʉ́ʉꞌ˜ júuˆ jáꞌˉ quiáꞌˉ dseaˋ do, jo̱baꞌ lɨta˜ dsiˋnaaꞌ e dseaˋ íˋ ꞌneáamˋbre Fidiéeˇ laco̱ꞌ sɨꞌíˆ; jo̱ song jmooˉbaaꞌ lajo̱, jo̱baꞌ lɨne˜naaꞌ e cøømˋ se̱e̱ˉnaaꞌ có̱o̱ꞌ˜ Fidiéeˇ.  
\v 6 Jo̱ song seengˋ dseaˋ i̱ jíngꞌˉ e cøømˋ seeiñˋ có̱o̱ꞌ˜ Fidiéeˇ, jo̱baꞌ ꞌnéˉ niꞌérˉ laco̱ꞌguɨ caꞌéeˋ ꞌñiaꞌˊ Dseaˋ Jmáangˉ fɨˊ jmɨgüíˋ la. 
\s1 Júuˆ ꞌnéˉ lɨti˜ e nɨseaˋ latɨˊ mɨ˜ uiing˜ 
\p  
\v 7 Dseaˋ rúꞌˋnaaꞌ i̱ ꞌneáanˋn eáangˊ, jaˋ lɨ́ɨˊ laco̱ꞌ co̱o̱ˋ júuˆ ꞌmɨ́ɨˉ e júuˆ e ꞌnéˉ lɨti˜ quiáꞌˉ Fidiéeˇ e jmoꞌˊo la e catɨ́ɨngˉnaꞌ, co̱ꞌ e lab cajo̱ e caꞌíingꞌ˜ ꞌnʉ́ꞌˋ latɨˊ mɨ˜ calɨcuíingˋnaꞌ Dseaˋ Jmáangˉ. Jo̱ e júuˆ e ꞌnéˉ lɨti˜ do jaˋ sɨsɨ́ɨngˆ có̱o̱ꞌ˜ e júuˆ e caꞌíingꞌ˜ ꞌnʉ́ꞌˋ lamɨ˜ jéengˊguɨ do.  
\v 8 Jo̱guɨ dsʉꞌ e júuˆ e ꞌnéˉ lɨti˜ e jmoꞌˊo la quíiˉnaꞌ lana laco̱ꞌ co̱o̱ˋ júuˆ ꞌmɨ́ɨbˉ lɨ́ɨˊ; jo̱ dseángꞌˉ jábꞌˉ e júuˆ jo̱, jo̱ cajmitib˜ Dseaˋ Jmáangˉ laco̱ꞌguɨ jmitíˆ ꞌnʉ́ꞌˋ cajo̱, co̱ꞌ nɨcangoꞌíimˊ e nʉʉˋ sǿꞌˋ do, jo̱ lana nɨcanaangˋ jɨngꞌˋ i̱ jɨngꞌˋ jloꞌˆ do. 
\p  
\v 9 Jo̱ song seengˋ dseaˋ i̱ jíngꞌˉ e cøømˋ seeiñˋ có̱o̱ꞌ˜ i̱ jɨngꞌˋ jloꞌˆ do jo̱ dsʉꞌ ꞌníꞌˋ níimˉbre dseaˋ rúiñꞌˋ, jo̱baꞌ i̱ dseaˋ íˋ fɨˊ lɨ˜ nʉʉˋ sǿꞌˋbɨ seeiñˋ.  
\v 10 Jo̱guɨ i̱ dseaˋ quiáꞌˉ Dseaˋ Jmáangˉ i̱ jmiꞌneáangˋ rúngꞌˋ, cøømˋ seeiñˋ có̱o̱ꞌ˜ i̱ jɨngꞌˋ jloꞌˆ jo̱ jaˋ e uiing˜ seaˋ quiáꞌrˉ e nitéiñꞌˋ fɨˊ ni˜ dseeˉ.  
\v 11 Jo̱ dsʉꞌ i̱ dseaˋ i̱ ꞌníꞌˋ níingˉ rúngꞌˋ do, seemˋbɨr e jmóorˋ laco̱ꞌguɨ la jmóoˋ dseaˋ i̱ seengˋ fɨˊ lɨ˜ nʉʉˋ sǿꞌˋ; jo̱ jí̱i̱ꞌ˜ jaˋ ñirˊ jie˜ fɨˊ lɨ˜ ngóorˊ, co̱ꞌ fɨˊ lɨ˜ nʉʉˋ sǿꞌˋ dob seeiñˋ, jo̱baꞌ lɨ́ɨˊ lafaꞌ tiuumˉbre. 
\p  
\v 12 Dseaˋ rúꞌˋnaaꞌ i̱ lafaꞌ jó̱o̱ˋo̱, jmoꞌˊo e júuˆ la e catɨ́ɨngˉ ꞌnʉ́ꞌˋ quiáꞌˉ e jmiguiéngꞌˊ áaˊnaꞌ e nɨcaꞌíimˉ Fidiéeˇ dseeˉ quíiˉnaꞌ laꞌeáangˊ có̱o̱ꞌ˜ jaléꞌˋ e calɨ́ngˉ Dseaˋ Jmáangˉ fɨˊ dseꞌˋ crúuˆ.  
\v 13 Jo̱guɨ jmoꞌˊguɨ́ɨ e júuˆ la quíiˉ ꞌnʉ́ꞌˋ, dseaˋ lɨ́ɨngˊnaꞌ dseaˋ cǿøngꞌ˜ jee˜ dseaˋ quiáꞌˉ Dseaˋ Jmáangˉ, quiáꞌˉ e jmiguiéngꞌˊ áaˊnaꞌ e nɨcuíimˋbaꞌ i̱ nɨseengˋ lají̱i̱ꞌ˜ mɨ˜ nʉ́ꞌˉguɨ nitɨro̱o̱ˇ jmɨgüíˋ do. Jo̱guɨ jmoꞌˊguɨ́ɨ e júuˆ la quíiˉ ꞌnʉ́ꞌˋ, dseaˋ i̱ nɨꞌléꞌˋ cuíingˋnaꞌ Dseaˋ Jmáangˉ, quiáꞌˉ e jmiguiéngꞌˊ áaˊnaꞌ e nɨcalɨ́ꞌˉbaꞌ e joˋ lɨꞌˋ fii˜ i̱ ꞌlɨngꞌˆ jmɨgǿøiñˋ ꞌnʉ́ꞌˋ. 
\p  
\v 14 Dseaˋ rúꞌˋnaaꞌ i̱ lafaꞌ jó̱o̱ˋo̱, nab nɨcajméeꞌ˜e quíiˉnaꞌ e laco̱ꞌ nijmiguiéngꞌˊ áaˊnaꞌ e nɨcalɨcuíimˋbaꞌ Tiquíˆiiꞌ Fidiéeˇ. Jo̱guɨ nɨcajméeꞌ˜baa quíiˉnaꞌ cajo̱ jaléngꞌˋ ꞌnʉ́ꞌˋ, dseaˋ lɨ́ɨngˊnaꞌ dseaˋ cǿøngꞌ˜ jee˜ dseaˋ quiáꞌˉ Dseaˋ Jmáangˉ, e jmiguiéngꞌˊ áaˊnaꞌ e nɨcuíimˋbaꞌ i̱ nɨseengˋ lají̱i̱ꞌ˜ mɨ˜ nʉ́ꞌˉguɨ nitɨro̱o̱ˇ jmɨgüíˋ do. Jo̱guɨ nɨcajméeꞌ˜bɨ́ɨ quíiˉ ꞌnʉ́ꞌˋ, dseaˋ i̱ nɨꞌléꞌˋ cuíingˋnaꞌ Dseaˋ Jmáangˉ, e jmiguiéngꞌˊ áaˊnaꞌ e nɨcaꞌíimꞌ˜baꞌ júuˆ quiáꞌˉ Fidiéeˇ carˋ ngocángˋ óoˊnaꞌ, jo̱ jaˋ mɨˊ catiúungˊnaꞌ jí̱i̱ꞌ˜ capíꞌˆ, jo̱ nɨcalɨ́ꞌˉbaꞌ e joˋ lɨꞌˋ fii˜ i̱ ꞌlɨngꞌˆ jmɨgǿøiñˋ ꞌnʉ́ꞌˋ. 
\p  
\v 15 Jo̱baꞌ fɨ́ɨˉguɨ́ɨ jaléngꞌˋ ꞌnʉ́ꞌˋ e jaˋ síngꞌˋ yaang˜naꞌ fɨˊ gaˋ, o̱ꞌguɨ jmooˋnaꞌ dsináangˊnaꞌ jaléꞌˋ e ꞌlɨꞌˆ e seaˋ fɨˊ jmɨgüíˋ; jo̱ song seengˋ dseaˋ i̱ jmóoˋ lajo̱, jo̱baꞌ i̱ dseaˋ íˋ jaˋ ꞌneáaiñˋ Tiquíˆiiꞌ Fidiéeˇ.  
\v 16 Co̱ꞌ jaléꞌˋ e ꞌlɨꞌˆ e lɨ́ˋ dsíiˊ dseaˋ fɨˊ jmɨgüíˋ la jaˋ jáaˊ quiáꞌˉ Tiquíˆiiꞌ Fidiéeˇ, co̱ꞌ quiáꞌˉ i̱ ꞌlɨmꞌˆ lɨ˜ jáaꞌˊ do co̱faꞌ jaléꞌˋ e la: mɨ˜ lɨ́ˋ dsíiˊ dseaˋ jaléꞌˋ e iing˜ ngúuˊ táaiñˋ fɨˊ jmɨgüíˋ la, jo̱guɨ mɨ˜ dsináaiñˊ lɨ́ꞌˆ doñiˊ eeˋ ꞌlɨꞌˆ cangárˉ fɨˊ jmɨgüíˋ la, jo̱guɨ mɨ˜ iiñ˜ e íˋbre sɨlɨ́ɨꞌrˇ jaléꞌˋ e jloꞌˆ e seaˋ fɨˊ jmɨgüíˋ la e laco̱ꞌ jmiféngꞌˊ dseaˋ írˋ.  
\v 17 Dsʉꞌ co̱o̱bˋ mɨ˜ nitɨ́ˉ íꞌˋ e niꞌíingˉ lají̱i̱ꞌ˜ bíˋ e seaˋ quiáꞌˉ i̱ ꞌlɨngꞌˆ fɨˊ jmɨgüíˋ la co̱lɨɨng˜ có̱o̱ꞌ˜ jaléꞌˋ e ꞌlɨꞌˆ e dsináangˊ jaléngꞌˋ dseaˋ jmɨgüíˋ. Jo̱guɨ jaléngꞌˋ i̱ dseaˋ i̱ jmóoˋ jí̱i̱ꞌ˜ e iing˜ Fidiéeˇ, latab˜ nilɨseeiñˋ cøøngˋ có̱o̱ꞌ˜ dseaˋ do. 
\s1 Jial ñiˊ dseaˋ jnang˜ júuˆ e jáꞌˉ jo̱guɨ jnang˜ júuˆ e o̱ꞌ jáꞌˉ 
\p  
\v 18 Dseaˋ rúꞌˋnaaꞌ i̱ ꞌneáanˋn eáangˊ, lana nɨjaquiéengˊ e tɨˊ lɨ˜ niꞌíimˉ jmɨgüíˋ. Jo̱guɨ nɨcanʉ́ʉbˉ ꞌnʉ́ꞌˋ e nʉ́ꞌˉguɨjiʉ e jo̱, nijáaˊ jaangˋ dseaˋ i̱ ꞌlɨngꞌˆ i̱ ꞌníꞌˋ níiˉ quiáꞌˉ Dseaˋ Jmáangˉ. Jo̱ nɨcalɨñíˆbaaꞌ røøˋ e téebˉ ró̱o̱ˋguɨ jmɨgüíˋ, co̱ꞌ latɨˊ lanab nɨcanaangˋ ngɨˊ fɨ́ɨngˊ dseaˋ i̱ ꞌníꞌˋ níiˉ quiáꞌˉ Dseaˋ Jmáangˉ.  
\v 19 Jo̱ jaléngꞌˋ i̱ dseaˋ íˋ cangotáamꞌ˜bre jee˜ jneaa˜aaꞌ lamɨ˜ jéengˊguɨ, dseaˋ lɨ́ɨˊɨɨꞌ dseaˋ quiáꞌˉ Dseaˋ Jmáangˉ, dsʉꞌ catiúumˉtu̱r jneaa˜aaꞌ; co̱faꞌ mɨ˜ jaˋ cajméerˋ lajo̱, jo̱baꞌ quíimꞌ˜bɨr jee˜ jneaa˜aaꞌ latɨˊ lana jóng, dsʉꞌ catiúumˉbre jneaa˜aaꞌ. Jo̱ calɨ́ˉ lajo̱ e laco̱ꞌ calɨñiˊ dseaˋ røøˋ e jí̱i̱ꞌ˜ jaangˋ i̱ dseaˋ do lɨ́ɨiñˊ laco̱ꞌ jneaa˜aaꞌ, dseaˋ lɨ́ɨˊɨɨꞌ dseaˋ quiáꞌˉ Dseaˋ Jmáangˉ. 
\p  
\v 20 Dseaˋ rúꞌˋnaaꞌ, Dseaˋ Jmáangˉ nɨcaguíñꞌˋ jneaa˜aaꞌ, dseaˋ lɨ́ɨˊnaaꞌ dseaˋ quiáꞌrˉ, e nɨcangɨ́ɨngˋnaaꞌ Jmɨguíˋ quiáꞌrˉ, jo̱ lajo̱baꞌ nɨne˜naaꞌ jnang˜ dseángꞌˉ júuˆ jáꞌˉ.  
\v 21 Jo̱ uiing˜ jo̱baꞌ jmoꞌˊo e jiˋ la e catɨ́ɨngˉ ꞌnʉ́ꞌˋ, dsʉꞌ o̱faꞌ uii˜ e jaˋ mɨˊ cuíiˋnaꞌ jnang˜ júuˆ jáꞌˉ; co̱ꞌ ꞌnʉ́ꞌˋ, dseángꞌˉ røøbˋ nɨñíˆnaꞌ e jo̱. Jo̱guɨ ñíˆbɨ ꞌnʉ́ꞌˋ cajo̱ e jí̱i̱ꞌ˜ co̱o̱ˋ júuˆ jáꞌˉ jaˋ cuǿøngˋ nigüɨꞌɨ́ɨngˊ jee˜ júuˆ e o̱ꞌ jáꞌˉ.  
\v 22 Jo̱baꞌ fáꞌˋ jnea˜: ¿I̱˜ i̱ dseaˋ adseaangˋ do? Co̱ꞌ íbˋ i̱ dseaˋ i̱ féꞌˋ e o̱ꞌ jáꞌˉ e Jesús lɨ́ɨiñˊ Dseaˋ Jmáangˉ. Jo̱ íbˋ i̱ dseaˋ i̱ ꞌníꞌˋ níiˉ quiáꞌˉ dseaˋ do, dsʉco̱ꞌ mɨ˜ ꞌníꞌˋ níiñˉ Jó̱o̱ˊ Fidiéeˇ jo̱baꞌ ꞌníꞌˋ níimˉbre la quie̱ˊ Tiquiáꞌˆ dseaˋ do cajo̱.  
\v 23 Jo̱ doñiˊ i̱i̱ˋ i̱ ꞌníꞌˋ níingˉ Jó̱o̱ˊ Fidiéeˇ, lajo̱b ꞌníꞌˋ níiñˉ Tiquiáꞌˆ dseaˋ do cajo̱; dsʉꞌ i̱ dseaˋguɨ i̱ féꞌˋ e jábꞌˉ e Dseaˋ Jmáangˉ cagüéiñˉ e lɨ́ɨiñˊ jaangˋ dseaˋ jmɨgüíˋ, jo̱baꞌ dseaˋ do e jáꞌˉbaꞌ cuíiñˋ Dseaˋ Jmáangˉ jóng, jo̱guɨ nɨcuíimˋbre la quie̱ˊ Tiquiáꞌˆ dseaˋ do cajo̱. 
\p  
\v 24 Jo̱ fɨ́ɨˉguɨ́ɨ ꞌnʉ́ꞌˋ, jie˜ mɨˊ tʉ́ˋnaꞌ e júuˆ jáꞌˉ quiáꞌˉ Dseaˋ Jmáangˉ e canʉ́ʉˉnaꞌ latɨˊ mɨ˜ uiing˜ do. Jo̱ song jaˋ catiúungˊnaꞌ e júuˆ jo̱, jo̱baꞌ cøømˋ nilɨseengˋnaꞌ có̱o̱ꞌ˜ Jó̱o̱ˊ Fidiéeˇ jo̱guɨ lajo̱bɨ có̱o̱ꞌ˜ Tiquiáꞌˆ dseaˋ do cajo̱.  
\v 25 Jo̱ e lab e júuˆ e dseángꞌˉ nɨcacuøꞌˊ Dseaˋ Jmáangˉ jneaa˜aaꞌ, e nilɨse̱e̱ˉnaaꞌ cøøngˋ có̱o̱ꞌ˜ Fidiéeˇ lata˜.  
\v 26 Jo̱ nɨcajméeꞌˇe e júuˆ la quíiˉnaꞌ e laco̱ꞌ nilɨñíˆnaꞌ quiáꞌˉ jaléngꞌˋ dseaˋ i̱ iing˜ nijmɨgǿøngˋ ꞌnʉ́ꞌˋ e nisíñꞌˋ ꞌnʉ́ꞌˋ fɨˊ gaˋ.  
\v 27 Jo̱ dsʉꞌ laꞌeáangˊ e seemˋ Jmɨguíˋ quiáꞌˉ Fidiéeˇ cøøngˋ có̱o̱ꞌ˜ ꞌnʉ́ꞌˋ e cangɨ́ɨngˋnaꞌ cacuøˊ Dseaˋ Jmáangˉ do, jo̱baꞌ jaˋ ꞌneángˉnaꞌ e dseaˋ jiéngꞌˋ niꞌéꞌˉ ꞌnʉ́ꞌˋ laco̱ꞌguɨ jí̱i̱ꞌ˜ e nɨñíˆnaꞌ, co̱ꞌ ꞌñiabꞌˊ Jmɨguíˋ quiáꞌˉ Fidiéeˇ e eꞌˊ ꞌnʉ́ꞌˋ jaléꞌˋ e ꞌnéˉ nilɨñíˆnaꞌ. Jo̱ jaléꞌˋ e erˊ do jmangꞌˉ júuˆ jábꞌˉ, jo̱ jí̱i̱ꞌ˜ co̱o̱ˋ faꞌ lɨ́ɨˊ júuˆ e o̱ꞌ jáꞌˉ. Jo̱baꞌ fɨ́ɨˉɨ ꞌnʉ́ꞌˋ, jie˜ mɨˊ tʉ́ˋnaꞌ e seengˋnaꞌ cøøngˋ có̱o̱ꞌ˜ Dseaˋ Jmáangˉ laco̱ꞌguɨ nɨcaꞌeꞌˊ Jmɨguíˋ quiáꞌˉ Fidiéeˇ ꞌnʉ́ꞌˋ. 
\p  
\v 28 Jo̱baꞌ fáꞌˋguɨ́ɨ dseaˋ rúꞌˋnaaꞌ i̱ ꞌneáanˋn eáangˊ, jie˜ mɨˊ tiúungˊnaꞌ e seengˋnaꞌ cøøngˋ có̱o̱ꞌ˜ Dseaˋ Jmáangˉ, jo̱ lajo̱baꞌ nɨsɨtaˇ dsiˋnaaꞌ e joˋ ꞌgóꞌˋnaaꞌ o̱ꞌguɨ ɨꞌˋ lɨ́ɨngˉnaaꞌ fɨˊ quinirˇ mɨ˜ nigüéengˉtu̱r fɨˊ jmɨgüíˋ la.  
\v 29 Co̱ꞌ nɨñíbˆ ꞌnʉ́ꞌˋ guiʉ́ˉ e Dseaˋ Jmáamˉbingꞌ i̱ dseángꞌˉ éeˋ guiʉ́ˉ, jo̱guɨ nɨñíˆbɨ ꞌnʉ́ꞌˋ cajo̱ e doñiˊ i̱i̱ˋ dseaˋ i̱ éeˋ guiʉ́ˉ contøøngˉ, dseaˋ íbˋ dseángꞌˉ i̱ lɨ́ɨngˊ jó̱o̱ˊ Fidiéeˇ. 
\c 3  
\s1 Jial lɨ́ɨˊ mɨ˜ uíingˉ dseaˋ jó̱o̱ˊ Fidiéeˇ 
\p  
\v 1 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ i̱ ꞌneáanˋn eáangˊ, ñíiˉnaꞌ jial tíiˊ ꞌneáangˋ Tiquíˆiiꞌ Fidiéeˇ jneaa˜aaꞌ, co̱ꞌ íˋbingꞌ nɨcacuøꞌˊ jneaa˜aaꞌ e lɨ́ɨˊɨɨꞌ laco̱ꞌ jó̱o̱ˊbre. Co̱ꞌ e jáꞌˉ, dseángꞌˉ jó̱o̱ˊbre lɨ́ɨˊɨɨꞌ. Jo̱ uíiꞌ˜ e lajo̱b lɨ́ɨˊnaaꞌ, jo̱baꞌ jaléngꞌˋ i̱ dseaˋ i̱ jaˋ mɨˊ calɨcuíingˋ Fidiéeˇ jaˋ cuíiñˋ jneaa˜aaꞌ cajo̱.  
\v 2 Jo̱guɨ lana, dseángꞌˉ jó̱o̱bˊ Fidiéeˇ nɨlɨ́ɨˊɨɨꞌ; dsʉꞌ jaˋ neˇeeꞌ røøˋ eeˋ e nidsijéeˊ quíˉiiꞌ cøøngˋguɨ, lɨfaꞌ nɨsɨtabˇ dsiˋnaaꞌ e mɨ˜ nigüéengˉtu̱ Dseaˋ Jmáangˉ fɨˊ jmɨgüíˋ la, jo̱baꞌ ie˜ jo̱ nilíiˉnaaꞌ laco̱ꞌguɨ la lɨ́ɨngˊ Fidiéeˇ ꞌñiaꞌrˊ, dsʉco̱ꞌ nilɨne˜baaꞌ jial dseángꞌˉ lɨ́ɨngˊ dseaˋ do.  
\v 3 Jo̱ doñiˊ i̱i̱ˋ dseaˋ i̱ nɨta˜ dsíiˊ e nɨlɨ́ɨiñˊ laco̱ꞌguɨ Fidiéeˇ mɨ˜ nijáaˊtu̱ Dseaˋ Jmáangˉ, jo̱baꞌ nijmɨꞌúuiñˋ e niꞌérˉ guiʉ́ˉ laco̱ꞌguɨ dseaˋ do ꞌñiaꞌrˊ. 
\p  
\v 4 Dsʉꞌ doñiˊ i̱i̱ˋ dseaˋ i̱ beángꞌˊ dseeˉ yaang˜, jo̱baꞌ jmóorˋ laco̱ꞌguɨ dseaˋ i̱ ꞌlɨngꞌˆ i̱ ꞌníꞌˋ níingˆ Fidiéeˇ, dsʉco̱ꞌ dseebˉ mɨ˜ ꞌníꞌˋ níingˉ dseaˋ Fidiéeˇ.  
\v 5 Jo̱ ꞌnʉ́bꞌˋ nɨñíˆnaꞌ guiʉ́ˉ e cajáˉ Dseaˋ Jmáangˉ fɨˊ jmɨgüíˋ la e cajaꞌíiñˇ dseeˉ quíˉbaaꞌ, jo̱ dseaˋ íbˋ dseaˋ i̱ jaˋ røøngˋ jí̱i̱ꞌ˜ co̱o̱ˋ dseeˉ.  
\v 6 Jo̱guɨ doñiˊ i̱i̱ˋ i̱ contøømˉ seengˋ cøøngˋ có̱o̱ꞌ˜ Dseaˋ Jmáangˉ, jo̱baꞌ jaˋ beángꞌˊ dseeˉ yaaiñ˜. Jo̱guɨ doñiˊ i̱i̱ˋ i̱ beángꞌˊ dseeˉ yaang˜, jo̱baꞌ dseángꞌˉ jaˋ mɨˊ cangáaiñˋ dseaˋ do o̱ꞌguɨ cuíiñˋ dseaˋ do cajo̱.  
\v 7 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, jaˋ cuøꞌˊ fɨˊ yaang˜naꞌ e nijmɨgǿøngˋ dseaˋ ꞌnʉ́ꞌˋ; co̱ꞌ song jaangˋ dseaˋ éerˋ guiʉ́ˉ laco̱ꞌ catɨ́ɨngˉ e jmóoˋ jaangˋ dseaˋ quiáꞌˉ Dseaˋ Jmáangˉ, jo̱baꞌ dseaˋ guiúmˉ lɨ́ɨiñˊ, co̱ꞌ guiʉ́bˉ éerˋ laco̱ꞌguɨ ꞌñiaꞌˊ dseaˋ do.  
\v 8 Jo̱guɨ song seengˋ dseaˋ i̱ jaˋ tʉ́ˋ e beángꞌˊ dseeˉ ꞌñiaꞌrˊ, jo̱baꞌ dseaˋ quiáꞌˉ fii˜ i̱ ꞌlɨmꞌˆ lɨ́ɨiñˊ, dsʉco̱ꞌ íˋbingꞌ i̱ beángꞌˊ dseeˉ ꞌñiaꞌˊ latɨˊ mɨ˜ uiing˜. Jo̱ uiing˜ jo̱baꞌ cajáˉ Jó̱o̱ˊ Fidiéeˇ fɨˊ jmɨgüíˋ la e laco̱ꞌ niꞌíiñˉ jaléꞌˋ ta˜ quiáꞌˉ fii˜ i̱ ꞌlɨngꞌˆ do. 
\p  
\v 9 Jo̱ jí̱i̱ꞌ˜ jaangˋ dseaˋ i̱ lɨ́ɨngˊ jó̱o̱ˊ Fidiéeˇ jmóorˋ ta˜ jmɨrǿngˋguɨ dseeˉ ꞌñiaꞌˊ, dsʉco̱ꞌ i̱ dseaˋ íˋ seeiñˋ laꞌeáangˊ có̱o̱ꞌ˜ Jmɨguíˋ quiáꞌˉ Fidiéebˇ; jo̱baꞌ joˋ catɨ́ɨiñˉ faꞌ niꞌéˉguɨr dseeˉ, co̱ꞌ jó̱o̱ˊ Fidiéebˇ nɨlɨ́ɨiñˊ.  
\v 10 Co̱ꞌ nɨne˜baaꞌ røøˋ i̱˜ i̱ lɨ́ɨngˊ jó̱o̱ˊ Fidiéeˇ jo̱guɨ i̱˜ i̱ lɨ́ɨngˊ jó̱o̱ˊ fii˜ i̱ ꞌlɨngꞌˆ cajo̱, co̱ꞌ doñiˊ i̱i̱ˋ dseaˋ i̱ jaˋ éeˋ guiʉ́ˉ fɨˊ quiniˇ Fidiéeˇ o̱ꞌguɨ jmiꞌneáaiñˋ dseaˋ rúiñꞌˋ, jo̱baꞌ i̱ dseaˋ íˋ jaˋ jáꞌˉ e lɨ́ɨiñˊ jó̱o̱ˊ Fidiéeˇ. 
\s1 ꞌNéˉ nijmiꞌneáamˋbaaꞌ dseaˋ rúꞌˋnaaꞌ 
\p  
\v 11 Jo̱ latɨˊ mɨ˜ uiim˜ nɨcanʉ́ʉˉ ꞌnʉ́ꞌˋ e ꞌnéˉ jmiꞌneáangˋnaaꞌ dseaˋ rúꞌˋnaaꞌ.  
\v 12 Jo̱ jaˋ güɨjmeáangꞌˇ yee˜naaꞌ laco̱ꞌ Caín, dseaˋ calɨꞌiiñ˜ e calɨ́iñˉ dseaˋ quiáꞌˉ fii˜ i̱ ꞌlɨngꞌˆ; jo̱ uíiꞌ˜ e lajo̱baꞌ cajngaiñꞌˊ jaangˋ rúiñꞌˋ dseaˋ ngáangꞌ˜ có̱o̱ꞌr˜, co̱ꞌ jmangꞌˉ e guiʉ́bˉ caꞌéeˋ i̱ ꞌlɨɨ˜ rúiñꞌˋ do, jo̱guɨ ꞌñiaꞌrˊ jmangꞌˉ e gabˋ caꞌéerˋ. 
\p  
\v 13 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, jaˋ güɨdsigáˋ óoˊnaꞌ e ꞌníꞌˋ níingˉ jaléngꞌˋ dseaˋ jmɨgüíˋ i̱ jaˋ cuíingˋ Dseaˋ Jmáangˉ ꞌnʉ́ꞌˋ.  
\v 14 Jo̱ nɨne˜baaꞌ e joˋ lɨ́ɨˊguɨ́ɨꞌ lafaꞌ ꞌlɨɨng˜naaꞌ uíiꞌ˜ dseeˉ quíˉiiꞌ, co̱ꞌ lanaguɨ cøømˋ nɨse̱e̱ˉnaaꞌ có̱o̱ꞌ˜ Fidiéeˇ. Jo̱ guiʉ́bˉ nɨne˜eeꞌ e jo̱, co̱ꞌ jmiꞌneáamˋ rúꞌˋnaaꞌ laꞌóꞌˋ jneaa˜aaꞌ, dseaˋ lɨ́ɨˊɨɨꞌ dseaˋ quiáꞌˉ Dseaˋ Jmáangˉ. Jo̱guɨ i̱ dseaˋ i̱ jaˋ jmiꞌneáangˋ dseaˋ rúngꞌˋ, lafaꞌ ꞌlɨɨm˜bɨr lɨ́ɨiñˊ uíiꞌ˜ dseeˉ quiáꞌrˉ.  
\v 15 Jo̱guɨ doñiˊ i̱i̱ˋ dseaˋ i̱ jmóoˋ ta˜ ꞌníꞌˋ níingˉ rúngꞌˋ lɨ́ɨiñˊ laco̱ꞌ jaangˋ dseaˋ i̱ jmóoˋ ta˜ jngangꞌˊ rúngꞌˋ. Jo̱guɨ ꞌnʉ́bꞌˋ nɨñíˆnaꞌ cajo̱ e jí̱i̱ꞌ˜ jaangˋ dseaˋ i̱ jmóoˋ ta˜ jngangꞌˊ rúngꞌˋ cuǿøngˋ lɨseeiñˋ cøøngˋ có̱o̱ꞌ˜ Fidiéeˇ lata˜.  
\v 16 Jo̱ nɨcuíiˋbaaꞌ jial lɨ́ɨˊ e jmiꞌneáangˋ dseaˋ rúiñꞌˋ do, co̱ꞌ lajo̱b cajméeˋ Dseaˋ Jmáangˉ e ꞌneáaiñˋ jneaa˜baaꞌ mɨ˜ cajángꞌˋ ꞌñiaꞌrˊ e cajúiñˉ fɨˊ dseꞌˋ crúuˆ uíiꞌ˜ dseeˉ quíˉiiꞌ. Jo̱ lajo̱b ꞌnéˉ jmóˆ jneaa˜aaꞌ cajo̱ e nijáangꞌ˜ yee˜naaꞌ e nijmɨcó̱o̱ꞌˇ rúꞌˋnaaꞌ, jo̱ lajo̱baꞌ cuøˊ li˜ e jmiꞌneáamˋ rúꞌˋnaaꞌ.  
\v 17 Faco̱ꞌ jaangˋ dseaˋ i̱ seabˋ jaléꞌˋ e ꞌnéˉ, jo̱guɨ ñiˊbre cajo̱ e seemˋ dseaˋ dseángꞌˉ laniingˉ ꞌnéˉ e lɨcó̱o̱ꞌr˜, jo̱ dsʉꞌ jí̱i̱ꞌ˜ co̱o̱ˋ jaˋ e jmɨcó̱o̱ꞌr˜ i̱ dseaˋ íˋ, jo̱baꞌ jaˋ ꞌneáangˋ i̱ dseaˋ do Fidiéeˇ, co̱ꞌ jaˋ jmɨcó̱o̱ꞌr˜ i̱ dseaˋ rúiñꞌˋ do. 
\p  
\v 18 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ lafaꞌ jó̱o̱ˋo̱, jaˋ cá̱ˆnaꞌ júuˆ ta˜ júuˆ e fóꞌˋnaꞌ e jmiꞌneáangˋnaꞌ dseaˋ rúngꞌˋnaꞌ; co̱ꞌ la tíiˊ la lɨ́ɨbˊ júuˆ ꞌnéˉ cá̱ˆnaꞌ, jo̱ lajo̱baꞌ nilɨli˜ e dseángꞌˉ jmiꞌneáamˋ rúngꞌˋnaꞌ. 
\s1 Jial ta˜ dsíiˊ e se̱e̱ˉnaaꞌ có̱o̱ꞌ˜ Fidiéeˇ 
\p  
\v 19 Jo̱ song jmiꞌneáamˋ rúꞌˋnaaꞌ, jo̱baꞌ dseángꞌˉ nɨtab˜ dsiˋnaaꞌ e lɨ́ɨˊɨɨꞌ dseaˋ quiáꞌˉ Fidiéeˇ, jo̱ lajo̱baꞌ nɨne˜naaꞌ røøˋ e joˋ ɨꞌˋ lɨ́ɨˉnaaꞌ mɨ˜ nitɨ́ˉ fɨˊ quiniˇ dseaˋ do, co̱ꞌ jmiꞌneáamˋ rúꞌˋnaaꞌ.  
\v 20 Jo̱ song ɨꞌˋ lɨ́ɨmˉbaaꞌ fɨˊ quiniˇ Fidiéeˇ uíiꞌ˜ e jmooˉnaaꞌ jaléꞌˋ e jaˋ catɨ́ɨngˉ do, jo̱baꞌ güɨguiéngꞌˊ dsiˋnaaꞌ e dseángꞌˉ dseaˋ féngꞌˊ lɨ́ɨiñˊ jo̱guɨ nɨñirˊ lajaléꞌˋ.  
\v 21 Jo̱baꞌ fɨ́ɨˉguɨ́ɨ ꞌnʉ́ꞌˋ dseaˋ rúꞌˋnaaꞌ i̱ ꞌneáanˋn eáangˊ, song ta˜ dsiˋnaaꞌ e jaˋ ɨꞌˋ lɨ́ɨngˉnaaꞌ fɨˊ quiniˇ Fidiéeˇ, jo̱baꞌ nɨtab˜ dsiˋnaaꞌ e jaˋ ꞌnéˉ jmóˆooꞌ ꞌgóꞌˋnaaꞌ fɨˊ quinirˇ mɨ˜ féengꞌ˜naaꞌr jóng.  
\v 22 Jo̱baꞌ mɨ˜ mɨ́ɨꞌ˜naaꞌ Fidiéeˇ lɨ́ꞌˆ doñiˊ eeˋ, núuˋbre júuˆ quíˉiiꞌ jo̱ lajo̱baꞌ ngɨ́ɨmˋbaaꞌ, co̱ꞌ nʉ́ʉꞌ˜baaꞌ júuˆ quiáꞌrˉ e ꞌnéˉ lɨti˜ do, jo̱guɨ jmooˉbaaꞌ jaléꞌˋ e iáangˋ dsíirˊ cajo̱.  
\v 23 Jo̱ e lab e júuˆ quiáꞌˉ Fidiéeˇ e ꞌnéˉ lɨti˜ do, e nijáangꞌ˜ yee˜naaꞌ fɨˊ jaguóˋ Fíiˋnaaꞌ Dseaˋ Jmáangˉ, jo̱guɨ e nijmiꞌneáangˋnaꞌ dseaˋ rúꞌˋnaaꞌ laco̱ꞌ ta˜ quiʉꞌˊ Fidiéeˇ.  
\v 24 Jo̱ doñiˊ i̱i̱ˋ dseaˋ i̱ nʉ́ʉꞌ˜ jaléꞌˋ júuˆ e ꞌnéˉ lɨti˜ quiáꞌˉ Fidiéeˇ, jo̱baꞌ cøømˋ seeiñˋ có̱o̱ꞌ˜ Fidiéeˇ, jo̱guɨ dseaˋ do seemˋbre cøøngˋ có̱o̱iñꞌ˜ do cajo̱. Jo̱ ne˜baaꞌ e seemˋ Fidiéeˇ có̱o̱ꞌ˜ jneaa˜aaꞌ laꞌeáangˊ có̱o̱ꞌ˜ Jmɨguíˋ quiáꞌrˉ e nɨcangɨ́ɨngˋnaaꞌ do. 
\c 4  
\s1 Jial lɨ́ɨˊ Jmɨguíˋ quiáꞌˉ Fidiéeˇ jo̱guɨ jial lɨ́ɨˊ bíˋ quiáꞌˉ dseaˋ i̱ ꞌlɨngꞌˆ 
\p  
\v 1 Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, jaˋ jáꞌˉ güɨlíingˋnaꞌ quiáꞌˉ jaléngꞌˋ dseaˋ i̱ féꞌˋ e laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇbaꞌ guiarˊ e júuˆ quiáꞌrˉ do, co̱ꞌ laꞌuii˜ jangꞌˉ cá̱ˆnaꞌ cuante su e júuˆ e guiaˊ i̱ dseaˋ do guiarˊ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ o̱si laꞌeáangˊ có̱o̱ꞌ˜ bíˋ quiáꞌˉ i̱ dseaˋ i̱ ꞌlɨngꞌˆ dob é. Co̱ꞌ fɨ́ɨmˊ dseaˋ nɨseeiñˋ lana e jmɨgóorˋ e féꞌrˋ cuaiñ˜ quiáꞌˉ Fidiéeˇ, dsʉꞌ o̱ꞌ jáꞌˉ e lajo̱.  
\v 2 Jo̱ nilɨñíbˆ ꞌnʉ́ꞌˋ i̱˜ i̱ guiaˊ júuˆ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ: co̱ꞌ doñiˊ i̱i̱ˋ i̱ jíngꞌˉ e jáꞌˉbaꞌ cagüéngˉ Dseaˋ Jmáangˉ fɨˊ jmɨgüíˋ e lɨ́ɨiñˊ jaangˋ dseaˋ la jneaa˜aaꞌ, dseaˋ lɨ́ɨˊɨɨꞌ dseaˋ jmɨgüíˋ, jo̱baꞌ dseaˋ íbˋ i̱ guiaˊ júuˆ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ.  
\v 3 Jo̱ doñiˊ i̱i̱ˋ i̱ féꞌˋ e jaˋ jáꞌˉ e Jesús cagüéiñˉ lajo̱, jo̱baꞌ i̱ dseaˋ íˋ jaˋ féꞌrˋ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ, dsʉco̱ꞌ féꞌrˋ laꞌeáangˊ có̱o̱ꞌ˜ jmɨguíˋ quiáꞌˉ i̱ ꞌlɨngꞌˆ i̱ ꞌníꞌˋ níiˉ quiáꞌˉ Dseaˋ Jmáangˉ. Co̱ꞌ nɨnʉ́ʉbˉ ꞌnʉ́ꞌˋ lamɨ˜ jéengˊguɨ e dseángꞌˉ nɨsɨꞌíˆ quijgeáamˋ bíˋ quiáꞌˉ i̱ dseaˋ i̱ ꞌlɨngꞌˆ do jee˜ dseaˋ jmɨgüíˋ, jo̱ latɨˊ lana, lab nɨquijgeáaiñˋ fɨˊ jmɨgüíˋ la. 
\p  
\v 4 Dseaˋ rúꞌˋnaaꞌ i̱ lafaꞌ jó̱o̱ˋo̱, ꞌnʉ́ꞌˋ seengˋnaꞌ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ, jo̱baꞌ jaˋ mɨˊ calɨꞌˊ i̱ dseaˋ i̱ ngɨˊ ta˜ jmɨgóoˋ do faꞌ nɨcajmɨgǿøiñˋ ꞌnʉ́ꞌˋ; dsʉco̱ꞌ ꞌgøngꞌˊguɨ Jmɨguíˋ quiáꞌˉ Fidiéeˇ e seengˋ jee˜ ꞌnʉ́ꞌˋ laco̱ꞌguɨ bíˋ quiáꞌˉ i̱ dseaˋ i̱ ꞌlɨngꞌˆ i̱ quijgeáangˋ jee˜ dseaˋ i̱ jaˋ cuíingˋ Fidiéeˇ.  
\v 5 Jo̱ jaléngꞌˋ i̱ dseaˋ i̱ ngɨˊ ta˜ jmɨgóoˋ do lɨ́ɨiñˊ dseaˋ i̱ jaˋ cuíingˋ Fidiéeˇ, jo̱guɨ féꞌrˋ quiáꞌˉ lají̱i̱ꞌ˜ e iaꞌˊ e lɨgøøngˋ dseaˋ e seaˋ fɨˊ jmɨgüíˋ la, jo̱baꞌ jaléngꞌˋguɨ dseaˋ i̱ jaˋ cuíingˋ Fidiéeˇ tɨbˊ dsíirˊ núurˋ e júuˆ jo̱.  
\v 6 Dsʉꞌ jneaa˜guɨ́ɨꞌ, dseaˋ quiáꞌˉ Fidiéebˇ lɨ́ɨˊɨɨꞌ, jo̱baꞌ doñiˊ i̱i̱ˋ dseaˋ i̱ cuíingˋ Fidiéeˇ tɨbˊ dsíirˊ núurˋ júuˆ quíˉiiꞌ. Jo̱guɨ i̱ dseaˋ i̱ jaˋ cuíingˋ Fidiéeˇ jaˋ jíiꞌr˜ júuˆ quíˉiiꞌ. Jo̱ jo̱b lɨ˜ lɨne˜naaꞌ i̱˜ i̱ dseaˋ i̱ féꞌˋ laꞌeáangˊ có̱o̱ꞌ˜ Jmɨguíˋ quiáꞌˉ Fidiéeˇ jo̱guɨ i̱˜ i̱ féꞌˋ laꞌeáangˊ có̱o̱ꞌ˜ bíˋ quiáꞌˉ i̱ dseaˋ i̱ ꞌlɨngꞌˆ do. 
\s1 Jaangˋ i̱ ꞌnéebˋ lɨ́ɨngˊ Fidiéeˇ 
\p  
\v 7 Jo̱ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, e dseángꞌˉ ꞌnéˉ e nijmiꞌneáangˋnaaꞌ dseaˋ rúꞌˋnaaꞌ, dsʉco̱ꞌ lajo̱b cangɨ́ɨngˋnaaꞌ cacuøꞌˊ Fidiéeˇ jneaa˜aaꞌ. Jo̱ jalémꞌˋ dseaˋ i̱ jmiꞌneáangˋ rúngꞌˋ, dseángꞌˉ jáꞌˉbaꞌ nɨcuíimˋbre Fidiéeˇ, jo̱baꞌ jó̱o̱ˊ dseaˋ dob nɨlɨ́ɨiñˊ.  
\v 8 Co̱ꞌ doñiˊ i̱i̱ˋ i̱ jaˋ jmiꞌneáangˋ rúngꞌˋ, jo̱baꞌ jaˋ mɨˊ calɨcuíiñˋ Fidiéeˇ, co̱ꞌ jí̱i̱ꞌ˜ dseaˋ íbˋ dseaˋ lɨ́ɨiñˊ jaangˋ i̱ ꞌnéeˋ.  
\v 9 Jo̱guɨ laco̱ꞌ nilɨlíꞌˆnaaꞌ jial tíiˊ ꞌneáaiñˋ jneaa˜aaꞌ, jo̱baꞌ Fidiéeˇ casíiñˋ i̱ Jó̱o̱rˊ camɨ́ɨngꞌ˜ do fɨˊ jmɨgüíˋ la e laco̱ꞌ laꞌeáangˊ írˋ, cøømˋ nilɨse̱e̱ˉnaaꞌ có̱o̱ꞌ˜ Fidiéeˇ lata˜.  
\v 10 Jo̱ lajo̱b lɨne˜naaꞌ jial tíiˊ ꞌneáangˋ Fidiéeˇ jneaa˜aaꞌ; dsʉꞌ jneaa˜aaꞌ jaˋ cajmiꞌneáangˋnaaꞌ dseaˋ do laꞌuii˜, co̱ꞌ íˋbre dseaˋ cajmiꞌneáaiñˋ jneaa˜aaꞌ laꞌuii˜, jo̱ uiing˜ lajo̱baꞌ casíiñˋ i̱ Jó̱o̱rˊ i̱ cajúngˉ fɨˊ dseꞌˋ crúuˆ do e laco̱ꞌ caꞌíngˉ dseeˉ quíˉiiꞌ. 
\p  
\v 11 Jo̱baꞌ fǿnꞌˋtú̱u̱ ꞌnʉ́ꞌˋ, dseaˋ rúꞌˋnaaꞌ i̱ ꞌneáanˋn eáangˊ, e laco̱ꞌ nɨcajmiꞌneáangˋ Fidiéeˇ jneaa˜aaꞌ, lajo̱b cajo̱ jneaa˜aaꞌ ꞌnéˉ nijmiꞌneáangˋnaaꞌ dseaˋ rúꞌˋnaaꞌ.  
\v 12 Dsʉꞌ e jáꞌˉ, jí̱i̱ꞌ˜ jaangˋ dseaˋ jaˋ quɨ́ɨꞌr˜ jmɨɨ˜ níiñˉ Fidiéeˇ dseángꞌˉ lana, jo̱ dsʉꞌ song jmiꞌneáangˋnaaꞌ rúꞌˋnaaꞌ, jo̱baꞌ seemˋ Fidiéeˇ có̱o̱ꞌ˜ jneaa˜aaꞌ contøøngˉ, jo̱guɨ dseaˋ do jmiꞌneáamˋbre jneaa˜aaꞌ laco̱ꞌ sɨꞌíˆ.  
\v 13 Jo̱ ne˜baaꞌ røøˋ e cøømˋ se̱e̱ˉnaaꞌ có̱o̱ꞌ˜ Fidiéeˇ jo̱guɨ dseaˋ do cøømˋ seeiñˋ có̱o̱ꞌ˜ jneaa˜aaꞌ contøøngˉ laꞌeáangˊ có̱o̱ꞌ˜ Jmɨguíˋ quiáꞌrˉ e nɨcangɨ́ɨngˋnaaꞌ.  
\v 14 Jo̱ co̱ꞌ jneaꞌˆ dseángꞌˉ nɨcane˜baaꞌ, jo̱baꞌ cuǿøngˋ feˇeeꞌ e jáꞌˉ e Tiquíˆiiꞌ Fidiéeˇ casíiñˋ Jó̱o̱rˊ Dseaˋ Jmáangˉ fɨˊ jmɨgüíˋ la e laco̱ꞌ nileáiñˉ dseaˋ jmɨgüíˋ jee˜ dseeˉ quiáiñꞌˉ.  
\v 15 Jo̱guɨ doñiˊ i̱i̱ˋ i̱ jábꞌˉ lɨ́ɨngˋ jo̱guɨ féꞌrˋ e jáꞌˉbaꞌ e Jesús lɨ́ɨiñˊ i̱ Jó̱o̱ˊ Fidiéeˇ camɨ́ɨngꞌ˜ i̱ cagüéngˉ fɨˊ jmɨgüíˋ la, jo̱baꞌ i̱ dseaˋ íˋ cøømˋ seeiñˋ có̱o̱ꞌ˜ Fidiéeˇ, jo̱guɨ Fidiéeˇ cøømˋ seeiñˋ có̱o̱ꞌ˜ dseaˋ do cajo̱. 
\p  
\v 16 Jo̱ co̱ꞌ lajo̱b lɨ́ɨˊ, jo̱baꞌ dseángꞌˉ nɨcalɨne˜baaꞌ jo̱guɨ jábꞌˉ lɨ́ɨˋɨɨꞌ cajo̱, e eáamˊ jmiꞌneáangˋ Fidiéeˇ jneaa˜aaꞌ. Jo̱guɨ co̱ꞌ jábꞌˉ e dseaˋ do lɨ́ɨiñˊ jaangˋ i̱ ꞌnéeˋ quíˉiiꞌ, jo̱baꞌ doñiˊ i̱i̱ˋ dseaˋ i̱ seengˋ i̱ jmiꞌneáangˋ rúngꞌˋ, seemˋbre cøøngˋ có̱o̱ꞌ˜ Fidiéeˇ jo̱guɨ Fidiéeˇ seemˋbre cøøngˋ có̱o̱ꞌ˜ dseaˋ do cajo̱.  
\v 17 Jo̱ co̱ꞌ nɨsɨtabˇ dsiˋnaaꞌ e jmiꞌneáamˋ Fidiéeˇ jneaa˜aaꞌ laco̱ꞌ sɨꞌíˆ, jo̱baꞌ joˋ ꞌnéˉ jmóˆnaaꞌ ꞌgóꞌˋnaaꞌ mɨ˜ nitɨ́ˉ íꞌˋ e niquidsiˊ Fidiéeˇ íꞌˋ quiáꞌˉ jaléꞌˋ dseeˉ quiáꞌˉ dseaˋ, co̱ꞌ laco̱ꞌguɨ lɨ́ɨngˊ Dseaˋ Jmáangˉ ꞌñiaꞌrˊ, lajo̱b lɨ́ɨˊ jneaa˜aaꞌ fɨˊ jmɨgüíˋ la cajo̱.  
\v 18 Jo̱ song se̱e̱ˉbaaꞌ e Fidiéeˇ jmiꞌneáaiñˋ jneaa˜aaꞌ, jo̱baꞌ jaˋ ꞌgóꞌˋnaaꞌ fɨˊ quiniˇ dseaˋ do mɨ˜ niquidsirˊ íꞌˋ quíˉiiꞌ. Jo̱ co̱ꞌ dseángꞌˉ laco̱ꞌ sɨꞌíbˆ jmiꞌneáangˋ dseaˋ do jneaa˜aaꞌ, jo̱baꞌ jgiéemˉ e ꞌgóꞌˋnaaꞌ do. Jo̱ song i̱i̱ˋ jneaa˜aaꞌ jáaˊ quíˉiiꞌ e ꞌgóꞌˋnaaꞌ, dsʉꞌ e jo̱ lɨ́ɨˊ uii˜ quiáꞌˉ jaléꞌˋ dseeˉ e ꞌnéˉ quíˆbaaꞌ. Jo̱baꞌ song eáangˊ líꞌˆnaaꞌ e ꞌgóꞌˋnaaꞌ, jo̱baꞌ jaˋ mɨˊ calɨta˜ dsiˋnaaꞌ e ꞌneáamˋ Fidiéeˇ jneaa˜aaꞌ dseángꞌˉ laco̱ꞌ sɨꞌíˆ. 
\p  
\v 19 Jo̱ co̱ꞌ Fidiéebˇ dseaˋ laꞌuii˜ cajmiꞌneáaiñˋ jneaa˜aaꞌ, jo̱baꞌ jmiꞌneáamˋbaaꞌ dseaˋ rúꞌˋnaaꞌ jo̱guɨ jmiꞌneáamˋbaaꞌ Fidiéeˇ cajo̱.  
\v 20 Jo̱ song seengˋ dseaˋ i̱ jíngꞌˉ e jáꞌˉbaꞌ ꞌneáaiñˋ Fidiéeˇ, jo̱ dsʉꞌ lajeeˇ jo̱ ta˜ ꞌníꞌˋ níingˉ jaléngꞌˋ dseaˋ rúmꞌˋ jmóorˋ, jo̱baꞌ i̱ dseaˋ íˋ lɨ́ɨiñˊ jaangˋ i̱ adseaamˋ. Co̱ꞌ song jaangˋ dseaˋ jaˋ jmiꞌneáaiñˋ dseaˋ rúiñꞌˋ i̱ níiñˉ contøøngˉ, jo̱baꞌ jaˋ quɨ́ɨꞌr˜ jmɨɨ˜ nijmiꞌneáaiñˋ Fidiéeˇ, co̱ꞌ dseaˋ doguɨ jaˋ mɨˊ cangáaiñˋ jí̱i̱ꞌ˜ co̱o̱ˋ néeꞌ˜.  
\v 21 Jo̱ ꞌñiabꞌˊ Dseaˋ Jmáangˉ cajíñꞌˉ e júuˆ quiáꞌˉ Fidiéeˇ e ꞌnéˉ lɨti˜ na: “Doñiˊ i̱i̱ˋ dseaˋ i̱ jmiꞌneáangˋ Fidiéeˇ, lajo̱b ꞌnéˉ jmiꞌneáaiñˋ dseaˋ rúiñꞌˋ cajo̱.” 
\c 5  
\s1 Jial lɨ́ꞌˋnaaꞌ e jaˋ lɨgøøngˉnaaꞌ có̱o̱ꞌ˜ jaléꞌˋ e ꞌlɨꞌˆ e seaˋ fɨˊ jmɨgüíˋ 
\p  
\v 1 Jo̱ doñiˊ i̱i̱ˋ ꞌnʉ́ꞌˋ e dseángꞌˉ jábꞌˉ lɨ́ɨngˋnaꞌ e Jesús lɨ́ɨiñˊ Dseaˋ Jmáangˉ i̱ casíingˋ Fidiéeˇ fɨˊ jmɨgüíˋ la, jo̱baꞌ i̱ dseaˋ íˋ jó̱o̱ˊ Fidiéebˇ lɨ́ɨiñˊ; co̱faꞌ jneaa˜aaꞌ jmiꞌneáamˋbaaꞌ jaléngꞌˋ tiquíˆiiꞌ, jo̱baꞌ la quie̱ˊ tɨˊ jaléngꞌˋ rúmꞌˋbaaꞌ jmiꞌneáangˋnaaꞌ jóng.  
\v 2 Jo̱ nɨtab˜ dsiˋnaaꞌ e dseángꞌˉ jmiꞌneáamˋbaaꞌ jaléngꞌˋ dseaˋ i̱ lɨ́ɨngˊ jó̱o̱ˊ Fidiéeˇ mɨ˜ jmiꞌneáamˋbɨ́ɨꞌ Fidiéeˇ ꞌñiaꞌrˊ jo̱guɨ nʉ́ʉꞌ˜bɨ́ɨꞌ dseángꞌˉ laco̱ꞌ catɨ́ɨngˉ jaléꞌˋ júuˆ ꞌnéˉ lɨti˜ quiáꞌrˉ.  
\v 3 Jo̱ song jmiꞌneáamˋbaaꞌ Fidiéeˇ, jo̱baꞌ nʉ́ʉꞌ˜baaꞌ e júuˆ quiáꞌrˉ do; jo̱ o̱ꞌ júuˆ iiˋ e jo̱ faꞌ jaˋ quɨ́ꞌˉ jmɨɨ˜ nijmitíˆiiꞌ.  
\v 4 Jo̱ jaléngꞌˋ dseaˋ i̱ lɨ́ɨngˊ jó̱o̱ˊ Fidiéeˇ, lɨꞌˋbre e jaˋ lɨgøøiñˋ có̱o̱ꞌ˜ jaléꞌˋ e ꞌlɨꞌˆ e seaˋ fɨˊ jmɨgüíˋ. Jo̱guɨ laꞌeáangˊ e jábꞌˉ lɨ́ɨˋnaaꞌ e Jesús lɨ́ɨiñˊ Dseaˋ Jmáangˉ, jo̱baꞌ calɨ́ꞌˉbaaꞌ e jaˋ calɨgǿngˋnaaꞌ có̱o̱ꞌ˜ jaléꞌˋ e ꞌlɨꞌˆ e seaˋ fɨˊ jmɨgüíˋ.  
\v 5 Jo̱ jí̱i̱ꞌ˜ i̱ dseaˋ i̱ jáꞌˉ lɨ́ɨngˋ e Jesús lɨ́ɨiñˊ Jó̱o̱ˊ Fidiéeˇ, jí̱i̱ꞌ˜ íˋbingꞌ lɨꞌˋ e jaˋ lɨgøøngˋ có̱o̱ꞌ˜ jaléꞌˋ e ꞌlɨꞌˆ e seaˋ fɨˊ jmɨgüíˋ. 
\s1 Júuˆ e cacuøˊ Fidiéeˇ quiáꞌˉ Jó̱o̱rˊ Dseaˋ Jmáangˉ 
\p  
\v 6 Jo̱ i̱ Jesús i̱ lɨ́ɨngˊ Fíiˋnaaꞌ Dseaˋ Jmáangˉ, dseaˋ íbˋ i̱ cagüéngˉ fɨˊ jmɨgüíˋ la jo̱ cajgáaiñˉ jmɨɨˋ jo̱guɨ catu̱u̱ˋ jmɨꞌøøiñˉ mɨ˜ cajúiñˉ e laco̱ꞌ cuøˊ li˜ quiáꞌˉ jaléꞌˋ ta˜ quiáꞌrˉ e cajajméerˆ fɨˊ jmɨgüíˋ la. Dsʉꞌ o̱ꞌ jí̱i̱ꞌ˜ e cajgáaiñˉ jmɨɨˋ do, co̱ꞌ ꞌnéˉ lajɨˋ tú̱bˉ co̱lɨɨng˜, e cajgáaiñˉ jmɨɨˋ do có̱o̱ꞌ˜guɨ jmɨꞌøøiñˉ e catu̱u̱ˋ mɨ˜ cajúiñˉ. Jo̱ e Jmɨguíˋ quiáꞌˉ Fidiéeˇ do tíiˊ ni˜ jo̱guɨ cuøˊ júuˆ quiáꞌˉ jaléꞌˋ e jo̱, jo̱guɨ jmangꞌˉ júuˆ jábꞌˉ cuøˊ e Jmɨguíˋ quiáꞌˉ Fidiéeˇ do.  
\v 7 Jo̱ lɨ́ɨˊ laco̱ꞌ ꞌnɨˊ íingꞌ˜ e tíiˊ ni˜ do jo̱guɨ cuøˊ júuˆ quiáꞌˉ e jo̱:  
\v 8 jo̱ caꞌíingꞌ˜ do Jmɨguíˋ quiáꞌˉ Fidiéeˇ, jo̱ caꞌíingꞌ˜guɨ e cajgáangˉ Dseaˋ Jmáangˉ jmɨɨˋ, jo̱guɨ e caꞌíingꞌ˜guɨ do e jmɨꞌøøngˉ e catu̱u̱ˋ quiáꞌˉ Dseaˋ Jmáangˉ mɨ˜ cajúiñˉ, jo̱ røøbˋ júuˆ quiáꞌˉ lacaꞌíingꞌ˜ do.  
\v 9 Jo̱guɨ jábꞌˉ lɨ́ɨˋnaaꞌ lají̱i̱ꞌ˜ júuˆ e cuøˊ dseaˋ jmɨgüíˋ quiáꞌˉ lají̱i̱ꞌ˜ e cangárˉ, dsʉꞌ e júuˆ e cuøˊguɨ Fidiéeˇ eáangˊguɨ ꞌnéˉ jáꞌˉ nilíiˋnaaꞌ, co̱ꞌ laniingˉguɨ lɨ́ɨˊ, dsʉco̱ꞌ Fidiéeˇ cuørˊ júuˆ uii˜ quiáꞌˉ Jó̱o̱rˊ Dseaˋ Jmáamˉ.  
\v 10 Jo̱ i̱i̱ˋ i̱ jáꞌˉ lɨ́ɨngˋ e júuˆ e cacuøˊ Fidiéeˇ quiáꞌˉ Jó̱o̱rˊ, jo̱baꞌ dseángꞌˉ ímꞌˋbre e júuˆ jo̱ carˋ ngocángˋ dsíirˊ. Jo̱guɨ i̱i̱ˋ i̱ jaˋ jáꞌˉ lɨ́ɨngˋ lají̱i̱ꞌ˜ e júuˆ e cacuøˊ Fidiéeˇ do, jo̱baꞌ lɨ́ɨˊ lafaꞌ féꞌrˋ e Fidiéeˇ lɨ́ɨiñˊ jaangˋ i̱ adseeˋ, co̱ꞌ jaˋ jáꞌˉ lɨ́ɨiñˋ lají̱i̱ꞌ˜ júuˆ e cacuøˊ dseaˋ do uii˜ quiáꞌˉ Jó̱o̱rˊ Dseaˋ Jmáangˉ.  
\v 11 Jo̱ e lab júuˆ e cacuøꞌˊ Fidiéeˇ jneaa˜aaꞌ e cuǿøngˋ se̱e̱ˉnaaꞌ cøøngˋ có̱o̱ꞌr˜ lata˜, jo̱ e jo̱ cacuøꞌrˊ jneaa˜aaꞌ laꞌeáangˊ có̱o̱ꞌ˜ Jó̱o̱rˊ Dseaˋ Jmáangˉ.  
\v 12 Jo̱ doñiˊ i̱i̱ˋ i̱ seengˋ cøøngˋ có̱o̱ꞌ˜ i̱ Jó̱o̱ˊ Fidiéeˇ do, jo̱baꞌ seemˋbre cøøngˋ có̱o̱ꞌ˜ Fidiéeˇ lata˜; jo̱guɨ i̱i̱ˋ i̱ jaˋ seengˋ cøøngˋ có̱o̱ꞌ˜ i̱ Jó̱o̱ˊ Fidiéeˇ do, jo̱baꞌ jaˋ seeiñˋ cøøngˋ có̱o̱ꞌ˜ dseaˋ do lata˜ cajo̱. 
\s1 Júuˆ lɨ˜ cadséngˉ e lʉ́ꞌˊ Juan 
\p  
\v 13 Jo̱baꞌ jmoꞌˊo jaléꞌˋ júuˆ e to̱o̱˜ fɨˊ ni˜ jiˋ la e catɨ́ɨngˉ jaléngꞌˋ ꞌnʉ́ꞌˋ e laco̱ꞌ nilɨñíˆnaꞌ e seengˋnaꞌ cøøngˋ có̱o̱ꞌ˜ Fidiéeˇ lata˜, ꞌnʉ́ꞌˋ dseaˋ jábꞌˉ lɨ́ɨngˋnaꞌ e Jesús dseángꞌˉ jáꞌˉ lɨ́ɨiñˊ Jó̱o̱ˊ Fidiéeˇ. 
\p  
\v 14 Jo̱guɨ nɨtab˜ dsiˋnaaꞌ mɨ˜ lɨɨng˜ eeˋ mɨ́ɨꞌ˜naaꞌ Fidiéeˇ e cǿøngˋ có̱o̱ꞌ˜ lají̱i̱ꞌ˜ e iiñ˜ ꞌñiaꞌrˊ, jo̱baꞌ núuˋbre júuˆ quíˉiiꞌ.  
\v 15 Jo̱ mɨ˜ dseángꞌˉ nɨne˜baaꞌ røøˋ e jábꞌˉ núuˋ Fidiéeˇ jaléꞌˋ júuˆ quíˉiiꞌ, lajo̱baꞌ nɨta˜ dsiˋnaaꞌ e dseángꞌˉ nɨcangɨ́ɨmˋbaaꞌ lají̱i̱ꞌ˜ e nɨcamɨ́ɨꞌ˜naaꞌre do. 
\p  
\v 16 Jo̱ song jaangˋ dseaˋ nírˋ e jaangˋguɨ dseaˋ rúiñꞌˋ éerˋ dseeˉ, jo̱ song e dseeˉ jo̱ jaˋ jmóoˋ e ꞌnaangˋ dseaˋ có̱o̱ꞌ˜ Fidiéeˇ lata˜, jo̱baꞌ ꞌnéˉ nimɨ́ꞌrˉ Fidiéeˇ uii˜ quiáꞌˉ i̱ dseaˋ íˋ e laco̱ꞌ nitʉ́iñꞌˋ do e jo̱, jo̱ lajo̱baꞌ Fidiéeˇ nicuǿrˉ e nilɨseemˋbɨiñꞌ do cøøngˋ có̱o̱ꞌr˜ song e dseeˉ e seaˋ quiáꞌˉ dseaˋ do jaˋ lɨ́ɨˊ quiáꞌˉ co̱o̱ˋ dseeˉ e jmóoˋ e ꞌnaangˋ dseaˋ có̱o̱ꞌ˜ Fidiéeˇ lata˜. Dsʉꞌ e jáꞌˉ, seabˋ dseeˉ cajo̱ e jmóoˋ e ꞌnaangˋ dseaˋ có̱o̱ꞌ˜ Fidiéeˇ lata˜, jo̱ jaˋ fáꞌˋa e ꞌnéˉ mɨ́ɨꞌ˜naaꞌ Fidiéeˇ uii˜ quiáꞌˉ e dseeˉ jo̱.  
\v 17 Dsʉꞌ jalébꞌˋ e gaˋ e jmóoˋ dseaˋ, dseebˉ lɨ́ɨˊ fɨˊ quiniˇ Fidiéeˇ; dsʉꞌ seabˋ e dseeˉ do e jaˋ jmóoˋ e ꞌnaangˋ dseaˋ có̱o̱ꞌ˜ Fidiéeˇ lata˜. 
\p  
\v 18 Jo̱ nɨne˜baaꞌ røøˋ e jaléngꞌˋ dseaˋ i̱ féꞌˋ e jáꞌˉbaꞌ Fidiéebˇ dseángꞌˉ lɨ́ɨngˊ Tiquiáꞌrˆ, jo̱baꞌ joˋ beángꞌˋguɨ dseeˉ yaaiñ˜, dsʉco̱ꞌ ꞌñiaꞌˊ i̱ Jó̱o̱ˊ Fidiéeˇ dob nɨjmóoˋ íˆ írˋ, jo̱ lajo̱baꞌ joˋ dsiquiéengˊ fii˜ i̱ ꞌlɨngꞌˆ cáaiñˋ e nijmeángꞌˋneiñꞌ gaˋ.  
\v 19 Jo̱guɨ nɨne˜baaꞌ røøˋ e jó̱o̱ˊ Fidiéebˇ lɨ́ɨˊɨɨꞌ, jo̱guɨ lajɨɨngˋ dseaˋ i̱ jaˋ jíiꞌ˜ Fidiéeˇ, fii˜ i̱ ꞌlɨmꞌˆbingꞌ quie̱ˊ nifɨˊ quiáꞌrˉ.  
\v 20 Jo̱guɨ nɨne˜bɨ́ɨꞌ cajo̱ e nɨcagüémˉ i̱ ꞌñiaꞌˊ Jó̱o̱ˊ Fidiéeˇ do fɨˊ jmɨgüíˋ la e laco̱ꞌ cacuøꞌrˊ jneaa˜aaꞌ e nilɨcuíingˋnaaꞌ dseángꞌˉ i̱ Fidiéeˇ i̱ jáꞌˉ do. Jo̱ lana cøømˋ nɨse̱e̱ˉnaaꞌ có̱o̱ꞌ˜ i̱ Fidiéeˇ i̱ jáꞌˉ do jo̱guɨ có̱o̱ꞌ˜ i̱ Jó̱o̱rˊ Dseaˋ Jmáangˉ do cajo̱. Jo̱ íˋbingꞌ lɨ́ɨngˊ dseángꞌˉ i̱ Fidiéeˇ i̱ jáꞌˉ do, jo̱ laꞌeáangˊ có̱o̱ꞌ˜ íbˋ cajo̱ ngɨ́ɨngˋnaaꞌ e se̱e̱ˉnaaꞌ cøøngˋ có̱o̱ꞌ˜ Fidiéeˇ lata˜.  
\v 21 Jo̱baꞌ liúungꞌ˜guɨ́ɨ ꞌnʉ́ꞌˋ, dseaˋ rúꞌˋnaaꞌ i̱ lafaꞌ jó̱o̱ˋo̱, jmeeˉ íˆ yaang˜naꞌ, jo̱ jaˋ güɨlɨgøøngˋnaꞌ e nijmiféngꞌˊnaꞌ diée˜ i̱ o̱ꞌ jáꞌˉ. 
\p Jo̱ lajo̱b nilíˋ. 
\p Jo̱ lanab jí̱i̱ꞌ˜ féꞌˋ jiˋ laꞌuii˜ quiáꞌˉ Juan.